Ас йывсим



Чужи август 1 лунö 1936 годö Чурак нима неыджыт посадын. Айö да мамö уджалiсö колхозын. Кыкнанныслöн грамотаыс эз вöв: айö ештöма велöтчыны öтiк год, а мамö гижны да лыддьöтны велöтчöма ликбезын — тöдiс букваэз и кужис гижны ассис ним...

Айö да мамö нач умöля кужисö гижны да лыддьöтны, но нiя бура кужисö уджавны, некытшöм удж бердö эзö полö кутчисьны и уджавтöг нач эзö вермö овны. Öнi ме верма ошшасьны и гордитчыны, что сэтшöмöсь менам вöлiсö дона морттэз. Эд öння кадö миян отир лоис дышöв: етша кинлöн пондiс висьны юр и сьöлöм дона му понда, етша кин тöждö, медбы ыббез вылын быдмисö сюэз, вöлi бы асланым нянь.

Быдми сiдз, кыдз овсис, кыдз ен шуис: тулысöн, кыдз только пондывлiс сывны лым, мыччисьлiс му, керкуись öтöрö чеччöвтлi нач кöмтöг да вешьянтöг и öтiк йöрнöсокöн лун-лун ёрттэзкöт котраси улицаын, вунöтлi пыравны керкуö, медбы сёйны, сiдз кыдз деревняын эз вöв челядь сад, а ыджыттэзлö некöр вöлi синйыны миянöс.

Усис быдмыны сьöкыт да тшыг война годдэзö, етша кöр сёйлывлi пöттöдз, эг пешлывлы чöскыт сёян, эг тöд конфетаэзлiсь, пряниккезлiсь да сахарлiсь кöр. Ны местö бура тöдi, кытшöмöсь кöвдöммез, кöднö мамö пöжавлiс турунiсь. Некöр ог вунöт, кыдз быд рыт чуманокöн котрасьлi колхознöй мельницаö, кытöн безменöн бригадир öшлывлiс пизь — содз пизь, кöдö шедтывлiсö айö да мамö и кöда нач эз вачкись пизь вылö, вöлi сьöд рöма, кыдз бус, кыдз нять...

Учöтсянь пыр сималiс кынöм, сiйöн одза-одз пондi уджавны колхозын. Вунöтi ни кыным год вöлi меным, кöр гожумöн челядьыскöт котöртлiмö ыб вылö, сувтчывлiмö зэв-зэв öтамöд бердö и осяэз коласiсь нетшкимö-орлалiмö ёгтурун, уджалiмö быд лун асывсянь сёр рытöдз.

Верма ошшасьны, что учöтся-учöтöн кужи кокны-кучитны картов, вöлöн видззез вылын кыскалi турунъюррез. Колхозын керисö тöв кежö турун, томся-томöн тали зороддэз — быдöс кери сiйö, кытчö иньдiс бригадир, уджалi, эз шоччöтлö нельки кресенняэзö.

Медодз велöтчи гортiсь школаын. Велöтiсö коми кыв вылын. Витöт классöдз велöтчи бура — пыр ошкисö, козьнавлiсö премияэз (тетраддез да карандашшез), но витöт класс бöрсянь пондi «джöмдавны велöтчöмöн» — дзугис математика.

Гортiсь школа кончитöм бöрын подöн мунi Кудымкарöдз, лöсьöтчи лоны агрономöн. Вачкисис, что агрономлöн удж кокнит — чатрась ыббез вылын да сьыв-ов. Но сельхозтехникумö велöтчыны эг шед. Городö челядь локтöмась уна, вöлi ыджыт конкурс. А ме, кыдз висьталi ни, математиканас джöмдалi и ковсис бöр котöртны городiсь гортö. Эстöн веськыта висьтала, что эна луннэзöдз городын эг вöвлы, сiя меным эз гленитчы, сьöлöм бöр кыскис гортö, гажа посаданым, кöда поздiсьöма джуджыт грива вылö. Медджуджыт местаын сулалiс басöк вичку, кöда ылiсянь тыдалiс. Гажöтiс и кыксувда школа, гажöтiсö веськыт да лудъя улицаэз. А отирыс... Вачкисис, что миян отир кодь сэсся некытöн абу. Быд морт олiс и уджалiс дружнöя, морт мортлö вöлi кыдз сой или вон, öтiк кодя семья. И мый отирыс пондывлiсö керны, кутчисьлiсö öтдруг, уджалiсö öтмоз, кöть колхозын, кöть, шуам, аслыныс, помечын. Кытшöм уджаöсь да гажаöсь вöлiсö пöриссес, сэтшöмöсь и быдмисö челядь. Пöриссез олiсö гортын, и челядь — гортын, етша кин мунiс велöтчыны одзлань. Сiдзкö, гленитчис меным гортын оланыс, нач эг повзьы школа бöрсянь доддявны вöв, тулысöн асывнас кайлi ыб вылö сэк, кöр эшö шондi эз мыччисьлы кымöрас, эшö и ыбшар эз сьыв, и пондöтчывлi гöрны. И вöлi сэк меным кытöнкö дасвит годся невна унажык. Öння кадö ме годсяэс эшö, натьтö, вöввезлiсь полöны, кыдз лёк зверрезлiсь.

