Сырчик да йы



Локтiс тулыс. Шонтiс шондi, сылiс лым. Визывтiсö шоррез. Сьылiсö кайез. Лым увтiсь мыччисисö ыббез.

Берег дорын пукалiс чери кыйись, видзöтiс ю вылö да видзчисис, кöр кывтас йыыс, медбы кыйны чери, но тöвнас морозыс бура дорис-кынтiс да йынас вевттис юсö, и йыыс эз сыв. Мужиклöн берег дорын сималiс кынöмыс, сёйис бы черисö, но кыйны эз вермы и петiс лöгыс.

— Мужик, мый пукалан? Кинöс видзчисян? — чери кыйись дынö локтiс кöч, прыг да скок чеччöвтiс.

— Öнджа... — юрсö гыжьялö мортыс. — Чери бы сёя, но йыыс оз кывт, а жугдынытö ог вермы.

— Ме отсала! — гажöн висьталiс кöчыс. — Видзöт, чеччöвта берегсяняс, сымда и лоас! Жугалас йыыс.

Мужикыс эз ешты синöн кваркыштны, кыдз кöчыс чеччалiс ни йы вылын, но йысö чегны эз вермы.

— Весь ошшасин, — мортыс пондiс серавны кöчсö.

— Мöдöтпыр чега, — кöчыс прыг да скок и абу: стыд лоис кузь пельыслö бöбöтчöмыс бöрсянь.

Мужикыс юрсö öшöтiс да одзлань пукалö, видзчисьö, кöр шондiыс сылöтас йысö.

— Дядь! — видзчисьтöг бöрсяняс ыкöстiс руч. — Мый сэтöн керан?

— Чери бы кыя, да йыыс дыр оз кывт. Жугдыны бы...

— Вердан кö черинас, чеччöвта, бöжнам öвтышта и — оз ло! — ошшасьö ручыс, нюлышт-малышт керö öм гöгöрсö.

— Верда. Мыля ог?.. — висьталiс чери кыйисьыс. — Отсалан кö йысö жугдыны да черисö васис кыскыны...

Ручыслö сiя и колiс бы: прыг чеччöвтiс йы вылö, öвтыштiс кузь бöжнас, гыжйöвтiс йысö гыжнас, курччöвтiс — бергалiс, ниртчис, нювсис, лапанас вартлiс, но йыыс кыдз вöлi, сiдз и кольччис.

— Эх тэ! — ручыслö шуис мужикыс. — Бöра эд бöбöтiн!

— Ась! Гожумнас вöлiсь! Сэк... — шуис хитрöй ручыс и пышшис. Мужикыс одзлань пукалö берег дорын да видзчисьö, кöр сылас ю вылiсь йыыс, тöждiсьö.

— Эй, мужик! Мый сэтöн юртö öшлан?! — сэтчö сибöтчис кöин — пиннес гер, бöжыс — чер, кынöмыс сималö — дульыс вотялö, лöг.

— Чери бы пешла, — кöинлö висьталö мортыс, — да йыыс дыр оз кывт. Жугдыны бы...

— Мый сiйö жугдынытö? Вердан кö черинат,отсала, — шуö кöиныс.

— Верда! Мыля ог верд, — кöсйö черикыйисьыс. — Отсав!

— Эр-р-р! Ых! — горöтiс зверьыс, уськöтчис берегсянь йы вылö, усис, кынöмыс вылын ыскöвтiс бадь дынöдз, люкасис пуыс бердö — синнэзсис чеччöвтiсö бичиррез, повзис да сöтiс пышшыны, кыдз кымöсас лыйисö.

Мужик юрыс вылiсь лöсьöтiс шапкасö, сьöвзис кöиныс бöрсянь и одзлань пукалö, надейтчö шондiыс вылö, что сiя сылöтас йысö. Сэк вöлись и чериалас.

— Ой-ой! — бöрсяняс локтiс да пондiс ружтыны ош. — Тöвбыт гуын куйлi, нем эг сёй, эг ю, кынöмö öддьöн сималö, но некинöс ог вермы кутны. — А тэ эстöн мый кера-а-ан?

— Мый кера... Чери бы кыя, да йыыс, видзöт, дыр оз сыв, а жугдынытö ог вермы.

— Вердан кö?..

— Мыля ог верд? Верда...

— Сэк пазда! Жугда! — ружтö ошыс, ачыс уськöтчис ни йыыс вылö да кыдз пондiс уджавны, кыдз пондiс вынсö мыччавны, пиньлавны да монлавны йысö, вартны лапаэзнас йыыс кузя, что мужикыс пукалö да думайтö: «Но, Иван! Тыдалö быль эд сёян ни черисö...» Да весь эд сiдз думайтiс мужикыт — вомдзалiс асьсö: ошыс мырсис-пессис, но нем эз вермы керны и ружтытöн иньдöтчис вöрö.

Шондiыс одзлань шонтö. Вынсялöны шороккез, визывтöны-больгöны. Черикыйисьыс сё пукалö ю дорын, видзчисьö кöр сылас йыыс, но сiя оз сетчы шороккеслö и шондiыслö, оз думайт эшö кывтны.

И эстöн... Чик да чирк! Сырчик лэбзьö, бöжокнас öвтышалö, мужикыслiсь юасьö:

— Мый нö?.. Тöвбыт я мый я ю дорас сунасин? Видзöт, кыдз ме йысö чеглала, чик-чирик!

— Адззисьöм чеглалiсь!.. — сьöвзис мужикыс. Эстöн не тэ кодьöсь ни уджалiсö, да нем эз вермö керны, а тэ бытьтö кöс коккезнат...

Эз ешты öмыс пöднассьыны чери кыйисьыслöн, сырчикыс пуксис йы вылö, быркнитiс-чеччöвтiс öтiлаын, мöдiлаын и... Йыыс потiс, пондiс юыс ружтыны, дундöтчыны, вынсявны... Вöрзис да пондiс кывтны. Мыччисис ва.

Сысянь отир тулыссэзнас и баитöны: «Локтас сырчикыс и вöлись юыс вылiсь чеглалас йысö, вöлись и пондам бöра чериавны...»

ГÖССЕЗ



Лэбзис-чулалiс тулыс. Лун-мöдöн цветитiс льöмпу, улицаэзiсь косьмис нять, эз ни сьылö сьöдкайез, и бригадаын ошшасисö, что кöдзсьöны ни осяэз. И кывсис, что Кöчыбö локтöмась виль олiссез. Олiссес бытьтö пö локтöмась овны, а кин бöра шуö, что гöститны. Кыдз бы эз вöв, но меным колö ветлыны Кöчыбöдз.

Кытчöдз лöсьöтчи да вöрöтчи, кадыс эз узь — чулалiс эшö лун-мöд и вот корöны ни сельсоветö. Сьöлöм вылын шог, мунан сельсоветö и думайтан: «Видасö, но, поди, кымöсам оз жö вачкö», — эта думаöн кайи сельсоветiсь посöдзö да чорппезнам тарски ыбöсö.

— Да! — председательыс шуис кыз голосöн, топ миян коддесö асывсянь сизимö ни адззылiс и быдöнкöт пурсис. Смела шагньöвтiпредседательыс одзö, здоровайтчи и лöни.

— Тэ важын ни Кöчыбас эн вöв? — юалiс Иван Петрович.

— Лун куим-нёль...

― Сэтчин виль отир локтöмась, ― Иван Петровичыс гардö басни. ― И шогалöны ни пö... Норасьöны...

