Гриша, вася да бес пилика



Миян деревняын олiс öтiк старуха. Шуисö сiйö Бес Пиликаöн. Конечно, не быдöнныс. Буржыка отирыс тöдiс старухасö Туруна Пиликаöн. Вöлiсö сылöн и мöдiк ниммез, и сымда, что ежели гижны старухасö каждöй нимнас торья паспортö, то нiя мешöкö оз тöрö.

Унажык ниммесö сылö сеталiсö челядь, да и ми, нысся пöрисьжыккес, тожö эг кольччö челядьыс сьöрись. А мыйсянь — часöт тöдатö.

Баитiсö, что эшö важ годдэзнас, революцияöдз, старухаыс сюртнясьöма баняись бессэзкöт да сэтшöм небыта, что мый колö Пиликалö — лоас: лечитас мортсö и калечитас. Мийö, конечно, этаись джын кыв эгö веритö, но пöрись отирыс эта сказкаö веритiс кыдз енлö, этасянь и Бес Пиликалö веритiс.

А вöлöма пö сiдз. Порйöтлöмась гожумнас праздник купальница. Дак эта ойö Бес Пилика лонтöм баня, кутöм ассис чим сьöд котсö и ловйöн баняас пуöм. Кöр пусяс котыс, то яй бердсис калькалас пö кытшöмкö лы. Этö лысö, шуöны, Пиликаыт пиас часöт новйöтö. И сiя пö не котыслöн лыыс, а сотаналöн веськыт кисис чунь. Вот мыля только думайт, мый тэныт колö, — öмтö он ешты осьтны, а думаыт лоас керöм. Морт-мöд деревняас пондылöмась пуны пö каньсö баняас, но бесыс абу сетöм пö лысö. Только Пиликаöс öтнасö пö бесыт радейтö. Öтiккез шуöны, что Пилика шогöттэз веськöтö ен отсöтöн, а мöдiккез — бес киöн. Ми эг тöдö, веськöтiс эз кинöскö, но кынымкö мортöс аслас лечитöмöн гробöдз вайöтiс.

Деревняись челядь решитiсö Бес Пиликалiсь «мырддьыны» лысö, мöднёж шуны, керны сiдз, мед Пилика вунöтiс ассис нятьöсь уджсö. Но баитны кокнит, а керны сьöкыт. Бес Пилика сiдз керис, что сизим понöн он кут — следыс абу.

Дед Онтон баитiс миянлö: — Челядь, эд вöрöтö этö кöс россö, мед куйлас порог увтын: сэтчин сiя оз мешайтчы.

Но миянлiсь син бытшкис эта кöс росыс: кыным унажык олiм, сыным Бес Пилика смевсялiс.

Вöлi менам ёрт Сева. Характер сылöн — пизьö. Сева лöгасис Пилика вылö сэтчöдз, что веськыта баитiс:

— Шедас кö, шедас нёштöм чужöмыс — кучиксö куля да вузала заготларёкö!

Сылiсь баснисö кылiс и Гриша воныс, кöда вöлi пионерöн и велöтчис нёльöт классын. Гриша — смев зоночка, велöтчис бура, гожумöн унажык кадсö аслас ёрт Васякöт чулöтлiс вöрын: то кыйöны муошшезöс, то öктöны тшак-ягöд, то видзöтöны кайезлiсь олан.

Чулалiс лун-мöд, кыдз грöзитчис Сева кульны Бес Пиликаöс. Гриша да Вася чапкисö вöрнысö, лун-лун деревня кузя шляйтчöны, асьныс гажтöмöсь, етша баитöны.

Öтпыр кылi ме, кыдз баитiсö дед Онтон да том ёрттэзным.

— Деда, — юалö Гриша, — а кин сiя бесыс?

— А сотанаыс? — юалö Вася.

— Пон тöдö, кагаэз, — паныт нюжöтö дед Онтон, — эг на адззыв да...

— А командирныс кин нылöн? — юасьö Гриша.

— Комиссарныс, шуат? — кваркыштiс хитрöй синнас дедыс да содтiс: — Лешакыс пö, челядь.

Ме эг понды кывзыны и ог тöд, мыйöн кончитчис эта басниыс.

Недыр мыйись эта бöрсянь öтiк гажа рытö банничайтiс Бес Пилика. Баняыс сылöн сулалiс садниккез бöрын, видз дорын, кöда öнi вöлi вевттисьöма басöк цветтэзöн да чöскыт дука турунöн.

А двадцать шаг ылына баня дынсянь, сук, чöскыт дука турун коласын, куйлiсö Гриша да Вася и адззисö быдöс, мый керис Пиликаыс банничайттöн. Челядьыс нельки вермисö лыддьыны, кыным пинь кольччöмась старухалöн öмас и кыным бородавка кымöсас да рожабаннэс вылын. Адззылiсö челядьыс и сiйö, кыдз старухаыс баняö ваялiс кытшöмкö саöсь гырниччез, видз вылiсь нетшкис веж цвета турун да вожмалiс нiйö баня передникын. Эшö адззылiсö, кыдз старуха кутiс лягушаöс да дзебис сiйö пиас.

— Лешакыс и эм, — бар вайис Вася.

— Эн баит, а то кылас, — гусьöн паныт шуис Гриша. Дöнзис бы челядьлö Пиликасянь, ежели шедiсö нiя старуха киö. Да и весь öшис бы нылöн неделяся уджныс, кöда коста ой и лун следитiсö колдуння сьöрын. Но старуха эз казяв, что сы сьöрын видзöтöны.

