Сьöлöмö туй



1

Кöдзыта мунiс тöлыс, сэтшöм мороззэзöн, что кувтöдз кынмисö каёккез. Кöдзытыс öтöрын сотiс рожабаннэз. Но Öмель, мед и пöрись ни, кыкьямыс год ни тыртö, кöдзытiсь оз пов: одз асылöн доддялiс вöв и шондi петан гöгöр мунiс сюла. Юж тöвся туйöт вöв ружтышалiс да котöртiс. Додь увтын дзуртiс лым. Мороз то тачкöтiс-орсiс йöрöн, то кыдз чер обухöн брякöтiс пуэз бердö. Лымöн куржавитöм вöр, топ повзьöм, сулалiс вöрзьытöг. Öтiк рака эз шыась и эз лэбзьы, каёккез эзö быркайтö. Ыббез узисö лым увтын.

Вöв котöртiс юж туйöт, сыбöрын кежис шором дынö, кытöн эз ни вöв туйыс, и колiс болскыны лымöт пидзöссэзви, а мукöдпыр и кынöмöдз. И вöлыс мунiс да пырскайтiс, чожа мыдзис, сувтчышалiс, лолалiс кынöмыс сорöн.

Ямщик чеччывлiс додись, вöйлiс косви лымö, педзис-жöдзис: кыт баöн, кыт коккес вылын кыссис вöлыс одзö, тальны дженыт коккезнас Гнедколö туй. Пымавтöдз пессис, тэрмасис бы уджавны — тöвся лун дженыт: шондi мыччисьыштлас недыр кежö, топ öддьöнжык сайкöтас русö, и бöр саясьö. öнi эшö шондiыс эз тыдав, но югдiс сiдз ни, что юр вевдöрын кымöр пондiс вачкисьны лöз и лöз кынмöм шучтыдалана йы вылö. Öмель кеписьнас чышкышалiс сьöд рöма тошыс бердiсь гыöр, сьöкыта чушыктiс, быд вынсис кыссис шором дынöдз, бытьтö сытöг уджсö эз бы керö.

Ыб вачкисис чочком паськыт пызан пöв вылö, только межаыслань вöлi невна вылынжык. Вöрланьöт моз Гнедко пондiс мунны кокнитжыка. Öмель кыссис додь вылö, сувтiс пидзöссэс вылö да кутчисис вожжиэз бердö.

Шором дынöдз вöлi матын ни, и сэтöн... Вöв коккез увтiсь лым пытшкись сьöрсьöн-бöрсьöн чула-чала лэбтiсисö таррез. Гнедко пырснитiс нырнас, ордчыштiс, пондiс орсны пеллезнас — повзис, но ямщикыс шатёкöн швычкис бöрсяняс. Шаг и... Додь ож да полоз коласын Öмель синнэз вылö усис тар, кöда топ додь ожыс да полозыс коласö ачыс сюйыштöма юрсö.

— Тпру-у-у, Гнедко! — ямщиклöн пиньöвтчис öмыс. — Сулав, чомор! Он адззы мый петö?!

Öмель сьöласьтöн чеччис додись, ружтытöн додь ож коласiсь мездöтiс кулöм ни кайсö, дыркодь тарсö кеписсезнас видзис одзас, думайтiс, мый сэтшöмыс лоис, кыдз сiдз вермис петны, что кайыс сюрис, кытчö бы эз ков шедны.

Морт медодз думайтiс добычасö вайны гортö, но сэтöн жö повзьöтiс дума: «Страмыс!.. Весись эд юрсö, кытчö оз ков, эз сюйышт. Добро, Öмель, эн видзчись! Вöрдö мыйкö бöра вöрдядьыс, тьфу!» Пöрись сьöвзис шульга пельпоныс вевдöрöт и ылöжык швыргис тарсö.

Полöмöн вöр вевдöрö мыччисис шондi, кыдз бы кынмис кымöрас — бледöтiс. Лоис эшö кöдзытжык.

— Но, Гнедко, вöрöтчы! Матын ни шоромыс. Локтам, тэчам доддяным шоромсö, ваям гунаыс вылö, вились, ме тэнö, зон, шоччöтышта. Ась совет лодыррес горвыввезаныс кишкаэзнысö пöжöны, старик видзöтыштiс посадлань, но гортланьын эшö некин эз тыдав.

Томся-томöн пондiс уджавны Öмель, некытшöм уджись эз пов, мый пондас кö керны, тöв и гожум уджалö, люзь пымалö, вывсис пар кайö, некин сьöрись оз кольччы, но öнi... Кöдзытiнын лолыс тырö, пöдтö, сьöлöмыс чеччалö.

Дед адззис ни шоромсö, нач ни матын вöлi сюыс, да бöра эз ло сы моз — дзугсис уджыс: швачкис-орис завёрткиыс. Гардсьыштiс-бергöтчыштiс шульга додь ож гöгöрöт Гнедко, пырснитiс, сувтiс.

— Рать тэнö, олан, дед сьöвзис лым вылö, вöвкöт, кыдз былись зонкöт, баитiс. Адззан, Гнедко, мый петö. Луныс талун сералö асывсянь, кöть тэ горзы, но кöть мый ни, колас додь öжсö кыдзкö кышавны.

Пыдына лолалiс Öмельыс, кöр тöдiс, что пыдын лымын да этатшöм кöдзытiнын орöм завёрткисö кокнита он гардышт, да мыйись эшö? Додь нырыс бердiсь гезокöн или... Кушаксö пöрччалiс коссис.

Кöдзытiнын да пыд лымын уджавны — не сьывны да йöктыны, дед ёна пессис додьыс гöгöрын. Вöлыс бергöтлiс юрсö, морт моз ылöсöн видзöтiс хозяиныс вылö, кыдз бы висьталiс: «Эн тэрмась, старик, эн тэрмась! Кытчö сiдз тэрмасян? Кин сьöрö бы вöтчан?»

Öмель уджалiс чожа — сьöлöм сылöн сэтшöм вöлi, еныс сэтшöмö сетöма мортыслö, что тэрмасьтöг уджавны оз куж, и додь ож чожа вöлi кышалöма додь бердö.

Только шором дынын старикыс жагмыштiс, сюсö додьö тэчис, кыдз нянь шором пызан вылын бергöтлiс: быд шепсö öктiс лымыс вылiсь, сiдз кыдз тöдiс, что не назём пондас кыскыны, а ваяс гуна вылöдз нянь — енöн сетöм тор, кöда вердö.

Киэзöн уджавны стариксö велöтiс эшö айыс, кöдö тöдö и оз, бытьтö адззылiс кытiськö вöтöн да öштiс: одз кулiс айыс, кöда öтiкö тöдiс — уджалiс да уджалiс, уджавтöн ыб вылын и петiс лолыс. Öмельлöн и мамыс мужикыс бöрсянь дыр эз ни ов: кулiс челядясьтöн, сiйöн зоночкаыс одз и гöтрасис. Инь шедiс жöникыс кодь жö чож, öтiк вöлi умöль, что челядьыс дыр эзö шогмö. Сэк Öмель вайöтiс тöдсаэзлiсь зонка-быдтасöс, недыр мыйись босьтiс быдтыны нывкаöс, и лоисö керкуын челядь — гаж пырис Öмеллезö.

Отир моз пондiс овны мортыс: эз тшыгьяв, быдтiс челядь — отсасиссез видзчисис, а сэсся мый колiс? Сэтöн и богатство эд бы.

Быдмисö челядь кыдз роднöй соя-вона, аймам торйын эзö видзö: вердiсö öтiк дозiсь, узьтöтлiсö öткодь ольпась вылын, шонтiсö öтмоз. И кыдз овлö, зоночка гардчис ай дынын, нылочка ниртчис унажык мам дынын. Быдтiсö челядь, надейтчисö; что Помич быдмас да пондас отсасьны айыслö, но зонка быдмис асныра. Кöр гöтрасис, Öмельлö зоныссянь олан эз ло — чер да пурт лоис Помич киын. Кыдз вежалун, кыдз томлö шедас тагья юан, нач бöбмас, быдöн вылö: «Вия! Юррезнытö масьта!»

Сэк вöлись Öмель и вежöртiс, что Помич эз вöв роднöй зон и оз ни ло — няньсö сэтшöмсянь он сёй, и висьталiс быдтасыслö: «Помич, дзескыт кö керкуас, верман петны да иньыткöт овны мöдiлаын. Öнi тшыгйöн он ни кув, вердан ни асьтö».

Сiдз Öмель янсöтчис быдтаскöт, кыдз эз и вöв вежöмыс.

Мöдкодь вöлi Лукша, кöть и Помичкöт быдмисö öтiк позын, öтiк мам борд увтын: учöтсянь вöлi чож, вежöра, кывзiсис.

Аймам Лукша вылö эзö горзö, кöр нывка быдмис, петiс ни жöник сайö и олiс кыдз колö: асьсö эз серав не уджын, не отир одзын.

Öмельлöн мöд ныввес, кöдна чужисö сёрöнжык, кöр вöлiсö ни быдтассэс, быдмисö жö. Лизаыс петiс жö ни жöник сайö, Лукша моз жö олiс. А Öпимöс кыдз бы сетiсö айка сайö: картаö вайöтiсö Öльöшöс, кöда айыс сьöрись кольччис годовöйсяöн. Мамыс сылöн вöлi визыв инька, некытшöм уджись эз пов, öтнас быдтiс зонсö и эз повзьы öтнас кольччыны гортас.

Öльöш — туяна морт, прокмис уджавны, некытчö эз йöрмы, эз сибды. Уджалiс Öмельлöн зять — ош моз бергöтiс удж, кöр и дзескамлiс керкуын, кыдз сюра пороз. Овлiс сiдз, лöгасясö кö мыйись-мый кык мужик — горшшезныс бердö чуть оз кутчисьö или черрез бердö оз боссьö.

Öмель пöрись ни, но мывкыдыс томсянь немымда эз вежсьы: чож старикыс да лёк, мый абу кö сы сьöртi, öзйö и сотö — матö эн лок. Зятьыс сэтшöм жö чирей — чорыт, кыв дынас оз сибöт.

Сiдз и олiс Öмель зятьыскöт öтiк керкуын: талун тесть да зять роднöйся-роднöйöсь, ашын вермасö лоны враггезöн. Кыдз бы орсöны-олöны зятя-тестя, кыдз пон да кань или кык ош, а коласаныс Öпим, кöдалö кыдзкö колö лöсьöтчыны овны айыскöт и мужикыскöт.

Сiдз овсис — пöрисьмис Öмель, некытчö зять да ныв дынiсь эз пышшы, эз дзебсись, отсасис пестунничайтны кагаэз нылыслö, кöда челядьсö кольттялiс кыдз курöг, кыдз год — сiдз и кага шогмö, но кыдз год — сiдз кага и кулö. Овмöтчисö только Колька, кöда мамлöн шогмис мöдiк кагаöн, и Лёнька, кöдалö гожумнас тырас куим год. Öмель медöддьöн любитiс Лёнькасö; внучоккöт чеччис и водiс, кытöн дед — сэтöн и внучок. Только тöвнас кöдзытiнын учöтыс оз лысьт пуксьыны додьö да мунны уджавны.

Öмель öнi уджавтöн сизимись ни касьтылiс Лёнькасö, сизимись ни думаэзнас зоночкакöт баитiс-висьтасис, кыдз додь увтö шедiс тар, кыдз орлiс завёртки, кыдз додьö тэчис шоромись сю. «Лёнька, Лёнька, — сьöкыта лолалiс старикыс, сувтчыштiс уджавтöн, видзöтiс гортланяс, кöть и деревняыс эз тыдав. — Кага тэ менам! Мый одзын жö страм тарыс заргис юрсö додьыс увтö?! Оз я бöра керкуаным вöзйись страм шогöт, оз я бöра пышшöт бы тэнö ме дынiсь. Кристос миянкöт...» — дедлö сэтшöм лоис умöль, сьöлöмсö топ пидзыртiс кинкö — синваэз, петiсö. Но эз-эз да умöль думаэсö вашöтiс уджöн: вынöнжык, чожажык кутчисис кольтаэз бердö, кöть и нач эз ло гажыс, сё тарыс вöлi синнэс одзын, кыдз бытьтö бесыс сулалiс бöрас, нерис, пеллес одзö шушкис: «Старик тэ, старик, мыйлö ни пессян-уджалан? Мыйлö? Тэныт эд кольччис овнытö нач етша — талун ловья, ашын кулан...»

«Но и мый кула кö? — кулöмись эз пов Öмельыс. — Ась кула, век эд ог понды овны».

И думаэз бергалiсö аслас олöм гöгöр: томсянь, кытчöдз важ оланыс эз разьсьы, эз тöдлы мый сэтшöм кынöм сималöм. Мунас кö уджавны, сьöрас пыр босьтлiс ведра тöран туисö сук тагья ырöш, кöдö юыштас да бöра уджалiс, юыштас да бöра уджсö бергöтiс. Ырöшсянь пыр вöлi пöт, эз мыдз — рытсянь асылöдз или асывсянь рытöдз вермис керасьны черöн или гöрны. Мымда уджалiс — аслыс керис, мый кöдзис да быдтiс, сiйö и сёйис, эз бы уджав, эз бы сёй, а öнi... Вот царьсö вашöтiсö — олансö бергöтiсö, вежисö. Öмель топ уджалö сiдз жö, но берся ни адззылiс и пешлiс: мунас кö уджавны, оз ни туиснас тагья ырöшсö сьöрас нöбöт, абу ырöшыс, и няньыс абу, кöр лун тшыгйöн уджалö, кöр мыйöнкö тыртас кишкапонсö — кулöмись сёяс и быдöс сэтöн! Буржык оланыс кытчöдзкö орддьö, оз тыдав...

Колхозö Öмельыс пырис зятьнас, отир сьöрись эз кольччы, кытчö быдöнныс, нiя сэтчин жö: кытшöм дозiсь сёйöны быдöнныс, нiя сэтiсь жö. Сёйöны то öтiк дозiсь, дак и уджавны бы быдöнныслö колö öтмоз, а петö, что...

Талун Öмель уджавны мунiс медодз, а отирыс кытöн? Мый горттэзаныс керöны, кöр шондiыс ни мыччисис? Мыля стариклöн сьöлöмыс колхознöй удж понда пессьö, а мыля отирлöн юрыс колхоз понда öддьöн оз вись?

«Ой-ой, Гнедко! Мый нö сы дырна керöны горттэзаныс? Менам тай додьыс тэчсьö ни, чожа гуна вылын лоа, а сё некин оз тыдав, или бригадирыс öтнамöс сюсö ваявны иньдiс? Мый жö лоас? Кыдз жö одзлань пондамö овны? Ме то мый? Талун эм, ашын абу, а Лёнькаыс!» — бöра юрыс пондö висьны внучок понда, учöтыс бöра жаль, сы понда тöждö.

Мороз гöгралiс уджалiсьсö, сiдз бы и чеплялiс ныр гöгöрсö, пырис важ пасёк увтö, но Öмель кöдзытыслö оз сетчы, додьсö зэлöттöн нельки киэзсис лым вылö шентiс кеписсез да сiдз и уджалiс, а ачыс пöв синнас видзöтышалiс деревнялань и сё эз адззы, медбы кинкö локтiс вöлöн.

Старик зэлöтiс додьсö, кытшöвтiс-мунiс додьыс гöгöрöт, быд шеп-тусь босьтiс. Сю дынын морт уджалiс, а кынöмыс сималiс.

— Тшыгьявны и колö каляннэзлö! — дед эшö öтпыр видзöтiс гортлань, видзчисис уджалiссесö, кöдна сiдз эзö и мыччисьö. — Тшыгьявны и колö öнджаэзлö да унажыклö тшыгйöн кувны, грех кöть абу еныс одзын. Мый бы öнöдз гортын керны? — пондiс дед жалейтны ассис зятьсö, кöдö, висьтавны кö веськыта, заргисö бригадирö, öтлаын вожöтiсö и завхозавны. Сiя ой и лун жöдзис, гортö эз и пыравлы, эз и сёйлы. А мый сэтiсь? Фермаын куканнез кулöны, мöссэсö бöрöн кыскöны. Немöн вердны подасö, а гортын мыля нö эм мый сетны?

— Бес оланыс! — старикыс висьталiс аслыс и вöвлö шуис. — Но, Гнедко! Вöрзьöт додьсö. Ваямö сюсö гуна вылöдззас, сэтчин ме тэныт жуг одзат пукта, сёйыштан, да вöлись пондам одзлань уджавны.

2

Эз ешты локны тулыс, Öмель пöрис коккес вылiсь, пондiс сьöкыта шогавны: пыктiс юрыс, лоис кыдз ыджыт гырнич, синнэс только дзуз видзисö. Сьöлöмöдззас ой и лун лыйис зубыт, сотiс би жар. Дед кодьöн синнэсö эз осьтлы, куйлiс то западня вылын, то гöбечын, ружтiс лун куим-нёль ни, öмас пань ва эз босьт, эз баит.

— Ай, кулан эд! Кöть бы няньтор сёйин или пöжалöм картовсö пешлiн. Тэ понда сысъялi сукжык ырöш — чöчильыс рытнас шоналас.

— Нем оз ков, — киргышалiс шогалiсьыс.

— Дедук, эн кув, гажтöм меным лоас, — чочком юрсиа Лёнька гардчис дедыс гöгöрын, сiйö и керис лельгис, то жалейтiс Öмельсö, то мыйкö юасис или висьтасис — кыв эз шоччись, кöмтöг да вешьянтöг котрасис нятьöсь джоджын.

— Ох, Лёнька! Сёйсис няньыс менам. Коля ни ме тэнö. Пондан овны Колька воныткöт, мамыткöт да тятюыткöт. — Тэ меным, дедук, колан.

Кувны лöсьöтчис пöрисьыс, но Öпим айсö эз бы лэдз кувнытö, кöр старикыс пригодитчис эшö. Сiйöн инька и котрасис тöдiсь старухаэз дынö, кöдна эзö шванитчö, вовлiсö — чертитiсö, сёпкисö, сьöлалiсö, и мыйкö эд, батя, отсалiс: Öмельлöн юрыс жагвыв ямис, эз понды сотны жарыс, старик осьтiс синнэсö, пидзöссэс вылын кыссис еннэз одзö и пондiс юрбитны.

Лёнька бöра сэтöн и эм ни, юасьö:

— Деда, тэ мый керан? Юрбитан я мый я? Кольканым тай шуö, еныс пö абу.

— Еныс бы, Лёнька, эз кö вöв, ми бы тэкöт эгö вöлö. Колькасö школаас бессэз велöтöны! — дед лöгасис. — Лёнька, сiдз эн баит. Öтöрсис кыдз пырта шатьсö да бöр гöгöртö кыдз чирсъя, сэк пондан тöдны.

— На чирсйы. Ог эд понды горзыны, — зоночка бöрсö бергöтiс дедыс одзö.

— Мöдöтчит, — Öмель раммис. Лёнькалiсь малыштiс юрсö, чеччис-сувтiс еннэс одзись, жагвыв кыссис комö, горöдзись босьтiс пöжалöм картов, пуксис пызан сайö, кулис картов бердiсь кышсö, курччöвтiс и пондiс аклявны. Но сёяныс эз тöр.

— Дед, тэ тай быль кувны ни мöдан, сёйнытö ни он вермы, — Лёнька кыдз рад — сералö пöрисьсö.

Öмель шы эз сет: сэтöн жö босьтiс пуовöй пань да кыдз шваткис внучекыслö кымöсас, сiдз Лёнькалöн öмыс и резьдiс, пондiс керкутыр базанитны — синваыс шорокöн визывтö, но зоночкаöс некин эз жалейт, мамыс жö содтiс:

— Эн горзы! Сiдз тэныт и колö. Пондан тöдны, кыдз дедтö сёйтöнняс нерны.

Лёнька вешшис пызан дынiсь, пондiс гуддьыны нырпыссэз, кывзiсис, кыдз öтöрын уннялiс пурга, лымöн чажöтiс-коялiс öшыннэзö. Дзуртiс короминна вылын пöв. Пон шыасис сарайын. Жолькнитiс посöдз ыбöс, и керкуö пырис Öльöш. Лёнька вунöтiс ни, что дедыс öнi только паньöн сяткис кымöсас, котöртiс айыслö паныт, жмитчис кöдзыт коккес бердö, пондiс ошшасьны, что дедыс веськалiс ни, сёйис ни пöжалöм картов, ашын кыкöн мунасö кыйны кöччез.

Вöлi асыв. Öтöрын лöз югдiс. Югыт видзöтчис керкуö кынмöм öшыннэзöт.

— Ой кыдз нöбöтö, — горöтчис Öльöшыс. — Не син, не пель... Тыртö-гладьöтö, понлöн след оз тыдав.

— Тэ кытöн нö бöра одза-одз вöлiн? Этатшöм погоддянас... — Öпим пеничайтöмöн горöтчис мужикыслö.

— Уджавны отирсö иньдi...

— Сiдз тэныт этатшöм погоддяас и котöртасö уджавнытö. Öльöш кеписсесö пуктiс горвыв дорö, гор бердын пондiс шонтны киэсö. Чужöмыс вылын аскодя шог, бытьтö шогалö или сьöлöмыс бердын сьöкыт из кыскалö. Эз-эз да горöтчис:

— Бöра талун кукань черпезьдöма, — вирснитiс нырнас, содтiс: — Сёясö куканнес понда... — Кывзiс, кыдз сьöлöмыс пессьö, шуис. — Сельсоветсис предыс важын ни пиннесö кеслö. Судитны лöсьöтчö...

— Мортсёйисьыс! — комын чирзыштiс Öпим. — Мортсёйиссес сiйö и видзчисьöны, кыдз бы отирсö сёйны. Мыля асьныс озö мунö фермаас уджавнытö?! Ась бы пешлiсö подаыс гöгöрын бергавны! Или иньсö бы Öник Иваныс куканнес дынö иньдi!

— Иньдас сэтшöмыс... — сьöкыта горöтчис Öльöшыс, думаэзнас кытчöкö бы дзебсис-пышшис эта оланiсь. Но кытчö? Туйыс гортiсь пöдана — колхозö кöрталöмась, бригадирö сийöсалöмась, кытiсь мезмыны оз вермы.

— Пуксьы да сёй пöжалöм картоввесö. Дристöсь куканнес понда эн горзы! — висьталiс Öпим мужикыслö.

Öтöрын кылiс, кыдз вынсялiс тöв — унньöвтiс, мутшнитiсö керку угöввез.

— Оз менам симав. — Öльöш пуксис лабичö, öшöтiс юрсö — тöждö.

Керкуын лоис ыркыт: кöдзытыс кыткö пырис öтöрись, ыркöтiс. Öмель жагвыв кыссис гор вылö. Лёнька вöтчис бöрсяняс, бобгис: «Дед, ме тэ бокö вода».

— Мый тэ страм колхозыс понда тöждан?! — Öпим пондiс пизьны. — Миян я мый я тэкöт сэрпöсь колхозыс? Отирлöн юррезныс тэ моз озö висьö öтласа удж понда, а тэ ой и лун, — сьöвзис, содтiс: — Керисö морт виян олансö миян вылö.

Мужикыс паныт эз шыась, сылöн сьöлöм телепитiс-кыскис ни гуна вылö, кытöн ойбыт öвинын тшупöтчис-косьтiс сю Öндреян Иван, и бригадир асывсянь тöдiс бы: вермис я ойнас косьмыны öвинас сюыс, сiдз кыдз Öндреян Иван вöлi кокнит мывкыда, мый юрас пырö, сiйö и вермас керны: или ойбыт уджавны, или узьны да висьтавны, что песыс уль, оз сотчы.

Пурга уннялiс керку угöлын. Öльöш чеччис лабичись, юрыс вылö пуктiс бырöм шапка, нинкöммезнас сувтiс джодж шöрö, кыдз бы öшис.

— Мыйлö бы олансö вöлi дзугны?! Мыйлö бы колхозас вöлi отирсö подаыс моз жö заргыны? Мый сэсь? Буржыка я мый я пондiмö овны? Поннэсö и каннесö ни тай сёйимö, а сё ошкöны: колхоз да колхоз...

— Уна эн тöд. Кузь кыласö öнi озö радейтö. Кыдз бы кывтö эзö орöтö! — Öльöш орöтiс иньыслiсь басни, петiс керкуись, бöрсяняс зубыта жвангис ыбöс.

Ыбöсöт ештiс керкуö чепöссьыны кöдзыт, сiя кизерик кудель кодь тшынокöн катыльтчис порог дорсянь веськыта пызан увтöдз.

3

Öтöрын вöлi эшö рöма-дзара, но тыдалiсö ни керкуэз, столаэз, кöдна гöгöрын орсiс-гардiс лым пурга. Лэчыт тöв чышкис-нöбöтiс ойланьсянь лунлань, брякöтiс стыннэз бердö столаэз, лымсö сюйис керкуэз коласö, шучкöп мунiс Öльöшлiсь важ пасёк. Вылын посад весьтын öшалiс тöлiсь, кöда вöлi быдса ни.

Бригадир гортсянь иньдöтчис гуналань, пидзöсöдз болскис лым, сiдз кыдз туй вöлi тыртöм и гладьöтöм сiдз, что одзын нем эз тöдчы — öтiк чочком дöра. Öльöш сьöрö вöтчис поныс, ниртчис хозяин коккез бердö.

Югдiс топ öддьöнжык ни. Рака ни лэбзис, тöвкöт вермасис, быд вынсис öвтiс борддэзнас. И пантась жö сэтöн, видзыс шöрын, Öльöшлö Öник Иван, кöдö вöр царьыс я мый я кыскалö одза-одз, колö и оз, быдлаö сюйö нырсö. Талун Иванлöн кöин кодь синнэз ыждöмась, болскö лымöт, кынтö нырсö да мунö, öвтö киэзнас ракаыс моз жö.

Бригадир ылiсянькодь адззис сельсоветiсь предлiсь чочком югöра синнэз, кöднаö топ кинкö койыштöма пöим, и пытшксис некöр и нем он адззы, нем оз тыдав, мый думайтö мортыс, дзик пыр лёкся-лёк, öтiк гаж абу. Тыдалö, что гручкö пиннесö, ньылалö тшыг пон моз дульсö, бытьтö лöсьöтчö пурны бы, но Öльöшсö эта только пондiс гажöтны, бригадирлöн öзйыштiс дума: «Он сёй, Иван Петрович! Юрö гöна, бöрö... Виньдан!» — и ачыс эз казяв, кыдз шынньöвтiс.

Öльöш отир коласын гажа морт, етша кöр кин вылö весись будзгылясьö, етша кинкöт пурсьö, эмись и абуись уджалiссезöс оз зэлöт, а пыр баитö бытшöма. Иван Петрович ассяма: пыр уна тöдö, уна адззö, уна керö, пыр кинкö вылö мыйкö понда лöг, пыр пиннес гер, нето отирсö сералö, нето видö. Чочком вевья синнэзас пыр лёк югöр, öмыс пиньöла, пантасяс и вунöтö здоровайтчыны, но оз вунöт эрзыны. Öнi тöв паныт бригадирлö ыкöстiс:

— Бригаде-е-ер, горзыны колö, а тэ öмтö пиньлалан — сералан. Бöра абу я талун ойнас пермаас кукань кулöма, — тöв уннялö — лымöн паныт коялö, басни летö торрез вылö, и мортлöн голос кылö кыдз кöинлöн: «У-у-у, этö-ö-ö-ö...» Или топ пон вувтö: «Гав-гав-гав, бригадир, у-у-у. Бригадир, мыля гортат куканьыс оз ку-у-ув, у-у-у, гав-гав, а фермаас кулöны, ав-ав-ав. Умöля вердан колхознöй подасö, бу-бу!»

«Тэ я мый я ме местын подасö синъян?! — бригадирыс невна только эз резгы Иван Петровичлö, но курччöвтiс кывсö, ружтыштiс и бöра арттöммоз шынньöвтiс, кыдз бы нерис сельсоветсис предсö.

— Бригаде-е-ер, дер-дер, — тöв уннялiс мужиккес гöгöрын, баснинысö пышшöтiс. — У-у-у.

Баитöны видз вылын бригадир да Иван Петрович, кыдз бы нерöны пургасö — öтыс лöгалö, мöдыс сералö. Öльöшлö мылякö тöдвылас усис, кыдз мöйму сiя предсö одз асывнас кутiс гуна вылiсь: Öник Иван пырöма кыткö гуна пытшкас и зеппезас куралö сю, кöда рытнас тöлöттöг кольччис ведра-мöд.

Сэк вывтi ни сьöкыт вöлi оланыс — уна кулiсö тшыгсянь, но некин эз лысьт колхознöйсö öтiк тусь вöрзьöтны. А вот Иван Петровичыс гусясьтöн шедiс. Колiс бы сiйö зэлöтны-норасьны, сымда бы и вöлi эд — эз ни бы эстöн пиннесö гручкы, но Öльöш сэк только вак-вак серöмтчис да шуис:

— Иван Петрович, мешöк эд колiс гортсит босьтны и сэтчö куравны да нöбöтны, а тэ зеппезат... Уна я сэтчин тöрас?

— Мымда тöрас, — мур-мар горöтчис Öник Иван, чочком синнэс був-бав, вирснитiс нырнас и петiс гуна пытшкись.

Эта бöрсянь колiс бы мортыслö спасибо висьтавны, а сiя öддьöнжык пондiс лöгавны: кытöн пантасьö, сэтöн и мурзьö-курччöвтö бы.

Натьтö, кöркö предыс да бригадирыс люкасясö жö кымöссэзнаныс, а талун Öльöш гажöн юалiс:

— Иван Петрович, кытчö нö сы одза этатшöм погоддяас бöра шыбыльтлiн? Мый нö бöра одзза-одз гуналаняс ветлöтан? Менам понö, видзöт жö, бöжсö лэдзис да некытчö бы оз мун.

Иван Петровичлö, ежели кö сiя ылöса морт, натьтö, медодз тöдвылас усис, кыдз сiйö бригадирыс кутлiс гуна вылын, но сiя этö немöн эз мыччав, бобгыштiс: — Эн серав! Тэ понда ме одза-одз лымсö болска, нырöс кынта. Öнджа... — ышки-пойки лолалö, лöгсянь пöдö-баитö. — Тэ лыддисян бригадирöн, а ме пон моз котрася, видзöта, мед сюсö некин эз гусяв.

Бригадирыс горöтчис бы: «Тэ моз быдöнныс я мый я гусясьöны», — но аскадö вермис асьсö, мöдiкö висьталiс:

— Кытшöм сю, Иван Петрович? — öмыс реш видзö-сералö. — Некытшöм сю гунаыс вылö эзö кольö. Кöда эм, сiя öвинын косьмö. Öндреян Иван талун тшупöтчö.

— Öндреян Иваныс эд тэ кодь жö нинкöм, кöр колö уджавны, иньыслiсь котöртö зуавны.

— Иван Петрович, а тэ он я мый я зуасьлы?! Помечанаöс медавлан?! — бригадир синнэзын бес йöктö — гаж чеччалö.

— Пиннетö эн герйöтлы! — ыкöстiс Иван Петрович, тальччис бокö, лымö вöйис пидзöссэсви. Унньöвтiс коласöттяныс тöв — лымöн койыштiс рожабаннэзаныс. — Сыбöрын пыралан сельсоветас!

— Мыйлö?! — тöвлiсь шы вермис-ыкöстiс бригадир, шагньöвтiс предыс весьтöдз, сувтчыштiс, синнэзас бы пантасисьлö видзöтiс, да эз вермы: мöдыс юрсö бергöтiс.

— Талун жö складдэзат ревизия пондасö керны! Кылiн?!

— Керö. Мый видзö? Важын ни колiс керны, то шыррес вермасö сюсö сёйны, сыбöрын пондат шуны ме вылö.

Янсöтчисö мужиккес лымöн вевттьöм да тöлöн гладьöтöм видз вылын, гуна туй вылын. Öльöшлöн кыдз гыркас мыйкö сотчис, лоис сэтшöм умöль, что некытчö ни бы эз видзöт, пондiс модьны ныр увтас: «Мортсёйисьыс! Ась керö ревизиясö, ась! Мый сiя складдэзсис сэтшöмсö адззас, медбы менö дойдны? Тшыгйöн кула, но колхознöй сюсö öтiк тусь ог вöрзьöт! Кинлö колö, ась сёйö. Бригадиравнытö сэсся ог понды, ась кöть юрöс кералöны!» Кыдз не ачыс бригадир локтiс öвиннэз дынöдз. Öтiк öвин увтiсь гардчис-петiс кизерик тшын, кöдö сэтöн жö летiс-койис вына тöв. Öвин увтiсь петiс калян кодь Öндреян Иван — кöсыник мужик, кöда некöр шынь оз кер, но кылыс отир дынын некöр оз шоччись, лёбö, кыдз одзсис лыддьöтö книга. Öнi казялiс бригадирсö, пондiс сярзьыны:

— Öлексей Иванович, тэныт оз, батя, узьсьы. Котрасян поныткöт одза-одз. Ме бы тэ местын иньтö эшö окалi да окалi, кöр тэныт оз ков тшупöтчыны и тöлöтчыны. Ме, кывзы, гортын эг узь и ог тöд, мый сэтчин керсьö. Натьтö эд, Öльöнö бöра петалiс соседöкöт окасьнытö. Сiдз! Тöн рытнас гортiсь мунтöн сiдз и висьталiс, нем пö тэ кодьыскöт овнытö, кöр гортiсь пышшалан. Думайтан инькаэс вермасö овны кöть öтiк ой мужиккестöг этатшöм оланас, кöр вывтi бура сёйöны и госныс пизьö? Иньдiн ни кытчöкö уджавнытö Öльöнöс? Тэ бы то сiйö медсьöкытiнас тургин, медбы коккес вылiсь усьтöдз туртiс да йöз мужиккес вылö эз видзöтлы, — нырнас вирснитiс мужикыс, бытьтö сiдз и колiс.

— Тöлöтчыны иньдi...

— Ой тэ! Бöра эд мунас, и гортö ог ешты локны, кöть бы неделянас öтпыр петух моз китöстi да Öльöнöс сорсöттяс кокыштi, то ета... Поплёбканас оз эд понды вердны.

— Котрась. Ме пукалышта öвиныс увтын.

Öльöшлöн сьöлöмыс вылын сё вöлi недолыт, сьöкыт, кыдз мыйöнкö кинкö одзын вöлi виноватöй, мед и Öндреян Иванкöт баитiс-сералiс, баснинас тойыштiс бы гудыра думаэз: синнэс одзись эз öш Öник Иван. Бригадирыс пырис öвин увтö, пуксис би бокö. Одзас чискис-сотчис уль кыдз, лöз югöра би нюжласис пессэз вылын, öгралiсö шоммез, пыкис жарöн. Бригадир пукалiс да видзöтiс биыс вылö, видзöтiс, топ пондiс овны кытöнкö ылын. Сэтчö локтiс Öндреян Иван, пырис öвин увтö, кекеркаöн пуксис Öльöш бокö, вирснитiс нырнас.

— Чожа тай? — юалiс бригадир.

— А мый дырсö керны? Кыдз сёям, сiдз иньöкöт и олам эд. Ог ни ме мужикыс вылö туй: пыри керкуас, малыштi иньöлiсь шагыра каджсö, думайтi бы мыйкö уджалыштны жö, а сiя юрсö эз и думайт лэбтыны. — Бöра вирснитiс нырнас, шуис. — Ой и нöбöтö! Син — не пель... А тэнö, Öлексей Иванович, мыйкö вылö складдэз дынö корöны ни. Начальство öксьöмась. Мый бы поннэслö колö складдэс дынын одза-одз. Лёкöсь, кыдз менам Бускоö жö. Гир-вар горöтчисö, медбы тэрмасин!

— Киннэз? — юалiс бригадир.

— Ета... Öтiк эд миян медлёк начальникыс. Иван Петровичлö эд оз узьсьы. Сулалö — пиннес гер. Господи, кыдз сэтшöмыс бокын иньыс узьлö? Ме бы Öксиння местын джагöтчи, нежели водi Иваныс бокö. Кыдз думайтан, Öлексей Иванович?

Алексей Иванович думайтiс мöдiк йылiсь ни: сьöлöмыс мыйиськö полiс, сiйöн басниöн öштiс бы повзьöмсö, ёртыслiсь юалiс:

— Он пов веськыта баитны начальствоыс йылiсь? — А мый бы повнытö? Ме эд ог вöттэзöс вöтась, мый эм, сiя и эм — быдöн одзын эд оламö.

Пурга уннялiс тшыг кöин моз, немымда эз мыдз гардны лым.

Öльöш петiс öвин увтiсь да мунiс колхознöй складдэз дынö, кытöн сулалiсö ни мужиккез — ревизионнöй комиссиялöн членнэз.

Складдэзын сю уна эз вöв, да и весаэз эзö вöлö. Сю меряйтiсö кадуляöн: куралiсö öтiклаись да кисьтлiсö мöдiклаö, öтiк йöртöт ректiсö, мöдiкö тыртiсö. Медодз уджалiсö рудзöг дынын, сыбöрын вöрöтiсö ид, шогдi, анькытш, зöр. Медодз уджалiсö кöдзыссэз дынын, сыбöрын сёян сю куралiсö.

Асывсянь рытöдз уджалiсö складын. Петiс сiдз, что сюыс вöлi невна унажык, нежели пуктiсö арöн да гижлiсö документтэзö.

— Завхоз! — пондiс няпкыны Öник Иван — пиннес гер. — Кысь нö сюыт содiс? Пиялiсö я мый я сю туссес? — синнэсö мöртiс Öльöш синнэзö. — Эн я запты гортат нöбöтны?

— Заптi. Мыля ог? Сiйö и кера тай öтiк тусьöн гортö кыскала да эг ешты быдöс нöбöтнытö, — пеничайтöмöн паныт эрзыштiс бригадир.

— Судитны пондасö эд!..

— Эг ме гусяв öтiк тусь, — пондiс дорйисьны ни бригадирыс. — Арнас сюсö пуктiмö быд кадуляö чукöрöн, а тi öнi курасит только дорресвиöн.

— Судыс видзöтас! — кöстiс Öник Иван, сёйис бы бригадирсö.

— Судитö... — медбöрын висьталiс Öльöш.

Ревизия бöрсянь кад уна эз чулав, сё эшö вöлi тöв, эшö лолалiсö лёк мороззэз, а Öльöшöс корисö ни судö, кытöн гардiсö эмсö и абусö, медодз сiйö, мыля ревизия кертöн складдэзын сюыс лоис кык кадуляöн унажык, нежели пуктiсö арнас, сэтöн жö содтiсö, мыля кулöны колхознöй куканнез, мыля кулiсö кык вöв и уна мöдiкö.

4

И кольччисö Öльöшлöн гортын овны ник и няк: медодз пöрись Öмель, кöда ышки-пойки ни олö, шогалöм бöрсянь колхозын эз ни вермы уджавны, Лёнька, кöда кöдзыт кадö öтöрö эшö полö петны. Колхозын уджалiсö Öпим да Миков.

Миков лысиннас вачкисис мужик вылö ни, но томöв эшö вöлi, эшö керкуын хозяин эм кöть абу — юрас тöв шутнялiс, вот и горзiсö да олiсö, кытöн нач тшыгöсь, кытöн мый шедас, сiйöн и тыртiсö кынöммез, видзчисисö гожум.

Öпим ойез эз узь, тöждiс-полiс, что Öльöшсö оз ни адззыв, мужикыс тюрьмасис оз ни лок, и инькаыс кувтöдз пондас кöкны — быд лун горзыны да овны.

Мый бы эз вöв, кыдз бы эзö олö, но тöлыс чинiс да чинiс, содiсö луннэз, пондiс буржыка шонтны шондi.

— Огö ни öнi кулö, — öшынöт öтöрö видзöтчис Öмель да ошшасис Лёнька внучеклö. — Локтас гожум, нучок, ми тэкöт пондамö вöрö котрасьны, тшак да ягöд ваявны. Видзöтан кö, кöчöс панталам, кутам да гортö ваям или ошöс сьöвталöм. Яй лоас, Лёнька! Пондам овны буржыка, мед сэк миян сьöрö вöтчöны отирыс! Ась.

— Дед, а ошыс миянöс оз сёй?

— Кин миянöс тэкöт лысьтас сёйны? Этатшöм смев да вынаэсö... Дедыт ышö, нучок, таракан талун вермис вийны, а тэ ошись полан! Э-э-э, кин эд Öмельсö оз тöд, сiя вермас серавны да сэтöн тэ, видзöт жö, кытшöм мужик ни! Гöрны ни, поди, пондан?

— Понда, дед, Гнедконас!

— Мый нö сэк миянлö тöждыны?

Луннэз кузьöсь ни. Öмель весь овны оз вермы, то кыйö нинкöммез, то лöсалö чер ороп. Удж адззисьö, оз пышшав. Сэтöн пондiс и лымсö сылöтны, только тулысыс дедыс моз жö шогалiс-мырсис. Öддьöнжык тшыгьялiс отир, но Öмеллезлöн эшö кыдзкö кыссисö картов сорöн, кöр мукöдыс сёйисö ни кулöм вöввез. Уна отир и пода тшыгсянь кулiсö, тöлöн шойна вылö туй эз ешты тыртны некытшöм пурга: талун дзебисö öтiкöс, а мöдiклö керисö ни гроб.

Тшыгсянь соседдэзлöн — Серафиммезлöн — кропнитiсö öтiк неделяö кык мужик. Лун-мöд бöрсянь коккез нюжöтiс мöд соседдэзлöн невеста юра нывка.

Сылiс лым. Визывтiсö шороккез и шоррез. Луннэз вöлiсö кымöраöсь, дзугыляöсь, кыдз бы лöсьöтчисö горзыны отир сьöрын.

Лёнькалöн дед гортын овтöн нач гажтöмтчис, мöднёж ни пондiс баитны внучекыскöт:

— Лёнька... Öнджа эд, батя... Верма я гожумöдззас овнытö? Мылякö меным сьöкыт лоис. Желлялö морос гöгöрöс, топ морос пытшкöс кань гыжьялö. — Но, дед! Сё тэнат кыткö висьö. То моросыт, то кынöмыт. Кувны тэныт и колö. Мыйлö шогöттэзкöт овны? Видзöт, Серафиммеслöн мужиккес шогалiсö дак чожа кулiсö, а тэ шогалан-шогалан... — ыджыт морт моз баитö зоночкаыс, зырымсö тiльö нырыс увтын, дедсö баснинас вийö бы, но пöрись оз лöгась, висьталö:

— Кытшöм, Лёнька, олан, сэтшöм и сьылан. Еныс эд...

— Оз ков грехö пырны, — зонка висьталö дедлö. Кыкöн öшынöт видзöтöны öтöрö, кыдз уджавны мунöны мам да Колька: мам вöрöтчö чожажык, а Миколка мылякö маласьö посöдзныс дынын, сiйöн Лёнька и висьталö. — Дедук, а дышöв мылякö миян Кольканым. Видзöт, мамö Серафиммез öшын увтын ни, а сiя сё посöдзным гöгöрын бергалö. Этадз кö вонокö пондас уджавны, быль эд тшыгйöн кувсяс.

— Сiдз, сийöсыс мылякö Колькасö бöрлань бы кыскö, но веськыта кö висьтавны, Кольканым чож, кыдз чанёк котрасьö ни нывкаэс сьöрын.

— Кин кытшöм эм, дед, мöдпöв он ни кер.

Дед шынньöвтö — тöдö, что сылöн эна кыввес лоисö внучекыслöн ни.

Тулыс таво вель дыр шогалiс, вель дыр вермасис тöвкöт, то кöдздöтлiс, то öдззöтчывлiс сывны. Микола гöгöрын шонтiс сiдз, что лун-мöдöн пуэс вылын потiс лист, пондiс быдмыны турун, и отирыс ловзисисö топ кокнитжыка, чужöммез вылын пондiс тöдчыны оланлöн аскодя рöм.

Öмель Лёнькакöт ветлiсö ни матiсь ыббез вылö, мымдаöнкö öктiсö кöктоин, кöчазь. Öпим пуис кöктоинсö, пуксьöтiс мужиккесö пызан сайö, и нiя сёйисö сэтшöм чöскыта, только паннез лэбалiсö.

— Деда, öнi огö ни кулö. Пöт ни пондамö сёйны, — висьталiс дедыслö Лёнька.

— Мыля ми тэкöт куламö? Грех гожумнас муыс пытшкö дзебсисьны. Кылан, кыдз сьылöны каёккес! Асывнас таррес сё бобгöны. Чожа кöк пондас кöкны. Ыббес вылын сю быдмас. Нучок, ми тэкöт уна эшö мамтö грехас пыртамö.

Микола гöгöр колхозын кöдзсис, и сэтöн жö локтiс гожум, лоис жар, пондiсö бизгыны ни лöдззез, рыттэзöн курччасисö номмез да геббез.

Колхозын кöдзсис. Мужиккес пондiсö гöрны паррез, а инькаэс кутчисисö вочны йöррез. Öпим öнi топ вывтi сьöкыта эз уджав, но одззамоз жö пöттöдз эз сёй — сёяныс вöлi öтiк турун. Инька кыдз арланьын турун за косьмис коккес вылын, вывтырас топ яйтор ни эз вöв, сiдз кыдз пыр уджалiс, а сёйис умöля, и сьöлöмыс ой и лун висис мужикыс понда, кöда эз ов кытöнкö ен пола увтын, а пукалiс тюрьмаын.

Öльöш важын ни эз вöв гортын. Миковлöн школаын велöтчиссис ни мöйму, сiя лоис грамотнöй, не ни дед да мам кодь синтöм, енлö эз юрбит и рыттэзöн котрасис ни нывкаэс дынö.

— Зон, эн бы тэ рыттэзнас öвтчы! — зонкалö модис мамыс. — Мый öштiн да деревнясис кошшан рыттэзнас? Видзöт мый керсьö!

— Мый керсьö? — зонка осьтiс öмсö.

— Ойбыт оз я воротанас отрядыс жольöтö! Кошшöны пышшалiссесö. Айыт моз жö кытчöкö юртö сюртнялан.

— Ме эд, мам, абу Киршинсис Фёдорыс кодь, бандиттэскöт öтiкö туйсö ог таль.

— Мый Пёдорыс?

— А-а-а, — зонка öвтыштiс кинас. — Тöдан эд сiя кытшöм. Берся отирыс баитöны...

— Ась баитöны, а тэ тöд да эн!

Öпимлöн сьöлöмыс бöра пессис, полiс олансис — зонсö жалейтiс, сiя бура тöдiс Фёдорсö, кöда вöлi аскодя-асныра, кыдз шуöны, кыт мунас, бöрсяняс пу-туруныс оз сулав, öткöн инь морт отир син сайын эн пантась. Кывсьылiс, что мужикыс не öтiклiсь ни босьтöма ловсö, пукалöм ни тюрьмаын.

Мам тöждiс зоныс понда: рыттэзöн Миковсö некытчö бы эз лэдз, кöр быд рыт, кыдз только пондас пуксьыны шондi, отряд вöввезöн бöра ни ветлöтiс ыджыт туйöт, ыб дорись ворота жольк да жольк керлiс, и бытьтö бы талун унажыкись да öддьöнжык дзуртiс и жольöтiс воротаыс.

— Кылан?! — Миковлö шуис мамыс.

— Кыла, кыла, — аслас басни зонкалöн. Коккезсис шупкалiс нинкöммез, айыслiсь кöмалiс важ чорзьöм да бырöм сапоггез, вежис йöрнöс-вешьян, сэтшöм жöник лоис, кöть талун жö гöтрав бы — мамлö отсасись вайöт, но дедыс этатчö шебралö:

— Öм гöгöрсит ась мам йöлыс косьмö, да вöлись гöтрасьöмыс йылiсь думайт, то вайöтан невестасö, а он понды тöдны кöд бокас водны,

— Тэ эд велöтан! — Миков резгис дедлö, лöгöтiс пöрисьсö, кöдалöн сэк жö чорзис чужöмыс, синнэс тувдiсö, няпыртiс кулаксö и мурзис:

— Калян, важын я дедыт вешьянсит небыттэтö дугдiс дзимлявны? Кыдз коссим кушаксö пöрччала да кыдз пывсьöта, сэк пондан тöдны, кыдз дедыткöт пиньгисьны! Думайтан, вынö оз тырмы? Тырмас эшö тэнö гындыны!

— Пывсьöт, пывсьöт, деда! Сiя менö дойдлывлö жö: талун ни кымöсам печиктiс, — рад Лёнька, что дедыс сiйö любитö öддьöнжык, нежели Колькасö.

Дед мурзис. Пöрисьыс эз вöв челядьыс мам кодь, кыввезнас эз чапкась, висьталас и керас, ась талун киэсö эз понды сэрпöсьтны. Дузгыльтчис, вешшис комö, пызан вылiсь босьтiс пурт и пондiс вöлавны туисö вевт, вирскайтiс нырнас да уджалiс. Пöрисьсö чувйис лöг, кöр Öмель вежöртiс, что кывнас одззамоз уна бы керö, а киэзас абу ни томся выныс: печиктас кö внучекыс, сэтöн жö пезьдас. Одз воис зырымöсь Миколка, одз мужикö пöрис, и бур бы эта, но асныракодь. А кин öнi томмес коласын абу асныра, кöр оланыс нач мöдкодь — вежсис, сералö отирсö, и нем тэ сыкöт он вермы керны.

Вöтiс сёр рыт. Öпим жöдзис-керис, пуксис эшö лабич вылö вочны кепись, да синнэс куньсисö, и ланьтiс сэтчö, кытöн пукалiс. Лёнька дед бокын чискис джодж шöрын — не увтöс, не вевтöс, кычанок моз ускыньтчис и бур, чöскыт онöн узьö. Миколöс кöть падты, кöть эн — петiс и öшис. Китсасис петух. Керкуын бизгисö гуттэз, лэбалiсö да курччасисö номмез. Ен угöлын öшалiс лёк чужöма ен, лöга видзöтiс Öмель вылö, кыдз бы осудитiс, мыля пöрисьыс сё грехö пырö — олö да оз кув.

Пöрисьыс вундасис пуртöн, юрас пелитчисö думаэз. То видiсö асьсö, то дзескамисö оланöн. «Ой, старик! Öнi томмес мöднёж олöны, вермасö кывнаныс вийны и кулакнаныс сiдз сöтны, что гут моз черк-барк таралан, сэтöн и лов петас. Кувны бы ни то — енсö нем нерны, нем бы, старик, эн понды тöдны, ась томмес кöть кыдз бы колхоззэзаныс олi, öтамöднысö кöть бы ульöн сёй! Не пельыт бы эз кыв, не синыт эз адззы. Пукав бы то, тыткы, Öмель — кынöмтö мыйöн шедас тырт да эн ни шыась, а тэ...»

Öмель уджалiс и думайтiс, кытöн асьсö видiс, кытöн еныслiсь смерть корис.

Öтöрын рöма-дзара гожумся рыт. Миков мунас гортiсь и вермас локны только шондi петан гöгöрын, но талун мылякö вичку дынiсь бертiс чожа, шардöм моз пырис: синнэс тувдöмась, кыдз мыйиськö повзьöма и оз шыась.

— Мый лоис? — саймис Öпим да юалiс зоныслiсь. — Али петшöралiсö нывкаэс?

— Кин петшöралас? — тык-мык висьталiс. — Отир вичкуным дынö вайöтiсö. Баля табун мымда. Рочöсь.

— Чиганнэз я мый я? — эз вежöрт Öмельыс.

— Абу. Миян кодьöсь жö. И сельсоветсис предыс гардчö да баитö, что овнытö керкуэзаным сюясö. Миянö оз я кинкö шед...

— Господи помилуй! — Öмельыс пызан вылö пуктiс пурт, малыштiс чужöмсö. — Берся ни овтöнням адззылi да, тыдалö, ышö адззыла. Беднöй отир... Натьтö, эд кытöнкö горт жö вöлi, да репöтiсö гортсиныс. Мый понда бы миян коддесö еныс дойдö?

Миков эз шыась, пуксис паськöмнас лабич вылö. Öпим пуксис жö лабичö, тiлис синнэсö, висьталiс:

— Джоджным нятьöсь и ёгöсь. Быль кыдз вайöтасö миянö, серавны пондасö локтiссес.

— Сiдз тэ дынö кинкö и локтас! Эмöсь миянся буржыкöсь да просжыкöсь керкуэс, — висьталiс Öмельыс.

Загонын сёйис-вувтiс пон. Эз ештö дугдыны баитны, кыдз öтöрись посöдзö пондiсö ёркöтны.

— Кылат! — шуис Öмельыс. — Брякöтöны ыбöсас, топ вийны бы пырöны. Юав жö, Колька, кин сэтчин, — старикыс пондiс жöдзны комын.

Колька чеччис лабичись, коккес увтiсь лабич увтö брынгис нинкöм, осьтыштiс керку ыбöс, кыз голосöн юалiс:

— Кин сэтчин?!

— Осьтö! — пиннес пыр, кылö, горöтчис сельсоветсиныс пред, лёк Öник Иван. — Осьтö, то жугда ыбöснытö!

— Ассит мун и жугды, понкулись! — Öмель öзйыштiс-висьталiс комын, но сiдз, что голосыс öтöрöдз эз кыв.

— Осьта, — сiдз жö жеркöтчана, кыз голосöн висьталiс Колька, но эз тэрмась петны керкусис.

— Пон! Горш орöтас. Миков, осьт, мед эз жö жугды ыбöснымöс. А мый сылiсь босьтан? Сэтшöмыслiсь... Паздас, и рожаас он чеччöвт да гыжьяв. Сiтöсь начальник! — Öмельлöн пизис вирыс, няпралiс кулаккесö. Мый бы и керис!

Миков осьтiс öтöрись посöдз ыбöс. Керкуö сьöрсьöн-бöрсьöн пырисö тöдтöм отир, но медодзын киэзнас öвтiс Öник Иван, арзiс-ыксiс, топ быдöннысö курччавны лöсьöтчис:

— Тi мый?! Али тiянлö эм кöть абу Совет властьыс?! Тюромщик табун! Кöзяинныт сьöрö жö быдöннытö колö иньдыны!

— Иньды! Мыля он иньды! Кöдыскö öтыс эд... — Öпим паныт эрзыштiс. — Иван Петрович, мыля жö бöра огö кылö? Кылам, да адззан быдöнным кытшöмöсь! Öтiк пöрись, мöдiк том, сэтöн эшö учöтсö огö бы саймöтö, — Öмель Öник Иванлö пондiс кеймисьны ни, медбы горöн эз баит, чтоб не саймöтны Лёнькасö, кöда саймис ни, пуксис джоджыс шöрö, синнэсö осьтiс да видзöтiс локтiссес вылö.

Öмеллезлöн повзисö и эзö асланыс начальниклiсь, Öник Иванлiсь, унажык лöгасисö, кöть лöгнысö вывтi эзö мыччалö.

Сёр рыт, но керкуын битöг тыдалö бура — быд чужöм синнэз одзын, медодз видзöтöны пыриссез вылö, а не гер пиня начальник вылö. Йöз отир синнэзын мыдз югöр, спинаэзныс сайын котомаэз, и мый понда позьö дивуйтчыны дак этö сiя, что инькаэз сувтiсö порог дорö и сулалiсö, видзчисисö, топ кеймисö, медбы эзö ни вашöтö керкусис, сетiсö бы шоччисьыштны.

Сельсоветiсь пред чывкйис джодж шöрын, голясö нюжöтiс комлань, курччöвтiс чуньсис гыж, сьöвзис, вырснитiс дульсö и вöлись кыдз кералiс-висьталiс:

— Эна кулак табуныс пондасö овны тiянын!

— Ог тöд, — шыасис Öмель. — Лудыккезсис да тараканнэзсис озö кö полö...

— Лудыккез! Мед кыз яйезнысö сёйöны! Лыэз бердöдз кулак табунлiсь вильöтöны. Нiя миян кодьыслiсь сёйисö жö яйнымöс эд! — и ыкöстiс, горшыс сибдiс, инькаэслö ни. — Эд сулалö Кристосыс моз! Пуксьö, чöвтчö и водат джоджас!

— Озö жö куш джоджас водö! — Öпим пондiс вöрöтны лабич вылас паськöммез. — Ольсалам мыйкö да вöлись.

— Сiдз узясö! Нем нiйö чечеритны! — Öник Иван топ вöлi гортас, кивзiс векнит голосöн керкутыр.

5

Гудi-гадi баляэз моз локтiссез эшö дзöрисö порог дорын, öтамöд коласын баитiсö роч кыввезöн сибдыштöм мыдз голоссэзöн. Тöдчис, что отирлöн кынöммезныс сималöны и горшшезныс косьмöны. Нiя пöв синöн видзöтчисö кытчö шедiсö, адззисö, кытшöм умöля татöн олöны, кöть бöр бы пет, а эн сэтöн виздiсь-видзчись.

Öмеллезлöн олiсö сiдз, кыдз вермисö, некинлiсь нем эз гусялö и нылiсь гусявны вöлi нем, мый эм быдöс синнэз одзын: лабичын паськöмторрез, стенаэз кушöсь, саöсьöсь, котрасьöны тараканнэз, лэбалöны гуттэз, лудыккез ветлöтöны западня вылын. Стенаэз пöлöн кузь лабиччез, веськыта сулалö лякöсь пызан, кöда вылын абу пызандöра, не пань, не бекöр. Ком абу торйöтöм немöн ыджытжык жыр дынiсь, и тыдалiс быдöс — гор дынын чугуннэз, кринкаэз, ухваттэз, сунлабичын — бекöррез, паннез.

Джоджыс ёгöсь да нятьöсь. Джодж шöрас шупкöмась важ гуня, кöда вылын узис да чеччис Лёнька, öнi кваркыш эз кер, видзöтiс локтiссезöс.

Керкуын олiссез локтiссезкöт баитiсö нач етша: öткö сiйöн, что рочöн эзö кужö баитны, мöдкö недолыт вöлi, что сельсоветсиныс предыс ыксiс керкуас, петiс и бöрсяняс колис аскодя шог.

— Пуксьö да ваксьö, — медодз локтiссезлö висьталiс Öпим. — Инькаэз пуксисö, кыдз бытьтö вежöртiсö баснисö.

Öпим босьтiс комись неыджыт туис, котöртiс погребö юанла, кытöн вöлi тулысöн чапкöм лымöн гу.

Чожа хозяйка бöр пырис керкуö, тыра туис нюжöтiс пöрисьжыклö, шуис: «Юö. Горшныт эд туйыс вывсянь косьмö».

Кöть роч, кöть коми, сiдз эд вежöртiс, что юкталöны и, косьмö кö горш, босьт да ю.

Инькаэс сьöрсьöн-бöрсьöн юисö быдöнныс.

Колька пукалiс лабич вылын, эз шыась, эз вöрöтчы, пöв синнас видзöтiс пыриссес вылö, адззис, что локтiс мам ныввезöн: мамыс абу пöрись, и ныввез томся-томöсь да басöкöсь — öткодь лöз югöра синвевьяöсь, зумыт яяöсь, тыра мороссэзöн. Нывкаэз кыскисö дынаныс — Колька эз вермы öштыны синнэсö басöк чужöммез вылiсь, кöть и полiс веськыта видзöтны.

Зонка пондiс стыдитчыны, что сылöн вешьяныс аскыйöм дöраись да асвурöм, йöрнöсыс сэтшöм жö, а локтiссес роч паськöмаöсь, коккезаныс кöмалöмась чакчуриэз, и басниныс сьöртi тöдчö, что кыввезныс чожöсь.

— Мыйöн нö ме гöссесö верда? — Öпим öшис аслас керкуын. — Кынöммезныс эд сималöны.

— Мыйöн вердан? Мый асьным сёйимö, сiйöн и верд, — комсянь петiс да лабич вылö пуксис Öмель.

Чо будете кушать-то? — юалiс Öпимыс инькаэслiсь.

— Нам ничего не надо, — висьталiс нывкаэзлöн мамныс.

— Вердыштны бы колö, мам, — Колька ни шыасис и синнэсö эз вермы öштыны медтом да медбасöк нывкаыс вылiсь, кöдалöн син югöрыс вöлi медъюгыт, медлöз, кыдз лöзчача цвет цветитiс, и чужöмыс лöсьытжык сойезся, вачкисис акань вылö. Нывкаыс эз-эз да веськыта видзöтышалiс Миколыслань, кыдз бы син югöрыс йиджис сьöлöмöдз, шонтыштiс или жмитыштiс да юалiс: «Мый нö тэ, зонка? Мыля нач етша баитан?»

Повзьöтiс син югöрнас зонкасö. Кöть посадын и эмöсь басöк нывкаэз, но нiя асланыс, ныкöт Миколка быд лун пантасьлiс да янсöтчис, тöдiс мывкыддэз, а эта...

— Ой, мам! Кин эта?! — повзьöмöн ыкöстiс нывкаыс да чуннезас видзтöн мамыс нырлань нюжöтiс таракан.

— Настя! — чорыта висьталiс мамыс. — Тэ абу ни учöт. Шупкы таракансö, а эн сэтöн... Нiя и гортын вöлiсö.

— Мам, а миян тараканнэс мöдкодьöсь, — нывка таракансö — шупкис джоджö, бöра веськыта гажöн видзöтыштiс Миковлань, кыдз нач ни тöдсалань — вонлань или ёртлань.

Öпим эта коста пызан вылö вайис мый вöлi сёйны: луккез, пöжалöм вит картов, гырничöн шöмйöв, няньтор, кöда нач эз вачкись нянь вылö.

— Пуксьö да мый эм сёйыштö, — висьталiс гöссеслö Öпим. Нывкаэслöн мамныс сёйöмыс местö пондiс пильскыны-горзыны, синваэз пыр висьталiс, что разисö гортнысö да вашöтiсö кытчöкö и öнi стыд отирсис...

— Мый керан? Сэтшöм олан локтiс. Еныс дойдö... — Öпим пондiс чышкыны жö синваэсö, норасис. — Миянлiсь тай кöзяинсö нуöтiсö жö. Нем понда пуксьöтiсö... Пуксьö да сёйыштö, эдö ни горзö. Кыдзкö эд колö овны, кöть нывкаэс понда...

— Ме бы сёя жö, — пызан увтын ни нырсö гуддис Лёнька.

— Лёнька, тэ ассит пайсö дзимлялiн ни! — дед орöтiс внучоклiсь кивзöм.

Вердiсö локтiссесö мыйöн вермисö и мый адззисö. Сыбöрын Öпим джоджö ольсалiс важ гуняэз, и локтiссес водiсö джоджö, жмитчисö öтамöдныс бердö зэв-зэв. Гöссез эз вöлö миян инькаэз кодь косьмöм бöраöсь: лядьвейезныс кызöсь, гладьöсь. Миколыс пöв синнас видзöтыштiс медодз Настя нимаыс лядьвейез вылö, кваркыштiс синнэзнас да петiс узьны посöдзö.

Узисö кöда западня вылын, кöда джоджын, кöда полатьын.

Асывнас медодз чеччис Öпим, бергалiс гор гöгöрын, вöдитiс пода, вашöтiс посад сайöдз, сэтчö вöлись мыччисис шондi — тэрмасис осьтны лун.

Чеччисö и гöссез, сыналiсö юррез, миссисö кöш понiсь öтöрын, сыбöрын Öмель инькаэзлö висьталiс: «Важ керкуас пондатö овны».

Ылын я важ керку? Öтiк короминна увтын — петiн да пырин.

Локтiссез пырисö овны важ керкуö.

6

Ылiсь локтiссез пондiсö овны важ керкуын, эзö дзескöтö хозяиннэсö, тöрисö овны посöдзын, сiйö и керисö, пырисö да петiсö öтамöд ордö, пондiсö тöдны öтамöдлiсь олан, семьяэз йылiсь.

Öмеллезын бура ни тöдiсö, киннэз олöны ны ордын — Белоруссияись отир. Устинья — нывкаэзлöн мамныс — висьтасис, что айнысö, кыдз кулакöс, кыдз Совет властьлiсь врагöс нуöтöмась тюрьмаö, янсöтöмась семья дынiсь, и ловья ли Егорыс, некин оз тöд.

Колькаэзын пондiсö овны отир Белоруссияись, сэтчинiсь, кытöн татiсь некин эз вöв, эз тöд кытöн сэтшöм му, кытшöм отир олö, а, видзöт, кытшöм чожа öтамöдкöт пондiсö дружитны, топ лоисö роднöйся-роднöйöсь.

Локтiссес весь эзö олö, пондiсö уджавны колхозын, немöн и некин сьöрись уджöн эзö кольччö. Öпим локтö уджалансянь и ошшасьö ни, что Устиньялöн ныввес — бикыввез! Кыдз эд прокмöны ытшкисьнытö, кыдз пондасö турунсö ольсавны, покоснас пыр медодзын, да медчож нывкаэс коласын Настя. Господи, кытшöм нывка вермöм шогмыны!

— Сiя, тыдалö, гöрдззисьö и вурсьö — киэс пизьöны! — содтö Öмель.

— Вот бы то Кольканымлö невестасö, да одзöв розбойниксö гöтравны!

— Мый видзас? Менö томся-томöн гöтралiсö, кöр айö эз вöв, — Öмель кöть талун жö гöтралö бы ыджытжык внучексö. Лёнька ни бытьтö бы мыйкö вежöртö и лякö: «Ме Настяыс вылын гöтрася!»

— Сапöсь ныр! Гöтрасись... Ныр увттö эшö он куж весöтны, а гöтрасян ни бы, — мамныс сералö Лёнька вылын, сералö да нывкаэз мамкöт басни лöсьöтö, Устиньялö шуö: — Устья, гöтраламö жö Колькасö Настяыс вылö!

— Гöтралам! Мыля огö? Жöникыс топ туяна, — сералö ни нывкаэслöн мамныс — синнэзас öзйыштö гаж: не пыр жö горзыны да кивзыны.

Устья эз пов ныввесö сетны татiсь зонкаэс сайö, сiдз кыдз коми отиркöт велалiс ни овны и уджавны, адззö, что нiя сы кодьöсь жö, кужис ни коминас ректасьны, вежöртiс ни баснисö. Только вот зонкаэс посадын эз вöлö смелöсь — öмсиныс нывкаэсö лэдзасö. Этö, натьтö, сiйöн, что етша кытöн овлiсö йöз отир коласын, Белоруссияись кодь нывкаэсö нач эзö адззывлö, кöдна кöть кинлö адззисö висьтавны кыв, сiдз шебраласö, что уджаланiнын пыр отир сералiсö — мыдзсянь, тшыгсянь чуть эз кулö, но гажöтчисö.

Басниаöсь да чожöсь Белоруссияас нывкаэс, бытшöмöсь да уджаöсь, весь мамныс эз ошшась, что гортаныс видзöмась куим мöс да куим вöв, баляэз вит-квать, курöггез. Татчöдз долонь кыза порсь гос вайöмась да вердiсö Öмеллесö, а татöн порссесö быдса год быдтöны, а нiя сё кыдз вердтöм шыррез: не яй, не гос абу.

Богатöя гортаныс олöмась Устьяэзлöн, выттез абу нюжлалöмась. Кужöмась овны отир, пызан вылын пыр тырдоз вöлöма, абу одзöсасьöмась, беднöй отирöс абу ас выланыс уджöтöмась — быдöс керöмась асьныс.

— Гы. Мыля озö керö этатшöм челядьнас?! Видзöт жö нывкаэс кыдз уджалöны! Одзза кадö бы... — сьöкыта лолалö Öмель. — Одзжык мый, Öпим? Умöля я мый я олiмö? Тшыгьялiмö я кöркö? Эгö я пыр кык мöс да вöв жö видзö? Э-э... Мый нö сэк?

Олiсö да колхозын уджалiсö Устья ныввезнас, некин сьöрись уджöн эзö кольччö, но и татöн, тыдалö, овнытö вöлi дзескыт и нечöскыт: неделянас кыкись вовлiс сельсоветсис предыс, локтас посöдз дынö рытöн, керкуö оз пыр, бурундук вывсянь ыксö:

— Эй! Кытöн кулаккес? Мый ни керöны? Эзö эшö пышшö?! Видзöтö менам! Пондат кö умöля уджавны или гортланяныт видзöтлыны, тальчча бöжжезныт вылö. Кылiт? Сiдз колö тiянкöт.

Мурзяс-керас, вувтас пон моз посöдз дынын Öник Иван, сiйöн сорöн и мунас, бöрсяняс Öмель нерö:

— Понкулись! Кудöбаыс то и пиньöвт бы öмсö, медбы осьтны эз вермы, али зор бы кинкö зарги öмас. Понкулись, страм!

— Ой, Устья! Миян дзескыт-дзескыт оланыс, а тiян...

— Кöть кытöн эд миян коддеслö öткодь, — Устьялöн син доррезас сöдзöны синваэз. — Кöть Тöлiсьыс вылö пышшамö, сэтчинiсь адззасö, кутасö, пыдынжыка ловзисьны озö лэдзö, заргасö кытчöкö пыдöжык вöррез коласö, мед отирыскöт етшажык пантасьлiм. Бур, что эшö кыдзкö отир коласын видзöны, эм кинкöт кыв горöтчыны, то думайтiм ни овны дзирс пемыт вöр коласын.

— Олö, кытчöдз видзасö, — Öпим рад, кöр мукöдсö вайöтiсö ылiсь и заргисö вöрö, и кыдз сэтчин олöны Устья коддес? Мый керöны инь отир, кöр вöр коласас керкуэс абу — некытчö зэр шогья дзебсисьны.

Локтiс гожум, кöда оз сет пыдынжыка ловзисьны — отир быд лун уджалö öт пемытсянь мöд пемытöдз, öтiк удж озö ештö керны, мöдiк ни вöзйисьö, сыбöрсянь куимöт.

Гожум пöдтiс жарöн. Кад сэтшöм, что ов да пов, кöр эшö вöррезын пышшалiсö отир, и ны сьöрын ой и лун вöтлiсисö солдаттэз. Солдаттэзлö шедöм Киршинiсь Фёдор, кöда бытьтö бы гардчöм пышшалiссезкöт-бандиттэзкöт, сiйöн мортсö и нуöтiсö гортiсь. Сыбöрсянь неделя эз чулав, кыдз пондiс кывсьыны, что Гришкинiсь ни дзимлялöмась морт куим-нёль.

Öтiк, мöдiк, куимöт... Киршинiсь, Гришкинiсь... И Чуракын ни адззисис Фёдор кодь арттöм Яраш, кöдалöн дышыс петiс уджавны, и сiя посадiсь пышшис жö вöрö да пондiс полöтны отир.

Гожумся кузь луннэз чулалöны чожа, топ эзö ештö кöдзны, а, видзöтан кö, ыббез вылын осяэз быдмисö четверть сувдöн ни, эшö чулалас неделя-мöд, и пондас ковны ытшкисьны.

Лунöн Öпим ыб вылын садь быртöдз сöвтiс назём, гортö локтiс сёр рытöн, ештöтчис, водiс западня вылö, синнэз кунис и онмöссис, но немымда эз узь, кыдз кинкö ыбöсас пондiс ёркöтны.

— Öпим! — Öмель куйлiс джоджын, лэбтiс юрсö да негорöн ыкöстiс нылысö. — Кинкö локтiс да пырö бы. Оз я кульыс бöра понкулисьсö вайöт? Бöра нюкьясьö ойнас! — Öмель ружтытöн чеччис джоджись, модис нырыс увтын, кöмтöг петiс да осьтiс посöдз ыбöс.

Старик сьöрö бöрсяняс пырисö том нывкаэз — роч паськöмаöсь, баитiсö рочöн, шуисö:

— Дед, шоччисьыштам бы, и горшшезным косьмöны.

— Шоччисьö, кагаэз, шоччисьö. Кысянь да кытчö нö?

— Ылiсянь ми. Вöр коласiсь пышшамö.

Пöрисьыс сэкжö вежöртiс, кысянь локтiсö нывкаэс, Öпимлö висьталiс чожажык вайны юны и пыриссеслö шуис, мед водöны джоджас да шоччисьöны, сiя чушкасьны оз котöрт: некин и нем оз понды тöдны. Нывкаэс юисö, спасибо висьталiсö, шуисö, что некöр нылö быглясьны, лöсьöтчисö петны.

— Кытчö ойнас?! Адззатö я туйсö? Натьтö эд, Усольелань вартатö жö? — Öмель тöдiс бы кöдöрö мунасö нывкаэс, висьталiс бы нылö туй, мед эзö жö пырö вöрас да öшö, сэтöн жö висьталiс, кыт да кытчö мунны, бур туй кöсйис томмеслö, мед еныс дорьяс умöль отирись, лёк зверрезiсь.

Томмес пыралiсö да петiсö, дзик эзö и вöлö. Дженыт гожумся ой чулалiс, кыдз лэбзис. Ашынас шондiыс эшö эз ешты лэбтiсьны вöрыс вевдöрö, керкуö швыркнитiс милиционер — пон мывкыда морт, кöда кытiськö кылöма ни, что татчö пыралiсö нывкаэз, вожмöвтiс порогсö и пондiс чирзыны:

— Старик, тэ мыля враг чужöммесö узьтöтiн? Мыля сельсоветас эн юöрт?! Или дышыт пондiс петны гортын овны?

Дед томсянь полiс и эз милиционер коддеслiсь: пырин кö, ло мортöн или... Ыбöсыс осьта, верман петны, котöртны гортат и сэтчин кöть мымда горштö лет. Пöрисьлö кöть кувны, кöть овны — сiдз кыдз олiс ни ассис и смерть ни видзчисьö. Öнi милиционер вылö сьöвзьыны эз думайт, бытшöмика висьталiс, что сiя узис и некинöс вöтöн эз адззыв, нем оз тöд, и нем сэтöн Василейлö ыксыны бы.

— Видзöт, пöрись! — пишкис милиционер, петiс керкуись, бöрсяняс жвангис ыбöссö, пуксис вöв вылö и сöтiс — му дрöжитiс.

— Ожо, вöтас да сёяс нывкаэсö! — милиционер бöрсянь Öмель пондiс жалейтны ойся гöссесö. — Господи, мыля нö лёк отирлö нем оз ло, а сё умöликкесö дойдан? — ен одзын пуктiс пернапас старикыс.

— Дед, ме пола, — дед бердö жмитчис Лёнька.

— Кинöс бöра öштöмась? — западня вылын юрсö лэбтыштiс и бöр лиг-ляг водiс да ланьтiс Миколка, кöда ойнас нем эз кыв — узис чöскыт онöн.

Деревняын юöррез озö суналö: он ешты горöнжык несйыны, сэтöн быдöн тöдö ни. Эзö ештö асывнас чеччыны отир, быдöн ни гусьöн ас коласын лёбис, что ойнас Усть-Коколись пышшöмась посланеццез — нывкаэз мунöмась Усольелань. Но абу ештöмась локны Кокорникöдз, кыдз вöтöма нiйö милиционер, кутöма, вайöтöма сельсоветö и сэтöн вартлöма отир одзын, кыдз поннэзöс песöма да бöр вöлыс одзын нуöтöма вöрö — Кокольö.

Отир быдса лун баитiс только эта йылiсь, жалейтiс нывкаэсö, кыдз ассиныс челядьнысö.

7

Öльöш кыдз гут помойö вöйис — не юöр, не письмо эз вöв. Öпим горзiс да думайтiс, что мужикыс абу ни ловья, сiсьмöны ни лыэс кытöнкö тюрьмаын. Инькалöн сьöлöм висис мужикыс понда, ой и лун тöждiс-шогалiс, гажöтчис только отир коласын или виль олiссезкöт, кöдна бура вежöртiсö инькасö, кужисö сыкöт баитны — янсöтiсö быдöс мый вöлi и эз.

Отир уджалiс и надейтчис, что таво гожумнас сюэс быдмасö буржыкöсь ни, арнас пондасö сёйны пöтжыка, ежели кö озö кулö...

— Оламö ышö! — ошшасис Öмель. — Мый миян кодьыслö лоас?! Ась кинкö кулö, а ми ышö вермам тшыгьявны!

Старик баитiс да асьсö бöбöтiс — отирöс кыввезнас бы гажöтiс, кöр, кыдз шуöны, öтiк беда сьöрын вöтлiсьö мöдiк беда, свалитчöны, вынсялöны и отирöс буржыка пурöны. Лёк шогöттэз тöв и гожум эзö кольö отирöс, а эстöн жар луннэзö эшö виль шогöт павдöтчис деревняö: жарöн да кынöм висянöн пондiсö шогавны. Вирмыт пондiс вийны отирсö, и некин бура эз тöд, кыдз этаись дорйисьны, мый керны, кытшöм лекарствоöн веськöтчыны. Быдöнныс öддьöнжык надейтчисö ен вылö, но еныс бытьтö эз кыв и эз адззы отирлiсь олансö, некинöс эз жалейт: талун Васька Миковвезлöн кулiс Нина нима нывка — дзебисö дас да öкмысгодся невестасö, ашынас пезьдiс Чукыллезлöн старуханыс, Öник Иваннэзлiсь нёльгодся зоночкаöс гробö водтöтiсö, кöть и Öник Иван, кыдз начальник ошшасис, что сы ордö некытшöм шогöт оз лысьт пырны.

Шогалiсö семьяэзöн.

Фельдшер Щелгачёв, кöда посадö локтiс революция бöрсянь годдэзö, вывтi шогалiссес дынö эз котрась — етшажык керис, унажык лёбис: «Киэзнытö буржыка матегöн миссьö!» А кытöн матегыс? Кыдз да мыйöн бы бура миссьыны? Öшымöссэзас эд ваыс быдöнлö öткодь.

— Кристос миянкöт! — Öпим полiс шогöтiсь, сiдз кыдз сылöн учöттэс кулiсö мытсянь, пернапасасис ен одзын, рыттэзнас кресталiс да кресталiс ыбöссэз.

Олöны — луннэз джендöтöны öшöм поннэз моз. Чулалiс июнь. Матын ни Петырлун. Рытнас Öпим садникись ытшкис межаэз. Мича лунö ашынас жö турун жоль косьмис. Öмель Лёнькакöт петiсö куртны да тэчны зород. Уджалiсö-пизисö: дед ошкышалiс внучоксö, кöда кучиксис петiс, сiдз уджалiс ас могись: отсалiс дедлö зород дынö ваявны, турун, сыбöрын кайис зород вылö и пондiс тальны сiйö. Дед лэбталiс вилаöн турунсö да отсасисьлö баитiс: «Жöник ни эд миян Лёньканым! Паздö-уджалö. Мöдiк годö пондамö гöтравны ни. Кинöс, Лёнька, босьтан? Кöдна бы нывкаэз гленитчöны!»

— Дед, Настяыс вылö гöтрася. Сiя медбасöк и медöддьöн гленитчö. Эз я менö куим-нёлись ни окав!

— Кхе-кхе, кужат тi Настуыскöт окасьны, кужат. Басöк и чож нывкаыс, Лёнька, да вот öнджа петö... Миколкаыс, тыдалö, Настяыс вылö видзöтлö жö, дульсö ньылалö, разбойник.

Лёнька сералö-висьталö:

— Дед, оз Миколканым адззыв нывкасö. Ме гöтрася Настя вылö! Кольканым мед гöтрасьö Катя вылö, сiя сы сьöртi: ыджытжык и кызжык, кыдз тай йöла пирöг.

— Оксана вылö, натьтö, ме гöтрася, — дед шынь оз кер, сьöвзьö долонь вылö, вилаöн бытшкö турунö.

— Хи-хи, дед... Гöтрасись тэ... Вешьяныт оз я, видзöт, усьö ни, а сё бы гöтрасян. Кыдз зуралас Оксаныс, ылö лэбзян!

— Рать, Лёнька! И сiя вермас ме кодьыскöт лоны!

Шондi вöлi рытлань ни. Дед да внучек мырсисö-тэчисö зород, пыкисö öтмöдöрсянь, сыналiсö боккесö, пöрись дыр видзöтiс аслас удж вылö, ошшасис:

— Бура ми тэкöт, Лёнька, уджалiмö. Талун мамыт оз я чöскытжыка верд?

— Мый миян чöскытыс и эм сёйнытö?

— Мый-мый... Нöк ли мый ли корамö!

— Нöксяняс менам сьöлöм гудыртчö, — зонкаок пиньöвтыштiс öмсö.

— Ась. Нетшкöвт, Лёнька, гряд вылiсь сёртни. Абу я сёртниыс ыджыткодь ни. Тэныт тырмас сёйнытö.

Лёнька прыг да скок котöртiс гряддэз коласö, кутчисис сёртни бердö — мырсис, чисто пымалiс, но сёртни учöтлö эз сетчы.

— Нучок, вынажык тэсся сёртниыс. Вай ме нетшкöвта, — дед кыскис сёртни, весöтiс, сетiс йирны Лёнькалö.

Рыт вöлi гажа. Лёнька эшö котрасис öшын увтын, вöтлiсис бабыввез сьöрын, пуксьылiс поныс вылö, а ойнас зоночка вылö уськöтчис би-жар: сотчыны пондiс учöтыс, синнэсö эз осьт, чушыктiс, мамыслiсь корис юны.

— Господи! Мый тэкöт лоис, зон?! — Öпим нач öшис, эз тöд мый керны, мый бердö кутчисьны, кыдз отсавны зоныслö. Ойнас жö котрасис фельдшер дынö, кöда сетiс пузырёкöн кытшöмкö лекарство, таблеткаэз, висьталiс, кыдз нiйöн юктавны. Но нето лекарствоэс нем вылö эзö туйö, нето шогöтыс вöлi сэтшöм лёк, что Лёнька пондiс шогавны öддьöнжык, асывланяс пондiс мытитны — öтöрасис вирсорöн.

Öпим повзис öддьöнжык, öшис. Керкуö смерть пырис. Гожум эз ло гожумöн. Асывнас одза-одз Öмель ачыс ни котöртiс Щелгачёв дынö, да не куш киэзöн, а нöбöтiс бекöртыр нöк.

Лекарствоэз öшын вылын содiсö. Шондi асывсянь сотiс жарöн — пöдтiс öтöрын и керкуын. Быдлаын ройöн лэбалiсö гуттэз. Лёнька синнэз одзын сырсмис, топ шогöт сысъялiс сiйö — эз понды вермыны лэбтыны юрсö, куйлiс западняын.

Öмель эз и вешшы внучекыс дынiсь, то юкталiс шогалiсьсö, то малалiс юрсö, баитiс:

— Эн сетчы, кага, шогöтыслö! Веськав. Гожум, видзöт, öтöрас, шондiа, гажа. Сувтан коккет вылö, и ашынас жö ми тэкöт котöртамö тшаклö и ягöдлö. Веськав, Лёнька!

Мам луннас уджалiс, эз лысьт кольччыны гортö, кöр бригадирыс сёйис — баитiс, что колö уджавны, а нем этатшöм луннэзнас гортын пукавны. Уджалiс луннэзнас Öпим — сьöлöмыс шöри потiс: джыныс сьöрас, мöдджыныс гортын, зонокыс дынын, куртö или ытшкисьö, синваэсö чышкö, еныслö кеймö, медбы быдöс вöлi бур. Но ен мамыслiсь кыввесö эз кывзы: ойнас Лёнькалöн петiс лолыс.

Öпим горзiс сiдз, что шондiсö эз адззы, эз сёй, эз ю, нач öшис. Öмель öддьöн гажтöммис, öшöтiс юрсö и лун-лун пукалiс посöдзын, сьöкыта лолалiс да модис: «Меным бы то кувнытö, меным!»

Луннэс пондiсö вачкисьны лёк зверь вылö, кöда топ бергалiс керку гöгöрын, видзöтiс-лöсьöтчис эшö пурны.

Дзебисö Лёнькаöс. Рытöн шондi пуксьытöн китсасис петух, нёштöма уннялiс пон.

— Мый нö эшö миянлö кöсйö оланыс?! — герьялiс Öпим. Устья сэтöн и вöлi: петас ныввезнас и öтлаын горзöны — янсöтöны горесö. Басниöн вашöтiс бы Öпим сьöлöм бердiсь шог, но вермисö я инькаэс этатшöм кадö керкусис вашöтны шогсö? Олiсö лун-мöд, и пондiс шогавны Öмельыс ни: дедсö внучек моз жö медодз сотiс би-жар, сыбöрын кутчисис кынöм висян.

— Ныв, тэ ме понда эн горзы, — синнэс дедлöн вöйисö сингуэзас, сьöкыта чушыктiс, голосыс сибдiс, сiйö и керис юис ва, нюлiс тырппесö и лöсьöтчис кувны. — Эд горзö, кагаэз, ме понда. Ме ассим олi ни, тiянöс бы кыдзкö еныс дорйис. Колькалöн петiсö синваэс: курччöвтiс тырппесö, петiс посöдзö, пуксис и пондiс пильскыны. Мöд керкусис петiс Настя, зэв пуксис бокас, горöтчис:

— Колька... Эн горзы, — и аслас пондiсö визывтны синваэс, пильскис-вишыкасис.

— Настя, — синваэс пыр зонка видзöтiс нывка вылö. — Настя...

— Колька!

Мый сэтöн унажык баитны, кыдз пальöтны томмесö, ежели кыввез озö адззисьö. Колька кутыштiс нывкалiсь кисö, пырис керкуö, но буржык бы вöлi, эз бы кö пыр: мамыс чирнитiс-горöтiс, уськöтчис пöрись айыс дынö, кöда кыдз бытьтö узис западня вылын, да сiдз, топ Öмельлö öддьöн бур лоис, сэсся буржыкыс сылö нем ни эз ков. Öнi кыдз бы узис пыдын онöн, нельки кыдз бы шыннялыштiс-сералыштiс нiйö, кöдна кольччисö ловьяöсь, кöдна сы моз жö пондасö пессьыны-овны и асьныс озö пондö тöдны, мый понда сiдз ой и лун пондасö мырсьыны и мыйлö. Дедыс кулiс и кулöмнас вöлись сералiс шынь-серöмöн оланыслö, вештiсис кыдз бы Öмельыслö, кöда пыр нерис сiйö.

— Кытчö тi тэрмаситö, мыля миянöс колитö? Меным бы то кувнытö, медбы синнэзö эзö адззö и пеллезö эзö кылö эстiсь олансö, ой-ой-ой! — брякöтчис западня дорын Öпим, сэтшöм ни кöсыник, учöт уркаёк мыгöра, кöда вылö видзöтан и дивуйтчан, кыдз эта инькаыс быд лун уджалö да керö сьöкытся-сьöкыт удж: ытшкисьö, куртö, а кöр колö, черöн керасьö. Колхозын Öпим уджалiс öт пемытсянь мöд пемытöдз, кöр сёйис, кöр эз. Сэтчöдз ни локтiс, что турьялiс-ветлöтiс — пöльышт и пöрас.

— Ефимия, дона тэ да чож инька! Дугды горзынытö, кыдзкö видзсьы. Овны тэныт эшö колö, овны! — синваэсö Öпим дынын чышкис Устья, кöда ачыс вöлi мам, быдöс вежöртiс — мöдiклöн гореыс, сылöн горе, и сылiсь сьöлöмсö пурис. Кыдз вермис сiдз и отсалiс бы Öпимлö, сiдз кыдз олiсö öтiк семьяöн — öтамöд дынiсь эзö янсöтчывлö, рыт и асыв пырисö и петiсö öтамöдныс ордö, мыйöн вермисö, сiйöн и отсасисö.

Джагöтчыны мöдiс Öпимыс, да эз кер сымдасö, эз мöдöр югытас бесыс öлöдзö пуксьы. Кулiс бы инькаыс, но смерть эз лок, эз вий, бытьтö сылö эз ков эта мортыс: киннэз колiсö, пышшöтiс...

Дзебисö пöрисьöс, и вöлись Öпим оланас нач öшис, вöлись пондiс вежöртны, что öштiс меддона ёрттэзöс, кöднö некöр и некытiсь оз ни адззыв, оз пантав. Горзiс ой и лун инька, видзöтiс кöр Миков вылö, думайтiс: «Былись я мый я гöтравны зонöс?» Думайтiс и висьталiс Колькалö, кöда дедыс да Лёнька понда гажтöмтчис топ етшажык, нежели мамыс тöждiс, мамлö адззис кыввез:

— Ешта, мам, гöтрасьнытö. Невестаэс абу сьöдкайез, некытчö тöв кежас озö пышшö.

— А кыдз лэбзяс Настукыт, зон? Эз я ме бердö бöра ни Öник Иваныс кутчисьлы: висьталiс, что Устьясö ныввезнас вашöтас ылöжык. Сылiсь нем он босьт, керас и некинлiсь оз юась.

— Мый сэтшöмыслö миянсянь колö? — смев зонкаыс, олансö вежöртö ас мознас, лыддьö, что кытöнкö эм правда, сiя дорьяс. Ошкö зонка Совет властьсö, надейтчö сы вылö.

— Эн бы тэ, зон, кывтö кузя видз. Туялан эд айытлiсь туйсö, — пильскö Öпим, синватöг öтiкö оз вермы овны.

— Пола я мый я?! — зонка невна рамжыка ни баитö — гусьöнжык горöтчö, кöть юрсö видзö чатырöн, керö ассис: луннэзнас уджалö колхозын, одззамоз рыттэзнас некытчö оз ни котрась. Локтас уджалансянь, вежас паськöм, миссяс, сёйыштас, петас öшын увтö и бытьтö бы мыйкö уджалö-гуддисьö, а аслас синнэз важ керкулань: Настятöг лун оз вермы овны, кöда уджалансянь локтöм бöрын керкуись оз вуджöртчы, оз мыччись — мыйкö вышивайтö да гöрдззисьö. Но... Талун Настялöн чегöма литовка ороп, сiйöн рытнас петiс öтöрö, дыр видзöтiс Колька вылö, кыдз сiя мырсьö-маласьö йöр дынын, шынньöвтiс öм угöвнас, небыт голоснас нюжвыв горöтчис:

— Колька... Кер жö меным литовка оропсö. Чегис, видзöт, рытнас ни.

— Ме оропсö ог куж кернытö, — ныр увтас бизгыштiс зонкаыс.

