Пантиль, ен, чёрт да смерть



Дед Пантиль — простöй смертнöй. Сылö годдэс унакодь ни, уджавны оз вермы и быд месяцö сiя босьтö «пенза». Овны бы стариклö да нем не думайтны, но юрас оз-оз да и пырышавлö аскоддя думаок: «Кин тöдö, мый лоас одзлань. Талун ловья — ашын тыртасö муöн и чожа вунöтасö тэ йылiсь, кыдз пу лист йылiсь, кöда киссьö арöн му вылö да пöрö назёмö».

Пантиль малалö рыжöй сук тошсö зеркало одзын, баитö:

— Эх, Пантиль — лук киль, овсьö ни оланыт, нырыт лöзöтöма ни, а адззылiн я тэ бур олансö? Адззылiн сэтшöмö, кытшöмö не айыт, не мамыт, не прапрадедыт эз пантавлö — сьöкытсö и лёксö. Талун антиресно овнытö, ашын — эшö антиреснöйжык, а мöдлун мый лоас? Кöть бы öтiк синöн видзöтны коммунизмсö, сэк вöлiбы мыйöн мöдöр югытас ошшасьны старухаö одзын.

Öтiк рытö дед водiс полать дорö да пондiс только уморочитны, кыдз керкутыр гымгис-лыйис пушка. Зэгнитiс Пантильöс лыйöмыс, и дед пондiс кытчöкö лэбзьыны борддэзтöг. Мöдiс горöтны Пантиль öмтырнас — корны отирлiсь отсöт, но öмыс эз оссьы, кикокыс эз вöрзьы: старикöс давитiс сьöкытся-сьöкыт из, вынася-вына вын.

— Аминь! — думнитiс Пантиль и сэк жö сувтiс коккес вылö, но не гортас, а кытшöмкö тöдтöм местаö, кöдö вöтöн эз вöтасьлы и думаöн эз думайтлы. Сулалö Пантиль, синнэзнас кваркышалö, а кыкнан бокас сулалöны очередьын отир. Отир кыдз отир, только чужöммезныс бледöсь-бледöсь, бытьтö белитöмöсь. И паськöмныс тожö чочком. «Вот лягуша чукöр, — дивуйтчыштiс Пантиль, но нем эз шу. — Вöлiме биас и ваас, но этатшöм мундиррезнас отирыс эз пантасьлö». Только ештiс думайтыштны Пантиль этö, одзас оссис ыбöс веськыта мöдöр югытас, и сэтчинсянь быд вынiсь ыксöны:

— Пантиль, пыр татчö!

«Мöдöр югытö, дак мöдöр югытö, кытöн миян кодьыс эз шатлась!» — шуис ас кежас старик и шагньöвтiс жагвыв мöдöр югытас: тэрмасьны некытчö, тасянь му вылö бöр туйыс абу.

Шедiс Пантиль веськыта ыджытся-ыджыт жырö, кытöн югытыс не югыт, а кытшöмкö лöзкодь-веж. И патшкис нырö ладанöн да эшö кытшöмкö дукöн — то ли бесовскöйöн, то ли смерть дукöн. Жыр шöрас сулалö гöгрöса пызан, сы гöгöр — скамьяэз. Пызан вылын чернило, карандашшез и графин. Мый графинас — нето ва, нето вина, нето эшö мыйкö, — он вежöрт, сiдз кыдз тэ мöдöр югытын. Скамья вылын, веськыт ладорас, пукалö ен, шульга бокас — куим сюра чёрт, а стариклö паныт — смерть. Дзарнитiс Пантиль веськытлань — пернапасасис; дзарнитiс шульгалань — вальс сьöвзис пельпон вевдöрöттяс, а гер пиня, кульöм мыгöра смерть вылö эз и видзöт. «Лягуша чукöр!» — только и вермис думайтны Пантиль, этатшöмсö адззикö. Но сэсся думайтiс-керис да здоровайтчис пызан сайись пукалiссезкöт:

— Здорово!

— Ур-р-ра! — рявкнитiс Пантильлö паныт смерть.

