Статтяэз
Баитам веськыта
Асывнас дыш петö чеччыны, но мамö саймöтö: «Чеччы, айыт вöв ни вайöтiс, мунö гöрны, а тэ сё узян!»
Синнэзöс тiля, чечча, пета посöдзö, видзöта шондiыс вылö, кöда саймöм, миссьöм чужöмсö да гажöн видзöтчö вöр сайсянь. Отирыс тэрмасьöны ыб вылö, и айö тэрмасьö гöрны. Сiя перыта пуксьö вöлыс вылö, висьталö меным: «Зон, павжунсö ваян. Ме муна Порсьгриваö».
Сьылö сьöдкай. Синнэз гажöтö öшын увтын луд, горшсö летö-китсасьö петух. Мамö комын гор одзын пöжалö нянь — нянь и абу нянь, а турун да кульзöр пизись кöвдöммез, кöдна сьöд рöмаöсь, вачкисьöны назём вылö, но чöскытöсь, кöр сималö кынöм. Мамö тэрмасьö, горись кыскалö няньсö, тэчö кöвдöммесö суньлабич 1вылö и айöлö пешоркаас пуктö павжун, ачыс видзöтлö öшынö да модьö: «Ой! Колисö ни, колисö ни! Талун медбöрын ни муна уджавнытö!»
Шондiыс оз сунав, лэбтiсьö вылынжыка, полöтö маммезнымöс, что нiя сёрмасö петны уджавны. Сiйöн нiя гортын оз мöдейтö, ештöтчасö и — бордпавкйöн öтöрö! И меным сэсся узьны некöр, тэрмася ыб вылö, кыска айöлö пешоркаöн павжун. Кыным меным год? Вит, квать или унажык? Вунöтi, но горт гöгöрись тöда ни ыббеслiсь ниммесö, тöда, кытшöм ыб вылö кытшöм сю кöдзöны.
А вот и Порсьгрива. Эстöн айö и шулялö-гöрö му, кöда лолалö аскоддя уль руöн. Шутнялыштлöны гöриссез, карзö рака, бороздаын больгö шорок, цветитö лымдорчача, вöрыс син одзын пасьтасьö зелёнöй паськöмö.
Сьöкыт гöрны — этö ме тöда, но айö гöрö, сыбöрын казялö менö и сувтöтö вöвсö, шынньöвтö да гажöн юалö: «Локтiн?!»
— Горись локтiс! — гöриссес сьöрсьöн-бöрсьöн бороздаын сувтöтöны вöввезнысö, кымöссэзныс вылiсь йöрнöс соссэзнаныс чышкöны ньылöм, локтöны межа дорö.
Туруныс межа вылын дженыт. Мужиккес тэчöны вöввез одзö мöймуся кöс турун, пуксьöны шоччисьны. Ме пукся ны дынö. Айö босьтö пешорка, кыскö сэтчинiсь павжун: кöвдöммез, лук, шöмйöв, и ми пондöтчам сёйны. Ыбын сёяныс чöскыт. Шоччисьöм бöрсянь гöриссес вились кутчисьöны удж бердö. А ме кöмтöм коккезнам котöрта нятьöсь бороздаöт айö сьöрö да никса: «Ая, вай гöрышта, ая...»
Айö вöвсö сувтöтö, сьöкыта ловзисьö, мездöтчö гöр бердiсь, вешшö бороздаись. Сы местö гöр бердö лякася ме, асмознам шутньöвта вöлыслö и гöра — вöтча горыс сьöрö, ог вежöрт: несьö ме плугсö видза, несьö сiя менö...
Одз ми пондiм шедтыны аслыным няньсö, одз вердiм асьнымöс, быд гожум ыджыттэслö отсасим уджын: медодз осяэз коласiсь нетшким ёг, мед эз пöдты сюсö, коким картов, кыскалiм турунъюррез, талим зороддэз. Сьöкыта олiм, кынöмнымöс тупкалiм мыйöн вермим, но войнаыс быд годö кольччис бöрлань, ыббес вылö сюэс пондiсö быдмыны буржыкöсь — унажык лоис урожай, няньсö маммезным эз ни пондö пöжавны турун сорöн, и пондiм сёйны пöттöдз, а пöт кынöмöн гажажык лоис олан. Висьтала, что деревняын пыр быдöнлö тырмис удж, некин весь эз ов, некин эз норась, что сылö сьöкыт, некин эз сьöвзьы оланыс вылö, ог тöд, медбы кинкö пышшис гортiсь, колис позсö, челядь да иннезнысö.
