Федосеев

СЕМЁН АЛЕКСЕЕВИЧ

ÖКТÖМ

ПРОЗА

© Piratical edition ©

PARMA 2006

КОШШАН:

Пытшкöс

Роман

Сьöд цветтэз

Повесттез:

Виль гортын < Пармаын югыт, 1985

Вöттэз < Сьöлöмö туй, 2004

Вужжез < Сьöлöмö туй, 2004

Калян < Сьöлöмö туй, 2004

Кöиннэз < Повны не овны, 1989

Кусöм биэз < Кусöм биэз, 1991

Повны не овны < Повны не овны, 1989

Сiсьмöм вужжез < Кусöм биэз, 1991

Сьöлöмö туй < Сьöлöмö туй, 2004

Счастье ас киын < Счастье ас киын, 1978

Висьттэз да мойддэз:

Бедаыс öтлаöтö < Бичирок, 1965

Булибарда < Иньва, 1995

Вот эд кыдз овлö < Вот и мичамис, 1967

Гажыс уджын < Иньва, 1987

Горш чери < Бичирок, 1965

Гöссез < Иньва, 1992

Гриша, Вася да Бес Пилика < Бичирок, 1965

Гуын < Бичирок, 2003

Демократия йылiсь < Иньва, 1995

Доттэз < Иньва, 1971

Дружба < Иньва, 1964

Ёрттэз < Бичирок, 1991

Звезда < Иньва, 1968 (*)

Зэра кад бöрын овлö мич < Иньва, 1966

Кизертöм краска < Вот и мичамис, 1967

Колö кужны < Бичирок, 1967

Колö унажык < Вот и мичамис, 1967

Колька < Бичирок, 1993

Кортöм гöсь < Бичирок, 1991

Кöк < Бичирок, 1991

Куим ёрт вöрын < Бичирок, 1964

Кыдз гöтрасис да иньыскöт олiс Паша < Иньва, 1995

Кыдз ми вашöтiм тараканнэз < Бичирок, 2003

Кыдз судитiсö ручöс < Иньва, 1995

Кыксувда гоб < Бичирок, 1965

Лекарствоыс оз ков. ― Иньва, 1976

Ленка < Бичирок, 1993

Мед ни донаыс пиян < Бичирок, 1965

Мыля кöиныс лёк < Тыра öшымöс, 1993

Невунöтан луннэз < Иньва, 1983

Некодя морт < Бичирок, 1965

Неполiсь Симчик < Иньва, 1987

Номмез < Тыра öшымöс, 1993

Оз кут некытшöм висян < Иньва, 1964

Олан < Тыра öшымöс, 1993

Öнi уджалöны (юмореска) < Иньва, 1965

Пантиль, ен, чёрт да смерть < Вот и мичамис, 1967

Пикан < Бичирок, 2003

Пиньшедталiсь

Поперёк обычайлö < Вот и мичамис, 1967

Праздник панытö < Гора му, 1963

Проллöн инь < Иньва, 2002

Справка < Иньва, 1987

Столовöйын < Бичирок, 1991

Сырчик да йы < Бичирок, 1993

Тöвся цветтэз < Тыра öшымöс, 1993

Тöлiся ойö < Бичирок, 1975

Тшакьявтöн < Бичирок, 1993

Уна тöдiссез < Бичирок, 1993

Учöтик басняэз < Иньва, 1967

Фермаын < Иньва, 1987

Чарöм вылöт < Иньва, 1976

Чёрт тöдö < Бичирок, 1993

Шлепеч < Бичирок, 1991

Шойнаок дорын < Иньва, 1971

Эмöсь бур отирыс < Пармаын асыв, 1974; Иньва, 1965; Вот и мичамис, 1967

Ягöдавтöн < Ракурс, 1992'10'17'

Статтяэз:

Ас йывсим < Сьöлöмö туй, 2004

Баитам веськыта < Миян шог. Кудымкар, 1990

РОМАН

Сьöд цветтэз



Омöн вöррез да сэтшöмöсь, что синöн он судзöт и коккезöн он меряйт. Вöррез коласын джуджыт грива вылö поздiсьöма неыджыт посад, посадыс гöгöрын öтöрын и мöдöрын эмöсь деревняэз, но нiя етша. Локтöмась вöррес коласö отирыс, кыдз кытiськö пышшöмась да татiсь кошшöмась бы бур олан, но оланыс кöть кытöн öткодь, кöть кытöн колö уджавны. И уджалöны отирыс, важын ни олöны вöррес коласын, вунöтiсö ни, кин татчö локтiс медодз, кин медодз лэбтiс медодзза керку.

Олöны отир вöррез коласын, ветлöтöны вичкуö, юрбитöны енлö и некöр да некытчö оз думайтö татiсь мунны, сiдз кыдз посадын гажа. Басöк посадыс, но медбасöк вичкуыс, кöда сулалö медвылын местаын, посадыс шöрын, и золотöй рöма юрыс ылiсянь тыдалö. Кытчö бы посадсис мортыс эз мун, кытшöм вöр коласö эз шедлы, кытöн бы эз ветлöт, бöр пондас кö локны, медодз ылiсянь синнэс одзö посадыс шöрись мыччисьö басöк вичкулöн юрыс, кöда ылiсянь кыдз шыннялö, гажöтö, козьналö вын, тэрмöтö — корö дынас.

Кыссьö оланыс посадын, кулöны пöриссес и чужöны кагаэз, посадсö оз орддьö шогöттэз, керкуись керкуö ветлöтö гаж и горе. Татöн эмöсь стражник да урядник, эм чижовка, кытчö йöртлывлöны нiйö, кöдна асныраöсь, лöгöтöны властьсö, эстöн олöны поп и попадья, эм неыджыт земскöй школа, эм челядь велöтiсь.

Олöны отир посадын и олöны, некин олансö оз дзуг, оз лöсьöтчы разьны керкуэз, вашöтны кытчöкö отир, некинлö юрас оз пыр, что вермас лоны кытшöмкö вын, кöда локтас татчö да дзугас олансö.

Посадын олiссез йылiсь позис бы гижны сiя лунсянь, кöда лунсянь татчö локтiсö да поздiсисö медодзза локтiссес, кыдз олiсö тшына керкуэзын, вöррез коласiсь весöтiсö ыббез, гöрисö да кöдзисö. Но сэтшöм оланыс йылiсь уна ни гижöм, и сiйöн аслам посад йылiсь ме пондöта висьтасьны сэксянь, кöр оланыс видзчисьтöг пондiс вежсьыны.

1

Тулысыс сибöтчис рам, мывкыдсö эз дзуг падераэзöн, лым усянöн, ой тöввезöн да мороззэзöн. Ыджыт лун панытö Андрейлöн айыс одз асывнас доддялiс вöв, вöвсö сувтöтiс öшын увтаныс, пырис керкуас, медбы сёйны няньтор да сыбöрын, ветлыны турунла. И сiдз кыдз турунсö етша ваялiс öтнас, а пыр сьöрас кыскалiс отсасисьöс — додь талисьöс, öнi видзöтыштiс иньыс кыз кынöм вылö, кöда вöлi ыджыт ни: талун-ашын пондас висьöтны, аслыс висьталiс; «Нем оз ло! Абу кольть, оз жугав!» и мур-мар горöтчис: «Мунан мекöт!..»

— Ог тöд, — кивзыштiс иньыс.

— Мый лоис?! Мунан!

Сьöд поныскöт уна он баит — этö иньыс тöдiс и эз понды аснырасьны: пасьтасис, мужиксö одзалiс петны керкусис, пуксис додьö, и чожа иньдöтчисö уджавны. Вöлыс рöктiс-котöртiс гортсянь доддезöн керöм туйöт, додьыс шыблялiс, вывтi бы эз и зэгйы, но кыдз зэгнитас, сiдз инькаыслöн кынöмыс топ и резьдö, сiдз топ и потö, сiйöн пукалö додяс да кыкнан кинас видзö кынöмсö, пиньлалö öмсö да гичралö пиннесö, ас кежас кеймö: «Эг жö бы вöр шöрас понды висьöтны, эг жö бы...» А мужикыс вачкö да вачкö вöлыслö, педзö додяс и бöрланяс дзар оз кер, оз видзöт, кыдз пукалö иньыс, мый керö... Сiдз локтiсö зород дынöдз, сiдз жö мужикыс пишкис нырнас, мурзьышалiс, ыксышалiс; «Вöрöтчы!»

Пондiсö тэчны додь, Гришаыс зород вывсянь додьö шупкалiс турун да ыксiс: «Кут! Вöрöтчы, гöжöм!» И бытьтö эз адззы иньыслiсь кыз кынöмсö. Инькаыс мöдiс жö бы висьтавны: «Мый ыксан?! Ачыт доддялiн менö и ачыт жö кынöмöс пичкыртан бы... Эг кö вöв бы тыра, додьыс вылын бергалi бы сярган моз, а тэ...», но кытчö?! Лысьтiс я инькаыс мужикыслö паныт шыасьны, кöр Гришаыс сьöд синнэсö ыждöтас, вижлок öмсö осьтас да рявзö: «Вöрöтчы, черань!» Вöрöтчис инькаыс — додьын турун талис, сыбöрын эшö гортöдз вöтчис тыра додьыс мышкын — шаг эз кольччы и мужикыслö отсалiс ректыны додьсö, а кöр пондiс пырны ни керкуас, вожмöвтiс порогсö, сэк вöлись и кынöмсö жмитiс, вöлись и зэлöтiс да сiдз, что лолыс тырис, син одзас лэбзисö гöрд рöма гöгляннэз, но эз ружтышт, бытьтö нем эз вöв. И мужикыс бöра эз казяв, что иньыс лöсьöтчö челядясьны, мурзис да рытöдз уджалiс, а рытнас, кöр кусöтiсö ни бисö, водiсö полатьö, гусьöн кайис иньыс дынö и пондылiс бы маласьны, но Февраыс сьöвзис да веськыта шуис: «Пон тэ, пон... Петö ни, а сё чеччалан...»

Вöлi Ыджыт лун ой. Ойшöр гöгöрсянь мужиккес пондiсö лыйсьыны: то öтiк керку дынын гымыштас, то мöдiк дынын чарöтасö. (Сiдз посадын панталöны Ыджыт лунсö). Ёгпешын ойбыт сотчис сартас, тшыныс сёйис синнэз, курöтiс горш. Керкуас вöлi шоныт. Февраыслöн кынöмыс сiдз висис, сiдз жмитлiс да недыр кежö лэдзыштлiс, что пымалiс сирньылöмöн и котрасис öтöрö да керкуö, гичралiс пиннесö, ружтiс, пессис, а мужикыс чискис-узис лабичын, бытьтö нем эз кыв и эз адззы, саймышалiс сэк, кöр колiс öзтыны да пешавны ёгпешö виль сартас.

Февраыс ончир эз кер, ойбыт пессис, а мужикыс чеччис одзся-одз, вежис вывсö, кöмалiс сапоггез, виль вешьян, пасьталiс виль йöрнöс, сыналiс юрсö и кайис вичкуö. Тонгисö колоколлэз. Нылöн шыыс пуктiс-кылiс ылöдз, саймöтiс отирсö посадiсь и деревняэзiсь, гажöтiс асывсö. Февраыслöн кынöмыс висис öддьöнжык и öддьöнжык, садь быртöдз ни пидзралiс, шогалiс шогöтся-шогöтöн, пыралiс джоджулö, петалiс баняö, заргисьлiс гидйö — кошшис пон моз аслыс пельöс, медбы некин эз тöд и эз адззыв кыдз челядясьö. Рытсянь асылöдз пессис инькаыс, рытсянь асылöдз öштiс вынсö, но кагаыс эз чуж.

Югытыс пондiс видзöтчыны ни öшынöт, отирыс вот пондасö локны вичкуас, служитас попыс, сыбöрын быдöнныс пондасö ветлöтны гöститтöн керкуись-керкуö, поди, и ны ордö кинкö пырас гöститны, а сiя кольмöм кань моз кыскасьö. Мый жö лоö сэтшöмыс, мыля еныс сiдз дойдö, мыля оз чуж кагаыс, кöр мöддэсö ваялiс кокнита, бытьтö кольттялiс курöг моз: пондас кö висьöтны, петас гидö, нето заргисяс джоджулö, куснясяс-веклясяс недыр, и эм — горöтас вежöмыс... Мужикыс сьöд синнэзнас оз и адззыв, нем торта пеллезнас оз и кыв, саймас только сэк, кöр кагаыс жексыштас гöбечын... А талун... Инькаыс кивнитiс гöбечыс дорын, кöстiсис кык кусiнь, кыкнан кинас кутчисис кынöмыс бердö, гичыртiс пиннесö, кунис синнэсö, быдвынсис вынсьöтчис и... Садьыс бырис. Саймöтiс кагаокыс — жексыштiс коккес увтын, джоджас, топ дзель...

Вöлi нач ни югыт. Öшынöт тыдалiс öтöрыс, каёк, кöда пуксьыштiс öшын рамаас, нырнас тарс-тарс керис и быркнитiс. Кöдзыт ньылöм вотялiс Февраыс чужöмись, но вöлi долыт ни, кыдз мезмис капканiсь, и шоччисис гöбечыс дорын. Позис бы водны, но медодз колiс гöгыс бердiсь орöтны бы кагасö, а сылöн выныс эз тырмы мышкыртчынытö. Эта коста öшын увтöт вичкусянь мунiсö ни отирыс, вот-вот пырас мужикыс и, бат, не öтнас, а вайöтас гöссез — деревняись родня. Февраыс уськöтчис западня вылö, а кагаыс жексiс джоджас, и гöгсö некин эз орöт. Öшынöт видзöтчис югытыс, кыдз стыдитiс. Февраыс думаэзнас дзебсисис бы, но эз ни вермы вöрзьыны. Посöдзаныс кинкö турски-тарски кайис, кашыкасьтöн осьтiс ыбöссö, ыбöсыс коласын мыччисис мужикыс, а сыбöрсянь тыдалiс Киршинiсь сватныс. Мужиккез сьöрсьöн-бöрсьöн вожмöвтiсö порогсö, невна эз тальччö кагаокыс вылö, синнэзнысö барöтiсö, рожаэзныс чочкоммисö, öшисö недыр кежö. Сватыс сэтöн жö бöрöн-бöрöн петiс керкусис, а Гришаыс пондiс педзны порогыс дорын да няправны киас шапкасö, тыдалö, лöсьöтчис жö бöр пышшыны керкусис, но иньыс кивзыштiс: «Тэ кытчö?!»

— Кытчö? — мурзьыштiс Гришаыс. — Ветла... Гöгинь бабыс дынö...

— Бось пуртсö да орöт гöгсö! — лöгасис Февраыс, кытiськö содiс вын.

— Öнджа... — мужикыс чисто пымалiс, чужöмыс чочкоммис, и киэс пондiсö дрöжитны. — Öнджа...

— Ме тэныт мый шуи?! — сьöкыта ловзисис Февраыс. Гришаыс сунки-панки мунiс комö, босьтiс сартас шулялан пурт, локтiс иньыс дынö, чöвтiс вывсис паськöмсö, пондiс ружтыны да öддьöнжык пымавны, жагвыв пуджис соссэсö, а кагаыс жексiс, гаг моз веклясис кöдзыт джоджас коккес дынын, öмокнас кошшис няня.

— Вöрöтчы! — мыдз голоснас ыкöстiс Февраыс. — Доддявны верман, а юскынытö полан. Сьöд пон!

Гришаыс кыз чуннезнас кутчисис нильыг гöгыс бердö, вирснитiс нырнас да пондiс пилитны ныж пуртнас гöгсö.

— Ой, мужиккез! — западня вылын ружтiс иньыс, пиньласис Гришаыс вылö. Бöра гажöн пондiс тонгыны вичку вылын колокол. Петухыс сьылiс-китсасис асмознас радувья.

— Бöра эд кулас, — синваэс мылякö петiсö Гришаыслöн, вирöсь киэсö эз тöд кытчö воштыны.

— Тэ кулан! — нерис иньыс. — Эз я юр вердiсьным и шогмы...

Нем сэсся эз шу мужикыс: гöбеч дорись босьтiс дöраовöй рузумторрез, полöмöн, топ сiдз и уськöтiс кагасö, каттис рузуммезас, гультым-гультым ньылалiс дульсö...

Талун праздник — Ыджыт лун. Талун жö, но рытнас ни посадын чужис мöдiк кага — этö Февра сойлö еныс козьналiс зон жö...

Сiдз овлö — сэтшöм судьба, и нем сэтöн он кер, колö овны.

Кагаэсö чожа пыртiсö вичкуын да бöра жö öтiк лунö и нимтiсö Гришаэзлiсь зонкасö Андрейöн, а Прокоппезлiсь — Мишаöн. Ниммезнысö сетiсö деддэзныслiсь, кыдз овлö миян комиэзлöн, медбы эз öштö роднысö. И пондiсö быдмыны Андрейыс да Мишаыс, да эд не пу-турун моз, а морттэз моз — öддьöн жагöн, эд годöдз кагасö колö видзны киын, пестунничайтны быд лун, нимöтны. Медодзза лунсянь Андрейыслö колiс пестуння, а кытöн сiя? Кин сiйö Гришаэслö козьналас, кöр пöриссес важын ни кулiсö, немöн вöлi медавны йöзсö, вот мамыслö и усис зоныс гöгöрын бергавны ой и лун, кöда лёк горшнас и ойезнас эз лэдз шоччисьнытö, а луннэзнас нач ни öмыс эз тупкась, пыр жексiс, пыр мыйкö эз тырмы, мамсö корис дынас... Вöвлi, что мамыс зонсö луннэзнас кыскалiс ыб вылö, или петас кö чилькöтчыны, зырымöсьыс бöра сьöрас: Февраыс öт кинас чилькöтö мöссö, мöднас пидзöсыс вылын видзö кагасö. Ёна шедiс грехö пыртан оланас, и вöвлi, что мукöдпыр мамыс лöгасяс да учöтыслö корö ни смертьсö — кывнас вийö бы, но Андрейыс овмöтчис...

Мамыс пессис-быдтiс зонсö, а айыс ошшасис: «Аслам зоныс быдмö! Менам кабыс!»

— Тэнат, тэнат! — нерис иньыс мужиксö. — Тэ кодь жö дулльöсь пороз! Ветлы «баббезас», ась луннас синъясö кагасö.

«Баббес» — асланыс родня, öтiк вудж. Бабыс гортаныс медпöрись, бытьтö бы медыджыт — хозяйка, но пöрисьыс вылö видзöтöны кыдз бырöм нинкöм вылö — эм и абу, етшажык нянь бы колiс, эз бы кö вöв, керкуас вöлi бы личытжык, югытжык... Пöрисьыс уджавны оз ни вермы, но пестунничайтны эшö прокмö, эшö ляшмасьö — вовлö луннэзнас Андрейыс дынö: öтпыр кагасö видзöтас, нимöтас сюрись, дзимлялас-вежас увтсис ва рузуммез и коляс, кöть тэ сыбöрсянь, вежöм, мымда чирзы-горзы, сэсся рытöдззас тэнö некин оз кыв, оз адззы, оз верд, кытчöдз оз лок мамыт...

Чулалiс год куим-нёль и лоис кокнитжык: Андрейыс ачыс ни пондiс котöртны «баббезас», лун-лун орсiс Миша воныскöт, эз кö лöгöтлö бабсö. Бабыс уна ныкöт эз баит: лöгасяс кö, заргас кыкнан кагасö баняö, öтöрсянь ыбöссö пыкас бедьöн и — олö, бес пияннэз! Мукöдпыр зонкаэс лунйывлiсö баняын, кöть и горзiсö, петiсö бы öтöрас, эд гожумнас гажа, но мымда бы эз горзö, эз кеймисьö пöрисьыслö, нылö некин эз отсав: отирыс уджалiс ыб вылын, и некин эз кыв голоссэзнысö... Сiйöн и Андрейыс эз вунöт баняись сьöд-саöсь стенаэсö, тшын дуксö, тöдвывсис эз öш, кыдз Миша воныскöт мавтчывлiсö саöн, что вачкисьлiсö сьöд каляннэз вылö, кöр рытнас бабныс лэдзлывлiс нiйö банясис.

Быдмисö кык вон, бытьтö вöлiсö öтiк мамлöн, кöть Андрейыс вöлi винерик, а Мишаыс кыз, ён, ота рожабана, синвевья, сьöд юрсиа. Натьтö, позис бы висьтавны, что быдмисö курыта, но кин жö сiя кадö йылiс мöднёж, кинлöн учöтнас вöлi пестунняыс? Кин жö вешьянöн да кöмкöтöн чулöтiс гожумсö? Кинлiсь бы эн юась, висьталöны öтмоз, но и некин оз норась, оз горзы челядься кадныс вылö, быдöн тай бытьтö вöлöма счастливöй, кытчöдз абу пондöмась уджавны-отсасьны ай-маммезныслö, а уж уджавны усис одз: Андрейсö сизим год вылын пуксьöтiсö вöв вылö и тшöктiсö пинявны.

Шедiс уджавны одзся-одз, сэтшöм ни судьбаыс Андрейлöн да воныслöн, и етша сэк кин велöтчис — эз кужö лыддьöтны и гижны Андрейлöн айыс и мамыс, но оз позь шуны, что нiя вöлiсö нач вежöммез, нем эз вежöртö. Öкмысöт год вылын зонкасö айыс тöв кежö нуöтiс школаö, кöть мамыс и кивзiс жö: «Мыйлö велöтнытö?! Асьным эг велöтчö, да нянь сёям...» «Нем тэ он тöд!» — мурзьыштiс айыс, кыдз висьталiс, сы моз и лоас! Чорыт вöлi айыс, мед быдöс бы вöлi сы моз.

Сiдз пондiс велöтчыны Андрейыс, бöра Миша воныскöт öтiк парта сайын пукалiсö, бытьтö сiдз ни дружитiсö, что öтамöдныстöг овны эз вермö, но... Пыр öтамöдныслiсь чувйисö боккезнысö, и кинлö жö бы унажыкыс шедiс? И кыдз еныс шуöма, учöтжыкыслö да винержыкыслö унажык кивзыны да горзыны, сiдз и вöлi: Мишаыс пыр ёнжыка перкйис вонсö, дзерöтлiс эмись и абуись, мöдыс горзiс и сэтöн жö чеччалiс паныт. Веськыта висьтавны, Андрейыс учöтсянь эз вöв небыт, быд местаö сюйис нырсö, воныскöт тышкасьнытö ачыс кутчисьлiс одзжык, и вöвлi, что челядьыс асывсянь ветлöтiсö топ медлёк враггез, а рытнас бöра ни вöлiсö ёрттэз — не ваöн он янсöт, не биöн он сот.

Челядься олан... Быдмис Андрейыс, гожуммезнас уджалiс — отсасис ыджыттэслö, а тöввезнас велöтчис, бытьтö ыджыт ни вöлi, но айыс... Мыйись-мый уна эз баит, лöгасяс кö, мыйöн шедас, сiйöн и вачкас. Велöтiс зонсö, медбы сiя быдмис мортöн: эз гусясь, эз пöрьясь, мед кывзiс пöриссесö. Но Мишаыс жö кöр норасис воныс вылö: «Дядь, Андрейыс эд бöра пыралiс Фёдоррес йöрö...» «Кыдз?! Кытчö?! Ме сiйö вия!» — сэтöн жö рявзiс Гришаыс, öвтiс кулаккезнас юрыс вевдöрын, кöр зоныс и быль Фёдоррез йöрись гусявлiс льöм да сёртни, сибавлiс и Егоррез садникö, кытiсь пиас готтьывлiс анькытш, но аслас юрöн я сiя уджалiс умöль уджсö? Чеччис и водiс эд Миша воныскöт, и воныс жö медодз вишыкасис:

— Андрейко... Дзöт жö садникас анькытшыс! Нетшкыштны бы бабöлö, ась чöскöтiс бы öмсö, то, öнджа эд... Оз адззы ни керкусис петнытö да тшыгйöн и олö... Мамö няньнас оз верд, мыля оз уджав...

— Грех гусясьнытö... — будзгылясис Андрейыс. — Ачыт бы... Тэ ыджытжык, коккет кузьжыкöсь, и юрыт буржыка уджалö, мыйись-мый...

— Пыри бы, да кокö висьö, — кивзiс Мишаыс.

— Тэнат пыр кокыт! — модяс Андрейыс, дзир-бар керас и пырас йöз йöрö.

Сiдзкö, зоночкаыс керö, мый оз ков, бабыс понда, оз думайт, что воннэслöн сiдз пöтöсь, и бабнысö бы вермисö вердны пöт. Мый ваяс Андрейыс, вердö воксö и бабсö, кöр и ачыс сёйö жö, а кöр оз и пешлы йöз быдтöмсö, но айыссянь боккезас ёна ни панялö, ёна ни бусйöны... Но и мед...

Быдмисö кык вон — тöв и гожум öтлаын. Андрейыс томся-томöн пондiс уджавны, а Мишаыс думайтат одз пуксис вöлыс вылö? Эз эд. Некытшöм нужда зонкасö эз зэлöт, медбы сiя учöтся-учöтöн шедтiс нянь.

Андрейыс быдмис, куим тöв велöтчис школаын, нёльöт годсö эз ни пуксьы партаыс сайö, доддясис уджавны, а Мишаыс велöтчис öтiк тöв унажык. Петö, что öтыслöн грамотаыс лоис унажык, мöдыслöн етшажык, öтыс кыдз сьöкыта уджалiс, сiдз и уджалiс, а мöдыс киэсö öддьöн эз нятьöсьт: велöтчöм бöрсянь медодз уджалiс волостнöй писарьöн, сыбöрын, видзöтан кö, пондiс вердчыны то öтöрын, то мöдöрын. Мый бы эз шуö, но, видзöтны кö, грамотнöйыслö овсис буржыка и кокнитжыка. Андрейыслö пыр гöрыс бердын эз жö усь асьсö вывтi мыдзöтны, а пондiс уджавны вичкуын.

2

Кыдз Андрейыс шедiс вичкуас? А сiдз шедiс, что отирыс моз жö медодз ветлöтiс юрбитны праздникö и будденьö, юрбитiс еныслö, кужис сьывны молитваэз, и Игнат попыс казялiс этö да корис уджавны медодз псаломщикöн.

— Кристос тэкöт! — гажмис мамыс, кöр зоныс пондiс уджавны вичкуас да ошшасис аслас уджöн, надейтчис мамыс, что Андрейыс пондас шедтыны деньга, и нiя пондасö овны буржыка, а айыс сьöвзис, серöмтчис да шуис: «Ог тö-ö-öд... Натьтö, эд сэтшöм соломщиксис еныс повзяс да сьöлöмыс потас...»

— Тэнат мед оз пот! — öмалiс мамыс айсö.

Сiдз Андрей пондiс уджавны вичкуын. Тöдiс молитваэз, голосыс вöлi векнит, чиння, кыдз пондас сьывны «господи благословисö», сiдз сьöлöм вылын быд мортлöн лоö кокнит, бур, синваэз петöны, греххез öшöны. Сьывны бы кувтöдз Андрейыслö молитваэз да деньга гортас ваявны, но сэтöн пондiс шогавны вичкусис старостаыс и чожа кулiс. Дзебисö старостасö, попыс псаломщиклö и пондiс баитны: «Андрей, тэ мортыс грамотнöй. Эн я бы уджав старостанас?» Вот кыдз... Староста... Кытшöм бы Андрейыс староста? Удерлун вöв доддялiс, тöн молитваэз сьылiс, а талун староста ни... Зонкаыс медодз öшис, повзис кодь, эз верит, что вермас уджавны сiйö уджсö, кöдö эз керлы, но сэтöн пантась жö попадьяыс, кöда пондiс сильгыны ласковöй голоснас: «Раб божий, Андрей... Эн пов! Тэнат шогмас уджыс». И сiдз веськыта видзöтiс зонкаыс синнэзö, что Андрейлöн чужöмыс öзйис — чепöссис вир, пымалiс и одзлань пыксьыны уджсис эз ни вермы, да и айыс кижган голоснас кижгыштiс: «Мый нö тэ? Али кынöм висянöн шогалан? Пондыв!» Веськыта кö висьтавны, зонкаыслö гленитчис попадьяыслöн басниыс, и ачыс попадьяыс вöлi сэтшöм, что видзöтан кö вылас, сьöлöм пондö пессьыны, Андрейыс эз ни вöв винерик да вывтi учöт мыгöра, а быдмыштiс, вынсялiс-ёнсялiс, чужöмыс лоис лöсьыт.

Попадьяыс вöлi лöсьыт мыгöра, небыт яя, ён, медодзза лунсянь пантавлiс вичку дынын старостасö да ласковöя юасис: «Эн я гöтрась, ангел? Но и бур, чож!» Бöра видзöтiс веськыта старостаыс синнэзö, шыннялiс-шонтiс или стыдитiс, Андрейыс эз вермы вежöртны, топ сiйö пуксьöтлiсö пым пöим вылö... Кодя вöлi попыс и кодя вöлi попадьяыс, кöр вичкусис старостаыс шедлiс Игнаттэзас, попадьяыс Андрейсö пыр пуксьöтлiс пызан сайö, вердлiс тупöсь-пирöгöн, юктавлiс чöскыт винаöн, бергалiс-быркайтiс пызаныс гöгöрын, лёбис жöниккез да невестаэз йылiсь, а попыс кывзiс иньсö, шыннялiс, а кöр и дзугис баснисö: «Грешно, матушка, грешно...»

— Тэныт, батюшко, грех, а меным абу. Менö еныс жалейтö и быдöс проститö, — китшкис-сералiс попадьяыс да Андрейыс пиö сюйис пирöггез — гöснеч иньдiс зонкаыс мамлö.

Вичкуын позис бы уджавнытö, зонкасö радейтiсö попыс и попадьяыс, шедышавлiс и деньгаок да, бöра жö, попыс виноватöй.

Попыс, кöр видзалiс Ыджыт видзнас, вичкусис эз и петавлы, юрбитiс да юрбитiс, а эта коста попадьяыс гöститiс мамыс ордын Перемын. Локтiс гöститансянь, медодз вичку дынiсь панталiс старостасö да юалiс, кытöн попыс, тыдалö, гажтöмтчöм мужикыстöг.

— Юрбитö, — висьталiс Андрейыс.

— Ась юрбитö, сылöн греххес уна, — шуис попадьяыс и пондiс юасьны, кыдз да мый, мыля сiдз да этадз, сэсся пондiс рочавны гортас, модис: «Лок, староста, да видзöт жугалöм öшынсö. Батюшкоыс бытьтö оз адззы, а ме кынма. Вежöртiн?!» Кыдз сэтöн он мун? Мый висьталан, кöр тшöктöны локны и керны? И старостаыс мунiс поппезас, пырис господскöй керкуö, полöмöн тальччис краситöм джоджö, полöмöн ловзисис, видзöтiс öшыннэз, кöдна вöлiсö дзоньöсь — öтiк став абу жугалöм, сэк мый нö? «Тэ, староста, пуксьы, пуксьы! Эн тэрмась! Ме тэнö верда пирöггезöн, юктала чайöн, пешлан ма... Тiян эд сэтшöмыс абу!» Абу и оз ков — эз велав Андрейыс сёйны чöскыт сёянсö, петiс да мунiс бы эстiсь ― пышшис, но кыдз, кöр хозяйкаыс сiдз и козьналö ласковöй кыввез, бергалö гöгöрас: юрыс вылiсь босьтiс ни шапкасö, отсалiс ни чöвтчыны, кыскис ни пызаныс сайö, одзас пуктiс ни рöма пирöг, ачыс сё кувтыртiс, кисьтiс-баитiс, ниртчис старостаыс дынын... Гöститiс поппезын Андрейыс, кöр попыс гортас эз вöв, эта коста батюшкоыс юрбитiс вичкуын. Попыс постуйтö — кöс лунся сёян сёйö, а попадьяыс пирöггез йитшкö — грехö пыртö.

Гöститöмсянь Андрейыс пышшис пышшöмöн, сыбöрын пондiс орддьыны попадьясö — ылiсянь кежлiс, и асыввезнас одзся-одз пондiс кайны вичкуö. Öтпыр вичкуас локтiс пемытсорöн, небыт кокшыöн пырис пытшкас, сувтчис еннэс сайö моз, кытöн вöлi эшö пемытжык, еннэс одзын сотчисö масiссез, омöн югдöтiсö веж-югытöн: еннэс джоджас ольсалiсö ассиныс вуджöррезнысö. Попыс юрбитiс.

Андрей эз понды юрбитöмсö дзугны, сувтiс, юрыс вылiсь босьтiс шапкасö, пернапасасис, пондiс сулавны да видзöтны Игнатыс вылö, кыдз адззис сiйö медодзись. Батюшкоыс пемытiнас ас вылас дзик эз и вачкись, а бытьтö татчö кинкö бы пырöма йöз, или еныс лэдзчисьöма вевдöрсянь. Старостаыс сулалiс, лолалiс ладан дукöн, видзчисис, кöр дугдас юрбитны попыс, но сiя пернапасасис да пернапасасис, мышкырасис да мышкырасис. Андрейыс сулалiс, сылö бöра тöдвылас усис попадьяыс, кöда бöра кыдз локтiс син одзас, и синнэзас орсiс аскодя гажа югöр, бöра пондöтiс аскодя басни, серöмтчис да юалiс: «Сiдз эд, Андрей?»

«Мый сiдз? — нач öшис старостаыс, кыдз былись баитiс попадьяыскöт, кылiс, кыдз вирыс чепöссис рожабаннэзас, гöрдöтiс, öшис, юрсö бергöтiс бы мöдöрö. Но попадьяыс одзлань дзульзис: «Ме ог курччась, эн пов!»

— Дугды, матушка, — Игнатыс баитiс иньыскöт. — Зонкаыс кывзiсьö, грехö оз пыр, а тэ...

— Мый ме? Он лэдз баитны старостаыскöт, а ме баита бы.

— Грех, матушка...

Андрейыслö эта усис тöдвылас, бытьтö бöра вöлi поппезас, адззис кыдз юрбитiс попыс, думаэс бергалiсö попадьяыс гöгöрын и сэтöн... Еннэс сайсянь попыс одзö мыччисис нач пасьтöм морт — инька, кöдалöн кузь юрсиыс вöлi кыйтöм, лэдзчисьöм пельпоннэс вылö, вевттьöм мымдакö спинасö, гырись няняэс чер видзисö, чочком яйыс масiсь югöрыс весьтын дзик орсiс, йитрикöн-йитрикöн дзöрис вывтырас, кыдз тальччис, сiдз и вöрис öтлаын лöсьыт мыгöрнас.

Андрей кваркыштiс синнэзнас, но пасьтöмыс эз öш, и думаэс сöтiсö-висьталiсö, что ангеллэз ни лэдзчисö попыс дынö. «Ангеллэс эд!» — пернапасасис старостаыс, повзьыштiс, вывтырас кöдзыт ва киссьыштiс моз, но адззис ни, что син одзас морт, кöда сибöтчис попыс дынö. Попыс, тыдалö, эз повзьы, эз дугды юрбитнытö. Сэк старостаыслö усис думаыс бес йылiсь, кöда тальччис да тальччис попыслань кöмтöм коккезнас, жагвыв мунiс изiсь тэчöм вичку джоджöттяс, кыдз уйис...

«Господи! Мый ни эта лосьö?!» — бобгыштiс старостаыс, видзöтiс и нем эз вежöрт, кытчöдз попыс эз öвтышт кинас да лöгамоз шу: «Сгинь, сатана!» Сатанаыслö Игнатыслöн кыввес эз мöртчö, одзсис пасьтöмыс эз öш, попыс мöдпöв ни горöтчис «Сгинь, сатана!», бöра öвтыштiс кинас, пернапасасис, а пасьтöмыс жагвыв сибöтчис и сибöтчис Игнатыс дынö. Сэк Андрейыс вöлись казялiс, что попыс одзын попадьяыс, кöда сэтöн жö небыт да ласковöй голоснас мужикыслö шуис: «Дугды грехас пыртны, батюшко. Мужик тэ али абу?»

— Сгинь! — лöга ни ыкöстiс попыс.

Андрейыслöн нельки садьыс бырис, кöр попадьяыс киись син вылас усис утюг, кöдö адззывлiс поппес ордiсь и тöдiс ни, мый сiя сэтшöмыс. Утюгсö инькаыс öвтыштiс-öдззöтiс и... вачкис батюшкоыслö. Кивнитiс Игнатыс или эз, старостаыс оз куж висьтавны, повзьöмыс увья сэсся нем эз кыв и эз адззыв, и эз пышшы...

Быдöс аркмис чожа, и чожа öшис попадьяыс. Попыс бöра сулалiс еныс одзын, но öнi пидзöссэс вылын ни да одззамоз жö юрбитiс и юрбитiс.

Öшынöт вичку пытшкö пондiс ни видзöтчыны асылыс: югдiс жагвыв. Андрейыс кашык-кашык керис и шагньöвтiс Игнатыслань.

— Этö тэ, Андрей? — ласковöя юалiс Игнатыс.

— Ме, батюшко.

— Адззылiн сатанасö?

Андрей öвтыштiс юрнас — грехö пырис, кöр бöбöтiс попсö.

— Раб божий, — Игнатыс кресталiс Андрейсö. — Эн висьтась... Грехас эн пыр...

— Тэ мый, батюшко?!

Öтöрас югдiс öддьöнжык. «Тин-н-нь! Тон-н-н!» — омöн кылiс колоколлэзлöн шы. Чожа отирыс локтiс вичкуö, медбы юрбитны еннэзлö — греххез кольны.

Андрейыс эта бöрсянь эшö мымдакö уджалiс вичкуын, но кыдз адззас еннэсö да ны одзись попсö, сiдз син одзас и мыччисьö пасьтöм попадьяыс...

«Ог висьтась, ог висьтась! — думайтö Андрейыс, вунöтö бы попадьяыслiсь лöсьыт вывтырсö, чочком яйсö, басöк да лöсьыт гöгрöса чужöмсö, кузь сьöд юрсиэсö, но пондö пессьыны сьöлöмыс, кöр думаэс пондöны бергавны инькаыс гöгöрын и шуö. — Ог висьтась... Грех!»

Миша воныслö абу грех, пантасяс кö, риз видзö — öмыс сийöс пасьта, корö Андрейсö нывкаэз дынö, пукаланiнö бы мунö.

— Некытчö ог мун, — баитö Андрейыс.

— Тырмас тэныт! Видзан ой и лун вичкутö, святöй! Ветлам рытнас, адззам невестаэз, — модьö Мишаыс и сэтöн жö ошшасьö. — Тöдан мый... Ипатыслöн нылыс эд кытшöм! А... Вот нывка дак нывка! Öтiк няняэс кытшöмöсь! Корасьны бы? Мый жö бы лоас? Натьтö, эд миян кодьыс сайö оз мун. Оз миян кодьыскöт свалитчы... Вывтi ни богатöя олöны. Но тэ ышö... Вичкуын староста! Висьтасин бы, кыдз ни служитан. Сöдзö я мыйкö?

— Грех, Миша!

— Грех... — нерö вонсö Мишаыс. — Мый сэтшöм грехыс? Öнджа эд... Святöйнас, натьтö, он жö ло...

Öтiкö да мöдiкö быздiсö, и Мишаыс кыйис эд Андрейыслiсь, кыдз сiя адззылöм пасьтöм попадьясö.

— А тэ лёбан греххез йылiсь... — сералö Андрейсö воныс. — Быдöнным ми грешнöйöсь!

3

Ыджыт луныс таво локтiс одз, праздникыс бöрсянь лымыс эшö вöлi пыдын, эшö нывкаэс рыттэзнас котрасисö пукаланiннэзö, и зонкаэс ветлöтiсö нывкаэс дынö, чулöтiсö рыттэсö, кошшисö да бöрйисö аслыныс невестаэз. Мишаыс бöра гардчис Ипат ныв гöгöрын, сiдз и гумыштiс бы нывкасö, топ сэсся сылö некин эз ков, ась и туша-рожанас оз бы лöсялö: öтыс кузь мыгöра, а мöдыс дженыт, но топыт и моросвевья да чужöмыс понпутшöсь, кыдз резсьöмась нять ваöн, и баитö — нырнас паткö, кыдз öмсö осьтас, сiдз пиннес вылö бы эн и видзöт: öтiк кузьжык, мöдiк дженытжык, а лолалö... Пöдтö аскодя дукöн, да и чикисьыс вачкисьö баля бöж вылö, но уджа: печкö, гöрдззисьö, вурö-вочö — йöз дынö оз котöрт, керас, кöть киись эн чапкы, а видзöт да эн вомдзав. Ипатлöн нылыс — нывка, асьсö тöдö: зонкаэсö дынас матö бы оз сибöт, желлясьö, кошшö аслыс медбур жöник, сiдз кыдз Ипатлöн ныв. Ипатыс быдöнкöт öтiк пызаныс сайö оз пуксьы, öтiк кружкаись оз ю, но Мишаыс гардчö и гардчö Öльöныс гöгöрын, ошшасьö воныслö, видзöт, видзöт пö, Андрей, мый лоас! Зять эд пö лоа Ипатыслö, а тэ, вонö, Танясö кут да небытжыка малышт и шонт мороснат, сiя пö тэ сьöртi мывкыднас и мыгöрнас сэтшöм жö, айыс да мамыс абу польдiсьöсь, пондан кö корасьны, сетасö нывкасö.

Андрейыс кытöн чорзьöтчис, а сэтöн пондiс видзöтчыны, и быль эд гленитчис сьöд юрсиа да кузь чикися Таняыс, кöдö абу вомдзалöмась-тшыкöтöмась.

Гленитчис Андрейыслö руд сина Таняыс, и пондiс зонкаыс варыш моз думайтны, кыдз бы нывкасö кутны, медбы сiя синöн эз ешты кваркыштны, и тэнат лоис — пышшöтны бы, но кыдз эд бöра айыс? Айыскöт не кокнит баитны, оз я зоныслö шу, что одзöв эшö, етша няньсö сёйис, медбы гöтрасьны, быдмышт эшö, зырымöсь, да вöлись и думайт нывкаэс йылiсь. А зонкаыслö колö нывкаыс, ой кыдз колö бы! Ойесö оз узь да бергалö Таняыс гöгöрын...

Кадыс тулыс эд: луннэзнас сылöтö, а ойезнас кынтö. Ойезнас зонкаыс нывкаэскöт койö, а асыввезнас дышыс петö чеччыны. Кыдзкö Гришаыс асывнас саймöтö зонсö — киас чунь кыза шать, и синнэс вирдалöны да гичралö пиннесö:

— Тэ, öнджа!.. Тэ эд вичкуын уджалан, зырымöсь бедь! Тэ дыр пондан ойезнас клёктун моз котрасьнытö?! Мый попыс йылiсь баитан?! Кысь попадьясö пасьтöг адззылiн?! ― и шатьнас кыдз швычкис спинаыс кузя, чисто вир чездiс.

— Тэ мый, тять?! — синнэс баралiсö Андрейыслöн. — Кысь?!

— Ме тэныт, зырымöсь кульлö!.. Ме тэнö... Он бöбöт! Тэ менам пондан кывтö курччавны да овны! Вичкуас сэсся, бес, он мун! Он понды нерны еннэсö, грехас он понды пыртны! Шабаш! Гöтрала, пон юртö кöртала гортö! Ась иньыт велöтас овнытö! — И сьöвзис зоныслö чужöмас.

Шедiс вöлись Андрейыс кузь кылыс понда! Сэсся оз понды баитны мый оз ков, да эшö айыс гöтралас кытшöмкö öтiк сина, öтiк кока нывка вылö, и нем он шу, паныт он ордчы, кыдз еныс шуас, сiдз и пондас овны! Быдöс вежöртö Андрейыс, тöдö, что мыйись-мый сэсся Танясö оз адззыв, ась вöлись узьö да вöтасьö нывкасö. Но рыттэзнас одззамоз котрасьö пукаланiнö, котрасьö гусьöн, мед айыслö не шедны. И лоис сiдз, что öтiк рытö Андрейыс пукаланiнсянь кольлалiс Танясö. Рытыс вöлi лöнь, ыркыт, но руыс тулысся, кыдз ловзисян, сiдз и гывьялö морос, сiдз бы жмитыштiс нывкасö, окыштiс... Кыкöн мунiсö улицаöт, Таняыс тэрмасис, полiс айсис, а мöдыс вöтчис сьöрас, видзышалiс киöттяс да модис: «Тэ мый? Сулалышт... Ме эд ог дыр... Висьтала кыв-мöд и мунан... Таня...»

— Но мый колö?! Кинöс öштiн?

Тöлiсьыс эшö кытöнкö суналö, и рытыс топ суналö жö. Узьöны ни отирыс, зонкаыс нывкаыс гöгöрын гардчö, оз бы сунав, сьöлöмыс пессьö, öмас косьмис дульыс, дрöжитöны киэс, думаэс джöмдалöны, и коккес джöмдалöны жö, кыдз шагньöвтас, сiдз бытьтö и усьö бы...

— Мый тэныт месянь колö? — нывкаыс пышшö бы зонкаыс дынiсь. — Лэдз!

— Кывзы... Ме бы тэныт мыйкö висьтала.

— Мый тэ меным кужан висьтавнытö? — сералö нывкаыс, серавтöг оз вермы овны, пыр этадз, топ зонкасö лыддьö челядёкöн, пемытiнас синнэс пытшкын тыдалö гаж.

— Кежам этчин, — дульыс öмас косьмö Андрейыслöн, нывкасö киöттяс кыскö льöмпуэс увтö, кöдна эшö пасьтöмöсь, но кылö ни тулысся льöмпу дукыс.

— Кежам! — эз повзьы бытьтö нывкаыс.

Сувтiсö льöмпуэс увтö и сулалöны чарöмыс вылын. Кыкнанныс пыдына да перыта лолалöны, дзик котöртiсö да мыдзисö — вöтчисö бытьтö öтамöдныс сьöрö.

— Висьтав! Мый он баит? — нывкаыс бöра одзалiс горöтчыны Андрейыслö.

— Кывзы, Тань...

— Мый öшин?

Андрейыс Таняыслiсь жмитiс кисö.

— Ой тэ! — серöмтчис нывкаыс. — Вöлiн бы тэ Миша воныт кодь, эн бы чушыкты сэтöн... Эн бы вöтлiсь ме сьöрын.

— Таня...

Рытыс чулалiс. Лэбтiсис тöлiсь. Сайкалiсö асьныс и коккезныс, но янсöтчыны оз тэрмасьö.

— Таня, мунан ме сайö?!

— Босьтан кö, — сералö нывкаыс — кокнита баитö, и он вежöрт, быль я лöсьöтчö мунны жöник саяс или бöбöтö.

— Мунан или он?!

— Мый тэ и модян бöб кывнат? Кöр колас, сэк жöниксö и адзза, — бöра сералö Таняыс.

— Он я бы Пестер Миша вонö сайö лöсьöтчы? — синваэс ни петöны Андрейыслöн, сiдз бы нывкасö и жмитö, да полö, эд Таняыс быд кылын сералö и вермас дынсис тойыштны да бöра шуны: «Вöлiн бы Миша воныт кодь...»

— Кин одзалас корасьны, сы сайö и муна, — шыннялö Таняыс, а тöлiсьыс вöрыс сайсянь видзöтö, топ кывзiсьö да шуö: «Но мый нö тэ, зонка? Кысь эшö сэтшöм невестасö адззан?!...»

Андрейыс сьöкыта ловзисис. Таняыс жмитчыштiс бердас и лоис топ шонытжык. Тöлiсьыс жагвыв лэбтiсис вылöжык и вылöжык, лымыс вылö кисьтiс золотöй рöма югöр. Янсöтчисö зонка да нывка, медбы ашын рытнас бöра пантасьны пукаланiнын да гортö мунтöн кежны отир син одзись, недыр кадсö чулöтны öтлаын, кыв-мöд горöтчыны, мед бурмасö сьöлöммезныс.

Андрейыс дугдiс ни уджавны вичкуас, кöть попадьяыс и кивзiс: «Тэ мый, Андрей? Мыля эз гленитчы еныс пола увтын уджавнытö? Гардчин бы батюшкоыс гöгöрын да вердчин...» — сiдз баитiс, топ аслас зонкöт янсöтчис и козьналiс ласковöй кыввез. И попыс мортöс моз кольлалiс: «Господь тэкöт, зон. Эн горзы еныс вылö, ачыт судьбатö бöрьян».

«Кольччö, — думайтiс зонкаыс. — Постуйтö да юрбитö, а ме муна, кывза айöлiсь кыввесö». Петiс Андрейыс вичкусис и сэсся сэтчин эз пырав... И гöтрасьны лöсьöтчö, Танясö ой и лун оз вермы вунöтны, а сэтöн лымыс ни сылiс, нывкаэс дугдiсö рыттэзнас ветлöтны пукавнытö. Локтiс тулыс, ковсис доддявны вöв да кутчисьны гöр бердö.

Тулыснас уджалiс сьöкыта: одз асывсянь сёр рытöдз гöрис ыб вылын, мыдзлiс сэтчöдз, что вунöтлiс нывкаэс йылiсь, но эз-эз да недыр кежö мездöтчывлiс вичкуыс дынö, кытöн öксьывлiсö томмес. Кöкисö кöккез. Сьылiсö нывкаэс, кыскисö кадсö, видзчисисö, кöр öддьöнжык пемдыштас, ланьтасö пöрисьпöлöсыс, сэк вöлись и пондасö мунны горттэзаныс, но асьныс видзчисисö зонкаэсö, кöр кин да кинöс кутас, кинкöт мунас, кольлалас недыр, кежöтлас син сайö, медбы висьтавны шоныт кыв.

Андрейыс бöра кольлалiс Танясö, кöда мылякö эз ни одззамоз шынняв и серав быд шагын, кыдз мыйкö понда тöждiсис или шогалiс, мунiс и сьöкыта лолалiс да видзöтiс кытчöкö ылö-ылö, топ кинöскö видзчисис.

Ойес югытöсь. Мунöны улицаöт зонка да нывка. Етша нылöн кадыс, медбы этадз öвтчыны ойнас, пантасисö и абуöсь, и сэсся кöр эшö мезмасö уджись, кöр бöра пантасясö, висьталасö öтамöдлö кыв-мöд. Колö бы нылö баитны да баитны, бобгыны таррез моз жö, кöдна бобгöны ыб вылын ойшöрöдз, а нiя етша баитöны, унажык кывзöны, кыдз кöкö кöкыс, и кыдз мороссэзаныс тёпкöтöны сьöлöммезныс. Шагнялiсö-керисö, сыбöрын кежисö Егоррез льöмпу увтö, кöда цветитiс-пизис, козьналiс сэтшöм чöскыт дук, что бергалiс юр, эн бы и мун эстiсь асылöдз. Зонкаыс жмитчыштiс нывкаыс бердö и юалiс: «Мыйнö тэкöт?»

— Пестер Мишаыс ме сьöрын вöтлiсьö, и тэ сэтшöм жö... — вишык-вишык керис Таняыс, синваэс петiсö. — Айö шуö, что сета пö Мишаыс сайö...

Кöкис кöк. Бобгис тар. Сьылiс каёк.

«Вот кыдз! — Андрейыслiсь сьöлöмсö бытшкис дума. ― Но и Миша! Но и вон! Бытьтö оз тöд, что ветлöта Таняыскöт?! Юрсö сюйö кытчö оз ков! Лязны бы нырсö!» — пизис лöгыс, лудiсö киэс, сiдз бы и вачкис Мишаыслö, кидтiс Таняыс дынiсь, но кöр? Öтыс быд лун гöрö, а мöдыслö эм и абу гöраныс, бöра ни аслыс адззöм кокнит удж, бытьтö бы кытöнкö гижö, да и кадыс сэтшöм, что талун водан, ашын чеччан и он тöд, мый тэкöт лоас: виль олан пö, виль власть лоис, гöрддэс пö бергöтлöны и дзугöны, томмесö босьтöны армияö, и сэтöн жö кывсьö, что виль властьыс öтiклунся, ашын пö локтасö чочкоммез, и мый нiя пондасö керны, некин оз тöд...

Оланыс вачкисис бырöм паськöм вылö: эз шонт и зэрись эз дорйы.

Гожйисö. Уджалiсö да кеймисö енлö, медбы быдöс вöлi бур. Арнас, кытöнкö Покров панытас, Григорийыс гортас пырис öтöрсянь да горöтчис: «Мый нö, зон?.. Невестатö эд кокыштöмась!.. Танятö эд сетöмась Миша воныт сайö... А тэ узин!»

Кольмис эна кыввез бöрсянь Андрейыс, эз куж и кыв паныт горöтчыны, сэтшöм ни сылö недолыт лоис, сiдз ни айыслöн кыввес дöнзисö, что котöртiс бы да Мишаыслiсь орöтiс горшсö, мырддис невестасö, но, кыдз шуöны, пуыс пö пöрас кö, бöр он ни сувтöт, сiсьмас ни муыс вылын, и эстöн сiдз жö: петiс кö жöник сайö невестаыт, венчайтчис вичкуын, сiя абу ни тэнат и оз ло, кöть мымда ни вырскы дультö да няправ кулаккетö, нем ни он кер.

Сералiсö, сiдзкö, Андрейсö луннэс — öтiк лун öддьöн, мöдiк лун эшö öддьöнжык, куимöтыс нерис, нёльöтыс сьöлöмсö чеплялiс, витöтыссянь нем бурсö он видзчись... Чулалiс неделя, сыбöрын мöдiк, и, видзöтан кö, арыс вынсялiс, лоис кöдзытжык, ойезнас пондiс кынтлыны. Зонкаыс абу нывка — жöник сайö эз лöсьöтчы, некин рыттэзнас гортö эз кöртав. Андрейыс гажтöмтчис, гажтöмтчис невестаыс понда, петiс рытнас öтöрö, мунiс пукаланiнö, чулöтiс томмескöт рытсö, и сьöлöмыс вылын лоис личытжык.

Сiдз овсьö томмеслöн: не öтнас Андрейыс öштiс невестасö, не öтiк зонка этадз тöждiсис невестаыс понда — тöждiсяс да вильö адззас, и Андрейыс пондiс видзöтышавны Еля вылö, кöда мыйöнкö гленитчис, кöть и етша шыннялiс да етша баитiс, а унажык пукаланiнын печкис да дзебсисис бы зонкаэс син одзись. Видзöтiс, видзöтiс рыттэзнас зонка нывкаыс вылö, смевмис да öтпыр пуксис бокас и пондiс пукавны да кывзыны, кыдз чöрсыс швырйö-бергалö Еля киын.

— Тэ мый ме дынö öштiн? — нывкаыс лöгöнмоз юалiс зонкаыслiсь?

— Тэнö.

— Сэтшöм тэ и эм кодя? Сiдз тэ нывкаэсö осьта öмнат и синъян? Пукав да видзöт чöрсыс вылö, а менö оз я бöра боксит гусялö...

— Ог сет!

— Он пöрьясь?! — юрсö легнитiс нывкаыс.

— Пöрьясьны не зорьясьны, öнi мöда тэ вылö гöтрасьны!

— Вот кыдз!

— Сiдз!

Этадз и пондöтчис басниыс эта Елякöт, кöда гордöй эд — юрсö видзö вылына, кöть и немöн бы гордитчыны. Андрейыс пукалiс нывка бокын, бытьтö Таняыскöт чулöтiс рытсö. Гардчис рытсö Еля дынын, кольлалiс нывкасö гортöдззас и колiс бы гажöтчыны, кувтыртны тар моз, а Андрейыс етша баитiс, унажык сьöкыта лолалiс, олiс аслас думаэзöн,

— Кöр нö гöтрасян? — эз серав Еляыс и эз лöсьöтчы мунны Андрей сайö, но юалiс.

— Ашын...

— Талун мый видзö?! — нывкаыс топ хозяйка ни зонкаыс вылын — шынь оз кер.

— Талун некöр.

Сiдз чулалöны рыттэс. Зонка да нывка кыссьöны öтамöдныс дынö, но коласаныс мыйкö эм, оз лэдз сибöтчыны зэв-зэв, кöть и сьöлöммезныс тёпкöтiсö и кылiсö öтамöдныслiсь уджсö, жмитчыштiсö да шонтiсö бы öтамöднысö.

Кадыс тöв ни, öтöрас кöдзыт, дыр лымыс вылын он сулав — адззисисö и янсöтчисö, и пемыт ой шебралö олансö: узь да бöра видзчись ашыння лунсö, сыбöрын и рытсö... Кöдзыта таво чулалiс тöлыс, лёк мороззэз ой и лун ёркöтiсö ыбöссэзö, пырисö бы керкуэзö шонтiсьны, ойезнас кöр сiдз кöдздöтас, что ловзисян, и руыс сотö горш. Луннэс и ойес мичаöсь, етша усис лымыс, некытчö вöлi ой кежас дзебсисьны таррезлö, сьöлаэзлö да бадьöггезлö, нiйö адззывлiсö кулöммезöн — кынмöммезöн, кынмисö-кулiсö и учöт каёккез, подалö вöлi кöдзыт карта вылын, кынтiсö рожабаннэз уджавтöн отирыс.

Öтiк лунö Григорийыс öтнас ветлiс вайны сю. Гортö локтiс, пырис керкуас, Андрейлöн мамыс ой да ой: мужикыслöн рожабаннэс чочкомöсь, кынмöмась. Сэтчин да татчö, зыртiсö да мавтiсö и топ чулалiс шогöтыс, но нач эз пышшы, тыдалö, мортыслö пырöм гыркас, сьöлöмыс бердö кутчисьöм, и ашынас чеччынытö оз вермы: кижгö-баитö, сотö жар и норасьö, что писькöтö спинаас.

— Кулас ожо, айыт, Öндрей! — повзис мамыс. — Мый пондам керны?!

— Мыйöн тöда... — Андрейыс сьöлöм вылын недолыт да сэтчö жö асывнас улицаэзö видзчисьтöг пырисö доддя вöввез — этö гöрддэс прудйисö учöт посадсö, быд керкуö заргисисö солдаттэз, дзик öвинö кольтаэз — не бергöтчыны, не узьны бытшöма он вермы.

Андрейезö пырисö жö солдаттэс. Мамыс вöлi горись кыскалö нянь чöвпаннэз: керкутыр чöскыт пöжассьöм нянь дук, öмын дуль сöдзö, да сёйнытö аслыныс эз удайтчы, кöр кортöм гöссес тшыгöсь, öммезнысö осьтiсö и ыксöны:

— Тётка! Сёям бы. Вай татчö няньтö!

Чисто тшыг поннэз, бытьтö неделя öманыс крöшки абу вöлöма, уськöтчисö горыс дынö, и кöдö чöвпансö нянь зырнас горсис хозяйкаыс кыскö, сiйö пымнас и босьтöны да пызан вылö, сэтöн жö монлалöны-торйöтлöны и öманыс! Кушки-кашки керасö и чöвпаныс абу, бöра ыксöны: «Вай ышö, хозяюшка!»

— Кысь ме тiянлö сымдасö верма пöжавнытö?! — горзöмсорöн баитö Февраыс.

— Вай! — ыксöны, сiдз бы горш бердö и кутчисьöны, сёйöны öтлаын няньнас, но керкуас пырис командирыс да ыкöстiс:

— Эта мый сэтшöмыс?! Цыганнэз ми или солдаттэз Гöрд Армиялöн? Марш горыс дынiсь! — хозяйкаыслiсь малыштiс спинасö, ласковöя ни горöтчис. — Тэ, мам, простит нiйö. Куим лун ни эз сёйö...

Шöмöскураныс кольччис аслыныс.

Öтöрас мороз вынсялiс. Гор вылын ружтiс Григорийыс.

Полöтiсö, бытьтö пö гöрддэс вачкисьöны бессэз вылö ― лёкöсь, мортвийись чужöмаöсь, а нiя, видзöт, вöлöмась сэтшöм жö отир, сiдз жö баитöны и сёйöны бы, и нельки солдаттэс коласiсь медтомыс кужис кыйны нинкöммез, Андрейыскöт ветлiс турунла, но гöрддэслö посадас дыр эз удайтчы овнытö. Öтiк асылö видзчисьтöг керöс кырылын пондiс кывны аскодя шы, бытьтö кинкö пондiс сотны верöс и чав-чав потласис да сотчис чорыт лысыс. Пондiс кывны лыйсьöм...

Солдаттэс керкуись чепöссисö öтöрö. Керкуыс бöра лоис прос, дзик бöб праздник бöрсянь, кöр джоджсö тоясö-талясö коккезöн, колясö бус, нять, ёг... Февраыс кокнита ловзисис, мужикыслö гор вылö ыкöстiс:

— Чеччы ни! Али сё шогалан?

— Ог ни бы... — мурзьыштiс Григорийыс, гужа-важа лэдзчис горыс вылiсь, эз ешты тiльны синнэсö, кыдз керкуас бöр пырис солдаттэзлöн командирныс, порог дорсянь висьталiс:

— Хозяин, доддяв вöвтö да нуöт миянöс!

— Кытчö?! — чужöмыс чочкоммис Гришаыслöн.

— Лопанöдз!

— Господи! — клап вачкис киэзнас боккезас Февраыс. ― Шогалö сiя! Кулас кытöнкö туйыс вылын, — пондiс чышкыны синваэсö.

— Ми жö тiян понда! Пессям... Врагыскöт тышкасям, мед пондiт буржыка овны! — Счастливöя... — пондiс модьны командирыс.

— Кытшöм миянлö чассё да богатство колö?! — эз вежöрт Февраыс. — Кыдз ен шуис... Кынöмным пöт — и бур... Тi эд од тöрö муыс вылын да тышкасят, öтамöднытö поннэз моз пурат, а миянлö мый?

— Тэ, хозяйка, уна эн баит. Некöр! Хозяин! Вöрöтчы! Доддяв вöвтö, то видзöт!..

— Мый нö кернытö? — иньыс вылö видзöтö мужикыс.

— Некытчö он мун!

— Мунас! — боксис нагансö малыштiс солдатыс. Февраыс рик-рик горöтiс. Уськöтчис еныс одзö, а мужикыс пондiс ружтыны да пасьтасьны.

Час эз чулав, кыдз гöрддэс öшисö посадсис. Бöра лоис лöнь, топ пеллез сiдз и потласясö. Йöррез бердын шовкöтiс морозыс, видзчисис кöр осьтасö ыбöс, медбы заргисьны керкуас да чочком тшакыльöн катыльтчыны ыбöс дынсянь пызан увтöдз. Улицаын туй вылын шагнялiс рака, карзыштiс бы, да голосыс сибдiс...

Эз ештö пыдынжыка ловзисьны, улицасö бöра тыртiсö доддя вöввезöн, бöра пöдана öтöрись ыбöсас пондiсö ёркöтны йöз отир да лёкжыка, вынöнжык, топ лöсьöтчисö вартлыны и быдöс мырддьыны. Февралöн сьöлöмыс урни-верни, чеччöвтiс моросас. Инькаыс кивнитiс, ойзытöн петiс да осьтiс ыбöссö, и керкуас заргисисö мöдкодь паськöма солдаттэз, сэтшöм жö вижлоккез, сiдз жö пондiсö ыксыны: «Хозяйка, вай сёйны!»

Кын öшыннэзöт полöмöн видзöтчис тöвся шондi, лажмыта öшалiс керкуэс сайын, тысяча девятьсот восемнадцатöй год «орсiс» отирыс кузя.

— Хозяйка!!

— Нем менам сёйнытö! — синваэсö чышкö Февраыс.

— Адззы!

— Вöрисьыс бы тiянöс и нöбöт! Да и сiя кытчöкö дзебсисис и, еныс кулiс я мый я, господи! — öмтырнас солдаттэсö видiс Андрейлöн мамыс, пырис джоджулö, петкöтiс картоввез, сёртниэз, öлöдзсис тэчис пызан вылö, горöтчис, — Сёйö! Менам сэсся нем абу!

Андрейыс дзебсисис гор вылö и юрсö эз мыччав, а куйлiс да кывзiс мый керсьö керкуас, няпралiс кулаккесö.

— Еныс тiянöс оз вермы чарöтнытö! Оланыс тiян кузя миян кодьыслö абу, — тоткис мамыс. — Кöть бы чожажык мунiт...

Посадын шуксисö колчаковеццез. Чожа Андрейезö кывсис, бытьтö пö эм öнi кытшöмкö виль начальник — комендант, кöда лёк пö, уна оз баит, мыйись-мый...

— Прости господи! Кристос батюшко да пресвятая богородича! Мый понда?! Кысь усис эта оланыс?! Кинлö сэтшöмыс колö? Мыля нö вартлöмась сваттянымöс?! Мый понда сiдз?!

Вартлiсö чочкоммес сваттянысö и сватнысö, ёна пывсьöтiсö сы понда, что Февралöн сватыс абу пö пондöм сетны ассис вöвсö эна мортсёйись чужöммеслö.

— Спасит и отсав, ен батюшко! — юрбитö инькаыс, не весь юрбитiс: кытчöдз нiйö солдаттэс эз вöрöтö.

Чочкоммес Андрейезын олiсö неделя етш, неделя Андрейыс унажык быглясис гор вылын, только петавлiс, медбы доддявны пöрись вöвнысö, кöда кольччис öтнас, да ветлывлiс нето песла, нето турунла — и быдöс уджыс. Петiсö керкусис солдаттэс, öшисö и бур бы, но ашынас жö пырис Льöминаись вижлок öма, черань кынöма Пороз Миков, вожмöвтiс порогсö, кыз кынöмсö дундöтiс и горöтчис...

— Ме эта... Вот... Дружиналöн команде-е-ер! Мый висьтала, сiйö и пондат керны! И тэ, зырымöсь куль! — этö Андрейыслö ни. — Тэ, зырымöсь куль, лöсьöтчы армеяö! Тырмас, натьтö, гортын этö кернытö...

— Кытшöм армеяö?! — повзис Февраыс.

— Кытшöм, кытшöм... — ружтö Миколыс. — Кытшöм миян öнi государство, сэтшöм и армея! Колчак батюшко локтiс, сылö и служитам. Ме, мыся, ета... Командер дружиналöн, начальник, мыся! Од пондö кывзiсьны, уна ог понды модьны, а кута да пöвсала боккезнытö, и некытчö од норасьö! Эта тiянлö абу гöрд поннэслöн властьыс, а миян!

— Тэ бы, Миков, пуксин да морт моз...

— Некöр!

— Том эд Öндрейыс! — рушмис чужöмыс Февраыслöн.

— Гы-гы, том... Нывкаэс сьöрын вöтлiсьны абу том, а служитны том. Кытöн кöзяиныт?!

— Гöрд поннэс нуöтiсö... Бат, абу ни ловья... Öттэс — мужикöс, мöддэс — зонöс, куимöттэс локтасö да ачымöс доддяласö...

— Гы-гы, адззан мужикыт гöрддэс дор, и тэ сэтшöм жö! Видзöтö, кыдз бы эд пондö горзыны! Комендантыс тiян коддескöт уна оз баит... Сiдз?! Лöсьöтчы, зырымöсь куль, армияö!

Этö баиттöнняс ыбöсыс оссис, и керкуас пырис Гришаыс ― ловья локтiс хозяиныс, гаж бы колiс вайны, да синваэз петöны.

— Гы-гы, бат, кыкнанныт мунат служитнытö, — сералö Пороз Миколыс.

— Мый сэтшöмыс лоис?! — мамыс öшис, ыбöс бöрöдз кольлалiс Миколсö, кеймисис. — Миков, батюшко! Криста ради кыкнаннысö эд жö нуöтö! Мый ме мужиккестöг понда керны?

— Нем он ло, гы-гы! Олан. Видзöт, кытшöм каджыт шыгыра, вöр бы кыскавны, а горзан... — сералö Миколыс.

5

Гортын кык вон öтамöдныскöт пыр дзескамисö, эз кужö овны, а йöзын бöра жö öтлаын. Андрейыс умöля вежöртiс, кöда враг, а кöда ёрт, кöр оланыс öвтiс сэтчин да татчö и мый понда? Кинлö бур вöлi этасянь? Некин посадын этö вежöртны эз вермы.

Чочкоммес нуöтiсö томмесö, месяц етш велöтiсö солдаттэзö, велöтiсö ой и лун, немымда эз жалейтö, кытöн колiс, путрайтiсö лымын, кытöн тшыгйöтiсö, мед тöдiсö чöскыт я йöзын няньыс.

Служитiс Колчаклö Андрейыс — синваэсö чышкис, кöр сiйö гортiсь нуöтiсö, бытьтö понöс кöрталiсö да кыскисö йöзö, и олiс зонкаыс йöзын, ой и лун думайтiс, кыдз бы пышшыны гортö. Пышшыны — и быдöс сэтöн! Сэтчин кöть мый ло, ась и кутасö, кыдз кутiсö ёрттэсö-пышшалiссесö да лыйлiсö син одзаныс, но уна я шедiсö сэтшöммес? Кык мортöс эд лыйисö, а куим-нёльыс кытöн? Натьтö, мезмисö и öнi олöны гортаныс да сералöны сосаныс...

Öтпыр солдаттэсö саймöтiсö ойшöрöн, сувтöтiсö стройö и пемытiнас нуöтiсö кытшöмкö деревняö. Вöлi кöдзыт. Усис лым, а нiя мунiсö тöлыслö паныт и эз тöдö кытчö мунöны. Шагнялiсö — ныррезнаныс пишкисö час етш, локтiсö деревняö. Керкуэс умöля тыдалiсö лым пытшкись, некытöн дзуз эз видзö биэз. Мунiсö одзлань, ружтiсö. Вот и чулалiсö ни медбöрья керкуэз, и сэтöн одзаныс пондiс тыдавны би. Биыс сотчис баня дынын. Сы гöгöрын бергалiсö морт куим-нёль солдаттэз да офицер и биыс вылö шупкалiсö пессэз.

— Стой! — ыкöстiс офицерыс.

Солдаттэс сувтiсö. Паныт лымöн койыштiс лэчыт тöв.

— Равняйсь! — ыкöстiс офицерыс. Солдаттэс бергöтчисö банялань.

Тшöка усис лым, вижгис лэчыт тöв, лымсö коялiс синнэзö, но баня бердiсь би югöрыс весьтын бура тыдалiсö чöвтчöм морттэз — нач пасьтöмöсь, кöмтöг.

Андрейыслö ёткис сьöлöмас, кöть вöлi кöдзыт, а сiя сэтöн жö пымалiс, кöр пасьтöммес лэчыта видзöтiсö веськыта, топ юалiсö: «Кин тiянöс татчö ойнас корис? Мый мöдат керны?! Кинöс? Ми эд тiян кодь жö отир...» Синнэзаныс нёштöм бичир. Чалöтö-сотчö би, резö шоммез лымыс вылö. Гардчö тшын, пырö синнэзö. Петöны синваэз. Биыслöн югöрыс йöктö солдаттэс чужöммез вылын, баняыс бердiсь югдöтö пасьтöм морттэсö, кöдна педзöны-жöдзöны öтiк местаын, кынмöны...

Одзаныс сэтчин да татчö öвтчö унтерныс: синнэзас лöг, сёйись чужöма и эм, сэтшöм морт, кöдалö нем оз мöртчы, бытьтö сылöн абуöсь не ёрт, не горт, мортсö мортö оз пукты, мый пондас керны, керас, вермас и сiйö, Андрейсö, пондас кö асныравны. Сiдз. Андрейыс бура тöдö ни ассис командирсö, тöдö, что сiя некöр шынь оз кер, некинкöт морт моз оз баит, пыр ыксö кыдз пон вылын — летö горшсö, етша лоас, вермас и пельбокат пöжавны, а норась кинлöкö, пондыв асьтö дорйыны, чожа адззасö туйсö.

Андрейыс сулалiс стройын, гегдiс-кынмис, полöмöн видзöтiс то аслас командир вылö, то баняланяс пасьтöммес вылö, и юрас пизис дума: «Мый нiя?! Киннэз?! Мыля лымыс вылын сулалöны нач пасьтöмöн? Мый ныкöт лöсьöтчöны керны? Оз я лыйлö?»

Вижгис лэчыт тöв, синнэзö коялiс лымöн. Сотчис би, öвтiс сiйö тöлыс, летiс, кусöтiс бы, но эз вермы кусöтнытö. Андрейсö курччалiсö думаэз, эз лэдзö пыдынжыка ловзисьны, а тöдтöммес-пасьтöммес сё видзöтiсö веськыта синнэзас, кыдз врагся-враггез, кыдз мортвийись вылö, кöдасянь нем бурсö видзчисьны.

Кöдзытыс йиджö паськöм пыр яй бердöдз. Андрейыс кынмö, сяткöтöны пиннес. Кынмö... А, бат, етшажык кынмö, а унажык дрöжитö сы понда, что полö вийны мортсö, тöдвылас кыввес гортiсь попыслöн, Игнатыс не öтпыр баитлiс: «Зон, медыджыт грех тöдан мый понда усьö мортыслö? ― видзöтiс рамыника, баитiс жагвыв. — Сы понда, кöр мортыс вийö мортöс... Эн вунöт этö. Еныс быдöс проститö, вунöтö быд грехсö, кöр юрбитан да кейман сылö, но морт вийöмыс понда оз ни простит, шедан мöдöр югытас веськыта адас...»

Веськыта адö... Адын пондан пуны векись векö и некин ни тэнö оз дорйы... Мый шедтан эта дженыт оланын, сiйö и босьтан мöдöр югытас... А эна, кöдö лыян, кытчö бы шедасö сэтчин?

Вижгис лэчыт тöлыс. Андрейыс кушкыртчис стройын, кыдз зэр увтын курöг.

— Становись! Равняйсь! К ноге! — пондiс горшсö летны унтерныс, кöдö Андрейыс эз любит и кöдаись полiс.

— Тiян одзын гöрд сволоччез! Паразиттэз. Оз бы уджалö, а чöскыта бы сёйöны и бура олöны! Нiя мырддьöны бы миянлiсь му и керкуэз! Челядьнымöс кольöны бы ай-мамтöг, но кыввезныс кузьöсь да киэзныс дженытöсь. Етша няньсö сёйисö, медбы мырддьыны сiйö, мый мортыслö козьналiс еныс... Эна! Сатанаэс шедiсö бойын и кеймисьöны, медбы мийö нiйö лэдзим, эг вийö, ха-ха! Но асьныс мый керöны, а!.. Мый тi, сволоччез, керат, а?! Бытьтö кодяöсь, а шед кö, од пондö баитны, а сэтöн жö лыйлат эд. Сiдзкö, коммунисттэз, видзöтам мый öнi пондат сьывны, кытшöм тi геройез! Смерть коммунисттэслö, смерть! — чеччалiс и чирзiс солдаттэс одзын офицерыс.

«Кытшöм му? Кин сiйö менчим мырддяс? Эм я сiя менам мырддьынытö?» — Андрейыс сулалiс офицерыс одзын топ мыр, только думаэс и бергалiсö, кыдз эта жö пургаыс, кöда минута эз шоччись, гардiс и гардiс лымсö. Пемыт. Ой. Отирыс узьöны, а нiя...

Андрейыс тöдö ни, киннэз сы одзын сулалöны пасьтöг, вежöртö ни, мыйлö нiйö вайöтiсö татчö. Солдатыс видзöтiс то банялань, то офицерыс вылö, сылöн дрöжитiсö киэс, öмас косьмис ни дульыс. Сiя эз на адззыв, кыдз лыйлöны отирсö, öтiк мортлö эшö эз и печикты, а сэтöн... Сöтны бы, котöртны, пышшыны вöрланяс, но коккез сэкжö вöясö пыдын лымас или вöтас пуля.

— Приготовиться-а-а-а! — ыкöстiс унтерыс и кобурасис кыскис наган.

Андрейыслöн сьöлöмыс кыдз вотьыштiс, кыдз спинасяняс кок пятаэс дынöдз вундыштiсö пуртöн. Жиль-жоль керисö винтовкаэз. Саймыштiс том солдатыс эта шысянь, быдöнся бöрынжык лэбтыштiс винтовкасö, медбöрын жолькнитiс затворнас. Усис лым, тöлыс топ вынсялiс, шупытжыка лымсö койыштiс синнэзö. Баня бердын пасьтöммес жмитчыштiсö öтамöдныс бердö. Пемыт. Кöдзыт. Отирыс узьöны деревняын. Тачкöтö биыс, нюжлалö кывсö öтöрö и мöдöрö, топ пышшö бы да пессэс видзöны. Биыслöн югöрыс югдöтö пленнöйеслiсь чужöммезнысö, кöдна дзик лэчытжыка пондiсö видзöтны Андрейыс вылö, кыдз шуисö: «Но мый нö тэ?! Лый ни, то кынмам эд...»

— Приготовиться! — бöра ыкöстiс офицерыс.

— Зверрез! Етша эшö отирыслiсь юит вирсö да миянлiсь содтат... Ась еныс шуö аслыныт кувны поннэзлö моз! — пленнöйес коласын юрсö лэбтыштiс öтiкыс и горöтiс сибдöм голосöн.

Унтерыс лэбтiс нагансö. Солдаттэс сьöрсьöн-бöрсьöн лэбтiсö винтовкаэзнысö, но нiя киэзнаныс öвтчисö, топ тöлыс мырддис бы пишаллезнысö...

— Пли! — ыкöстiс командирыс.

Тöлыс чужöммезаныс койыштiс лымöн, кыдз сьöвзис, и некин эз лый. Биыс раммыштiс, дугдыштiс йöктыны пессэс вылын. Тöлыс лöньыштiс, кыдз дзебсисис баняыс сайö. Офицерлöн чужöмыс пиньöвтчис, топ мортсö лöсьöтчис паздыны ойтöв — кудоба. Сулалыштiс унтерыс, öмтырнас лолалiс-лолалiс, мурзис-мурзис да вöлись бöра и горöтчис:

— Мый эта?! — чеччöвтiс солдаттэс одзын петух моз. — Мый эта?! Или тi баняыс бердö жö бы сувтат?! Сувтöтам! — и пондiс чывкйыны солдаттэс одзын, синнэзнас сёйис-видзöтiс быдöнныс вылö, öвтiс ныррезныс одзын наганнас.

Солдаттэс пыдына лолалiсö и веськыта видзöтiсö командирныс синнэзö.

— Гöрд поннэз! Лэбтö винтовкаэзнытö! Ме видзöта кытшöм тi солдаттэз! Или...

Андрейыс веськыта жö видзöтiс унтерыс вылö, но сёйис ни солдатсö дума: «Шедiн бы тэ меным кытöнкö!..»

— Ага, полан! — офицерыс зэв локтiс Андрейыс одзö, ловзисис чужöмас вина дукöн, синнэсö топ лöсьöтчис кыскавны. — Полан!

— Ме пола?! — солдатсö топ кинкö чувйыштiс, горöтчис — пиньöвтiс öмсö, топ серöмтчис. — Ме пола?! Этö кöччес вöрас полöны, а ме... — гичыртiс пиннесö, эз тöд, мый баитö, кыдз вермисö öмсис чеччöвтны сэтшöм кыввес. — Ме!..

Офицерыс юрсö бергöтiс Андрейыс чужöм дынiсь, кыдз ачыс повзис, кöр сы вылö сёйисö-видзöтiсö...

Сэтöн жö Андрейыс казялiс, кыдз сы вылö видзöтö öтiк пленнöй, видзöтö и видзöтö, и сэтшöм сiя гöгрöса чужöма, сьöд сина, кыдз кульöм и ляпкöм Киршинiсь Кошель Иван... Сэтшöм жö торта пеля. «Сiя эд!» — повзис Андрейыс, но пленнöйыс вылö видзöтiс кваркышавтöг, вермасис аслас думакöт, кöда то висьталiс Кошель Ивансö, то суськис бы... Колiс öддьöн бы, медбы эз вöв Андрейыс одзын Иваныс, колiс бы...

Синнэзас пырис тшыныс, петiсö синваэс, но думаыс эз вешшы, полöтiс: «Кошель Ваняыс, Андрей! Ваняыс...»

Тöлыс то вынсялiс, то раммыштiс, лымсö гардiс унажык баняыс гöгöрын. Офицеррес кыскисö кадсö, кыдз нагладь пленнöйесö дыржык сулöтiсö лымыс вылын, медбы ёнжыка кынмисö да вöлись и вийны. Андрейыс надейтчис, что офицеррес повзьöтлöны: кынтасö, кынтасö отирсö да лэдзасö и некинöс оз лыйö... Сiдз ни пондiс веритны Андрейыс эта думаö, что лёк унтерныс кажитчис ни рамжыкöн, топ сы чужöмись адззис гаж, кöр тай мортыс умöль уджсö оз кер, кöть и думайтiс бы керны.

Офицеррес сiйö и керисö, биыс вылö шупкисö да шупкисö песжуггез, биыс орсiс-сотiс ассис добычасö, нюжласис кыввезнас вевдöрö, лэчыт тöлыс сiйö нетшкис, койис бичиррезöн, öвтiс тшынöн.

Андрейыс öнi видзöтiс только тöдса чужöма пленнöйыс вылö, думайтiс, кыдз жö бы сылö отсавны, пизис сьöлöмас вирыс, сiдз бы сьöлöмыс и чеччöвтiс Кошель Иваныс дынö. Эта йылiсь баитiс бы Миша воныскöт, кöда вöлi эд öтлаын жö, но сулалiс бокын, веськыт киыслань, некинлö вöлi тангыны гырдззанас, некинкöт гусьöн кыв горöтчыны, а пленнöйыс сё видзöтiс, кыдз видiс ни: «Тэ мый керан, Öндрей?! Эх тэ... А ме думайтi, мыся, кодя...»

«Кодя, кодя... — Андрейыслiсь синваэс курöтiсö горшсö, сiя курччалiс тырппесö, ньылалiс дульсö, баитiс Кошель Иваныскöт бы, шуис. — Тэнö бы ме местö...»

«А кыдз тэнö ме местö, а?! — дзик шынньöвтыштiс Иваныс или öмыс пиньöвтчыштiс лöгыс увья. — Мырддьыны бы кисит пишальтö, сэк бы видзöтiм, Öндрей!»

«Ог бы ме тэнö лый, ог!» — гичыртiс пиннесö Андрейыс.

— Приготовиться-а-а! — бöра öмсö осьтiс офицерыс, и пленнöйес лэбтыштiсö юррезнысö.

Койыштiс синнэзö лым. Андрейыслöн киэс небзисö, нач öшис выныс, а Кошель Иван чужöмаыс (эз бы ков Кошель Иваныс, ой кыдз бы Андрейыслö эз ков!) видзöтiс и видзöтiс Андрейыслань, кыдз висьталiс ни рамжыка: «Ась, Öндрей... Мый ни öнi керан? Мый лоис, он ни бергöт... Лый ни веськыта кымöсам, ме тэ вылö ог понды обидасö видзны, но гортын висьтав, ась тöдасö...»

Тöдчис, кыдз Иваныслöн рожабаннэзöттяс пондiсö визывтны синваэс — чежмасисö биыс югöр весьтын.

— По коммуниста-а-ам! — чирзiс офицерыс. «Кытшöм, поди, комунис Иваныс? — ештiс вирдыштны дума Андрейыслöн. — Кытшöм, поди, комунис? Нач эз велöтчыв кö... Но жö...»

— Пли! — тöлыс нетшкöвтiс офицерыслiсь голоссö — ыкöстiс и виньдiс.

«Хлоп!..» — и медодз лымас кыминь усис Иваныс.

Андрейыс лыйис жö, но метитчис кытчöкö мöдöрö...

Лёк тöлыс лымсö быд вынсис пондiс гардны вийöммес коласын, бытьтö тэрмасис тыртны син одзись. Андрейыслöн киэс öшöтчисö сыр-лёль, сiя кыдз кытiськö мезмис, лоис топ не ачыс — не дума, не лöг, не жаль чувствоэз эз лоö...

Тöлыс гардiс лымсö, резiс би вылiсь шоммез. Деревняыс узис. Отирыс нем эз кылö, поннэз эз шыасьö. Чожа пургаыс тыртö мортлiсь следдэсö, чожа тыртас и лымыс вылiсь вийöммесö.

6

Мишаыс эз лöсьöтчы служитны Колчакыс армияын, и кöр чочкоммес локтiсö посадö, зонкаыс медодзза лунас жö лöсьöтчис кытчöкö пышшыны-дзебсисьны йöз отирыс шогья, но кытчö тöвнас саясян, кöр омöн лым? Öтöрын кöдзыт, вöрын кöз увтын он понды овны, шыр моз муö он гарйись, йöзын некин тэнö оз видзчись, да и йöзас эд нiя жö кöин чужöммес: уна оз баитö, а шедан кö, вартласö, кыдз вартлiсö ни öтiк-мöдiкöс, а мый понда, отирыс асьныс бура оз тöдö, или кутасö да кымöсат лыясö, сымда и лоас — оз юасьö, оз висьтасьö, нылöн властьыс, нiя вынаöсь. Лыясö; сiдзкö, Миша, кымöсат, виясö, кыдз гöрддэслiсь солдаттэсö, кöдна шедöмась Ошибланьын пленö, кöрталöмась нiйö доддез бердö да кыскöмась посадас и лыйлöмась томмесö гунаэсланьын — ыбыс дорын овсис оланныс... Сэтшöм олан, тыдалö, вöтiс — кин да кинöс! Гöрд да чочком тышкасьöны öтамöдныскöт — вирныс пизьö, и мый понда? Мый колö, Мишаыс оз жö вежöрт, кöр öтлаö гардöны отирсö.

Том мужикыс думаэзнас сэтчин да татчö, и адззö, что некытчö оз вермы пышшыны, оз вермы дзебсисьны, да и том инь эд гортас, кöдö вайöтiс нач неважын, етша и узьлiс бокас, и кöда вир синваöн горзö да шуö, что джагöтчас мужикыстöг...

Жаль Таняыс... Модьö иньыс: «Дзебсись! Эн коль менö!» И пондiс Мишаыс ой-лунсö джендöтны гусьöн: уджавны кö, гортсис петас дзирс пемыт, мунас и абу — лунсö абу, рытнас локтö пемыт жö да не веськыта улицаöт, а лямпаэзöн лымыс вылöт йöрöттяныс ыскöвтас-локтас, пöрччалас коккес бердiсь лямпаэсö, пырас керкуас, оз ешты чöвтчыны, иньыс паныт да öшöтчас голяыс бердö и горзö, модьö: «Ловья! Ме думайтi...» «Ловья. Мый мекöт лоас?» — мужикыс тойыштö иньсö дынсис, кöр айыс видзöтö и осудитö: эз вöв айыслöн да мамыслöн томнаныс этатшöмыс, медбы иньыс отир син одзын öшöтчис голя бердö, а сэтöн...

Стыд кöть мый, но бисö эд керкуас оз öзтö. Пöриссес адззöны томмеслiсь ниртчöмнысö да бытьтö оз адззö. Локтас гортö том хозяиныс, ниртчыштас иньыс бердын, вöлись чöвтчас, да пуксясö сёйны, маласьтöн и сёясö, тыртасö кынöммезнысö сыбöрын бöра маласьтöн каясö гор вылö или нюжöтчасö полатьö и пондöны гуддисьны пемытiнас, бöра маласьны, мед некин эз адззыв...

Чочкоммес Мишаэзын дыр эз олö — лун или кыкö гудыртiсö да петiсö и абуöсь, мамыс бöрсяняныс кресталiс керку ыбöссö, дзик бессэз кольлалiс.

Керкуас пыр лоис кöдзыт: жечись дорöм печка эз лонтö, етша осьтöн видзисö посöдз ыбöснысö, весись эз петö улицаö, вичкуö эз ветлöтö, но пöриссес юрбитiсö рыт и асыв да еныслiсь корисö отсöт, мед еныс отсалас-дорьяс, ась гым кымöрыс мунас бокöт...

Но вот кыдзкö луншöрнас, кöр Мишалöн мамыс вöлi гортас, посöдзаныс дзурка-вирка кайис Пороз Миков, брынгис ыбöсаныс, бытьтö гортас пырис, да ыкöстiс:

— Прокоп, ось, мыся!.. Он кö ось, умöль лоас! Позтö разясö, а тэнö зоннат Сибирö иньдасö ошшесö пестунничайтны! Ось, мыся!

Прокопсö нем шуны, олiс морт моз: йöзлiсь няньсö эз сёй, эз думайт кортöн ветлöтны, гöрддэс дыр и чочкоммес дыр медодз дрöжитiс кык вöв понда, и чанёкыс вöлi жаль, кöда вылö видзöтiс, топ зон вылö жö. Но локтiсö эд... Этö вежöртiс Прокоп, кöр сiя гуддисис гидын и кылiс, кыдз посöдзас кайис йöз морт, брынгис ыбöсас...

Вöлi сэтшöм кöдзыт, что морозыс вартлiс быд пельöсö, бытьтö прикашайтчис... И Прокоп гидсяняс сунки-панки кайис посöдзаныс, ыкöстiс: «Мый колö?!» Шы эз сетö öтöрас, но ыбöсас брынгисö сiдз, что стенаыс дзуркнитiс.

— Мый колö?! — мöдпöв кижган голоснас ыкöстiс Прокопыс.

— Ось, Прокоп, — рамжыка ни ыбöсыс сайын шыасис Пороз Миколыс, кöда асьсö посадас талун лыддис медыджыт мортöн — начальникся начальник и уна оз баит.

— Мый? — повзис Прокопыс, осьтiс ыбöссö, чужöмыс — чочком чышьян, синнэс ыждöмась, голосыс нач сибдiс.

— Мый, мый? — нерис Миколыс, öвтчис кузь мыгöрнас, сельнича кынöмнас вевттис ыбöс колассö. — Кытöн зырымöсь кöиныт?!

— Кытшöм кöин?!

— Зоныт!

— Уджалö.

— Эта... — Миколыс писис кыскис гижöт и нюжöтiс хозяиныслö, висьталiс. — Кыдз локтас гортö, ась сэк жö котöртö комендантыс дынö! Вежöртiн?! Но и быдöс... — содтiс. — Ась армеяö лöсьöтчö! Нем узьлыны том иньыс бокын, ештас ышö кагаэсö дорны.

— Армияö... — Прокопыслöн дзик сьöлöмыс потiс, лолыс тырис.

— Ась ветлас да служитас! — нерис Миколыс. Хозяиныс киас бергöтiс гижöтсö да шуис:

— Ме, сват, лыддьöтнытö эд ог куж. Пырин бы керкуас, бат, горшыт косьмö...

— Абу эд жар, — мур-мар горöтчис Миколыс, бергöтчис и шупыта лэдзчис посöдзсис — вылас пась, коккезас пимиэз, кыдз лöсьöтчöм мунны бы вичкуö.

«Быдтi, быдтi, колö бы ой и лун уджавны, а оланыс пыдынжыка оз лэдз ловзисьны. Нуöтасö Пестерсö и бöра öтнам»... — горшсö курöтiс Прокопыслiсь, синваэзсорöн ньылыштiс дульсö, турйöвтiс и джöмдавтöн пырис керкуас.

— Кин сэтчин?! — шардöм-повзьöм голосöн панталiс иньыс.

— Кин? Устин тай... — мужикыс курччöвтiс тырпсö, содтiс. — Зонытлö котома лöсьöт! Нуöтöны...

— Кытчö?!

— Кытöн ми тэкöт абуöсь... Вöрöтчы! Да эн вунöт паньсö пуктыны, сэтчин некин сылö сiйö эз запты!

— Ой да ой! — пондiс кивзыны иньыс, öшис керкуас.

— Эн жöдз, а кер мый висьталiсö! — кижгис Прокопыс. Мужикыс не йöзын, не гортын, не уджын эз тэрмась, вöрöтчис жагвыв, но быдöс керис сiдз, медбы бöрсяняс некин мöдпöв эз кер — уджалiс аслыс, олiс ас пондасис, вöлi надз, иньыслö эз кыйлы виль нинкöммез сэтчöдз, кытчöдз важжес нач эз бырö, нямöттэс эз мыччисьö кöмкöтсис, сёйис — кишкапонсö тыртiс, ась и некöр эз тшыгьяв, юансö пыр юис синва кодь сöдзö, лöсьöтчис бы уджавны буржыка да керны унажык — зоныссянь видзчисис отсöт и — на!

Пондiс мужикыслiсь сьöлöмсö нимавны сэтшöм шогöт, что дзебис бы кытчöкö зонсö, а нуöтасö кö, медбы мымдакö айыслö вештiсö деньга — копейка да сылöн бы вöлi.

Эта коста Миша шупöтчис öвинын, видзчисьтöг сэтчö шардöм синнэзöн пырыштiс айыс, повзьöтiс зонсö.

— Котöрт гортö! Нуöтöны бы,..

— Некытчö ог мун! — будзгыльтчис зонкаыс.

— Кыдз он мун?! — öддьöнжык повзис айыс, öшис. — Мый лоас?! Сотасö эд! Пöжаласö öтлаын поданас.

— Менö оз пöжалö, — пиннес гер зонкаыслöн.

— Тэнат эд сэтöн жö, — синваэсö чышкö Прокопыс.

— Эн горзы! Муна! — медбöрын лöга айыслö горöтчис зоныс, сьöвзис аслас нинкöм вылö, петiс öвиныс увтiсь и öвтчытöн иньдöтчис гортлань. Айыс кольччис öвиныс увтö ештöтны бисö, а кöр уджалансянь локтiс гортö, зоныс эз ни вöв. Иньыс горзiс гöбеч дорын, синваэсö чышкис содзнас да причитайтiс, что сэсся Мишасö оз ни адззыв, виясö ни зонкасö.

— Кытöн кузь бурсиыс?! — кижгыштiс Прокопыс, юалiс моньсö. — Мишаыс биись и ваись петас, а вот моньным... — малыштiс кузь чужöмсö.

— Мый моньным? — мужиксö нерис иньыс. — Мый сiя? Синтöм али коктöм? Медбы зонкаыс кыдзкö петi, — пондiс пильскыны.

— Ме висьталi, мыся, петас и петас! — нянь бердö кутчисис мужикыс и пондiс тшавгыны-сёйны порсь моз öмтырнас да кымöсыс увтöт видзöтышавны иньыс вылö и гажöн думайтны: «Кыдзкö вöввесö эз нуöтö, кыдзкö! Нуöтiсö кö бы, мый бы лоис... Кыдз бы пондiм уджавнытö да овнытö, а Пестерыс... Некытчö оз торксьы».

Рытланяс пырис моньыс и пондiс западняыс вылын быглясьны да горзыны, кöть керкусис пышшы. Матшкаыс пальöтiс бы моньсö, малалiс юрсö, шоныт кыввезöн баитiс, а батшкоыс мурзис да модис ныр увтас: «Нем он ло! Видзчисян! Ештан ышö мужикыт бокын узьлынытö...»

Кытчöдз гортын Мишаыс понда тöждiсö, сiйö Андрей воныскöт и эшö куим-нёль сы кодь жö зонкаэзкöт, кöдна армияын эшö эз служитö, чочкоммес пуксьöтiсö доддезö да кыскисö гортiсь медодз Чердынöдз, кытöн неделя етш бытьтö бы велöтiсö служитны: ветлöтiсö стройын, котрасисö, кыскасисö кынöммезныс вылын, кыкись-куимись лыйсисö, ойезнас сулалiсö караулын, а сыбöрын подöн нуöтiсö Усольеöдз.

Армияын вердiсö горт сьöртi буржыка: гортын ульлунся сёяннас пыр эз чöсмасьö, а татöн яйыс анькытш тусь ыжда да шедiс быд лун, и службаыс эз вöв вывтi сьöкыт, видзöтны кö сiйö гортiсь удж сьöртi, кöр гортын мырсисö пöт, олiсö эстöн, дзик орсiсö челядь моз ать-два да ать-два, левöй-правöй, левöй-правöй, или командирныс ыкöстас: «Сено-солома! Балда, куда прешь?! Бегом! Ложись! Комики, запевай! Замолчи! Бегом!» — эна кыввес кылöны лунтыр, асывсянь рытöдз, кытчöдз оз водтöтö узьны, вачкисьö, топ солдатыс вылын пыр вувтöны, гав да гав... «Гав! Кытчö, кержак, мунан?! Гав-гав! Смир-р-рно! Слушай мою команду-у-у! — ыксö — горшсö летö старшöйыс. — Ложись! Ползи, таракан!» Ыксöны, кöр ны моз он ловзись, он тальччы, он сёй, он вод, он пасьтась... Он да бöра он, сiйö и видзöт, кыдз пельбокат пöжаласö, сэк пондан тöдны...

Мишалöн ёрттэс-солдаттэс аскоддяöсь: öтiккез рочöсь, мöдiккез комиöсь, комиэслö комиэскöт бур, кöр кужöны баитны, а рочческöт ректасьöны — кыввезнысö чеглалöны, мыкталöны, но Мишаыс коми кывсö оз и явит, бытьтö чужис кытöнкö Сибирьын да богатöй семьяын, кытчö тэ, кульбук! Мишаыс кыз кодь вывтырнас, пыр вöрöтчö жагöна, оз любит, медбы сы вылын ыксiсö, кинкö вöлi бы ыджыт, а сiя учöт, шуам, эта жö командирыс — унтерыс, кöда пасьталöм мундир и бытьтö бы сiя и эм, кешитчö, мыччалö асьсö, эх-ух! Медбы сы одзын быдöнныс кыскасисö кынöммез вылын гаггез моз, вöлiсö поннэз кодьöсь, кывзiсисö и уськöтчисö сэтчö, кытчö висьталас. Унтерыс мылякö öддьöнжык ыксiс комиэс вылын, эз любит нiйö, шуис кержаккезöн, сералiс быд шагын, но Мишаыс дынö ниртчис моз бы. Кыдзкö сибöтчис, вежис мывкыдсö да гусьöнмоз, мед некин эз кыв и некин эз адззыв, шуис: «Видзöта ме тэ вылö и адзза, бытьтö грамотнöй... — ловзисис чужöмас лук дукöн, кижгыштiс. — Он я лыддьöт, мый этчö гижöмась... — видзöтыштiс öтöрö-мöдöрö, кыскис писис гижöт, нюжöтiс солдатыслö ныр увтас. — На!»

Мишаыс невна гатш эз пöр, сэтшöм сылö диво лоис, что унтерыс тшöктö лыддьöтны гижöт вылiсь гижöмсö, бытьтö ачыс оз куж, сiдзкö... Эмöсь жö эна коласын юртöммес. Босьтiс гижöтсö, кокнита лыддьöтiс гижöмсö и висьталiс, мый сэтчö гардöмась.

— Тэ этö... — медбöрын нач ни рамыника горöтчис унтерыс, синнэзас сэтшöм югöр, дзик öшис и эз тöд мый висьтавны, кеймисьны или кулаксö мыччыны, медбы падтыны, ась оз висьтась — кывсö кузя оз видз. — Тэ этö... Вежöртiн?! Абу ни учöт мужичокыс, вежöртiс, мый сыкöт баитö командирыс. Рад ни солдатыс, смевмыштiс, чувйис ни том мортсö дума: «Эх, унтер тэ, унтер! Тэ тай ме сьöртi баранся-баран вöлöмыт... Миян кодьсö оз бы ков серавнытö, ми эд, öнджа, тэ кодьöсь жö бы...» И пондiс солдатыс надейтчыны, что унтерыс оз понды быд шагын тальны, а пондас жалейтны: кокньöтас, сiдзкö, службасö и пöтжыка пондас вердны, но... Öтнассö... Сiдз ас кежас думайтiс Мишаыс, да унтерыс абу мывкыднас вöлöма морт — гер пинь вöлi, гер пинь и кольччис.

Кыдзкö öтпыр Мишаыслöн сiдз пондiс висьны кынöмыс, сiдз бергöтiс гöг гöгöрсö — пуртöн кыдз вундалiс, синнэз одзын гардчисö гöрд гöгляннэз — смерть-шогöт кутiс, кöр он ни думайт ать-дваыс йылiсь, а водiн бы кытчöкö да куйлiн, но командирыс дзик эз кыв и эз адззы, кыдз куснясис да норасис солдатыс, одзлань ыксiс: «Ать-два, ать-два! Левой-правой, правой-левой, сено-солома, солома, комики!» И тойöны солдаттэс коккезнаныс лымсö, тойöны. Лымыс дзуртö, топ норасьö, но некин сiйö оз жалейт, оз кывзы, и Мишасö оз жалейтö, кöр сiя шогалö и педзö ёрттэскöт öтлаын жö, некытшöм сылöн абу гаж, öмас косьмö дульыс, сотчö-косьмö горшыс, висьö кынöмыс, чукрасьö рожаыс, пымалö кöдзыт ньылöмöн.

Асывсянь шогалiс солдатыс, павжун гöгöрас вöлись унтерыс юалiс: «Мый лоис, лодырь?»

— Животом маюсь, господин унтер...

Ас юр вылö эд висьталiс: командирныслöн пиннес гер, гöрдлö:

— Живот легче всего вылечить, — и рявзö. — Отделеннё, ложись! Отделеннё, ползи!

Луныс кöс. Кöдзыт. Шондiыс мыччисис да катыльтчö вöрыс вевдöрын зэв-зэв, дзик кöрталöмась кöз йыввезас. Юр вевдöрын лöз кынмöм кымöрас öтiк палачок абу. Кайез абу, и поннэз оз кылö. Синнэз ёрö чочком лымыс.

Солдаттэс кыссьöны кынöммезныс вылын лым кузя, ружтöны, уджалöны киэзöн и коккезöн, лымыс пырö öманыс, ныррезаныс, синнэзö шедö, пырö паськöм увтö, шедö кучик бердöдз. Кыскасьöны лымöт — кынöммезнаныс лымсö гöрöны. Мишаыс пымалö — дзулля ва кымöсыс, спинаыс ва, кызöтö — пес кералö. Ёрттэс ружтöны, сьöласьöны, мурзьöны, но öтiк оз бизгы, что сылö умöль, что оз бы ков этадз керны.

Миша служитö — кынöмыс вылын лым кузя кыскасьö, кынöмыс висьö, и оз, кыдз пон курччöвтас гöг гöгöрсö да бöр лэдзас. Недолыт солдатыслö, вöрöтчö лым вылын вöтöн моз ни, вöтöн моз ни думайтö, что кулас и оз ни адззыв ассис иньсö, кöдалö норасис бы, висьтасис, и, бат, отсалiс бы Таняыс. Эх, кыдз бы эшö оз кув! А командирныс гавзö: «Но как? Выздоровел? Или эшö веськöтны шогöттö? Ха-ха!» Унтерыслöн синнэс лöзöсь, кöдзытöсь, видзöт эн видзöт, нем этатшöм синнэзас оз тыдав.

«Веськöта ме тэнö! — Мишаыс öмас чапкö да чапкö кöдзыт лымсö, ньылалö. — Вия понöс! Одзöв эшö кувнытö, — ружтö солдатыс, мöдiк дума ни юрас, кöда бöбöтö гортö. — Пышшыны колö, пышшыны! Гортлань вартны». Но кытчöдз лымыс дзугö: тальччан и тыдалö быд шагыт...

Сiдзкö, одзöв гортлань видзöтны...

Рытöдз кыскасис кынöмыс вылын, эз кув. Рытланяс лэдзис кынöм висяныс, сибöтчис воныс дынö да вöлись комиöн пондiс баитны:

— Öндрей, мый пондам керны?

— Мый колö керны? — нузгö Андрейыс, сiя нач етша баитö, унажык юрсö öшöтöмöн видзö, мыйкö пыр думайтö и оз висьтав.

— Мый пондам керны? Горттöг он гажтöмтчы? Натьтö, Лизаыт видзчисьö...

— Некытшöм Лиза менö оз видзчись, — нузгыштiс Андрейыс, юрсö бергöтiс мöдöрö: лöгалö воныс вылö.

— Тэ мый?! Сё Таняыс понда горзан или öнджа?.. Эз ков, вонö, узьны. Кин кинöс одзалiс, сылöн и лоис...

Быздö Мишаыс, сералыштлö, рад, что кынöмыс дугдiс висьны, да и оланыс дзик пондiс шыннявны, кöсйыны кокнитжык служба: солдатыс öтпыр пантасис тöдтöм офицеркöт... Офицерыс аскодя, командир вылö дзик оз и вачкись, шинельöн, погоннэзöн, но горшсö оз лет, пантасис, корис дынас, тшöктiс поткöтны пес.

Солдатлö мый? Мый тшöктасö, сiйö и керö. Мишаыс босьтiс чер, клин-клён керис, и песыс лоис поткöтöм, приказыс керöм, вермас мунны, ась мöдöтпыр оз ни адззö да бöра оз тшöктö уджавны, но кузь мыгöра мугуй кодь офицерыслö уджыс лоöм етша: корис керкуöдз, пуксьöтiс пызан сайö да пондiс юасьны кытiсь сэтшöмыс, кысянь шедiс татчö, киннэз айыс да мамыс, мымда грамотаыс. Юасьö-гуддисьö, уна бы тöдö, уна адззö, а мыйлö бы, мыля Мишасö чувйö? Медбöрын офицерыс юалö: «Бат, тiян коласын эмöсь сэтшöммес, кöдна думаэзнаныс сулалöны гöрддэс дор?»

«Мый эта? — нельки повзис кодь Мишаыс. — Мыйлö?! Эмöсь али абу, мыйöн ме тöда?! Ась бы и эмöсь... Кин ме сэтшöмыс, медбы нюкьясьны йöзыс сьöрын? Кинлöкö кошшыны виноватöйезöс, вузавны и вердчыны чöскытжыка, пöтжыка... Мед кöть мый сы йылiсь думайтöны, кöть кытшöм понöн лыддьöны, но Мишаыс кытчöдз беснас эз вöв и, натьтö, оз пöртчы, оз вузав асьсö няньтор вылö, оз чушкав ёрттэсö, кöр ныкöт öтлаын узьлö, кынöмнас гладьöтö лымсö, кынтö зырымсö... Тi эд, офицеррес, бытьтö миян дор, а видзöтны кö...» — кынöмсö бöра шогöтыс кыдз жмитыштiс, пидзыртiс, сьöлöмыс гудыртчыштiс, пымалыштiс, тöдвылас усис, кыдз лун пессис-шогалiс, сiйöн и висьталiс:

— Ог тöд, кинлöн мый понда сьöлöмыс висьö... Кин да мый вöтасьö...

— Сiдз, сiдз, — эз лöгась офицерыс, шынь эз кер, эз веж голоссö, но видзöтiс ни кытчöкö мöдöрö — дзебис бытьтö синкагаэсö, медбы солдатыс эз адззыв, мый сьöлöмыс вылын, кытшöм мортыс мывкыднас, бöбöтö я или былись гöрдззö-кыйö. Вежöртiс я офицерыс Мишасö, Мишаыс эта понда тусь эз тöждiсь — солдат эм солдат, сылiсь судьбасö кöрталöмась, кыдз сунис бердö, и кыскöны эна жö офицеррес, кытчö нылö колö: öнi бытьтö тэ дор, а бергöтчас — йöз ни, он ни ков — эм тэ и абу. Солдатыс вежöртiс офицерсö, адззис, кытчö бы сiя пöрöтö пусö, кöдöр ладорö пöльтö-лолалö и шуис, что нем сiйö вöрöтны, нем оз тöд, кинлö колö, ась сiя и пурö ёрттэсö, а Мишаыс оз понды и быдöс сэтöн! Петö, что адззисисö да янсöтчисö. Янсöтчытöнняс офицерыс мурзьыштiс да висьталiс: «Лöсьöтчы... Ме тэнö ас дынам босьта писарьöн. Грамотаыт эд эм...»

Нем сэтчö эз висьтав Мишаыс, кöть и сьöлöмыс пондiс гажöтчыны — надейтчыны кокнитжык служба вылö. Солдатыс служитö одзлань и керö сiйö жö, мый керöны ёрттэс — асывсянь сёр рытöдз изö куль пизьсö да думайтö, немлö лун-лун ветлöтны стройын, котрасьны весись, сизимись ни вöлi бы буржык, уджалiс кöбы гортын. Сьöкыт сьöлöмыс вылын Мишаыслöн, öтiк дума отсалö, что шедас писарьöн, надейтчö кузь мыгöра офицерыс вылö, кöда баитiс да топ вунöтiс или мыйкö видзчисьö, оз я думайт, что солдатыс ачыс локтас и висьтасяс кин да мый баитö ёрттэс коласын — вузалас, сiдзкö, ёрттэсö, кöдна узьöны и вöтасьöны горттэзныс йылiсь, оз шыасьö не гöрддэс, не чочкоммес йылiсь, ась нiя öтамöдныскöт кöть мый керасö...

Гортö бы, гортö... Горт йылiсь думайтöны Андрейыс и Мишаыс, но чулалöны луннэз, гортныс ылын, некин татiсь оз лэдз, и писарьö оз босьтö, сэтшöмöсь жö кöдзытöсь луннэс, сiя жö унтерыс одз асывсянь сёр рытöдз гардчö гöгöраныс да ыксö, пон моз вувтö, кöть сыись Мишаыс полö и оз, адззö, что командирныс бöбöв кодь, натьтö, вöвсö оз куж доддявны, черсö оз куж кеслыны, и мырддьыны кö одзсис няньсö, оз я кув тшыгсянь? Медбöрын унтерыс мылякö нач эз понды радейтны Мишасö, пондiс лякасьны быд торыс понда, öтöрын эрзö: «Мыля коккет лымöсьöсь?! Пыркöт буржыка! — керкуын бöра пиннес гер, пурö. — Мыля мундирсит киззет сiмöмась?! Кержак! Зырт, мавт!» Кержак и ним лоис, сылö унажыксö пондiс шедны миськавны джодж, керкуыс гöгöрись дзимлявны лым, ружтыны сортирын, и солдатлöн эшö öддьöнжык лöгыс петiс командирыс вылö, сiдз ни петiс, что эз бы кö вöв армияын, пöжалiс бы пельбокас унтерыслö, сымда бы и вöлi, мед тöдiс бы, кытöн юссес пöжсьöны, но татöн киэс кыдз кöрталöмöсь.

Служитö солдатыс и надейтчö мыйкö вылö, сiдз и котöртiс ни бы кузь мыгöра офицерыс дынö, шушкыштiс пельыс одзö, видзöт жö пö, господин офицер, унтерным эд мый керö!.. Гöрддэзлань эд сынö бы... Од веритö? Юалö солдаттэзлiсь, кöр командирным шуис... «Кержаккез! Служитны кö этадз пондат, буржык ни лоас мунны гöрддэс дынö... Нылöн, гöрддэслöн, бытьтö пö анархия, уна миян коддескöт оз пондö баитны...» А мый сэтшöм анархияыс, Мишаыс эз тöд, баитö, йöз кыввезöн, вузалö бы думаэзнас унтерсö, бат, бы эта бöрсянь быль шедiс уджавнытö штабö, но бöра эд полiс командиррезсис, падтiс асьсö: «Вöрдядьыс тöдö, кин сэтшöм кузь мыгöраыс?! Абу я сэтшöм жö лёквир? Öтiк гуна вылын эд вартöны! Ог я аслам юр вылö кöт?..» Кыдз бы службаыс эз мун, но колiс ас йылiсь тöждiсьны да надейтчыны еныс вылö. Эшö öтiк дума вöлi, оз я нуöтö фронт вылö, кытiсь бы позис шыбыльтны, да и тулысыс матын ни, луннэзнас короминнаэз вылiсь пондiс ни вотявны ва — кокнитжык лоас службаыс.

Талун асывсянь вöлi гажа, öтiк кымöр-палачок эз тыдав небоас, керкуэзiсь тшыннэс лэбтiсисö веськыта, лымöн кундöм вöрыс узис пыд онöн, суналiсö керкуэс. Но рытланяс видзчисьтöг ловзисис лэчыт тöв, пöльтыштiс стола вылiсь лымсö, унньöвтiс керку угöлын, шутньöвтiс трубаын. Ловзисис лэчыт тöлыс, шоччисьыштiс недыр, дзик кывзiсьыштiс, кыдз солдаттэс вылын ыксö унтерыс и пöльыштiс ни вынöнжык да пондiс гардны лымсö керкуэз гöгöрын, коявны солдаттэс чужöммезö и командирныс синнэзö, кöда эз любит путрайтчыны лымас, сьöвзис и видчытöн солдаттэсö тшöктiс пырны керкуö.

Пургаыс орсiс-гардiс лымсö луннас, топ эз пöт уджнас и лöсьöтчис керку угöввезын уннявны эшö ойнас. Солдаттэс водiсö узьны сёрöн, и чожа оныс мыдз отирсö лязiс, чожа томмес пондiсö вöтасьны вöттэз, бытьтö öтiк олiс гортын, мöдiк шедiс кытшöмкö сэтшöм местаö, кöдö некöр эз адззыв, эз думайт сы йылiсь, кытöн эз вöв и оз шед, но вöтöн быдöс вермö лоны, быд местö верман шедны, и бур, что солдатыслö вöтöн да позьö шоччисьны пöт, мезмывны унтерыс дынiсь, лоны аслыс ас вылас хозяинöн, а одзлань кöть мый ни бöра, кöр одзся-одз лёк голос саймöтö: «Отделение-е-е... Подъём!»

Ыкöстiс унтерыс, чеччöтiс солдаттэсö да не асывнас, а пыд ойöн, петкöтiс öтöрö, кыдз шупкис пургаыс öмö, кöда пондöм вижгыны вынöнжык, уннявны лёкжыка, и лымыс усис тшöкжыка. Кöдзыт. Нуöтiсö солдаттэсö оя-ойшöрöн лыйлыны пленнöйезöс — сэтшöм жö солдаттэзöс. И лыйис Мишаыс Кошель Иванлö веськыта кымöсас.

7

Ойнас жö солдаттэсö бöр вайöтiсö керкуö, пуксьöтiсö пызан сайö, одзаныс вайисö сёйны да сымда, кыдз вердiсö бы праздникöн — сёй да ошшась, касьтыв талуння лунсö, но не умöль кылöн... Мишаыс уськöтчис сёяныс вылö, пондiс пурны няньсö, бытьтö тшыгьялiс неделя. И паньыс солдатыс киын лэбалiс öмас да бекöрö.

Мишаыс пурис-сёйис, а Андрейыс пукалiс сiя жö пызан сайын, сьöлöмыс гудрасис, юрыс висис, дрöжитiсö чуннес, кыдз öнöдз кынмис и ньылалiс дульсö... Андрейыс одзын сё сулалiсö пасьтöммес, медодз Кошель Иваныс, некыдз эз веритсьы, что Иваныс абу ни, что некöр ни мортыскöт оз пантась, кöр быдмисö öтлаын, пантасьлiсö пукаланiнын, и зонкаыс эз вöв пон кодь: кужис кыв горöтчыны, кужис томмескöт гажöтчыны, и мый понда мортсö? Недолыт вöлi Андрейыслö, топ сы пулясянь кулiс Иваныс, топ сiя лыйис ёртыслö, кöда нем умöльсö эз кер. Синваэс петiсö Андрейыслöн, сiя видзöтышавлiс воныс вылö, дивуйтчис кыдз сiдз Мишаыс вермö гажöтчыны, сёйны, топ нем эз вöв? Кыдз?!...

Пукалiсö пызан сайын, синнэзнаныс пантасьлiсö öтамöдныскöт, но Андрейыс воныс синнэзiсь эз адззы тöждiсьöмсö, адззис, что Мишаыслö кокнит, нельки гажа, что сiя лöсьöтчö бы мыйкö висьтавны-серавны, натьтö, шуны: «Мый нö тэ? Нывка моз... Горзан йöзыс понда... Ас йывсит тöждiсь, а кулöммес понда эн ни думайт!»

Андрейыс пукалiс пызан сайын, эз сёй, видзöтiс ёрттэс вылö, лöсьöтчис бы баитны воныскöт, но Мишаыс юрсö бергöтлiс мöдöрö — дзебис кыдз синнэсö бы, эз баит.

Чулалiс рытыс, кöда вачкисис вöт вылö. Чулалiс сiя ойыс, кöр Андрейыс ончир эз лэдз, и лун-мöд сёйны эз вермы, пыр син одзас сулалiс пасьтöм Иваныс, бöра веськыта юалiс: «Но мый, Андрей? Гленитчö отирсö вийны?» «Ме эд эг тэныт лый, эг... Бокö пезьдöтi...» — дорйö асьсö солдатыс, умöль ой-лунсö чожажык бы кольö бöрö, но нiя нагладь кыссьöны дыржык.

Служитö одзлань Андрейыс, топ абу ни ачыс — öшöм или мыйкö öштöм, шогöтся-шогöт сьöлöмыс вылын, кошшисьö сьöлöмыс, баитö бы кинкöткö, янсöтö тöждiсьöмсö, но некин эд сэтшöм ёртыс абу, воныс и сiя бытьтö йöз, пыр пиннес гер, пыр гажöтчö аскодя гажöн, дзик пленнöйесö лыйлöм бöрсянь мыйкö сэтшöмö адззöм, донаö, бурö, и эм мыйöн ошшасьны, гажöтчыны, польдыны, висьтавны и мыччавны, бытьтö сiя вонысся и смевжык, и вынажык, и кодяжык. Мишаыслiсь нем он босьт, синнэзас он сьöлав, кылiс ни Андрейыс, кыдз ошшасис иньнас, но и мед... Ась и мунö штабас да служитö ― чышкö офицеррезлiсь бöр гöгöрнысö, а сылö кыдз ен шуас... Андрейыс пондас служитны одзлань, сiя айыс кодь жö мывкыднас дундöм-тувдöм, мый висьталасö, сiйö и керас...

Андрейыс, кыдз лыйлiсö пленнöйесö, солдаттэс коласiсь öштiс ёрттэсö: некинкöт эз дружит, етша баитiс, а воныс пыр солдаттэс коласiсь адззис аслыс ёрттэз, сэтшöммезö, кöдна бытьтö кодяжыкöсь вонысся, нiя, кöдналöн бытьтö эм деньгаок или нiя, кöдна сы кодь жö герпиннез — серавны бы ёртнысö, дойдны кывнаныс.

Одзлань Андрейлö службаыс лоис шогöт кодь, öтiк лун ни эз бы ов эстöн, эз кывзы унтерныслiсь кижган голоссö, эз видзöт лёк чужöмсö, талун жö бы мунiс ни гортö, да эз лысьт пышшынытö, полiс, что шедас. Кыкöн бы... Кытшöм бы эз вöв воныс, но оз-оз да кыскö сьöлöмыс Мишаыс дынö, надейтчö сы вылö, öтiк вуджись эд.

Сэтöн вöтiс тулыс. Визывтöны ни шоррез, сьылöны кайез, тöлыс пöльтö гортланьсянь, рамыника лолалö рожабаннэзö да топ шушкö пель одзö: «Чожа, Андрей...» Быль эд чожа сылiс быдöс лымыс, сэк жö пондiс петавны зелёнöй рöма турун. Кыдзкö Андрейыс сибöтчис воныс дынö да горöтчис: «Мый нö?.. Кöр ни пондан писаравны?»

— Кытшöм писаралöм?! — рыг-рыг серöмтчис воныс. — Чожа иньдасö пуляэз кутавны, а тэ писаралöм... Бат, гортнымöс ог адззылö... Пышшыны, Öндрей, колö! Сöтам жö гортö! Али тэ ныкöт öтлаын бы мунан? Видзöт, кыдз гöрддэс пондасö пыкны, эна вешьяннэзаныс какасö, а ми тэкöт шедам гöрддэслö, а нiя уна оз пондö баитны, медодз юаласö, кыдз ми тэкöт Кошель Иваныслö лыйим, но и асьнымöс... Сяткасö кымöссэзаным и абуöсь! Кошшы Андрейсö да Мишасö! — бöра серöмтчис, кыдз орсiс баснинас, баитiс горöн.

— Эн горöн баит! Кыласö, — Андрейыс осудитiс вонсö.

— Ась кылöны! Нiя комиöн оз вежöртö. Унтерыс сэтшöм баран, кöть майöг юрыс вылын лöсав...

Эта коста Колчаксö гöрддэс пондiсö пыкны, и офицеррес висьталiсö, что ашын-мöдлун быдöннысö иньдасö фронт вылö.

— Не-е-е, Öндрей... Ме, батя, тышкасьнытö ог мун, нем сэтчин эг öшты. Колö нылö, ась öтамöднысö сёйöны... Шыбыльтам гортö!

— Мый лёбат?! — дынаныс сибöтчис унтерыс. — Молчать, кержаки!

— Дык ето... Как его, господин унтер? У товарища живот заболел, наверное нехорошая болезнь мучает, зараза настоящая... — Мишаыс пондiс ректасьны командирныскöт.

— Торйöтны!! — синнэз ыждöны командирныслöн.

— Дык того и етого, господин унтер! — одзлань гардö солдатыс. — Жаднöй кодь менам землякö: уськöтчас тшыг пон моз сёяныс вылö, а сыбöрын шогалö, будь проклят бы...

— Туземцы! — бокö вешшö командирныс, а Мишаыс сералö.

— Ми тэнö тöдам и огö... Чожа он понды миян вылын ыксыны...

— Эн горöн баит! — бöра вонсö падтö Андрейыс.

— Тэ пов...

Сэтшöм басни кык вон коласын, сiдз ни сьöлöммезныс кыскöны гортö, что оз ни вермö бы видзчисьны талуння ойсö — локтас рытыс и сöтасö! Но рытнас янсöтiсö öтамöдныс дынiсь: öтсö сувтöтiсö дневальнöйöн, а мöдсö заргисö кухняö. Тулысся ойыс рам да шоныт. Андрейыс сулалö пост вылын. Гажтöм. Синваэз петöны, öтнас ни бы пышшис да жаль Мишаыс, кöр баитчисö керны öтлаын.

Дженыт тулысся ойыс, да чассэс нюжалöны. Казармаын узьöны солдаттэс, бат, вöтöн кытöн и эмöсь. Курыт оланыс Андрейыслöн: оз кö гортö вермö мунны, пуксьöтасö вагоннэзö и — фронт вылö, а сэтчин пуляыс оз юась...

Асывланяс ни, кöр пондiс югдыны, дневальнöйыслöн пондiсö куньсьыны синнэс, сiдз и водiс бы да узьыштiс, но пондыв-ко! Шедан кö, уна оз баитö — фронт и быдöс сэтöн! И сулалö солдатыс пост вылын, сулалö-пессьö оныскöт, видзчисьö мыйкö, оз тöд мый. Нач ни югдiс, а воныс абу, пышшöм йылiсь нем ни думайтны... Сэтöн вöлись дзуркнитiс казармасис ыбöс, часовöйыс лэбтыштiс юрсö, видзöтö: пырöны Мишаыс да унтерныс. Осьта ыбöсöт тулысыс ловзисис сöстöм да шоныт руöн. Дневальнöйыс нюжöтчис офицерыс одзын, кöда бытьтö солдатсö эз адззы и эз кыв, сылö пель одзас мыйкö лёбис Миша, топ инмöмась кык ёрт, и оз вермö янсöтчыны. Мишаыс бöра эд ошшасьö, что сiя богатöй семьяись, эм нылöн вит руб золотöй деньга, вöввез нёля, мöссэз куима, что иньыс том, и колiс бы ветлыны гортö.

