Чарöм вылöт



1

Пилич Миня локтiс гортас уджалансянь. Жолькнитiс лабич увтö чер, чöвтчис.

— Кынöм сималö,— ныр увтас бобгыштiс Миняыс.

— Сёй. Одзат эд, — висьталiс иньыс.

— Ен сетiс меным этатшöм иньсö! — кокнита горöтчис Миняыс.

Пызан вылын вöлi ужин. Минялöн иньыс год-мöд ни олö гортас — босьтö пенсия — и мужиксö панталö да кольлалö удж вылö. Уджалiс бы, да здоровьеыс — сiсь тшак. Чужöм вылас мöдöтпыр жöник сайö сет, а здоровьеыс оз басит. Горт гöгöр бергалö.

Иньыс Миняыс сьöртi — сырчик: кöсыник, кокни кок вылас. И басниыс мыгöрыс кодь: баитö-сьылö, йöзсö некöр кывлас оз дойд.

Миняыс пуксис пызан сайö, шöрыштiс чöвпансö. Босьтiс пань, думайтыштiс. Вачкисис, что пон моз вишкыштiс сёянсö. Паньыштiс, чапкис öмас паньсис и минута кежö тувдiс, топ йыовöй ва сотiс пиннезас. Пукалiс сiдз недыр, сьöвзис. Мöртiс кöдзыт синнэсö иньыс чужöмö. Шы эз сет. Баснитöг вежöртан: добросö эн видзчись.

Синнэс Минялöн — гудыра йыэз. Садь али код, рам али лöг — öткодьöсь синнэс. Оз тыдав Минялöн синнэзас не думаыс, не гажыс.

Пукалö иньыс.

— Мый эта? — юалiс гусьöн иньыслiсь.

— Поплёбка.

Шы эз сет. Кутiс бекöрсö, шентiс порог дорас. Бекöрыс трингисис-таралiс комланяс. Нем эз шу иньыс Минялö, тöдiс сылiсь мывкыдсö — этадз буржык.

Эта лöгöтiс Минясö. Би чапкис сьöлöм вылас. Мужикыс видзчисис иньыссянь видчöм, а сiя эз вöв.

— Вердiн! — кижгыштiс змея моз Миняыс. — Ме турта, а тэ меным поплёбкасö он пу!

— Вай пуантö — вердны понда, — висьталiс иньыс.

— И вая! — дразнитыштiс иньсö мужикыс. — Видзöта, мый тэ пуан меным.

Шы эз сет иньыс.

Шы эз сет и Миняыс. Пишкайттöн чеччис, чапкис юр вылас рукйöсь шапкасö, петiс керкусис.

Кытчö мунны?

Вöлi рыт. Шондiыс улына öшалiс улица конецас. Ыркöтiс. Лымыс кажöтiс ни кок увтын. Керку крыша дорын кузя öшалiсö йыовöй чуннез. «Тулысыс кыссяс дыр», — рада думайтыштiс Миняыс. Эта думаыс öштiс лöгсö.

Бур думаыс пыр лöньсьöтö сiйö.

Миня кокнита шагнялiс Öсип ордö, аслас важ ёрт дынö, кöдакöт туйис сёрнитны быдöс йылiсь. Минялöн лэбалiс ни сьöлöмыс, быркайтiс вöрын. Адззылас Миняыс эшö рассэз, юэз, узяс кöз увтын. Томтас сьöлöмсö, только бы согласитчис Öсипыс.

2

Тулысся луныс кузь. Борис места эз адззы. Сiя эз велав пукавны öтiк местаын. Стариккес пукалöны, вижгöны табак да висьтасьöны, кыдз вöралiсö, дзик век абу адззисьлöмась. Дышыс петö Борислöн пукавны стариккескöт, но кольны ёрттэсö оз туй — вöрын. Не стариккес — эз бы мун вöрас. Мунiс бы, дак öтнас, медбы некин эз мешайт, медбы вöлi быдöс сiя, мый колiс душалö. А öнi пукав, видзöтлы шондiыс вылö. Не айыс — эз бы мун вöрас. Поперёк туйсö айыслiсь эз поперегав. Кувтöдз пондас кöритны.

А шондiыс кывзö вöралiссеслiсь баснисö: кышасис кöз йыввез бердö и öшалö.

Луныс весь овтöн кузь.

Но вот шондiыс мезмис кöз йыввезсис, пондiс тарöвтчыны вöр коласас. Лоис ыркытжык — битöг он ни пукав, пырö кöдзытыс паськöм увтö.

Чорзьыштiс, невна пондiс лэбтыны лымыс, и сувтiсö лямпаэз вылö. Иньдöтчисö ылöжык, кытчö мортыслöн кокыс етша тальччывлö.

Только вöрзисö, только вуджисö чальöс да кайисö мöд берегас, кыдз инмисö жырас ¹вылö. Эстöн лоссес олöмась табунöн, пода моз: кöззэз коласын юж туйез, кöть гöняйт вöлöн. Тыдалö, эстöн зверрес тöвйöмась. А талун мунöмась неважын.

Поныс сувтöтiс гöнсö, вишкыштiс воздухсö и сöтiс вöралiссес одзись. А нiя — лöньсисö и перыта лöсьöтчисö: пишаллез — кианыс, певвез — куроккез вылын. Сьöлöм тёпкöтö моросын — счастье одзын.

Уна лыйсисö вöралiссес асланыс оланын. Уна чарлалiсö вöрас пишаллез: öтiккезлö вайлiсö смерть, мöдiккезлö — счастье. Етша сетлiсö осечка.

Кывзiсö понлiсь голоссö. Но поныс эз увтчы. Чожа сiя мыччисис син одзаныс и виноватöя öвтiс бöжнас, сьöкыта лолалiс. Нискö поныс, тэрмöтö одзлань. Пондöны невна дрöжитны киэз.

— Кошшы! — лöга висьталö поныслö хозяиныс.

Поныс лэдзис бöжсö, сулалö. Разь бöбöтас поныс хозяинсö?

— Абу, — сьöкыта ловзисис Борислöн тятьыс и сувтöтiс пишальсö кок ныррес дынö. — Матын абу.

Поныс эшö öтпыр кытшöвтiс жырассö — некин эз вöв.