Умöля олiм, кыт тшыгöсь, кыт пöтöсь, но быд ар, кыдз только ыббез вылiсь пондасö вундыны сю, медодзза кольтасис и суслонсис — государстволö! Колхозным вештывлiс налог, и неетша: öтiк Чураковскöй колхозыс, öнiбригада, государствоас сетлiс 800-1000 центнерöн. Кыскас öтiк план, сетасö мöдiкö, содтасö куимöтö, нёльöтö... Сiдз планнэзнас урожайсö сысъяласö, что сюсö колясö только кöдзыс вылö, да медбы нач эн тшыгьяв. Сiдз вöлi, сiдз олiм, но тшыгйöн эг кулö, вердiм асьнымöс и государствосö — городiсь отирсö. И нем бы горзыны сiя кад вылö, кöр деревняын сы понда и олан, медбы быдтыны сю, вердны асьтö и отирсö. Но сьöлöм öнiвисьö сiйöн, что эта сю понда колхозыслö эз вештiсьлö или вештiсьлiсö сiдз — сетлiсö грош да копейка. Босьтiм бы öннямоз асланым удж понда честнöй руббез, поди, гортiсь бы етша кин и пышшис, да эшö вöлiсö бы бур туйез, натьтö, быдыс олiс бы гортын.
Кöдзим сю и видзим пода: вöвсö и мöссö, баляэсö и порссесö. Садитiм-быдтiм картов да капуста, лук да морковь, нельки огуреццез — быдöс вöлi, кыдз кодя отирлöн, кöдалö сунавны некöр, но ошшасьны эм мыйöн.
А талун мый? Кытöн важ отирыс, кöда эз пов гöрны, кöдзны, вундыны, пöрöтны вöр да тшупны керку? Кытчö лоисö деревняэс, кытöн пизис оланыс? Öтiккез кулiсö, мöдiккез пöрисьмисö, куимöттэз шыбыльтiсö кошшыны кузь руббез да кокнит олан — сьöвзисö асланыс позö, бытьтö нем нылö эз ло жаль, бытьтö деревняэзсис ош вашöтiс... А кин виноватыс? Думайта, что асьным, кöр кутiм да öтлаöтiм колхоз колхозкöт, деревня деревнякöт. Сельсоветас вöлiсö дас колхоз, а лоис öтiк, унаись керим етша, вынсьöтiм бы, да петiс мöднёж: колхозыс паськалiс, а отирыс пондiс дышсявны, надейтчыны öтамöдныс вылö, сайласьны спинаэз сайö. Содiсö начальниккез, кöр одзза учöт колхозас вöвлiпред да счетовод (ог лыддьö бригадирресö, кöдна колхозниккезкöт öтлаын уджалiсö черöн да вилаöн).
Кокнита пондiм овны, кöр ыджыт колхоззэзö вайöтiсö тракторрез да комбайннэз, пыкисö быдкодь машинасö сымда, что öтiкö оз ештö доддявны, видзöтан, вайöны ни вильö, öтiкыс оз ешты сiмны, кутчисьöны ни мöдiк бердö. Уна вöлiи сiдз, что ваясö машинасö, сувтöтасö зэр увтö и сэтöн кöртыс сiсьмö, или видзöтан кö, нач виль машинасö бöр ни кыскöны утильö. Гажа лоис оланыс, кокнит — уджалöны машинаэз, дыш пондiс петны киö босьтны чер, назём вилаэз, кöр назёмыс местö пондiсö вайны удобреннёэз, кöр томмес пондiсö повны нятьöсьтны киэзнысö, а зонкаэс, кöдна кольччисö школа бöрсянь гортö, кутчисö велöтчыны механизаторрезö — босьт бедь, шупкы и инман несьö трактористö, несьö шофёрö. И нывкаэс... Нiя пондiсö велöтчыны да уджавны городдэзын. И оланыс томмесö деревняын янсöтiс: нывкаэсö бöбöтiс городö, зонкаэсö колис гортö. Вот и жöниккес олöны гöтрасьтöг, тошсялöны да багсялöны, топ нем вылö оз туйö... Висьтала, что и школаын том мортсö тшупöны не только гижны да лыддьöтны, а бöра жö городö мунны да велöтчыны одзлань, медбы уджавны кытöнкö да мыйкö керны заводдэзын, фабрикаэзын — геройскöй удж уджавны, а татöн мый?
