Дѣйствие 2

ЯВЛЕНИЕ ПЕРВОЕ

Курояд жрец

Слышѣте празнична рога!

День прийде Перуна бога,

День шумний, бурний, ужасний,

празник громний, велегласний.

Слышѣте, рустии люди!

Домы, орудия, труды.

Торгы, купля оставѣте,

спѣшно на празник идѣте!

Воли, кравы избирайте,

толстии жертвы давайте!

Он есть бог молниелучний,

любит мяса зѣло тучны.

Слышѣте празнична рога!

День прийде Перуна бога,

День шумний, бурний, ужасний,

празник громний, велегласний.

ЯВЛЕНИЕ ВТОРОЕ

Пиар с Куроядом

П и а р

Курояде, престани, престани, престани!

К у р о я д

Что тако, о Пиаре?

П и а р

Всуе нынѣ страни

Оглашаеш, не будет, не будет днес жрома

жертва; не движи людей.

Ку р о я д

Невѣже! Ест грома

Праздник.

П и а р

Честний Жеривол не готов есть.

К у р о я д

Како Жеривол не готов ест?

П и а р

Не готов есть всяко.

Курояд

Ко чему ест не готов?

П и а р

Не готов ест жерти.

К у р о я д

Дадѣте мы, о бозы, да аз тако терти

Возмогу куры моя, яко он всецѣло

трет волы безмѣрния! И на сие дѣло

Что ест нужно, молю тя, повѣжд.

П и а р

Нѣст удобна времени, яко вижу.

К у р о я д

Рѣч се неподобна.

Жерти ему нѣсть время? Прелщаешся, друже,

и вѣруешь; аз же ни, но чаю, что уже

Он бы хотѣл, дабы был праздник непрестанний.

Дивну вещ реку: видѣх, когда напитанний

Многимы он жертвамы лежаше во хладѣ,

а чрево его бяше превеликой кладѣ

Подобное; обаче в ситости толикой

знамение бѣ глада и алчбы великой:

Скрежеташе зубамы, на мнозѣ без мѣри

движи уста и гортань. И достойно вѣри

Слово твое, Пиаре: «время не имѣет».

И во снѣ жрет Жеривол.

П и а р

Се не разумѣет

Любимий мой Курояд Пиарева слова!

Рѣх «не имать времени», видя не готова

Его быти.

К у р о я д

Мню, зубов не изостри или

не испраздни стомаха.

П и а р

Ругаешся; ни ли

Во грѣх не вмѣняеши дерзок смѣх творити

с мужа толь велебнаго! Что ж имѣет быти,

Увѣси потом.

К у р о я д

Почто праздника не творит?

П и а р

Нинѣ сие довлѣет.

К у р о я д

То он нас поморит

Гладом.

П и а р

Нужда терпѣти.

К у р о я д

Но молю тя, кая

нужда се необична?

П и а р

Аз, дрова збѣрая

На жертву, ходя нынѣ сквозѣ лѣс пустинний,

и се бѣжаше скорий, простовлас, безчинний

Жеривол и, от земли вихром подносимий,

не позна мя при пути, но неудержимий

Бѣг творя, пущаше вопль в дебры необичний,

от всѣх же стран пустины страшны и различни

Отповѣдаху гласи, и свисти, и кихти.

К у р о я д

Скорб нѣкую имѣет.

П и а р

Сего ради рѣх ти,

Яко нѣсть готов жерти.

К у р о я д

Убо потерпѣмо,

что се будет. Но се он, се он бѣжит сѣмо!

ЯВЛЕНИЕ ТРЕТОЕ

Жеривол, Курояд, Пиар

Ж е р и в о л

Скорб велия! Лютѣ мнѣ! Скорб, братие, зѣлна!

К у р о я д

Что ти есть, Жериволе? Престани! Бездѣлна

Толикая печаль есть. Аще и что злое

случится ти, сотворше совѣт, можем тое

Исправити и в добрий случай премѣнити.

П и а р

Скажи, да совѣтуем.

Ж е р и в о л

Ничтоже совѣти

Успѣют, аще самы не потщатся бозы.