— Дырöв узим! — сьöвзис Гриша Öсипыс. Дульыс лякасис рыжöй тошыс бердö.

Нёштöма дзарнитiс ёртыс вылö Пилич Миня, нем эз шу. Эх, удачаыс öмсиным петiс! Мыйыс оз овлы вöравтöнняс, но этадз, медодзза следас...

Öсипыс сулалiс ёртыс бокын. Думаэз сылöн лöгöсь. Нуöтiс эд сiя одзжык, а вот эз мунö. Öнi мун лешакыс позйö. Вöтчы кöдзыт следыс кузя, кошшы абусö, пуктытöмсö. Туйис и гортiсь, матiсьжык, адззыны. Бöра жö Минькаыс вермис горшнас. Не ны öмöн шырресö куталöны! Эта ылына пырисö — и весь!

Борисыс нем эз думайт. Сылöн коккес дзоньöсь, сылö эта мунöмыс — не мунöм. Вирыс только пондöтчис орсны том вöралiсьыслöн.

— Может, вöтчам? — юалiс Борисыс. Сьöкыта ловзисис Öсипыс, нем эз шу.

— Кыдз думайтан, Öсип дядь? — мöдпырся юалiс том вöралiсь.

— А сiя, зон, видзчисьö, кöр вöрись дядьным миянлö вайöтас, — лöга висьталiс зоныслö Миняыс. — Мун öтнат, эн видзöт миян вылö.

Шондiыс лэдзчисис, чарöмыс пондiс лэбтыны. И нiя мунiсö. Кокнита чуйкйисö лямпаэз, чажöтiс лымыс ны увтын.

Зверрес мунöмась кокнита. Нiя вожмалöмась колодаэз, шагнялöмась столаэзöт, топ абу и вöлöм пыд лымыс. Мукöдлаöттяс чарöмыс лэбтöм зверресö. Мукöдлаас том лоссес орсöмась, козаэз моз ветлöтöмась колодаэз кузя. Пöриссес мунöмась одзаныс, томмес бöраныс. Но мукöдлаас одзас петалöмась и томмес — отсалiсö керны лым кузя туй. Мунiканыс сёйöмась.

Лоссес некинiсь эта вöрын эз полö. Эстöн эз вöлö кöиннэз не лана, кытöнкö узис лым увтын ош.

Умöля ни тыдалiс вöрас, а лоссез сё чуклялiсö кöззэз увтöт, эз думайтö шоччисьны.

— Бориска, кыдз бы миянлö битöг не йöктыны кöззэс гöгöр, — сувтöтiс зонсö Миняыс. — Би колö керны.

Нач пемдiс. Дыр эз адззö кöс пессö. Пантасис ньывпуовöй мыр.

Ноддяыс сотчис гажöн да сьöласис биа шоммезöн. А нiя узисö. Узисö чöскыта. Пöриссес — ныргорöн. Только поныс дыр эз вермы адззыны аслыс местасö. А кöр водiс, узис крепыта, вöтасис. Нискис узьтöнняс, вöрöтiс лапаэсö. Удача вöтасис поныс.

Ойшöрнас горöтiс нёштöма Öсип, чеччöвтiс местасис, саймöтiс ёрттэсö. Зонкаыс повзис сы синнэзiсь.

— Бориска, а Бориска, — сьöвзис Öсипыс би вылас, — тöдан жö, мый ме вöтаси? Мый вöтаси!.. Кытчöкö бы муна. Ачым ог тöд. Тьфу! Öтнам, сэтшöм местаöт... сотчöм вöрöт. Мунi, мунi да кы-ы-ыдз берездаси! Гуö уси, небоыс юр вевдöрам öвчина пасьта. Мый бы эта?

— Мöдöр югытыс, — висьталiс Борислöн тятьыс.

— Грек кöть спасеннё... Мый меным гардiс эта вöтыс? — кутчисис тошыс бердö Öсипыс.

3

Ойнас усьыштiс лымок. Лямпаэз пондiсö ыскöвтны кокнитжыка. И быд следыс лым вылас кыдз гижöм. А асылыс! Öзйö заряыс кумачöн, небоас кымöртор абу. Ыркыт. Кокнит воздухыс. Кылö люльгö-пискö сьöла. Готсьö-лэбзьö коть ¹вылö дозмöр. Чеччалöны юр вевдöрын пистöггез. Тэрмасьöмöн юисö чай. Вдруг Öсипыс шуис:

— Чапкам.

— Мый? — эз вежöрт ёртсö Миняыс.

— Чапкам. Кытöн нiя, кошшы...

Дыркодь видзöтiс Миняыс ёртыс вылö, серöмтчис:

— Ой тэ ёрт менам, золотöй дружок! Зверьсö чапкыны? Кинкöт попыс венчайтiс — сыкöт и векнымöс джендöтам... Конечно, ачыт тöдан, тэ не зыбкаись кага.

Кöдзытжык лоис мича асылыс, гажтöммыштiс пöрись вöрыс. Шы сеттöг пукалiсö вöралiссес. Видзöтiс вöрыс ны вылö, дивуйтчис.

... Мунiсö ноддя дынiсь верста етш, кыдз поныс сöтiс одзлань.

— Збуд! — ыкöстiс Борислöн тятьыс, чепöссис одзлань. Öсип сы сьöрö. Кажитчис, минута — и пöриссез керасö яйсö, да Минялöн гардчыштiсö коккес, и сапкисис вöралiсьыс кыминь. Öсип кышасис ёртыс лямпаэзö, вожасис Миняыс вылö.

Борисыс гышкöптiс спина сайсис котомасö, чуйкнитiс пöрись вöралiссез бокöт поныс голос вылö. Кынымкö минута пöриссес гардчисö öтлаын. Матькисö лешаксö и енсö, кленитiсö öтамöднысö. А лямпаэзныс некыдз эз лэдзö чеччыны.

Лямпаэз вылын Борисыс кыдз щука ваын. Некин сы моз оз котрась вöрас. Некытшöм вöралiсь Бориссö эз вермы кольны лямпаэз вылын.

Том вöралiсьыс öшис син одзись. Лямпаэз кокнита чуйкйисö чарöм вылöт. Только видзöт одзат, кыдз бы не кышасьны ув бердö, не люкавны кöз. Секунда кежö дзугсян, öштан шагтö — и зверрез колясö ылö.

