Повны — не овны



1

Давидлö куимдас год гöгöр ни, и мамыс лыддьö, что зоныс пöрись, что ендiс гöтрасьтöг, тошсялiс-багсялiс, и некин ни сы сайö оз мун, сiдз и кулас — не бöрас не одзас.

— Некытчö тэрмасьны, — зонкаыс висьталiс мамыслö. — Быдмö эшö невестаö.

— Кытöн? — юалö мамыс.

— Кытöн колö, сэтчин и быдмö, — шуö зоныс.

«Мый тэ сэтшöмыскöт баитан, — ныр увтас бобгыштiс пöрисьыс, кинас öвтыштiс жöникыс вылö, висьталiс, — сэк ашын чеччы и отсась!»

Мамыс эшö абу вывтi пöрись, медбы одз асывнас саймöтны да уджöтны зонсö, но Давидлö висьталасö — керас, оз любит, кöр дыр модьöны, топ лыддьöны немортöн. А чеччö зонкаыс асывнас — петухсö саймöтö. Чеччас, петас öтöрись посöдзö, нюжöтчас, шынньöвтас асывся зарнилö, кывзыштас, кыдз садник кырылын видз вылын герчкö кайыс, адззö Лёнялiсь рыжöй понсö. Одза-одз поныс кытчöкö котöртö, хозяиныс кодь жö люш пель, тöв и гожум бур олансö оз адззыв, сё тшыг, öвтчö деревняын да видз вылын, нерö ракаэзöс и вувтö катшаэз вылö.

Давидлöн мамыс, кöр лöгасяс зоныс вылö, видö, что Лёняыс да Давидыс — ем да сунис, öтiк туй кузя ветлöтöны, что некöр нылö дышувьяныс невестасö адззыны, сiдз и куласö.

— Бöбöтан, старуха, — сэтчö зонкаыс висьталö мамыслö. — Миян коддес, старуха, деревняас, рас, — кусiньтö чуньсö. — Симчик — холостöй. Два — Рыжöй Рожнев, гöтыртöм, три — Кöк Миков öтнас, а невестаэс кытöн? Кытöн невестаэс, мам? Или куим пиня монь тэныт вайöтны? Эх, старуха тэ, старуха! Уна олöмыт, а етша адззан... Öння кадын деревнясис невестаэсö лёк шогöт пышшöтöм, и менö Лёняыскöт öтiк пызан сайö эн пуксьöт. Лёняыс уджалö гаражын да вина юö, а ме гаражас ог уджав и винасö ог ю...

Гажа гожумся асылö Давидлöн бур думаэз. Сiя, кыдз кодя зон, посöдзись босьтö ведраэз да кузь шаггезöн оськалö öшымöслань. Сэтчö саймö мамыс, керкусянь уськöтчö посöдзö и зоныслö бöрсяняс ыксö:

— Зон, тэ мый керан? Мыля менö стыдитан? Ачым кайöта васö, ачым!

Мамыс жöник сайö мунöм дассизимöт год вылын и сылö мужикыс некöр не пес абу пыртöм, не гоз ва абу кайöтöма, а Давидыс мый керö? Мыля мамыслö васö кайöтлö? Отирыс эд пондасö серавны, что пöрисьыс и васö ни оз вермы вайны... Кытшöм монь сэтшöм матшкаыс весьтö локтас?

Давидыс мамсö кывзö и оз, вайö васö да посöдзын пондö чок-чок вартлыны литовка. Дас минута — и литовкаыс вартлöм.

Пöрисьыс бöра петö посöдзö, киас чилькöтчан ведра. Сувтыштiс зоныс спина сайö и модьö:

— Зэрны лöсьöтчö...

— Но и мый? — шуö зоныс.

— Тэ бöра колхозас ытшкисьны мунан? Или мöссö он мöд видзны?

— Мöсыс не менам, — висьталö Давидыс.

— Миян я мый я? — обидитчö и öшö мамыс. — Ми эд талун эмöсь, ашын абу.

Мамыс сэсся шы оз сет, сулалыштö посöдзын, видзöтö бöрсяняс зоныс ота спина вылö, дзарнитö шондiлань и думайтö: «Айыс эд томсяняс сэтшöм жö вöлi, сiдз жö дзуртiс колхозас, а гортын кöть быдöс киссьы-разьсьы... А отирыс не миян моз олöны, унажык сьöлöмныс ас пондасиныс висьö... Видзöт кытшöм керкуэз йöткисö — вичкуэз! А ми...»

Пöрисьыс жольнитiс ведраöн, пырис карта вылö.

Давид кончитiс вартлыны литовка да пондiс видзöтны улицаö, кытöн тулыссянь косьмöм нятьыс, и некин сiйö оз думайт гладьöтны, мунан и видзöт, медбы эн берездась. Сьöлöм гудыртчö сэтшöмсö адззыны, а сельсоветыс эм и абу, нем оз кер.

Тыдалö, стариккес пуксьöтöмась гажа да гладь местаö деревнясö, бокас визывтö ключ-шор, картаэс бöрын видззез, ны сайын вöр: он дышöтчы кö, асывнас уджавтöдз верман тшаксö вайны ведра тыр.

Гажа Тылаыс, ежели он видзöт нятьыс вылö, а кöркö вöлi эшö гажажык: гожумнас улицаэзын быдмис кузь луд — коктö он и нятьöсьт, а öнi нятьын улицаэс, но сы местö туйö ошшасьны виль керкуэзöн, кöднö медбöрын пондiс строитны колхозыс — пыр да ов, оз ков не торкны деньга, не керны помеччез. Сiдз томмес и керöны: гöтрасясö, пырасö виль керкуö и олöны — асьнысö оз вийö и деньганыс дзонь.

Асыв. Вашöтiсö ни деревня сайö пода, но отирыс колхознöй видззез вылö оз тэрмасьö, мед и турун керан кад — би страда. Давидыс вартлiс литовка, пуктiс сумкаö павжун, вердiс пон, садникись вашöтiс петухсö, кöда, кöть сьöвтав, адззас осьта и пырас карчйöрас.

Видз вылас пуксис ни асывся туманыс, дугдiс герчкыны кайыс, чикиссез лэбтiсисö вылö — судзöтiсö небосö, пель одзöт бизгис-лэбзис медодзза лöдз. Давидлö син вылас усис Лёнялöн мамыс. Сiя умöля кылö, умöля адззö, быд шагын пöдö-ружтö да кашляйтö, кивзö да ойзö. Кулö бы, но оз кув, а кыдз гожум — страда, вдруг ловзьö, некыт оз понды висьны, веськалö и медодз котöртö видз вылö аслыс керны турун. Давидыс оз любит ассиныс мöснысö, кöда уна сёйö, оз любит и Лёняыс мам кодь отирсö, кöдна колхозас чуньöн оз павкöт, но аслыныс — сто год оласö!

«Мед, — зонкаыс кармансис кыскö нянь тор да чапкö воробейезлö. Кайес кокасьöны бурундук вылын. — Мед Лёнясö мамыс буржыка вердö... — лöгасьö Давид дышшес вылö, кöдна уджавны петöны луншöр, уджалансянь локтöны сёр павжун. Сьöлöм гудыртчö. — Ась ошшасьöны», — босьтö вила и иньдöтчö уджавны.

Луныс пондöтчö мича, ыркыт тöлока.

Сьöрсяняс чеччöвтö посöдзись поныс, одзалö хозяинсö и лэбзьö-котöртö видз вылöт.

Гожумся луныс кузь. Уджалан пöт. Гортö локтан, кöр шондiыс эшö вылын — мöдiк сымда уджав, но зонкаыс нюжöтчö диван вылö и видзöтö телевизор.

Мамыс да айыс локтöны сёрöнжык. Пöриссес уджалöны садь быртöдз — аслыныс керöны турун. Айыс пырас керкуö, кыдз баняись: пымалöм — люзь ва, чужöмыс шондiыс вылын сотчöм, гöрд, голосыс сибдöм, кижгö:

— Зон, кöть бы тэ зородсö отсалiн тэчны...

— Зород... — топ оз вежöрт зонкаыс. — Мый ме зороднас кера? Ме Сибирьö лöсьöтча...

— Кытчö?... — юрсö лэбтö айыс, повзьö. — Мый тэ сэтчин öштiн?!

Вот сiдз, зонка. Кольны лöсьöтчан ай-мамтö, а мый вылö сэк тэнö быдтiсö? Тэсянь видзчисьöны отсöт, а тэ... Кöин моз вöрö видзöтан.

Айыслöн вежсьö чужöмыс — сьöдöтö старикыс, сыр-лёль öшöтчöны пельпоннэс, и сiя лöгöн висьталö:

— Öзтыны керкусö и быдöс сэтöн!

— Вай истöгсö! — гажöн горöтчö зоныс.

— Смертьыс миянiсь пышшалö! — висьталiс мамыс, кöда ляшмасьö мыдзувья комын: кöть сiдз, мам, мыдзин, сё колö уджавны, а быдтiсин эд, пессин, ойесö эн узь, тшыгьялiн — öмсит кыскин да кагаэтö вердiн, а öнi кольччан — не одзат, не бöрат, некинкöт лоас кыв горöтчыны. «Ау, старик! Кытöн тэ?! Ловья я горыс вылын?» — сiдз и пондат овны кыкöн да öтамöднытö керкуас ыксыны, кытчöдз од черпезьдö.

Баитöны кык пöрись, думайтöны, что зонныс, натьтö, вежöртас, но Давидлö мый пырас юрас, тöвчикыс оз нöбöт: сiя думаэзнас кузь туйын ни, вöтчö ни аслас борда счастье сьöрö, олö бы отир моз жö богатöя, мед деньгаыс вöлi тыр! Да городдэз видзöтö, а гортын мый? Быд лун — чер да вила. Городас, висьтасьöны, и нывкаэс тыр, он тöд кин бердö кутчисьны, кинöс бöрйыны — öтiк басöк, мöдiк эшö басöкжык, асьныс голя бердö öшöтчöны и не татöн кодь куим пиня невестаэз, кытшöм бригадирыслöн племянницаыс, кöдалöн юрсиыс кузь, а мывкыдыс дженыт. Или кытшöм вылö гöтрасис Паша ёртыс: öтыслö годдэс кыкдас, мöдыслö — нёльдас. Пестуння... Курöггес сэтшöм невестанас пондасö серавны.

Вöлiсö бы нывкаэс гортын, натьтö, бы сьöлöмыс городас сiдз эз и кыскы. Этö сiдз да не сiдз, городас мун да пов, кöр он тöд, кытöн и эм бур оланыс, кытöн небосяняс и киссьö, кыдз айыс баитö: «Кытöн ми абу...» Вот кытöн ми абу, а кытöн эмöсь, колö уджавны.

Давидыс и гортын уджалö. Учöтсянь эз котрась весь олiссескöт, кыдз öнi любитöны овны томмес: зонка кöз сувда ни, а мамыс сё юрсö малалö да окалö: «Кага тэ менам, кага!» Окыштас кöз сувдаыслiсь чужöмсö, одзас пуктас пряник да конфета, а кöр и водтöтас бокас да сьылö: «Узь, кага, узь, бокат локтас сюзь. Тэ эд эшö менам учöт». А зоныс думайтö ни, кыдз бы гöтрасьны да мамыс öлöдзö пуксьöтны кага. Сэтшöммесö нывкаэс эшö öддьöнжык любитöны, а тэнö орддьöны, оз топ и адззö, мыля колхозын уджалан, назём сöвтан да пода вöдитан.

Колхозын уджалö Давидыс. Сылöн деревняын и кодя ёрт абу, некинкöт и кыв горöтчыны, янсöтны гаж, ошшасьны уджöн, висьтавны, мый вöлi и эз. Бутылка дорын ёрттэс адззисьöны, только мыччав деньга, уськöтчасö поннэз моз, кок пыдöссэтö нюласö, медбур ёрттэзöн лоасö, а кыдз деньгаыт абу, некинлö он ков. Öтiк Лёнькаыс кытшöм — кытöн пантасьö, сэтöн и модьö: «Тэ руб — ме руб! Мы с товарищем вдоем оба водочку не пьем, попадет бутылка водки — вместе с горлышком пропьем! Их-ох! Давид, вай деньга!»

— Кытiсь деньгасö, кöр бригадирыс сiдз нарядсö гижöма? — норасьö Давидыс.

— Мый тэныт бригадирыс? — нерö Лёняыс. — Жмот тэ, зонка. Сувтöтiн бы бригадирыслö бутылка, лун узин и деньга сыналiн! А тэ...

Сэтшöм ёрттэскöт ылö он мун, колхозсö напрочь разян, пöрöтан коккес вылiсь. Да разь Лёняыс вежöртас?

«Сiдз оз ло!» — думайтö Давидыс, сьöлöмыс эшö öддьöнжык пондö кыскыны гортсис сэтчин, кытöн йылö-быдмö виль олан.

Дыр ни лöсьöтчö кузь туйö, но сьöкыт вöрзьыны гортiсь, кöр вужьясис татчö и некин, натьтö, йöзас оз видзчись: сьöлöмыс полö, оз лысьт вöрзьыны и, натьтö, эз бы и пышшы гортсис ни, адззис бы невестасö деревняись, гöтрасис да пондiс овны не шы, не тöв. Но, кыдз шуöны, мый кошшан, сiйö и адззан — судьба сэтшöм.

Деревняын сё эшö бус страда, турун керö отирыс, некöр спина гыжьявны, кöр погоддяыс лэдзö турунасьны.

Уджалiс Давидыс, уджалiс, некин сьöрись эз кольччы, öтiк прогул эз кер, а деньга босьтiс Лёнькася етшажык. Бöра сералö Лёнькаыс: «Тэ — руб, ме — руб! Жалейтiн бутылкаыс вылö деньгасö, ас вылат горзы. А ме эг жалейт и адззылiн: тэсся унажык босьтi!».

— Мун тэ! — лöгасис Давидыс, сiя тöдiс, что Лёняыс уна шедтö да пыр кортöн ветлöтö, но весь оз ошшась, кöр потолокö сьöлалö, но винаыс быдöс керö — вийö и ловзьöтö... Поди, быль, Давид, оз ков рубтö жалейтны, а босьтны бутылка да юктавны пöттöдз бригадирсö, ась Ефим Селиверстовичыс горшсö миськалö, сэк, поди, и тэ деньгасö пондан босьтны медуна?

Эз любит зонкаыс Ефим Селиверстович кодь бригадирсö, но мый керан, кытчö воштiсян, кöр оланыс гардö ассис — сералö тэ вылын, и, ежели быдöн моз бы олан, котöрт магазинö.

Магазиныс Тылаын деревня шöрас — сэтчинсянь и тасянь тыдалö. Быдöн адззö, кöр магазиныс одзö сувтас винаöн машина, и Лёнькаыс жö машинаыс вылiсь ректö ящиккез. Кытчöдз винасö вайöны, кöть купайтчы, — сотчытöдз ю, только вöлi бы деньга, а Тылинса велалiсö ни юны: кыным уна, сыным етша, юöны и юöны, но эшö некин эз сотчы, некин бутылкаыс пытшкö эз вöй.

Гажа гожумыс и гажа оланыс деревняын, ежели магазинiсь винаыс оз бырсьы — быд лун праздник. Бурöсь отирыс Тылаын, кöр юöны вина, только сiя умöль, кöда оз ю — надз, деньгасö жалейтö. Сэтшöмыс вылö видзöтöны, кыдз йöз вылö, лыддьöны, натьтö, не мортöн, сералöны, что здоровьеыс сiсьмöм: не винасö оз ю, не кувны оз кув.

Уджалiс Давидыс — öтiк лун прогулсö эз кер, керис турун. Быдса месяц спинаыс и кымöсыс вöлiсö ваöсь, но месяц конецас бöра деньгасö ёрттэс сьöртi босьтiс медъетша. Сiйöн зонкаыс и лöгасис — абу дак абу! Котöртiс зонкаыс магазинö, вузасисьыс одзö чапкис деньга: «Филипьевна! Бутылка!»

— Мый одзын?! — Филипьевналöн синнэс ыждiсö — Оз я ашын лым усь? — Сералö вузасисьыс зонкасö.

— Усяс! — висьталiс Давидыс. — Ашын лымыс усяс пидзöсöдз! — и пиас дзебис чочком юра змейсö.

Пиас дзебис бутылкасö, мед кöин горшшес эз адззылö, и магазинсянь веськыта иньдöтчис бригадир ордö, кыдз миян деревняын керöны ылöса отирыс, кöр оз орддьö ассиныс начальникöс. Мунö зонкаыс да джöмдалö, и юрас думаэс кокасьöны: «Сёйö, кикимораэз! Юö пöт, мед тi талун жö сотчат! Ась горшаныт тасасьö, ась виньдат...»

Тылинса абу гордöйöсь, кöть нылö кытшöм смерть кöсйы, оз полö: Ефим Селиверстовичыс топ видзчисьöм ни Давидсö посöдзаныс, синнэсö шондi паныт чикралö, горзьöтлö, вина дукыс öмсис петö, кыдз баняись чад, и ачыс модьö:

— О, кинöс еныс вайö! Давид, кыдз тэ бöбасин татчö?!

— Бöбаси! — гажöн висьталö зонкаыс, ошшасьö. — Ефим Селиверстович, менам талун чужан лун! — бöбöтö бöбöтчисьсö, кöр чужан луныс тöв шöрнас — би мороз коста, а талун гожум — жар.

Бригадирлöн синнэс сiдз и вуджисö кымöсас:

— Ой, да тэ, зонка, кытшöм чож! Ась тэныт еныс буржык невеста козьналö, кöда бы окалiс да быд год мироннэз козьналiс, хе-хе! — ачыс швырк пырис керкуö и петкöтiс рюмкаэз.

Ефим Селиверстовичыс юис кык рюмка да ляс кодззис, и Давидлöн кылыс пондiс гардчыны, ошшасьö, что ашын чеччас шондiтöг, петас öтнас видз вылö и тэчас зородсö. Вот, бригадир, кыдз колö уджавны! Думайтö Давидыс, что весь оз ошшась, кыдз бур уджалiсь кывнас и киэзнас колхозсö лэбтö, но пöрисьжыкыс веськыта дзугö:

— Эх, зонка! Пикан тэ вöлöмыт... Гут мымда юин да öшин, — чикралö синнэсö, вирскöтö чер ороп кодь нырнас, пиньлалö öмсö, нерö Давидсö: модь унажык, а ми кывзам, кыдз тэ вылын курöггес сералöны.

— Он верит?! — чеччалö бригадирыс одзын зонкаыс.

— Верита, верита, — китшсьö бригадирыс. — Кыдз сэтшöм отирыслö не веритны? Верита!

— Колхозным миян, Ефим дядь, первöй сорт! Районаным медбур колхоз. И уджалам бура. Сiдз эд?! Ефим Селиверстович! Тэнö эд ошкöны. Не бригадир, а золото! — Горöтiс зонка бригадирлö пель одзас да чувйыштiс сылö бокас.

Давидыс юрсö лэбтiс вевдöрö, китшсьö и ыксö, кыдз вермö, сiдз и ошкö бригадирсö, думайтö, что ас пондасис керö бурö, что сiя талунсянь Ефим Селиверстовичлöн медбур ёрт, мый колö, сiйö и пондасö керны кыкöн — быдöс нылöн. И зонкасö окалö ни Ефим Селиверстовичыс, дульнас рожасö мавтö, тьфу!

Тылаын улица тыр шум да гам, кыдз праздник, и быдöн этö кылö да адззö. Поди, кинкö ошкö, что бригадирыс страда коста код, а кин, поди, и сьöласьö да ружтö, ас кежас думайтö: «Шать бы кызжык тэныт, бригадир! Шать бы... Вурны бы да вурны спинатö...» Но отирлöн киэзныс дженытöсь, öмныс пöдана... А бригадирыс ёртыскöт баитö:

— Сiдз, сiдз... — сьöласьö да модьö ныр увтас. — Пöрöтiм ни коккес вылiсь колхозсö, но и мед... Меным колхозыс оз ков, и уджыс мед берездасьö, кöр горшöс зэлöтö — ловзисьны немöн, а тэ, зонка, том... Том эшö и нем он вежöрт, а модян...

— Ме модя! — петух моз чеччалö Давидыс. — Ме ог модь, а баита. Мый синын, сiя и öмам.

Ошкис-керис бригидирсö — кымöрöдз лэбтiс и бöр лэдзис, сэтчö дундöтчис Ефим Селиверстовичыс, гöрдöтiс, кыз певнас чышкыштiс чер ороп кузя нырсö и ачыс ни пондiс кисьтны серебро — ошшасьö, кытшöм сiя кодя, кужö отирыскöт овны и уджавны, что сы кодь мортыс быль Тылаын абу. Видзöт жö, зонка, кыдз колхозыс богатсялас — быдöннысö пым пöим вылö пуксьöтас. Готсьö бригадирыс, го-го! Кывзы жö, Давид, таво мымда ни турунсö керит! Тысяча мöс вермат тöвйöтны, а! Давидыс кöть код, но юрыс эшö уджалö, ас киэзнас зороддэсö тэчö, но деньгасö босьтö Лёнькася етшажык. Кытöн правдаыс, бригадир?!

— Абу сiя, — висьталiс Ефим Селиверстовичыс, чуп окыштiс том ёртсö. — Нем абу миян колхозын, быдöс ни киссис-разьсис...

Лöсьöтчис сэтчö Давидыс кыввезнас бригадирсö кольмöтны, синнэсö осьтны, висьтавны, кыдз уна турунсö керисö, но тöвнас нем бöра лоас вердны, бöра пондасö дугаöн ытшкисьны — кортöн ветлöтны, небны вердчансö кытiськö Сибирись, öтiк центнерыс — сто руб, но пуртыс вылö эз уськöтчы, эз стыдит ни асьсö и терпитiс, кывзiс бригадирсö.

— Тэ баит, эн пов, веськыта шыр, веськыта! — синнэс гудыртчисö Ефим Селиверстовичлöн, кулаккесö ни няпралiс.

— Ог, Ефим Селиверстович, ме ашын татöн ог ло. Шабаш. Ог адззы невестасö, лэбзя Сибирьö. Адззисьлытöдз, Ефим Селиверстович! Видзöтам сэк, кин тэныт пондас тэчны зороддэсö. Может, Лёнькаыс, а? Лёнькаыслiсь уна он босьт... Сiя не ме кодь, чожа тэнö, бригадир, зуралас.

— Кытчö-ö-ö? — синнэс ыждiсö бригадирлöн. Мый? Кин тэнö Сибирас видзчисьö? Мый сэтчин öштiн? Думайтан гортын невестасö ог адззö? Вот чулалас гожумыс, керсяс туруныс, вундiссяс, сэк ме тэныт нывкасö ачым вайöта. Не невеста, а царевна — тысяча руб вылö он адззы! Сэтшöмыскöт, зонка, оз ло стыд пызан сайö пуксьыны и челядь быдтыны. А тэ мый? Нем эшö, тыдалö, он вежöрт, инькаэскöт, тыдалö, эшö эн и окась, а пыран ни бы кытчö оз ков. Ох, Давид! Нiя тэнö сiдз гардасö — ловзисьны он ешты, кувтöдз пондан горзыны. Вежöртiн?

Бригадирыс баитö öтiкö, а думайтö мöдiкö. Племянницаыс понда мортыслöн сьöлöмыс висьö, кöда пешлiсис ни овны кык мужиккöт, но öтiксö кольлалiс ачыс оз тöд кытчö, а мöдсö, отир басни сьöртi, водтöтiс гробйö. Етша лоисö кык мужикыс, öнi гöгралö Давидыс гöгöр, варыш моз гыжжесö мöртö бы веськыта сьöлöмас.

Эх, зонка! Бригадирыслöн племянницаыс кыдз сьöвталас, кыдз сермöталас, что пондан ружтыны-уджавны, а иньыт сёйны-юны да тешитчыны.

— Ме, Ефим дядь, — Давидыс син дорсис чышкис синваэсö, — любитны понда иньöс!

— Ошшась. Кывзам, — одзись сiсьмöм пиннесö мыччалö Ефим Селиверстовичыс. Ме эд тэ моз жö томсяням любитi иньöс... Кыдз шатьсö босьта да кыдз куля!.. Но ничего, олiм, некин вылö эг горзö... А тэ...

— Ен джаджын понда видзны. Ась сiя гортын олö, пода гöгöр бергалö да менö видзчисьö рыттэзнас.

— Чож, Давид! Молодеч! Видз иньтö ен джаджын да юрбит сы вылö, ачыт пöрись вöв моз мырсьы, а сiя эта коста мöдiккезкöт пондас окасьны, — юрнас гогинялö бригадирыс, сералö, но этö зонкаыс оз адззы, сё ассис:

— Менам, дядь, медодз лоас зон! Быдта зонöс, мортö пöрта, мед ме моз жö немись оз понды повны. Вот!

— Сiдз, кага, сiдз. Кытшöм каб, сэтшöм и нинкöм.

— Зонö быдмас и ме моз жö пондас уджавны! Суналö бригадирыс: öт синыс куньöм, мöдыс осьта, но быдöс кылö.

— Во! — горöтö Ефим Селиверстовичыс: — Паладьыс тэныт, зонка, как раз! Сiя тэныт кольттялас сэтшöм зон, что лабич дорсянь вöв вылö пуксяс. Он верит?! Ох тэ, господи благослови, хи-хи!

— Паладьыс да-а-а... Первöй сорт! Но тэ ме вылын, дядь, эн серав. Кута да племянницаыт вылын и гöтрася. Мый сэк лоас? Думайтан умöля пондам овны?

— Гöтрась, гöтрась. Он тшык.

Кодувья кытчö бöбöтасö, сэтчин и бöбасян, топ он тöд Паладьсö — племянницасö бригадирлiсь, кыдз йöз мортöс, кöр тэтöг Паладьыс сьöрын котрасьöны быдкодь жöниккез. Сэтшöм иньыс вермас козьнавны зоныс местö кöинпиян, что и няньсö он ешты сёйны, кыдз юртö кералас.

Садьувья Давидыс керис бы öтiкö, а кодувья баитö нач мöдiкö. Бригадиркöт сэтчöдз окасис-ниртчис, что быдöс бы ассис козьналiс и вузалiс, только бы Ефим Селиверстовичыскöт дружитны; кöсйисис бригадирыслö турун керны да уджыс понда нем не босьтны, капля вина не юны.

— Отсав, кага, — кеймисьö ни Ефим Селиверстовичыс. — Видзöт, старухаö пöрись, оз вермы, а ачым ог ешты: сэрпöсь уджыс быдöс оланöс сёйö! Уджавны ог вермö, а йöв бы сёям, йöз киэзöн турунсö керам. — Асьсö осудитiс бригадирыс. — Начкыла мöссö. Вот адззылан!

— А колхозас?! — вдруг öшис зонкаыс.

— Тöдан жö мый, племянник, — кыдз аслас роднякöт ни баитö бригадирыс. — Колхозсис уджсö лешакыс оз сёй, миян векын тырмас и колхознöй подаыс не менам! Вежöртiн кытчö пусö пöрöта?.. Отсав, кага, ашын меным, грех оз ло.

Шондiыс как раз улицаыс весьтын. Сералö деревенсасö, стыдитö, но нылö кодувья нем оз мöртчы: окасисö кык мужик, жмитлiсö öтамöднысö мороссэзныс бердö, горзiсö и пондылiсö сьывны, но дыр мыйись сё жö джöмдiсö, кöр Давидсö лязiс сьöкыт он, и сiя эз кыв ни, эз адззыв, кыдз бригадирыс öшын увтöт мунiс Парась баб — полокала, тöлыс öвтö, а öмыс пыр осьта, уна адззö да шевгö:

— Господи прости! Этö тэ, Давид?! Мыля сэтшöм, зонö, нёштöм талун? — кызöтiс, ружтiс, сьöвзис и содтiс, кыдз кымöсö сартас песöн вачкис. — Но, бригадир... Öтiк морт деревняаным эз ю да сiйö бесыс паськöмöн пасьтöтiн. Ловйöн мортсö сёйит! — öдззис бы котöртны, кöр бригадирыс мыччис кулаксö, но падмис и нюжалiс улица шöрас.

Шондiыс сё эшö öшалiс улицаыс шöрын, кыдз бытьтö эз думайт пуксьыны — кадсö козьнавны ойыслö.

— Нем оз ло! — старушкаыслö висьталiс Ефим Селиверстовичыс, кутiс Давидсö конувтöттяс и, кыдз аканьöс, кыскис пытшкись посöдзаныс да водтöтiс кровать вылö племянницаыс бокö, кöда важын ни дрöжитiс-видзчисис бокас зонкасö и сэкжö кыкнан кинас лягуша моз кутчисис Давидыс голя бердö и сiдз жмитiс, что мöдыслöн топ чегласисö коскаэс.

Кузь я гожумся ойыс? Шондiыс эз ешты топ пуксьыны, бöр ни мыччисьö, но Давидыс саймис одз. Осьтiс синнэсö да видзöтö — ачыс оз вежöрт кытöн: вевдöрын — крыша, öт бокас сэрпöсь кöньöс — помой, а мöд бокас... Кыдз адззис бригадирыслiсь племянницасö, топ кöин бокын и узьöм...

«Мыля ме сы бокын узя?!» — сотiс дума, но нем эз ешты висьтавны невестаыслö, Паладьыс морос тырнас жмитiс и пыма пондiс окавны бы:

— Эн тэрмась, роднöй да любимöй! Зонкаыслöн сiдз юрыс висьö, сiдз сьöлöмыс гудрасьö, что синнэс куньсьöны, а сэтöн эшö Паладь..!

Китöстiс петух — хозяин ас вылас, мый колö сiйö и керö, некин оз осудит и оз серав, а тэ Давид, кыдз пондан отирыс син одзö мыччисьны? Мый висьталан мамытлö, кöр сiя юалас: «Но, зон, кытöн талун узин?!»

Паладьыс бöра öшöтчö голяыс бердö. «Но тэнö!..» — зонкаыс öвтыштiс нывкасö, топ мездöтчис таракан бердiсь и öтöрö. Посöдзсянь чеччöвтiс петшöррез коласö да йöррес пöлöн мунiс, кыдз бандит, мед некин эз адззыв, но Парась бабыс бöра ни посöдзаныс ружтö и юасьö:

— Кытöн сы одза вöлiн?

— Некытöн эг... — эрзыштiс и веськыта гортас, пырис гусьöн посöдзаныс да быгыльтчис кроватьö.

Эз ешты куньны синнэсö, мамыс сэтöн и эм, саймöтö:

— Чеччы! Кытöн тöн сiдз лаксин?! Кин юкталiс? Мыля асьтö стыдитан? Кытшöм тэ сэтшöмыс жöник? Кин тэ сайö мунас? Кинлö тэ колан? Кыдз пондiс тшупны, кöть пеллетö тупкав, кöть пышшы, но талун Давидыс эз понды мамсö кывзыны, а рыг-рыг серöмтчис да висьталiс:

— Мам, гöтраси.

— Кин невестаыт? Или курöг позас узьтöтiн?

— Он верит? Паладьыскöт. Талун бокас ни узи, ашын сельсоветын гижсям и порядок! Тэ сьöртi, натьтö, мам, моньыс... Только кузьöсь жö пиннес, но мый керан? Кытшöм уж эм...

— Бытшöм невестаыт, — ошкö мамыс. — Лöсялат кык вешьянтöм тури. Öтныт пондат уджавны — деньга шедтыны, а мöдныт магазинö котрасьны да вина горшас кисьтны.

— Мам, öнi кодя отирыс сiдз и олöны! — сералö зоныс. Но мамсö он бöбöт, адззö, кыдз öтiк рытöн гöтрасис, сiйöн сiя и висьталiс:

— Вайöт кин тэныт колö... Ме — талун эм, ашын абу.

«Сiдз, мам, — думайтö зоныс. — Оланыс курыт, Давид. Зонка, зонка, мый жö тэ керин?! Кыдз тэнö вермисö сюртнявны Паладьыскöт и öтiк ойö эд...» — юрсö мöртiс öшынö, видзöтö öшын увтсис льöмпу да калина вылö, ружтiс-керис, малалiс кымöссö, бöра сьöкыта ловзисис, кыдз невеста, кöдö жöник сайö сетöны-вузалöны, и сiя оз тöд мый керны.

— Куртны бы колö, Давидушко, — шуö мамыс, — или котрасин бы да Поп видзыс вылiсь ытшкыштiн межасö...

Шы оз сет.

— Мый нö тэ?! Он кыв?!

— Некöр меным! Колхозас зородсö тэчны некинлö.

— Кытчö лоисö мужиккес?

— Мый тэ вежöртан, старуха?! Быдöнныс эд уджалöны машинаэзöн, только ме виланас гуддися.

— Эн мун, — мамыс öбидитчис. — Мыйöн мöссö тöвнас пондан вердны? Кытiсь йöвсö пондан сёйны? — Или чуннетö пондан нимавны?

Пишкö зоныс. Кöмасьö бы, но сапогсö оз адззы. Айыс горвыв дорись швыргис сапогсö, мамыс моз жö модьö:

— Ыджыт ни, а юрас сё тöв шутнялö. Вузалам мöссö к чёртовöй матере! И пондам овны: асьным гор вылын, коккез сёр вылын. Вот оланыс гажа лоас! Думайтi разь ме, что кöркö вöтас этатшöм часыс? Эх, калина-малина!..

— Эд модьö! — висьталiс зонныс. — Рытнас ытшка.

— Тöда, кыдз ытшкисян...

Давидыс эз ешты кöмасьны, осьта ыбöсыс одзын вуджöртчис бригадирыслöн кыз мыгöра иньыс. Зонкаыслö совсем ни недолыт лоис: «Вöрисьыс одза-одз вайöтö». Дзебсисис бы кытчöкö, но эз ешты: бригадирлöн иньыс керкуын ни, ышки-пойки сувтчис западня дынö, лэчыт да жаднöй синнэзнас чувйыштiс быд угöвсö и ласкова баитö, а сьöлöм вылас нач мöдiк:

— Давидушко, тэ дынö эд Ефим дядьыт вашöтiс...

«Дядь... Адззисьöм родня... — сiдз бы и висьталiс-лыйис лэчыт кылöн, но терпитiс, садьмис ни, юрыс дугдiс топ висьны, стыд лоис, что бутылка вылö тöн вузалiс ассис совестьсö. — Вот эд, зонка, кöть талун кымöсат лый, но он ни бергöт».

— Паладьсö мыля колин? — сярзьö кортöм гöсьыс. — Сiя миянын öтнас, горзö. Хи-хи, гöтрасит тi али только ойсö öтлаын джендöтiт?

— Мед гöтрасьö! — бригадирыс инь одзö комсяняс чеччöвтiс Давидлöн мамыс. — Мед сюртнялö бöб юрсö, мед...

— Тэ, сваття, эн видчы. Томмес коласö ныртö эн сюй, нiя асьныс тöдöны, мый керöны...

