Сiсьмöм вужжез



1

Вöлi эшö гожум, но видзöтчис ни арыс: луннэзнас жар, ойес пемытöсь да ыркытöсь ни, син одзын воисö рудзöггез, сорласисö зöррез, чорзис видззез вылын турун, пуэз вылын кельдöтiсö ни öтi-öтi листтэз. Деревняын оланыс дзескыт: вель уна колö керны эшö турун, вöтiс ни вундан кад — вунды да эн вунöт кöдзны рудзöггез, öтсö и мöдсö кер, тöд: кыдз дзимлялан урожайсö, сiдз и годъян, кыдз кöдзан öзиммесö, сiдз мöдчид и вундан.

Митиперыс куимöт год ни уджалö бригадирöн, тöдö ни, кöр колö кöдзны, турунсö керны и вундыны. Талун сiя асывсянь гардчис турункериссес дынын, эз вунöт видзöтны и ыббезлань, кытöн рудзöгыс лунiсь-лунö сивмис, кельдöтiс, тырсялiс, но жагöн: нетшкöвтан шепсö, ниртан долоннет коласын, думайтан воöм ни тусьыс, а сiя эшö умöля мезмö шепыс бердiсь, мезмас, видзöтан кö польдöм, зелёнöй рöма и абу эшö нянь дука. «Видзчисям лун-мöдсö», — бригадирыс шагнялiс межаöт, малалiс кузь рудзöг шепсö, видзöтiс шондiыс вылö, нырнас вишкис русö, олiс и полiс, кыдз бы погоддяыс эг тшык: лун-мöд и чужас виль тöлiсь, эд етша овлö сiдз, медбы тöлiсьыс эз миссьы — эз зэр, а кыдз пондас зэрны, кыдз кутас кисьтны ой и лун, сэк вöлись, бригадир, туруныт керсяс, рудзöггет пондасö чужны кок выланыс, он понды тöдны, мый керны, кытчö воштiсьны, кинöс видны, кинлö кеймыны — ойесö он понды узьны, но природаыс вылын тэ эшö учöт хозяиныс.

Митиперыс сёр павжун локтiс куртiссес дынсянь, мунiс межаöт, малалiс рудзöг, нетшкис шеппез, тiлис-нилис нiйö долоннес коласын, мездöтлiс шепыс бердiсь туссесö, видзöтiс ны вылö, вишкайтiс нырнас, пешлiс кывнас, курччалiс, öвтiс юрнас да баитiс аскöттяс: «Одзöв эшö... Лун-мöд бы этатшöм погоддясö, сэк туяс лэдзны гриваыс вылö комбайнсö, а логгес коласiсь видзчисьыштны. Сiдз и керам: ашын томöс и пöрисьöс иньда куртны, öтiк лунöн гумыштны бы Ольсис турунсö, сэсся етшажыкöсь ни кольччасö видззес...

Бригадирыс надейтчис погоддяыс вылö, но медöддьöн веритiс отирыслö, эд быдöн ассис кыз турунсö керис ни, и öнi вермас ни бы том и пöрись отсавны колхозас. Думаэс сувтiсö паныт, кöр вöрас воис ягöд, быдмис тшак... Колхозас петöны уджавнытö кыкдас гöгöр, а адззылiн бы, мымдаöн асывнас отирыс мунöны ягöдысла! Сьöрсьöн-бöрсьöн кыссьöны вöрланяс... «Кытiсь нiя сымда?!» — дивуйтчис Митиперыс, кöть и тöдiс, кытiсь сымда отирыс гожумнас: öтiккез пенсионеррез, мöдiккезлöн гожумся каникуллэз, куимöттэзлöн гöссез — отирыс эмöсь, а уджавнытö некинлö. Сэтöн жö аслыс висьталiс: «Локта и пыра сельсоветö. Ась чукöртöны воскресник. Нем весьолiссеслö öвтчыны, мед колхозас öтiк лун уджалöны. Сэтiсь жö эд няньсö сёйöны».

Мунö межа дорöт бригадирыс — луныс син одзас: асывсянь пондöтчис понлöн моз. Сенич Фёдор уджавны иньдытöн кутчис ыксыны улицатыр: «Ачыт мун да уджав! Деньгасö босьтат, а кинöскö тшöктат уджавны!» Деньга... Кин деньгасö колхозас и босьтö? Кöр сiйö и адззывлам? Пыр государствоыс одзын долгын, но Фёдор коддес думайтöны, что правленчиыс деньгатöг оз олö — начальствоыслö эм, а колхозниккеслö абу. Фёдорыс видчытöг оз вермы овны, быд асыв бригадирыс вылö летö горшсö, корö деньга, бытьтö уджалö Митиперыслö, бытьтö Митиперыс колхозсис босьтö не трудоденнез, а гумалö кузь руббез, но пондыв кö висьтав мортыслö, что тэ сы кодь жö, сэтшöм жö колхозник, оз кывзы, ассис керö-вувтö эмись и абуись, видас бригадирсö кыдз вермас. Эта бöрсянь луныс — не лун, эн бы и видзöт некытчö, кунин бы синнэз да пышшин или босьтiн литовка, мыдзтöдз уджалiн отирыскöт, локтiн гортö, сёйин-юин пöт, водiн шоччисьны и узин — юрыт бы нем понда эз вись, и сьöлöмыт бы местаын вöлi, ашынас чеччин, бöра вартлiн литовкатö... Мый отирыслöн, сiя и тэнат, а эта уджын оланыс абу и оз ло, быд шагын — тэ, бригадир! Мыля туруныс оз керсьы, мыля ыббес вылын сюэс умöля быдмöны, мыля мöссэс йöвсö сетöны етша?.. Мыля деньгасö уджалöмыс понда оз сетö? Мыля да мыля?.. Бригадир да бригадир... Кöр лöгасясö, синö бытшкöны нельки сы понда, что погоддяыс умöль, нето зэрö, нето дыр оз зэр, бытьтö тэ ен, быдöс верман керны, бытьтö колхозыс тэ пельпоннэз вылын видзсьö и бокыс вылö пöрö тэ кузя жö. Кинлö сэтшöм уджыс колö?! Мед бöрйöны бригадирас сiйö, кöда чож, кужö уджавны, керас быдöс сiдз, кыдз колö — быдöнлö небыта ольсалас, колхозсö сувтöтас коккес вылö и трудоденьыс местö пондасö сетны деньга. Сэк вöлись богатсялам!.. А öнi уджавнытö дышным петö, ыксам: «Вай, бригадир!» Но кытiсь сiйö вайны?!

Одзза сьöртi сьöкыт лоис бригадирыслö уджавны. Митиперыслö талун сизимись ни тöдвылас усьлiсö войнабöрся годдэс (эшö шестидесятöйезнас позис бы ошшасьны), кöр колхозас быдöс уджсö бергöтiсö киöн, и некин эз горзы, эз норась сьöкыт оланыс вылö, колхозсö и уджсö лыддисö ассиныс, а öнi отирсö дзик вежисö, дзик йöзлö пондiсö уджавны.

«Кöть мый, Митипер, кытчöдз нач эн сюртнясь, эстiсь уджсис колö вешшыны... — сюсö малалiс да думайтiс бригадирыс, видзöтiс, кыдз тöлок дюттясис-пöльтiс рудзöгыс весьтын, и чикиссез шырисö-лэбалiсö зэв сюыс вевдöрöт, чирзiсö да питьыртiсö, гажöтчисö асмознаныс. — Кыдзкö арöдззас кысся, — эз гажöтö кайес Митиперсö, — дзимляла ыббес вылiсь и юскися бригадирсис, а оз пондö кö лэдзны...» Думайтiс гортiсь пышшыны, только сiдз ни мездöтчас эта уджись, мед и абу паспорт, кöдö колхозниккеслö оз сетö (справкаэсö предыс оз гиж).

Думаыс пондiс бергавны паспорт гöгöр: «Кин сайсянь жö бы шедтыны гижöттэсö?» Эм сылöн öтiк ёрт, сыкöт öтлаын служитiсö армияын, но...

Бригадирыслöн юрас бергалiсö думаэс — олiсö и эзö гортын, сы сорöн сiя и янсöтчис рудзöгыскöт, вуджис йöрсö, петiс туй вылö, кöдö лойöмась да тальöмась тракторрезöн — нять да ва, сэтöн тöдвылас усис вöт, кöдö вöтасис талун ойнас. Вöтыс аскодя, топ Митиперыс кытöнкö тöдтöм ыб дорын, киас кöртзыр и гарйö гу. Тэрмасьö-уджалö, кымöсыс вылiсь вотялö ньылöм. Муыс чорыт, гуыс содö жагöн и уджавтöнняс кылö басни: «Митипер, аслыт эд гусö гарьян...» Тöдса бы голосыс, но кинлöн? Оз вежöрт. Саймис и пондiс думайтны... Сiдз сэсся ончир эз лэдз, чеччис, юрыс куд сьöкыта, кыдз абу и водлöм, абу шоччисьöм. Мамыс койис ни подаыс гöгöрын, котрасис керкуö да öтöрö, ружтiс, норасис, что эстi и сэтi висьö — олан эз ло, модьö, что зоныслö колö бы отсасись вайöтны или сiдз пö и пондан турзьöм тури моз овны?

Зоныс мурзьыштiс, висьталiс вöтсö. Мöдыс öдззис кивзыны: «Ой, зон! Умöль вöтыт! Бурсö эн видзчись!..»

— Тöдан тэ мыйкö, — мамыслö висьталiс Митиперыс, эз сёй, эз ю, петiс керкусис и öнöдз тшыг.

2

— Митипер, тэнö правленнёö корöны, — керку дынаныс панталiс Анна баб, правленнёись сторож.

— Кинлö ме кола?! — лёк бригадирыс.

— Начальсво локтöмась, — гажтöма висьталö Анна бабыс.

— Кытшöм начальство?! — лöга юалiс бригадирыс, топ правленнёись сторожыс кузя талун отирыс сёрöн мунiсö уджавны, дыр пажнайтiсö, етша куртiсö — луныс öшис, уджыс дзугсис. «Колхозлö уджалам... — нерис уджалiссесö Митиперыс. — Аслыныс бы... Шондiтöг бы мунiсö, шондiтöг локтiсö, некин вылö эз надейтчö, эз видзчисьö, а сэтöн йöзлö быдöнныс уджалöны...»

— Ме мыйöн тöда, кытшöм начальсво?! — недолыта ни шуис Анна бабыс, бергöтчис и бöр иньдöтчис не правленнёыслань, а кежис мöд улицаас, натьтö, кинöскö эшö кошшис.

Бригадирыс мурзьыштiс. Сiдз сылöн Анна бабыс бöрсянь öмсис бы и чеччöвтiс: «Нем кернытö да чувйöны!... Босьтiсö бы кураннэз, мунiсö бы öтлаö отирыс дынö, отсалiсö бы, а эз бы миян кодьсö кыскалö правленнёас! Начальство!..»

Шондiыс öшалiс веськыта улицаас, но чикиссес лэбалiсö лажмыта, посöдзыс бокын гуддисисö курöггез. Бригадирыслöн сималiс кынöмыс и косьмис горшыс. Сiя вöлi лöг, но эз тöд, кин вылö петiс лöгыс, бытьтö дзескöтiс не только уджыс, но и петухыс, чикиссес и номмес, кöдна зубыта курччасисö, сiдзкö, кöсйисö зэр... Митиперыс лöсьöтчис пырны бы керкуаныс, öмас чапкыны няньтор, но син вылас усис соседыс, кöда талун колхозас эз уджав (эз юась, эз висьтась, кыдз сiдз и колö), мунiс аслыс куртны, öнi локтiс куранöн, тыдалö, мыдз, но шыннялö — рад, что мый колö, керис, а тэ, бригадир... «Мый ме?! — чепöльтiс асьсö бригадирыс, кöр ноша турун эшö аслыс эз кер, пыр мамыс да мамыс... Этатшöммескöт и уджав!» Этатшöмыс овлö быд лун, кöть кытшöм страда, и бригадирыс нем оз вермы керны асныраэскöт, кöть сизимись норасяс правленнёас... Сiйö жö бöра кöритöны правленнёас, бригадирсö жö бöра пондöны видны...

Рытланяс лоис ыркытжык. Дугдiс пымавны быд шагын, и юрас кокнитжык, кöр лун ветлöтiс топ кольмöм. Митиперыс дыша локтiс правленнё дынö. Эстöн посöдзас сулалiс куш юра, лёк лöзвевья сина колхозсиныс предныс, кузь, векнит мыгöра и нач сивöй юрсиа парторгныс и топыт мыгöра мужик, кöда, натьтö, уджалiс райкомын, татчö сибавлiс етша, но уна тöдiс и уна адззис. Кöр локтас колхозас, эмись и немись пыр видö бригадирсö. Митиперыс здоровайтчис мужиккескöт, но некинлö кисö эз нюжöт, и мöддэс бригадирыслö киэзнысö эз жö нюжöтö да уна эз и баитö. Уполномоченнöйыс веськыта юалiс:

— Никифор Иванович, мыля од вундö? Или видзчисят, кöр сюыс пондас киссьыны!..

— Одз эшö сылö киссьынытö, — бригадирыслö лоис недолыт, кöр сы вылын ыждалöны.

Митиперыс кытöн рам, а кытöн асныра жö — туйсö эн вожмöвт. Öнi сылö горшас кыдз мыйкö тасасис, ловзисис, и руыс кыдз пöдтiс — виньдiс, сiйöн зубыта ньылыштiс дульсö и пондiс видзöтны посöдзыс бокись петшöррес вылö, кытöн веклясисö гöна гаггез.

— Натьтö, эд туйö ни вундынытö гриваыс вылiсь? — мыдз голосöн шыасис предыс.

— Отирыс вундöны, а ми пыр бöрын... — öмсö пиньöвтiс парторгыс, дзик сылöн висис пиньыс.

— Вундöны отирыс! — баснинас быдöнöс вермис районiсь мортыс. — Красильниковаын пятьдесят гектар ни пöрöтiсö рудзöгсö, а тiян пыр зелёнöй настроеннёныт! Видзчисят бöра, кöр пондас усьны лымыс.

— Миян рудзöгыс бригадааным пятьдесят шесть гектар вылын, — ассис пыкис бригадирыс. — Куим лунöн вермам дзимлявны.

— Сiйöн лымыс усьтöдз быд год и вундамö эд, — висьталiс парторгыс, бытьтö сiйö кöркö тшöктылiсö вундыны, ачыс уджалö школаын, велöтö челядь и колхознöй ыббесö видзöтлö только школаыс öшынöт.

— Тöда ме, кыдз тi дзимлялат! Талун жö колö пöрöтны! Кытчöдз шондiыс мыччасьö! — эшö лёкжыка пондiс тшупны райкомись мужикыс.

— Талун ог ни ештö... Шондiыс пуксьö ни, — Митиперыс шуткаö бергöтiс баснисö и ас юр вылö, кöр уполномоченнöйыслöн синнэзсис чеччöвтiс сэтшöм лёк бичир, парторгыс пондiс несйыны, и предныслöн чочкоммис рожаыс. Уполномоченнöйыс кыдз кытiськö мезмис, кыдз кулакнас посöдзыс забор бердö гымгис да кыдз ыкöстiс: «Тэ кин татöн?! Бригадир или гöсь? Кытiсь тэ сэтшöмыс локтiн?! Кин тэнö бöрйис бригадирас?! Мыйлö няньсö сёян?! Бригади-и-ир! Мый тэ йылiсь думайтö отирыс?! Висьтав, бригадир, комбайннэзнытö вочит?! Жаткаэс уджалöны?! Или пондат вочны сэк, кöр пондас ковны доддявны?! Эд кö вочö машинаэзнытö, босьтö чарлаэз, кайö ыбыс вылö, а ме видзöта, пондат я уджавны!»

— Чарлаэс абу, — шынь керис парторгыс.

— Кытчö лоисö?! — нач гöрдöтiс чужöмыс уполномоченнöйыслöн. — Горын сотiт или вöрö чапкит?! Меным мый? Мунö, кошшö, адззö чарлаэсö и ашын сувтö вундыны, мыччалö отирыслö! Вежöртiт, мать тiянöс!

Пурис да пурис районсис уполномоченнöйыс — синнэз кунь да сэсся эн и осьт бы, но сiя жö парторгыс горöтчис:

— Керам.

— Мый керат? — дзик саймис уполномоченнöйыс.

— Ытшкам и вундам, — ошшасис предыс. Митиперыс бергöтiс юрсö и пондiс видзöтны шондiыслань, кöда пуксис, кыдз бытьтö вöйис кымöрö. Том и пöрись, челядь и инькаэз, кин вермис видзны куран да литовка, сьöрсьöн-бöрсьöн гортö кыссисö видззез вылiсь — аслыс быд мортыс уджалiс.

— Этадз бы колхозас! — лöга серöмтчис райкомись уджалiсьыс и видзöтiс Ондрон вылö, кöда гортö локтiс медбöрын ни, кыдз кувны ни лöсьöтчöм, сiдз ни мыдзöм — тальччö и оз, мунö и турьялö, чужöмыс шондiыс вылын пöжассьöм, дзик сковорода гор би одзын. Кöть мый, а уджалö эд дедыс, уджалö, кытчöдз вермö только сiйöн, что старухаыскöт видзöны мöс, а мыйлö бы пöриссеслö видзны мöссö? Разь öнi тшыгьялам? Но мöсыс эм, колö сiйö вердны, керны турун, и мырсьöны отирыс гожумбыт, пессьöны... сiйöн, что стыд овнытö деревняын мöстöг, стыд.

— Бригадир! — Митиперыс бердö бöра лякасис уполномоченнöйыс. — Бригадир, быдöннысö колö вашöтны уджавны колхозас. Отирыс öвтчöны, а тэ нiйö он адззы!

— Кин? — дзик эз вежöрт Митиперыс, кин йылiсь баитö уполномоченнöйыс.

— Эта жö старикыс... Или эта! — юрнас öвтыштiс мöдыс Ондроныс внучаткалань, кöда син одзöт мунö — орсö мыгöрнас, сэтшöм ни сiя тыра — анькытш пуртöс кодь ён, лöсьыт, топыт мыгöра, что некинлö бы йöзыслö эн мыччав, некытчö эн лэдз. Нывкаыс гожумыс кежö гортö вовлö гöститöм могись, а сэсся велöтчö. Митиперыс эд некинöс колхозас оз сьöвтав. Деревняыс гожумнас весь оз ов, шондiыс гаж вылын боккесö оз пöж.

— Ягöдалiссесö колö доддявны жö! — видiс райкомын уджалiсьыс бригадирсö.

— Ме ны вылын абу хозяин, — Митиперыс сё видзöтiс шондiыс вылö, кöда саясьлiс ни кымöррес сайö и кыдз мыйкö вунöтiс да бöр мыччисис и югöрнас судзöтчис керку скороминаэс дынöдз.

— Кин сэк тiян хозяиныс?! — дугдыштлiс ни топ уполномоченнöйыс и бöра дундöтчис, предыслань перыта бергöтчыштлiс, но предыс эз шыась, чочком синнэзнас видзöтiс кымöрыслань жö.

Минута-мöд правленнёыс посöдзын шы эз вöв, минута-мöд рытыс ружтiс-уджалiс: гут и мöдiк гаг бизгис и уннялiс льöмпуэз гöгöрын, сырчик и воробей быркайтiсö посöдзыс дынын да öктiсö гаггез, чикиссез сiйö и керисö лэбалiсö крыша увтын поззэзныс гöгöрын.

— Сельсовет, — мезмис бригадирыслöн.

— Сельсовет!.. — сэтöн жö Митиперсö нерис уполномоченнöйыс, пишнитiс нырнас, льöмпулiсь нетшкöвтiс лист, курччöвтiс сiйö, курччалiс, сьöвзис, эшö лёкжыка шуис. — Собраннёнас ме тiянлö висьтала! Ме тiянöс!.. — И кыдз татöн хозяин, шуис. — Пырам клубас!

Колхознöй начальствоыслö недолыт, кöр сiдз стыдитiсö, сiдз видiсö, бытьтö нылöн нем оз керсьы, керсьö или оз, но асьтö он вермы дорйыны.

Лэдзчисö посöдзсис. Сьöраныс вöтчисö номмез да гуттэз, юррезныс гöгöрын пондiс гардчыны зi.

— Кытшöм собраннё? — кыдз вöлись саймис бригадирыс да юалiс парторгыслiсь.

— Партийнöй, — джын голоснас висьталiс парторгыс.

— Ме абу партийнöй, — мöдöрö бы бергöтчис Митиперыс, кыдз лöсьöтчис кытчöкö пышшыны.

— Ме тэныт висьтала абу партийнöйсö! Гожум, страда! Вундыны ни колö, а сылöн туруныс керöм семьдесят процент и эшö будзгылясьö... Марш клубö! — парторгыс веськыта шырзьыштiс бригадирыслö, и Митиперыс сэсся шы эз сет, а чожа пырис клубö, кöда сiя жö ыджыт керкуын, кытöн и правленнёыс, только колö пырны мöдöрсяняс.

Рытыс вöтiс чожажык нежели июлься луннэзö. Пемдiс, ыркöтiс. Колiс бы гортын шоччисьыштны да ашын бöра уджавны, но отирыс клубас дыр эз öксьö, собраннёыс дыр эз пондöтчы. Но и сэтöн коммунисттэс локтiсö невна джынысся унажык — пöрисьжыккес да весьолiссес, нiя, кöдналöн отпуск, кöдна уджалöны кокнита, вывтi оз мыдзö.

«Абу колöм локны. Абу колöм пырны, — Митиперсö нерис дума да эшö öддьöнжык сэк, кöр пондöтчис ни собраннёыс, и бöра жö медодз кутчисисö сы бердö, сувтöтiсö отирыс одзö да пондiсö юавны, кыдз уджалö бригадирыс.

— Колö тöдны, мунö отирыс дынö да юасьö! — сувтiс бригадирыс быдöн одзö, шваткис-висьталiс, кыдз сiя уджалö, ас вылас кыскис отирыслiсь лöгсö, и бöра сы вылö жö медодз уськöтчисö, кутiсö видны, пурны, что öмтö эн осьт, и медодз уполномоченнöйыс жö, сiя жö кулакнас гымгис пызан пöлыс вылö, рявкнитiс: «Распустились! Не с кого стало спрашивать! Все стали начальниками! Носы задрали и пашем облака, а в это время на лугах сено гниёт и хлеба будут плакать!..»

Бригадирыс лöсьöтчис жö бы баитны, дорйис жö бы асьсö, отирыссянь корис бы отсöт. Мöдiс коммунисттэс одзын висьтавны, что колö бы видзчисьыштны, лун-мöд бы оз эшö ков вундыны. Но кытчö тэ?!

— Дак тэ мый, Никифор Иванович?! Тэ сё эн вежöрт?! Велöтöны овны да уджавны, велöтöны, а тэ сё аслыт! — районсис уполномоченнöйыс видiс да видiс öнi отирыс син одзын ни, бытьтö Митиперыс нач ни не морт, кольччис сiйö судитны...

— Судитö... — ныр увтас бобгыштiс бригадирыс, кыдз эз вежöрт, мыля сiйö видöны.

— Мый шуин?! — сэтöн вöлись нач ни лöгасис предыс, чеччöвтiс гöрд пызаныс сайись, няпыртiс кулаксö, öдззис сiйöн öвтны одзас да рявзыны. — Никифор, вежöртiн?! Ашын жö, ашын жö, мыся! Вежöртiн?! Сувтöтам жаткаэз и ытшкам рудзöгсö, вежöртiн?! — чочком чужöмыс предыслöн, а сэтöн нач чочкоммис, кыдз саван дöра павдöтiсö, пов, медбы кудöбаыс эз жö чапкы.

— Вежöртiн?! — кыдз вöтöн кылiс Митиперыс и нем эз вежöрт, юрас бум-бум!

— Тэкöт эд баитöны! — ыкöстiс бы парторгыс, но голосыс сибдiс.

— Кыдз зэрмас? — вöлись повзис Митиперыс.

— Прогнозсö, Никифор, сувтöтöны учёнöйез, — висьталiс парторгыс.

— Мый тэ, Никифор Иванович, бöжнат и öвтан? Кер, кыдз пöрисьжыккес висьталöны да велöтöны! Велöтчы овнытö вильмоз, а эн сэтöн... — парторг бöрын чуйк сувтiс öтiк коммунист (пöрись ни мортыс, но юрыс уджалö, кывнас эшö керö). — Тэ тöдан кöркö киэзöн вундiм да öтiк тусь ыббес вылын эг сiсьтö, а öнi комбайннэз! Неделяöн туйö урожайсö дзимлявны!

— Тi и дзимлялат, — гусьöн аслыс моз горöтчис бригадирыс, и бур эд, что сiдз шуис, некин эз кыв.

Отирыс етша вöлiсö открытöй партийнöй собраннёыс вылын, но баитiсö уна, унажык пурисö бригадирресö и медöддьöн Митиперсö, кöда медбöрын да бöра горöтчис: «Ог понды уджавны!»

— Мый, мый? — кыдз уполномоченнöйыс эз вежöрт бригадирсö. — Кыдз эшö пондан уджавны! Кыдз эшö, зонка, пондан керны!

3

Асылыс петiс лöнь, дзугыля, шондiыс весьтын кизерик кымöррез, лысваыс абу не лудыс, не лист вылын. Митиперыс бöра отирсö иньдiс куртны (механизаторресö ог лыддьö, нылöн кураннэз местын машинаэз). Бригадирыс иньдiс отирсö куртны, вундöмыс йылiсь дзик вунöтiс, кöть сылö тöн тшуписö да тшуписö сiдз, что талун юрас, кыдз кольмöм каньлöн.

Иньдiс Митиперыс отирсö куртны, сыбöрын лöсьöтчис гортас пыравны, сёйыштны и вöлись мунны уджалiссес дынö, но правленнё дынсянь гриваыс вылын пондiс кывны тракторлöн шы. Бригадирыс видзöтыштiс ыбыслань и сьöлöмыс кыдз мезмис: «Беларусьыс» пондöтчис ытшкыны медбур рудзöгсö, кöдö видзöтiс тöн рытнас и тöдiс, что сюыс эшö абу воöм. «Кывзас разь кинкö миянöс?!» — сэк жö Митиперыслöн пондiс висьны юрыс, дугдiс симавны кынöмыс. Сiя öвтыштiс быдöс вылö кинас и аслыс шуис: «Мед кöть мый керöны!.. Ась...» — и öшöм моз ни иньдöтчис ыбыс вылö. Пантась жö эшö кузницаэс дынын Ондрон старикыс, кöда бöра тэрмасис куртны, адззис бригадирсö, осьтiс öмсö, мыччис шоч пиннесö и ылiсянь юалiс:

— Митипе-е-ер, ытшкыны я мый я мöдöны рудзöгсö?

— Ог тöд... Поди, ытшкасö... — шыасис бригадирыс, содтiс шаггесö, медбы пöрисьыс дынiсь чожажык вешшыны, кöр тöдiс, что Ондроныс пыр уна тöдö и уна адззö, пондас бöра быдöннысö лэбтыны и лэдзны, видас и шуас, и тэныт шедас.

— Кин сэк тöдö? Али катшаыс майöгыс вылын? Ох тi и начальсво! Ме ог тöд, тэ он тöд, сiя оз тöд — немöй поннэзö лэдзчисим и олам.

— Мун тэ сэтiсь, дед! — ас кежас висьталiс Митиперыс и колис стариксö.

— Чожöсь! Кутам, подаыслö ытшкам да вердам сюсö, а аслыным мый?! — кивзыштiс. — Кöркö-ö-ö... Быд шепсö öктiм... Ох-хо-хо! А мый? Государсвоыс эд бöб юрнас кыськö ваяс да вердас... Тшыгйöн оз видз. Одззамоз бы... Уна бы тшыг кынöмнаныт уннялiт. Велалiт бы овнытö и уджавнытö, — инька моз бизгис старикыс.

Кыдз эта шусьö? Эта шусьö, что пöрисьыс велöтö бы овнытö томмесö, а нiя тэ вылö, дед, дзар бы оз керö. Или мый?

Тракторыс ыб вылын кыскалiс жнейкасö, ытшкис сю, лёдззöн-лёдззöн рудзöгсö водтöтiс ыбыс вылö. — Но мый, бригадир? — межа дорын бöра бригадирсö панталiс уполномоченнöйыс, кöда тöн рытнас матегалiс Митиперсö.

Шы эз сет бригадирыс, синнэзас шогöт, чужöмыс нюжалöм, голосыс сибдöм. И уполномоченнöйыс сэсся эз понды баитны. Межалань катыльтчис тракторыс, сувтчис зэв. Кабинасис чеччöвтiс трактористыс, був-бав видзöтыштiс Митиперыслань, шынньöвтiс и висьталiс :

— Ме эд ытшка...

— Тшöктiсö и ытшкы, — горöтчис бригадирыс.

— Одзöв жö, натьтö...

— Некытшöм одз абу! Ольсав! — трактористсö öмнас вермис уполномоченнöйыс.

— Ме мый?.. Ме öтiк лунöн пöрöта, только вот мый пондат вартны? — кабинаö бöр пуксис трактористыс.

Бригадирыслö эстöн нем лоис керны. Сiя ыб вывсянь иньдöтчис гортланяс и сiдз бы öнi жö юис вина, что öмас сöдзис дульыс, кынöмас дзользьыштiс кыдз гаг. Вина... Этö асывнас, кöр отирыс уджалöны, а тэ... а тэ... Но сiдз ни тöн да талун Митиперыслiсь гудыртiсö олансö, что юис бы пöт, водiс и узис, кöть сэтчин мый ло! Сэк талуннямоз деревняын эшö винасö эз юö, но...

Вермасис-керис Митиперыс думаэскöт, но эз кеж не магазинланяс, не Ильяэзлань, кöда заптiсис нимлун кежас. Бригадирыс эз мун и уджалiссес дынö, а ыб вывсянь локтiс гортас, юис ырöш, пöрöтчис западня вылö, куйлöв-керис и ачыс эз казяв, кыдз ланьтiс. Узис сэтшöм бура, что осьтас синсö, видзöтас öшынас, лöсьöтчас чеччыны бы, но бöр онмöссяс, кыдз кытчöкö вöяс, да берсясö вöтасьö и вöтасьö...

Саймöтiс зэр, ва воттез гиззисö-вартiсö öшынö, крыша бердö, öшын увтын льöмпуыслiсь уввесö нёкралiс тöв. Митиперыс шупыта чеччис западнясис, петiс öтöрись посöдзö, пондiс видзöтны, кыдз небыт кымöррез паськалöмась деревняыс весьтö, шондi югöрсö вевттьöмась сiдз, что эн и думайт, бытьтö талун дугдас зэрны. Швачкис-зэрис бура.

Сiйöн сорöн чулалiс öтiк лун, мöдiк, вöтiс да колис куимöт, и нёльöт лунас зэррес дзугисö удж. Бригадирыс быд лун отирсö иньдiс ытшкисьны, а эта коста ытшкöм туруныс видззес вылын кельдöтiс, нёштöммис.

Тöвнас сiйö оз ни пондö мöссэс сёйны чöскыта, оз ни ло сiя йöлыс. Туруныс мый! Вот ытшкöм сюыс куйлiс зэрыс увтын, и быд морт бригадирыслö вермис висьтавны: «Дзимлявны эд колö рудзöгсö! Бригадир!.. Мыйöн думайтан? Сiдз разь отирыс уджалöны?»

«Кыдз уджалöны? Кыдз уджалöны?.. — мурзис бригадирыс, оланыс сьöкыт из моз лязiс, видiс и нерис, но сiя нем эз вермы керны, эз куж вермасьны погоддяыскöт.

Зэрö. Багсявны ни пондöтчис ытшкöм рудзöгыс. Талун багсьö, ашын пондас чужны, а чужöм сюнас мый керны? Няньсö он ни пöжав. Кольччас керны сур. Вöлись сэк колхозным пондас дзунгыны сурсö, быдса год йöктыны да сьывны, а сыбöрын тшыгувья нюжöтас коккесö... «Огö кулö, челядь! Вердас государствоыс...» — юрнысö вылына видзöны колхозниккес, но бригадирыслöн сьöлöмыс сiсьмö гусьöн, кыдз гаг сёйö...

— Эн тöждiсь, Митипер! — гажöн быргö сiя жö агрономыс. — Видзöт погоддяыс кытшöм... Вина юны и эм... Босьтам магазинсис да сöтам! Кыдз думайтан?

— Э-э, — вирснитiс дульсö бригадирыс и иньдöтчис магазинö: винаыс миян и луныс миян. — Ю, Валерка! Кулам, дак мöдöр югытас öманым некин ни оз кисьт.

Юыштiсö. Быдöс вунöтiс — бур. Рытнас гажа, асывнас юрыс висьö. Чеччас, ветлас правленнё дынöдз, висьталас, кинлö да кытчö мунны, мый керны и тшыг пон моз бöра ни нюкьясьö, кошшисьö, бытьтö винаыстöг оз вермы овны.

— Дугды! — неöтпыр ни висьталiс предыс, мыччалiс кулаксö, но Митиперыс адззис и эз сэтшöм хозяинсö.

Погоддяыс — шогöт, шондiыс оз и мыччась. Отирыс тöждiсьöны удж понда, а Митиперыслö гажа, нем понда оз тöждiсь.

— Мый миян бригадирлö лоис?! — дивуйтчöны ни колхозниккес, нылö ни недолыт, что Митиперыс ветлöтö код.

Мый бригадирыслö лоис, ачыс тöдö... Сiя думайтö, что юас дыржык, лэдзас кодувья бригадасö, сэк вöлись и вашöтасö бригадирсис, но кытчöдз юö да уджалö. Висьтав, что оз уджав, уджалöны отирыс, а Митиперыс гардчö. Бригадирыс юис неделя, неделя юрыс эз сайкав, и вöлись винанас потiс, сэтчöдз тагьясис, что сьöлöмыс пондiс гудыртчыны, эз понды тöрны не сёян, не юан, не узьны эз понды вермыны. А зэрнытö эз дугды, эшö кык неделя ваын куйлiсö ытшкöм туруннэс, пöрöтöм рудзöг. И кыдз вердны эта бöрсянь тöвнас подасö, мед думайтö предыс. Кыдз сёйны чужöм рудзöгсö, ась думайтö агрономыс. Но Митиперыс адззö, что агрономыс оз думайт тшыгйöн овны, предыслöн некыт оз вись подаыс понда, сэк мый нö? Öтнатлö я мый я быд торыс понда сьöлöмыт висьö? Тыдалö, сiдз...

Гожумыс отирыскöт дзик орсiс: зэрис да дугдiс, бöра лоисö гажа луннэз. Ыббес вылiсь чужöм рудзöгсö вартiсö комбайннэз, видззес вылiсь турунсö куртiсö да тэчисö зороддэзö. Уджыс эз падмы, уджалiссес весь эз олö, но бригадирсö чувйис аскоддя враг, полöтiс локтан тöлыс, топ модис: «Митипер, кытчöдз эн сюртнясь, колö мездöтчыны! Вешшыны колö...»

Мездöтчыны... Кытiсь? Бригадаыс не додь, и бригадирыс абу вöв, кöдö, кыдз мукöдыс сералöны, доддялiсö бригадиравны и юскисьнытö оз вермы... Туйис бы отирыс дынiсь кокнита юскисьнытö, Митиперыс бергöтчис да мунiс ни бы, но бригадирыс талун пышшö бы, ашын видзöтö: этö эшö абу керöм, сiя кертöм и бöра думайтö: «Дзимляла гуна вывсис сюсö и муна!» Удж да удж... Кöр сiя бырсьö колхозас? Кин öтiк луннас керö? И уджалö бригадирыс, кыскö кадсö, и арнас ни, бöрья вундан неделянас люкась жö предыскöт, кöда Митиперсö асывнас корис дынас да пондiс сьывны-баитны:

— Никифор Иванович, уна эшö вундынытö?

— Эм гектар пятьдесят гöгöрыс... Оз кö тшык погоддяыс, чожа ни дзимлялам.

— Райисполкомсянь звонньöны, — юрсö гыжьялö предыс. — Модьöны... Сводканас тшöктöны талун жö вундöмсö сетны...

— Кыдз?! — бытьтö эз вежöрт бригадирыс, кöр этатшöмсö сизимись ни пантавлiс: керан или он, но сводкаэзнас, бригадир, сет отчётсö, бöбöт, дзик назёмыс кыскассис и туруныс ваяссис, а мунан кö ыбас — туруныс зороддэзын и назёмыс карта вылын. Буракодь ни ми велалiм кыввезнаным керны, сiдз уджавны, что кöть кинöс шныгам, и ог думайтö, мый этаись петас.

И петö, что колхозыслö нем оз сод, а начальствоыслö?.. Нiйö ошкöны, премируйтöны... Талун Митиперсö тшöктöны ошшасьны сiйöн, кöда абу, бöбöтны колö колхозниккесö, колхозсö и асьсö.

— Райисполком, райисполком... — предыслöн мылякö пымалiс плешыс, тöдчис, что совестьыс мымдакö эм жö.

— Зэрмас кö? — дзик предыс одзын öшис бригадирыс.