Унтерыс лэбтыштiс кулаксö, мыччалiс солдатыслö, вежöрт, что кöть мымда, Миша, командирытлö кöсйы золотосö, гортö оз лэдз.

— Кыдз служба?! — пиннесö гичыртiс ни унтерыс Андрейыс одзын. Солдат нюжöтчис офицерыс одзын öддьöнжык, ыкöстiс:

— Служитам, Ваш благороддё!

— А эта мый? — командирыс кутчисис Андрейыс ремень бердö, гардыштiс, зэлöтiс сiдз, бытьтö лöсьöтчис кынöмсö орöтны кишкаэссорöн. — Мыля ременьыс öшалö, кыдз пöрись инька бердын, а?! — Десять суток ареста! Понял?!

— Нет! — синнэс бав Андрейыслöн.

— Как?! Или ты на самом деле дурак...

Эта коста Мишаыс офицерыслö бöрсяняс кыдз мыйöнкö чорытöн сöтiс, сiдз мöдыс и пуксис... Öмсö осьтiс часовöйыс,

— Мый дундiн?! — кижгыштiс Мишаыс, кисис босьтiс карабинсö. — Лок!

Сымда нiйö и адззылiсö.

8

Рыт. Видз вылын турун коласын пондiс герчкыны кай, лёкжыкöсь лоисö номмес, ыркытжык руыс, смевжыка чирзiсö кöбывкаэз.

Зонкаэс тышкасьöв-керисö номмескöт, видзчисисö, кöр посадын лöнясö отирлöн голоссэз. Вöлись Мишаыс и иньдöтчис гортö. Сiя пышшалiсь моз дзебсисьöмöн сибöтчис керкуныс дынö: кыт баöн, кыт котöртiс, кытöн туруныс коласö водлiс, кывзiсис, видзöтчис. Посöдз ыбöсныс вöлi осьта, гортын быдöнныс чöскыта узисö, только айыс мыйлöкö петöма карта вылö.

Сiя медодз и панталiс зонсö, сьöвзис, кöр колiс бы здоровайтчыны зоныскöт, шуис: «Эн я тэ бöра гортö лок юасьтöг? Эн я тэ...»

Седала вылын борддэзнас шовкнитiс петухныс, китöстiс, кыдз ыкöстiс: «Мый узят, кокöльöсь юррез?! Гöсь локтiс!»

Иньыс узис гöбечын, саймис, шупыта чеччис, повзис, пондiс синнэсö тiльны да видзöтны мужикыс вылö, бытьтö эз верит, что одзас Мишаыс, и дыр мыйись вöлись чеччöвтiс, öшис, топ падмис: радувья öшöтчис бы мужикыс голя бердö, но стыдитчис пöрисьжыккезсис. Батшкоыс пырис керкуас, нюжöтiс чукасö, нюмыртiс öмсö и бöра пондiс кижгыны: «Мый нö? Кысянь? Одз тай служитсис...»

— Тупкав джыннянтö! — мамыс ыкöстiс айыс вылö. — Дзескыт керкуас...

— Пышшим, — шынньöвтiс Мишаыс.

— Кыдз пышшит?! — öмсö осьтiс айыс. — Кыдз пышшит?! И мый öнi лоас?! — чужöмыс чочкоммис, öшис, повзис, топ сiдз кинкö посöдзас и кывзiсьö, вот пырас, кутас öтлаын зоныскöт, нуöтас и сымда и эм.

А мамыс тойис коккезнас зоныс гöгöрын да дзульзис:

— Дитя тэ менам, кага! Еныс тэнö вайöтiс! Пышшыны и колiс! Ась пон чужöммес öтамöднысö вийöны да сёйöны, ась! А тэ, Микаль, иньыткöт пондат уджавны, сэк ми вöлись и пондам овнытö! Сэк вöлись ась миян сьöрö отирыс и вöтчöны!

— Мам, ме эд бöр муна, — висьталiс зоныс. — Меным гортын овнытö оз туй, кутасö эд... — Малыштiс иньыслiсь гладь юрсö, содтiс. — Вайö няньтор да луккез, и ме муна. Ашын кинкö локтат Кöкушкаас, ми пондам видзчисьны.

— Кинкöт?! — мурзис айыс.

— Öндрейыскöт...

— Тьфу! — сьöвзис айыс. — Кык арттöм-ладтöм, юртöм бараннэз!

Мамыс чывкнитiс комö, петкöтiс рудзöговöй чöвпан, сюйыштiс зоныслö конувтö, висьталiс кокнита:

— Кристос тэкöт! Мун да горттö эн жö бöра вунöт. Зоныс кокнита петiс керкусис, чеччöвтiс посöдзсис садниканыс, медбы некин эз адззыв и эз тöд, что вовлiс гортö.

9

Одз асывнас, шондi петаныс гöгöр, гортсис петiс Таня, мунiс-пыркöтiс лысвасö туруныс бердiсь. Инька тэрмасис, шагнялiс, топ коккес увтiсь мусö эз кыв и эз адззы, сьöлöмыс быркайтiс — кыскис том мужикыс дынö, кöда видзчисис Кöкушка расокын. Таняыс бытьтö мунiс вöвла: пельпоныс вылын сермöт, дубас подолсö лэбтыштöм, мед туруныс бердiсь лысваыс эз вад, киас няньтор, пиас нянь чöвпан, сiдз сёянсö дзебöма, что ылiсянь адззан кытшöм моросвевья том инькаыс, кыдз чöлöса сёртни — окышт и росолыс петас бы.

Асылыс ыркыт. Бизгöны номмез. Кыз лысваöн миссьöны видззез. Осяэз лöсьöтчöны ни гумсявны, рудзöггез лэдзисö ни шеп, туруннэс быдмöны син одзын сукöсь да кузьöсь — талун-ашын ытшкись.

Бур нянь отирыслö кöсйö гожумыс, подалö тöв кежö вöзйö пöт олан. Только бы сулалiс погоддяыс, сэк сю лоас, турун керасö, да мунiсö бы юр вылiсь чочкоммес, отирсö колисö бы овны повтöг да тöждiсьтöг.

Таняыс мунiс видз вылöт, гажöтчис и тöждiсис, сьöлöмыс быркайтiс моросас: том инькаыслö вöлi гажтöм, да гажыс усис кыдз кымöрсяняс, но эд и сiя бöбöтчана: гусьöн бы том инькаыс мунiс мужикыс дынö, мед оз казялö кытчö мунö, оз думайтö, что жöникыс видзчисьö. Шондiыс ештiс мыччисьны вöрыс сайсянь, югöрнас эшö эз ешты нюжöтчыны кöз йыввезöдз, инькаыс вöлi ни Кöкушкаын, бергöтлiс ни юрсö межаыс вылын, нёджжасис гулю моз.

Саймисö ни кöз увтын пышшалiссес, куйлiсö турун коласын, тышкасисö номмезкöт да видзчисисö — видзчисисö гортiсь Танясö: Мишаыс сiйö и керис шыннялiс, а Андрейыс нюмыртiс öмсö, топ лöсьöтчис горзыны, но медодз син вылас сылö жö и усис Таняыс, повзьыштiс, сьöлöмсö топ кинкö кутыштiс, мыйкö дзик моросас орыштiс, мезмыштiс, и пондiс перытжыка вирыс тёпкöтны кöсичаэзас. Кажитчис, что том инькаыс, кыдз том туруныс жö, быдмыштöм, ёнмыштöм, моросыс чердыштöм, рожабаннэзас орсö югыт вир, и быдöс сiя сэтшöм, кыдз мичöтöм кольть, бытьтö ылiсянь шонтö-пыкö жарöн. Андрейыслöн пымалiсö кисис долоннес, кымöсас сöдзис бисерöн ньылöмыс, но Таняыс эз ни вöв сылöн, эз ни лок сы дынö, эз вай гажсö, шонытсö. А Мишаыс куйлiс бокас, шыннялiс, видзöтiс иньыс вылö, сiдз бы и жмитiс, окыштiс да окыштiс и сыбöрын бы син сайын ниртчис да ниртчис.

— Татчö, — негорöн шыасис Мишаыс, лэбтiсьыштiс туруныс коласiсь да öвтыштiс кинас.

Шутньöвтiс каёк, öвтыштiс бöжокнас кыдз ув вылын. Таняыс перыта сибöтчис мужиккес дынö, пондiс сьывны-баитны, гажöтчыны каёкыс моз жö, веськыта видзöтiс Мишаыслань и сэтöн жö Андрейлö козьналiс гажсö: дзар керас да бöра, топ сiдз и жмитчис бы Андрейыс бердö, кыдз тай вöвлi рыттэзнас, нывканас, кöр зонкаыс кольлавлiс пукаланiнсянь. Сiдз я вöлi, но Андрейыслö вачкисис сiдз, и сiя юрсö бергöтiс мöдöрö, нетшкöвтiс си турун, пондiс сiйö перститны чуннезас.

Мишаыс иньыс киись босьтiс нянь, пиньöвтiс-торйöтiс чöвпансö: джынсö сетiс воныслö, мöд джынсö курччöвтiс öмтырнас, сёйис да шуис: «Быгья сюромка бы эшö, сэсся нем ни бы эз ков!»

Няньыс небыт, синма, тшыгувья сёйсис чöскыта, и чожа мужиккес рудзöговöй чöвпансö кушки-кашки керисö.

— Ме муна, — мужиккеслö висьталiс инькаыс.

— А ме кольлала, — висьталiс Мишаыс и иньыскöт иньдöтчис гортлань да кыдззес сайöт моз, ась оз адззылö, Андрейыслö колисö шогöт, кöда поздiсис сьöлöмыс бердö и пондiс овны сэтчин.

Сiдз сыбöрын вöрас и öвтчисö: оз-оз да бöра шогöтыс жмитыштас сьöлöмсö, бöра юрас пöльтыштас Таняыс йылiсь дума.

Мишаыс янсöтчис иньыскöт и вель дыр эз лок. Андрейыс пондiс сунасьны муыс вылын куйлытöн, но ланьтыны эз вермы, кöр номмесö вежисö лöдззез и ройöн лэбалiсö юрыс гöгöрын.

Луншöр гöгöрас, кöр весь овтöнняныс мыдзисö куйлыны, Мишаыс лэбтыштiс юрсö, нюжöтiс голясö, пондiс видзöтны межалань и шуис:

— Кин жö миян моз öвтчö этчин? Оз я миянöс ни кошшö?

— Кин, кин? Абу я Якуня Ваняыс? — шыасис Андрейыс.

— Сiя и эм! — серöмтчис Мишаыс. — Но Иван-баран... Кытчö питкыльтö. Эз я босьтö армияö жö, а мыля нö?.. Эй, Иван!

Пантасисö томмес, здоровайтчисö. Иваныс унажык видзöтiс карабин вылö, ошшасис, кыдз шедлiс армияö, пышшис чочкоммес дынiсь, да гортö оз лысьт локнытö, шатласьö, вердчö пиканнэзöн да тшаккезöн, кöдна петöны, но етша.

— Дыр я этадз пондам вöрас овны? — тöждiсис Иваныс. — Вот Якуня Ваня! Оз бы лöсяв эд.

— Мыля оз лöсяв? Öддьöн бур! Оз ков уджавны, куйлы да узь и быдöс сэтöн!

— Оз жö куйлiссьы, да мый керан? — баитiс Иван ёрттэслö.

Шогалiсö весь олöмсянь, видзчисисö рытсö. А рытнас, видзöтöны, межаöт туиссэзöн шагнялöны томмез — этö Таня Лизакöт бытьтö мунöны ягöдла. «Мыйлö Лизаыс Таняыскöт локтö татчö? Быдöс я бур гортын?» — повзьыштiс Андрейыс, нывкаыс сылö лоö бытьтö бы родня, но и пукаланiнсяняс эд кольлавлiс жö...

Инькаэс локтiсö, вайисö пöт сёян и юан, Лизаыс виноватöя пондiс баитны, что сiйö татчö иньдiс айыс, что тшöктiс нуöтны Андрейыслö — эд сiя лоö сват нылö — кытшöмкö сёянторрез, мед оз тшыгьяв вöрас.

Сiдзкö... Тöдöны ни деревняас ны йылiсь...

— Ась тöдöны! — гажöн баитiс Мишаыс. — Оз эд вöрсис гумыштö, а пондасö кö, эм тай пишальыс...

— Якуня Ваня керам! — Иваныс сёйис, сэк жö содiс вын, гажмис, синнэзас пондiс орсны оланыс, басниыс чожмис. — Öнджа лоас!

— Тэ, Ванька, пукалышт, а ми нывкаэсö кольлалам, — ёртныслö висьталiс Мишаыс.

— Кольлав менö, Öндрей... Ме тэныт мыйкö висьтала, — Лиза горöтчис Андрейыслö.

— Мый висьталан? — дыша чеччис Андрейыс.

— Мый висьталас?! — сералiс Мишаыс. — Бытьтö он тöд, мый нывкаэс висьталöны зонкаэслö? Эх тэ! Тэрмась, а то кольччан.

Öттэс сэтчин, мöддэс кольччыштiсö, кежисö мöд туй бокас. Лöнь рытыс. Кылiс, кытöнкö кöкис эшö кöк. Лиза серöмтчис да горöтчис Андрейыслö:

— Кывзы... Тэ понда öтiк нывка гажтöмтчö... — Тэ я мый я? — зонкаыс кутiс кисö нывкаыслiсь, жмитыштiс.

— Лэдз! Ме пола... — чужöмыс гöрдöтыштiс Лизалöн.

— Эн пов. Ог эд курччась.

— Кыдз курччöвтан? — синнэзас нывкаыслöн сэтшöм гаж, бытьтö орсö бы, и Андрейыслöн сьöлöмас вöрзис сэтшöм чувство, бытьтö пантасис Таняыскöт, сiдз бы и жмитыштiс, но асьсö эз лэдз сiдз кернытö. Нывкаыс кывнас дзик шонтö, но матö оз сибöт — зэв он лок.

Пуксисö колода вылö, пукалiсö туйыс бокын да негорöн баитiсö сэтчöдз, кытчöдз эз понды кывны Танялöн голосыс, кöда мунiс гортö сэтшöм рад, топ лэбзис.

— Тэ асьтö берегит, — янсöтчикас горöтчис Лиза.

— Мый тэнат юрыт висьö ме понда? — шынь эз кер зонкаыс.

— Сьöлöмö висьö, бöб öнджа! Айö эд бöра пондас юавны, мый пö сэтчин керö ни? Порозыс кутлöма ни вичкуыс дынын Мишаыслiсь айсö да юалöма, мый ни пö зоныт керö? Кыдз пö служитö? Эз я гортö мыччисьлы? Порозыс эд мортсёйись кодь, «курччöвтны» вермас, сiя пö эшö кытшöмкö командер.

— Ась курччасьö, — шынньöвтiс Андрейыс. — Кытчöдз пиннес эмöсь...

— Окасит бы да сiдз янсöтчит! — сералiс Таняыс, видзöтiс Андрейыс вылö, дзик ачыс бы окыштiс зонкасö.

— Ештам окасьнытö, босьтас кö инь вылö, — юрнас легнитiс Лизаыс, чатыртчис и мунiс гортлань, бöрас сэсся дзар эз кер, а Таняыс шагнялiс нывкаыскöт ордчöн да куим-нёлись бергöтлiс юрсö, видзöтiс Андрейыслань, кöда сулалiс сэтчöдз, кытчöдз инь отирыс эз саясьö чукыля туйыс сайö.

Кольччисö мужиккес кытчöдзкö овны вöрын. Чулалiс эшö öтiк ой. Ашынас одзся-одз, Лизалöн мамыс только ештiс чеччыны, кыйны баличаэсö, миссьыны рожасö да сувтны еныс одзö юрбитны, кыдз посöдзаныс кайисö солдаттэз, брынгисö ыбöсас, пырисö керкуас. Мортсёйись чужöмаöсь и эмöсь, синнэзаныс сэтшöм лёк югöр, что хозяйкаыс пондiс дрöжитны — кыв эз вермы горöтчыны.

— Кытöн жöникыт?! — солдаттэс бöрсянь джодж шöрöдз чывкнитiс Пороз Миков.

— Узьö. Мый сысянь колö?! — тырппес лёбöтöны инькаыслöн.

— Саймöт!!

Чеччис Лизалöн айыс, Лизаыс жöдзис ни команыс, солдаттэс сiдз и пырöны бы джоджуланыс, полатьö нюжлалöны голяэзнысö.

— Мый тiянлö колö? — сералö хозяиныс. — Кинöс öштiт?

— Кинöс, кинöс? Кытчö рыттэзнас котрасьö нылыт? Кинкöт вöрас пантасьлö?! Висьтав, а то видзöт кыдз спинаат йöктас шатьыс! — мурзьö Миколыс.

— Тi ассис юалö, кытчö ветлöтö нывкаыс. Меным эд оз висьтась, бат, куим жöник видзö да...

— Öтiкö пантавлö, эталiсь зонсö! Öндрейсö-бандитсö, кöда пышшалö! Одö я сiйö джоджуланыт видзö?!

— Да мый тi и баитат, сват?! Кинöс ми джоджулас гожумнас дзебам? Пышшалö кö Öндрейыс, натьтö, эд вöрын жö гожум шöрнас, оз жö юрсö сюйышт джоджуввезас...

— Кин тiянöс тöдö?! Бат, и сюйö! — ыксö Пороз Миков, солдаттэс штыккезнаныс сiдз и бытшкöны бы быд пельöсö, джоджувсис ыбöссö осьтiсö, наган хозяйкаыс спинаö мöртiсö да ыксöны: «Пыр одзас!»

Асылыс эз ешты бытшöма югдыны, кыдз Лизаэзлiсь соровтiсö быд угöв — чом, карта, гиддэзö пыралiсö, кошшисисö сэтчöдз, что мамыс бердö кутчисис кынöм висян. Но некинöс эз адззö, сiйöн сорöн и мунiсö.

— Адззам! Кутам! — кулаксö жмитлiс Пороз Миколыс. — Шедасö! Сэк вöлись öтлаын панялат! Вöлись!..

— Эн полöт! Адззöмыт мыйöн полöтны... — лöгасис Лизалöн айыс да веськыта висьталiс Миколыслö, кыдз синас бытшкис.

— Мы-ы-ый?! — бытьтö эз вежöрт дружиналöн командирыс да сöтiс-вачкис спина кузяс шатьöн.

Зубыт я лоис мужикыслö, шы эз сет.

Кошшисисö и Андрейезас, сiдз жö бергöтiсö быдöс, дзик Андрейыс вермис гортас дзебсисьны нельки рос увтö, рос угöлас. Гарйисисö Мишаэзын, сыбöрын комендантыс дружиналiсь командирсö корис дынас и пондiс тшупны:

— Тэ этö... Дружиналöн командир али кин?! Талун-ашын дизертирресö кут и вайöт этчö! — мыччалiс пызан дынö. — Он кö кер, он кö кут, ме тэнö, калянöс, тöдан мый кера!..

— Вöрыс паськыт, — ружтiс Пороз Миколыс. — Кысь ме нiйö адзза?

— Адззы! Мый вылö сэк чукöртiм дружинасö? Кин эстöн пондас властьсö видзны? Ми тэкöт или эна... Модьöны ни эд, бытьтö пö вöрас партизаннэз олöны! Отирыс нылö ни веритöны, а не миянлö. Чукöрт дружинатö, босьт эшö солдаттэз и — аллё! Кутав дизертирресö!

— Бöжжезныс абуöсь, — ныр увтас бобгыштiс Миколыс и петiс комендантыс дынiсь.

Туйез вылын пондiсö öвтчыны солдаттэз да дружинниккез, бытьтö сiдз нылö пышшалiссес и шедасö, петасö вöрсис и на... Кутö да нуöтö комендантныт дынö...

Эта коста Андрейыс ёрттэскöт öтiк кöз увтын эз пукалö, а ветлöтiсö: талун эстöн, ашын сэтчин. Нiйö кошшöны ылiсь ыббез сайись, а нiя Картабöрас пукалöны да сералöны. видзöтчöны и кывзiсьöны, мый керсьö посаданыс; кошшöны пышшалiссесö Картабöрись, нiя эта коста öвтчöны ылiсь ыббез гöгöрын.

Гожумыс вынсялiс. Луннэс содiсö-содiсö да пондiсö бöр ни чинны, но чинöмыс эшö эз на тöдчы. Лоис жаржык. Важынкодь ни дугдiс цветитны горадзуль, пондiс чорзьыны видззез вылын турун.

Отирыс талун-ашын петасö ытшкисьны, а Мишаыс ёрттэскöт весь олöны, оз тöдö кыдз öштыны кадсö, вöрын вердöны ном-гебсö, шатласьöны да нянь сёйöны. Гортiссес тшыгйöн оз видзö: то Мишалöн иньыс, то Андрейлöн айыс, то Иванлöн мамыс, гортсиныс пестерöн петасö бытьтö тшакьявны, а асьныс вöрас нöбöтöны сёян. Гожумöн отирыс гортын оз пукалö, не öтiк дак мöдiк вöрас пантасьöны пышшалiссеслö, кыдз шуам, Ректан Степан, кöда гортсис петöма вöрокас керавны майöггез, инмöм пышшалiссес дынö, рад лоöм и пондöм быздыны-ошшасьны, асьсö ошкыны:

— Тi, челядь, Петыр луннас локтö ме ордö гöститны, иньö сэтшöм чöскыт пирöггезöн вердас, мыся, чисто кывнытö ньылыштат. Быль!

— Локтам. Гöститöт, Степан дядь.

— Тэ, дядь, ачыт, натьтö, пирöггесö йöзiсь жö сёйлывлан да. Иньыт пыр жö мылякö праздниккезнас кортöн ветлöтö, öктö сёянсö, — сералö Якуня Ваня, мый зонкаыслöн син одзас, сiя и чеччöвтö öмсис. — Якуня Ваня, тöдан одзынöтай ме тiянö Петыр луннас пыралi, а тэ меным квассö юнытö эн вай, а аслат горшыт, кыдз пондас косьмыны, сiдз и котöртан миянö.

— Грех, Ванька, отирсö серавны, — дузгыльтчис Степаныс.

Мужиккес кыввезнысö öманыс бергöтлöны да пиннезнысö кеслöны вöрын туй бокын, нач нем керны. Öттэслö быль нем керны, а Степаныс... Мунiс эд уджавны, да вунöтiс уджыс йылiсь, сiйöн сылiсь Якуня Ваняыс и юалiс:

— Степан дядь, тöдан мый... Эз я тэнö миян дынö Пороз Миков сватыт иньды? Мылякö уна бы тöдан и адззан, черыт эм, а он керась, миян сьöрын вöтлiсян бы. Миков сватыт эд öнi ыджыт начальник. Сэрпöсь командер дружинанытлöн и миянöс кутö бы...

— Тэ мый, тэ мый, Ванька?! Адззöмыт сватсö... Отопки да чакчури. Öтiк бороздаын ми, Ванька, сватöкöт ог гöрö, и тэ, мый оз ков, эн лёб. Ме тiян кодь жö мортыс... Не бöрам, не одзам, не юскыны, не доддявны. Гöрддэскöт эг нюкьясь и чочкоммескöт ог тöдчы, кыдз ен шуис, сiдз и ола...

— Сiдз, — эз верит Якуня Иваныс, чикыртiс синнэсö да видзöтiс кöз вылö, кытöн таво силь öшалiсö голиэс, и питьыртiс уркай. Кöдзыввез дзöрисö-уджалiсö мыр гöгöрын.

Мужиккес вель дыр пукалiсö кöз увтын, сыбöрын Андрейыс дульсö ньылыштiс да шуис: «Сёйны бы пöтжыка да сюромка юыштны!»

— Мый нö тi, челядь? — юалiс Степаныс. — Кытчöдз этадз пондат öвтчыны али од думайтö одзлань овнытö? Сёйнытö...

— Гусясьны пондам, дядь! — реш видзö Иванлöн öмыс, нюжöтiс чукасö, öтiк синсö кунис: рожаыс пондöм тошсявны ни, но тошокыс шочыник-кизерик да небытик гöн кодь, да талун зонкаыт эшö абу миссьöма, син дорас нятьтор лякасьöма, повзьöтлö.

— Талун тэнчит мырддям пирöггетö, ашын сватытлiсь горшсö зэлöтам! А мöдлун... Ох-хо-хо, иннезнытö мырддям и пондам вöрас овны да сьывны.

— Ой-ой! — Степан клап вачкис долоннезнас бокас. — Грехы-ы-с! Чарöтас еныс.

— Оз чарöт!

— Тырмас тiянлö кöтнытö! Мунам! — баснисö дзугис Миша.

— Кытчö бы? — Степаныс нюжöтiс голясö.

— А уджавны, дядь. Ми эд аслыным деревня бы керам, керкуэз тшупам да лэбтам, весöтам му и пондам овны да серавны тэ коддесö.

Зонкаэс муыс вылiсь чеччисö, пыркöтiсö ёгсö вешьяннэзныс бердiсь, иньдöтчисö пыдöжык вöрас. Степаныс сьöраныс жö, висьталiс, что сылö колö бы ветлыны Печканöдз, йöр пö колö видзöтны, медбы осяыс эз жö травитчы.

— Ми Печканас, дядь, ог кежö, мöдöрö вартам! — висьталiс Якуня Ваня. — А ме бы видзöта керкуэзнытö, бат, отсала тшупсьынытö, — бобгис Степаныс.

Лöз небоын шондiыс видзöтчис веськыта, топ сералiс мужиккесö. Небыт да кокнит тöлок гусьöн борддэзнас öвтышалiс вöрас, койис сир дук. Мужиккес перыта мунiсö, колисö бы Степансö, но кольны эз вермö: вöтчис мужикыс, бытьтö мортыслöн некытшöм удж эз енды.

— Сулалö! — кыдз мырö падмис Иваныс, сувтiс, бергöтiс юрсö Степаныслань, кöда пымалöм и кымöсыс вылiсь сатшкöтiс-вотялiс ньылöм.

Сувтiсö. Иваныс мышкыртчис да коккес дынiсь нетшкöвтiс вужжессорöн гöрд гриб, сыбöрын зэв шагньöвтiс Степаныс дынö, плеша юрыс вылö сувтöтiс грибсö и гажöн висьталiс:

— Эн вöрöтчы, Степан дядь, а тэ, Андрей, босьт пишальсö, мун эта кыдз дынöдз и шваткы... Ме видзöта, кыдз инман грибас, писькöтан пулянас Степан дядьыс юр вылiсь тшаксö... Сэк Якуня Ваня лоас!

— Тэ мый, племенник?! — Степаныслöн рожаыс чочкоммис, нюжалiс, тырппес пондiсö дрöжитны. — Ванька...

— Эн пов, дядь. Андрейыс бура лыйсьö, он кö вöрзьы, пуляыс тшаксö бытшкас, а вöрзян... Ас вылат горзы. Сулав веськыта! А тэ, Öндрей, тэрмась, мед дядьöлöн повзьöмувьяс сьöлöмыс эз жö ешты потнытö!

— Вöрöтчы, — Мишаыс ни воныслань öвтыштiс юрнас.

Андрейыслö некытшöм охота эз вöв лыйсьыны, а Степаныс чуть эз горзы ни, лöсьöтчис уськöтчыны пидзöссэс вылö да юрбитны зонкаэслö.

— Öндрей, тэ нö мый, Якуня Ваня! — модис Иваныс, öт кинас Степаныслiсь няпыртiс йöрнöссö спинаыс вылiсь, мöднас грибсö видзис юрыс вевдöрын.

— Челядь... Племенниккез, эд лыйö... Грехö пыри, душаöс сэрпöсьтi, сэсся ог понды, ась ачыс Пороз пияныс тiян сьöрын вöтлiсьö, и куим рубыс сылöн оз ков, господи прости!

— Лэдзам — огö? — Иваныслöн сьöлöмыс кыдз вöрзис, юалiс Мишаыслiсь, кöда серöмтчис да шуис:

— Мыйлö? Сiя эд ачыс миян дынö локтiс — кошшис кымöсас пулясö...

Öнi Андрейыс вöлись вежöртiс, что Степаныс былись ны дынö локтöма, медбы отсавны кутны сватыслö, но и лöгасис, пельпоныс вылiсь лэдзис карабинсö, чорыт да кузь шаггезöн ылöжык мунiс ёрттэс дынiсь, кöдна коласын пидзöссэс вылын сулалiс Степаныс да горзiс, а Иваныс видзис юрыс вылын тшаксö и сералiс.

Вöрын жар. Руыс топ сукмöм. Андрейыс сувтiс небыт нитш вылö, лэчыта видзöтыштiс ёрттэслань, думанас пернапасасис, лэбтiс карабинсö.

— Криста ради-и-и, челядь, эд вийö-ö-ö, — горзiс Степаныс.

Щёлк! Вöрыслö топ вачкисö плетьöн да зубыта эд... Степаныс лиг-ляг пöрис бок вылас и трек эз кер. Юрыс вылiсь грибыс усис мышкас моз. Андрейыс тувдiс, дума сотыштiс: «Вийи эд!..» «Вийис эд», — Мишаыс повзис жö, синнэс ыждiсö, а Иваныслöн киэс пондiсö дрöжитны.

Кивзыштiс да жарнас пöдiс кыр. Кöдзыввес эз дугдö котрасьны мыр дынын. Уннялiсö лöдззез. Медодз Мишаыс чепöссис Степаныс дынö да бергöтiс спинаыс вылö.

— Эд вийö-ö-ö, — кивнитiс Степаныс, осьтыштiс синсö.

— Тьфу тэ, — сьöвзис Мишаыс да серöмтчис.

10

Степаныс вöрсис петiс, кыдз шуöны, не кулöм, не ловья, дзик водлiс гробö, но чеччис, пышшис. Оз и тöд кыдз локтiс гортас, веськыта вöрсяняс дзебсисис карта выланыс да пондiс шогавны кынöм висянöн: оз ешты лэбтыны вешьянсö, бöр ни лэдзö. Рытöдззас мужикыс нач сырсмис: синнэс топ вöйисö сингуэзас, нырыс нюжалiс, голосыс пондiс сибдыны.

— Кулас ни, кулас! — посöдзас жöдзис Степаникаыс, эз тöд, мый керны, кыдз отсавны мужикыслö.

— Мый лоис?! — сэтчö локтiс Пороз сватыс, бурундук вылын пöввес коккес увтын дзуркнитiсö.

— Ог тöд. Кулас ни, — синваэсö чышкис Степаникаыс. — Вöрö тай ветлiс да локтiс и пондiс шогавны.

Отир локтiсö уджалансянь, быдöнныс лöсьöтчисö шоччисьны да ашын одзся-одз бöра мунны уджавны.

Пороз Миколыс лякасис и ыксö: «Мый лоис Степаныслö?! Кытöн сiя?! Ме сыкöт ачым баита!» — висьталiс и пырис карта вылö, вишкыштiс нырнас назём дуксö, мурзьыштiс сватыслö, кöда вешьянтöг куйлiс идзас вылын.

— Вöрас ветлiн?!

— Эг, — кижгыштiс Степаныс. — Ветлiн! Ме адззылi! Пантасьлiн?!

— Эг...

«Пантасьлiн, сiтöсь вешьян! Ме тöда», — думайтiс Миколыс, немымда эз жалейт сватсö, кöть и адззис, что сiя шогалö.

— Мыся, тi менö адззит. Мый умöльсö и кери-и-и? — сэтчö пондiс риксьыны Степаныс. — Адззылi, да мый сэсь? Нылöн эд коккез эмöсь... Картабöрас и вöлiсö, а öнi кытöн бöра и эмöсь ни-и-и... — пильскис мужикыс. — Менö сэсся эн вöрöт... — сватыс син одзын, сэтчö жö пуксис кекеркаэс вылö да пондiс дундöтчыны...

— Тьфу! — сьöвзис Миколыс, курни-верни петiс карта вывсис и веськыта иньдöтчис Прокоппезö.

— Кытöн зоныт?! — вожмöвтiс порогсö и ыкöстiс Прокопыслö дружиналöн командирыс. — Кытöн дезяртирыс?!

— Ме тэнчит лöсьöтчи юавны кытöн зонö, а тэ менчим юасян, — шынньöвтiс Прокопыс. — Меным эд оз висьталö, кытöн нiя öвтчöны.

— Тьфу тэ! — бöра сьöвзис Миколыс, мурзьыштiс да висьталiс. — Шедасö! Сэк вöлись тэ, Прокоп, адззылан олансö! — и петiс керкусис.

Немымда кадыс эз чулав, Прокопыс öшынöт адззылiс, кыдз Миколыс солдаттэзкöт оськöвтiс Картабöрлань, öддьöн эд тэрмасис, бытьтö быль ни шедас Мишаыс, но Прокопсö он бöбöт: мужикыс веритiс зоныслö. Сiйö кутнытö — уна колö няньсö сёйны!

Öтiк кошшис пышшалiссесö, а пышшалiссес кошшисö ни сiйö: Андрейыс ёрттэзнас куйлiс кöзоккез коласын зэв Льöмина дынын, зонкаэс дзебсисисö и баитiсö:

— Лыйны и быдöс сэтöн! Зэв эд, Якуня Ваня. Инман эд этасянь кымöсас, Öндрей? — ёртыслiсь юалiс Якуня Иваныс. — Оз ло и оз понды миян сьöрын вöтлiсьны!

— Ог жö бöра вийö... Морт жö бöра эд, — горöтчис Мишаыс, öвтыштiс кинас номмеслö, содтiс. — Но колö, порсьöс, велöтны! Ась тöдас...

— Велöтан сэтшöмсö... Талун миянлiсь кинöскö лöсъяс, ашын кутас да керкуэзнымöс сотас, и нем тэ сэтшöмыслiсь он бось, — сьöласис Иваныс.

— А бурсö нем видзчисьны, — содтiс Андрейыс.

— Кутам медодз да видзöтам.

Рытыс кыдз сёрмöтчис. Отирыс дырöв ештöтчисö и дыр эз водö узьнытö: то жолькнитасö ведраöн, то пон кивзыштас, то петух китöстас. Дыша пондiс сорласьны гожумся ойыс рытыскöт, кöр ойшöрсö он и казяв кыдз локтас, пемдыштас и бöр ни пондö югдыны. А талун кадыс кыссис дыша. Лоис ыркытжык, руыс ульжык. Саймис каёк да пондiс шыасьлыны векнит голосокнас. Матi мужиккес дынöт турун коласöт котöртiс шыр. Керкуэзланьсянь гусьöн мунiс кань. «Мунам», — сэк висьталiс ёрттэслö Мишаыс, чеччис туруныс коласiсь. Ёрттэс сы сьöрö. Деревняын некин ни эз вуджрась, но видзчисьтöг мыйкö жолькнитiс-усис, повзьöтiс, дзик пышшалiссесö сiдз кинкö и кутiс бы: дрöгнитiсö, сувтчыштiсö, Андрейыс кутчисис карабин бердö, кывзiсис...

Надейтчисö унажык коккезныс вылö, медбы мыйись-мый бöр сöтны вöрланяс, но кыдзкö некин эз мыччись, некин, сiдзкö, эз саймы, керкуись эз пет, мужиккеслöн сьöлöммезныс дугдiсö тёпкöтны, смевжыка ни иньдöтчисö Пороз Миков керку дынö, гусьöн кайисö посöдзö, гусьöн ыбöс бердiсь кыскисö пöдан и пырисö пытшкись посöдзö.

Эта коста Миколыс узис посöдзаныс — чöскыта эд узис, нем эз кыв.

— Чеччы, сват! — Миколсö пельпонöттяс вöрзьöтiс Мишаыс.

— Мый?! — хозяиныс осьтiс синнэсö, сэк жö боксис босьтiс бы чер, но черыс вöлi Андрейыс киын ни, сiя жö и шуис:

— Эн орс, сват... То видзöт, кыдз юрыт орас!

— Адззит! — мурзис Миколыс, чеччис да пондiс кизявны вешьян киззесö.

— Тэ эд миянöс кошшин, вот и адззин, — нерис Мишаыс. — Тэрмась!

— Кин сэтчин?! — осьта ыбöсöт керкусянь кылiс Миколiкалöн голосыс.

— Узь! — мурзьыштiс Миколыс.

Öтöрын югыт ни. Кинкö керку весьтын трубаись вевдöрö кайö кизерик тшын. Гажöн китсасьöны петуххез. Кылö молотоклöн литовка бердö вартöм.

Керкуэз дынсянь веськыта лэдзчисисö логлань, вöрыслань. Бöрсяняныс юрсö бергöтлiс да дыр видзöтiс дыш пон, эз вувт, эз вöтчы. Видз вывсянь кежисö мельница туй вылö, кöда гладь, туруна, небыт коккез увтын — коктö вешты да мун. Миколыс ружтiс, мурзис, пиньласис мужиккес вылö, но мунiс шысеттöг. Кöр мунiсö деревняыс дынiсь вель ылö ни, сэк вöлись дружиналöн командирыс эрзыштiс: «Мый нö?! Кытчö? Али горт дынын од вермö лолöс босьтны?!» — Ештам! — серöмтчис Якуня Ваня.

— Висьтав, сват, мыйöн сiдз гленитчисö тэныт чочкоммес? — Миколыс одзö сувтiс Мишаыс. — Мый тэныт нiя сэтшöм бурсö вайисö? Топ абу жö вывтi богатöй, медбы сiдз вежöммеслiсь нювны бöр гöгöрнысö, али быль думайтан, что оланыс сэтшöм и лоас, бытьтö пыр лоан дружинанытлöн командирöн?

— Вешшы, зырымöсь куль, син одзись! — гудыра синнэзнас сiдз пондiс видзöтны Миколыс Мишаыс вылö, кыдз сёйис бы.

— Ми тэкöт, дядь, кыдз морткöт, а тэ... — Иваныс осудитiс пöрисьжыксö. — Сэк ачыт тöдан, верман Фоминнытлiсь нювны, бат, быль сiя тэныт буржык олан керас, олоас кö... Мыся, вашöтасö кö гöрддэс чочкоммесö, сэк кытчö воштiсян? Мый пондан керны челядьнат? Абу я нiя жальöсь?

— Страм тэ! — сьöвзис Миколыс. — Страм моз и баитан. Тэнат эд нем абу, нем босьнытö, сiйöн и пышшалан да отирсö полöтан, а ме абу тэ кодь горттöм пон, и эд велöтö менö овнытö, страммез! Еныс тiян дор абу! Вунöтiт ни, кыдз чочкоммес вермисö гöрддэсö?! Э-э-э... Бытьтö эд адззылö, кыдз отирыс панталiсö нiйö? Колоколлэс сiдз трингисö, бытьтö вöлi ыджыт праздник! Игнатыс ойбыт эз узь, одзлань иньдöма гöссесö пантавны... Энö... Прошасö да Матвейсö. Нiя эд подöн котрасисö Галлезöдззас. Гусьöн мунiсö, медбы опичерресö пантавны, висьтасьны, мый татöн керсьö. Мый сiдз видзöтат? Од веритö?! Веритö кöть эдö, но еныс абу тiян дор, а миянлань, кöр тi сiйö вунöтiт. Эм еныс, бессэз! И юррезнытö мургыльтас, вот видзöтат! — пондiс ружтыны да пыдына лолавны, рожабаннэзöттяс визывтiс ньылöм, чужöмыс лоис веж-чочком. — Сiдз?!

— Кывзам, мый эшö висьталан! — гажöн шуис Мишаыс.

— Тi эд бырöм вешьяннэз, гöрд поннэз! Олансö соровтат, а видзöтö жö кин тiян дор?! Кыным морт? — Ыы-ы-ы, зырымöсь куллез! Да некин тiян дор абу, и оз ло. Отирыс тiянiсь полöны, вöрас оз лысьтö мунны. Вийö менö, мортсёйиссез, вийö! Но асьныт шедат жö!

Миколыс ружтiс-баитiс, пыдына лолалiс, топ мыдз вöв бороздаын.

Якуня Ваня будзгыльтчис, пиньöвтчис да кывзiс Миковсö, тöдчис, что зонкасö баснинас он вермы, он бöбöт, асланят он кыскы, кöть горзы. Мишаыс шыннялiс, синнэзас гаж, кыдз орсiс пöрисьжыкыскöт, шуис: «Модь, Миков дядь, модь унажык... Ми эд тэнö важын ни тöдам, кытшöм тэ Пороз Миков...»

Шондiыс шонтiс быд вынсис. Цветитiс пожум, и киссис ни сылöн бус кодь веж пыльцаыс, вагöпокын уялiс веж кеньöн, кöда увтын виклясисö кöрттув гаггез. Мошшез, зiэз, лöдззез, гуттэз — быдöс гут-гагыс бизгис, керис мыйкö ассис, лэбалiс омöн и юррезныс гöгöрын. Гультымасис кырныш, дзик видзчисис аслыс сёян — кулöмлiсь яй. Миколыс мышкыртiс юрсö и дугдiс баитны.

Сулалыштiсö, кыдз одзлань эз тöдö мый керны, Миколыс бöра горöтчис:

— Еныс тiянöс чарöтас!

— Мунам! — Мишаыс тангис пельпонас, и иньдöтчисö туй кузя одзлань — пыдöжык вöрö. Лэбтiсис шондiыс, быд шагын пондiсö пымавны, но эз сувтö, а лэдзчисисö керöс кырылö, локтiсö мельница дынiсь коппез дынö, сэтöн сувтiсö.

— Мый тэкöт керны? — сэтöн Миковлiсь юалiс Мишаыс.

— Вийö да сёйö! — ыкöстiс Миколыс.

— Тэ бы, миянöс кутiн кö, эн вий?! Чочком кöин тэ! Тэ эд медодз миян сьöрын вöтлiсин, кошшин, медбы вийны, а шедiн ачыт! Тэ...

Миколыс гичыртiс пиннесö, гудыра да гöрдöтöм синнэзнас видзöтiс кымöсыс увтöт быдöнныс вылö, кыдз лöсьöтчис сьöвзьыны, но дульыс вöлi жаль и эз сьöвзьы, а ружтiс.

— Чöвтчы! — карабинсö лэбтыштiс Андрейыс. Миколыс эз тэрмась: жагвыв пöрччалiс йöрнöс киззесö, жагвыв лэбтiс юрыс вылö подолсö, гышкöптiс вывсис ас вурöм сера дöраись паськöмсö и косысви кольччис нач пасьтöм ― чочком яйыс йитрикöн-йитрикöн вердöм порсьлöн моз орсiс син одзын. Номмес да лöдззес сiйö и видзчисисö, уськöтчисö пасьтöмыс вылö.

Томмес кыскисö кадсö.

— Мый нö? Али киэзныт дрöжитöны? — öмыс пиньöвтчис Миколыслöн.

— Ештан...

— Ванька, пöрччав вешьяныс бердiсь гасниксö, — ёртыслö висьталiс Мишаыс.

Мельницалань карзыштiс и виньдiс рака. Номмес да лöдззес нач вельмисö и пышналiсö быдöннысö.

— Вешшы! — пиннесö гичыртiс Миколыс и ачыс пöрччалiс гасниксö.

Адззисö сажень кузя ки кыза бедь. Бедьсö Миколыслö пуктiсö спинаыс бердö, паськöтiсö киэсö и крепыта гасникнас кöрталiсö бедьыс бердö — Христос и лоис, только Миколытлöн кынöмыс вöлi ыджытöв — сельнича кодь да тошыс сьöд и чужöмыс вира да лёк — эн лок дынас пишальтöг, курччöвтас!

Кöр Миковлiсь киэсö кöрталiсö бедьыс бердö, Иваныс гöгöрöттяс кокнита кытшöвтыштiс, юрсö бергöтлыштiс, шлячкыштiс кывнас да шуис: «Но, Миков дядь, кытшöм тэ öнi лоин басöк! Гортат локтан, оз и тöдö...»

Дружиналöн командирыс видзчисьтöг сьöвзис Иваныс чужöмö, но дульыс, тыдалö, косьмöм и эз павк зонкаыслö.

— Ы-ы-ы, пон! — Иваныс нетшкöвтiс бы Андрейыс киись карабинсö, но Мишаыс падтiс:

— Лок, Ванька! Мед сiя... Бат, öнi оз понды миян сьöрын котрасьны, а пондас кö, сэк вöлись ми сiйö бöрöн öшöтам эта пожум вылö!

11

Чулалiс лун-мöд и посадiсь пышшисö чочкоммес, кыдз нiйö лэчыт тöв нöбöтiс — койыштiс и абуöсь! Неделя етш чочкоммес бöрсянь посадын эз вöв некытшöм власть. Погоддяыс гажа. Ойезнас сибöтчас гым кымöр, зэрас пöт, чарлалас-гымалас, и асывнас бöра мыччисьö шондi, рытöдз юррез вевдöрын кымöр-палачок абу, а деревняын гожумнас мый эшö колö? Вöлi бы буржык погоддя, а властьыс эм кöть абу. А сэтшöмыс, кытшöм вöвлi медбöрья кадö, совсем оз ков. Локтасö кö гöрддэс, мырддьöны вöввез, корöны нянь. Нiйö вашöтасö кö, бöра верд чочкоммесö, нiя бöра мырддьöны медбöрья вöвтö да эшö кутасö и вартласö, и ачыт он тöд мый понда. Некинлö не норасьны, не висьтасьны.

Абу властьыс талун и оз ков — сьöлöм сытöг оз пов, ойесö отирыс узьöны чöскытжыка, луннэзнас уджалöны буржыка.

Андрейыс ёрттэскöт петiсö вöрись, пондiсö овны гортаныс, дугдiсö весь сёйны няньсö — пондiсö уджавны, отсасьны айезныслö да маммезныслö.

Кытöнкö Петыр лун гöгöрын Андрейыс айыскöт да мамыскöт куртiсö керöс кырылын, тэрмасисö-уджалiсö: туруныс вöлi нач кöс, патшкис чöскыт дукöн, вöлi гажа, но кытöнкö мурзьышалiс гым кымöр, сiйö и видзöт, кыдз öшöтчас видзыс весьтö, койыштас ведрапонiсь, и косьты сыбöрсянь турунсö...

Кымöрыс мурзьышалiс кытöнкö вöр сайын, Андрейыслöн айыс пизис-уджалiс да видзöтышалiс юрыс вевдöрö и туйланьö, кыт ветлöтiсö Кöсö и Чердынöдз. Кытöнкö рытланяс моз ни, кöр шондiыс бергöтчис сёр павжунас, кымöрыс дугдiс мурзьыны, Андрейезлöн куртсис туруныс, кольччис сiйö тэчны зородö. Вдруг уджалiссес казялiсö, кыдз туй кузя посадныслань гöнитöны вöввез вылын отир, бöрсяняныс бус только гардсьö, и неетша морттэс, а дасся унажык и тэрмасьöны.

— Кинöс бöра Вöрдядьыс вайöтö? — зоныслö бобгыштiс Гришаыс, йöрнöс соснас кымöсыс вылiсь чышкис ньылöмсö, пыдынжыка ловзисис и содтiс. — Бöра эд, натьтö, пондасö кошшисьны да гарйисьны — оланыс оз ло! Пон табун... Эз я, зон, чочкоммес бертö?! Поди, дзебсисин бы кытчöдз дзонь?..

— Ог тöд, — Андрейыс босьтiс вила, заргис кöс турунас.

Бадь сайын пондiс пильскыны да синваэсö чышкыны мамыс. Зород вылiсь вдруг Андрейыслö пельпон вылас чеччöвтiс дзöдзыв, эз усь му вылас эд, а кышасис пельпоныс бердö.

— Сотанаыс эд вöлись! — айыслöн чужöмыс чочкоммис, шупкис кисис курансö, öшис дзöдзылыс одзын. — Сотанаыс, зон... Бöра синва кöсйö, добросö эн видзчись! (Дзöдзывсö лыддьöны кыдз сотанаöс, каяс кö тэ вылö, бурсö нем видзчисьны: синва лоас...)

Андрейыс кинас öвтыштiс дзöдзылыслö, мöдпырись заргис виласö турунас и уджалiс одзлань, кыдз нем эз вöв.

Гортö уджалансянь локтiсö шондiтöг. Эз ештö посöдзныс дынö сибöтчыны, видзöтöны: котöртö Якуня Ваня и топ мыйиськö повзьöм, ылiсянь ыксö:

— Андрей, сулав жö...

— Мый лоис?! — Андрейыс эз вежöрт ёртсö.

— Мый лоис... — посöдзыс дынын ни Иваныс пондiс баитны гусьöнжык. — Чердынсянь тай бöра локтöмась красногвардееччез пö... Отряд. И медодз менö корисö, но... Юасьöны тай, кыдз пö да мый... Комиссарныс шуö, тi пö партизаннэз вöлiт, но... И карабиныс понда лякасис, кывзы: «Вай и быдöс сэтöн! Он кö сет...» Вот сiдз, Öндрей. Мый пондам керны?

— Сетö тi, сетö гормöччаннытö! — висьталiс Андрейыслöн айыс.

Андрейыс мурзис, но нем эз шу.

— Мыся, кывзы, дружинаыс йылiсь мыйкö юасьöны...

Попсö гардöны. Грехö пыртöны, а кысь ме быдöс тöда?! — одзлань лёбис Иваныс.

Рытланьсянь сибöтчис лöз кымöр, жагвыв шебралiс-вевттис, небосö, сайöвтiс югытсö, мурзис, гымалiс, топ кинкö керкуас кулакнас вартлiс пызанпöлыс кузя. Кымöрыс лолалiс ни ыркыт руöн. Пуэз, кöдна быдмисö садникыс кырылын, сулалiсö кыдз повзьöмöсь. Нельки воробейезлöн шы эз ло, кöть эшö эз узьö.

Сьöлöм вылын вöлi недолыт, чувйис аскодя дума, гусьöн полöтiс Андрейсö, топ сiя быдöн одзын вöлi виноватöй, но эз вежöрт мый понда: ёртыс висьтасис, а сiя кылiс и эз баснисö — сорисö думаэс.

— Мый шуан?! — кыдз саймис Андрейыс, кöр дугдiс баитны Иваныс.

— Тэ мый?! Узян! — лöгасис ёртыс. — Мыся комиссарыс юасьö öтiк-мöдiкö... Корö пишальсö.

— Нiя я мый я меным сiйö сетiсö? — лöгасис Андрейыс.

— Ог тöд, — ружтыштiс Иваныс, жмитiс тырппесö, думайтыштiс да бöра шуис. — Ог тöд, Öндрей... Мыся, шуисö эд, мыйись-мый пö.

Иваныс сьöкыта ловзисис и мунiс. Андрейыс юис квас, пыралiс джоджулö, мудöт вылiсь босьтiс карабинсö и оськöвтiс школалань, кытчö сувтöма отрядыс. Зонкасö панталiс комиссарыс, ылiсянь нюжöтiс кисö, бытьтö тöдса, öмыс реш видзис, юасьö:

— Кыдз олан, партизан?! Мыля властьыс абу? Кытöн коммунисттэс?

Андрейыс медодз нельки öшис, гöрдöтыштiс, кöр сылiсь сымда юасьöны, бытьтö быль виноватöй, что чочкоммес бöрсянь татöн абу властьыс, пондiс виноватöя модьны:

— Кытшöм ме партизан? Босьтö гормöччансö да менö эд вöрöтö. Нем ог тöд... Сэсся меным карабиныс оз ков.

— Бат, колас?! — синнэзас веськыта видзöтö комиссарыс. — Он я миянкöт талун мун? Колас чулошитны эд дружинниккесö, мед тöдасö кыдз тешитчынытö! Кыдз, Андрей?

— Ог ешты, — челядь моз горöтчис зонкаыс. — Айö ашын одзся-одз нуöтö ытшкисьны. Отирыс, видзöт, туруннэсö керисö ни, а ме öвтчи... Вашöтасö гортiсь!

— Ачыт тöдан. Ми тэнö ог пондö кöртавны да сьöраным кыскавны. Ло здоров! — кисö бöра нюжöтiс комиссарыс.

Гым кымöрыс сё öшалiс рытланяс, мурзис, топ видзчисис-лöсьöтчис уськöтчыны посадыс весьтö, кöр ланьтас отирыс.

Кымöрыс вöлi лёк, гымалiс, вирдалiс — синнэзiсь югöр гусялiс. Андрейыс локтiс комиссарыс дынiсь, тэрмасис-сёйис пызан сайын, нянь крöшкаэсö чышкис, чапкис öмас, петiс пытшкись посöдзаныс, пöрöтчис аскерöм кровать вылö, кунис синнэсö, но ланьтны сэк жö эз вермы: кымöрыс гымалiс керкуныс весьтын ни да сiдз, что быд гымыштöм бöрсянь дрöжитiс керкуныс, быд вирдыштöм бöрсянь посöдзаныс паськалiс би югöр.

Онмöссис сэк, кöр короминнаыс кузя вачкисö медодзза гырись зэр воттез, нето шер туссез. Дзуркнитiс керку ыбöсныс, мамыс öтöрö петкöтiс нянь зыр, кольть, кöдö Ыджыт лунö пуктылiс ен джаджö, шупкис кольтьсö улицаö, нянь зырсö посöдзныс бокö, кресталiс-пернапасалiс ыбöссö, асьсö, молитваэз лыддьöттöн бöр пырис керкуас, дзик кольтьнас да нянь зырнас былись ни падтас шерсö... Кытöнкö ойшöрыс гöгöрын зонсö саймöтiс мамыс, ыкöстiс: «Зону, оз я мыйкö сотчы!»

Андрейыс саймис, кыдз мыйöнкö вачкисö, недолыта горöтчис: «Эн модь!», но чеччöвтiс ольпасьыс вылiсь, перыта петiс öтöрись посöдзаныс и казялiс, что мöд улицаас быль мыйкö сотчö: биыс сiдз и нюлö-нюжласьö гым кымöрыс дынöдз, ризьöтöны-чалöтöны кöс керрез, тшын павкö нырö... Зонкаыс босьтiс ведра, чеччöвтiс посöдзсис, сöтiс бы котöртiс, но люкасис Мишаыс мамкöт, кöдалöн синнэс ыждöмась и кеймисьö: «Öндрей! Эн мун Криста ради! Гöрддэс öзтöмась керкусö да матö оз лэдзö локны! Мый и лоас, мый и лоас?!

Пöжасям быдöнным!»

Шовкйис-сотчис керку. Бичиррес мезмалiсö керкуыс бердiсь, лэбзисö вылö и ылö. Ойыс уль. Поснитика зэрö. Кымöрыс юр вевдöрын мурзьышалö. Вирдалö, но öнi лунланяс ни. Андрейыс Мишаыс мамлö нем эз шу, бергöтчис гортлань, ведраö öшымöсiсь гумыштiс ва, тыра ведрасö сувтöтiс öшын увтаныс и пондiс видзчисьны, медбы мыйись-мый... Но тöлыс кыдзкö руалiс ойланьсянь, бичирресö резiс лунланяс, посадныс сайö, видззеслань, кытöн сук, уль зелёнöй туруныс бердö биыс эз ни кутчись. Керкуыс сотчис, биыслöн югöрыс жагвыв кыдз пуксис и нач саясис син одзись. Отирыслöн голоссэз эз ни кылö, дзик быдöнныс узисö или кулiсö. Ойыс чулалiс. Андрейыс эз узь. Шондi петан гöгöрас пондiс сунавны, пöрöтчис öтöрись посöдзаныс и эз казяв, кыдз ланьтiс. Саймöтiс сiйö Якуня Ваня, ёртыс пукалiс бокас да баитiс:

— Кылiн ни, бат... Льöминасис Пороз Миколыслiсь керкусö сотöмась жö, — юöрнас кыдз бытшкис Андрейыс сьöлöмö.

Андрейыс кöть и эз жалейт Миколсö, но мыйкö эд вöлi жö, что сьöлöмыс пондiс пессьыны. Иваныс лöга содтiс: «Ачыс, пон, пышшöм! Абу шедöма. Шедiс бы, натьтö, миян моз эз бы пондö милуйтны, овсис бы Порозыслöн оланыс!»

Андрейыс шы эз сет. Мылякö кажитчис, топ сы дынö локтасö жö и нуöтасö, а керкунысö сотасö. А мый понда, мыля? Эз вежöрт, но вот сьöлöмыс пессис, места эз понды адззыны, сiдз бы кытчöкö и саясис, пышшис, кыдз вöлi чочкоммес дыр.

Кымöрас бöра öтiк палачок эз вöв, топ зэрыс ойнас сiдз миськалöм, что шуч тыдалö, и лудыс öшын увтаныс орсiс зелёнöй рöмöн, кыдз сералiс, гажöтчис. Айыс тэрмасис ытшкисьны. Мамыс пестерö тэчис павжун. Кольччис сёйыштны да мунны видз вылö, но мамыс петiс и öшис.

— Мый нö сiя?! — айсö кыдз пондiсö сёйны тойез, пондiс жöдзны керкуас, сiйö и керис видзöтлiс öшынöт öтöрö да модис. — Курöггес гуддисьöны и чикиссес муыс бердöт лэбалöны. Зэрны пондас... — гичралiс пиннесö. — Кыдз зэрмас да кыдз турунсö ог вермö керны, сэк вöлись кузь юрсиаыслö бöжыс вылö тальчча! Сэк пондас тöдны кыдз тури коккезнас котрасьны улицаöттяс. Сэк вöлись!..

Керкуас шоныт и ыбöсыс осьта. Öтöрын кылö кыдз кинкö бытьтö горзö или сьылö — уннялö пон моз.

— Кытöн сiя?! — Андрейлiсь юалiс айыс, бытьтö зоныс вермис тöдны кытчö мунiс мамыс. — Кытöн сiя?!

Андрейыс пишнитiс нырнас. Вöлись посöдзö кайис хозяйкаыс, быркнитiс-пырис керкуас, кивзыштiс, мыйкö лöсьöтчис бы висьтавны, но мужикыс одзалiс ыкöстны: «Кытöн вöлiн?!»

— Порсь позын! — горзöмсорöн шыасис инькаыс, пильскыштiс нырнас. — Кöть тэ бы эмись и абуись горштö эн лет!.. Олан эз ло.

— Колö мунны уджавны! — рамжыка ни иньыслö шуис Андрейыслöн айыс.

— Ештан, — инькаыс вирснитiс нырнас, кыдз лöсьöтчис горзыны и горзан голосöн пондiс норасьны. — Попсö ни пö кутöмась да йöртöмась дзöдзыв позаныс. Ой, бытьтö пö врагöн лыддьöны, — пондiс чышьянасьны и одзлань норасьны. ― Кытшöм Игнатыс враг?! — пернапасасис. — Ен эд сiя миян! Ангел батюшко, Кристосыслöн зон! Прости, господи, грешнöй душаöс, прости, господи, отирсö... — и Андрейыслiсь ни юалiс. — Öндрей, мыйöн попыс виноватöй?! Шы эз сет Андрейыс, сы местö айыс пöжалiс:

— Тыдалö, колö!

— Тэ мый, сотана?! Бес тэ... Сотана кучикас, тыдалö, вурсян жö! Чарöтас эд еныс. Прости, господи! — бöра пернапасасис енугöвлань. — Мый понда Игнатсö йöртiсö дзöдзыв позаныс? Оз я ловья вывтöттяс кучиксö кульö бы?

— Кытiсь и мый кылiн? — иньыслiсь юалiс Гришаыс.

— Пет öтöрас да кывзы! Отирыс эд синмаöсь и пеляöсь, адззöны и кылöны да баитöны. Ипатыс тай пантасис да висьталiс. Ипатыс одзöт Игнатсö и нуöтöмась дзöдзыв позаныс... И бытьтö пö вартлöмась.

Посадыс абу ыджыт — ыкöст улицаыс конецсянь, мöд конецöдззас кылас. Гришаыс жö кылiс ни, кыдз одзжык мужиккес ас коласаныс гусьöн лёбисö, что Игнатыс бытьтö пö чочкоммескöт тöдчöма эшö сэк, кöр нiя татöн эз вöлö: колчаковеццеслö паныт пö Усольелань иньдылöма сiйö жö Ипатсö, но эта вöлi басни, кöдö эз туй горöн баитны. Андрейыслöн айыс эз любит кывзыны йöзыслiсь баснисö да эшö поп йылiсь, весись гортсис некытчö эз ветлöт, эз кывзiсь да нюкьясь пон моз, и öнi дума мужиксö повзьöтiс: «Быль я мый я?! Быль я мый я Игнатыс?!. Ме тай сысянь сэтшöмсö эг бы видзчись, попыс не миян кодь бöб юра... Грех эд, натьтö, грешитны Игнатыс вылö...»

Грех попсö бы кутны и отирыс син одзöт нуöтны исполкомö да эшö вартлыны.

— Вот эд виль властьыс кытшöм! Бессэзлöн и эм. Ох, чарöтас еныс, чарöтас быдöннымöс! — пильскис Гришикаыс.

— Дугды! — Гришаыс öмалiс иньсö: веськыта кö висьтавны, виль властьыс нылö нем умöльсö эз кер, кöр одзза оланыс мортсö бур мортас эз жö пукты.

Баитiсö и тэрмасисö бы мунны уджавны. Öтöрас лёк горшöн китöстiс петухныс. Шондiыс эз сунав, лэбтiсис вевдöрö. Гожумся луныс кузь да дженыт, оз сет сунавны, и Андрейыслöн айыс тэрмöтiс иньсö: «Вöрöтчы! Тупкав öмтö да мунам ни уджавнытö!»

12

Висьталам, что кöдна одзлань панталiсö чочкоммесö да вöлiсö чочкоммес дырни дружинаын, эз шедö отрядыслö. Но кинкö норасьöм попыс вылö, и сiйö быль корлiсö исполкомö, юасисö, мый колiс юасьны, и лэдзисö бöр. Только Андрейыс сiдз эз и вежöрт, вермис я Игнатыс юрсö сюйны чочкоммес да гöрддэс коласö, кöр быдыс быдöс керис юасьтöг да висьтасьтöг.

Öтiк рытö улицаöт пондiс котрасьны Якуня Ванялöн айыс, сувтчышалiс быд керку дынö, торскöтiс быд öшынö бедёкöн да векнит голоснас кань моз нявзышалiс:

— Эй! Собраннё керöны! Тэрмасьö... Котöртö...

— Мый сiя сэтшöмыс?! — синнэсö барöтiс Андрейлöн мамыс. — Сэрпöсь гöрддэслö мый жö бы юраныс пырис? Некытчö ог мун! — босьтiс пестер и пемытсорöн, кыдз сэтшöм ни смев, что немись и немымда оз пов, иньдöтчис кошшыны тшаккез.

— Собраннёö мунö! — Одзлань улицаöт шагнялö Якимыс, чотö: öтiк кокыс дженытжык, мöдыс кузьжык, кöр сэтшöм и чужöм да быдмöм. — Собраннёö!

— Кытшöм браннё?! — повзис Андрейлöн соседкаыс. — Бöра попсö я мый я? Али ме бердö ни кутчисьöны?! Ась юрöс орöтасö, но некытчö ог мун! — öшис керкусис и абу: баля гидö инькаыс заргисис.

Некöр отирыслö рыттэзнас шляйтчыны, кöр лун уджалiсö, мыдзисö и гортын эшö колö уджавны, и кытшöм вермас лоны страданас собраннё? Мый сэтчин керны?! Отирлö некытшöм собраннё оз ков. Дзескыт кадыс, дзескыт, а сэтöн локтасö кытшöмкö весь олiссез и соровтöны... Инькаэс эта собраннёись саясисö — кинлö да кытчö туй, а мужиккес думайтыштiсö, но эз пондö сайласьны: эшö полiсö, эз лысьтö вывтi чеччавны, некин эшö эз вунöт чочкоммеслiсь шатьсö да гöрддэслiсь плетьсö, кöр öттэс вартлiсö, а мöддэс вартлiсö и сотiсö керкуэз. Мужиккес сьöрсьöн-бöрсьöн пондiсö кыссьыны вевдöрö, вичкуыс дынö, кытöн вичкуыслö паныт сулалiс ыджыт керку — одззася волостнöй управа. Локтiсö керкуö, пырисö, пуксисö скамьяэз вылö, а одзаныс пызан сайын жöдзö ни том морт (комиссар пö, кöда йылiсь кылiсö, и мукöдыс адззылiсö ни мортсö). Том комиссарыс, но тöдчö, что смев и уна тöдö да адззö, эз ештö пырны мужиккес, сэк жö быдöнкöт здоровайтчис, пондiс юасьны, кыдз да мый, кин да мымда ни керис турун, оз я ков кинлö отсавны.

— Киэзнаныт, бат, öнджа, — паныт ни комиссарыслö шыасис Ректан Степан, кöдалiсь нем он босьт: мый синас, сiя и öмас, кылыс чож, ачыс сэтшöм жö чож — ёсь, оз вермы пукавны, чеччöвтас медодз, а сыбöрын боккезас и панялö, бергалö, но некысь ни вайнытö, кыдз тай шедлiс пышшалiссеслö... — Бат, мыся, öнджа... Кывнаныт керат, а киэзныт полöны...

«Но и быздöм öм тэ! — мужиккес думайтiсö ни Степаныс йылiсь. — Бöра эд миян юр вылö жö... Бöра эд комиссарыс кутас да шатьсö мыччалас...»

— Сiдз, товарищи! Эмöсь миян коласын городiсь, но унажыкыс тiян кодьöсь жö, деревняись жö. Ытшкисьлiм и куртiм, гöрим и кöдзим, — шынньöвтiс. — И няньсö кужам сёйны, тöдам кытшöм пизись няньыс чöскытжык. Шуам, ме пукси вöлыс вылö кватьгодся... — ошшасис мортыс, баснинас кытшöвтiс бы мужиккесö, асланяс керис, но нiя дузгыльтчисö, дундöтчисö, кыдз тувдiсö, и уна эз баитö, а видзчисисö, мый жö лоас одзлань.

Мужиккеслöн грамотаныс вöлi нач етша — кыкдас морт коласын велöтчис, бат, öтiк, отирыс велöтчисö овнытö ыб да видззез вылын, власть ны юр вылö пыр сувтöтлiсö нытöг, эз юасьö, эз висьтасьö, а керлiсö, а эта... Мужиккес етша кöр тöждiсисö, что умöля олöны — няньыс эм, и сэсся нем оз ков, сэтöн и богатство, олан, счастье — быдöс няньын, а кöдалöн няньыс абу, сiя беднöй, сылöн нем и абу, кортöн ветлöтö, но кин виноватыс?

— Совет властьыс медодз отирыслö сетас му, — пондiс ошшасьны комиссарыс.

— А попнымöс вият и миянöс молитваэзтöг колят... ― сэтöн бöра шыасис Ректан Степаныс.

Комиссарыс баснинас джöмдiс и пондiс видзöтны мужиккес вылö, дзик бараннэз вылö, кöдна бытьтö пастухтöг öтiк лун оз вермö овны. Мый жö бы нылö сэтшöмсö висьтавны? Мый жö бы? А Степаныс öмсö осьтiс и видзчисьö, кыдз нянь корö.

Мужиккеслöн синнэзаныс öтiклöн лёк югöр, мöдiклöн сiя жö, куимöтыс дзик лöсьöтчö сьöвзьыны.

— Религия — эта, ёрттэз, опиум для народа, — бузгис комиссарыс. — Сiдз шуис Ленин.

— Мый сiя лоö? — öтiк мöдiклö тангис гырдззанас бокас. — Сват...

— Шы эн сет, — сватыс кижгыштiс да сiдз, что кылiс комиссарыс, но сiя роч, а мöддэс комиöн шöралöны.

— Кин сэтшöмыс? Лениныс... Ен я мый я? Али ета? Кыдз сiйö шуöны?.. — Ме ог тöд... Бытьтö пö нылöн жö кинкö ыджыт юра... А, бат, ме кодь жö бöрöн керöм, хи-хи...

— Висьталан тэ...

— Он верит, эн юась!

— Поппескöт нем тöдчыны! — аслыс гардö начальник-комиссарыс. — Поппес бöбöтчöны!

— А тэ он пöрьясь?! Мылякö Игнатсö вартлiт и грехсис эд повзьö! Еныс эд чарöтас!

— Некин тiянлiсь Игнатнытö эз вартлы, — висьталiс комиссарыс. — Усис посöдзсяняс, а тi модят, мый оз ков.

Дзуркнитiсö виль нинкöммез, несйис Степаныс, серöмтчис, горöтчис:

— Висьталат пожум йылiсь тури, и бытьтö ми веритам, — рочöн и комиöн ректасьö, но вежöртны позьö.

— Нем тiян поплö эз ло! Бöр локтас, — висьталö рочыс.

— Пöрьясьö бес чужöм! Эд веритö сэтшöмыслö, грех! Шыасисö мужиккес и лöнисö. Комиссарыс жöдзис пызаныс сайын, виноватöя шыннялiс.

— Вот, öнджа, ета... Кысь бы меным мусö сетат? — чирзыштiс — сорис пемытсö баснинас Степаныс жö. — Ме эдö мортыс мед ни татöн беднöй.

— А тэ, Степан сват, бось чер, мун вöрас, окты пуэсö мымда верман, кыдз ме Маркокуланас октi, вот тэныт и му лоас — ыб керан, кöдзан сэтчö и нянь пондан сёйны! — Степанлiсь öмсö тупкалiс Пиля Роман — веськыта шырзьыштiс.

— Ми мусö торйöтам богатейеслiсь, — Степансö пондiс дорйыны комиссарыс.

— Сiдз и колö! — пиннес гер Степаныслöн.

— Кин миян богатжыккес и эмöсь, кöдналiсь бы туйис мусö мырддьыны? — бобгыштiс Романыс, чисто пымалiс.

— Эмöсь, Роман! — юрсö чатыртiс Степаныс. — Бось тэнö жö, абу, думайтан, тэнат муыс месся унажык?

Дзуркнитiсö скамьяэз. Мужиккес сьöкыта ловзисисö, топ быдöнöс лöсьöтчисö чöвтны и мырддьыны быдöнлiсь öмсиныс няньтор.

Романыс сьöвзис коккес увтö, чужöмыс чочкоммис да сiдз, что керкуас пемытiнас тöдчис, кыдз бледöтiсö рожабаннэс, кыдз жмитыштiс пиннесö и кулаккесö, тэчöмöн висьталiс:

— Тэ, Степан, киэтö эн нюжлав йöзыс пызан вылö! Косьмасö нiя!

— Мыля оз нюжлав? Сылö и нюжлавны... Велалiс иньыскöт кортöн ветлöтны, вот и кыссьö бы йöз муыс дынö!

— Ась кыссьö, ась, а ми видзöтам, кытчöдз пондас кыссьыны!

Керкуын пемыткодь, да и öтöрас рöма-дзара: Петыр лун бöрын тöдчöмöн чинöны луннэс, а ойес содöны, лоöны пемытжыкöсь.

— Эд шумитö, ёрттэз! Ми татчö эг локтö пурсьыны, а виль власть бöрйыны. Колö бöрйыны волисполкомö председательöс, — мужиккескöт баитö комиссарыс — öмалö лёккесö. — Сыбöрын вöлись муыс йылiсь пондам баитны.

— А тэ öнi жö шöрав! Зырымöссеслö сет, а миянлiсь мырддьы да коль няньтöг, мед черпезьдам!

— Сы йылiсь абу басниыс, — кеймисьö ни комиссарыс. ― Колö волисполкомö председательöс бöрйыны.

— Миян кодьсö сё ни од бöрйö. Бырöм вешьянаэс öнi бергöтöны олансö, нiйö и бöрьят.

— Сiдз! Нiйö и бöрьям, Роман сват! Миян праздникыс оссис! — скамья вылiсь чеччöвтiс Степаныс, ыкöстiс — öмсис дульыс резсис. — Грамотнöйезö бöрьям! Во... Мед быдöс тöдöны и кужöны, во!

— Кинöс бы тэ, товарищ? — Степанлiсь юалö комиссарыс.

— Кинöс, кинöс... Думайта этö, ö-ö-ö... Прокоплiсь Мишасö да Гришаыслiсь Öндрейсö. Нiя миян дошлöй чужöмаöсь, гижасö и колас кö, лыддьöтасö!

— Кыдз Картабöрас тэныт лыддьöтöмась... Вешьянат небыттэсö лэдзöмыт... Сэтшöм миянлö и колö властьыс.

— Сэтшöм и колö, ась тiян коддесö öмлöсаласö, то, öнджа... Бöра вывтi ни польдат, миян кодьсö мортö од пуктö.

— Тише, товарищи, тише! Голосуйтны пондам! Романыс чеччис, сьöвзис и петiс керкусис. Керкуын лоис пемытжык.

— Мый сiя сэтшöмыс?

— Мыйыс?

— Совет я мый тай висьталöны?..

— Ме ог тöд...

— Кин сы понда, медбы бöрйыны... — комиссарыс вевдöр лэбтiс кисö.

Кынымкö ки лэбтiсисö вевдöр, унажык мужиккеслöн юррезныс лэдзчисисö увдöрö, бытьтö синнэзнысö дзебисö и эз адззылö комиссарыслiсь кисö, кöда голосуйтiс медодз. Керкуын лоис жар да дзескыт. Уль руöн лолалiс отирыс. Пымалiсö. Мишаыс котрасис да вайис кыськö лампа, и öзтiсö би. Мишаыс пуксис пызан сайö, чатыртiс юрсö и гордöя пондiс видзöтны мужиккеслань.

Вöлi тысяча девятьсот восемнадцатöй год, июль месяц.

13

Гöрддэс вашöтiсö чочкоммесö. Быд пельöсын, быд посадын и деревняын, син одзын и вöр сайын оссис мöдкодь олан, кöда вöрзьöтiс быд мортöс, иньдöтiс бы овны вильмоз, но виль оланыс кокнита эз сетчы: беднöйес видзчисисö му да нянь, богатжыккес, кöдналöн вöлi кöть пызандöра пасьта му, пыдынжыка муас лэдзисö вужжезнысö да ёнжыка кутчисисö удж бердö, а куимöттэс талун жö бы мездöтчисö виль властьсис, олiсö бы одззамоз. Виль олансö колiс дорны виль думаэзöн, и этö олансö медодз усис дорны посадын Мишалö да Андрейлö, кöдна вöлiсö грамотнöйöсь, дзик тöдiсö и кужисö унажык. Кыкнан вонсö бöрйисö волисполкомö: öтыс секретарь, мöдыс председатель. И бöра кык вон олiсö и ветлöтiсö оча пельпон, топ пыр кежö вунöтiсö обидаэз, зонкася оланнысö, невестаэзнысö, кöднöн мырддясьлiсö. Олiсö да уджалiсö кык ёрт — öтiк следö тальччисö, вовлiсö öтамöдныс ордö гöститны, кöть Мишаыс и згальничайтлiс: «Тэ, Андрей, менам инь вылö эн видзöтлы, вомдзалан или гусялан, гы-гы... Гöтрась ачыт, он эд понды öтнат пöрисьмыны...»

— Кытöн невестаыс? — дузгылясис Андрейыс, кöр нывкаэзсис топ полiс, сылö кажитчис, что бöбöтасö: талун бытьтö лöсьöтчасö тэ сайö, а ашын адззасö мöдiкöс...

— Ме тэныт ачым корася и вайöта! — ошшасис Мишаыс. — Он верит?! Адззылан. Висьтав и кера!

— Корась, — сьöкыта лолалiс Андрейыс да мышкыртлiс юрсö.

— Лизасö корасям! — ошшасис одзлань Андрейлöн воныс. — Али мый? Оз гленитчы?

Гленитчö Лизаыс Андрейыслö, ась и мывкыднас айыс кодь жö чорытöв — пантасин, кывнат эн джöмды, а шуан кö мыйкö не сы сьöртi, бергöтчас и мунас. Нывкаыслöн айыс эд сэтшöм жö: пыран керкуаныс, медодз порогыс дорын юрыт вылiсь босьт шапкатö, пернапасась, видзöт, мед нинкöммет эз вöлö зырымöсьöсь — ваöсь, сыбöрын вöлись шагньöвт одзлань, а пуксьöтасö кö пызан сайö сёйны, уна эн баит, сёян да эн шынняв, эн вирскайт нырнат, то кымöсат пуовöй паньнас тузгасö и бур лоас, ась кöть и тэ тöдтöм или тöдса, дона гöсь или абу. Но и ась, тестьыскöт эд оз понды овны, а инь колö, сэтшöм, кытшöм Лизаыс: чож, шардöм кодь, кöда пыр пизьö, кытчöкö тэрмасьö, мыйкö керö бы — котрасьö, дзик пыр мыйкö сылöн ендö: керö-керö, а сё оз вермы керны.

Сэтшöм Лизаыс, но Андрейыс гусьöн сё видзöтлö кенакыс вылö да тöдвывсис оз вермы öштыны, кыдз дружитiс нывканас Таняыскöт...

— Корасям! — модьö зонкаыслö воныс.

— Ог тöд... — нузгö ныр увтас Андрейыс.

— Кин пондас тöдны? Ме я мый я? Видзöт, ме верма эшö öтiк инь аслым вайöтны, только тэ, öнджа, сыбöрын эн горзы, гырдззаэтö эн курччав.

— Ась сэк, — сьöкыта ловзисис Андрейыс.

Ась кö, ась и лоö. Мишаыс öтнас мунiс корасьны и сыбöрын висьтасис, кыдз пырöма Лизаэзас. Пырис, сiдзкö, том мортыс корасьны нывкаэс ордö, вожмöвтiс керкусис порогсö, юрыс вылiсь босьтiс фуражкасö, пернапасасис и пондiс видзöтны нывкаыс ай вылö, кöда лабичын кыйис нинкöм, пымалöм — кымöсыс вылын дзулля ва, кымöсыс увтöт дзар керис, видзчисьтöг нинкöмсö пуктiс бокас, видзчисьтöг жö горöтчис:

— Гы, тэ абу я комунис?! Кыдз нö лысьтiн еныслö юрбитны? Тiян коддес эд, шуöны, енсö оз тöдö...

Сералiс Лизалöн айыс Мишасö, осудитiс и видiс, но мöдыс эз öш, висьталiс:

— Ме абу ышö комунистовöй. Эг ешты партияас пырны!

— Öтiк гуна вылын вартан, бес пиян!

— А кытчö воштiсян? Кинлöкö колö вартны, не ме кö, мöдiк ме местын бы вартiс...

— Сiя сiдз... — рамжык лоис хозяиныс, видзöтыштiс нылыс вылö, кöда тöвчикöн петiс öтöрö: кузь чикися, чочком юрсиа, кыдз юсь.

— Мый нö, сват? — западня вылö шлёпкисис Мишаыс, видзöтiс пöдналöм ыбöсыс вылö. — Мый нö? Нылыт эд пондас пöрисьмыны, а тэ жöниксö он адззы... Оз разь корасьö?

— Тiян кодь рызi-бызiэс... Кöдалöн не вылас, не коккезаныс и мывкыддэзныс топ эталöн жö... Менам Бускоыслöн...

Мишаыс öмсö осьтiс, дзик оныс петiс, нюжöтiс коккесö виль нинкöммезнас, лöсьöтчис бы куритны, но хозяиныс сэтöн жö падтiс:

— Тэ табак тшыннат миянлiсь керкусö эн сэрпöсь! Тэ еныс вылö видзöт да вöлись!

Быль: керкуас енугöлас сулалiс пызанпöв пасьта рисуйтöм ен, кöда видзöтö лöга и веськыта исполкомись предыс вылö.

— Мый миянiсь öштiн?! — бöра одзалiс горöтчыны Лизалöн айыс. — Он я миян кодьсö лöсьöтчы кытчöкö иньдыны Сибирьлань? Тiянлiсь эд нем он бось, тай Пороз Микол сватöлiсь керкусö сотiт, иньсö кытчöкö нуöтiт да челядьнас...

Медбöрья кыввесö Мишаыс дзик эз кыв, эз лöгась, а шынньöвтiс и висьталiс:

— Ме, дядь, нывтö корасьны локтi!

— Кин сайö бы?

— Эн пов. Ог ас саям. Эг бы вöв гöтыра, бат, и босьтi бы Лизатö. Öддьöн ни гленитчö.

— Эн бы адззыв, кыдз ассит пеллетö! — орöтiс хозяиныс.

— Эн бы сет?! Меным! Кыдз эталö, волисполкомись предлö?! — голосыс чорзис Мишаыслöн, кöть и шыннялiс. ― Тэ, сват, мыйкö тай мöдöрö бы шыбыльтан — бокö тальччан. Кытшöм лунсянь нö сэтшöм лоин?! Али Пороз сватыт туйö тальччин?!

Кашык-кашык керис хозяиныс, кыдз öшис гортас: босьтiс нинкöм шуль и пондiс сiйö перститны.

— Сетан али он нывтö?! — одзлань баитiс Мишаыс ― веськыта шырзис. — Öндрей вонö бы гöтрасьö! Сылö гленитчö нылыт. А мый? Зонкаыс грамотнöй, тэ моз пыр оз понды нинкöммесö кыйны, пызан сайын юрсö вердас, и нылыт пондас овны кыдз эта ен сайын...

Кашыкасис бöра невестаыслöн айыс, ружтiс, чеччис лабичсис да пондiс жöдзны джоджас, эз бы сет нывсö Андрейыс сайö — эта арттöм-ладтöм сайö, кöда Мишаыс кодь жö: не енсö оз тöд, не отирыс одзын юрсö оз мышкырт. Керкуас ведраöн чывкнитiс Лизаыс, лэбзис корасисьыс одзöт комö. Айыс нылыслiсь юалiс:

— Мунан — он воныс сайö?

Тыдалö, айыс надейтчис, что нылыс оз мун Андрейыс сайö, а сiя комсяняс петыштiс джоджыс шöрö, легнитiс юрнас, висьталiс:

— Муна, тять! Мыля ог мун? Сэтшöм жöниксö сэсся ог ни адззыв!

Вальс сьöвзис джодж шöрас айыс, кивзыштiс-ойкнитiс, шуис:

— Бес оланыс быдöннытö ни тай пурис! Мунö мамнат кыкнанныт керкусис, öтнам понда овны!

— Он ов! — гажöн висьталiс Мишаыс, серöмтчис кокнита: мый колiс, керис, пызаныс вылö сувтöтiс шкалик вина, гажöн жö горöтчис. — Вай, сват, юыштам!

— Ме винанас öмöс ог сэрпöсьты! — шуис этадз нывкаыслöн айыс и петiс керкусис, а корасисьыс ачыс комись босьтiс кружкажуг, кисьтiс сэтчö винасö и юис.

Сымда и вöлi: корасис Миша воныслö невеста, чукöртiсö свадьба, венчайтчисö мöдiк посадын, Щёкинаын, попыс асланыс эз вöв.

Любитiс я Андрейыс иньсö медодзза лунсянь, талун веськыта оз вермы висьтавны, и кыдз бы любитны инь, кöр одзжык öння моз иннесö эз любитлö — быд шагын эз окасьö, эз ниртчö син одзын и син сайын, олiсö, топ öтамöдсиныс стыдитчисö — гленитчис невестаыс и бур, сэсся нем оз ков! Лизаыслöн грамотаыс эз вöв, но некытчö эз йöрмы, мунас кö кытчö гортiсь жöникыс, сьöлöмыс оз пессьы, оз тöждiсь, кöр тöдö, что иньыс öтнас куртас, вундас и вартас...

Туйис овны Лизаыскöт.

14

Андрейыс гöтрасис Покров паныттэзас. Отирыслöн вундiссисö ни сюэс, тэчсисö шороммез, лöсьöтчисö карта вылö йöртны пода. Погоддяыс быд лунö дзугсис: луннэс лоисö кöдзытöсь, зэран кымöррес эз и вешшö посадыс весьтiсь, кыдз синйисö кöр Андрейеслöн пондасö вундыны медбöрья четверть вылiсь ендöм зöр, кöдö кöдзисö медбöрын и кöда дыр эз во. Вундынытö петiсö нёльöн: медодзын Лизаыс юрсö чатыртiс да мунiс кыдз нетель, топ мусö коккес увтiсь эз адззы, уськöтчис уджавны, топ кытiськö мезмис, и киас пондiс чарлаыс лэбавны, дзик эз вунды, а ытшкисис — некин уджнас сьöрас эз вермы вöтчыны.

— Шедiс моньным! — матшкаыс моньыс вылö видзöтiс бöрсяняс да ошшасис мужикыслö — сьöлöмыс орсiс, радуйтчис, полiс кывсö горöнжык горöтчыны.

Гришаыс будзгыльтчис да уджалiс, инькаыс вылö видзöтышалiс кымöсыс увтöт, мурзис, иньыс кыввез бöрсянь сьöвзис, мур-мар ныр увтас горöтчис: «Одз ошшасян, вомдзалан!»

— Оборони, господи! — пернапасасис инькаыс, мышкыртчис и одзлань уджалiс, топ кывсö ньылыштiс.

Павжуныс бöрын мыччисис шондi, югöрнас шебралiс дзор вöрсö, сюэзiсь чöвтчöм ыббесö, сöдз ваöн шорок, но орддис посадсö, гривасö и вöлись бöра посадыс сайын вöрыс вылö вöвдiс веж-югыт дöра. Гажтöмöсь ни ыббес, вöрыс, юокыс, лажмыта öшалöны сук зэран кымöррес, перыта уйöны ойланьсянь, тэрмасьöны сайöвтны шондiсö. Сэтöн жö койыштiсö катша шыдöсöн — поснит, чорыт шер кодь лымöн. Лымыс чажгис сука, швачкис вундытöм сюыс вылö, син одзын тыртiс суслоннэз, вундöмпод, зелёнöй отава, бороздаэз, лякасис кöз да ньыв лыс бердö. Джын часöн син одзын локтiс тöв, лязiс му вылö вундытöм сюсö, чочком чышьяннэзöн чышьяналiс суслоннэз. Уджалiссеслöн кынмисö киэзныс, асьныс гегдiсö сэтчöдз, что öммезныс эз пондö оссьыны, эз бы баитö, эз позь одзлань уджавны, только том моньныс бытьтö эз кынмы. Медбы кöть невна шонтiсьны — кöз увтö öзтiсö би. Гришаыс асьсö кыдз дорйис, модис: «Ась. Абу уна. Шедiс лымыс увтö и шедiс, еныскöт эд он понды тышкасьны...»

— Одзжык колiс вундыны! — пондiс сэтчö тоткыны моньныс.

— Кысь одзжык вундан, кöр эз во? — висьталiс матшкаыс, бытьтö моньыс эз адззы, что сюыс кыт воöм, кыт зелёнöй сора шедiс лымыс увтö.

— Тулыснас одзжык колiс кöдзны! — бöра бизгис Лизаыс.

— Колiс, да эг керö. Öнi эд мöдпöв он ни кöдз, — лöга висьталiс моньыслö батшкоыс, эз любит, мед сылiсь поперегалiсö баснисö, а эстöн томыс уна тай тöдö...

— Ог жö тшыгйöн кулö... — сьöкыта ловзисис матшкаыс. Лымыс сэсся эз сыв. Суслоннэсö дзимлялiсö лымыс увтiсь ни. Сэтчö вöтiс Покровыс. Праздникыс панытö кöдздöтiс, лымыс кöда тальсис нятьсорöн, кок увтын рытсянь чорзис, пондiс кажöтны коккез увтын, вылöжык лэбтiсисö кымöррес, öшын увтын льöмпу вылын жевгисö-шутнялiсö жоннез, вылö-вылö лэбтiсьлöмась ракаэз и лэбзисö кытчöкö пемыт сорöн ни. Гажтöма таво панталiсö Покровсö, дзик отирыс шогалiс аскодя шогöтöн, кыдз быдöнныс мыйкö öштiсö, вунöтiсö керны, бытьтö лöсьöтчисö кувны. Но праздник асылас одзся-одз, пемыт сорöн, видзчисьтöг посадсö саймöтiсö колоколлэзлöн шыэз: «Тилибом, тилибом, тон-н-н, тон-н-н!» ― тонгисö колоколлэс, и быдöнлöн сьöлöммезныс гажмисö, кыдз шоналiсö, отирыс кыдз ловзис, инькаэс тэрмасисö лонтны горрез, пондiсö пусьыны-пöжасьны, бергавны пода гöгöр, пасьтавны да кöмавны буржык паськöм и котöртны вичкуö, кытöн юрбитiс ни Игнат попыс, кöдö нуöтлiсö гортiсь и лэдзöмась бöр.

— Мый нö? — Андрейыс эз и сёй, одзжык мунiс исполкомö да юалiс предыслiсь.

— Лешак ныкöт! Ась юрбитöны, — кокнита горöтчис Прокопьевичыс, шынньöвтiс, содтiс. — Миянöс тэкöт оз дойдö.

— Мый пондам керны? — Андрейыс думайтiс, что праздникнас грех бы уджавны, но предыс висьталiс, что Совет властьыс важ праздниккесö оз тöд, и колö уджавны.

Быдöн олö аслыс, асмознас: локтö тöв, талун праздник, асывсянь тонгöны колоколлэз, отирыс вовлас вичкуö, сыбöрын быдöнныс мунасö горттэзаныс, пондасö сёйны, юны шоныт ырöшшез, öтамöдныс ордö петаласö гöститны, а лун-мöд бöртi бöра петасö уджавны. Кадыс чулалас, чулалас тöлыс, локтас тулыс...

Ашынас волисполкомö пырис Степан — öмыс осьта, пиннес гер и пондiс баитны:

— Кывзö... Бат, примитат менö партеяаныт?!.. Ме эд мортыс туяна-колана бы...

— Кытшöм партияö? — öшис Мишаыс.

— Кытшöмö... Он я мый я тöд? Комуниссэс дынö бы... Натьтö, эд нiйö пондасö бöрйыны начальниккезö...

— Тэ мый? Начальникалан бы? — серöмыс я, лöгыс я петiс ни Степаныс вылö Прокопьевичыслöн.

Андрейыс пукалiс аслас пызан сайын, видзöтiс Степаныс вылö, шыннялiс да думайтiс: «Степан тэ, Степан... Кытчö ылöтасö, сэтчин и бöбасян... Кысь кылiн, что коммунисттэсö пондасö бöрйыны начальниккезö? Ачыт я?»

— Начальникалi бы! Мыля бы эг? Кокнитжык жö овнытö тiян коддеслö, и мусö бы эз я сетö?

— Партияас, Степан сват, быдöнöс оз примитö. Колö лоны сэтшöмöн...

— Кытшöмöн?! — Прокопьевичлiсь баснисö дзугис Степаныс. — Мый понда нö ме тiянöс собраннёыс вылын этчö бöрйи? Не ме бы... Сiдз эд? — Торйöтасö, торйöтасö мусö! — предыс гажöнжык ни висьталiс Степаныслö. — Гöран, кöдзан и пондан овны кокнитжыка.

— Ог тöд, кöдöрсянь тöлыс пондас пöльтны, — ыш ловзисис мужикыс, малыштiс гладь юрсö, пондiс петны волисполкомсис, содтiс — корис гортас:

— Талун эд праздник ашын? Пыралö сюромкасö юны...

— Пыралам, — кольлалiс предыс Степансö, бöрсяняс сьöвзис, лöга горöтчис. — Эг ештö партияас пырны, кöритöны ни! Бытьтö сы понда и пыри, мед уджавны эстöн... — и воныслiсь юалiс. — А тэ мый нö? Кольччан...

— Одзöв... Быдмышта да вöлись. Кытшöм ме партеец? Мый меись?

— Видзöт... Удерлун собраннёыс вылын коммунисттэс касьтылiсö... Колö пö Андрейсö...

— Ешта... — бöра шуис Андрейыс, кыдз кольччис воныс сьöрись, джöмдiс, кытöн бы, натьтö, эз ков джöмдыны, но мый керан? Не быд мортыс эд öткодь горш. Быдöн кö Прокопьевичыс моз оланыс вылö пуксис бы сулавтöн и сунавтöн, сэк ыббес вылын кин бы пондiс быдтыны няньсö?

Сiдз оланыс и мунö. Кыдзкö рытнас Андрейлö айыс горöтчис:

— Мый нö? Гöрны и кöдзны пондас ковны эд... Некöр лоас гыжьясьнытö, уджавны пондас ковны, а тэ, зон, сё я мый я öнджаат пондан пукавны?

— Кытшöм öнджаын? — некыдз зоныс эз вежöрт айсö.

— Исполкомат нö... Натьтö, эд ыб вылын бы колiс уджавны! Няньсö эд миянлö виль властьныт пызаныс вылö оз вай, мырддьö эшö, господи прости! Кывсьö тай, öнджа... Налог бöра... Контрабуция пö, тьфу!

— Сэтчин менам уджыс, — шыасис Андрейыс.

— Сэк сэтчинiсь няньсö и сёй! — висьталiс айыс, кыдз пызаныс вылiсь одзсис мырддис няньсö. Морт кулиссез...

— Тэ мый, пон юр?! — бизгыштiс Андрейыслöн мамыс. — Кытшöм пон одзся-одз пурис?!

— Ась! Тшыгйöн ог кулö! Вердчам кыдзкö! — öзйис-лöгасис моньныс — чиж-паж горöтчис, швыркнитiс керкусис öтöрö, жвангис бöрсяняс ыбöссö — öшыннэс жолькнитiсö.

— Чож моньным, — бöрсяняс горöтчис батшкоыс. — Видзöтам, кыдз асьсö пондас вердны.

— Тупкав öмтö! — горзöмсорöн мужикыслö ыкöстiс иньыс, но Гришаыс бытьтö эз кыв иньсö, серöмтчис да содтiс:

— Чож моньным, мыся! Ась янсöтчö. Видзöт: дзескыт лоис керкуас, оз тöд, кыдз асьсö мыччавны, тьфу!

Андрейыс петiс керкусис и мунiс исполкомö, кытöн сiйö видзчисис ни Миша воныс, куритiс да видзöтышавлiс öшынö. Здоровайтчисö, эз ештö öтамöдныслö кыв-мöд горöтчыны, исполкомö бöра пырис Степаныс, порогыс дорын юрыс вылiсь босьтiс бырöм шапкасö, пернапасасис енугöлас, видзöтiс предыс вылö и пондiс модьны:

— Мый нö, Прокопьевич?! Этö эд... Тулыс локтiс. Колö кöдзны, а менам бöра кöдзнытö некытчö. Мыйöн понда лöпсö вердны? Али бöра кортöн ветлöтны — виль властьсö стыдитны?

— Комиссия пондас муэсö торйöтлыны, — висьталiс Прокопьевичыс.

— Киннэз комиссияаныт? Абу я эна... Вакуллес...

— Киннэз колöны, нiя и лоасö!

— Менö бöрйö!

Басниыс эз ешты орны, пырис Васька Öсип, киэс сыр-лёль, кыдз мунöм кытчöкö, öшöм, туйсö оз адззы и пырöм татчö, медбы юасьны-висьтасьны.

— Мый, Öсип Васильевич? — предыс юалiс Öсипыслiсь.

— Мый? Öнджа... Ойнас тай кулiс медучöтыс, — вирснитiс нырнас, чорзьöм чунь йывнас син дорсис чышкис синвасö. — Мамыс куим лун ни эз сёй, а мöддэс, кöда вермö, кытöнкö кортöн ветлöтöны. Эд я бы мыйöнкö отсалö?.. — бырöм нинкöммезнас тойис джоджсö, педзис порогыс дорын.

— Мыйöн тэныт отсавны? Медодз тэныт колас мусö кыськö адззыны, — пондiс баитны предыс. — Только буржыка уджав! Эн дышöтчы!

— Уджалам! — юрбöрсö гыжьялiс Öсипыс, кöр тöдöны, что дышкодь, а иньыс эшö дышжык, пондас кö мый керны, асьсö оз вий, мый бердö кутчисяс, медодз суналас-шоччисяс и вöлись пондö уджавны, и челядьыс дынын сiдз жö: медбы нимöтны учöт кагаэсö, сiя мышкыртас юрсö, ассис нянясö заргас öмас и клотшкö-нималö, а кагаэсö прокмö ваявнытö, кыдз год, сiдз и кага, кöр öтдруг и кыкö. Петö, что семьяыс ыджыт, а уджавны некинлö. Талун öтiк кулöм, но кольччисö эшö кыкьямыс — осьта öммез, ой и лун корöны сёйны. Отсавны бы кыдзкö колö мортыслö, и предыс висьталiс, что отсаласö.

Чукöртiсö комиссия, кöда пондiс öтiклiсь шöравны мусö да сiйö сетны мöдiклö — богатжыккесö сыналiсö. Öсиплö мусö торйöтiсö Филарет воныслiсь, кöдалöн семьяыс учöтжык, но гöрис да кöдзис унажык, бытьтö олiс буржыка, кортöн эз ветлöт. Томжык вонлiсь мырддисö мусö, мырддисö да козьналiсö пöрисьжыкыслö — грехö пырисö. Öсипыслöн воныс лöгасис, а Öсипыс лоис рад, доддялiс вöв, ачыс кывзiс тулысся шорлiсь больгöм, сьöдкайлiсь сьылöм, кыз голоснас ыксiс челядьыс вылö да иньыслö закажитiс: «Тэ öнджа... Луннас ветлы кöктоиннэзла, вай да пу! Ме рытнас локта и сёйышта!»

— Ме думайтi, мыся, йöр пöднавны ветла, мед, мыся, подаыс öзимсö оз жö сёйö.

— Ештан йöрсö пöднавны! Ветлы кöктоинысла, вай да пу! Кылiн?!

Мужикыс няридзö пуктiс гöр, пуксис вöлыс вылö, шутньöвтiс. Вöлыс турйöвтiс, вöрзис мунны, но тальччис и эз, сiдз топ и пöрис бы...

Тулысыс пизис. Оланыс лолалiс пыдына да шоныта. Потiс пуэз вылын лист. Сьöдкайез тэрмасисö тэчны поззэз, мужиккес тэрмасисö гöрны. Öсип гöрны мунiс шондi петан гöгöрын, а рытнас шондiыс пуксян гöгöрын, иньыс казялiс, что вöлыс вылын гортö локтö Öсиплöн воныс, Филаретыс, а мужикыс няридзыс вылын куйлö, и юрыс орöм, голясис вотялö вир...

Инькаыс топ кулiс, а Филаретыс öшын увтас ыксiс: «Эй! Кенак, вонöс вайöтi, пырт керкуас», — баитö, чужöмыс вылын топ немымда абу вежсьöм, абу кералöм воныслiсь юрсö.

Волисполкомись предыс котöртiс арестуйтны Филаретсö.

Тулыс. Сьылöны кайез, пондöтчö цветитны льöмпу. Природаыс кыдз вермö, сiдз и гажöтчö, а посадö кыдз локтiс шогöт: отирыс öшöтiсö юррезнысö. Öсиплöн кольччисö челядьыс кыкьямыс. Янсöтчис инькаыс мужикыскöт да кыдз эшö янсöтчис... Öтiк горе вöтiс мöдiкöс: Öсипсö гробын гортын узьтöтiсö куим ой, лöсьöтчисö дзебны морт моз бы — öтлаö кулöммес дынö, но попыс отпевайтiс и висьталiс, что мортыс эз кув аслас смертьöн, и дзебны сiйö ковсяс торйöн, шойнаыс бокö, канаваыс сайö. Сiдзкö, кыдз понöс... Петö, что ловья вöлi мортыс, горзiс да олiс, а кулiс и бöра жö дзебны колö торйöн... Мый сэтöн керны? Кинлö норасьны? Öсипика сэтчин-татчö, попыс дынсянь исполкомö, горзö, корö гижöт, медбы мужиксö кулöммес дынö жö дзебны, öтлаö жö бы, ась мöдöр югытас бессэс дынö оз шед, но Прокопьевичыс попыслö эз вермы висьтавны, медбы сы моз вöлi, кöр шойнаыс вылын хозяиныс вöлi попыс... И тыртiсö кулöмсö шойнаыс вылын торйöн, мед сiя мöдöр югытас пыр олö öтнас — бессэскöт кешитчö...

Эг бы касьтылö этчö Öсипсö, попсö, но видзöтö, оланыс эд бöра шыбыльтö асмознас, бöра попсö да исполкомсö люкöтö оча кымöс, бöра Прокопьевичыс Игнатыс вылö мурзьö, Андрейыслö норасьö: «Кывзы, Öндрей... Игнатыс миян вылö бöра эд бöрöн бы кайö... Но и поп! Оз гленитчы святöй душалö Совет властьыс. Бöра эд проповеддез лыддьöтö, миянöс тэкöт кыдз кужö, сiдз и шуö-видö пö. Враггезöн лыддьö. Бытьтö пö Совет властьыс абу власть. Шуö: «Кытшöм сэтшöмыс власть?! Мый сысянь бурсö видзчисьны, кöр сэтчин пукалöны сатанаыслöн слугаэс?!» Вежöртiн? Ми тэкöт лоим сатанаыслöн слугаэз, а? Ме пö лои Пестер пиян да медумöль морт. Вежöртiн?! Дзик некинöс ог кывзы. Сэтöн жö эта контрибуцияыс... Кинкö думайтiс да тшöктö керны, а ме виноватöй. Öнджа, весь, батя, Лениныс религиясö опиумнас оз шу, оз!»

Андрейыс лöсьöтчис бы вонсö бурмöтны кылöн, висьтавны, мед Мишаыс оз тöждiсь да ракаыслiсь юöрресö оз öкты, но кывсö курччöвтiс да нем эз шу: воныс асныра, кыдз пондас асланяс сынны, вешшы...

Пукалöны кык вон исполкомас, предыс норасьö, а секретарьыс кывзö, сэтчö пырö Степан. Вожмöвтö мортыс порогсö, пондö юрбитны Прокопьевичыс вылö да модьны.

— Спасибо, спасибо, Прокопьевич, не тэ бы... Аминь бы лоис меным! Ась еныс тэныт козьналö буржык здоровье и дыржык овны. Муыс понда эд баита, кöдö тэ, Прокопьевич, козьналiн...

— Кывзы! — сэтöн дундöтчис предыс, гöрдöтiсö синнэс. ― Тэ мыля ме вылö юрбитан? Ме эд тэныт абу ен! Тэ менö попнас эн лыддьы, попныт видö исполкомсö да сералö, и тэ сэтшöм жö!

— Öнджа, Прокопьевич... Кöдзыс бы эшö мымдакö, ― предсö эз вежöрт Степаныс, кеймисис-корис муыс бöрын кöдзыс.

— Вештасö контрибуциясö и сета!! — ыкöстiс Степаныслö

Прокопьевичыс. — А öнi пет татiсь! Мун син одзись!

— Мыля, Прокопьевич? — рамыника шыасис Степаныс.

— Пет, пет! Он ков, — предыс öвтiс кинас.

Вöлись Степансö керкусис, кыдз кöин ньылыштiс. Петiс исполкомсис, но öмыс эд пыр осьта, кин пантасьö, сылö и норасьö: «Кывзы... Пыри исполкоманыс, ой-ой! Мыся этö, мыся, кöдзыс кора, а предыс сэтшöм лöг, ой-ой-ой! Попсö кыдз видö и богатöйес вылö стрась лöг... Ме пö! Öнджа пö! Богаттёсö пö велöта овнытö. Весöта пö горттэзсиныс, мать их! Öнджа пö...»

15

И пондiсö думайтны мужиккес — öшисö олансис, кöр öтiк öтнёж, мöдiк мöднёж, он вежöрт, кинлö да мый колö — оланыс нач онняюртчö, сiйö и видзöт, кыдз локтасö да мырддясö медбöрья сю тусьсö, и сыбöрын тшыгйöн коккетö нюжöтан. И кин дынö котöртны, кинлiсь отсöтсö корны? Исполкомö оз лысьтö эмись и абуись пырны, кöр предыс сэтшöм лоöм... Зэлöтö бы быдöнöс. Мужиккеслöн грамота етша, но пельпоннэзныс вылын эшö юррезныс эмöсь, эшö вежöртöны, кин ны дор: медодз бöра котöртöны вичкуö, юрбитöны еныслö — кеймöны, корöны отсöт, норасьöны попыслö, и Игнатыс пондö лыддьöтны молитваэз, еныслö висьтасьö оланыс йылiсь, видö виль властьсö, öтлаö гардö исполкомсö, коммунисттэсö... Эта кывсьö исполкомöдз, и исполкомсис предыс гичрасьö да некинлiсь оз пов, надейтчö ас вылас, некытчö оз норась, йöзö умöль юöррез оз иньды, оз петкöт.

Сiдз талун да ашын — лунiсь лунö, посадын отирыс янсалöны: öттэс эстöн, мöддэс сэтчин, öттэс лöгöсь и мöддэс лöгöсь.

Гожумнас öтiк кресенняö богатжыккес асывсянь öксисö Рыжöй Мититтэзö. Мититлöн бытьтö бы талун нимлун, и мужикыс босьтöма вина, иньыс сысъялöма ырöшшез, погребö заптöма сур да сюромка, пусьöм-пöжасьöм.

Мититыс лёк и надз — этö посадын тöдöны, тöдöны и сiйö, что мортыс отирыскöт öддьöн оз баит, оз тöдчы, олö да уджалö, беднöйжыккесö отирö оз пукты, пыр шуö понпияннэзöн, оз тöдчы и богатжыккескöт, топ мортыслiсь чомсис заптöмсö сiдз кинкö и гусялас, мырддяс, вывсис чöвтас аскыйöм дöраись асвурöм важ йöрнöссö, коккезсис пöрччалас важ нинкöммесö, гусялас подасö да мырддяс иньсö, кöдö сьöкыт уджыс сiдз ни нярьялöм, сiдз сёйöм и вартöм, что инькаыс кольччöм дзель ыжда, но пыр котрасьö — ой и лун коккес вылын, ой и лун мырсьö и пыр полö мужиксис, кöда етшажык баитö, а унажыкись вачкö...

Митит кодьыс посадын некин абу. Мöдöтпыр бы сiя иньсö эз лэдз ырöшсö сысъявны и вийöтны сурсö, эз бы керкуас чукöрт ёрттэсö, праздникöн жвангас бы ыбöссэсö, посöдзныс дынöдз бы эз лэдз не айсö, не мамсö, но талун тöдвылас усис чужан луныс да, натьтö, öддьöнжыксö сiйöн, что лун-мöд кыдз чулалiс, корлiсö исполкомö и кышалiсö вештыны контрибуция, медодз деньгаöн, а сыбöрын и чомсис петкöтасö мый эм и абу.

— На! Öмтö ось да бось!.. Эм да аслам! Эна киэзöн сюсö быдта, а тi... Тьфу, понпияннэз! Асьныт од уджалö, а йöзыслiсь сёят бы. Öтiк тусь ог сет, кöпейка од босьтö! ― мурзис мужикыс, синнэс вирдалiсö, юрыс вевдöрын öвтiс кулаккесö, быдöнöс бы рез-паз керис! Сьöлалiс и видiс, лöсьöтчис пиннесö кисьтны сылiсь, кöда локтас и пондас бы мырддьыны йöз быдтöмсö.

Немись и некинлiсь эз пов Мититыс, эз лöсьöтчы янсöтчыны сюöн да деньгаокöн, ась кöть быдöнныс öтiк лунö черпезьдöны! И Совет властьыс Мититыс вылын абу хозяин, кöр ачыс асьсö верднытö оз вермы, а сiя ачыс асьсö вердö, оз гусяв, оз мырддьы некинлiсь, кортöн оз ветлöт, слугаэсö оз видз.

Этадз и висьталiс Мититыс исполкомас — веськыта шырзис, кöр сiйö корисö предыс дынö. Сэк сiйö кывзiс Прокопьевичыс, но вежсис чужöмыс вылын, и Андрейыслiсь, кöда пукалiс пызан сайын да гуддисис гижöттэзын, юалiс: «Мый пондам керны?»

— Ась вештiсьö, — висьталiс Андрейыс.

— Кылiн, Митит дядь! Вештiсьны колö! — Мититлö ыкöстiс Прокопьевичыс.

— Нем од адззылö! Ассиныт сёйö! — ружтiс Мититыс. ― Велалiт ни миян коддесö чилькöтны. Ловзисьны пыдынжыка од лэдзö, куль пияннэз.

— Кин куль пияныс?! — тырппес пондiсö дрöжитны Прокопьевичыслöн. — Ми я мый я куль пияннэс?! Советыслöн властьыс? — чеччöвтiс пызаныс сайись, öвтыштiс кулакнас, голосыс сибдыштiс. — Митит дядь, тi бöра Колчаксö видзчисят я мый я?!

Пöрисьжыкыс вылын ыксiс Прокопьевичыс, и Андрейыслö лоис недолыт, но вонсö эз понды падтыны. Андрейыс чеччис пызаныс сайись, вожмöвтiс порогсö, пуксис öтöрись посöдзас и пондiс пукавны да кывзыны, кыдз воныс сёрнитö Мититыскöт (гожумнас жар и ыбöсыс осьта, керкусис öтöрас басниыс кылö...)

— Сiдз, Никита Митрофанович!.. — Андрейыс бöрын пиннес пыр горöтчис Прокопьевичыс, синнэсö мöртiс Мититыс вылö, кöда пукалiс джек вылын, джекыс увтас ружтiс да дзуртiс: мужикыс топыт, кыз, голяыс порозлöн кодь, киэс кага юр гырисяöсь — вачкас кö... Таралан да дыр он чеччы. — Сiдзкö, Никита Митрофанович, ми кычаннэз, а тэ морт! — Прокопьевичыс баитö Мититыскöт да видзöтö сы киэз вылö. — Сiдзкö, тэныт Совет властьыс эм и абу? Враг тэ, Митит дядь. Вöлiн враг и врагöн кольччин. Сiдз?! Или абу?

— Мыля ме враг? Кинлö? — мурзьö Мититыс — обида мортсö тальö, дойдö.

— Враг, мыся! — чужöмыс чочкоммис Прокопьевичыслöн. — Узян и вöтасян, кыдз бы Совет властьсö онняюртны! Ме эд эг вунöт, кыдз тэ, Митит дядь, Колчакыс дыр дружинаас жö вöлiн да отирсö полöтiн. Сiдз эд?! Вöлi эд?!

«Но и мый?.. — Мититыс чужöм вылын öтiк чукыр эз вöрзьы, веськыта видзöтiс кымöсыс увтöт, думайтiс аскöттяс. — Зырымöсь куль тэ! Пышшалiн, да эн шед. Шедiн бы... Ме бы тэкöт уна эг баит! Кучиктö ловья вывтöттят бы кули, понпиянлiсь!»

— Митит дядь, враг тэ! — одзлань тшупö Прокопьевичыс. — Ми тiян коддесö тöдан мый керам! — няпыртiс кулаксö. — Мый пиньласян? Думайтан ме ог адззы, кыдз пиннетö гручкан?!

Мититыс ружтiс, чужöмыс гöрдöтiс, дундöтчис, польдiс — вермис бы, Прокопьевичыслö пичиктiс и абу, но вежöртö, что кöть и вына, да öтнас, керис бы, да оз позь.

— Контра тэ, Митит дядь! — одзлань кыввесö шупкалö Прокопьевич. — Враг тэ, Митит дядь! Спасибо висьтав, что ловья, что одззаыс понда эз лыйö. А ме тэнö, Митит дядь, ачым лыя! Он кö вешты талун жö контрибуциясö, вия!

— Тьфу! — видзчисьтöг сьöвзис Мититыс. — Зырымöсь куллез! Шедiт этчö и куснялат олансö, поннэз моз отирсö пурат.

— Сiдз?! — Прокопьевичыслöн чочкоммис чужöмыс, вирыс топ сувтчис сьöлöмас, син одзас пемдыштiс, гичыртiс пиннесö... Сiдз лöгасис, топ асьсö вунöтiс, эз тöд мый керны: сöтны я Мититыслö пельбокас или... — Контра! Враг! Думайтат ог тöдö, кыдз пиннезнытö кеслат Совет властьыс вылö?! Тöда! — ньылалiс дульсö, синнэзас сэтшöм лöг югöр, что мöдiк бы Мититыс местын быль повзис, öшöтiс юрсö, эз бы паныт понды пиньгыны, а Мититыс сiдз жö, сэтшöм жö лёка видзöтiс Прокопьевичыслань, бöра бузгас:

— Нем тi месянь од адззылö! Абу менам деньгаыс и сюыс абу жö, чожа ачым понда кортöн ветлöтны!

— Сэк он сет?

— Ог.

— Сета-а-ан! — лöга и гажöн шуис Прокопьевичыс, мышкыртчис пызаныс весьтын и осьта кодь пызан жырокись синнэс вылö усис наганыс, кöдö козьналiсö неважын районын, и сэтöн жö кинкö кыдз нагансö сетiс киас, босьтiс сiйö, перыта лэбтыштiс веськыт киас, иньдiс пöрисьжыкыслань и пишнитiс. — Ме-е-е... Тэнö, гадöс, лыя! Или вештан контрибуциясö, или эта чачаöн кымöстö пырöта! Кöдыскö öтыс.

Мититыс чочкоммис, дульсö зубыта ньылыштiс, пондiс пишкыны, кыдз шедiс ош гыжжезö: вöлi мортыслöн праздник кодь оланыс да чулалiс...

Сiдз и петiс мужикыс исполкомсис, мунiс веськыта гортас, öтöрсянь стук да бряк, ыксö иньыс вылын: «Вия! Пазда!»

Инькаыс эз ешты синнэсö буржыка осьтны, кыв горöтчыны, мужикыс заргисис джоджулö, мудöт кер увтiсь кыскис деньга и бöр öтöрö!

— Господи прости! Кыдз нö пондам овнытö? — Мититлöн иньыс пондiс чышкыны синваэсö, а эта коста öтöрсяняс öшынас люкасис кытшöмкö ыджыт кай и рез-паз жугдiс стеклосö. Добро одзын разь эта?

Мититыс волисполкомö мурзьытöн вайис деньга, швыргис Прокопьевичыс одзö, пиннес пыр висьталiс: «Сёй да сэсся эн кор! Абу!»

— Эм! — серöмтчис Прокопьевичыс,

— Абу, мортсёйиссез! — синваэссорöн горöтiс Мититыс — и ыбöсö! Брякнитiс бöрсяняс ыбöссö.

— Эм! — предыс видзчисьтöг, кыдз мыдзис и нем сылö эз понды ковны, шляпкисис джек вылö да пондiс думайтны, что, буржык бы вöлi гöрны, нежели этадз отирыскöт овны. Лöгувьяс Прокопьевичыс шупкис бы ассис уджсö, но чожа сайкалiс, раммис, няпыртiс кулаксö и воныслö шуис: «Вот сiдз, Öндрей вонö... Нiя миянöс, а ми нiйö... Кин да кинöс! Правдаыс миян дор! Тырмас нылö отирыслiсь вирсö юны, мед пешлöны жö умöль олансö!»

Вештiс Мититыс контрибуциясö. Мöдiк лунö сылiсь Гриваыс вылiсь мырддисö медбур мусö, и кыдзкö öшын увтас локтöма Васька Öсиплöн зоныс да корö: «Митит дядь, вöвтö сетлы öтiк лун кежö... Ме гöрышта Оль дорсис муоксö и бöр Воронкотö вайöта...» — Мы-ы-ый?! — пишнитiс Мититыс, сылöн вывтырас кыдз киссис пым пöим — сотыштiс. — Мый, понпиян, коран бы?!

— Вöвтö, мыся, сетлiн бы, — синнэзас веськыта видзöтö зонкаыс, кöда гортсис вöвсö эз адззывлы и оз адззыв, но корö эд...

— А тэ вунöтiн я мый я? Айтö эз я йöз добро понда торкö — юрсö масьтыштö, и тэ сэтшöм жö... Вöв коран. А быдтiн я Воронкосö?!

— Эг, но волисполкомсис предыс тшöктiс...

— Коккес коласiсь ась сетö, мед йöз керкуас оз ло кöзяиннас! На. Вот тэныт! — мужикыс зонкаыслö ныр увтас заргис бирулькасö. — Доддялö волисполкомовчиыскöт этö! И гöрö... Эн вежöрт? Эшö мыйкö видзчисян?! Кытöн жö черыс?! — коссис малыштiс бы черсö, кöда эз вöв. — Юртö понпиянлiсь масьта! Керала!!

Зонкаыс öдззис котöртны, но колис сэтшöм шогöт, что сыбöрсянь не сёйны, не юны, не узьны — олан эз ло, бытьтö быдöнныс враггез — гортын и йöзын, керкуын и öтöрын... Лöгыс пондiс петны, некинöс бы оз адззы. И кыным мортыслöн лöгыс петö öддьöнжык, сыным оланыс сiйö дойдö ― мортö оз пукты. «Сулалö, öнджаэз! — мурзьö Мититыс. ― Кытчöдз ловья, ышö мыччала! Ышö адззылат Мититсö!»

Олiс мортыс — ой эз узь, мöдiкö, сыбöрын сёр рытö няридзö тэчис сюöн тыра мешöккез да вöвнас кыскис вöрö и сэтчин тыртiс гуö. И топ рад лоис, нерны пондiс враггесö: «Од адззö! Од сёйö!» Гажöтчис, но недыр: ашынас одзся-одз асывнас бöра öшын увтаныс сибöтчö Васька Öсиплöн вежöмыс — öмыс реш видзö, рад, вылас йöрнöсыс рукли-ракли, сизим дöмасöн вочöм, вешьяныс — яйыс тыдалö, кöмтöм, рожаыс сьöд, пиннес гер, кылыс öмас лет-мот и ветшкö:

— Митит дядь, вöвсö меным эн сет, да еныс асьтö адззис! Дзебин сютö, да адззисö! Э-э-э...

Мититыслö топ кымöсас шентiсö обухöн! Медодз нем эз адззы висьтавны, но öдззöтчис-öдззöтчис да горöтчис:

— Ме тэныт! Понпияннэз! Да тi... — мышкыртчис, коккес дынiсь киас шедiс бедь и быд вынсис бедьнас швыргис зонкаыслань.

Вийис бы, натьтö, зонкасö, но сiя ештiс бокö чеччöвтны, пышшис неылöдз, бергöтчис, кывсö мыччис и нерö: «Э-э-э, Митит — вешьяныт куш сiт, шедан волисполкомас!..»

Мититыс кулакнас вачкис аслыс моросас — сьöлöмыс берездасис. И пондiс мужикыс тальны да вачкыны — кин матын, сiя кивзытöн и пышшö. Иньыс кивзiс-керис да шуис жö:

— Енсис кöть бы полiн... Ашын эд витдас год да сизим ни тырö, а тэ сё öткодь... Чужан лун, мыся, ашын!

— Кинлöн?! — öмсö осьтiс Мититыс, кыдз повзис. ― Быль я мый я? Отирыс чужан луннэзныс кежö, öнджа, а менам... Ой и лун уджала, уджала, сё сымда... Не тшыг, не пöт... Мый эм, сiйö мырддьöны, — öмыс пиньöвтчис, и синваэс петiсö.

Иньыс эз адззывлы, медбы кöркö горзiс мужикыс, а сэтöн — на! Мититыслöн петiсö синваэс... Этасянь жаль лоис мужикыс, небыта ни горöтчис:

— Сысъяла нö ырöшсö и сур кера... Бат, кинöскö юöртан? Отир моз жö...

Шы эз сет Мититыс...

Гожум. Погоддяыс орсö: талун зэра, ашын мича. Быдöн тэрмасьö керны турун: одз асывсянь кин да кытчö и мунö! Некин гортын луннас абу; кöда тэрмасьö ытшкисьны, кöда куртны — быдöн видзöтлö шондiыс вылö. Мититыс талун некытчö эз тэрмась, бытьтö лöсьöтчö кувны и нем сылö оз ков — не турун, не вурун...

Одз асыв. Митит ордö дзуртö-локтö Ипат — этö Мититыслöн сват, кöдакöт Мититыс важын ни оз здоровайтчы, бытьтö оз тöд и оз адззы сватсö, кöда сы кодь жö чорыт, надз да жаднöй: чуньтö öмас эн сюйышт, курччöвтас! Но талун Ипатыс уджавны эз мун, а асывсянь типкыльтiс сватыс ордö, кыдз полiс, что орддяс кö Мититсö, сылiсь сымда и сёян ― нем он адззыв. Дыр мыйись Ипат сьöрö вöтчис Фрол, сэтшöм жö будзгыля сина, богатöй жö мортыс, осьта öма — быдöнöс нимкодялö-шуö да видö, бытьтö сы кодьыс абу и оз ло, и туйсö эн поперегав: джöмдан, усян да коктö чеган. Фролсö шуöны тöдiсьöн, кыввезнас кужö пö тшыкöтны и веськöтны. Фролыслöн эз ешты саясьны спинаыс Мититтэз керкуын, кыдз дзир-бар öтмöдöрö видзöтчытöн эшö мунö мужик, сы сьöрö вöтчö мöдiк. Гöссес сьöрсьöн-бöрсьöн локтiсö, пырисö керкуö, пернапасасисö порог дорын и веськыта порогыс дорсянь пуксисö пызан сайö, босьтiсö паннез, пондiсö панявны шыд.

Хозяиныс пызан вылö сувтöтiс четверть вина.

— Öнджа... — пондiс мыктавны Фролыс. — Грех жö, поди, асывсяняс винасö юны? Видзöтö жö кытшöм погоддяыс. .. Куртны бы колiс. — Кин тэнö татчö корис?! Гезöн я мый я кöрталiсö да кыскисö?! Мун да курт. Уджав, вижлок! Уджав, мед гöгыт письтö да гырнич ыжда кила лэдзчисьö! Думайтан вижлок öмнат пыр кежö потан?! Он эд... Талун керан, ашын локтасö волисполкомсянь да нöбöтасö, и пондан Васька Öсипыс моз жö тшыгьявны да Криста радиöн ветлöтны. Али Советтэскöт лöсьöтчан овны?

— Ме?! — голясö нюжöтiс Фролыс. — Медодз, эта... Васька Öсипыс абу ни ловья, и нем сэтшöмсö нянь-сов дорас касьтывны, а сыбöрын... Мортсёйиссескöт, ме кула, да öтiк пызаныс сайö ог пуксьы! — витшыктiс, ньылыштiс дульсö и содтiс. — Ог понды волисполкомас юрбитны!

— Кытчö воштiсян?! — пиннес гер Ипатыслöн. — Кыдз эшö пондан нювны бöр гöгöрсö Пестер пияныслiсь, ого!

— Ме?! — Фролыс чеччöвтiс пызаныс сайись, босьтiс тыра туис и шоччисьтöг пондiс ружтыны да дзунгыны-юны, кытчöдз эз рекмы дозыс. Юсис ырöшыс, мужикыс долоньнас чышкис öм гöгöрсö, ружтыштiс, малыштiс кынöмсö и бöра ыкöстiс. — Ме?!

