Висьттэз
Праздник панытö
Вячеслав — колхознöй тракторист. Мыгöрыс не ыджыт не учöт, а вермасьны эн кутчись: брякнитас, кыдз резьдöм нинкöмöс, и сэсся шы он сет. Кöть и выныс вöлi детинаыслöн, но некöр некинöс эз öбидитлы — номöс весись оз вий. А вот уджавны любитiс и трактор вылас и чера уджын.
Сылö тырис восемнадцать ни, но отир сё шуисö Славикöн. Сiя вöлi боёк и смев, сы вылö часто дзиргисö-видзöтiсö том нывкаэз.
Öтпыр сiйö председатель корис дынас и шуö:
— Слава, колö ветлыны Кöсö, но туйыс не туй — гроб: ваэс быликчисö-петiсö береггезiсь, нятьыс пидзöсöдз...
— Николай Максимович, тэ ачыт тöдан: не первуись эд! Мöдöт. Николай Максимович ыш ловзисис, видзöтыштiс Славик синнэзö строгöя и юалiс:
— А тэ тöдан, мыйла мöдöта районас?
— Ог, — серöмтчис Славикыс.
— Деньгала... Мöдлун Первöй май, а миян копейка абу. Мый колхозниккес висьталасö?
— Мый, кöть и деньгала, сёровно эд, — согласитчис Славикыс. — Мымда?
— Тысяча-мöд лоас.
— Уна кодь... Позяс олыштны, шыбыльтны дак — сералöмöн горöтчис Славик.
Эзö бы и мöдöтö Славиксö, но бухгалтерыс шогалiс, а счетоводдэс — инькаэз, нiйö кытчö ни мöдöтан эттшöм туйезас?
Ашынас Славик вöлi районын ни. Кытшöм бы эз вöв туйыс, но сiя локтiс. Двадцать пять километр — ю берег дорöдз — локтiс верзьöмöн, Сэсся инмис чериалiсь вылö, кöда и вуджöтiс мöд берегас. Сэтчин Славик сёйис, шоччисьыштiс и двадцать километрсö мунiс подöн. Узьны пырис соч ордö, кöда посадас важын ни олiс. Сочыс примитiс бура, гöститöтiс и, кыдз овлö инь пöлöслöн, эз вунöт юавны:
— Мый инö мешöкыт умöлик? Мыйлö нö катыльтчин эттшöм туйезас?
— Вашöтiсö, соча, гортiсь. И мешöксö кодясö эз сетö тай, — шыннялöмöн висьтасис Славик.
Рытнас ветлiс киноö и этасянь кольччис довольнöй öддьöн: картинаыс вöлi зонкаыс сьöртi, да и мыччалiсö не кыдз гортын, а кыдз городын — бура, любо видзöтны.
Ойыс, чулалiс казявтöг: кöд бок вылас водiс, сiдз и чеччис. Саймис асъяпоннас — шондiыс дзардö синнэзас — чепöссис, думыштiс: «Натьтö, важын ни колö уджавны». Но кватитчис — не гортын. Сочыс тшöктö эшö узьны:
— Татöн не деревняын, народыс — чад кайö, узьö луншöрöдз.
Но Славиксö сэсся эз узьöт, сьöлöмыс телепитiс-кыскис керны делосö, кытчö мöдöтiсö гортсянь. Нюлыш-малыш сёйыштiс мыйкö — и банкö.
Банкын и шыррес абу, не только отирыс. Зонка видыштiс эттшöм порядоксö да пуксис посöдзас. Шондi бура шонтiс, и Славик радся-рад лоис погоддяыслö: поди, шурöтас невна, дак буржык лоас мунны гортö. Небоын öтiк кымöрок абу, а му вылын дзульзьöны ыбшаррез да сьöдкайез, больгöны шороккез, сылö медбöрья лым.
Зонка радуйтчис эта асывлö, кыдз бытьтö лоас мыйкö эшö гажажык эта тулысö.