Чорзис чужöмыс, тыдалö, лöгыс петiс ме вылö, но кытчöдзкö видзсис, тöдiс, что весь овны ог любит, что больницаын фельдшерыс öтнам, кыдз, тай, отирыс баитöны: öтiк вöлыс кык додьсö оз кыскы, мортсö шöри он орöт.

— Ой, Иван Петрович! — кивзыштi. — Некöр эшö вöлi... — Дорйи жö бы ачымöс, содтi: — Керам, Иван Петрович! Ветлам...

— Сэк бур туй тэныт...

Колiс мунны Кöчыбö. Нятьöсь туйöт мотоциклöн эшö ветлöтны эз туй, велосипед дыш петö кыскавны... Кольччö Синько.

Кышалiвöв спина вылö седло и шутньöвтi: «Но, ёрт, вöрзям бöра...»

Погоддяыс шоныт, топ природаыс кузь тöлыс бöрсянь только саймис да лэбтiс юрсö и дивуйтчö мыля дыр узис. Медодзза кöдзöм ыббес рöмсялiсö ни осяэзöн, путриктiсö öзиммез. Лöнь. Шоныт. Тулысся русö дюттьöтöны тракторрезлöн шыэз — уджалöны деревняэз. Синько шупыта оськалö тракт кузя, чеччала седло вылын, тупка моз видзöта ас гöгöрсим тулысся олансö да думайта, что бур бы вöлiпукавны кытöнкö межа дорын, кывзыны, кыдз пель одзын бизгö медодзза ном, кыдз кöс мыр бердын тачкöтö гаг, кыдз бороздаöт визывтö-больгö шорок, кыдз кöз йылын питьыртö ватшкан, и лог дорын öтамöднысö одзалöны пизьöны-сьылöны каёккез, оз тöдö, кыдз бы эшö ошшасьны тулыснас, видзöтны, кыдз каёк öктö турунчиррез — тэчö поз. Эшö бы видзöтi, кыдз бадьлöн ыждöны почкаэз, кыдз нiя лэдзöны гöн кодь зелёнöй уссэз, и бадьыс гöгöрын ройöн лэбалöны зiэз да малянкаэз.

Кадыс рытлань, шондiыс öшалö ни деревняным сайын, сылöн: югöрыс сидзö керку юррезö да югдöтö веськыта синнэзö.

Чулалiдеревня, лэдзчиси ыб кырылö, и туйыс кайöтiс керöс паныт моз, вайöтiс гараж дынö, кытöн суналiсö быдкодь машинаэз.

— Эй! — видзчисьтöг мазьöсь да пöв сина керкуок дынсянь быд горшсис горöтiс Миков Сеня, гаражись сторож, да лэбтiс кисö, топ сувтöтiс бы менчим Синькосö.

— Мый колö?! — зэлöтiсермöт поводдэсö.

— Здорово! Кытчö рытнас вашöтан? — юалö Семёныс. Честнöя висьтавны кö, Миков Сеня бур морт, рам, мекöт пыр адззö басни, но талун сторожыс биргылясьтöн (öт кокыс дженытжык, мöдыс кузьжык, сiйöн сiя и сторож) локтiс ме дынö, кутiс вöлыс юр бердiсь сермöт, тшыг порсь моз паськöтiс нырпыссэсö, вишкыштiс русö, пиньöвтiс öмсö и гöрдöтöм синнэзнас пондiс сёйны-видзöтны ме вылö, кыдз враг вылö. Код, тыдалö, Миков Сеняыт, трескöм, пöт — вина дук дынсис пыкö. Ме сэтшöммесö ог любит...

— Мый колö?! — мöдпöв юалiсторожыслiсь.

Сiя шы эз сет, сё сёйис менö синнэзнас да видзис сермöтöт вöвсö.

— Ме тэрмася!

— Тэрмасян?.. — Сеняыс няпыртiс кулаксö, лэбтiс вевдöрö: — Видзöт, кыдз менчим киöс поннэс пурисö... Зубыт, кöть джагöтчы.

ВидзöтiСемёнлiсь кулаксö и адззи, что быль эм сэтöн рана — кань гыжйöвтöм, и пондiжалейтны-серавны. Эта коста кинлöнкö понок чепöссис гараж воротаэз увтсянь, уськöтчис Синькоыс вылö и пондiс сёйны-вувтны.

— Шарик, Шарик, — ласковöя баитiбы поныскöт, но басниöс дзугис сторожыс:

— Тэ, öнджа... Ветлöтан вот эстiи нем он тöд и он адззы! Синнэтö куньöмыт да олан, а миян эстöн кöть юр пельпоннэз вылiсь нетшкöвтасö, немöн кöртавны... Не бинт, не йод, не аптечка... — Кулакнас öвтiс юрыс вевдöрын и сэтöн жö ыкöстiс сьывны. — Ой да тэ, малинушка-а-а... Кыдз олам, сiдз и кулам. Веськыта висьтавны, штö колхоз, штö совхоз — öтiк ножничöн шырöмась.

— Вöлiаптечкаыс, — Семёныс одзын пондылiдорйыны ачымöс, но кытчö тэ! Учöт мыгöрнас Миков пияныс, но дёрок, мый пондас керны, туйсö эн поперегав, сiдз и этадз вермас и керас ассис.

Натьтö, дас минута гöгöр ыксiс Миков Сеняыс и пöтiс-виньдiс, пондiс ме вылö видзöтны, топ дивуйтчис ни: «Но мыля нö тэ он лöгась?! Мый эшö тэныт сэтшöмсö бы висьтавны, медбы йиджис сьöлöмöдззат?! Бедьöн заргыны я мый я кынöмат?»

Кöз йылын питьыртiс ватшкан. Каёкыс гажа сьыланкылöн кольлалiс тулысся шондiсö, кöда лöсьöтчис ни пуксьыны вöр сайö. Нюжалiсö туй вылын кöззэзлöн вуджöррез.

— Лоас аптечкаыс! — висьталiсторожлö, коккезöс жмитыштiвöлыс кынöм бердö, мыйсянь Синькосö топ лöдз курччöвтiс, и сiя öдззис котöртны, невна Сенясö коккес вылiсь эз пöрöт.

— Эй! Вай аптечкасö! — бöрсяням ыксiс сторожыс, но бöрам дзар ни эг кер, дюттяси седло вылын да обидасянь курччалiтырппезöс — эг вежöрт, мый понда сiдз видiс менö Миков Сеняыс.

Обидаыс сьöлöмöс чеплялiс не öтiк минута. Синькоыс котöртiс зэркыта, зэгйис юр веммез — пыркöтiс гажтöм думаэз, и грива вылын ни, чукыльын син одзись öшисö сторожлöн гöрд синнэс. Сэтöн жö туйыс бокын зелёнöй рöма баддез коласын чочком цветöн шынньöвтiс льöмпу, топ невеста.

Гажöтчö оланыс. Природаыс сьылö да олö. Природаыс йылiсь думайттöн грива вывсянь адззи ни Лямина — чеччöвт и шедан улицаö. Вöлыс содтiс шаггез и чожа пондiс мунны Лямина нятьöсь улицаöт. И бöра мылякö сьöлöм вылын дзескыт: нятьöсь да ёгöсь деревняыс, быд керку дынын ыджыт кучаэзын пес — синнэз тыртö и дойдö, и ёгыс... Рукляэз, бырöм сапоггез, кöтiэз, баня бердын пиннесö гер керöм кулöм пон, кöдö кокалöны кык рака — мырддясьöны пон яйнас. Кытöн нять, бус, ёг, сэтöн и инфекция, сэтöн и шогöт и бöра эд тэнат, фельдшер, удж...