— Тэ, тэ, сват... — Ипатыс нерис ёртсö.

— Тырмас тiянлö! — хозяйкаыс пондiс падтыны гöссесö. — Мый сэтшöмыс лоис? Мыля миян керкуын горöтлат?

— Дугдö, — рамыника висьталiс хозяиныс, винасö кисьтiс рюмкаö и пондiс гöссесö юктавны сьöрсьöн-бöрсьöн — быдöннысö öтмымдаöн.

Мужиккес мурзисö, хозяиныслö кöсйисö дыржык овны да буржык здоровье, медбы этадз жö пыр пызаныс вылын вöлi тырдоз.

16

— Тырдоз!.. — юис винасö, йöрнöс соснас чышкис öм гöгöрсö да висьталiс Фролыс. — Кытшöм ни öння кадын тырдоз лоас? — и кытiськö кыдз мезмис да ыкöстiс. — Видзöтö... А... — пондiс пильскыны-горзыны. — Пасьтöг колясö... Ы-ы-ы, копейка-мöд заптылi да сiйö мырддисö... А кин да мый меным сетiс?! Эна киэзöн эд быдöс кера. — Пуджис йöрнöс соссэсö, няпыртiс кулаккесö, кöдна чорзьöмась уджсяняс, кыдз нятьöсь иззэз. — Эна киэзöн и киж-каж кера! Совдеповщинасö, вот...

— Эн жö, сват... Дугды... Кин йöзыслö гусö гарйö, ачыс сэтчин пырö, — хозяйкаыс пондiс бурмöтны Фролсö.

Мужиккес кутчисисö туис бердö: öтiк юас туиссис мымда вермас, сыбöрын сетас мöдiклö. Ружтöны да юöны гöссес, чужöммезныс гöрдöтiсö, коддзисö.

— Олiм, сваттэз, кыдз öнджаэз, — пондiс ошшасьны Фролыс да бöра чышкыны синваэсö. — А öнi ог тöд... Кыдз Библияас гижöм...

— Сiдз и кулам! — висьталiс мöдiк. — Не одзаным, не бöраным оз ло, срам!

— Еныс асьнысö адззас, — бöра ружтiс Фролыс, бöра туисiсь бы лакис сюромка. — Адззас, мужиккез, еныс. А мый думайтат?

— Еныс? — Фролсö нерö Мититыс, кöда юис шоныт ырöшсö да сiдз польдiс, что бытшкы кынöмас пыжьянöн, шлоп потас и кулас, но эз пот и эз кув, а одзлань кивзiс. — Еныслö öнi тöдат кыдз пондiсö видзöтны... Бессэс! — видзчисьтöг кулакнас гымгис-вачкис пызан пöлыс кузя. — Эх! Синнэзнымöс куням да видзöтам, а нiя керöны! Чожа иннезнымöс син одзаным кутасö, подуллэзнысö лэбтасö, а ми пондам видзöтны да дуллезнымöс ньылавны!

— Жыддэз! — пызаныс сайись сьöкыта лэбтiсис Ипатыс, ловзисис. — Разьны колö зiпозсö! Рез-паз и абу! Медодз джагöтны Пестер пиянсö!

Ипатлöн мывкыдыс — би, синнэс вирдалöны — эн вöрзьöт! Вöрзьöтан кö, вияс! Орддьы сэтшöм мортсö, кöр код и лöг.

— Виям! — Ипатыс нетшкöвтiс мороссис йöрнöссö, киззес рич-рач! — Виям!

Керку ыбöсыс оссис, ыбöсыс сайсянь юрсö мыччис Ипатлöн зон, Третьяк, да айыслö шуис: «Ая, тэнö мамö гортö корö. Куртны колö мунны».

— Куртны? — кыдз эз вежöрт айыс. — Кин корö?

— Мамö.

— Мунö да куртö, а ме талун шоччися. Мый ме шуи?! Зынбуссэз! — джек вылiсь ружтытöн чеччис Ипатыс, джекыс пöрис, мужикыс турйöвтiс, вачкис кулакнас моросас, кыдз тыра кöньöсö. — Ме тiянöс!

— Ай... — шыасис Третьякыс ыбöсыс сайын ни, но лöнис, кöр айыс пызаныс вылiсь босьтiс тыра бекöр да сiйö швыргис зоныслань.

— Ы-ы-ы, буссэз! Кин мекöт?! — чужöмыс сiдз вирсялiс, бытьтö сiдз и вотьыштас вирыс джоджас. — Кин мекöт?! Кин бессэсö тальö бы?! — мышкыртчис, лабич увтiсь босьтiс чер, лэбтiс юрыс вевдöрö и öтöрö! Вешшö, масьтас!..

— Господи, вияс эд! — комын садьыс бырис хозяйкаыслöн, а Ипатыс эрзiс ни öтöрас:

— Ы-ы-ы, мортсёйиссез! Вирьюиссез! Овсис тiянлö! Праздникыс оссис миян! — чернас сöтiс бурундукö, кералiс посöдз бердiсь важ кöньöс, сöтiс бы петухлö, но эз инмы и пондiс öвтны чернас шульга и веськыт ладорö, кыдз бергалiс аньборд — матö эн сибöтчы! Виртöм Ипатыс, некинöс оз жалейт: вияс йöзöс и роднöйезöс.

— Господи! — керкуас кивзiс хозяйкаыс. — Господи, мый ни тi керат? Еныс эд чарöтас, вияс!

— Нем оз ло! — Мититыс чорыта муныштiс джоджöттяс, горöтчис иньыслö. — Нем оз ло, Öпим! Важын ни колiс разьны Советтэсö, да некинлö вöлi, а талун луныс гажа.

Смев мужикыс, не весь сiя Колчакыс дыр вöлi дружинаас жö, сыбöрсянь пышшалiс вöрын жö и медодз петiс вöрсис, топ немись и некинiсь эз пов и ёрттэслö висьталiс: «Эд полö! Нем оз ло»... И быль тай дружинниккес кольччисö дзоньöсь, кöть и морт-мöдлiсь сотiсö керкуэзнысö, натьтö, Советтэс думайтiсö, что враггес пöрасö бур отирö, а сiя видзöт жö...

— Нилям коммунисттэсö! Пеляннэз вылö масьтам! — Мититыс тожö пызан вылiсь джодж шöрöдз швыргис бекöр и керкусис уськöтчис öтöрö.

Митит да Ипат сьöрö вöтчисö ёрттэзныс, сэтшöм жö кодöсь, кöда бедьöн, кöда зорöн — киэзныс сярганнэз и вешшы-пышшы, кытчöдз боккетö эз гындö! Сизим морт улицаын зызöны, кыдз быдса рота-банда, медодз лöсьöтчöны разьны исполкомсö.

Шондiыс вылын ни, пöжалö-шонтö мусö. Кай и курöг, пон и порсь заргисисö поссэз увтö, только пöрись Устья баб, кöда кылö, но оз адззы, павьялö улицаыс шöрын, топ видзчисьö кöр зорнас вачкасö горбас... Сiдз и петiс: Мититыс брынгис старухаыслö, сьöвзис и одзлань мунö — вешшö том и пöрись!

Эта часö жö кытчöкö да мыйлöкö мунiс попыс. Сiя эз тэрмась, некинiсь эз пов, бура тöдiс посадiсь отирсö, сувтчыштiс да пондiс видзöтны коддэслань.

Чирзiсö чикиссез, чивзiсö воробейез. Ипат лöгувья топ эз адззы попсö, öвтiс чернас юр вевдöрас.

Поп кутiс моросöттяс Ипатсö.

— Сулав, раб божöй, — попыс рамыника висьталiс Ипатыслö, нюжöтiс кисö и кокнита мужикыс киись мырддис черсö да бöра баитiс. — Грех сiдз кернытö... Еныс чарöтас...

— Кинöс?! Менö?! Коммунисттэс понда я мый я?! Öнджа ме нiйö!

— Грех, раб божöй, — пернапасасис попыс, веськыта видзöтiс Ипатыс синнэзö, осудитiс или ошкис, он вежöрт. ― Грех, мужиккез...

— Кералам сотанаэсö! — Ипатлöн öмсис резсис дуль, мороснас пыкис попсö.

— Кералам! — ордчöн ружтiс ни Мититыс. — Виям, батюшко! Кöть грех, кöть спасеннё.

— Оз ков грехсö босьтны душаэзныт вылö, — ласковöя баитiс попыс и веськыта видзöтiс пороз синнэзаныс. — Асьныт юррезнытö öштат.

— Немись ог полö! — Мититлöн öмас шапсис быг.

— Но и Христос тiянкöт... — медбöрын горöтчис Игнатыс.

Коддэс эшö смевжыка иньдöтчисö исполкомлань, öтамöднысö тойлалiсö-турьялiсö, ыксiсö: «Еныс миян дор! Еныс оз сет...»

Исполкомын öтнас пукалiс предыс да гуддисис гижöттэзын. Öтöрас жар, а керкуын ыркыт. Öтöрын чирзiсö воробейез. Прокопьевичлöн думаэс бергалiсö Киршинаын — деревняын, кытöн мужиккес öтамöдныс коласын эз пондö лöсявны, мырддясисö муöн: кöдзисö да гöрисö öтамöдныслiсь и юасьтöг-висьтасьтöг, кыдз асьныс ас выланыс хозяиннэз, эз тöдö не власть, не полöм.

«Отир... — модис горöн предыс. — Чеччалат... Мый колö, сiйö и пондiт керны, бытьтö, некытшöм власть тiянлö эз ло, хозяин тiян вылö оз адззись!.. Сибала... Бытшöмика пондыла баитны, а од кö пондö кывзiсьны, ас выланыт горзö! — лöгöн да вывтi ни горöн горöтчис Прокопьевичыс. — Норася! Ась бöра вовлöны и ась велöтöны овнытö!..»

Сэтöн предсö кыдз кинкö пондiс ошкыны, кöр сiя думаэзнас асьсö пондiс лэбтыны отирысся вылöжык — лыддис асьсö ыджыт начальникöн, кöда вермö керны быдöс, мый колö; думаэс кыдз йöктiсö, гажöтiсö, ошкисö: «Тэ эд, Прокопьевич, пред, и тэись полöны жö, ась... Оз кö немымда пондö повны, кытшöм тэ сэк лоан пред? Мый тэись? Кытшöм олан лоас Пальникас? И Киршинас... Муна кö... Нагансö колас сьöрö босьтны... Сiдз, а мый? Кин тöдö, мый нiя сэтчин думайтöны? — öмсö осьтiс, пыдына ловзисис, нюжöтчис — оныс петiс: тöн рытсяняс гортын иньыскöт кань да пон моз öтамöдныс вылö мурзисö и вувтiсö. Таняыс локтiс уджалансянь, мыдз, тшыг, лякасис мужикыс бердö да пондiс модьны: «Тэ весь олiсь! Кöть бы öтпыр мунiн мекöт да отсасин! Он и думайт чуньöн павкны уджас. Мый пондан сёйны? Сэтiсь жö эд панялан!» Мужикыслöн медодз синнэс баралiсö, öшис, кывзiс-кывзiс иньсö да висьталiс: «Тöдан мый... Тупкы öмтö! Пиннетö эн мыччав, эн гыжьясь! Учöт эшö керкуас хозяйкаыс, вежöртiн?! Мый ме? Ог я мый я уджав?! Думайтан исполкомас вода да узя или кот моз бöр гöгöрöс нюла?! Тэнö бы ме местö! Видзöтi бы...» Сэтчöдз пурсисö, что медбöрын иньыс пондiс горзыны, петiс посöдзö, водiс куш джоджас да сэтöн и узис, и Прокопьевичыс дыр эз ланьт: куйлiс западня вылын, думаэскöт вермасис — асьсö пурис, онмöссис кытöнкö ойшöр бöрас, а öнi петö оныс, недолыт, лöг ас вылас, иньсö эз бы и адззы, уджыс сэтшöм жö...

Исполкомын ыркытжык нежели öтöрас. Шондi югöрыс пырö öшыннэзöт, нюжöтчö джоджас, павкö пызаныс дынöдз. Предыслö син вылас усис гижöт, кытчö кырöвтлiс кинлiсь колö медодз босьтны контрибуция, и кин сiйö вештiс ни. Босьтiс, бергöтiс гижöтжугсö, тöдвылас усис Мититыс, кöда медöддьöн пыксис, эз бы вештiсь, но кытчö воштiсяс?! Вештiсис, контра! Сетiс деньгасö и сюсö, кöр мыччалiсö нагансö... А мый нö?! Кыдз эшö сэтшöммескöт? Юрнысö малавны или юрбитны еннэзлö моз?! Аскоддя лöг и гаж ошкисö Мититыс понда Прокопьевичсö, кöр сiя вермис-керис, некинöс эз кор отсавнытö и пондас керны! «Сiдз!» — предыс няпыртiс кулаксö, вачкис пызаныс вылö, сыбöрын кымöсыс вылiсь чышкис ньылöмсö: жар, кöть öддьöн он и вöрöтчы, жарсяняс висис ни юрыс, водiс да чöскыта узьыштiс бы, но некöр узьны. Районсянь вайисö сэтшöм гижöт, что ойнас он понды узьны: юöртöны, что вöррезын пондöмась шатласьны бандиттэз и лöсьöтчöны бы онняюртны Совет властьсö сiдзкö, ов да видзöтлы, председатель! «Бандиттэз! — мурзис Прокопьевичыс, неöтпыр ни лыддьöтiс гижöтсö, думаэзнас ошшасис. ―Адззисьöмась! Полöтöны... — клап вачкис веськыт кинас бокас: наганыс эз вöв, сiдзкö, вунöтiс гортö. — Юртöм петух! А кыдз локтасö?! Но и ась! Ог пондö орсны... Ыкöста коммунисттэсö, комсомолеццесö корам, мед оз сулалö, а то медбöрья кадö томмес эз пондö öддьöн вöрöтчыны...»

Прокопьевичыс исполкомын баитiс аскöттяс да видзöтiс öшынö: öтöрын, йöр вылын, пукалiс рака да осьта öмнас пыдына кыскалiс шоныт русö, пукалiс и видзчисьтöг лэбзис, топ кайсö кинкö повзьöтiс... «Бандиттэз...» — кокнита серöмтчыштiс предыс, зепсис перыта кыскис кисет, гардiс чунь кыза чигарка, öзтiс, горша кыскис тшынсö, виньдiс, кызöтiс-керис да чышкис синваэсö и бöра клап вачкис бокас, кытöн пыр öшалiс наганыс, нö талун сьöрас эз вöв...

Öшын увтöт котöртiс Мититлöн поныс, мунiс дыша — öтiк понiсь эз пов, бытьтö хозяиныс кодь жö — сiя и эм! Прокопьевичсö кутiс лöг, думаэс кежисö Мититыс дынö, горöтчис: «Вижлок! Осьта öма, гав-гав! Кыдз кытшöмкö собраннё, пон моз и вувтö и отирсö гусьöн чувйö: «Мый тiянлö Советтэс вайисö? Кытшöм чöскыт тор? Медбöрья вешьяннэзнытö чöвтасö, хи-хи...» Гусьöн олансö соровтö, но Прокопьевичыс кылö эд и адззö. Этатшöмыс тэ дор, председатель, оз ло, мыйись мый... Медодз горшат пуртсö мöртас... И мыля жö бы Колчакыс бöрсянь ловйöн колисö сэтшöмсö? Этö некыдз эз вермы вежöртны Прокопьевичыс, этасянь öддьöнжык петiс лöгыс, вештiсис бы, но киэс эз судзö, быдöс кытчöдз сылö эз сетчы...

Недолыт талун Прокопьевичыс сьöлöм вылын, и ачыс бура оз вежöрт, кытшöм лöдз сiйö курччöвтiс зубытжыка: иньыс или йöз отир...

Прокопьевичыс исполкомын дзир öтнас — шыр джоджöт оз котöрт, не видзöтны кö гуттэз да лöдззез вылö, кöднасянь оланыс абу не öтöрын, не керкуын. Öтнас керкуын предыс, секретарьсö лэдзис уджавны аслыс, луныс кöть шондiа, да кытшöмкö гажтöм. Прокопьевичыс то пуксьывлiс пызаныс сайö, то чеччывлiс, вовлiс öшын дынö, видзöтчис öтöрö, синнэсö лэбтыштлiс кымöрас, кöда вöлi лöз и лöз, шондiыс ёрис синнэсö, ылын вöрыс дзик гажöтчис, йöррез весьтын дзöрис руыс, волисполком öшынöт тыдалiсö и ыббез — межа да межа: öтiк торын быдмö рудзöг, мöдiкын ид, куимöтын зöр... И, тыдалö, Третьякольлань гöрö Паль Гриша. Сылö муоксö сетiсö таво ни — Мититлiсь жö бöра шöрыштiсö нянь шöрöмсö, и ась мортыс гöрö, гажöтчö, что исполкомыс беднöйесö оз вунöт. «А тэ мый нö, Пестер, öшынöттяс видзöтчан, а он гöр? Или иньыт кыдз висьталiс, сiдз и лоас — он мöд сёйнытö? Видзчисян, что Гришаыс пондас вердны... Натьтö, эд оз, кöть тэ асьтö и пуктан начальникö. Колö бы кыдзкö гöрны жö...» — Прокопьевичыс видзöтiс öшынöт ылiсь и матiсь ыббеслань, адззис йöзлiсь уджсö, думайтiс ас йывсис, эшö юрас пырис сэтшöм дума, что бур бы вöлi гöрны кö муэсö öтлаын — öтiк бороздаö сувтны мужиккеслö и шулявны, сэк кокнитжык вöлi бы... А кыдз пондiсö бы öтамöдныс коласын торйöтны быдтöмсö, эз ни думайт, только тöдiс, что мужиккес сы моз оз керö — оз сувтö öтiк бороздаас, кöть тэ юррезныс вылö майöггез лöсав, озö и озö, кöр быдöн медодз пессьö ас пондасис. Предыс бытьтö олiс ни ашыння лунсö, думайтiс-орсiс думаэскöт и эз казяв, кыдз сотчис чигаркаыс, кыдз саймыштiс, кöр биыс чуткис чуннезас.

Эта коста öтöрас пондiс кывны кытшöмкö гайзöм. Мый лоис, кин да кинöс видiс, вермис öмнас и мый колiс, вежöртны вöлi сьöкыт...

Волисполком керкуын ыбöсыс осьта. Прокопьевичыс ыбöсас эз чепöссьы, а юрсö сюйыштiс öшын косяккес коласö, дзар керис öтöрас и несьö повзис, несьö лöгасис, кöр адззис, кыдз улицаöт öвтчöны да исполкомыслань шатласьтöн локтöны мужиккес.

«Мый нiя?!» — медодз эз вежöрт Прокопьевичыс, кöр син вылö усис Ипатлöн ота кымöсыс, кöда свиттялiс шондi югöрыс увтын, топ мавтöм виöн и моросыс гав, сотчöм шондi вылас. Мужиккеслöн вешьян коккезныс лёллясьöмась, öтiклöн нинкöмсис воньыс пöрччассьöм и кыссьö бöрсяняс, мöдiклöн пуджöмöсь йöрнöс соссэс... Не стыд, не срам мужиккеслöн, луншöрнас öвтчöны улицаын да поннэсö нерöны, бытьтö уджассьöм и нем лоöм керны.

Кодöсь, вежöммез, адззис этö Прокопьевичыс, и сьöлöмыс кыдз мезмыштiс — повзис, дума висьталiс, что посöдз ыбöссö колö пöднавны, медбы бöб синнэзнаныс эз адззö, эз пырö, а мунiсö асланыс туйöт. Предыс бöра бы боксис кутыштiс нагансö, но сiя эз шед, сэк пызаныс вылiсь курым-карым керис гижöттэсö, дзебис нiйö шкафö и уськöтчис öтöрö, вожмöвтiс керкусис порогсö, чепöссис бы улицалань, но коддэс одзалiсö: голоссэзныс кылiсö ни бурундукыс вылын.

17

Прокопьевичыс чеччöвтiс öтöрö, сыбöрын мöдöрö — öшис посöдзас, некытчö пышшыны, а эта коста коддэс ружтiсö ни пытшкись посöдзас, медодз жексiс Мититыс:

— Челядь! Татöн эд кикимораыс! Шедiс пестер пияныс, мать сiйö! Кулям ни пон кучиксö да кышалам йöрыс вылö, ась шондi югöррез весьтын косьмас, ха-ха!

Рад Мититыс, сьöласьö, гичралö пиннесö, ружтö, топ вийны и сёйны лöсьöтчö.

«Кытчö жö, кытчö?!» — Прокопьевичыс посöдзын чеччалö, кошшö осьта, и сьöлöмыс моросас пессьö. Медодз чылiс бы вевдöрö угöлöттяс, дзебсисис керкупöлскас, но эз ешты, и киас нем сэтшöмыс эз шед — не шать, не бедь, медбы дорйисьны поннэс шогья.

— Эй, пон! Пет сэтчинiсь! Эн дзебсись! Кöть из увтö пыран, адззам б..! Адззам, мортсёйись, и юртö мургыльтам! — ыбöсыс коласын ружтiс Мититыс, но, тыдалö, полiс жö медодзын юрсö мыччыны, натьтö, думайтiс, что предыслöн наганыс сьöрас, и бöра эд медодз пулясö кутас сiя. — Пет керкусис, пон!

— Эн ыксы, Митит сват, повзьöтан, — ёртсö, кылö, падтiс Ипатыс. — Сiдз эд шедас. Кытчö воштiсяс? Киэзаным ачыс пуксяс, сэк ми вöлись вешьянсö и чöвтам, сэк вöлись и öнджа кера-а-ам...

— Мед кылö! — эрзiс Мититыс. — Ась вешьянас небыттэсö лэдзö, а сыбöрын вöлись и чередитам!

Кывзы, председатель, мый шогмö, кыдз тэнö шуöны да видöны, мортö оз пуктö, топ быль ни оланыт овсис — враг лоин и сэсся горттö он ни адззыв. Мыля жö нагантö вунöтiн? Кöть бы öтiклiсь кымöссö писькöтiн, мöддэс бы сизим верста пондiсö орддьыны. «Эх, Мишка!» — Прокопьевичыс курччалiс гыжжесö, кöч моз видзöтчис, моросас пессис сьöлöмыс, и сэтöн син вылас усис нужникыс, сэтчин и заргисис да бöрсяняс пöдналiс ыбöссö.

— Шедiн совдеповскöй крыса! Пет сэтчинiсь! Дыр эшö тэнö видзчисьнытö?! Дыр эшö пондан миян вывтi серавны?! Дыр пондан миян коддеслiсь няньсö сёйны?! Пет, мыся, добром, то видзöт... Öзтам зiпозтö, и вешьянтö он ешты лэбтыны, сiтыт вылын и кулан.

Пукалö нужникын Прокопьевичыс не кулöм, не ловья, видзöтчö кыдз жö бы пышшыны, но осьтаэс абу, а враггес посöдзас ыксöны, ошшасьöны, что виясö.

— Эй, пон! Дыр эшö тэнö видзчисьнытö?! Али вешьянтö он вермы лэбтыны? Пырам да отсалам.

Прокопьевичыс нужниксис пондылiс шедтыны пöв — вирöдз дойдiс чунь йыввесö, но пöввес дорöмöсь крепыта, нiя эз и вöрзьö, сэк вöлись председательыс и вежöртiс, что некытчö ни оз пышшы, колö кыдзкö дорйисьны.

— Абу сiя татöн, — керкуын ни ружтiс Ипатыс, брынгис и вачкис табуреткаэзö да пызанö.

— Нужникас пукалö! Ха-ха, вир мыт повзьöмувьяс кутöм председательсö, и оз вермы чеччыны. Од разь кылö, кыдз табак дукыс нырö вачкö. Эй, Прокоп пиян, мый нö?!. Видзчисян кöр ыбöс пöввесö поткöтлам? — жвангис нужник ыбöсö Ипатыс.

Сэк быд вынсис Михаил Прокопьевичыс брынгис нужник ыбöсас паныт, сэтчинсянь чеччöвтiс посöдзас, кинöскö люкалiс юрнас и уськöтчис öтöрö.

— Татöн! — зверь моз горöтiс Фролыс. — Кутö! Пышшас эд! Кутö!

Прокопьевичыс кулакнас вачкис Фролыс пиннезö, брынгис Демьянлö, кöда сулалiс увдöрись ыбöсыс коласын, кинлöкö ештiс вачкыны моросас, но сiйö асьсö ни брынöтiсö и вартлiсö, бытьтö мужиккес уджалiсö сьöкыт удж: ружтiсö, кивзышалiсö, видчисö.

Медодз председательыс дорйисис жö, öвтiс киэзнас, но кытчö тэ! Öтнас сизимыскöт... Юрбöрас кинкö вачкис песжугöн, и небзис Прокопьевичыс — сыр-лёль öшöтчис пельпоннэс вылын юрыс да кушкыртчис бурундукыс вылö.

— Шедiс бесыс! Öнi ми тэнö ловйöн ог ни лэдзö! Пондан тöдны, кыдз миян коддесö тальны... Масьтö юрсö, сваттэз! Вийö серпöсьсö и быдöс сэтöн! Мый видзöтат?!

Брынгисö и вачкисö мужиккес, тэрмасисö — öтамöднысö одзалiсö. Вувтiс бöба пон, кымöрас чирзiсö чикиссез, топ ны сьöрын вöтлiсис варыш. Жар. Ловзисьны топ немöн. Мужиккеслöн кымöссэзныс вылiсь вотялö ньылöм.

— Грех лоас, — кинкö кыдз мыдзис ни вартлыны Прокопьевичсö. — Грех эд, мужиккез, лоас...

— Кинлö грех? Эта понда?! Да господи прости!.. — сувтiс Мититыс и гудыра синнэзнас пондiс видзöтны то ёрттэсö, то Прокопьевичсö, кöда куйлiс бурундукыс вылын и топ эз ни лолав. — Тьфу, отопки! Мортыс вылö оз вачкись, а эшö сэтöн... — öдззöтчис да бöра брынгис председательыслö моросас. — Кыдз сэтшöмсö еныс и видзö миян юр вылö?! Ме бы сы местын джагöтчи, а сiя... Тьфу! — сьöвзис рожаас да бöра ыкöстiс. — Но мый, бес?! Дугдiн киэтö вевдöрын видзны... Мый кошшин, сiйö и адззин. Тэ думайтан кöзяиныс и эм?! Ох тэ-э-э... — Öдззöтчис да эшö брынгис быд вынiсь, и мöддэс брынöтiсö и талисö, сьöлалiсö и дыр мыйись, кыдз мыдзисö, сувтiсö, пондiсö пыдына лолавны да ружтыны, чышкисö йöрнöс соссэзнаныс кымöссэзныс вылiсь ньылöм.

Михаил Прокопьевичыс сыр-лёль куйлiс коккезныс дынын, чужöмыс вачкисис масьтöм яй вылö, йöрнöсыс да вешьяныс косяссьöмась, коккезсис сапоггес сэтöн да татöн ― полан видзöтны.

— Бось сапоггесö да нöбöт, — пыдына ловзисис Мититыс да висьталiс Ипатыслö. — Сiя, натьтö, кинлiськö мырддис миян кодьлiсь жö да новйö.

— Мыйсö?! — эз вежöрт Ипатыс. — Поди, кулöмлiсь новйö, а ме понда кöмавны. Нинкöммесö эшö верма кыйны.

— Сэк ме босьта, — шуис Мититыс и мышкыртчис сапоггес дынö.

— Э, тэ мый керан?! — бöрсяняс Мититсö кутiс Фролыс. — Эн вöрöт, нiя менам сапоггес.

— Мыля тэнат? — чатыртчис Мититыс. — Кысь?

— Вот сэсь... Менам!

— Но и бось! Тэнат челядьыт уна, вижлок öмыт некöр оз пöтлы, — Фролыслö висьталiс Мититыс.

— Тэ öддьöн эн чеччав! — кулаксö вевдöрö лэбтiс Фролыс да мыччалiс Мититыслö.

— Дугдö! — ыкöстiс Ипатыс. — Мый оз тырмы?! Сапоггес понда öтамöднытö пурат бы? Кыдз шедат гöрд поннэс дынö, нiя мыччаласö сапоггесö!

Жар. Жара луныс. Кымöрас öтiк палачок абу. Чирзöны чикиссез. Улицаын не пон, не кань — быдöн уджалö, только коддэс и зызöны.

— Лолалö эд! — кинкö кыдз повзис.

— Сотана! Мортыс бы важын ни кулiс, а сiя лолалö, вийны ог вермö. Котрась, сват, черысла, — Мититыс гуддисис ота нырпыссэзас. — Сöта голяас!

— Сiдз кулас. Кытчö воштiсяс? И-и-и-ех! — быд вынсис Михаил Прокопьевичыслö брынгис Ипатыс, кыдз вийис бы понöс, но эз вермы. — Вот бесыс! А... — и пондiс горзыны да тiльны нятьöсь чуннезнас синнэсö.

Гуттэс ройöн ни лэбалiсö волисполкомись предыс гöгöрын, пуксисö вирöсь рожаыс вылö.

— Аминь! — пернапасасис Мититыс, шаг-мöд шагньöвтiс посöдзыс дынiсь, мышкыртчис да вирöсь киэсö чышкис лудыс бердö.

Шоныт руыс öшалiс посадыс весьтын, топ лязiс и пöдтiс. Тöвтор эз вöв, школа дынiсь тополлез вылын нельки лист эз вöрзьы, «орсiсö йöррез». Патшкис уль вир дукöн — сьöлöм гудрасьö.

Ипатыс пернапасасис и пондiс вешшыны бокö. — Ипат сват, тэ кытчö?! Кут коккезöттяс да отсав кыскыны отирыс син одзись! — Ипатлö чорыта висьталiс Мититыс, мышкыртчис да кутчисис предыс коккес бердö. — Кут!

— Ме?! — синнэс ыждiсö Ипатыслöн.

— Кут коккезöттяс да бöрöн кыскы петшöррес коласö! — синнэсö мöртiс Ипатыс вылö Мититыс — öмыс осьта, ральник кодь пиннес гер. — Кут, мыся, то видзöт!

Мöдыс полöмöн локтiс Прокопьевичыс дынö, мышкыртчис и полöмöн жö нюжöтiс киэсö коккес дынö, кöдна бердö некин бы эз кутчись.

— Вöрöтчы! — пишкис Мититыс.

Ипатыс кутчисис Прокопьевичыс коккез бердö, кöдна вöлiсö топ кöдзытöсь ни, нетшкöвтiс — бергöтiс кыминь, мед чужöмыс эз тыдав, и кыкöн пондiсö гужгыны лудыс вылöт йöр бердö. Посадын шы эз вöв.

18

Андрейыс гöрис керöс кырылас: путшкис öзим увтö му, мöдiк годö лöсьöтчис эстiсь вундыны бур рудзöг. Вöлыс мыдз и дыш, вачкы эн вачкы, бытьтö оз кыв, шатьыс оз дöнзьы, кöть и вердöм — спинаыс гладь кольть кодь.

Мортыс тэрмасис бы уджавны, но Гнедкоыс эз тэрмась, бороздаын шагнялiс öтiк шагöн. Гöрисьыс чунь кыза шатьöн вартлiс вöвсö, летiс горшсö — ыксiс, сьöласис, йöрнöс соснас сiйö и керис кымöсыс вылiсь чышкис ньылöмсö, ачыс видзöтышалiс гöрöм муыс вылö да думайтiс, что рытöдззас оз вермы гöрнытö межаыс дорöдз. «Ме кодь гöрисьсö бы да сэтшöм вöвсö!.. Важын бы колö, мужик, Гнедкотö вузавны да небны мöдiкö, но жаль вöлыс... Кытöн дыш, а кытöн бöра додьсö кыскö, оз и ружтышт, да сэтöн жö немöн виль вöвсö босьтны — деньгаыс абу. Кыдз и понда овны? Мый и понда керны?» — гöрисьыс уджалö и думайтö ас кежас, кöр гортын мужик мортыс öтiк: гöрны, кöдзны и черöн керасьны — быд местаын колö аслыс. Чужис öтiк зон, но кöр сiя эшö быдмас? Кöр мортас пöрас? Пондас я отсасьны айыслö?.. Андрейлöн öддьöнжык сьöлöмыс пессис сiйöн, что оланыс вежсьö, и он тöд мый лоас ашын, кытчö бергöтчас, кытчö локтасö. «Эх

олан, олан — сьöд калян! Öтiккезлiсь мусö мырддям да мöдiккезлö сетам... Öтiккез радöсь, а мöдiккез горзöны, сiдз юртö бы и кералöны — быд лун война... Тэ вылö эд, Андрей, черсö, натьтö, важын жö ни кеслöны, пиньласьöны жö, и он тöд, кытöн панталан... Вот сiдз! А кыдз колö? Огö я весь отирсö чувйö? Поди, оз ков муэсö мырддявны, кöр быд морт эд ачыс аслыс мусö керис — пöрöтiс вöрсö и сотiс, пессис пöттöдз, а ми — вай татчö! Сiя не тэнат! Готовöйыс... Мый, разь эта муторыс не менам?! Айö эд эшö мырсьöм-весöтöм вöрсö, а сылö кинкö разь отсалiс? Эх тэ... Но и олан петiс!

Öтiклö керам бурö, мöдiклö умöльö... — öтiк дума вежис мöдiкöс, вермасисö — сьöлöм чувйисö. — И мый сэтшöм умöльсö керам, что юррез бы кералöны? Буржык олан жö бы керам — беднöйесö богатсьöтам, сiйöн богатжыккезлiсь мусö и мырддям — шöриöн бы, мед быдöнныс олiсö бы öтмоз, но... А, поди, быль этадз эз бы ков? — И сэтöн жö аслыс висьталiс. — Колö, колö! Нем богаттёыс вылö видзöтны! Важын ни колiс мусö янсöтны öтамöд коласын! Сэк бы некин ни талун кортöн эз ветлöт и эз горзы. А кин вот унажыксö тшыгьялö да кортöн ветлöтö? Дыш кучиккес бöра жö эд, а Митит коддес олöны... Сiдз эд? Сiдз. Мититыс тöдан кытшöм горш! Вижлок! Асывнас пемыт мунö уджавнытö и рытнас локтö нач пемыт и сё сылö етша, пыр öмыс осьта и ыксö: «А-а-а! Эта менам!» Сет бы быдöс муэсö, оз пöт, паськöтчас и пондас кöдзны да гöрны... Лолыс петас бороздаас, но пондас ой и лун дзуртны. А Ипатыс!.. Вижлок дак вижлок! Эта вöлись эд... Кинöс корас уджавны, сэтчöдз уджöтас, что мортыс куим лун кольмöм моз ветлöтö, а мый босьтö — грош да копейка... Уна он сёй сэтшöмыслiсь — надз Ипатыс, корас уджавны, мортыслö жаль шöмйöлыс; вердас кушманöн и бур... Эмöсь нiя миян, горшшез орöтасö, некинлö оз сетчö. А, поди, сетчасö? Поди, Совет властьыс сэтшöммезсис оз повзьы? А мый бы ныись повнытö? Зэлöтны колö, сымда и лоас!»

Андрейыс гöрис, талис нинкöммезнас бороздаын косьмöм мусö, öвтiс шатьöн, ыксiс, ружтiс, сiйö и керис йöрнöс соснас чышкис кымöсыс вылiсь ньылöмсö, уджалiс и думаэзнас олiс мöдöрын — мöдiк удж керис, кöр сьöлöмыс öддьöнжык висис Совет властьыс понда. «Вот, — сьöвзис гöрисьыс. — Миша вонö пырис партияö, и мортсö бöрйисö волисполкомас предöн. — А мый? Ась уджалö. Да-а-а, Миша вонö эд аскоддя мывкыда жö, и ог тöд кыдз бергöтас уджсö? Мый сылöн петас исполкомас? Мый петас, сiя и пет! Ме сы местö юрöс ог сюйышт. Пырны кö меным партияас?! — юалiс ассис Андрейыс. — А мый? Мишаыс тай, вöлi, баитö, да мыйкö эшö кыска... Иньö эд бöра осьтас öмсö, пондас ыксыны, штö антихрист, бес, бокам оз понды водны. А мый тэ сылiсь босьтан? Сэтшöмыслiсь, кöда öтiк буква оз тöд, некытöн эз вöв и асныра, кыдз эта жö...»

— Ны-ы-ы! — ыкöстiс вöлыслö и шынньöвтiс, кöр иньсö мывкыднас сравнитiс вöлыскöт. — Ны-ы-ы, кокан!

Сьöкыт гöрнытö, кöть муыс и нöк кодь небыт» Уджалö Андрейыс и кылö, что посадланяс мылякö лёка вувтöны поннэз, кыдз кинкö локтöм йöз.

«Чиганнэз я мый я? — гöрö и думайтö Андрейыс. — Или кинкö асланым кучиксис петö? Талун кытшöм лун? Кресення эд... Отирыслö, поди, грех уджавнытö, а ме гöра... Мужиккес, натьтö, гортын, нiя и нерöны поннэсö.» Син одзас мылякö мыччисис Мититыс, кöда асывнас пантасис воротаыс дынын да öмсö пиньöвтiс: «Кытчö гöрнытö мунан, кульпиян? Абу разь грех кресеннянас уджавнытö? А мый тiян коддеслö? Совдеповщинаыслö... Енсис, не бессис од полö... Некытшöм грех од тöдö... Эдö на... Еныс эд синма, адззö... Панталат, сэк вöлись казялат, кысянь тöлыс пöльтö, а талун тiян праздникыс, тi кöзяиннэс... Мун-мун, ме вылö сiдз эн видзöт. Ме тiян коддесö тöда и ог, тьфу!»

Нем Мититыслö Андрейыс эз шу, топ эз кыв, не эз адззы, вачкис вöлыслö да иньдöтчис аслас мулань, а öнi мыйкö вылö усис жö Мититыс тöдвылас.

Гажа луныс. Жар. Вöлыс пымалöм, кыдз сутшкöм ваö, и гöрисьыслöн вылас йöрнöсыс ва. Гöгöрын лэбалöны лöдззез, пышналöны-курччалöны вирöдз Гнедкосö и гöрисьсö, кыдз заргасö нырнысö, сiдз вир чездö, но уджалö Андрейыс: шоччöтас вöвсö да одзлань гöрö. Нинкöммес бердö лякасьö муыс, новйöтö нятьсö горыс сьöрын, а сы бöрсянь бороздаöт шагнялö рака, кайыс öктö гаггез. Вöлыс сувтас, и ракаыс сувтö да осьтö öмсö и вöлыс моз жö чушыктö-лолалö, бытьтö мыдз жö.

Гортыс матын — гриваыс сайын. Гриваыс вылын эшö быдмö вöр, кöда весьтын асывсянь ни лэбалö варыш.

Андрейыс гöрис-керис, пельпоныс вылö пуксис лöдз да нырсö заргис спинаас — биöн сотыштiс. Гöрисьыс сувтчыштiс, быдвынсис кисö öдззöтiс пельпоныс вевдöрöт да долоньнас вачкис бы лöдзыслö, но зубытыс шедiс аслыс, и сэтöн пондiс кывны, топ гортланяс кинкö горзö или ыксö ― он вежöрт кинлö да мый колö и мый лоис. «Поди, сотчам! ― гöрисьсö повзьöтiс дума, лöсьöтчис ни котöртны гриваыс вылöдз, дзарнитны мый керсьö посадас, но гортлань тшыныс эз тыдав, сiдзкö, нем оз сотчы. Малыштiс вöвсö, адззö ни, что гортланьсянь лэбзьö-котöртö зонкаок и чирзö: «Миша дядьöс вийисö-ö-ö! Миша дядьö-ö-öс...» Господи, мый эшö сэтшöмыс? Бöра я мый я война?»

«Кытшöм Миша дядь? Кин вийис?!» — медодз эз вежöрт Андрейыс, ылiсянь эз тöд кинлöн зоночкаыс, и кöр ыксiсьыс сибöтчис матöжык, адззис, что зонкаыс Ипатлöн.

— Кин вийис?! Мыля?! — паныт ни зоночкаыслö котöртiс Андрейыс. — Мый сэтшöмыс?!

— Миша дядьöс вийисö! — öмыс осьта зоночкаыслöн, ышки-пойки и горзö. — Миша дядьöс...

— Эх тэ, öнджа... — вöлыслань дзарнитiс гöрисьыс, öвтыштiс кинас, кöр Гнедкоыс гöрнас кыссис ни межалань. — Öнджа... — тырппес дрöжитiсö, сьöлöмыс пессис ни. — Мый сэтшöмыс?! Мортсёйиссез...

— Вийисö, Öндрей дядь, Миша дядьöс...

— Кин?!

— Коддэс, — пильскис Третьякыс.

«Шедасö!.. Ме нылö! — Андрейыс нинкöммезнас котöртiс бы и эз вермы котöртны, кöр нинкöммес бердö лякасис гöрöм муыс. — Эх!.. — модис-мунiс, лöсьöтчис веськыта пырны гортö, босьтны важ пишаль да быдöнöс вийны-лыйны, мед тöдiсö, но кинкö топ падтiс... Жаль Мишаыс, ась воныс вон вылö мукöдпыр и эз вачкись, но öтлаын эд... Öтлаын! Чеччöны и водöны. Тэрмасьö мужикыс, синваэс петöны, горзö бы и оз вермы, сотö дума: — Вот эд кытчöдз олiм! Начальникалiм... Да мед кинкö бы сэтöн юрсö вердö, только бы эгö ми!»

Ыб вывсянь Андрейыс веськыта кежис волисполкомлань, сiйö и керис видзöтчис кин да кытöн, топ сiдз кинкö сы вылö ни уськöтчас, но некин некытöн эз тыдав, кыдз посадсис чышкöм-вашöтöмась отирсö, и дума ни вöлi, что зоночкаыс бöбöтiс, что ловья Мишаыс, но коккес топ асьныс вайöтiсö волисполкомыс дынö.

Лöнь. Волисполком öшын увтын тополь вылын лист оз вöрзьы. Юрыс гöгöрын пондiс лэбавны зi, сiдз бы и чушкалiс. Посöдзыс дынын падмис, сувтiс, öшöмöн видзöтчис öтмöдöрö, мышкыртiс юрсö, и бурундук вылiсь синнэс вылö усис косьмöм ни вир, да сымда, топ начкылöмась порсьöс...

Андрейыслöн небзисö кикокыс, клап вачкис боккезас, бöра бергöтлiс юрсö, адззис бы кинöскö мортöс, медбы юавны, мый вöлi эстöн, но улицаын некин эз вуджöртчы. «Мый жö эта, а?! Кин жö?..» — Андрейыс пондiс павьявны волисполкомыс одзын — ачыс и не ачыс, киэс дрöжитiсö, öмас косьмис дульыс, петiсö синваэс, видзöтчис öтöрö да мöдöрö, и пондiс повны, что сы вылö сiдз жö кинкö уськöтчас да вачкас. Öвтчöв-керис посöдзыс дынын, сыбöрын синнэс вылö усис сiя, кыдз кузь лудсö тальöмась-нильöмась йöрыслань, и сэтöн вöлись кыдз кынмис местаас. Петшöррес коласiсь казялiс мортлiсь кöмтöм коккез, кöдна вылын сьöд пукалiсö гуттэз.

Андрейыслöн сьöлöмыс берездасис моросас, чужöмыс лоис нач чочком, и сiя полöмöн шагньöвтiс йöрыслань...

Йöрыс бердын, петшöррес коласын пав видзис Мишаыс, йöрнöс-вешьяныс летöм-нетшкöм, кытöн тыдалiс куш яйыс, а кытöн и эз, телосö топ пурöмась поннэз: сэтöн вир и сэтчин вир, кытöн рана, кытöн абу, кытöн лöз, кытöн нач чочком, но чужöмыс оз тыдав, сiдз кыдз куйлö кыминь.

Андрейыс сiдз бы и пышшис эстiсь, котöртiс, но кытчö? Мыля кольны ёртсö? И кинöс ыксыны, медбы отсалiсö?

«Поди, эшö ловья? — бурмöтiс асьсö думаöн. — Кöть бы ловья! Кöть бы...» — тальччис петшöрреслань и эз, вештiс коксö и эз, кыдз Андрейсö вартлiсö и тойыштiсö думаэс, сьöлöмыс пышшис бы, сiдз полiс кулöмсис, но вежöртiс жö, что луннас кулöмыс оз сёй, оз курччöвт, сiйöн и кыссис да кыссис петшöрреслань... Локтiс зэв ёртыс дынö, жагвыв нинкöма коксö нюжöтiс Мишаыс кок дынöдз и вöрзьöтыштiс кулöмсö: Мишаыс эшö абу тувдöм, и сэк Андрейыс смевжыка ни мышкыртчис воныс дынö, кутiс вирöсь кокöттяс да кыскыштiс асланяс. Мужикыс кивнитiс.

— Ловья! — радмис Андрейыс. — Ловья, öнджа-бöра! Миша! Мишка!.. — смела ни мышкыртчис воныс чужöм дынö, бергöтiс гатш.

Мишаыс кивнитiс и лöнис, а воныслöн вотялiсö синваэс, думайтiс: «Мый керны? Кытчö воштiсьны? Кинас корны?»

— Эй, отир! Котöртö татчö! — горзöмсорöн ыксiс улицатыр, и сы дынö кысянькö бöра жö сiя зоночкаыс котöртiс да юалiс:

— Мый, дядь? Ловья?

— Ловья, Третьяк, ловья! Фельдшерсö бы колö... Поди, котрасян...

— Сiя, дядь, вöрö мунöм, — висьталiс Третьякыс.

— Вöрисьыс сiйö кыскалö! Мый нö лоас?!

— А Васька Степаника бабыс эд эм! — висьталiс Третьякыс.

Андрейыс Мишасö кыскис петшöррес коласiсь и сэтöн вöлись нач повзис да öшис, эз понды тöдны мый керны: öтiклаö котöртыштас, мöдiклаö — некин абу.

— Мый öштiн? — керку сайсянь мыччисис Степаника бабыс. — Кинöс кошшан? — лёк чужöма пöрисьыс, видö Андрейсö. — Эх, мортсёйиссез! Мый, керöмась Мишаыскöт? Еныс сэтшöммесö оз вермы чарöтны! Греххезным эд этчö вайöтöны, греххезным...

— Кытшöм греххез? — кыдз саймис Андрейыс.

— Котöрт, бось ведрасö да öшымöссис гумышт васö! — мурзис пöрисьыс. — Господи благослови! Биын сотчам, пöжассям ловьяöн ни... Тэрмась! Мый сулалан?!

Андрейыс котöртiс попыс керку öшын увтö, кытöн öшымöс весьтын пыр öшалö ведра, гумыштiс васö и вайис волисполкомыс дынö, ачыс сё модис: «Кöть бы эг кув, кöть бы...» Еныслö кытöн веритiс, кытöн эз, но тöдвылас усьлiс умöль кадö.

Старухаыс ванас миссьöтiс Мишаыслiсь чужöмсö, пондiс сьöласьны да модьны ныр увтас молитваэз. Гуттэс ройöн лэбалiсö вартлöм морт гöгöрын, пуксисö вирöсь паськöмыс вылö. Андрейлöн гудрасис сьöлöмыс, висис юрыс, а Степаникаыслö кöть бы мый! Сiя бергалiс Мишаыс гöгöрын, ниртiс да малалiс, и чожа председательыс осьтiс синнэсö, дыр видзöтiс ас гöгöрсö да мыдз голосöн юалiс:

— Мый тi эстöн керат?

— Мый кера?! — недолыта шыасис старухаыс. — Тэнö мöдöр югытсис бöрöн кыска! Сотанаыс öлöдзись мырддя. Пуны бы тэныт мöдöр югытас греххет понда сир пöртйын, пукавны бы бесыс öлöдзын да нювны пым сковорда, мед сэтчин велöтчин овнытö, да жаль... Чеччышт, ме ышö спинатö видзöта, — и Андрейыслö бöра ыкöстiс. — Мый сэтöн вузалöм пон моз сулалан?! Отсав. Господи! Эм я муыс вылын эшö кöзяиныс?! Или сарсö вийисö да некинлö лоис мортвийиссесö сьöвтавны? Ог я этадз пыр пондö вадъяс пуны? Öтöрö ни эз понды туйны петны, луншöрнас пондiсö вийны-вартлыны, — пернапасасис пöрисьыс, ачыс сё ниртiс да миськалiс Мишасö.

Андрейыс сэсся эз понды видзöтны, кыдз старухаыс маласьö Мишаыс дынын, волисполкомыс дынiсь кыдз тöвчикöн пöльтiс деревняыс сайö, сöтiс ыблань. Локтiс вöлыс дынö, рич-рач юскис сiйö, пуксис Гнедкоыс вылö и ыкöстiс: «Но, порсь! Вöрöтчы!» — коккезнас вöлыслiсь боккесö тойö и тойö, брынгö да брынгö, вöлыс бороздаын дыш, а гортлань тэрмасьö-оськöвтö.

Андрейыс вöвсö доддялiс няридзö, сэтчö пуктiс идзас, идзасыс вылö водтöтiс Мишасö, домалiс няридзыс бердö, мед эз усь кузь туйын, и иньдöтчис районö. Районöдз мунан да мунан — сизимись мылаыт бырас, но Андрейыс ойшöр гöгöрас шогалiсьсö вермис вайöтны больницаöдз.

Сiя жö лунö посадö Чердынсянь гöнитiс неыджыт отряд, медбы кутавны бунтовщиккесö.

19

Гöнитiс отрядыс — вöввез бöрсянь лэбтiсис бус, нюжалiс рыжöй тшын моз туйыс пöлöн и вöлись бöр лэдзчисис бадь кусттэз вылö, каттисис турун бердö. Воротаыс дынын каркнитiс рака, öвтыштiс борддэзнас и лэбзис гунаэзлань, кыдз стрела муыс пöлöн швыркнитiс кайварыш, сöтiс-кутiс воробейöс, кöда пукалiс йöрыс вылын и эз адззыв варышсö. Посадыс кыдз кольмöм морт суналiс и эз лолав. Локтiссес жолькнитiсö-осьтiсö воротасö. Эта шыыс эз вöв гора, но сiйö кылiс Степаника бабыс, кöда бергалiс волисполкомись предыс гöгöрын, öнi видiс петухнысö, мыля сiя курöггесö пыртö — бöбöтö бы садникö. Пöрисьыс кылiс ворота шылiсь пöднассьöмсö, юрсö бергöтыштiс туйыслань, адззис вöввесö, йöз отирöс и сьöлöмсö кыдз кинкö зубыта зэгнитiс, пондiс пессьыны — öмöттяс бы чеччöвтiс, кöр бабыс тöдiс ни, что солдаттэс весь оз локтö, лоис кö сэтшöмыс... Асланыс юррез вылö эд мужиккес кодувьяныс бедасö ыксiсö. Бабыс эз вöв виноватöй, но сёжö мöдiс саясьны йöз морттэс син одзись, да эз ешты: чожа вöлыс пирснитiс и сувтчыштiс посöдзыс дынö зэв — синнэс зверьлöн, пыдына чушыктö-лолалö, быгсялöм-пымалöм, йирö удилаэз, педзö коккезнас и öвтö бöжнас. Вöлыс вылын лёк чужöма том морт, пымалöм жö — йöрнöсыс ва, киас шать, синнэс вирдалöны...

— Здоровöн олан, пöрись! Мый тiян лоис?! — юасьö мужикыс.

Вöлыс бöб синнэзнас сiдз и кайö бы посöдзас, пеллезнас орсö, пирскайтö нырнас.

— Нем эз, — бабыслöн пондiсö дрöжитны киэс.

— Кыдз нем эз?! Кин вартлiс волисполкомсис предсö?! А!

— Ме ог тöд, — бабыслöн лöзöтiсö тырппес. — Шуöны тай быдöс пö эта... Ипатыс я мый я...

Степаникаыс эз бы баит, эз бы норась асланыс отир вылö, но повзьöмувья сiдз петiс, что висьталiс сiйö, кöда öмсис чеччöвтiс.

— Кытöн олö?! — вöлыс вылын ыкöстiс мужикыс.

— Этчин, — пöрисьыс лунлань öвтыштiс кинас.

— Нуöт!

Сэтöн бабыслöн мылякö пондiс висьны кокыс, и коскас топ сöтiсö-вачкисö, тальччис-кивнитiс, кыдз шаг, сiдз и усьö.

— Он ков! — вöвсö посöдзыс дынiсь бергöтiс йöз мужикыс. И сöтiс отрядыс улицаöт — муыс дрöжитiс. Дзебсисисö пос увтö курöггез, дугдiсö чирзыны воробейез, только чикиссес шырисö-лэбалiсö вылын юррез вевдöрын и сьылiсö гажöн.

Андрейыс районсянь локтiс рытнас, юскис вöвсö, пырис гортас, гуж-важ пуксис западняö, мыдз, юрсö öшöтiс: юрас топ мыйкö варкйö-пуö.

— Но мый, бес? Локтiн! — джоджын узис иньыс, чеччис и пондiс пеничайтны. — Ловья воныт али коккесö туйыс вылын нюжöтiс? Ой да ой! Отирыс уджалöны — турун керöны, гöрöны, а тi кык пон!.. Дышныт петö уджавнытö, юрнытö сюйыштiт кытчö оз ков, отирсö сёят, вот еныс и адззис! Еныс эд тiянöс греххезныт понда, еныс!

— Дугды! — лöгасис Андрейыс, ыкöстiс, но голосыс сибдiс, кöр горшыс лунтыр ни косьмö, кынöмыс сималö, а сэтöн...

— Мыйлö бы вöлi кутчисьны Ипат коддескöт?! Мыйлö бы зiпозсö вöрöтны?! Ась бы нiя олiсö... Али миян пызаныс вылын няньыс абу? Йöззэзлiсь кык бес няньсö мырддят! Отирсö сёят! Тшыгйöн колят... Мый нiя? Сюсö кинлiськö гусялiсö я мый я? Бытьтö гусялiсö, а тi мырддят...

— Тупкав! — Андрейыс синнэзын öзйыштiс нёштöм югöр.

— А мый нö!.. — öмыс пиньöвтчис иньыслöн, сiдз бы и герйöвтiс-горöтiс, но зонокныс саймис, кивнитiс: «Мама-а-а!»

— Узь! — зоныс дынö комö уськöтчис мамыс. Öтöрын лöз-югыт. Поннэз горшшезнысö летöны йöз отир вылö. Сьöлöм мыйиськö полö. Дрöжитö Андрейыслöн иньыс.

Сэтöн öшынас ёрк-торк, рамаыс стеклоэзнас жолькнитiс, повзьöтiс недолыт лёк голос: «Волисполкомö корöны!»

Андрейыс эз ю, эз сёй, эз миссьы туйыс вывсянь, чеччис: коккес вугмöмась вöлыс вылын пукавтöн, тальччис-турйöвтiс, тальччис-пиньöвтчис, ружтыштiс и петiс керкусис да биргылясьтöн мунiс волисполкомö. Посадыс эшö эз узь: жолькнитiс ыбöс, пирснитiс вöв, кинкö мыйкö модис, сэтöн жö пондiс горзыны инька.

Волисполком öшын увтын вöввез. Волисполкомын пукалiс сiя жö командирыс, кöда отряднас вовлiс ни татчö, кöр пышшисö чочкоммес. Комиссарыс здоровайтчис. Жöдзö. Синнэзас лёк югöр, висьталö:

— Весь ми сэк тiянлiсь буржуйезнытö колим, весь! И öнi бöра эз шедö. Шедiсö бы!.. — няпыртiс кулаксö.

— Некин эз шед? — горöтчис Андрейыс.

— Эзö!.. Но ми весь татчö эг локтö! Разям кöин познытö!

«Кытшöм кöин поз?» — юалiс бы Андрейыс, но эз юав, кöр адззис, что нем эстöн ас вылö кыскыны лöгсö.

Волисполкомö пырисö и петiсö солдаттэз. Комиссарыс öтiклö висьталiс кытчö мунны, мöдiкöс иньдiс-туйдiс...

— Попныт, натьтö, бöра сорöвтö, — видзчисьтöг горöтчис комиссарыс.

— Поп... Ог тöд, — шыасис Андрейыс, узис бы: оныс сiдз и лязiс, баитiс топ вöтöн ни.

— Видзöтам! — висьталiс комиссарыс.

Жольöтiс ыбöс, ветлöтiсö солдаттэс. Öтöрас посöдзыс дынын вöввес коккезнаныс вартлiсö мусö, пирскайтiсö, педзисö. Андрейлiсь бöра юасисö кыдз вöлi, мый лоис, мыля вартлiсö вонсö. Андрейыс висьтасис, а синнэс сiдз и куньсисö. Керкуын бизгисö номмез. Вайöтiсö Степаника бабöс, кöда нач öшöма, долоннезнас клопöтö боккезас, сiйö и керö модьö: «Мортвийиссес, мортвийиссес!» Пондiсö пырны да петны челядь, инь отир. Öтiккез горзiсö горöн, мöдiккез пильскисö, Андрейыс вылö видзöтлiсö полöмöн, топ отирыслö вöлi йöз... Керкуыс ыбöсöт лолалiс ыркыт руöн. Видзчисьтöг быдöс лöнис. Бöра оссис ыбöсыс: ружтыштiс и сунки-панки порогсö вожмöвтiс попыс, öнi сiя немымда эз вачкись поп вылö, кöть эшö вывтырас тöдчис вын, но берездасис моз, нёльподöн моз локтыштiс джоджыс шöрöдз, натьтö, бöрсяняс брынгисö или тангисö...

Андрейыслöн лабич вылын оныс öшис, синнэс баралiсö, сiя пондiс видзöтны попыс вылö, кöда сувтiс одзас, пернапасасис, моросыс одзись кыкнан кинас кутiс крестсö, окыштiс да шуис: «Господи! Помилуй и прости нас грешных... Мый понда этадз?! — веськыта видзöтыштiс Андрейыс синнэзö, кыдз юалiс: «Мый нö тэ, Андрей? Кыдз сiдз?»

Джоджыс кузя котöртiс сьöд борда кöс гаг. Сы вылö тальччис комиссарыс да попыслiсь юалiс:

— Висьтав, поп, кытшöм проповеддез вичкуас лыддьöтан?!

— Господи прости грешнöй душаэзнымöс! Кытшöм проповеддез? Кысь? — Игнатыс пернапасасис и пондiс веськыта видзöтны комиссарыс вылö, синнэс ыждöмась, голосыс чиння, сöстöм, сэтшöм, кытшöмö Андрейыс попыслiсь топ эз кывлы, Игнатыс топ лоöма томжык.

— Сiдзкö, он тöд... Вунöтiн... Весь ми тэнö эта одзын, поп, лэдзлiмö, весь, — юрнас öвтыштiс комиссарыс. — Тöдiм эд, что Колчаксö богаттёыскöт öтлаын панталiн, сiдз? Шуöны эд, что вöлыс пö нёль кока да джöмдалö, и ми, тыдалö, джöмдiм жö... Только сэсся ог пондö джöмдавны!

Попыс сулалiс да веськыта видзöтiс комиссарыс вылö. Сэтчö волисполкомас пырисö куим морт, жвангисö бöрсяняныс ыбöссö. Здоровайтчисö. Локтiссес рочöсь. Томöсь. Топытöсь мыгöррезнаныс, кыввезныс пышшöны-баитöны и оз джöмдö.

— Ме следователь, — кылiс Андрейыс йöз мортсянь, кöда эшö мыйкö перыта горöтчис, но волисполкомсис секретарьыс быдöс баснисö эз вежöрт, только дивуйтчис кыдз кузь туйöт эна отирыс ештiсö локны районсянь. Андрейыс пукалiс лабичын, видзöтiс кин да мый керö, кваркышалiс синнэзнас, кöр сылань ни локтiсьыс гогиньтыштiс юрнас да юалiс комиссарыслiсь: «Эта?»

— Эта! — комиссарыс юрнас öвтыштiс попыслань. — Оз вермы кодя молитваэсö лыддьöтны, а пыр сьылö проповеддесö, медбы Совет властьсö онняюртны. Дзугö олансö...

— Видзöтам... — рамжыка ни шыасис следовательыс, юалiс. — Эм тiян эстöн торья жыр или абу?

— Ыбöсыс сайын, — висьталiс комиссарыс.

И попсö петкöтiсö мöд жырас. Комиссарыс петiс керкусис. Öтöрын кылö шутньöвтiсö, кылiс кыдз вöввес буткöтiсö-котöртiсö волисполкомыс дынiсь. Эрзыштiс пон и лöнис. Волисполкомын мыйкö дырна шы эз вöв. Андрейыс лолалiс и кылiс ассис лолалöмсö, бöра пондiсö куньсьыны синнэс. Дженыт гожумся ойыс бура эз пемдыв. Асылыс гусьöн видзöтчис ни öшынöт. Волисполкомись секретарьыс вермасис мымдакö оныскöт, водiс бы да узис или мунiс гортö, но эз тöд мый керны, кöр думайтiс, что бöра пондас ковны эна отирлö... Öвтчис Андрейыс думаэзнас и эз казяв, кыдз ланьтiс, топ кытчöкö вöйис.

Ёркнитiс ыбöсыс. Андрейыс саймис. Чуйк пуксис — онсö кыдз босьтiсö киöн. Керкусö гажöтiс ни асывся шондiлöн югöр. Стенаыс сайын кылiс, кыдз кинкö мöд жырас ружтiс, дзик сьöкыта шогалiс — ловсö кыскалiс, Андрейыслö колiс бы öтöрасьны. Сiя чеччис лабичыс вылiсь, жагвыв петiс öтöрö, дзар керис телегаö доддялöм вöв вылö, кöдö сувтöтöмась зэв посöдзыс дынö, кежалiс чом сайö, пондiс бöр пырны исполкоманыс и сэтöн ыбöсыс коласын моз люкасис попыскöт, кöда петiс мöд жырсис, кытчö сiйö ойнас пыртiс следовательыс. Игнатыс турйöвтiс, öвтыштiс веськыт кинас Андрейыслань, кутчисис косякыс бердö, видзöтыштiс веськыта Андрейыс синнэзö, топ пырис сьöлöмöдззас да сiдз, что волисполкомись секретарьыс повзьыштiс: попыслöн синнэзас вöлi аскодя сöстöм югöр, кыдз челядёклöн, кöр тай учöтсö видасö и вартласö, сiя горзас-керас, бергöтчас и бöра öтлаын, кыдз нем абу бы и вöлöма. Но Андрейыслiсь йыздыштiс спинасö, кöр сiя адззылiс поплiсь пыктöм, лöзöтöм, вирöсь чужöмсö, кöда вылын дзонь места эз вöв, кузь юрсиыс гардчöм-пашмöм, юрси тылöппес лякасьöмась пельпоннэс бердö, а вирыс сiдз кыськö чездö и визывтö, вотялö моросас, моросыс вывсянь джоджас...

Андрейыслiсь сьöлöмсö топ пурис пон, сiя повзис и кыв эз вермы горöтчыны, эз вермы синнэсö бергöтны мöдöрö, адззис, кыдз Игнатыс моросыс одзись кутiс крестсö, жмитiс, шагньöвтiс чорытжыка ни, висьталiс: «Господь нас простит за грехи!» Андрейыслö эд горöтчис, бытьтö сiя вартлiс Игнатсö... Но Андрейыс кыдз кынмис, сулалiс попыс одзын, видзöтiс вирöсь киэс вылö, кылiс, кыдз батюшкоыс сапоггезын шлёпкöтö мыйкö, натьтö, вир жö... «Простит менö, батюшко», — гусьöн горöтчис Андрейыс. «И тэ менö простит, раб божöй, — пернапасасис попыс. — Простит... — голосыс сибдiс, кижгыштiс. — Юа бы...»

Попыс бöрын зэв сулалiс следовательыс, кöдö Андрейыс öнi адззис югытiнас ни — синнэс медодз тыдалiсö, кыскисö дынас, кыдз вына зверьлöн, сералiсö асмознаныс, дзик мый вермис, сiйö и керис да ошшасис уджнас.

Попыс и следовательыс шагньöвтiсö Андрейыс бокöт ― аскодя вир дук вачкис волисполкомись секретарьлö, сiя перыта шагньöвтiс-вожмöвтiс аслас жырись порогсö, пырис волисполкомас, люкасьöмöн да тэрмасьöмöн адззис нюмрасьöм дора кружка, пöльыштiс пытшксис ёггез, гумыштiс ведраись ва и петкöтiс Игнатыслö, кöда сулалiс следовательыскöт доддя вöлыс дынын.

Паныт быд вынсис югьялiс шондiыс, югöрыс паськалiс улицаöт, пырис посöдзö, посöдзыс сайö, судзöтчис короминаэз вылö, но эз сибав керку вуджöррезö. Игнатыслöн крестыс сё вöлi киас, вöрисö тырппес, натьтö, лыддьöтiс молитва или сылö зубыт вöлi, что дрöжитiсö тырппес... Андрейыс локтыштiс попыс дынö тыра кружканас, нюжöтiс юны, но следовательыс чорыта горöтчис: «Оз ков!»

Игнатыслöн киыс сыр-лёль усис бöр кынöмыс бердö, синнэзас мыччисьыштiс и öшис сэтшöм шог, бытьтö сiдз бы и пондiс горзыны, но сэтöн жö юрсö лэбтыштiс, гогиньтыштiс волисполкомись секретарьлань, кыдз бöра шуис: «Простит, раб божöй...»

Чирзiсö öшын увтын воробейез, мырддясисö сю туссезöн. Вичку вылын ургис гулю. Луныс оссис гажа, шондiа.

— Пуксьы! — попыслö пельпонас тангис следовательыс.

Вöлыс пирснитiс нырнас, сувтöтiс пеллесö, пондiс йирны кöртiсь дорöм удилаэсö.

Андрейыслö топ вачкисö, сiя öшöм моз сунки-панки кайис посöдзö да пырис аслас жырö.

20

Лёк отирыс ештiсö пышшыны гортiсь и шатласисö кытöнкö йöзын — öштiсö кадсö, эз я надейтчö, что виль властьыс чожа разсяс или думайтiсö, что вунöтасö ны йылiсь, кöр оланыс бытьтö орсiс — талун нiя, ашын мöдiккез...

Медодз гортсис пышшис Мититыс, и сылö медуна дöнзис, кöр отрядыс кошшисьтöнняс Мититтэс керку бокö чапкис би...

Вартлiсö волисполкомись предсö, думайтiсö вийны бы, но сiя кольччис ловья, куйлiс больницаын неделя-мöд, веськалiс кодь, локтiс гортö, туйыс вывсянь веськыта пырис волисполкомö, осьтiс керку ыбöссö, гажöн горöтiс:

— Сiдз и думайтi!

— Мый думайтiн? — эз вежöрт Андрейыс.

— Ловья, мыся! Олам ми эшö тэкöт, виль олансö керам и вöлись нылö мыччалам! Вештiсям, едрёна корень! — Шедасö! — рад лоис Андрейыс. — Веськав чожажык, кöр адззис, что воныслöн чужöмсис лöз гаддес нач абу чулалöмась.

Окасисö кык ёрт, кöр мöдöтпыр эз ылöстö бы окасьнытö, юасисö öтамöдныслiсь кыдз да мый, баитiсö кыдз овсис Прокопьевичыстöг, и Мишаыс эшö öтпыр пиннес пыр висьталiс: «Шедасö сукаэз!»

— Эн тöждiсь. Уджавны пондам, — Андрейыс висьталiс воныслö, пырис пызанö да жырись кыскис гижöттэз.

Уджалiсö одзлань. Эз ло попыс, сытöг деревняын лоис топ гажажык, вичкуас эз пондö ветлöтны отирыс.

Волисполкомö локтiсö гижöттэз, кытöн отирсö тшöктiсö велöтны грамотаö — лыддьöтны да гижны.

— Вот вöлись уджыс! — Андрейыс öшис, пондiс гыжьявны юрсö. — Мымда миян синтöм отирыс? Висьтав, что быдöнныс оз кужö гижнытö да лыддьöтнытö...

— Эн пов! Керам! — висьталiс Мишаыс, серöмтчис — кокнита баитiс, кыдз лöсьöтчис öтiк лунöн отирсö велöтны лыддьöтны, бытьтö быдöнныс вöлiсö челядь.

Кадыс вöлi ар. Мукöдыслöн вундiссис ни — дзимляссисö сюэз.

Öтöрын нять, зэрö: курöггес дзебсисьöны пос увтö, исполкомын керны бытьтö нем, секретарьыс да предыс одзлань кыввезнысö кеслöны:

— Менам, натьтö, некытчö ни оз велав, — пондiс серавны иньсö Прокопьевичыс. — Кыдз менö видны да кагаэз чужтыны, сэтöн и эм! Кыкö ни, видзöт, жынгис и эшö оз я лöсьöтчы козьнавны, а! Пола и бокас ни водны... Ковсяс чеччавны бокö, кыдз думайтан? Кытшöм ни сэтöн велöтчöм? Мый юрас пондас пырны?.

«Чеччалан ни, пороз! — Андрейыс думанас осудитiс вонсö и дорйис Танясö, кöдö нач вунöтнытö сiдз эз и вермы, кöр вöтасьö, а кöр син одзöттяс мунас, мыйкö топ гусялö или мырддьö. — Чеччалан ни, Мишка! Адззылi, кыдз нюкьясян комсомолка-учительшаыс дынын». Нывкаыс локтiс челядьсö велöтны, кошшö бы жöник ни да грамотнöйö, бытшöмö, Мишаыс кодьö, и волисполкомись предыс оз сунав...

Баитiсö кыкöн отир велöтöм йылiсь, кытöн тöждiсисö, кытöн сералiсö, но öтöрас баснинысö эз петкöтö, а сэтöн жö баитчисö кин да кытöн пондас велöтны, кöр колiс велöтны быд керкуись, быд мортöс. И медодз отирсö велöтны усис школаись велöтiссезлö, но нiя вöлiсö нач етшаöн — куим-нёль морт, сыбöрын баснинаныс велöтiссесö адззисö грамотнöй комсомолеццез коласiсь, и коммунисттэс эд кужисö жö лыддьöтны да гижны. Якуня Иван вермис гундыртны книгаэс дынын. Тöдвыланыс уськöтiсö челядьсö, кöдна велöтчöны. Мый нiя? Вермасö эд маммезныслö мыччавны букваэсö... Петö, что ветлöтiссес адззисисö, велöтчиссес пондасö ветлöтны изба-читальняö.

Кадыс лолалö вильмоз — виль олан пыртö да дзескыта, дзик бöра велöтчöмыс некинлö оз ков бы, только исполкомовеччеслö да партийнöйеслö... Пример: шуам, секретарьыс исполкомсянь рытнас локтiс гортö, сёйис, зоныскöт, кöда котрасис ни, петалiсö садникö, сыбöрын пондылiсö гуддисьны карта вылын. Андрейыс уджалiс пемдытöдз, кытчöдз эз лок иньыс. Локтiс Лизаыс, сэсся эз бы и вöрöтчы ни — сiдз, ни мыдзöма, но эшö колiс вердны зонсö, бергавны подаыс гöгöрын, а кöр ештöтчис, мужикыс горöтчис:

— Тöдан мый... Велöтчыны эд колас.

— Мы-ы-ый? — эз вежöрт иньыс, пондiс видзöтны мужикыс вылö бытьтö Андрейыс код.

— Велöтчыны тэныт колас! Гижны да лыддьöтны.

— Ойе-е-е, — серöмтчис иньыс. — Сералан али быль? Мый ме грамотанас кера? Тэ моз ог я пуксьы пызан сайö да понды весь овны? А уджавнытö кин пондас?! Кин пондас няньнас вердны? Дяддес или сваттэт? Али эна... Дженыт бöжа невестаэт? (Бöра эд вежöктiс мужиксö). Тэ вердан? Тэ кыдз эд эта... Кужан ме вылын ыксынытö, а сэсся нем... Эз бы вöв иньыт, важын бы тшыгйöн пезьдiн... Нем меным грамотанас керны, сiдз кужа уджавнытö — нятьсö панявны!

«Нятьöсь порсь тэ!.. Сетöм еныс тэныт нятьын нырьясьны и нырьясян, сэсся нем он тöд...» — лöгöн ни иньыс вылö видзöтiс Андрейыс, лёкжыка ни висьталiс:

— Велöтчан! Он кö понды... Доддяласö!

— Мый тэ ме бердö велöтчöмнат кышасин?! Колö грамотнöйыс, кошшы, гöтрась! Эз ков гöтрасьны ме кодьыс вылö... Он адззы... Кынöмö бöра эд моросö вылö кайö ни. Он я челядьсö понды сьöрат волисполкомат кыскавны, а ме уджала?!

Пишнитiс нырнас мужикыс: кадыс зэлыт эшö и кытчöдзкö вунöтiсö велöтчöмыс йылiсь: колiс дзимлявны сюэз да лöсьöтчыны тöв кежö... А кöр кынтiс, луннэс лоисö дженытöсь, гажтöмöсь, локтiс праздник — Октябрьскöй революциялöн годовщина. И бöра праздниксö кольлавны и пантавны ковсис исполкомыслö. Андрейыс да воныс комсомолеццезкöт и коммунисттэзкöт не öтпыр öксьылiсö öтлаö, баитiсö и думайтiсö, кыдз да мый керны, кыным флаг да кытчö öшöтны, кыным лозунг и кинлö гижны, сэк жö локтiс эшö письмо, медбы вöлi демонстрация: отирыс флаггезöн да лозунггезöн петiс улицаö, сьывтöн ветлöтiс посадын, том и пöрись гажöтчис, адззылiс, что праздникыс миян — уджалiсь отирлöн.

Праздник панытас ни Андрейыс иньыслö горöтчис:

— Кывзы... Праздник эд локтö.

— Кытшöм бöра праздник?! — эз вежöрт иньыс. — Неважын Покров чулалiс, чарлачöвтан кольлалiм и бöра кытшöмкö праздник адззат! Нач нем тiянлö керны, весь овтöнняныт госныт пизьö, сiйöн и кошшат праздниккесö!

— Эта эд... — сьöкыта ловзисис Андрейыс — дзескыт гортын, что иньыс сэтшöм — нем оз вежöрт, но эшö висьталiс. — Октябрьскöй революциялöн лун, мыся!

— Тiян сiя праздникыс!.. — эрзыштiс Лизаыс и петiс керкусис.

— Мать твою перемать! Бöжыт вылö ожо тальчча! — мужикыс бöрсяняс ньылыштiс дульсö, лоис сэтшöм недолыт, что зонсö тойыштiс дынсис — зубыта тангис и петiс жö керкусис да лöгыс увья пондiс масьтыны-керны посöдзыс дынын пес.

Праздник панытас ни эшö öтпыр öксьылiсö изба-читальняö, эшö öтпыр баитчисö кыдз да мый, сэтöн жö шуисö öктывны медодзза велöтчиссезöс — пöрись отирöс. И кыдз нiйö öктiсö, кöть горзы, сьöвзьы быдöс вылö и эн касьтыв... Медодз улицаэзöт бедьöн котрасис исполнитель, бедьнас быд öшынö, ыбöсö тарскöтiс да ыксiс: «Эй, Певра! Кылан-он?! Велöтчыны мун! Он кö мун, он кö кывзiсь, штрафуйтасö! Кылан?! — этö кучиксис петiс — ыксiс Ректан Степан, бытьтö сiя и эм, сы кодьыс некин абу. Степанлöн дышыс петö бы котрасьнытö, но полö Прокопьевичись, кöда корис исполкомö, веськыта шуис: «Степан Николаевич!.. Юöрт отирсö, и ась локтасö! Озö кö локтö, видзöт менам!..», и Степаныс мунö улицаöт, модьö ныр увтас — видö Прокопьевичсö: «Зор тэныт... Миян кодьсö адззан! Ассит иньтö бы иньдiн пон моз котрасьнытö? Мыля он иньды рышкыт бöра Танятö? Видзöт кыдз сiя госсялöма... Ы-ы-ы! — жвангö бедьнас Паладь керку ыбöсö, эрзö: «Паладь! Разьсьöм чуман, котöрт изба-читальняö! Он кö мун, шедан! Мун öнi жö...»

— Мун ачыт, сир сёйись клёктун! Тэныт нем керны, а менам челядьыс лун öтнаныс и оз кольччö рытнас... — Паладьыс сьöласьтöн петö карта вылö.

— Лисавета... Эй, Лисавета, — рамжыка ни Степаныс ыксö Андрейыс иньлö. — Котöрт велöтчыны...

— Мый?! — эз вежöрт Лисаветаыс, керкуись чужöмсö мыччис öшын одзын.

— Велöтчыны, мыся!

Инькаыслöн гурнитiс сэтшöм лöг, что юрыс бергöтчыштiс, сьöвзис, петiс посöдзö, босьтiс ыбöсыс сайись кудель и зоныскöт заргисисö баняö, и мöдiк инь отир сiдз жö сайöвтчисö кытчöкö син одзись, кöда баняö жö, кöда гидö — сизим понöн он адззы! Изба-читальняö локтiсö морт-мöд, медодз волисполкомись предлöн иньыс — Таняыс, кöда сьöрас вайöтöма зонсö. Пырис, шынньöвтiс да сiдз, что Андрейыслöн шоналiс сьöлöмыс, дзик рытнас мыччисис шондi. Андрейыс мыйкö бы висьталiс Таняыслö, сэтшöмö бы висьталiс, натьтö, касьтылiс бы зонкася да нывкася оланнысö, но, кыдз шуöны, матын гырдззаыт, да он курччöвт: абу ни инькаыс сылöн. Таняыс горöтчис мужикыслö: «Мун гортö! Мöдыс горзö!» Вашöтiс мужиксö, пуксис Андрейыс одзö скамья вылö, шынньöвтiс, думанас дзик висьталiс: «А тэ мый татöн керан? Али иньыт оз гленитчы? Оз шонт?..»

Сэтчö пырис Якуня Ваня, босьтiс книга, осьтiс сiйö и пондiс мыктавны да лыддьöтны.

Пондöтчисö, сiдзкö, велöтны отир, и бöра жö дойдiсö нiйö, кöдна эз бы велöтчö: штрафуйтiсö. Деньгасö öктiсö нач етша, но исполкомö шедiс эд деньга, и Прокопьевичыс воныслiсь юалiс: «Мый пондам деньганас керны?»

— Кыдз мый? — эз вежöрт Андрейыс.

— Бат, праздникыс кежö босьтам вина да юыштам?!

— Тэ мый?!

— А мый? Грех оз ло, — сералiс Мишаыс, сэтöн жö петiс исполкомись и иньдöтчис лавкалань...

Öтiккез копейкасö эз тöдö кыдз да кытiсь шедтыны, кыдз видзны, а мöдiк кутiс да öтiк лунöн торкис горшас...

21

Эта сорöн и панталiсö праздниксö — дыр модисö да лöсьöтчисö волисполкомын: керисö флаггез, Андрейыс гижис лозунггез, комсомолеццезöс тшöктiсö сьывны да йöктыны изба-читальняын, коммунисттэз отир коласын быд лун модисö, что вот локтö Октябрьскöй революциялöн годовщина — миян праздникыс, а не поппезлöн, сiдз что лöсьöтчö, ёрттэз, лöсьöтчö! Праздник лунас быдöнным петам улицаö, керам митинг... Инькаэс кывзiсö этö да коммунисттэс бöрсянь сьöласисö, видчисö и сералiсö... Прокопьевичыс сiдз и этадз модис:

— Андрей, праздник лунас вöлi бы гажа, шондiа! Кыдз думайтан?

— Тэ юрбит еныслö!

— Кинöн лыддян?! — лöгасьлiс воныс. — Тэ эд поппескöт тöдчин, а ме ны йылiсь ог бы и кывзы! Видзöтам, видзöтам...

И видзöтiсö, кöр луннэс чинiсö да чинiсö, кöдзыт, праздник ойнас жвангис-кынтiс, пондiс усьны поснит лым. Югдiс жагöна, топ асылыс вöлi мыдз. Исполкомö предыс да секретарьыс локтiсö пемытсорöн. Лозунггез да флаггез петкöтiсö öшын увтö и пондiсö видзчисьны отирсö, но отирыс эз тэрмась петны гортсиныс: медодз исполком одзын пондiсö котрасьны поннэз, и öтiк ны коласiсь вöлi сэтшöм ылöстöм, что локтiс лозунгыс дынö, кöда сулалiс йöрыс бердын, лэбтiс коксö, чижнитiс кык-куимись, дзарнитiс исполком öшыннэзö сiдз, бытьтö нем эз кер, мыйöн Прокопьевичсö сiдз лöгöтiс, что сiя чепöссис öтöрö, порогас падмис, усис, дойдiс коксö и сiйöн сорöн кивзытöн бöр пырис керкуас.

Миша воныс одзын кивзiс-куснясис, малалiс коксö, а мöдыслöн серöмыс петiс, но эз лысьт серавнытö.

— Кытöн отирыс?! — пондiс ыксыны предыс. — Мый суналöны?! Али сё узьöны?!

— Ме ог тöд, — шыасис Андрейыс, видзöтiс öшынö и некинöс улицасис эз адззы.

Праздникыс эз вачкись праздник вылö. Отирыс кыдз полiсö петны керкуэзiсь, медбы не кынмыны öтöрас — быд морт асывсянь адззис удж: инькаэс куделясисö баняэзын ― бусöн тырисö, а мужиккес керисö доддез да даддез, вочисö сийöссэз да сермöттэз, кöда доддясис, медбы вайны подалö вердчан, кöда кайöм короминна вылö да идзасöн тупкалö осьтаэз...

— Котрась этаыс дынö! — мурзис Прокопьевичыс.

— Кин дынö? — эз вежöрт Андрейыс.

— Этаыс дынö... Ректаныс дынö! Мед татчö котöртö! Иньдам отирсö чукöртны!

«Ачыт мыля бы он мун?» — думайтiс Андрейыс, öвтчытöн дыша петiс исполкомсис, ветлiс Ректаннэзöдз, висьталiс Степаныслö, что корöны исполкомö. Степаныс топ сiйö и видзчисьöм: юрыс вылö кышалiс бырöм шапкасö, пасьталiс вочöм гунясö и бордпавкйöн сöтiс гортсис.

Югдiс öддьöнжык ни. Дугдiс усьны лымыс, кöдзыта лолалiс ой тöв. Ректан Степан улицаэзöт котрасис бедьöн, брякöтiс бедьнас ыбöссэзö и горшсö летiс: «Мый узят?! Кылiт-эдö? Колö котöртны исполкомыс одзö праздник вылö! Тэрмасьö, вежöммез!»

— Тэ ачыт вежöм! — инькаэс сьöласисö баняэзын, пыркöтiсö нярьялöм лён, зуалiсö кудель, сьöласисö — дуллезныс нятьöсьöсь, синнэзныс був-бав.

Котрасьö улицаэзöт Степаныс, а Прокопьевич исполком посöдзыс дынын жöдзö да секретарьыслiсь юасьö: «Кытöн отирыс?! Мый керöны?!» — дзик виноватöй Андрейыс.

— Оз тай локтö, — бобгö секретарьыс, пöлялö долоннес вылö: ныр йылыс лöзöтöм, чужöмыс чочкоммöм — кынмö.

Катша китшкö короминна вылын — нерö Прокопьевичсö. Адззöны, лыннялö öтiк коммунист, сы бöрын мöдiк. Ны бöрсянь полöмöн сибöтчисö школаись велöтчиссез. Локтiс милиционер — синнэс пыктöмась, татчö шедiс праздник кежö, некинiсь эз пов, эз юась-висьтась, мый сылö керны, кытöнкö узис, саймис, тöдвылас усис, что колö мунны исполкомö, вот и локтiс, вот и лыннялö дышкучик...

— Евлампий Трофимович, мый пондам керны? Отирыс эд абу! — Прокопьевичыс юалiс милиционерлiсь, а сiя юрсö чатыртiс вевдöрö, видзöтiс кымöррез вылö, кöдна юр вевдöрын небосö шебралiсö вывтi ни сука.

Евлампий Трофимовичыс дыша иньдöтчис улицаэзöт, сувтчис быд керку дынö да Степаныс моз жö ыксiс: «Эй! Котöртö праздникавны! То видзöтö менам...» Отирлö воштiсьны некытчö: кöть мымда пышшав, кöть шыр нораö дзебсись, адззасö да эшö штрафуйтасö, сiдзкö, колö мунны: медодз гортiсь исполкомлань вöрзисö мужиккес, кöмасьöмась нинкöммезöн, пасьтасьöмась кин да мый вермöм: öтiк гуня, мöдiк шабур, куимöтыс бырöм да вочöм пась. Мужиккес шатласьтöн локтöны исполкомлань, а милиционерыс одзлань пон моз кошшö инькаэсö: пырö баняэзö, гиддэзö, видзöтчö джоджуввезiсь, ыксö инькаэс вылын — видчö кыдз мезмöма тюрьмаись, и инькаэс, кыдз уджалiсö бусöсь да нятьöсь паськöммезнаныс, кыдз петiсö баняэзiсь да гиддэзiсь мисьтöм рожаэзнаныс, сiдз и иньдöтчисö празднуйтны. Кымöра. Кымöррез колассянь мыччисьыштiс шондi и бытьтö сылö стыд лоис да дзебсисис бöр.

— Сувтам, ёрттэз, стройö, сувтам! — исполком одзын павьялö Прокопьевичыс, летö горшсö, киэзнас öвтö-мыччалö мый керны отирыслö.

Мужиккескöт кокнитжык: кыдз бы эз овсьы, но нiя шедлiсö армияö, вежöртöны мый сэтшöм строй, кыдз сувтны эта стройö, а инькаэс... Баля табун и эмöсь!..

Андрейыс да Прокопьевичыс пессисö-керисö, отирыс сувтiс лёдззö, и бöра медодзын лоис Михаил Прокопьевичыс. Сылöн киас флаг, сiя медодз дундöтчис, пыдына ловзисис, чорытжыка шагньöвтiс и ыкöстiс сьыланкыв: «Вставай, проклятьем заклейменный!..», голосыс сэтöн жö сибдiс, пондiс кызöтны.

«О-о-о», — бакöстiсö мöдiккез, и син одзын лымыс вылын пондiсö вöрны нинкöммез.

Сiдз чулöтiсö праздниксö, эз юö суррез, сюромкаэз, эз йöктö и сьылö. Ашынас изба-читальняö бöра öксисö велöтчыны. Отирсö велöтiс Якуня Ваня. Велöтiсьыс ыксiс Егорлö:

— Чукыля кок! Эта мый? Кытшöм буква?

— Ы-ы-ы, — баксiс Егорыс.

— Сулема тэныт, а не ы... О эта букваыс! Вежöртiн?!

— Абу тай учöт. Вежöртi, — шыасьö Егорыс и пымалö кöдзыт ньылöмöн да думайтö: «Адззöмась весь олiссез мый керны...Уджавны колö, а тi...»

— Эта кытшöм буква? — Иваныс думаэсö сорö Егорлiсь, юасьö ни Танялiсь. — Висьтав, суланджек!

— Сö! — гажöн шуö инькаыс.

— Ась сö, — велöтiсьыс топ гажмö. — А эта? — и мыччалö «м» вылö.

— Мö-ö-ö...

— Вот сiдз, Егор! — пондö ошшасьны велöтiсьыс. — Инькаэс тэсся буржыка велöтчöны.

— Сылöн мужикыс начальник! — модьö Егорыс. — Узьтöнняныс, натьтö, букваэсö велöтöны, а ме мый? Мымда ачым, сымда и иньö, узьлам пода моз...

— Сiдз, Ванька! Кагаэсö дорны грамотаыс оз ков! — китшсьö Ректан Степаныс, кöдалö кöть кымöсас вачкы, некыдз оз велав лыддьöтнытö, а кылыс... Чож Степаныс!

Велöтчöны отирыс, кöр нiйö силой тшöктöны велöтчыны: арсянь тулысöдз томöс и пöрисьöс не сiдз дак этадз вашöтöны рыттэзнас сельсоветö, кытчöдз мортыс оз понды лыддьöтны и оз велав гижны ассис нимсö...

Олiсö тулысöдз. Тулыснас Андрейыс чапкис исполкомись уджсö.

— Важын бы сiдз! Öнi пондан отсасьны меным, а то пыр весь олiн, — Андрейлö висьталiс иньыс — рад лоис.

22

Андрейыс волисполкомын эз ни уджав, етша ни пантасьлiс воныскöт, кöда медбöрын лоис етша басниа и юрсö пондiс видзны вылынжыка. Уджалiс Андрейыс отирыс моз жö — ас пондасис олiс, етша тöдiс мый керсьö исполкомын, газетаэз эз вöлö, эз лыддьöт, виль юöррез кывлiс медбöрын, сьöлöмыс етша висис государство понда, эз тöд мый керсьö талун соседыслöн, мый пусьö-пöжсьö ылынжык. Иньыс жö пыр уна и одзжык тöдiс оланыс йылiсь, ваялiс юöрресö, вот öтiк лунö мужикыслö павжнайттöн и шуис:

— Мый нö?.. Умöля сёян... Али комуниссэс кучикö вурсин, да няньыс эз ло чöскыт?

Андрейыслöн нельки паньыс усис кисис, сiя некыдз эз видзчись, что Лизаыс пондас мыйöнкö кöритны да эшö пондас шуны коммунистöн, кöр партияас эз пыр, мужикыс дзик виньдiс няньнас, гультым-гальтым керис, синваэсö чышкис да лöгöн юалiс:

— Мый тэ бöра?! Али эта?..

— Сiя, сiя... Сималö кö кынöмыт, сёй! Ме чöскытжыка тэнö верднытö ог куж! Али котрась да нылiсь сёй, кöдна любоöсь! Нылöн киэзныс абу сэрпöсьöсь.

Иньыс мужиксö пыр пондiс вежöктыны, мыйись-мый, кыдз чорытжыка горöтчас, öзйö, Андрейсö пондö шуны пёсикöн, бытьтö эмöсь «пёсикыслöн» кодя да басöк невестаэз, кöдна любитöны не сы моз.

— Сi-i-iдз, — ружтiс мужикыс и унажыксö нем эз висьтав: быд торыс понда видчыны кö, уна лоас — керкуас кöть эн пыр. Андрейыс пызаныс сайись эз пышшы, няньыссорöн ньылыштiс лöгсö, выргис-панялiс шöмйöв, курччалiс рушмöм кушман, сыбöрын чеччис да сьöкыта ловзисис.

— Мый сьöкыта лолалан? — мужиксö пондiс нерны Лизаыс. — Али вичкуыс жаль жö?

— Мый меным вичкуыс?!! — öзйис Андрейыс, эз вежöрт иньсö. — Мый пиннетö вузалан вичкуыс понда? То попыс понда горзан да менö видан, то бöра вичкуыс понда кöкан...

— А мый? Абу я мый я сiдз? Попсö öтлаын жö отсалiн вийнытö! Воныткöт! Сотана чужöмыскöт... Бесыскöт! Комунисö жö эд гижсин... Етша лоис öтiкыс, öнi мöдiк бердö кутчисят! Синнэзныт нач тырöны еныс весьтöт. Вичкусö ни тай пö лöсьöтчат разьны! Думаш оз тöдö? Оз адззö и оз кылö? Еныс эм, сотана чужöм! Эм еныс и кöркö чарöтас жö горт шöрын!

— Дугды, мать! — синнэс вирдыштiсö Андрейыслöн. — Мун тэ ме дынiсь да юрбит мымда колö! Ме ог видз... ― пыдына лолалiс-керис, вермис ассис лöгсö, рамжыка ни горöтчис. — Кин тiянлö да мый и висьталö? Кысь да мый одзлань и тöдат?

— Еныс, бес чужöм! Еныс!! Сiя быдöс адззö и кылö да отирыслö юöртö. Ожось кыдз мыжьяс тiян коддесö!

— Тэнö ась мыжйö, öнджасö! — сьöвзис Андрейыс, синнэс пондiсö вирдавны, рожаыс чочкоммис — виртор оз орс. — Кыдз кута да кыдз мыччала, пондан тöдны кытшöм пу вылö увтчыны, пон! — и петiс керкусис топ пурисö сьöлöмсö — шондiсö бы эз адззы.

Сiдз луныс и чулалiс, кыдз чужьялiс: öтiк не сiдз, мöдiк мöднёж. Рытланяс ни уджавтöнняс кисö дойдiс, локтiс гортö одзжык, эз сёй, водiс кöмкöт-паськöмнас западня вылö и дыр эз вермы онмöссьыны — аскоддя думаэз чувйисö. Асывланяс ланьтiс чöскыт онöн, узис и топ синнэсö эз ешты куньны, кыдз кинкö öтöрись ыбöсас пондiс ёркöтны да сiдз, что öшыннэс жольнитiсö.

— Кинöс бöбыс одзся-одз и новйöтö?! — синнэсö осьтiс Лизаыс, баличаэсö гардыштiс юрыс гöгöрö, кöмтöм коккезнас петiс посöдзö, и сэкжö хозяйкаыс бöрсянь гужа-важа керкуас пырис Михаил Прокопьевич, кöдö сэтшöм одз татöн некин эз видзчись и кöда вылö Лизаыслöн пыр петiс лöгыс, мыля Прокопьевичыс аскоддя: кокнита бы олö да йöзыс сайсянь керö. Веськыта висьтавны — Прокопьевичыс умöль морт, кытöн оз ков — сiя, а кытöн колö — абу, уджалö бы йöз киэзöн, олö йöз сайсянь, сёйö чöскыта, но йöз бекöрись бы... Натьтö, талун Миша воныс ордö одзся-одз эз лок весь, натьтö, сылöн бöра кытöнкö да мыйкö шöмалö эд, öтнас оз вермы керны, кошшö отсасись — бöбöтö бы Андрейсö...

— Пуксьы! — хозяйкаыс будзгыльтчыштiс, мунiс комö, миссис рожасö, кыйис баличаэсö да пондiс юрбитны еныслö.

Андрейыс нюжласис западняын, Прокопьевичыс пуксис бокас, ружтiс-керис и пондiс баснинас кытшлавны-бöбöтны ас дынас вонсö:

— Андрей, ме тэ дынö бы...

— Мый тэ бöра сы дынö вунöтiн?! — комсяняс швыркнитiс хозяйкаыс. — Али бöра öнджа... Бöра кытчöкö отирсö нерны нуöтан? Али кöдзны нуöтан? Öтлаын кöдзат, вундат, а сёйнытö пондан тэ! Пыр тэ йöзыс öмöн шырресö куталан! Эн-на, еныс адззас...

— Тэ мый, кенак? Ачыт я? Эн ешты чеччыны, менö видан... Но тэ и морт! Кыдз сэтшöмыскöт вонö олö? — пондiс серавны Прокопьевичыс.

— Кыдз олам?! А тэныт мый? Кыдз олам, сiдз и олам — асьным тöдам, коласаным йöз мужиккесö да инькаэсö ог узьтöтлö! Мый эм, асланым! Вот тэ... Тöдам, кыдз думайтан йöзыс вылö вожасьны! Тöда-а-ам...

— Тупкав! — лöгасис Андрейыс. — Пиннетö кисьта.

— Тэ тупкав, Сивöй Таракан! Тэнат некытöн öмыт оз оссьы, а ме вылö верман ыксынытö!

Мужиккес эз пондö шыасьны. Андрейыс чеччис, пуксис западняыс вылö воныс бокö, пондiс гуддьыны ныр гöгöрсö. Дыр мыйись Прокопьевичыс горöтчис:

— Öндрей... Тöдан мый... Öтiк удж бы колö керны... — баснинас кытшлалiс, вишыкасис да бузгис. — Вичкусö бы колö разьны.

— Мы-ы-ый?! — невна гатш эз пöр Андрейыс.

— Разьны, видзöт, тшöктöны... Ась посадыс шöрын оз сулав.

— Пöрöтны али сотны?! — перыта юалiс Андрейыс.

— Кöть кыдз, — нырнас пишнитiс воныс.

— А мый сiя?! — чужöмыс нюжалiс Андрейыслöн. — Кинкö вылö кайö али мый? Али этö... Курччасьö?

— Хе-хе... Эта эд, вонö... Кыдз сiйö шуöны?.. Кывзы, еныс эд абу. Сiдз? Сэк мый нö? Али тэ, öнджа... Иньыт кодь жö?.. Грамотаыт оз тырмы? Он вежöрт? Эх, вонö!.. Мылякö ме тэнö эг понды вежöртны!.. Мöдöрö пондiн чукыльтны...

— Эм еныс али абу, ме сiйö ог тöд, но вичкуыс...

— Мый сэтшöмыс?! — хозяйкаыслöн чочкоммис чужöмыс, нюжалiс, синнэс ыждiсö, öмыс нюмыртчис. — Мый баитат, бессэз?! Быль я мый я вичкуыс выланыт кайö?! Кык бес вылö... — комись босьтiс няньзыр, мыччисис мужиккес одзö — би, сотас и пöжалас — тшын каяс! Сiдз бы зырнас и тойö, вачкö, кымöссэзнысö поткöтö. — Тi мый?! Еныс бердö кутчисит! Да ме тiянöс!.. Да сiя тiянöс! — веськыта шырö — морттэзö оз пукты, эмöсь и абу сэтшöммес, только кольччис юррезнысö тальны и быдöс сэтöн! Но... выныс етшаöв... И кольччис кывнас дойдны висьтавны. — Петö керкусис! Петö, ась синö оз адззы и пельö оз кыв!

— Уна эн тöд! Пыр менчим туйсö эн поперегав! Эшö эг и думайт керны, а тэ... — хозяиныс чеччис, пызаныс вылiсь босьтiс совдоз да сiйöн лöсьöтчис иньыслö синнэзас шентны, но инькаыс заргисис комас и курччöвтiс кывсö, кöр бура ни тöдiс мужиксö: виртöм жö эд Андрейыс лöгувьяс, вермас быль паздыштны мыйöн шедас.

Лизаыс комын пондiс лонтны гор, джоджöт котöртiс таракан, бытьтö немись оз пов — сiя хозяиныс керкуас, каньыс ниртчис хозяиныс коккез бердын. Недолыт Андрейыслö, кöть синнэз эн осьт. Пукалыштiсö, Прокопьевичыс бöра осьтiс öмсö:

— Мый нö сэк? — ачыс видзöтiс кытчöкö рос угöлас.

— Мый ме? — эз вежöрт Андрейыс.

— Кыдз мый тэ?! — лöгöн юалiс воныс. — Мыля сiдз?! Тэ эд исполкоманым член.

Нем сэтчö эз шу Андрейыс, кывзiс, мый эшö висьталас воныс. А сiя пондiс видчыны:

— Разьны колö деревняыс шöрись öнджасö! Мед эз вöлö син одзын еннэс и враггес, сэсся медбы Совет властьыслö паныт поппес эз ордчö и отирсö кытчö оз ков эз бöбöтö. А тэ... Иньыт моз...

Андрейыс не тьфу, не ну, и комын иньыс жиля-жоля.

— Мый мугин?! — лöгжыка юалiс Мишаыс и пондiс видзöтны веськыта синнэзас, юалiс и юрыс вылö кышалiс моршень кодь фуражкасö, ачыс сё видзöтiс Андрейыс вылö, видзчисис вöтчас я сьöрас.

— Мед мунö, мед... Ась кошшö, поди, панталас! — комас бöра пондiс шыасьлыны Лизаыс — öддьöнжык лöгöтiс мужиксö, а Андрейыс гöбечись босьтiс нинкöммез, кöмасис и керкусис петiс Мишаыс сьöрö, эшö ыбöсыс коласын шынньöвтiс, топ радся-рад, что асылыс гажа, бытьтö мунö керны сэтшöм удж, сэтшöм удж, кытшöмö некин эшö и вöтöн эз вöтась.

Посöдзсянь тыдалiс, кыдз вичкуыс орсiс шондiыскöт ― юрыс югьялiс сэтшöм югöрöн, что синнэз топ асьныс видзöтiсö сэтчин. Ошшасьны бы, что сэтшöм вичкуыс только татöн ― медбасöк, вежьюгыт юра, кыдз чача, а сiйö тшöктöны разьны. Веськыта кö висьтавны, Андрейыс эшö эз верит, что Мишаыс быль нуöтö керны сэтшöм удж, кытчö сьöлöмыс эз кыскы, и киэс эз лэбö, но мунiс воныс сьöрö, кöр велалiс ни вöтлiсьны Мишаыс сьöрын.

Асылыс гажöтчис, кыдз орсiс вичкунас, мыччалiс, мый вермöны керны отир, что тшупöны да лэбтöны не только керкуэз, но и эттшöм бытшöм вичкуэз. Кык вон тэрмасисö — быдöннысö одзалiсö бы керны сэтшöм удж, кöдö мöдiкыс оз кер — кöть юрсö керав, оз кер, а нiя мунiсö, кыкöн шупыта оськöвтiсö вичкуыс дынöдз, сувтчыштiсö ньывпуэз увтö, кöднö кöр да кин и садитöм, пуэс быдмöмась стройнöйöсь да джуджытöсь и шушкöны ас коласаныс, кöть и абу некытшöм тöлок.

Ньыввес увтын Мишаыс пондiс куснявны чуннесö — лыддис, кин локтас уджавнытö, куснялiс чуннесö и модис:

— Опонь, Кипрей, Максим... Быдса помеч öксям! — шынь керис, бытьтö помечсö öктiс не разьны, а лэбтыны керку да сэтшöмö, что пондасö овны отирыс да касьтывны бур кылöн. — Кыныма ни öксисö? Ага, куима да ми кыкöн. Тырмасö али озö? А локтасö я ышö сэтшöм öнджаэс? Поди, иннезныс бöра жö ордчасö паныт? — и сэтöн жö чорыта висьталiс. — Локтасö! А кытчö воштiсясö?! Некытчö оз воштiсьö, локтасö! Кыдз думайтан? — модис Мишаыс, тöдчис, что сьöлöмыс чеччалö жö, полö жö кутчисьны вичкуыс бердö.

Андрейыс абу коммунист и сылö нем бы керны эстöн, но воныслiсь туйсö он поперегав, кöр сiя лякасис кыдз сир и модьö быд шагын: «Лок. Эн кольччы! Мый вöрöтчан кыдз гöжöм?!»

Андрейыс лэбтiс юрсö да видзöтiс вичкуыслiсь медыджыт юрсö, кöда матiсянь вöлi эшö басöкжык, эшö ёнжыка югьялiс шондi югöрыс весьтын, и мöд юррес вичкуыслöн вöлiсö басöкöсь жö, кöть и золотöй рöмыс нысянь павкис етшажык. Вичкуыс гöгöрын чирзiсö да лэбалiсö чикиссез, кöдна поззэзнысö лякöмась крышаыс бердö, ургисö гулюэз. Андрейыс сулалiс вичкуыс дынын, видзöтiс вевдöрö, и небоыс кыдз лэдзчисис увдöрö, зэв вичкуыс юр бердöдз, и пöрöтiс вичкусö сы вылö.

Гажöтiс шондi, улицаыс луд вылын ветлöтiсö да кокасисö курöггез, быркайтiсö сырчиккез, чеччалiсö воробейез — быдкодь гагыс и гутыс лэбалiс и уджалiс асмознас. Кытчöкö уджавны вöв вылын гöнитiс Ипатлöн суланджек сувда зоныс, сыбöрын котöртiс Прокопьевичлöн понокыс, кöда некöр оз тöд хозяинсö, кин шутньöвтас, сэтчин и котöртö. Вичкуыс сайлань, мöдöр бокланяс, вöрöтчисö морт-мöд, а улицаын, кырывланяс, беддясис Ольöп старуха, годдэсö сылiсь некин оз тöд, и ачыс оз вермы висьтавны. Ольöпыс вылын паськöмыс рызi-бызi — дöмас дöмас вылö вурöм, спинаыс сайын сэтшöм жö котома, кöда сiдз жö бырöм да сизимись вочöм. Некин эз вермы висьтавны, кытöн чужис Ольöпыс, эм я сылöн гортыс, айыс да мамыс, кысянь сiя видзчисьтöг локтö посадö и кытчö мунö, но быдöн тöдö, что инькаыс ветлöтö кортöн — öвтчö деревняись деревняö, пырö да петö керкуись керкуö, видзчисьö кин да мый сетас, кин мыйöн вердас, сiйöн и олö. Некинлö и нем умöльсö Ольöпыс оз кер, и сылö некин и нем умöльсö оз кер, а быдöн жалейтö инькасö.

Мунiс Ольöпыс, мунiс и локтiс мужиккес дынö, пернапасасис да горöтчис: «Мед тiянлö еныс буржык здоровье козьналö! Мед тiян челядьыс оз шогалö, мед...» Сувтчис мужиккес одзö и пондiс öвтчыны, кыдз öшис, видзчисис, что мужиккес чапкасö понлö моз няньтор — мыйöн богатöсь, сiйöн и радöсь, но сы местö Прокопьевичыс чорыта шуис: «Нем миян тэныт сетнытö!»

— Ме не сiйöн, кагаэз, — ласковöя висьталiс Ольöпыс. ― Ме мöдiкöн... Öнджа... — рожасö пиньлалöв-керис, дзик орсiс челядь моз, бöра пондiс модьны. — Отирыс баитöны, бытьтö вичкусö лöсьöтчат пö разьны... Быль али...

— Мый тэныт?! — эрзыштiс Мишаыс.

— Еныс!.. — öмсö пиньöвтiс Ольöпыс.

— Еныс абу! — кыдз сьöвзис, шуис Прокопьевичыс.

— Кытчö лоис?! — повзис инькаыс. — Кин нö миянöс вердö да юкталö?! Еныс эз бы кö вöл, ми бы эг вöлö, вот! Кристос воскрес! — пернапасасис вичкуыс вылö, чужöмыс чорзис, голосыс вынсялiс, смевмис, веськöтчис, веськыта пондiс видзöтны и веськыта ни содтiс. — Еныс эм, мужиккез!

Кристос воскрес!

— Кымöсат кöс пес! — ныр увтас шуис Прокопьевичыс, малыштiс ота кымöссö, сьöвзис Ольöпыс кокныррез дынö да содтiс. — Ми тiян коддеслiсь ог юасьö! — висьталiс сiдз, что инькаыс бöра пернапасасис куим-нёлись ыкöстiс ни:

— Господи! Енсö бесыс лöсьöтчö вермыны! Отсалö, ой! — код морт моз герйöвтiс улицатыр. Лёк горшнас вермис эд

Прокопьевичсö, сiдз ыкöстiс-унньöвтiс да пондiс горзыны, что Андрейыслöн сьöлöмыс ловзис, пондiс моросас вартны, кыдз вачкисö шатьöн, сiя ас гöгöрас дзир-бар керис и адззис, кыдз öтiк посöдзын чочком юрсö мыччис челядёк, мöдiкын — инька, пондiс вувтны пон, посадыс ловзис.

— Тупкав öмтö! — Ольöпыс вылö эрзыштiс Михаил Прокопьевичыс. — Он?! Ме тэнчит этöн тупкала! — конувтсис мыччыштiс и дзебис наган. — Тупкав, мыся, а то видзöт!..

Ольöпыслöн чочкоммисö рожабаннэс, медодз сiя кыдз кынмис, синнэс ыждiсö, дыр сулалiс да видзöтiс Прокопьевичыс вылö осьта öмöн.

— Шы эн сет, кикимора! — эшö öтпыр висьталiс Ольöплö Прокопьевичыс, дзебис пыдöжык нагансö, шагньöвтiс Гераськоэзлань: вына, ота пельпона, смев — быдöс пыкас и вермас, некинiсь оз пов.

23

Прокопьевичыс да Андрейыс мунiсö Гераськоэзö, шагнялiсö веськыта дженытик улицаöт, и ны вылö эз вувт öтiк пон, туйнысö эз поперегав кань, эз вожмöвт морт, кöть и тöдiс ни отирыс, что кык вон лöсьöтчöны разьны вичкусö. Отирыс эз гардчö син одзын эшö, натьтö, сiйöн, что эз вунöтö, кыдз Прокопьевичсö вартлöм бöрсянь кошшисис отряд, кыдз сотiсö керкуэз — мыччалiсö, что уна оз ков чеччавны, колö тöдны, кöр осьтны öмтö и лэбтыны китö да кин вылö.

Шондiыс вылынкодь ни, югöррез усьöны веськыта синнэзö, но некин эз тэрмась уджавны, бытьтö отирыс эз лöсьöтчö овны одзлань. Кык вон тэрмасисö Гераськоэзö, и быдöн ни посадын тöдiс, что Гераськоэзö нiя весь оз мунö, кöр зонкаыс сэтшöм жö пон юр, кöть сылö оланыс талун жö кусас, пельнас оз вöрзьöт, а пöрöтасö кö вичкусö, оз пернапасась...

Кадыс уна кодь ни, и Гераськоыс вермис гортас не лоны: кöр сылö колас — уджалö, оз — сьöвзяс быдöн вылö и лун узяс, нем чуньöн оз вöрзьöт. Узяс зонкаыс луннас пöттöдз, ойнас мунас да кинлiськö мыйкö сöтас-вартас и бöра пöт, и нем тэ сэтшöмыслiсь он босьт — синнэсö он кыскав. Öнi эта морт дынö тэрмасис волисполкомись предыс, бытьтö Герасько кодьсö сэсся оз адззы — некин сы моз оз прокмы отсасьны Прокопьевичыслö.

И нiя Андрейкöт тэрмасисö, медодз мунiсö Мироннэз öшын увтöт, кöдналöн тöн рытнас кулiс öтiк морт, а ойнас мöдiк: рытнас пезьдiс бабыс, а ойнас квать месяцся кагаок (кыкнаннысö вийис шогöт)... Колö висьтавны, что сэк отирыс шогалiс ёна, шогöттэс ветлöтiсö деревняись деревняö, пырисö и петiсö керкуись керкуö, торкисö отирсö, да сымда, что талун этаö оз бы и веритсьы, кулiсö пöрисьöсь и томöсь, кулiсö тöв и гожум, будденьö и праздникö да сiдз, что шойнаыс вылö туйыс эз тупкась не тöв, не гожум, некытшöм лым тöвнас эз вермы тыртны. Фельдшеррезтöг да враччестöг чужисö и кулiсö отирыс.

Мироныс жöдзö öшын увтаныс, оз тöд мый бердö медодз кутчисьны, кыдз дзебны кулöммесö — öтiк гробö водтöтны или керны кык гроб? Миронлöн чужöмыс — сьöд шом, синнэс гöрдöсь, ыждöмась, керкуас, кылö, кöин моз уннялiс-горзiс иньыс да сiдз, что керкусö орддин бы, эн бы кывзы сэтшöмсö, но орддьыны эз позь, пеллез он тупкав, некытчö он пышшы, кöр олöны öтiк посадын.

Прокопьевичыс Мироныс одзын гогыньтыштiс юрнас, но мöдыс кыдз этö эз и адззыв, синнэзас эз вöрзьы югöрыс, кытшöм вöлi чужöмыс сьöдöтöм да кымöртчöм, сэтшöм и кольччис, и кык вон мунiсö керкуыс дынöт, кыдз шойна дынöт и вöлi сэтшöм ни гажтöм.

Андрейыс мунiс виноватöй пон моз — стыд сылö вöлi и жаль отирсö, но эз вермы кежны воныс дынiсь, эз пышшы, кöр вöрзис гортсяняс öтiк туйö, öтыс тöждiсис — асьсö пурис, а мöдыслöн эз тöдчы нем, эз мыччав, что виноватöй кинкö одзын, юрсö эз мышкырт, эз чинт шагсö, кöр Мироныс бöрсяняныс ни котöртыштiс, вöтiс, одзалiс и предыс одзын ни пондiс модьны-кеймисьны:

— Прокопьевич... Криста ради сулав жö, — чышкис синвасö, öмыс сiдз и пиньласис, голосыс сибдöм, кижгö, киэс боккезас сыр-лёль. — Прокопич...

Прокопьевичыс эз чинт шагсö, эз сувт Мироныс одзö, топ эз кыв пöрисьжыкыслiсь голоссö, и Андрейыслö лоис сэтшöм ни недолыт, умöль, что ёртыслö бöрсяняс горöтчис: «Миша! Сувтчы...»

Вöлись Мишаыс сувтчис, перыта бергöтчыштiс Мироныслань (чужöмыс вылын обида, кöр тэрмасьö, а сiйö дзугöны-падтöны) лöгöн моз горöтчис: «Но мый?!»

— Кытчö тэрмасят? — Мироныс чышкис долоньнас синвасö. — Ме тiянкöт баита. — Öнджа, быль я мый я?

— Мый быль?! Мый быль?! — горöтчис предыс. Тöдчис, что Прокопьевичыслö оз жö гленитчы вичку разян уджыс, кöть и гажöтчö бы... Öнi сулалiс Мироныс одзын, орсiс нырпыссэзнас, паськöтлiс да бöр жмитiс, лолалiс пыдына и тöдвылас усис, кыдз сылö районсянь звоннисö да ыксiсö: «Дыр эшö тiян полокаланыт посадныт шöрын пондас сулавны да отирсö нерны?! Дыр эшö пондат юрбитны еныслö?! Прокопьевич, тэ коммунист или абу?! Или тэ партияас пырин орсны?! Видзöт, кыдз бы ас вылат эн понды горзыны...» А сэтöн на... Гардчöны, нерöны, дзик быль еныстöг оз вермö овны. Кулiс и кулiс пöрисьыс... Оз эд понды кык век овны, и учöтыс понда нем бы вывтi горзыны — виль одзын... Волисполкомись предыс видзöтiс Мироныс вылö и мöдiс веськыта висьтавны, медбы эз модь, дзебис старухасö да кагасö, но эз жö веськыта шырзьышт, эз висьтав, что, Мирон, мун тэ сэтiсь.

Мироныс жö мышкыртiс юрсö, тырппес дрöжитiсö, баитiс бы и эз вермы, сiдз бы инька моз и герйöвтiс, лöсьöтчис-лöсьöтчис и пондiс норасьны:

— Öнджа... Видзöтö жö мый лоис эд, — öвтiс юрнас. — Еныс эд... — лэбтыштiс юрсö, виноватöя пондiс модьны. — Отирыс тай, Прокопьевич... Быль я мый я? Оз я пö вичкусö разьны мöдö? Мый нö менам сэк лоас? Отпевайтны жö колiс бы...

Мортыслöн грамотаыс абу, но оз вермы уджавтöг овны, мый отирлö, сiя и сылö — öтмоз тöждö роднöйес понда, и вичкуыс жаль.

— Кин отпевайтас? — шынньöвтiс Прокопьевичыс. — Попыс эд абу.

— Быль эд! — кыдз саймис Мироныс, невна эз горöтчы: «Попсö эд тi жö...», но аскадö казялiс и шуис мöдiкö. ― Сi-i-iдз, — а аскöттяс думайтiс: «Попсö торкит и вичкусö бы разят? Кöть чужан, кöть кулан, кöть свадьба, кöть праздник, некинлö отпевайтны, некытöн венчайтчыны... Кыдз пондам овны еныстöг? Оз я бессэс быдöннымöс пöртö бессэзö?! Тi грамотнöйöсь, а керат бараннэз моз! Висьталö жö, кытöн отпевайтны кулöммесö?! Лоас кö вичкуыс, поди, бы кытшöмкö старуха сэтчин и сьылiс молитваэсö, а öнi мый? Мый лоас, висьталö?! Тiян кö ме моз бы?!.»

Андрейыс Мироныс синнэзiсь адззис горесö, думаэсö — йöзлöн шогöтыс дöнзис сылö, но эз вермы мортыслö отсавны. — Отпевайттöг дзебат! — мурзьыштiс Прокопьевичыс.

— Кыдз отпевайттöг?.. — нач öшис Мироныс. — Сотанаыс киö я мый я шупкам! — и сiдз пондiс горзыны, что Андрейлiсь топ нетшкöвтiс сьöлöмсö, сылöн юрас чепöссисö думаэз да пондiсö чувйыны, кöть синнэз кунь, кöр асывсянь ни оланыс олан вылö эз вачкись: гортын видöны и йöзын шуöны, но Прокопьевичлiсь туйсö он поперегав...

Миронлöн мамыс эшö эз вöв пöрись, колiс бы овны да овны, кöр эшö вöлi ловья, лун-мöдöн одзжык сы дынö пыралiс Андрейыс, медбы одзöстны истöггез, сэк Натальыс и пеничайтiс, что Прокопьевичыс сiйö штрафуйтiс сы понда, что эз мун рытнас ликпунктö. Кытшöм ни Натальсис бы грамотнöй петiс, кöр томнас эз велöтчы, кöр рыттэзнас колö гортын уджавны да челядьыс гöгöрын бергавны, но Прокопьевичыскöт уна он баит, кутiс да штрафуйтiс инькасö. Лöгувьяс Натальыс видiс и Андрейсö:

— Тэ воныт кодь жö, эшö лысьтiн пырны истöггезла. Абу тэ понда истöггес, начальник! Мун гортат да ассит видз, а миян кодь беднöй отирыс дынö эн вовлы — эн серав!..

Эттшöм басни вöлi Андрейыслöн Наталькöт, этадз пантасьлiсö медбöрьяись.

«Простит менö, Наталь, простит... — öнi думайтiс Андрейыс. — Вонö эд, вонö... Прокопьевичыс, а ме мый?..» — «Эн баит! Öтiк гуна вылын вартат», — Натальыслöн кыввес пеллес дынын.

— Ох-хо-хо! — улицатыр герьялö Мироныс. — Ох-хо-хо! Кыдз ме понда овнытö да ой-лунсö джендöтнытö?! Кыдз?! Висьтав, Прокопьевич! Тэ эд миян вылын начальникыс...

— Мунам! — висьталiс лöга Мишаыс, перыта бергöтчис Мироныс одзись и кузь шагöн иньдöтчис одзлань.

Луныс оссьö гажа бы, но гажтöм Андрейыслö, сылö уна ни вöлi бы буржык, доддялiс кöбы вöв и мунiс гöрны да лун мырсис, миссис ньылöмöн, нем эз адззыв, эз тöд и эз кыв, а рытнас локтiс уджалансянь, водiс, и ойыс бы чулалiс казявтöг, но öнi он ни пышшы, кöр воныс куим-нёлись ни модис: «Öндрей! Эн кольччы...»

Гераськоэз олiсö сэтöн, кытöн посадыс бытьтö котöртöм-котöртöм лунланяс, сувтчöм крут керöсыс дорö и талун сулалö да видзöтö ольлань, бытьтö сiдз керкуэс и лöсьöтчöны тарöвтчыны кырылö. Гераськоэзлöн керкуныс, кыдз кай паськöтöм борддэсö и медодз лöсьöтчö лэбзьыны увдöрö — онняюрöн заргисьны оляс, пышшыны хозяиныс дынiсь, кöда нем вылö оз туй — не чер оз куж видзны, не пурт, а олö да орсö, топ оз адззы, что посöдзыс важын ни пуксьöм муыс бердö, поступеннес сiсьмöмась — тальччыны ни он лысьт, и керкуыслöн учöт öшыннэс пиньöлаöсь да дзик горзöны.

Гераськоыс том, ён мыгöра, топыт, но уджавны дыш, шу кöть эн, оз кыв, оз адззы, что колö бы овны отирыс моз жö. Сiдз и олö, кытöн гусясьö, кытöн весь олö, а унажык — вöр да пишаль: локтас вöрсис мыдз, пöрöтчас гор вылö и пишкö-узьö, саймас, нюжöтчас, öмсö осьтас, петас керкусис — синнэс варышлöн, сiдз бы сöтö и вартö.

Герасько любитö весь овны, но кытöн колö визыв! Сэтшöм, что син одзын вермас киэс вылын онняюрöн мунны улицаöт джын посадсö, нето бöрöн öшöтчыны крыша дораныс и öшавны кушборд моз джын лунсö, или вевдöрö чылас сэтшöм гладь столб кузя, что сьöрас оз вермы вöтчыны йыла гыжжезнас кань. Гераськоыс унаись ни мыччалiс асьсö: каяс вичку юр вылö, паськöтас морос весьтiсь йöрнöссö, гажöн ыкöстас, лэбзяс вевдöрсяняс онняюрöн, берездасяс, усьтöнняс бергöтчас куимись да кань моз татш сувтас коккес вылö. Отирыс, ой! Вийсис эд! Бöбöтат: Гераськоыс вичкуыс вывсянь эз лэбзьы онняюрöн вийсьыны... Колö? Зонкаыс син одзын вермас уськöтчыны ваö — öт берегас саясьны, а мöдас мыччисьны. Смев зонкаыс — вывтi смев, но дыш, шагньöвтас, сэтöн жö кисö нюжöтö да кырымас корö деньга. Мöдiк бы босьтiс деньгасö да сы вылö небис йöрнöс-вешьян, пасьтасис морт моз, медбы отирыс бöрсяняс эз сералö, что йöрнöсыс увтiсь тыдалö яйыс, а сiя йöрнöсыс местö босьтас вина, юыштас и ветлöтö — öвтчö да поннэсö нерö или эшö кинлöкö пель бокас сетас... Герасько олö да гажöтчö — отирсö сералö, мыля нiя вöввез моз уджалöны, а сiя не киэсö оз нятьöсьт, не коскыс оз вись.

Талун одз асывсянь Герасько пукалiс посöдзаныс — öт синыс куньöм, мöдыс осьта и ылiсянь видзöтö, кыдз сы дынö локтöны Андрейыс да волисполкомись предыс, бытьтö важын ни видзчисьö гöссез. Шондi югöр весьтын рыжöй юрсиыс зонкалöн югьялiс-öгралiс би югöрöн. Гераськолö нач нем вöлi керны, и сiя пукалiс, куталiс лöдззез да нiйö пысалiс турун заö, орсiс: öтiк лöдз кутас, пысалас бöрас турун за, лэдзас, видзöтас, кыдз гагыс бизгö — лэбзьö и кутö мöдiк лöдз, кöдна лэбалöны гöгöрас, пуксьöны то вешьяныс вылö, то спинаас, то моросас и сэтöн жö шедöны мортыслö.

— Здоровöн олан, Герасим! — зонкаыскöт гажöн здоровайтчис Михаил Прокопьевич, дзик Гераськоыс сэтшöм ни кодя морт, что кытчö тэ!

Зонкаыс Прокопьевичыслiсь кутыштiс кисö, кыдз аканьлiсь юрсö, и бöра пондiс турун заö пысавны лöдзöс, кöда пышшис бы — бизгис быд вынсис.

— Мый нö, Герасим Максимович, уджалан? — зонкаыслiсь ласковöя юалiс Прокопьевичыс.