— Но, Колька. Дыш тэ. Дедыт ловья бы вöлi, ме бы тэ вылö эг юрбит.

Миков нывкалö быдöс бы керис, мый колiс, да сiдз, медбы сiя босьтiс киас, и сьöлöмыс гажмис, но...

— Колька, керан или он? — Настя лöгасис кодь.

Кöмтöг нывкаыс луд вылын сулалö и сiдз жö луннэзнас уджалö, кöть видз вылын, кöть вöрын. Коккез сылöн ёнöсь, озö полö тальны чорыт нять короггез, некин оз чушкав, некытчö оз кырышт. Мыйлöкö петiс öтöрö Öпим, адззис нывкасö кöмтöм коккезнас, пондiс жалейтны: — Насту, кага, дойдан эд коккетö. Видзöт, кинкö чапкöма стеклотор.

— Тётка, видзöт жö Колькаыс кытшöм. Оз эд кер литовка оропсö, — Öпимлö норасьö Настя, видзöтö кыдз мам вылö жö.

Öпим зоныслö пондiс модьны:

— Тэ мый, зон? Кер жö нывкаыслö оропсö. Мыйöн сiя ашын ытшкисьнытö мунас?

— Кера, кера, — зонка мунiс чом сайö, босьтiс сэтчинiсь литовка ороп кыза кузь бедь, кöдö тулыссянь заптiс дедыс, керкуись петкöтiс пурт и джын час эз чулав, кыдз ороп лоис гладьöтöм, литовка садитöм ороп бердö, и сэтöн жö зонка пешлiс, мый керис, кыдз петiс: ытшкыштiс коккес увтiсь луд. Литовка бритiс-босьтiс. Ытшкыштiс куим-нёлись Колька, литовкасö нюжöтiс нывкалö, ачыс видзöтiс кытчöкö муö, шуис:

— Пешлы. Бат, нем вылö оз туй.

Нывка ытшкыштiс лудсö, гажöн горöтчис:

— Колька, кужан уджавнытö. Медбура керöмыт.

— Кыдз шогмö, сiдз и кера, — гажтöм голосыс зонкалöн, кымöсыс увтöт видзöтыштiс нывкаыс вылö, сыбöрын кутiс кисö Настялiсь, кöда шоныт, небыт, топ тöдчис, кыдз вирыс тёпöтiс — сьöлöмöдз йиджис, гажöтiс зонкасö сэтчöдз, что мыйкö бы висьталiс, да кылыс öмас эз бергöтчы, но медбöрын ачыс эз казяв, öмсис чеччöвтiс. — Окыштан кöркö...

— Мый понда?! — Настялöн сiдз и пондiс пизьны гаж, сералiс.

— Уджалöмыс понда.

— Лоас! — сералiс нывкаыс — гаж пизис, синнэзас бичиррез, топ лоис эшö басöкжык, топытжык, лöсьытжык мыгöра, рожабаннэс жаритчöмась шондi вылын, син югöрыс лöзжык, пыр Колькасö сералiс, кöр инмасö кыкöн. — Колька, тэ эд менö он босьт. Гöтрасян асланыт нывкаэз вылö. Вот босьтiн бы, ме бы окалi нö.

Миков тырппесö жмитiс, жмитыштiс нывкалiсь киэсö, мöдöрö бергöтчис — сымда и эм.

Нывка литовкасö сувтöтiс посöдзö, пыралiс керкуö, петкöтiс гöрдззисян, пуксис öтöрись посöдзö и пондiс гуддисьны, кöть и курччасисö геббез да номмез. Нывка пукалiс, а зонка сулалiс посöдзыс бокын, киэзнас сiйö и керис öвтышалiс-вашöтлiс номмесö гöгöрсис и нывкаыс дынiсь, эз баит.

— Колька, мый нö тэ? Видззес вылын отирыс дырни ой кытшöм басниа, а öнi кывтö ньылыштiн я мый я?

— Ог куж баитнытö, — гöрдззисян ем кутыштiс нывкалiсь — сорис уджсö.

— Колька, эн бы орс. Тэрмася гöрдззынытö.

— Жöник сайö я мый я лöсьöтчан мунны?

— Босьтасö кö, мыля ог мун? Он я тэ бы гöтрась?!

— Настя, натьтö, эд водны ни колö. Ашын эд бöра чеччыны, — посöдзö петiс нывкалöн мамыс.

— Мам, меным Колькаыскöт гажа, пукалышта эшö. Только вот сiя етша баитö.

— Сiя эд абу тэ кодь тарабайка, да и нем зонкаыслö весь быздыны, кöр сэтшöм нылöн керкуаныс горе, — Устья сiдз видзöтыштiс зонкаыс вылö, топ нылыс местын окыштiс.

Сiдз и чулалiс рыт. Кöр пемдыштiс кодь, дугдiсö шыасьны каёккез, нывка да зонка пырисö горттэзаныс, водiсö узьны, ашынас бöра öтдруг мунiсö уджавны. Отир ни быргисö, что Öпимлöн зоныс, натьтö пö, гöтрасяс роч нывкаыс вылö, кöдö, видзöтö жö, велöтiс баитны комиöн ни, и пыр ветлöтiсö оча пельпон зэв-зэв.

— Некин вылö ме ог гöтрась! — отирлiсь басни орöтлiс зонка, кöда вöлi айыс кодь жö чож кыла, быдöнлö адззис висьтавны кыв.

Уджалiсö талун. Рытнас локтiсö. Шоччисьыштiсö. Настя бöра петiс посöдзö, пондiс гöрдззисьны. Колька петiс, пуксис бокас, пондiс кыйны нинкöм, но медодз кабсö меряйтiс Настя кок сьöртi — ордчöн пуктылiс.

— Тэ мый, Колька? Он я меным нинкöмсö кый бы?

— А кинлö нö? Ог жö сё мамöлö да аслым. Видзöт, кöмтöг ветлöтан, и отирыс пыр пиннезныс вылын видзöны-сералöны.

— Ог эд понды кужны сэтшöм нинкöммесö новйыны. Миян гортын нинкöммес мöдкодьöсь.

— Новьян!

— Кый, кый. Умöль оз ло, — нывкалöн сэтшöм небыт да басöк голосыс, топ пыр сьылö да баитö, мыйсянь зонкалöн сiдз сьöлöмыс бöра и чеччалö.

Рыт. Пемдö и оз. Шоныт, нельки жар. Шоччисьöны отир, только вичкуланьын кылöны томмезлöн голоссэз. Дзикнитiс гармоння.

— Настя, ветлiн бы нывкаэс дынö, сьылыштiн да йöктыштiн öтлаын, — висьталiс Колька, ачыс нинкöм кыйис, сiдз уджалiс, что нырыс йылын öшалiс ньылöм — ва воть, кыдз бисер лякасьöм. — Некытчö ме, зонка, ог мун. Сэтчин солдаттэс да сельсоветсиныт предыс адззылас, кöда сiдз ни эрзiс-шуис, что адззылас кö рытнас кытiськö, сэк жö зэлöтас. Мыйлö грехас пырны?

Баитiсö посöдзын томмес, касьтылiсö сельсоветiсь предсö и, кыдз шуöны, кöть ошсö пö касьтыв, и сiя локтас: посöдз дынö нинкöммезöн чышкис-локтiс Öник Иван, пиннес ылiсянь гер видзöны, синнэзас лёк югöр, топ сiдз сёйны и лöсьöтчö, мурзьö ни:

— Гортынöсь?!

— Гортын, — Миков юрсö бергöтiс мöдöрö, кыдз бы эз адззы Иван Петровичсö. — Кытчö лоамö? Кинлö колiс, кулiс, а ми кытчöдзкö ловьяöсь.

— Кинлö колiс, кулiс, кöда тюрмаын олö! — серöмтчыштiс-гажöтчыштiс Öник Иван, гыжжесö пондiс курччавны, одзлань мурзьыны. — Тöдны колö, гортынöсь я роччес. Эзö я эшö пышшö? Ме нiйö, мать, ась кö пондыласö пышшыны, чожа тойезöс моз ляза! Мыччала олансö!

— Уджалöны тай, — Миков висьталiс ассис. — Некин сьöрись уджнас озö кольччö.

Сельсоветiсь пред синнэсö мöртiс зонка вылö, вель дыр видзöтiс да пиннес пыр горöтчис:

— Зонка, ме видзöта и адзза, мыся, айыт кодь жö чож. Уна пондöмыт тöдны.

Миков одзлань эз шыась, öвтiс киэзнас номмесö, кывзiс, кыдз вичку дынын чирзöны зонкаэз да нывкаэз, ыб дорын жавкнитiс ворота, пирснитiс вöв, мöдiк вöв гöрöктiс, кылiс, кыдз котöртiсö-буткöтсö коккезнаныс вöввес.

Иван Петрович мунiс посöдз дынiсь, мунтöнняс ни мыйкö тотис ас кежас.

— Юрыт бы коккет увтö, — гусьöнмоз шыасис Колькаыс.

— Мый сэтшöмсö горöтчин? Эг вежöрт.

— Уна пондан тöдны, жöникыт бокö он понды водны.

— Шедас жö тэ сайö кинкö. Уна жö горесö панялас, — пеничайтöмöн висьталiс Настя, дзугыльтчис кодь, но недыр кежö: зонка небыта малыштiс пельпонсö, висьталiс:

— Тэ эд горесö пондан панявны.

— Ой, Колька! Ме да тэ коласын паськыт ю визывтö, öтамöднымöс адззам, да киэзным дженытöсь, огö судзö. Видзöт, кыдз миян кодьсö синйöны. Тэ эд сэтöн жö — öтiк посöдзöт ветлöтамö.

— Кывзы сэтшöммесö...

Посад узис и эз: кытöнкö Ольланьын бузгисö-лыйисö. Лыйöм шы повзьöтiс сьöлöммез. Миков пырис да турбыльтчис джодж шöрö, куйлыштiс, мамыслiсь юалiс:

— Мам, кыдз тэныт Настяыс?

— Зон, ме бы Настясö кыкнан кинам жмитi, дзеби моросам и некинлö эг мыччав. Вöлiн кö бы пöрисьжык год-мöдöн, талун жö гöтралi!

Бур лоис Колькалö. Шынньöвтiс, кунис синнэз, и ачыс эз казяв, кыдз онмöссис.

8

Ойес дженытöсь да югытöсь: öтöрын коккез увтö ем бы уськöт, адззан. Страда. Отир керöны колхозлö турун, некин аслыс öтiк час эз уджав, кöть быд морт видзö пода. Тэрмасьöны уджавны — одз асывсянь, сёр рытöдз видззез вылын, кöр и ойшöрöн гортö локтöны. Мыдзöны отир уджавтöн или озö, некин оз норась, топ озö вежöртö, мый сэтшöм мыдз, некин оз норась, что сылöн ой и лун сималö кынöмыс, что пöттöдз сёйны некинлöн и нем абу.

Медбöрья рыттэзö Коля да Настя посöдзын эзö пукалö. Öпим сэкжö казялiс зонкалiсь дзугыльтчöм, юалiс:

— Микол, кытшöмкö кань я мый я коласöттяныт котöртiс? Мылякö рыттэзнас нывкаэс посöдзас эзö пондö мыччасьны?

— Пет кöть эн, ог горзы!

Чорыта мамлö горöтчис Колька, и мам сэтöн жö шуис:

— Ме тэныт, зон, видзöт! Вынö етша, но кыдз кута да юрсиöттят тогья, сэк пондан тöдны. Мамыт вылö китö эшö он лэбты.

Висьталiс мам зонлö лэчыт кыввез, и лоис недолыт, кöр сiдз ни полöтö оланыс, что оз ни лысьт думайтны ашыння лун йылiсь, водö бы да ланьтö чожажык, медбы кöть сьöд ойнас мыйкö дырна вунöтлыны лунсясö — шоччöтны бы сьöлöмсö.

Öпим пöрöтчис западня вылö, кунис синнэсö и сэк жö пондiс вöтасьны, топ öшын увтаныс локтiс нач тöдтöм морт — вуджöртчис öшын весьтас и сэтöн жö дзебсисис посöдз бердiсь петшöррез коласö, только бытьтö бы тыдалiс тоша рожаыс, кöда вачкисис калян чужöм вылö и юалiс: «Мый, инька, узян? Осьт ыбöстö. Ме пырала да видзöта, кыдз ни олатö».

Инькаыс повзис да повзис, сьöлöмыс пондiс тогзьыны, вылас нето кисьтiсö кöдзыт ва, нето чапкис жарö. Бытьтö пышшö бы и оз вермы, кресталö бы öшынсö, но киэсö кыдз кöрталöмась, озö вöрöтчö. Ачыс топ дорöма западняыс бердö, бытьтö бы суседко лязö, а калян чужöмаыс посöдзыс дынiсь оз мун, чорппезнас сяткöтö ни стенаö. «Колька, Колька!» — ыксö бы Öпимыс, но öмыс оз оссьы, а öтöрас: сят-сят, сят-сят. Ойшöр. Мед и лöз рöма югыт, но шоччисьö отир, и кылö ни былись Öпимыс, что öшынаныс кинкö сяткöтö.

— Кин сэтчин?! — инька чеччöвтiс западня вылiсь — öшынлань синнэс, сьöлöмыс былись тогзьö. — Кин сэтчин?!

— Ме, — öтöрас шыасис нач тöдса голос, топ Öльöшлöн басниыс.

Öпим эшö öддьöнжык повзис, ачыс оз тöд, мый сыкöт лоис: садьыс бырлiс или эз, но чеччöвтiс посöдзö, пытшкись посöдзсянь негорöн ни юалiс:

— Тэ, Öльöш?

— Ме. Ось ыбöссö да жагöн. Гусьöн ветлöт.

Мыля Öпимлö гусьöн колiс пантавны мужиксö? Инькаыс эшö нем эз вежöрт, некöр эшö вöлi думайтны-öшлыны, мый сэтшöмыс, кöр пизис ни гаж, сэтшöм ни вöлi рад, что осьтiс ыбöссö, öшöтчис мужикыс голя бердö и пондiс никсыны пон моз: синваэсö тiлис, малалiс Öльöшыслiсь спинасö и чуннезнас кылiс, кыдз сiя косьмöма-умöльтчöма, топ мыгöрыс чиныштöма.

— Дугды, мед некин оз адззыв, — кеймисис ни мужикыс.

— Мый нö тэ? Мыля сэтшöм?!

— Эн модь. Пышши ме.

— Кыдз пышшин?! Мыля?! — инькаыслöн сэтöн жö сайкалiс сьöлöмыс, вылас кыдз киссис кöдзыт ва. — Шедан, да виясö эд!

— Пырам керкуас, — мужикыс мездöтчис иньыс киэзiсь, шагньöвтiс пытшкись посöдзö, бöрсяняс пöдналiс ыбöссö.

Кыша-паша пырисö керкуö. Öпим сэк жö чывкнитiс комö, лöсьöтчис öзтыны бы би да лонтны гор, но мужикыс бöра падтiс: «Эн котрась, оз ков öзтыны бисö».

Инькаыс медодз кыдз бытьтö кольмылiс, но эз-эз да сьöлöмыс дугдiс чеччавны, пондiс ни вежöртны, что былись локтiс мужикыс — аслас роднöйыс, кöда медодз нач ловзьöтiс сьöлöмсö не только локтöмнас, но тошнас, бырöм паськöмнас, ыждöм синнэзнас, кöднаын тыдалiс аскодя югöр, кыдз мыдз да вартлöм понлöн, кöда пышшöма хозяиныс дынiсь, локтöма йöзö и полö, что вачкасö или кинлöкö шедас, сiйö и дзирбарасьö öшынлань, керку пытшк видзöтö, — синнэзнас сiдз и кошшö пельöс, кытчö бы туйис заргисьны, медбы некин эз адззы, эз кут, эз вартлы или вий, кыдз гутöс.

— Кыдз нö? Мый? Быль я мый я пышшин? — Öпим босьтiс туис, лöсьöтчис бы вайны юны, а ачыс сё видзöтiс и видзöтiс мужикыс вылö, кыдз бытьтö эз верит аслас синнэзлö.

— Дугды модьны, — мыдз да кижган кодь голосöн висьталiс Öльöшыс, гыжьясис, кыдз тойöсь кань, кöдö сiйö и керисö курччалiсö тойес, и норасис ни. — Нач тойсялi...

— Чöвт чожажык вывсит! — педзис инькаыс. — Югдыштас, да баня лонта.

— Эн чеччав. Ме эг лок гöститны. Тшыгйöн пондiмö кувны да сiйöн и пышшимö. Кöть лун-мöд ола гортын. Он я няньторöн чöскöт öмöс?

— Ойи-и-и! — унньöвтыштiс Öпимыс, кивзыштiс, кусiньтчыштiс пызаныс дынын, пондiс горзыны сiдз, медбы зоныс эз саймы, эз кылö öтöрын и мöд керкуас. — Мыля нö ми сэтшöмöсь? Мыля чассёным öтiк абу? Шедан кö, виясö эд. Отрядыс оз я ой и лун жöдзö. Ой и лун кошшисьöны...

— Бат, озö. Ола лун-мöдсö да ачым сетча, — сьöкыта горöтчис Öльöшыс, сэтшöм голосöн, что кöть мый керас, кöть кыдз дзебсисяс, но сiдз и этадз шедас, и былись вермасö вийны. Гажтöма баитiс мужикыс.

Пильскис-горзiс инькаыс. Эз я бы ков нылö пуксьыны öтамöдныс бердö зэв-зэв, но кыкнанныс вежöртiсö, что мыйкö колö керны, некöр медодз любитчыны.

Öльöш медодз вывсис чапкис да порог дорö шупкис паськöмсö, пасьталiс гортiсь йöрнöс-вешьян, вöлись пуксис пызан сайö, вöлись пондiс сёйны, мый вайис иньыс. Сёйтöн видзöтчис, вöлись казялiс, что абу Лёнька зоныс и тестьыс.

Тестьыскöт гортын овтöн олiсö умöля — пыр эзö тöрö кык сюра пороз моз керкуас, люкасьлiсö, но öнi Öльöшыс гажтöмтчöма старикыстöг, сiйöн и юалiс сы йылiсь, сыбöрын Лёнькасö касьтылiс. Вöлись Öпим горöн рик-рик горöтiс, резьöтiс керкутыр да сiдз, что мужикыслiсь кыдз бы нетшкöвтiс сьöлöм, мыйсянь Öльöш нето повзис, нето кольмис, öшöтiс юрсö и нем эз понды вермыны висьтавны.

— Мыйлö менам и шогмиссьöма? Мыйлö ме и ола? Мыля отирыс кулöны, а менам некыт оз вись, и лолö оз пет?! — горзiс Öпим, кыввезнас öддьöнжык дойдiс мужикыслiсь сьöлöмсö, кöда асьсö иньыс одзын пондiс лыддьыны виноватöйöн, кöть эз гусясь, некинöс эз вартлы, эз вий, а вот янсöтiсö семьяыскöт. Вежöртiс, что вöлi бы гортын, овсис кокнитжыка, эз я бы шогöтыс орддьы керкунысö, эз я бы тестьыс да зоныс вöлö ловьяöсь, а öнi мый?.. Пырис гортö минута-мöд кежö, кыдз бандит, кыдз гусясись, оз лысьт пыдынжыка ловзисьны, горöнжык кыв горöтчыны, оз лысьт иньыскöт любитчыны, оз вермы ашын котрасьны шойна вылö да видзöтны, кытчö дзебисö роднöйся-роднöйесö. Мужиксö курöтiс и зэлöтiс обида, сiдз зэлöтiс, что пöдтыны пондiс.

Горзiс-норасис Öпим, кöдалö сэтшöм лоис умöль, что горзытöнняс пондiс витшыктыны, кыдз бы пöдтiс руыс, виньдiс.

Öльöш гультымасис-гультымасис, зубыта ньылыштiс дульсö да висьталiс:

— Тырмас. Кыласö отирыс.

Пондiс тэрмасьны-югдыны. Китöстiс петух. Мöд керкусис, кылö, петалiс Устья да зэркыт кокшыöн ветлiс картавывланьö.

— Киннэз мöд керкуас? — повзьыштiс Öльöш.

— Эн пов. Миян кодьöсь жö. Горттэзсиныс вашöтöмась да татчö вайöтöмась. Кодяöсь отирыс.

Öтöрын жолькнитiс кинкö киын ведра. Öпим кыдз саймис кыз онiсь, нюжöтiс голясö, кывзiсис вöрын кöч моз, полiс отрядiсь, но матын керкуныс дынын кытчöдзкö некин эз кыв. Югдiс öддьöнжык — лун синнэсö осьтiс, пондiс видзöтчыны öшынöт, кöднö ой кежö немöн эзö саявлö. Джоджын Миколка узис пыдын онöн. Ен угöлын буржыка ни тыдалiсö енлöн синнэз. Помой доз весьтын миссис Öпим, сыбöрын сувтiс еныс одзö да юрбитiс. Лонтiсис гор.

— Кытчö бы дзебсисьны? — Öльöш синнэзнас керкуись пондiс кошшыны пельöс, кытчö бы позис саясьны.

— Ме ог тöд! — горзöмöн горöдз одзын шыасис иньыс, кöр гортын — аслыс позын хозяинлö колö дзебсисьны. — Джоджулас пыран ли мый.

9

Морт я вуджöтчас öшын увтын, пон я котöртас посöдз дынöт, мöс или баля бакöстас, Öпимлöн сьöлöмыс кыдз шöри потö-повзьö, сiдз и вачкисьö, что локтöны ни, кутасö да нуöтасö, но сэтöн жö дума гажöтö: «Гортын эд Öльöшö, гортын!»

Инька аслас гöсьлö эмись и абуись пöжалiс пирöггез да тупöссез, кöднö Öльöш сёйис и öддьöн бы бур лоис пукавны пемытiнын, но сёянсянь чожа пондiс висьны кынöмыс: ульлунся сёян соровтiс кишкаэсö, вашöтiс öтöрö.

Кынöм висян джоджулiсь вашöтлiс часто. Öльöш сiйö и керис пырис да петiс джоджулiсь, и некин сiйö некытшöм рака синнэзöн эз адззыв, сiдз кыдз посöдз ыбöс вöлi пöдана. Только öтпыр пытшкись посöдзын мöд керкуись Настя люкасис нач тöдтöм сылö мужиккöт, кöда вöлi шырöм юра, тоша, ыждöм гöгрöса синнэзöн, топ посöдзас кысянькö усис и повзис: синнэс ыждiсö, рожабаннэс тош увтын чочкоммыштiсö, падмис недыр кежö, осьтiс öмсö, сулалыштiс и сэтöн жö бöр метырнитчис керкуö. Недыр мыйись Устья петiс Öпим дынö, мог лöсьöтiс, бытьтö сылö колö сов, и кык инька порог дорын мыйкö шушкöтчыштiсö.

Быдöс бур. Учöт посадын олан одззамоз жö пессис-уджöтiс пöттöдз отирöс. Рыттэзöн ыб дорын ыджыт туй вылын дзуртiс-виксышалiс ворота, кöр лёка вувтiсо поннэз, пырскайтiсö вöввез, кылiс вöввеслöн котöртöм. Китсасисö петуххез, видз вылын рыттэзöн дзуртiс-горалiс герчкан. Невна топ чиныштiсö луннэз, содыштiсö ойес да лоисö топ пемытжыкöсь. Öпим асыввезнас чепсасис уджавны, рыттэзнас тэрмасис гортö. Ылiсянь гортö локтöн видзöтлiс керкуныс вылö, ылiсянь сьöлöмыс дрöжитiс, видзчисис умöльö, но кыдзкö быдöс вöлi бур: Öльöш олiс эшö гортын, пукалiс джоджулын, сэтчинiсь петавлiс только ойшöрнас.

Öльöш гортын куим лун да куим ой чулöтiс ош моз. Джоджулын эз вöв нач пемыт — öшынокöт павкис югöр, сэтi жö ветлöтiс кань, öтöрись кылiс баляэзлöн баксöм, петухлöн китсасьöм, курöггезлöн готсьöм, ракаэзлöн карзöм: деревняись олан павкис и олiс нач матын Öльöшкöт, кытöн гажöтiс, кытöн полöтiс. Öтпыр луннас, кöр отир горттэзын абуöсь, кылiс, кыдз буткöтiсö-мунiсö вöввез, кылiс морттэзлöн басни: кык морт ошшасисö, что кöр-некöр шедасö бандиттэс, сэк вöлись нiйö паздасö быдöннысö — öтiк мортöс ловйöн озö кольö.

«Кутö да вöлись ошшасьö! — гажöн думайтiс Öльöш, но голоссэз сьöртi эз тöд, киннэз сёрнитiсö öтöрын.

Гажтöм вöлi лунйыны джоджулын, да эшö гожумся луннэз вöлiсö кузьöсь, кöр весь олан, и мужик ештывлiс думайтны берсясö: тöдвылас усьлiс быдöс оланыс, кыдз быдмис айтöг, кыдз велöтчис öтiк год, вöлi бытьтö бы грамотнöй, кужис ректасьны-лыддьöтны, гижис мало-дело, уджалiс — некинлö эз сетчы, некöр эз думайт шедны тюрьмаö, а вот шедiс. Пешлiс штык и пуля — шедлiс тышкасьны германеццезкöт, Гражданскöй войнанас ёна койис сэтчин и татчö, шедлiс чочкоммес и гöрддэс дынö, медбöрын пышшис чочкоммес дынiсь, локтiс гортö, но эшö пышшалiс вöррезын, кытчöдз чочкоммесö эзö репöтö татiсь. Кöр татчö ни локтiсö гöрддэс, сiйö партизанöн лыддисö отирыс, командиррез, ошкисö, что отсалiс керны Совет власть, а сыбöрын пырис колхозö.

Дыша джоджулын чулалö кадыс, но и ась, только бы лоны гортын, сэсся не адззывны бы тюрьмасö, не тшыгьявны кувтöдз.

Öльöш думайтiс, что весись пукалö тюрьмаын — сёйисö асланыс отир и медодз Öник Иван, дзескыт сылö вöлi эстöн овнытö.

«И мыля бы еныс сiдз шуöма овнытö? Мыля дзескыт оланыс муыс вылын? Мыля öтамöднымöс сёямö?» — думаэз зэлöтöны, дзескöтöны, нуöтöны бы кытчöкö. Мужиклö юрас кöр пырö бöб дума, что олыштас эшö гортын лун-мöд, сыбöрын сöтас вöрö, кытöн абу дзескыт, оланыс абу жö чöскыт, но некин оз понды ыждавны. Некинкöт и некöр сэсся оз пантась, ош моз пыд вöрын керас горт, кыдз кöркö Вöрью бердын олöмась кык вон Кирилл да Мырыл, кöдна, натьтö, мыйкö понда пышшылiсö жö отирыс дынiсь, кувтöдз олiсö кöззэз увтын.

Öльöш вöрсис эз пов, вермис кувтöдз бы овны пыд вöр шöрын, но сэтöн жö думаэс бергöтчисö мöдöрö, сэтöн жö осудитiс асьсö: «Тэ мый, мужик?! Ачыт я? Джоджулас пукавтöн отирыстöг гажтöмтчан, а вöрас...» Öльöш вöлi мортöн, морт моз бы и олiс: сьöлöмыс висис гортыс понда, жаль вöлi зоныс, иньыстöг гажтöмтчис, аслас посадiсь отирсö бы адззылiс, уджалiс бы быдöн моз — сю быдтiс и нянь сёйис. Отир моз бы олiс мужикыс, медбы асывнас чеччис, видзöтiс шондiлань, адззис бы асывся лысва, дзар керис бы ыббезлань да казялiс, кыдз быдмöны сюэз, адззис бы, кыдз видз вылын путриктö турун, цветитö быдкодь цвет, кылiс бы кöклiсь кöкöм, адззис бы быдкодь гут-гаглiсь лэбалöм, пуэзлiсь сук-зелёнöй лыс. Мортлöн сьöлöмыс лэбзис бы отир коласö, олiс бы отир моз, медбы зверь моз быд шыись эз пов, эз видзчись, что талун-ашын локтасö да нуöтасö, бöр янсöтасö иньыс да зоныс дынiсь.

«Лёнька, Лёнька! Кыдз тэ колан бы талун айытлö! Кыдз бы Öльöшыс дзудзгöтчис тэкöт, быдтiс мортö, пондiн бы уджавны — пригодитчин айытлö да мамытлö, а тэ...»

Öльöш джоджулын горзiс инька моз, но негорöн, полöмöн — и горзынытö горöн эз позь, иньыс моз жö кинлiськö юасис: «Мыйлö менам шогмиссьöма?! Мыйлö?! Мыля менам учöтнам абу кувсьöма? Мыля войнаэс вылын пуляэс орддисö — öтiк пуля некыт эз кырышт, кöр одзам и бöрам пöрис отир, кыдз турун ытшкисö? Мыля тифнас шогалi да эг кув? Еныслö я мый я сiдз колiс, медбы олi да песси — сералiс оланыс?»

Кузьöсь гожумöн луннэс, умöль öтнаслö пукавны джоджулын.

Кытчöдзкö Öльöшсö некин эз вöрöт, кöть сiя полiс, медбы Трофимыс эз шед, кöдакöт пышшисö тюрьмасис, кöда вöлi кокнит мывкыда, гортö локтöн ошшасис: «А кин менö Киевсис, вöр колассис, кутас? Некин менö вöррес коласiсь оз кут!» Шедас кö Трофимыс, сэк жö висьтасяс, кыдз да мый, и кутасö Öльöшсö, кöть иззэз увтö пыр, адззасö.

10

Рытлань кад. Асывланьсянь мурзьытöн сибöтчис кымöр и орддис посадсö да вешшис Киев деревнялань.

Трофим, кöда пышшис Öльöшкöт тюрьмаись, пукалiс öтöрись посöдзаныс, панiс иньыслö нинкöм, видзöтышалiс гымалан кымöр вылö, мыйкö мурзис нырыс увтын, уджалансянь видзчисис иньсö да челядьсö, кöдна мужиклöн вöлiсö вита — вердiсö ни асьнысö.

Киевлань сибöтчис зэран кымöр, лёка мурзис, вывтi ни гымалiс и вирдалiс, уöтiс-урöтiс, натьтö, кыткö дойдiс шерöн, но кытчöдзкö Киевыс весьтöт эшö эз зэр. Пöльтыштiс вына тöв, кытiськö нöбöтiс бус да ёг, öтмöдöрö резiс геб-номпöлöс. Швачкыштiсö медодзза гырись зэр воттез, вадiсö ру и му. Трофим юрыс вылö пуктiс важ фуражка, полöмöн ни видзöтыштiс кымöр вылö, полiс кымöрсис, но немымда эз пов отирись, что кинкö эстöн вермас сiйö чушкавны.

Мужиклö синнэс вылö усис дед Сергей, кöда кивыльтiс уджалансянь, гуналаньсянь, а мöдöрсянь, туйыс вылын посадысланьын, локтiсö вöввез вылын солдаттэз.

«Ме дынö эд!» — Трофимöс сотыштiс дума, медодз посöдзас öшис, эз тöд кытчö уськöтчыны-дзебсисьны: то ли заргисьны пытшкись посöдзас да пöднавны ыбöссö, то ли сöтны вöрö.

Солдаттэз пукалiсö вöввез вылын, öвтышалiсö юррезнаныс, киэзаныс шатёккез. Вöввез эзö тэрмасьö, öвтiсö юррезнаныс да бöжжезнаныс, пырскайтiсö. Солдаттэз кыдз бы суналiсö вöввез вылын. Трофимлöн сьöлöмыс чеччалiс моросас, а ачыс сё жöдзис посöдзын, сöтiс ни бы котöртны, но сэтчö локтiс Сергей дед, лöсьöтiс басни:

— Мый нö, Трофим, керан? Нинкöммез он я пан? Колö, колö. Ме тай сiдз жö...

Трофим эз ни кывзы пöрисьыслiсь баснисö, а чеччöвтiс посöдзсиныс и быд вынсис пондiс котöртны вöрлань.

Эз бы понды котöртны мортыс, эз бы пышшы, солдаттэс, натьтö, дзар бы эзö керö — адззисö да эзö, но эстöн вежöртiсö, что мыйкö не сiдз — морт весись кöч моз гортiсь рытнас оз котöрт.

— Сулав! — öтiк солдат зэлöтыштiс сермöт повод — сувтöтiс вöв, спинаыс сайись тэрмасьöмöн лэдзис ни карабин. — Сулав!!

Кытчö ни сэтöн сувтас Трофимыс? Мужик öдззис котöртны буржыка, только виль нинкöммез мелькайтiсö бöрас.

— Сулав! — не öтiк голос ни öтдруг рякöстiсö мужиклö, и сэк жö чарöтiс лыйöм.

Шутньöвтыштiс пуля, вöтiс пышшисьсö, юрыс вылiсь нетшкöвтiс важ фуражка, öддьöнжык повзьöтiс Трофимсö, кöда вежöртiс, что мöдiк пуля мöртчас ни юрыс бöрö.

Гымалiс кымöр, мурзис лёк морт моз. Ыркыт руöн пöлялiс тöв, нёкралiс льöмпу уввез, шушкисö сыспуэз, кöдна куим-нёль сулалiсö медвылын местаын — деревня шöрас, и ылiсянь тыдалiсö грива вылын. Повзьöм баляэз гуналаньсянь гизнитiсö керкуэзлань, дзикнитiс порсь, готсьыштiс петух. Быдöс энö шыэсö Трофимыс эз ни кыв, сылöн дрöжитiсö киэс, сьöлöмыс, бергöтчыштiс юрыс. Бöрсяняс котöртiс-буткöтiс вöв, вöтiс, сувтчис зэв, ловзисис пеллес бокын улькодь руöн, мороснас пыкис, невна эз тальччы.

— Кин сэтшöмыс?! — карабинлöн дуло пыкис ни спинаас — Мыля пышшан?!

— Ме. Тэ... — пондiс мыктавны Трофим, бледöтiс чужöмыс, невна эз чись вешьянас. — Эд лыйö!

— А но мунам деревняöдззас! — солдат сiдз пишаль дулонас и мöртiс бы спинаас, талис бы вöвнас, сiдз и лыйис бы. Мужиклöн кикокыс кывзiсис умöля, дрöжитiс, некытшöм дума пышшöм йылiсь юрас эз ни вöв.

Вöрыс дорын моз ни вöтiсö Трофимсö да бöр бергöтiсö гортö, юалiсö кытöн олö.

— Сэтöн тай, — пышшисьлöн лёбöтiсö тырппес. — Öнджаас... Эта керкуын.

Вайöтiсö посöдз дынö, юалiсö мыля пышшалö.

— Кытчö нö воштiся? Тюрьмаас невна тшыгйöн эз вийö. Сiйöн тай и локтi гортö, — мужиклöн сё дрöжитiсö тырппес, ачыс эз казяв, кыдз шогмис басни — вузалiс асьсö.

— Ми тэныт мыччалам, кыдз пышшавнытö! — швыч да швыч спина вылын йöктö ни плеть. — Висьтав, кин эшö тэкöт пышшис!

— Эдö вартлö, кагаэз, — пондiс кеймисьны Трофимыс. — Чуракись Öльöшкöт локтiмö.

— Господи помилуй, господи помилуй! — дед Сергей перыта дзебсисис асланыс посöдзö да модис. — Господи, бур смертьнас ог ни кув.

11

Зэрыштiс-койыштiс ыркыт ваöн, ашынас луд вылын да льöмпу листтэз вылын сыркьялiс кыз лысва. Гажöнжык чирзiсö воробейез, топ горöнжык китсасис петух. Öпим чеччис одз, шондiтöг бергалiс керкуын, но öтöрö эз петав, öшынö эз видзöт. Югдiс одз, чожа лэбтiсис шондi. Инька тэрмасис рыт и асыв, кыдз сы весьтöт пыр ендiс уджыс, пыр колiс вöрöтчыны одза-одз, бергавны пода да гор гöгöрын, мыйкö пуны мужиккеслö сёян. Медодз буржыка бы вердны мужиксö, кöть и верднытö нач вöлi немöн. Тöн уджалансянь локтöн туй боккезiсь котрасис-кошшис медодзза тшаккез и талун топ пеллесö адззис, стряпайтiс — рад вöлi, что Öльöшсö вердас тшакьяшыдöн, мед мужикыс öмсö чöскöтас, то кин тöдö, мый лоас. Öпимлöн сьöлöм полiс-чеччалiс быд шысянь, топ сiдз кинкö и локтас, пырас керкуас, нуöтас-мырддяс мужиксö. Инькаыс олiс и быд минутаö видзчисис гым-кымöр, кöда вот-вот чарöтас.

Öпим сiйö и керис юрбитiс еныслö, кеймис, медбы сiя отсалiс, сэсся некинсянь и нем бурсö эз видзчись.

Инька бергалiс гор дынын, öшын увтын чирзiсö воробейез и лöнисö, кыдз кинлiськö повзисö, топ лэбзис öтöрас кайварыш.

Пессэс сотчисö умöля, и инька не öтпыр ни ухватöн бергöтiс нiйö горыс пытшкын. Уджалiс сiдз, что пымалiс и пондiс йöрнöс соснас чышкыны кымöсыс вылiсь ньылöм, кыдз öтöрись посöдз ыбöсö кинкö пондiс ёркöтны. Инька киэзiсь ухватыс усис, сьöлöмыс сувтчыштiс, кивнитыштiс, кыдз дойдöм каёк, чеччöвтiс зоныслань, кöда чискис-узис джодж шöрын, пуктiс ен одзын пернапас. Ыбöсас вартлiсö сiдз, что керкуыс дрöбамис. Öпим думаэзнас осьтiс бы эшö джоджув ыбöс, мыйкö висьталiс бы мужикыслö, но некöр ни вöлi, сiдз кыдз посöдзын рочöн ыкöстiсö: «Осьтö ыбöссö, то умöль лоас!»

«Шедiс эд роднöй да любимöйö-ö-ö! — рик-рик горöтыштiс инькаыс, синватöг горзiс, кикокыс небзисö, местаись эз понды вермыны вöрзьыны, кувны кыдз лöсьöтчис, но öтöрись посöдзын öддьöнжык ыксiсö ни: «Осьтö чожажык!»

Ковсис жагвыв петны пытшкись посöдзö да юавны: «Мый тiянлö колö?»

— Лэдз, хозяйка, то умöль лоас! — рамжыка ни шыасисö ыбöсыс бöрын.

Öпимлö öтöрсянь нырас вачкис табак тшынлöн дук, кöр Öльöшыс эз курит, табакнас керкуас эз пыравлы.

Öпим вежöртiс ни, киннэз посöдзын, сiйöн дрöжитöмöн кутчисис иган бердö и осьтiс ыбöссö — оча кымöс люкасис куим солдаткöт, кöдна вештыштiсö бокö хозяйкасö, одзалiсö пырны керкуас.

Солдаттэз киэзын вöлiсö винтовкаэз да наганнэз.

Инька шагньöвтiс кортöм гöссез бöрын, сувтчыштiс западня дынö.

— Кытöн мужикыт?! — öтiкыс, пöрисьжыкыс, синнэсö сувтöтiс хозяйка вылö.

— Кытöн сылö лоны? Соликамскын. Тюрьмаын. — Öпимлöн косьмис дульыс, эз бы дрöжит — быд вынсис видзсис.

— Бöбöтан, инька! Гортын мужикыт. Ось джоджул ыбöстö! Саймис джоджын Миколка, пуксис джодж шöрас, пондiс тiльны синнэсö, лöга притькыштiс:

— Мый тiянлö эстiсь одза-одз колö?!

Зонкасö кыдз бытьтö некин эз адззы и эз кыв: джоджув ыбöс весьтын вöлi кинкö киын пистолет, Öпимöс тшöктiсö осьтны джоджув ыбöссö. Инькалö некытчö лоис воштiсьны, и сiя жагвыв керис, мый тшöктiсö, да мужикыслö ыкöстiс:

— Öльöш, пет, — пильскыштiс. — Пет, то лыясö тэнö и миянöс.

Джоджулiсь бес моз юрсö мыччис Öльöш.

— Киэтö вевдöрö! — кылiс эрзыштöм.

Öльöш джоджулiсь петны оз тэрмась, жагвыв вöрöтчис-кайис увдöрись посок кузя. Юрси бердас вöлi каттисьöмась чераньвеззэз да бус. Сiйö кутiсö спинаöт, бур аскыйöм йöрнöсöт, кыдз дзутöс, кыскисö вевдöрö, кымöсас иньдiсö наган.

— Öльöш, кöть бы няньтор курччöвтiн, то нач тшыгйöн нуöтасö, и бöра пондан тшыг кынöмнат овны. Мый ме и кери? Мыля одзжык эг чеччы да тэнö эг верд? — кивзiс-горзiс инькаыс, чепöссис бы комö, но мужикыслö спинаас тангисö ни кулакöн, брынгисö керкуись.

Öтöрись посöдзöдз вöтчис Öпим. Сьöрас чеччöвтiс Колька, кыкнанныс мыйкö эшö висьталiсö Öльöшыслö, но сы дынö матö эзö ни лэдзö, зэлöтiсö гöгöр куим солдат — öтамöдöрсянь пыкисö наганнэзöн.

— Виясö ни айтö, виясö, — тогзис Öпим зоныслö, кöдалöн сьöдöтiс чужöмыс.

Короминна вывсянь чеччöвтiсö солдаттэз, кöдна кöр и ештöмась кайны вевдöрö.

— Виясö ни-и-и! — инька горзiс улицатыр.

— Эн горзы, мам! — пиннесö гичыртiс Колька. — Озö вийö. Öльöшöс кайöтiсö сельсоветлань, бокö шаг эзö лэдзö тальччыны.

Сiя жö лунö мужиксö нуöтiсö Кöсö, дзимлялiсö иньыс синнэз одзись.

Бöра Öпимлöн оланыс эз ло олан кодь, кöть синнэз бы эн осьт: не сёйны, не юны эз тöр, ойöн эз узьсьы, висис сьöлöмыс. Сэтшöм гажтöм, что гортыс абу горт — ош поз, кöда полöтiс, вашöтiс бы. Инька только отир коласын и öштöтiс умöль кадсö: петас уджавны и кыдз вермö, сiдз асьсö садь быртöдз и нярьялö, медбы рытöн локны гортö, ештöтчыны, водны да онмöссьыны и нем не кывны, не саймыны бы ойшöрöн. А саймас кö, оныс öшас, синнэс тувдасö, пырасö юрас думаэз и пондасö гардны, сэтчöдз нерны и серавны, что бöра еныслiсь смерть пондö корны.

Уджын öштiс сьöкыт кадсö, отир коласын кокнитжык сьöлöмыслö: öтiк морткöт баитас öтiкö, мöдiккöт — мöдiкö. Некин кывнас оз дойд, оз шу, что мужикыс тюрьмаын — умöль морт, и сiя сэтшöм жö, öтiк кучикö Öльöшыскöт вурöма. Кодя отирыс, быдöн шуö, что мужиксö озö вийö, пукалас мымдакö и локтас.

Посадын быдöнныс вöлiсö Öпим дор, кöр отир мужиксö тöдiсö бура, медодз кыдз бригадирöс, кöда некинöс весись кывнас эз дойд, кужис овны и уджавны отирыскöт. Только öтнас Öник Иван, сельсоветiсь пред, öтiк рытö нагладь локтiс Öпиммезö, сувтiс посöдз дынö, бузгыльтчис и пондiс мурзьыны:

— Мый нö, суланджек? Сiдзкö, мужиктö джоджулас видзин да вердiн. Эдö я Курайыскöт öтiк шöрöм сёйö? Адззат тi кытшöмöсь! Лыйны солдаттэслö колiс кыкнаннытö!

— Лый! Мыля он лый?! Или бось черсö да юррезнымöс керав, а эн сэтöн кывнат вий! Ми эд абу кодя отир, поннэз местын оламö!

— Кытшöм тi отир?! — одзлань пурис сельсоветiсь предыс — сёйис-видзöтiс синнэзнас, мыйсянь инькалöн сьöлöмыс гурнитiс, öзйис сэтшöм лöг, что пондiс чирзыны паныт:

— Тупкав öмтö, мортвийись! Думайтан, огö тöдö, кыдз Щелгачёвыскöт Усоллё туй вылын вöтчитö Макарыс сьöрö да мортсö вийитö куим руб понда?! Тöдамö! Свидетель эм. Талун жö вермасö юасьны Коновал Иваника кенаклiсь, аслас синнэзöн адззылöма.

— Ы-ы-ы, э-э-э! — Öник Иван бытьтö пондiс вырскыны пым шыд — тырппесö сотiс, кывсö курччöвтiс, лоис сэтшöм зубыт, что чужöмыс бледöтiс, öмас заргис ассис чунь йыв, пондiс йирны гыжсö, курччавны да сьöласьны.

— Вийитö эд мортсö! — сьöлöмыс нач öзйис Öпимлöн. — Мортвийись тэ! Вий и менö ни. Мый тэныт? Киыт эд лэбас!

— И-и-и, э-э-э, — курччалiс Öник Иван.

— Вешшы, вешшан кö эстiсь! — Колька ни петiс посöдзö да висьталiс кыдз мужик. — Котöрт, Иван дядь, да этчö эн вовлы, то ме тэныт туйсö мыччала!

Кылiс энö кыввесö сельсоветiсь предыс зонкалiсь, сьöкыт вöлi вежöртны, кöр Öник Иван чышкис-мунiс ни кырывлань и сё кыдз бы вырскис пым шыд — пиннес пыр öмас кыскалiс шоныт гожумся ру, бытьтö пöдiс.

Öпим лёк мужик бöрсянь эшö тотис, мый юрас пырис, унажык ас кежас баитiс сы йылiсь, кыдз мöйму Чуракöттяс Усольелань питкыльтiс кузь мыгöра Макар. Натьтö, мортыс городлань весь эз мун, весь спинаыс сайын эз кыскы тшыг котома, натьтö, мужиксö гортсис вашöтiс тшыгыс, лöсьöтчис бы отирын шедтыны деньгаок, босьтны нянь да вайны челядьыслö. Но Чуракас адззисисö кык мортсёйись — этö бытьтö бы посадын медкодя отир, Öник Иван да фельдшер Щелгачёв, кык пон юр, кöдна отирысся олiсö невна буржыка. Но, кыдз шуöны, мортыслöн пö кыным уна, сыным унажык колö, сiйöн и вöтчисö Макар сьöрö и точкисö пыд вöр коласын Васькина волокын. Но и мый сэсь? Макарыслöн сьöрас копейка деньга абу вöлöма, мымда котомаас бырöм паськöммез.

Мортвийиссез торкисö мортсö и думайтiсö, что некин нылiсь умöль уджсö эз адззыв, но, кыдз шуöны, вöрыс синнэза и пеллеза, быдöс кылö и адззö: Коновал Öпимлöн кенак аслас синнэзöн быдöс вöрсис адззылöма, мый вöлi Васькина волокын, и сыбöрын гусьöн висьтасьöма Öпимлö.

Кыдз инькаыс пурсис сельсоветiсь предкöт, кылiсö важ керкуын олiссез, и посöдзö петiс Устья, кöда вöлi сэтшöм рад, сэтшöм гаж чужöма, бытьтö ачыс пывсьöтiс петшöрöн лёк мортсö, кöдасянь оланыс некинлö абу, важын бы дьяволöс колiс öмлöсавны, да мортыс эз адззись.

— Ефимия! — Устья моросыс бердö жмитыштiс Öпимсö. — Кытшöм тэ чож! Вöлись эд!

— Тётка Ефимия, тётка! — нывкаэс ни посöдзын жмитчöны Öпим бердö. — Тэ тай немись он пов!

— А мый нö?! Олан эз ло мортсёйись весьтын! Мед тöдö асьсö да вöлись миян коддесö пурö! — чатыртчыштiс Öпим.

12

Настялöн мам — гажа морт, кöть и кынöмас пыр жö тшыг уннялö, Колькалö сералöмöн моз пондiс модьны:

— Колька, кöр ни гöтрасян? Ме эд тёща лоа, блиннэсö кöть мыйись кужа пöжавны. Кöдö босьтан? Кöда гленитчö öддьöнжык? Видзöт, кытшöм нетеллез менам быдмöны, ой и лун сiйö и вöтасьöны, кыдз бы жöник сайö мунны. Тусь ни ме ныкöт не рад.

Миковлö сэтöн веськыта колiс бы гардыштны: «Тётя Устья, чожажык блиннэтö пöжав, тэрмась. Менам кынöмö стрась ни блиннэс вылö сималö, Настукыс вылö гöтрася. Быль!» Но сiя бергöтчö мöдöрö, öмас кыдз бы ва видзö, только синнэзас гаж: був-бав керис, а нывкаэзлöн мам одзлань дзульзьö:

— Менам эд Настяыс сойес коласын мед ни визыв! Ой эд сiя кытшöм! Он кö ешты гöтрасьны, пышшас!

— Меным мый? Ась Максимыс сайö пышшö. Сiя кыдз казялас нывтö, сiдз и ньылалö дульсö, ошшасьö: «Колька! Эта лоас менам!»

— Быль?! — синнэс ыждöны Устьялöн, öмыс осьта. Но эстöн Миков бöра кыдз йöймö, одзлань не тпру, не ны — быдöс мый сьöлöмас эм, оз мыччав, оз висьтав. Бичирок шаялö, оз сайкав, шонтö, гажöтö, керкуись пыр кыскö посöдзö. Вот и дзуртö быд рыт и асыв ыбöс дзир.

Кыдзкö зонкаыс гортас кольччис öтнас, мамыс мунiс Кöсö, медбы адззывны айсö, кöдö пукöтöны кытчöдзкö Кöсас. Зонка ветлöтö керкуись да посöдзö, пантасьö бы быд шагын Настякöт, но паныт пыр петö нывкалöн мамыс, ошшасьö-сералö ныввезнас, юасьö, мый отсавны керны. Настя эта коста пукалö лабичын: нето гöрдззисьö, нето книга лыддьöтö, бытьтö нем оз кыв и оз адззы, а сьöлöмыс чеччалö жö моросас, сэтшöм рад, что сы кодь радыс, натьтö, посадын некин ни абу.

Устья чепсасьö да юасьö, мый отсавны керны Колькалö, но ачыс етша кöр чилькöтö мöс или лонтö гор, а пыр иньдö Настясö, нылыслö шуö:

— Настя, мый сэтöн шлап видзан? Отсав зонкаыслö!

— Меным мый! Ме эд абу сылöн инь, ась ачыс мöссö чилькöтö.

Нывка модьö öтiкö, а керö мöдiкö: котöртö ни Колька дынö, гажöн юалö:

— Кытчö нö бöра сибдiн? Эх зонка! Мöссö ни он куж чилькöтны! Вай чожажык подойничасö!

Настя чилькöтö мöс, пожпыртö йöв. Колька гардчö гöгöрас, оз-оз да малыштö нывкалiсь юрсö.

— Колька! Сёян эд! Видзöт, кыдз босьта быгрöтчансö да кымöсат тузга!

— Настя!! — посöдзын нывсö ыксö ни Устья. — Тэ мый сэтчин керан?! Он я Колькасö вартлы ни?

— А мый нö? Киэсö нюжлалö...

13

Колька эз адззыв и эз тöд, что сёр рытöн Устья ордö ештöма пыравны Öник Иван, сельсоветiсь предыс, и висьтавны, мед Устья ныввезнас тэчис котомкаэз да лöсьöтчис мунны посёлокö, Усть-Кокольö, вöр шöрö сё жö вашöтiс инькаэсö.

— Гöтрассис тэнат, Колька! — асывнас одза-одз зонкаэзö петiс Устья да пондiс горзыны. — Талун мунам ни тiянiсь... Овнытö предыс иньдö посёлокö, вöррез коласö. Ош позын пондамö овны...

— Мыля?! — нем эз вежöрт Колькаыс.

— Ачыт тöдан эд, киннэз ми, — горзытöн бöр петiс Устьяыс. Колька петiс посöдзö и люкасис Настякöт, кöда кымöра, оз баит. Сэтшöм недолыт нывкаыслö, что син доррезас сöдзöмась синваэз.

— Настя, кольччы, — шыасис зонкаыс.

Нывка кыдз нем эз кыв, пырис керкуö. Колялö некыдз эз веритсьы, что талун оз ни ло Настяыс, оз понды быд лун кывны нывкаэзлiсь басни, кöдна кужöны баитны: быд кыв висьталöны, кыдз бы сьылöны.

Асывнас эшö мöд керкуын кылiс нывкаэзлöн басни, но нiя öтдруг петiсö керкуись, висьталiсö спасибо и... Устья окалiс Колькаöс да öшис синнэз одзись. Лоис сiдз, бытьтö инькаэс мунiсö и быдöс, мый эм и абу, сьöраныс нöбöтiсö, кольччисö только керкуын важ стенаэз, гуттэз, тараканнэз да лудыккез. Сэсся нем эз вöв, нельки Бускоыс топ кувны лöсьöтчöм: лэдзöма бöжсö, юрсö оз лэбты, лыннялö посöдз дынын.

Гажтöм вöлi зонкалö. Медодз лöгыс петiс сельсоветiсь пред вылö, кöдалö посадын дзескыт овны Устьяэзкöт, топ инькаыс ныввезнас Öник Иваныслiсь сёйисö нянь-совсö, одзсис быдöс мырддисö.

Вöлi гажа гожумся лун, кöр Устья ныввезнас мунiс посадiсь.

Миков кыдз öшöм уджалiс колхозын, локтiс гортö, був-бав, сэтчин-татчö: не сёйны, не юны эз тöр, не мöссö чилькöтны эз куж, не баляэсö юктавны бытьтö эз вермы. Зонка нем керöм могись пызан дынын тышкасис тараканнэзкöт. Сэтчö мамыс локтiс Кöссянь, пырис öддьöн мыдз, спинаыс сайись шупкис кöзича, миссьöтiс киэсö, ачыс петiс чилькöтны мöс. Дыр я, недыр я, мамыс пырис карта вылiсь, вöлись казялiс, что зоныс бытьтö бы шогалö — дзузгыльтчöма, и Устья ныввезнас оз кыв и оз мыччась, вöлись повзис да юалiс:

— Кытöн Устьяэслöн?!

— Вашöтiсö, — тырппесö курччöвтiс зоныс.

— Кытчö?! — öпим невна гатш эз пöр.

— Öтiклаö эд нiйö нуöтöны... Кокольланяс жö...

— Господи! Ловзисьны отирлö пыдынжыка озö лэдзö. Олiсö да олiсö бы миянын. Тöримö тай, лöсялiмö.

— Кыдз айö? — Колька дзугис мамыслiсь гажтöм басни.

Мам пыдына ловзисис, пуксис лабичö, кöс долоньнас малыштiс косьмöм да шондi вылын жаритчöм чужöмсö, висьталiс:

— Кытчöдзкö Кöсас видзöны. Уджöтöны, — коккезсис пондiс пöрччавны виль нинкöммез, кöднö кöмалiс Кöсö мунтöн и кöдна ештöмась кузь туйын бырны. — Вердöны пöт. Бат, арöдззас олас пö эстöн.

Мам голосын кылiс долыт шы, эз ни горзы одззамоз. Пöрччасис, шоччисис, пондiс висьтасьны: — Эта... Киршинсис Педорсö сэтчин жö пукöтöны. Ёна пö зэлöтöны. Айыт жö гусьöн висьталiс, что йöртлöмась пö кöртiсь керöм шкапö, кытöн пö не пуксьыны, не бергöтчыны оз туй, только сулавны местаыс и эм. Но и видзöмась шкапас, тыдалö, вель дыр, — сэтöн жö кыдз повзис аслас кыввезiсь, висьталiс, кеймисис ни. — Тэ, зон, некытöн и нем эн баит. То эшö миянöс пондасö кыскавны.

— Мый ме тэныт, учöт кага я мый я, баитны мый колö и оз? Айö сэк бура олö.

Öпим висьталiс, что айыс кытчöдзкö олö бура, нем сы понда öддьöн тöждыны, и ачыс бура ветлiс, некинöс кузь туйын эз пантав, кöть и полiс жö пышшалiссезлiсь. Кöр мамыс локтiс гортö, керкуын топ лоис невна гажажык, но... Колька пондiс никсыны:

— Мам, ме ветла.

— Кытчö? Вичкуыс дынö я мый я? Шоччисин бы. Мыдзин эд лунтыр ытшкисьтöннят.

— Вичкуыс дынын меным нем кернытö. Кокольöдззас котрасьны бы.

Гожумыс бöрлань ни пондiс мунны, чинны ни пондiс: луннэс лоисö дженытжыкöсь, ойес кузьжыкöсь да пемытжыкöсь, и рытыс топ пемытжык жö. Сiйöн Колькалöн мамыс повзис да юалiс:

— Кытчö, зон, ойнас?! Ачыт я?! Лэбзян я мый я страм Коколяс? Сэтчинöдз мунны джын лун öштан да сымда жö бöр локнытö колö, а кöр уджавнытö? Судитасö эд он кö понды уджавны!

— Шондi петан гöгöрас гортын лоа!

— Нач я мый я öшин олансис?

Öтöрын пон гав оз кер, петух узьö, нывкаэс сьылöны вичку дынын, мун бы да öтлаын томмескöт кувтырт, а Колька петiс и абу. Кытöн да мый керö, мам нем оз тöд, аслыс оз верит, что зоныс былись ойнас вермас мунны кытчöкö вöррез коласö. Мамлöн сьöлöм пессьö, узьö и оз Öпимыс.

14

Миков некин вылö и нем вылö эз видзöт: петiс керкуись, кымöс увтöт дзарнитiс рытланьö, кöдöрö пуксис шондiыс, и иньдöтчис вичку дынöт керöс кырылö, чышкис-мунiс телегаэзöн ветлöм туйöт. Кокнита шагнялiс зонкаыс, коккес топ муас эзö и сидзалö, чожа бöрö колис ассис посадсö, Зинкöв дынын шедiс солдаттэзлö, кöдна мыччисисö кöззэз увтiсь, ыкöстiсö: «Сулав, кытчö мунан?!»

— Нывкаэз дынö котöрта! — зонка синнэзöн кваркыш эз кер.

— Видзöт, зонка! Он я переселенеццес дынö варт бы? Или бандиттэскöт тöдчан?!

— Кулаккес абу я мый я отир? — Миковлöн зi кодь мывкыдыс, эн вöрзьöт, а солдаттэс эшö лёкжыкöсь: вöв вывсянь кутiсö сикöджöт, трекнитiсö, висьталiсö, что мыйись-мый дженыт лоас басни. Бат, сiдз бы и лоис, но солдаттэз коласын вöлiсö тöдса зонкаэз, кöдна рыттэсö чулöтiсö öтлаын вичку дынын, йöктiсö и сьылiсö нывкаэскöт да зонкаэскöт. Нiя и шуисö, что Колька бур зонка, мед мунö аслас туйöт.

Солдаттэс этчин, Колька сэтчин — одзлань зонкаöс сьöлöмыс кыскö, тэрмöтö, коккез сiдз педзöны, что и номмес топ озö ештö вöтчыны-лэбзьыны, озö ештö вывтi курччасьны. Ойыс эз ешты бытшöмжыка пемдыны.

Киевöдз котöртiс-мунiс: керöс кырыл и керöс паныт — öтiк шаг. Спина пымалiс, вамис йöрнöс, кымöс вылiсь визывтiс ньылöм, пырис синнэзас, öмас, но шаггез эзö чинö, кöр коккезас нинкöммес кокнитöсь, небытöсь, туй кöс — вешты да вешты коккез. Киевын важын ни узисö, деревняыс кыдз бы кулöма, но гажа местаын — грива вылын коккез увтын кöс песок, керкуэз гöгöрын быдмöны лапья сыспуэз. Тасянь туй заргисис вöрö — ошпозъяинö, кытчö мöдöтпыр Колькаöс луннас шатьöн бы эн вашöт, а талун мунiс-сöтiс, эз сувтчы, эз кывзiсь, эм я сёр рытöн кинкö вöрын. Мунiс, сьöлöмыс полiс кодь, сiдз топ бöрсяняс кинкö и кутö бы, топ вöрдядьыс пуэс коласын сулалö, видзчисьö и вермас солдаттэс моз жö ыкöстны: «Сулав, зонка?! Кытчö мунан? Мый татiсь öнi öштiн?»

Вöрдядь йылiсь оз бы думайт, но думайтсьö, сiдз кыдз берся басни ни отирсянь кывлiс. Модисö отир, кöр да кыдз, кытiсь пантавлiсö Лешаксö, что вöрисьыс весь оз пантась, сё ни сыбöрсянь мыйкö лоас умöль. Думаэз... Озö кольччö, вöтчöны, кöр вöрын да сёр рытöн öтнат.

Котöртiс-котöртiс зонкаыс, локтiс Лолым ю дынöдз, кытчö керöмась умöлик пос — талун эм, ашын абу, содас ва и кылöтас. Миков вуджис пос кузя, одзлань люгис-котöртiс. Локтiс бытьтö бы посёлокö — отир оланiнö, кöда отир оланiн вылö эз и вачкись: омöн вöр, керкуэс етша, коккез увтын мыррез, нитш, чашья, нырö павкö тшынöн. Пондiс вувтны пон. Зонка сьöлöм вылын лоис личытжык — быдöс туйсö вунöтiс. Но кытiсь кошшыны нывкаэсö мамныскöт? Кытшöм керкуö пырисö овны? Юась кö сэтöн, кöр некин тöдсаэс абуöсь: он ешты кайны посöдзö, кыдз кымöсö тузгасö, и берездасян. Колька полiс кодь тöдтöм отирись, мымдакö бергалыштiс виль керкуэз гöгöрын и пемытжык вöрланьсис казялiс кöз увтiсь би югöр, кöда весьтын вуджöртчис морт. Зонка — сэтчин!

— Колька! Тэ я мый я?! — ыкöстiс Настялöн мам. — Тэ кысянь ойнас? Кытчö мунан?! — синнэс ыждiсö, повзисö.

— Гортсянь, — вöлись зонкаыс пондiс кывны коккезiсь мыдз, но сьöлöмыс кыдз сьылiс, лоис радся-рад.

— Кытчö мунан? — сё юасис Устинья, кöда аслас синнэзлö эз верит, что одзас былись Колька. Устинья ныввес кодь жö бытшöм, лöсьыт мыгöра, кöр гажöтчö, эшö невеста вылö вачкисьö: югыт чужöма, синкагаэзас том олан. Весь инькаыс эз ошшасьны, что одз челядясис, одз ныввес быдмисö, лоисö невестаэз, ачыс эшö вачкисьö невеста вылö, только эта сьöкыт оланыс кöстö...

— Татчö локтi! — ошшасис ни зонкаыс. — Мамö иньдiс, — нузгис-бöбöтiс мыдз голосöн.

— Мыйлö ойнас?!

— Чышьяннытö вунöтöмныт да... — Миков писис кыскис важ чышьян, нюжöтiс Устьялö, кöдö Настялöн мам тэрмасьтöн былись вунöтöма Öпиммезö.

— Колька-а-а, чышьяныс понда колiс я татчöдз локны? Сибалiм бы, поди, кöркö да асьным босьтiмö, — юрсö чуклялiс инькаыс, дивуйтчис-видзöтiс, рад и абу, шуис ни. — Пуксьы биыс дынö да шоччись. Миянöс, видзöт, кытöн узьтöтöны. Локтiмö рытнас ни. Комендантыс сьöвзис, видзöтыштiс кыдз поннэз вылö и тшöктiс узьны кöззэс увтын. Бур, что эшö гожум, шоныт, а тöвнас бы!.. Чильдiмö быдöнным. Эх! — юрнас öвтыштiс, синнэзас сöдзисö синваэз. — Зверь — комендантыс! Öтiк кыв бытшöма оз вермы висьтавны — ряксö, кыдз бытьтö тюрьмаö шедiмö ли мый ли. Видзöт, нывкаэс мыдзисö да узьöны, а ме... Ончир эг кер, горзыны колö, а серала. Колька, мый эшö миян коддеслö оланыс оз мыччав, кыдз кувтöдззаным и пондам овны? Огö я эта кöз увтын бы и гожйö? А кытчö воштiсьны? Мый керны? Кин миянöс жалейтас, жмитас бердас? Огö жö бы эшö кулö. Сiя жö зверь-комендантыс висьталас; что мыйись-мый, пышшам кö, вöтас и аслас киöн лыяс. А мый? Мый тэ сэтшöм кöинлiсь босьтан? Лыяс и прав кольччас.

Устья баитiс негорöн, сiйö и керис, видзöтышалiс öтмöдöрö, полiс, мед баснисö озö кылö.

Колькалö жаль Устья тёткасö, эшö öддьöнжык жальöсь ныввес, кöдна öнi одзас узисö кöз увтын, нюжöтчöмась нитш вылö, пу уввеслö поперегöн и чискöны, а мамныс сералiс асьсö и олансö, енсö, вöрсö, зверь-комендантсö, законнэсö.

Сы синнэзын то синваэз, то гаж, басниыс то лёк, то кокнит, кöть и шог унажык кылö, и сьöлöмыс, натьтö, пыр висьö и висьö. Колькаыс жалейтö инькасö, но оз вермы сылiсь сьöлöмсö веськöтны, и некин мортыслö öнi оз вермы отсавны, оз ни козьнав сiйö, мый мырддисö-нетшкöвтiсö сьöлöмыс бердiсь: зубыт, да вирыс оз пет, и некинлö оз тыдав сiя ранаыс, кöда эм инькаыс бердын.

Нывкаэс биок бокын шебрасьöмась важ бырöм öнöн, водöмась öтамöд бердö зэв-зэв, кыдз бы гряд вылын чöлöса сёртниэс, сэтшöм жö югыт чужöмась, лöсьытöсь, зумыт яяöсь. Колька сiдз бы и жмитыштiс Настясö, кöда сойес коласын медтопыт, узис дорын. Нывкаэзлöн мамныс кытiськö кöзыс вужжез коласiсь кыскис пöжалöм картов, нюжöтiс, шуис: «Сёй, Колька. Тiян эд картоввезныт. Мамыт эшö сетлiс, да быдöс эгö сёйлö, талун, видзöт, нем нач öмö вöлi чапкыны и пöжалi».

— Ог ме сёй, тётка.

— Пöтiн я мый я кузь туйсö котöрттöн. Видзöт, кыдз пымалöмыт, чисто йöрнöсыт вамöма. Сёй кытчöдз вердöны, то саймасö невестаэзö, и картов кышшесö он адззыв. Нiя менам уджавнытö дышöсь, а сёйнытö чожöсь.

Шыннялiс Колька. Чискис-сотчис жагвыв кöз увтын пес, тшын гардчис. Номмез тшын весьтын лэбалiсö етшажык. Устья баитiс, кыдз больгис шор. Долыт кывзыны инькасö, кöс сiя басниа, абу лёк, кыдз бы зонкаыслö роднöйся-роднöй ни, асланыс...

Зонка пуксис биок бокö, синнэсö пондiс курöтны тшын, тiлис, оныс пондiс петны, узис или вöтасис ни, кылiс и эз ни Устьялiсь баснисö, топ Настяыс ни баитiс: «Весь эд, Колька, ме сьöрын вöтлiсян, весь: сiдз и этадз миянöс янсöтасö». Нывкаыс топ пондiс горзыны.

Колька осьтыштiс синнэсö и казялiс, что Устья тётка горзiс, да гусьöн, мед нывкаэс и Колькаыс эзö кылö: пильскышалiс, синваэс визывтiсö и визывтiсö рожабаннэзöттяс, вотялiсö моросыс вылö, муöдз киссисö анькытш туссез моз, павкалiсö биа шоммезö. Горзiс инькаыс и пукалiс кыдз тувдöм. Зонка невна только эз горöтчы: «Тэ мый, Устья тётка?!», но сэтöн жö вежöртiс мый пöрисьжыкыскöт, курччöвтiс тырпсö, гичыртiс пиннесö, кунис синнэсö и бытьтö нем эз понды кывны — быдöс вежöртiс, но олансö ас мознас эз вермы лöсьöтны.

Ойыс кыдз суналiс-керис и бöр ни саймис: эз ешты нач пемдыны, эз ештö öтi-öтi каёккез шыасьтöг олыштны, кыдз Коколь юлань пондiс уксыны нёштöм шыöн сюзь. Лоис ыркытжык, вöр коласö öшöтчис кень кыза туман, кöда сорласис кизьöрик тшынкöт.

Миков мымдакö пуксöн узьыштiс. Устья дугдiс горзыны, биö чапкис кöз уввез, коккез дынiсь босьтiс тыра кöзича, пöрччалiс кöртöт, веськыт кисö сюйыштiс кöзичаыс пытшкö, гуддисис-керис, сьöкыта ловзисис, шуис: «Мый нö талун пондамö сёйнытö? Öтiк няньтор тай абу. Уджалiм, уджалiм Чуракас, натьтö, мымдакö шедтiмö жö трудоденнесö, но сэтчинiсь сiдз вашöтiсö, что правленнёöдззас эгö ештö котрасьны. Кувны бы то, да смертьыс миянiсь пышшалö, и джагöтчыны полöм петö, — мам видзöтiс ныввес вылö, öвтiс юрнас и аскöттяс баитiс. — Быль кö джагöтча, сэк öтнаныс ни оласö. Абу ни учöтöсь, — бöра рожабаннэзöттяс визывтiсö синваэз, горзiс да баитiс. — Жальöсь челядьö! Кыдз нiя пондасö метöг овны? Кыдз, бат, зверь-отирыс озö и пондö серавны, — ыш ловзисис да аслыс шуис. — Кöть мый, Устья. Ась быдöнным öтлаын тшыгйöн кулам, но ог джагöтчы, кыдз вермам, пондамö овны-кыссьыны, — кивзыштiс кычан моз, кöдö озö вердö, а быд лун вартлöны, узьтöтлöны öтöрын, тшöктöны синйыны керку-карта. — Пиканнэз я мый я кытiськö öктыны да пуны? Или пиканнэс чорытöсь ни? Мыля Чуракас ытшкисьтöнняс инькаэс эзö ни öктö, — асьсö сералiс. — Оланыс кöть кытчö, Устья, велöтас. Эг и кывлы, что туйö сёйны кытшöмкö турун, а öнi туруныстöг ог вермы овны». — И пондiс юрсö пельпоннэс вылын дюттьöтны.

Миков пукалiс биок бокын, суналiс-узис и эз, быдöс адззис и кылiс, мый керис Устья, и думаэс чувйисö: «Талун жö гортö нуöта Настясö! Пондам уджавны колхозаным, сё ни мыйкö шедтамö и мыйöн пондам вермыны тёщалö отсалам».

Бур думаэзöн олiс зонка, кöть вермис, кöть эз, но быдöс бы керис, немись эз пов.

Виль керкуэзлань дзуркнитiс ыбöс, повзьöтiс зонкасö, кöдалiсь онсö кинкö кыдз мырддис.

— Николай, натьтö, эд гортат колö мунны, — полöмöн пондiс баитны Настялöн мамыс. — Гортын öштасö эд. Он кö уджав, дойдасö.

Зонкаыс вежöртiс, что сiдз вермас и лоны, и сьöлöмыс пондiс пессьыны: кыскис гортö и кольччис бы татчö.

— Тэрмась, кага. Ештан эшö гортöдз котöртны, локтан уджалан кежас, — тэрмöтiс Устья, но Колька эшö би бокын пукалiс кыдз öшöм.

— Адззылан эшö Настятö, — гажöнжык ни горöтчис нывкалöн мамыс. — Огö жö, поди, öтдруг кулö, а ылöжык сэсся некытчö озö нуöтö, кöр сiдз ни пыртiсö вöр пыдöсас.

— Саймöт Настясö, тётка, — пондiс кеймисьны зонка. Асывлань нывкаэс узисö пыдынжык онöн, кöть шатьöн чивкнит, сэк жö озö и саймö. И Настя чожа эз саймы: нюжöтчис, тiлис синнэсö, недолыта юалiс: «Мый колö?»

— Мый колö... Жöникыт локтiс да бöр ни мöдö мунны, а тэ сё узян. Чеччы! Кольлав Колькатö!

— Кытшöм Колька? — Настя пуксис кöз увтö, синнэсö мöртiс зонкалань, пондiс модьны. — Эз ешты Чураксиныт спинаö саясьны, бöра ни ме дынын! Адззыны бы кычан кодь жöник да чожажык мунны сы сайö, сэк бы эн бöб юрнат понды вöтлiсьны!

— Тырмас, катша! Вывтi китшсян... Тыдалö, колан зонкаыслö, сiйöн сы ылынаись ойнас и локтiс, а тэ сералан. Кольлав кöть шаг-мöд да вöлись узь кöть луншöрöдз, кытчöдз эшö эстöн уджавнытö эзö доддялö.

— Лок нö, — Настя чеччис, тiлис синнэсö, нюжöтчис кань моз, öт öм угöвнас шынньöвтiс, зонка одзын пондiс жагвыв мунны нитшья-вужья туйöт.

Мунiсö телегаöн ветлöм туйöдз, эзö ештö саясьны пöрисьжык синнэз сайись, нывка горöтчис:

— Тырмас, Колька, — шуис, и öмыс кыдз бы жугалiс, пиньöвтчыштiс, сöдзисö синваэз, висьталiс горзöмöн. — Гажтöм.

— Лок бöр Чуракас. Сэтчин гажажык.

— Эх, Колька. Туйис кö, верми бы гортö Белоруссияас лэбзьыны, а эг эстöн номмесö верд!

15

Вывтi жар гожумыс, немымда эз ыркöт, кöть и пондiсö ни вундыны рудзöггез. Зэррез орддисö вöррез коласiсь посад: кымöррез гымалiсö да кытшлалiсö оланiн, люзьгисö кытöнкö пыд вöррез весьтын.

Отир уджалiс ыббез вылын, но эшö öтi-öтiлаын позис пантавны турун кериссезöс да унажык мужиккезöс ни. Уджалiс отир, а Киршинiсь Фёдор, кыдз и Öльöш, кытчöдз пукалiс Кöсын тюрьмаын. Сё мортлiсь кыйисö бы, пантасьлiс я бандиттэскöт и кытöн да кыдз. Фёдор кытöн вöлi абыз кодь, баитлiс унаöв, а эстöн кывсö кыдз ньылыштiс, нем оз висьтась. Сэк сiйö былись заргисö кöртiсь керöм шкафö, кытöн революцияöдз купец Быков, натьтö, видзлiс деньга или кытшöмкö меддона товар. Öнi шкафыс пригодитчис милициялö. Ота лысина Фёдорлö сулавны сэтчин вöлi дзескыт жö, но кин Фёдор коддесö жалейтас, если оз баит, оз висьтав — пыр, мужик, да олышт кöртiсь гробын, бат, бöб юрат веммет пондасö думайтны буржыка и тöдвылат усяс, кытöн да кынымись пантасьлiн Курай ёртыткöт, кытiсь позьö сiйö кутны.

— Ёлки зелёные! Нем ме ог тöд, — Фёдор ружтiс и пернапасасис шкафö пыртöн, пелитчис да сувтiс кöртiсь позö, кытчö эз ешты пелитчыны, кыдз пöдналiсö ыбöссö и лоис сэтшöм умöль: öткö сiйöн, что вöлi жар — лолавны сьöкыт, мöдкö, эз туй бергöтчыштны, буржыка вöрзьöтчыштны, коккез мыдзисö час бöртi, пондiсö дöлöтны, топ мунiс не öтiк дас верста ни.

Кöр следователь осьтiс шкаф ыбöс, юалiс: «Но кыдз, Фёдор Васильевич? Усис ни мыйкö тöдвылат?»

— Ёлки зелёные! Мый меным усяс тöдвылам? Эта разь... Инькаö или бесыс синнэзö одзын лунтыр йöктiс, а сэсся нем...

Голосыс мужиклöн лоöма векнитжык, мыдз, но эшö вермис бы ыкöстны сьывны да сiдз, что лампаыс бы кусiс. Тöдiс кыдз асьсö видзны милицияын, эд и одзжык шедлiс полицияö, жандарммезлö, тюрьмаын пукалiс. «Видзöтам эшö, ёлки зелёные!», невна только следовательлö эз вальскы синнэзас, но аскадö казялiс, что колö видзсьыны.

— Фёдор Васильевич! Лыйны эд вермасö, пондан кö пыксьыны. Ми эд быдöс тöдамö, кынымись тэ Курайыслö сёйны да юны нöбöтлiн, кытöн пантасьлiтö.

— Тöдат, дак мый нö юасятö, ёлки зелёные! — веськыта синнэзö бытшкис-видзöтiс Фёдор, немись и некинлiсь бытьтö эз пов, но синнэс одзын сулалiс Курайыс, кöда унаись лёкжык вöлi эта следователься, уна эз баитлы, мыйись-мый не сы сьöртi, öвтыштас кинас, и сэтöн жö мортсö лыясö. Сiдз öтiк кыв понда лыйисö вöрын Öмельлiсь быдтассö, Помичсö, Демидовись Коля Васькаöс. Фёдор синнэз одззын чередитiсö мужиккесö, кöдна нем умöльö Курайлö эзö керö, только горöтчисö, что сьöлöммезныс кыскöны гортö, вöррезын пышшавны дышныс петö ни.

Лёк следователь, но эшö лёкжык Курай, кöда вермас кöть кытiсь адззыны, некытчö тэ сы шогья он пышшы, он дзебсись: му пытшксис кыскас, кымöрись судзöтас...

— Некытшöм Курайкöт ме, ёлки зелёные, эг пантасьлы. И мый бы меным вöрсис гожумнас кошшыны, кöр колö уджавны. Менам эд челядь быдмöны!

— Сэк сулалышт эшö шкафыс пытшкын, — дзуту сина следователь бöра пöдналiс Фёдорöс шкаф пытшкö, эз понды туйны не вöрзьöтчыны, не кекеркаöн пуксьыштны да коккез шоччöтны.

Сулалö Фёдор шкафын, кыдз гробын, и некин сы йылiсь гортын оз тöд, сiдз кыдз сiйö кутiсö Кöс туй вылын, а не деревня шöрын сермöталiсö.

16

Миков гортö локтiс асылöн. Мамыс эшö бергалiс гор гöгöрын, ештöтчис. Шондi вöлись только мыччисис вöр весьтын, да керкуö öшынöт койыштiс веж югöр. Етша эшö кин ветлöтiс улицаöт.

— Зон, кытöн вöлiн?! — повзис Öпим. — Быль я мый я Кокольöдззас ветлiн? Юртö эд кытчöкö öштан!

— Кытшöм Кокольö ветла? Зонкаэскöт тай орсiм да мый да. Нывкаэсö кольлалiм. Öнджаыслiсь нывсö öнджа кери, гортöдззас мöдöтi, гöтрасьны мöда, мам.

— Кинöс босьтан? Ме тэнö ожо гöтрала! Кыдз коссим пöкрöмсö пöрччала! Думайтан, месся ыджытжык, дак вынö оз тырмы? Тырмас эд.

— Эн баит, мый оз ков.

— Сэк веськыта висьтав, а эн сэтöн мамтö пыжтöг ваыс вылын ыслöт, ме синнэт сьöртi адзза, кытöн оййин.

— Но ветлi, — вöлись зонка мыдз голосöн висьталiс, кöр ойбыт эз узь, ойбыт жöдзис коккез вылын, а öнi колö лöсьöтны литовка да мунны ытшкисьны. Зонка петiс керкуись, чик-чок вартлiс литовка да сэтшöм чожа, что керкуын эз ешты ештыны гор, эз ешты петухныс чеччöвтны седова вылiсь да китöстны.

Миков öтiк лун ытшкисис, мöдiк лунö тэчис зород, куимöтö ыб вылын уджалiс, но öтiк минута кежö эз вунöтлы Настя йылiсь: локтiс я гортö, мунiс я гортiсь, туйлань и вöлiсö синнэс, сiдз топ нывкаыс и вермис мыччисьны да локны, сiйöн кытшöмкö асылö чеччис, миссис да мамыслö висьталiс:

— Мам, нiя эд кöз увтын олöны.

— Кин кöзыс увтын олö? — эз вежöрт Öпимыс.

— Настяыс, мамнас!

— Мыля кöз увтын оласö? Кывсьö тай, бытьтö пö керкуэз жö керöмась ни.

— Кытшöм керкуэз?! Эмöсь да етша. Быдöнныс озö тöрö. Поди, ошыс ни сёйис. Или тшыгйöн кулiсö ни.

— Мыля жö тшыгйöн куласö? Тшакыс да ягöдыс вöрас сё эшö эм.

— Тшакнас да ягöднас уна он ов. Видзöт, татöн уджалiсö-уджалiсö, а босьтiсö шыш. Нем эд эзö сетö уджалöмыс понда. Ме бригадирыскöт баитi ни, сiя шуис: «Колька, ми вермам пизь сетны, ежели нöбöтан Кокольöдззас, вот».

— Тэ бöра кöин моз вöрлань видзöтан?! — пондiс лельгыны Öпим. — Оз я юась ни сельсовтсис поныс, шуö: «Кытöн нö ойезнас зоныт котрасьö? Адззылöмась тай, кыдз кулачикаыс ныввез дынö ветлöма. Шедас кö, пидзыртасö!» Ме сылö веськыта бöра шебралi, мыся, ме зонö сьöрын ойезнас ог котрась, ог синйы, кинлiсь сiя няняэсö пешлö. Колö тэныт, тэ и нюкьясь томмес сьöрын, оз я öтпыр кытöнкö нырöмат пильскö. А тэ бöра Кокольыслань видзöтлан! Кошшы гортiсь нывка да сыкöт нö баитлы.

— Талун ог нö мун, — медбöрын мамлiсь сьöлöм бурмöтiс зонка.

Луннас уджалiс, рытнас локтiс, вежис вывсис паськöмсö, чуп-чап мый шедiс сёйыштiс, петiс и öшис. Зонка бöра лэбзис-мунiс посёлокö.

Öнi туй вöлi тöдса. Вöр вылын пондiс ни вежöтны лист, рытыс лолалiс ни арся ыркыт руöн. Етша ни кинöс адззан видз вылiсь, кöр сэтчин сулалiсö зороддэз да быдмис отава, номмез ни лоисö етшажык. Зонка бöра шупыта мунiс вöр коласiсь посёлокö, сiйö и керис мунтöнняс видзöтышалiс рытся кымöрлань, сiдз кыдз ойес лоисö пемытжыкöсь, вöрын гажтöмжык.

Колька тэрмасис Настя дынö да сiдз, что коккес топ муас эзö и сидзалö. Гажа вöлi мунны деревняэз коласöт, кöр эшö вермис пантавны мортöс, кöда ендöм локны уджалансянь или деревня дынын пантавлiс да кольлавлiс пон. Лэбзис-мунiс зонка, эз и казяв, кöр локтiс Киев гунаэз дынöдз, лажмыт местаöдз, кытöн мылякö вöлi гажтöмжык, топ сiдз и кутiсö бöрсяняс — йыздышалiс спинаыс, сэтöн пель дынас и вачкис шы — ыкöстiс мужик:

— Мый тiянлö месянь колö?! Мый ме тiянлö умöльсö кери?!

Зонкалö дзик вачкисö кымöсас. Повзьыштiс. Юрсö лэбтыштiс, сувтiс, пондiс кывзiсьны: тёпкöтiс сьöлöмыс.

— Мый ме тiянлö умöльсö кери? — ружтiс-баитiс кинкö гуна воротаыслань.

— Эн бизгы, сiтан чышкöт! Нюлан коммунисттэслiсь бöррезнысö, сэк тупкав öмтö, то пиннетö кисьтамö! На вот! Сёй! Чöскыт кулакыс?! — клотш да клотш кылiс шы, бытьтö зорöн вартлiсö вöвлö, боккезас тойисö.

Кивзiс морт. Колька вежöртiс, что кинöскö вартлöны, но кин да мый понда? Абу я кодöсь?

Думаэз гурнитiсö, повзис сьöлöмыс, сiдз бы и сöтiс-дзебсисис понульникö, öшис синнэз одзись, но топ тöдса голосыс кылiс:

— Кытшöм коммунисттэзлiсь ме бöрсö нюла? Тi мый?!

— Кин тэнö тшöктö бригадиравны?! Коммуниссэс эд! Сэк сёй эшö, пон! — бöра сiдз вачкисö, что шыыс лöнь рытö кылiс ылöкодь, топ тышкалiсö гырын дöра.

Колька чеччöвтiс ни понуллез сайö, кöдна зэв быдмисö туйыс бокын. Пель бокас уннялiс ном, мöдiк курччöвтiс пель боксö. Киевын сёйис-вувтiс пон.

— Эд ни вартлö-ö-ö, — кивзыштiс мужик голос. Колька сулалыштiс и понуллез да кыдзоккез пöлöн, кöдна туйыс бокын быдмисö гунаыс бердöдз моз, пондiс сайласьöмöн жагвыв мунны сэтчин, кытöн кылiсö отирлöн голоссэз. Жагвыв да жагвыв зонка сибöтчис öвин бердöдз, угöв сайсянь нюжöтiс голясö, сэк вöлись гуна ворота бердiсь и казялiс, кыдз куим мужик гöгöртöмась Киевись бригадирсö, зэлöтöмась ворота бердö: öтiк видзö моросöттяс, мöддэс кулаккезнаныс öвтöны нырыс увтын.

Куимнан мужикыслöн пельпоннэз вылын öшалiсö пишаллез, а бригадирыс киын нем эз вöв, сiя мездiсис бы — асмогсис киэзнас öвтышалiс да кеймисис: «Эд вартлö. Весись менö вартлатö, нем ме тiянлö умöльсö эг кер».

Ёна зэлöтöмась отир син сайын Андрей дядьсö, сiдз, что вермасö вийны, ежели кö бандиттэз. Мый керны? Кытчö воштiсьны? Кыдз отсавны Андрей дядьлö? Котöртны я Киевöдззас, вон керкуэс тыдалöны ни, нач ни абу ылын, но отир узьö, нем оз кыв.

Медодз зонкалöн юрас сöтiс дума, что пышшас или былись котöртас деревняöдз, висьталас отирлö, но, натьтö, оз ешты, бандиттэс вийны бригадирсö вермасö.

— Отсалö-ö-ö! — кивзыштiс бригадирыс.

Öтiк бандитыс пельпоныс вылiсь лэдзис пишаль да прикладнас вачкис Андрей дядь юрö, мыйсянь сылöн кусiньтчыштiсö коккес, и усис.

Колька эз думайт шыасьны бы, но ачыс эз казяв, кыдз шутньöвтiс да сiдз, что деревнялань лöнис понлöн голос. Бандиттэс öтдруг бергöтчыштiсö öвинлань, но Колькасö эзö казялö. Зонка эз думайт, что вермас ачыс шедны кинлöкö, но сiя умöля видзöтiс бöрланяс, эз казяв, кыдз кинкö шамырнитiс йöрнöсöттяс и мурзьыштiс:

— Тэ мый эстöн, зырымöсь куль, керан?!

Миков нетшкöвтчис и чеччöвтiс бы тошаыс дынiсь, но сы одзын сулалiс сысся кыкöн ыджытжык да ёнжык мужик, веськыт кинас ёнжыка зэлöтiс пачöсiсь кыйöм йöрнöссö, сералiс — ральник кодь пиннес гер, вöв синнэзас сьöд рöма югöр и ружтiс, кыдз бы тыра додь кыскис, горöтiс:

— Локтö татчö! Меным кинкö шедiс. Юрсö пиньöвтамö да понуллес коласö заргамö, мед сэтöн и сiсьмас!

— Антип, кин тэныт шедiс? Эта я мый я? Эшö комунисовöй кинкö? Мургыльт голясö, сымда и лоас! Эн видзöт страммес вылö!

— Юала нимсö да вöлись! — кыз голос дзуртiс Колька юр вевдöрын, сiдз няпыртiс йöрнöссö, топ ош лапаэзнас зэлöтiс. Зонка видзöтiс тошаыс вылö и тöдiс и эз мортсö, бытьтö бы кытiськö адззывлiс ни, но кытiсь?

— Но мый, зырымöсь? Миянöс синъян? Видзöт, кыдз юртö пельпоннэт вылiсь нетшкöвта. Кыдз питшалка шедас!

Чирзiсö коккес увтын кöбывкаэз, дзуртiс межаын кай. Нырö патшкис тшынöн: кытöнкö мыйкö сотчис. Миков медодз сiдз повзис, что киэс сыр-лёль öшöтчисö, но чожа топ саймис и пондiс веклясьны гаг моз бандит киэзын, кöда матькыштiс негорöн да нöш кодь кулакнас зонкалö пуктiс пельбокас.

Чиннитiс пеллезын. Бандиттэс пондiсö гöрдлыны-серавны, öтiкыс сьöвзис рожаö.

— Мый сыкöт керны? — ёрттэзлiсь бöра юалiс Антип нимаыс, кыкнан кинас ни видзсис Колька морос бердын.

— Мый тэ сыкöт керан? Комсомолеч, натьтö, эд. Öшöтны майöгыс вылö, сымда и лоас! А мый сэсся? Сэсся нем пестунничайтны бы.

Кивзöмöн моз вувтiс Киевын пон. Кинлöнкö кылö жавкнитiс ыбöс.

— Лэдзö, то видзöтö! — Миков лöгасис.

— Видзöтам, видзöтам, — рыгзисö, вöв пиннезнысö мыччалiсö мужиккес. Сёйись чужöмаöсь и эмöсь: синнэзныс був-бав, рожаэз нятьöсьöсь, тошаöсь, паськöмныс кинлöн кытшöм эм, бытьтö код отир шедлöмась кытчöкö, пасьталöмась мый шедас и öвтчöны.

— Кинлöн тэ? — Антип нимаыс юалiс зонкалiсь, лолалiс веськыта чужöмö кытшöмкö аскодя лов дукöн, мыйсянь гудыртчис сьöлöм.

— Тэнат тай! — Колька видзчисьтöг брынгис бандитлö коккес коласö. Но мужикыс и трек эз кер, кывнас нюлыштiс потласьöм тырппесö да кыдз зонкасö быд вынiсь брякнитiс öвин бердö, топ шупкис тыра сюа кольта, сiдз, что юрвеммес пыркалiсö.