Тöдвылын сiя, кыдз миянöс корлiсö кыкьямысöт классын велöтчиссез дынö. И мунам ми, специалисттэс, челядьыс дынö, одзаныс локтам: фельдшер, агроном, зоотехник, механик да киномеханик — рочöсь да комиöсь, быдöс интеллигенция. И пондöтчам челядьыс одзын разьны-дундöтчыны да ошшасьны асланым уджöн, кин да кыдз кужö, кыдз вермö, сiдз и гардö-быздö... Шуам, ме велöтчи фельдшерö, и уджыс менам абу нятьöсь бытьтö, кокнит — баита, мед челядь мунiсö велöтчыны только фельдшерö, дзир сэтöн лоасö счастливöйöсь.
— Бöбöтат! — менö öмалö киномеханик. — Велöтчö мыччавны киноэз, вот уджыс!
— Челядь, мый тiсiйö кывзат? Велöтчö зоотехникö! — сьылö зоотехникыс.
— Чу! Велöтчö учительö! — бузгас челядьлö велöтiсь.
Томмес одзын пурам öтамöднымöс, ошкам уджнымöс, а челядьыс пеллезнысö öшöтасö, кывзöны да гажöн думайтöны: «Ага, фельдшернас бур, а киномеханикнас эшö буржык. Киномеханикыс быд рыт кино видзöтö и деньга оз вешты да уджалö луннас кык часöн... И велöтiсьнас, натьтö, няньыс шедö кокнита. А вот тэ, зоотехник, кöть ошкан уджтö, а видзöтан подаыс вылö и сьöлöм гудыртчö...» И челядьыс петасö школасис да тарöвтчасö гортiсь кинлö кытчö туй!
Чужи да быдми сьöд вöр шöрын. Аслам учöт посадöн ошшасьны и ог куж, но сiя меным вöлiи кольччис меддона да медгажа, öннямоз менö мамö городö эз вашöт, а кöр лöсьöтчи мунны велöтчыны, модис: «Мый тэ сэтчин öштiн? Мый кошшан? Отирыс гортын олöны, а тэ...» А меным стрась охота вöлiвелöтчыны, медбы сыбöрын бертны гортö да унажык отсавны аслам отирлö.
Сэсся армияö босьтiсö. Служитiинженернöй войскоэзын, медодз кери сiйö, кытшöм приказ сетасö. Сыбöрын босьтiсö штабö.
Писарь, но гижа да пукала нач етша, унажык котрася, кера пропусккез, кöднатöг татöн некин и некытчö оз мун: не командировкаö, не гортас, не уджавны, не шоччисьны — режим. Подписка, фотографияэз, разовöй, временнöй, постояннöй пропусккез — оперативнöй удж, сунавны некöр. Менам уджыс абу кокнит, но ог норась, а гордитча сiйöн, что отсала керны оружие, кöда эм ни врагыслöн да кöдö сiя лöсьöтчö лэдзны миян вылö — Хиросима керны. Ась кутчисьö, ась пондылö, мый кошшас сiйö и адззас — вештiсям сiйöн жö, сiдз жö, медбы эз вунöтö, тöдiсö кинкöт кутчисьны. Ми дорам оружие, и ме учöтика да отсала дорны сiйö.
Тöда ни, что татöн вöлiавария, ыджыт беда, омöн радиация, сiйöн сэтшöм и служба — быд шагын тайна.
Ме том, ог думайт, мый вермас лоны эта радиациясянь; служита, кыдз служитöны ёрттэзö, кöднакöт быдми да велöтчи, и нiя öнiслужитöны, письмоэзын ошшасьöны бур службаöн, и ме нылö ошшася, быд кылын бöбöта, что пехота — царица полей. Эна луннэзсянь ме талунöдз бöбöта аслам службаöн, бöбöта ёрттэзöс, тöдсаэзöс, быдöннысö, кин шыасяс, юалас, служитiя кöркö. Пондiшогавны. Мыйсянь? Эг думайт. Поди, сiйöн, что сайкавлiсö коккез или радиациясянь, кöдö он адззы, он кыв, но кöда эм. Öт бокам или мöдам унажык? Или видзчисьö одзат? Веськыта висьтавны, мый ме тöдi? Кöр аварияыс вöлiи мыйсянь? Сёйи, юи, лолалi, ветлöтi— бергалiсымда, мымда ёрттэзö эз бергалö, но, тавося годöдз, кытчöдз эз пондö висьтавны радиоын, телевизорын, газетаэзын, эг тöд, кöр да кытшöм годö вöлiаварияыс, мый сэтчин лоис. Поди, сiйöн, что вöлiтом солдат, и солдатлö нем вöлiнырсö сюйны сэтчö, кытчö оз ков — кер ассит и быдöс сэтöн! И ме кери.
