Кыдз ми вашöтiм тараканнэз

Зоночкалöн висьтасьöм



Война бöрын ми олiмö умöля. И öтiк гожумö Гриша дед менö пондiс нуöтны Усольеö: «Ветлам жö городас, нучок, сэтчин няньнас вердöны, миянлö оз я сёйнытö пöттöдз дöнзьы».

Вöлi гажа гожум, гладь туй кузя только чышкы-мун. И мийö подöн мунiмö городö. Сэтчин ме адззылi, кыдз олöны отир, тöдсаси горожанакöт. Кöр пондiм локны городсянь, пемдiмö, и ковсис туй дорись деревняын узьны.

Узьны лэдзисö дорись керкуö. Шедiмö богатöйкодь морт ордö, кöда пуксьöтiс миянöс пызан сайö, сёйны вайис нянь да сов.

Пуксимö пызан сайö, эгö ештö курччöвтны нянь, кыдз пызан вылын пондiсö котрасьны тараканнэз да сiдз, бытьтö нiя лунтыр уджалöмась, кынöммезныс сималöны сiдз, что сёянсö киись бы мырддьöны.

— Мый нö тi, челядь? — дедö пондiс баитны тараканнэскöт. — Хозяинныт нач я мый я оз верд?

— Вердан сымдасö, — пондiс норасьны хозяиныс. — Сымда ни öксисö, что чожа керкусис вашöтасö.— А ми нiйö асьнысö вашöтамö! — гажöн висьталiс хозяинлö дедö. — Ашын ась хозяйкаыт сысъялö ырöш, и быдöс лоас бур!

Узим. Ашынас эз ешты бытшöма югдыны, хозяйка дзоллис-сысъялiс ни ырöш. Чеччим, миссим, дедö юрбитiс Енлö, сыбöрын пуксим пызан сайö. Бöра тапким-сёйим, ёртö и горöтчис:

— Но, нучок! Öнi пондылам уджавны, — хозяйкалiсь корис сунис. Инька сетiс метра кузя сунис. Ёртö меным висьталiс:

— Кут жö, нучок, таракансö да кöртав голяас сунис!

Гаг кутны, кыдз сьöвзьыны! Кутi гагсö, голяас кöрталi сунис да нюжöтi дедöлö. Сiя сунисöт кутiс таракансö, угöлiсь босьтiс рос и пондiс джодж шöрöт сунисöн сiйö кыскыны ыбöслань. Кыскö дедö сунисöн ыбöслань таракансö, бöрсяняс вартлö росöн и бобгö ныр увтас:

Кыш, кыш, таракан,

Рыжöй беслöн тэ пиян.

Пет жö керкусис тэ, пет,

Татöн нем тэныт ог сет.

Кыдз соседдэзас котöртан,

Сiдзи ны ордын тэ пöтан,

Кыдз соседдэзас котöртан,

Сiдз ны ордын пöттöдз сёян.

Кыскис дедö таракансö ыбöс сайöдз, сыбöрын öтöрись посöдзöдз. Ачыс сё гаг бöрын вартлiс росöн, ныр увтас сёпкис: «Таракан, таракан, рыжöй беслöн тэ пиян, пет жö керкусис тэ, пет, татöн нем тэныт ог сет...»

Петкöтiс старик таракансö öтöрись посöдзöдз. Лэдзис посöдз омöн да гöрдлöмöн ни шуис: «Во кыдз колö, а тi...»

Эшö узим керкуын. Ашынас бöра пöттöдз вердiсö, юкталiсö, да вöлись иньдöтчим туйö.

Чулалiс гожум, локтiс тöв, тöв бöрын сибöтчис мöдiк гожум. Дедö бöра питкыльтiс городлань. Мунiс-мунiс да мыдзис, локтiс сiя деревняöдз, кытöн мöйму дорись керкуись вашöтiм тараканнэсö, и узьны пырис тöдсаэзö.

— А-а-а, здоровöн локтiн, Григорей! Важын ни ме тэнö видзчися, — кыдз меддона гöсьöс панталiс хозяин. — Пыр да шоччись, висьтась кысянь да кытчö. Оз я кынöмыт симав?

Сэк жö туйись мортöс пуксьöтiсö сёйны. Дедö сёйис, а хозяин ошшасис: «Батя, öнджа... Кыдз мöйму вашöтiт тараканнэсö, сiдз керкусис öтiкö эгö адззылö. Бурöсь тi, батя, отирыс вöлöмась!»

Кыдз он ло бур, кöр кынöм сималö, и кыдзкö колö вердчыны.

ГУЫН

Мойд



Олiс-вöлiс öтiк мужик — горш морт, кöда прокмис уджавны, некöр эз тшыгьяв. Но öтпыр мужиклö охота лоис сёйны яй, кöдö колiс торкны ¹вöрись. И вот морт босьтiс кöртзыр, мунiс ылöжык вöрö, пырис тэлляинö. Зверрез туёк шöрö гарйис пыдын гу, кöдö вевдöрсянь тыртiс уввезöн-лыссэзöн, мед гу эз тыдав коккез увтын, и гажöн шуис аслыс: «Но, ёрт, чожа тэнат лоас яй. Пондасö зверрез мунны туёк кузя, тальччасö и вöясö гу пытшкö, а ме сэтöн и лоа!»

