Кыдз судитiсö ручöс

Мойд



Олiс морт, видзис пода, вердiс да кольттьöтiс курöггез, и быдöс бы оланас вöлiбур — гажöтчы да ов бы, но сэтöн курöггес пондiсö öшны: öшас курöгыс и абу, кыдз биын сотчас. «Мыйкö эстöн не сiдз, — думайтö мортыс. — Натьтö, кинкö курöггесö гусялö...» И вот мужикыс пондiс синйыны ассис курöггесö и öтiк асылö адззылiс кыдз вöрланьсянь керку дынö котöртiс руч, кутiс курöгсö и пышшöтiс.

«Сулав! Ме тэнö велöта! — руч йылiсь думайтö мортыс. — Шедан!» И сэкжö сиялiс капканнэз, öшлiс руч туй вылö петляэз-кытшшез, босьтiс бедь и пондiс видзчисьны ручсö, и зверьыс чожа локтiс, но сiдз локтiс, что быд капкансö и петлясö орддис, а мужикыс дынö матö эз сибöтчы — он кут и он вачкы. Öтпыр этадз, мöдöтпыр сiдз жö. Мужикыс кеймö ни еныслö — отсöт корö, но оланыс сё öткодь — öтмоз ручыс вовлö да гусясьö.

— Норась! — мужиклö пондiсö баитны отирыс.

— Кинлö норася? — оз вежöрт мужикыс. — Вöрдядьыслö я мый я?

— Натьтö, эд кинкö вöрас эм жö хозяиныс, — бöра баитöны отирыс. — Бат, прокурор или судья...

— Кытшöм, поди, прокурор или судья? Мымда ветлöта вöрас, но некинöс эг пантавлы.

Баитiс этадз мортыс, но воштiсьны некытчö, сiдз и этадз ручыс гусясьö, видзöтан кö, нач курöгтöг керас, и мунiс вöрö. Неылöдз гортсяняс и мунiс, медодз сылö пантасис кöч, кöдалiсь юалiс:

— Кöчок – дженыт бöжок, эм я тiян вöраныт прокурор или судья?

— Кыдз нö, кыдз нö! — ошшасьö кöчыс. — Эм миян вöраным прокурорыс. Кыдз панталан ошсö, сiя и прокурор лоас.

— Бур туй тэныт! — кöчлö висьталiс мужикыс да иньдöтчис одзлань, медбы кошшыны ошöс, кöда ылын эз ов, чожа пантасис мужикыскöт.

Здоровайтчисö, мужикыс и пондiс норасьны:

— Тэ пö бытьтö, Михаил Иванович, вöрас прокурор, öнджа эд, — пондiс тiльны синнэсö.

— Да, — висьталiс ошыс, — ме вöрас прокурорыс, мый бы колö месянь?

— Ручыс эд тiян бöбалö, — одзлань баитö мужикыс. — Олан эз ло, курöггесö рыжöйыс гусялö. Нач кольтьтöг ни керис.

— Тэк, — шыасис ошыс, ружтыштiс да рочöн висьталiс, —но и гад, позорит весь звериный род! Ладно. Мы ей покажем. Заведём уголовное дело по статье тысяча один бе прим и на суд потащим!

— Мый эта сэтшöмыс?! — нельки повзьыштiс мужикыс.

— Эта, мужик, — веськыта баитiс ошыс, — эта сiя, что бура дойдам: или юрсö орöтам, или пиннесö кисьтам, мед сэсся немöн лоас джагöтны тэнчит курöггесö, или вит год кежö заргам пемыт гуö! Сымда сыкöт и баитам...

И мужик да ош янсöтчисö недыр кежö. Чулалiс лун-мöд, сэтöн мужиклö рака вайис юöр, что сiйö вöрö корöны судö.

Мортыс кöмалiс виль нинкöммез, пасьталiс виль пестрединнöй йöрнöс, сыналiс кузь юрсисö и мунiс вöрö. Локтiс мужикыс лапья кöз увтö, кытöн сiйö панталiсö зверрез, сiдзкö нiя öксьöмась суд вылö. Судьяыс — кöин, да лёк чужöма, пиннес гер, эмöсь и кык заседатель, бытьтö отирлöн судын моз жö — öтыс — лана, мöдыс — барсук — быдöнныс бöжаöсь, и эм защитник — кöчок, дженыт бöжока да кузь пелёка. А прокурорыс кытöн бы? Ага, сiя чожа петiс тэлляинiсь, пуксис бокöмоз...