— Тэ видзöт шондiыс вылö, — предыслöн синнэс був-бав.

Недолыт Митиперыслö, кыдз мыйкö сiйö тшöктöны гусявны, но оз вермы паныт ордчыны — веськыта висьтавны, что сiдз оз кер, сiйöн и баснинас кытшлалö, юасьö:

— А мыйлö бы одзлань сетны отчётсö? Кöда абу...

— Колö, тыдалö... — мöдöрö видзöтö Кузьма Дмитриевичыс.

― Öддьöн колö?

— Ме мыйöн тöда?! Эз бы ков, эз бы бюронас полöтö, — лöгасис кодь ни предыс.

— Кинлö колö, мед керöны, а ме ышö думайта! — кыдз вачкис бригадирыс, бöра эд предыслiсь туйсö поперегалiс... И сылiсь я только?!

— Ась, — сэк рамыника ни шуис предыс. Кузьма Дмитриевичыс кужö овнытö районсис начальствоыскöт. Сылö колö не талун дак ашын пантасьны райисполкомас уджалiссескöт, сiя Митиперся ыджытжык должностьнас, вот ась и бöбöтö, кинöс сылö колö, эд колхозниккескöт талун вермас пантасьны, вермас и орддьыны отирсö: пуксяс вöв вылö, дзик мунас ылiсь бригадаö, а ачыс кежас чериавны и быдöс бур, мыйись-мый тэнчит жö юалас: «Бригадир, мыля этö эн кер?!» А Митиперыслö отирыскöт колö пантасьны быд лун, и быд морт вермас юавны: «Бригадир, кывзы жö... Радиоас ошшасисö, бытьтö пö быдöс ни миян вундöмась, а Пальникас ошыс зöрсö сёйö, и Вöрсаяс рудзöгыс эшö вундытöм... Мый сiя лоö?» Кузьма Дмитриевич, мый эта лоö?

Предыс кужö овны начальствоыскöт. Сiя Митиперыскöт сводкаэс йылiсь баитiс, кошшис аслыс ёрт, кöда спина сайö позис бы сайöвтчыны, дзебсисьны, ежели мыйись-мый... Мый вермас лоны, кöр тэ ачыт колхозас хозяин, кöр талун эн вунды пятьдесят гектар, а сводкаöн юöртiн, бытьтö бы вундiн? Думайтан кинкö йöзыс пондас кошшыны вöр колассис пятьдесят гектар вылiсь сюсö, кöр сэтчин ошыс хозяин? Кöркö бы... А öнi предыс кужö уджавнытö и овнытö начальствоыскöт. Сiя бригадирыскöт баитiс öтiкö, а бöрсяняс керис мöдiкö: Митиперыслöн правленнёсис петтöн спинаыс эз ешты саясьны, а Кузьма Дмитриевичыс счетоводыслö висьталiс ни: «Светлана, гижан сто процент!»

«Но», — кокнита юрнас öвтыштiс Светланаыс, кöдалöн дышыс петö фермаын чилькöтны мöссэсö, сiйöн и уджалö счетоводöн и бура вежöртö предсö.

Погоддяыс сулалiс. Шондiыс гажöтiс мича югöрнас. Киссис вöр вылiсь лист. Кинкö адззылöм, что лэбзьöмась ни туриэз. Тракторрес гöрисö зяббез. Колхозын вундiсö медбöрья ыббез да сэтшöм местаэз, кытчö сьöкыт пырны комбайнöн, нiйö колö кыскавны тракторöн.

Погоддяыс талун гажöтiс, а ойнас пöльыштiс лэчыт тöв, вайöтiс кымöррез и пондiс люззьыны-кисьтны зэр, кыдз овлö арнас. И кыдз овлö арнас колхозын, вундытöг кольччисö ыббес, кытiсь сводкаэс сьöртi важын ни дзимлялiсö сюэсö, и кыдз овлö, эта йылiсь ештiсö ошшасьны ни газетаын и радиоöт. Бöра петiс сiдз, что бытьтö бригадирыс ошшасьöм кертöмнас, кöда абу, да бытьтö эм, кинкö керис, а отирыс медодз адззисö Митиперсö и синнэзас бытшкисö: «Тэ мый, бригадир? Кöр ни миян вундiссьöм, а тэ сё эшö иньдан миянöс вундыны?» Кöть рожаат симöт павдöт...

Кыдз эта бöрсянь отирыскöт уджавны? Кытшöм вермас лоны бригадирыслöн авторитет?

Зэрис ой и лун. Луннэс гудыраöсь, и Митиперыслöн гудыраöсь думаэс. Сiя öтiк ой эз узь, тöждiсис колхозыс понда, мöдiк ой эз узь, тöждiсис ни ас пондасис, унажык думайтiс, кыдз бы шедтыны паспорт, а куимöт ой кежас гортö эз ни енöвтчы: пасьталiс виль йöрнöс, кöмалiс виль вешьян, зепас сюйыштiс руб-мöд деньга, мамыслö висьталiс, что мунö городö, и петiс керкусис.

Митиперыс подöн оськöвтiс районöдз, рытнас локтiс ёртыс дынö, кöда уджалiс милицияын, сувтöтiс бутылка, юисö кыкöн, и ашынас мортыслöн лоис паспорт, борддэз кыдз быдмисö, и кöть кытчö лэбзьы!

4

Сiдз петiс, что Митиперыс пышшис гортiсь, колис роднöй деревнясö, мамсö — нем эз жалейт и некинлö эз норась, что умöля быдмис, сьöкыта уджалiс, учöтсянь новйис нинкöммез, вочöм вешьян, етша вермис велöтчыны. Мый вöлi отирыслöн, сiя и сылöн, кыдз олiс отирыс, сiдз олiс и сiя. Кинкö моз кузь руббез эз кошшы, кöр тöдiс, что кöть кытöн колö уджавны, что и городас весь няньнас оз вердö, кокнит уджыс оз пантась, кöр специальностьыс эз вöв, деревняын мый бердö кутчисис, сiйö и керис, а йöзын быдöс вöлi тöдтöм, мöдкодь.

Город... Кин мезмис деревнясис да олiс городын, кужис ошшасьны оланнас, а Митиперыс локтiс городас, медодз эз тöд кытчö мунны, кытöн узьны, öвтчис лун-мöд кыдз öшöм, кыдз не ачыс, кык ой узис вокзалын, луннас сёйис öтпыр, шогалiс тöдтöм шогöтöн, ачыс аслыс эз верит, что вермас овны татöн, кытöн шум да гам, машина да тшын, öтiклаö мунан — очередь, мöдiклаö тальччан — бöра очередь. Городын медодзза луннэзö сiдз дзескöтiс, что талун жö бы пышшис гортö, кöть мый, бöр бы пондiс бригадиравны, сёйны мамыслiсь пöжалöм нянь да лолавны сöстöм руöн, но чулалiсö öтiк лун да мöдiк, куимöтас панталiс тöдса мужикöс, кöда татöн олiс сымда ни, что некинöс ни эз тöд деревнясис, а эд вöлi Митиперыскöт öтiк вужись, важ родня, сiдзкö. Важ родняыс нуöтiс гортас, вердiс, узьтöтiс и ашынас иньдiс заводö.

Заводыс эз вöв ыджыт. Митиперыс медодз эз тöд, мый сэтöн уджалiсö. Да и мыйлö вöлi тöдны, мый керисö заводыс пытшкын, кöр сылö сетiсö вöв и висьталiсö, что вöвнас пондас кыскавны сiйö, мый тшöктасö. Зонкаыс вöввесö любитiс учöтсянь, кужис нiйö доддявны и юскыны, вермис кöть мый тэчны телегаö и ректыны. Мый сэсся колö, эд татöн не колхоз, а город, пондас шедтыны не трудодень, а деньга, кöда вылö мый колö, сiйö и босьт.

Нем сэсся кытчöдз эз ков Митиперыслö, пондiс овны тöдсаэз ордын, ыджыт керкуын, мед и увдöрись этажас ни, кыдз джоджулас бы, кытöн öшыннэс муыс бердын ни. Олiссес шондi югöрсö бура эз адззывлö, пыр лолалiсö уль ру, стена бердын öшалiс да багсис паськöм, но вöлi горт. Эстöн туйис узьны и шоччисьны, и нем сэсся эз ков Митиперыслö, кöть квартирасис хозяиныс вöлi аскодя: пыр кинкö вылö лöгалiс, некинкöт эз баит, эз лэдз джоджöттяс весь ветлöтны, кызöтны, несйыны, пыдынжыка ловзисьны, сёйны, юрыс висис табак тшынсянь, сьöлöмыс гудыртчис ньылöм дуксянь. Олöмыс понда эз кор деньга, а месяц конецас тшöктiс вайны литра вина.

Митиперыс пондiс овны да уджавны заводын. Гленитчис уджыс. Сiя мыйöнкö вачкисис деревняын удж вылö: сэтшöм жö вöлыс, сiя жö — тэч да ректы, кыскы да вай. Öтöрö ветлас да мöдöрö, видзöтан кö, и луныс чулалас, локтас рыт, колö юскисьны, вöвсö йöртны гидйö, кытöн сiйö вердö конюх, кöда дышкодьöв, кöр код, кöр садь, вöввесö вердö и оз, и Митиперыс рытнас сёдö ачыс и асывнас оз вунöт вайны гöснеч: талун няньтор, ашын яблок — ачыс оз сёй, да вайö нёль кока ёртыслö.

Деревняын уджавтöн, кöр бригадиралiс, зонкасö уджыс топ керис лёк мортöн: етша чулавлiсö луннэс, медбы эз эрзы не öтiккöт дак мöдiккöт, и ёрттэс вöлiсö етша, а татöн некинкöт лоис пурсьыны — нем вöлi янсöтны, медодз сiя жö конюхыс пантавлiс, кыдз бур ёртöс ни, кöдакöт кужисö баитны вöввес йылiсь, öшлiсö и кералiсö олансö, баснинаныс гöтрасисö и янсöтчисö, быздiсö, мый колö и оз: баитан и сьöлöм вылын кокнит, оланыс шыннялö ни. Митиперыслöн етшажык ни тöдвылас усьлiс гортыс и мамыс.

Мамыс öнi гортын олö öтнас, натьтö, гажтöмтчö жö, котрасьö нылыс ордö, жмитчö бы Нинаыс бердö, но сылöн аслас челядьыс нёля, и сэтшöмыслiсь няньсö уна он сёй, кöр мамыс вылö видзöтлö пиньöлöн.

Олö да уджалö зонкаыс городын и, кыдз квартирасис хозяиныскöт баитчисö, месяц конецас небö кык бутылка вина, вайö гортö, юкталö роднясö.

Кытöнкö тöв шöрнас адззисис виль ёрт — Гаврил дядь. Сiя Митиперыс сьöртi пöрись ни, но зонкаыс дынö сибöтчис ачыс и юалiс: «Но кыдз, деревняись мужик, дыр вöвнас пондан уджавны?»

— Мый сэтшöмыс? — эз вежöрт Митиперыс.

— Вöлыс, зонка, талун эм, ашын абу... Видзöтан кö, Уралыт местын пондас катлясьны машина, мый сэк пондан керны? Лок миян дынö цехас уджавнытö. Плотникöс кошшöны, а тэ, поди, чернас кужан керасьнытö? Уджалыштан мымдакö, а сыбöрын велöтчан мыйкö мöдiкö керны.

— Мый мöдiксö керны?

— Уджыс адззисяс, киэт бы эз полö! Висьталiс Гаврил дядьыс и пыртiс Митиперсö уджавны цехö. Виль удж. Виль ёрттэз. Отирсис эз пов, уджсö керис: черöн бергалiс, кытчö вачкис клин, кытчö кöрттув дорис, кокнит уджыс, и кадыс тырмö видзöтны, кин мый керис сы гöгöрын. Медодз бöра Гаврил дядьыс дынын гардсьö. Дядьыс рам мывкыда, жаг, мый пондас керны, топ суналö, но быдöс сылöн аркмö — любо видзöтны.

Пöрисьжыкыс эз пов уджсис, мый бердö кутчисис, сiйö и керис, мырсис-маласис, сюр-сяр плансö эз тырт, кузь руббез сьöрын эз вöтлiсь, баитiс: «Сiдз, Никифор Иванович... Этадз кöркö деревняас уджалiм, а öнi кыдз сэтчин?»

— Сякö, Гаврил дядь...

— Мыля нö? Или кинкö вомдзалiс деревенскöйесö?

— Ме мыйöн тöда?..

— Сiдз, сiдз... Сiйöн тэ и пышшин гортсит?

Шы оз сет Митиперыс. Недолыт сылö, кöр деревнясис олансö оз тöдö, а сералöны, бытьтö сэтчин быдöс нач ни дзугсис, недолыт Митиперыслö, но оз дорйись, немöн деревнясö городыс одзын ошкыны, ежели ачыс вартiс татчö.

— Вежöрта, Никифор Иванович!.. Сэсся уна ог баит, видзöт, кыдз колö тöчитны этö болтсö, да велöтчы. Пригодитчас!

— Велöт, велöт, Гаврил Романович! — мастерыс сэтöн и эм. — Миянлö том токаррес колöны.

— Велöтчам! — Гаврил дядьыс видзöтö томжыкыс вылö да Митиперыслö нюжöтö кöрттор. — Пешлiсь.

— Ог куж, — полö зонкаыс.

— Он куж или полан? Он куж — велалан, а пондан кö повны, öддьöнжык повзьöтам. Кут! — висьталiс и лэдзис станоксö, кöда унньöвтiс, бергалöв-керис моторнас, вдруг сувтiс, дзик пондiс видзчисьны Митиперсö.

— Кут, кут! — киас ни Митиперыслö сетiс кöртторсö пöрисьжыкыс, ачыс сувтiс бокас, велöтiс, кыдз да мый кутны, пуктыны и зэлöтны. И зонкаыс пондöтчис уджавны виль удж. Медодз киэс дрöжитiсö — етшажык уджалiс, унажык кымöсыс вылiсь чышкис ньылöмсö, пессис — керис болт бы, а петiс кöрттув — брак, сiдзкö, и кöть тэ сэтöн горзы, кöр учöтсянь эн велав сулавны станокыс сайын, но Гаврил дядьыс жö бöра малыштiс спинасö и баитiс:

— Но мый, деревня? Оз кывзiсь детальыс? Тэ эн тэрмась, не нывка сьöрö вöтчан... Юрнат унажык уджав, сыбöрын киэзнат, вежöртiн?

— Угу, — нырнас вирскайтiс томжыкыс.

— Вай мыччала, — Гаврил дядьыс сувтiс станокыс сайö Митиперыс местö, ошкис ёртсö. — Видзöта ме, что тэ, мыся, зонкаыс прока, но абу смев. Городас, Митипер, колö смелöн лоны! Синнэз эд пыр полöны, а киэз керöны, и некин пö быдсöн абу чужöм: талун оз пет, ашын, видзöтан кö, керан. Сiдз?! — Видзöтiс лэчыта, и синнэзас гаж.

Öтпыр да мöдöтпыр Митиперыс сулалiс и уджалiс станок сайын: öтпыр зырымсö чышкис, мöдöтпыр эз куж тöчитны болтсö, а куимöтпыр керис мыйкö сэтшöмö, кöда пондiс ни вачкисьны деталь вылö.

Пöрисьжык ёртыс видзöтiс, кыдз уджалiс томжыкыс, бöра веськыта юалiс: «Мыля нö деревнясис пышшин?»

— Пышши тай... — шуас Митиперыс.

— Ачыт тöдан, Никифор Иванович... Тэныт овны, миянлö, пöриссеслö, одзжык кувны. Эн лöгась, но ме тэныт веськыта висьтала... Лöсьöтчан кö татöн одзлань овны, колö вужьясьны, бадь моз лэдзны вужжетö муас пыдöжык, мед не тöв оз пöрöт, не лёк морт оз шедты. Кыдз думайтан? Бур я му пытшкас квартираас овнытö? Натьтö, эд том мортыслö оз лöсяв?.. Ме бы тэ местын видзöтi-кери да керкуок неби... Медбы бекöр пасьта да садник вöлi, кытчö бы тулыснас садитi лук, ведра-мöд картов... И быд торсö эз бы ков босьтны, а кытöн, поди, ачым бы луксö быдтi да вузалi...

«Ог тöд?.. — думайтö зонкаыс, сылöн и деньгаыс абу, да и оз вежöрт, мыйлö садниксö видзны городас.

— Уджалышт, думайтышт да вöлись садниккес йылiсь пондам сёрнитны, — бöра баитö Гаврил дядьыс. Эна басниэс бöрсянь, быль, олан бы не ни талуння лунöн, а одзлань думайтан и деньга ни öктан бы, етша, но рубсис керан бы кыкö, быд копейкасö карманат дзебан пыдöжык ни.

Гаврил дядьыс сайсянь Митиперыс жагвыв велалiс уджавны станок сайын. Чулалiс месяц-мöд, пöрисьжык ёртыс жö баитöм мастерыскöт, и Митиперсö öтнассö ни лэдзисö уджавны токарьöн. Зонкаыс ачыс эз казяв, кыдз деревняын олiсь пöрис городскöйö, крестьянинiсь — уджалiсьö, и деньга ни сылöн лоис да сымда, что позис аслыс сёйны пöт и мымдакö иньдыны мамыслö, но кытчö тэ! Митиперыс ачыс пöт эз сёй и мамыслö öтiк копейка эз иньды, öктiс деньгасö да узис и вöтасис, кыдз бы босьтны керкуок, медбы сэтöн пызан пасьта да вöлi му, кытчö бы тулыснас садитiс картов, лук, помидоррез и эшö öтiкö да мöдiкö. Сылöн и юрыс уджалiс, и киэс эз полö уджсис.

— Сiдз, зонка! Кольччис гöтрасьны, — сiя жö Гаврил дядьыс баитiс Митиперыскöт. — Бöрйы городсис невестасö. Кинöс босьтан? Поди, Ромашкинасö? Би нывкаыс! Сэтшöмыскöт некытчö он торксьы. Мый юртö öшлан? Или оз гленитчы Ромашкинаыс?

Ромашкина... Уджалö сэтшöмыс цеханыс. Токарь жö. Эшö баитöны, что месткоманыс кытшöмкö начальник. Басöк нывкаыс, но вывтi чож. Кытчö ни, поди, Митиперыслö Ромашкинаыскöт, кöр нывкасис цехас начальниккес и мастерыс полöны? «Эх, Ромашкина, но и Ромашкина! Милиционер!.. — мужиккес ас коласаныс сералöны нывкасö и орддьöны, тöн юыштöмась, а талун шогалöны. — Но, Ромашкина! Еныс адззас жö асьтö...» А Ромашкинаыс сэтöн и эм, чирзö:

— Герман Николаевич, мый бöра талун сунавтöн ветлöтан?! Бöра юрыт тыра куд сьöкыта? Видзöт, эн нильды! Вашöтас кö директорыс заводсис, месткомыс оз понды дорйыны...»

— Тэ мый, Дарья Кирилловна?! Кöр ме юа?! Кезöтö винасяняс, — Германыс зэгйö юрсö.

— Сэк мый нö пö бöра гусялöмыт? — веськыта юалö Дарьяыс.

— Мый, мый? — Германыслöн ыждöны синнэс, бытьтö кага, нем эз кер, эз адззыв, оз тöд и некöр оз гусясь, мед ни честнöй мортыс.

Гаврил дядьыс гöтралö бы Митиперсö Ромашкинаыскöт, гажöтчö, нывкаыс стрась сылö гленитчö. Сералö дядьыс, ачым бы пö гöтраси, да одзöв пöрисьми, а тэ, Митипер, том эшö, видзöт пö да думайт.

Одзöв гöтрасьны Митиперыслö. Медодз сiя öктас деньга, босьтас керку и вöлись сэтчö вайöтас невестасö, а деньгаыс öксьö дыша: öтiк месяц эм, мöдiк месяц етшажык, куимöт унажык — руб öтлаасьö рубкöт, жагвыв содö и, видзöт, кык год бöртi öктiс эд, мымдакö. Кыдзкö Гаврил дядьыс жö зонкаыслö шуö:

— Но мый? Ме адззи тэныт керкусö. Важ кодь ни, но вочан дак тэнö эшö пöрисьтас.

— Босьта, — висьталiс Митиперыс.

5

Митиперыс городыс дорись небис важ керку и пондiс сiйö вочны-гуддисьны: то вайис кирпич, то кошшис вöр да пес, то кыскалiс жеч. Уджавны эз тэрмась, любитiс маласьны быд торыс дынын, керны сiдз, медбы отирыс бöрсяняс эз сералö — аслыс эд уджалö, (кресенняэзнас керкуыс дынын мырсис, эз адззыв не отпуск, не праздниккез, эз тöд невестаэз, тöдiс только завод да горт). Кöр и Гаврил дядь вовлiс, отсавлiс дорны то öтiклаöт, то мöдiклаöт.

Сьöкыткодь вöлi, но туйис овны городын, кöр эм деньгаокыс. И магазиныс зэв, кытчö колö мунны — автобус, троллейбус, такси, а жаль кö деньгаыт, котöрт подöн, рытнас верман мунны театрö, кежавны киноö или петны соседат.

Митиперыс киноас ветлiс öтпыр-кыкись, театрыслiсь пытшксö эз адззыв, соседдэсö тöдiс умöля.

— Зонка, кытчöдз керкутö вочан, пöрисьман. Кöть бы миянö öтпыр петалiн, — баитö сiя жö Гаврилыс.

Матын да ылын: адззылiс ни кытöн олö Гаврил дядьыс. Пыксьы, эн пыксьы, колас пыравны пöрисьжыккезас, мыччавны асьтö Гаврил дядь иньлö, кöда видзöтö бы пö деревняын шогмöм мортыс вылö, топ деревенскöйес мöдкодьöсь. И Митиперыс кресеннянас пасьтасис медбур паськöмнас да иньдöтчис ёртыс дынö.

Гаврилыс эз ов богатöя, но керку гöгöрас ёг эз вöв — чышкöм и дзимлялöм, посöдзсö сiдз миссьöтöмась, что сiя кыдз сералö да шуö: «Сулав! Бурундукыс вылö коль кöмкöттö...» Митиперыс локтiс ёртыс керку дынö, сувтчис, видзöтчыштiс, думаэзнас ошкис пöрисьжыксö, мыля сiя весь оз ов, а, тыдалö, пыр чувйö керкусö, кыт мавтöм краскаöн, кытчö дорöм басöк сера пöв: этчö лöсялöм петух, сэтчин кокасьö пуовöй курöг — быд торыс синнэз бöбöтö, висьталö, мед тэ сiдз жö уджалiн да олiн. Митиперыс видзöтчис-керис, кыскалiс коккесис котiэсö и кöмтöм коккезнас ни кайис посöдзö, здоровайтчис хозяиныскöт, кöда уджалiс мыйкö пытшкись посöдзас.

Пöрисьыс казялiс зонкасö, кисис шупкис молоток, гажöн ыкöстiс: «О-о... Мыся, кин жö локтö! Гöсь вöлöма... Маруся! Кытöн тэ?! Синнэтö осьт öддьöнжык да видзöт менчим ёртöс, то он верит, что сiя деревняись, и сэтчин вöлöма медыджыт, медбасöк, медвына да медчож. Марусяа-а-а! — кутiс зонкасö киöттяс, кыскö посöдзсянь керкуö, ачыс бобгö-ошшасьö. Иньыс паныт... Ыбöсыс коласын жö здоровайтчис, мужикыс моз жö сьылiс-баитiс, кытшöмкö жöник да невеста касьтылiс, кинöскö баснинас окалiс, кинöскö желлялiс, а Митиперыс кывзö хозяин да хозяйкасö, полö пыдынжыка ловзисьны, видзöтö Гаврилыс инь вылö, дивуйтчö, мыля öтыс вöснит — лы да кучик, а мöдыс, инькаыс, — кыз, и кыдз кызыс да вöснитыс олöны, лöсялöны керкуас.

Зонкаыслöн думаэс чеччалiсö öтыс дынö да мöдыс дынö, но сэтöн сiйö кыскисö пызан сайö.

Эз ешты висьтавны, что сёйис ни, кынöмыс оз симав, кыдз пукалiс ни пызан сайын, одзас пирöггез да тупöссез, зелёнöй лук турун, бекöртыр сола чери, яблоккез, помидоррез, вареннёэз — сёй да касьтыв кытöн вöлiн! Гöсьыс быдöс пешлiс, эз тэрмась, тшыг моз кырыммезнас сёянсö эз курав, öмтырнас эз из, а жагвыв курччалiс пирöггесö, панялiс шыд и виноватöя шыннялiс.

Гаврилыс кыдз хозяин тожö пуксис пызан сайö жö, етшажык баитiс, унажык кывзiс, а иньыс кыдз хозяйка бергалiс пызаныс гöгöрын, кылыс минута эз шоччись, юасис Митиперыслiсь, кытöн олiс, мый керис, мыля абу айыс, кыдз олö мамыс — быдöс бы тöдiс, бытьтö быдöс сылö мыйлöкö колiс.

Сёйис гöсьыс да видзöтiс керку пытшксö, сэтöн комсяняс мыччисис Гаврил дядьыслöн нылыс, тальччис джоджыс шöрö и пондiс дзиргыны веськыта лöзвевья синнэзнас да сiдз, что Митиперыс ньылыштiс бы öмсис сёянсö, да виньдiс, курöг моз пондiс синнэзнас кваркышавны, дульсö ньылавны да лолавны морос тырнас. Гöсьыслöн синваэс петiсö, сылö стыд лоис, что горша сёйö, этасянь и виньдiс, рожаас чепöссис гöрд вир. Митиперыс пышшис бы пызаныс сайись, но Гаврилыс öт кинас кутiс йöрнöс сосöттяс, мöднас клап вачкис спинаас, гажöн висьталiс, что нем умöльыс эз ло, Никифор Иванович, что нiя сы кодь жö эд отир, чужисö и быдмисö деревняын, кöть öнi и олöны городын.

— Петух моз эн сёй, — шынь керис Гавриллöн нылыс, мыччис гладь сер-серöтан пиннесö, лöз-югыт синнэзас сэтшöм гаж, что керкуас топ шондi югьялö. Нывкаыслöн юрсиыс сьöд, чикисьыс коскöдззас да ки кыза. Сiя абу мамыс кодь кыз да рышкыт, а топыт да лöсьыт.

Митиперыс сёйис и эз, бöра лöсьöтчис чеччыны пызаныс сайись, но хозяиныслöн нылыс пуксис мöдöрсяняс оча-паныт, пондiс веськыта видзöтны, кыдз юалiс: «Мый нö тэ? Сэтшöм я мый я и эм?»

— Вомдзалан эд... — шыасис зонкаыс.

— Мый сiя лоö? — эз вежöрт нывкаыс и пондiс видзöтны эшö лэчытжыка.

— Сiя лоö, что тэ гленитчин гöсьнымлö, — нылыслö висьталiс айыс и Митиперыслö ни шуис. — Сёй буржыка, сэк тэ сайö и сета нылöс.

Сiдз гöститiс Митиперыс Гаврил дяддезын, топ роднöйöс панталiсö и кольлалiсö. Хозяиныс мунтöнняс ни баитiс:

— Тэ, зонка, миянö туйсö эн вунöт. Ыбöсыс пыр осьта...

Эта лунсянь татчö кыдз колис сьöлöмсö, кыдз рыт, сiдз и шыбыльтö Гавриллэзö, кыдз рыт, сiдз и татöн, ась и шуöны, что гöсьсö öтпыр, кыдз гöсьöс, панталöны, а мöдöтпыр ыбöссö ныр одзат ни пöдналöны.

Вöлi тулыс. Цветитiс турун и льöмпу. Сьылiсö кайез. Зонкаыс эз понды вермыны овны басöк нывкатöг, кöдö пондiс бöбöтны то киноö, то театрö, немымда ни эз жалейт деньгасö, кöр одзжык кырымас жмитлiс быд копейкасö, видзис только сёйны да керку вочны. Да керкуыс, висьтав что, вочсис, кольччис мымдакö уджавны öшыннэз да посöдз гöгöрын и... котрасьны невестаыс дынö, корасьны, гöтрасьны и овны. Тэрмасис бы гöтрасьны зонкаыс, но нывкаыслöн мамыс бура синйис Машасö, быд шагын кольлалiс и панталiс, нылыс дынiсь эз вашöт зонкасö, но и эз лэдз пышшöтны, эд сiя эшö велöтчис.

Ветлöтiсö зонка да нывка рыттэзнас киноö, ветлöтiсö, кыдз мыйкö öштiсö и кошшисö, а сыбöрын öтiк гажа рытö окасисö пöрись тополлез увтын и чожа гöтрасисö.

Митиперыс невестасö вайöтiс аслас керкуö. Рад, пеллесö адззö, что шедiс сэтшöм инь, кöда кывнас оз джöмды: медодзза лунсянь жö керкуас пырис хозяин вылö хозяйка, пондiс веськöтлыны Митиперсö: «Митипер, а васö он жö бы кайöт... Митипер, пес пырт! Митиш, джоджсö чышкы, гор лонт, похлёбка пу, магазинö котрась, паськöмсö песлав, воч, вур, дзимляв да гумлав...» И Митиперыс асывнас чеччö одз, водö сёрöн. Уджалö заводын, локтас заводсянь, бöра уджалö, котрасьö — кымöссис ньылöм вотялö: пес да ва пыртö, джодж чышкö да гор лонтö, пуö сёйны и магазинö котрасьö, вочö, вурö и песлалö, а иньыс... Киэсö оз бы нятьöсьт, паськöмсö вывтсис оз лякöсьт, оз бы мыдз, оз бы пöрисьмы... Басöк да кодя иньыс шедiс Митиперлö.

Кык месяц Митиперыс иньыскöт олiс бура: öтыс уджалiс, и мöдыс уджалiс, öтыслö деньгаыс шедö сьöкыта, мöдыс уджалö — тöв чужьялö, ветлöтö столовöйö, пусьö да вердö, а локтас гортö, водас ольпась вылö, нюжласьö и кивзö: «Ой, мыдзи! Ой, коскö висьö!»

Митиперыс уджалансянь локтö мыдз, колö бы шоччисьны, а сiя эшö гортын пöттöдз уджалö, иньсö, сiдзкö, жалейтö.

Кык месяц мужикыс гортын уджсö керис ассис и иньыслiсь, но сыбöрын пондiс мыдзны. Öтпыр öтöрас зэрис, мужикыслöн спинаыс висис, локтiс уджалансянь, синнэсö бы кунис и сэсся не ки, не кок эз вöрзьöт, но иньыс шупыта ыкöстiс:

— Похлёбкасö кин пондас пуны?!

Митиперыслöн дугдiс висьны спинаыс, öшис мыдзыс, сiя кытiськö кыдз мезмис, сiдз лöгасис да ыкöстiс:

— А тэнö мый вылö?!

— Эн ыксы, деревня!.. — пирснитiс Машаыс. — Некытчö толкыт абу.

«Деревня... Мыйöн деревняыс умöль? Не деревняыс бы, тэ бы, Машенька, кань моз эн ов! — мужикыслöн пизис ни вирыс. — Деревня... Не деревенскöйыс я тэнö любитö?! Митипер, пым пöим вылö пуксин эд, тыдалö... Видзöтан и полан вынöнжык ловзисьны, мед эз жугав... Бокат узьлыны и эм, сэсся некытчö... Кыдз пондан овны сэтшöмыскöт?! Лоас кö эшö кага...»

Иньыс эз ни ло басöк, эз ло любо — йöз лоис, кöдзыт сьöлöма... Мый бы и керис ни асьсö? Кытчö и воштiсис? Но некытчö он пышшы, он коль керкутö.

Ветлöтö уджавны Митиперыс: асывнас мунас заводö, рытнас локтö гортö. Юрсö новйöтö пельпоннэс вылын öшöтöмöн ни.

6

Сэтöн соседыс, кыдз кырныш, дзик видзчисьöм, кöр тэ пондан öшыннэс увтöт ветлöтны да юртö öшлыны, гажöн ыкöстiс:

— Эй, сусед! Тэ мый, сöтам-вартам, öшын увтöттяс ветлöтан и он здоровайтчы?! Или ыджыт начальникö мöдан пöртчыны, сiйöн миян кодьыскöт он и баит? Сулав. Пуксям да ваксям, юасям да висьтасям, куритам да баитам, видзöтан кö, и дружитны пондам. Ме эд тэ моз жö татчö локтi деревняись. Колхозiсь жö, сöтам-вартам, пышши, и иньö, Кöс кокыс, колхозничаовöй жö.

Митиперыс тöдiс да эз соседсö, адззывлiс быд лун и дзик эз, кöр здоровайтчас, кöр оз, а вот талун Германыскöт усис тöдсасьны буржыка, матöжык мортыс дынö сибöтчыны, медбы поннэс моз не овны, а отирöн жö лоны, сiдз, кыдз, шуам, деревняын олöны, мый тэнат, сiя и менам.

— Здорово, кум! — кузь кисö нюжöтiс Герман Митиперлö, и кузь голяыс вылын юрыс бергалiс öтöрö да мöдöрö, кыдз майöг вылын тупка. — Мый нö, кум, гажтöм? Или сьöд кань туйтö поперегалiс? Или, сöтам-вартам, дедыт мыжйис? Ежели мыжйис, черöшлан кöрталам, пирöггез пöжалам да кын синнэсö касьтылам нянь-сов дорö, мед нiя миян вылö оз лöгалö. Сiдз эд, сöтам-вартам, сосед?! Кытöн тэ чужин да быдмин, кытшöм деревняись татчö шедiн?

Митиперыс висьталiс.

— Ох, сöтам-вартам! Да миян тэкöт нач матын овсьöм. Всего-этого, двести километра öтамöдным коласын вöлöм. А мыля тэ гортiсь пышшин? Кин вашöтiс роднöй да любимöй деревнясит? Может, сöтам-вартам, предыс дойдiс или бригадирыс пурис? Сэк пыр керкуас, эн орддись, ежели ми тэкöт быдмим деревняын.

Лякасяс сэтшöм морт, кыдз нять сапог бердö, и чожа сы дынiсь он мезмы, кытчöдз сiя тэнчит оз босьт, мый думайтö мырддьыны. Германыс медодз соседсö кыдз бöбöтiс дынас, поттшуйтiс папиросаöн, сыбöрын кыскис керкуас, пуксьöтiс пызан сайö, пызаныс вылö вайис няньтор, лук да сувтöтiс бутылка.

Митиперыс эз бы думайт винасö юны, кöр сiя жмот кодь — быд копейкасö дзебис карманас, сизимись лыддьö да вöлись сетö, а сэтöн мый и лоис, мыля кокнита и бöбасис юнытö, мыля и дзугсис заводсянь гортö мунтöн? Натьтö, ачыс ас вылас талун эз вöв хозяин, натьтö, гудыра думаэз тойыштiсö Германнэзас...

Митиперыс юис и ляс коддзис: синнэс люммисö, пондiс петны оныс, но пукалiс да кывзiс виль ёртсö.

Германыс баитiс и медодз ошшасис аслас уджöн, иньнас, ошкис асьсö, зонсö, ошкис сапоггез, вешьянсö, керкусö — кужис гардны кывнас, вермис гöрдззыны и разьны, только кывзы!

Юыштöмувья Митиперыс кывзiс соседсö, кывзiс и рад вöлi, сьöлöмыс кыдз шоналiс, кыдз бöра шедiс деревняö, тöдса отир дынö, кытöн праздник и буддень пыр соседат да пукав, баит, и некин тэнö керкусис оз вашöт.

Юисö-керисö да баитiсö пöттöдз, пемытöдз лёбисö. Пемыт сорöн ни Митиперыс иньдöтчис гортö. Сiя мунiс да турьялiс, öвтчис да ныр увтас мыйкö модис, ошшасис или кинöскö видiс — оз ни тöд. Оз тöд, кыдз локтiс гортö, вунöтiс, кыдз смела кайис посöдзаныс, пырис керкуаныс и смела ыкöстiс:

— Маша, тэ бöра талун похлёбкасö эн пу?!

Колiс я мужикыслö сiдз баитны том иньыскöт, кöр эшö код? Колiс я гортö локны кодöн да эшö ошшасьны, что сiя юис и немись оз пов — ачыс керкуас хозяиныс, а тэ, Маша, том, но дыш, он куж мужиктö пантавны, кöр сiя кодувья сёйö бы яя шыд? Но похлёбкасö иньыс абу пуöм, и джоджыс ёгья.

«Ась ёгья, ась Машаыс похлёбкасö эз пу — керам асьным, только талун, любимöй инь, гортö мужикыт оз лонт. Тырмас! И джоджсö оз чышкы, вежöртiн?!»

Нем эз вежöрт Машаыс. Сiя адззис, что мужикыс код, а коддэсö видзöтны эз вермы, кывзыны эз куж, коддэс сы понда, кыдз кульбуккез, кöдна некинлö оз колö — таль кок увтын или орддьы!

Митиперыслöн иньыс кывзiс-керис, мый лёбö код мужикыс, видзöтiс-керис, кыдз сiя чывкйö джоджас, гудыртчис сьöлöмыс, но кытчöдзкö терпитiс, сымда видзсис, мымда вермис, но медбöрын öдззис чирзыны:

— Пет керкусис! Мун! Меным тэ сэтшöмыс он ков! Нятьöсь порсь!