Мортыс боёк, а лоссес эшö боёкжыкöсь. Кин кинöс!

Моростырнас лолалö Борисыс, содтiс шагсö. Боёкöсь лямпаэс! Кольччöны бöрö кöззэз, мыррез, чальöссэз, керасоккез, а Борисыс сё содтö и содтö шагсö.

Шарикыслöн голосыс нетшкö вöралiсьлiсь сьöлöмсö. Сылöн голосыс — гора джыннян. Гора вöрыс.

Борисыс невна эз люкась зверьыскöт. Тоша, кузь кока, дзор сивилёна ыджыт зверь сулалiс кöз сайын да дыша öвтышавлiс поныс вылö юрнас, бытьтö сы одзын чеччалiс не поныс, а лэбалiс ном. Поныс сёйис-увтiс. Поныс зi моз лякасьлiс зверьыслö ныр бердас, тшакыльöн тарöвтчывлiс бокö.

Борисыс чуйкнитiс лосьыслö доль. Ыскöвттöнняс пезьдöтiс-лыйис зверьыслö лопаткаэс коласö. Лыйöмсö вöралiсьыс эз кыв, лыйöмыс сорласис поныс голоскöт. Лосьыс дрöгнитiс аслас баня кодь тушаöн, мяч моз кокнита чеччöвтiс бокö, сöтiс местасис, но джöмдiс.

Кöз гöгöр Борис бергöтчис лосьыслань, шульга кисис заргис пишаляс виль патрон, лэбтыштiс пишальсö. Но лыйнытö эз ешты: öтамöднысö сорöмöн, одзасьöмöн, вöралiсьлö паныт шагнялiсö куим зверь. Шагнялiсö жагвыв, кыдз вöввез. Нiя кынымкö секунда кежö син одзсис саялiсö ранитöм лосьсö. Борисыс дзир-бар керис ас гöгöрас и сэк жö пезьдöтiс одзисьыслö. Тшыныс недыр кежö сорласис воздухас, патшкис сотчöм порох дукöн. Тшыныс пыр вуджöртчыштiсö зверрес, койыштiсö öтмöдöрö. Вотьыштiсö, кыдз крыша дорись ва воттез.

Борисыслöн сьöлöмыс орыштiс и сiя пондiс кывны, кыдз вожасис пельпоннэс вылö сьöкыт мыдз, небзьöтiс коккесö. Кöсыник, айыс кодь жö, Борисыс некöр эз тöдлы мыдзсö, а эта секундаö кытiськö изöн вожасис мыдзыс. Эз верит Борисыс, медбы этадз пышшисö ныр увтсис зверрес, но нiя эз вöлö. Вöралiсьыс сьöкыта ловзисис. Кыскис кармансис табак, каттис чигарка, пондiс öзтыны и сэк кылiс поныслiсь эрзöмсö. Поныс эрзiс не лöга, а рада, кыдз добыча вылын. Дзарнитiс одзись кöззэс коласö, син вылас усис тушаыс: лосьыс сулалiс пидзöссэс вылын.

Босьтiс пишальсö, лэбтiс и сэтöн бöрсяняс ыкöстiс тятьыс:

— Бориска! Эн лый! Эн лый, юрсö кералам!

Тятьыс мыдз голосын кылiс счастье да гордöй дума аслас зон понда.

Борисыс öзтiс чигаркасö, пыдына ловзисис табак тшыннас.

— Юрсö кералам! — рада висьталiс тятьыс, тэрмасьöмöн иньдöтчис зверьыс дынö.

Зверьыс дзебыштiс пеллесö мортыс вылö, сувтöтiс гöнсö.

— Сулав, сотана! — ыкöстiс Миняыс. — Ми тэкöт эшö вермасям, видзöтам кин кинöс. — Миня жагвыв сибöтчис зверьыс дынö бöрсяняс и кань моз кокнита чеччöвтiс спина вылас.

— Шедiн! — эрзыштiс Миняыс, — ноко ыслöт! Но-о! Видзöтам, кыдз тэ ыслöтан! Ха-ха-ха! — вак-вак серöмтчис да шутньöвтiс разбойничöй шутньöлöн.

Лосьыс сувтчыштiс одзись коккес вылö, бöр сунгисис.

— Но, ышö, ышö! — чирзiс Миняыс, дзарьялiс ас гöгöрас, топ сы вылö видзöтiс циркын публика. — Но; Серко!— вартлiс шатьöн зверьлiсь боккесö.

— Тырмас, тять! — ыкöстiс зоныс. Сiя эз вермы терпитны айыслiсь бöб мывкыдсö. — Тырмас!

Швачкис чер дорнас Миняыс зверьыслö пеллес коласö. Сунгисис лосьыс нырыс вылö, жагвыв пондiс пöрны бок вылас...

4

Вöрыс лöнис, неммис. Эз кыв не кырлöн кокасьöм, не дзеззэзлöн ¹пискышавлöм. Пеллез чинньöтiсö. Чарöтiс лыйсьöмыс вöрсö. Чередитiсö яйсö баснитöг, тэрмасисö, видзöтышавлiсö öтмöдöрö, мыйиськö полiсö, ась эта пыд вöрын некин эз вöв.

Иньдöтчисö бöр следыс кузя. Воздухыс вöлi уль, кок увтын лымыс небзис. Мунны лоис сьöкыт.

Öсипыс некытöн эз вöв. Сiя вöтчöма лоссес сьöрö öтнас. Сы след вылö инмисö не чожа. Сьöвзис Борислöн тятьыс, матькыштiс.

— Эх, зонö! Адззан, мый петö — оз пöт мортыс... Иньдöтчисö след кузяс. Муннытö сё сьöкытжык, сё öддьöнжык лякалö лямпаэз бердö. Ляшмис Миняыс, сырсмис. Нырыс нюжалö, синнэс ыждöны.