— Эн лöсьöтчы сёйны няньсö, кöр сюыс эз на во! — тузгис кулакнас чёртлö кымöс кузяс ен.

«Но и лягуша!» — эшö дивуйтчыштiс ас кежас Пантиль да буржыка пондiс нёджжавны пукалiссесö.

Ен — морт кыдз морт. Сiя вачкисис öтiк поп вылö, кöдакöт кöркö Пантиль ювлiс вина. Только еныс вöлiвежкодь-чочком чужöма, бытьтö сiйö тульгылöмась гудыра тыö. Синнэс то ли кынöсь, то ли гудыраöсь винасянь — он вежöрт.

Смерть пукалö енлö паныт да öмсö осьтöтлö. Öмыс сылöн, кыдз крокодиллöн: пиннес öмтыр садитöмöсь и лэчытöсь, дзик пилалöн. Да не простöйöсь нiя и не золотöйöсь — лöз биöн сотчöны. Сыбöрын ни Пантиль пондiс тöдны, мыйлö смерть быдтö этатшöм пиннесö: медбы кыкись курччöвтöм бöрсянь ньылыштны грешнöй душаöс.

Смерть — и енлöн, и чёртлöн слуга — морт мыгöра жö. Только сылöн кучикыс вачкисис лягуша паськöм вылö и вöлiсэтшöм вöснитик, что быдöс лыэс и кишкаэс тыдалiсö шуч. Нем вылö и видзöтны, а мымда отир сiя кыскис чочком светiсь мöдöр югытö!

Чёрт рамыник, мыдзöмкодь чужöма и, ежели бы сылöн не сюррес да не бöжыс, туйис бы сiйö сорны енкöт.

— Тэ тöдан, морт, кытчö шедiн и мый тэнö видзчисьö? — юалö Пантильлiсь ен.

— Кöр шыр шедас кань öмö, судьбаыс сылöн öтiк, — висьталiс Пантиль.

Смерть хитрöя мигнитiс стариклö и векыштiс öмсö.

— Сiдз, — шуис ен Пантильлö. — Тэ шедiн мöдöр югытö и сулалан öнiад да рай коласын. Мöдöр югытсис бöр туйыс абу. Аминь!

Кывзiс Пантиль да пель саяс баснисö тэчис: может, пригодитчас пö татöн овтöнняс. А ен одзлань баитiс:

— Райö тасянь туйыс веськыт, но сэтчин шедны сьöкыт. Перво видзöтам, уна я тэ бурсö му вылас керин, кыдз сэтчин олiн.

Смерть бöра хитрöя мигнитiс Пантильлö, а чёрт шы эз сет.

— Ним-фамиллё? — юалiс ен. — Кыным год?

— Ме Пантиль — лук киль. А годдэзöс ен тöдö... Ежели бы татчö эг шед, олiбы эшö.

— Ми сiдз тöдам, — öбидитчис ен и содтiс: — Тэнчит юасьöны — висьтась. Тэ сулалан ен одзын, а не нывка одзын.

Пантиль ас кежас думнитiс: «Шедiн кöиннэз коласö — унняв!»

— Кин айыт?

— Ен тöдö. Быдми ме аймамтöг.

— Тöдны аймамсö! — висьталiс ен, и сэк жö кытiськö пызан дынö петiсö гижöттэз да сымда, что и еныс, и смерть чёрткöт öшисö ны коласö.

Чулалiс лун, а может, месяц нето год, мыйöн тöдан мöдöр югытас, — чёрт смертькöт сё гарйисисö гижöттэз коласын, кошшисö, кытöн, кытшöм лунö-часö чужисö и кулiсö Пантильлöн аймамыс.

Пантиль шы эз сет, сулалiс то öт кок вылас, то мöд вылас, видзчисис, кöр адззасö колан гижöттэсö. Но вот чёрт висьталiс, что мамыс Пантильлöн öнiадын — греххез кольö, а айыс — öт джыныс сылöн райын, мöд джыныс — адын.

«Эх тi, лягуша чукöр, — думайтыштiс Пантиль. — Тыдалö, верма и пантасьны айöкöт да мамöкöт татöн».