Сьöрсьöн-бöрсьöн, почти öтдруг, локтiсö сотрудниккез. Славик пырис банкö аслас дöраовöй сера кöзичаöн, локтiс касса öшынок дынö да сетiс пашмöм юра нывкалö доверенность.
Нывкаыс дыркодь лыддьöтiс бумажка вылiсь гижöмсö, кыдз бытьтö эз верит, что сы одзын сулалö морт, кöдалö колö сетны деньга. Сэсся юалiс:
— Колхоз «Родина»?
— Сiдз, — гогиньтiс юрнас Славик. — Вот справка, — зонка нюжöтiс документсö. Нывка осьтiс справкасö, котöртiс синнэзнас первöй страница вылöт, сетiс бöр и негорöн, висьталiс:
— Лэдзам одзжык, ылiсь мортыс.
Джын час бöртi Славик каттис деньга пачкаэз вощанöй бумагаö, кöдö петкöтiс кытшöмкö жырись сьöд чужöма мужик.
Славик сiдз волнуйтчис, что нельки киэс дрöжитiсö. Сiя первуись видзис киэзас эта мымда деньгасö, эта ыжда богатство — вöтöн не вöтасьны. Аслас сьöлöмыс то рада быркнитыштлiс, то сразу орыштлiс, лöньсьылiс, кыдз ыджыт беда коста.
— Зонка каттис деньга пачкаэсö öтiк ыджыт пачкаö и заргис сiйö кöзичаас, дзик кытшöмкö багсялöм нянь чöвпан.
Кыдз тай прокод лöсялö мукöд мортыслö — счастьеыс öшынöттяс пырö пö — сiдз эна луннэзö и Славиклö: только ештiс лэдзчыны банк посöдзись, кыдз сюрис машина вылö.
Нем и баитны, туйыс — мед век не адззывны сэтшöмсö: зэгйö кишкаэз, машинасö кисьтö бы. Зонка терпитiс, сiя радуйтчис, кыдз бытьтö только этö и видзчисис.
Машина ужйис-буксуйтiс, реплiс тулысся ямаэзö, но сэсся локтiс берег дорöдз. Бöрö кольччисö двадцать километр, а эта абу шутка. Öнi кольччис только вуджны юсö, а сэсся лыддьы — гортын ни.
Деревняыс сулалiс крут берегын, и юыс сiйö эз кöтöт, кöть и лöзöтöм и паськалöм сiдз, что и син оз судз. Ыджыт ю кучиксис петiс, кешитчис Славик син одзын, дзик лöсьöтчис чепöссьыны берегын сулалiсь морт вылö да нуöтны сiйö сьöрас.
Первöй жö керкуас, кытчö пырис Славик, сюрис, кыдз баитöны, самöй лöг пора: пызан сайын пукалiсö мужиккез да сёйисö.
— Нянь да сов... — шуис Славик.
— Ем да свой, — шыасис нахальнöй чужöма мужик и юалiс гардчöм кылöн: — Мый колö, дружок?
— Вуджны бы вот...
— А-а, лöз пагöль! Литра сувтöтан — сэтчин лоан, — висьталiс сiя жö мортыс. Мöддэс куритiсö, шыннялiсö, но нем эз баитö. Вежöртiс Славик, что инмис коддэз дынö и сразу лöгасис и ас вылас, и эта братия вылö, лöга шуис:
— Мöдöр светас получитан!
— Но, ачыт тöдан, зонöй. Ми эд ог вöзйисьö... Зонка бергöтчис, жавкнитiс ыбöссö...
«Шкуродёррез, этадз и кульöны отирсö», — лöга видчис сiя. Но васö колiс вуджны, колiс кошшыны вуджöтiсьöс. Славиклö стрась противнöй лоис деревняыс, сылö кажитчис, что деревняас быдöнныс талун, кыдз нарочно, трескöны-юöны садь быртöдз, что деревняас öтiк мортöс он адззы честнöйсö. Энiя крутöй, кыдз берегыс жö, думаэзöн зонкаыс пондiс мунны ва пöлöн, надейтчис адззыны черикыйисьöс, — сiя, натьтö, вуджöтас баснитöг. Сiдз Славик кайис куим километр гöгöр и некытшöм черикыйисьöс эз пантав. Мый керны? Бöр бертны — ылын, а вуджны колö.