Сэтшöм Машаыслö умöль, что оз тöд, мый керны, кытчö воштiсьны, кöр оланыс сiйö нерö и сералö, сiйöн сiя и ыксö: «Пет керкусис!»

— Машенька! — киэсö паськöтiс Митиперыс, варыш моз уськöтчис иньыс вылö, жмитiс бы моросыс одзö да пыма окалiс. — Машенька, ме жö тэнö любита! — окыштiс бы Машасö, но эз казяв, кыдз мöдыс быд вывсис öдззöтiс веськыт кисö да шлёчкис пельбокас.

— Бур, — ныр увтас моз ни мурзьыштiс Митиперыс, вешшис порогыс дорлань. — Бур, Машенька...

Вот, зонка, кытшöм оланыс вöлöм: талуння лунöдз орсiн да олiн, а талун иньыт мыччалiс, что орснытö колö бы кужны, оз бы ков нерны олансö, кöр сiя вермас жугавны.

Нем сэсся иньыслö мужикыс эз шу, вывтсис чöвтiс паськöмсö и водiс диван вылö, но дыр эз онмöссьы, пильскис ас кежас, а норасьны вöлi некинлö...

Машаыс эшö час етш модис, кыдз колö овны и кыдз нiя олöны — отирсö стыдитöны, видiс Митиперсö, видiс да лöсьöтчис пышшыны, кöр эшö кагаыс абу, думайтiс, адззас эшö не сы кодь, «деревенскöй нинкöм».

Деревенскöй нинкöм да деревенскöй нинкöм... Машаыс и одзжык сiдз шуис Митиперсö, но топ сералiс-шутитiс, а öнi лöгувья ни кöритiс деревняись нинкöмöн, дзик мужикыс нем вылö ни оз туй, ежели чужис деревняын.

Недолыт Митиперыслö... Эз бы ю... Быдöс бы бур вöлi, а öнi... Кинкö öмас кисьтiс или мый? Деревняись нинкöм и эм...

Пессис-бергалiс да ланьтiс... Ашынас чеччис — быдöс бур: юрыс оз вись, и кынöмыс оз симав. Синнэсö тiлис да ласковöя иньыслö горöтчис:

— Машенка, кытöн жö менам кöтiэзö? Машенькаыс — йирк да торк! И сэсся шы абу: не горсö эз лонт, не джоджсö эз чышкы, не мужикыскöт оз баит. Шы эз сет Машаыс, одзöттяс петiс-лэбзис керкусис и абу.

«Чужи, быдми сьöд вöр шöрын да ой! — сьöкыта ловзисис Митиперыс и пондiс пасьтасьны, заводын видзчисьöны эд.

Медодзза луннэзас, кыдз пондiсö лöгавны, мужикыс локтас уджалансянь и сёйны пуас, ачыс гусьöн видзöтлö иньыс вылö, оз я Машаыслöн синнэзас югйöвт гаж, но иньыс... Немöн тэ сiйö он гажöт, он бöбöт, кытшöм сiя эм, сэтшöм и эм...

Олiс этадз неделя, чулалiс мöдiк — керкуас öткодь враггез, и сэк Митиперыслöн сьöлöмыс жагвыв пондiс сайкавны, кыдз пондiс овны ни йöзын, рытнас уджалансянь гортö оз ни бы мун.

— Эй, сöтам-вартам! Митипер Иванович! Ёлки зелёнöй, кежав миянö. Мыйкö висьтала! — посöдзсяняс рытнас бöра ыксö Германыс. Кытчö тэрмасян? Гортын мый ендö?

Германсö уна городас тöдöны, и заводын тöдöны. Сiйö шуöны хитрöй мортöн, топ быдöннысö бöбöтö, гусясьö да мырддьö. Öтiккез сiйö орддьöны, мöдiккез сы дынö кыссьöны-лякасьöны: кинлöн мый оз тырмы, кöдö он неб магазинын, он адззы улицаись, он гусяв, кöда некытöн абу, не тэнат и не сылöн — эм Германлöн. Германыс быдöс адззö, вермö и кужö, кöть и учöт мортыс — абу начальник, но мый керан? Сiдз овсьö. И мыйись-мый, заводас жö баитöны: «Котрась Германыс дынö... Юрбит... Поди, отсалас». И быль: сылöн эмöсь запчасттез, быдкодь кöртторыс, только вöлi бы вина да деньга. Сэтшöм соседыс Митиперлöн. Висьталам, что бур мортыс, кöдакöт туйö дружитны.

— Кежав, сöтам-вартам! — обидитчис ни Германыс. — Или меись полан? Эн пов, ме ог курччась.

Этатшöм мортсö разь орддян, кöр сылöн душаыс тэ понда осьта? И рад Митиперыс, сiйö кыдз бöрсяняс кинкö тойыштö ёртыс дынö.

Кежис соседдэзас. Германыслöн пыр эм бутылка, только иньыс бизгö кодь жö, топ тöдö и оз сэтшöм соседсö, кöдалöн аслас абу, но йöзсис адззö. Сiдз, но мужиккес эз пондö видзöтны хозяйкаыс вылö, юисö винасö. Етша лоис, содтiсö. Митиперыс лöсьöтчис кармансис кыскыны деньга да вештiсьны винаыс понда, но кытчö тэ! Ёртыс кутiс кисö и веськыта висьталiс:

— Сöтам-вартам! Еныс, зонка, чарöтас! Ме тэ ордö локта да сiдз жö понда керны?! — чуп окыштiс соседсö. — Колö кужны овнытö, вонö! Сетi-босьтi и быдöс сэтöн! Ме тэнö винанас верма пöдтыны, вежöртiн?! — чышкис синваэсö. — Сосед тэ менам али абу? Воннэз моз пондам овны, вежöртiн?! Мый менам, сiя тэнат — шöриöн. Сiдз? Во, сöтам-вартам!

— Бырöм вешьян тэ! — иньыс пондылiс нерны Германсö, мыля юисö, а сылö эз кисьтö. — Ошшасян...

— Ме ошшася?!

— Узя бы, — сэтöн öмсö осьтiс Митиперыс. — Нач коддзи. Гортö муна.

— Мунам! — Пасьтасис Германыс и гортöдззас кольлалiс соседсö, мед и иньыс — та-та-та! Пулемётсянь шырö, но мужиккеслö кыввес оз мöртчö. Нiя турьявтöн петiсö керкусис и пемыт ни мунiсö Митиперрезас, кытöн нiйö видзчисис Машаыс, одзлань кеслiс пиннесö, кузь кывсö нюжлалiс, лöсьöтчис рез-паз керны локтiссесö, и кыдз нiя только осьтiсö ыбöссö да вожмöвтiсö порогсö, хозяйкаыс шысеттöг чепöссис паныт мужиккеслö, чеччöвтiс Митиперыс одзö — öт пельбокас да мöд пельбокас, öт пельбокас да мöдас! Лопатитiс и öддьöн бур! Сiдз вартлiс, что мужикыслöн петiсö синваэс, а Германыс осьтiс öмсö да видзöтiс, мый жö эта сэтшöмыс, кыдз жö сiдз, или нiя не ни мужиккез?!

— Вия кыкнаннытö! — медбöрын висьталiс Машаыс и пондiс кошшыны пурт.

— Спасибо висьтав, Маша, что тэ не менам иньыс, — саймис вöлись Германыс. — Ежели бы менам... Сöтiм-вартiм...

— Он сёй! — Машаыс чеччöвтiс Германыс одзö, ныр увтас сюйыштiс кулаксö, тiлис-паджис бы, но эз понды, а петiс керкусис.

Мужиккес пуксисö гор бердö, пишкисö ныррезнаныс да норасисö öтамöдныслö, что правдаыс некытöн эз ло.

— Не-е-е... Этадз, вонö, оз туй. Кытшöм сiя олан, кöр иньыс вартлö мужиксö? Янсöтчы, Митипер Иванович. Вашöт! Сöтам-вартам мöдiкö, — баитiс Германыс и ачыс кöч моз кывзiсис, полiс, оз я Машаыс кывзiсь посöдзас? Оз я пыр да эшö сылiсь кеслы пельбоккесö?

— Некытчö он воштiсь, — пильскис Митиперыс. — Он адззы, кынöмыс кытшöм... Тыра... Ог только тöд, кинöс жынгас? Поди, öнджа... Кинкö дорис, а ме понда быдтыны... А мый?

— Во, сöтам-вартам! Öнi отирыс сiйö и думайтöны, кыдз бы сöтны-вартны! Боксит пышшöтасö и нем он шу, а пондан бизгыны — горшат пурт!

7

Горзiсö-керисö кык ёрт и янсöтчисö. Водiс Митиперыс, узис, саймис — иньыс абу. Сёйтöг мунiс уджавны. Уджалiс — вештiс лунсö: висис юрыс, шогалiс и ачыс эз тöд, кыт медöддьöн висьö, мыля сэтшöм гажтöм. Уджавтöнняс эз бы мыччав, что шогалö: некинлö синнэзö эз видзöт, некинкöт эз баит, пыдынжыка эз ловзись, медбы вина дуксö эз кылö, но медодз сiя жö Ромашкинаыс öтпыр мунiс Митиперыс станок дынöт, мöдöтпыр кыз бöрнас биргылясис, топ нюкьясис и юалiс эд:

— Никифор Иванович, оз я юрыт талун вись? Лэчыта видзöтö Ромашкинаыс — пон нырнас быдöс кылö, кань синнэзнас адззö.

— Мыля? Вина ог ю, насмукаöн ог шогав... — рамыника горöтчис Митиперыс и веськыта ни пондiс видзöтны инькаыс синнэзö.

— Да-а-а, — нюжöтiс Ромашкинаыс и иньдöтчис аслас местаö. «Мужик бы тэныт... Пороз кодьö, сэк бы эн понды нюкьясьны! — инькаыс бöрсянь думайтiс Митиперыс и одзлань уджалiс, эз вöтчы план сьöрö, эз думайт шедтыны уна деньга.

Чулалiс луныс. Митиперыс рытнас петiс заводсянь и веськыта иньдöтчис Германнэзлань, кöда сулалiс ни посöдзаныс, видзчисис соседсö да модис:

— Здорово, Митипер Иванович! Сöтам-вартам, кула ни... Юр висьö! Поди, босьтiн бы?.. Эн пов, ме вештiся... Талун öтiклö моторок козьналi, а сiя вöлöма не морт, эз и сьöвзьы...

— Вирьюись! — Германлöн иньыс ыкöстiс садникланьсянь. — Вирьюись, бöра государствосö гусялiн да юан? Кинкö уджалö, пессьö, а тi... Кытшöм ни сэтшöмыс олан локтiс?! Кытöн миян милицияыс?! Мыля тiян коддесö оз судитö?

Рыг-рыг серöмтчис Германыс и висьталiс:

— Миянöс кö судитны, сэк джын отирсö колö лыйлыны, и тэ, пон мульöс, уна эн кыв и уна эн адззы, а то видзöт, сöтам-вартам! — Пондыв! Чожа кын кирпиччесö мунан йирны!

— Сöтам-вартам, Настусь! Ми раз гусясям?! Ми эд орсам. Вот кин мильонöн гумлалö, сiя гусясьö, но сэтшöмсö, кывзы, оз адззö, а миянöс тэ адззан. Котрась, Митипер Иванович, магазинöдззас, душанымöс бöра веськöтам...

Котрасис Митиперыс магазинö, вайис вина. Юисö посöдзас жö, кöть Германыслöн иньыс модис-видiс сэтчöдз, кытчöдз öмсö эз тупкалö: кисьтiсö жö сто граммсö...

Юисö. Оланыс бöра мужиккеслöн праздник кодь! Оланыс — бес: талун тэ дор, а ашын, поди, зуралас и некинлö он норась. Не весь Германыс шуö: «Ю, вонö, кытчöдз юкталöны! Оз кö пондö юктавны, сöтам-вартам, лоас... Вообче, ми тэкöт свет вылас öтпыр олам, а не куимись и, думайта, мыся, кытчöдз ловьяöсь — сёй, ю пöт, а мöдöр югытас сьöрат нем оз пуктö, нем сэтчинiсь он адззыв».

— Черпезьдiн бы! — Германлöн иньыс бöра сэтöн и эм — яд кывнас дзугö гажсö, кöр етша винанас юкталiсö.

— Го-го, Митипер Иванович, сöтi-вартi... Адззан кыдз бы нiя вийöны! Ловйöн бы муас сюйыштöны, но, натьтö, нылöн нем оз пет, смертьыс Германсö ылi-i-i эшö орддьö.

— А быль, — кыдз повзьö Настяыс. — Кин юö, сiя некöр больничаас оз котрась, а миян кодьыс...

— Тэ, Настусь, лок матöжык. Миян кольччис ышö, кисьтыштам.

Настяыс сьöд юрсиа, сьöд вира, винерик — чуньöн павк и пöрас, но смела сибöтчö винаыс дынö, чатыртö стопкасö и ошшасьö: «Пыр этадз понда! Мед тiянлö етшажык кольччö...»

Юисö-керисö, Митиперыс шапкасö юр вылö и öтöрö!

— Но-о-о, мый сылö лоис?! — öмсö осьтiс Германыс. — Бöра эд пельбокас басöк иньыс вачкас. Котрасьны да дорйыны быдь...

— Мужик да инь — öтiк пинь. Ныртö эн сюй, кытчö оз ков! Нiя жö бöра öтлаын! — Германлö висьталiс иньыс, но мужикыс сöтiс öтöрö.

Пемыт. Городыс ружтö. Городыс оз узь. Быд керкуын сотчöны биэз. Юр вевдöрöт чарöтiс-лэбзис самолёт. Говкыс гым кымöрöн моз мурзис-вешшис ылöжык,

Германыс тэрмасис ёртыс сьöрö й гичыралiс пиннесö: лöгыс петiс öтiк морт вылö, кöдалö заводас луннас сетiс телевизорись часттез, думайтiс, что ны понда босьтас уна деньга, а сылö сетiсö дас руб и абу!

«Зверь, шакал! Спасибо пö, а! Сöтiм-вартiм... Кöр магазинас öтiк лампаыс сулалö дас руб. И мый сiя думайтö? Поди, мекöт сэсся оз ни бы пантась? А кыдз пантасям?! Менö, воннэз, öтпыр шныгöны, а мöдöтпыр ме ылiсянь ни адзза шакаллэсö!» — модис Германыс и ачыс эз казяв, кыдз кымöснас люкалiс соседыслiсь посöдз ыбöссö, кöда пöдана, но осьтаокöт пытшксис тыдалiс би, и сэтчин дзик уджалiсö — быд вынiсь ружтiсö... «Сулав, сöтам-вартам!» — аслыс висьталiс Германыс, сувтiс посöдзыс дынö и пондiс кывзiсьны.

— Юртö керала! — пытшкись посöдзас ыкöстiс Машаыс.

«Ох тэ-э-э! — ружтыштiс Германыс. — Бöра эд Митиперсö чередитöны... — пишнитiс нырнас, быд вынсис брынгис ыбöсас и невна эз тальччы Машаыс вылö, кöда чочкоммöм — зверь и эм! Киас чер, коккес дынын мужикыс нюжöтчöм, кыдз садьтöм.

— Тэ мый керан?! Чапкы черсö! — нач повзис Германыс. — Чапкы!

— Вия! — Машаыс лэбтiс черсö мужикыс юр вевдöрö. — Вия!

Германыс быд вынсис кутiс да пиньöвтiс Машаыслiсь кисö.

8

Асылыс дзескыт. Отирыс тэрмасьöны уджавны, пелитчöны-пырöны автобуссэзö. Митиперыслö öддьöн недолыт: синнэсö кунис бы и некинöс эз адззы и некытчö эз видзöт, но колö мунны уджавны. Сiя дзик джыныс ловья, мöд джыныс кулöм ни, видзчисис машина, дыр-мыйись отирыс коласын пырис автобусö, кытöн сэтшöм дзескыт, что чунь ни эз мöртчы. Но мужикыс ыбöсыс дынсянь заргисис отирыс коласö пыдöжык, гырдззаэзнас и мороснас вештiс боккесис и одзсис томöс и пöрисьöс, но, тыдалö, öддьöнöв пессис: кулакнас казявтöг инмис пöрись чужöма инькалö да ныр увтас. Мый сэтöн лоис! Мый сэтöн лэбис! Инькаыслöн синнэс ыждiсö, öмсö осьтiс и пондiс чирзыны автобустыр, быд вынсис ыксыны: «Бандиттэз! Алкашшез! Олан эз ло! Кытöн милицияыс?! То сiя. Кутö-ö-ö!!» Автобусын отирыс Митиперсö пондiсö сёйны-видзöтны — öтiк чужöм вылiсь он адззы, медбы сiя тэнö жалейтiс или вöлi тэ дор. Остановка вылын Митиперыс бöр уськöтчис улицаö. Бöрсяняс брынгисö, вачкисö, сьöвзисö и жвангисö ыбöссö. Берездасис, усис чорыт тротуарыс вылö, вирöдз дойдiс пидзöссö, курччöвтiс кывсö, синнэсис чеччöвтiсö бичиррез... Эта мый? Курччöвтöм кывсис вирыс öддьöн эз пет, кокыс зубыт вöлi да дугдiс доймыны, а висис душаыс — тöдтöм шогöт нималiс сьöлöмсö, топ лоис виноватöй быдöн одзын, быдöн тэныт кувтöдз пондас вачкыны и сьöвзьыны. Эна юрвисян да сьöлöмгудыртан думаэзöн Митиперыс локтiс уджавны, вежис паськöмсö, сувтiс аслас станок дынö, босьтiс чертёж и пондiс сы вылö видзöтны, кыдз тай шуöны, баран библия вылö, кöр нем киас эз пыр, син одзас дрöжитiсö букваэс, свалясисö да орласисö. Уннялiсö-уджалiсö ёрттэслöн станоккез, уджалiс да ас мознас лолалiс цехыс, а сiя öтнас эз вермы кутчисьны бытшöмик удж бердö.

— Мый нö? — бöрсяняс сибöтчис тестьыс. Сiя кытшöм вöлi, сэтшöм и эм, бытьтö оз тöд, кыдз олöны нылыс да зятьыс. Гаврилыслöн эз вежсьы не мывкыдыс, не басниыс и голосыс рам.

— Мый нö он уджав? — юалiс, кисис босьтiс гижöтсö, пöв синнас дзар керис сэтчин и вöлись шуис да сiдз, кыдз колiс бы баитны одзжык ни, но надейтчис, что зятьыс кыдз мужик, ачыс вежöртас, кыдз колö овны: талун код, ашын садясяс, юрсис чулалас кольмöтыс и бöра морт лоас, а сiя шыбыльтö мöдöрö. — Зять тэ зять... Мый нö керан?

Сэтчö Митиперыс нем эз шу, лэдзис станоксö, кöда унньöвтiс и пондiс уджавны öтiк шыöн.

Тестьыс вешшис. Митиперыс кутчис уджавны, но недыр: уджсö сорис Ромашкина Дарья. Инькаыс сибöтчис сэтшöм чужöмöн, кыдз не Ромашкинаыс, а лёк прокурор: чорыта тальччö, лэчыта видзöтö — жмитас и кивнитны он лысьт.

— Лок, — юрнас öвтыштiс Ромашкинаыс.

— Кытчö? — эз вежöрт Митиперыс, шынньöвтiс челядь моз, сувтöтiс станоксö.

— Тэрмась! — чиння голосыс инькаыслöн.

Шупыта мунiсö да пырисö начальникныс дынö, кöда пукалiс пызан сайын, куритiс и одзсис вештiс öтмöдöрö гижöттэз.

— Видзöтö! — начальникыслö шуис Ромашкинаыс. — Кытшöм сiя басöк.

— Абу эд горадзуль, — шынньöвтiс Митиперыс, кöр быдöн адззö, что синнэс гöрдöсь, рожаыс пыктöм.

— Пуксьö, Никифор Иванович, — стул вылö кинас мыччалiс начальникыс.

— Эг мыдз, — пыдына ловзисис Митиперыс.

— Мый нö пондам керны, Никифор Иванович?

— Мый колö керны? — телефон вылö видзöтiс Митиперыс и эз вежöрт, мый сыкöт баитöны, но вот стена вылiсь казялiс плакат, кытчö рисуйтöмась сы кодь жö мортöс, только вывтi ни лёк чужöмаöс, кöда чуньсö веськыта иньдö тэ вылö и кыдз ыксö: «Шедiн эд, Митипер! Öнi тэнö вöлись...»

«Мый тi менö керат? Од эд сёйö, — Митиперыслö недолыт. — Од эд сёйö...»

— Иньыс норасьö, — Ромашкинаыс пизис. — Юö, тышкасьö. Иньсö гортiсь вашöтö! — Синнэс ыждiсö Митиперыслань. — Тöн бöра юин?! Эн суськись! Синнэт висьталöны... И уджалан, стыд видзöтны.

«Мый сылö месянь колö?! — лöгыс петiс Митиперлöн. — Не весь мужиккес милиционерöн шуöны... — мöдiк дума нерис: — А басöк, вакуль! Грех бы эз вöв сэтшöмыскöт окасьны...» (Юрас, натьтö, тöнняыс орсö).

— Мый пондам керны, Никифор Иванович? — мöдпöв юалiс начальникыс.

— Вартлö! — öмыс пиньöвтчис Митиперыслöн.

— Тэ мый сiдз баитан, Никифор Иванович?! — бöра чирзö Ромашкинаыс, синнэс кыдз каньлöн.

— А мый нö?.. — синваэс петiсö Митиперыслöн, но видзсис, асьсö эз стыдит. — Быдöнныс юöны, но некинöс оз адззö..

— Юам! — кыдз ошшасис начальникыс. — Но... Колö кужны юнытö.

— Колö кужны юнытö! — сяткис и Ромашкинаыс. Одзлань Митиперсö эшö видiсö-тшуписö, велöтiсö овны, но сiя эз ни шыась, эз дорйись, думаэзнас öвтыштiс быдöс вылö, обидитчис: «Кужат миян кодьсö... Асьнытö бы тöдiт...» Сулалiс начальникыс одзын мужикыс, юрыс висис, сьöлöмыс гудрасис, а мöддэс кыдз эз адззö и эз вежöртö, что мортыслö сьöкыт, öддьöнжык эта Ромашкинаыс, кöда одзас чеччалiс, велöтiс овны ас мознас.

— Мун да уджав, — дырмыйись висьталiс цехсиныс начальникыс. — Видзöтам, кыдз тэ одзлань пондан.

Петiс начальникныс дынiсь и син одзас мылякö биыс лампочкаэсис сьöдöтiс, коккес эз бы кывзiсьö, нiя гардыштсисö, юрыс бергöтчыштiс, но вермис шогсö, локтiс станокыс дынöдз, жмитiс кнопкасö да пондiс уджавны. Натьтö, джын час эз уджав, кыдз кинкö кынöмас заргис пуртöн да сэтшöм зубыта, что не ловзисьны, не ыкöстны... Кытöн сулалiс, сэтчö и таралiс, кык кусiньöн водiс станокыс бердö, кивзыштiс.

Сiя жö лунö керисö операция.

Сьöкыта кадыс чулалiс операцияыс бöрсянь, сьöкыта веськалiс шогалiсьыс, но веськалiс мед и дыр куйлiс больницаын. Быдöс бур, кöр куйлiн пурт увтын, резьöтiсö да вурисö бöр — вочисö и одзлань ов! Только эн вунöт, что эта бöрсянь асьтö колö бы берегитны. Но кыдз? Кывзыны кö сiйö жö Германсö да сы моз овны, операцияыс бöрсянь Митиперыслö кык век бы колö джендöтны; кывзыны кö враччесö, винасö юны — шабаш! Öмö сэсся эн босьт, кöр тэнат кынöмат вöлöм язва и сiя потiс... А веськыта кö висьтавны, Митиперыс оз думайт одзланься оланыс йылiсь: талун ловья — бур, а ашын, поди, дзебасö... Бур, что талун ловья, рад, что петiс больницасис и гажтöмтчис ни заводыстöг, уджалiс бы, но киэс эшö дрöжитöны — öтiк бердö кутчисис, мыдзö, мöдiк бердö кутчисяс — юрыс пондö висьны, сiйöн лун керкуын да öтöрын шатласьö, потолоксис пöввесö лыддьö да кымöрсис звездаэсö синйö.

— Мый öштiн? Кинöс кошшан?! — юалö иньыс. Шы оз сет мужикыс.

— Ме адзза, что сьöлöмыт бöра ни винаыс понда висьö, — модьö Машаыс.

Машаыс быдтö кага. Кинсянь? Митиперыс оз верит, что зонкаыс сысянь, но грехö оз пыр — обидасö пöжö сьöлöмыс бердын, видзöтö иньыс вылö, кöда абу ни одззакодь тупöсь: сысъялö кагаыс Машасö.

— Локтö бöра кузь кокыт! — иньыс сэтöн и эм: пиннесö мыччис ни, кöр адззис öшынöттяс Германсö. — Пырас бöра керкуас, пондас зызны да тэнö бутылкаыс дорö кыскыны. Срам! Кыдз сэтшöмыскöт семьяыс и олö?!

— Миянся буржыка олöны! — шынь керис Митиперыс, рад, что соседыс оз вунöт, сiя только ёртыс и эм.

Пырис керкуас Германыс, öтöрсянь уськöтчис хозяиныс вылö, жмитiс моросыс бердö, пондiс окавны, ачыс горзö, тiльö синнэсö, ружтö. Сьöлöм гудыр!

— Сöтам-вартам... — чуп да чуп окалiс Германыс, горзö. — Ы-ы-ы... Вонö, кыдзкö ловья! Кыдзкö еныс тэнö мöдöр югытсис кыскис, — гичралö пиннесö, сьöкыта лолаö. — Митипер... — несйö да риксьö инька моз. — Митипер... Кыдз нö эн кув?! Мыля? Ме бы тэ моз пуртыс увтö шедi, аминь бы вöлi, а тэ ловья, — бöра чуп да чуп окалö ёртсö. — Сöтi-вартi! Зон эд иньö чужтiс. — Кивзö ни. — Да эд не мена-а-м, ы-ы-ы кагаыс... Сöтiсö-вартiсö... Йöз дорöма вежöмсö-ö-ö...

— Мый кöтан?! — повзис Митиперыс.

— Вот кöта... — садьмис Германыс, мездöтчис ёртыс бердiсь, пуксис стул вылö, чышкис-тiлис кулаккезнас синваэсö, чорзис чужöмыс, голясö нюжöтiс, пиннес югмисö, синнэс оссисö — лöг лоис и пондiс висьтасьны: — Он верит?! Быль! Кöс кокыс пон пиян вайöм. Лок да видзöт. Не кага, а звирь, сöтам-вартам... Юрыс ыдж-ж-жыт! Синнэс этатшöмöсь! — чуннезнас гардыштiс гöгляннэз. — А öмыс... Во! Пыр осьта, сёйны и лöсьöтчö!..

— Аслат жö эд, — горöтчис Машаыс.

— Кыдз аслам?! — синнэс ыждiсö Германыслöн. — Мыля аслам? Ме разь кöин вылö вачкися? — чеччис стулыс вылiсь, локтiс зеркало одзö, пондiс видзöтны асьсö да пиньлавны öмсö. — Топ абу жö кöин, а кагаыс кöин чужöма...

— Етшажык колiс юны! — эрзыштiс Машаыс.

— Мы-ы-ый?! — öшис джоджыс шöрын Германыс. Мужиккес петiсö посöдзö. Шондiыс гажöтiс ёрттэсö, но Германыс кымöра, голосыс сибдöм, сiя Митиперыслiсь юалiс:

— Веськалiн?

— Джыныс веськалi, мöд джыныс эг.

— Джыныс да мöд джыныс, сöтам-вартам... Гажöтчы да ов, тэныт иньыт облезянаэсö оз чужты, — гичыртiс пиннесö. — Юыштам?!

— Оз туй, — шуис Митиперыс.

— Э, туйö да оз... Сiдз жö эд кулан! Кык вексö он понды овны, черпезьдан и некин тэ понда оз горзы. Думайтан, Машаыс горзас?! Оз эд. Поди, важын ни видзчисьö, кöр черпезьдан...

— Кисьт сэк! — лöгасис Митиперыс.

9

Садьувья тöдвылас усис вöт, кöдö вöтасис гортын, бытьтö гарйö аслыс гу, но некыдз оз вермы вежöртны, мый вылö гарйис, кöр пыр эз жö вöв код, сайкавлiс юрыс, петавлiсö садь луннэс и уджалiс морт моз. Сэк Митиперсö заводас ошкисö кыдз бур уджалiсьöс. И бур сiя, что мужикыслöн быдмис ни зон — Максимка. Зоныс унажыксö гардчис айыс гöгöрын.

Годдэс чулалiсö. Öтiк год да мöдiк и, видзöтан кö, сорок год ни вожмöвтiс, сэтöн и пятьдесятыс вöтас...

Годдэс вежöны мывкыддэзнымöс, юррезаным тэчöны ум: Машаыс пондiс вежöртны, что сiя керкуас инь и мам, сылö колö унажык бергавны комын, чышкыны да миськавны джоджсö, вочны и вурны — хозяйкаöн лоны не только öмнас, но и киэзнас. Сiя эз ни вачкись одззамоз кукла вылö. Синнэс дорын мыччисисö чукыррез, нiя эшö öддьöн эз тöдчö, но вöлiсö ни, и синнэзас одззамоз эз ни вöв лёк югöрыс, эмись и абуись эз ни рез-паз кер да керкуас быд торыс понда эз гыжьясь, а унажык ни вермис терпитны, кöр Митиперыс код локтас гортö, модяс-керас да водас узьны. Да и Митиперыс етшажык ни юö, но кодувья лоис мöдкодь: одзжык вöлi рам, а öнi шедас кö юрас — зверь, уна эн шыась, сiдз и вачкö, брынгö, вермас и пурт бердö кутчисьны, öтiк мортöс кодувья любитö Митиперыс — этö Максимкаöс. Зонсö кывнас некöр оз дойд, и мöдыс айсö пыр панталö öшын увтаныс. Гортын кö айыс, садь кö Митиперыс, зоныскöт пыр видзöтöны телевизор.

— Максимка, адззан, мый керсьö! — зоныслö ыксö айыс. — Не стыд, не совесть эз ло отирыслöн! Сöтöны-вартöны, топ тшыгöсь... Гусялöны öтамöднысö и государствосö, а пыр шуöны, что етша, нем абу... Одзза олансö бы... Турунiсь пöжалöм тупöссезнас бы вердны да нинкöммезнас кöмöтны...

— Поди, эд и гусясьлö? — нерö Машаыс.

— Кöр?! Кöр умöля олiм? — öзйö Митиперыс. — Ага, öннямоз жö тай ыбöссэзас нинкöм ыжда замоккез öшлiм... Сэк, кага, кытчö мунам, ыбöсас заргам бедь и бур, а öнi коль жö ыбöстö пöдантöг?.. Сымда и адззылан керкусит шурум-бурумсö... Гусясьнытö чожöсь, а уджавнытö дышöсь лоим, — няпыртас кулаксö: — Зэлöтны бы!..

— Тiян коддескöт и керан эд! — эрзыштас иньыс.

— Мый ми?! — дорйисьö мужикыс. — Тшыгьявны понда, но йöзыслiсь ог гусяв! Юа, дак йöз карманас ог пыр! Тiян моз... (Машаыс эд столовöйсис гусьöн ваялö жö гортö öтiкö да мöдiкö, а асьсö пуктö честнöйöн — медöддьöн видö гусясиссесö.)

— Быдöнныс гусясьöны, — висьталö Машаыс. — Кыным ыджытжык начальник, сыным унажык и гусясьö. Босьт миянлiсь завсö...

— Сэтшöммесö бы шатьöн, — горöтчö Митиперыс. Мамыс бы асланяс кыскö зонсö — ас мознас велöтö овнытö, а Максимкаыс айыс дынын ниртчö. Сiйöн, кöр Митиперыс вывтi код, оз ни вермы локны гортö, турьялö да усялö, лым тупыль кодь кыссьö, зоныс котöртö паныт. Посöдзаныс вуджöртчас понокныс и öшö, а Митиперыс улицатыр ыксö:

— Максимка, некöр эн верит понлö да мамытлö! Поныслö чапкасö няньтор, и сiя керкуас лэдзас кöть кинöс. Мамыт сэтшöм жö, кин шынньöвтас, сiя и сылöн...

Сьöлöм гудыртчö, сэтшöм код Митиперыс, но Максимкаыс айсö öтöрас оз коль, кеймисьö:

— Тять, а тять... Пырам керкуас...

Зызiс-зызiс да черпезьдiс: онмöссис öтöрись посöдзас, кöдзытiнас. Максимкаыс керкусис петкöтiс пась, шебралiс айсö.

Сiдз овлö, а öтпыр узьтöтiсö милицияын, сыбöрын нуöтiсö больницаö, кытöн веськöтiсö вина юöмись: видзисö кык месяц. Больницаын дзик садьмис и ловзис. Пондiс овны мöдкодь думаэзöн, лöсьöтчис янсöтчыны винаыскöт, кывзiс садь юра ёрттэсö: «Кывзы, Митипер, ежели он понды юны, некытшöм лекарство оз ков — чапкин и абу! А пондан кö юны... Лекарствоыс больницаыс порог дорöдз!»

Чулалiс кык месяц больницаын. Унажык Митиперсö сэтчин эз видзö, а кöр лэдзисö гортö, локтiс, керкуыс сулалiс дзир öтнас — не иньыс, не зоныс эз вöлö. Ыбöс дынын пукалiс рыжöй котныс, дульсмöм синнэзнас видзöтiс хозяиныс вылö, кыдз норасис: «Вот эд мый миян лоис... Быдöс эд керкусис хозяйкаыс кулис-волис да нöбöтiс. Кыдз пондам овны?» — Синваэс петiсö Митиперлöн. Сiя кутiс каньсö, жмитiс моросыс бердö, малалiс, окалiс, синваэсö чышкис да баитiс: «Шы эн сет, Васька... Олам кыдзкö...»

Васькаыс ниртiс юрсö хозяиныс бердö, мурзис-сёрнитiс аслас кань кыв вылын, öтыс и мöдыс тшыгöсь. Колiс бы сёйыштны, но мый? Некытöн няньтор абу, кыдз керкусö росöн чышкöмась.

Колö бы иньыс, но абу... Мужикыс малыштiс котсö, сьöвзис: «Мед, Васька. Ась кошшö томжык да боёкжык петуххесö, а ми тэкöт... Ох-на!»

Кутiс да лонтiс горсö.

Керкуыс шоналiс и эз. Котыс нюжöтчис каминыс бокö. Митиперыс джоджас жö чапкис важ пальто, лöсьöтчис водны, но дзуркнитiс ыбöсыс и шысеттöг керкуас пырис соседыс, Германыс — лым тшакыль.

«Вот эшö... Мыля ме вунöтi пöднавны ыбöссö?! — думаэзнас видiс асьсö Митиперыс, но ёртыслiсь гажöн юалiс:

— Тэ мый ойнас шатласян? Или иньыт гортсит репöтiс?

Рыг-рыг серöмтчис Германыс:

— Мыля менö вашöтасö? Тэнö эд иньыт колис, кöр нем вылö ни он туй, — нюжöтiс кöдзыт кисö, здоровайтчис, пуксис паныт стул вылö и пондiс висьтасьны, кыдз öтiк мужиклöн кулöм иньыс. — Вот бедаыс! Отирыс — сьöд вöр! Дзебöны мортсö. А старухаэс сэтшöм кодöсь! Сöтам-вартам... Оланыс кытшöм лоис. Мортсö дзебам и сымда вина юам... — ёртыслiсь юалiс: — Веськöтiсö вина юöмсис? Öнi миян кодьыскöт он ни понды тöдчыны...

— Ог...

— Во! Грамотнöйöсь лоисö отирыс... Ежели бы меным Кöс кокыс сэтшöм зонсö эз козьнав, ме бы дугдi жö юнытö, а öнi горш косьмö. Нерваэзö... — Гичыртiс пиннесö. — Кöть керкуас эн и пыр...

Митиперыс шы эз сет.

— Сöтам-вартам! Мыся, ёртö локтiс... Мыся, öтiкö, да мöдiкö, юыштам, — кармансö малыштiс. — Левацкöйес шедiсö... А тэ!

— Мый ме? Мый ме? — сэтшöм недолыт хозяиныслö, что некинöс бы оз адззы.

― Важын бы сiдз, ― Германыс писис кыскис джыння бутылка, сэтiсь винасö кисьтiс нятьöсь стаканö и нюжöтiс Митиперыслö.

10

Чеччис. Сьöлöмыс гудрасьö, юрыс висьö, кынöмас — чашья. Мый адззис, сiйö и пасьталiс, но сё кынмис: пиннес сяткöтiсö и рожаыс лöзöтöм. Котыс бöра ниртчис коккес бердын — сёйис бы, но сёйны нем, и каньыс петiс керкусис, сьöрас нöбöтiс медбöрья гаж.

