Горш чери



Ме мунi верзьöмöн неыджыт берег пöлöн. Туйыс то пыравлiс вöрас, то вились зэв лякасьлiс ваыс бердö. Ме эг гöнит, мунi жагвыв и любуйтчи береггезнас, вöрнас, думайтi ассим думаэз. Вдруг, кытi туйыс мунiс матi юыс дынöт, одзам чулi-чалi пондiс резсьыны ваыс да сэтшöм вынöн, нельки бичиррезöн чижйис шондi югöр вылас метр вылына. Вöлыс менам пырснитiс нырнас, кынмис местаас. Мый сэтшöмыс? Кин резö васö, а син одзö оз мыччись?

Жагöник лэдзчи вöлыс вылiсь, домалi сiйö поводнас кыдзок бердö да сибöтчи гусьöн берег дорас. И эстöн син вылам усис существо, кöда вачкисис змея вылö, но кык бöжа — и юрас, и бöрас бöж. Сiя вынöн соровтö-вартö васö, и вачиррес резсьöны вевдöрö. Ме босьтi из тор да шентi эта существоö. Но сiя не эз кыв, не эз казяв этö, а сё чулi-чалöтöмöн уялiс то йирланяс, то берег дорö. Дыр эг вежöрт, кин син одзам, но вот сiя мыдзис койны да сувтiс неылö берег дорас туруннэз коласö, и сэк ме горöтчи:

— А, да этö щука! Вон кутöма юрöттяс мöдiк щукаöс почти ас ыждаöс жö. Вот кытöн жадинаыс!

Чожа котраси вöлö дынö, пöрччалi седло бердiсь кöзича, кисьтi сэтчинiсь нянь торресö и... жагвыв сыныштi васис щукаэсö. Вермасьтöн нiя мыдзöмась сiдз, что, натьтö, эз и казялö, кыдз шедiсö кöзичаам. «Сэтчин и места тiянлö, хищниккезлö», — думайтыштi аскежам да кышалi кöзичаöс седло бердö.

Мед ни донаыс — пиян



Август шöрын, кыдз только газетаö гижисö, что туйö вöравны, ми ёртöкöт кытсöвтiм поннэз, босьтiм пишаллез и мунiм вöрö. Но вöралöмись нем эз пет: некинöс эг адззылö и öнi, лыннялöмöн да природанас любуйтчöмöн, локтiм гортö.

Туйыс виклясис рассэзöт, шутёммез кузя и вайöтiс неыджыт важ пруд дынö. Ми пуксим сэтчö шоччисьны и пондöтiм басни чöрсканнэз йылiсь, кöдна вöтлiсисö миян гöгöрись гуттэз сьöрын. А одзаным, осокасö борддэзнаныс вартлöмöн, лэбалiс куличок, кöдö миян шуöны витулиöн. Сiя лэбалiс и сiдз и этадз, пуксьышавлiс кöчкаэз вылö, вились лэбтiсьлiс да бырнитлiс баддез коласö.

— Мый сiя, кöс ныр, койö син одзын? — юалiс ёртö. Сэтчö осока коласiсь тули-боли мыччисис ёртöлöн рыжöй поныс.

— Вон тай кин чулошитö, — гогыньтi ме юрнам поныслань.

Витули уськöтчис поныс вылö и сэтшöм матi лэбзис сы ныр одзöт, что кажитчис, бытьтö борднас вачкис аслас враглö, и сунгисис бадь куст шöрö. Поныс чепöссис кайыс сьöрö. Витули шувка-шовка лэбтiсис бадь уввез сайсянь. Ми мöртiм синнэзнымöс ны ладорö и адззам: витули коккезын почти ас ыждаас жö öшалö мöдiк витули. Пияныс? Быль, эта вöлi пияныс, кöда эз эшö вермы лэбавны и пышшыны поныс шогья, и сiйö пышшöтiс мамыс. Пияныс! Этö ми вежöртiмö ёртöкöт, но эг вежöртö, кыдз эттшöм учöтик кайыс вермис лэбтыны ас ыжда кайöс? Натьтö, сылö колiс ыджыт вын, да и не только вын, но и ыджыт любитöм аслас пиян дынö.

Поныс, тыдалö, тожö вежöртiс этö, сувтiс и виноватöя лэдзис бöжсö да жагвыв иньдöтчис миянлань.

Бедаыс öтлаöтö



Мед ни бура кайез коласiсь отир любитö, натьтö, сьöдкайöс. Кыдз только локтас деревняö эта чим сьöд каёкыс, аслас песняöн вöрзьöтас морт сьöлöмись мед ни рад чувствоэз, и сэк тöдан ни, что локтiс годын медгажа кад — тулыс.

Любитiс сьöдкайесö и Саша дядь. Видзöтан кö, дак огородечас каждöй пельöсö лэбтöм кайпоз, и быд асыв дырöн кывзывлö кайезлiсь сьылöмсö.

Öтпыр, кöр Саша дядь эз вöв гортын, сылöн сера канёкыс миян син одзын потш кузя чылiс кайпоз вылö. Кайис и пуксис сэтчин, бытьтö сiдз и колö. Сьöдкайез пондiсö койны-лэбавны видзчисьтöм гöсьыс гöгöр — сiдз и кокыштасö синнэсö. А каньлö кöть бы мый: мышкыртчис да и сюйлö лапаэсö осьтаас, но пытшкöдззас оз судз. Кинкö лöгасис миян коласiсь: шентö пö кöс гыжлö, ась урни-верни лэдзчö сэтчинiсь!

Эта коста кысянь и грудитчис сьöдкай табун — только шум сулалö — и сэтшöм лöга канёксö кутчисö сизьны, что мöдытлö некöр лоис лапаэсö нюжлавны кайпоз осьтаас: сiйö и видзöт, юр вемсö дрöбитасö. Дыркодь сiя то öт лапанас, то мöднас öвтышавлiс юр гöгöрас, вевттис бы юрсö лэчыт ныррезсянь, но нем эз пет: кайез адззисö кытчö заргыны кортöм гöсьыслö.

И каньыс повзис, трусливöя лэдзчис потш кузя кайпоз вылiсь да чувизнитiс син одзись.

— Важын ни этадз колiс! — лэбис рад басни.

А пятьдесят гöгöр сьöдкай пуксисö провод вылö и эз лэбзьö сэтчöдз, кытчöдз ас синнэзöн эз адззö, что каньыс сэсся оз ни лок кайпоз дынас.

Рытнас эта йылiсь тöдiс Саша дядь. Сiя шуис:

— Кайес, челядь, кыдз отир жö: бедаас оз чапкö öтамöднысö. Тi вот ны моз жö велöтчö овны.