Не вѣсте ли, о друзы, яко зѣло мнозы

Супостати на богов и на нас восташа?

Воводят христов закон.

П и а р

Убо, честност ваша,

Призови силу богов: твоих оны пѣний

слухати навикоша, ниже повелѣний

Преступают.

Ж е р и в о л

Нынѣ бѣх в дебрех непроходных

и созвах безчисленних, лютих, страхородних

Сонм духов неизчетний. Егда же познаша

нужду мою, скоро вси равним совѣщаша

Гласом, яко не требѣ вести всего полка.

«Мы,— рекше,— увидѣхом от слов Ярополка,

Яко князь ваш Владимир, иже скорб толику

наводит, страст имѣет зѣлну и велику

Ко похоти тѣлесной и ко мирской власти.

Того ради цариков, иже тѣмы страсти

Владѣют, звати треба. Трие сут: бѣс мира,

бѣс плоти, бѣс противства божия. Тѣм вѣра,

Нам неблагоприятна, колѣблется всюди.

Но тии где-сь странствуют. Убо наши труди

Будут в том, да поищем и пришлем их скоро».

Се рекше, полетѣша поспѣшно и споро.

Тих на помощ аз чаю.

Курояд

Лютѣ! Что се странно?

Ж е р и в о л

Что ти ест, Курояде?

Курояд

Бозы нечаянно

Вострепеташа.

П и а р

Нѣсть то, развѣ примрак нѣкий

и мечтание ти быст.

К у р о я д

О позор великий!

Смотри ж сам.

Ж е р и в о л

Знамение сие ест ужасно!

П и а р

Зови сих, Жериволе! Трубы велегласно!

Пѣснь Жеривола

Аде, на помощ востани,

спѣшно двигни твоя брани,

двигни сили, двигни власти,

твоя имать честь упасти.

Вѣтре пернатий, воскорѣ

преносяй корабль по морѣ,

помощной нам адской силѣ

подажд воскорие крилѣ.

Летѣте, дуси, летѣте

нам на помощ, не медлѣте!

Изострѣте гнѣва жало:

люто время нам настало.

ЯВЛЕНИЕ ЧЕТВЕРТОЕ

Бѣс мира, Жеривол

Б ѣ с м и р а

Что се тако нужное и кая потреба тако

скорой помощи, Жериволе?

Ж е р и в о л

С неба

О господие мои, послаша вас бозы.

Не вѣсте ли, в Киевѣ что творится? Мнозы

Лжемудрцы, лжепророки, хулники восташа:

пасти имать закон ваш, пасти вѣра наша.

Б ѣ с м и р а

Кто такых злых навѣтов вина?

Ж е р и в о л

Князь велможний.

Б ѣ с м и р а

Не бойтеся, дерзайте! Ни ли он, безбожний,

Приймет моих совѣтов, аз отмщу сторично.

Обаче не мню тако: князю ли прилично,

Да свою распятому и нищему вию

Христу приклонит? Лютѣ! Аз недоумѣю

Объяти се мислию, ниже помисл умний

может сие сказати. И аще безумний

Сотворить тако, аще от греков прелстится,

вѣсте ли вы, кому он в сем уподобится?

Константину оному, иже риболова

Петра, всѣх худѣйшаго, и с ним неистова

Шатерей дѣлателя Павла, во снѣ пьяний

узрѣв, тако восприять совѣт их поганий,

Акы бы был болярский, и себе в неславу

толикую воверже, яко злату главу

Не усрамися старцу Силвестру худому

преклонити смиренно. Вси царскаго дому

Возсмѣяшася тогда; мы же наединѣ

на мнозѣ плакахомся и даже донинѣ

Плачем, толику его погибель помняще.

О Христе! Аще прелстиш и сего и аще

Поймеши Владимира, буди (яко лживий

твердит о тебѣ народ), буди бог правдивий!

Аз же да не буду цар, да не буду честний,

да не буду всесилний. Калугеров лестний

Вожд, о мой Жериволе, язик да устроит

и да много глаголет; мнѣ же недостоит

Словом прелщати, дѣлом хощу показати,

что могу.

Ж е р и в о л

Равно тебѣ благодарствовати

Не можем ми, о царю! Твоя будет слава,

аще твоя сих лестцов побѣдить держава.

