Колö унажык



Эшö не öддьöн важын, революцияöдз, картошка миян вöлiсахар местö: пызан вылö сiйö вайлывлiсö только жаритöмöн и только гöссезлö. Да, картошкаыс быдмывлiс сымда, мымда колiс вердны гöссезöс праздникöн.

Етша вöлiкартошкаыс сысянь, что сiйö эз кужлö вöдитны. Öнiвöдитöны наука сьöртi. Но ежели бы миян оланыс мунiс только öтiк наука сьöртi, то свет вылас овны вöлiбы гажтöм. Гажтöм вöлiбы овны миян деревняын и Мельник Ивантöг. Сiя вöлiсэтшöм морт. кöда мыйкö керö пыр вились-вильö, адззывлытöмö. И колö эшö содтыны, что Мельник Иван вöлiневна, сьöд гыж мымда, жаднöйöн. Этö сiя отир син одзö эз петкöт, но отирыс рожабаннэзö симöт он павдöт — адззöны.

Год-мöд Мельник Иван мастеритiс гортас, керку-карта гöгöр. Мастеритiс, мастеритiс пöттöдз, и колö бы сылö пöрисьувьяс шоччисьны ни, но иньыс мастерытлöн пила кодь:

— Сивöй тош, тэ керку-картатö и гуэз да гиддэз гымгин, а кинöс мöдан видзны сэтчин? Мый мöдан чапкыны подаыс одзö?! — рявзö сiя.

— Мый ни только тэныт оз тырмы, — кöритыштiс иньсö Мельник Иваныт. — Дöс ни эд öнiмиян эм!

— Кытшöм тэ хозяин! — лöгасис иньыс мужикыс вылö. — Отирыс назьмитöны садниккезнысö ¹, картошкасö гумалöны, дзик юись ва, а миян подаыслiсь öммезнысö немöн чöскöтны!

— Ми разь ог назьмитö?

Вальс сьöвзис иньыс да висьталiс:

— Видзöт отирыслiсь!

Мельник Иваникалö кажитчö, что отирыс мусö назьмитöны буржыка и картошкасö гарйöны садниккезсиныс унажык. Сэтшöм ни мывкыдыс инькаыслöн.

И Мельник Иван пырис юрöн и кокöн «агрономияö», сiдз кыдз иньыслö колö уна картошка, а сiйö быдтыны должен Иван.

Сiя лыддьöтiс книгаэз, юасис отирлiсь, но ачыс нем эз висьтась. Мужик арöн и тулысöн назьмитiс садниксö, гöрис тожö тулысöн и арöн. Быдöс назём карта вылiсь петiс садникö, колхознöй ыб вылö сетны вöлiжаль. Мый бы эз кер, только мылякö картошкаыс уна эз сод. Вот беда: кöть кучиксит пет, но муыслiсь висö он пичкы. И вай жö сэк колхозас кытшöмкö удобреннё. Сiйö колхозыс не öддьöн жалейтiс и видзис назём моз жö гуна вылын. «Натьтö, эстöн агрономияыс», — думайтiс Мельник Иваныс да пондiс уджавны кыдз рыт — кило, кыдз мöдiк — кык кило гортас кыскö. Картошка садитан кад гöгöр Иванлöн удобреннё вöлiпöттöдз, и назём эта тулысö сiя сетiс колхозлö даром. А кöр петалiс ни картошкаыс, кöдзис удобреннёсö. Соседдэз юасисö:

— Тэ мый кöдзан, сват?

— Гаг кытiськö павкöтчис, да дустала...

Картошка пондiс быгыльтны лöз стенаöн. Мельник Иван пеллесö адззис да эшö содтiс удобреннёсö. Сэк картошка корыс мылякö пöрис сваль. «Лэбтыны сiйö колö», — решитiс Мельник Иван да содтiс удобреннёсö, только öнiмöдiк сорт: ас пондас, ас садникас Мельник Иван эз вöв надз. Да и весь эд шедiс доброыс.

Неделя бöртiМельник Иванлöн садник лоис гöрд рöма.

— Гагыс быдöс сёйис! — горзiс отирыс одзын ылöстöм агроном. Но отирсö емтöм суниснас он вур: тöдiс сiя арт-ладсö. Мельник Иванлö вöлiсьöкыткодь, а отирыслö гажа. Ежели бы не Мельник Иваныс, то миянын овны вöлiбы гажтöмжык. Не городын эд, театрыс абу.