Мöдöр югытын квартира оз ков, кынöм оз симав. И не морозыс оз кöр, не жарыс оз пöжав, тэрмасьны некытчö — и Пантиль сулалö, видзчисьö, мый судьбаыс висьталас сылö.

— Юрбитiн ли енлö? — юасьö ен. — Грешитлiн ли?

— Кöр вöвлiзэлыт, касьтывлiенсö, кöр личыт — чёртöс кытсавлi, — висьталiс Пантиль.

Чёрт радмыштiс, ен öшöтыштiс юрсö.

— Матькин енсö?

— Еныс не кривöй Митит — тöдö, натьтö, менчим оланöс. Кысь ме верма висьтавны быдöс, мый керлывлi?

— Сi-iдз, — нюжöтiс ен. — Кынымись гöтрасьлiн? Уна я песлiн иньтö? Кыным бочка аскур юин?

«Вот эта комиссия! — бöра дивуйтчис Пантиль. — Тыдалö, сiя ачыс сэтшöм томувьяс вöлöма да думайтö, что и ме сы кодь!»

— Гöтрасьлiöтчид, песлiс менö иньö, а не ме сiйö, вина юи не унажык тэсся.

Ен гыжьялыштiс лöзöтöм ныр йывсö да висьталiс:

— Сiдз, Пантиль! Райö тэ он сюр, а бöр туйыс абу.

— Мортыс не рак, бöрöн оз ветлöт, — висьталiс Пантиль.

— Но ме верма отсавны, отсалан кö и тэ меным. «А мый, поди, согласитчыны сыкöт? — думыштiс старик. — Видзöтам, мый лоас сэтiсь».

— Райö ме ог лöсьöтчы, но отсавны верма.

— Бур, Пантиль, что тэ и татöн юртö он öшöт и лöсьöтчан отсасьны миянлö, — ошкис старикöс ен. ― Бытшöм комиссия лоас миян!

«Лягу-у-уша! — думайтыштiс Пантиль. — Не весись Васька-соседö баитлiс: кöза да ен öтiк умаöсь пö, только коккезныс не öтмымдаöн».

Сiдз Пантиль шедiс не кытчö-нибудь, а комиссияö, кöда пондас отирöс бöрйыны адö да райö.

Кöр комиссия пуксис пызан сайö, ен висьталiс:

— Колö миськавны мортсö, мыйкö сiя патшкö олан дукöн.

Пызан вылö сувтöтiсö вина — ю мымда колö. Юисö сэтчöдз, что чёрттэзлöн сьöлöммезныс пондiсö гудрасьны. Син одзаныс не рай, не ад, не чочком светыс — быдöс сорлассис. Чёрт енкöт пуксисö оча пельпон, ыкöстiсö сьывны. А смерть шентiс косасö лабич увтö и Пантиль бердö лякасис:

— Тэ, Пантиль, менам медбур ёрт. Ме тэнö му вылын дорйи и татöн некинлö ог сет чуньöн ляпкыны.

— Ага, — шуö Пантиль, — кöин балялö тожö ёрт.

— Тэ только кывзы менö и кер, кыдз тшöкта.

— Кывза, — баитö Пантиль. — Только тэ менö медодз кывзы кыдз ёрт ёртöс: сувт ме одзö юр вылат, ме видзöта, мый тэ верман керны.

Смерть кодувьяс готов кучиксис петны Пантиль одзын, медбы только сы кипод увтö мортыс шедiс.

Сувтiс Пантиль одзö смертьыс онняюрöн. А Пантильлö эта и колö: чожа пöрччалiс коссис кушаксö, сьöвталiс смертьсö да кышалiс онняюрöн потолокö.

Смерть ыксö-горзö, кеймисьö Пантильлö, мед старик мынöтiс сiйö наказаннёись. Пантиль шыннялыштлö, оз тэрмась мынöтны смертьöс.

— Öшалышт, ёртöй, нем умöльыс оз ло, — сералö старик. — Разь только умнöйжык лоан.

— Этадз оз лöсяв! — пиньгö смерть. — Эд метöг оланыс — не олан. Меным колö му вылö тэрмасьны.