Жолькнитiс пишались затвор.

— Эн лый весись. Тальччы юрыс вылö, сымда и лоас да мунамö.

Миковлöн топ недыр кежö садьыс бырис, но сэтöн жö саймис, только пеллезас чиннис öткодь шы, сiя кунис синнэсö, лöсьöтчис кувны и вöтöн моз пондiс кывзыны, кыдз му бердö бытьтö кинкö вартлö нöшöн: топ-топ-топ! Кыдз бы вöввез котöртiсö ли мый ли.

Нач матын пель бокын чирзiс кöбывка.

— Мый кератö?! Сулалö!! — рытсö повзьöтiс чиння голос. — Лый, Борис Тимофеевич!

И былись чарöтiсö-лыйисö, поткöтiсö рытся ру. Омöн паськалiс говк. Сэтöн жö том да чиння кодь голос шыасис:

— Пышшисö эд!

— Сулав. Ме нiйö вöта! — паныт шыасис мöдiк голос.

— Кытiсь вöрсис вöтан. Видзöт, кыдз бы кымöсат эзö пöжалö. А мый нылiсь босьтан? Луннас бы...

Пырскайтiсö вöввез, ны вылын пукалiсö мужиккез да Колькалö ни модисö гажа голоссэзöн:

— Чеччы. Ловья эшö? Мый нö сэк?

Миков кыдз саймис, лэбтiс юрсö, сэк жö тöдiс милиционерöс да комиссарöс, кöднö адззылiс ни Чуракись и кöдна йылiсь унакодь ни баитлiс мамыс: эз кулит отирсö, эз ляк умöль кыввезöн.

Миков жагвыв чеччис, öвтыштчис.

— Ха, Öмельлöн нучок! Тэ эстöн ойнас мый керан?! Кыдз татчö шедiн? — гажöн юасис ни комиссарыс, — тöдiс зонкасö. — Или гортсит вашöтiсö?! Или энакöт жö?

— Натьтö, кытшöмкö лякöсь подола сьöрын котрасьö, — серöмтчыштiс мöд вöлыс вылын милиционерыс, кöда кужис отирсö серавны.

— Кокольö котраси бы да энаэслö шедi. Тэчисö пельбоккезам.

— Кокольö! — шутньöвтiс комиссар. — А мый тэныт сэтчин керны? — гажöн серöмтчис. — Или быль посёлоксис кинöскö адззин? Но и Öмель пиян! Дедыс кодь жö чож!

Эз ни турун коласын герчкы кай. Узис деревняын отир, только öтмоз уннялiс пон, негорöн баитiсö мужиккес.

— Тöдсаэз дынö ветлыны мöдi, — бобгис зонкаыс, муö видзöтiс.

— Оз ни талун, зонка, посёлокас мунсьы. Ковсяс бöр котöртны гортö.

— Сулалö! Эд тэрмасьö! Бригадирсö воротаэс дынö пöрöтiсö! — пöрисьжыккезлiсь басни орöтiс Колька, шагньöвтiс гуна вороталань. — Татiсь бригадирсö бандиттэс вартлiсö, бат, абу ловья. Сы понда и ме шедi.

Вороталань кивзыштiс морт, вöрзьöтчис, лэбтiсьыштiс гырдззаэс вылö.

— Чугайнов! — Борис Тимофеевич зэлöтiс сермöт поводдэз.

Чугайнов чеччöвтiс ки вöв вылiсь да вöлыс одзын шагнялiс бригадирлань, мыйкö ас кежас модис. Локтiсö вартлöм морт дынö, милиционер лöга юалiс:

— Мый лоис?!

— Лоис тай, — кыдз код баитiс бригадирыс, чышкыштiс чужöмыс вылiсь вир. — Лоис... Кутiсö мортсёйиссез да вартлiсö. Мылякö эзö жö вийö...

— Тöдан киннэз?

— Кысь тöда? Уськöтчисö поннэз моз и давай трöситны! Ыксöны, мыля пö бригадиралан да комуниссэзлiсь бöррезнысö нюлан. Вот эд кыдз овсьö. Эз понды туйны керкуись петны. Кыдз сэтöн овны да уджавны мортсёйиссес весьтын?!

Турйöвтыштiс Андрей дядь, паськöтiс киэсö, кутчисис ворота бердö, милиционерыс кутiс, мед эз усь.

— Кынымöн вöлiсö?

— А? — вирöсь чужöмсö комиссарлань лэбтыштiс бригадирыс, тöдчис, что оз кыв, кöр адззисö ни, что пеллезсис чездöма вир.

— Чуракö эд, Андрей Николаевич, колас! — Борис Тимофеевич мышкыртчис вöлыс вывсянь да ыкöстiс бригадирыслö. — Чуракö, мыся, колас!! Сэтчин фельдшерыс мыйкö керас, отсалас!

— Нем меным Чуракас керны. Веськала, кыдз пон. Видзöтö, вундан кад локтiс, колö ой и лун уджавны. Кысся кыдзкö гортöдз, эстöн зэв, ашын чечча и нем оз ло.

— Ачыт тöдан, но колiс бы веськöтчыны.

— А... — öмсö осьтiс да видзöтiс бригадирыс, кымöссис сё визывтiс вир.

— Веськöтчыны бы колас!

Андрей дядь öвтыштiс кинас, турйöвтiс и ва кукань моз пондiс мунны деревнялань.

— Усяс я мый я? — Борис Тимофеевич видзöтiс бригадирлö бöрсяняс.

— Крепыт мужикыс, оз усь, — висьталiс милиционерыс. Пирскайтiсö ныррезöн вöввез, педзисö, кальскöтiсö удилаэзöн.

Милиционер пуксис аслас латькыт да топыт вöв вылö, видзöтыштiс Колька синнэзö, шуис:

— Но мый, мужик, мунам гортö! Колька пыдына ловзисис, шы эз сет.

— Тэ мый, Чугайнов? Мунас сiя гортö! Он адззы, сьöлöмыс кытчö лэбзьö бы. Кин жö, зонка, тэнö смилитiс Коколяс? Висьтав миянлö, ми некинлö огö висьтасьö. Этаэс я мый я, кöдна тiянын олiсö? Ха-ха, ме бы тэ местын котраси жö посёлокас, кокыштi жö басöк нывкасö бы, а мый? Абу я мый я переселенкаыслöн ныввес басöкöсь? Сьöлöм моросын сувтö!

— Кулак пияннэз жö, — бизгыштiс Чугайновыс.

— Тэ, Чугайнов, ачыт кулак пиян. Отир кыдз отир. Сiдз инькаэс, натьтö, вир синваöн горзöны да олöны, а тэ эшö сэтöн... Мун, Колька, котрась, да сэсся бандиттэслö эн шед, то ми эд быд шагын отсавнытö огö вермö, öддьöн паськытöсь вöррес.

Комиссар да милиционер темляккезöн вачкыштiсö вöввезныс боккезö и сöтiсö гортланьö, только эшö недыр кылiс, кыдз вöввезлöн коккез буткöтiсö чорыт туйын.

Миков дзир-бар керис ас гöгöрас. Некинöс сэсся эз адззы, и йöр пöлöн дзебсисьöмöн ни, öдззис деревнялань, чожа кайис улицаö, кыт мунiс невна жагöнжык, и одзлань бöра сöтiс котöртны.

Котöртiс-котöртiс зонка, люзь пымалiс, кыдз сутшкисö ваö, коккес увтiсь эз кыв и эз адззы мыррез да пуэзлiсь вужжез; некытчö эз падмы, эз берездась, кокнита посок кузя вуджис Лолым, кайис керöслань моз и петiс посёлокö, кытöн вöр коласiсь мыччисисö виль керкуэз, кыдз бы серöмтчисö: видзчисьöмась ни зонкасö.

Талун вöлi сэтшöм ни пемыт, что умöля тыдалiс коккез увтын туй. Керкуэс тыдалiсö, но одззамоз нырö эз ни павк матiсь тшын дукöн, кöззэз увтын эз ни югьяв би, эз тыдалö морттэз. Узисö отир. Пон гав эз кер. Колька медодзза керкуэс дынын ни öшис, эз тöд кытiсь кошшыны Настясö и эз лысьт саймöтны да юасьны нач тöдтöм отирсö, сiйöн и öвтчис мымдакö керкуэз коласын, видзöтчис öшыннэзö, кыдз бы дульсмöм синнэзö. Но öтiк керкуын некин эз вуджöртчы. Колiс кайны кинкö посöдзö, чорппезöн сяткöтны ыбöсö, саймöтны кузь мыгöра мужикöс, кöда посöдзö чуть ли не нач пасьтöг петтöн повзьöмöн юалiс:

— Мый колö? Зонка висьталiс.

— Мöдöрсянь пыр и адззан, — кокнитжыка ни шуис мужикыс и бöр пырис керкуö.

Сiдз и керис том мортыс: кытшöвтiс керкусö, кайис мöдiк посöдзö, саймöтiс Устьяöс, кöда бöра нето повзис, нето дивуйтчис — гажöтчис, аслыс медодз эз верит, юалiс: «Тэ я мый я, Колька?!»

Шы эз сет зонкаыс, пишнитiс нырнас.

— Ой, Колька! Асьтö виян кузь туйын! Быль я мый я любитан зырымöсь Настяöс?! Мый тэ сыись бурсö адззин? Ме бы тэ местын эг и сьöвзьы.

Эз шыась Колька, ружтышалiс.

— Ой, мый нö чужöмыт?! Эз я кинкö вачкы?! Виясö эшö вöрас и кошшы?! А мый?! Бурсö эстöн нем видзчисьны!

— Кинлö ме, Устья тётка, кола? Уси да дойми.

— Пырин бы керкуас. Видзöт, ми отир моз ни оламö, бытьтö бы асланым горт ни, кöть и дзескыт — бергöтчыны нельки оз позь, но ась. Кытöн шуöны дзескыт, сэтöн чöскыт, только бы кöззэс увтын не узьлыны ни, то ошыс сёяс! Настя! — быд горшись мам ыкöстiс нывлö. — Настя, чеччы да пантав жöниктö, кытчöдз сiя эз пышшы, котрасьö эта ылына тэ дынö! Кылан-он?! Колька керкуö эз пыр. Устья важ кружкаöн петкöтiс юны: квас не квас, сэтöрöн патшкö юаныс, но чöскыт кöра, бур. Юис и веськалiс горшкосьманыс. Настя узьöма чöскыт онöн, бытьтö дышыс петiс чеччыны, тiлис пыктöм синнэсö, шынньöвтiс — рад , но эз бы мыччав радсö, нузгис:

— Кытшöм жöник йылiсь баитатö? Эта я мый я? Бöб юра чурашинечыс... Сэтшöм жöниккес ме гöгöр номмес мымда гардчöны.

— Ошшес да кöиннэс! — мамыс серöмтчис. — Или вöрдядьыс, кöда вермас былись пышшöтны инь вылö. Но тэ и ныв менам!

Кытчöдз посöдзын быргисö, пондiс югдыны, да жагвыв, гусьöн, полöмöн да стыдитчöмöн моз, топ мыйкö гусялiс да полiс отирсис, пышшис полöмöн. Бöра Коколь юланьын шыасис сюзь. Посöдзö кöмтöг петiс Настя, пуксис зонкаыс бокö, пильснитiс:

— Колька, он и пов татчö ойнас локны? И мый бы татiсь кошшан? Ог вежöрт.

— Мунамö миянö!

— Кытчö?! Ой, зонка! Ме ачым ассим пола, а тэ нуöтан бöр Чуракат. Ашын жö сельсоветсис предыс бöр вашöтас. Ола татöн кытчöдзкö, кытчöдз ог кув, а кула, сэтчин и туй. Мыйлö этатшöм олансö видзöтны томся-томсянь?

— Быдöс бур лоас! — зонка кутыштiс нывкалiсь кисö.

— Колька, — пондiс вишыкасьны Настяыс. — Öддьöн эд татöн гажтöм.

Нывка горзiс. Колькалöн синваэс петiсö.

17

Вöлi август ни. Ойес лоисö ыркытжыкöсь, но луннэзнас одззамоз жö сотiс шондi. Асыв сибöтчис дыржык ни, и Миков гортö локны эз сёрмы, но сё жö шедiс бригадирлö, кöда лякасис эмись и немись, пондiс матегавны:

— Кытöн бöра талун оййин?! Эн я бöра сосланеччес дынö котрась? Видзöт менам! Кыдз кута да сьöвтала, горттö он понды вунöтны и уджавтöнняс лун-лун он понды сунавны. Зонка, абу я Коколяс сосланеччес боккетö гындöмась, синыт увтö пöжалöм картов лякöмась? Чöскыт пöжалöм картовыс?! Сiдз тэныт и колö! Он понды роччес дынын ниртчыны? Абу я мый я асланым нывкаэс? Видзöт жö кытшöм куканнез!

Сэтöн и сельсоветсис предыс сибдöмкодь голоснас жергö, гыжжесö бöра ни курччалö, сьöласьö, синнэзас нёштöм югöр:

— Комиссарлö нораси! Ась айыс дынö дзимлялö, а нем сэтöн...

— Нуöт да сёй! — Öпим кылiс баснисö Öник Иванлiсь, немымда эз сетчы мужиккеслö. — Тэнат пиннет лэчытöсь, а миян отирöс сёйны ныжöсь.

— Ы-ы-ы, — пондiс дульсö вирскыны Öник Иван, вешшис бокö, былись вермис кö, сёйис бы, натьтö, Öпимсö и зонсö. Но, тыдалö, эз вунöт, кыдз Öпимыс öтпыр öмлöсалiс ни да эшö вермас отирыс дыр висьтавны, кыдз Щелгачёвыскöт Усолье туй вылын мортсö торкисö, сэк буржык кыв курччöвтны да овны...

Миковлöн мам зонсö дорйис, а сiя бытьтö кылiс да эз пöрисьжыккезлiсь модьöм. Уджалiс да олiс, неделя етш бöра гортсис рыттэзöн некытчö эз мыччась. Эта коста Öпим мöдöтпыр ни котрасис Кöсöдз, эшö öтпыр адззылiс мужиксö, кöдö сё пукöтiсö районын. Öльöш ошшасис, что Кöсын видзöны бура, озö тальö-зэлöтö, олö кыдз асланым отир коласын. Сiдзкö, сы понда нем тöждыны.

Öпимлöн кокнитжык сьöлöмыс вылын, и ась Чураксянь туйыс чуклясьö вöрöт, но инькалö кузь туйын некытшöм бандит эз пантась, кöть гортын полöтiсö бандиттэзöн, кöдна пантасясö кö, лоас умöль. Только Денинсянь пондiс петны ни асланыс ыббез вылö и Гыркашор пос вылын инмис Яраш вылö, кöда пукалiс поспуэз вылын, тышкасис лöдззезкöт, нузгис-сьылiс. Кыдз казялiс Öпимсö, гажöн видзöтыштiс сы вылö, öмтырнас серöмтчис и пондiс юасьны:

— Öпим, кытчö нö бöра котрасин? Эн я мужикыт дынö? Ёна бöра Öльöшыс гогналiс эд, ха-ха!

Рыжöй юрси Ярашлöн пашмöм, пиннес гер, синнэс дульсмöмась, рожасö важын ни абу миссьöма, кыдз олöма кытöнкö гуын — сьöлöм гудыртчö!

— Отирсö пиннет вылын эн видз! Асьтö тöд, — Öпим кыввезнас Ярашлö эз сетчы.

— Тэ мый китшсян? Пуксьы бокам да ваксьы. Öтнамлö гажтöм.

— Весь оз ков шатласьны, сэк оз ло гажтöм. — инька зэв мунiс Яраш дынöт — шаг эз чинт, юрси тылöп эз вöрзьы, эз повзьы дульсмöм синасис, кöда гожумбыт ни пышшалö вöррезын, полöтö инькаэсö, гусясьö. — Ловья жö ышö Öльöшка ёртö? — пышшалiсь ыксiс Öпимлö бöрсяняс ни. — Эз я комуниспöлöсыс вийö ни? Нылö эд мортсö вийны, кыдз гутлö печикнитны.

— Ловья, Кристос сыкöт! — Öпим горöтчис и бöрас дзар ни эз кер, одзлань лэбзис-мунiс нинкöммезнас, топ кузь туйын немымда эз мыдз.

Яраш кольччис пос вылын, орсiс да олiс, бокас поспуэз вылын важ пишаль. Öпим кайис керöс вылö моз, чукыльын бергöтчыштiс, видзöтыштiс бöрас. Ярашлöн рыжöй юрсиэс сё тыдалiсö, шондi югöр вылын юрыс свиттялiс, кыдз важ гырнич, рожаыс, кыдз горись кыскöм рöма шаньга, синнэс, кыдз дзутулöн, дзуз видзисö, пельпоннэс паськытöсь — горпöданнэз, ачыс топыт — мусянь тэчöма.

Отир ой и лун уджалöны — ньылöмöн миссьöны, кытöн нач тшыгöсь, кытöн мымдакö пöтöсь, олöны и кыдз бы гожумсö озö адззывлö, а Ярашлö нем абу, весь овтöн вир пизьö.

Öпим раз-мöд эшö дзарнитiс бöрас, мунiс и видзöтышавлiс шондiлань. Кадыс вöлi рытлань ни, шондiыс вот-вот вотьыштас керöсыс увтö, кыдз вöяс вöрыс сайö. Инька гöгöрын шуксис-лэбалiс быдкодь гаг, юрыс вевдöрын, кымöрын, эз павьяв öтiк палачок. Туйыс бокын канаваын кельдöтiс ни турун, кыдззез вылiсь киссис ни вежöтöм лист. Ыб вылын стожаррез вылын пукалiс да кивзiс канюк.

Вöрыслöн чужöмыс вачкисис арся вылö ни. Ыббез дзормисö-кельдöтiсö, воисö ни осяэз, павьялiс нянь дук. Öпим петiс ыджыт ыб вылö, тэрмасис-кайис керöс паныт, думаэс бергалiсö Яраш гöгöрын, унаись ни ассис юалiс: «Кыдз сiдз вермö овнытö мортыс? Оз уджав, нем понда оз тöжды... Весь озö шуö, что бадьыс вылö кöзыс оз быдмы: аймамыс Ярашлöн вöлiсö сэтшöмöсь жö дышöсь, сiйöн и олiсö рушки-рашки, не выланыс — не коккезаныс. Не сёйны, не юны, пыр öвтчисö, кортöн ветлöтiсö. Тарас Степан гозъяыс кöркö кералöмась юр ссыльнöй Помалiсь... Вöлöма сiдз, что нач весись торкöмась мортсö, кöдалöн бытьтö пö вöлöма уна деньга, но нем абу адззöмась: мортыс нем понда юрсö öштöм. Эта эд сэтшöм жö — кералас кинлiськö юрсö. А мый тэ Ярашлiсь босьтан, кöр сiя учöтсянь мортвийись кодь и вöлi, пу-турун сы весьтын некöр жö эз сулав.

Чурак дынын ни, крут керöс кайтöн Öпим вöлись пондiс кывны, кыдз мыдзöмась коккес, кыдз нiя дöлöтöны. Сiйöн и пукалыштiс туй бокын недыр, синнэсö чикралiс-видзöтiс шондi пуксян ладорö, адззис ылö-ылö, топ думаэзнас лэбзис вöррез весьтöт.

Этасянь гортöдз вöлi нач ни матын. Инька некинiсь ни эз пов, долыт вöлi сьöлöмыс вылын, колiс бы думайтны гортыс йылiсь ни, но мылякö думаэс сё бергалiсö Яраш гöгöрын. Öпим сё видiс арттöм мортсö, кöр сiя олiс да полöтiс отирöс, пышшалiс, но отирыс жö баитiс, что Курайкöт Яраш оз гардсьы, оз тöдчы. Сы сьöрын вöтлiсьöны милиционеррез да солдаттэз, но некыдз кутны озö вермö. Пышшалiсьсö кошшöны вöрись, а сiя кöркö ештöма кайны Öндреяника керкупöлскö и сэтчин не öтiк лун олöма, видзöтöма, кин да мый керö. Сiдзкö, сералöма сельсоветiсь предсö, милиционерресö, солдаттэсö, сёйöма-юöма, сыбöрын петöма позсис, мыччисьöма Öндреяникалö и пондöма серавны, что нылiсь сёйöма рись тупöссез, гырничись юöма йöв, коккезас каттьöма виль нямöттэз, пасьталöма виль йöрнöс (бöра эд гусялöма жö) и нерö хозяйкасö — пиннес гер, синнэс був-бав, ошшасьö:

— Тётка, эн горзы йöлыт понда, йöрнöссö эн жалейт, а нямöттэт асьныс меным вöзйисисö. Тэ, тётка, чож. Кыян бöра дöрасö и вуран, мый тэныт колас, а менам, видзöт, иньö абу, дöрасö ог куж кыйны и йöвсö пешла жö бы.

— Яраш, еныс мургыльтас эд юртö, — Öндреяника боккезас клап да клап вартлiс.

— Еныс! — гöрдлiс Ярашыс. — Еныскöт ми, Öндреяника тётка, öтiк бекöрись сёямö. Быль! Он кö верит, юав Кристосыслiсь, висьталас.

Сьöвзис инька арттöм мужиклö, сэсся нем эз вермы керны: рожаас эд кань моз оз чеччöвт да оз гыжьяв.

Луншöрнас Яраш онняюрöн уськöтчис посöдзись, кань моз усьтöнняс бергöтчис, татш сувтiс коккес вылö, кинас öвтыштiс, мыччис гер пиннесö, висьталiс:

— Тётка, сельсоветас висьтав, мед ме понда озö тöждö! Ме мортыс, видзöт, сэтшöм, что немись и некинiсь ог пов.

Луныс вöлi жар, пöдтiс, рытланяс топ ыркöтыштiс, но Öпимлöн сё эшö чужöмсис визывтiс ньылöм. Инька чышьян пельöсöн чышкис рожаыс вылiсь ньылöмсö, чеччис и жагöнжыка ни иньдöтчис гортöдз...

18

Öтiк лунö комиссар Боталов Кöссянь вöлöн гöнитiс медодз Чуракöдз, сыбöрын лöсьöтчис кежавны Кокольöдз, видзöтны, мый ни керсьö посёлокын, кыдз сэтчин поздiсисö ни переселенеццез, кöдö и комиссартöг синйисö бура, но сiя ачыс бы видзöтiс, кыдз овмöтчöны виль отир.

Борис Тимофеевич Кöсiсь вöрзис асылöн одза-одз, шондiтöг, вöвнас гöнитiс ыркыт чассэзöн, кöр эзö пышналö лöдзпöлöс, кöр отир вöлiсö эшö гортын, ыббез вылын некин эшö эз тыдав, сiдзкö, етшажык адззылiсö бы, кытчö мунö комиссарыс, эд быд деревняын бандиттэзлöн вермасö лоны синнэз и пеллез: он ешты петны посöдзö, Курай тöдö ни, что тэ лöсьöтчан мунны Чуракö.

Кузь туйын Боталов бандиттэзлiсь эз пов, кöть нiя и лöсьöтчöны пö (отир басни сьöртi) локны Кöсöдз да паздыны милиция, райисполком — быдöс начальствосö рез-паз керны, сувтöтны районын виль власть, сыбöрын вöлись мунны Москваöдз и сэтчин ни бергöтны-онняюртны Советтэсö, бергöтны олансö, кыдз колö. Басни, басни... Баитны-ошшасьны кöть кин кужас, но некин вывтi Курайись эз пов, тöдiсö, что сы дор отир етша мунö, только öтi-öтi, сэтшöммес, кöдналöн дышныс петö уджавны или кöднö дойдiс виль властьыс, и лöгныс петö быдöн вылö.

Одз гортсис лöсьöтчис петны комиссарыс, бур думаэзöн панталiс бы лунсö, нельки иньсö эз саймöт — гусьöн керис, ась Надюшаыс, кöдö радейтö, узьыштiс бы дыржык, но кöр кöмасис Борис Тимофеевичыс, иньыс саймис, эз ешты юрсö лэбтыны юрöдз вылiсь, пондiс модьны:

— Борис, бöра кытчöкö одза-одз? Гортö он ни вовлы. И мый тэ жöдзан районас ой и лун, бытьтö тэтöг сэсся некинлö уджавнытö! Эмöсь тай тыр начальствоыс! Ась кинкö мöдiк бы тэ местö мунiс.

— Надюша! — гажöн да рамыника шыасис мужикыс, шынньöвтiс, гöгрöса чужöмыс югмис. — Видзöт öтöрас мый! Абу я ар, погоддяыс гажа. Отирыс сюэз дзимлялöны, а ме чарланас ог уджав. Сэк мый нö? Сэтiсь жö эд няньсö сёя. Муна да кöть баснинам крестьяналö отсала.

— Ме тэ понда ойесö ог узь, сiя и дума, кытöн да мый керан, ловйöн я гортö локтан. Оз я кытöнкö кымöсат тачкö.

— Мый мекöт вермас лоны?! — Борис Тимофеевич миссис ни и сералiс кыдз зонка, бытьтö нач нем эз тöжды, нач немись и некинiсь эз пов. — Гулю тэ менам! — чышкис чочком чышкöтöн чужöмсö да киэсö, сибöтчис иньыс дынö, кöда пондöтчис сынавны юрсö, чуп окыштiс рожабансö, висьталiс. — Эн тöжды ме понда. Ме талун Чуракö муна. Чуракö, мыся, сэтчин, кытöн чужи и быдми, кöдö ог вермы нач вунöтны, — ружтышалiс. — Гажа эд, Надюша, Чуракыс. Отирыс сэтчин тöдсаöсь, бурöсь, некин некинöс кылöн оз дойд. Сiдзкö, ме кыдз бы гортö муна, сiйöн сьöлöмö и гажöтчö, — сьылыштiс-нузгыштiс кытшöмкö сьыланкыв, пондiс пасьтавны гимнастёрка.

— Кузь эд, Борис, Чуракас туйыс, сё вöрöт да вöрöт.

— Но и мый? Мый вöрыс менö керас? Ош я мый я сёяс? Да ме ошшескöт эг я учöтсянь дружит? Тöдан эд... Ошсö эзö я быдтылö Чуракас, — серöмтчыштiс. — Сiя гожумнас öтнас кольччас отирыс сьöрись, орсö челядьыскöт или кайö да лэдзчö посöдзись посöдзö, пырö кöр керкуэзö, сёйö, мый адззас. Чож и интереснöй вöлi зверьыс.

Торья жырокын дзуркнитiс кровать, ружтыштiс кöдакö зоныс.

— Гусьöнжык баит. Торган сэтöн одз асывсянь! Саймисö эд челядьыс, — мужиклö висьталiс Надя. — Сёян, он?

— Кытшöм сёйöм эта одза? Оз эшö симав, — Борис Тимофеевич шагньöвтiс зоннэс дынöдз, кöдна узьтöнняныс вывсиныс кульыштöмась шебрас и чискöны ныррезнаныс. Ай сулалыштiс зоннэс дынын, сьöлöмсö кыдз бы шонтiс-гажöтiс, что сылöн эмöсь сэтшöм челядь, кöдна бöбкодьöсь, но и ась... Кин учöтнас абу бöб? Не я быдöнным сэтшöмöсь вöлiмö.

Борис Тимофеевич лöсьöтчис малыштны бы кыкнан зонсö, окыштны, но эз окышт и эз малышт, сiдз кыдз иньыс думаэсö сорис, бöра шуис:

— Сёйин бы!

— Оз, мыся, симав! — чорытжыка горöтчис мужикыс, сiйö и керис видзöтышалiс öшынö, кытöн жагвыв мыччисис шондiыс, койыштiс керкуас веськыта синнэзö югöр.

Инька тэрмасьöмöн мужикыслö зепас сюйыштiс няньтор, жмитiс бы, да ассис я мый я стыдитчис, эз понды ниртчыны, кöть сьöлöмыс пессис, мыйкö тöждiс-полiс, кыдз бы шогалiс и ачыс эз тöд, кыт висис и мыля. Гажтöма кольлалiс Надя мужиксö, чуть эз горзы, сэтшöм лоис, кöть сьöрас бы вöтчы, синваэс сiдз и петiсö, сiйöн и горöтчис:

— Борис, ме талун умöльö вöтаси.

— Но тэнö. Кыдз старуха. Вöттэзлö веритан, серöмтчис Борис Тимофеевичыс, локтiс пызан дынö да пондiс видзöтны фотография вылö, кöда öшалiс стекло увтын стенаын: фотографияыс вылын иньыскöт кыкöн, томöсь, басöк чужöмаöсь, а öнi... Борис Тимофеевич малыштiс чужöмсö, думайтiс: «Пöрисьма я мый я ни? Не я чукыррез ни шогмöны кымöсам? Но и ась шогмöны. Мöдпöв, натьтö, ог жö ни понды гöтрасьны. Надюша кодьсö эд ог жö ни адззы, — шынньöвтiс, видзöтыштiс иньыслань, кöда чужöм вылын сё вöлi гажтöм, гажöн висьталiс:

— Сьöвзьы тэ вöтыт вылö! — шуис этадз, бергöтчис и кокнита петiс керкусис.

Инькаыс вöтчис öтöрись посöдзöдз, висьталiс, медбы Чуракас некинкöт дыр эз дзудзгöтчы, юалiс кöр локтас.

— Тэ мый, Надя? Мый, кöть невна олышта Чуракас? Ог эд тшык, некин менö тэ дынiсь оз мырддьы, — и лэдзчис посöдзсис, öдззöтчис кокнит походкаöн, кыдз зонка.

Надя сулалiс посöдзын, видзöтiс мужикыслö бöрсяняс, вöлi сылö мылякö сiдз гажтöм, кыдз бытьтö янсöтчис сыкöт дыр кежö. Борис Тимофеевич улицаöт мунiс мöдiк керку дынöдз, кысянь колiс кежны-саясьны, бергöтчыштiс, шынньöвтiс, негорöн шыасис:

— Мый нö тэ? — веськыт кинас öвтыштiс, сöтiс милициялань, медбы сэтчин пуксьыны вöв вылö. Мунiс мужик и гажа дума думайтiс: «Еныс меным сетöма сэтшöм иньсö! Сыкöт некытчö он йöрмы». Сэтöн вöлись мылякö аслыс ни лоис гажтöм, аскодя шог пидзыртыштiс сьöлöмсö, сiдз бы и бергöтчис бöр, окыштiс Надясö да вöлись и мунiс. Но умöль думаэсö сэк жö талис коккес увтö, сiдз кыдз, кöр кытчö мунö, оз любит бöрлань шаг тальччыны, пыр керö сiдз, что некöр и некытчö оз сёрмы, и оз любит, кöда сёрмöтчö локны уджавны или кытшöмкö собраннё вылö. Некин сьöрись оз кольччы, кыдз этна каёккес жö. Асывнас шондiыс кытöн и эм, а нiя быркайтöны ни и шыасьлöны, уджалöны: öктöны гаггез да вердöны пияннэсö. Талун воробейез чирзiсö ни улицаын, лэбалiсö том пияноккезнаныс.

Вылын юр вевдöрын чирзiсö чикиссез. Рытлань ладорын öшалiс кизерик кымöр, кöсйисис зэрны бы, да синнэз одзын кизермис, кизермис и öшис. Öддьöн ни колiс бы зэрыс, да бöра эз зэр, бöра лоö шондiа луныс.

Борис Тимофеевич чожа локтiс милицияö, кытöн сiйö панталiс ни конюх да висьталiс:

— Борис Тимофеевич, седлоалi ни Воронкотö.

— Ме эд ачым верми бы, Павлович!

— Ачыт. А ме мый понда керны? Весь я мый я няньсö понда сёйны? — гажöн баитiс конюхыс, кыдз ёрткöт сёрнитiс, сiдз кыдз тöдiс комиссарлiсь мывкыдсö: Борис Тимофеевич кужис и радейтiс баитны кöть кинкöт, эз вöв пон кодь лёк. Бур мортöн лыддис конюхыс комиссарсö. Павлович кольлалiс сiйö кузь туйö, бур туй кöсйис.

Вöв суййис гладь туйöт. Шондi лэбтiсис вылынакодь ни, ёрис югöрöн синнэз.

Воронко котöртiс латькыта, чожа вайöтiс Гущинöдз. Эстöн медодзза керку дынын, чом сайись мыччисис хозяин и гажöн ыкöстiс:

— Здоровöн олан, Борис Тимофеевич! Оз тэныт узьсьы. Шондi вöлись неважын мыччисис, а тэ бöра ни кытчöкö вöвтö вашöтан.

— Кытчö нö воштiсян, Петра дядь? Колö.

— Мый нö керан, колö кö, — шыасис Петраыс, босьтiс вила. Морткöт басни: кыв-мöд и — аллё! Одзлань гöнитö вöв.

Сьöлöм вылын лоис гаж, бытьтö синнэз одзын сё сулалiс уджалiсь мортыс, лыддис сiйö кыдз аслас деревняись, эз пов баитны, кöть тэ и комиссар. Петрасö кыдзкö корлiсö милицияö (бригадирныс я мый я норасьöма, что сёрöнжык петöма уджавны). Пырис Петра милицияö, бат, джын лунся унажык öштiс öтмöдöрö ветлöттöн, чужöмыс нюжалöма, тöждö — шондiсö оз адззы, полö, что дойдасö. Отчаяннöй Митит, милиционер, уна эз любит баитны, а сэкжö зэлöтiс-юасис да висьталiс:

— Тэ, Кузь Петра, мыгöрнат кузь, да мывкыднат дженыт! Мыля дышöтчан уджавнытö?! Видзчисян, кöр этöн плетьнас пывсьöта? И пывсьöта, ог видзöт, что тэ месся ыджытжык, асьтö пуктан ылöсажыкö!

— Мыйöн ме тэись ылöсажык? — Петра полiс видзöтны милиционер вылö, дрöжитiс.

— Вот ылöсажык!

Сэтчö öтöрсянь пырис Борис Тимофеевич, казялiс, что Митит асывсянь ни пизис, рамыника юалiс:

— Мый, Попов, бöра асывсянь ни поплёбкасö пуан? Пизян тай вывтi ни.

— А мый нö?! Кулак родiсь жö абу я эта мужикыс! Тальччыны колö бöжыс вылö!

— Тэ, Попов, мылякö быдöнлö бы бöж вылö тальччан. Он я бы нильды да усь?

— Борис Тимофеевич, эта мортыс гущинеч. Сiя меным кöркö пельбокам клёпкылiс!

— Эн кутчись! Ачыт эд одзжык моросö бердö кутчисин, — гущинечыс смевмыштiс ни, адззис, что комиссарыс кыдз бы баснинас сы дор. — Мырддин бы менчим нывкасö, дак пельбокат сёйин.

— Во! Адззылiн гущинеччес, Борис Тимофеевич, кытшöмöсь: öманыс чуньтö эн сюйышт, сэк жö курччöвтны или бокись инь мырддьыны вермасö.

Кыв да мöдiк — басниöн дзугисö-сорисö уджнысö, милиционер сэтöн жö вунöтiс, мыйлö ни локтiс Гущинiсь Петраыс, пондiс ошшасьны, кыдз сiя зонканас рыттэзöн котрасьлiс Гущинö, кыдз зонкаэзлiсь гогнавлiс пельбоккезнысö, и кыдз сылiсь лопатитлiсö ныр гöгöрсö. Петра сералiс öтлаын, петiс милицияись и мунiс гортас.

Öнi ылiсянь адззис комиссарсö, здоровайтчис, вель дыр видзöтiс Борис Тимофеевичлö бöрсяняс, кыдз сiя тюгьясьö вöв вылын.

Борис Тимофеевич гöнитiс ни мöд Гущиныс дынын, а сё думайтiс Петра йылiсь, кыдз сiя öтпыр висьталiс: «Тэ, Борис Тимофеевич, бур мортыс. Меным уна ни бурсö керин!»

«Мый ме отирыслö бурсö и кери? — вöв вылын дюттясис комиссарыс. — Натьтö, унажык умöльö кера, натьтö... А кытчö воштiсян, кöр сэтшöм оланыс?! Мукöдпыр и колö дойдны мортсö, он кö дойд, асьтö сiдз пурасö, что нерад лоан овны...»

Воронко джöмдiс, несйöвтiс, ружтыштiс да зэгнитiс вывсис мортсö, кöдалöн дзугсьыштiсö думаэс да бöр кöртасисö, Борис Тимофеевич ас кежас горöн висьталiс: «Унаöлöсь эшö Совет властьлöн враггес, уналö эшö оз гленитчы виль оланыс, но и ась. Асныраэслiсь ныррезнысö лязамö. Кутамö Курайсö, сэк етшажык мутэйнас пондасö соровтны, — думаэс бöра бергалiсö Курай гöгöрын, кöдö комиссар лыддис умöль мортöн, но ылöсаöн, грамотнöйöн, бандитыс немись и некинлiсь эз пов, ассис керис, и отир сы сьöрö вöтчисö, веритiсö. Бандиттэс унажык бергалiсö Чурак гöгöрын, öддьöнжык вöр пыдöсiсь деревняэзö пыравлiсö, кыдз Гришкинö да Шаламö, натьтö, и Киев гöгöрас шедлывлiсö. Вöррес миян паськытöсь — коккезöн он меряйт, синнэзöн он судзöт, мортыс вöр пытшкын, кыдз идзасын ем: саясяс синнэт одзын кöз сайö и абу... Кыдзкö мöднёж бы колö Курайкöт орсны — пантавны бöбöтöмöн, а кыдз вот? Гожумбыт ни вöтлiсямö, а етша кин эд шедiс».

Комиссар шутньöвтiс, зэлöтыштiс сермöт поводдэз. Вöв öдззис котöртны. Чулалiс ни кыкнан Гущинсö. Туйыс чуклясис вöроккез да ыббез коласöт, лэдзчывлiс логоккезö, лэбтiсьлiс гриваэз вылö, торйöтiс ыббез, кöдна вывсянь тыдалiс ылö-ылö. Вöррез весьтын öшалiс кизерик тшын — этö кытöнкö ылын сотчисö вöррез, и тшыныс паськалiс татчöдз.

Ыббез вылын вундiсö отир — мышкырасисö, бытьтö кокасисö кайез. Быд сю тусь дзимлялiсö му вылiсь, сувтöтiсö суслоннэз, кöдна таво вывтi тшöка эзö сулалö, сiдзкö... Бöра годыс лоас зэлыт, бöра отирыс пöт озö пондö сёйны. Природаыс миян надз — гожум гожумкöт озö лöсялö, етша кöр овлö сэтшöм погоддяыс, кöр бура шогмö нянь.

Кузь талун туйыс комиссарлöн. Час-мöд чулалiс, кытчöдз эз лок Пуксипиöдз. Деревняын луннас некин эз вöв. Öтiк керку дынын бурундук вылын пукалiс старуха и суналiс петух моз, кöда суналiс жö посöдз бокын öтiк кокыс вылын.

— Баб, кытöн талун тiян отирыс? — Борис Тимофеевич сувтöтыштiс вöвсö посöдз дынö, думаэзнас лöсьöтчис юавны бы сельсоветiсь пред йылiсь, кöдакöт колiс бы сёрнитны-юасьны, горöтчыны, кыдз да мый керсьö-овсьö татöн, кывсьö я Курай йылiсь. Бат, бандитыс сибавлö гортас, сiдз кыдз вöррезöттяс семьясö оз кыскав. Пöрись лэбтыштiс юрсö, ныж синнэсö тiльыштiс, юалiс:

— Тэ кысь сэтшöмыс? Тöлiсь вылын я мый я олан, он тöд, мый öнi керöны отирыс. Быдöн ыббез вылын талун, зонка! Вундöны, кытчöдз погоддяыс сетö уджавнытö. Ме моз кö пондасö сунавны, пиннезнысö эд пондас ковны öшлыны тув вылö, кöр сiдз ни няньсö öддьöн огö адззывлö. Öнi тай кытчöкö питкыльтiс сельсоветсиным предыс да меным шуис, тэ пö мый, старуха, эстöн пукалан, колö пö эд вундыны. Адззан, кытшöм ылöсаöсь миян начальниккес, менö ни тшöктöны бы вундынытö, а ме чарласö ни киам ог вермы видзны, талун-ашын ола, бат, этчö и лолö петас.

— Шоччись, баб! — пöрисьлö гажöн висьталiс комиссар и юалiс. — Курайыс йылiсь нем оз кывсьы?

— Курай... Сiя тэнат вон я мый я? Мый юасян менчим кöдö оз ков? Кöть и вовлас Иваныс, дак миянö оз пыр, гортас жö иньыс дынö мунö. Сэтшöммескöт миян озö тöдчö.

Кöсва вуджис-броддис вöлыс. Сыбöрын гöнитiс сё вöрöт да вöрöт, кöда пытшкын вöлi гажа, кокнит, ыркытжык, быд пуыс öгралiс веж да гöрд рöмöн, кыдз невеста сулалiс и вöзйисис бы жöник сайö. Туй вылö кыдз бы ольсалöмась басöкся-басöк сера дöра — синнэз гусялö, лист кышöтö вöв коккез увтын. Туй бокись быркайтöны öтi-öтi сьöлаэз, то лэбтiсяс дозмöр — кула-пола борддэс, сiдз шовкöтас, что вöлыс повзьö. Яггезын да песокаиннэзын сьöлаэс и дозмöррес вöлiсö сымда, что сьöлöм чеччалiс — пишаль бы то колiс! Кöть бы öтiк кай лыйис...

Борис Тимофеевич эшö томнас, челядь кадö, Чуракын овтöн ветлöтiс вöравны и простöн гортö эз вовлы. Öнi сiйöн пишальыс тöдвылас и усис, сiйöн и думайтiс, что локтас кö Чураксис гортö, лоас кö бур погоддя, кресенняöн мездöтчылас вöравны, шоччöтас сьöлöмсö.

Денин ыббез вылöдз вöв вайöтiс луншöрöдз. Воронко пымалiс, мыдзыштiс, дышöтчыны пондiс рöктыны, мышкырасис да туй бокись öмтырнас йирис отава.

Вот и Денин. Деревняыс кыдз бы дзебсисьöма грива-ыббез коласö лажмытжык местаö. Деревня шöрöт визывтiс шорок, сэтöн жö öшымöс. Керкуэс кыдз бы ляпкисьöмась вылынжыкинö. Сэтöн — веськыт ки вылын — милиционерлöн керку, а шульга вылас, конецас ни, — колхозiсь предлöн, медбöрья керку посöдзын пукалöны кык пон, бытьтö озö и адззö локтiсьлiсь вöвсö — гордöйöсь.

Татiсь предсö комиссарыс тöдiс бура. Предыс öтiк ойö адззылöма, кыдз бандиттэс ойнас туй кузя гöнитöмась Чураклань — быдса обоз кыссьöма, и унажык отирыс вöлöмась асланыс, гришкинса.

Милиционер Чугайнов ныр увтöт бандиттэс ысласисö, а сiя узис, эз адззы, мый керсьö гортас. «Но и милиционер! Тэ кодьыскöт, вонö, уна кашасö он пу и он сёй! Брынöтны бы милициясис, но кин öння кадö сы местö юрсö сюйыштас? Кинлöн оланыс вывтi ни курыт, медбы асьсö сувтöтны кытшöмкö чер или пурт увтö, кымöссö мыччыны пулялö? Ась ни уджалö, кытчöдз уджалö, кöть баснинас отиркöт ассис уджсö керас и сiя бур. Мый жö талун бöра пондас гардны Чугайновыс?» — эна думаэзöн Боталов вöвсö кежöтiс милиционеррезлань, кöдналаньсянь паныт чепöссисö кöин чужöма поннэз — сёйны лöсьöтчисö.

— Тi мый керат?! Ассиным пурат бы! Ме тiянлö! — комиссар вöв вывсянь ыкöстiс поннэслö, кöдна кыдз бы виньдiсö — лöнисö, бöжжезнысö лэдзисö и саясисö чом сайö.

— Тi мый, Борис Тимофеевич? Еретик я мый я? Поннэслö öтiк кыв висьталiн, и нiя пышшисö.

— Колö кужны, — Боталов вöвсö сувтöтiс милиционер одзö, чеччöвтiс Воронко вылiсь.

Чугайнов кöс мыгöра, кöс чужöмбана, чукылякодь коккезöн педзис ни вöлыс гöгöрын, шыннялiс, лёбис мый колö и оз. И сьöкыт вöлi вежöртны мортсö: то ли сiя сэтшöм гажа, чож, то ли хитрöй — кужö пантавны комиссарсö. — Чугайнов, тэ мый уджалан?

— Тэнö видзчися, — милиционер веськыта видзöтiс комиссар синнэзö. — А мый?

— Кысь тöдан, что ме локта?

— Кысь тöда... Э-э-э, Борис Тимофеевич! Ме, батя, мортыс дорын узьны кужа жö. Мыйлö милиционернас уджавны, кöр сiйö ни ог понды тöдны, что миянö локтö комиссар? Ме быдöс тöда, Борис Тимофеевич.

— Ошшась да ошö эн пöр. Бандиттэс нырыт увтöт ысласьöны, а сiйö мылякö он жö тöд.

— Кысь ме нiйö ойнас адзза?! Менам керкуыс видзöт кытöн, а нiя мунöмась туйыс кузя. Поннэс быд ой кинöскö сёйöны-увтöны, и он эд понды быд ой öтöрас пукавны да видзчисьны, кин локтас Денинааным, да эшö ойес лоисö пемытöсь ни. Не-е-е, Борис Тимофеевич. Тэ, батя, менö эстöн эн стыдит, ме, батя, мортыс, тöда мый керны. Нiя, бандиттэс, асьныс бöра локтасö одзам, вöзйисьны пондасö, медбы кутi. Видзöт, батя, гришкинсасö эд сермöталiсö, кöдна бандиттэскöт тöдчисö. Сiдз эд?

— Сiдз, да мый сэсь, кöр шедiсö нiя, кöдна асьныс, поди, эзö тöдö мый керисö.

— Кыдз эзö тöдö? Тöдiсö! Денинсис тай мылякö некин магазиннэсö петкöтны ойезнас эз ветлöт, а нiя мунöмась. Важын ни колiс гришкинсасö чышкыны, ме немымда сэтшöммесö ог жалейт.

— Мый нiйö жалейтнытö?

— Во! Нем, мыся, сэтшöммесö жалейтны, кöдна асьныс кошшöны пулясö. Кытчö воштiсö бандитпöлöссö?

— Сэтшöмсö эн юась, Николай Васильевич...

— Ась. Пыралам миянö. Кöть няньтор öмат чапкан да шöма квас юан. Горшыт эд косьмö. Чугайнов поводöт кутiс Воронкосö да кöрталiс посöдз бердö, кытчöкö сё тэрмасис, топ мыйкö мортыслöн ендiс и колiс керны öнi жö.

Борис Тимофеевич видзöтiс ёртыс вылö и думайтiс: «Мыля жö сiйö Турбасöн шуöны? Турöп кодь мывкыднас, сiйöн или мый?»

— Тэ эн пов, Борис Тимофеевич, Турабасыс керас! Турабасыс некытчö эшö эз йöрмыв и оз йöрмы. Он верит?!

— Верита, верита, — шыннялiс комиссар.

19

Вöлi павжун гöгöр ни, кöр петiсö Денинiсь. Шондi шонтiс эшö гожумсямоз, öшалiс паныт — синнэз ёрис.

Косьмисö бöра ыббес вылын сюэс, вершок сувдöн песокаиннэзас быдмисö, нем вундыны. Бöра пондамö тшыгьявны.

— Николай Васильевич, тэ эд, натьтö, вывтi он тшыгьяв. Етша я, уна я, но деньга босьтан, и пизёк сетöны, а отирлöн копейка абу, — Борис Тимофеевич пукалiс вöв вылын и кöритiс ёртсö.

— Тэ мый?! Мыля Турбасыс тшыгьялас?! Кысь тэ сэтшöмсö кывлiн?! Турбасыс не сiдз, дак этадз вердчас: вöрыс абу я керкуным дынын зэв, сьöлаэсö посöдзсяняным лыйла! Только вот бандиттэс, трой нiйö проклят! Узьны ойнас бытшöма он лысьты, сiйö и видзöт, кыдз юр босьтасö! Ойнас менам инькаö öтöрасьны оз лысьт петны. Абу колöма менам ошсö торкны, сыкöт ме бы вöрдядьсис эг пов!

— Висьтасин бы ошыт йылiсь.

— Мый уна висьтасьнытö? Одзунöтулыснас эд... Да лым эшö кöззэз увтын вöлi! Но ме босьтi чер. Думайтi, мыся Сiя дорас видззес вылöдз лэдзчыла да керала кöть турун потш. Нач матö мунi, этаыс дынöдз... Мельницаыс кытöн вöлi. Ягыс вылöдз эг ешты локны, öтöрасьны пожум увтö пукси, эг ешты вешьянöс лэдзны, сэтöн... Прыг кöзоккез сайсянь да зэв эд одзам чеччöвтiс, кыдз тупыль быгыльтчис, ошпиянок! Ме невна гатш эг пöр, сiдз повзи. А мый тэ, зонка! Мамыс кыдз бы мыччисис, сэк эд вöлись... Турбасыслöн овсис эд! Мый бы черокнас кери?!

— Кыдз нö сьöлöмыт эз пот? — сералiс Борис Тимофеевич.

— Э-э-э, Турбас! Сьöлöмыс менам, Борис Тимофеевич, кöртiсь дорöма. Би вылö кöть чапкы, гöрдöдз калямас, бöр сайкалас и сё öткодь лоас. Умöль сьöлöмнас милицияас, думайта, öнджа, нем керны. — Сэтöн жö баснинас бöр кежис ошлань. Но и вот, Турбасыс, мыся, вешьянсö эз ешты лэдзны, сэтöн и ошпияныс. Но кычанок кодь! Ме сiйö кутi да гортö вайöтi и пондi быдтыны. Быдмис, Турбас пиян! Хозяин улицаыс вылын лоис — öтiк пон эз лысьты паныт кутчисьны, а тöвнас тöдан жö мый вöлi! Доддяла вöвсö, пукся кошоваас, бокам пуксьöта Мишкасö и сöтам — бöрсянь лым гардчö! Пондыв-ко сэтöн мекöт кутчисьны? Матын да ылын, некытшöм бандит эз лысьт матö локны.

Денинсянь Чуракöдз сизим верста, туй лэбтiсьö да лэдзчисьö керöс вывсянь керöс вылö, вуджö шороккез, и вот Чурак дынын ни медкрут керöс, а сэтчин посадыс ни. Медодз мыччисис вичкулöн юр, кыдз му пытшкись тыдалiсö только золотöй рöма гладь шар да крест, но нiя бöр дзебсисисö керöс увтын. Кöр локтiсö керöс увтö, пантасис Опось, инька, кöда пыр ветлöтö кортöн, вылас паськöмыс лешки-вошки, спина сайын кöзича, киас бедь, мунö-ружтышалö. Пантасис, копыртчис — поклон сетiс, горöтчис:

— Кытчö нö, кагаэз?

— А тэныт мый?! — милиционер инька одзö зэв сувтöтiс вöвсö. — Уджавны колö, а тэ öвтчан сэтöн!

— Тэнчит одзсит нем ог мырддьы, сэк эн вид. Ме мортыс сирота, видзöт, веськыт киö кöс, уджавнытö ог вермы. Вердча, кин мый сетас. Тэныт бы менчим олансö.

— Уна баитан, Опось!

— Дугды, Николай Васильевич! — Борис Тимофеевич чорыта горöтчис, веськыт кинас пырис вешьянiсь зепö, кытчö асывнас иньыс сюйыштiс няньтор, кöда йылiсь вунöтлiс ни. Кыскис зепсис няньсö да сетiс кортöн ветлöтiсьлö.

— Спасибо да спасибо, кодя отир, — Опось бöра копырасис мужиккес одзын. — Мед тiянлö еныс сетö здоровье, ась.

Янсöтчисö кориськöт. Вöввес жагвыв кайисö керöс паныт.

— Мыйлö тэ няньсö сэтшöмыслö сетiн? — шыасис Чугайнов.

— Николай Васильевич, эн я висьтась ни, что учöтнат ачыт кортöн ветлöтöмыт. Богатсялiн и эн понды кориссесö радейтны!

— А мый нö эшö?! — Чугайнов пишнитiс нырнас и дугдiс баитны.

20

Петiс сiдз, что Чуракись бригадир кылöма, бытьтö пö Усть-Кокольын олiссез коласын эм прока морт, кöда кужö керны берся: кисис петö чарла, молоток, куран, вермö пö шогöтiсь веськöтны мöс и баран, телега пö керöма. И шуис сэк Васька дядь Миковлö, мед зонкаыс котрасис посёлокöдз да юасис телегаыс йылiсь, эд колхозаныс телегаэс озö тырмö и, бат, мыйкö вылö вермисö бы сiйö небны или вежны.

Бригадир Колькаöс посёлокö иньдiс сiйöн, что зонкаыс вöлi ни роччес дынын, тöдö ни вöрöт туйсö, отиркöт кужö ни баитны, ны ордын олiсö роччес.

Сiдзкö зонка ыб вывсянь котöртiс гортö, бырöм да сьöкталöм нинкöммез шентiс лабич увтö, кöмалiс айыслiсь важ сапоггез, кöднö только öтпыр кöмавлiс, ветлiс котрасьны нывкаэс дынö, вежис йöрнöс и öшис гортсис — сöтiс керöс кырылö.

Зонкалöн сьöлöмыс лэбзис-кыскис нывка дынö, етша думайтiс кытшöмкö телега йылiсь, кöр кылiс ни Настялiсь нюжвыла басни, адззис ни чужöмсö, синнэсö, мыгöрсö, Колькаöс некин эз адззыв, ежели не лыддьыны Якимöс да Якимикаöс, кöдналöн керкуныс деревня дорын. Якимика колхозын асьсö вывтi эз вий, сiдз кыдз мужикыс пукалiс правленнёын, и кöр бы эн пыр, сё мыйкö счёты вылын лыддис и лыддис — юрсö пызан дорись эз лэбты. Яким — Öник Иванлöн томжык вон, но мывкыдыс нач мöдкодь: весись отирсö эз вувт, эз пур. Талун сiя сулалiс öшын увтаныс, видзöтiс Колька вылö да юалiс:

— Кытчö сiдз тэрмасян, Миколок?

— Этчин, — кинас одзлань öвтыштiс зонка,

— А-а-а, — табак тшынöн пöдiс Яким, вижгис-куритiс. Сымда и вöлi: туй гладь, зонка суййис-тэрмасис одзлань, пымалiс ни. Зинкöвöдз эз и казяв кыдз локтiс. Чожа и Зинкöв кольччис бöрын, и ло жö сэтöн: Колька тальччис из вылö, ойкнитiс — зубыт жмитыштiс сьöлöмсö, синваэс петiсö. Тальччис бы эшö зонкаыс, но невна эз усь — зубыт лыйис öддьöнжык, колiс пуксьыны туйыс бокö, пукалiс да вырскайтiс тырппезнас.

Туй вылö дынас зэв пуксис катша, дюттьöтыштiс бöжсö, пондiс китшсьыны, кыдз бы сералiс. Сырчиккез лэбалiсö зэв, чирскисö кöбывкаэз, лэбалiсö бабыввез, вöрыс кыдз сералiс-гажöтчис, öгралiс веж-югыт би югöрöн. Лöнь да вывтi ни гажа вöлi.

Зонка пукалiс вель дыр, ружтiс, видзöтышалiс шондi вылö, кывзiс, кыдз кокас зубытыс дöвкис-лыйис пидзöсöдз ни. Пондылiс сапогсö кыскыны бы, но эз вермы, сэк чеччис, сувтыштiс кокыс вылö, только нач эз ни вермы нырыштсьыны лапаыс вылö, босьтiс бедь и пондiс кекны-мунны пурöм пон моз.

Эта коста Боталов да Чугайнов вöввезнаныс локтiсö ни Чуракöдз да сибöтчисö Якимммез керку дынöдз, Чугайнов казялiс öшын увтiсь Якимсö да ыкöстiс:

— Петрович, мый ни керан? Узян я мый я топольыт увтын?

— Здоровöн локтат, мужиккез? — Яким веськыт кинас чышкыштiс öм гöгöрсö, здоровайтчис, чикыртiс синнэсö, пондiс видзöтны локтiссеслань и кыдз былись саймис да горöтiс. — Абу я Борис Тимофеевич?! Кытчö нö бöра сiдз мунатö? Бöра Кокольлань вартатö или татчöдз?

Борис Тимофеевич быдмис öтлаын Якимкöт, öтлаын котрасьлiсö улицаын, тiльлiсö ныррезныс гöгöр и миритчывлiсö. Öнi, кöр пантасясö, радöсь. Радмис Яким, корис пыравны кöть недыр кежö, талун иньыслöн нимлун. Сысъялiс Öльöныс шоныт ырöш, колö бы пешлыны, туйö я ырöшыс юнытö.

— Мый керам? — Борис Тимофеевич юалiс ёртыслiсь.

— Э, Турбас! Пыралам! Мыля огö?

Лэдзчисö вöввез вылiсь, домалiсö вöввесö йöр бердö, пуксисö öтöрись посöдзö. Боталов пондiс кывны, кыдз коккес вугмöмась и мыдзöмась вöлыс вылын пукавтöн, и бур öнi шоччöтыштны нiйö. Якимлöн иньыс сэтöн жö туисöн петкöтiс юны.

Ырöшыс вöлi тагья, бура веськöтiс горш. Юöм бöрсянь юрын нельки пондiс кывны таглöн удж, топ кодззыштiсö. Яким жагвыв баитiс:

— Тэ, Борис Тимофеевич, кыдзкö миянлiсь Чураксö он вунöтлы. Кольччин бы да олiн. Ми бы тэкöт медбасöк невеста адззимö.

— Ог ни ме Чуракас, натьтö, лок, — шыннялiс Борис Тимофеевич. — Видзöт, пельпоннэзö вылö кытшöм удж кышалiсö, ружты да кыскы.

— Тэ кыскан кöть кытшöм додь, абу миян кодь дыш, — кашыкасис Яким.

— Челядь эд менам, Яким Петрович, эмöсь ни. Кыка, öтiкыслö вöлись год тырис.

— Быдмасö! Тэ кодьöсь жö чожöсь лоасö.

— Думайта, быдмасö.

Эшö дзунгисö ырöшсö, кöдö Боталов учöтсянь велалiс юны, а гортын инькаыс, бат, сысъялiс бы, да кытчöдзкö немись вöлi: эз вöв зöр пизь. Юисö, сыбöрын Яким юасис, кыдз да мыля Борис Тимофеевичлöн пöрисьжык воныс торксис, кöда Гражданскöй война коста комиссарöн вöлi, тышкасис чочкоммескöт,

— Вийисö сiйö, — гажтöма висьталiс Борис. — Огö и тöдö, кытчö дзебисö. И дзебисö я?

Баитыштiсö эшö и Борисыс ай йылiсь, кöда татöн вель дыр школаын велöтiс челядь, революцияöдз эшö отирлö висьтавлiс, кыдз пондасö овны, ежели вашöтасö царьсö. Тимофей Порфирьевич вöлi öддьöн прока, мый бердö бы эз кутчись, сiйö и керис. Вон кытшöм шкаффез колис фельдшерыс дынö! Базарись он неб! Яким эз вунöт юавны, кытöн да мый керö Борислöн томжык вон Толя, кöда татöн олiс дыржык, районас медодз чукöртiс комсомольскöй организация. Отир и öнi касьтывлöны, кытшöм вöлi чож зонкаыс.

Басни кыдз шорок боргис. Чугайнов юрсö лэбтыштiс, чикыртiс синсö да висьталiс:

— Челядь, Турбас эстöн шöмалö, а шондiыс эд оз видзчись. Тэрмасьны бы колö.

Яким синнэзнас кольлалiс ёрттэсö керöс кырылöдз, кытчöдз вöввес эзö кежö Зинкöвлань. Мужиклöн мылякö сьöлöмыс вылын вöлi гажтöм.

Вöввез шагнялiсö топыта да шупыта, öвтышалiсö юррезнаныс, кöр пеллезныс гöгöрын лэбалiсö гуттэз. Борис Тимофеевич етша баитiс, синнэс одзын сё вöлi кольöм посад, кöда сылö вöлi мыйöнкö дона, некöр эз вунöтлы, кытöн бы эз вöв. Мужик думаэзнас мöдпöв олiс челядься кадын, бöр бы пöртчис учöт зонкаокö, бöра бы Яким коддескöт котрасис лудъя улицаэзын, нем понда бы эз тöжды. Но мöдпöв оланыс оз овсьы, и одзлань пондас ковны районöт жöдзны то вöлöн, то подöн, кыдз усяс, сiдз и мунсяс.

Думаэз, думаэз... Нiя юрын орсiсö только Зинкöвöдз, а Зинкöв бöрын Чугайнов бöра пондiс ошшасьны мыйöн вермис и кужис, медодз касьтылiс иньсö, сы кодьыс бытьтö бы абу районас, я быдöс кужö керны: мужикыс бокын узьны, нянь пöжавны, юан сысъявны, печкыны, дöра кыйны, вурны-вочны, баня лонтны и колхозас асыввезнас ыб вылö медодзын котöртны.

— Быль, Борис Тимофеевич! Эз кö бы вöв сэтшöм чож, мыйлö бы сэтшöм иньсö Турабасыс видзис? Кинлö бы сiя колiс?! Кыдз думайтан?

Борис Тимофеевич думайтiс аслас инь йылiсь, кöда немöн эз вöв умöльжык Чугайнов инься, но сералöмöн моз висьталiс мöдiкö:

— А менам краля нем оз куж керны. Пыр кытöн тшыг, кытöн пöт ола. Чожа, натьтö, коккезöс сёйтöг нюжöта.

— Э, Турбас! — Милиционер юрсö бергöтiс Боталовлань да дыркодь видзöтiс чужöмыс вылö, шуис: — Чужöмыт сьöртi оз тöдчы, что умöля вердöны. Кужан жö, батя, зонка, пöрьясьнытö.

— Пöрьясьны, не зорьясьны эд, — серöмтчыштiс комиссар.

Сiдз и мунiсö одзлань — басниöн кузь туйсö джендöтiсö, сэтöн милиционерлö мый и лоис: наган бердö кутчисис да ыкöстiс:

— Абу я Турбас одзаным! Кин питкыльтö? Бандит чужöм эд, батя! Али эта...

Боталов серöмтчыштiс да висьталiс:

— Но тэ и Чугайнов! Быд морт одзат бандит я мый я? Асланым жö, натьтö, кинкö. Тöдса абу я мыгöрыс.

21

Чожа вöтiсö Чуракись Миколöс, кöда текис-мунiс.

— Тэ кытчö, Турабас пиян?! — Чугайнов лякасис зонка бердö. — Бöра я мый я Коколяс роч нывкаэс дынö питкыльтан? Но тэ и зонка. — А кöр нö уджалан? Или пыр этадз öтмöдöрö котрасян? Видзöт менам! Норася бригадирнытлö, мед зэлöтас!

— Бригадирыс ачыс иньдiс Коколяс, — баитiс Колька, сувтчис, нырыштсис бедь вылö: синнэс гудыраöсь, пымалöма, мыдз. — Телега пö кинкö посёлокас керöма, да босьтöны бы колхозаным, сiйöн менö и иньдiсö юасьны да висьтасьны, тэрмаси-мунi и кокöс дойдi.

— Сiдз, Турабас пиян! Умöль, тыдалö, оланыт. Он адззыв беддясьтöннят посёлоксö и басöк нывкаэсö, турбыльтчан кытчöкö.

— Нем меным оз ло. Муна! — зонка гичыртiс пиннесö.

— Пуксян, поди, вöлыс вылö? — комиссар юалiс зонкалiсь.

— Ог тöд, — полöмöн моз шыасис зонка.

Боталов вöвсö кежöтiс туй бокись кер дынö, и Колька кер вывсянь кокнита ни пуксис комиссар вöв вылö — лякасис мышкас.

— О, Турбас! Мыйлö тэ идовöй чöвпансö пуксьöтiн. Мед котöртiс бы, коккес дзоньöсь эд, абу стариклöн кодьöсь.

Одзлань куимöн ни мунiсö кык вöлöн. Зэв ни одзаныс Киев деревня, бура ни тыдалiсö улицаись сыспуэз, лудъя грива, только деревняын некин эз вуджöртчы. Ворота ыб дорын мылякö вöлi осьта. Межаын мурскис-сёйис баля, юрсö лэбтыштiс и öдззис котöртны матiсь понульниклань. Вöввез шагнялiсö ни кöс улицаöт.

— Колiс бы воротасö пöднавны, висьталiс Боталовыс.

— Локтöнняным вöлись, — кокнита горöтчис милиционерыс, сэтöн жö голясö нюжöтiс, пондiс дзиргыны керкуэзлань и кивзыштiс:

— Борис Тимофеевич, абу я Ярашыс?!

Борис Тимофеевич перыта юрсö бергöтыштiс сыспуэзлань, казялiс, кыдз улицаöт котöртiсö кык мужик, и öтiкыс былись топ вачкисис Яраш вылö, кöдö соравны мöдiк морткöт вöлi сьöкыт: топыт да лажмыт мыгöра, ветлöтiс невна мышкырöн моз, тальччис öтiк кокнас бокö моз и вöлi кокнит коккес вылын.

— Яраш, сулав! — Чугайнов вöв вывсянь быд вынсис чирнитiс, кутчисис наган бердö, коккезнас тойис вöлыслiсь боккесö, кöда шаг эз содты, кыдз мунiс, сiдз и мунiс. — Яраш!! Лыя, Турабаслö, кымöсат!

Яраш киын вöлi пишаль, сiя вöтчис кузьжык мыгöра морт сьöрö, и сэтöн жö нiя саясисö керку сайö. Пышшиссез сьöрö вöвнас гöнитiс ни Борис Тимофеевич, ыкöстiс Чугайнов моз жö, медбы Яраш сувтiс, но сiя öшис синнэз одзись.

Кинлöнкö лёк пон уськöтчис пышшиссез сьöрö, но сэтöн жö бергöтчис бöр и мурзьытöн котöртiс гортланяс... Боталов вöвсö сувтöтiс сыспу увтö, чеччöвтiс вывсис, негорöн шуис Колькалö, мед видзис сiйö, и ачыс котöртiс керкулань. Сьöрас вöтчис милиционерыс, тоткис ныр увтас, лöсьöтчис сьöвтавны кöть кинöс или лыйны Ярашлö кымöсас — пуляöн писькöтны синнэс коласöт.

Деревня весьтын öшалiс кизерик тшын, кыдз туман. Öшын увтын öгралiс аслас арся листöн рябина. Пу вылiсь койыштiсö-лэбзисö ватшканнэз.

Боталов медодз чепöссис посöдзö, тангис посöдз ыбöсас, кöда кокнита оссис.

— Кин сэтчин?! — повзьöм голосöн юалiс старуха, кöда осьтiс керку ыбöссö, мыччыштiс дзор юрсö.

— Баб, кин тiянö пырис?! — пöрисьлiсь юалiс комиссар.

— Некин эз пыр, — öмсö осьтiс старуха. — Мылякö тай жолькнитiс топ карталанись ыбöсыс, а ме некинöс эг адззыв.

Боталов бöр уськöтчис öтöрись посöдзö, Чугайновлö висьталiс, мед сулалiс карта воротаыс дынын, а сiя... Сiя кокнита чылiс ни угöлöт вевдöрö, кайис короминна вылöдз, киас видзис наган да видзöтчис.

— Эй, Турбас пиян! Ярашко, пет-ко сэтчинiсь, то умöль лоас: лыя-писькöта кымöстö, — ворота одзын модис Чугайнов, öвтiс наганöн. Яраш, ме бытшöмик баита!

Колька лэдзчис ни вöв вылiсь, кыкнан вöвсö кутiс сермöт поводдэзöт да видзис, мед эзö пышшö. Вöввес пирскайтiсö ныррезнаныс, нетшкöвтчисö бы зонка киэзiсь. Вувтiс пон. Боталов мышкырасис карта короминна вылын, жагвыв шагнялiс да видзöтiс бы увдöрö — гид пытшкö, и сэтöн кропнитiс лыйöм.

Колька адззылiс, кыдз гид пытшксянь осьтаэзöт вевдöрö петыштiс тшын, чирзыштiс ватшкан, кивнитiс-ружтыштiс короминна вылын Боталовыс и усис кыминь. Сэтöн жö, натьтö, мöдiк воротаöт карта пытшкись чеччöвтiсö кык морт и сöтiсö йöрöт, картов коласöт, вöрлань.

— Пышшöны эд! — горöтiс Колька да буржыка зэлöтiс сермöт поводдэз.

— Сулав, Турбас! Лыя-лыя, мать тэнö, Яраш! — сöтiс бы котöртны улицаöт милиционер, но кытчöкö падмис, кыминь сапкисис да нагансяняс лыйис вевдöрö.

Быдöс шогмис сэтшöм чожа, что Колька бура эз вежöрт, мый лоис, только пеллес одзын чиннис öткодь шы, топ вачкисö пельбокас. Деревня, кыдз повзис, эз лысьт пыдынжыка да горöнжык ловзисьны. Яраш ёртыскöт важын ни öшисö синнэз одзись, йöр пöлöн сэтчин да татчö котрасис Чугайнов, öвтiс наганнас, модис, что пышшис эд врагыс — öмсиныс лэдзисö, сьöласис, бытьтö кинкö вöлi виноватöй, а не сiя.

Короминна вылын кивзiс и ружтышалiс Боталов.

— Борис Тимофеевич, мый тэкöт?! — пондiс ыксыны Чугайнов. — Вийисö я мый я?!

— Дядь, вийисö эд комиссарсö, — Колька жагöн локтiс карта дынö, бледöтiс чужöмыс.

Угöлöт вевдöрö Чугайнов пондылiс кайны, но эз вермы: дрöжитiсö киэс, и керрез бердiсь мезмалiсö коккес.

Гöрöктiс вöв. Вылын кымöрын чирзiсö да сьылiсö чикиссез. Колькалöн нельки дугдiс висьны кок. Сiя угöлöт одзалiс вевдöрö чывны короминна вылö, сибöтчис Боталов дынö, кöда куйлiс тёссэз вылын кыминь: веськыт киас наган, шульга кинас кутчисьöма морос бердö и ружтö.

Вир визывтiс комиссарыс увтiсь.

— Мый тэныт, Борис дядь?! — нач повзис зонка.

— Вешшы сэсь! — эта коста короминна вылö вермис кайны Чугайнов да Боталов дынiсь бокö тойыштiс зонкасö, комиссарöс бергöтiс спина вылö, бобгис-матькис, модис. — Но Турбас! Борис Тимофеевич, ме тэныт шуи, мыся тэ вевдöрас эн кай, а ме чыла, а тэ эн кывзы. Ме бы! Мать душу! — клап вачкис боккезас. — Но мый öнi керны? Вирыс эд быдöс петас! Кöртавны бы мыйöнкö мороссö! — жöдзис-керис, кыдз нач öшöм, вöлись вывсис чöвтiс йöрнöссö, Колькалö ыкöстiс. — отсав, зонка! — кир-вар косялiс йöрнöссö, пондiс гардны комиссарыс морос гöгöрö, вирöсьтiс киэсö.

Колька отсасис Чугайновлö, мед и сьöлöмыс гудыртчис уль вир дуксянь, дрöжитiсö киэс.

— Мый тiян лоис?! — увдöрсянь пондiс кывны мужик голос.

— Мый лоис, мый лоис... Видзöт тай, мый лоис. Бандитыс лыйис комиссарлö. Больницаö бы чожажык кыскыны! Вöв колö доддявны!

— Керам! — сiя жö мужик голос шыасис карта ворота дынын.

22

Медодз Боталовöс телегаöн кыскисö Чуракöдз. Телега вылын небыт турун вылын куйлiс ранитöм комиссар — синнэсö эз осьт, нач эз вöрöтчы, эз баит. Вöв телегасö кыскис жагöна, медбы ранитöмсö чорыт туйын эз зэгйы. Чугайнов пукалiс аслас вöв вылын, вöтчис доддя вöв сьöрö, ружтiс ёнжыка ранитöмысся, эз-эз да модис: «Эх, мый миян шогмис! Колiс я сылö картаыс вылö кайны?! Ачыс эд виноватöй, ачыс».

Колька пукалiс телега вылын, веськöтлiс доддя вöвсö, сiйö и керис видзöтiс, медбы ранитöмыс эз усь, кывзiс — лолалö я. Зонкалö вöлi недолыт, бытьтö сiя мыйöнкö виноват, мыйкö керис умöльö — синваэс петiсö, но видзсис, эз горзы.

Лун чулалiс, кыдз враг, колис-мунiс, петалiс, медбы керны умöльсö, кöр некин оз тöд, мый сiя лöсьöтö и вайö.

— Тöдiм-тöдiм бы, сизим верста бы орддим Киевсö. И мыйлö бы миян юррез вылö вайöтны кытiськö страм кулак табунсö — энö роччесö? Мед нiя кытöн олiсö, сэтчин бы и ов, или быдöннысö бы лыйлыны, сымда и вöлi бы Турбас пияннэзлö. Ны понда эд быдöс сiдз шогмис. Но бандиттэз! Шедат кö, бурсö нем эдö видзчисьö, аслам киэзöн лыйла! Кыдз гуттэзöс вия!

Дзуртышалiс-виксышалiс телега колесо, пирскайтiсö вöввез. Вильыбын кытiсь и кöр кылöмась ни, что Киевын лыйисö мортöс, öтiк улицаын тыдалiс том и пöрись, быдöнлöн чужöммез кымöраöсь: кöда сьöкыта лолалö, кöда чышкö синваэсö, но öтiк морт эз юав, мый тiян лоис, мыля сiдз петiс. Чулалiсö неыджыт деревня Вильыб. Зинкöвын бöра жö отир: быдöн бы аслас синнэзöн телегаись видзöтö ранитöмсö, быдöн жалейтö Боталовсö, висьталö, что бур морт вöлi и ась веськалö жö, оз жö кув.

Тöждöны отир. Тöждöны ыббез и вöр.

Кöр локтiсö Чуракö, отир узис ни. Сувтчыштлiсö Якиммез öшын увтö. Керкуись посöдзö чеччöвтiсö Яким гозъя, пондiсö кивзыны-ойзыны, туисöн петкöтiсö юан, юкталiсö бы Боталовсö, но сiя синнэсö эз осьт.

— Юсьöма ни сылöн, — öмыс пиньöвтчис Якимикалöн.

— Натьтö, эд фельдшер колö! — вöлись кыдз саймис Яким да котöртiс медпунктлань, но весись котрасис: Щелгачёв гортын эз вöв, и некин эз тöд, кытöн сiя, только иньыс тiлис синнэсö да висьталiс, что мужикыс мунiс Шаламö, а кинкö горöтчис, что мунöма пö чериавны или вöравны.

— Мунам Кöсöдз! — висьталiс Чугайнов.

Рытыс вöлi сэтшöм пемыт, что туй вылын умöля ни тыдалiсö гöппез. Вичку дынын орсiс гармоння, и сьылiсö нывкаэз.

Колька гортö эз и кежав, кыдз Киевын пуксис телегаö, сiдз и пукалiс да районöдз кыскис комиссарöс. Асывланяс ни вайöтiс сiйö больницаö, колис сэтчин и гортö бöр мунтöн эз вунöт кежавны милицияö, кытöн öштiс нельки джын лун, пантасьлiс айыскöт.

Зонка баитiс айыскöт, кöда пукалiс эшö татöн, и сьöлöмыс вöлись кыдз веськалiс, лоис гажажык.

23

Районсянь гортö мунтöн телегаö кышасис Киршинiсь Фёдор, кöда вöв моз гöрöктiс:

— Ёлки зелёные, зонка! Он я менö кыскы бы гортöдз?! Гöститны ветлi да дыркодь гöститi, гортын, натьтö, ловйöн озö ни лыддьö. Нуöтан, он?!

Колька айыс басни сьöртi тöдiс, что Фёдор пукалiс милицияын и öнi мезмöма, и мунö бы зонкаыскöт гортö. Но и ась мунö. Чугайнов мыйлöкö кольччис Кöсö, и кыкöн нылö кузь туйын лоас гажажык.

Кöссянь Чиркöвöдз локтiсö чожа. Медодз керку дынын Фёдор ыкöстiс: «Го-го! Ёлки зелёные, Öльöш пиян! Сувтöтлы жö вöвтö! Абу я посöдзыс дынын чер? Босьтамö, бат, колас мыйкö вылö». И чеччöвтiс телегаись, босьтiс кинлiськö чер, пуктiс телегаö: синнэзас гаж, топ адззис донася-дона тор, кöда вöлöма сылöн, видзчисьöма хозяинсö.

Гусялiс Фёдор черсö — синöн эз кваркышт, топ сiдз и колiс, а Колькалö лоис недолыт, топ сiя полiс, что черлöн хозяиныс вöтчас да тэчас боккезаныс.

Кыкöн телегаын мунiсö гортö, эзö вöлö нач тöдтöмöсь, не враггез, но Колька мылякö ёртсис пондiс повны — видзöтыштiс Фёдор чужöм вылö, кöда пестер пасьта, нырпыссэс отаöсь, синнэс гырисьöсь, сьöдвевьяöсь и лёк югöр ныын, бытьтö кинöскö сiдз бы и джагöтö, немись и некинлiсь оз пов. И ачыс мортыс топыт, пельпоннэс отаöсь, киэс, кыдз нöшшез, баитö — боксö или мурзьö, а серöмтчас кö — пиннес кыдз ральниккез мыччисясö.

Фёдор етша баитö, унажык нырнас пишкö или мурзьö, мылякö кулаккесö няпралö, кыдз бы пыр кинкö вылö лöг, пидзыртö-джагöтö бы.

Аскодя мужикыс, сэтшöм, кытшöмö ен сетöма.

Мунöны — вöв кыскö телега, кöда виксышалö, дзуртышалö. Туй гуа-гöпья. Дыша мунö вöлыс, öвтышалö бöжнас, юрнас, кыдз суналö. Телегаын мурзьышалiс Фёдор, но сэтöн мужиклö мый и лоис! Чеччöвтiс телегаись, туй бокись босьтiс кузь да кыз бедь и быд вынсис вачкис вöлыслö, сiдз сöтiс, что турйöвтiс Рыжкоыс, ружтыштiс и пондiс люг-люг котöртны.

Колькалöн петiсö синваэс, шыасис:

— Фёдор дядь, виян эд вöвсö.

— Кинöс, го-го! Ёлки зелёные! — Фёдор осьтiс öмсö — пон юр тöрас. — Мый сылö лоас?! Абу эд инька. Ме ассим инькаöс зорöн пывсьöтла, да оз кув, кызжыкöсь лоöны боккес, а тэ вöв...

Рыжко пымалiс — быгсялiсö боккес, кöть зорöн вартлы, шаг оз содты. Эзö-эзö да локтiсö Кöкöвöдз.

— Тпр-р-ру, ёлки зелёные! — Фёдор ыкöстiс медодзза керку дынын. — Сулав, мужик! Ме пырала эта керкуö.

Фёдор чеччöвтiс телегаись кинкö öшын увтын, пырис керкуö и öшис. Колька вöлöн сулалiс улицаын. Кад чулалiс, а ёртыс абу и абу, и кольны эз лысьт.

Вель дыр Фёдор олiс керкуын, петiс, сьöласьö, ота долоньнас чышкö öм гöгöрсö.

— Мый лоис, Фёдор дядь?! — юалiс Колька.

— Тьфу, ёлки зелёные! Невеста менам эстöн олö. Бöрыс Рыжкоыс бöр пасьта жö, лядьвейес, кыдз ошлöн. Госа инькаыс, ёлки зелёные! Вывтi горш мужикыс вылö. Кыдз казялiс менö, медодз тшöктiс нювны кыз бöрсö, а сыбöрын вöлись окасимö, тьфу!

Улицатыр сералiс Фёдор — не стыд, не срам: курöггез повзисö да дзебсисисö, петух китöстiс и виньдiс, поннэз заргисисö поссэз увтö.

Вöрзисö одзлань. Туй кузь. Вöв мыдз. Телега дзуртышалö. Рытнас ни вуджисö Кöсва, узисö берег дорын кöззэз увтын, ашынас пемытсорöн доддясисö и — одзлань. Кытöнкö Денин дынын ни вöрись туй вылö чывк петiс мужик: ыджыт мыгöра, тоша, видзöтö-сёйö, бандит и эм.

Вöв повзис тöдтöм мортiсь. Ямщиклöн сьöлöм тёп-тёп только, но Фёдор ош голосöн рякöстiс:

— Ёлки зелёные, сват! Тэ кысянь?!

— Басни эм, — лёк чужöмаыс юрнас öвтыштiс вöрлань, и Фёдор чеччöвтiс телегаись, вöтчис тöдтöмыс сьöрö.

Шондi видзöтчис пу уввез коласöт. Вöр вöлi гулыт ни. Пиксiс сьöла. Чирзiс ватшкан. Фёдор вель дыр эз мыччись туй вылын. Петiс — пиннес гер, пондiс вöртыр серавны:

— Ёлки зелёные! Гришкинсис Семёныс асывнас петöма кöззэс увтö öтöрасьны, вешьянсö лэбтöма, бöр бы пырöма гортас, да видзöт кытöн ни. Öшöма эд, лешак пиян!

Колька вежöртiс, что ёртыс бöбöтчö, но и ась. Сылö мый?

24

Зонка гортын юскис вöв, лэдзис видз вылö, а Фёдор подöн ни Чураксянь суййис гортöдззас, мунтöнняс висьталiс, что Колькаыс ай местын тюрьмаас öтiк лун бы эз пукав, сöтiс-пышшис бы вöрö и — кошшы!

Фёдор гортö мунiс — вöрдядь моз ыксiс да сiдз, что керкуэзiсь öшын стеклоэз дрöжитiсö. Кузь шаггезöн шагнялiс керöс кырылöдз, локтiс ключ-шор дорö, пуксис гажа гриваок вылö, öзтiс чигарка и пондiс куритны. Табак тшын ньылавтöн нельки кодззыштiс, юрыс бергöтчыштiс, сотыштiс дума: «Ёлки зелёные, Фёдор! Мый керин?! Куим руб понда асьтö эн я вузав? Вузалiн эд, мужик, — малыштiс мороссö, кытöн йöрнöсыс увтын кылiс деньга, кöда кыдз бы гильöтiс, сотыштiс, эшö юалiс ассис. Кыдз одзлань пондан овны?»

Кыдз одзлань овны? Мöдiк бы пондiс шогавны — тöждыны ой и лун, думайтны, а Фёдорыс сэтöн жö сьöвзис, баитiс аскöттяс да сэтöн жö баснисö вунöтiс, немымда ни эз тöжды ашыння лун понда, кöда кыдз локтас, сiдз и чулалас. Только невна полiс кодь Курайсис, кöда бытьтö бы сулалiс одзас, мöртiс лёк синнэсö и юалiс: «Но кыдз, Фёдор?! Кыдз нö мезмин поннэс дынiсь? Или лэдзисö, медбы тэ сайсянь менö кутны? Видзöт, кыдз бы пельпоннэт вылiсь юртö эн öшты! Тэ менö тöдан...»

«Ёлки зелёные! Курайыс быль эд уна оз баит, тузгас кымöсö, заргас лыскыр увтö, и абу Фёдор! — сэтöн жö асьсö дорйис. — Тьфу, ёлки зелёные! Адззи мыйись повны... Кытчö бы Фёдорыс эз шед, но петiс биись и ваись.

Пукалiс мужик шорок дорын, кывзiс кыдз больгö ва и долыт лоис: бур вöлi сьöлöмыслö, гажа, кöр омöн вöрыс öгралiс быдкодь рöмöн. Пукалiс Фёдор шорок дорын, некытчö эз тэрмась, нем сылöн кертöг эз енды, некин эз горзы. И тöдвылас усис, кыдз сiйö пукöтiсö Кöсын, заргылiсö шкафö, лöсьöтчисö лыйны, но колисö ловйöн. Эшö тöдвылас мужиклö усис, кыдз сiя томся-томöн шедлiс тюрьмаö, кытöн мортö эзö пуктö, видзисö кыдз понöс. И эз я бы пон моз кытöнкö пезьды да сiсьмы, но бöра жö ачыс, аслас юрöн мездöтчис тюрьмасис, кöр прокмис бöбöтчыны, сьывны: радейтiс сьылöмсö сылiсь кывзыны тюрьмасис начальникныс, сiйöн и одзжык лэдзис гортö.

«Кытöн жö бы Курай вонö эна луннэзö олö? Кысь бы сiйö кошшыны да пантасьлыны? — Фёдорöс сьöлöмыс кыскис Курай дынö, только вот бура эз тöд, кытöн вермасö лоны пышшалiссес, кöр нiя вермасö пырны сэтшöм пыд вöрö, что некытшöм пон оз адззы, некин оз тöд кытöн ёрттэс, ежели Курайлöн нельки эм керку Уролка йыввезын — медпыдын местаын, кытöн олöны только ошшез, кытöн мортыс овлö только öтпыр-öтпыр, вермас шедны только вöравтöн.

Фёдорöс сьöлöмыс кыскис Курай дынö, сы вылö надейтчис и эз, кöр тöдiс, что ёртыс вöрын дыр оз ни пышшав, локтö ар ни, киссис ни вöр вылiсь лист, талун эшö шоныт, ашын вермас кöдздöтны, лоасö зэррез, сыбöрын усяс лым, и быд следыс пондас тöдчыны. Оланыс пышшалiссезлö вöрын оз ло, сэк кытчö воштiсяс бандиттэзлöн командирныс, мый пондас керны? Оз я бы ош моз кытöнкö вöр пыдöсас тöвйы? Натьтö, эд не сэтшöм Курайыс, медбы дзебсисьны пыд вöр пытшкö и ош моз сулавны да видзчисьны мöдiк гожум, и вöлись бöра койны.

Ылöса пышшалiссезлöн командирныс — аслас юрöн олö, и Фёдор аслас юрöн жö олö. Сiдзкö, морт думайтiс öтöрö и мöдöрö, лöсьöтчис öнi жö бы заргисьны вöрас, но сэтöн жö вермисö мöдкодь думаэз. Мужик чеччис шор дорись, видзöтiс гöгöрсис вöрресö да иньдöтчис гортас.

Локтiс рытъявылöн: пырис керкуö, нюжöтчис западня вылö, топ челядьсö эз и адззы, и нiя эзö лысьтö горöн баитны, керкуын овны, петiсö öтöрö котрасьны.

Фёдор нюжласис шондiыс пуксьытöдз, сэтчöдз, кытчöдз пемытсорöн уджалансянь эз лок иньыс, кöда посöдз вевдöрö öшöтiс чарла, жмитiс бердас челядьсö, малалiс юррезнысö, и челядь öтамöднысö одзалöмöн, полöмöн висьталiсö мамныслö, что локтiс айныс.

— Мый айныт вайис? — нылочкаэзлiсь юалiс мам.

— Нем эз, — вишыкасисö нылочкаэс. — Мам, кынöммезным сималöны.

Фёдорика керкуö эз и пыр, посöдзись босьтiс подойница да пырис карта вылö чилькöтны мöс.

Челядь жмитчисö öтамöдныс бердö, сулалiсö пытшкись посöдзын и видзчисисö йöв. Сэтöн öшын увтö локтiс мужик, кöдö учöттэс эзö адззывлö, эзö тöдö, кöдаись челядь полiсö, кöть и мортыс пондiс баитны рамыника, медодз юалiс айнысö. Нылочкаэс суськисьны эзö кужö и висьталiсö, что айныс талун локтiс гортö, куйлö западня вылын.

— Корö татчö сiйö, — мужик висьталiс нылочкаэслö.

— Ме ог лысьты, — шыасис учöтжыкыс.

— Ме пола, — висьталiс ыджытжыкыс.

— Ош кодь я мый я айныт?! — серöмтчис тöдтöмыс.

— Ёлки зелёные! Кин сэтчин?! — Фёдор керкусянь кылiс öтöрись басни, мурзьыштiс, чеччис западня вылiсь.

— Ме, Фёдор Васильевич! — мужик шыасис посöдз дынын, серöмтчыштiс. — Вунöтiн я мый я ни Илья сваттö? Мöсным куим ой ни кытöнкö узис, да кошша. Бытьтö пö таланись адззылöмась...

— Ёлки зелёные! Кыдз Чураксис мöсыс татчö вермас шедны? Лэбзис я мый я йöррес вевдöрöт? Тэ мыйкö, Илья сват, лёбан мöдiкö, — Фёдор керкуись мыччисис öтöрö — моросыс гав и гыжьялö мороссö кыз чуннезнас.

— Кывзы, Фёдор, тэнö сельсоветö мыйкö вылö корöны. Тэрмöтiсö. Ась пö öнi жö котöртö.

— Ёлки зелёные! Ловзисьны пыдынжыка озö сетö! Кинлö и мый ойнас колö?! — мужикыс сьöласис, видзöтiс вöрлань, вöлi сэтшöм ни пемыт, что матiсь вöрыс тыдалiс кыдз сьöд стена. Вöлi сэтшöм лöнь, что кылiс, кыдз карта вылын лолалiс мöс, кылiс кыдз бизгисö-лэбалiсö дбруньгаггез. Öзйыштiс дума: «Сöтны я мый я вöрас! — лэбзис-пышшис бы сьöлöмыс, но асьсö вермис, нинкöммезнас лэдзчисис посöдзись, мурзьыштiс: «Ась. Ветла нö сельсоветаныт».

25

Усть-Коколь — ном поз, ошлöн горт, но ошлöн олан дзугсис: ой и лун пондiс кывны отирлöн басни. Отир уджалiс: керасис черрезöн, сяткöтiс-вартлiс литовкаэз, вувтiсö поннэз. Зверь медодз пышшылiс аслас гортiсь, ветлiс овны отир дынiсь ылöжык, но вöрын зверрез олiсö асланыс горттэзын, тöдтöм зверрезöс вашöтiсö дынсиныс, и Коколь гöгöрын олiсь ош бöр локтiс овны матöжык отир дынö.

