Мыля кöиныс лёк

Мойд



Кöчок — дженыт бöжок, кузь пелёк да чочком гöнок, котöртö лым вылöт, кокнита чеччалö, гажöтчö тöвся оланнас. Лымыс кöчоксö оз вöть, шатьыс оз вачкы, морозыс оз кынт.

Котöртiс, котöртiс кöчокыс кокнита да гажöн и ачыс эз казяв, кыдз люкасис кöинкöт.

— Э-э-э! — горöтiс кöиныс да сэк жö кутiс кöчоксö пеллезöттяс. — Ыджыт син, дженыт бöж, кузь пель, мый, разь тэныт туйыс оттöм, али паськыт синнэзнат он адззы, кытчö котöртан?! Кöчокыслöн сьöлöмыс тёп да тёп, кыдз ва воть крыша дорын.

Лёк кöиныс, тшыг кöиныс. Быдса неделя сьöд гыж ыжда яйтор эз пантав.

— Иэ-э-э-х, ха-ха! — пыд горшсис сибдöм голоснас серöмтчис кöиныс. — Öнi ме тэнö дженыт бöжнат, кузь пеллезнат да небыт гöннат ньылышта.

— Ой! — кеймисьö кöиныслö кöчокыс. — Лэдз менö минута кежö, кöинiньöй! Ме котрася пипуок дынöдз да йирышта эшö сылiсь качсö. Пöтувья гажажык кувнытö, и тэ пöтжык лоан.

— Он бöбöт?! — эрзыштiс кöиныс, дульсö ньылыштiс и думайтö: «А быль эд пöт кöчыслöн, натьтö, яйыс госажык».

— Котрась. Только неылöдз, а то менам кынöмö вирöдз ни сималö.

Лэдзис кöиныс кöчоксö. А кöчокыслö только сiя и колö: прыг да прыг, прыг да скок! Котöртiс кöиныс син одзись, кыдз сылiс чочком гöннас чочком лымыс вылын, бытьтö эз вöвлы. Эз вежöрт кöин, кöда ладорö лыйис-котöртiс кöчок, мед невна сёйыштны кулöмыс одзын.

Видзчисис, видзчисис кöиныс кöчсö, эз вермы видзчисьны. Эшö öддьöнжык пондiс кынöмыс симавны, лöгыс петны, эрзö пиннес пыр: «Но, кöчок — дженыт бöжок, видзöтлы менам! Мöдпыр он пышшы».

НОММЕЗ



Мыдзи ни тальны пыд лымсö, а гортöдз вöлi эшö öддьöн ылын. Косьмис горш да висис спина. Колiс шоччисьыштны, но дыш петiс керавны пессö да öзтыны бисö.

Казялi йывтöм кöз, кöдалöн öт бокыс вöлi кöс да сира: натьтö, пусö кöркö чарöтлiс чарньöв или кинкö вачкис черöн.

Öзтi сирсö и пондi шонтiсьны да шоччисьны öдъя биыс одзын.

Сэтöн пель одзам, кыдз гожумнас, пондiсö бизгыны номмез. Нiя пуксисö пельпоннэз да моросö вылö, лэбалiсö чужöм дынын: номмес шонтiсисö жö биыс одзын.

Кытiсь нiя лоисö лёк морознас?

Син вылö усис, кыдз сьöрсьöн-бöрсьöн номмес петiсö гырка пусис, — кöдна веськыта лэбзисö биыс пытшкö, кöдна пуксисö лымыс вылö, а кöдна лякасисö моросö одзö.

Шоналi да ласковöя баитi номмескöт:

— Ёрттэз, важын ни ме эд тiянöс эг адззыв. Пуксьö, кагаэз, моросö вылö да шонтiсьö. Тiянтöг эд и гожумнас оланыс лоас гажтöм.

Номмес недыр кежö вайöтiсö меным гожумсö.

Шоналi. Босьтi паськыт кöз ув, вартi-кусöтi бисö да иньдöтчи гортлань, а номмес сiдз и кольччисö лымыс вылö.

Тöвся цветтэз



Погоддяыс умöль, уль: то усис лым, то зэралiс, то öшöтчывлiс туман. Кажитчис, что эта тöлыс сiдз и чулалас эна туманнэзöн, лымöн да ульгаэзöн. Но вдруг морозыс öтiк ойö койис-резiс кымöрресö, кöдзис небоас звездаэз, öшöтiс серебрянöй нар-тöлiсь и трингис сэтшöм кöдзытöн — берегит рожабантö!

Асывнас муыс лоис мöдiк. Вöрыс мыччисис кытшöмкö чуднöй, кыдз сказкаын, картинаöн, пондiс цветитны уна рöмöн, лымыс бичирасис.

Цветтэз югьялiсö луннас шондi югöр вылын, а ойнас — тöлiсь югытсянь. Нiя кöрталöмöсь букеттэзö, кöдна тыдалöны омöн, нельки пондывлöны киссьыны небосянь.