Кыскö менö вöлыс Кöчыбö, а синнэз Ляминаын, думаэз татöн. Видзöта: вöлыс одзын туйöс поперегалö Петрика, сы пельпоннэз вылын тыра ведраэз, и мортыс тэрмасьö бытьтö бы...

— Здравствуйте! — гажöн здоровайтчи инь морткöт.

— Здравствуй! — гажöн жö шуис Петрикаыс, сiдз видзöтыштiс кымöсыс увтöт сьöд синнэзнас, что сувтöтiвöвсö.

— Кытчö ой кежас öдззöтчин? — юасьö инькаыс.

— Одзлань, — висьталiПетрикалö да юалi. — Ваыс гудыра?

— Гудыр, — недолыта шуис Петрикаыс. — Мыля оз ло нятьöсь, кöр быд öшымöсö боргис сылöттöнняс. Киэзöн гумлалам...

— Кöть пизьöтö да сiдз юö.

— Ог жö пизьöттöг юö, — бöбöтö инькаыс, кöр тöда, что некöр и некин миян васö оз пизьöт, кыдз керкуас пыртасö ведраöн, сiдз и сысъялöны ырöшшез.

Шлёп-шлёп, — коккезнас педзис вöлыс и вöрзис местасис.

— Сергей Васильевич, Сергей Васильевич! — бöрсяням ыкöстiс Петрикаыс.

Зэлöтiповоддэз. Сувтiс Синькоыс. Бöрлань бергöтiюрöс и пондiвидзöтны, кыдз инькыас сулалiс ни тыра ведраэзнас бурундукныс вылын да пондiс модьны:

— Сулав жö, Сергей Васильевич... Мыйкö бы ме тэныт висьтала, — ачыс иньдöтчис мелань.

— Висьтав, ме тасянь кыла, — сералiни Петрика вылын сiйöн, что мортыс тыра ведраэзнас ветлöтö öтöрö да мöдöрö.

— Секрет менам! — быд горшсис сералiс инькаыс улицатыр, и кöр зэв локтiс вöлыс дынö, кутчисис стремена бердö, вöлись гусьöн моз ни шуис: — Тöдан жö мый?.. Менчим кöзяинöс Кузь Мититыс пон яйöн вердöм. Мый лоас, а?! — видзöтiс сьöд синнэзнас веськыта — полiс и видзчисис отсöт. — Оз я кув вижлöкыс?! Кулас кö, дак кинöс жö бы пондасö судитны? Поди, менö?! — синнэзас повзьöм дума. — Ой, Сергей Васильевич, упаси боже бы сэтшöм олансö! Кöть эд кыдз алкоголикыскöт олам, но ме сiйö ышö пон яйнас эг верд. Эг, господи прости! Ас вылам еныс одзын грехсö ог босьт. Ог, Сергей Васильевич! Вижлöкыс, мыся, ачыс аслыс смертьсö кошшö. Сiдз эд? — юалiс сэтшöм голосöн, кöть горзы, но только эн бöбöт, но ме шы эг сет, сэк инькаыс кыскыштiс асланяс стременасö да сiдз, что вöлыс кыкнан кокнас таджьясис и пондiс повзьöмöн видзöтны йöз морт вылö.

— Кулас или оз пон яй сёйисьыс?! — мöдпöв юалiс Петрикаыс.

— Нем оз ло, — сьöлöмсö бурмöтiинькаыслiсь, мыйсянь сiя сэк жö гажмис — синнэс югйöвтiсö каньлöн моз, шуис:

— Но и чёрт сыкöт, ась кулö!

КывзiПетрикалiсь баитöм да шыннялi.

— Тэ мый риз видзан? Кин вылын сералан?! — Петрикаыс вежис пельпоннэс вылын ведраэсö. — Он я менö серав?!

— Тэнö! — гот-гот серöмтчи. — Меным бы тэ кодь гажа иньсö, Катя!

— Адззин улица шöрсис! — Катялöн гажöн югйöвтiсö сьöд синнэс кай варышлöн моз. — Öмтö осьт да босьт, сiдз ме тэныт курöг моз, поди, и сетча?!

— Вина ог ю, табак ог курит, — гильöтiс гаж, öзйис шутка — ошки ачымöс.

— Тэ мый, думайтан, что вина он ю, он курит, дак медбур жöник ни?! Э, зонка! Тэ ышö инькаэсö он тöд, а кöр пондан тöдны, мöдiкö пондан сьывны. Тöда ме тiянöс! — дугдiс серавны Катяыс, зэв сибöтчис вöлыс дынö, вевдöр нюжöтiс голясö, гусьöн моз пондiс модьны. — Кывзы... Тури Васикаэслöн пö умöль шогöтöн шогалöны. Вежöртiн, мый висьтала?! — Висьталiс и синнэзö видзöтö, тöдö бы: верита я ме сылö.

Эг бы мыччав, что думайтiни Тури Васикаэз йылiсь, но кытчö тэ! Лэчыт сина инь мортсис разь мыйкö дзебан? Из увтiсь дуксö пон моз кылас, мый тэнат сьöлöмыт бердын. И адззис Петрикаыс, кыдз ме тöждiси ни сы басни бöрсянь.

— Ачыт, мыся, тöдан! — дыр мыйись улица тыр ни ыкöстiс инькаыс. — Ме тэныт висьталi... Шогöтыс водтöтас кö быдöс деревнясö, ме вылö эн горзы, — серöмтчис и кольлалiс. — Пырав миянö, кöр горшыт косьмас.

— Екатерина Петровна, öшын увттö дзимляв жö... Абу басöк, вермасö штрафуйтны.

— Тэ я мый я?!

— Ме разь öтнам отирсö штрафуйтла? Санэпидстанция... — Мый сiя сэтшöмыс?!

Но ме вöвсö бергöтiни Кöчыблань...

Чулалiс, бöрö кольччис Лямина. Вöлыс менö кыскис керöс вылöдз. Шондiыс медбöрьяись югйöвтiс веськыта синнэзö, орсыштiс югöрнас ва гöппезын и пуксис вöр коласö. Пеллез одзын бизгис ном. Кöчыбын, кылö, вувтiс пон, эшö кытöнкö ылын, топ кинкö вачкис ведра кузя — вöрсö повзьöтiс лыйöм; сьöлöм жмитыштiс обида, что локтiс тулыс, что кинкö кытöнкö вöралö, а ме кыным тулыс ни киам ог босьт пишальсö...

Уик-уик — гöп дорись, вöлыс коккез увтiсь, перыта швыркнитiс ва кай. Видзöтiыб вылö, сiя бöра дзугис думаэзöс тулысся оланöн.

Вот и Кöчыб. Деревняыс кыдз тарöвтчöм керöс увтö, тарöвтчытöнняс рез-паз жугалöмась да пиньласьöмась керкуэс, кышасьöмась шорок дорö сэтчин и татчö, кöдалöн öшыннэс киссьöмась, кöдалöн öшын стеклоэс жугалöмась, кöдалöн короминаыс пиньöла. Вöлiкöркö деревняыс, да висьтав, что абу ни, олöны татöн морт-мöд — этö нiя, кöдна пöрисьöсь и некытчö ни оз лысьтö мездöтчыны позсиныс — кытчö ен шуис, сэтöн и куласö ни, сэтöн и пондасö сiсьмыны. А öнiтатчö эшö столббез кузя нюжалöны проводдэз, вувтö пон, китсасьöны петуххез.