Мужикыс шапкасö юрыс вылiсь босьтiс, пуксис зверрес одзö и пондiс видзчисьны, мый сылö висьталасö судын.

— Господа! — мурзьыштiс кöиныс (öддьöн эд лёка видзöтiс да баитiс, бытьтö сы кодь начальникыс вöрас сэсся абу). Господа! Пондöтам судлiсь заседаннё. Судлöн членнэз — этö — ме, сiдзкö, судья, заседателлез лана да барсук, — висьталiс и мужиклiсь юалiс: — мужик, согласитчан я этöн суднас? Или кинöскö эстiсь колö вежны? Заседателлес местö вермам пуксьöтны мöдiккезöс...

«Эх-хе-хе, — аскежас сьöкыта думайтiс мужикыс. — Öксьöмась öткоддес... Вирьюиссес...» Думайтiс этадз мужикыс, но шы эз сет, кöр тöдiс, что сiйö вермасö не кывзыны: кöдö пуксьöтiсö судö, сiя и пондас пукавны, кöть заседателяс лоас мöдiк, некин вылö бура эз надейтчы...

Суд одзö вайöтiсö ручöс, кöда юрсö öшöтöма, бöжсö кыскö муыс бердöт, дзик сiдз ни тöждiсьö, сiдз тöждiсьö, что видзöтö, кыдз бы быдöн одзын лолыс эз пет.

И пондöтчис суд.

— Миянлö норасис мужик, — одзлань разис кöин-судьяыс, бытьтö сылiсь курöггесö гусялöмась да сёйöмась. — Сiдз эд, мужик?

— Сiдз, — юрнас гогиньтыштiс мужикыс. — Даскык курöгсис кольччис öтiк. Беда менам!

— Ага! — мужиксö öмалiс кöиныс. — Эн горзы, мужик, видзöтам и керам мый колö! — сэтöн жö мыйкö заседателлес коласын гусьöн сёпкис, юалiс: — Мужик, кинсянь да мыйсянь пондöтчам юасьны? Медодз ручлiсь или... Думайта, что юасям медодз мужикыслiсь, кöр сiя норасьö. Сувт, мужик, да висьтась нö.

Мужикыс пондiс тöждiсьны, öдззис мыктавны мырыс вылын:

— Öнджа... Бöра... Эта...

— Сувт, — лёкжыка висьталiс судьяыс, — да эн пöрьясь! Пондан кö пöрьясьны, асьтö судитам статья кыкдас сизим сьöртi. Вежöртiн?! Сэк висьтась одзлань.

Мужикыс сувтiс, шапкасö пондiс малавны да баитны:

— Öнджа, бöра... Мыся, этö... Сьöкыт мыся, таво годыс, пыр зэрö да зэрö. Не сюэз бытшöма оз шогмö, не йöрас кушман оз быдмы. Öнджа, мыся... Не гортын, не вöрын. Курöггес вылö и надейтчи, а сiя видзöтö жö мый петö, — юрсö бергöтыштiс ручлань, лöга мурзьыштiс. — Вöлiбы пишаль! Ме бы лыйи кымöсас, но пишальыс абу... Жугалiс важыс...

— Но, мужик, баит да тöд мый баитны! Пишальыс понда эм статья сто двадцать восьмöй, кöда висьталö, что асьтö вермам гуö йöртны дас год кежö. Вежöртiн?!

— Но, — гажтöма шыасис мужикыс.

— Висьтась одзлань, — модис судьяыс.

— А мый висьтасьнытö?! — юрсö лэбтыштiс мужикыс. — Мыся, таво годыс умöль, курöггес вылö и надейтчи. Мыся, кольттяласö да челядьыс сёясö, кöр и ачым пешла, а сiя, öнджаыс... Öнджа-бöраыс, кузь бöжаыс быдöс ни курöггесö гусялiс да сёйис. Öтiк курöг, кывзö, колис, а сэсь мый? Кынымись бы вермас кольттявны луннас? Во... Öнджа да бöра эд лоö... — и дугдiс баитны, кыдз виньдiс да пондiс видзöтны судьяыс вылö — синнэзас шогöт.

Судьяыс юалiс:

— Быдöс тiян?!

— Быдöс я мый я? — сьöкыта ловзисис мужикыс, кыдз уджалiс да дугдiс уджавнытö.

— Сiдз, — судьялöн синнэс був-бав, — öнiкывзам ручсö, и ручыслö: — сувт, кумушка, да висьтась, кыдз сiдз петiс, мыля гусясян. Кыным курöг пышшöтiн?! Только видзöт менам! — лапанас кöиныс öвтыштiс. Эн пöрьясь, то кыкдас сизимöт статьясö содтам. Вежöртiн?!