Арнас ни кинкö ошöс адззылiс Коколь юок дынiсь, кинкö зверьлiсь следдэз адззылiс нач матiсь керкуэз бöрись.

— Мам, кыдз этатшöмас пондамö овны? — медодз Настя горзiс да юасис мамыслiсь, луншöрöн полiс öтнас петны улица вылö, топ сiдз нывкасö ошыс и сёйис.

— Огö ми зверьыслö колö, огö, — баитiс нывкаэзкöт мам. — Кык кока ошшезлiсь полö, нiя чожажык миянöс сёясö.

— Кытшöм кык кока ошшезлiсь повны? — Настя эз вежöрт мамсö, кöр виль оланiнын тöдiс ни быд мортсö, быдöн немымда эз вачкись ош вылö. Нем понда вöр коласö öтлаöтiсö отирсö, кöдна одзжык öтамöднысö нач эзö тöдö, эзö и кывлö, что эм кытöнкö, шуам, сiя жö Настяыс, но овмöтчöны эд: нельки некин некинöс эшö кылöн эз дойд. Только посёлокын комендантыс пон кодь, быдöнöс кыдз кужö, сiдз и видö, быдöн вылö вувтö, лöсьöтчö иньдыны эшö кытчöкö ылöжык. Комендантлiсь полiсö и эзö, синнэс одзын шуисö только Сергей Петровичöн, а бöрсяняс — кин кыдз кужис и вермис, сiдз и нимкодялiс. То лякисö ним, что Сергей Петровичыс абу морт, а кузь майöг, сатана, вöрдядь, зверь-мортсёйись кöдалö кöть синнэзас сьöлав, кваркыш оз кер, сё пондас ассис кöстыны, кöть голяас гез бы кöртав да понды джагöтны, сё пондас думайтны öтiк дума, кыдз бы переселенеццесö зубытжыка дойдны, зэлöтны.

Комендантлöн гортыс Кöсын, татöн сiя олö кыдз командировкаын. Том мужиклöн эм инь, эмöсь челядь, ошшасьö, что ловьяöсь айыс и мамыс, но гортас ветлöтö нач етша, пыр гардчö посёлокын, син вылiсь отирсö оз öшты, полö, медбы переселенеццес эзö пышшö, ась уджалöны ой и лун, ежели олöны бы...

Пыд вöр шöрын отирöс некин оз жалейт, оз видзöтö кин тэ, том или пöрись, мужик или инька, зонка или нывка.

Устья ныввезнас посёлокын эшö уна эз ов, но ештiс ни керавны вöр, пöт вундiс ни сю, кöдö татöн учöт ыббез вылö кöдзöмась сытöг. Пöт ни инька вылö ыксiс комендантыс, матькис:

— Ме тiянöс, кулак пияннэзöс, велöта овнытö! Ме тiянöс, öнджаэзöс!.. Одö пондö отирлiсь вирсö юны!

Устья ружтiс, тырппесö курччалiс, но паныт эз шыась, кöр и горзiс кытöнкö гусьöн, мед ныввес эзö адззылö, и одзлань олiс.

Комендантлöн пиннес лэчытöсь, кöть кинöс вермас пурны, киэс Сергей Петровичлöн кузьöсь, кöть кытшöм инька подол увтö вермас нюжöтны, отир синнэз одзын инькасö серавны, кыдз Раковскийлiсь нывсö, кöдö кутöма горт шöрас, пöрöтöма мамыс синнэз одзын и öнi нывкаыскöт олö, кыдз бы инькакöт. Не стыд, не срам оз тöд.

Нывкаэз посёлокын полöны комендантлiсь, сiдз кыдз Сергей Петрович öтпыр быдöн одзын кисö нюжöтлiс ни Настя дынö, шамыртiс лядьвейсö, синнэз быликтöмась, кöть ёсь заргы. Нывка карыша рожалö немöн эз заргы, но сотiс кыввезнас, висьталiс:

— Сергей Петрович, вöрзис кö вешьянат, чеччöвтлы Жучкаыс вылö, а ме дынö киэтö эн нюжлав, ме тэныт абу пон!

Комендантлöн чисто öмыс оссис, чужöмыс нюжалiс, медодз эз тöд, мый паныт горöтчыны, эз-эз да вöлись пыдына ловзисис, вöлись кöин моз и эрзыштiс:

— Ме тэнö, кулак пиянöс! Велöта овнытö!

Мöдiк бы Настя местаын кылiс да эз энö кыввесö, а сiя пишнитiс и висьталiс:

— Уйс! Он сёй! Пиннет озö мöртчö! Ме тэныт не Раковскийлöн ныв! Тэ эд Оксанасö курöгöс моз талин, а ме ог сетчы!

— Сетчан!

— Пондыв!

Посёлоктырьяс мужик да нывка ряксöны — вöр дрöжитö, поннэзлöн шы абу, только Устья не кулöм, не ловья.

— Ме тэнö! — Комендантлöн синнэз кыдз рысьлöн, зэв сибöтчис нывка дынö — мороснас пыкö, сiдз бы и тальö. Но Настялö киас шедiс чер, синнэс бöбсялiсö, кыдз лоис виртöм, öвтыштiс чернас — юр кералас и синöн оз кваркышт. Эрзiсö-керисö да янсöтчисö: комендант вартлöм пон моз пöльтiс Раковскийезлань, кöдна олiсö дорись керкуас, зэв вöрыс дорын.

Лöнь лоис посёлокын, бытьтö кылiс, кыдз быдöнлöн тёпöтiсö сьöлöммез — пессисö мороссэзын, видзчисисö беда, а Настя серöмтчис, горöтчис:

— Важын бы этадз. Котöртiн да окасин бы Оксанаыткöт, а эн киэтö нюжлав ме дынö!

Нывка жагвыв пондiс сайкавны и вежöртiс, что сылö талун локтiс сьöкыт лун: лöгувья ачыс эз тöд, мый керис, натьтö, унаöв чеччалiс, бур ой-лун öнiсянь оз ни адззывлö, и аслыс, и мамыслö олан оз ло, и сойесö талясö, или виясö, или заргасö тюрьмаö.

«Ась вийöны, — нывка кыдз бы нем понда ни эз тöжды, бергалiс ни рам вöв гöгöрын, кöда дынын эз тöд мый керны, кыдз сiйö сийöсавны. Пуксьыны кöбыла вылö эз вермы, сэтöн вöлись и лоис сэтшöм умöль, что эз ни вермы терпитны, öдззис горзыны. Сойес да мамыс кыдз кужисö бурмöтiсö нывкасö, а мöдiккез мышкыртiсö юррезнысö, аскöттяныс жалейтiсö жö сiйö. Мамыс отсалiс Настялö сийöсавны вöвсö.

Нывка иньдöтчис уджавны ыб вылö, ваялiс кольтаэз шором дынö.

26

Настя уджалiс рытöдз. Шондi вöррез коласын пуксис топ чожажык: öшöтчис вöр весьтö, сыбöрын кыдз бы вотьыштiс-саясис пуэз коласö и абу ни. Локтiс ыркыт рыт, вöр коласын павьялiс уль ру. Горажык лоис вöрыс: несйы — и ылö кылö. Отирлöн голоссэз кыдз джынняннэз — тронгöны вöртыр. Настя локтiс уджалансянь и кылiс, кыдз посёлокын горшсö летö комендант, бöра кинкö вылö рявзö ни:

— Мать тiянöс! Ме тiянöс велöта овнытö! Ме тэныт мыччала! Ме тэнö мортö пöрта!

Нывка вöлöн локтiс гортö, öшын увтаныс вöв голяись босьтiс сийöс, лэдзис кöбыласö. Мыдзувья сьöлöм вылас бöра лоис недолыт, гортö бы эз пыр, пышшис бы кытчöкö, медбы пеллес эзö кылö комендантлiсь ряксöмсö, синнэз эзö адззö. Пильснитiс-вирснитiс нырнас, пондiс чышкыны синваэсö. Сэтчö керкуись петiс мамыс и ныр увтас пондiс тотьны:

— Заргыны бы сэтшöмыслö öмас кулак! Мортсёйись!

Нылыс сьöрö пондiс горзыны и мам. Тöдвылас усис одзза олан, Белоруссия, кытöн вöлi асланыс керку — горт, вöлi мужик, кöда мый бердö бы эз кутчись, сiйö и керис. Вöлiсö нылöн куим мöс да куим вöв, порсь, курöггез, уджалiсö татöнмоз жö, öт пемытсянь мöд пемытöдз, некинöс йöзсö эзö уджöтö, некинлiсь вирсö эзö юö. И — на тэныт! Пöрисö кулаккезö-враггезö, вайöтiсö татчö — разисö олансö. Синнэс одзын инькалöн одзза оланыс — öтiк час кежö оз вунöт мужикыс йылiсь, синнэс одзын роднöй деревняыс, отирыс, кöднакöт кужисö овны, татöнмоз некин öтамöд вылö эз ыксы.

— Верма я кагаэзöс берегитны этатшöм оланас?! Верма я?! — кыдз бы мужикыскöт баитiс Устьяыс. — Мый нывкаэс öтнаныс пондасö керны? Кин нiйö дорьяс комендант кодь зверрезсянь?

Инькаыс ой и лун гусьöн горзö, мед ныввес эзö кылö, но нывкаэс пеляöсь, кылöны мамлiсь пильскöмсö, и асьныс пильскöны да кöр öтдруг.

Рыт, Лöнь. Горзöны инькаэз. Поннэс сёйöны-вувтöны, вöрлань видзöтöны, кыдз бы лёк зверьöс вöрсис кылöны. Устья горзiс-керис, чышкис синваэсö, босьтiс рос и пондiс чышкыны посöдз.

Сёйис-вувтiс медöддьöн комендантлöн кузь гöна поныс и сöтiс вöрлань, бытьтö чушкалiсö зiэз, сэтöн жö вöр дорын керкуэз сайын пирснитiс вöв да мыччисис синнэз одзö. Öтiк вöв бöрсянь тыдалiс мöдiк. Устья лэбтыштiс юрсö, медодз дума сотiс, что посёлокö локтö отряд, кöда унажык бергалiс Чурак гöгöрын, но талун... Вöввес вылын пукалiсö не солдаттэз, а вöлiсö мужиккез, и спинаэзныс сайын тыдалiсö пишаллез. Устья эшö пöв синнас адззылiс, кыдз Раковскийез посöдзсянь чеччöвтiс кузь да кöс мыгöра комендантыс и аслас пон моз жö котöртiс вöр пытшкö.

— Пышшис эд кöиныс! — кинкö ыкöстiс вöввес вылын.

— Натьтö, какис вешьянас, ха-ха!

Вöр поткöтiс-чарöтiс лыйöм шы, нач повзьöтiс Устьялiсь сьöлöмсö. Инькаöс посöдзись кыдз росöн чышкисö, ачыс эз казяв, кыдз чепöссис керкуö, бöрсяняс пöдналiс ыбöс, ныввеслö кижгыштiс: «Дзебсисьö!»

— Мый лоис, мам?! — Настялöн юрси тылöп эз вöрзьы.

— Дзебсисьö, мыся!

Жырокын-керкуокын шырлö некытчö бы дзебсисьны — бергöтчыны дзескыт. Нывкаэз саясисö öшын весьтiсь, пондiсö шушкöтчыны. Посёлоксö чувйисö ни кыдз лёк поннэз: эстöн гам, сэтчин мать. Лыйисö öтпыр да мöдöтпыр. Кинкö кайис Устьяэз посöдзö, брынгис ыбöссö, ыкöстiс: «Осьтö ыбöснытö! Осьтö или сотамö!»

Не кулöмöсь, не ловьяöсь кушкыртчисö джоджö да пукалöны инькаэс, дрöжитöны, ловзисьны пыдынжыка озö лысьтö. Öтнас Настя горок бокись босьтiс ухват, синнэзас лёк югöр, кыдз зверьлöн, кöда мымда вермас дорьяс асьсö.

— Ась пырöны! Синнэзнысö кыскала!

— Настя, Криста ради бандиттэскöт эн кутчись! Может, озö вийö, жалейтасö!

Öшын увтын гöрöктiс вöв. Кылiсö мужиккезлöн голоссэз, кинöскö видiсö-ыксiсö улицатыр, бригадирсö кыскисö вöрлань — нетшкисö йöрнöсöт, вартлiсö юр гöгöрас, а Максим шы оз сет. Сэк и Устьялöн ни öзйис сьöлöмыс, смев гурнитiс — вир чепöссис юрас, ачыс эз тöд, кыдз осьтiс ыбöс, чеччöвтiс посöдзö, пондiс чирзыны:

— Тi мый кератö?! Мыля Максим Демьяновичсö вартлатö?! Мый сiя тiянлö умöльсö керис? Етша эшö миянöс еныс дойдiс, да эшö сэтöн тi. Некытöн ни миян кодьыслö оланыс эз ло. Эд вöрöтö мужиксö!

Инька чеччöвтiс посöдзись, кöмтöм коккезнас тальччис чаггез вылö, подолсö лэбтiс тоша мужик одзö, долоньнас клоп да клоп вачкыштiс гöгыс весьтö, риксьыштiс:

— То тiянлö! Вермат босьтны да нöбöтны! Сэсся нем миян сетнытö, мый одзаныт, сiя и эм.

— Гы-гы! — гöрöктiс жеребец моз бандитыс, ёрттэслö висьталiс. — Лэдзö эталiсь мужиксö, то сытöг, тыдалö, овны оз вермы! — и Устьялö ни веськыта шуис. — А тэ, инька, басöк кодь ышö! Иван, сутшкисям, бат, эта инька латкаын?! Иван, мый öмтö осьтiн да видзöтан? Видзчисян, кöр ме тэнö одзала.

Иван нимаыс Устья одзын кыдз бы öшис, эз тöд, мый керны: синнэс — вирöсь гöгляннэз, öмыс осьта — воробей лэбзяс и пырас, мыгöрыс ошлöн кодь и эм.

Устья пондiс нерны ош чужöмасö:

— На! Он сёй! Виньдан!

— Го-го-го, Трофим! Мый нö тэ?! Нач ни нем вылö он туй я мый я, го-го-го?! Гогнав ли мый ли да коль мымдакö миянлö, то тэнат тоинöн эд только тусь тойны... Разян быдöс!

— Ог разь! Тырмас меным и тiянлö. Вильöтышта гладь бöрасö. — Ош мыгöраыс шамыртiс Устьясö, зэлöтiс конувтас и пондiс кыскыны керку сайö.

Учöт посёлокын кыдз война: мый эм и абу, быдöс кыскöны ни керкуэзiсь. Инькаэз горзöны, мужиккез ружтöны. Дорйисьны нач некинлö, некинлöн пишаль абу, только черрез, да нiя ныжöсь.

Зверь кодь отир уськöтчисö посёлокö, олiссезöс озö пуктö отирö, мый колö, сiйö и керöны: кöда горзö, кöда чирзö, кöда ыксö. Бандит киэзын пессьö Устья, курччасьö шырок моз, чужьясьö да сылöн я выныс или мужиклöн? Бандит увтын ни инькаыс.

Керкусянь öшынöт казялiсö этö нывкаэс. Медодз мамсö дорйыны чеччöвтiс Настя: синнэс вирдалöны, варыш моз öвтыштiс киэзнас, лэбзис-чеччöвтiс посöдзсянь ош кодь бандит пельпоннэз вылö, бöрсяняс кыкнан кинас кутчисис кузь юрсиыс бердö и быд вынсис пондiс кыскыны асланяс — чатыртiс юрсö.

— С-с-сука! — мурзьыштiс бандитыс, быд вынсис трекнитiс бы нывкасö, но сiя видзсис юрсиэс бердын, кыдз учкись понок бердын — кулас, но дорьяс мамсö, и ачыс эз тöд мый чирзiс.

Настя бандит бердiсь мезмис вöлись сэк, кöр бöрсяняс сибöтчис мöдiк бандит и спина кузяс свистайтiс плетьöн, сiдз вачкис, что нывкалöн потiс йöрнöсыс, спинасис чездiс вир. Настя зубытсянь медодз таралiс мамыс бокö, да сэк жö чеччöвтiс, чепöссис эшö бы гыжьясьны лёк кань моз. Но сы вылö пон моз уськöтчис ни сiя, кöда вурис плетьнас, кульыштiс вывсис йöрнöссö.

— Настя-я-я!! — быд вынсиныс ыксiсö ни сойес, чеччалiсö гöгöрас, гыжьялiсö бы рожабаннэзнысö бандиттэзлiсь да унажык сылiсь, кöда лэдзис Настясö и пондiс öвтны öтмöдöрö плетьöн.

— Пышшамö!! — пöдöмöн ыксiс ни Устья. — Котöртö, челядь!

Вöлись нывкаэс кыдз саймисö. Медодз вöрлань öдззис котöртны Настя, сы бöрсянь ышки-пойки чеччалiсö сойес.

Öшисö синнэз одзись нывкаэс. Öтнас бандиттэз одзö кольччис Устья: баличаэс разьсьöмась, паськöмыс летки-мотки, синнэс ыждöмась — бöбсялöмась, горзö да ыксö:

— Стыд тiянлö абу! Ми абу я тiян кодьöсь жö. Гортiсь вашöтiсö, вайöтiсö вöрыс коласö, и кинлöн дышыс оз пет, сiя мый колö, сiйö миянкöт и керö. Тшыгйöн бы вийöны, вартлöны. Поннэс уна буржыка олöны, а тi эшö сэтшöмöсь жö... Господи, мыля нö еныс сiдз миянöс?! — киэсö лэбтiс вевдöрö, нюжöтчис пемыт кымöрланьö. — Эй, Тропим! Мый нö тэ?! — бандитлö ыксöны ёрттэс.

— Но сэтшöмсö! Сьöлöмö гудыртчö, тьфу!

— Тырмас! Эд вöрöтö. Мед олöны. Нем нылiсь босьтны. Мымда берданыс... Эй, Тропим! Мунам эстiсь.

— Бригадирнысö кöть колiс бы пу вылö бöрöн öшöтны!

— Ха-ха, да сiя чожа ачыс кулас. Он адззы, лы да кучик кольччöмась, вешьяныс оз ни видзсьы.

27

Кыным унажык отряд вöтлiсис Курай сьöрын, сыным унажык сiя вельмис-смевмис, унажык отир чукöртiс гöгöрас, и кин бöбасис-сюртнясис бандиттэскöт, дрöжитiс-олiс, полiс ни бöр керны — öттэс и мöддэс уна эзö баитö, мыйись-мый öтöрсянь пуля и мöдöрсянь пуля.

Курайлöн содiс отир. Сiя аслас отрядöн койис унажык вöррезын, но немымда эз пов сибавны деревняэзö, и только öтпыр Лёвич туй вылын казявтöг оча-паныт пантасис отрядкöт. Лэбис бой, кыдз би гурнитiс: лыйисö-керисö öтамöдлö да дугдiсö, бандиттэс солдаттэз ныр увтiсь, кыдз кымöрö лэбзисö, — öшисö. Шедiс только öтiк ранитöм морт, кытшöмкö деревняись мужичок, кöда немымда бандит вылö эз вачкись, отрядö шедiс сiйöн, что бытшöма мортлöн эзö вöлö не горт, не ёрт, тшыгсянь сэтчöдз ни умöльтчöма-косьмöма, что печикты — и пöрас. Öнi шедiс и дрöжитiс, кыдз пипу вылын лист да модис:

— Челядь, эд вийö! Эд вийö, кагаэз! Ме эд эг ачым. Менö гортiсь кыскисö.

— Мый модян, кöдö оз ков?! Кинöс пöрьялан?! Эх! — и мужичоклö бокас сiдз брынгисö, что нюжалiс кöз увтö, лöнис.

Мужиклiсь нем вöлi босьтны, кытiсь кутiсö, сэтчö жö и тыртiсö: синнэсö вевттисö муöн да нитшöн.

Отряд тэрмасис вöтчыны Курай сьöрö, только гожумöн вöрын мортлöн след абу, кыдз пырас вöрас, öшö.

Бур вöрын овны, кытчöдз шоныт, кытчöдз быд кöз увтын горт, быд пу аслас лысöн-листöн саялö-дзебö кöть кинöс. Курай вöлi талун Багайланьын, ашын кытöнкö Лопан волокын ни, мöдлун öвтчö Усолье туй вылын.

Кадыс ар ни. Ойез пемытöсь да ыркытöсь ни. Кушмö ни вöр — чöвтö вывсис лист, лоö гулыт: сьöла лэбтiсяс да пуксяс и ылiсянь ни тыдалö, сiдзкö, мортлö дзебсисьны пуэз коласö лоö сьöкытжык. Курай вежöртö, что сылö мужиккезкöт Совет властьсö не вермыны, сiдз кыдз мужиккес арттöмöсь: лыйсьыны бура озö кужö, гусясьны öтнаныс озö лысьтö, а думаэзнаныс олöны бы бура, но кинкö сайсянь.

Вöрын овны лоис умöльжык и умöльжык, мужиккезлöн сьöлöммез пондiсö кыскыны горттэзаныс. Нiя важын ни пышшисö бы командирныс дынiсь, кöр быдöнöс видзчисисö гортын, но вот полiсö властись, кöда пышшалiссезкöт уна эз баит.

Курай аслас бандаöн олансö гудыртiс Кöс гöгöрын, а Кöчланьын гудыртiс Распутин, кöда дынö Иваныс иньдылiс ни ассис мортöс, медбы öтлаасьны да öтлаын дзугны Советтэзлiсь олансö. Но петiс сiдз, что мортыс мунiс Распутин дынö да öшис, кыдз эз и вöвлы.

Арся лун дженыт. Шондi кымöрын уялö лажмыта ни. Ыркыт. Пышшалiссезлöн командир öтiк ойö саймис кöз увтын и сэсся ланьтны некыдз эз вермы: думаэз дзугисö онсö. Мортыс олiс бы морт моз жö да эз овсьы, юрын вöлi öтiк дума: мый одзлань керны? Кытчö воштiсьны? Нинкöма мужиккес вылö надейтчыны я мый я?

Уннялiс лог дорын кöин, горзiс зверьыс, нетшкис сьöлöм бердiсь лов. Иван пуксис кöз увтö, биокö шупкис пес-мöд, думайтiс кытчö воштiсьны, сизимись бергöтлiс олансö. И петiс, что колö кольны ёрттэсö да вартны кытчöкö ылö-ылö, сэтшöминö, кытöн сiйö эзö тöдö, эзö кывлö, абуöсь тöдсаэз. Муыс паськыт, да оланыс дзескыт. Ен кö сетас эшö овны, вöр шöрын умöль лоас смерть видзчисьны.

Куритiс пышшалiссезлöн командир сэтчöдз, что öмас курзис, горшсö пондiс дзиктавны табаклöн тшын, сьöлöмыс гудыртчис. Сiя видзöтыштiс иньыс вылö, кöда лун-мöд ни вöрын гардчö öтлаын. И мый бы инькалö овны вöрас? Мый керны эстöн, кöр сылöн горт эм. А горт инькалöн кыдз эм да абу: важын ни сэтчин гардчöны ой и лун милиционеррез, видзчисьöны Курайсö, что локтас иньыс дынö, медбы кутны и кыкнаннысö нуöтны. Но, кыдз шуöны, матын да ылын: милиционеррез ныррез увтiсь Курай нуöтiс гортсис иньсö, колис бур керку, кöмкöт-паськöм, дозмук — мый вöлi и эз, быдöс кольччис, нем эз ков: мед кöть öтiк лунöн комиссаррес горшаныс тасалöны, ась сёйöны-юöны, новйöны, век кежö йöзыслöн оз тырмы, а сiя эшö шедтас-босьтас паськöмсö и кöмкöтсö, керас эшö керку.

Ойыс лöнь. Кöин уннялiс да дугдiс, кыдз пöтiс горзöмнас. Курай тöждiсис да дугдiс, би вылö эшö содтiс пессэз, бöра пондiс думайтны, мый керны ашын, кытчö мунны, кыдз бы не шедны отрядлö. Тöдвылас усис Киршинiсь Фёдор, кöда шедлiс милицияö, но сэтчинiсь сiйö лэдзöмась, и этö сэк, кöр ёрттэслiсь дзимлялiсö быдса семьяэз, нуöтiсö кытчöкö, и некин оз тöд, кытчö инькаэз лоисö челядьöн. Только думайтсис, что важын ни отирыс абу ловьяöсь, а эта кыдзкö мезмöма милициясис.

«Фёдор!.. Фёдор бердö куш киэзöн эн кутчись! Öтiк горшнас повзьöтас, биись и ваись петас. Вузалас ассис мамсö, колас кö... Нем керны, вузалас! — юрнас öвтыштiс Курайыс, тiлис синнэсö, кöднö сёйис курыт тшын. Сьöвзис биа шоммес вылö, шынньöвтiс. — Но, Фёдор сват, мыйись-мый...»

Иванлö охота лоис юыштны вина, медбы личöтны сьöлöмсö, веськöтны сьöлöмыс вылiсь шог. Но винаыс эз вöв. Мукöд лунö вöрын олiссезлöн быдöс вöлi, а кöр и тшыгсянь кынöмын гаг уннялiс. Талун гагыс и дзользис кынöмас, сёйис и юис бы.

* * *

Ойыс кузь. Кымöрын дзöрисö звездаэз. Сьöкыт удж бöрсянь шоччисисö горттэзын отир. Перыта пемдiс, но не öддьöн сука: вöр коласöт кымöрыс вöлi лöз-югыт, коккез увтын эшö тöдчис гöп и нять корог, эшö дзингисö-лэбалiсö дбруньгаггез. Фёдор нинкöммезöн чышкис-мунiс гортсянь сельсоветö, кык километр етш педзис то крут керöс паныт, то вуджис шорок да бöра кайис керöс вылö, сыбöрын мунiс ыб пöлöн, вуджис ключ-шороксö, кытöн пукалiс асывнас, кöда öнi больгис топ горöнжыка, дзик мыйкö висьтасис бы. Но мужик эз пуксьы кöс местаö, а вуджис шороксö и дженытжык шаггезöн ни пондiс кайны медкрут керöсö, кытöн пукалiс Чурак, кытöн öтiк пон ни эз лявзы, только туй вылын ыб дорас жолькнитiс ворота, да пырснитiс вöв. Фёдор пондылiс думайтны, мыйлö бы сiйö ойнас корöны сельсоветö, но сэтöн жö думаэсö дзугис, аслыс висьталiс: «Кинлö нем керны, сiя и кыскалö ойнас! И мед кыскалöны, мый меным? Нем менчим босьтны, кытöн пуксясö, сэтöн и чеччасö!»

Ружтыштiс мужикыс, видзöтыштiс кымöрö, кытiсь мезмис звезда и усис, кыдз бы кымöрсö вундыштiс-кырöвтiс би кодь кырöлöн, кöда сэтöн жö кусiс. Сiдзкö, Фёдорыс сьöртi петiс, что кинкö кулiс, и ась кöть быдöнныс кулöны, етшажык нянь пондас ковны, личытжык олан лоас, то кин пантасьö, сiя и видзöтö, кыдз лёкся-лёк морт вылö.

Вöлi лöнь и, веськыта кö висьтавны, гажа. Сельсовет дынын Фёдорлöн казявтöг сьöлöмыс öзйыштiс-гурнитiс гажöн, и сiя ыкöстiс сьывны ассис арттöм сьыланкыв, кöдö некин бура эз вежöрт. Но мужиклöн петiс сьöлöмсяняс. Сьывтöн и кайис сельсовет посöдзö, тальччис ыбöс коласö, кöда вöлi осьта, но öшыннэзын некытшöм би югöр эз тыдав. Посöдз дынö йöр бердö вöлiсö кöрталöмöсь кык вöв, кöдна мортсис повзисö, пырснитiсö, ордчыштiсö пышшыны бы, но эзö мезмö.

Фёдор пемытiнын маласьтöн кайис посöдзö, маласьтöн жö осьтiс ыбöс, здоровайтчис, но паныт сылö некин эз шыась, топ керкуас нач некин эз вöв.

— Ёлки зелёные! Эм али абу кинкö керкуас?! Гуö кыдз пыран и кöть быдöс нöбöт, некин оз понды тöдны!

— Гусясь да тöд кытöн гусясьны, Фёдор Васильевич, то видзöт! — гор сайын вöлись шыасис роч морт, сэтöн жö тшöктiс пуксьыны стул вылö, кöдö пемытiнас Фёдор казялiс пызан бокись, и пуксис, эрзыштiс. — Ёлки зелёные! Мый нö бöра тiян ойнас ме весьтын ендiс?!

— Кыдз Кöсöдз ветлiн, Фёдор Васильевич? — юалiсö мужиклiсь, сорисö баснисö.

— Öддьöн бура, ёлки зелёные! Кыдз гöститны нуöтлiт. Гортын няньыс абу, юаныс юан вылö оз вачкись, сэтшöм шöма, а сэтчин тытки пöт, — лöсьöтчис бы серавны-норасьны, кыдз сулöтiсö шкаф пытшкын, но курччöвтiс тырппесö, казялiс, что вермас умöльжыкö аслыс керны.

— Мый оз овлы, Фёдор Васильевич. Оланыс сэтшöм. Тэ менö тöдан или он? Ме — Зеленин, командир солдаттэслöн. Вöтлiсям вот Курайныт сьöрын и некыдз кутны огö вермö.

— Тöда, ёлки зелёные! — Фёдор баитiс, стенаэз топ дрöжитiсö. — Тöда тэнö, Зеленин, куимись-нёлись пишальнас кымöсат иньдылi ни, но сё инмис сiдз, что пезьдöтнытö эг ешты. Еныс кытчöдзкö тэнö, зонка, полаэс увтын видзö!

Кашык-кашык керис Зеленин, копыртчыштiс пызаныс весьтö, кура-пара вöрзьöтiс кытшöмкö гижöттэз. Командир вöлi кöсыник да учöт мыгöра, кöда пемыт керкуын вöлi топ эшö учöтжык. Фёдор только невна эз серöмтчы, эз висьтав, что кытшöм тэись командир, кöр сысся кыкись учöтжык, но ньылыштiс дульсö и юалiс:

— Мый нö коритö?

— Мыйлö корим? Мыйлö корим... Эх-эх, Фёдор Васильевич! Тэтöг эгö пондö вермыны овнытö, сiйöн и коримö! — гажа кыввез лэдзис солдаттэзлöн командир, некыдз эз шу, эз вид Фёдорсö, тöдчис, что веськыта сёрнитiс. — Метöг, натьтö, баитiсö Кöсас эд?

— Баитiсö ой и лун, сымда тотисö, что юрö бергалiс.

— Сэк мый нö?

— Мый, ёлки зелёные?! Деньгаыс вот етшаöв.

— Эн пов. Вина ми тэныт босьтамö, ю да эн сотчы.

— Тэ мый, ёлки зелёные?! Ме эд кöть кытшöм да ачымöс, поди, тöда жö.

28

Настя сойескöт посёлокись сайöвтчисö вöрö, пышшисö, котöртiсö кыдз баляэз кöиннэз дынiсь, котöртiсö кытчö синнэзныс видзöтiсö, коккезныс нуöтiсö. Чужöммезаныс уввез вартлiсö, коккез падтiс чашья, усисö-пöрисö, бöр чеччисö да бöра котöртiсö сэтчöдз, кытчöдз нач эзö атшалö, эз понды кывны бöраныс поннэзлöн вувтöм и отирлöн ыксöм.

Вöрын вöлi гажтöм, быд пу полöтiс бандиттэзся öддьöнжык, быд шагын топ сiдз и мыччисис ош: вот рякöстас, лязас, кир-вар керас, и ловзисьны он ешты.

Котöртiсö нывкаэс, но öтамöднысö эзö кольö. Кöр мыдзисö, сувтiсö, лолалыштiсö пыдынжыка, вöлись кыдз саймисö и вежöртiсö, кытöнöсь нiя.

Пымалiсö. Вамисö спинаэзныс. Ньылöм сатшкöтiс кымöссэзiсь.

— Настя-я-я! — унньöвтiсö öтдруг Настялöн пöрисьжык сойес. — Настя-я-я-я, кытöнöсь ми?! Ошыс эд сёя-а-ас! Лок чожажык бöр гортö, ась кöть мый бандиттэс керöны. Настя-а-а!

Настя курччöвтiс тырппесö, синваэс визывтiсö рожабаннэзöттяс, сьöлöмыс тогзис, пышшис бы вöрсис, но кытчö? Кытöн туйыс? Юррезныс вевдöрын кымöрыс эшö мало-дело лöз видзис, а коккез увтын нем ни эз тыдав, сэтчö жö кинкö Настя кöмтöм кок вылö чеччöвтiс нильыг — кöдзыт ва киссис спинаыс вылö.

Зубытöсь вöлiсö уввезöн кырлалöм чужöммез, чашьяö бытшкалöм коккез. Ойыс лöнь. Ежели кывзiсьны, то кылан, кыдз пу бердiсь мезмас вежöтöм лист и жагвыв кышöтчöмöн усяс му вылö, кытöнкö кинкö ружтыштас, топ муыс шогалö и ружтö. Но нывкаэз нем эз кылö и эз адззö: жмитчисö öтамöдныс бердö и пильскисö, пельпоннэзныс зэгйисисö, полiсö осьтны синнэзнысö, медбы не адззыны, кыдз дынаныс локтöны зверрез.

Горзiсö пöттöдз, чышкисö синваэзнысö, асьныс сё дрöжитiсö.

— Мый пондамö керны? — сойеслiсь юалiс Катя.

— Муныштам эшö, огö я петö туй вылö, — шыасис Настя.

— Кытöн туйыс? Кöдöрын?

Кытöн и эм туйыс, кытiсь и кошшы пемытiнас, кöр луннас вöрсис эзö бы вермö петны, но Настя чорыта висьталiс, что колö муныштны эшö невна одзлань.

Мунтöн быд шагын кышасисö уввез бердö, люкасисö пуэзö. Коккезныс увтын лоисö кытшöмкö гöппез, кытчö падмисö, и быдöнныс усисö, кивзытöн да ружтытöн чеччисö. Павкис уль ру, кытöнкö быдмис сэтöр, и кылiс сылöн чöскыт дукыс и багульниклöн ру. Бур, что эзö ни курччасьö номмез, эз пöж шондi, но сы местö пондiсö кынмыны.

— Этчин колö мунны! — кытчöкö пондылiс кыскыны Катя.

— Кытчö тэ нуöтан?! — кивзiсö сойес. — Пыдöжык кытчöкö кыскан.

— Тырмас тiянлö! — сойеслö ыкöстiс медтомыс. — Пуксям эта пу увтö и кыдзкö джендöтам ойсö, ашын югытiнас вöлись...

Бöра горзiсö пöттöдз, пуксисö кöз увтö, кöчка вылö пелитчисö öтамöд бердö зэв-зэв, лöнисö, кывзiсö, кыдз тёпкöтöны сьöлöммезныс. Ыркыт ой маласис, пырис паськöм увтö, кöда луннас дорйис жарись и кöдзытiсь, а ойнас платьеокезныс нем вылö эзö туйö.

Öддьöн кузь ойыс, кöр нач он узь, нывкаэс топ унаись кувлiсö да ловзисö, ончир эз керö. Асывнас, кыдз лöз югдыштiс, пондiс тыдавны коккезныс увтын, лöсьöтчисö мунны, но кытчö? Öтiк шуис, что колö этчин, мöдiк висьталiс, что гортныс сэтчин, куимöтыс шы эз сет. Настялö тöдвылас усис, что кытiськö кывлiс ни, ежели кö видзöтны, то лунланьын пуэзлöн уввезныс кузьжыкöсь, ойлань дженытжыкöсь, кöдзыввезлöн поззэз пуэз да мыррез бердын лунланьын. Сэсся нем сэтшöмыс эна нюр-гöппез коласын эз вöв, медбы нывкаэслö висьталiс кöдöрö мунны. Нiя пондылiсö видзöтны пуэзлiсь уввез, но нем эзö вежöртö, кöдöр ладорын уввес кузьжыкöсь, кöдöрын дженытжыкöсь.

Тöдтöм вöр-ошпозъяин, а сойес — кöиннэзлöн мульöссэз. А сэсся мый? И кин вылö бы вачкисьöны резьдöм паськöммезöн, миссьытöм нятьöсь рожаэзöн, кöднö топ зверь гыжьялöма, вир чездöма, коккезныс пыктöмась нето ранаэзсянь, нето кынмöмсянь.

Вöр. Некытшöм туй абу, косьмöм ни кок вылын турун некин абу тальöма-нильöма. А эстi кин ветлöтöма? Абу я кинкö мунöм?! Быль, кинкö мунöма, но абу морт.

— Кöть мый, а колö видзчисьны шондiсö. Сiя будь иньдас туй вылö, — горзiс-керис да висьталiс Катя.

Шондi вель дыр эз мыччись, кыдз öшис жö, туйсö эз адззы, модейтiс гортас. Катя бöра унньöвтiс горзыны, но сы вылö сойес ыкöстiсö: «Дугды ни! Тупкав öмтö!» Юррез бергöтiсö веськытлань, нюжöтiсö голяэз, кывзiсисö и кылiсö топ мöслiсь джыннян, кöда тронгис: «Трон-трон».

И вöлись öтамöднысö одзалöмöн, усьöмöн-пöрöмöн уськöтчисö котöртны джыннян шылань и нач чожа петiсö туй вылö, кöда вöлöма зэв боканыс.

— Катя! Туйыс!

— Настя!

Окасисö, быдöс вунöтiсö, но чожа садьмисö, бöра öтмöдöрö дзарьялiсö, юасисö:

— Кытчö мунны?!

— Кытчö... Озö жö миянöс бандиттэс öнöдз видзчисьö!

— Кыдз видзчисьöны?..

— Мунам Чуракö! — гажöнжык висьталiс Настя, кöдалöн мылякö сьöлöмыс кыскис посадö.

— Мый посадсис адззин? Кытшöм чöскыт тор? — Оксана кыскис посёлокö, но сойес вермисö. Иньдöтчисö Чураклань.

Муныштiсö невна нывкаэс, кöмтöм коккезöн талисö чорзьöм нять, уввез, песок и гöпокись, нюдз нятись, казялiсö нинкöм след.

— Кин эта мунöма?! — Катя повзис, думайтiс, что одзаныс былись ни ош шагнялöма, но сы вылын сойес öдззисö серавны да висьталiсö, что кинкö нятьсö тальöма нинкöмöн.

Катя нач немись пондiс серавны-куснясьны.

— Мый киссян? Кинкö одзат котöртiс я мый я? Мыччалiс мыйкö?

— Нинкöммес... — пöдiс-сералiс нывка. — Этатшöм нинкöммесö гортсиным некöр бы эгö адззылö, а татöн...

— Мый тэныт нинкöммес? Умöльöсь я мый я? Ме бы кужи кö — кыйи ачым да коккезiсь эг и пöрччав. Видзöтан кö, коккез дзоньöсь бы вöлiсö, то нiя кыдз понлö шедлöмась.

— Колькаыт Чуракас козьналас, — сералiс или былись баитiс Катя.

— Но и мый?! Козьналас кö, ог пыксьы, босьта и понда новйыны.

Ойся олансö кыдз вунöтiсö. Полiсö касьтывны, сералiсö öтамöднысö, кöть и сималiсö кынöммезныс, и косьмисö горшшезныс. Тэрмасисö — кöмтöм коккезныс мелькайтiсö. Чожа умöль пос кузя вуджисö Лолым и Киев дынын ни ыб дорас, зэв туйыс бокын, мужик жевгыштiс:

— Кытчö нö мунатö? Бöра пышшатö посёлоксис! Ме тiянöс! — и пондiс матькисьны, кыдз лöсьöтчис вийны. Медодз повзьыштiсö нывкаэс, сьöлöммезныс шурк-шарк, кыв эзö адззö паныт висьтавны, кöр кöз сайись мыччисис кузь да векнит мыгöра посёлокись комендант — кöдзыт син югöра, топ синнэзас смерть пукалö, некöр он тöд, мый мортыс думайтö, да эшö сэтöн жö горшсö летö-ыксö. — Бергöтчö бöр, то эта лоас! Мыля пышшатö?!

Нывкаэс видзöтiсö-видзöтiсö мужик вылö, кыдз бы пондiсö садясьны, казялiсö кытшöм мужикыс, морт вылö оз вачкись, бытьтö бы шедлöма зверь увтö, паськöмыс кыдз нывкаэслöн жö косяссьöма, вешьян пидзöсыс летсьöма, чужöмсö кытчöкö дойдöма, вирöсь. Бес и эм: пиннес гер, эрзö.

Сэтöн Настя медодз серöмтчис öмтырнас, пондiс ваксьыны-баитны:

— Сергей Петрович, тэ нö мый?! Мый тэкöт лоöма?! Эн я бандиттэслö шедлы или ош увтын бергалiн?! Öддьöн тай мылякö чужöмыт вылын нёштöм. Ме думайтi, тэ вывтi смев, да полiсь жö тай вöлöмыт, только миян коддес вылын жö верман пиннетö кеслыны. Адззылiм эд, кыдз посёлоксис пышшин, кöр бандиттэс локтiсö. Ох, Сергей Петрович! Мыля нö тэ сэтшöм?! Мыля öтнат миянкöт кутчисян бы вермасьны? Видзöт жö ми куимöн, а тэ öтнат, и некин оз адззыв, кыдз вешьянтö чöвтам да кодзамö! Быль!

Сергей Петровичлöн тырппес пондiсö лёбöтны, чужöмыс сьöд му кодь лоис, синнэзас лёк югöр вежсис, и пондiс бы мыйкö висьтавны, но эз вермы: мыйкö модис-тотис, только и кылiс öтiк кыв: «Ме-ме-ме...»

— Сергей Петрович, ми эд важын тöдамö, кин тэ. Сiтöсь комендат, отир сёйись. Шедан кöркö кодя мортлö, юртö мургыльтас, и он понды петух моз быдöн вылö чеччавны.

— Ме-ме... — дрöжитiсö тырппес комендантлöн.

Киевын пондiсö тронгыны мöссэзлöн джынняннэз, вувтiс пон, гажöн китсасис петух, баксiс баля, горзiс челядёк, и кинкö лёк голосöн ыксiс: «Петра-а-а, зырымöсь куль! Лок гортö-ö-ö! Бандиттэс кутасö-ö-ö!»

Гора асылыс, топ кылiс, кыдз деревняын лолалiс отир.

— Мунам! — Настя висьталiс сойеслö, чатыртiс юрсö и бöра медодзын пондiс перыта шагнявны деревнялань. Паныт видзöтчис шондi, ёрис синнэз, шоныта малалiс чужöмбаннэз. Вöр кыдз бы орсiс-олiс, ошшасис гажöн.

— Сельсоветас норася! — кыдз бы саймис бöраныс комендант и пондiс горöтны.

— А ми сельсоветас норасьны и мунамö! Оз я вежöртö миянлiсь олансö да мыйöнкö отсалö! — юрнас лег-лег керис Катя, бöраныс нывкаэс дзар эзö керö.

«Вайöтiсö юр вылö кулак пияннэзöс! Быдöннытö бы тальны, сэк пондiтö бы кывзiсьны, эдö бы пондö пышшавны, дзöдзыв синнэз! — нывкаэз сьöрись туй шöрö кольччис комендант, павьялiс, эз тöд кöдöрö мунны, тыдалö, сё полiс пышшалiссезiсь. Öвтчис-керис туй вылын, öвтыштiс кинас, шуис: «Сергей Петрович, талун абу я Семья лун. Натьтö эд Киевас сюромкаэз да суррез эмöсь. Кежала сэтчин, дзунгышта сурресö, бат, лунъя да узя. А мый? Кытчö меным тэрмасьнытö? Мый ендö? Пышшасö кö посёлоксис öнджаэс, ылö озö мунö, чожа шедасö!»

Комендант чукылякодь кузь коккезнас пондiс питкыльтны-вöтчыны нывкаэз сьöрö, но кольччис деревняö, мöддэс мунiсö одзлань, талисö кöмтöм коккезнаныс туй вылiсь бус, туй бокись кельдöтöм ни турун вылiсь пыркöтiсö кыз лысва.

Лун оссис, уджöтiс отирöс, кöдна ыббез вылiсь дзимлялiсö сюэз. Павжун гöгöрын нывкаэз локтiсö Чуракö и веськыта мунiсö Öпиммезö, кöдналöн посöдз ыбöс вöлi осьта, сэтчин куйлiс пон, кöда казялiс нывкаэсö, чеччис да пондiс öвтны бöжнас, гажöтчис. Гажöн улицаын китöстiс петух, чирзiсö воробейез, лэбалiс быдкодь каёк, керку короминна вылын уксышалiсö дудiэз — оланыс эстöн вöлi мöдкодь, нежели вöр коласын, гажа.

Никсышалiс и Настя коккез дынын ниртчис пон.

— Кин сэтчин?! — керкуись чеччöвтiс Колька и посöдзас мугис: öмсö осьтiс, синнэс ыждiсö, горöтчис бы мыйкö и эз вермы, только видзöтiс нывкаэс вылö.

— Колька, курччöвтiн я мый я кывтö?! — шыннялiс Настя. Он я мый я талун уджав? Мыля луннас гортын?

— Павжнайтны локтi, — кылыс гардчыштiс зонкалöн, мылякö вир чепöссис рожабаннэзас.

— Кин сэтчин?! — осьта керку ыбöсöт кылiс ни Öпимлöн голос.

— Эна тай... Весь олiссес ветлöтöны... — ачыс эз тöд, мый баитiс Колька.

— Уджалiсь тэ, — Настя пондiс нерны зонкасö. — Вывтi уджалан да мыля нö сё бырöм нинкöммезнат ветлöтан?

— Некöр кыйнытö.

Посöдзö чеччöвтiс Öпим, катша кодь чож и кöс, пондiс кивзыны да ойзыны, юасьны кыдз да мый, кысянь нывкаэс шедiсö татчö, чожажык корис керкуö, модис, что кынöммезныс сималöны, а нылöн няньыс сёйны оз туй — öтiк тöричаись пöжалöма, сьöд, песок пиннез увтын кажöтö.

— Нем миянлö оз ков, — öтiк голосöн шыасисö нывкаэс.

Öпим туисöн вайис ни юны лöз квас, юкталiс. Сэк жö петалiс садникö, нетшкöвтiс луккез, кушман, зоныс вылö ыкöстiс:

— Колька, весöт жö чожажык кушмансö да тёрит. Мый сулалан посöдзас?! Или кынмин?

Колька топ пеллесö адззис, сэтшöм ни сылö лоис гажа, сэтшöм лоис рад, что адззö Настясö, кöда нятьöсь чужöма, лешки-вошки паськöма, но и ась! Ась бы нывкаыс чуд моз олiс бы баняын, Колька понда сiдз и этадз вöлi бы медбасöк, öтiк голосыс кытшöм! Чиння, нюжвылöн моз баитö, бытьтö бы сьылö.

Сойез пырисö керкуö, миссян увтын миссисö рожаэз, пуксисö лабичö.

— Кыдз ни олатö? Мый ни кератö? — Öпим койис-котрасис öтмöдöрö, тэрмасис вердны гöссесö, сiйö и керис видзöтышалiс öшынöт öтöрö, полiс сёрмыны мунны уджавны.

Нывкаэс öтамöднысö одзалöмöн висьтасисö, кыдз да мый олöны, уджалöны, но кытчöдзкö эзö явитö, мыля шедiсö татчö.

— Ой, кагаэз! Ой, дитюэз! Кыдз нö пондамö овнытö?! Мый нö лоас?! Быдöнным куламö я мый я?! Еныс тай нач ни лöгасис, кыдз сiйö эгö пондö тöдны, — Öпим котрасис керкуын, и кылыс эз шоччись.

— Нем миянлö оз ло. Ми эд гаггез кодьöсь жö, кыным сьöкытжык оланыс, сыным крепытжыкöсь! — ошшасис Настя, видзöтышалiс Колька вылö, кöда бытьтö нем эз адззы, нем эз кыв, мизуритiс комын.

Нывкаэс чожа пуксисö сёйны: киэзаныс пондiсö лэбавны паннез, бекöрын кушман эз ешты шöмавны, эз курöт öммез. Сёйисö гöссез, спасибо висьталiсö, чеччисö пызан сайись. Öпим лöсьöтчис мунны уджавны, нывкаэслö висьталiс, мый рытланяс керны, ежели сысся одзжык гортö локтас пода.

— Эн пов, тётка, быдöс керам, — висьталiс Оксана и сэсся эз вермы терпитны, медбы Öпимлö не висьтавны, кыдз посёлоканыс тöн рытнас локтiсö бандиттэз, кыдз кутiсö мамнысö, а нiя пышшисö и узисö вöрын.

— Тi мый?! — ыбöс дорын ни повзис Öпимыс. — Ловья я сэтчин мамныт?! Эзö я кöин табуныс мыйкö Устьясö керö?! Вот эд вöлись, вот эд... Ой и лун эстöн солдаттэс койöны, а пышшалiссесö озö вермö кутны. Сельсоветас кöть бы висьталiтö.

— Мун да висьтав! — серöмтчыштiс Колька. — Видзчисясö, поди, талунöдз посёлокас бандиттэс! Натьтö, кытöн бöра и эмöсь ни.

29

Нывкаэс Öпиммезын пыд онöн узисö джодж шöрын сiдз, что эзö кылö, кынымись саймылiс Öпим да петалiс посöдзö. Видзöтiс, кыдз асывланьсянь кайис гым кымöр, кöда сiдз гымалiс и вирдалiс, что пемытсö паськöтлiс югытся-югыт биöн, сьöлöмыс инькалöн топ вотьыштлiс моросiсь. Керкуö пырöм бöртi сiя сувтлiс юрбитны-кеймыны еннэз одзö, медбы быдöс бур вöлi, эз бы чарöт, эз вий греххез понда.

Колька рытнас петалiс кытчöкö, но чожа локтiс, пырис керкуö, мамыслiсь юалiс:

— Мый нö, мам, сiдз юрбитан? Полан енсис?

— А тэ он пов?! Бесыс кучикö вурситö и некинлiсь эдö пондö повны! Сiйöн сiдз и оламö эд! Господи...

Керкуын вöлi пемыт, но кыдз öтöрын вирдыштас, сiдз и быдöс тыдалö. Адззöны, кыдз Настя узьтöнняс зэгнитыштö то кинас, то кокнас, то узьтöнняс кивнитыштö, бытьтö кинкö чеплялö нывкасö, и сойес сiдз жö узьöны. Пондылiс пильскыны-горзыны Оксана. Колька вöрзьöтыштiс коксö нывкалiсь.

— Эн вöрöт! — Öпим ружтыштöмöн моз висьталiс зоныслö. — Он адззы, нiя сiдз повзьöмась, что узьтöнняныс зэгйö. Кöть бы эз понды кудöбаыс чапкавны. Кöть бы нывкаэс эз пондö шогавны. Господи, кытшöм отирлiсь ен дзугö олансö!

Колька пуксис западня вылö, пукалöв-керис шы сеттöг. Мамыс юрбитiс комын, öтöрын сё гымалiс да чарлалiс сiдз, что керку дрöжитiс.

— Мам, ме сэсся Настясö ог лэдз.

Öпим кресталiс веськыт кинас мороссö, кыдз öшис еннэс одзын, пондiс видзöтны зонысланьö — эз вежöрт Колькасö.

— Гöтрася Настя вылö! — горöнжык висьталiс зонка.

Мам эз вежöрт, быль я баитö зоныс, сiдз кыдз Колькалöн мывкыдыс эшö кокнит, эшö нем оз думайт, мый баитö, — висьталас, кыдз сьöвзяс, и сэтöн жö вунöтас. Мам и öнi зоныслö эз верит, что вермас гöтрасьны, но сьöлöм педзис. Ачыс эз тöд, мыйсянь и мыля.

— Быль я мый я баитан? — мамыс юалiс Колькалiсь.

— Кöр ме тэнö бöбöтлi?

Мам сэтöн нем эз шу, юрбитiс ен одзын, öтöрын эшö ёна гымалiс да вирдалiс, сыбöрын короминна вылö кыдз ведра понiсь пондiс кисьтны-зэрны. Мам дугдiс юрбитны, полöмöн шуис:

— Колька, Покровыс гöгöрын нö... Вундiссяс да вöлись... Эта кадö мылякö тай озö гöтрасьлывлö...

— Гы... Арöдззас, мам, Настясö вöр коласын ош вермас сёйны.

Öпим сэсся кыввезнас эз понды панласьны, пондiс баитны, кыдз да мый керны: свадьба жö кытшöмöкö лöсьöтны или сiдз, кöр эд сёйнытö пöт абу, да и согласитчас я Настя, эд нылöн и воднытö некытчö — öтiк кровать, да сiя важ, пуовöй, он лысьт водны, сiдз и разьсьö увтат.

— Полатьын узьлам! — Колька немись эз пов.

— А лудыккес!

— Сэк джодж шöрын!

— Мый ольсалатö увтаныт? Мыйöн шебрасятö? Öтiк öн эм, да сiя важ: Настялöн сьöлöм гудыртчас.

— Оз гудыртчы, мам, ежели ме сылö понда ковны! Баитiсö мама-зона, кыввезнаныс кыдз бы орсiсö или былись лöсьöтчисö овмöтчыны Настякöт, асьныс эшö эзö веритö.

Нывкаэс джодж шöрын пишкисö-узисö, но не быдöнныс: Настя öтiк пельнас да быдöс кылiс, мый быргисö мама-зона. Нывкалöн гажсянь я, повзьöмсянь я, горёсянь я сьöлöм пондiс пессьыны, топ сiдз бы и чеччöвтiс öмöттяс, петiсö синваэс. Но куйлiс вöрзьöтчытöг, курччалiс тырппесö да медодз жалейтiс мамсö: «Мам, ловья я тэ сэтчин? Кыдз пондан метöг овнытö? Мам...» Нывкалö медöддьöн колiс мамыс, и Колька вöлi жаль, кöр тöдiс ни, что зонка былись сытöг оз вермы овнытö, гöтрасьны лöсьöтчö, кöть эта йылiсь веськыта эз висьтав, эз юав нывкалiсь, мунас я... Öтöрын гымалiс-гымалiс да дугдiс, кылiс, кыдз кымöр жагвыв мурзьöмöн вешшис лунланьö. Миков пöрöтчис западня вылö и сэкжö пондiс пишкыны-узьны, а Настя джоджын эшö вель дыр эз онмöссьы, вель дыр юрас бергалiсö думаэз, то олiсö ни Öпиммезын, то жалейтiсö мамсö.

Ашынас шондi эшö эз и мыччись, Миков чеччис ни, рожасö миссис да нывкаэзлö горöтчис:

— Чеччö, гöссез! Тырмас тiянлö джоджыс шöрын быглясьны! Петухыс важын ни китсасис. Мам, вай жö пызан вылö мыйкö сёйыштны. Тэрмасьны колö, то уджавнытö колясö.

— Ой! Ме кöть горсö лонта да мыйкö пуа сёйны.

— Некöр, мам! Кушман да лук пырт, а сэсся мый? Кöр буржыка пондамö овны, буржыка и сёямö.

Нывкаэз чеччисö, сынасисö-маласисö, топ стыдитчисö зонка одзын бергавны, но Колька вывтi ни смевмис, öтiк ойöн нач ни топ мужикö пöрис, веськыта висьталiс, что гöтрасьны думайтö.

— Мый керны?! — Настялöн баралiсö синнэс, бытьтö нач нем эз тöд.

— Кинöс нö босьтан бы?

— Ачым тöда кинöс! Натьтö, Настя вылö гöтрася!

— А ежели сiя оз мун, мый пондан керны?

— Кытчö воштiсяс? Мунас! Оз кö мун, ме кодьсö эд сэсся оз адззыв.

— Ой, Настяа-а-а! — öтiк öмись горöтiсö нывкалöн сойес, пондiсö тiльны синнэз гöгöрöт. — Настя! Мамö мый висьталас?! Юасин я мамöлiсь?!

— Мый сэтöн юасьнытö? — тэчис-баитiс Колька. — Нем сэтöн юасьны. Кöркö тёщаö эд ветлiс жö жöник саяс, и тi мунатö, одö пондö кувтöдз öтнаныт овны.

Öпим усьöмöн-пöрöмöн пырис садникись, пызан вылö пуктiс весöтöм луккез, торскис тыра совдоз, долонь кыза сьöд рöма чöвпан, бекöрöн вайис рись, шöмйöв, а сэсся мый колö?

Пуксисö пызан сайö: зэв-зэв öтамöд бердö Настя да Колька, кöть и мам да сойес дырни нывка эшö полiс кодь, эшö эз жмитчы зонка бокö, эшö стыдитчис, мыля вылас паськöм нятьöсь, важ, косяссьöма. Но жöник смела кинас жмитыштiс невестасö, быдöн одзын окыштiс, и вöлись быдöнныс вежöртiсö, что Колька былись эд гöтрасьö, что Настя сэсся гортö оз ни мун. Сойеслö ковсяс öтнаныслö котöртны посёлокö, бöр пырны вöр коласö. Катялö да Оксаналö жаль вöлi сойныс, нiя öдззисö горзыны, пызан сайын горзыштiс и невеста, но чожа быдöс лоис бур, нельки нывкаэс сералыштлiсö ни да панялiсö, мый вöлi бекöррезын.

Кад лэбзис — асыв дженыт: эзö ештö пöттöдз сёйны пызан сайын, кыдз öшынöт видзöтчис ни шондi, бригадир ни бедьöн торскöтыштiс öшынö да висьталiс, кинлö и кытчö мунны уджавны.

— Ме муна жö! — жöникыс бокись перыта бы чеччис Настя и котöртiс быдöнныскöт уджавны, но Колька кутiс, жмитiс кисö да висьталiс:

— Кытчö тэ?! Шоччисян öтiк лунсö да вöлись! Джоджсö кöть луннас миськалан, то оз туй пырны ни, сэтшöм нятьöсь.

— И миянöс кытчöдзкö кольлалан, — висьталiс Катя, кöда чужöм вылын тöдчис ни гаж, кöть синнэс горзöм бöрын вöлiсö гöрдöсь.

Шынньöвтiс Настя, жмитчыштiс жöник бердö. Öпим нюжöтчыштiс да окыштiс моньсö, шуис: «Кристос тiянкöт, кагаэз! Олö бытшöмика, мед отир эзö пондö серавны», — и пиньöвтчис öмыс, пондiс горзыны, синваэсö чышкыны йöрнöс соснас. Инькалöн медумöль оланыс мыччисис синнэс одзö: Öльöш кыдз бы пырис керкуас да юалiс, мый ни керöны, синнэс одзын гробын пондiсö куйлыны айыс, мамыс, Лёнька зоныс и медучöт кагаоккес, кöдна немымда эзö ештö овны, но мамлö вöлiсö öтмоза жальöсь, кыдз и Лёнькаыс жö.

Горзiс бы пöттöдз Öпим, но некöр вöлi горзыны: соседка öшын увтын ыкöстiс: «Öпим! Лок ни мунамö уджавнытö! Талун эд кыкöн быдöн сьöрись кольччимö ни».

— Ась, — синваэсö чышкис инька. — Луныс кузь, пöттöдз ештамö уджавнытö.

Петiс гортсис Öпим, мунiс уджавны, а Колька талун дышöтчис гортiсь мунны, кыскис кадсö, ниртчис том инь бокын. Сэтчö посöдз дынö локтiсö сельсоветсис пред да районiсь уполномоченнöй. Кинкö ештöм висьтавны ни, что татöн эмöсь гöссез. Предыс ыкöстiс:

— Эй! Кытшöм тiян талун праздник?! Одö я мый я мунö уджавнытö?! Видзöтö менам! Эшö Кокольсис локтöмась пö öнджаэс. Ме нылö мыччала, кытöн пышшавнытö!

— Мый тэ, Иван дядь, мыччалан бы нывкаэслö?! — посöдзö чеччöвтiс Колька. — Гöтраси ме талун, вот!

— Кылiм ни! — öмсö пильтыртiс сельсоветсис пред, вырснитiс дульсö, курччöвтiс веськыт чуньсис гыжсö, юалiс-кивзыштiс. — Кин тэнö сосланеччес вылö тшöктiс гöтрасьнытö, а?! Ме тiянлö!

— Дугды, Иван Петрович, — рамыника горöтчис уполномоченнöй.

Сiя вöлi Иван Петровичся кузьжык мыгöра, чужöмыс вылын тöдчис, что морт абу лöг, душаыс кодя, рам мортыс, и синнэс шыннялöны, тöдчö, что абу варыш кодь, весись оз кокышт, некин вылö эмись и абуись пон моз оз вувт. Видзöтiс Колька вылö да шуис. — Мый тэ модян, Иван Петрович? Мый нö томмеслö керны, ежели озö пондö гöтрасьны? Этö эд ми тэкöт...

— Гöтрась да не эта вылö бы! — Иван Петрович нач бледöтiс.

— А мый сiя? Не морт я мый я? Кытшöм эшö, бат, морт! Кытшöм бура эшö, бат, и пондасö овны, ха-ха!

Иван Петрович сьöвзис, бергöтчис и иньдöтчис сельсоветлань.

Колька пырис керкуö.

— Кин сэтчин ыксö? — Настя юалiс мужикыслiсь.

— А... — кинас öвтыштiс Колька. — Понным тай гавзö.

30

Шонытöсь вöлiсö гожумыс и арыс. Вöрын сымда петiс тшак, что мунан и тальччыны некытчö. Ыббез кыдз бы вывсиныс чöвтiсö ни бур паськöм, лöсьöтчисö тöвйыны лым увтын. Ыббес вылын сулалiсö шороммез, гуна вылын ой и лун сярзис тарабайка.

Öпиммезлöн уджалiсö колхозын куимöн ни, лун и ой томмес кодьöн гортö эзö и пыравлö: луннэзнас ыб вылын, ойезöн гуна вылын тöлöтчисö да вартiсö.

— Эх, Настя, шоччисьыштны кöть бы öтiк лун. Вöрö бы тшакла котрасьны, — Коля одз асылöн нюжласис важ кровать вылын, эз бы и чеччы. Но мамыс пондiс модьны:

— Зон, котрасин бы тшакла, ме бы тöв кежас солалi.

— Кытшöм тшак?! — кивзыштiс том мужик.

— Мый нö тöвнас пондамö сёйны?

— Чеччы, дыш кучик! — Настякöт уна он баит: мужик вылiсь кульыштiс шебрас, коккезöттяс кыскис кровать вылiсь. Том гозъя одза-одз, пемыт сорöн котöртiсö матiсь вöрокö öктыны тшак.

Асылыс кымöра. Карзiс рака, кыдз öшöма да гортсö оз адззы и лэбзис-карзiс. Кытöнкö бобгыштiс тар и лöнис.

Томмез локтiсö вöр дорö, муныштiсö видзок вылöт и сэтöн...

— Колька! Видзöт жö, рыжыкыс мымда быдмöма! — Настя мышкыртчис и пондiс ведраö öктыны рыжыккез, кöдна лёдзöн-лёдзöн быдмöмась видзок вылö.

— Ме думайтi кульбуккез, — Миков ниртчис иньыс дынын, пельпон пельпон бердын.

— Эн сэтöн кот моз ниртчы, а öкты тшаксö! — Настя баитiс мужикыскöт, мышкырасис, юрсö эз и лэбтыв, тэрмасис, кöр колiс чожажык бертны гортö да мунны уджавны.

Югдö дыша. Вöр вылiсь эшö киссьö лист, кöда етша ни пуэз бердын. Ру кöдзыт ни. Гора вöр.

Настя мышкырасис-мышкырасис, веськöтчис, сувтiс и повзьöмöн мужикыслiсь юалiс:

— Колька! Мый кылö?!

— Ошыс! — сералö Миколыс.

— Кытшöм ош эстöн вермас лоны? Видзöт, туй вылöт кытшöмкö мужик нинкöммезнас кытчöкö шлопöтö и сьылö.

Туй вылöт былись Шаламлань топöтiс Киршинiсь Фёдор, кöдö Миков ылiсянь тöдiс мыгöр сьöртi и иньыслö висьталiс:

— Меддона ёртö оз я кытчöкö питкыльт. Видзöт, кыдз мунö! Мороснас пыкö русö, бытьтö оз тöр туй вылас, киэзнас, кыдз аньборддэзöн, öвтö, бытьтö кинкöткö тышкасьö. Но и Фёдор дядь! Кытiсь и мый сы одза кошшö? Вот кинлöн медбур олан: озö тшöктö не уджавны, не тшакьявны. Меным бы сiдз!

— Мун, вöтчы! Кин тэнö ме дынын видзö? — серöмтчыштiс Настя.

— Кытчö ни ме тэ дынiсь торйöтча, чикись! — Коля жмитыштiс иньсö морос бердö.

Югдiс öддьöнжык. Гортланьын пондiсö кывны инькаэзлöн голоссэз. Фёдор мунiс-мунiс да ыкöстiс сьывны ассис медбур сьыланкыв, кöдö Колька кывлiс ни мужиклiсь, кöр öтлаын гортö локтiсö Кöсiсь.

Ой, да миянлö овны лоис дзескыт!

Ой, да няньыс эз ло чöскыт!

Пöдтö-зэлöтö лёк закон,

Ой, да видö вон, и пурö пон!

— Смев, бес! — серöмтчыштiс Миков. — Мöдiк бы этатшöмсö öмсис эз лысьт лэдзны, а Фёдор дядь сьылö — вöр öмнас паськöтö. — Смев, — сьöкыта ловзисис Настя, гусьöнжык баитiс, мед некин эз кыв, кöть и вöр дорынöсь. — Миянлiсь öммез озö лэдзö осьтны, а кинкö сэтшöма сьылö.

— Мед сьылö. Мый тэныт. Öмыс эд аслас, — висьталiс Миков и кывзыштiс, кыдз лöнь асывся вöрын кылiс сьыланкывлöн говк: гав-гав...

Фёдор чожа саясис томмез одзись, только спина сайись эшö тыдалыштiс тыра котома, кытöн бултыкайтчис бутылкаэзын вина, кöдö мужиклö сетiсö пемыт сёр рытöн сельсоветын. Винаын вöлi сорлалöма онмöсьтан лекарство, кöдö аслас ёрттэзкöт юас Курай, онмöссяс кытöнкö вöрын банда, сэтчö локтасö солдаттэз и кöрталасö пышшалiссесö. Сымда и эм — басни оз ло, то гожумбыт вöтлiсьöны пышшалiссез сьöрын, но кутны некыдз озö вермö.

Командир Зеленин надейтчис Фёдор вылö, сiдз кыдз тöдiс, что мужик медодз гардчис пышшалiссескöт, а талун мöднёж ни тальччис, кöть и вöрын олiсь ёрттэслö бытьтö бы одззамоз новйöтiс сёйны и юны. Вузалiс, сiдзкö, мужик ассис медбур Курай ёртсö, но кытчöдзкö эта йылiсь Курай нем эз тöд.

Асылыс дзугылясис. Омöн юр вевдöрын öшалiс кизерик кымöр, и сэтöн сiя мурзьыштiс, югйöвтiс чарньöлöн, тучки-пачки зэрмыштiс и дугдiс.

Фёдор кокнит да гажа думаэзöн оськалiс Шаламö, медодз думаэзнас пантасис ни аслас сваткöт, кöда, натьтö эд оз видзчись сiйö. Да и сватьяыс оз пöжав пирöггез да тупöссез, кöда надз, асныра, лёк, Фёдорсö оз радейт, синнэзнас бы оз адззы. Но мужик сёравно вовлö сваттэзас, кыдз шуöны, синнэсö куньö да пырö, бытьтö оз кыв и оз адззы, кыдз панталöны. Талун локтас, пырас кыз сватьяэзас, осьтас керку ыбöс и бакöстас пороз моз:

— Ёлки зелёные! Кыдз ни олат, сваттэз?! Ме, видзöтö, важын ни эг вовлы, а талун, мыся, кежала, видзöта, мый ни кератö. Вывтi ни тiянтöг лоис гажтöм.

Сватьяыс будзгыльтчас, кыз бöрнас бериньтыштас одзöттяс, пишнитас нырнас, топнитас кокнас и петас керкусис да öшас, бытьтö карта вылын пондас бергавны пода гöгöрын. Сэтчöдз бергалас карта вылын, что мöдiклöн мыла бы бырас пукавны да видзчисьны, кöр хозяйка пырас да кöть юанöн юкталас. Мöдiк Фёдор местын оз понды видзчисьны, кöр сватья ваяс юны, а Фёдор видзчисяс — кык ой пуксöн узяс лабичын, но видзчисяс или лöсьöтас басни сваткöт, кöда иньыс кодь жö дзугыля, сэтшöм жö чорыт, надз, лёк, только мыгöрнас кöсыник и етша басниа. Но Фёдор пондас ырбыльтны-ошкыны хозяинсö, что сiя мортыс Шаламын мед ни кодя, ылöса, прока, вежöра, мый бердö кутчисяс, сiйö и керас. Сватöс только колö кужны ошкыны! Кыдз ошкан, сiдз сiя тэкöт и баитас, сiдз и панталас да кольлалас. Кыдз пондан öмнат изны кодя басни, хозяин ачыс комись туистыр ваяс юан, пондас жöдзны да иньсö видны, мыля дыр оз пыр карта вылiсь. Сiдз видас и шуас, что кöть пеллез тупкав, синнэз эн осьт, керкуись пет, а Фёдор пондас шыннялыштлыны да юрнас гогинявны и кыввез чапкавны: «Сiдз, сват! Мый бы тэныт, ёлки зелёные! Нiя эд... Эна... Вижлоккес, видзöт, олансö соровтöны! Но и ась, мед кучиксиныс петöны, чожа оланыс овсяс! Овсяс, ёлки зелёные!» Или мый? Натьтö, талун Фёдор уна оз понды баитны, пырас сваттэзас, горöтчас:

— Лекарствосö бöра эд вайи. Натьтö, тшакьялiссес метöг шогалiсö ни, горшныс косьмис, ась свокоту юыштасö! Одзжык лöсьöтчи, да, видзöт, мый петiс... Кинкö, натьтö, чушкалiс! Кытшöмкö пон юрлöн лöг ме вылö петiс и норасис милицияас. Нуöтлiсö, видзöт, гортiсь. Но мед... Ме эд Фёдор, ме ышö кöть кинöс, ёлки зелёные, этö кера! Мекöт куш киöн, батя, он кутчись! Шедас кö, враг, пантасяс кö, пон юр, пондас тöдны, кыдз ме вылö бöрöн кайны, юрсö мургыльта понлiсь!

— Мургыльтны и колö! — висьталас Васька Петра, кöда олö и тöдö, мый керны, бытьтö бы колхозö жö пырис, но сэтшöмсис колхозникыс, кыдз баранiсь вурун, шырнытö нем, сiдз кыдз гортын бараныс только луннэзнас, а ойезнас пышшалö — вöрын öвтчö. — Мый меным колхозыс? Эм кöть абу öтласа уджыс, ха-ха. Ась гöвмöммес уджалöны, кöть эд мымда уджаласö, сё пондасö тшыгйöн кувны, а ме, слава богу, видзöт, сват, кыдз ола! Нянь пызан вылiсь эшö эз бырсьыв, быгья юан эшö юа, и паськöмоккес эмöсь да абу бырöмöсь, сiдз эд?!

— Сiдз, ёлки зелёные! — сватсö ошкас Фёдор. — Кужан овнытö, да мыля бы няньсö не сёйны и бур паськöмсö не пасьтавны! Ме тай видзöт...

Фёдор сватыслiсь öдззöтас баснисö, видзöтас, кыдз олö Петра. Тöдö, что пызан вылын пызандöра кыйöм и вурöм не иньнас, а мырддьöм богатöйлiсь Васькинаын, важ кровать вылын öныс бöра жö абу асланыс, не ас киöн кыйöма, а гусялöм жö. Пызан вылын пань и бекöр, сунлабичын гырниччез, гор одзын чугуннэз, нельки посöдзын гыр и стенаын öшалан пестер, лабич увтын чер — быдöс Петра сватлö шедiс, кöр ойезöн гусясьтöн ветлöтiс Курайкöт. Ёна сватыс сыналiс отирсö, но ошшасис, что быдöс сылöн эм аслас, ачыс керис. И колiс бы висьтавны, что Петра гардсис бандакöт но эз шед. Эта понда мортсö колiс ошкыны.

Талун одз асылöн Фёдор шагнялiс Шаламö, бытьтö бы мунiс сват ордö гöститны, кöдалöн бытьтö бы талун чужан лун, бытьтö бы Петрика керöма сур, сысъялöма шоныт ырöш, пуöма яя шыд, пöжалöма пирöггез да тупöссез: сёй, ю да ошшась сыбöрын, кöр сёян-юансö он пешлы, сурсö он ю. Пыралан керкуас да петан и — абу, но отирлö колö висьтавны мый абу, мед эзö пондö мыйкö думайтны сэтшöмö, мед эз адззись бöра кинкö пон чужöма да эз норась, что Фёдорыс эд бöра пышшалiссес дынö тыра котоманас котöртö.

Демидовö мужик локтiс, кöр нач ни югдiс, отир сьöрсьöн-бöрсьöн мунiсö ни уджавны. Лёк поннэз уськöтчисö мортсö пурны бы, да асьныс боккезаныс сёйисö беддез, и морт-мöд былись юалiсö, кытчö сiдз тэрмасьö-мунö.

— Ёлки зелёные! Важын ни Петра сватö дынын Шаламас эг вöв, да инькаö вашöтiс тай. Шуис, медбы котраси, видзöтi кыдз ни сватö олö, а веськыта кö висьтавны, руч чужöмаыслöн талун нимлун, и мыся, ёлки зелёные, оз я кöть сурöн юктав или шоныт ырöшöн гöститöт, да ог тöд, мый лоас. Надз эд руч чужöмыс, бат, порог дорöдз оз лэдз!

— Сiя сэтшöм! — сералöны отир.

— Ась, ёлки зелёные! Менам ручыс сур вылö горшö оз косьмы. Ме бöра сöта Курай вонö дынö вöрас, сыкöт вöлись юыштамö и сёйыштамö. Курайлöн тырмö вина и сёян!

Отир синнэзнысö барöтöны, öммезнысö осьтöны и озö тöдö, мый сэтчö висьтавны, веритöны и озö Фёдорлö, кöда быздö пыр сiйö, мый колö и оз ков — лад абу морт басниын.

Талун Фёдорлö некин эз верит, что вермас мунны Курай дынö луннас веськыта деревняöт и эшö спина сайын кыскыны тыра котома.

Фёдор Демидовын быдöнöс бöбöтiс, емтöг и сунистöг вурис-баитiс, ас кежас сералiс арттöм отирöс, чожа пондiс кайны керöс вылö моз, кытчö поздiсьöма Шалам. Васька Петраэзлöн ыбöс вöлi пöдана. Бурундук вылын куйлiс да рюксышалiс порсь: лыэс гер, гöныс спинаыс вылын — зу сулалö; посöдзын куйлiс порсьыс кодь жö пон: не кулöм, не ловья, ловсö кыскалiс, вувтыштiс бы, да голосыс сибдiс. Фёдор быд вынсис брынгис порсьлö, бедьöн вачкис понлö, кулакнас жвангас öтöрись ыбöсö, ыкöстiс: «Ёлки зелёные! Эм али абу кинкö керкуас?!»

Дыр мыйись керкуись петiс да осьтiс ыбöс хозяиныс: нырыс векнит да кузь, синнэс сингуэзас вöйöмöсь, чужöмыс векнямöм, вылас паськöм öшалö — лы да кучик мортлöн, пиннес гер и жергö:

— Мый вöрдядьыс кыскалö? Пыран бы, ыбöссö жугдан!

— Э, сват! Тэ мыля нö сэтшöм лоöмыт, ёлки зелёные? — Фёдор Петра вылö тусь эз лöгась, пеничайтiс.

Пырисö керкуö. Керкуын шöм дук. Джоджын ёг, нять.

— Кин сэтчин?! — комсянь кань голосöн кивзыштiс хозяйка, ловсö кыскалiс, кыдз кувны лöсьöтчис, кыз яйыс нач лязiс.

— Одö я мый я талун уджалö? — юалiс локтiсь.

— Шогалам кыкнанным, — нырнас вирскыштiс Петра, думайтыштiс да содтiс. — Бригадерыс бедьöн бы вашöтö уджавнытö, но ме сылö висьталi, мыся кыкнанным вир мытöн шогаламö, но сiя и öшис, кыдз биись повзис да пышшис, хе-хе, — вöлись öтiк öм угöвнас шынньöвтiс мужик.

31

Фёдор лунйис Петраэзын, гульк вина эз ю, быглясис западня вылын, ружтiс. А кöр луншöрнас Петра петiс садникö, чеччис западня вылiсь, шагньöвтiс комö, няпыртiс кыз яя сватьясö, жмитiс, пыма окыштiс и пöрöтiс джоджас.

— Тэ мый, тэ мый, Фёдор? Мый висьталас Петраыс?! Юрöс эд кералас!

— Нем эн шу, ёлки зелёные! Петраыт кытчöдз садникас нёджжасьö, ми тэкöт окасям-керам.

Павжунöн вердiсö медчöскыт сёянöн, топ былись Петралöн вöлi талун нимлун. Ужнайтiсö тожö бура, юыштiсö винаок, кöдö хозяйка талун эз жалейт Фёдорлö, и вöлись асывнас одза-одз, кöр эшö öтöрын дзирс пемыт, эшö Шаламын поннэс эзö вувтö, петуххес эзö китсасьö, эшö лысва вывтi кыза эз усь му вылö, Фёдор да Петра гусьöн петiсö керкуись, метырнитчисö логлань, сэтöн вöлись видзчисисö, кöр югдас да пондас тыдавны коккезныс увтын.

Лунлань лэбзисö да кривзiсö туриэз. Кык мужик лог пöлöн мунiсö бöр Демидовлань моз, гусьöн бы мунiсö, но сiдз эз пет: Петра сiйö и керис мурзис-видiс Фёдорсö, то мыля мунö чожа, то мыля вöв моз буткöтö-тальччö быд шагын, то мыля ружтö-лолалö.

— Мый тэ модян, ёлки зелёные?! — медбöрын лöгасис Фёдор. — Öмат эд зарга кулакöс!

— Ме тэныт аслыт зарга!

«Вот страм! Кыдз сэтшöмыскöт овны? Ме бы сваттяö местын тэнö ванас эг юктав, — Фёдор думайтiс сват йылiсь, сералыштiс думаэзнас. Сватьяыс топ сё сулалiс одзас да гажöтчис, натьтö, бöра видзчисис Фёдорсö. — А мужикыс эз я казяв иньыслiсь Фёдоркöт любитчöмсö? Бат, сiйöн быд шагын и эрзiс, кучикас эз тöр, но и ась. Сiдз сэтшöмыслö и колö».

Мунiсö кык мужик вöрöт, лог дорöт, умöль местаöт, кытчö гожумöн и пода оз пыр, мунiсö, öтамöдныс вылö эрзышалiсö, сiдз локтiсö Якимыб дорöдз, пырисö тшöк рас коласö, сувтчисö, кывзiсьыштiсö, видзöтчисö.

Фёдор вишыкасис кыз нырнас, гусьöнмоз шуис:

— Некин тай оз кыв и оз тыдав.

— Тэ моз жö озö эд пондö быздыны, — карзыштiс ёртыс, юрсö бергöтiс мöдöрö.

— Но тэ и сват! Но тэ и пон юр. Кыв дынат он лэдз. Вöрас ни бы он тöр, — Фёдор пишнитiс нырнас, жонь моз жевгыштiс-шутньöвтiс.

Öтöрсянь былись паныт шыасис жонь, и мöдöрсянь жевгыштiс бöра жö жонь, но шульгаланьын жоньыс бытьтö бы не кай моз шутньöвтiс. Сэк Петра шыасис уркай моз, кöть таво гожумбыт и арнас öтiк уркай эз лэбав. Сэк жö паныт притькыштiс уркай. Фёдорлöн нырпыссэс польдыштiсö, синнэзас öзйыштiс лёк югöр, кыдз каньлöн шыр одзын.

— Локтö татчö, — вöлись кань голосöн шыасис Петра, и асьныс иньдöтчисö ни сыланьö, кöдöрын кылiсö кайезлöн шыэз. Мунiсö сiдз, что коккез увтын öтiк кöс улок эз тачнит, эз кышöтчы вöр вылiсь киссьöм лист, кöда вылын дзöлк видзис лысва.

Нырö павкис тшын дук. Кöр локтiсö пышшалiссез дынö, шондi лэбтiсис ни кöз йыввез вевдöрöдз. Пышшалiссес пукалiсö шоч кöзъяин — пес керанiнын, пукалiсö да суналiсö, кöдна куритiсö. Курай куйлiс лапья кöз увтын, локтiссес вылö эз и видзöт, бытьтö эз кыв и эз тöд не Фёдорсö, не Петрасö, бедёкöн гуддис одзсис биокись шоммез. Курай вöлi не том и не пöрись, кöдалö уджавны да уджавны бы, орсны да овны бы, а не шатласьны вöррезын.

— Ёлки зелёные, сьöкыт вöлöма котомаö, чисто пельпоннэз кыскис, — би одзö спина сайись Фёдор гышкöптiс котомасö.

Курай вöлись руд синнэзнас кымöс увтöт видзöтыштiс Фёдор вылö, син югöрнас кыдз бы бытшкис веськыта синкагаэзас, мыйсянь мöдiк бы повзис, но только не Фёдор, кöда синнэзнас кваркыш эз кер, видзöтiс веськыта, юалiс:

— Кыдз нö метöг олатö? Натьтö эд, тшыгьялiтö и горшшезныт косьмисö.

— Уна ни тай тшыгйöн кулöмась, — Курай öзтiс чигарка да пондiс куритны, видзöтiс аслас виль сапоггез вылö, кыскис табак тшынсö раз-мöд, юалiс:

— Но мый, Фёдор?!

— Мый?! — кокнита шыасис мужик.

— Ачыт поннэс дынö котрасьлiн, или кутiсö да нуöтлiсö?

— Тэ мый, ёлки зелёные, Иван?! Ачым юрöс эг жö поннэслö вузав бы! Менö кинкö вузалiс! Кытшöмкö страмлöн юр висьöм. Шедас кö, б..., юрсö мургыльта!

— Эге-ге, Фёдор! Кин ми и шедамö одзжык! Кыдз вот мезмин комиссаррес дынiсь?!

— Кыдз мезми, ёлки зелёные! — мужик веськыта видзöтiс Курай вылö. — Мезми тай... Ёна жö пывсьöтiсö боккезöс, невна эзö вийö, но мый менчим босьтасö? Тöдан ме кытшöм! Öмö весись оз резьды.

— А кыдз резьдас? — чигаркапон Курай швыргис би вылö. — Кыдз резьдан, Фёдор, эна пуэс вылын, кöр бöрöн öшöтам кык пу йылö, лэдзамö нiйö, и нiя тэнö резьöтасö. Кыдз думайтан?!

— Öшöтö, ёлки зелёные, ежели ме мыйкö тiянлö умöльö кери! Сэтчин и туй!

Фёдор да Курай горöн эзö баитö, но пышшалiссес лэбтiсö юррезнысö, быд кöз увтын кывзiсисö, киэзаныс видзисö пишаллез. Пу уввез вылын дзöлк видзис лысва, кöда вотялiс му вылö. Жексис жак, кокасис кыр. Чискис-öгралiс неыджыт биок.

— Мыйкö вайин? — Курай би бокын бергöтчис бок вылiсь бок вылö.

— Мыля жö ог вай, ёлки зелёные?! Быдöс, мый колö вайим, да етша, — Фёдор мышкыртчис да пондiс пöрччавны котомасö.

— Тырмас! Мымдаöн дöнзяс, сымда и юамö, — би вылö сьöвзис Курай, веськыта видзöтiс Фёдор синнэзö.

Мужик бытьтö бы немымда эз пов бандиттэзлiсь, кöдна сылö вöлiсö тöдсаöсь, öтлаын сёйлiсö-юисö, вöррезын ветлöтлiсö, магазиннэз петкöтлiсö и эшö керисö öтiк-мöдiкö сiйö, мыйöн некин и некöр оз понды ошшасьны, некин оз понды тöдны, ась кöть öнi жö лыясö кымöсаныс. Фёдор бытьтö смела видзсис вöрын олiссезкöт, но сьöлöм тёпöтiс, топ сiдз сiйö былись бöрöн öшöтасö пуэз вылö, и овсяс оланыс.

Фёдор котомаись кыскалiс винаöн тыра бутылкаэз, сувтöтiс нiйö би бокö, эта коста Курай видзöтiс мöдöрö, синнэс вöлiсö кöз уввезланьын, кытöн öшалiс öддьöн басöка кыйöм чераньвез. Сы вылын бисерöн öшалiсö лысвалöн поснит воттез, и черань одза-одз асывсянь мырсис гут дынын, кöда кышасьöма кыйсянö. Пышшалiссеслöн командир видзöтiс, видзöтiс чераньвезлань, серöмтчыштiс да шуис:

— Фёдор, кöркö эд миянöс эта гут моз жö кутасö.

Фёдор дрöгнитiс, топ бöрсяняс вачкисö шатьöн, но сэтöн жö вежсис, серöмтчис, кыдз вöв гöрöктiс:

— Ёлки зелёные! Иван, кин миянöс кутас?! Ась пондылöны! Бат, асьныс шедасö!

— Мый тэ сiйö, командир, талун баитан? — Курай дынö локтыштiс Гришкинiсь Семён да горöтчис сiдз, топ мортсö дойдiсö. — Ми не я тэкöт öтлаын вöрас одзза луннэзсянь, да этатшöмсö тэсянь эг кывлö.

— Сьöлöмö мылякö талун менам висьö кыдз. Думаэзö гажтöмöсь. Натьтö, умöль вöт вöтаси...

— Ёлки зелёные! Адззöмыт вöттэз вылö видзöтны. Гардас вöтыс мый оз ков. — Фёдор пондiс осьтны бутылка, пиннезнас кажнитiс сургучсö, сьöвзис.

Курай сё видзöтiс кöз ув вылö, кытöн мырсис черань, гардiс гут гöгöрö чераньвез. Ув вылiсь веськыта синас вотьыштiс лысва. Командир чышкис синсö, кымöс увтöт лöга видзöтiс Фёдор вылö, кыдз аслас лёк враг вылö, пиннес пыр висьталiс:

— Медодз юан ачыт. Эн я бутылкаас яд вай!

— Тэ мый, ёлки зелёные?! Кытшöм яд вая? Мылякö тэ, командир, менö эн понды радейтны.

Курай ружтыштiс. Фёдор бутылкасö чатыртiс öм весьтö, юыштiс, ружтыштiс, чорзьöм-вартчöм кулакнас чышкис öм гöгöрсö, корис куритны.

— Эй, банда! — Курай ыкöстiс ёрттэслö, и кин да кысянь и петiсö биок дынö, öтлаö чукöртчисö дас-мöд мужик, пуксисö биок гöгöрö, вишыкасисö, вöлiсö нiя кöдна тошаöсь, кöдна тоштöмöсь, кöда том, кöда пöрисьжык, кöда рожасö миссьöма, кöда абу, кöда буржык паськöма, кöда бырöм запона, нинкöммезöн. Отир-мужиккес, кöдналö колiс бы паз керны-уджавны, узьöмась вöрын сэтчöдз, что синнэзныс гöрдöтöмась, пыктöмась. Нiя тшыг поннэз моз уськöтчисö юны вина, и öтiк морт эз касьтыв гортсö, удж, семья йылiсь, некин мылякö эз шыась, а жаднöя видзöтiсö бутылка вылö, ньылалiсö дуль.

— Весь олiссез! Уджавнытö одö кужö, а винасö юны верматö, ёлки зелёные! — Фёдор пондiс серавны мужиккесö. — Ме бы тiян местаын, тöдат, мымда арнас вундi, э! А тi, э!..

— Кисьтлы, а эн сэтöн пиннетö вузав! — висьталiс Курай Фёдорлö. — Адззисьöмыт уджалiсь вина да нянь дорын!

— Ёлки зелёные, Иван! Ме эд серала жö, гажöта бы мужиккесö. То, видзöт, мылякö нiя талун асывсянь юррезнысö öшöтöмась, — Фёдор бутылкаись саöсь кружкаö буль-боль кисьтiс винасö, нюжöтiс командирлö, шуис. — Ю, командир. Ачыт кодя жö овлан.

Курай Фёдор киись босьтiс тыра кружкасö, но сэк жö эз ю, зубыта видзöт-керис веськыта Фёдор синнэзö, кöдалöн синкагаэс дрöг эз керö, пондiс котомаись эшö кыскавны бутылкаэз да тэчны одзас.

— Сёйтöг юнытö оз лöсяв. Вайин я няньсö?

— Нянь... Тыр миян сёяныс! — вöлись синнэсö мöдöртiс Курай бöрын Гришкинiсь Семён, кöда бытьтö эз тыдав, но командиркöт эз янсöтчывлы.

Вöлись юис командир, öмас заргис нянь да лук, пондiс изны пиннезнас. Фёдор сэк жö кодззыштiс, пондiс унажык баитны, бöра пондiс ошшасьны, что быль шедлiс милицияö, нуöтлiсö Кöсöдз, сэтчин вартлiсö кыдз, чисто спинасис кучиксö шöралiсö, кыдз нинкöм шуллез, но терпитiс, ёлки зелёные!

— Ёлки зелёные, командир, заргылiсö менö кöртiсь керöм шкап пытшкö. Быль! Кыдз сюйыштасö шкап пытшкö, сiдз не пуксьыны, не сулавны, не вöрзьöтчыны, и жар, топ баняын, ловзисьны немöн. Мыся, этö кера ни, кула ни, натьтö, ёлки зелёные!

— Тэ етшажык баит да унажык уджав! Он адззы, отир юöны бы! — Курай öмалiс Фёдорсö.

— Ештасö. Юасö, ёлки зелёные! — мужик бöра бутылкаись винасö чольскöтiс кружкаö, эз вунöт юктавны и Петра сватсö, кöда сулалiс зэв да ньылалiс дульсö: кузь, векнит голяас бура тыдалiс, кыдз катыкыс ветлiс увдöр да вевдöр.