— Öнджа кера... — нырнас пондiс пишкыны Гераськоыс. — Он разь адззы, что вöр дядьыслiсь вöввез доддяла, мед, мыся, уджалыштöны, весь отирыслiсь вирсö оз юö, а сiдз то мый?.. Нач нем лоис керны, Прокопьевич. Видзöт, вöввез сэсся гусявны он лысьт... Усоллёын шедлi да ёна ни боккезöс гындiсö, невна эз вийö, а öнджа кö, вöлiсö бы Ипатыслöн вöввес, натьтö, доддялi бы ышö! А мый? Сынавны колö богатöйеслiсь боккезнысö, мед тöдöны. Кыдз думайтан, Прокопьевич? — и пондiс видзöтны веськыта волисполкомись председательыс синнэзö да видзчисьны мый висьталас пöрисьжыкыс, но Прокопьевичыс этчö нем эз висьтав, только шыннялiс, а мöдыслöн, тыдалö, кылыс лудiс, сiйöн и гардiс. ― Вот öнджа бы, Михаил Прокопьевич, — пондiс рыгзьыны-серавны. — Адззыны бы Ипатыслiсь золотосö. Дзебис эд кыз кынöм кытчöкö жö, а! Но кытчö?! Поди, Прокопьевич, тöдан?

— Тöдi бы... — серöмтчис исполкомсис предыс.

— Во! Тöдi бы, важын ни бы ме сылiсь Усоллёас золотосö нöбöтi, но ог тöд...

— Кошшы, — шыасис Прокопьевичыс.

— Адзза эд! Думайтан, ог адззы?! Сэк, Прокопьевич, дöраовöй вешьяннас ог ни понды ветлöтны!

— Судитасö, Герасим Максимович, — висьталiс исполкомись предыс.

— Кинöс?! — синнэсö чикыртiс зонкаыс. — Менö?! Ох, тэ-э-э... Кинöс жö, мыся, судитöмась бы?! Гераськосö! Да сылö эшö, зонка, законыс абу гижöм.

— Гижасö! — серöмтчис Прокопьевичыс, топ ачыс гижис законнэсö.

Андрейыс сулалiс посöдзыс дынын, но шы эз сет: дышыс петiс баитны сэтшöм мортыскöт, кöда оз уджав, а чöскыта бы сёйö.

— Чож! — медбöрын Гераськолö висьталiс Прокопьевичыс, малыштiс юрсö да содтiс. — Тэ бы миянлö колан, Герасим Максимович.

— Мый сэтшöмыс? — дугдiс лöдззесö кутавны зонкаыс.

— Удж эм. Öнджа... Вичкуыс вылiсь крестсö колö бы лэдзны.

— Кресс... — эз вежöрт Гераськоыс. — Ых, тэ! А еныс?! Или этö... Вичкуыс кинöскö дойдö али мый? Оз я кинкö крессö моросас перна местö бы кышав? — бöра веськыта видзöтiс синнэзö, топ лöсьöтчис шуны: «Тэ эд, Прокопьевич, крессö моросат бы кышалан!» — но эз шу.

Мöдыс обидитчис и висьталiс:

— Кывзы жö, бырöм вешьян! Миянлiсь тэкöт оз юасьö, мый керны, и оз висьтасьö... Сiдзкö, враггес моз эн бызды, то видзöт!.. Öнi миян властьыс мöдiк, абу ни царьыслöн режимыс!

— Но и мый?! — Гераськолöн вежсис чужöмыс, дугдiс быргыны. — Меным эд кöда поп, сiя и...

— Видзöтам, — ольланяс бергöтчис Прокопьевичыс. Недыр мужиккес коласын шы эз вöв, топ кыввезнаныс вартлiсö öтамöднысö да доймисö. Бизгисö лöдззез. Öтiкö Гераськоыс кутiс пидзöсыс вылiсь, орöтiс юрсö и швыргис посöдзыс бокö.

— Сэк мый? — дыр мыйись юалiс Прокопьевичыс.

— Менö сiя оз люкав! — висьталiс Гераськоыс и бöра пидзöсыс вылiсь кутiс лöдз да сiйö пондiс пысавны турун заö.

— Тэ, Герасим Максимович, эн лöгась... Эн лöгась мыся! — рыг-рыг кокнита серöмтчис волисполкомсис предыс.

— Кöда лöгасьö, сiя нятьын нырьясьö! — гажмис зонкаыс.

— Кин сэк вичкуыс вылö каяс? — юалiс Прокопьевичыс.

— Ачыт!

— Верми бы... Тэ дынö бы эг лок.

— Полан?! — китшсис Гераськоыс. — А ме ог. Вот еныс... Да. Еныс, Прокопьевич, оз видзöт кин тэ, кöть начальник, кöть кин...

— Абу сiя.

— Еныс?! Да тэ мый? Абу я начальник кодь, а баитан... ― шуис этадз и бöра пондiс ошшасьны, кыдз сiя Усоллёын шедлöм, кутлöмась вийны, но... Еныс отсалöм, а тi... И сэтöн жö веськыта резгис. — Бутылкаыс лоас?!

Прокопьевичыс кык чунь мыччис одзас.

— Поди, куима?

Тувдiс чужöмыс Прокопьевичыслöн, кыдз виньдiс и пондiс видзöтны вичкулань.

Вылын кымöрас чирзiсö чикиссез. Шондiыс öшалiс ни юр вевдöраныс моз — уна ни кадыс, а нiя сё кеймисьöны Гераськолö. Зэв Гераськоэз дынсянь олiс Ипат, сылöн керкуыс сотчис, зоныс да нылыс олiсö чомын, видзисö курöггез да баляэз, мöс. Ипаттэзлöн петухныс быркнитiс да пуксис йöр вылö, гажöн китöстiс, топ шуис: «Видзöтö, кöть тi миян кодьсö дойдат, а оланыс эд оз кус — шондiсö од сайöвтö!»

Китöстiс петухыс, и Андрейыслöн синнэс баралiсö: Михаил Прокопьевичыслöн наганыс мылякö лоис Гераськоыс киын, кöдöн сiя пондiс иньдöтны петухыслань.

— Тэ мый керан?! — повзис Андрейыс.

— Сiйöн, Герасим Максимович, оз орсö, — рамыника висьталiс Прокопьевичыс и кисö нюжöтiс наганыслань. ― Вай татчö.

— Бось тэ, бось! — горöтчис Гераськоыс и нагансö сетiс хозяиныслö. Мöдыс босьтiс кöртторсö, чышкис соснас кымöсыс вылiсь ньылöмсö, бöра шуис:

— Но мый нö?

Мужиккес баснинаныс öшлiсö-керисö и баитчисö, что четверть вина вылö Гераськоыс вичкуыс вылiсь лэдзас крестсö. Баитчисö и иньдöтчисö вичкулань.

24

Вичкуыс дынын нiйö видзчисисö ни Öсип, Опонь да Кипрей, а мöддэс, кöдна вылö эшö надейтчисö, эз вöлö.

— Гутöн морген, гутöн таг, Прокопьевич! — сёпкöмöн здоровайтчис Кипрейыс, кöда вöлi медодзза мировöй война вылын, шедлiс немеццез дынö пленö и кужис ректасьны мöдкодь кылöн. — Кыдз тшöктан уджавны, Прокопьевич? Поди, öзтам багадильнясö? А мый? Сымда и лоас, гутöн моргöн, гутöн таг! Пессьыны я мый я?

— Тэ, Кипреян, эн серав и мый оз ков, эн модь! ― Кипрейсö öмалiс Прокопьевичыс.

— Кыдз нö сэк?

— Котрасьö геззэзла! — висьталiс исполкомись предыс, ачыс юрсö чатыртiс да пондiс видзöтны вичку крестыс вылö. — А тэ, Герасим Максимович, эн сулав! Мый ме тэныт висьталi?!

— Он бöбöт? — Гераськоыс сьöлалiс долоньыс вылö.

— Тэ кинöн менö лыддян?!

— Вежöртi, начальник, гутöн таг! — Кипрей моз висьталiс Герасько.

Чирзiсö чикиссез, топ адззисö варышшезöс. Вичку öшынöт лöга видзöтiс ен — басöка рисуйтöм чужöм.

Мужиккес вайисö геззэз да нiйö кöрталiсö öтамöдныс бердö, мед лоис кузь гез. Мужиккес тэрмасисö, сiйö и керисö видзöтiсö ас гöгöраныс: оз я кинкö чепöссьы да пывсьöт зорöн, вартлы садь быртöдз, но кытчöдз вичкуыс дынö некин эз сибöтчы, кöть и кылiс ни, кыдз кинкö герьялiс быд горшсис да причитайтiс: «Еннэсö ни пондiсö торкны-ы-ы!»

Андрейыслö лоис сэтшöм недолыт, что пышшис ни бы эта шыись, но Прокопьевичыс сiйö и керис ыксышалiс:

— Андрей, тэ кытöн? Мый керан? Отсась!

«Еннэсö ни пондiсö торкны-ы-ы-ы!» — Андрейыслö кылiс пель одзас, вичку пытшксянь öшынöт видзöтiс ен — лёк чужöма, кыдз видiс: «Мый керат?! Юррезныт эмöсь или абу пельпоннэзныт вылын?! Видзöтö эд мый лоас! Кывзö жö отирыс мый керöны...»

Мужиккеслö некöр лоис видзöтны еныс вылö, эз пондö кывзыны кин да кытöн уннялö-горзö еннэс понда, эз адззö, что керкуэз сайсянь ны вылö видзöтiсö ни томмез и челядь — полöмöн мыччисисö, и кылiсö ни старухаэзлöн голоссэз: «Мый нö ни? Сотанаыс ныкöт жö али абу? Господи прости! Пресвятöй богородича да Кристос батюшко, мыля нö бессэслiсь од мургыльтö юррезнысö?! Господи-и-и».

Гожумся луныс вынсялiс. Шондiыс ёна ни шонтiс мусö да сiдз, что мужиккес быд вöрзьöтчöмын пымалiсö, сiйö и керисö кымöссэзныс вылiсь чышкисö ньылöммезнысö. Вичкуыс гöгöрын эшö öддьöнжык чирзiсö чикиссес.

— Мун чожажык! — Прокопьевичыс Гераськолö киас сетiс гезпон.

Зонкаыс кутiс гезсö, смела локтiс вичкуыс угöлö, видзöтiс-керис вевдöрö и кокнита пондiс чывны угöлöттяс. Сiя чылiс ур моз, кöть и угöлыс бердын топ кутчисьнытö вöлi некытчö. Öтiк чылiс, а мöддэс öммезнысö осьтiсö да видзöтiсö йöзыслiсь уджсö, дивуйтчисö, кыдз сiдз вермö Гераськоыс, мыля сiя сэтшöм чож.

— Гутöн таг! — сэтöн жö шуис Кипрейыс. — Думайтат сiя ачыс вичкуыс вылö кайö? Оз эд! Бесыс сiйö лэбтö! Вот тiянлö и гутöн таг!

— Эн вомдзав! — Кипрейлö шуис Öсипыс. — Кöть бы сэтчинсянь эз мезмы...

— Мый тэ сiйö жалейтан? Ась кöть урни-верни берездасьö. — Грех лоас...

— Вичкусö разьны абу грех?

Мужиккес баитiсö, а Гераськоыс вöлi вевдöрас ни, кымöрсяняс ни кыдз ыкöстiс:

— Кутö гезсö!

Кинкö шöрись улицаын пондiс причитайтны öддьöнжык, топ кутчисис Андрейыс морос бердö ни и шуис: «Но тэ и морт вöлöмыт? Тэ понда эд...»

— Тэрмась! — увдöрсянь вевдöрö Гераськолö ыксiс Михаил Прокопьевичыс, и сэтöн нач ни матын Егоррес керку сайын резьöтiс шы: «Вашöтö антихристтэсö! Господи-и-и» Эта шыыс вöлi вына, сэтшöм, что öмас кулактö он заргы, кымöсас он лый, кöр оз тыдав, а корö отирсö, тшöктö паздыны-разьны не вичкусö, а вичку разиссесö. Михаил Прокопьевичлöн сьöд гöна поныс кысянькö уськöтчис хозяиныс коккез увтö, дзебис бöжсö и пондiс никсыны.

— Брысь, пос увтiсь командер! — Прокопьевичыс брынгис поныслö, пешлiс боксис нагансö и бöра ыкöстiс вевдöрö. — Герасько, мый нö тэ сэтчин?!

— Гутöн таг, быдöн эд миянлö, ёрттэз, лоö враг, — сярзьыштiс Кипрейыс и пондiс дзирбарасьны, топ сiдз сы вылö кинкö и уськöтчö. — Натьтö эд, мужиккез, нем миянлö лоас керны.

— Тэ кин?! — Прокопьевичыс синнэсö мöртiс Кипрейыс вылö. — Абу я коммунист.

— Вöлись мöда лоны, — виноватöя пондiс мыктавны Кипрейыс. — А мый?

— Нем абу, — висьталiс Прокопьевичыс и бöра ыкöстiс быд вынсис вевдöрö. — Тэ мый сэтчин?! Кулiн я мый я?!

— Зi поз татöн! — вичку вывсянь кылiс зонкаыслöн голосыс. — Öнджа... Эшö чушкаласö...

— Тэ медодз мездöтлы колоколлэсö!

— Ачыт бы, — кылö, серöмтчис Гераськоыс, и сэтöн колоколлэс пондiсö трингыны да сiдз, что нылöн шыыс паськалiс омöн, бытьтö отирсö вичкуас поппес корисö Ыджыт лунö.

— Тэ мый, Герасько?! — ыкöстiс Прокопьевичыс, но сылöн голосыс падмис — вермисö колоколлэзлöн шыэз, кöдна вынсялiсö, и улицаэзöт öтöрсянь и мöдöрсянь, сьöрсьöн-бöрсьöн, öтамöднысö одзалöмöн, кин кыдз вермис, сiдз и котöртiс вичкуыслань, бытьтö талун отирыслö грех лоöм уджавны, и быд мортыс видзчисьöм, кöр тонгыштас колоколыс. Отирыс тэрмасисö вичкулань, но некин матö сы дынö эз лок — быд мортыс ылöжык сувтiс йöррез дынö, уськöтчис пидзöссэс вылö, и быдöн пондiс кымöснас люкавны мусö да юрбитны вичкуыслань, а колоколлэслö дзик öд шедiс, нiя бронгисö-сорасисö шынаныс, джöмдалiсö, но эз сувтö.

— Герасько! Эй, Герасько! Дугдан-он?! Видзöт, ме тэныт кыдз пезьдöта! Лыя! Мед тэ сэтчинсянь онняюрöн берездасян! — киэзнас öвтiс Прокопьевичыс, котрасис вичкуыс гöгöр, но сылiсь некин эз кыв ыксöмсö. — Гераси-и-им! Прокопьевичлöн гöрдöтiс чужöмыс. — Лыя, пон чужöм!

— Вичкусö разьöны-ы-ы-ы! — быдöнöс öмнас вермис Ольöпыс. — Еннэсö паздöны-ы-ы-ы!

И инькаэс сьöрсьöн-бöрсьöн, кыдз шойна вылын öдззисö герьявны — нетшкыны сьöлöм, топ öтiк лунö дзебисö джын посадсö, а мужиккес йöррес дынын дугдiсö юрбитны и пондiсö сёйны-видзöтны волисполкомись предыс вылö да няпралiсö кулаккезнысö, топ видзчисисö, оз я кинкö уськöтчы одзжык, кин жö смевжыкыс...

— Прокопьевич... Кывзы жö... Гутöн таг эд лоас... Видзöт, мужиккес! — Прокопьевичыс дынын пыдына лолалiс Кипрейыс да видзöтлiс ас гöгöрас, тыдалiс, кыдз сылöн дрöжитiсö киэс и коккес, кыдз сiя видзöтлiс гортланяс да быд вынсис лöсьöтчис бы котöртны... А Мишаыс некинiсь эз пов, бытьтö сiйö и видзчисис, кöр отирыс унажык öксяс вичкуыс гöгöрын, медбы адззисö, что чожа некытöн лоас юрбитны. Одззамоз смела да гажöн ыксiс Гераськолö: «Герасим! Зонка, сэтчин эн орс, а уджав!.. Уджав мыся, öнджа... Эй, Герасько!»

— Мун тэ сэтiсь! — вевдöрсянь сьöвзис Гераськоыс, ачыс öдззöтiс колоколлэсö.

Инькаэс горзiсö. Видзчисьтöг кысянькö, Егоррез керку сайсянь, кыдз мезмис и пондiс гардны буссö да чаггесö тöвчик, чышкис туйсö, катыльтчис отирыслань, кыдз бергалiс колесо, заргисис инькаэс коласö, кöдакö юрись нетшкöвтiс сера чышьян, лэбтiс сiйö вичку юрыс вылына, и чышьяныс, кыдз ыджыт бабыв, пондiс лэбзьыны ольланяс.

— Ой-и-и-и! — ыкöстiс кинкö и виньдiс, отирыс эз понды ружтыны да горзыны, быдöн синнэзнас кымöрсис кольлалiс чышьянсö, быдöн думайтiс, что чышьянсö тöвчикыс юр вылiсь весь эз кульышт — ов да видзчись, мый эшö тэныт мыччалас оланыс, кытшöм бес эшö пондас йöктыны синнэт одзын, кыдз эшö сералас отирсö. Виньдiсö вичку вылын колоколлэз. Лоис лöнь да сэтшöм, что кылiс, кыдз чирзiс кытöнкö юррез вевдöрын чикись.

— Мездöт колоколсö! Мый нö тэ сэтчин?! — юрсö вевдöрö лэбтыштiс Прокопьевичыс да бöра ыкöстiс Гераськолö.

Пильскисö-горзiсö инькаэз, кылiс, кыдз сьöкыта лолалiсö мужиккес, кöдна матöжык ни сибöтчисö вичкуыс дынö да видзöтiсö, мый керöны вичку разиссес. Мужиккес сулалiсö кыдз öмлöсалöмöсь, кыдз нiйö кинкö кöрталiс, медбы киэзнаныс эз öвтö, оммезнысö эз осьтö, только видзöтiсö да думайтiсö, адззисö, мый вöлi да оз ло и касьтывлiсö сыбöрсянь кувтöдз, кыдз олiсö да мый керисö...

Гераськоыс полö жö грехись, енсис полö жö, мыйкö видзчисьö, сулалö вичкуыс вылын и оз мездöт бы колоколлэсö.

Пондiс кымрасьны, кымöрас паськöтчисö палаккез и юр вевдöрын баляэз моз вешшисö ойлань.

— Еныс абу, — сёпкö Кипрейыс. — Ме кытöн эг и вöв, да енсö некысь эг адззыв... Мыся, еныс, мужиккез, абу!

— Мун тэ сэтiсь, бес чужöм! Вешшы син одзись, ась тэнö еныс талун жö чарöтö! — Ольöпыс нач смевмис, чеччöвтiс мужиккес дынö и пондiс китшсьыны. — Чарöтас еныс!

— Эй, Герасько! — ыксö Прокопьевичыс.

— Öтнам ог вермы, — вичку вылын шыасьö Гераськоыс.

— Кипрей! Кытчö тэ?! Кай вичкуыс вылö да отсав! — мурзьö Прокопьевичыс.

— Кин?! Ме?! — öмсö осьтö Кипрейыс, видзöтö кыдз бöб баран: öмыс гöрд, синнэс сьöдöсь, юрсиыс сьöд, а чужöмыс чочком, бобгö. — Ме ог кай сэтчин! Пола.

— Эх! — сьöвзис Прокопьевичыс и ачыс иньдöтчис вичку ыбöслань, кöда пöдана и сы бердын öшалö аскерöм замок.

Прокопьевичлiсь мунтöнняс туйсö поперегалiс сьöд кань, кöда сьöрö вöтчис понок, паныт сувтiс Ольöпыс, мöртiс синнэсö и видзöтö, топ видзчисьö, кыдз тэ сылö пель бокас пöжалан.

Волисполкомись предыс топ да топ локтiс вичку ыбöсыс дынö, нетшкöвтiс бы замоксö, но кöртжугыс эз и вöрзьы.

Отирыс коласын, у-у-у! Дзик бöра пöльыштiс тöвчик, кöин моз унньöвтiс Ольöпыс да öдззис горзыны.

— Мед тэнö еныс!.. Мед... — Ольöплöн синнэс бöбöсь, чеччалö Прокопьевич одзын.

Волисполкомись предлöн чужöм вылын öзйыштiс нёштöм югöр, сiя сюйыштiс конувтас кисö да висьталiс: «Лок... лок... Ме тэнö чарöта! Ме тэнö!..»

— Ой, вияс! Сылöн пишаль эм! — öмтырнас пондiс лолавны Ольöпыс и бöрöн-бöрöн вешшис Прокопьевичыс одзись.

Эта коста Кипрейыс котрасис гортöдззас да вайис чер. Босьтiс черсö Прокопьевичыс, лэбтiс юрыс вевдöрö и быд вынсис жвангис замокыс кузя. Шовкнитiсö оча, кöрт кöрт бердö, бичир чеччöвтiс, но замоксö чожа он жугды, колiс эшö обухнас силльыны вит-кватись, и только сэк вичку ыбöсыс ван оссис, пытшксяняс нырö вачкис масiсьöн да ладанöн, и отирыс сьöкыта ловзисис, кивнитiс да пондiс ружтыны.

— Берегись! — вичку вывсянь кылiс Гераськолöн бöб голосыс. Сiя кыдз орсiс отирыскöт, эз тöд кыдз гажöтчыны, мыччавны асьсö. — Вешшö!

Мутшнитiс вичкуыс, жиль-жоль вевдöрсянь брякнитчис сьöкыт колокол.

— Ой-и-и-и! — ружтыштiс отирыс, чужöммезö пöльтыштiс шоныт ру, синнэзö койыштiс бус, кытiськö павкисö ва воттез, кыдз резсис нять, кöда эз вöв.

Öтiккез уськöтчисö пидзöссэзныс вылö, мöдiккез тэрмасисö-юрбитiсö, а куимöттэз, смевжыккез, чеччалiсö ни ыбöсöт вичкуыс пытшкö да сэтчинiсь кин да мый вермис, сiйö и петкöтiс: öтiк ен, мöдiк пызанок, куимöтыс паськöмтор, пышшöтiсö кинлö мый шедiс, мый адззисö — дзимлялiсö еныслiсь добросö асланыс кипод увтö.

Андрейыс сэтöн жö гардчис отирыс коласын, видзöтiс кин да мый керö, но эз кутчись не кузь гезыс бердö, медбы вевдöрсянь лэдзны колоколлэсö, не эз пыр вичкуыс пытшкö да эз петкöт еннэсö. Сылö жаль лоис вичкуыс пытшкись доброыс, эд ачыс кöркö пондылiс уджавны эстöн, и тöдiс сы пытшкись быд торсö, но öнi нем эз лысьт шуны отирыслö, кöр нiя вöлiсö лöгöсь.

Андрейыслöн висис юрыс, сiя лöсьöтчис бы кинлöкö мыйкö шуны, медбы вежöртiсö, что сiдз оз жö бы ков, а Ипатлöн иньыс чеччöвтiс одзас, лельгис кывнас, сьöласис да кивзiс, видчис мужикыс понда, модис: «Э-э-э, бессэз! Сотанаэз! Отирсö сёйит-сёйит да эд пöтö, öнi еннэс бердö кутчисит! Думайтат, еныс оз адззы мый керат?! Кристосыс юртö мургыльтас и пондан ветлöтны юртöм петух моз!» Инькаыс унажык чеччалiс Андрейыс одзын, кöсйис умöль олан, видiс и вийис бы отирыс син одзын, но кытчöдз еныс эз вий не Андрейсö, не Кипрейсö, кöда öнi унажык жöдзис отирыс син одзын, ыксiс, что весь оз разьö вичкусö, что сы местö керасö школа, кытöн пондасö велöтны челядьсö да бöб юра старухаэсö, мед нiя вöлiсö грамотнöйöсь.

— Мый ми грамотанас керам?! Уджавнытö эд сiдз кужам? Ойе-е-е! — кивзiс Ипатикаыс. — Вайö меным мужикöс, вайö! Мый понда тi сiйö торкит?! Мый умöльсö керис?!

Кивзiс не только Ипатикаыс, кивзiсö мöдiккез, но мымда бы отирыс эз ойзö-кивзö, еныс нiйö эз дорйы и эз кыв: усис вичку вылiсь медодзза колоколыс, трингiс-потiс шöри, и сылöн öтiк тор павкис Прокопьевичыс понлö, кöда хозяиныс моз жö гардчис вичкуыс дынын, гавзiс-вувтiс да чеччалiс быдöн вылö, быдöнöс бы пурис, но öнi ловзисьны эз ешты, кыдз шедiс сьöкыт колоколыс тор увтö, кивнитiс да лöнис. Вöлi Прокопьевичлöн поныс да эз ло, и некин сiйö эз жалейт, только Якуня Ваня сьöвзис да шуис: «Беднöй тэ... Мый öнi хозяиныт тэтöг и пондас керны? Некинлö эд лоас отирсö вувтны...» Шуис энö кыввесö Якуня Ваняыс, но сiдз, мед Прокопьевичыс эз кыв, но кылiсö отирыс. Ачыс Прокопьевичыс бергалiс вичкуыс гöгöрын, бытьтö некинöс эз кывзы, а пеллес осьтаöсь, быд мортлöн быд кылыс бокö оз лэбзьы, павкö татчö, йиджö сьöлöмöдз и он тöд, мый эшö лоас одзлань, кыдз эшö терпитас энö кыввесö волисполкомсис предыс.

Отирыс гардчис вичкуыс гöгöрын, эта коста Прокопьевичыс ештiс пырны вичкуыс пытшкö, ештiс кузь пос кузя кайны вевдöрö, ачыс ни кутчисис мездöтлыны колоколлэсö и Гераськоыс моз жö вылiсянь бöба ыксiс:

— Пышшö! Вияс!

Мöдiк колокол мезмис вевдöрсянь и шутньöвтiс-вотьыштiс увдöрö да сiдз, что усис и джыныс мöртчис муас. Кинкö бöра бöба ыкöстiс, дзик Прокопьевичыс пон моз жö шедiс колоколыс увтö, доймис и корис отсöт, но отсавны вöлi некинлö: отирыс видзчисьтöг котöртiсö кинлö да кытчö туй! Кöр да кин кытчö и ештiс пышшыны, кин кытчö и лоис, только öтнас горттöм Ольöпыс сулалiс эшö вичку бердын моз, пернапасасис да пернапасасис, кыдз моросыс одзын киыс местын бергалiс сярган.

— Вешшö! — эта коста кылiс вичкуыс вевдöрын, и шутнялöмöн усис куимöт колокол.

Луншöр гöгöрас луныс кыдз мыдзис: шондiыс öштiс ассис югöрсö, сы весьтö павдöтчис кымöр и не кымöр, а кыдз кинкö юр вевдöрö ольсалiс шоча кыйöм дöраись важ öн и кусöтiс вичку юрсис золотöй рöма югöрсö.

Вевдöрсянь лэдзчис Гераськоыс, мужиккес пуксисö шоччисьны вичку посöдзö. Прокопьевичыс гардiс кыз чигарка и пондiс тшынйыны, а Кипрейыс бöра сёпкис кыз кывнас: «Гутöн таг, вот тэныт и пятак... Мый одзлань пондам керны, ёрттэз? Крессö эд колö лэдзны жö.»

— Лэдзам! — лöга висьталiс Прокопьевичыс.

— Кресыс абу вешьян! Натьтö, шоччисян, дак сiйö кокнита лоас лэдзнытö, — рыг-рыг серöмтчис Гераськоыс, мыччис ральник пасьта пиннесö, пиньöвтiс пестер кодь ота рожабаннэсö и быздiс. — Аслам юр вылö жö эд колоколлэсö лэдза. Гы-гы, натьтö, Прокопьевич, колас вештiсьны жö...

— Эн модь! — зонкаыс вылö ыкöстiс Прокопьевичыс. ― А кер мый колö!

— Ась, — Гераськоыс чеччис посöдзсис и кöмтöм коккезнас шлёпöтiс-пырис вичкуыс пытшкö.

Талуння лунöдз öтiк морт эшö вичкуыс вылö медджуджыт крестыс дынöдз эз кайлы, кöть Гераськоыс и кöтö, что сiя нем керны чылас сэтчин, пуксяс и пондас кутавны ракаэсö да кымöрресö. И быль: кадыс немымда эз чулав, а зонкаыс вичку крышаыс вывсянь черань моз кыссис ни медджуджыт вичку юрыс вылö, медодз чылiс золотöй рöма шарыс дынöдз, сэтöн шоччисис и одзлань пондiс веклясьны.

— Ме ог вермы видзöтны, — ёрттэслö висьталiс Кипрейыс да пышшис волисполкомлань, и мöддэс вешшисö жö бокö, кöр видзöтан вичкуыс вевдöрö, вачкисьö топ вичкуыс вешшö бокö, сiдз тэ вылö и пöрö.

— Эй тэ! — увдöрсянь ыксiсö Гераськоыслö. — Тэрмась, он разь адззы, кымрасьö, поди, зэрмас.

Вот и крестыс дынын ни зонкаыс, сiя лоис топ учöтжык, пондiс вачкисьны кай вылö и сэтчинсянь ыкöстiс: «Кутö гезсö!»

Мужиккес кутчисисö гез бердö, дундöтчисö, гöрдöтiсö рожабаннэзныс, öтдруг ружтыштiсö: «Рас берём! Два ышö берём!»

25

— Сивöй Таракан! — Андрейсö гортын панталiс иньыс. ― Вияс эд тэнö еныс, вияс!

— Мед вийö, — мурзьыштiс мужикыс. — Мый тэныт содас?

— Тэ кодь тараканыскöт он ни баит... Бесыскöт.

— Вай сёйны! — Андрейыслöн синнэс югйöвтiсö нёштöм югöрöн. — Вай, мыся, сёйны! Андрейыс, кыдз быдöс мужиккес, эз ылöст аслыс пызан вылö вайны сёйны — не пань, не нянь бердö эз кутчись, кытчöдз иньыс эз верд, оз куж горись кыскыны чугун да чöвтны шыд (ог ни пондö ошшасьны, что иньыслö эз куж öшымöс дорись вайны ва, пуны аслыс похлёбка, чышкыны джодж...). Мужик Андрейыс, мужик местын и олiс, кöр сылö стыд отирсис син одзын комын лякöсьтны киэз, петны пода дынö гидйö, а кынöмыс кö сималö ыксö: «Вай сёйны!» И талун кыдз пырис керкуö, чарöтiс:

— Вай сёйны! — порог дорсянь нинкöммезнас веськыта пызан дынöдз, пуксис пызаныс сайö и пондiс пукавны да видзчисьны, кöр вердас иньыс, но талун Лизаыс мужикыс вылö видзöтiс сiдз жö, кыдз видзöтiсö öтöрас отирыс — грешнöй и эм грешнöй!

— Мый ме шуи?! — пызаныс сайын будзгыльтчис мужикыс.

«Оборони, господи! — пернапасасис инькаыс, сьöвзис шульга пельпоныс вевдöрöт и пондiс лыддьöтны молитва «Отче наш», кöда пö мортсö дорйö быдкодь бесiсь, вакулись и сьöд вöр шöрын вöрисись, öтiк бес пö эта молитва бöрын нем тэкöт оз вермы керны.

Андрейыс чурс сьöвзис джоджыс шöрö, швырк чеччис пызаныс сайись и, кыдз пырис керкуас тшыг, сiдз и петiс, бöрсяняс жвангис ыбöссö да веськыта иньдöтчис ыб вылö, медбы сэтчинiсь кутны Гнедкосö да ойнас мунны гöрны, эд луннас мырсис вичкуыс дынын, вöлi жар и лöдзза. Мужикыс кöсыник мыгöра, но кокнит коккес вылын, чож, а кöр эшö лöг, чышкö-мунö, некинöс оз адззы и оз кыв, и öнi эз казяв кыдз локтiс видзыс дынö, дзар керис бöрас и бокас, кайис йöрыс вылö да чеччöвтiс мöдöрас... Чеччöвтiс и сэтöн жö пуксис шоныт да уль муыс вылö, кыдз мортсö кинкö ытшкыштiс-октiс коккес вылiсь, и кокыссянь юрöдззас лыйис зубыт да сэтшöм, что жмитiс мороссö — не ыкöстны, не пыдынжыка ловзисьны, и синнэзсис чеччöвтiсö бичиррез.

Андрейыс пукалiс му вылас — не вöрзьыны, не ыкöстны, а эта коста сы гöгöрын уннялiсö номмез, бизгисö пеллес одзын, пырисö бы синнэзас, нырас и öмас. Пукалiс мужикыс уль муыс вылын, ружтiс, видзчисис, кöр зубытыс лэдзас коксö, и зубытыс жагвыв да жагвыв ыскöвтiс увдöрö.

Андрейыс ружтiс-керис, перыта бы чеччöвтiс местасис, но бöр дырснитчис-пуксис йöрыс бокö, и пондiс нерны дума: «Вот эд, Андрей... Адззин! Тэныт мый вичкуыс дынын кöсйис отирыс?! Öнi курччав тырппетö... Сiдз тэныт, «Сивöй Таракан!» Топ иньыслöн голосыс, кöр сiя лöгасис да сiдз видö мужиксö, шуö Сивöй Тараканöн.

«Сивöй Тараканыс» гичыртiс пиннесö, ружтiс пымавтöдз, сыбöрын киэс вылын кыссис йöрыс дынöдз, кутчисис потш конецö, öшöтчис киэс вылö да сувтiс. Сьöлöмыс сiдз токöтiс, готов вöлi öмöттяс петны. Номмес эшö öддьöнжык петшöралiсö киэсö и спинасö. Шондiыс лöсьöтчис ни пуксьыны керöсыс сайö. Сэтöн видзöтö и адззö, что кытчöкö мунö Якуня Иваника. Сылö Андрейыс горзöмсорöн ыкöстiс:

— Сваття... — голосыс кыдз йöзлöн, кижгö да жексö. — Титовна... Отсав жö, кага...

Якуня Иваникалöн пельпоннэс вылын коромысла и ведраэз, сiя эшö Андрейыслö родня кодь, но öнi родняыс мужиксö кылiс и эз, адззылiс и топ эз адззыв, швырк одзöттяс и абу! Пырис ведраэзнас гортас. Мый тэ сэтöн керан? Сьöлалан я мый я синнэзас? И думайтö ни мужикыс да синваэсö чышкö: «Эх, Сивöй Таракан тэ, Сивöй Таракан... Ачыт эд шедтiн этö «гажа» олансö, что асланыт отирыс тöдöны и озö, кöть син одзаныс пондан кувны, некин оз адззы... Сивöй Таракан, мый пондан керны?» — вöрзьöтчис, чожа бы тальччис, но коксяняс зубытыс сiдз бöра лыйис, что невна эз тарав.

Шоччисьыштiс. Пымалiс кöдзыт ньылöмöн да вердiс тшыг номмесö. Якуня Ванялöн сёйис-вувтiс поныс, топ адззис нач йöз мортöс — пурис бы. Рытыс шоныт и кузь, но шондiыс вот-вот вотьыштас керöсыс увтö, колö гортö мунны, а кокыс эз кывзiсь, кыдз вöрзьöтчас, сiдз зубытыс и лыйö. Андрейыс öшалiс йöрыс вылын, гичралiс пиннесö да курччалiс тырппесö, ньылалiс дульсö, кöр зубытсянь вожасисö обидаэз и пурисö, дзик бöра гöгöрас öксисö асланыс отирыс и сералiсö — быд морт гажöтчис, что коммунистыс доймис, что сiдз сылö и колö, ась тöдö кыдз отирсö пурны-сёйны...

Андрейыс пöттöдз ружтiс йöрыс бердын, йöрыс бердiсь жö синнэс вылö усис майöг, мышкыртчис, босьтiс сiйö и сы вылын пондiс биргылясьны-беддясьны да кыссьыны гортлань.

Шондiыс пуксис ни, мыдз гожумся луныс шоччисис, рытыс лоис ыркытжык, и мужикыс ас кежас горöтчис: «Кыдзкö луныс чулалiс ни, кыдзкö...», ачыс ружтiс да кыссис гортлань. Кипрейез öшын увтын посöдзсяняныс ыкöстiс Кипрейыс:

— Андрей! Тэныт мый лоис?

— Пыр керкуас, уна эн адззы! — Кипрейыслö, кылö, гидсянь ыкöстiс иньыс.

«Тьфу тэ, öнджа... Öтлаын эд енсö нерим, а кыдз умöляс уси, бытьтö оз адззы... Но и Кипреян! Но и сёпот! Ась. Мый керан? Нем он кер, кöр мортыс сэтшöм. Быдöс колö терпитны, кывзыны и видзöтны, кыдз тэ вылын сералöны йöз и ёрт». Андрейыс тырппесö курччалiс да одзлань кыссис-беддясис майöгыс вылын, локтiс посöдзныс дынöдз, сэтöн падмис да вöлись и нюжалiс кыминь, сапкисис посöдзыс бокö и пондiс куйлыны — не ки, не кок эз вермы вöрзьöтны, шы эз сет, ась кöть мый лоö, эд гортын ни. Сэтчö керкусис петiс иньыс, паськöтiс öмсö да пондiс летны горшсö: «Вийисö да сёйисö-ö-ö!»

«Ага, — ас кежас думайтiс Андрейыс. — Вижлок öмнат горзан жö... Кольны бы тэнö öтнатö, медбы олыштiн мужикыттöг, пешлiн бы чöскыт олансö...» Думайтiс ас кежас Андрейыс, куйлiс посöдзыс бокын, эз и вöрзьы, сэк иньыс чеччöвтiс посöдзсяняс, кутiс моросыс одзö мужиксö, бергöтiс гатш и пондiс кывзыны лолалö я. А Андрейыс нагладь дыр эз ловзись, видзчисис, мый жö лоас, кыдз жö иньыс пондас герьявны, но Лизаыс синваэсö эз понды чышкыны, и мужикыс ловзисис да ыкöстiс: «Мун сэтiсь, Урбöж!»

Сiдз вöлi. Но колiс овны одзлань, кöть оланыс — не олан, а синва, быд луныс пондöтчö этатшöм кыввезсянь: «Овсис эд, Сивöй Таракан! Мыля коктö чегин?! Кин пондас уджавнытö? Кин гöрас да кöдзас? Турунсö керас, сюсö вундас? Висьтав, Сивöй Таракан?!» Нач кулö инькаыс, öтiк лун ни бы оз ов, а мужикыс ранитöм зверь моз мурзьö да малалö коксö, но иньыслö паныт оз шыась — терпитö.

— Гожумбыт пондан седун моз джоджыс шöрын пукавны! — одзлань кивзö Лизаыс. — Мый нем он шу? Сивöй Таракан! Бур весь овнытö?! Юртö бы керав да поннэслö чапкы...

Ружтö Андрейыс, обидасö пöжö сьöлöмыс бердын.

— Кин тэнö пондас вердны?! Поди, эта... Пон юр воныт?.. Кöда мый керны, тэ дынö, а кыдз доймин, чужöмсö оз мыччав, бытьтö эз кыв, что тэнö еныс...

Гожум. Отирыс уджалöны, оз ештö водлыны и сёйны, лун-лун ыббез да видззез вылын, а Андрейыс оз пет посöдзöдз, асьсö оз мыччав, пукалö керкуын, пöжö боккесö, ружтö, несьö нинкöммез кыйö да пестунничайтö — быдтö мöдiк зон ни, сэтшöм жö зырымöсь куль, кöда не оз кув, не оз ов бы — пыр няргö, кучикас оз тöр, и мый оз тырмы кагаыслö, некин оз тöд.

Сьöкыт оланыс, кöр он вермы уджавны, и луннэс топ год кузяöсь. Андрейыс одз асывсянь сёр рытöдз керкусянь öшынöт видзöтлö шондiыс вылö — тойыштö лунсö, думайтö, что талун кö умöль, ашын, поди, бур ни лоас (сувтас ни кокыс вылö), но ашынас сiя жö, сiдз жö иньыс öтнас мунö уджавны, а сiя зонсö гыччöтö зыбкаын, кыскасьö лабич пöлöн, тышкасьö гуттэзкöт, видзчисьö, оз я кинкö лок да сьöлöмсö бурмöт басниöн, но луннас улицаын некин оз вуджöртчы, некин оз тыдав, бытьтö тэ некинлö он ков, и тэнö некин оз бы адззы.

Андрейыс эз уджав неделя, мöдiкö, пестунничайтiс зонсö, сэк вöлись и локтiс воныс, бытьтö Прокопьевичыс узьöм-узьöм да саймöм и тöдвылас воныс усьöм. Да оз я Прокопьевичыслö бöра мыйкö ков?

Пырис Андрейезö волисполкомись предыс, шуис: «Здоровöн олат!» и нырсö пиньöвтiс мöдöрö, тöдчис, что сьöлöмыс гудыртчис, мыля керкуыс порсь поз кодь: джоджыс нятьöсь да ёгйöсь, пызан вылын лякöсь доззэз, кытöн пукалöны гуттэз, джодж шöрö павдöтöмась лякöсь кага рузум, но Андрейыс панталö вонсö, бытьтö оз адззы, что Прокопьевичыс пырис керкуас да нырсö бергöтiс мöдöрö.

Андрейыс рад, что ны ордö локтiс волисполкомись предыс, кисö нюжöтiс гöсьыслö и горöтчис:

— Здоровöн локтiн, вонö! Пуксьы да шоччись, висьтась да юась. Видзöт менам оланыс кытшöм...

— Некöр, — бизгыштiс Прокопьевичыс.

— Кытчö тэрмасян? Кин сьöрö вöтчан?

— Уджавны колö! Кылiн ни, поди, что колхоззэз аркмöны...

— Катшаыс бöж вылас меным юöрресö оз ваяв, — висьталiс Андрейыс. — Мый сiя бöра сэтшöмыс?

— Сiя... Эх тэ! Олан и нем он тöд! Колхозыс, вонö, сэтшöм кикимора, сэтшöм виль олан, что быдöнныс пондасö овны öтмоз. Оз лоö не беднöйез, не богатöйез, и отирыс пондасö öтлаын уджавны. Быдöс лоас öтласа, во! Вöввез и мöссэз, гöррез и пиняэз... Öтiк бороздаын пондам гöрны и кöдзны.

Ошшасис Прокопьевичыс да сiдз, что киэзнас öвтiс воныс ныр увтын, топ керöма ни виль олансö и медбурö — вöтчö сы сьöрö!

Лабичын пишкис-узис Андрейлöн зоныс, бизгисö-лэбалiсö гуттэз, джодж шöрын быглясис кань, öшынöт керкуö видзöтчис шондi — нерис мужиккесö, мыля нiя пукалöны керкуын.

— Веськав чожажык, мед он жö кольччы öтнат! — шуис Прокопьевичыс.

— Мыля öтнам?! — кыдз повзис Андрейыс. — А иньö? И челядьыс? Али нiйö колхозас жö мырддясö?!

— Ха-ха! Тэ мый? Бöра сералан эд, — обидитчис Прокопьевичыс.

— Ачыт эд баитан...

Пукалöв-керисö мужиккес, пестунничайтiсö думаэзнысö, Андрейыс шуис:

— Сiдз... Басöк да кокнит олан кöсъян, вонö! Бур бы эд лоас! Öддьöнжык меным... Эта кокöн... Вода гор вылö, коккезöс сёр вылö — и пондасö вердны! А мый? Кымöрсяняс пондас киссьыны... Да, öнджа... Кывза вот тэнö и думайта, что сэтшöмыс оз вермы лоны, а лоас кö...

— Дугды ассит гардны! Кыдз мый буржыкö керны, тэ иньыт моз жö пиньöвтан этчин, — Прокопьевичыс пельпонсö пиньöвтыштiс банялань. — Бöрöн кыскан.

— Велöтö эд Урбöжыс, — сёрöмтчис Андрейыс. — Тэнö разь оз велöт иньыт?

— Мун тэ! Инь... Иньыс тöдан кытшöм... Инь вылö да пыж вылö некöр пö эн надейтчы!

— Овлö, — серöмтчис Андрейыс и пондiс думайтны ассис.

— Веськав чожажык, мед иньыткöт од жö кольччö единолишниккезöн.

— Веськалi бы, да кокö оз веськав. Куим неделя пö колö дзаввес коласын видзны. Тшыгйöн кувсяс...

— Колхозас он кув! — сьöлöмсö бы бурмöтiс мöдыс. Лабичын кивнитiс зоночкаыс, нюжöтчис, öмнас чуп-чап керис и бöр ланьтiс. Мужиккес пукалöв-керисö, видзчисисö, кöр онмöссяс кагаыс, сыбöрын Андрейыс юалiс:

— Шуан öтлаын пондам гöрны и кöдзны? И сёйны öтiк йöртöтiсь. Позьö я сiдз, а? Мырддясö кö вöввесö да мöссэсö, не пань, не кань оз кольö... Кин сэк ме лоа? Кытшöм кöзяин керкуас, мать тэнö?! Вот славаыс вöлись! Ачым, мыся, гор вылын — коккез сёр вылын. Кинкö пондас уджавны, а ме коддес шондi сайын сайласьны, а мый? Мый вылö сэк меным, шуам, уджавнытö? Бось сiйö жö Гераськосö... Сiя разь уджалiсь?! Кыдз гусясьö да олö, сiдз и пондас сöтны да вартны... Кинкö пондас керны, а сiя овны!

— Тэ, Андрей, эн модь, мый оз ков... Враг баснисö эн баит, а то видзöт!.. Уна миян коддескöт оз эд баитлö...

— Гы... Шуан миян коддескöт уна оз пондö баитны? Сэк мый нö мекöт баитан? Бось шать да вашöт карта вывсис мöссö и вöвсö, каньсö нуöт и понсö пышшöт, ог понды горзыны и курöггес понда... Абу дак абу!

Рад ни вöлi Андрейыс, что локтiс воныс, да сэтöн жö бöр кымöртчис, эшö öддьöнжык недолыт лоис сьöлöмыслö. И мыля сiя сэтшöм чожа дузгыльтчис, сэтшöм матö ас дынас лэдзис кыввесö Прокопьевичыслiсь, кöр керкуас пукавтöн колхоззэс йылiсь талунöдз бура нем эз кыв? (Иньыс модис жö мыйкö, но сэтшöм осьта öмыслiсь он вежöрт — кылас да асмознас висьталас, гöрдззас-панас, что и ачыс оз тöд мый гардö). Тшыкö мужикыслöн весь овтöнняс мывкыдыс, одзжык ни вöлi чорыт; мый не сы сьöртi рез-паз кералас и абу — а öнi пöжö сьöлöмыс вылын сэтчöдз, что пондö писькöтны моросас, и ас дынас мукöдпыр кыв оз лэдз — эр да эр.

— Колас меным тэнат поныт... — кывзiс-керис Прокопьевичыс Андрейсö да мурзьыштiс. — Поныт эд тэ кодь жö... — вирснитiс нырнас да пондiс видзöтны потолокö, тыдалö, недолыт лоис, мыля öтамöднысö кыввезнаныс дойдöны. Видзöтiс потолокас — дыр шы эз сет, сэсся кыдз нем и эз вöв, пондiс ошшасьны, что тöн рытнас попыс видз вылö сувтöтiс медодзза зород.

— Менам талун куртны жö мунiс. Ог тöд, мый сэтчин öтнас керö, — гажтöма висьталiс Андрейыс.

— А... Нем повны. Тэнат иньыт чужмöр кодь чож. Керас!

— Керас! — серöмтчис Андрейыс, бедёкöн тарскис кокас. — Инькаэс эд сё мужиккес моз и уджалöны...

— Колхозас пыран, сэк кокнита пондан уджавны, — Мишаыс бöра баснисö чукыльтiс колхозлань.

— Меным сiдз бур, — бобгыштiс Андрейыс.

— Сэк кин медодз колхозас пырас? Думайтан ме öтнам?! Ежели бы... Ме бы тэ дынö эг и лок, эг бы и понды баитны.

— Бöра ме! Быд шагын менö адззан... А коммуниссэс кытöн?! И öнджа... Эна... Кöдналöн не бöраныс, не одзаныс. .. Мед нiя медодз колхозсö и керöны да öтлаын уджалöны. Поди, асьнысö пондасö вердны, то этö... котомаэзнаныс деревняись деревняö, керкуись да керкуö... Шатласьöны да кеймисьöны... Мыля бы сэтшöммеслö менам инь моз не уджавны?!

— Кытöн уджаласö, кöр нылöн муыс абу? — беднöйесö дорйис Прокопьевичыс.

— Кытчö муыс лоис?! Кин сёйис? Вöрыс видзöт жö кытшöм паськыт. Совет властьыс лэдзö эд октынытö. Весöт, вот и ыббез. Ась черресö босьтöны да уджалöны жö невночка. Ми эд уджалiм жö. Тöдан кыдз Марко-Пальник саяс кöньöс кыза пуэсö черрезнаным октiм да орлалiм... Ох и миссим ньылöмнаным! Спинасиным йöрнöсыс эз и косьмывлы, етша узьлiм. Сiдз эд?

— Сiдз, — шуис Прокопьевичыс, гардiс чигарка, и мужиккес вылö бöра вожасис дума, кöр талунöдз олiсö, кыдз вермисö и кужисö, а талунсянь... Быдöс разсьö, а мыля? Кыдз дорйисьны сэтшöм олансис? Пукалöны мужиккес, думайтöны, кöть Прокопьевичыс и баснинас вывтi кыскö колхозас, а аслас эд дзескыт моросас, видзöтö табак тшыныс вылö, кыдз сiя гардчö керкуас, уялö да синнэз курöтö, видзöтö да сьöкыта лолалö. Öтыс куритö, мöдыс дойдöм коксö малалö, и ошшасьö, что кöбы эз шогав, кöбы эз кокыс вись, адззылiс бы мый керис! Вöтчы бы сэк сы сьöрö, но... Эх и олан — сьöд калян!

— Ештан ышö... — табак тшынсö кыскö Прокопьевичыс.

— Гожумыс оз видзчись...

— Кывзы... — сэтöн шыасис Прокопьевичыс. — Тэ таво Пальниксис идсö мымда вундiн?

— А мый тэныт? — Андрейыс кыдз повзис, чеччыштiс бы да бöр пуксис. — Мый бы тэныт?!

— А сiдз, — рамыника шуис воныс. — Мыся, унакодь вундiн эд...

— Вундi! — лöга серöмтчис Андрейыс. — Йöзыслö! Развёрсткаыс эз я чомсö росöн чышкы. Понлö да порсьлö...

— Городыс эд сёйö жö бы.

— А менам кынöмö мый? Чуман я мый я? Быд лун тай кишкаэз уннялöны, и челядьыс сёйтöг оз вермö овны.

Баитiсö кык вон — кыввезнаныс унаöв ни керисö: кöдзисö и вундiсö, сувтöтiсö турун зороддэз, чукöртiсö бы колхоз, кöда мый и эм бы, кыдз сiйö и шу? Öтыс кыскис асланяс, а мöдыс эз сетчы — пыкис дынсис.

— Тэ, Андрей, вывтi эн тöждiсь, — медбöрын висьталiс Прокопьевичыс и лöсьöтчис петны керкусис, но сэтöн ыбöсыс коласын ни мöдпöв юалiс:

— Кыным пуд, шуан, идсö Пальниксис дзимлялiн?

— Гы, — серöмтчис Андрейыс. — Пальниксис вундi, а Печканас ачыт эд тöдан муыс кытшöм... Шоль песок... Унажык кöдзан, етшажык босьтан.

— Эн эд тшыгьяв?

— Нем шуны. Выттесö колiс жö нюжлавны, кöр ме уджалi, а дяддес сёйисö.

— Эшö эд колас сетны! — Мишаыс öтiк кокнас сулалiс ни пытшкись посöдзас, мöднас керкуас.

— Мы-ы-ый? — эз вежöрт воныс.

— Эшö, мыся, сюсö корöны, — нюжвывтiс исполкомсис предыс.

— Кинлiсь?! — лöга серöмтчис Андрейыс. — Тэнчит или менчим?!

— Тэнчит и менчим, — сярзьыштiс Прокопьевичыс. ― Но менам нем ни сетнытö.

— Тэнат абу, а менам эм! — Андрейыслöн бергöтчыштiс юрыс, сiя перыта чеччыштiс лабичыс вылiсь, турйöвтiс (вунöтiс, что кокыс тöбалöм дзаввез коласö) и лёкжыка шуис. ― Тэнат абу, а менам эм?! Сiдз я мый я?! — пондiс ыксыны ни. — Сiдз я мый я, Пестер?! Думайтан ме ог тöд, кыдз тэ Печканас вартiн да няридзöн сюсö вöрас пыртлiн?! Синнэзö эшö, вонö, кымöсам эмöсь! Адзза эшö кин да мый керö! — висьталiс, кыдз синнэзö бытшкис. Прокопьевичыс синнэзнас кваркыш-кваркыш керис, рожаыс пиньöвтчис, дзик пондiс сьöдöтны, мыйкö эшö бы висьталiс, но Андрейыс бöра одзалiс горöтчыны. — Не сiдз я мый я, Прокопьевич?! — ачыс шыннялiс ни и веськыта видзöтiс синнэзö.

— Öнджа, — шуис Прокопьевичыс. — Öнджа, Андрей... Мый тэ лöгалан? Кытшöм пон тэнö пурис?

— Мый öнджа да бöра? Веськыта колö баитны, вонö! Нем, мыся, чуклявнытö!

— Öнджа, — чужöмыс вежсис Прокопьевичыслöн, и сiя вотьыштiс-петiс керкусис.

Мунiс Андрейлöн воныс — вон и не вон, кыдз сiйö и шу? Öтöрсянь видзöтан, бытьтö воннэз, а мöдöрсянь...

— Вöрисьыс кыскы! — воныс бöрсянь висьталiс Андрейыс. — Икота бы горшат, медбы виньдiн, да лолыт петiс... Адззисьöмыт... Начальник... Миян кодьсö зэлöтан бы... Нем эн шу... Поди, ачыт кöркö панталан... Думайтан пыр этатшöм лоан? Он эд. И думайтан царьыслöн властьыс? Абу ни эд. Кер, да тöд мый керны! Прокопьевич тэ, Прокопьевич — Пестер тэ пиян! Кута да гижа веськыта Москваас... Быдöс гарда, кытшöм тэ... Адззылан сэк, кытшöм Совет властьыс. Лениныс моз колö овнытö. Вежöм! — ыкöстiс кагаыс вылö, кöда саймис и горöтiс керкутыр. — Тэ сэтшöм жö! Пестерыс кодь жö!.. Модис-керис ас кежас, вартлiс и кералiс кыввезнас, гижис и иньдiс гижöтсö, но некин эз адззыв и эз кыв, мый баитiс — быдöс кольччис гортö. Ванькаыс дугдiс горзыны, топ вежöртiс айсö. Гуттэз лэбалiсö зоночкаыс гöгöрын, пуксисö рожаас, эз сетö сэсся ланьтны.

Öтiк лун ни гортын бы эз пукав, но некытчö он воштiсь, кöр кокыс бурдö жагöн.

26

Пукалö гажа гожумся лунö посöдзаныс Андрейыс, кыйö нинкöм да видзöтлö, кыдз лунланьсяняс сибöтчö сук кымöр — мурзьö, лöсьöтчö койыштны зэрöн, нето швачкыны гырись шерöн — вартны сюэсö и садникись карчсö. Кымöрыс мурзьö, и быдöн топ сыись повзис да лöнис и дзебсисис: не курöг эз понды тыдавны, не воробейез оз чирзö, не гут-номыс эз понды бизгыны. Лоис ыркытжык.

Пукалö Андрейыс, заптiсьö тöв кежö кöмкöтöн и кывзiсьö, оз я керкуас горöт зоныс, öт пельнас керкуын, мöднас татöн, адззö не только кымöрсö, но и кыдз вевдöрсянь, йöр угöв сайсянь, мыччисис телегаö доддялöм вöв, телегаас пукалöны тöдтöм отир.

«Чиганнэз абу я? Ме кодь жö весь олiссез... Пырны бы керкуас да ыбöссö жвангыны», — ештiс думайтны Андрейыс, но эз ешты чеччыны местасис, кыдз вöлыс сувтiс ни посöдзыс весьтö, телегасис чеччöвтiс тöдса чужöма мужик да гажöн юалiс:

— Эстöн олö Андрей Григорьевичыс?!

— Асывсяняс эстöн олiс... А мый сэтшöмыс? — сьöктансö Андрейыс пуктiс бокас.

— Тэ дынö локтiм. Здоровöн, мыся, олан!

— Здоровöн, мыся, локтiт! Мый татчö öштiт?!

— Тэ мыля луннас гожум шöрнас нинкöммесö кыян?

— Мый меным керны? — Андрейыс кабнас нинкöмсö шупкис пидзöссэс вылiсь. — Мый нö ме, мыся, понда керны? Эта абу я мый я удж? Кин кыдз кужö, сiдз, батя, юрсö и вердö, öнджа...

— Гм-м-м, а тэ тöдан мый вылö ми локтiм?

— Кымöсаныт, сваттэз, абу гижöм...

— А тэныт колö бы гижны?

— Гижö кöть эдö, ме сiдз ни адзза кытшöм тi чиганнэз.

Андрейыс кужис кывнас гажöтны — йöз мортöс пантавны, медбы тöдiсö, что татöн отирыс отир кодь жö олöны.

— Хозяин, тöдан мый... Сю бы миянлö колö, — висьталiс кузьжык мыгöраыс — шынь эз кер, лэчыта пондiс видзöтны хозяиныс вылö, топ Андрейыс важын ни заптiсис сэтшöммеслö, кöр ачыс тшыгйöн сорöн олö, или кинлiськö гусялiс и, видзöт, локтiсö да лöсьöтчöны мырддьыны.

— А вöлi менам сюыс да вöлö пöрис! — серöмтчис мужикыс. — Кынымись тi эшö пондат кортöн ветлöтны? Думайтат миян понда öтiк годнас гожумыс сизимись вовлö?

— Эм тэнат! Волисполкомсиныт предыс висьталiс! Пондан кö суськыны, адззам! — сiя жö ыджытжык мыгöраыс висьталiс, кыдз кымöсас вачкис.

— Нем менам сетнытö. Кошшö... — синваэс петiсö. — Видзöтö кытшöм седун лои, гожумбыт ни эстöн пукала, а иньö öтнас уджалö...

— Он бöбöт?

— Тöдат жö мый... Пожум вылын пö тури пукалöм да сартас шулялöм!

— Пукав сэк, седун! А ми эта коста пыралам чомат и видзöтам мымда тэ дзебин няньсö! — кыдз врагкöт ни баитiсö локтiссес и унажык эз пондö модьны, эз пондö сэсся юасьны, лэдзан тэ или он чомат.

«Эх! — мороссö зэлöтiс Андрейыслiсь, киэс сiдз и лудiсö: босьтiс бы кабья нинкöмсö да кыдз пöжалiс веськыта баля юррезаныс! Сэк бы тöдiсö, кыдз йöз чоммезас кошшисьны, но топ кинкö киэзöттяс кöрталiс и видзис да шушкис пель одзас: «Чöв, Андрей! Шы эн сет, ась тшыг поннэс... Кöда сю тусьыс кольччис, иньыт важын ни дзимлялiс... Некытшöм пон оз адззы. Оз адззö.»

Йöз отирыс кошшисисö ни чомын, мыйкö сэтчин гыма-йирка вöрöтiсö да ас коласаныс видчисö, а хозяиныслöн сьöлöмыс кыдз вотьыштiс, сыр-лёль öшöтчисö киэс.

Кымöрыс, кöда нач ни öшöтчылiс посадыс весьтö, вевттьылiс шондiсö, сютки-патки койыштiс зэр воттезöн да жагвыв пондiс вешшыны рытлань. Бöр мыччисис шондiыс, курöггес петiсö карта вылiсь, воробейез пондiсö чеччавны йöр дынын, гут-гебыс одззамоз жö пондiс бизгыны посöдзыс гöгöрын. Посöдзыс бокын жö öмсö осьтöм, кывсö мыччöм да чашыктö Андрейыслöн поныс, кöда сэтшöм ни дыш, что дышыс петiс бöжнас öвтыштны, кöр локтiсö йöз морттэз, дышöтчис вувтны, мед кöть керкусис быдöс нöбöтöны.

Андрейыс юрсö öшöтiс и пукалiс посöдзаныс, думайтiс дума, кöда вашöтiс гортсис, колис пиньöла угöла керкусö, важ картасö, курöггесö и мöссö... И вöлыс ни эз ков — быдöс вылö думаэзнас öвтыштiс мужикыс: абу дак абу! Мед иньыс и олö, кöр сiя керкуас оз жö тöр, а сiя мунас кытчöкö, ась кöть кытчö, только бы эстöн не овны ни.

Андрейыс кыдз тувдiс посöдзаныс, думаэс дорисö сэтчö, кытöн пукалiс и сэтшöм ни сылö лоис недолыт, что эз ни бы ов, нем ни эз адззы, эз адззыв кыдз посöдзыс дынö локтiс Ольöпыс, сувтiс бурундукыс дынö, мышкыртчис бедьыс вылö, дыркодь видзöтiс Андрейыс синнэзö и негорöн шуис:

— Здоровöн олан, Андрей сват!

Андрейыс дыша лэбтiс юрсö, гудыра синнэзнас пондiс видзöтны инь мортыс вылö кытчöдз бöра мöдыс эз шу:

— Здоровöн, мыся, олан, сват!

— Ола, — висьталiс Андрейыс. — А мый?

— Видзöта, мыся, и ылiсянь адзза... Юрыт мылякö пельпоннэтся улынжык öшалö... Одзжык вылына видзин, а öнi мыля нö сiдз? — синнэзас гаж, смев и кокнита баитö. — Али иньыт умöля пондiс видзны?

— Сьöкыт юрö, сiйöн и öшöтi... Мыся, голяöс шоччöтышта, — сiдз жö кокнита висьталiс Андрейыс.

— Сiдз... — конувтас кисö сюйыштiс да пондiс гыжьясьны Ольöпыс. — А эта вöлыс кинлöн?

— Гöссез локтiсö.

— Ылiсянь?

— Тасянь оз тыдав.

— Сiдз... — мöд кинас ни, мöд конувтас пондiс киллисьны инькаыс. — Тыдалö веммет юртö пондiсö вермыны...

Посöдзыс бокын саймис поныс и пондiс эрзыны, кыдз Ольöпыс медлёк враг — медчож, вермас гусявны мый эм и абу.

— Кокыт мый? — Ольöпыс топ эз адззы и эз кыв поныслiсь эрзöмсö.

— Нем абу, — Андрейыс кунис синнэсö, бытьтö дышыс петiс баитны инькаыскöт — оныс петiс, думайтiс, что Ольöпыс вежöртас, кöр сыкöт оз бы баитö, а сiя оз вермы пöднавны öмсö, одзлань шлячкö:

— Сiдз тэныт и колö! Эз ков вичкусö разьны. Еныс эд эм.

Китöстiс петухыс, кыдз ыкöстiс: «Тырмас! Пöтны ни колö бöб баснинат!»

Ружтiс Андрейыс. Чомын кылö пурсисö-видчисö тöдтöм отирыс, кöдна, бытьтö быль мыйкö сэтчин öштiсö и кошшöны, кыдз асланыс керкуын, кöр эз мыччалö некытшöм гижöттэз, поди, быль ни цыганнэз или кытшöмкö öнджаэз...

— Мый он баит? Или кывтö öштiн?! — модьö Ольöпыс.

— Тэныт мый месянь колö?! — лöгасис Андрейыс. — Или видзчисян няньтор?! Абу сiя менам! Вежöртiн?! Тэ моз жö йöз вердö! Иньöлiсь сёя, а тэ... Ог сет!

— Хозяин! — эта коста чомсянь кылiс лёк голос. — Кужан бöбöтчыны. Мыля сюсö кильнас сорлалiн?! Дзебöмыт и думайтан, что ог адззö. Адззам, хозяин!

Андрейыслöн вöлись кымöсыс вылiсь пондiс вотявны дзулля ва. Ольöпыс топ вöлi и эз, кыдз син одзын пырис муыс пытшкö — öшис. Чомись кудтыр петкöтiсö сю, кисьтiсö мешöкö и тыра мешöксö ни лэбтiсö телегаö. Лёка готсис петухыс, поныс бöжсö лэдзис да пырис пос увтö, чирзiсö воробейез, топ матын лэбалiс варыш.

— Нöбöтат? — горшас курыт лоис мужикыслöн. — А мый ме понда сёйны?! Кагаэслö кöть бы колит содз сю...

— Туруныс коккезныт увтын быдмö, сёят! — рыг-рыг серöмтчис томжыкыс, кöда пуксис ни телегаö да вöввеслань öвтiс шатёкöн.

27

Рытнас уджалансянь локтiс Лизаыс. Сiя эз ешты пырны керкуас, чирзiс ни: «Но, Сивöй Таракан! Бöра сюсö козьналiн весь олiссеслö?! Бöрья сю тусьсö сетiн... Колiс эд аслыт ни мунны ныкöт, — рик-рик горöтiс, топ кинкö кулiс, а мужикыс пукалiс лабичын да шы эз сет, кыдз эз кыв иньыслiсь голоссö, кöда горзiс да модис разис мый оланыс каттис сьöлöмас, дойдiс, что некинлö лоис инь мортсö дорйыны, кöр чомсис медбöрья сю тусьсö ни нöбöтiсö, а мужикыс шы оз сет, сiдз бытьтö и колö.

Горзiс-керис Лизаыс, пöтiс синваэзнас и веськыта висьталiс: «Тырмас пукавны, ашын мунан уджавны!»

И сэтöн эз шыась Андрейыс, кöть и уджавнытö эз вермы — эз лысьт эшö бура тальччыны кокыс вылö, но и мый? Кин тэнö, мужик, пондас вердны? Думайтан гортiсь бы пышшыны, но и пышшынытö эд он вермы, кöр топ сьöвталöм — джоджыс кузя бедь вылын кыскасян. Но ковсис уджавны, ковсис бедь вылын питкыльтны иньыс сьöрö видз вылöдз, отсавны тэчны зород, а сыбöрын кутчисьны вундыны.

Кöть кокыс эз и куснясь, но уджалiс, и сьöлöмыс быркайтiс — рад вöлi: таво сюэс аркмисö тыраöсь, оланыс кöсйис пöтжык ни кад.

Арыс вайис гаж, гажöнжык ни чулалiс сыбöрын тöлыс, а тулысланяс Андрейсö пондiсö корасьны колхозö, кытчö чукöртiсö ни, позьö висьтавны, быдöннысö, только богатжыккесö колхозыс местö лöсьöтчисö иньдыны мöдöрö, но Андрейыс колхозас пырны эз тэрмась, думайтiс видзöтчöв-керны, кытшöм лоас виль оланыс да вöлись...

— Тэ кин?! — Миша воныс локтiс гортöдззас да пондiс гудыртны. — Контра али мый?! Кулаккескöт öтлаын? Сэк котома тэч да лöсьöтчы Сибирö!

— Кытчö?! — Прокопьевичыс вылö вувтчис Лизаыс. — Кытчö тэ, пон чужöм, менчим мужикöс бы иньдан? Ме тэнö, пон чужöмöс! Ачыт пырин я колхозас?! Нуöтiн я гортсит мöссö да вöвсö?! Вот. А миянлiсь бöра медодз... То тэныт! — Прокопьевичыслö ныр увтас гардыштiс куим чунись акань. — Этö эн адззыв?! Видзöт да тöд кинкöт баитны. Ме тэныт абу иньыт кодь пым тупöсь, кöдö тэ кыдз петух курöгöс моз быд шагын öнджа керан...

— Мый кера? — Прокопьевичыслöн вежсис чужöмыс. — Мый ме кера иньöс?

— Мый керан? Да этö керан... Совестьтöм пороз тэ... Кытöн да мый керсьö, сэтöн медодз менчим и каттян. Кытöн дзескыт, сэтöн Сивöй Тараканыс и медодзын! Ме сылö...

— Но, но...

— Мый но? Тэ эн нокайт, ме тэныт абу вöв! Прокопьевичыс öзтiс чунь кыза чигарка, керкуас тыр лэдзис тшынсö — сьöлöм гудыртчö, и кагаыс пондiс лабичыс дорын несйыны, но куритiс эд, пиньласьыштiс кенакыс вылö и гусьöн моз ни эшö воныслiсь юалiс:

— Сэк мый?

— Ог тöд, — шыасис Андрейыс, думаэс бöра ни кыскисö йöзö, сэтчин, кытöн эз вöв, кытöн абу я оланыс буржык...

28

Думаэс кошшисö виль олан, кытöн бытьтö шондiыс шонтiс мöднёж, югытыс вöлi мöдкодь, муыс эз вачкись татiсь му вылö, отирыс вöлiсö отир кодьöсь: эз дойдö öтамöднысö, эз дзескамö, кытöн позис бы овны да уджавны, сёйны пöт да ошшасьны оланнас, а татöн мый? Кыдз овнытö? Видзöт, зэлöтöны эд и зэлöтöны бы, пыдынжыка ловзисьны бы оз лэдзö — не öтiк дак мöдiк, не шогöт кö, то Прокопьевичыс локтiс и вайис юöр...

Пышшис бы гортiсь Андрейыс, кöть и гортын ни вöлi гажа: локтiс тулыс, локтiсö кайез, сьылöны ой и лун, вöрыс саймис, осьтiс синнэсö, шынньöвтiс и пондiс путриктыны зелёнöй рöмöн, цветитöны цветтэз, ловзисян и сэтшöм чöскыт руыс — юр бергöтчыштö. Этатшöм кадö гортö эн бы и пыр, эн бы и узь, эн шоччись, а уджалiн ой и лун, кöдзин унажык и арнас бöра эд морт бы вöлiн — няньыс пöт, а сэсся мый колö? Мужикыслöн сьöлöмыс чеччöвтiс — уськöтчис бы уджавны, лоис жаднöй, киэс лудiсö; но сэтöн жö оланыс кыдз шентiс кымöсас, сералiс: «Кинлö да мыйлö уджалан? Талун керан, ашын оз ло! Мырддясö, и кольччан тшыгйöн — не вылат, не кокат, не кынöмат... Кöкыс моз жö, бат, позсит репöтасö, и пондан кокны... Мый сэк керны? Кытчö воштiсьны?»

— Мам, сёя бы... — мамыслiсь сёйны корис Колькаыс.

— Мам, льöль... — лабич дорын котрасис Ванькаыс.

— Му-у-у, — мöсыс карта вылын шыасьлiс, тöвнас мыйöнкö эд пондас ковны вердны — турун колас, кöдö эшö эз кер, но колас керны.

Öшын увтас курöггес кокасисö, бöра сёян жö видзчисисö — сю колö: няньтöг некин оз вермы овны.

«Кöть мый... — Андрейыс сьöкыта лолалiс, сьöлöмыс бердын пöжис шогöттэз. — Кöть мый... Некытчö пон юртö он сюйышт, ковсяс уджавны...» — кöмалiс нинкöммез, мурзис, иньыслiсь корис сёйны — ыксiс, кыдз иньыс виноватöй быд шагын, бытьтö сы кузя быдöс эта оланыс берездасьö...

Андрейыс асывнас няридзö доддялiс вöв, мунiс гöрны и гöрис öт пемытсянь мöд пемытöдз, немымда эз жалейт асьсö и вöвсö, сэтчöдз уджалiс, сэтчöдз мыдзис, что гортö локтiс ― юрыс пельпоннэс вылын öвтчис, синнэс куньсисö, эз кыв, кыдз бобгис тар, ябыртiс-сьылiс кай, кöкис кöк, эз адззы, кыдз юрыс вевдöрын öшöтчис кымöр палачок и койыштiс зэр воттезöн. Тулысыс путриктiс. Гöрансянь локтiкö Андрейыс садниккес кырылын бöра пантасис Прокопьевичыскöт, кöда ветлöма деревняö да локтö. Сувтчис Прокопьевичыс, ылiсянь видзöтiс воныс вылö, видзчисис да пондiс баитны:

— Гöрны ветлiн? — дзик эз адззы, что воныс локтö гöрансянь.

— Ветлi, — мыдзыс öшис Андрейыслöн.

— Уна бöра шулялiн эд, а ме... Бöбма ни... Сiйö и керöны сильгöны телепоннас да юасьöны кыным морт ни пырисö колхозас. Пыдынжыка ловзисьны оз лэдзö!.. Кöр и гöра, мый и понда сёйны?

— Ачыт мыля он пыр? — недолыта горöтчис воныс.

— Ме?! — серöмтчис Прокопьевичыс и пондiс видзöтны гöпокись витули вылö. — Да тэ мый, Андрей? Ог я уджав исполкомын! Он я думайт, что понда уджавны сэтчин и эстöн — кык кöч сьöрö тшöктан вöтчыны. Бöбöтан! Юрö öтiк, киэзö кыка. Кык местаас ог вермы жöдзнытö.

— А иньыт?

— Мый тэныт иньö? Иньыс менам, а не тэнат, — шыннялiс исполкомись предыс, тöдiс ассис уджсö и асьсö, медбöрын висьталiс. — Сiдзкö, вонö, менö эн осудит. Талун вот собраннё öктам. Отирсö колö бы пыртны колхозас, кытчöдз вöлись пондöтчисö гöрны. Ась öтлаын и гöрасö. Локтан эд?

«Мун тэ ме дынiсь собраннёнат!» — сьöлöмыс öзйис Андрейыслöн, сiдз лöгасис, что лолыс тырис, пöдыштiс, но видзсис — нем эз висьтав.

— Локтан эд! — мöдöтпыр ни лöгжыка горöтчис воныс, вермис öмнас, топ ыджытжык хозяин Андрейыс вылын.

— Локта, локта, — шынньöвтiс Андрейыс.

— Лок да видзöт. Кулаккесö эд пондасö разьны, а середнякыс... Тэ коддес пондасö кö асныравны, öтлаö шедасö! Думайтан уна миян коддескöт пондасö баитны? Озö эд! Кузь туйыс осьта...

«Иньды. Мый меным? Менö öтiк вöвнам, бат, озö жö, ― думанас асьсö дорйис Андрейыс и вöрзьöтiс вöвсö.

Ужнайтiс пöт, кöть няньыс пöт сёйнытö эз и вöв, кöр сiйö кильсорнас ни нöбöтiсö чомсис, но иньыс жö эд бöра... Кытöн пиннес кузьöсь — пурсьö, а сэтöн, видзöтö, сюсö кöркö кужöм дзебны да сiдз, что и мужикыс эз тöд. Öнi вердö: «Сёй, Сивöй Таракан! Сёй да уджав! Челядьсö кыдзкö колö быдтыны...»

— Эн видчы, — рамыника баитö Андрейыс, сёйö, думайтö собраннё йылiсь, и думаыс топ сьöлöмыс бердын из öшалö: недолыт, шогалö, висьталiс, что оз мун некытчö и оз, мед кöть мый... Ась нуöтасö... Бытьтö эд оз пов, но сьöлöмыс полiс, кöр тöдiс, что вермасö нуöтны да, бöра жö, Пестерыс вылö надейтчис, кыдз вон вылö, оз я дорйы?

Сiдз и водiс, кыдз ньылыштiс желля сёян и недолыт — эн бы и синнэтö осьт. Рытыс рам, шоныт. Ойыс сэтшöм жö: быдтö турун и пу, гöтралö кайöс и кöчöс. Андрейыс рытсяняс ланьтiс, кыдз сылiс, саймис ойшöр гöгöрас и петiс öтöрасьны, но эз ешты осьтны посöдзсис ыбöссö, кыдз кымöсас кинкö вачкис — повзьöтiс шы: кытöнкö матын топ сьылiсö или горзiсö... Мужикыс сувтiс посöдзас, öмсö осьтiс, сьöлöмыс жмитчыштiс, пондiс кывзiсьны...

Ойыс югыт, лöнь, ловзисян и кылö керкуöдз, кинкö быль дзик уннялiс или горзiс да нач ни матын — йöрыс сайын и сибöтчис матöжык да матöжык... Шыыс эз вачкись морт горзöм вылö и сiдз оз никсы пон. «Мый нö сэк эта?! Кин? И поннэс мылякö оз вувтö. Эз я бöра томмес тышкасьö, бучкöтö боккезнысö?» Андрейыс тöдiс бы, мый сiя сэтшöмыс, кывзiсис посöдзаныс, видзчисис, лэчыта видзöтiс чомныс сайö, и сэтöн соседыс керку сайсянь мыччисис телегаö доддялöм вöв. Вöлыс шагнялiс жагöн, телегаын пукалiсö отир да морт-мöд вöтчисö бöрсяняс... И бокас, вöввез вылын пукалiсö морттэз. Ружтышалiсö вöввес, дзуртышалiс телегаыс, дзуртiс сийöс, топ сьылiсö-горзiсö инькаэз да ойнас, кöр отирыс узьöны.

Андрейыс медодз öшис, сылö юрас вачкис дума, что прикашайтчö, бесыс нерö. Или чиганнэз... Думанас пернапасасис, дзебсисис бы, эз бы видзöт вöввес да отирыс вылö, медбы сiйö эз адззö, но сiйö кыдз кинкö кöрталiс посöдзас, видзис, тшöктiс видзöтны, мый лоас, кыдз чулалас, киннэз нiя... Вöввес шагнялiсö и лолалiсö нач ни матын, дзуркöтiс телегаыс, пильскисö инькаэс. Андрейыс сэк вöлись повзис, кöр телегаыс вылiсь тöдiс Квать Чунь Зотяöс, кöда телегаыс вылын пукалiс тупка моз, мышкыртöм юрсö, юрыс öвтчышалö, и ныввес вöтчöны телегаыс сьöрö, горзöны, кыдз уннялöны кычаннэз — öтамöднысö голоссэзнаныс одзалöны да мылякö оз лысьтö горöн горзынытö.

Дзурк-вирк, дзурк-вирк бергалöны мавттöм телега колесоэз. Телега бöрсянь вöтчö Зотикаыс: баличаэс разьсьöмась, дубас подолыс кыссьö муыс бердöт, инькаыс турьялö-öвтчö, горзö или никсö — он вежöрт.

«Кытчö нiя?!» — медодз сотiс дума. Дзурк-вирк, дзурк-вирк и вöввес телеганас локтiсö посöдзыс весьтöдз. Андрейыс сулалiс посöдзаныс да видзöтiс мунiссес вылö, полiс вöрзьöтчыны, сьöлöмыс надейтчис, что эта вöт, вот саймас, и нем оз ло или казялас Зотяыс, мыйкö шуас, но сiя, кыдз пукалiс телегаыс вылын, сiдз и пукалiс — öвтчис юрыс, бытьтö мортыс вывтi уна думайтiс, некинöс эз кыв и эз адззы, а телегаыс бокын öтöрас и мöдöрас зэв моз педзисö-мунiсö вöввез, кöдна вылын пукалiсö тöдтöм морттэз да одзаныс пидзöссэзныс вылын видзисö пишаллез.

Дзурк-вирк... И Зотикаыс бергöтчыштiс Андрейыслань, горöнжык герйöвтiс, кыкнан кисö лэбтiс вевдöрö, öвтыштiс нiйöн, кыкнан кинас жö кутчисис юрыс бердö и сунки-панки иньдöтчис одзлань.

Дзурк-вирк, дзурк-вирк телегаыс катыльтчис одзлань. Ойыс югыт, но кадыс, натьтö, ойшöр гöгöр, сiдз кыдз каёккез дугдiсö ни сьывны, бизгисö öтi-öтi номмез.

Сайкалiс я Андрейлöн сьöлöмыс, кынмис я мый я посöдзаныс, эз вежöрт, дума кокалiс веммесö: «Мый нö? Кыдз нö?.. Мыля?»

Телегаыс морттэзнас саясис — чукыльтiс мöд улицаас, кылiс кыдз пирснитiс вöв, никсiс-горзiс инька, дзуртiсö мавттöм колесоэз. Андрейыс кыдз öшöм лöсьöтчис пырны керкуаныс. Сiя вунöтiс öтöрасьны, дзар керис кымöрас, кытöн ойланьсяняс тыдалiс ни бледыник веж-гöрд шондiлöн югöр, и сэтöн жиля-жоля соседыс керку сайсянь мыччисис мöдiк телега, мöдiк доддя вöввез, мöдiк отир, и бöра телегаыс бокын зэв-зэв вöввез вылын жö пукалiсö тöдтöм морттэз да киэзаныс видзисö пишаллез. Öнi видзчисьтöг быд горшсис герйöвтiс инька, резьöтiс ойсö: «Ой-е-е! Да мый ми отирыслö умöльсö керим?! Да мыля миянöс еныс и дойдö-ö-ö?! Да сё тай тшыгйöн да пасьтöг челядьсö быдтi, а öнi лои кулакö-ö-öн! Ох-хо-хо-хо!»

Андрейыслö медодз думайтсис, бытьтö кинöскö кыскöны гробöн, нöбöтöны шойнаыс вылö дзебны, но сэтöн жö адззис, что телегаыс вылын некытшöм гроб абу. Сiя бöра посöдзаныс гöжис, спинаас топ киссис кöдзыт ва, сьöлöмсö жмитыштiс кинкö лэчыт гыжжезöн и лэдзис. Вöввес телеганас эта коста ештiсö локны посöдзыс весьтöдз, сэтöн бытьтö вöввес джöмдiсö, сувтчыштiсö, и Андрейыс пондiс адззыны Ректан Степанöс — этö рызi-бызi мортсö, кöдалöн пыр öмыс осьта, простöй, кыдз нинкöм, мый тöдö, öмас оз видзсьы, мый сылöн, сiя и тэнат, оз ни юрсö видз чатырöн, оз польды-тешитчы, асьсö мыччав кодяöн.

Степаныс рышкыт мывкыда, кыдз инь морт, кöдö кытчö ылöтасö, сэтчин и бöбасьö — олö йöз юрöн. Öнi эта ойö мужикыс пукалiс йöз телегаын, шыннялiс да видзöтiс Андрейыс вылö, бытьтö ойнас мунiс кытчöкö гöститны и вöлi рад, сьöлöмыс гажöтчис, сiйöн Андрейыслö гажöн висьталiс:

— Здоровöн чеччин, Андрей сват! Мый он узь?! Ме, видзöт, колхозас ог бы пыр да муна овнытö Сибирö, коля гортö лöпсö, ась мамныскöт пешлiсьöны овнытö, то эта — пыр видöны да шуöны, менö умöль мортö пуктöны. И тэ ме понда эн горзы, ме, бат, дыр ог ветлöт: видзöта-кера и оз кö гленитчы, бöр варта гортö, а гленитчас кö, кокнит мывкыдаэсö дынам кыска.

Кокнит мывкыда Степаныс, орсö-олö, некöр оз тöждiсь, мунö öнi кытчöкö, да не аслас воляöн, а бöрсяняс, чукыльсяняс, керкуэс сайсянь, мыччисис мужикыслöн иньыс челядьыскöт — кватя эд нылочкаэс сьöрсьöн-бöрсьöн Степаныслöн быдмöны, öнi мамныс гöгöрын типоккез моз гардчöны, никсöны-горзöны, кöр мамыс котöртö бы, вöтчö мужикыс сьöрö и оз вермы вöтчыны, только öвтö киэзнас да ыксö: «Степан! Куш кымöс! Вунöтiн эд вежны йöрнöстö! Кыдз отирас пондан овны сьöд йöрнöснат? Пасьталiн бы дзоньсö! Ох-хо-хо! Лолыт петас кытчöкö, и ог адззылö кытöн сiсьмасö лыэт!»

Пильскисö мамныс гöгöрын челядьыс.

— Некытчö менам лолö оз пет! — гажöн шыасис Степаныс и бöра Андрейыслö ыкöстiс:

— Мед тiянöс Вöрдядьыс колхознаныт ылöжык кыскö! Кылiн, Öндрей?!

Вöввес телеганас эз тэрмасьö: дзурк-вирк да дзурк-вирк, но сё жö öшисö син одзись. Öшисö пишаллезöн йöз морттэз, öшис Зотяыс, öшис Степаныс, кыдз вöлiсö да эз лоö, быдöс кыдз вöлi вöтöн.

Андрейсö зэлöтiс дума: «Мый нö эта? Мый понда бы? Но Зотясö эшö... — дорйис бы кинöскö, только не Зотясö — эз вöв сы дор, кöда Зотя Зотя и эм — чорыт и зэлыт мортыс, Андрей коддескöт уна эз баит, бытьтö эз и адззы, богатöй: некöр эз тшыгьяв, эз кынмы-косьмы, асьсö вывтi уджын эз вий, пыр ысласис беднöйжыккес вылын, видзлiс уджалiссезöс, кöдна уджалiсö да босьтiсö нач етша, а Степансö мый понда бы? Кузь кылыс понда я мый я, или сiйöн, мыля колхозсис пыксис, эз пыр, быдöнлö модис, что юррезнытö кытчö оз ков, эд сюйö, колхозас пырöны нiя, кöдналöн дышныс петö уджавны.» Бöб юр и эм эд Степаныс — кокнит мывкыда, бöра эд, натьтö, колхозыс йылiсь баитö йöз кыввезöн и йöз басниöн. Но и мый бы? Ме эд кытчöдз öтнам жö уджала. Оз я Степаныс моз жö керö?

Андрейыс сулалiс посöдзаныс, юрас пизисö думаэз, сэтöн челядьнас посöдзыс весьтöдз локтiс Степаникаыс, кивзыштiс-ойзыштiс, баличаэсö лэбтыштiс пельпоннэс вылö, пондiс лэчыта видзöтны Андрейыслань, дзик медодз эз тöд кин сы одзын посöдзас и вöлись пондiс пеничайтны синваэссорöн:

— Тэныт эд, öнджалö, пыр дзескыт вöлi менам мужик весьтöт. Пыр эд синнэт тырисö жö Степаныс весьтöт, сёйин бы! И сёйит!.. Öнi, бат, керкуэзаныт куим шондiöн пырасö, вöлись пондат овны кокнита да гажöн дзöдзыв поззэзаныт, вöлись эд!.. А ме челядьнам... — рик-рик горöтiс и сыркьявтöн содтiс. — Еныс, бат, оз вунöт. Бат, пияноккезнам... ― мыкталiс и сыркьялiс.

Унньöвтiсö сьöрсьöн-бöрсьöн мамныс сьöрын челядьыс, Андрейыслiсь сiдз пидзыртiсö сьöлöмсö, что петiсö синваэс.

Ыркыткодь ойыс öшыныс увтiсь зелёнöй лудсö миссьöтiс лысваöн.

Андрейыслö колiс бы пырны гортас, а сiя сулалiс кыдз кынмöм. Степаникаыс челядьнас горзытöн бергöтчисö и бöр иньдöтчисö гортланяныс, кöмтöм коккезнаныс талисö лудсö.

Китöстiс петух. Андрейыс горöтiс бы: «Тэ мый, Степаника?! Мыля менö?!», — но горшас кыдз тасасис ёсь, и турйöвтiс мужикыс да пырис керкуас.

Иньыс узис джоджын, саймис и юалiс:

— Мый сэтчин?

— Узь, — сьöкыта ловзисис мужикыс, водiс джоджас, шебрасис важ öнöн, кунис синнэсö, но узьнытö эз вермы: одзас сё бытьтö челядьыскöт сулалiс Степаникаыс да ыксiс: «Пыр эд сёйин Степансö!»

«Кöр ме сёйи Степансö?!» — некыдз эз вежöрт Андрейыс, тöдвылас усис быдöс оланыс, кöда эз вöв кокнит, пыр кыдз зверь орсiс Андрейыскöт, то курччалiс, то лапанас небыта малалiс бы или гыжйöвтiс.

Сьöкыт вöлi мужикыслö, кöр бытьтö ашын жö быдöн сьöвзяс синнэзас да веськыта висьталас: «Тэ эд Степансö...»

Куйлiс, думайтiс, ланьтiс бы и эз вермы ланьтны и пондiс лудны вывтырыс.

29

Тулысыс путриктiс-пизис и чожа джöмдiс, пондiс модейтны: кöдздöтiс, бöра лэчыта вижгис ой тöв, эз лэдз быдмыны турунсö, падтiс пуэсö, медбы нiя эз пасьталö зелёнöй лист. Отирыс эз узьö, кöдзисö. Етша кольччис кöдзнытö и Андрейыслöн: лыддис ни луннэсö, кöр муыс вылö чапкас медбöрья сю тусь...

Сэтöн öтiк рытö керкуас бöра пырис Миша воныс, кыдз нем абу и вöлöм, топ кенакыскöт некöр оз пиньгись. Пырис, здоровайтчис, пуксис западня вылö, гардiс чунь кыза чигарка, öзтiс сiйö и горöтчис:

— Öнджа... Кöть кытчö воштiсь...

— Тэ мый вылö татчö локтiн?! — кенакыс пондiс кöкны. — Али бöра кынöмыт пондiс симавны? Бöра чомсиным лöсьöтчан медбöрья кöдзыссö чышкыны да кинлöкö козьнавны?! Ме тэныт!..

— Пöднав ыбöстö!! — иньыслö ыкöстiс Андрейыс.

— Тэ пöднав! — мужикыслö эз сетчы Лизаыс: öмнас эд бöра бы вермис. — Бöра миянöс куштыны локтiс! Ме сылö то мый мычча!

— Весь, кенак, ыксан, — рамыника висьталiс Прокопьевичыс да боксис вештiс кага рузум. — Весь, мыся, пиннетö вузалан! Пусö тöв паныт он пöрöт. Мый керсьö, сiдз и лоас. Миянлiсь тэкöт оз юасьö и оз висьтасьö: колiс, видзöтö, царьсö брынöтiсö, колiс — Совет власть керисö, колiс — чоммезсиным сюэсö гумлалiсö... Видзöтö, колхоззэз керöны... Оланыс, кенак, кöбывка, талун сьылас, ашын чеччöвтас, зурзяс и абу... Миянлiсь тэкöт оз юасьö... Вежöрт...

— Öддьöн тiян колхозныт кинлöкö колас... — небзис инькаыс.

— Колö или оз, но керöны, и тэ кывтö кузя эн видз, то пурт босьтасö и абу... Орöтасö. Вундыштасö, мыся, кенак, кывтö. Синтöм я мый я, он адззы, кыдз отирсö дойдöны? Кöда туйсö поперегалö — Сибирь! Вöлiн да он ло, а тэ... Эх!

— Но и мый? Ме эд абу кулачка.

— Шы эн сет, икота! — чирзыштiс Андрейыс.

— Но... А эта... Степаныс мый понда? — пондiс юасьны Лизаыс.

— Степаныс... — кокнита серöмтчыштiс Прокопьевичыс. — Аслас бöб юр понда... Тöдан эд сылiсь мывкыдсö... Кытчö ылöтасö, сэтчин и баран моз котöртö, но и вот... Мунöм дорйыны бы Зотясö да öтлаын гортiсь тарöвтчис.

— Мый бы сылö Зотяыс? Кин? Родня я мый я? Топ некысянь родняыс абу.

— Ме мыйöн тöда?! Отирыс жö тай лёбöны, бытьтö пö Зотяыс кöдзнытö сетöма ид, но и вот...

Дугдiс юасьны Лизаыс, мужиккес пондiсö баитны ас коласаныс, медодз Прокопьевичыс висьталiс:

— Вашöтiсö сельсоветсис...

— Мыля?! — повзис бытьтö Андрейыс.

— Мыля, мыля, — кокнита серöмтчис Прокопьевичыс. — Мыля тэ карта вывсис вашöтан мöссö или посöдзсис понсö?

— Поныс пон и эм... — шыасис Андрейыс, думайтiс: «Сiдз тэныт и колö! Мый кошшин...», думайтiс, но эз мыччав гажсö, топ нем эз кыв и нем оз тöд — синнэс баралiсö.

Хозяйкаыс чывкнитiс джоджыс шöрö да бöра кывсö мыччис: «Важын бы сiдз!»

— Тэ бöра?! — Андрейыс ыкöстiс öмтырнас.

Керкуас пондiс кывны, кыдз чераньвезын бизгö гут, бизгö и бизгö...

— Андрей, мунам татiсь, — шуис Мишаыс.

— Кытчö? — эз вежöрт вонсö Андрейыс.

— Туйыс эд осьта... Видзöт, менам своякö Лысьваын олö и ошшасьö... Сюыс пö сiдз шогмö-ö-ö, что оз тöд кытчö воштыны... И юыс зэв: черисö кырыммезнаныс гумлалöны! Вот. И городыс зэв, мый колö, котöрт и тэнат! Мунам!

— Кытчö ме муна? — гажтöма горöтчис Андрейыс. — Энö кытчö коля? — мыччалiс пызан увтiсь Ванькаыслань, кöда кыскасис джоджас, синнэс був-бав, рожаыс сьöд и ачыс вешьянтöм, кынöмыс кыз, мый шедас джоджсис, сiйö и öмас.

— Мунам! Отирыс олöны, и ми пондам овны, а эстöн... Колхоз... А мый сэтiсь? Öтiк пондас уджавны, а сизима сёйны.

Вот тэныт и волисполкомись пред, вот тэныт и Прокопьевич, кöр тöн гардiс öтöрö, а талун кыскö мöдöрö ни.

— Повзин?! — эта коста Прокопьевичыс нерис Андрейсö. — Думайтан татöн оланыс лоас? Оз эд! Сiдз и этадз, не талун дак ашын сюртняласö колхозас. Быдöнöс нуöтасö гортсит: вöвтö, мöстö, курöггетö оз кольö. Некинöс, мыся, оз кольö! Поди, и иньтö пышшöтасö, мать твою... — серöмтчис, пондiс видзöтны Лизаыслань, кöда мыгöрнас учöт, кöсыник, но эн кутчись!

Синнэс вирдыштiсö инькаыслöн, да пишнитiс:

— Кинöс?! Менö я мый я?! Ми ышö видзöтам! А тэ, Пестер, ассит «тупöсьтö» колхозас козьнав, а йöз иннес вылö кырныш моз эн гольксьы, еныс чарöтас!

— Некинöс, мыся, оз кольö! — чорытжыка шуис Прокопьевичыс. — Не мöс, не вöв и каннесö öтлаö жö — росöн чышкасö! Сэтшöм политика. Постановленнё. Менö сы понда районас и корлiсö. Сэтчин уна эз баитö, юалiсö жö: «Прокопьевич, тэ колхозсö кöр ни чукöртан? Мыля етша отирыс пырисö колхозас?!» А ме сэтчö и горöтчи, мыся, ме эд росöн колхозас отирсö ог чышкы, кинлö колiс, сiя пырис ни. Жагвыв сэтшöм уджас... «Но, а ачыт?» — юалöны. «Кытчö?» — бытьтö ог вежöрт. Нiя: «Кыдз кытчö?! Колхозас!» Öнджа... ― ме сэтчö öши, мыся, сельсоветын уджала эд... А нiя: «Ах, вунöтiм! Но сэк талунсянь сельсоветас он понды уджавны, марш колхозö!» Сiдз вöлi, вонö, а тэ... Талун ёрт, а ашын враг, а врагыслö туйыс веськыт — Сибирь! Мый сiдз видзöтан?! Он верит?! Отирыслö бы бурсö керан, а врагö кольччан. Мунам, Öндрей, кытчöдз эз доддялö да врагöс моз эз иньдö кузь туяс.

— Ме сылö муна! Ме сылö... — лельгö Лизаыс. — Ась челядьсö котомаö тэчö да понпияннэз моз сьöрас кыскö, а ме гортын ола!

— Муна! — сэтöн матькыштiс Андрейыс. — Тiян коддес вылö нем видзöтны! — синнэс вирдалöны, лёк мужикыс. — Нагладь муна. Поди, метöг невна пиннет ныжмасö.

Висьталiс и керис, кöть майöг юр вылас лöсйы, бöр оз ни берт: асывнас одзся-одз, кöр эшö пемыт, мед некин эз адззыв. Андрейыс да Прокопьевич пуксисö вöввез вылö и — адззисьлытöдз! Иньдöтчисö кузь туйö, кыдз öшисö посадсиныс — вöлiсö да эз лоö.

Лизаыс курччöвтiс тырппесö, но эз понды горзыны, эз шу, что тэныт, мужик, бур туй, а ньылыштiс дульсö, кутiс Рыжкосö, кöдалö нёльöдз год ни, но етшаись эшö доддявлiсö, доддялiс няридзö, сэтчö пуктiс гöр и мунiс гöрны.

Тулысыс гажа. Шонтiс.

Сьылöны ыбшаррез, рытланяс кöкö кöк. Гажа. Сьöлöмлö колö бы быркайтны моросын, нетшкöвтчыны бы да уджавны — öтiк лунöн бы гöр да кöдз, но инькаыслöн уджыс мужикыс удж моз оз пет, оз пизь. Нинкöммезнас кок увтсис бороздаын лойö нять, гардö сiйö подолыс бердö, сiйö и керö ньылöмсö кымöсыс вылiсь чышкö йöрнöс соснас, ыксö вöлыс вылын, бытьтö Рыжкоыс нач оз куж ветлöтны бороздаас, бытьтö вöлыс виноватöй, что гöрнытö сьöкыт.

Уджалö Лизаыс ыб вылын, асьсö видö — смерть корö, вöзйисьö мöдöр югытас, кöр кодя оланыс эз вöв и, натьтö, оз ни ло, кöр колис мужикыс, и öтнас колö быдтыны челядьсö.

Гöрö инькаыс — ньылöмнас миссьö, сьöлöмыс чеччöвтö бы öмöттяс, гортö кыскö, думаэз вийöны: «Кыдз сэтчин челядьыс?! Мый гортын öтнаныс керöны? Тэ сэтöн пессян, а нiя кутасö да öзтасö керкусö или каясö полатяс, сэтчинсянь усясö да чегасö кинысö или кокнысö... Ен батюшко! Кыдз жö овны одзлань?!» Думаэс уджысся сьöкытжыкöсь, сiдз бы быдöс и колис, чапкис и котöртiс гортö, но видзöтö отирыс вылö, кыдз нiя гöрöны öтiк бороздаын — колхозын уджалöны, и стыд лоö, что сiя öтнас пондас шатласьны гортö да ыб вылö, ыб вылö да гортö, а кин пондас сы местö гöрны? Кин керас уджсö, кöр быд часыс дона? И уджалö инькаыс öт пемытсянь мöд пемытöдз, некин сьöрись уджнас оз кольччы.

Чожа чулалö лун, кыдз бытьтö Лизаыс вылын сералö. Инькаыс рытнас юскö вöв, пондö пуксьыны бы Рыжкоыс вылö, но гардыштчöны коккес и нятяс нюжалö вöлыс бокö, кытiсь чеччö бы и чеччыны оз вермы — оз кывзiсьö мыдзöм кикокыс.

А кöкыс кöкö, гажöтчö, ошшасьö оланнас — ошкö гажа кадсö. Обида пурö Лизасö, что сiя кöкыс моз жö öтнас, колö уджавны, но оз вермы. Синваэс пондöны зэлöтны горшсö, пöдтöны. Горзöв-керис, модьö: «Мыля ме вылын еныс и сералö? Мый ме сылö умöльсö и кери? Пыр öтнам да öтнам...»

Сьылöны каёккез, больгö шорок, муыс лолалö шоныт руöн, а инькаыс горзö и топ сылiсь кинкö юалö ни: «А мужикыт кытöн?! Мый керö Андрейыт? Мыля тэ гöран?»

Инькаыслöн петöны синваэз, ньылалö сола дульсö и шуö: «Сэтшöм мужиксö бы... Эм кöть абу... И мыля сiя менам, а не мöдiклöн?»

Гажöтчöны-сьылöны каёккес, ошкöны тулыссö, а гöрисьыс вöлыс бокын нятяс нюжласис-керис, жагвыв чеччис, вöвсö поводöттяс нуöтiс мыр дынö и мырыс вывсянь вöлись пуксис Рыжкоыс вылö. Кöть и мыдз Рыжкоыс да ылöса, топ морт, быдöс вежöртö, кывзiсьö, кöть вид, кöть вартлы, оз пышшы, оз зурась, а уджалö и уджалö. Вöлыс вылын пукалiкö инькаыс видзöтыштiс шондiыслань, кöда öшалiс кöз йыввес вылын ни.

Бобгисö таррез, муыс кага моз лолалiс небыт да шоныт руöн, лöсьöтчис тулыссянь ни отирсö вердны бур няньöн, и Лизаыслöн бöра петiсö синваэс, кöр лун нырьясис-гöрис и сьöлöмыс пондiс гудыртчыны, что умöля гöрис: пласт пласт вылö абу водöм, топ мусö порсь нырьялöм.

Тулысыс путриктiс, гажöтчис, рыт и асыв сьылiсö кайез, а инькаыс рыт и асыв горзiс да быд вынсис уджалiс, уджнас вöтчис бы отирыс сьöрö, но вöтчынытö эз вермы: йöзыс унаöн — колхоз, а тэ öтнат — единоличник и мырсян, кыдз пезинын кай, некинлö он ков, некин тэнö оз адззы и оз жалейт.

Тулысбыт кöкис кöкыс, кöда видзчисьтöг Картабöр видзыс вывсянь лэбзяс чом юрыс вылö и сэтöн нерö инькасö: «Ку-ку, пуктi! Ха-ха!» Морт моз сералö, морт моз кöкыс ошшасьö, что пуктiс и, натьтö, кузь бöжыс весь чомыс вылын оз кöк, натьтö, висьталö мыйкö умöльö... Кывзö кöксö инькаыс, пурöны думаэз, узьны оз сетö, кöть и луннас кок вывсис усьтöдз уджалас, кöр рытсяняс водас да ланьтö, узьыштас мымдакö, сыбöрын саймис и пондö думайтны, кыдз бы чожажык кöдзны, кыдз бы отирыс моз жö овны, быдтыны бы челядьсö, сэтöн жö бергалö мужикыс гöгöрын, ась кöть сiя кытшöм, но мужик эд, кöть сыкöт сьöкыт, а сытöг эшö сьöкытжык.

Тулысбыт кöкыс сьылiс да олiс, а инькаыс горзiс да уджалiс. Сэтöн и гожумыс вöтiс: дзар керин, колö мöдiк удж бердö ни кутчисьны, а кöдзнытö быдöс сiдз эз и вермы, кöть позис бы эшö гöрны да муас чапкыны сю тусьсö, но мыйлö ни, кöр чулалiс ни Миков луныс, и арнас не зöрыс, не идыс оз ни воö...

«Ась, — думайтö Лизаыс. — Мый лоас, сiя и лоас... Тшыгйöн, поди, ог жö пондö овны».

Вöрыс вылын листыс потiс, видззес вылын туруныс быдмис вершок сувда, колхозаныс кöдзсис, а Лизаыс сё ветлöтiс медбöрья му дорö: колхозниккез сьылiсö да уджалiсö, а сiя горзiс да мырсис. Инькаыс уджалiс мужик моз и адззис, что колхозас уна кокнитжык оланыс, что мымда бы тэ öтнат эн мырсьы, но одзлань этадз овнытö оз туй — отирыскöт жö колö, и Лизаыс талун жö бы котöртiс ни да юрбитiс колхозниккеслö, кеймис, медбы примитiсö колхозас, но думаэс жö бöра полöтiсö, видiсö и стыдитiсö: «Мужикыт пышшис, а тэ мунан вöзйисьны... Мый тэныт отирыс висьталасö? Веськыта эд быдöн шуас, что тэ нылö он ков.» Сiдз да не сiдз, кöр талун öтнат, а ашын бöра жö öтнат, некин тэнö оз жалейт, оз шу, что тэ, ожо, сулав, эн тэрмась, ме локта да отсала...

Сизимись ни думаэзнас öтпöв и мöдпöв олiс ассис олансö, сизимись öшлiс и кералiс да бöра öшлiс быд лунсö, но сiдз и этадз эд колö мунны колхозниккес дынö... Котöртны Кипрейыс дынö, кöда колхозас предöн, кöда асныра, но оз я вежöрт, эд кöркö дружитлiс Андрейыскöт. Лизаыс думаэзнас öддьöн надейтчис Кипрейыс вылö, сэтчин да татчö, вермис полöтны думаэсö, и öтiк рытö иньдöтчис Кипрейезас, кöдна олiсö лунвыв улицаас, посадныс конецын моз ни.

Кипрейыс вöлi гортас. Сiя пукалiс пызан сайын, порсь моз нятшкис-сёйис пöжалöм картоввез, юис туисiсь юан да горзьöтлiс.

Лизаыс пырис преддэзас, висьталiс: «Здоровöн олат», полöмöн сувтыштiс порогыс дорö, но хозяиныс, кыдз пукалiс пызаныс сайын, топ мöртöм нырсö пызан пöлас, сiдз и пишкис да нятшкис картоввесö — не юрсö эз лэбты, не кымöсыс увтöт дзар эз кер, дзик керкуас некин эз пыр.

Лизаыс сулалiс преддэс порог дорын, сьöкыта ловзисис, кыдз нач йöз — йöз деревняись, йöз морт.

— Тэ мый?! Виньдiн я мый я?! — Кипрейлö комсянь ыкöстiс иньыс. — Он адззы морт пырис!

Хозяиныс шы эз сет. Инькаыслöн сьöлöмыс повзис, тук да тук.

— Порсь! — висьталiс Кипрейлö иньыс.

— Но и мый?! — эрзыштiс пызаныс сайын мужикыс да лёка видзöтыштiс комлань.

— Тэ кодь поныскöт уна он баит, — обидитчис предыс вылö иньыс, и Лизаыслö ни ласковöя висьталiс. — Пуксьы да шоччись, сэтшöм öнджаыс вылö эн видзöт. Не мортыслö...

Кипрейыс пишкис пызаныс сайын, а инькаыс сулалöв-керис порогыс дорын, смевмöтчис-керис да не смела пондiс баитны:

— Кипреян, ме эд тэ дынö... Весь эг лок... Öнджа эд... Сивöй Тараканыс, видзöт, колис челядьнас и ог тöд мый керны, кыдз овны, кытчö воштiсьны... Юрöс кöть талун жö петляö сюйышт. Уджавны колö, а öтнам... Гöрнытö ог куж! — пондiс пильскыны.

— Сiдз, дева! — комсянь петыштiс Кипрейлöн иньыс и пондiс жалейтны Лизасö. — Кыдз тэ мужикыстöг и олан? Мый и керан? Челядьнат... Локтас кö турун кераныс, сэк эд вöлись!

— Сiдз и ола... Синваэзнам мисся да бöра... Сiйöн и локтi! Кипреяныс дынö, мыся... Оз я примитö колхозас? Кокнитжык бы öтлаын эд...

— Примитасö! Мыля оз примитö? Ми инькаэскöт важын ни эта йылiсь баитам. Примитасö! — Кипрейикаыс пондiс гажöн баитны мужикыс местö, а Кипрейыс кывзыштiс, пызаныс сайын юрсö лэбтiс да висьталiс:

— Ме тiянлö абу Кипрей, а Кипреян Васильевич! «Вот кыдз! — Лизаыслö юрас вачкис дума. — Вот кыдз...

А ме... Эх, Сивöй Таракан, мыля менö тэ понда оз радейтö?!»

— Тьфу! Адззисьöм роч. Начальник! — сьöвзис джодж шöрас Кипрейыслöн иньыс.

— А кыдз тi думайтат?! — горзьöтiс предыс и топ сьылыштiс. — Гутöн моргöн и гутöн таг! Мед колхозас не пырны бы, а тэ ветлöтан...

Кипрейезлöн Андрейезся буржыка эз олö: выланыс сiя жö дöраись вурöм йöрнöс-вешьян, джоджныс сэтшöм жö нятьöсь да ёгöсь, керку стенаэс бусöсьöсь, коккезаныс нинкöммез, и тараканнэз котрасьöны жö пызаныс вылын, сiя жö пань-бекöрыс предыс одзын, но мый керан? Пред эд Кипрейыс! Начальник! Нырсö вылына видзö, умöль мортыскöт оз бы баит. Вот эд оланыс кыдз тшыкöтö отирсö.

— Кипреян Васильевич, отсалiн бы... Грех оз ло... Кипреян Васильевич пишкис да сёйис, видзöтлiс öшынöт öтöрлань, бытьтö öтöрас кинкö мортсö видзчисис — некöр сылö, некöр, а тэ!..

Инькаыс адззис эд, что некöр предыслö, но надейтчис, веритiс отирыслö, öддьöнжык Кипрейикаыслö, кöда висьталiс ни, что примитасö колхозас, но предыс сёйис-керис, лэбтiс юрсö, лöга пондiс видзöтны порогыслань и пиннес пыр шуис:

— Адззисьöмась!.. Мужикыт сы понда и пышшис, медбы колхозас не пырны, а тэ ветлöтан... Кошшан аслыт шоныт да пöт олансö! Ме бы тэ местын мужикыт сьöрö жö оськöвтi!

Мый эта бöрын предыслö висьтавны? Кыдз эшö мортыскöт баитны? Лизалöн бöра синнэзсис чепöссисö синваэс, сулалiс йöз порог дорын, горзiс да эшö кеймисис предыслö, медбы сылiсь жалейтiсö челядьсö, быдöнныс эд быдтiсьöны, но Кипрейыслöн чужöмыс кытшöм эм сьöд каб, сэтшöм и кольччис, кылiс да эз, адззис да не инькасö, пишкис пызаныс сайын, юрсö бергöтiс öшынлань и öтöрсис видзöтiс топ мыйкö донаö.

— Тэ поныскöт эн баит, — Лизаыскöт сёрнитiс Кипрейикаыс. — Сэтшöмыскöт... — Отирыс дынö мун, отирыс мый висьталасö, сiдз и лоас.

— Ага, висьталасö... — керыштiс предыс, швыркнитiс-чеччис пызаныс сайись и öтöрö! Топ керкусис вашöтiсö шатьöн.

Лизаыс петiс бöрсяняс. Öтöрас пондöм поснита зэрны. Шоныт. Но инькаыс öнi нем эз адззы и эз кыв, гудыра думаэзöн, кыдз öшöм, мунiс гортö, шагнялiс-öвтчис улицаöт и сэтшöм ни вöлi мыдз, сiдз ни етша вöлi выныс, что кытчö падмас, сэтчö и усьö да бöра чеччö. Мунiс-öвтчис, локтiс гортö, кытöн видзчисисö челядьыс.

Керкуас сунлабич дынын пукалiс Ванькаыс, гуддис нырсö да видзöтiс мамыс вылö, кыдз шогалiс и горöтчис:

— Мам, ме бы сёя.

— Мый бы сёян? — мамыс малыштiс зоныслiсь юроксö.

— Йöв бы сёя.

— Пукалышт, ме пета да чилькöта Сьöданьканымöс и тэнö верда.

— Мун, мам, — ыджыт морт моз баитiс Ванькаыс. — Ме видзчися, а Колькаыс, видзöт, тшыгйöн онмöссис.

Сёр рыт. Мамыс босьтiс подойница да карта вылö! Чилькöтiс мöссö да чожажык керкуö, а зоныс сё пукалö сунлабичыс бердын: чужöмыс нятьöсь, йöрнöсыс лякöсь, киэс нятьöсьöсь жö — нятьыс пытшкись топ оз и тыдав, но мамыслö некöр зонсö миссьöтны, некöр банясö лонтны...

— Мам, а тятьным кöр локтас? Ме бы сыкöт вöвнас ыслася. Гöрны бы кыкöн мунiм, а тэ бы шоччисин, — шуö Ванькаыс, кужö ни жалейтны мамсö.

— Локтас, — кывсö курччöвтiс мамыс, дульсö ньылалiс да зонкаыслö бекöрö кисьтiс йöв, киас сетiс пань.

— Мам, ме öтнам ог сёй.

— Мыля?

— Тэкöт сёям.

— Некöр менам.

— Кыкöн мам. Тэнат эд кынöмыт сималö жö.

— Пуксьы сэк пызаныс сайö, — висьталiс мамыс, ньылыштiс дульсö, но сьöлöмыс вылын лоис кокнитжык.

— Мам, а мам, — йöвсö паньыштiс Ванькаыс. — Тöдан жö мый... Ме чожа ни быдма и тэныт понда отсасьны. Ачым вöвсö доддяла и муна гöрнытö. Вот адззылан!

— Сёй да чожажык быдмы, — висьталiс мамыс и ачыс думайтiс: «Зон тэ, зон... Öнi отсасян, а быдман кö, поди, мамыт вылö дзар он понды керны.»

Сiдз и лоис: Ванькаыс велöтчис, велöтчис и только ештiс петны школасис — война! Парта сайсянь — фронт вылö и сэтчинсянь пыр гижис письмоэсö: «Мам, тэ ме понда эн горзы, чожа ни врагсö вермам, и ме локта гортö, сэк ме тэныт висьтася, кыдз тышкаси врагыскöт, кыдз вештiси Колькаыс понда, кыдз шедлi штрафнöй ротаö, но кольччи ловйöн. А öнi ме лейтенант — командир... Мама, чожа ни, чожа... Берлиныс тыдалö ни...» Тыдалiс ни Берлиныс, матын ни вöлi Победаыс, но сiйö эз адззыв Ванькаыс, и мамыс зонсö эз адззыв...

Ашынас луныс вöлi сэтшöм жö, сiдз жö одзся-одз кыдз луныс пуксис Лизаыс пельпоннэз вылö, шутньöвтiс да вачкис шатёкöн, кыдз инькаыс гöртöнняс шутнялiс да вартлiс вöлыслö, и уджав инька! Лунтыр гöр да видзöтлы шондiыс вылö, медбы талун уджалансяняс локны одзжык, сiдз кыдз рытнас шуöны чукöртасö колхознöй собраннё и оз я эта собраннё вылын тэнö примитö колхозас. (Предыс будзгылясьö, матö бы оз лэдз, но инькаыс надейтчö отирыс вылö.)

30

Лизаыс уджалiс да видзöтлiс шондiыс вылö, юскисис одзжык, одзжык ыб вывсянь локтiс гортö, вердiс челядьсö, чилькöтiс мöс, вежис вывсис паськöмсö и иньдöтчис правленнёö, ачыс сё думайтiс, что, поди, весь тэрмасьö, кöр вöтасис умöль вöт, бытьтö сылö вöтöн öшын увтаныс пантасис Ольöпыс, и сэтшöм ни корисьыс лоöм басöк, сiдз ни пасьтасьöм, что некöр бы эн думайт, что мортыс ветлöтö кортöн. Ольöпыс топ лöг Лизаыс вылö и шуö: «Э-э-э, единолишнича! Вичкусö разит, да думайтат еныс оз адззы! Адззö еныс, и эн думайт, что тэнö колхозас примитасö. Он тэ ков отирыслö!»

Öнi инькаыс мунiс правленнёас и думайтiс аслас вöт йылiсь: «Мыля жö бы Ольöпыс сэтшöм? Етша разь вердi и юкталi пöрисьсö? А öнi видзöт жö...» Инькаыс мунiс да видзöтышавлiс рытся заряыс вылö, кöда мылякö вöлi вывтi ни гöрд, думайтiс вöт йылiсь, сыбöрын öвтыштiс кинас: «Но сiйö...» Эна думаэзöн локтiс правленнёö, кытöн эшö отирыс эз вöлö. Правленнё джодж шöрын жöдзис предыс, сiя бöра видзöтыштiс Лизаыс вылö и лёка шуис:

— Бöра локтан? Эн лок. Он миянлö ков!

— А ме тэнчит, Кипреян, ог юась! — паныт кыввезнас лыйис инькаыс. — Мый отирыс висьталасö, сiя и лоас!

— Мый ме висьталi, сiйö и отирыс висьталасö... — Кипрейыс öмас заргис чунь йывсö, пондiс курччавны гыжсö да чывкйыны джоджыс шöрын, ачыс пишкис нырнас да модис:

— Гутöн моргöн! Мун гортат, котöрт!

Лизаыс предыскöт сэсся эз понды эргисьны, а петiс керкусис, сувтiс посöдзыс дынö и пондiс видзчисьны отирсö.

Эта коста посадыс весьтö öшöтчис кизерик кымöрок, лоис ыркытжык, руыс кокнитжык и рожабаннэзö павкисö поснит зэр воттез. «Слава богу, ась зэрыштö!» — инькаыс радмис, пондiс видзöтны Игнат вылö, кöда дженыт коккезнас перыта локтiс правленнёыслань, сувтчыштiс посöдзыс дынö, шуис:

— Здоровöн олан, сваття! — шынньöвтiс, юалiс. — Мый нö зэр увтас сулалан?

— Ыджытжыка бы эшö быдма, — шынньöвтiс жö инькаыс и смела ни исполкомсис предыслö шуис. — Игнат, мый нö мекöт пондат керны?

— Мый пондам керны? — кыдз эз вежöрт Игнатыс. ― Мыйкö пондам керны, — серöмтчыштiс. — Поди, жöник сайö сетам?... Или гöтралам? — сэтöн жö мöдöрö чукыльтiс. ― Но, но, тэ бöра эн лöгась, ме эд серала... Колхозас жö, натьтö, эд пондан уджавны...

— Спасибо да спасибо тэныт, — инькаыс сiдз бы и уськöтчис Игнатыс одзö да пондiс юрбитны, но мöдыс лöгасис кодь и шуис:

— Тэ, сваття, этö... Отирыслö юрбит, а меным мый вылö? — шуис и пырис керкуас.

Мымдакö эшö чулалiс кадыс, и правленнёö пондiсö локны отирыс, медодз мужиккес, сыбöрын инькаэс, и быдöнныс Лизаыслiсь юасисö, кыдз ни олö да мый керö, эд уджалö пыр öтнас, а нiя — артель, колхоз, мый пондасö керны, керасö — öтiк удж бöрсянь кутчисьöны мöдiк бердö, а тэ пö мый? Пыр пö колхозас!

— Ме сiйöн и локтi, — гажöнжык ни баитiс Лизаыс, колхозниккес бöрсянь бöра пырис керкуас, шыр моз ыбöсыс дорсянь заргисис медбöрас, шлапкисис лабичö да топ и эз и понды лолавны, а Кипрейыс пукалiс пызаныс сайын смев да гордöй. Предыс эшö öтпыр синнэзнас отирыс коласiсь кошшис Лизасö, но эз адззы, курччалöв-керис гыжжесö, ньылыштiс дульсö и шуис: «Пондöтам нö собраннёнымöс, но кин жö пондас гижны протуколсö и преднас кин лоас?»

— Ачыт гижан и баитан, ― несьö сералiс, несьö лöга висьталiс Тима Васька, кöдалiсь уна он босьт: мый синнэзас, сiя и öмас. — Миян моз эд луннас эн уджав, гижан...

Рыг-рыг серöмтчисö отирыс. Пондöтчис колхознöй собраннё. Пызаныс сайö пуксис Игнатыс, и этасянь Лизаыслöн сьöлöмыс гажмис, лоис кокнитжык, сiя эта минутасянь кытiськö кыдз мезмис и пондiс кывзыны быд кыв.

Медодз баитiс Игнатыс, кыдз овсьö йöзын, мый керсьö районаныс, кыным колхоз ни чукöртчисö ылын и матын, кыдз кöдзисö, пондiсö ни керны тöв кежö турун и вöлись пондiс баитны, что нылöн колхозаныс кöдзсис жö аскадö, тыртiсö жö план, но погоддяыс мешайтö!..

— Мый погоддяыс?! — сэтöн шыасисö мужиккес коласын. — Погоддяыс овлö ышö не этатшöм... Сэтшöм, кöр и öтöрас оз туй петны, но пыр тай кöдзлiм, турунсö керлiм, а таво пондiм норасьны погоддяыс вылö, повзим...

Быль: кöс таво гожумыс, кыдз кöдзисö, сысянь зэррес эз на вöлö, а колö бы зэрыс, но абу (нем тöння да талуння зэрсö лыддьыны, кöр зэрыштiс лысва местö).

— Сьöкыт годыс, — висьталiс Игнатыс.

— Сьöкыт, — сёпкö Кипрейыс.

— А кöр кокнит овлö? — кузь нырнас вирскыштiс Егор. — Натьтö, колас сюромкаэс йылiсь вунöтны...

— Ог кулö сюромкаэстöг! — висьталiс Тима Васька — чорыт морт, кöда и праздниккезö грехö пырö — уджалö, бытьтö сылöн пыр ендö уджыс и пыр нем сёйны. — А вот, öнджа... — тэчöмöн баитö Васькаыс, рожабаннэс гöрдöтiсö, голосыс чиння. — Кöдзнытö то кöдзам и ытшкисям, медбы только вöлi мый ытшкыны, а вот висьталö, преддэз, мыля жö бы куканнес кулöны гожум шöрнас? Сёяныс оз тырмы, али... Отирыс моз жö писти кокалö? И эта... — резгис-висьталiс мужикыс, топ быдöнся ылöсажык. — Ета, мыся... Проша Иваныс, мыся, вöвсö вöдитö сё кыдз ассис, бытьтö колхозас эз и сетлы! Мыля вот, öнджа, меным бöр ассим Гнедкосö од сетö? Ме бы кужи жö сiйöн уджавнытö!

— Василий Тимопеевич! — сэтöн то местасис чеччöвтiс

Öльöксан. — Василей Тимопееч, тöдан жö! — öмас шыд пуö, сiдз баитö. — Мый тэ пондiн бöрöн кайны менам сват вылö?! Жаль лоис Гнедкоыт, кöр сватö гöрис тулыснас? А мый керны? Кытчö, мыся, воштiсьны, кöр менам вöлö жаль жö, видзöт, тöн ышö асьным вердiм и юкталiм, а талун кутас кытшöмкö зырымöсь куль и ысласьö, а ми видзöтлам!

— Öльöксан! Тэ юрнат думайт да вöлись баит! Ме мортыс веськыт. Кöть бы Воронкоыт бур вöлi! Вöв разь колхозас сетiн?! Кукань эд колхозаным тэнчит доддялiсö, а бур вöвтö кытчö воштiн?!

— Кытчö воштi?! — чирзыштiс Öльöксаныс. — Кулiс тай!..

— А ме думайтi чиганнэзлö вузалiн, — яд кывнас гардыштiс Васькаыс.

— Ме ог тöд... — öшис Öльöксаныс. — Поди, тэ чиганнэскöт тöдчан, а ме ог. Колхозас, тай, вöв кодьö жö сетi, а öнi вöлыс вылö оз вачкись... Мöсö ни пöртiт... Тьфу! Кöзяиннэз! Баляэсö од кужö вердны, а ышö вöввез! — пондiс сьöласьны мужикыс.

— Асьтö тöд!

— Тырмас, ёрттэз, — рамыника пызаныс сайын горöтчис Игнатыс.

— А мый тырмас?!

— Оз тырмы! Сетö бöр вöввесö асланым киэзö, пондам уджавны колхозас, а вердны гортын!

— Тiянлö мый шуисö?! — пызан сайын чеччöвтiс Кипрейыс. — Тi баитö да тöдö мый баитны! Али эта... Кулаккес сьöрö жö вöтчат бы?!

Мужиккес лöнисö.

— Колхозаным бригадир колö, — бöра шыасис предныс.