— Кин мый кошшö, сiйö и адззö, — висьталiс Пантиль. — Давай öшалышт.

Но смерть öдззис ыксыны сiдз, что енлöн да чёртлöн код юррезныс садясьöмась. Котöртiсö нiя смерть дынö, мынöтiсö сiйö петлясис да тузйисö бытшöмика, мед одзлань эз дзуг нылiсь сьылöмсö.

Дыр я, не я юисö да сьылiсö, но сё жö кутчисö удж бердö. Медодзза дело — тöдны мортлiсь греххез и решитны, кытчö мортсö иньдыны: то ли адö, то ли райö.

Пукалö комиссия: ен — председатель, чёрт да смерть — заместителлез, морт — свидетель да советник.

Пырö старик. Пызан дорö старикöс кипöлöн вайöтö смерть. Смерть радся-рад, сiдз и сотчö, ошшасьö, что кокнита мортсö кыскис татчö чочком свет вылiсь.

— Фамиллё, ним? Мый уджавлiн му вылын? — юасьö ен.

Старик пернапасасьö, висьтасьö ас йывсис.

— Грешитлiн? — юалö ен.

— Грешитлi, — висьталö старик.

— Юрбитлiн енлö?

— Еныс эд кöрмилеч, — висьталö старик, — сы йылiсь вунöтнытö оз туй.

Пантиль пукалö да кывзö, пель саяс тэчö.

— Видзöтам, — баитö ен, — мымда тэ, грешнöй душа, кыскин татчö греххетö.

Ен нырыштö пызан вылiсь кнопка — и чаркнитö да гымыштö гым кымöр, сэсся минута-мöд уннялö невежöртана шум, а вöлись пызан вылö усьö неыджыт гижöт, кытчö гижöма: грешнöй. Быдöс вежöртана, оз ков юр жугдыны. Чёрт радз вартö оча долонь, смерть рявзö «ура», и ен висьталö:

— Адö.

— Одзжык греххесö öшлывлiм безменöн, öнi— кибернетика! — ошшасьö Пантильлö ен.

Смерть пыртö преисподньöйö попöс.

— Аминь! — пызан одзын горöтö поп.

— Мыля одзöв вайöтiн! — юалö лёка смертьлiсь ен. — Эта мортыс му вылын вöлiменам отсасись.

— Колiс и вайöтi! — паныт эрзыштiс смерть. Смерть дор сулалö чёрт:

— Менам киэз лудöны, важын ни мыйкö поппес эз пантасьлö татöн.

— Огö пондö серавны, — öбидитчö чёрт вылö ен. — Этö мортсö ме тöда кыдз ачымöс жö: сiя му вылын вöлiменам заместительöн и некöр эз грешит. Ме думайта, что нем гарйисьны сы сöстöм душаын.

Чёрт мигнитö смертьлö, смерть мигнитö чёртлö и горöтчö:

— Ен, сет меным кыв-мöд висьтавны!

— Некытшöм басни! — орöтö ен.

— Кыдз некытшöм? — лöгасьö чёрт и пондö сырйыны асьсö бöжнас.

— Ме ачым тöда! — арзö ен. — Иньдöтам сiйö райö.

— Нем тэ он тöд! — чирзö смерть. — Тэ уна пондiн надейтчыны аслат заммез вылö и дугдiн лэдзчывлыны му вылö.

Пызан сайын лэбис шум — кöть пеллез тупкав: ен чарлалiс-гымалiс, чёрт рявзiс, смерть ваксис нето горзiс — сьöкыт вежöртны, — а поп синнэсö барöтiс да öмсö осьтiс.

Пантильлöн пондiс петны серöмыс, но сiя серьёзнöя висьталiс:

— Господа, менö кутö стыд тiян понда. Миян му вылас кытшöм ни оланыс грешнöй, но этатшöмсö эг адззывлы. Стыд и срам. Давайте уджавны.

Шум лöньсьö, и недыр мыйись поплiсь юасьöны одзлань. Öнiюасьö чёрт, ен изö скамья вылын, бытьтö кутöма сiйö пинь висян.

— Пируйтлiн?