— Ю, сват, — Фёдор юкталiс сватсö. — Тэ эд менам медкодя сват, кыдз локта тiянö, сiдз менö гормöччаннас и öбралан бы, хо-хо! Петра шы эз сет, босьтiс сват киись стакансö, чатыртiс и — абу.

— Эшö кисьтышт, — Курай висьталiс Фёдорлö, одззалiс бы юны быдöнся медодз.

Мужик чольснитiс винасö кружкаö, пондiс видзöтны командир вылö, кöда сэсся нем эз шу, босьтiс кружкасö, юис, чатыртiс юрсö и бöра пондiс видзöтны кöз ув вылiсь чераньсö, кöда сё мырсис гут дынын. Видзöтiс командир сы вылö, юрас орсiс ни вина, лоис кокнитжык сьöлöмлö, висьталiс горöн:

— Ох, черань! Но и черань. Тэ моз и овсьö эд: быдöн бы öтамöдсö кыйö, везö гардö да сёйö, кин кинöс вермас. Вот гуттö сёян, пöтан лун-мöд кежö и олан, а сыбöрын мый? Миян моз жö пондан вöрас öвтчыны, кытчöдз нач оз кöдздöт, оз усь лым. Но, öнджа! Тэ, гаг, а ми абу гаггез. Ми эшö коммунисттэслö мыччаламö! Нiя уна ойесö эшö миян весьтын озö узьö. Сiдз, Фёдор?!

— Сiдз, командир, ёлки зелёные! — Фёдор уджалiс: кружкаö кисьтлiс вина да юкталiс мужиккесö, кöдна сьöрсьöн-бöрсьöн локтiсö вина юкталiсь дынö, босьтлiсö кружка, юисö, бöр вешшисö, котомаэзiсь нятьöсь киэзнаныс кыскалiсö няньторрез, курччалiсö да жаднöя ньылалiсö.

Фёдор юктасис и эз казяв, кысянь да кöр Курай дынö локтiс иньыс. Сiя пуксис бокас, малыштiс долоньнас рожабансö, юрбитiс, босьтiс нянь да луккез и пондiс сёйны, юрнас зэгнитiс, кöр инькалö нюжöтiсö винаöн кружкасö, кезöтiс винаыс.

— Кытöн нö пирöггет? — Курай юалiс иньыслiсь.

— Сэтчин, — гажтöма висьталiс инька, юрнас öвтыштiс бöрланяс, чеччис, кытiськö кöззэз увтiсь ыджыт чумантыр вайис пирöггез да тупöссез, пуктiс мужикыс одзö.

— Вот менам инькаö кытшöм! — Курай босьтiс пирöг. — Эттшöм инькакöт ме некытчö ог йöрмы, не ог торксьы! — пондiс öмас аклявны сёянсö, кылыс гардсис, баснинас джöмдалiс, шуис. — Фёдор, винаыт талун мылякö топ вынажык!

— Сэтшöм жö, ёлки зелёные!

— Меным мый нö, баля бöжжез?! Вунöтiт тай юктавнытö! — векнит чиння голосöн кöз сайын шыасис мужик — этö слепöй Коля, Шаламись жö морт, кöда учöтсянь эз адззы, öддьöн прокмис орсны гармонняöн, сiйöн татчö вöрас и шедiс, медбы орсны-гажöтны вöрын олiссесö. — Юкталiн жö винанас бы, Фёдор сват, то эд орснытö ог понды кужны.

— Ёлки зелёные, Коля сват! А ме думайтi, тэ винасö он ю, —

Фёдор кисьтiс стаканö вина да чеччис местасис, и ачыс стаканнас ветлiс гармонист дынö, кöда юис, висьталiс спасибо. Сэтöн жö пидзöссэс вылын паськöтiс гармоннясö да сiдз пондiс серöтны-орсны, что быдöнлöн синнэзын пондiс öгравны гаж, только öтнас Курайлöн инь вöлi нач гажтöм, сёйис пирöггез да öшöтiс юрсö.

— Мый нö тэ? Шогалан я мый я? — Курай юалiс иньыслiсь.

— Ог, — пыдына ловзисис инька, видзöтiс кизерик тшын вылö, кöда гардчис одзаныс, лэбтiсис вевдöрö и öшис пуэз коласын.

Мужиккес горöн бобгисö ни ас коласаныс. Гармоння дзикöтiс, дзикöтiс да дугдiс орсны, гармонист эшö пикнитiс: «Фёдор, кисьтiн бы ышö...»

— Но тэнат, сват, и горш. Öтiк кружканас пöтны он вермы, — Фёдор эшö кисьтiс винасö гармонистлö, юкталiс.

Вöр коласöт видзöтчис ни шондi, лоис шонытжык. Косьмис жагвыв лыссэз вылiсь да коккез увтiсь лысва. Лэбтiсис пуэз коласöт кизерик туман. Шыркйисö-лэбалiсö ватшканнэз, быркайтiсö да пиксышалiсö дзеззэз, жевгышалiс жонь.

Юисö мужиккес, кушки-кашки сёйисö пирöггез, чорыт няньторрез, ошкисö хозяйкасö.

Фёдор эшö кисьтлiс вина, невна юыштiс ачыс и юкталiс ёрттэсö, но немымда эз кодззы, дума сёйис: «Мый нö нiя?! Кытöнöсь? Пöрьясис я мый я Зеленин? Пöрьясис кö, мед сэсся оз пантась, ме сылö эг вöв бур ёртöн и ог ло, пантасяс кö, кымöсас пуля лэдза!»

Вина эшö вöлi. Фёдор киас видзис тыра бутылка, öвтiс сiйöн. Сэтчö кысянькö кöззэз сайсянь чеччöвтiс Яраш, кöдö Фёдор эз думайт пантавны татöн, кöр мортсö одзжык эз адззыв пышшалiссес коласiсь. Топыт мыгöра Яраш ош моз берездасис Фёдор одзö, гöрд рожасö пиньöвтыштiс, эрзыштiс:

— Меным колин жö винасö?!

— Эг, ёлки зелёные. Яраш! Одзжык ме тэнö тай вöрсис эг пантавлы, а талун кымöрсянь я мый я усин?

— Кымöрсяняс! — пиннес гер Ярашлöн, сералiс, ошшасис. — Ме мортыс тöдан кытшöм! Сэк эн вунöт. Кисьт, юыштам, то горшö пакмö! Öтнам вöрас котраси, но лоис гажтöм, кöр эшö комиссарлö бузги моросас. Кывсьö, бытьтö пö черпезьдöма. Сiдз сэтшöмыслö и колö, ась ме сьöрын оз вöтлiсь. Кисьт, Фёдор, юыштамö да сьылыштамö.

— Тэ он я он куж юнытö, — Фёдор кружкаö кисьтiс вина и баитiс Ярашкöт. — Ме ог куж юнытö?! Мый тэ сiйö и баитан, сват. Горшö эд быдöн кодь жö, и сьöлöмö юö бы, гажöтчö!

Бöра пондiс орсны гармоння. Кинкö мужиккес коласiсь свистнитiс-шутньöвтiс, чеччöвтiс быдöн одзö и öдззис бырöм нинкöммезнас мыр гöгöрын нитшсö нильны-тойны, пондiс чуклясьны-веклясьны, юрсö зэгйыны. Синнэзас сэтшöм гаж чеччалiс, что некöр бы эн думайт, что эна отир кытöнкö вöрын, что нiйö лыддьöны бандиттэзöн, вöтлiсьöны сьöраныс солдаттэз — талун ловьяöсь, а ашын, бат, тыртасö муö и вунöтасö. Тойис нитш бырöм нинкöммеза мужик, сiдз йöктiс, что сьöрсяняс чеччöвтiсö эшö куим-нёль мужик, сiдзжö пондiсö чеччавны мыр гöгöрын да нильны нитшсö нинкöммезöн и сапоггезöн, сiдзжö синнэзаныс öгралiс гаж, сэтшöм бес нерис и сералiс, что Фёдорлöн öзйис сьöлöм. Сiя ни швыркнитiс-чеччöвтiс местасис, топ лэбзьыштiс ёрттэс коласö и пондiс педзны, жöдзны и тойны мыр гöгöрас, шутнявны, пеллезын чиннис, и ыксыны ош голоснас:

— Их-ох, их-ох, ёлки зелёные! Гажöтчам, челядь, кöр гажа!

— Гажöтчам! — Яраш ряксiс чиння голосöн, кокнита чеччöвтiс вевдöрö, быдöн одзын кыдз бы лэбзьыштiс-бергöтчыштiс юр гöгöрöт, бöр му вылö татш сувтiс, и коккес сё педзисö.

Вöр кыдз бы повзис: лöнисö каёккез, кусiс би, дугдiс жексьыны жак.

Мужиккес сэтчöдз йöктiсö, что чужöммезныс гöрдöтiсö, вир орсiс, пымалыштiсö, пыдына лолалiсö, кыдз бы уджалiсö да мыдзисö. Лöнис гармоння. Гармонист чиння векнит голосöн шыасис:

— Мыдзитö, рыжкоэз! Сiдз тiянлö и колö, госныт весь овтöнняныт оз понды пизьны.

Миковлö кинкö юрыс вылö пелитiс важся-важ багсялöм шапка, кöда гармонистсö пöдтiс, и сiя няргыштiс: «Абу ни отир. Кыв оз туй горöтчыны, сiдз и виятö бы».

Курай кöз увтiсь эз и вöрзьы, пукалiс синнэсö куньöмöн, топ узис. Бокас сiдз жö юрсö öшöтöмöн пукалiс иньыс и мыйкö думайтiс.

— Ёлки зелёные! Винаыс эд, мужиккез, ышö кольччис. Юыштам ышö!

— Кисьтлы. Мый сэтöн-ка?

Фёдор эшö кисьтлiс вина да юкталiс быдöннысö, видзöтiс, кин да мый керö, оз я пондö бы сунавны, и öтiк-мöдiк былись кушкыртчисö ни шондi гаж вылын: кöда пукалiс, кöда куйлiс нитш вылын да кунис синнэсö.

32

Зеленин Чуракись ассис отрядсö вöрö нуöтiс ойшöр гöгöрын. Солдаттэз посадiсь мунiсö вöввезтöг да не утугаöн, а морт-мöдöн, сьöрсьöн-бöрсьöн, этчинсянь да сэтчинсянь, керкуэз дынiсь янсöтчисö, кайисö ыб вылö и вöлись кежисö туй дынö. Чукöртчисö матiсь вöрок дорын, кытöн командир эшö öтпыр висьталiс, мед некин эз тэрмась, эз кызöт, эз несйы, эз баит, мунiс кыдз кань — быдöс ась шогмас сiдз, кыдз эшö баитiс гортын. Медöддьöн Зеленин тшупис Петралö, солдатлö, кöда вöлi вылиддё кодь, колiс кöть эз, асьсö пыр бы мыччалiс, пыр вышитчис.

Петра Петров вылын сералiсö ёрттэс, пыр кеслiсö кыввезнысö. Вöлi сiя учöт мыгöра, кöсыник, синнэс бытьтö учöтсянь повзьöмась-паськалöмась, синкагаэс ыждöмась и сэтшöмöсь, топ зонка видзöтö морт вылö и пыр юалö: «Кутасö кö менö, мый пондатö керны?!»

Сiдз-то чож комсомолец Петровыс, кöть зонкасö ёрттэс пыр сералiсö. Но вот кин бы ойнас öтнас мунас вöрас? Етша кин солдаттэс коласiсь вöрас ойнас котöртас, кöр зонкаэс унажык чужисö и быдмисö городын и ны понда пыд вöр, кыдз гу — усян и он ни пет. А Петра Петровлö только висьтав, только ешты öм осьтны, сiя сэтöн ни чарöтö: «Ме, ёрт командир! Мый тшöктатö керны?!»

— Петров, не вöлöн, не подöн ёрттэт сьöрись некöр эн кольччы, то...

Мый то? А сiя, что Петров öтпыр сёр рытöн Гришкин туйын вöв вылiсь лэдзчис, медбы öтöрасьны. Кежис солдат туй бокö, вöвсö кöрталiс кöзок бердö, ёрттэслö шуис, мед мунöны, а сiя чожа вöтас. Но зонка сiя рытö ёрттэсö эз вермы вöтны, öшис, и ашынас отряд солдатсö кошшис быдса лун, и быдöн ни думайтiс, что Петровлöн овсис, шедiс бандиттэслö. Вöлыс öтнас локтiс Чуракö, но... Солдат локтiс, кыдз бы гуись петöм ош, полöм петö вылас видзöтны: паськöмыс летки-мотки, синнэс нач ыждöмась, мыгöрыс кыдз бы чиныштöма, но шыннялö да ошшасьö. Кöр рытнас ёрттэс сьöрись кольччис да бöр пондiс пуксьыны вöв вылö, Воронко нетшкöвтчис-мезмис да котöртiс вöр пытшкö, хозяиныс — сы сьöрö. Петров пырис вöрас да öшис ветлöттöнняс и узис кöз увтын.

Сэтшöм солдат Петра Петров. Полö сы понда командир, мед не öштыны жö бы зонкасö. Зеленин эз бы сьöрас нуöт Петровсö, колис бы посадö, мед синйис бы вöввез, но кытчö тэ! Вермас я бокö кольччыны том солдат да эшö комсомолец, кöр сiя ёрттэстöг оз вермы овны да эшö кутö бы асьсö Курайсö. Öнi командир пемытiнын ни шушкис аслас солдатлö:

— Тэ, Петров, видзöт! Эн тэрмась! Одзлань эн чеччав! Мунан медбöрын. Вежöртiн, Петров?

— Вежöртi, ёрт командир! Мыля ог вежöрт? Абу ни учöт кага.

Чож Петра Петров, только уна басниа, öмас кылыс кыдз сярган бергалö. Командир öвтыштiс кинас, мыччалiс кулак, но вöлi пемыт и умöля тыдалiс.

Пемытсянь умöля тыдалiс и коккез увтын; но солдаттэз мунiсö туй бокöт и адззисö мыррез, эзö кымöссэзнаныс люкалö кöззэсö, некин некытчö эз падмы да эз усь. Только Петров нырнас öддьöн пишкис, чушкыштiс, бытьтö пельпоннэс вылын кыскис не пишаль, а кöньöс кыза кер.

Ой. Лэбтiсис тöлiсь и пондiс омöн кисьтны золотöй рöма югöр. Коккез увтын кышöтiсö листтэз.

Колiс мунны сэтчöдз, кытчöдз висьталiс локны Фёдор. Одзас отрядсö нуöтiс Яким, кулöм комиссарлöн ёрт. Сылöн бандиттэз вылö петiс лöг, кыдз комсомолецлöн да эшö сы понда, мыля Боталовсö вийис Яраш. Яким эз вöв уна басниа, бура тöдiс горт гöгöрись вöррез, мунiс солдаттэз одзын.

Ой кузь. Ыркыт. Пишкышалiсö-мунiсö солдаттэз, вöтчисö Яким сьöрö.

Колан местаöдз мунны кольччис етша, но одзöв бы... Сё эшö пуэзлöн вуджöррез кузя куйлiсö зэв-зэв öтамöд бердын, сё эшö быд мыр солдаттэзлö вачкисис морт вылö, бытьтö вöрöтчис, и командирныс гусьöн висьталiс, мед эзö тэрмасьö, ась буржыка видзöтчисö öтöрö и мöдöрö.

Югдан дорын ыб вывсянь пырисö тшöк кöзъяинö, понульникö, и дзебсисисö да пондiсö видзчисьны. Вöр эшö узис. Некытöн некытшöм шы эшö эз кыв. Тöлiсь кымöрын нач бледöтiс. Пуксисö солдаттэз кöззэз увтö, пукалыштiсö. Сэтöн Петровлö öлöдзас видзчисьтöг чеччöвтiс лягушка, кöдö солдат кутыштiс кинас, уськöтiс нильыгсö и негорöн шыасис: «Мама!»

Петралö ёрттэс бокас зубыта заргисö кулакöн, и бöра вöрын лöнь, пеллезын чинньö.

Эз-эз да пондiс югдыны. Медодз пондiс карзыны рака, сыбöрын öдззисö быркайтны дзезок да кокасьны кыр. Шоча кöззэз вылiсь вотялiс кыз лысва. Том зонкаэзлöн пондiс петны он, синнэзныс куньсисö, но командирныс бöра мыччалiс кулаксö.

— Чожа ни, челядь! — Яким видзöтыштiс ёрттэс вылö, малыштiс кымöссö.

Чожа баитсьö да дыр керсьö: шондi лэбтiсис ни кöз йыввез вевдöрöдз, сэк вöлись кытöнкö матын бакöстiс-ыкöстiс сьывны, вöрсö повзьöтiс лёк горшнас Фёдор:

Ой, да миянлö овны лоис дзескыт!

Ой, да няньыс эз ло чöскыт!

Пöдтö-зэлöтö лёк закон.

Ой, да видö вон, и пурö пон!

— Ме тiянлö шуи, мыся, топ гармонняöн орсiсö и шутнялiсö, — шыасис Яким, но сiйö некин ни эз кывзы: солдаттэзлöн кыдз бы повзьыштiсö сьöлöммез, чорзьыштiсö чужöммезныс, синнэзын öзйыштiс мöдкодь югöр.

Зеленин öвтыштiс кинас, солдаттэз чеччöвтiсö местаэзiсь, пондiсö котöртны бы, но командир лэбтiс кулаксö вевдöрö, горöтчис «Жагöнжык, челядь!»

Мунiсö кöззэз коласöт — сайласьмöн, мышкырасьöмöн, одзаныс лэчыта видзöтöмöн да сувтчышалöмöн, киэзаныс крепыта пишаллез видзöмöн сылань, кöдöрöн кылiс ошлöн моз ряксöм-сьылöм. Говк паськалiс омöн, вöрзьöтiс ру и дзебсисис вöрас. Кылiс ни кыдз пикöтiс гармоння, кыдз шутнялiсö мужиккез.

— Кытшöвтамö öтöрсянь и мöдöрсянь. Петров, Лесников сэтчинсянь, а тэ, Воронов, мöдöрсяняс да гусьöн, мыся!

Солдаттэз янсöтчисö, пондiсö вöр коласöт кытшöвтны сьылiссесö, кöдна одзаныс кылiсö нач ни матын, чарöтiс-орсiс гармоння, бура кылiс, кыдз мусö тойисö-йöктiсö отир: му буткöтiс, топ вартлiсö нöшöн.

— Но, лешак, — мурзьыштiс солдаттэзлöн командир. — Одзöв эд локтiмö. Абу эд онмöссьöмась. Или этаыс мöдiк винаöн юкталiс, лекарствонас эз гöститöт?

Колiс бы сувтöтны солдаттэсö, дзебсисьны вöрас, видзчисьыштны, но эз ни туй падтыны зонкаэсö, нылöн сьöлöммез öзйисö ни, тэрмасисö ни чеччöвтны кöззэз коласiсь.

Чиння голосöн орсiс гармоння, лёк горшöн ыксiс-сьылiс Фёдор ассис дона сьыланкывсö.

Солдаттэс эшö эзö ештö кытшöвтны пышшалiссесö, кыдз чарöтiс лыйöм шы, вöр косьöвтчис. Зеленин казялiс, кыдз мыр вылiсь таралiс гармонист, öтöрö-мöдöрö чепöссисö котöртны пышшалiссес и öшисö.

Солдаттэс вöлись öтдруг пондiс кропöтны-лыйны, но кинлö?

Некин ни одзаныс эз тыдав. Сэк вöлись лöгасис командир, вöлись гичыртiс пиннесö, матькыштiс да ыкöстiс: «Кин медодз лыйис?!»

Солдаттэс жагвыв чукöртчисö командир дынö, виноватöйöсь, кыдз вартлöм поннэз.

Кöззэз коласöт павьялiс кизерик порох тшын. Шондi кыдз бы видзöтчис да сералiс, нюжласис югöрöн быдöн рожаэз дынö, медбы бытшöмжыка видзöтны веськыта синнэзö.

— Кин медодз лыйис?! — мöдпöв юалiс командир, бледöтöм чужöмыс.

— Ме эг, — шыасис öтiк солдат.

— Ме эг, — висьталiс мöдiк солдат.

— Петров лыйис, — висьталiс куимöт.

— Петров! — нюжвыв горöтчис командир. — Петров, мый тэкöт керны?!

— Вийи эд ме! — юрсö öшöтiс Петров и быдöнныс казялiсö, что мыр бокын былись куйлö гармонист: гармошкасö жмитöма морос бердö, кусiньтчыштöма кык кусiньöн, и кымöс вылiсь нитшö вотялö сук вир.

— Эх, Петров! Судитны колас, — сьöкыта ловзисис Зеленин и Якимлiсь ни юалiс. — Петрович, поди, тöдан кин гармоннянас?

— Тöда. Мыля ог. Шаламись тай слепöй Коля.

— Синтöм, сiдзкö, вöлi... Мый нö сэк керис бандиттэскöт?

— Ме кысь тöда, мый керис бандиттэскöт Коляыс? — серöмтчыштiс Яким, веськыт кинас чышкыштiс кымöссö, кытчö сöдзöма ньылöм.

Кöз вылын китшсис катша, нерис отирсö.

33

Кад эз сунав. Чулалiс гожум, кыдз бы эз и вöв. Локтiс ар. Пондiс лун и ой зэрны, шондi етша мыччисьлiс. Умöль погоддя, но ыббез вылiсь отир ештiсö вундыны сюэз, тэчны шороммезö, а кöдö сэкжö вартiсö. Кольччис босьтны только картов да тöв кежö лöсьöтны-вочны картаэз.

Öпиммезлöн топ пондiсö овны буржыка ни; медодз кокнитжыка овсис Öпимлö, кöда лöсялiс овны моньыскöт. Инькаэс öтамöдкöт каннез моз эзö гыжьясьö, тöрисö керкуö, асыв и рыт кыкöн жöдзисö керкуын, бергалiсö гор одзын да пода гöгöрын. Томмез пыр дзульзисö-баитiсö мыйкö, адззисö басни, топ быд лун öтамöдтöг гажтöмтчисö, сэтчöдз баитлiсö, что асывнас Миковлö дышыс петiс чеччыны, нюжласис бы дыржык. Но кытöн ни сэтöн дыр узьны? Инь да мам то пондасö горöн висьтасьны, кыдз уджалiсö, мый керисö, то öдззасö öтамöдлö ошшасьны асланыс одзза оланöн, сераласö и горзасö, сэк мужик пондö лöгасьны, мукöдпыр висьталас: «Дугдат-одö?! Некöр тiян кузя ме ог вермы узьнытö!»

— Ой-ой, эн пöт, батюшко, оннат. Ойнас бöра мыйкö вöтасин я мый я? Озö я невестаэт бы тöдвылат усьлö? — Настя сибöтчас кровать дынö, мужикыслiсь малыштас юрсö, окыштас рожабансö, висьталас. — Чеччы да отсав мöссö вашöтны, ме сы коста джоджсö миськала, видзöт кытшöм сьöд ни лоис.

— Миськалан да идзас колö ольсавны! Отирлöн идзас джоджаныс и етшажык нятьöсьмö, а тэ быд лун миськалан и миськалан, чожа плахаэс бырасö ни.

— Но и ов! Мый меным? Нятяс буржык овнытö или чочком джоджнас? — ыкöстö-повзьöтö. — Вий таракансö!!

— Кытшöм таракан? — том мужик маласьö-кöмасьö, оз бытьтö адззы таракансö, кöда котöртö джоджöт, сувтчышалö, уссэсö вöрöтö, дзик нюкьясьö мыйкö.

— Вий таракансö!!

— Тэныт мешайтчö, тэ и вий, — Миковлöн аслас басни. Керку сöстöм, стенаэзын абу ни чераньвеззэз, стенаэс и потолок миськалöмöсь, джодж зыртöма песокöн да кöс росокöн, веж видзö, но тараканнэс... Некин эз тöд, мый ныкöт керны, некин нiйö эз вермы керкусис вашöтны.

— Ветлыны колас Гриша дядьö дынö, ась вовлас, молитваэсö лыддьöтас — вашöтас рыжöйесö керкусис, — висьталiс том мужик: сералiс или быль баитiс, он вежöрт.

— Гриша дядьыт, зон, тараканнэсö только Игнатика дынiсь жö кужö вашöтнытö. Гортö поныс моз жö етша вовлö да, кытшöм сэсь таракан вашöтiсь. Локтас тöв, кöдздöтас буржыка, петалам лун-мöд кежö соседдэзаным, кынтамö бес чужöммесö, сэк бöра кытчöдзкö озö лоö.

Бура моньыскöт олö Öпим, посадiсь инькаэс кöр пырасö, видзöтны кровать вылö, чуннезнаныс пешлöны рочовöй ольпась, сьöкыта лолалöны да шуöны:

— Öпим, кужин моньтö босьтны. Видзöт жö кытшöмö ольпасьсö вайис. Миянлö сэтшöмсö вöтöн не адззывны.

— Мыля од адззылö? Гöтралат зоннэзнытö, и паськöмсö сэтшöмö жö ваясö моннезныт.

— Гöтрасясö кытшöмкö арттöммез вылö.

— А тi босьтö Настяыслiсь сойесö. Нiя эд сойныс кодьöсь жö.

— Кысь ни миянлö Настялiсь сойесö, кöр зоннэзным рочöн озö кужö баитнытö да. Сiдзкö, Öпиммезлöн олан кыдз бы пондiс лöсявны, только керкуын эз тырмы айныс, кöда понда медöддьöн тöждiс Öпим, мужиксö эз вунöтлы не ой, не лун. Сысянь босьталiсö öтi-öтi письмоэз. Öльöш велöтчылiс нач етша, гижис, кыдз бытьтö гижöт вылöт нятьöсь коккезнас курöг ветлöтöм, но и сiя вöлi бур: гортын тöдiсö, что мужикыс ловья, уджалö Магнитогорскын. Город и завод отсалö пö строитны, видзöны пö бура, оз тшыгьяв, и, ежели кö нем умöль оз ло, чожа локтас гортö. Öльöш эз ни пукав тюрьмаын, и эта гажöтiс Öпимсö.

Уджалiсö гортын колхозын, шедтiсö мымдакö пизь, кöдö ведомостьöн сеталiсö, и Öпим таво öтпыр няньсö пöжалiс ни куш пизись, эз пукты туруннэз да сiйö, мый сёйисö не öтiк год ни, тыртiсö кынöммез мыйöн шедас. Чöвпан вачкисис калач вылö, видзöтан — и öмын дуль сöдзö.

— Мам, мый одзын тэ сiдз миянöс вердан? — Миков сёйис чочком нянь да сералiс бытьтö бы мамсö, а петiс, что сералiс олансö: уджалiсö-уджалiсö, а няньыслiсь кöрсö вунöтiсö ни.

— Сёйö свокоту, талун эм, ашын эд бöра оз ло, бöра кульзöрись пöжала.

— Кöть тэ мыйись, мам, пöжав, сёямö, ми абу ыджыт роччез, кынöманым быдöс тöрö...

— Ми тэкöт, Миков, мый! Моньным вот... Висьтасьö, что гортаныс бура олöмась, — гажтöма баитö Öпим.

— Олöмась-вöлöмась... Ми тэкöт сэтчин эгö вöлö, — горöтчис том мужик, кöр мам ошкис важ оланнысö, бытьтö бы кöркö сiдз жö олiсö богатöя. — Олiтö тi... Не выланыт, не коккезаныт. Нинкöммез жö новйöмась. А вот Совет власть! Медбурö олансö керас!

— Сiйöн эд и тшыгьяламö...

Мам да зон пондiсö пиньгисьны, öммезнаныс öтамöднысö вермисö, ошкисö и виль, и важ олан: кöда кöднысö и вермасö. Талун Настя мама-зоналiсь дзугис баснисö, горöтчис:

— Мый тi пыр и модятö? Менö предыс корö правленнёö уджавны.

— Мый правленнёас тшöктöны керны? — Миков и эстöн сералiс иньсö. — Предыслiсь бöр гöгöрсö чышкыны я мый я?

— Счётоводöн уджавны, арттöм!

Колхоз вöлi учöт — öтiк посад, быдöс синнэз одзын: петан правленнёись, бергöтчан посöдзын, и омöн быдöс тыдалö, адззан кин да кытöн мый керö. Начальство колхозын — пред, бригадир да öтiк счётовод, некытшöм агроном, не зоотехник, не механик, не заммез, не поммез эзö вöлö.

Настя уджалiс правленнёын, кокнита уджалiс и топ ёнмыштiс кокнит удж кертöн, чужöмыс лоис гöгрöсажык, синнэзас унажык тöдчис гаж. Öпим видзöтышалiс моньыс вылö да думайтiс: «Бытшöм Настяным! Кöть бы некин эз жö вомдзав...» Матшка эшö адззис, что моньыс тыра.

Чулалiс тöв. Локтiс виль тулыс, и кайез борддэзныс вылын Öпиммезлö вайисö учöтик кагаок — морток содiс керкуын, нывкаок, кöдö пондiсö шуны Валяöн.

Усть-Коколись Устья ныввезнас каша сёйны локтiс. Сiя радся-рад, ыбöссянь киас босьтiс внучаткасö, окалiс, горзiс и сералiс. Гöститiс Устья зятьыс ордын да бöр ныввезнас мунiс аслас ошпозъяинö, эд посёлоканыс комендант вöлi сё сiя жö, полiс отир сылiсь.

Öпиммезлöн быдмис кага, кöдö киэзiсь эзö бы и лэдзö, пестунничайтiсö быдöнныс, только луннэзнас, кöр уджалiсö, новйöтлiсö Василика баблö.

Сэтöн гортö локтiс Öльöш, пырис керкуö кыдз вердöм пороз — юр и голя öтвыв, сэтшöм ён мужик, бытьтö бы абу судитлöмась, а олöма кытöнкö бур местаын.

— Кысянь нö тэ сэтшöмыс? — Öпимлöн синнэс баралiсö, видзöтiс мужикыс вылö.

— Кысянь, кысянь... Социализма кери, вот кысянь! — Мужик чикыр эз кер синöн. — Уджалiн кö ме моз бы, ме моз жö вердiсö бы.

— Но тэ и богатöй лоöмыт, польдыны велалöмыт, — мужиксö нерис инька. — Тойетö сымда вайöмыт, что паськöмтö полi миськавны. Лонтi банясö да горас вешьянтö сотi.

— Асьтö бы сотны! Кысь меным бöра базарскöй вешьянсö? Бöра эд пондас ковны асланым кыйöм дöраись кöмавны да пасьтавны.

— Кöмалан и пасьталан, абу кодя морт.

Öпиммезлöн бытьтö бы семьяныс эз ни понды разьсьыны: некин эз кув, некинöс сэсся эзö судитö. Овны пондiсö буржыка ни. Война панытö ыббез вылын, кыдз нагладь, сю шогмис сымда, что тырмис сетны государстволö и аслыныс сёйны. кольччис пöттöдз. Бура ни пондiс бы овны отир, кокнитжыка ловзисис, да олансö дзугис война, чарöтiс томöс и пöрисьöс, инькаöс и мужикöс.

Медодзза война годö жö гортiсь нуöтiсö Миколöс.

— Олö бытшöма, — кыдз быдöн мужиккес, сiдз и Миков висьталiс янсöтчытöн, окалiс иньсö и нывсö. — Мыйись-мый, Настя... — и пондiс горзыны. — Джагöтча! — Настя горзiс да öшалiс мужикыс голя бердын. — Тэтöг кула.

Война сёйис отирöс. Война вылын Миколöс ранитiсö, и сiя ранаэзсянь кулiс госпитальын. Настя сё видзчисис да видзчисис роднöй Колькасö, но эз вермы видзчисьны, и война бöрын ни, кöр кад чулалiс вель уна, оланыс невна зорамис, кöр быдмис ни Валя да пондiс велöтчыны, кöр пöрисьмыштiс ни Öпим, Настя аслас мамкöт мунiсö овны ылiсь гортаныс. Инькасö сьöлöмыс кыскис сэтчин, кытöн чужис, кытöн орöтiсö гöгсö. Öпим вежöртiс, что моньсö видзны оз вермы: Настялöн аслас юр, и ась сiя олö сiдз, кыдз сылö колö, кыдз буржык.

Эшö колiс висьтавны, что Зеленин аслас солдаттэзкöт сiдз эз и вермы кутны Курайсö: пышшалiссез торйöтчисö кинлö да кытчö туй — öтiккез пондiсö овны горттэзаныс, кыдз нем эз и вöвлы, мöдiккезöс нуöтiсö горттэзсиныс, и сэсся нiйö некин эз адззыв, нем эз кывсьы.

Фёдор кытшöм вöлi, сэтшöм и олiс кувтöдз, тыртiс ассис вексö Киршинын, но мывкыдыс кувтöдз эз вежсьы. Горшнас пыр полöтiс челядьöс и инькаэзöс. Дышöтчис уджавны. Вежалуннэзö, кöр быдöнныс гажöтчисö, мужиккезлö мыччавлiс кулаккесö, но и аслыс гындiсö боккесö, сэтчöдз вартлывлiсö, что дырöн быглясьлiс ольпась вылын. Кыдз кужис, сiдз и олiс морт, кöть и кöр осудитiс отир.

Эшö, натьтö, колiс бы висьтавны, что сiя годö, кöр Зеленин вöтлiсис Курай сьöрын, арнас ни усис лым да сылiс бöр, туйез лоисö нятьöсьöсь, сувтiс кöдзыт да уль кад. Öтiк лунö милиционер Чугайнов, кöда асьсö нимтiс Турбасöн, вöлöн, верзьöмöн гöнитiс Усолье туйöт Кокорник деревняоклань, кытöн вöлiсö сизим керку. Чугайнов вöтчис переселенеццез сьöрö, кöдна бöра пышшисö Коколись. Сэтöн Кокорник туй вылын Турбаслö бöра пантасис Яраш. Сiя петiс вöрсис милиционер одзö, казялiс Чугайновсö и бöр уськöтчис вöрас. Милиционер бöра, кыдз кöркö Киевын, чирзыштiс:

— Эй, Ярашко! Сулав, Турабас пиян! Сулав мыся, то лыя! — и ештiс эд кобурасис кыскыны наган да лыйны. Пуля бандитлö инмис шульга киас, но эз вий.

Ярашöс Чурак гöгöрись адззылiсö медбöрьяись... Но Средньöй Азияын армияын служитiкö Демидоваись Сеня Öльöксан öтпыр шедлöма городскöй базарö. Деревняись морт эд деревняись морт, отир коласын синнэзнас був-бав, видзöтö олан, быдкодь сёян-юан, паськöм адззö и... Оча кымöс люкасьöма Ярашкöт. Медодз Öльöксан ачыс аслыс абу веритöм, что сы одзын вермас сулавны гортiсь морт, и юалöма:

— Яраш, тэ?

Но только, тыдалö, солдат одзöв осьтöм öмсö: Яраш чужöма мортыс кыкнан кинас морос дынöт нетшкöвтöм йöрнöссö, резьöтöм гöг весьтöдз и пондöм ряксыны: «Ой, начкылöны-ы-ы! Ой, вийöны!»

Отир базарын шуксьöм-жöдзöм. Яраш горшсö леттöн саясьöм отир коласö и öшöм.

Чулалiсö годдэз. Бöрö кольччис лёк война. Уна мужиккес чинiсö деревняэзын, етша ни кин кольччис пöрисьжыккес коласiсь — öтiк поколеннё вежис мöдiкöс. Етша ни кин касьтылiс Курайсö, кöр видзчисьтöг кысянькö локтiсö овны горт ладорö Курайлöн инь да зон. Сэк вöлись пондiс кывсьыны, что кöркöся пышшалiссезлöн командир олöма и уджалöма пö кытöнкö Сибирьын, то ли колхозын предöн, то ли заводын директорöн. Бура пö морт олöма да уджалöма, нельки козьналöмась пö Ленин нима орден.

Курай кулöма ни.

Чулалöны годдэз — история панöны. Вель дыр Усть-Кокольын öтлаын олiсö комиэз и роччез. Медбöрья годдэзö посёлокын олiссез керисö вöр. Но локтiс кад, и посёлок некинлö эз понды ковны, сэтiсь отир кин да кытчö и мунiс.

ВÖТТЭЗ



1

Асылыс гажа. Чирзiсö ягчикиссез. Нiя лэбалiсö сэтшöм вылына, что эз и тыдалö юр вевдöрын. Вöр весьтын öшалiс лöз тшын-туман, руыс не ни сэтшöм сöстöм, кытшöм овлö июнь месяцö. Ыркыта лолалiс видз. Кыз лысва сыркьялiс луд вылын. Курöггез гуддисисö посöдз дынын. Лонтiсисö горрез. Тшынсö трубаись топ кинкö садитiс муыс вылö, и сiя вöлись паськалiс да лэбтiсис вевдöрö.

Улицаöт тэрмасис бригадир, локтiс Иваннэз посöдз дынö и ыкöстiс:

— Иван! Ванька, чеччы ни... Талун мунан шором тэчны да синнэтö дыр эн тiль. Тэрмась!

— Тэрмася, тэрмася! — Иваныс гуддис синнэсö. Бригадирыс тöдiс Ивансö, надейтчис зонка вылö, тэрмöтiс, медбы сiя асывнас вöрöтчис, луннас уджалiс, а рытыс сылöн, мед кöть мый керö.

Колiс тэчны шором — зöр дзимлявны, кöдö инькаэс вундiсö неделя сьöрна. Суслоннэс сулалiсö ыбыс вылын зэв-зэв, лёдзöн-лёдзöн, сюыс тыра — любо видзöтны, сьöлöм гажöтö. Асылыс ыркыт, миссьö лысваöн. Ыб вылын сырса йылö пуксьöм каёк и кивзö. Шондiыс вылынкодь ни, а отирыс кытöн? Некинлöн эшö ыбыс дорын рожаыс эз тыдав.

Иван ыбас öтнас. Сьöлöмыс пизис, киэс лудiсö, лöг, рез-паз бы уджалiс, тöдiс, что кыным чожажык дзимляссяс сюыс, сыным одзжык рытнас локтас гортö. Позяс бы сэк пишальöн котрасьны деревня сайись вöрокö, кытöн быдтiсис сьöла, кöдö адззывлiс аслас синнэзöн, кöр вöрас сибавлiс уджавны мунтöн. Кайыслöн öнi пияннэс быдсаöсь ни, и югытсорнас оз я öтiк сьöла коттьышт... Ашын бы мамыс масьтiс сьöласö, масьтöм яйсö сутшкыны бы пым идовöй няньöн, кöдö кыскасö горись да пуктасö пызан вылö. «Эх!» — öмас дульыс сöдзис зонкаыслöн. Сiя таво сьöла яйсö эшö эз на пешлы и, кыдз видзöтыштас вöрыслань, сiдз топ сьöлöмыс и пышшö, сiдз ни бы мунö вöрас. Сьöлаэс бордаöсь, вöрыс паськыт, талун кö Иваныс оз вермы мунны пишальнас вöрас, ашын мунас. А Нина син одзсис оз и вешшы, сулалö нывкаыс, шыннялö, бöбöтлö, но кытöн рытыс эшö, кöр луныс вöлись пондöтчö, кöр уджалiссес горттэзаныс гыжьясьöны, оз вежöртö зонкасö...

«Жек-жек!» — суслон вылын Ивансö нерö жак, и жоннес сюыс дынын жевгышалöны.

— Мун тэ сэтiсь! — зонка мышкыртчис, босьтiс галя и шупкис жакыслö.

— Иван, кинкöт тышкасян?! — ыб вылö мыччисис Иванлöн ёрт Илья, кöда вöвсö доддялöма додьö и вурö-вартлö меринсö, а сiя и бöжнас оз вöрзьöт, суналö да мунö.

Илья кыдз бы гажтöмтчöма ёртыстöг, сiйöн эз ешты ыб вылö локны, басни лöсьöтiс. Сэтчö локтiсö ни мöд уджалiссес, кутчисисö пурны асьсö, стыдитiсö:

— Ой, Илья! Бöра эд дыр узьöмыт! Эн я асылöдз нывкаэс сьöрын котрась?!

— Котрася... Мыля ог, — зонкаыс чужöм вылын нем эз вöрзьы, кывнас немымда некинлö эз сетчы, эз повзьы сералöмись, висьталiс: — Вöлыс сьöрын асывбыт котраси. Медодз дбруньгагыс дыр эз пантась, кошши öтiклаись, а сiя заргисьöма логас и сулалö. Кыдз пондi кутны, öдззис пышшавны. Дбруньгаг уджавтöнняс коккесö оз вермы вöрöтны, а сэтöн чож! Кыдз сотас... Люзь пымалi-вöтлiси.

Быдöн тöдiс, что Ильялöн мериныс быль асныра: дышыс кö пондас петны уджавны, некыдз кутны оз сетчы — пöттöдз грехö пыртас. Но зонкасö сералiсö-нерисö ни мöд уджалiссес, кöдна сьöрсьöн-бöрсьöн локтiсö ыб вылö:

— Пöрьясян, Илья. Геройыт рам, ачыс гортö локтö.

— Тырмас тiянлö гöрдлыны! — ёртсö пондiс дорйыны Иван. — Уджавны колö, а тi...

Öмсö нюмыртöмöн мыччисис ни бригадир. Öтiк уджалiссес кутчисö мöртны сырсаэз, мöдiккес вöлöн иньдöтчисö суслоннэз дынö. Удж пондiс пизьны ыб вылын. Иван ачыс тэчис шоромсö, зэв-зэв кольта кольта бердö пуктiс, асьсö уджас эз стыдит, мед бöрсяняс эз видö. Асывсянь шондi спинасö шонтiс, а луншöр гöгöрас пондiс кымрасьны, сiйö и видзöт, кыдз зэрмас.

— Тэрмасьö, челядь, тэрмасьö! — Бригадир сё тэрмöтiс-модис.

Уджалiссес эз и казялö, кöр юррезныс вевдöрын нач гудыртчис кымöрыс да пондiс вотясьны, сiйö и видзöт гизнитас-койыштас ведрапонiсь и вашöтас ыб вылiсь, дзугас уджсö. А сюыс кытшöм: тыра зöр роззэс кыдз золотöйöсь, сiдз бы зэрыс шогья ыбсö поланат и вевттин.

— Тэрмасьö, челядь! Тыртам ни шоромсö, — кинлöнкö кылiс голос, кокнита баитiс, и отир уджалiсö, шы эз сетö, тöдiсö, что колö керны уджсö.

— Кöть бы эг зэрмы! Кöть бы... — бригадир сiйö и керис видзöтышавлiс кымöррес вылö, кöдна небзисö, топ горзыны лöсьöтчисö, лэдзчисисö лажмытжыка. — Кöть бы эг зэрмы... Тэ мый, Илья, вöвнат керан? Тэрмась!

— Супоньыс орис! — ружтiс вöв дынын Илья. Сiя Иваныс моз жö эз любит сунавны уджавтöнняс.

— Илья... Мый асьтö нывкаэс одзын стыдитан? Видзöт, кыдз Нинаыс сералö.

Нина эз серав, абу нывкаыс кытшöмкö катша кодь, некöр вöлi серавнытö, уджалiс — мужиккез сьöрись немöн эз кольччы: вöв веськöтлiс, додьö кольтаэз тэчис, кыскис шором дынö, и быд кольтасö чапкис вевдöрö. Сьöкыт уджсянь киэз орисö, но нывка эз норась — не öтнас эд мырсьö.

Уджалiс нывка, чужöм вылiсь ньылöм вотялiс, некöр сылö вöлi видзöтны Ильялань, кöда визыв, киэсö любитö нывкаэслань нюжлавны, сiдз и кутiс бы да жмитыштiс.

Нывкалöн сьöлöмыс Ванька дынö кыссьö, рытсö оз вермы видзчисьны, кöр дугдас уджавны, локтас гортö, вежас кöмкöт-паськöм, и бригадир оз кö ойнас тшöкты тöлöтчыны, котöртас гармошка дынö...

Ештiс пуктыны шором вылö Ванька медбöрья кольта, кыдз сэтчö гизнитiс, бытьтö койыштiс ведрапонiсь, и пондiс зэрны — тшын гардчö. Уджалiссеслöн кинлö кытчö туй: кöда ештiс заргисьны кöз увтö, кöда юрсö сюйыштiс сiя жö шором бокö. Тшыг вöввес мöртчисö межа дорö да пондiсö сёйны отава. Эшö час бöртi ыб ружтiс да уджалiс, а öнi кыдз миссис удж бöрсянь.

Шором бердын кылiс бригадирлöн голос:

— Эг ештö быдöс тэчнытö... Вадiс суслоннэсö.

— Вадiс сюсö, — жалейтiс мöдiк, кыдз ассис. — А кöть мый ни öнi... Поди, дыр оз понды зэрнытö.

— Тшыкас суслоннэзас зöрыс, кöдзыс вылö оз понды туйны...

Мужиккес баитiсö кöдзыс йылiсь, а Ванька пукалiс шором, бокын, дынас — зэв-зэв Нина... Томмес кывзiсö зэрлiсь шы.

— Нина... — дыр мыйись шуис Иван.

— Мый öштiн? — шыасис нывка, чышкыштiс кымöс вывсис зэр воттез, видзöтыштiс зонка вылö — синнэзас гаж.

— Мый талун рытнас пондан керны?

Баитiсö негорöн, мед некин эз кыв. Зэр вартiс шором кузя, вадiс нинкöммезнысö, кöдна эз тöрö сю увтö.

— Сьывны да йöктыны, — серöмтчыштiс нывкаыс, кöть тöдiс, что некöр сьывнытö: бур, мезмас кö гортiсь, котöртас томмес дынö, рытсö орсас шырöн да каньöн, сьылас да йöктас, а сыбöрын кытöнкö ойшöр гöгöрас томмес — кинлö кытчö туй. Нина — чожажык гортö, а бöрсяняс варыш моз лэбзяс-котöртас, вöтас да кутас крепыта Ванька.

Гленитчис зонкалö нывкаыс, но матын да ылын: Нинасö аймамыс рыттэзнас гортiсь эз лэдзавлö, топ сiдз сiйö кинкö и кокыштас-пышшöтас. И Ванькалöн айыс шуис ни: «Миянлö сэтшöм невестаыс оз ков!»

Видзöт да кывзы мый пöриссес баитöны. Туйсö поперегалöны. А Ванька сiдз и этадз котрасис Нина сьöрын, ассис керис да думайтiс: «Кытшöм бы невеста меным айö бöрйö? Кузь мыгöраö или вöв чужöмаö? Пöрись нинкöммез, асьныт од тöдö, мый кыввезнаныт изатö! Ванька эд öддьöн тiянлiсь кывзас — öт пельöттяс пырас, мöдöттяс петас, и быдöс сэтöн!»

Пемыт. Некин томмесö оз адззы, не оз кыв, кöр нiя кывзiсьöны, кыдз садникын чирзö кöбывка, керку сайын ыб лолалö рудзöг дука руöн. Юррезныс вевдöрын шовкнитас борддэзнас кушборд, и бöра сэтшöм лöнь, что кылö, кыдз мороссэзын чеччалöны сьöлöммезныс, орсö том вир, кылöны öтамöдныслiсь лолалöм, но öтамöдсиныс дзик полöны — полöны жмитчыны, дойдны чорытжык кылöн. Ванька луннас уджавтöн нывка одзын асьсö пуктiс бы смелöн, лёбис, мый пырас юрас, сералiс асьсö, что учöт да абу смев, что оз куж оропавны чер, кыйны нинкöм, а öнi... Полiс, думайтiс: «Окыштны кö?.. А сыбöрын мый лоас?.. Нина вежöртас кö асмознас, пышшас, пырас гортö, йöртчас керкуас и сэсся вöтöн он адззыв. Но сьöлöмыт эд пондас кыскыны эта учöтик керкуок дынö. Вот и думайт, мый керны, сулав нывка дынын да дрöжит».

Гленитчис Ванькалö Нина, а айыс кивзiс-жексiс: «Миянлö сэтшöм невестаыс оз ков...»

Веськыта висьтавны: Ванькалöн айыс кошшис богатöй невеста. А мый богатствоыс Нинаыслöн? Нинкöммез да дöраись вурöм дубас. Не колхозыс бы, нывкаэслöн сё бы, поди, ветлöтiсö кортöн, кеймисисö: «Сетö Криста ради... Кулам ни эд тшыгйöн...»

Олан абу ни одззакодь. Но Ванькалöн аймамыс одззамоз бы олöны, и зонкалöн лöг петö ны вылö, но кытчöдзкö паныт оз шыась.

Öнi Ванька Нинакöт пукалiсö шором бокын. Зонкалöн юрас пизисö думаэз, кыдз эта зэрыс жö. И, тыдалö, дыр пондас зэрны, сiдз кыдз гöпоккезын öксьöм ва вылын польдiсö да потласисö поллез. Бригадир модис, что сюсö эз ештö дзимлявны, ашын асывнас колiс бы одзжык пондöтчыны вартны гуна вылын. А Ванька кылiс и эз бригадирсö — кисö нюжöтiс нывкалань, кутiс Ниналiсь долоньсö, жмитыштiс да шуис: «Рытнас видзчись...» Висьталiс и бытьтö нем оз тöд: чеччис шором бокись, нюжöтчис и иньдöтчис лапья кöзлань.

— Тэ кытчö? — Ванькалiсь юалiс бригадир. — Öнi мунам гуна дорö.

— Дядь... — пондiс никсыны зонка. — Дядь, меным колö бы тöдан мый керны... Сельсоветö колö бы пыравны...

— Ештан сельсоветас! Сэтчин нем оз шöмав.

— Ог эд.

— Ой, Иван! Кыдз тiянкöт и уджавны? Джын лунöн кö пондам öвтчыны, колхозным онняюртчас! — видчис ни бригадир.

— Джын лун... Пемдö ни, а тэ сё джын лун... — аслыс кыскис Иван.

— Чёрт тэнö бось... — шуис бригадир. — Ашын ни ковсяс вартнытö, но... Видзöт менам! Тöвсö чужьявны быд лун он понды! Вежöртiн?!

— Кыдз ог вежöрт? — пиннес гер зонкалöн, сералö, что кужис бöбöтны бригадирсö, но пöрисьсö керöс паныт он ыслöт, тöдö и адззö кытчö сьöлöмыс кыскö Ванькасö, сiйöн кузь чуньнас и легöтö:

— Ашын сьöланас вердан?

— Кöин яйöн ме тэнö, дядь, верда! — сералö и ыб вылiсь котöртö Иван.

2

Локтiс кад висьтавны, кыдз Иванлö шедiс сьöла.

Зэрис. Шором сэсся тэчны эз туй, и зонка тэрмасис гортö, некытшöм зэр ни öнi сiйö эз видз, мед и ведрапонiсь бы кисьтiс вевдöрсяняс. Сiя видззез кузя омöн локтiс гортö, садниксянь веськыта пырис важ керкуö. Эз веж вывсис ва паськöмсö, зепас заргис няньтор, сэтчин жö сюйис заряда патроннэз. Тэрмасис, бытьтö кытöнкö сотчис керку, и сытöг бисö оз вермö кусöтны. Зонка таво колхозсис мезмис первуись, и сiдз ни сьöлöмыс кыскис вöравны, что нем вылö эз видзöт, эз пов, что вермас ыбöссэс коласын пантасьны айыс, кöда сэтшöм багсьöм öр, кыдз зонсö казялас, пондас бöра мурзьыны: «Э-э-э, этö колö керны! Сiя кертöм, а тэ öвтчан...»

Иван пышшöмöн пишальнас мöдiс мунны гортсис, но мамыс вöлöм карта вылын и посöдзас ни пыртöн казялiс зоныслiсь спинасö. Посöдзыс вöлi керöм важ да олан керкуэз коласын.

Зэрис. Польдiсö и дундöтчисö кымöррез, топ лöсьöтчисö пуксьыны грива вылö. Коккез увтын шлячкöтiс ва, визывтiсö гудыра шоррез и шороккез. Му бердöт зэв шырисö-лэбалiсö чикиссез. Воробей купайтчис вагöпын. Садникын сыр-лёль öшöтчис картов кор, ниль водiс межаын отава. Иван тэрмасис вöрö, тöдiс, что зэрикас кайыс рам. Зонка ештiс только вуджны горт дынiсь видзсö да пырны вöрас, кыдз йöрыс дынiсь лэбтiсис сьöла, уль русö орöтiс борд шыöн и, кылö, пуксис кытшöмкö кöз уввез вылö.

Вöралiсьлöн сьöлöмыс тёп да тёп... Пишаль киас. Гусясис, топ эз и лолав — коккес увтын улок эз чег, лэчыта видзöтчис. И синнэс вылö усис кай. Лыйис, но сьöлаыс лэбзис нач ни юрыс вевдöрись, гöн эз вöрзьы.

Мöдiк кай вылö бы сэсся дзар эз кер, кöр увдöрсянь вевдöрöдз вамис, кыдз бытьтö вöралiсьсö сутшкисö тыра кöньöсö, сьöвзис бы кайыс вылö. Но Иван пишальнас гортö етша простöн вовлiс и талун эз бы сiдз кер. Сiя бöра пондiс гусясьны кöззэс коласöт, сайласьтöн орддис кушин коддесö. Но кайыс лоис вöй ни: одзжык казялö вöралiсьсö — быркнитас да бöра... А Ванька видзöтö, кöдöрö лэбзяс кайыс, кытчö пуксяс, и одзлань гусясьö, сибöтчö сьöла дынö — зэвмоз ни локтö, кольччö только лыйны. Но кыдз шуöны, добычаыс матын да ылын: уввес коласiсь оз тыдав, или адззас да пезьдöтнытö оз ешты...

«Кытшöм икота мунтöнням поперегалiс туйöс?! — думаэзнас сьöласис зонка да одзлань вöтлiсис кай сьöрын. И вöлись кöр пондiс пемдыны ни, кöр лоис рöма-дзара, кöр кöз уввес топ сукмисö, да дугдыштiс зэрны, сэк вöлись юрыс вевдöрын сьöла пондiс шыасьлыны: «Пать-пать-пыть...» Кай вуджöртчис. Вöралiсь эз ни понды видзчисьны, кöр добычаыс нач мыччисяс тшöк уввез коласiсь, лыйис. Лыйöмлöн говк паськалiс и лэбзис ылö. Сьöла кура-пара усис вевдöрсянь. Зонкалöн пондiсö дрöжитны киэс. Сiя босьтiс добычасö да дзебис пиас и лоис счастливöй, топ лыйис не сьöла, а дозмöр: яй тырмас аслыс и бригадирлö, и мед одзлань сiя оз вид, мед пешлас сьöла яйсö, сьöлöмыс бурмас и мöдöтпыр бöра лэдзас вöрас...

Пемдiс. Коккез увтын тыдалiс умöля. Вöралiсьлöн паськöмыс ва. Сiя вöрсис петiс туй вылö да иньдöтчис гортö. Мунтöнняс кöз увтiсь повзьöтiс скокчикöс: кай лэбтiсис и топ нетшкöвтiс сьöлöмсö да öшис кöзъяинö.

Вöралiсь шлючки-шлячки нач ни пемытсорöн вöрись петiс видз вылö, и колiс бы мунны гортас, но коккес кыдз асьныс межаöт нуöтiсö учöт керкулань, вайöтiсö карта крыша увтö, кöда вывсянь вотялiсö ва воттез, но Ивансö эз ни вадö. Сiя сувтiс короминнаыс увтö и пондiс видзчисьны. Недолыт зонкалö вамöм паськöмнас эстöн: коккес увтын ва, нять, и гидсянь нырсö чегö назём дук, но колö! Нывка видзчисьö...

Сулалö зонка Нинаэз карта бокын да дульсö ньылалö. Посöдзсянь чеччöвтiс понок, локтiс, нюкьялiс, пондiс ниртчыны коккес бердö, бытьтö баитiс: «Бöра, ёрт, кошшисян? Менам оланö эд тэ кодь жö, но ог норась...»

Зонка малалiс понлiсь кымöс да видзчисис нывкасö, сiдз кыдз эшö луннас шором увтын висьталiс, что рытнас локтас. А öнi Нина эз и думайт петны керкусис, сьöлöмыс эз кыв, что локтiс ни Иван, сулалö зэр увтын, паськöмыс ва, думаэс сёйöны: «Мый жö бы керны? Кыдз жö бы керкусис бöбöтны? Тупылька, кор жö татчö хозяйкатö! Яйторöн верда...» Кымöра да пемыт рытыс — кок ныррез он адззы. Недолыт зонкалöн сьöлöм вылас. Чужöмыс бердöт зэв лэбзис кушборд, швыркнитiс, и сэтöн жö короминна вывсянь пельпоннэс вылö чеччöвтiс сьöд кань, мöртiс гыжжесö и пондiс мурзьыны... Ванькалöн невна сьöлöмыс эз пот, сiдз повзис каньсис.

— Калян! — медодз кутчисис пишаль бердö. — Лыя эд! Кыввезнас каньсö вийис бы, а ачыс малалiс ни, модис ласковöй кыввез: «Менам пельпон вылын разь шырресö кошшöны?»

Эз ешты моросас меститчыны сьöлöмыс, кыдз карта вылас кинкö вашöтiс курöггесö. Нiя бордпавйöн пемытiнас лэбзисö кин кытчö вермис.

Дорись керкуыс дынын луннас гажа: зэв ыб, сьылö быдкодь каёк, а пемытiнас!.. Иван öтнас оз пов узьны вöрын кöз увтын, а эстöн... Повзис курöггезiсь.

Вичку дынын кылiс томмезлöн чирзöм, нiйö нем эз видз: не зэр, не дзирс пемыт рыт — койисö, кыдз тулысöн таррез, гудыртiсö, кытчöдз эз гизьнитö горттэзö.

Думайтны кö, Ванька эд талун кык кöч сьöрын вöтлiсьö: вöрсис кутiс и деревнясис бы оз лэдз. Вöрсис вайö, а деревняын колö эшö видзчисьны.

«Мый жö? Мый жö?.. — зонка малалiс сьöд каньсö, кöда мурзис-сьылiс ассис песня, а, поди, зонкаыс моз горзiс ни... — Гортын я Нина? Абу я вичкуыс дынын жö? Сьылас да йöктас, а сыбöрын Петькаыс кокыштас, бöбöтас чом угöлö и пемытiнас окалас...»

— Мый пондам керны, Калян? — негорöн баитiс канькöт Ванька. — Он я тэ пыр керкуас да висьтав Ниналö, что ме сiйö видзчися? Али тэнат сьöлöмыт местын из?

Калян кывзiс-керис гöсьлiсь баснисö и сiдз мöртiс гыжжесö зонка моросö, что Ванька лöгасис, кутiс кузь бöжа ёртсö и швыргис карта вылö. Кань кутчисис ва да нильыг тёссэз бердö, нявнитiс. А поныслö сiя и колiс: Тупыль пондiс чеччавны карта ворота одзын да вувтны.

Дзурк-вирк оссис посöдз ыбöс, и Нина повзьöм голосöн ыкöстiс:

— Тупылька, тэ кинöс вувтан?!

— Гав! — чеччöвтiс поныс и гыжйöвтiс карта воротасö. — Гав!

Топ висьталiс: «Татöн кык кока каньыс! Сiя важын ни тэнö, хозяйка, видзчисьö, а тэ узян...»

Кань чеччöвтiс крыша вылiсь да заргисис пытшкись посöдзö. Пон кузь кывнас пондiс нювны öм гöгöрсö. Ванька ньылыштiс дульсö да гусьöнмоз шуис: «Нинка, петав жö... Нин...»

— Мый тэ сэтöн керан?! — повзис нывкаыс. — Ой тэ и Ванька-дурак!

— Кык час ни зэр увтас сулала, кöс сунис вылам абу, сiдз ни эд вами, а тэ... — зонкалöн сяткöтiсö пиннес, кеймисис. — Нин, ме бы тэныт мыйкö висьтала.

Кап да кап крыша вылiсь вотялiс ва, дзик висьталiс: «Сiдз, кагаэз... Быдöнныс эд томувья сэтшöмöсь». А Тупылька чеччалiс да ниртчис коккезныс дынын, рад, что пемытiнас абу öтнас.

— Айö кучикöс куляс, адззылас кö тэкöт ойнас! — висьталiс Нинаыс. — Мун гортат, ылöстöм. Кöр оз ков, сэк и локтан. Сералан миян кодьсö.

— Кöр сэк, Нин? Луннас я мый я, кöр быдöн варыш синнас адззö? Тэ висьтав мамытлö, что тэнö бригадирыс ой кежас иньдö тöлöтчыны, и пет керкусис.

— Ванька, грех эд!

— Петан али он?! Али ме вода посöдзаныт и ог мун!..

— Ванька!.. — нывка недыр кежö пыралiс керкуас и бöр петiс, пасьтасьöм шонытжыка да юрыс вылö кышалöма чышьян.

— Пишальöн ышö... — сералiс Нина. — Бандит моз... — Лэдзчис посöдзсис кокнит кок шыöн, мунiс чомныс дынö да пуксис кер вылö. Ванькаыс — сьöрас.

Керку öшыннэзын öтi-öтi югьялiсö биэз. Кинлöнкö жевгис-вувтiс пон. Нина топ кынмис: киэс и коккес дрöжитiсö, но пемытiнас этö Иваныс эз адззы.

— Мый висьталан? — зонкаыслiсь юалiс нывка.

— Гöтрасьны колö бы... — висьталiс Иван.

— Гöтрась. Кин тэнö видзö.

— Мунан ме сайö?

— Тэ мый?! — повзис Нина. — Учöт эшö жöникыс сайö муннытö.

— Мунан! — висьталiс Ванька.

Ниналöн кыз да кузь чикисьыс коскöдззас, топ додь ожпон. Сiя кутiс ассис чикисьсö, малыштiс да висьталiс:

— Ванька, ме бы тэ сайö, поди, мунi, но... — сьöкыта ловзисис. — Тöда, что аймамыт оз радейтö... Беднöйесö...

— Кинöс?! — кутчисис зонкаыс пишаль бердö. — Öнi тöдан мый... Беднöйес да богатöйес абу! Быдöнным колхозын уджалам. Артильöн... Öтмымдаöн шедтам и öтмымдаöн босьтам.

— Эмöсь жö... — гажтöма горöтчис Нина. — Бось Маринсö... Ме моз разь кöмасьö да пасьтасьö? Вот и думайт...

— Нинук... — Иван жмитыштiс нывкасö бердас. — Тэ меным колан, сэсся некытшöм Марин вылö ог видзöт. Дзимляссясö сюэс, и Покров бöрас гöтрася.

— Мый сiдз ендö? Кытчö тэрмасян? — серöмтчис нывка.

— Колö! — шуис Ванька, öшöтiс юрсö да дыр мыйись бöра висьталiс. — Тэнö босьта. Некин вылö ог видзöт. Он кö мун... Гусяла! Тэ менö тöдан. Мунан али он?!

— Но тэ и Ванька-дурак! — гажöн ни висьталiс Нина. Пемыт. Нем оз тыдав. Ыбланьсянь павкис уль мулöн ру.

Гуналаньын пондiсö сьывны нывкаэз. Натьтö, ой кежас кайисö тöлöтчыны. Дзуркнитiс керку ыбöс, и посöдзö петiс Ниналöн айыс, кывзiсьыштiс, сьöласис да бöр пырис керкуас.

— Менö видзчисьö, — серöмтчыштiс нывка и жмитчыштiс зонка бердö да содтiс гордöя. — Любитö айö менö, сiйöн и оз узь, кöр рытнас гортын абу. Мый и лоас, ежели кö мыйись-мый?..

— Абу эшö пöрисьöсь, оз кулö, — висьталiс Ванька, кармансис кыскис сьöласö да нюжöтiс нывкалö. — Этö тэныт.

— Ой! Мый сiя?! — Нина пемытiнас малыштiс гöна кайсö и повзис.

— Эн пов. Кай. Куштан и вердан пöриссетö.

— Тэ мый, Ванька? Пондасö шуны кытiсь да мый, а ме мый висьтала? Тэ менö нач ни... Оз ков кайыс, сет Тупылькалö, ась чöскытжыка сёйö.

— Думайтан ог сет?! — Ванька видзчисьтöг сьöласö шупкис понлань.

Тупылькалö сiя и колiс: гöснечсö öмас да петшöррез коласö.

— Вайин гортат! — пондiс видны ёртсö нывка. — Шать бы тэныт... Да буржык инь, медбы тэнö зэлöтiс, сэк пондiн бы тöдны, кыдз сьöлаэзнас поннэсö вердны. Мун гортат! Видзöт, кыдз ва паськöмнат кынман да пондан шогавны.

— Некытчö ог мун! Вода вот чом бокас и узя. Он верит?!

— Иван-дурак и эм... Мун гортат, а ме пыра. Код я мый я, он кывзiсь?

— Эстöн и узя! Öшын увтаныт, — ассис модис Иван.

— Сэк баняас пыр. Сэтчин шонытжык жö лоас, — сералiс ни Нина.

— Öшын увтаныт и узя! — модис ассис зонка.

— Но и узь! — Нина быркнитiс-чеччис боксис и перыта шагньöвтiс посöдзлань, но Ванька кутiс бöрсяняс, бöр пуксьöтiс бокас и бöра пондiс корасьны-модьны, что öнi жö нывкасö кутас и нуöтас гортас, некин вылö оз видзöт, некинiсь оз пов — ачыс ас вылас хозяин. Но нывка баитiс, что олан нылöн оз ло, сiдз кыдз оз ков Ванькаыс аймамлö, мед этадз пантасьласö-ветлöтасö, кадсö öштасö и бур.

Ванька сьöкыта ловзисис. Пукалыштiсö, Нина и шуис:

— Кывзы, Ванька, отирыс мый баитöны... Война пö лэбас.... Быль или мый?

— Некытшöм война оз ло! — кокнита висьталiс зонка и мыччалiс пишаль вылö. — Ась пешлiсьöны! Видзöт пишальыс... Ме нылö мыччала!

— Сэтшöм тэ и эм?! — сералö нывка. — Герой! Мöдыс бöра шуö:

— Эшö öтпыр юала, мунан али он?!

Лöгасис ни зонка, лöсьöтчис мунны гортö, медбы сыбöрсянь орддьыны нывкаэслiсь керкусö. Тупыль бöра чеччалiс дынаныс. Поснита зэрис.

— Муна, Ванька, — мöднёж пондiс баитны Нина. — Кыдз вундiссяс, сэк и муна.

— Ылынкодь...

— Он вермы видзчисьнытö? — сералiс нывка, содтiс чорытжыка. — Видзчисян! Свадьбаыс кежö сьöлаэсö унажык ваян.

— Дыр лоö, — гажтöмтчис Ванька. — Сетасö кö тэнö мöдiк сайö?

Карта вылын сьöкыта ловзисис мöс. Поныс лэдзис бöжсö да гажтöма видзöтiс томмес вылö.

Пукалыштiсö чом бокын, кывзiсö сьöлöммезнысö, видзчисисö да видзöтiсö, кыдз деревняын кусiсö биэз: отир ны моз зэр увтас пемытiнын эз пукалö, а сьöкыт удж бöрсянь чöскыта узисö.

— Кывзы жö, Нинка... Кыдз нö отирыс сэтшöм чожа да кокнита гöтрасьöны? — баитiс зонка. — Кывсяс, что нывкасö корасьöны, а ашынас видзöтан кö — свадьба! Год оз чулав, кага ни, эшö лун — и кагаыс абу... Кулöм или... Лабич дор котрасьö.

— Кин сэтшöм кокнита гöтрасьö да олö? — сералö нывка.

— А эта... — пондiс гардны томмес йылiсь.

— Эн тöждiсь. И тэ гöтрасян. Петухыс куимись оз ешты китöстны, адззан аслыт богатöй невеста, и пондас сiя тэныт быд год кагаэз вайны.

Бöра дыркодь пукалiсö шысеттöг, кывзiсö, кыдз крыша вылiсь вотялiс ва, зэрис и эз, топ коясис уль пизьöн, кыкнанныс ыш да ыш, лолалiсö сьöкыта. И сэтöн видзчисьтöг Нина кутiс кыз да кузь чикисьсö, нюжöтiс зонкалань да висьталiс:

— Разь чикисьöс! Вöрöтчы! Модин, модин, а кöр чикисьöс сета разьны, повзин. Разь, кытчöдз айö керкусис эз пет!

— Мый?! — öшис зонка.

— Разь, Ванька! — горзöмсорöн ни висьталiс Нина. — Ась ме кольчча нывкаöн, но чикисьö лоас разьöм. Тэныт эд сiйö разьнытö сета, Ванька!

Зонкалöн пондiсö дрöжитны киэс, öмас косьмис дульыс. Медодз голясö нюжöтiс бы окасьны, но Нина бытьтö кералiс-янсöтiс бокисьсö:

— Кöр бокат вода, сэк и окасян, а öнi голятö эн нюжлав! Миян родын эшö некин ассис юрсö эз серав. И ме, Ванька, аймамöс ог понды серавны!

Ванька сэтчин-татчö и пемытiнас пöрччалiс чикись бердсис кöртöтсö, сыбöрын разис кыйöм юрсисö.

— Но вот, Ванька... Öнi мун гортö да нем умöльсö эн думайт... Тöд, что ме тэнат ни, — Нина чеччис зонка бокись да гордöй мыгöрнас шагньöвтiс посöдзлань.

— Нинук, — горöтчис зонка, чеччис кер вылiсь, лöсьöтчис бы мыйкö висьтавны или кутны да окыштны, но мöдыс сэсся шы эз сет, саясис ыбöс сайö да бöрсяняс пöднасис.

3

Кöр павжун бöрас зэрмöтчис, а Ванька пишальнас пышшис вöрö, гортö уджалансянь локтiс айыс. Рыжöй тоша да топыт мыгöра мужик вачкисис сира мыр вылö, кöдö не зэр оз незьдöт, не тöв оз пöрöт.

Айтöг и мамтöг быдмис Ванькалöн айыс — йöз быдтiс, и, натьтö, йöзыс сизимись кеймис еныслö — корис кагаыслö смерть, но учöтыслö нем эз мöртчы, быдмис, кыдз ёгтурун, и кöть öнi годдэс вöлiсö кватьöдз десяток ни, уджас эшö некинлö эз сетчы, и Ванька коддесö эшö пыкис мороснас.

Талун тошаыс колхозын видз вылын тэчис медбöрья зород, уджалiс — асьсö эз жалейт. А кöр пондiс кымрасьны, уджалiс кык морт туйö, бытьтö погоддялiсь мырддис бы кöс турунсö. Уджалансянь локтiс гортö, посöдзö шентiс пешорка, босьтiс чер да пырис чомö, медбы сэтчин тöв кежö лöсьöтны йöртöттэз. Зэрис. Ванькалöн айыс ружтiс чомын. Сiя öтiк минута эз вермы овны весь — керны дак керны, а нем асьсö и отирсö нерны. Кöть кытöн тэрмасис, топ уджыс пыр сы дынiсь лöсьöтчис пышшыны. Тэрмасис пöрись — нырыс вылiсь ньылöм ни вотялiс.

Чомын уджыс сэтшöм: öтiк пöв колiс дорны, мöдiкö лöсйыштны... И лöсалiс, и дорис бы тятьыс пöввесö, керис бы, но öтнас, а пöввес чер увтын бергалöны, кыдз ловьяöсь, дзугсьö удж. Сэтöн бы колiс отсасись: кутыштiс, зэлöтыштiс, видзыштiс и на... Сымда и вöлi, но отсасисьыс абу. Пöрись чер обухнас вачкис пöв бердö да лöгасис, мур-мар ош моз мурзьыштiс, вачкис бы кöрттулö, но сы местö дорис певсö... Зубытсяняс кивнитiс, матькыштiс и пондiс креставны и матегавны:

— Кытöн Иван?! Пыр гортын абу! Сё шатласьö!

— Аслат зоныт, — сэтöн то и горöтчис иньыс. — Ныв бы...

— Тэ ышö?! Лысьтан шыасьны, — тоша лэбтiс юр вевдöрö кисö, сыбöрын öмас заргис певсö да пондiс нимавны да мурзьыны. — Кытöн Иваныс?! — брынгис коккес увтiсь бусöсь чуман. — Кытöн, мыся, Иваныс?! — горшнас повзьöтiс курöгöс, кöда сьöрын черöн вöтлiсис Ванялöн мамыс, медбы керавны бес-курöглiсь юрсö, сiдз кыдз сiя эз кольттяв, а китсасис петух моз.

— Ку-ка-ре-кек-ке! — китöстiс курöг, нерис хозяйкасö да гордöя шагнялiс хозяиныс одзын.

— Бесыс!.. — Ванька мамлöн голос сибдыштiс, чернас öвтчö. — Добро одзын разь сорстöм петухыс китсасьö?! Ме юр вылö ад горшсö летö...

— Кытöн Иваныс?! — певсö нималöмöн Иванлöн айыс горшсö летiс да мöд кинас моросыс бердiсь малалiс аскыйöм дöраись йöрнöс. — Ась тiян юррез вылö китсасьö курöгыс, ась тiянöс кудоба пиньлалö, юррезнытö мургыльтö! Кытöн, мыся, Иваныс?!

— Пишальöн мунiс! — паныт мужиклö ыкöстiс иньыс да бöра чернас чепöссис курöгыс вылö. Но öтыс борда, а мöдыс только кык кока. Öтыс падмис да чом одзö нюжалiс, а мöдыс гажöн китöстiс асмознас, вачкис борддэзнас петух моз.

— Кут курöгсö! — мужикыс вылö чирзö инька. — Кут, мыся, курöгсö! Он адззы, сiя миянлö кöсйö беда!

Курöг быркнитiс пос увтö, сыбöрын пес костёр коласö и öшис.

— Курöгсö он вермы кутны, — рамжыка ни эрзыштiс Ванькалöн ай.

— Тэ кодь жö эд... — шуис мамыс. — Китсасят вот асланыт юррез вылö.

— Го-го, — серöмтчис тошаыс. — Го-го! Юрсиэзныт кузьöсь, а мывкыдныт дженыт. Сiдз разь курöгыс сьöрын вöтлiсьöны?!

— Кыдз нö колö? — Инька чеччис му вывсис, öмсö осьтiс да пондiс видзöтны мужик вылö.

— Кыдз петух, тэ сiдз жö бы...

— Зор бы öмат! Он тöд, кыдз иньтö дойдны да серавны сы вылын... Зоныт понда пыр пуран, а ачыт сылö нем он лысьт шуны. Ачыт Иваныскöт и баит, а ме мый? Кин менö кывзат? Кöдныт? Кöть бы нинкöммесö сьöкталiн... Ашын бöра кок чуннезö нинкöммезсис отирыс син одзын мыччисясö, — и пондiс чышкыны синваэсö.

— А ме тэныт кин?! Машина? — чужöмыс гöрдöтiс тошаыслöн. — Сiдз?! Ог вермы луннас сизим гоз нинкöмсö кыйны, кöр тэ нiйö сёян-бырöтан, мунан и коккетö муыс бердöт гужган, бытьтö он вермы лэбтавны.

— Юрö вылын я мый я тшöктан ветлöтны?

— Ветлöт! Кузь бурсиэт эд оз кышасьö.

— Неб чакчуриэз!

— Вай деньгасö.

— Шедтыны эшö сiйö колö.

Пурсисö да раммисö, топ сiдз и колiс, мöднёж эз кужö овнытö, шоччисьыштiсö, ловзисисö кокнитжыка. Тошаыс бöра и шуö:

— Кывзы, Еремеевна... Гöтравны бы барансö, а? Вайöтны бы сэтшöм инь, медбы гортiсь эз пышшав! Вунöтiс бы вöрсö и пишальсö...

Еремеевна коккезсис кыскалiс важ отопкиэз, öшöтiс нiйö чом желоб увтö, малыштiс юрсö, кöдö вадiс зэр, да пондiс видзöтны мужикыс вылö, кыдз йöз вылö, кöдö бы керку дынас матö оз ков лэдзны.

— Али тэныт монь оз ков? — öмсö осьтiс тошаыс.

— Ме ышö ачым невеста, — висьталiс инь.

— И-и-и-ех! Адззисьöма невеста, тьфу! Да кин ни тэ вылö видзöтас? Кин сэтшöм разьсьöм нинкöмыс вылö рад? Тыр эмöсь тэ кодь кузь пиняэс. Кыдз сэтшöмыскöт моньыт пондас овны? Медодзза лунсянь жö сiйö рос угöлö пуксьöтан!

— А тэ эд вöлись!.. Тэныт моньнас лöсялас Вöрисьлöн нылыс, а мöдкодькöт он куж овнытö. Сiя бы чожа пиннетö чеглалiс! Зэрис. Зэрыс шовкöтiс-вартiс крыша кузя, картошка кор бердö. Ковйис чом вылiсь ва.

— Гöтравны барансö, сэсся нем сыкöт керны, — раммыштiс Ванькалöн айыс. — Сэтшöмö босьтам невестасö, кöда мужиксö велöтас овны, а шедас кö... — öвтыштiс кинас.

— Мый шедас? Морт вылö жö, поди, гöтрасяс? — иньыс эз вежöрт мужиксö.

— Кöдалöн не вылас, не кокас! Лöсяласö кортöн ветлöтны... Кужасö отирсö нерны...

— Ме тай шуи ни, мыся, тэныт моньнас колö Вöрисьлöн нылыс. Сыкöт лöсьöтчан.. — бöра пондiс чирзыны Ванькалöн мамыс, но айыс дундöтчис, малыштiс тошсö да висьталiс:

— Тiянлö колö öнджа... Мед öммезнытö эд осьталö! Öнджа... Ме важын ни синъя Туйис Öльöксанлiсь нывсö. Не нывка, а нетель! Не джöмыт, не паныт... Бисис и васис петас... А тэ тю-тю...

— Пиннес коккес увтöдз жö... Кыв жö бердас оз понды лэдзны, пондас миян кодьсö кок ныррес вылын видзны.

— Тöдан тэ мыйкö, — нырнас вишкайтiс тоша. — Айыс вылö видзöт... Тöдан, кыдз пондылiсö раскулачитны да падмисö. А тэ пиннез... Кинлöн пиннес абу? Думайтан, тэ рам? Ого, чунь мыччы, кöин моз курччöвтан.

— Тэ менö томсянь мортас эн пукты! — пондiс пильскыны иньыс.

— Тупкав! Видзöт кыдз чер оропсö сёян, — Ванькалöн айыс босьтiс киас чер да висьталiс, кöть сэсся джагöтчы, оз кывзы, а керас сiдз, кыдз колö сылö. — Ашын асывнас босьтан нянь да сов и вартан Öльöксаннэслань! Сiя миян кодьсö мукöдчид мортас оз жö пукты бы, но... Кер сiдз, кыдз колö!

— Оз сылöн нылыс миян сайö мун!

— Кыдз оз мун?! Ме висьталi! — пöрисьыс пиньöвтiс рожабансö — чукыр чукыркöт свалитчисö, мурзьö. — Мый бы Öльöксанлö дундöтчынытö? Син одзын эд нылыс. Ыджыт да бытшöм, но кикимора, и кинлö сiя колö? Мый дзöдзыв синнэтö паськöтiн?! Или быль он бы мун корасьнытö?

— Аслыт жö бы колö, — горöтчис иньыс.

— Ме тэныт мый шуи?! — гöрдöтiс хозяин. — Мунан ашын одзжык, шондiтöг. Кылiн?! Мыйись-мый... Отир оз адззылö.

— Ме кумаöс кора, — нырнас вирснитiс Ванькалöн мамыс.

— Ме могись кöть Собольыскöт мунö, но невеста мед вöлi! — мужик, сьöвзис долонь вылö, босьтiс чер и саясис чом пытшкö.

— Кок-ке-рек-ке-ке! — бöра пос увтын китöстiс курöг. Ванькалöн мам синваэсö чышкытöн да модьтöн кöмтöм коккезнас талис бурундук вылiсь нятьсö и пырис керкуас.

Ашынас пемытсорöн инька босьтiс конувтас чышьянö каттьöм нянь чöвпан да сов, и кумаыскöт мунiсö Öльöксаннэзö.

Ванька эта коста узис медчöскыт онöн, вöтасис, топ сы дынiсь кытчöкö пышшö Нина, пышшö — бöрас дзар оз кер, а зонка вöтчö бы и вöтны оз вермы. Сыбöрын пондiс вöтасьны, топ керкуас отир тыр — свадьба пö: гöтралöны Ванькасö, и невестаыс Нина, кöда медбасöк и медлюбо.

— Горько! — быд горшсис арзiс айыс. — Горько, Ванька! Саймис зонка, кыдз кинкö кыскыштiс коккезöттяс. Синнэсö осьтiс и видзöтö: керкуас канькöт кыкöн, сiя миссьö — лапанас порог вылын ниртö рожасö, тыдалö, висьталö гöссез.

— Вань, чеччы, — сэтчö пырис бригадир, сералö да юасьö. — Эн на гöтрась? Ендан эд, невестаэт оз пондö мунны. А ме кылi, бытьтö мамыт ветлöм пö корасьны, — висьталiс, топ кöдзыт ва кисьтiс, топ вирыс сьöлöмас сувтчыштiс. — Свадьбаат кор жö менö. Богатöй невеста бердö, батя, кутчисят, богатöй и лоас свадьбаныт. Мый юртö öшлан?! Али мыйкö не сiдз?

Шы оз сет зонка, сотö дума: «Быль? Или сералö? Быль кö? Сэк эд вöлись! Вот невестаыс, зонка! Кузь мыгöра, кузь чужöма, коккес... Майöг! Кыдз пондас кин сьöрö вöтчыны, котöртö — мусö саженьöн меряйтö. Сэтшöмыс дынiсь он ни пышшы и вöрас пишальнат гусьöн он ни котöрт. Вот сiдз, Иван-дурак!»

Петö, что Ванька и вöтöн эз вöтась, кытшöм невеста адззисö айыс да мамыс, кыдз и кор сiйö гардiсö. «Мый пондан керны? — ассис юалiс зонка. — Пышшыны кö гортiсь? Заргисьны пыдöжык вöрас и овны... А мый? Некин тэ вылын оз ло не ыджыт, не учöт. Сыбöрын Нинасö сэтчин жö нуöтан...»

Думаэс гортсис вашöтiсö, кыскисö вöрö, сiдз кыдз невестасö синöн бы эз адззы, но кин деревняас томмес коласiсь пышшалö? Кытчö? Некин эд оз коль колхозсö, и Ванька оз вермы овны йöзын!

Погоддяыс нач тшыксис: быд лун люззьö-зэрö, сiсьтö бы сюэз. Бригадир зонкасö паз уджöтö: ойнас гуна вылын, луннас ыбын да сiдз, что рыттэзнас некöр котöртны томмес дынö. Умöльтчис зонка, косьмис, чужöмыс векнямис и нюжалiс. Нинасö адззывлiс ылiсяньмоз кытöнкö тöлöтчытöн или туйын, висьталiс бы кыв-мöд, но нывкаыс ылiсянь кежлiс бокö, бытьтö пышшалiс: абу эд пельтöм и синтöм, кылö и адззö мый керсьö, да кытшöм невеста корасьöны зонкалö.

Тшыксис олан Ванькалöн, гажтöм лоис Ниналö. А мамыс сысъялö ни ырöшшез, вийöтö сур. Ай начкылiс баран. Тэрмасьöны пöриссес гöтравны зоннысö, оз видзöтö, что страда, что эм эшö колхозас вундыны. Ванькаыс топ сё эшö нем оз тöд, видзöтö, мый керöны пöриссес, лöгыс пизьö: пöрöтiс бы ырöшшесö, а сурсö мöслö юкталiс...

Видзöтiс-видзöтiс аймамыслiсь уджсö да öтiк рытö и юалiс:

— Мам, тi кытшöм праздник кежö лöсьöтчат?

— Он я гöтрасьны мöд, — шуис мамыс.

— А ме думайтi, айö лöсьöтчö гöтрасьнытö, — рыг-рыг серöмтчис зонкаыс.

— Но и юртöм! Ыджыт ни, а мывкыдыт сё öткодь. Пöрисьман и сё лоан Ванька, — пондiс пеничайтны мамыс, содтiс, кыдз вачкис. — Нем эн шу... Доддялам, сэк он понды пиннетö вузавны.

Зонкаыс мый бы эз кер, кыдз бы эз гöтрась, но сыкöт уна эз пондö баитны, а лöсьöтчисö свадьба кежö.

Кадыс лэбзис. Вот ашын ни, ашын ни, а Иваныс сё малалö пишальсö, сё лöсьöтчö дыр кежö пышшыны вöрö. Адззö этö айыс и мурзьö:

— Тэ кытчö?! Колö невестала мунны, а тэ вöрö...

— Ме невестала и лöсьöтча! — паныт эрзыштiс зоныс. — Вöрсис, мыся, ог я адззы?.. — веськыта видзöтiс пöрисьыс синнэзö. — Ачыт гöтрась!

— Мы-ы-ый тэ шуан?! Лэдз жö вешьянтö, ме бöр гöгöртö лöсъя!

Пишнитiс нырнас зонка.

— Ох, зон! Чожöсь öнi быдматö. Кужан айыткöт баитны, кужан! Ми кöркö тiян годдэзö пöрисьжыккеслö поперёк кыв эг лысьтö горöтчыны, а тэ кыввезнат горш бы орöтан. Тöдан я, что ме тэнö эшö кусняла-гарда, кыдз небыт няньöс! Гарда эд...

— Ая, тышкасьны ог пондö, но сiя невестаыс меным оз ков.

— Кытшöм невеста сэк тэныт колö?! Öнджаыс я мый я?.. — пöрисьыс зоныслö лöсьöтчис висьтавны эшö лёкжык кыв, но эз висьтав, только сьöвзис.

— Кин меным колö, сiйö и вайöта!

Эстöн басни орис, öтамöднысö сэсся эз пондö пурны, кöр сiдз ни деревняын сы йылiсь и басни вöлi, кин мый вермис, модис: кöда Ивансö осудитiс, кöда эз, мукöдыс мортö бы ни эз пуктö.

Сэтчин да татчö: павжун бöрын доддялiсö вöввез и вайöтiсö невеста. Гöссез пызан сайö пуксисö вит-квать, унажыкыс невестаыслöн. Нывкаыс ыджыт мыгöра, бытшöм (Ванькаыс пельпоннэзöдззас), шынь оз кер, чужöмыс топ пыр кежö косьмöм, и некин оз тöд, гажöтчö я кöркö Мариныс, или пыр кежö öмсö кыдз вурöмась.

Бур невеста Иваныслö бöрйисö.

Пукалö жöник нывкаыс бокын, а синнэс öшынлань, сьöлöмыс öтöрын — вот мыччисяс Нинаыс и мырддяс Мариныс бокись, но кадыс чулалö, а Иванлö некин оз отсав, быдöнныс радöсь, что гöтралöны.

— Горька-а-а! — ыкöстiс, пороз моз кыдз бакöстiс айыс, ружтiс, дундöтчис, малыштiс кынöмсö, öмас лыись керöм вилкаöн чапкис пельнянь, эз и курччав — ньылыштiс, бöра керкутыр рякöстiс. — Горька-а-а!

Счастливöй айыс, что гöтралö зонсö.

— Горько, Ванька, — синваэсö чышкö мамыс.

Жöник вермис ассис шогсö, нюжöтчис бы окавны невестасö и эз судз (коккес дженытöлöсь). Кинкö коккес увтö ештiс сувтöтны джек, сэк вöлись чупыштiс Маринсö: тырппес лоисö солаöсь.

— Олö... Кристос тiянкöт, — синваэсö чышкис мамыс.

— Тэ мый пызаныс сайын зырымтö нырыт увтö каттян? — пыдына ловзисьöмöн юалiс айыс иньыслiсь и сiдз видзöтыштiс, кыдз бытьтö пызаныс сайын жö бы и кокалiс юр пыдöссö.

— Нда-а-а, — брезгуйтöмöн бизгыштiс невесталöн айыс. — Нда-а-а... — и чеччис пызан сайись, медодз разис свадьбасö, а сэтшöмыс лыддиссьö умöль приметаöн.

Свадьбаыс чулалiс сiдз, бытьтö гöссес вештiсö принуд: некин эз сьыв, эз йöкты, быдöнныс мыйкö думайтiсö, тöждiсисö, юисö сюромка, сур да шоныт ырöш, сёйисö кинлö да мый тöрис, и эз кодззö, топ немöн эз пöтö. Медуна сёйис да юис Ванькалöн айыс, бытьтö сы понда и вöлi керöм свадьбаыс. Сёйис-юис, ружтiс-керис, чеччис пызан сайись да висьталiс:

— Тырмас, челядь! Томмеслö колö узьны, ойыс эд дженыт.

Ванькасö вежайыс водтöтiс иньыс бокö кроватьö, шебралiс дöраись кыйöм öнöн да висьталiс: «Узьö чöскытжыка, мед олат кокнитжыка». Но Иван медодзза ойсö иньыскöт узис асмознас: спина — Маринлань, чужöм — ыбöслань. Ашынас чеччис и вит лун да вит ой гортö эз пырав: бригадирлö быд лун кеймисис, медбы сiя иньдiс медсьöкыт уджö, ась бы уджалiс коккес вылiсь усьтöдз, кольмытöдз. Уджыс сы понда адззисис — сё эшö дзимлялiсö сюэз.

Витöдз лунас мамыс панталiс сiйö гуна вылын, öшöтчис голя бердас да пондiс горзыны:

— Ванька... Кыдз ме тэнö и быдтi, акань местын видзи, да айыт... Сылö разь мыйкö лысьтан шуны? Ошыслö. Ульöн сёяс эд... Мыля гортiсь пышшалан?

— Ась, мам... — голосыс сибдiс зонкалöн.

— Лок гортö. Кытчöдз эшö ачым ловья, верда и пасьтöта. Лок, кага. Мамыт вылö эн лöгав.

Иваныс вежöртiс, что кöть мымда гортiсь пышшав, но колö локны, и рытнас жö пырис керкуаныс. Локтiс мыдз — коккесö гужгö-кыскö джоджöттяс. Пöрччасис, чöвтчис, миссис рожасö, а сэсся бытьтö эз тöд мый керны. Мамыс вердiс шöмйöлöн да тшакьяшыдöн. Пызаныс сайын жö куньсисö синнэс. Думаэзнас лöсьöтчис водны важ керкуас — торйöн иньыс дынiсь.