— Кыдз эг, — ручыс сувтыштiс, нюжöтчыштiс, юрсö пиньöвтыштiс, тырппесö нюлыштiс, и сэтшöм ни бытьтö сiя кодя, ылöса, сiдз ни сiйö топ оланыс дойдiс, что беднöйлö талун жö колö кувны ни, да смертьыс оз лок, и сэтöн жö эшö эта... Сiйöн горзöмöнмоз шыасис — быдöс пö вежöртi.

— Висьтась, кума, висьтась, — рамыника баитiс судьяыс.

— А мый сэтöн висьтасьнытö? — пондiс сярзьыны ручыс, — асьныт тöдат эд, таво кытшöм годыс да оланыс... Сьöкыт, мыся, оланыс... Тулыссянь ни еныс быдöннымöс вийö бы. Быд лун зэрö и зэрö — шондiсö тай ог адззывлö. Не тшак, не ягöд оз быдмö. Кайес кытчöкö лэбзисö, шыррес пышшисö, а эна, — кöч вылö видзöтыштiс пöв синнас, шуис бы, что кöччеслöн пияннэс нач етша, но сэтöн жö висьталiс мöдiкö, — öтiк яй тор ни ог пешлывлы, турунöн ни вердся, — чышкис син дорсö. — И вот... Сiдз и лоис, что ковсис мунны да гусясьны... — рик-рик горöтiс.

— Д-а-а, — шыасис кöиныс. — Сьöкыт годыс, челядь!

— Дойдат кö öддьöн, челядьöс нач некинлö лоас синйыны, öтнаныс куласö, — бöра горзiс ручыс. — Эд жö бöра вывтiдойдö...

Вöрын лоис сэтшöм лöнь, топ кинкö кулiс.

— Эшö мый висьталан? — дыр мыйись судьяыс юалiс ручлiсь.

— Нем ог... Быдöс ни топ висьталiда, — шуис ручыс, чышкис синваэсö.

Сьöкыта ловзисис ошыс-прокурорыс, ружтыштiсö заседателлез. Мужиклöн пессис сьöлöмыс.

— Кин да мый эшö баитас? — юасис судьяыс.

Сувтiс ош-прокурор, кымöсыс увтöт видзöтыштiс быдöн вылö и пондiс мурзьыны-баитны:

— Зверрез-судьяэз, талун мийö судитам ручöс — этö гусясисьсö, хитрöй куманымöс, кöдö мöйму ни колiс судитны бы, а сiя, видзöтö, сё котрасьö. Стыд ручыслö абу! Мöдiк бы сы местын джагöтчис ни, а сылö кöть мый. Пукалö одзаным и, натьтö, думайтö: «Но тiянöс, öнджаэзöс! Асьныт гусясят, а ме вылö пыкат» да лöсьöтчö мужикыслiсь медбöрья курöгсö пышшöтны. Э-э-э, законнэз сьöртiгусясисьыслiсь тысяча да один бе прим статья сьöртiколö орöтны юрсö! Или керавны одзись лапасö! Но, бöра жö, колö видзöтны, что таво годыс сьöкыт, вöрын эз быдмы не тшак, не ягöд, кайез пышшисö, шыррез кулiсö, учöт зверрез быдмöны умöля — шогöт да шогöт... — ружтыштiс и одзлань тэчöмöн баитiс, — сiдзкö, думайта, что гусясисьыслiсь юрсö оз жö бы ков керавны, но коксö керавны колö, ась вывтiоз чеччав, оз гусясь.

Ручыс бöра рик-рик горзыштiс, но сiйö некин топ эз жалейт, некин шы эз сет. Ош-прокурор бöрсянь сувтiс баитны защитник — кöч, кöдалö öнiэз бы ков лоны защитникöн, но некытчö он воштiсь, кöр сiдз петö, что кöчлö усис дорйыны ассис врагсö.

— Господа! — лельгыштiс кöчыс, öвтыштiс лапанас, пеллесö лэбтiс вевдöрö. — Господа судьяэз! Тiйö талун судитат ручöс, кöда гусялiс курöггез. Этаыс... Рыжöйыс ыджыт изъян керис мортыслö, и колö бы сiйö быль öддьöн дойдны да лёк закон сьöртi, но... — кылыс кыдз пиннес коласö кышасис — дугдыштiс баитны, дзар керис ручлань, кöда сё сыркьялiс-горзiс, шуис, — ме дорья ручсö!