Солдаттэс уджалiсö промплощадка вылын, уджалiсö чочком халаттэзöн, маскаэзöн, карманнэзаныс кыскалiсö кассетаэз, нылö усьлiс öтiклаын уджавны минута, мöдiклаын кыкö — мымда радиация, сымда и удж, сэтшöм и служба. Командиррез синйисö, медбы бокö эн тальччы, унажык радиациясö эн кошшы, а сiя эз тыдав, лякасис, мöртчис шучкöп. Кöр удж бöрсянь солдаттэс пыравлiсö санпропускниккезö, «дзингисö» приборрез — орсiс сигнал: тревога, тревога! Этö сiйöн, что тэ «дзинган», что тэ бердын дозаыс ыджыт и колö миссьыны. И миссьöны öтпыр, мöдöтпыр, кöда куимöтпыр, но лампочкаэс öзйöны да сильгöны приборрез.
Тöдвылын, кыдз öтпыр миян полкö вайöтiсö рота — двести морт, кери ме нылö пропусккез, ротаыс уджалiс неделя, босьтiсö вир и чожажык бöр, зона сайö. Ме бöра нылö кера пропусккез, бöра вайöтöны виль рота, öнiдумайта: «Эта мый вöлi? Мыля сэтшöм чожа ротаэсö вежисö?» И кыдз медик ни думайта, что, натьтö, не весь солдаттэслiсь босьтлiсö вирсö и весь нiйö полксис эз вежö, поди, нылöн вирыс тшыклiс — вöлiни кокнит, но лучевöй болезнь, шогöт, кöда йылiсь эз баитö враччез, эз шыась некин.
Ме ачым шогалiни. Котраси медпунктö öтпыр, мöдöтпыр, ньылалiтаблеткаэз, но немымда лич эз кер, а кöр мунiврачыс дынö куимöтпыр, сiя резгис: «Гортö бы мунан!».
Служитiодзлань, ог вермы норасьны, что курччöвтiс радиацияыс, пурис пыр кежö. Сэсся водтöтiс госпитальö, кысянь и лэдзисö гортö. Сетiподписка, коли «Сороковкасö» бöрам («Сороковка» — сiдз ми, солдаттэс, шуим ас коласаным «Челябинск-40», кöдö тавося виöдз тöдiсö, но некин эз тöд...) Гортын бöра медодз котöртiвраччез дынö, и бöра нiя медодз видзöтлiсö чужöмам, кытчö абу гижöм, что шогала, а пытшкас, сьöлöмын, мый керсьö, ме бердын... Спасибо, что роднöй посадын, учöтик участковöй больницаын, невна веськöтiсö, да эшö иньö, медсестра, быднёж отсалiс: эз повзьы уколсö керны, ласковöй кывнас веськöтiс... Сыбöрын ачым велöтчи фельдшерö, аслам ки увтын лоисö лекарствоэз — сёй, ю да эн кивзы! Сiдз оланыс и кыссьö, адззисьлiс жö бур врач, водтöтлiсö больницаö. Счастливöй отирыс небöны машинаэз, а ме деньгасö öкта веськöтчыны...
Ог шу, что вöлiвойна вылын, ог шыась, что тышкаси врагкöт, кöр куимись сетлiподписка, медбы кылöс кузя не видзны, и шогала не öтнам: миян командаись — этö районсиным двенадцать морт вöлiсö Челябинскöй «Сороковкаас» пятьдесят седьмöй годö, кыкыс локтiсö жö госпитальсянь (мöддэс горт ладорын оз олö и судьбанысö ог тöд), а Мартынов Вася, Сосновка посёлокись зонка, киномеханик, кöда коласаным топ здоровьенас вöлiмедбур, кулöма ни... Важын ни абу, и сылöн тшыкöма вирыс — лучевöй болезнь вийöм.
«Сороковка» да Чернобыль. Коласаныс — куимдас годся унажык, и бур талун, что солдаттэсö, кöдна вöлiсö Чернобыльын, враччес босьтöны диспансернöй учёт вылö.
Оз бы ков меным кылöс видзны кузя, но öмöс осьтi, сiдз кыдз талун гласность, и не ме öтнам касьтыла важсö, йита вильыскöт. Талун, кöр эшö эз ештö вунöтны Чернобыль йылiсь, кöр эшö сы йылiсь гижöны газетаэз да мыччалöны телевизорын, кöр отирыс эшö не öтiк сотня тысячаэзöн олöны радиация увтын, бытьтö сiдз и колö, бытьтö радиацияыс — курорт, сьöлöм висьö не ас пондасим (олiни ме ассим, и кöть и курыта, но олi), а отир понда.