— Тöдас сэтшöм кынмöм бараныс! Кинöс бокас водтöтасö, сiя и инь.

— Мам... — сьöкыта ловзисис зоныс.

— Стыд жö тыдалö! Синнэзö он жö лысьт видзöтны. Юртöм жöни-и-ик.

Видö мамыс зонсö, сэтчö бригадирлöн иньыс содтö-кивзö:

— Давид, тöн Ефимыскöт мый баитiт?..

— Тöн ми Ефим дядьöкöт сизим мöс высьтiм и эшö öтiк-мöдiкö керим, а талун ме быдöс вунöтi, — сюр-сяр лöга висьталiс Давидыс, ачыс бöра юрсö мöртiс öшынö.

— Куртны бы колö, Давидушка. Кыдз нö сiдз? — обидитчис инькаыс.

— Вот сiдз! А мый нö! Метöг колхозас мый петас?! Ежели зэрмас, а зородсö тэчны некинлö... Öтiк кодя морт ни эз кольччы бригадаас, быдöнныс весь олiссез.

— А тэныт мый? — комсяняс ни кылiс мамыслöн голосыс. — Ась бригадирыс думайтö, кыдз колхозас керны турунсö!

— Мый колö, сiя и петас! — бригадирыс голосöн ни висьталiс Ефимлöн иньыс. — Мед сьöлöмыт колхозыс понда оз вись!

— Сваття, — пондiс осудитны бригадирлiсь иньсö Давидлöн мамыс. — Сваття, тэ, öнджа... Тэ, Матрёна, тöдан эд, кыдз кöркö колхозас уджалiм! Кыдз пондас кымöрыс кайны, мурзьыны, ми ракаэз моз лэбзям ни видзыс вылö и кутчисям куртны, кинлöн мый шогмö. И туруныс пыр шедлiс зелёнöй — золото! А öнi мый? Мыля жö томмеслöн колхознöй доброыс понда сьöлöммезныс эз пондö висьны?!

— Сваття, — сэтчö шуис Матрёнаыс, кыдз осудитiс пöрисьжыксö. — Öнi, сваття, отирыс грамотнöйöсь. Тöдöны кöда бок вылö водны, кöда бок вывсянь чеччыны. Унажык ас пондасиныс думайтöны. Öнi, сваття, деньга понда уджалöны, а ми тiянкöт трудодень шедтiм. А трудоденьыс вылö мый сетлiсö?

— Нянь! — чорыта висьталiс Давидлöн мамыс — Кöрмылича понда уджалiм, а öнi няньыс понда оз тöждiсьö. Кыз кынöммезным ой и лун пöтöсь.

— Сiя и эм, — Матрёна кутчисис коскыс бердö, кивнитiс. — Ой, сöтiс коскам! — ружтöв-керис да висьталiс: — Öтiк лун колхозас абу колöм уджавны! — Топ колхозыс сылö вöлöм медлёк враг, кöда курччалiс-пурис, нярьялiс и талис, кыдз врагöс да чапкис улица шöрö, и öнi, видзöт, Матрёнаыс некинлö оз ков, кöть талун жö черпезьды.

А Давидыслöн мамыс Матрёна вылö видзöтiс и думайтiс: «Тöдам ми тэнö, сваття, кыдз колхозас уджалiн! Быд местаö миян моз эн чепсась, асьтö эн вий, кыз яйтö эн öшты. Етшажык уджалiн, унажык суналiн. А öнi горзан!...»

— Сэк мый, Давидушко? — кеймисис ни зонкаыслö бригадирыслöн иньыс.

— Тэч павжун! — мамыслö горöтчис Давидыс, вежöрт, что сiя уджавны мунас колхозö.

Зонкаыс босьтiс павжун, вила да чер, петiс öтöрись посöдзö и ештiс только посöдзсиныс лэдзчыны, видзöтö — чотö-кивыльтö Лёнька — öтiк киыс дженытжык, мöдыс кузьжык. Лёнькаыс кодувья год-мöд бöртi шедлiс трактор увтö и ки лапасö орöтiсö больницаын, сы местö öнi зонкаыс новйö протез и видзöт эшö, кыдз вермö уджавны, что некин сы моз винасö кык кинас оз вермы юны. Лёнькалöн чочком юрсиыс — лён сöдз, сiдз и югьялö асывся шондi югöрыс весьтын, синнэс гöрдöсь, кыдз кроликлöн, сы сьöртi и тöд, что тöн бöра дзунгöм бутылка етш и талун юрыс висьö — не олан, а веськöтчыны деньгаыс абу.

— Здорово, племенник! — ыксö Лёнькаыс. — Кытчö виланат?

— Кытшöм ме тэныт племенник? — кыз голоснас юалiс Давидыс.

— Кытшöм? Да сэтшöм... Племеннича Паладьö вылö шуöны гöтрасьöмыт, ха-ха! Суськисян, поди? Ачым ни Паладьыс бокын раз-мöд шонтiсьлi. Юр эд потласьö, вонö!.. Котрась магазинас.

— Кöт унажык! — лöга висьталiс Давидыс и иньдöтчис видззезлань.

— Ох тэ, жмот! — бöрсяняс сьöласис Лёнькаыс, — рубсö жалейтан. Эн-на, аслат юрыт пондас висьны, ме тэныт три копейки ог сет.

Лöз небоын сьылiс ыбшар. Шондiыс асывсянь шонтiс-пöжалiс.

Давидыс и талун уджавны мунiс быдöнысся одзжык, гожумся кузь гажа лунö уджалiс пöт. Рытöдз мыдзис и мамыслö бöра эз вермы отсавны ытшкисьны. Айыс эз понды желлясьны, висьталiс: «Уджав. Сё ни мымдакö колхозас шедтан, а ми мамыткöт мымда вермам, гудыртам...».

Кин эз дышöтчы страда коста шедтiсис колхозас. Вöлi мый лыддьыны месяц конецас, но Давидыс деньгасö öнi босьтiс етша, а уджалiс — öтiк лун эз шоччись,

Лёнькаыс жö, кыдз пыр, сералiс, кöр ачыс уджалö — пыр тöв чужьялö, но некöр оз горзы, что сылöн деньгаыс абу:

— Котрась, Давид, магазинас... Тэ эд деньгасö уна босьтiн, кöр öнi бригадирыслö лоин родня.

Сьöвзис Давидыс. Сiя тöдiс, кыт Лёнялö пырö карманас деньгаыс и кыт петö. Но и ась... Ачыс эд виноватöй, что бригадирыслö кöсйисис турун керны и племянницаыс вылö гöтрасьны.

— Котрась жö правленнёас да норась предыслö! — модис мамыс.

— Уна колö, ветлы, мыччав басöк чужöмтö, а ме сiдз кыдзкö ола... Тшыгйöн ог кув, — висьталiс и виньдiс, кöть юрыс вылын йöкты — гордöй, а гордöйес вылын öння кадын кыдз вöв вылын уджалöны — назём кыскалöны.

Чулалiс жар да гажа июль месяцыс, а август луннэс дженытжыкöсь ни, ойес ыркытжыкöсь да пемытжыкöсь и асыввезнас луд вылын сыркьялö кыз лысва, кöдö вöр дорын межа вылiсь пыркöтöны тарлöн пияннэз — кокалöны воöм озъягöд. Важын ни деревняись он адззыв сьöдкайез, кöдна лэбалiсö видззез вылын и öшисö. Одзза моз ыб вылын сырса йылын öнi оз пукалö канюккез. Нiя öшисö жö, сёйисö кытшöмкö яд и кулiсö. Богатжыка пондiм ыббесö киськавны удобреннёöн, и беднöйжык лоис природаыс. Öнi ыббес вылö кайисö комбайннэз.

Пондöтчис мöдiк страда — сю дзимлялан кад, а Давидыс сё керö турун. Пондас вилаöн да литовкаöн ветлöтны кытчöдз оз усь лым — сэтöн тiянлö, старухаэз, не кöркöся моз, кöр Тылаын отирыс вöлi кöдзыв мымда и керисö турунсö — неделя киум-нёльöн гумлалiсö вердчансö, а öнi кин одзза моз видззес вылын уджалö?

Уджалö Давидыс гожумбыт. Мыдзö жö и лöгыс петö, кöр бригадирыс виноватöй, что зонкаыс уна уджалö, а етша деньгасö босьтö. Кыдзкö панталiс Ефим Селиверстовичсö Картабöр видз вылын да юалiс:

— Ефим дядь, мый ме видззес вылö узьны я мый я ветлöта?

— Мыля? — шыннялö бригадирыс.

— Унажык уджала, а босьта...

— Но тэ, зонка! Ме разь кöркö тэнö дойдлi? Тэ уж ме вылö эн горзы. Пырав правленнёас да юав бузгалтерыслiсь. Сiя эд тöдан миян кытшöм хитрöй руч!.. Ой и мухлюй! Ытшкисьны коскыс висьö, а ручканас пызаныс сайын сiдз гардас, что некытшöм прокурор оз вермы гарйыны...

— Пырала!

— Да... — кымöссö малыштiс бригадирыс, видзöтöв-керис Лёня пон вылö, кöда пыр öвтчö видзыс вылын, кошшö шыррезöс, кöр бур поннэсö öнi одзза моз дом вылiсь он лэдз — соседыт жö чапкас яд и янсöтчан нёль кока ёртыткöт, а кöда поныс нем вылö оз туй, олö. — Да-а-а, — сьöкыта ловзисис Ефим Селиверстовичыс.

— Мый «да», Ефим дядь?

— Дык, öнджа... Ето самое, тэ мыля Паладь племенничаöс сiдз позоритiн?! Бокас узин, а эн гöтрась. Стыд и срам.

Давидлöн рожабаннэзас чепöссис вир — гöрдöтiс зонкаыс, кыдз арнас пипу лист, но мыкталöмöн да ректасьöмöн шуис жö:

— Ме эд сы бокын только сiдз...

— Хо-хо, ха-ха! Али Шарикыс Паладь племенничаöкöт ойбыт окасис?! Ме эд эг узь и быдöс кылi!.. Тьфу тэ, прости господи!

Вот, зонка, вöлись кытöн тэныт синнэзат сьöлалöны! Стыд и срам, позор чочком светыс вылын. Только кольччис кувны или пышшыны гортiсь!.. А кыдз кулан? Может, этö... Джагöтчан? Ки оз лэб петлясö голяö кышавны. Кольччис Сибирьö мунны. Пон моз öшны Тылинса синнэз одзись, мед нiя кыввезнысö эз кеслö.

2

Давидыс чеччис гусьöн, мед мамыс эз кыв и айыс эз саймы.

Шондiыс эшö эз вöв, öтöрас пемыткодь. Кымрасьö. Ойнас зэрыштöм и луд вылын кыз лысва. Зонкаыс пондiс кöмасьны, сэтöн мамыс кровать вылын лэбтiс юрсö да повзьöмöн юалiс:

— Тэ кытчö талун сы одза? Быль я мый я гортiсь мунан?!

— Посёлокö колö бы ветлыны... — виноватöя висьталiс мамыслö. — Сэтчин вайöмась бур чери. Босьта черисö, а то сёйны нем, сё йöв да йöв и курыт лук турун...

— Айыт жö тöн ветлiс чериысла!

— Колö меным ветлыны!

— Эн бöбöт! Ме тöда кытчö мунан! Пышшан гортiсь... Мый ми тэныт умöльсö керим? Умöля быдтiм или пасьтöг видзим? — пондiс горзыны мамыс. — Тэ бы морт моз... Ми разь эг бы вежöртö?!

— Но, мам... — Давидыс курччöвтiс тырппесö. — Кувны эд ог лöсьöтчö... Война вылö я мый я?..

Öтнёж да мöднёж миритчисö. Давидыс пондылiс жö сёйны, но сёяныс эз кылав. Айыс эшö комись пызаныс вылö вайис бутылка да кисьтiс рюмкаэзö, чышкис синваэсö, висьталiс:

— Но, зон, может, сэсся ог адззисьлö... Быдтi эд ме тэнö...

— Ог ме... — зоныс чеччис пызан сайись, киас босьтiс сумка, жмитiс моросыс одзö айсö, сыбöрын мамсö, шуис жö: — Чожа ме... Видзöтча и тiянöс нуöта... Ог коль...

— Еныс чарöтас! — мамыс петiс посöдзöдз. — Зон, еныс чарöтас, ежели миянöс вунöтан.

Деревняыс эшö узис медчöскыт онöн, только петуххес китсасисö — летiсö горшшезнысö, топ повзисö кинiськö, и уннялiс гидйын Шарикыс, кöдö айыс пöдналöм сэтчин, медбы поныс эз вöтчы зоныс сьöрö. Уннялiс-горзiс поныс, нетшкис ловсö и сэтшöм лоис гажтöм янсöтчыны деревняыскöт, что горшас чепöссис курыт тшакыль, петiсö синваэз. Мунiс Картабöр видзыс кузя, кытöн быд турун чирыс тöдса — чöскыт дука, роднöй, и быдöс öнi кольччис-янсöтчис, а мамыс сё сулалiс йöрныс дынын, тыдалö, чышкис синваэсö, видзöтiс, кыдз зоныс шагнялö-мунö дынсис, кольö сiйö и, кин тöдö, адззисьласö я эшö, эд пöриссеслö кымöсаныс еныс абу гижöм, дыр я овны.

Давидыс перыта шагнялiс видз кузя, тэрмасис янсöтчыны деревняыскöт, медбöрьяись бергöтчыштiс, ылiсянь ни дыр видзöтiс мамыс вылö, кöда сё тыдалiс йöрныс дынын, зубыта ньылыштiс дульсö, чышкис синваэсö и кокнитжык шаггезöн ни иньдöтчис керöс кырыв сайö.

Эз казяв кыдз локтiс Гыркашор дынöдз. Посыс вылын тэрмасьтöнняс падмис, сунки-панки берездасис, дойдiс коксö, но эз понды малавны зубыт местасö, а кöзок увтö шупкис сумкасö, топ эта сумкаыс кыскис бöрлань, и öнi мый вылас, сiя и лоис сьöрас.

Сьöкыта мунiс гортiсь, сьöкыта... А кин сiйö вашöтö? Бергöтчы да ов, бригадирыс вылö сьöвзьы: век эд Ефим Селиверстовичыс бригадиравны оз понды, но Давидыс гордöй, ежели вöрзис туйö, бöрас етша ни видзöтас. Да и колхозыс талун-ашын эд... Разясö сэтшöм бригадиррес...

Давидыс подöн мунiс километра куим-нёль, сэтöн сiйö вöтiс посёлокись машина. Шофёрыс ачыс сувтöтiс машинасö, тшöктiс пуксьыны кабинаö.

Кабинаын мунiс час етш и локтiс посёлокö, кытöн зонкаыс öтiк машинаись чеччис, мöдiкö пуксис, и автобусöн рытланяс локтiс Кудымкарö, а сысянь Перемöдз автобуссэс тарöвтчöны ни быд часö.

Сьöлöмыс вылын сё эшö вöлi гудыра-кымöра, ачыс эз тöд мыйöн шогалiс, кыт висис, но Кудымкарас вокзалын пантасис сы кодь жö горттöм кöк зонка, кöда быдмöм Давидыслö пельпоныс ви, но визыв — кылыс пышшö дынсис, ошшасьö, что мунö Камчаткаö кыйны мореись чери. Кытiськö ёртыс небис куим бутылка сур. Сурсö юисö автобуссэз дынын тополлез увтын, ошшасисö невестаэзöн, кöднö колисö гортаныс.

Давидыс ошшасис Паладьöн, кöда бокын узис кодувья, висьтасис аслас удж йылiсь, сэтöн локтiс нылöн автобус, и рытнас зонкаыс пукалiс ни вагонын.

Давид мунiс Сибирьö, паськыт богатöй да гажа местаэзö, кытöн, думайтiс, сылö уджыс адззисяс кöть колхозын, кöть кытöн, вöлiсö бы только киэз да коккез. Пукалö зонкаыс вагонын, синнэс мыдзöны ни видзöтны отир вылö, кöда кытчö и мунö, мый и кошшö, топ быдöс Россияыс кöдзыввез моз мунö кытчöкö, семьяэзöн и öтнаныс, томмез и пöриссез, быдкодь мыгöраöсь и не öткодь чужöмаöсь, басöкöсь и коласаныс эмöсь нёштöмöсь, рамöсь и лёкöсь. Сэтöн дынас локтiс том морт и юалiс:

— Туйö бокат пуксьыны?

— Пожалуйста, — вештыштiс Давидыс, и сы дынö пуксис не ыджыт и не учöт лöсьыт мыгöра эшö том чужöма зонка. Пукалыштiс минута-мöд да юалiс кытчö мунö.

— Ачым ог тöд, — честнöя висьталiс Давидыс, гöрдöтыштiс, кöр эз бöбöтчы, а сэтöн бöбöтiс йöз мортöс, кöр думаэс кыскисö важ родня дынö, кöдна Тылаись Сибирьö мунöмась тридцатöй годдэзö.

— А-а, — кöдзыта дзарнитiс бокись мортыс и дыркодь кывзiсис, кыдз рельсаэс вылын стук-бряк катыльтчöны вагоннэз, öшын одзын вежсьöны местаэз, мыччисьöны и öшöны ыббез, керкуэз, вöроккез-рассэз, кытöнкö, кыдз киноын, адззыштан и öшас морт.

— Сiдз он и тöд кытчö мунан? — дыр мыйись мöдпöв юалiс Давидлiсь тöдтöм мортыс, поди, ачыс сы кодь жö, а поди, милиционер, кöда пасьтасьöм сы моз жö и нюкьясьö, кошшö весь олiссезöс, а вдруг сiя вор! Сiйö и думайтö, кыдз бы кармансис сöтны деньга или луншöрнас чöвтны вешьянсö. Мый оз и думайтсьы деревняись мортлö, кöр сiя йöзын вöвлi етша, а сэтöн кин кытiсь и эм, мый кинлö и колö.

Öнi Давидкöт баитiс йöз морт, веськыта сёрнитiс, юасис — быдöс бы тэнчит тöдiс, а кин сiя ачыс — зонкаыс оз тöд.

«Повны — не овны!» — аслыс висьталiс Давидыс, пöв синнас гусьöн видзöтышавлiс тöдтöм мортыслань. Сiя топ оз ни полöт, бандит вылö оз ни вачкись, сэтшöм жö морт, кытшöм и тэ.

Катыльтчö одзлань поезд, кыскö отирсö Сибирьö. Сибирьыс паськыт, не öтiк неделя этадз тырмас ысласьны.

Давидлiсь ёртыс юасьö:

— Кытöн уджалiн? Мый керин?

— Колхозын уджалi, — висьталö Давидыс.

— Мый колхозаныт? Умöль я мый я оланыс? Мыля гортiсь пышшин? Или быдöнныс ни деревнясис пышшöны?

Пантасян туйын сэтшöм мортыскöт, лякасяс тэ бердö сир моз и мездöтчыны он вермы: öтiк сылö колö, мöдiкö сет, куимöтö тöдö бы... Иньдыны бы тэнö, ёрт, аслат туй кузя, но Давидыс не пон кодь, сiя деревняын эз велав быдöнныскöт пурсьыны и веськыта висьталiс, что пышшö бригадирныс понда, кöда, видзöт, зонкаыс вылö пондiс кайны бöрöн: нарядсö гижас не сiдз, сьöкытжык уджö иньдас. Етша эта, эшö водтöтiс узьны племянницаыс бокö.

— Кыдз водтöтiс?! — эз вежöрт ёртыс, и вагонын отирыс пондiсö видзöтны интересöн, топ быд юалiс: «А но висьтась, зонка, кыдз тiян деревняын нывкаэскöт узьлöны!..»

— А вот водтöтiс... — шуис Давидыс. — Рытнас кыкöн бригадирыскöт юим вина, мыся этö... Юктала Ефим Селиверстовичсö, поди, öнджа, пондас наряддэсö честнöя гижны, а сiя менö кодувьям гöтралöм бы племянницаыскöт.

— И узин?! — сералö ёртыс.

— Кытчö воштiся... — Вот эта жöник! — сералö ёртыс, синваэс петöны, топ чувйöны боккесö. Кыдз сiдз кужöмыт гöтрасьны? А одзлань? Öтлаын я иньыткöт олiн?

— Кытшöм инькöт? — обидитчö зонкаыс. — Кодувьям эг кыв кыдз чулалiс ойыс. Эмöсь сэтшöм иннес быд угöлын, кöр нiя куимись годнас жöниккес сайö ветлöны, — думайтiс-керис — Бригадирыс увья быдöс... И гортiсь сы понда жö муна...

— Тэ только, ёрт, эн бöбöт! Думайт мый баитан! — дугдiс серавны Давидлöн ёртыс да чорытжыка ни юасьö. — Кин тiян бригадирныт? Поди, шабашник? Или ачыт сэтшöм... Сöтан-вартан, талун татöн, а ашын мöдöрын, кошшисян, кытöн кокнитжык?

— Кин?! Ме! — лöгасис Давидыс. — Да ме колхозаным чужи, быдми и уджалi...

— Сэк мый нö?

— Мый? — öшис Давидыс... — Ме мыйöн тöда? — недолыт лоис, что сiйö оз вежöртö, кöр веськыта висьталiс ни, что юö Ефим Селиверстовичыс, а кин юö...

— Да-а-а... Абу сэк сэтшöмыс бригадир.

— Сiя сэтшöм и эм! Сувтöт бутылка — быдöс керас! — норасис Давидыс. — Мöдiк бригадиррес, шуöны, наряддэсö сетöны öтiк местаын, а миян бригадирлöн горшыс косьмö, сiйöн асыввезнас котрасьö керку дынсянь керку дынö, асывсянь горшас кисьтö, кинлiсь рюмка, кинлiсь кыкö.

— А тэ эн юктав калабродасö!

— Кыдз он юктав?! Кытчö воштiсян? Орддян, оз эд вунöт. Пантасьны колö, кöр пондас ковны вöв или трактор, сэк Ефим дядьыс пондас ружтыны, кивзыны, норасьны, что вöввесö колхозсис вузалiсö цыганнэзлö, а тракторсö тöн Лёняыс жугдöм...

— Кывзы жö... — кинкö грамотнöй адззисьö вагонас. — Öнi эд вöввесö оз ни лэдзö цыганнэслö вузавны!

— Сэтшöм бригадирсö колö на шило да на мыло! — мöдiк висьталö ассис.

— Во! Сэтшöммес деревняэсö и разисö. Ны понда отирыс колхоззэзсис и пышшис.

— Вежисö совестьнысö бутылка вылö! — ыксö ни чож старичок.

— Петух! Эн чеччав! — старикыс вылö ыксö старухаыс. — Тэнчит öнi оз ни юасьö, кинлö мый керны.

— Кыдз оз юасьö? Да кыдз эшö юасясö! — тошоксö нетшкöвтiс старичокыс. — Лэдз менö, Юлечка! Некытчö тэкöт ог мун, а понда овны деревняын. Тöдан эд кин колхозсö керис! Кин керис колхозсö? Ме колхозсö кери, ме! — синваэс петöны пöрись мортыслöн. — Керим, керим колхозсö, а кытшöмкö бригадиррез разьöны. Муна бöр деревняö и точка!

— Пукав, петух! — том чужöма иньыс зэгнитiс ассис пöрись жöниксö, и старикыс лöнис, только синнэзас тöдчö: «Видзöт эд, мый керсьö! Пондыв этатшöм враггескöт овны! Нiя тэнö чожа бритасö!»

Вагонын отирыс лöнис. Давидлö ёртыс дыр мыйись горöтчис:

— Весь тэ бригадирсиныт повзин. Сы понда колин пöриссесö... Мый нiя пондасö керны öтнаныс? Кыдз пондасö овны?

Мый сэтöн керны, кöр поездыс тэнö кыскö одзлань? Кöр ылын ни гортыт и бöр он бергöтчы, а бергöтчан, бöра медодз Лёняыс пондас вузавны пиннесö: «Но кыдз, Давид? Мыля бöр гортö? Повзин? Эх, тэ... А эшö шуан ме...» Думаэсö дзугö ёртыс, юалö:

— Мый лоас, ежели панталан сэтшöм жö бригадир? Или кувтöдз пондан пышшавны, кошшыны аслыт бур места да кодя бригадирöс? Бöбöтан, зонка, кöть кытöн колö уджавны. Вот ме бы эшö деревняын олыштi!

— Деревняын гажа! — висьталiс Давидыс, син одзас Тылаыс, топ пукалö не вагонын, а трактор тележкаын и асывнас мунö фермаö.

— Вöлi бы менам тэ кодь оланыс... Ме бы тэкöт эстöн эг и пукав, а гöри бы да вундi...

Давидыс лöсьöтчис ёртыслiсь юавны, кытöн чужис и быдмис, мыля сiдз баитö, но сiйö кинкö кыдз падтiс, осудитiс, что уна бы тöдö. Сiя эшö бура эз и верит Алексейыслö, а вдруг... Ёртыс кывнас гортiсь Лёня моз жö уна керö, а киэс уджсис полöны.

— Эг куж деревняын овны, — кыдз дорйис ни асьсö Алексейыс. — А чужи эд тэ моз жö вöр коласын. Айöс ог и тöд — одз кулiс, и мамö сьöрись кольччи этатшöм (мыччалiс метра сувдöн). — Быдтiс тёткаö. Тöдвылам усьö эшö кытшöмкö йöз ай... Поди, тёткаöлöн мужикыс или мамöлöн виль жöник, ог ни тöд... — Сибдiс кодь Алексейыслöн голосыс. Кызöтыштiс, ружтыштiс да содтiс. — Велöтчи гортiсь школаын, сэсся пондi уджавны. Гöтраси. Иньöс босьтi посёлокись. Басöк да чож шедiс, но сылö деревняын оланыс эз гленитчы. А мыля? Тэ моз жö... Видзöт, колö фермаын уджавны, а сэтчин нять, кöр и вердчаныс мöссэслö оз тырмы. Вот Валяыс и шуö: «Лок татiсь мунам!» — Инькаэскöт, зонка, он спорит, нiя сiдз и этадз вермасö тэнö. Гöтрасян и пондан тöдны...

— Бöра эд шедас Паладьыс кодь... — асьсö сералö ни Давидыс.

— Не быдöнныс жö сэтшöмöсь. Видзöт кытшöмöсь ветлöтöны! — ёртыс висьталiс нывкаэс йылiсь, кöдна син одзын пукалöны вагонын, цветитöны, сiдз топ и вöзйисьöны жöник сайö. Шынньöвтiс Давидыс.

Одзлань тарöвтчö рельсаэз кузя поездыс, кыскö отирсö. Асывнас вöлiн Уралын, а рытнас Сибирьын ни, ештiн луннас ёртыткöт баитны пöт, сёйны öтiк пызан сайын, юны öтiк кружкаись.

— Но мый тэ кужан керны? — медбöрын Давидлiсь юасьö ёртыс. — Черöн уджавны, зороддэз тэчны, а поди, и бензопилаöн пилитчыны?

— Мый тшöктас бригадирыс, сiйö и кера! — ошшасьö мöдыс. — И бензопиланас уджалi, а мый сэтшöмыс?

— Мунам мекöт! — вдруг висьталiс Алексейыс, пондiс ошкыны ассис вöркералан посёлоксö, кöда эшö виль, быдöс керкуэс, кыдз чачаэз басöкöсь да вильöсь, и отирыс вöрас деньгасö унаöн шедтöны.

Посёлокын Давид вöвлi и тöдö, кыдз сэтчин овсьö, кыдз уджассьö.

— Мунам! — висьталö ни Алексейыс. — Нем тэныт кошшыны роднятö и буржык местаэз. Ме ачым абу я бригадир. Думайта, что не тiян Ефим Селиверстовичыт кодь. — Пондiс висьтасьны, что нылöн бригадаыс вöрын уджалö подрядöн, дисциплинаыс видзсьö, но... Шедöны эшö отирыс, кöдна кузь руббез кошшöны, да кокнит удж: талун уджалас, ашын пышшö... Сэтшöммескöт только стыдитан асьтö. — Мунам, — медбöрын ёртыслö висьталiс Давидыс.

3

Вöркеран посёлокö локтiсö сёр рытöн. Отирыс узис ни. Улицаын öтi-öтi сотчисö биэз. Алексейыс Давидкöт мунiсö улицаöт и баитiсö негорöн, топ полiсö саймöтны отирсö, но поннэс кылiсö йöз мортлiсь кок шысö и пондiсö вувтны.

Эз бöбöтчы Алексейыс: посёлокыс и сёр рытнас гажöтiс аслас виль керкуэзöн, пемытiнас тыдалiсö виль тёсiсь дорöм крышаэз, йöррез бердö басöка тэчöм пессэз. Горт посёлоккезын пессö тэчасö да тэчасö — оз туй мунны... А татöн би югöр весьтын öшын увттэзын тыдалiсö, кыдз чышкöм ёг, только эз тырмö палисадниккезын пуэз, кöдна бы, натьтö, öддьöнжык гажöтiсö посёлоксö.

— Садитам эшö пуэсö, — висьталiс Алексейыс. — Адззылан, кытшöмöсь нiя быдмасö!

Пуэсö садитны недыр, только дыркодь нiя пондасö быдмыны, но и ась: Давидыс адззылас и нiйö, ежели татöн пондас уджавны. Зонкаыс лöсьöтчис ни быдтыны кытшöмкö керку öшын увтын, кыдз гортын жö, рябина, льöмпу да жоягöд ¹.

Мунiсö улицаöт, пемытiнас вуджисö пöввезiсь керöм посок кузя.

— Водопровод керöны! — ошшасис Алексейыс. — Пондöтiсö да Петровичыс мыйкö кыскö, оз тэрмась, а то сiдз бы керкуэзаным ва ни вöлi...

— Кин Петровичыс? — юалiс Давидыс, топ тöдiс ни татiсь отирсö.

— А... Тiян бригадир кодь жö... — шаг-мöд шагньöвтiс и асьсö веськöтiс. — Уджалö Петровичыс, но эна гöппез дорын мыйкö дырöв ни нырьясьö. Норасьö, что трубаэз оз тырмö, кöр трубаэсö важын ни колiс вайны, а сiя кыскö. — Сэсся содтiс гажöнжык ни: — Кöть мый, но чожа ми пондам ошшасьны асланым водопроводöн. Вот сiдз, зонка, не тiян деревняын моз!

«Не миян деревняын моз... — думаэзнас обидитчис Давидыс. — Мый миян деревняыс? Гажтöмжык я мый я? — пемытiнас падмис, сунки-банки котöртыштiс и люкасис Алексейез посöдзö.

— Эстöн и ола, — висьталiс ёртыс. Алексейезлöн узисö ни, но ыбöсыс вöлi осьта: тангы и пыр да кöть быдöс нöбöт. Кöркö деревняын вöлi этадз жö, но отирыслöн вежсисö мывкыддэзныс и öнi, кытчö мунöны, ыбöсас колö кышавны нинкöм ыжда замок. «Цивилизация!» — ас кежас шынньöвтiс Давидыс да бурундук вылын пондiс чышкыны ботинкаэсö.

Хозяиныслö паныт чеччöвтiс кузь гöна пон, пондiс рада кивзыны да ниртчыны Алексейыс коккез бердын.

— Вешшы, Бим! — хозяиныс малыштiс понсö и пырис пытшкись посöдзö, посöдзсянь керкуö. Кöр öзйис би, Давидыс повзьыштiс: «Кытшöм керкуыс гажа! Кин жö Алексейыслöн иньыс? Натьтö, учительница или врач? Мый вылö ме татчö колхозникыс и пыри?» — Кынмис порогыс дорын, а хозяиныс чöвтчис ни, паськöмсö öшöтiс порог увтiсь тув вылö, ачыс баитiс: «Тэ мый, зонка? Чöвтчы!»

«Повны — не овны», — аслыс висьталiс Давидыс, мышкыртчис и медодз пондiс коккезсис пöрччавны ботинкаэсö. Комсянь быркнитiс-петiс хозяйкаыс, ласковöя юалiс:

— Локтiт ни?

— Локтiм, а мый? — иньыслiсь юалiс Алексейыс.

— Ми эшö луннас видзчисим... — иньыс жмитчыштiс мужикыс бердö. Алексейыс весь эз ошшась иньнас, кöр сiя, тыдалö, кужö уджавны и мужиксö пантавны.

Давидыс полöмöнмоз чöвтчис, öшöтiс тув вылö паськöмсö и лякасис порог дорись стул вылö, ачыс сё пöв синнас видзöтiс йöзлiсь олансö, завидуйтiс ёртыс счастьелö, кöдö эз туй немöн небны, не гусявны.

«Да, колхозник (асьсö думаэзнас вдруг пондiс шуны колхозникöн, топ сiя мыйöнкö умöльжык быдöнся) олöны жö отирыс, а ми мый? Топ гортын отир моз жö быдöс эм, и нянь и яй, тырмö ягöд и тшак, но пöрись ни, зонка, мамыт, мыдзö ни гуддисьны быд местаын».

Гажтöм думаэзöн пуксис пызан сайö.

Сёйисö да юисö рюмкаöн вина. Комись жырын кивзыштiс зоночка. Сылö ласковöя висьталiс инь голос: «Узь, кага, узь, бокат локтас сюзь».

— Узьöны? — гажöн юалiс иньыслiсь Алексейыс.

— Узьöны, — висьталiс иньыс.

Сёйисö. Баитöв-керисö и водiсö узьны. Давидсö водтöтiсö диван вылö.

Сiя дыр эз онмöссьы. Висис юрыс, боккес. Онсö сорис чулалöм лун да хозяин гозъялöн басни, кöдна негорöн баитiсö мöд жырас, тöдчис, что гажтöмтчöмась и сёрнитöны, пöтны оз вермö.

Давидыс ачыс эз казяв, кыдз куньсисö синнэс. Вöтасис айсö. Сiя топ лöгасьöм и видö зонсö, мыля

пышшис гортiсь, кытöнкö öвтчö тшыгйöн, кöр гортын некинлö отсасьны. Саймис эта онсянь, пемытiнас адззис стенаись басöк ковёр, кöда и ойнас сотчис-öгралiс мича югöрöн. «Не гортын эд! — повзьöтiс дума. Тöдiс, что тэрмасьны некытчö, бригадирыс дынö оз ков котöртны, бур эд, кöть мымда быглясь, некин оз вöрöт! Но мымда бы синнэсö куньöмöн эз видз, сэсся онмöссьыны эз вермы.

Алексейлöн иньыс чушки-пашки бергалiс ни гор гöгöр. Горыс гажöн тачкöтiс-лонтiсис. Биыслöн югöрыс йöктiс стена вылын.

Давидыс куйлiс диваныс вылын и видзöтiс гладь потолокö, бöра думайтiс гортыс йылiсь, медодз жалейтiс мамсö, кöда, натьтö, чеччис жö ни, лонтiс гор, видiс каньсö, петухсö, касьтылiс зонсö...