— А Öсипыслöн Васькаыс мый?! — бöра кылiс Тима Васькалöн голосыс.

— Ыть тэнö! — серöмтчыштiс Öльöксаныс. — Юав жö Öсип Васькаытлiсь кöдöрсянь доддялöны вöвсö, оз эд тöд. Оз! А тэ бригаде-е-ер! Адззöмась бригаде-е-ер... Натьтö, оз тöд мый гортас пусьö-пöжсьö, а тэ бригаде-е-ер!..

— Покась! — сьöвзис коккес увтö Якуня Ваня. — Якуня Ваня, мыся, мужиккез! Стыдитам асьнымöс. Колхозным, öнджа...

— Мый колхозным?! — обидитчис Тима Васькаыс. — Мый колхозным?! Да ми ышö мыччалам этаэслö... Адззыласö...

— Адззыласö, Якуня Ваня, ага... Кöр нем ни лоис буржыксö мыччавны.

— А тэ, Якуня Ваня, баит да тöд мый лёбнытö! Öмтö осьтöн пыр эн видз, кулаккес одзын эн йöкты, видзöт...

— Ме?! — фуражкасö чапкис коккес увтö Якуня Ваняыс. — Ме!

— Мый нö? — голосыс чорзис Игнатлöн. — Мужиккез, мый нö бöра сiдз пондiт пурны öтамöднытö?

— А мый нö! Öнджа эд, Игнат Ильич! — Кипрейыс пондiс курччавны гыжжесö. — Бригадир бöрьям, а нiя... Öсипыслöн Васькаыс не морт я мый я? Оз гленитчы, сiя и басни: «Öсип Васька, Öсип Васька... Сiт фуражка!» Но и вот, на видзöт... Кöдöрсянь тöв...

— Кхе, кхе, — пызаныс сайын öшис Игнатыс. — Тэ вот сiдз, Кипреян, думайтан, а отирыс, кывзы жö, мый сьылöны...

— Мед сьылöны... Оз кö понды сьывсьыны, сэк вöлись и пондасö горзыны, а ме ассим висьталi! — чатыртiс юрсö и пондiс видзöтны потолокö колхозсиныс предыс.

Правленнёын лоис жар, кöть вывсит йöрнöс чöвт, руыс уль. Пемыткодь, но тыдалö, бисö оз öзтö. Мужиккес сьöкыта лолалiсö, кыдз вöввез, кöдна уджалiсö-уджалiсö и на тэныт, нiйö жö вартлöны шатьöн. Но и ась вартлöны, ась предыс бригадирсö и бöрйö да уджалö!

Правленнёын собраннё, колхозниккес бöрйöны бригадир, а öтöрас зэрö и оз, и ашын колö бы быдöнныслö чеччыны одзся-одз, ештöтчыны и котöртны уджавны.

— Мый нö сэк? Мый пондам керны? Вермас я Öсип Васькаыс уджавны бригадирнас? — юасьö Игнатыс.

— Мед уджалö! — ыкöстiс Тима Васькаыс, кыдз мездöтчис шогись. — Мед, мыся, уджалö, кытчöдз колхозныт оз онняюртчы!

— Онняюраыс мöдпöв оз ни онняюртчы, Якуня Ваня, ― негорöн шыасис Якуня Ваняыс и хитрöя пондiс видзöтны инькаэслань.

— Сэк голосуйтам, — виноватöя пондiс шыннявны пызан сайын Игнатыс.

— А-а-апчи! — несйис Тима Васька, долоньнас чышкис öм гöгöрсö и одзлань эз понды шыасьлыны, а мужиккес ружтiсö, топ нiйö сёйисö тойез, но гыжьясьнытö отирыс син одзын стыдитчисö.

— Инькаэз! Мый пондам керны? Мый од голосуйтö?! — инькаэслiсь ни юалiс Игнатыс.

— Тив-тив, коллектив! Пороз Микаль сомустил, а Öсип Васька покастил, — видзчисьтöг кокнита сьылыштiс жö Тима Васькаыс частушка, кöдö посаданыс ештiсö ни сочинитны, кöр колхозас медодз пырис Пороз Микаль, а сы сьöрö вöтчис Öсип Васькаыс — осьтiсö кыкöн туйсö отирыслö, но асьныс... Кытшöм дышöсь вöлiсö, сэтшöмöсь и кольччисö.

Серöмтчисö отирыс, кинкö гажöн сэтöн жö шуис: «Голосуйтам, мужиккез!» да лэбтiс кисö вевдöр, мöддэслö топ сiя и колiс — киэзныс сяр, вевдöрын жö.

Правленнёын лоис жаржык, кыдз баняын ни, быдöнныс öддьöн пымалiсö, лолалiсö сьöкыта да видзöтлiсö ыбöслань, кöда вöлi осьта, и öтöрсянь бизгисö-пырисö керкуас номмез.

Рытыс чулалö. Öтöрас пемытыс сукмис. Пызан вылö öзтiсö лампа.

— Мый нö ышö, Якуня Ваня? — мыдзис ни пукавны мужикыс.

— Нем абу, а вöвсö сiдз менчим эз и сетö аслым уджавнытö! — лöгасис Тима Васькаыс.

— Иньтö доддяв! Сы вылын ыслась.

— Мый менам иньыс?!

— Оз кö ков, меным вай, ме доддяла, Якуня Ваня! Сiдз бы и пурсьöны мужиккес, сiдз пиннезнысö и кеслöны.

Игнатыс пызаныс сайись петалiс öтöрö, олыштiс-ыркöтчис посöдзын, пырис бöр да Кипрейыслö висьталiс, что сiйö корöны телефон дынö, трингöны пö районсянь, но телефоныс только сельсоветын.

— Кинлö да мый колö?! — мурзьыштiс колхозсис предыс, кöда талун рытывбыт ни лöг, ачыс оз тöд кинöс бы пурö, и эшö сэтöн жö телефон!..

— Ог тöд, — висьталiс Игнатыс. — Öнджа тай, звонитöны...

— Невеста корö, Якуня Ваня! — гажöн висьталiс Якуня Ваняыс.

— Кытшöм невеста?! — ыбöсыс дынын ни мурзьыштiс предыс.

— Сюра бöжаыс...

Петiс правленнёсис предыс, и мужиккес пондiсö вöрöтчыны.

— Ёрттэз! — гажмис Игнатыс и кылыс пондiс бергавны кокнитжыка. — Миян эм ышö öтiк вопрос. Эта...

— Чожажык, Игнат!

— Эта... Öтiк морт бы ышö пырö колхозас, да предныт оз бы примит.

— Гы... — бöра медодз шыасис Тима Васькаыс. ― Öндрей сватыс Пестерыс сьöрö жö вöтчис да, а иньыс сэтöн и эм...

— Мый керны? Ассит эд юртö Андрейыслö он сет, а инькаыс челядьнас öтнас.

— Сiя и эм, штö нем он кер, то бы кут, вешьянсö лэдз да лöсйы кыдз колö!

— Мый сэк?! — тэрмöтiс Игнатыс.

— Мый сэтöн модьны? Ась öтлаын уджалö, гажажык лоас! — висьталiс сiя жö Тима Васькаыс.

— Правильно, Якуня Ваня! Колхозсö эд öтнанымлö ог керö, пода моз пондiм дык пода моз и олам ни...

Лизаыс нето лоис рад, нето сылö лоис умöль: юрыс бергöтчыштiс и пондiс чышкыны синваэсö.

— Голосуйтам! — шуис Игнатыс, а отирыс топ важын ни сiйö видзчисисö — киэзныс лэбтiсисö вевдöрö.

— Сiдз, — Лизалö шуис Игнатыс. — Талунсянь — колхозница. Мун да уджав отирыскöт öтлаын. — И отирыслö ни висьталiс. — Ёрттэз, талун быдöс баитiм, поди, тырмас сэсся? То бöра эд ашын колö уджавны.

Мужиккес тэрмасисö, юррезнысö пондiсö вевттьыны фуражкаэзöн, инькаэс тура-тара баляэз моз уськöтчисö бы ыбöсö, но сэтöн, швырк! Сельсоветсянь локтiс колхозсиныс предныс и порогыс дорсянь жö пиннес пыр ыкöстiс:

— Тi кытчö?!

— Мый сэсся? Нем сэсся, — топ öшис Игнатыс. — Тай, öнджа... Колхозас примитiсö Лисавета Ивановнаöс.

— Кинö-ö-с?! — повзис Кипрейыс. — Мыля?!

— Отирыс эд, — шыннялiс Игнатыс.

Кипрейыс чывкнитiс пызаныс дорöдз и пондiс йирны чуннезсис гыжжесö, а отирыс петiсö правленнёсис.

31

Октябрьскöй праздник панытö Андрейыс локтiс Лысьвасянь. Сiя вöлыс одзын мунiс подöн, а бöрсяняс поводöттяс кыскис Гнедкосö. Вöлыс и мортыс мунiсö да шатласисö ― пöльышт и пöрасö! Сiдз ни нiя мыдзöмась да умöльтчöмась, что Гнедокыслöн лы да кучик, ковкаэс вылö öшлы пестеррез и оз киссьы, мунö и суналö, тальччö и джöмдö, и дядьöлöн сiдз жö лы да кучик: чужöмыс косьмöм, нырыс нюжалöм, синнэс ыждöмась — чашкаэз, а вылас паськöмыс — стыд бы и видзöтны, рызi-бызi!

Андрейыс югытiнас локтiс Третьякольöдз, кысянь посадыс тыдалö ни кыдз долонь вылын, а луныс эшö уна кодь — сёр павжун гöгöр. Мужикыс мунiс да видзöтiс, кыдз бы эз адззылö — асьсö бы отирыс одзын эз стыдит. Стыд Андрейыслö, эд гортiсь мунiс кошшыны бур олан, а бöр локтö! Зуралiс, сiдзкö, йöзас оланыс...

Гортö локтö Андрейыс — тöлыс шатлалö, и вöлыс бöрсяняс вöтчö да шырзьö-сёйö ньыв лыс, сэтшöм ни тшыг Гнедокыс. Öтыс тшыг и мöдыс тшыг, мортыс туйыс бокись вöлыс моз жö шырзьö ньыв лыс да шупкö öмас, нималö порсь моз, тшавгö курыт сёянсö и думайтö, мый жö сытöг гортын лоис? Кыдз жö иньыс олö челядьнас? Поди, пырас керкуас, а сёйнытö нем...

Кöдзыт. Шондiыс уйö кымöрас лажмыта ни, сылöн югöрыс веж рöма, павкö кöз йывввезö. Вижгö арся тöв, нёкралö кöз йыввез и шуч мунö бырöм паськöмыс пыр. Вöлыс и мортыс кынмöны-дрöжитöны, но Андрейыс полö öзтыны кытчöкö туйыс бокö би, медбы тшыныс сьöртi эз казялö, йöрыс дынын ни сiя кежис туйыс вылiсь да Гнедокыскöт дзебсисис кöззэз увтö. Эстöн сулалiсö-керисö, сёйисö кöз лыс, но чожа кöдзытыс да тшыгыс вашöтiсö лапья пуыс увтiсь, и Андрейыс зверь моз öтöрö да мöдöрö видзöтчытöн петiс кöззэс увтiсь ыб дорас межа вылö, адззис турун зородок, баöн кыссис сы дынöдз, мымда вермис, кыскалiс зородсис турунсö, домалiс сiйö кушакнас и бöр пырис вöрас.

Гнедокыс горöктiс и уськöтчис сёйны.

Рытöдз кöз увтын кык ёрт джендöтiсö кольччöм лунсö, и кыдз только пемдыштiс, вöлись иньдöтчисö гортлань, бöра мортыс мунiс вöлыс одзын, а вöлыс вöтчис бöрсяняс.

Усольесянь туйыс посаданыс кыссьö вöрöт, и пемытiнас мортыс да вöлыс сьöрö вöтчис кöин, зэв котöртiс кöззэс коласöт, то одзавлiс Андрейсö, то кольччыштлiс да бöр вöтлiс и мунiс ордчöн. Вöлыс мыдз, быд шагын джöмдö да джöмдö, сiдз топ и усяс да оз ни чеччы, но кылö кöиныслiсь дуксö, пирскайтö нырнас, нетшкö мортыс киись поводсö: хозяиныс крепыта видзö домöтсö и мунö одзлань.

Кöиныс вöтчис мортыс да вöлыс сьöрö и видзчисис, кöр жö нiя усясö-берездасясö, петас ловныс и пондас туйны сёйны, но Андрейыс нырнас ни кылiс баня дук, тшыныс павкис и тэрмöтiс, козьналiс мымдакö вын. Андрейыс мымда вермис, содтiс шаггесö. Мыдзувья сiдз бы и заргисис баняас, вывсис чöвтiс паськöмсö, кöштыр койыштiс иззэз вылö ва и пондiс пывсьыны — не нянь, не юан бы эз ков, мыдзыс öшис, но баняыс лонтiсис Егоррезлöн, и стыд вöлi туйыс вывсянь вöзйисьны тойезнас Егоррезас, колiс тэрмасьны гортö, кöр сьöлöмыс сiдз ни кыскис челядьыс дынö.

Кöиныс унньöвтiс йöррес дынын и пемытiнас кольччис бöрö, а Андрейыс да Гнедокыс улицаöт ни иньдöтчисö веськыта гортö, локтiсö карта одзö. Эстöн Андрейыс эз ни понды видзчисьны, кöр керкусис петас иньыс да осьтас воротасö, а ачыс карта вылö йöртiс вöвсö.

— Кин сэтчин?! — посöдзö петiс Лизаыс.

— Ме! — кыдз хозяин ни висьталiс Андрейыс — Ось!

— Этö тэ, Сивöй Таракан? — ласковöя ни баитiс инькаыс и жолькнитiс пöданöн.

— Ме тэныт мыччала Сивöй Таракансö! — лöгасис Андрейыс, кöр эз ешты шагньöвтны керкусис порогсö, а бöра ни нимыс только «Сивöй Таракан».

Лизаыс осьтiс ыбöссö, öшöтчис жö бы мужикыс голя бердö, но öвтыштчис-турйöвтiс, кутчисис ыбöс косякыс бердö и пондiс видзöтны жöникыс вылö.

— Вай сёйны, — медодзза кыввесö шуис Андрейыс. Медодз челядьыс коласiсь саймис Колька зоныс, повзьöм голосöн юалiс:

— Мам, кин сэтчин?

— Узь! Некин абу, — висьталiс Лизаыс и мужикыслiсь юалiс. — Тэ кысянь?

— Кытöн вöлi, сэтчин абу ни...

Лизаыс öзтiс сартас, пешалiс ёгпешö. Керкуас паськалiс веж рöма югыт би, югдöтiс мужикыслiсь косьмöм да векнямöм чужöмсö, йыла нырсö, ыждöм синнэсö, чиныштöм мыгöрсö да повзьöтiс иньсö, кöда сiдз ни полiс эмись и абуись, пыр кивзiс да ойзiс, и öнi кивнитiс, кыдз син одзас мыччисис не мужикыс, а вежöм бес.

— Вай сёйны, — рамыника ни баитiс Андрейыс, пуксис западня вылö и пондiс пöрччавны бырöм нинкöммесö.

Сiдз и бертiс гортö Андрейыс. Узис ойсö гортын и ашынас жö гижис заявленнё да нöбöтiс правленнёö и пондiс уджавны колхозын, кöть предыс и кöритiс:

— Локтiн, чöскыт нянь кошшись... Мыля нö бöр вартiн гортö? Ми эд тэтöг бы татöн эг кулö.

— Ме тэнчит, Кипреян Иванович, одзсит няньсö ог мырддьы, ачым понда шедтыны, и одзлань йöзыслö гусö эн гарйы, кыдз бы ачыт сэтчин эн берездась...

— Видзöтам, — гыжжесö пондiс курччавны предыс, ружтiс-керис и киргыштiс. — Уджав, кытчöдз собраннёсö эг чукöртö... Поди, примитасö...

Доддялiс Гнедкосö Андрейыс (öтiк лун эз шоччöт вöвсö) и мунiс колхозö ваявны сю. Уджавтöнняс отирыслö баитiс, мыля локтiс гортö, сералiс йöзiсь олансö.

— Абу сэтчин олан, ёрттэз, а кывзö жö... Миянын эд оланыс! Йöзас, ёрттэз, русö колö небны, а миян!.. Ох-ха, — паськöтiс киэсö да бытьтö русö жмитыштiс моросыс бердö, окалiс и одзлань ошшасис. — Эд полö, челядь, быдöс лоас бур!

Луныс уджавтöнняс лэбзис-чулалiс. Рытнас Андрейыс пывсис баняын, вежис важ паськöмсö и иньыслö висьталiс, что петалас Прокопьевиччезас, юöртас мужикыс йылiсь Прокопьевичыс иньлö, кыдз да мый, поди, инькаыс тöждiсьö жö мужикыс понда... Висьталас, мыля йöзын олö Пестерыс, кöр мортсö видзчисьöны жö...

— Мун пон мульöссэзат, оз я Пестерыслöн иньыс бокас узьтöт, — лёк кыв шупкис Лизаыс.

— Кин тэнö курччöвтiс? — эз вежöрт иньсö мужикыс и сiйöн сорöн петiс керкусис.

32

Рытыс пемыт да кöдзыт. Кок увтын дзуртö медодзза лым. Руалö ой тöв, чужöмö коялö шыдöс кодь поснит лым. Юр вевдöрын кымöррес коласын мыччасьлiс джыння тöлiсь.

Виль небыт лым вылöт мужикыс мунiс кань моз, кань моз жö кокнита кайис йöз посöдзö, сяткыштiс чорппезнас ыбöсö, и ыбöсыс оссис, кыдз абу и вöлöм пöдана.

Андрейлöн сьöлöмыс пессис-чеччалiс кыдз челядёклöн, кöда мунiс и полiс, что сiйö ыбöсыс дорын падтасö, кымöсас вачкасö, оз лэдзö керкуас.

Прокопьевичлöн иньыс пукалiс лабичын да печкис вурун, ачыс сiйö и керис öзтiс сартас да пешалiс ёгпешö, но сартассэс унажык тшынйисö, нежели сотчисö, мыйсянь керкуас вöлi тшын, кöть синнэз эн осьт.

— Ой! — повзис Таняыс, кöр керкуас пырис Андрейыс. — Вунöтi эд öтöрись ыбöссö пöднавны... Вот юртöм курöгыс... И сартасыс сэтшöм жö... Мужиктöм олансö бы миянлiсь!

— Мый мужикыс? Сартассö эд оз косьты, — шынь керис порогыс дорын Андрейыс, и сьöлöмыс бöра пондiс вартны моросас, топ пантасис не воныс инькöт, а нывкакöт, кöдакöт сымда дружитiс, но дыр эз адззисьлö. Инмисö öтлаö да кыкнанныс повзисö, оз тöдö мый керны и баитны. Таняыс кыдз эшö томмыштöм, чужöмыс лоöм гöгрöсажык, виражык, моросыс чердыштöм, и быдöс сiя путриктö-пизьö, бытьтö весь олö да нянь сёйö.

— Тэ кысянь? — ёгпешö виль сартас пешалiс Таняыс, киыс вылö уськöтiс биа шом, нетшкöвтiс биыс увтiсь и пондiс ниртны моросыс бердö. Голосыс сöстöм, но джöмдö кодь, дрöжитö моз.

— Гортсянь, — Андрейыслöн голосыс сибдыштiс жö. — А мый?

— Мунiт да öшит, а ми эстöн öтнаным, — норасис инькаыс.

— А тi бы öтнаныт эд олö, виль мужиккез адззит, — шыннялiс Андрейыс.

— Эмöсь тiян коддес, öнджа... Мый сулалан? Пуксьы. Андрейыс лякасис западняыс дорö, юрыс вылiсь бокас шупкис люш пеля шапкасö и пондiс видзöтны рос угöлас, а хозяйкаыс чапкис печкансö, котöртiс комö, сэтчинсянь туисöн петкöтiс быгья сюромка, пондiс юктавны гöсьсö, ачыс питьыртiс-модис, норасис, что пизьыс важ, юаныс оз шогмы, абу курыт, и джоджыс, видзöт жö, сьöд, керкуас кöдзыт — абу ни оланыс и оз ло Пестерыс сайын, кöда пышшалö гортiсь.

Сiдз. Керкуас тшын, он суськы, но джоджыс миськалöм — веж рöма, пызаныс вылын вöвдöм сера пызандöра, ачыс пасьталöм нывкася паськöмсö, кöдöн унаись пантасьлiс Андрейыскöт, кöр эшö эз вöв жöник сайын, и сiдз гленитчывлiс зонкаыслö, что син вылiсь эн бы и öшты. Но и мый? Öнi кöть видзöт, Андрей, кытшöм лоис Таняыт — йöз иньнас гажöтчы да дультö ньылав, кöр эн вермы сы вылын гöтрасьны. Таняыс топ немымда абу вежсьöм не кывнас, не мыгöрнас, кыдз горöтчас, топ сьылö, оз ни иньыт моз мурзьы, оз шу Сивöй Тараканнас.

Таняыс котрасис керкуас, серöтiс-баитiс, юкталiс Андрейсö сюромкаöн, кöда быгья, кöра, кыдз юан, сiдз и пондö орсны вир.

Андрейыс дзунгис-юис сюромкасö.

— Поди, кынöмыт сималö? — одзас чывкйис Таняыс. — Мыля нö умöльтчöмыт? Лы да кучик...

— Йöзас сё сiдз эд, — висьталiс гöсьыс. — Оз вердö, сюромканас оз юкталö... — Тэ бы корин.

— Оз видзöтö миян вылö роччес!

— Мыля нö? Мöдкодьöсь я мый я сьöктаннэзныт или од кужö йöзас нюкьясьнытö?

— Огö, — сералiс ни Андрейыс да веськыта синнэзас видзöтiс Таняыслö, топ видзчисис мыйкö унажык.

— Сёян или он, а ме тэнö верда, — висьталiс хозяйкаыс.

— Учöтыс кытöн нö? — шыасис гöсьыс.

— Узьö, — висьталiс Таняыс, ачыс пызан вылö вайис ни сёйны и пондiс пуксьöтны гöсьсö нянь да сов дорö.

Андрейыс эз бы сёй — шванитчис, но Таняыс дынiсь сiдз он мун, модьö: «Чöскыта иньыт вердiс, сiйöн бы менчим сёянсö он и пешлы, а ме ог я эшö чöскытжыка верд!»

И бöра Андрейыс адззö, что Таняыс абу вежсьöм, медодз мывкыднас, топ мужикыс сайö абу и мунöм.

Гöсьыс пуксис пызаныс сайö, паньыштiс госа шыд, ньылыштiс и виньдiс да пондiс несйыны и кызöтны.

— Мужиккез! — китшсис-сералiс хозяйкаыс. — Мый нö тэ?

— Мый ме? — синваэсö чышкис Андрейыс. — Кытшöм?

— Сэтшöм тай... Кыдз кага... Натьтö, иньыт пыр киэс вылын новйöтö?

— Новйöтö... Пиннес вылын...

— Мый нö сiдз? Или öтлаын од узьлö?

— Узьлам жö...

— Мый нö сэк? — баитiс Таняыс и котрасис комö, мышкырасис да джоджсис öктiс ёггез.

— Сiдз и олам, — сьöкыта висьталiс Андрейыс. Комын кивнитiс хозяйкаыслöн зоныс, корис юны. Гöсьыс курччöвтiс кывсö. Таняыс лэбтыштiс кулаксö: вежöрт, Андрей, что абу гортат.

— Сёй! — зоныс дынсянь гöсьыс одзö котöртiс Таняыс. — Эн пов, сэсся оз саймы.

Андрейыс сёйис и веськыта ни видзöтiс хозяйкаыс вылö, сьöлöмыс чеччалiс, шоналiс, сiдз бы Танясö и жмитiс моросыс бердö, но видзсис, топ ыбöсыс сайын посöдзас сулалiс Мишаыс, кывзiсис, чуньнас легöтiс да шуис: «Андрей, кенак эд лоö Таняыс! Кенак...»

Родня, сiдзкö. Грехыс... Андрейыс бекöрись паньыштiс ыджытжык яйтор, пондiс сiйö йирны пиннезнас да думайтны: «Вошйы, Миша! Поди, кынöмыт сималö, хи-хи... Ачыт кодя жö овлан...»

— Сёй да ю сюромкасö! — сiйö и керис модис Таняыс. — И винасö пешлы, — кöдö сувтöтiс рюмкаокöн пызаныс вылö.

Андрейыс сёйис да юис, юис да эшö сёйис, панясис да сiйö и керис видзöтышалiс хозяйкаыс вылö, тшыг кöин моз, кöда лöсьöтчö сёйны не только пызаныс вылiсь...

Ёгпешын чискис-сотчис сартас. Тшыныс керкуас тыр, курöтö синнэз, пырö горшö. Курöг позын гор увтын гуддисьö петух, сiя видзчисьтöг китöстiс и лöнис. Стенаын, кытчö лякöмась гижöтторрез, кышöтчöны тараканнэз. Керкуын шоныт да долыт.

— Кыдз сэтчин олiт? — дыр мыйись юалiс хозяйкаыс.

— Олiм, — висьталiс мöдыс.

— Мый нö бöр? Мый колит татчö?

— Тiянöс.

— Оз тöдчы.

Таняыслöн синнэс гырисьöсь да сьöдöсь, кöднöн видзöтас и кыдз смилитас, кыдз вурас ас дынас, и пондан сiсьмыны да косьмыны. Бытшöм инькаыс! Мыля нö сэк Мишаыс Лысьваас олiс и вöтасис виль инь йылiсь, кошшисис да модис: «Андрей, гöтрасям жö татöн... Ме öтiкö панталi... Ой, инькаыс! Басöк...» Модис воныс, гусьöн шыблялiс йöз инькаэз дынö, а татöн... Сетiс я Андрейыс бы кинлöкö Танясö, если бы сiя ачыс эз мун Мишаыс сайö?

— Пöтi, — висьталiс Андрейыс, чеччис пызаныс сайись да пуксис лабичас ёгпешыс дынö.

— Кытöн ни менам люш пельыс? — сэтöн вöлись инькаыс буржыка ни пондiс юасьны мужикыс йылiсь. — Эз жö, поди, пон юрсö некытчö сюйышт?

— Сэтчин... — шыннялiс гöсьыс. — Гöтрасьны лöсьöтчö. .. Куим кока невеста адззис.

Таняыслöн чужöмыс немымда эз вежсьы, топ эшö лоис раджык, чожажык пондiс чывкйыны джоджöттяс — комö да Андрейыс дынö, Андрейыс дынö да комö, койö öтмöдöрö и гöсьсö пöдтö да юкталö, а гöсьыс сымда ни юис, что öдва ни лолалö.

— Мунны ни бы колö, — недыр мыйись Андрейыс пондiс маласьны лабичын: кошшис шапкасö.

— Кытчö тэрмасян? Пукав, сюромкаыс эшö эм.

— Эм эшö? — кыдз öшис гöсьыс.

— Тэныт тырмас.

— Таня... — коддзыштiс да смевмис Андрейыс, бöра пондiс пессьыны сьöлöмыс. — Таня... Мыля жö тэ ме сайö эн мун?

Андрейыслöн сьöлöмыс пессьö, кыдз сы одзын Таняыс сё нывка, кут да окышт, гумышт моросыт одзö, медбы сэсся Мишаыс иньсö эз ни адззыв, но отирыс мый пондасö шуны? Быдöн эд синö бытшкас, что кенакыскöт койö. Но лэдзис öмсис кыввесö — бузгис, и кöть ов, кöть кув, кыдз дойдiс инькасö, кöда рытывбыт гажöтчис, а сэтöн кымöртчис, öшис джоджыс шöрö и пондiс дульсö ньылавны да видзöтны комас, а гöсьыс видзчисис, мый жö висьталас хозяйкаыс, оз я босьт гормöччансö да вашöт керкусис, но Таняыс эз вашöт, а висьталiс:

— Тöдан мый, Андрей... Тi эд миян кодьсö мортö од пуктö. Од ештö нывкаыс дынö сибöтчыны, а петух моз думайтат ни сорсыс бердö кутчисьны...

«Вот кыдз!» — дума вачкис Андрейыслö, но сiя нем эз ешты висьтавны, кöр ачыс ни Таняыс разис олансö:

— Вöтлiсин ме сьöрын осьта öмнат, видзчисин, кöр ме тэныт ачым понда вöзйисьны, вот и видзчиссис...

— Айö дзугис, — бобгыштiс Андрейыс.

— Айыт... А сiя айыс вылö эз видзöт, кытчöдз тэ люш пеллезнат ме сьöрын котрасин, кутiс да пöрöтiс льöмпуным увтö... А мый ме сэтшöмыскöт верма керны? — пондiс горзыны хозяйкаыс. — Курччалi жö и гыжьялi синбансö, а сiя керис ассис... Кыдз ме сы бöрсянь тэ сайö мунi бы, Андрей?! Кыдз бы бокат водi да мый висьталi?!

«Вежöртiн, ёрт?! — сьöлöмас Андрейыслö кыдз бытшкисö пуртöн. — А тэ... Думайтiн мöдiкö...»

Гичыртiс пиннесö мужикыс и пукалiс, кöр сiйö оланыс сералiс, мортö эз пукты...

Сотчис ёгпешын сартас, тшыннис, тшыныс сёйис синнэз, курöтiс горш. Таняыс видзöтiс гöсьыс вылö — синнэзас шог, видзчисис, мый эшö сiя пондас модьны, а Андрейыс пукалiс, ружтiс и думайтiс: «Сiдз, медодзза ояс жö бы юалi эд, кытчö да кинлö вузалiс честьсö... И пондi бы узьлыны, кыдз йöз бокын — кöдзыт из бы бокам узьтöтлi да думайтi... Нывканас чеччалiс, а мужикыс сайсянь оз я мый я вермы кежласьны?! Не олан бы, Андрей, лоис, не олан...»

Öнi Андрейыс Таняэзын пукалiс гöсь местын, кык дума тышкасисö юрас, вермасисö: öтыс любитiс инькасö, а мöдыс осудитiс.

Хозяйкаыс висьталiс ассис нывкася олансö, сiйö, кöдö эз тöд Андрейыс, горзiс-керис и лöнис, вунöтiс ни сюромкаыс йылiсь, кыдз видзчисис, что еныс быль чарöтас греххес понда, но некин эз пыр керкуас и эз чарöт.

Андрейыслö колiс мыйкö висьтавны, колiс бы, да эз вермы — кылыс эз бергöтчы, колiс мунны ни бы гортö, но гортö сьöлöмыс эз кыскы.

— Öндрей, мун ни гортат, — сэк шуис хозяйкаыс. ― Инькаыт эд öштiс ни.

Гöсьыс шы эз сет, полать дорись босьтiс рукйöсь шапкасö, пуктiс юрыс вылö и — ыбöсö! Заргисис керкуыс пытшксянь посöдзас и пемытiнас берездасис, — вунöтiс, что посöдзас эшö вöлöма ыбöсыс бердын посöдзок, сысянь и усис, но юрсö эз жö пиньöвт, коксö эз чег. Керкусяняс вöтчис хозяйкаыс да повзьöмöн юалiс:

— Öддьöн доймин?! Нырнас вирскыштiс Андрейыс.

— Беднöй тэ, — сэтöн пемытiнас юрсö малыштiс Таняыс. — Мыля тэ сэтшöм и эм? Мыля сё тэныт да тэныт? ― синваэс сiдз и вотялiсö.

— Кытшöм? — мурзьыштiс гöсьыс.

— Сэтшöм... — инькаыс öшöтчис голяыс бердö. ― Сэтшöм... Топ пипу чуркаись лöсалöм, кытöн колö — абу, кытöн оз ков — тэ...

Посöдзын ыркыт. Осьтаэзöт пöлялö тöв. Таняыс сулалö пасьтöг и кынмö — пиннес сяткöтöны, а Андрейыс и жмитö да жмитö, кыдз вöвлi зонканас, кöр вöлiсö кытöнкö син сайын, некин нiйö эз адззы и эз кут, и быдöс, мый медбурыс вöлi — вöлi нылöн, кöр любитчисö и пöтны эз вермö.

— Чарöтас миянöс еныс, — счастливöя баитiс Таняыс. ― Грехсö мымда öктам!

— Оз чарöт, — баитiс Андрейыс. — Мед мужиктö чарöтö, сiя эд менчим мырддис тэнö.

— Мед и чарöтö, — немымда инькаыс эз жалейт роднöй мужиксö — еныслiсь Мишалö корис смерть, кöда йöзын и, поди, кытöнкö эта коста тшыг.

Посöдз угöлын шутнялiс лэчыт тöв, карта вылын шыасис пон.

— Мама! — керкуас кылö саймис Таняыслöн зоныс. ― Мама!

— Ожось! Кага... — мамыс шыасис посöдзас, ачыс чуп да чуп окалiс Андрейсö.

33

Мый лоис? Да нем эз ло, но Андрейыс олiс и полiс отирсис, кöр эм сэтшöм басни: «Кöиныс мымда бы эз горшась, шедö...» И тэ, Андрей, шедан жö... Шедан и мый жö бы висьталан Мишаыслö?

Олiс и полiс, кыдз быдöн ни тöдiс, мый сiя керис тöн рытнас, но чулалiс тöнняыс и кольччис бöрö — оланыс вешшис одзлань, но некин и нем Андрейыс йылiсь умöльсö эз баит, а сьöлöмыс кыскис Таняыс дынö, пель одзас топ инькаыслöн сё кыввес: «Вунöтан эд бöра... А ме понда ой и лун видзчисьны...»

Чулалö лун, локтö рыт. Отирыслöн уджалансянь мужиккес тэрмасьöны гортö, а Андрейлöн думаэс мöдöрын — сэтчин и син, Таняэзлань, пышшö бы гортiсь, но ачыс жö бöра асьсö падтö: «Тэ мый керан?! Кытчö ныртö сюян?! Кывсяс кö Мишаыслö?!..»

Сьöлöмыс сэтчин, но ачыс гортiсь оз пет, мыйкö видзö гортас, кöть и иньсö синнас бы оз адззы. Лöг Андрейыс, ыксö да рявзö — эта сылö не сiдз, сiя не этадз. Мурзьö да эрзö ― керкусис пышшы, и Лизалöн сьöлöмыс тöдiс, что мужикыс весь эз вежсьы, сiдз и думайтiс, что Мишаэзас весь эз рытйы, натьтö... А, поди, сэтчин, Лысьваас, кольччис кинкö, кöда сысся любожык и сытöг оз вермы овны. Ох и сьöлöм инькаэслöн! Мыля бы сiдз? Мыля быдöс тöдöны?

Кытöнкö Рöшво гöгöрын, кöр тöлыс лоис кöрт кöдзыт, гортö Лысьвасянь локтiс Прокопьевичыс, локтiс ойнас и подöн — не одзас, не бöрас, не вöв, не пон, не вылас, не коккезас, бытьтö шедлöм бандиттэз дынö, кöдна мортсö чöвтöмась и пöрччалöмась и вöвсö мырддьöмась.

Кыдз локтiс Мишаыс, ашынас жö эта йылiсь кылiс Андрейыс, но бытьтö воныс йылiсь тöдiс и эз — эз чепöссьы ёртыс дынö.

Тöлыс кузь, кузьöсь и тöвся ойес, кадыс вешшö жагöн. Öтiк рытö öксис колхознöй собраннё, Андрейсö сэтöн примитiсö колхозö и сэтöн жö пуктiсö бригадирö, топ колхозниккес сiйö и видзчисьöмась, кöр мужикыс пырас колхозас, медбы грамотнöй мортыс вылын серавны — кышавны сьöкытжык котома.

Эшö сiя жö рытö Андрейыслö иньыс козьналiс куимöт зон, кöда быдмис топ йöзлöн: бригадирыс кагасö бура эз и адззывлы: асывнас чеччö пемыт, пемыт мунö гортiсь и рытнас бöра жö локтö пемыт, но и сэтöн одз овлö шоччисьны — кöр тöвся луныс дженыт, колö эшö котöртны фермаö, кытöн бöра кулöны куканнес, и он тöд мый нылö оз тырмы, кыт висьö. Котрасьö ой и лун бригадирыс, кын коккезнас сэтчин да татчö, кыдз öшöм, топ гортыс абу. Андрейыс мырсьö, а эта коста Прокопьевичыс пукалö ни правленнёын, потолокö сьöлалö, гижö да счётыэз вылын шовкöтö — лыддьö трудоденнез. Прокопьевичлöн уджыс бöра öмидз тусь: оз пымав, оз мыдз и пöт, а мый сэсся мортыслö колö? Андрей пон моз котрасьö видззез да ыббез вылöт, öвтчö гуна дорын, фермаын, а кыдз локтас правленнёö да пырас Прокопьевичыс дынö и тшöктас сiйö лыддьыны мымда шедтiс трудоденнесö, сiя чик-чок шовкнитас счётыэс вылын и висьталö:

— Кыкдас да вит, вонö.

— Кыдз сымда?! — повзьö бригадирыс. — Мисечас кыным лун? Ме жö öтiк лун эг шоччись.

— Ме ог тöд, ме ог тöд... — шуас Прокопьевичыс. ― Поди, тэ, öнджа... Этö керан... Джын луннэзнас узян, а мöд джынсö котрасян?

— Но тэ и налим! — веськыта шырзьö Андрейыс. — Кужан!

— Ме?! Кин? Да тэ мый, вонö? Мыля менö весь видан? Вай эшö лыддям! Кывзы жö... Мöд неделянас тэ турунсö аслыт вайин? Вайин, вонö! Праздник лунас шоччисин? Шоччисин! Мый нö тэныт эшö колö?! Кытшöм эшö трудодень видзчисян?

— Ме праздникнас тэ моз сюромкаэсö эг öкты! — лöгасьö Андрейыс.

— Ог тöд, мый тэ керан, ог тöд, — юр бöрсö гыжьялö Прокопьевичыс. — Менчим он верит, предыслiсь юав.

— Налим и эм, — сьöласьö бригадирыс.

— А тэ кин? — юасьö Прокопьевичыс. — Тэ, мыся, кин?! Можот, эта... Öнджа... Враг народа, а? Кыным кукань ни фермаас кулiсö?! Мыля гортат оз кув, а колхознöйыс пезьдö, öнджа...

— Мун тэ сэтiсь! — видчö Андрейыс. — Уджалыштiн бы бригадирнас...

— Кин? — сералö Прокопьевичыс. — Ме? Мый ме бригадирас öштi? Бöбöтан, вонö! Кутчисин, кыскы додьсö, а йöзыс вылö эн кышав!

Пишкасö-керасö öтамöдныс вылö кык вон, сыбöрын Мишаыс мöдiк голосöн шуö: — Мый нö?

— Мый? — оз вежöрт Андрейыс. — Дугдiн миянö вовлыны... Таняыс праздник асылас касьтылiс, шуис: «Некин миянö эз понды пырны... Кöть бы Андрей воныт кежалi...»

— Некöр!

— Некöр... Сюромкасö юны кадыс адззисяс — не баля шырны... Или быль чапкы бригадиравнытö, мый сiя тэныт?

— Пышша!

— Он пышшы! — висьталö предыс, кöда пукалö мöд пызаныс сайын да кывзö мужиккеслiсь баснисö.

— Кытчö пышшан? — сералö Мишаыс. — Ми тэкöт öтпыр пышшылiм ни да бöр локтiм.

— Пышша! — висьталö Андрейыс.

Мишаыс кокнита лёбö, быдöс сылöн аркмö чожа, кыдз сказкаын: нем понда оз горзы, юрыс йöз понда оз вись и ас пондасис топ оз тöждiсь, а Андрейыслöн сьöлöмыс пессьö сы понда и эта понда, сэтчин котöртö и татчö локтö.

Сьöкыт тавося годыс, гожумнас вöлi жар, быдöс сотiс, эз быдмö туруннэз и сюэс. Öнi нач ни немöн лоис вердны подасö, да и отирыс ни тшыгьялöны: кöда уджалö колхозас, сылö эшö сетöны мымдаöнкö сютор, и сэтiсь, кин кыдз кужö, сiдз и изö пизь: öтiк шор вылын мельницаын, мöдiк киа изынöн, керасö отирыс сьöд рöма пизь, инькаэс пöжаласö эта пизись турун да пилитчан чаг сорöн кöвдöммез.

Тшыгьялöны отирыс, пода, поннэз и каннез — талун ловья, ашын видзчись смерть...

Бригадирыс ой и лун котрасьö, тшыг жö, но сьöлöмыс висьö унажыксö отирыс понда и подаыс жальöсь, но нем оз вермы керны — немöн отсавнытö.

Быд лун шойна вылö кыскöны кулöммесö...

Андрейес эшö вывтi эз тшыгьялö, кöть и пöт эз жö сёйö, но Лизаыс кориссесö гортын панталö быд лун, кöдна керкуас пырöны и петöны сьöрсьöн-бöрсьöн, пырас мортыс керкуас сувтас порогыс дынö да юрбитö-кеймö, корö сёйны, кöр ачыт тшыг, но мортсö бöрöн иньдыны грех: картов кыш да сетасö...

Тшыгьялö отирыс... Кин эшö ловья, быдöс, мый шедас, сiйö и сёйö — нем оз чапкиссьы: кулас кö вöв — татчö! Кулöм подасö вöрас оз кыскö, а дзимлялöны горттэзö, дзебан кö, тыртан муö, гусяласö да сёясö...

Сьöкыт годыс!

Тшыгыслö отсасьöны шогöттэз, кöдна посадсис оз и вешшö, а вежöны öтамöднысö: кор да писти, писти местö отирсö пондö пöрöтны кынöм висян, шогалöны челядь, томмез и пöриссез.

— Мый жö лоас? — Андрейыс юалö иньыслiсь.

— Мый Библияас гижöм, сiя и лоас. Быдöнным кулам.

— Ог кулö, — ружтö бригадирыс да петö керкусис, тэрмасьö фермаö.

Кöдзыт да сьöкыт кузь тöлыс. Жагöн чулалöны луннэз. Апрель месяцö, кöр содiсö луннэс, и шондiыс пондiс шонтны ни, лоис эшö сьöкытжык, нач ни немöн лоис вердны подасö. Сэк вöлись Андрейыс юрсö и öшöтiс, кöр эшö районсянь локтiс ОГПУ-ись начальник, бригадирсö йöртiс правленнёö, мед некин эз кыв, мый пондасö баитны, и веськыта юалiс:

— Мыля, бригадир, куканнет кулöны и мöссэс йöвсö оз сетö?! Мыля сiдз лоис, вакрамеш?!

— Немöн верднытö, вот и кулöны, — веськыта висьталiс бригадирыс.

— Мыля немöн верднытö?!

— Туруныс абу.

— Мыля абу?!

— Кытiсь сылö лоны, кöр гожумнас видззес вылö эз быдмы, быдöс сотiс жарнас?

— Тэ, вакрамеш, бригадир! Меным сказкаэсö эн висьтав! Тэ менö эн бöбöт, ме абу ни челядёк! Веськыта висьтав, мыйöн пондан подасö вердны?!

— Ог тöд... Ог понды уджавны, — шуис бригадирыс.

— Он понды уджавны?.. Ох тэ! Лöсьöтчан пышшыны дзескытiнсис! Думайтан, что кöдзин этатшöм олансö, а пондас вундыны мöдiк! Оз эд, зонка! Он бы уджав, тэч котома. Ми тэныт туйсö адззам! Он ешты синнэзнат кваркыштны, кыдз ачыт он тöд кытчö лоан! Сiдзкö, зонка, вакрамеш... Уджав! Или враггес моз жö?..

— Кытшöм враггез? — öшис бригадирыс.

— Бытьтö он тöд... Ме тэнö, вакрамеш!.. Уджав, кытчöдз оз вöрöтö.

Тулыс эд локтö... Колö бы лöсьöтчыны кöдзны, а кöдзысыс — шыррезлö нем сёйны, и воввес усялöны-пöрöны карта шöрас.

«Андрей, — думайтö бригадирыс. — Овсис оланыт... Кыдз пондасö шоррес визывтны, ачыт кулан вöввес сьöрö или ОГПУ-ыс нуöтас... Овсис, Андрей, оланыт», — думаэс вийöны мортсö. Но тулысыс вöтiс, вайис гажа луннэз, и вöввес быдöс эз кулö, гожумыс кежö кольччис и отирыс.

Сылiс лымыс, пондiсö визывтны шоррез. Лым увтiсь мыччисисö ыббез. Кайез сьылöны, цветитöны медодзза цветтэз, син одзын быдмö турун, вöлыс мышкыртчас и мöртчас эта турунö да йирö-сёйö, кöть эшö и оз пöт зелёнöй турунокнас, но оз ни нач тшыгьяв.

Гöрöны колхозниккес, вöввезныс öвтчöны бороздаын, но гöрöны, а кинлöн вöлыс усяс бороздаас, сiйö лэбтасö артильöн, сувтöтасö коккес вылö, шоччöтыштасö межаын и вились уджалöны одзлань, а гöрисьыс кö пöрас бороздаас, сiйö артильöн жö лэбтасö, тшöктасö шоччисьыштны и — одзлань уджав!

Уджалöны колхозниккес, син одзаныс шондi югöрыс пемдö, но надейтчöны, что таво гожумыс лоас буржык, сюэс быдмасö и арсяняс оз ни пондö тшыгьявны. Веритöны отирыс аслыныс, еныслö и оланыслö веритöны, а мöднёж кыдз?

Колхозниккес гöрöны, ныкöт öтлаын гöрö и бригадирныс. Андрейыс видзсьö горыс бердын, тальччö и оз, и вöлыс сiдз жö. Кытöн отирыс, сэтöн и бригадирныс, мый отирлö, сiя и бригадирлö, бригадирыслö тулыснас сизимись унажык дöнзьö — сысянь эд сизимись унажык и видзчисьöны...

Тулыс. Оланыс сьылö да йылö, а отирыс горзöны да уджалöны: горзöны асланыс челядь понда, пöрись и том понда, кöдна эз вермö овны талуння гажа лунöдззас, кулiсö тöвнас тшыгсянь, шогöттэзсянь, а öнi быд мортыс надейтчö, что ловзяс ни, кöр кок увтын сёяныс: му вылын быдмö кöктоин, межа дорын шöмкор, логгезын пикан, позьö бы кöч моз пожум ли йирыштны, пожумыслiсь жö сёйны ягöдсö да тугансö, ньылавны бадьлiсь почкаэз, и инькаэс пондiсö пöжавны быдкодь турунiсь нянь чöвпаннэз да ошшасисö, что öтiклöн няньыс чöскыт, пикансорöн, мöдiклöн чöскытжык, мöймуся сiсьмöм картошкаись, кöда арнас кольччöм ыбыс вылö и мыччисьöм лымыс увтiсь.

Тулысыс ловзисис небыт да шоныт руöн, и отирыс ловзисис кокнитжыка. Радмис и бригадирыс, ась и уджыс таво сетчö сьöкытжыка.

Уджалöны отирыс ой и лун: мужиккес талун гöрисö Печканын, ашын пондöтчасö гöрны Пальникын. Гöрöны мужиккес, и муыс кыдз ловзьö, пондö лолавны уль руöн, топ рад, что сiйö эз вунöтö, и ракаэс радöсь, что гöрöм муыс вылын шедöны кокавны гаггес. Гöрöны мужиккес. Шондiыс шонтö быд вынiсь. Межа дорын кыдз орсö — цветитö лымдорчача.

Сырчик лэбалö гöрöм муыс весьтöт, ракаэз вöтлiсьöны бороздаын гöриссес сьöрын. Видзчисьтöг кайесö кинкö повзьöтiс, нiя лэбтiсисö межаыс вылiсь да пуксисö кыдззез вылö. Дыр мыйись межаö вöрись петiс морт, сувтчыштiс, дзик падмис или повзис, пиньöвтiс öмсö и пондiс видзöтны уджалiссес вылö.

«Кин?!» — думайтiс öтiк. «Кытшöм весь олiсь?» — эз вежöрт мöдiк.

Мужиккес гöрöны — ньылöм визывтö рожабаннэзсиныс, а мöдiк тöв чужьялö... Гöриссез сувтöтiсö вöввезнысö, пондiсö видзöтны тöдтöмыслö, топ тöдiсö бы кин одзаныс.

— Эй! Мый öштiн да кошшан?! — йöз мужиклö ыкöстiс чукыля кока Егорыс, кöдалöн быдлаын кылыс лудö.

Эз шыась йöз мортыс, а сэкжö саясис син одзись — пырис вöрас.

— Эй! Мый нö тэ?.. Лок öтлаö уджавнытö! — Егорыс ыксiс бöрсяняс.

Сьылiс каёк. Да дугдiс сьывны.

— Но-о-о! — вöлыслö шатьöн вачкис бригадирыс, медбы отирыс весь олiсьыс вылö эз видзöтö, ась весь олiсьыс шляйтчö, пöт кö кынöмыс, а нылö колö уджавны — быд минутаыс дона.

Шутньöвтiс вöлыслö и Егорыс. Синькоыс нюжöтчис, сьöкыта ловзисис, тальччис и эз — местасис эз бы вöрзьы.

— Уджалö мужиккез! — бригадирыс шутньöвтiс Гнедкоыслö, и вöлыс вынöнжык ни тальччис уль муас, кокнитжыка вöрзьöтiс гöрсö.

Уджалiсö мымдакö мужиккес да пуксисö шоччисьны: асьныс шоччисисö, и вöввес межа дорын йирисö турун. Пукалiсö мужиккес межа дорын, сэтöн Егорыс шуис:

— Кывзö, тöдса эд мортыс мыччисьлiс вöрсис... Кыдз эта... Липовöйсис важ сватным...

— Мый сiя татчö öштöм да кошшö? — юалiс Тима Васька.

— Мый кошшас? Оз я пышшав пышшалiссескöт? Курайыскöт, поди, оча пельпон ветлöтö, — Якуня Ваня эз вермы пукавны баиттöг.

— Бандиттэз...

— Мед кöть мый керöны, — гажтöма шыасис Тима Васькаыс.

И пондiсö лёбны мужиккес кин да кытiсь мый кылiс, висьтасисö кин да кытшöм деревняись пышшалiс Курайкöт, тöдiсö ни кöр да кинöс вийöмась бандиттэс, мый гусялöмась. Öтiккез полiсö Курайсис, кöр пантасьлiсö сыкöт Пуксипиын гöститтöн или ветлöттöн, мöдiккез öнi жö кутiсö бы да зэлöтiсö, мед олансö эз дзугö, кöда сiдз ни дзугсьöм.

Вöввес межаын марскисö дженыт турунок. Бороздаын межаыс дорын больгис шорок. Гöрöм муыс топ гажöтчис, что сiйö эз вунöтö гöрны. Шондiыс тэрмöтiс мужиккесö, медбы нiя видзöтлiсö сы вылö да дыр весь эз олö.

— Тырмас тiянлö, — висьталiс бригадирыс ёрттэслö. — Гöрны колö. Весь олiссес ась весь олiссесö и куталöны. Отрядыс миянтöг тöдö мый керны.

— Гöрны колö, мужиккез, — межаись чеччис Якуня Ваня и кутчисис вожжиэз бердö.

— Кыдз и пондам овны? — гажтöма шыасис Тима Васька и кутчисис гöр бердö.

Вöрыс синнэз одзын гажöтчис зелёнöй паськöмöн, муыс видзчисис, кöр сы вылö кöдзасö сю.

Гöрисö мужиккес — одз асывсянь сёр рытöдз бороздаын, эз надейтчö уджнас некин вылö, тöдiсö, мый керасö — нылöн, озö — пондас ковны ветлöтны кортöн. Нянь быдтiсö мужиккес.

Чулалiс лун, вöтiс рыт. Шондiыс кыдз жагвыв луннас уйис кымöрас, сiдз дыша и лэдзчисис вöрыс сайö. Гöрöм муыс лолалiс аскодя уль руöн. Ракаэс кокыштiсö медбöрья гаггез, дыша лэбтiсисö бороздаись да пуксисö пуэз вылö. Сьылiсö каёккез. Кувтыртiс тар. Больгис бороздаöт шорок. Потiс медодзза лист, турунок небытик да зелёнöй быдмис ни межаын.

Мужиккес юскисö вöввесö, пуксисö выланыс и жагвыв иньдöтчисö гортö. Андрейыс локтiс гортö, пырис керкуö, пызан вылiсь босьтiс пикансорöн пöжалöм кöвдöм, курччöвтiс, аклялiс öмас, ньылыштiс и бöр петiс керкусис да веськыта иньдöтчис фермаö, кытöн олiс вель дыр, бертiс бöр сэк, кöр узис ни посадыс и сiдз мыдзис лунтырнас, сiдз мыдзис, что эз и пöрччась, пöрöтчис западняыс вылö да ланьтiс, топ кытчöкö вöйис; ойнас бокас тангис иньыс да ыкöстiс:

— Черпезьдан луншöрöдз! Узян поныт моз жö, нем он кыв, а чомсит эта коста быдöс петкöтöмась! Спасибо висьтав, что асьтö бöрöн эз кыскö. Кыскыны бы колiс... Ой ни да ой!

— Тупкав! — мурзьыштiс Андрейыс.

34

Чом ыбöсыс осьта. Ыбöсыс одзö киськассьöм зöр киль, кöдö куд етш вайлiс арнас, а сэсся мый бы гусявнытö? Отопкаэс я колiсö кинлöкö? Или коробьяись иньыслöн венчайтчан паськöмыс? Андрейыс видзöтчис сэтчин да татчö, сiдз бура эз и вежöрт, мый гусялiсö. Сэтчö петiс иньыс, бöра кутчисис мужикыс бердö, öдззис герьявны да причитайтны:

— Узян, а эта коста пасьтö нöбöтöмась...

— Кытшöм пась?

— Айыт кöдö сетлiс.

Андрейыс гичыртiс пиннесö и иньдöтчис сельсоветö, тэрмасис, локтiс сельсовет öшын увтö и адззö: öшын увтын дом йылын сулалöны тöдтöм вöввез, керкуö пырисö и петiсö тöдтöм отир — солдаттэз, кöдна эз баитö, но локтiсьыс вылö сiдз видзöтiсö, топ сiя ачыс гусялiс чомнысö и эшö сэтöн ветлöтö норасьны.

«Мед... Век кежö нем оз тырмы... Ась гусялöны, — сувтчис улицаыс шöрöмоз Андрейыс и пондiс думайтны да видзöтны йöз отирыслань, кöр адззис, что сытöг татöн дзескыт и ковсяс тарöвтчыны мöдöрö, но сэтöн... Керкусис посöдзö мыччисис Якуня Ваня — бес чужöмыс бес чужöм и эм: шынь видзö, виноватöя видзöтö бригадирыс вылö, синнэзас гажыс абу, коккезас бырöм нинкöммес, нятьöсь нямöттэс. Бöрсяняс наганöн петö солдат да модьö: «Вöрöтчы! Гöжöм тури...»

— Здоровöн чеччин, Öндрей! — Иваныс топ эз кыв и эз адззы бöрсис солдатсö, гажöн здоровайтчис бригадирыскöт. — Кыдз узин?!

— Узи тай... — вирыс кыдз сувтчыштiс Андрейыслöн: адззис эд, что Иванытлöн бöра эд мыйкö не сiдз — не сiя следö тальччис или Степаныс сьöрö вöтчö и мый понда?! — Узи тай... — Андрейыс баснинас дзугис бы гажтöм думасö. — Чоманым кинкö пыралöм ойнас...

— Мый кошшöмась? — посöдзас сувтiс Иваныс, кöть и тэрмöтiс солдатыс.

— Мый кошшасö... Пась тай абу, а сэсся нем гусявнытö да...

— Бур пасьыс вöлi?

— Кытшöм бур?! Сизим дöмас жö ни ляклiсö...

— Но и ась! Эн горзы! Виль одзын, — гажöн баитiс Иваныс, кинас öвтыштiс солдатыслö да шуис. — Эн тэрмöт, ёрт! Ме, бат, сэсся Андрейсö ог адззыв, а сыкöт öтлаын партизанитiм — эта власть понда пессим, а öнi, дзöт жö, мый петö, Андрей... Да ачым ме виноватöй! — кокнита висьталiс бригадирыслö. — Тöдан эд... Ви тай примитны тшöктiсö, öктi отирыссянь висö, а кынöм — кузь чуман — сималö, и эг вермы терпитнытö: бекöрöн висö петкöтi чомсиным гортö да сёйим, но и... Сiдз меным и колö! Сэтчин и туй, сэсся гусясьнытö ог понды. Но тэ бöра, Андрей, ме понда эн горзы! Тöдан эд, кыдз вöрас пышшалiм! И талунöдз öтлаын уджалiм. .. Колiс бы öтлаын кöдзны ни да вöлись кольны тiянöс, но тэрмаси, видзöт, висö сёйны...

— Ванька!.. — недолыт лоис Андрейыслö, тшакыль тасасис горшас. — Иван...

— Ась, — кинас öвтыштiс Иваныс, кокнита лэдзчис посöдзсис и кокнита жö иньдöтчис Кöслань, ачыс сьылiс кытшöмкö сьыланкыв, кöдö сорис сельсоветiсь предыс: петiс керкуись посöдзö, здоровайтчис да ыкöстiс: «Андрей, кинöс кошшан? Мый öштiн?»

— Нем эг, — гажтöма висьталiс бригадирыс. — Öнджа тай... Ойнас кинкö пыралöм чоманым да гусялöм...

— Пыр керкуас!

— Киннэз?! — Андрейыс юрнас гогиньтыштiс йöз отирыслань.

— Он адззы... Отряд. Банда миянланьын. Ны сьöрын и вöтлiсьöны, — Игнатыс талун, тыдалö, ачыс аслыс абу рад.

— Эг думайт, эг думайт, — пондiс модьны бригадирыс. — Тöн, поди, гöриссес дынö и мыччисьлiс...

— Кин мыччисьлiс? Кытöн? Мыля одзжык эн висьтав?! Узин!

— Узи, — недолыта горöтчис Андрейыс. — Узян сэтöн, кöр он ешты ныр гуддьыштны...

— Ась. Эн горзы. Шедасö! — висьталiс Игнатыс.

— Тöн бы колiс... — асьсö дорйис бы Андрейыс. — Но кытчö тэ?! Нiя, поди, пишаллезöн, а ми... Беддезöн я мый бы?..

— Ась. Пыр керкуас.

Кыкöн Игнатыскöт пырисö керкуö, кытöн бöра вöлiсö йöз отир.

— Висьтав, бригадир, — сельсоветас сэк жö Андрейыс бердö кутчисис топыт мыгöра мужик, кöдалöн бокас öшалiс наган. — Висьтав, кытiсь да кöр адззылiт бандиттэсö?! ― синнэзнас сёйö-видзöтö, топ тэ бандиттэскöт жö ни.

— Ме мыйöн тöдi...

Миян отирыс оз любит норасьны, кöть и некин бура оз ов, овлö и öтамöдныс коласын пурсясö-керасö, овлö, что праздниккезнас сiдз гындасö-тышкасясö, эн бы и видзöт выланыс, но ашынас чеччасö, и топ нем абу и вöлöм, бöра öтлаын, некин норасьны оз котрась, а талун, на! Мыля да кыдз? И Андрейыс веськыта висьталiс, кыдз тöн мужиккескöт адззылiс мортсö.

— Бригадир! Сэк жö эд колiс котöртны да висьтавны, ми бы кутiм нiйö, а тэ...

«Кутан... — нето лöгыс, нето серöмыс пондiс петны бригадирыслöн, думайтiс, но шы ни эз сет, а видзöтiс йöз мортыс вылö. — Кутан вöрсис зверьсö, кöр быд пуыс сайын позьö дзебсисьны... Мый нö од пуксьö вöввезныт вылö да гöнитö? Мый суналат? Видзчисят, кöр бандиттэс асьныс локтасö? Эх, тi! Поди, нiя кытöнкö Картабöр вöрокас и шоччисьöны да сералöны миянöс?..»

— Сiдзкö, чоманыт пыралiсö? — юасис отрядлöн командирыс.

— Пыралöмась... — гажтöма висьталiс бригадирыс. — Видзöтö, некин оз тöд кин пыралiс... Кикокнысö абу кольöмась. Эз я асланым кинкö?.. Герасько кодьыс...

— Кытшöм Герасько?

— А... — сельсоветсис предыс ни горöтчис, кыдз эз верит, что Гераськоыс вермас гусясьны.

— Вот тi кытшöмöсь! — недолыт лоис командирыслö. — То эм, то абу. Колö веськыта баитны! Оз я Гераськоныт ныкöт жö гардчы?

— Кин сiйö тöдö? — висьталiс Игнатыс. — Пыралiс жö колхозас, лун-мöд уджалiс, тышкасис Якуня Ваняыскöт и öшис.

— Сiдз. Вот и куканнезныт кулöны... Висьтав, бригадир, мыля куканнезныт сымда кулiсö?! — лякасис йöз мортыс бригадирыс бердö. — Поди, эта... А!

Андрейыслöн моросас сiдз и чеччöвтiс сьöлöмыс, сiдз и гурнитiс лöгыс: быдöн, кöда локтö йöзыс, сiя и юасьö, кыдз да мыля, мыля кулöны куканнес, абу я тэ эта... Поди, пö враг тiян эм?! Оз эд вежöртö, что вердчаныс подаыслö абу...

— Мыля куканнезныт уна кулiсö? — мöдöтпыр юалiс отрядiсь командирныс.

— Эз жö уна кулö, — виноватöя никсыштiс бригадирыс. — Арсяняс куима черпезьдiсö, а тулысланяс вита.

— Етша? — кыдз видiс и осудитiс йöз мортыс.

— А мый ме кера? — обидитчис Андрейыс. — Мыйöн верда, одзаныс эд этатшöм газетасö (мыччалiс пызан вылö, кытöн куйлiс газета) ог павдöт да тшöкты лыддьöтны, медбы нiя отирыс моз жö велöтчисö овны сёйтöг и ютöг.

— Да-а-а-а... — юрнас гогыньтыштiс командирыс. — Нёштöм оланыс. — Шуис этадз и пондiс видзöтны бригадирыс вылö — öт öм угöвнас топ шыннялiс, а бригадирыслöн синнэзас лöг югöр и лёк думаэз: «Бандиттэскöт я мый я öтлаын бы гардат?! Сiдзкö, вермат и дзимлявны, а то мыдзи ни бригадиравнытö».

«Сiдз, сiдз», — йöз мортыс синнэзö кыдз гижöма, что тэ, бригадир, виноватыс, но талун оз тöдö мый тэкöт керны...

Думайтöны кык морт сельсоветын — думаэзнаныс тышкасьöны, но кыввезнаныс кытчöдзкö вывтi оз пурсьö, топ пешлiсьöны кыдз жö бы эшö öтамöднысö дойдны, медодз Андрейсö, кöда мыйöнкö аскодя, нинкöммез новйö, но...

— Миянлö некöр! — отрядлöн командирныс эшö öтпыр синнэзас веськыта видзöтыштiс бригадирыслö, пуктiс юрыс вылö шапка. — Некöр миянлö, но тэ, бригадир, пантасян кö эшö бандиттэскöт, эн ни лэдз.

— Ог, ог, — кокнита висьталiс Андрейыс. — Кута, сьöвтала и татчö!

Командирыс ыбöсö! Андрейыс вöтчис сьöрас, петiс öтöрö жö.

Асылыс кымöра, кыдз луныс лöсьöтчö горзыны, и Андрейлöн сьöлöмыс вылын недолыт, зубыт, мыйкö оз тырмы и ачыс оз тöд мый, кöть отирыс син одзö эн и мыччись. Бригадирыс аслас чом да гусялöм пасьыс йылiсь эз ни думайт, а вот колхознöй куканнес... Кулöммесö он ни ловзьöт, но эд ловьяэс коласын эмöсь, кöдна олöны талун-ашын и мыйись-мый бöра пондасö синнэзас бытшкыны: «Тэ эд, бригадир! ... Кытчö видзöтiн да мый керин?!» Ылöсаöсь отирыс, уна тöдöны да йöз киэзнас бура бы уджалöны...

Тöдтöм отирыс (отрядыс) вöввезöн гöнитiсö районлань. Саясисö син одзись вöввес, жолькнитiс-пöднассис ыб дорись ворота, дугдiс вувтны пон, а Андрейыс сё сулалiс сельсовет öшын увтын, кыдз öшис да видзöтiс колхознöй куканнез вылö, кöднö Картабöр видзлань вашöтiс пода вöдитiсь и не йöз, а Таняыс, Прокопьевичлöн иньыс. Таняыс мунiс куканнес бöрын, öвтiс шатёкöн, юрсö мышкыртöм да шыннялö, а куканнес одзас öвтчöны да мунöны, быд куканёкыслöн гöныс нятьöсь, косьмöм бердас, кадыс тулыс ни и колiс бы тöвся гöныслö киссьыны ни, но сiя эз киссьы.

Подаыс мунöны да шатласьöны, пода вöдитiсьыс мунö, да оз тöждiсь, шыннялö ас кежас. Таняыс шыгыра каджа, чужöмыс вылын вирыс сiдз и орсö, сiдз и пизьö, дзик абу инь морт, а нывка, кöть талун жö корась да гöтрась, тöдчö, что сьöкыт годас абу тшыгьялöм, оз тöждiсь, сьöлöмыс нем понда оз вись.

Кöть мый шуö, но куканнес дынын уджавны кокнитжык, нежели, шуам, пес керавны. И кин жö бы эта уджö иньдiс Танясö? Думайтат мужикыс? Öддьöн тай иньыс понда тöждiсьö Мишаыс!.. Сылö, натьтö, буржык бы вöлi, если иньыс мырсис бы нятьын, кöр быдöн ни тöдö, что Прокопьевичыс нюкьясьö ни Митит Василиса гöгöрын.

Танясö куканнес дынö иньдiс уджавны бригадирыс, и ась некин оз бизгы, что нагладь сiдз керис, кöр не быдöн жö кутчисьö эта уджö: полöны инькаэс вöдитны подасö, кöдö немöн вердны, а Таняыс смев.

Пода вöдитiсьыс вачкис куканёклö, лэбтiс юрсö, смела видзöтыштiс бригадирыс синнэзö, топ шуис: «Эх, бригадир! Кытöн да мый и керан?»

И бригадирыс сьöлöмын öзйис аскодя гаж — öтiк минутаöн вунöтiс, кыдз сiйö одзся-одз саймöтiс иньыс, повзьöтiс, что гусялöмась чомсиныс пасьсö, и сельсоветсис йöз отирöс вунöтiс. Синнэс кыдз мöртчисö колхознöй куканнеслань, и сьöлöмыс пондiс кыссьыны Таняыс дынö, кöдалö бы висьтасис-норасис аслас олан вылö, сысянь видзчисис шоныт кыввез, а пода вöдитiсьыс видзöтыштiс веськыта, бöр мышкыртiс юрсö, ыкöстiс нятьöсь бöра куканёклö и пондiс мунны одзлань.

— Мыйöн талун вердiн подасö? — бригадирыс ыкöстiс пода вöдитiсьыслö.

— Мый вайин, сiйöн и вердi, — пондiс нерны Таняыс. — Мыйöн верда? Одзаныс тэнö бы чапки, да он лок, полан, а видзöт жö... Öтiк кукань бöра пондiс чотны. Мыйись-мый... Менö судитасö!

— Судитасö! — Андрейыслöн югмыштiсö синнэс.

— Судит, судит! — смела баитiс пода вöдитiсьыс.

— Горзыны колö, а тэ сералан, — рамжыка ни горöтчис бригадирыс и шагньöвтiс куканнеслань да юалiс. — Кöда бöра чотö?

— Тэ горзы... Тэнат синваэт колхознöйыс понда петöны, — кивыль-ковыль пиньöвтчыштiс бригадирыс одзын Таняыс, котöртыштiс шогалiсь куканёкыс дынö, кöда подаыс коласын мунiс медбöрын, кутiс порозоксö голяöттяс, малыштiс кымöссö и висьталiс. — Лок да видзöт, мый сылöн... Мый сулалан? Видзöт куканьсö!

— Ме эд абу коновал, — нач ни небзис Андрейыс, шынньöвтiс да шагньöвтiс куканьыслань. — Öнджа...

Таняыс öт кинас видзис куканёксö голяöттяс, мöднас юрыс вылiсь лöсьöтiс чышьянсö, а синнэс сiдз бригадирсö и сёйисö, сiдз бы и ньылыштiсö...

— Мый куканьыслöн? — зэв ни локтiс бригадирыс куканекыс дынö.

— А тэ лок матöжык, лок! Оз сiя тэнö курччöвт. Эх, гöжöм! Мышкыртчы да пешлы, мыся, аслат киэзöн, а эн сэтöн...

Андрейыс мышкыртчис куканьыс бокö, кутiс сылiсь одзись коксö. Таняыс пондiс киссьыны-серавны да баитны:

— Ох, бригадир! Но тэ и бригадир! Бöрись кокыс жö сылöн доймö, а тэ одзас маласян... Велалöмыт ни инькаэс дынын одзаныс маласьнытö... Бригадир!

Мöд куканнес зэв сибöтчисö бригадирыс дынö, кöда нырнас ниртчис ни Андрейыс бердö, кöда сюррезнас люкалiс бы да эз вермы, кöда лакис бы кымöссö, а Таняыслö сiя и колiс: сералiс-керис, сэтöн жö мышкыртчис бригадирыс дынö, шоныт руöн ловзисис чужöмас, киэзнас бытьтö отсалiс кутны порозокыслiсь коксö, ачыс ниртчис рожабаннэзнас Андрейыс юр бердö да кань моз мурзис: «Андрей тэ, Андрей... Кытшöм тэ вöлiн турзьöм-кынмöм тури, сэтшöм и эм... Нем он вежöрт... Сьöвталöм иньыт, и олан, не одзсит, не бöрсит он адззы...»

Андрейыслöн сьöлöмыс абу жö кöртовöй, мед сiйö одзся-одз асывсянь оланыс сералiс и лöгöтiс ни. Öнi вунöтiс куканнес йылiсь, вунöтiс, что Таняыслöн мужикыс гортын ни ― сьöвзис быдöн вылö, эз понды видзöтны, что сулалöны улица шöрын, кытöн быд поныс адззö и кылö — быдöс вунöтiс, зэвжык жмитчис куканёкыс бердö, кинас голяöттяс кутыштiс Танясö, окыштiс рожабансö — öтпыр окыштiс да мöдöтпыр, ружтыштiс.

— Бöб, адззыласö эд... — висьталiс инькаыс, но эз вешшы, а жмитчыштiс, пондiс перыта баитны да сiдз, мед йöзыс эз кыв:

— Пестерыс лöсьöтчö гортiсь мунны... Велöтчыны пö бытьтö иньдöны...

— Ась мунö, — коксö куканёкыслiсь малалiс Андрейыс.

— Кыдз нö öтнам? Мый лоас? Турунсö некин оз отсав вайнытö и песыс оз ло? — модис Таняыс.

— Керан. Каджыт кыз кодь... — сералiс бригадирыс.

— Кера... Кытчö нö воштiся? Кера, а тэ?..

— Мый ме?

Таняыс бöра окыштiс рожабансö, мышкыртiс öддьöнжык куканьыс бокын юрсö и шуис: «Тури тэ, мыся, Андрей! Сьöлöмыт изовöй, ачыт пуовöй. Каб и эм...»

Кыкöн ниртiсö-керисö порозокыслiсь коксö, и Таняыс шуис: «Эн пов, бригадир, нем сылöн умöльыс абу. Чотас-керас да веськалас. Сёйыштас вот видзыс вылiсь зелёнöй турунсö...»

— Мый нö куканнес коласiсь адззит?! — видзчисьтöг бöраныс сибöтчис Егор, кузь нырсö чышкыштiс, синнэзас аскодя югöр, дзик тöдö мыйкö сэтшöмö, мый оз тöд бригадирыс, но оз висьтав.

— Отсалiн бы, — Егорыслö висьталiс бригадирыс. — Он адззы куканьыс оз вермы сулавны.

— Адзза, — висьталiс Егорыс и бöра шынньöвтiс асмознас — хитрöя, кöдалiсь он вежöрт, мый думайтö. — Адзза кинлöн да кыт висьö, — бöра чуньнас чышкис ныр гöгöрсö, бергöтiс коккесö мöдöрö и пондiс тойны-мунны сельсоветлань.

«Но и чукыля кок! ...Адззылiс эд... — Андрейсö пондiс стыдитны дума, но сэтöн жö мöдiк дума ошкис. — Мед адззылö! Оз эд курччав...»

— Висьтасяс, — повзис Таняыс.

— Оз висьтась, — шуис бригадирыс. — Мый сылö содас висьтасьöмсяняс?

— Быдöс эд тэ кузя сэтшöм оланыс! — Таняыс гусьöн моз пондiс пеничайтны Андрейыслö. — Томся-томöн... Не гортö сьöлöмö оз кыскы, не челядьыс оз колö... Пышши бы кытчöкö да кöрталöм...

— Кин кöрталiс? — шыннялiс Андрейыс.

— Тэ!

— Дугды! Он адззы, Игнатыс посöдзас сулалö...

— Сулав. Мый меным...

— Тэкöт уна он баит, — шуис Андрейыс, бергöтчис и иньдöтчис вичкулань, веськыта висьтавны, что пышшис ни, медбы Таняыскöт отирыс сэсся эз адззылö.

— Бригадир! — бöрсяняс лöга ыксiс пода вöдитiсьыс. — Луннас лок да видзöт куканнесö. Он кö... Ме ог понды коктöммесö да бöжтöммесö пестунничайтны! Абу асламöсь. Талун эшö уджала, а ашын ась мöдiк бöра пешлiсьö. Кылiн, бригадир? — и шатьöн öвтыштiс куканёккеслань.

Бригадирыс кыдз эз кыв Таняыслiсь кыввесö, тэрмасис-мунiс аслас туйöт. Кинлöнкö вичкуыс сайын вувтiс пон, но сэтöн жö лöнис. Йöр угöв сайсянь мыччисис Киршинiсь Педöт — пиннес гер, пестер пасьта рожаыс топ вир пытшкын, моросыс гав — горпöдан пасьта. Педöтыс аскодя, сыись полöны инькаэс, оз лысьтö пантасьны син сайын, кöр тöдöны, что мортыс пон кодь, кöть кинлiсь иньсö вермас кутны да кыскыны син сайö... Или оз? Но эд баитöны мортыс йылiсь... Педöтыс мыйкö öвтчö мöдiк лун ни, бытьтö оз адззы удж: талун мунö Шаламлань, тöн Андрейыс адззылiс фермаланьсиныс. Андрейыс здоровайтчис Педöтыскöт, юалiс кытчö сiя мунö, но мöдыс веськыта эз висьтав, горöтчис, что öштiсö мöс и куимöт лун ни кошшисьöны...

35

Андрейыс Таняыс дынсянь гортö эз мун, сельсоветсянь кежалiс правленнёö, петiс сэтчинсянь, сулалыштiс правленнё посöдзас, думайтöв-керис, видзöтiс, кыдз отирыс сьöрсьöн-бöрсьöн тэрмасьöны уджавны: Миков лунöдззас кольччис лун-мöд и колiс бы сэк кежö кöдзсьыны.

Юр вевдöрын жагвыв вешшисö зэран кымöррез, мыччисис шондi, орсiс аслас югöрöн вичку юрын, бöбöтiс синнэз. Сьылiс чикись — тавося медодзза гöсь, сiдз кыдз Андрейыс талуння лунöдз чикиссесö эта годö эз на адззыв. Кинкö кылö чарöтiс-лыйис Ольланяс, но эта нем эз висьтав, этадз быд тулыс морт-мöд пишаллезöн котрасьöны вöрö, лыйöны кай да кöчпöлöс. А вот Киршинiсь Педöтыс, кöда вуджис улицасö да кежис Картабöр видзыслань, Андрейыслö козьналiс недолыт чувствоэз, сiя вермис керны мыйкö умöльö, кутны куканнес дынын Танясö.

Веськыта висьтавны, Андрейыслö асылыс шыннялiс и эз, кöр чеччис пемытсорöн, эз сёй и öвтчö, но ачыс бура оз тöд мыйлö öвтчö, кыдз бытьтö бригадирыстöг уджыс вермас джöмдыны ыббез и видззез вылын, кытчö инькаэс мунiсö весöтчыны (керавны летöрöс да видззес вылö быдмöм пуоккез). Сулалö бригадирыс правленнё посöдзын, видзöтö Ипат зон вылö, кöда мылякö талун гöрнытö мунö медбöрын, и зонкаыс юалö: «Андрей дядь, тэ талун миянкöт гöрнытö он мун?»

— Некöр! — недолыта горöтчис бригадирыс. — Куканнес шогалöны, ны дынö колö ветлыны, а тэ мый дыр узин?!

— Вöвсö тöн лэдзи видззес вылö да дыр эг адззы, — висьталiс Третьякыс. — Но тэ эн пов, ме мöддэсö вöта и коля уджнас!

— Вöвтö бöра вывтi эн уджöт, мед эз жö коккес вылiсь пöр, — бригадирыс видзöтiс ни Третьякыс вöв вылö, кöда мунiс и турьялiс.

— Мый сылö лоас?! — гажöн шуис Третьякыс, вачкис да вачкис Буланкоыслö, кöда зурзисис бы и пондiс люг-люг котöртны.

Шондiыс вöлись лэбтiсис Шыгырсай ыбыс весьтö. Ыбшарыс эз ешты пöт сьывны, а посадыс рекмис ни: отирыс мунiс уджавны, гортö кольччисö поннэз да курöггез и правленнёын счётоводыс. Прокопьевичыс петiс правленнёсис, нюжöтчис кань моз, осьтiс öмсö и шыасис:

— Андрей, тэ Киршинсис Педöтсö эн адззыв? Андрейыслö лоис недолыт Мишаыс одзын, кöр талун ни окасис иньыскöт и бобгыштiс:

— Öнi тай мунiс Картабöр видзланяс? А мый?

— Сiдз, — кымöссö ниртiс Прокопьевичыс. — Эз я сэтшöмыс чомат пырав? Вермас эд...

— Ог тöд, — бöра бобгыштiс бригадирыс.

— А тэ мый сэтшöм кымöра? Или шогалан? Да дугды кытшöмкö пась понда, не морт эд кулiс? Отирыс тöвнас тöдан мымда черпезьдiсö, да некин сiдз оз тöждiсь, а тэ... Да-а-а, олан эз ло. Ме бы сэтшöммесö лыйлi!

— Кинöс? — эз вежöрт мöдыс.

— А сэтшöммесö... — шыасис счётоводыс и пырис правленнёас, а бригадирыс думаэзнас иньдöтчис гортас бы: сималiс кынöмыс (гортын иньыс лöсьöтчис пуны кöчазь). Андрейыс иньдöтчис гортас бы, но коккес топ асьныс нуöтiсö мöдöрö — шагнялiсö Картабöр видзлань, кытчö Таняыс нуöтiс куканнесö. Бригадирыс тэрмасис, видзöтчис öтмöдöрö, кыдз мунiс гусясьны.

Видзыс вылын синнэз гажöтiс тулысся зелёнöй турун. Туруныс эшö дженыт, нельки ракаэзлö, кöдна тальöны зелёнöй дöрасö да мыйкö кокалöны коккез увтiсь, пидзöссэзöдззаныс. Сэтöн жö лэбалiсö сьöдкайез, воробейез и эшö быдкодь борда душаыс, кöда чирзiс и сьылiс, кыдз вермис, сiдз и гажöтчис, но весь эз ов, а уджалiс, и куканнес сэтöн жö, нем нылö абу лоöм — öтiк абу кулöма, йирсьöны лажмытжык местаас, баддеслань моз.

Подаыс сёйис тавося небытик туруноксö, но порозокыс, кöда чотiс бöрись кокыс вылö, эз тыдав.

«Быль я мый я кытчöкö баддес коласö турбыльтчис?!» — бригадирсö повзьöтiс дума, синнэзнас пондiс кошшыны порозоксö подаыс коласiсь, но куканьыс местö баддес сайсянь мыччисис Таняыс. Пода вöдитiсьыслöн чужöмыс шондiыс кодь жö мича, öмыс осьта — шынь видзö, ачыс топыт да лöсьыт, абу Андрейыс инь кодь, кöда уджалö, уджалö быд лун и кольччис бедь кодь ни...

— Мый öштiн, бригадир? — ылiсянькодь Таняыс ыкöстiс бригадирыслö. — Тэрмась! Куканьыс татöн, куйлö и ружтö, вот лолыс петас... Поди, тэнö видзчисьö, медбы кувтöнняс висьтавны кыв-мöд... .

— Мед кулö, — мурзьыштiс Андрейыс, ачыс видзöтiс гунаэзлань, кытöн кылiсö инькаэзлöн голоссэз.

— Мед кулö... — Таняыс нерис бригадирсö. — А кинлöн сiя?! Гортсит жалейтан, а колхозсис виян бы! Но тэ и бригадир! Но и морт! — пода вöдитiсьыс ыксiс чиння голосöн ― видзтыр чарöтiс, бытьтö сiдз ни лöгыс петö бригадирыс вылö, ох, кыдз петö!

Андрейыс шынньöвтiс, лэчытжыка видзöтыш-керис гуналань.

— Татöн, мыся, порозокыс! Лок да видзöт! — öддьöнжык чирзiс пода вöдитiсьыс.

Кытчö сэтöн воштiсян? Корöны, бригадир, и колö мунны. Андрейыс мышкыртiс юрсö, иньдöтчис баддеслань ни, коккес увтiсь повзьöтiс учöт бабыввезöс.

— Кытöн куканьыс?! — зэв локтiс Таняыс дынö Андрейыс.

— Синнэт абу я мый я?! Баддес сайын, мыся!

Нiя мунiсö баддес сайö: öтыс одзас, мöдыс вöтчис бöрсяняс.

— Кытöн нö куканьыс? — баддес сайын ни юалiс бригадирыс.

— А тэ тай... — Таняыс бергöтчыштiс и висьталiс Андрейыслö. — Порозокыс...

— Эх тэ! — бригадирыс кык шагöн зэв локтiс пода вöдитiсьыс дынö, жмитiс моросыс бердö.

— Стыд тэныт абу...

— А тэныт?

Сьылiс ыбшар. Шондiыс шонтiс пымавтöдз. Порозокыс куйлiс баддес коласын и видзöтiс бригадирыс да Таняыс вылö — синнэзас гаж.

Тулыс. Быд гагыс кошшö аслыс ёрт, быд кайыс ёрттöг оз вермы овны, сiдз природаыс керöм олансö.

— Мунам, — Андрейыс гусьöн баитö Таняыслö.

— Кытчö? — оз вежöрт Таняыс. — Кытöн миянöс видзчисьöны? Кытöн бур оланыс? Или челядьнымöс гаггез моз колям да кыкöн пондам шатласьны? Грех, Андрей! Одзжык колiс...

―А öнi мый?

— Ог тöд, — горзö инькаыс. — Мун, котöрт син одзись, мед оз адззылö.

Мый эта? Кыдз шуны? Кинлö висьтавны, кинлö норасьны? Кинлiсь корны отсöтсö? Некинлiсь, Андрей, он кор, некинлö он норась, некин тэныт оз отсав — мый эм, тiян, кыкöн... Мымда гажöтчат, сымда и адззылат...

Локтiс луныс и чулалiс. Луннас посадын отирыс абу, быд мортыс гортö локтö сёр рытöн. Оланыс сьöкыт: сё эшö отирыс тшыгьялö, сэтöн жö бандиттэз... Кывсьö ни, что Гришинса пö сорласьöмась Курайкöт, и унаöс ни эта понда нуöтöмась гортсиныс. Пондiс кывсьыны, что шедöма пö Киршинсис Педöт, кöда пышшалiссеслö вöрас новйöм сёйны да юны, и Педöтсö пö отсалöм кутны Прокопьевичыс, кöда правленнёсис оз и петавлы, а адззöм... Но Прокопьевич суськисьö: «Тi мый? Тi мый? Ме вöрас кöр ни ог лысьт мунны! Лёбат мый оз ков! — мужиккес коласын кылiс счётоводыслöн голосыс. — Мый оз ков, эд модьö».

Мый сэтöн модьны? Лысьтан я кывтö кузя видзны, кöр ов да пов, сiйö и видзöт, кыдз бы бандаыскöт öтлаö эз сьöвталö.

— Ась. Мый кин кошшас, сiйö и адззас, а тэ, Таракан, юртö кытчö оз ков, эн сюй. Эн сюй, мыся! Прокопьевич вонтö орддьы. Сiя весь овтöнняс оз тöд мый керны, орсö, а тэ... ― Андрейлö модьö иньыс.

— Дугды!

— Сiдз эд!

Баснинысö сорис Прокопьевичыс, кöда швырк пырис керкуас, эз здоровайтчы, пуксис западня вылö и рад, ошшасьö:

— Велöтчыны муна...

— Кытчö и велöтчан ни? Сiдз ни чернас вунöтiн кыдз уджалöны, — лöга баитö Лизаыс. — Велöтча... А тэ, Андрей, эн вунöт жö бöра... Отсав турунсö да пессö вайны, мед эз жö керкуас кынмö и подасö тшыгйöн вийö.

— Керам, — аскодя гаж Андрейыслöн.

36

Быдöс кö висьтасьны, кадыс оз тырмы. Уна бурыс и умöльыс тридцатöй годдэзö керсис посадын. Кыдз бы оланыс эз орс, кыдз бы эз таль и дойд, но кадыс чулалö одзлань, бöрö кольччö сьöкыт часыс, тшыгьялан годыс, и видзöтан кö, колхозыс ловзисис ни кокнитжыка, пондiс сувтны коккес вылö, вынсявны, сiдз кыдз отирыс эз узьö, а уджалiсö — немымда асьнысö эз жалейтö. И няньыс лоис пöт, праздник лунö бöра пондiсö чукöртчыны öтлаö, öтiк дозiсь, панявны öтiк бекöрись да йöктыны öтлаын жö.

Андрей сё уджалiс бригадирöн, олiс да дрöжитiс, адззис эд, что оланыс кöть и лоö пöтжык, но мывкыднас тшыкö-вежсьö, лоö аскодя: ов да кывтö кузя эн видз, баит, да тöд мый горöтчыны — öтiк кыв понда мортсö кутöны и нуöтöны гортсиныс.

Уджалiс Андрейыс, и сьöлöмыс висис, шогалiс асмознас, вермасис думаэскöт, дзебсисис бы кытчöкö, саясис, пышшис бригадирсис, но крепыта гöрöдалiсö гöрöдсö, зэлöтiсö супоньсö — норась эн норась, бытьтö оз и кылö, морт оз адззись, медбы вежны бригадирсö, а веськыта кö висьтавны, некин бы грехас оз пыр, оз веж чöскыт онсö сьöкыт вöттэз вылö.

Андрейыс уджалiс колхозын, а воныс, Прокопьевичыс, велöтчис и велöтчöмыс бöрсянь лэбзис ылö: недыр уджалiс городын, сыбöрсянь пондiс уджавны районас прокурорöн. Ыджыта быдмис мортыс, ой, ыджыта! Таняыс, кöр эшö торйын олiс мужикыскöт (öтыс городын, а мöдыс татöн) Андрейсö эз вунöт. Локтас гортöдззаныс, пырас керкуас, пондö сьывны-баитны, «Андрей, туруныс вайтöм, песыс кертöм... Кынмам ни керкуаным и подаыслö одзаныс нем чапкыны...»

— Мужикыт эд начальник лоас! Миян кодьыскöт од пондö баитны! — Лизаыс бытшкас кывнас.

— Начальник... Пестерсис и пöрас эд начальникыс... — кыдз кужö, сiдз и шуö-видö мужиксö Таняыс. — Чарöтiс еныс томся-томöн...

— Эн горзы. Отсалам, абу йöзöсь, — висьталö бригадирыс. — Вöвсö сетам, а колö кö... Ачым локта.

— Мыйлö?.. — синваэсö чышкö Таняыс, но рад, дзик пеллесö адззö.

— Мед уджалö, гортын оз жö отсась! — желлясьö Лизаыс, тöдö или оз, что мужикыс любитö Танясö, оз мыччав.

Турунла мунасö кыкöн, пес ваясö кыкöн жö — луннас öтлаын и рытнас öтлаын, туйис бы, эз бы и янсöтчö, но рытыс локтас и ой кежас колö мунны гортö. Локтас гортö Андрейыс, пырас керкуас — ош, мурзьö, ружтö, водö узьны öтнас нето полатьын, нето гöбечын, мед ойнас дынас иньыс эз лок да бокас эз вод. Лöг Андрейыс иньыс вылö, но Лизаыс оз кеймись, вермас чушкасьны неделя, кыкö...

Пантасьлöны Таняыс да Андрейыс — гусьöн любитчöны, но отирыс синмаöсь, басни ни посадас гардчö, бытьтö пö бригадирыс пода вöдитiсьсö подаыс дынын весь оз видз, ачыс вöдитö нетельсö... Баитöны отирыс, но веськыта некин оз шу, что сiдз и этадз... Оз лысьтö, эд Таняыслöн мужикыс ыджыт начальник, ны кодьыскöт уна оз понды баитны. Да и Таняыс ачыс ни ошшасьö:

— Бригадир, менам куканнес эд бöра шогалöны... Мый пондам керны? Мыля он лок да видзöт? Куласö кö, ме ог понды рожаöс стыдитны... Нем тэ менö куканнет понда он кер! Мужикö прокурор!

«Прокурор! — кыдз биöн сотыштiс бригадирсö. — Адззылiн вöлись!.. Эшö норасяс, кыдз окасьлат, сэк... Андрей, колö кежны...» Не отир моз олö Андрейыс — ачыс ас вылас гым кымöрресö кыскö, видзчисьö, мый жö лоас одзлань. А одзлань лоис сiя, что посадас локтiс Прокопьевичыс, медодз пыралiс сельсоветö, сыбöрын правленнёö, петiс правленнёсис да пантасис бригадирыскöт и гажöн юалiс: «Кыдз ни олан, вонö?» Шуис энö кыввесö, дзик гортiсь некытчö эз ветлы, оз уджав прокурорнас, нем оз тöд, баитö воныскöт.

— Кыдз ола?.. Сё сiдз... Öт бокö вылö вода, мöдыс вылiсь чечча! — гажöн жö висьталiс Андрейыс.

— Мыйкö тэ вылö норасьöны, — сералö Мишаыс.

— Ась.

— Ась — гöна пась, — серöмтчыштiс прокурорыс, малыштiс бригадирыслiсь юрсö, мыччалiс этöн, что сiя сысся ыджытжык ни, вон, да не сiя ни, баитö öтнёж, а малалö... Тöдса понöс тай кыдз... Пантасисö кык вон, баитiсö-керисö, кыдз сто год абу адззисьлöмась, Андрейыс шуис:

— Пырам миянö, кынöмыт эд сималö.

— А менö вердiсö ни. Сельсоветсис предыс... Мöдöтпыр... Пантасисö и янсöтчисö: öтыслöн удж и мöдыслöн удж. Сiдз и олöны: öтыс — районын прокурор, а мöдыс ― посадын бригадир. Öтыс локтас да ошшасьö, что сьöкыт уджыс, мöдыс — что сылöн эшö сьöкытжык уджыс, кöть öтыс и мöдыс мырсьöны отир коласын. Пантасясö да янсöтчасö и бöра пантасьöны — часто вовлö прокурорыс, часто пантасьлö воныскöт. Öтпыр кыдзкö висьталiс: «Тэ менö пыр эн рочав, менам талун колö пыравны Егор Ильиччезö... Вежöрт, что служба, ага? Вежöртiн? Но ме мунi».

Прокурорыс висьтасьтöг да юасьтöг кежис Егоррезö, пырис керкуаныс да сiдз повзьöтiс Егорикасö, сiдз повзьöтiс, что инькасö кынöм висян кутiс. А мый нö? Кыдз нö? Быдöн бы эд повзис Егорикаыс местын, кöр висьтасьтöг тiянö пырис прокурорыс и порогыс дорын жö горöтчис: «Кытöн Егорыс? Мый керö? Или бöра вöрö яйла мунiс?!» «Кытшöм яйла? — сьöлöмыс топ шöри потiс Егорикаыслöн. — Адззöмыт яй вайисьсö... Тэ мый сiйö, Миша сват, баитан?!» (Сват... Кытшöм Мишаыс тiянлö сват?) Но и ась... Прокопьевичыс оз лöгась, что хозяйкаыс шуис сватöн, шынньöвтiс да одзлань пондiс кыйны-бöбöтны Егорикасö кыввезнас:

— Тэ, сваття, öнджа... Тöдам эд кин да мый керö... Ми Егорыскöт кöркö öтлаын тшупсим и чери кыйлiм. Вунöтiн ни?

— А мый нö! — Егорикаыслöн чужöмыс пондiс вачкисьны морт чужöм вылö ни, и кынöмыс дугдiс висьны. — Öнджа эд... — тюр-тюр котöртiс комö, сэкжö заргисис джоджулö, туисöн петкöтiс юан и юкталö. — Ю, сват! Ачыт гортат кодя жö овлан.

Пальниканыс, кöр эм мыйись, бурö сысъялöны ырöшсö: юан — горзьöтан, и сэсся некытшöм сёян оз ков.

Юис Прокопьевичыс, пишнитiс нырнас, öзтiс чигарка, лэчыта видзöтiс керкусис быд пельöссö, бöра юалiс: «Кытöн Егорыс? Мылякö ме сiйö важын ни эг адззыв. Гажтöмтчи...»

— Егорыс? Кытчö лоас?! Кöин эд эз сёй! Ожо, пырас керкуас.

Шуöны жö, что ошöс пö касьтылан, и сiя локтас, эз ештö туис дорас касьтывны хозяинсö, дзурк-вирк оссис ыбöсыс, и гортö пырис хозяиныс, паськöм вылас запон, коккезас нинкöммез, киэзас пон кучикись кеписсез, тошокыс гыöрзьöм, сiдзкö, уджалöм пöт ни, кöть эшö и луншöр абу.

Мужиккес здоровайтчисö. Прокурорыс эшö дзунгис сюромкасö, эшö висьтасис, кыдз сiя арнас ветлöм кинкöткö вöравны, но лосьыс зуралöм, сiйöн таво гортас яйыс и абу, пыр колö небны магазинiсь, кыввезнас кытшлалiс-вугралiс бы мыйкö, но не Егорыс, не иньыс эз вежöртö, что Прокопьевичыс керкуас пырис не только быздыны, а эшö висьтавны мыйкö сэтшöмö, кöдö он бы и вöтась.

Баитiсö-керисö мужиккес, Прокопьевичыс и шуö:

— А тэ, Егор, мый нö?

— Мый ме? — öмсö осьтiс Егорыс, кузь да чукыля нырсö чышкис долоньнас и пондiс видзöтны прокурорыс öм вылö.

— Öнджа эд, Егор Ильич... Тэ вылö норасьöны, бытте пö налоггесö он вешты...

— Быль, Прокопьевич, быль! Эг вештiсь ышö таво, эг! А мыйöн вот и вештiсь? Кысь деньгасö?! Шедтi мымдакö вöрас уджавтöн, дак эд... Öтiклöн вешьяныс бырöм, мöдiк йöрнöстöг ветлöтö, куимöтыс, нёльöтыс да витöтыс... Вöрисьыс нiйö, Прокопьевич, ме юр вылö! Отирыслöн кулöны, а нылö нем оз ло! Öтiк кашык оз кер...

— Кытöн нö челядьыт?

— Эй, кытöн тi?! — Егорыс ыксö керкутыр, ачыс учöтик да винерик, а голосыс чиння. — Кытöн тэ, Васька?!

— Ме татöн! — лабич увтын шыасьö öтiк.

— А тэ, Сенька?

— Мый? — рыжöй юрсö пызан увтiсь мыччö мöдiк. Куимöтыслöн чочком юрсиыс тыдалö кöньöс сайын ― ельдöг кодь нылочкаыс.

Öтiк да мöдiк... Öтiк рыжöй, мöдiк сьöд, куимöтыс чочком, а нёльöтыслöн юрсиыс кытшöмкö сера...

— Егор Ильич, тэ нö мый? — сералö Прокопьевичыс. — Мыля нö сэтшöмöсь челядьыт? Али этö... Кабсö йöзлiсь одзöстлiн.

— Мыля? — оз лöгась Егорыс. — Аслам жö кабыс вöлi, да мый керан, ежели иньö сэтшöм.

— Йöз челядьсö дорис? — обидитчö Егорикаыс.

— Вермасö, — шуö Егорыс. — Ме мыйöн тöда?... Баитiсö-сералiсö челядьыс йылiсь, бöра юисö сюромка да ошкисö хозяйкасö. Коддзыштiсö мужиккес, гöрдöтiсö рожабаннэзныс. Егорыс пондiс думайтны: «Спасибо еныслö... Гым кымöрыс вешшис... Поди, кытчöдзкö налоггес йылiсь оз пондö касьтывны?.. Уджалышта вот эшö вöрас, шедта эшö мымдакö деньгасö да дарсала аданыс, мед менö сэсся оз вöрöтö, а вежöммес кыдзкö оласö... Пасьтöг керкуас оз кынмö и тшыгйöн оз черпезьдö». Думайтö этадз Егорыс, а гöсьыс шынь керис да бöра шуö:

— Но, Егор Ильич, сёйим-юим пöт, öнi колö гортö мунны, но... Налогыс йылiсь эн вунöт, мед мöдöтпыр меным эз норасьö, ась ог жö пондö описьсö керны...

— Тэ мый, Прокопьевич?! Ог вунöт... Кыдз сэтöн вунöтан? Мыйись-мый... Пондас ковны мöсыскöт янсöтчыны... Вештiся, вештiся, Прокопьевич.

— Вештiсь!

— Вештiся, вештiся, — модьö Егорыс, оз думайт, мыйöн, кытшöм кушманöн вештiсяс, кöр деньгаыс эшö кытöнкö вöрын китсасьö, но кöсйисьö.

Кольлалiс мортыс гöсьсö öтöрöдз, мед отирыс адззылöны, что Егорыс ась и умöль морт, но прокурорыс, видзöтö, сiйö эз орддьы, пыралiс керкуас, юис сюромка, баитiс мортмоз ― эз брезгуйт.

Талун этадз, а ашын мый лоас? Ашыныс понда озö тöждiсьö, кöть Егорыслöн деньгаыс абу, но олö отир моз жö: эмöсь челядь, пода — мöс, баляэз, быдмö порсёк. Пода видзö мужикыс, кöть ачыс и уна йöвсö оз сёй и яйсö пöттöдз оз пешлывлы — налогггезöн пöдö, но... Порсьсö начкылас и сэк вöлись... «Ох, Марпида!» — Егорыс дзик пеллесö адззö, сiдз ни ошшасьö, что сёйыштас яйсö, но иньыс нерö:

— Адззисьöм... Тöдан öнi подасö оз лэдзö начкывнытö, начкылан кö — аслат юр вылö... Тюрьма лоас! Колян менö челядьыскöт. Кыдз пондам овнытö?

— Тюрьма... Адззöмыт мыйöн полöтны? Кылан, отирыс мый баитöны... Быдöнлö пö еныс шуöм тюрьмасö пешлыны, и некытчö тэ этаись он вештiсь, он пышшы... Мый отирлö, Марпа, сiя и миянлö!

37

Чулалiс гожум. Егорыс öтiк лун эз шоччись, уджалiс колхозын, шедтiс трудодень да гажöтчис, что арнас трудоденнес вылö сетасö сю, и пондас сiя челядьнас овны буржыка ни, а тöвнас корсяс вöрö, шедтыштас деньга.

Сiдз и лоис, таво сюэс быдмисö буржыкöсь, погоддяыс арнас лэдзис дзимлявны няньсö аскадö, и трудодень вылö колхозсис сетiсö зöр да рудзöг, мымдакö ид — ов, Егор, да оланыс вылö сэсся эн горзы! И рад ни мужикыс, что оланыс сылань бергöтчö, шыннялö. Мортыс Покров кежö ведомостьöн босьтiс зöр пизь и иньсö тшöктiс керны сур да сысъявны шоныт ырöш, мед праздникнас кин пырас, куш кымöснас не пантавны жö.

Покров панытö жö керисö чарлачöвтан. Предыс тшöктiс сысъявны ырöшшез, инькаэз пöжисö да вийöтiсö суррез, мужиккес начкылiсö бараннэз. Быдöс сёян-юансö öктiсö правленнёö, сэтчö жö рытнас öксисö томмез и пöриссез, медбы быдöн сёйис да юис, касьтылiс бур кылöн гожумсö, мöдiк гожумö лöсьöтчис уджавны эшö буржыка.

Бура кольлалiсö чарлачöвтансö, ёна ни гажöтчис отирыс, йöктiсö да сьылiсö пöттöдз, а ашынас бöра праздник — этö Покровыс ни, отирыс бöра сьылiсö да йöктiсö, бöра гажöтчисö, кыдз кужисö и вермисö, ветлöтiсö керкуись керкуö, орсiс гармошка, а кöда босьтiс горпöдан и гизи-вази, гизи-вази кеслiс-орсiс. Инькаэс тупи-тапсö сiдз йöктiсö, что керку пöлсккезiсь буждiс песок. Праздник эд, вöлi! Быдöнлö вöлi гажа, кöр эз ков уджавны, кöр отирсö шоччöтiсö, юисö сюромкаэз, сьылiсö да йöктiсö, но некин топ кодыс эз вöв, некинöс эз адззылö, медбы таралiс öтöрас или кодувья пезьдiс лабич увтö, некин горшсö эз лет, эз видчы, эз тышкась. Эз кывсьы, медбы кытшöмкö арттöм-мывкыдтöм сьöвзис отирыслö, или пöжалiс кинлöкö пельбокас или... гортсис вашöтiс иньсö. Том и пöрись, бригадир и пред — быдöн праздниккез лунö юисö öтiк дозiсь, сёйисö öтiк пызан сайын, ошшасисö öтiк уджöн, эз вунöтö сибавны фермаö, эз öштылö гунадорö туйсö, кытöн вöлi ваялöм сю и колiс сiйö шупöтны. Совесть йылiсь эз баитö, но сiя вöлi, отирыскöт бытьтö олiс гусьöн...

Покров куимöт лун лунö, кöр пондiсö юсьыны сюромкаэз, и инькаэс мыдзисö ни пантавны да кольлавны гöссесö, Егорыс пукалiс гортас да кыйис нинкöм. Пызан вылын сотчис «шырби» — лампа, полатьын вишыкасисö челядьыс, сiдз кыдз айныс дыр нiя полiсö бöбавны, потолокын кышöтчисö тараканнэз. Керкуас шоныт и долыт, кöр кынöмыт оз симав, подалö вайöм турун и чомын мымдакö эм сю. Сэтшöм рытö сьöлöм оз вись, киэз уджалöны, думаэз бурöсь.

— Тять, — полатьын бизгыштiс Егорлöн медучöт зоныс, кöда эшö уна эз ылöст и смевжык. — Видзöт жö, тять, Васькаыс мый керö!... — Шыасьö менам! Сёят кабья нинкöмсö, сэк пондат тöдны! — мурзьыштiс Егорыс да сьöктаннас сяткис-вачкис нинкöмыс бердö.

— Тять...

Эта коста öтöрись ыбöсас кинкö жог-жог керис, поныс карта вылас пондiс лёка вувтны.

— Кинкö локтö! Сета ме тiянöс, ась котомаас тэчö да нуöтö, — челядьыслö висьталiс айныс, ачыс пондiс кывзiсьны.

Посöдзас мöдöтпыр, ёрк-ёрк!

«Ага, кинкö быль локтö!» — нинкöмсö чапкис Егорыс и иньыслö ни ыкöстiс:

— Он кыв? Кинкö локтö.

Егорикаыс ыбöсö! И сэкжö бöр пырис керкуас, а бöрсяняс... Жагвыв пырö Михаил Прокопьевич... Бöра эд ыджыт гöсь... Да сэтшöм бы гöсьсö!... Локтiс бы соседыт, пырис керкуас нинкöммезнас, мый эм — сёйис да юис, абу — сiдз мунiс, а сэтöн он тöд кыдз пантавны, кöр джоджыс ёгöсь, пызаныс вылын челядьыс сёйисö пöжалöм картошкаэз и колисö кышсö, лабичын — печкан, западня вылын — кöньöс, комын турски-тарски ветлöтö кукань, кöда чужис асывнас, пыртiсö керкуас и эз петкöтö.

— Марпа-а-а! Дзимляв кöньöссö! Печкантö сота! Шедат тi меным! — Егорыс оз тöд мый керны, кыдз пантавны гöсьсö, öтiкö швыргö комö, мöдiкö шупкö лабич увтö, ныр увтсö чышкö, киэсö бы миссьö да рукомойникыс эшö комас, кытöн ветлöтö куканьыс. — Марпида-а-а!

— Мый горштö летан? Он вермы морт моз баитны?.. — бизгö иньыс, кöда пасьтасьöм сiдз жö рызi-бызi, сьöлöм гудыр и öвтчö джоджас.

— Да тi эд жöдзö. Ме понда эд котрасьö... Пыри, мыся, видзöта кыдз ни олат, мый ни керат, — кылыс гардчö Прокопьевичыслöн, синнэс дульсмöмась-гöрдöтöмась: юыштöм мортыс... Но и мый? Мый керны, кöр вöлi праздник.

Праздник вöлi, а талун буддень ни, но и мый, пырис гöсь, и колö сiйö вердны да юктавны.

— Марпида-а-а?

— Богатöя олан, Егор Ильич, — русö вишкайтö да нузгö Прокопьевичыс, сулалö джоджыс шöрын и видзöтлö кытчö бы пуксьыны, кöр лабичыс ёгöсь, западняын бус, öтiк табуретка да и сiя лякöсь, а джекыс вылын пукалö пон ыжда кань. — Богатöя, мыся, олан, Егор Ильич... — потолокö ни видзöтö прокурорыс, кытöн öшалöны чераньвеззэз.

— Кытшöм менам богатство? — сералö Егорыс. — Кытiсь?

— Кыдз кытiсь? А челядьыт! И тараканнэс...

— Эмöсь! — ошшасьö ни хозяиныс. — А мый ме ныкöт верма керны? Вилаэз эд (тараканнэслö) голяэзаныс ог кышав...

— А тэ кышав! — сералö Прокопьевичыс да видзöтö ни хозяйкаыс вылö, кöда пасьтасьöм умöля, винерик, но чужöмыс вылын басöк — том эшö и ештiс ни чышкыны пызансö да ваялiс сёйны. Гöсьыс öтöрсянь бура эз ешты эшö шонавны, Егорыс шуö ни:

— Пуксьы, Прокопьевич, сёйышт. Кынöмыт эд дöс ни сималiс.

Михаил Прокопьевичыс шинельсö вывсис эз и чöвт, сiдз и пуксис пызаныс сайö и пондiс видзöтны тыра бекöррес вылö, топ нiя сы одзын виноватöйöсь, кöть и сёяныс туяна-колана бы: öтiк бекöрын яя шыд, мöдiкын ягöд, куимöтын сола тшаккез, нёльöтын... Мый только и абу пызаныс вылын! А мый нö... Миян пыр эд этадз: будденяс тшыгйöн олам, но праздникыс кежö турунiсь да сё ни инькаэс пуасö да пöжасö, мед кин пырис, вöлi бы мыйöн вердны.

— Богатöя олат, — бöра нузгыштiс Прокопьевичыс, босьтiс пань да пондiс пишкыны нырнас.

— Олам, — ошшасис Егорыс. — Няньыс эм, сэсся нем ни оз ков. Олам, Прокопьевич, олам! Вунöтны ни пондiм кыдз тшыгьялiм. Бось жö рюмкасö, юыштам да сыбöрын вöлись и баитыштам, — пызаныс вылiсь босьтiс тыра рюмка вина, кöда вöлi кыдз лекарство, и годнас пешлышалiсö öтпыр-кыкись да сэк, кöр этадз керкуас пырас медыджыт гöсь, или пондас висьны пинь.

— Сiдз, — тыра рюмкасö босьтiс гöсьыс. — Сiдз, Егор Ильич, бура ни пондiм овны, вывтi бура...

Юисö. Öтыс ньылыштiс винасö и синнэзнас чикыр эз кер, а мöдыс — хозяиныс, топ тыра ведра ректiс и пондiс öмсö пиньлавны, нырнас пишкыны да дульсö ньылавны, кыдз бытьтö сiдз лолыс и петiс ни.

Прокопьевичыс лыись керöм вилкаöн бытшкис бекöрись тшак и — öмас, бытшкис яйтор и — бöра öмас! Паньыштiс ягöд и — öмас да пондiс изны, öдззис монöвтны — аннэс дзуртöны, а хозяиныс пань йывнас паньыштiс ягöд тусь и пондiс сiйö нимавны чупки-чапки, бытьтö бекöрас сёяныс тырмис талун и ашын, эшö мöдлун кежö кольччас, кöр пöлатьсянь жаднöя видзöтчöны челядьыс да ньылалöны дульнысö.

Гöсьыс сёйис яйсö, синнэсö мöртiс хозяиныс вылö и чорыта юалiс:

— Кытiсь яйсö?!

— Яйсö... — öшис Егорыс, кушкыртчыштiс пызаныс сайын и пондiс видзöтны иньыслань комö, надейтчис Марпаыс кыв вылö, и инькаыс сярзьыштiс:

— Курöгнымлiсь юрсö масьтыштiм! Праздникыс кежö, мыся... Кин пырас, мыся, мед куш кымöснаным не пантавны жö!

— Мда-а-а, — ружтыштiс Прокопьевичыс. — А ме думайтi порсьныт...

— Порсьыс ловья эшö, — тэрмасьöмöн висьталiс хозяйкаыс. — Юышт, Михаил Прокопьевич...

Гöсь Егорыслöн — ыджыт гöсь и медодз сылöн, а не мöдiклöн, ась Прокопьевичыслöн и эм вон, но сiя, видзöтö, пырис татчö, пукалö пызан сайын и Егорыскöт юöны вина. Егорыс баснинас гажöтчö, а думаэс — пемыт гу, вийöны и вартлöны, желлялöны и пурöны, топ талун ловья, а ашын — аминь! Лолыс петас и абу...

— Ю, Прокопьевич, ю! — Егорыс юкталiс гöсьсö, кыдз медбур мортöс-ёртöс. А Прокопьевичыс видзчисьтöг сувтöтiс хозяиныс вылö гудыра синнэсö и юалiс:

— Налоггетö вештiн ни?!

Егорыс кыдз курччöвтiс няньтор, сiдз и виньдiс, öмсö осьтiс да пукалö, думаэзнас асьсö дорйö бы, кöр тöлыс вöлись локтö, лöсьöтчö мунны вöрö, шедтыны деньга да вештiсьны, но прокурорыскöт уна он баит, ассис гардö:

— Егор Ильич, норасьöны эд... Недоимка эд...

— Нем сiя оз тöд! — пызаныс дынö пыш моз кокнита чеччöвтiс Егорикаыс и сярзьыштiс. — Нем сiя оз тöд... Ме ачым одзöстi деньгасö да сетi ни.

Прокурорыс синнэсö лэбтiс хозяйкаыс вылö и пондiс видзöтны, топ инькаыс одзас усис кымöрсис, адззис, что Марфаыс бöбöтö, да кулактö öмас он заргы. Марфаыс модис-керис, и одзлань быдöс петiс бура ни, гöсьыс гажöн шуис:

— Кись эшö, Егор Ильич...

Егорыс бöра кисьтiс бутылкасис, лэбтiс сiйö ныр одзас и пондiс видзöтны пöв синнас, мымда эшö кольччис винаыс, кöда сэтшöм ни жаль да дона, куим год бы бутылкасö колiс видзны ен джаджын, но вот тэныт, на! Ректiс...

— Егорка, эн пов! Мортыс ме сэтшöм... Вежöртiн?! Мый тэныт колö, сiйö и кера. Вежöртiн?! — Прокопьевичыслöн гардчис кылыс, куритiс кисис чигаркасö, эз и чапкы: öтiк кусö, мöдiкö öзтö, керкуас табак тшыныс öшалö ни джоджсянь потолокöдз, и хозяйкаыслöн висьö ни юрыс.

Бутылка пыдöсас эшö тыдалiс винаыс. Егорыс вöлi лöсьöтчö дзимлявны этö, но гöсьыс шыасис: «Кись эшö, Ильич...»

— Кхе, кхе, — шыасис хозяиныс, тыдалö, гöсьыслö лöсьöтчис бы висьтавны, что, натьтö, эд, Прокопьевич, унаöв жö ни лоас, но кылыс джöмдiс и бöра винасö кисьтiс рюмкаас, кöдö гöсьыс босьтiс да юис, кыдз юис ма и сэсся шы эз сет, чеччис пызаныс сайись, лабич вылiсь босьтiс шапкасö, кышалiс юрыс вылö и... Не прощай, не спасибо! Уськöтчис ыбöсас, кыдз мортсö керкусис чышкисö росöн.

— Мый сылö лоис?! — повзис Егорикаыс.

— Ме мыйöн тöда?! — сьöкыта горöтчис Егорыс, синнэс весьтö лэбтiс бутылкасö, видзöтыштiс сы пытшкö, кытöн эшö рюмка етш вöлi винаыс, ружтыштiс да винаоксö вотьöтiс öмыс весьтын.

— Егор! — синваэс сорöн шуис Егорикаыс. — Егор, тэ мый керан?!

— Нем ог, — висьталiс Егорыс, тожö чышкис синваэсö.

38

Одзöв пондiс вижгыны ой тöв, ёна кöдздöтiс и усис медодзза лым. Öтöрын лоис гажа, арыс топ мыдзис зэрны, ассис уджсö козьналiс локтан тöлыслö и öнi шоччисис: синнэсö кунис да кывзiсис кин да мый керö.

Лöнь. Прокопьевичыс петiс Егоррезiсь, моростырнас ловзисис сöстöм да кöдзыт руöн, сьöвзис и ныр увтас бизгыштiс: «Тьфу, баля гид! Сьöлöм гудрасьö...» И пондiс нырнас нюкьясьны, кыдз пон, кöда ылiсянь кылö, кытшöм керкуын рытнас лонтiсьö печка, кытöн узьöны ни, а кытöн эшö пукалöны.

Прокопьевичыс юис винасö, коддзис и эз, сылöн вирыс орсiс быд жилаын, чувйис сьöлöмсö, кöда пизис — гажöтчис, эшö бы кошшис юыштны, но кытiсь и кинлiсь? Ась. Тырмас. Веськыта кö висьтавны, Прокопьевичыс осудитiс асьсö, модис: «Но мый, Пестер? Лаксин бöра... Но тэ и... — кымöрас видзöтiс тöлiсьыс вылö, кöда юрыс вевдöрын öшалiс чарлася паськытжык. — Кытчö öнi? Кин ордын пондан узьны? Поди, Андрейезас мунан? Сулав! Сэтчин нем керны. Сэтшöммезас...» Кытшöммезас, ачыс эз вежöрт, но сьöлöмыс эз кыскы воннэзас.

Прокопьевичлö татöн быд мортыс тöдса — асланыс, и сiйö быдöн тöдö сiдз, что, натьтö, быд керкуö пырас и узяс, некин оз шу, что тэ, Прокопьевич, пет керкусис.

Прокурорыс видзöтiс-керис тöлiсьыс вылö, кöда вылö пондiс петны ни лöгыс, мыля сiя югдöтö, омöн тыдалö, кыдз луннас жö, и тэнö адззöны кытчö мунан и мый керан. И адззы бы... Мый сэтшöмыс адззасö кö? Тöдас и оз адззиссесö. «Прокурор! — юрас орсiсö думаэз. — А кин вöлi? Син сайын Пестерöн и шуисö, а öнi быдöнныс: Прокопьевич да Прокопьевич, пырав миянö... Сiдз бы бöргöгöр быдöнныс и нюлöны. А мый? — Прокопьевичыс сувтiс йöррес бердö, ружтiс да сьöласис, öтöрасис, гурйöвтiс и сэтöн жö серöмтчыштiс. — Унаöв юсьöма... Егорыс эд! Чукыля кок... Мед... Дорйыны колö зонкасö, то быль налоггес понда дойдасö, — и сэтöн жö кодувья юрас пырис Проша Опонь, кöда гожумнас ытшкöма колхознöй межаись ноша етш турун, вердöм мöссö. — Тьфу тэ мать! — сьöвзис. — Эз эд додь турун гусяв, а ноша етш. Опоньыс эз жö бы сiдз кер, да сылöн мöсыс коксö дойдöм, видзис карта выланыс. Но... Сёпканыс (предыс) норасис эд... Ноша туруныс понда, кöда гожумнас кок увтын быдмö мымда колö, тюрьма, кхе-кхе... Матын ни вöлi Опоньыслö, да ачым жö... Жаль лоис мортыс и дорйи, но... А сiя? Пон чужöм: панталас, здоровайтчас, а гортас оз рочав. Вежöртiн, прокурор?! Мед... Ачыс тöдö. Поди, бöра пантасяс? Сэк, Опонь, прокурорыс тэныт оз ни понды шыннявны, тырмас шырöн да каньöн орсны! — сулис зырымсö, сулалыштiс, öвтчис-керис, видзöтчис, мед некин эз адззыв, что код, асьсö осудитiс. — Но, Пестер, бырöм вешьяна прокурор, совестьтö öштiн... Кытчö колин, кытöн коккет увтö талин? — сэтöн жö кыдз саймис. — Тэ мый сiйö баитан?! Совесть... Мыля жö ме сiйö öшта?! Юыштi, но и мый? Абу жö ышö пон... — серöмтчыштiс, чорытжыка сувтiс коккес вылö, юрсö чатыртiс, бöра кымöсыс увтöт видзöтыштiс тöлiсьыслань, сьöвзис: лöгыс петiс тöлiсьыс вылö и ас вылас. Гардiс чигарка, öзтiс, куритiс, видзöтчис, кинлöн жö бы öшыннэзас тыдалö би. Но биыс етша ни кинлöн дзуз видзис, кöть быд мортыс рытнас аслыс адззис бы удж, но быдöн, тыдалö, мыдзис ни пантавны да кольлавны гöссесö и öнi куйлiс нето гор вылын, нето полатьын, ружтiс, кöть и оныс эз пет. И прокурорыс пондiс тальны виль лымсö да жагвыв шагнявны вичкуланяс моз, кыдз öшис. Тöлiсьыс кымöрас топ вöтчис сьöрас, нерис... Поннэз лёка вувтiсö öшын увттэзын, вуджöртчис и öшис вичкуланяс морт, баняэзлань котöртiс сьöд гöна кань — вожмöвтiс Прокопьевичыслiсь туйсö.

Прокурорыс сьöвзис каньыслань, кежис мöд улицаас, пондiс мунны баняэз да йöррес пöлöн сылань, кытöн олiс Илья Катя.

Катяыслöн керкуыс сулалiс бокын моз, кыдз кушкыртчöм-дзебсисьöм ыбыс дорö, мед сэтчö рыттэзнас некин оз лок.

Катяыс олö öтнас, и рыттэзнас сылiсь керкусö орддьöны мужиккес, полöны инькасис, сы лёк мывкыдiсь, кöда лёк кань кодь — эн малышт, гыжьялас! Нем и думайтны, что узьтöтас бокас, но прокурорыслöн сьöлöмыс пондiс кыскыны дорись керкуыслань.

Прокурорыс видзöтыштiс тöлiсьыс вылö, кöда вöтчис — шаг эз кольччы, и мортыс саясьлöмöн моз, баняэс пöлöн, топ мунiс гусясьны, кыссис одзлань.

Сёр рыт, некин и некытöн оз ни тыдав, а Прокопьевичыс полö отирсис, а, поди, мымдакö ассис стыдитчö, что ойнас кыссьö инька ордö, кöда олö öтнас...

Катяыс керку дынын некин абу ветлöтöм — пон след нельки виль лымыс вылын оз тыдав, бытьтö хозяйкаыс гортсис абу и петалöм. Мужикыс мунтöнняс сiдз пымалiс и мыдзис, что сьöлöмыс моросас чеччалiс-пессис. А тöлiсьыс юрыс вевдöрын сё сiдз жö шыннялiс, бытьтö лöсьöтчис быдöнлö висьтасьны, кытшöм Прокопьевичыс морт.

Локтiс Катяэз посöдз дынö, тупка моз юрсö бергöтiс öтöрö да мöдöрö, небыта шагньöвтiс ни посöдзас и сэтöн:

— Гав! — посöдзыс увтсянь чеччöвтiс понок. — Гав!

Прокопьевичлöн сьöлöмыс тёп-тёп! Кутчисис наганыс бердö, пиннес пыр висьталiс: «Ме тэныт!»

Овсис бы оланыс понокыслöн, но сiя тöдö ни йöзлiсь мывкыдсö, адззö, что былись кымöсас вермасö пöжавны, сiйöн кивнитiс, лэдзис бöжсö и сöтiс син одзись.

«Враг!» — поныс бöрсянь сьöвзис Прокопьевичыс, малыштiс кымöссö, ловзисис пыдынжыка, топ нач садьмис и вöлись кокнита кайис посöдзас, чорппезнас тач-тач вачкис ыбöсас и пондiс кывзiсьны.

Арся рытыс эз лысьт пыдынжыка ловзисьны. Посадыс бытьтö узис ни, но нырö кысянькö павкис тшын дук. Прокопьевичыс видзчисис, но керкуас некин эз кыв. Катяыс куйлiс гор вылын и, кыдз кылiс посöдзсис йöзлiсь шысö, сiдз сьöлöмыс и пондiс тёпкöтны, повзис, пондiс кывзiсьны да видзчисьны оз я мун, оз я...

Кöр прокурорыс вежöртiс, что ыбöссö оз осьтö, сэк сiя коксö öдззöтiс да брынгис. Керкуас пондiс кывны кокшы, öшынöт öтöрö чеччöвтiс би югöр, водiс лымокыс вылö и пондiс видзöтчыны.

Кылö, оссис керку ыбöсыс, и хозяйкаыс пытшкись посöдзсянь ни повзьöмöн юалiс: «Кин сэтчин?!»

— Ме, — ласковöя бы горöтчис Прокопьевичыс, но голосыс кыдз йöзлöн киж-каж керис и сибдiс.

— Кин тэ?! — сiдз жö полöмöн мöдпöв юалiс хозяйкаыс.

— Ме, Катерина Васильевна, ось...

— Кин тэ?

— Кин да кин... Ось! — лёкжыка ни эрзыштiс кöин моз прокурорыс. — Вунöтiн ни Прокопьевичсö?!

— Мый тэныт ойнас колö?

— Горш косьмö. Ось ыбöстö, эн пов, ме тэнö ог сёй. Дзурк-вирк оссис ыбöсыс, Прокопьевичыс маласьтöн пырис тöдтöм посöдзö, маласьтöн жö вожмöвтiс керку ыбöсыслiсь порогсö.