Сьöкыт Митиперыслö, кыдз вузалöм, дзугсьöм — öвтчö гортас, оз тöд, пондас я эшö уджавны заводас, кöр, может, важын ни сэтчин гижöттэс вылiсь нимсö чышкисö — абу и он ков! Тöдвылас усис, что больницаын уджалiс и, натьтö, мымдакö сетасö деньга. Мунiс сэтчин. Только сибöтчис больницаыс дынöдз, видзöтö — паныт локтö врачыс и юасьö: «Юин?!»

— Тэ мый, доктор?! — Митиперыс смела да веськыта видзöтö врачыс синнэзö.

— Бур, — шуис докторыс. — Чож, Никифор Иванович! Верита... Видзöт...

Янсöтчисö кыдз ёрттэз. Митиперыс босьтiс деньга, медодз небис нянь, сов, табак, кольттез да мымдакö чери, ас кежас ошшасис: «Но, Васька, öнi ог ни кулö! Пондам овны сiдз, что кузь бöжыс завидуйтас...»

Мунö гортö — морос тыр сёян нöбöтö. Пантасьöны тöдсаэс, инькаэс юасьöны:

— Гöтрасьны мöдан?

— Гöтрася. — Ачыс думайтö: «Колат тi...» Луныс чулалiс, рытнас водiс и узис. Эз йöрмы лонтны гор, чышкыны джодж, пуны похлёбка — быдöс кужö керны. Оланыс вöлi бы бур, только гажтöм, öддьöнжык кузь ойезнас: саймас ойшöр гöгöрас и куйлö, бергалö бок вылiсь бок вылö, ружтö, юрас пырöны бöб думаэз, кöть керкусис пышшы. Сэтöн и деревняыс син одзас — роднöй местаэс, кытöн чужис и быдмис, важыс, кöда öння оланыс вылö оз бы и вачкись, кöр уджалiс садь быртöдз, а сёйис мый? Мымда тшыгьялiсö война годдэзас и сы бöрсянь? А талун, видзöт жö, кыным лун ни весь олö и пöт. Думайтö Митиперыс кузь ойезнас и оз тöд, кытчö воштiсьны: öтiк лун татöн, мöдiк — деревняын бы...

Мунö бы деревняö и оз лысьт — аслыс оз верит, что сэтчин вермас одззамоз уджавны, кужас я одззамоз кöдзны и гöрны?

Оланыс сералö, видö, бöбöтö, шыблялö, кöть тэ мый одзлань кер, кöть велöтчы быдöннысö бöбöтны, гусявны или уджав да ов честнöя. Кадыс, Митипер, тэ сьöртi, но колö бы кыдзкö мöднёж овны. Германыс моз бы, поди?

Кöть мый, а колö заводас мунны, отир дынö кыссьыны.

Öвтчис-керис лун-мöд да мунiс заводас. Сэтчин панталiсö бура, топ нем эз тöдö, кыдз гажтöмтчöмась, кыдз сытöг некытшöм удж абу аркмöм. Сiдз Митиперыслö кажитчис, а, кыдз видзöтан, не быдöн тэныт, не быдöнныс тэлань: öтiк жалейтö, мöдiк бöрсяняс бобгö: «Алкаш!..» Öддьöнжык видöны инь отир, пиннезныс вылын видзöны, топ только тэ иньыткöт и торйöтчин, тэ — враг и пон кодь!

«Тöдам!.. — асьсö думаэзнас дорйö Митиперыс. — И тэ, Дарья Ромашкина, пиннетö ме вылö эн кеслы, ме тэись ог пов!..»

Митиперсö медöддьöн кокалö Дарья Ромашкинаыс: син одзас эн мыччись, орддьы сизим верста, топ тэ Ромашкинаыслöн мужик и мый колö, сiя тэкöт сiйö и керас.

Одзлань уджалö заводын мортыс, деньга шедтö, асьсö вердö, и деньгаыс эшö кольччö пасьтасьны, только вот гортас...

Заводыс ыджыт. Отирыс уджалöны уна, рытнас, кöр вежсьö смена, йöзыс воротаэзöт петö, кыдз тулысся ва визывтö, быдöн тэрмасьö гортö, и Митиперыс тэрмасьö жö, мед и гортын некин оз видзчись, но колö лонтны гор, пусьыны да ужнайтны. Тэрмасьö гортö, а сэтöн кинкö бöрсяняс кутö пельпонöттяс, повзьöтö:

— Сулав, мужик!

Дзар керис — бöрас Дарья Ромашкинаыс: синнэс лэчытöсь, киыс чорыт, пиннес кузьöсь, кылыс — яд, уна адззö, уна кылö и уна тöдö.

— Некöр меным, — мурзьö Митиперыс.

— Мыся, тэ эд холостöй... Он я менö босьт?

Висьталас инькаыс, кöть гатш пöр! Кыдз кымöсат вачкас. Видзöт, Митипер, городскöйес кытшöмöсь, асьныс голя бердö кышасьöны, а тэ...

«Öддьöн меным...» — думайтö мужикыс.

— Мый он баит? Или кывтö ньылыштiн?! — Дарьяыс лöз-югыт синнэзнас сотö-видзöтö.

Мунöны кыкöн улицаöт. Гöгöраныс койö отир, быдöнлöн аслас олан, некин тэнö топ оз кыв и оз адззы. Мунiсö да баитiсö. Кыкнанныслöн асланыс думаэз. Нiя бергалöны öтамöдныс гöгöр, полöны и сибöтчöны бы. Эз и казяв Митиперыс, кыдз Дарьяыс падмис да усис, а сiя эз ешты кутны инькасö.

— Но тэ и осьта öм, — сералö инькаыс. — Кинлö тэ сэтшöм жöникыс колан?

Митиперыс гöрдöтiс, нач бöра öштiс кывсö.

Скверын сьылö кытшöмкö каёк, гажöтö олансö. Нiя сулалыштiсö тополлез увтын. Дарьяыс лёбис, адззис басни, пондiс ошшасьны, что сылöн деревняын эм сой — невеста, кöда уджалö, пода вöдитö и уна шедтö деньга. Богатöй невестаыс, только тэныт, Митипер, и эм, ежели он понды юны.

Жöникыс шы оз сет, а Дарьяыс рисуйтö-ошкö сойсö, а кытöн и видö, нем оз суськы.

— Гöтрасян или он?! — веськыта ни юалö Дарья. Колас я Митиперыс эта Катялö? Катяыс, басни сьöртi, туяна-колана. «А эта кодь жö кö гордöй? Мый сэк? Бöра эд, Митипер, тэ вылын лоас хозяин! Пуксяс пельпоннэт вылö и пондас веськöтлыны... Кöть мый кер?!..» — мужикыслöн полöм ни петö мöдöтпыр гöтрасьны, думаэс кыскöны деревняö, сэтшöм инь дынö, кöдö кошшис бы томсянь, но эз пантав.

— Винасö он понды юны и олат! — веськыта баитö Ромашкинаыс.

Мужикыс шы сэсся эз сет, кöр рожаас чукыррез ни, и юрсиыс пондiс дзормыны.

Янсöтчисö Ромашкинакöт, сьöлöмас кольччис нето гаж, нето шогöт — оз вежöрт, и бур, что рытнас пырö Германыс, порог дорын быздö:

— Сöтам-вартам! Здорово, Митипер! Ловья эшö? Ме кылi, что тэныт премия козьналöмась. Öнi миян коддескöт здоровайтчыны ни он понды.

— Ог, — дыша висьталiс Митиперыс. Пуксисö, пукалöв-керисö, Германыс и горöтчис:

— Сöтам-вартам, сьöвзьöмась бöра кымöрас мильон!

— Мый сьöвзьöмась? — эз вежöрт ёртыс.

— Спутник лэдзöмась...

Митиперыс шы эз сет. Пукалiсö, топ кинöскö дзебисö и тöждiсьöны.

Сэк Германыс писис кыскис бутылка, кармансис стакан, кисьтiс стаканас вина и Митиперыслö кисьтiс.

— Эх, смерть — тоска! Кувны дак öтпыр, — Митиперыс босьтiс тыра стакансö, кыскис моросас русö, кунис синнэсö и юис.

Ректiсö бутылкасö, куритiсö. Германыс модис, кыдз иньыслö эз сет деньга: бöбöтiс кузь юрсиасö, мед сiя нюкьясьö, чирзö, кыдз вермö летö горшсö, кöр мужикыслö козьналiс не зон...

11

Митиперыс лöсьöтчис гöтрасьны. Пасьталiс виль йöрнöс, голяас кышалiс галстук, кöмалiс виль ботинкаэз, матегöн миссис чужöмсö, сувтiс зеркало одзö — жöник! Только чужöмыс лёк — Митиперыс и не Митиперыс, кыдз кинкö йöз сералö и осудитö: «Адззисьöм жöник!.. Кинлö сэтшöм алкашыс колан?!» Быль: кинлö сiя колö? Кин сы вылö видзöтас? Мый сы дынö инь отирыс öштiс? Томсянь бы... И пондiс видны асьсö: «Пукалiн бы...» Кутчисис галстукыс бердö, топ лöсьöтчис джагöтчыны, но думайтöв-керис, вешшис зеркалоыс одзись, шляпкисис табуретка вылö и сэтшöм лоис недолыт, что пондiс бытшкыны сьöлöмас — не ловзисьны, не ыкöстны.

Вина бы... Чатыртiс бы стакан, гывьялiс умöль думаэсö, вештiс сьöлöмыс вылiсь шогöтсö, смевмис, и быль бы, поди, мунiс кошшыны невестасö, а öнi мый? Писькöтiс-зэлöтiс зубытыс мороссö...

Пукалöв-керис, чеччис ружтытöн, кыдз пöрись морт, бытьтö сивьяс сьöкыта мыйкö пуктiсö. Кытчö лоис чожыс? Может, быль эта винасянь? Не весь жö враччес модьöны, что юны оз туй... Чапкыны бы... Мый жö бы сэк лоас? Натьтö, пондас эд эшö котрасьны, эшö мыччалас... Мед сэк Машаыс видзöтö... Ась... Адззас эшö аслыс... Невеста... — Дзар керис öшынö: талун кресення и отирыс öтöрас жöдзö. Видзöтiс-керис отирыс вылö, кöда пасьтасьöм, дзик праздникö мунö, а сiя...

— Мый пукалан? Пасьтась! — öтöрсянь öшынас ыксö ни Германыс.

Кыкöн петiсö базарö. Базарын кöдзыв мымда отир. Кин мый вермö, сiйö и небö да вузалö, а Герман коддес öмнысö осьтöмась да видзöтöны, кытiсь да мый бы сöтны.

Сэтöн Германыс нюжöтiс голясö, ёртыслö тангис гырдззанас и шуис:

— Сöтам-вартам, Митипер! О-о-о, да-а-а! Невестаыс!.. — ньылалiс дульсö и видзöтiс инькалань, кöда неылын сулалiс мужиккес дынсянь, топ пизис син одзын, сэтшöм ни вöлi зумыт яя, гöгрöса чужöма, сьöдвевья синнэза да волькыт рожабаннэза.

— Да-а-а, — пыдына лолалiс Германыс. — Гöтрась, вонö, грех оз ло.

Китшсис-сералiс Германыс, синнэзнас сёйис бы инькасö, а эта коста эз казяв, кыдз бöрсяняс локтiс мöдiк инь морт да брезгуйтöмöн шуис:

— Жöниккез... Кинлö ни тi сэтшöммес колат? Голосыс тöдса. Этадз только вермö баитны Ромашкина Дарья, кöдалöн пыр рожабаннэс öгралöны, синнэс кыдз хитрöй лёк ручлöн — чеччалö да бöжсö мыччалö, адззан, да он кут, курччöвтан бы, да асьтö пурас. Чукыль-мукыль керис Дарьяыс, юалiс:

— Гленитчö?! — сэтöн жö кутiс Митиперсö киöттяс и пондiс кыскыны отирыс коласöт — не стыд, не совесть. Джöмдiсö да падмисö, мунiсö и локтiсö тöдтöм инькаыс дынö. Дарьяыс жö гажöн висьталiс: — Катя, жöник кутi! Мыся, оз я гленитчы...

Видзöтыштiс Дарьялöн подругаыс Митипер вылö, и мужикыслöн кыдз моросас мыйкö мезмис, вотьыштiс, и кылыс öшис. Сiя синнэсö бергöтiс мöдöрö, но Германыс эд сэтöн жö: гырдззанас бокас заргö да заргö и пель одзас модьö: «Лэбты юртö, кукань! Сöтам-вартам, эм или абу... Кöдыскö öтыс!»

— Мый тiянлö?! — чорыта да гордöя юалö невестаыс, асьсö мужиккес одзын оз стыдит.

— Сöтам-вартам, невеста! — синнэсö чикыртiс Германыс. — Он я тэ бöбась бы? Жöникыс, во! Туяна-колана, позьö висьтавны, что первöй сорт, он верит?! Ассис юав. Главнöйыс... — горшас печиктiс, — оз ю. И уджавтöг öтiк лун оз вермы овны. Иньсö киэс вылын пондас новйöтны. Сiдз эд, Митипер Иванович?!

— Тöдам ми тiян кодь жöниккесö, — синнэсö мöртiс невестаыс Митиперыс вылö. — Асьнытö од вермö вердны и кышасят миян коддес бердö. Сiдз?

Но сэтöн Дарьяыс чукыль-мукыль керис и веськыта висьталiс:

— Катюша, ме тэныт назёмсö бы одзат эг кыскы! Тöда кинкöт тöдчыны, правда... Юыштö жö мужикыс, но кин öнi оз ю? Гöтрасят кö, жмитан, и быдöс бур лоас!

Сiдзкö, Ромашкинаыс важын ни корасьöма Митиперыс сайö Катясö, öнi только орсiсö-баитiсö, лöсьöтiсö отир моз жö бы, медбы сыбöрын некин эз серав, что невестаыс ачыс жöникыс ордö локтiс.

12

Катяыс пырис Митиперыс ордö, эз повзьы не нятись, не бусiсь. Пырис керкуас Митиперлöн виль инь, видзöтiс керку пытшксö, вежис вывтсис паськöмсö, босьтiс рос и пондiс чышкыны джодж.

Митиперыс шынь да шынь — пеллесö адззö, сэтшöм ни рад. Чышкис-керис Катяыс керкусö, вочöтiс, топ невеста. Узисö и ашынас мужикыслö вайöтiс зон да ныв. Пырисö керкуас челядьыс, и Катяыс висьталö, медбы Митиперсö шуисö айöн.

Гöтрасис мужикыс и видзöтö иньыс вылö, мый сiя керö, кыдз керкуас бергалö, петö и пырö — öтiк минута весь оз вермы овны, киэс пыр топ лудöны, быдöс миссьöтö да чышкö, дзимлялö да ас мознас керö — любо видзöтны! Гленитчö Катяыс. Ештö керкуас бергавны, и челядьсö любитны, и Митиперсö оз вунöт: вежис паськöмсö, водтöтiс виль ольпась вылö. Талун керис этö, ашын ветлiс деревняö, сэтчинiсь вайöтiс öшка да баляэз, висьталiс мужикыслö:

— Местит подасö!

А кытчö бы нiйö йöртны? Мыйöн городас вердны?

— Тэ мужик, тэ и думайт, мыйöн подасö вердны да кытöн видзны, — висьталiс иньыс, кышалiс сымда заботаэз, что ешты бергавны. Кытöн ни сэтöн винаыс йылiсь думайтны? Бур, что Митиперлöн керкуыс городыс дорын: матын ыббес и вöрыс, и исполкомыс отсалiс, сетiс ытшкыны турун, а подасö медодз йöртiс пес видзанiнö.

Пондiс мужикыс овны виль инькöт — любо бы видзöтны, отирыс завидуйтö, что нылöн хозяйство — эмöсь мöс, баляэз, быдтiс порсь, кольттьöтö курöггез, а Катяыслö сё мыйкö кыдз оз тырмы, сьöлöмыс кошшисьö да тöждiсьö, мужиксö тшöктö бы керны öтiкö да мöдiкö, кöр Митиперыс вунöтiс, кыдз и черсö ни оропавны.

— Мöстöг ме кула, — кыдзкö висьталiс Катяыс.

— Мыля кулан, кöр магазинас йöлыс оз и бырсьы? — оз вежöрт иньсö Митиперыс.

— Адззöмыт йöв! Ва сорасö...

Податöг инькаыс кыдз шогалiс и ачыс эз тöд, кыт висьö. Может, сьöлöмыс бöр кыскис гортас — деревняö, но челядьыс чожа велалiсö Митиперыс дынö, и кыдз сiя уджалансянь локтö, ыджытжыкыс — зонкаыс чепöссьö да чирзö: «Дядя Митипер!..» Мöдыс юасьö: «Тэ кытöн вöлiн? Мый керин?»

Гажа лоис оланыс. Кокнита тöвйисö. Тулысланяс Катяыс висьталiс: «Начкыв öшкасö!» Мужикыс öшис, сувтiс паныт: «Мый баитан? Гожумыс кежö начкывны?...» Оз бы кывзы иньсö, думайтö, что сiя бöб басни баитö, бöрöн уджалö, но Катясö он вермы: висьталiс и кер! И колö кывзыны иньтö. Митиперыс котöртiс соседас.

— Сöтам-вартам! — Германыс сэтöн и эм, рад, юалö. — Винаыт эм?!

— Кытшöм вина? — бизгыштiс Митиперыс. — Ог ю и абу. Натьтö, иньöлöн эм...

И одз асывнас кык ёрт петiсö начкисьны — öтыслöн чер, мöдыслöн пурт. Карта вылö одзас лёк чужöмöн заргисис Германыс. Митиперыс сувтiс воротаыс одзö, и пондiс кывзыны, кыдз уджалö ёртыс. Минута эз чулав, видзöтö: Германыс карта вывсис бöр ни петö, и сэтшöм гордöй — эн баит! Ыксö: «Вай сто граммсö!»

Шондiыс сералö, катшаыс китшсьö, мöсыс баксö — не удж, а шогöт, но пырисö керкуö, пуксисö порог дорö стуллэз вылö.

— Сöтiм-вартiм и абу! — кывнас гардыштiс Германыс, гордöй, нюмралiс-керис öмсö да висьталiс. — Колiс жö барансö шырны да вöлись чередитны...

— Кытшöм баран?! — повзис хозяйкаыс. — Öшкаыс местö барансö?! Ой, гореыс!

— Приказ...— нырнас вирснитiс начкисисьыс, кивзыштiс. — Киэз дрöжитöны. Тöн мужиккескöт газуйтiм, будь проклят бы...

— Ме тiянöс öтiкö тшöктi керны, а тi... — горзö хозяйкаыс, и кытöн видö, кытöн сералö, кисьтiс рюмкаö вина. Германыс юис, малыштiс кынöмсö, горзьöтiс, шынньöвтiс да висьталiс:

— Лок, Митипер, уджсö эд колö керны.

Час бöртi дзимлялiсö яйсö, пырисö керкуö, пуксисö пызан сайö. Сёйисö да вина юисö. Митиперыс пондiс ошшасьны, что сылöн быдöс эм, не кыдз тэнат, Герман: медодз хозяйкаыс — золото! Прока, чож, ылöса, и челядьыс сэтшöмöсь жö, а сёян-юаныс...

— Сöтiм-вартiм, кöбы не ме! Мыся, не ме бы..., тэ бы, Митипер... А ошшасян... — Германыс юрыс вылö пуктiс шапкасö и ыбöсö!

— Мый сылö лоис? — Катяыс эз вежöрт мужиккесö.

Митиперыс öвтыштiс кинас. Катяыс босьтiс рос да Германыс бöрсянь чышкис джоджсö.

Городö тулысыс локтiс не деревняö моз: деревняын сё кöдзыт, лым, а татöн важын ни сылöтö и сылöтны оз вермы.

Кыдз пондiс локны тулысыс, Катяыс мужикыслö шуис: «Митипер, ме думайта бöр деревняö мунны... Тэ кыдз?»

Мöдыс кыдз виньдiс и шы эз сет.

— Подасö некытöн видзны, картаыс абу, — иньыс кыдз дорйис асьсö, сiя уна оз баит: абу жö небыт нянь, он курччöвт, ежели мый думайтö — керас.

Митиперыс малыштiс Надялiсь юрсö, топ аслас дона нылоклiсь, курччöвтiс тырпсö и öтiк йöрнöснас петiс öтöрö. Погоддяыс небыт, но тöлыс эшö лэчыт, видзöт, кыдз вижгас, и пондан шогавны, но мужикыс сулалiс посöдзас и эз кынмы, эз кыв кöдзытсö, видзöтiс кытчöкö ылö и нем эз адззы, куритiс...

Думайт, мужик, мый керны да кыдз одзлань овны? Кинлö норасьны да мый висьтавны? Кин лечитас сьöлöмтö, кöда мукöдпыр висьö пинь висян моз, зубыт... Мужик тэ, мужик... Быд морт эд тэнö видö, что быдöс умöльыс аркмö ассянят, бытьтö эн куж овны Машаыскöт, а öнi бöра сiя жö бы лоö...

Сiдз тэныт и колö, Митипер... Сiдз и колö... Медодзись колiс гöтрасьны мöдiк вылö, эз ков кокнит мывкыда Машаыскöт судьбатö гардны.

— Дядь, мыля посöдзас пасьтöг сулалан? Кынман эд. Пыр гортö, — посöдзö петiс Борисыс — не аслас зоныс, но аслас кодь жö: дядьыс дынын гардчö, Митиперыссянь топ мыйкö видзчисьö... Сизимöт год велöтчö Борисыс, а лыддьöны учöтöн. Митиперыс сы годдэзын важын ни пинялiс и гöрис... Вежсьö оланыс.

Зонкаыс кутiс Митиперыслiсь кисö, пондiс кыскыны посöдзсис керкуас, кеймисис, бурмöтiс сьöлöмсö.

Пырис посöдзсис. Иньыс эз ни баит деревняыс йылiсь.

«Сюра мöс», — ас кежас думайтiс мужикыс, пасьтасис да петiс. Бöрсяняс ыкöстiс Борисыс: «Дядь, тэ кытчö?!»

Шы эз сет. Веськыта мунiс соседдэзас. Ёртыскöт туйö янсöтны кöть мый. Германыслöн сьöлöмыс топ тöдö, что тэ весьтын оланыс кымöртчö: сулалö посöдзаныс ни, öмыс осьта, шоч пиннес гер и рявзö:

— Сöтам-вартам! Абу я Митипер сватö? Тыдалö, гортсис бöра брынöтöмась.

— А тэныт мый? — Митиперыслöн нюжалiс чужöмыс.

— Кыдз мый, сöтам-вартам?! Сьöлöмö, поди, тэ понда висьö...

— Эн баит... — кинас öвтыштiс Митиперыс, кармансис кыскис кырымтыр деньга, висьталiс: «Котрась!»

— Айн моментус! — Германыс рад. — А иньыт?..

Луныс кымöра, зэрö бы и оз вермы. Митиперыс сулалiс Германнэз посöдзын и думаэзнас тэрмöтiс ёртсö: «Вöрöтчы! Мый нö öшин кытчöкö?!». Топ горшыс сотчис и колiс кусöтны öнi жö...

Ёртыс эз узь: чожа мунiс и чожа локтiс — öт карманас бутылка и мöдас бутылка, эшö и писис кыскис бутылка.

Заргисисö баняö. Сэтчин и юисö да сёйисö няньторöн. Сьöлöммезныс вылын лоис кокнит, оланыс гажа, быдöс вунöтiсö, быдöн вылö сьöвзисö, ась кöть ашын мый ло: талун эм — ашын оз ков, талун праздник... Юисö да гудыртiсö, пондылiсö горзыны и сьывны, норасисö öтамöдныслö, бытьтö оланыс враг, оланыс хитрöй, лёк, кужö бöбöтны и дзугны, дзебсисьны и мыччисьны, кольны и вöтны, кинöскö дорйыны, кинлöкö отсавны, но не нылö — абу дак абу и оз ков, мед сiя горзö, кöдалö оз тырмы, а нылö пыр тырмö, мед мукöдпыр и няньыс пызаныс вылын абу. Ура, Митипер! Да олас, Германыс!

Митиперыс оз тöд, кыдз да кöр янсöтчис ёртыскöт, кыдз локтiс гортö, кыдз водiс, мый думайтiс. Саймис, осьтiс синнэсö — пемыт. Нюжöтiс кисö — вевдöрын пöдан, бокас — стена, увтас — джодж. «Гробын эд! — повзьöтiс дума, сьöлöмыс тёп да тёп. — Ловйöн муас сюйыштöмась!..» Сiдз повзис, что медодз öмсö эз вермы осьтны, но минута-мöд бöртi бöба ыкöстiс: «Герма-а-ан! Герман, ой! Кула эд...»

— Сёйöны я мый я? — кытöнкö кылiс иньыслöн голосыс.

«Слава богу... — кыдз мезмис кытiськö. — Абу жö эшö ештöмась дзебнытö...» — малыштiс ас гöгöрсö — оз вежöрт кытöн. Иньыс öзтiс би, чорыт шаггезöн локтiс, кутiс киöттяс, лабичыс увтiсь кыскис джоджыс шöрö, сьöвзис чужöмас да эшö шуис: «Отир смех! Стыд абу?!» Унажык эз баит, но сiдз висьталiс, что юрыс пондiс висьны-потласьны, сьöлöмыс гудыртчис: оланыс — нять, оланыс — бес, орсö мортыс весьтын, нерö. Куйлiс джодж шöрын, кытчöдз Катяыс эз шу: «Эшö öтпыр этатшöм локтан, коля!

13

Уджавны сiя лунö эз мун. Олiс гортын, но сыкöт некин эз баит. Весь олiс, но эз сёйсьы-юсьы. И бöра пондiс овны топ не ачыс, кыдз узис да вöтасис: чеччö и водö Германыскöт — ваöн он янсöт и биöн он сот. Германыс кужö овны гортас и ёртыскöт, пыр велöтö Митиперсö, медбы сiя вöлi аскоддяс жö: смев и иньыс вылö эз видзöт, олiс аслас юрöн.

Митиперыс кöр узьлiс Германнэзас, кöр и вовлiс гортö, кöмкöт-паськöмнас водлiс ольпась вылö, ланьтлiс пыд онöн. Ашынас чеччис, мукöдпыр сёйö бы, но сыкöт некин эз баит, эз верд, эз юктав, паськöмсö эз миськав. Сiя и ачыс эз думайт бритчыны, пывсьыны баняын, вежны паськöмсö, олiс порсь моз, дынсис патшкис ньылöмöн, табак дукöн, кöть дынас эн и лок — ныр чегö. И заводын уна эз баитö, и ачыс некинкöт эз баит, а локтас, будзгыльтчас и уджалö.

Сiдз и тöвйис, но эз адззыв тöвсö, быд лун юрыс висис и быд лун колiс сiйö веськöтны, и деньгаыс эз вöв, но вöлiсö ёрттэз, роднöйöсь да любимöйöсь, кöднакöт кужис овны, адззис басни, деньга, сёян-юан. Тулыснас ни кыдзкö гортö локтiс садь и кыдз первуись казялiс шондiсö, зелёнöй туруноксö, льöмпулiсь листтэсö. «Тулыс ни тай... — дивуйтчис Митиперыс, кармансис пешлiс деньга, кöдö талун вайис гортö. — Тулыс ни!..» — топ рад вöлi тулысыс вылö, сiйö и керис малалiс деньгасö, думайтiс сетны иньыслö.

Катяыс сулалiс посöдзын, видзöтiс кыдз йöз вылö, топ эз адззы, что талун мужикыс садь.

— Здравствуй, — виноватöя шынньöвтiс Митиперыс, но Катяыс топ эз кыв, чужöмыс вылын öтiк чукыртор эз вöрзьы, кöдна татöн ни пондiсö тшыкöтны чужöмсö.

— Ме талун деньга босьтi, — мужикыс малыштiс юрсö. — Деньга, мыся, босьтi!

— Адззöмыт мыйöн ошшасьны... Ме тэсся унажыкöн босьта да ог ошшась, — кöдзыта, но рамыника горöтчис иньыс.

— Поди, тiянлö деньгаыс колö? — Митиперыс иньыс одзын пон моз чукыльтiс юрсö, осьтiс öмсö, кытöн эз ни вöлö мымдакö пиннес.

Митиперыс öзтiс папироса, горша кыскис тшынсö, кывзiс, кыдз нерис дума: «Деньгаыс оз ков, деньгаыс оз ков...» Эта думаыс и вашöтiс гортсис, кыскис Германнэзас, посöдз дынын чепöссис кепись ыжда понок и пондiс сёйны-вувтны, дзик эз тöд Митиперсö.

— Собака! — ыкöстiс понокыслö. — Кытöн хозяиныт?!

— Татöн ме! — керку сайсянь юрсö мыччис Германыс.

14

Тулыс. Топ тöн забор пöлöн вöлi лым, а талун сы местö пондöм быдмыны ни петшöр, топ тöн эшö льöмпуэз сулалiсö пасьтöг, а талун киссьö ни ны вылiсь цветыс. Тэрмасьö тулысыс, и отирыс тэрмасьöны садитны картошка да лук. Митиперыс гуддисьö садникын. Сiя талун уджалö кодя морт моз. Колö бы гажöтчыны, но мужикыслö мыйкö оз тырмы, топ шогалö, тоша, нырыс нюжалöм, синнэс вöйöмась сингуэзас, рожаыс чукрасьöм — син одзын пöрисьмö, и сьöлöмыслö недолыт. И мый сьöлöмыслö колö, мый оз тырмы, ачыс оз тöд.

Уджалiс-керис, гарйис гряд да иньыслö шуис: «Катя, таво огуреццес быдмасö тыр. Пондам вузавны».

— Вузав. Тэныт эд деньгаыс уна колö, — иньыс вердö порсьпиян. — Ме вот босьта эшö öтiк дзут, яйыс лоас и деньгасö кыя. Ог понды тэ моз йöзас котрасьны да нюкьясьны.

— Дугды ни, дугды... Ме кöр ни ог ю!

Мымда ни оз ю винасö? Неделя или кыкö? Чуннес вылын гусьöн лыддис, петö, что неделя етш — уна ни, не весь Германлöн иньыс кыдзкö пырис, синваэсö содзнас вештö да норасьö, что олан эз ло, быд лун мужикыс зызö, тышкасьö... Горзö инькаыс, норасьö, корö отсöт. Митиперыс пö чапкис юнытö и ась ёртсö велöтö овны ас мознас жö.

— Отсав, Катя! — горзö Германлöн иньыс, кеймисьö. — Тэ эд мужиктö вина юöмсис мыйöнкö лечитiн, кидтiн. Мыйöн веськöтiн? Кытшöм ядöн юкталiн?! Отсав. Ог вунöт.

— Милицияыс эм эд. Йöртласö кын кирпиччесö йирны, сэк, поди, дугдас юны.

— Мый тэ сiйö баитан?! — повзис инькаыс. — Кыдз ме сiйö пуксьöта?! Мый сытöг понда керны?! Керкуас лоас гажтöм. Лекарсво бы...

— Лекарство?! — лöгыс петö Катялöн, соседкаыс эд мужиккес кодь жö: удасö — чатыртас рюмкасö, оз и кезöт — эшö етша, унажык колö, думайтö этадз Катяыс, но оз жö висьтав, а шуö: — Курöг позсис назёмсö пöж, ванас чай сорöн юктав, и вунöтас мужикыт винасö.

— Быль?! — синнэс баралiсö Германыс иньлöн.

— Ме сiдз кери...

— Кыдз кулас?! — видзöтö Митиперыс вылö, синнэзнас юалö: «Сiдз я мый я, Митипер?!». Но Митиперыс шы оз сет, шыннялö.

Инькаыс пильскытöн да норасьтöн петö керкусис. Бöрсяняс видзöтан — кöс катша, топ яйтор ни абу, думайтан: «Мыйöн мортыс и олö ни?», но олö эд...

— Быдöннытö бы курöг позiсь назёмнас юктавны, — Германыс инь бöрын мужикыслö висьталö Катяыс. — Ась бы мужиккес тöдiсö...

— А инькаэс? — пиннес гер Митиперыслöн.

— Петав жö рытнас да видзöт, кин унажык кодыс öвтчö... Думайта, что инькаэс мужиккес сьöрись немöн ни оз кольччö..

Петö, что таво тулысыс Митиперыслö козьналiс кыдз виль олан: асывнас чеччö шондiтöг, ештö гуддисьны йöрын, сыбöрын котöртö заводö, уджалö пöт и рытнас бöр тэрмасьö гортö. Мыдз, но долыт, кыдз абу уджалöм, а шоччисьöм. Кöр посöдзсяняс Германыс ыкöстас жö: «Сöтам-вартам! Орддисян, сват...»

— Некöр!

Митиперыс тэрмасьö гортö, сылöн ендö удж: медодз иньыслö отсасьö йöрын, сыбöрын вайöтö мöс. Оз и верит, что нылöн эм мöс, что туйö сiйö видзны городын, эз бы ков сылö сюраыс, но иньыс вермис: «Вайöта и видза! Тэнчит ог юась, ог тшöкты вердны... Ачым!» И видзö. Вот и колö гортö уджалансянь тэрмасьны, шупыта мунö Митиперыс, кылö баксöм мöсыслiсь, кöда сiйö видзчисьö кыдз хозяинöс ни.

Богатöй Митиперыс. Отсасьö иньыслö и не весь. Катяыс уджалö — öтiк минута весь оз вермы овны, мыдзö и рытнас пызан сайын норасьö:

— Кöть мый, Митипер, а сьöкыт... Сьöлöмö кыскö деревняö.

Вот тэныт и блин: бöра деревняö... Мый сэтчин Катяыс колис, мый öштiс?

Уджавтöн эз и казялö, кыдз чулалiс гожумыс, ар ни лолалö, быд лун зэрö. Митиперыс кыдз гожумсö эз и адззыв — пыр заводын да садникын, садникын да заводын, мöс да кукань, кукань да порсь, и иньыс мöднёж ни видзöтö, топ мужиккöт олö, любитö или оз, но оз вид, оз ыксы, керкуас оз дзескам, а олö, кыдз бур ёрткöт, кöда вылö туйö надейтчыны.

Бур Митиперыслö. Нем сылö сэсся оз ков, вот гарьясö картошкасö, дзимляласö луксö и пондасö видзчисьны тöв. Тöлыс бöра ваяс ассис удж, бöра пондас ковны бергавны мöсыс гöгöрын: вайны турун, садникö петкöтны назём... Бур Митиперыслö, но кытöнкö сентябрь медодзза луннэзас Катяыс горöтчы жö:

— Мунан?

— Кытчö?! — эз вежöрт мужикыс. — Деревняö.

— Нем сэтчин эг öшты.

— Но и ов! — висьталiс иньыс, петiс керкусис и зубыта пöдналiс ыбöссö, а ашынас видзчисьтöг öшыныс увтö сувтiс колхознöй машина. Митиперыслöн сiдз сьöлöмыс и вотьыштiс: «Вот эд...» Öшис, киэс сыр-лёль, сьöлöмыс сайкалiс. Сулалiс джодж шöрын и видзöтiс, кыдз керкусис петкöтлiсö паськöмсö... Видзöтiс, а сы вылö некин эз видзöт — не челядьыс, не иньыс...

И керкуыс бöра öтiк лунöн гöвмис, кыдз суййисö ыб вылiсь кöз, мунан джоджыс кузя и быд шагыс, бум-бум! Полöтö.

Гордöй Митиперыс, мед и шуöны алкоголикöн, гордöй мужикыс, оз вöтчы иньыс сьöрö, оз кеймись Катяыслö, аслас эд керкуыс. Олö дзир öтнас — не одзас, не бöрас, не баитны, не горзыны — некин оз адззы, оз кыв, оз вид, оз жалейт, кöть кув, кöть ов... Керкуас öвтчö и öтöрас петас öвтчö — öшöм. Гажтöм. Коккес топ асьныс нуöтöны соседдэзас.

— Митиш! Еныс тэнö вайö.

— Покась! — иньыс нерö Германсö, осьтöм керкусис öшынсö и видзöтö мужиккес вылö. — Митиперыс тэ вылö дзар оз кер. Сiя тэ моз оз ни винасö былскы!

— Эн кывзы кöс перксö! Ме öнi винасö ог жö ю, — ошшасьö Германыс. — Он верит?! Сöтам-вартам, но сiдз петö... Язва кынöмсим адззисö. Эстiсь... — кулакнас вачкис гöгыс увтö. — Язва, зонка! Кыдз кишкаэзам гу гарйöмась... Öшымöс пыдына, во! Поди, рак ни... Но ме, сöтам-вартам, ог пов, кувнытö öтпыр, рас и абу! — Кармансис кыскис папироса, пондiс куритны, ачыс модис. — Кывзы жö... Кöр жö ми тэкöт медбöрьяись адззисьлiм? Натьтö, эд сорок дён ни чулалiс? Поди, колö сорок дёнсясö касьтывны... Кыдз думайтан?

— Кöр кулам, сэк и касьтыласö.

— Митипер, тэ-э-э... Ме кылi, бытьтö иньыт пö бöра того-этого? Но и ась. — бергöтiс баснисö. — Может, котрасин бы, а?

— Ог! — орöтiс ёртыс.