Гортын бы чеччис да медодз вартлiс литовка, сыбöрын тэчис павжун, мамыслö отсалiс вердны курöггез, кырымнас воробейезлö чапкис шыдöс, юкталiс мöснысö и сэсся керны бы лоис нем. Видзöтан: асылыс бы чулалiс и пондiс бы ковны мунны уджавны и бöра бы медодз петiс ытшкисьны, нерис соседсö. Лёняыс бы рака моз мыччис чомсяняныс юрсö и пондiс бöрсяняс лёбны: «Шуруй, Давид, шуруй... Талун бригадирыс гижис ни сто руб. Ихо-хо, ах-ха, чожжес вылын вöр кыскалöны...»

Нималö сьöлöмсö обида, что бригадирыскöт эз лöсяв, эз куж гортын овны, туйис, талун жö бы лэбзис деревняö, но кытчö? Быдöн эд серöмтчас, что спинаыс эз ешты саясьны, а кымöсыс мыччисьö ни.

— Лок гортö, — кыдз баитö ни бригадирыс. — Ог ни племенничаö вылö гöтрав, кузь руббез пондан шедтыны. А мый пондан вот уна деньганас керны? Вина он ю, челядь он быдты...

«Разь деньгасö сы понда керöны, медбы вина юны? — думайтö Давидыс. — Кужа видзны быд копейкасö, кöмася-пасьтася и пета клубö, ась видзöтöны. Нывкаэс синнэзнысö барöтасö да ас коласаныс шу-шу... «Эта я мый я Давидыс?!» — «Эта! А мый нö, сiя!..» — и асьныс голя бердö öшöтчасö: öт бокас сьöд юрсиа, мöдас — чочком, кыдз ельдöг. Гöтрася — чож да медбасöк вылö, сэк бригадирыс оз ни понды видны.

Думаэзнас олiс медбура, сiдз, мед отирыс ошкисö бы. А кытчöдз олас татöн, видзöтчас, уджалыштас и — гортö! Или вайöтас пöриссесö.

Асылыс эз тэрмась. Югдiс дыша, не ни сiдз, кыдз югдö июль месяцö.

Улицаöт мунiс машина. Комись осьта öшынöт керкуö пырис бензин дук. Öтöрын чирзiсö воробейез.

Давид лöсьöтчис ни чеччыны, но сэтöн гор бокын вуджöртчис ныв морт, топыт да лöсьыт мыгöра, вершок мöдöн ыджытжык хозяйкаысся, отажык пельпона, сьöд юрсиа и сьöд синкыма. Нывкаыс, тыдалö, узьöм жö татöн, только мöд жырас и öнi кытчöкö тэрмасис.

«Натьтö, родня, — думайтö Давидыс. — Поди, сiя тöн и стряпайтiс пельняннесö, а тэ кот моз лаксин пызаныс сайын и нем он тöд...»

Нывкаыс петiс керкусис, а Алексейыс горыс сайсянь юалiс: «Мунiс ни?»

— Мунiс, — висьталiс иньыс. — Тэрмасьö. Пыр кытчöкö тэрмасьö. Ме кодь жö бöб сьöлöма. Кытшöм сылöн удж и ендö, кин сiйö эта одза и видзчисьö вöрас?

— Тi эд кыкнанныт öтiк вужись... — серöмтчис Алексейыс.

Хозяиныс саймöтiс и чеччöтiс Давидсö, висьталiс, что колö сёйны и мунны уджавны.

Пызаныс сайын ни зонкаыс юалiс:

— Кин сэтшöмыс асывнас тiянын вöлi?

— Нывкаыс? — серöмтчис Алексейыс. — Гленитчис? — Сэтöн жö пондiс ошкыны да вöзйыны. — Басöк эд невестаыс! Гöтрась. Уна ог кор. Ящик вина — и тэнат.

— Купец, — иньыс сералö мужикыс вылын. — Кыдз эшö тэнö кывзасö?! И кынымöдз жöник сайö ни тэ сiйö вöзъян? Кытчöдз ачыс жöниксö оз адззы, нем тэныт нывкаыс вылын серавны.

— Вежöртi! — шуис Алексейыс.

Сёйисö и пемыт сорöн петiсö керкусис да зэв-зэв пельпоннэзнаныс мунiсö улицаöт, мунiсö да баитiсö удж йылiсь.

Алексейлöн иньыс ошшасис, кыным кубометра сiя тöн примитiс вöр, висьталiс, кыдз сiйö пондылiс бöбöтны шофёр: етша вайис машинанас вöрсö, а тшöктiс бы гижны унажык.

— Синнэзас мыля эн сьöлав?! — лöгасис Алексейыс. — Ме бы тэ местын сьöлалi! А тэ бы, Давид?

— Ме бы... — öшис перво зонкаыс, но чожа смевмис, кöр ёрттэс сы кодьöсь жö, сэтшöм жö уджалiсь отир, нiя жö думаэзöн, басниöн, заботаэзöн, только гортын турун да пода йылiсь, а татöн — вöр...

— Ме бы судитi аслам судöн! — висьталiс ёртыслö Давидыс.

— Мый тi талун сэтшöм гажаöсь? — кинкö юалiс томмеслiсь. — Гажа асылыс, сiйöн и гажаöсь, — висьталiс Алексейыс, а Давидыс видзöтiс посёлоксö, кöда пукалiс ю берегын, кысянь тыдалiсö омöн вöррез. Юыс визывтiс зэв, нельки кылiс, кыдз плескайтчисö ваввез, уйис катер, да ва вевдöрын лэбалiсö чочком чайкаэз, кöдна гортын абу, абу и этатшöм баддес, кузь уввезöн и мöдкодь югьялан листöн. Посёлокын улицаэс паськытöсь да веськытöсь, керкуэс вильöсь, öткодьöсь, кыдз чачаэз, быд öшын увтын палисадник ограда, кок увтын кöс песок, юр вевдöрын лöз небо. Кыдз деревняын жö одз асывнас вöрö вашöтöны мöссэз, кинлöнкö виксö порсь, китсасьö петух, котрасьöны поннэз, — но машинаэс мöдкодьжыкöсь: вöр керан да кыскалан машинаэз, тракторрез, и отирыс уджавны мунöны мöдкодь паськöмöн.

Давидыс ёртыскöт мунöны медодз контораö, медбы гижны заявленнё, удж вылö примитöм йылiсь.

Давидыс мунiс и волнуйтчис, мыйиськö полiс, пурисö аскоддя думаэз: вдруг сiйö уджавны оз примитö. Сэк мый керны? Кытчö воштiсьны? Бöра эд пондас ковны кытчöкö тарöвтчыны, кöр велалiс ни Алексейыс дынö, топ мортыскöт олiс ассис джын олансö.

Алексейкöт здоровайтчисö мужиккез да инькаэз, здоровайтчисö тöдтöм отир и Давидкöт, видзöтыштасö, топ юаласö: «Кин тэ сэтшöмыс? Абу я бöра кытшöмкö шатласись морт, кöда талун татöн, ашын мöдöрын ни?» «Ме не сэтшöм» — думайтö зонкаыс.

Валяыс кольччис берег дорö, кытöн штабеллезын куйлiс вöр, а мöддэс локтiсö контора дынö. Сэтöн сулалiсö морт-мöд. Öтiкыс кымöра чужöмöн, гудыра синнэзöн — асылыс вылö не рад, тöдчö, что шогалö.

— Митька, бöра эд, тыдалö, юрыт висьö! — Алексейыс пондiс серавны зонкаыс вылын.

— Шогала... — ружтыштiс Митькаыс. — Калера кутчисис... Врачыслiсь справка бы колö корны да ог лысьт, бöра пондас шуны унаöв пö юöмыт.

— Аллилчеп сылö колö! — серöмтчис пöрисьжыкыс. — Или скипидар.

Сералiсö том мортсö, что сiя тöн юöм, а талун юрыс висьö.

Баитiсö лекарствоэз да больница йылiсь, кöдö лэбтöмась вильö жö, но бöб юрöн сувтöтöмась посёлок дынсис бокö, нюр дорас, кытчö сьöкыт лоас нюжöтны водопровод. Мымда весись колас чапкыны деньгасö!

— Городас не сэтшöм водопроводдэз нюжлалöны да оз горзö! — висьталiс томжыкыс.

— Миянлiсь тэкöт, ёрт, оз юасьö, — висьталiс мöдiк.

— Сiйöн бöрын и олам эд! — висьталiс куимöтыс.

Быдöнныс грамотнöйöсь, быдöнныс тöдöны, но кинкö абу тöдöм и абу кужöм, и абу юасьöм, а керöм кыдз сылö колöм, государстволiсь деньга торкöм, кöда понда юрыс оз вись, а уджалiсь отирлö деньгаыс жаль, только вот нылiсь оз юалö и оз кывзö.

— Мый бöра, петуххез, öтамöдныткöт кокасят? — локтiс участокись начальник, здоровайтчис и медодз пондiс видзöтны Давидыс вылö. Видзöтiс-керис, öмас заргис папироса и юалiс кин да кытiсь эта мортыс? Мый татöн керö? — Шпиён! — вак-вак серöмтчис старичок, кöда сулалiс бокын моз, кывзiсис да хитрöя видзöтiс томмес вылö, сё лöсьöтчис мыйкö висьтавны и öнi висьталiс. — Шпиён, товариш начальник! Чожажык юöртны колö участковöйлö, ась нуöтö кытчö колö.

— Дед, тэнчит эд оз юасьö!

— А?! — дедыс пель саяс паськöтiс долоньсö.

— Уджавны локтiс, — висьталiс ни Алексейыс. — Приказ колö гижны. Аслам бригадаö босьта.

— Приказсö ме чожа гижа, но видзöт...

— Видзöта, видзöта... — кыдз нерис Алексейыс начальниксö, кöр сылö оз бы веритö.

Час эз чулав, кыдз Давидыс колхозникись пöрис вöркерисьö.

Сэкжö пуксисö брезентöн вевттьöм машинаö и вöрзисö туйö.

Давидыс шедiс тöдтöм отир коласö, кöднакöт колiс уджавны не öтiк лун. Сiя рад вöлi, что весь оз понды овны, топ мунiс аслас колхозö жö пöрöтны вöр, кöдаись тшупасö виль ферма или керку.

Машинаыс гладь туйöт чожа тарöвтчис посёлокись, но делянкаэзöдз локны чулалiс джын лун. Вöрыс етша вачкисис гортiсь вöррез вылö. Татöн унажык яггез да нюррез, унажык быдмис пожум, унажык туй бокын сулалiсö кудриа сыспуэз.

Давидыс видзöтiс машина вывсянь вöр вылö, и сiйö нерис жаднöй дума: «Тшупны бы эна пожуммезiсь виль ферма...»

— Кытöн тэ сэтшöм жаднöйыс чужин? — видзчисьтöг Давидлiсь юалiс чочком юрсиа зонка, кöда пукалiс бокас зэв, куритiс да быдöнкöт ештiс ни эрзыны-видчыны.

— Мыля ме жаднöй? — öшис Давидыс.

— Синнэт сьöртi адзза.

— Коля! — чорыта орöтiс Алексей.

— Быдöс, бригадир! — шапканас вевттис öмсö Коляыс и пиньöвтiс рожасö: вежöрт, что некин сылiсь öмсö оз тупкав и некинiсь оз пов.

Кузовын коккезныс увтын жольöтчис-быглясис важ нюмрасьöм да сiмöм ведра, жексiс Коляыс моз жö, но мöддэс — Давидлöн виль ёрттэс — кытчöдз, шы эз сетö, быдöнныс думайтiсö ассиныс думаэз. Сизим морт, бригада, машинаöн кайис вöрö, медбы дас лун уджавны сэтчин, а сыбöрын локны гортö и шоччисьны. Кин колассиныс, натьтö, гажтöмтчис семьятöг, кин, поди, думайтiс кертöм удж йылiсь, поди, и сiйöн эз баитö, что эз тöдö Давидсö, видзöтчисö кытшöм сiя, мый сыись петас.

Катыльтчисö-мунiсö, машинаыс видзчисьтöг перыта бергöтчис да сувтiс. Сiя жö Коляыс ыкöстiс: «Локтiм!» — и медодз чеччöвтiс кузовись. Машина вывсянь пуксисö трактор доддьö, и эшö час етш тракторыс мырсис-кыскис кытчöкö одзлань, гусеницаэзнас лойис нять да чашья и вайöтiс учöтик керкуок дынö.

— Локтiм! — бöра ыкöстiс Коляыс и веськыта нять гöпö чеччöвтiс трактор доддись, нятьöсьтiс вешьянсö, фуфайкасö, нятьыс резсис чужöмас — не син, не бан.

Сералiсö ёртнысö, дзар керисö öтамöдныс вылö — сэтшöм жö нятьöсьöсь. Кинкö горöтчис: «Хозяйкаыс талун öтöрын узьтöтас...»

— Ме сiйö асьсö пос увтын узьтöта! — сьöласис Коляыс.

«Кытшöм хозяйка»? — эз вежöрт Давидыс, лöсьöтчис юавны Алексейыслiсь, но сiя ёртсö топ эз и адззы, тэрмöтiс: «Вöрöтчö! Гöжит я мый я?» — да медодзын иньдöтчис керкулань, кöда сулалiс гриваок вылын, кöс местаын, а сы бокöт визывтiс-больгис шорок. Зэв коккезныс дынiсь быркнитiс сьöла.

— Лыйö! — серöмтчис Коляыс и шлуп-шлап нятьöсь сапоггезнас кайис посöдз бердiсь бурундук вылö.

— Мыйöн лыя? — кижгыштiс цыган чужöма Багратыс и виньдiс: керкусис мужиккеслö паныт чеччöвтiс нывка да чиння голосöн ыкöстiс:

— Коля, кытчö нятьöсь коккезнат каян?! Кытчö каян? Тэ не гортат, жöник! Тэ менам талун пос увтас узян или сапоггетö миссьöтан!

— Катюша, тэ мыля талун сэтшöм лёк? — рам голосöн нывкаыс одзын вежсис Коляыс, кöда неважын ошшасис, что кинкö пондас узьны посыс увтын. — Вай жö, Катюша, ме тэнö окышта, а то гажтöмтчи.

— Ме тэнö окала, ме тэнö!.. — синнэс вирдалiсö нывкаыслöн, кöдö талун Давидыс адззылiс ни Алексейез ордiсь и кöда... «Кыдз сiя татчö шедiс?! — сотiс дума. — Али ме вöтöн адззылi?»

— Кыдз локтiн? — сэтöн нывкаыслiсь юалiс Алексейыс.

— Бура, — шынньöвтiс мöдыс, ачыс ни юалiс:

— Кытöн сiдз нятяс купайтчöмась? Ме талун кроваттес вылiсь вежи паськöмсö и джоджсö миськалi.

— Эн тöждiсь, Катюша. Ми нятьöсь порссез моз ог пырö.

— А ме пыра! — нывкаыс одзö чеччöвтiс Коляыс.

— Ме тэнö пырта! Ме тэнö велöта, кыдз колö отирыскöт овны!

— Кöр тэнат лоа, сэк и велöтан, а öнi — матын да ылын.

— Коля, уджавны колö! — висьталiс бригадирныс.

Перыта иньдöтчисö вöрö делянкаэзö. Мунiсö шондi паныт. Давидыс вöтчис Алексейыс сьöрö, шагнялiс кузя, но быд шагын колiс содтыны нылiсь кузясö. Мунöв-керисö ни, кöр бöрсяняныс ыкöстiс нывкаыс:

— Алексей, сёйыштiт бы!

— Некöр, Катюша.

— Сё тэныт некöр... Сэк кеписсесö босьтiн бы, натьтö, мöддэс бырисö ни. — Баитiс, кыдз вонкöт, и Давидлiсь сьöлöмсö пидзыртыштiс обида, что сiйö оз адззö, а ёртсö быд шагын Алексей да Алексей.

— Некöр, Катюша, — эшö öтпыр висьталiс Алексейыс и пондiс мунны эшö чожажык. Мунöв-керис Давидыс и ачыс эз казяв, кыдз юалiс:

— Кин сiя?

— Гленитчис? — сувтыштiс да серöмтчис Алексейыс.

— Гы...

Шы эз ло. Мунiсö да ружтiсö, локтiсö делянкаö.

— Мыля мöддэс кольччисö? — юалiс Давидыс.

— Мед вöрöтчöны! — лöгöн висьталiс Алексейыс. — Ме öтнам пöрöта, а нiя то суййыны оз ештö, то тракторыс жугалö. — Тойез моз уджалöны... А ми тэкöт! — синнэс югйöвтiсö гажöн.

— Мекöт дак мекöт, — Давидыс кутчисис кузь зор бердö.

Алексейыс киын пилаыс горалiс, кыдз ловья. Ёртыс уджалiс кокнита, орсiс, а эз уджав, эз ружты, эз пымав медодзза пуыс дынын, пиланас ветлöтiс пожум дынсянь пожум дынö и пилитiс, но не быд пусö, а орддис сыспуэз, кöдна пантасисö öтi-öтi.

— Этö мыля колин?! — ыксiс Давидыс да мыччалiс кыз сыспу вылö.

— Тэ мый? — минута кежö сувтöтiс пиласö ёртыс да видзöтiс, кыдз кинöскö адззö сэтшöмö, кöдакöт нем бы керны. — Тэ мый? Уна колö?

Давидыс виноватöя висьталö:

— Кубометраэс сэтöн.

— Кубометраэс... Эн горзы! Видзöт жö вöрыс мымда!

— Дак эд... — модьö Давидыс, но голоссö вермö ни пилаыс, кöда бöра дугдывтöг эрзö, ешты вöрöтчыны.

Ружтöны пожуммез, ризя-разя пöрöны сьöрсьöн-бöрсьöн. Давидыс кузь зорнас котрасьö пу дынсянь пу дынöдз, быд вынсис пыкö, пымалö. Зонкаыс уджсис оз пов, но талун чожа пондöны дрöжитны киэс. «Кöть бы минута етш шоччисьыштны...» — думайтö Давидыс, но шы оз лысьт сетны, быд вынсис пыкö пуэсö, медбы нiя пöрисö зэв-зэв, эз водö муыс вылö, кöдалö кытчö шедас.

Кузь пуэз му вылö пöрисö и водiсö öтамöдныс дынö зэв-зэв. Алексейыс уджалiс шоччисьтöг — не кынöмыс эз симав, не горшыс эз косьмы. Дугдывтöг уннялiс пилаыс, сувтчыштлiсö только сы понда, медбы бачокö кисьтны бензин.

Кадыс эз узь, топ круг бергöтчисö — шондiыс сёр павжун ни. Пуэслöн вуджöррес кузьöсь ни. Алексейыс эз мыдз, а киас пилаыс мыдзис, пондiс виньдыны уджавтöнняс, но вöркерисьыслö нем эз мöртчы, сiя топ пиласис пидзралiс олансö, медбы сыбöрын чапкыны да босьтны вильö.

Давидлöн öтiк пу дынын коккес гардыштчисö, сiя нильдiс да пуксис, ружтытöн чеччис бöр, виноватöя шыннялiс, чышкис кымöсыс вылiсь полаас ньылöмсö.

— Но кыдз?! — ыкöстiс — пилаыслiсь шысö вермис Алексейыс.

— Кыдз тэ, сiдз и ме! — пель одзас ёртыслö ыкöстiс Давидыс.

Шынньöвтiс ёртыс, кыдз колö, сiдз и вежöрт. Но Давидыс адззис, мый думайтiс пöрисьжыкыс. Алексейыс, натьтö, гажöтчис: «Дундöтчы, эшö дундöтчы, ёрт! Ме видзöта, кыдз тэ верман дундöтчыны...» «Кинöс полöтан?! — Давидыс дзарнитiс шондiыс вылö, видзöтыштiс ассиныс уджсö. — Ого! Уна ольсалiм...»

Вöрын тшын, сiдз уджалöны, асьнысö воть оз жалейтö.

Шондiыс öшалiс ни кöз йыввезын. Давидлöн киэс дрöжитöны, косьмö горшыс, спинаас öшалö топ сьöкыт кöзича.

— Но кыдз? — пöрöтiс пу-мöд и юалiс Алексейыс.

— Кыдз тэ, сiдз и ме! — ыксiс Давидыс. Пилаыс эрзыштiс лёкжыка. Сылöн шыыс уськöтчис логлань и сибдiс тшöк тэлляинö, кытiсь талун пышшисö не только ыджыт зверрез, но и дзебсисисö шыррез.

— Но кыдз? — ышки-пойки горöтчис Алексейыс и сувтöтiс пиласö мыр бердö.

Лоис сэтшöм лöнь, топ казявтöг вöйисö гуö.

— Шоччись, — висьталiс пöрисьжыкыс, ачыс дыша шагньöвтiс бачок дынö, пилаö содтiс бензин, малыштiс коссö, видзöтöв-керис пöрöтöм вöрсö и пондiс видны трактористсö. — Кытöн мый и керö? Натьтö, бöра тракторсö кайöтiс мыр вылö. Шедан тэ менам! Ме тэнö велöта, кыдз колö уджавны.

— Кин? — эз вежöрт Давидыс.

— Колькаыс. Мый, разь тэ сiйö он тöд? Нятьöсь порсьыс, кöда öмнас только уджалö. Вöлiсö бы трактористтэс, ме бы сiйö важын ни вашöтi бригадасис! А öнi мый? Ми тэкöт дзуртам, а нiя сё эшö мöд делянкаас тöвсö чужьялöны. Вот тэныт и подряд! Кöр ми тэкöт ас коласаным порядоксö керам? Эн тöждiсь! — бригадирыс киас пондiс сюйны кеписсесö. — Уджалышт неделя-мöдiкö, ме начальникыскöт баита и тэнö иньдам велöтчыны. Думайта, что тэись петас трактористыс.

Давидыс висьталiс, что сiя колхозас öтiк гожум уджалiс прицепщикöн и тракторнас мымдакö велöтчис ни гöрны.

— Быдöс ми тэкöт кужам керны, — пилаыс бöра унньöвтiс Алексейыс киын.

Уджалiссес делянкаись петiсö, кöр пемдiс кодь ни. Вöлi лöнь, рам августся рыт, природаыс кыдз суналiс. Небоын югьялiсö медодзза звездаэз. Керкуöдз мунiсö мыдзöсь, пишкисö, эз адззись басни.

Керкуыс дынын ни шорокын миськалiсö сапоггезнысö, чöвтчисö посöдзын и паськöммезнысö öшöтiсö туввез вылö.

— Этадз колö! — гажöн висьталiс Алексейыс. — Хозяйкаыс миян лёк. Мыйись мый, керкусис вашöтас.

«Кытшöм тiян сэтшöмыс и хозяйка, что быдöнныт полат?» — эз вежöрт Давидыс, чöвтчис и полiс, что öтöрись посöдзын вамöм ньылöмöсь паськöмныс оз косьмы, но ёртыс висьталiс: «Катяыс косьтас».

Пукалыштны бы öтöрись посöдзын, шоччöтны вамöм коккез, кывзыны, кыдз лолалö пемытiнас вöрыс, но оссис керку ыбöс, и сiя жö нывкаыс ыкöстiс:

— Тэрмасьö, шыдыс сайкалас!

— Адззылiн! — гордöя шуис Алексейыс. — Сэтшöм инь шедас кö тэныт, тшыгйöн öтiк минута оз понды видзны, пондан мöс моз сёйны ой и лун.

Нiя миссисö керку угöлын умывальникын, чышкисисö и пырисö керкуö, кытöн öшалiс чöскыт яя шыд дук.

Ёрттэзныс пукалiсö ни пызан сайын и ружтiсö-панясисö бекöррезiсь.

— Ох, тi и чожöсь пызаныс сайын! — несьö ¹лöгöн, несьö шуткаöн шуис Алексейыс. — Мый ни асланыт делянка вылын уджалат? Или сё öтiк местаын нырьясят? Этадз пондам уджавны, няньнас эд оз пондö вердны.

Некин шы эз сет, быдöнныс нырьясисö не делянкаын, а бекöррезын, ружтiсö, пишкисö ныррезнаныс.

— Коля, тэныт эд медодз тракторнас колö тэрмасьны! — Колялö горöтчис бригадирыс.

— Менö вöрыс, бригадир, оз вöрöт! — паньсö пызан вылö чапкис трактористыс. — Ме сiйö эг садит, эг быдты и ась сiя гажöтö кок вылас отирсö.

Обидитчис эд Коляыс. Эз бы ков мортсö мыдзувья, тшыгйöн видны пызаныс сайын, кöр сiя сёйис. Обидитчис трактористыс аслас бригадир вылö. Кин ни сэтöн оз öбидитчы?

— Сэк мый вылö тэ татчö локтiн? — бöра пурис трактористсö бригадирыс. — Россияыс эд паськыт, мун кытöнкö да шатлась.

— Ме, бригадир, шатласьнытö ог понды. Мöдiклаын, видзöт, умöля вердöны, а татöн Катяыс рыт и асыв пуö чöскыт яя шыд, кöть потласьтöдз сёй. Сiдз эд, ёрттэз?

— Сiдз, — юрсö гогиньыштiс куим пиня ёртныс, кöдалiсь Давидыс нимсö эшö эз тöд.

— Потан тэ менам! — Алексейыс пуксис ёрттэс бокö пызан сайö, а Давидыс öшис, эз тöд мый керны, топ видiсö не Колясö, а сiйö, что сэтшöм жö... Уна пондан няньсö сёйны...

Катяыс сулалiс пызан дынын, нем эз шу, кывзiс мужиккесö. Сылöн юрыс вылын чочком чышьян, кыдз ресторанын и шынь оз кер, синöн оз кваркышт, кывзö да видзчисьö, мый жö бы эшö мужиккес мыдзувьяныс пондасö гардны, кöр лёкöсь, медбы сыбöрын нiйö öтiк кылöн рамтыны, ежели смелöй, а абу... Сiдз и пондас кыдз кöиннэз коласын овны — не кулöм, не ловья.

— Тэ эшö мый видзчисян?! — вдруг горöтчис Давидыслö Катяыс да сэтшöм голосöн, что повзьöтiс. — Или йöз? Пуксьы да сёй. Он адззы, кыдз мыдзувьяныс изöны, только пеллезныс вöрöны, тэныт нем оз кольö.

— Колям, — тырппесö нюлiс Коляыс. — Лыэсö эд вильöтас...

— Лыэзас эд вемыс и эм, — стул вылö вожасис Давидыс да киас босьтiс пань.

Мужиккез сёйисö — паннез киэзаныс лэбалiсö, ружтiсö. Вежöрт, что кин кыдз уджалö, сiдз и сёйö, а нiя лун-лун сöстöм воздух вылын вöр керöны, а не спинаэзнысö гыжьялöны.

Керкуын шоныт. Угöлын орсö радио. Пондiс петны он.

Медодз пызаныс сайись чеччис Микол, сыналiс зеркало одзын юрсö, малыштiс кымöссö и пондiс чывкйыны джоджыс шöрын да ошшасьны, что гöтрасяс Катяыс вылö, и мунасö нiя Чёрнöй море дорö, небасö сэтчинiсь медбур керку, сы гöгöр садитасö яблоняэз, грушаэз, басöк цветтэз и пондасö нiйö быдтыны да вузавны, öдззасö овны, кыдз райын.

Катяыс видзöтiс-видзöтiс зонкаыс вылö, сыбöрын горöтчис:

— Кыдз тэ цветтэзнас лöсьöтчан деньгасö кыйны? Ме ог вежöрт.

— Ме? — серöмтчис Коляыс. — Кыдз цвет — руб, мöдiк — кык руб и сiдз одзлань... Городас тöдан, кыдз цветтэсö любитöны! Мунан ме сайö, Катя?!

— Кыдз эшö муна! — юрнас легнитiс нывкаыс да пызан вылiсь пондiс дзимлявны дозмук ^1.

— Мунан! — Висьталiс зонкаыс.

Катяыс мужиккез коласын вöрас öтнас. Мöдiк бы сы местын татчö öтiк час кежö эз лок, а сiя олö, кöр мужиккес мывкыддэзнаныс абу öткодьöсь, коласаныс эмöсь сэтшöмöсь, кöдналöн не ёрт, не семья и гортнысö бура оз тöдö кытöн: талун татöн, ашын мöдöрын, может, кöиннэз моз кувтöдз пондасö öвтчыны кытöн шедас, кытöн тшыгöсь, кытöн пöтöсь, тэ нылöн талун ёрт, ашын некин абу. Видзöт, пызан сайын пукалö Вадим — шаромыга, öмыс пыр осьта, кытöн тыдалöны куим пинь. Кин сэтшöм Вадимыс? Натьтö, ачыс оз тöд, оз вермы бура висьтавны, вунöтiс ни, кытöн чужис да быдмис, вöлiсö я айыс да мамыс, но ошшасьö эд, асьсö ошкö, что сы кодьыс некин абу, велöтчöм пятнадцать год, бытьтö кончитöм университет, пондылöм уджавны кытшöмкö деревняын, кытшöмкö колхозын, кытшöмкö школаын велöтöм челядь, уджалöм пастухöн, высьтöм мöссэз, тшупöм керкуэз, вöлöм реставраторöн, художникöн, директорöн Дом культурыын. Сэтчинiсь пышшöм, татчö локтöм, татöн абу гленитчöм, мунöм мöдiклаö. Сэтчин не сы сьöртi, и татöн дзескыт.

Кыкись гöтрасьлöм да кыкись янсöтчöм, öтiк инькаыс сайö пыралöм картаö ², кыка корасьöмась да абу мунöм. Ештöм ветлöтны джын Сибирьсö, вöлöм богатöй и беднöй, узьлöм гостиницаэзын и пон моз пос увтын, вöлöм пöт и тшыгьялöм, етшажык уджалöм, унажык кинiськö пышшалöм, но ачыс оз тöд кинiсь да кытчö пышшалöм, несьö иннезсис, несьö милицияись. Ошшасьö, что мый вылас, сiя и сьöрас.

Мöдiк бы Вадимыс местын тöждiсис деньга понда, шогалiс, что öтнас — не бöрас, не одзас, не ёрт, не враг, а сiя — шыннялö, оз тöждiсь, нем понда оз горзы, ашыння луныс сылö эм и абу. Мöдiк Вадим местын бы шогалiс кынöм висянöн и коскаэс доймисö, а сылöн здоровье — кöрт, нем оз мöртчы: не би, не ва, не лёк тöв, не бимороз.

Вадим татчö посёлокö шедiс не Давидыс моз, а локтiс кытшöмкö аскоддя ёрткöт, кöдö вунöтiс ни кытiсь, нимсö ни оз тöд. Посёлокын нiйö поннэзöс моз кутiс участковöй, пондiс корны документтэз, но ёрттэслöн некöдыслöн эз вöв не паспорт, не военнöй билет.

— Кытшöм тюрмаись пышшит?! — лöгасис милиционерыс, кыскис наган и веськыта висьталiс, что машинаöн нуöтас райотделö и ась только пондылöны пышшыны... Пуляыс вöтас.

— Некытшöм тюрмаын ме эг вöв! — милиционерлö висьталiс Вадимыс и содтiс веськыта: — Тэ, ёрт милиционер, он ешты синнат кваркыштны, кыдз öмсит лэбзя.

— Да?! — шуис милиционерыс, кöда дынiсь эшö некин öтiк эз мезмы.

— Да, — висьталiс Вадим. — Не тэ кодь Шерлок Холмссэз ме понда ни горзiсö...

Участковöйыс смев, немись оз пов, только öтнас полö узьны керкуын и оз лысьт мунны вöрö, но öнi Вадимöс пуксьöтiс ёртыскöт машинаö и пондiс нуöтны райотделö: туйыс не матын, чуклясьö вöррезöт, гардчö логгез коласöт, чеччалö грива вывсянь грива вылö.

Вадимлöн ёртыс машинасис вотьыштiс посёлокыс сайын жö. Участковöйыс нем эз казяв. Райотделö Вадимсö вайöтiсö öтнассö да медодз йöртiсö КПЗ-ö и пондiсö видзны, кыдз бур гöсьöс, вердны весь да юктавны. Сылö гленитчис сэтшöм оланыс, кöр он уджав, а сёян, пöт, только вот гажтöмкодь.

Джын месяц Вадимыс олiс милицияын. — Öддьöн эд бур оланыс вöлi, но мöдджын месяцас вдруг сы бердö кутчисис невежöртана шогöт, сэтшöм окояннöй тоска, что и сёйны эз понды тöрны. Сэк мортыс милицияись начальниклö веськыта висьталiс, что, ежели оз лэдзö, пышшас, кöр Вадимсö весь замокыс сайын видзöны.

— Ми тэнö, гражданин, татöн весь ог видзö! — висьталiс начальникыс. — Видзчисям документтэз, а кöр нiя локтасö, ме могись кöть тöлiсь вылö лэбзьы.

Кошшы Вадимлiсь биографиясö, кöр сiя ачыс оз тöд, и некытшöм Шерлок Холмс этö оз понды тöдны, но видзисö КПЗ-ын. Милицияись начальник пондiс тöдны, что мортыс не бандит, что олö тöв моз: шутньöвтас — кылан, но он адззы, адззан да он вöт, вöтан да он кут, кутан да нем он кер, сiдз кыдз Вадимыс абу бандит, некин одзын немöн не виноватöй.

Быд местаын Вадимсö милицияыс судитiс бы, а сэтöн лёк начальникыс пондiс баитны мöднёж:

— Вадим Иванович (адззылiн тэ, топ сэтшöм ни кодя Вадим Ивановичыс), — колö бы уджавны. Миян, видзöт, уджалiссес оз тырмö. Вöркериссез бы колöны. Сэтчин эм бригадир, сiя быдöнкöт кужö овны и тэ пондан деньгасö гумлавны содззезнат.

— Ме деньгасис пола, ёрт начальник! — веськыта висьталiс милицияись начальниклö Вадимыс. — Сiя враг, деньгаыс понда юр орöтасö и чапкасö кöз увтö, но ме любита уджавны. И вöрсö верма керны. — Веритiс ни милицияись начальниклö, кöр мöдыс эшö мортыслö, натьтö, немымда эз верит, кöр быдкодьсö ни адззывлiс.

Мед. Сы йылiсь ошшасис Вадимыс и вунöтiс, а кöр локтiс Алексейыс дынö, бригадирыс веськыта висьталiс:

— Мед тэ и майöг кодь кузь да вына, но сьöкыт миян дынын!..

— Ме тiянлö, шаромыга, абу инька, медбы менö кинкö жалейтiс.

Милицияыс öддьöнжык полiс Вадимсис, а Алексейыс медодзза минутасянь баитiс кыдз ёрткöт, кöть и думайтiс жö: «Кышаласö юр вылö шаромыгаэсö... Мый ныись?»