Менам Синькоö сувтiс Проша деддэз öшын увтö: этчö сiя вовлö тöв и гожум, тöдö ни, что керкусö ог орддьö. Дедлöн керкуас эшö туйö овны, эшö посöдзыс виль, öшыннэзас эшö гаж, и Прошаыс миян коддесö эшö янöтас — сизимись коляс уджöн и вöрын пишальöн.

Прошаэзлöн öтöрись ыбöсыс пыр осьта и талун осьта: кöть ойшöра-ой пыр да узь, ойшöра-ой хозяиныс панталас кыдз колö и кольлалас морт моз, сiдз, мед сыбöрын умöль кылöн эн касьтыв.

Вöлыс сувтчис Прошаэз посöдз дынö, дзик локтiс гортö. Сэтöн ме пыр шоччися, ежели шеда кузь туйö, сёйла тшыгувья. Олам вот дедкöт öтным Кöчыбын, мöдным — Пальникын — коласаным сизим верста, а пантасьлам унажыкись, нежели, шуам, Гриб Фёдоркöт, кöдакöт керкуэзным зэв-зэв. Сэтшöм олан — ылын да матын, йöз, да кыдз аслам, öтiк позын пыр бытьтö дзескыт, а йöзын (татöн) чöскыт. Прошакöт öтамöднымöс кылöн ог дойдö, туйнымöс ог поперегалö, пантасям кö, дзик янсöтчыны ог вермö.

Локтiс ёртö посöдз дынö, чеччöвтiвöлыс вылiсь, повзьöтiкычанокöс, кöда менö эшö оз тöд, лэбзис курöг, кöда чож да юрыс учöт — мывкыднас стыдитiс асьсö и менö. Домалiвöлöс майöг бердö, видзчиси, что керкусис петас хозяиныс, но сiя одззамоз эз тыдав, сiдзкö... Сiдзкö, ёрт, весь менö татчö эз корö, колö тэрмасьны.

Шондiыс важын ни эз вöв, важын ни вöлiрыт, но тулысся рытыс югыт — ем уськöт и кок увтiсь адззан. Ме адззи, что талун Прошаэз öшыннэзын некин эз вуджöртчы, бытьтö менö некин эз видзчись, сiйöн пыдына ловзиси и кокнита кайи посöдзö, шагньöвтiпышткись посöдзöдз, падми ыбöсыс одзын — дзугсис шаг, кыдз повзи бы пырны.

Керкуын сюр-сяр кылiс кытшöмкö шы и лöнис — виньдiсö том да пöрись голоссэз.

Чорппезнам сяркнитiыбöс косякö и пыри керкуас. Керкуыс сöстöм, нем оз бöбöт синнэз. Веськыта лабичын пукалö Прошалöн нылыс, кыдз горись кыскöм рöма нянь чöвпан — юрсянь коккезöдз öгралö том гажöн, лöз синнэс югытöсь и лёкöсь, кыдз видзöтыштiс, сiдз топ сьöлöмам и заргис пыжьянöн. Здоровайтчи и падми джоджыс шöрö, кöр вежöртi, что талун не сiдз, абу ни керкуас Проша дедыслöн киподыс и голосыс...

Здоровайтчи, и мекöт здоровайтчисö, но гажтöма или лёка — эг вежöрт: нузгыштiсö ныр увтаныс и бур! Унажык нем видзчисьны.

А эд Вераыскöт кöркö ми öтлаын уджалiм колхозын, рыттэзнас ойшöрöдз öтлаын койим вичку дынын, и котрасьлiме сы сьöрын кычанок моз, бытьтö лöсьöтчи дружитны, но нывкаыс ме вылö эз видзöтлы — гордöй я мый я вöлiили кошшис мöдiкö — буржыкö, сэтшöмö... А вот сэтшöмыс и эз адззись: топ некин эз любит нывкасö, некин сьöрас рыттэзнас эз петкöт, а мыля бы? Поди, сiйöн, что нывкаыс вöлiлажмыт да паськыт мыгöра, а кöр шынь видзас, öтiк пинь одзас вöлiкузьжык мöд пиннес сьöртi— нач тшыкöтiс öмсö, кöр эшö анас мöртчас поперег... Öтiк пинь...

Вöлiда абу ни Вераыс öмын нёштöм пиньыс, сы местын югйöвтiс золотöй рöма югöр... Вот тэныт и Вера!

Гусьöн видзöтышалiзолотöй пинь вылö, эта коста комсянь джодж шöрö чывкнитiс том мужик — юрнас потолоксö люкалiс и баснинас пурис, сiдз горöтчис медодзза кывсö, что вежöртi— абу ни ме татöн гöсь, абу...

— Тэ фельдшерыс?! — эрзыштiс том мужикыс, пиньöвтiс синнэсö да пондiс кваркышавтöг видзöтны, бытьтö ме гусялiмыйкö татiсь.

Эх тэ! Пантасьлiни ме аслам оланын быдкодь морткöт — рамкöт и лёккöт, врагкöт и ёрткöт, гичралiсö ни ме вылö пиннез и няпралiсö кулаккез, вöлi, что вачкывлiсö ни пельбокам, ачым ни гичравлiпиннез, няправлiкулаккез, кöть и некинлö и некöр эшö эг вачкы пельбокас, но, мыся, ас могсим смев кодь жö: ог жö бы пов быдкодь кычансис, ог жö бы дзебсись лёк понiсь, ог пыр из увтö гым кымöрись, смела узьла вöрын и ойшöра-ой верма мунны нач тöдтöм туйöт.

— Но, ме фельдшерыс, — шуи рамыника.

— Дыр жö тiянöс колö видзчисьны! Жагöн жö, ёрт, вöрöтчан. Мöдейтан... А мый бы лоис, кулiс бы кö тёщаö?! Висьтав! Сылö гроб, а тэныт?!.. Тэ эд татöн отирсö лечитан и калечитан! Тэ! Мый понда государствосис деньгасö босьтан?! Фельдше-е-ер... Тьфу тэ, мать, медицина... Мый нö шы он сет?!

Шедiвöлись эд, а! Тангисö кымöсам и бур! И кин бы эта мортыс? Кытöн вермöма сэтшöмыс чужны да быдмыны?

Овлö кад, что думаэз пизьöны, дорьян бы асьтö и он вермы дорйыны, öнiог тöд мый мекöт лоис йöз морт одзын, кылi, кыдз рожабаннэзö чепöссис вир, гöрдöтiя стыдсянь или лöгсянь, ог куж висьтавны, но кылi, что джоджыс дюттясьö коккез увтын, öшыннэзын лоис пемытжык, минута-мöд некинöс эг адззы, эг кыв, эг вермы висьтавны кыв. А тöдтöм мортыс сё модис:

— Вот эд тi! То эд! — кузь киэзнас öвтiс да кузь чуннезнас легöтiс син одзын. — Кытчö тiовнытö дзебсисьöмась и олат... Некин тiян вылын хозяиныс абу... Совет властьыс кытöн?! — шоччисьыштiс, мурзис-керис и одзлань шырис. — Сiдз эд, фельдшер? А! Мый нö нем он шу? Или кывтö гортат колин? Мда-а-а... Деревня. И тэ, Вера, менö татчö вайöтан овны бы?! Ог тö-ö-öд... Этатшöммескöт... Вера!

Вераыс шы эз сет, сэк мужикыс бöра кутчисис ме бердö:

— Мыля дыр эн лок?! Кöр ни ме юöрсö иньдi?!

— Кöр? — мезмис менам öмсим.

— Асъяпоннас!