— Бес каттьывлiс.

— Йöз инькаэз дынын маласьлiн?

— Бес тойыштлiс.

— Гусясьлiн?

— Бес отсавлiс.

— Ага, бес отсавлiс! — треситö сюррезнас чёрт. — А висьтав, вöлiя тэкöт öтлаын кöть öтпыр бесыс?

Поплöн шы абу, поп öмас ва босьтö. Ен лöгувьяс дрöжитö скамья вылын. Чёрт сюррез вылас ветлö, смерть жекыртöм пиннезнас чакöтö.

«Лягу-у-у-ша!» — думайтö ен йылiсь Пантиль. Сiя стрась лоö бы чёртыс да смертьыс дор, некыдз бы оз лэдз попсö райö.

— Ась сторожöн лоö рай ворота дын, — шуö ен.

— Уна сiя меным отсалiс! — висьталö чёрт. — Адö сiйö колö!

— Чöлö жö, мый весь споритны! — баитö Пантиль. — Эм жö тiян брыннöтика!

— Лэдз кибернетикасö, — висьталö енлö чёрт.

Ен нырыштö кнопка. Ёна гымнитöм бöрсянь пызан вылö усьö гижöт, кöда вылö гижöма: грешнöй.

Чёртлöн югьялöны синнэс, смерть ниртö оча долонь, а горбыльтчöм ен шуö:

— Талун тырмас.

— Тырмас дак тырмас — луннэз не пож етш, тэрмасьны некытчö, — шуö Пантиль. — Да и колö шоччисьыштны. Али татöн шоччисьтöг уджалöны?

— Часöт бура шоччисям, — шуö чёрт и пондö кыскавны пызансис винаöн бутылкаэз.

Юыштöм бöрсянь смерть баитö:

— Может, Пантильыслö мыччавны адсö? Эд сiя комиссияын, а адыс йылiсь етша тöдö.

Ен согласитчö.

Ад ворота одзын часовöйез: öт бокас пöрись чёрт, мöдöрас — том. Нылöн öт кианыс сабляэз, мöданыс — багоррез. Сулалöны нiя и суналöны.

Пантиль, пöрись солдат, этö терпитны оз вермы. Эта абу порядок, ась нiя и ад дынын сулалöны. Часовöй эм часовöй.

— Смир-р-рно! — вдруг рявзö быд горшсис Пантиль.

Часовöйез, кытöн сулалöны, сэтчö и пуксьöны повзьöмсянь.

Комиссия баралö. Комиссия оз вежöрт, мый лоис ад ворота одзын.

— Эта понда миян няньнас бы эз вердö, — висьталö Пантиль. — Кытшöм сiя часовöй, кöда суналö пост вылын? Сувтны смирно! — бöра рякöстiс Пантиль, и чёрттэз чеччöвтiсö кок йыланыс, нюжöтчисö сы одзын.

Оссьö адö ыбöс, и сэк жö Пантильлiсь нырсö чегö ад дук — ловзисьны немöн. Пеллез потласьöны невежöртана шумсянь: öтдруг кинкö ряксiс и горзiс, уннялiс и баксiс, виксiс и жексiс. Пантильлö вывтырас кöдзыт ва киссис, но сiя эз повзьы: «Смерться умöльжыкыс нем оз ло!»

Адын тшын — нем оз тыдав: ад ад и эм. Комиссия одзö тшынiсь петiс да сувтiс солдатскöй паськöма морт, кöда бокын гардчö винерик чёрт. Шовкнитiс мортыс оча кок и висьталiс ятнöя:

— Батюшко ен! Тэнат владеннёын удж мунö расписаннё сьöртi! Öшлам, кералам, пуам, пöжам, весöтам инструкция сьöртi. Рапортуйтiс командующöй Пельвундъюркерал!

— Бур, — шуис ен.

Öнiтолько Пантиль казялiс, что сы одзын мортыс фашистскöй паськöма.

— Лягу-уша! — первуись горöн дивуйтчис Пантиль.