Весь сiдз мортыс йылiсь одза-одз думайтöны, кöр сiйö эшö оз тöдö. Вадимыс абу вöлöм вывтi бöбöтчись и абу вöлöм дыш, мый пондас керны, уджсö эн сор, садьыс бырас, но керас, немись оз повзьы.

Уджалiс Вадимыс месяц етш, велалiс ни топ вöрын керны сьöкыт удж и бöра кутчисис сы бердö невежöртана шогöт, бöра топ шедiс КПЗ-ö, сьöлöмыс висьö мортыслöн, места оз адззы, ачыс оз тöд, мый сэтшöмыс, нельки пешлiс ни валериановöй капляэз — флаконсö ньылыштiс кыкись. Нем эз отсав, кöть тэ горзы, пышшы, вöтчы кинкö сьöрö. Но некин некытöн оз видзчись, мед и тöдö, что бöра пондас ковны узьлыны пон моз пос увтын, кытöн тшыгьявны, кытöн сёйны пöт, кытöн уджавны, кытöн овны весь. Öтiк кылöн висьтавны — шаромыга, кöдалiсь олансö не быд морт и тöдö.

Казялiс Вадимлiсь шогöтсö бригадирыс и веськыта висьталiс:

— Из увтö пыран, адзза, ваö уськöтчан — вöта! Уджав, нем тэныт зверь моз пышшавны, отирсö серавны. Видзöт жö, кытшöм ош мыгöр.

Алексейыс сэкжö локтiс участокись начальник дынö, кутiс сiйö моросöттяс и веськыта баитö: «Несьö Вадимыслö квартира, несьö ме... Ежели ёртнымлö оз ло квартираыс, ачыт вöрас уджав!

Кöть кытöн вермас уджавны Алексейыс, уджсис оз повзьы и аслыс позсö адззас. Чожа Вадимлö козьналiс леспромхозыс квартира, кытчö мортыс вермас локны шоччисьны и кöть мый керас — ачыс хозяин. Вот эшö адззас бур невеста, и оланыс лöсямас, кöть быд лун ошшась.

Пондiс овны одзлань посёлокын Вадимыс да уджавны Алексейыс бригадаын, и невестаыс йылiсь баитö:

— Ме ачым адзза, кытшöмö колö, сэтшöм вылö и гöтрася!

Öнi сiя пукалö рытнас вöрын керкуокын, шоччисьö öтлаын бригадаыскöт и гусьöн, пöв синнас видзöтышалö Катяыс вылö, но кытчöдз сы йылiсь нем оз баит, думаэсö видзö дзебöмöн, кывзö, кыдз Миколыс модьö, топ лöсьöтчö гöтрасьны нывкаыс вылын.

— Тэ меным он ков! — Катяыс веськыта висьталiс трактористыслö. — Кöть юрбит, кöть кок ныррезöс окав, нем тэнат оз пет.

«Чож! — гажмис Давидыс, öшис сылöн лунся мыдзыс, вунöтiс мымдакö кежö гортыс йылiсь.

«Сiдз!» — тырппесö курччöвтiс Вадимыс и пондiс думайтны, что весь ассис олансö пон моз торкис, кытчö шедiс талис, видзöт: поди, мужик, счасьтеыт сэтöн и эм, только пиннет öмат етша ни, колö бы тэчны кöртовöйезö.

Нывкаыс вöрас öтнас, а жöниккес — уна.

«Эта роч нывкаыс менам лоас! — сьöд да ыджыт синнэзнас сiдз бы и сёйис-гусялiс Катясö Арменияö Сурен Абраханян, кöда бригадаын не медбöрья морт. — Неба деньга вылö или гусяла, нем ог жалейт. Суреныс моз эд Катясö некин ни оз понды любитны».

Суреныс посёлокö шедiс бöра жö йöз отиркöт, кöдна берег дорö посёлокас лэбтiсö медодзза керкуэз, а сыбöрын шыбыльтiсö мöдiк местаэзö, но сiя кольччис татчö, медбы шедтыны унажык деньга, небны машина, а поди, и невеста.

Керку угöлын, кытöн орсiс да сёрнитiс радио, пукалiс ота рожабана да ота пельпона Баграт. Сiя коласаныс медпöрись — сорок год ни мортыслö, сылöн семья, вит челядь, но Багратыс эшö гусьöн видзöтышавлö Катяыс вылö, сьöкыта ас кежас лолалö да думайтö:

«Вöлiсö бы меным годдэзö двадцать, некинлö бы нывкасö эг сет!»

Вот кытшöмöсь ми мужиккес, кöр иньным дынаным абу, а одзаным басöк нывка.

Пызан угöлын суналiс Борис. Сiя коласаныс, натьтö, медсчастливöй. Зонкаыс гöтрасис таво, иньыс шедiс томжык, и мед лёбöны, что нывканас тöдöм мöдiккезö, Борисыс медсчастливöй. Сiя думайтö только öтiкö, кыдзкö бы чожажык мунны гортö.

— Мый юртö öшлан? — Борисыс вылын сералö Катя. — Иньыт, поди, эта коста клубын кино видзöтö, а тэ тöждiсян.

Шы эз сет Борисыс, нюжöтчис аслас кровать вылö и ланьтiс.

Вöрын олöны да уджалöны сизим мужик и öтiк инь юр: луннас быдöнныс торйын, а рытнас — öтлаын.

Мужиккес уджалöны луннас, а Катяыс унажыксö — рыт-асывнас.

Сьöкыт вöрын уджыс. Мыдзисö мужиккес, но сёйисö чöскыта, и мыдзныс ыскöвтiс пельпоннэзныс вылiсь.

— Гармошка колöм вайны, — шуö Багратыс.

— Телевизор колö, — шуö Коляыс.

— Тэ эшö мый он понды модьны? — юалö Катяыс. — Гажтöм. Мунiн бы ме сайö, Катюша. Сэсся бы меным некытшöм телевизор ни эз ков. Ме тэнö кыдз кагаöс киэз вылын понда видзны.

— Дугдiн ни бы, Миков, öтiксö модьны, — падтöны мужиккес.

Тöдчö эд, что вöркериссес любитöны Катясö, видзöтöны сы вылö ласковöя, берегитöны.

— Катя, — баитö Алексейыс. — Тэ нем он тöд?

— Мый колö тöдны? — Катяыс видзöтö Алексей вылö, кöда сылö татöн, кыдз вон и ёрт.

— Кывзы жö, талун ме кытшöм зонкакöт уджалi! Ош моз бергöтö уджсö, а тэ Коля вылö видзöтан...

— Бригаде-е-ер! — пиннесö гер керис Миколыс. — Сё тэ менчим туйсö поперегалан.

Давидыс гöрдöтiс — пеллес вир пытшкын.

Катяыс видзöтыштiс Давидлань, адззис и эз сiйö, чукыль-мукыль öвтыштiс юрнас, чывкнитiс джоджыс кузя: гордöя, асьсö оз сет серавны.

— Кинöс ме сэк тэныт жöниксö адзза?

— Мужиккез... Кытшöм тi жаднöйöсь миян вылö, кыдз кырнышшез. Ме тiянлö ог ков, и тi меным од колö.

— Ага, верита, поди.. Олат тi кинкö мужиккезтöг? — трактористыс öзтiс папироса, но эз ешты тшынсö öмас кыскыны, кыдз Катяыс ыкöстiс:

— Марш керкусис!

— Шедас этатшöм инь... — зонкаыс петiс керкусис.

Кузь арся рытыс, чулалö жагвыв. Мужиккес баитiсö-керисö да водiсö, а Катяыс кинлö вочö кеписсез, кинлöкö миськалö йöрнöс.

Кузь арся рытыс. Мыдзис Давидыс, и оныс пондiс лязны. Сiя пöрöтчис аслас кровать вылö, а мöд койкаыс вылö водiс Миколыс и гусьöн висьталiс:

— Давид, ме талун Катяыс бокын понда узьны.

— А меным мый? — шуис Давидыс.

— Вот деревня, — серöмтчис мöдыс, бергöтчис и онмöссис — нырыс шутнялö.

Давидлöн öшис оныс. Сiя куйлiс гатш да видзöтiс потолокö, лыддис, кыным пуын вöлöмась кыным ув, кöдна тöдчисö плахасö пилитöмыс бöрсянь. Пызан вылын сотчис лампа, öтöрын, кылö, шушкис пожум, кöда зэв быдмис керкуыс бокын, угöлын тачкöтчис гаг. Ружтöны да пишкöны мужиккес узьтöнняныс, джоджулын пиксышалöны шыррез.

Давидыс оз узь. Сiйö чувйöны думаэз, кöдна медодз бöра горт йывсис, нiя дзугсьöны, пантасьöны виль отиркöт. Медодз адззö Катясö, кöда дыр оз вод. «Мый меным Катяыс?! — видö асьсö. — Кин сiя сэтшöмыс? Мед кöть мый керö, кöть кин бокас узьлö...» Но думаэс...

Куйлiс и эз казяв, кыдз ланьтiс и вдруг саймис, кыдз кинкö вачкис шатьöн: осьтiс синнэсö — керкуын пемыт, кинкö коккез увтын дзуркнитiс джоджыс.

«Но, Миколка! — сöтiс дума. — Весь эд эз ошшась... Ашын пондас быдöн одзын ошшасьны, что Катяыс сылöн... Но и пон!.. Но и сволочь!»

Коляыс чеччис аслас кроватись, пемытiнас маласис-кошшис истöггез и öзтiс папироса. Поди, сiя кывзiсис, кин узьö или оз, видзчисис мыйкö...

«Эх, Колька! Ах, Миков!» — Давидлöн пессис сьöлöмыс, сiдз бы чеччис да пель бокас вачкис ёртыслö, но мöдыс дзурк-вирк петiс öтöрö, ыбöсöттяс керкуö лэдзис ыркыт да кокнит воздух. «Вот сiдз, Колька! Ошшасьны кужан, а ме кодь жö... Не тэкöт миянлö цветыс быдмöм», — Давидыс гажмис. А мый бы сiя керис, ежели бы вдруг водiс Катяыс бокö, и нывкаыс зонкасö дынсис эз бы вашöт? Нем бы эз кер, кöр сылiсь эз бы юасьö, эз висьтасьö. Только Давидыс ашын чеччис бы одза-одз и вöрсянь веськыта сöтiс гортö, локтiс бы Тылаас да висьталiс бригадирныслö: «Здравствуй, Ефим Селиверстович, вот и ме! Бöр локтi...» — «Ага! — пондiс бы пиннесö кеслыны бригадирыс. — Тэ думайтiн сiдз и эм? Думайтан кытöнкö оланыс буржык? Абу эд. Некытöн сэтшöм бур оланыс абу, кыдз миян Тылааным, а тэ пышшалан да кошшисян... Ов гортын, некинлö тэ он мешайтчы!..»

Пемыт ойыс быдöс син одзись саялö. Миколыс куритiс öтöрас, пырис керкуас, сулалiс порог дорын, ас кежас мыйкö думайтiс, лöсьöтчис керны, сьöкыта лолалiс да ружтöв-керис, гыжьялiс, кылö, мороссö и иньдöтчис аслас кровать дынö.

Водiс узьны Миколыс, но тыдалö, оныс эз пет и кижгыштiс, кыдз сералiс: «Давид, Давид, пола бокас водны... Зверь эд, сотана! Вдруг ме сылö быль ог ков, а? Зурзяс кыдз! Поди, тэ пешлiсян? А мый? Ме бы тэ моз эг понды ревнуйтны...»

Шы эз сет Давидыс: мый сэтшöмыскöт баитны, кöр нем оз вежöрт?

4

Асывнас Давидсö саймöтiс Катяыс. Сiя зонкасö жагвыв вöрöтiс пельпонöттяс да ласковöя баитiс: — Чеччы, жöник. Кольччин эд...

— А? Этö тэ? — осьтiс бöб синнэсö: öшынöт видзöтчö шондi югöр, сералö. Керкуын дзир кыкöн.

— Кольччин эд! — сералö нывкаыс, видзöтö, кыдз челядёк вылö, кöда асывнас дыр любитö узьны. — Чеччы да пасьтась, а ме сы коста петала öтöрас, мед тэнö не вомдзавны.

— Ме абу вомидзöсь, — виноватöя висьталiс Давидыс, тэрмасис бы кöмавны вешьянсö, но киэс дрöжитiсö и ружтiс-мырсис, быдöс пымалiс: эз тöд, мый одзжык пасьтавны, то ли вешьянсö, то ли йöрнöссö.

Эз ешты кизявны йöрнöс киззесö, Катяыс посöдзись пыртiс сапоггесö, торскис одзас и серöмтчис: Кöч сьöрö я мый я лöсьöтчан вöтчыны, сiдз тэрмасян?

— Öнджа, колисö эд...

— Эз ков лун шöрöдззас узьны! Мый ойнас керин? Или Миколыскöт öтамöднытö синйит, мед ме бокö öтамöднытö эд одзалö водны?

— Ме эг... — шуис Давидыс. — Этö Миколыс...

— Ой, кагаэз! — пондiс куснясьны-серавны Катяыс. — А ме тiянöс кыкнаннытö ойбыт видзчиси, мыся, водат бокам, и ме тiянöс жмитышта, од я тi кынмö... — сералiс-керис, пондiс кöритны. — Ох тi, зонкаэз, кытшöм тi кодяöсь, что быд ныв морт бокын бы шонтiсят, а кыдз ме тiянöс эшö примита?! Кыдз эшö ме тiянöс ыбöсыс бöрын кöдзытiнас узьтöта, сэк пондат тöдны, кытöн невестаныт.

Давидыс сэсся баитны эз лысьт, миссис кань моз умывальник увтын, юалiс жö: «Нiя кытöн?» — и лöсьöтчис петны: кытчö эшö сэтöн кыкöн керкуас, кöр стыдитöны — синнэз кунь?.. — Сулав! Сёй да сiдз мун! — висьталiс Катяыс, кыдз мамыс жö.

— Ачыт сёй! — чеччöвтiс посöдзсянь, дойдiс коксö, но зубытсö эз кыв и ышки-пойки иньдöтчис делянкалань. Син одзас Миколыс, кöдалöн öмыс пыр осьта, бöра пондас серавны: «Но мый? Кольччин Катяыс дынö? Ушлöй тэ, ёрт. Уна он баит, а керан... Или дышыт петö уджавны да сiйöн кольччин? Деньгасö эд öтлаись пондан босьтны».

Креста туй весьтын сувтчыштiс: «Но нiйö... Мунны бöр посёлокас, кытчöдз эшö юрöн-кокöн эг ешты гардчыны...» Но сэтöн жö асьсö стыдитiс: «Мый бöрсянят пондасö думайтны? Быд морт эд шуас, что вовлiн, мыччалiн чужöмтö и пышшин... Эм и абу сэтшöмыс...»

Асылыс кымöра. Мыччисьлiс шондi, но саясис. Керöслань, топ кöззэз йылын, öшалöны кымöррез. Вотясьö. Коккез увтын шлячкöтö ва.

Давидыс сибöтчис трактор дынö. Сэтчö жö чукöртчöмась ни ёрттэс. Нiя топ зонкасö эз и адззö. Кылiс Алексейлöн лёк голос:

— Тöн кытöн вöлiн?! Мый керин?! Эн разь кыв, что моторыс уджалö и виньдö? Шляпа!

— Тэ ачыт шляпа, — модьыштiс Миколыс и содтiс. — Мыйöн ме тöда, что моторыс джöмдалö, сiя эд не куим кока вöв.

Миколыс куритiс да сьöласис, сулалiс тракторыс дынын бокын моз, быдöн вылö видзöтлiс лöга — лёк, кыдз виноватöй не сiя, а мöдiк.

— Чулалöм месяцас деньгасö босьтiт четыреста рубöн, а эта месяцын, ёрттэз, пондат кушман сёйны! — бригадирныс пондiс гуддисьны тракторын.

— Мыля, шаромыгаэз? — гажöн юалiс Вадимыс, гажöн жö видзöтыштiс быдöнныс синнэзö. — Ми разь, умöля уджалiм? Эгö эд, только талун.

— Меным деньгаыс оз ков. Нем сiйöн керны, юрöс кыдзкö пон моз верда, — ныр увтас бизгыштiс Миколыс, дорйис асьсö.

— Эн модь, а вай ключсö да отсась! — чорыта висьталiс бригадирыс, но трактористыс бергалiс, видзöтчис и ключсö эз адззы, ачыс топ баитiс: «Адззан сiя, Давид, кытшöм! Оз тöд, мый понда миян кодьыс бердö кутчисьны... Сiя и тэныт эшö мыччалас! Вот адззылан...»

Ключыс син одзын, гусеницаэз вылын. Давидыс босьтiс сiйö да сетiс Алексейыслö.

— Важын бы этадз, — раммыштiс Алексейыс да бöра лёкжыка ни горöтчис Миколыслö. — Миков, тэ кытöн велöтчин?! Машинасис нем он вежöрт, а нывкаэс дынын, ой-ой...

— Кытöн тэ, сэтöн и ме. Советскöй школаыс эд öтiк.

— Кужö, шаромыга! — вак-вак серöмтчис Вадимыс, мыччис одзись куим пиньсö.

— Том эд... — висьталiс Багратыс. — Локтö, челядь. Мый пондам эстöн весь овны? Пöрöтöм вöрыс тыр, мунам да суйям кöть...

Мужиккес иньдöтчисö уджавны. Давидыс лöсьöтчис вöтчыны ны сьöрö жö, но Алексейыс падтiс: «Тэ кытчö, Давид? Ми тэкöт мунам!»

Лёк Алексейыс, мый не сы сьöртi, некин вылö оз видзöт, кöть кинöс видö. Недолыт лоис Давидыслö. Нежели весь овны да видзöтны, кöр лöсьöтас бригадирыс тракторсö, сiя бы мöддэскöт уджалiс делянкаын.

Трактор дынö кольччисö куимöн. Машинаыс дынын гуддисисö джын лун. Кöр тракторыс пондiс уджавны, пырисö керкуö сёйны, но Алексейыс эз павжнайт, а босьтiс нянь, сюйыштiс пиас да иньдöтчис вöрö.

Кыкöн Давидыскöт эз ештö локны делянкаöдз, кыдз зэрмис. Медодз зэрис поснита, но жагвыв öдззис и öдззис сiдз, что пондiс кисьтны ведра понiсь. Вöрын некытчö эз понды туйны павкöтчыны — увдöрсянь и вевдöрсянь ва, но Алексейкöт он пиньгись: босьтiс пиласö и паздö-уджалö.

Уджалiсö пемдан дорöдз. Вамисö, кыдз бырöм нинкöммез. Зэртöн и локтiсö керкуö.

— Тi мый? — посöдзын ни панталiс Миколыс. — Бöра эд пöтö вöрас, уджалiт этатшöм погоддяас?

— Эг пöтö... — Алексейыс кыскалiс коккезсис сапоггесö. — А тi пöтiт?

— Ми?.. Миянöс Катяыс вердiс ни.

— Сiдз, Колька. А тракторыс эз жö бöра разьсьы?

— Мый кöртыслö лоас?

Сё эшö вывсиныс вежöны паськöмнысö, а Катяыс пызан вылö вайö ни сёйны — керку тыр чöскыт шыд дук.

— Катя! — ыксö Миколыс. — Мыля миянлö сымдаöн бекöрас яйсö эн пукты, а нылö пуктан петух ыждаöн? Кытöн демократияыс?! — шутитiс я трактористыс или быль яйнас эз пöт — он вежöрт.

Давидыслö лоис недолыт, сiя сувтiс джоджыс шöрö, но Катя трактористыслiсь öмсö тупкалiс ни: — Кин мый шедтö, сiйö и сёйö! Мымда талун уджалiн?

— Талун жö зэрис, отир! Зэрис!

— Сiдз, жöник. Кинлö колiс, — уджалiс, кинлö эз — шоччисис.

— Совесть колö тöдны, шаромыга! — висьталiс Вадимыс, кыдз ув кералiс и сэсся шы эз сет.

— Совесть! — öзйис тракторист. Кытöн сiя, кинлöн? Ошшасят совестьнаныт, а асьныт узят и вöтасят деньга...

— Ноко, ноко, мый эшö бурсö висьталан, Микола? — öмсö осьтiс Вадимыс.

— Мый сiя хрен висьталас, кöр ачыс оз тöд мый кöтö, — шуис Багратыс.

— Кин? Ме ог тöд?! А тэ тöдан? Кыдз деньгасö оз сетö, натьтö, быдöнлiсь юрсö кералан. Кытшöм сэк миян совесть? Кытöн сiя? Ме кывлi пöриссезсянь, что кöркö, одзза годдэзас, олöмась умöля, уджалöмась тшыгйöн, но деньгасö миян моз абу корлöмась. Вот сэк вöлöм совесть, а öнi ми вижлоккез мыся.

— Во, шаромыга! Да тэ мый, Микола? Коммунизмöдззас ми эшö тэкöт эгö локтö, — пондiс серавны Вадимыс.

— Тэ кодь шаромыгаыскöт и локтан! — сiдз обидитчис Миколыс, что синваэс петiсö.

— Ме шаромыга?! — лöгасис Вадимыс. — Да ме тöдан кин! Ме, зонка, университетын велöтчи, высшöй образованнёöн, а тэ кин?

— Университет... Жучкаыс бöж увтiсь... — висьталiс Миколыс и öтiк йöрнöснас чеччöвтiс öтöрö, кытöн кылö зэрö — ведра понiсь кисьтö.

Сёйисö пöт, а Миколыс сё кытöнкö пукалiс посöдзын.

— Кынмас эд сэтчин, — горöтчис Вадимыс.

— Нем оз ло! — шуис бригадирыс. — Ась бöб юрсö зэрыс увтын миссьöтö.

Давидыс пызан сайсянь жö петiс öтöрас.

Шысеттöг сулалыштiсö, кывзiсö, кыдз ас кежас больго-сёрнитö шорокыс, крышаö вартö зэрыс и вдруг Миколаыс шуис: — Давид, лок татiсь кытчöкö мунам. Мый эстöн керны? Он адззы нiя кытшöмöсь... Деньга да деньга... Деньгаыс понда ловнысö... сетасö, а меным мый деньгаыс? Етша эшö шедтыны... Ёрт бы сэтшöм, кöда бы вежöртiс.

— Ог тöд, — шуис Давидыс.

— Нем тэ он тöд! — обидитчис Миколаыс. — Тэ, сэтшöм жö... — и пырис.

Давидыс пуксис посöдзас ыбöсыс бердö, кытчö оз сидз зэрыс и пондiс шоччисьны, кывзыны, кыдз зэрыс шушкö пожум уввезын, больгö шорокыс, и крышаыс вылiсь вотялö ва.

Миколыс бöрсянь сьöлöмыс вылын лоис недолыт, мыйкö кыдз эз понды тырмыны, поди, ёртыс моз жö мунiс бы кытчöкö мöдiклаö, сэтшöм местаö, кытöн ачыт ас вылат хозяин — некин тэныт овны оз мешайт, оз дзуг олантö не думаэтö, мый колö, сiйö и кер, кыдз вöрын зверь... Эмöсь эд, натьтö, сэтшöм отирыс, кöдна уджалöны и олöны, топ аслыныс. Гажа бы вöлi сэтшöм оланыс или гажтöм?

Думайтiс öтнёж, сыбöрын асьсö жö осудитiс: «Не, Давид, натьтö, гажтöм лоас отирыстöг, кöр быдмин деревняын и уджалiн колхозын, артельöн...»

Дзуркнитiс бöрас керку ыбöсыс, петiс Алексейыс да горöтчис:

— Пасьтась. Кынман эд, — и спинаыс вылö чапкис жакет.

Давидлöн сьöлöмыс кыдз сылiс, кытшöмкö аскоддя чувство зэлöтыштiс мороссö, кöр татöн эм морт, кöда тэ понда тöждiсьö. Мыйкö лöсьöтчис висьтавны Алексейыслö, но кыдз сылöн овлö, топ виньдiс, ньылыштiс дульсö, но нем эз шу, недыр пукалыштiс и только сэк смевмöтчис да юалiс:

— Алексей, кин тэныт лоö Катяыс?

— Катяыс?! — ёртыс голосын кылiс гордöй шы (быд местаын Алексейыс гордöй, может, мукöдлаын и вывтi ни гордöй сiйöн, что веськыт, уна ошкö ассис уджсö, а кöр и асьсö). — Катяыс, зонка, Валяыслöн сой. Родня менам. — Свестя сiдзкö? — кыдз эз верит Давидыс. Сэкжö чужисö думаэз: «А мыля сэк сiя татöн вöрас? Öтнас мужиккес коласын... Мый разь сэсся места оз адззы, удж абу?»

— Свестя... — одзлань баитiс Алексейыс шоныта. — Асланым. Жаль меным Катяыс, сiйöн дынам уджавнытö и кори. Син одзын и деньгасö сымда-мымда шедтас... Ветлiс ни жöник сайö, да бöбöв шедiс жöникыс: эз ештö гöтрасьны, бöр янсöтчисö. Вот сiдз и вöлi, но ештiс кага адззыны. Этö, кöда миянын жö олö. Ылöса зоночкаыс. Мöдiк ай бы, натьтö, кагасö эз чапкы...

Гизнитiс-зэрмис öддьöнжык. Керкуын, кылö, мужиккес мыйкö öдззисö лёбны. Может, бöра Миколыс модис-тшупис Суренлö, что роч нывкаэс вылö сылö оз туй гöтрасьны, кöр нылöн Арменияын оз лэдзö вина юны, и зэлöтас сэтшöм иньыс Суренсö, что не ловзисьны, не норасьны: эшö законнэсö бура тöдöны роч нывкаэс.

— Быдтам кыдзкö Толиксö! — гажöнжык ни висьталiс Алексейыс. — А кытчö воштiсян? Он эд чапкы зонкасö, сiя абу виноватöй, что ай-мамыс сiдз керöны, а миян Валяыскöт эшö некин абу — пон да кань.

Пöльтыштiс тöлок. Давидыс пондiс кынмыны. — Пырам, — висьталiс Алексейыс и одзас пырис керкуö.

Мужиккес пукалiсö пызан сайын да шваткöтiсö доминоэзöн.

5

Чулалiс дас лун.

Талун уджалiссес видзчисьöны машина, медбы мунны посёлокö: вежсьö вöркериссеслöн вахтаыс.

Асылыс кöдзыт ни. Шорок дорын кок увтын кажöтö вöр вылiсь киссьöм лист: кынтöм.

Видзчисьöны машина. Давидыс неылын керку дынсянь пукалö мыр вылын и панталö ыркыт асывсö.

Думайтö Давидыс горт йывсис, но асьсö падтö: «Кöть мый ни... Ачым эд кошши этö».

Вадимыс сулалö посöдзын, öмсö осьтöм да мыччöм куим пиньсö и сералö:

— Эй, Давид! Шаромыга, сöтам Ташкентö! Сэтчин сё эшö гожум. Как раз яблоккесö дзимлялöны и номмес оз курччасьö. Видзöтам, кыдз отирыс олöны.

Ужнитiс машина.

— Кытöн тэ, Давид? — ыксöны ёрттэс.

— Сiя гортö оз мун. Лöсьöтчö эшö уджавны, — сералö Миколыс.

— Может, быль кольччан? — посöдзын сулалö Катяыс, быдöнкöт шутитö. — Пондам кыкöн кашаэз пуны. Али он? Сэк ачыт тöдан. Видзöт, виль жöниккез меным вайöтiсö, кытшöм колö, сэтшöмö и бöрйы.

— Давидыс полö тэись! — кылö Миковлöн голосыс. — Бöрйы аслыт жöниксö мöд сменасис, сэсся пыр пондан синваэзнат миссьыны.

— Тэ полан, — Миколыслö горöтчис Давидыс и пуксис машинаö.

— Давид, эн жö бöра йöз нывкаэс дын пышшы, лок жö уджавнытö, — машинаас ни пукавтöн кольлалö Катяыс.

— Локтас, локтас, мед сьöлöмыт сы понда эз сiсьмы! — пиннес гер Миковлöн.

Вöрзис машинаыс и кык часöн вайöтiс посёлокö да сувтöтiс контора одзö, Давидсö вайöтiс йöзö. Сьöлöмыс вылын лоис нач гажтöм, думайтö: «Кытчö пырны? Кин татöн видзчисьö?» Вöрас тöдiс, что уджалас, локтас керкуокö. Катяыс вердас. Шоччисян и бöра уджавны, а татöн мый?

Лэдзчисö машинаись, и сiя öшис кодь.

— Мый сулалан? Лок! — чорыта висьталiс Алексейыс. — Или пыран бы овны общежитиеö? Ме бы тэ местын сэтчин эг ов. Тöдан эд, томмес юöны да шумитöны. Тэ ныкöт он лöсяв. Кытчöдзкö миянын олан.

— Öнджа, — шуис Давидыс.

— Öнджа да бöра, — нерис Алексей. — Лок! Ловья отир, тöрам керкуас.

Рытнас нуöтö клубö.

Мый сэтчин бурыс? Кино? Но телевизорын мыччалöны буржыкö. Давидсö клубö сьöлöмыс оз кыскы, велалiс рыттэзнас пукавны телевизор одзын, но талун ёртыс нуöтö клубас: «Лок, старикас эн пöртчы!»

Пасьтасисö да петiсö гортiсь. Клубыс татöн ыджыт да гажа, не сэтшöм, кытшöм горт деревняын, и отирыс томжыкöсь, пасьтасьöмась городскöйез моз.

«Ашын жö виль ботинкаэз неба, — думайтö Давидыс, топ отирыс вылö полö видзöтны, что сылöн кöмкöтыс важ и вылас йöрносыс не сэтшöм, дзебсисьö угöлö, видзчисьö, медбы чожажык мыччалiсö киносö. Но киноыс эз вöв: öштöмась киномеханиксö, кöда несьö код, несьö мунöм районö.

Клубын пондiс орсны баян. Томмес чеччöвтiсö йöктыны.

Давидыс Алексейкöт петiсö посöдзö, пантасисö мастеркöт, здоровайтчисö, и мастерыс юалiс:

— Дежуритат?

— Висьталiсö, что лоас пö кино, но киноыс эз ло.

— Механикыс код пö, — шуö мастерыс, бöра юалiс дежурство йылiсь, но Алексейыс шуис, что сылöн очередьыс эз лок, а поди, и кырöвтiсö ни дежурствосис.

— Быдöс миян бур, — висьталiс Алексейыс. — Öтiк умöль, что трактористным бригадаас дыш.

— Дыш, сэк колö велöтны! — чорыта висьталiс мастерыс. — Некин эд быдсöн эз чуж.

— А тэ пондылiн ни велöтны?! — лöгасис Давидлöн ёртыс. — Кин кытшöм эм, мöдпöв он ни чужты.

— Велöтны колö отирсö! — эшö öтпыр висьталiс мастерыс. — Вот эта мортыс, — мыччалiс Давид вылö. — Сэтшöм жö? Трактористыс кодь жö или..

— Мый или... Сiйö зыбкасянь ай-мамыс быдтöмась мöднёж, не Миколыс моз! — шуис Алексейыс.

— Öтнёж да мöднёж... Öнi оланыс, зонка, мöдiк. Грамотнöй отирыс, уна тöдö, а уджавны дышыс петö. Вот и колö бы кыдзкö томмесö велöтны уджас, — асмознас баитiс мастерыс. А Алексейыс сiдз жö кыскис асланяс, баитiс-керис:

— Менö, мастер, некин эз велöт, быдöс ачым и сэтшöммескöт дыш петö уджавны. Керны дак керны! Вашöта бригадасис!

— Öтiкöс вашöтан, мöдiкöс вашöтан, сэк кинкöт пондан уджавны? Ачыт и кошшы отирсö. Кодяэс, бригадир, вöрас дышöтчöны уджавны, а дышшес... Кымöснысö мыччаласö, адззасö, что уджыс сьöкыт, не ны сьöртi, кок ныррезнысö бергöтасö и пышшасö.

— Но и мед пышшöны, абу дак абу сэтшöм уджалiссес, буржык, кöр öтiкыс кык местö керö! — висьталiс Алексейыс.

Давидыс казялiс ни, что ёртыс кытöн мый не сы сьöртi, ась и сiдз бы оз ков, керö асмознас — пыкö асланяс. Может, эта кытöн и бур, но не быд местаын.

— Лок гортö, — Давидыс пондiс корны гортö ёртсö, кöр адззис, что сiя споритö мастерыскöт.

— Сулав, Давид, — висьталiс Алексейыс. — Ме бы эшö мыйкö юала. — И мастерыслiсь эшö пондiс юасьны да корны виль трос, запчасттез, виль кеписсез, сiйö, мый важмö-бырö вöрын уджавтöн и нылö колö прейскурант сьöртi.

— Кытiсь ме тэныт талун быдöс вая? — серöмтчис мастерыс.

— Меным мый, кöть кытiсь вай!

— Меным бы квартира колö, — сэтчö смевмис да висьталiс Давидыс.

— Эшö öтiк шогöт кышасьö... — виноватöя висьталiс мастерыс. — Абу кытчöдз квартираэс. Ов мымдакö ёртыт ордын, сыбöрын, видзöтан кö и квартираыс лоас. — Шынньöвтiс и содтiс. — Ежели кö эшö басöк невеста адззан да гöтрасян.

— Дзескыт разь миянкöт? — обидитчис Алексейыс. — Тiян эд семья, — шуис мастерыс и содтiс гажöнжык. — Юртö эн öшлы, бура пондан уджавны, мыйкö лоас.

Клубсянь гортö локтiсö югыт сорöн, сувтiсö öшын увтö и пондiсö видзöтны керрез вылö, кöдна орлалöмась да тэчöмась йöр бердö.

— Мый керрезсис лöсьöтчан керны? — Давидыс юалiс ёртыслiсь.

— Баня бы колö тшупны да некöр. Кыдзкö отпускöдззас ола ни.

— Тшупам! — вöснит голосöн посöдзын ыкöстiс Катялöн зоныс да чеччöвтiс мужиккес дынö, радöн уськöтчис нылö паныт.

— Тэ мый он узь?! — перыта Толикыслiсь юалiс Алексейыс.

— Тiянöс видзчися! — сералö зоночкаыс. Пырисö керкуö, сёйыштiсö и водiсö узьны. Давидыс бокö поздiсис Толикыс.

— Тэнат местаыт кытöн?! — зоночкаыслiсь юалiс дядьыс.

— Меным мый... — öмыс жугалiс мöдыслöн и гырись воттезöн пондiсö вотявны синваэс.

— Кöть тi мый керö, — кинас öвтыштiс Алексейыс.

Зоночкаыс водiс Давидыс бокö сэтшöм рад, топ сытöг овны оз вермы. Мый тэ керан челядькöт, кöр нылöн асланыс оланыс.

Ойыс чулалiс казявтöг: кöда бок вылö водiс, сiя бок вылiсь и чеччис. Давидыс одзалiс чеччыны быдöннысö, шондiтöг кеслiс чер, петiс öтöрö и пондiс тшупны баня, кöда йылiсь тöн баитiсö Алексейыскöт.