15

Эз ю и эз кув. Эз кув, но кык лун эз ветлы уджавны, а мый керис? Ачыс оз тöд, кöр унажык куйлiс и думаэзнас кошшис туй, медбы пышшыны, но кинiсь да кытчö — ачыс эз тöд. Но колiс мыйкö керны. Поди, вöтчыны Катяыс сьöрö? «Ог и ог! — падтiс асьсö. — Нiя пондасö пышшавны, а ме вöтлiсьны... Ась нiя вöтлiсьöны!»

Кык лун эз уджав, сёйис и эз, узис и эз, олiс, кыдз вартлöм, а куимöтас колiс мунны заводö.

Заводын медодз панталiс Ромашкина Дарьяыс. Инькаыслöн синнэс гудыраöсь, кыдз горзöм, чужöмас гажыс кусöм, голосыс сибдыштöм, оз ни одззамоз чирзы, только юалiс:

— Мый нö тэ?

— Мый ме? — сибдöм голосöн жö шыасис Митиперыс и мунiс Ромашкинаыс бокöт, люкасис цехсис начальникныскöт.

— Юин?! — гым кымöр моз мурзьыштiс начальникыс.

Митиперыс шы эз сет.

— Лок татчö! — висьталiс начальникыс и иньдöтчис аслас жырö. Митиперыс коккесö гужгис бöрсяняс.

Öктiсö комитет и пондiсö весöтны да матегавны, кöть синнэз эн осьт. Быдöнныс модьöны: «Алкоголик, дыр пондан?! Дугдан он?! Нем тэкöт баитны... Вашöтны и быдöс сэтöн!»

Митиперыс юрсö öшöтiс и пукалiс — не тпру, не ны! Шы эз сет, эз шу, что эз ю, эз кеймись, медбы эз вашöтö, думайтiс: «Ась... Синнэзныт тырöны кö, муна... Тiянтöг ог кув...»

Видiсö, лöсьöтчисö голосуйтны, бытьтö керисö бы закон сьöртi, медбы эз норась, некытчö эз гиж.

— Ась эшö уджалыштö, — сэтöн пондiс дорйыны цехсис начальникыс, медлёк враг Митиперыслöн, а, видзöт, морт жö вöлöм.

«Эд тi öвтö, ог кывзы... — Митиперыслöн синнэзас шог, лёк югöр. — Орсат...»

— Мортсö оз ков чапкыны! — чеччöвтiс Ромашкинаыс, сiдз и горзö, сiдз синваэс и петöны. — Юö, но прогуллэсö талуння лунöдз эз кер... Тöн вöлi нач садь. Ме тöда, мыля эз вöв заводас...

— Но, но, Ромашкина! Кин тэныт прогульщикыс лоö? Сват или вон? Мыйкö öддьöн ни дорьян... — кутчисьöны Ромашкинаыс бердö бы, но сiя оз сетчы — кывнас вермö:

— Тöн, мыся, Никифор Ивановичыс нач садь вöлi! — вынсялö голосыс инькаыслöн, пыкö ассис. — Ме тöда... Семьяыс сылöн разьсьö... Дзугсьö оланыс...

— Ачыс виноватöй! Эз ков юны!

— Мортыслö отсавны бы, а ми... — кыдз пондiс Ромашкинаыс, кыдз кутчисис резны-паздыны кывнас, мöддэс синнэзнаныс кваркыш да кваркыш и одзлань нем оз адззö висьтавны. — Быдöнным юам, да некинöс топ ог адззö, а сэтöн... Жаль меным Никифор Ивановичыс.

— Мый менö жалейтны? Öтiк местö кыка локтасö, — серöмтчис Митиперыс, некинлö эз верит.

— Ме дак думайта... — пондiс няргыны кыз мужик, профкомсиныс член жö, сэтшöм зуд, что эн пантась: — Ме думайта...

— Мунö тi ме дынiсь! — Митиперыс эз понды кывзыны, мый сы йылiсь думайтö пестер пасьта чужöмаыс, чеччис, бергöтчис и петiс начальникыс жырись.

Заводыс ружтiс-уджалiс, лолалiс бусöн да аскодя дукöн пöдтiс. Митиперыс пышшис эта ру дынiсь, мунiс кузь шаггезöн гортö, нельки гажöтчис, топ кытiськö мезмис сэтшöмись, что важын бы колiс керны этадз, да эз вермы, а öнi керис и бур — гажöтчы, ошшась, висьтась быдöнлö, мед сы местö некин эз бöбась. Локтiс гортö, керкуас шой дук, эн бы и пыр, но пырис, вывтсис вежис паськöмсö, петiс садникö и сэтчин гуддисис рытöдз. Шондi пуксян гöгöрас улицасянь ыкöстiс тöдса инь голос: «Хозяиныс гортын?!»

«Кытшöм тэныт öнджа колö?! — недолыт лоис Митиперыслö, нятьöсь киэсö миссис ведраын, чышкис бырöм чышкöтö, сапоггесö колис ыбöсыс дынö и пырис посöдзö. Сэтöн сiйö и видзчисис Ромашкинаыс. Ромашкинаыс виноватöя шынньöвтiс, шуис: «Менö эн вид...»

Видiс бы — веськыта бы шырис, мед тöдiс бы, что сэтöн жö — öтлаын жö вартiс-пурис. Нем эз шу Митиперыс, сы местö Ромашкинаыс юалiс:

— Мый нö тiян лоис? Гöтралi, думайтi олат, а тi...

— Ачыс эд...

— Ачыс... А тэ кытöн?! Хозяин керкуас или абу?! Мый юртö öшлан?! — вынсялiс голосыс инькаыслöн — Ромашкинаыс пöрис Ромашкинаö. — Кувтöдз öтнат пондан дзуртны?! Басöк лоас оланыс... Понлöн кодь...

— Эн вид, — пыдына ловзисис Митиперыс.

Сулалöны посöдзас, пурöны öтамöднысö. Кыкнанныс дрöжитöны, мед и абу ыркыт.

— Мый пондам керны? — дыр мыйись юалö Дарьяыс.

— Мый колö керны? — оз вежöрт Митиперыс.

— Мунны эд колö деревняас.

— Сiя пышшалö, а ме понда вöтлiсьны.

— Ой, кытшöм гордöй! Сiя пышшалö... Ме бы сы местын пышши жö. — Думайт, мый эстöн керны? Буссö вишкыны да ой и лун шумсö кывзыны?! А сёям мый?! Чожа магазиннэзас шыррес пондасö кувны! Деревняас эд вöлись оланыс! Гажа, руыс сöстöм... Петан карта вылас — мöсыс, баляэс, курöггес, куканьыс... Йöлыс, яйыс, виыс, только эн дышöтчы и пондан овны — во!

— Мыля нö ачыт татöн олан? — нерис ни Митиперыс.

— Мыля ола? Кытчö нö воштiся?.. Эстöн кöть пессö оз ков керны...

Пырисö керкуас. Джоджыс ёгья, пызан вылын клеёнкаыс лякöсь, стул вылын кеписсез, стул увтын газетаэз — сьöлöм гудыртчö. Ружтыштiс-мурзьыштiс Ромашкинаыс, адззис рос, чышкис джоджсö, миськалiс пызансö, паньбекöр, ачыс сё модис, видiс хозяинсö, велöтiс овны, медбы эз ю, тöдiс гортсö, иньсö, мужик бы вöлi, мужик! А öнi сiя кин?!

— Висьтав, кин тэ öнi, Никифор Иванович?! — юалiс веськыта.

— Ме мыйöн тöда? — виноватöя шыннялiс Митиперыс, рад или абу рад — ачыс оз тöд мый сыкöт, кöр керкуас инька морт, кыдз аслас, роднöй, мыйöнкö вачкисьö Катяыс вылö.

— Ашын жö мун Катяыт дынö. Нем эстöн керны! Öтнат торксян, винаöн сотчан, гагсялан-багсялан или тöвнас кынман керкуат, тшыгйöн кулан. Висьтав, мунан или он?!

— Ог тöд...

— Мунан и быдöс сэтöн! Ме вовла и видзöта! Ромашкинаыс кытöн видiс, кытöн кывнас шонтiс и мунiс. Сы бöрсянь керкуыс лоис шонытжык, сьöлöмыс вылын долытжык. Мужикыт водiс и ланьтiс чöскыт онöн, топ юис кытшöмкö лекарство. ... Чеччис, медодз пырис зепас, кыскис деньга, гиль-голь! Гижöтовöйыс öтiк руб абу — талун сёян, ашын сёян, а мöдлун ковсяс кортöн ветлöтны или гусясьны... Бöбöтан: сэтчöдз Митиперыс эшö эз ов. Сылö деньгасö уджалöм понда сетасö заводын, но сэтчин некытшöм вын эз кыскы — абу и оз ков! Син вылас джаджись усис чеснокöн тыра кöзича. Чеснокыс асланыс садникись, эшö мöймуся, гырись, эз сiсьмы, не эз чуж. Мый бы сiйö сэтöн видзны? «Вузала!» — аслыс шуис Митиперыс, кöть базарас эшö эз сулавлы, но оланыс эшö не сiйö мыччалас.

Висьталiс — керис, мунiс базарö, вузалiс товарсö, кыдз чапкис донтöмика. Гортö локтöн ни Германыс ыкöстiс:

— Сöтам-вартам! Тэ нö мый? Кежалiн бы... Менам бöра кынöмö висьö, етша ни кольччис овнытö.

«Шыш тэныт! — думанас висьталiс Митиперыс, но горöтчис. — Некöр! — И мунiс гортас, тэрмасис — сьöлöмыс кыскис, кыдз мыйкö тöдiс.

Гортын посöдз ыбöсыс осьта. Повзис, пытшксяняс эд игнавлiс бедьöн. «Нем гусявнытö да сэтöн... — сьöлöмыс пондiс пессьыны, стук-бряк чеччöвтiс посöдзас и нетшкöвтiс керку ыбöссö.

Керкуыс ловзисис аскодя шоныт да чöскыт руöн, кыдз видзчисьöм хозяинсö: лонтiсьöм гор, джоджыс миськалöм и чышкöм, пызан вылын сулалö зеркало, и... Комсяняс джодж шöрö чывкнитiс Машаыс — важ иньыс, да сэтшöм чож, сiдз пасьтасьöм, ниртчöм-мавтчöм, что мужикыс невна гатш эз пöр. Невеста! Вот эд кыдз!..

Митиперыслöн сьöлöмыс мый и лоис: джöмдiс я, берездасис я, рад или курыт, ачыс оз тöд, оз вежöрт, мый сыкöт. Öшис Митиперыс гортас, сулалö мыр моз, сьöлöмыс чеччалö горшöдззас. Мöдiк бы мый и керис, кыдз бы радуйтчис, а сiя сулалiс мымдакö и кижган голосöн шуис:

— Тэ мыйлö локтiн?

— Кыдз мыйлö?! — шондi моз югмис инькаыс, шынньöвтiс. — Инь ме тэныт или абу? Кола ме тэныт или ог? Вунöтiн ни, кыдз нывканам сьöрам вöтлiсин? Кыдз окалiн тополлес увтын? Вунöтiн?! Но тэ менам и мужик!.. Думайтан чöскыта узин медодзза ойсö бокам и быдöс сэтöн?! Думайтан, мöдiкыс эта бöрсянь вермас любитны сiдз жö?! Митипе-е-ер! — ыкöстiс, рик-рик горöтiс керку тыр, чеччöвтiс мужикыс одзö, öшöтчис голяыс бердö и пондiс окавны, дульнас мавтны тырппесö, нырсö, синнэсö, ниртiс да малалiс небыт киэзнас голясö, ачыс гулю моз сьылiс: «Мужик... Пышшалам öтамöдным дынiсь, пышшалам, а сьöлöм кыскö тэ дынö... Простит...»

Небзис сьöлöмыс Митиперлöн, минута кежö быдöс öштiс, вунöтiс, мый вöлi и эз — нем сэсся эз ков, сэтöн бытьтö счастьеыс и эм, кут да сэсся эн ни лэдз, но сулалiс тувдöм моз — öшöм, дойдöм я мый я, ньылалiс дульсö.

— Митипе-е-ер, мый нö тэ? — Машаыс малалiс юрсö. — Мый нö тэ?

Садь мужикыс и думаэс садьöсь. Сьöлöмыс олö Катяыскöт бы, а эта мед ниртчö, буржыка окалö, жмитлö, кеймисьö, кöсйисьö бура овны, мед...

— Мый тэныт сiдз лоис? Мыля шогалан? — Машаыс мезмис голяыс бердiсь, мунiс комö, ылiсяньжык видзöтiс-керис мужикыс вылö, сё модис ассис и пызаныс вылö пондiс ваявны нянь, яблоккез, конфетаэз, колбаса, кыдз Митиперыс челядь, кöдö позьö бöбöтны чöскыт сёянöн, смилитны ас дынас не этадз дак сiдз — бöбöтны вина бутылкаöн, кöда юрсö мыччис сёяннэс коласын.

Вежсьöм Машаыс, абу ни одззакодь гордöй, и мыгöрыс топ рышкыт ни, не ни топыт яя.

Кытiськö керкуас пырöм таракан (эз я Машаыс хламнас кыскы сьöрсис?), тараканыс котöртiс джоджöттяс, сувтчышалiс, бергöтлiс уссэсö, кыдз нюкьясис...

— Да-а-а, — ружтiс Митиперыс. — Öнджа-а-а... Кола я ме тэныт? Эта эд... Тэнат эз я бытшöмжык вöв, не ме кодь гöжöм...

— Мый тэ сiйö баитан? — пильскис ни Машаыс. — Мыля тэ сiдз?! Тэнат вöлi и менам... Кыкнанным грешитiм... Вай вунöтам и пондам овны!

Пукалiс западня вылын Митиперыс, видзöтiс джоджас, сьöкыта лолалiс, пиньлалiс кыз да чорыт чуннесö. Оланыс орсiс, нерис.

— Пуксьы пызаныс сайö да сёй, — Машаыс кеймисис ни, вердiс бы топ гöсьöс. — Пуксьы да сёй! Эн сэтöн...

— Öкты да пет керкусис, кытчöдз öтлаын эг узьö, — сэтöн висьталiс Митиперыс и пондiс видзöтны Машаыс вылö, кыдз лöсьöтчис вартлыны бы.

Машаыс медодз чочкоммис, сыбöрын чужöмыс вылын öзйис лёк югöр, синнэс пондiсö вирдавны, öдззис чижьявны:

— Ага! Тэ сiдз? Тэ сэтшöм, турзьöм пороз! Тэ... — нетшкöвтiс пызан вылiсь пызандöрасö, гиль-голь джоджö киссисö паньбекöр и бутылкаыс тарöвтчис öтлаын, куралiс-кармалiс пряниккез, конфетаэз, кулис-волис стенаись ковёр, дугдiс шовкöтны часы, эз ло син одзын зеркало — быдöс лэбзис, пырис кытчöкö: дзебсисис чемоданö, кöзичаö, подол увтö. Вöлi керкуыс час-мöд кежö невеста кодь да эз ло, и ов одзлань öтнат, мужик!

16

Городыс весьтын öшалiсö сук кымöррез, но эз зэр. Улицаын öшалiс кизерик лöз тшын, ловзисян и дзикталö горш. Митиперыс пышшис гортсис, вöтöн моз локтiс вокзалö, небис билет, час етш видзчисис автобус, пуксис машинаö и катыльтчис деревняö.

Деревняö локтiс рытнас. Лэдзчис автобусiсь и кыдз шедiс кытчöкö сэтшöм местаö, кытöн отирыс оз олö, только сьылöны кайез, туй бокын больгö шорок, кок увтын быдмö сук зелёнöй турун, кытöнкö урöтö трактор, кöкö кöк, и руыс сэтшöм кокнит — ловзисян и коддзан.

Отирыс городын моз эз кылö, городын моз пеллез эз мыдзö. Одзас деревня. Гажöн китöстiс петух, бакöстiс мöс, пондiс вувтны пон, кылiс ни челядьлöн чирзöм.

Митиперыс топ татöн кöркö вöлi ни, кöть и эз вöв, но топ адззылiс ни этö деревнясö, кöда ошшасис не только паськыт ыббезнас, каёккезöн да шорокöн, но и виль керкуэзöн, кöдна вачкисисö чачаэз вылö: öтöрсянь дорöмöсь тёсöн, мавтöмöсь рöма краскаöн, — и только деревняыс дорын сулалiс важ чом, кытöн, тыдалö, видзöмась нето сю, нето йöртлöмась пода.

Деревняыс боксяняс эз ни вачкись сiя деревня вылö, кытшöмö кöркö колис Митиперыс, кöр пышшис гортсис.

Дыркодь мужикыс сулалiс важ чомыс дынын, топ шедiс сэтчö, кытöн чужис и быдмис, тöдвылас усисö деддэс и баббес, мамыс ни бытьтö бы тыдалiс гортланяс, но эшö эз адззы зонсö... Сьöкыт сьöлöмыс вылын, кыдз öшöм, виноватöй, оз вежöрт, сiдз я керö, колiс я локны татчö, кöр янсöтчис Катяыскöт, тöвйис öтнас, öнi эз висьтась и локтö? Поди, локтас, керкуас оз ешты пырны, вачкасö кымöсас, и мун аслат туйöт! Вермас лоны...

Кöть мый ни... Митиперыс бöр бергöтчыны эз вермы, эз ни вермы овны öтнас, нятьöсь туёк кузя сiя иньдöтчис иньыс керкулань. Эз тэрмась, гусьöн мунiс, медбы некин эз адззыв, эз юась, но медодзза жö олан керкуыс дынын сулалiсö кык старушка и важынкодь ни видзöтiсö тöдтöм мортыс вылö. Татöн сiдз он мун, асьтö он дзеб, старушкаэс видзöтiсö синвевйöн, кыдз йöз вылö, топ Митиперыс татчö локтö бы гусясьны.

Одзлань здоровайтчис пöриссескöт, мöддэс гогыньтыштiсö юррезнаныс, кольччисö бöрас да шыасисö:

— Ог тöд... кин да мый татчö öштiс? Öвтчöны öнi... Тöн тай Епиммеслiсь чер гусялöмась...

— Господи! Кинлöкö черыс ни колöм!

— Колöм...

— Вот эд кытчöдз олiм... Енсис эг пондö повны...

Не ассиным.

— Кöркö-ö-ö-ö...

— Мый ни кöркöсясö талуння лунö касьтылан? Спасибо висьтав, что эшö горт шöрат оз начкылö...

Митиперыс мунiс и кылiс бöрсис баснисö, думайтiс, что пöриссес, натьтö, весь баитöны. Оз вермы сiдз лоны или быль ни сiдз тшыксис отирыс, что деревняын эз понды туйны овны?

Лöнь. Шондiа. Шондiыс пуксьö ни, югöрнас малыштiс чужöм, павкис керку короминаэзö, орсiс ыб вылын зелёнöй öзимöн. Пель бокас бизгiс ном.

Мужикыс полöмöн моз локтiс иньыс керку дынö, посöдзыс бердын паськöмыс вылiсь пыркöтiс буссö, бурундукыс вылын кодя морт моз коккезсис кыскалiс сапоггез, морос тырнас ловзисис и тальччис посöдзас. Паныт уськöтчис Шарикыс, чеччöвтiс моросас да пондiс нювны чужöмсö, кивзiс, ниртчис. Гажтöмтчöм поныс.

Шариксö малалiс, жмитлiс бердас, ачыс посöдзсяняс видзöтiс ыббеслань, кöдна тыдалiсö ылöкодь и пасьтасьöмась зелёнöй пасьöн — öзиммез быдмöны-путриктöны. Ыб вылын катыльтчис трактор. Кинкö мунiс телегаö доддялöм вöлöн, кöкис кöк, и кайес сiдз сьылiсö, что сьöкыт вöлi вежöртны, кöда горалö басöкжыка, кöда нёштöмжыка. Дзуркнитiс ыбöс, тöдса голос ыкöстiс:

— Кин сэтчин?! Митиперыс шы эз сет.

— Шарик, кин сэтчин?! — мöдпöв юалiс Катяыс.

— Ме, — шуис Митиперыс, сьöлöмыс джöмдыштiс.

— Мый тэ чуд моз ветлöтан? — рамжыка ни юалiс иньыс, паныт петiс öтöрись посöдзас, юалiс. — Кысянь?

— Гортсянь.

— Пыр. Эн сулав сэтöн кöмтöм коккезнат, посöдзыс кöдзыт, — висьталiс Катяыс да сiдз, топ пыр олiсö öтлаын, янсöтчылiсö лун-мöд кежö, и öнi мужикыс локтiс, колö чожажык пырны керкуас, шоччисьны и ашын бöра уджавны. Митиперыслö юрас чепöссис вирыс, вешшисö сьöкыт думаэз, кöдна полöтiсö шуч туй, сiя смевжыка ни пырис иньыс бöрсянь керкуас и лякасис порогыс дорö стул вылö, кöр кöмтöм коккес нятьöсьöсь, а джоджыс — веж кольть, полан тальччыны.

Катяыс койис ни керкуас, видзöтышалiс мужикыс вылö, чужöмыс вылын топ лöг, а синнэзас гаж и шупкалö кыввез: «Тэ мый нö порогыс дорö гöжин? Чöвтчы, миссьы и пондам сёйны».

«Сiдзкö, рад Катяыс, рад! — Митиперыс пондiс миссьыны киэсö, гусьöн видзöтлiс иньыслань да думайтiс ас кежас.

— Кыдз ни олан? Поди, гöтрасин ни? — сералöмöн моз юасис иньыс, кöр пондiсö пуксьыны пызан сайö.

— Гöтраси, — бöба видзöтiс веськыта Катяыс вылö мужикыс. — Важ иньö вылö, а мый?

— Гöтрась... Меным мый... Менö эстöн деревенскöйес быд лун корасьöны, — не то ошшасис Катяыс, не то тöждiсис-обидитчис.

— Он верит?! — веськыта баитiс Митиперыс. — Быль! Машаыс вовлiс, пырöм метöг керкуас, пызаныс вылö пуктöм зеркало, кроватяс ольсалöм — вод да узь, бокат локтас сюзь! — ваксис öмтырнас. — Но ме мылякö эг вод бокас, вашöтi!

— Колiс овны, — гажтöма горöтчис Катяыс. — Мый нö эд олö?

— Эг тай олö, — шынь видзис мужикыс. — Тэ дынö мылякö сьöлöмö кыскис.

— Мый тэ ме дынö öштiн?

— Ме мыйöн тöда?..

— Сёй... — комö мунiс хозяйкаыс и пондiс курччавны тырппесö, тышкасис бы сьöлöмыскöт, вермис бы асьсö, но эз вермы Митиперсö вашöтны керкусис, кöр видзчисис сiйö, ась кöть кытшöм, да эд аслас мужикыс, сьöкыт овны öткöн, кöк моз кöкны садникын, карта вылын, йöзын и гортын, кöр быд шагын сё колö аслыт да аслыт, ась эта и юö, но оз жö пыр садьтöг ов, мичамлöны жö луннэс, сэк бура отсасьö, дорö кöрттувсö и лöсьöтö посöдзсö.

«Некинлö ог сет! Пиннезнам кутчися, курччöвта, гыжжезöс мöрта и понда видзны! — Катяыс курччалiс тырппесö, ньылалiс дульсö, гуддисис-керис комас, öштiс кадсö, вермис умöль думаэсö, вöлись петiс комсис, локтiс пызаныс дынö, мышкыра юрнас пондiс шöравны нянь.

— Катюша... Ме, может, весь локтi? Поди, тэ менö бöр вашöтан? Ог ме тэныт ков? — пондiс модьны Митиперыс, кутчисис нянь чöвпан бердö, сэсся чеччис пызаныс сайись, ружтыштiс, пыдына ловзисис, перыта шагньöвтiс иньыс дынö, ош моз нюжöтчис, киэзнас жмитiс Катясö бердас и пондiс окавны.

17

Лёк горшöн китöстiс петух, саймöтiс и повзьöтiс Митиперсö: сiя и одзжык тöдiс, что деревняын дыр оз ков узьны, колö одзавны чеччыны петухсö да сэк, кöр шондiыс эшö эз ешты медодзза югöрнас малыштны мусö, что колö чеччыны да медодз миссьыны рожатö.

Чеччис одз, но Катяыс эз ни вöв бокас. Митиперыс жагвыв пасьталiс йöрнöс-вешьян, петiс посöдзö и пондiс видзöтчыны. Асылыс вöлi ыркыт. Посöдз дынын чирзiсö воробейез, кайпоз вылын пондылiс сьывны сьöдкай и сэк жö дугдiс (не сiя кадыс, кöр асывсянь рытöдз сьöдкайыс гажöтiс тулыссö, öнi нiя пондöтчисö ни пöжны пияннэз), логланяс лажмыта öшалiс кизерик туман, деревняыс сайын тöннямоз жö синнэз гажöтiс öзим, и тöннямоз жö öтамöднысö одзалöмöн кöкисö кöккез. Кокнит и долыт, некыт оз вись и оз зэлöт. Митиперыс ловзисис морос тырнас и ассис юалiс: «Кытöн Катяыс?»

Иньыс мыччисяс йöрыс сайсянь, мыдз чужöма, нö чужöмыс вылын гаж, öт öм угöвнас шыннялö.

— Кытöн вöлiн? — Митиперыс юалiс Катяыслiсь.

— Öтiк эд менам уджыс... Фермаын вöлi. Мöссэсö тай чилькöтiм. Пастухыс одз вашöтö. Беднöйезöс... — пондiс жалейтны подасö, кыдз ассис жö. — Не карта вылын одзаныс абу, не вöрас эшö туруныс оз шед. Кöть бы кыдзкö кыссьыны туруныс быдмытöдз...

— Öнi мый? Вон зелёнöйöсь ни ыббес и туруныс, натьтö, шедö ни сёйнытö, — висьталiс мужикыс.

— Кытiсь сiйö?! Вöрас эшö нем абу, — бöра пондiс тöждiсьны иньыс.

Кöкисö коккес. Кайеслö вöлi гажа, эз тöждiсьö сёяныс понда. Кинкö герйöвтiс да сiдз, бытьтö кулöм вылын горзiс, повзьöтiс сьöлöм.

— Кöть бы вывтi эг горзö... — гажтöма висьталiс Катяыс.

— Мый сэтшöмыс?! — эз вежöрт Митиперыс.

— Сырчиков Федя кулöм, — гажтöма шыасис иньыс. — Тöн рытнас юöмась, а талун абу чеччöм. Мужиккез! Винасö думайтат дойдны, а сiя тiянöс...

— Мымдаöн чилькöтат? — Митиперыс сорис баснисö иньыслiсь.

— А тэ думайтан, мымдаöн? — обидитчис Катяыс, бытьтö Митиперыс мыйöнкö виноватöй, что етшаöн чилькöтöны. — Асыввезнас кык литраöн да рыттэзнас сымда жö... Эта разь йöв?! Тöвнас силосыс и запаркаыс вöлiсö, сэк унажык жö йöвсö сетiсö, а öнi не öтыс, не мöдыс... Подасö кыскам сiсь турун вылын. Кытöн ни сэтöн йöлыс?! Ой, — сьöкыта ловзисис. — И бригадирыс сэтшöм жö, луннэзнас фермаас чужöмсö оз и мыччав, полö, что пондам вердчансö корны. — Коккезсис кыскалiс нятьöсь сапоггесö да шупкалiс бурундук вылö, ачыс сё норасис: — Фермаыс дынын асьным нятяс коскöдззаным вöялам, а мöссэс кынöммезöдззаныс броддьöны... Кöть бы кытшöмкö начальник локтi да шуганитi, поди, бы сэк фермаыс гöгöрö кöть из или мый ваялiсö...

— Тэ бы эн пессьы! Кошшин мöдiк удж.

— Кытöн мöдiк уджыс миян, деревняас? Да мöдiк уджас нач ни нем он шедты — копейкаэз босьтан, а эстöн мед и нятяс купайтчан, но руб-мöднас сё ни усьö.

Пырисö обедайтны. Эз ештö пуксьыны пызаныс сайö, керкуас пырис морт, мужик. Сiя эз юась, эз висьтась, вожмöвтiс порогсö, медодз матькыштiс и горöтчис:

— Бöра эд том морт öштiм! Кинкöт пондам уджавны?

— Оз ков начкыны! — Катяыс висьталiс веськыта.

— Уна я юим?! — горöтiс локтiсьыс. — Сымдаöн разь трескам, да топ ог и коддзывлö, а тöн куимöн кык бутылка.

— Етша юöмныт. Унажык колiс, сэк бы талун куимнаннытö дзебисö!

— Мый керан? — виноватöя ни горöтчис локтiсьыс. — Кинлöн кытшöм судьба...

— Чарöтi бы еныс тiянлiсь магазиннытö!

— Катя... Магазинсö чарöтас кö, сэк кытiсь пондан сахарсö босьтны?

— Ваят! — кералiс Катяыс. — Ваят, бригадир. Бригадирыс пукалiс западня вылын, юрыс вылiсь кульыштiс шапкасö, мыччис пашмöм юрсисö, ньылыштiс дульсö, чышкис син дорресö, бöра жалейтiс кулöмсö.

— Мый керан? Кулiс и кулiс... Бöр он ни ловзьöт, — горöтчис Катяыс и висьталiс. — Тэ бы, Кирилл Иванович, запаркасö мöссэслö тшöктiн керны. Нiя талун-ашын пондасö коккезныс вылiсь киссьыны. Сiдз йöлыс чинiс...

— Керим бы... — виноватöя висьталiс бригадирыс. — Но кыдз кöрымсö ваявны фермаыс дынö? Нятяс эд сибдöны тракторрес! Трой бы тэнö... Но тэ эн пов, Катерина Васильевна... Мыйкö лоас жö бöра... — содтiс недолыта. — Лешакыс менчим юрöс эта уджö сюйыштiс! Некыдз ог вермы мезмыны. Мед кинкö мöдiк бы пыри вадъяс...

— Кин, поди, и рад öння кадын тэнат места вылö?

— Сiя и эм... Некинлö лоис уджавнытö, а быдöнныс уна тöдöны... Бригадир да бригадир!.. А мый ме öтнам верма керны?!

— Ачыт отирсö велöтiн кокнита овнытö! — веськыта висьталiс Катяыс.

— Кытчö велöтi?! — эз вежöрт бригадирыс.

— А вот велöтiн! Джын лун уджалам, а гижан быдса лун. Сiдз?

— Мый керны? Ог кö понды гижны, нач эд оз пондö уджавны, быдöнныс пышшасö.

— Вот-вот... Велалiм ни государствосö чилькöтны, кин уджалö, сiя горзö, кöда оз, сiя пыр код да пöт, тьфу!

— Эн ни, Катерина...

— А мый эн! Не сiдз я мый я?!

Бригадирыс öмас сюйыштiс папироса, öзтiс сiйö, тшынсö горшас кыскис куим-нёлись, осьтiс ыбöссö да папиросасö швыргис ыбöсыс сайö и кивзыштiс: «Ой! Юрö висьö! Унаöв жö тöн тасассьöм. Кывзы... Тöн эд винасö этаыслö ачым кисьтi. Эг бы кисьт, эта, поди, бы эз и аркмы, талун бы гробсö эз ков керны, отирыс ыб вылас бы петiс унажык, а öнi мый?! Кöть кытчö воштiсь? Медодз кинöскö колас иньдыны гроб керны, гарйыны гу... Отирыс эд пондасö гардчыны кулöмыс гöгöрын...

— Ме тэныт уджалiсьсö козьнала, — висьталiс Катяыс.

— А сiя лысьтас я колхозаным киэсö нятьöсьтны? — сералöмöн юалiс бригадирыс.

— Кирилл Иванович... Мыля нö тэ бöра баснинат порссесö чилькöтан? — серöмтчис Катяыс. — Тэ кодь жö эд мужик... Öмыс и кынöмыс... Кöркö бригадиравлöм жö.

Митиперыс гогыньтыштiс юрнас, думайтiс: «Кытшöм тэ сэтшöмыс бригадир? Бригадирыс разь луншöрöдззас кошшисьлö?..»

Видзчисис бригадирыс, и Катяыс мунiс комö да сэтчинiсь рюмкаöн петкöтiс вина и пондiс юктавны гöсьсö.

— Ась — гöна пась... Мед тiянлö еныс сетö буржык здоровье да дыржык овны! — бригадирыс кыкнан кинас кутчисис рюмкаыс бердö, юис, чышкис öмсö долоньнас, чикыртыштiс синсö да петiс керкусис.

Митиперлö недолыт. Сiя думайтiс, что деревняын винасö оз юö, уджалöны одзза моз жö, кыдз пятидесятöй годдэзö уджалiс пöрисьпöлöсыс — не ой, не лун эз тöдö, мырсисö, а петö... «Мед... Видзöтам...» — эна думаэзöн Митиперыс перыта пасьтасис, и иньыскöт мунiсö гаражö, кытöн сулалiс трактор (Катяыс мужиксö гаражас нуöтiс, кыдз кыскис дом вылын порозокöс).

Шондiыс вöлi вылынкодь ни. Гаражын трактористыс гуддисис трактор дынын, видзöтлiс шондiыс вылö да деревнялань и модис: «Некин я мый я талун кöдзисьыс оз лок? Некинöс я мый я бригадирыс эз иньды?» — кыдз эз адззы Митиперсö, топ сы дынö локтiс кытшöмкö весьолiсь.

— Вайöтi уджалiсьсö, Илья! — трактористыслö гажöн висьталiс Катяыс. — Кык местö пондас уджавны.

— Ог тöд... — юр бöрсö гыж-гыж керис трактористыс.

Ильяыс том, может, эз и вöв эшö армияын, но топыт, ён мыгöра, баитö пöрись моз. Сiя уджалiс да тэрмасис, кокнита гусеница кузя вартлiс кувалдаöн.

— Илья, — бöра баитiс Катяыс. — Кинöс нö тэныт мöд кöдзисьсö иньдiсö?

Баитöны. Луныс оссис гажа. Шондiыс лэбтiсис вылöкодь ни, сы сьöрö кымöрас вöтчис ыбшар да сэтчинсянь сьылiс-кисьтiс тулысся сьыланкыв. Гараж крыша вылын котрасисö гулюэз, чирзiсö воробейез. Кытöнкö ыб вылын пондiс уджавны мöдiк трактор, сылöн шыыс пуктiс-кылiс татчöдз. Ильяыс курччöвтiс тырпсö, бобгис-керис, бергöтчис деревнялань и ыкöстiс: «Вöрöтчы! Коккетö эн гужгы!»

— Мый ме тэныт? — кузь шаггезöн, но дыша, лынь-лынь, тракторлань локтiс кузь мыгöра да векнит вывтыра зонка. Сылöн киэс боккезас öвтчисö кыдз аньборддэз ¹, юрыс пельпоннэс вылын öшалiс, дзик майöг вылын гырнич.

— Тэрмась, Женя! — мурзис Ильяыс. — Он адззы шондiсö...

— Мый меным шондiыс? — матöжык локтiс Женяыс. — Мый ыксан-кривзан, кыдз öнджа...

— Кышав сеялкасö, кузь тури!

Митиперыс чеччöвтiс сеялкаыс дынö, но сiйö кык-куим шагöн одзалiс Женяыс, вештiс пельпоннас бокö и висьталiс: «Пышшин бы сэтiсь, дядь... Шедан кö машинаыс увтö, ой-ой! Бöра милиция... А ме нiйö стрась ог радейт!»

Кышалiс тракторыс мышкö кык сеялка, и машинаыс вöрзис ыблань.

18

Митиперыс сулалiс сеялкаыс вылын. Сьöлöмыс орсiс, то ли гажöтчис, то ли полiс-чеччалiс моросас, топ сы вылö видзöтöны отирыс да ошкöны... Только асьсö ошкыштiс бы думаэзнас, кысянькö лэбзис да веськыта шульга синас заргисис геб. И пондiс синваыс визывтны — эн бы и осьт синнэтö. Недолыт лоис, видзöтыштiс синваэс пыр шондiыслань и кузь Женяыслань. Зонкаыс риз видзис — пиннес гер, сералö, топ шуö ни: «Но тэ и уджалiсь... Эн ешты сувтны сеялкаыс бöрö, а горзан ни... Кин тэнö, сэтшöмсö, татчö корис?!.»

Тракторыс перыта мунiс ыбыс кузя, зэгйис, гусеницаэс увтiсь гардiс бус, кöда пырис öмö, каттисис чужöмö. Митиперыс тiлис синнэсö, ниртiс рожасö, вирскайтiс нырнас, сулалiс сеялкаыс вылын да касьтылiс городсис олансö, кытöн эта нятьыс абу — ма оланыс; сёй-ю, видзöт рытнас телевизор и узь...

Тракторыс зэгйис-керис сеялкасö, локтiс межа дорö. Эстöн нiйö тыра телегаöн видзчисис ни «Беларусь», кöда гöгöрын гордöя ветлöтiсö ракаэз да катшаэз.

Тэрмасисö бы сеялкаэзö мешöккезiсь кисьтлыны сю, но Митиперыслöн сiдз пондiс синсис лэдзчыны синваыс, что эз понды вермыны уджавны.