Пызан вылын сотчис биок, югдöтiс керкусö, кöда вöлi учöт — круг бергöтчин и сибдiн, но гажа: джоджыс сэтшöм сöстöм, что полан и тальччыны, стенаэс сiдз жö зыртöмöсь-миськалöмöсь да лякöмöсь картинкаэзöн. Тыдалö, что хозяйкаыс чож, кöть и виль нинкöммесö вунöтöм жö дзимлявны, чапкöм жечись дорöм печкаыс бокö. Но Прокопьевичлö медодз син вылö усис не джодж да потолок, а чöвпан ыжда зеркало, сiдз кыдз деревняэзын етша кинлöн эмöсь нiя. А вот идзасiсь керöм чачаэз праздник паныт пондöны öшавны быд керкуын, и Катяыслöн эмöсь жö.

Локтiсьыс жаднöя видзöтiс керку пытшксö, сыбöрын синнэсö иньдöтiс хозяйкаыслань, кыдз керкуас быль пырис тшыг, и горшыс косьмö, кижгыштiс: «Чож...»

— Кытшöм эм, — шыасис Катяыс.

— Öтнат и олан?

— А кин меным колö? — кокнита баитiс хозяйкаыс да полöмöн видзöтiс Прокопьевичыс вылö. Катяыс вöлi неыджыт мыгöра, топыт, зумыт яя, моросвевья, гöгрöса чужöма, кыскис мужиксö дынас, öзтiс аскодя думаэз, сiдз бы кодувья и малыштiс, окыштiс да жмитыштiс бердас. Но кыдз шуöны:

«Матын гырдззаыт, да он курччöвт». Öтыс садь, мöдыс код, öтыс совестьсö пöдтöм винаöн, мöдыс эшö эз вермы вунöтны роднöй-любимöйсö, кöть и Ванькаыс, жöникыс, кулiс важынкодь ни, но олiс, узис да вöтасис Ванькасö, думаэзнас асьсö ылынжык видзис мужиккес дынiсь, и быд лун уджалö колхозын, быдöнкöт öтлаын, мый колö керны, кытöн сьöкыт уджыс, оз вермы öтнас, шыасяс-висьталас, мужиккес сэтöн и эмöсь: турунсö ваясö, пес кераласö, нинкöмсö кыясö и ырöшсö юасö, но киэзнысö оз нюжлалö, а эта... Пырис керкуас — öмыс осьта, пиннес гер, синнэзнас сiдз тэнö и сёйö.

Катяыс тöдö Прокопьевичсö кыдз счётоводöс, прокурорöс... Да Прокопьевичыс бура тöдса Катяыскöт, тöдö, что инькаыс асьсö оз понды стыдитны, оз вод увтас, оз öшöтчы голяыс бердö.

— Здравствуй, Катерина Васильевна! — Прокопьевичыс порог дорсянь чывкнитiс джоджыс шöрöдз и пондiс кижгыны. — Кыдз ни олан?

— Ола, — вöлись шынь керис хозяйкаыс, малыштiс юрсö и сувтiс пызаныс сайö.

— Чож, — шуис и бöра кыдз виньдiс локтiсьыс, матöжык шагньöвтiс пызаныслань, гардыштчисö коккес, сапоггес бöрын джоджас кольччис след — сылiсö лымторрез.

Хозяйкаыслöн синнэс югдыштiсö, но эз мыччав, что полö.

— Катерина... — прокурорыс шапкасö шупкис лабичö. — Катерина, тöдан жö мый... Эта эд менам... — серöмтчыштiс, вывсис чöвтiс шинельсö да шупкис жö лабичас. — Эта эд менам... Иньö сьöрам абу и горшö косьмö, — баитiс-кижгис да жаднöя видзöтышалiс Катяыс вылö.

Сiйöн, что керкуас кыкöн, что мыйись-мый, некин оз кыв, оз отсав, Катяыс кыдз кынмис пызаныс сайö и сулалiс, топ не кулöм и не ловья — ловзисьны пыдынжыка эз лысьт, эд сы ордö пырис не асланыс бырöм нинкöма колхозник, а прокурор, кöда кöмалöм сапоггез, пасьтасьöм не деревенса кодь паськöмöн да и баитö, кыдз керкуас хозяин.

Öтыс дрöжитiс гортас, а мöдыс веськыта видзöтiс Катяыс синнэзö, пöрччалiс ни коссис ременьсö, сы бердiсь мездöтiс наган да сiйö торскис-пуктiс лабичас жö.

Кыдз хозяйкаыс адззылiс нагансö, сэк вöлись нач и öшис, топ бырис садьыс; сiя кывлiс, что наганыс лыйö, сылö кажитчис, что только вöрзьöтчы, наганыс ачыс вермас лыйны.

— Вот сiдз, Катюша, — сапоггесö ни коккезсис кыскалiс Прокопьевичыс.

Енугöлын тачнитiс, кыдз еныс печиктiс пызан пöлыс кузя, висьталiс, что этадз оз бы ков, кöр хозяйкаыс керкуас эшö ловья.

— Мый керан? — смевмöтчис, смевмöтчис да горöтчис Катяыс, кыдз ловзисис быд вынсис.

— Ме мый кера, хе-хе, — серöмтчыштiс прокурорыс. — Чöвтча да пöрччася. Ог жö понды öтöрас узьны.

Висьтав бы сэтöн: «Мун татiсь, узь сэтчин, кытöн олöны мужиккес!» — но... Катяыслöн кылыс эз бергöтчы, öмыс эз оссьы: мöдiклö бы висьталiс, мöдiклö бы туйсö ыбöсыс бöрись мыччалiс, а эталö...

— Мый нö? — видзöтöв-керис хозяйкаыс вылö Прокопьевичыс да шуис ласковöй голосöн. — Менам эд горшö быль косьмö. Или сюромкаыт юсис ни?

— Эм эшö, — шыасис инькаыс.

— Сэк вай.

Катяыс чывкнитiс комö, сунилабич вылiсь босьтiс кружка, пыралiс джоджулö, петкöтiс юан и юалiс: «Кыдз юан? Поди, шонтыны?»

— Мыйлö?! — гажöн горöтчис Прокопьевичыс, шыннялiс, жаднöя видзöтiс инькаыс вылö да ньылалiс дульсö. — Эн шонт. Ме гортын пыр юа йысорон.

— Сэк ю, — шынь керис хозяйкаыс, смевжыка ни локтiс тыра кружканас Прокопьевичыс дынö и нюжöтiс дозсö.

Мöдыс этö и видзчисис: шульга кинас босьтiс кружкасö, а веськытнас кутiс инькаыслiсь кисö, кыскыштiс асланяс, быд вынсис жмитiс небыт телосö бердас да сiдз, что Катяыслöн сьöлöмыс сувтчыштiс, небзисö кикокыс, бергöтчыштiс юрыс, а прокурорыс пишкис-лолалiс вина дукöн, пöдтiс-жмитiс.

— Тэ мый керан?! — кивзыштiс инькаыс. — Пон! Еныс енугöлас чорыта да лэчыта видзöтiс Катяыслань, кыдз шуис: «Мый ме тэныт висьталi?! Вунöтiн!»

— Катюша! — кыкнан кинас ни бердас жмитiс Прокопьевичыс инькасö да сiдз, что сылöн ризьöтiсö лыэс. — Катюша ... — пондiс окавны — дульнас мавтiс рожабаннэсö.

Катяыс пессис жö бы, виклясис, но эз ни вермы не брынгыны, не курччöвтны, кыдз бытьтö сы вылö тальччис ош.

39

Асывнас Прокопьевичыс узис дыр, а Катяыс чеччис пемытся-пемыт и котрасис комын: медодз лонтiс гор, петалiс мöс дынö и бöра öшис джоджыс шöрö, сувтiс да пондiс видзöтны аскерöм кровать вылö, кытöн пишкис-узис йöз мужик — йöз не йöз, кин сiя Катяыслö и лоö, кин и эм, кыдз и шу, и сылö нем и абу: локтiс, пырис керкуас, вожасис вылат и талун сё узьö... Этадз разь керис бы аслат мужикыт? Локтiс я бы код Ванькаыт, кöр сiя гортын топ полiс горöнжыка кыв горöтчыны, полiс тэнö зэлытжыка жмитны, видзис, кыдз чачаöс, а эта ош моз няпралiс киэтö да сiдз, что талун доймöны и, натьтö, лöзöсь... Катя тэ, Катя... Но кин эта тэныт?! И стыд тэныт абу йöз мужиксö узьтöтны ольпасьыт вылын? Видзöт жö еныс... Кыдз öнi мыччисян отирыс син одзö? Мый висьталан? Отирыс эшö мый?.. Кыдзкö олан, не öтнат эд сэтшöмыс, эмöсь морт-мöдыс, кöдна вылын пыр сералöны, шуöны да видöны — кодя ним абу, но Ванькаытлö мый висьталан?! Ловья кö Ванькаыт?.. (Ванькасö нуöтiсö армияö, и сэтчинсянь локтiс гижöт, что вийöмась...) Ох, Катя, Катерина — бöжтöм сучка тэ! Совесьтöм öнджа... — синваэс петiсö инькаыслöн, видзöтiс йöз мужикыс вылö и эз ни тöд, мый сiдз пессьö сьöлöмыс, кинiсь медöддьöн полö.

Видзöтiс инькаыс Прокопьевичыс вылö, вермасис думаэскöт да кутчис бергавны горыс гöгöрын, керис уджсö, сыбöрын чожа пасьтасис и нач пемытöн петiс керкусис, медбы мунны уджавны.

«Катя тэ, Катерина, сучка! Мый керин?! — Катяыс одзся-одз мунiс уджавны, а юрас пизисö думаэз, кöдна талисö асьсö и топ ылiсянь ни адззисö Прокопьевичсö, кöда некинiсь и немись эз пов, некинся абу умöльжык не тушанас, не рожанас... Да эшö прокурор! Кöда йылiсь баитöны и полöны, а сiя узис тэ бокын, окалiс и жмитлiс, кыдз ассис... Сiдзкö... Любитiс эд... А тэ? Катя тэ, Катерина, сучка тэ! Но кин тэ талунсянь сэтшöмыс?! Кытшöм кылöн шуны да видны? Абу мужикыт и на... И лоас я? Локтас я Ванькаыт? Ловзяс я вийöмыс? — тышкасис думаэскöт инькаыс, бергалiс Прокопьевичыс гöгöрын, то видiс, то мöдöр бергöтлiс. — Тэнат эд! Тэ бокын узис и лоас тэнат!» Öтöрас эшö пемыт. Инькаыс öтнас, некин сiйö оз адззы, некин оз кыв, думаэсö оз вежöрт, оз тöд мый сьöлöмас.

Прокопьевичыс узис вель дыр, югдытöдз, сыбöрын осьтiс синнэсö, видзöтiс омöн, перво эз вежöрт кытöн и мый сыкöт, вöлись швыркнитiс-чеччис, перыта кöмасис, пасьтасис, эз миссьы, эз сёй, шы эз сет, юрыс вылö пуктiс шапкасö и — ыбöсö! Пышшис керкусис, топ пыралiс гусясьны и некöр вöлi бöрсяняс пöднавны ыбöссö. Луныс оссис тöння кодь жö лöнь, рам да кымöра, кыдз лöсьöтчис мыйкö керны, думайтiс овны мöднёж и шоччисис, медбы талун жö вежны мывкыдсö. Улицаын дыша котрасисö поннэз, дыша керку юррез вевдöрын трубаэзiсь петiс тшын да сэтöн жö уськöтчис крышаэс вылiсь увдöрö — ольсассис лымыс вылö. Дворись отирыс дыша нуöтiсö вöввез, только школаö тэрмасьöмöн котöртiсö челядёккез. Прокопьевичыс йöррес пöлöн мунiс сельсоветö, бергöтлiс юрсö, кыдз полiс, что кинкö кутас бöрсяняс. Сельсоветын сiйö видзчисис ни сельсоветiсь предыс, сiдз кыдз тöн ни висьталiс, что талун локтас одзжык.

И тöдiс предыс, что колö чеччыны одзжык, одзжык локны сельсоветас, мед прокурорыс оз жö понды кöритны, что дыр узян, весь олан. Чеччис одзся-одз предыс, котöртiс уджавны, пукалiс аслас местаын, кытöн пукалö быд лун, быд лун керö удж, кöда аркмö и оз. А талун мый и лоас, кыдз луныс и чулалас, кöр эм тэсся ыджытжык, кöть Игнатыс не öтiк год ни уджалö сельсоветас, тöдö ни кыдз колö пантавны и кольлавны начальствосö, öнi öтнас жöдзис сельсоветас, сiйö и керис видзöтлiс öшынö-öтöрö, кöр улицаыс эшö вöлi лöз югыт, но отирыс мунiсö ни уджавны, а прокурорыслöн след эз вöв. Кадыс чулалiс. Жагвыв югдiс, и вот чом угöв сайсянь мыччисис прокурор, швыркнитiс сельсоветлань, чожа кайис посöдзö, пырис керкуас, кöдзыта здоровайтчис (кисö эз сет, а гогыньтыштiс юрнас). Ыбöссянь пуксис пызан сайö, Игнатыслiсь юалiс, мый ни керö, кыдз олö да уджалö, кыным ни морт мунiсö керны вöр.

— Уджалöны отирыс, — Игнатыс тэчöмöн нюжвыв горöтчис, кыдз асланыс мортлö, кöдö тöдiс бура: быдмисö öтлаын, кöдзлiсö и вундiсö, вöлi, что öтлаын котрасисö и нывкаэз дынö. Быдöс вöлi томсяняныс и сыбöрын топ öтамöднысö эз вунöтлö, и мый бы öнi баснинаныс чуклявны да суськыны, кöр оланыс син одзын, но Игнатыс шуис, что олöны бура, сёйöны пöт, а сэсся мый колö? Мый колö эшö крестьянаыслö, кöр нiя сы понда и олöны медбы быдтыны нянь, только вот сьöкытöв жö, кöр деньгаыс абу, да эшö и налоггез...

— Менö деньгаыс оз пур! — видзчисьтöг лöга эрзыштiс прокурорыс. — Мыся, кыным морт ни мунiсö вöрас?! — синнэзас кöдзыт югöр — йöз лоöма.

— Кыным морт?.. — öшис Игнатыс. — Тöн мунiсö вита да талун морт-мöд. (Баитiс, что вита да морт-мöд, а былись кö... Некин эд эз мун: отирыс лöсьöтчисö вöрас кайны быдöнныс öтлаын.)

Прокопьевичыслöн висис юрыс и гудрасис сьöлöмыс. Этö адззис сельсоветсис предыс, но нем эз шу, только ас кежас шыннялiс...

— Тэ кин?! — ыкöстiс Прокопьевичыс. — Сельсоветас пред али старуха, кöда только кужö горвыв дорын печкыны да тараканнэз кутавны, сiйö ни он тöд, кыным морт мунiсö вöрас! Ныр увтат он тöд, мый керсьö! План колö вöрас тыртны! Председатель!.. — сiдз бы и матькыштiс, но видзсис.

— Кытчö тэрмасьнытö? — эшö асмознас модис предыс. ― Сылöтас эд... Мукöдыс ышö доддезнысö абу керöмась и подаыслö вердчансö эз вайö...

— Кытшöм пода?! Кытшöм вердчан?! — öзйис прокурорыс и кулакнас гымгис пызаныс вылö. — Кытшöм вердчан?! Кытшöм пöда?! Думайтан этöн! — чуньнас мыччалiс аслас юр вылö. — Думайтан или он?! Планыс оз видзчись, ог кö тыртö, миянлiсь тэкöт юррезнымöс кераласö! Мый синнэтö паськöтiн да ме вылö видзöтан?! Или важын ни эн адззыв?!

Игнатыс дынöдз Прокопьевичыслöн кыввес дзик сё эз локтö, шынь керис и шуис:

— Кытшöм пон пурис тэнö?

Прокурорыс осьтiс öмсö и пондiс видзöтны, кыдз сы одзын сулалiс не Игнатыс, а нач йöз — бöб морт, кöдалö кöть юрыс вылын майöг лöсйы, пондас керны ассис. Видзöтiс-керис Прокопьевичыс сельсоветiсь предыс вылö, аслас эта коста лöгыс гурйис-сотчис и вöлi сэтшöм недолыт, что петiс бы керкусис, ловзисис моростырнас, öмас заргис кöдзыт лымсö, но эз пет, а пыдына да сьöкыта лолалiс, дзик вачкисö пельбокас, а Игнатыс шыннялiс, кыдз орсiс...

Юрыс висис Прокопьевичыслöн... Лöгыс петiс и пиннес пыр Игнатыслö висьталiс:

— Тöдан жö мый... Мун гортö да тэч котома. Тырмас тэныт эстöн весь няньсö сёйны!

Игнатыслöн вежсис чужöмыс, кельдöтiс.

— Мый тэныт висьталi?! — пиннес пыр горöтчис прокурорыс. Сельсоветсис предыс вöлись öшис, пондiс ружтыны, кыдз сiйö горт шöрас вартлiсö шатьöн, сiдз стыдитiсö, что сыбöрын кöть отирыс син одзö эн мыччись, некинкöт эн баит, кöр том и пöрись пондас шуны: «Тэ миян сельсоветiсь председатель, мый нö тэ? Мыля нö сiдз уджалiн? Нач ни тай тшыкин, а ошшасян...» И Игнатыслöн шы эз ло, кыдз кывсö ньылыштiс. Сельсовет стенаын шовкöтiс часы, посöдзын кылiс кинлöнкö шы, натьтö, кайис пон.

— А! — прокурорыс сёйис-видзöтiс предыс вылö. — Мый лоис?! Ньылыштiн я мый я кывтö?! Висьтав, мыля вöрас быдöнныс эз мунö?! Или быль видзчисян кöр лымыс сылас? Сэк миян понда некин ни оз понды уджавны. Вежöртiн пон юрнат! Мый он баит?!

Игнатыслöн öмыс бöра шыннялiс, но не сысянь ни, что вöлi рад, а повзьöмувья.

Прокопьевичыс кульö-видö Игнатсö, а сiя пиньлалö öмсö, кыдз рад, что видöны, и этасянь прокурорыслöн эшö öддьöнжык петö логыс, видзöтны ни оз вермы предыс вылö.

— Мый шыннялан?! Или каньыс одзат бöжсö лэбтiс?! А! — юалiс прокурорыс.

— Ме ог шынняв, — бизгыштiс мöдыс, аслас öмыс сё сэтшöм пиньöла.

Прокурорыс куритiс, чигаркаторсö швыргис горыс сайö (лэбзисö бичиррез), чеччис пызаныс сайись, ветлöтöв-керис ыбöс дынö да бöр, ачыс веськыта видзöтiс стенаö Сталин портрет вылö, шоччисьыштiс да вöлись бöра и пондiс баитны:

— Но мый эшö висьталан? Мыйöн сьöлöмöс гажöтан?

— Öнджа... — пондiс мыктавны Игнатыс да веськыт кинас ныр увтсис нетшкыны уссö. — Эта... Ипатыслöн Третьякыс тöн рытнас вартлöм Семик Сергейöс...

Предыс мöдöтпыр эз бы шыась тышкасьöмыс йылiсь, кöр Ипатлöн зоныс да Сергейыс тышкасьöмась — курöггес сераласö: унажык öтамöдныс вылын ыксöмась да öтпыр Третьякыс Сергейыслö пöжалöм, но öнi Игнатыслö юрас мый и пырис, кыдз кылыс и бергöтчис норасьны, ачыс оз вежöрт, натьтö, повзис прокурорыс одзын, кöр сiя быд торыс понда пондiс лякасьны, и быд торыс понда прокурорыс одзын виноватöн лоис только Игнатыс. Горöтчис Игнатыс — лэдзис öмсис кыв, кöдö бöр он ни кут и сэтöн жö думаэзнас асьсö пондiс видны, кыдз понöс, кöда весь вувтö тöлiсьыс вылö, кöр адззис, кыдз Прокопьевичыслöн синкагаэс ыждiсö — нёштöм югöр синнэзас мыччисис и кивзыштiс:

— Ки-и-ин? — и пондiс пишкыны нырнас.

— Мыся, эта... Ипат пияныс вартлöм чотоводсö...

— Эта! Кулак пияныс! — радмис прокурорыс, вунöтiс вöр керан йылiсь. — Айыс кодь жö эд облезяна! Но, председатель! Ышö мый керис Ипат пияныс?! Можот, этö ни, а! И тэ ныр увтсит он адззы... Эх, председатель! Мый сельсоветат керсьö?!

— Öнджа... Эта... — Игнатыс пондiс мыктавны — рожаыс гöрдöтiс. — Третьякыс йылiсь талунöдз нем эд эз кывсьы. Зонкаыс уджалö... Бригадирыс пыр ошкö...

— Бригадир... Ошкö... — нерис ни Прокопьевичыс. — Пеллезаныт нитш сюйöмась и олат... А, поди, тiян бандиттэз ни бöра гуддьöны олансö?!

— Некытшöм бандиттэз эг адззыв, — ассис модис предыс.

— Сiдз, председатель, сiдз, Игнат... Видзöта ме тэ вылö... Начальникö пöртчöмыт. Хозяин! Быдöннысö шонтан... Ныр увтсит он адззы... Враггесö конувтат видзан.

— Ме враггескöт эшö öтiк пызаныс сайын эг сёй, — дузгыльтчис Игнатыс, кымöсас мыччисисö ва воттез.

Öтöрас сельсовет посöдзын пондiсö эрзыны поннэз: свадьба нылöн талун и тышкасьöны — гöн тöвзьö!

— Тьфу, пон табун! — прокурорыс öшынöт видзöтыштiс öтöрö. — Быдтöмась... — И бöра лякасис предыс бердö. ― Кинлö тэ висьталан?! Кинöс бöбöтан?! Ме тэныт абу этатшöм, — мыччалiс пызаныс сувда морт вылö. — Думайтан ог тöд, кыдз чарлачöвтаннас быдöнныт öтлаын сёйит и юит?

— Мый отир, сiйö и ме. Ог жö понды торйöтчыны, — дорйисис Игнатыс.

— Кыдз отир, сiдз и тэ...

— Ог тöд... — моростырнас ловзисис предыс. Кымöра лöсьöтчö лоны луныс и дженыт — арся лун.

Гажтöм.

— Кор татчö Ипатыслiсь зонсö! — чорыта шуис прокурорыс да пондiс нютшкыны виль чигарка.

Игнатыс виноватöй пон моз лынь-лынь иньдöтчис ыбöслань, но коккес гардыштчисö, джоджыс шöрö падмис дыш вöв моз, сунки-банки турйöвтiс и невна эз люкав ыбöссö, осьтiс сiйö да мыдз голосöн ыкöстiс сельисполнительлö, кöда пукалiс мöд жырас (отирыс сьöрсьöн-бöрсьöн дежуритiсö сельсоветын, кыдз солдаттэз, кöднö ыкöстан — сэтöн и эмöсь, кытчö висьталан, сэтчö и котöртöны).

— Константин Фролович! Котрась жö Сенич Сергей да Ипатыс зон дынö. Да тэрмась!

— Счас, Игнат Василич, — сярзьыштiс сельисполнительыс — öт кокыс татöн, мöдыс сэтчин... — Котрасям, Игнат! А мый сэтшöмыс?!

— Прокурорыс, — гусьöн горöтчис предыс. — А-а-а, — öмсö осьтiс Костяыс и берездасис ыбöсыс сайö.

— Олат жö... — прокурорыс горöтчис сельисполнительыс бöрын. Кыдз шуис: «Важын ни тiянöс колö бы велöтны да некинлö, а меным некöр». Игнатыс ньылалiс дульсö и думайтiс: «Эн вöв тэ, Прокопьевич, бур мортнас и он ни ло... Нач тшыкöтöм службаыт... Миян кодьсö мортö ни он пукты, а мый эшö одзлань лоас?!» Думайтiс этадз Игнатыс да кывсö курччöвтiс, медбы не горöтчыны — ас вылас не öктыны прокурорыссянь шогöтсö. Недолыт сельсоветiсь предыслö, асывсянь эз тöд мый бы и керис, кытчö бы и пышшис, медбы некин эз тöд и эз адззыв, но... Некытчö он пышшы — из увтö он дзебсись, он шу, что тэ талунсянь он понды уджавны, кöр кыдз кöрталöм сельсоветас и кöть мымда горзы, колö уджавны, кытчöдз оз вежö, а вежасö кö?.. Сэтчин и туй! А талун, он пышшы, а пышшан кö, кутасö, и эта жö прокурорыс юалас: «Мыля пышшалан?! Мыля он уджав?! Мыля отирыс вöрас эз кайö?! Мыля кулöны куканнес?! Вöввес мыля колхозас сэтшöмöсь? Мыля тышкасис Третьякыс?» Мыля да мыля. .. Быдöс колö тэныт, председатель!» Думаэс асывсянь сёйисö Игнатсö, но сiя видзсис, прокурорыслö паныт вывтi эз шыась, адззис, что Прокопьевичыслöн юрыс висьö (сельисполнительыс асывнас баитiс, что сёрöн рытнас Прокопьевичыс мунöма пö Катяэслань). «Ой Катерина-а-а-а! — думаэс бергалiсö ни Катяыс гöгöрын. — Мый нö тэ?! Кыдз нö?.. Али... Эз жö, бат, инькасö серав... А мый сэтшöмыслiсь босьтан?! Сiя керас!» Игнатсö видiсö, а сылöн сьöлöмыс висис йöз понда, сiдз бы чеччöвтiс-котöртiс Катяэзас, юасис инькаыслiсь, кыдз ни олö, мый керö, веськыта бы юалiс, эз я прокурорыс серав, но колiс пукавны сельсоветын и... Кин сiя Катяыслö?! Локтас сы ордö, а мöдыс видзчисьтöг кö шуас: «Мый татiсь кошшан? Или Прокопьевичыс моз жö?.. Начальство... Сьöрсьöн-бöрсьöн миян кодьсö сералат...»

Дзескыт сьöлöмыс вылын Игнатыслöн, дзескыт и, поди, лоас эшö дзескытжык, этадз кö пондас прокурорыс... Сiйöн видзöтiс-керис Прокопьевичыс вылö, смевмöтчис-смевмöтчис да горöтчис:

— Прокопьевич... Талун эд, натьтö, эшö эн сёйышт?.. Кынöмыт эд сималö.

— А? — кымöсыс увтöт видзöтыштiс прокурорыс — вежсис голосыс, рамжыка ни баитiс. — Мый тэ шуан? Кынöм... Мед сималö... Некытчö ме сёйнытö ог мун. Колö уджавны. Тэрмöт öнджаэтö...

— Локтöны ни! — öшынлань бергöтчыштiс Игнатыс, кытöн улицаöт сельсоветлань сьöрсьöн-бöрсьöн тэрмасисö куим морт: медодзын сельисполнительыс, сы бöрсянь Ипатлöн Третьякыс и медбöрын ни питкыльтiс колхозсис счётоводыс.

Öтöрас пондiс усьны лым, но шоча, кыдз кымöрсис киссис чочком гöн.

Прокурорыс öзтiс чунь кыза чигарка, долоньнас моросыс одзись гладьöтiс йöрнöссö, ременьыс бердiсь лöсьöтыштiс нагансö, малыштiс юрсö да висьталiс:

— Медодз ась пырö эта... Зырымöсь счётоводыс. Сыкöт баитыштам.

— Сергей Семёнович! — Игнатыс локтiс ыбöсыс дынö, осьтыштiс сiйö да ыкöстiс. — Пырав!

Сергейыс ыбöсыс сайсянь шагньöвтiс кузь шагöн, пырис, шынньöвтiс, тувдiс порогыс дорö да пондiс видзöтны веськыта прокурорыс синнэзö. Счётоводыс пасьтасьöм счётовод моз: коккезас вочöм пимиэз, вешьяныс виль, вылас жакет, только йöрнöсыс дöраовöй, но нач жö виль... Рожаыс — сёртни рöма, вирыс сiдз и орсö, синнэс лэчытöсь, повтöг видзöтö прокурорыс вылö, кыдз юалö: «Но мый? Корит — локтi!»

— Тэк, тэк... — Прокопьевичыс пöв синнас видзöтыштiс счётоводыслань, пызаныс вылö одзас ольсалiс неыджыт гижöт. — Тэк, тэк... Мый сiдз видзöтан? Или эн адззывлы менö?

— Адззывлi! Мыля ог адззывлы? — нырнас вирскыштiс том мортыс.

— Бур, что адззылiн. Кыдз олан? — прокурорыс веськыта юалiс Сергейлiсь. — Кыдз ай-мамыт? Ме эд татiсь быдöннытö тöда, и тэнö этатшöмсянь адззывлi, — мыччалiс пызаныс увтö. — Да-а-а, айыт учöт, мамыт сэтшöм жö суланджек, а тэ... Кин сьöрья? Или мирон? — серöмтчыштiс. — Тэ эн лöгась, ме серала.

— Абу, — ныр увтсö чышкыштiс Сергейыс.

— Вот мый, зонка, висьтав-ко мый тöн керин? Мыля эн уджав? — син одзын вежсис Прокопьевичыс, голосыс вынсялiс, чужöмыс лоис лёк.

— Мыля? — öшис зонкаыс. — Дыш петiс, натьтö... Шогалi кодь...

— Кыт висьö? Мыля шогалiн? Ветлiн фельдшерыс дынö?

— Эг. А мый сiя? Менö вартлiс Третьякыс! — юрсö мышкыртiс Сергейыс.

— И öддьöн? — Талис и мый...

— Кытöн ранаэс? Мыччав!

— Эстöн, — юрыс бöрö кисö нюжöтiс Сергейыс.

— Чöвтчы да мыччав!

— Мый чöвтча? Сiдз эд тыдалö, — счётоводыс бергöтiс спинасö, лэбтiс вевдöр жакетсö и йöрнöссö. — Гор пöдан кодь спинаö, лöз... — öмыс сiдз и жугалiс, сiдз синваэс и петiсö.

— Пуксьы! — сэк жö висьталiс Прокопьевичыс. — Некыт тэнат абу лöз. Висьтав, мыля тöн эн уджав?! — öддьöнжык лöгасис, кöр юрыс топ эшö öддьöнжык пондiс висьны и пондiс симавны кынöмыс ни — тшыгыс нималiс моросыс увтöт, и тöння рытыс син одзас, топ Катяыс локтiс да юалö: «Мый нö?.. Пон моз... Пырин-петiн и абу...»

«Да-а-а, — прокурорыс видзöтiс счётоводыс вылö и думайтiс Катяыс йылiсь. — Сэтшöмыс бокын абу стыд узьнытö...» И бытьтö бöра инькасö кутiс, жмитыштiс да окыштiс, но думаэсö дзугис зонкаыс, кöда веськыта видзöтiс и веськыта жö юалiс:

— Но мый нö? Мый понда менö корит?

— Мый понда?! А вот сы понда! Мыля вот тöн эн уджав?! Тэ тöдан, прогулыс понда мый овлö?!

— Тöда...

— Сiя и лоас! Вежöртiн?! И пет эстiсь!

Керку угöлын видзчисьтöг шутньöвтiс тöв, öшынö койыштiс лымöн, и сiя жö тöлыс топ керкусис нöбöтiс-пöльыштiс счётоводсö. Крыша вылын дзуркнитiс тёс. Дзурк-вирк керис сельсоветiсь ыбöсыс, Прокопьевич чеччис пызан сайись, гор одзö швыргис чигарка, бöр мунiс пызаныс дынöдз, чорппезнас сярзьыштiс пызан пöлыс кузя и шуис:

— Ме тiянöс, каляннэз! Велöта овнытö... Од пондö прогуллэсö керны да тышкасьны!

— Прокопьевич, поди, ме татöн ог ни ков? — полöмöн моз горöтчис Игнатыс, кöр аслас сельсоветын топ лоис йöз и нем бы сылö татöн керны ни.

— Пукав, — мурзьыштiс мöдыс и ыбöсас ни ыкöстiс. — Эй! Кин эшö сэтчин?!

Пырис да Сергейыс местö жö, табуретка вылö, ыбöсыс дынö пуксис Ипатлöн Третьякыс — ыджыт да топыт мыгöра, чочком юрсиа том зонка, кöда, натьтö, кöть уджавны, кöть томмескöт вермасьны да тышкасьны и, поди, йöктыны некинлö оз сетчы, быдöнöс вермас. Третьякыс топ тöн эшö вöлi каляпа, а талун видзöт кытшöм ни, только пасьтасьöм и кöмасьöм не счётоводыс моз: коккезас виль нинкöммез, кöднö пышналöмась виль пытшыннэзöн, кöрталöмась виль воннезöн, а нямöттэс важöсь, вешьяныс важ жö, дöраись вурöм, но эшö абу бырöм, вылас гуня.

40

Прокопьевичыс видзöтыштiс зонкаыс вылö, öт öм угöвнас шынь керис, кыдз сералiс — эз верит, что Ипатлöн зоныс вермас сы ыжда быдмыны, сiдз пасьтасьны да кöмасьны, кöр Ипатыс олiс да ружтiс не уджсянь да мыдзсянь, а вывтi бура олöмсянь, а зоныс... Прокурорыслö медодз тöдвылас усис Ипатыс, кöда вöлi зонысся топытжык, пыр отирыс вылö видзöтiс кымöсыс увтöт, кыдз лöсьöтчис люкавны быдöнöс, а Третьякыс айыс моз эз будзгылясь, а видзöтiс веськыта. И кыдз дыржык Третьякыс видзöтiс прокурорыс вылö, сiдз öддьöнжык и лöгасис Прокопьевичыс, сiдз син одзас дзик и сувтiс Ипатыс, кöда олiс да тешитчис, йöзсö мортö эз пукты, бытьтö сiя и вöлi — öтнас кодя, вына да богатöй, пыр видзис куим вöв, куим мöс, вöлi сылöн нельки очёрка-машина, и отирсö уджöтiс — некинöс эз жалейт, шедан кö — гöран и кöдзан öт пемытсянь мöд пемытöдз, етша лоас — ойнас дзуртан, садь быртöдз уджалан, а вештiсис... — грош да копейка, и вердiс кушманöн да багсьöм няньторöн. Öнi Ипатыс абу ни, а, поди, эшö ловья, эшö отирсö кытöнкö нерö да дульсö кöин моз ньылалö, Совет властьсö бы люкалö... Кин тöдö, кöр эз шед... «Пантасим бы, кулак, сэк бы и видзöтiм, кыдз тэ китö лэбтiн бы Совет властьыс вылö! Видзöтiм бы, кыдз тэ миян коддесö талин и вартлiн...» — лöгыс пизис прокурорыслöн Ипат вылö, кöть и одзас пукалiс зоныс.

Прокопьевичыс пöв синнас видзöтiс Третьякыс вылö, а думайтiс айыс йылiсь и сылöн видзчисьтöг пондiс висьны спинаыс, топ тöн пывсьöтiсö-вартлiсö зоррезнас (пыр эд этадз спинаыс висьö погоддяыс тшыкан одзын). Прокурорыс чатыртчис, нюжöтчис, спинаыс ризя-разя керис да сiдз, что кылiс сельсоветын пукалiссеслö, сыбöрын вöлись и шуис:

— Ну-с... — и синнэзнас топ лöсьöтчис сёйны Ипатлiсь зонсö. — Мый одерлун рытнас вöлi?! Третьяк Ипатыч, а!

— Нем эз, — челядь моз кокнита горöтчис Третьякыс, синнэзнас кваркыш эз кер.

— Кыдз нем эз вöв?! — прокурорыс бöра чорппезнас пондiс сяткöтны пызан пöлыс бердö. — Тэ менö, зонка, эн бöбöт, ме абу ни учöт, мать тэнö! Висьтав веськыта, мый одерлун керин?!

— Нем эг, — сiдз жö веськыта видзöтiс Третьякыс.

Öтöрас крыша вылын дзуркнитiс тёс, угöлын лёкжыка ни уннялiс тöв. Усис лым — швачкис öшыннэзö. Погоддяыс тшыксис.

— Петав, — Прокопьевичыс юрнас öвтыштiс Игнатыслö. Игнатыс петiс да бöрсяняс топыта пöдналiс ыбöссö.

— Но! — пиннесö гичыртiс Прокопьевичыс, жагвыв кокнит кокшыöн сибöтчис Третьякыс дынö да сiдз пондiс видзöтны веськыта синнэзас, кыдз лöсьöтчис ньылыштны. ― Но!

— Мый, но? — Третьякыслöн чочком чужöмыс нач чочкоммис.

— Тэ тöдан кинкöт баитан?! — пиннес пыр шуис прокурорыс.

— Тöда... — гажтöма шыасис зонкаыс.

— Тэ... — одзись кузь чуньнас Третьякыс ныр одзын пондiс легöтны прокурорыс. — Тэ... Кулак пиян! Вежöртiн?! Абу морт, а кулаклöн зон, вежöртiн?! Айыт кодь жö враг! Айыт моз жö пиат пурт новйöтан. Сiдз эд?!

— Менам пуртыс абу, — сёпкыштiс зонкаыс, аслас син дорас мыччисис синва.

— Тэ меным эн висьтав, кулацкöй морда! Ме тiянöс важын ни тöда... Тöда, что бадьыс кöзыс вылö оз быдмы, вежöртiн?

— Эг, — шуис Третьякыс и пондiс вирскыны нырнас.

— Мыся, кöзыс вылö бадьыс оз быдмы, вежöртiн?! Висьтав, кинкöт вартлiн счётоводсö? И мыля?.. Мый он шыась?! Или...

Гор одзын кусöттöм чигаркасянь öзйисö гижöттэз, керкутыр лэдзчисис тшын — чегис ныр, курöтiс синнэз. Прокопьевичыс гардыштiс нёштöм кыв, чеччöвтiс горыс одзö, талис-кусöтiс бисö, бöр чывкнитiс зонкаыслань и горöтчис:

— Баитны пондам или огö?!

— Сiя ачыс одзжык вачкис, — нузгыштiс ныр увтас Третьякыс.

— Шуан ачыс одзжык вачкис?! Да-а-а, — юрнас пондiс öвтны Прокопьевичыс. — Ог тöд кöдныт тi одзлань вачкит, но думайта, тэ китö одзжык лэбтiн и кин вылö?! — пиннесö гичыртiс. — Кин вылö китö лэбтiн?! Думайтан или он, что сiя счётовод?! Сiя и эм, кулацкöй морда, враглöн элимент. Мыля вартлiн счётоводсö?!

— Колiс! — юрсö лэбтыштiс Третьякыс, шуис, кыдз лыйис и пондiс видзöтны прокурорыс вылö веськыта, кöть синнэзас бытшкы, кваркыш оз кер.

— Ага... Сiдзкö, колiс! Но и бур, — радмис Прокопьевичыс. — Сiдзкö, тэ айыт моз жö... Пизьдыны-паздыны миян кодьсö. Сiдз эд? Но, но... — баитiсьыслö кыдз кинкö вачкис бöрсяняс, чеччöвтiс зэв зонкаыс одзö. — Лыя, кулак пиян! Вия, — кыскис кобурасис нагансö и иньдöтiс Третьякыслань. Зонкаыс тувдiс табуреткаыс вылын.

Öтöрын тöлыс вынсялiс, брякнитiс-шупкис мыйкö посöдзас.

— Висьтав, кулацкöй морда! — прокурорыс нагансö сiдз и заргис зонкаыс öмö — пиннес кальснитiсö и тырпсис чепöссис вир. — Висьтав, то лыя!

Третьякыс вирсорöн сьöвзис коккес увтö и горзöмöн моз баитiс:

— Мый ме вылiсь казялiн? Уджалi-уджалi, а чотоводыс меным гижöма шыш. Локтi правленнёас да юала, мыся, Сергей, мый нö тэ, мыся? Мыля трудоденьсö гижöмыт медъетша? Быдöнкöт тай öтмоз уджалi... А сiя ныр увтам сюйыштiс бирулька да висьталiс, эта пö тэныт оз ков?! И эшö пель бокам вачкис. А мый понда?! Мый ме? Поди, морт жö... Бур, что чотоводыс уджалö пызан сайын, а вöлi бы ме кодь!.. Ме бы сылö аслыс нырыс увтö сюйыштi, мед кувтöдз бы эз вунöт! Тöдiс бы кыдз отирыскöт баитны.

— Вот-вот! — ыкöстiс прокурорыс. — Сiдз и эм... — видзчисьтöг шуис. — Мунан мекöт! Районас тэкöт эшö баитыштасö. Сэтчин ме моз оз пондö юртö малавны! Вежöртiн?!

— Мый понда? — синваэс петiсö Третьякыслöн.

— Котрась гортат да буржыка пасьтась. Но! Мый пукалан, кинöс видзчисян?! — медбöрын прокурорыс öвтыштiс наганнас и дзебис кобураас.

Третьякыс петiс сельсоветсис, öвтчис топ код, а Прокопьевичыс зонкаыс бöрсянь чывкйис-керис джоджöттяс, öзтiс чигарка, куритöв-керис, кыдз шоччисис сьöкыт удж бöрсянь, кöр мортыс дышöтчö и думайтны ни. Пуксис пызан сайö, малыштiс рожасö — тошыс зу, колiс бы бритчыны, но некöр, да и, натьтö, посадас некинлöн абу бур бритваыс, пукалыштiс минута етш, видзöтiс öшынöт öтöрас, адззис, что погоддяыс дзугсис. Öтöрас, кыдз шуöны, не син, не пель — тöлыс тыртiс туйез и колö бы тэрмасьны, мунны районö, но Прокопьевичлöн юрыс висьö — синнэсö бы кунис, водiс да узис, но сэтöн син одзас бöра бытьтö сувтiс Катяыс, шыннялiс да корис гортас. «Но нiйö! Чуньтö мыччав, курччöвтасö и пондасö нимавны, пондасö вöтлiсьны сьöрат, быдöн пондас шуны: «Тэ мый керан, прокурор?!» Шуасö не одзын, дак бöрсянь, и нем он босьт, синнэзнысö он бытшкав! — серöмтчис ас кежас. ― Да-а-а, туяна инькаыс!» Думаэзнас мöдпöв олiс тöння рытсö, баитiс Катяыскöт и аскöттяс: «Инька... Абу эшö мужикыстöг тшыкöм. Веритö я, что ме сы дынö вовлi командировкаö? Или думайтö, что понда любитны? Натьтö веритö! Колiс бы окыштны да сiдз янсöтчыны... — сэтöн жö асьсö видiс. — Но нiйö! Быдöнныс öткодьöсь...»

Мишалöн öддьöн ни сималiс кынöмыс, сiйöн и ньылалiс дульсö, но кольччыны татчö сёйны эз ни понды, думайтiс мунтöнняс сувтчыны Пуксипиö, пыравны кинкö ордö и сёйыштны сэтчин.

Дженыт арся луныс, колö бы тэрмасьны. Прокопьевичыс эшö чорппезнас орсiс-сяткöтiс пызан пöлыс вылын, каттис чигарка, но эз öзты, а бöр шупкис джоджас, мöд жырсис ыкöстiс Игнатсö да висьталiс, медбы татчö корис бригадирсö. Висьталiс и сэк жö öшынöт казялiс, кыдз сельисполнительыс пöльтiс-котöртiс улицаöт, дзик вöтчис лэчыт тöв сьöрö, кöда гардiс и гардiс лымсö.

Öтöрас пурга. Мöдiк бы ассис понсö öтöрас эз вашöт.

Прокурорыс пукалiс пызан сайын да видзöтiс öшынö, Игнатыс сулалiс горыс бердын, виноватöй морт моз голясö нюжлалiс öшынланяс жö, сылö вöлi недолыт, топ мыйкö керис сэтшöм умöльö отирыслö, что синнэсö бы ни эз осьт, эз видзöт прокурорыс вылö, кöда пишкис пызаныс сайын, пиньласис сельсоветiсь предыслань и видзчисьтöг юалiс:

— Кыдз думайтан Кöсваыс кынмис или эз?

— Ог тöд, — висьталiс Игнатыс. — Ойес кöдзытöсь эд вöлiсö.

— А... Эз кынмы кö, вуджа пыжöн, кора вöв и муна, — эз пов Кöсвасис Прокопьевичыс.

Басниыс небзис, вежсис. Öнi удж йылiсь эз баитö, и смевмис Игнатыс да юалiс:

— Прокопьевич, быль я мый я Третьяксö нуöтан?

— А мый? — мурзьыштiс мöдыс, юрсö сюйыштiс öшын косяккес коласö. — Эн юась, мый оз ков!

— Мыся, öнджа... Эз жö эд морт вий...

— А тэ видзчисян, кöр морт вияс? Айыс моз жö керас! Но тэ и Игнат! Эг думайт, что сiдз пондан... Ассит уджсö тöд! Вежöртiн?!

— Öнджа... — гöрдöтiс Игнатыс и сьöкыта пондiс лолавны. — Ме бы...

— Мый тэ?! — прокурорыс лэчыта пондiс видзöтны сельсоветiсь предыслань. — Мый тэ?!

— Этö... — сыр-лёль кикокыс лоисö Игнатыслöн, чочкоммис рожаыс.

Мый бы сэтöн эшö и вöлi, кыдз бы прокурорыс кыввезнас эшö эз и дойд Игнатсö, но дзуркнитiс сельсоветiсь ыбöсыс, и пырис бригадир. Сувтчыштiс порогыс дорö, здоровайтчис, шынньöвтiс, тыдалö, нинкöммезнас лöсьöтчис шагньöвтны пызаныс дынöдз да нюжöтны кисö, но прокурорыс Андрейыслö чорыта шуис: «Пуксьы!» Висьталiс кыдз йöзлö, кыдз прокурорыслö Андрейыс эз вöв вон. И Андрейыс вежöртiс, что эстöн сiя бригадир, а не родня, вежöртiс, мыля сiдз сыкöт баитö Прокопьевичыс, сiйöн и ружтыштiс, шынь керис öм угöвнас, аслыс думанас шуис: «Ась. Ми учöтöсь...» Пуксис табуретка вылö, медбы шоччöтны коккесö, сылöн нiя вöлiсö мыдзöсь ни — мыдзны и колö коккеслö, ежели нiйöн куимись ни «меряйтiс» посадсö сэтчин да татчö, лымыс вылöт талис туйез быд керку дынö, адззылiс ни Прокопьевичлiсь следдэсö, кыдз сiя петöм Катяыс ордiсь, кыдз кежалöм гид угöлö, öтöрасьöм, сьöласьöм и кот моз ляшмасьöм сельсоветас.

— Но мый, бригадир? — шыасис прокурорыс, а бригадирсö сё нерис дума: «Прокопьевич, тэ Прокопьевич! Думайтан öтнат татöн ылöсаыс? Абу эд. Ми эд сэтшöм жö сьöктанöн кыйöмась. Эмöсь жö синнэзным и пеллезнымöс эг öштö, сэт жö ветлöтам и сiйö жö няньсö сёям, и тэ, Прокопьевич, Пестер тэ пиян, кер да видзöт жö ас гöгöртö, медбы бöрсянят эз сералö, асьтö бы отирыс син одзын эн стыдит...» Думайтö этадз Андрейыс, но шы оз сет, оз баит, сы местö прокурорыс мурзьыштiс:

— Вöв колö. И буржыкö да ямщикыс мед оз ло гöжöм, то пуксяс кытшöмкö, а менам колö тэрмасьны!

— Вöвсö адззам, — кокнита висьталiс бригадирыс. — А мужиккес... Талун мужиккес одз мунiсö Лолым сайö сюла. Поди, инькаöс?..

— Ачыт мунан! — кералiс Прокопьевичыс.

— Некöр бы, — нузгыштiс бригадирыс. — Тэныт некöр и меным некöр. Рытöдз пондам эстöн орсны?!

— Сэк аслым колас, — Андрейыс юрыс вылö кышалiс люш пеля шапкасö и петiс керкусис.

Ыбöсöт керкуö чепöссис кöдзыт ру. Öтöрас öддьöнжык шутньöвтiс тöв.

41

Чожа сельсовет öшын увтö Андрейыс сувтöтiс доддя вöв — доддялöм воронöй жеребецсö, кöдö колхозаныс видзöны кага местö, но талун доддялiсö, и вöлыс педзис-орсiс додь ожжес коласын, сiдз бы и котöртiс, но ямщикыс зэлыта видзис вожжиэсö.

Прокопьевичыс сельсовет öшынöттяс видзöтыштiс öтöрас, шынньöвтiс и петiс керкусис, а сьöрас вöтчис Игнатыс, топыт мыгöрнас öвтчис, горбылякодь мунiс и пасьтасьöм люшки-пешки, не кыдз сельсоветiсь пред, а бригадирыс моз жö, кыдз колхозник и тальччö сiдз жö, кыдз мунö уджавны колхозö. Прокопьевичыс жö тальччис солдат моз, чорыта да веськыта, вöлi сiя не мужиккес кодь, кöдна вачкисисö рукйöсь гöна бараннэз вылö, а стройнöй, лöсьыт мыгöра, вылас паськöмыс казённöй — юрсянь коккезöдз не кыйöм да вурöм, а небöм: мунö мортыс и ылiсянь ни адззан, что сiя не миян ни — абу татiсь и колö бы сыись повны, кöр юрсö видзö вылынжыка, шагнялö смевжыка да кокнитжыка.

Прокурорыс кокнита лэдзчис сельсовет посöдзись, кокнита жö локтiс кошоваыс дынöдз, кокнита пуксис кöс туруныс вылö, видзöтыштiс Игнатыслань, кöда кычанок моз вöтчис сьöрас, и шуис:

— Мый и лоас сылöтас кö? Талуння лымыс эд... Додьнаным сибдам волокас.

— Оз сылöт, — шыасис Игнатыс.

— Мыйöн тöдан?

— Неделя етшсö оз, — ассис гардiс Игнатыс, сэк бöра прокурорыс мурзьыштiс:

— Кытöн Ипат пияныс?!

Третьякыс сэтöн сулалiс ни да видзöтiс сiдз, бытьтö синнэзнас сералiс — немись эз пов, кöть и зонкаыслö колö мунны кузь туйö, кöр погоддяыс не син, не бан, гардö и гардö лымсö. Погоддяыс сьöртi и пасьтасьöм зонкаыс: коккезас нiя жö виль нинкöммес, но вылас öнi виль гуня ни, кеписсес вильöсь жö, но шапкаыс... Кыдз шедлöм лёк понлö — летöм да вочöм-вурöм.

— Мунам! — висьталiс прокурорыс.

— Кытчö тэрмасьны? Кежалам миянö, — сэтчö шуис Андрейыс, гажöн баитiс, топ орсiс кыввезнас.

Прокопьевичыслöн сё висис юрыс, вöлi недолыт, да сэтшöм, что юис бы быдса туис юан или юрсö бы сюйыштлiс лымыс пытшкö, и öнi öвтыштiс кинас, кыдз бы висьталiс, что ась, ветлам нö... Андрейыс шутньöвтiс вöлыслö. Лэчыт тöлыс чужöманыс койыштiс лымöн. Воронкоыс кокнита öдззис котöртны улицаöт да сiдз, что додьыс йирка-торка чеччалiс кын корогаэзкузя, сiдз кыдз додьыс увтын лымыс вöлi эшö етша.

Вöвсö Андрейыс иньдöтiс гортланяс, крепыта видзсис вожжиэс бердын, видзöтышавлiс прокурорыс вылö, кöдалöн чужöмыс кельдöтöм и лöг, тöдчö, что ачыс аслыс абу рад. А Андрейлöн бергалiс юрас дума: «Тöдö Пестерыс или оз? Натьтö, тöдö эд, кöр ми иньыскöт пантасьлiм...»

Думайтiс этадз бригадирыс, полiс прокурорсис, а не ни кыдз вонсис, но сэтöн жö гажöтчис, кыдз боккесö чувйис оланыс: «Мый жö лоас, быль кö тöдö?..» Чеччöвтiс додьсис, вожжиэсö домалiс посöдзыс бердö, вöлыс одзö чапкис турун и гажöн ыкöстiс:

— Лисавета-а-а! Гöссез локтiсö.

Инькаыс ештöм пöттöдз ни уджавны, локтöм гортö павжнайтны, ештöм сёйны ни и росöн посöдзсис чышкыны лым. Сылö колiс бы гажöтчыны, кöр локтö гöсь, а сiя мурзьыштiс:

— Тэнат гöсьыс...

— Тэ мый нö, кенак? — рыг-рыг серöмтчис прокурорыс. ― Вывтi я мый я богатсялiн? Миян кодьыскöт он ни бы баит...

— Мыля? — голосыс небзис Лизаыслöн. — Ме эд Сивöй Тараканыскöт ог баит, а тэкöт баитны — кылö лудö.

— Мыля сiдз?

— А мый сыись? Гортö оз и пыравлы. Кытшöм сiя сэтшöмыс мужик?

Мужиккес сiйöн жö роснас, кöдöн хозяйкаыс чышкис посöдзсö, кöмкöтныс бердiсь чышкисö лымторрез да пырисö керкуö, а Третьякыс, кöда ештiс ни локны сельсовет öшын увтсянь, кольччис посöдзас.

— Сiдз, сiдз, — керкуас ни вежсис Прокопьевичыс — гажмис и сералiс ни, ачыс чöвтчис да видзöтiс керку пытшксö, кöда вöлi тöдса и сэтöн жö топ тöдтöм, бытьтö одзза сьöртi стенаэс лоöмась бусöсьжыкöсь и джоджыс ёгöсьжык. — Кыдз ни олат?

— Некöр челядьыскöт, — висьталiс хозяйкаыс. — Куимыскöт эд колö овны! Эшö зонкаэз...

— Менам сiдз жö ни кольттялiс... Гортö ог вовлы, а кытiськö чужöны. Петухыс бокын я мый я кевьяыт узьлö... — асьсö и иньсö сералiс Прокопьевичыс: не йöзын эд, тöдö мый баитны.

Пуксисö пызан сайö. Андрейыс комись вайис бутылка да пуктiс пызаныс вылö. Сёйисö и юисö винасö, но колисö бутылкаыс пыдöсö.

— Мыля нö Третьякыс керкуас эз пыр? — сэтöн повзис Лизаыс.

— Ме ог тöд, — шуис Андрейыс.

— Нем сылö татöн керны! Ась видзчисьö öтöрас! — висьталiс Прокопьевичыс.

— Оз сiдз лöсяв, — виноватöя висьталiс хозяйкаыс и юалiс. — Сiя тiянкöт жö мунö?

— Мунö! — шуис прокурорыс, чеччис пызаныс сайись, пасьтасис, петiс керкусис, вунöтiс висьтавны спасибо да вовлö жö пö миянö.

Жеребецыс мыдзöм ни посöдзыс дынын сулавны, и Третьякыслöн нырыс лöзöтöм ни — кынмöм зонкаыс. Только ештiсö пуксьыны доддяс, кыдз Воронкоыс сöтiс котöртны.

— Э, — прокурорыс ыкöстiс зонкаыслö. — Тэныт бы подöн колö котöртны!

— Тэ мый, Прокопьевич?! — Андрейыс осудитiс вонсö. — Кин вермас котöртны Воронкоыс сьöрö?!

— Котöртiс бы... — пишнитiс нырнас прокурорыс да öмас заргис кыз чигарка.

Сувтчыштiсö эшö сельсоветыс öшын увтö, а сыбöрын веськыта иньдöтчисö кузь туйö. Ыбыс вылöт гожумся туйыс эз ни тöдчы: гладьöтöм и тыртöм пургаыс, медодзза лымсö койöм омöн, кöть эшö додьыс увтын и кылiсö короггес; жеребецыслö эта лымыс эшö вöлi и эз, Воронкоыс шупыта котöртiс одзлань, кыскис тыра додьсö керöсок вывсянь керöс вылö, вуджöтiс логгез, кайис да лэдзчисьлiс увдöрö. Лог да вöр, рас да бöра лог и омöн вöр. Кöз йыввезын гардö тöв, вижгö-шутнялö, но вöрыс коласын топ абу тöла. Туй бокын кыдзоккез вылын пукалöны гöрд мороса жоннез, быркнитiс чочком бадьöг, а сэтчин, шутёмок бердын, кöз йыввез вылын голяэзнысö нюжлалöны таррез, туйыс бокын котрасьöм кöч — сэтшöм оланыс вöрын.

Вöлыс кыт котöртö, кыт мунö шагöн, пирскайтö нырнас, несйö, и Андрейлö юрас пырöны думаэз, что колiс бы гортын висьтавны, медбы ойнас öвиннэзас косьтiсö зöрсö, эз бы сайкöтö öвиннэсö, ашын бы асывсянь жö сюсö вартiсö, изiсö и праздникыс кежö сеталiсö ведомостьöн, ныр увтын ни ноябрьскöйыс. Бригадирыс мунiс гортiсь öтiк ой кежö, и топ колхозас нач сытöг ендiс ни уджыс, бытьтö сытöг нем оз керсьы... «Поди, керасö?..» — думайтö бригадирыс да веськöтлö вöвсö и кывзö, кыдз додьыс увтын дзуртышалö лымыс, кöда пондiс кыдз небзьыны.

Додьын пукавтöн чожа сайкалiсö. Андрейыс чеччöвтiс додьсис, пондiс котöртны бöрсяняс, но нинкöммес увтын небыт лымыс дзугис шаггесö и сьöкыт лоис вöтчыны Воронкоыс сьöрö, колiс бöр пуксьыны доддяс, одзлань гичравны пиннез да тэрмöтны жеребецсö, медбы Пуксипиас шоччисьыштны.

Пемдан дорас локтiсö Кöсва дорöдз. Ваыс вылын йыыс эшö вöснит, ылiсянь тыдалö, топ ваыс лолалö, но видзöтiсö-керисö и адззисö, что кинкö ны кодь жö баран юра лысьтöм вöлöн-доддьöн кайны эта йы вылö да вуджны мöд берегас, кытöн тыдалiс Пуксипиыс, и кытöн кылiсö инькаэзлöн голоссэз, кöдна баитiсö асмознаныс — нюжлалiсö быд кывсö, кыдз лöсьöтчисö сьывны, но эз сьылö (сэтшöм Пуксипинсалöн басни, сэсся некытöн сэтшöм нюжвыла оз баитö).

— Мый пондам керны? — Андрейыс сулалiс берегын и видзöтiс векнит йыыс вылö, сьöкыта лолалiс, гыжьялiс юрбöрсö. Сiя полiс вуджны мöд берегас.

— Мый керны? Вуджны колас, — шыасис Прокопьевичыс и смела иньдöтчис одзлань, кайис йыыс вылö, нильдiс, пöрис да чеччис. Йыыс ризьнитiс мортыс увтын — вот-вот потас, и тульгисян чериэс дынö, кöдна син одзын, кыдз стекло увтын уялiсö да нерисö.

Вöлi мый дорын тöждiсьны, кöр Кöсва чукыльыс увдöрын вöлi эшö осьта, кöда лолалiс, орсiс сьöд ваöн, полöтiс. Мöд берегас сибöтчис мужик да ыкöстiс: «Мый, мужиккез?! Чериэсö бы кыят?»

— Колö бы, — шыасис Андрейыс.

— Сэк вуджö, эд полö! Мыйись-мый ме иннезнытлö юöрта...

— Тэ öнджа... Мый оз ков, эн лёб, — Прокопьевичыс ыкöстiс мужикыслö и смевжыка ни подöн иньдöтчис йыыс кузя мöд берегöдззас.

Пуксипиын лёка вувтiсö поннэз.

— Мый пондам керны? — Третьякыслiсь юалiс Андрейыс.

— Ог тöд, — шыасис зонкаыс и иньдöтчис прокурорыс сьöрö.

— Вöят эд! — мöд берегас несьö сералiс, несьö падтiс пуксипинечыс.

— Огö, — думаэзнас пернапасасис Андрейыс да жеребецсö жагвыв иньдöтiс йыыс вылö, а моросас сьöлöмыс йирмалiс — жмитчис быд шагын, сiдз бы и кунис синнэсö да эз видзöт, кыдз додьыс увтын потласьö йыыс и сьöд рöма ваыс топ лолалö коккез увтын.

Вуджисö. Кокнита ловзисисö. Андрейыс думаэзнас бöра пернапасасис, пуксис доддяс да зэлöтiс вожжиэсö. Шаг-мöд и Пуксипиын ни. Вöвсö сувтöтiсö керку дынö, кытчö висьталiс Прокопьевичыс.

Сувтöтiсö вöвсö посöдз дынö, вожжиэсö кöрталiсö йöр бердö, жеребецыс одзö чапкисö турун и пырисö керкуас.

Медодз пырис прокурорыс, гажöн здоровайтчис да хозяйкаыслiсь юалiс: «Видзчисит или эдö гöссесö?!»

— Пырö да шоччисьö, — комсянь петiс том инька, кöдö Андрейыс тöдiс, но вунöтiс нимсö.

— Шоччисьыштам, — синсö чикыртыштiс Прокопьевичыс, вишнитiс нырнас: керкуас патшкис чöскыт яя шыдöн, джоджыс шöрын лонтiсис жечись дорöм печка и сы вылын пусис-пöжсис, тыдалö, бöра жö сёян.

— Да-а-а, — дульсö ньылыштiс Андрейыс. — Öнджа-а-а. . .

— Мый кöин моз дультö ньылалан? — сералiс прокурорыс и баитiс хозяйкаыскöт — кывнас орсiс, топ аслас инькöт, кöр мортыс гажтöмтчас и уркай моз питьыртö — радся рад. Тöдчис, что татöн прокурорыс тöдса, сiйö видзчисьöмась: хозяйкаыс рад, чывкйö джоджыс шöрын — комö да пызан сайö, топ панталö роднöйся-роднöйöс, шыннялö-цветитö и сьылö-баитö, что талун мужикыслöн кулан лун, касьтылö Ильясö, кöда черпезьдiс одзся-одз и мед мöдöр югытас гырниччесö керö, эз кö татöн куж овны, а ми пирöггесö сёям.

Андрейыслö сiя и колiс: шоныт печкаыс, чöскыт сёяныс, инькаыслöн гажа басниыс, кöр йöзын видзöтöны, кыдз не йöз вылö, а гöсь вылö, и бур думаэз ни гардчöны юрын, кынöм пондö симавны да сiдз, что öмын дуль сöдзö.

— Пуксьö да сёйö, — хозяйкаыс пызан вылö вайис сёян. — Поди, тэрмасят...

— Тэрмасям, — шыннялiс Прокопьевичыс, сэк жö чöвтчис и пызан сайö!

Бокас сёйнытö лякасис ямщикыс, а Третьякыс пукалiс печкаыс бокын, шонтiс киэсö, видзöтiс би югöр вылö, кöда йöктiс печкаыс одзын, сималiс кынöмыс, но эз лöсьöтчы пуксьыны пызаныс сайö.

— Мый нö тэ? — хозяйкаыс юалiс Третьякыслiсь. — Вешшы пызаныс сайö!

— Нем сылö сэтöн керны! — висьталiс прокурорыс, ыкöстiс. — Марш öтöрас!

Зонкаыслöн öзйис чужöмыс, топ лоис вир пытшкын, сьöлöмас кыдз бытшкисö пуртöн, кöть и вирыс эз пет, но лоис сэтшöм зубыт, что сьöвзис да петiс бы керкусис, но хозяйкаыс бöра вермис рам и ласковöй голоснас: «Тi мый, мужиккез? Сёйö, сёйö...» А Третьякыс, швырк! И абу ни керкуас.

Обидитiсö медодз хозяйкасö... Кытiсь да кöр кывсис, медбы миян комиэслöн вöлi этадз: пырис керкуас гöсь и пондiс ыксыны керкуас — йöзын... Но лоис эд, и кин керис? Прокурор! Этö вежöртiс хозяйкаыс, вежöртiс, что сылö колö лоны не йöзын и баитны сiдз, кыдз баитö, медбы и мöддэс керкусис эз петö — эз бы стыдитö нач.

— Сёйö, сёйö, — рамыника баитiс инькаыс, бергалiс пызаныс дынын, мужиккеслö одзаныс тэчис то паннез, то пирöггез. — Сёйö...

Медодз Прокопьевичыс босьтiс рöма пирöг, курччöвтiс сiйö öмас тыр и пондiс сёйны.

Андрейыс босьтiс жö пирöгсö, курччöвтiс, ньылыштiс бы сёянсö да виньдiс...

Öшыннэзын рöма-дзара ни, вот пемдас и öтöрас лоас кöдзытжык, кöть и тöлыс дзик лöнис, эз ни сэтшöм лöга гард лымсö.

— Тэрмасьны бы колö... — горöтчис ямщикыс.

— Пукав! — Прокопьевичыс пызаныс сайын кулакнас бокас заргис Андрейыслö. — Некытчö тэрмасьнытö.

Некытчö тэрмасьнытö, кöр керкуас печкаыс пытшкын гурйис-сотчис пес, горвыв дорын кашыкасис да юрсö мыччалiс пöрись старуха, сэтшöм ни пöрись, что рожасö топ оланыс гöрöм и пинялöм — чукыр вылын чукыр, а голосыс эшö том и синнэс лэчытöсь, кыдз видзöтыштiс мужиккес вылö да кыдз мурзьыштiс, что нем сэтöн... йöзас тöдны и уна адззыны, Андрейлöн дугдiс симавны кынöмыс, но Прокопьевичыс жö бöра бокас гырдззанас тангис и висьталiс: «Сёй!» Пирöгсö курччалiс да курччалiс Андрейыс, топ пиннес эз вöлö.

— Но! — видзчисьтöг шыасис прокурорыс и веськыта пондiс видзöтны хозяйкаыс синнэзö. — Мый нö тэ?!

— Мый ме? — шыннялiс хозяйкаыс.

— Горш эд косьмö... Вай винатö.

— Кытiсь сiйö?! — шыннялiс хозяйкаыс, мöдöтчöм-вочöтчöм медбур басöк дубасöн, запонöн, юрыс вылö кышалöм медбасöк чышьян, коккезас пимиэз. — Абу!

— Эн бöбöт! Менам нырö ылiсянь кылö.

— Тiян шогья нем он дзеб, — кыдз пондiс норасьны инькаыс, мунiс комö и пызан вылö торскис джыння бутылка.

Юыштiсö винасö, чеччисö пызан сайись. Прокопьевичыс куритiс, а Андрейыс хозяйкаыскöт чапкасис гажа кыввезöн (öтыс корасис, а мöдыс кыдз мунiс бы жöник сайö). Эта баснисянь быдöнлö лоис шоныт и долыт, кöть эн бы и пет керкусис.

Прокопьевичыс куритiс, чигаркапонсö чапкис печкаыс пытшкö, малыштiс кынöмсö да хозяйкаыслö шуис:

— Кывзы, гулю... Вай жö меным десятка.

— Кытшöм десятка?! — повзис инькаыс — синнэс ыждiсö.

— Деньга!

— Ой! — инькаыс клап вачкис боккезас. — А кытiсь сiйö?! Кин колхозас деньгасö шедтö? Тэ абу я прокурор! Уна шедтан, а колхозницаыслiсь коран...

— Прокурор да карманö осьта, кыт пырас, сэт и петö, — рыг-рыг серöмтчыштiс Прокопьевичыс.

Öтöрын кылö гöрöктiс вöлыс, топ тэрмöтiс мужиккесö.

— Эн горзы, сета! Кытчö воштiсян? Ог кö сет, шеда и судитан эд, а? Думайтан он? — веськыта видзöтiс хозяйкаыс.

— Дугды! Мый оз ков, эн модь, — рамыника висьталiс прокурорыс, сибöтчис инькаыс дынö да малыштiс спинасö. — Мыля этатшöм инькасö судита? Ог!

«Э-э-э, вонö... Мыйкö тэ бöра асмознат керан! Варыш моз инькасö гöгралан. Натьтö эд...» — думайтiс Андрейыс, но нем эз шу: тöдвылас усис Таняыс, кöдö бы Прокопьевичыс местаын эта инька вылö эз веж...

Öтöрас эта коста нач пемдiс, кыдз лунсö кинкö гусялiс да дзебис ашынöдз. Керкуас шоныт, пондiс сунöтны. Винаыс бöрсянь сэтшöм бур, что узьыштiн бы да вöлись и одзлань.

Эта коста хозяйкаыс комись вайис деньга и сетiс Прокопьевичыслö.

— Мый тэныт эта понда? — сералiс Прокопьевичыс. — Окавны или мыйкö козьнавны?

— Öтсö и мöдсö, — юрнас легöтiс хозяйкаыс.

Эна кыввез сорöн и петiсö керкусис. Пытшкись посöдзас жö Прокопьевичыс и горöтчис:

— Кыдз, вонö? Басöк эд гулюыс?! Мужикыс эд абу жö...

— Тэ, тыдалö, быд деревняын ни лöч туйсö видзан, — лöгамоз висьталiс Андрейыс.

— Но тэ и висьталан! Мый ме тэныт клёктун я мый я?

Дзурка-вирка лэдзчисö посöдзись и пуксисö доддьö.

Посöдзыс сайись мыччисис Третьякыс да кутчисис додьыс мышкö.

— Подöн тэныт бы котöртны! — мурзис Прокопьевичыс, но зонкаыс бытьтö сылiсь голоссö эз и кыв, эз лэдзчись додьсис.

Жеребецыс пирснитiс нырнас да сöтiс котöртны. Чожа Пуксипиись биэс кольччисö бöраныс и эз пондö тыдавны. Вольвыл гöгöрöдз шонтiс юöм винаыс, а кöр пондiсö кайны Вольвыл керöссö, бöра пондiсö сайкавны. Андрейыс недыр кежö чеччылiс додьсис да котöртыштiс бöрсяняныс. Третьякыс люшкыртiс жö додьыс сьöрын, Андрейыс юалiс зонкаыслiсь:

— Пуксипиас öтöрас я мый я и кынмин?

— Кин?! Ме? — серöмтчыштiс. — Пыралi мöд керкуас.

— Чож! — рад лоис Андрейыс.

Шупыта мунiс жеребецыс, и чожа кайисö Вольвыл улицаö, кытöн паныт чепöссисö поннэз и пондiсö сёйны-вувтны. Поннэс моз жö Прокопьевичыс пондiс пиньласьны Третьякыс вылö да модьны: «Котöрт подöн! Он адззы кыдз вöлыс мыдзис ни... Кулак пиян!»

Третьякыс шы эз сет, сiя и сiдз етша пукалö доддяс.

— Мый тэ сы дынö пыр?! — недолыта шуис Андрейыс.

— А тэ мый сiйö дорьян?! Кин сiя тэныт?! Мужиккес поннэз моз эр-вар керисö и лöнисö, кылiс, кыдз ружтiс Воронкоыс да додь увтын дзуртышалiс лымыс, ой кежас бöр ни кöдздöтыштiс (сизимись луннас вежсяс погоддяыс).

Винаыс топ джендöтiс туйсö: кольччис бöрö Вольвыл, Коков деревня, пырисö Зимьягö и дыр мыйись локтiсö Чиркöв керöс дынö. Пукалiсö додьын, суналiсö или эзö, но эз баитö: недолыт ямщикыслö, топ кинкö вартлiс, унаись ни думаэзнас видiс асьсö, мыля мунiс прокурорыскöт... А Третьякыс... зонкаыс öшöтiс юрсö и эз жö шыась.

Мыччисис тöлiсь, кымöррес коласын то дзебсисьлiс, то мыччисьлiс, топ орсiс челядёк моз да вöтчис вöлыс сьöрö. Ыббез и вöрыс узисö пыд онöн.

— Чиркöвас пыралам, — керöссö кайтöн висьталiс Прокопьевичыс.

— Бöра невеста? — серöмтчыштiс Андрейыс да ыкöстiс Третьякыслö. — Эн ни додьыс мышкын котрась, пуксьы!

Прокопьевичыс пиньöвтчыштiс Андрейыс вылö, но нем эз висьтав, сы местö бригадирыс мурзьыштiс: «Вöлыс колхознöй, ме киын, и ачым тöда мый кера...»

— Да, — нерис Прокопьевичыс.

Воронкоыс кыскис керöс паныт. Сiя эз ешты вайöтны медодзза керку дынö, кыдз прокурорыс шыасис:

— Пыралам.

Вöлыс несйöтiс да сувтiс кинкö керку дынö.

— Адззан! — гажöтчис Прокопьевичыс. — Воронкоыс тöдö кытчö мунны. Пырам!

Андрейыс дзар керис керкуыс вылö и пемытiнас невна эз сьöвзьы: одзаныс керку не керку — унажык баня вылö вачкисьö, сэтшöм учöт да лажмыт. И кин жö бы олö эстöн? Поди, бöра жö инька, кöдалöн не мужик, не челядь... Веськыта висьтавны — Пестерыс сьöртi...

— Тэ мый сералан? — прокурорыс чеччис додьсис да турйöвтiс и юалiс Андрейыслiсь. — Думайтан весь ме татчö пыра? Вот адззылан.

«Ась — гöна пась!» — думаэзнас сералiс ямщикыс и вöтчис керкуас прокурорыс сьöрö. Ыбöсыс вöлi осьта, нiйö панталiс инька, пасьтасьöм сэтшöм паськöмöн, что он бы и тöд кин тэ одзын, нето мужик, нето... И баитö-кижгö, кыдз куритiсь. Вöтчисö хозяйкаыс сьöрö керкуас, кöда пытшкын вöлöма кöдзыт, джоджас пидзöсви вöвдöма важ идзас, пызаныс вылын сотчö би и котрасьöны тараканнэз. Хозяйкаыс пöрись чужöма ни, чукрассьöм рожабана, тöдчö, что дыш, гыжьясьö да ружтö, кивзö да ойзö-норасьö, что сёйны нем, юны абу, ой и лун туртö-уджалö, и сё сымда, некöр и джоджсö чышкыны, паськöмсö лабиччес вылiсь дзимлявны, юрсö зуавны и няньсö пöжавны... Веськыта кö висьтавны — эта... Дуня и эм, кöдалö еныс шуöм öтнаслö овны и öтнаслö кувны.

— Мый нö тэ, Дуня? — гажöн ыбöсыс дорсянь жö баитiс Прокопьевичыс. — Мый нö тэ?! Абу и видзчисьöмыт... Джоджсö дышыт петöм чышкыны... Ме эд кöть кытшöм да, мыся, прокурор... Начальник кодь, поди... А эта... — чуньнас иньдiс воныслань. — Эта, ох-ох кытшöм ыджыт начальник! Городiсь...

— Адззисьöмась начальство! Кулик да пичик — пышты дорын дзик да вик... Мый ме пола я мый я тiянiсь?

— Печкатö лонт! — лöгöнмоз ни висьталiс прокурорыс.

— Песыс абу... Гортаныт разь иннезныт эз шонтö?

— Дуня!

— Мый Дуня? Ме нёльдас да öтiк год ни Дуня... Басöк нима, а тэ кин? Кыдз шуöны? Пыран керкуас да ошшасян, штö прокурор, а нимтö вунöтлан жö. Эмöсь тiян кодь начальниккес поныс бöж увтын... Быд лун эстöн гардчöны, асъяпонсянь рытöдз сё полномоченнöй да полномоченнöй, поннэс деревняаным етшажык ни...

— Дуня!

— Мый Дуня? Сiя нёльдас год ни, мыся, вожмöвтiс и эшö, натьтö, пондас овны, озö кö тiян коддес сёйö... Мужикöс моз жö...

— Дуня!

— Мый Дуня? Думаш, ме пола? Ог эд. Талун эм, ашын абу — некинлö горзынытö, челядьыс абу, родняыс кулiсö, йöзыслö ог ков.

— Котрась, мыся, винала! Кынмим.

— Ойнас?! — повзис хозяйкаыс.

— Адззы! — прокурорыс кармансис кыскис деньга да нюжöтiс инькаыслö. Мöдыс дыша босьтiс деньгасö, дыша пасьтасис да лынь-лынь петiс керкусис.

Андрейыслö недолыт: пырисö керкуас, кыдз йöзöсь, а лоисö кыдз хозяиннэз, инькаыс, натьтö, лунтыр пессис-уджалiс, мыдзис, колö бы шоччисьны, но... «Тэнö бы сiдз, Прокопьевич! Мый жö бы пондiн сьывны?» Бригадирыс видiс асьсö, но шы эз сет ёртыслö, кöдалö кылыс оз мöртчы.

Мужиккес пукалiсö западня вылын, ружтiсö, а Третьякыс кольччис öтöрас. Джоджын идзаснас орсiс каньпиян, пызан весьтын вез вылын öшалiс черань: гагыс дюттясис, бöбöтiс лёк думаэз.

Хозяйкаыс петiс керкусис и öшис, а Прокопьевичыс лабич увтiсь кыскалiс пессэз, сюйис нiйö печкаö, öзтiс. Печкаыс кыдз саймис, пондiс гурöтны и гажöтны асмознас. Öтöрас посöдзын тачнитiс мороз. Кадыс кыссис, а хозяйкаыс эз вöв.

— Буржык мужик да кузьжык шать бы! — мурзис Прокопьевичыс, тыдалö, висис юрыс, шогалiс аскодя шогöтöн, сiдз ни бы винасö юис.

— Ага, — шыасис Андрейыс, нето вöлi Прокопьевичыс дор, нето инькаыслань — он вежöрт.

— Гленитчö? — сэтöн юалiс Прокопьевичыс.

— Кин? — канёкыс вылö видзöтiс Андрейыс и эз вежöрт, мый сылiсь юалöны.

— Кин, кин, — нерис прокурорыс. — Хозяйкаыс!

— Öддьöн... — серöмтчис Андрейыс, кöр хозяйкаыс немöн эз вачкись не аслас инь вылö, не прокурорыс инь вылö, но вот баитö жö ёртыс — пиннесö вузалö.

Пукалiсö да кыв-мöдöн шупкасисö, кыскисö кадсö. Керкуыс шоналiс, джоджыс шöрö нюжöтчис каньпиянокыс, курöгпозын пондiсö гуддисьны курöггез, жолькнитiс посöдзись иган, и пырис хозяйкаыс — лöг, кыв матö оз лэдз, быд шагын мурзьö да модьö, видö кинöскö. Эта Андрейсö дзескöтö, а Прокопьевичсö гажöтö. Прокурорыс чеччис западняыс вылiсь, чывкнитiс джоджыс шöрö и пондiс гардны-висьтасьны, кыдз кöркö томнас медодз пантасис иньыскöт, бытьтö бы Таняыс медодз этадз жö желлясьöм, хе-хе... А сыбöрын...

— Эх, Дуня! Вай жö ме тэнö окала, öддьöн ни тэ меным гленитчан.

— Иньтö окав! — будзгыльтчис Дуняыс, пызаныс вылö сувтöтiс бутылка да висьталiс. — Лопайтö и мунö! Меным колö шоччисьны, ашын эд бöра бригадирыс вашöтас уджавны.

— А ме ог тшöкты тэнö вашöтны, — пондiс ошшасьны прокурорыс. — Шоччисьыштан.

— А кин пондас вердны? Тэ?!

— Ме? — сералiс Прокопьевичыс. — Ачыт сёян... — Курччöвтiс бутылкаыслiсь юрсö. — Тэ бы вайин мыйкö сёйыштны. Мый нö суналан?!

— Нем менам абу.

— Сэк мыйлö свет вылас олан?

— Колхозсис уна он босьт.

— Бöбöтан, Дуня! Ме эд тöда кытшöмöсь таво сюэзныт быдмисö.

— Быдмисö сюэс, — нузгыштiс инькаыс. — Слава богу бы да не аслыным... Вундiм-вартiм да йöз горшö, быдöс дзимлялiсö-кыскисö государствоас, сёйнытö колисö тöрича да кульзöр.

— Веритас кинкö... — сералiс Прокопьевичыс. — Предныт эд жмот кодь, натьтö, заптiсис жö...

— Дзебан тiян весьтын! Олiм бы кытöнкö вöр шöрын, поди бы, и дзебим, а сiдз варыш синнэзнаныт адззат, кöть тыра мешöккесö подуллэз увтö дзимляв.

— Тэ менö, Дуня, эн кöрит. Ме сэтшöм уджсö ог кер, колхозниккесö няньтöг ог коль.

— Öтiк гуна вылын эд вартат, — висьталiс инькаыс и пондiс коккезсис пöрччавны сьöкталöм нинкöммез.

— Кинкöт?! — сералiс Прокопьевичыс.

— Начальствоыскöт.

— Тэ этö, Дуня... Баит да бöра тöд жö мый баитнытö, вежöртiн?!

— Кыдз ог вежöрт?! Тэ и сёйин эд менчим мужикöс ... Тэ!

— Мый? — челядь моз кокнита баитiс Прокопьевичыс, кыдз нем эз кыв и эз тöд.

— Мыся, тэ мужикöс сёйин! — мöдпöв висьталiс инькаыс да сiдз, что Андрейыс повзис, думаэс шардiсö: «Дуня! Кыдз сiдз лысьтан прокурорыскöт баитны?!» — Тöда! Тэ мужикöс сёйин, гортiсь тшöктiн нуöтны! И мый понда?! Только предыслö горöтчöм, бытьтö пö нем вылö тэнö партияас примитны бы... Сымда и вöлi! — тшупис хозяйкаыс.

— Эх, Дуня!

— Не сiдз я мый я? Кытшöм бы предсиным коммунис, кöр сiя асывнас колхозничаэсся дыржык узьö?

— Эх, Дуня! Вай мыйкö сёйыштны.

— Ачым тшыгйöн ола.

— Кулан, надз тури, — Прокопьевичыс пызаныс вылiсь босьтiс лякöсь кружка, чунь йыввезнас чышкис кружкаыслiсь дорресö, кисьтiс сэтчö винасö, вишнитiс и юис да дыр видзöтiс хозяйкаыс вылö, сыбöрын пыдына ловзисис, долыта шыасис. — Бур тай вöлöма.

Андрейыс ньылыштiс дульсö, юис или эз бы, но видзчисис. Хозяйкаыс лöсьöтчис водны гор вылö. Прокопьевичыс юис, долоньнас чышкис öм гöгöрсö, бöра кисьтiс кружкаас бутылкасис, нюжöтiс хозяйкаыслö и шуис: «Чипышт жö, Дуня, да ме вылö эн лöгав. Ме мортыс тэ кодь жö, сэтшöм жö колхозник... Мый висьталасö, сiйö и кера. Талун татöн, ашын сэтчин. Талун прокурор, ашын босьта чер и тэкöт понда уджавны. Он верит?! Юав мортыслiсь! Ми сыкöт öтлаын быдмим, гöрим и кöдзим, öнi öвтча, не ой, не лун ог тöд, кыдз пон... Юышт, Дуня, да эн будзгылясь! Ог радейт, кöр будзгылясьöны!»

— Ме винасö ог куж юнытö!

— Ачыт тöдан, — висьталiс Прокопьевичыс, эшö кисьтiс-содтiс кружкаас, бöра чатыртiс горшыс весьтö, ружтыштiс, гультым-гальтым керис, дыр видзöтiс кытчöкö комас и вöлись кисьтiс Андрейыслö.

Ямщикыс босьтiс кружкасö и кокнита юис, мый не юны, кöр юкталöны и деньга оз корö. Юис Андрейыс винасö, ружтыштiс да шуис, что колö бы мунны ни, но ёртыс висьталiс: «Пукав!» и пондiс кыссьыны гöбечлань, кытчö кайис да водiс хозяйкаыс. Прокурорыс маласис гöбечыс дорын, а ёртыс эз тöд мый керны, петны я керкусис или пукавны.

Канёкыс чеччис джоджсис, пиньöвтчыштiс мужиккеслань и кайис гор вылö, а прокурорыс сё маласис, модис ласковöя:

— Эх, Дуня! Но мый нö тэ?..

Дуняыс пишкис нырнас, шы эз сет, топ видзчисис кöр сыкöт мужиккес пондасö окасьны да пель одзас пондасö шушкыны басöк кыввез. Прокопьевичыс дзурка-вирка кайис ни приступкаыс вылöдз и сё модис: «Дуня, ме кынма жö, лэдз бокат... Мый нö тэ?»

«Немись оз пов, вежöм! — эта коста Андрейыслöн пизисö аскодя думаэз, сьöлöмыс джöмдалiс. — Тьфу тэ, öнджа...»

Канёкыс чеччалiс ни Прокопьевичыс ки дынын, курччалiс и гыжьялiс ни бы мужикыслiсь вына кисö, но мöдыс смела кыссис одзлань и сэтöн... И сэтöн горвывсяняс шупыта лэбзис нинкöм да сiдз шмоньгис прокурорыслö веськыта кымöсас, что сiя приступкаыс вывсянь йирк-торк усис джоджöдззас, чеччис, ниртыштiс кымöссö и шуис: «Бур».

Андрейыслö кыдз заргисö йыла ёсьöн и пондiсö гильöтны — серöмыс петö, видзсьыны оз вермы.

— Тэ мый, Дуня? Тэ мый? — пондiс модьны Прокопьевичыс. — Ме эд нем бы умöльсö эг кер, эг бы...

Дуняыс шы эз сет, кыдз нем эз ло. Курöгпозын гажöн китöстiс петух. Андрейыс киссис-сералiс.

— Тэ ышö сэтöн! — дыр мыйись Андрейыс вылö ыкöстiс воныс.

— Он куж маласьнытö, — вöлись Андрейыс дугдiс серавны.

— Мунам! — прокурорыс шапкасö пуктiс юрыс вылö и уськöтчис ыбöсö.

Посöдзсянь чеччöвтiсö доддьö. Жеребецыс пиньöлöн видзöтыштiс мужиккеслань, пирснитiс нырнас, курччöвтiс удилаэз и кузь шаггезöн öдззис оськавны Кöслань, кытчöдз кольччис эшö дас верста. Туйыс лоис волькытжык, вöлыс кокнитжыка котöртiс ыббез кузя, кöдна öтмöдöрсянь кытшöвтöмась вöррезöн и тöлiсь югöрын суналiсö аскоддя мыгöрöн.

Мужиккес эз баитö, но Андрейыс думайтiс: «Сiдз тэныт и колö! Важын ни колöм эта лекарствоыс! Мед тöдiн...»

Чожа чулалiсö öт Гущинсö, сыбöрын локтiсö мöдыс дынö. Керкуэзын öшыннэзöт эшö дзуз видзисö öтi-öтi биэз.

Ныраныс патшкис тшын дук, лявзыштiс пон, и бöра кылö кыдз дзуртö полоззэз увтын лым, да ружтышалö вöлыс.

42

Мöд Гущинсянь Кöслань туйыс уськöтчис керöс вывсянь, и Воронкоыс содтiс шаггесö. Октыль шорыс дорын ни Третьякыс чеччöвтiс додьсис да кольччис бöрлань.

Тöлiсьыс видзöтчис быдсöн чужöмнас, лым вылын тыдалiс быд кöзокыс и следыс, но бöраныс чукыльланяс эз понды тыдавны зонкаыс.

— Тр-р-р, — прокурорыс ыкöстiс вöлыслö. — Сулав!

— Мый лоис? — ямщикыс зэлöтiс поводдэсö.

Вöлыс сувтiс. Воронкоыс вылiсь тöлiсь югöрыс весьтын кайис кизерик пар, вöлыс лолалiс пыдына, кынöмыс сорöн — мыдз.

Прокопьевичыс видзöтiс бöрланяс, сьöласис. Тöлiсьыс весьтын прокурорыс синнэзын тöдчис лёк нёштöм югöр. Чожа чукыльсянь мыччисис зонкаыс, кöда лыннялiс жагвыв, сьöласис, видзöтлiс öтöрö да мöдöрö.

— Тэрмась! — прокурорыс ыкöстiс Третьякыслö. — Тэнö эд видзчисям!

Зонкаыс кылiс и эз энö кыввезсö — öтiк шаг эз содты, локтiс жагвыв и тöдчис тöлiсь югöрыс весьтын, что чужöмыс чочкоммöм.

— Пуксьы! — Прокопьевичыс ыкöстiс зонкаыслö, кöр сiя сибöтчис додьыс дынö.

— Меным мый... Ме кынма, — шуис мöдыс.

— Пуксьы! — лёкжыка ни ыкöстiс прокурорыс.

— Юрö висьö, — пиннес сяткöтiсö зонкаыслöн. — Мать тэнö! — Прокопьевичыс кокнита чеччöвтiс додьсис, Третьяксö кутiс пельпонöттяс да тангис додьыслань и ыкöстiс. — Кинкöт баитöны?! Он кыв?! Вöрöтчы!

Вöлыс пирснитiс, нетшкöвтчис бы Андрейыс киись да öдззöтчис котöртны, но ямщикыс жмитiс поводдэсö.

Кымöрас öтiк палачок ни эз вöв, тöлiсьыс öшалiс öтiк местаын, вевдöрсяняс видзöтiс кыдз нач матын. Третьякыс жöдзис додьыс бöрын, но додьыс вылö эз пуксьы. Прокопьевичыс пыдына лолалiс, ружтiс, кыдз уджалiс черöн и сувтiс шоччисьны, ачыс ыксiс:

— Мый ме тэныт шуи?! Мый шуи?!

Код Прокопьевичыс и öдва сулалö коккес вылын, голосыс лёк, сибдышалö, сьöд синнэзас нёштöм югöр, киэзнас öвтö, сiдз и вачкö. Воронкоыс сiдз и нетшкöвтчö бы ямщикыс киэзiсь, педзö коккезнас.

— Мый ме тэныт шуи?! — ыксö Прокопьевичыс, полöтö вöвсö и вöрсö.

Югыт. Лымыс вылö ем уськöт и адззан. Андрейыс прокурорыс киись видзчисьтöг казялiс наган, кöдö Прокопьевичыс кöр и ештöм кыскыны да öнi öвтiс одзас и ыксiс:

— Вöрöтчы! — сiдз и вачкö, брынгö, наганнас öвтö Третьякыс ныр увтын.

Андрейыслöн мый сэтчö сьöлöмыс и лоис, чеччöвтiс бы öмöттяс или сувтчыштiс моросас, джöмдiс да одзлань пондiс тёпкöтны — тэрмасьны кытчöкö, киэс дрöжитiсö, öмас косьмис дульыс. Кодышкодь вöлi ямщикыс, да садьмис.

— Вöрöтчы! — прокурорыс брынгис Третьякыслö. — Он кыв, мый ме тэныт тшöкта керны?!

— Меным мый... — горзöмсорöн шыасис зонкаыс, тöдчис, что оз лöсьöтчы пуксьыны доддяс.

— Мый тэ сы вылын ыксан? — воныс горöтчис Прокопьевичыслö, öмас кылыс эз бергöтчы, но шуис эд. — Ась подöн муныштö, матын ни эд, ась шоналыштас.

— Ме тэныт мый шуи?! — прокурорыс кыдз эз кыв Андрейыслiсь кыввесö, лэбтiс кисö наганнас и шупыта вачкис Третьякыслö. Зонкаыс кивнитiс и таралiс лымыс вылö.

Кöть бы кинкö эшö вöлi, кöть бы пон или морт мыччисисö туйыс вылын, йöз морт бы локтi да юалi, мый тi сэтöн керат, мыля тышкасят, но рытыс сёр, некин и некытчö оз мун, только юр вевдöрын тöлiсьыс видзöтö, да нем оз шу, кыдз адззö и оз отирсö. Пирскайтö да коккезнас педзö Воронкоыс.

— Ме тэныт мыччала, кулак пиянлö! Ме!.. — ыксö прокурорыс, брынгö и вачкö Третьякыслö.

— Пуксьы, Третьяк! Пуксьы, кага, — зонкаыслö пондiс ни кеймисьны Андрейыс.

Бур модьны, кöр тэ вылö оз ыксö и оз вартлö, а вот Третьяксö вартлöны, и сiя кыдз öшис туйыс шöрö, мугис и сулалö, видзчисьö — не сэтчин, не татчö. . .

Лöнь. Вöлыс пишкайтö нырнас да лымсö кокö коккезнас.

— Ме тэныт мыччала! — прокурорыс öдззöтчис да быд вынсис вачкис зонкаыслö, и бöра таралiс лымыс вылö Третьякыс, бöра шы эз сет, топ сылö эз дöнзьы. Сэк Прокопьевичыс чеччöвтiс да пондiс тальны и брынöтны одзсис мортсö, топ уджалiс — вачкис дак вачкис, ась йиджис бы сьöлöмöдз, пыркамисö юрвеммез.

— Мыля тэ менö вартлан? — кивнитiс зонкаыс. — Мый ме умöльсö кери?

— Дугды, Миша, — Андрейыс зубыта ньылыштiс дульсö и личöтыштiс поводдэсö, Воронкоыслö сiя и колiс: быд вынсис чепöссис туйыс вылiсь вöрыслань, топ лэбзьыштiс...

— Тпру! — ямщикыс быд вынсис зэлöтiс поводдэсö. — Тпру, Воронко!

Ыксы кöть эн сэтöн, кöр Воронкоыс повзис да котöртiс — коккес увтiсь лэбзисö лымторрез, зубыта павкисö ямщикыслö рожаас, синнэзас. Сiя кунис синнэсö, видзсис быд вынiсь вожжиэс бердын, эз ни лет горшсö, думайтiс мый жö вермас лоны, заргисяс кö вöлыс додьнас вöрас пуэс коласö. Смерть эд...

Но нем умöльыс эз ло: жеребецыс додь ожпоннэсö кышалiс кыдззез бердö, татш сувтiс, пишнитiс нырнас, бöба пондiс орсны пеллезнас, пирскайтны нырнас, ружтыны да педзны, топ сьöрас вöтчисö кöиннэз.

Ямщикыс жагвыв, рамыника да ласковöя пондiс баитны вöлыскöт, жагвыв жö лэдзчис додьсис, кыдз кагаокöс малыштiс Воронкосö, кöда дрöжитiс, бергöтлiс сьöд синнэзнас, койис нёштöм югöр — эн бы вöрзьöт!

Малалiс да малалiс ямщикыс вöвсö, баитiс да баитiс, кыдз шогалiсь зоныскöт, мыйсянь ёртыс дугдiс дрöжитны, дугдiс пирскайтны нырнас и «орсны» пеллезнас, сэк вöлись Андрейыс жагвыв да жагвыв пуэс коласiсь кыскис бöрлань додьсö, и вöвсö петкöтiс öтлаын жö кытöн эз ни вöлö пуэс, бергöтiс туйыслань и петiс следдэс вылö, кыдз мезмис кытiськö сэтшöмись, кытiсь мезмынытö эз бы позь. Тöлiсьыс кöдзыта видзöтiс. Некин эз тыдав, ёрттэс син одзас эз вöлö. Туйыс вылын сувтöтiс Воронкосö, бöра сылö горöтчис рам да небыт кыввез, видзöтiс сэтчин и татчö, ас гöгöрсö. Пыдына лолалiс вöлыс. Гажтöм.

«Кытöн жö нiя? — кыдз кöдзыт киöн спинасö малыштiсö Андрейыслiсь, эз верит, что Прокопьевичыс вермас мунны подöн, кольны сiйö. — Мыйкö эстöн не этадз... Не сiдз, Андрей!» Асывсянь ни сьöлöмыс вылын недолыт, асывсянь ни оланыс кыскö мöдöрö, нерö, дойдö бы, и ойнас узис да вöтасис кытшöмкö аскоддя вöттэз: бытьтö уйö ваöт, и берегыс оз тыдав, кöть и уявнытö оз куж. Иньыс сэтшöм жö, кольлалiс-мурзис: «Бöра сэтчин! Воннат... Сэтшöмыскöт...» «Тэ пыр этадз аснырнат!..» — мурзис Андрейыс, сiя терпитны эз вермы, кöр иньыс кольлалö этадз, ыбöсыс коласын, да эшö горöтчас кытшöмкö умöль кыв. Мун и думайт, оз я юрыт вылö пу пöр да вий кыдз гагöс... Сьöлöмыс тöдö, что талуння вина юöмыс да орсöмыс бура оз чулалö, мый-нибудь козьналасö. «Эх тэ, калян-олан! Колiс я аслыс мунны кузь туяс?! А öнi мунан да быд деревняын и мыччалан кытшöм тэ пальнишенеч, а сэтöн эшö Третьякыс... И мый Прокопьевичыслö сысянь колö, мый оз тырмы, что зонкасö сiдз вартлö, вийö?! Айыс понда я мый я прокурорыслöн сiдз лöгыс петö? Но и мый бы айыс? Босьт Андрейсö... Уджалö бригадирнас и кинкöт луннас мукöдпыр оз и пурсьы, кин да мый оз и висьтав, но öт пельöттяс пырö, а мöдöттяс петö: талун пурсяс мортыскöт, ашын бöра ни öтлаын, кыдз нем эз и вöв... Отирыскöт колö кужны овнытö, лöсьöтчыны кöть кытöн... Прокурор! Но и мый? Вот тэныт и, Андрей, оланыс мыччалö и эшö мый адззылан, ачыт он тöд...»

Ямщикыс сувтöтiс вöвсö, кыдз кужис, малалiс да любитiс сiйö; видзöтчис-керис — некин оз тыдав, и бöра сьöлöмыс вылын недолыт, бöра шогöт... Вöлыс бöра пондiс «орсны» пеллезнас да кытчöкö видзöтны туйыс бокö, топ кинкö сэтчин эм и топ кытöнкö Прокопьевичыс кашык-кашык керис.

― Эй! — негорöн ыкöстiс Андрейыс.

— Мый ыксан? — пуэс коласын нач зэв шыасис ёртыс.

Радмис Андрейыс: «Слава богу, эм...». Вöлыс эшö öддьöнжык пондiс «орсны» пеллезнас, пирснитiс нырнас, ямщикыс зэлöтiс поводдэсö, видзöтчис öтöрö и мöдöрö, медодз синнэзнас кошшис Третьяксö, кöда эз тыдав, кöр Прокопьевичыс мыччисис ни пуэс сайсянь, киэсö ниртiс оча долонь, ружтышалiс да сьöласис.

— Мый нö? — ёртыслiсь юалiс Андрейыс.

— Нем абу. А мый колö? — прокурорыслöн голосыс топ не аслас, кыдз повзьöм или сибдöм винаыс бöрсянь.

— Третьякыс кытöн?

— Одзаным, — кинас öвтыштiс Прокопьевичыс. — Кынмö кулак пияныс дак, ась котрасьö, нем сiйö жалейтны. Вöлыс мыдзис, а сiя пондас назём моз пукавны доддяс, — кокнита баитiс, видзöтiс гажöн ни. — Сэтшöммесö колö велöтны. Котöртас подöн Кöсöдззас, пырас милицияас, сэтчин ышö баитасö кыдз колö. Тöдан эд кулак пияннэс... Вашöт вöвтö, ― пуксис доддяс.

— Ме бы сiдз эг кер, — кöр вöлыс мымдакö котöртыштiс ни керöс паныт, висьталiс Андрейыс.

— Эн бы кер? — серöмтчыштiс Прокопьевичыс. — Тэ бы эн кер, тэнö керисö... Шедiн кö бы, кучиктö бы ловья вывтöттят чöвтiсö, эн бы понды сiдз баитны, — öмас заргис чигарка, öзтiс и пондiс куритны. — Или мый? Ме пешлi, тöда... Кыдзкö ловья кольччи, но погоддяыс вежсян одзын, ой-ой! Тшепитö, кыдз лёк пон пурö, — и вежис баснисö. ― Вашöт, матын ни. Локтам да шоччисям.

Андрейыс зэлöтыштiс поводдэсö. Воронкоыс содтiс шаггесö. Кылiс ни, кыдз Кöсас лёка вувтiсö поннэз и тшын дук павкис нырö. Вöлыс тэрмöттöг пондiс рöктыны.

— Чож Воронкоыс! — Прокопьевичыс пондiс ошкыны вöвсö. — Мöдiк вöлöн, натьтö, кытöнкö бы узим.

— Бур вöлыс, — шыасис ямщикыс, сылö недолыт, пессьö сьöлöмыс, сiйö и керö видзöтышалö одзас, оз я тыдав Третьякыс, но зонкаыс одзаныс абу, топ лэбзис-колис. Андрейыс эз бы баит, а ёртыс модис, кыдз гожумнас эта шутёмок вылын тшакьялiс да ягöдалiс и эна кöззэз увтын пантасьлiс кытшöмкö инькакöт. Быздiс Прокопьевичыс, кыдз кузь туйын немымда эз мыдз, а Андрейыс кылiс и эз ёртыслiсь баснисö, сiйö и керис видзöтышалiс то тöлiсьыс вылö, то одзланяс, вермасис думаэскöт: «Но мый нö? Кытöн нö сiя?»

— Д-а-а, эмöсь инькаэс, — ружтiс Прокопьевичыс. «Мый тэись бурсö и адззöмась инькаэс? Кытшöм сэтшöмыс и сьöлöм инькаэслöн, что сiдз тэ бердö лякасьöны? Ме бы ны местын тэнö, Пестер, сизим верста ордди! Мыля вот менö тэ моз оз любитö?! Ме бы тэ моз ны вылын эг серав, кужи бы окасьнытö и любитнытö, но оз аркмы... Эх, Андрей!» — Андрейыс поводнас вачкыштiс мыдз вöлыслö, и сэтöн мыччисисö медодзза керкуэз. — Эг вöтö, — гажтöма шуис Андрейыс.

— Кинöс? — серöмтчыштiс Прокопьевичыс. — Тэ мый?! Сiя, натьтö, оз сунав, а мунö жö.

Дзуртiс додь увтын лымыс. Сьöкыта лолалiс вöлыс. Посадыс узис ни, туй морттэсö öтiк пон эз пантав. Вöлыс сувтчис бы быд керку дынö, но ямщикыс вöрзьöтлiс вожжиэсö, и мунiсö одзлань, кытчöдз эз локтö ыджыт да бытшöм керку дынö, кöда вылö видзöтыштiс Андрейыс, но нем эз шу, только кеписьнас вöрзьöтiс юрбöрсö — сылö сэтшöм керкуас вöтöн не овны, и чувйис дума: «Вот кыдз, Андрей, а тэ Танясö бöбöтiн бы ас саят... Адззис я бы сiя тэкöт этатшöм олансö?»

Керкуас биыс эз вöв.

— Видзöт, кыдз менö видзчисьöны! — лöгöнмоз шуис Прокопьевичыс. — Ми кынмим да лун ни тшыгьялам, а нiя черпезьдöны... Или этö... Танюшаö, поди, йöз мужик ни адззис, а ме ошшася, что пирöггез пöжалiс... Вермас сiдз лоны али оз, висьтав-ко, Андрей? — и пондiс видзöтны сьöд синнэзнас тöлiсь югöрыс вылö, кыдз не Прокопьевичыс, а йöз морт, баитiс. — Тэ вöвсö юскы да пырам керкуас.

— Бат, ме ог узь, — шуис Андрейыс, кöдалöн думаэс бергöтчисö мöдöрö — сьöлöмыс пондiс кыскыны гортö, пондiс думайтны, что пырас йöзö, кöть и шуам не йöзö, но кин ордö? Не миян кодь колхозник ордö жö, эшö иньыс... Таняыскöт талун эз бы пантась, эз бы видзöт, кыдз сiя син одзас пондас гардчыны мужикыс гöгöрын, вердны да юктавны Мишасö, а Андрейыс йöз местын и лоас керкуас...

«Ась, — думайтiс ямщикыс. — Бöр муна Гущиныс гöгöрöдз, юася кинкö ордö узьны, ойсö джендöта, асывнас одзжык пета да локта гортö...»

— Мый лоис? Мыля он узь? — пондiс модьны ёртыс.

— Ашын уджавны, а ме эг висьтав, что öвиннэсö колö шупöтны...

— Ачыт тöдан, ме тэнö ог кöртав, — висьталiс прокурорыс, кайис посöдзаныс, брынгис ыбöсас, а ямщикыс бергöтiс посöдзыс дынын вöвсö, пуксис доддяс, вачкыштiс вожжинас Воронкоыслö. Вöлыс пишнитiс да дышажык ни пондiс котöртны гортлань.

Кинлöнкö бöба пондiс вувтны пон, сiя вöтчис додьыс сьöрö и кольччис йöрыс дынын. Тöлiсьыс топ гажöнжыка югдöтiс туйсö да кымöрас топ вöтчис жö вöлыс сьöрö. Лöнь. Эз кö бы додьыс увтын дзуртышав лымыс да эз ружтышав вöлыс, нач бы вöлi гажтöм, Андрейыс пукалiс доддяс, сiйö топ сiдз и кинкö кутiс бöрсяняс, сiдз бы и кыскис додьсис.

Кöссяняс туйыс лэдзчисис керöс увдöрöнмоз, кокнита ыскöвтiс додьыс, öвтчис шыбыллезын. Чожа Воронкоыс вайöтiс Октыль шор дынöдз, сэтчöдз, кытöн вöлыс додьнас Андрейсö кыскалiс вöрас и кытчö кольччис Третьякыс. «Кыдз жö сiдз? — ачыс эз казяв кыдз поводдэсö жмитыштiс Андрейыс да сувтöтiс вöвсö. — Видзöта, мыйлö жö вöрас кежалiс Пестерыс?» Сьöлöмыс вылын недолыт, дзескыт, полö, но сувтöтiс Воронкосö, кежöтыштiс кыдзок дынöдз, вожжиэсö кöрталiс пуокыс бердö и пондiс видзöтны лымыс вылiсь следдэсö.

Андрейыс вöлi полiськодь, веритiс чорттэзлö, быдкодь бесыслö, кöдна вермасö пö мыччисьны и сэтöн жö бöр öшны, веритiс эмыслö и абуыслö, полiс эмись и абуись, кöть и отирыс син одзын вöлi герой кодь, а öтнас да сёр рытöн вöрын и йöзын... Андрейсö сiдз топ кинкö и кутiс, сiдз и юалiс: «Ёрт, кытчö ысласин и мый эстiсь кошшан?!» Быд кöзыс сайсянь сiдз кинкö топ и мыччисис, сiдз и нюжöтiс гöна да кузь кисö, мыччис лэчыт пиннесö да курччöвтiс-сёйис... Полiс Андрейыс, сьöлöмыс сiдз и жмитчыштiс, но мужикыс вермис асьсö, кашыкасис, ружтiс, жöдзис öтiк местын, бытьтö сэтшöм ни смев, что немись оз пов, видзöтчис-керис и Прокопьевичыс следдэзöт кежис туйыс вылiсь.

Тöлiсьыс югöр вылын шоч вöрын бура тöдчисö следдэс, кыдз лымыс вылö рисуйтöмась. Быдöн бы адззис, что прокурорыс туйыс вылiсь кежöм не öтнас: этчö сапогнас тальччöм сiя, сэтчö нинкöмнас Третьякыс, öтыслöн следдэс кузьжыкöсь да тальччöм чорытжыка и веськытжыка, а мöдыс шагнялöм дженытжыка, öвтчöм-турьялöм, öтыс тальччöм веськыта, а мöдыслöн кок следыс пиньöла кодь, кыдз мунöм ош, бытьтö мортсö кыскöмась бы бокö — этö Прокопьевичыс турьялöм, а зонкаыс мунöм то бокас моз, то одзас.

Андрейыс тальччис и эз, ловзисьны пыдынжыка полiс, топ мунiс шойна вылöт, кытöн вермисö чеччыны кулöммес. Шаг... Вот эстöн буржыка тöдчö, кыдз эта бадь дынö зонкаыс сувтчыштöм... А эта... Мыля жö öтыс чеччöвтöм бокö, кыдз кöч, кöдö повзьöтöмась, пышшöм бы да абу вермöм? А эта... Андрейыс лымыс вылiсь синнэзнас кошшö быд следсö, адззö, что эта кыдзок дынын бытьтö Пестерыс брынгöм зонкаыслö, мöдыс усьöм, чеччöм, нильдöм, нёльподöн вожмöвтöм кöчкасö и одзлань... Пуэслöн вуджöррес куйлiсö öтамöдныскöт зэв-зэв. «Мыйлö сiя Третьяксö пыртiс вöрас? Мый кошшыны?!» ― быд шагын чувйис дума, кыдз вартiс кымöсас, висьталiс ни, что эстöн умöль уджыс, умöль, и колö пышшыны, но пышшынытö эз вермы, кинкö кыдз тойыштiс одзлань — пыдöжык вöрас. Андрейыс тальччис и эз, мунiс и кыдз кинкö пыкис паныт, вашöтiс бы бöр. Сiя сувтчышалiс, дырöн видзöтiс вöлыслань, сыбöрын коккес увтö и бöра керис шаг да шаг. Одзас ёрттэслöн следдэс пуэс коласö кыдз дзебсисьлiсö да бöр мыччисисö, кыскисö-корисö, медбы тöдны кытöн жö Третьякыс... Тачнитiс коккес увтын улок, сьöлöмыс сувтчыштiс, дзик кöдзыт ваöн кисьтiс вывтырас.

Шаг да шаг, кажитчис что туйыс вывсянь мунiс вель уна, но вöлыс тыдалiс, сэтöн Андрейыс лым вылiсь казялiс вир воттез, но эз мышкыртчы, эз понды бура видзöтчыны вир воттес вылö. Думаэс сiдз ни висьталiсö, что... Бöбöтат! Эз вермы лоны сiя, эз!..

Ачыс аслыс эшö эз верит, что Третьякыс абу ни ловья, что Прокопьевичыс кокнита вермас вийны морт, кыдз тальччыны таракан вылö, Андрейлöн сяткöтiсö пиннес и дрöжитiсö киэс...

Сiя шагнялiс вöрас одзлань, а коккес кыскисö бы бöрö — пышшис бы, сöтiс додьыс дынö... Несйöвтiс вöлыс, кыдз лыйис бöрсяняс, мыйсянь Андрейыс сiдз повзис, что садьыс бырис, но жагвыв бöр саймис. Дрöжитöв-керис, лолалiс öмтырнас и одзлань шаг да шаг, тальччис и эз, тальччис и эз. «Пышшы татiсь, пышшы!» — пель одзас кыдз кинкö шушкис, но сэтöн жö кылiс Третьякыс сойлiсь басни, кöда осудитiс и видiс: «Бригадир... Кытчö воштiн менчим вонöс?! Или öтлаын прокурорыскöт ловсö босьтiт?..» — топ пеллес одзын герьялiс нывкаыс да сiдз, кыдз нетшкис сьöлöмсö — синнэз кунь и пышшы отирыс дынiсь, кöр быд мортыс эд пондас шуны, что тэ морт вийись, кыдз морт вийись вылö и пондасö видзöтны.

«Мый ме?! — горшсö дзикталiсö синваэс. — Ме я мый я?!» — чышкис кеписьнас синваэсö, сулалыштiс, сьöлöмыс вылын лоис личытжык, коккезас кокнитжык, лэчытжыка видзöтiс одзас. Думайтiс, что зонкаыс ловья — этö сiя асьсö бöбöтö, и шагньöвтiс смевжыка, кокнитжыка — тальччис лапья кöз увтö, падмис, мышкыртчыштiс да зэв-зэв панталiс Третьякыслiсь синнэсö: зонкаыс пöрöм гатш, куйлö, синнэс осьтаöсь, видзöтö, топ ловья, но синнэзас югöрыс абу ни сiя — гудыртчöма ни...

Андрейыс невна гатш эз пöр... Кулöммезсис и одзжык полiс, а сэтöн мый и лоис, ачыс кулавлiс или садьыс бырлiс, оз тöд, оз куж висьтавны, оз тöд кыдз петiс вöрсис, кыдз пуокыс бердiсь пöрччалiс вожжиэсö, пуксис доддяс, кыдз вöлыс кыскис Гущинöт, мунiс ыббез кузя.

Саймис Чиркöвын ни: син одзас мыччисисö керкуэз, öтiк керкуын öшынöттяс дзуз видзис биок. Биыслань и кежöтiс вöвсö, сувтöтiс зэв посöдзыс бердö, чеччис додьсис, дыр видзöтiс бöрланяс, кыдз кинкö сiдз и вöтчис, кутiс бы... Дыркодь сулалiс да вермасис думаэскöт, эз верит, мый лоис, кыдз петiс, дзик ачыс вийис зонкасö, эз тöд мый керны, висьтасьны я отирыслö или öмсö видзны тупкалöмöн. Кытчö воштiсьны? Сулалiс, сайкалiс, спинаыс пондiс кынмыны и колiс пырны керкуас. Тöдвылас бöра усис, что ашын отирсö колö иньдыны уджавны, а сiя... И гортын зоннэс пондасö юасьны: «Мам, кытöн тятьным?» Видзчисьöны гортын и некытчö он дзебсись, он пышшы, мый бы эз вöв, колас мунны гортö... Андрейыс жагвыв кайис йöз посöдзö и пондiс йиркöтны ыбöсас. Дыр мыйись дзуркнитiс керку ыбöс да мужик голос юалiс: «Кин сэтчин?»

— Ме, — шыасис Андрейыс.

Ойсö узис или эз: мыдзувьяс топ ланьтлiс жö, но кыдз куняс синнэсö, сiдз и мыччисьö Третьякыс, син одзас куйлö, видзöтö, кöритö: «Мыля тэ менö и колин?!»

«Мыля ме тэнö и коли?» — синваэс петöны Андрейыслöн, гусьöн горзö да сiдз, мед йöз отирыс оз саймö, оз кылö, что горзан, ачыс думайтö-вийö думаэзнас. — Мыля ме тэнö, зонка, и коли?! Бат, ме дырни эз бы лысьт вийнытö... — курччалö тырппесö, сэтöн жö дорйисьö. — Вöлыс эд... Сiя эд пышшöтiс вöрас... Третьяк! «Сэтшöм ни жаль зонкаыс, кöдакöт öтлаын уджалiсö, мый висьталiс бригадирыс, сiйö и керлiс, некöр эз пиньгись. А öнi мый? Кыдз бы эз бергöтлы, кытшöм дума бы Третьякыс йылiсь эз пыр, зонкаыс син одзас мыччисис только бур ладорсянь. Кöть бы дзебны, ась ракаэс синнэсö эз бы кокалö... Дзимлявны бы колiс мортöс моз, но кинлö висьталан? Кин керас? Кин отсалас?! Висьтавны я отирыслö, сойыслö, кöда нач кольччис öтнас?!» — думаэс пурисö Андрейсö, эз тöд мый керны, мый баитны отирыскöт — полiс öтiкись и мöдiкись... Висьтасьны кö, Пестерыссянь оланыс оз ло, оз кö висьтась...

Узис и эз, кыдз куйлiс биа шоммез вылын, бергалiс бок вылiсь бок вылö, вермасис думаэскöт: «Ась. Ог висьтав! Мед оз тöждiсьö, мед думайтны, что зонкаыс ловья, бытьтö прокурорыс нуöтiс ОГПУ-ö и видзöны сэтчин... Кулöмсö он ни чеччöт, он саймöт... Сiя кулiс, а миянлö колö овны». Бригадирыс öддьöнжык ни жалейтiс зонкаыслiсь сойсö, бöра полiс прокурорсис, кöда виртöм — не стыд, не совесть оз тöд и вермас этадз жö дзимлявны тэнö да сiдз, что некин оз понды тöдны, кытчö петас лолыт.

Асывнас чеччис одз, нач пемыт, саймöтiс хозяйкасö, кöда, натьтö, сы кузя узис и эз жö, зыбкаись босьтiс кага, пондiс сiйö нимöтны да жалейтны Андрейсö, мыля умöля узис и сы одза мунö гортас.

Андрейыс нем ни эз понды баитны: пасьтасис, петiс керкусис, маласьтöн да горзытöн доддялiс вöвсö.

Погоддяыс небзьöм: ойнас шонтöм сiдз, что уль руыс вачкисис тулысся ру вылö, крышаэз вылiсь вотялiсö вотьваэз, додьыс увтын мöднёж дзуртiс лымыс, омöн öшалiс сук туман, тöлiсьыс эз тыдав.

Югдiс жагöн. Пуксипиöдз локтiс пемытсорöн, пыралiс сiя жö керкуö, кытöн тöн шоччöтiсö вöвсö да юисö винасö, но талун сiйö панталiсö мöднёж ни — эз ни вердö пирöггезнас, эз юкталö винанас и баитiсö чорытжыка, кыдз тöдтöмкöт.

Шоччöтыштiс вöвсö, видзчисис, кöр югдас öддьöнжык, медбы Кöсва йыыс вылö кайны не арттöг жö, сiдз кыдз погоддяыс шонтiс, и йыыс вöв увтын вермас чегны. Ас йывсис эз думайт, жаль жеребецыс, кöда вöлi не аслас, а колхознöй, и сэтшöм вöвсö сэсся колö быдтыны да быдтыны...

Полiс Андрейыс, что вöснит арся йыыс Кöсвасö вуджтöн вермас чегны, но сiя вöлi крепыт, додьыс увтын öтпыр эз ризьнит.

Луншöр гöгöрас бригадирыс вöлi гортас. Эз ешты юскыны вöвсö, эз ешты кузь туйыс бöрсянь öмас чапкыны няньтор, кыдз локтiс Третьякыслöн сойыс, осьтiс ыбöссö, вожмöвтiс порогсö и юалiс: «Кытöн вонö?!»

Нывкаыслöн чужöмыс сьöдöтöм, повзьöм, кыдз шогалö сьöкыт шогöтöн, синнэзас сэтшöм югöр, сiдз видзöтö, что эн бы и пантась, но кытчö воштiсян?

Андрейыслöн синнэзас сэтшöм жö мыдз югöр и шогалö — ачыс оз тöд кыт öддьöнжык висьö, öнi горшас тасасис комок и пондiс зэлöтны — не ловзисьны, не кыв горöтчыны, синваэс сiдз и петöны, сiдз бы и герйöвтiс, но курччöвтiс тырпсö, ньылыштiс дульсö, дундöтчис-пессис, вермис асьсö и вöлись висьталiс, что зонкаыс кольччис Кöсас, нем сылö оз ло, нем тöждiсьны. Ружтiс-бöбöтiс, бытьтö вожмöвтiс гу, кытчö вермис усьны... Нывкаыс, тыдалö, эз верит, пондiс горзыны да модьны: «Оз ни лок... Айö моз жö виясö ни... Беднöйка да беднöйка менам Третьяк! Мыля нö миян сiдз?! Мый ми сэтшöм умöльсö отирыслö керим?! Еныс дойдö, хо-хо-хо!» — кыдз гроб вылын горзiс, нетшкис бригадирлiсь сьöлöмсö, а сiя нем унажык бурсö эз вермы висьтавны, кылыс эз бергöтчы одзлань бöбöтны — бурмöтны томыслiсь сьöлöмсö. Аслас синваэс сiдз и петiсö, сiдз бы и герйöвтiс, пондiс причитайтны, висьталiс бы быдöс, мый вöлi сьöлöмыс вылын. Андрейыс ружтiс, кыдз шедiс пу увтö, кöдö вылас пöрöтiс лэчыт тöв и мездöтчыны некыдз оз вермы, некин эстöн оз отсав.

43

Оланыс эз джöмды, öтiк лун кежö эз сувт: талун сьöкыт, ашын сьöкыт, а мöдлун топ абу ни сэтшöм, кöть сьöлöмыт и висьö.

Пальникас отирыс эз ни тшыгьялö. Андрейыслöн гортын топ быдöс ни вöлi бур, кöр зоннэс быдмисö да пондiсö отсасьны, ачыс сё бригадиралiс — гардчис отирыс гöгöрын, олiс бур думаэзöн ни, веритiс, что этадз кö пондасö овны, сувтöтас виль керку, велöтас зоннэсö, гöтралас, сэк вöлись и петас бригадирсис да пондас шоччисьны — уджавны отирыс моз жö, но не весь шуöны, что тэ керан öтiкö бы, а оланыс важын ни заптöм мöдiкö, сэтшöм оланыс, что вöтöн он вöтась, некытшöм тöдiсь оз ворожит...

Бöра гожум. Ойес дженытöсь, югытöсь да гажаöсь. Кайес оз и ланьтлö, кöда ойбыт дзуртö видз вылын, кöда горалö Картабöрын баддес коласын. Видззес вылын путриктöны туруннэз, асыввезнас миссьöны сук лысваöн. Абу эшö турун керан страдаыс, но колхозын уджыс адззисьö: мужиккес гöрöны, инькаэс вочöны йöррез, ыббез вылын сöвтöны назём. Öтiклаын да мöдiклаын и, видзöтан кö, кузь луныс оз тырмы.

Бригадирыс гардчö отирыс гöгöрын жö — лунтырнас сiдз мыдзас, что локтас гортö и чожжык водö да шоччисьö. Талун Андрейыс локтiс гöриссес дынiсь, юис юан, пöрччалiс нинкöммесö, посöдзас шупкис гуня да öн и йöрнöс-вешьяннас турбыльтчис джоджас, а каньыс сэтöн и эм, топ хозяиныстöг узьны оз вермы. Водiс Андрейыс, мыдзыс увья ланьтiс чöскыт да пыд онöн. Узьö и вöтасьö, топ киннэзкö посöдзаныс турски-тарски кайисö, сувтчыштiсö, шушкöтчыштiсö. и... сяткисö ыбöсас.

Бригадирыслö кыдз кинкö бокас чувйыштiс бедьöн: осьтiс синнэсö, лэбтiс юрсö. Бокас каньыс юрсö лэбтiс жö.

Андрейыслöн дышыс петiс осьтны ыбöссö, но öтöрсяняс пондiсö йиркöтны перытжыка и вынöнжык, тыдалö, лöгасисö, что дыр оз осьт

Бригадирыс перыта чеччис ольпасьыс вылiсь, кöмтöм коккезнас шагньöвтiс ыбöсыс дынö и юасьтöг вештiс пöдансö.

Öтöрыс паныт ловзисис ыркыт руöн, ыбöсыс коласöт лэбзисö номмез, бизгисö-гардчисö пеллез гöгöрын. Андрейыслö веськыта синнэзас лэчыта видзöтiс йöз морт, кöда вöлi лöг, топ сiдз и лöсьöтчö вачкыны. Паськöмыс вылас не дöраовöй, а солдатлöн-милиционерлöн. Нiя татчö сибавлöны етша, но кыдз локтасö, не весь, сё ни кинöскö гöн паныт малыштасö — дойдасö или веськöтасö, кöр тальччан бы бокö... Милиционерыс сулалiс ыбöс коласын, сёйис-видзöтiс Андрейыс синнэзö, кыдз лöсьöтчис пурны, пишкис нырнас, кыдз бригадирыс вöлi сэтшöм ни виноватöй, сэтшöм ни морт, что сыкöт оз бы и ков баитны...

«Мый нылö колö?!» — бригадирыс повзис, лöсьöтчис здоровайтчыны, юавны кытчö да мый вылö милиционеррес мунöны, но эз ешты осьтны öмсö, кыдз тöдтöмыс кывнас дойдiс:

— Бригадир! А узян...

«Мый понда?! — сьöлöмсö жмитыштiс зубыт. — Оз я Третьякыс... Эз я Пестерыс мыйкö?» — думайтiс и шыасис йöз голосöн:

— Бригадир... А мый?