Саймис хозяйкаыс, петiс посöдзö да юалiс:

— Тэ мый керан?

— Керку аслым тшупа, — сералiс зонкаыс, топ быль пондöтчис тшупны керку.

— Горе тiянкöт, мужиккез, — то ли лöгасис, то ли гажöтчис Валяыс, лонтiс гор и пондiс пöжавны пирöггез — öтöрöдз кылö чöскыт дук.

Погоддяыс гажа, кöс — уджав да уджав. И уджалö Давидыс, тюк-тюк! Баня тшупö.

Кинкö мунö улицаöт, здоровайтчö да юасьö: «Медалiс Алексейыс? Уна жö лöсьöтчö вештыны?»

— Мöссö мöдö сетны, — шыннялö Давидыс. Посöдзын китöстiс петух. Саймис ни хозяиныс, юрсö лэбтiс ольпась вылiсь и лöгöн юалö иньыслiсь:

— Кин сэтчин?

— Ёртыт тшупсьö.

— Мый сiя?... Колö шоччисьны, а сэтöн... — öтiк майканас петiс посöдзö и ыксö. — Эй, шардöм! Кытшöм пон тэнö пурис?

— Сэтшöм, кытшöм пурлö тэнö, — Давидыс бергöтiс кер.

Хозяиныслö ковсис босьтны чер да петны уджавны, а то видзöт: керрес бы йöрыс бердын мымда эшö и багсисö.

Паздiсö-тшуписö баня и неделяыс кыдз лэбзис. Субботанас бöра колö ни пуксьыны машина вылö да кайны вöрö.

Валя да Толик уджалiссесö кольлалiсö контора дынöдз. Зоночкаыс эна луннэзö пыр гардчис мужиккес дынын. Но гажыс сылöн öшис, мыля сiйö кольöны.

— Мый сэтшöм синнэт гудыраöсь? — Толикыслiсь юалö дядьыс, сералö, кöр адззö, что учöтыс гажтöмтчö. — Мый нö, Давид дядьö лöсьöтчис нуöтлыны тшаккезла, а ачыс пышшö...

— Может, тэ вöрас уджавнытö миян местö мунан?

— Муна! Мамöс адззыла и уджалышта бензопилаöн.

— Öнi уджалан бы, а быдман — уджсис пондан пышшавны.

— Тэ мый кагасö неран? — обидитчис мужикыс вылö Валяыс.

— А тэ мый мужиккес коласö ныртö сюян? Ми асьным тöдам мый колö баитны, — серöмтчис Алексейыс, жмитыштiс иньсö бердас.

— Тi сэтчин эд жö доймö, ме мылякö пола, топ сьöлöмö мыйкö тöдö, — гажтöмтчö ни Валяыс.

— Но, пондан сэтöн кырныш моз...

Пуксисö машинаö и вöрзисö туйö. Синнэз бöра гусялiсö вöррез да рассэз, кöдна нач вежсисö: вежöтiсö-гöрдöтiсö.

Машинаын бöра Давидкöт паныт пукалö Миколыс. Тыдалö, что талун сьöкыт зонкаыслö, — юрыс висьö и сьöлöмыс гудыртчö, эшö нырсö кытчöкö дойдöма — лöз гадь.

— Колька, бöра шогалан...

— Тi шогалат, — эрзыштiс зонкаыс, öзтiс папироса и куритö. Быдöн вылö лöг, топ ёрттэс сы одзын виноватöсь, а Вадимыс ошшасьö:

— Вот, воннэз, а! Неделя гортын олi и öтiк капля öмам винасö эг босьт.

— Мый одзын? Лым пондас усьны.

— Кывзö тi шаромыгасö... Ежели Вадимыс оз понды юны, сэк магазинас продавецыс говмас.

— Говмас сэтшöмыс! — сьöвзис Миколыс — Тöн менö кодувьям куим рубöн шныгис и синнас эз кваркышт. Пондылi жö корны деньгасö, а сiя кыдз кань синнэсö югдöтiс да пондiс менö жö пурны: «Тэ сэтшöм забулдыгаыс! Звонита счас жö милицияö!» — «Но и звонит. Видзöтам сэк, кин миян коласын забулдыгаыс», — лöгаси ме да мöдi ни кымöсас бутылканас шмоньгыны, но терпитi. — А мый сэтшöмыскöт керан? Нем он кер, кöр тэнö жö милицияыс сто рубöн штрафуйтас...

— Оз ков юны, Колька! — шуис Вадимыс. — Кöр ме ювлi, тöдан, пасьтöг и кöмтöг ветлöтi. А мый понда думайтан? Думайтан, быдöс деньгаыс вина вылö мунiс? Эз эд. Этö вузасиссес менö чилькöтiсö. Видзöт жö, кыдз нiя олöны.

— Да олöны уж, — горöтчис Багратыс. — Ми вöрын мырсям да сiдз керкуаным ковёрресö ог öшлö, а нiя Миков коддесö чилькöтöны, кокнит удж керöны, но будь здоров!

— Во! Сiдз миян коддесö и колö! — кыдз ошшасис Алексейыс. — Менö некин оз бöбöт, кöр садь локта магазинас.

— Сiдз миян коддесö и колö, — бöра горöтчис Вадимыс. — Эстöн посёлокас эм öтiк нывка, лось вылö вачкисьö, сэтшöм ни сiя крепыт да боёк. И мöс видзö да порссез вердö, натьтö, курöггес вит-квать, эшö кроликкез да дзодзоггез. Сiдз, Бориска?! Вот ме сы вылö и гöтрася.

— Ежели нырöмтö оз разь, — висьталiс Борисыс. — Сiя миян коддескöт уна оз баит, — и содтiс. — Гöтрась, гöтрась, Вадим. Машаыс кыдз тэнö доддялас да вылат пуксяс, сэк пондан мырсьыны-уджавны да рыт-асыв кузь песня сьывны: «Мама родная, отсав, дорогая...»

— Тэ менö, Борис, уджнас эн полöт. Ме мортыс, тöда кытöн раккес тöвйöны. — А тэ мый юртö öшлан, Сурен? — сэтöн бригадирыс юалiс Суренлiсь.

Суреныс гырись сьöд синнэзнас видзöтыштiс ёртыс вылö — беда эд, зонкаэз! Ёртныт чожа деньгасö öктас ни машина вылö, но невестасö оз адззы. Поди, кыдзкö эшö пондывны корасьны Катясö?

Шы оз сет Суреныс, натьтö, думайтö аслас Армения йылiсь — гажтöмтчö, а, поди, и Миколыс моз жö тöн тагьясис, и талун юрыс висьö, но мыйöн тöдан сэтшöм мортыслiсь, кöр сiя юас, кöть оз ю — мывкыдыс оз вежсьы и оз Миколыс моз турьяв.

— Сурен, а Сурен... Посёлокас эм öтiк нывка...

— Меным Катяыс колö! — висьталiс Суреныс и бöра öмсö кизялiс.

Лёбисö мужиккес, мый колö и оз и эз казялö, кыдз локтiсö асланыс керкуок дынö.

— Кыдз шоччисит? Мый вöтасит? Гажтöмтчöмась я иннезныт тiян понда? — посöдзын мужиккесö панталö Катяыс. Рад, топ ачыс гажтöмтчöм бригадаыстöг. — Пырö керкуас чожажык да сёйö, дöс эд кынöмныт ни кузь туяс сималiс.

— Ой, кыдз сималö! — висьталiс Миколыс. — Тэтöг öтiк лун эг сёй, сiдз ни гажтöмтчи.

— А ме эг. Адззи эстöн аслым кавалер на сто двадцать и пеллезöс адзза!

— Некöр, Катя! — бригадирыс спинаыс сайись посöдзö шупкис котома.

— Кыдз сэтчин менам? — зоныс йылiсь юалö Катяыс.

— Толикыс?.. Эта сувда ни быдмöм! — Алексейыс мыччалiс юрыс вевдöрö. — Татчö жö бы вöлi локтö, но ме эг лэдз.

Миколыс эта коста сибöтчис аслас трактор дынö, кöда матын сулалiс керкуыс дынын да видзчисис ассис хозяинсö, босьтiс ведра, шорокись гумыштiс ва, кисьтiс сiйö радиаторö. Трактористыс эз тэрмась, сылö луннэс — не пож тыр, эшö юрыс висис, но не уджыс понда, а вöлi сэтшöм спохмелля, что кык лун сьöрна сёяныс оз понды тöрны.

— Сьöкыт талун Колянымлö, — бöра ёртныс вылын сералiс Вадимыс, кöда винасö эз ю, и юрыс оз вись. — Гöтравны колö зонкасö, а то напрочь тшыкас.

Эта коста трактористыс заводитiс машинасö, кöда тыр-тыр керис да виньдiс.

— Аминь! — сьöвзис Вадимыс. — Бöра жугалiс. Важ дак важ и эм, колö только утильö кыскыны. Бригадир, мыля виль трактор он кор?

— Виль тракторыс мöдiккезлö колö, — висьталiс Алексейыс.

— Мöдiккес миянся буржыкöсь я мый я? Или нiя басöкжыкöсь?

Нем сэтчö эз висьтав бригадирыс. Локтiс тракторыс дынö и пондiс трактористыскöт гуддисьны машинаын.

«Кар-кар, — пожум вылö пуксис рака. — Кар-кар, ме Макар, а тi киннэз? Мыля од уджалö, кöр отирыс важын ни уджалöны?»

— Мыля тэнат эна винттэс личытöсь? — бригадирыс пондiс видны трактористсö. — Мыля проводыс öшалö?! Быд лун этасянь и пондöтчö, что тракторын гуддисям. Кöр сэк мöд бригадаэс сьöрö вöтчыны? Пыр пондам бöжжез местö уджавны. Ракаэс ни, мать тiянöс, сералöны! А топливнöй аппаратурасис приводыс, зонка, тьфу! — Уджассис! — Вадимыс пукалiс посöдзас да долоньнас вачкис пидзöсыс кузя. — Шаромыга! Кöр оз ков, сэк и жугалö. Шедтам бöра эта декадаын деньгасö шыш да помаленьку. Мунам, Давид, Ташкентö! Сэтчин, ёрт, яблоккез быдмöны менам юр ыждаöсь, и номмес оз курччасьö. А! Мунам?

— Ме тэныт муна! — кулаксö мыччалiс бригадирыс. — Ветлыны бöр колö посёлокöдззас да вайны запчастьсö. Машинаыс мунiс ни?

Машинаыс сулалiс керкуыс сайын. Шофёрыс гуддисис жö мыйкö моторас.

— Василий Григорьевич, колö бы чожажык лэбзьывны посёлокас механикыс дынö. Бöра эд жугалiс тракторным.

— Лэбзьыны ог куж, но нуöта, — кабинаö пуксис шофёрыс.

— Николай, пуксьы машинаас и медбы менам öтiк кокыт вöлi сэтчин, мöдыт татöн. Вежöртiн?!

— Вежöртi, — сьöвзис Миколыс и лынь-лынь локтiс машинаыс дынö, ружтiс-пуксис кабинаö, дыр видзöтiс керкулань и öвтыштiс кинас.

Машинаыс несйис тшынöн и минутаöн öшис син одзись. Вöрын лоис лöнь, только кылiс шороклöн больгöм, эшö кокасис кыр да шыасисö уркайез.

— Вот, шаромыга, — пондiс баитны Вадимыс. — Мöд лесоучастокас пö вайöтöмась сэтшöм слон кодь трактор, кöда пö ачыс пöрöтö и кыскö. Кытшöмкö вöр керан комбайн... Мыля бы миянлö медодз сэтшöмсö не сетны? Начальствоыс кыдз, шаромыга, видзöтöны, сiдз и керöны.

— А тэ эн видзöт, кыдз сэтшöм слон-тракторыс уджалö?! — нерис Вадимсö Алексейыс. — Ме адззылi, мый сiя керö. Пират вöрас. Быдöс нильö и тальö. Кытöн уджаласö, триста год вöрыс оз понды быдмыны. Ме бы сэтшöм машинасö вöрас матö эг лэдз. Мый пондам, челядь, керны?

— Мый колö керны, сiйö и керам, — висьталiс

Вадимыс.

— Тi мунö да суййисьö, а ме видзчися машинасö.

— Миянлö мый? Миянлö мый висьталасö, сiйö и керам, — пельпоныс вылö Вадимыс чапкис черсö и горöтчис ёрттэслö ни. — Локтö, шаромыгаэз. Нем тiянлö шондiыс вылiсь деньгасö лыддьыны.

— А ме мый понда керны? — öшис Давидыс.

— Тэнат мый уджыс?! — кыдз лöгасис Алексейыс. — Сiйö и пондан керны.

— Кöр Миколыс локтас? — öшис кодь Давидыс и пуксис мыр вылö.

— Талун жö локтас! — желлясис Алексейыс, ачыс пырис керкуö, а Давидыс медодз эз тöд кытчö и воштiсьны, лыддис-керис синнэзнас посöдз дынiсь пес чуркаэз, босьтiс чер и пондiс поткöтны нiйö.

— Тэныт нем керны?! — топ пель одзас посöдзсянь ыкöстiс Катяыс.

— А мый? — юрсö пессэс дынiсь лэбтыштiс зонкаыс.

— Ачым поткöта!

— А ме мый понда керны?

— Бöбöв жö тэ, зонка, — рамыника шуис Катяыс и пырис керкуö.

Давидыс уджалiс пымавтöдз ни, но машинаыс сё эз вöв. Керкусис петiс Алексейыс, гажтöма видзöтiс-керис гортлань и висьталiс ёртыслö:

— Ежели эшö вит минута оз лок машинаыс, колас аслам мунны посёлокас!

— Мыйöн?! — эз вежöрт Давидыс.

— Подöн! — Кылан, локтö ни, — сэтöн висьталiс Давидыс, кöр кылiс ни машинаыслöн шыыс.

Машинаыс чожа сувтчис керкуыс дынö, шофёрыс чеччöвтiс кабинасис да гажöн ыкöстiс: «Здоровöн олат! Дыр ветлöтi?»

— Тэ бы узин эшö...

— Поди, бы и узи, — виноватöя ни шуис шофёрыс. — Механиксö час-мöд кошши. Сiя кыз кынöмнас мунöм гаражсис катер дынö. Сыбöрын босьтi кöрт торнытö и татчö! А трактористныт, öнджа, öшис, кольччис посёлокас. Нахрен пö меным уджыс, ме пö вöрсö эг быдты, ась пö кин быдтiс, сiя и керö. Пышшис, сiдзкö, тiян дынiсь Кольканыт. Может, öнi посёлокас ни абу...

— Но гад! Шедiн бы меным, ме бы тэнö велöтi овны. Вежöм! — лöгасис бригадирыс. — Давид! Вай кыкöн тракторсö лöсьöтам! — и машинаись трактор дынö кыскис запчасттесö, а шофёрыс эта коста висьталiс:

— Мастерсö адззылi... Баитiс: поди, пö, кинöскö трактористсö иньдыны?

— Тöда ме мастерсö... — шуис Алексейыс. — Ежели луннас куимись тэнö оз бöбöт, не морт лоас. Трактористтэс, Василий Григорьевич, миян кок увтын эна кульбуккес моз оз быдмö, — брынгис мыр бокись кульбуклö. — Вот бы сэсся машинаыс эз жугав...

Машинаыс мунiс. Вöрын топ нем умöльыс эз ло, оланыс эз вежсьы: сiдз жö югьялiс шондiыс, чирзiс кытшöмкö кай, вылын небоас лэбалiс варыш, пуэз вылiсь киссис лист — вöрыс чöвтiс гожумся паськöмсö.

«Чок-чок, — вöрын рытъявылöдз кылiс шы — этö кык мужик лöсьöтiсö трактор, тэрмасисö. Кыкнанныслöн чужöммезныс нятьöсьöсь, синнэзныс був-бав, чуннезнысö дойдiсö вирöдз, но тэрмасисö уджавны, и шондi пуксян гöгöрас Алексейыс тракторсö заводитiс да Давидлö горöтчис: «Öнi, ёрт, некöр ни оз жугав! Сёям да мунам уджавны!»

Давидыс видзöтыштiс шондiыслань. Сiя, вежöтöм рöма, лэдзчисис ни вöрыс коласö. Вöрыс гажтöм, кыдз лöсьöтчö узьны и сысянь сылö недолыт. «Кытшöм уджалöм вöрас пемытiнас, кöр ылöса отирыс пондасö шоччисьны?» — эз вежöрт Алексейсö Давидыс, а сiя модис:

— Тэрмась, тэрмась! Нем тэныт гыжьясьны, колö уджавны!

Катяыс керкусис петiс песла, и сылö Алексейсянь бур оланыс абу, нывкаыслö бригадирыс ыксö:

— Катя, чожжык сёйны лöсьöт. Ми ойнас мунам уджавны!

— Кытчö? Кытшöм уджалöм?

— Но тэнö к чёрту! — сьöвзис Алексейыс, чеччöвтiс кабина пытшкö и ёртыслö ни ыкöстiс. — Мунам!

Тракторыс, кыдз танк киноын, нетшкöвтчис местасис, чеччöвтiс мыр вевдöрöт, ловзисис сук тшынöн и иньдöтчис вöрлань. Бöрсяняс посöдзсянь ыксiс Катяыс:

— Кытчö тi тшыгйöн?! Сёйит бы! — но машинасö сувтöтны эз вермы и сьöвзис. — Тöда ни ме тэнö бöб сулёмаöс. Мед. Аслат кынöмыт. Ме могись, кöть тэ кувтöдз тшыгйöн ов, иньыт разь пондас горзыны.

Делянкаö мунтöн, тракторлö пантасисö уджалiссес, кöдна пöт ни уджалiсö и локтiсö ой кежас шоччисьны. Алексейыс сувтöтiс машинасö, мыччис кабинаись юрсö и ыксö: «Одз локтат! Эшö колiс уджавны...»

— Тэ мый, бригадир, шаромыга, совесть колö тöдны, — обидитчис Вадимыс. — Кок вылiсь усьтöдз уджалiм, а тэныт сё етша.

— Эн кув, Вадим... Шоччисьö, а ми Давидыскöт ойнас уджалыштам, луннас, видзöтö, шаромыгаыс понда весь олiм.

— Кытöн Коляыс?

— Пышшис! Ташкентö... Яблоккез сёйны.

— О, шаромыга. Кодя смертьнас, натьтö, оз жö кув, — висьталiс Вадимыс, босьтiс юр вывсис шапкасö да пондiс малавны куш юрсö-плешсö, гладьöтiс и сё ныр увтас модис, но тракторыс бöра ни пондiс эрзыны сiдз, что морт голосыс эз кыв.

6

Шондiыс веж югöрнас малыштiс кыдззезлiсь йыввез, кöр тракторыс локтiс делянкаö пöрöтöм вöр дынö, чывкнитiс-бергöтчис пу йыввез одзö и сувтiс. Машинаыс дынсянь, кыдз баняись, пыкис жар — öд.

«Вот эта тракторист! — гажмис Давидыс. — Не Колькаыс кодь. Миколыс мунö, гöна гаг моз кыссьö, а Алексейыс, кыдз лётчик!..»

— Мый шыннялан?! — ёртыслiсь юалiс Алексейыс, и висьталiс. — Чокеррезнас пондан пу йыввесö кышавны. Кужан?

— Не сер серöтны, — шуис Давидыс, ачыс видзöтiс пуэс вылö, кöдна вöлiсö уна — пöт уджыс.

— Серöтан тэ... Юртö эшö пуэс увтö сюйыштан.

— Кин?! — горöтiс Давидыс, топ пель бокас вачкисö. — Мый ме, думайтан, колхозас тракторыс бердö пуэсö эг кышавлы? Вöрас эг уджав? Думайтан кольть пытшкись петi-чужи, ага?!

— Прости, извини, Давид! Ме думайтi тэнö быль курöг кольттялiс... Кышав пуэсö, только, öнджа... Быль юртö эн сюйышт и эн тэрмась! Ме эд ачым пола, тракторнас важынкодь ни эг уджав.

Шондiыс сё эшö малалiс делянка дорись пуэзлiсь йыввесö, кöр Давидыс чокернас джагöтiс медодзза пуэзлiсь йыввесö, öвтыштiс кинас виль трактористлö, и тракторыс топ дундöтчис, ружтыштiс да жагвыв вöрзис местасис и пондiс кыскыны эстакада дынöдз вöр.

Öтпыр вöрсö кыскис эстакада дынö, Алексейыс тракторсö сувтöтiс, петiс кабинасис, малыштiс чужöмсö, гажöн шынньöвтiс да ёртыслö висьталiс:

— Но, Давид, ми тэкöт, тыдалö, некытчö ог йöрмö!

— Мый сэтöн? Сер серöтны я мый я? Тэрмась, напрочь ни эд пемдiс, — висьталiс Давидыс, кöр сылöн пондiс кынöмыс симавны, и думайтiс, оз я ёртыс чапкы уджсö да мун шоччисьны.

Тракторыс дынын фараэзсянь югыт, а кыдз пондан видзöтны бокö — гу пемыт, только юр вевдöрын югьялöны звездаэз, топ му вылын только кыкöн и сэсся некин абу.

Öтпыр кыскисö вöрсö, мöдöтпыр.

«Кöть бы тракторыс эг жугав, кöть бы эг жугав, — кышалiс пуэсö да ас кежас модис Давидыс, — ежели жугалас, Алексейыскöт уна он баит, пондас бöра ойбыт гуддисьны машинаыс дынын, может, эшö, лунсö öштан. Кöр сэтöн шоччисьны?» А тракторыс кыдз думаэсö кылö, чывкнитас-бергöтчас öтiк местаын, сувтас, стекляннöй синнэс югьялöны, рапкö да видзчисьö, кöр тэ кышалан пуэсö.

Полярнöй звездаыс жагвыв вешшис рытлань, небосис öтi-öтi киссисö бичиррез. Ойшöр бöрас лэбтiсис тöлiсь. Вöрын лоис гажа, топ сказкаын, кыдз пондан видзöтны кузь мыррез вылö, нiя топ вöрöтчöны, вуджжез — зверрез.

Уджалiсö ойбыт, минута эз шоччисьö. Асывланяс ни тракторыс бергöтчытöнняс кайис мыр вылö и гусеницаыс мезмис колесоэс бердiсь.

— Эх, старуха, — кабинасис чеччöвтiс Алексейыс да брынгис машинаыслö. — Пенсия вылö колас иньдöтны. — Бергалiс-керис гусеницаыс дынын и висьталiс ёртыслö, что кышавны колас нинкöмсö.

— Кышалам, — öмсö осьтiс да нюжöтчис Давидыс, сылöн петiс оныс: водiс бы кöз увтö и узис, кытчöдз шондiыс эз пет, дзар бы эз кер нятьöсь гусеницаыс вылö, но колiс мырсьыны, и пессисö мыдзтöдз (уджавтöнняс сiдз эз мыдзö), киэз бы вевдöрö эз ни лэбтö. Сэтöн и небоыс ни пондiс жагвыв мöдкодьсявны-югдыны.

— Кышав эшö пу-мöд — бöра висьталiс Алексейыс.

Мöдыс кышалiс чокернас тракторыс бöрö пуэсö.

Тракторсö сувтöтiсö, кöр шондiыс пондiс ни малавны чужöммезнысö, и петiс онныс — синнэзныс куньсисö.

— Здорово, мужиккез! — Давидыс кылö Вадимлiсь кижган кодь голоссö. — Тi мый? Ойбыт уджалiт? Уна тай вöрсö дзимлялöмась... — Кузь мыгöрнас син одзын öвтчö Вадимыс, öмыс пыр осьта — куим пинь тыдалöны. Алексейыс чеччис кабинаись, тiлис синнэсö, видзöтыштiс асывся шондi вылö, кызöтiс-керис, сьöвзис и Вадимыслiсь юалiс:

— Тi миянлö сёйнытö вайит?!

— Нем ми тэныт эг вайö. А мый?

— Мый, мый? Он адззы эшö мымда вöрыс, сiйö эд колö кыскыны!

— Кулат эд, шаромыгаэз, мырресö йиртöн!

— Тэ кулан. Кынöм сималö.

Ыркыт асывнас. Усис кыз лысва, кöда вачкисьö пуж вылö и лун оз косьмы. Мужиккес öзтiсö биок, пуксисö сы гöгöр. Давид да Алексей пондiсö сёйны кинлiськö павжун. Мöддэс куритiсö, баитiсö, кыдз пондасö уджавны, видiсö Миколсö, кöда чапкис тракторсö.

— Вот бы уввесö суййыны машинаöн, сэк бы уджыс кокнямис, — коласаныс баитö öтiк.

— Эмöсь эд машинаэс, но миян дынын мылякö абу. Мыля, бригадир, миянлö уввесö суййыны машинаэсö оз сетö?

— Кöть мымда босьтö, висьталiс бригадирыс. — Но сэтшöм машинаыс меным оз ков. Мый сiйö видзöтны я мый я, кыдз пондас син одзын сулавны?

— Да, — сьöвзис Вадимыс. — Вот за границей керöны! А миян мый?..

— За границей, шаромыга, петуххес пö кольттялöны.

— Тэ сэк сэтчин и мун, öнджа... Пондан овны капиталисттэс моз... Деньгасö миллёнöн босьтны да отирыслiсь вир юны.

— Кин?! — лöгасис Вадимыс. — Мый ме тэныт?! Предатель?! Деньга вылö вежа Родинаöс? Эх, шаромыга тэ, Борис, шаромыга. Тэ тöдан, кöр ме шатласи пон моз, мымда тшыгьялi, кынми и косьми?!.. Шариксö эд тэ гортын уна ни буржыка видзан, сэтшöм ни вöлi менам оланыс, но... — кулакнас вачкис кымöсас. — Öтпыр бöб думаыс эз пыр, медбы мунны за границу. — Сьöвзис, гажтöма пондiс видзöтны трактор вылö. — Асьным ми дышöсь. Олам бы кокнита, сёям чöскыта, а уджавны — тюп-ляп!

— Эмöсь сэтшöммес, — Борислö лоис недолыт, что Вадимсö кыввезнас дойдiс.

— Кытшöммес?! Кöдна за границу мунöны?! — чикыртiс синсö Вадимыс. — А мый тэ сэтшöммесö жалейтан? Ме ны понда ог горзы, немымда абу жальöсь. Мед и мунöны да пешлöны чöскыт няньсö, ежели гортын оз пöтö, уна колö!

— Мылякö бöр жö локтöны бы, — висьталiс Багратыс.

— Тыдалö, весь сэтчин оз вердö, — шуис Суреныс.

— Ме бы нiйö сто вёрст матö гортö бöр эг лэдз! — нельки чочкоммис, сiдз лöгасис Вадимыс. — Кошшин бур олансö — ов. Паняв, мый шедтiн! Предательлö öтiк судыс, кыдз войнаыс вылын вöлi.

— Миянлiсь тэкöт, шаромыга, оз юасьö, — Багратыс осудитiс Вадимсö.

— Оз юасьö, шаромыга... — нерис Вадимыс Багратсö. — Совесть колö тöдны, ёрт, медбы мунны за границу, кöр тэнö этатшöмсянь быдтасö, велöтасö пятнадцать год и тэ жö куим чунись акань мыччан... Седуннэз!

— Мукöдыс, натьтö, иннезныс дынiсь пышшöны, — шуткаö баснисö бергöтiс Борисыс, кöр адззис, что Вадимыс лöгасис.

— Вадимным талун политикаöн занимайтчö, — рыг-рыг серöмтчис Багратыс.

— А мый нö... Тiян коддесö сё эд колö велöтны, — серöмтчис ни Вадимыс.

Лёбöны мужиккес — кадсö кыскöны, видзчисьöны, кöр сёяс бригадирныс, медбы сыбöрсянь кутчисьны удж бердö. Лёбöны мужиккес — кеслöны пиннезнысö, видзöтöны: делянкаö эшö кинкö локтö.

— Поди, öнджа... Бöра лешакыс лесниксö вайö... Штрафуйтас бöра...

— Кинöс да мый понда? — эз вежöрт Багратыс.

— Бура уджалам, сiйöн и штрафуйтасö, сiдз и колö! Мед штрафуйтöны. Кытöн уджалам, пу-туруныс оз кай, а кöр миян бöрсянь сэсся вöрыс быдмас? Да, шаромыга, пондасö жö кöркö миянöс пияннэзным касьтывны... Сьöлавны могилаэзным вылö, — висьталiс Вадимыс.

— Мед и сьöлалöны, сiдз миянлö и колö, кöр уджалам и дышным петö мышкыртчыны, медбы мырсö лажмытжыка пилитны, — местасис чеччис Багратыс лэчыта пондiс видзöтны локтiссеслань. — Кин уна адззö да уна тöдö, тöдан миян мый сыкöт овлö? — юалiс Борисыс.

— Мый?! — топ эз вежöрт Багратыс.

— Тэ кодьсö миян оз любитö.

— Ме тöда оз любитö, но и мый? Мый менчим босьтасö? Черсö коссим мырддясö? Но и ась мырддьöны, ме мöдiк чер босьта. Ась полöны нiя, кöдна пызан сайын пукалöны. Вот нылiсь портфельсö мырддясö — пондасö горзыны, а ме мортыс уджалiсь...

Киннэзкö жагвыв сибöтчисö матöжык, может, и видны уджалiссесö локтöны. Бригадирыс сёйис — кынöмас тэчис, талун эз тэрмась.

— Кынöм öддьöн сималiс, — виноватöя висьталiс ёрттэслö бригадирныс.

— Сёй-сёй, — кыдз ошкис Алексейсö Борисыс и вдруг висьталiс. — Японияын пö, öнджа, вöрсö керасö и быдöс местасö росöн чышкöны, öтiк ёг оз кольö, а миян мый?

— Вот бы тэнö, Бориска, министрöн леснöй промышленностяс!..

— Ме нырöс, кытчö оз ков, ог сюй!

— Хозяин миян абу, — дыр мыйись, кыдз саймис Суреныс.

— Мыля абу, Сурен? А тэ кин?

— Хо-хо, адззöмась, шаромыгаэз, Суренсис хозяин. Сылö бы ме моз жö только унажык деньга, а сэтчин, кöть трава не расти!

Матынжык ни тöдтöм морттэс, но эшö умöль местаöт, кыт кыскалiс вöрсö тракторыс, сорöвтiс мусö да разис туйсö, чожа он мун, и мужиккес видзчисьöны, кытшöм жö начальник вöрас ны дынö локтö, штрафуйтас я нiйö лесникыс, мыля умöля уджалöны.

— Да. Меным деньга колö! — ёрттэслö вдруг висьталiс Суреныс. — А тi мый думайтат? Думайтат весь ме татöн зырымöс кынта да номмесö верда. Деньга меным колö. А тi мый вöрсис кошшат?

— Ме, например, шаромыга, — висьталiс Вадимыс, — пышшала аслам судьба-злодейкаись, кöда пыр вöтлiсьö ме сьöрын да бöбöтö весь овны, а кöр и тшыгйöн асыввесö пантавны, а татöн, тiян коласын, ме морт вылö вачкися. Сiдз эд, бригадир?!

— Чож, Вадим!

— Во! Кылат, мый бригадирыс висьталö?

Матынжык ни локтiссес, вöркериссез адззöны ни, что ны дынö сибöтчö техрук, сiя усис-пöрис, но локтiс зэв, здоровайтчис.

— Здоровöн локтан! — техруклö шуис Багратыс. — Тэ мый вöрсис каёккесö повзьöтлан? Он адззы, кыдз нiя тэнö казялiсö да лэбзисö дзибьяс?

— Ышö корреспондент вайöтöм, синнэсö чикыртiс Вадимыс да видзöтiс тöдтöм зонка вылö, кöда локтiс техрукыскöт. Ме йылiсь ни мöдат гижны?

— Гижасö штрафсö, — сё полöтiс Борисыс.

— Ась штрафуйтöны. Миянöс эд тэкöт, Борис, оз штрафуйтö. Леспромхозыс эд вештас. Сылöн карманыс кыз, — висьталiс Багратыс.

— Враг тэ, Баграт, — рамыника горöтчис Борисыс.

— Мыля нö асывсянь лöгöсь? — юалiс техрукыс.

— Кин лöгыс? Рамöсь ми, только ульöн бы сёям кинöскö. Мыля трактористыс абу?

— Бригадирнытлiсь юалö, сiя тöдö, висьталiс техрукыс.

— Мый?! — сёйис бригадирыс и кыдз виньдiс да сiдз дзарнитiс техрукыслань, что мöдыслöн син кагаэс ыждiсö.

Мужиккес вылö смела видзöтiс, синнэзнас кваркыш эз кер сiя зонкаыс, кöда локтiс техрукыскöт. Ыджыт мыгöра, пельпоннэс — гор пöданнэз, только голяыс кузь кодь и дыш чужöма — весь олiсь.

— Мый вылö тэ этö мортсö вайöтiн миян дынö?! — лöга юалiс техрукыслiсь бригадирыс. — Мый сiя татöн пондас керны?

— Мый колö, сiйö и керас! — Чорыта висьталiс техрукыс. — И тэ, Алексей, кыдз оз ков, отирыскöт эн баит! Шы сэсся эз сет бригадирыс, и виль уджалiсьыс эз баит, видзöтiс ыджыт синнэзнас мужиккес вылö, кыдз брезгуйтiс, видзöт: быдöнся тöдö унажык.

— Да-а, этатшöм шаромыгасö сьöкыт лоас Катяыслö вердны, — öмсö осьтiс Вадимыс — мыччис куим пиньсö: воробей горшас лэбзяс, некытчö оз кышась.

— Но и осьта жö тэнат, Вадим öмыт... Эз на ешты зонкаыс локны, а тэ сякö шуан ни, — Вадимыслö висьталiс Алексейыс.

— Ме шуа? — Вадимыс мигнитiс веськыт синнас Борислö. — Ме некинöс ог шу, только баита.

Виль уджалiсьыс бöра шы эз сет, но пиньöвтыштiс öмсö, кыдз серöмтчис: «Видзöтам, воннэз, видзöтам...»

7

— Давид, — юалö Алексейыс, — тэ баитiн, что кужан пиланас пилитчыны?

— Думайтан, бöбöта?

— Верита, что кужан бöбöтчыны, — шутитiс Алексейыс.

— Мый пондам керны? — эшö öтпыр бригадирыс юалiс Давидыслiсь. — Пöрöтны эд колö вöрсö и суййыны.

— Ме понда пöрöтны, — висьталiс Давидыс.

— Вермас? — юалiс техрукыс. — Видзöтö менам... Кыдз бы нем умöльыс эз ло... Мыйись мый... Менчим юрöс медодз пилитасö.

— А тэ мун да видзöт, кыдз пондас уджавны... Или сувтöт бригадасö. Кöда буржык лоас?

— Сiдз ни сувтiс...