— Ох, дядя! — кузь мыгöра Женяыс лолалiс öмтырнас, модис: — Ыбыс вылын эд городас моз буханкаэзнас оз вердö. Видзöт, кытшöм сьöкытöсь мешöккес! — кокнита кутчисьлiс тыра мешöк бердö, орсiс-чапкалiс нiйö, пöрччавлiс да сюсö кисьтлiс сеялкаас.

Митиперлö стыд, что томмес моз оз вермы уджавны, а весись ружтö, пессьö жö пымавтöдз, киэс дрöжитöны, сэтöн эшö синыс... Бöра тöдвылас и усьö, кöр томся-томöн гожуммезнас саймöтлiс мамыс, лысва кузя котрасьлiс вöвла, доддявлiс Буланкосö, пестерö босьтлiс павжун — турунiсь пöжалöм кöвдöммез, луктор да бутылкаö шöмйöв, кöмавлiс нинкöммез и чожажык, чожажык вöвсö вашöтiс ыб вылö, одзавлiс шондiсö, кöда эшö суналiс вöрыс сайын...

— Дядь, мый нö тэ?

— Мый ме? — синвасö чышкис Митиперыс.

— Шоччись! — кокнита босьтiс медбöрья мешöксö Женяыс и шупкис сеялкаыс вылö. — Шоччись, дядь, мед гöг увтат килаыс оз жö лэдзчись.

Пондiсö кöдзны. Митиперыс син одзын югьялiсö тракторлöн гусеницаэз, гардчис бус, сiя пырис горшö, пöдтiс, тупкалiс синнэз. Сеялкаыс чеччалiс бороздаэзын, быд гöпокын, зэгйис.

Ыбыс паськыт. Кытчöдз тракторыс мунас öт межасянь мöд межаöдз, пöттöдз панялан буссö, и киэз мыдзасö видзсьыны сеялкаыс бердын. Пеллезын öтiк шы: эрзö тракторыс. Оз гленитчы уджыс, эз бы уджав Митиперыс тракторыс дынын, но колö, он пышшы.

Тракторыс сувтчывлiс только тыртны сюöн сеялка, и кöдзисö одзлань. Шондiыс эта коста лэбтiсис вылöжык и вылöжык, ёнжыка шонтiс спина. Митиперыс пымалiс. Уджавтöнняс унаись ештiс думайтны аслас олан йылiсь: медодз син одзас мыччисьлiс Германыс, сiя мыччалiс вöв пиннесö, сералiс ёртыс вылын да модис: «Но кыдз, Митипер, сöтам-вартам, ага! Чöскыт колхозас няньыс?» «Чöскыт, тунеядец! Тэнö бы вердны этöн няньнас, натьтö, эн бы понды быд шагын гусясьны да винасö лопайтны!» «Митипер, сöтам-вартам! Видзöт... Жугалас кö тракторыт, ме дынö котöртö, сета моторсö, но весь ог...» «Тöда, что тэ весь сортирас он пуксьы, сё ни мыйкö коран». «А кыдз нö, кыдз нö... Тэ думайтан, сiдз и овсьö? Оз эд, Митипер вонö!»

Дугдывтöг урöтö моторыс, гöппезын чеччалö сеялка. Гардсьö бус, сiя öшалö ыбыс весьтын, пырö нырö, синнэзö... Видзчисьтöг Женяыс ыкöстiс: «Сюыс бырсис!!» Сувтiс тракторыс. Женяыс лэдзчис сеялка вылiсь да иньдöтчис межалань, водiс-нюжöтчис межаыс вылö, лязiс зелёнöй турунсö, лымдорчачаэз, брынгис дзöдзывлань, кöда кыша-паша мöймуся кöс турун коласöт котöртiс баддез коласö, и ыкöстiс:

— Локтö татчö! Татöн бур öддьöн. Эх, узьыштны бы минут сто двадцать!

— Лэбзяс эд öмат ракаыс, — ёртыс дынö локтiс трактористыс.

— Мед лэбзьö, — нюжласис Женяыс. — Юр висьö, челядь... Вайö деньгасö, котрася... Дядь, вай рубтö!

Митиперыс сулалiс межаыс дорын. Сылöн пеллезас сё эшö урöтiс тракторыс, бергалiс юрыс, пиннес коласын кажöтiс песок, синнэсö дзескöтiс нять.

— Менам деньгаыс абу, — висьталiс Митиперыс.

— Но тэ и дядь!..

— Женя, мый тiян тöн вöлi? Мыля Сырчикыс кулiс? — юалiс Ильяыс.

— Вот жö... Ме мыйöн тöда?! — пуксис Женяыс, онсö кыдз мырддисö. — Сы бокын эд эг узь.

Сьылiс ыбшар, кайыс кöдзис гаж, а нiя баитöны кулöм йылiсь... — Мый нö дыр сюсö оз вайö?! — Недолыта горöтчис Женяыс. — Поди, ме ветла? Чожа эд котрася кузь коккезнам, — чеччис межаыс вылiсь да иньдöтчис деревнялань, кытöн тыдалiсö дзор керку юррез.

— Öшан жö эд, — бöрсяняс ыкöстiс Ильяыс. — Кöть бы бригадирыс вовлi!

Сюсö оз вайö, бригадирыс оз мыччась, кöть лун узь, кöть орс челядь моз, а кöдзаныс... Кинлö сiя колö? Тэныт, Илья, или тэныт, Митипер? Öтнаныт я мый я няньсö сёят?

Шондiыс вылын ни, сьылö ыбшар, лэбалöны ракаэз, катшаэз, сырчиккез, бороздаын больгö медбöрья тулысся шорок, каёк öмас öктöм кöс турунчиррез да новйö позö, топ син одзын быдмö зелёнöй турун. Лöнь. Шоныт. Бур, синнэз куньсьöны — узьöтö. Митиперыс куйлöв-керис, недолыта шыасис:

— Ог тö-ö-öд... Кöркö, Илья, этадз эг уджалö...

— Кыдз уджалiт?! — лöга шыасис зонкаыс.

— Стариккес тулыснас гöртöнняс шувлiсö, что шать чегны кадыс абу. Ачым гöрлi. Асывнас шондiтöг доддясьлiм, шондiтöг юскисьлiм. А кыдз нö? Тракторрес эд эз вöлö. Вöввезнас быд ыб колiс гöрны! Чöвпан ыжда муторсö гöртöг эг кольö, быдöс кöдзим да эшö киöн жö. Этадз эг уджалö, — юрнас гогыньтыштiс межалань, кытчö быд год гöртöг колисö мусö и колисö, сэтчö жагвыв быдмöм вöр, пыкö ни уджалiссесö, а нiя бытьтö оз адззö, оз жалейтö, топ радöсь, что етшажык кольччö уджавны.

— Киöн гöрит, кöдзит да сымда и сёйит... — осудитiс одзза олансö зонкаыс, бытьтö кöркö пыр тшыгьялiсö.

— Няньсö!.. Пятнадцать центнерöн вундiм, — обидитчис Митиперыс. — А пекарняыс эз вöв, магазинсис эг босьтö, государствоыслiсь эг видзчисьö. Мый кöдзим, сiйö и вундiм, сэтiсь и нянь пöжалiсö... Шедтiн колхозсис, босьтiн ведомостьнас, эн — пиннетö тув вылö öшлы. Сiдз, кага, вöлi, а öнi тракторрезнаныт вывтi уна уджалат да етша сёят, пыр магазинiсь видзчисят.

Ильяыс юрбöрсö гыж-гыж керис. Митиперыс лöсьöтчис бы висьтавны, что удобреннёсö эз тöдö, а вöввезнас жö ыббес вылö быд ар кыскисö назём, но ньылыштiс дульсö и дугдiс баитны.

Кадыс чулалiс. Кöдзыссö эз вайö, а Женяыс мунiс да öшис. Сьылiс и сьылiс ыбшарыс. Кытöнкö гургис-уджалiс мöдiк трактор, колис уджнас. Ильяыс ачыс ни лöсьöтчис котрасьны деревняöдз, но сэтöн гортланьсянь мыччисис Женяыс и öвтчытöн пондiс сибöтчыны ёрттэслань. Дыша кузь коккезнас шагнялiс.

— Мый сэтчин?! — паныт чеччöвтiс Ильяыс. — Быдöнныс я мый я черпезьдiсö?! Некинлö ни лоис кöдзыссö вайны!

— А-а... — кинас öвтыштiс Женяыс. — Тракторыс жугалöм.

— Öнджаыс эз жугав!.. — ыксiс Ильяыс. — Бригадирыс мый керö?! Асьсö бы доддялiн.

— Доддялан тэ сiйö... Пышшöма правленнёсис... Заседаннё пö сельсоветас...

— Адззöмась кöр собраннёэсö керны... Котрасин бы сэтчинöдз! Ылын разь эна коккезöн?..

— Кузьöсь да абу казённöйöсь! — ружтiс Женяыс, чужöмыс гöрд, шыннялö, синнэс люммöмась.

— Бöра ни ештöм лаксьыны! — модьö Ильяыс.

— Кытiсь?!

Ильяыс сьöвзис, пуксис кабинаö, тракторыс лöга эрзыштiс да иньдöтчис деревнялань.

Павжун бöрас ни кутчисисö уджавны. Кöдзисö, мымда вöлi кöдзысыс, и эшö ыбсö эз вермö кончитны, бöра эз тырмы шогдiыс, шондiыс эз тэрмась пуксьыны, топ нерис уджалiссесö, öшалiс öтiк местаын. Шондiыс пуксян гöгöрын кöдзыссö вайисö «Беларусьöн». Телегаись ректiсö кöдзыссö, сэтöн Женяыс ружтiс-керис и джыння мешöксö сюнас бöр шупкис трактор тележка вылö да мыччалiс кинас трактористыслö, кöда пукалiс «Беларусьыс» вылын. Мöдыс гогиньтыштiс юрнас.

— Мыйлö бöр мешöксö сюнас гортö иньдан? — эз вежöрт Митиперыс.

— Дядь, курöггес эд сёйöны жö бы.

Вежöрт, дядь, мый вылö сюсö гусялöны, но уна эн адззы, тэ уджалiсьыс татöн талуння, кер да видзöт, велöтчы овнытö, ежели олан бы татöн.

Уджалiсö шондiыс пуксьытöдз и сыбöрын эшö кöдзисö, кытчöдз тыдалiс. Митиперыс мыдзис, гортö пырис, кöр быдöнныс узисö ни. Кокнит онöн узис иньыс. Катяыс перыта чеччис койка вылiсь, пасьталiс платье и вайис сёйны. Сёйтöнняс ни мужикыслiсь юалiс: — Но кыдз? Гленитчö колхозас уджыс.

— Гленитчö... Ашын бöра муна, — эз жö вывтi гажöн висьтав Митиперыс.

— Мый нö сiдз баитан, бытьтö шогалан? Кыкись-куимись паньыштiс яя шыд, ньылыштiс, ружтiс-керис, и ачыс эз казяв, кыдз юалiс:

— Катя... Мыля нö колхозас сiдз керсьö?

— Мый керсьö? — эз вежöрт иньыс.

— Дак вот... — и пондiс висьтасьны, кыдз кöдзыссö Женяыс ыб вывсис бöр иньдiс гортö, мед и джын мешöксö, но иньдiс эд...

Катяыс дузгыльтчис, дыркодь нем эз шу, но висьталiс: «Сiдз и олам эд, сöтам да вартам... Куштам колхозсö, кин кыдз кужö и вермö, а асьным горзам, что умöля олам... Но тэ нем эн шу! Осьта öмаэслö татöн оланыс абу...»

19

Дугдiсö кöдзны, кöр пипуэз вылын листыс быдмис пятак ыжда ни, и асыввезнас таррес дугдiсö кувтыртны. Кöдзсис татöн, и тракторресö иньдiсö мöдiк бригадаö, а бригадирыс Митиперсö уджавнытö иньдiс йöз отир дынö, кöдна татчö локтöмöсь кысянькö ылiсянь, пондöтчöмась лэбтыны виль гараж, и колö пö нылö эшö öтiк морт.

— Мöдiксö ме сэтчин ог иньды, — бöра асывнас пукалiс бригадирыс Катяэзын, чикралiс синнэсö, никсiс-корис хозяйкаыслiсь стопка вина да баитiс веськыта. — Ме мортыс, Никифор Иванович, кодя, иньда уж тэнö сэтчин, кытöн деньгаыс кыпалö... Шедты унажык да менö эн вунöт!

Бригадирыс баитö öтiкö, а Митиперыс сiйö вежöртö мöднёж, кöр Катяыс аслас бöб мывкыдöн кытöнкö Кирилл Ивановичыслö висьталöм кöдзысыс йылiсь — этö джыння мешöкыс йылiсь, кöда ыб вывсянь «Беларусь» тележкаын катыльтчис гортö. Инькаыс не öтiк сюнас кöритiс бригадирсö, а содтiс ассяняс сiйö, мый пöжис умöльсö колхозын уджавтöн сьöлöмыс бердын, и — на, Митипер, öнi бöр мун бригадасис кытшöмкö йöз отир дынö...

И мунiс Катялöн мужикыс керны нач мöдiк удж. Пантасис Митиперыс медодз гырись сина и кыз ныра морткöт, кöдö шуисö Фёдорöн и кöда гараж кериссес дынын вöлi медглавнöй, кыдз бригадир жö.

— Здорово, вонö! — Митиперыскöт здоровайтчис кыз ныраыс, клап вачкис пельпонас кыдз аслас ёртлö, кöдö тöдiс важын ни, видзчисис — овны эз вермы и öнi рад, медодз тэныт сетас медкокнит, меддона да медбур удж, сiйöн гажöн и горöтчис: «Вонö, юртö вылынжыка видз! Ми етша, но öтiкыс кык местö! Уджалам сьöкыта, узьны некöр, пемыт чеччам и пемыт водам, но деньгасö... Гумалам да солалам!..» — рыг-рыг серöмтчис, гырись синнэзнас був-бав видзöтыштiс тоша ёртныс вылö да сылiсь ни юалiс:

— Сiдз, Егор Анисимович?!

— Сi-i-iдз, — кижгыштiс Егор Анисимовичыс, топ кынмöм öмас кылыс и кувны лöсьöтчö.

— И тэ, Никифор Иванович! — одзлань ошшасис сьöд синаыс. — Сiдз жö пондан?..

Митиперыс шынь серöмтчис, сiя адззис, кытшöм отир дынö шедiс, кылiс мый баитöны: эз, эз любит этатшöм морттэсö, кöдна кывнаныс кокнита олöны, а киэзнаныс... Тöд жö, тöд... Но жаднöй бесыс чувйис ни мужиксö, думаэзнас ошшасис ни иньыс одзын: «То эд, Катерина Васильевна, мымда ме шедтi! Кытчö пондам деньгасö воштыны? Поди, медодз босьтам машина? Или мый?..» А веськыта кö... Мукöдпыр думаэзнас этадз ошкас асьсö да аслас юр вылö: сыбöрсянь оланыс и сералö да сiдз, кöть горзы, но мый керан, кöр мортыслöн сэтшöм мывкыд?

Митиперыс эз на уджав, а босьтiс ни бы деньгасö.

— Овны пондам! — кыз тырпаыс да сьöд синаыс бергалiс мужикыс гöгöрын, дзик видзöтiс базарын вöв. — Овны пондам, Никифор Иванович!

Адззис ни Митиперыс, что сы одзын командир, только вывтi уна ошшасьö, польдö, тыдалö, йöз киэзöн керö бы, но и мед: öтiк мортыс шондiсö оз вевттьы, только бы уджалiсö мöддэс.

Кöкыс асывнас пöт эз ешты кöкны, колхозниккес эз ештö пода вашöтны, а гараж кериссес мунiсö ни асланыс уджаланiнö.

Виль гаражыс ошшасис ни виль стенаэзöн, виль крышаыс вылын чирзiсö ни воробейез, стенаэс коласöт öтiклаöт да мöдiклаöт гаражыс пытшкö видзöтчис шондi, кертöм ыбöс местöт и öшынтöм косяккез коласöт пöлялiс ыркыт ру. Киэз лудiсö-кошшисö удж. Пырисö гаражыс пытшкö, сьöд сина бригадирныс був-бав керис синнэзнас, стена бердiсь босьтiс кöртзыр, нюжöтiс сiйö Митиперыслö да висьталiс: «Никифор Иванович, гарьян этчö гу!»

— Гарьям, — шуис Митиперыс. — Мыля ог гарйö?

Бригадирныс сэтöн жö кузь шаггезöн шагнялiс гаражыс шöрын, меряйтiс öтöрö да мöдöрö, сэтчин и татчö мöртiс бедёккез, мед адззин и эн сорась, мый пасьта колö гуыс, чикыртыштiс синсö да юалiс: «Вежöртiн, Никифор Иванович?!»

— Вежöртi. Мыля ог вежöрт? — нырнас вирснитiс Митиперыс, юалiс: — Мый пыдына гарйынытö и мыйлö бы гаражыс шöрö? Али эта?..

— Ай-ой! — сэтöн жö осудитiс Фёдорыс. — Ай-ой, Никифор Иванович, абу ни топ учöт, а сэтшöмсö он вежöрт. Татöн уна оз баитö, а керöны. Татöн, видзöт, не государстволö уджалам, а колхоз понда, да... Рытыс кежö гарйыштан, и бур лоас, а рытнас ме локта да мешöкöн вая деньга. Сiдз?

— Вежöртi. Мыля ог вежöрт? — бöра шыасис Митиперыс, но гажтöма ни, сiдз кыдз умöля вежöртiс бригадирсö, кöда баитiс и бытьтö сорасис — дзугсис баснинас.

Шондiыс лэбтiсис вылöжык. Митиперыс босьтiс кöртзыр, кыкнан кинас кутчисис оропыс бердö, лэбтiс вевдöрö зырсö да быд вынiсь сiйö заргис чорыт муас.

Жар. Пöжö, спина сайын топ лонтiсьö гор. Сьöкыт гарйыны чорыт мусö. Митиперыс уджалö, а бöрас сулалö кузь Фёдорыс и ружтышалö да няпралö кулаккесö, дзик сiя уджалö. Митиперыс уджалö, а бригадирыс сулалö. Сылöн синнэс югьялöны топ варышлöн, öмыс пиньласьö, пымалö.

Öтiк уджалö, а сизима видзöтöны: öтiк чочком чужöма, мöдiклöн чужöмыс вежöтöм, кельдöтöм, куимöтыс — бригадирныс кодь жö сьöд, нёльöтыс и витöтыс — öтiк гезöн кöрталöмöсь, вурöмась öтiк судьбаöн, быдöнныс öшöмась олансис, дзугсьöмась и гардчöны йöзын — некинлöн абу не инь, не мам, не ай, не вон, асьныс оз тöдö, мый лоас талун рытнас, мый вöтас ашын, талун эм — бур, ашын оз ло — эшö буржык, некинлö норасьны оз пондö, висьтасьны оз кужö, но, видзöт, панталiсö Митиперсö и сералöны, бытьтö ны кодь чожыс некин абу.

Öтiк уджалö, мöдiккес весь олöны да сералöны уджалiсьсö.

Уджалö Митиперыс — гарйö гу. Бригадирыс вель дыр сулалiс дынас, висьталiс: «Уджав, вонö, уджав... Гусö эд колö гарйыны пыдынö. И кöкыс, кывзы жö, кöкö-лыддьö не сiйö, мымда тэныт кольччис овнытö, а кынымись мöртан зырсö. Деньгаыс весь оз шед. Шакаллэс весь олöны, пиннезнысö вузалöны и думайтöны, что уна шедтасö... Озö эд... Ме нылö сымда сета, мымда уджаласö, а вот тэныт, Никифор Иванович, лоас!» Шуис этадз, öшис и абу.

Митиперыс уджалö. Кöкыс кöкö. Кайыс оз джöмды, сьывнытö оз мыдз.

Митиперыс гарйыштiс да чапкис мусö, кылiс и эз кöкыслiсь сьылöмсö, адззис и эз ёрттэсö. Пессьытöнняс тöдвылас усис öтiк инька, кöда уджалiс заводас ны цехын, сэтшöм жö позтöм кöк — не мужик, не горт абу, пыр шатласьö — олö йöзын, йöз мужиккезсянь и кагаэз чужтö, кытöн чужтас пиянсö, сэтчö жö и коляс, сiя жö больницаö и вунöтас... Эм и абу сэтшöм мамыс, но лыддиссьö эд, мам — мортö эд пуктöны...

Уджалiс Митиперыс. Кымöсыс вылiсь чышкис соснас ньылöмсö да одзлань гарйисис, а эта коста син одзас быдкодь оланыс петалiс, быдкодь отирыс мыччисьлiс, быдыс ошшасис, что кокнита ни пондiсö овны, только тэ, Митипер, öтнат ни пö гарйисян...

Уджалö Митиперыс, и бригадаыс весь эз ов. Митиперыс пöв синнас адззö, мый керöны ёрттэс, кыдз нiя öтiк чернас тшупсьöны и лöсасьöны; öтiк керасьö, а мöддэслöн киэзаныс кöрттув да молоток: мöртöмась муас столббез и ны коласö тэчöны керрез, пуктасö керсö, шувк-шовк! Дорасö öтiк кер мöдыс бердö, мöдсö куимöтыс дынö и бур. Чожа аркмö уджыс, кокнита, мужиккес орсöны-уджалöны, оз тöждiсьö, мый ны бöрсянь лоас, син одзын эд гаражыс оз киссьы.

Гараж керöны уджалiссес, но не аслыныс уджалöны, а колхозлö, а Митиперыс топ колхозыслö керö, сы понда сьöлöмыс висьö, сiйöн сiя и тэрмасьö. Гуыс пыдын ни, ота — трактор тöрас, а мужикыс сё мырсьö, сiйö и керö кымöсыс вылiсь чышкö ньылöмсö и спинаыс люзь ва. Уджалö Митиперыс да гусьöн видзöтышавлö ёрттэс вылö, оз я нiя шоччисьö, оз я шуö, что тэ, Митипер, сувт, шоччись жö, тырмас ни гарйисьнытö шыр моз, но шы абу.

Кытöнкö павжун бöрас пуксисö шоччисьны.

— Но мый? Пöтiн уджнас? — бöра сералöны ёрттэс.

— Эг, — рожаыс нюжалöм ни Митиперыслöн.

— Сэк уджав эшö, — висьталiс тошаыс. Командирыс локтас и юалас...

«Командир... Быд местын командир, кытчö бы эн тальччы, — лöгыс петö Митиперлöн. — Не весь отирыс баитö, что öтiк гарйисьö, а сизима видзöтöны... И мымда жö миян весьолiссес?!»

Шондiыс вылын эшö. Гуыс пыдын ни, но ёрттэс шуöны, что колö гарйыны, и Митиперыс ружтiс-чеччис да кутчисис кöртзырыс бердö.

Луннас уджалiссеслiсь уджсö видзöтны вовлiсö медодз велöтчиссез. (Виль гараж эд колхозас лэбтöны, колö тöдны, кытшöм сiя лоас!) Локтiсö челядь гаражыс дынö, сулалöв-керисö, медучöтыс и юалiс:

— Дядь, а тэ мыйлö гусö сэтчö гарьян?

— Керку аслыс керö. Сэтöн тöвнас пондас ош моз овны, — öмтырнас серöмтчис Егорыс да малыштiс тошсö.

— Сiдз и лоас. Кин вина юö, сiя сэтöн и пондас тöвйыны, — висьталiс мöдiк.

— Быдöс деревнясö эд колас пуксьöтны, — серöмтчис челядьыс коласын смевжыкыс.

— Медодз Егорсö... — висьталiс тошаыс. Баснисö пондöтiсö челядь, кöрталiсö ыджыттэс, нiя сералiсö öтамöднысö, бытьтö öтiк кодя, мöдiк кодяжык, а видзöтан кö — öткодьöсь.

Ыджыттэс пондiсö пиньгисьны öтамöдныскöт, а челядьыслö кинлö да кытчö туй — вöлiсö да эз лоö. Эз ештö учöттэслöн голоссэзныс öшны деревнялань, кыдз уджалiссес дынö локтiс Влас дед. Дедыслöн юрсиыс сивöй, чужöм вылас сэтшöм ни пöрись, что годдэсö он вермы тöдны, но пöрисьыс эшö чож, эшö öмсис трубка оз чапкы — куритö да баитö-ошшасьö, кыдз сiя мöйму гожумнас ветлiс корасьны, но невестаыс эз гленитчы. Уджалiссес кывзiсö стариксö, и Митиперыс минута-мöд кежö дугдiс уджавны, öтлаын жö гажöтчис-сералiс пöрисьсö, кöда öтiк басни вывсянь кежис мöдiклаö, ласковöя юалiс:

— Деньга шедтат?

— Шедтам, дед! А мый? — юалiс сiя жö Егорыс.

— Нем абу, — дедыс чикыртiс синсö. — Чожа, батя, гаражныт быдмö.

— Быдмö, дед, кöр асьнымöс ог жалейтö, а уджалам ой и лун.

— Вот кыдз, — одзлань кывнас тэчö старикыс. — Мылякö керрес коласын осьтаэс ыджытöсь жö?

— Пруект сэтшöм, дед, — кокнита висьталiс Егорыс.

— Сiдз начальсво тшöктö, — шуис мöдiк.

— Озжык ло жар, — шыасис куимöт. Шыннялöны — пиннезныс гер, кокнита шедтöны деньгасö, пöт сёйöны.

— А тэныт мый, дед? — лöгжыка ни юасьö нёльöтыс.

Стариклöн чужöм вылас öтiк чукыр эз вöрзьы, сiя видзöтiс смела да лэчыта, но нем эз шу, Егорыс жö шуис:

— Сiдз, дед!

— Сiдз то сiдз бы, да öнджа... Гортаныт, натьтö, сiдз эд од керö?!

— А менам, старик, гортö абу! — ошшасьö Егорыс.

— А мыля нö, кага, тэнö еныс чарöтiс?! — пöрисьыс юасьö.

— Еныс разь эм?

— Быль, тыдалö, абу, — медбöрын висьталiс старикыс, бергöтчис и кокнит да кузь шаггезöн иньдöтчис деревнялань.

Дедыс кывнас шоччöтiс Митиперсö.

Шондiыс эшö вылынкодь. Гараж ыбöсöт, кöда эшö ыбöсыс вылö оз вачкись, тыдалiс, что уджалансянь локтiсö ни колхозниккез, кöть и туйис бы эшö уджсö менöвтны пöт.

Митиперыс уджалö, мышкырасьö гараж шöрын, гарйö гу, мусö чапкö öт бокас да мöдöрас. Рытланяс ни локтiс колхозсис предыс, сувтiс гуыс дорö Митиперыс юр весьтö, паськöтiс коккесö и вевдöрсяняс видзöтö, дзик некöр мортсö эз адззыв.

— Ёрт председатель, — Митиперыс кылö гу пытшксянь Егорлiсь голоссö. — Кынöмным сималö... Чожа коккезнымöс нюжöтам. Кытöн жö бы яйыс, кöдö неделя-мöд ни кöсъят?

— Ашын лоас! — висьталö председательыс. — Порозсö тшöкта начкывны. (Голосыс вына, чорыт — висьталiс и керас, и тэ кер.) — Начкылат и колхозниккесö вердат, а миянлö бöра бöж да гыж...

— Ме висьталi!

— Видзöтам, — эз верит Егорыс, молотокöн быд вынiсь вачкис корттулö да — чуняс... Не кöрттувсö дорис, а гыжас паздыштiс, пондiс вартлöм пон моз кивзыны.

— Мый эшö тiянлö колö? — юалiс председательыс, вешшис гуыс дынiсь.

Предыс мунiс. Шондiыс вот-вот пуксяс. Бöра кöкö кытöнкö матын кöк, пуктö пеллезö ассис сьыланкывсö.

— Мый жö тэ керан, Никифор Иванович? — казявтöг гуыс дынö локтыштiс кыз тырпа бригадирыс. — Мый жö тэ керан? Колас эд бöр ни тыртны гусö.

— Мымда тшöктiт, — кылыс ни эз бы бергав Митиперыслöн, сiдз ни мыдзис. Уджалiсьыс ружтытöн да кивзытöн петiс гусис, пуксис уль муыс вылö, пукалöв-керис и иньдöтчис гортланяс.

— Сулав, Никифор Иванович! Миян сiдз оз керсьы, öтлаын уджалiм и öтлаын ужнайтам! — висьталiс бригадирныс, кутiс йöрнöс сосöттяс и кежöтiс керку дынö, кытöн олöны ёрттэс-уджалiссес.

20

Ыбöссянь чöвтiсö вывтсиныс уджалан паськöмнысö и пуксисö сёйны. Сёйисö — пиннезнаныс изiсö, тöдчис, что пöт уджалiсö, и сималiсö кынöммезныс.

Митиперыс мыдз, сiя рад бы водны, пызан сайын ни куньсисö синнэс, но командирныс комись вайис стакан, сувтöтiс уджалiсьыс одзö, сэтчö тыр боргис вина и чорыта висьталiс:

— Ю!

Сьöкыта ловзисис Никифор Ивановичыс, топ эшö и ойнас тшöктöны гарйыны сэтшöм жö гу, кытшöмö гарйис луннас. Ёрттэс жаднöя видзöтiсö тыра стаканыс вылö, ньылалiсö дульнысö, никсiсö, бергöтлiсö öтмöдöрö юррезнысö да сьöкыта лолалiсö.

— Мый, кöиннэз? Горшныт косьмö жö? — юалiс бригадирныс. — А винасö эд эд шедтö. Колiс Никифор Ивановичыс моз жö гарйисьны, сэк бы вöлi. Кытчöдз гаражыс оз керсьы, нем од адззылö!

― Тöдам, командир... — шуис öтiк, а Егорыслöн син доррезас сöдзис синва и унньöвтiс:

— Кытöн правдаыс?

Да. Кытöн правдаыс? Висьтав, командир? И командирыс висьталiс:

— Эд горзö! Кисьта ме тiянлö фронтовöйесö, но унажыкыс оз ло!

Гажмисö мужиккес, юисö доззэзсиныс, а Митиперыс пиньласис и модис, что оз ю, юрыс висьö.

— Сылöн икотаыс оз ю, — ватшкис Егорыс.

— Никифор Иванович?! — кыдз повзис командирныс. — Кин öнi оз ю? Эн стыдит асьтö!

И сьöвзис мужикыс аслас думаэз вылö, босьтiс стакансö, чорзьöм чуннезнас жмитiс и лэбтiс. Сэсся сылö нем эз ков, а командирныс баитiс:

— Тэрмасьö сёйнытö да буржыка шоччисьö. Ашын ме тiянöс саймöта одзжык и кутчисям мöдiк удж бердö! Ферма колö лэбтыны, бöра деньга шыннялö. Шедтам кыкись-куимись унажык. Вежöртiт?!

— Керам, командир! — медодз кокнита висьталiс Егорыс. — Керам... Но, öнджа бы... Тэ, командир, миянöс зэлöтан... Сетiн бы деньгасö копейка-мöдöн?.. Немöн небны лекарсвоэз.

— Кöр унажык шедтан, сэк и босьтан!

— Командир...

— Ме висьталi!

Митиперыс кыссис сёяннэс дынiсь и петiс öтöрö. Коккес небзьöмась, гардчöны, мунö гортö и джöмдалö. Сьöлöмыс вылын сьöкыт: «Кыдз бöра и мыччись иньыс одзын? Мый и висьтав? Эх...»

Кыссьö мужикыс иньыс дынö, ляшмасьö. Сы вылö деревенсаыс видзöтöны да баитöны: «Кин сiя?!.» «Ме мыйöн тöда кин?» «Кума, абу я мужикыс Катянымлöн! Но и мужик жö кытiськö адззöм! Абу, дак абу!...»

Абу дак абу ни тэ кодьыс, Митипер... Но Митиперыс кыссис гортöдззас, кытöн панталiс иньыс — синнэс вирдалöны.

— Кытöн сы дырна вöлiн?! — посöдзаныс сулалö Катяыс. — Кытöн вöлiн?!

― Деньга шедтi, Катюша!

— Тьфу, деньга... Абу я код?!

— Код... — ныр увтас бизгыштiс мужикыс, баöн моз кыссис пытшкись посöдзöдз, пöрччалiс коккесö, чöвтчис. Синваэс петiсö обидасянь, курччалiс тырппесö, ружтiс: син одзас гуыс, кöдö гарйис асывсянь рытöдз и топ аслас юр вылö гарйис.

Öтöрын шоныт, гожум ни локтö: цветитö ни горадзуль да гуткулантурун. Шоныт öтöрас. Пес весьтын «йöктöны» — лэбалöны номмез. Митиперыс юрöдзас чапкис важ фуфайка и водiс. Сiя сэтшöм мыдз, что некыт бы эз вöрзьöт, но дыр эз онмöссьы, кывзiс карта вылiсь мöслiсь ружтöмсö, курöггезлiсь киллисьöм, видз вылiсь кайлiсь дзуртöм — кывзiс ойся шыэсö да курччалiс тырппесö и думайтiс, мый жö керны одзлань, кыдз жö овны. Мыля жö оланыс пыдынжыка оз сет ловзисьнытö.

Китöстiс петух, сылö шыасис мöдiк. Деревняыс ловзисис ыркыт да кокнит гожумся руöн. Митиперыс осьтiс синнэсö и пондiс кывзiсьны, кыдз керкуас иньыс зэркыта мунiс джоджыс кузя, пашмöм юрсиэзнас петiс посöдзас, сулалыштiс мужикыс юр весьтын, мышкыртчис и пондiс кывзiсьны, ловья я Митиперыс.

Мужикыс нагладь дугдыштiс лолавны, но дыр ловзисьтöг эз вермы овны и кыскис моросас воздухсö.

— Эшö бöбöтчö! — гажöн шуис иньыс и сэтöн жö кыдз лыйис. — Эшö öтпыр локтан код, вашöта!

21

Месяц эз чулав, кыдз гаражыс керсис. Митиперыс уджалiс и öмас капля вина эз босьт. Медодз сiя луннэзнас кöртзырöн гарйис гуэз, медбы сувтöтны столббез, сыбöрын отсалiс öктыны ыбöссэз, вевттис крыша.

Луннэс кузьöсь и эшö содiсö. Ыббез вылын быдмисö сюэз, шепасис ни рудзöг. Колхозын пондiсö силос вылö ытшкыны небыт турун. Етша ни сьылiсö кайез, но асыввезнас эшö кöкис кöкыс, луннэзнас ыбыс весьтын дзульзис ыбшар, и йöр вылын мукöдпыр суналiс рака.

Уджалiс бригада, тэрмасис и вот öтiк асылö гараж юр вылö вачкисö медбöрья кöрттув. Командирыс одз асывнас котрасис уджалiссес дынын да сiйö и керис-ыксiс: «Митипер Иванович, этö осьтасö тупкы! А тэ, Егор Анисимович, татчö эшö дор кöрттувсö, медбы син одзаным эз жö пöр гаражным, ха-ха!», кузь коккес вылын чеччöвтiс вевдöр и ыкöстiс:

— Шабаш, челядь! Шоччисьö да комиссия видзчисьö.

Мужиккес пондiсö куритны да нюжласьны, видзчисисö комиссия, а сыбöрсянь и деньга, кöда йылiсь талун лёбисö медуна, ошшасисö, что небасö вина, сёян, паськöм — богатöйöсь лоасö, а одзлань мый?

— Юышта бöра пöт! — ырбыльтiс Егорыс. — Юышта бöра, челядь, пöт, а сыбöрын...

— Командирным тай ферма лöсьöтчö керны...

— Керам фермасö, а сыбöрсянь?

— Одзлань эн кув! Поди, гаражыс понда деньгасö ог адззылö...

— Дугдö васö кырыммезнаныт гумавны! — командирныс бöра ыксö. — Тупкалö стенаэсис быд осьтасö!

Бöра вартöны клиннэз и нитшалöны осьтаэз. Уджалöны — пымалiсö, некинöс оз адззö и оз кылö, сэтöн и локтiс комиссия — этö медодз колхозсис председательыс, сы бöрсянь питкыльтiс кыз кынöма бухгалтер, кöдалöн, тыдалö, миян моз жö бур паськöмыс абу, вылас кышыштöм жакет да важ йöрнöсок, но юрсö видзö медвылына; бухгалтер бöрсянь видзöтчö бригадир, топ мыйкö öштöм, кошшö и оз адззы, медбöрын локтiс механик, медтом коласаныс, но синвевья. Локтiс комиссия — колхознöй начальство. Начальствоыс здоровайтчис медодз командиркöт, öтдруг пыдына ловзисисö предыс, бухгалтерыс, механикыс и бригадирыс. Предыс юалiс: «Но кыдз? Быдöс уджсö керит?»

— Керим! — гажöн висьталiс Егорыс и лöнис: сы вылö öддьöн лёка пиньöвтчис сьöд сина командирныс да ачыс ни бытшöмика горöтчис:

— Син одзаныт, ёрттэз, уджыс! Кöть асьныт пырö да олö. Гажа и шоныт.

— Мда, — тырппесö жмитiс предыс,

— Сiдз, — юрбöрсö гыж-гыж керис бухгалтерыс.