— Мунам миянкöт!

«Но и вот!» — кыдз вотьыштiс сьöлöмыс, но бöра юалiс:

— Кытчö?

Ойыс югыт, кыдз кымöра лун. Картабöр видзыс вылын герчкö кай, керку угöлын дзуртö гаг, карта вылын рöмысьтö мöс, гуддисьöны курöггез, и чом бердын пирскайтöны кинлöнкö баляэз, кöдна гожумнас вунöтöны гортаныс туйсö. Гажаöсь гожумся луннэз и ойес гажаöсь, кöть и некöр гажöтчыны: ой-луныс тэрмасьöны овны и отирсö тэрмöтöны уджавны, кöть немымда эн узь — уджав да уджав, а сэтöн... Локтасö ойшöрнас да саймöтöны.

— Вöрöтчы! — мурзьыштiс милиционерыс.

— Кытчö?! — кокнита да гажöнмоз юалiс бöра бригадирыс, сiдз кыдз отирыскöт кужис баитнытö.

Эз висьталö кытчö, но мöдыс горöтчис:

— Тэрмась! Некöр тэкöт...

Бригадирыс вежöртiс ни, что весь сы дынö эз локтö, что, тыдалö, нуöтöны жö, кыдз гортiсь нуöтiсö Пыридз Ивансö, кöда пö горöтчöм: «Сэтшöммескöт пö бы öтлаын ог уджав!» Сэтшöммес... А кытшöммес? Кин? Мый? Абу висьталöм, кытшöм отиркöт бы олö и уджалö, но и кинкö чушкалöм-юöртöм кытчö колö, и абу ни талун Иваныс — враг местö олiс и мунiс... Иваныс вöлi осьта öма: медодз горöтчывлiс да сыбöрын ас гöгöрсö видзöтлывлiс, сiдзкö, шедiс аслас кыв понда, а бригадирыс...

— Мый понда? — милиционерыслiсь юалiс бригадирыс.

— Вöрöтчы! — зубыта кутыштiс Андрейыслiсь кисö милиционерыс.

Андрейыс лöсьöтчис бы саймöтны иньсö, кöда зоннэзнас джоджын узис керкуас, висьтавны иньыслö, что мунö и, поди, дыр оз лок, ась мужикыс понда оз горзы, но öвтыштiс кинас, шагньöвтiс ольпасьыс дынö и пондiс сэтöн гуддисьны, кыдз öштiс фуражкасö или вешьянсö. Киэс дрöжитiсö, кöть и немись вöлi эшö повнытö, эз эшö верит, что нуöтöны гортiсь.

Бригадирыс эз тэрмась, кöть сiйö и тэрмöтiсö. Думанас сiя кыв-мöд горöтчис жö бы челядьыслö, гортын овтöн дзудзгöтчыны зоннэскöт кадыс эз вöв, пыр йöзкöт да йöзын, бергалiс отиркöт, кöр колхозас уджыс ендö тöв и гожум, а öнi сьöлöмыс пондiс кыскыны челядьыс дынö, жмитыштiс бы бердас зонкаэсö, кöдна узисö чöскыт онöн и эз саймö.

— Тэрмась! — пишкыштiс милиционерыс.

Вешьян кокыс гардыштсис и эз пыр кокас. «Кинлö и мый ме умöльсö кери?! — пурис дума. — Мыля сiдз? Колхозыслö жö бы... Бригадир тэ, бригадир!.. Быдöнлö я кужин коккезныс увтö небыта ольсавны? Кинöс шонтiн, а кинöс нö вунöтiн?» — Андрейыс сьöкыта ловзисис, курччалiс тырппесö — синваэс курöтiсö ни горшсö.

— Тэрмась!

— Горшö косьмö... Лэдзö юнытö... — сибдöм голосöн бригадирыс пондiс кеймисьны милиционерыслö. Мöддэс видзöтыштiсö öтамöдныс вылö, и öтыс öвтыштiс юрнас.

Бригадирыс жагвыв ляшмасьöмöн пырис керкуас. Керкуас öшын стеклосö люкалiс-лэбалiс бабыв, пессис, петiс бы керкусис, но осьтаыс эз вöв. Эта мылякö медодз хозяиныслö усис син вылас, сiя эшö дзар керис челядьыс вылö, кöдна мамныскöт джоджас чöскыта узисö и эз кылö, кыдз айныс кöмтöм коккезнас шлапöтiс-мунiс джоджöттяс, думаэзнас окалiс бы. Колькасö, Ванькасö и Митрейсö, но сэтöн горшсö пондiс зэлöтны руыс, сэк мужикыс пызаныс вылiсь босьтiс тыра туиссö да юис: шоныт юаныс горшсис кылöтiс курыт тшакыльсö. Моросыс топ лоис личытжык, но сiдз и этадз эз тэрмась, кыдз вермис, сiдз и кыскис кадсö, думанас кутiс бы бабывсö öшыныс бердiсь, лэдзис öтöрас, но кöр? И бöра дума пурис: «Тэ эд этадз жö... Бабылыс моз... Пондан мырсьыны-петны бы да он вермы...» — ньылыштiс зубыта дульсö.

Иньыс узис сэтшöм чöскыта, что дульыс вотялöм юрöдзыс вылö. Мöдöтпыр бы Андрейыс брынгис Лизаыслö, шуис: «Чеччы! Мый сы дырна черпезьдан?! Адззан, ме муна ни!», но талун сэтшöм жаль лоис иньыс, что окалiс бы, да некöр вöлi, сiйöн негорöн горöтчис: «Чеччы жö...»

— А?! — Лизаыс лэбтыштiс юрсö, пондiс гудыра синнэзнас видзöтны и эз вежöрт мый сысянь колö, луннас уджалiс пöттöдз, а öнi шоччисьнытö оз лэдзö. — Бöра гортiсь кытчöкö пышшан? — шуис, кыдз мужикыс бытьтö пыр сiйö и керö, пышшалö гортсис.

— Пышша, — кывсö курччöвтiс бригадирыс, видзöтыштiс осьта ыбöсыслань, кытöн коласас сулалiс милиционерыс.

— Мун. Мый меным? Тэсянь эд сё сымда... Кöть бы карта воротасö видзöтiн!

— Мый карта воротаыс?! — лöгöнмоз шыасис мужикыс. — Кытöн одзжык вöлiн?! Меным, мыся, некöр.

— Мун да эн видчы. Кыдзкö ачым дора кöрттуввесö! — пеничайттöн юрöдзсö пондiс лöсьöтны Лизаыс, а мужикыс сьöкыта ловзисис, лöсьöтчис бы висьтавны, что пешлан, и адззылан эшö метöг олансö, унаись эшö касьтылан мужиктö, но шы эз сет, бöрас дзар эз кер, бергöтчис, петiс керкусис, сувтчыштiс пытшкись посöдзас, думанас лöсьöтiс-гардыштiс бы ольпасьсö, но милиционерыс сэтöн и эм, мурзьö: «Тэрмась!»

«Ась!» — бригадирыс öвтыштiс кинас быдöс вылö, мышкыртчис, ольпасьыс дынiсь курым-карым босьтiс конувтас нямöттэсö да нинкöммесö и милиционерыс одзын ни лэдзчис посöдзсис да иньдöтчис сельсоветлань.

Китöстiс петух. Деревняыс узис, узисö отирыс и бур, что некин оз адззы, что мунан кöмтöг, нинкöмметö видзан конувтат, а бöрсянят вöтчöны милиционеррес. Мед узьöны отирыс, то пондiсö бы пиннезнысö вузавны, бытьтö пö бригадирныс этö... Враг лоöма... Только каньыс кольлалö бöрсяняс ― шаг оз кольччы, вöтчö хозяиныс сьöрö, нявзö быд горшсис... — Эх, Мурка! — Андрейыс мышкыртчис да малыштiс каньсö, думанас босьтiс бы моросыс одзö, но бöрсяняс сiдз и пыкисö, мурзисö: «Вöрöтчы!»

«Кытшöм отиркöт эшö он и пантась? Кин тэ вылын оз и понды ыксыны? Дзик тэ абу ни морт, а нiя отир...» — бригадирыс тальччис и эз, ляшмасис кöмтöм коккезнас улицаöт, талис чорыт нятьсö да видзöтыштлiс то каньыслань, то вичкуыслань, лöгыс петiс, сiдз бы и сьöвзис милиционерыслö синнэзас, но пиннесö гичыртiс да видзсис.

Андрейыслöн зэв эшö гортыс, тыдалö керкуыс, но сiя эз бергöтчы, эз видзöт керкуныс вылö. Кöть сылö и жаль вöлi быдöс, мый эм и абу, жаль нельки канёкыс, кöда нявзö да вöтчö — шаг оз кольччы.

Бригадирыс кыдз узьтöн мунiс аслас садник йöр угöлöдз, а кыдз шагньöвтiс йöрыс угöв сайö, сiдз топ и саймис, вöлись пондiс вежöртны, что не талун, не ашын гортö оз лок, поди, некöр ни оз адззыв не каньсö, не иньсö, не челядьсö...

Андрейыс содтiс шаггесö, мунiс стыннэс пöлöн, кыдз йöз ни, кыдз быль виноватöй, что сiдз оланыс чукыльтiс-гардыштiс, сералö, что некинлö эн понды ковны, некин оз пантав и оз кольлав, оз мыччись син одзö да юав, кытчö мунö.

Андрейыс шагнялiс и лэчыта видзöтiс омöн, видзчисис, что вот кинкö петас гортсис, сувтас посöдзаныс, горöтчас кыв-мöд, а сiя висьталас кытчö мунö, мед тöдiсö жö, что ашын асывнас бригадирыс оз ни ло, ась бöрьясö мöдiкöс...

Посадыс узис, нем эз тöд, эз кыв и эз адззы. Бригадирыс мунiс-шагнялiс кузь туйö, и кин тöдö, бертас я кöркö гортö. Натьтö, эд оз, натьтö... Этö бура вежöртiс Андрейыс, но сылöн, кыдз бригадирлöн, колхозыс понда сё висис юрыс, кыдз вöвлi быд лун. Дыр кежö гортiсь мунiс бригадирыс, син одзас öшыннэз увтiсь усисö няридззез, телега, гöр, пиня — быдöс колхознöй доброыс, кöда асланыс — ас киöн керöм и кöдö эз жö бы ков этадз öшыннэс увтö юскыны, но мый керан? Нем ни öнi он кер, кöр быд мортыс уджалö сiдз, кыдз сылö буржык, кыдз колö: рытнас юскас öшын увтас, ашынас чеччас — сэтöн и эм: вайöтас вöв, доддясяс, оз понды кошшисьны. Некин гöрресö да пиняэсö оз гусяв, оз жугды.

Шагнялiс бригадирыс улицаöт, юрас кыдз кинкö вачкис: «Но и юртöм петух! Тöн эд эшö лöсьöтчи челядьыслö висьтавны, медбы нiя талун пинявнытö мунiсö ойнас... Ойнас абужык жар и лöдзыс етшажык, но вунöтi... И колiс бы висьтавны, медбы Егорыс вöвсö мыччалiс ветеринарыслö, то Рыжкоыс мылякö чотö... Оз кö мыччав Егорыс вöвсö, Рыжконас уна он уджав, а вöввестöг миян хана!.. Эх, бригадир! Этö колö бы керны и сiя не сiдз! Котрася, котрася жö бытьтö, а быд местаас ог вермы сибавны». Бригадирыс думаэзнас сё бы лэбтiс колхозсö, кöть öт милиционерыс мунiс бöрас зэв-зэв — лолалiс спинаас, а мöдыс шагнялiс бокас, кыдз гортiсь нуöтiсö морт вийисьöс.

Каньыс нявзытöн кольччис бöрас, кежыштiс вичкуыслань, пуксис улицаыс шöрö и пондiс нявзыны, топ сылiсь гусялiсö пияннэсö.

«Мурик! Мурочка... Кага тэ менам, мунiн бы гортö. Мунiн бы... — бöра тырпсö курччöвтiс Андрейыс и пöв синнас пондiс видзöтны вичкуыслань да думайтны. — Оз я менö еныс?.. Христосыс, кöдö тöдлi да вунöтi, а сiя, поди, быль эм и видзöтö да сералö, гажöтчö, бергöтлö олансö, кыдз сылö колö и гленитчö — талун тэ, а ашын сiя... Греххезö понда...

Колiс разь колоколлэсö меным разьны?! Ась бы, кинлö нiя овнытö эз сетö, сiя бы и паздiс... Ась бы Пестерыс, но не ме! А керис эд... И менö öтлаö жö гардiс... Сэк ас вылат и горзы!»

Шагнялö Андрейыс роднöй посадöт, мунö улицаöт и лэчыта видзöтö да югыт гожумся ойнас адззö, кытöн да мый эз ешты керны, мый керис да не сiдз, топ асывнас бöра чеччас, керас сiдз, кыдз колö ни, мед некöр ни асьсö оз стыдит, и мед мужиккес уджалöны да олöны отир моз. Думаэс бурöсь... Думаэс сьöкытöсь да умöльöсь...

Креста туйыс вылын пантасис Рыжко — вöлыс. Этö вöвсö бригадирыс любитiс медöддьöн, сiйöн что Рыжкоыс мывкыднас рам, вына, абу асныра, мортсö вежöртö, дзик ачыс вачкисьö морт вылö. Рыжкоыс чотiс веськыт кокнас, сувтiс, лэбтiс юрсö, рап-рап гöрöктiс и дыр видзöтiс Андрейыс вылö. Бригадирыслöн бöра синнэзсис сöдзисö синваэс, курöтiсö горшсö, зэлöтiс мороссö, вöлись вежöртiс, что янсöтчö посадыскöт, эта вöвкöт, керкуэскöт, кытöн быдöс и быд торыс роднöй.

— Рыжко... — синваэс пыр горöтчис бригадирыс. — Рыжко... — ньылыштiс дульсö да виньдiс.

— Молчать! — бöра ыкöстiс милиционерыс.

— Мыля тi менö? — курыт дульсö ньылыштiс Андрейыс, видзöтыштiс Егорыс гудыра керку öшыннэзö, кытöн топ кинкö вуджöртчис да öшис, поди, повзис Егорыс или иньыс и дзебсисис грехсис ылöжык.

«Егор, мыля нö дзебсисян? Кöть бы тэ петiн керкусис и горöтчин кыв-мöд... Ме бы тэныт висьталi, кытчö кöдзны рудзöгсö, юöртiн бы эталö... Кинлö жö? Кин миян медчожыс? Ипатыс нывлö, ась бы котрасис Нинъядзибöдззас да пöдналiс заворсö, то подаыс пырасö и сёясö сюэсö. Ой и юр жö менам! Или тэ, Егор, ачыт ни казялан, мый колас керны?» — бригадирыс Егоррес öшын увтын нач чинтiс шагсö, тальччис и видзöтiс керкуланяс, видзчисис: оз я быль кинкö вуджöртчы öшынас, но керкусис сiдз некин эз и мыччись. Сэк Егорыс йылiсь умöль думаэс öшисö, кыдз сьöлöмыс вылiсь мыйкö ыскöвтiс.

— Шире шаг! — пишнитiсö бöрсяняс.

«Ох тэ, шире шаг! Кужан миян кодьыс вылын ыксыны... Тэнö бы, пон юр, ме местö... Тэныт бы ыксыны шире шагсö, тэныт, весь олiсьлö! Пешлiн бы кыдз янсöтчыны челядьыскöт, пешлiн бы... Шире шаг!.. Чужтö жö тiян коддесö кинкö... Быдтö». Сэтöн Андрейыслö пондiс вачкисьны, бытьтö милиционерыслöн тöдса голосыс, кыськö топ кывлiс ни сiйö, но кысь бы?! Кытöн?! — пондiс думайтны, гарйисьны юрас, но тöдвылас эз вермы уськöтны, кöр оланыс веськыта ни тальччö юрыс вылö и думаэс дзугсьöны, сорласьöны, пессьöны сьöлöмыс моз жö. Кытöн ни сэтöн видзны тöдвылын, кин тэ вылö и кöр эшö ыксiс?

— Вöрöтчы! — мурзьö милиционерыс.

«Эх тэ, пон!» — вöлись пельбокас бытьтö вачкис голосыс, сэтшöм ни лоис тöдса, что бытьтö бöра служитiс чочкоммеслö, бöра тöв, коккез увтын лым, вижгö ойтöв, сiя солдат, шагнялö-мунö ойнас и оз тöд кытчö мунö, а командирныс ыксö: «Шире шаг! Шевелись!»

Усис тöдвылас сэкся унтерыс, кöда öтпыр шынь эз кер, синнэзас пыр тöдчис кöдзыт югöр, пыр öмыс осьта, пиннес гер, пыр ыксö: «Шире шаг!» Сэк нуöтiсö лыйлыны пленнöйез, öнi асьсö унтерыс кодь жö милиционер нуöтiс и кытчö?.. Натьтö эд, Андрей, лыйны жö. Оланыс, батя, Андрей, сэтшöм, что он тöд кытчö локтан, кыдз тэныт пондас вештiсьны, серавны. Сiдз шыбыльтас, что он тöд кытчö лолыт петас... Простит менö, Иван! Тэнö эд туяла... — пыдына ловзисис Андрейыс, кöр медодз тöдвылас усис Киршинiсь тöдсаыс, кöдö лыйлiсö кыдз пленнöйöс, кöда öнi топ локтiс син одзас, пондiс видзöтны и баитны: «Вот, Андрей, пантасим... Натьтö, эн думайт адззисьлынытö, да адззисьлiм... Бур или абу, кöр спинаат пыкöны наганнас? Тi эд меным сiдз жö...»

«Сiдз, Иван, грех отирсö вийны, грех... Но мый ме сэк верми керны?» Тшöктiсö эд... Эг бы кö, ачымöс бы тэ местö...»

«Эн бы кö... — нерис ни Иваныс. — Повзин, сiдзкö...»

«Повзи... — юрсö öшöтiс Андрейыс, тöдвылас усис Степаныс ни и Якуня Ваняыс, кöднакöт олiс, янсöтчывлiс и öнi бöра бытьтö вöтчис сьöраныс. Бöра эд оланыс сералö, аслыс ни мыччалö ёрттэслiсь туйсö, кöднö нуöтiсö эта туйöт жö кыдз враггезöс, и сiя шагнялiс кыдз враг жö ни... Сьöкыт, натьтö, вöлi мужиккеслö янсöтчыны роднöйезныскöт, и Андрейыслö сьöкыт. Сылöн кольччис инь, зоннэз и посадыс да колхозыс, кытöн велалiс ни отирыскöт уджавны... И думаэзнас янсöтчис колхозыскöт да отирыскöт, шуис: «Проститö менö, мужиккез и инькаэз, проститö...»

Узьö посадыс, муыс узьö. Отирыс узьöны. Андрейыс мунö гортсис, сьöлöмыс бердын кыскö сьöрас посадсö, отирсö, медбы кулiкас да тöдвылö уськöтны.

— Шире шаг! — мурзьö милиционерыс.

— Пшёл тэ! — Андрейыс невна эз сьöвзьы милиционерыслö. — Лэдз менö бöрьясö аслам улицаöт шагнявны жагвыв.

— Ладнö-ö-ö, — бöра эд морт моз эз шыась милиционерыс, а сiдз горöтчис, дзик пишнитiс змея.

«Летан горштö, пон! Думайтан кинкö ошкас...» — думаэс бöра бергалiсö милиционерыс гöгöрын, сьöвзис, но нем эз шу, эз содты шагсö, сiя эшö гортын, кытöн хозяиннэс бытьтö эна... Йöззэс, кöдна локтасö, кыдз усясö кымöрсяняс и бергöтöны олансö, отирсö отирö оз пуктö. Но абу жö эшö посадас тi хозяиннэс, татöн Андрейыслö быд торыс тöдса ― сизимисьöн улицаэсö луннэзнас меряйтiс коккезнас, тöдö быд гöпоксö, и сiйö отирыс бура тöдöны да отирыс я только, поннэс и порссес эд тöдсаöсь, и видзöтö, зверрез, кыдз тiян вылö уськöтчасö Бускоэс, летасö. Но поннэс казялiсö бригадирсö, лэдзисö бöжжезнысö, лыннявтöн мунiсö да бöр водiсö öшыннэз увтö, а Якуня Ванялöн понокыс, кöда гажтöмтчис хозяиныстöг, пыр котрасьлiс бригадирыскöт, сiдз и вöтчис Андрейыс сьöрö.

Посадыс сайын моз ни, кытöн гунаыс, кытöн веськыт ки вылын видзыс вылын герчкис кай, бригадирыслö тöдвылас эшö усис, что колiс бы пöрöтны вöр, тшупны виль öвин, медбы арыс кежö вöлi кытöн сюсö косьтыны, но, тыдалö, пöрöтсис вöрыс и шупöтчиссис сюыс...

Бригадирыс шагнялiс шоныт му вылöт кöмтöг, коккес увтiсь кылiс быд корогсö, турунсö, кокнитжыка ни мунiс гортсис, лэчыта видзöтiс омöн — вöрыслань, кöда дзебсисис рöма-дзара ойыс пола увтö, топ полiс шыасьны — узис жö или видзöтчис да гусьöн. Одзаныс гажöн котöртiс Якуня Ванялöн понокыс: сувтчыштас, юрсö бергöтыштас да бöра котöртö, оз коль бригадирсö, кыдз лöсьöтчö мунны сыкöт быдлаö.

— Вöрöтчы! — милиционерыс модис бöрас, гужгис коккесö да дынас эшö матöжык сибöтчис, рожаыс кыдз вердöм порсьлöн, чушыктö-мунö.

Ыб вывсянь тыдалiс ылö-ылö. Сук зелёнöй вöрыс узис. Туйыс бокын межаын цветитiс быдкодь цвет да нырö патшкис чöскыт дукöн. Бизгисö балямошшез и ойся гаггез, курччасисö номмез. Гриваыс вылын канава бокын сулалiс доддя вöв. Якуня Ванялöн понокыс вöтчис телегаыс дынöдз и, тыдалö, лöсьöтчис бригадирсö кольлавны ылöжык.

— Мун гортö, Буско, — ласковöя висьталiс поныслö, мышкыртчыштiс да малыштiс кымöссö. — Мун, кага, ме этасянь ог ни öш...

Поныс öвтышалiс бöжнас, ласковöя жö видзöтiс Андрейыс синнэзö. Видзчисьтöг милиционерыс коккес увтсис босьтiс бедь, öдззöтчис да бедьнас швыргис поныслö. Минута-мöд кежö топ дугдiс кывны номмезлöн бизгöм, вöввес лэбтыштiсö юррезнысö, пирснитiсö ныррезнаныс. Бускоыс кивнитiс, бöжсö жмитiс, сöтiс гортлань, но ылö эз пышшы, пуксис туйыс вылö и пондiс видзöтны бригадирыслань.

— Пон! — пиннес пыр горöтчис Андрейыс, перыта пуксис телегаас, топ полiс, что сiйö колясö.

44

Сiя жö асылö Лизаыс чеччис одзся-одз, шондiтöг, петалiс посöдзö, чукöртiс да дзимлялiс мужикыслiсь ольпасьсö и тöдвылас усис, что ойнас кытчöкö мунiс Сивöй Тараканыс, но кытчö и кинкöт, эз тöд, эз адззыв, только тöдö, что вöтöн моз саймöтiс мужикыс, горöтчис мыйкö и öшис... «Мый нö сiя? Бытшöмика эз висьтав... И ольпасьсö абу дзимлялöма, бытьтö петöм садникас и часöт абу...» Эз вежöрт инькаыс, кытчö вермис мунны ойнас мужикыс. Сэтчин да татчö — абу Андрейыс! «Вот Сивöй Таракан, бöра котöртiс эта дынö...» — инькаыслöн сьöлöмыс пессьö, вежöктö мужиксö Игнатикакöт, кöда олö öтнас и бытьтö пö гусьöн пантасьлö бригадирыскöт, но талун мылякö веритiс и эз, что Андрейыс вермис мунны Игнатикаыс дынö — сьöлöмыс кыдз мыйкö тöдiс...

Шондiыс только мыччисис, югдöтiс медодзза югöррезнас посадсö. Воробейез чирзiсö öшын увтын, сэсся улицаын некин эз тыдав. Лизаыслöн пессис сьöлöмыс. Сiя юрыс вылö кышалiс чышьян и бордпавкйöн öдззöтчис правленнёлань. Улицаас и пантасис Егоркöт, кöда ештöм ни доддявны Рыжкосö, мунö пиняла. Егорыс и висьталiс, что бригадирсö ойнас нуöтiсö милиционеррез.

Инькаыс мый сэтчö и лоис... Кынмис местаас или садьыс бырис, только тöдö, бытьтö муыс коккес увтын пондiс бергöтчыны, топ кытчöкö вöйис, син одзсис шондi югöрыс кусiс, сыбöрын, дыр мыйись Егорыслöн голосыс пондiс кывны ылын-ылын, кöда модис: «Чеччы, Лисавета! Чеччы, мыся!..» «Мый мекöт?! Мыля лэбзя?!» — Лизаыс киэсö нюжöтiс вевдöрö, думаэзнас кутчисис бы Егорыс бердö, но эз вермы вöрзьыны, кыдз дорисö уль муыс бердö.

Недыр мыйись инькаыс осьтiс синнэсö: киэсö öтöрсянь видзис Колька зоныс, мöдöрсяняс Егорыс да баитiс:

— Тэ мый, Лисавета?.. Эн жö бöра... Локтас жö, поди, Öндрейыс... Локтас!

— Кытiсь ни локта-а-ас?! — вöлись инькаыс унньöвтiс горзыны и сэтшöм зубыт лоис сьöлöмыслö, что юрсисö нетшкöвтiс кырымас тыр и горöтiс. — Мыля нö сiдз, Егор?! Мыля?!

— Ме мыйöн тöда? — Егорыс видзöтiс мöдöрö. — Ме кысь тöда? Öнджа... — И пельыс одзын ни висьталiс. — Дугды! Эшö тэнö мужикыт сьöрö кыскасö... Кинкöт челядьыт пондасö овны?!

— А... — öмыс пиньöвтчис Лизаыслöн, дугдiс горзыны, кыдз юрыс весьтö öшöтiсö чер: усяс, сöтас голяас и абу!

Сэтшöм олан петiс отирыслöн, что эз понды туйны не горзыны, не горöнжыка баитны...

Лизаыс смев мортыс, вермис быдöнкöт кычан моз пурсьыны и мырддис бы думаэзнас мужиксö кöть кин киись, а öнi... Öшис и лунсö джендöтiс-тойыштiс, уджалiс да горзiс, а мöд асывнас бöра чеччис медодз, лонтiс гор, пöжалiс тупöссез, пирöггез, мый вöлi гортын чöскытжыкыс, тэчис котомаö, челядьыслö висьталiс, медбы нiя олiсö бытшöмика — эз тышкасьö, эз бöбалö, юасис предыслiсь и иньдöтчис Кöсö. Эз повзьы öтнас подöн мунны вöррезöт, эз джöмды кузь туйын, тэрмасис да тэрмасис — нёльдас верстася унажыкö мунiс, эз и шоччись, эз сёй, эз ю и рытнас локтiс Кöсас.

Татöн сiя вöлi ни кык-куимись, но отирсö эз тöд, сiдз топ и öшис посадас, но юасис да висьтасис, и кылыс вайöтiс прокуроррезас, кöдна эз вöлö нач йöзöсь, и ны вылö надейтчис медöддьöн, веритiс, что Прокопьевичыс мужиксö дорьяс, туйдас-иньдас, висьталас кытöн Андрейыс и мый колö керны.

Лизаыс сёрöн ни рытнас пырис Прокопьевиччезас. Посöдзаныс жö спинаыс вылiсь шупкис тыра котомасö, кöда луннас сiдз кыскис пельпоннэсö, что спинаас топ мöртчис майöг — не ловзисьны пыдынжыка, не вöрзьöтчыны, сетiс котомасö Таняыслö (медодз гöснечсö тшöктiс сетны прокурорыслö, сыбöрын, мый кольччас, мужикыслö) и посöдзас жö Прокопьевичыс иньлö пондiс горзыны да висьтасьны, мыйлö локтiс татчö, кыдз мунiс кузь туйöт да горöтчис:

— Сёйö, Таня, пирöггесö, босьтö висö, дзимлялö кольттесö, эд мöсыт абу и курöггесö од видзö да отсалö меным адззыны Андрейсö. Отсав, Таня! Отсав, кевья! Тэ эд абу йöз, асланым... — Лизаыс веськыта видзöтiс Таняыс синнэзö. — Прокурор эд Прокопьевичыс... Тöдö...

— Нырыс увтiсь оз тöд! — лöгасис Таняыс — орöтiс баснисö. — Винасö ютöн чожа вунöтас ни нимсö, а тэ ышö юалан бы Андрейыс йылiсь... Сэтшöмыслiсь!..

— Мыля жö? — эз вежöрт Лизаыс.

— А мый нö?! — ыджыт öмöн баитiс Таняыс. — Тöдан отирсö мымда ни пуксьöтiсö, янсöтiсö челядьыс дынiсь... Тöдiн бы...

— Кысь ме тöда? — виноватöя баитiс Лизаыс, кöр тöдiс уджавны, некытчö гортiсь эз ветлöт, а сэтöн прокурорыслöн иньыс сэтшöмö висьталö. — Ме сы вылö надейтчи...

Инькаэс баитiсö посöдзаныс, сыбöрын пырисö керкуас, пуксисö порог дорö западня вылö.

И бöра кушкырасис да баитiс Лизаыс, — норасис аслас олан вылö, что мужикыс пыр уджалiс да уджалiс, гортö эз и пыравлы, а инькаыс челядьнас сё öтнас да öтнас, а сэтöн... Мужикыс колö челядьыслö — айтöг кытшöм олан?!

Прокурорыс гортын эз вöв. Иньыс баитiс да видзöтлiс öшынö, öтöрас эшö нач эз пемды — тыдалiсö отир и керкуэс, ветлöтiс öтöрö да керкуö, петiс да пырис, кивзiс да ойзiс, кыдз мортсö курччалiсö пытшшез сiдз ни видзчисис мужиксö, видiс Прокопьевичсö, но медöддьöн жалейтiс Андрейсö.

— Мый нö эта? Мыля Андрейсö? Этатшöм мортсö? Кытшöм сiя враг лоис? Золотöй эд сiя миян! Некинöс кывнас оз дойд, некин вылö кисö оз лэбты. Мыля нö сiдз? Любимöй тэ миян да золотöй!.. Вот эд кытöн мортсёйисьыс! Локтан тэ гортö!.. Локтан! Ме тэныт вöлись мыччала кыдз ассиным сёйнытö!

— Ог тöд мыля сiдз, — синваэсö чышкис Лизаыс.

— Локтас гортö! — чеччалiс Таняыс. — Ме сылiсь рожасö куля, мыччала, кыдз роднöйсö дойдны! Ме бы кöть пöв синнам адззылi Андрейсö, öтiк кыв горöтчи да сола няньторöн вердi! Но мыля сiдз?! — невна эз нетшкы юрсиэсö, жöдзис и жöдзис öтöрö да мöдöрö.

Сёр ни рытыс. Отирыс узьöны, а Лизаыс да Таняыс горзöны и видзчисьöны прокурорсö.

Прокопьевич гортö локтiс кытöнкö ойшöр бöрас. Инькаэс эшö пукалiсö, пильскöтчисö ныррезнаныс. Хозяиныс пырис керкуас, чывкнитiс ыбöсыс дынсянь веськыта джодж шöрöдз, бытьтö инькаэсö эз и адззы, шы эз сет, топ сэтшöм ни мыдз, что кылыс öмас оз бергав, чöвтiс вывсис мундирсö да швыргис кровать вылö, ыкöстiс иньыслö:

— Вай сёйны!

— Мый ыксан?! — Таняыс öмнас вермис мужиксö. — Мый оз тырмы? Или етша этö... Натьтö, эд кузь туяс бöра беднöй колхозниккесö иньдiт... Тьфу, öнджаэз...

— Слушай! — Прокопьевичсö топ пон курччöвтiс, синнэс пондiсö вирдавны, медодз, тыдалö, лöгыс петiс кенакыс вылö. — Тэнö бы ме местö! Тэ бы вöлись! Öтiк мортöс бы ловйöн эн коль!

— Вий! Мый тэныт иньыт и зоннэт? Киэт эд оз дрöжитö. Паздышт кымöссэзаным и абу! Талун жö сизимö вайöтан...

— Тупкав!

— Тэ тупкав вижлöк öмтö!

Лизаыс пукалiс западняыс вылын — ловзисьны пыдынжыка эз лысьт. Сы дынын ниртчис прокурорыслöн каньыс, натьтö, корис жö пирöггесö, но нiйö Таняыс дзебис ни.

— Кытöн Андрейыс?! — мужикыслiсь юасис Таняыс.

— Кытшöм Андрей? — кыдз нем эз тöд прокурорыс.

— Бытьтö нем он тöд, дульсмöм синнэзнат нем он адззы, сiсьмöм пеллезнат нем он кыв... Тэ! Асьтö важын ни колiс вострогас иньдыны! Честнöй отирсö судитат судтöг, а асьныт мый керат? Думайтан ме нем ог тöд?! Думайтан менам синнэзö тэ кодьöсь жö, пеллезам нитш сюйи? Пестер тэ, Песте-е-ер... Кытöн Андрейыс?! Родня эд сiя миянлö. Асланым. Кыдз мöдан отирыскöт Пальникас пантасьны? Или рожаат симöт павдöтан? Вевттян гырись синнэтö... Кытöн, мыся, Андрейыс?! Он висьтав?! Онмöссян, и юртö керала!

Вирснитiс нырнас прокурорыс, горöдзö чапкис чигаркасö, гудыра синнэзнас видзöтыштiс кенакыслань и висьталiс: «Нуöтiсö Андрейсö...»

— И тэ, лёлльöсь вешьяна прокурор, нем эн вермы керны?! Тэ! — вöлись öзйис Таняыс — лöгасис, синнэс вирдалöны, сiйö и видзöт, кыдз мужикыслiсь синнэсö гыжьялас. — Пёсик! Гагйöсь ныр! Прокурор... Мыйлö сэк няньсö сёян?! Мыйлö сэтшöм начальниксö видзöны, и кин видзö?! Йöзыслö бы керин... Совестьтö бы бутылка вылö вузалiн да керин, а сэтöн... Öнджа тэ... Думайтан ог тöд, что бандит Сидорсö лэдзит, кöр сiйö колiс бы вийны, а колхозниккесö кузь туйö иньдат. Думайтан ог тöд?! Быдöс тöда...

— Сэтчин жö мунан, — бизгыштiс прокурорыс, топ не иньыслö. — Мыля тэнат сiдз Андрейыс понда юрыт висьö? Он я тэ сы понда джагöтчы? Оз я сьöлöмыт сiсьмы? Ме эд тöда, мыля тэ сы понда сiдз горзан.

— Мыля? — мужикыс одзö чеччöвтiс Таняыс.

— Сiдз, — стеналань юрсö бергöтiс Прокопьевичыс. Иньыс пондiс горзыны и бöра дзерöтiс Лизасö, но кöть мымда ни горзы, синваэзнат мужикытлö он отсав, если прокурорыс, Андрейыслöн вон, и то нем бурсö эз висьтав.

Эта лунсянь Андрейыс кыдз кулiс, бытьтö мортсö дзебисö, тыртiсö муö шойна вылын и сэсся сэтчинiсь оз ни лок. Но Лиза дыр эшö мужикыслiсь керкуас кылiс кок шысö, бытьтö мужикыс ветлöтö гортын, и баитö, и вöтöн иньыслö пантасьлö: дзик Андрейыс ловья, талун-ашын локтас, осьтас ыбöссö, пырас керкуас, мурзьыштас-юалас: «Кыдз ни олат?» и бöр петас, котöртас улицаöт, медбы отирсö иньдыны уджавны, медбы гортö пырны только узьны, нем оз понды ештыны отсасьны иньыслö, но и ась оз отсась — вöлi бы ловья, только бы керкуас вöлi да висьталi, мый да кытöн керны. Зонкаэс öнi топ ыджытöсь ни, вермöны ни дорны кöрттув, лöсасьöны черöн, но мый пондасö керны, пыр юалöны: «Мам, кыдз этö?» А мамыс тöдö я, кыдз уджавлiс мужикыс керкуыс гöгöрын, керасьлiс я уна чернас, керлiс я мужикыслiсь уджсö, кöть гозйöн овтöн и думайтлiс, бытьтö Андрейыс нач ни оз отсась, тöдö только колхозсö да йöзсö, а вöлöма, что горт гöгöрын керöма ассис уджсö...

Челядьыс быдмисö: Коляыс гöрö ни, а Иваныс да Митрейыс учöтся-учöтöн пуксисö вöввез вылö да пондiсö пинявны, мамныс талун оз ни пов, что куласö тшыгйöн. Но то Коляыс, то Иваныс да и Митькаыс озö-озö да шуасö: «Мам, тятьным бы, натьтö, этадз эд керис, мöднёж...»

Тятьныс бы керис... Колö зонкаэслö айныс. А кытöн сiя? Мый сыкöт? Ловья я? Инькаыс думайтö мужикыс йылiсь, сiдз думайтö, сэтшöм ни сылö сьöкыт, что мукöдпыр олö топ бöбöв, öшöм: öвтчö я, уджалö я, гортö локтö я или мунö, бытьтö нач оз вежöрт, мый керö. И сiдз лунiсь лунö, год бöрын тыртö год, олö да олö сьöкыт луннэсö, сiя бур, что зоннэс абу асныраöсь, кывзöны мамнысö, быдöнныс удж бердö лякасьöны кыдз сиррез, кöть гортын, кöть колхозас асьнысö отирыс одзын оз стыдитö, шедтöны трудодень.

И подасис Лизаыс эз юскись... Видзис мöс, баляэз вöлiсö, курöггез кольттялiсö, да и оланыс пондiс мöдкодьсявны — зорамны пондiс. Колхозныс пондiс вынсявны, отирыс кокнитжыка ни уджалiсö, пöтжыка сёйисö, буржыка пасьтасисö, праздниккесö пондiсö кольлавны гармошкаэзöн да сьыланкылöн.

Дружнöя олiсö гортын и дружнöя уджалiсö колхозас, отирыс эз вöлö пон кодьöсь, некин и некöр Лизасö эз корит, синнэзас эз бытшкы, что сiя сэтшöм да этатшöм, что мужикыс враг, сэтчин сылö и туй, ась пешлö тюрьмаыслiсь кöрсö, ась кытöнкö черпезьдö. (Натьтö, бригадиравтöнняс быдöнöс гöн ньылат эз жö эд малав, ёна жö лöгöтлiс отирсö, но...) Инькаэз озö-озö да кытöнкö син сайын, гусьöн юаласö:

— Лисавета... Кыдз нö ни?.. Кытöн ни Андрейыс? Гижö я?

Инькаыслö бöра горшас тасасяс пурт, бöра петасö синваэз, горöтчас:

— Абу ни ловья да...

— Мый тэ?!... Мыля абу ловья? Эн горзы! Ловья Андрейыс! Локтас!

— Ен пеллезö бы тiянлiсь кыввезнытö, — пильскö инькаыс, веритö ёрттэслö, и предыслö веритö, кöда инькаэс моз жö гажöн висьталö: «Ловья Андрейыс!»

Кодя предыс, кöть и чорыт, кытöн колö — зэлöтö, кытöн бöра мыйöн вермö, сiйöн и отсалö, и бригадирыс оз бы зэлöт, кöр кывзiсян, асьтö он жалейт, уджалан...

Олö мужиктöг Лизаыс, уджалö, горесö вермö гаж, кöр видзöтö зоннэс вылö и адззö, кыдз нiя быдмöны, кытшöмöсь бытшöмöсь лоöны, чожöсь — жöниккез ни, талун-ашын гöтрав бы, и пондан овны отир моз, пызан вылын пыр лоас тырдоз. Оз я зоннэс сэк керö виль керку, кытöн лоас быдöнлö прос да гажа, и кöр Андрейыс локтас гортö, пырас керкуас, шынньöвтас да горöтчас: «Вот, Лисавета, ми тэкöт олiм умöля, сьöкыта быдтiсим, но весь эд, батя, эг мырсьö!» И пуксясö нiя кык пöрись горвыв дорö, пондасö видзöтны томмеслiсь олансö да бöра горзыны, но öнi синваэзныс лоасö мöдкодьöсь — гажа синваэз лоасö.

Но одзöв Лизаыс орсöм думаэскöт, одзöв думаэс бöбöтöмась инькасö — лöсьöтчис бура бы овны да вомдзалiс асьсö. Сэтшöм миян судьба, сiдз еныс шуöм, что минута ни гажöтчыны оз позь — враг миянлö асланым думаным. Оланыс лёк, орсö, бытьтö шыннялö, ачыс пиас дзебöма пурт, медбы заргыны веськыта сьöлöмö, вийны или сэтчöдз дойдны, что кувтöдз он веськав, гробö водан, да сьöлöмыт пондас тшепитны-висьны...

Лизаыс войнатöг öштiс öтiк мужик, сэтчö эшö вöтiс лёк враг — война. Медодз янсöтiс Колькаыскöт, бöра сьöлöмыс бердiсь нетшкöвтiс роднöй-любимöйсö, мырддис, кыдз кайлiсь борд увтiсь пиянсö. Жаль зоныс, но отирыс моз жö кольлалiс войнаыс вылö да пондiс еныслö кеймыны. Медбы Колькасö эз вийö, эз ранитö, мед гортö локтiс ловйöн. Но войнаыс вылын отирсö торкисö быд лун, маммес быд лун пондiсö босьтны вийöм гижöттэз, быд лун и ой инькаэс горзiсö, топ посадыс уннялiс-сьылiс сэтшöм кузь сьыланкыв, кöда некöр ни оз ор.

Кеймис еныслö мамыс, мед эз вийö Колькасö, но еныс мамыслiсь кыввесö эз кыв: усис медыджыт зоныс врагыскöт тышкасьтöн. Босьтiс инькаыс вийöм гижöт и öдззис уннявны ранитöм кöин моз да сiдз, что горзiсö бытьтö инькаэс быдöс посадсис, быд морт инькасö жалейтiс: «Мужикыс и зоныс понда эд сiдз... Беднöй тэ, Лизавета...», кöда и шуис:

— Асьтö жалейт! Кык зон эшö кольччисö. Эм кин вылö надейтчыны. Видзöт: Аннаыслöн неделянас усисö кык мужик, нач öтнас кольччис и кыдзкö лöсьöтчö овны, и тэ пондан овны.

«Ванькаыс и Митькаыс ловьяöсь...» — горзö мамыс и сьöлöмсö бурмöтö дума, лоö кокнитжык бы, но войнаыс горш — оз пöт öтiк зоннас, и нуöтiсö Ванькасö ни, кöда эшö нач том, эшö эз бы ков зонкаыслö янсöтчыны мамыскöт, но янсöтчис, мунтöнняс мамыслö бур кыввез висьталiс: «Мам, эн горзы... Ме Колькаыс понда вештiся и локта. Вот адззылан!»

«Бур бы эд!..» — думайтiс да горзiс Лизаыс, гортö кольччис медучöтыс. И сьöлöмыс бöра öддьöн висис шöрöтыс понда. Ванькаыс письмоэзас ошшасис, что тышкасьö врагыскöт — ёна тышкасьö, что сiйö öтiк пуля эшö эз дойд, быдöс бур, локтас гортö и быдöс висьтасяс...

А мамыс сё мырсис колхозын, шедтiс бы трудодень, но трудоденьыс вылö колхозсис нем лоис босьтны, быдöс сюсö нöбöтiсö фронт вылö. И бöра отирыс пондiс тшыгьявны да тшыгйöн уджавны, быдöнныс уджалiсö да няньыс местö сёйисö турун, кульзöр, сiсь картов, кöда вöлi кö, — мый шедiс, сiйö и сёйисö, тыртiсö тшыг кынöмнысö да уджалiсö: öтiк лун эз шоччисьö, эз шуö, что ог мунö уджавнытö, ась кинкö уджалö, кöда бура сёйö. Лизаыслö топ тшыгьявнытö вöлi кокнитжык, кокнитжык вöлi тöждiсьны мужикыс да зоннэс понда, кöр дынас эшö вöлi медучöтыс, а отирыслöн, инькаэслöн некин ни эз вöв, маммес öтнаныс ни быдтiсö челядьсö, тшыгьялiсö асьныс и тшыгьялiсö челядьыс, а войнаыс сё кыссис и кыссис, сёйис и сёйис отирсö, кöть и врагсö пыкисö ни — вермисö ни, веритiс отирыс, что локтас лун, кöр кусас войнаыс, бертасö ловьяэс гортö... Матын ни вöлi победаыс, тулыслань ни вöлi кадыс, вот локтасö кайез, борддэзныс вылын ваясö отирлö гаж, но мамыслö кайес вайисö унажык шогöт, курытжык синваэз: Ванькасö вийисö Берлиныс дынын ни. Мый сэтöн висьтавны? Кытшöм кыввезöн пальöтны инькасö? Горзö мамыс зоннэс и мужикыс понда, одз асывсянь сёр рытöдз горзö, ойнас саймас да горзö, синваэс петöны уджавтöн. Инькаэс бöра пальöтöны:

— Эн горзы, Лисавета... Видзöт: Аннаыс нач мужиктöг кольччис, да тэ моз оз горзы. Тэнат эшö öтiк зон, эм кинкöт кыв горöтчыны, эм кин вылö надейтчыны...

Этадз баитöны инькаэс, а сэтöн — бряк! Митькасö ни корöны военкоматö, сьöрас тшöктöны босьтны пань да няньтор. .. Сiдзкö, мамсö нач дойдö войнаыс.

— Мам... — янсöтчö мамыскöт медучöт зоныс. — Эн горзы. Войнаыс талун-ашын кусас, менö оз ни вийö. Локта гортö, и ми тэкöт пондам овны медбура...

— Ог ни ми тэкöт, зон, бур олансö адззылö! — герьялö мамыс да война вылö кольлалö медучöт зонсö ни. Кольлалiс зонсö и кольччис гортö, кыдз ыб шöрын турун тылöп, кöдö тöлыс нёкралö, морозыс кынтö, ваыс оз тырмы и подаыс тальö. Но талясö, нетшкасö-летасö, а сiя бöра юрсö лэбтö, ась и гортын керкуыс лоис ош поз кодь: орддьы бы, пышшы керкусис, но кытчö? Кин тэнö и кытöн видзчисьö?

— Эн горзы, Лисавета, ловья эд эшö Митькаыт, локтас, и пондат овны... — бöра баитöны инькаэс... Асывнас баитiсö, а рытнас мамыслö вайисö вийöм гижöт: торксис медбöрья зоныс войнаыс бöрсянь, бытьтö пö бандиттэз вийöмась...

Инькаыс усис садьтöг, куим лун эз сёй, эз уджав, мед кöть мый бригадирыс керö — ась судитö, ась вийö, нем мортыслö эз ков, кувны лöсьöтчис: сувтас еныс одзö и юрбитö, корö аслыс смерть, горзö: «Мыля тi менö сiдз, ен-батюшко да богородича-матушка?! Мый ме тiянлö сэтшöм умöльö кери?! Мыля челядьöс вийнытö сетiт, а менö эд вийö? Вийö! Талун жö бы кула. Мыйлö понда овнытö? Кинлö? Господи-и-и, джагöтча!»

Еныс видзöтiс лёка, топ осудитiс, кыдз сiдз еныслö и колö — мырддис мужиккесö мамыслiсь и быдöс сэтöн! А джагöтчан ки, сатанаыс öлöдзö пуксян и пондан пукавны, и пондас бесыс мöдöр югытас ни кешитчыны: татöн оланыс эз вöв и сэтчин оз ло... Полiс инькаыс юрсö сюйыштны петляас: олiс, эд быд лун колiс уджавны: гортын бергавны пода гöгöрын, одзжык асывнас мунны уджавны колхозö — шедтыны трудодень, кöда вылö мымдакö сетiсö пизёк, но отирыс баитiсö ни, что мöдiк годö оланыс лоас буржык, пизьсö пондасö босьтны унажыкöн.

Год-мöдсö войнаыс бöрсянь инькаыс олiс вöтöн моз: водö или чеччö, шоччисьö или уджалö, тшыг или пöт, дзик оз вежöрт мый сыкöт — чулалас луныс и бур, ашын локтас мöдiк лун и бöра чулалас: чожажык лолыс петас...

Сивмис мортыс, нач дзор лоис юрсиыс, пöрисьмис одзся-одз, но олiс одзлань и уджалiс, а гортас сё öшынлань синнэз бергöтчöны, пыр видзöтчö, оз я мужиккес коласiсь кинкö вуджöртчы, оз я лок, эд еныслö оз вунöтчы юрбитнытö öтiк лун, кеймö Христосыслö, корö мужиккесö, и кывсьö, бытьтö бы пö öтiк мамлiсь этадз жö вийöмась зоннэсö — босьтöм вийöм гижöттэзсö, а сыбöрсянь зоныс локтöма...

Олö Лизаыс да уджалö, öтiк лун оз шоччись. Уджалö и отирыскöт топ гажажык, а пондас кö локны уджалансянь, видзöтас керкуыс вылö и нач повзьö: позыс сiдз ни важмöм-пöрисьмöм, что короминнаыс пиньöвтчöм, посöдзыс сiсьмöм и талун-ашын разсяс: «Мый лоас, ог кö кув?! Кытöн понда овнытö? Мужиккес сiсьмисö, и керкуыс пондiс сiсьмыны...»

45

Кувны бы чожажык ни... Но кöкыс тулыссэзнас и гожуммезнас кöкö и кöкö — уна лыддьö эшö овнытö, и катшаэс öшын увтас пуксясö да китшсьöны — бур юöррез вайöны.

Войнаыс бöрсянь чулалiс уна ни кадыс. Андрейыс дас год эз вöв гортын, дас год эз гиж письмоэз, ловья вöлi или кулöм, некин сы йылiсь нем эз тöд.

Чулалiсö годдэз. Чулалiс важын ни войнаыс. Оланыс сё вöлi сьöкыт, но годiсь годö пондiсö сёйны буржыка, инькаэс горзiсö мужиккезныс понда да быдтiсö челядь, челядьыс быдмисö, пондiсö отсасьны ыджыттэслö, а Лизаыс пыр öтнас да öтнас. И öтнас ни лöсьöтчис овны кувтöдз. Арнас, кöр ойес вöлiсö кöдзытöсь ни, а луннэс топ эшö гожумсяöсь, эшö шонытöсь да гажаöсь, Кöсланьсянь Пальникö питкыльтiс-локтiс Андрейыс.

Сiя гортö локтiс сiя жö туйöт, кöда туй кузя нуöтiсö, и быдöс сылö вöлi тöдса, только вöрыс вежсьöм: быдмыштöмась туйыс бокын кöззэз да кыдззез, шорок вылiсь разьсьöм пос, йöрресö кыт вочöмась, кыт абу. Мортыс эз тэрмась, жагвыв кайис гриваыс вылöдз, сувтчис шоччисьны. Сiя чужöмыс вылын пöрись ни: сивöй юрсиа, рожабаннэс чукрасьöмась, мыгöрыс топ чинöм и косьмöм — лы да кучик, но синнэс эшö лэчытöсь, ылiсянь адззисö посадсö, медодз ассис керкусö, кыдзсö, кöдö садниканыс садитлiс ачыс, и пуыс сытöг быдмöма крышаыскöт тшöтш, ылiсянь тыдалiс, что садник йöрыс пиньöвтчöм — ловзись вынöнжык и пöрас, тыдалiс и баняыс, кöда чинöма-пуксьöма, кыдз мöртчöма муас, чомыс лоöм сэтшöм жö. Но не öтнаныслöн сэтшöм керкуыс да картаыс, не öтнаныслöн пиньласьöм керкуыс, пуксьöм чомыс, сiсьмöм керку крышаыс да разьсьöм йöрыс, öт улицаас и мöдас ылiсянь тыдалiсö öткодь пиньöла керкуэз, кыдз посадыс дас годнас Андрейыстöг пöрисьмöм, сивмöм, керку крышаэс багсьöмöсь. Колхозыс, тыдалö, пöрисьмöм жö: öвиннэс, кöднö Андрейыс эшö бригадиравтöнняс лöсьöтчис бы керны виллезö, да эз вермы кернытö, öнi нач ни мышкыртчöмась и топ норасисö, что нылöн оланыс овсьö, ружтöны да косьтöны сюсö и мыйись-мый... Сiсьмöм короминнаэс бердö кутчисяс кö би, кымöрас лэбзясö не только гунаэс, но и посадыс...

«Мый нö метöг керöмась мужиккес?! Мыля абу сибалöмась гунадорас? И горттэзаныс... Или быдöннысö сёйис войнаыс? Ми думайтлiм, что олам эшö год-мöдсö, только год-мöд уджалыштам буржыка, дундöтчам и вöлись ловзисям кокнитжыка, пондам овны отир моз — сёям и юам пöт, вöлись лэбтам виль керкуэз, тшупам öвиннэз, чоммез, лöсьöтам туйез, а петö... Кыдз тай коли, сё сiдз: колхозас оланыс, кыдз вердтöм вöв джöмдö и джöмдö...»

Умöль вöлi йöзын, берсясö пешлiс Андрейыс, адззылiс умöльö, и бурыс синнэс вылö усьлiс, но эз думайт, что гортас пондас локны и синнэзас бытшкас посадыс — пондас норасьны сэтшöм ни умöль оланöн, кöда эз вöв бур и лоас я?..

Андрейыслö лоис недолыт, сэтшöм ни гажтöм, сiдз ни сьöлöмсö пидзыртiс эта оланыс, что туй бокас пуксис, сьöкыта ловзисис, юрсö öшöтiс и пондiс тöждiсьны, кыдз овны одзлань, и мый бöра сылö оланыс заптiс, мый козьналас, висьталас, кöть и надейтчис, что быдöс лоас бур, что ловьяöсь зоннэс; ловьяöсь кö кагаэс, петасö биись и ваись, но... Ловьяöсь я, кöр йöрсö некинлö лоöма вочнытö? Ловьяöсь кö вöлiсö бы мужиккес, мыля сiдз оланыс джöмдiс, мыля колхозныс лöсьöтчис берездасьны, кöр сiя, видзöт, таджьясьöм, сувтöм и синваэсö топ чышкö. Война, война...

Андрейыс сэтчин эз шедлы, но пешлiс эд сылiсь кöрсö и вежöртö, кыдз сiя мыччалiс ассис мывкыдсö. Туйö я осудитны эта война бöрсянь олансö и отирсö, кöдна кольччисö ловьяöсь? Оз, но локтiс гортö и эз думайт, что сiдз вермас посадыс разьсьыны и багсьыны...

Шоччисис Андрейыс гриваыс вылын, видзöтiс посадсö и ыббесö, кöдна ошшасисö тыра воöм сюэзöн, кöсйисö пöт олан, и этасянь сьöлöмыс вылын лоис кокнитжык. Андрейыс эшö эз и пыр гортас, но лöсьöтчис ни уджавны отирыскöт, сёйны няньсö эна ыббез вылiсь, думайтiс ни: «Эг уджав... Но и ась. Вердасö эд! Кытчö воштiсясö?! Оз жö кутö да бöр брынöтö Сибиряс?!»

Думаэс поздiсисö сьöлöмас, тэрмöтiсö гортö, медодз пантасьны иньыскöт, кöда панталас и шуас: «Сивöй Таракан, кытöн да мый сы дырна керин?!» Мöдöтпыр бы лöгасис эна кыввез понда, а талун... Иньыслöн быд кылыс ма местын бы...

Шондiыс гажöтiс-видзöтчис керöсыс кырывсянь ни, ой кежас лöсьöтчис дзебсисьны вöрыс сайö, öнi медбöрьяись югöрнас малыштiс керку юррез, кутiс бы кымöрсис чикиссез, да эз вермы кутны чож каёккесö и мужикыслö кыдз шуис: «Тэрмась, дед, тэрмась! Тэнö видзчисисö, да дугдiсö ни видзчисьнытö». Андрейыслöн сьöлöмыс чеччöвтiс ни бы гриваыс вывсянь гортöдз, но видзсис, эз котöрт, кокнита оськöвтiс гортö, ыбыс вывсянь важ пиньöвтчöм воротаöт пырис улицаö, чывкнитыштiс Якуня Ваняэз öшын увтöт, кöдналöн понныс уськöтчис тöдтöм мортыс вылö, гавкнитiс и виньдiс, челядьыс йöр сайсянь мыччисö юррезнысö и бöр öшисö, а ыджыттэс гортын, тыдалö, эз вöлö, эз шыасьö, не эз мыччасьö, и Егорреслöн ыджыттэс эз жö вöлö, поныс жö эрзыштiс бурундукныс вылын, челядьыс жö бöра, кöда йöрсянь, кöда посöдзсянь вуджöртчисö и öшисö. Посадыс олiс, кыдз горзiс ыджыттэс понда, кöдна эна чассэзö эшö мырсисö ыббез вылын. Вичкуыс, кöдö кöркö пондылiсö разьны да нач эз вермö разьнытö, сулалiс аслас местаын — гордöя сулалiс, сiдз жö шондi югöрыс весьтын золотöй рöмöн югьялiс медджуджыт юрыс, вичкуыс гöгöрын сё быдмисö ньыввез да льöмпуэз, шырисö-лэбалiсö да чирзiсö чикиссез, и крышаыс вылын ветлöтiсö гулюэз. Кöть мый, а гажа посадыс, кöть кытшöм оланыс, а ыбöссэзас отирыс абу кышалöмась кöртiсь дорöм замоккез, а мунöмась гортсиныс и сторожыс местö кольöмась беддез — ыбöсас вугыс бердын эм и бур, некин оз пыр, оз гусясь. «Мый и гусявнытö? — ас кежас серöмтчыштiс локтiсьыс и сэтöн жö шуис. — Гусясисьыс адззас...» Эна думаэзöн и локтiс аслас керку дынö, вайис рад и полöтан чувствоэз, аскоддя думаэз, посöдзныс дынын лэбтыштiс юрсö, адззис, что посöдз ыбöсныс, осьта. Посöдзыс и ыбöсыс пиньöвтчöмась, пуксьöмась муыс бердö хозяиныстöг — бурундукыс вывсянь вожмöвт — и керкуас! Öшын увтаныс куйлiсö баляэз, кукань. Кинлöн нiя, йöзлöн или асланыс, Андрейыс эз тöд, эз тöд, эм я гортын иньыс. Тальччис поступеньыс вылö, и сьöлöмыс вöрзис моросас — берездасис, дзугсисö шаггес, кöр эшö нырас павкис табак тшын дук — вачкис мужик дукöн. Кин вермис куритны гортын? Натьтö, зоннэс...

Андрейыс мыдз, но мыдзыс öшис, öтöрись посöдзсянь кокнита чывкнитiс керку ыбöсыс дынöдз, кутчисис вугыс бердö, ыбöссö нетшкöвтiс асланяс, шагньöвтiс керкуас и синнэс баралiсö: лабичын пукалiс Прокопьевич да шынь видзис. Ачыс оз тöд, мый лоис сыкöт: нето повзис, нето öшис, öтiк дума вежис мöдiкöс. Сэтчин, кытöн джендöтiс дас годсö, мукöдпыр öтiк луныс кажитчис год кузя, кöр тöдвылас гортыс усьлiс сизимись, думаэзнас неöтпыр мöдпöв олiс ассис олансö, бöра уджалiс единоличнöй оланöн и бригадиралiс колхозаныс, пантасьлiс быд морткöт, эз орддьы и Прокопьевичсö, кöда гöгöрын думаэзнас бергалiс медуна, эз орддьы, кыдз мортöс, но морт я вöлi Андрейыслöн воныс? Сэтшöмыскöт бы сэсся эз и пантась, эз адззы, но видзöт жö... Öтiкö думайтiс, а мöдiкö панталiс — сералö эд бöра, сiдзкö, оланыс! Но мый керны? Вожмöвтiс ни гортiсь порогсö, сьöлöмыс берездасис-дзугсис, мугис, кынмис я мый я местаас, руыс дзикталiс горшсö — не одзлань, не бöрлань, не кыв горöтчыны, не бöр петны, а Прокопьевичыс пукалö сiдз жö — не сэтчин, не татчö, местасис эз вöрзьы, чужöмыс эз вежсьы, куритö — кыскö да кыскö горшас табак тшынсö и шы оз сет.

Дыр эз адззисьлö кык вон, но пантасисö, колiс бы радуйтчыны, а нiя öтамöдсиныс кыдз повзисö, öтыс пукалiс лабичын, мöдыс сулалiс гортас порогыс дорын. Дыр мыйись Прокопьевичыс жö одзжык горöтчис:

— Здорово, вонö! Мый нö тэ? — веськыт кинас гладьöтiс моросыс одзись мундирсö, топ чышкис долоньсö, медбы сетны кисö, но сэк жö эз чеччы, а дыр мыйись, сэтчин да татчö и вöлись сувтiс, локтiс Андрейыс дынö, нюжöтiс кисö да шуис мöдпöв. — Здорово! Мый нö тэ? Кыдз йöз пырин...

— А тэ? — Андрейыс кисö нюжöтiс жö, но эз жмит, кыдз ки лапаэс не аслас.

— Тэнö видзчися, — висьталiс Прокопьевичыс.

— Кысь тöдiн?

— Тöдi, — кокнита ни, кыдз одзжык кокнита баитлiс прокурорыс, кöр нем понда эз тöждiсь, шуис воныслö.

Мезмис Андрейыслöн горшсис каличыс, кылыс пондiс бергавны:

— А ме думайтi...

— Мый думайтiн? — сералiс ни прокурорыс.

— Мыся, ог ни пантасьö, — сьöкыта ловзисис Андрейыс.

— Кытчö воштiсям? Кытчöдз ловьяöсь... — кокнита баитiс Прокопьевичыс, рожаыс гладь, мыгöрыс веськыт, пельпоннэс паськытöсь — мортсö абу чукралöм и курччалöм войнаыс, Андрейыс моз абу шедлöм лагеряс, абу тшыгьялöм, кынмöм и косьмöм.

Кык вон эз адззисьлö дас год, пантасисö, кыв-мöд горöтчисö, и одзлань басниыс джöмдiс: Андрейыс спинаыс сайись лэдзис котомаоксö, а Прокопьевичыс бöрöн-бöрöн бöр вешшис порогыс дынiсь; шлапкисис лабичас да ылiсяньмоз ни пондiс видзöтны вонсö.

Пуксис Андрейыс западняыс вылö да вöлись юалiс:

— Кытöн хозяйкаыс?

— Натьтö, йöрас петiс, — шуис Прокопьевичыс. Андрейыслöн кылыс йылын сiдз и бергалiс, сiдз бы и юалiс зоннэс йылiсь, но öмсис чеччöвтiс мöдiк, шуис:

— А тэ?! — öзйис сьöлöмыс, лöсьöтчис юавны, мый сэтöн пукалö да видзчисьö, кöр гортын некин абу.

— Котöрта, мыся, да висьтала, что локтан, да ендi, — виноватöямоз ни шыасис Прокопьевичыс.

— Кыдз олат? — юалiс Андрейыс, чеччис западняыс вылiсь, шагньöвтiс пызаныслань, лэчыта пондiс видзöтны воныс вылö и юалiс. — Сё отирсö сёян?

Керкуас некин йöзыс эз вöв, басниыс джöмдiс-виньдiс, пондiс кывны, кыдз бизгö гут. Прокопьевичыс кашык-кашык керис, эз эд лöгась, эз кинкö моз рез-паз висьтав, что тэ этö... Баит, да тöд кинкöт мый баитны, то... А сiя кылiс да эз воныслiсь кыввесö, лэдзис бытьтö пеллес бокöт, китш-китш серöмтчис и кокнита висьталiс: «Олам.»

«Тэ олан... — Андрейыс юрсö бергöтiс ни мöдöрö. — Мый тэныт, сэтшöмыслö, лоас, не биыс эз сот, не пуляыс эз адззы, натьтö, войнасö ылi орддин!..» Сэтöн жö син вылас комись сунилабичись усис нянь чöвпан — нянь и не нянь, топ карта вывсис пыртöмась мöсыслiсь сiтсö, пöжалöмась и сёйöны. Этатшöм няньсö, Андрей, натьтö, и тэ он сёй. «А тэ, прокурор?! Вердны бы, а?.. — думаэс нерисö, висьталiсö и мыччалiсö. — А ыббес вылын сюэс бурöсь эд... Мый нö сэк? Или быдöс кыскöны?..» Сьöлöмас бытшкисö ни — эз ешты пырны гортас, но дзескыт ни лоис керкуас.

Хозяйкаыс кыдз нагладь дыр эз пыр, сыбöрын вуджöртчис öшыныс увтын, кылö, кайис посöдзас, ружтыштiс старуха моз, чапкис мыйкö кисис, вöлись осьтiс ыбöссö, вожмöвтiс порогсö, сувтiс да пондiс чикравны синнэзнас, видзöтiс мужикыс вылö и эз верит, что этö Андрейыс, вишыкасис-керис минута-мöд, вöлись керкутыр и кивнитiс: «Тэ, Öндрей?! Кысянь нö еныс вайис?! Мöдöр югытсяняс, али?..» — пондiс чышкыны синваэсö, горзiс бы, кыдз горшсö мукöдпыр летлiс томсяняс, но горзынытö эз вермы, только ружтiс.

— Мöдöр югытсяняс, — дульсö зубыта ньылыштiс Андрейыс, сьöлöмсö пидзыртiс обида, что ачыс пöрисьмис, и иньыс пöрисьмöм — старуха ни Лизаыс, а кöр нö нiя ештiсö öтлаын овнытö? Мыля сэтшöм чожа?

Колiс гажöтчыны, но гажыс эз вöв. Иньыс эз öшöтчы мужикыс голя бердö, эз понды окасьны, а порог дорсянь мунiс комö, кыдз не ачыс пондiс кошшыны кружка, но эз адззы и сэк герйöвтiс керкутыр да юалiс: «Адззылiн жö кытiськö зоннэтö?!»

— Кысь адззыла, — юрсö öшöтiс Андрейыс, кöр сiя вежöртiс, что зоннэс абуöсь ни, и оз лоö.

Инькаыс вöлись пöт и горзiс. Быдтiсö челядь, а мый вылö? Кинлö? Войнаыс горшö? Андрейыс эз горзы, ружтiс, а Лизаыс горзöв-керис, потiс синванас, и пондiсö öтамöдныс вылö видзöтны старик да старуха, кöдналöн не бöраныс, не одзаныс — дзир кыкöн, кыкнанныслöн юраныс вачкис: «Кыдз пондам овны?!»

Пантасисö инь да мужик — ёрт ёрткöт, томнаныс олiсö öтлаын — сякö олiсö, кытöн лöгалiсö, кытöн эзö, кытöн колiсö öтамöдныслö, кытöн бытьтö эзö, и оланыс, кыдз кужис, сiдз и сералiс ни ны вылын, а одзлань кыдз? Мый лоас?

— Быдöс лоас бур, — кокнита шуис Прокопьевичыс, кöда эз пет керкусис, пукалiс лабичын, видзöтiс öшынö, натьтö, видзчисис, кöр пызаныс вылö ваясö сёйны да юны, и сылö оз я кыпав винаок... Эз бы ков керкуас öнi Прокопьевичыс — абу дак абу сэтшöм гöсьыс, но мый керан? Он эд гормöччан босьт да вартлы-вашöт, кытчöдз ачыс оз вежöрт, что колö мунны.

Не сiя я вонсö дас годыс кежö иньдылiс Сибиряс? Не сы кузя я эстöн керкуас етшажык баитiсö, а унажык горзiсö? Не сы кузя я Лизаыс унаись думайтiс пышшыны керкусис да мунны, кытчö синнэс видзöтасö и коккес нуöтасö, но эз мун, ой и лун видзчисис мужиксö да зоннэсö? Не эта я мортыс этчö керкуас пыртö шогöт да синва? Оз бы ков сылö татчö кокнас тальччыны, а сiя, видзöт, бöра ни эстöн... Эз я сiя бöра вай смерть кодь шогöт? Оз я бöр янсöт вонсö кенакыскöт?

Пукалiс Прокопьевичыс не йöзын, а воннэзас, а воныслöн сы вылö петiс лöгыс, эз бы и адззы прокурорсö, эз бы и видзöт.

— Андрей, мый ме вылö пиньласян? Ме эд тэнö эг дойд, — веськыта ни видзöтiс воныс Андрейыс вылö. — Тэ вылö эд бытьтö бы норасьöм Кипрейыс... Бытьтö пö тэ шуöмыт, что не колхозыс бы, дак оланыс бы пö вöлi богатжык... Шуин или эн?

— Ме?! — киэс пондiсö дрöжитны Андрейыслöн. — Ме шуа?! Ох тэ-э-э... Тöдi бы...

— Мый бы керин? — веськыта видзöтiс Прокопьевичыс — пиннес гер, нерö, чувйö-гарйö важсясö, йитö талунняыскöт, мыччалö, что тэ, Андрей, кытшöм вöлiн, сэтшöм и кольччöмыт, весь чеччалан — асьтö мыччалан...

— Мый бы кери?! — западня вылын ни пукалiс Андрейыс, пöдiс — ловнас тырис, мый бы и керис аслас враггезкöт, ась и вежöртiс, что сiя сё эд öтнас, некин сы дор абу, некин оз отсав, мый колö, сiйö и керасö эта оланöн, кöда кытшöм вöлi, топ немымда эз вежсьы, законнэсö абу дзугöм. — Ог тöд, мый бы кери?..

— Гы-гы, — юрсö пондiс гыжьявны Прокопьевичыс, кöр адззис, что воныс сё сэтшöм, но мыйкö мывкыдас топ не сiя ни, бытьтö мыйкö содтöмась, мыйкö чинтöмась, кыдз велöтöмась овнытö, да абу вермöмась велöтнытö ... «Эх, Андрей, петух тэ! Ас могсит чеччалан, а мый бы мыччалан?» — орсiс дума прокурорыслöн, кыдз воныс вылö видзöтiс ылiсянь — кымöрсяняс, вермис чарöтны, но жалейтiс, гажöн думайтiс: «Мый ни тэнö, поди, вöрöтнытö?.. Абу ни кольччöмыт да...»

Кыкнанныслö лоис недолыт, кöр эз бы ков этадз пантасьны — медодзза минутасянь чапкасьны лёк кыввезöн.

— Кипрейыс эд... — юрсö мышкыртiс Прокопьевичыс.

— Мед, — мурзьыштiс Андрейыс. — Эм кö еныс, асьсö, поди, адззас...

Прокопьевичыс шынньöвтiс, куритiс, табак тшынсö кыскалiс öмас, ньылалiс дульсö, нюжлалiс голясö, видзчисис...

Посöдзын китöстiс петух, кыдз саймöтiс хозяйкасö. Сiя вöлись пондiс котрасьны да лöсьöтны сёйны, а Прокопьевичыс видзчисьтöг юрыс вылö кышалiс фуражкасö — и öтöрö!

— Тыдалö, совесьыс эм жö мымдакö, — бöрсяняс горöтчис Лизаыс.

— Адззöмыт кинлiсь совестьсö кошшыны!.. — висьталiс Андрейыс и пуксис пызаныс сайö.

Мужикыс сёйис пызан сайын, а иньыс пукалiс паныт лабичын, видзöтiс Андрейыс вылö и аслыс эз верит, былись я эта Андрейыс, кöдö мыдзис ни видзчисьнытö, но видзчисис. Андрейыс одзжык эз вöв басниа, и öнi эз баит, пöрисьмöм, эз тэрмась сёйнытö, бытьтö сёянсö жалейтiс, колис бы ашын кежö.

— Кывзы, — Лизаыс видзöтiс-керис мужикыс вылö да пондiс баитны. — Ме эд тэнö унаись вöтасьлi... И пыр ловйöн адззывлi, веритi, что локтан.

Шы эз сет Андрейыс. Иньыс пондiс горзыны, сыбöрын чышкис синваэсö да горöтчис:

— Якуня Иваныс локтiс да висьталiс, что тэ ловья.

— Мыйöн Иваныс тöдiс? — Андрейыс лэбтыштiс юрсö.

— Ловья тай шуис...

— А кöр сiя локтiс?

— Год-мöд ни кыдз...

— Дыр жö Ванькаыс кытöнкö «гöститöм», — вöлись медодзись шынньöвтiс Андрейыс.

Андрейыс локтiс гортö и весь немымда эз понды овны: медодз уджалыштiс колхозас, а сыбöрын кутчисис колхоззэзлiсь примитны сю, кöдö öктiсö вичкуö. Уджалö мужикыс, няньсö весь оз сёй, и некин мортсö оз шу, что умöля уджалö, или, шуам, кинöскö дойдö, кыдз Прокопьевичыс. Одззамоз жö, кыдз кывсяс, что сiя локтö Пальникас, инькаэс сысъялöны шоныт ырöшшез, а мужиккес керöны яй, бытьтö оссьö праздник, мед куш кымöсöн не пантавны жö прокурорсö, пырас кö кинкö ордö. Оз вунöтлы Пальниксö Прокопьевичыс, локтас, мунö улицаöт, том и пöрись здоровайтчöны, рочалöны: «Прокопьевич, пырав жö миянö... Кынöмыт эд сималö и горшыт косьмö...»

— Пырала, пырала... Сыбöрын, — висьталö прокурорыс, мортсö кывнас оз дойд.

— Пырав, Прокопьевич... Сюромкасö пешлы...

А мый керны, шуам, эта жö Егорлö, кöда челядьнас сьöкыта олö, и сiйö жö пыр пурöны бы: то оз вешты налог, то челядьыс вылö норасьöны.

Егорыс олö кöч моз, ой и лун видзöтлö бöрас и одзас, топ юрыс вевдöрын пыр гым кымöр öшалö, топ тöв и гожум еныс чарöтö.

Кыдзкö мужикыс уджалiс вöрын, кресення кежас локтiс гортö, керкуас пырис мыдз, кынмис, кынöмыс сималö, колö бы сёйны, пывсьыны баняын, шоччисьны да ашын жö бöр кайны вöрас, но эз ешты пöрччавны кын нинкöммес бердiсь воннесö, кыдз керкуас ышки-пойки пырис сельисполнитель и висьталiс:

— Егор, сельсоветö корöны...

— Мый сэтшöмыс? — эз повзьы Егорыс, лöгыс пондiс петны, кöр пыдынжыка ловзисьны оз лэдзö.

— Ме мыйöн тöда? — обидитчис сельисполнительыс.

— Тять, мамöс тöн ни корлiсö, — комын шыасис медучöт зоныс. — Деньга пö корöны. — Кысь деньгасö?! — невна эз матькышт мужикыс, разис ни да бöр каттис кокыс бердö нинкöмсис воньсö. — Эм я мый я менам деньгаыс?!

— Тойетö, поди, бараксис вайин? Кайöт нiйö да сет, — висьталiс иньыс — асмознас сералiс.

— Тi, бат, тойсялiт! — мурзьыштiс да петiс керкусис хозяиныс, пемытсорöн ни чукыля коккезнас иньдöтчис сельсоветö. Пырис сэтчин, здоровайтчис, шапкасö босьтiс юрыс вылiсь и пондiс зубыта видзöтны финагент вылö, кöда зорöн оз зорьясь, черöн оз керась, а отирсö куштö, бытьтö сiя и эм, сэтшöм ни начальник, что кытчö тэ! Горöнжык эн горöтчы, паныт эн шыась, а кер сы моз.

— Здорово, Егор! — здоровайтчис финагентыс — кывнас орсiс, кокнита баитiс. — Кыдз ни олан? Вештiсьны эд колö бы... — И счётыэз вылын пондiс шовкöтны-лыддьыны недоимка, уджалiс кывнас и киэзнас — руб да эшö руб и видзöт жö, Егор, тöвбытнас вöрас сымда деньгасö он шедты — етшажык шедтан, а унажык ни колö вештыны. — Сымда, Егор. Закон! И кöр пондан вештiсьны или опись керны?..

«Господи! Мый понда? Кытшöм сэтшöм налоггез?! Ловзисьны оз сетö! И мый описьнас нöбöтасö?! — мужикыслöн веммес уджалöны бура и думайтö. — Керкусис, бат, оз жö вашöтö, только мöссö вермасö нуöтны... Тшыгйöн кув да вештiсь... — лöгыс пизис, кошшис бы правда, а кытöн сiя, кин козьналö, мездöтö тэнö сьöкыт олансис? — Некинлö тэ он ков аслат челядьöн, сiдз что уна эн баит, а кер мый висьталасö!» Öшöтiс юрсö мужикыс и сьöкыта горöтчис.

— Сетасö деньгасö уджалöмыс понда и вештiся. Мöд кресенняыс бöрын...

— Видзöт, Егор!.. — шуис финагентыс, кöдакöт кыдзкö пурсис ни Егорыс, но весь — аслас юр вылö, кöр асьсö зэлöтöны. — Видзöт, Егор...

Егорыс сэсся шы эз сет, сьöкыта ловзисис и петiс сельсоветсис, но петтöнняс ыбöсыс коласын мурзьыштiс жö: «Ловья вывтi кучикöс кулят ни...»

Ловья вывтi или сыбöрын, но мый колö, кулясö — этö тöдö мужикыс, но оз тöд сiйö, кыдз эшö унажык шедтiсьны да вештiсьны. Уджавны колö! А сiя разь оз уджав? Кин жö сы местын вöрас пуэсö йирö, косви болскö лымас и катлялö кöньöс кыза пуэсö? Финагентыс я мый я? Уджалö, уджалö, а пондас кö босьтны деньгасö, колясö заёмö, подоходнöйö, сельхозналогö — быд копейкасö кыскасö асланяныс, а тэ босьтан сымда, что быдöс осьтаэсö тупкавны немöн, но надейтчан, что эта неделя бöрын деньгасö, бат, сетасö унажык ни, сэк и вештiсян...

Неделяыс дженыт — öтiк лун да мöдiк, видзöтан кö и вöтiс кресенняыс, но деньгасö эз сеталö, а сытöг гортö бы эн и лок, но локны колö, кöр ёрттэт быдöнныс вöрсис лэдзчöны гортö, медбы пывсьыны да одзлань уджавны.

Егорыс кресення кежö бöра локтiс гортö, пырис рытнас керкуас, иньыс сэтöн и эм, кывнас сёйö-модьö: «Кывзы... Прокурорыс пö бытьтö пон юрсö лöсьöтчö вайны...»

— Мед! Мый меным сiя?! — недолыт Егорыслö, ась и думайтö мöдiкö — видзчисьö прокурорсö умöльжык думаэзöн.

— Мый тэныт... — эз мездöтчы иньыс. — Эз я бöра налоггес понда норасьö? Бöра эд пырас варыш синнэзнас да рака моз пондас карзыны...

— Ась сiя!.. — матькыштiс мужикыс. — Налоггез!.. Мыдзи ни... Ась нуöтöны мöссö да гöннас сёйöны, бат, лёк горшаныс тасасяс!

— Но тэ и морт! Нем тэныт оз ков! Не челядьыс, не мöсыс... Одзöстiн бы кинлiськö да вештiсин... — мужиксö пурис инькаыс.

— Мать твою!..

— Енсö эн матькы!

— А мый нö... Лонт банясö!

Пывсис баняын, ойсö узис пыд онöн: кöд бокыс вылö водiс, сiя бок вылiсь и чеччис. Чеччис одз, югдытöдз ештiс кыйны гоз нинкöм, уджалiс, но сьöлöмыс висис аскоддя шогöтöн, бытьтö виноватöй кинкö одзын или мыйкö оз тырмы, öштiс, вунöтiс керны, дзик гусясис и вот-вот... öнi жö пырасö керкуас да шуасö: «Но, Егор! Шедiн эд...» «Шедi, а мый понда?» — кыдз эз вежöрт, но сэтöн жö — син одзас сулалiс финагентыс и модис: «Егор, налоггетö эд колö вештыны...» Аскоддя мортыс, рамыника баитö, но кывнас вийö-гарйö, гуддьö душасö, сьöлöм увтсö, дзик Егорыс öтнас оз вештiсь аскадö, но мый эм — некытчö он воштiсь... Асывбыт тöждiсис мужикыс, думаэзнас вунöтлiс налоггес йылiсь и бöр бертлiс, а кöр öтöрас югдiс кодь, пасьтасис да петiс керкусис.

Ойнас усьыштöм лым. Руыс кокнит, абу вывтi кöдзыт, не абу вывтi шоныт, сэтшöм, кытшöм погоддяö только вöрын и уджавны — не он пымав, не он кынмы, но талун кресення: рытланяс вöлись доддялас вöв да ыскöвтас бараккезö, а öнi ветлас сельсоветлань — оз я быль адззыв прокурорсö, баит сыкöт налоггес йылiсь, юасяс да висьтасяс и, бат... Прокопьевичыс эд асланыс мортыс, поди, вежöртас, отсалас...

Егорыс пемытсорöн ветлiс сельсоветлань, думаэзнас кошшис бы прокурорсö, кöда иньыс кыввез сьöртi талун татöн бы, но Егорыслö Прокопьевичыс эз пантась, только весь öштiс кадсö да думаэзнас öддьöнжык дойдiс асьсö. Шагнялiс улицаöт мужикыс, весь талис виль нинкöммезнас лымсö, бöр бертiс гортыс дынöдз, сувтiс керкуыс одзö, кöдö тöвнас сiдз кундiсö-тыртiсö лымнас падеррез, что лымыс увтiсь только дзуз видзисö öшыннэс да тыдалiс короминнаыс. Керкуыс важ, учöт, но аслас — уна челядьнас абу бы горт, но мый керны? Кытшöм эм... Керкуыс хозяинсö сiдз эз дойд, кыдз думаэс... Сьöвзис бы, но оз сьöлассьы, кöр öтiкö бы керан, а мöдiк петö, кыдз пеллес одзын кинкö шушкис: «Егор, адззин правдасö?! Эх тэ! Гортын видöны, йöзын шуöны... Некытöн оланыс абу... Войнаыс вылын тышкасин врагыскöт, топ нем эз ков — öтiк лунöн олiн: талун эм, ашын абу, а локтiн гортö... Сулав! Эшö не сiйö лöпнат адззылан, кöр Серанькатö нуöтасö!» — Егорыслöн петiсö синваэс.

Ружтiс-керис, чышкис синваэсö, пыдынжыка ловзисис, шагньöвтiс шаг и кылiс кыдз зоныс керкуас чирзiс: «Мам, сёя бы-ы-ы-ы!» Öтiклöн кынöм сималö, мöдiклöн висьö кынöмыс. И нерö ни асьсö Егорыс: «Кин тэ вылö, Егор, нiйö вайöтiс, кытiсь? Сэтшöм иньыс бы... Потласис быд год кролик моз, эз и шоччись... — и сэтöн жö иньсö дорйис. — А мый бы вöлi дыш иньыскöт? Уна бы эд челядьнас саппесö каттин... Эта кöть ваясьö, но челядьсö нятяс оз видз, нач йöрнöс-вешьянтöг оз олö». Сулалiс мужикыс öшын увтаныс, думаэзнас вермасис оланыскöт, сэтöн карта вылын бакöстiс мöсыс.

— Мый колö?! — ыкöстiс Серанькаыслö, кöр сiдз недолыт, а сэтöн эшö сiя. — Сёй! Одзат эм эд идзасыс. Али... — мый «али» сiдз эз и вежöрт бы, но пондiс модьны. — Вердан, вердан тэнö, а сё сымда! Йöвсö огö и пешлывлö. Деньгасö дарсалам налогö, йöвсис керам ви да бöра жö налогö...Четырнадцать кило ни эд вештам винас! Мать тэнö... Кытöн ни сэтöн йöлыс да нöкыс?! Шöмйöвсö панялам и сiя бур...

— Му-у-у! — бакöстiс мöсыс. — Му-у-у!

«Кöть кытчö воштiсь? Кöть кыдз бергöтлы? Торкны бы тэнö, Серанька!.. — сэтöн жö кыдз сотiс. — А челядьыс?! Нылöн эд öммезныс пыр осьтаöсь, рыт и асыв бриньгöны: «Мам, вай йöвсö...» Егор, мый нылö пондам висьтавны?

Кытiсь йöвсö пондан вайны? Он я асьтö понды чилькöтны? — кеписьыс пытшкын няпралiс кулаккесö. — Абу оланыс, Егорка! И оз ло... Бур, что колхозас сюсö пондiсö мымдаöнкö сетны, то сё турун бы сёйим...»

Тöдвылас усис, кыдз пырис колхозас. Серöмыс пондiс петны, кыдз пышшалiс гортсис: ветлiс Усольеö, Гальö — мунiс да бöр локтiс, кыскис-öштiс кадсö, надейтчис, что панасö-керасö да вунöтасö Егорыс йылiсь, но öтпыр локтiс Усольесянь, пырис керкуас, видзöтö: лабичын пукалö сельсоветсис предыс и шуö: «Но мый, Егор Ильич? Дыр эшö кöин моз пондан пышшавны гортсит? Дыр эшö колхозас он пыр? Или тэнö сермöтавны вöлöс моз да кыскыны? Али Совет власьыс оз гленитчы?»

Кинлö сэк, поди, виль властьыс гленитчис, кöр олансö сiдз соровтiсö, что водiн бы ловья и сэсся эн и саймы ни... Но пондыв-ко... Асныраэскöт уна эз баитö...

И ашынас Егорыс Савраскосö нуöтiс колхозас, кыдз янсöтчис зоныскöт.

Öнi Егорыс сулалiс öшын увтаныс лым вылын. Сайкалiсö ни коккес и ачыс, но керкуас эз бы пыр.

— Му-у-у, — карта вылын шыасис Серанькаыс. Луныс оссис кымöра да лöнь.

46

Вöлi кресення, но прокурорыс шедiс Пальникланяс: медодз районсянь локтiс Гришкинаö и сэтчинсянь ни кежис Пальникас: мортсö деревняэзöт ыслöтiс аскоддя удж, кöда адззисис тöв и гожум.

Локтiс Прокопьевичыс Пальникö, медодз пыралiс сельсоветö, сыбöрын правленнёö, кежалiс складдэзö, фермаö — быдöс видзöтiс и адззис кытöн да мый керсьö, кин да кыдз уджалö, кытöн зэлöтiс, кытöн личöтiс — керис сiдз, медбы бöрсяняс уджыс эз джöмды, некин эз дышöтчы, эз пышшав уджсис. Уджалiс прокурорыс и рытланяс ни, кöр пондiс симавны кынöмыс, пондiс думайтны кин ордö жö бы пырны да сёйны. Вердiсö бы быд керкуын, но быд керкуас сьöлöмыс эз кыскы, эз пыр сельсоветiсь преддэзас, эз кеж, кöдна эз вöлö йöзöсь, но веськыта кö висьтавны, йöз кодьöсь. Сэтчин да татчö, мунiс Прокопьевичыс фермаланьсянь вичкулань и посöдзсяняныс сылö ыкöстiс Кипрей: — Прокопьевич, кытчö туйсö талян? — сёпкис Кипрейыс.

— О, Кипреян! — радмис прокурорыс. — Ыджыта ни быдмин? Важын ни ме тэнö эг адззыв. Натьтö, кыдз колхозас преднас дугдiн уджавны, сiдз эг и пантасьлö...

— Пантасьлiм жö, — висьталiс Кипрейыс. — Тöдан эд Илья луннас...

— Вöлi, вöлi, — шуис Прокопьевичыс, пондiс видзöтны Кипрейыс куш юр вылö, кöда лоöма гладь, кыдз галя.

Вöлi мортыс война вылын, локтiс нач дзонь, öтiк пуля эз кокав, эз сидзлö осколоккез, только юрыс вылiсь киссис юрсиыс да пöрисьмыштiс. Кипрейыслöн осьта öма иньыс бытьтö пö кытöнкö баитöм, что мужикыс, кыдз и одзза войнаыс коста, бöра шедлöм пленö (эз я врагыс одзын ачыс киэсö лэбты? Но эта йылiсь некин оз тöд, и ми баитны ог пондö) и бöра пленас уджалöм сiя жö помещиклö, кöдалö уджалöм одзза войнанас. Отирыс баитöны... Но ассис Кипрейыслiсь сэтшöмсö он кыв. Панталiс Прокопьевичсö, гажöн пондiс модьны:

— Гутöн моргöн! Гутöн таг, Прокопьевич! Тöдан эд кыдз öтлаын уджалiм!.. Быдöс враггесö Совет властьыслiсь чик да чок! — Вачкис оча долонь и сьылыштiс. — Гутöн морген да гутöн таг. Кежав миянö, поди, обороникаыс мыйöнкö вердас!

— Ог ни бы тэнö дзескöт...

— Кинöс?! Менö дзескöтан?! А вунöтiн ни кыдз ми тэкöт вичкуыслiсь юрсö пöрöтiм?! Гутöн морген да гутöн таг!

Прокопьевичыс гыж-гыж керис юрбöрсö и пырис важ ёртыс ордö, кöда бура эз жö ов: джоджас ольсалöм идзас, кроватьсö шебралöм аскыйöм дöраовöй öнöн, а челядьыс...

— Марш! — челядьыслö ыкöстiс айныс. Нiя кинлö да кытчö туй! Öтiк гор вылö, мöдiк öтöрö, куимöтыс лабич увтö — лыддьыны он вермы, чужöммезныс сьöртi он и тöд кинлöн, кыдз бытьтö и не Кипрейыслöн: öтiк чочком юрсиа, мöдiк сьöд... Керкуас руыс баля помой дука — сьöлöм гудыртчö, но шоныт.

Хозяиныс лажмыт мыгöра, но топыт и зумыт яя — эн кутчись!

Сэтчин да татчö и пуксисö сёйны. Хозяйкаыс вердiс гöсьсö и не то норасис, не то ошшасис:

— Мый бы и вöлi? Кыдз бы и олiм? Еныс эд отсалiс, еныс! Кыдзкö эд сьöд нинкöмсö война вылас эз вийö! Эз вийö, мыся, сьöд чумансö, сэтчö жö Ерманиясяняс иньдiс паськöмнас куим посылка. Ой кытшöм бура, тыдалö, Ерманияас олöмась! Да чисто паськöмыс шёлковöй! Босьтан киат и нильдö... Вура, мыся, шёлковöй дöрасис зырымöссеслö то йöрнöс, то вешьян, нiя и радöсь. А мый колö? Сiдз и олам, Прокопьевич...

— Мый модян?! — Кипрейыс пондылiс падтыны бы иньсö, но кылыс эз мöртчы — иньыс модьтöг оз вермы овны, одзлань гардö:

— А мый нö? Мый эм, сiйö и баита!

— Сiдз, сiдз, Афанасьевна! — хозяйкасö ошкис Прокопьевичыс, панялiс шыд, видзöтышавлiс стенаись йöз странаись вайöм ковёр вылö да думайтiс: «Но тэ и Кипрей! Тыдалö, велалöмыт...»

Сёйисö мужиккес, юисö сюромка, кöдö Кипрейикаыс бытьтö сысьялöм касьтiсьны, горшшезнысö гывьявлiсö рюмка-мöд винаöн, ошшасисö мыйöн шедас, и сэтöн жö Кипрейыс прокурорыслö пондiс норасьны, бытьтö сiйö зэлöтö бригадирыс, чушкалöны соседдэс...» Тэ кывзы, Прокопьевич, кытчöдз вельмисö отирыс... Бось чукыля кока Егорсö жö... Срам! Кыдзкö и шуö: «Кипрея-я-ян, тэ эд войнасö эн адззыв! Тэ эд пленас ачыт сетчöмыт...» Во, Прокопьевич! Вермас я мортыс ачыс врагыслö сетчыны? Фашиссэслö... Этö... — сiдз бы и горзö, норасьö. — Сэтшöм кыввес понда тöдан мый овлö!.. Сiдз эд?! Кыдз думайтан, Прокопьевич?

— Сiдз, — сьöкыта, моростырнас лолалiс прокурорыс, вирыс орсiс рожаас, юис сюромкасö, но эшö косьмис горшыс, содтiс бы винаок, да Кипрейыслiсь уна он ю — кык рюмка и тырмас!

— Мый нö ни ме баитi? А... Егорыс, мыся, кузь нырсö

быдлаö сюйö. Уна тöдö. Вежöм и эм. Кут бы да петшöрав, бат, дугдiс бы...

— Мый тэ сылiсь босьтан? — сералiс Прокопьевичыс. ― Баранöс моз эд он нимты?

— Кодзны и колö, — сёпкис Кипрейыс, чеччис пызаныс сайись да пондiс чывкйыны джоджыс шöрын — вешшы! И пурö только Егорсö, кыдз сэсся басни оз адззись.

Сёйис-юис прокурорыс Кипрейезын, кывзiс баснисö хозяиныслiсь, видзöтлiс öшынö, кытöн чожа пемдiс, и тэрмасис петны керкусис — сьöлöмыс кыскис мöдiклаö, кытöн эз я бы юкталö пöтжыка.

— Сулав, Прокопьевич! — гöсьсö сосöттяс кутiс хозяиныс да иньыслö ыкöстiс. — Эй, чукыля кок! Öнджа... — юрнас öвтыштiс ыбöсыслань. — Мыйкö пукты, сьöрас Прокопьевичыслö.

— Мый? — эз вежöрт иньыс.

— Ч...! Вот мый. Тэрмась! Или киат сетны? Осьта öма хозяйка, кытöн тэ, а эстöн...

— Тэ мый, Кипреян? — кыдз обидитчис Прокопьевичыс.

— Шы эн сет! Ми тэкöт абу йöзöсь.

Кипрейлöн иньыс чожа мöд керкусис пыртiс мыйкö чышьянö каттьöм тор, нюжöтiс гöсьыслö, кöда юрыс вылö пуктiс ни шапкасö, веськыт кинас öвтiс и бобгис: «Тэ мый? Тэ мый? Ог бось, ог...»

— Босьтан! — Кипрейыс гöснечсö, ачыс ни сюйыштiс прокурорыс сумкаö, пöдналiс сiйö, шлопкис долоньнас и долыта висьталiс. — Сiдз, Прокопьевич!

— Сiдз дак сiдз... Мый тэкöт керан? Он эд киэтö керав. — серöмтчис. — Или кералам? Мед нiйö эн нюжлав кытчö оз ков...

— Керав, мать! Ог эд повзьы, — Кипрейыс нюжöтiс прокурорыс одзö гöна ки лапасö.

— Но тэнö, — Прокопьевичыс тангис ыбöсас и петiс керкусис.

47

Прокопьевичыс петiс Кипрейезiсь. Öтöрас усис небыт лым. Вöлi пемыт ни, сэтшöм, что коккез увтын не лымыс бы, нем бы эз тыдав, но öнi тöдчис туйыс, керкуэс, и кымöррес коласöт оз-оз да нёджжасис тöлiсь: югйöвтас и öшас, мыччисьыштлiсö звездаэз, нырö патшкис тшынöн. Узьны эшö одз. Прокопьевичлöн не то, не сё — юис винасö, но эз пöт, только нерис асьсö. Сiя сулалыштiс улицаын, куритiс, тöдвылас усьлiс Катяыс, кöда бокын узис öтiк ой, и талун мунiс бы сы дынö, но Катяыс эз ни вöв... И мыля бы? Колiс бы тöдны медодз сылö, но сiя тöдiс да эз, мед отирыс кöть мый модьöны...

Сулалыштiс улицаыс шöрын Прокопьевичыс, куритiс, и ачыс аслыс бы веськыта эз висьтав, мыля кежис Егоррезлань, натьтö, сiйöн, что Егорыс вылö норасис Кипреяныс, а, поди, сiйöн, что Егоррезас кöр бы эз пыр, сё ни адззасö вина ― ачыс хозяиныс оз ю, но тэныт ваяс. Кежис Егоррезлань Прокопьевичыс, мунiс да ас кежас думайтiс и сералiс: «Пыра и шуа, мыся, Егор, тöдан жö мый... Зонка, ошшасин что налоггетö вештiн ни, а абу эд вештöмыт... Мый пондан керны?» Син одзас мужикыс. Оз я медодз чужöмыс сьöдöт, сыбöрын кельдöт, и оз я понды мыктавны: «Прокопьевич... Öнджа эд... Шедтам вöрас да етша...» «А меным мый? Кöть тэ öтiкö эн шедты, но вöлi бы! — тальччис ни прокурорыс Егоррес посöдзö, ачыс сералiс. — Кöть тэ öтiкö эн шедтiсь...» Дзуркнитiс коккес увтын посöдз пöв.

Посöдзын пемыт, но прокурорыс одзза сьöртi тöдö ни, кытчö колö тальччыны: маласьтöн вожмöвтiс порог да мöдiк порог, кутчисис ыбöс вуг бердö и пырис керкуас. Хозяйкаыс ой да ой! Джоджсö ештöм миськавны и плахаэс эшö ульöсь. Миськалöм джоджöттяс комö, а челядьыс — полатьö. Хозяиныс пукалö лабичын да кыйö нинкöм.

Керкуын биыс эм кöть абу — дзуз видзö.

Егорыс дзар керис Прокопьевичыслань, ружтыштiс, чышкис ныр увтсö, нинкöмсö шупкис лабич увтö, киэсö чышкис дöраовöй вешьяныс бердö, здоровайтчис и бытьтö гажöн гардыштiс:

— О-о-о, гöсь тай! — аслас мый и эм: гудыра и кымöра душаас.

— Кежала, мыся, — ружтö прокурорыс. — А мый?

— Вöрö бы колiс кайны да вот тай... — виноватöй Егорыс. — Ашын ни одзжык доддяся да гöнита... — Жöдзö ни виль нинкöммезнас джоджыс кузя да челядьыслö мыччалö кулаккесö — лёк и öшöм, киэс дрöжитöны.

Умöля олö Егорыс, но мый эм, оз жалейт, вермас быдöс сетны и деньга оз кор. Талун Прокопьевичыс одзын кыдз нач öшис, жöдзö джоджас, кыдз мыйкö öштiс да кошшö, иньыслö ыксö:

— Мый нö тэ?!

— Мый ме? — оз вежöрт инькаыс.

— Вöрöтчы! Мортыслöн эд кынöмыс сималö.

— Ештас сёйнытö. Рытыс кузь, — той моз вöрöтчö хозяйкаыс — кыскö кадсö, босьтö пань да бекöр, петö керкусис и посöдзын пондö керавны кын капуста.

— Мый нö? Пуксьы, — Егорлöн öмас косьмö дульыс. — Счас сёйны ваясö.

Прокурорыс нырнас виш-виш керис, видзöтiс омöн керку пытшксö, пиньöвтыштiс рожасö, ружтыштiс: «Эг мыдз...»

— Кынöмыт сималö?

— Оз.

— Сималö, натьтö, и горшыт косьмö!

— Косьмö, — серöмтчыштiс прокурорыс.

Егорыс комö да бöр: киас юанöн тыра миска, юкталö гöсьсö: «Ю, Прокопьевич».

— Ог, — юрнас зэгйö Прокопьевичыс, ньылалö дульсö, но керкусис оз пет, кыдз юö бы мöдкодь юан, кöда абу. Вина вылö сылöн горшыс косьмö, вина вылö!.. Но хозяиныс топ оз адззы бы этö, кыдз оз вежöрт, что Прокопьевичыс юö бы вина, бöра чирзö иньыс вылын: «Вöрöтчы! Он адззы... Прокопьевичыс тэрмасьö!»

Дыр я, не я, хозяйкаыс пызан вылö вайис сёян. Хозяиныс кутiс гöсьыслiсь соссö, кыскис пызан сайö, пуксьöтiс сёйны. Рад бытьтö Егорыс, а синнэс видзöтöны мöдöрö — увдöрö, бытшкö сёянсö да öмас, паньыштö да öмас, тэрмасьö, дзик сотчö керкуыс, а гöсьыс нырсö пиньлалö, вишкайтö, оз бы и сёй, дзик быдöс сёяннэс шöмалöмöсь — сьöлöмыс гудыртчö.

Керкуас веж-югыт. Пызан вылын сотчö семилинейнöй лампа. Керосин дук и тшынкодь.

— Вай! — иньыслö ыксö Егорыс.

Инькаыс бекöрöн пызаныс вылö пуктö сола тшаккез. Мужиккес тшаккесö оз сёйö, сэк Егорыс бöра модьö: «Вай».

— Мый вая? — бытьтö оз вежöрт инькаыс.

— Мый ваян, мый я ваян... — нерö иньсö хозяиныс. — Он тöд?!

— Мый?

— Сiя! Кöдалöн нем абу! Сэтшöмыслöн! — шогалö ни Егорыс, туйис-вермис бы, вöйис джоджнас муыс пытшкö — абу дак абу! Но некытчö он воштiсь, пукав гöсьыс одзын да синнэтö бергöтлы и гöсьыслö модь. — Сёй, Прокопьевич, сёй... Мый эм...

— Нем оз ков сэсся, — гöсьыс пызан вылö пуктö пань, чеччö пызаныс сайись, юрыс вылö пуктö шапкасö, сувтö джоджыс шöрö, чатыртчö, малыштö кыкнан кинас спинасö, кыдз сiдз ни висьö коскыс, что вöрзьыны ни оз вермы. Эта коста Егорыс юр вылö кыдз киссьö потолокыс — оз и вöрзьы, оз шыась, кольмöм моз пукалö пызаныс сайын да пыдына лолалö: стыд мужикыслö, сэтшöм ни стыд, что синнэсö оз бы осьт... — Спасибо, Егор, — шуис öтiк кыв гöсьыс топ шоччисьыштiс, ружтыштiс и содтiс. — Кывзы... Налоггетö эд колö вештыны бы... Бöра эд норасисö... Куим лун, и мöстö нуöтасö, ме нем ог вермы керны... Мыся, ог вермы отсавнытö... — Прокопьевичыс баитö рамыника, оз кöсйись дойдны, оз вид.

Шы эз сет Егорыс. А мый сэтöн шуны? Кынымись висьтавны, что чожа вештас ни. Нем одзлань эз шу и Прокопьевичыс, сулалыштiс эшö джоджыс шöрын, кыдз мыйкö видзчисис, но сэсся нем эз дöнзьы, сэк шагньöвтiс ыбöсыслань, сувтчис порогыс дорö, сьöкыта ловзисис да вöлись лёкжыка и бузгис: «Вештiсь!» И петiс керкусис. Эз судит, эз вид, эз вий, но...

Егорыс ружтiс-чеччис пызаныс сайись, казявтöг тальччис каньыс вылö, кöда гардчис коккес увтын и нёштöма кивнитiс.

48

Егорыс и понедельникнас вöрас эз кай, а чеччис, пасьтасис, петiс керкусис да пондiс думайтны, кыдз жö вештыны налогсö. Мужикыс думаэзнас пыралiс быд керкуö, бöрйис ёрттэс коласiсь медбур ёрттэз, нiйö, кöднакöт дружитiс и эз дружит, кöр быдöнöс тöдiс сiдз, кыдз деревняын тöдöны öтамöднысö, кöр мыйись-мый ёрт и враг тэ понда уськöтчасö биö и ваö, колö — шöри торйöтасö нянь шöрöмсö, öтiк истöгсяняс öзтасö джын деревняись горись пессэз, асьныс оз сёйö да юö, но тэныт отсаласö, а талун... Деньгаыс... Эм я сiя кинлöнкö? Вермасö я соседыт или родняыт сетны кöть руб-мöд? Озö и озö... Этö тöдiс мужикыс, кыдз тöдiс, что инькаэс етша кин асывнас няньсö пöжалiсö куш пизись — быдöн нянь шöмöсас тöн тёритiс картошка, эз я кö эшö кинкö пöжав няньсö турунсорöн?..

Некинлöн абу деньгаыс — этö тöдiс Егорыс, тöдiс, что талун оз кö кай вöрас, павжун бöрас жö корасö сельсоветö, пондасö лöсьöтчыны судитны, но и ась... Сiдз и этадз эд ни... Мöсыс жальжык, нежели ачыс...

Мужикыс сулалыштiс посöдзаныс да лöз-югыт иньдöтчис Андрейезлань, медодз думаэзнас надейтчис старикыс вылö, кöда эз уджав колхозас... Абу я сылöн деньгаыс?

Старикыс Егорыс моз жö чеччис одзся-одз, одз петiс öтöрас да посöдзыс гöгöрись жагвыв чышкис лым, кöда усьöм ойнас. Чышкис лымсö дедыс, уджассис, но керкуас эз пыр, кöр асылыс лöнь, руыс кокнит, шуам, чöскыт — лолав да лолав, и Андрейыс улицаöт жагвыв иньдöтчис вевдöрö, Егорреслань моз, сувтчыштiс креста туйыс вылö, сулалiс, видзöтчис, кыдз сто год эз адззыв ассис посадсö. Сулалö пöрисьыс, видзöтö: сы дынö юрсö мышкыртöм да питкыльтö Егорыс — öддьöн эд тэрмасьö, ачыс мыйкö модьö да сiдз мунö. Эз казяв, кыдз локтiс Андрейыс дынöдз. Сэтöн пöрисьжыкыс öвтыштiс кинас да шуис:

— Кытчö сiдз, Егорка?!

— А! — Егорыс лэбтыштiс юрсö.

— Здоровöн, мыся, чеччин! Мый юртö öшöтiн? Он я шогав?

— Мый меным лоас? — гажтöм Егорыс. — Сiдз тай... Öнджа... — веськыта ни висьталiс. — Налог корöны. Он кö пö вештiсь, мöстö пö нуöтам!.. Тöн рытнас бöра прокурорыс пыралiс гортöдз, — мужикыс баитiс и видзöтiс кытчöкö мöдöрö — стыд сылö деньгасö корны.

Андрейыс кывзiс Егорсö и бытьтö эз кыв, нырнас вирскайтiс, хитрöя шыннялiс — синнэзас гажа югöр, кöда умöля тöдчис рöма-дзара югытiнас. Пöрисьыс кыдз рад, что Егорсö зуралöны, а сiйö оз вöрöтö.

— Мыля менö öтнамöс? Бытьтö öтнам ог вештiсь? — Егорыслöн сiдз и пиньласис öмыс, сiдз бы и горзiс.

Андрейыс кывзiс-керис ёртсö, кокнита серöмтчыштiс и кокнита жö шуис:

— Уна оз ков тöдны...

— А?! — дзик саймис Егорыс, дыркодь видзöтiс пöрисьжыкыс вылö.

— Винанас, мыся, етша юкталiн! — горöнжык ни горöтчис Андрейыс.

— Вердi эд... — виноватöя шыасис томжыкыс.

— Юктавны колiс, — нырнас вирснитiс пöрисьжыкыс. — Ведра етш бы сувтöтiн, сэк бы...

— Эз вöв! — кивзыштiс томжыкыс.

— Эз кö вöв, колiс гöснеч сетны!

— Гöснеч... — пондiс думайтны Егорыс и эз вежöрт, мый бы вермис гöснечавны прокурорыслö, кытшöм бы сылöн гортас эм чöскыт да дона тор. Öддьöн эд думайтiс, но думаэзнас нем сэтшöмсö эз адззы — аслыс абу, а эшö йöзлö...

— Сiдз, Егорка... — не то сералiс, не то кодя морт моз баитiс пöрисьжыкыс. — Сетiн бы гöснечсö, талун бы пон моз эн котрась. Деньга он я кошшы?

— Кошша, Григорьевич...

— Мымдакö верма сетны, но етша. — Мымда эм... Андрейыс ветлiс гортö, петкöтiс деньга и сетiс ёртыслö, кöда эз понды видзчисьны нач югдöмсö, а сэтöн жö котöртiс сельсоветö, вештiс налогсö, но етшаöв вöлi деньгаыс, етшаöв, и финагентыс бöра шовкöтiс счётыэз вылын, пишнитiс нырнас да нузгыштiс:

— Егор, пеняыс эд уна ни кайис! Он кö вештiсь, керасö эд описьö!

— Мыля? Сетi ни тай...

— Етша. Мöстö кыдз петкöтасö, сэк пондан тöдны! Прокурорыс висьталiс эд...

— Кöть талун жö кöрталö сюррезöттяс да петкöтö! — сэтöн Егорыслöн гурнитiс лöгыс. — А мый нö?! Мöс да мöс... Öтiк мöс да сiя быдöнлiсь синнэсö бытшкö. Оз ло, и басни оз ло! Полицайез...

Кöть мый, но медбöрья кывсö эз бы ков горöтчыны, эз бы ков, Егор! Но шуис эд, и он ни кут, кöда лэбзис öмсит да зубыта павкис финагентыслö. Финагентыс медодз эта кыв бöрсянь чочкоммис, пондiс мыктавны-педзны, кыдз бöрас мöртчис ем, педзис-керис, зубыта ньылыштiс дульсö и пондiс чирзыны:

— Тэ! Тэ! Сэтшöмыс! Этаыс! Видзöтны я мый я тiян вылö?! Сэтшöммес вылö!..

— Кытшöммеслö? — эз повзьы Егорыс.

— А сэтшöммеслö! — финагентыс мöдiс шуны, что зырымöссес вылö, но эз жö шу, только няпыртiс кулаксö и пондiс пыдына лолавны, топ сы вылö уськöтчисö сизим пон и пондiсö мортсö пурны — олан эз ло!

— Кытшöммеслö?! — Егорсö колiс только лöгöтны, колiс только вöрзьöтны, а вöрзьöтiн кö... Би! Сотана! Не бöрас, не одзас оз видзöт, быдöнöс пурас. — Кытшöммеслö?! — модис мужикыс да лёка сёйис-видзöтiс финагентыс вылö.

— А сэтшöммеслö... — финагентыслöн увдöрöмоз лэдзчисисö пельпоннэс — повзис кодь ни, кöр одзся-одз сельсоветас только кыкöн и тöд жö тöд...

— Вот! Тiян коддес, кöдна войнасö эз адззылö, олiсö эстöн, инькаэзнымöс чилькöтiсö и лöдззез моз талун!..

Вежöртiн?!

— Пет эстiсь. Мун, мун, — кинас пондiс öвтны финагентыс. — Мун, эн чеччав...

— И муна! — Егорыс швырк бергöтчис да ыбöсö, и пантась жö ыбöсыс коласын сельсоветсис предыс, кöда пон моз кутчисис:

— Егор Ильич! Мыля нö талун гортын? Мыля вöрас он уджав?!

— Вот! — чужöмыс чочкоммис мужикыслöн, кинас öвтыштiс финагентыслань. — Джагöтöны... Но и сетi налогсö да вöлись, то мый бы и лоис...

— Талун жö медбы вöлiн сэтчин! Кылiн, мый ме висьталi?!

— Кылi, кылi, — бобгыштiс мужикыс и вожмöвтiс сельсоветiсь порогсö.

Петiс Егорыс сельсоветсис, иньдöтчис гортланяс, думайтiс доддявны вöв, медбы кайны вöрас, но креста туйыс вылын бöра пантасис Андрейыскöт, кöда топ сё сулалöм öтiк местаын, ылiсянь шынь видзис, вирскайтiс нырнас, видзчисис Егорсö да юалiс:

— Мый нö?!

— Опись бы керöны! — лöг Егорыс.

— Опись... — эз вежöрт мöдыс. — А деньгасö разь эн сет?

— Сетi да етша.

— Но тэ... — лöг кыв гардыштiс пöрисьжыкыс. — Бытьтö талун быдöс и колö?!

— Полицайез! — смела ни висьталiс Егорыс.

— Нiя и эмöсь...

Кымöра луныс пондöтчö. Горзö бы асывсянь. Бöжсö öшöтöм да кытчöкö котöртö Егорлöн поныс. Тшыг. Быд асыв Бобикыс котрасьö улицаын, нюкьясьö посöдззез дынын, мыйкö бы сёйö, оз норась, оз ошшась, что пöт или тшыг, öнi казялiс хозяинсö, бöжсö лэбтiс — рад, видзöт: биö и ваö уськöтчас Егорыс сьöрö! Поныс рад, и Андрейыс гажöн Егорыслö шуис:

— Поди, ышö кыськö кошшыны деньгасö?

— Тырмас... — кымöртчис ёртыс. — Мыйöнкö эд пондас ковны вештiсьны одзöсасьöмыс бöрын...

— Но и мый? Вештiсян.

— Тырмас! — видзчисьтöг висьталiс Егорыс. — Бöра проценттэз жö пондасö корны!

— Кытшöм проценттэз? — эз вежöрт пöрисьжыкыс.

— Сэтшöммесö... Ветла ышö прокурорыс дынö. Сулалыштiсö, но эз ни баитö, думайтiсö ассиныс думаэз.

— Прокурорыс дынö шуан? — бöра одзалiс горöтчыны Андрейыс. — Ветлы, ветлы... Сiя тiян коддесö важын ни видзчисьö, медбы вешьянтö чöвтны, — кокнита серöмтчыштiс и сьöкыта да лёка висьталiс. — Гижны колö!

— Кинлö и кытчö?! — эз вежöрт мöдыс. — Некытчö ог гиж!

— Но и ов бöб юрнат. Мöсыткöт янсöтчан кö, сэк вöлись и пондан тöдны.

— Мед... — сьöкыта шыасис Егорыс.

— А тэ начкыв Серанькатö! — видзчисьтöг гажöн висьталiс пöрисьжыкыс, кыдз челядь, кöдалö сiдз и этадз — эм и абу Егорыслöн мöсыс.

— Начкыла? — синнэс ыждiсö Егорыслöн, бергöтчис ёртыслö оча паныт, сувтiс зэв-зэв, повзис и пондiс видзöтны веськыта. — Тэ мый, Андрей Григорьевич?! Сералан?!

— Серала! — лöгöн шуис Андрейыс. — Оланыс миянöс тэкöт сералö, а не ми асьнымöс. Думайт юрнат! Одзöн и бöрöн думайт, сё сэтчö локтан! Петкöтасö кö Серанькасö, нем он шу, а начкылан кö, челядьытлö юрсис да коккезсис шыд пуан. Öнджа...

«Мый сiя баитö? Ачыс я? Не весь эд отирыс баитöны, бытьтö пö Андрейыс сорасьлö мукöдпыр баснинас...» — öшис Егорыс.

— Тэ мый öвтчан?! Али уджавнытö он мун?! Мый пондан сёйны?! — чира-жака посöдзаныс петiс Егорлöн иньыс и пондiс летны горшсö улицатыр. — Мый öвтчан?!

— Тэнö öштi да кошша! — иньыслö висьталiс Егорыс, аслас вирыс пизис — кольмис кыдз, топ вартлiсö, и эз тöд кыт öддьöнжык зубыт, мыйсянь сiдз висьö, мыйöн веськöтны.

Асылыс лöнь, но керку угöв сайсянь локтан луныс ловзисис лэчыт тöлöн и койыштiс лымöн. Егорыс иньдöтчис гортланяс, кык-куимись тальччис и керку угöланыс моз люкасис Якуня Ванякöт, кöдалöн кылыс пыр джыннян кодь — баиттöг мортыс оз вермы овны, сувтiс паныт Егорыслö и тотьö:

— Егорка, тэнö мыйкö вылö прокурорыс да финагентыс кошшöны... Быль! Öнi сувтiсö магазиныс дынö.

«Öтiк, мöдiк, куимöт... Дзик Егорыс шондiсö вевттьö, няньсö быдöнлiсь сёйö. Да мунö тi сэтiсь! Вешшö!» — мужикыс эз дыр понды думайтны, эз мун сельсоветас, кытöн сiйö видзчисьöны финагентыс и прокурорыс, йирка-торка кайис посöдзаныс, кыдз эз вöв ачыс, сэтшöм лöг, сэтшöм зверь, что осьтыштiс керку ыбöссö и иньыслö ыкöстiс:

— Чередита! Абу дак абу!

— Мый бöра лоис?! Мый бöра кучикат он тöр?! — шыасис иньыс керкусяняс да гор одзö сувтöтiс ухват. — Мый кудöбаыс пиньлалö?!

Мужикыс пырис ни керкуас, пызаныс вылiсь босьтiс пурт и бöр öтöрö! Жвангис бöрсяняс ыбöссö — öшыннэс жолькнитiсö.

Егорыс эта минутаö вöлi кыдз виртöм — не ачыс! Карта посöдзись босьтiс чер, сьöвзис долоннезас да ош моз уськöтчис мöсыс дынö.

Серанькаыс сулалiс карта шöрас, ыджыт кынöма — пытшпиа, дыша лэбтыштiс юрсö, пыдына ловзисис, натьтö, думайтiс, что хозяиныс одзас чапкас кöрым или идзас, но хозяиныс не мöссö, не асьсö эз вежöрт.

Гидын бакöстiс баля. Мöсыс бöра пыдына ловзисис, пондiс рöмысьтны. Öтöрас карзiс рака. Егорлöн медучöт зоныс петiс керкусис, вирснитiс нырнас и посöдзсяняс тятьыслiсь юалiс: «Тять, тэ мый керан? Мамö корö сёйны...»

Тятьыслöн горшас тасасис комок — синваыс петiсö, но сылö нем эз ков, и кынöмыс эз симав, сэтшöм ни лöг, что начкылiс ни асьсö бы, но эз жö киыс лэб, медбы моросас мöртны пуртсö, а черсö вермис лэбтыны юрыс вевдöрö, вермис сибöтчыны Серанькаыс дынö, кöда сё видзöтiс и видзöтiс ыджыт сьöд синнэзнас, топ дивуйтчис да лöсьöтчис юавны:

«Тэ мый? Öшин я мый я?»

— Тять... — посöдзас бöра шыасис зырымöсь ныра зоныс. — Тять...

— Шы эн сет! — пиннесö гичыртiс мужикыс, шагньöвтiс шаг — синнэс бöбöсь!

— Тять, тэрмась! Кынöмö сималö, — никсiс зоныс. — Тять...

Тятьыс нем эз кыв и нем эз адззы, быд вынсис öдззöтiс юрыс вевдöрын черсö да йыла дорнас сотiс мöсыслö кымöсыс коласö...

Серанькаыс ружтыштiс и жагвыв хозяиныс одзö уськöтчис пидзöссэс вылö, бöра пыдына ловзисис, пишнитiс и пондiс ружтыны морт моз, топ кольмис и юрыс висис. Нырö павкис уль вир дук. Егорыслöн бергöтчыштiс юрыс, пондiсö дрöжитны кикокыс.

— Тять, тэ мый ни керан? — посöдзын кивзiс зоныс. — Тять...

Гидйын бöра бакöстiс баляыс. Öтöрын китшсис катша.

— Быдöннытлiсь юррезнытö масьта! — пиннесö гичыртiс Егорыс, вились юрыс вевдöрö лэбтiс черсö.

Серанькаыс пидзöссэс вылын сулалiс хозяиныс одзын. Мöсыслöн гырись сьöд синнэзас гажтöм югöр, шог, сьöкыт олан. Мöсыс ружтiс морт моз, морт моз синнэзсис визывтiсö синваэс, голясис назём вылö вотялiс вир. Эз кув Серанькаыс, кöть и вийис бы сiйö хозяиныс, эз кув мöсыс, натьтö, сылö вöлi зубыт, лязiс обида, что сiдз петö: вердiс, вердiс йöвнас и на! Юрсö кералöны. Кыдз тэнö сэк шуны, морт?!

Кин тэ сэк сэтшöмыс?! Кытшöм тэ сэтшöмыс хозяин?!

— Тять... — посöдзын бизгис зоночкаыс.

Тятьыс дзик кынмис Серанькаыс одзын, бöба видзöтiс мöсыс вылö, эз тöд мый керны одзлань. Егорыслöн пеллезас кылiс аскоддя шы, топ юрас вижгис тöв, сьöлöмыс чеччалiс моросас, дрöжитiсö киэс и косьмис горшыс.

Кап-кап, назём вылö вотялiс мöсыс галяись вирыс.

— Серанька тэ миян... — сэтöн Егорыс бöрын посöдзас пондiс öмтырнас горзыны зоныс. — Кага тэ... Роднöй да любимö-ö-öй!.. Мыйнö тэкöт тятьным керис? Мыля нö сi-i-iдз? — дрöжитiс и сыркьялiс учöтыс. — Серанька-а-а-а!

Зоныс вöлись нач топ и вундыштiс сьöлöмсö — зубыт, но вирыс оз пет, сы местö мöсыслöн голясис вотялiс вирыс, кыдз Егорсö жагвыв саймöтiс кыз онiсь, и пондiс мужикыс вежöртны, мый керис, адззис ни что кулас мöсыс, а кыдз бы ловзьöтiс бöр!

— Тять, а тять! Мöсным эд кулас! Тэ мый керин?! Кинлiсь пондам йöвсö сёйны?! — чирзiс зонокыс — нетшкис сьöлöмсö.

Егорыс сыр-лёль сулалiс мöсыс дынын, сылöн сайкалiс сьöлöмыс, чочкоммис чужöмыс — зверь! Эн лок, черыс киас. .. Тырппес дрöжитöны, зоныс моз жö синнэзсис визывтöны синваэс, руыс зэлöтö горшсö, ыксö ни: «Серанька! Серанька! Мый ме кери?! Эн жö кув! Эн кув, кага миян! Юр вердiсь тэ миян, эн кув! Серанька!»

Синваэзнас пöдiс мужикыс, швыргис ни кисис черсö, пидзöссэс вылö уськöтчис мöсыс дынö, юрсö жмитiс моросыс бердö, окалiс пеллесö, кымöссö, малалiс вирöсь голясö и горзiс.

Мöсыс ружтiс — не эз кув, не эз ов бы, сулалiс пидзöссэс вылын. Кöть мый, но Егорыс мöсыслö мöдöтпыр сöтны эз вермы. Эз вермы и быдöс сэтöн, кöр оланыс карта шöрас чарöтiс, летки-петки разис Егорсö бы, кöр мужикыс вежöртiс, что эта кадсянь не асылыс, не луныс, не ойыс оз лоö олан кодьöсь, не аслыс, не челядьыслö мöсыстöг бур оланыс оз ло. И кин сiйö кералiс? Ачыс! Аслас нятьöсь киэзöн и кöрт сьöлöмнас.

Мужикыс сэсся эз вермы сöтны мöсыс юрö, но Серанькаыс ружтiс-керис да жагвыв хозяиныс одзö пöрис, нюжöтчис и пондiс коккезнас зэгöтны.

Öтöрас раджыка китшсис катша, вувтiс понныс. Кылiс инька голос, кинöскö видiс, но этö Егорыс эз кыв, сiя видзöтiс аслас мöс вылö, кöдö вийис, и сэтшöм мöссö оз ни адззыв, кöда йöвсö сетiс пöт бы...

— Серанька, — синваэс пыр пильскис Егорыс. — Серанька... — пельпоннэс инькалöн моз зэгöтчисö, нятьöсь чуннезнас, тiлис синнэсö. — Мый нö ме кери-и-и-и?!

— Тять, — посöдзас шыасис зоныс. — Мый ни сэтчин керан?

