Оз кут некытшöм висян



Ме фельдшер. Кöть и практикант вöлись, но фельдшер: вывлам чочкомся-чочком халат, юр вылам сэтшöм жö чочком колпак, а пеллезсим öшöтчöны резиновöй трубкаэз. Нiйö ме ог и кыскыв пеллезсим — бытьтö нiя быдмисö юр вемсянь и нарочно öшöтчисö шогалiсьсö кывзöм понда.

Кывсьöма, что ме, фельдшер, локтi деревняö, да пырöны ме дынö томöсь и пöрисьöсь, инькаэз и мужиккез. Ме нiйö тшöкта чöвтчыны, сыбöрын кывза, мый керсьö ны моросын, бергöтла öтмöдöрö, тшöкта керны физкультура. Шогалiссез, кöть и коккезныс ризьöтöны, но куснясьöны ме одзын ружтöмöн и ружтытöг, перыта и öдва-öдва. Сэсся бöра кывза. Кöть и нем ог вежöрт, мыйöн шогалö мортыс, но ме йылiсь баитöны шоныта, бытшöма: «Видзöт, батя, кытшöм сiя... Кыдз токо оз и монлав, гöгöр чуннезнас шваткöтас-вартас, сё висянсö вöтлö бы... Вот эта пель-шö-öр!» А ме кывза этö да эшö буржыка шогöттэсö кошша. И некой пору быдöннысö видзöтi, морт-мöдлö кашельсянь порошоккез сетi да и шоччися.

Пырö старик. Тошыс — сивöй нитш, юрсисö дзик би нюлöм — öтiк тылöп абу, нырыс лöзöтöм, а пеллес гöнсялöмась — сысянь и нем оз кыв, натьтö. Стогодся, не томжык.

— Кыт висьö, деда? — юала сылiсь.

— А?

— Мый, деда, маитö?! — ванза гöна пеляс.

— Кодя пельшыр локтöм пö да, пырала, мыся, ноко.

— Чöвтчы, — шуа, — ме и эм фельдшерыс!

— А-а?! — нюмыр-нямыр керис öмнас.

— Чöвтчы, деда!! — арза пель одзас.

Шы оз сет, дрöжитан киэзнас пöрччалö киззез, чöвтö йöрнöссö. Менам полöм петö павкöтчыны сы бердö: старикытлöн лы да кучик, некытшöм яй тор абу — годдэс яйсö вильöтöмась. Юрам думаок: «Вот бы анатомическöй кабинетас... И сторожитiс бы, и скелет бы вöлi».

Кывза трубкаэзнам стариктö, нем ог вежöрт: нето каша варкйö-пусьö морос пытшкас, нето поннэз пурсьöны-эрзöны, и думайта: «Натьтö, порок сьöлöмас, чожа ештас...»

— Порок, деда! — висьтала старикытлö.

— А-а-а?!

— По-рок!!!

— Порог, шуан?.. Верма эшö порогсö вуджны, кага, верма. Уджалыштла эшö, дитя. Öнi грех и кувнытö. Оланыс бур лоис. Видзöт, Тöлiсь вылö пö кайлöмась ни, челядьыс моньöлöн баитöны. И меным охота кайлыны, токо вот чуньö доймö, веськöт-ко, кага...

И сэк менö быдсöн сывьялiс ыджыт гордость эта пöрись морт понда, сы вына сьöлöм понда, кöдалöн некытшöм порок абу, кöда кувтöдз том лоас. Сэтöн жö вежöртi: сэтшöм мортлiсь душасö некöр оз вермö пöдтыны не шогöтыс, не пöрись годдэз: сiйö оз кут некытшöм висян.

Пиньшедталiсь



Кинлöн висьöны пиннез, сiя эта коста адö шедлö — сiдз ме думайта ас сьöртöттям.