«Вакрамеш, — эта коста думайтiс кöч йылiсь мужикыс. — Тiян тай вöраныт оланыс отирыс кодь жö... Тэнö ни, кöч, небöмась деньга вылö — вузалöмыт душатö, гырись син, да куим копейка вылö, сэк мый ни баитны миян кодьыс йылiсь, кытiсь правдасö кошшыны?»

— Господа!! — вынöнжык ыкöстiс кöчыс, дзугiс мортлiсь думаэсö. — Ме дорья ручсö сiйöн, что оланыс лоис нач сьöкыт, нач ни эз понды туйны овнытö. Сiдз?! Еныс ни миянöс вийö бы, сiдз? Кыдз тулыссянь пондiс зэрны, сiдз гожумсö кодьöн эг и адззылö, шондiыс оз и петавлы ни, а тiэстöн баитат сёян йылiсь. Кытшöм ни сэтöн басни, медбы буржыка сёйны, кöр пышшисö кайез, кулiсö шыррез, оз быдмы тшак, оз шогмы ягöд? Туруныс ни кельдöтö да чорзьö... — чышкис син дорресö, натьтö, горзiс ни, но голосыс вынсялiс, ыкöстiс, — номмез и нiя ни горзöны да олöны, а миянлö мый керны?! Думайтат, кынöммезным абу или öммезсиным нач киссисö пиннезным! Эм эшö кынöмö менам, тэнат, ош, и тэнат, господин судья, сэк мый нö? Сималö или оз кынöмным, веськыта висьталö?

Ручыс бöра рик-рик горзыштiс. Ошыс ни чышкис синваэсö.

— Вот и думайтö, господа, мый керны ручыскöт, — кашык-кашык керис кöчыс морт моз да одзлань пондiс кисьтны-баитны, — думайта, что этö... Öнджа, кыдз сiйö шуöны? — вачкис кымöсас. — Ручыслö, мыся, кольччис öтiк — этö гусявны курöггез. И быдöс сэтöн — басни абу...

Ручыс пильскис-горзiс. Шыасис кöин — мурзьыштiс пон моз, ошыс öвтiс юрнас. Вишыкасис мужикыс, кöр сiя ой и лун уджалiс, но некöр пöт эз сёй, некытшöм гожумö няньыс пызан вылын пыр эз вöв, и эшö сэтöн курöггес...

— Менам быдöс, господа, — медбöрын кокнита шыасис кöчыс да пуксис кöз вужжез коласö.

— Судыс мунö решитны, мый керны ручкöт, — мужиклiсь сьöкыт думаэсö дзугис кöин-судья, чеччис да заседателлезкöт мунiс кыз кöззэз сайö.

Вöрын лоис сэтшöм лöнь, что кылiс, кыдз ружтiс — чужтiс пияннэз кытшöмкö гаг. Бизгис, сёйис бы, ном. Дульсö тшыг увья ньылалiс ошыс, сiдз бы и киж-каж сёйис мужиксö, кöда юрсö öшöтiс да пондiс тöждiсьны-думайтны, мый жö висьталасö ручлö, оз я судитö вештыны курöггез понда. Дыр-мыйись судья заседателлезкöт мыччисис кöззэз сайись, и кöиныс пондiс лыддьöтны приговор да сэтшöм ятнöя, топ быд кывсö öмсис лэдзис и тэчис мужикыс öлöдзö.

— Именем! — лыддьöтiс кöин-судьяыс. —Именем лешачьего царства и нашего лесного государства суд приговорил: Лису Патрикеевну Пратрикееву считать виновным не по статье тысяча один бе прим, а по статье тысяча бе прим один и приговорить условно сроком наказания на один год с условием отбывания наказания по месту жительства, то есть, в лешачьем царстве. Приговор окончательный и обжалованию не подлежит! Судья Волков Волк Волкович, заседатели...

— Мый сiя изö?! — ошлiсь юалiс мужикыс,

— Öтiк год условнöя, — мурзьыштiс ошыс,

— Мый öтiк год? — эз вежöрт мужикыс, кöда суддэзöт некöр эз ветлöтлы.

— Условнöя...

— А мый сiя сэтшöмыс?

— Эта... Кыдз эшö гусялас, сэк вöлись и лоас.

«Нем эз ло! — лöгасис мужикыс. — Быдонныт öтiк гуна вылын вартат. Öткодь шмыллез...» Лöгасис мужикыс, вöрись локтiс гортас, кутiс бöрья курöгсö и кералiс юрсö, медбы бöрьяыс эз ни шед ручыслö.