Овлö жö, что тэнö видöны и вартлöны, а тэ сералан да неран мортсö, ме бöра кыдз нерöмöн горöтчи:

— Сiдзкö, юöрыс подöн ветлöтiс. (А мыйöн сылö тасянь ветлöтны бы? Самолётыс лэбалö да вывтiвылына, машинаэс ветлöны да кытöнкö мöдöрын, кольччö мунны подöн).

— Мый?! Кин сiдз баитö?! — пондiс чывкйыны джодж кузя мужикыс. — А! Кыдз сiдз?!

— Сiдз, сiдз, — сэтöн öмыс пиньöвтчис Вераыслöн, шынь керис инькаыс асмознас, натьтö, гажöтчис. — Сiдз, Володя. Куль буржыка фельдшерсö, матегав. Ась тöдö! Мед оз вунöт, что отирлö уджалö, — ректасис рочöн да комиöн, видчис и сэтöн жö ошшасис. — Видзöт, фельдшер, кытшöмö мужиксö адззи городсис!.. Не тiян кодь каляпа. А тiкöркö менö татöн мортö эд пуктö.

Чисто пымалi— кöдзыт ньылöм сöдзис кымöсам, стыд лоис, что сiдз сералöны, а мыйöн дорйисьны и кыдз? Кыдз шуöны, не увтöс, не вевтöс еныс эз козьнав, не мыгöр, не кыв — гöжöм тури кодь и эм.

— Адззан кытшöм менам Володькаö! — чукыль-мукыль юрнас керис Вераыс.

— Бур, — вöлись пышшис öмсим, пондiмалавны юрöс да жагвыв дзик саймыны пыд онiсь. Думайтсис ни, что кытшöм инь, сэтшöм, натьтö, и мужик — öтiк гуна вылын вартöны.

Сулалiджодж шöрын и вунöтi, мыйлö локтiтатчö. Кытöн жö Проша дедыс? Мыля гортын абу? Ми бы сыкöт кужим баитны. Сулалiджодж шöрын. Вералöн мужикыс видзöтiс, топ лöсьöтчис вартлыны, а Вераыс шыннялiс — мыччалiс öмсис золотöй пиннез, вöлiрад, пеллесö адззис, öтöрас пемдiс сiдз, что керкуас тыдалiс рöма-дзара, кöр тай биыс оз ков и битöг умöль. Öтöрын несйöтiс Синькоыс. Сэтöн жö комас ружтыштiс — сьöкыта ловзисис Проша дедыс. А, поди, не дедыс? Или сiйö ме моз жö зятьыс да нылыс йöртiсö рос угöлö, и пукав, старик, да эн шыась, то адззылан!.. Сюям боккезат, Проша дед, и некытчö он норась... Вермас лоны сiдз, вермас...

— Овны татчö локтiм! — лыйис-висьталiс том хозяйкаыс. — А тiвидзöт, кыдз панталат миян кодьсö!

Горвыв дорын вуджöртчис кань и öшис, кинкö вылö öтöрас гавкнитiс пон. Пондiс петны серöм, что сiдз мекöт баитöны: шынньöвтi, смевжыка ни видзöтiВераыс синнэзö.

— Сералан?! — топ виньдiс Вералöн жöникыс, — серав, серав кытчöдз синваэт оз петö, а кöр пондан горзыны, ме понда серавны!

«Сiдз, Вера! — гажöн видзöтiни Вераыс вылö. — Ме тэнат жöникись ог ни пов: тiгöссез — талун эмöсь, ашын абу, а ми олiм и пондам овны или... Пондат овны да быль мыччалат, кыдз колö овнытö? Но, но...» — Кокнит думаэзöн ни шагньöвтiкомö, кытöн забор бердын сулалiс кровать, и сэтöн куйлiс Проша дедлöн иньыс, сивöй юрсиа пöрись морт. Старухаыс эз вöрöтчы, сiйö шебралöмась кыз гуняöн, коккес вылö шупкöмась подушка.

Гор одзын пызан, пызаныс вылын пизь да лойöм уль нянь, тыдалö, томмес лöсьöтчöмась керны пельняннез, но ме дзуги нылiсь уджсö. Важын ни сималiс кынöм, и öнi, кыдз адззи пельняннесö, ньылыштiдульöс и пондiжалейтны Прошасö: «Эх, старик! Ачыт, натьтö, тöв шöрнас яйись керöм пельняннесö пöт он сёйлы, а зятьытлö начкылöмыт медбöрья барансö. Дона жö, батя, зятьыт...»

Сувтчыштiкровать дынö старухаыс юр весьтö. Эта коста гор сайсянь чушки-пашки петiс Прошаыс, виноватöя шынньöвтiс, топ шуис: «Эн осудит... Мый эд керан?..» Дедыс кузь мыгöра, вöлiэшö топыт, коккес вылын кокнит — пидзыртас, ва петö, а öнiмортсö топ öтiк лунöн сысъялöмась-пидзыртöмась и абу... Горбыльтчöм, косьмöм, синнэс вöйöмась сингуэзас, киэзас польдöмась вир жилаэс — лы да кучик. Жаль дедыс, кöть и кадыс вермалö ни пöрисьсö — кык век оз ов, талун-ашын костас и косьтас мортсö кадыс, но сё жö...

— Мый лоис? — юалiдедыслiсь.

— Вот, — сiя öвтыштiс кузь киэзнас, кыдз кай лэбтыштiс и лэдзис борддэсö, кöр оз ни вермы лэбзьынытö. — Вот... öнджа...

— Мый лоис? — юалiни старушкаыслiсь.

Сiя пöв синнас зубыта видзöтыштiс шебрас увтсянь, ружтыштiс и шуис: «Юрö, кага...»

Бöрсяням комö шагньöвтiс пöриссеслöн зятьныс — йöрнöс соссэс пуджöмöсь, синнэс рысьлöн моз — смев да лёк, бöра пиннесö кеслö бы ме бердö:

— Мый старухаыслöн?! Тэ эд тöдан или бум-бум... Нем он вежöрт? Кыдз шаман...

— Эн бы сiдз... — кивзыштiс Прошаыс — падтiс бы зятьсö, но мöдыс эз вежöрт пöрисьсö, юалiс:

— Мый тэ шуин?! Висьтав, старик? Ме эд коми кывсö ог вежöрт.

— Кикимора тэ, — висьталiс дедыс.

— Мый сiя сэтшöмыс?! — синнэсö мöртiс ме вылö зятьыс.

— Öнджа... Мыся, сёйны тшöктö, а менам кынöмö оз симав.

— А, да...

— Дугды, Вова! — сэтöн горöтiс Вераыс, тöдчис, что менам кыввезö бокö эз лэбзьö.

— Деревня... — пиньöвтiс öмсö Володяыс и öшис комсис.

— Слава богу! — кыдз шогöтiсь мезмис Прошаыс. — Видзöт, Сергей Васильевич, старухаöс... Поди, эшö отсалан, он лэдз кувнытö...

Кывзiни старукаыслiсь сьöлöмсö, ачым баитi:

— Дед, кыным год олiт старухаыткöт?

— Öнджа... — паськöтiс пöрисьыс киэсö, кыдз нач öшис пызаныс дынын, кузь йöрнöс подолсö сюйыштiс бы гасник увтö да киэс эз кывзiсьö. — Ме ог тöд... Нёльдас годся унажык ни бы я мый я...

— Мый тэ пасмаыслiсь юасян? — видзчисьтöг старухаыс вывсис джоджö шупкис подушка, брынгис коккес вылiсь шебрас, топ öтiк минутаöн висьталiс, томмис, гажмис. Вына голосöн ни горöтчис: — Ой, старик! Мый тэ и лёбан ни? Кытшöм тэ вöлiн, сэтшöм и кулан ни, кыдз синнэзö куньсясö, сiдз сьöрам и вöтчан? Витдас год ни эд öтлаын олам, витдасö!