— Мун, зонö, ме жагвыв. Вöта, — тшöктö Миня. Мыдзыс тöдчис Борислöн, но вöралан счастьеыс быдöс вермис. Удачаыс пондöтчис асывсянь, кöсйисис лоны одзлань. Колiс вöтчыны удачаыс сьöрö. И Борис кокнита колис айсö, мунiс одзлань. Сы бöрсянь жагвыв иньдöтчис Миня. Кытöнкö ылын, дзик му пытшкас, кылiс лыйöм. Воздухыс эз и вöрзьы. Думайтö вöрыс, лöнь.

Чожа Миня лямпаэз увтö шедiс вийöм тулан. Туланыс вöлi эшö шоныт и абу ештöм тувдыны. Бергöтiс зверёксö бок вылiсь бок вылö, чапкис: рукйöсь гöныс. Эта Öсиплöн уджыс.

Следдэс сё кыскисö одзлань, топ вöрыс нималiс Öсипсö.

Миняыс вöтчис зоныс сьöрö, а вöтiс Öсипсö. Öсипыс пыкис спинанас лапья кöз. Лöга дзарнитiсö öтамöдныс вылö. Оз вачкисьö ас выланыс: нятьöсь рожабанаöсь, синнэзныс паськалöмöсь. Лöгöсь. Мый понда? Асьныс бытшöмик эз вежöртö.

— Кытшöм тэ вöлiн, сэтшöмöн и черпезьдан, — гажтöма висьталiс Миняыс ёртыслö и пуксис сы бокö. Мöдыс нем эз шу. Пукалыштiсö сiдз, и дыр мыйись юалiс Миняыс:

— Вöрисьыс кыскис?

— А тэнö кин? — дразнитöмöн юалiс Öсипыс.

— Тöда ме тэнö учöтсянь, и эз бы ков тэкöт мунны, да лешакыс сё сюртнялö. Тырмис бы, поди, öтiкыс, — кöритiс ёртсö Миняыс.

— Меным бы тырмис, а тэныт эз! — висьталiс лöга Öсипыс.

Пукалiсö одзлань шы сеттöг. Только пеллезаныс вöрыс чинньöтiс. Дыр шоччисисö. Шы сеттöг иньдöтчисö одзлань, юраныс гудыра думаэзöн öтамöдныс вылö. Лымыс ульсалiс сiдз, что быд шагыс шедiс сирньылöмöн. Мунiсö кок вылiсь усьтöдз. Лöгöсь да мыдзöсь водiсö узьны. Ноддятöг, учöтик биокöн.

Ойнас Öсиплöн öзйöма фуфайкаыс. Узьтöнняс абу кылöма, кыдз шомыс лякасьöма вата бердас. Чеччöвтiс, кöр биыс заваритiс боксö. Кусöтiс фуфайкасö, но спинаыс весьтын нем эз вöв — сотчöм.

Миняыс узис али куйлiс, кылiс али эз ёртыслiсь кусöтчöмсö — эз и вöрзьы. Только асывнас рада висьталiс:

— Еныс адззис... Öнi тоштö спина вылат паськöтан. Вирскыштiс нырнас Öсипыс — вот и быдöс.

...Борисыс узис бура. Сималiс жö кынöмыс, да мыдзувья чожа онмöссис и эз кыв, кыдз чулалiс ойыс. Тöдiс вöралiсьыс, что зверрес тожö узьöны. Кытшöм бы нiя эз вöлö вынаöсь, чожöсь, нiя тожö мыдзисö. Эта чарöм кузя да пыд лымöт колiс пышшыны.

Ойнас кынтыштiс. Лымыс пондiс лэбтыны. Одз асывнас Борис иньдöтчис одзлань. Мунiсö поныскöт кокнита, лямпаэз чуйкйисö чарöм вылöт.

Тэрмасис. Зверрес вермисö эшö узьны. Застанитны бы куйлассиныс. Но лоссес куйласаныс эз ни вöлö. Поныс чеччöвтiс зверрес узьласö, нюкайтiс местасö, нискис.

Борис кыскис кармансис сахар торок, кöдö видзис эта кадöдз, торйöтiс шöри. Джынсö öмас, мöд джынсö поныслö. Чöскытыс йиджис сьöлöмöдззас. Сэк жö пöдтыштiс кынöм сималöмсö.

И вдруг вотьыштiс поныс, пондiс увтчыны одзас.

Некöр он вунöт и он сорав, кыдз увтö поныс ыджыт зверьсö. Сьöлöм вöрзьö местаись, пондö тэрмасьны тёпкöтны. Гажа лоö вöрас.

Вöралiсьыс нетшкöвтчис аслас ёрт дынö. Öнi сiя котöртiс веськыта поныс голосö, эз видзöт кок увтсис следдэз. Кералiс и кералiс поныс голоссö и сё чайдiс кытчöкö. Дыр котöртiс Борисыс, пымалiс, вылас кöс сунис эз вöв. Но вот матынжык кылö поныслöн голосыс. Вот, кажитчö, ордчöн ни, зэв. Содтыштiс шагсö.

Кык лось мунiсö жагвыв. Одзисьыс ныр бердын чеччалiс поныс. Зверьыс пирскайтiс, не тэрмасьöмöн шагнялiс одзлань. Деревняын эта поныс дыш, но татöн мыччалö, мыйлö олö светас. Шариклöн руд гöныс мелькайтö то зверрез одзын, то шедлö коккезныс коласö, то лякасьлö ныррезныс бердö, и лосьыс некыдз оз вермы мунны одзлань, тышкасьö поныскöт. Немымда оз жалейт поныс асьсö.

Борис жагмыштiс. Кывзыштiс поныслiсь голоссö, кöда öшалiс вöрас öтiк гора говкöн. Лыйис ворга ¹вевдöрöт. Чожа вежис лыйöм патронсö. Зверрес саясисö син одзись, но поныс увтiс зэв. Сiдзкö, колö тэрмасьны, но оз ков повзьöтны. И зонка жагвыв кыссис кöззэз коласö да лыйис одзисьыслö. Зверьыс чеччöвтiс, пирснитiс, и поныс кивнитiс кытöнкö лосьыс коккез коласын. Борислöн сьöлöмыс орыштiс. Чожа мöдiс вежны патронсö, но патроныс эз кыссьы. Мышкыртчис, пондiс гуддисьны патронникас.

