Дѣйствие 5

ЯВЛЕНИЕ ПЕРВОЕ

Курояд, Пиар

Ку р о я д

Ясти мнѣ хощется, о ясти! Горе! Ясти!

Ясти хочу. Горе мнѣ! Приходит пропасти.

П и а р

Курояде, гдѣ ти был? Гдѣ был еси нынѣ?

К у р о я д

Даби тако не жив был князь наш (наединѣ

С тобою бесѣдую), яко богом жертва

чрез него вся оскудѣ! О, аще бы мертва

Слышах его, слышах бы вѣст радостну, нову.

П и а р

Кая вина?

Ку р ояд

Увѣрив философа слову,

Запрѣти приносити жертву по всѣм градом.

П и а р

Мала се еще злоба.

Ку р ояд

Убывати гладом

Малу злобу зовеши? А еще пречестных

жерцов и молебников за вес мир нелестных!

Се аз ходих на село курей куповати.

И когда сие бяше!

П и а р

Горшее слышати,

Вижу, ти не случися? Что глаголют мнозы,

молю тя, кто болий ест — жерци или бозы?

К у р о я д

Вѣм что вопрошаеши: аки би скорб сию

о мнѣ имѣл. Ни, друже! Мене не жалѣю,

Жалѣю богов. Ибо аще оскудѣет

жертва, аз куплю мяса, но бог не имѣет

Пѣнязей и не пойдет на село: глад убо

нам — ему смерт готова. И сие сугубо

Печалива мя творит.

П и а р

Еще ти не вѣси

Злобы его горшия? Како его бѣси

На богов возъяриша? Повелѣ повсюду

крушити боги. Видѣх, како уд от уду

Отторжен валяшеся, многым носи, нозы

урѣзание видѣх. О благие бозы!

Болѣю за вас зѣло. Чи не скорб се, друже?

Ладо не может уже плясати, ему же

Сие дѣло от богов всѣх ест порученно,

но токмо лакти движет всуе недѣйственно.

Мошко же отнюд кадил не возможет чути,

а Позвизд (О скорб моя! О жалю мой лютий!)

Пребиту голень имать и храмлет стеняя.

Но слиши множайшия и крайная злая.

Что видѣх, окаянний! Зри вещ неподобну:

дѣти студнии, кумир разсѣкши подробну,

Во главу, аки в сосуд, испраздняют стомах.

К у р о я д

Что главѣ творят?

П и а р

Стомах испраздняют.

Курояд

Ах, ах!

Да како их не пожрет земля, се видяще?

Вѣсть ли сие Жеривол?

П и а р

Курояде, аще

Увѣсть сия Жеривол, предасть духа богу.

К у р о я д

Но гдѣ он ест? Не вѣси?

П и а р

Впаде во премногу

Болѣзнь от скорбей многих и едва возможет

убѣжати от смерти. Зѣло бо не может

Ясти, ни вкуса чует; третий день минает,

отнель он единаго токмо пожирает

Бика на день.

К у р о я д

О лютѣ! Всѣ мы измрем гладом!

О княже беззаконний! Да бы ти над адом

Царствовал, не над намы, не над руским родом!

П и а р

Молчи! Тѣшимся твоим, господи, приходом.

ЯВЛЕНИЕ ВТОРОЕ

Мечислав, вожд Храбрий, Пиар, Курояд

М е ч и с л а в

Кое зде дѣло, жерцы? Воистинну дивний

упор сей! Вы едины имате противны

Быти волѣ княжеской? О столпи безумны!

Скоты безсловесния! Старцы дѣтоумны!

К у р о я д

Что толиким, господи, движеши нас страхом?

М е ч и с л а в

Ни ли слишасте воли княжей?

К у р о я д

Не слышахом

Воистину. Кая ест?

X р а б р и й

Убо еста глуха?

Трубний глас извѣщаше.

П и а р

Но не дойде слуха

Нашего. Мы зде равно прийдохом от пути;

не быхом днесь в Киевѣ. Но воспомянути

Изволте, господие, кой указ ест княжий.

Мы творим волю его. Воистинну вражий

Дух бы был, аще бы кто противился волѣ

толикаго владикы.

Мечислав

Убо вам дотолѣ

Нѣсть вѣстно, яко всюду крушити кумиры

князь повелѣ, наставшей християнской вѣрѣ?

П и а р

Се новое слишим мы.

К у р о я д

Ниже нам чаянно.

Мечислав

Како? Вся вѣсть Россия, вам же неслиханно

Доселѣ ест. Лжете, псы!

П и а р

О господи, буди,

яко же глаголеши; обаче мы люди

Простии, не слишахом.

К у р о я д

Да не прогнѣвится

власт твоя, ваша повѣсть отнюд быти мнится

Неудоб вѣрителна: наш боголюбивий

князь есть.

Мечислав

О горе тебѣ! Ти ли мнѣ, псе лживий,

Лгати велиши? Убо от твоего ж дѣла

явлю истинну: круши идоли.

К у р о я д

Сѣчила

Не имам со собою.

Мечислав

Воины, дадѣте

оружие.

Курояд

Милости прошу, не мучѣте

Болнаго. Виждте, яко не могу подѣяти.