Эта бöрсянь морт неделя етш эз ветлы вöрö, сыбöрын иньдöтчис яйла. Мунiс-шагнялiс мужик вöрöт и сэтöн... Ух! Эз и казяв, кыдз зверь местö усис гуö ачыс.

Усис морт гу пытшкö, дзар керис вевдöрö и адззö, что юрыс весьтын кымöрыс тыдалö овчина пасьта. Морт сэтчин-татчö, педзöв-керис. Пондылiс петны гуись, но... Кикок вöлiсö дженытöлöсь, а гу пыдын, и некин матын абу, некин оз отсав.

Гу пытшкын овтöн чулалiс лун, ой да бöра лун.

«Тыдалö, тшыгйöн кувсяс, — пондiс тöждыны мортыс. Пуксис и пукалö гуын, кымöсас кулакнас вартлö, асьсö видö. — Мыйлö ме этö кери?! Кин тшöктiс?!»

И сэтöн... Бут-бат мужик дынö усис ош, казялiс мортсö, рякöстiс:

— Тэнат эд эта уджыс, мужик! Тэ гусö гарйин! Мужик повзис, пондiс лёбны:

— Ме эг, ме эг.

— Сiдз, — ружтö ош. — Огö кö эстiсь вермö петны, ме тэнö, морт, сёя да вöлись кула. Кылiн?!

— Кылi, кылi, — дрöжитö мужик.

Одзлань пукалöны ош да морт, öтамöд вылö пиньласьöны-видзöтлöны. Эшö чулалö лун, локтö ой. Мужик оз узь — öтiк синыс осьта, мöдыс куньöм, полö, видзчисьö, кöр зверьыс джагöтас. И ош мужиклiсь полö, оз жö узь.

Пукалiсö-пукалiсö гу пытшкын ош да мужик, сэтöн бöра бут-бат, и... Гуö вевдöрсянь усис кöин — тшыг да лёк зверь, казялiс мортсö, эрзыштiс:

— Тэнат эд уджыс, мужик?

— Ме эг, ме эг... Аслым эд эг жö бы шойнасö гарйы, — лёбö мортыс.

— Сiдз, — эрзö кöин. — Огö кö эстiсь вермö петны, ме тэнö, морт, сёя да вöлись кула! Кытчöдз зверрез мужиксö эзö сёйö, надейтчисö, что кыдзкö гуись петасö, видзöтлiсö öтамöд вылö, и сэтöн... Бряк! Гуö вевдöрсянь усис вöрмöс, ружтыштiс, горöтчис:

— Кин бы этö гусö гарйис, ачыс бы и усь этчö, ме бы сiйö тали!

— Ог тöд, ог тöд, — быргис мужик. — Ме эг, ме эг...

Зверрез коласын морт кытчöдз и ловья, кöр гуö ештiс ни усьны руч, берездасис кöч, усис шырок. И нылöн — öтiк дума, кыдз бы сёйны öтамöдöс да медодз джагöтны мортöс.

― Ёрттэз, ― сэтöн пондiс пильскыны-кеймисьны зверрезлö морт. ― Проститö менö, бöб юрöс, сэсся этадз ог понды керны. Вермам кö петны эстiсь, челядьöлö висьтала, мед ме моз эз олö, ась зверрез эз торкö. Дружитны пондамö...

― Видзöтам, видзöтам, ― мурзьö ош. ― Он я былись мывкыдтö веж? Былись миян кодьсö он понды торкны? Мылякö ме тэныт, морт, ог верит.

― Веритö-ö-ö! ― синваэз чышкö мужик, былись кувны гуын лöсьöтчö.

И сэтöн, на! Мужик пель одзын пондiс бизгыны ном: «Отсала-а-ам! Отсала-а-ам! Только тэ, мужик, сыбöрын миянöс, ном табунсö, вердан буржыка-а-а, ― ыксö ни мöдiк номмезлö. ― Эй, ном табун! Лэбзьö татчö чожажык! Уджалыштны колö!»

Гу дынö и гу пытшкö лэбзис сымда ном пöлöс, топ руыс сукмис. А быд ном весись эз лэбзьы: кöззэз увтiсь босьтiс лыс, лэбзис-вайис лыстор гу весьтö, шупкис увдöрö.

Асывсянь рытöдз уджалiс ном кельöп, гуö кыскалiс лыс и рытöдз гу тырис. Гу пытшкын олiссес эзö и казялö, кыдз лоисö вевдöрын.

― Спасибо тiянлö, номмез! ― висьталiс мужик и вöлись иньдöтчис гортлань.

― Э-э, морт! ― бöрсяняс утугаöн лэбзис номпöлöс, бизгис. ― Ми тэныт уджалiм, уджалiм, а тэ миянöс он бы верд. Сiдз, ёрт, оз лöсяв... ― И быд ном пуксис мужик вылö, заргис яйö ныр, юис пöттöдз вир. Но быдöс мортлiсь юны вир эзö вермö, сiя локтiс гортö, пондiс модьны аслас челядьлö:

― Кин йöзлö гарйö гусö, ачыс сэтчин усьö. Тi, челядь, некöр и некинлö гусö эдö гарйö, ой-ой!