5

Лосьыс сыныштiс ас увтас понсö, нярьялыштiс коккезнас и кынымкö секунда кежö кынмис местаас. Макнитiс Борисыс патроннас пишаль бердас. Кылiс кöрт шысö лосьыс, син вылас усис морт.

Борисыс öтiк синнас ештiс казявны, кыдз сы вылö уськöтчис зверьыс. Ачыс оз тöд, кытшöм вын сiйö чапкис кöз сайö — кыдз только эз гардчö некытчö лямпаэс!

Зверьыс öштiс мортсö син одзсис, кöть зэв сулалiс Борисыс бокын и сьöкыта лолалiс. Боксис булькайтiс вир. Зонка думайттöг кватитiс коссис черсö и рапкис-сöтiс лосьыслö кок жила кузяс. Зэгнитiс кöзыс, голиэз киссисö Борис юр вылö — сiдз зурзис лосьыс.

Вöралiсьыс кыссис ылöжык зверьыс дынiсь. Дзарнитiс аслас враг вылö, кöда сулалiс куим кок вылын, и кöдзыт ва пондiс киссьыны спина вылас. Вежöртiс, мый кольччис бы сыись, если инмис лосьыс сылö.

Лöгасис Борисыс. Лöгыс висьталiс, мый керны. Патроныс öнi шедiс кокнита. Может, усьтöнняс кытчöкö павкис стволнас, вöрзьöтiс сибдöм патронсö. Вежис лыйöмсö, чуйкнитiс кöз бокö, лыйис. Биыс нюжалiс лосьыс бокöдз.

Кысянькö чепöссис поныс, лякасис зверьыс голя бердö и видзсис сiдз сэтчöдз, кытчöдз эз пöр лосьыс. А сiя дыр эз пöр. Дзик колдуйтöм, топ пöртмасис. Киргис морт моз и эз пöр. Сэк Борисыс жагвыв сибöтчис зверьыс дынö, тангис пишальнас бокас и пöрöтiс, кыдз турунъюрöс.

Вöралiсьыс пуксис шоныт тушаыс вылö и кылiс, кыдз мыдзыс нырыштö юрсö.

6

Яйыс быдса кучаэзöн. Сымда, что некытшöм вöлöн-доддьöн он кыскы. Эта яйыс не горт подалöн. Медбур яй. Сёй быд лунö, быд вытьын — некöр оз öш эта яй вылö аппетит. Эта яйыс кыдз лекарство — веськöтас шогöт, томтас пöриссезöс. Этö яйсö сёй ульнас масьтöмöн, сёй пöжöмöн, стряпайт мый колö И кин сiйö быдтiс? Не морт сiйö быдтiс — Миня тöдö этö, — а ен. Оз вежöрт только сiя, мыля мукöдыслö эта яйыс жаль, топ быдтiсö нiя зверьсö, вердiсö асьныс. Но талун повны немись. Берегитчыны колö, но повны нем. Кин сiйö эта вöрись кутас-адззас?

Бурöсь думаэз пöриссезлöн, бурöсь, кöр эм добыча. Миритчисö öтамöдныскöт пöриссес, баитöны, кыдз медбур ёрттэз, вунöтiсö öбидаэз.

А Борислöн мыйкö не сiя. Мыйкö гажтöм и сьöкыт. Мыдз али лосьыс сiдз повзьöтiс? Кытшöм бы дума, кöр счастьеыс одзат, кытшöм басни полöм йылiсь, кöр сьöлöмыт смев и берсясö адззылiн вöравтöн?

Том вöралiсьлöн син одзас не лось яйыс, а ранитöм зверьыс. Кыдз сiя видзöтiс, кыдз пессис оланыс понда — эз бы кув. Первуись этадз вöлi. Кöр висьтасис эта йылiсь айыслö, Миня касьтылiс некодя кылöн Кöстикасö — соседкасö, «ерекничасö», кöда тöн поперегалiс вöралiссезлiсь туйнысö. Эмöсь сэтшöм сьöлöма отирыс — вомдзалöны вöралöмсö. Кöстика сэтшöм. Кыдз пантасяс али поперегалас туйтö — бöр берт.

Не Кöстикаыс сэтöн виноват, что дыр эз усь лосьыс. Борислöн син одзас то мый: кишкаэз бокын валяйтчö лосьлöн пиянок. Гöрд гöна, басöк. Только кулöм. Сы понда мамыс сiдз пессис, сiдз бы эз кув. Не Борислöн пуля — сiя ловья бы вöлi. И кöркö пантасисö бы. Кыдзкö, правда, пантасьлiсö жö, да мый — век бы не касьтывны! Вöралiс дядьыскöт. Вöлi эшö учöт, первуись лосьсö панталiс. Пис вылö локтiс. Пискисö сьöла — локтiс лось. Сьöрас пиянок. Дядьыс дробнас лыйис пиянокыслö. Ранитiс. Пиянокыс куйлiс и сё кошшис няня. Сэтшöм сiя вöлi басöк да жаль, что Борислöн сöдзисö синваэз... Яйыс эз вöв бур — нильыг, и Борисыс сiйö эз сёй. Некыдз эз вермы сёйны. Талун бöра сiя жö, только мöднёж.

Борис учöтсянь тöдiс вöрсö. Любитiс сiйö, эз вермы овны сытöг. Пыр вöралiс. Вöралöм — сылöн счастье. Но некöр сiя эз вöв жаднöй. Некöр весись эз лый кайлö. Но сылöн вöлi душаыс айыс кодь: весьöн кадсö вöрас не öштыны. Вöралан — тожö удж. Только эта уджын Борис не айыс кодь жаднöй. Борис вийлiс и кайöс, и зверьöс только бöрйöмöн, а айыс — кин пантасяс: лыяс и веж öма сьöлапияноклö, лыяс поз вылiсь дозмöрлö. Талун зверьыс сылö тырмис, ашын понда Миня эз тöждiсь. «Тэ думайт, — баитлiс сiя, — меным не кык век джендöтны».