Охота öктыны энö цветтэсö, пыртны керкуö да сувтöтны пызан вылö, кыдз сувтöтлiм гожумнас вазаö. Но колiс только босьтны киö энö цветтэсö, кыдз нiя куслiсö, öштывлiсö син одзын югöрнысö, и пöрлiсö ва воттезö.

И вöлi кыдз сказкаын: омöн югьялiсö цветтэз, но нiйö киöн эз туй вöрöтны.

ОЛАН



Гожум шöрас кошши медодзза тшаккез и шедi видз вылö, кытöн неважын лёдзöн сулалiсö чочком сарафана кыдззез.

Кыдззесö кералiсö пес вылö, и вежсис местаыс, лоис гажтöм. Локтi этчö, адзза: тулыснас горзöмась пуэс, аскодя синва визывтöм мыррес вылöт и косьмöм качыс бердö.

Пукси, мыр вылö и пондi думайтны олан йылiсь. И ачым эг казяв, кыдз пондi осудитны мортöс. «Кин тэ? — юалi ассим. Враг эд. Тэ понда олö природаыс, чужтö и быдтö, а тэ мый керан? Кералан, нетшкан и талян коккет увтын, жугöтан и сотан, дойдан и виян. Мöднёж он вермы. Видзöт: быдмисö, быдмисö кыдзоккес, а тэ кералiн...».

Син вылам усис орöтöм йыв, сы уввез вылын быдмисö копейка ыжда зелёнöй листтэз. Кералöм кыдзыс эз бы кув, уввезнас кыссис шондiыслань, югытiнас, и уль муыс калекасö юкталiс ваöн. Мöртi муас кыдз йылыслiсь конецсö и думайтi: «Гажöтчы медбöрья гожумсö!»

А унажыксö мыйöн отсавны и кыдз?

ПИКАН



Мунiс война. Гортын вöлi сьöкыт. Отир олiс, уджалiс да тшыгьялiс, а война вылын вöлi сьöкытжык. Ой и лун вийисö отирсö, ранитiсö, некытöн и некöр мыдзувья шоччисьны, бытшöмик узьны. Солдаттэслö, кыдз и гортын отирыслö, тшыгыс шедiс тырмöмви, но миян солдат петiс биись и ваись, кулiс и бöр ловзис, вермис и тшыг кынöмсö.

Öтпыр гожум пондöтчикö, кыдз висьтасьö Егор дядь, нiя врагыскöт тышкасисö Ленинград дынын. Омöн нюррез да вöррез, кöр зэрö, кöр шондiа, нять да ва. Ой и лун лыйсьöны, бомбитöны, и сёйны нем (эз ештывлö тылсянь вайны сёянсö). Но Егор дядьыс дзир-бар керис ас гöгöрас, видзöтö: öтiклаын быдмö кöчазь, мöдiклаын — шöмкор...

«Ог кулö!» — гажмис солдат. И кыдз только лоис личытжык, етшажык пондiсö бомбитны, сiя медодз öктiс кöчазь да пондiс ошшасьны ёрттэслö, что вердас сэтшöм сёянöн, кöда бöрсянь нiя пондасö сьывны да овны. Ёрттэс був-бав видзöтöны Егорыс вылö и сералöны:

— Эх, Егор, Егор... Войнаыс тэнö, тыдалö, нач дзугис! Турунсö ни пондiн сёйны...

Солдаттэз оз тöдö, что комиэс пыр сёйöны турунсö тулыснас гöснеч местö. «Видзöтам! — Егор пуис кöчазьсö, сёйис, да кöр потiс, пондiс кынöмсö малавны. Сылö лоис сэтшöм долыт, кыдз бытьтö война вывсянь ветлiс гортö гöститны, и мамыс пуксьöтлiс сiйö пызан сайö. — Видзöтам...» Лун-мöд бöртi Егор неыджыт ыбок вылiсь казялiс кöктоин. «Ага, — бöра думайтö солдатыс. — Эта сёяныс кöчазьысся эшö буржык, только вот луннас сiйö полöм петö öктыны, эд вермас кокыштны снайпер или юр вылö самолётсянь шупкасö бомба. Терпитам рытöдззас! Мед эшö быдмыштö кöктоиныс...»

А рытнас, кыдз только пемдыштiс, котöртiс ыб вылö, водiс и пондiс кыскасьны кынöм вылас да нетшкыны кöктоинсö. Нетшкис сымда, что котомаас ведра етш лоис. Бертiс ёрттэс дынö да бöра ошшасьö:

— Челядь! Талун эд бöра Еныс меным козьналiс сёян, да сэтшöмö, что сёян и быдмыштан, лоан смевжык да вынажык.

— Видзöтам, пешлiсям... — мöднёж ни баитöны Егорлöн ёрттэз, чожажык тшöктöны пуны кöктоинсö, асланыс дульныс сiдз и вотялö.