Шондiлöн вир кодь гöрд шарыс павкöтчис ни му бердас, дугдiсö ни дзингыны мошшез, а старуха сё эз ветлы гортас.

— Нем оз пет, — шуис Вася, — тыдалö, гортас и коросьысла оз мун.

Гришалöн шы эз вöв.

Старуха жагвыв, ляшмасьöмöн, гöгöртiс банясö, осьтiс дзурка-вирка ыбöссö, кресталiс кöс кинас баня пытшксö да перыта торкнитiс ыбöссö бöр. Сэсся биргылясьöмöн, кыдз утка, мунiс гортас.

Бес Пилика эз на ешты саясьны син одзись, а зоночкаэз кыссисö ни турун коласöт банялань. Эшö минута, и нiя лэбзисö баня ыбöсö. Чужöманыс ловзисис жар ру да баня дук. Полок пöввез лэбтавтöн кыкнанныс пымалiсö, сьöлöммезныс то ли жарсяняс, то ли тэрмасьöмсянь вартiсö перыта-перыта и стрась ни горöн, и вирыс готов вöлi кöсичаэз поткöтны. Но вот и полок увтын.

Пилика жагвыв дзуркнитiс ыбöснас, шагньöвтiс баня пытшкö, видзöтiс гудыра синнэзнас быд пельöсö, дзик кылiс челядьлiсь дуксö, сэсся мышкыртчис баня гор одзö.

Баня горын шоммез öгралiсö, и эта би югöр одзын старуха öтiк секундаö челядьыс син одзын пöртчис нёштöм баба-ягаö, кöда йылiсь Гриша да Вася лыддьöтiсö книгаись. Баба-ягаыс паськöтiс нырпыссэсö, шутнялöмöн кыскис гыркас жар русö.

Челядьöс нырыштiс страшнöй дума: а вдруг баба-яга шуас: «Морт дук вачкö!» — и кутас кöс киэзнас зоночкаэсö да жаритас öгыр вылас? Но эта вöлi только полöм, эта вöлi не баба-яга, а морт — Бес Пилика.

— Уф-ф, уф-ф, — сьöкыта баня жарнас лолалöмöн, Пилика лабич вылiсь босьтiс сьöд гырнич, кисьтiс сэтчö ва да сувтöтiс гор одзас.

Челядьлöн öшис полöмыс, сы туйö лоис любопытство. Старуха лет-мот кыскис писис бöрись кокöттяс лягушасö.

Челядь дугдiсö лолавны.

Пилика куимись сьöвзис гырничас, шевгыштiс мыйкö ныр увтас, тульс-тульс лэдзлiс ваас куимись лягушасö и сэк жö швыргис сiйö биа шоммез вылö. Банятыр лэдзчисис жаритчöм яй дук: гор пытшкын чижа-пажа сотчис лягуша. Старухалöн эта коста чужöм вылас быд чукöрыс чорзис, синнэзас орсiс лёк, гордöй биок, и öгырлöн югöрыс гажöн йöктiс старухаыс дубас вылын.

— Ух-ху, — ружтыштiс Вася курыт дуксянь. Пилика местасис эз вöрзьы, только синнэс ыждiсö, гöгрöсмисö да веськыт рожабансö зэгнитiс ойтöв.

Баняын лоис шы не тöв. Нельки би югöрыс кусыштiс Пиликалöн дöмаса дубас вылын. А Пилика дзик тувдiс, сiдз и пукалiс пиньöла öма. Вася китш-китш серöмтчис. Гриша чепöльтiс ёртыслiсь боксö, и Васялöн серöмыс öшис зубытсянь.

Бес Пилика джын минута кежö кынмис местаас, но, тыдалö, эз вежöрт, что сiйö сералöны, и пондiс уджавны одзлань. Сiя кватитiс биа шом, чапкис сiйö гырничас. Чш-ш, п-шш — нетшкöвтчис васис тшакыллезöн пар, каттисис старухаыс юр гöгöр.

— Сякöй ылöтчöмсянь, — негора кижган голосöн старуха кресталiс гырничсö, — сякöй мудроссянь, чочком чужöммезсянь...

Каждöй кыв бöрсянь Пилика чапкалiс ваас биа шоммез, мыйсянь ачыс öшис пар коласас, а жаритчöм лягуша дук дынö содiс эшö тшын дук.

— Енкулитiссезсянь...

Торк лэбыштiс полок пöв да бöр усис аслас местаö.

— Аслам ду-умм... — неммис Пилика джын кылас. Йирк-торк чеччöвтiс полок пöлыс вылöжык.

— Тьфу! — сьöвзис колдуння шульга пельпон вевдöрöт. Тики-ток, тики-ток йöктыштiсö кык пöв сьöрсьöн-бöрсьöн.

— Аминь! Богородича, аминь! — клина-бутки пернапасасис шульга кинас Бес Пилика, аслас синнэс кайисö кымöс вылас.

— Уфф! — сьöкыта ловзисис нёштöм голосöн полок увтас. Гымнитiс пöв.

Старухаöс топ тöвчик шупкис банясис, только сера моршеньыс юр вывсис мезмис да небыта усис баня гор одзö.

Бес Пилика эта бöрсянь öшис кытчöкö. И отирыс вунöтiсö старухасö, но меным сё усьö тöдвылö эта историяыс. А ме сэтшöм морт: мый тöда, сё ни висьтася отирлö. Вот сiйöн и гижи эта йылiсь.