Ме сiя тулысö гöри дассизим гектарся унажык ни, гöри сёр арöдз, арöн ыббез вылiсь отирыслö отсалi дзимлявны сюэз. Уджалi сiдз, мед некин эз серав, эз вид, эз шу, что дыш, что нем вылö ог туй.

Удж бöрын подöн иньдöтчи кузь туйö — мунi Кöсö, оськöвтi велöтчыны одзлань. Вонöс босьтiсö уджавны райкомö, и сiя менö корис велöтчыны шöрöт школаö.

Спасибо вонöлö, кöда менö вердiс, отсалiс велöтчыны, кöдакöт дружитi, кыдз бур ёрткöт. Öнöдз видза тöдвылам, кыдз сiя мунiс война вылö, врагкöт тышкасис танкистöн, витiсь вöлi ранитöм, моростыр вайис орденнэз да медаллез, кöдна пыр гажöтiсö менчим сьöлöм. Гордитчи да пыр лöсьöтчи лоны вонö кодьöн, думаэзнам олi сы моз, сiдз кыдз сiя асьсö некöр и некытöн эз стыдит...

Кöсын велöтчöм бöрын, 1956 годö, лöсьöтчи мунны армияö. Военкоматсянь висьталiсö, мед видзчиси повестка.

Лöсьöтчи мунны армияö, гажа гожум чулалiс гортын, горт посадын: то уджалi колхозын, то томмескöт гажöтчи, рекруталi. Но кад чулалiс. Ёрттэзöс кольлалi армияö, только меным некытшöм повестка эз лок. И Чуракын томмез пондiсö баитны, медбы кутчиси уджавны клубö. Ме кужи орсны гармонняöн, аккордеонöн, прокми рисуйтны, верми гижны лозунггез да кыдзкö сэкжö гижи медодзза рассказ, кöдö печатайтiсö районнöй газетаын «По социалистическому пути». Медодзза рассказ, медодзза статьяэз газетаö, медодзза учöтик очерккез уджалiсь отир йылiсь — этасянь пондöтчис менам гижöм.

Уджалi клубын, гардчи отир гöгöрын, тöдi быдöс, мый керсьö колхозын, деревняэзын. Тöдi отирöс, нылiсь мывкыд, думаэз — кин кытшöм эм. Любитi кывзыны пöриссезлiсь висьтасьöм, тöдi бура асланым посадлiсь история, кöда ась и сулалö вöррез коласын, но важ кадсянь отир сiйö озö орддьö: миянöт мунiс важ туй г. Усольеö, Чуракöт уна отир ветлiс гортсянь городö да городсянь гортö... Чуракын жö революцияöдз ни вöлiсö ссыльнöйез, унажык уджалiсь отир, кöдна мыйöнкö эзö гленитчö царьыслö да сы слугаэзлö, и царьыс вöррез коласö иньдывлiс ассис враггесö.

Посаданым жö революция вотöдз ни уджалiс школа, кытöн челядьöс велöтiс кодя, уджа, смев Боталов Тимофей Порфирьевич, кöда бытшöма кужис велöтны лыддьöтны да гижны, прокмис баитны отиркöт олан йылiсь, дружитiс менам дедкöт. Боталов киись петiс быдöс, мый бердö бы эз кутчись. Öнöдз Чуракын, больницаын, сулалöны шкаффез, кöднö керлiс велöтiсьыс.