Бѣс хули

Не менш о сем потщуся и аз, Мире златий!

Зрѣте же, аще любит истинну распятий.

Яко сам злодѣй бяше (не бо средѣ двою

злодѣю распят бы был), тако со собою

И полки злодѣйския вести зѣло любит.

Кому се нѣсть извѣстно? Сам он гласно трубит

В своем евангелии. «Не прийдох призвати

праведников,— глаголет,— но грѣшних взискати

Тожде дѣлом являет. Донелѣ державний

Владимир имя имѣл доброе и славний

Мужеством бѣ, и Христу он мняшеся быти

непотребен. Но егда сродную пролити

Дерзну кров и княжеский сан сотвори мерзкий,—

сотвори себе Христу любима, да дерзкий

Будет оттол разбойник: убо богов сила

ненавидит всячески толь сквернаго дѣла.

Но недолго грѣх ходит волний и безказний,

во слѣд злодѣяния пойдет неприязний

Гнѣв мой: вложу в мисл ему христоненавистны

помисли, на язик же наведу безвѣстны

Хули. Мняшеся тебѣ, о тектонов сыну,

яко Владимир будет равен Константину,—

Будет противу тебе Иулиян вторий.

ЯВЛЕНИЕ П ЯТОЕ

Бѣс тѣла и Жеривол

Б ѣ с т ѣ л а

Простѣте, аще мало закосних; аз скорий

Всегда на сицевую помощ, днес ея же

ищеши, Жериволе!

Жеривол

Ни, о любви княже,

Не на мя пущай стрѣли; вѣм, яко твоего

лука язви сладки сут, но тѣла моего

Вси уди, вси утробы твоих ран сут полны.

Язви князя нашего.

Б ѣ с т ѣ л а

Но он весь ест болний

От стрѣл моих: триста стрѣл, ядом напоенних,

внурих ему во сердце, триста жен сочтенных

Бѣсится любовию.

Ж е р и в о л

Но вся отринути

хощет уже.

Б ѣ с т ѣ л а

Кто тако жестокий и лютий

Любов ему отъемлет?

Ж е р и в о л

Един, убо вѣси,

един безчеловѣчний всесладкия бѣси

Христос от душ изгонит и всѣм ест противний.

Б ѣ с т ѣ л а

Не скорбѣть. Покажу вам образ зѣло дивний

Християнской чистоты. Яко к вам позванний,

не скор прийдох; не вѣсте, чим бых удержанний.

В далекой странѣ, Христа держащей уставы,

двое суть княжения особной державы.

Двоим ихь князем любов ко единой дѣвѣ

влиях в сердце; недолго убо в тайном гнѣвѣ

Прибыша со собою, скоро, ярость звѣрну

откривше, лютую брань и силу безмѣрну

Двигнуша и единой жени ради тако

кров людей безчисленных проливают, яко

Троянская иногда брань долго лияше,

когда греком Елена похищенна бяше.

Тако мя побѣждают християне!

Ж е р и в о л

Убо

со Владимиром тебѣ братися сугубо

Удобнѣйша брань будет: понеже бо зѣло,

яко повѣтствуеши, едной жени тѣло

Двох мужей побѣждает; колмы паче триста

связати единаго могут и от мѣста

Двигнутися не дадут, аще приложиши

о том попечения.

Б ѣ с тѣ л а

Всуе тя трудиши,

Жериволе! Наша в том печаль, наши труды.

Ты отселѣ, молим тя, безпечален буди.

Ж е р и в о л

Братия, радуймося: еще не у может

Христос торжествовати, ни ему поможет

Многорѣчие жерцов его.

П и а р

Нам прилично

еще пред побѣдою пѣти краснолично.

Кур ояд

Прилично воистинну.

Ж е р и в о л

Устройтеся спѣшно,

спѣшно до скакания, аз же вам утѣшно

Явлю зде знамение: понеже имамы

сладкие пѣти пѣсни, бозы же со намы

Будут скакати, токмо первие им мушу

пришептати и дати коемуждо душу.

Идолы со жерцами, поющими пѣснь, скачут.