Алексейыс бöра пуксис трактор вылö, а Давидыс виль уджалiськöт, кöдö шуисö Сергейöн, да техрукыскöт иньдöтчисö делянкаö, кытiсь колiс пöрöтны вöрсö.

«Бур, — думайтiс Давидыс да гордöя гусьöн видзöтчышалiс виль ёртыс вылö. — Сетöм еныс зонкасö... Этакöт туяс пуэсö пилатöг коккезныс вылiсь октыны». Ыджыт мыгöрнас Давидыс, но Сергейыслö только пельпонöдззас. Сергейсис петасö кык Давид, а техруккес Сергейсис петасö куима, киэс зонкалöн — ош лапаэз, мороснас пыкас трактор.

«Видзöтам, видзöтам, — кыдз сералiс Алексейыс Давидсö. — Может, тэнат виль ёртыт только сёйны пондас, а уджавны ковсяс мöдiклö. Етша разь öнi миян спина вывтi Сергей коддес ысласьöны?» — «Но тэнö, Алексей... — одзлань думаэзнас баитiс Алексейыскöт Давидыс. — Тэнат сё аслат... Мыля жö бöра этатшöм зонкаыс, поди, оз понды уджавны?! Эшö кыдз!...»

— Вот сiдз! — пондiс велöтны уджавны техрукыс, кöр локтiсö делянкаö. — Медбы пуэс увтö эн пыр, вежöртiн?! Ежели пыран пуыс увтö, некин тэнö сэтiсь оз ни кыскы, вежöртiн?

— Вежöртi, — медодззаись шынньöвтiс Сергейыс. — Ежели пуыс увтö пыра, мый вылö ни, поди, сэтiсь менö кыскыны?

— Сэк вежöртiн, Сергей, кыдз колö уджавны?

— Вежöртi, Илья Сергеевич, — Сергейыс кутчисис кузь зор бердö, лэбтыштiс сiйö и сiдз ружтiс, топ му бердсис зорьялiс сто пуд сьöкыта из.

— Сьöкыт я мый? — серöмтчис Давидыс.

— Пилаытся сьöкытжык, — висьталiс Сергейыс. — Уджалö, уджалö, — тэрмöтiс техрукыс. — А ме видзöта, мый тiян петас. Мыйись-мый...

Давидыс заводитiс пиласö, нетэрмасьöмöн локтiс кыз пу дынö и пондiсö сiйö пилитны. Мед сiя ошшасис, что пиланас уджавлiс ни вöрын, но кöр эта вöлi?! Быдкодь уджын сё ни колö мырсьыны частожык. Эд нинкöмсö кыйны ни вунöтiм, а нинкöмсö кыйлiс ни эд и Давидыс. Öнi сiя эз тэрмась, медбы медодзза пуыс дынын техрукыс син одзын не позоритны жö асьсö, а умöльжык эшö, ежели, кыдз шуö сiя жö техрукыс, мыйись мый... Сэсся эд гортсö оз ни адззыв... Но... Слава енлö, пилаыс кыдз ачыс мöртчис пуас и пондiс сёйны — пилитны. Минута и... Кыз пожумыс цепьсö зэлöтiс — не одзлань и не бöрлань.

Техрукыс уджалiссес дынсянь пышшис ылö и кöззэс колассянь видзöтчис, кыдз пуэз увтсянь понок, кöда полö быдкодь зверись.

Сергейыс кузь зорнас гардсис пуыс гöгöр, ружтiс мыйкö, пыкис пожумсö, сьöласис, но нем сылöн эз пет.

— Пык! — дундöтчис Давидыс да пуыс бердiсь кыскис бы сибдöм пиласö, но сылöн нем эз пет. — Пык, Сергей!

Сергейыс зорнас пыкö пусö напрочь мöдöрö — боксяняс, дундöтчö, гöрдöтö, ружтö, но сылöн то зорыс нильдö пуыс бердiсь, то коккес нильдöны нитшыс вылын и таракан моз педзö öтiк местаын.

— Тасянь пык! — ружтö быд вынсис Давидыс, ёртыс моз жö гöрдöтö и пымалö.

Шушкö ас кежас вöрыс, топ сералö уджалiссес вылын.

Бокын, кытöнкö кыз пуэс коласын шыасьö техрукыс, кöда уджалiссес дынö оз лысьт локны:

— Мый тiян лоис?

— Давидыслöн гöг увтас кила лэдзчисис, — шынь эз кер Сергейыс.

— Кытшöм кила?! — повзьöм голосöн юалiс техрукыс. — Но тi и уджалат! Но тi и керат! Меным тiян понда тюрма лоас...

— Нем оз ло! — шынь керис Сергейыс, топ рад, что пусö оз вермö пöрöтны, кыскö папироса, öзтö сiйö и жаднöя пондö куритны.

«Мый эта? Мыля талун миян медодзза пуыс дынын жö уджыс дзугсьö? Кытшöм кань поперегалiс туйнымöс? — оз вежöрт Давидыс, сылö лоö сэтшöм недолыт, что ошшасис бригадирныс одзын, а петö, что весь ошшасис — стыдитiс асьсö. Ньылыштö курыт дульсö, бергалö пуыс гöгöр, кöда крепыта сулалö вужжез вылын и вдруг ёртыслiсь юалö:

— Кин тэнö, Сергей, вöрас иньдöтiс уджавны?

— Кыдз кин? — оз вежöрт Сергейыс, дыркодь видзöтö ёртыс вылö и висьталö. — Мамö! А мый?

— Сiдз... — сьöкыта ловзисьö Давидыс. — Тэныт эшö бы колö велöтчыны... Парта сайын бы колö пукавны, а тэ локтiн вöр керны...

— Кытчö эшö велöтчыны? Ме, дядь, важын ни грамотнöй. Тöдан, мымда книгаэсö лыддьöтi!.. Ой! Öтiк академик, натьтö, ме мымдасö эз лыддьöт и тэ, натьтö, сымдасö киат эн видз.

— Эг, — шуö Давидыс. — Вай пондам одзлань уджавны.

— Вай, — чапкö папироса Сергейыс.

— Эй! Мый ни керат? — пуэз колассянь юалö техрукыс. — Пуыс дынын матын эд сулалö да тöлыслö паныт эд пöрöтö. Пилитöм щеляс вачкисö чер и ружтiсö-керисö, заводитiсö пиланысö да пöрöтiсö пунысö. Давидыслöн киэс мыдзисö ни, сэсся нем бердö бы эз ни кутчись, но луныс вöлись только пондöтчö.

— Курит! — гажöн шуö Сергейыс, кармансис кыскö папироса, пуксьö мыр вылö и чöскыта пондöтö ньылавны табак тшынсö. Быдöс бы бур: Сергейлöн рожаыс лöсьыт и ыджыт мыгöрыс, но, тыдалö, папиросасö öмсис оз бы и чапкы.

— Дугды куритны, табаксяняс кельдöтан эд... — висьталö Давидыс.

— Мый тэ сiйö и баитан, дядь? Табаксяняс кин кельдöтö? Мыйкö ме эшö эг на адззыв сэтшöм мортсö.

— Эй, мый ни керат?! — бöра пуэз сайсянь ыксö техрукыс.

— Баняын пывсям, — висьталö Сергейыс, сьöвзьö долоннес вылö, кутчисьö аслас зор бердö. — Вай, дядь, одзлань пондам уджавны, а то, видзöт жö, эта надзирательсянь миянлö тэкöт татöн оланыс оз ло.

— Сулалö, лешöй пияннэз! — котöртö уджалiссез дынö техрукыс. — Чапкö уджсö, нем тiянлö татöн керны! Кытшöм тi сэтшöм уджалiссез, кöр öтiк пусö час ни октат? Вият эшö öтамöднытö, а ме — отвечайт! Но чапкö.

— Ачыт чапкы, — ныр увтас висьталö Давидыс, заводитö пиласö и пондö пуэсö пилитны одзлань.

Ризя-разя пöрö пу.

— Эй, берегись! — быд вынсис ыксö Сергейыс. — Берегись, виям!

Техруклöн бöра дукыс сайкалiс, только пуэс коласын гардчö тшын — бензин сотчö.

Пöрöтiсö куим-нёль пу, Сергейыс шынньöвтiс да Давидлö пель одзас горöтчис: «Сулав! Менам киам мозоллез ни...»

— Но тэнö. Кöр ештiс мозольыс аркмыны?! — уджалö Давидыс.

— Сулалö! — кысянькö боксяняныс ыксö техрукыс. — Сулалö, мыся, лешöй пияннэз...

— Мый лоис?! — Давидыс сувтöтö пиласö и шыннялö.

— Вот! — лöгасьöм техрукыс, смела ни локтiс пилитчисьыс дынö да пондiс велöтны уджавны. — Уджалö кытчöдзкö, кытчöдз пилитчисьыс оз адззись, но... Видзöтö менам! Вежöртiт? Медбы менам эд вийсьö, а то тiянöс дзебасö, а меным тюрьма! Вежöртiт?

— Мый тэ сiдз тюрьмасис полан? Ме дак тусь ог пов, — серöмтчис Сергейыс и бöра ни куритiс.

— Эн пов. Быдöс лоас бур! — гажöн висьталö Давидыс и пондö пилитчыны одзлань. Сiя рад ни, что быдöс мöдö аркмыны кыдз колö, быдöс лоас бур и тэ, техрук, ны понда эн тöждiсь.

Вöрыс ружтö, уджалö пила. Вöрын тшын — бензин дук. Ризя-разя пöрöны пуэз, водöны сьöрсьöн-бöрсьöн му вылö. Вöлi татöн аскоддя олан, кöдö векись-векö некин эз вöрöт, некин эз полöт, а öнi локтiсö отир и пондiсö разьны — керны вöр. Давидыс кытчöдзкö уджалö öтнас. Сергейыс куритö да малалö ассис мозоллесö, сыбöрын ёртыслö ыксö:

— Эй, гöгыт письтас! Эн пессьы öтнат. Вот куритсяс папиросаыс и понда отсасьны. — Шыннялö Сергейыс. — Кытчö тэрмасян? Вöрыс эд некытчö оз пышшы, видзöт жö пуэс мымда — стена! Рам зонкаыс. Кöть мый висьтав, кöть вид, кöть ошкы, сё шыннялö, только вот дышыс петö уджавнытö, а деньга йылiсь оз вунöт, кыдз пöрас пуыс, горöтö: «Эм бöра руб двадцать!»

Павжунöдз Сергейыс басниыс сьöртi шедтiс пятьдесятö, рытöдз — сто руб. Месяц конецöдз шедтас миллион, а босьтны лоас нем.

Оз любит Давидыс дышшесö — синöн бы сэтшöммес вылö оз видзöт: кытöн бы тэ эм, сэтöн и ов, кöть лунтыр курит, только пуэс увтö юртö эн сюйышт, медбы тэ понда сыбöрын прокурорыс эз кыскав, но мый керан? Оз эд аслыс уджав, иньдiсö отсасись — уна эн горав, нето пышшас и бöра жö тэнчит, Давид, юаласö: «Мыля вашöтiн мортсö, кöр сiя уджалiс?»

Техрукыс дынаныс эз ни вöв: мунiс, медбы, натьтö, грехас уна не пырны, öнi джын лунсö мырсисö кыкöн — ныррезныс нюжалiсö, мыдзисö, кöть горзы, но кыдз Давидыс видзöтас ассис уджсö, стыд лоö: Алексейыс сьöртi джынсö эз кер.

— Этадз пондам уджавны... — модьö сiя, недолыт зонкаыслö.

— Этадз пондам уджавны, месяц бöртi деньгасö некытчö лоас воштыны! — ошшасьö Сергейыс.

— Тэкöт и шедтан, мыля он...

— Шедтам!

Пессисö медодзза лунö, мыдзисö, коккезнысö му бердöт кыскöны.

Шоччисьны керкуоканыс локтiсö сёр рытöн. Давидыс посöдзын коккезсис кыскалiс сапоггесö, а аслас синнэс куньсьöны ни.

— Кыдз уджассьö? — панталö Алексейыс. — Менам бöра тракторыс жугалiс. Гусеницаыс чеччöвтiс... Но кыскалi, мымда верми.

Шы эз сет Давидыс.

— Мый он баит? Или лöгасин?

— Он петö...

— Мыдзис колхозникыс! — сералö Сергейыс, топ сылö нем и абу, бытьтö лун уджалiс и мыдзсö вывсис чöвтiс öтлаын паськöмыскöт.

— Мыдзис? А тэ эн мыдз?

— Мыдзи да эг, — кокнита горöтчис Сергейыс. — Тöдан, мымда ми талун паздiм вöрсö! Быдса ыб керим!

Пуксисö сёйны, Давидыслöн топ кынöмыс эз и симав. Катяыс одзаныс няньсö пуктiс унажык, бекöрсö ыджытжыкö да висьталiс: «Сёйö, челядь, тi талун миян ударниккез!»

«Кытшöм ударниккез, — бытьтö вöтасис Давидыс пызан сайын, — куньсисö синнэс».

Ойыс чулалiс вöтöн моз: топ эз ешты синнэсö куньны, бöр ни саймöтöны, — мыдзöсь, но колö чеччыны и уджавны.

Сергейыс бöра бöрсяняс вöтчö — лыннялö делянкаö. Делянкаын тöння моз жö Давидыс заводитö пила, тöння моз жö ёртыс медодз öзтö папироса, пуксьö мыр вылö, куритö да шоччисьö и эшö оз вунöт ошшасьны, что талун, натьтö, деньгасö шедтасö бöра!

Давидыс оз видзöт ёртыс вылö: мед кöть сiя мый керö!

Пилаыс лöга мурзьö, йирö-пилитö пу, кöда минута-мöд бöртi ризя-разя пöрö, и зэлыт струяöн воздухыс вачкö уджалiссеслö.

— Чапкы папиросатö! — Давидыс ыксö ёртыслö.

— Счас, колхозник, — сералö Сергейыс.

— Ме тэныт мыччала колхозниксö! — лöгасьö мöдыс, гичыртö пиннесö и пондö пилитны виль пу. — Лöгасин я мый я? — баитö ёртыс. — Ми жö тэкöт чеччам и водам — медбур ёрттэз. Прости, Давид Александрович, сэсся ог понды. Но простит...

— Пык пусö! Он адззы, бöра зэлöтö бы... Павжунöдз уджалiсö — вöрсö ольсалiсö, любо видзöтны. Пуксисö сёйны, Сергейыс пондiс ошшасьны аслас невестаэзöн:

— Тöдан, Давид Александрович, кöр ме велöтчи восьмöй классын, окаси Оксанакöт. Ма нывкаыс, вежöртан! Любитiс менö — сьöрам и вöтлiсис, кытчö ме, сэтчин и сiя. Овны öтамöднымтöг эг вермö. Мыся, гöтрасьны я мый я ни? Видзöта: оланыс, зонка, дзугсьö и чожжык кежи Оксанаыс дынiсь. — Куритö зонкаыс, видзöтö Давидыс вылö, кöда пöрисьжык и, натьтö, унажык ни дружитiс нывкаэскöт. — А девятöй классын бöра ме бердö Снежана лякасис. Эта сувда мусяняс — кукла, а жöник кошшö. Мый тэ сэтчö висьталан? — И вдруг юалö. — А тэнат, Давид Александрович, вöвлiсö жö невестаэс?

— Некин менам эз вöв, — сьöвзис Давидыс. Стыд лоис сылö, что сымда ни олö и некинöс эшö бытшöмик эз окав, а öнi томмес видзöт кытшöмöсь: öманыс чунь эн сюйышт — курччöвтасö быдсöн ки.

— Ничего, — шуис Сергейыс. — Ештан эшö. Может, татöн адззам...

— Вöлi öтiк, — сэтчö шуис Давидыс и висьталiс Сергейыслö, кыдз öтiк ой узис бригадирыс племянницакöт. Кодувья эд узис, ачыс нем оз тöд, а асывнас пышшис.

— Гöтрасьлiн я мый я öтiк ой кежас? — сералö Сергейыс.

— Гöтрасьлi... — пиласö заводитö Давидыс.

Талун луныс уджавтöн чулалiс кокнитжыка, унажык ни пöрöтiсö вöрсö, етшажык мыдзисö, и техрукыс нырсö ны дынö эз мыччав, сё, натьтö, полiс, медбы юрыс вылö эз пöрöтö кыз пожум.

Рытнас тракторыс вöрсö кыскавны локтiс Давидыс делянкаö.

Алексейыс локтiс тракторнас, лэдзчис кабинаись, сибöтчис ёртыс дынö, видзöтöв-керис сылiсь уджсö да гусьöнмоз висьталiс:

— Талун начальникыс вовлiс миян дынöдз. Лöг. Видчö, мыля тэ праваэзтöг уджалан. Но тэ уджав, эн пов! Ме сылö висьталi, мыся, адззы пилитчисьсö. А кытiсь сiя татöн адззас, кöр нiя коккез увтын оз быдмö?

Гажажык лоис вöрын уджавны, кöр быдöс бригадаыс öтлаын.

Рытнас керкуö мунтöн погоддяыс пондiс вежсьыны: ойланьсянь ловзисис кöдзыт да лэчыт тöв. Пондiс дзуртны пу. Вöрыс топ норасис-ружтiс, чужöмö павкисö зэр воттез.

Кöр сёйисö да лöсьöтчисö водны, видзчисьтöг Давид бокö пуксис Катя да висьталiс, что ашын сiя гортö оз мун и мед сэтчин Толикыс мамыстöг оз горзы.

— Ме сiйö тшакла лöсьöтчи нуöтлыны, — висьталiс Давидыс.

— Нуöт. Но вöрас эд жö öшö, а то менам эд зоныс. Или эшö гусялан зонöс, кöд коста ме эстöн уджала.

— Ме аслым быдта, — гöрдöтiс Давидыс. Казявтöг чулалiс кадыс, вöрын уджалiсö мöдiк вахта. Эта коста нач ни локтiс ар: ойбыт вижгис лэчыт тöв, уннялiс керкуок трубаын, угöввезын, дзуртiс пожум, öшынö вартiс зэр. Ашынас чеччисö, видзöтöны: вöрыс пасьтöм, öтiк лист абу кольччöм пуэс вылö, а тöлыс сё вижгö ойсянь, небоас нетшкö да вашöтö сук кымöррез.

Талун виль вахтасö вайöтiсö пемыт сорöн ни. Öтiк машинаöн вайöтiсö отир, мöдiкöн вайисö бензин да солярка. Локтiс мастерныс. Сiя бöра пондiс модьны, что Алексейыслö эз бы ков вашöтны трактористсö.

— Кин вашöтiс? Мыля ме сiйö вашöтi? — лöгасис Алексейыс.

— Кин сэк вашöтiс? Ме я мый я?

— Может, и тэ! — висьталiс бригадирыс, бергöтчис и Давидыслö ни шуис. — Пуксям бензовозас! Мед мöддэс автобуснас мунöны.

— Меным мый... — горöтчис Давидыс и пырис ёртыс дынö кабинаö.

— Вашöт! — шофёрыслö ни висьталiс Алексейыс. — Тэрмась!

— Кытчö тэрмасьны? — юалiс жö шофёрыс, но бригадирыс тэрмöтiс, топ гортын ендö удж, кöдö колö керны талун жö.

Машинаыс вöрзис. Керку öшын одзын вуджöртчис Катяыс.

— Адззисьлытöдз! — кабинасянь ни Давидыс кинас öвтыштiс нывкаыслö.

Тöлыс лэчытжыка вижгыштiс ойланьсянь, керку одзись чышкыштiс веж лист, гардыштiс ёгсö угöв сайö.

Туйыс зэр бöрсянь нильыг. Кабинаын пукавтöн кылö, кыдз машинаыслöн колесоэс нильдалöны нятьын, кыдз бензовозсö шупкалö гöппез дорын, но шофёрыс смев, машинасö вашöтö топ бур туйöт. Син одзын туйыс бокись лэбзьöны — бöрö кольччöны пуэз, нельки колесоэс увтö невна эз шед кай, но лэбтiсис и, кыдз киноын, öшис син одзись.

Давидыс эз велав öддьöн ысласьны машинаэзнас да эшö этатшöм шофёркöт и öнi сьöлöмыс полö, сiдз и вотьыштö мороссис.

Катыльтчö гортö вöрсянь машина, лэбзьö-мунö. Спидометрись стрелкаыс чеччöвтiс восемьдесятöдз, кылiс, кыдз кабина вевдöрын шутнялö тöлыс.

— Чожаöв мунам, — полöмöн висьталiс Давидыс.

— Полан я мый я? — серöмтчис Алексейыс.

— Пола.

— Эх, тэ, а эшö...

И сэтöн топ муыс син одзаныс бергöтчис.

8

Юрыс висьö-потласьö и бергалö, сьöлöмыс гудыртчö. Осьтiс бы синнэсö и оз вермы осьтны. Не ки, не кок оз бы кывзiсьö, кыдз не аслас. Кылiс кинлiськö инька голос, кöда баитiс и öшис. Пондылiс думайтны, но думаэс сорласисö и кыдз кытчöкö вöйис.

Мöдöтпыр саймис, осьтыштiс синнэсö и адззö биок да пызан. Пызаныс вылын кытшöмкö доз, бутылкаэз. Горшыс сотчö-косьмö. «Код я мый я? Кöр юи? — оз вежöрт Давидыс и быд вынсис ыксö Алексейлö. — Алексей, тэ кытöн?!»

— Шоччись! — кинкö небыт öнöн шебралö-вевттьö мороссö. Голосыс топ тöдса, кыдз Катялöн.

Синнэсö осьтiс да дыр видзöтiс ас гöгöрсö.

«Кытöн жö? — думайтö юрыс висьтöдз и оз вежöрт, эд топ не вöрись керкуаныс и öтöрсис оз кыв пожумлiсь шушкöмсö». — Кытöн зонкаэс? — юалö Катяыслiсь, кöда дынас мылякö сулалö чочком паськöмöн. — Тэ бöра менö эн саймöт!

— Уджалöны, — висьталiс Катяыс. Сылöн чужöмыс чочкоммöм, синнэс гöрдöтöмась, кыдз горзöм или абу узьöм, поди, и шогалö.

— Тэ мыля менö одзжык эн саймöт?! — юрсö лэбтыштö бы Давидыс, но голяыс сэтшöм зубыт, что синнэс одзын пемдыштö.

— Узь. Тэ не гортын, а больницаын, — висьталö нывкаыс.

— Больницаын?! — повзис зонкаыс, вишнитiс нырнас и вöлись казялiс, что омöн лекарство дук, мыйсянь гудыртчö сьöлöмыс и висьö юрыс. — Мый ме татöн кера?

— Шогалан.

«Шогала... Мыля ме шогала, кöр тöн эшö уджалiм?» — Кыдз вöтöн тöдвылас усьö, кыдз нiя Алексейыскöт мунiсö бензовозöн, тэрмасисö и машинаыс...»

Давидсö татчö вайöтiсö, кöр нiя берездасисö машинаöн. Куим лун зонкаыс куйлiс садьтöг. Сыбöрын öтiк лун кежö садясьлiс, пондылiс баитны и рытнас жö кылыс бöр öшис. Шогалiс сьöкыта. Врачыс луннас вовлiс неöтпыр, бергалiс дынас, сестраэс бытшкалiсö уколлэз.

Больницаын синйисö бура, но медбöрья ойесö пукалiс эшö и Катяыс. Сiдз колiс бригадирыслö. Мужиккес Катясö иньдiсö шогалiсьыс дынö, медбы Давидыс дынын вöлi асланыс син.

А эта коста гортын гробйын куйлiс Алексейыс, сэтшöм горе да синва, кöть керкуас эн пыр. Катяыслö бы эна луннэзö унажык колiс лоны сойыскöт, но Валяыс жö висьталiс: «Мун да шогалiсьыс дынын узь öтiк ойсö, дозирайт, сылöн эд татöн не вон, не пон... Оз вунöт, дак кöркö спасибо висьталас...» Горзö инькаыс, синнэс пыктöмась, кöр вöтiс сэтшöм горе, что мед еныс мöдiклö оз шу.

«Мый нiя и керисö?! Мыля и берездасисö?!» — сiя и басни посёлокын.

— Ачыс виноватöй. Эз ков шофёрсö тэрмöтны!

— Кин рульыс сайын вöлi? Алексейыс я мый я? — шуас мöдiк.

Посёлокын эм кытчöдз мый баитны. Беда посёлокын, сiя и басни, кыдз берездасьöм машинаыс, да вийсьöм Валялöн мужикыс и доймöм Давидыс, кöда ловья и абу ловья — ен тöдö, а вот шофёрыслö нем абу лоöм. Сiйö арестуйтiсö да нуöтiсö милицияö. Мый сэтiсь, что мортсö пуксьöтасö тюрьмаö? Челядьыс кольччасö айтöг.

Катяыс талун пукалö Давид дынын больницаын, ачыс и не ачыс — горесянь сьöлöмыс измис, горзö гусьöн — синванас пöтны оз вермы, небыта малыштас зонкалiсь юрсö, гусьöн юалас: «Мый тiян и лоис?»

— А?! — кыдз повзяс Давидыс, синнэсö осьтас, дыр видзöтас Катяыс вылö да юасьö. — Катя, мыля горзан?

— Ог горзы, — нывкаыс вирснитас нырнас, чышкас синваэсö. Голосыс мыдз.

— Мый керö Алексейыс? Ми, натьтö, машинанас эд сыкöт вöлiм?

— Уджалö, — пиньöвтчö öмыс Катялöн, ньылыштö синваэс сорöн дульсö, ружтö морос тырнас. — Тэ эд öтнат доймин... — Кутö зонкаыслiсь кисö, кöда чочкоммöм, кыдз некöр абу уджалöм.

— Катя, тэ мыля горзан? — Дугдö горзыны! — пырö врачыс да чорыта висьталö Катяыслö.

— Ме ог горзы, — виноватöя висьталö нывкаыс, аслас синваэс сiдз и визывтöны.

Давидыс пондö думайтны мамыс йылiсь и шуö:

— Катя, гижин бы мамöлö письмо, мед сiя оз гажтöмтчы. Ачым бы...

Сьöкыт больницаын шогавны, и здоровöй мортыслö овны сьöкыт. Воздухыс сьöкыт, шогалiссес кивзöны да ойзöны, кин бы кулö, кин веськалö. Давидыс топ больницаас шедiс медодзись и этасянь сылö эшö умöльжык. Вермис бы, пышшис...

Катяыс петö палатаись, кытiськö вайö ручка, пуксьö Давид дынö и пондö гижны письмо. «Здравствуй, мама!» — гижö нывкаыс и повзьö: «Сiя разь меным мам?!» Думайтö-керö, но кыввесö оз веж и содтö, что сiя — зоныс, донтiс веськыт кисис чуннесö, веськöтчö больницаын, ачыс ручкасö видзны оз вермы и письмосö тшöктiс гижны нывкаэслö. Тэ, мам, эн тöждiсь, сiя чожа веськалас, пондас уджавны и тiянлö иньдас деньга. Иньдас я деньгасö Давидыс, Катяыс оз тöд, но колö пöриссеслiсь бурмöтны сьöлöммезнысö...

— Мыйкö уна ни гижан? — зонкаыс юалö Катяыслiсь. — Ме тэ местын сымдасö эг бы вермы гижны.

— Лыддьöта, — висьталiс нывкаыс. Давидыс кывзiс, кывзiс да серöмтчис:

— Кужан. Тэныт только пöриссескöт и овны.

— Мый разь полi бы? — шуö нывкаыс.

— Катя, а тэ мыля он уджав? — вдруг Давидыс юалiс нывкаыслiсь.

— Мöдiк ме местын уджалö... Ме жö не öтiк смена вöрас олi.

— Сэк бур. А то думайтi ни, мыся, ме понда он уджав.

— Мый кöть бы и тэ понда? Кин татöн эшö тэ дынö локтас? А мужиккес шуисö: «Катя, тэ мун больницаас и ов кытчöдз Давидыс дынын. Сылöн эд некин абу, а йöззэс тöдан кыдз...» Вот ме и ола лун-мöдсö...

— Толикыс мый керö? — зонкаыслö усис тöдвылас Толикыс.

— Мый сылö керны? Котрасьö садикö.

— Гажтöм татöн, — норасьö шогалiсьыс.

— Мыля гажтöм? Тэ эд не öтнат. Видзöт, мымда шогалiссес.

Рытнас нывкаыс мунö гортас. Давидыс кольччö больницаö, медбы джендöтны сьöкыт да кузь луннэз.

Эта коста кымöра лунö дзебисö Алексейсö. Кöр гробсö сюйыштiсö гуö, лэбзисö медбöрья туриэз, нiя гажтöма кривзiсö — янсöтчисö тöв кежö, медбы локны тулыснас, но Алексейыс сэсся оз ни берт, некинкöт оз ни пантась.

Чулалöны арся кöдзыт луннэз, кыдз горзöны.

Давидыс веськöтчис больницаын. Сылö лунiсь лунö лоис кокнитжык, мед и юрыс сё эшö бергалiс, и врачыс эз лэдз уна ветлöтны да чеччыны кроватьыс вылiсь.

Сьöкыт да гажтöм больницаын уджалiсь мортлö, сизимись ни сьöкытжыка уджалiс бы вöрын, нежели боккесö пöжны бы татöн.

Чулалö куим лун и видзöтö: палатаö бöра пырö Катяыс. Сьöрас вайö гöснеччез: яблоккез, конфетаэз, пирöггез.

— Этö мый вылö? — кыдз обидитчö зонкаыс, но сьöлöмыс гажöтчö: вот оз вунöт сiйö нывкаыс! Катяыс ветлöтö и уджалö сöстöм воздух вылын, а умöльтчöм, кыдз шогалö.

— Шогалан я мый я? — юасьö зонкаыс.

Сэтöн нывкаыслöн синваэс мезмисö. Сiя мышкыртчис зонкаыс морос вылö и öмтырьяс курччöвтiс одеялосö.

— Мый лоис, Катюша! — повзис ни Давидыс, и мöд шогалiссес петiсö палатасис, кöр адззöны, что эна кык морт коласын асланыс горе, кöдö колö янсöтны йöз отиртöг. Давидыс смела кутiс Катяыслiсь кисö, жмитiс моросыс бердö.

— Умöль Алексейыслö... — юрсö лэбтiс нывкаыс, чышкис синваэсö, видзсис, видзсис и висьталiс. — Сiя эд тэкöт жö машинаас доймис... Дзебим ни...

— Мы-ы-й?!..

Горзыны и колö, кöр сэтшöм олан вöтас, рокыс янсöтас меддона морткöт, кöдакöт сэсся он ни пантась: эд мортыслö усьö овны öтпыр, сэсся тэ сiйö он адззыв, кöть ачыт пондан овны сто год. А эта коста мöдiккез гажöтчöны, шондi шонтö, пуэз быдмöны, кайез сьылöны — быдöс природаыс олö мортыс понда...

— Катюша, ме тiянöс ог чапкы, — висьталö Давидыс.

Янсöтiс ассис горесö Катяыс, и топ сьöлöмыс вылын лоис кокнитжык.

Не вон эд Алексейыс Давидыслö, абу родня. Пантасисö неважын — месяц-мöд эз чулав, а вот бедаыс вöтiс — нетшкöвтiс мыйкö зонкаыс сьöлöмись, кыдз öштiс роднöй вонсö, кöдакöт топ быдмис öтлаын, öтiк бекöрись сёйис, уджалiсö öтiк делянка вылын.

Гажтöм. Бур, что оз вунöт Катяыс, нем вылö оз видзöт, ылiсянь локтö районнöй больницаöдз, пукалыштас дынас — етша баитö, но уна отсалö, оз сет кольччыны öтнасыслö сьöкыт думаэзкöт.

Талун нывкаыс час етш пукалiс палатаын, пондiс лöсьöтчыны гортö, ачыс баитö:

— Сёй да веськав чожажык! Тэ йылiсь уджалiссес быд лун юасьöны.

— Мый нiя ме йылiсь юасьöны?

— Баитöны, мый ни керан, кöр веськалан.

— Чожа ни веськала! — ошшасьö Давидыс.

Но одзöв ошшасьö. Больницасис лэдзисö только сэк, кöр Алексейлiсь кулан лунсянь пондiсö касьтывны сорок дён.

Давидыс мезмис дука да сьöкыт воздухись, петiс больницасис, но юрыс бергалö и коккес оз бы кывзiсьö. Кыдз подöн посёлокöдз мунны пятьдесят километрасö, кöр некин татöн тöдсаэс абу, некин вылö надейтчыны? А сэтöн вдруг мунö туй кузя, юрсö öшлö, и бокас сувтö машина да шофёрыс юалö: «Тэ Давид?» — «Кин сiя сэтшöмыс, что тöдö менö?!» — кыдз повзьыштiс зонкаыс, но шофёрыс висьталö ни: «Пуксьы! Мунам».

Посёлокöдз туйыс кузь, арся, нять да гöп сiдз, что туйын чулалiс часся унажык, и луншöр гöгöрын Давидыс шагнялiс ни посёлок улицаöт.

Мед и вöлi кöдзыт, кымöра, кайес ни етша и улицаын отирыс эз тыдалö, но зонкаыс кыдз мезмис кытiськö — юрсö видзис вылынжыка ни.

Вот бы эшö Алексейыс... Кыным матынжык ёртыс керку дынын, сыным сьöлöмыс вылын сьöкытжык, кöть пышшы... Но асьсö вермис, локтiс тöдса посöдзыс дынö. Видзöтö, сэтöн сулалö тöдтöм пöрись мужик. Сiя тоша, синнэс и рожабаннэс гöрдöсь, а ныр йылыс лöз. Ылiсянь вежöртiс, что мортыс код.

Зонкаыс здоровайтчис. Пöрисьыс паныт мурзьыштiс: «Здорово!» и сiдз дзарнитiс, топ сылiсь мыйкö гусялiсö донаö, но мый? Ачыс оз тöд, вот и пиньласьö, вот и лöгыс петö — кучикас оз тор.

— Тэ кысянь, дед? — юалiс Давидыс.

— Ме кысянь? Педöт карта бöрсянь, — пишкис-керис и содтiс: — Ме Алексейыслöн кöркö вöлi ай. Локтi зонкасö касьтывны... — пондiс мурзьыны. — Мый тi бöб юррезнаныт и керöмась? Колiс разь бильзовозас пуксьыны, кöр автобус вöлöм?! Сэтчö бы тiянöс ньöр кыза шатьöн пывсьöт да пывсьöт, медбы тöдiт...

«Кытшöм ай? Алексейыс топ айнас эз ошшасьлы...» — старикыс шоч пиннез вылö видзöтiс Давидыс и эз верит, что эта мортыс вермис кöркö лоны Алексейлöн ай.

— Мый тi керит? — дзуртiс кыз голоснас старикыс.