Мöдiк инь бы, натьтö, мужиксö панталiс посöдзас, шынньöвтiс, жмитiс да гусьöн окалiс, а эта... Эта топ мужиксö эз адззы: зыр-зыр мунiс джоджöттяс, жолькнитiс-пуктiс ведра, нырыс увтын пондiс пишкыны да мыйкö модьны. Мый бы Мариныслö колö? Мый оз тырмы? Кытшöм жöник сайö бы мунiс?

Том мужиклöн сьöлöмыс гортас оз шонав. Лöсьöтчис бы иньыс дынiсь водны торйын, но видзчисьтöг Мариныс шагньöвтiс дынас, шы эз сет, нюжöтiс кузь киэсö, жмитiс быд вынсис мужиксö бердас да сiдз, что не ловзисьны, не ыкöстны, бытьтö вывтырсö каттис змея, гардыштiс моросыс одзö и кыдз кагаокöс шупкис пуись керöм кровать вылö. Ачыс водiс бокас, кузь киэзнас сийöсалiс голясö, коксö пуктiс коккес вылö. Эта лунсянь зонкаыс лоис не ни Ванька, а Иван, сiдз кыдз овсис гажа оланыс: борддэсö кöрталiсö, коккесö сьöвталiсö...

Пöриссес видзöтiсö только моньныс вылö да вишыкасисö: айыс рад, а мамыс пыдына ловзисьны оз вермы — горшсö зэлöтöны синваэз.

Водiс Иван иньыс бокö, бöра бы спинанас — Маринлань, чужöмнас — ыбöслань. Мыдз мужикыс. Колö бы узьны, но иньыс бергöтiс, кыдз асланяс катыльтiс колода, öддьöнжык жмитiс голясö.

Чужьясис бы эшö иньыс бокын Иван — мыччалiс асьсö, но нем эз пет, мыдзувья ланьтiс да пондiс вöтасьны мыйкö сэтшöмö, что кöть бы и юалiн, эз бы висьтав, узис мымдакö и саймис, топ бокас заргисö йыла емöн: чуш-паш зэв кылiс кокшы. Кинкö пемытiнас сибöтчис томмес дынö. Иваныс осьтiс синнэсö — и пондiс кывзiсьны, эз верит, что кинкö ветлöтö керкуас, а ветлöтiсьыс гусьöн локтiс зэв, малыштiс чорыт киöн...

— Мама! — ыкöстiс Мариныс, чеччöвтiс мужикыс бокись.

— Мый лоис?! — полатьын повзис Ванькалöн мамыс.

— Мый ыксат?! — дзуркнитiс сибдöм голоснас Иваныслöн айыс.

Ванькаыс нем эз шу, ньылыштiс дульсö, куйлiс-куйлiс да ланьтiс. Ашынас чеччисö и бытьтö ойнас нем эз вöв, некин нем оз тöд, шы оз сет, бытьтö сiдз и колö. Мöд ойнас, кöр водiсö томмес, Иваныс бöра спинанас пондiс пыкны иньсö, кöда кутiс да колода моз мужиксö бергöтiс бöра асланяс. Важ кроватьыс дзурка-вирка, дзурка-вирка, полатьын öзйис би: айыс öтпыр öзтiс бисö, сыбöрын мöдöтпыр... Кöр томмес вöрзьöтчасö кровать вылын, дзуркнитас увтаныс кровать пöв, сэк и öзйö би.

— Узь! — Марин мужикыслö кулакнас заргис ордлыэс увтö.

— Узь, кöин! — Иванлöн мамыс мужиксö кыдз кужис, сiдз и видiс, но мöдыс шы эз сет, ружтiс, видзчисис, кöр томмес увтын бöра дзуркнитасö пöввез, медбы сэк жö öзтыны би.

Мымда бы этатшöм гажа оланыс эз орс керкуас, но сылö локтiс конец: öтiк пемыт сёр рытö Иванлöн айыс бöра чушки-пашки, чушки-пашки пондiс сибöтчыны томмес кровать дынö. Том мужик видзчисис ни айсö, одзлань юрöдзас пуктiс кабья нинкöм. Öнi босьтiс сiйö да кыдз урвенитiс айыслö, мöдыс шы эз сет, кайис полатьö, и вöлись эта бöрсянь пондöтчис олан.

4

Олöны томмес. Неделя олöны, мöдiкö. Иваныс топ пондiс велавны ни иньыс дынö, кыдз бытьтö сiдз и колöм, кыдз Мариныстöг оланыс абу и вöлöм. Вывтi бы мужикыслö горзыны аслас инь вылö оз туй: Мариныс етша баитö, но уна керö, мый бердö кутчисяс, киэс пизьöны, кöть пода гöгöрын, кöть сер серöтны, не весь аймамсö шуöны богатöйезöн, а мортыслöн богатствоыс петшöр моз оз быдмы — быдöс колö керны аслат киэзöн.

Маринлiсь аймамсö шуöны богатöйезöн, а нывкалö мылякö етша сетiсö козинсö: рукйöсь гöна кепись ыжда баранок, виль нинкöммез да асвурöм дубас. Унажык кö колö, ачыт быдты да шедты, абу ни учöт, жöник сайö ни петiн...

Киподнас туяна бы Иванлöн иньыс, но мужикыслiсь сьöлöмсö оз куж шонтыны — кöдзыт Мариныс.

Чулалö ни ар. Колхозын удж лоис етшажык, кад личамис. Иван уджалiс: керис, мый тшöктас бригадир. Удж сы понда — гаж, петас отир коласö — праздник, а пондас локны гортö. синнэс видзöтöны мöдöрö, коккес мунöны бы Нинаэс керкулань. Одз асыв я, сёр рыт я, нывкаыс керкулань и син, но сiя кыдз öшис, вöйис, некытöн эз пантась, эз мыччась.

Сьöкыт том мужиклö: локтас уджалансянь, олан керкуас оз и пыр, оз ю, оз сёй, важ керкусис босьтас пишаль и мунас вöрö. Вöрсис локтас дзирс пемыт, мыдз, кынöмыс сималö. Вайö я добычасö или оз, оз ошшась, но гортö локтiкö пемытiнас сё ни мунас ыб дорöт, зэв Нинаэс керку дынöт. Кöр мунас, оз сувт, а кöр и сувтас нывкаыс карта бокö и сулалö, видзчисьö. Нинаэзлöн понныс пыр ниртчö коккес бердын, никсö, дзик мыйкö висьталö бы, но оз куж баитнытö.

Айыс видзöтiс-видзöтiс зоныслiсь сэтшöм олансö и горöтчис, кыдз гым кымöр мурзьыштiс:

— Сота пишальтö!

— Ась зонкаыс котрасьö, кыскö кö сьöлöмыс вöрас. Сё ни тай кинöскö вайö, вöрись яйнас кöть öммезнымöс чöскöтам, — мамыс зоныс дор.

— Ме тэныт, дзöдзыв бöж... Ме тэнö яйнас! — иньыс вылö пондiс эрзыны тошаыс, и мöдыс öмсö пöдналiс.

Ар. Погоддяыс быд часöн вежсьö-дзугсьö, но Иванлiсь вöралансö некин оз вермы дзугны, вöрас сiя шоччöтö душасö, лолалö сöстöм руöн, видзöтö, кыдз шоррезын югмö ва — сöстöммö, топ пондö вачкисьны синва вылö, и листыс киссьö коккез увтö — ольсалö сэтшöм рöма дöра, что только сы вылö бы и видзöтiн.

Иванлöн сьöлöмыс шоччисьö вöрын, а гортö локтас — иньыс желлясьö, мурзьö.

Быд лун лоö кöдзытжык. Номмес важын ни öшисö, ошыс пöт ни сёйис рябина да кузь тöв кежö кошшис аслыс гу, медбы водны да узьны тулысöдз. Иваныс гортын пишальсö эз ни видз: пондас локны вöралансянь, дзебас колода увтö — сизим понöн он адззы. И кытчöдз этадз пондас овны, ачыс эз тöд. Чулалiсö эшö лун-мöд, иньыс тальччис бöжыс вылö:

— Мöсыс дынiсь колiс бы джоджсö лöсьöтны! Али бöра кöззэс увтын кинкö видчисьö? — мурзьыштiс Мариныс — синнэзас нёштöм югöр.

— Видзчисьö, — бизгыштiс Иван, сьöлöмыс бöра чеччалiс, сiдз бы и пышшö гортсис.

— Ме тэнö видзчися! Ме тöдiсь дынö ветла да мыжья тэнö сiдз, что керкусис он понды вермыны петны! — висьталiс иньыс сiдз, что мый баитö, керас, сылiсь унажыксö нем видзчисьны.

Гажа лоис арпоныс, кöть керкуас эн и пыр, а Ивансö йöртöны бы ыбöс сайö. Сэк мужикыс вöлись нач и вежöртiс, что сiйö весь эз гöтралö, сiдз доддялiсö, что он юскись: супоньыс дженыт да зэлöтöм, и сийöсыс джагöтö.

— Айö мый вылö? — бобгыштiс жö да кöин моз видзöтiс видзлань, кытöн лэбалiсö ватшканнэз, сильгисö сьöвбöррез, и кöззэс топ кыдз шыннялiсö и корисö дынаныс.

— А тэ мый вылö?! Айыт гробö водас и сё пондас уджавны, а тэ гортiсь пышшалан... — пишнитiс Марин, кузь чужöмыс нач чорзис, синнэс рысь кодьöсь.

И вермис мужикыс асьсö, гыжйöвтiс юр бöрсö, кыдз керкуас öшис: öтiк угöлiсь кошшис чер, мöдiкись пила да петiс уджавны.

Иван мый пондас керны, эз сунав, и öнi сiя тэрмасис, но и видзöтiс, медбы бура петiс: кöрттув вачкас, и сэтöн некин мед бöрсяняс эз серав, уджалiс — любо видзöтны. Керис уджсö, пырис керкуас и иньыслö ошшасьö:

— Петав да видзöт, не джодж кери, а пызан пöв вöвдi... Иньыс шы эз сет, öмсö нюмыртыштiс, кыдз рад, а, поди, брезгуйтö, оз любит уна баитiссесö: босьтiс ведра и петiс мöс дынö. Вель дыр олiс карта вылас, пырö бöр: нач кымöра, öтiк кокыс посöдзын, а ыксö ни:

— Кин этадз уджалö?! Киэт разь сiсьöсь?! Али черсö он куж видзнытö?! Джоджас осьтаэс — кань тöрас. А плахаэс... Колiс эд нiйö стружитны... Мöсыс эд коксö талун жö желлялас! Кö-ö-öзяин!

Но мужик эз понды паныт пурсьыны, шуис жö:

— Мöдöтпыр стружита... Чулалö лун — шерöн вартö. Рытнас том мужик гуддисис лабичын — кыйис нинкöм. Оныс эз пет, но колiс водны бы и дыр мыйись водiс иньыс бокö жö, кыдз жельнöг коласö, кöда бытшкалö, но вирыс оз пет, и бокыс сайкалö.

Гöтрасьтöдз узьлiс, кыдз кулöм — коккезöттяс кыскы, и нем оз кыв. Öнi öшис оныс: синнэсö куняс да думайтö, кыдз овны бы одзлань, думайтö и думайтö, топ кöдзыт гу пытшкö вöйö и сэтчинiсь некыдз петны оз вермы, и некин оз отсав, некин оз кыскы. Сэтчö жö иньыс вывтырнас топ оз тöр аскерöм пуовöй кроватяс, то брынгö, то гырдззанас бокас зубыта танго, кöть мужикыс сiдз ни умöльтчис — лы да кучик, и нем бы сiйö чеплявны.

Мый керны? Кытчö воштiсьны? Узьö эд нелюбöй морт бокын и кöть талун жö янсöтчы! Пышшыны бы, но оз вермы — кöрталöм. Дума вийö, осудитö: «Кин томмес янсöтчöны? Кытiсь кылiн, что талун гöтрасясö, а ашын торйöтчöны ни? Эз вöв эшö миян сэтшöмыс, а тэ?! Быдöн эд пондас синнэзö бытшкыны-серавны...» Петö, что колö сыкöт овны, кöдакöт судьба гардiс.

И одзлань олiс. Олiс лун, олiс мöдiкö — вештiс неделяэз и мыйкö пыр видзчисис. Месяц-мöдöн вежсис, лоис лёк, мый не сы сьöртi, ыкöстас кöть пöрисьлö, кöть томлö. Нем эз понды ковны, нем бытьтö эз адззы, только сэк и гажмывлiс, кöр бöра пишальöн котрасис вöрö, жöдзис быд кöз увтöт, ветлöтiс сэтчöдз, мыдзлiс — коккес позяласö, и локтö-кыссьö, кыдз бöрсяняс кинкö тойыштö, гортыс — ош паныт.

Мунас этадз и мукöдпыр вöрас узяс ой, мöдiкö. Ольпасьыс — лыссэз, иньыс — пишаль, ёртыс — пон. Вермас лыйны кайöс и зверьöс — котоманас он кыскы, но уна оз торк: мыйöн мунö, сiйöн и локтö. Оз ешты гортiсь ыбöссö осьтны, иньыс бöра ни вувтö:

— Кытшöм тэ мужик?! Гортiсь пышшалан... Ассит юртö он вермы вердны, а эшö кага видзчисян. Не айыт бы, тшыгйöн ни кулiм...

Чушкалас Мариныс кыввезнас, оз юась, мыдз или кынöмыс сималö, адззö и оз, эм тэ сылö и абу. А олö эд. Кадыс чулалiс месяц куим-нёль ни.

Марин смевмö и смевмö, мамсö ни пондiс зэлöтны быд шагын да пурны:

— Зоннытö абу вермöмныт велöтны! Нем оз куж керны... Весь олö! Толкыс некытчö абу, только бы пон моз гортiсь пышшавны, кошшисьны да нюкьясьны. Мый вылö и гöтрасьöм? Мыйлö менчим нывкася олансö и дзугис?!

Иванлöн этатшöм кыввез бöрсянь моросас кыдз мыйкö орö, кыдз мужикыс кытчöкö вöйö, сибдö. Думаэс пондöны пизьны-пессьыны да чепсасьны, чеччавны, топ мортсö пон моз домалöмась и мезмыны оз вермы.

«Мыля сiдз?! — кынымöтпыр ни юалö ассис. — Мыля карта вылас джоджсö эг понды кужны керны, кöр гиддэзас джоджсö пыр вöвдöны стружиттöг, и некинлöн мöссэс коккесö оз желлялö? Ванька тэ, Ванька! Эм тэ сэтшöм мужикыс и абу...»

Öтöрын шондiа, гажа, кöть и луннэс дженытöсь ни, а керкуын гым кымöр: каньыс том хозяин шогья заргисис джоджулö, мамыс керкусис петiс, а айыс малыштiс рыжöй тошсö, дундöтчис, ружтыштiс, но не сэтчин, не татчö — нем эз шу, топ сы сьöртi оланыс и абу сiдз сьöкыт.

Иваныс пырис öтöрись и сувтiс порог дорö.

— Пöрччась! Эн сулав порог дорын корись моз. Джоджсö бырöм нинкöммезнат эн таль. Он эд миськав! Миськалiн бы, сэк и талин! — кылö иньыслöн чиння голос.

Видчö Мариныс, кöть ачыс сэтшöм жö нинкöммезöн ветлöтö öтöрö да керкуö, порог дорсянь шагньöвтö веськыта пызан дынöдз.

— Лет буржыка горштö! Кинкö öддьöн тэись полас... — ныр увтас бизгыштiс Иваныс, пöрччасис порог дорын, нинкöммесö швыргис горвыв вылö и нятьöсь джоджöт пондiс ветлöтны кöмтöг. Недолыт лоис сьöлöмыслö, кöр эшö мамыс пондiс никсыны: «Ой, зон!..»

Мамыс öтiк неделяöн пöрисьмис, яйсö вывсис чапкис, öнi унажык ружтiс да чужöмсö малалiс, а кöр и шуас жö: «Ой, зон!..»

— Сiдз тiянлö и колö! Асьныт любимöй моньнытö вайöтiт. Эшö не этö мыччалас!

— Грех, Ванька! — пильскис мамыс. — Еныс мыжьяс. — Еныс, мам, абу!..

Баитiсö мамыскöт, а иньыс чирзiс:

— Бось ножничсö, пет да шыр барансö!

— Мари-и-ин! — эз вермы терпитны Иванлöн мамыс, велöтiс жö бы моньсö отир моз овны. — Некинлöн, тай, мужиккес бараннэсö оз шырö и джоджжесö оз миськалö, а тэ нö мыйлö? Кыдз сыбöрын Ванькаыс отир син одзö пондас петны? — Тэ, старуха, уна эн кыв, уна эн адззы, то видзöт!.. Иванлö бы керкуас колö лоны хозяинöн ни, а сiя кылö и оз мый баитö иньыс.

5

Иван уна эз баит да аслыс керис: кыдз усис медодзза лым, кайис уджавны вöрö.

Вöрын олiсö бараккезын. Татöн некин тэ вылын абу не ыджыт, не учöт — ачыт ас вылат хозяин. И бур эд, кöр луннас уджалан, локтан баракö, сёян, нюжöтчан топчан вылö и он казяв, кыдз чулалас ойыс.

Вöр кериссес унажык томöсь, ёнöсь, вынаöсь и чожöсь. Быдöнныс любитiсö уджавны, некинöс эз ков кыввезöн тэрмöтны, öтiк лун некин весь эз ов: пемытсорöн баракись мунöны, пемытсорöн рытнас локтöны. Öтiккез вöввезöн кыскалiсö вöр, мöдiккез пöрöтiсö пуэз. Уджыс абу хитрöй: лучковöй пила да чер, и вöлiсö бы бура вердöм вöввез.

Иван пöрöтiс вöр. Уджалiс Ильякöт, кöда Иваныс кодь жö абу ыджыт мыгöра, топ невна ёртысся нельки визывжык, басниажык, уджалö да некин вылö оз надейтчы, кöть черöн пусö октас, кöть пилаöн пилитас, а кыдз споритыштны — заклад пессьыны — сэтöн и эм! Оз сёй, но керас, кутчисяс и Ивансö одзалас чернас октыны пу. Сэтшöм и колö ёртыс, кöда бы уджас эз сор и баснинас эз нер, а мый колö, керис.

План нiя тыртiсö быд лун, а кöр и керисö вöрсö унажык.

Илья кресенняэзнас вöр кериссескöт вöввезöн лэдзчывлiс гортö, медбы пывсьыны баняын, гортiсь вайны нянь да ырöш, а Иван гортö эз и думайт мунны.

— Тэ мый? — пыр юасис Илья. — Мыля гортö он мун? Или тэнö некин оз видзчись?

— Оз, — шуас Иван и быгыльтчас топчан вылö.

— Колiс тэныт гöтрасьны Нина вылö, — öтпыр ёртыс шуис Иванлö, кöр вöрас пажнайтны пуксисö би бокö. — Видзöт нывкаыс кытшöм! Не кывнас оз йöрмы, не уджсис оз пов.

— А иньöс кытчö? — бытьтö ёртсö эз вежöрт Иваныс.

— Вештiн бокö, и быдöс сэтöн! — кокнита баитiс зонка.

— Видзöтам, кыдз гöтрасян да иньтö пондан бокö вештыны...

— Мый нö сэк керны? Видзöта и жаль меным тэ и нывкаыс жаль.

Вöрас уджалiсö мужиккес не öтнаныс — нывкаэс сэтöн жö, и Нина öтлаын, только нывкаэс узьлiсö мöдiк баракын, кöда мужиккес дынсянь зэв — куимись шагньöвт и сэтчин, но Иваныс Нинасö часто эз пантавлы: вуджöртчас син одзас да абу

Иван эз ни бы думайт нывкаыс йылiсь, некöр ни бы думаэзнас орсны, но некытчö эд он пышшы, синнэтö он кунь да сiдз ов: пантасясö кöр нывкакöт, люкасясö этадз оча-паныт, сэк видзöтыштас Нинаыс синнэзö, адззылас, кыдз нывкаыс шогалö, и бöра сьöлöмлö лоö дзескыт, бöра думаэс пондöны орсны, бытьтö мыйкö гусялiс, мырддис и оз сет, видзö дынас. Кöть и мыдзся ни мыдз, ойнас бöра саймас и думайтö, бöра мыйкö мужиклö оз тырмы...

Пессис Иваныс вöрсö кертöн, асьсö немымда эз жалейт — нярьялiс, уджалiс кресеннясянь кресенняöдз, видзчисис, кöр мужиккес пондасö мунны гортö, ныкöт лöсьöтчис жö бы иньыс дынö. Но локтiс кресення, а сiя кышалiс лямпаэз и чуйкнитiс мöдöрö. Гортiсь иньдiсö сёян, но кин? Мамыс, а не Мариныс? Топ инька да мужик вунöтiсö ни öтамöднысö: Иван эз вöтась иньсö, мöд мужиккес моз эз касьтыв, и отирыс шы эз сетö, кöр адззöны том мортлiсь олан.

Чулалiсö луннэз. Мужик уджалiс вöрын, асьсö уджас эз стыдит, умöль кылöн отирыс сiйö удж дорö эз касьтылö.

Гортiсь вöрö вöввезöн да вöввезлö жö кыскалiсö турун. Турун ваялiссез юöртiсö Иванлö, что сiйö гортö пондöм видзчисьны иньыс, что сiя эшö колö Мариныслö.

«Тöда ме, кыдз тэныт кола! — том мужиклöн öзйис аскодя гаж. — Олышт. Пешлы мужиктöг олансö, сэтшöм кодя кö тэ. Оз я сьöлöмыт мымдакö небзьы?» Аслас оз-оз да тöдвылас усяс Нинаыс, кöда бы öддьöн колiс Марин местö. Сiя бы иньнас колiс, сiя бы шонтiс, вердiс сьöкыт удж бöрсянь и вурис-вочис кеписсез да вешьянсö, кöр вöрас паськöмыс бырис-разьсис.

Бараккес дынын жö эм баня, сiйö лонтiсö субботаэзнас: кинлö колö, миссьы и пывсьы. Декабрь дженыт лунö кресеннянас Иваныс асывсянь бараксис некытчö эз мун, лонтiс баня, пывсис мужиккескöт, кöдна вöрсис гортö эз мунö. Погоддяыс кöдзыт. Баня бöрсянь колiс бы шоччисьны, но сэтöн мöд барак посöдз дынiсь, кытöн олiсö нывкаэс, Иван казялiс Нинасö: нывка мырсис-поткöтiс бы кöньöс кыза сира чурка: сотас и черыс сибдö, а чуркаыс оз и вöрзьы, оз пот. Нина, тыдалö, мыдзöм ни керны пессö, но ружтö, тырппесö курччалö да уджалö. Иваныс банясяняс пымалöм, вир сiдз и орсiс чужöмыс вылын, чеччöвтiс нывка дынöдз, мырддис кисис черсö, лэбтiс юрыс вевдöрö, ружтыштiс и сöтiс. Чуркаыс торьясис, кыдз серöмтчис.

— Этадз колö! — Ванькаыс гажöн видзöтыштiс Нина вылö.

— Кужан, — нывкаыс нерис мужиксö. Сiя кытöн шынь видзис, а кытöн и вермис чушкавны, что сыбöрсянь шы он сет. Иваныс нывкалö сэсся нем эз горöтчы, пыдына ловзисис кöдзыт рунас, тшöк мунiс да пондiс кызöтны. Эта коста Нина швыркнитiс баракас.

Мужиклöн сьöлöмыс сiдз и чеччöвтiс бы сьöрас, кöр нывкаыс вöрас уджавтöн топ ёнмыштöм, сöстöм ру вылын лоöм топ эшö басöкжык да лöсьытжык мыгöра — сiдз и кыскис дынас. Иваныс вермис бы и пырны нывкаэс баракö, пуксьыны Нина бокö да баитны мый колö. Но кыдз сiдз керас, вöрас эд не öтнас. Мый талун жö пондасö лёбны Нинаыс йылiсь? Сыбöрсянь кöть эд синнэтö эн и осьт. И мужикыс лынь-лынь пырис аслас баракö.

— Но и мый? — пиннес гер ни Ильялöн, кöда лэдзчылiс гортö и кайис ни талун одза-одз да Прокоп дедлö отсалiс юскыны вöв. — Зуралiс невестаыт?

— Кытшöм невеста?! — синнэс ыждiсö Иванлöн.

— Тöдам, Ванька!

Иван одзлань шы эз сет, пöрöтчис аслас топчан вылö и кунис синнэсö. Керку угöлö кыдз кинкö вачкис зорöн — этö öтöрас вынсялiс морозыс. «Зонка, сiя эд не тэнат ни — асьсö нерис Иваныс. — А менам кö лоас?!» Думайтiс и эз казяв кыдз ланьтiс, да чулалiс ойыс.

Асывнас одз петiс посöдзö, и кыдз кинкö татшкис моросас, сэтшöм вöлi кöдзыт. «Нинкöммезам колас тэчны турунсö рожень етш, сэк коккез оз пондö кынмыны», — думайтiс вöр керись и чожа бöр пырис баракас. Джодж шöрын гугйис-лонтiсис печка. Мужиккес — кöда пусис, кöда кöмасис. Баракын патшкис чöскыт шыдöн, ньылöм дук чегис ныр — сьöкыт руыс, сiдз кыдз рытсянь косьтiсö ва кöмкöт-паськöм.

— Иван, он я мый я сёй? Мыля он пусьы? — юалiсö мужиккес.

— А сiя пöт ни. Нинаыс вердiс, — згальничайтiс пöрись Прокоп, кöда вердiс вöввез и чеччис медодз.

— Ох и лесник! Не вöрсис, дак керкусис лыйö, — серöмтчисö мужиккес, сэтöн жö ошкисö. — Сiдз, Ванька! Лыйсьы, кытчöдз лыйсяныт оз опчекайт.

Югдiс дыша, асывся зарни öзйис жагвыв, а öтöрын мороз вынсялiс сiдз, что пуэс коласын гардчис ни тшын. Кöда, натьтö, думайтiс, что этатшöм кöдзытiнас некин ни оз пет уджавны, но шондiыс эз ешты мыччисьны, а мужиккес коккезныс вылын ни: кöда вöлöн, кöда подöн — öтамöднысö одзалöмöн петiсö уджавны.

Иван да Илья баракыс дынсянь уджалiсö не вывтi ылын. Талун кык ёрт быдöннысö одзалiсö кайны вöрас, медодз пондiсö пöрöтны пуэз, суййисö нiйö, орлалiсö керрез вылö.

Бимороз. Сьöвзян, и сэтöн жö дуль кынмö, оз ешты лэбзьыны лым вылöдз, а уджалiссес пымалöны.

Рытöдз керисö норма, мыдзисö кодь. Пондiс пемдыны. Колiс бы тэрмасьны бараккезö, югытсорöн петны делянкасис, а жаднöй Ильяыс дундöтчис да горöтчис:

— Кывзы жö, Вань... Вай жö эшö этö пусö пöрöтам.

— Эн пöт уджнат? — Иваныс видзöтiс кузь да кыз пожум вылö. — Сёрмам эд.

— Пöрöтам! — чер бердö кутчисис Ильяыс и пондiс тшаптыны-керавны пусö.

Иваныс босьтiс пила.

Отирыс — гортö, а нiя, кык арттöм, йирисö-пилитiсö кыз пу, кöда ружтiс-керис да ризя-разя пöрис, лымыс бердын ни медбöрьяись сьöкыта ловзисис да лöнис. Но сiйö эд колiс эшö суййыны да орлавны.

— Керам! Орлалам! — Ильяыс видзöтыштiс тöлiсь вылö, кöда вылынкодь ни öшалiс кымöрас.

Мороз бöра вынсялiс — ловзисьны немöн.

Уджалiсö вöр кериссес, шедтiсö деньга, медбы получитны ёрттэзся унажык, и оз я сетö эшö премия.

Сiдз и лоис: виль год панытö вöр кериссезлö козьналiсö премия. Радöсь мужиккес, что бур удж понда премия босьтiсö, эм мыйöн иннезныс одзын ошшасьны, а Иван киас бергöтлiс, бергöтлiс дöрасö, пиньöвтыштiс öмсö, топ мортсö дойдiсö и шлёпкис:

— Илья, поди, тэ босьтан?

— Менам аслам эм! Мый лоис? Бöра бöб поныс пурис?

— Пурис... — будзгыльтчыштiс Иван да вöлись дöраторсö сюйыштiс ольпасьыс увтö.

— Эх, мужиккез! Гажа талун луныс. Винаок бы этчö или буржык сюромка! — Илья Иванлiсь малыштiс юрсö. — Лэбты жö юртö да вузалöм пон моз эн пукав. Ме понда орсны гармоннянас, а тэ сьыв! Ильяыс неважын небис туй мортлiсь гармошка — важö да бырöмö ни, но эшö туйис орсны. Зонка босьтiс гармошкасö киэзö. Паськöтiс и — эр-эр да эр-эр, бытьтö етша эшö пилаыс луннас пель одзын бизгö.

— Илья, тырмас ни пессö пилитны! — горöтчис Проша.

— Илья, вай жö гармошкатö пешла, — чочком юрсисö малалö да Ильялiсь гармошкасö корö Гриша дядьлöн Митькаыс, кöда кывзö гармошкалiсь шысö, сьöлöмыс дзик öзйö, гаж пондö чеччавны, киэс сiдз и кыссьöны орсны.

— Орсан бы, аслыт неб. Менам абу казённöй, — Илья киын порсь моз ни виксö гармошкаыс — пеллез тупкав.

— Сет, Илья! Ась Митькаыс сьöлöм гажöтыштö, то тэ орсöмсянь сьöлöм гудыртчö, — лöгöн ёртыслö висьталiс Иван.

— Велала жö орснытö, сэк нывкаэс быдöнныс лоасö менам! — вöлись Ильяыс гармошкасö нюжöтiс Митькалö, кöда öт öм угöвнас шыннялö, ласковöя малыштö инструментсö, и меххес паськалöны. Гармошкаыс кокнита ловзисьö, что мезмис хозяиныс дынiсь, и öнi мыччалас, кыдз колö орсны. Гармошка кыдз саймö кыз онiсь и гажöн пондö сёрнитны, топ ловья, асланым роднöй, ась быдöн вунöтö лунся сьöкыт удж, чапкö дыш, кольö кытчöкö шогöттэз, сьöкыт думаэз, ась вöр шöрын оссьö праздник, öтлаö чукöртö томöс и пöрисьöс!

Митька прокмис орсны, кöть и гармошканас орсны школаын эз велöтö, дзик зонкаыслö мамыс зыбкаын ни козьналöм сер серöтан шыэз, кыдз тулысся сьыланкыв. Баракын пызан вылын сотчö лампа, джодж шöрын югыткодь, а пельöссэзын пемыт, но гармошкалöн шыыс керкуас бытьтö öзтiс кык шондi. Серöтiс-орсiс Митькаыс, гармошкаыс гажöтiс сьöлöммез, но мужиккес эз сьылö, эз йöктö. Ны местö керкуö ыбöсöт сьöрсьöн-бöрсьöн каёккез моз быркнитiсö нывкаэз, и сiдз жö сьöрсьöн-бöрсьöн порог дорсянь веськыта чеччöвтiсö джодж шöрöдз, дубас подоллэзнаныс гардыштiсö-öвтыштiсö и öммезсиныс керкутыр пышшö ни частушка:

Менам милöй сэтöр сина,

Сiя быдмöм куим пиня.

Öтiк пиньыс, кыдз тоин,

Ачыс сiя, кыдз кöин.

Их, ох! Митька, орс буражыка!

Сьылiс öтiк. Эз ешты сылöн öмыс пöднассьыны, кыдз мöдiк эшö горöнжыка да басöкжыка кисьтiс:

Порсь, порсь, менö бось!

Ме тэ сайö муна.

Тэнат коккет дженытöсь,

Дöра оз ков уна!

Ильяöс няньöн эн верд, сiя сэтöн и эм: чеччöвтiс аслас топчан вылiсь и пондiс тойны тусьсö, пондiс коккезнас гажсö нильны — любо видзöтны. Мыгöрнас сiя вöлi учöт, но голосыс — чиння:

Весь тi, нывкаэз, чеччалат,

Вывтi гажнытö мыччалат!

Ме бы тiянкöт окаси,

Но мöдiккöт ни гöтраси.

Их, ох! Ильялöн кык кок,

Öтiк кокнас — топ!

Мöднас — шовк!

Сымда менам и прок!

Нывкаэс йöктiсö зонка гöгöрын, кыдз ма гöгöр лэбалiсö мошшез. Сэтöн жö йöктiс и Нина, но мöддэс моз вывтi эз чег, а йöктiс сiдз, топ только коккес и вöрöтчисö, да синнэзас гаж чеччалiс.

— Митька! Буржыка орс! — джодж шöрын чеччалiс Илья — кымöснас потолоксö люкалiс. — Ванька, пет öтлаö! Эй, Ванька!

А Ванькаыс абу ни керкуас. Ёрттэс гажöтчисö, а Иванлöн горшас курыт — мороссö зэлöтiс обида, шогöт.

Йöктiсö нывкаэс джодж шöрын, питьыртiс-орсiс гармошка, а Иваныс сулалiс посöдзын: сьöлöмыс места эз адззы, эз кыв мужикыс, кыдз лёк морозыс чеплялiс чужöмсö и йöрнöсыс пыр яйсö.

Тöлiсьыс вылын ни. Вöрын шы абу. Вöрыс кыдз кывзiсис, мый керсис баракын. Мезмис кымöрсис да вотьыштiс-усис звезда. Кытöнкö нёштöм голосöн унньöвтiс тшыг кöин — норасис аслас судьба вылö.

Иваныс сулалiс посöдзын, сайкалiс и кынмис; но видзчисис, кöр нывкаэс петасö мужиккес баракись.

— Ванька, эй! — баракын, кылö, ёртсö ыксiс Ильяыс, топ öшис керкуас. — Ванька!

Оссис ыбöс. Шонытсорöн нывкаэс керкусис уськöтчисö öтöрö. Нинаыс кыдз усис веськыта Иван киэзö, чирнитiс-повзис, дрöжитö, кеймисьö ни:

— Лэдз, Иван! Ванька... — и кутыштiс шоныт киэзнас Иванлiсь кöдзыт киэсö. — Нина! — гусьöн модис Иваныс.

— Лэдз!

— Некытчö ме тэнö ог лэдз!

— Лэдз, Ванька! Эн серав.

— Ме тэнö любита!

— Иньтö любит! Сiя не ме кодь каляпа, — горöтчис нывкаыс, нетшкöвтчис да сiдз, что юрсиыс разьсис, и котöртiс асланыс баракö.

Иван кынмис — оча пинь эз локтö, кыв ни эз вермы горöтчыны. Дрöжиттöн пырис баракö, ыбöс дынсянь веськыта локтiс аслас топчан дынö и йöрнöс-вешьяннас водiс.

— Бöра öмсит лэдзин! — осудитiс Илья, кöдалöн топчаныс зэв — китö нюжöтан и падман Илья кымöсö, кöда пым, но не пымалöмсянь, а сiйöн, что ештiс окыштны ассис Дарьясö, кöдö важын ни кытшлалiс и любитiс.

Илья узьлiс Иваныс бокын зэв, адззис и кылiс, мый вöтасьö ёртыс, думаэсö кыдз тöдiс. Сiйöн и юалiс, мый думайтö Иваныс, да модис:

— Ванька... Кыдз думайтан? Тэ бы гöтрасин Дарьяыс вылö?

— Мун тэ сэтiсь! — висьталiс Иваныс и бергöтчис мöд бокыс вылö.

Мужиккес етша кин эшö узисö: кöда кыйис нинкöм, кöда вурис-вочис сермöт да сийöс, — лöсьöтчисö ашыння удж кежö.

6

Мороззэс вынсялiсö. Асывнас Ильяыс баракö пыртiс кынмöм каёк. Нiя лэбзьытöн усялöны — кынмöны, а отир уджалöны, кöть бы мый.

Баитчисö, что талун плотбищесянь пондасö локны öтдруг и мыйись-мый отсавны öтамöдлö, но кöр Иван Ильякöт делянкаись петiсö ледянка вылö, сэтöн некин эз вöв, только вöрас öшалiс тшын-туман, и морозыс сотiс рожабаннэз.

— Кин миянöс тэкöт этатшöмас пондас видзчисьны? — шуис Илья и иньдöтчис туйыс кузя бараккезлань, дзик катыльтчис тупыль.

Иван иньдöтчис ёртыс сьöрö. Мороз сотiс рожабаннэз, сiдз зэлöтiс, что ловзисьны топ вöлi немöн. Содтiсö шаггез и пондiсö чышкыны-мунны да сiдз, что чожа пымалiсö спинаэзныс. Логлань лэдзчикö одзаныс кинкö пондiс тыдавны.

Тöдчис, что морт ны моз жö тэрмасьö. Мужиккес содтiсö шаггезнысö и чожа одзаныс казялiсö нывкаöс. Ылiсянь ни Иван мыгöрыс сьöртi тöдiс, что эта Нина, и сылöн сьöлöмыс гажмис, кыдз пондiс лэбзьыны одзлань. Иван одзалiс ёртсö и логыс дорын вöтiс Нинасö. Нывка мунiс-печикасис, кыдз мырсис öтiк местаын.

— Кытчö тэрмасян?! — Нинаыслö ыкöстiс Иван.

Мöдыс бергöтчис да гажтöма пондiс видзöтны мужик вылö. Öтiк рожабаныс чочкоммöм, кыдз лякöмась пятак ыжда гижöттор, чышьяныс и синлыссэс гыöрзьöмась.

— Кытчö, мыся, тэрмасян?!

Нывкаыс мыйкö бы шуис, но öмыс пиньöвтчыштiс, и кыввес эз аркмö.

— Тэ мый, Нинок? Кынман?

— Мититыс вöвнас вöтiс и колис. Эз пуксьöт, — öмыс нач пиньöвтчис нывкаыслöн.

— Мыля тэнö Мититыс пуксьöтас, кöр тэ вылö лöг? — пиннес пыр висьталiс Иваныс. — Сiя абу я Мариныслöн дядь... Сэтшöм жö рака син. — Кыскис кеписьыс пытшкись кисö, малыштiс нывкаыслiсь рожабансö и шуис. — Эх, Нинка! Лöгалан ме вылö, а ачыт...

— Мый ме?

— Шы эн сет! — висьталiс Иваныс и небыта пондiс ниртны Ниналiсь рожабансö, уджалiс кинас и баитiс. — Ме жö тэнö любита! А тэ...

— Тэ мый керан?! Вешшы! — нывкаыс дынсис тойыштiс бы мужиксö, но Ивансö пыкны, кыдз кыз кер зорйыштны.

— Дугды! — жмитыштiс сiя нывкасö.

— Тэ жö ме вывтi сералiн, и тэ жö... Эх, Иван... Разин чикисьöс, а ачыт... Абу ни вöлöмыт морт!

— Кин?! — Не ме жö...

— Доддялiсö менö... Эз юасьö и эз висьтасьö, а öнi тэ понда сьöлöмö сiсьмö, кöть джагöтчы!

— Джагöтчы! Мый видзö?!

— И джагöтча! Вот адззылан!

Ильяыс кольччыштлiс бöраныс, вöтiс и юалiс:

— Оз я ков отсавны?

— Шоналам! — гажöн ни шуис Иван, и Илья иньдöтчис одзлань, колис ёрттэсö.

Ниналöн петiсö синваэс, Ивансö дынсис эз ни тойышт. Мороз сiйö и видзчисис, кöр мортыс сувтас, медбы ёнжыка зэлöтны: медодз кынтас рожабаннэз, сыбöрын пондасö кынмыны коккез, спина, и топ пырö ни коскаэз дынöдз.

— Котöртам, Нин! — гажöн шуис Иваныс, нывкасö кутiс киöттяс и пондiс кыскыны одзлань.

Медбы кокнитжыка доддезöн кыскавны вöр, туйсö киськалiсö ваöн. Котöртiсö, кöть и кын нинкöммезныс нильдалiсö туйыс вылын. Котöртiсö и чожа пымалiсö. Нывкалöн гöрдöтiсö рожабаннэс. Сiя сувтчыштiс, гажöн ни видзöтiс Иваныс вылö да юалiс:

— Тэ кытчö менö кыскан?

— Кынман эд, — виноватöя висьталiс Иван, малыштiс нывкаыс кымöс вылiсь юрси, видзöтыштiс нинкöммес вылö и шуис. — Нина, нинкöммет бырöмась, уссэз тыдалöны, а коккет...

— Некинлö сьöктавнытö. Гортöдз мунны тырмасö, а сэтчин виллезö пышнала.

— Ме тэныт виллезö кыя.

— Эн серав.

— Кыя!

— Ох тэ, Иван-баран... Баран и эм, а эшö лöсьöтчин ме вылö гöтрасьны. Ов ни кыдзкö инькаыткöт да ме сьöрын эн вöтлiсь.

— Понда вöтлiсьны! — видзчисьтöг жмитыштiс нывкасö и окалiс.

— Мый керан, Ванька?! — гажöн ни юалiс Нинаыс. — Грех эд.

Шондiыс пуксис ни, морозыс вельмис, шовкöтiс пуэз бердын, полöтiс, сiдз бы и пöртiс мыррезö. Томмес öнi эз ни тэрмасьö, кыскисö кадсö.

— Ваня, мый öнi лоас? Сьöлöмöс пурин, сёйин лёк горшнат... Кыдз одзлань овнытö? Вай ог пырö бараккезас, ог мыччисьö отирыс син одзö.

— Ме тэкöт верма и кöз увтын овны.

— Стыд отирыс син одзö мыччисьны. Быдöн öмсö осьтас да пондас пиннесö кеслыны: «Нинаыс Ивансö инь дынiсь янсöтö! Вот сучкаыс!» Думайтан бур сэтшöмсö кывзыны? И быдöс эта, Ванька, тэ кузя! Юрнат он думайт да керан. Тэнат оз я зон ло...

— Но мый ме кера, сiдз кö петiс?! Айö кузя... Но öнi кöть мый, тэ вылö гöтрася. Пышшам кыкöн, ась оласö!

Нина абу иньыс кодь. Сыкöт гажа, адззисьö басни, баитöны, и сьöлöмлö долыт, кыдз шоналан, быдöс лоö бур, сэсся нем ни оз ков. Кыкöн локтiсö уджалансянь. Пыд вöрöт мунiсö, кытöн и каёккес эз шыасьлö, и некин нiйö эз адззы, но локтiсö бараккес дынö, пантасис Прокоп дед. Старик петöм бараксис вöввес дынö, сулалö посöдзас, öмыс чуман кодь пиньöла, малыштiс долоньнас тошоксö, гажöн видзöт-керис томмеслань да пондiс лельгыны:

— Тень-тень... Иван, иньыт иньдöма юöр, ась пö, öнджа... Этö... Кыдз сiйö шуны? Прокопыс пö мед мужикöс синйö, ась пö сiя нывкаэс дынын оз нюкьясь...

— Дед, асьтö тöд... Гöтрасин бы... (Дедыслöн куим год ни кыдз кулiс иньыс, öнi олö öтнас да бöрйö бы аслыс невеста).

— Гöтраси бы, да гöтрасян торыс абу ни! — кивзыштiс пöрисьыс.

— Сэк йöзыс вылö эн гольксьы!

— Тэ сэсся ме дынö эн лок! — Нинаыс котöртiс аслас баракö, но Иванлö колис гаж, кöдö некин ни оз вермы мырддьыны.

Эта лунсянь том мужик чеччис и водiс, узис и вöтасис Нинасö, сiйö и керис, модис ас кежас: «Менам Нинаыс, менам! Некинлö ме сiйö ог ни сет. Гöтрася и кыкöн пышшам, ась чожажык локтö тулыс». Но пышшыны Иван эз вермы — сiйö некин и некытöн оз видзчись, и колхозсис сiдз и этадз оз лэдзö, некин и некытшöм гижöт эз сет. «Оз кö лэдзö, вöрын пондам овны! — думайтiс Иваныс. — Кöз увтö поздiсям!»

Эта лунсянь мужиклöн оланыс вежсис, сiя бöра лоис том, смев и визыв. Уджавны мунас, пила киас орсö, чер сярган моз бергалö, рытнас ужнайтас и Ильялö шуö:

— Илья, кытöн гармошкаыт? Гажöтышт!

— Ог куж. Песся-велöтча бы, но ог велав.

— Велöтчы!

Гажа баракын, кöть и дзескыт да пемыт, нять, но Митькаыс босьтас гармошкасö, паськöтас да кыдз пондас орсны, сiдз нывкаэс и гизьнитöны асланыс баракись да пондöны йöктыны. Иваныс син одзын — Нина, и сэсся нем сылö оз ков, но нывкаыс дынö быд шагын эз лякась, гöгöрас эз жöдз. И Нина топ адззис и эз Ивансö, ась и кыкнанныслö овлiс гажтöмкодь, кöр дыр эз баитö, а инмас кад — нылöн! Пукалыштасö отир син сайын, висьтасясö да юасясö — басниыс адззисис, век бы эз янсöтчö. А пантасьлiсö унажык рыттэзнас, кöр Иваныс ужнайтас да петас öтöрö бытьтö куритны, сувтас посöдзö и видзчисьö. Ачыс видзöтлö тöлiсьыс вылö, кöда вот-вот мыччисяс кöззэз сайсянь и омöн югдöтас быд торсö, кыдз шондiа лунö. Дзуртöны пуэз, ургö тöлок, натьтö, вайöтö кымöррез, лым. Карта вылын пырскайтöны вöввез. Эта коста нывкаэз баракись и петавлiс Нинаыс. Петас, локтыштас Иван дынö, жмитчыштас, сьöкыта ловзисяс да шуас:

— Ой, Ванька! Мый ми тэкöт и керам?!

— Нем умöльыс абу, — Иваныс висьталас нывкалö, жмитыштас, но сэтöн... Сэтöн Прокоп дедсö кыдз видзчисьöны: петас старикыс и пондас модьны:

— Тень-тень, мый нö бöра? Бöра окасят или сiдз сулалат?

— Лэдз, Иван! — Нинаыс нетшкöвтчас Иван дынiсь и пырас бараканыс.

— Дед! — Иван лöгасьö старик вылö. — Натьтö, кöркö тэ сёян жö месянь!

— Мый сэтшöмыс? — бытьтö нем оз вежöрт дедыс. Этатшöм бöрсянь лун-куим Нинасö видзчись кöть эн — оз пет бараксис, ась и адззылас öтмöдöрö ветлöттöн, видзöтас Иваныс синнэзö, кöдна гöрдöтöмась: горзöм бытьтö мужикыс.

Нинаыс местö мукöдпыр рыттэзнас нывкаэс барак посöдзö петавлiс Öгруш. Сiя петас бараксис öтiк йöрнöсокöн и сулалö, кыдз кинöскö видзчисьö жö, сьöд синнэс пемытiнас югьялöны — полöтöны Ивансö. Нывкаыслö тридцать гöгöр ни, но мылякö сiйö зонкаэс эз радейтö, поди, сiйöн, что нывкаыс ыджыт öма, пондас кö баитны, быдöнöс голоснас вермас, и уна тöдö да уна адззö, пыр сылöн и голос: «Ав да ав! Ме сэтчин вöлi и этö адззылi!» А кытöн ештiс вöвны, мый адззылiс, кöр гожуммезнас ытшкисян да вундан кадыс сiдз гардас, что пыдынжыка ловзисьны эз позь, нетолишто кытчöкö бы мунны. Но модьö эд, нырсö сюйö кытчö колö и оз. Öнi Иваныс петiс баракись, медбы пантасьны Нинакöт, но Нинаыс местö казялiс Öгрушöс.

— Öгруш, тэ менö видзчисян? — Иваныс юалiс нывкалiсь.

— Колан тэ меным сэтшöм каляныс?! — нывкаыс стыдитiс мужиксö, мыля сiя мыгöрнас учöт, а мöдыс унажык мужик вылö вачкисис: ён, ота пельпона, кыз голоса, баитiс, кыдз ыбöс дзуртiс. — Тэ меным, Иван, он ков. Тэ понда Ниналöн сьöлöмыс сiсьмö-косьмö, а тэ он и кыв, он и адззы, а ошшасьнытö кужан! Не иньытлö он ков, не Нинасö он адззыв.

— Ась петалö Нинаыс!

— Мый меным содас, висьтала кö?

— Мый колö?

— Кöть бы тэ, Иван-баран, жмитыштiн моростырнат, менам бы сьöлöмö бурмис, то видзöт кыдз кынма... — сьöвзис мужик моз. — Но тiянöс, кынмöм мериннэсö! Видзчись гулютö, висьтала, мед петас, да пöттöдз окасят.

Дзуркнитiс ыбöс и öшис Öгрушыс. Сы местö бараксис петiс Нина. Пельпоннэс вылын кыз шаль. Шыннялö. Локтiс Иван дынö, жмитчыштiс да юалiс:

— Мый колö?

— Гажтöмтчи.

Ойес кузьöсь, öтöрас дыр он сулав, а томмес оз тэрмасьö пырны баракö, кытчöдз бöра эз дзуркнит ыбöс и эз пет Прокоп — эта шар син старикыс, кöдалöн дульыс вотялiс томмес дыр, сiдз бы кинöскö и жмитыштö жö, но некинлö ни эз ков.

— Тень-тень, тi бöра ни окасят? — модис дедыс.

— Дед! — шуис Иван. — Ме тэнö гöтрала Öгрушыс вылö. Босьтан?!

— Тень-тень, Ванька! Пола ме сылiсь: бокас вода, да нем оз аркмы кö? Сэк эд зуралас, а?

— Вермас! — висьталiс Иван. — Мый тэ сэтшöмыслiсь босьтан.

Морозыс малалiс спинаэзнысö, вашöтiс керкуö.

7

Тöлыс кузь. Луннэс содiсö, но мороззэс эз чинö.

Иваныс уджалiс вöрын. Бура уджалiс, а гортын мый? Эз думайт: эм кöть абу сылö гортыс! Öнi сiя немись ни эз пов, панталiс и кольлалiс Нинасö, кытöн колö, сэтöн и отсасис нывкалö, и мöдыс сiдз жö вурис и вочис, пусис и вердiс ёртсö, только öтлаын эз узьлö. Вöр кериссес медодз сералiсö Иваныс вылын, мыля сiя чапкис иньсö да пондiс гардчыны нывкакöт, а сыбöрын адззисö, что Иваныс быль лöсьöтчис овны Нинакöт, нем эз пондö шуны, кыдз бытьтö сiдз и колiс.

Уджалiс вöрын мужикыс, бур сылöн лоис оланыс, но февраль падера лунö, рытнас, видзчисьтöг баракö пырис иньыс.

Мариныс кузь мыгöра, векнит, сувтчыштiс барак порог вылö, юрнас таджьялiс потолоксö, вишнитiс нырнас сьöкыт уль ру, кöда сорлассьöм ньылöмöн да шыд кöрöн. Вишнитiс пон моз нырнас, пиньöвтiс нырсö и веськыта порог дорсянь шагньöвтiс мужикыс дынö, кöда пукалiс топчан вылын да йирис няньтор. Иванлöн чочкоммыштiс рожаыс.

Мариныс зэв сибöтчис мужик дынö да пишкыштiс:

— Чöвт, кага, вешьянтö! И йöрнöстö чöвт да тэрмась, песик! Меным, видзöт, видзчисьнытö некöр, колö бöр гортö!

Мужиккес баракын тыр, öтлаын Иванкöт öммезнысö осьтiсö да видзöтöны инька вылö.

— Чожа! Ме эд видзчися!

— Мый сэтшöмыс?! — дульсö зубыта ньылыштiс Иваныс, а иньыс спинаöттяс кутiс йöрнöссö, вынöн кульыштiс вывсис, кыдз баранлiсь кучик да висьталiс:

— Вешьянтö ачыт чöвтан али отсавны жö?! Мужикыслö вöлi стыд — быдöс район пондас серавны этатшöм позор вылын. Но воштiсьны некытчö, и Иваныс отир син одзын ружтытöн чöвтiс вешьянсö и кольччис трин-брон... Нагöлеч.

Иньыс сэсся нем эз шу, курым-карым мужикыс одзись керис паськöмсö, и кыдз пырис кын коккезнас, сiдз и петiс.

Мариныс кыз кынöма — этö адззылiсö быдöнныс. Сiдзкö, Иванлöн лоас кага, кöда йылiсь бытьтö сiя эз тöд, но тöдiс ни Нинаыс.

Иваныс синнэсö мужиккес одзын эз кунь, эз павдöт рожаыс вылö симöт, а пасьтасис мужиккес паськöмöн, кöдö сылö сетiсö, кыдз сироталö — жалейтiсö. Немымда ни эз думайт иньыс йылiсь Иван, и кагаыс ло кöть эн. Пасьтасис йöз паськöмöн, петiс нывкаэс баракö и веськыта висьталiс, что талунсянь Нинаыс сылöн инь.

Некин мужиксö эта понда эз ошкы и эз вид, эз падты, но Öгрушыс, кöть и грамотаыс сьöд гыж мымда; аслас яд кыввезнас шуис:

— Иван-баран, сiдз и пондан чеччавны öтiк инь вывсянь мöдiк вылö, кытчöдз оз кодзö? Или Совет властьыс сiдз велöтö овны? Мылякö одзжык эта эз вöв, кöть калян сайö миян кодьсö сетасö, но олiсö инькаэс...

Оланыс нач эз дзугсьы и эз сувт.

Кытöнкö март месяцö, кöр крыша доррезö рыттэзнас öшöтчывлiсö ни йыовöй чöрссэз, а луннэзнас шонтiс сiдз, что тöв сайын позис ни сунавны и не кынмыны, Иванлö гортсянь вайисö гижöт, кöда юöртiс, что сiйö видзчисьöны сельсоветын.

Сельсовет — этö не Öгрушыс, кöда пиннесö вузалас да бöра öтлаын, сельсоветö весь оз корö. И Иваныс рытнас жö пуксис доддьö и турун ваялiссескöт иньдöтчис гортö.

Иньыс гортас эз вöв, сiя олiс аслас мам дынын.

Ивансö мамыс панталiс синваэзöн, кивзiс да ойзiс, видiс моньсö, унажык жалейтiс зонсö да норасис: «Öнi, зон, вöлись иньытлö шедан! Сёяс ни... Сысянь эд и меным ни оланыс нач эз ло, гортын шыр моз ола, ог лысьт горöнжык кыв горöтчыны, эмись и абуись пурö. Слава богу, кыдзкö петiс мамыс ордö».

— Сiдз тэныт и колö! — бöра мамсö Иваныс эз жалейт — резгис лэчыт кылöн.

— Ме эд эг думайт, — синваэзнас виньдiс мамыс, а айыс дундöтчис, горзьöтiс и пондiс ошшасьны:

— Некин оз сёй кытчöдз ловьяöсь! Кулам кö, сэк кöть мый мед керöны.

Иваныс думаэзнас олiс Нинакöт, кывзiс и эз аймамсö. И бур думаэзöн водiс да узис, а мöд лунас шондi петан гöгöрас иньдöтчис сельсоветö, кытöн сiйö видзчисьöма ни председательыс. Предыс пукалiс аслас пызан сайын, рамыника здоровайтчис, лёка пондiс видзöтны веськыта синнэзас и баитiс:

— Висьтав, Иван, кыдз уджалан?

— Кыдз отир, сiдз и ме. Оз видö, не оз ошкö, — шуис Иваныс.

— Мыля гортö он вовлы?

— Сьöлöмö оз кыскы...

— Вот кыдз! — нырнас вирснитiс предыс. — Сiдзкö, горттö вунöтiн?!

— Дыш петö ветлöтнытö, — шуис Иван и пондiс норасьны. — Кыдз ме сэтшöмыскöт понда овны?!

— А ме кыдз ола?! — паныт ордчис предыс. — Кыдз ми олам, кöр быдöннымöс гöтралiсö аймамным, эз юасьö?! Кытчöдз невестаэзным бокö эг водö, нывкасö кодьöн эг адззывлö, а öнi тi чожöсь. — Шынньöвтiс и сэтöн жö лöгасис, — некытчö иньыт дынiсь он пышшы! Кужан... Иньыт видзчисьö кага, а тэ... Законыс, мужик, абу тэ дор! Кыдз прокурорыс желля кеписсезнас жмитас, сэк вöлись пондан сьывны мöднёж, сэк вöлись!.. И думайт буржыка, кысянь тöлыс рамжыка ургö, бура думайт и вöлись невестаэсö кошшы. Вежöртiн, Иван?! Или эшö колас мыйкö содтыны?

— Оз, — юрсö öшöтiс Иваныс и петiс сельсоветсис, посöдзас ни пыдына ловзисис небыт руöн, видзöтыштiс лöз кымöрас, кытöн уйисö öтi-öтi сера-кутшша палачоккез, кöдна небзисö, свалясисö. Туй вылын гордöя шагнялiс сьöдрака, дзульзис тулыссямоз кöрымкай, кöсйис чожа разьны ни туйез, сiдзкö, чожа ни пондас ковны локны вöрись. Иваныс чеччöвтiс сельсовет посöдзись и гортö! Эз сёй, эз ю, мамыслö шы эз сет, спинаыс сайö кышалiс котома, петiс керкусис, сувтiс лямпаэз вылö и... Сымда бöра и адззылiсö мужиксö!

Бараккезö чуйкйис-локтiс час-мöдöн, водiс топчан вылö да пондiс ранитöм ош моз ружтыны, видзчисис уджалансянь Нинасö, медбы сыкöт талун жö пышшыны городлань.

Нывкаыс локтiс пемытöн, мыдз да гажтöм, кыдз шогалiс, некинкöт эз баит и Ивансö бы эз адззы. Иван панталiс Нинасö барак посöдзын и веськыта бузгис:

— Мунам!

— Кытчö?! — повзис мöдыс. — Мамöс кин вылö коля?! Сiя эд шогалö.

Иваныс думайтiс, что Нинаыс сыкöт уськöтчас биö и ваö, а петö... Öтiк мортöс любитiс, веритiс сылö, но сiя тэнö эз вежöрт. Кыдз сэк овны одзлань? Иваныс гичыртiс пиннесö, бöб синнэзнас уськöтчис аслас баракö, пасьталiс ва паськöмсö, босьтiс пишаль и сувтiс лямпаэз вылö.

— Тэ кытчö?! — сьöрас вöтчис Ильяыс.

— Кытчö? — повзис Прокоп дед.

— Пожум йылiсь тури лыйны! — эрзыштiс Иван, чуйкнитiс кöззэз коласö и öшис.

Лямпаэс чуйкйисö-ыскöвтiсö лым кузя, а Иван эз адззы и эз кыв кокшысö, эз вежöрт, мый сылö вöрсис колö ойнас. Мунiс сымда, мымда тыдалiс и вермис. Кöдздöтiс. Юрыс вевдöрын пуэз коласöт югьялiсö звездаэз.

Вöрыс узис. Сiя вöлi вына, немись эз пов, некинлö эз норась, некин эз тöд, кыткö сылöн висьö или оз. Вöрыс пöрись, натьтö, тöдö мортлiсь олансö не öтiк век ни, сiйöн и шы оз сет, топ осудитö Ивансö. Иваныс кадсö тöдiс звездаэс сьöртi. Мунiс, мунiс и пондiс кывны, что мыдзис, топ кыскис куим пуд сьöкыта котома: коккез дугдiсö кывзiсьны, вывтырсö кыдз нярьялiсö, кольмис, синнэс ныжмисö, быд мырыс и кöзокыс одзын пондiс дзöрны.

Пуксис кöз увтö. Пукалö и сайкалö. Мыдз. Сьöлöмыс вылiсь жагвыв ыскöвтö обида, öшö шогöт, юрас пырöны ни садь думаэз, кöдна бурмöтöны, кöсйöны олан.

Чожа пондiс кынмыны: гöжисö киэс, кынмис спинаыс. Тöдвылас усисö истöггез. Пемытiнас дыркодь кошшис кöс мыр, пöрöтiс сiйö, кыскис лапьякодь кöз увтö и öзтiс би. Билöн югöрыс пондiс йöктыны вöрыс коласын, повзьöтiс и вашöтiс мортыс дынiсь пемытсö.

Тулыс. Талун-ашын одз асывнас пондасö бобгыны таррез, каёккез ваясö гаж. Оланыс саймас, ловзисяс кокнита. Тулысся руöн ни лолалiс вöрыс и ойыс, шовкнитас-чеччöвтас песыс бердiсь шом и кылö ылöкодь. Кöз увтын гажöн тачкöтiс би, тшыныс сёйис синнэз, курöтiс горшсö. Иван пондiс кызöтны, дзик кералiс пес — говкыс вöрас полöтiс аскодя шыöн.

Сотчис пес, шонтiс мортсö, мыйсянь сьöлöмыс вылын лоис кокнитжык. Ачыс эз казяв, кыдз ланьтiс биыс бокын. Узис да вöтасис, топ кöзыс увтö локтiс кагаок и рад, бобгö-сяргö баитö Иваныскöт. Иваныс кывзiс и эз вежöрт, мый колö учöтыслö. Кагаокыс бергалiс-керис биыс гöгöрын и öшöтчис Иваныс голя бердö, рожаас ловзисис шоныт руöн, пондiс ниртчыны рожабаннэс бердын да лёбны: «Тять, лок гортö!»

Вöтыс сэтшöм, что саймис, осьтiс синнэсö и кыдз сё биыс бокын кагаокыс — киэтö нюжöт и тэнат, но Иваныс эз вермы вöрзьыны, бытьтö дорöмась кöзыс бердö, сiдз ни мыдзöм тöн, кöр лун-лун ысласис лямпаэзнас — гортсянь да бараккезö, бараккезсянь да эта кöз увтöдз...

Пукалiс да куритiс. Сьöлöмыс полiс вöтсис, думаэс чувйисö: «Кытшöм кага вöтыс гардö?! Мый одзын?!»

Пондiс югдыны, кöз йылын шутнялiс жонь. Сувтiс лямпаэс вылö, босьтiс пишальсö и ыскöвтiс керöс кырылö. Сэтöн кыдз нач коккес увтiсь, кытiськö кöзоккес коласiсь чеччöвтiс кöч и пуксис зэв одзас: пель йыввес сьöдöсь, ачыс нач чочком, кыдз кагаокыс и эм, кöдö адззылiс вöтöн. Зверьыс пукалiс, кыдз видзчисис, кöр сылö лыясö. Иваныс сулалiс да видзöтiс кöч вылö и эз вермы вежöртны, мый сылö колö, мыля оз пышшы. Позис бы лыйны или прикладнас вачкыны, но киыс эз лэб, эз вермы вийны зверьсö, кöда вöлi кытшöмкö мöдкодь. «Мый сiя?! — сьöласис Иваныс, то кутчисьлiс пишаль бердö, то бöр мездöтлiс прикладыс бердiсь кисö. — Кыш-ш-ш, бес!» Кöчыс эз-эз да чеччöвтiс, пондiс котöртны жагвыв и саясис син одзсис.

Вöлi чарöм кодь ни, но кöчыслöн тöдчисö следдэс, и Иваныс кежис зверьыс следдэс кузя, медбы видзöтны, мыля кöчыс сiдз сыкöт «орсiс». Кежис, чуйкнитiс кöзоккес коласö, сэтöн лымыс вылiсь и адззис кöчлiсь пияноккесö, сэтшöм учöтöсь да сэтшöм басöкöсь, что кынмис или тувдiс местаас, дыр сулалiс и видзöтiс учöттэс вылö, полiс шаг керны, пыдынжыка ловзисьны, а нiя — кöчпияноккес — жмитчисö и жмитчисö öтамöдныс бердö... «Бур, что эг лый», — кокнита ловзисис Иваныс и кокнита жö бергöтiс мöдöрö. Гажа вöрас, эн бы и лок гортö, но Ивансö кöчлöн пияннэс топ саймöтiсö, висьталiсö, что колö уджавны. Мужикыс синнэсö лэбтыштiс вöрыс вылö, видзöтiс уввез сьöртi кöдöрö мунны и пондiс ыскöвтны бараклань, кытчö локтiс час гöгöр бöртi. Ёрттэс пантасисö ни ыбöс коласын.

— Гортсянь?! — гажмис Илья. — А ме думайтi, öтнамлö ковсяс уджавны.

— Отирыс эд эмöсь, — бизгыштiс Иван.

— Мый меным отирыс? Пыр да сёйышт, ме тэныт шыдсö коли.

— Оз симав, — дыша висьталiс Иваныс, пöрччалiс коккесис лямпаэсö и сэтöн жö вöтчис отир сьöрö.

Луннэс кузьöсь ни. Асмознас сьылiс пистöг. Вöрын кад пондiс чулавны гажöнжык. Уджалiссес модьöны горт йылiсь, мужиккес кыввезнаныс кöдзöны ни.

Иваныс уна эз баит, но уджавтöн сьöлöмыс дугдiс висьны, мед и Нинаыс син одзас — вунöтны эз вермы, надейтчö мыйкö вылö, унажыксö нывка вылö. Думайтö, что сiя висьталас: «Но, Ванька! Мунам!»

Сiдз и вöтiс тулысыс: öтiк ойö лунланьсянь пондiс пöльтны шонытжык тöв, вайöтiс зэран кымöррез, и асывнас пондiс поснита зэрны, а рытланяс разьсисö ни вöр кыскалан туйез.

Вöр кериссес тэчисö котомаэз, пуксисö доддезö и иньдöтчисö гортö. Гортын öтiк лун эз шоччисьö: бригадирыс важын ни видзчисьöм отирсö, иньдiс кинöс кыскавны назём, кöдö фермаö ваявны турун, а нывкаэс бергалiсö гуна вылын — тöлöтiсö кöдзыс.

Неделя — и лым увтiсь мыччисисö ыббез. Эз ешты сывны лымыс — межаэзын эшö столаэз, бороздаэзöт эшö визывтöны шоррез, — а мужиккес доддясисö ни гöрны.

Ыб вылын уджалiсö öт пемытсянь мöд пемытöдз. Иванлöн вöлыс дыш, некыдз бы эз ветлöт бороздаöт, гöрсö кыскис бокö, но колiс гöрны, и гöрисьыс гöрис да сiдз, что уджас вöтiс и колис ёрттэсö бöра жö сiйöн, что ачыс вердiс вöвсö — öмсис кыскис да удiс нёль кока ёртыслö.

Сьöкыта уджавтöн некöр лоис думайтны Нинаыс йылiсь — ыб вывсянь да бöра ыб вылö, гортö вовлiс только узьны. Мужиккес тэрмасисö кöдзны, быдöнлöн сiя и басни, кыдз бы Миколаöдз петны бороздасис, и Иванлöн сьöлöмыс висис колхознöй удж понда — нянь понда тöждiсис, медбы бура да чожа кöдзны, быдтыны сю, а арнас вундыны.

Уджалiсö мужиккес, и Иван уджалiс да эз думайт иньыслö кеймисьны, кöда мымдакö олiс гортас, да бöр локтiс жöникыс керкуö. Пöрисьжыккес никсiсö-горзiсö моньныс понда.

— Мый тiянлö?! Кыдз колö, сiдз и олö! — мамыскöт нельки пиньгисьö зоныс.

— Кыдз жö, зон? Иннезнас орснытö эд оз бы ков.

— Орссьö да мыля ог орс...

Мамыс моньыслö шы эз сет, надейтчис: оз я Марин понды вежöртны, оз я мывкыдсö веж да понды бытшöма овны.

Этатшöмыс Иваннэс родын эз вöвлы...

Öтiк рытö том мужик локтiс уджалансянь, пырис керкуас, пöрччалiс коккезсис нинкöммесö, ружтышалiс, но эз баит — иньсö кыдз керкусис эз адззы. Сёйис кушки-кашки няньтор, быгыльтчис западня вылö и ланьтiс. Сэтöн Мариныс ачыс водiс мужик бокö, ыджыт кынöмнас жмитчис, кутiс Ивансö голяöттяс, жмитыштiс и... Небзис мужиклöн сьöлöмыс.

Тулыс тэрмасис и тэрмöтiс отирсö: Микола паныттэзö кöдзсис, сiя жö кадö Мариныс Иванлö козьналiс зон.

Мужикыс локтiс гöрансянь — гöрисö, медбы кöдзны клеверсорöн зöр — посöдзын пöрччалiс нятьöсь нинкöммесö, кöмтöг пырис керкуас и адззö: иньыс ружтö гöбечын, а бокас каньпиянок моз кивнитiс кага. Иван повзис — сьöлöмыс берездасис: «Но-о, одзöв тай...» Но нем эз шу, кашык-кашык керис, топ шынньöвтiс — рад или абу, ачыс эз тöд, а иньыс рузуммессорöн моросыс одзö лэбтiс кагаоксö да ошшасис: «Видзöт... Тэ чужöма эд!» «Тьфу тэ! — думанас сьöвзис Иваныс. — Ме чужöма... Лягуша вылö вачкисьö, а сiя шуö ме чужöма пö... Адззис, натьтö, кинсянькö». Вот кытшöм медодз думаэз мужиклöн, но шы эз сет, курччöвтiс кывсö: мый эм, сiя и эм ни, грехас кытчöдзкö пырны эз понды. Нинаыс дынö он ни котöрт, кöдö, кыдз локтiс вöр керансис, иньдiсö сплав вылö, и часöт абу. «Ох, Нина, Нина!» — дзескöтiс дума Ивансö.

— Ой тэ миян кутю! Ой тэ миян и кагаок! Зонка эд! Айыслö отсасись быдмас! То эд айыт, кага! Видзöт кытшöм рад тэ вылö! — мамыс моньыс киись босьтiс кагасö, лэбтыштiс киэс вылын, сiдз бы и окыштiс, но эз жö эшö окав, а пондiс каттьыны рузуммез коласö да гажöтчыны. — Кыдз нö пондам шуны? Натьтö, дедыс нимöн? Натьтö, сiдз, айыс?!

Айыс петiс керкусис и абу. Мариныс бöрсяняс жевгыштiс: — Ай разь сэтшöмыс? Песикыс... Сiйö и думайтö, кыдз бы кинкö вылö чеччöвтны, а не видзöтны ассис кагасö... Иванлöн чужис зон. Медодз мужикыс эз и видзöт зоныс вылö — гаг вылö вачкисис, эз лысьт локны да пыдынжыка ловзисьны, а сыбöрын, видзöтан кö, кагаокыс зорамис — ойезнас узьнытö эз сет, рытсянь асылöдз чирзiс, кöть мымда гыччöт, а луннас, кыдз мамыс жö висьталiс, узьö кöть бы мый...

Талун да ашын, и öтпыр Иваныс зонсö босьтiс киас, бура гусьöн видзöтiс, кин вылö вачкисьö кагаокыс, бергöтлiс — рад и абу.

— Ой, зон! — мамыс бöра сэтöн и эм ни, рад пöрисьыс, пеллесö топ адззö, внучекыс вылiсь синнэсö оз и öшты, зоныслö ыксö. — Дедыс вылö вачкисьö каганым! Дедыс вылö... Сэтшöм жö синвевья. Абу шогмöма мамыс родö. Миян! Нимсö сетамö прадедыслiсь.

«Миян кö, ась и лоас миян!» — моросыс бердö айыс жмитыштiс зонсö. Этасянь мужикыс вежис мымдакö мывкыдсö, гортыс эз ни ло йöзлöн кодь, сьöлöмыс топ пондiс гажöтчыны зоныс понда: пырас керкуас и зыбка дынö! Лельгö-баитö учöтыскöт, ошшасьö кытöн уджалiс, мымда шедтiс трудодень, висьталö, что талун-ашын Андрейсö пуксьöтас вöлыс вылö и мунасö гöрны. Андрейкаыс топ вежöртö ни айсö: дзульзьö каёк моз, шыннялö, киоккезнас öвтö, кыссьö бы айыс дынö. Керкуас гажа.

Иньыслö колiс бы мывкыдсö нач вежны жö, но Мариныс сiдз шынь-серöмсö эз и мыччав, сё желлясис быд шагын, колiс и эз, чирзiс-видiс мужиксö, шуис каляпаöн, кöр и дзезöн, бытьтö бы Иваныс нем вылö эз туй. Видзöтны кö, абу бы оланыс томмеслöн, сэтшöм иньнас нем бы керны, но зонныс... Мужиклiсь рыттэзнас Андрейыс сьöлöмсö кыскис гортö, и кöр пукалiс вöв вылын, шутнялыштлiс, шыннялыштлiс, ошшасис аслыс: «Зон эд менам!»

Быдмис Иванлöн зон — öтлаын сюэзкöт да туруннэзкöт, нюжалiс: видзöтан кö, чожа и зыбкаас ни оз понды тöрны.

Андрейыс эшö оз котрась, но, тыдалö, лоас бöб: пу-туруныс сы весьтын оз жö пондö сулавны, и этатшöмыс, бöра эд, айсö гажöтö: «Тöдö миянлiсь родсö!»

Гожумнас кузьöсь луннэс, только кадыс чулалö казявтöг, бытьтö лэбзьö. Локтас ар. Вундiссяс. Колхозын керасö праздник «Чарлачöвтан». Керасö суррез да ырöшшез, начкыласö бараннэз. Öтлаö öксясö том и пöрись, юыштасö и öдззасö сьывны да йöктыны, топ сьöкыт уджсянь эз мыдзлö.

Чöвтасö чарла, мужиккес каясö вöрö и тöвбыт кодьöн гортö оз мыччисьлö, а инькаэз да пöрисьпöлöс кыдз колö, сiдз и тöвйöны — луннэзнас уджалöны колхозын, а рыттэзнас нярьялöны лён, печкöны да кыйöны дöра и нинкöммез.

Иваныс бöра керис вöр Ильякöт, но таво вöр керанын Нинаыс абу ни. Сiйö «Чарлачöвтан» бöрын корасис ю сайся деревняись зонка, кöда локтiс финскöй война вылiсь ранитöм и эз бöрйись невестаэзас.

А Ниналö воштiсьны некытчö — сералiс ассис юрсö, дружитiс гöтыракöт, и öнi быдöнныс синнэзас бытшкисö: «Иван мульöс тэ». Йöзыс бы эта йылiсь тöдiс и эз, если бы жöникыс пондiс любитны.

Иваныс думаэзнас янсöтчис нывкаыскöт, кыдз бытьтö Нинасö вундыштiс сьöлöм бердiсь — зубыт, да вирыс эз пет, оз-оз и усяс тöдвылас, лоö гажтöм.

8

Чулалiс тöв. Тулыссянь Иваныс гöрис, олiс гортас буржыка ни, кокнитжык думаэзöн, кыдз бытьтö велалiс ни овны иньыскöт. Гожумыс таво локтiс шоныт. Вöлi жар, муыс косьмис да косьмис сiдз, что лöсьöтчис потласьны. Зэр бы колiс, медбы сибöтчис гым кымöр да люзьгис ведрапонiсь, юкталiс ваöн сюэз, туруннэз. Видзöтан кö, и ыббес кыдз бы ловзисясö кокнитжыка, гажмасö.

И гым кымöрыс кайис.

Одз асывнас бригадирыс котöртiс Иваннэзö, кыдз öшöм.

— Кытчö талун? — юасис Иван.

— Кытчö... — бригадирлöн чужöмыс вежсьöм, топ сьöкыта шогалö, места оз адззы. — Тэ нем эн кыв?

Мый колö кывны, кöр мортыс олö да уджалö, инькаэс моз быд юöрсö оз кывзы, радио абу, газетаэз сiдз жö.

— Война эд, Ванька, — висьталiс бригадирыс.

— Кытшöм война? — эз вежöрт Иваныс, моросас мыйкö кыдз орис, сьöлöмыс чеччалiс ни.

— Война, Иван, — мужикыс öзтiс бы чигарка и эз вермы: киэс дрöжитiсö, голосыс мыдзöм. Эз тöд медодз, мый талун керны, кытчö иньдыны отирсö.

Куритiсö. Чигаркаэзныс сотчисö, тшыныс курöтiс синнэз. Инькаэс унньöвтiсö ни горзыны,

— Мый пондам керны? — бригадирсö эз вежöрт Иваныс, лöсьöтчис мунны ни бы войнаыс вылö, но бригадир висьталiс, что колö мунны гöрны. — Гöрны колö, — шыасис мужикыс, улицасö вуджис мöд керку дынö, мунiс и джöмдалiс, пельпоннэс вылын топ кыскис тыра мешöк.

И мужиккес гöрисö война медодзза лунö. Кöр вöввесö сувтöтiсö шоччöтны, пуксисö межа дорö, пукалiсö кыдз öшöмöсь, эз тöдö мый керны: шоччисьны или садь быртöдз уджавны. Эз кö мыдзö бы вöввес, натьтö, сiдз бы и керисö, а öнi пукалiсö межа дорын, тöждiсисö, кинöс одзжык босьтасö... Кöда талун, кöда ашын, кöда мунас да адззылас я эшö энö гажа ыббесö...

Гажтöм. Мужиккес кыв горöтчасö и лöнясö. Öтнас Ильяыс шынньöвтiс, кыдз нем сылö и абу, горöтчис:

— Вань, а ме думайта мунны доброволецöн!

— Мы-ы-й?! — чужöмыс нюжалiс Микаль дядьлöн, кöда вöлi ни война вылын — тышкасис финнэзкöт, кокыс ранитöм, мунö и чотышалö, и кылыс баиттöнняс мыкталö кодь. Сiя медодз зонкасö кывнас и поперегалiс. — Тэ, Илья, эшö эн эд пешлы пуляыслiсь кöрсö... Кöр пешлан, сэк вöлись и баит.

— Кöть мый ни, мужиккез, — рамжыка висьталiс Öльöш дядь. — Кöть мый ни, мужиккез... быдöннымлö усяс биас уськöтчыны... Натьтö, эд колас дорйисьны артильöн.

— Натьтö, колас... — межа вылiсь чеччис Кипрейлöн Иван, кöда мужиккес коласын вöлi медвына, кутчисис гöр бердö, шутньöвтiс: — Но-о-о, Гнедко! Шулялам эшö медбöрьяись ыбсö, а сэтчин... Баббезным оз я пондö гöрны...

— Кыдз, Ванька? Гижсям доброволеццезас. Видзöт кыдз миян кодь шырресö колясö гортö! — горыс дынын ни баитiс Ильяыс.

— Ог тöд, — шыасис Иван, шатьöн öвтыштiс вöлыслö.

— Бур тэныт вот, Илья. Колян мамтö, и ась сiя кöть кыдз олö, а Иваныслöн, видзöт жö, инь абу я эм, и эшö зон быдмö, — Ильялö висьталiс Öльöш дядьыс.

— Э, тiянкöт уна он баит, — лöгасис моз Илья. Кинлöнкö кивзiс плуг. Бороздаэзын вöввез сьöрын вöтлiсисö ракаэз, кисьтiс-сьылiс ыбшар. Иваныс гöрис, вöтчис плуг сьöрö, видзöтiс му пласт вылö, топ пласт местын бергалiс оланыс.

Гöрисö сэтчöдз, кытчöдз эз понды пуксьыны шондi, а кöр муыс вылö межа дорö кöззэс ольсалiсö кузь вуджöррез, гöриссес юскисö вöввезнысö да иньдöтчисö гортö.

— Но кыдз? — вöв вылын ни шыасис Ильяыс.

— Кыдз тэ, сiдз и ме, — сьöкыта горöтчис Иван.

Илья аслас вöв вывсянь нюжöтчис ёртыс дынöдз, жмитiс кисö да гусьöнжыка ни шуис:

— Заявленнёсö эд ог куж гижны...

— Гижам! — гажöнжыка висьталiс Иван, темлякнас вачкис вöлыслö.

Иваныс гортын некинлö нем эз висьтав, одззамоз пырис керкуас, зонсö босьтiс киас, окалiс дыржык, малалiс юрсö и баитiс:

— Андрейка, чожа ме гöрнытö муна ылö-ылö и гортö дыр ог лок, тэ бабтö метöг кывзы, эн бöбав! Он кö понды кывзiсьны, гöснечсö ог вай.

— Кывзiсяс сiя... — синваэсö чышкис бабыс. — Юрыс вылын ни сулалö.

И пондiсö мужиккесö нуöтны то öтiкöс, то мöдiкöс, кöдна бороздасис веськыта пуксисö вöввез вылö и нiйöн жö вöввезнас мунiсö гортiсь, а кöднö кыскисö мöдiк вöввезöн. Иван да Илья лöсьöтчисö бы мунны медодз, но пöрисьжыккес сьöрись кольччисö да кольччисö, топ некинлö эз ни колö. И вöлись август месяцö том мужиккесö корисö военкоматö, кытöн юасисö, кыдз да мый уджалöны, кыным годöн велöтчисö, бытьтö гижöттэс сьöртi эз тöдö, что Илья и Иван кыкнанныс велöтчисö гортын сизим годöн — грамотнöйöсь отирыс.

— Мый, ог я мый я войнаыс вылын туйö?! — военкоматын пизис Илья. — Гижим заявленнёэз, и нiя кытчöкö öшисö, кыдз ваö вöйисö.

— Ештат эшö, — военкомыс эз тэрмöт. — Лётнöй школаö думайтам кыкнаннытö иньдыны — лётчиккезö велöтчыны. Мый висьталат?

Дыр эзö пондö думайтны — мунасö и быдöс сэтöн.

— Лэбавны пондам, Ванька! — кымöрсö дзик судзöтiс ни Ильяыс.

— Лэбалiсь тэ... — ёртсö нерис Иваныс. — Бат, одзöв баитан?

— Комиссия лоас, — висьталiс военкомыс. — Вермат школаас эшö не шедны.

Петiс сiдз, что лётнöй школаö колiсö доброволеццез, но гортын Иваныс эта йылiсь эз понды модьны. Только Маринсö бöбöтны вöлi сьöкыт, иньыс казялöм и пиннес пыр горöтчис:

— Вöзйисят, да мыля оз нуöтö! Дзескыт гортын миян коддескöт овнытö... Кöин моз сё вöрлань видзöтан. — Монь, война эд... Миянлiсь оз юасьö. Пöрисьöв вот лои и синнэзнам умöля адзза, то кыкнаннымöс бы öтiк ыбöсöт... — зонсö дорйис айыс.

— Мыйлö и олi? — пондiс пильскыны мамыс. — Песси ой и лун, сё не вылам, не кокам. Öтiкö еныс отсалiс быдтыны, да сiйö мырддьöны. Пöрисьма, и некинлö лоас ваöн юктавны. Кула, и гробсö некинлö лоас керны...

— Керасö, — мурзьыштiс мужикыс. — Некинöс эшö кулöм бöрын вевдöрас эз видзö. Бласловесьöн бы кольлавны зоннымöс, а не пильскыны да касьтывны кулöммесö. Ог я ми тэкöт сто год олö! И вöрöтчы. Тэч котомасö кокнит сьöлöмöн!

Колiс бы котомасö тэчны Мариныслö жö, но сiя мурзьыштiс, зыр-зыр петiс керкусис.

— Синнэт абу я мый я?! Бат, сьöкыт инькаыслö... — мурзис Иванлöн айыс, видiс иньсö.

Том инькаыс бöра вöлi тыра, мöдiк кага кынöмас новйöтiс и öнi асьсö берегитiс, бöба эз чепсась матшкаыс моз, кöда сизимись тырсявлiс и бöрсö да одзсö эз тöд, шардöм синнэзнас пыр уськöтчис биö и ваö, мöдöртiс кöть кытшöм удж.

Матшкаыс эз надейтчы моньыс вылö, уджалiс.

Сьöкыта кольлалiсö Ивансö, только айыс юрсö лэбтiс да гажöтiс басниöн, и Андрейкаыс чирзыштiс:

— Тятюö бöр локтас!

— Öндрейка! Ен пельö бы тэнчит кывветö! — бабыс окалiс внучексö.

— Локтас тятюö! — айыс голя бердын öшлiсис зоныс. Ивансö кольлалiсö кыдз война вылö ни: öтiккез горзiсö, мöдiккез юррезнысö öшöтiсö, а Мариныс тырппесö жмитiс и öтiк синватор эз лэдз.

— Кöрт сьöлöма моньным! Кыдз сэтшöмыскöт овнытö? — бöра тöждiсис Иванлöн мамыс, а айыс мурзис, что оласö.

— Олам! — чирзыштiс Андрейкаыс.

— Шондi тэ миян! Не тэ бы, сьöлöммезным бы потласисö.

Пондiсö чулавны гажтöм луннэз, кöр эз тöдö, мый медодз видзчисьны, то ли вийöм гижöт, то ли письмо. Но месяц эз чулав, кыдз öтiк шондiа лунö, кöр инькаэс сё эшö вундiсö ыб вылын, гортö бöр локтiсö Иван Ильякöт.

— Еныс тiянöс вайöтiс! Еныс, — мамыс öшöтчис зоныс голя бердö.

— Тятюö локтiс! Тятюö локтiс! — керкуас и öтöрын лэбалiс-котрасис Андрейкаыс. — Мам!

Андрейлöн мамыс пырис уджалансянь, вожмöвтiс керкуись порогсö, жагвыв чöвтiс вывсис паськöмсö — шынь эз кер, только синкагаэс бытьтö ыждыштiсö, мужикыслiсь юалiс:

— Служитчис я мый я?

— Служитчис тятюöлöн! — лельгыштiс Андрейыс. — Самолетас абу тöрöма.

— Еныс отсалiс или мый? — зоныслiсь юалiс мамыс.

— Наборыс училищеас тырöма.

— Слава богу! Слава богу!

Надейтчисö, что войнаыс чожа кусас, но сiя только öддьöнжык öзйис. Отирсö гортiсь нуöтiсö сё унажык — нач гöвмис колхозыс. Кусiс деревняын гаж. Инькаэс унажык уджалiсö да горзiсö, чем баитiсö да шыннялiсö. Иванлö да Ильялö военкоматын висьталiсö, медбы уджалiсö да видзчисисö повесткаэз, кöднö вермисö иньдыны талун-ашын. Но повесткаэз кытчöдз эз вöлö, сiдз кыдз военкоматыс деревняись эшö готтис пöрисьжыккесö.

Тöв кежас Иван бöра мунiс уджавны вöрö, гортö вовлiс нач етша: локтас, бергöтчас сэтчин да татчö, пывсяс, узяс и бöр. Эз туй кольччыны öтiк лун кежö, чожа сельсоветыс вермис адззыны, матегавны кыдз колö, вермис и судитны, сiдз кыдз оланыс вöлi лёк, отирыскöт уна эз баитö, некин ачыс ас вылас эз вöв хозяинöн: бокö эз тальччы, эз аснырав.

Вöрас и локтiс юöр, что корöны военкоматö. Иван да Илья луннас уджалiсö, рытнас ештiсö пырны баракö, кыдз мастерныс пондiс будзгылясьны да модьны:

— Вöрöтчö! Вöрöтчö! Ашын асывнас колö лоны ни военкоматас. Сельсоветсяняс вайисö юöр, медбы тасянь и мунiтö, гортö эд кежалö.

— Мый сэтшöмыс? — Ильяыс пондылiс бы кöстыны ассис, но сiйö öмалiсö.

Эта коста мамыс Иванлöн гортын педзис, горзiс и модис: «Мыля вöрсяняс нуöтöны? Кöть бы гортö киэсö шонтны пыралiс да вывсö вежис! Монь! Кöтiн бы няньсö, да пöжалiм пинятуввез!» Рыт ни вöлi. Кöдзыт тöвся рыт керкуö вайис горе, Иванлöн мамыс öшис, эз тöд, мый бердö медодз кутчисьны, унажык горзiс, нежели уджалiс — керкуас бергалiс да зоныслö лöсьöтiс сёян. Моньыслöн кынöмыс бура ни тöдчис, и Мариныс öддьöн берегитiс сiйö: эз чепсась, эз тэрмась — тальччис и эз. Талун локтiс уджалансянь, кайис гор вылö да ружтышалö, нельки басниыс дона, оз висьтав, мый сыкöт — нето мыдзис, нето шогалö. Матшкаыс эз тöд, что тöн рытнас моньыс петiс сёдны мöс, пондiс кайны сараяс, кынмöм нинкöммес нильдiсö, и сiя усис кынöмыс вылö, а талун висьöтö: бедаыс пö керкуас öтнас оз пыр.

Мариныс ружтышалö гор вылын, чеччö, бытьтö лэбтöны зоррезöн. Матшкаыс жиля-жоля комын: лонтö гор, кöтö нянь — синнэзсис сатшкöтöны синваэс. Иванлöн айыс тэрмасьö доддявны вöв; сельсоветсис предыс куимись ни вовлiс, модис: «Вöрöтчö!»

Пöрисьжык мужикыс эз тэрмась доддясьны — кыскис кадсö, ас кежас думайтiс, что кöть мый, ась кöть судитасö, кöть лыясö, но чож жеребецнас гöнитлас вöрас, босьтас сэтчинiсь Ивансö да Ильясö и бöр: ась томмес гортсянь петасö. Ежели вöвсö вежны, Кöчöдззас вермасö локны аскадö.

Доддялiс вöвсö мужикыс, пуксис доддьö, шутньöвтiс и абу ни öшын увтаныс. Ойшöр гöгöрас Иваныс вöлi гортын ни: ыбöссянь чöвтчис, пöрччасис — вежис вöрын уджалан кöмкöт-паськöмсö и пуксис пызан сайö. Иньыс кивзышавтöн пондiс ваявны сёйны.

— Тять, мамö шогалö, — висьталiс зоныс. — Тять, ме тэ сьöрись ог кольччы.

Вишыкасис учöтыс. Айыслöн петiсö синваэс, иньыслiсь юалiс:

— Мый нö тэ?

— Мый ме тэныт?!

— Кыдз жö, Марин? — комсянь томмес коласö нырсö сюйыштiс матшкаыс. — Мужик эд абу я Иваныс! Он я быль шогав или сiдз мыдзин?