Гортаныс яйтöг олiсö етша: не вöрись, дак гортiсь. Честнöя висьтавны, Борислöн сьöлöмыс öнi вöрас эз кыскы не сiйöн, что полiс шедöмись, а вöлi мöдiк, аслыс невежöртана причина. И öнi мунiс вöрас только стариккес понда. Нiя вöрас сытöг — китöг и коктöг. Ошшасьöны — ми да ми пö, а вöрас бöраныс унажык видзöтлöны. Вот сiйöн и мунiс. А кыдз откажитчас, пондiсö бы серавны: «Адззан, вöралiсьыс: пызан вывсис панялö, стариккес вердöны...» Кужöны нiя баитны, не велöтны.

Томмыштiсö стариккес эта удача бöрын. Öшыштiс мыдзныс, радöсь лоисö. Енсö касьтылöны. Борис йылiсь басни абу. Öзтiсö би, асьныс чередитiсö лосьсö, пуисö яйсö, шонтiсö чай.

А том вöралiсьлöн душа вылас кымöра. Абу гажыс. Кыдз син вылас усяс кулöм куканёкыс — сьöлöмыс гудрасьö.

— Бориска, тэ мый?

— Мыдзи, — висьталö Борисыс. Но сiя абу сэтшöм мыдз, сылöн мöдiк.

7

Дзебисö яйсö. Дзебисö сiдз, что ошыс оз лок, ланаыс орддяс: яй весьтас нюжöтiсö вонь, вонь бердас кышалiсö лысiсь гардöм кольца. Кольцаыс бергалö, кыдз вöрзьöтан воньсö, и зверьыс повзьö.

Сьöраныс босьтiсö сымда, медбы вермыны мунны пессьытöг. Гортаныс ылын, туйыс кузь. Пöриссес туйсö меряйтöны луннэзöн. Колö тöдны ассит вынтö, медбы петны эта вöрись. Он тöд вöрсö, он тöд ассит вынтö — видзчись беда. Вöрыс оз любит кокнит умаэсö.

Мунiсö компас сьöртi. Адззисö бы туйсö и компастöг, но кöр эм компасыс — отсасьö.

Лякасис ни лымыс лямпа пыдöссэзö, сьöктöтiсö котомаэз. Рытланяс погоддяыс тöдчöмöн вежсис. Небоыс сукмис кымöр палачоккезöн. Тöлок орсiс кöз йыввезöн. Эшö час-мöд, и вöрыс пондiс ружтыны. Казявтöг пемдыштiс, пондiс киссьыны-гардчыны уль лым. И джын часöн лымыс кундiс вöрсö. Эз ни туй павкöтчыны лысыс бердö: лякасис лымыс паськöм бердö, кöдзыт ва йиджис яйöдз.

Быд часö тöлыс вынсялiс, быд часö ружтiс-нерсис вынöнжык, и омöн гардчис кöдзыт лымовöй пась, кöдасянь эз вöв некытöн спасеннёыс.

Пуэз шатласисö кизерик чочком нять пытшкын, вöралiссез купайтчисö кöдзыт лымовöй ваын.

Медöддьöн шедiс Öсиплö. Сотчöм фуфайкаыс немымда эз дорйы лэчыт тöвсис да уль лымсис. Нагладь дыр эз инмö кöс пес вылö. Öсипыс кыссис медбöрын, ружтiс да модис:

— Не весись вöтаси ме вöтсö.

Яйыс чöскыт, да нечöскыт вöралöмыс:

— Эг думайт, что пезьда этадз кытöнкö, — ойзiс Öсипыс. — Эг думайт.

— Колiс думайтны! — лöга баитiс Миняыс. — Тэ тöдан, что черикыйисьлöн смертьыс ваын, вöралiсьлöн — вöрын! Шедiн — терпит.

— Карзы, карзы! — горзöмöн ни баитö Öсипыс. — Ракаэс тай öтiк туй кузя жö лэбалöны да сё öтамöдныслö карзöны.

— Вöрисьыс тэнö ме юр вылö кышалiс! — отвечайтö ёртыслö Миня.

Кöр быдöс бур — воннэз, кöр сьöкыт — пон да кань. Видзöт: гыжьясясö, горшшезнысö орöтасö. И сiдз томсянь пöрисьöдз. Йитö кык мортсö не мывкыдныс, а мöдiк — жадность. Нiя сэтшöм жаднöйöсь, кыдз тшыг кöиннэз. Некин ны кодьыс деревняас абу. Некинкöт нiя вöрас оз лöсялö, некин ныкöт оз вöрав, сiйöн сё кыкöн. Синнаныс мукöдпыр öтамöднысö оз адззö, а сё кыкöн — сэсся некинкöт.

— Притчаыс вöтiс, — ружтö Öсипыс, — черпезьдан вöрас.

— Мый кошшин, сiйö и панталiн, — видö Öсипсö Миня. — Эз ков торкны весись тулансö. Тэ увья и миянöс лешакыс гардö!

— Ме эг думайт, что этадз лоас...

— Тырмас! — лöгасис Борисыс. — Тi абу челядь. Сьöкыт вöрас этатшöм погоддяас, а этатшöм ёрттэскöт эшö сьöкытжык. Нельки Шарикыслö сьöкыт.

Синва сорöн öзтiсö ноддясö. Öсиплöн пиннес оча эз локтö. Локтiс мортыс сэтчöдз, кув кöть ов — öтiк. Да и Миняыс не басöкжык, только вермö эшö вирскайтны нырнас.

Видзöтö Борисыс ёрттэс вылö да сьöкыта лолалö. Думайтö, кыдз ойсö джендöтны.

Жаралiс ноддяыс, вештiс уль лымсö да лёк тöвсö бокö. Шоналыштiсö би бокас вöралiссес. Басни лоис:

— Öсип, а Öсип... — кöс нырсö би пытшкас сюйыштö Миняыс.

— Мый колö?

— Тэ менчим Бобиксö тöдлiн?

— Сератö?

— Но. Кöда тай инькаöс караулитiс.

— Тöда, — гажöнжык ни висьталiс Öсипыс.

— Тэ кодь жö тай вöлi, öнджа...

— Мый?

— Мыся, тэ кодь жö Бобикö вöлi. Кыдз сёйны — вай! Кыдз вöрö, дак нет. Вот кытшöм ёрттэзкöт ме оланöс джендöтi! — сьöкыта ловзисис Миняыс.