И быдтiс велöтiсьыс сэтшöм зоннэз, кöдна йылiсь позис бы гижны торья повесть или роман. Тимофей Порфирьевичлöн Гражданскöй война коста пöрисьжык зоныс, Василийыс, вöлi комиссарöн, кöдö колчаковеццез вийисö Ошиб дынын. Мöд зонсö сiдз жö, кыдз комиссарöс, Киев нима деревняын лыйис Яраш, кöда уджавны вöлi дыш, а мортсö вийны чож. Öнi комиссар Борис Тимофеевич куйлö Кöсын вичку дынын. Этö сы йылiсь гижис повесть миян гижись Иван Алексеевич Минин. Да и менам сьöлöмö висис и висьö, мыля эг гиж бур морт йылiсь. Эшö велöтiсьлöн вöлi медтом зон Толя, кöда Чуракын чукöртiс медодзза комсомольскöй организация...

Сiдзкö, менам роднöй посадлö эм мыйöн ошшасьны, кöть оланыс кыдз кужис, сiдз и орсiс-сералiс и дойдiс отирсö, бергöтлiс ны судьбаэзöн, сiдз кыдз Гражданскöй война коста посад пыр ветлiсö гöрддэз да чочкоммез. А кöр чукöртiсö колхоззэз, эта жö кадö вöррезын öвтчис Курайлöн банда — асланым жö отир, кöдналö эз гленитчы Совет власть, эзö колö колхоззэз. Нiя жö сьöкыт годдэзö миян посадö вайöтiсö тöдтöм роч отирöс, спецпереселенеццезöс, веськыта висьтавны, сэтшöм жö ссыльнöйезöс, кыдз и революция вотöдз. Нiя вöлiсö сэтшöм жö отир, кытшöмöсь вöлiсö миян айез да маммез. Тöдтöм роч отир пондiсö овны öтлаын чурашанакöт. И миян керкуын олiсö бур морттэз — тöрисö öтлаö, уджалiсö öтiк удж сэтчöдз, кытчöдз вöррез коласö эзö керö аслыныс посёлоккез.

Висьтала, что комиэз роччезкöт öддьöн чожа пондiсö дружитны, медодз томмез, нывкаэз да зонкаэз. Сэтчöдз дружитiсö, что аркмылiсö семьяэз, менам роднöй тёткалöн медпöрись зоныс, Коля очавонö, пондiс любитны роч Настяöс — лöсьыт мыгöра да бытшöм чужöма, визыв нывкаокöс, кöда чожа велалiс баитны комиöн. И вонö гöтрасис Настя вылын, кöдакöт бура олiсö сэтчöдз, кытчöдз Колясö эзö нуöтö война вылö да сэтчин эзö вийö.

Настяыс дыр видзчисис мужиксö война вылiсь, сы бöрын мунiс овны гортас — Белоруссияö...

Висьтася ме отир йылiсь, кöднö ог вермы вунöтны, кöднакöт олi и уджалi школа бöрсянь клубын быдса год. Этö вöлi 1957 год.

Гожумöн бöра видзчиси военкоматсянь повестка. И арöн видзчиси повестка, сэтчöдз, что вöтiс ни Октябрьскöй праздник, кöда куимöт лунö гöтраси. Лöсьöтчимö керны свадьбаок, но сэтöн вöлись повесткаыс и адззис. Öддьöн эд дыш петiс мунны да служитны, кöр колiс янсöтчыны том инькöт. Но мый керан?

Служитны шедi сэтшöм местаö, кöда йылiсь етша кин тöдiс, сысянь, что öммез кöрталiсö подпискаöн, мед некин кыв эз видз кузя.

Город Челябинск-40, «сороковка». Эстöн керисö атомнöй бомбаэз. Вöлöма взрыв да сэтшöм, что радиацияыс сибалöма ылö-ылöдз, кöда йылiсь, бöра жö, тöдiмö только мийö, служитiссес. Миян отделеннё уджалiс то öтiклаын, то мöдiклаын, керимö сiйö, мый тшöктiсö керны командиррез. Ештiсö нуöтлыны и промплощадка вылö, кытöн тырмис удж, кытöн уджалiмö чочком халаттэзöн да маскаэзöн. Но, тыдалö, радиациясö эз падты не халат, не маска. Кыдзкö рытöн пыри санпропускникö, аппараттэзын öзйисö лампочкаэз да пондiсö дзингыны-звонитны приборрез, кöдна висьталiсö, что буржыка колö миссьыны. И мисси öтпыр да мöдпыр, мисси сiя ваöн, кöдöн колiс, кöда мылякö вöлi кöдзытöв.