«Мый ми керим?» — недолыт Давидыслö, топ öтнас ни виноватöй, что сiдз петiс, что колiс бы посöдзыс дынсянь бергöтчыны и мунны аслас туйö — не дзугны йöзлiсь олансö, но сэтöн керкуись петiс Толикыс да гажöн ыкöстiс:

— Дядя Давид, дядя Давид! — чеччöвтiс посöдзсянь, öшöтчис голяыс бердö и пондiс горзыны да норасьны. — Дядьö эд кулiс. — Ачыс окалö, гажтöмтчöм. — Дядя Давид, ми тэнö видзчисям.

— Эн горзы, Толька, — синваэсö чышкис Давидыс. — Эн горзы...

— Э-э-э, öнджаэз... — пöрисьыс пондiс мурзьыны томмес вылö.

Кайпоз вылын чирзiсö воробейез. Карта вылiсь петiс Алексейлöн поныс, ниртчис Давидыс коккез дынын.

Пырисö керкуö. Ыбöс коласын жö нырö вачкис пöд дук. Керкуын тыр отир, унажык пöриссез. Нiя сулалöны пызан гöгöр да юрбитöны енлö. Пызан вылын быдкодь сёян.

Одзжык Давидыс осудитлiс касьтiсянсö, кöр гортын мамыс пöжасьлiс да этадз жö юрбитiс. Сэк петавлiс керкусис, но пирöггесö сёжö сёйлiс.

Талун касьтылöны ёртсö и мед касьтылöны, нем умöльыс оз ло.

Давидыс пырис керкуас да сувтчис ыбöсыс дынö, аслас сiдз и петiсö синваэс, но видзсис. Эз и веритчы, что Алексейыс абу ни ловья, вачкисис, топ ёртыс гортын, вот мыччисяс комись да шуас: «Пуксьы! Мый порогыс дорö кынмин?» Но комсяняс ёртыс эз ни мыччись...

Сьылiсö-горзiсö старухаэс, юрбитiсö.

Давидыс юрбитны эз куж, пуксис порог дорись скамья вылö, чышкис синваэсö и малалiс юрсö. Толикыс ниртчис-керис сы дынын, комись петкöтiс пирöггез, пуктiс öлöдзас и пондiс кеймисьны: «Сёй, дядь, тэнат эд кынöмыт сималö!»

— Ой! Тэ мый керан? — кыдз саймис инькаэс коласын Валяыс. — Локтö жö, мужиккез, сёйыштö. Давид одзын комын вина, быдкодь сёян. Хозяйкаыс кеймисьö, медбы зонкаыс талун керкуас вöлi хозяин, а Давидыс думайтö, что пондасö отирыс серавны, кöр ёртыс эз ешты кувны, а сiя сэтöн и эм... Медодз эна жö старушкаэс осудитасö.

Валяыс горзiс быд шагын, пызан сайын и комын, öтöрö петö и пырö — горзö. Кыдз сэтöн овны, эд Давидыс оз куж бурöтны инькаэсö? — Кужат зырымнытö ниртны, — этö дзуртö Алексейлöн айыс, кöда öтöрын и керкуын уна кылö и уна адззö, быд местаын сiя и эм.

— Старик, стыдитчы! — видöны пöрисьсö, но старикыслö, кöть синнэзас пöимöн койышт, сё ассис.

Давидлö больницаыс бöрсянь недолыт, чожа мыдзö, юрыс висьö — пызан сайын куньсьöны синнэс.

— Тэныт письмо, — отирыс коласiсь петiс Катяыс да сетiс конверт.

Гортсянь письмоыс. Зонкаыс гажмис кодь, разис письмосö и лыддьöтiс. Пöриссес гижöны, что шогалöны, гажтöмтчöны, быд лун горзöны, кöр керкуас некинкöт кыв горöтчыны, некин пес оз пырт, ва оз кайöт. Мый и лоас, кыдз и пондасö одзлань овны, ежели смертьыс дыр эшö оз лок? Вежöрт, что айыс да мамыс горзöны сы понда — судьбанысö пурöны, что быдтiсö зоннысö, а сiя видзöт кытöн...

Мöдöтпыр бы, натьтö, Давидыс шуис: «Олат. Од кулö!» Но талун жальöсь пöриссес. Этадз жö куласö и сэсся оз адззыв.

— Кин гижö письмосö? — юалiс Толикыс.

— Дед да баб, — висьталö Давидыс. — Гöститны корöны. Мунан?

— Ме? Муна! Мам, ме Давид дядьöкöт гöститны муна!

«Кокнита жö эшö, кага, олан!» — думайтчö сэтöн.

— Видзчисьö тэнö кинкö! — Катяыс видö зонсö, адззö, что Давидыслö недолыт, сiйö тшöктö водны да шоччисьны.

Касьтiсисö-керисö пöрисьпöлöс и мунiсö горттэзаныс. Керкуыс кыдз кулiс, быд шыыс бытшкö сьöлöмö.

Давидыс туй вывсянь онмöссьыштiс и бöр саймис: порог дорын старикыс ружтö да куритö, ветлöтö öтöрö да керкуö, быд шагын инькаэс бердö лякасьö.

Öтöрын пемыт ни. Посöдзын чеччöвтiс кань, мутшнитiс керкуыс быдöс — эна шыэс талун павкöны сьöлöмö, полöтöны инькаэсö, нiя полöны кулöммезiсь.

— Давид дядь, — никсö Толикыс. — Менам юрö висьö, мунам тшакла.

— Ойнас, да кöдзыт вöрас? — оз вежöрт Давидыс.

— Ашын.

— Ашын колö садикö мунны! — видö мамыс.

— Ме сiйö нуöта! — кижгö Алексейлöн айыс, мыччалö кöс кулаксö. — Ме тэнö!

— Давид дядь, дорйы! — Давид бердö жмитчö зоночкаыс.

Старикыс талун нёштöм: синнэс гöрдöсь, нырыс эшö лöзжык, юрсиыс пашмöм, лолалö-шутнялö, кызöтö, но öмсис оз и чапкы чигаркасö.

Ойыс чулалö, кыдз шогалö. Асывнас Давидыс саймö сiйöн, что кылö горзöмсö Катялiсь — матын инь мортлöн синваэс. Зонкаыслö одзжык кажитчис, что Катяыс чорыт, лёк, нем сылö оз мöртчы — не шогöт, не горе, а петö...

Локтiс виль асыв. Эз ешты югдыны, керкуас бöра ни пырö Епимика баб. Сiя отсасьö хозяйкаыслö: лонтö гор, пöжасьö, пусьö и ештö петавны пода дынö карта вылö. Киэс пöрисьыслöн уджалöны и öмыс оз тупкась. Епимикаыс медöддьöн оз радейт Алексейлiсь айсö, сiйö и керö — старикыс вылö ыксö, велöтö бы овны: «Тэ бöра куритан! Тэ бöра джоджас сьöлалан!» Но старикыслö нем оз мöртчы, сiя пукалö да жаднöя куритö порог вылын. Сылöн дрöжитöны киэс, тырппес, но лэчыт гудыра синнэс сiдз и бергалöны, керкусис чувйöны быд угöвсö.

— Дед, мый öштiн?! — ыксö Епимика старухаыс. — Мый варыш синнэзнат кошшан?!

— Тэныт мый? — лöгöн жö отвечайтö старик. Епимика бергалö гор гöгöрын, лöсьöтö сёйны, но не эта стариклö (Сэтшöмсö эшö вердны?! Сылö ыбöс бöрын местаыс!), сё ыждалö:

— Стыд тэныт абу? Ен грехсö он тöд. Кулан, дак мöдöр югытас тэкöт уна оз пондö баитны, пым пöим вылын пондасö пöжавны.

— Ага, — старикыс сьöвзис коккес увтö и джоджас ниртiс дульсö сапогнас, ачыс сё видзöтiс Епимикаыс вылö, кыдз лöсьöтчис сiйö ньылыштны. Ружтöв-керис да чеччис местасис и ружтытöн жö да мороссö малавтöн кольмöм моз мунiс öтiк угöлö, сыбöрын люкасис мöдiкö, кызöтiс, гуддисис-пешлiс быд местаись быд торсö, топ мыйкö öштiс донаö да эз адззы и этасянь чужöмыс вылын лоис эшö лöгжык.

Вдруг старикыс кровать вылiсь ен угöлö швыргис подушка, кульыштiс одеяло, простыня и нiйö чапкис ен угöлас жö и сэтчин жö лэбзис сартас пес жуг. Пöрисьыслö киас шедiс каньыс, кöдö Алексейыс любитiс овтöнняс и кöда öнi ниртчис быдöн коккез дынын, старикыс и сiйö кутiс бöжöттяс да шентiс ен угöлас.

— Бöбмöм! Вашöтö кикиморасö керкусис! — ыкöстiс Епимикаыс, но кин бöб юрсö вашöтас, кöр инькаэслö вöлi не сы дынöдз, а Давидыс не гортын — эз бы киэсö лякöсьт сэтшöмыс бердö, кöр больницаыс бöрсянь талун юрас тöв дзик вижгö — кытшöмкö аскоддя шы, недолыт. Этасянь, что керкуас хозяиныс эз ло, пöрисьыс пондiс кок увтсис гардны половиккесö. Киэзнас уджалö и öмнас быдöс вермö:

— Зонöс ачым быдтi! Ачым... Р-р-р, мый колö, сiйö и босьта, мед доброыс некинлö оз кольччы.

— Старик, эй, старик! — пöрисьыслö кеймисис Епимикаыс. — Мый тэ половиккезнас керан? Босьт пызаныс вылiсь скатертьсö, зеркалосö нöбöт, йöрнöссэсö пыж кынöмат кышав, вешьяннэсö таракан коккезат кöмав, шапкасö бöб юрыт вылö пукты, но мый вылö тэныт бырöм сапоггес, кöднаöн карта вылас ни оз туй петны?! Мый вылö, баля юр?!

— Тэ, пöрись кöин, уна эн адззы! — эрзыштiс старикыс. — Ме зонсö ачым быдтi! — кытiськö киас шедiс Валялöн важ платье и сiйö чапкис ен угöлас.

Старикыс дынсянь патшкис багсялöм дук, поди, важ паськöмсянь, кöдö сiя кыскалiс быд угöлiсь, поди, ачыс ни багсис да тшынсялiс вина юöмыс да куритöмыс вылö.

Давидыс видзöтiс старикыс вылö и думайтiс, кыдз пондiсö миян öнi дзебсьыны, кöр одзжык эта вöлi святöй дело. А öнi... что свадьба, что дзебсьöм — öтiк, кисьтасö горшаныс вина и зызöны — сьöлöм гудыртчö. Епимика старухаыс видзöтiс-керис бöб мортыс вылö, кöдö керкуас некин эз падты и сьöлöмыс, тыдалö, öзйис.

— Тэ мый керан, нинкöм чужöм?! — ыкöстiс старухаыс. — Тэ мый керан?! — Вдруг гор дынiсь угöвсис босьтiс ухват и сiйöн уськöтчис Алексейыс ай вылö сэтшöм кокнита да чож шаггезöн, топ бабыв быркнитiсö ухватыслöн вожжес одзлань. — Ыы-ы! Вирöсь синнэтö кыскала! Дедыс киас эта коста видзис бырöм пими и бöрöн-бöрöн пондiс вешшыны джодж шöрсис, но пимисö эз лэдз.

— Чапкы пимисö, нинкöм чужöм! — ыксiс Епимикаыс, мöртiс ни ухватыслiсь йыла вожжесö старикыс кынöмö. — Чапкы, мыся, пимисö, курöг позiсь суседку!

— Тэ мый? Тэ мый, старуха? Он жö эд кишкаэзöс лэдз? — старикыслöн чужöмыс лöзöтiс.

— Лэдза! — горыс бердö ни ухватнас старухаыс пыкис дедсö. — Кöть грех, кöть абу, а вия ме тэнö, старик! — Дундöтчис Епимикаыс, чужöмыс гöрдöтiс, киэс чорзисö — бес орсiс бабыс сьöлöмын.

— Баб! — öтöрö петалiс Давидыс, пырис и чепöссис пöриссес коласö. — Баб...

Старикыслöн горыс бердын синнэс ыждiсö, кылыс ни öшöтчис öмсис, киргис ни баран моз, кöдалö горшас мöртöны пурт. Секунда и — кулас! Но кисис сiдз бырöм пимисö эз и чапкы — видзис. Сэк старухаыслöн киэс сыр-лёль öшöтчисö, небзисö, усис ухватыс, и пöрись баб горзöм сорöн висьталiс:

— Сёй, нелюбöй чужöм, пимиэсö. Нятьöсь чышьянсö ньылышт. Нем ни абу жаль...

Алексейлöн айыс вдруг люшмис жö, кисис уськöтiс важ пимисö. Сылöн небзисö коккес, öшöтчисö киэс, пондiс киргыны, ружтыны, топ горшас Епимикаыс быль ни заргис ухват оропсö.

— Тюрьма тэныт, старуха, — киргыштiс старикыс, стенаэс пöлöн кыссис порог дорöдз, шляпкисис пуксис порогыс вылö, ружтiс-керис да мöдпöв шуис. — Тюрьма тэныт, старуха, лоас, но ме зонöлiсь паськöмсö нöбöта!

Кытöн тэ одзжык вöлiн, дед? Мыля посёлокас эн мыччась, кöр зоныт вöлi ловья? Натьтö, эд Алексейыс тэныт нем бы эз жалейт — юрсянь коккезöдз кöмöтiс да пасьтöтiс, а öнi тэ стыдитан асьтö и отирсö посёлоксис позоритан.

Видзöт, Давид, оланыс кытшöм. Тэ эшö абу пöрись, видзöт, кыдз олöны отирыс, да пель саят тэч — быдöс пригодитчас, ежели совестьтö он öшты, бурсö — бур местö пуктан, умöльсö — коккет увтö талян.

Старикыс ружтiс-керис, кызöтiс, öзтiс папироса и пондiс куритны. Сiя эшö эз лöсьöтчы кувны.

Сэтчö пырис лесоучастокись мастерыс. Здоровайтчис да пуксис порогыс дорö жö, пондiс юасьны, кыдз дзебисö да касьтылiсö Алексейсö, жалейтö бригадирсö, кöда кодь, видзöт, некин эз вöв и сэсся сэтшöм мортсö он ни адззыв. Баитö мортыс инь отиркöт, бурмöтö сьöлöммезнысö, а нылöн сьöлöммезныс вылын обида, мыля мастерыс бригадирсö дзебтöн эз вöв, мог адззöм и кайöм сiя лунö вöрö. Мед... Аслас совестьыс. — Сытöг дзебисö кыдз колö.

Пуксис старикыс бокö мастерыс и пондiс Давидлiсь юасьны здоровьесö, видö шофёрсö, кöда асныра, некинöс эз кывзы, бöба вашöтiс машинасö и берездасисö.

— Кин сэтöн виноватыс? — юалö Николай Викторовичыс.

— Кин виноватыс?! — бöра лöгасьö Епимика бабыс и веськыта висьталö, — тi, Николай Викторович, виноватöсь. Начальствоыс. Мыля одзжык эд адззö, что шофёрыс вöлi бöбöв? Разь етша сiя рульыс сайын пукавлiс код?! Может, сылöн асывнас вöлi спохмелля? — Сiя эз ю уджавтöнняс, — асьсö дорйö мастерыс. — Асыввезнас эдö, поди, нiйö медикыс проверяйтö...

— Проверяйтö... — нерö мастерсö Епимикаыс. — Кöть сысся этатшöммесö проверяйт (мыччалö старикыс вылö) сё юöны да сiдз, что некытшöм пон оз тöд мымда юасö. Мый тэ меным сiйö висьталан, кöр менам старикыс сэтшöм жö — жöргас палитура али нянь вылас ви местö вöвдас кытшöмкö, тьфу, господи! И бöбмö...

— Ог тöд... — недолыт лоис Николай Викторовичыслö.

— Он тöд... — нерис старухаыс мастерсö. — А ме тöда. Ачым кодя шофёрретö юктавла. А кытчö воштiсян, кöр миян коддеслö колö öтiкö вайны, мöдiкö кыскыны? Винатöг öнi кин тэныт, кытшöм кляп керас? Кин дынö бутылкатöг локтан?!. Да некин тэ вылö дзар оз кер. Юис шофёрныт, вот и мортсö торкис. На! Видзöт... Валяыс кытшöм томöн кольччис. Слава богу, штö Давидсö эшö эз вий!

— Сiдз, баб! — содтiс Алексейлöн айыс. — Сiдз, вакрамешшез! Мыля ме винасö пондi юны? Сiйöн, что уджалi трактористöн. Во... Медодз тракторыс вылö пукси, а öнi мый?

Мастерыс только кваркышалö, сыбöрын Давидлö шуö: «Лок петалам öтöрас...» Петiсö посöдзö, мастерыс юалö:

— Кыдз здоровьеыт? Пилаыт эд тэтöг вöрас горзö... Некинлö лоис уджавны, öтiк пондылiс пилитчыны, но чожа коскас сöтiс и пышшис. Разсяс Алексейыслöн бригадаыс. А эз бы ков разьны... Дружнöя тi уджалiт.

— Менам эд корочкаыс абу... Мыйись мый...

— Тэ сы понда эн горзы. Ме ачым адззылi, кыдз уджалан. Коркаэс лоасö, медбы только здоровьеыт вöлi!

— Тэ, мастер, зонкасö эн бöбöт! — сэтöн оссис керку ыбöс и кылiс Катялöн чорыт голосыс. — Он адззы сiя кытшöм...

— А тэ мый сiйö сiдз дорьян? — сералö.

— Сьöлöм висьö, вот и дорья!

9

Чулалiс эшö öтiк сутки. Рытсяняс зэрис, а ойнас мичамис и асылыс локтiс сöстöм, кыдз миссьöм.

Давидыс чеччис одз, гусьöн лöсьöтчис, пасьтасис да только и петны керкусис, но Валяыс саймис, сэк жö гор одзын чиж-паж пöжалiс кольттез, нiйö сковородаöн пуктiс пызан вылö и висьталiс:

— Давид, сёй. Челядёкас эн пöртчы. Тшыгйöн кытшöм удж?

Зонкаыс сёйис и быдöннысся одзжык локтiс контора дынö. Вöлi эшö пемыт сора. Воробейез эшö эз чирзö. Юыс, тыдалö, шебрасьöм сук чочком туманöн, визывтö да ружтö ас кежас. Контора дынын сулалö ни сторож, панталö Давидсö.

Чожа мыччисис кузь да топыт мыгöрыс Сергейлöн. Чывкнитiс зонкаыс Давид дынö, здоровайтчис да юалiс: «Веськалiн?!»

— Веськалi! — гажöн шуис Давидыс, кöть и вöлi недолыт жö эшö.

— Бур. Талун бöра кыкöн пондам уджавны.

— Сё жö тэ, Сергей, дышöв, — сторожыс модис ассис. — Видзöт, Давидыс больницасянь, но тэнö одзалiс. — Ась. Мед одзалö, мед уджалö. Сiя пöт больницаас шоччисис, а ме ачымöс ой и лун нярьяла! — лöгасис Сергейыс. — Чожа эта уджыс гробйö водтöтас, дед.

Лоис югыт ни и перытжыка пондiс чукöртчыны отирыс контора дынö. Чожа локтiс мастер, кöдалiсь Давидыс корис гидроклин, ежели мыйись мый... Сергейыслö эз верит, кöда, натьтö, бöра пондас унажык куритны, етшажык уджавны.

Кытчöдз кайисö вöрö, шуч туй зэрышалiс. Бригадаын отирыс нiя жö, только содiс тракторист, кöдö Давидыс эшö эз адззыв и Алексейыс местын бригадирнас Баграт.

Талун вöрö мунтöн мылякö ёрттэс эз баитö, топ шогалiсö, только Вадимыс öтпыр горöтчис жö: — «Но и погоддя, шаромыга... Давид, мунам Чёрнöй море дорö! Сэтчин öнi шоныт и яблоккес быдмöны юр ыждаöсь».

Давидыс шынньöвтiс — рад, что ёрттэс сэтшöмöсь жö, абу вунöтöмась шуткасö.

Талун вöрын эз пантав Катя. Сы местын керкуок öшын увтын пессö поткöтö бригадирлöн иньыс — кыз да ота рожабана инька, кöдö Багратыс адззöм кытiськö вокзалiсь и пыр ошшасьö, что Öльзаыслöн киэс золотöйöсь, кöть нянь пöжавны, кöть похлёбка пуны, и челядьсö мужикыслö чужтiс — эм мыйöн ошшасьны, только мылякö учöттэс не öтiк чужöмаöсь: нывкаыс чочком юрсиа, зонкаэс сьöд каббез, а öтiкыс нач рыжöй, юрсиыс би сотчö, кöр айыс сьöд чуман. Но и мый, ежели ай-мамныслö сэтшöмöсь колöны?

Гажöтчö Багратыс и польдö, что öнi сiя бригадир, что иньыс уджалö татöн жö:

— Öтiк минута талун менам од пондö шоччисьны, ежели плансö ог керö! — висьталö ёрттэслö виль бригадирыс. — Кин оз понды менö кывзыны, ась ас вылас горзö!

— Ме, шаромыга, — шуö Вадимыс, — вöрас только узьны и вовла.

— Ме тэныт узя! — кулаксö мыччалö Багратыс и иньыслö ни ыксö: — Тэ мужиккесö нятьöсь кöмкöтнас керкуас эн лэдз!

— Ась пырöны, асьныс эд сэтöн пондасö порссез моз нырьясьны, — висьталö Багратлöн иньыс, кöда вывтi, тыдалö, уна он ыслась.

Давидлö гажтöм. Сылö вöрыс топ не сiя ни, абуöсь ни татöн не Алексейыс, не Катяыс, кöдна сiдз топ и мыччисясö кысянькö да гажöн шуасö: «Давид, юртö эн öшлы!»

То зэрö, то мыччисьö шондi, кöда небоас уялö лажмыта ни. Вижгö лэчыт тöв. Ар.

Мужиккес уджавны оз тэрмасьö, мед бригадирныс и тэрмöтö — этö адззö Давидыс, адззö и сiйö, что ачыс Багратыс сайласьö быд шагын, косас уджыс сöталö.

Давидыс здоровайтчис виль поваркöт, керку угöлö кышалiс котомасö, Алексейыс моз жö шоччисьтöг и сёйтöг босьтiс пила да Сергейлö шуис: «Мунам!»

— Ештам, — Сергейыс кармансис кыскис папироса.

Давидыс сэсся ёртыслö нем эз шу, но бöрсяняс сылö ыкöстiс бригадирыс:

— Öтлаын мунам!

— Мед мунö, ежели сылö уна колö, — горöтчис кинкö мужиккес коласын. — Тiян кодь шаромыгаэскöт няньсö уна он сёй, — сьöвзис Вадимыс.

Давидыс бöрас эз видзöт, мунiс, кыдз вермис, кöр эшö больницаыс бöрсянь коккес умöля и кывзiсисö, сiдз бы и кышасисö быд вуж бердö. Тэрмасис зонкаыс сiдз, что вамис кымöсыс, пымалiс, сьöлöмыс моросас вартiс, кыдз кытiськö мезмис, но вöрыс вылö видзöтiс ни жаднöя, кöр вöлi кытöн бергавны, медбы только пилаыс эз жугав.

Делянкаын Давидыс медодз вывсис чöвтiс фуфайка, пуктiс сiйö мыр вылö, дзар керис, оз я лок Сергейыс, но сiя эз тыдав и нем видзчисьны ёртсö, кöр томжыкыс бöра пондас лыннявны да небосис синйыны ракаэз, и пондiс заводитны пиласö.

Пилаыс заводитчис кокнита. Сылöн шыыс лэбзис вöрас, логланьын павкис пуэз бердö, резсис-паськалiс омöн, и Давидыслöн öзйис гаж, киэс пондiсö лудны. Зонкаыс содтiс газсö да пиласö иньдiс медодзза пуö.

Кöзыс пöрис кокнита, эз кышась, не эз чеглав уввез.

«Эм öтiк! — кокнита ловзисис пилитчисьыс, кöр пöрис пуыс. — Кыкöн бы колiс... Кыкöн, а кытöн ёртыт? Мыля тэ сiйö он зэлöт? Уджавны дак уджавны, оз уджав, мед оз гардчы...»

Мöдiк бы Давидыс местын сiдз висьталiс, но сiя öвтыштiс кинас. Талун сiя больница бöрсянь пондöтiс удж, и ась бергалiс кодь юрыс и чожа пымалiс, но сы местö — сöстöм воздух — ачыс ас вылас хозяин, кыдз колö, сiдз уджав, и зонкаыс уджалiс — делянкаын гардчис лöз тшын, сьöрсьöн-бöрсьöн пöрисö пуэс.

Уджалö Давидыс, топ сылö мукöд часас нем ни оз ков, душаыс сьöртi уджыс, но оз-оз да думаыс вайöтас син одзас Алексейсö, топ ёртыс сулалö бöрас да висьталö: «Этадз кер! Мöднёж пилатö видз». Велöтö топ ёртыс, кыдз кокнитжык уджавны, но сiя эд абу ни ловья...

«Абу ни Алексейыс...» — зонкаыслöн кыдз мыйкö орö моросас, вотьыштö, оз и веритсьы, что ёртыскöт сэсся некöр ни оз пантась.

Киэзас эз вöв одзза выныс, пилаыс топ чожа лоис сьöкытжык, но вермис уджавны шоччисьтöг, кöр аскоддя жаднöй чувство, медбы керны унажык, чувйис ни сьöлöмсö — кыным мортыслö уна, сыным колö керны унажык аспонда и отир понда.

Мымда шоччисьтöг уджалiс (сувтöтлiс только содтыны бензин), шондiыс вылö эз видзöт, часыыс киас эз вöв. Ньылöмсянь кылö вамис йöрнöсыс, мыдзис кодь ни спинаыс. Локтiс Сергейыс, шысеттöг зорöн пондiс пыкны пусö. Мылякö бöра ружтiс, дундöтчис, чужöмыс зонкаыслöн гöрдöтiс, нильдалiсö нитшыс вылын коккес, но пуыс (кöда эз и вöв кыз) топ сералiс томмес вылын, öвтчис и эз пöр.

— Мый лоис?! — Давидыс дугдiс пилитны кöзсö.

— Мый лоис, мый лоис... — виноватöя горöтчис Сергейыс. — Он адззы, вöрисьыс миян вылын сералö. Курит да вöлись, а то видзöт гöг увтат кила лэдзчисяс, — кыскис папироса и швапкисис-пуксис колода вылö.

— Кывзы жö, Сергей! — лöгасис Давидыс. — Пуыс эд воздухыс вылын видзсьö. Выланым пöрас...

— Кытчö сiя пöрас, кöр воздухыс бердö кöрттуввезöн дорöмась?! — сералö зонкаыс.

«Мый тэ сэтшöмыслiсь босьтан? — сьöкыта ловзисьö Давидыс. — Вöлiн бы тэ менам вон...» — мыр бокö сувтöтiс пиласö, мырыс вылö жö, кыдз джек вылö, пуксис шоччисьны. Лöгыс петiс Сергейыс вылö, но одз эшö пурсьыны, кöр рытöдззас ылын кодь, эшö охота юасьны, кыдз сытöг татöн овсис и уджассис.

— Кыдз метöг уджалiт? — юалiс Сергейыслiсь.

— Уджалiм, — Сергейыс вешшис бокö, öмас заргис папироса и пондiс видзöтны кытчöкö кöз йыввес вылö, топ сэтчин пукалiс тури.

Недолыт, кöр кыкöн и вöрас оз тöрö.

— Тэ мый сюрретö меным мыччалан? — юалiс Сергейыслiсь Давид.

— Ме? Кытiсь тэ адззан? — кыдз повзис томжыкыс, чапкис папиросасö да шуис. — Вай ме пилитчышта, тэ эд мыдзин. Тэ да ме... Кыкöн тöдан мымда керам!

Вöрыс кыдз повзис: тöлок оз ловзись. Давидыс сетiс ёртыслö пиласö, висьталiс: «Эн тэрмась...»

— Кытчö тэрмасьны, кöч сьöрö эд ог вöтчö, — шынньöвтiс Сергейыс и пиласö чача моз лэбтыштiс киас, вот пондас орсны-уджавны. И орсö томжыкыс пу гöгöр, пилитö кöньöс кыза пожум, а Давидыс эта коста шоччисьö да видзöтö, кыдз ёртыс уджалö. Гордöй дума ни пöрисьжыкыслöн: «Вермö эд, кöр кутчисяс, а вот дышöтчö...» Кокнит лоö сьöлöмыс вылын, кöр уджыс лöсямö, оз дзугсьы, кöр лунсö весь он öшты, уджалан и тöдан, мый понда пымалан.

Кыз пуыс пöрис. Сы бердö Давидыс чуньöн эз павк. Сергейыс бергöтчыштiс ёртыслань — синнэс югьялöны, рожабаннэзас орсö вир, öмыс осьта — пиннес гер, певсö лэбтöм вевдöрö да ыксö: «Видзöт!»

— Видзöта, видзöта... — шыннялö Давидыс. Сылöн пымалöм — ва спинаыс пондö кынмыны, кутчисьö зор бердö, медбы пыкны пуэсö. Пöрисьжыкыслöн лöгыс оз ни пет ёртыс вылö. Только ошкис, дзар керис и адззö, что Сергейыс пондöтчö пилитны сыспу и ыксö ни сылö.

— Эй! Тэ мый керан?! Мыля сыспусö пöрöтан?

— А мый? — спинасö веськöтö ёртыс.

— Видзöт ме тэныт!

Этадз жö медодз Давидсö эд сыспуэс понда видiс Алексейыс.

Серёгаыс пиланас вешшö мöдiк пу дынö и бöра гажöн горалö мотор.

Давидлöн кынöмыс ни сималö, эд сiя медбöрья кадö велалiс сёйны öтiк чассэзö.

— Кер да вöлись ошшась! — ыксö сiя Сергейлö.

Эз ешты этö горöтчыны, пилаыс виньдiс и сувтiс. Кизерик лöз тшын гардчис пуэс коласын и жагвыв лэбтiсис вевдöрö. Вöрын лоис сэтшöм лöнь, что чиннис пеллезын.

— Мый лоис?! — юалö Давидыс.

— Ог тöд, — öшис Сергейыс, паськöтiс киэсö. — Натьтö, пилаыс шоччисьö бы.

Кыкöн пиласö кыскисö кöз бердiсь. Заводитiсö-мырсисö пымавтöдз, но заводитны эз вермö.

— Бригадирыс кодь жö лукавöй, — сьöвзис Сергейыс. — Оз тöд, мый керны. Важын ни виль пила бы колö.

— Кытiсь миянлö быд неделяö виль пилаэсö? Кин сымдасö керас?

— Кин керас, кин керас... А заводдэс мый вылö? Мый вылö отирыс сымда городас олöны, ежели этö страм пиласö ни оз вермö керны?

— Разьны колас... — юр бöрсö гыжьялö Давидыс и ёртыслiсь юалö. — Поди, метöг сiйö кинкö разьлiс?

— Тэ мый, Давид?! Эз! Некин пиласö эз вöрöт.

Сергейыс сэтшöма баитiс, что сылö туйис бы веритны, но Давидыс пишкис ныр увтас, кутчисис ни ключчез бердö.

Шондiыс оз видзчись, кöр тэ лöсьöтан пилатö, луныс сёр павжун гöгöр ни. Öшöм гортсис да кытчöкö лэбзьö рака, карзö, топ нерö том уджалiссесö, что нылöн весь öшис луныс. Давидыс мырсьö пила дынын: сiя кöркö разьлiс ни этö моторсö, но вунöтiс, кытöн кытшöм винт да гайка. А поди, вежисö часттесö.

— Может, часттесö вежисö, — мурзис да сьöласис Сергейыс, кöда тыдалö буржыка кужис разьны моторсö.

— Дугды куритнытö! — Давидыс дзарнитiс шондiлань.

Весь полiс, что дыр разясö пиласö: Сергейыс раз-два! И пилаыт гиль-голь: быдöс син одзын.

— Серёжка, эта мый? — Давидыс мыччалiс магнето вылö.

— Ме ог тöд, — челядь моз Сергейыс брынгис голи, кöда вöлi кок увтас.

— Кин вежис магнетосö?! Пилаыс виль, а сiя важ...

— Мый тэ сiйö, ёрт, и баитан? Сэтшöм жö тай кöрт торыс! — обидитчис Сергейыс. — Вот тэныт, честнöй слово, сiя жö магнетоыс!

Пöрисьжыкыс босьтiс киас кöртжугсö, кöдасянь кынмисö чуннес; колiс ны вылö пöлявны и видзöтны, сiя я частьыс. Кöть тэ мый шу, а не сiя: медодз номерыс сьöртi...

— Ежели бы не эта гадыс, ми бы тэкöт джын вöрсö ни ольсалiм! — кымöртчис томжыкыс.

— Ольсалiм бы... — чуннес вылö пöлялö Давидыс и эшö öтпыр юалö. — Он тöд, что вежисö частьсö?

— Ог! Вот тэныт крест, — пернапасасис Сергейыс, синнэзас сэтшöм диво, что кöть кин мортыслö веритас, только Давид оз верит.

— Тэ эд пиланас уджалiн и он тöд! — лöгасис пöрисьжыкыс. — Пель бокат кыдз сöта, сэк пондан тöдны. — Лёк чужöмыс жö, кöр лöгасяс, кöть кинöс повзьöтас.

— Давидка, этö Колькаыс! — повзис Сергейыс. — Сiя, дзöдзыв син, меным портсигар сетiс, шуис: «Шы эн сет!» Сiдз вöлi... А ме мый кера, кöр бандитыс карманас метра кузя пурт новйöтö, сiдз бы и начкылö. Мед уж магнетосö гусялö, нежели менö начкылö, сiдз эд, Давид? Кöда жаль? Ме али кöрт торыс?

— Кöрт торыс, мать боль! Он вежöрт, что талун миян луныс öшис?!

— Луннэс, зонка, тöдан мымда... Миян векын эшö тырмасö и кольччасö.

Медодз Давидыс лöсьöтчис брынöтны ни ёртсö, но кыдз видзöтiс синнэзас, жаль лоис Сергейыс: пикан и эм эшö, кытчö бöбöтасö, сэтчин и бöбасьö.

— Марш! Кöть кытiсь магнетосö вай! — ыкöстiс ёртыслö пöрисьжыкыс. — Или юртö керала! — мыччалiс чер вылö. Некöр, натьтö, эшö сэтшöм лöг эз вöв.

Свидетеллес абу, только кыкöн, мый керöны ас коласаныс и совестьнаныс ошшасьöны и честьнысö дорйöны.

— Кытiсь ме öнi сiйö вая? — горзöмсорöн шуис томжыкыс. — Колькаыс эд посёлокас. Натьтö, бутылка вылö кинлöкö магнетосö сетiс ни... — Ме нем ог тöд, но медбы пилаыс уджалiс, вежöртiн, бес пиян?!