Старик ниртiс оча долонь, пиньлалöв-керис öмсö и вöлись висьталiс:

— Сiдз. Натьтö, витдасö олiм, а кулан кö... Сьöрат вöтча. Мый ме эстöн понда керны этатшöммескöт?! Нiя менö тшыгйöн виясö!

— Тьфу, деревня! — забор сайын сьöвзис зятьыс.

— Дыр ни, мыся, öтлаын олам, — пондiс ошшасьны старухаыс, сьöкыта лолалiс. — Öнджа... Эна моз (кинас öвтыштiс томмеслань). Эна моз эг эд олö, öтiк лун весь эг олö. Вежöртiн, мый ме баита? Ой, ой! Смелöсь öнiныввезным. Смелöсь рышкыт бöррез. Мöдiк жöник ни эд городсис адззис... Öтыс вöлiбур, мöдыс эшö буржык, вот!.. — синваэс петiсö пöрисьыслöн. — Но ог тö-ö-öд... Кыдз еныс шуас? Поди, бöра лоас мöс вöра, а?

— Мама! — горöтiс Вераыс.

— Мый ме? — эз повзьы мамыс. — А тöдан я, кытшöм тэ шогмин?! Гаг кодь эд вöлiн. Не юрыт, не бöрыт. Ой и лун горзiн, зырымтö каттин, а öнiпаськöмтö вежöмыт, тырппетö мавтöмыт и бытьтö мортö пöрöмыт. Мортсö, кага, öнджа...

— Мам!

«Тэ пышшин, а ме эг, — нерис дума. — Тэ кокнит олан кошшин, а ме эг, а öнiлоктан бы... Но и лок, оз ло дзескыт, но мывкыдыт... Деревняэзас эд отир жö олöны...» ДумайтiВера йылiсь да видзчиси, мый жö бы эшö нылыс йылiсь висьталас мамыс, кыдз эшö ошшасяс аслас оланöн, но старухаыс кинас öвтыштiс, нюжöтчис кроватьыс вылö и мыдз голосöн ни шуис: «Ась...»

Öтöрас бöра вувтыштiс да лöнис пон. Тулысся ойыс эз узь. Зарöтiшогалiсьлö уколлэз.

— Кулас ни... Коляс ни... — модис старикыс.

— Эн модь! Сьöлöм гудыртчö! — Прошасö öмалiс иньыс. — Сiйö и видзчисян, кыдз черпезьда, да мöдiкö вайöтан! Нагладь ог кув, мед тэ öддьöнжык невестаэт понда горзiн. — И меным висьталiс. — Ой, кага! Томсяняс эд ой кытшöм песик жö вöлi! Баран!.. Кин вылö дышыс эз пет, сы вылö и чеччöвтiс, сiя сылöн и невеста вöлi: котöртас кытчöкö йöз деревняö и öвтчö и öвтчö неделяöн, бытьтö уджалö, кöньöссэз да мый керö, только сыбöрын кывсьö, что Петрикасö или Васикасö кабъялöм...

Видзöтiстарикыс вылö и эг вежöрт, быль я баитö старухаыс или сералö.

— Бöбöтö, — рыг-рыг серöмтчис дедыс.

— Ме бöбöта?! Ага, бöбöта...

Тöдчис, что пöрисьыслö уколлэс бöрсянь лоис кокнитжык. Шутитiм-керим, ачым видзöтышавлiчасы вылö, кöда жагöн чинтiс дженыт тулысся ойсö.

— Мöссö чилькöтiн ни?! — сэтöн чорыта юалiс старикыслiсь старухаыс.

— Кин чилькöтас? — ружтыштiс Прошаыс.

— А тэ мый керан?! — ыкöстыштiс старухаыс. — Ы-ы, турзьöм!...

Вежöрт, что пöрисьыс видiс не стариксö, а кыввесö лэдзис томмеслань, но нiя эз кылö, сэк дедыс ружтытöн гор бердiсь босьтiс ведра. Гор вылiсь чеччöвтiс кань.

— Пап, мый лоис?! — чорыт голосöн юалiс дедлiсь зятьыс. Мöдыс висьталiс, что лöсьöтчö высьтыны мöс.

— Ме ачым пета! — висьталiс зятьыс.

— Кытчö тэ?! — старухаыс чуйк пуксис кроватьын, синнэс нёштöма югйöвтiсö. — Старик! Ме мый висьталi?! Кытшöм сiя чилькöтчись? Мöсыс сюррезiсь эшö пондас йöвсö кыскавны! Или вомдзалас Серанькасö.

Керкуас лоис тöдчöмöн пемытжык. Öзтiсö би.

— Баб, может, ашын больницаö? Куйлыштiн бы...

— Ашынöдз веськала, понда йöктыны ни, — серöмтчис старухаыс.

Пöдналiлекарствоэзöн сумкаöс. Старикыс юкталiс ырöшöн, и лöсьöтчи гортö.

— Мый, фельдшер? — забор коласö сувтiс Прошалöн зятьыс. —

Кулас или олас старухаыс?!

— Мыля сылö бы кувны? — гажöн юалiпöриссес гöсьлiсь.

— А мыля бы оз? — пишнитiс Володяыс и бöра пондiс тшупны. — Ох, фельдшер! Оз бы ков сiдз уджавны!.. Отир эд веськöтан!

— Ме тэнö мöйму ни вежöртi! — висьталiлöгöн, жмитiтырппезöс, мед унажык не баитны, босьтiсумкаöс и шагньöвтiыбöс дынö.

Медодзын ыбöсыс коласöт öтöрö петiс каньыс, сыбöрын ме, а ме бöрсянь жиля-жоля ведраöн Проша дедыс, öтöрас ловзиси кокнита, топ мезми ош гуись, кытчö шедлiнедыр кежö, но невна эг пöд. Ойыс шоччöтiс деревнясö — шы не тöв. Майöг бердiсь пöрччалiСинькоöс. Проша дедыс бöрсяням лэдзчис посöдзись, локтiс вöлыс дынö, пондiс малавны сылiсь боккесö да негорöн баитны:

— Спасибо тэныт, Сергей Васильевич. Кыдзкö эн вунöт миянöс, то мый бы и вöлi... Эн горзы ме вылö... Мый эд керан?.. — Пöрисьыс малалiс вöвсö и зубыта ньылалiс дульсö (быдöс эд тыдалiс югыт тулысся ойнас). — Мый эд керан?.. Кытчö воштiсьны миянлö? Видзöт локтiсö дона гöссезö, — полöмöн, пöв синнас видзöтiс керку öшыннэз вылö. — Видзчисьны старухаöкöт эг вермö... Чожа, поди, кулам, а зiпозсö ог жö бы сiдз кольö: кувтöдз уджалiм-керим, керим и йöзыслö ог жö бы чапкö, асланым кагалö бы... Но ог тöд... Ох, жысь! — сьöвзис вöлыс коккез увтö. Матöжык сибöтчис ме дынö, ачыс сё чуннезнас сыналiс вöвсö и пель дынам моз ни висьталiс. — Старухаöс эд коккес вылiсь кодя зятьö пöрöтiс! Он верит?! Луншöрнас кытчöкö петалiс ыбыс вылö, натьтö, вöрисьыс кöктоиннэзла кыскалiс, но и... Пырисö керкуас и на!.. Тесть пö... Тэнат эд пö тыр деньгаыс! Вежöртiн?! Деньга нылö пондiс ковны... А ме мый? Сетiбы, чёрт ныкöт, но кысь, мыся, сымдасö?! Мый ме колхозас миллион шедтiя мый я?! Кинкö моз эд кузь руббес сьöрын эг вöтлiсьö... — сэтöн жö горöтiс. — Матушка тэ миян, колхоз!.. Кыдз ми тэнö пестунничайтiм, быд торсö лыддим ассиным, а öнi... Трудодень вылö эд уджалiм, — норасис дедыс. — А трудоденьыс мый? Сю, пизь, а деньгаыс, — тьфу! Копейка... Но няньыс... Няньыс, мыся, вöлiасланым, магазинсис эг видзчисьö, во! И богатöя, мыся, бытьтö олiм. — Дедыс чуньнас чышкыштiс син дорсö, шоччисьыштiс, [...] и ышö деньга... Чеччам и водам, узям и вöтасям — олансö öшлам и вежам деньга вылö. Мый сiдз видзöтан?! Разь ме мыйкö умöльö баита? Мыся, совестьнымöс и чесьнымöс небам и вузалам деньга вылö, эх! — пиннесö гичыртiс. — Кытöн ни сэтöн колхознымöс лэбтыны?! Мыйöн öчапитны? Тэ тэрмасян?