— Мый меным лешöй лоас?! — мурзьыштiс инькаыс. Пызан вылын сотчис шырби, кытчöдз эшö öзтывлiсö стеклотöг лампа, но гор вылын косьмис ни сартас пес. Пызан вылын чöскыт сёян — оз тшыгьялö. Иваныс курччöвтiс мамыслiсь пöжалöм пым пирöг, ньылыштiс, и синваэс петiсö.

9

Стена вылын шовкöтiс-джöмдалiс важ часы. Айыс сiйö и керис видзöтышавлiс сы вылö, тэрмасис: джоджулiсь петкöтiс вина, бутылкасö сувтöтiс пызан вылö, висьталiс:

— Юыштам, Ванька... Туйыс кузь... Эх! — öвтыштiс кулакнас. — Поди, сэсся ме тэнö ог адззыв.

— Мыля он адззыв?! — горзiс мамыс. — Кристос миянкöт! Мед еныс дорйö зоннымöс. Ми эд еныслö нем сэтшöм умöльсö эг керö. Грешитiм да вывтi эгö жö.

— Юыштам, зон, — айыс Иванлö учöтик рюмкаö кисьтiс вина.

Дзуркнитiс ыбöс. Пырис бригадир. Веськыта пуксис пызан сайö. Пырисö том зонкаэз, кöдна дугдiсö велöтчыны да айезныс местын пондiсö уджавны колхозас, бытьтö бы лоисö нач ни ыджытöсь, ыджыттэс дынö пуксисö пызан сайö. Керкуö öтöрись кöдзыт ру лэдзисö нывкаэз, и чожа пызаныс сайын лоис дзескыт.

Иванлöн айыс сьöрсьöн-бöрсьöн быдöнöс юкталiс винаöн: зонкаэс мымдаöнкö чипыштiсö, а нывкаэс рюмкасö матö дынаныс эз лэдзö. Отирыс бытьтö бы сёйисö, но некинлö öманыс нем эз тöр.

Кадыс тэрмöтiс — вожмöвтiс ойшöрлань. Пырис сельсоветсис предыс, эз ни понды эрзыны, кеймисис ни:

— Тэрмасит бы, мужиккез. Менчим тiян понда юрöс орöтасö.

— Кытчö, Алексей Николаевич, зоннэзнымöс тэрмöтан? Мыля сiдз янсöтан? Али ныкöт дзескыт лоис овнытö?

— Мам! Ме бы нiйö кырымам жмитi и некинлö эг мыччав, но колö! — курччöвтiс предыс тырпсö, шапкасö шупкис лабичö, эшö öтпыр видзöтыштiс часыэс вылö, локтiс пызаныс дынö, дыр видзöтiс медодз Иваныс вылö, сыбöрын бригадирлань да юалiс: — Кинкöт нö пондам уджавнытö? Кинкöт вундыны, вартны, гöрны и тулыснас кöдзны?

— Дзуртам кыдзкö... Миянлö оз эд ков велöтчыны... Юисö. Етша баитiсö. Сельсоветсис предыс сё тэрмöтiс да тэрмöтiс, стена вылын часы шовкöтiс да шовкöтiс. Курöг позын китсасис петух, гажöн летiс горшсö.

— Тять, мунам, — медодз сьöкыта горöтчис Иван, пондiс чеччыны пызан сайись.

— Тять! Ме тэкöт, — зоныс висьталiс тятьыслö.

Мамыс керкутыр унньöвтiс горзыны. Иньыс юрсö öшöтiс да сулалiс джодж шöрын — синваэс эз петö.

Отир пильскисö, öддьöнжык нывкаэс. Мамыс окалiс зонсö. Иван окасис бригадиркöт, зоноккöт, сельсоветiсь предкöт. Сiйö окалiсö нывкаэс. Иньыс сулалiс кыдз öшöм, кыдз эз куж окасьны. Мужик шагньöвтiс Марин дынö, жмитыштiс кисö, висьталiс: — Ме муна. Олö бытшöма.

Инькалöн пиньöвтчыштiс öмыс, кымöс увтöт видзöтыштiс мужикыс вылö.

— Пыр бы янсöтчин, да сiйöн еныс и янсöтö, — мамыслöн чеччöвтiсö кыввез, мыйсянь быдöнлö лоис недолыт, но некин пöрисьжыксö эз öмав, паныт эз шыась.

Бöра гажöн китöстiс петух. Ыбöс коласын ни мамыс зоныс юр вылiсь босьтiс шапкасö да шупкис комас, медбы Иваныс бергöтчылiс бöр, шаг-мöд да ветлiс комöдззас — сiдз кольлалiсö армияö.

Ойыс лёксялöма, лоöма кöдзытжык да тöлiся. Тöлiсь рожабаннэзын эз тыдав не шог, не горе. Кымöрас дзöрисö звездаэз. Морозыс шовкнитiс йöр бердас. Понныс гажöн вувтыштiс, сыбöрын юрсö лэбтiс вевдöрö да унньöвтiс кöин моз.

Митька гармонняöн сулалiс ни öшын увтын, додь дынын да чарöтiс-орсiс.

Пуксисö доддьö. Вöлыс пырснитiс нырнас.

— Слава богу! Эд тöждö вывтi, вöлыс несйöтiс, — горöтчис бригадирыс.

Сё чарöтiс гармоння — вермис инькаэслiсь горзöм. Нывкаэс пондiсö сьывны. Иван эшö öтпыр окалiс зонсö, жмитыштiс бердас мамсö, дзар керис иньыслань, кöда кыдз тувдiс: Маринлöн тöлiсь югöррезсянь нач бледöтöм чужöм вылын эз тöдчы гажтöмтчöм, кыдз бытьтö инькаыс нем эз думайт, сулалiс кыдз кольмöм — не синва, не басни.

— Марина! Ов буржыка, — медбöрын Иван горöтчис иньыслö, синнэзас тöлiсь югöр весьтын мыччисьыштiс сэтшöм зубыт, что курччöвтiс тырппесö, юрсö бергöтiс мöдöрö и айыслö шуис:

— Вашöт, ай.

Дзуркнитiс додь. Öтдруг унньöвтiсö горзыны инькаэс. Виньдiс гармоння.

— Тять! — чирзiс и лым вылын виль нинкöмоккезöн чеччалiс Андрейка. — Тять! Менö эн коль.

Деревняын керкуэс кыдз повзьöмась, кушкыртчöмась лым увтö и сулалöны. Вöлыс содтiс шаггесö. Иванлöн мамыс ляшмасис-вöтчис бы эшö додьыс сьöрö, но гардыштсисö коккес, падмис, усис, юрыс вылiсь нетшкöвтiс шальсö, ыкöстiс: «Ванька-а-а!»

Мариныс лым вылын сулалiс кыдз кынмöм.

Вöлыс додьсö медодз кыскис керöс кырылö. Тöлiсь кыдз бы вöтчис сьöраныс. Иваныс пукалiс доддьын, мунiс гортсис да видзöтiс деревня вылö, кöда чинiс и вöйис лым коласö, том мужик пеллезын сё эшö кылiс мамлöн баитöм да горзöм, синнэс одзын сулалiс иньыс, и синваэсö пидзыртiс-ыксiс зоныс: «Тять! Менö эн коль».

Дзуртiс додь увтын лым. Вöлыс суййис-мунiс перыта. Иванлö вöлi гажтöм: жальöсь мамыс и зоныс, виноватöйöн лыддис асьсö Марин одзын Нина понда. Или Мариныс эз я вöв виноватöй мужикыс одзын? Эз лöсяв оланныс — дзугсис мöдiк вылö. Кöть кыдз бергöтлы, олöмсö мöдпöв он ни ов...

Ружтышалö-кыскö вöлыс гортiсь. Кöдзыт. Муыс и вöрыс узисö.

Кыскö вöлыс война вылö, и тöд жö тöд... А умöль думаэз вöтчöны сьöрас, оз бы кольччö. «Ог лок гортö! Кöть виясö, кöть озö, ог лок!» — ачыс эз казяв, кыдз тасалiс аслыс, и нем бытьтö эз ни ло жаль.

— Эн тöжды, Вань! Чожа ми бöр локтам, — гажöн шыасис Илья, бытьтö тöдiс, мый думайтiс ёртыс.

Сьöкыта ловзисис Иванлöн айыс, шатёкöн чивкнитiс вöлыслö, тэрмасис, полiс, медбы эз сёрмö военкоматас. Тэрмöтiс вöвсö ямщикыс, и Кöчö локтiсö асывнас лöзъюгытöн.

Кизерик тшын-туман павьялiс посад улицаэзын, кыссис юлань, вöлi эшö кöдзытжык, нежели рытнас. Военкомат öшын увтын сулалiсö вит-квать доддя вöввез, додь дынын чеччалiс да киэзнас öвтiс неыджыт мыгöра инька — нерис кöдзытсö.

Иванлöн айыс вöвсö сувтöтiс йöр бердö, одзас додись шупкис корось ыжда турун и иньдöтчис посöдзлань, шагньöвтiс том инькалань. Иваныс вöтчис сьöрас и повзьыштiс: одзас сулалiс Нина, сё сэтшöм жö гöгрöса, вира чужöма, том — немымда абу вежсьöма, топ нывканас. Повзьыштiс и инькаыс: синнэс ыждыштiсö, рожаыс чочкоммыштiс, öмсö осьтыштiс.

Кытöнкö джын минута етш сулалыштiсö öтамöдныс одзын, а сьöлöммезныс чеччалiсö ни мороссэзаныс, мед и öтыслöн эм инь, а мöдыслöн — мужик, олöны ассиныс, кыдз еныс шуис...

— Нина, тэ?! — гажöн юалiс Илья.

Ниналöн синваэс сатшкöтiсö ни синнэзсис, öмсö нюмралiс ни.

— Нина! — Илья бы медодз уна тöдiс, сулалiс инькаыс одзын, но Иван бергöтчис ни керку öшыннэзлань, медбы не адззыны инькалiсь горзöмсö.

— Мужикöс кольлала, — пондiс вишыкасьны Нинаыс.

— Кытöн мужикыт? Ме видзöта. Тöдсася бы, оз я öтлаын нуöтö.

— Челядь мывкыддэз! — томмесö осудитiс Иванлöн айыс. Осьтiсö военкомат керкуись ыбöссö. Тэрмасисö-пелитчисö керкуö. Нинаыс пырис öтлаын и пондiс ниртчыны топыт да ыджыт мыгöра мужик дынын, кöдалöн чужöмыс вöлi аскодя: кузь, сьöктан кодь ныра, гырись, да лэчыт сина — смев морт, кöда немись оз пов, некытöн оз торксьы, семьясö йöзлiсь оз дзуг, и не эта бы войнаыс, колхоззэз этатшöм мужик пельпоннэз вылын бы и видзсисö.

— Мöссö узьтöтлы шоныт гидас, то ойес эшö кöдзытöлöсь, пондас кö пиявны, куканьсö кынтас, — Нинакöт баитiс мужикыс, кыдз бытьтö мунiс гортсис недыр кежö, и чтоб сытöг вöлi быдöс бур.

— Но, — вишыкасис инькаыс, чышьян пельöснас чышкис синваэсö.

— Гожумыс кежö барансö колö бы начкывны. Лэдзат и од адззылö.

— Начкылiн бы. Яйсö бы сёйин, а ми мый? — öмыс нюмрасис инькалöн.

— Некöр вöлi.

Кытчö деревняыс пыр и тэрмасьö — тöв и гожум уджыс ендö, нельки войнаыс вылö тожö тэрмасьöны.

— Мыля сiдз тiянöс тэрмöтöны? — Иваныс синнэзö веськыта видзöтыштiс Нина, кыдз бы юалiс: — Кыдз гортын?

— Ловьяöсь, — Ивансö одзалiс горöтчыны Ильяыс, а мöдсö дума нерыштiс: «Кытчö ни тэныт, Иванок, вермасьны Нинаыс мужиккöт, кöр сыись тэ коддес кыка петасö?»

Сералiс ассьö Иван, а сьöлöмыс кыссис бы Ниналань, кöть и коласаныс сулалiс инькалöн мужикыс.

10

Велöтiсö месяцся унажык. Сьöкыта шедiс велöтчаныс: командиррес эз жалейтö, вашöтлiсö öт пемытсянь мöд пемытöдз — уджöтiсö солдат уджöн, бытьтö нагладь керисö сiдз, медбы некöр вöлi думайтны горт йылiсь, чтоб вунöтiсö семьяэзнысö.

Колхозниккезiсь и заводын уджалiссезiсь керисö бы солдаттэзöс — чожа бы керисö, только юррезiсь чожа гортiсь олансö сьöкыт вашöтны: чеччис и водiс Иваныс, топ пеллес одзын сё китсасис петухныс, кытöнкö матын вувтiс понныс, кылiс зоныслiсь и мамыслiсь голоссэзнысö, адззис айсö, кöда уна эз баит, и нач ни етша баитiс иньыс, сё чужöмыс вылын вöлi лёк, пыр кыдз кынмöм, тырппесö жмитöм; пырö керкуас, ыбöссö жвангö, тальччö джоджас — джодж дзуртö, горöдзас ухватсö пуктö — быдöнöс повзьöтö. Лёк Мариныс, пыр кыдз кинкö вылö лöг, и мымда бы инькöт эз ов — эз пондыв вежны ассис мывкыдсö, иньыс эз небзьы, колiс и эз, эрзышалiс: «Мун шоныт сьöлöмаыт дынö!»

Шоныт сьöлöмаыс... Туйис-вермис, лэбзис бы Нина дынö, пондiс сыкöт овны, и ась иньыс бы öтнас узьлiс, если сы бокын эз куж узьлыны. А олiсö эд... Зон ни эм, да и бöра иньыслöн кынöм быдмö. Дума повзьöтö, бытьтö бы юалö: «Сулав, Иван! Мый сэк кольлавтöнняс иньыт кивзышалiс? Эз я кынöм висян вылö норась? Эз я?.. И мамö джын кыв горöтчис, бытьтö бы доймöма. Чапкас вот эшö кынöмсö... И эз я нагладь усь, медбы чöвтчыны? Юавны бы колiс...»

Думаэс öвтöны мужиксö öтöрö-мöдöрö, то дорйöны, то озö, и медбöрын висьталöны бы: «Ась кöть мый лоö: Андрейкаыс бы...»

Андрейкаыс понда сьöлöмыс висьö. Зоныс колö.

Кыдз бы эз овсьы, кыдз бы эз вöв, но видзчисис письмо, эд Мариныс эз вöв мамыс кодь синтöм, кужис гижны и лыддьöтны, только письмоэс эз вöлö, и этасянь служитсис эшö сьöкытжыка, думаэс соровтiсö эшö буржыка. Олiс топ öшöм, кöр минута кежö вунöтлiс кытöн и мый керö, сэтчöдз öшлiс, что öтпыр командирныслö вунöтiс сетны честь — кисö эз лэбты шапкаыс дынöдз, мый понда мöдыс лöгасис и висьталiс: «Наряд очередьтöг!»

Армияын уна оз баитö, командирлöн приказ — закон. Иваныс ойбыт казармаын зыртiс-миськалiс джодж, асывнас ни пондiс водны да аслыс горöтчис: «Сiдз, Ванька! Вöлись эд доддялiсö. Эстöн тэныт абу гортын, не колхозас уджавны. А мый жö бы эта коста керöны гортын?»

Эз вермы думайтны аслыс висьтавны, мый керöны эта коста гортын — ланьтiс, кыдз кулiс, и пондiс вöтасьны, топ мыйкö бы уджалiс ыб вылын, коккезнас лойис-тойис нять, косви броддис-вуджис ва, мырсис-кайис крут берегö, кытчöкö мунiс да мунiс бы и мылякö вöлi öтнас. Сыбöрын вöтö уськöтчис Мариныс, кöда бытьтö бы вундöма, пельпоныс вылын чарла, и кытчöкö бы мунö — кольö Ивансö, оз кыв, оз адззы мужиксö, мунö и мунö, а Иваныс ыксö бы и оз вермы.

Сыбöрын вöтöн шедiс нач тöдтöм местаö. Бöра бытьтö бы öтнас. И умöль бы мужиклö, недолыт, сьöкыт, но пантасис Нинаыс, кöда ылiсянь шынь видзис да горöтчис кык-куим кыв:

— Иван, менам сьöлöмö эд сё тэ дынö кыссьö. Иньыт сьöрын эн вöтлiсь.

— Кин сьöрын сэк меным вöтлiсьнытö? — вöтöн баитö Иваныс? Тэнö любитi, да жöник сайö мунiн, а сэсся мый? Эшö я мый я кошшыны нывка?

— Мый тэ нывкаэзнас керан? — Нинаыс баитö и солдатлö сетö йöла пирöг, кöдö Иван курччöвтiс, но эз вермы ньылыштны — курöтiс пирöгыс.

— Подъём!! — вöттэсö орöтiс команда.

Чеччöвтiсö солдаттэс ольпассез вылiсь и чушыктöны-тэрмасьöны кöмасьны, эд быд уджсö колiс керны перыта: секундаэзöн пасьтасьны, минутаэзöн сёйны. Кинкö кöть öтiк ёрттэс сьöрись кольччас секунда-мöдöн, оз ешты öтдруг пасьтасьны или кöмасьны, взводыс сэтöн жö чöвтчö бöр, водö кроваттез вылö, кывзö-дрöжитö, кöр бöра ыкöстасö чеччыны.

Иванлö мукöдпыр вачкисьö, что нiя орсöны, что ны вылын командиррез сералöны, кöр вермисö бы уджавны, а не этадз изны. Оз гленитчы Иванлö службаыс, но сiйö велöтöны лоны солдатöн: чеччöны-водöны секундаэзöн, котрасьöны садь быртöдз, только вот мылякö етша лыйсьöны.

Уджöтöны бура да вердöны умöля, сiйö и кылан: «Кынöм сималö».

— Кулöм кань бы сёйи, — кыдзкö асьсö сералiс Илья.

— Тiян сималö, а менам, думайтат, оз симав?! — лöгасьö командирныс. — Чöскыт сёяныс фронт вылын лоас. Сэтчин пондасö вердны бура.

И солдаттэс тэрмасьöны ни фронт вылö, модьöны, что кöть бы чожажык ни, чожажык.

Гортö гижис кык письмо ни — öтсö инькалö, мöдсö мамыслö да айыслö, видзчисис, что гижасö паныт, но письмоэсö мылякö эз босьт, натьтö, сiйöн, что дыр ветлöтö почтаыс — кузь гортöдз туйыс, а сьöлöмыс висьö.

Умöльтчис солдат: рожабаннэс векнямисö, ныр нюжалiс, синнэс ыждiсö, голос лоис кызжык.

— Шогалан я мый я? — юасис Илья, кöда гортын вöлi уна басниа, а татöн бытьтö пондiс мыдзны баитнытö и эз ни лёб мый колö и оз.

— Мыля?

— Чужöмыт векнямис.

— Асьтö видзöтiн бы. Нырыт ни только кольччöма, — шынньöвтiс Иван. — Кинкö понда сiдз сьöлöмыт висьö я мый я?

— Висяс. Вывтi вашöтлöны. Кылiн, тöн öтiк мый шуис: «Пон — командирным. Шедам кö öтлаын фронт вылö, медодзза пуляыс лоас сылöн».

— Тэ кывтö кузя эн видз.

— Мый меным. Городскöйес мукöдыс смелöсь. Кöть сiдз, кöть этадз эд.

— Ась, Илья. Ми тэкöт отирыс учöтöсь.

Бур, что Ильякöт öтлаын, кыдз гортын уджалiсö, сiдз и служитöны — торйöтöны гаж и горе, этасянь служба сетчö кокнитжыка.

— Мыйкö Дарьяыт гижö жö? — юасьö Ильялiсь Иван.

— Маш. Ме тэныт вунöтi ошшасьнытö. Тöн рытнас ни босьтi письмосö. Лыддьöтан?

— Лыддьöта.

Кыкöн лыддьöтiсö Дарьялiсь письмо. Нывка бытьтö бы ошшасис аслас оланöн, быд кылын касьтылiс колхозын öтласа удж, отирсö. Петiс, что гортын пасьтöг эз ветлöтö, нач эз тшыгьялö, ой и лун уджалiсö. Нывкаыс гижис, что зонкаэскöт оз дружит, и Ильялö нывкаэс сьöрын эз тшöкты котрасьны, то городскöйес чожа сьöвталасö, что сэсся гортсö вунöтас. Дарья эз ошшась, что зонкасö любитö, видзчисьö или лöсьöтчö сы сайö мунны. Илья и сiдз тöдiс, что Дарьяыс видзчисьö.

— Оз кö видзчись? — нерö ёртсö Иваныс.

— Кыдз оз?! Тэ мый сiйö, Ванька, гардан?

Лыддьöтiсö Дарьялiсь письмо, топ гортö шедлiсö, минута-мöд кежö вунöтлiсö службасö, Ильяыс юалiс:

— Тэнат мый?

— Мый менам... Озö кужö гижнытö. Медавны, видзöт, колö.

— Иньыт эз я велöтчы жö.

— Етша велöтчис...

— Быль сiя тэнат чорыт сьöлöма, тэ тöждан, а сiя... Ме бы тэ местын сьöвзи.

— Кöть мымда, Илья, сьöлав аслат оланö, кыдз еныс шуöма, сiдз и пондан овны.

Служитö солдатыс одзлань — месяц армияын ни, пондöтчö мöдiк, и вöлись гортсянь вайисö письмо. Айыс гижö, кöть пöрисьлöн грамотаыс — öтiк класс, но курöг моз гижöма-кокалöма: «Зон, миян понда эн тöжды. Ми эстöн чеччам и водам асланым отиркöт — артильöн соровтам. Бергöтам кытчöдзкö уджсö, нем оз енды. Гöрны ни пондöтчимö. Чалконас понда ыббесö шулявны, а тэ сэтчин асьтö эн стыдит. Служит, кыдз колö, да гортö лок. Андрейыс öддьöн ни чож».

Айыс Марин йылiсь кырöвтöма кыв-мöд, что моньыс шогалыштiс да веськалiс, а мыйöн шогалiс, оз тöд.

Унажык бы солдатыс тöдiс иньыс йылiсь, но пöрисьыс нем абу гижöма.

Кокнямисö думаэс.

11

Солдаттэсö саймöтiсö гожумся шоныт ойö. Пуксьöтiсö вагоннэзö, кытöн вöлiсö мöдiк командиррез ни. Нiя кажитчисö рамжыккезöн ни — öтiк кисетiсь табаксö куритiсö, öтiк басни баитiсö, тöдсасисö-юасисö, кин да кытiсь, кытöн уджалiсö, мый керисö — топ гажтöмтчöмась асланыс семьяэзтöг, отиртöг.

Вагонын вердiсö топ пöтжыка ни. Сьöраныс сетiсö табак, сукаррез, тор-мöдöн сахар.

— Винаыс кытöн? — серöмтчисö смевжыккес.

— Шедтыны эшö колö.

Гожум ни. Муыс лолалö кокнит руöн. Гажа кадыс, да отирыс гажтöмöсь: быд морт, кöда пантасяс гражданскöйес коласiсь вагоннэз дынын, топ горзöма или топ мыйкö öштöма, кинöскö кошшö бы, да оз адззы.

Йирк-торк, йирк-торк катыльтчöны вагоннэз, поезд сувтчышалö нач етша, сувтчö сэк, медбы только заправитчыны ваöн.

Думайтсьö вагонын, кöр керны нем. Юрсö öшöтiс Иваныс да думайтö — думаэзнас олö гортын, тöдвылас усьö быд лун и час, кыдз быдмис, кыдз велöтчис, уджалiс колхозас. Бура бытьтö бы быдмис, гожуммезнас пыр кöмтöг и пасьтöг котрасис, тöввезнас етша пыравлiс керкуö, кынтiсис, бырöтiс нинкöммез, важ гуняок, кöр сёйис, кöр эз, но быдмис — öтпыр эз шогав. Одз пондiс пинявны — дас год вöлi, кöр пондiс шедтыны колхозын трудоденнез, позьö висьтавны, что вердiс ни асьсö. Котрасис школаö — петiс грамотнöй мортöн, но одзлань эз понды велöтчыны, сiя кадö деревнясис етша кин велöтчис, быдöнныс школа бöрсянь уджалiсö колхозын, кыдз айезныс да маммезныс. Кинкö шувлiс, что сьöкыт колхозас уджыс, но Иван любитiс уджавны кöть кытöн: ыб вылын, вöрын, уджалiс-олiс да гажöтчис томмескöт. Одз гардчис нывкаэс гöгöрын, бытьтö бы орсiс-олiс. Нывкаэскöт дружитiс, кыдз сойезкöт, а сэтöн пантасис Нинаыс...

Нина, Нина... Кöр янсöтчисö нывкаыскöт, сэк вöлись оланыс буржыка мыччалiс пиннесö, вöлись зуралiс да сiдз, что готов вöлi кучиксис петны. Но пондöтчис война. Бöра оланыс кыдз бы зуралiс: эз юасьö, тышкасьö бы врагыскöт или оз, а кутiсö да нуöтiсö. Конечно, Иван войнасис эз пыксьы, эз ыксы, что сылö войнаыс оз ков, но сьöлöм кыскис бы бöр гортö.

— Иван, — думаэсö дзугö Илья, кöда гажмö, кыдз только адззылас мыйкö мöдiкö, вильö, басöкжыкö или умöльжыкö: видзöтö тöдтöм-адззывлытöм олансö, адззö тöдтöм отир, керкуэз, пода, и педзö-жöдзö вагон öшын одзын. — Ванька!

— Мый тэныт?

— Поездыс мый ыжда-а-а!

— Челядь мывкыда тэ, Илья. Орсны бы тэныт чачаэзöн...

— Вöлыс! А нывкаэс!

— Кольччы да окасьышт.

— Челядь! Челядь мывкыдаöсь и эмöсь. Орсат бы только, одö думайтö, что инькаэслö öнi сьöкыт. Ми тiянкöт, видзöтö жö, ысласям, а инькаэс ой и лун уджалöны, вердöны и пасьтöтöны миянöс. Жöниккес йылiсь, натьтö, вунöтiсö, — томмесö сералö виль командирныс и осудитö кыдз.

Командирныс мыйöнкö вачкисьö гортiсь бригадир вылö, медодз чужöмнас, и баснинас баитö-тэчö, а кытöн колö, сiдз висьталас, что мöдпöв оз ни горöтчы. Кöр лейтенантыс лöгасьлiс, вермис ыкöстны или чорытжыка горöтчыны солдаттэслö, но сэтöн жö бергöтчас и бöра ни сералö öтлаын, тöдö ни Ильялiсь, что сылöн эм невеста, кöда, командирыс кыввезöн, зонкасö некин вылö оз веж, и мöдыслö Дарьясö оз ков стыдитны, оз ков голясö нюжлавны басöк нывкаэслань.

— Сьöлöмö кыскö, ёрт лейтенант, — никсö Ильяыс, сыбöрын Иванлö шуö, что командирныс — морт, и быдöс сэтöн.

Вагонын быдöнныс тöдöны ни Дарья йылiсь, касьтылöны мöдiк солдатлiсь Марья, куимöтлiсь — Галя, нёльöтлiсь — Валя.

Ошшасьöны и ошкöны невестаэзнысö, но адззисьöны и сэтшöм солдаттэз, кöдна баснисö чукыльтöны мöдöрö.

— Дарья-Марья... — кывнас шлячкö Ведерников, кöда вöлi бытшöм чужöма и быдмöма городын, кöда бытьтö бы сымда ни нывкаэскöт дзудзгöтчöма, что кытчö ни Иванлö да Ильялö деревняын овтöн! — Дарья-Марья... Кин инькаэсö оз тöд, ась сiя ошкö. Инькаэс сiйö, воннэз, и видзчисьöны, кöр горттэзсиныт спинаэзныт саясясö, да-а-а. Öт кокныт эшö керкуаныт, мöдныт порог сайын, а нiя ето-то ни керисö... Дунькаэзныт соседдэзныткöт ни окасисö да тiян вылö норасисö: «Ой кыдзкö да кыдзкö... Кыдзкö звирьсö гортiсь дзимлялiсö. Сы кузя эд меным оланыс нач ни эз вöв. Сiя эд ме вылын ойнас ысласяс, а луннас садь быртöдз уджöтас да пыр лöсьöтчис юрöс керавны. Öнi вöлись!.. Öнi вöлись ен ыбöс керкуаным оссис». «Сiдз, öмидзтусь! — сёпкö кыз кынöма соседныт, кöдö кынöмыс понда армияас эз и босьтö, бытьтö бы зараза — калека, оз вермы врагыскöт тышкасьны да колхозас уджавны, а кыдз йöз инькаыс голяыс бердö öшöтчис, няньöн эн верд, вот и сьылö Дуняшалö, и сьылö: « Дуняша... Ме тэнö эд важын ни любита, только мужикыт дзугис, öнi тэ менам ни!»

— Ведерников! — солдатлiсь öмсö тупкалö лейтенантыс.

— Кывза! — Ведерниковлöн пиннес гер.

— Эн серав инькаэсö. Ми бы нытöг пасьтöг олiм и тшыгьялiм.

— Вермас лоны, вермас, ёрт лейтенант, — солдатыс оз öш. — А думайтны кö, оланыс быль эд сэтшöм.

Быргöны вагонын солдаттэс инькаэз йылiсь — öшлöны, кералöны и сералöны, кытöн думайтан быль бы сiдз, кытöн абу, но ёрттэслöн басниыс Иван дынö сибалö, сьöлöмас йиджö, вачкисьö, топ сы инь йылiсь баитöны, Маринсö сералöны, кöда сiдз письмосö эз и гиж, и петö... Вермис эд адззыны ни мöдiкöс, шуам, Сюра Васькалiсь Колясö, кöда корасьлöма жö Маринсö нывканас, кöдö армияö эз босьтö. Коля коддеслö, солдаттэс сьöртi, öнi гортын оланыс ма...

— Бöбöтан, Ведерников! — Ильяыс дорйис ассис Дарьясö, пиньгисис Ведерниковкöт.

Йирк-торк одзлань катыльтчö вагон. Туйыс кузь. Поездыс тэрмасьö.

— Илья, тэ ме вылö эн лöгась, — Ведерниковыс кывсö оз шоччöт. — Ме тэнчит невестатö эг адззыв, ог тöд. Может, сiя тэнат быль медбасöк, кодя, только тэнö и любитö. Меным бы сэтшöмсö, кужи бы ошшасьны.

Ильяыс оз ни баит Ведерниковкöт, орсö ни гармонняöн. Ёрттэс кöдна юррезнысö öшöтiсö, кöдна чатыртiсö. Дзикöтö гармоння, сэтöн кинкö ыкöстiс: «Воздух!»

И вагон бокын чарöтiс-потiс ни бомба, зэгнитiс русö, брякнитiс вагон ыбöсö. Кöр сiйö осьтiсö, отир уськöтчисö öтöрö. Юррезныс вевдöрын нёштöм шыöн уннялiсö самолёттэз, боканыс потласисö бомбаэз, да шырзисö пулемёттэз. Кылiс кинлöнкö ыксöм ни: «Отсалö-ö-ö!»

Ильяыс жмитчис Иван бердö, чужöмыс чочкоммис, синкагаэс ыждiсö, топ быд бомбаыс вермис юрыс вылö и усьны. Тшын. Бус. Кинкö горзö, кинкö кивзö.

— Виясö эшö одза-одз, — Ильялöн пиньöвтчис öмыс. Гичыртiс пиннесö Иван.

Самолёттэс гардчисö-лэбалiсö вагоннэз весьтын и öшисö. Мыйкö дырна шы эз вöв, топ быдöнныс кулiсö, только минута-мöд бöртi вöлись пондiсö котрасьны санитаррез, кивзiсö ранитöммез, горзiс санитарка. Недолыт, умöль Иваныслö.

— Ой челядь! Кыдз эд повзи! — кивзыштiс сiя жö Ведерниковыс. — Пишаль бы, то немöн лыйны. Эг я бы öтiк фашистöс уськöт.

— Ештан эшö, Мишка!

— Кöр? Кöр юр бöрам смертьыс кокыштас? Бöбöтат, челядь! Ме войнаыс вылö муна тышкасьны, а не орсны.

Врагыслöн самолёттэс кыдз видзчисисö Ведерниковлiсь баснисö.

— Воздух! — бöра орöтiс кыв.

Солдаттэс, кöдна локтiсö ни состав дынö да чеччавлiсö вагоннэзö, бöра кöччез моз сöтiсö пышшыны, а Иван да Илья, кыдз пукалiсö вагонын, сiдз и пукалiсö. Пернапасасис уна басниа Ведерниковыс и онняюрöн уськöтчис вагон увтö.

«Господи благослови», — Ильялö тöдвылас усис ен, кöть и некöр эз юрбитлы.

Бöра потласисö сьöрсьöн-бöрсьöн бомбаэз, соровтiсö мусö, койисö осколоккез, резiсö тшын. Иван да Илья кушкыртчисö вагон пытшкын, пукалiсö не кулöм не ловьяöсь. Иван ачыс ни еныслö думаэзнас кеймис: «Господи! Отсав. Эн сет вийнытö».

Нач матын потiс бомба, сiдз зэгнитiс вагонсö, топ шупкис кытчöкö, юрвеммез пыркöтiс, сьöлöммез чуть эз вотьыштö. Иван сэтöн казялiс, что юрыс вевдöрын вагон лоис осьта — крышаыс письтöма долонь пасьта, сэт тшын пытшкын тыдалiс шондi.

Неылын кылiс кинлöнкö кивöстöм: «Ойи-и-и!»

Дыр я бомбитiсö, солдатыс эз бы куж висьтавны, бытьтö бы вöтöн кылiс, кыдз урöтiсö-лэбалiсö самолёттэс, и бöра лöнис.

— По вагона-а-ам! — кижгис-ыксiс командирыс.

Солдаттэс котöртiсö вагоннэз дынö, тэрмасисö дзебсисьны, но дас-мöд морт куйлiсö туй бокын. Войнасö эз и адззылö, кулiсö.

— Счастливöйöсь, — пöриськодь солдат горöтчис вийöммес йылiсь.

— Кин?

— Нiя, — баитiсьыс гогыньтыштiс вийöммеслань.

— Но тэ, Михайлович, и висьталан...

— Сыбöрын вежöртат, — Михайловичыс гардiс ассис чигарка, пондiс куритны.

Вагонын командирныс лыддис кин эм, кин абу. Быдöнныс куритiсö, кыдз пондiсö саймыны, баитiсö, и бöра пöрисьжыкыс командирлiсь юалiс:

— Кöр ни сетатö пишаллесö, то гажтöм эд нытöг, бытьтö пастучитны бы мунамö?

— Лоасö, — мöдöрö видзöтiс командирыс.

Солдатыс топ ньылыштiс баснисö табак тшыннас, дугдiс юасьны.

Сотчисö вагоннэз. Сук тшын павьялiс омöн, пöдтiс. Шутньöвтiс паровоз, нетшкöвтiс вагоннэсö, жолькнитiс кöрт кöрт бердö, и вöрзисö...

— Челядь, а Ведерниковыс кытöн?! — кинкö кыдз саймис.

— Абу сiя, — висьталiс уса солдат, чышкис öм гöгöрсö, содтiс. — Пуляыс öмас и мöртчöма — разьöма пиннесö.

— Кыдз?! Кöр?!

— Öмас и жвангöма. Катыльтчыштiсö мымдакö, басни лоис:

— Дзебны бы колiс зонкасö.

— Колiс бы...

Колiс бы да эзö дзебö — некöр вöлi. Сэтшöм войнаыс — быдöнлö лоас öткодь: öтмоз куласö, öтмоз кытöнкö пондасö сiсьмыны. Нерыштiс не öтiкöс этатшöм дума да кольччис — ловьяэс эз бы думайтö кулöм йылiсь.

12

Поездыс кыскис одзлань. А кытчö? Некин эта йылiсь эз тöд. Москва бöрсянь нуöтiсö только ойнас. Мунiсö-катыльтчисö и кытöнкö сувтiсö. Оссис вагонiсь ыбöс, командирыс ыкöстiс, медбы петiсö вагоннэзiсь.

Ой. Сöстöм ыркыт ру. Ружтiсö отир. Тэрмасисö. Сувтöтiсö стройöн вагоннэс дынö. Командир висьталiс, медбы эз куритö. Дзульзьö кай, бытьтö оныс некöр оз пет. Гажа вöлi гожумся ойыс, да сьöлöммез вылын гажтöм, полiсö, топ сiдз врагыс и уськöтчас, юасисö, мыля сё эз сетö винтовкаэз.

— Мыйлö? — командирныс бурмöтö. — Кытöн эшö врагыс? Сетасö, кöр колас.

Одзлань мунiсö подöн, сiдз кыдз гожумся ойес эз вöлö вывтi пемытöсь: коккез увтын адззисö гуок-гöпоккез, изторрез, боккезын тыдалiсö туруннэз да цветтэз.

Мунiсö-чушыктiсö. Басни эз кыв. Думайтсис. Иваныс думаэзнас бергалiс гортын, кыдз мунiс бы тöдса туйöт — быд шорокыс и гöпокыс кыдз гортас, вачкисис, что чожа ни локтас асланыс деревняö. Паныт чепöссяс понныс, пондас чеччавны моросас, кивзышавны, кыдз бы юасяс: «Кытчö пишальтöг?» Поныс мунö бы вöравны... Мунасö, ваясö добыча. Зоныс панталас посöдзаныс, пондас чирзыны: «Ой, баб! Тятюö мый вайöма!»

Мунiс солдатыс ойöн, лолалiс ыркыт руöн, кыдз гортын бы ыб вылын. Думаэс сорласисö-орласисö: синнэс одзö мыччисьлiсö то мамыс, то зоныс, то айыс, и иньыс топ петiс посöдзаныс — пиннес гер и чирзö:

— Тэ бöра кытöнкö шатласян?! Мöссö эн чилькöт!

— Некöр меным! — нузгыштас нырыс увтын.

— Некöр... Пышшалан гортiсь!

Мунiс и суналiс солдат. Падмис ёртыс спинаö, саймис. Иньыс сё кыдз синнэс одзын, баитiсö кыдз бытьтö, и Иваныс эз тöд лöгавны Марин вылö или гажöтчыны.

Сьöкыта ойнас шагнялiс стройыс, сьöкыта лолалiсö солдаттэс. Кытöнкö ылын одзаныс кыдз бытьтö пондiс гымавны. Гым кымöр я гымалiс или... Медодз Иваныс эз вежöрт мый кылiс, только топ руыс зэлöтiс, дзескöтiс мороссö, сьöлöмыс повзьыштiс.

— Ванька, кылан?! — бокас ружтыштiс Илья. — Бат, войнаыс ни?

Одзаныс баснинысö сорис голос: «Тпру, окояннöй! Кытчö отирыс вылö мунан?!»

— Кин сэтчин?

— Раненöйезöс кыскöны.

— Отсалö, ёрттэз! Ог ни вермы терпитнытö.

— Терпитышт, роднöй...

Юррезныс вевдöрын пондiсö эрзыны самолёттэз — муыс дрöжитiс. Иван сiдз бы кöч моз и чеччöвтiс туй вылiсь, дзебсисис баддез коласö, но эз кыв команда, некин эз пышшы. Моростырнас ловзисис солдатыс. Самолёттэс лэбзисö. Ойыс кыдз бы пондiс ружтышавны. И бöра мунiсö, бöра пондiсö куньсьыны синнэз, бöра одзас топ мыччисис мамыс: сулалiс туй бокын, чышкис синваэсö да баитiс:

— Зон, кытчö ойнас? Шоччисин бы! Мыйкö бы ме тэныт висьтала...

Осьтiс синнэсö. Мамыс öшис. Ловзисис пыдынжыка, содтiс шагсö, падмис кинкö спинаö. Шаг да шаг, и куньсисö синнэс, эшö мыччисис мамыс да баитiс:

— Ванька, иньыт эд тэ йылiсь вунöтiс ни...

— Мый модян?! — лöгасис Иваныс, недолыт лоис, сiя гортын етша мамыслö горöтчывлiс горöнжык. — Мый меным сэтшöм иньыс?

— Ачыт тöдан, — горöтчис мамыс, öвтыштiс кинас. Сэтöн солдатыс саймис. Гурс-гурс кинкö му бердöт кыскис коккесö, дзуртiс-шагнялiс строй.

Иван мунiс, мымдакö дырна оныс эз пет, но недыр мыйись бöра куньсисö синнэс, бöра ни мунiс и вöтасис. Öнi одзас мыччисис иньыс ни, лöг, мужикыс вылö эз бы видзöт, эз баит, сулалiс. Осьтiс синнэсö. Мариныс абу, и одзлань му бердöт гурскисö солдатлöн коккес — кузь туй меряйтiсö, кöда кытöн и сувтöтас или орас. Мунiс солдат одзлань, синнэс куньсисö, айыс ни кыдз пантасис, баитiс:

— Зон, бытшöмика сэтчин. Иньыт понда эн тöжды. Локтан, и мöдiкö адззам.

— Подтянись!

Командирлöн голос вашöтiс айсö. Быд морт гортiсь лоисö синнэс одзын, кöднакöт уджалiс и олiс, кыдз öтiк семьяын, кöр быдöн Ивансö шуисö Ванькаöн. Иваныс некинöс кывнас эз дойд, и сiйö некин эз вид, только вот гортын кöр.

13

Югытыс смела вежис ойсö. Кöкис кöк. Горалiсö каёккез. Солдаттэз коккез увтiсь чеччалiсö лягушкаэз да кöбывкаэз. Кыз лысва сыртьялiссук зелёнöй турун вылын, сöстöм бисерöн öшалiс туй бокын бадь листтэз вылын. Юррезныс вевдöрын öтiк кымöр-палачок эз вöв. Асыв сунöтiс, и Иваныс мунiс да суналiс, кöр тальччыштлiс гöпокö, кыдз кытчöкö вöйыштлiс, зэгнитчыштлiс, осьтыштлiс синнэсö. Дышöтчис видзöтны гажа асывсö, кöр вот-вот мыччисяс шондi, кöр асывланьын, вöр весьтын, топ öшалiс ни паськыт веж-гöрд рöма пызандöра, кöда вылö бытьтö бы луныс кежö лöсьöтчис пуксьыны шондiыс и жагвыв катыльтчыны пызандöра вылöт, кöда, кыным вылынжык лоис вöр весьтын, сыным рöмсялiс лöз югöрöн, сэтшöм вöлi сöстöм, гладь, что любо вöлi нёджжавны асывся кымöрсö.

Луныс лöсьöтчис лоны бур, гажа, сэтшöм, кытшöм колiс деревняын, медбы пöттöдз уджавны. Донаöсь гожумся луннэс — отирыс баитö, что гожумся луныс быдса год вердö, но солдаттэс эта йылiсь эз думайтö, эз тöждiсьö удж понда, сiдз кыдз Москва бöрсянь мунтöнняныс адззылiсö ни, мый керöма войнаыс, кыдз разьöма-паздöма деревняэсö, тальöм ыббесö.

Колiс бы гажа гожумся луныс уджалiссезлö, и войналö колöма этатшöм луныс: эз ешты эшö шондiыс бытшöмика вöр сайсянь мыччисьны, эз ешты бура да бытшöма солдаттэс одзись ыб вылö югöрсö койыштны, кыдз вевдöрын пондiс урöтны самолёт: эрзiс борда машинаыс, лэбзис вылына да эз швырöт бомбаэз, эз тэрмась, а уннялiс-йирис сьöлöм, кыдз бы видзöтчис-кошшис му вылiсь солдаттэсö.

— Рама, — сьöвзис кинкö.

Мый сэтшöм «рама», мыля сiдз самолётсö шуисö, некин томмес коласiсь бура эз тöд. Етша кин адззывлiс враглiсь этатшöм самолётсö, но морт-мöд пöрисьжыккес коласiсь тöдiсö, кытшöм «кай» лэбалö, мый кошшö. Разведчик ылiсянь да вылiсянь видзöтчис-кошшис солдаттэсö, сiйö уськöтны вöлi сьöкыт да и немöн.

— Мыйöн уськöтан? — басни кылiс солдаттэс коласын.

— Быкышшы да лый, — сералiсö öтамöднысö. — Иванлiсь ойся онсö да коккезсис мыдзсö самолётыс кыдз мырддис, колiс кытчöкö бы сайöвтчыны-дзебсисьны.

— Рота, в кусты! — ыксiс ни командирныс. Уннялiс-урöтiс юррезныс весьтын самолёт. То лэбзьылiс вöрланяс, то бергöтчывлiс бöр. Ыб весьтын кисьтiс-сьылiс ыбшар, сьыланкывнас вермис бы самолётлiсь шысö. Ыб вылын путриктiс ося, кöда талун-ашын лöсьöтчис гумьясьны. Сюыс коласын, туй дорсянь неылын, сулалiс сивöй гöна вöв. Тöдчис, что кляча вердтöм, мезмöм сьöкыт уджись, сёйöм пöт и сулалö да суналö. Асывся руыс ыркыткодь эшö, а шондiыс шонтö ни боккесö, да и гут-гадыс оз пока бизгы вöлыс гöгöрын.

— Эх, начкывны бы Синькосö да яйсö вильöтны пöт, то тöнсянь ни эг сёйö, и кынöм вирöдз сималö, — модис öтiк солдат.

— Ась олö, — висьталiс командирныс.

«Рамаыс» ыб весьтiсь вешшис-лэбзис бокö, сылöн шыыс жагвыв вынтöмсялiс. Кокнитжык лоис сьöлöммез вылын, кöр эшö командирныс висьталiс, что чожа бöрсяняныс ваясö сёйны, сэтöн жö кыскасö да сеталасö винтовкаэз, и вöлись пондасö мунны одзлань.

Кокнитжыка ловзисисö солдаттэс. Синнэзаныс саймис гаж, бадь кусттэз сайö сайöвтчыштiсö, пуксисö туй бокö шоччисьны.

Сюыс весьтын öшалiс кизерик лöзвевья туман, кöда пондiс öшны. Сивöй вöлыс юрнас öвтышавтöн иньдöтчис ыб вылiсь вöрлань — чотышалiс да тэрмасис топ дзебсисьны. Солдаттэс коласын кинкö ныргорöн каргис-узис, кинкö мыйкö туткис ас кежас. Видзчисьтöг ыб весьтiсь ыбшарсö кыдз кокыштiс варыш — дугдiс сьывны кайыс. Вöр сайсянь лажмыта-лажмыта швыркнитiс-лэбзис самолёт — эрзыштiс и öшис. Бöрсяняс кыдз гырись лым пондiсö öвтчыны-киссьыны гижöтторрез, кöдна дюттясисö-öвтчисö, лэдзчисисö увдöрö и пуксисö омöн: канаваö, солдаттэс вылö, вевттисö турун.

— Спасибо, фриц, то миян гижöтыс абу чигаркаэз гардны, — солдат нюжöтiс гижöтлань кисö.

— Не трогать! — ыкöстiс командирныс. — Провокация!

— Некытшöм провокация, ёрт командир, абу, — пöрисьжык солдатыс сё жö босьтiс гижöтсö, пондiс лыддьöтны, мый сэтчин гижöма. Лыддьöтiс, сьöвзис да шуис: — Гöститны корö немечыс. Бур олан кöсйö.

— Оз я винаöн бы юктав, — рыг-рыг серöмтчис мöдiк.

— Натьтö, юан... Öмтö осьтан да босьтан, ньылыштан и виньдан.

И гöрдлöны-сералöны ни немецсö солдаттэс, баснисö бергöтöны невестаэзлань, бытьтö бы немецыс быдöннысö лöсьöтчö гöтравны краляэз вылö.

— Тьфу, Фёдор! Сiдз тэныт фашистыс и козьналас небыт басöк подоласö! Натьтö, аслас дульыс сöдзö. Колан немкаыслö сэтшöм чорыт киа колхозникыс. Мый тэись? Только назём жö бура кужан сöвтны, а басöк инькаэс бокын он куж узьлынытö. — Эшö кыдз кужа!

— Но да! Сьöлöмыт потас.

— Но тэ и Константин! Мыйлö тэнö еныс чочком светыс вылö и сетöма? Пиннет вылын миян кодьсö и видзан, колхозниксö мортö он пукты, бытьтö миян кодьыс нач ни нем вылö оз туй. А веськыта кö висьтавны, Костя, ме вылö иньö эз норась, мöдiк мужиккез эз кошшы. Сiдзкö, рад мекöт овнытö вöлi, а немкаэс... Натьтö, Гитлерыс кодь жö проституткаэз эд. Быдöн одзö водасö. Кыдз думайтан?

— Мый сэтöн, сват, думайтнытö? Германияас пö инькаэс ма дознысö миян иннез моз оз жалейтö, сетасьöны пö.

— Видзöтам, кöр локтам Берлинас.

— Ох, ылын эшö Берлинöдззас! Кузя ныррезным нюжаласö.

— Но локтам эд!

— Локтам, локтам! Адззан, Гитлерыс мый керö... Гожум. Сюсö колö бы быдтыны, арнас дзимлявны да нянь сёйны, а сiя отирсö сёйö и ышö энöн бöр чышкан гижöттэзнас дынас бы корö. Кöть мый, челядь, а ме этöн гижöтторнас сортирö öтпыр ветла и бур лоас, — солдатыс чукыртiс-няпралiс кырымас листовкасö и дзебис пиас.

— Но и жаднöй тэ, Фёдор! Немецыслiсь гижöтсö ни пиат дзебин.

— Абу тэ кодь рызi-бызi...

Минута-мöд кежö солдаттэс коласын басниыс öзйылiс и кусiс. Басниöн шоччöтыштiсö öтамöднысö и пондiсö вунöтны ни листовка йылiсь. Да и рам тöлок лолалiс-ургышалiс ыб весьтöт, сибавлiс солдаттэс дынöдз, дзимлялiс-öвтiс гижöтторресö, нöбöтiс вöрлань. Но кыввезныс солдаттэзлöн эзö эшö вöлö мыдзöсь, и коласаныс сё ни вöлi сэтшöм, кöда баиттöг, кыдз лолавтöг, эз вермы овны и бöра лöсьöтiс басни:

— Мый жö бы эта пон Гитлеркöт керны, ежели шедiс бы?

— А мый бы тэ сыкöт керан?

— Сiйö и думайта, мый бы заразакöт керны... Этö бы...

— Ме бы сiйö!.. — сьöлöмыс öзйис куимöтлöн. — Ме бы сiйö медодз чöвтi нагöлеч да нуöтi вöрас. Во бы лоис! Эшö сотанаöс кöрталi бы кöз бердö, и ась бы сэрпöсь яйсö сёйисö номмес.

— И рад лоас, что оз вийö.

— Ог тö-ö-öд... Чöвтчы да пешлiсь-ко миян вöррезын гожумнас вердны номмесö, чожа, натьтö, коккетö нюжöтан.

— Эх-ге-ге... Баитам мый оз ков, челядь, а гортын эд менам старухаö дзир öтнас кольччис. Кыдз сiя сэтчин и олö?

— Старухаыт, поди, уджалö да спинасö оз ешты гыжйыштны, а тэ тöждан.

Баитiсö куйлытöн солдаттэс. Туй кузя ны дынö жагвыв кыссис телегаöн вöв: тальччис и эз, öвтышалiс бöжнас. Тыра телегаын пукалiс ота рожабана, пöриськодь чужöма солдат и топ суналiс, эз тэрмöт вöвсö, немись и некинлiсь эз пов, кыдз вунöтöма, что армияын, что колö бы вöрöтчыны-тэрмасьны, ежели иньдiсö кö кыскыны винтовкаэз, мешöк-мöд сухаррез, и сiйö телеганас видзчисьöны.

— Фёдор! Видзöт жö... Оз я эта öнджаыс телеганас миян дынö катыльтчы? Да жагöн мыйкö...

— А кытчö сылö тэрмасьнытö, дундуклö? Натьтö, пöт, адззан, суналö, миян моз эз мыдз... кымöсас бы, балдалö кулакöн заргы, вöлись бы пондiс тöдны!

— Тпру, Дуська! — эта коста солдаттэс дынö неылö вöвсö сувтöтiс ота рожабанаыс, сьöвзис, кижгыштiс. — Тi менö я мый я сiдз видатö?

— Тэнö, тэнö! Вöрöтчыны бы колö!

— Ме вöрöтча, да Дуськаыс мыдз. Ойбыт вöтча и вöтны ог вермы, чёртыс тiянöс сiдз кытчöкö кыскö!

Солдатыс вöтiс доддя вöлöн ёрттэсö, гажмыштiс, тыдалö, кывсö кеслыштiс-баитыштiс бы, но эз ешты — кинкö горöтiс: «Немеццез!»

Чукыль сайсянь, бадь вуджöррез мöдöрсянь, сярзьыштiс мотоцикл, мыччисьлiс, и сэтöн жö кыдз кинкö шупкис бокö. Мотоциклыс швыркнитiс туй вылiсь канаваö, сувтчис, бöрсяняс гардыштчис тшын. Некин, натьтö, синöн эз ешты кваркыштны, кыдз öтiк машина бöрсянь швыркнитiс мöдiк, куимöт... Миян казялiсö сёрöнöв, и немеццес бытьтö бы медодз кыдз бы дзугсисö-сорасисö туйыс вылын, öтамöднысö люкалiсö машинаэзнаныс, чеччалiсö канаваö. Миян жö кинкö чеччöвтiс ни тыра телега дынö, кватитiс винтовка, нетшкöвтiс затворсö.

Сярзьыштiс медодз автомат, паныт сылö роч командирыс шовкнитiс нагансянь.

Пуляэз дзингисö-лэбзисö юррезныс вевдöрöт, шырзисö баддезлiсь листтэз, швачкисö телегаö, вöлыслö, кöда ружтыштiс да кытöн сулалiс, сэтчö и лиг-ляг водiс. Ямщикыс веськыт кинас кутчисис морос бердö и нюжалiс аслас Дуська бокö. — Челядь, телега дынö локтö да босьтö винтовкаэсö!

Телега дынын вöлiсö ни морт куим-нёль, шедiсö ни киэзаныс винтовкаэз, лыйисö паныт немеццеслö. Только немецыс лыйсис автоматсянь, кыдз ытшкис пуляэзнас, а миян винтовкаэс только шовкöтiсö.

Иваныс ачыс эз бы куж висьтавны, кыдз чеччöвтiс туй бокись, кыдз киас телегаись шедiс винтовка, брякнитчис-водiс, гичыртiс пиннесö и лыйис.

Немецлiсь öнi эз пов солдатыс — некöр вöлi повзьынытö, аскодя лöг и вын пизисö вывтырас, кöр лыйлiс отирлö, и сылö лыйлiсö.

Шондiыс ыб весьтын вöлi вылынкодь ни. Сэтшöм ни вöлi шоныт, что шондi гаж вылын позис ни пымавны вöрöтчытöг. Ыб вылын пизис бой. Кин мыйсянь вермис, сысянь и лыйис, сук зелёнöй том сю вевдöрын öшалiс ни кизерик порох тшын. Каёк, кöда лэбалiс вевдöрын, öвтыштiс борддэзнас и бокöн-бокöн лэбзис вöрлань, кыдз бы ыскöвтiс вевдöрсяняс.

Кивзыштiс ранитöм, кинкö корис мамсö. Немеццес чеччöвтiсö и уськöтчисö одзлань, лыйисö и котöртiсö.

— Ур-р-а-а-а!

— Ур-р-ра-а-а! — ыб вылöт лэбзис, кыдз потiс, вермис лыйсьöм шы — враглö паныт чеччöвтiсö кыдз öтiк миян солдаттэс, дзоннес и ранитöммес, томмес и пöрисьжыккес. Синнэзаныс бöб югöр, рожаэзныс пиньöвтчöмась, кöда винтовкаöн, кöда кулакöн, кöдалö кытiськö шедöма зор и — одзлань! Вачкисö, брынгисö, лыйисö, джагöтiсö — кин да кинöс вермис...

Рам топ миян мортыс уджын, любитö уджавны — керны кö, керас, а лöгöтасö кö, сiдз пидзыртас, сiдз зэлöтас, что кувтöдз он вунöт.

— Ур-р-ра-а-а!!

Ышки-пойки лолалiсö солдаттэс, тышкасисö врагкöт — начкылiсö-лыйисö и джагöтiсö. Кин да кыдз вермис, сiдз и вийис.

Бойыс тöвчик моз гардыштiс, киж-каж керис и кусiс. Усисö отир туй вылö, сю коласö. Межа дорын горзiс-сулалiс кыдз: уввес-чикиссес öшöтчöмась кыдз нывкалöн, кöда лöсьöтчис бы жöник сайö да эз вермы муннытö — вийисö зонкасö, мырддис врагыс синнэз одзын. И пондас сулавны невеста-кыдз да кувтöдз шогавны, кувтöдз пондас висьны сьöлöмыс... Баддез шушкисö öтамöд коласын, кыдз арттöм нывкаэз, кöднö повзьöтiсö смев зонкаэз. Кок увтын тальлöм цветтэз лэбтiсö бы юррезнысö, но эз вермö. Сук едöм вир юис муыс, кöда дыр ни эз ю зэр ва. Кивзiс, кыдз горзiс, кытöнкö канюк. Вевдöрö öшöтчис кымöр-палачок, сувтчыштiс шондiыс весьтö, кыдз бы вуджöрнас сайöвтлiс вийöммеслiсь чужöммесö. Лэбалiсö-бизгисö жаднöй гуттэз.

14

Ловьяэс кыдз мезмисö врагыс öмись, öтамöдныс дынö чукöртчисö вöрын, эшö бура эз вежöртö, мый ныкöт вöлi, кыдз сiдз лоис, эшö сьöлöммезныс тёпöтiсö лёк бой бöрсянь. Эшö пеллезаныс кылiс ёрттэзныслöн чирзöм и ряксöм, эшö адззисö враглiсь то лёк, то повзьöм чужöммез, эшö кöдалöн дрöжитiсö киэз, полöтiс дума, что мортвийöмыс понда вермисö дойдны. Тöння лунöн сё олiсö солдаттэс, эшö аслыныс эз веритсьы, что быль шедiсö ни война вылö, что пантасисö ни оча-паныт врагыскöт, что война сiдз вермас вийны отирсö.

Ловьяэс бой бöрын чукöртчисö вöрын командирныс дынö, кыдз типпез бабука-курöг дынö, кöр командиртöг эз велалö уджавны гортын и овны татöн.

Чулалiс бой. Гым кымöр кыдз чулалiс, и бытьтö бы миян солдаттэс вермисö врагсö, но вермисö я? Эз я асьнысö вермы врагыс? Эз я ыбыс вылiсь репöт кыдз баляэзöс, и öнi эз лысьтö мыччисьны отир син одзö, кöть эз ни вöлö куш киэзöн — быдöнныс ни кыскисö нето винтовка, нето автомат.

Гожумся луныс кузь, богатöй оланöн. Вöрын ыркытжык, ульжык ру, нырö вачкис папоротникöн и эшö быдкодь дукöн. Вöрыс вермис дзебны — сайöвтны уна отир. Вöрыс асланым, роднöй, сiя эз баит, но вежöртiс мортсö, кыдз бы шыннялiс, шушкис, пиксышалiс-виксышалiс: гырка пуын чирзiсö кырпияноккез, чирзiсö да быркайтiсö нач том ватшканнэз, гаггез лэбалiсö, ветлöтiсö, котрасисö, эз вежöртö мый сэтшöм война, эз тöдö горе. Быдöн ловьяыс топ гажöтчис да олiс. Только мортыс кыдз зверься-зверь, бытьтö öтнас муыс вылö эз тöр, сёянöн эз пöт, уськöтчис öтамöд вылö и вийис, вийис сэтшöм оружиеöн, кытшöмö эз кер не лёк зверьлö, не гаггезлö...

— Вань, — ышки-пойки горöтчис Илья, кöдалiсь рожасö кыдз кань гыжьялöма, вир чездыштöма — веськыт ки лапасö лёк немец курччöвтöма. — Вань... Ловьяöсь эд кольччим, ловьяöсь! Одзжык бы сетiсö винтовкаэсö, öтiк немец бы синöн эз ешты кваркыштны, эх! Мыля нö, Вань? — Шы ни эн сет. Спасибо висьтав, что ловья кольччин. Илья синнэзын шог, бытьтö кыткö висьö, и ачыс оз тöд кыт.

Вöрын пуэзлiсь йыввезнысö нёкрышалiс тöлок. Шушкис вöр, командирныс тэрмöтiс: «Чожажык, ёрттэз!»

Том командирныс. Эз тöд кытöн öнi враг, кытöн асланым. Полiс кодь вöрын öвтчыны лейтенантыс — быдмис и олiс городын.

Иван да Илья вöрö шедiсö кыдз гортö — быд туруныс, пуыс и гагыс тöдсаöсь, кинкö вöрас полö öшны, а нiя вермасö синнэзнысö куньны и мунны кöть кытчö и сёян адззасö: медодзза тшакыс нылöн, пиканыс, кöда гумсялiс ни, сёйсис чöскыта.

Шорок дорын шоччисисö, миссисö.

Петiс сiдз, что командирныс бойын öштiс ассис сумкасö, кытöн вöлöмась карта и компас. Компастöг лейтенантыс полö шаг шагньöвтны, и Иван шуис, что мунас одзас.

Иваныс ёрттэсö нуöтiс асланымиссез дынö. Командирыс кывзiс солдатсö, юасис сылiсь, кытöн колiс, кытöн ачыс веськöтлiс отирöн.

Неделя öвтчисö вöрас, сё кыссисö гортлань, кошшисö ассиным отир, и öтпыр рытöн вöр дорын ыкöстiсö: «Стой! Кто идет?»

— Свои мы! — шыасис командирыс, кöдалöн рожабаннэс тошсялiсö, паськöмыс эз ни öддьöн вачкись командиррез паськöм вылö, юрыс вылiсь пилоткасö öштiс, солдаттэскöт öтлаын тшыгьялiс, сайласис-пышшалiс врагись, ойесö джендöтiс быдöнкöт кöззэз увтын, етша узьлiс, öнi медодз и шыасис.

— Кто свои?! Руки вверх! А ну!

— Что ну?! Не видишь, салага?! Мы воюем, голодаем, а ты тут винтовкой играешь!

Эшö бы кыв-мöд и быль бы вермисö öтамöднысö лыйны, но котöртiс ни тöдтöм командир, юрсö видзö вылына баитö-ыксö, шебралö кыввез: «Сетны оружие!»

— А тэ сiйö сетiн миянлö?!

Воштiсьны некытчö: сöстöм-бритчöм командир одзö сьöласьтöн шупкалiсö винтовкаэз да автоматтэз, и бöра кыдз бы эз лоö солдаттэзöн. Нуöтiсö деревняö, командирнысö кыскисö штабö, видзисö сэтчин час-мöд да вöлись нуöтiсö шоччисьны.

— Сэтшöм удж, Иван, — кыдз бы лейтенантыс норасис Иванлö, кöдакöт дружитiс кодь ни вöрын шатласьтöн.

— Пöт ни öнi сёям! — ошшасис Илья, кöда медöддьöн бы узис да сёйис, пыр вöрын тотис, что вермас сёйны гöннас кöть кулöм вöв.

— Сёян! — ёртыслö висьталiс Иван, содтiс. — Иньды гортö письмо да вöлись.

— А тэ?

— Гижа жö...

— Тэнат эд инь эм...

Мурзьыштiс Иваныс: эна артладтöм ойлунö етшаись тöдвылас усьлiс гортыс, думаэзнас быдöс вылö öвтыштiс — талун ловья, ашын... Мылякö етша тöждiс гортыс понда, а сэтöн Ильяыс модьö, баитö иньыс йылiсь, кöда мыччисис топ синнэс одзö, мурзьыштiс и туп-тап мунiс джоджöттяныс, бытьтö мужиксö эз адззы, а зоныс ошшасьö: «Уджалам, тять! Олам, тять! А тэ кыдз? Мыля дыр гортын абу ни?»

Гажтöм зоныстöг лоис.

Вöрись петöм бöрсянь вердiсö, вежисö паськöмнысö, шоччöтiсö. Видзчисисö пополненнё — ротаыс эз ни вачкись рота вылö, джын отирыс ни эз вöлö.

Иваныслö топ службаыс пондiс сетчыны кокнитжыка: етшажык котрасис, унажык гардчис командирыс гöгöрын, лейтенант иньдöтлiс керны сiйö, кытöн кокнитжык, буржык.

Ойнас вайöтiсö том солдаттэзöс. Нач том отир локтiсö, и командирныс сэтшöм жö том — младшöй лейтенант, сiдз и лякасис солдаттэс бердö, сiдз и чирзышалiс: «Мыля пилоткаыт сiдз юрыт вылын пукалö?! Мыля гимнастёркаыт öшалö?! Винтовкатö муöттяс эн кыскы! Наряд вне очереди!»

Рытсянь асылöдз вермис том командир чирзыны и луннас ыксыны эз пöт.

— Вот эта командир! — сералiсö нiя солдаттэс, кöдна тышкасисö ни врагыскöт. — Этатшöмыскöт гажа бы вöлi шатласьны вöрас. Быдöс ошшесö бы öмнас повзьöтiс.

— Ме бы сэтшöмыскöт атакаö эг мун, — ассис кöстiс Илья.

— Кытчö бы воштiсин? — ёртсö кыдз осудитiс Иваныс, думаэзнас младшöй лейтенантсö эз жö ошкы, асланыс командирныс гленитчис буржыка: кывнас весь эз дойд и вöлi смев, Ивансö пыр адззис медодз, пыр ыксiс: «Дружинин, керам!»

Иваныс эз вöв асныра, кывзiс командирсö, мый тшöктiсö, сiйö и керис. Öтпыр ойнас лейтенантыс саймöтiс солдатсö, шуис: «Дружинин, мунам мекöт».

Иван прыг да скок: пасьтасис-кöмасис и вöтчис командирыс сьöрö, кöдалö ойнас колöма видзöтны, эз я том часовöйес ланьтö, война вылын эд вöлiсö.

Олiсö окоппезын ни. Нырö вачкис уль муöн. Пемыт ойыс. Туна-тана öтамöднысö тойлалöмöн кыссисö-мунiсö траншеяöт, сибöтчисö часовöй дынö, кöда быль узис и эз кыв, кыдз офицерыс кисис босьтiс винтовка. Сыбöрын мунiсö блиндажö, кытöн бöра жö чöскыт онöн чискис-узис томжык командирыс — младшöй лейтенантыс вöтасис бур вöттэз. Узис том командирыс, бат, вöтöн олiс гортас, а не война вылын, шыннялыштлiс. Вöтöн вунöтiс, что мунö война, враг матын, вермас локны да начкывны быдöннысö. Быдöс ойнас вермас лоны, и медодз пондасö кыскавны старшöй лейтенантсö, юасясö, мыля взводыс узис, кытöн вöлiсö командиррес — етша баитасö да керасö: трибунал лоас...

Блиндажын аскерöм джек вылын сотчис-чадитiс аскерöм лампа, тшыныс потолоксянь öшалiс джын блиндажас. Шырок гуддисис аскерöм джек дынын, повзис да пышшис.

— Дроздов, — негорöн шыасис старшöй лейтенант, саймöтiс бы младшöй лейтенантсö. — Дроздов.

Дроздовыс узис, кöть кут да коккезöттяс кыскы, ежели мортыс эшö абу бритчылöма, эшö челядёк вылö вачкисьö, вöлi кö бы öнi гортас, мамыс бы асывнас саймöтiс сёрöн, а эстöн зонкалöн мамыс абу, эм старшöй лейтенант. Сiя лöгасис сы понда, что часовöйес ланьтöмась, ланьтöма и командирныс, и устав сьöртi кöть талун жö узиссесö судит.

— Дроздов!

— Дроздовыс одзлань чискис-узис. Сэк лейтенантыс веськыт кинас няпыртiс мороссö да кыдз зэгнитiс, сэк вöлись Дроздов и чеччöвтiс, вöлись повзис. Одзжык ачыс повзьöтлiс солдаттэсö и вöлi кыдз бы смев, öнi сувтыштiс аслас командир одзö, кыдз кынмис, чужöмыс бледöтiс, а ротасис командирыс ыксiс ни:

— Тэ мый, взводiсь командир?! Кытöн служитан?! Абу я война вылын. Узьöны часовöйет, и ачыт узян. Трибуналö эд колас сетны, а!

Лейтенантыс ыксiс сiдз, что Иван некöр бы эз и думайт, что командир вермас видны командирöс. Иваныс эз осудит ассис пöрисьжык командирсö, осудитiс томжыксö и сылö, Иваныс думаэз сьöртi, тыдалö, лоö трибунал.

Эта вöлi ойнас, ашынас некинöс эз судитö, некинöс некытчö эз корлö, бытьтö сiдз и колiс — вöлi да абу, ас коласын мый оз овлы — керим и вунöтам талун, медбы мöдöтпыр сiдз эз ло.

Чожа лоисö бойез: пуляэз уннялiсö, снаряддэз потласисö, отирöс ранитiсö и вийисö — страда вöлi войналöн. Медодз младшöй лейтенант бытьтö бы öмсö видзис тупкалöмöн, а сыбöрын быдöс вунöтiс и бöра ыксышалiс солдаттэс вылö, лёка видзöтышавлiс Иван вылö, топ быд тор понда вачкис бы пельбокас. Только солдатыс сэтшöм командирлiсь öддьöн эз пов, сiдз кыдз сылö эз подчиняйтчы.

Аслас командир вылö надейтчис Иваныс, кöдакöт позис служитны, да счастье солдатлö дыр эз шынняв: öтiк асылö, кöр буржыка югдiс, шовкнитiс кысянькö лыйöм, и ротаись командирыс пöрис, нельки эз и кивзышт.

Рытöдз командирыс куйлiс траншеяын, и кыдз только пемдiс, лейтенантсö кыскисö вöрок дорöдз и сэтчö дзебисö.

Медодзись эта война вылын Иванлöн петiсö синваэс не только командир понда, но и ёрт понда.

Гажтöм лоис врагкöт тышкасьны командиртöг, кöда местö недыр кежö пуктiсö Дроздовсö. Бöра солдаттэс тышкасисö врагкöт и эзö тöдö, мый лоас талун рытнас или ашын асывнас: рытнас ротаыс эшö пукалiс окоппезын, а ойнас солдаттэс шагнялiсö мöдöрö ни — ылö мунiсö важ местасиныс, асывнас гарйисö окоппез, дзебсисисö муö и пондiсö видзчисьны. Кывсис, что немецыс кытöнкö орöтöма оборона, но некин бура эз тöд эта йылiсь, а командиррес öммезаныс кыдз видзисö ва — нем бытьтö эз кылö, эз адззылö.

Луннас рота весьтö öшöтчылiс гым кымöр, гымалiс-зэрис ведрапонiсь моз, гым кымöрыс вешшис бокö, сэсся нем сэтшöмыс эз вöв. Врагыс эз тыдав, солдаттэзлö бытьтö бы керны вöлi нем, кöда куритiс, кöда кеслiс кывсö — висьтасис аслас олан йылiс, кöда гижис письмо. Командирныс ветлiс полксиныс командир дынö, локтiс чожа, пизис-тэрмасис кытчöкö, перыта висьталiс, что колö мунны разведкаö, что разведкаö мунас ачыс, сьöрас босьтас вит-квать солдат, что мунасö машинаöн, кöда видзчисьö ни эта шорок сайын. Младшöй лейтенант висьталiс, киннэз мунасö сыкöт.

Разведкаö мунны шедiс Иваныс. Сiя ёрттэскöт пукалiс полуторка вылын да катыльтчис зэр бöрсянь нятьöсь туй кузя — мунiсö разведкаö врагсö кошшыны. Ыскöвтiсö километр кык гöгöр, вöрок коласiсь шупыта мыччисисö ыб дорö, кытöн сулалiсö öтi-öтi мöймуся идзас стопаэз, кöдна гöгöрын лэбалiсö ракаэз, кык кырныш. Одзаныс туйыс кайис керöс панытмоз, сэтчин поздiсьöма деревня.

Ыб дорын машинаыс сувтчис: — Видзöтчам да вöлись! — висьталiс командирныс, нюжöтiс голясö керöслань, сыбöрын кинас öвтыштiс. — Мунам!

Машина вöрзис. Командирыс кабинаын пукавтöн видзöтiс кытчöкö идзас стопаэслань, кыдз бы минутаэсö олiс аскöттяс. Колiс катыльтчыны ыб кузя, мунны паськыт да гöв местаöт. Мунiсö деревнялань, кытöн часöт нем сэтшöмыс эз тыдав, нельки пон эз гавнит, и на! Керкуэз сайсянь чеччöвтiсö немеццез.

— Сулалö! — горöтiс командир. — Чеччалö машинасис и котöртö идзас стопа сайö. Чожа!

Медодз машинасис öтнас чеччöвтiс Иван, иньдöтчис бы стопалань, но сэтöн жö кыдз джöмдiс: бöрсяняс шовкнитiс лыйöм, пуля шутньöвтiс пельыс бокöт. Солдат эз ешты повзьыны, перыта бергöтчыштiс, и синнэс баралiсö: командирыс киас видзис наган и кыдз бы сералiс, öмыс пиньöвтчыштöм, пиннес гер.

Иваныс топ мугис, кикокыс небзьыштiс, кыдз кöдзыт ва кисьтiсö вылас, но сэтöн жö саймис, юрас сöтiс, что колö асьсö дорйыны, и перыта лэбтыштiс автоматсö. Сярзьыштiс бы солдатыс аслас командирлö, нем керны, да ёрттэс вöлiсö сiя жö машинаын, дума кыдз кутыштiс киöттяс, падтiс.

Бледöтiс Иваныс. Бöр лэдзис автоматсö, а лейтенантыс сё асмознас шынь видзис, кыдз код, горöтчис: «Машинаö и гортö!»

Немеццес деревнялань тэрмасисö, мыйкö ыксiсö ас коласаныс.

Машина сэк жö бергöтчыны эз вермы: уннялышлiс, несйис, педзис бöрлань да одзлань, командир чирзiс:

— Чожа, чожа! Бергöтчы, мать душу!

Кытчöдз машина зэрöм бöрсянь нильыг туй вылын колесоэзнас нилис-бергöтчис, Иван ештiс чеччöвтны кузовö.

15

Асывнас жö ротаись солдат Суров нуöтiс арестуйтöм Ивансö деревняöдз, спинасö пыкис штыкöн и модис: «Вöрöтчы! Мый сэтöн умöль вöв моз быд шагын джöмдалан или нач тшыг? Сёйсис тэнат няньыт и оланыт овсис».

— Олам, бат, эшö, — шыасис Иваныс, гичралiс пиннесö: курыт вöлi горшас, синваэс петiсö, сiдз бы и риксис-горзiс, но быд вынсис видзсис. Кывзiс, кыдз Суровыс тэчис-баитiс бöрас пöрись морт моз,— бытьтö сто год олöма, тöдö олансö, быд кылын гардö: «Оланыс правда любитö, и мымда бы сiйö эн бöбöт, кыдз бы сыкöт эн орс, нем тэнат оз шогмы, кытчö тальччан, сэтчö и кольччан. Йöзыслö, ёрт, гусö эн гарйы, ачыт сэтчö берездасян».

Ружтышалiс Иваныс, лöгыс петiс Суров вылö — асьсö кленитiс, что олö, что эз вермö талунöдз вийны, и колö стыдитны рожасö, бытьтö бы быдöн одзын виноватöй.

Ивансö ременьтöг ни, кыдз врагöс, нуöтiс следователь дынö асланым жö солдат, кöдакöт война вылын кашасö панялiсö öтiк дозiсь, но öнi Суровыс — солдат, кыдз бы герой, а сiя кин?

Думаэс юрас пизисö, öтiк бы эз дорйы. Мунтöнняс Иваныс öштiс бы сьöкыт думаэсö, сорис мöдiккезöн. Этасянь сiя видзöтышавлiс ёртыслань, кöда некöр шынь эз кер — гажыс мортыслöн абу, он адззы не синнэзсис, не чужöмыс вылiсь, не он кыв. Синнэс вöлiсö ыджытöсь, топ куканьлöн, рожаыс — кузьмöса, кöс, бледыник, юрсиыс — лён сöдз кодь чочком, нырыс горбылякодь да кузьöв, пеллес, кыдз шуöны, торта пеллез, öтмöдöрö паськалыштöмась моз гырнич юрыс бердын. Кöсыник солдатыс, некöр и некытчö эз тэрмась, кöть шатьöн вачкы — шагыс öтiк, мывкыдыс тусь оз вежсьы.

Суров понда винтовкаыс вöлi ыджытöв, гимнастёркаыс вылас кузьöв, коккезас ботинкиэс ыджытöлöсь, ныррезныс чангыльтчöмась моз — но солдат эд! Бытьтö бы немись и некинлiсь оз пов, только разведкаö оз босьтö, а мукöдпыр пригодитчö: öнi Ивансö нуöтö следователь дынö, бöрсяняс оз-оз да чапкö кыв: «Эх-ма, тöдiн, тöдiн бы кытöн смертьыс видзчисьö, сизим верста бы сiйö местасö орддин...»

— Орддьы! Мый видзö?! — паныт шыасьö Иваныс.

— Кытчö орддян?! Кытчö еныс шуöма кувнытö, сэтчö и лолыт петас, кöть мымда пышшав. Ме ог я пышшы бы, да кöрталöм смертьыс одзö, кыдз виноватöй пон, и тöд жö тöд, кöр страм смертьыс сёяс, кöр сылöн öддьöнжык пондас симавны кынöмыс.

— Бат, меись одзжык кулан... — Тöдi бы...

— Сэк мый нö?

— Мый, мый... Ме тэ кодь жö гаг: висьталiсö и кера! Баитiсö — кыввезöн шупкасисö, локтiсö неыджыт деревняö, кытöн штаб — начальниккез, солдаткöт уна оз баитö. Ивансö заргисö керкуокö, ыбöс сайö сувтöтiсö часовöйöс — сiйö жö Суровсö — и видзчись, кöр оланыт овсяс. — Тэ, ёрт, вывтi одзлань эн тöждiсь. Тэ ов да немись эн пов. Ме тэныт шуи ни, мыся, правдаыс быдöсся вынажык! — ыбöсыс пыр Иванкöт баитiс Суров, кöда баиттöг эз вермы овны. Сы йылiсь шутитiсö, что иньдыны бы только солдатсö немецыскöт баитны, врагыс бы киэсö важын ни лэбтiс. Но Суров весь нем эз горöтчывлы, быд кывсö öмсис лэдзис только сэк, кöр сизимись бытьтö бы öшлас да вöлись висьтавлiс.

«Суров, Суров... Мый жö эстöн тöдсаыс? — Иваныс думайтiс бы часовöй йылiсь, сорис ассис умöль думаэсö. — Кысь ме кывлi эта фамиллёсö? Мый эстöн тöдсаыс?»

— Суров! Тэ кысь? Абу я коми? — ыбöсыс пыр Суровлiсь юалö Иваныс. — Или оз туй миянлö тэкöт баитнытö?

— Мортöс вийны оз туй, а сэсся кöть мый ми тэкöт вермам керны, кöр начальствоыс матын абу. Кытшöм коми йылiсь баитан? Роч ме мортыс, кыдз эта жö...

Суровсянь уна он босьт. Солдатыс немöн тэныт оз вермы отсавны. Кöть кыдз бергöтлы, кöть кыдз öшлы, кöть джагöтчы — öтiк ни! Он ни тэ мезмы петлясис, сiдз кыдз учöт мортыс — солдат, а Дроздовыс — командир, офицер. И командиррес дорьясö командирсö жö, сылö веритасö. Виноватöй бытьтö бы Иваныс, кыдз бытьтö сiя лыйис офицерлö, а война коста уна оз пондö баитны. А олiс бы эшö солдатыс, кöть и овсис сiдз, что нач немöн ошшасьны.

Сьöкытöсь думаэс солдатлöн, сэтшöмöсь, что гортсö вунöтiс, тöдвылас только кыкись-куимись усис мамыс, и лöгыс петiс сы вылö, мыля сiдз: эз кö бы чуж свет вылас, нем бы эз тöд...

Думаэс чушкалiсö Ивансö, бöбöтiсö, кöсйисö и вöзйисö умöльö, кöр пондылiсö дорйыны бы, а кöр и сотiсö-юалiсö: «Пышшыны бы?! А кытчö? Кытчö да кытчö... Гортö я мый я, ежели гортын кутасö, и сiя жö лоас? Врагыс дынö... Ыбöсас тангы, чеччöвт и абу... Кошшы, кöр Суровыс пондас маласьны да вöрöтчыны, сэтчин ни лоан. Врагыс дынын оз я оланыс ло? Овны пондан, а гортыт?»

— Солдат, пет!

Шаг — и ыбöс сайын. Ловзисис кокнитжык руöн, кыдз бытьтö сьöкыт из кыскис. Тальччис му вылö, кöда вöлi тальöм и гарйöм, но сы вылын кыдзкö эшö быдмис турун, и цветитiсö цветтэз, дзоньöсь сулалiсö улица пöлöн кынымкö пу. Дзуртiс-сьылiс каёк. Воробейез кыдз гортын жö чирзышалiсö да тышкасисö йöр вылын. Юр вевдöрын уйисö кымöррез. Арлань ни погоддяыс: шондiыс кымöрас уйö лажмытжыка ни, ыркытжык ни, сорласьö-вежöтö ни льöмпу лист. Иван жаднöя видзöтыштiс тöдтöм деревняись олансö, синнэзнас кошшис бы отирöс, кöдна эз бы новйö солдаттэзлiсь паськöм, но сэтшöммес эз тыдалö, только бокас зэв-зэв винтовканас шагнялiс Суров. Бледыник чужöм вылын нем бурыс и умöльыс эз тöдчы, Ивансö думаэзнас эз дорйы и эз бы таль, шупкис кыв: «Кöда горша сёйö, сiя виньдывлö». Мый бы этöн висьталiс солдатыс, Иван эз вежöрт и некöр сылö вöлi думайтны йöз басни вылын, кöр сьöлöмыс пессис-педзис, кыдз повзьöтöм каёк, кöда лэбзис бы и лэбзьынытö эз вермы.

Деревня кырылын вöлi вöр, кыдз гортас жö, кытöн, натьтö, быдмисö тшаккез, и вöлi гажа. Этасянь Иванлö лоис сэтшöм охота мунны-лэбзьыны, шедны гортас, что сiя ачыс эз казяв, кыдз падмис гöпокö и усис пидзöссэс вылö. Зэгнитчыштiсö юрвеммес, и Суровыс горöтчис, кыдз пуктiс: «Одзлань эн кув, а то отирыс пондасö серавны!»

— Мый меным лоас, Суров? — Иван ружтытöн. чеччис, сувтiс гöпокыс дорын коккес вылö.

— Кин мый кöдзö, сiйö и вундö.

Солдатыс эз куж пöрьясьны, эз велав асьсö дорйыны бöбöтöмöн, кöр учöтсянь айыс модьлiс: «Пондан кö бöбöтчыны, кывтö керала!» Иван эз куж кинкö моз висьтавны сiйö, кöда абу, кöр мукöдыс бöбöтчöмнас и олö да счастливöй. Солдатыс висьталiс быдöс сiйö, кыдз вöлi разведкаын, и следователь медбöрын горöтчис: «Вермат мунны!»

— Мый сэтшöмыс? — кыдз вöтöн офицерлiсь кылiс кыввесö.

— Мунö асланыт частьö да служитö одзлань!

Петiс Иваныс следователь дынiсь, шынньöвтiс, топ шондiыс малыштiс рожабаннэсö, висьталiс: «Олан эшö, солдат!» «Олам эшö, олам!» — пизис гаж.

— Мый нö?! — нюжвыв горöтчис Суровыс. — Олам эшö!!

— А ме мый шуи? Мыся, кин гусö йöзыслö гарйö, сiя ачыс сэтчин пырö.

Пуксисö. Гардiсö чигаркаэз, но эз ештö öзтыны, кыдз мыччисисö самолёттэз.

— Заргись гуас! — медодзын уськöтчис Суровыс.

Иваныс сьöрсяняс. Бергöтчыштiс, видзöтö: следовательыс öтлаын ружтö, синнэзас орсö-повзьöтчö олан. Самолёттэс гардыштчисö-лэбзисö зэв-зэв короминнаэз вевдöрöт, швыргисö бомбаэз, кöдна сэтöн жö потласисö. Синнэз одзö мыччисис Дроздов, кöдакöт öтлаын ветлiсö разведкаö, кöда понда невна эз шед мöдöр югытас. Котöртiс Дроздовыс улицаöт, кыдз дзöдзыв потш кузя, бöрсяняс быд вынсис ыксiс гусянь офицер-следовательыс: «Татчö, татчö!»

Сэтöн брякнитiс бомба, и бытьтö эз и вöв Дроздовыс, бытьтö горöн потiс ва поль, öтмöдöрö резiс му, изторрез.

Недыр деревняоксö бомбитiсö. Самолёттэс öшисö. Тшын да бус öшöтчис керкуэз весьтö, сотчисö керку-мöд.

— Вöлись повзи! — гуись баöн кыссис Суровыс, басниажык бытьтö лоис; пондiс висьтасьны-тэрмасьны: — Кывзы... Гортын кыдзкö ме мунi сю дзимлявны. Сэтчö кутiс да зэрмис. Быль! Дзугис зэрыс уджсö. Бригадирным кутiс матегавны: «Иван, тэ жагöн вöрöтчин! Тэрмасин бы, сюыс бы зэрыс увтö эз шед, шоромын бы вöлi». Ме сылö и шуа, мыся, видзöт кыдз уджалi, чисто пымалi. Адззылiн тэ, мый шогмö. А олам эд! А кытчö воштiсян? Да, бöра жö, бригадирсö еныс адззис: ашынас жö кыз кынöмöс пороз люкалiс... Кыдз заргöма кынöмас, кишкаэс петöмась — и абу, а ме — эм.

Бомбитöм деревняись иньдöтчисö асланыс частьö. Чожажык ни шагнялiсö. Суровыс тэчöмöн пишкис-баитiс:

— Кывзы, Иван... Еныс эд эм! Думайтан абу? Эм! Немечыс эд, кывзы, отирсö вийö да оз думайт, что аслыс гусö гарйö. Заргисяс гуас медбöрын сiдз, что нем керны миян кодьыслö лоас. А отирыс... И мыля бы муыс вылын дзескыт овнытö, мый оз тырмы отирыслö? Öтамöднысö вийöны и вийöны, бытьтö бы немецыс мöдкодь морт, сьöлöмыс абу. Иван, тэ вежöртан или он, кытöн эстöн правдаыс? Ме вот нем ог вежöрт. Сысянь и лöг петö немецыс вылö. Колöма вот дедöлiсь важ пишальсö босьтны. Сiйöн бы вот самолёттэсö котти. Ылiсь оз я судзöт важ пишальыс, а винтовкасяняс только эд морт виян.

Суровыс кужис баитны, а синнэзас вöлi аскодя югöр, топ мортыслöн пыр висис да сiдз, что некин эз вермы отсавны-веськöтны, и эз норась öддьöн, быдöс терпитiс.

— Иван, ме эд тэнö öддьöн жалейтi. Мыся, быль я мый я оз ни лэдзö?! Мыся, тургасö штрафнöйö или лыясö, сымда и лоас, а эзö эд. Öнджа-а-а, тэ жаль, отирыс жальöсь, ачымöс жалейта. Кужи, кужи бы начальствоыс моз баитны, лэбтiси бы кытчöкö вевдöрö, кымöррес дынöдз, и ыкöстi быд вынсим: «Мый керат, бессэз?! Еныс эд чарöтас!» Вежöртiсö я бы менö, Иван?

— Ог тöд, — шыасис Иваныс, а ачыс ёртсö эз бы кывзы, кöда челядь моз баитiс ни.

— Кывзы, Иван... Менчим эд айöс сiдз и сёйисö. Уджалiс айö колхозас завхозöн, и центнер сю абу тырмöма. Быль, Иван! Эз гусяв сюсö айö! Кöть абу ни ловья, нем ни бы дорйынытö, а дорья, только тэныт и висьтала, а сэсся кинлö. Соседнымлö я мый я — гер пиньлö, кöда чушкалöма, бытьтö пö айö гусясьö. Эх!.. Некöр и некинлö айö йылiсь нем ог шу, сьöлöмö вылын пöжа, видзчися... Верит, что тöлыс кузь, кöдзыт, но локтö тулыс и сылöтö. Сылöтас и миян, пондасö вежöртны, что отирсö эз ков сёйны, да сёрöнöв ни лоас: кулöммесö гробсис он чеччöт и кöть мымда ни сыбöрсянь синваэтö чышкы...

Иваныс ёртыскöт мунiсö ротаö. Öтыс баитiс, мöдыс эз шыась. Иваныс думаэзнас олiс гортын, сё юалiс бы кинлiськö, мый жö бы лоис, если бы асланымиссес вийисö сiйö? Натьтö эд, öтiк морт бы эз жалейт, эз бы понды касьтывны нянь-сов дорö, пондiсö бы Суровыс моз шуны: «Мый кöдзис...» Стыд аймамыслö лоис бы, что быдтiсö... Мужикыс кыдз мезмис смертьыс киэзiсь, гажöтчис думаэзнас и эз, а ёртыс лёбис:

— Кывзы, Иван... Ме эд эшö öддьöн бы ола! Мыля бы не овны, кöр чужи? Кылiн, Иван! Ола бы, — ружтышалiс, нырнас пишкышалiс, мыкталiс. — Ештi гöтрасьны ни. Вайöтi, видзöт, инь, кык кага ни эмöсь. А мый? Мыйлö сэк иньсö бы? Сiйöн öддьöнжык и ола бы, да виясö эд! Виясö, кыдз гутöс! Тöда. Кыдз вот сэк пондасö быдмыны зырымöссес, Иван?!

— Быдмасö! Миян коддесö эд еныс оз вермы чарöтны, и смертьыс оз куж сёйны! — гажöн висьталiс Иваныс. — Бур отирсö вот вийö еныс.

— Сiдз. Нятяс и сюыс буржыка быдмö.