Славик пуксис, кыскис няньтор и чöскыта сёйис сiйö. Пукалыштiс эшö. Шы не тöв — некин некытöн абу, некытшöм черикыйись, нельки и кайез дугдiсö сьывны.
И сэтöн син вылас сылö усисö пес кряжжез, кöднö ваыс чапкöма берегас.
Эшö джын час бöртi готов ни вöлi плот, быднёж панöм-каттьöм гардöм шаттезöн.
Ваыс бытьтö сiйö и видзчисис, кöр Славик лэдзас плотсö: уськöтчис плот вылас, лöга зэгнитiс, бергöтiс öтiк местын; дзуркнитiсö шаттез, но плотыс эз разьсьы. Эз повзьы и плотыслöн хозяиныс: сiя шупыта татшкис потшсö ва пыдöсас, гöрдöтiс, кыдз рак, и веськöтiс плотсö. Ваыс сразу миритчис — вежöртiс мортыслiсь характерсö и дугдiс пизьны.
Уйны колiс верста-мöд — сiдз содöма ваыс, вöтьöма лажмыт береггесö совсем кöззэзöн, баддезöн.
Кöр Славик локтiс ва шöрас ни, вдруг мыйкö гырснитiс плотыс увтын, мыйсянь сiя пондiс паськавны.
Славик вывтырöт котöртiсö кöдзыввез... Зонка пондiс сынны мымда вын, но берегыс эз думайт локны паныт сылö. Кадыс вирдыштiс-мунiс сэксянь, кыдз пондiс разьсьыны плотыс, но вуджисьыслö сiя кажитчис год кузя. Зонка вожасис плот вылас, а сiя сё паськалiс быд сыныштöмсянь и коккесö кыскис бокö, мöдiс доль поткöтны мортсö. Морт сынiс и видзис коккезнас проклённöй кряжжесö. А берегыс эшö ылынкодь...
...Славик дзик саймис и казялiс, кыдз торьясис плотыс, а кряжжес жагвыв уйисö кинлö кытчö туй. И эшö казялiс, что сiя видзсьö кöз уввез бердын, а гöгöр — лöз ва. И ачыс люзьва — то ли пымалöма, то ли вадiсьöма. Кватитчис — кöзичаыс спина саяс, и сразу дзик йы ыскöвтiс сьöлöм вывсис и сэк жö кикокыс орис, — вот-вот усяс ваас кöз уввес вылiсь.
Лöз ва, ылöстöм ва, орсiс шондi югöррезкöт, бытьтö дразнитiс мортсö аслас глупöй победаöн, что вермис-даки лэбтыны эттшöм кызъяйсö пу вылас. Шондi лöсьöтчис саясьны горизонт сайö, аслас югöррезöн прощайтчис ашынöдз и ваыскöт, и кöзыскöт, и бедаö шедöм мортыскöт. Пемдас вот чожа, и кин тöдö, мый лоас. Эд горт берегыс то сэтöн и эм, а он чеччöвт. Горшас мыйкö дзик тасасис, öмас дульыс лоис сола, синнэс пемдiсö.
— Тьфу, — сьöвзис сола дульсö Славик, — ог я горзы, а?.. Вот пильскан нинкöм! Может, кувны ни лöсьöтчин?! Сулав жö, гöтрасьны, натьтö, колас да вöлись кöть...
Комокыс жагвыв ыскöвтiс горшсис, лоис долытжык. Зонка буржыка пуксис кöз ув вылас и тупка моз пондiс дзарьясьны öтмöдöрö, кошшыны синнэзнас кытшöмкö спасеннё и кöр вежöртiс, что сiя абу некысянь, горöтiс быд вынiсь:
— Отсалö! Отсалö!..