Тэрмаси, но стариксö эг бы обидит, ась сiя модьö. — Мыся, племенник, жаль меным колхозным! Жаль... Эна киэзöн эд керим сiйö, быдöс вузалiм-козьналiм гортiсь, мый вöлiи эз, колхозас сетiм, а мыйлö? Кытчö? Кинлö? Эг эд думайтö, что вöтас этатшöм оланыс, узим и вöтасим, что буржыка пондам овны. Веськыта висьтала, что отирсö вежисö — абу ни одзза отирыс и оз ло сэтшöмыс, кöдакöт, мыся, ойшöра-ой, кыдз öтiк... Мыся, мунам, керам, ог горзö и ыксö, что деньга колö, а уджалам нянь понда вот! А öнiкинлö уджалöны? А! То-то, мыся! Йöзлö пондiм уджавны, тюп да ляп и на! Талун керам, ашын разсяс! Сiдз эд, Сергей Васильевич?! Но мый нö тэ? Висьтав веськыта — шебрав, ме эд мортыс тöдан кытшöм... Мый синам, сiя и öмам... Видзöт тай локтiсö... Овны лöсьöтчöны... Но ог тö-ö-öд? Деньга жö эд, натьтö, юраныс. А кытöн сiя, кöр государствоас долгыс пö миллион? Прости господи талуння олансö, мыся, кöркö олiм да эг думайтö кытшöмкö шкаппез йылiсь, эг тöждiсьö телевизор понда, а нiя... О! Жаднöйöсь... Дедыс корис месянь отсöт, но кыдз да мыйöн? Кыввезнам я? Или... Вöлiстарикыс дор, но олансö эг ни вермы падтыны, эг вермы дедыс одзö вайöтны сiйö отирсö, кöдакöт уджалiс пöрисьыс, эг ни вермы коккес вылö сувтöтны колхознымöс, кöда понда сьöлöмыс висис пöрисьыслöн и менам сiдз жö...

— Поди, ойнас менö джагöтасö? — челядёк моз горöтчис дедыс. — А мый тэ нылiсь босьтан?! Зэлöтасö копейка понда горш и аминь! Кин миянöс жалейтас? Пондасö шуны, штö пöрисьöсь вöлiсö да кулiсö, а тэ справкасö гижан... Сiдз эд? Гижан или он?!

— Кытчö воштiся? Натьтö, гижа? — серöмтчи ме. — Од жö пондö мöдöр югытас документтöг мунны.

— Вот, сiдз ми и уджалам! — бöра дзугис лöньсö старикыс. — Тöдан, кöркö тулысыс локтас да кыдз кöдзим! И сюсö, мыся, быдтiм, а öнiмый? Эхо-хе... Бур, пуксьы вöлыт вылö да вашöт, ме мöссö, мыся, чилькöта.

Пукси вöлыс вылö. Вöлыс öдззис рöктыны керöс паныт. Керöсыс вылын ни зэлöтiповоддэсö, сувтöтiвöвсö, кывзыштi, кыдз лолалö тулысся ойыс, видзöтiыббез вылö, кöдна видзчисисö гöриссезöс да кöдзиссезöс, но нiя эз тэрмасьö, и сьöлöмö поздiсис шогöт: эстiсь жö эд сёя-юа, верми, вöлiбы кад, доддялiбы Синькосö, кöркöсямоз сувтiбы бороздасö гöрны, мымда верми шулялiбы ыбсö, кöдзи ассим пайсö, кöдзи бы... И сэтöн жö полöтiс дума: «Гöрись... Тэрмась жö, тэнö эд больницаат видзчисьöны»... А Ляминаас мый жö гардiс Петрикаыс? Кытшöм жö сэтшöм шогöтöн шогалöны Тури Васикаэзлöн? Абу я шогöтыс заразнöй, кöда пондас вуджласьны керкусянь керкуö? Мыйись-мый, бöра эд меным жö усяс изны деревняись деревняö, кошшыны, кöда шогалö и кöдалö пондас ковны отсавны... Муыс видзчисьö гöрись-кöдзисьöс, тэрмöтö тулысыс кöдзны, а менö кадыс тэрмöтö гортö...

Зэлöтiповоддэсö.

* * *

Тулысыс чулалiс казявтöг: сэтчин да татчö и, видзöтан кö, вöрыс пасьтасис ни зелёнöй паськöмö, канаваын вершок кузя ни быдмис турун, лоис гожумсямоз шоныт. Аслам уджын гардча ой и лун, то больницаын, то муна деревняö, но не Проша деддэзö, а кöр личытжык, тöдвылö усьлö жö Проша дедыс и сылöн иньыс. Кыдз нiя сэтчин? Шогалö я старухаыс? Овмöтчисö я нывныскöт да зятьныскöт?

Лун-мöд и юöр локтiс, корöны бöра Кöчыбö, не Проша деддэзö, а мöдiк ордö. Кин бы эз кор, кин бы эз шогав, колö мунны. Бур, что туйыс кöс ни, оз ни ков пуксьыны Синько вылö. Öнiзаводитiмотоцикл, час и сэтчин! Эшö джын час, кывзiшогалiсьöс, видзöтiмортсö, сетiлекарствоэз, бытшки укол и бöр гортö! Швыркнитiкык колесоа машинанам деревняыс дорöдз, сувтiворота одзö, медбы осьтны да катыльтчыны одзлань, но эг ешты шаг шагньöвтны, кыдз бöрсяням ыкöстiс Проша дедыс:

— Зонка, лöгася эд ме тэ вылö! Мыля нö орддисян?

«Ба, Проша дед! — бергöтiюрöс голосыслань и адзза дедсö: шыннялö старикыс — цветитö лымдорчача моз, чужöмыс гöрдöтöм шондiыс вылын, и дедыс абу ни сэтшöм, кытшöм вöлiтулыснас, öнiсiйö гожумыс вежöм, дзик томмöтöм, козьналöм вын да здоровье.

— Пырав!

— Некöр, дед!

— Кувны некöр, а менам эм сола чери. Сёйыштам и одзлань!

— Öнджа..

— Абуöсь ни нiя, абуöсь! — баитö пöрисьыс — рад, öмыс — пеллезöдззас паськалöм.

Кытчö воштiсьны? Колö кежны деддэзö, и кежи, и пыри керкуас, öтöрсянь — пызан сайö, öтöрсянь — сола чери, пельняннез, тупöссез да пирöггез.