— Кинлö мый ен шуис, — висьталiс Öсипыс, — ме тай пыр пон моз леша вöрас, а кинкö зобсö тыртö. Сiдз и лолö петас бöбöвлöн. Талун вежöртi, что этадз эз бы ков овнытö, да эд мый керан, кöр ас юрнат он ов.

Ойнас виль беда: Öсиплöн лэбтiсис жар, би пытшкын сотчö, биа шоммез вылын бергалö, аслыс гыö, — он вежöрт, вöтасьö али садьтöм. Отсавны немöн. Сiйö и видзöт — черпезьдас. Сiя бы и колiс, — Миня öддьöнсö оз жалейт, — да бöра жö прокурор одзын пондас ковны висьтасьны. А Миня шедлiс ни прокурорыс одзö. Правда, важын ни, кöр дзеблiс сю, мед эз нöбöт продотрядыс. Но кувтöдз полö прокурорсис, кувтöдз öбидаыс эта сю понда.

Борис вöдитчö Öсипкöт: пуктö кымöс вылас ва нямöт, шебралö аслас фуфайкаöн.

Шогалiсьыс полöтö: пуксьö, бöба видзöтö Миняыс вылö, кыдз бытьтö адззö первуись. Синнэзас нёштöм би. Синнэс дульсмöмась, югьялöны гудыра ваöн, мыйкö видзчисьöны тэсянь.

— Ёрттэз! — саймышавлö Öсипыс. — Ой, ёрттэз!.. Отсалö... Не весись ме вöтаси, ух!

Ружтö Öсипыс, ружтö вöрыс омöн. Гардö уль лымсö пургаыс юр вевдöрын.

— Ёрттэз, ёрттэз!..

— Ха-ха, ха-ха, у-у-у-о! — сералö лешакыс бöба. Öсипыслöн смертьыс радуйтчö: видзчисьö добычасö. Кöдзыт ва киссьö вывтырö.

— Пияннэз вöлiсö туланыслöн, — то ли вöтасьö Öсипыс, то ли баитö, — мыччалiс, кыдз морт мыччалiс. Одзись коккезас кутöм да мыччис позсис... аслас синваэз... Ой, ен батюшко, мый понда тэ менö сiдз керан?!

— Ха-ха, — сералö пургаыс, — у-у-у! — Коялö би вылас лымсö, пöдтö-кусöтö бы бисö. А мый битöгьяс?!

— Черпезьды бы сiя татöн, — бергалö бок вылiсь бок вылö Миняыс, — эг бы жалейт.

— Дугды, тять! — лöгасис Борисыс.

Уна ни вöрас джендöтiс ойесö Борисыс, но этадз эз шедлы. Лымыс сё гардчö. Вöрыс ружтö, и ойыслöн конецыс абу. Сьöкыт ойыс. Жагвыв чулалö.

8

Öсипыс эз кув. Смертьыс пешлiс пöрись вöралiсьлiсь вынсö, бергöтлiс сiдз и этадз, но колис ловйöн. Эз лöсялö Минялöн кыввес, кöр сiя баитiс, что вöралiсьлöн смертьыс вöрын.

Асывланяс ни Öсиплöн жарыс ыркнитiс. Моросас дугдiс пуны сьöлöмыс. Но сё эшö вöлi сьöкыт.

— Ловья? — лöгöн юалiс Миняыс Öсиплiсь.

— Тэ тарав, — сiдз жö лöгöн шуис Öсип.

Колiс мунны. Котомаэзын эз ни вöв öтiк няньтор. Сёйисö яй: Миняыс — ульнас, Öсиплö и аслыс — пуис Борисыс.

Öсипыс шы сеттöг котомасис кыскалiс яйсö, шенталiс кöз увтö да сувтiс лямпаэз вылö. Миняыс бöрйис яяжыккесö, чапкис аслас котомаö. Иньдöтчисö: одзас Борисыс, бöрсяняс айыс, медбöрын Öсипыс.

Ойнас лымыс усьöм пидзöсöдз. Уль. Лякасьö. Лямпаэз — дзик изовöйöсь. Бур, что лöнис пургаыс. Усьö эшö шочыника лымыс, летышавлö тöлыс кöз йыввесö, но эта не сiя ни, мый вöлi тöн.

9

Öтöрас уннялiс тöв, шутнялiсö керку угöввес, ойзiс крыша вылын трубаыс, и, кажитчис, прикашайтчö быд угöлын. Ойнас Миняика (а соседдэс моз — Миника) ончир эз лэдз. Сiя гортын, а мужикыс? Мый ныкöт, кыдз нiя? Юрси кышöпöн сувтö. Мунiсö куим ой кежö, а чожа вöтас витöдз. Сьöлöмыс — пезимын ¹кай, места эз адззы, сякöй думаыс юрас гардчö.

Одз асывнас öтöрись ыбöсас кинкö пондiс йиркöтчыны. Орыштiс кöч сьöлöмыс, кикокыс небзисö. Оз тöд, кыдз осьтiс ыбöссö.

Видзчисис вöралiссесö, а ыбöс коласас сулалiс Öсипикаыс.

— Мый? — невна эз усь кок вывсис.

— Керкуас, — гусьöн висьталiс Öсипикаыс и керкуас не аслас голосöн содтiс. — Милиция пö локтö.

— Милиция?

— Юöртiсö отирыс.

Миникалöн пемдыштiс светыс син одзас. Потолокыс юр вылас буждiс али джоджыс кок увтсис киссис — эз вежöрт. Саймис лабичын. Кутю моз гöгöрас бергалiс Öсипикаыс.

— Мый милицияыс? — юалiс эшö öтпыр.

— Юöртiсö отирыс, — висьталiс мöдпöв Öсипикаыс.

— Чушкалiсö! — унньöвтiс Миникаыс. Тырппес дрöжитöны.

— Может, кинкö тышкасис, — бурмöтiс сiйö Öсипикаыс.

— Сё ни вöрыс понда,

— Кöть мый! — трагичнöя согласитчис Öсипикаыс.

— Сотчим! Ой, кума, сотчим! Пöжасим! — пондiс уннявны Миникаыс.

— Паныт бы... — шуис Öсипикаыс.

— Кытчö паныт, кытшöм туй кузя?