Мечислав

Уд непослушний мечем достоит отъяти.

К у р о я д

Лютѣ мнѣ!

Мечислав

Достизайте! Ты на мѣстце друга

наступи. Ни ли и ти тогожде недуга

Вредом ослаблен еси?

П и а р

Послухай мя мало,

владико! Се Ладо ест бог, а се Купало,

А се Перун великий; с тѣмы убо, яко

хощете вы творѣте, сего же никако

Не вредѣте, молю вас. Ах, с коликим страхом

поминаем, что о нем от древних прияхом.

Прорекоша древние жерцы, яко аще

вредит кто бога сего, тогда, то видяще,

Солнце лучи закриет, Днѣпр же воспятится,

Киев, трусом низвержен, во прах обратится.

Молю вас, не дерзайте.

X р а б р и й

Друзы, дерзнѣм сие

увѣдати: дѣло нам страх сей явственнѣе

Покажет. О великий! О боже преславний!

Не прогнѣвайся на ны: что велѣ державний

Князь достоить творити. Аще погибаем,

яко же прещаеши, обаче дерзаем.

П и а р

Не дерзайте, молю вас. О лютѣ! О горѣ!

Зрѣте: трясется земля, падет град воскорѣ.

Падет град! Что творите? Не могу стояти

на ногах.

Мечислав

Лживий лестче! Не досит ти лгати?

П и а р

Солнце измѣняется.

Мечислав

О колико бяше

лщение! Колико же невѣжество наше!

Кая слѣпота! Камень и древо бездушно,

аки бога, лживаго, усердно, вседушно

Умилно почитати и тих рабом быти,

их же раб мой, художник, обиче творити.

Христе, свѣте истинний! Что тебѣ имамы

воздати за толику милость, юже с намы

Нынѣ сотворил еси!

X р а б р и й

Но не изволися

власти вашей видѣти, како князь крестися?

Мечислав

Желал от усердия; воинское дѣло

удержа мя, не могох настигнути. Зѣло

Жалѣю того. Ти же добрия нам вѣсти

подажд, видѣл бо еси.

X р а б р и й

Но кто исповѣсти

Предивний позор может? Никогда толика

торжества аз не видѣх. Два полка велика

Идяху стройно, в едном славеннороссийский,

в другом бяше избранний народ византийский,

Двор свѣтлаго деспоты, иже восприяти

князя послан ест царем; на всѣх воех златий

Цвѣт в одеждах ткан бяше; броня же толикий

свѣт испущаху, яко зрящым и страх нѣкий

И радость родяшеся. В толиком позорѣ

прийде князь наш ко храму. Храм низу и горѣ

Весь иконы украшен; посредѣ стояше

сосуд сребран великий, яко в нем можаше

Един погрузитися человѣк; на десной

странѣ стояше престол утвары пречестной —

Первому епископу сѣдалище, инным —

мало нижайша бяху; ошуюю чинним

Образом вся особно бѣлия лежаху

одежди, бѣлостию крины побѣждаху.

Утвар сию деспота Владимиру, сину

духовному своему, сотвори по чину

Древнему у християн. Вся же та полата,

аки звѣзд, полна бяше кованных от злата

Лампад и свѣтилников. От восточной страни

сладкая исхождаше воня безпрестани.

Ставшу при дверех князю, се златимы враты

от олтаря идяше клир весь. Аз, объятий

Страхом радостним (вѣруй, благородство ваше!),

забых, гдѣ есм; сердце же во мнѣ трепеташе.

ЯВЛЕНИЕ ТРЕТОЕ

Вѣстник, Мечислав

В ѣ с т н и к

Великий князь Василий здравие и радость

благородству твоему посилает.

Мечислав

В сладость

Приемлю такую вѣсть. Но кое гласиши

имя ново — Василий? Чаю, приходиши

От князя ти нашего.

В ѣ с т н и к

Наш мя посилает

князь к тебѣ, Мечиславе, но тебѣ желает

Здравствовати Василий.

Мечислав

Тайно твое слово.

В ѣ с т н и к

Владимир в крещении прият имя ново,

Василий нареченний. Хартия извѣстно

сия явит.

Мечислав

Храбрий, чти, да все будет вѣстно.

М е ч и с л а в

Совѣт княжий усердно приемлю, понеже

прежде Христа вседушно возлюбых и еже

Идоли сокрушити дѣлом исполнихом,

что творити указом первим должны быхом.

За коругов усердно полк благодарствует,

за щит же тако крѣпкий велми долженствует

Мечислав, да сам своя персы вмѣсто щита

дасть ему, от всякаго вражия навѣта

Защищая власть его. О вои! Се златий

возсия день; достоит всѣм торжествовати.

[П’єсу закінчує хор апостола Андрія з ангелами].

МИЛОСТЬ БОЖІЯ,

Украину от неудоб носимых обид лядских чрез Богдана Зиновія Хмельницкаго

преславнаго войск запорозких гетмана, свободившая, и дарованными ему над

ляхами побѣдами возвеличившая, на незабвенную толиких его щедрот память

репрезентованная в школах кіевских 1728 лѣта.