Київський літопис Похід Ігоря Святославича проти половців у 1185р.

Игорь же Святославичь тот год бяшеть в половцех, и глаголаше: «аз по достоянью моему восприях побhду от повеления твоего, владыко господи, а не погань­ская дерзость обломи силу раб твоих; не жаль ми есть за свою злобу прияти нужьная вся, их же есмь приял аз». Половци же аки стыдящеся въеводства его и не творяхуть ему пакости, но приставиша к нему сторожов 15 от сынов своих, а господичичев пять, то тhх всих 20; но волю ему даяхуть, гдh хочеть ту hздяшеть и ястрябом ловяшеть; а своих слуг с 5 и с 6 с нимь hздяшеть; сторожевh же тh слушахуть его и чьстяхуть его, и гдh послашеть кого, бес пря¹ творяхуть повелhное им. Попа же бяшеть привел из Руси к себh, со святою службою: не вhдяшеть бо божия промысла, но творяшеться² тамо и долъго быти. Но избави и гос­подь за молитву хрестьяньску, им же мнозh печаловахуться и проливахуть же слезы своя за него. Будущю же ему в половцех, тамо ся налhзе ся мужь, родом половчин, именемь Лавор; и тот приим мысль благу, и рече: «пойду с тобою в Русь». Игорь же исперва не имяшеть ему вhры, но держаше мысль высоку своея уности, мышляшеть бо емше мужь и бhжати в Русь, молвяшеть бо: «аз славы дhля не бhжах тогда от дру­жины, и нынh не славным путем не имам пойти». С ним бо бяшеть тысяч-кого сын и конюший его, и та нудяста и, глаголюща: «пойди, княже, в землю Рускую, аще восхощеть бог избавить тя»; и не угодися³ ему время таково, какого же искашеть. Но якоже преже рекохом, возврати­шася от Переяславля половци; и рекоша Игореви думци его: «мысль высоку и неугодну господеви имhешь в собh: ты ищеши няти мужа и бhжати с ним; а о семь чему не разгадаешь, оже приhдуть половци с войны, а се слышахом, оже избити им князя и вас и всю Русь? да не бу­дет славы тобh, ни живота». Князь же Игорь приим во сердцh съвhт их, уполошася⁴ приhзда их и возиска⁵ бhжати: не бяшеть бо ему лзh бhжати в день и в нощь, имъже сторожевh стрежахуть его, но токмо и веремя таково обрhтh в заход солнца. И посла Игорь к Лаврови конюшого сво­его, река ему: «перееди на ону сторону Тора, с конемь поводным»: бяшеть бо съвhчал⁶ с Лавром бhжати в Русь. В то же время половци напилися бяхуть кумыза, а и бы при вечерh: пришед конюший повhда князю своему Игореви, яко ждеть его Лавор. Се же встав ужасен и тре­петен, и поклонися образу божию и кресту честному, глаголя: «Господи сердцевидче! аще спасеши мя, владыко, ти недостойнаго» — и возмя на ся крест, икону, и подойма стhну и лhзе вон. Сторожем же его игра­ющим и веселящимся, а князя творяхуть спяща. Сий же пришед ко рhцh и перебред, и всhде на конь: и тако поидоста сквозh вежа. Се же избав­ление створи господь в пяток, в вечерh. И иде пhшь 11 ден до города Донця, и оттолh иде во свой Новъгород, и обрадовашася ему; из Новагорода иде ко брату Ярославу к Чернигову, помощи прося на Посемье. Ярослав же обрадовася ему и помощь ему дати обhща. Игорь же оттолh hха ко Киеву к великому князю Святославу, и рад бысть ему Святослав, также и Рюрик сват его.

__________________________________________________________

¹без заперечення, ²гадав, ³не видавався час, ⁴злякався, ⁵шукав нагоди, ⁶умовився