Мылякö голосыс эз вöв сэтшöм гора, кыдз вöрын, падмис кытчöкö — юас я мый я сунгисис — ваыс и этöн йöртiс мортсö.
— Отсалö! Отсалö!! — рявзiс сiя. Но некин некысянь эз лок. Деревняыс вöлi ылын, мöдöрас, а гортланьын — вöр. Славик шоччисьлiс да ыксiс-рявзiс вились, кытчöдз эз сибды голосыс, но некин некысянь, — бытьтö быдöс му вывсис вöтис ваыс, только вот сiя, Славик, öтнас кольччис кöз вылын.
Шондi саясис мыс сайö да бöр джын чужöмнас мыччисьыштлiс деревня сайын, дзик мöдiс тöдны, сё я мортыс кöз вылас. Но вот и сiя саясис, только гöрд видзис горизонтыс. Ю ловзисис ыркыт руöн. Ва вевдöрöт чеччалiсö чериоккез, боркайтiсö щукаэз — вашöтлiсö поснит черисö.
Рытыс кывтiс не ваыс моз — не тэрмасьöмöн, бытьтö видзчисис, кöр петас лолыс мортыслöн. А морт пондiс кынмыны, пиннес чакöтiсö, чуннес эз пондö кывзыны, коккес тувдiсö, и сiя вежöртiс, что чожа усяс ваас. Сэк зонкаыс тувдöм чуннезнас пöрччалiс коссис ременьсö и домасис уввез бердö, а кöзичасö волыссэзнас кöрталiс юр вевдöрись уввез бердö. Ась мортыс и усяс ваас, а кöзичасö адззасö честнöй отир, и деньгаыс кольччас дзонь.
Ойыс вöлi кöдзыт, югыт и гажа. Сьылiсö ойся кайез кытöнкö берегас, юр вевдöрöт шутнялiсö, борддэзöн орлалiсö русö уткаэз, а деревняас кылiс сералöм, жексiс гармоння, — тулысся ойыс эз узь. Эз узь и Славик, сё видзöтiс горт ладорас, но сэтчин только вурксiсö лягушаэз.
Кöдзытыс сьöвталö бы киэз, коккез, сувтöтö бы мортлiсь сьöлöм. А мортыс оз сетчы сылö — öвтö киэзнас, коккезнас, куснялö асьсö. А инмис бы эта кöз дынö пöрись морт, шуис бы: лешакыс ва шöрас койö.
А зонка юрö пырисö думаэз, и бурыс, и умöльыс, син одзас локтiс быдöс некузь оланыс. Сэсся локтiс председательыс да бузгис-юалiс:
— А тэ тöдан, мыйла мöдöта районас?..
— Позяс олыштны, шыбыльтны дак... — шынньöвтiс Славик и сэк жö дрöгнитiс: — Вот и шыбыльтi — кошшы кытöн. Олыштi тай... Сымда, поди, и адззыла... Этö ойсö вот... Эх, — гирчыкнитiс пиннезнас. — Чулалас лун-мöд — оз адззö и пондасö думайтны: вот эд шпанаыс мый керис, вирöн шедтам деньгасö, а сiя гусялiс. Айöлö синмас пондасö бытшкыны быдтiн, шуасö, кодя зонтö — вердiс тай тэнö и миянöс... Не, этадз оз ло! Оз вермы лоны!
Славик курччалiс тырппесö и эз кыв зубытсö. Ойшöр гöгöрас кöдзытыс зэгйис öддьöнжык ни, пыркöтiс юр вемсö, думайтiс кольмöтны мортсö, но Славик эз сетчы — уджалiс быдсöн вывтырнас, шонтiсис.