— Менö татчö овнытö маöн он бöбöт! — веськыта висьталiс бригадирыс, а механикыс синнэсö чикыртiс и нем эз шу: томмеслö пыр эд мыйкö оз тырмы — не ны моз, не сiдз, вай буржыкö, а асьныс... Тшöкты асьнысö керны, киэзнысö оз нятьöсьтö. Механикыс одз воöм: быдöс адззö и медуна кылö, видзöтчö виль гаражын, но кытчöдз быдöнлiсь туйсö оз вожмöвт. Комиссияыс уджалiссезлiсь видзöтö удж. Уджалiссез сьöлöм вылын недолыт, кинкö кыдз лöсьöтчö дойдны и мыйись-мый...

Но мыйись-мыйыс эз ло, мöдпöв уджсö оз ков керны, предыс жö гажöн висьталiс:

— Спасибо, ёрттэз! Öнi тöвнас лоас ни кытöн вочны машинаэсö. Трактористтэс оз ни пондö нятяс нырьясьны да кынтны киэзнысö. Быдöс бы бур, быдöс бы кыдз колö, но кыз кынöма бухгалтерыс топ кытiськö мезмис и пондiс быздыны да сiдз, что он вежöрт мый зызö, кыдз сёйö кыввесö:

— А эта мый? Эта кытшöм осьта? Мыля керыс чукыля да нитшыс багсьöм? Мыля?..

— Тупкалам, Родионыч, тупкалам! — уджалiссеслöн командирныс кырымас видзö нитш и сэтöн жö осьтаэзас заргö да заргö, модьö. — Эх, сэтöр сина öмидзтусь, мыля тэ и сэтшöм гусь? Мыля тэ, Родионыч, сымда и адззан, миян кодьсö мортö бы он пукты?

— А мый тэ думайтан? Эмöсь жö кымöсам синнэзö... Умöля уджалöмныт, командир! — бухгалтерыс öтiк пельöсiсь кыскис нитшсö, мöдiкись нетшкöвтiс клин.

— Жуликкез! Кырнышшез моз уськöтчит колхозыс вылö и куштат да кокалат... Сöтат-вартат, а колхозниккеслö мый? Эта разь гараж?! Баля гид вылö оз туй! Ме бы сэтшöм гаражсö асланым отиркöт эг кер. Кери бы дак кери, чача бы лэбтiм, а эта мый?! Стыд и баитны... — колхознöй бригадирыс ни веськыта бузгис и пондiс чуньнас гуддьыны ныр пырöтсö.

— Немись эн пов, Валерий Анатольевич! — сэтчö гажöн висьталiс Митиперлöн командирыс. — Кин тэ?! Командир! Во! Зэлöт вожжиэсö, мед этатшöммес уна эз адззö и эз тöдö! — мыччалiс чуньнас бухгалтерыслань.

— Метöг нiйö велöтöмась... — гажтöма шыасис предыс, кармансис кыскис ручка и бухгалтерыслiсь юалiс. — Кытöн актыс?

— Актыс... — був-бав синнэс бухгалтерыслöн, дзик нем, оз тöд.

Митиперыслöн командирыс чикыртыштiс синнас бухгалтерыслань, кармансис перыта кыскис деньга и сiйö нюжöтiс Егорыслань да висьталiс:

― Öтiк кокыт татöн, мöдыт магазинын! Вежöртiн?!

22

Луныс эшö вель уна. Уна эшö сьöдкайес торкисö гаггез да вердiсö пияннэзнысö, кöдна веж öммезнысö мыччалiсö ни кайпоззэзiсь.

Егорыс котöртiс кошшыны вина, а уджалiссес эта коста утугаöн ветлiсö правленнёöдз и сэтчинсянь веськыта мунiсö гортаныс — квартираö. Локтiсö квартира дынаныс, уджалан паськöмсö чöвтiсö öшын увтын, сэтöн жö миссисö рожаэзнысö. Митиперыс вöлi öтлаын, чуклясис-öштiс бы туйсö, но кыдз кинкö сiйö видзис, эз мун гортö.

Пырисö керкуö. Ыбöс коласöт сьöраныс лэбзисö гуттэз. Керкуын джодж шöрын пызаннэз, пызаннэз вылын мый колö, сiйö и сёй: сковорода вылын пöжалöм порсьпиянок, яя шыд, помидоррез, яблоккез.

Уджалiссес ыбöс дынсянь веськыта вожасисö пызан сайö, медодз кузь гыжа чуннезнаныс нюжöтчисö порсьпиянокыслань.

— Эге! — горöтчис командирныс. — Разь образованнöй отирыс сiдз керöны? Трофим, пызан сайын оз тэрмасьö да кöр эшö видзчисям гöссез.

— Кытшöм эшö гöссез?! — Трофимлöн сималö кынöмыс.

Вот и гöссес: эз ештö пыдынжыка ловзисьны, керкуö пырис кыз кынöма бухгалтер, сыбöрын мыччисис колхозсиныс предыс, механик и... Кузь Женяыс, кöдакöт ыб вылын кöдзис Митиперыс и кöдö татчö некин эз кор, но зонкаыс локтiс, балда синнэсö паськöтiс и порог дорсянь — веськыта пызан дынö, пуксис стул вылö. Командирыс лöсьöтчис бы мыйкö висьтавны зонкаыслö, но эз висьтав, ньылыштiс дульсö и механикыслö ни шуис:

— Фёдор Васильевич, пуксьы пызаныс сайö да сёй, а то этатшöммес он и казяв кыдз дзимляласö!

Быдöнныс ни пызаныс сайын. Паньыштiсö шыд, кин мымда вермис, кыдз кужис — öтiккес тэрмасьöмöн, мöдiккес степеннöя.

— Тэ мый татöн керан?! — предыс вöлись кыдз пызан сайись адззис Женясö. — Тэ мый, ме сiйö жö, — бобгыштiс зонкаыс, нюжöтчис кузь кинас пöжалöм порсьпиянокыс дынö, менöвтiс сылiсь коксö и заргис öмас.

Комись вайисö стаканнэз. Шондiыс видзöтчис öшыннэзöт, кыдз дивуйтчис, мыля керкуас одзся-одз луннас гöссез, кöр öтiккез мырсьöны ыб вылын, а мöдiккез пымалöмась пызан сайын.

Егорыс сёйис да сiйö и керис, быд курччöвтöм бöрын кружкаись дзунгис быгья ырöш, или висьталам, «сюрагаг» (рочöн шуöны суррогатöн.) Сюрагагыс вöлi туяна-колана: стакан юан и рожаат пондö орсны вир, дзугсьö басни...

Пишкисö ныррезнаныс мужиккес. Будзгылясис да сёйис Женяыс. Командирыс бутылкаись кисьтлiс стаканнэзö вина (аслыс рюмкаö) и гажöн горöтчис: «Мед миянлö еныс пыр иньдö тырдоз!» — и юис. Командирныт юис, а тэ мый, Митипер?

Мужиккес гöгöрын бергалiс Домна баб. Сiйö татчö вайöтöмась пусьыны да сысъясьны и вердны мужиккесö. Бабыс чож, сiйö и керö юкталö уджалiссесö и гöссесö, лэбзис-локтiс Митиперыс одзö, туп да тап йöктыштiс и шуис: «Их-ох, Митипер Иванович! Талун миян праздникыс! Юышт, эн шванитчы! Грех оз ло...» И Митиперыс юис. А кытчö воштiсян, кöр быдöнныс юöны, а сiя оз жö понды пызаныс сайын öтнас пукавны мыр моз да синнэзнас кваркышавны. — Праздник ны улицаын! Юöны да сёйöны мужиккес — «миськалöны виль гараж», ошшасьöны, кыдз уджалiсö бура да бытшöма, сэтчö сувтiс механикыс да юыштöмувья пондiс горзыны:

— Анатолий Валерьевич... Эта... Сiя... Мужиккес öммезнысö осьтiсö, кыдз садьмисö.

— Унаöв жö вештiт уджыс понда, — кылыс гардыштчис механизаторыслöн, но коккес вылын сулалö. — А тöвнас пондам кынмыны.

— Пондан кö кынмыны, гор пондан лонтны! — механиксö кывнас вермис предыс.

Öгралiс и лöсьöтчис öзйыны умöль удж бы...

— Васильевич, а Васильевич... — механикыскöт ласковöя пондiс сярзьыны Митиперлöн командирыс. — Эн баит, мый оз ков. Керим, во!

Механикыс кымöртчис, синнэсö мöртiс джоджас, а эта коста предыс, швырк! и абу ни...

— Антиллегент! — кыдз сьöвзис, бöрсяняс висьталiс бухгалтерыс. — Миян кодьсис брезгуйтö, а гортас...

— Тэ мый, Родионыч?! — небытика горöтчис командирыс. — Тэ мыля сiдз?

— Нем абу, — будзгыльтчис бухгалтерыс.

— Ой! — чывкнитiс Домна бабыс. — Тi нö мый, мужиккез? Мыля умöля сёят-юат, али менам шыдыс оз гленитчы, юаныс абу курыт? — ачыс сiйö и керис кружкаись чипышалiс «сюрагагсö».

Митиперлöн ыскöвтiс мыдзыс, сiйö эз ни полöтö думаэз: нем етш эз ло не иньыс, не городсис керкуыс, кöдö некинöс эз тшöкты видзöтлыны и тöдвывсис эз öштыв.

Мужиккес коддзисö. Лёбисö, кинлöн мый шогмис. Кадыс лэбзис: неважын вöлi топ павжун, а öнi шондiыс видзöтчис ни рытсянь. Лабич увтö медодз таралiс Федотыс, а сылö кыз кынöма бухгалтерыс брынгö да брынгö, ачыс модьö: «Бобик! Пет керкусис! Мый сэтöн керан?!»

— Сулав! — Митиперыс эшö вежöртö, мый керсьö сы гöгöрын, кутiс бухгалтерыслiсь кисö. — Родионыч, мортсö эн брынöт. Сылö зубыт.

— Зубыт... — сералö бухгалтерыс, киэсö нюжлалö Домна бабыслань, окалö Митиперсö, гöрдлö-ошшасьö. — Никифор Иванович! Ю, сёй! Этö ме тiянöс верда и юктала. Вежöртiн?! Эн эд. Не ме бы... Тi бы гаражыс понда джын деньгасö эд босьтö. Вежöртiн? Ме мортыс кодя, ме кодь бухгалтерсö кулан и сэсся он адззыв, — бобгö Родионычыс, öмсис дуль резсьö, вина дукöн пöдтö.

Митиперыс кывзö бухгалтерсö, сьöлöмыс гудыртчö, и думаэс нерöны: «Вот эд, Митипер... Адззан начальствоыс кытшöмöсь, зызöны, а тэныт мый кольччö керны? Немись сэк эн пов, эн стыдитчы! Некин тэнö оз осудит...»

Мужиккеслöн праздник. Инькаэс, натьтö, уджалöны фермаын да видззез вылын, а мужиккес юöны вина. Гажа оланыс, оланыс гудыра — öтiккезлö праздник, мöдiккезлö абу. Керкуын тшын, бус, нять, шум. Кин да мый керö, кин да мый модьö, он вежöрт, но адззан кöда узьö, кöда кулаккесö няпралö.

Кузь Женяыс суналiс, кыдз нем эз тöд и эз кыв, но видзчисьтöг юрсö лэбтыштiс и ыкöстiс:

— Сiдз, Домна баб! Сiдз, бухгалтер! Няньсö од шедтö, а чöскыта сёят! Вайö татчö «сюрагагсö»!

Юис «сюрагагсö» зонкаыс, бухгалтерыс ныр увтö сюйыштiс кулаксö и пондiс пишкыны.

— Тэ кинöс?! — будзгыльтчис Родионычыс. — Лякöсь ныр!

Механикыс несьö код, несьö садь чеччöвтiс öтöрö.

— Горшшезнаныт вашöтiт зонкасö! — механикыс бöрсянь шуис Домнаыс... — Немымда беднöйка эз ю.

— Колхозсиным начальсвоыс сэтшöмöсь эд и эмöсь! — будзгыльтчис Женяыс.

— Кытшöмöсь?! — öмсö пиньöвтiс бухгалтерыс.

— А сэтшöмöсь! — зонкаыс пишнитiс. — Тi только аслыныт да аслыныт, а колхозникыслö?!.. Висьтав, бузгалтер, мый колхозникыслö?! Этö, — Родионычыс ныр увтö заргис бирулькасö, пиннесö гер керис и юрнас гогыньтыштiс Митиперыс командирлань. — Этатшöммес горшö деньгасö торкат.

— Кывзы, козёл! Кин одзын кулаккезнат орсан?! — чужöмыс лöзöтiс бухгалтерыслöн.

Лабич увтын пороз моз бакöстiс Федотыс: «Ой тэ, Иньва да Иньва ваиньöй, голубöй синбана ва-а-а...»

— Тöдам! — Женяыс кулакнас гымгис пызаныс вылö. — Тöдам, бузгалтер, кытчö колхозсис деньгасö воштат. Думайтан, ми бы асьным гаражсö эг кужö керны? Керим бы да эшö кытшöмö, ой-ой! Но тiянлö колхозниккеслö деньгаыс жаль, бытьтö ми абу отир, а нiя отир... Но и уджалöмась... Тьфу! Дундöтчы, пöльышт и гаражныт лэбзяс, а деньгасö гумыштiсö тэ сорöн!

— Женя!... Уна эн тöд, том эшö.

— Ме том?

— Мужиккез! — Домна бабыс чеччöвтiс мужиккес коласö. — Юö, сьылö да йöктö, но эд косясьö.

Кыласö я мужиккес старухасö, кöр нiя кодöсь? Вешшы сэтiсь, Домна баб!

И чеччöвтiсö петуххез моз мужиккес öтамöдныс вылö, и кутiсö мороссэзнысö да зэгнитiсö быд вынсиныс, вачкисö öтныс и мöдныс пельбоккезаныс — öзйис удж не удж, а тышкасьöм, кöда йылiсь эн бы ошшась, но кытчö воштiсян, ежели оланыс сэтшöм, он орддьы не бурсö, не умöльсö?

— Убили-и-и! — быд вынсис ыкöстiс да унньöвтiс Домна бабыс. — Вийисö-ö-ö!

Гожумся луныс жагвыв кусiс. Шондiыс стыдитчöм рожанас дзар керис деревняыс вылö и вотьыштiс вöр саяс, китöстiс петух да виньдiс.

23

Мужиккес пондiсö садьмыны витöдз лунас, кöр бырсис «сюрагагыс». Домнаыс пышшис гортас, некин эз понды вердны да веськöтны юррезнысö. И командирныс кытчöкö öшис, кыдз вöйис. Пондiсö мужиккес шогавны смерть-шогöтöн, светсö бы оз адззö.

— Пышшыны колö, — синнэс був-бав Егорыслöн, нач тошсялöм, рожаыс пыктöм — не морт и эм, кулöм чужöм.

— Кытчö пышшан? — ружтö Митиперыс, кöдалöн синнэс гöрдöсь, чужöмыс сэтшöм жö тошсялöм.

— Кытчö синнэз видзöтасö... — дыша висьталiс Егорыс. — Туйыс эд тупыльö абу каттьöм.

— А деньгаыс?! — ружтö куимöтыс. — Весь разь татöн асьнымöс нярьялiм?

— Деньга... Ой, мужиккез! Тi мöдат деньга адззывны? — пондiс серавны Егорыс. — Абу командирным и абу деньгаыс! Вежöртiт!

Абу командирныс, абу и деньгаыс. Сэтчö жö погоддяыс тшыксис: рытнас лэбис тöв да вайöтiс кымöррез, пондiс гымавны да койны-зэрны ведрапонiсь. Кымöрыс гымалiс-чарлалiс, раммис, но зэрны эз дугды. Öтöрын лоис нять, а мужиккеслöн коккезаныс только панöм нинкöм кодь кöтiэз, кöть улицаö эн пет.

Нять öтöрас. Поснита зэрö. Мужиккес шогалöны, мужиккес тöждiсьöны, быд кылын касьтылöны командирнысö да видзчисьöны деньга.

Митиперыслö важын ни колiс бы мунны гортö, но сiя кыскö кадсö. Но вот сiя чеччис, кыссис ыбöс дынöдз, кутчисис вугыс бердö, медбы петны öтöрас, а сэтöн паныт командирыс... Кытöн сiя вöлöм, мый керöм — полан вылас видзöтны: чужöмыс пыктöм, öт синыс ыджытжык, мöдыс учöтжык, öт син увтас öшалö лöз пуртöс, мöдас помидор ыжда гадь, пиннес гер — öтiк пиньыс абу — öшöм, и ачыс оз тöд, кытчö öштöм. Вожмöвтiс керкуас порогсö командирыс, був-бав видзöтыштiс ёрттэс вылö, юалiс: «Ловьяöсь?»

— Мый миянлö лоас?! — Егорыс сiдз видзöтыштiс командирныс вылö, бытьтö эз ни лыддьы мортöн.

Эз ешты командирныс бöрсянь пöднассьыны ыбöсыс, видзöтöны, юрсö керкуас мыччö колхозсис бухгалтерыс. Но эта бес дак бес! Эта командирнысö сизимись янöтöм: чужöм гöгöрсö сiдз тiльöмöсь, сiдз вартлöмöсь, что синнэз дзуз видзöны, рожаыс — масьтöм яй, юрыс пыктöм, топ лоöм ыджытжык, веськыт ки лапасö каттьöм бинтöн, шульга кисö мавтöм зелёнкаöн, чотö-кивыльтö, голосыс сибдöм и ыбöсыс колассянь ни шуö: «Митипер, быдöнныт пуксят кын кирпиччесö йирны!..»

— Ба-а, — öмсö осьтiс Федотыс и джоджыс шöрись бöрöн-бöрöн вешшис комлань. — Ба-а-а, Родионыч... Мый нö тэкöт? Кытчö шедлöмыт?

Бухгалтерыс пишкöв-керис, будзгыльтчис да гав-гав горöтчис:

— Мыля менö сiдз вартлiт? Судитчыны, мыся, понда...

Сэтчин да татчö, мурзисö да кулаккезнысö няпралiсö мужиккес и миритчисö, только вай вина, а винасö босьтны немöн.

— Кöр лоас деньгаыс, Родионыч?

— Деньга... — кыдз кыз онiсь саймис бухгалтерыс, пуксис пызан сайö, дыркодь юрсö видзис öшöтöмöн и висьталiс. — Деньгаыс, мужиккез, оз ло... Аминь деньганытлö! Тi эстöн пöтöсь и кодöсь, нем од тöдö, а тöн милицияыс татчö сэтшöм сабантуй осьтiс, ой-ой-ой! Кыдзкö менö «чёрнöй вороннас» эз кыскö.

— Родионыч!..

— И преднымöс öтлаын... — нырнас вирснитiс бухгалтерыс. — Гусясьны оз ков! Сэтчин и туй сэтшöммеслö, во! Колхозсö чилькöтöны да думайтöны, что пыр этадз лоас, оз эд. Оз, ёрттэз! И тi эд чеччалö.

— А миянöс мый понда?! — синнэс ыждiсö Егорыслöн.

— Öтлаын эд...

Мужиккес пондiсö пишкыны, веритiсö и эзö бухгалтерыслö, думайтiсö ни, что, ежели кö жуликыс татöн предныс, то медыджыт мошенникыс — этö Родионычыс, кöда вачкисьö мошенникыс вылö юрнас и киэзнас.

— Шестнадцать тысячаэз, челядь, шестнадцать... — бухгалтерыс пондiс кивзыны да ойзыны. — Ми тiянкöт ой и лун туртам, уджалам, шондiсö ог адззывлö, а нiя!.. Шестнадцать тысячаэс!..

Митиперыс сэсся мужиккесö эз понды кывзыны, кыдз кольмöм петiс керкусис, öтöрас поснита зэрис. Оланыс дзик горзiс, а деревняыс шогалiс, топ кинкö бöра кулöм, и шы абу: не пон оз вувт, не петух оз китöст, только улицаыс шöрын, гöпок дорын, пукалö рака да карзö, зэр корö или сералö Митиперсö. Кытчö воштiсьны? Ылiсянь видзöтö иньыс керку вылö, кöда тыдалö кыдз йöзлöн ни.

Кытчö мунны? Колан я тэ Катяыслö? Может, веськыта шыбыльтны городлань? Сэтчин аслас керку, кытiсь некин оз вашöт, тшыг или пöт — ачыт хозяин, а татöн... Сьöкыт Митиперыслö. А кöр сылö вöлi кокнит? Пыр эд мортсö сералö оланыс, кöть садь, кöть код, пыр не отир моз...

«Мед...» — öвтчис улицаын Митипер и иньдöтчис жö иньыс керкулань, повзьöтiс поннэсö, кöдна кивзышалiсö и заргисисö посöдззез увтö.

Катяыс гортын. Сiя керку öшынöт казялiс мужиксö, чепöссис öтöрö и Митиперыс ныр одзын жвангис-пöдналiс ыбöссö, и кöть кытчö мун!

— Катерина-а-а! — посöдзас ни кивзыштiс мужикыс. — Катерина-а-а...

— Кар-кар, — шыасис рака чом вылын, нерис эд бöра жö мужиксö — öткодьöсь инькаэс и кайес.

Поснита зэрис. Гожумся шоныт рыт. Садниккез весьтöт лажмыта лэбзис чочком варыш, повзьöтiс öшын увтiсь воробейесö, кöдна öшисö йöр дынiсь. Деревняыс суналiс, шоччисис удж бöрсянь. Мужикыс бергöтчис иньыс посöдз дынiсь и вузалöм пон моз иньдöтчис туйлань.

24

Гожумся рытыс югыт, но городын улицаэзын сотчöны лампочкаэз. Городыс лун и ой уджалö, топ ружтö и сьöкыта лолалö.

Митиперыс етша олiс деревняын, но ештiс ни велавны лöнь ойлуныс дынö, а татöн бöра шедiс дзескыт оланö, кытöн и ловзисьны пöтжыка да пыдынжыка оз туй, сiдз и несйöтан, воздухыс абу чöскыт. Гусьöн-полöмöн, кыдз йöз, сибöтчис аслас керку дынö, кöда ойнас сулалiс, топ дзебсисьöм льöмпуэз коласö. Керкуыслöн öшыннэс öтöрсяняс дорöмöсь пöввезöн, ыбöсас öшалö ыджыт замок. Пöввес вöлiсö асланыс местаын, замокыс öшалiс асмознас, и палисадникись йöрыс дзонь, сiдзкö Германыс синйис керкусö.

— Сöтам-вартам! Здорово, Митипер! — сэтöн и эм ни ёртыс, рад, кöр и локтiс, кöр и адззылiс, что Митиперыс гортын ни. — Тэ кысянь?! Али коскат деревняас сöтiс уджавнытö? Мый лоис? Мыля бöр? — лолалiс Германыс помой дука руöн.

Митиперыс шы эз сет, а мöдыс модис-кисьтiс, ошкис асьсö и видiс ёртсö.

— Натьтö, сват, эд колас вештiсьны, — медбöрын горöтчис Германыс. — Мыся, сöтам-вартам, керкуыт эд кымöрас бы лэбзис. Сотiсö бы керкутö уркаэс, но ме синйи, а сы понда колö бы... — горшас печиктiс. — Кыдз сутки, сiдз и кык руб. Итого — восемьдесят.

Митиперыслöн петiсö синваэс, но шы эз сет, осьтiс ыбöссö, пырис керкуас, кытöн вöлi ыркыт, гажтöм.

Германыс вöтчис сьöрас, пырис и порог дорын жö ыкöстiс: «Вай юыштам! Менам эм чекушка, — писис кыскис чекушкасö, ошшасьö. — Эн пов. Германыскöт он торксьы. Вай доз!»

Митиперыс шы эз сет.

— Тэ öнджа... Бöра этö... Вештiсь керкуыт понда, — модис Германыс.

— Шоччисин ни бы, — шыасис хозяиныс.

— Вашöтан? Ага! Эх, Митипер!.. Нем тэ он тöд, а менчим зонöс судитiсö. Тюрьма эд, сöтам-вартам!

— Мый понда?! — гажмис Митиперыс, топ рад лоис, что судитiсö ёртыслiсь зонсö, кöдö колiс судитны, кыдз пельвундiсьöс.

— Кинöскö пö бытьтö чöвтöм, — гажтöма баитiс Германыс. — Адззылiн, кытшöмöсь öнi зоннэс быдмöны!.. Бур, что тэнат абу. Вöлi бы... Сiдз жö бы, сöтiн-вартiн...

— А мый тэ сэтшöмыс понда горзан? Кöть пельбоккетö оз понды вочны...

— Жаль эд, вонö, жаль... Кöть кытшöм, а зон эд.

— Мый кöдзин, — öмсис пышшис Митиперыслöн.

— Да-а-а, сöтам-вартам, вежöмась тэнö деревняас, вежöмась, — дузгыльтчис Германыс и петiс керкусис.

Митиперыс петiс ёртыс сьöрö, сулалыштiс посöдзаныс да кывзiс городыслiсь узьöмсö, кöда узис и эз, ружтiс. Гажтöм. Катяыс бы колö! Вöлi бы Катяыс, быдöс бы вöлi бур, а öнi мый? Кинкöт баитны? Юасьны да висьтасьны? Кытчö ашын мунны? Кытiсь бöра кошшыны уджсö? Сулалiс посöдзын да кывзiс городыслiсь лолалöмсö, и сьöлöмыс висис, кöр нем оз ков, не керкуыс, не городыс.

Ружтiс-керис, пырис керкуас, лонтiс гор и тшыг да мыдз водiс.

25

Кынöмыс сималiс. Медодз колiс котöртны магазинö, босьтны нянь, кöдö эз шедты. Няньыс öнi донтöм, мымда колö, сымда и босьт да сёй, но эм я сылöн няньсö босьтны деньгаыс? Кошшис-керис кармансис и адззис копейкаэз.

Рожасö эз миссьы, малыштiс кузь гыжа чуннезнас тошсö, гладьöтiс бы рожаыс вылiсь чукырресö, кöдна эз гладямö, и сiйöн сорöн петiс керкусис.

Öтöрас шондiыслöн югöрыс веськыта павкис синнэзас, кыдз стыдитiс. Митиперыс мышкыртчис и гусьöнмоз, отирсис синнэсö дзебöмöн, иньдöтчис магазинлань: стыд жö, что оз уджав, а сёйö бы, да сэтöн эшö магазиныс дынын ни тöдса голос ыкöстiс:

— Здорово, алкаш! Мый нö рожатö дзебан? Пиннет висьöны али мый?

«Алкаш... — сöтiс дума. — Кытшöм ме алкаш?» — сiдз бы и резгис шуисьыслö, но терпитiс.

— Алкаш, он я мый я миян кодьсö ни тöд? — магазиныс угöлын люкасис тöдса калекакöт, кöда кодувья шедлiс поезд увтö, и сыбöрсянь коккесö кералiсö пидзöссэсви, и öнi пукалö магазиныс угöлын да нюжлалö нятьöсь кисö, видзчисьö, кин кырымас пуктас деньга, топ не деньга корö, а сьöлöмтö бы мырддьö, кöр сiя калека — коктöм, а тэ котрасян жеребец моз и умöль мортсö бытьтö он бы и адззы.

— Эн жалейт копейкатö... — кеймисьö ни коктöмыс. — Еныс сетас здоровье.

Митиперыс швыркнитiс коктöмыс одзöт. Сiдз и пондöтчис оланыс эта грешнöй лунö: сёйис нянь и пöтiс да эз... Нач лоис керны нем, и пондiсö чувйыны думаэз: öтiк тшöктiс джагöтчыны, мöдiк овны, а куимöтыс вашöтiс гортiсь. «Сэтчин тэныт и туй! Кулан да некинлö лоас дзебны. Чапкасö поннэзлö...» — зубыта ньылалiс дульсö, топ кулiс ни аслас керкуын и сэтöн сiсьмас, некин оз понды тöдны и адззыны. Сэтшöм думаэс курччöвтiсö сьöлöмсö, выныс эз тырмы, медбы голяас кышавны петлясö.

Пукалiс-керис керкуын, видзöтiс, кыдз шондi югöрыс жагвыв вешшис джоджас, кывзiс каньыслiсь нявзöмсö (котыс тшыг, сёйö бы), куритiс бы, но табакыс эз вöв, сёйис и бöра ни кынöмыс сималö, но сэсся деньгаыс абу. Колiс петны öтöрö...

Коккес кыскисö городöт. Лыддьöтiс объявленнёэз, кытчö гижöмась удж йылiсь — бöрйы да шедты деньга, но быд местö эз уськöтчы, а думайтiс, юрсö гыжьялiс, оз бы нятьöсьт киэсö, оз бы зорьясь кытöнкö вöрын, а кошшис бы кокнитжык жö удж. Мунiс и ачыс эз тöд, кытчö мунö, кошшис удж и ачыс эз тöд, мый бердö кутчисьны, сiдз и пантасис морткöт да сэтшöмкöт, кöда бутылка понда окалас и боккетö тышкалас. Сiя и нуöтiс складдэзö.

Складдэзын уджыс тырмис — бергав, вöрöтчы, кыскав да тэч-ректы машинаэз, а сыбöрын и сёй. Уджалiсö, асьнысö эз жалейтö, эз полö бусiсь и нятись. Митиперыс уджалiс да думаэзнас чöскытжыка бы сёйис, а эта коста ёртыс ештöм ни гусясьны: ящикись кыскöм колбаса, пряниккез, кытiськö вермöм сöтны и бутылка.

— Тэ мый керан?! — повзис Митиперыс.

— Ме мый кера? — пиннес гер ёртыслöн, пыдынжыка пиас дзебис колбасасö, серöмтчис. — Мый йöзыс, ме сiйö жö... Тэ видзöт, кыдз отирыс олöны, и ны сьöрö жö вöтчы! Адззылан, кыдз рытнас одзöттят складсис пондасö петны тыра сумкаэзнаныс... Крысаэз моз... И киннэз бы?! Не ми жö тэкöт, а начальсвоыс... Медодз зав, сыбöрын зам, замыс бöрын пом и помыслöн ни зам...

«Сiдз» — думайтö Митиперыс, но шы оз сет, дульсö ньылалö, видзчисьö, оз я ёртыс верд чöскытжыка.

Уджалöны складын мужиккес, уджалöны нiя, кöдна некинлö ни оз колö, некин ни ны понда оз горзы — этö алкашшес, кöднö öтiклаись вашöтасö, мöдiклаись брынöтасö, куимöтлаись кежöтасö, вот и локтiсö татчö, медбы лун уджавны, мöдiк лунö шоччисьны.

― Кывзы, — пель дынас кижгö Митиперлö ёртыс. — Сöт эта ящикись черисö. Аслыныс, натьтö, вайöны... Магазинас этатшöмсö ог адззывлы. Сöт, а ме бöра этчинiсь пешла...

Дуль öмын сöдзö, сiдз бы и сёйö черисö, кöдö век оз адззыв, сылö абу, а мöдiккезлö эм, и сöтны бы, но киыс оз пыр ящикас, сьöлöмыс полö...

Рытöдз мырсисö, мыдзисö кок вылiсь усьтöдз. Рытнас сэтöн жö саясисö отирыс син одзись, пуксисö сёйны, ёртыс кыскис писис колбасасö, пряниккез, быдöс тэчис Митиперыс одзö, гажöн висьталiс: — Талун верда, а ашын ассит сёй! Талун пöт, а ашын бöра кошшись... Гардчö мужикыс складдэзын да магазиннэз гöгöрын, кöр шедö — уджалö, оз и шоччись, кытöн пöт, кытöн тшыг. Сэтшöм оланыс оз гленитчы, но мый керан? Мый керан, кöр йöзыс тэ вылö видзöтлö, кыдз пон вылö, топ тэ мортыс вылö он ни вачкись. Абу морт и он ни ло. И миритчис ни Митиперыс сэтшöм оланыскöт: асывнас оз бритчы, рожасö оз миссьы, сьöд киэзнас пызан вылiсь босьтас чорзьöм няньтор, порсь моз тшавгас-сёяс, кöр пöт, кöр тшыг петö керкусис. Абу сылöн не ёрттэз, не враггез — дзир öтнас. Бöбöта: кыдзкö рытнас посöдзас турски-тарски кайис морт, сяткыштiс чоропнас ыбöсас, и керкуас пырис Дарья Ромашкина, кыдз порогыс дорö быркнитiс гулю и падмис: синнэсö чикыртiс, дыр видзöтiс Митиперыс вылö, кöда пукалiс веськыта пызаныс сайын. Здоровайтчис Ромашкинаыс, шынь керис, но кытчöдз нем эз висьтав, бытьтö мыйкö видзчисис или сiдз повзис нятьсис да буссис, что садьыс бырис. Митиперыс адззис, что гöстяыс, кöдö эз видзчись, пырис и повзис керкусис да хозяинсис, мыля джоджыс нятьöсь, пызаныс вылын бус да няньторрез, джоджыс шöрын нятьöсь сапоггез, стул вылын бырöм кеписсез, шапка, пызан сайын ректöм папироса коробкаэз — сэтчин и эстöн не сiдз, не сэтшöм, кытшöм бы колiс лоны керкуын, ежели бы Митиперыс олiс инькöт. Хозяиныс виноватöя видзöтiс инькаыс вылö, топ лöсьöтчис юавны: «Мый колö? Мый ме дынiсь öштiн?», — но кылыс эз бергав, öмыс эз оссьы.

Митиперыс пукалiс пызаныс сайын, а Ромашкинаыс сулалöв-керис порогыс дорын, вишыкайтiс пон моз керкусис русö, кытöн инька оланыс эз кыв, и мужикыс син одзын дыш, нем вылö оз туй, бöр пет да мун, мед сiя и олö!

Нем бы вöлi татiсь кошшыны Ромашкинаыслö, кöр Митиперыс сылö абу родня, вöлi тöдса да эз ло — ветлöт аслат туйöт, а сiя кыдзкö тiянтöг олас!

— Мый нö он пантав? Ме гöститны бы локтi, а тэ пöднасьöмыт... — пондiс баитны Дарьяыс.

— Гöститны? — кыдз эз вежöрт Митиперыс, вирыс чепöссис рожабаннэзас.

— Пырала, мыся, — кокнитжыка ни баитiс Ромашкинаыс, порогыс дынсянь полöмöн тальччис одзлань, голосыс чорыт, но абу лöг, оз вид, оз осудит. — Пырала, мыся... Тэ эд, Никифор Иванович, деревняö ветлiн.

— Ветлi, — кыдз пондiс саймыны Митиперыс.

— Мый нö сэтчин керö Катяыс? Кытшöм ни деревняным? Ме эд сэтчин жö чужи, эшö эг вунöт ассиным керкунымöс. Эз я сiйö сотö ни? — юасьö-кисьтö кыввесö Ромашкинаыс. Митиперыс эз ешты пыдынжыка ловзисьны, öмсö осьтны, синнэс був-бав: видзöтö инькаыс вылö, кöда чывкйö ни джоджыс шöрын, круг бергöтчис кок ныррес вылын, шагньöвтiс комланяс, сибалiс горыс сайö, петiс сэтчинiсь, кинас малыштiс заборсö, чунь йыввезнас пешлiс пызаныслiсь дорсö, каттис буссö, ачыс сярзис-баитiс: — Мый нö тэ, Никифор Иванович? Кыдз нö?

— Мый ме? — виноватöя шыннялiс Митиперыс. — Кыдз ме?

— Бöра торйöтчит или мый?

— Мый нö кернытö? — öмсö пиньöвтiс Митиперыс.

— Мый керны, мый керны? Бытьтö тэ он тöд, мый керны? Сё том я мый я? Челядь юрöн олан, Никифор Иванович! Овны эд колö...

— Колö... — челядь моз шыасис мужикыс, курччöвтiс тырпсö, ыш ловзисис: сьöлöмсö жмитiс кыдз чорыт киöн и сэк жö лэдзис.

Горыс увтын чирскис сьöд таракан, топ керкуас пырöм ыб кöбывка. (Кöр керкуас он ов, быдкодь тварьыс поздiсьö.)

Ромашкинаыс дугдiс баитны, веськыта видзöтiс Митиперыс вылö — дойдiс лэчыт синнэзнас, видзчисис. Сэк Митиперыс топ кытiськö мезмис, пондiс висьтасьны да норасьны, кыдз сiя локтiс деревняö, уджалiс колхозас, сыбöрын шедiс шабашниккес дынö, отсалiс керны гараж, юис вина и на... Татöн.

— Юрат пилитчан чаг, мужик! — веськыта висьталiс Ромашкинаыс. — Пыркöтны колö сiйö да некинлö. — Жöдзис-керис джоджыс шöрын, комись адззис рос, чышкис джоджсö, пызаныс вылiсь дзимлялiс няньторрез, гор вылö чапкис кепись-шапка.

Инькаыс уджалiс, а Митиперыс пукалiс да вишыкасис нырнас, нем эз адззы баитны.

— Уна деньгасö шедтiн? — кöр комас ни бергалiс Дарьяыс, юалiс Митиперыслiсь.

— Кытшöм деньга?! — повзис Митиперыс. — Некытшöм деньга эг шедты.

— Мыйлö нö уджалiн?

— Отсаси отирыслö...

— А мый нö сёян?

