Вот эд кыдз овлö



Сёр ар. Погоддяыс то шоныт, гажа, то юр вевдöрын öшöтчасö рукйöсь кымöррез: кисьтö-зэрö, усьö лым да вились зэрö. Но и эта оз видз миянöс гортын, сьöлöм кыскö вöрö. Мийö эшö томöсь вöралiссес, но вöравны öддьöн любитам, унажыксö природа увья. Да и кыдз сiйö он любит! Вот вöр. Мусö шебралöма веж да биöн сотчана гöрд лист, кöда киссьöм пуэз вылiсь. Гажа. Вöрыс гора, быд шагыс ылö кылö, а ежели лыян, говкыс паськалö омöн му пасьтас, лэбзьö дюттясьöмöн, бытьтö пешлö ассис вынсö.

Ась мийö и часто вöрын, но эшö ог тöдö досповна вöрлiсь олансö, ог тöдö сылiсь быдöс тайнаэсö... И ежели мый миянлö ковсяс кывны нето адззывны вильö вöрын, мийö этö дыр ог вунöтö. И сыбöрын сьöлöм вылын видзсьö долыт, гажа чувство, что вöрыс оз сайлав миян одзись ассис олансö.

Ми ёртöкöт, Лёнякöт, часто ветлам вöравны узик кежö. Вöрын узьны бур. Öткö, сiйöн, что пöттöдз лолалан сöстöм воздухнас, мöдкö, адззылан и кылан вöрись олансö и лунсясö, и ойсясö. И эшö мийö Лёнякöт вöралам ыджыттэс моз жö, нельки невна веритам лешöйлö и асланым вöттэзлö. Эта веритöмсянь миян одзын вöрыс лоö эшö аскоддяжык.

Талун, кöр пондiм водны би бокö, Лёня шуö:

— Мый ноко талун вöтасям, огö вунöтö. Виль местаын узикас эд вöтыс быльö пöртчö...

Этадз часто пöрись вöралiссез баитöны водтöн, вöрдöны¹ашын кежас бур удача. Водiм, и миянöс шебралiс небыт ольпасьöн ойся пемыт небо. Узям. Би чискö-сотчö. Некин миянöс оз вöрöт узьтöн эта пыд вöрын, некин миянöс оз тöд, кытöн ми узямö, мый вöтасямö.

Только ойшöр гöгöрас Лёня зэгйö менö пельпонöттям:

— Чеччы, чеччы! — жексан голосöн, дзик ведра кузя вартöны бедьöн, чирзö сiя: простуда, тыдалö, кутöм нето повзьöм кувтöдз. Осьта синнэзöс, видча:

— Мый колö? Некöр он лэдз морт моз узьнытö!

— Узян эстöн, — жергö ёртö. — Мыйкö умöля вöтаси. Висьтася, ог?

— Виньды тэ вöттэзнат, — лöгöн öмала сiйö и бергöтча мöд бок вылам.

И сэк жö тöдвылö усьöны висьтасьöммез лешöй йылiсь, кöдакöт вöрас пантасьлöмась. Быд висьтасьöмыс син одзын, и лешакыс сэтöн жö. Кöть бы и он пов, а спина сайын лешакыс сулалö, вöзйисьö узьны би бокас! Сэтчö жö Лёняыс не ас голоснас жергö, саймöтö. Вöрыс сьöд стенаöн сулалö син одзын, а би югöр весьтын мыччисис морт.

«Лешакыс!» — мелькнитiс юрам. Чеччöвтiбы би боксис да пышши, кытчö коккезö нуöтасö. Но омöн вöр, а вöрас эшö пемытжык и öддьöнжык петö полöм: он тöд, мый тэнö видзчисьö быд кöзок увтын. И сэтöн тöдвылö усьö, что ордчöн бикöт сулалö морт сувда нитшсялöм мыр.

— Дак висьтася али ог вöтсö? — юалö мöдöтпыр Лёня и пондö висьтасьны аслас кижган голосöн. — Бытьтö бы менö пурис порсь. Абу ыджыт, но стрась лёк: синнэс биöн сотчöны. Пурис порсьыс, быдöс коккезöс и спинаöс летiс. Некыдз ог вермы сы дынiсь мездiсьны. Кинкö сэтчö меным и ыкöстiс: «Лёня, лый!» Ме порсьыслö и кожги кымöсас, но эг инмы: пуляыс син одзам ордйис порсьсö. Вот сотана! Сэк порсьыс бöра кутчисис коккез бердö. И ме быд вынсим брынги... — Лёня видзöтiс кок вылас и сэтöн горöтiс: — А сапог-г-ö кытöн?!

Ме эгжык бы повзьы, ежели бы ёртö юöртiс, что сiйö ош ляпкöтö. Но сiя: «Сапогö кытöн?». Ме некыдз эг видзчись энö кыввесö. Мый, мый öшис бы, а сапог... Кытчö вермис лоны сiя ловья морт кокись? Неужто лешакыс кыскис? Ме повзьöмсяняс немми, эг вермы и лэбтiсьны местасим да кошшыны сапогсö. Чеччисö поннэзным, вишыкалiсö воздухсö да лэчыта видзöтiсö пемытiнас и, тыдалö, нем эз вежöртö. Сiдз мийö пукалiм кынымкö минута.

— Но кытöн сапогö? — спокойнöя ни юалiс Лёня. Этасянь жагвыв öшис и менам повзьöмö.

— Сапогыт, шуан? А может... лешакыс? — мый ме думайтi, сiйö и висьталiёртöлö.

— А мый ми сылö умöльсö керимö?