— Одзжык адын быдöс уджсö керисö чёрттэз, — висьтасьö ен, — но нылöн уджныс важмис, кыдз му вылын пöрисьмис каменнöй век. Эна му вылын велалiсö уджавны буржыка, нежели чёрттэз адын, и ме нiйö сувтöтiадас командиррезöн. Веськöтлö нiйöн фюрер, кöдö му вылын Гитлерöн видöны. А чёрттэз öнiтолько адъютанттэз.

— Опыт быдлаын пригодитчö, — сьöкыта ловзисис чёрт. — Видзöтам одзлань.

Адын вöлiад: öтiккезöс жаритiсö би вылын, мöдiккезлiсь ловья вывтiкулисö кучиккезнысö, куимöттэзлiсь ловья вывтiйирисö яйнысö чёрттэз, нёльöттэзлiсь кералiсö кикокнысö. И быдöс этö керисö чёрттэз, а фашистскöй паськöмаэс только чуньнаныс иньдалiсö, кинлö кытшöм удж керны.

Пантиль казялiс йöр вылiсь ыджыт плакат и лыддьöтiс невночка сэтiсь гижöмсö:

Кыдз колö весöтны греххезiсь.

1. Кин бöбöтчывлiс — нювны быд лунö биöдз калитöм сковорода.

2. Кин гусясьлiс — керавны и масьтыны быд лунö чуннез.

3. Кин эз юрбитлы енлö — пусьыны котёлын.

Пантиль эз вермы лыддьöтны быдöс — сöтiс коскас переживаннёсянь, йывмис радикулит, кöда донимайтiс сiйö медбöрья кадö му вылын овтöн.

— Дыр я весöтöны грешнöй душаэсö татöн? — юалiс Пантиль.

— Кытчöдз му вылын оз вунöтö кулöмсö, — висьталiс ен.

— Мыля сэк фашисттэсö оз весöтö? Эд нiя мед ни грешнöйöсь!

— Нiя уджалöны татöн, сiйöн и весöтöны ассиныс душанысö.

— А кытöн часöт Гитлерыс? — юалiс бöра Пантиль.

— Гитлер пукалö сизим ворота сайын, сизим цепь вылö дорöм, сизим цепыс сизим замокöн игналöмöсь.

Чёрт мигнитiс Пантильлö да шушкыштiс пель одзас:

— Еныс полö Гитлерсис: лэдзны кö сiйö иган сайсис, вермас енсö йöртны аслас местö.

— Но, а кытöн солдаттэс, кöдна кулiсö Гитлеркöт пессикö?

— Нiя мöдiк министерствоын.

Комиссия баиттöн мунiс адöт, станок дынiсь станок дынö, чан дынiсь чан дынö и, кöр локтiсö рай ворота одзö, ен гордöя висьталiс:

— Вот и быдöс адскöй производство. Одзаным рай. Кыдз тэ думайтан, Пантиль, туяс я эта бöрсянь мортсö лэдзны райö?

— Кин тöдö... Ылöстöмлö кöть майöг юр вылас лöсав — ылöстöмöн и кольччас. Но, мунам шоччисьны.

Пантиль адззис адiсь бутылкаок скипидарöн да сюйыштiс карманас, мед лечитны радикулитсö личыт кадö. Му вылын овтöн фельдшер тшöктылiс жö скипидарнас мавтны коссö.

Чулалö лун, чулалö неделя, а может, и только кынымкö час. Чёрттэз лöгöсь Пантиль вылö сы понда, что часовöйез вылын ыксiс, и öнiкошшисö причина, медбы вештiсьны Пантилькöт. Да и ен сiдз бы и турнитö сiйö адö, мыля часто сылö поперёк керö.

Öтпыр чёрттэз скамья вылö, кытöн пукавлiс Пантиль гöгрöса пызан сайын, тэчисö пым пöим и, кöр Пантиль пуксьыштiс, пöимыс пöжалiс бекреннесö. Пантиль асысся джуджытжыка¹чеччöвтiс, но нем эз шу, только думайтiс: «Чöв, вештiся ужо!»

Сэтчö комиссия одзö лэбзьыштiс ангел и пондiс норасьны, что райö кыдзкö шедöны грешнöйез весöттöг.