Рытöн водi дзонь — некыт эз вись, а асывнас эг понды вермыны чеччыны...

Куимись котраси санчастьö, кытöн пантавлiс врач — майор Багмет, кöда кыкись сетлiс таблеткаэз, а куимöтпырас висьталiс, что сы дынö ветлöта сiйöн, мыля муна бы гортö... Врачыс бытьтö вачкис кымöсам, сьöвзис синнэзам...

Эта бöрсянь врач дынö эг мун, кöть и ёна шогалi. А сыбöрын чожа корисö уджавны штабö.

Штабын öтiк лун эг пукав весь. Быд лун пон моз котраси пропусккезöн. Котраси февраль месяцсянь ноябрь месяцöдз, кытчöдз эг шед госпитальö, кöда бöрсянь лэдзисö гортö.

Гортын медодзза месяццезö армия бöрсянь вöлi сьöкытöв, кöр вöлi том, чужöмö вылын нач эг вачкись бы шогалiсь вылö, но...

Годся дыржык некытöн эг уджав (петiс неыджыт пенсия). Сыбöрын, 1960 годö, пондi уджавны заведующöйöн асланым библиотекаын. Эстöн вöлись позис бы ошшасьны, что удж лоис ме сьöртi. Вöлiсö книгаэз, кöднö любитi лыддьöтны. Только библиотекаын пукалi етшаöв. Пыр ме понда адззисис мöдiк удж: то сельсовет, то парторганизация, то комсомол сетлiсö быдкодь заданнёэз. Уджалi то выборрез коста, то вöлi пропагандистöн политкружокын, то вежлалi деньга...

1961 годö пондi вежöртны ни, что колiс бы велöтчыны — вöлi бы специальность, сэк, поди, оланыс вöлi бы кокнитжык. Думайттöг да лöсьöтчытöг мунi Кудымкарö, медучилищеын сетi экзаменнэз и пондi велöтчыны, медбы лоны фельдшерöн.

Мыля лоны фельдшерöн? Öнöдз ачым бура ог тöд. Верми бы, поди, лоны художникöн, кужи бы вочны телевизоррез... Уна öтiк-мöдiкö бы талун эшö кера и, бат, кери бы, но вот...

Велöтчи Кудымкарын и думайтi, кыдз бы гижны рассказзэз: лöсьöтчи-лöсьöтчи, смевмöтчи-смевмöтчи да мунi издательствоö, кытчö нöбöтi роч кыв вылын гижöм повесть сы йылiсь, мый йылiсь одзлань висьтаси ни — этö Чурак посадлöн история, кытöн мыччалi Гражданскöй войнася годдэз.

Издательствоын панталiсö сэтшöм гижиссез, кыдз С. И. Караваев, Н. В. Попов да мöдiккез — томжыккез, кöдна веськыта висьталiсö, что ме мортыс коми и колö бы меным гижны комиöн. И комиöн гижи рассказ-мöд, кöдна эзö вöлö вывтi бурöсь, но пöрисьжык ёрттэз ошкыштiсö, нельки печатайтiсö альманахын. Эта бöрсянь гижтöг овны эг ни вермы. Гижи уна, да унажык весись, сысянь, что некин и некытöн гижны эз велöт, гижи сiдз, кыдз шогмис-петiс.

Кык год да джын велöтчи Кудымкарын. Велöтчöм бöрсянь мунi уджавны гортö, кöть нiя жö ёрттэз, пöрисьжык гижиссез, кольöны бы вöлi Кудымкарас или иньдöтöны бы вöлi уджавны Куваö, но сьöлöмö кыскис гортö, кытöн учöтсянь велалi овны вöрын. А эшö кывзi мамöс, кöдалö колiс, медбы зоныс вöлi дынас.

1956 годсянь 1983 годöдз уджалi гортiсь больницаын. Ен-батюшко! Кытшöм эта вöлi удж ме понда, кöр больницаын эз вöв нельки телефон, эз вöв машина. Вöлi только вöв, и кыдз больницаöн и врачебнöй участокöн заведующöйлö, колiс меным бергавны дассизим деревняын, кöдна коласын расстояннёэс дас километр мымдаöн. А менам только вöв, и не быд фельдшерскöй пунктын эмöсь фельдшеррес, да и больницаын пыр шогалiссез видзчисисö менö жö. Бергалi ой и лун, вунöтлi кресенняэз, вежалуннэз. Оя-ойшöрöн чеччöвтлi ольпась вылiсь, чепöссьывлi баняись, котöртлi вöрись...