Вдруг öтiк минутаö овсис Миникалöн оланыс — и мый понда? Ачыс эз вежöрт. Кысянь и кöр эта биыс сибöтчис, кытöн караулитiс — эз вежöрт. Отчаяннöй тоска летiс сьöлöмсö, нетшкис душасö. Мый понда колiс этадз пöрисьмытöдз овны, кинлö заптыны, уджавны, пешлыны öнняся оланнэзлiсь сьöкыт шаггесö, кöдна эз жалейтö, мунiсö тэ спина кузя, кöр колiс кужны кин дор мунны, медбы кольччыны ловйöн, ась мукöдпыр сьöлöмыт пуис, кыдз пöртын сир. Тöдвылас усис, кыдз асныра мужикыс лэбтiс Совет власть вылö кисö, кыдз сы понда кольлiс öтнасö и кытшöм вöлi сьöкыт овны да пырны отирыс коласö, кöр мужикыс мунiс не отирыскöт, а паныт. Быдöс öтiк минутаö усис син одзас: и тшыг кынöмыс, и сьöкыт уджыс война годдэзö, и талунняыс, кöр оланыс пондiс вачкисьны олан вылö, кöр быдöс лоис и тырмис и кöр эз ков кувны. И мый лоис? Кысянь да мыля? Мый эз тырмы, медбы эшö öтпыр судьбалö пешлыны мортлiсь душасö, лёка сералыштны мортыс вывтi?

Вайис юöрсö Öсипикаыс и колис Миникасö гортас öтнасö, а сiя öшис керкуас. Стряпайтö, кыдз бöбöв, оз тöд мый бердö кутчыны, быдöс киэзсис киссьö.

Петны бы, мунны отирыс коласö, öштыны тоскасö, да оз лысьт. А вдруг юаласö: «Кума, кытöн мужикыт?» Мый висьталас? Милицияись пондiс повны, кыдз смертись. Одзжык милиция бытьтö эз и вöв.

Погоддяыс умöль, луныс оз и оссьы. Не тулыс — аскодя ар. Сьöлöм вылын из öшалö. Кутiс кынöм висян. Котрасьö öтöрö да керкуö — ыбöс дзирыс бырис.

10

Вöралiссес кыссисö гортö. Эз ни вöв öтiк вын, но кыссисö. Котомаэз рекмисö. Яй торрез, кöдна быд шагын сьöктöтiсö котомаэсö, бöраныс кольччисö. Поныс эз видзöт яй торрес вылö, сiя вöлi сэтшöм жö мыдз.

Умöльтчисö, горбыльтчисö, паськалiсö синнэзныс, нюжалiсö ныррезныс. Тошсялiсö. Öвтчисö быд шагын.

Мунiсö öт пемытсянь мöд пемытöдз. Мунiсö етша.

Эшö öтiк сьöкыт ой чулалiс вöрас.

Öсип бöра модис аслыс, чепсасис. Миня мыдзöм, вартлöм пон моз ружтiс би бокас, но эта ойö эз баит. Борис вердiс и шонтiс ёрттэсö.

Виль луныс лоис мича, бытьтö некöр эз вöв пургаыс. Чулалiс лёк тöлыс, локтiс вились гажа тулыс — этö вермасисö тöлыс да тулысыс. Лёка вермасисö. Вермис тулысыс. Бöра сьылiсö ассиныс нехитрöй песня дзеззэз, асывнас пондылiс бульгыны кытöнкö тар. И асывся морозыс дорис кок увтö чарöмись джодж.

Кокнит муннытö. Вешты коккетö. Мыдзöсь да тшыгöсь, öнi тэрмасьыштiсö.

Рытланяс мыччисисö гортiсь ыббез. Öнi одзас мунiсö пöриссез — мыдзöсь, лöгöсь, öтiк думаöн: локны гортö, пöттöдз юны квас, водны гор вылö да узьны пöттöдз. Матын ни вöлi гортныс, но локтiсö кыдз кöиннэз. Полiсö. Киэзаныс пишаллезöн: вуджöртчы — пезьдöтасö, кыскасö колода бокö — и кошшы!

Но не сэтшöм отир коласын олiсö вöралiссес. Мыйыс оланас эз овлы — и лось яйсö ваявлiсö быдöс деревнянас, быдöнлö тырмывлiс, быдöн пöтлiс, некин некинöс эз пур. Векись векö, годiсь годö сiдз. Только медбöрья годдэзö лоис дзескыт. Том отирыс вильмоз олö. Да и пöриссес не нiя ни.

Пемытöн чулалiсö йöррез пöлöн йöз синнэз, локтiсö гортаныс.

... Чулалiс лун. Чулалiс мöдiк. Вöралiссес шоччисисö. Мыччисис рожабаннэзныс вылын вирок. Некин некытöн эз баит вöралöм йылiсь. А погоддяыс эта коста сё шонтiс, сё вынсялiс тулысыс, пуксис син одзын лымыс.

Сьöлöммезныс кыскисö яйысла: талун этатшöм — ашын кутас да сылöтас. Погоддяыс вылö öнi надеяыс абу.

Но и эз туй. Локтiс районiсь милиция. Нюкасьöны тышкасиссез дынын, а кин нылiсь тöдас? Берсясö думайтiсö вöралiссес, сякö вайисö думананыс яйсö — эз туй! Жаль вöлi яйыс. Кöр сымдасö эшö панталан?

И рокыс вöтiс. Быдса лун пöжалiс лымсö гажа шондi. Небоас кымöртор эз вöв. Эта локтiс тулыс, кöдö быдöн видзчисис.

Быд ойö Миняыс не öтпырись петавлiс öтöрас, кывзiс погоддясö, но лун и ой больгисö шоррез, эз лок морозыс, кöда дорис бы чарöмсö.

Кöр мыччисис улицаэзын нять, кöр лоис вежöртана, что яйыс торксис, гажмыштiс Пилич Миняыс:

— Нем эд шуö, Пилич Миняыс эшö ловья, пешлас эшö вöрсис яйсö.

— Месянь тырмас! — вдруг орöтiс айсö зоныс.

— Тырмас, дак тырмас, — гажтöма висьталiс айыс зоныслö. — Öнi тi, томмес, ас мознаныт олат.

Мамыс Борислöн гажмыштiс, сылöн оланыс пондöтчис вились.