Ен эз верит ангеллö, чёрт смертькöт — тожö: бöбöтчö пö, натьтö. Но Пантиль лоис ангел дор: видзöтны пö колö, сэки пондан тöдны.

Видзöтiсö. И быль: грешнöйез гусьöн сибöтчывлiсö рай ворота одзö, юктавлiсö винаöн часовöйезöс сэтчöдз, что мöддэслöн син одзаныс пемдывлiс, и вöлись сюрöтчывлiсö рай пытшкö. Кыдз тай баитöны: мавтiн — мунiн...

— Чёрттэзöс колö велöтны служитны! — висьталiс сэк Пантиль. — Ме тай шуа: татöн порядок абу.

Ен согласитчис: воштiсьны некытчö — уджыс чёрттэзлöн син одзын. И Пантиль пондiс велöтны чёрттэзöс мöдöр югытын службаö — пригодитчис чочком свет вылын оланыс. Медодз велöтiс, кыдз колö сулавны пост вылын, сыбöрын — кыдз ветлöтны стройын, сэсся — кыскасьны кынöм вылын да котрасьны.

— Кынöм выланыт, кынöм выланыт! — командуйтö чёрттэзлö Пантиль. — Дзöдзыв моз кыскасьö, бес увтыр! Кытшöм сiя солдат, кöда оз вермы кыскасьны кынöм вылын?! — Ачыс джоджас кап-кап вотьöтö скипидарсö.

Чёрттэз чожмöны, дзöдзыв моз кыскасьöны. А Пантиль сё киськалö скипидарсö.

— А ноко котöртны! — сетö команда Пантиль. — Кытшöм тэ солдат, ежели котрасьны он прокмы!

И чёрттэз котрасьöны, котöртöны öтiк марафонскöй верста, мöдiкö. Пымалiсö — быг шапсьö-вотялö вывсиныс, кыввезныс моросви öшöтчисö, бöжжезныс летъялöны джоджын.

— Тырмас, натьтö, ни, — жалейтö чёрттэзöс ен. — Ась шоччисьöны.

— Буржык дисциплина лоас, — висьталö Пантиль. — Ать, два! Ать, два!

Сэк ен ачыс сетö чёрттэзлö команда:

— Шоччисьö!

— Некöр, — ышки-пойки висьталöны чёрттэз, — эшö круг-мöд котöртамö.

Ен макнитiс кинас ны вылö и нуöтiс Пантильöс принимайтны виль локтiссезöс.

Медодз пырис стрась богатöй — капиталист. Вöлiсiя кыз, волькыт, небыт, но жаднöй сина.

Ен сэк висьталiс:

— Эталöн абу некытшöм грех: сiя му вылын вичку аслас деньга вылö осьтiс, праздник коста молебен служитлiс. Позьö шуны — святöй.

— Ог верит, что сылöн греххез абу! — горöтiс Пантиль. — Тэ, ен-батюшко, мыйкö соран.

— Абу сылöн греххес! — сулалö богатöй дор ен. — Изан сэтöн, мый оз ков!

— Ноко, мый машинаыс висьталас, — шуис сэк Пантиль и ачыс нырыштiс колан кнопкасö. Машина гымгис-лыйис, унньöвтiс кöин голосöн — и пызан вылö усис гижöт, кытöн вöлiгижöма ятнöя: грешнöй.

Пантиль лöгасис, гöрдöтiс, дзик бикыв. Сiя терпитны эз вермы бöбöтчöм, а сэтöн — ен бöбöтö. Чеччöвтiс сiя местасис да веськыт кинас заваритiс енлö пель бокас, шульга кинас — чёртлö ныр кузяс, кокнас брынгис смертьлö и вына голосöн горöтiс сiдз, что, натьтö, кылiсö адас и раяс:

— Провалитчö тiтартарары!!! — и гымгис кулакнас пызанпöв кузяс.

Сэтчö гымыштiс, чаркнитiс, и Пантиль саймис: осьтiс синнэсö, дзарнитiс омöн и казялiс, что сiя сё эшö куйлö пöлатьын, кытчö водiс рытнас.