Асывланяс зонкаыс вежöртiс, что сэсся оз ни вермы кöдзытыскöт нем керны — эз кывзö не ки, не кок, только юрыс уджалiс вöтын моз: «Праздник ни гортын... Натьтö, предыслiсь Фёдор Митя, кöда медумöля уджалö, камгö-корö: «Вай деньгасö! Отирыс празднуйтöны, а ми мый?»
Син одзас койис сякöйыс. И ежели эм адыс, кыдз шуöны поппез, то эта сiя, мый адззылiс зонкаыс талун ойнас...
Лоис асъяпон. Сьылiсö-дзульзисö берегас кайез, лажмыта лэбзис ва вевдöрöт варыш — кошшис сöтны дыш чериöс. Горт ладорас мыччисис шондi. Лягушаэз эзö ни вурксö, а кылö чеччалiсö, шлёпöтiсö ва вевдöрас. А может, не лягушаэз? Может, пароход колесонас васö песö? А кöть мый... Славиклö узьны колö.
* * *
Бульк, бульк — сынiс васö пелыс. Учöтик пыж уйис ва паныт не тэрмасьöмöн, колис бöрас поснитик туй сер.
Пыжын сулалiс старик, сынсис жагвыв да чикралiс синнэсö, тыдалö, смекайтiс чериа местаэз.
Вдруг старикыс дугдiс öвтны пелыснас, тувдiс местаас. Пыжыс сувтiс, дюттясьыштiс öтiк местаын, а сэсся дзик мыйиськö повзис, пондiс кывтны бöрлань. Старик сулалiс и кваркышалiс синнэзнас, и веритiс и эз, мый адззис: кöз вылын öшалiс то ли морт, то ли мешöк. А может, мыйкö син одзас пöртмасьö? Повзьыштiс, вальс сьöвзис шульга пельпон вевдöрöттяс, бергöтiс юрсö — сё сiдз. «Морт эд, тыдалö, не вакуль», — решитiс сiя и жагвыв, полöмöн, пондiс уйны кöзыс дынö. Пыж кокнита чуйкнитiс кöз уввез бердöдз, и старик шуис: «Сiдз и эм — морт. И ловья. То гаг моз вöрöтö коккесö, кöть и синнэс куньöмöсь и юрыс сырс видзö».
— Эй, дружок, чеччы! Тырмас узьнытö, шондi петiс ни!
Мортыс эз и вöрзьы. Старик лэбтiс пелыссö, зангис бок кузяас. Морт осьтыштiс гудыра синнэсö и сэк жö кунис бöр. Но старик эз попуститчы, нюжöтчис кинас мортыс кок дынöдз, кутiс сапогöттяс и давай зэгйыны.
Славик осьтiс синнэсö — оз тöд, кытöн сiя, и кытшöм старик кыскö сiйö ваас. Вдруг юрас вачкис: «Грабитöны!» Нетшкöвтчис — нем эз пет; быдöс телосö кизялöм. — Мый колö?! — горöтiс быд вынiсь, но горöтöмыс эз пет, только джыннян моз бреньгыштiс.
— Саймы, саймы! — ряксiс старик и кöр казялiс, что зонка садьтöм, лэдзис сiйö пу вывсис дзик мешöкöс.
И вот Славик берегын. Старик котрасьö-копошитчö, öзтö би, ачыс видö зонкасö:
— Ылöстöм тэ, зонö, ылöстöм! Эд тэ талун мöдöр светас гырниччез керин ни бы. Ой-ой! Колiс жö плотöн вуджны... Раз некин эз вуджöт — локтiн бы ме дынö.
Славик шы эз сет, только небурика шыннялiс: быдöс бур. Рытнас Славик вöлi гортас ни. Николай Максимович рад, юалö:
— Но, кыдз ветлiн? Дзонь деньгаыт?
— Бура... Берег дорöдз машинаöн локтi. Кöзичаöс швырги-чапки кузовö, и некин эз и думайт, что ме деньга кыска.
— А мый нö кижган?
— Пон тöдас... Тыдалö, кöдзыт васö юи да...