Кизертöм краска



Меным колiс краска, бур краска, а сiя некытöн эз вöв.

— Кывзы, отсав, — кеймися ме синваэз пыр Миколкалö.

— Басни абу, — висьталiс сiя, — только кизертны колö.

— Олифаыс эм менам, — радмыштiме.

― Мый кöтан? — кöритыштiс менö Миколка. — Али талун чужин? Кизертны, мыся, колö.

— Но дугды, эн ылöтчы! — лöгаси ме.

— Баран тэ, — кöритыштiс менö Миколкаыс. — Колö мавтыштны, вежöртiн?

Ме нем эг вежöрт, видзöтiМиколка вылö, кыдз балда.

— Эн вежöрт? — лöгасис ёртö. — Эн бы вöв дружок, эг бы ме тэкöт баит. Вай куим руб.

Куим дак куим, кытöн сiя эз вöвлы, — сетi.

— Лок öтлаö, — висьталiс Миколка, — велöта, кыдз кизертны.

Миколка дыр эз думайт — эта понда ме сiйö любита, — котрасис магазинö и локтiс не куш киöн. Менам — деньга, ёртöлöн — бутылка.

— Лоас, — висьталiс чорыта Миколка. — Вöтчы ме сьöрö.

Ме Миколка сьöрö, кыдз сунис ем сьöрö. Мунiм деревня сайöдз. Пырим кытшöмкö складö. Панталiс миянöс шогалiсь чужöма морт.

— Здорово! — горöтчис Миколка.

— Здорово! — ружтыштiс шогалана чужöмаыс.

— Уджалам — потолокö сьöлалам? — юалiс гажöн Миколка.

— Сякö...

Тöдчис, что Миколка эстöн не йöз морт.

— Кыдз настроеннё, Петро? — одзлань сярзис дружокö. — Поди, юрыт висьö?

— Сьöкыт, — ыш ловзисис Петро.

— Веськöтны колö — кокнит лоас.

— Ох-хо! — ружтыштiс норöнжыка хозяиныс.

— Вай стакансö, — корис Миколка да гогиньтiс мелань юрнас: — Дружок менам. Первöй сорт.

Петро кыскис ёг коласiсь нятьöсь стакан. Миколка чышкыштiс стакансö йöрнöс подулас, писис кыскис московскöйö.

— Ме ог, — откажитчи ме.

— Но! — сюйыштiс ныр увтам стакансö Миколка.

Кöстiм бутылкасö. Петро рöмсялiс, кыдз цветок шондiодзын.

— Краска бы колö, — висьталiс Миколка.

— Ог тöд, — сьöкыта ловзисис Петро, — вермасö чушкавны.

— Эм? — юалiс Миколка.

— Колö юавны начальстволiсь, — ордйис Миколкаöс Петро.

— Надз кынöм тэ, — висьталiс Миколка Петролö и менчим корис: — Вай, Ванька, кык трояк.

Ме сетiквать руб. Миколка вайис кык бутылка. Öтсö сэтöн и ректiм. Сэсся мунiм кытшöмкö складдэз пыр, пыралiм то öтiклаö, то мöдiклаö, кежавлiм карта бöррезö и юим. Ме сотчи, кыдз масiсь еннэз одзын, сiдз кыдз невна тöдi, мый керисö менам деньгаöн. Но сэк жö лöньси: менам öнiвöлiсö уна ёрттэз. Быдöнкöт ныкöт туйис баитны, мый тэныт колiс; быдöнкöт ме куритi, сьылiкытшöмкö песняэз, кинкöткö окаси, кинöскö матьки.

Гортö ме вайи неыджыт банка. Эта вöлiкраска, кöдö некин некытiсь эз вермы адззыны.

— Вот, — висьталiме гордöя гортiссезлö, — вот краска! Этö меным судзöтiсö ёрттэзö. Öнiме керкунымöс пöрта вичкуö. Вежöртiт?

— Молодец, — шуис меным мамö да водтöтiс узьны.

Ашынас ме медодз кутчиси краска бердö. Но сiя вöлiсымда, что ме эг вермы керны керкунымöс вичку кодьöмас. Бергöтлiбанкасö сiдз и этадз: сiя сулалö öтiк руб да двадцать копейка, а менам кармансим ыскöвтiс двадцать руб. Эх, и ёрттэз!