— А сылiсь эд он тöд... Ачыт эн я висьтась, кыдз пантасьлöм тятюытлö?

Вöлöм пö сiдз. Пондöтчö миян тайгасянь Каменка шор. Визыв крут берега шор дорын зэв гажа. Сэтöн эмöсь важ бараккез, кöднаын кöркö овлöмась вöркералiссез. А öнiразь узяс ныын вöралiсь. Кыдзкö сёрмас вöравтöн Лёнялöн тятьыс да и водас узьны важ баракас. Водас и узьö чöскыт онöн — шоччисьö. Вдруг дзурка-вирка оссьö ыбöс. Вöралiсьыс осьтас синнэсö, видзöтö ыбöс вылö и адззö: пырö баракö морт, да не учöт и не ыджыт, а пелитчö ыбöсас — косяккес ружтöны. Кытшöм ни смев Лёнялöн айыс, а сьöлöмыс тёпнитас, полöмыс спинасö гыжьялö. Повзяс Лёнялöн айыс, но местасис оз вöрзьы, видзöтö. А тоша, сьöд паськöма да югьялан киззеза мортыс пырас, кытшöвтас стенаэз пöлöн жырсö да сувтас Лёняыс ай одзö. Сувтас, киэсö паськöтас и шысеттöг пондас öвтны нiйöн вöралiсьыс весьтын вывлань-увдöрлань, но чуньöн оз павкöт сiйö. Öвтö ыджыт мужикыс киэзнас, и джоджыс дюттясьö быдсöн стенаэзнас, керкунас. Лёнялöн айыс, конечно, сэк жö казялас, что сы одзын не морт, а лешак. Но смев вöлöма Лёнялöн айыс. Видзöтас, видзöтас лешакыс вылö да кыдз ыкöстас:

— Кытöн черыс?! Масьта-керала!.. — Ачыс нюжöтö кисö стеналань, кытчö пуктiс рытнас черсö. Только горöтас вöралiсьыт, а лешакыс абу ни.

Эта öнi, ойнас, усис тöдвылам. Да и сiя ли только. Ме тöдiöддьöн уна сказкаэз. Тöдi, что лешакыс вöралiськöт вермас керны кöть мый. Вермас öштöтны вöрас сiдз, что пондан неделя ветлöтны и он адззы горттö, и заряда пишальыт оз понды лыйны.

Лёня веритiс и эз верит öнiлешакыс йылiсь баснилö. Ме шысеттöг видзöтiсы кöмтöм кок вылö.

— Кытчö лоис сапогö? Эта мый сэтшöмыс? — гуддисис ёртö лыссэз коласын, кöднö мийö ольсалiм увтаным. — Весись, тыдалö, эг вöтась сэтшöм умöля.

— А может, тэ пöрччасьлiн рытнас да чапкин ылöжык бокö?

Лёня ме вылö дыркодь видзöтiс полöмöн, сэсся горöтчис:

— Тэ мый? То лешак йылiсь, то пöрччаси... — Сэсся пондiс баитны ас кежас: «Рытнас ме пöрччаси, рази нямöттэзöс да öшлiкосьтыны эта понулёк вылö, а сапоггезöс сюйи куш коккезам... Но эд эз жö лешакыс, поди, пöрччöт менö?!»

Сэк ме дзарнитiбилань, и син вылам усис чунь пасьта сьöд трубка. Сiя куйлiс матын би бокас. Нюжöтчи да босьтiкиам. Ёртö тожö видзöтiс трубкаыс вылö. Ме рази жагвыв трубкасö и синнэзöлö эг верит: ме киын вöлiсапогись резинатор, кöда сотчöм да каттисьöм трубкаö.

— Сапогыт! — горöтiме.

Лёня кватитiс резинаторсö кисим.

— Сапогö? Сапогö, сапогö, — модис ёртö ас кежас. — А кыдз сiя сотчис коксим?

Эта сапоглöн торыс эшö öддьöнжык öнiдивитiс миянöс. Кыкнаннымлöн юраным пизис виль дума: «Кыдз вермис сотчыны кокись сапог?» Но сэтчö меным пондiс лоны вежöртана.

— Мый тэ, шуан, вöтасин?.. — юалiме сэсся ёртöлiсь.

— Порсь бытьтö менö пурис...

— И тэ сылö брынгин?

— Быд вынсим брынги, — гажтöма баитiс Лёня.

— Сапогыт эд куш кокат вöлi?

— Вот, лешак... Брынги, — и сэтöн мылякö рада горöтiс Лёняыс: — Брынги, и лэбзис личыт сапогыс куш коксим!

Сэк жö öшисö лешак йылiсь думаэз, лэбзис кытчöкö полана чувство, и биыс пондiс шонтны буржыка, сьöлöм вылын лоис кокнит. Мийö радмим сэтчöдз, что пондiм ваксьыны.

— А öнiкуш кокöн гортö шагнявны? — дыр мыйись шыасис Лёня.

— Эн тöждiсь, — шуи ме.

Джын час бöртiмийö кулим нинпуэз. Эз чулав и кык час, кыдз миян вöлiготов нинкöм. Панiс сiйö ёртö, кыйим кыкöн чорыт улiсь керöм сьöктанöн. Нинкöммесö кыйны Лёнясö велöтлöм тятьыс, а менö дедö. Кыдз пригодитчис эта миянлö вöрын! Öнiёртö кöмасис нёштöма: öт кокас сапог, мöдас — нинкöм. Но мийö вöлiм радöсь, что вермим петны бедасис не öтнёж, дак мöднёж. И эшö колö висьтавны, что эта кадсянь лешаккеслö веритны дугдiм.