Солдат весöтiс кöктоиннэзлiсь кышсö, пуис котёлын тыр, солыштiс, паньыштiс, ружтыштiс, топ бöра пукалö гортын пызан сайын, и мамыс вердö асланыс сёянöн, кöдасянь сьöлöм бурмö и мыдз öшö.

— Но мый, Егор?!

— Пешлö, сэк висьталат, — шуö Егор, ачыс вырскö да вырскö пым сёянсö, кыдз черива панялö.

Ёрттэс коласiсь öтiк повтöг кутчисис пань бердö. Паньыштiс пым сёянсö, Егорыс моз жö ружтыштiс, ньылыштiс да пондiс кывзыны, кыдз кынöмас лоö долыт и киэзас содö вын. Вöлись öдззис сёйны — киас пань лэбалö!

— Ванька! Коль жö миянлö! — бытьтö саймисö мöддэс, но Ванька ештiс ни ректыны котелоксö, быдöс панялiс кöктоинсö, дозсö босьтiс киас да вырскис пым васö, кöда пань-мöд эшö кольччылiс пыдöсас. Егорлö ковсис сёянсö пуны мöдпöв и куимöтпöв.

И эта лунсянь, кыдз локтö рыт, солдаттэз баитöны:

— Егорка, котрась бöра!

Егор öнi тöдö ни кытчö мунны: сiя киас босьтö винтовка, спинаыс сайö кышалö котома да мунö ыб вылö. И öктö кöктоин.

Война куим лунöн эз чулав, сiя кыссис не öтiк год. Чулалiс ни эта тулысыс. Вöр пасьтасис листöн, быдмис турун, ыб вылын дзормис кöктоин, пöрис урбöжö, и сёйны сiйö эз ни туй.

Егорлö бöра ёрттэс шуöны:

— Егорка, тэ, поди, эшö тöдан кытшöмкö сёян? Поди, эшö мыйкö адззан сэтшöмö...

— Ме?! — рад солдат. — Сёяныс эд, челядь, кок увтын быдмö! Только эн дышöтчы и лоан пöт... Гожумыс эд сы вылö и эм... — ошшасьö сiя.

Кежас Егор логлань вöр сайö, олас сэтчин час етш и бöра котомаас вайö тыр, но öнi не кöктоин, не кöчазь и не шöмкор, а пикан, кöда видззез вылас быдмö сымда, что кöть мымда öкты.

Пуис пикансö Егор, вердiс ёрттэсö — тöдсаэсö и тöдтöммесö — эд война вылын тöдсаыс и тöдтöмыс — вон и ай местын. Сёйисö пикансö солдаттэз, ошкисö Егорсö, что сiя сэтшöм ылöса — некытчö оз йöрмы не оз сибды, биись и ваись петас и сёйны лöсьöтас.

Пондiс война вылын мунны слава, бытьтö пö эм сэтшöм солдат, кыдз сказкаын, кöда кужö и врагыскöт тышкасьны, и пуас кö зуд, дак и сiйö позьö сёйны.

Лэбзис славаыс командиррез дынöдз, кöдна дыр эз пондö видзчисьны, чожа дынаныс корисö Егорсö и висьталiсö:

— Рядовöй Федотов, тэ пö тöдан сэтшöм сёян — лекарство, кöда пö вермö мортсö гробись чеччöтны. Госпитальын бы колö отсавны раненöйезлö...

— Мыйöн верма — отсала! — солдат командиррез одзын шовкнитiс оча кок, мунiс и эшö öктiс пикан, нöбöтiс сiйö госпитальö, враччеслö висьталiс, кыдз пуны да сёйны... Враччес жö сэк шуисö, что пиканыс пö — бур сёян, эшö пö сэтöн эмöсь витаминнэз, кöдна отсалöны веськöтны шогалiссезöс. Сiдзкö, пиканыс быль кыдз лекарство...

Ме эшö öтпыр шуа, что Егор война вылын кужис врагыскöт тышкасьны штыкöн да прикладöн, бура прокмис лыйсьыны. Сьöкыт часö, кöр и сёйны вöлi нем, ачыс тшыгйöн эз ов и ёрттэсö вердiс. Ёрттэс солдатлiсь и юасисö:

— Кытöн тэ сэтшöмыс чужин да быдмин? Кытöн тэнат гортыт?

— Тасянь оз тыдав, но матын, — ошшасис Егор. — Сэтшöм матын, что подöн мунан — уна кад сёян, поездöн ыскöвтан — етшажык ни мыдзан, самолётöн лэбзян — чожа гортö шедан. Сiдзкö, ёрттэз, кыдз только чулалас война, мунам миянö гöститны. Ме тiянöс гортын верда эшö шöмкора шыдöн, шöмшыдöн, тусяшыдöн, тшакьяшыдöн, а сiдзжö яёвöй, тшаковöй, кушмановöй да капустаись керöм пельняннезöн, юктала шоныт ырöшöн, сюромкаöн да сурöн.

— Богатöя олан, Егор! — бöра ошкисö ёрттэс Егорсö. — Локтам тэ ордö гöститны, локтам!