— Ог жö тшыгьяв, — шынь керис Митиперыс, но Дарьясö он бöбöт, сiя адззö, кыдз тэ олан да мый сёян, и бöра кивзыштiс:

— Эх, Никифор Иванович! — шуис, кыдз горзiс аслас роднöй понда, кыскис сумкаоксис дас руб деньга, пуктiс пызаныс вылö и сöтiс-висьталiс. — Сэсся эн ю! Юны пондан, вешьянтöг кольччан.

26

Эз ешты Ромашкиналöн следыс сайкавны керкусис, пырис Герман: öмыс осьта, синнэс був-бав, ыбöс коласын ыксö ни:

— Деньгаыт эм ни?! Вай деньгасö! Ме тэнчит керкутö весь эг синйы, — сэтöн жö пондiс гардны-ошшасьны, что талун калека зоныс керкусö пондылöм öзтыны, что чожа ни, талун-ашын ни, Германыс зонсö «козьналас» государстволö, мед калекасö кытöнкö быдтöны...

— А тэ мый? — эз вежöрт Митиперыс.

— Кыдз ме мый?! — садь синнэзöн видзöтö Германыс.

— Кинкö керö да вайö, а тэ... Государство быдты... Чож!

— Ох тэ и грамотей лоöмыт! — лöгасьö Германыс. — Но тэ и, сöтам-вартам! Мый вылö сэк детдоммесö? Кин сэтчин весь няньсö пондас сёйны? Вай деньгатö, сöтам да вартам!

— Абу.

— А менам эм! — ошшасьö ёртыс, пуксьö западня вылö, писис кыскö джыння бутылка и ыксö. — Юыштам!

— Оз тöр.

— А меным тöрö, — Германыс юис и пондiс ошшасьны, кин да мымда шедтö. — Кывзы, Митипер, талун ме дынö локтiс кытшöмкö начальник, дынас менö корö, ага. Ме, сöтi-вартi, локтi и юала, мыся мый колö? Сiя шуö: «Лок татчö, — и кыскö отирыс син сайö... Но ме вöтчи сьöрас, и мый тэ думайтан?! Мыччö колбаса, сöтам-вартам, да копчёнöйö, сыбöрын гöрд чери... Вежöртiн?! Вот, а тэ мый, вонö? Эх, Митипер, Митипер! Уджалiн деревняын, пессин, а няньсö немöн босьтны. Но и ов, Христос тэкöт! — висьталiс и петiс керкусис.

Локтö ар. Асывнас лудыс вылö усьö ни пуж. Пужмалö и юрсиыс Митиперлöн — сивмö, öддьöнжык чукрассьöны рожабаннэс. Пöрисьмö мортыс, и некин оз тöд, мыля ас годдэсся отирыс сьöртi одзжык пöрисьмö, несьö думаэс чинтöны олансö, несьö шогалö...

— Дыр тэ сiдз пондан овны? — кыдзкö пырис бöра соседыс, мыйкö одзын садь. — Уджавны колö. Нем тöвсö чужьявны! Черсö кужан видзны? Во, сöтам-вартам! Кытчö кöрттув дорам, кытчö клин вачкам и деньгаыс, во! Юыштам, поди?

— Оз тöр.

— Чож. Сiдз тэныт и колö. Пондан кö уджавны, ударникö петан. Чесь, слава, почётнöй грамотаэз... Митипер да Митипер! Вина он ю, он гусясь, инькаэс дынö он ветлöт, а ме... Кыным винасö юа, сыным томма, и киэзö öддьöнжык лудöны, кöть кымöсам лый, гусясьтöг ог вермы! Мый эшö миян оланас и лоас?! — кыдз падмö, повзьö и видзöтö ёртыс вылö, видзчисьö, бытьтö Митиперыс тöдö, мый лоас ашын или год-мöд бöртi. — Кывзы! — ыкöстiс Германыс. — Одёрлун ветлi ме этчö... Посадö, иньдылiсö заводсяняным жö, кыдз шеффезöс, дак вот сэтчин и баитöны, бытьтö пö школасиныс директорныс ассис керкусö государствоыслö вузалöма вит тысяча вылö...

— Но и мый?

— Мый... Хрен! Вот мый, сöтам-вартам! Бур эд бы вöлi, ежели бы тэ ассит керкутö вузалiн, зепат дзебин деньгасö и сэтöн жö пондiн овны. Вузав, Митипер, керкутö!

— Кинлö сiя колас?..

— Кинлö колас... Талун жö босьтасö!

Сэтчö шы оз сет Митиперыс, оз тöждiсь ас пондасис. Кык ёрт дугдöны баитны, вель дыр пукалöны шысеттöг, топ кинкö кулiс и стыд кулöмсö баснинаныс полöтны.

— Сэк ашын мун ни уджавнытö, — медбöрын висьталö Герман и мунö гортас...

Митиперыс мунiс уджавны мастерскöйö, кытöн сiйö топ видзчисьöмась.

Мастерскöйын уджыс тырмö: этö кер, сiйö воч — чер да струж, öжын да чер и, видзöтан-кö, важись керас вильö, вочас, и мортыс спасибо висьталö да эшö сетö бы деньга, но Митиперыс деньгасö оз босьт, оз дзеб зепас, а висьталö: «Вештiсь бухгалтерияö...»

Уджыс эм, уджыс тырмö, но не быд лун жö, кöр и весь олыштö, кöть весь овны стыд жö. Кыдзкö Митиперыс казялiс мастерскöй одзись стуллэз да пызаннэз, кöднö чапкöмась — некинлö разьсьöмыс да жугалöмыс оз ков: кутчисис и вочис öтiк стул, сыбöрын мöдiкö... Вочас, важсис кыдз вильö керас, позьö талун жö магазинö петкöтны. Мастерскöйсиныс заведующöйыс локтiс да висьталiс:

— А ми думайтiм сотны ни нiйö, а тэ, видзöт жö... Но и Митипер Иванович! Киэт золотöйöсь!

— Кыдз тшöктат, — висьталiс Митиперыс и жагвыв пондiс öктыны киссьöм-разьсьöм шкаф.

Некин мортсö эшö сiдз эз ошкы, кöть, поди, колiс бы кöркö ошкыны жö, и Митиперыслöн сьöлöмыс тырис гажöн, кöть сiя гажсö эз мыччав, Германыс моз эз ошшась, что сiя — вот, а тэ — то, только вина юны да весь овны, сэсся некытчö и толкыт абу, а, видзöтö, вöлöм эшö толкыс, эшö пригодитчö отирыслö. И мизуритö-уджалö мортыс, керас, кöть киись эн чапкы, видзöт да ошшась.

Кык месяц уджалiс и куимöтыс бöрсянь босьтiс премия. Вина öнi эз ю. Быдöс бы бур, но уджалансянь гортö сьöлöмыс эз кыскы: гортын öтнас, некинкöт кыв горöтчыны, а татöн отиркöт. Гажтöм гортын. И думайтö! «Эшö уджалышта и муна Катяыс дынö, уськöтча одзас пидзöссэз вылö да понда юрбитны... Мед кöть мый керö, но сэсся öтнам ог понды овны...»

— Сöтам-вартам! — кыдзкö бöра горт посöдзыс дынын панталiс Германыс. — Талун тэнат, Митипер, чужöмыт шондiыс кодь жö югыт! Натьтö, деньгасö зеппезат тыр ваян? Ваян эд...

— Вая, вая, — недолыт Митиперыслö: мöдöтпыр бы, поди, рад вöлi, а талун Германсö эз бы и адззы, кöр сiя деньга йылiсь шыасьö. Мужикыс сэкжö зепсис кыскис деньгасö, лыддис и сетiс соседыслö. Мöдыс эз шу, что уна лоас, сюйыштiс пиас, чикыртыштiс синсö и мунiс. Эз ешты спинаыс саясьны, видзöтö: Германыс бöра ни сэтöн, пырö ни керкуас. Порогсö вожмöвтiс, а бöрсяняс вöтчö кытшöмкö инька, пöрись ни бы, но нач абу жö эшö старуха, эшö мавтöм-краситöм тырппесö да синнэс гöгöрöт, коккес вылын кокнит и кылыс дынсис пышшö. Здоровайтчис, ыбöсыс дынсянь веськыта пызан бердöдз локтiс и пызаныс вылö пуктiс, бытьтö подарок, гижöтö каттьöм сёяннэз. Веськыта висьтавны, туяна-колана эшö инькаыс, Митиперыс медодз повзьыштiс, кöр сэтшöм смела сы ордö пырöны, ыбöсыс дынсянь веськыта чывкнитöны пызан дынöдз и эшö вайöны подарок, а мужикытлöн эд джоджыс чышкытöм, вылас йöрнöсыс важ и вешьяныс сэтшöм жö руклядь.

— Митипер Иванович, сöтам-вартам! — ышки-пойки джодж шöрын сулалö Германыс и ошшасьö: — гöссез локтöны, а тэ... Он ылöст паныт петны да пантавны. Адззан кытшöм инькаыс!

— Ме мыйöн тöда? — кижгыштiс хозяиныс.

— Сöтам-вартам, Митипер Иванович! Ми абу йöзöсь, эта менам сваття.

Инькаыс шыннялö, сiдз видзöтö, кыдз оз адззы, что джоджыс ёгйöсь и вылас йöрнöсыс нятьöсь.

«Лешакыс юр вылö... Кыдз сэтшöмыскöт бергавны, пантавны да кольлавны? Мый сылö ме ордiсь колö? — сьöлöмыс чеччалö ни хозяиныслöн, а ёртыс, Германыс, одзлань гöрдззö:

— Митипер Иванович! Сöтам-вартам... Осьт öддьöнжык синнэтö да видзöт буржыка, кин локтiс! Нежели винасö эн понды юны, дак миян кодьыскöт он бы и баит ни? А ме думайта, мыся... невеста тэныт адззи, сöтам-вартам! Кылан или он?! Вай чожажык мыйкö пызаныт вылö!

Сералö эд «помой дозыс», сералö. Сылö бы куимись гöтрасьнытö — куим иньыскöт бы пешлiсьны овнытö, сэк бы видзöтiм, кыдз пондiс сьывны, но оланыс, челядь, быдöнлö öтмоз оз шынняв.

— Эй, Митипер! Вай, мыся, сёйнытö! Сöтам-вартам, — Германыс рад, Германыс потолоксö судзöтö бы, сiдз старайтчö ёртыс понда. — Митипер!

27

Сiдз и пондöтчис эта аскодя рытыс: пуксисö пызан сайö, кытöн нем ни бы сёйны, но няньыс вöлi, вöлi и подарокыс гöстяыслöн, и мужиккес юисö стопкаэзiсь, кисьтiсö мöдпыр. Ны сьöрись эз кольччы и инькаыс: чатыртiс жö аслас дозiсь, пиньöвтiс öмсö, чикыртiс синнэсö, ой кезöтö! Ой оз вермы юнытö... Чышкис-керис öм гöгöрсö Лисавета Яковлевнаыс да висьталiс:

— Не-е-е, мужиккез! Враг винаыс, ме сiйö öмам ог босьт, кöбы не тi...

— Веритам, Лисавета Яковлевна, веритам, роднöй тэ да любöй миян! — Германыс Лисавета Яковлевналö кисьтö мöдiк стопка да гажöн висьталö. — Лисавета Яковлевна, öтiк кокыс абу ни кок, сöт ышö!

Гöстяыс чуклясьöв-керис, но босьтiс тыра дозсö, жмитыштiс чача кодь чуннезнас, вайöтiс рюмкасö тырппес дынö и... Юис да эшö ошшасьö: «Ох, мужиккез! Винаыс тай чöскыт вöлöм!»

— Вот эта инька, сöтам-вартам! — гордöя баитö Германыс. — Меным бы сэтшöм иньсö! Ме бы... Яблук эд, Лисавета Яковлевна, тэ, яблук, мыся! И тэ, Митипер Иванович, ёрт и сват менам, мöдöрö эн видзöт, а синнэтö Лисавета Яковлевнаыслань кер да думайт, кинöс ме тэныт вайöтi! Митипер Иванович, мужик тэ али абу? Эн жö бöра стыдит асьтö Лисавета Яковлевнаыс одзын...

Юыштiс Митиперыс, коддзис и эз — син одзын вежсис. Вежсис и Лисавета Яковлевнаыс, кöр сiя керкуас пырис гулю кодь рам и эз мыччав, что сiя кужö бы ниртчыны мужиккес гöгöрын, а сетöн — на, Герман! Кань моз ниртчö и ниртчö Германыс бердын, кывнас ласковöя мавтö-ошшасьö, что сылöн быдöс эм, вермас тiянöс, мужиккез, кöмöтны и пасьтöтны, вердны сэтшöм сёянöн, кöдö вöтöн он вöтась. Ниртчö Лисавета Яковлевнаыс Герман бердын, ачыс синнэсö оз öшты Митиперыс вылiсь да сiдз, что Митиперыс видзсис-керис и думаыс чувйыштiс ни: «Вот бы... Этадз бы... Ог-го, го...» и дульсö ньылыштiс чöскыта.

— Лисавета Яковлевнаыс, мыся, уджалö магазинын, — Германыс сваттяыслiсь малалö небыт кисö. — Митипер, кылан мый ме баита? Мыся, Лисавета Яковлевнаыс магазинын уджалö, но... Сiя не вузасиссес кодь.

— А кытшöм нö?! — Митиперыслöн чеччöвтiс кыв.

— Кытшöм? Кытшöм... — Германыс нерö ёртсö. — Тэ видзöт, кытшöмöсь миян магазиннэзас вузасиссес... Адззан он честнöйсö, кöда тэнö оз бöбöт? Он эд...

— Менö эз бöбöтлö, — шынь керис Митиперыс. — Кинлöн уна деньгаыс, может, сэтшöммесö и бöбöтöны.

— Во! — хи-хи серöмтчис Лисавета Яковлевнаыс. — Жулик — жуликöс, ага, сват.

— Дугдö бöб баснисö гардны, сöтам-вартам! — Германыс ассис. — Мыся, Митипер Иванович, Лисавета Яковлевнаыс кодь честнöйсö некысь он адззы! И тэ ышö он тöд, кытшöм сiя богатöй!

28

Кодувья ойыс дженыт: синнэз кунин рытнас, осьтiн — асыв. Юрыс висьö. Малыштiс бы юрсö, но ки увтас шедiс не аслас юрсиыс, а инькалöн: баличаэс разьсьöмась, видзöтö — бокас Лисавета Яковлевнаыс пишкö-узьö.

Митиперыс, прыг чеччöвтiс бы, но кытчö тэ! Инькаыс голясö кутiс да сiдз жмитiс, что невна эз пöдты и пондiс ниртчыны, окавны, ласковöй кыввез пель одзас сёпкис, мыйкö норасис-висьтасис, лöсьöтчис овны и любитны. Лисавета Яковлевна дынсянь вачкö чöскыт руöн, вермö мужикыслiсь ньылöм дуксö, думаэсö сорö, полöтö сьöлöмсö: оланыс орсö!

Лисавета Яковлевнаыс ниртчö мужикыс бокын, малалö юрсö, спинасö, окасьö бы, а мöдыслöн чеччалöны думаэз! «Пышшыны, пышшыны!»

— Одз эшö, — модьö Лисавета Яковлевнаыс. — Куйлышт эшö.

«Кытшöм одз, кöр югыт, ни?! — асьсö пурö Митиперыс, ёртсö видö — мортö Германсö оз пукты. — Но, сивöй пон! Мыччала ме тэныт! Пондан тöдны, кыдз менö гöтравны!»

— Мый нö шы он сет?! — Кыкöн куйлöны кроватьын, горзöм сорöн ни баитö Лисавета Яковлевнаыс.

«Ха-ха! — радиоын сьылö кыз голоса артист. — Ха-ха! Рыцарь двадцатого века-а-а!..»

«Рыцарь!.. — сьöлöмыс гудыртчö Митиперлöн, мездöтчö инькаыс дынiсь, ольпась вывсянь босьтö вешьянсö, заргö вешьян кокас кисö... Иньыс... (Кытшöм сiя, поди, инь? Или иньöн шуам?) Иньыс видзöтö и оз вежöрт мужиксö — синнэс Лисавета Яковлевнаыслöн ыждiсö ни, сьöлöмыс пессьö ни.

Югытыс видзöтчö öшынас, колö тэрмасьны уджавны. Митиперыс медодз вешьян коксö сюйыштiс киас, сыбöрын вежис кокас, кöмасис, пасьтасис, эз миссьы, эз сёй — ыбöсö! И абу... Мунö уджавны и мортсö вийöны думаэз, что бöрсяняс чеччас Лисавета Яковлевнаыс и мунас гортас, оз понды сыкöт овны?

Чулалiс лун. Вöтiс рыт. Митиперыс уджалiс и эз — тойыштiс лунсö и рытнас локтiс гортö, видзöтö: ыбöсыс осьта, и Германлöн сваттяыс гортын, абу и думайтöм мунны, видзчисьö хозяинсö, сулалö посöдзын. Казялiс Лисавета Яковлевнаыс Митиперсö, паськöтiс киэсö, уськöтчис паныт, öшöтчис голяыс бердö и бöра окасьны (кöть бы стыдитчи югытiнас отирсис, а сiя оз), пондiс окавны да модьны: «Но кыдз? Но мый? Юрыт оз вись? Кынöмыт оз симав? Мыдзин? Но мый нö он баит?!» «Угу, — сэк шыасис мужикыс, и пырис иньыс сьöрö керкуас — гужгис коккесö, топ кувны лöсьöтчö, кöр колö гажöтчыны. А керкуыс... Чача лоöм, сiдз сiйö Лисавета Яковлевнаыс вочöтöм, сiдз вужьясьöм, что некыдз ни кыв оз бергöтчы, медбы инькасö вашöтны гортiсь. И Митиперыс пондiс видзöтны басöк ковёррез вылö, пызан вылiсь скатерть вылö, джоджись палас адззис и тувдiс джоджыс шöрö: оз тöд, тальччыны я паласыс вылö или юр вылын ветлöтны джоджöттяс?

— Пуксьы, Митипер, да сёй, — гöгöрас гардчö Лисавета Яковлевнаыс. — Видзöт, мыйöн ме тэнö верда!...

Да, пызаныс вылын тырдоз! Колбасаыс не öтiк сорт, ви, кольть, нöк, йöв, чери и бутылкаöн дона вина — öмын дуль сöдзö.

Митиперыс эз ешты уджалан паськöмсö вывтсис чöвтны, кыдз одзас Лисавета Яковлевнаыс вайис виль йöрнöс да вешьян, котiэз, тшöктiс миссьыны и чожажык сёйны.

Сьылiс-баитiс Лисавета Яковлевнаыс, ниртчис мужикыс бердын, а мöдыс кымöра... Оз тöд Митиперыс, мый керны, кытчö воштiсьны. Но сэтöн кинкö, кылö, кайис посöдзас да чороппезнас рач-рач... Юасьö пырны, сiдзкö...

— Да-а-а! — ош моз мурзьыштiс хозяиныс. Ыбöсыс оссис и пöднассис: керкуас чеччöвтiс том мужик, порогыс дорын жö модьö:

— Никифор Иванович! Здорово, здравствуйте! Сто год тэныт овны да сто год тырдоз керкуат! Простит жö миянöс, ради бога, простит! — нюжöтiс кисö хозяиныслö, сетiс чунь йыввесö, кöдна кöдзытöсь и нем жмитны. Киыс локтiсьыслöн учöтик, топ нывкалöн, но ачыс мыгöрнас кузь, абу бы том и абу бы пöрись, басниыс чож, кывнас мавтö, а синнэзнас тойыштö — кöдзыт югöр синнэзас. — Гöссез локтам! — Висьталiс, и кöть ёрт, кöть враг, эн лöгась, а пантав да кольлав — мортöн ло, мед синнэзат эз сьöлалö, бöрсянят эз видö.

Локтiсьыс пырис керкуас, да хозяиныслö баснинас эз гленитчы, бытьтö не морт тэ одзын, а нильыг налим — пырас и петас, не из увтö оз сибды, не йöрö оз йöрмы. Этатшöм гöсьыс Митипер ордö эшö эз вовлы, сэтшöм мортыскöт эз на пантасьлы, а локтiсьыс шуис ни: «Никифор Иванович, кытiськö ме тэнö адззылi?»

— Вермит, — висьталiс Митиперыс. — Миян коддес эд уна эмöсь.

— А миян коддес... — сералiс мöдыс, ыбöс дорсянь юасьтöг пуксис пызан сайö, кытiськö кыскис да сувтöтiс дона вина, сэтöн жö горöтiс: — Праздник бöра талун, Лисавета Яковлевна!

«Мунiт бы тi праздниккезнаныт» — сырлёль киэс öшöтчисö Митиперыслöн, бытьтö сiя и не хозяин ни гортас.

— Мый нö, жöник да невеста, пызаныс сайö од пуксьö? — гöсьыслöн вына голосыс, чужöмыс гордöй, мывкыднас, тыдалö, смев, мый висьталас, сiйö и кер.

— Валентин Иванович, Валентин Иванович, — тюр-тюр Лисавета Яковлевнаыс гардчис ни пызан гöгöрын, топ пеллесö адззö да Валентин Ивановичсö, а Митиперыс оз ни ков бы. И сэтшöм ни гажа, сэтшöм ни чож Лисавета Яковлевнаыс, что Валентин Ивановичыслö сетiс ни окавны öт рожабансö и мöдсö, ваялiс сёйны, рюмкаэзö кисьтлiс вина, а эта коста керкуас пырис Германыс, Германыс бöрсянь öтiк, мöдiк, куимöт — дзуртiс да дзуртiс ыбöсыс.

Пырисö отир, здоровайтчисö, мукöдыс ыбöсыс дынсянь веськыта шагньöвтiсö пызан дынö, стуллэз вылö и джоджö тэчисö кытшöмкö коробкаэз, каттьöттэз, сёян-юаннэз — тыртiсö керкусö сiйöн, мый эз вöв Митиперыслöн, кöдö эз адззыв, вöтöн эз вöтась, что вермас сэтшöмыс лоны, но эм, и, видзöт, хозяин, да шы эн сет, кöр вайöны керкуат и деньга оз корö. И Митиперыс видзöтiс да эз вежöрт, мый сэтшöмыс лоис, кысянь киссьö керкуас, кин сылö иньдiс гöссесö, кöр сiя нем оз тöд, некинöс эз адззыв, эз юöрт, а нiя эмöсь да быдöнныс аскодяöсь — абу тэ кодь рызi-бызiэз, ордчöн эн бы сувтöт не Митиперыскöт, не Германыскöт, не нiя уджалiссезкöт, кöднакöт пантасьлан мастерскöят и адззисьлан заводын. Видзöтö Митиперыс гöссес вылö и дивуйтчö, бытьтö локтiссесö городсис эз адззыв, бытьтö нiя татöн оз олö, а усисö кымöрсис — еныс иньдiс.

Митиперыслö колö бы гажöтчыны, гöссез эд локтiсö, а сiя топ öшис гортас, оз тöд, мый керны, кытчö воштiсьны. Но Лисавета Яковлевна эз öш, чожа пасьтöтiс мужиксö нач виль паськöмö, пöртiс жöникö. Ов, Митипер! Шы эн сет, уна эн баит. Тоша да чукрассьöм ни рожабана, дзормöм юрсиа жöник, оз ни вачкись жöникыс вылö, но быдöнныс ни шуöны эта кылöн, кöть Митиперыслöн и душаыс висис, пыкис бы ас дынсис жöник нимсö, дзебсисис бы кытчöкö, но керкуыс абу ыджыт и дзебсисьны некытчö, некытчö ой кежас он пышшы. Чож Валентин Иванович кутiс ни сiйö конувтöттяс, топ челядёкöс кыскис пызан сайö да пуксьöтiс Лисавета Яковлевнаыс бокö зэв-зэв.

Пукалö Митипер пызан сайын Лисавета Яковлевнаыс бокын, колö или оз, но инька бокын, топ не ачыс, йöз. Сылöн гöссес томöсь, чожöсь, гажаöсь — вирныс пизьö. Пуксисö пызан сайö, рюмкаэзö кисьтлiсö вина, ыкöстiсö: «Горько!», сяткисö оча доззэзнаныс, юисö и пондiсö сёйны — пызаныс ружтö.

— Горько! — мöдпöв ыкöстiс Валентин Ивановичыс, мöдiк тыра рюмка лэбтiс вевдöрö.

— Горько-о-о! — ыкöстiсö керкутыр гöссес.

Чулалö гажа рытыс. Кытöнкö ойшöр гöгöрас винаыс Митиперсö октiс. Мужикыс пöрис кровать вылö, нюжöтчис, кунис синнэсö, лöсьöтчис онмöссьыны, но гöссес сьылан-йöктанöн дзугисö онсö, öддьöнжык Лисавета Яковлевнаыс, иньыс (инь или не инь? Öнi оз вежöрт), кыдз водiс мужикыс, бытьтö вились кытiськö мынiс и пондiс койны, педзны, мыччавны асьсö, кыдз сiя кужö юны, сьывны, йöктыны и бергавны мужиккес гöгöрын.

Гöссес гажöтчисö. Керкуыс ружтiс, дзуртiс джоджыс, дюттясис горыс, кроватьыс и сы вылын Митиперыс. Сiя бытьтö узис, но кылiсö пеллес, осьтыштлiс синсö, адззис гöрдöтöм да пымалöм чужöммез, киэз, коккез, гусьöн видзöтiс, кин да кинкöт окасис, кин да кöда бердын ниртчис. Код, а сё ни казялiс, кыдз инь отирыс унажык ниртчис Валентин Иванович дынын, а сiя, кыдз медбур зонка, быдöнныс вылö, тыдалö, эз уськöтчы, тöдiс, кöдалö гажа кыв висьтавны, кöдö малыштны, кöдö окыштны, а кöда вылö и сiдз видзöтны, что мортыс сэтöн жö адззис аслыс места.

Валентин Ивановичыс эта табун коласын, тыдалö, вöлi асланыс, но быдöнся топ ылöсажык, грамотнöйжык, мужиккес коласын мыйöнкö вынажык, смевжык, поди, басöкжык. Сiя вывтi эз орс, вывтi эз ю, асьсö эз бы уна мыччав, керис сiйö, мый колiс керны. Любитiсö эстöн инькаэс Валентин Ивановичсö, а, может, öддьöнжыксö полiсö — этö Митиперыс бура эз вежöрт, а вежöртiс, что Валентин Ивановичыс эна отир коласын начальник кодь — ыджыт или учöт, но начальник, кöда талун тэнö малыштас, окыштас, а ашын вермас и вештыны бокö, не сiйöн я мортсö сiдз любитiсö инькаэс, бытьтö сiдз бы и лöсьöтчисö водны бокас, козьнавны ассиныс честьнысö и совестьнысö!

Митипер ордын праздник. Бытьтö сы увья оссис праздникыс, но Митиперыс видзöтiс и вежöртiс, что сiя только эстöн мог, отирыс жö гажöтчöны мöдiк понда. Кин понда да мый понда, этö сiя эз тöд.

Митиперлöн керкуыс гажöтчис сiдз, кыдз некöр эз гажöтчы не одзжык, не бöртi, гажöтчис отир, кöда, натьтö, асьсö сьöкыт уджын оз вий, киэсö Митиперыс моз эз нятьöсьт.

Хозяиныс бытьтö узис, но эз узь. Сiя кывзiс и видзöтiс, мый сы ордын керöны гöссес и вежöртiс, что оланыс бöра орсö сыкöт, нерö, дзик мыччö бöжсö и сэтöн жö дзебö, талун сiя вывтi ни богатöй — керкуас быдöс эм, но ашын мый лоас?! Дыр я Митиперсö дынас видзас эта компанияыс? Да и Лисавета Яковлевнаыс сылö эм и абу, некыдз эшö иньнас он шу, и мед сiя окасьö Валентин Ивановичыскöт...

Гöссес керкуас койисö, мыччалiсö асьнысö, гажöтчисö, топ видз вылын лэчыт тöв гардiс турун юр.

Порог дорын важын ни садьтöг узис Герман. Сылö брынгисö, тальччисö и сьöвзисö, но кодыслö эта вöлi нем туйö.

Ойыс ружтiс да кыссис. Митиперыс узис бы да эз вермы, видзчисис, кöр жö мунас эта отирыс, но гöссес эз тэрмасьö, и только асывланяс ни петiсö керкусис — öтiк да сыбöрын мöдiк. Валентин Ивановичыс гажöн ыкöстiс: «Челядь, узьны колö!», но ачыс дзугсис порогыс дорын, бытьтö öштiс фуражкасö, кöдö пондiс кошшыны Лисавета Яковлевнаыс. Кошшис-керис, адззис, пуктiс гöсьыс юр вылö да кутчис окавны и модьны: «Любита ме тэнö, любита!»

— Ох, Лисавета Яковлевна! Роднöй тэ менам да любимöй, öнi тэнат мужик эм... Мужик, мыся, и тэ миян кодьыс вылö эн ни чеччав, а бöрат видзöт... — рамыника и джын голосöн питьыртiс Валентин Ивановичыс, ачыс окалiс Лисавета Яковлевнасö. — Ох, Лисавета Яковлевна!

29

Етша узис, но саймис одз. Видзöтö: бокас Лисавета Яковлевнаыс. Чеччис да сэтöн жö падмис: одзас велосипед, бöрас гармошка, öт бокас телевизор, мöдас — радиоприёмник, джодж шöрын ковёр, комын ковёр, стенаын бöра ковёр... Часыэз, самовар... Богатсялöм керкуыс, но дзескыт лоöм — не тальччыны, не бергöтчыны и ловзисьны немöн — аскодя ру.

Кошшис ассис важ паськöмсö, пасьтасис, кöмасис и öтöрö! Гортсис, кыдз биись, пышшис, öтöрас руыс кокнит, ыркыт. Улицаын öшалö туман. Курыт öмас, курыт сьöлöмас, дзескыт, Сьöвзис, ружтытöн да кивзытöн лэдзчис посöдзсис, и лыннявтöн иньдöтчис уджавны.

Куим лун уджалiс, ойшöрнас водлiс шоччисьны. Быдкодь думаэз нярьялiсö, юрсö, но öтiк некыдз юрсис эз пет: «Ась, ог мун гортö! Мед олö...»

Куим лун уджалiс, но локтiс кресення и ковсис кыссьыны гортас.

Вöлi ар ни. Пуэз вылын вежöтiс листыс. Воис рябина. Ватшканнэз да сьöвбöррез лэбалiсö, пуэз вылiсь сёйисö ягöд. Руыс ыркыт да сöстöм. Митипер уджалансянь мунiс гортö, шагнялiс и полiс, топ сiдз сiйö кинкö и кутiс, кöрталiс и оз лэдз. Германнэз öшын увтын сувтчыштiс, думайтiс: «Мый жö керö Германыс? Баитыштны бы... Юыштны бы...» Ёртыс льöмпу вылiсь быркнитiсö сьöвбöррез, посöдзö петiс хозяйкаыс, горзöм сорöн ыкöстiс: «Митипер, бöра деревняö ветлiн?... — Митиперыс эз ешты висьтавны, кытöн вöлi, кыдз инькаыс рик-рик горöтiс да висьталiс: — Германыс эд кулi-i-iс...»

— Мыля? — Митиперлöн сьöлöмыс берездасис моросас, чужöмыс чочкоммис.

— Тöн дзебим...

— Мыля дзебит? — нач öшис мужикыс.

— Кытчö воштiсям? Ог жö пондö вевдöрас видзны... — герьялiс ни ёртыслöн иньыс, а Митиперыс думайтiс: «Мый жö эта сэтшöмыс?! Мыля жö эта?»

— Юöма кытшöмкö öнджа... — риксьö Германлöн иньыс.

Кымöракодь асылыс, нач гажтöм. Кытчöкö тэрмасьöны öтi-öтi морттэз, некытшöм шогöт не горе оз тöдö — бокöттят мунöны, а тэ... «Юöм, юöм, — вирыс кож-кож вартö Митиперыс пеллезö, кыдз кольмöм. — Эх, Герман! Ошшасин, что дыр пондан овны, а петiс мöднёж...» Петiсö синваэс, кöднö ньылалiс, но эз унньöвт, а посöдзын герьялiс быд горшсис ёртыслöн иньыс, бытьтö мужикыс торксис война вылын.

Чира-жака льöмпу вылö пуксисö ватшканнэз. Митиперыс шатласьтöн иньдöтчис гортланяс, кылiс и эз, кыдз бöрсяняс ыкöстiс Германлöн иньыс: «Пыралiн бы!» «Мун тэ! — аслыс горöтчис Митиперыс. — Кыдз ловья вöлi, быд лун смертьыслö вöзйин, а öнi тшöктан пыравны... Ов öтнат, пешлiсь мужиктöг овнытö!» Горт дынас моз ни, кинкö тöдса бöрсяняс горöтчис: «Асывсянь ни жöргöм! Вежöм!» Мужикыс лёк кыввесö кылiс да эз, локтiс керкуыс дынöдз, ылiсянь ни адззис, что ыбöсас öшалö замок: сiдзкö, Митиперсö некин оз видзчись! Сiдз и эм: ыбöсыс пöдана, садникас ёгтуруныс быдмöм йöрыс сувда, кытöн и картов кор! Отирыс гарйöны ни картошкаэз, а сiя... «Мед», — думайтö и быдöс вылö öвтыштö кинас. — Абу и оз ков...»

Каньыс пукалiс посöдзын. Котыслöн гöныс пашмöм, бусöсь, синнэс дульсмöмась. Сiя нявзыштiс и пондiс ниртчыны сапогыс бердын. «Пыра или ог? — юалiс ассис, бöр бы бергöтчис да мунiс Германнэзас, но думаыс сöтiс: «Абу ни эд Германыс!»

«Абу Германыс! — матькыштiс Митиперыс, клап вачкис боккезас. — Мыля нö сiдз?! Мыля, Васька?! Поди, миянлö вöтчыны жö Германыс сьöрö? А мый?»

— Здоровöн олан, Никифор Иванович! — бöрас гажöн шыасис тöдса голос, кыдз нетшкöвтiс кузь юрсисö. Льöмпу вылiсь чирзытöн лэбзисö кайез. Митиперыс бергöтыштiс юрсö и оча-паныт пантасис Дарья Ромашкинакöт. Ромашкинаыс шынь сералiс и чужöмыс öгралiс гажöн, синнэзас орсiс том олан.

«Лешакыс тэнö кыскалö!» — Митиперыс невна эз шу инькаыслö, но падтiс асьсö.

— Или вунöтiн ни? — кайес моз жö питьыртiс Ромашкинаыс, ошшасис: — отпускын. Лöсьöтча гортö ветлыны и, мыся, кежала... Он я Катяыслö юöр иньды?

— Кытöн тэнат гортыт? — сибдöм голосöн юалiс Митиперыс.

— Кытöн?.. — сералö Дарьяыс. — Деревняын! Кытчö тэ ветлiн, сэтчин и ме туйсö таля.

«Керкуас бы эз пыр... — мужикыслöн чеччалiс дума. — Мый эд бöра менам сэтчин и эм... Эз кö эшö Лисаветаыс мун?.. А сiя пырас, — öмас косьмис дульыс, бöр бы пробойес бердö кышалiс замоксö, но осьтаэзас эз инмы. Коккес дынын нявзiс котыс, нач зэв сулалiс да шыннялiс Ромашкинаыс, сералiс: «Мый нö тэ? Он я бöр пöднась?»

— Öнджа эд..., — кисис уськöтiс замоксö, мышкыртчис да босьтiс и вожмöвтiс порогсö. Сьöрсяняс вöтчис Дарьяыс.

Пырисö керкуас, и Митиперыслöн сьöлöм вылiсь ыскöвтiс шогöт: Лисаветаыс эз вöв, эз вöлö керкуас не ковёррез, не телевизор — быдöс кыдз чышкöмась да нöбöтöмась, кольöмась только стенаэсö.

— Здравствуй, Дарья! — вöлись кокнитжыка ловзисис Митиперыс. — Пуксьы да ваксьы.

— Да-а-а, — пыдына ловзисис Ромашкинаыс, чужöмыс бöра чорзис, синнэс пондiсö вирдавны, юалiс. — Мый думайтан?

— Мый колö думайтнытö? — эз вежöрт Митиперыс.

— Мунам!

— Кытчö? — челядь моз юалiс Митиперыс.

— Катяыс дынö!

Дугдiсö баитны. Сьöд тараканыс, кöда эз пов овны керкуас öтнас, чирскис гор увтын. Котыс пукалiс пызан сайын да синнэсö куньышалiс, видзчисис сёйны. Лабич увтöт пызанлань котöртiс шыр.

— Васька! — Митиперыс ыкöстiс котыслö. — Кут шырсö.

Васькаыс кыдз нагладь кунис синнэсö и бытьтö эз адззы добычасö.

— Сёясö тэнö каньыткöт öтлаын шыррес, — висьталiс Ромашкинаыс и бöра шуис. — Мунам!

Митиперыс эз баит. И бур, что Ромашкинаыс кытчöдз нем эз тöд Лисавета Яковлевнаыс йылiсь.

— Ме ветла да юöрсö тэныт вая, — керкусис петтöн, кыдз аслас роднялö висьталiс Ромашкинаыс.

Митиперыс гогыньтыштiс юрнас.