Лекарствоыс оз ков



Фельдшер дынö пырö ружтiсь инька. Пöрись ни, но кувны одзöв бы мортыслö.

— Пуксьы. Кыт висьö?

Ласковöя шынньöвтiс шогалiсьыс:

— Узьнытö ог вермы, места ог адззы. Кывзiс, видзöтiс фельдшерыс, лекарство вöзйö.

— Мымда сы понда колö? — юасьö шогалiсьыс.

— Кык руб да öтiк копейка.

— Кык рубся унажык?

Пырис пиас, йöрнöс увтас, мороссис чеччöвтiс перна, перна сьöрö петiс кошелёк. Бергöтчис мöдöрö, дыркодь лыддисис.

— Оз тырмы? — юалö фельдшер.

— Тырмас, эн пов!

Дыркодь вöрöтiс деньгасö, юалiс:

— Мымда?

— Кык руб да öтiк копейка.

— Тöдан мый?..

— Мый?

— Менö керисö...

― ?

— Тшыкöтiсö менö, морт дынын колö лечитчыны, а тэнат мый, поди, лекарствоыс.

— Ачыт тöдан.

— Тöда! — гажöн горöтчис инька, чеччис да боёка петiс.

Учöтик басняэз



Майöг видö йöрöс:

— Весьолiсь! Вексö менам пельпоннэз вылын öшалан!

Висьтав бы сэтчö: не йöрыс — тэ бы эн и вöв!

Сапог ошшасьö нинкöм одзын:

— Тэ йылiсь, видзöт, вунöтiсö ни, а менö кокись оз чапкö.

— Эх, сапог, сапог! Тэнö эд нинкöмыс и чужтiс.

Порсь казявтöг пуксис петшöр вылö и зубыта петшöрасис. Кöть кучикыс поллясис, но эз лöгась, а только висьталiс:

— Любита петшöрсö: пуксян сы вылö — петшöралö, а он вöрзьöт, дак и шы абу.

Кывтö кокнит кымöр-палачок, видзöтö му вылiсь вуджöрсö и думайтö: «Не только небоöт уяла, но и шондiсö шебрала!». И сэтöн жö пакмис-паськалiс.

Öнi уджалöны



Пантасис кыдзкö мекöт öтiк писатель, менам ёрт, и сьылö-висьтасьö:

— Гижи кык лунöн пьесалiсь медодзза действиесö и сэтшöм бура!

— Но дак мый инö сэк? — юалi ме.

— Мый? — ыш ловзисис приятельö. — Видзöт: вайöтi ме районiсь геройезöс командировкаö колхозö. Нiя медодз, конечно, ыджыт совещаннё чулöтiсö, видзöтiсö, мый керсьö фермаын, а сэсся ог тöд, кытчö воштыны нiйö.

— Уна разь нiя? — юалi ме.

— Да эмöсь морт-мöд...

— Мда-а... Вот мый: иньдöт тэ нiйö сёйыштны, тшыгйöн эд некин оз ов, — серöмтчи ме. — А сыбöрын эшö мыйкö адззисяс.

Кынымкö лун бöртi вились пантасис ёртö.

— Но кыдз геройет олöны? — юася ме. — Мый керöны?

— Уджалöны.

— Кытöн?

— Кыдз тшöктiн, сiдз и кери: иньдi ме нiйö сёйны, а нiя сэтчин юыштасö менам, коддзасö и ножö споритны! Иван Ильичлöн характерыс порозлöн — визьгас пельбокас Фома Кузьмичлö — сiя лякасяс джоджас... Сэтчö дружинниккез локтасö... Часöт кыкнанныс тротуаррез весöтöны, пятнадцать суткиöн сетöмась нылö.

Справка



Айö пыр уджалiс вöрын, вöлöн кыскалiс кер. Тöвбытöн гортö эз петавлы: оз лэдзö, тшöктöны уджавны выходнöйезтöг.

Кылас, что локтöм том ветеринар, и нуöтас ассис меринсö сы дынö.

— Справка бы колö, что вöлö берёжа, — висьталас ветеринарыслö. Рыжкоыс вöлi пöрись ни, и кынöмыс öшалiс кöшельöн. Ветеринар шляп-шляп вачкас вöлыс кынöм кузя, шуас:

— Сетам.

И гижас справка, что вöлыс чожа пондас пиявны, и колö сiйö шоччöтны.

Неполiсь симчик



Кык ёрт босьтiсö вина, кежисö магазин пельöс сайö. Лёнчик шуö:

— Мунам эстiсь мöдiклаö.

— Ерунда, — висьталiс Симчик. — Ме некинлiсь ог пов. Некин менö чальöн оз вöрзьöт, — и кыскис кармансис бутылкасö да пондiс пиннезнас йирны пробкасö.

— Пиннетö чеглалан, — жалейтiс ёртсö Лёнчик.

— Ерунда! Менам пиннезö кöртовöйöсь

Кыскис пробкасö и онняюртiс бутылкасö öмас. Буль-буль!

— Ю да видзöт! — Лёнчик падтiс Симчикöс. — Öнi тöдан...

— Ерунда! Ме немись ог пов! — бобгис Симчикыс.

Вдруг Симчик дынö локтiс милиционер, кутiс киöттяс и пондiс нуöтны.

— Ерунда, Лёнчик! Дыр оз видзö! — мунiкас ни ыксiс Симчикыс. Но кöр пондiс лыддьыны, мымда карманас сюясö штрафсö, вежсис чужöмнас и гажтöма ни горöтчис: «Э-э, зонка, эта абу ерунда!»