Пукалам старикыскöт пызан сайын, дедыс ырбыльтö-баитö, ошшасьö, что гожумыс бöра ловзьöтiс, бöра пондiсö овны, и старухаыс, эз кув, пиканла ни ветлiс. Нылыс да зятьыс йылiсь шы абу, но ме сэтöн и горöтчи, мыся, мый нö... кыдз нö? Томмес тай лöсьöтчисö овны бы, а...

— Да тэ мый сэтшöммесö нянь-солыс дорö касьтылан?! — дедыслöн öмыс бöра пеллезöдззас паськалö — пиннес гер, быдöнныс эд тöдöны, что дедыс веськыта баитö. — Мый тэ, мыся, сэтшöммесö нянь-солыс дорö касьтылан?! Оласö разь сэтшöммес колхозас?! Деньга нылö колö, деньга, а миян колхозаным кытöн деньгаыс?! Тэ висьтав, кытöн, мыся, миян колхозаным деньгаыс?! Пöрис ни коккес вылiсь да, вот... Сiдз что, Проша дедыт бöра олö старухаыскöт да пирöггез сёйö! Мыся, том бы вöлi, вöлiбы, мыся, том, ышö бы мыччалi, кыдз колö уджавнытö: доддялiбы, мыся, вöв, кайи ыбыс вылö, гöри, кöдзи, вундi, вартi, изiи ассим няньсö бы пондiсёйны, ась некин бы стариксö эз кöрит, что весь олö и нянь сёйö, а öнi... Но тэ сёй пирöггесö, сёй да Прошаыс вылö эн видзöт, сiя кывнас ни только уджалö... Абу ни Прошаыс и оз ло, — öмас заргис пирöг, аклялiс-керис да веськыта содтiс: — И колхозыс оз ни ло эна руководителлезöн! Вежöртiн?

Дзар кери öшынас — öтöрас гожум, чулалас джын месяц, пондас ковны керны турун. Гожум, колö бы уджавны, медбы ньылöм визывтiс, а миян уджалöны, кыдз шуö дедыс, шаляй-валяй... Шаляй-валяй керасö турунсö, арнас шаляй-валяй вундасö сюэсö и шаляй да валяй пондам овны одзлань. Сёй, кытчöдз вердöны, а оз кö пондö вердны... Пöриссес кулам, а тi, томмес, кöть мый керö...

Дедыс веськыта баитiс.

Сёйи-юи деддэзас, петiкеркусис, пукси мотоцикл вылö, няпыртiгаз и абу ни Кöчыбын. Ме мый? Ме кера ассим удж.

ШЛЕПЕЧ



Сiдз шуисö рыжöй вöлöс, кöда вöлi учöт мыгöра, кöсыник, вачкисис кукань вылö да вöлi эшö сэтшöм лёк, что дынас лок да видзöтлы, мед эз зурав или эз курччöвт... Аскодя вöлокыс. Не весь сiйö шуисö Шлепечöн (этö учöтик

лöдз, кöда гожумнас пуксьö морт вылö, мöртö йыла нырсö да юö вир).

Некин бы оз уджав Шлепечнас, некинлö сiя оз ков, кöр мывкыдыс — эн вöрзьöт, а уджавны — додьсö оз вермы кыскыны.

Некин учöтик да лёк вöвсö эз доддяв не турун, не пес вайны, не гортын уджавны. Но бригадир Коля дядьлö висьталiс, мед сiя кутiс Шлепечсö да пондiс уджавны и мед эз шыасьлы, эз кивзы, мый висьталiсö, сiйö и керис.

Мый висьталiсö, сiйö и керö Коля дядьыс, сiдз кыдз сiя учöт мыгöра жö, етша жö выныс, медбы вермасьны да тышкасьны ыджыттэскöт. И мывкыднас мортыс рам, кöть вид, кöть ошкы — шыннялö да шы оз сет, бытьтö сiдз и колö, сы понда и олö, медбы доддявны медумöль вöв да дзуртны-уджавны колхозын.

Уджалö Шлепечöн Коля дядьыс — отирыс сералöны: турунла мунас — вайö медъетша, песла ыскöвтас — öтпыр лонтны кыскö, не трудодень оз шедты, не иньыссянь кодя ним оз кыв.

Уджалö Коля дядьыс и мукöдпыр мурзьö жö, недолыт, что мырсьö, а отирыс сьöрись кольччö уджнас. Но мый керан? Нем он кер... Кинлöкö эд колö бура уджавны, а кинлöнкö сiдз оз пет...

Öтпыр гожумнас Коля дядьыс мунiс Кöсва ю дорö ылiсь видззез вылö кыскавны турунъюррез. Мунiс сiя уджавны кыдз колö: вöвсö сийöсалiс, голяыс гöгöр гардiс гез, босьтiс павжун, пуксис вöлыс вылö и лэдзчисис кузь туйö. Шлепечыс кытöн дыш, а сэтöн чож, кöр пышналöны-курччалöны сiйö лöдззез да номмез. Сiя чожа вайöтiс Коля дядьсö Кöсва дорö.

Юыс зэррез бöрсянь содöм и нёштöма видзöтiс морт вылö. Коля дядь эз куж уявны. Кыдз пырас ваас, сiдз и вöяс из моз. Но воштiсьны некытчö, сiдз и этадз колö вуджны мöд берегас. Сэк мужикыс малыштiс ассис вöвсö да иньдöтiс сiйö ваö.

Шлепечыс смела пырис ваö, пондiс ружтыны, пырскайтны нырнас да уйны, а Коля дядьыс пукалiс вöлыс вылын, кыдз пыжын, видзöтчис тупка моз öтмöдöрö да гажöтчис, что быдöс аркмö сiдз, кыдз колö. А видзöтчытöнняс сiя эз и казяв, кыдз вöлыс голя бердiсь пöрччасис гез...

Пырскайтiс Шлепечыс, ружтiс да уйис — öт берегсянь мöд берегö спинаыс вылын вуджöтiс хозяинсö. Матын ни вöлi берегыс, но сэтöн Шлепечыс ваас дзик падмис, бытьтö сiйö кинкö ва пытшкас кöрталiс и пондiс видзны, кöть мымда пессьы, коккезöн варт, сё öтiк местаын, бытьтö кыскö Вакульыс, вöтьö бы. Уйö, мырсьö-пессьö Шлепечыс, мыдзис, вöйны ни лöсьöтчö: саясис ваыс пытшкö юрыс. Сэк Коля дядь вежöртiс, что вöлыс голя бердiсь гезыс ваыс пытшкын кытчöкö кышасис и видзö... Колiс уськöтчыны ваö, мездöтны вöвсö дом бердiсь или öтлаын вöйны...

И Коля дядь уськöтчис ваö. Гезыс бердын видзсьытöн, сiя ваыс пытшкын кыссис сюра-пеля мыр дынöдз, кöда бердö кышасьöм гезыс, да мездöтiс сы бердiсь... Сэтöн и садьыс бырис... Саймис кöс берегын... Осьтiс синнэсö: Шлепечыс сулалö юрыс дынын да пон моз нюлö кымöссö...

Петö, что отирыс видiсö да шуисö Шлепечсö умöль вöлöн, а сiя видзöт жö кытшöм вöлöм! Ачыс петiс васис и хозяинсö кыскис мöдöр югытсис да эшö жалейтiс сiйö — кымöссö нюлiс.

Эта бöрсянь Коля дядьыс трудодень сьöрын эз вöтлiсь, мымда вермис уджалiс да уджалiс Шлепечкöт.