— Мый ни керан?! — бöба ни ыкöстiс иньыс, кöда петiс керкусис, жолькнитiс ведраöн, сувтiс зоныс дынö — синнэс вирдалiсö. — Мый керан, вежöм?! Мыля мöсыслiсь кералiн юрсö?! Кудоба! Öнджа тэ... — кыдз кужис, сiдз и видiс мужиксö. — Ой тöлыс тэнö оз вермы кынтны! Еныс тэнö оз вермы чарöтны. Мый керин, морт сёйись?! — кыдз герйöвтiс, кыдз паськöтiс öмсö, бытьтö öтдруг кулiсö кык зон.

Егорыс пукалiс кöдзыт назём вылын зэв мöсыс бокын, пиннесö гичралiс, курччалiс тырппесö, кывсö, няпралiс кулаккесö, горзiс синваöн — пидзралiс сьöлöмсö.

— Ой, Серанька! Роднöй да любимöй... Мый нö тэкöт керисö?! Мыля тэнö вийисö-ö-ö?! — иньыс уськöтчис увдöрö карта посöдзсяняс, водiс мöсыс вылö и кыдз кулöм морт вылын герьялiс быд вынсис, нетшкис юрсисö, йöрнöссö. — Ой тэ, менам Серанька-а-а-а!

И зоныс водiс мамыс бокö, öдззис уннявны векнит голосöн... Сьылöны асмознаныс, кöть тэ сэтöн, мужик, мый кер, синнэтö тупкав — кунь да пышшы, мед пельыт эз кыв, синыт эз адззы...

Луныс гусьöн видзöтчис осьтаэзöт картаыс пытшкö, кыдз адззис и эз мый керсьö Егоррезас, кыдз стыдитчис, медбы сыбöрын не ошшасьны этатшöм уджнас, и Егорыс эз тöд мый одзлань керны, кöть тэ сэтöн мöсыс бокö вод да кув жö.

Одзлань мый керны? Кыдз овны? Мый керны рытнас, асывнас, мöд лунас, кöр челядьыс чеччасö и пондасö кивзыны: «Мама, сёя бы-ы-ы! Мам, йöв колö!» Кытчö котöртан йöлысла, кинлiсь коран, кин сетас, кöр быдöнныс вештöны налог, йöвсö сёйöны только öмнысö чöскöтöм могись?..

Оз вежöрт Егорсö иньыс — некыдз сы юрö оз пыр, мыля мужикыс мöсыслiсь кералiс юрсö, олiсö-олiсö и на тэныт!

Кувны эд кольччис, инька! Водны быдöнныслö öтiк гробö и быдöс сэтöн! Челядьнас öтлаын... А мый сэсся?

Егорыс пильскис-керис, пондiс видзöтны иньыс вылö, кыдз йöз вылö — тув синнэзнас мöртчис öтiк местаö и пукалö, а иньыс причитайтö, касьтылö, кыдз нiя беднöя быдмисö ― не выланыс, не коккезаныс, тшыгьялiсö, дзебисö роднöйезнысö, ветлöтiсö кортöн, öнi топ пондiсö бы ловзьыны челядьнас, но оланыс сё сералö и сералö...

— Вешшы сэтiсь! — бöб синнэсö мöртiс иньыс вылö мужикыс, кутiс да тойыштiс мöсыс дынiсь. — Пыр керкуас, то видзöт кыдз мöсыс бокö водан!

— Вий! Сёй öтлаын! — дугдiс горзыны иньыс. — Бандит!

— Ме тэныт мыччала бандитсö! — Егорыс бöра киас босьтiс черсö.

Иньыс лэбзис-кайис посöдзö, саясис син одзись и керкуас пыртöн ни бöра унньöвтiс.

Луныс кымöра, кыдз горзö. Луныс топ оз и оссьы, воробей моз шагньöвтас асывсянь рытöдз и пемдö.

Кытчöдз Егорыс мöсыс дынын кивзiс да ойзiс, уджалiс не колана уджсö, локтiс павжун, сэтчö локтiс и соседыс, кöда кылöма шум да гамсö и пондiс отсасьны. Кыкöн час-мöдöн чередитiсö мöссö, сыбöрын Егорыс ветлiс бригадирыс дынö, корис вöв, доддялiс, яйсö Якуня Ваняыскöт жö тэчисö доддяс, и сёйтöг-ютöг иньдöтчис Егорыс кузь туйö.

Погоддяыс — не син, не бан: жагвыв да жагвыв вынсялiс тöлыс и лэбис пурга, пондiс гардны лымсö, тыртiс туйесö.

Туйыс кузь. Вöлыс кытöн шагöн, кытöн рöктö, додьсö кыскö одзлань. Егорыс кытöн пукалö доддяс, кытöн люшкыртö-котöртö бöрсяняс. Сылö недолыт. Сiя кыдз шогалö, и ачыс оз тöд кыт висьö, или топ мыйкö öштöм и ачыс оз тöд мый öштiс, кытiсь пондас кошшыны. Мунö мужикыс кузь туйöт, кыскö додьын яй — ассис мöссö кыскö, дзик лöсьöтчö чапкыны катша-ракалö, кыдз дзар керас доддяс, сьöлöмыс топ шöри потö, ась и зубытсö оз кыв.

«Сёйин, кералiн Серанькасö! Мун да гортö сэсся эн лок! Абу дак абу сэтшöм мужикыс!» — пель одзас иньыслöн кыввес.

«Мун, мун... — тыра додьыс кивзö-дзуртö. — Му-у-ун гортiсь...»

«Гортö эн лок... Вот эд кытчöдз олiн, мужик! Сьöкыта олiн, пессин, но пыр мыйкö бурö видзчисин, надейтчин ашыння луныс вылö, а петiс... Гортö эн лок... А кытчö воштiсяс? Кытöн пондас шатласьны? Кинлö сiя колас? Кин гортсö кольö, чапкö челядьсö? Поныс или каньыс? Кöиныс или ошыс? Зверьыс или подаыс? Поди, быль быдöс чапкыны, кольны и пондыны тöвсö чужьявны — талун эстöн, ашын сэтчин?..»

Думаэс сёйисö Егорсö, думаэс шогöтся сьöкытжыкöсь, лёкжыкöсь... Думаэзнас эз ни бы ов, еныслö ни кеймис, медбы сiя козьналiс морт виян шогöт да вийис Егорсö, эстöн жö водiс кöз увтö, синнэсö кунис и абу! Тыртiс бы лымыс, и нем бы эз понды ковны, нем бы эз кыв, эз адззы, эз думайт...

Дзуртö додь увтын лымыс, пирскайтö нырнас вöлыс, сьöкыта кыскö тыра додьсö. Дзуртышалöны туйыс бокын пуэс, кöр нiйö нёкралö лэчыт да вына тöв. Лымыс гардчö кöз йыввезын, тöлыс койö лымсö синнэзас. Туйыс нуöтö вöрöт. Вöрас Егорыс öтнас, некинкöт и кыв горöтчыны, некин тэнö оз вид, оз ошкы, оз шу, что тэ, Егор, эн ни тöждiсь, мый лоис дак лоис ни, эшö быдтан мöссö, эшö пондан овны, челядьыт быдмасö, и оланыс вежсяс. Некин этö оз шу, оз бурмöт сьöлöмсö кодя кылöн. Дзуртö додь увтын лымыс, пирскайтö вöлыс, ружтö-кыскö тыра додьсö. Дженыт тöвся луныс, чожа пемытыс пондö син одзись гусявны пуэсö — дзебны вöрсö мортыс одзись.

Мунiс-мунiс кузь туйын Егорыс, пемытсорöн локтiс Пуксипиöдз, вöвсö сувтöтiс дорись керкуыс дынö, одзас чапкис турун и пырис керкуас.

Эстöн олiсö тöдсаöсь. Нiя радöсь, что локтiс гöсь, вердöны бы Егорсö и юкталöны юанöн, но Егорыслöн кынöмыс оз симав, горшыс оз косьмы, сылöн бöра петöны синваэс,

— Мый нö тэ, Егорка? — юасьöны Егорыслiсь. — Шогалан я мый я? Кытшöм яй кыскан доддят?

— Сераньканым пондiс пиявны, да ковсис начкывны, — пильскö Егорыс, чышкö чорыт чунь йыввезнас син дорресö, бöбöтö йöз отирсö, кöдна сылiсь олансö оз тöдö.

— Господи! А сiя мыля? Мый сэтшöмыс? Кыдз нö челядьнат?! — повзисö тöдсаэс, сы моз жö эд олöны, мыйись-мый бы нылöн, сiя жö бы лоис. Мыля нö еныс сiдз?

Еныс я сiдз? Эм я сiя, Егор? Вöлi бы, сiдз бы эз кер, эз бы миян кодь беднöй отирыс вылын серав...

«Эм я еныс? — юрсö öшöтiс Егорыс, — Эм я?.. — думайтö и полö думайтны — грех, кöр грамотаыс — кань несйис, книгаэсö эз лыддьöт, веритö еныслö, кöть и оз юрбит, а сэтöн... — Господи! Кытöн тэ? Мыля миян кодьсö сiдз?!»

— Егорка, кыдз нö öнi челядьнат?!

— Кöть кыдз... — сьöкыта баитö мужикыс.

— Мый нö лоас? Мый нö лоас? — керкуас котрасьö хозяйкаыс — öшис гортас, оз тöд мый бердö кутчисьны, мыйöн отсавны Егорыслö. — Öнджа... Ме кöть туисö тэныт йöвсö пань-мöд пукта...

— Оз ков, — висьталö мужикыс. — Нем оз ков, сваття...

— Мыля оз ков?! Тэ мый, Егорка? Челядьыт кöть чöскöтасö öммезнысö...

Шы сэсся эз сет Егорыс, пуктiс юрыс вылö кепись ыжда важ шапкасö и петiс керкусис. Öтöрас пемыт ни, кöдзыт, некин тэнö оз адззы и оз видзчись. Вöлыс рап-рап гöрöктiс, лэбтiс юрсö.

И бöра додь увтын дзуртö лымыс, бöра пель бокын вижгö лэчыт тöв. Пемыт. Омöн вöр и вöр — стена, только коккез увтын чочком лым. Топ öтнас Егорыс муыс вылын, мунö кытчöкö и ачыс оз тöд кытчö мунö, кин гортсис вашöтiс, мый кошшö... Несйö вöлыс, ружтö.

Мунiс, мунiс, кадсö оз тöд, кöр часыэс абу, деревняэзын биэс оз тыдалö. Кытöнкö Чиркöв гöгöрын вöтiс тöлiсь, вештiс небосис кымöрресö, лöньыштiс пургаыс, дзик мыдзис да водiс шоччисьны. Тöлiсьыс пондiс вöтчыны Егорыс сьöрö, кыдз видзöтiс бы, мый жö уджалö мортыс, кытчö мунö ойнас. Кытöнкö туйыс бокын кинкö кыдз горзiс или уннялiс, вöлыс «орсiс» пеллезнас, пирскайтiс и содтiс шаггесö. Кöсас локтiс нач сёрöн — ойшöр гöгöрас. Вöлыс мыдз, пымалöм. Егорыслöн вылас паськöмыс — йыжоль.

Вöлыс вайöтiс посадö, сувтiс дорись керкуыс дынö. Посадыс узьö — не морт, не пон. Биэс оз тыдалö. Йöзын Егорыс. Некин татöн оз видзчись, некинлö оз ков, а колö бы кытчöкö пырны, кинкö ордын узьны. Доддяс пукалöв-керис, пондiс кынмыны — пиннес сяткöтiсö, морозыс вашöтiс керкуö. Сэк тöдвылас усис Öмельыс, кöдакöт тулыссэзнас уджалiс Кöсва вылын — кылöтiс вöр. Сэтчин и кежöтiс вöвсö.

Öмельыс кыдз видзчисьöм: йöрнöс-вешьянöн сулалiс посöдзаныс и ыкöстiс:

— Этö тэ, Егор сват?! Кытчö ойнас? Мый бöра öштiн?

Или гортсит вашöтiсö?

— Вöтлiсö, вонö, — вöвсö воротаэз одзö сувтöтiс да додьсис чеччис Егорыс — рад ни, кöр адззö, что öтöрас оз ни узь, кöр ёртыс петöм пасьтöг посöдзас да панталö и сэтшöм жö осьта öма, кытшöм вöлi одзжык, мый син одзас, сiйö и баитö — веськыта шырö, оз видзöт некин вылö, кöть том, кöть пöрись, кöть инька, кöть мужик. Рад Öмельыс, что сы ордö локтiс ёртыс, кыдз эз пантасьлö сто год, и öнi эм мый лёбны, ошшасьны пöттöдз.

Кыкöн ни юскисö вöвсö, додьсö тойыштiсö загонö. Ружтiсö-керисö, Öмельыс турун увтiсь додьсис малыштiс яйсö, юалiс, кытшöм сэтшöм добро кыскö ёртыс.

— Яй тай... — гажтöма висьталiс Егорыс. — Мöснымöс торким... — синваэсö гусьöн чышкыштiс.

— Мыля?! — пемытiнас синнэс ыждiсö Öмельыслöн — повзис и тэнö повзьöтас. Лэбтыштiс дöраись вурöм вешьянсö, кöда умöля видзсис бекреннес бердын, сiдз ни косьмöм-умöльтчöм мужикыс, малыштiс гав мороссö, кытöн крон видзисö лыэс, мöдпöв юалiс. — Мыля, Егорка?

— Шогавны пондiс... — бöбöтiс Егорыс: стыд отирас висьтасьны, мыля торкис мöссö.

49

Öмельыслöн керкуыс учöт да дзескыт: круг бергöтчин — бöрнат сибалан горыс бердö, а кымöснат люкалан ыбöс косяксö, но шоныт, кыдз öтöрсяняс пыран баняö. Пызан вылын сотчö «шырби», джоджыс шöрын лонтiсьö кöртiсь дорöм печка, биыс мурзьö и чискö. Западня вылын пукалö да печкö хозяйкаыс: ен мыгöра, рожаыс рöма пирöг кодь, мыгöрыс яя.

— Сёйны лöсьöт! — ыбöсыс коласын ни керкуас пыртöн горöтiс хозяиныс. — Да вöрöтчы! Он адззы гöськöт локтам и кынöммезным сималöны!

— Ештат, — шыасис хозяйкаыс и чеччис печканыс вылiсь.

Туй морт пырис керкуас, порог дорсянь лякасис западня вылö, киэзсис кыскалiс кынмöм кеписсез, нюжöтчис печкаыслань, а Öмельыс жöдзö, топ мортсö сёйöны лудыккез.

Жöдзö Öмельыс и кисьтö-ошшасьö, кыдз сiя мöйму начкылiс мöссö жö, и öнi олöны йöвтöг да оз кулö.

— Сэтшöмыс весьтын!.. Сэтшöмыскöт!.. — шыасис иньыс, но эз видчы-эрзы, баитiс, кыдз сiдз и колiс. — Öмельыс моз оланыс и мунö: не йöв, не мöс, не сёян, не юан — луныс локтас и чулалö, ойыс вöтас — узям, кокнита баитö мортыс, кокнита и олö. Мый пызан вылын, сiя и кынöмын. А кысь миянлö буржыксö, кöр колхозас деньгасö ог шедтö, абу кодя отир, кыдз ен шуис, сiдз и олам.

Егорыс кывзiс, и сьöлöмыс топ бурмыштiс, кокнитжыка ни пöрччалiс коккесö, чöвтчис и вешшис пызан сайö.

Кытöнкö горвыв сёрдас шыасисö челядь.

— Ештат! — челядьыслö висьталiс айыс. — Егорка, сёй мый эм! Ми эд тэкöт тöдан кыдз сплавыс коста... Эх, Агаша! Шоныт ырöш бы этчö да тагьяжыкö, ми бы кружка-мöдöн Егорыскöт дзунгим и видзöтан кö, оланыс нач бы гажмис!

— Кытöн ышö пизьыс? — шыасис иньыс.

— Кытöн пизьыс... — мужикыс нерис иньсö. — Изiн бы...

— Мый изнытö? Кульзöрыс эд миян кодьыслö гунаыс дорись оз шед.

— Кув, — шуис Öмельыс, бытшкис бекöрись сола капуста и пондiс риззьыны-курччавны сёянсö да юасьны. — Мый лоис, мыля сiдз, Егорка?

Егорыс бертыштiс чöвпан бердiсь нянь шором, босьтiс лыись керöм вилка, бытшкис тшак, сьöкыта ловзисис и пондiс ньылавны сёяныссорöн синваэсö, бытьтö виньдiс.

— Сёй, Егорка! — баитiс хозяиныс. — Миян няньыс абу тiян кодь, миян колхозным тiян колхозся богатжык, картовсорöн ни няньсö пöжалам, адззан кытшöм чочком — калач.

Сiдз и эм: чочкомжык Öмельыслöн няньыс и чöскытжык, кöр Егорреслöн няньсö оз жö ни пöжалö туруннэссорöн, но...

— Сёй, Егорка! — панясис Öмельыс. — Мый керан? Абу жö морт мöсыс, кулас кö мортыс, сэсся сэтшöмсö он неб, а сiйö... — öвтыштiс кинас. — Сё ни бöра кöркö да кыдзкö босьтан. Сёй. Эн тöждiсь. Менам, тай, мыся, сiдз жö... Медодз кулiсö кык баля... Но думайта, мыся, ась... Шупка поннэслö и абу... А сiя... Невна олыштiм, поныс кулiс... Сыбöрын каньыс, вежöртiн? Но и каньыс бöрсянь мöсыс пондiс шогавны... Мать бы боль сэтшöм олансö, медбы вöтöн эг вöтась! Но кыдз бедаыс вöтас, öтiк бöрсянь мöдiк... Некыдз он вермы мездöтчыны. Пондыв кö сэк овнытö!.. Бура эд дöнзьö!

— Медодз каньыс жö öшис, — мужикыслö висьталiс иньыс.

— Быль, Егорка! Медодз каньным и öшис. Натьтö тöдiс, что мöсным кулас и йöлыс оз ло... Сыбöрын, мыся, баляэс и мöсыс... Нем эн шу. Кыдзкö дзуртан-ружтан да бöра овмöтчан, ась бы здоровьеыт вöлi, и челядьыс эз шогалö. Быдöс лоас бур, вот адззылан.

— Эта эд... — бöра Егорыслöн петiсö синваэс, горшас тасасис сёяныс. — Öнджа эд... Налоггес понда эд мöссö начкылi... Деньгаыс абу, а корöны... Горш орöтöны! Опись бы керöны... Висьталiсö, штö быдöс петкöтасö...

— Тьфу тэ, мать твою! А мый миян тэкöт петкöтнытö и эм?! Эта разь... Вылат бырöм запоныт или нинкöммет?..

— Абу нем бы, но адззасö эд... Мый тэ нылiсь босьтан? Колясö ляч пасьтöг челядьнас...

— Нiя чöвтасö! — баснисö öдззöтiс Öмеликаыс.

— Да ети-пети! Мый нö лоö? Кытшöм ни сэтшöмыс олан петiс? Совет властьсö керим-керим, видзчисим бурö, а сiя кыным олам, сыным ёнжыка зэлöтöны, — хозяиныс чывк чеччис пызаныс сайись, пондiс чывкйыны джоджыс шöрын, киэзнас öвтны юрыс вевдöрын. — Но, калян! Сiдзкö, ачыс прокурорыс висьталiс, штö мöстö петкöтасö? Но и морт! Кин сэтшöмсö керöма да вайöма? Тöда ме прокурорсö... Тöда... А кин миян сiйö оз тöд? Нять, а не морт... Калян чужöм... Мöдiк бы сы местын ассиным отирсö, во! Жмитiс да моросыс бердын шонтiс, а сiя... Лöг петö, но нем он кер. Пондыв ордчыны паныт, талун жö дзимляласö. Нем керны, янсöтасö челядьыт дынiсь! Ны понда законнэсö гижöмась, а не миянлö. Сiдз, Егорка! Мый юртö öшöтiн? Да тэ одзся-одз эн кув, кывзы менчим баснисö, менам, видзöт, пельпоннэз вылын сельсоветыс ышö аслам! Да...

Печкаыс джоджыс шöрын лöнис, ештiс, долыта пондiс сайкавны, сы бокын быглясис кузь гöна кань.

— Эн бы сiдз баит, — комсяняс Öмельсö öмалiс иньыс. — Осьта öм! Шедан жö кöркö кузь кылыт понда! Колян миянöс тшыгйöн керкуас...

— Кин шедас?! Ме! — Öмельлöн моросыс гав, лыэс тöдчöны топ кульöм урлöн, но смев да вына, вартлö кöс кулакнас моросас и кисьтö. — Тэ менö, Агафья, этö... Эн полöт! Ме, Агафья, звирьыс повзьöтöм ни. Вежöртiн?! То-то... Тöдан эд кыдз войнаыс вылын... Весь, натьтö, орденнэсö да медаллесö эз кышалö.

— Адззöмыт мыйöн польдыны!

— Кин?! — петух моз чеччалö Öмельыс. — Да тэ тöдан али он, штö ме эна медаллез понда вир кисьтi! Тэ видзöт жö котыс миян кытшöм! Но и кöзяин, но и кань, вежöртiн? Кысянькö неважын пырис керкуас и олö, бытьтö ме сiйö видзчиси. Ах, калян! Вот сiя ачыс ас вылас хозяин! Некинiсь оз пов, несйö прокурорыс вылö, начальствоыс одзын бöжсö лэбтас и мунö, а ми тэкöт, вежöртан я, дрöжитам!

— Эн, мыся, сiдз баит! — кулаксö мужикыслö мыччö иньыс. — Öмат зарга эд!

— Бöра я мый я революция керны, а, Егорка?! Рез-паз разьны прокурор коддесö и, видзöтан кö, кокнитжыка ловзисям. Кöть тэ мый шу, Егорка, мукöдлаас миян комуниссэс уджалöны нёштöма, олансö пиньöвтöны ольланяс...

— Эн, мыся, сiдз баит! Зарга öмат кулакöс! — гусьöн моз шыасис Öмельлöн иньыс.

— Но тэ и Агаша! Но тэ менам и инь! Кужан ме вылын эрзынытö, прокман мужикытлö кулаккетö мыччавны, а иньда кö ме тэнö прокурорыс моз жö кузь туяс йыла пиннезнат йирны пуэс бердiсь качсö... Мый сэк пондан сьывны?

— Ачыт эд пондан уннявны...

— Тэ, Агаша, Егорсис эн пов, видзöт, сiя колхозник. Кылан?! Öтiк мöс вöлöм да сiйö доддяс пöрöтöм и татчö кыскö, а тэ... Кинöс полöтан?! Вообче-то ме правильно эд баита. Ага, Егорка?

— Сiдз, — шыасис Егорыс.

— Правильно, мыся, Агафья!

— Дугды, мыся, курöг герой! Тэ гортын герой, а йöзас... Öмыт эд оз жö оссьы, оз.

— Йöзас... — сералiс хозяиныс. — Йöзас менам, инька, и поныс полö вувтны. Вежöртiн? То-то... — пызаныс сайö бöр пуксис Öмельыс. — Йöзас ми, Агафья, тöдам мый керны... Сэтчин кывтö колö курччöвтны да сiдз овны, то öнджа да бöра лоас... Нем эн шу, инька... Ми вот Егорыскöт мунам Москваö и сэтчин быдöс висьтасям да. . . Сталиныскöт баитам, вежöртiн?! Сыбöрсянь прокуроркоддесö, натьтö, öмлöсаласö. Думайтан озö?!

— Важын Сталиныс тiян коддесö видзчисьö! Бырöм вешьянаэсö...

— Ох Агаша, тэ Агаша... Он вежöрт олансö... Быдöс ни миян топ эм, но асьным абу.

— Сёй, ыджыт öм!

— Ме сёя, а вот Прокопьевич коддеслö косканыс сетам черрез и иньдам уджавнытö вöрö, ась йирöны жö мымдакö кын пуэсö, а асьным... Пуксям ны местö и пондам ны моз жö весь овны. Он верит?!

— Сёй, мыся. О, господи! Кин ме юр вылö этатшöм мужиксö кышалiс?!

— Видзöт, Егорка, кытшöм менам иньö! Вот сэтшöммескöт и ов... Вот сэтшöммескöт правдасö и кошшы... Тэ сылö öтiкö, а сiя мöдiкö... Сёй, Егорка! Эн ни горзы. Мый керан, ежели миян сэтшöм олан?! Ежели Сталиныс Москвасяняс оз адззы, кыдз уджалöны Прокопьевич коддес... Быль колас гижны, öнджа...

— Заргы öмат тшаксö да эн ни гы!.. Пеллез ни бырисö тэнат баснисянь! — Öмельсö видö иньыс, но сiйö падтыны, кыдз тулыснас ыджыт шор прудйыны.

— Етша разь прокурорыс миянлiсь отирсö сёйис ни? — рамжыка ни баитiс Öмельыс. — Шедас миян кодьыс, медодз сыналас мымда вермас, чöвтас луншöрнас и пöрччалас, а сыбöрын... — шутньöвтiс пызаныс сайын. — Иньдас мöдöр югытас гырниччез керны... Думайтан абу сiдз?!

— Дугды ни-и-и, — кивнитiс хозяйкаыс.

— Тэ дугды! Тэнат öмыт гöжöм, а менам ышö сiя аслам, мый колö, сiйö и баитö! Видзöт, Егорка... Бось Пиля Васькасö... Мымда мортыс сюнас и пизьнас, кольтьнас и винас вердiс Прокопьевичсö... Ой-ой! А мый петiс?!.. Думайтан дорйис али жалейтiс Прокопьевичыт Васькасö?! Ага! Сiдз и вöлöм... Жалейтас кинкö миян кодьсö, бырöм вешьяна колхозниксö! Вердiс, вердiс Васькаыс прокурорсö, но мортсö, видзöт, сiдз и этадз дзимлялiсö, а мыля?! Вот сiдз, Егорка!

— Мый лоис Васькаыслö? — мужикыслiсь юалiс иньыс.

— Мый лоис? Тэ бытьтö он тöд... Эн кыв... Мöдöр югытас мортсö иньдiсö, вежöртiн?! Во! А тэ: мый лоис...Чушкалiс жö бöра, натьтö, кинкö Васькатö... Думайтан эз? Ме думайта, штö чушкалiс суседыс... Бытте пö, öнджа... Васькаыс чери кыйöм сiя курьяись, кытöн кыйсьöм суседыс, да-а-а... Ета... Пон мульöс жö эд Пиля Мишаыс, сёйись чужöма жö эд... Бытте сiя и чушкалöм Васькасö...

— Тэ сё уна адззан и тöдан, — бöра öмалiс иньыс мужиксö.

— Отирыслiсь кылi, Агафья. Отирыссянь!

— И тэ шедан кузь кылыт понда!

— Но и мый? Тэ кывзы жö, Агаша, кодя отирыс мый баитöны... Быд мортлö пö еныс шуöма тюрьмасö пешлыны... Вот и думайт баля юрнат.

Сёйисö пызан сайын мужиккес, модис-лёбис унажык хозяиныс мый колö и оз, но йöзыс эз кыв, оз тöд йöзыс, мый баитiсö — кытöн баитiсö, сэтчö и колисö, сыбöрын чеччисö пызаныс сайись, Öмельыс бöра кöмтöм коккезнас шлапöтiс сайкалöм джоджыс кузя и ошшасис, кыдз сiя шедлiс ни Москваас и мый адззылiс, нерис иньсö: «А тэ мый адззылiн, Агаша? То-то, эта... Öнджа... Сiйöн эд сэтшöм и эм... Кай жö гор вылас да вод, а ми Егор вонöкöт ышö кыввезнаным уджалыштам, кытчöдз эг мыдзö баитнытö...»

Хозяйкаыс кайис горыс вылö и чожа пондiс пишкыны-узьны.

Шоныт керкуыс кузь туйыс бöрсянь сунöтiс Егорсö, но Öмельыс кöмтöг бергалiс одзас да быздiс:

— Оланыс сiдз керöма, Егор, что правдасö хрен адззан. Сiдз али абу?! Сiдз, вонö! Только еныс да Лениныс и вöлöмась кодяжыккес, но кыкнаннысö пондiм вунöтны ни, сё кыскам асланяным, медодз ас йывсиным думайтам. Сiдз али абу?! Бось тэнö... Думайтан юрыт медодз ас пондасит оз вись?! Висьö, Егорка, висьö! Пукты тэнö, шуам, Прокопьевичыс местö... Но прокурорас... Думайтан сы моз миян кодьсö он понды пурны да чилькöтны?! Судитан, вонö, и дойдан. Эстöн мед менö еныс и чарöтö, но мый эм, сiйö олансис чернас он керав, сiйö, мыся, и баита... Веськыта! Власьыс, Егор, отирсö нач тшыкöтö. Видзöт, кыным ыджытжык начальник, сыным сiя унажык думайтö ас йывсис, сыным сiя хитрöйжык, жаднöйжык, сыным мортыслö етша — оз пöт, öмсö осьтöм да, хап! И абу, сылöн ни... А ми мый тэкöт? Пызаныс вылын няньыс эм и бур! Сэтöн миян и чассёным... Кынöмным бы эз симав, да кикокным бы дзоньöсь, а уджсö... Бергöтам ни! Эшö колхознымöс лэбтам да лэбтам бы, кытчöдз пороз юра предным коддес нач сiйö оз разьö... Сiдз? Али мый ни ме баита? Мыся, кыным мортыслö сетан унажык, сыным сылö етша! Вежöртiн кытчö пуыс пöрö? Ме бы... да-а-а... Меным, мыся, оз ков уна, кынöмö бы пöт вöлi. Уджала, видзöт, колхозас, топ отирыс моз жö бы кера... Почётнöй грамотаэс... Мутэйöн ни он вермы соровтны... И грамотаö бы эм жö, сизим класс велöтчи, кужа, вонö, лыддьöтны и бура гижа, верми бы, мыся, уджавны кытöнкö начальник кодьöн жö, кокнита жö бы вердi юрöс, но... Сьöлöмö оз кыскы весь овнытö и точка! Чужи колхозникöн и беднöй колхозникöн кула, кöть и нач понда тшыгьявны! — вачкис моросас, гичыртiс пиннесö, пöв синнас видзöтыштiс гор вылас, оз я кывзiсь иньыс, но Агафьяыс узис, и басниыс эз джöмды. ― Душаö, Егорка, честнöй, — висьталiс хозяиныс. — Кыдз, вежöртан он, ангеллöн! Мед, мыся, некин оз шу, штö Öмельыс, видзöт, сэтшöм да этатшöм... Кыдз Прокопьевичныт кодь я мый я бы... Мед... А тэ думайтан, мый?! Колхозник кö, дак абу ни морт?! Кин сэк отирсö вердö?! Кытiсь Прокопьевич коддес сёйöны?! И городас бöра мымда отирыс... И быдöнныс öмнысö осьтöмась да видзчисьöны... А кывзы жö, мый ышö висьтала... Ошшася вот, а миянöс тэкöт эд пыр сералöны: колхозник пö да колхозник, бытте колхозникыс абу ни морт. Тэ кылан мый ме баита?!

Егорыс суналiс, кылiс и эз ни ёртыслiсь баснисö, кыдз вöтöн уйис или лэбзис кытчöкö. Öмельыс чывкйис джоджас, ветлiс то комлань, то пороглань и кöдзис баснисö ёртыс одзö — быздiс, дзик тöдiс медуна.

— Егорка, тэ видзöт жö кыдз отирыс олöны, — бобгис хозяиныс. — Тэ разь кытiськö адззылiн, штö кытшöмкö начальник олiс бы ме кодь жö керкужугын?! Этатшöм курöгпозас!.. Бöбöтан, вонö! Кин назём кыскалö, сю быдтö да вöр керö, сiя баля гидас и олö, а кöда пызаныс сайын пукалö, сiя миян моз шыр нораас оз пыр.

Егорыс суналiс и бур, что ёртыс гажöтiс баснинас, вашöтiс сьöкыт думаэсö. Öмельыс аслас мывкыдöн вачкисис Пальникись Андрейыс вылö, только Андрейыс любитiс асьсö серавны, кöр быд кылын небыта ольсалö, а Öмельыс висьталас-шебралас, топ небыт жö ольпасьыс, а вод кö... Петшöрасян.

Егорыс вежöртiс ёртсö, тöдiс, что мыйись-мый... Петкöт бы ёртыслiсь кыввесö öтöрö, ашын жö Öмельыс оз ло, öшас и абу...

Öмельыс кыдз лыддьöтiс ёртыс одзын ассис и йöзлiсь олансö, баснинас эз джöмды, а Егорыс кывзiс, кöть и тöдiс да кывлiс ни этö, кöр колхозас быдöнныс олöны öтмоз. Хозяиныс баитiс — öмсис быг резсис, öвтiс киэзнас, кулакнас вартлiс моросас, гичралiс пиннесö и сьöласис джоджас, кöдö талун миськалöм иньыс. Öмельыс баитiс-модис код морт моз, но эз вöв код, сэтшöм мортыслöн мывкыд, сiдз личöтö душасö, веськöтö сьöлöмсö, кöдö важын ни зэлöтöны думаэз, кöдна сiдз и петiсö бы, сiдз бы и висьтасис, но талуння рытöдз вöлi некинлö...

Кадыс унакодь ни — рыт или ой, часытöг он тöд, но мужиккес эз узьö, Öмельыс баитiс и эз пöт баснинас, адззис, что ёртыс суналö, но одзлань разис, ошшасис:

— Но, Егорка, кужа ошшасьнытö?! Кужа эд кывнам уджавнытö! — öмсö осьтöн видзö. — А мый? Ме эд правда баита, ась правданам порогыс дорöдз локтан и джöмдан — керкуас öтiк, а öтöрас мöдiк ни, но... — мышкыртчис Егорыс юр дынö да пель одзас пондiс шушкыны. — Только тэныт... Мед öтöрас оз пет, ась... Вот видзöт коммуниссэсö... Мукöдыс эд ны коласын партеяас сы понда и пырöны, медбы зобнысö тыртны да кокнитжыка овны, видзöт миян посадын... Кыдз начальник, сiя и партейнöй, колхозниккес коласын эд етша...

Етша, мыся!

— Тэ тупкалан али он öмтö, то нинкöмнас эд прудъя! — гор вылын ыкöстiс иньыс, повзьöтiс Öмельсö, кöда, чуйк сувтiс, öмсö öддьöнжык осьтiс и пондiс видзöтны горвывланяс и дыр мыйись негорöн ни шуис:

— Егорка, миян кодь осьта öмаэсö эд оз радейтö. Öтiк кыв понда лыйöны бы. Нем керны... Вот бы туйис быдöс висьтавны, мый менам эстöн! — вачкис кымöсас. — Ми бы тэкöт ашын веськыта мунiм Прокопьевичыс дынö, и ме бы синнэзас сьöлалi... Эг бы шуан?! Сьöлалi бы вакульлö! Стыдитi бы! — бöра кулакнас вачкис, но öнi моросас ни, топ кöньöс кузя шентiс да серöмтчис. — Менам эд Агафьяö мывкыднас Прокопьевичыс кодь жö, сэтшöм жö петшöр. Но кыдз бокас узян да жмитыштан, сэк ашынас пызаныс вылö вайö пирöггез, а он... Тшыгйöн мукöдпырся уджавнытö и ветлывла... Он верит?! Ассис юав.

Китöстiс гор увтын петух, гуддисисö курöггез.

— Но жö, вонö, — Öмельыс адззис ни, что Егорыс узьö ни бы. — Тэнат тай синнэт куньсьöны ни. Кай жö полатяс да турбыльтчы, а ме Агафьяö бокö жмитчышта, мед сiя ашын миянлö тэкöт вайö чöскытжык сёян, пуö да пöжö.

Егорыс чеччис лабичсис.

— Сулав жö, Егорка! — кыдз саймис Öмельыс. — Ашын яйнат мый пондан керны? Кытчö воштiсян? Вот эд бедаыс!.. Вöтöн он вöтась... Кытчö яйтö, Егорка, воштан?

— Ме мыйöн тöда? — нырнас пишкис Егорыс. — Кыска да Прокопьевичыс одзö додьсим пöрöта, ась пон моз вильöтö...

— Сiдз! — пондiс китшсьыны Öмельыс, чеччöвтiс джоджыс шöрö. — Райкомыс да райисполкомыс одзö и кыскы, ась видзöтöны, мед адззöны!.. Оз я быль кутö да мöссö аслыныс пыртö, поннэс моз жö...

Егорыслöн оныс дугдiс петны, ёртыс кыввез бöрсянь дума сöтiс юрас: «Мый и лёбан ни, Öмель?! Кывсяс кö...»

— Ни хрена! Сiдз и кер! Эн пов. Тöдан эд кыдз войнаыс вылын, а! Али тэ эн сэтчин тышкась? Но и вот, кыкнанным, сiдзкö... Сэк мый нö полан?! Эх, солдат! Сэтчин ми геройез вöлiм, а гортын... Гортын, вонö, автоматыс кианым абу. Но тэ эн пов! Кер, кыдз ме баита, кöдыскö öтыс... Али эта, али сiя...

Бöра китöстiс петухыс, кыдз мужиккеслö висьталiс, что тырмас ни, пöтны ни колö бы баснинаныс и узьны: ашын лун локтас...

Егорыс ружтытöн коккезсис кыскалiс носкиэз, йöрнöс-вешьяннас чылiс полатьö, сэтчин быгыльтчис стенаыс бердö — увтас важ гуня и бур, кöр шоныт. Мыдзувья ланьтiс, топ сылiс, эз кыв лудыккезлiсь курччалöм, кöдна уськöтчисö тöдтöм мортыс вылö и пондiсö пышнавны чöскыт яйсö.

Узис чöскыта, вöтасис öтiк вöт, топ додьнас сё кытчöкö дзуртö-мунö, вöлыс несйö да весйö — бурö кöсйö. Етша узис, но асывнас одз лэбтыштiс юрсö, кывзiсьыштiс, гыжьялiс кынöмсö да спинасö: чеччыны бы колö, но йöзын эз бы эшö шыась, эз бы одзся-одз саймöт хозяин да хозяйкасö, но

Öмельыс сэтöн и вöлi — öмыс осьта ни:

— Егорка, он ни узь? А ме думайта, мыся, быль яйтö кыскан кö райкомыс одзö, а?

— Черпезьдiн бы! — мурзьыштiс хозяйкаыс, чеччис, öзтiс лампа и пондiс лонтны гор.

Вердiсö сiя жö сола тшакöн, пым пуöм картошкаöн. Трингис-сёйис, туисiсь юис кизерик юан, горзьöтiс, висьталiс спасибо: кынöмыс пöт, оланыс зверь, он тöд, мый бöра и мыччалас и висьталас, но талун сьöлöмыс вылын топ кокнитжык ни... Кöмасис-пасьтасис, петiс да доддясис и бур: погоддяыс кöс, лымыс оз усь и тöлыс оз гард.

— Но тэ этö... Мыйись-мый... Кежав бöра, пырав. Менам нем абу бурыс, но няньыс да солыс эмöсь, сёйыштам да баитыштам и, видзöтан кö, кокнитжык лоас. Сiдз эд, Егорка?! Бур туй тэныт, — кольлалiс Öмельыс, долоннезнас вартлiс боккезас, модис. — Мый жö эшö оланыс бы мыччалас? Кыдз и пондам кувнытö? Олам-олам и, видзöт жö, сё эд цветитам сьöда! — посöдзсянь ыкöстiс иньыслö. — Öгруш! Тэч павжунсö! Бöра эд муна уджавнытö пермаö.

Шондiыс эшö кытöнкö узис. Асылыс эшö дзуз видзис — видзöтчис полöмöн, кыскис кадсö, эшö эз вувтö поннэз. Егорыс шутньöвтiс вöлыслö, сiя кокнита вöрзьöтiс додьсö. Дзуркнитiс лым. Шыыс дойдiс сьöлöмсö: бöра жаль мöсыс да сэтшöм, что гусьöн пильскыштiс, чышкис чорыт кеписсезнас син дорресö, вöлыслö шуис: «Мун, кага.. »

50

Дыша чеччис Кöсын отирыс, кöда керкуын öшыннэзас эшö эз тыдалö биэз, а кöда, поди, мунiс ни уджавны, но улицаын отирыс эз вöлö. Егорыс шутнялыштiс вöлыслö да видзöтчис, дзик öтнас полiс мунны йöз улицаöт, полiс поннэзiсь, кöдна чеччалiсö ни вöлыс дынö, летiсö горшшезнысö, нюкьясисö да вöтчисö додьыс сьöрö. Кытöнкö магазиннэс гöгöрын ни пондiсö пантасьны öтi-öтi отир. Нiя поннэс моз жö сувтчышалiсö, кылiсö додьсис яйсö, видзöтiсö бöрсяняс, а öтiк шыасис:

— Дядь, вузалан яйтö?

— Одз ышö, — вöлыслö шатёкöн öвтыштiс ямщикыс, и одзлань додьыс увтын дзуртiс лымыс, дыша шагнялiс Гнедкоыс. Дышöтчис и оссьыны тöвся луныс, но жагвыв югдiс, и морозыс лоис лёкжык, курччалiс ныр да рожабаннэз, пырис бы паськöм увтö.

Магазиннэз дынын Егорыс сувтöтыштiс вöвсö, бытьтö Гнедкосö шоччöтiс, домалiс забегаловка öшын увтö, нюкьясис пон моз, кöр нырас павкис чöскыт яя шыдöн. Вöлыс мурскис турун, Егорыс нинкöммезнас жöдзис магазиныс гöгöрын, видзöтiс, кыдз магазиныс посöдз бердö öтöрасьöмась мужиккес, кынтöмась посöдзсö и сьöласис, осудитiс йöзсö.

Шондiыс эшö вöлi ылын, эшö заряыс öзйис и эз, Егорыслöн сьöлöмыс вылын недолыт, тэрмасьö бы, öвтчö, видзчисьö, кöр нач югдас. Додьыс дынö сувтчылiсö ни морт-мöд, юасисö кытчö мунö, вузалас я яйсö, но Егорыс быдöнлö öткажитiс.

— А мыля? — роч паськöмаыс лякасис, сет тэ сылö или висьтав, кытчö нуöтан. Но и висьталiс Егорыс, что яйсö кыскö

Прокопьевичыслö.

— Кытшöм Прокопьевичлö бы?

— Мужик! Кытшöм тэ вöлöмыт басöк, быдöс бы тöдан и адззан! А он тöд, кин сэтшöм Прокопьевичыс...

— А... — осьтiс öмсö мöдыс, вöлись шыбыльтiс керкуэс сайö, кыдз рожаас сьöвзисö.

— Важын бы сiдз! — серöмтчис Егорыс, видзöтыштiс асывланяс: югдö öддьöнжык, и отирыс сьöрсьöн-бöрсьöн тойисö коккезнаныс — тэрмасисö учрежденнёэзö. Егорыс пондiс кынмыны, сэсся видзчисьнытö эз понды, кутiс вожжиэз, вöвсö вöрзьöтiс забегаловкаыс дынiсь и иньдöтiс райкомлань, кöдö тöдiс кытöн.

Гнедкоыс эз тэрмась, несйис да джöмдалiс. Хозяиныс эз жö тэрмась, полiс, сьöлöмыс вылын недолыт — шогöт, бытьтö сiдз кинкö и кутiс да йöртiс кытчö колö, но Гнедкоыс оськöвтiс райкомыслань, дзуртiс додьыс увтын лымыс, пантасисö отир да видзöтiсö, кыдз йöз вылö, кöда некинлö эз ков и некин сы понда эз тöждiсь, эз вежöрт.

Райкомыс одзын чирзiсö ни воробейез. Нiя татöн смелöсь, мортсис оз полö, сiдз бы и пуксьöны доддяс. Вöлыс вайöтiс райком дынöдз, сувтiс кык этажа керку одзö, пирснитiс нырнас и пондiс сулавны — шоччисьны.

Югдiс ни сiдз, что керку öшыннэзiсь кусiс би. Егорыс чеччис додьсис, вöлыс одзö чапкис турун, вачкис оча кепись, кöр кынмис ни и пондiс чеччавны öтiк местаын прыг да скок, прыг да скок.

Мужикыс чеччалiс, кыдз сылöн удж абу и орсö кытöн оз ков, но кытчöдзкö сы вылö некин эз видзöт, эз шу, что тэ, Егор, мун-ко чожажык эстiсь, кытчöдз дзонь... Нач ни югдiс, но шондiыс эшö кытöнкö шоччисис, воробейес чирзiсö мортыс коккез дынын, корисö сёйны, вöлыс лэбтыштiс юрсö: керкусяняс посöдзö петiс лёк чужöма морт. Сiя, тыдалö, эз радейт весь олiссесö: кымöсыс увтöт видзöтыштiс Егорыс вылö сiдз, топ лöсьöтчис вартлыны, но киас шатьыс эз вöв, сiйöн и юалiс:

— Товарищ, тэ мый эстöн керан?! Или он адззы кытöн сулалан?! Эстöн абу эд райзо.

Ой-ой! Бöра эд повзьыштiс кодь Егорыс... Райзо, районо... Рай да бöра рай... Мымда татöн сэтшöм нима керкуэс? Кин сэтöн уджалö? Кытшöм начальниккез? Кöда бы рамжык, кöда лёкжык? Егорыс нем оз тöд, сiдз кыдз олö Пальникын, уджалö колхозын, ылö оз ветлöт, а сэтöн, на! Беда, и сыкöт сiдз баитöны...

— Райзоыс меным оз ков, — виноватöя шынньöвтiс Егорыс, спинаыс сайкалiс öддьöнжык.

— Мый сэк тэныт колö?! — сэтшöм жö лёка юалiс мужикыс.

— Кыдз сiйö шуöны-ы-ы?.. Прокопьевичыс бы колö... — додьыслань видзöтыштiс Егорыс, кöр ойнас вöлыс турунсö сёйис вель уна, и мöс тушаыс тыдалiс доддяс. — Сылö, видзöт жö, яйсö вайи... Дык ог тöд кытöн Прокопьевичыс уджалö. Кытшöм керкуын... Бат, тiян дынын жö юрсö вердö?

Сылiсь бöра юалiс лёк мортыс:

— Кытшöм Прокопьевич? — рамжыка ни баитö бы.

— Бытте он тöд... Прокурорным... Пальнишенечным... Сiя жö эд кöркö миянын шогмис, а счас, видзöт жö, öнджа... Ыджыт начальник да и судитö бы менö... Опись бы, мыся, керöны... Мöссö петкöтöны... Прокопьевичыс жö, мыся, и висьталiс, ог кö пö налоггесö вешты, дак... Вот и ковсис мöссö начкывны да татчö кыскыны... Прокопьевичыс, мыся, ась кöть кытчö воштö... Мыся, гортас, поди, этö... Яйтöг олö... Сiдз, натьтö, кöр подасö оз видз... — Егорыс, кыдз кужис, сiдз и баитiс — деревняын чужис, олö и кулас, рочческöт етша пантасьлö, быдöс комиöн да комиöн, вежöртасö кöть озö...

— Обожди! — нач лöгасис лöг чужöма мортыс. — Обожди! — пятакасерöн гöрдöтiс чужöмыс. — Что-то я Вас, гражданин дорогой, не совсем понимаю!

— Понимай, не понимай, а корову я это самое... Некуда было деваться, кöть самому это самое — нож в горло, но и это самое — того... — Егорыслöн петiсö синваэс, чышкыштiс син дорресö кеписьнас, смевмис. — Ты, гражданин хороший, это самое... На меня не очень... Я ведь тоже воевал, трижды ранен и знаю что да к чему, могу и написать!

Егорыс веськыта ни шебралiс — абу дак абу! А мый сылö? Некинлö ни эз верит, ась райком, ась райисполком, кöр лыддис ни, что быдöнныс Прокопьевичыскöт вартöны öтiк гуна вылын.

Чирзiсö воробейез, мыччисис шондi да полöмöн видзöтчис, кинлöнкö тшыг пон сибöтчис додьыс дынö, öмтырнас тшапнитiс яйсö.

— Товарищ, — рамыника ни пондiс баитны тöдтöм мужикыс. — Тэ кысянь локтiн? Кысь тэ сэтшöмыс? Бытьтö адззывлi ни, но вунöтi?

— Кытiсь, кытiсь... Вöр пыдöсiсь ме. Пальникись. Он верит? Юав Прокопьевичыслiсь, сiя тöдö, унаись ни миянын юис сюромкасö, и винасö ме сылö босьлi жö.

— Пыр керкуас!

— А тэ менö, öнджа... Этö он я кер?.. — недолыт Егорыслö, коккес кыдз небзисö, и моросас топ тасасис зор. ― Менö гортын видзчисьöны, и поннэс яйсö...

— Öшынсяняс тыдалö.

И эта асылыс Егорыслö вайис мöдкодь олан, мороссö пондiс личöтны сiя шогöтыс, кöда кыным лун ни эз лэдз пыдынжыка ловзисьны, эз сет веськыта видзöтны отирыс синнэзö, кöр вöлi кыдз быдöнныс одзын виноватöй, смевжыка ни вöвсö кöрталiс райкомыс посöдз бердö, виль нинкöммезнас дзурка-вирка кайис посöдзас и пырис керкуас лёк мужикыс бöрсянь.

51

Егорыс и талун ловья да чож, кöть и кадыс оз узь: унакодь ни чулалiсö годдэс. Егорлöн быдмисö челядьыс да велöтчисö, пондiсö уджавны: Люсяыс библиотекаын, жöник мыгöра Викторыс колхозын, а мöддэс — кинлöн да кытчö туй! Кошшы, Егор, зоннэтö да эн вунöт кыдз быдтiсин.

Бура ни олö мортыс: видзö мöс, баляэз вит-квать, арнас начкылö порсь. Яй, нянь, чери, картов... Праздниккезнас босьтас вина, юыштас и сьылö да ошшасьö, что сiя, видзöтö, Егор! Сы кодьыс некин абу, сы моз бура некин ни оз ов, и мукöдпыр горöтчас:

— Челядь, öнджа... Прокопьевичсö эд ме кöркö яйнам «вердi». Сiйöн сiйö прокурорсис и брынöтiсö да нинкöммезöн кöмöтiсö, нето талунöдз бы прокуроралiс да миян коддесö талис.

Прокопьевичыс важынкодь ни оз уджав прокурорнас, дыр ни оз ов Кöсын, бöр овнытö локтiс посадö, пырис аслас керкуö, кöдö кöркö тшуплiс да лэбтылiс айыс и кöда сулалö ыб дорын — посадын медбöрья керку, медгажа местаын, кысянь омöн тыдалö ылö-ылö. Медодз, кыдз ыб вывсянь лэбзьöны нето ракаэз, нето катшаэз или тулысöн сьöдкайез, пуксьöны Прокопьевиччез тополь вылö, кöдö кöркö öшыныс увтö садитлiс хозяиныс. Пуыс быдмис кöньöс кыза, уввесö нюжöтiс керкуыс короминна бердöдз, и гожуммезнас топольыс кöть тöла, кöть абу пыр шушкö ас кежас, бытьтö мыйкö бы висьталö хозяиныслö.

Но Прокопьевичыс оз любит пукавны посöдзаныс, оз куж кывзыны пуыслiсь шушкöтчöмсö, етша олö гортас, а пыр кöмалас нинкöммез, пасьталас важ паськöм, кушакасяс важ кушакöн да асывсянь одзся-одз öвтчö посадын. Пырö öтiк керкуö да мöдiкö, топ мыйкö öштiс и кошшö, но оз адззы, и некин мортыслö оз сет сiйö, мый öштiс, сiдз кыдз Прокопьевичсö посадын оз радейтö — синöн бы оз адззö, медодз сы понда, что пыр бы куритö, но табакыс абу и пыр, кыдз пырас керкуö, пуксяс западня вылö, пукалыштас да шуö: «Вай жö куритыштам...»

Посадын отирыс абу надзöсь, мый эм, сiйö и сетасö, кöть деньгаыс табаксö небны абу, но медбöрья копейка вылö да мужиккес табаксö босьтасö и чепöльнаныс янсöтöны куритансö.

Прокопьевичыс йöзлiсь босьтас табаксö, гардас чигарка, öзтас, жаднöя горшас кыскас тшынсö, пöльыштас и петас керкусис — мунас öтiк керкуись, сыбöрын пырас мöдiкö, здоровайтчас да бöра шуас: «Вайö куритыштам...» И мортыслö сетöны чепöльöн табак, бöра сiя гардö чигарка, öзтö, тшынсö жаднöя кыскö горшас, пöльыштö и петö керкусис, улицаöт мунö одзлань, кыдз пон нюкьясьö, бытьтö гортыс абу, тшыг и кошшисьö...

Прокопьевичыслöн эм мыйöн небны табаксö, эм мыйöн магазинiсь босьтны сёян, кöр босьтö пенсия да сымда, что, шуам, Егорыслö жö сымда деньгасö и вöтöн не вöтасьны. Бура бы колö овны Прокопьевичыслö, кöть и абу ни прокурор, кöть и бöра вöр коласын, сiя жö посадын, кытöн чужис да олö, и öнi сэтшöм жö морт, сэтшöм жö нинкöммезöн ни ветлöтö, мыйöн ветлöтöны быдöс отирыс. Уджалö колхозын — коскас чер, киас кöртзыр, мунö сэтчин, кытчö иньдас бригадирыс. Уджалö Прокопьевичыс, инькаэскöт да стариккескöт гожуммезнас вочö йöррез, арнас шупöтö öвиннэз. Сьöкыта оз уджав, но сьöкыта мортыслö сетчö уджыс — оз бы эд лякöсьт и нятьöсьт киэсö, сiйöн оз и любит асьсö, посадсö, колхозсö, бригадирсö — быдкодь начальникöс, кöда бытьтö сысся ыджытжык, кöр ачыс вöлi прокурор, и сы одзын лякöсь ныра начальниккес жöдзисö кок чуннезныс вылын. Только шуас, только чуньнас мыччалас-висьталас, и мöддэс сэтöн и вöлiсö, ыксiсö: «Прокопьевич, час!.. Керам, Прокопьевич!» Öнi Прокопьевичыслöн бытьтö бур ним эз ло — Пестерöн мортсö пондiсö шуны. Сiя жö чукыля кока Егорыс вежалунö юыштас сюромка и модьö: «Кывзö, Пестерсö эд ме...»

— Кинöс?! — лöгасьö Прокопьевичыс, ньылыштö дульсö и виньдö, одзлань оз шыась, кöр тöдö и адззö, что некин сiйö оз дорйы.

И мунö лöгувья мортыс магазинö, пырö вузасись Нюра дынö. Нюраыс рад, сiя бытьтö важын ни видзчисьö Прокопьевичсö, медбы мортсö шныгны-бöбöтны.

Пырö Прокопьевичыс магазинö, вузасисьлö шуö:

— Нюра, кисьт.

Нюраыс прилавок увтiсь кыскö стакан, стаканыс бокö сувтöтö спичкаэзöн коробка и бутылкаись стаканас кисьтö вина да коробкаыс дорви — не унажык и не етшажык.

Юö Прокопьевичыс винасö, топ ма ньылалö, соснас чышкö öмсö, шоччисьыштö и бöра Нюралö шуö: «Нюрка, кисьт эшö».

Прокопьевичыслöн деньгаыс эм и кужö юны винасö, кöр велалiс юнытö эшö прокуроравтöнняс, но сэк юкталiс отирыс, а öнi юö ассис, юас, петас магазинсис, тарöвтчас посöдзсяняс веськыта нять гöпö и ланьтас да узьö, топ абу ни ловья.

Отирыс ветлöтöны магазин дынöт, инькаэс, кыдз шуам Егорлöн жö иньыс, сьöвзяс да шуö:

— Мортсёйись, адззин вöлись!

Мöдiк содтас: «Керав бы юрсö, мед тöдiс бы кыдз отирсö судитлöны!»

— Мыля сiдз, инькаэз? — адззисяс кодяжык сьöлöма и жалейта нять гöпын узисьсö.

— Страмсö! Мый кöдзис, сiйö и вундö!

Узьö магазин посöдз бокын Прокопьевичыс и некинлö ни сiя оз ков, нельки иньыс мужикыс понда оз тöждiсь, некöр оз кошшы, кöть бы и пöдас мортыс нять гöпас, кöть кытöнкö сотчас или тöвнас кынмас лым вылын.

Гожум. Шоныт. Нятьын узьны небыт. Котöртö пон, сувтчыштö узисьыс дынö, лэбтыштö коксö, чижгыштö и одзлань... Гордöя шагнялö петух, локта узисьыс дынö, сувтö, видзöтö, кыдз Прокопьевичыс ныр вылын пукалö гут, и кокышта гутсö. Колхознöй пороз мунö улицаöт, адззö узисьсö, пишнитö нырнас, лöсьöтчö люкавны бы мортсö, но мылякö оз люкав и мунö одзлань. Кузь гожумся луныс, пöттöдз нять гöпын узьö кодыс, рытланяс саймö, синнэсö тiльö, чеччö и жагвыв мунö гортас.

Шондiыс топ сералö Прокопьевичсö — веськыта синнэзас югöрыс югдöтö. Пырö гортас мортыс. Иньыс лёк кыввезöн панталö, веськыта шебралö:

— Кувнытö он вермы! Поннэс бы джагöтiсö!

Кыдз йöзöс видö мужиксö иньыс, оз бы видзöт вылас — мортö оз пукты, кöть и олöны только кыкöн, зоннэзныс быдмисö да мунiсö гортсиныс, кыдз öшисö — не письмо оз гижö, не юöр оз иньдö. Отирыс жö баитöны, бытьтö пö зонкаэс стыдитчöны сэтшöм айыскöт овны, кöдö отирыс оз радейтö.

— Эн тэ вöв мортнас и он ни ло! Эз бы ков меным тэ кодь мужикыс да вöлiн, — модьö Прокопьевичлöн иньыс.

— Мун. Мый меным? Öтнам ола, — сьöласьö Прокопьевичыс, вашöтö бы гортсис иньсö, а Таняыс ачыс бы вашöтö мужиксö — медлёк враггез лоисö гозйöн.

Быдмис топольыс öшын увтын да и пöрисьмис, кыдз вижгыштас лэчытжык тöв, сiдз и чеглалö уввесö, а таво гожумнас топольыс гагсялiс: листыс вылын пондiсö ветлöтны-виклясьны чунь кузя веж рöма гаггез, и сымда нiя лоисö, что пондiсö пырны керкуö, öшымöсö, ветлöтiсö посöдзын.

— Тэ кузя ерекничаэс топольыс вылö лэдзисö икöтаэзнысö! — видö иньыс — бöра эд Прокопьевичыс виноватöй. Гортын видöны, йöзö петан, бöра сякö шуöны — некытöн и некин ни мортсö оз дорйы. И Прокопьевичыс оз видзчись дорйöмсö, некин сылöн ёрттэс абуöсь, дзик олö вöр шöрын, кулас и дзебны лоас некинлö. Курöггесö буржыка ни Таняыс вердö. Сэтшöм оланыс лоис Прокопьевичыслöн. И лöгыс ни петö быдöн вылö, гичыртö пиннесö да олö, ас кежас думайтö: «Шедат, враггез! Шедат...» Мыйкö вылö надейтчö, аслыс веритö, что локтасö эшö сэтшöм луннэз, шонтас эшö шондiыс Прокопьевичсö, козьналас эшö оланыс вын, кöр одззамоз няпыртас кулаксö да сiя жö чукыля кока Егорыслö висьталас:

«Егор, шедiн эд!»

— Эн, Прокопьевич, эн! Ме нем тэныт умöльсö эг кер. Этö Öндрейыс эд... Воныт сэк мöссö тшöктiс начкывны да райкомас норасьны. Сiя.

Прокопьевичыс сiдз тöдö, что Андрейыс вон, но кыдз пон, вермас быдöс керны. Но шедас бöра сiя, сэк вöлись быдöнныт пöттöдз «сёят», сэк вöлись бöра Прокопьевичыс мыччалас тiянлö, вöлись бöра адззылат!

Гырчкö пиннесö Прокопьевичыс — гусьöн отирыс вылö лöгалö, ас кежас баитö — вештiсьö бы умöль отиркöт, кöдна сiйö пурöны бы, видзчисьö бур кад — кодя олан, кöда бöра мортсö пöртас мортö, и некинiсь бöра Прокопьевичыс оз понды повны, лоас хозяин, кöр эшö туяна-колана бы. Сьöлöмыс бердын шульга зепас новйöтö эшö партийнöй билетсö, ветлöтö партийнöй собраннёэз вылö, и собраннёэс коста эшö бöрйывлöны президиумö или юасьöны, кыдз пöрисьжыклiсь, кыдз да мый керны, и пöрисьжыкыс эшö томжык коммунисттэсö велöтö овны да уджавны, сiдзкö...

52

Вийисö бы Прокопьевичсö отирыс — смерть корисö мортыслö, и иньыс бы быд лун кыввезнас вийис, кеймис еныслö, медбы мужикыс кодувья усис нять гöпö да пöдiс или сотчис винаöн, только весь одзлань мортыслö гарйисö гусö, весь: локтiс кад, что шондiыс эшö пондiс шыннявны-шонтны и гажöтны Прокопьевичсö, оланыс эшö мортыслö гажöн шынньöвтiс. Чатыртiс юрсö мортыс, мороссö лэбтыштiс, смела мунiс сельсоветö, кытчö сiйö корисö сы понда, что тшöктiсö бы уджавны лесникöн.

Лесник... Лесникыс бытьтö вöрын лыддиссьö хозяинöн. Эта хозяинтöг бытьтö бы отирыс оз вермö мунны вöрö, медбы керавны майöг или сöтны ньöр, бытьтö бы оз лысьтö вöравны-вийны сьöла, кöч, вермöс, дзик лесниктöг отирыс вöрись озö лысьтö вайны ягöд да тшак, и бытьтö миян сэтшöм ни лёкöсь законнэз, что вöрыс бытьтö бы быль ни зелёнöй золото, кöдö синйöны и берегитöны ой и лун, а петö... Петiс сiдз, что лесникöн уджалiс Фёдор нима мужик, сымда уджалiс, сымда олiс Фёдорыс, что вöрын и лолыс петiс. Бур вöлi мортыс, отирыс билеттöг вöрись эз полö пöрöтны пу, кералiсö потш и ньöр, и вöралiсö пöт: кин мымда вермис, сымда и сёйис пöткасö. Кулiс Фёдорыс, и сы местö лесникöн уджавны корисö Прокопьевичсö, ась мортыс эз ни вöв том, эз ни вермы вöррезас котрасьны, но и мый? Некытшöм лесник эд вöррезас эз котрась, эз чеччав кöч моз, только колö синйыны вöрсö, сымда и эм!

И лоис лесникöн Прокопьевичыс, бöра бытьтö аскодя начальникöн лоис, кöдаись отир, ов да пов. Кыдз мортыс черöн пондас мунны вöрö, видзöтлö ни öтöрö да мöдöрö, тöдö ни, что медбы пöрöтны пу, медодз колö босьтны билет да вöлись керасьны, или, шуам, мортыс мунас кö вöравны, ась тöдö кинлö да кöр лыйны.

Посадын пондiс овны и уджавны виль лесник — этö Прокопьевичыс, юрсö чатыртiс, улицаöт бöра шагнялiс смела — эн вöрзьöт и эн шу Пестерöн, а бöра ни шу только Прокопьевичöн. Чукыля кока Егорыс медодз сералöмöн юалiс лесникыслiсь:

— Прокопьевич, бöра эн я ло начальникöн? Он я бöра миян кодьсö зэлöт?

— Ме тэнö! — пиннес пыр висьталiс Прокопьевичыс.

— Эн пов, Прокопьевич! Ме вöрас весись ог мун, а муна кö, öтiк понлö ог шед.

Егор коддесö мöдпöв он ни кер и пиннезнысö он кисьт. Сэтшöм жö Андрейыс, кöть и дас год кытöнкö умöля олiс ― чинтiс ассис олансö, но Егорыс моз жö жевгö:

— Вонö, виль керку бы тшупа, а деньгаыс билетсö небны абу. Ог я вöрсö пöрöт билеттöг? Пöрöта кö, он жö дойд?

Нач ни сивмис Андрейыс, топ косьмис да чинiс — нем вылö бы видзöтны ни, и уджав бы вичкуын, кытчö сiйö сувтöтiсö колхоззэзiсь примитны сю, но оз эд вермы овны морт моз, кычан моз сё эд лявзö: «Вонö, он я бöра одззамоз отирсö понды сёйны?..»

— А тэныт мый?! — воныс вылö лöгасис Прокопьевичыс.

— Сiдз тай... — шыасис Андрейыс. Прокопьевичыс сьöвзис Егор да Андрей коддеслö, пондiс одзлань уджавны лесникöн — деньга шедтiс да бытьтö вöрö ветлöтiс: кытчöдз лымыс оз усь, босьтас чер, гортсянь мунас километр-мöд, отирыс синнэз одзись саясяс кöззэз коласö, пуксяс колода вылö, куритас öтiк чигарка, сыбöрын мöдiкö, видзöтас неöтпыр шондiыс вылö, кöда арнас кымöрас дыр кежö оз енды, а тэрмасьö пуксьыны.

Дженыт арся луныс, час-мöд лесникыс олас вöрын и бöр локтö гортö. А мый унажыксö Прокопьевичыслö вöрын керны? Вöралiссесö оз вермы кутны: виясö кö нiя кöч нето сьöла, сiдз дзебасö добычасö, что некытöн нем оз и тыдав. Бокöттяс мунасö, а пöрисьыс нем оз казяв. А вот билеттöг вöр кералiссес лесниклö шедöны сразу, — керыс эд абу сьöла, пиö он дзеб.

Кокнит Прокопьевичыслöн уджыс: ветлöтö вöрö — öштö кад, но вöррес паськытöсь, а сiя öтнас, кöть и бытьтö бы вöрас лыддиссьö хозяинöн.

Öтпыр, кыдз только усис медодзза лым, Якуня Ваня вöрсис вайис кер. Веськыта кö висьтавны, мортыс пусö вайис билеттöг — орсiс аслас судьбакöт, нерис лесниксö, думайтiс, мый жö лоас, мый жö керас Пестерыс, кöдакöт одзза годдэзас, эшö гражданскöй войнанас, öтлаын сайласисö вöрас, вöлiсö бур ёрттэз бы, кöть и сы бöрсянь берся вöлi, но и ась... Öнi Якуня Иваныс тöдiс бы, мый жö лоас, кыдз пондас видзöтны Прокопьевичыс кöркöся ёртыс вылö, оз я понды пурны, а, поди, вежис ни мывкыдсö, лоис рам — отирыс дор лоис.

Якуня Ваня юскис вöвсö öшыннэз увтö, быгыльтiс керсö картаныс бердö и быдöнлö пондiс ошшасьны, что сiя, тулыснас, кыдз сылас лымыс, керсö орлалас, керас столббез, вочас йöр. Сэсся йöрас оз ни пондö пырны курöггез, кöр нiя нач ни вельмисö, быд гожум картовсö кокалöны и кокалöны. Басниыс эз ешты посадсö кытшöвтны, быд керкуö пыравны да петны, кыдз Якуня Иваннэз öшын увтö локтiс лесникыс и веськыта висьталiс, что Иваныс морт умöль, что оланыс сiйö некытчö эз велöт, бöра олö асмознас, гусялö вöрсö.

— Мый лоис?! — Якуня Иваныс эз повзьы лесниксис. ― Видзöт вöрсö мымда керöны-пöрöтöны леспромхозас, джынсö нöбöтöны, а мöд джыныс сiдз и сiсьмö. Бардак вöрас, но сiйö од адззö, а менö öтiк керыс понда адззат!

— Бöбöтан, Иван! — висьталiс лесникыс. — Кöдна вöрсö керöны, нiя оз гусясьö, а тэ гусясян! Штраф пондан вештыны!

Иваныс öнi олö буржыка, нежели, шуам, кыдз олiс война годдэзö или войнаыс бöрын — эм ни мортыслöн деньгаыс, и сiя сэтöн жö Прокопьевичыслö швыргис двадцать пять руб, кыдз сьöвзис или козьналiс деньгасö — абу и абу двадцать пять рубыс!

Мый сэтöн унажык баитны? Кытчö пуксин, сэтöн и чеччан. Мый Прокопьевичыс ольсалö, сы вылын и колö узьлыны. И лöгувья лесникыс кежис магазинö, Нюралö стаканö тшöктiс кисьтны вина, былскис винасö, петiс öтöрö, таралiс лым вылö да ланьтiс медчöскыт онöн.

Погоддяыс рам, морозыс абу лёк, лымыс лесникыс увтын небыт, кыдз пуховöй перина — узь да вöтась. Пондылiс кö мöдiк бы узьны лымыс вылын, натьтö, эд чожа тувдiс бы, сэкжö дзимлялiсö-нуöтiсö бы гортас, только не Прокопьевичсö. Сьöвзис бöра Якуня Ванялöн иньыс да веськыта висьталiс: «Мый кошшан, сiйö и адззан!»

— Понлö пон моз и кувны! — содтiс Прокопьевичлöн иньыс, кöдалö юöртiсö мужикыс йылiсь, радмис инькаыс, думайтiс, что öнi быль ни кулас Прокопьевичыс, но сiя лым вылын узис павжунсянь рытöдз, чеччис, сьöвзис, кудзасис, шапкасö пуктiс юрыс вылö, ыкöстiс Якуня Иваныс пон вылö, кöда öвтчис магазиныс дынын: «Ме тэныт мыччала!» и иньдöтчис гортас.

И тöвйис мортыс — öтпыр эз несйы, эз ружтышт, эз норась аслас здоровье вылö, сералiс шогалiссесö да олiс.

Март гöгöрас шондiыс вынöнжык пондiс шонтны, короминнаэз вылiсь пондiсö вотявны ваэз, луннэзнас сылöтiс, а асыввезнас бöр кынтiс, лым вылö шогмис чарöм. Сэк томжык мужиккес сувтiсö лямпаэз вылö и сöтiсö пыд вöрö вöравны. Петiс сiя, что колхозниккес лоисö браконьеррезöн, и браконьеррес пыд лымöт кокнита паздiсö вöрмöссэз, кин мымда вермис. Зверресö эд вöрсис некин эз лыддьы, гидйын эз видз, и вöлiсö нiя вель уна.

Вöрмöссö пыд лымöт вийны вöлi кокнит, кöр сiя уна котрасьны оз вермы. Пальнишана вöрын керисö яй да сымда, что яйыс тырмис быдöнлö, только вай да сёй! Эстöн жö колö висьтавны, что Пальникын отирыс вöравтöн вöлiсö дружнöйöсь, и вöрö яйла мунiс быд морт, кöда вермис сулавны лямпаэз вылын, кöда вермис кыскыны кулак ыжда да яйтор. Яйла эз мун только Прокопьевичыс, сiдз кыдз вöлi лесник. Мöдiк лесник, бат, отирыс сьöрись эз бы кольччы, мый быдöнлö, сiя и бы сылöн. Прокопьевичыс отирыскöт вöрö эз мун, эз куж посадас овны, сэкжö браконьеррес йылiсь телефонöт юöртiс милицияö да лесничествоö. Юöртiс, что пальнишанаыс вийöны лоссез, и колö бы нiйö кутны да судитны. Рад лоис лесникыс, что сiдз овсьö-керсьö, что чожа бöра эд сiйö пондасö ошкыны, только сiя умöля тöдiс пальнишанасö: эз ешты Прокопьевичыс звонитны-юöртны милицияö, мый керсьö посадын, кыдз районсянь паныт звонитiсö Пальникö: «Пальнишана, дзимлялö сёяннэзнытö!»

Посадö локтiсö лесниккез да милиционеррез, пондiсö кошшисьны, но Пальникын некин и нем эз тöд, некытшöм яй и некытöн эз вöв, кöть и пон коддес ветлöтiсö вöрись яйыс вывтi — талисö лым увтiсь керкуэз дынiсь. Лесниккес кошшисисö и вöрын, лямпаэзöн ысласисö лямпа следдэзöт, только следдэс вöрас вöлiсö унаöв: öтiк нуöтiс öтöрö, мöдiк мöдöрö, куимöтыс кытшлалiс да кытшлалiс кöззэз гöгöрöт, а сыбöрын бöр петкöтiс туй вылö и öшис...

Сьöкыт вöлi кутны вöрись отирсö, и лесниккес да милиционеррес некинöс эз кутö, только öтiк зородiсь турун коласiсь адззисö яйöн öтiк сера дöраись вурöм котома, босьтiсö сiйö и нöбöтiсö лесничествоö. Öтiк котомаöн посадсис и мунiсö лесничествоö лесниккес, колисö Прокопьевичсö, медбы сiя одзлань олiс Пальникын да синйис вöрресö. Сэтöн и локтiс тулысыс, сылiс лымыс, юэзын да шоррезын сымдаöн содiсö ваэс, что посадiсь некытчö ылö эз понды туйны мунны: разсисö туйес.

Локтiс тулыс. Отирыс пондiс кöдзны да гöрны, а Прокопьевичыс кыдз бöра весь олiс, и отирыс лесниксö öнi пондiсö нерны: «Прокурор — котома вор! Гусялiн, сiдзкö, миянлiсь яйсö! Видзöт, Пестер, еныс асьтö адззас эд...»

53

Андрейыс эта коста пукалiс гортас, нем сылö вöлi керны, ыббес вылö сюэсö вöлись кöдзисö, арöдз эшö ылын, эшö виль урожайсö колö видзчисьны да видзчисьны, кöр эшö вундасö, вартасö да пондасö вайны вичкуö — складö. Сэк вöлись пондас пизьны-уджавны, öшлас сюöн быд мешöксö, гижас кытшöм колхоз да мымда государствоас сетiс няньсö.

Позис бы эта коста Андрейыслö босьтны чер, колхозниккеслö отсавны вочны йöррез или керавны пес, но сылöн висис спинаыс.

Öтöрын гажа. Пондöтчис потны ни льöмпулöн листыс, сьылiс ни чикись, кöда таво локтiс одзза годдэс сьöртi одзжык, дугдiсö ни сьывны сьöдкайез, кöдна пуксисö ни пöжны пияннэз.

Андрейыс шоччисис гортын, думайтiс кытшöм лунö бы пондыны садитны картов. Сэтчö керкуас пырис воныс. Прокопьевичыс вель дыр ни эз вовлы воннэзас, а талун пырис, здоровайтчис, пуксис лабичö воныс бокö, дыркодь пукалiс шысеттöг. Пукалiсö кык вон, видзöтiсö, кыдз пызаныс весьтын стенаас «орсö» шондiлöн югöрыс — «кöчок».

Вель дыр сiдз пукалiсö кык вон, сэсся Андрейыс юалiс:

— Мый ни керан?

— Нем ог, — висьталiс Прокопьевичыс. — Шогала тай... — думайтыштiс и Андрейыслiсь юалiс. — А тэ?

— Разь он ни уджав лесникнас? — Андрейыслöн сьöлöмыс бытьтö сайкалiс воныс дынö, но лöгыс эз пет, кыдз вон вылö, кöр сэсся посадын некин эз вöв родняыс, кöда дынö позис бы петны да баитны-янсöтны шог и гаж.

— Уджала, — Прокопьевичыс пондiс гардны чигарка, сьöкыта ловзисис, ружтыштiс.

— Мый уджалан? — Андрейыс топ ачыс эз казяв мый горöтчис, веськыта баитiс. — Часöт отирыс эд вöрас оз ни котрасьö, некинöс лоис лось яйнас кутнытö! — и пондiс тшупны. — Кин сьöрья тэ сэтшöмыс, Пестер, и эм?! Мыля сэтшöм аскодя?! Асныра... Мый оз тырмы? Мыля отирыскöт он куж овнытö?! Сёйин бы няньсö да пукалiн гор вылын!

— Мый ме?! — паныт ыкöстiс Прокопьевичыс. — Сiдз и колö! Мед оз вöрöтö вöрсис мый оз ков!

— Тэ я мый я вöрас быдтiн мöссэсö, сiдз ны понда юрыт висьö? — рамыника ни юалiс Андрейыс. — Тэтöг отирыс вöрсис сёйисö, тэ дыр сёйöны, и тэ бöрын пондасö сёйны...

Прокопьевичыс жаднöя кыскис горшас табак тшынсö да висьталiс:

— Виньдасö! Öмлöсаласö!

— Ми тэкöт öмлöсалiссес и эмöсь эд... — сьöкыта ловзисис Андрейыс.

Гажа эд öтöрас. Шондiыс видзöтчö öшынöт, кыдз юалö: «Эшö тiянöс буржыка шонтны или оз ков?»

Прокопьевичлöн чужöмыс пиньöвтчис, киыс пондiс дрöжитны и кисис чигаркаыс усис джоджас. Керкуын шы эз ло, кылiс кыдз Андрейыс горшын лолавтöнняс шутнялыштлiс бытьтö гагок, а Прокопьевичыс кынöмын дзользьышалiсö кишкаэс. Мужиккес эшö пукалыштiсö, дзик öммезаныс видзисö ва. И вöлись Прокопьевичыс перыта чеччис да петiс керкусис.

Андрейыс кольччис гортас. Недолыт сылö лоис воныс понда, кöр Мишаыс увья отирыс Андрейыс вылö ни лöгалiсö, кыдз вöлi тöн: рытнас пырис Якуня Ваня да пондiс корны öжын. Öжыныс Андрейыслöн кытöнкö эм, но кытöн? Кытчö пуктiс, оз тöд — вунöтiс, а Иваныс сэтшöм, что сет сылö öнi жö, кöть кытiсь вай. Андрейыс пондылiс бы кошшыны мый корисö, но эз адззы, сэк Иваныс и горöтчис:

— Шыш тэнчит босьтан! Воныт кодь жö лоин! Висьталiс и петiс керкусис, мунiс и сэсся, натьтö, дыр оз лок — ылi пондас орддьыны керкусö, эшö отирыслö модьны, что Андрейыс Пестерыс кодь жö...

— Ась... — öнi воныс бöрсянь висьталiс Андрейыс. — Аслас юрыс эм, кыдз колö, мед сiдз и олö.

Одзлань оланыс овсис. Прокопьевичыс сэсся лесникнас дыр эз ни уджав: ветлiс лесничествоö, пуктiс заявленнё, босьтiс вина, юис пöт, узис кытшöмкö посöдзын, чеччис да локтiс гортас и иньыслö висьталiс, что талунсянь, шабаш! Ась кинкö мöдiк лесникалö.

— Эз вермы тэнö вöрас ошыс сёйны! — мурзьыштiс Таняыс.

Шы эз сет мужикыс, петiс керкусис, мунiс соседас, шуис:

— Вай куритам...

— Нютшкы вешьянсит! — веськыта висьталiс соседыс, кöдалöн зородiсь öшлiс яйöн сера кöзичаыс.

И бöра одзлань олö Прокопьевичыс: гортын иньыс видö, йöзын отирыслöн жаль сетны табакыс. Кувтöдз бы мортыслö посадын овны, кыдз понлö, кöдö хозяиныс репöтö гортсис, а сiя оз сайлась отирыс синнэз одзись, сё шатласьö, кöр и картовсö бы некин ни оз отсав садитны, да бöра адззисьöны кодя отирыс, жалейтöны иньсö, Таняыс эд некинлö и нем умöльсö эз кер.

Садитiсö таво картов, бергöтчисö и видзöтöны — гожум ни. Таво гожумыс шоныт, сэтшöм гажа, зэррес ылi орддисö посадсö, быд лун асывсянь сёр рытöдз шонтö шондi, косьтö мусö, кöда сiдз косьмис, что пондiс ни потласьны, садниккезын умöля быдмис картов, ыббез вылын кельдöтiсö сюэз, видззез вылын эз нюжалö туруннэз. Отирыс уджалiс, только Прокопьевичлö вöлi керны нем, кöр лесникалöм бöрсянь колхозас эз ни мун уджавны, босьтiс пенсия, котрасис магазинö да Нюралiсь корис: «Нюра, кисьт».

Гажа вöлi посадас. Томмес öксьывлiсö гажöтчыны уджалан бöрсянь вичкуыс дынö, кытöн пыр вöлi гажа, и нывкаэс да зонкаэс быд год, одз тулыссянь сёр арöдз рыттэзнас öксьывлiсö сьывны да йöктыны.

Чулалiс кузь гожумся луныс, кыдз мыдзис не уджсянь, а жарсянь, водтöтiс узьны ыббез и видззез, ачыс шондiыскöт саясис вöр сайö, колис рытсö, медбы сiя сьöкыт удж бöрсянь вичкуыс дынын гажöтiс томмесö, и томмес гажöтчисö, кылiс чиння голос:

Милöй пет, милöй пет, Меным, сьöлöмтö тэ сет, Ме сьöлöмтö босьта Да гор вылын косьта.

Прокопьевичыс бöра узис магазин посöдз дынын, саймис сьыланкывсянь, осьтiс синнэсö, сьöвзис, бобгыштiс: «Сета ме тiянлö сьöлöмöс!.. Видзчисьö...», чеччис да мунiс Нюраэзö, кöда магазинсис рыттэс кежö гортö пыр кыскавлiс вина и юктавлiс нiйö, кинлöн сёр рытöн винаыс вылö косьмис горшыс. Мужикыслöн деньгаыс эз ни вöв, но локтiс Нюраыс дынö, кöда эшö эз узь, пукалiс öтöрись посöдзаныс, видзöтiс Прокопьевичыс вылö, кыдз морт вылö, кöда вылö петiс лöгыс и серöмыс петiс — брезгуйтiс, но нем эз шу.

— Нюра, горшö косьмö, — вузасисьыс одзын пондiс никсыны Прокопьевичыс.

— Косьмö кö горшыт, мун öшымöсыс дынö да ю, — висьталiс Нюраыс, кöда посадас эна годдэзö вöлi медбогатöй: нинкöммез эз новйы, аскыйöм дöраись сарафансö эз пасьтав, няньсö сёйис калач кодьö, Нюраыс том, моросвевья — пизьö-олö. Видзöтыштiс инькаыс вылö Прокопьевичыс, тöдвылас усис зонкася оланыс, медодз Таняыс, иньыс, кöда томнас мыйöнкö вачкисис эта Нюра вылö, и дума ни мужиксö нерис-бöбöтiс: «Эх, одзöв пöрисьми! Окыштны бы тэнö, Нюрка!» Матын вöлi Нюраыс да ылын: Прокопьевичыс думаэзнас асьсö только нерис, бытьтö орсiс, то асьсö гажöтiс, то дойдiс, то Нюрасö окалiс бы, то лöгыс петiс. Тэрмöтiс бы инькасö, медбы öнi жö керкусис петкöтiс бутылкасö, а эз сэтöн нер, но инькаыс эз тэрмась пöрисьжыксö веськöтны, кöдалöн висис юрыс, вöлi недолыт, синнэсö эз бы и осьт. Нюраыс малалiс гладь чужöмбансö, шыннялiс да норасис, что талун-ашын бöра пондас ковны ытшкисьны, куртны, что луннэсö не ойесö оз понды адззывны, пондас ковны уджавны кöбыла моз. Кин жö бы шуöма овны деревняас?.. Мыйлö бы пессьыны аслат кынöм понда?

— А тэ эн пессьы, — висьталiс Прокопьевичыс. — Адззы сэтшöм жöник, кöда оз понды уджöтны! — серöмтчыштiс и содтiс. — Кыдз менам иньö... Гожуммезнас турунсö оз кер, и öнi, видзöт, гортын пукалö.

— Счастливöйöсь тiйö отирыс, — пыдына ловзисис Нюраыс.

— Ог тöд... Пыр тай ме вылö горзö, мортö оз пукты, ― висьталiс пöрисьжыкыс. — Тэ кодь вылö бы колöм гöтрасьны!

Модисö мый оз ков. Рытыс нач югыт, бытьтö недыр кежö кунис синнэсö да суналiс. «Милöй пет, милöй пет...» — вичкуыс дынын сьылiс нывка.

— Нюра, — кеймисис вузасисьыслö Прокопьевичыс. ― Горшö косьмö...

— Деньгаыт эм?! — юалiс Нюраыс.

— Отсала турунсö керны... — кöсйисис пöрисьжыкыс.

— Тэ кодьыс и отсалас... — öмсö пиньöвтiс томжыкыс, кыскис эшö мымдакö кадсö да вöлись петкöтiс керкусис бутылка и кыдз шупкис мужикыслö да висьталiс:

— Ю да одзлань этчö эн вöвлы! Магазиныс менам абу гортын!

— Дугды, Нюра, — кокнита горöтчис Прокопьевичыс, пиас дзебис бутылкасö и иньдöтчис гортланяс.

Невна кыдз пемдыштiс. Коккез увтын чирзiсö кöбывкаэз. Вичкуыс дынын сё орсiсö гармошкаöн, сьылiсö нывкаэс. Прокопьевичыс гортöдз эз мун, кежис магазиныс сайö, пуксис петшöррез коласö песжуг вылö, осьтiс бутылкасö да юис мымдакö винасö, коддзыштiс, но нач эз веськав: шогалiс аскодя шогöтöн, кöр эз тöд кыт öддьöнжык висьö, и мылякö медöддьöн недолыт вöлi сьöлöмыслö, кöда моросас пессис, чеччалiс топ мыйиськö полiс, или кытчöкö тэрмöтiс. Эшö кутчисьлiс юны, но винаыс эз тöр — гудыртiс сьöлöмсö.

«Эх Пестер, Пестер, — бутылкасö пуктiс бокас да шуис Прокопьевичыс. — Олiн жö мыйкö вылö. Пестер тэ! Прокурор эд вöлiн, мать твою душу! Но и мый?.. — сулис зырымсö, горöн кивзыштiс. — Эх!»

«Сi-i-iдз», — пельыс одзын бизгис ном.

«Прокурор эд, мыся, вöлi... Отирыс поннэз моз бöжжезнысö лэдзлiсö да бöр гöгöрöс нюлiсö, а ме! Пестер тэ, Пестер! Öнi не одзат, не бöрат... Быдöнныс кöсйöны да вöзйöны смерть, видзчисьöны кöр кула, а кыдз кула, гробсö оз керö: кутасö коккезöттям, кыскасö ольланяс, чапкасö ракаэслö и — быдöс сэтöн!»

«Сi-i-iдз», — номыс бизгис мöд пельыс одзын.

«Иньö и сiя вылам буржыка оз видзöт. Мыйлö бы колöм сэтшöмыс вылö гöтрасьны?! Ышö эд, мать твою... Öндрейыскöт мырддясим... Ась Öндрейыс бы и гöтрась да ов... Лöсялiсö бы кык вежöм, а ме бы! Гöтраси бы... — падмис-джöмдiс баснинас, шоччисьыштiс да висьталiс. — Гöтраси бы эта вылö, э-э-э... чиркöвкаыс вылö или пуксипинкасö бы босьтi. Нiя кыкнанныс кодяöсь вöлiсö, а эта...»

Сьöлöмыс пессис, пышшис бы кытчöкö. Веськыт кинас ниртыштiс мороссö, бöра пондылiс бы юны винасö, но юнытö эз ни тöр. Петшöррес коласын чирзiс кöбывка, котрасис шырок.

«Сi-i-iдз», — юрыс бöрын ни кылiс номыс.

«Ась!» — сьöвзис Прокопьевичыс, унажык думаэзнас эз понды баитны, кöр тöдiс вель уна, мый эз тöд иньыс, и эз тöдö посадсис отирыс.

Некöр и некинлö оз висьтась и оз понды висьтасьны, нельки оз понды думайтны, ась думаэсö оз кыв нельки номыс, мед кулас да мöдöр югытас не чортыс, не еныс оз пондö тöдны, кыдз уджалiс прокурорнас и мый керис да адззылiс, кыдз отирсö нуöтiсö эмись и абуись — нуöтiсö отирсö и лыйлiсö... Вийисö... Сьöкыта ловзисис Прокопьевичыс, тöдвылас сiя, кыдз мымдакö усис уджавны Кудымкарын, но и вот... Сэтчин медуна и вийисö отирсö и мукöдсö, натьтö, нач весись, кöр быд мортыс эз жö сымда гардчы Курайыскöт и Распутиныскöт, но уна эз баитö...

Пукалiс Прокопьевичыс, дзир öтнас магазиныс сайын пукалiс, некин сiйö эз адззы и эз кыв, олiс думаэзнас, кöдна чувйисö сьöлöмсö, тöдвылас усис одззася уджыс, только совестьыс эз стыдит, кöр мортыс лыддис, что уджалiс — долг ассис тыртiс, честнöя бытьтö уджалiс.

Честнöя уджалiс, а öнi сьöлöмыслö вöлi недолыт да не только винаыссянь...

«Сi-i-iдз» — уннялiс ном и лэбалiс Прокопьевичыс гöгöрын. Вичкуыс дынын сё кылiсö нывкаэс — гажöтчисö томмес, топ эз лöсьöтчö узьны, видзчисисö, кöр петас шондiыс. Прокопьевичыслöн оныс эз пет, сьöлöмыс эз кыскы гортас, отирыс дынö эз бы мун, а пукалiс магазиныс бокын, баитiс аскöттяс, то видiс номсö, то куритiс.

Рытыс нюжалiс, öтлаасис ни югыт ойыскöт. Петшöррес коласын чирскисö кöбывкаэз, видз вылын герчкис кай, мымдакö ыркöтыштiс, но етша.

Код мортыс эз казяв, кыдз чулалiс кадыс. Ойшöр гöгöрас вичкуыс дынiсь серавтöн мунiсö томмес. Дугдiс дзикöтчыны гармошкаыс. И вöлись Прокопьевичыс чеччис местасис, нюжöтчис, джыння бутылкасö винанас дзебис петшöррес коласö да сiдз, медбы некин эз адззы, и иньдöтчис вичкуыслань. Сьöлöмыс топ моросас пессис öддьöнжык, кытчöкö тэрмöтiс. И мыйлö бы мунiс вичкуыслань, ачыс эз тöд, оныс эз пет, гортын кöть ойнас, кöть и луннас нем вöлi керны. Топ мымдакö пемдыштiс, но коккес увтын тыдалiс бура, тыдалiсö чаггез, нять комоккез, гижöттор, кöдö кинкö шупкöм туёкыс вылö.

Прокопьевичыс жагвыв мунiс и бура адззис вичкуыслiсь пöввезöн дорöм öшыннэсö.

Котöртiс кинлöнкö сьöд кань — поперегалiс туйсö. Юрыс вевдöрöн быркнитiс-лэбзис ойся кай, лэбалiсö жуккез и гаггез. Прокопьевичыс жагвыв локтiс вичкуыс дынöдз, сувтчыштiс сэтчö, кытчö дзеблiсö гöрддэсö, кöднö лыйлiсö гражданскöй война коста. Шойнаокыс гöгöрö керисö оградаок, и сымда и эм, сэсся некин этчö оз видзöт. Прокопьевичыс топ эз адззы оградаоксö, а мылякö синнэс кыдз асьныс сё видзöтiсö вичку öшыннэзас и сэтöн... Вичкуыс öшынöт мыччисис чорт. Чортыс чорт и вöлi: сувтiс öшын косякыс вылö, шынньöвтiс — пиннес гер, гöна, сюра, бöжа и сьылыштiс нывкаэс моз жö:

Милöй лок, милöй лок,

Чожöсь тэнат кыкнан кок...

Сьылыштiс чортыс и ыкöстiс: «Прокопьевич! Тэрмась, ёрт! Ме тэтöг гажтöмтчи эд!» — Э, сволочь! — Прокопьевичыс сьöвзис, моросас берездасис сьöлöмыс, кунис да бöр осьтiс синнэсö, но чортыс эз öш, öвтыштiс бöжнас, синнэс був-бав.

— Мый тэныт месянь колö?! — чортыскöт пондiс баитны мортыс, кöть аслыс эз верит, что вермас пантасьны сюра-бöжаыскöт.

— Колан! — чортыс горöн висьталiс. — Ме бы тэкöт мыйкö баита!

«Лешöй пиян! Мый сылö месянь колö?» — юрыс бергöтчыштiс Прокопьевичыслöн.

— Сiя, колö, кöда тэныт колö, — шуис чортыс и öшис, но сы местö сэк жö öшынас мыччисис еныс ни: лэчыт синнэза, лёк чужöма — шынь эз кер, чортыс моз пиннесö эз мыччав, видзöтiс, бытьтö лöсьöтчис вартлыны, сiйöн и корис дынас, ыкöстiс:

— Лок татчö! Эй, Пестер!

— Нем ме тэ дынö эг öшты, — енсис повзис Прокопьевичыс, öмас кылыс эз бы и вöрöтчы, и коккес эз кывзiсьö, пышшис ни бы эстiсь, но эз вермы пышшыны, а еныс сё корис дынас, кинас ни öвтышалiс:

— Лок татчö, Пестер!

Вöлi лöз-югыт, но некин отирыс эз тыдалö — узисö. Прокопьевичыс кытöн сулалiс, сэтчö и тувдiс.

— Лок татчö! — вичку öшынсянь ыксiс еныс. — Вöрöтчы! Некöр менам тэкöт.

Код Прокопьевичыс, но кодыс пондiс ни öшны, вежöртö ни, что мыйкö сыкöт не сiдз, бöбмö я мый я, и зэгнитiс юрнас, кунис да осьтiс синнэсö, только бöра ни чортсö адззö, кöда сералö да ыксö:

— Мый нö тэ, Пестер? Лок ни татчö!

«Видзчись, сiдз и котöрта... — Прокопьевичыс думаэзнас баитö чортыскöт. — Сюра-бöжа чорт. Сотны колöм тiянöс кöркö вичкунаныт, сотны!»

— Тэ мый сiйö баитан, Пестер?! Енсö и менö сотан бы! Видзöтам кыдз эшö сотан, кöр кутам да асьтö пöжалам биыс вылын. Лок татчö! — чортыс кылö сылiсь думаэсö, ассис гардö.

Узьö посадыс, нем оз кыв и оз адззы. Асывлань пондö дзуз видзны ни шондiлöн рöмыс. Прокопьевичыс сулалö вичкуыс дынын и кывзö чортлiсь баснисö, а чортыс сё ыксö и корö дынас. Видзчисьтöг китöстiс петух. Чортыс вичкуыс öшын одзись öшис. Прокопьевичыс кыдз вöлись пондiс саймыны, но ачыс асьсö кыдз сё тöдiс умöля, сьöлöмыс сё пессис, дума полöтiс, бытьтö сiдз и мыччисис чортыс и бöра пондiс бы корны дынас, а мыйлö бы?

— Быдöнныт öткодьöсь! — синваэссорöн бобгыштiс Прокопьевичыс. — Отирыс, еннэс и бессэс öткодьöсь. Мыччала ме тiянлö, пон табунлö! — ыкöстiс и шагньöвтiс — коккес кыдз мезмисö, киыс кыдз ачыс пырис зепас, кыскис истöггез, мышкыртчис да коккес увтiсь босьтiс гижöттор, сибöтчис вичкуыс угöв бердö, угöвсö мымдакö жугдöмась-разьöмась нето челядьыс, нето ыджыттэс, тёсöн дорöм стенаэс сэтшöм ни кöсöсь, что шупкы бичир, и биыс сэтöн жö лякасяс да пондас сотны...

Посадыс узис, нем эз адззы и эз кыв. Прокопьевичыс дзир-бар керис öтмöдöрö, öзтiс истöгсö, бисö вайöтыштiс гижöтыс бердö, мыйсянь öзйис гижöтыс и... Биыс мортыс киись кыдз ачыс ни лэбзис кöс стенаыс дынö и жаднöя кутчисис дорöм кöс тёссэс бердö.

Биыс ловзисис пым руöн Прокопьевичыс рожаö.

— Ха-ха, Пестер! Мый керан? Котöрт гортат, а ме вöтча сьöрат, — вевдöрись вичку öшынын бöра мыччисис чортыс, серöмтчис, чеччöвтiс вевдöрсяняс и пондiс вöтчыны Прокопьевичыс сьöрö, кöда шупыт шаггезöн мунiс ни гортö.

54

Отирыс узисö. Биыс нюлiс вичку угöвсö. Прокопьевичыс вичкуыс дынсянь пышшис гортас. Сьöрсяняс чеччалiс, топ йöктiс — вöтчис чортыс, сералiс-нерис, ошшасис, что мортыс сьöрись оз кольччы, пондас овны Прокопьевиччезас.

— Он тэ меным ков! Он ков! — киэзнас öвттöн Прокопьевичыс кайис посöдзаныс, сыбöрын шагньöвтiс пытшкись посöдзö, пырис керкуаныс.

Чортыс кольччис посöдзас.

— Чеччы, — иньыслö висьталiс Прокопьевичыс. — Чортыс öзтiс вичкусö.

— Мый?! — саймис да повзис Таняыс.

— Вичкуыс сотчö! — ыкöстiс Прокопьевичыс и водiс западня вылö.

— Кусöтны колö! — керкуас öшис Таняыс, но мужикыс эз шыась, только пишкис нырнас. Немымда кадыс эз чулав кыдз öзйис вичкуыс, сы гöгöрын котрасисö ни отир. Биыс эшö эз вöв ыджыт, бытьтö кай паськöтöм борддэсö да кокасьö или нюлö сера керресö, нюжласьö вывлань. Пыкис ни сэтшöм жарöн, что матын сулавны эз ни позь.

— Васö вайö! Васö вайö! — кижган голоснас ыксiс чукыля кока Егорыс.

Егорлö киас сетiсö тыра ведра. Сiя койыштiс васö биыс вылö, топ сьöвзис и бöра ыксiс, медбы вайисö васö.

Кин да кöр и саймис, котöртiс ведраöн, а кöда кыкöн, а кöда повзьöмувья киас босьтöма кöш и кöшнас васö койö биыс вылö.

Отирыс синнэзын бöб югöр, отирыс чирзöны, кивзöны, котрасьöны, öтамöдныс вылö люкасьöны. Кин мый вермö, сiйö и керö — койöны ваöн бисö, но сiя вынсялö, гугйö ни.

Медöддьöн биыс дынын уджалö Егорыс, кыдз колхозын жö уджалö: тыра ведраэзiсь койö бисö, но биыс кыдз ловья, кыдз кай быркайтö сё вылöжык и вылöжык, чепсасьö увдöрсянь вевдöрö, кутчисьö ни вевдöрись öшыннэс бердö, сэтчинсянь лэбзьö мöд стенаыслань, паськалö потолокыс дынöдз и пондö гардчыны пытшкас, пондö öддьöнжык гугйыны.

— Васö вайö! — ыксö Егорыс — синнэс бöбöсь.

— Кристос! Господи! — ышки-пойки котрасьöны инькаэс, юрбитöны енлö.

Кöс жар. Ловзисян, и руыс сотö морос. Минута — и биыс дынас матö оз ни лэдз. Жиля-жоля öшыннэзiсь киссисö ни стеклоэз.

— Васö-ö-ö!! — ыксö Егорыс, и вешшö ылöжык биыс дынiсь.

— Кытöн кладовщикыс?! Кытöн Öндрейыс?! Мыля сiя абу?! — кинкö чирзö. — О-о-о!

— Колiс бы пырны вичкуыс пытшкö да пондывны сэтчинсянь ванас резны! — öмыс пиньöвтчöм Якуня Ванялöн, моросыс гав.

Вичкуыс сотчö, отирыс котрасьöны, баитöны Андрей йылiсь, кöда синнэз одзын абу. Сотчö вичкуыс...

55

Ежели Прокопьевичыс босьтiс пенсия да эз уджав да, кыдз шуöны, ассис пенсиясö — деньгасö кудзалiс угöлö — юис вина, то Андрейсö государствоыс эз верд, сылö колiс шедтыны няньсö, кöть и эз ни вермы бы шедтiсьнытö томмес моз, эз ни уджав сьöкыт удж, уджалiс складовщикöн. Гожумнас луннэзнас керны вöлi нем, кöр виль сюыс эшö эз быдмы, эшö колхоззэзас эз вундö и эз вартö. Сiдзкö, Андрейыс луннэзнас воныс моз жö весь олiс, и талун асывсянь лöсьöтчис ветлыны магазинöдз, петiс гортсис, мунiс вичкуыс дынöдз, но магазинöдззас локнытö эз вермы: только пондiс тыдавны магазиныс, только шагньöвтiс вичку угöлöдззас, видзöтö и адззö, что воныс öвтчö — одзалöм муннытö магазинланяс, ылiсянь тыдалö, что Прокопьевичыс кодыш, мунö и веськыт кинас öвтышалö, бытьтö бы кöдзö сю или кинлöкö мыйкö висьталö бы. Андрейыс винасö юö только вежалуннэзö, воныс моз курытсö оз былскы, а юыштас рюмкаись и пöт, а Прокопьевичыс кыдз пондас юны, дзик кöньöсö, кынöмас кисьтö, и мывкыдыс вежсьö — сьöвзьы да бергöтчы, медбы тэ бердö сир моз эз лякась да эз понды модьны, что мыля сiйö отирыс оз любитö, а мыля Андрейсö радейтöны. Абу и мед оз мыччись сэтшöмыс, и öнi Андрейыс вичкуыс дынсянь бöр бергöтчис гортö, локтiс, посöдзсиныс босьтiс чер и питкыльтiс вöрлань, медбы шедтыны кышньöг, сыбöрын пондывны керны туис. Луныс вöлi тöння кодь жö мича, тöння моз жö пöжалiс-сотiс шондiыс, пуэз вылiсь эз вöрзьы лист, эз пöльышт тöлок: Андрейыс тальччис и пымалiс, тальччис и öвтiс киэзнас — тышкасис лёк лöдззезкöт, кöдна уннялiсö юрыс гöгöрын, пуксисö чужöмö, спинаö, вешьян вылö — сёйисö бы, вир юисö, курччалiсö бы да быдöнныс и öтдруг. Бур вöрын öвтчыны, но не гожумнас. Андрейыс пымалiс, йöрнöсыс ни вамис, пондiс косьмыны горшыс, а юнытö вöлi нем: шороккез жарсяняс косьмисö, а пантасяс кö кытöн вагöпок, васö юнытö оз туй: ваыс вевдöрын уялö вежрöма лягуша паськöм, ваыс гöгöрын бизгöны-лэбалöны быдкодь гагыс, и ваыс пытшкын сiдзжö уялö быдкодь гаг. Гаг да гаг... Андрейыс чожа мыдзис, мунiс-вöрöтчис ни дыш гаг моз, некытшöм кышньöг эз вермы шедтыны, только чер ороп вылö кералiс кыдз бердiсь рубец, сiйöн и локтiс гортö и сiдз мыдзис, что пондiс висьны сьöлöмыс, кöда оз-оз да висьö, кыдз сьöлöмыс бердö кутчисяс кытшöмкö зверь и нималö и нималö... — Ох-хо, пöрисьман, Андрей! — Андрейыс шлапкисис посöдзö, пöввез вылö, кöдна шондi, гажыс одзын вöлiсö пым кодьöсь, бокас пуктiс черсö, долоньнас кымöсыс вылiсь чышкис ньылöмсö, но эз ешты шоччисьнытö, кыдз керкуись петiс иньыс да пондiс сярзьыны:

— Кытöн вöлiн? Мый керин? Спирьяыслöн кöзаыс садникас пыралöм да капустасö сёйöм!

— Мыля кöзаыс пырас? — иньсö эз вежöрт мужикыс.

— Стыниннэсö кинкö шедтöма.

— Мыля и кин шедтас?!

— Ме кысь тöда?! Шедтöмась!

Стыниннэз дорны — унажык баитны. Лöсьöтiс йöрсö Андрейыс, бöра пукалыштiс посöдзаныс, видзöтiс кыдз шондiыс лэдзчисьö вöрланяс. Чикиссез синнэсö бöбöтiсö, сьылiсö да лэбалiсö вичкуыс гöгöрын.

Андрейыс лöсьöтчис ветлыны вичкуыслань, кöть сэтчин нем сэтшöмыс эз вöв, медбы позис ойнас гусявны, да и ыбöсыс бердын öшалiс замок да и эм сторож — этö Осип Митрей, дыш мужик, кöда мунö да тальччö и оз, тальччö и оз, рытсянь вовлас вичкуыс дынö, бöр мунас гортас, водас и узьö. А веськыта кö висьтавны, посадын некин оз гусясь, кöть мортыс адззис бы нинкöм ыжда золото, сэтöн жö сьöвзис золотоыс вылö, кыдз сiттор вылö, и мунiс сельсоветö да висьталас, что этчин, улицаас, эм золото, мунö да босьтö, меным сiя оз ков, но сё жö вичкуас сюыс вель уна, эшö эм ящик-мöд вина, и Андрейыслöн, кыдз складовщиклöн, сьöлöмыс кыскис, медбы рытнас дзарнитны вичку ыбöсыс бердiсь замоксö да вöлись водны и шоччисьны.

Шондiыс пуксис, кымöрыс ашын кежö бöра эз кöсйись зэрны. Вылын лэбалiсö чикиссез, сьылiсö. Том отир локтiс уджалансянь и эшö эз ештö рыт кежас локны вичкуыс дынö. Андрейыс ветлiс, кытчö лöсьöтчис ветлыны, водiс посöдзö кровать вылö да сэкжö, ланьтiс крепыт онöн и пондiс вöтасьны, бытьтö бöра мунö вöрö, мунö тöдтöм туй кузя. Мунiс, мунiс и öшис — омöн пемыт вöр, юрыс вевдöрын паськöтчис сьöд кымöр, пондiс мурзьыны-гымавны, и бытьтö бы кинкö Андрейыслö висьталiс, что эта кымöрыс сiйö чарöтас — вияс. «Ась вийö!» — думайтiс Андрейыс, кöр бытьтö бы смертьсис эз пов — öтпыр эд кувнытö, только вот вунöтiс иньыскöт прощайтчыны, кöдакöт вель дыр ни олöны, но мымда жö олöны бы öтлаын? Петö, что вель уна олiсö торйын да и öтлаын овтöн мукöдпыр керкуас кыкöн кыдз эз тöрö — öтамöднысö кыввезнаныс дойдiсö. А кымöрыс вирдалö и гымалö...

Дыр я узис Андрейыс, дыр я вöтасис öткодь вöтсö, натьтö, эз вермы бы висьтасьны. Саймöтiс иньыс, ыкöстiс:

— Сивöй! Вичкуыс сотчö!

— А! — синнэсö осьтыштiс и Лизаыслiсь адззылiс только ыбöсыс коласiсь спинасö ни.

— Сотча-а-ам!! — резьöтiс голос.

Посöдзö осьта ыбöсöт пырис ни би югöр да павьялiс джоджын.

Андрейыс кроватьыс вылiсь чеччыштiс бы, но сэтöн жö кивнитiс да кутчисис моросыс бердö: веськыта сьöлöмас кыдз кинкö заргис йыла пуртöн — не ловзисьны, не ыкöстны.

— Сотча-а-ам!! — кылiс бöб голос.

Андрейыс ловзисис бы пыдынжыка и эз вермы: синнэс тувдiсö.

Посöдзын кылiс ни, кыдз гугйис-ургис биыс, тачкöтiсö-сотчисö кöс керрез, патшкис тшын дукöн. Андрейыслöн юрыс уджалiс, думаэс пизисö, кеймис: «Кöть бы сюыс эг сотчы! Сюыс бы эг сотчы!» Бытьтö бы биыс сотас только вичкусö, но вермас кольны вичкуыс пытшкись сюсö. Андрейыслöн сьöлöмыс öддьöнжык висис сюыс понда, эз думайт, что биыс гугйö ни, гардö ни биыс гöгöрын тöв, öтмöдöро койö бичиррез да головняэз, сiдз бы и шупкö матiсь керкуэс вылö, öзтö сiсьмöм короминнаэз, и Андрейыслöн керкуыс эд абу ылын, короминнаыс важ ни. Андрейыслö посöдзас эз тыдалö отирыс, эз тыдав вичкуыс, кöдалöн сотчис ни быд пельöсок, биыс чепсасис ни крышаыс дынö, но кытчöдзкö жечись дорöм короминнаыс эшö видзис бисö, эз лэдз сэкжö нетшкöвтчыны вевдöрö, судзöтны кымöрсö, матiсь керкуэсö, эз лэдз вывтi шупкавны головняэсö.

Андрейыс думанас бы котöртiс вичкуыс дынö, но мороссö зэлöтiс зубытыс, сiйöн местасис полiс вöрзьыны, только лолалiс сё пыдынжыка да пыдынжыка и недыр мыйись моросас топ лоис личытжык, пондiс вермыны ни кинас ниртны сьöлöмыс весьтöт.

— Сотча-а-ам! — посöдзаныс ни ыкöстiс иньыс. — Керкуным öзъяс!

— Мать сiйö! — кивзыштiс Андрейыс. — Мед сотча öтлаын керкунас, только бы сюыс...

Сё эд сюыс вöлi мед ни жаль: няньтöг медсьöкыт овны, гажтöм — этö тöдiс Андрейыс, вель уна овтöнняс тшыгьялiс.

Дженыт гожумся ойыс. Шондiыс топ эз ешты пуксьыны, асывланяс кымöрыс бöр ни пондiс орсны югытöн. Чожа саймис гожумся асылыс и пондiс миссьыны кыз лысваöн. Сё эшö видз вылын герчкис кай, а вичкуыс местын шаялiсö ни шоммез, бедаыс эшö лолалiс кизерик лöз тшынöн, курöтiс синнэз — пидзыртiс синваэз. Чирзiсö да лажмыта лэбалiсö чикиссез, кöдна отирыс моз жö ойнас эз узьö, и öнi горзiсö асмознаныс — пияннэзныс понда каёккез горзiсö, кöр вичку крышаыс бердö ляклiсö поззэз. Каёккес лэбалiсö и сiдз бы и уськöтчисö биа шоммес вылö.

Локтiс асыв. Отирыс öвтчисö асланыс керкуэз дынын, кöр кольмисö биыс дынын, синнэзаныс тыдалiс сэтшöм мыдз да шог, что горзыны ни эз вермö. Быдöнлöн пеллез одзын сё эшö кылiс шы «Сотча-а-ам!!», и чалöтiс бытьтö бы биыс, гугйис.

Сотчис вичкуыс, но некинлöн эз сотчы керку — эта вöлi бур, эта бурмöтiс отирсö, кöсйис-вöзйис олан.

Мыччисис шондi. Талун сiя тöння моз жö лэбтiсис вöрыс сайсянь и сэтöн жö топ повзис, чужöмыс тырис аскодя гöрд вирöн и чожа бöр саясис кымöр сайö, кöда пондiс лэбтiсьны вöрыс сайсянь, лэбтiсис жагвыв, паськалiс и дыр мыйись öшöтчис посадыс весьтö да койыштiс гырись да шоныт зэрöн, кыдз койыштiс, сiдз муыс вылiсь и гардыштсис бусыс.

Отирыс вунöтiсö ни, кöр зэрис медбöрьяись, кеймисö еныслö — корисö зэрсö, а сiя эз вöв, а кыдз ойнас сотчис вичкуыс, сiдз асывнас одзся-одз и зэрмис, койыштiс кымöрыс сотчöм вичкуыс местö ведрапонiсь моз ваöн и кусöтiс шоммесö, швачкис-вадiс пöимсö, миссьöтiс тшын дука русö и посадсö.

Дыр эз зэр — час эз чулав кыдз пондöтчис зэрнытö и дугдiс. Вешшис кымöрыс посадыс весьтiсь, и вöлись мыччисис шондiыс, кыдз ештöма ни миссьыны рожасö да быд вынсис пондiс кисьтыны югöр, сук лысваыс пондiс пöрны парö.

Отирыс лöсьöтчисö мунны уджавны, баитiсö кыдз да мый и мыля вермис öзйыны вичкуыс, медодз томмес коласын кылiс басни, что рытнас сёрöн вичкуыс дынiсь адззылiсö Прокопьевичсö, кöда гардчис мыйкö вичкуыс гöгöрын. Мый бы сiя öвтчис, эз я лэдз бисö?.. Но баитiсьсö сэтöн жö öмалiсö — висьталiсö, что нем лёбны мый оз ков, кöр эз адззылö сiя я лэдзис бисö. Эшö кинкö баитiс, что бытьтö бы эшö тöн асывнас складовщикыс вичкуас пыралiс винала и вермис эд сiя уськöтны бичирсö.

— Быдöс вермас лоны, — сьöкыта лолалiсö инькаэс.

Бедаыс гöгöрын пыр уна басни, сэк сьöкыт вежöртны кытöн правдаыс, кытöн абу. Вот милицияыс адззас кин керис...

А милицияыс сэтöн и эм ни: зэран кымöрыс только ештiс вештыны посадыс весьтiсь, но сё эшö öшалiс матiсь вöррес весьтын. Эз ешты зэрыс бöрсянь шондiыс быдöс косьтыны сук лысвасö, туйыс вылын эшö эз вöв бусыс, кöдö зэрыс швачкис-лязiс недыр кежö, а Кöсланьсянь Пальникö пöльтiс ни машина, кöда ужнитiс осьта öма инькаэс одзöт, сувтiс сельсовет öшын увтö, машинасис петiсö морт-мöд милиционеррез и пырисö сельсоветö.

Вöлi бöра жар ни. Сельсовет посöдз дынын öмсö осьтöмöн, кывсö нюжöтöмöн чашыктiс-лолалiс пон. Посöдзын павьялiс сотчöм дук, бытьтö пöжалiсö нянь. Андрейезлань бордпавкйöн котöртiс ни сельсоветсис сторожикаыс. И чожа Андрейыс бледыник чужöма, кушкыртчöм, пасьтасьöм чочком йöрнöсöн, сивöй юрсиöн жагвыв ляшмасис сельсоветыслань. Нач ни старик вылö вачкисис Андрейыс, кöть и годдэслö эз бы ков сэтчöдз пöрисьтыны мортсö, кöр сы годсяэс эшö котрасьöны чанёккез моз, эшö паздöны-уджалöны сiдз, что оз тöдö мый сэтшöм мыдз, а Андрейыс горбыля ни.

Андрейыс пырис сельсоветас, здоровайтчис — кижгыштiс, голосыс сибдiс, чужöмыс бледöтiс öддьöнжык.

— Андрей Григорьевич, — синнэсö мöртiс Андрей вылö милиционер. — Пуксьö.

— Эг эд мыдз, — шыасис Андрейыс, но пуксис стул вылö, пыдынжыка ловзисис, сьöлöмсö бöра чепöльтiс шог.

Сельсовет öшынöт веськыта синнэзас видзöтiс шондi, югдöтiс чужöмыс вылiсь чукöрресö, йöрнöсыс увтiсь лыэсö, кöдна тыдалiсö йöрнöсыс пыр, веж-чочком дзормöм юрсисö, и сьöлöмыслiсь тёпкöтöмсö, кöда сiдз топ и лэбтышалiс йöрнöссö.

Милиционеррес сельсоветас вöлiсö кыка, ны синнэзiсь Андрейыс эз адззы, медбы нiя мымдакö жалейтiсö или дорйисö сiйö, тöдчис, что быдöсын виноватöйöн лыддьöны сiйö.

— Тэ вичкуас вöлiн складовщикыс?! — юалiс öтiк милиционерыс.

— Ме.

— Мыля нö сотчис вичкуыс?

— Ог тöд, — мыдз голосöн шыасис Андрейыс.

— Кин сэк тöдö? Кытöн вöлi сторожыс, и ачыт мый керин? Сторож... Кытöн бы сылö лоны? Мый бы ойнас керны сторожыслö, кöр сы понда и босьтö деньга, медбы синйис вичкусö, но сiдз эд эз вöв: луннэзнас Осип Митрейыс уджалiс колхозын — трудодень шедтiс, а ойезнас... Петö, что весь Митрейыс босьтiс деньгасö. И кин сэтöн виноватöйыс? Не складовщикыс я? Андрейыслö эд колiс видзöтны, медбы сторожыс ойезнас гортас эз узь, а бергалiс вичкуыс гöгöрын. Ох, Андрей!

Клап вачкис боккезас Андрейыс и нем эз висьтав милиционерыслö.

— Андрей Григорьевич, — нырнас пишнитiс милиционерыс. — Мый ачыт ойнас керин?

Мый керис?.. Тöдiс бы милиционерыс, мый керис, кöр öзйис вичкуыс! Но оз эд шу, что чеччынытö эз вермы... Эз висьтав, что сьöлöмыс висис, сё ни эд оз веритö. И шы сэтчö эз сет Андрейыс, только бöра сьöкыта ловзисис да öшöтiс юрсö.

— Ветлы гортат, а ми эстöн видзöтчам. Только некытчö эн мун, пондан ковны!

Андрейыс петiс сельсоветсис, сувтiс посöдзас да дыр видзöтiс шондiыслань, бытьтö шондiыссянь видзчисис отсöт, но бöрланяс дзар эз кер — бöрланяс посöдзсяняс тыдалiс вичкуыслöн местаыс, ыджыт кучаын сьöдöтöм сюыс, кöдö зэрыс нач абу вермöма кусöтнытö, и сюыс вылын бытьтö сотчöны масiссез — тшыныс гардчыштö-кайö, лэбтiсьö вевдöрö.

Чикиссес сё эшö горзiсö-сьылiсö да лэбалiсö сотчöм шоммес вевдöрын. Андрейыс жагвыв лэдзчис сельсовет посöдзсис, пондiс мунны гортас — тальччис и моросас вöлi зубыт, тальччис и гусьöн кивзышалiс, мунiс да шогсö вермис бы, мылякö тöдвылас усис быдöс оланыс. Быдöс мыччисис син одзас, медодз айыс, кöда вöлi лёк, сыбöрын мамыс, кöда етша жö кужис шыннявнытö, но любитiс зонсö, быд местаын жалейтiс, кöсйис бур олан, челядься кадыс усис тöдвылас, кыдз сiя учöтся-учöтöн пуксис вöв вылö да мунiс пинявны, кыдз велöтчис, сыбöрын уджалiс вичкуын, и попыс топ сулалiс йöрыс дынын, öвтышалiс юрнас да баитiс: «Бог простит, Андрей... Бог простит». «Отсалас я еныс? — думайтiс Андрейыс. — Отсалас я?..» Тальччис-шагнялiс воробей шаггез кузяöн, мöдпöв адззис Танясö и Лизасö, кöда вылын гöтрасис, кöда некытöн и некин вылö эз веж мужиксö, видзчисис бы кöть мöдöр югытсис, быдтiс зоннэсö, кольлалiс войнаыс вылö, но нiя эз локтö. Сьöкыт эд вöлi Лизаыслö, уна горзiс, но олiс, тöждiсис, кодя ой-лунсö эз адззыв, и Андрейыс тöждiсис, только асмознас, гусьöн, мед некин эз тöд, эз кыв — сьöлöмыс бердын видзис шогсö, кöда öнi висис и висис... Андрейыс мунiс гортас и вежöртiс, что бöра пуксьöтасö, сэсся оз ни лок гортö, и иньыс лоис сэтшöм жаль, что петiсö синваэс, визывтiсö рожабаннэзöттяс, пырисö öмас. Солаöсь синваэс... Андрейыс мунiс, эз тэрмась, кылiс ни, кыдз посöдзаныс кöин моз уннялö-горзö иньыс, натьтö, сы понда горзö.

Кыссис гортöдз, мыдзис и пуксис посöдзаныс да öшöтiс юрсö. Иньыс петiс: синнэс гöрдöсь, нырнас вирскайтö, баитö:

— Мый висьталiсö?! Или бöра нуöтöны?

— Кытчö нуöтасö? — ружтыштiс Андрейыс.

— Кытчö, кытчö... Кузь туйöттяс... Бöра колян!

— Некытчö ог коль...

Лизаыс ойзiс, кивзiс, сьöкыта лолалiс, пондiс модьны:

— Мыйлö тэ сюсö примитны кутчисин?! Мед кинлö колö, сiя бы страм уджсö и уджалiс! Видзöт эд кытшöм кольччин — лы да кучик, пöльышт и пöран! И тэнö жö кыскалöны...

— Нем ог ло! — лöга шуис Андрейыс. — Мый меным лоас?! Сто год эшö лолö оз пет, понда овны да отирсö керны.

Шондiыс шонтiс сивöй юрсö. Гажöтчисö воробейез. Эз ешты буржыка шоччисьны, пыдынжыка ловзисьны, кыдз бöра корисö сельсоветö.

Мунiс, пырис сельсоветас, милиционерыс юалiс только öтiкö:

— Андрей Григорьевич, мыйлö тöн асывнас пыралiн вичкуас?

— Нем сэтчинiсь эг кошшы. Öнi эд сюсö ог примит, вичкуас пыравлi только месяцнас öтпыр-кыкись... Тöн эг пырав.

— Отирыс висьталöны...

— Эз я отирыс висьталö, что морт вийи?! — недолыт Андрейыслö, да эшö лоис умöльжык.

— Ладно, — висьталiс милиционерыс. — Верман ветлыны гортö, но некытчö ылö эн мун.

Андрейыслöн кылыс йылын бергалiс, сiдз бы и горöтчис: «Может, тiян дынö горт керны, медбы не ветлöтны?!», — но шы эз сет. Мый ни сэтöн баитны?..

Андрейыс петiс сельсоветсис и бöра öвтчытöн мунiс гортас, мунiс и тöдвылас усис тöння вöтыс — эта гым кымöрыс, кöда кöсйис, натьтö, этö олансö, гымалiс вöтöн юрыс вевдöрын, вийис бы, но эз жö вий, но вермис и вийны, но и ась вийö! Мед... Мыйлö этадз овнытö — отирсö серавны. Чирзiсö воробейез, чирзiсö чикиссез, лэбалiсö гулюэз: кайеслö горе жö эд, кöр сотчисö поззэзныс. Кайеслöн асланыс оланыс, нiя оз кужö баитны, оз вермö норасьны и висьтасьны, но Андрейыс вежöртö кайесö, висьталö бы нылö: «Эд горзö, кагаэз, тiянлö кокнитжык бедасö вермыны: тэчат поззэз, пöжат пияннэз, арöдззас эшö ылын, быдтат пияннэзнытö и быдöс лоас бур, а ме...»

Бöра локтiс посöдзныс дынö, кайис посöдзас, пуксис, сьöкыта ловзисис, кывзiсьыштiс, кыдз моросас сьöлöмыс чеччалö, бытьтö сьöвталöм, пышшö бы и оз вермы пышшыны.

Öшын увтаныс кокасисö курöггез, китöстiс петухныс. Гажа луныс бы, но Андрейыс эз вежöрт гажсö — синва оланыс и быдöс сэтöн.

Пукалыштiс посöдзаныс — думаэс вермисö юрсö, мышкыртiсö моросыс бердöдз, и сэтöн кыдз кинкö бöрсяняс бöра сьöлöмас бытшкис. Ыкöстiс бы иньыслö, но эз ни вермы ыкöстнытö. Сьöлöмыс сувтiс, и синнэс дорö петiсö синваэз.