— Вежöртi. Но тэ эн видчы, Давидка, ме вая. Вот адззылан, что ог вай, только тэ бöра быдöн одзын менö эн пур, ась дзöдзыв сина коддес менö оз сералö. Ага?

Давидыс эз ешты öмсö осьтны, а ёртыс котöртiс ни — кокпятаэс свиттялöны.

Лöнь вöрын. Кымрасьö и кöдздöтö ой кежас. Натьтö, бöра ойнас кынтас.

— Мый öнi керны? — öшис öтнас пуэз коласö Давидыс, пымалöм бöрсянь сайкалö спинаыс. Давидыс кыскис кармансис истöггез, чукöртiс кöс уввез да мыр бердö öзтiс биок, кöда гажöтö кодь и нырсö шонтö. Пукалö биыс дынын и медодз думайтö Сергей йылiсь: «Адззылiн лекарствосö! Тэкöт пыр тай колöм этадз, сэк бы эн понды дышöтчыны... Он бы уджав, а деньгаыс колö...»

Кöр лоис керны нем, зонкаыс думайтiс йöз йылiсь: öтiккесö видiс, мöдiккесö ошкис. Лöгыс медодз петiс сэтшöммес вылö, кöдна сё асланяныс да асланяныс: «Этö меным! Сiя колö! А кыдз нысянь — то. Мыччасö бирулька и быдöс...»

Умöль сэтшöммескöт овны, умöль уджавны, да...

«Нем тiян оз пет! Мымда бы эд гусялö, век кежö оз тырмы, сё лоат гöвмöмöсь, сё бы пондат гусясьны, но кöркö оланыс тiянöс дзугас жö, öмлöсалас...» — пукалiс кöз увтын зонкаыс, думаэзнас олiс отиркöт.

Думайттöнняс эз казяв, кыдз чулалiс кадыс, кöр и бергöтчис шондiыс рытлань.

Может, сiя суналiс ни биокыс бокын и пель одзас дзик Алексейыс ыкöстiс:

— Дыр ни узян!

— Эй, колхозник, ме татöн! — эта вöлöм Сергейыс, кöдалöн киас вöлi пилаö магнето. — Адззи эд дзöдзылыслiсь частьсö. Оз бы сет. Шуö: сувтöт бутылка, сэк тэнат лоас! А мыля ме бутылкасö сувтöта, кöр син одзам эта пилаись босьтiс!

— Тэ вайин или эн магнетосö?! — Лöгöн юалiс Давидыс. — Или бöра кытшöмкö важ кöрт тор кыскин?... Ме тэныт мыччала, ежели эшö кыла, что менö пондан шуны колхозникöн! Вежöртiн?! — пондiс кизявны Сергейыс фуфайкаись киззесö, кöдалöн моросыс осьта.

— Эн лöгась, Давидка! Ме эд шутита, кöр тэнö любита. Умöль разь, кöр колхозникнас шуа? — рад зонкаыс.

— Тэч пиласö! — Давидыс видзöтыштiс шондi вылö, думаэзнас тöждiсис: «Нем ни талун оз пет...»

— Тэча! Нем керны, — Сергейыс кутчисис пилаыс бердö — киэс сiдз и пизьöны.

Кöдзытжык лоö. Биокыс тшынöтö — синнэз сёйö, но кöрт бердын кынмöны киэз. Видзöтiс Давидыс ёртыс вылö, кыдз сiя уджалö и жаль лоис зонкаыс: колiс разь томжыкыс вылын ыксыны? Видзöт жö, сiя мый керö! Велöтчöм пиласö разьны и тэчны. Лöсьöтчис отсасьны, но Сергейыс ыкöстiс:

— Мун сэтiсь! Миянöс эшö школаас велöтiсö.

— Пилаэсö разьны да гусявны, — серöмтчис пöрисьжыкыс.

— Но да... — эз казяв, кыдз петiс öмсис Сергейыслöн и сэтöн жö веськöтiс баснисö. — Тырмас ни тэныт ме вылын згальничайтны. Öтпыр джöмда, стоись пондан модьны.

Вöр вевдöрöт вижгыштiс лэчыт тöлок, вевдöрсяняс шупкис голиэз. Эшö час етш Давидыс киэсö шонтiс би одзын, пилаыс бердö чуньöн эз павк. Быдöс, мый колö, керис Сергейыс, медбöрын сувтiс веськыта, шынньöвтiс, босьтiс стартер, чышкыштiс ныр увтсö, думайтыштiс и дернитiс стартерсö. Пилаыс öдззис эрзыны.

— Öнi ойшöрöдз пондам уджавны! — горöтiс Давидыс быд вынсис.

— Уджалам...

Шондiыс ни пуксис, а уджалiссес сё пилитöны. Спинаэзныс вамисö — уджалöны. Рöма-дзара, пилаыс сё эрзö.

— Бöра эд производственнöй травма керам, — шуö Сергейыс.

— Ой, коскам сöтiс, — виноватöя висьталiс Давидыс, тöдчис больницаыс: пондiс висьны коскыс и мыдзис, чуньöн ни бы эз вöрзьöт.

Керкуоканыс мунiсö, кöр нач ни лоис пемыт. Ыркыт. Кеписьтöг кынмöны киэз. Вöрын кыдз быдöс кулöм, шы абу. Гажтöм. Вот бы тулыснас, натьтö, татöн быд каёкыс бы сьылiс и бобгис.

— Керыштiм талун бöра, шедтiм деньгаоксö, — пемытiнас Сергейлöн югьялöны синнэс.

— Тэ мыля сэтшöм жаднöй? Мый сымда деньганас керан? — эз вежöрт Давидыс. — Меным, например, деньгаыс кöть эм, кöть абу. — Мымда ни эта йылiсь баитöны, но бöра сiйö жö модьöны. — Деньгаыс, ёрт, мортсö тшыкöтö: öтiк сысянь лоö жаднöй, мöдiк лёк, а куимöтыс хитрöй. Совестьыс мортыслöн öшö.

— Бöбöтан, зонка, — сералö Сергейыс. — Ачыт эд вижлöк кодь.

— Ме кодь бы вижлöк вöлiн, важын ни бы тшыгйöн кулiн...

Сiдз кык ёрт и мунiсö, кöр лэбтiсис ни тöлiсьыс. Мунiсö, а вуджöррезныс сьöраныс вöтчисö, кыдз нерисö.

Гажа лоис, кöр тöлiсьыс лэбтiсис, вöрын керкуокныс, кыдз сказкаын.

— А ми тiянöс лöсьöтчим кошшыны ни, — керкуокныс дынын панталiс бригадирныс. — Кытöн сы дырна вöлiт?

— Уджалiм! — гордöя висьталiс Сергейыс.

10

Давидлö эта неделяö шедiс уджавны куим лун, нёльöтас вежсис вахтаыс и бригадаыс локтiс посёлокö. Давидыс гажтöммис, мыйкö бöра эз понды тырмыны, кыдз вöрас öштiсис, колис, кошшисис и эз адззы.

Лэдзчис машинаись. Контора дынын куритö сторожыс. Сiя шыннялö и ыксö:

— Здорово, Давид! Тэ нем эн кыв? Денисыслöн пö иньыс кагаэзнас гортö ни локтöм. Вот мымда посёлоканым содiс отирыс! — пöрисьыс гажöн видзöтiс Давидыс вылö, ласковöя шыннялiс, баитiс топ аслас ёрткöт, кöдакöт туйö лёбны кöть мый — баснинас сьöлöм бурмöтны, кöр тэнö вежöртöны и мöд томмес моз оз иньдö Вöрисьыс дынö. — Молодец! — старикыс ошкис Давидсö. — Пырав жö контораас да кый премиятö, а сыбöрын менö вердан конфетаэзöн.

— Кытшöм премия, кöр ме эг уджав? — эз вежöрт зонкаыс.

— Адззылан эд... Ежели отирыслö эм, тэнö бокö эз керö. Босьтан меным конфетаэсö! Кытчö воштiсьны, кöр корöны тэсянь гöснеч? Давидыс кармансис пешлiс деньга: «Эм рубль!» Сэкжö пырис магазинö, синнэзнас бöрйис конфетаэсö, тшöктiс öшлыны нiйö сёртни кодь чочком чужöма нывкалö и петiс магазинсис.

Рытыс ыркыт да лöнь. Кытöнкö матiсь карта вылын ружтö мöс, баитö морт, уннялö машина. Эна шыэс посёлокын сорласьöны, дзугöны сьöлöм вылiсь гажтöм чувствоэз.

Сторожсö гöститöтiс конфетаэзöн. Игнатыс нималö конфетасö да ошшасьö:

— Кылiн, Давид, мый керсьö? Колхоззэз эд быдöс ни сюсö дзимлялöмась. Он верит?! Талун радиоас висьталiсö.

— Мый, дед, сюыс понда сiдз юрыт висьö? Тэнö эд сiдз и этадз государствоыс тшыгйöн оз видз? И колхозас тэкöт ог уджалö.

— Ог уджалö... А няньсö кытiсь сёям? Кин миянöс вердö? Вöр керам, а вöрсö мылякö кöзаэз моз ог жö йирö, сё магазинö няньла котöртам.

Пöрисьыс зонкаыслiсь вöрзьöтiс сьöлöмсö, кыдз шогöт: тöдвылас усис гортыс, кытöн, натьтö, сё эшö дзимлялiсö сюэсö. И вермисö я быдöс вундыны? Дзимлялiсö я идзассэсö, гöрисö я зяббесö? Поди, бöра одзлань сетiсö сводкаэз, что вундiсö да вартiсö, а сiя не сiдз петiс: погодаыс бöбöтiс, усис лым и быдöс син одзись тыртiс. Но Ефим Селиверстовичыс эд гажöтчö, ошшасьö, что сылöн бригадаыс медодз дзимлялiс урожайсö...

«Ошшасьö, ошшасьö, кытчöдз ошö од пöрö... öнi ме тiянкöт ог уджав»... — думайтiс том мортыс да оськалiс шоччисьны.

Посöдз дынын панталiс Толикыс. Зоночкаыс гажтöм, но шынньöвтiс.

— Кыдз, мужик, олан? — Давидыс Толиклö нюжöтiс кисö, кöда дынсянь павкö лыс дук.

— Олам... — кисö жмитö учöтыс. — А тэ кыдз?

— Уджалiм.

— Дыр мыйкö? Сетiс конфетаэсö, юасис, кинкöт Толикыс узьлö, мый керис садикын. Зоночка ошшасис, что садикын вердiсö яблоккезöн, что тётя Галяыс вывтi пондiс окасьны, топ пö кыдз ассис жö. Мый сылö Толикыс учöт я мый я?

Оз вежöрт, что сiйö ыджыттэс жалейтöны быд шагын, мыля кулiс дядьыс, жалейтöны и окалöны...

— Эшö мый бурыс эм?

— Давид дядь, тэнö Валя тёткаö тшöктö бы гидъяс джодж лöсьöтны... Ась пö талун жö кыдзкö керö.

— Лöсьöтам! — Давидыс видзöтö лöз ныра старикыс вылö, кöда сё эшö татöн, пукалö посöдзын. Нырыс сылöн лöз, синнэс нач ни гудыраöсь, но талун оз курит и оз баит.

«Мый жö татöн старикыс сы дырна керö? — думайтiс пöрисьыс йылiсь Давидыс. — Или сылöн горт абу? Он бы и видзöт сэтшöммес вылö... Кыдз только сыкöт гортас олöны? Натьтö, вашöтiс иньыс, сiйöн татöн и видзсьö, видзчисьö, кöр и татiсь брынöтасö. Но кин брынöтас, кöр хозяиныс эз ло, а хозяйкаыс... Инь отирлöн сьöлöммезныс не мужиккез кодьöсь...»

Давидыс думайтiс пöрисьыс йылiсь, эз бы и пантась ни сыкöт, эз баит, но старикыс одзлань здоровайтчис, малыштiс зонкаыслiсь спинасö и кижгыштiс:

— Тэ сэтшöм и эм? А ме думайтi... — сьöвзис. — Будь, тэ проклят! Джагöтас табакыс. Ме думайтi, мыся, зонö ордö öксьöм кытшöмкö шпана, а сiя видзöт жö... Ударник! Стакановеч! Мый сiдз видзöтан? Думайтан ме нем ни ог тöд? Тэ годдэзын эшö кытшöм вöлi! Тэ моз жö некин сьöрись эг кольччы. Премия да премия... А öнi... — Гичыртiс пиннесö. — Öнi некинлö эг понды ковны, гортiсь вашöтöны, йöзö пета — видöны. Тэ ме вылö эн видзöт, пыр да шоччись, кыскис кармансис папироса.

— Некöр, дед, шоччисьны. Колö пö карта вылö джодж лöсьöтны.

— Но вот и бур, кöть вур. Вöлi бы зонö ловья, натьтö, бы тэ вылö эз надейтчы...

— Ой, ме вунöтi! — Катяыс панталiс зонкасö керкуын. — Тэныт письмо гортсянят эм. Пызаныс вылын. Часто пондiсö гижны пöриссет. Гажтöмтчöны, тыдалö...

Письмосö нюжöтiс ни Толикыс да кеймисис:

— Давид дядь, горöн лыддьöт!

— Мун сэтiсь! Быд местын тэ... — видö мамыс зоночкасö.

Давидыс эз и чöвтчы, сэтöн жö разис письмосö, пондiс лыддьöтны. Гижöм айыс аслас киöн: букваэс йöктöны и öвтчöны, но вежöртö гижöмсö. Старикыс медодз гижöм-ошшасьöм, что дзимлялiсö отирыс сорöн картошка, кералiсö ни капуста, керисö баля яй, но мый толкыс олансис, кöр мамыс талун-ашын? Шогалö... Джоджыс кузя оз ни вермы мунны. Кулас и чужöмыс оз вежсьы, сiдз умöльтчис старухаыс. Айыс кольччас öтнас, вузалас керкусö да мунас, кытчö синнэс видзöтасö, лок кöть эн, ежели эз кужö быдтыны да велöтны, чапкин ай-мамтö, орöтiн гортiсь вужжетö...

«Вот сiдз, зон, — недолыт лоис Давидыслö. — Пышшин гортiсь, а гортын тэтöг оланыс напрочь разсис». Кулöны пöриссес и дзебны некинлö. Мый вылö тэнö быдтiсö, кöр вужжетö гортiсь нетшкöвтiн и мунiн кытчöкö?.. — горшсö топ зэлöтiс тшакыль, курыт лоис...

Горшыс косьмис, но вунöтiс юны: öтöрсянь керкуö, керкусянь карта вылö. Уджалö, дынас гардчö Толикыс. Уджалö, колö бы думайтны мыйкö мöдiкö, а думаэс горт йывсис, син одзас айыс, кöда топ кулöм ни и дзебны некинлö.

«Дзебасö», — бурмöтö ассис сьöлöмсö. А думаэс нерöны, кöр ашын эшö лöсьöтчис мастерыслiсь корны квартира и овны татöн.

Карта вылö петiс Валяыс, медбы отсавны пыртны кыз плаха, но етшажык отсасьö, унажык душасö, кыввезнас дойдö — юасьö.

— Мый гижöны пöриссес?

— Мамö шогалö...

— Öтiк кулö, мöдiк шогалö — гажтöма шуис инькаыс и юалiс. — Мый пондан керны? Поди, ветлан?

Лöсьöтiс карта вылын джоджсö, пырис керкуö, вежис вывсис паськöмсö и оз тöд, мый одзлань керны, топ эз мыдз и кынöмыс оз симав.

— Кöр пондан мунны гортö? — юалö Катяыс. Гажтöма видзöтыштiс Катяыс вылö, нем эз шу.

— Тэрмасьны колö! — висьталiс нывкаыс. Сьöлöмыс öтнассö оз кыскы, кöр олö, уджалö и шоччисьö, — гажтöмтчö Катяыстöг, кöр оз вунöт, кыдз нывкаыс пукалiс сы дынын больницаын, юкталiс и вердiс, отсалiс веськавны и öнi син одзас. Сiдз и янсöтчыны я мый я, медбы сэсся не пантасьны?

Рытыс гажтöм, кузь. Не телевизор оз видзöтсьы, не книга оз лыддьöтсьы: сьöлöмыс кыскö туйö, тэрмöтö, но не öтнассö бы. Пуксис пызан сайö сёйны, сёяныс оз тöр, кыв йылас и бергалö, сiдз бы Катяыслö и висьталö, что сытöг гортö оз мун.

Смевмöтчис, смевмöтчис да Толикыслö пель одзас шушкыштiс: «Толик, мамыт ась татчö вовлö... Только гусьöник висьтав».

Зоночкаыс прыг да скок чеччöвтiс мöд жырас мамыс дынö и öм тырнас ыксö:

— Мама, тэнö Давид дядьö корö!

— Мый? — виноватöя юалiс Давидыслiсь Катяыс, но сэтчö пырис Епимикаыс, пуксис гор бокö да Катясö пондiс велöтны овны:

— Тэ, кага, кыдз чеччан, медодз миссьы, сыбöрын юрбит еныслö да вöлись бласловесьöн горсö и лонт. Эн велöтчы öння томмес моз джодж шöрас чукыль-мукыль...

— Мамö, баб, чеччас да медодз туалетö котрасяс, а сыбöрын миссяс, — Епимикалö висьталö Толикыс.

— Ме тэныт! — пондiс серавны бабыс. Сералiс, чышкис синваэсö, висьталiс, что не сё жö горзыны, дзар керис комö, кытöн сёйис Давидыс и ылiсянь пондiс кыйны кывнас:

— Тэ, Давидушко, ай-мамтö эн чапкы. Ой-ой, еныс чарöтас... Öння томмес моз эн велöтчы овны... Да гöтрась чожажык, а то тшыкан, вина пондан юны. Невестаэс эд öнi быд шагын, кытшöм колö, сэтшöмö и бöрйы. Видзöт жö, со христом богом, Катяыс кытшöм. Мый, разь не невеста? Мало ли что жöник сайö ветлiс да овнытö эз удайтчы! Мукöдыс жöникыс сайö оз мун да сизим кага чужтö, а сiя некинöс йöзсö оз тöд. Мымда ни татöн олö да асьсö эз стыдит. Ме бы тэ туйын важын ни Катясö гумыштi! А мый?

— Сiя менö оз любит, — висьталiс Давидыс.

— Кин оз любит?! Кытiсь тэ сiйö кылiн? Кер сiдз, мед любитiс.

— Тэ мый, баб?! — кыдз повзис Катяыс.

— Ме разь мыйкö умöльö баита? Быдöс толком висьтала.

Сэтчö öтöрсянь Епимикасö ыкöстiс мужикыс.

— Эй, кикимора! Икота, кытчö бöра öшин?! Лок чожжык гортö. Зоныт локтiс, гöснеч вайис.

— Зон, — недолыта горöтчис пöрисьыс. — Кыдз деньгаыс бырсяс, чожажык иньнас — гортö и джагöтöны менö: «Мам, вай копейка-мöд... Деньганым бырсис, немöн лоис няньсö босьтны...» А кытчö видзисö деньгасö, кöр тысячаöн заробитöны? Горшаныс кисьтöны да пасьтасьöны. Деньга, Христос аминь. А кытiсь ме нылö, кöр пензиясö сорок пять босьта?

— Кинлö баитöны, что гортö колö локны?! — öтöрсянь бöра ыксiсö Епимикаыслö. — Старуха!

— Гортö ог бы и мун. Мед зоныс да моньыс айнысö чилькöтöны, кöр сiя пензиясö унажык босьтö, а менö кöть джагöт, талун öтiк копейка абу.

Только керкусис петiс Епимикаыс, сьöрас нöбöтiс гажсö, кыдз сэтчö ружтытöн да сьöласьтöн посöдзись пырис Алексейлöн айыс, айыс и не айыс — кин сiйö тöдö? Старикыс вожмöвтiс керкуö порогсö, тiлис синнэсö да юалiс:

— Кытчö лоис лёк старухаыс?

— Сiя разь тэныт эз пантась? Öнi эд керкусис петiс.

— Некинöс ме эг адззыв... — пондiс кызöтны пöрисьыс. — Öнджа, челядь, умöль эд петö... Мый ме сэтшöмсö татöн кодувья и кери? Стыд и срам... Миритчыны бы колiс старухаыскöт... Бутылка öтлаын юны, мед умöль кылöн эз касьтыв.

— Сiя, дед, винасö оз ю! — висьталiс Толикыс.

— Быль?! А кытшöм сэк яд юö? Кыдз нö сэк сэтшöмыскöт миритчыны?

Старик, старик... Кытшöм синнэзöн пондан пантасьны роднöйеткöт гортат? Мый висьталан иньытлö? Кыдз пондан ошшасьны, что бура дзебин зонтö? Стыд тэнат абу?

Стариксö татöн кытчöдз некин оз вид, кöр сiя, веськыта висьтавны, не асланыс, йöз, вöлi да оз ло, кытшöм совестьöн, сэтшöм и слава коляс, и сэсся татчö, поди, оз ни лок, а öнi пöрисьыс пырис керкуас, ружтiс-керис, кисö сюйыштiс конувтас, сэтчин мыйкö гуддисис, топ мортсö курччалiс кинкö и вдруг кыскис деньга, деньгасö бергöтiс неöтпыр синнэс одзын, ружтыштiс, кокнит кок вылын локтiс пызан дынöдз да ассис богатствосö пуктiс пызаныс вылö и висьталiс:

— Этö тiянлö.

— Мый миянлö?! — кыдз повзис Валяыс.

— Тiянлö! — чорыта шуис старикыс. — Зоночкаыслö небат мый колö... А ме муна гортö.

— Дед!

— Басни абу! — старикыс пондiс пасьтасьны, — Басни абу, кöр ме ачым тöда, мый кера.

Кöть сэтöн вид, кöть ошкы — кытшöм эм пöрисьыс, сэтшöм и мунö да эшö рытнас, кöр пемыт — синмö рос мöрт. Кытчö тэ, дед, ойнас?!

— Гортö! — пасьтасис старикыс, спинаыс сайö кышалiс котома. — Спасибо кагаэз. Буржыка олö да менö умöль дорас быд лун эд касьтылö, шать бы меным колö да нем он кер, кöр олансö олi, а юрам сё тöв вижгö. — Прошевайте, челядь! — пöрисьыс уськöтчис керкусис, кыдз берездасис пемытiнас.

Вот сiдз, ёрттэз. Кин кыдз кужö, сiдз и олö, только видзöтан да дивуйтчан, думайтан, что сiдз бы тэ эн ов. А кыдз бы тэ олiн? Поди, асьтö отирыс бöрсянят видöны и сералöны — этö уж кинлö кыдз.

Видзöт, петiс керкусис старикыс, колис инькаэсö Давидкöт да Толиккöт, и кöть тi кыдз одзлань олö. Кöть кыдз олö...

— Но мый, мужиккез, узьны колö, — висьталiс

Валяыс. — Кин кытчö водат?

— Ме Давид дядьöкöт вода! — висьталiс Толикыс.

— А ми мамыткöт водам, — шуис Валяыс.

— Понда вöтасьны Öльöш дядьöс, — сьöкыта ловзисис Толикыс. — И эшö понда вöтасьны, топ мамö бöра менö кольö, кайö вöрö, а меным гажтöм. Вот бы Давид дядьöкöт...

— Быдöнлöн челядьыс сэтшöмöсь или мöдкодьöсь жö? — горöтчис Толиклöн мамыс.

— Ог тöд, — висьталiс Валяыс. — Менам эз вöлö.

— Гортö колö мунны, — висьталiс Давидыс.

— Мун. Видзöт пöриссесö. Нылö эд оз ков уна, только мыччав асьтö, и нiя радöсь лоасö, что зонныс ловья. Мун, зонка, эн чапкы пöриссесö. — Висьталö Валяыс. — Только документтэтö эн вунöт. — Дыр мыйись юалö. — Мый сьöрат босьтан? Туй вылас эд кынöмыт пондас симавны.

Гажтöм янсöтчыны, кöр öтлаын олiсö, мед и етша — не год да кык, но велалiсö öтамöдныс дынö — эз пурсьö не шусьö и сэтöн жö öтлаын вермисö бы горесö.

— Кыдз тi вот, инькаэз, пондат овны? — Кыдз ен шуис, сiдз и пондам овны, — синваэсö чышкис Валяыс, пырис гардеробö и мужикыслiсь кыскис басöк йöрнöс да висьталiс. — Этö тэныт, Давид. Алексейыссянь подарок, мед миянöс он вунöт.

— Тэ мый?! — повзис зонкаыс. — Ог босьт!

— Босьтан!

— Ме... — смевмис зонкаыс да вдруг висьталiс, — сьöрам нуöта Толиксö и тэнö, Катя.

— Мый баитан? — эз вежöрт Катяыс, пондiс видзöтны вылас, топ пантасис только талун.

— Ме муна Давид дядьöкöт! — прыг да скок пондiс чеччавны Толикыс, кöда лöсьöтчис ни водны, а сэтöн сылöн öшис оныс. — Ме дядьö сьöрись ог кольччы.

«Асьныт тöдат», — пондiс думайтны Валяыс, кöр вежöртiс, что Давидыс весь оз баит, ежели сылö пондiс ковны сойыс, ежели зонкаыс туяна, абу кинкö кодь рызi-бызi.

— Катя, ме жö тэнö любита. Сьöрсим ог коль. Мунан ме сайö? Веськыта висьтав: мунан или он?

Керкуын шы эз ло. Öшынöт пырö тöлiсь югöр, кöда лэбтiсьö юыс сайсянь. Пызан вылын сяткöтö часы. Куимöн видзöтöны Давидыс вылö, топ эшö оз вежöртö, мый сiя баитö. Мый тэ этö керан, Давид?

Инькаэзлöн синваэз: медодз пильскö Валяыс, сыбöрсянь öдззö сойыс. Кин мый понда и горзö? Öтiк жаль и мöдiк жаль.

Недолыт Давидыслö, что обидитiс Валясö, что сойсö бы мырддьö сьöкыт кадö, кöр гöтрасьöм йылiсь эз бы и ков эшö баитны, но кытчö сылö воштiсьны? Сэтшöм час вöтiс, что мöднёж оз туй.

— Но тэ, Давид, — кöритö ни зонкасö Валяыс. — Видны тэнö оз туй и ошкыны ог вермы. Тэ дырни мужикöс öштi, öнi гусялан бы сойöс. Думайт, мый керан! Оз эд туй орсны бы оланнас. Видзöт жö, Катяыс эд вöлi ни жöник сайын, быдтö зон, а тэ сэтчö жö... Аркмас я мыйкö тiян оланын, оз я быдöс дзугсьы? Кыдз пондан быдтыны йöзыслiсь кагасö? Он я понды кок ныррет вылын видзны? Меным Толикыс жаль, кыдз аслам жö.

— Зон местын понда видзны! — чорыта висьталiс Давидыс. — Не ме первöй и не ме медбöрья. Етша разь иннезнысö челядьöн босьтöны? Мыйöн буржык сiя, кöда мужикыс сайын эз вöв и гöтрасян да тэнö пондас быд угöлын вежны. Катяыс меным колö!

— Сэк асьныт тöдат. Абу ни учöтöсь. Ме туйнытö ог поперегав. Тырдоз тiянлö да керку тыр счастье, ежели меным эз усь счастьесö адззывны. Мед оланыс ме моз тiян вывтi оз ни серав — горзö Валяыс.

— Тэ мый, Валя? Кытчö ме тэнö коля?! — Катяыс сойсö жмитiс моросыс бердö. Некытчö ме ог мун.

— Кыдз он мун?! — пондiс видны сойсö Валяыс. — Зонкаыс орсö я мый я? Али кинöскö буржыкöс бы кошшан? Он адззы и оз пантась, а инькаыслö мужиктöг еныс абу шуöм овны. Ме вылö эн видзöт. Менам счастьеыс абу и оз ло, а тэнат ась лоö. Лöсьöтчы туйö!

— Давид... — Катяыс пуксис лабичö Давидыс бокö, — ежели сiдз...

— Сiдз, мам, сiдз! — гажöн висьталö Толикыс.

— Узьны ни тэныт колö! — мамыс висьталö зоночкаыслö. — Сiдз, Катюша! — Давидыс жмитiс Катясö и окыштiс быдöн одзын.

— Жöник да невеста, адззисö места! — пондiс серавны Толикыс, пуксис Давидыс мöд бокö, жмитчис бердас и баитö. — Давид дядь, ашын эд мунам ни дед-бабным дынö?

— Чожа мунам, Толик.

Вот и быдöс, мый лöсьöтчис Давидыс висьтавны Катялö. Сэтöн и вöлi зонкаыслöн счастьеыс. Öнi сiя немись эз пов, кöть кытöн вермас овны Катяыскöт, и Толикыс зон, кöда висьтав, что быдмöм ни.

Инькаэс вдруг кыдз мезмисö шогöтiсь, кöда пырис керкуас, нярьялiс быдöннысö, видзöтчис быд угöвсянь, полöтiс, гусялiс меддонаö, гажтöмтiс, и пондiсö койны керкуас, кинлöн мый шогмö (синватöг бöра жö нем эз пет): Катяыс тэчис котомаэз, а Валяыс бöра кöтiс нянь, медбы ашын пöжавны пирöггез.

Толиклöн петiс ни оныс, но сылö тöдвылас усис, что поныс гортын абу.

— Кытöн поныс? — зоныслiсь юалiс Катяыс.

— Ме ог тöд. Мыйкö лун-мöд ни гортiсь эг адззыв. — висьталiс Валяыс и гажтöма содтiс. — Мый сылö гортын керны, кöр хозяиныс эз ло? Натьтö, пышшис. Ась. Быдöнным пышшам ни, кинлö кытчö туй, нежели овны сэтшöм керкуас.

— Эз пышшы. Ашын локтас! — синнэс куньсисö ни Толикыслöн, и сiя вдруг онмöссис пызан дынын стул вылö.

11

Чулалiс эшö лун куим-нёль. Погоддяыс медбöрьяись мыччалiс гожумыслiсь бöжсö: ойезнас кöдзыт, а луннэзнас жар. Отирыс сё эшö ваялiсö тшак да ягöд.

Давидыс вöрын эз ни уджав. Сылöн думаэс Тылаын ни, но некыдз оз вермы мунны. Сё видзчисьö начальникöс, кöда мунiс командировкаö и сытöг некин оз гиж приказ, медбы уджалiсьсö лэдзны леспромхозiсь: техрукыс кыскис кадсö, видзчисис, оз я Давидыс думаэзнас бергöтчы бöр и кольччы татчö, кöр сiдз участокас уджалiссес оз тырмö, и Давид коддес оз китсасьö, но зонкаыс некинлiсь ни нем эз кывзы, кöр сьöлöмыс кыскö гортö.

— Ох, шаромыга, а ме мыля нö гöтрасьны ог вермы?! — Вадимыс янсöтчис ёртыскöт.

— Öнi ме ни гöтрася! — ошшасис Сергейыс. — Босьта Катяыс кодь жö нывка, мед только менö и любитö. Гумышта унажык деньга и вöлись иньöкöт татiсь муна шоныт странаэзö.

— Ташкентö, шаромыга, сöтам, Сергей! — баитö Вадимыс. — Сэтчин яблоккес морт юр ыждаöсь и гожумнас номмес оз курччасьö.

— Весь тэ татiсь мунан, — висьталiс Багратыс. — Видзöт жö посёлокыс кытшöм! Город вылö вачкисьö.

— Ме бы тэ туйын деревняыс вылö эг веж, — шуö Борисыс. — Мый деревнясис бурсö адззин?

— Ох тi, шыло-мылоэз! — сэтчö осудитiс томмесö сторож — Игнат дедыс, кöда оз вунöт асыввезнас уджалiссесö кольлавны вöрö. — А тöдат я тi, что мортыслö меддона сiя местаыс, кытöн гöгсö орöтiсö?! Чож Давидыс, что эз вунöт ассис роднöй деревнясö, кöда сылö, натьтö, меддона, кöть и вачкисьö пышты ¹вылö. Сiдз эд, Давид?

— Сiдз, дед. Пöриссес менö видзчисьöны.

— Но тэ пöриссесö, шаромыга, дзеб, да бöр татчö... А кыдз нö?! Кин миянкöт пондас уджавны?

— Ме бы быдса царство сетi, медбы только гöтрасьны Катяыс вылö! — шыннялö Суреныс. — Вузав меным, Давид, Катятö?

— Князь персидскöй, хан армянскöй... Шаромыга миян кодь жö. Мый тэ модян? Кин вылын сералан? — Сурен вылö лöгасис Вадимыс. — Поди, тэ и миянöс быдöннымöс бы небан?

— Колат тi меным, — шуö Суреныс и кисö нюжöтö Давидлö. — Но, ёрт, видзчись деревняат. Ме татöн уджалышта и сöта колхозö, кытöн понда лэбтыны фермаэз — деньга шедтыны. Эм тiян колхозын уджыс?

— Кытчö лоас?

Давидыс кольлалiс ёрттэсö вöрö, локтiс гортö да шуö Катялö:

— Регистрируйтчыны эд колö, Катюша.

— Кытчö тэрмасян? Ме, поди, тэкöт неделя ола и бöр янсöтча... — сералö иньыс.

— Ештат. Некытчö сельсоветыс деревняас оз пышшы, — висьталö Валяыс. — Тэрмасьö. Сэтчин эд пöриссес видзчисьöны, — синваэсö чышкö да шуö. — Поди, тi олыштат да вовлат бöр? Öнджа... Ме эд эстöн öтнам ог тöд мый керны. Кытчöкö пондас ковны воштiсьны. Видзöта-кера да тiян дынö жö ыскöвта. Ог эд пов деревнясис...

— Ог ми тэнö татöн пондö видзны, — висьталö Валялö Давидыс. — Адззам гортын уджсö, ачыс думайтö: «Тэрмасьны бы колö...»

Думаэс бергалöны Тылаын, ай-мамыс гöгöр: «А кыдз эшö примитасö моньнысö? Гленитчас я зонныслöн иньыс, радöсь я лоасö, что иньсö вайöтö зонöн? «Тöдö эд, что мамыслö сiя и колö, медбы только вöлi кинкöт сёрнитны-гажöтчыны, а айыс? И айыс важын ни модис, что сылö бы внучек...» Сэк бы сiя эшö эз и пöрисьмы.

«Вот бригадирыс...» — вдруг повзьöтiс эшö дума. — Кыдз адззас, сiдз, натьтö, синнэс кымöсас и петасö, пондас шуны: «Эх, Давид! Эг ме тэнö вермы гöтравны племенничаö вылö! А, может, Ефим Селиверстовичыс бригадирнас оз ни уджав, кöр сэтшöм бригадирыс топ некинлö ни эз ков? Сэк эшö буржык лоас».

— Тэрмасьö, челядь! — бöра горöтчис Валяыс. — Сэтчин пöриссес тiянöс видзчисьöны.