Вот кывзö, мый вöлi мекöт кольöм война годдэзö. Олi ме сэки вöр посёлокын — ошпозъяинын. Вöлi жö миян больница, да только санитар сэтчин öтнас уджалiс сэк. Кинöс висян нырыштас — удас сылö кытшöмкö микстура да тшöктас туруннэзiсь настой керны. Но вот пиннез бердö эз кутчисьлы. А менö как раз пинь висяныс сэк монлалiс, готов вöлi анöс разьны, да туйдöтiсö бытшöм отир кузнец ордö — сiя пö мед ни ёна кужö пинь висьöмсö öвны. Вот и локтi сы дынö, висьтаси, мый колö. Пуксьöтiс менö джек вылö, öт кинас юрöс конувтас жмитiс, а мöдас кусак босьтiс да няж только керис — шедтiс пиньöс. Сэсся пöималiс пинь местасö, кудельтор пуктiс да менчим двадцать руб корис... А мый сэтöн керан? Мунны районöдз — сто километр. Машина абу, вöв абу, а кöмкöт кöть и казённöй, да коккезö — аслам.

Локтi гортö, зеркало одзын осьтi öмöс крокодил моз, мыся, видзöта, мыйöн эшö туяс няньсö изны. Кристос... аминь! Сiсьмöм пиньö сё ас местаас! Эшö öддьöнжык пондiс тшепитны-висьны пиньö. Натьтö öбидасянь.

Бöра мунi сы дынö, сiя юалö:

— Мый, сё висьö?

— Не сiйö шедтöмыт да...

— А мый сюрис кусак увтас. Сiя эд синтöм. Ноко пуксьы.

И бöра — няж, и бöра — двадцать руб да пинь менам абу.

Да мый сiя деньгаыс! Мед эн сюр зубытсяняс мöдöр светас — ачыт ассит пондан шедтавны. И пондi ме шедтавны. Не ассим, а отирыслiсь. Сiйöн пондi, мыля кузнецыс мунiс миян дынiсь и некинлö лоис отирсö адсис мездöтны. Да и, тово, деньгаок локтiс. А сiя — не пинь висян. Перво полi жö мыйкö: только босьта киам кусаксö — киэз дрöжитöны, бытьтö ме мортыслiсь мыйкö гусялi — öбидаыс да жальыс сё аслам пиньö понда видзö. А сыбöрын кыдз кусакала да мöдöрта — мортыс только öтiкö ештас горöтчыны: «Ме-эк!» — и пиньыс абу ни. Ён пинь — няж — и двадцать пять эм; сiсь пинь — няж — и тридцать руб эм: сiсьсö сьöкытжык шедтыны, умöльжыка кусакассьö. Кöда синваэс пыр сералö, кöда уннялöмöн да кыккусiньöн ме дынiсь петö, а ме баита ас понда: «Терпитö, öнджаэз, ме тожö терпитi!»

Локтiс кыдзкö мужик: аннэсö ки долоньнас пыкö. Дзар кери мужикыт вылö — дрöж кутiс: ош мыгöра, кöин öма, бандит сина — сiдз бы и сёйис менö, да вот пиннес, тыдалö, изводасьöмась.

— Веськöтан? — бобгыштiс сiя

— Кыт висьö?

— Пиннезö...

— Только шедтала.

— Шедты.

Пуксьöтi. Паськöтiс öмсö — дзик крокодиллöн. Менö жар кутiс. Киö дрöжитö, öдва кусаксö инми öмас сюйыштны. Монöвтi пиньсö. М-ммы! — гöрöвтiс мужикыс. Кикокö сыр-лёль öшöтчис: пиньыс эз и вöрзьы. Бöра кусакалi, мöдöртi — кыдз вöлi сiдз и эм. Мужикыс увтöн-банöн бергалö да уннялö, а ме думайта: «Кокнитжык мыр шедтыны, нежели эттшöм пиннесö». А сiя шуö:

— Он куж, дак эн кутчы.

— А тэ кужан, дак ачыт шедты! — лöгаси ме.

— Кужа, но ассим ог вермы.

— Шедты менчим! — лэбзис менам öмись кыв.

― Сiдз?

— Сiдз! — горöтi ме и шентi öлöдзас кусакöс.

— На! — сюйыштiс кулакнас пиннез кузям. — Ме вот этадз шедтала и деньга ог босьт... — ачыс бергöтчис да петiс.

Ме ньылыштi, кыдз сола лекарство, вирсорнам куим пинь и ашынас жö кылi, что меным öддьöн долыт лоис, сэсся некыт оз вись и некытшöм врач дынö оз ков мунны. А то, поди, и прокурор бы пондiс лечитны...