Атом, сiя учöт, но медвына, мезмас кö — медлёк. Сэтчин, Челябинскас, кытiсь мезмис радиацияыс да паськалiс тысяча километраэз пасьтöн (спасибо, что матын, кыдз Чернобыляс, эз вöлö ыджыт городдэз, етшажык радиацияыс увтö шедiс отирыс), мыччалiс, что аварияыс бöрсянь, медбы сiйö ликвидируйтны, сымда колöны ресурссэз, что ог куж и висьтавны... Не весь жö гижлiсö, что медодзза атомнöй бомбаыс миянлö сувтiс сы донöн жö, мымда богатствоным торксис Великöй Отечественнöй война коста.
Авария... Аскадö томмес уна вöлiсö сэтчин, но етша кин тöдiс сы йылiсь, и, натьтö, некин ни эз думайт, что куимдас год бöрсянь бöра пондам панявны радиоактивнöй нятьсö. Не весь покойнöй академик Ленгасов висьтавлiс: «öтпыр чарöтiс, мöдпыр эшö чарöтас!.. Мед еныс оз шу, медбы эшö чарöтiс куимöтпыр. Етша кинлö юрас пырö, мыля ми пондiм овны умöльжыка, бытьтö быд шагын виноватöй перестройка, бытьтö самогон керöмсянь бырсис сахар, кöр радиация увтö шедiсö медбур муэз, кытöн быдмис сахарнöй свёкла.» Мый вылö ме этö быдöс гарда? Öтлаö кöта кöркöся олансö, йита талунняыскöт? А сiйöн, ёрттэз, что сiдз овсьö, гардö тöннясö талунняыскöт, и некыдз тэ тöнняыс дынiсь он мездöтчы. И медбы овны одзлань, дзар колö керны бöрлань, видзöтны колö, кыдз вöлiсэтчин, и мый вермас лоны одзаным.
Округаным экономикаыс умöль, миян муын богатствоэз абу, бур вöррес керассисö, и кольччис керны только атомнöй станция. И бур лоас, ежели керасö АЭС-сö: лоасö туйез, и оланыс вöр шöраным оссяс топ ен ыбöс, кыт пондас киссьыны быдöс, мый колö и оз. Но мийö мылякö вунöтам öтiкö, что миян округын эм меддона да медыджыт богатство — этö отир, этö ми — комиэс, кöднö сiдз ни оланыс öвтiс — öтiккезöс городдэзö, мöдiккезöс Сибирьö, кöдö революцияöдз, кöдö сы бöрсянь, и ми ог ни вачкисьö ас выланым, унажыкыс баитам бы рочöн — стыдитчам, что еныс шуöм чужны комиэзöн, да эшö пермяккезöн.
Атом. Сiя вына, только колö кужны сыкöт уджавны и овны. Ежели лоис öтiк авария, сыбöрсянь мöдiк, и бытьтö эна аварияэз бöрсянь нем умöльыс оз ло — бöбöтöны! Сэтчин, Челябинскас, ме ачым кери пропусксö сержантлö, кöда шогалiс лучевöй болезньöн и гортö мунiс, натьтö, кувны.
Радиацияö медодз пырöны солдаттэз, но мылякö начальник коддес оз жö уськöтчö быд местаö, и талун Чернобыляс медодз пырöны да медуна нятьсö гумалöны простöй отир.
Ветлöмась миян Белоярскöй АЭС видзöтны, локтiсö да ошшасьöны, что сэтчин пö ма кодь чöскыт. А киннэз нiя сэтшöм осьта öмаэс? Рочöсь или комиöсь? Мылякö меным думайтсьö, что Гайнаын райкомись секретарьыс — роч морт, и пыр кежö сiя миянö эз вужьясь, зэлöтас мортсö оланыс и — адззисьлытöдз! Веськыта висьтала, что миянлiсь отирсö пуктöны ёг местö — эм сiя или абу, оз кывзö, сё одззамоз — етшажыккес да вынажыккес вермöны унажыксö. Вöлiсö митинггез, öктiсö подписсез, но топ эта лоис етша, топ подписсесö пуктiсö не отир, эшö колiс чукöртны комиссия, кöда кыскö асланяс жö, отирсö жö гусьöн да пöлöн тальö бы, аслыс керö: сетан АЭС! И быдöс сэтöн.
Меным мый? Меным, поди, овнытö кольччис недыр ни. Но синваэз петöны асланым отир понда, кöдна коласын чужи, быдми, ола да уджала, öтiк лун эшö йöзас эг тальччы, эг пышшав горт муись. Мый тэнат, сiя и менам! И мый эта отиркöт лоас одзлань?