Кадыс пыр зэлöтiс, но ештывлi эд эшö гижны, гижи, кыдз петiс, кыдз кужи. И некин и кылöн эз отсав. Пыр видiсö ёрттэз-гижиссез, издательствоын шедлiс пöттöдз, сэтчöдз, что мукöдпыр быдöс чапкывлi, пышшывлi вöрö. Сэтчин жöдзи мыдзтöдз, месяц-мöд кежö вунöтлi пуксьыны пызан сайö, но... Бöра кутчисьлi гижны.

Колiс бы одзлань велöтчыны. Институтiсь да университетiсь уджалiссез вовлiсö гортöдз, корисö велöтчыны, но полi... Полi, что понда шогавны öддьöнжык, что быдöс дзугсяс — весь öшта кад.

Колö висьтавны, что пыр и уна гижи окружнöй газетаö статьяэз, неыджыт рассказзэз, очерккез. Мыля и мыйлö гижи газетаö, кöр статьяэз понда лöгасьлiсö лёк и рам начальниккез, нылöн иннез, зоннэз, воннэз, сваттэз... Но гижи эд, кöр еныс я мый я козьналöма асныра бöб мывкыд, кöда пыр висьталiс, что эстöн не сiдз, сэтчин керсьö мöднёж, колö бы керны бура, а керöны умöля... Кошши правда, кöда йылiсь, шуам, талун озö ни баитö, а ме сэк кошши правдасö, кöда понда сiдз меным дöнзис, сымда менö дойдiсö, что быдöс висьтавны кö, поди, озö и веритö, озö кывзö. Öтпыр öтiк статья понда Чуракö ме дынö гажа гожумся лунö одз асывсянь катыльтчисö нёль легковöй машина: райкомись секретарь аслас медбур отсасиссезкöт, милицияись начальник, прокурор и райисполкомись председатель. Сэк ме былись повзи да иньöлö висьталi, мед кольччис да буржыка олiс и нянь-сов дорас менö эз касьтыв — нуöтасö ни, натьтö, гортiсь.

«Некытчö озö нуöтö! — висьталiс смевкодь иньö. — Сталиныс абу ни ловья. Ловья кö бы вöлi Сталиныс, тэнö важын ни лыйисö бы, кыдз гутöс...»

Былись иньö моз лоис, эшö и сыбöрын, кöр пондi уджавны райбольницаын методистöн (методистöн Косаын уджалi 1983 годсянь 1994 годöдз) ёна шедлiс да бöра жö гижöмö понда. Уджалi фельдшерöн куимдас год. Медицинаын удж понда сё жö козьналiсö медаллез «За трудовое отличие» (1967 г.), «За трудовую доблесть» (1982 г.), «Ветеран труда», нагруднöй знак «Отличнику здравоохранения» (1985 г.)

Этö, натьтö, быдöс сы понда, что Чуракын больницаын уджалi 1964 годсянь 1983 годöдз, гардчи отир коласын, а районын уджавтöн ысласи медпункттэзöт.

Вунöтi висьтавны, что айöкöт да мамöкöт пыр олiмö öтлаын — öтiк керкуын, кытчöдз нiя эзö кулö. Олiм, тöрим öтiк позö. А кöр кулiсö, ачым дзеби.

Эшö менам вöлi томжык сой Валя, кöда Ыджыт Кочаын уджалiс агрономöн да одза-одз пондiс шогавны ракöн и кулiс, кöр сылö вöлi нёльдас нёль год. Колис куим челядь, кöдна öнi ыджытöсь ни, уджалöны. Эмöсь менам кык ныв — этö Люда да Аля. Пöрисьжыкыс, Люда, велöтчис университетын инженерö, олö и уджалö Перемын, а Аля уджалö гортын, Косаын, медсестраöн.

Вöлiсö менам оланын бур ёрттэз, кöднакöт быдми и велöтчи öтлаын, нiя кулiсö ни, кулiс и бур ёрт — гижись Т. П. Фадеев, кöдакöт пантасьлiмö зонкасянь, дружитiмö, кöр и дзугылясимö öтамöд вылö, но сiя меным пыр отсалiс гижтöн...