Эз ни вöв ылын ротаныс, но кык солдат эз тэрмасьö окоппезö, басниöн кыскисö кадсö, медбöрын Суровыс пондiс кеймисьны:

— Кывзы, Иван... Виясö кö менö, гиж гортö. Ась тöдасö. Тэнö кö виясö, ме гижа жö.

16

Ротаын бöра ни командирныс виль. Зюлёвöн шуöны. Öтiк солдат пантасьö, мöдiк, куимöт — быдöнныс модьöны: «Зюлёв висьталiс... Зюлёвыс тöдö...»

Мöдiк командиррес йылiсь этадз эз баитлö, а эстöн нето видöны, нето ошкöны. Медодз Иван эз вежöрт и эз юав, кыдз эшö моросас бытьтö бы из кыскалiс, сё эшö бытьтö бы олiс вöтöн. А вöлöма, что командирнысö солдаттэс быд кылын абу касьтылöмась весь, сiдз кыдз мортыс ротаын олöм етша да керöма солдаттэс понда уна.

Командирыс вöлi не ыджыт мыгöра и не учöт, не лёк и не рам — морт да и быдöс сэтöн. Сiя быдöннысö: томжыкöс и пöрисьжыкöс шуис только нимнас да айнимнас, Иванлö медодз висьталiс:

— Иван Алексеевич, босьтан этö винтовкасö. Хозяинсö тöн тэтöг вийисö, а чапкыны жаль: бура инмö.

Зюлёвыс нельки джын кылöн эз касьтыв, что Ивансö нуöтлiсö следователь дынö, сетiс ассис куритны, тшöктiс вердны, кöть верднытö немöн вöлi — джын сухар да сiя багсьöм. Сыбöрын ременялiс командирныслiсь ремень, висьталiс, что сылöн эшö эмöсь кыка, тшöктiс сёйны-юны, шоччисьны, кытчöдз позьö, готовитчыны атакаö.

— Но мый, Ванька? Ловья! — Илья мед ни рад вöлi ёртыс понда. — Öнi олам бöра эта командиркöт! Кытчö пилоткатö воштiн?

— Сэтчин кольччис. Бомбитiсö, да сэк öштi.

— Бось сэк менчим. Командир козьналiс.

— Аслат кытöн?

— Эм да осьтаöсь: снайпер писькöтiс.

Сералiс Илья, топ снайперкöт орсöма. Шыннялiс ни Иваныс.

Быдöнныс шыннялыштлiсö, бытьтö бы рота лöсьöтчис вежалун кежö. Командирныс ачыс ветлiс вайны ужин — кашаöн вердiс солдаттэсö, кöть и командиртöг вöлi бы кинлö сёянсö вайны, но вайис эд Зюлёвыс и вердiс ассис солдаттэсö да висьталiс, что асывнас колö уськöтчыны атакаö — деревня мырддьыны немеццеслiсь.

Атакаö уськöтчасö пушкаэз лыйтöг — гусьöн, сэк, кöр врагыс эшö пондас узьны или чеччас да пондас тiльны синнэсö. Эта йылiсь командирныс висьталiс быдöнлö, быдöнкöт баитiс, висьталiс кыдз керны, медбы эз вийö, чтоб вермисö врагсö.

Ойнас петiсö окоппезiсь. Дзирс пемытöн ротаыс пырис расокö. Сувтiсö солдаттэс пуэз увтö и пондiсö видзчисьны югдöм. Иван нырнас кылiс, кыдз патшкис кöззэзсянь сир дукöн, чуннез увтö шедлiс чорыт да желля лыс, сэтöн жö вöлiсö ловпулöн уввез, кытöнкö матын быдмис сэтöр, кöдасянь вайöтiс чöскыт дук. Дынас ниртчис Суров, пишкышалiс нырнас негорöн, мед только кылiс Иваныс, тэчис-баитiс:

— Иван, тэ тöдан, мыйлö хозяиныс видзö понсö? Весись вердны я мый я? Оз эд. Поныс колö, медбы дорйис хозяинсö. Во кытöн оланыс! Ме вот сiдз жö ас йывсим и думайта, мыся, пон кодь жö... Сiдз жö и ола: пондi ковны война вылö и тасалiсö — пулясö падтыны иньдiсö!

— Дугды сiдз!

— Мый тэ полан? Некин эд йöзыс оз кыв. Виясö менö асывнас и быдöс сэтöн: кулöмсö он ни лый.

— Мый тi сiдз, Иван? — Илья тöдiс бы, мый ёртыс баитö Суровкöт, но Иваныс серöмтчыштiс да висьталiс, что вот инмисö кык Иван да ниммезнысö сорисö.

Югдыны эз тэрмась: медодз лöз видзис вевдöрын, сыбöрын пондiс чочкоммыны вундытöм ыб, пондiсö тöдчыны деревняись керкуэз. Думайтiсö, что немецыс узьö, а сiя пулемётсянь шырзьыштiс вöр кузя, кисьтiс пуэз бердiсь листтэз, повзьöтiс каёкöс, кöда чирзыштiс и швыркнитiс юррез вевдöрись.

— Тойес сёйöны фашистсö! — серöмтчыштiс Илья.

— Тэнö озö?

— Кыдз озö? Велалi ни верднытö враггезöс.

Баитöны, шуткаö бы бергöтöны баснисö, но сьöлöммез выланыс недолыт, дзик кинкö бöрсяняныс малалö чорыт да гöна киöн.

Югдiс öддьöнжык. Командир ветлöтiс ни коласаныс, баитiс:

— Пятнадцать минута бöрсянь. Кылiт?! Дружнöя. Эд полö. Врагыс миян кодь жö морт, сьöлöмыс абу кöртiсь дорöм. Полö жö.

— Еныс бы дорйи! — пернапасасис пöрисьжык солдат. Пондiс ни тыдавны лысва, кöда бисерöн öшалiс листтэз вылын, вотялiс турунö. Кыдз бы горзiсö пуэс. Жексьыштiс учöт дзезок: кынöмыс сималiс кайлöн, кошшисис-быркайтiс ув вылiсь ув вылö. Вачкисис, топ ружтыштiс му. Илья Иванлiсь жмитыштiс кисö.

— Матынжык видзсьы, — Суровыс висьталiс Иванлö, — не гöститны эд мунам.

Асылыс вöлi кöдзыт. Кöдзыт руыс пырис паськöм увтö, маласис яй бердын. Иван нетшкöвтiс кыдз лист, сюйыштiс öмас и пондiс аклявны. Кинкö пондылiс куритны — ныр чегис табаклöн тшын дук, но командир висьталiс: «Эд куритö!» «Мый жö ме вöтаси? — пондiс думайтны Иван, медбы дзугны думаэсö, кöдна полöтiсö гусьöн, асмознаныс, сьöлöмсö чувйисö, кöда моросас талун тёпöтiс чожажык. — Мый жö?»

— Вперед! За Родину! За Сталина! — негорöн ыкöстiс командирныс и медодз öдззис котöртны деревнялань, кытöн бытьтö бы некин эз вöв — öтiк морт эз шыась, но кытöн вöлi враг, вöлiсö гарйöмöсь окоппез.

Иван нетшкöвтчис пуэз увтiсь, повзьöтiс пистöгöс, кöда быркнитiс и öшис. Лысва гизьнитiс пуэс вылiсь, вотьыштiс нырыс вылö. Сьöкыт вöлi чеччöвтны одзлань, но котöртiсö ни ыб кузя солдаттэз, сьöкыта талисö вундытöм сю, кöда гардчис коккез бердö, падтiс бы.

Бöрас пишкис-лолалiс öмтырнас Суров. Одзас кокнита чеччалiс Илья.

Сьöкытöла котöртсис керöс паныт, коккез бердö лякасис нять, ботинкиэз бытьтö бы лоисö пуд сьöкытаöсь. Иван котöртiс. Кинкö ружтышалiс бокас, кинкö кылö мыйкö модис ас кежас.

Матын ни вöлiсö керкуэс, но некин эз лый. Вачкисис, топ врагыс пышшис, но чивзыштiсö кöбывкаэз моз пуляэз, кинкö кыдз повзис да ойкнитiс, солдаттэс эз джöмдö, котöртiсö. Иваныс бöрын мыйкö шовкнитiс-потiс, кыдз тальччисö тыра анькытш пуртöс вылö, и сэк жö ыбыс вылын том голос ыкöстiс: «Мама!» Иваныс бергöтыштiс юрсö, пöв синнас адззылiс Суровсö, кöда сулалiс пидзöссэс вылын, кутчисис бы морос бердö. Дзугсьыштiсö котöртiсьыслöн коккес, думаэс пышшöтiсö бы Суровыслань, но командирныслöн голос вачкис: «Вперед, ребята!»

Паныт сярзисö ни пулемёттэз, и лыйисö автоматтэзiсь.

Солдаттэс сё котöртiсö, дзик немись эз полö, нем нiйö эз вермы падтыны. Но вот и Иван одзын ни падмис да усис öтiк, сыбöрын мöдiк, куимöт кусiньтчыштiс да таралiс гатш. Иваныс кытчöдзкö эз падмы, тэрмасис медодзза керку дынöдз, саясис бы стенаыс сайö. А пуляэс лэбзисö сё тшöкжыка, коттисö колассиныс морттэсö.

Вот и быдöнныс ни куйлöны му вылын, пуляэс шырöны-дзингöны омöн. Иван мöртiс бы юрсö муас, жмитчис бы, дзебсисис, сiдз кыдз пуляэс гыжьялiсö гöгöрсис мусö, шутнялiсö пеллес бокöт. «Ен-батюшко, отсав!» — кеймис мужикыс. Бокас пондiс чирзыны эшö öтiк ёрт, мöдöрас кинкö модис: «Сёйис эд киöс, эх!»

А пулемёт шырис-лыйис зэв, пуляэс ытшкисö турун и сю шеппез, кошшисö му бердiсь солдаттэсö. Кинкö бöрöн-бöрöн кыссис ни бöрлань, вöрыслань, кöть и вöр дынöдз öнi вöлi ылынжык ни.

«Виясö эд», — полöтiс дума.

— Ребята, вперёд! — командирныс медодз чеччöвтiс пуляэслö паныт, вевдöрö лэбтiс кисö, öвтыштiс и пондiс котöртны.

Сьöкыт мездöтчыны пуляэслö паныт, но Иван адззис, кыдз боксис чеччöвтiс öтiк солдат, сыбöрын мöдiк, и сiя лэбтiсис.

Быдöс бытьтö бы аркмис кокнитжыка, нежели думайтсис: вот и керкуэс, кöдна дынö сiдз тэрмасисö, вот и вийöм враг вылö ни падмисö, кöдалö лыйис Иваныс. Оз верит аслыс, оз вежöрт, мый сыкöт: юрас кыдз мыйкö пуö, зэлöтö, кыдз кольмöм, и сьöкыт, кыдз быдöс керсис вöтöн. Öнi лыйлiсö зэв ни.

Бойыс кусiс. Сотчисö керкуэз. Тшыныс гардчис му бердöт.

— Сабуров, Петров, Суров! — кылiс командирныслöн голос. «Кытöн жö Ильяыс? — кыдз саймыштiс Иван. — Ловья я?!» Иньдöтчис командир голослань, öвтчышалiс-мунiс важ керку дынöт. Посöдз дынын сулалiс пöрись старуха, горзiс и ыксiс: «Серёжка, чеччы! Серёжка-а-а!»

Иван казялiс вийöм зоночкаöс, кöдалö пуляыс инмöма юрас, и вир визывтö му вылö. Серёжкаыс Андрейкася вöлi только невна учöтжык, сьöд юрсиа, сiя топ узис, а бабыс саймöтiс бы, ыксiс.

— Мый лоис, баб? — косьмöм тырппесö нюлыштöмöн Иван мыйлöкö юалiс баблiсь.

— Вийисö да вийисö Серёжкасö! Враггес проклённöйес! — пöрись клап вачкис боккезас, киэс уджсянь косьмöмась, синваэс оз петö, только пон моз уннялö — сьöлöм нетшкö.

Солдат сулалiс мышкыра юрöн, видзöтiс и кывзiс пöрисьлiсь горзöм, жагвыв топ саймис пыд онiсь, кыдз бы одзас куйлiс вийöм зоныс, кöда дынö тэрмасис бы локны да эз ешты.

— Серёжка-а-а!..

Бабыс кыдз бы горöтiс: «Андрейка-а-а!.. Тятюыт эд локтiс. Чеччы!»

«Неужто менчим Андрейкасö?..» — сöтыштiс дума, бытьтö бы минута олiс гортас, кытöн сэтшöм жö война, этадз вийöны отирсö. Жаль лоис зоныс, сэтшöм жаль, что пöдыштiс руöн, и только минута-мöд бöртi пондiс бергöтчыны сiя оланö, кытчö шедiс, кытöн öнi олö, и вöлись сьöлöмыс кыдз личамис.

Чожажык бергöтчис, бöр мунiс ыблань, кöдöрсянь локтiс, орддис бы вийöммесö, кылiс, кыдз бöрсяняс пöрисьыс сё корö ассис внучексö.

Сотчисö керкуэз. Вийöммес куйлiсö сэтчин и татöн. Солдат эз вермы видзöтны ны вылö, вирсö эз бы адззы. Коккес бытьтö бы асьныс кыскисö-кошшисö ёрттэсö, кытöнкö пондiс кывны тöдса голос, кöда кивзышалiс: «Отсалö-ö-ö...»

Межа дорын падмис Суров вылö, сэк вöлись нач кыдз саймис, кöр казялiс, кыдз куснясьö ёртыс, веклясьö гаг моз, ас могсис кыссьö бы, кыкнан кинас видзö кынöмсö, киргö-лолалö, сьöласьö вирсора дульöн. Чужöмыс чочком чышьян кодь, кöс нырыс нюжалöм öддьöнжык, синнэс вöйöмась кымöсас, кытчö петöм ньылöм. Вирöсьöсь и нятьöсьöсь киэс Суровлöн.

— Мый тэкöт?! — Иван кыдз повзьыштiс.

— Отса-а... — шуис бы том солдат, но джын кылын падмис, синнэсö осьтыштiс — чочкоммес бугыльтчыштiсö, öмтырнас кыргыштiс-ловзисис: — Отсав...

— Öддьöн? — Иван солдатыс бокö пуксьыштiс кекеркаэс вылö.

Томжыкыс нюлыштiс косьмöм тырппесö, кынöмыс дынiсь вештыштiс вирöсь киэсö, веськöтчыштiс бы. Вöлись сэтöн Иван и повзис, кöр казялiс, что ёртыслöн петöмась кишкаэс, бытьтö бы резьöтöмась порсьöс, кишкаэсö лэдзöмась и кольöмась нятьö. Нiя куйлiсö му вылын и патшкисö уль вирöн.

Гудыртчис сьöлöмыс. Суров синнэсö эз ни осьт, но эшö шыасис: «Отсав...» Иванлöн дрöжитiсö киэс, öмас нач косьмис дульыс. Ёртыс гаг моз вöрзьöтчыштiс, пондiс киргыны-кыскавны ловсö.

— Рота, ко мне! Рота-а-а!! — кылiс командирлöн голос. Ранитöмыс сё кыскалiс ловсö, некыдз бы эз кув. Иванлöн дрöжитiсö киэс, мыйкö кошшисö писис, а ачыс модис: «Счас. Сулав...»

Суров видзчисьтöг осьтыштiс синнэсö, бура видзöтiс-керис ёртыс вылö, кыдз бы нем сылöн эз вöв, и сöстöм голосöн шуис:

— Ладно, Вань... Ме понда эн тöжды. Овсис менам. Кыдз вот гортын?

Юрыс ранитöм солдатлöн пельпоннэс вылiсь кыдз бы мезмис да усис му вылö.

17

Тальччис я Иваныс зэркытжыка, шовкöтiс-сотчис я кöс керку кер, кылiс я кинлöнкö басни, пеллес одзын топ сё ыксiс старуха: «Серёжка-а-а! Ой, вийисö кагасö-ö-ö!» Уна солдатыс синнэз одзын вийöммес — асланым и враглöн, ёртыс Суровыс, но вийöм зоночка некыдз эз öш синнэс одзись: бледыник чужöма, кыдз узис-куйлiс бабыс одзын, öт öм угöвнас бытьтö шыннялыштiс...

Жöдзисö öтмöдöрö солдаттэз, вийöм немеццезлiсь öктiсö автоматтэз. Командирныс тэрмöтiс: «Окоппезö! Окоппезö!»

Шыннялiс бусöсь-нятьöсь чужöмöн Илья, ошшасис: «Вань! Видзöт немецыс, а! Видзöт жö мый менам эм — пистолет! А тэ мый? Сё винтовкатö кыскалан».

Кодззыштöм кыдз Ильяыс и гажöтчö, кöр колiс горзыны. Иван ёртсö öмалiс-нерис.

— Э-э-э... Гажöтчан...

— Мый нö? Горзыны тшöктан, кöр ловья? Автоматыс пригодитчас...

— Сьöлöм гудыртчö, Илья...

— Кыным фрицöс нö водтöтiн? — невна чöлыштiс солдатыс и басниöн мортсö чувйис.

— Этöн мый керан?! — недолыт Иванлö, юалiс ёртыслiсь — юрнас öвтыштiс полевöй сумка вылö, кöда öшалiс Илья бокын.

— Пригодитчас! Ог эд лöсьöтчы талун кувны. Деньга эг сет, офицерлiсь мырдди пистолетсö и сумкасö.

«Но тэнö!..» — Иван думанас öвтыштiс ёртлань, бергöтчис сэтчин-татчö; нем бурыс синнэс вылö эз усь, только тшын, бус, нять, вир да вийöммес и шагньöвтiс окоппезлань.

Сотчисö керкуэз. Би нюлiс-сотiс кöс керрез, короминнаэз, йöктiс, урöтiс, гажöтчис, шупкалiс-койис бичиррез, головняэз. Недыр мыйись пöтiс да пондiс раммыны: керкуэс кыдз пуксисö муас, ны местаись тöлок коялiс ни пöим.

Ротаись командир педзис-жöдзис окоппезын да траншеяын, ештiс иньдыны ни юöрöн полкись командир дынö, что деревнясö босьтiсö, но джын отирсö вийисö и колiс бы отсöт — немецыс оз понды узьны — вермас уськöтчыны атакаö и петас сiдз, что ковсяс тарöвтчыны бöр. Кöть командир и корис отсöт, но тöдiс, что талун сылö некин даже öтiк солдат татчö оз иньды, что нiя колöны мöдöрын, но мыйкö вылö надейтчис. Посыльнöй мунiс, а командир сё жöдзис, ештiс сибавны ни быдöн ловья дынö, юасис кин да кыдз ранитöма, öтлаын ештiс ни куритны чигарка.

Немец кытчöдзкö чöлiс, некытöн эз тыдав, кыдз бы шоччисис и шоччöтiс миянлiсь солдаттэсö, кöдна пондiсö саймыны бой бöрсянь, садьмисö, гуддисисö окоппезын, малалiсö винтовкаэз да автоматтэз, зеппезiсь пешлiсö патроннэз, куритiсö. Басниыс ловзис сэтшöм, кытшöм овлö садь да ылöса отирлöн.

Бöба эз лёбö, а касьтылiсö сёян-юан. Тöдвыланыс видзисö тöннясö и талуннясö, олiсö ашыння лунöн — мунны гортаныс. Некин кулöм йылiсь эз гард. Лöсьöтчисö бой кежö, тöдiсö, что немецыс сiдз и этадз пондылас бöр мырддьыны деревнясö, öддьöнжык сы понда, что сiя сулалö керöсок вылын, кысянь тыдалö ылöжык и сьöкытжык вашöтны солдатсö.

Лоис лöнь, сэтшöм, что кылiс, кыдз сотчис-чискис дорись керку местаын головня, и му пöлöн кыссис кизерик тшын.

— Белов, кыдз думайтан, узям ми эстöн талун чöскыта или огö? — командирыс Белов киись пешлiс немеццезлiсь пулемёт, кöдö мырддисö бойын.

— Мыля ог узьö, ёрт командир? Узям!

— Одзöв он я, ёрт, узь! Видзöт, кыдз бы немецыс узьтöннят бöрöн коккезöттят эз кыскы, — кылiс мöдiклöн голос.

— Ась пондылö! Ме сылö!

— Кывзы!.. — куимöтлöн, тыдалö, пеллес топ мöдкодьжыкöсь, кылö ни мыйкö.

— Быль эд, Гриша! Кылö мыйкö этчин. Машинаэз кыдз. Абу я танккез? Ме эшö нiйö эг адззыв...

— Танккез... Вермасö танккез лоны, — солдатлöн бöра ни чужöм вылын оланыс мöдкодьсялö, кыдз мортыс лоö повзьöм кодь.

— Эх, куритыштны бы!

— Ме бы сёйи!

— Кытшöм тэнат, Белов, сэтшöм и кынöм ни? Кöр ми тэкöт сёйим? Нач эд неважын, — басниыс эз ни мун сёян йылiсь, сiйöн старайтчисö дзугны асланыс сьöлöммез вылiсь сiйö повзьыштöмсö, кöдö вайöтiсö танккез, кöть эшö вöр сайись эз тыдалö.

— Рытнас сёйим, тöн рытнас, а öнi, видзöтö, мöдiк рыт ни локтö.

— Сёйим, — сiя жö тöдса голос дрöжитыштiс ни. — А быль эд, челядь, абу я танккез!

Солдаттэз голяэзнысö нюжöтiсö, юррезнысö лэбтiсö окоппезiсь, казялiсö куим танк, кöдна мыччисисö вöр коласiсь, сувтчытöг иньдöтчисö окоппезлань, а бöрсяняныс котöртiсö солдаттэз. Тэрмасисö.

Муыс топ окоппезын пондiс дрöжитны, дюттясьыштлыны, лоис дзескыт. Иван мылякö видзчисис, что командирныс ыкöстас, медбы пышшыны вöрлань, кысянь локтiсö асывнас, но сылöн чужöмыс чорзис, дугдiс уна баитны, видзöтiс танккеслань и висьталiс: «Эд полö, челядь! Немецыс одзаным сэтшöм жö, кытшöмö паздiмö ни. Лöсьöтö противотанковöй гранатаэз!»

Иван одзсис пешлыштiс ремень бердö кöрталöм граната, кöдö важын ни бы колис кытчöкö, да командирныс синйис, неöтпырись висьтавлiс: «Кыскав!»

— Тойес, челядь сёйöны! — Илья пондiс гыжьявны юр бöрсö, сералiс асьсö.

Басни дугдiс кывны, сiйö вермисö танккезлöн эрзöммез.

Кинкö винтовкасянь видзчисьтöг лыйис, но машинаэс эз сувтö.

— Эд лыйлö! Лэдзö матöжык, матöжык! — горöтлiс командир.

Иван видзöтiс танккес вылö и курччалiс тырппесö, эз бы пов, но пондiс кыдз кынмыны, пешлiс ремень бердiсь сьöкыт гранатасö, малыштiс винтовка затворсö, кöдö мылякö эз веж автомат вылö.

Ыб кыдз бы ружтiс, кивзышалiс-ыксышалiс. Танккез весьтын павьялiс кизерик лöз тшынок.

Неылын окоппез дынсянь танккес топ дугдiсö тэрмасьны, ассиныс пехотасö видзчисьöмöн локтiсö матöжык. Немеццес эз лыйлö, думайтiсö повзьöтны миянлiсь солдаттэсö, пыкны уна вынöн.

Кöр кольччис сто метр гöгöр, танккес янсöтчисö öтамöдныс дынiсь: öтiк — сэтчин, мöдiк — мöдöрö, куимöтыс мунiс шöрас; эрзыштiсö и чепöссисö. Шöрисьыс топ пушкасö иньдiс веськыта Иваныс кымöсö.

Иван лыйис медодзись немецлö, кöдалöн чужöмыс тыдалiс ни, бытьтö бы шыннялiс-локтiс, мыгöрнас ёрттэс сьöртi топ вöлi медыджыт, моросыс гав, юрыс куш — не пилотка, не фуражка. Немецыс падмыштiс. Усис я врагыс, Иван эз адззыв: нетшкöвтiс веськыт кинас асланяс винтовкасис затворсö.

— Тэ кытчö, Белов?! — быд горшсис ыксiс командирныс. — Белов! Лыя! Танккес öтдруг моз одзалiсö командирсö лыйны пушкаэзiсь, сярзьыштiсö пулемёттэз. Кымöр кыдз потiс, кыдз солдаттэс вылö пондiс киссьыны. Гымалiс бой.

Медодз танккес вожасисö окоппез вылö, эрзiсö бергалiсö, гусеницаэзнаныс разисö-тыртiсö. Вачкисис, что минута-мöд бöртi некин нем ни оз ешты керны, быдöннысö виясö, но вот öтiк танк увтын потiс граната. Машина джöмдiс, сувтчис и öзйис — вевдöрö нетшкöвтчис сук тшын. Мöд танкыс окоппесö вуджис и жагвыв катыльтчис бы одзлань, но сiйö вöтiс кинлöнкö граната. Танк пытшкись чеччалiсö танкисттэс, берездасисö и нюжалiсö машинаыс бокö.

Куимöт танк жиля-жоля мунiс Иваныс окоп вевдöрöт, пондiс катыльтчыны бы одзлань жö, но гусеницаэс увтын потiсö гранатаэз — öтыс Иванлöн и эшö кинлöнкö мöдiклöн.

Бой пизис. Лыйисö öтамöдныслö, потласисö гранатаэз. Немеццес кыдз бöбмöмась, локтiсö и локтiсö. Иван асьсö бытьтö эз ни тöд, лыйис да лыйис: öтiкö вияс, одзас топ мыччисьöны кыка, топ прикашайтчöны ни немеццес, кыдз бы бöб бессэз, кöдналö пуляэс оз мöртчö.

Немеццес чеччалiсö ни траншеяö, сэк вöлись и пондiсö масьтыны öтамöднысö кин да мыйöн вермис: вачкисö, брынгисö, лыйисö, мöртiсö.

Дзескытöв вöлi тышкасьны окоппезын, и эта кинöскö дорйис-отсалiс. Гымалiс бойыс и кусiс, кыдз ньылыштiс мыйкö да виньдiс. Кынымкö немец пышшисö-котöртiсö бöр вöрланяс, но нiйö бытьтö некин ни эз адззы.

Вель дыр шы эз вöв, только паздöм танккез дынын сё гардчис сук тшын. Сэсся пондiс кивзыны раненöй, тöдса голос гардыштiс:

— Мать тэнö, Варвара! Абу я киöс поныс сёйöма?! Курччöвтöма эд. Мый öнi, Варвара, гортö локта да тэныт висьтала? Ог эд понды вермыны уджавнытö. Челядь, кöть бы вирыс быдöс эг пет!

Пильскис солдатыс челядь моз, зубытсянь горзiс, лöсьöтчис эшö гортын уджавны бы, а ранасö или повзьöм увья, или зубытсянь эз домав.

Ёрттэсö Иван кылiс и эз: юрыс öвтчышалiс пельпоннэз вылын и вöлi кытшöмкö сьöкыт, сэтчин уннялiс аскодя шы. Коккез увтас куйлiс гер пиня вийöм — вöрзяс и каяс сы вылö, окоп бокын куйлiсö кыка — тальччас и шлячкöтö вир. Киэс вирöсьöсь, кыдз бытьтö начкисьöма — яй керöма. Ыб вылын, окоппез весьтын, топ вöвдöмась кольтаэз зэв-зэв öтамöдныс бердö — этö куйлiсö вийöммес, бытьтö ыбыс быдтöма не сю, а отирöс, медбы не вундыны, а вийны.

Сьöлöмыс гудыртчис эта вылö видзöтöмсянь, пельпоннэс вылö öшöтчис сэтшöм мыдз, что эз бы и вöрзьы местасис.

— Кин ловья? — мыдз голосöн юасис ни командирныс, шагнялiс лыйöм-вийöммес коласöт. — Кин ловья? Этö тэ, Иван?

— Ме, — кижгыштiс солдат.

— Кодöсь эд вöлöмась фриццес.

Ловьяэс вöлiсö квать морт, да и нiя кыдз шедлöмась нярьян увтö — нöитöмась отирсö, сэтчöдз калечитöмась, что мöдiклаын — некин бы ны коласiсь эз и вöрзьы, эз бы шыась, водiс да пондiс бы куйлыны сэтчöдз, кытчöдз эз бы локтö кодя отир, да отсалö кöртавны ранаэзнысö, эз бы юкталö-вердö. Но öнi Иваныс мышкыртчис да босьтiс винтовка, кöть етшыс ни эз вöв солдатыслöн.

Чукöртчисö öтлаö ловьяэс, сэтöн кинкö ыкöстiс, топ шедiс ош увтö: «Отсалö, ой!»

Отсöт корисö асланым тöдса кыв вылын, но Иваныс эшö вöлi бытьтö бы кольмöм, и синнэс одзö бöра мыччисис вийöм зонка, кöдö ловзьöтiс бы бабыс, ыксiс: «Серёжка-а-а!» Серёжка местö синнэс одзö мыччисьлiс Андрейка, и сэтшöм вöлi зоныс жаль, что пондiс пильскыны-горзыны. Горзiс недыр, синваэзнас топ миссьöтiс мыдзсö, сiйö шогсö, кöда бой бöрсянь лязiс, зэлöтiс. Вöлись юрыс бöра пондiс уджавны, овны öтлаын ловьяэскöт.

— Отсалö-ö-ö! — кивзiс асланым морт.

— Мыйнö мийö?! Мыля мортыслö ог отсалö?! — шуис Иван.

— Видзöтам, — шыасис командир, и кыкöн иньдöтчисö соровтöм траншеяöт, кöда етша ни вачкисис ас вылас. Недыр мыйись Иван падмис Илья вылö, кöда куйлiс не öтнас: увтас вöлi вийöм немец и вевдöрас тожö, а Ильяыс куйлiс коласаныс, мыччисьöм джын тушанас да кыдз бы узьö, киас сё няпыртö пистолет, кöдöн ошшасис неважын.

— Илья?! — Иван пöдыштiс ловнас. — Илья!

Вийисö Ильясö. Эз ни шынняв солдатыс, эз ни ошшась невестанас, некинкöт Иванлö лоис лёбны роднöй кыв вылын...

— Мыля тэ, Илья? — Илья юр дынын сулалöмöн вишыкасис Иван.

18

— Сволоччез! Фашисттэз! Быдöннысö колö паздыны! — Ильяыс дынын пиннесö гичралiс Иван. — Ёрт командир, кыдз думайтат? Уськöтчасö я эшö талун фашисттэс?

— Ог тöд. Пемдыны оз я лöсьöтчы? Ойнас, может, оз пондö кидласьны. Немецыс культурнöй, тальччö и видзöтö часы вылö.

«Кöть бы чожажык ни локтi ой!» — пондiс думайтны быд солдат, надейтчис, бытьтö сiя дорьяс-дзебас враг одзись, шоччöтас, а ашын... Быд морт видзчисис отсöт.

Ойыс видзöтчис ни, рöма-дзара вöлi, сэтöн и шутньöвтiс вöр сайсянь снаряд, брякнитчис окоппес одзö, потiс, осколоккез свистнитiсö юррезныс вевдöрöт, резiсö му комоккез, гардыштiсö бус. Эз ешты бусыс вешшыны бокö, кыдз пондiсö потны сьöрсьöн-бöрсьöн и öтдруг снаряддэз, му пондiс дюттясьны, руыс зэлöтiс, некин ни эз думайт кольччыны ловйöн, быдöнныс заргисисö траншеяö, водiсö и куйлiсö.

Лыйисö-садитiсö пушкаэз и лöнисö. Бöра му кокнита ловзисис, и солдаттэс сьöрсьöн-бöрсьöн, кыдз му пытшкись бессэз, лэбтiсö юррезнысö да юасисö, кин ловья, кин дзонь или ранитöм öддьöнжык. И бöра командир медодз лöсьöтiс басни: «Но мый, ёрттэз, панталам немецсö?!»

Некин паныт эз шыась, тöдiсö, что воштiсьны некытчö, что кытчöдз лолалан, верман лыйны, колас тышкасьны. А сотчöм керку дынын, льöмпу вылын, карзыштiс рака, кыдз ошшасис, что пöт лоас морт яйöн — рад арттöм кай: карзыштiс, öвтыштiс борддэзнас и лэбзис вöрлань. Сылöн гортыс эна солдаттэз моз жö эз вöв, но эз тöжды. Лэбзис рака, кыдз вöйис пемыт рöма вöрлань, окоппес дынын эшö павьялiс лöзъюгыт.

Смерть лолалiс ыркыт руöн. Гажтöм вöлi, кыдз шойна вылын.

Иваныс кулöммезсис эз ни пов, кыдз вöвлi гортас, а сьöлöмыс сёравно кыскис матöжык командир дынö, кöда веськыт кинас видзис шульгасö, дюттьöтiс вывтырсö, ружтышалöмöн пукалiс, эз бы мыччав, что öддьöн ранитöм. Иванлöн тожö висис юрыс да неыджыт ранаэс.

Думаэзнаныс лöсьöтчисö бы пантавны виль асыв: вöрöтiсö автоматтэз да пулемёт. Эта коста сiдз пемдiс, что вöрыс эз ни тыдав, эз ни тыдалö одзаныс вийöммес, только эшö коккезныс увтiсь адззисö гу-гöппез. Горт ладорын чажгисö ракетаэз, омöн кисьтiсö веж-югыт югöр-би. Эз ешты кусны öтiк ракета, сы местö öзйис мöдiк.

Солдаттэс вежöртiсö: гортланьын ни врагыс, кералiс туйнысö, а нiя эстöн пукалöны. Кыдз немец шедiс гортлань, кöр ештiс орöтны туйнысö, некин эз тöд.

Полöтны пондiс ойыс, сьöлöммез чувйис. Жмитiсö сайкыт автоматтэз, сё эшö надейтчисö мыйкö вылö, кывзiсисö. Сэтöн пемытсö повзьöтiсö кыввез: «Роч солдаттэз! Тiйö кытшын. Сетчö миянлö асьныт. Сьывны да овны пондат миян дынын. Роч солдаттэз!» Сыбöрын враггес дынсянь пондiс кывны асланым сьыланкыв «Катюша». Сiя гажöн лэбзис пемытiнас, сибалiс быд местаö, и пондiс вачкисьны, бытьтö бы шедiсö мöдöр югытас ни, кытöн бесыс тешитчис-орсiс, нерис, тэрмöтiс-корис дынас, ошкис ассис олансö, что сiя гажа, кокнит, бур.

Сьыланкылыс омöн паськалiс, лэбалiс и öшис.

Оланыс дзебсисис пемытiнас — не шы, не тöв. Кывзiсьыштiсö.

— Мунам, — ружтыштiс командирныс. — Мый вермим, керим, ась оз видö.

Голоснас командирныс асьсö эз ошкы, бытьтö виноватöй, что мый тшöктiсö, эз вермы керны.

Иван маласьтöн траншеяöт кыссьылiс вийöм Илья дынöдз, ёртсö кыскис кулöм немеццес коласiсь, тыртiс сэтчö жö траншеяö зырокöн, курччöвтiс тырпсö, чышкис синваэсö и пильскис-шуис: «Простит, Илья... Эн горзы ме вылö. Кыдз ен шуис, сiдз и янсöтчам». Бергöтчис и сибöтчис командирныс дынö, кöда ранитöм кинас öвтышалöмöн юалiс:

— Дзебин?

— Дзеби.

— Сэк мунам, — шуис командирныс, топ горзöмöн горöтчис. Ойыс пемыт, кöть синнэзö ёсь мöрт, нем оз тыдав. Лöнь.

Солдат кылö, кыдз одзас лолалö командир, кыдз аслас тёпкöтö моросас сьöлöм.

Жмитчыштiсö öтамöдныс бердö. Сяткыштiс автомат автомат бердö.

— Жагöн, — кижгыштiс лейтенантыс.

Мунiсö — тальччисö и эзö, медодз кыссисö бы вöрöдз синнэз сайö, медбы дзебсисьны врагсис. Вöрыс пемытiнас эз тыдав, но топ сiйö адззисö, кылiсö лолалöмсö — ульжык ру вачкис паныт, и чожа рожабаннэзаныс шваткыштiсö уввез, чирзыштiс и коккезныс дынiсь лэбзис каёк. Каёкыслöн шыыс топ вачкис-горöтiс: «Хальт!» Чеччöвтiсö кинлö да кытчö туй. Бöрсяняныс сярзьыштiс автомат.

19

Иван чеччöвтiс пемытiнас, кыдз гуö уськöтчис. Сьöлöмыс кыдз вöрзис моросас, пондiс пессьыны-чеччавны, лолыс тырис-джагöтiс. Котöртiс быд вынсис. Уввез вартлiсö чужöмас, киэзас, кышасисö паськöм бердö. Сунки-панки котöртiс да котöртiс пемытiнас, уськöтчис-водiс, öмтырнас лолалiс. Чожа сьöлöмыс моросас дугдiс пессьыны, вирыс дугдiс кожöтны пеллезас. Кывзiсьыштiс. Шы эз вöв, топ былись шедiс дзир öтнас пемыт гуö.

Лöнь бöбöтiс и полöтiс, сiдз кыдз враг кытöнкö вöлi матын.

Пемыт. Ойыс кузь, но колiс тэрмасьны-мунны асланымиссес дынö. И кöть кытчö мун, кöть кöдöрö кеж, кöр нем эз тыдав — кöть синнэз пысав уввезö. Иван видзöтiс медодз кымöрö, сыбöрын пон моз нюкьясис, и сьöлöмыс висьталiс кöдöрö мунны. Сiйö кыскис гортлань, кыдз пурöм понöс, кöдö хозяиныс ускайтiс кöин вылö, а ачыс пышшис-колис.

Быд шагын веськыт кинас пельпон вылiсь малалiс сайкалöм ойся руöн автоматсö, колас кö, лöсьöтчис лыйны-дорйыны асьсö. Сувтчышалiс, кывзiсис.

Ойыс быдöс бы сайöвтiс-дзебис, но эз вермы: солдат мунiс джын час етш, шагнялiс вöрöт. Видзчисьтöг бöра повзьöтiсö ракетаэз, кöдна кысянькö одзсяняс нетшкöвтчисö вевдöрö, койыштiсö би югöр, бöра лыйисö автоматсянь, кинкö кинлöкö лёка ыкöстiс. Но öнi быдöс эта эз ни вöв сэтшöм матын Иван дынын, медбы сiдз повзьыны, брякнитчыны му вылö, кывзiсьны да видзчисьны пуля. Кусiс ракетаэзлöн би. Лоис эшö пемытжык. Колiс берегитчыны, мунны да повны быд шагын.

Сьöкыт ойнас мунны, кöр нач умöля тыдалö, кöр синнэз бытьтö бы велалöны адззыны, но коккез кышасьöны то уввезö, то кытшöмкö бедьторö, или маласьтöн колö вожмöвтны пöрöм пу-колода. Мунiс солдатыс и мыдзис. Пуксис кöз увтö. Пукалыштiс, кывзiсьыштiс и вöлись нач топ рушмис, сiдз мыдзыс вожасис вывтырас, что эз ни бы вöрзьöт киэсö, автоматыс ни вöлi пуд сьöкыта, дышыс ни петiс дзебсисьны кытчöкö, мыйкö керны кöдзытыскöт — водны бы кытчöкö пу бердö, жмитчыны.

Полiс öзтыны би, ась и моросiсь зепас вöлiсö истöггес.

Пукалiс мымдакö да сiдз пукалöмöн и ланьтiс. Кокнита онмöссис и бытьтö бы сэк жö шедiс гортас: гожумшöр, улицаыс лудъя, луныс шондiа, посöдзаныс куйлö понныс, легралö бöжнас, китсасьö петух, Иваныс мунö улицаöттяныс, рад, сералö, тэрмасьö бы, но коккес оз кывзiсьö, и дума сёйö: «Ылын да матын, Ванька! Гырдззатö он курччöвт, гортат он чеччöвт!»

Зонсö вöтöн адззылiс, зоныс петiс посöдзаныс, пондiс бы чирзыны: «Баб! Тятюö локтö! Кöч нянь вайö!»

Прыг да скок чеччалö зоночкаыс, и бабыс ни дынас бы, ыксö жö: «Ой, Андрейка! Быль эд тятьыт! Еныс вайöтö!»

Матын да ылын... Иван тэрмасис бы вöтöн зоныс дынö, но коккес эз кывзiсьö, кыдз бöрсяняс кинкö бы видзис. А мамыс ыксiс: «Зон! Роднöй тэ менам да любимöй! Мый нö тэкöт лоис?!»

Солдатыслö бöрсяняс кыдз кинкö вачкис-сöтiс сивилёнас, и сiя таралiс. Зубытсö эз кыв, но сэтшöм лоис недолыт, умöль, курыт сьöлöмыс вылын, что петiсö синваэс. Öнi Иван бытьтö бы не ни вöтöн, а былись юалiс веськыта мамыслiсь: «Мам, мыйлö тэ менö вайöмыт да быдтöмыт? Войналö сёйны я мый я?» И пондiс горзыны. Мамсö дойдiсö зоныслöн кыввес, и сiя пондiс пеничайтны:

— Ванька тэ, Ванька... Эн горзы ме вылö. Ме эд тэнö войнаыс адö эг вай да эг быдты. Думайтi, мыся, отир моз жö эд пондам овны, а видзöт мый петiс... Ванька! Öддьöн эд тэ меным колан. Кытчöдз эд тэ эн шогмы, менам эд тэ одзын куим зон вöлiсö, да куимнансö одза-одз дзеби: öтiкö ог ешты муас тыртны, мöдiк шогмис... Öтiклö нимсö сета Иван, мöдiклö — Иван. Думайта, мыся, оз я эта Иваныс оз ни кув, оз я, мыся, одззасö веж да быдмы ни. Сiдз вöлi. Тэ только овмöтчин.

— Мам, эз ни ков менö Иваннас шуны.

— Ме мыйöн тöда? Бöб юрнам, синтöмнам, кöр грамотаö нач абу. Еныс вылö надейтчи...

Вöтасьö солдат — вöтöн гортныс дынын. Мамыс вöтöн посöдзаныс горзö и баитö, кыдз былись, а ачыс öшын увтаныс куйлö. Сэсся зон да мам коласын мылякö лоис кытшöмкö ыджыт джуджыт гу, кöда тырöма бы гудыр ваöн, кöдö он ни шагньöвт, а зоныс чирзö: «Тять! Тэ лок. Ме васö тэлань ог вермы вуджнытö». Оныс сэтшöм, топ былись баитiс зоныскöт и мамыскöт, кöдна кыдз мыччисисö, сiдз и öшисö, бытьтö бы Иваныс гу дорö и кольччис, а пытшксяняс юрсö мыччис ни то ли зверь, то ли зверь чужöма морт.

Узис солдатыс дженыт да пыд онöн и саймис: коккезöттяс кыдз кинкö кыскыштiс. Вöлi одззамоз пемыт, ыркыт. Некин и некытöн эз шыась. Дзир öтнас. Некин дынö жмитчыны, некинкöт кыв горöтчыны, только зоныслöн голос топ сё пеллес одзын, топ сё гортыс дынын, синнэс одзын гажа лун, понныс, петухныс, мамыс, гуыс и... Эта зверьыс или мортыс, кöда гудыра ва пытшкись мыччис юрсö. Немись бы Иваныс öнi эз ни пов, но повзис аслас вöтiсь. Жмитiс автоматсö. Петiсö синваэс. Медодз жалейтiс зонсö.

Одзлань мунны пемытiнас эз ни лöсьöтчы, кöдзытыс вашöтiс кöз увтiсь. Куритiс бы, но табакыс эз вöв, эз вöв и дынас командирыс, кöда вермис бы эта ой кежö табаксö чепöль-мöд видзны кытöнкö пиас. Думаэзнас бергалыштiс командир гöгöрын, ёрттэскöт бытьтö бы олыштiс, но кынöмыс пондiс симавны и маласьтöн нюжöтчис юрыс вевдöрö да кöз ув бердiсь нетшкöвтiс лыс, сюйыштiс öмас и пондiс аклявны да ньылавны курыт сира дульсö.

Лысöн патшкис, и сэтöр дук павьялiс гöгöрас.

Сэсся эз узьсьы. Думаэз тыртiсö юрсö, олiс бытьтö бы то гортас, то эстöн. То гажöтчис бы, то лöгыс петiс иньыс вылö, кöдакöт эз адззыв бур олансö, но оз кö вийö, локтас гортас. Андрейсö эз бы чапкы!

Кузь арся ойыс. Мырсис-вермасис думаэскöт и асывланяс ланьтiс, но узис етша: чувйис оланыс, кöдаись мездöтчыны эз вермы. Пемытсорöн иньдöтчис одзлань, надейтчис, что асланым войскоэс матынöсь, что колас только тэрмасьыштны и вöтас, панталас. Тэрмасьöмöн моз мунiс веськыта вöрöт, талис чашья, дзормöм да косьмöм турун, повзьöтiс кеньжакöс, тупка вылö видзöтiс-дивуйтчис, пистöггез адззылiс. Карзiс рака — кöсйис зэр. Ловзисис тöв, шоччисьыштiс, кыдз кывзiсис, да вöлись пöльыштiс вынöнжык, нетшкöвтiс пуэз бердiсь листтэз, кöдна етша ни вöлiсö уввез вылын. Нiя дюттясьöмöн усисö коккез увтö, кыйисö дöра. Дзуртiсö пуэз. Югытiнас сьöлöм вылас лоис кокнитжык, быдöс адззис и кылiс, враггес эз вермö казявтöг ыкöстны: «Хальт!..»

Öтнас. Кыдз бы колiс Ильяыс! Ёртыс топ кытчöкö кольччис и вöтас... Ильяыслiсь бытьтö бы кылiс ловшысö, а кöр голоссö, или вачкывлiс табак тшынöн, бытьтö бы ёртыс куритö.

Асылыс содiс. Вöлi кöдзытжык ни. Кынтыштiс. Лажмытiнö усис пуж, кöда чожа пондiс сывны. Кымрасис, кымрасис и пондiс поснита зэрны. Иваныс мунöв-керис, локтiс логок дорö. Сэтöн нырас павкис табак тшынöн: кинкö матын куритiс, кöть и эз тыдав. Иван пельпоныс вылiсь лэдзис автоматсö, сувтiс кöзоккез коласö и пондiс кывзiсьны да видзöтчыны. Кадыс немымда эз чулав, кыдз син одзас мыччисисö кык морт, кык солдат: шинеллезöн, сапоггезöн, фуражкаэзöн, но звездаэс эз вöлö. Эз вöлö киэзаныс и пишаллез, мунöны, бытьтö гортсиныс петöмась керавны пес: шаляй-валяй, öвтчöны да öтамöдныс коласын негорöн бобгöны. Баитöны рочöн. Öтыслöн öмас чигарка — тшынйö.

Иван видзöтöв-керис тöдтöммес вылö, адззис, что нем бы ныись повны и мыччисис кöззэс коласiсь да юалiс: «Тi кытчö?»

«А тэныт мый?» — падмисö ёрттэс, шыасис отажык рожабанаыс да кызжык ныраыс, топ тöдiс, что Иван сiйö и видзчисис эстöн.

Здоровайтчисö. Иван локтiс мужиккес дынö, кöдна вöлiсö сы кодь жö томöсь, только войнасö топ абу адззылöмась: паськöмныс дзонь, кöмкöтныс абу бырöм, рожаэзныс миссьöмöсь, синнэзаныс мыдзыс оз тöдчы — шыннялöны.

— Кытчö мунат? — юалiс Иван.

— А тэ?

— Муна.

— И ми мунам. Тышкасян, сiдзкö, — кокнита баитiс учöтжыкыс и томжыкыс, сэтöн жö зепсис чепöльтырнас кыскис табак да нюжöтiс Иванлö, горöтчис. — Курит.

Иван пыдына ловзисис, шынньöвтiс, босьтiс табаксö, висьталiс спасибо и пондiс гардны чигарка.

— Öтнат? — юалiс басниаыс.

— Кин меным колö?

— Сiдзкö, тышкасян немецкöт. Иван дзарнитiс вöр вылö и нем эз шу.

— Да, война... Кинлö сiя колö? — кокнита горöтчис да серöмтчис, топ гажöтчис. — Ась Москва тышкасьö, а ми Мишакöт — гортö! Сталинлö да Гитлерлö войнаыс колö! Он верит?! Ха-ха, пионер! Но вай-вай! Оланыс кöсйö рай! Тышкась, Ванька, тышкась Родинаыт понда, поди, пондан овны бура, то сё, натьтö, нинкöмметö новьян или сапоггез ни небин?

Сапоггес Иванлöн вöлiсö, кöть и важöсь — праздниккезнас кöмавлiс нiйö.

— Ми вот Мишакöт иннезным дынö мунам. Локтам гортö, пывсям баняын, сёям пöт, юыштам винаок и — Галяö бокö! А сiя Анютаыскöт пондас окасьны, во! А тэ шатлась. Мый сiдз видзöтан? Думайтан, ме бöбöта? Ог эд, и ме бы тэ местын автоматсö шупки жö, кöр сiдз и этадз эд Гитлерыс Советтэсö вермас, нем керны! Видзöт, мымда сылöн танккес! Миян эд подаыс етшажык, и самолёттэз.. Кымöрсö вевттьöны, а миянöс ыстöны кулаккезнаным тышкасьны, ха-ха-ха! Ванька-дурак тэ, Ванька-дурак... — лöгöн содтiс. — Тойöсь Россия!

Иван жаднöя куритiс, горшас кыскалiс табак тшынсö, кодззис, медодз эз вермы вежöртны и веритны, что сы одзын асланыс отир, сы кодь жö солдаттэз, и кыдз нiя сiдз лысьтöны баитны, кытöн быдмöмась, мый абу тырмöма? Враггез эд, предателлез! Сэтшöммесö колö орддьыны или вийны! Или тэнö одзжык виясö...

Иван куритiс и öт кинас буржыка бердас жмитiс автоматсö, видзöтiс томмес вылö, кыдз нач ни враггез вылö, а нiя сералiсö хи-хи да ха-ха, кыдз войнаыс абу и эз вöв. Баитöв-керисö, томжыкыс бöра и юалiс:

— Кытiсь тэ?

— Уралiсь, — веськыта висьталiс Иван. Шутньöвтiс баитiсьыс, шуис:

— Ылö öштöмыт горттö. Мунам миянкöт. Ми тэныт сэтшöм краля адззам, что пондан сьывны да овны. Мунан?!

Иванлöн юрас мöдiк думаэз, сьöлöмыс кыскис гортлань и лöгыс петiс этатшöм отир вылö — сьöвзис бы да мунiс или... Но киыс эз лэб, медбы кыкнанныслö лыйны, кыдз гортын пöриссес баитöны: «Сiтсö кö он вöрзьöт, сьöлöмыт оз гудыртчы...»

— Мунан, он?! — эшö öтпыр юалiс уна басниаыс. — Сэк миян вылö эн горзы. — Зепсис эшö чепöльнас кыскис табак, сетiс, висьталiс. — Немецыс лёк, зараза. Тэ бы автоматтö шупкин кöззэс увтö, видзöт, шедан кö чачанат, бурсö эн видзчись. Или сетчы пленас, морттэз жö эд нiя, оз жö сёйö. Миянся немецыс уна, батя, культурнöй!

Мужиккес модисö да эз лоö: шаг шагньöвтiсö и öшисö тшöк кöзъяинö. Иван сьöласьтöн иньдöтчис одзлань. Лöгыс петiс томмес вылö, кöть и гортын берся олансö адззылiс, кытöн тшыгьялiс, кытöн пасьтöг да кöмтöг быдмис, но медбы эна моз...

Кынöмыс сималiс сэтчöдз, что гудрасис сьöлöм. Пантасисö эшö öтi-öтi шлёпсьöм гриббез, позис сёйны воöм рябина. Сiдз и тыртiс кынöмсö, мый пантасис сёян кодьыс. Мыдзисö чожа коккес, колiс пуксьыны да шоччисьны и вöлись мунны одзлань.

Вöр пыр ас кежас кыдз мыйкö шушкис: пу йыввезын шутнялiс тöв, ружтiс — войнаыс топ эз вöв, некытшöм самолёт эз лэбав, эз лыйсьö, эз пантасьö тöдтöм отир, кыдз эна кыкыс, кöдна мунiсö гортаныс.

Павжун гöгöрын öзтылiс би, пöжалiс тшаккез да сёйис. Суналiс, шоччисис и быдöс бы топ бур эд вöлi, но мыйкö эз тырмы. Шогалiс и эз вежöрт, кыт висьö, бытьтö бöра сiдз кинкö и пантасис, сiдз и юалiс: «Но мый нö тэ? Кытöн вöлiн? Мый керин? Он я нагладь вöррезас дзебсись?» «Дзебсиси, дзебсиси! — мурзис-дорйис асьсö. — Тiянöс бы ме местö! — лöгасьлiс, быдöнöс бы пурис, иньдiс асланыс туйö, ась бы ныррезнысö кытчö оз ков, эз сюйö. — Пешлiсит бы!»

Лöгасьлiс йöз вылö и ас вылас, ружтiс, шогалiс аскодя шогöтöн. Сьöлöмыс пессис, шоччисьны пöт эз вермы, кыдз кошшис аслыс врагсö, сiйöн чожа и чеччис би бокись, талис шоммесö, мунiс неылö и петiс ыб вылö. Паныт пондiс ургыны лэчыт тöв, коккес мыдзисö сэтчöдз, что доймисö кок пыдöссэс и ранаоккес, кöдна бытьтö эз и вöлö, лоисö бöра зубытöсь.

Ыб вылын лоис кокнитжык, топ кылiс отирлiсь басни, кыдз бытьтö кинкö вермис лоны сэтчин, кöдалiсь позис бы юасьны туй йылiсь, чтоб мунны одзлань или кöть тöдны, кытöн асланым солдаттэс, а кытöн немеццес. Ыб кузя жö иньдöтчис мöдöрö, сылань, кытöн вермис бы лоны туй. Шагнялiс веськыта, кöть и коккез увтын лоис нять. Этасянь сьöкыта лолалiс и чожа пымалiс. Вуджис учöткодь ыб, локтiс ыджытжык ыб дынö, повзьöтiс межаись ракаöс.

Ыббес — не шутёммез, нiйö эшö таво кöдзлöмась, сюсö кыт дзимлялöмась, кыт абу, сiдз и пöрöм му вылö, эмöсь пода следдэз. Кыдз адззылiс пода следдэсö, кытiськö содiс вын.

Кымöра. Асывсянь мырсис погоддяыс, шогалiс — мывкыдсö вежлiс куим-нёлись ни: нето зэрис, нето дугдылiс, лэбтiсьлiс тöв и лöнис. Уль. Вевдöрын и увдöрын ва. Иванлöн öт ботинкиыс нач ни нем вылö эз туй, бырис: нырöттяс ва пырис и петiс, вамис кокыс, сайкалiсö кок чуннес. Но эта вылö сiя эз видзöт, а мунiс веськыта гöпоккезöт, шагнялiс сэтчöдз, кытчöдз нач эз мыдз, кытчöдз бура тыдалiс коккес увтын. Иван эз бы пет буржык да паськытжык туй вылö, сiдз кыдз татöн тöдчис подалöн тальöм, отирлöн ветлöтöм да машиналöн следдэз. Кадыс рытлань ни, чожа пондас пемдыны, но öнi сьöлöмыс кыскис одзлань, эз думайт ни узьны кöз увтын, топ мунiс ни тöдса местаэзöт. Топ шорокыс вачкисис гортiсь шорок вылö, туй бокын быдмисö сэтшöм жö чукыля и веськыт кыдззез, кытшöмöсь гортын Якимму вылын, вöлiсö ловпуэз, ньыввез, кöззэз, баддез, жоягöд, рябина, баляняня, сэтöр. И туйыс бытьтö чуклясис сiдз жö, кыдз Якимыб вылö мунтöн. Вачкисис, что матын ни гортыс — думаэс бöбöтiсö-ылöтiсö, что локтас, пырас керкуö, медодз панталас зоныс, пондас чирзыны: «Тять! Кöч няньсö вайин?» «Эг» — висьталас, что кöчыс ачыс сёйис. Ньылыштiс дульсö, сiдз кыдз сималiс кынöмыс ой и лун: шедiс бы, быдса порсь бы тшакыльтiс.

Думаэс тэрмöтiсö-бергöтiсö горт гöгöрын, кыдз орсiсö, мыччалiсö сiйö, мый абу, но вермис лоны, что пантасяс быдöнныскöт, нельки иньыскöт, кöда бытьтö одзас ни, немымда абу вежсьöм и вежöм ни мывкыдсö, рад ни, что локтiс мужикыс и модьö: «Тэрмась! Мый нö бöра мугин туйыс шöрö? Ме талун пирöггез пöжалi. Сьöлöмö тöдiс...»

Война Иваныс гöгöрын, сiйö и видзöт, кыдз бы боксяняс эз лыйö, но сы йылiсь эз думайтсьы, думаэзнас олiс асланыс отиркöт.

20

Мунö гортö Иван. Пемдö ни. Гизьнитiс-зэрмис, кыдз васö койыштiс кырымись, и дугдiс зэрны. Солдатыс тальччис да нильдiс, и сэтöн...

— Хальт! Хенде хох!

Сьöлöмсö кыдз нетшкöвтiсö: сувтчыштiс, вирдыштiс дума: «Дурак Иван! Шедiн эд!» Чеччöвтiс, сотiс и абу бы, но коккес эз кывзiсьö, кынмис: одзас сулалiсö куим немец, куим автоматöн пыкисö веськыта моросас.

Жевгö-шутнялö жонь. Кай бытьтö узьны оз вермы. Кыдз ув вылiсь вотялö ва. Солдатлöн чеччалö сьöлöмыс, синнэзнас оз кваркышав, топ сiдз и лыясö. Немеццес зэв вынаöсь, смелöсь, вердöмöсь, сёйöны-видзöтöны, кыдз тэ абу бы морт, а нiя отир. Кап да кап кыдз вылiсь вотялö ва. Кадыс кыссьö, а Иванлöн сiдз коккес оз и кывзiсьö, дзик одзас не враг, а змея.

— Йован, — кузь мыгöраыс шынньöвтiс öт öм угöвнас, сералö, нерö, мыччалö, что сылö эм и абу тэ, шедiн, шы эн сет. — Йован, суда, суда, — руыс öмсяняс аскодя, ректасьö бы рочöн, веськыт кисис мыччалö чуньсö. — Шнель, шнель! — малалö автоматсö.

Иван кыдз пондiс саймыны кыз онiсь: синнэс враггеслань да бокö, сьöлöмыс пессьö, чеччалö, пышшö бы, но немец вöрзис, шагньöвтiс матöжык, шынь видзис, модис асмознас, синнэзас бöб югöр — код или садь, он вежöрт, он тöд мывкыдсö, бурсö он видзчись. Кузь мыгöра врагыс, тальччис и эз, топ одзас кöч, эз тöд мый сыкöт керны, кутны да орсны или лыйны. Сибöтчис немец Иван дынö, малыштiс пельпонсö, шуис: «Гут». Ловзисис веськыта чужöмас сьöлöм гудыртчана лолöн, кутiс Иванлiсь автоматсö...

— Гут, Йован... — ловзисис, видзöтiс веськыта синнэзö. Мöддэс сiдз жö видзöтiсö и автоматтэзныс вылын видзисö киэзнысö. Пöльыштiс лэчыт тöв, нёкыртiс пуэзлiсь йыввезсö, койыштiс ваöн, кöда киссис пу уввез вылiсь: тöлыс вермасис ни гожумкöт, кöда эз бы сетчы.

Немец автоматнас тангис моросас, лэбтыштiс стволсö öмыс дынö да сiдз, что кальснитiсö пиннес, серöмтчис: кужис врагыс мыччавны ассис вынсö, кöр Иваныс нем сыкöт эз вермы керны, öт кинас кутчисис пленнöйыс морос бердö, мöднас автоматсö босьтiс пельпоныс вылiсь, кышалiс аслас пельпон вылö, вöлись öвтыштiс да шуис: «Пшёль!»

Сiдз Иван шедiс пленö. И мый сылö висьталiсö, сiйö и керис: бокö эз тальччы, кыв паныт эз горöтчы. Мунiс немецыс одзын, кыдз вузалöм и вартлöм пон, шагнялiс веськыта нятьöт, талис ва, нюжöтiс бы ассис олансö, кöда чинiс быд шагын. Эта коста пемдiс сiдз, что коккес увтын тыдалiс ни умöля, эз ни тöдчы ыб сайись вöр, эз адззыв деревнясö, кытчö локтiсö, кыдз пырисö шойна вылö — не би, не морт, не пон, не петух. И пода эз шыасьö, только сэтчин да татöн ветлöтiсö немеццез, бытьтö хозяиннэз, сералiсö, бобгисö ас коласаныс, мыччалiсö Иванлань.

Иван мунiс тöдтöм деревнялöн улицаöт, бöрсяняс шагнялiсö немеццес, нуöтiсö кытчöкö. А сiя сё мыйкö вылö надейтчис, эз верит, что пленын, что вермасö вийны, видзöтiс керкуэз öшыннэзö, посöдззезö, думайтiс адззыны бы ассиным отирсö, топ кинкö вермис бы отсавны. Но некин эз тыдав, эз пантась, и öшыннэзын биэс эз вöлö. Вайöтiсö ыджыт керку дынö, кöда вачкисис не то школа, не то сельсовет вылö, посöдз бердын павьялiс флаг, но не миян ни.

Вöлiсö эд сылöн думаэс, что пышшас враг дынö, сетчас пленö, чтоб не пантасьны сэсся иньыскöт, и вот шедiс... Шедiс, а думаэс чукыльтiсö нач мöдöрö, что шедiс мöдöр югытас ни, кытöн оланыс мöдiк, не сiя властьыс — не Иван понда. Немеццес, кöдна кутiсö Ивансö, дугдiсö шыннявны и серавны, лоисö лёк чужöмаöсь. Öтiкыс перыта котöртiс посöдз дынö, тарскöтiс-кайис посöдзас, дзуркнитiс ыбöсöн — пырис керкуö. Не мый дырна сэтчин эз ов, кыдз петiс офицер: öмас чигарка, киэзас кеписсез, юрсö чатыртöм и видзöтö, топ Ивансö оз адззы. Видзöтiс-керис кытчöкö офицерыс, сьöвзис чигаркасö, жагвыв лэдзчис посöдзсис, сибöтчис пленнöй дынö зэв, ловзисис вина дукöн, зубыта дзарнитiс Иваныс синнэзö аслас кöдзыт синнэзöн, висьталiс: «Гут!» да ыкöстiс солдаттэслö.

Öтiк солдат котöртiс кытчöкö. Иван сулалiс нять да ва паськöмнас бура пасьтасьöм немец одзын. Офицер юрсянь коккезöдз видзöтiс Иван вылö, кыдз зверь вылö, зепсис кыскис виль папироса, öзтiс сiйö, сотчöм истöгсö чапкис пленнöйыс кок ныррез дынö, топ мыйкö думайтiс, лöсьöтчис керны бы и эз тэрмась, сыбöрын сьöвзис да кывсö чеглалöмöн шуис: «Свиния!»

«Тэ ачыт свинья! — Иванлöн петiс ни лöгыс. — Менö гортын порсьнас некин эз шу, а тэ — фашист!»

Керкуын öзйис би. Югöр öшынöт чеччöвтiс улицаö и югдöтiс нять, Ивансö, лыммез, кöдна шоча киссисö кымöрсис, дзик лэбзисö чочком гуттэз, но эз ештö сибöтчыны му бердö, сылiсö. Иванлöн кынмисö вамöм коккес, кöднасянь кöдзытыс кайис спинаас. Дрöжитiс бы, но гичыртiс пиннесö да видзсис, медбы враг эз думайт, что сiдз полö. Офицер бергöтчис мöдöрö — мыччис спинасö и мыйкö мурзьыштiс.

Солдат, кöда кытчöкö котрасьлiс, вайöтiс том чужöма, но дзор юрсиа мужикöс, кöда сiйö и керис бобгис: «Гут, гут!» да рочöн ни юалiс Иванлiсь, кытiсь сылöн автомат. Иван топ роч кывсö эз вежöрт, шы эз сет.

— Кысь автоматыт?! — ыксiс ни рочыс. — Висьтав, то сымда и олан эд!

Иван шы эз сет.

— Кысь автоматыт?! Немецсö вийин да босьтiн, ага?!

— Адззи, — Иванлöн казявтöг комиöн пышшис öмсис.

— Мый?! — эз вежöрт сивöй юрсиаыс, ыксiс, топ эз вöв роч — не асланым, враг жö, но Иван эшö эз и думайт, что эта мортыс — враг, сiдз кыдз баитiс рочöн. — Висьтав, кытiсь босьтiн автоматсö?

Иван шы эз сет. Чужöмас керку сайсянь лолалiс кöдзыт ойтöв. Гид вылын пондiс нявзыны нёштöм голосöн кань.

— Кытiсь босьтiн автоматсö?!

— Адззи.

Офицер асмознас мыйкö висьталiс, и рочыс пондiс юасьны:

— Кытшöм полкись? Кытчö мунiн?

Иван öвтiс юрнас — кöть мый ло, но бытьтö нач эз тöд рочсö.

— Кытшöм нация?! — чирзiс ни рочыс.

— А тэнат кытшöм нация? — ачыс эз казяв, кыдз юалiс Иван. — Кысь сэтшöмыс?

— Висьтав, то лыясö! — модис рочыс, бытьтö эз кыв юасьöмсö.

— Иуда! — офицер сьöвзис.

— Еврей! — одзас чеччалiс рочыс. — Еврей тэ?

— Эг вöв, — рочöн шуис Иван.

— Сэки мый? — рамжыка ни юалiс рочыс, юрыс öвтчышалiс, топ кинкö бöрсяняс юрсиöттяс зэгйис. — Кытiсь?

— Сэтчинiсь, — Иван юрнас öвтыштiс бöрланяс. — Кытöн юссес пöжсьöны...

— Баит бытшöмика!

Керку сайсянь тöлыс то вынсялiс, то раммис. Шоча кытöнкö ылын лыйсисö. Офицер бöра мыйкö бобгыштiс. Переводчик мурзьыштiс: «Ов асылöдззас! Ашын тэкöт уна оз пондö баитны!»

Дынас котöртiсö солдаттэз, кутiсö киэзöттяс: öтыс — öт боксяняс, мöдыс — мöдсяняс, брынгисö бöрас, тангисö гид дынö, осьтiсö ыбöссö и эшö брынгисö да сiдз, что сунки-панки заргисис пытшкас, кымöснас кытчöкö зубыта люкасис, да сiдз, что синнэзсис чеччöвтiсö бичиррез, и усис пидзöссэс вылö.

Мыдзыс да думаэс Ивансö кольмöтiсö, лязiсö, но медöддьöн пурис обида, что шедiс, кыдз каннезлö шырок, и ашын оз ни ло ловья. Кулас ни ашын, сэсся оз адззыв гортсö, вöрсö, ыббесö, ассиным отирсö, и этасянь лоис сэтшöм умöль, сiдз бы и пышшис эстiсь, да кытчö пышшас? Маласьтöнняс киэс увтö шедiсö только стенаэс да öтöрсянь бура пыкöм ыбöс. Оз пышшы, олас ашынöдз, ашын лыясö — этасянь сьöлöмсö пидзыртiс сэтшöм обида, лоис сэтшöм умöль, что пондiс горзыны, горзiс сэтчöдз, кытчöдз эз пöт, кытчöдз эз ло личытжык моросас, кокнитжык сьöлöмыслö. Сэк вöлись маласьтöн пемытiнас кошшис аслыс кöсжык места да ускиньтчис стенаыс бердö.

Медбöрья луннэзнас сiя сымда адззылiс, сымда пешлiс берсясö, сымда ветлöтiс да нач етша шоччисис, сiдз ни мыдзис, что эз казяв, кыдз ланьтiс повзьöтчана онöн. Минута-мöд кежö быдöс öшис умöльыс, но узис нач етша: саймöтiс шы, бытьтö öтöрас нач зэв стена бердын кыкись-куимись вувтыштiс пон.

Ивансö эта шыыс дзик нетшкöвтiс коккезöттяс, чуйк пуксис, сьöлöмыс тёпкöтiс моросас, кыдз зверьлöн, кöдö кутiсö, коккесö кöрталiсö и шупкисö пемытiнас. Гидын пемытыс сэтшöм сук, что зэв чужöмыс одзись эз адззы чуннесö, но кылiс бура, что öтöрас лöнь, некытшöм пон оз вувт, только кытöнкö ылын урöтiс, дзик ружтiс машина. Пыдын гуын бытьтö пленнöйыс. Гидын вöлi уль назём дук, но кысянькö мымдакö шедö и сöстöм ру.

Сiдзкö, эм осьта, сiдзкö... Осьта, осьта... сöстöм руокыс кыдз бы ловзьöтiс, козьналiс бур думаэз, вын, шоччöтiс. И сiдз бы олiс, сiдз бы шедлiс гортö, пантасьлiс аслас семьякöт, сiдз бы эшö аслас понкöт ветлiс вöравны, что бытьтö минута-мöд олiс гортас, вöралiс ни. Öтiк дума ни эз думайтсьы плен йылiсь, кыдз эз ни бы вöв гидын. Сувтiс пемытiнас, стена пöлöн пондiс жагвыв ветлöтны да маласьны — быд пазсö, быд осьтаоксö кылiс чуннес увтын, дойдiс кытчöкö чунь йыввесö, но зубытсö кыдз бытьтö эз и кыв. Маласис, но ыджыт осьтасö эз адззы — эз шед чуннес увтö, сэк чорппезнас пондiс вартлыны керрезас, сяткöтiс и кывзiс, оз я шопкöт бы кытшöмкö кер, абу я сiсь. Гидыс вöлi важ, и шопкöтiсö чорппес увтын увдöрись керрес, но эз сетчö, медбы нiйö позис разьны.

Чер бы... Но сiя эз вöв, и кöть пиннезöн йир, кöть кымöсöн люкав... И сысянь, что эз вермы разьны гидсö, лöг петiс ас вылас, олансö кыдз кужис, сiдз и видiс. Лöгасьлiс да раммис, тöдвылас усьлiс и еныс, кöдалö кеймис ни: «Ен-батюшко, отсав! Отсалан кö, понда кувтöдз юрбитны!»

Кылiс я еныс кыввесö, тöдiс я, что Иванлö колö отсöт, этö сiя эз тöд, сё гуддисис пемытiнас, маласис, надейтчис мыйкö вылö.

Маласьтöнняс коккес увтiсь шедiс кытшöмкö кöрттор — асдорöм кöрттув или мый, кöда чуннес увтын кылiс, что йыла, чорыт, и кöдöн туйис гарйисьны.

Кузь ойыс, пемыт. Узис деревняыс, кытöнкö кылiс, кыдз кинкö керкусис петалiс посöдзö, кашыкасис, ружтiс, сьöвзис, öтöрасис, бобгыштiс тöдтöм кыв вылын.

Кылiс, кыдз короминна вылын ветлöтiс кань, кыдз стена сайын мурскис-рöмысьтiс баля. Эна шыэс вöлiсö да öшисö,

дзуглiсö солдатлiсь уджсö. Лöньлiс гидын Иван. Ойыс лöнис. Пемытыс топ сукмис. Иванлö эта и колiс: сiя веськыт киас буржыка жмитiс кöртжугсö, дугдiс думайтны умöль думаэз, немись ни эз понды повны. Малалыштiс пемытiнас гидлiсь увдöрись керресö, лэбтыштiс кисö и татшкис кöртторсö. Шопнитiс-шыасис керыс — гыркыс сiсьмöм. Кöртыс мöртчис.

Сьöлöмыс чеччöвтiс моросас, и сэтöн жö пель одзын топ кылiс немецлöн голос: «Йован! Мый керан?» Врагыс, гад, топ сiдз и сулалiс дынас, шыннялiс, синнэзас гаж, чужöмыс бытьтö бы лёк, бытьтö öнi вöлись кутiс Ивансö, вöлись шедiс, вöлись мыччалас.

Солдат повзьыштiс. Тувдiс. Кывзiсис, но некытшöм шы эз кыв, некин сы дынын эз вöв, только сьöлöмыс пессис. Чеччалыштiс сьöлöмыс и дугдiс. Пленнöй вöлись бöра маласьöмöн кöртжугнас пондiс кокавны керсö. Уджалiс шупыта, пымалiс, кымöссис вотялiс ньылöм, пырис синнэзас, öмас, кылiс, кыдз вамис йöрнöсыс.

Сiсь керыс, но кокнита эз сетчы писькöтны. Мыдзис киыс. Шоччисис, лолалiс моростырнас, кывзiсис зверь моз да бöра уджалiс.

Уджавтöнняс думаэс эз шоччисьö. Тöдвылас усьлiс одзза олан, медодзза бой, кыдз нiя врагкöт пишаллезтöг оча-паныт... Бöба уськöтчисö öтамöдныс вылö. Синнэс одзын недыр вöлiсö вийöм ёрттэс. Дивуйтчис ас вылас солдат, мыля кольччис ловья. Лöгасьлiс ас вылас, иньсö пондiс нерны: «Синнэзнат бы гортын эн адззы, голосöс бы эн кыв, кеймин, медбы вийисö, а ме ловья!.. И нагладь локта, ась синнэт нач паськалöны, ась видзöтан, что мужикыт некытчö эз торксьы».

«Гы-гы, Йован! Мый изан?! Тэныт овнытö кольччис час-мöд и абу», — синнэс одзö топ мыччисис немец, кöда панталiс эта керку дынын и мортö эз пукты.

«Серав, вежöм! Видзöтам кыдз эшö пондан серавны!» — пленнöйыс нерис врагсö, вынöнжык кöртторсö мöртлiс керö, думайтiс, кыдз асывнас керкусис петасö немеццес, а сiя абу! Вöлись пондасö ыксыны хальтсö, вöлись пондасö котрасьны...

Арся ойыс кузь. Пемытiнас умöль гарйисьны, но Иван эз сы вылö видзöт, сiя бура тöдiс, что ашын вермасö вийны. Кытöнкö асывланяс ни, кöр гортын, натьтö, китсасисö ни петуххес, а татöн мылякö нiя эз шыасьö, кöр отир узисö медчöскыт онöн, пленнöйыс чуннес увтын пондiс кывны кыдз гид пытшкö ойыс пондiс лолавны ыркыт руöн.

21

Петiс жагвыв гидсис. Пыдына ловзисис, кывзiсис, видзöтчис. Дрöжитiсö киэс, но рад дума чеччалiс: «Мезмин эд, Ванька!» Сьöлöмыс сiдз бы и лэбзис, но бöба эз котöрт, а иньдöтчис жагвыв, гусьöн тальччис, бöра видзöтчис да кывзiсис. Натьтö, вачкисис кань вылö, мунiс йöр пöлöн да йöр пöлöн, сiдз кыдз синнэс велалiсö ни адззыны пемытiнас.

Улица конецын, тыдалö, сулалiс машина, урöтiс и би югöрсö ольсалiс одзас, кöда Иваныс дынöдз эшö эз сибав.

Кушкыртчис петшöррес коласö, секунда-мöд видзöтчыштiс и öдззис котöртны.

Чожа ылöкодь кольччисö машиналöн шыэз, деревня. Коккес увтын гардчис кузь турун, кöдзыт ру малалiс чужöмсö, юасис бы пырны паськöм увтö, бырöм ботинкиэзöттяс коккесö вадiс сук лысва. Иван пемытiнас мунiс-тэрмасис вöрлань, кöдö эз адззы, но кылiс вывтырнас. Чожа пондiс жагвыв югдыны, медодз пондiсö тыдавны вагöппез, сыбöрын баддез, тыдалiс ни ыб вылын вундытöм сю. Содтiс шаггесö. Деревняланьсянь кылiсö машиналöн шыэз. Лыйсисö. Вувтiс пон. Иван усьöмöн да пöрöмöн öдззис котöртны вöрлань, кöда тыдалiс ни, кыдз корис дынас. Вöрлань жö чуклясис крут берега чальöс, сы гöгöрын быдмисö баддез, верöс, ловпуэз, нырö павкис сэтöрöн, коккес увтын больгис-визывтiс ва. Эта крут берега чальöсö медодз и сайöвтчис солдат, дзебсисис неыджыт пуэз коласö и вöлись вежöртiс, что сы сьöрö оз вöтчö, что мезмис пленсис, что кольччис ловьяöн. Пондiс саймыны кыдз кыз онiсь. Некытшöм мыдз эз вöв — кольччис гидö, кöть и горшыс косьмис, и кынöмыс сималiс, но эз мышкыртчы гöп дорö, а сёйны вöлi нем.

Луныс оссис кымöра, ыркыт. Карзiс рака — вöзйис зэр. Вöр дорын инмис вийöм морт вылö, кöда дынсянь патшкис сэтшöм дук, что гудыртчис сьöлöм. Чожажык мунiс сэтiсь, пырис ылöжык вöрас и вöлись пуксис шоччисьны, вöлись ловзисис кокнита, моростырнас, шынньöвтiс ас кежас, малыштiс мороссö — бур. Вöр шушкис ас кежас, бытьтö баитчис мыйкö уджавны. Иван шырзьыштiс кöз ув бердiсь лыс, чапкис öмас и пондiс нимавны. Быдöс бы бур, да öтiк умöль: ботинкиэс пытшкись мыччисисö кок чуннес, а кöдзыт ни. «Мед... — гажöтiс асьсö. — Дзонь бы лоны, а нятьыс тавося, мынас шинель бердiсь, тойесö вашöта, киэзöс мисся, бритча и бöра понда вачкисьны морт вылö».

Мыччисис асывся бледыник заря, гусьöн да полöмöн öзйыштiс, мыччалiс туйсö гортланьö. Асывланяс жö кымöрын, кыдз варышшез, лэбзисö самолёттэз, шынаныс повзьöтiсö думаэсö, кыдз висьталiсö: «Одз гажöтчан!» И бöра сiдз топ кинкö и пондiс бы кутны...

Луныс пондöтчис кымöра, топ горзыны лöсьöтчис. Иван чеччис кöз увтiсь, малыштiс тошсялöм рожасö и иньдöтчис асывланьö. Аскöттяс думайтiс-баитiс: «Эх Ванька!.. Мый, Ванька? А сiя, Иван, что öтнат тöдтöм местаэзын, вöлi бы ёрт...» Ёрт колiс, кöть и отирсис öнi полiс, эз бы пантась некинкöт, осудитiс асьсö: Кин вылö бы вачкисян? Солдат... Аслат му вылын полан, пыдынжыка он ловзись, он лысьт несйыштны, кыдз ачыт аслыт враг, дзик мыйкö гусялiн, пышшöтiн, мырддин да дзебин и шатласян. Гардiс думаэсö ас гöгöрас и асьсö эз вежöрт, эз бы вид некинöс, тöдiс ни, что эта войнаын мыйкö не сiдз, кыдз колiс бы лоны, кыдз кывлiс-баитлiсö, ошшасьлiсö: «Э-э-э, да мый сiя?! Эм и абу эд! Ась пондылö, ась кутчисьö! Пиннесö чожа кисьтам!» А петö... Ассиным пиннезнымöс кисьтiсö... Кинкö вылö петiс лöгыс, мыйкö эз вежöрт, мырсис-думайтiс, лöсьöтчис овны да видзöтчыны, висьтасьны гортын.

Мунiс вöрöт, кытöн не кай, не морт, не чёрт эз пантасьö. Сыбöрын петiс вöрсис ыджыт туй вылö, дыр сулалiс, кывзiсис, видзöтчис, кыдз кинöскö видзчисис, думайтiс, мый керны, кытчö воштiсьны. Сыбöрын чатыртiс юрсö, няпыртiс кулаккесö, кöть и чунь йыввес доймисö гидын гарйисьöм бöрын и иньдöтчис веськыта туй кузя, талис бырöм ботинкиэзнас пуэз вылiсь киссьöм лист да нять. Лэбтiсис сьöла, пуксис нач матö кöзок вылö, пондiс бергöтлыны юрсö да видзöтчыны, кöть киöн кут, кыдз бы висьталiс, что нем повны — етша эстi ветлöтöны отирыс. Иван эз бы пов, но сьöлöмыс сiдз и этадз гусьöн полiс, сiйöн видзöтчис öтöрö и мöдöрö, кокнита суййис асывлань. Тэрмасис, кöть и сималiс кынöмыс öддьöнжык, етшыс öшис, синнэзнас туй бокись кошшис шлёпсьöм тшаккез. Нiя пантасисö шоча-шоча, вöлiсö нильыгöсь, гагйöсьöсь, кынмöмöсь асывся кöдзытiнас, но Иваныс сылöтiс долоннес вылын, пöлялiс да шупкалiс öмас и сэтöн жö гультым-гальтым ньылалiс, топ сковорода вылiсь...

Шондiыс эз мыччись. Шонтыштiс: коккез увтын небзисö листтэз, вöр вылын сырк öшалiс лысва. Вöрыс туй бокын эз вöв тшöк, кöть и пышшыны бы, эн бы вермы саясьны. Но некин эз пантась, а тöдчис, что ветлöтöмась машинаэзöн, вöввезöн и подöн нильöмась нятьсö. Овны позис, овны вермис. Кытöнкö луншöр гöгöрас тшöкжык кöззэз сайын несйöвтiс вöв. Сьöлöмыс шурк-шарк! Чеччöвтiс бокö, лолыс тырис — руыс эз тырмы, но сулалыштiс, лöсямыштiс ловшыыс, видзöтчис, кывзiсис кöч моз, и кöр одзас некин эз мыччись, вöлись жагвыв полöмöн да видзöтчöмöн сибöтчис тшöка быдмöм пуэслань, гусьöн бы видзöтiс, кин сэтöн, мый керö. Но солдатсö одзжык ни адззисö, одзжык лёк голос пеничайтöмöн юалiс:

— Эй! Тэ мый бы лöсьöтчан керны? Вöлöс мырддьыны да менö вийны? Нем тэнат оз пет!

— Вöлыт меным оз ков и отирсö ог сёй, — шагньöвтiс ни веськыта, серöмтчис, казялiс неыджыт мыгöра, векнит чужöмбана мужичокöс, кöда пасьталöм вылас зипунок, йиасьöм вонёкöн, юрыс вылö кышалöм бырöм шапка, тошсялöм, юрсиыс быдмöм, кöть чикись кый, и киас видзö чер — матö эн лок! Но Иван локтiс матöжык, здоровайтчис, юалiс, кытчö туйыс нуöтö и кытöнöсь нiя.

— Ета... — мужиклöн синнэзас бöб югöр, сiдз бы черсö и лэбтö да юрö сöтö. — Ета туйыс, ёрт... сiя, кöда вермас нуöтны райö и адö... Кинлö кыдз...

— Кывзы, дед, меным колöны асланым бы!

— Асланым... — нерис пöрисьыс. — А то кинлöн? Кытчö вартан? Шпана али абу бы? — гогынялiс юрсö, шлёчкис кывнас. — Врагкöт, ить, тышкасьны нач некинлö, быдöнныс шатласьöны или быдöннысö паздiсö ни, мыйкö ог вежöрт, а? Дизяртир тэ али кин? Ить, кыдз дизяртир, то судитны колö.

— Дед...

— Судитны бы страшнöй судöн!

— Стари-и-ик! — телега вылын видзчисьтöг шыасис инька, кöда шебрасьöм сэтшöм öнöн, что öннас он бы и шу, и кöдö Иван медодз эз казяв. — Грехас будь эн пыр, господи прости! Отирсö эн смешит.

Старик черсö шупкис телегаас, чужöмыс топ небзис, кокнитжыка ни юалiс:

— Пышшин, ить, али мый?

— Кысь? — дзик эз вежöрт Иван.

— Кысь, кысь... Сэтчинiсь, армиясис...

— Пышши, дед. Пленiсь.

— Быль? — синнэсö öддьöнжык осьтiс пöрисьыс, веськыта пондiс видзöтны, юалiс. — Вермин?!

— Верми. Да шатлася öтнам. Эн я тэ адззыв кинöскö ассиным?

— Да, ить, кольччан öтнат. Нiя саранча мымда, тальччыны некытчö, только вöрас и кольччис овнытö, тьфу! Ог вермы видзöтны враг чужöммез вылö, сартирö ог пуксьы öтлаö, но и вот...

Вöлыс пырскайтiс нырнас, öвтышалiс бöжнас — лы да кучик, сiйö и видзöт, кыдз бы син одзын эз пöр да эз кув. Старикыс малыштiс каджсö, пондiс норасьны:

— Видзöт, старухаöкöт пышшим жö... А мый нö?! Шедас кö пишшаль, ить, öтiкöс да пöрöта!

— Тэ кодьыс! Кулöм бараныс! — пондiс модьны старуха, — Пукалiн бы гортын, а тэ менö эшö гортiсь вöрзьöтiн, полан кувнытö, да миянлö тэкöт кöть кытöн ни эд!

— Кин?! Ме?! Да ме, ить, ышö видзöта, кыдз пондас ерманецыс пышшыны! Тöдан эд ышö, кин колхозас медодз пырис! Коммуниссэсö эг я одзав, öнджа... Вот тэныт и олан! Уджалiм, уджалiм, кытöн тшыгöсь, кытöн пöтöсь, пондiм только пöтжыка сёйны и на! Бöра враг! Бöра чöвт зараза одзын вешьянтö.

Иван шыннялiс ни, эз ни öтнас вöрас вöв.

— Оз я кынöмыт симав? — мöднёж ни баитiс старикыс, юрсянь коккезöдз видзöтiс Иван вылö. — Адзза... Сималö. — Иньыслö ыкöстiс. — Тоня, Антонида, кыскы жö котомасис няньтор, а!

— Мый ачыт пондан лопайтны?! — кивзiс старуха, жалейтiс няньсö.

— Муссэзнымöс нимавны! — мурзис старик, писис кыскис нятьöсь кисет, гардiс чигарка и солдатлö чепöль йывнас сетiс табаксö.

Куритiсö. Пöрисьжыкыс норасис:

— Кывзы, солдат... Ить, немецыс эд сэтшöм öнджа, бат, бы сыкöт туйис лöсьöтчыны, но сука вöлöма, вежöртiн! Локтiс, кывзы, деревняаным, медодз кутчисис учительным бердö... Чик — и абу мортыс! А мый понда, висьтав?! Что челядьсö велöтiс, али коммунис вöлi, а? Ить, ми эд быдöнным ни коммуниссэс моз лолалiм, сiдз эд? Сэк мый нö? Быдöннымöс коттяс врагыс? И ета бöра, эз ештö локны, ыксöны: «Курка, яйка, молёко!» Вежöртiн! Бандиттэз и эмöсь! Керкуись керкуö котрасьöны, и пондыв, эн кö сет, а! И шуöны, пондат пö уджавны Ерманиялö. Вежöртiн! Раббезöн бы керöны, а ме мортыс гордöй! Вежöртiн! Колхозник абу я! Мый шедтi, сiйö и сёйи. Вежöртiн!

— Эн бы ошшась сэрпöсь колхознат!

— Умöля разь олiм! Тшыгьялiм нач я мый я? Тэ, старуха, баит да тöд мый модьнытö! Вежöртiн! А тэ, солдат, сёй няньсö, сёй да мун гортö и сэтчин быдöс висьтав, норась, мед порсь чужöммесö бöр репöтасö, а! Ме, ить, немецсö кöзяиннас ог шу и ог понды лыддьыны, вежöртiн! — баитiс, öвтiс киэзнас, бытьтö собраннё вылын, нюжласис кок чуннес вылын, голясö нюжлалiс, öмсис дуль резсис, синнэзас лёк югöр.

Иван сёйис няньторсö и эз пöт, кынöмыс топ сималiс эшö öддьöнжык, но няньыс сэсся эз вöв, сэк дедлiсь эшö корис табак, висьталiс спасибо да иньдöтчис одзлань.

— Эй, солдат, ить, этö... Черсö бы босьтiн, мыйись-мый... Кералiн бы кöть öтiклiсь юрсö.

— Оз ков, дед! — бергöтчыштiс солдат да гажöн висьталiс стариклö. — Пишаль адзза.

— Сiдз будь кö...

Чожа саясис пöрисьыс син одзись, но дыркодь кылiс эшö дедыслiсь голоссö, кöда сьöлöмсö гажöтiс.

22

Мунiс-тэрмасис, мыдзис. Рытланяс саясис кöззэз увтö, пуксис шоччисьыштны, но эз и казяв кыдз ланьтiс. Уна я узис, эз тöд, но ештiс вöтасьны, топ гортас бригадирыс саймöтö: «Ванька, эй, Иван, чеччы! Дыр ни узян, ытшкисьны колö мунны».

«Кытшöм ытшкисьöм?» — саймис солдат, пукалö и оз вежöрт кытöн, мыля бригадир иньдö ытшкисьны, кöр ар. Юрнас öвтiс, шыннялiс-дивуйтчис, что эмöсь сэтшöм стариккес, кытшöмö сiя панталiс доддя вöвнас, и бригадирыс вöтöн иньдö бы уджавны, сiдзкö, дума висьталiс: олас дыр, ытшкисяс эшö...

Кымöррес эз öшö, шондiыс эз тыдав, вöрыс пыр полöтöмöн шушкис ас кежас. Кывзiсьыштiс, бытьтö кылiс отирлiсь басни.

Чеччöвтiс, дзебсисис, пондiс буржыка кывзыны и быль: киннэзкö баитiсö, но эшö эз тыдалö. Нёджжасис и адззö: солдаттэз да асланым паськöмöн, бобгöны ас коласаныс топ рочöн. Асланым... Или абу? Или враг вежис паськöмсö, роч кылöн боргö, медбы бöбöтны Ивансö?

Иван сэк жö эз уськöтчы тöдтöм отир дынö, видзчисьыштiс, видзöтчис да вöлись и мыччисис кöззэс коласiсь.

— Сувт! Кин сэтшöмыс?!

— Асланым ме, асланым, — висьталiс Иван, содтiс кытшöм полкись да ротаись.

— Кытöн ёрттэт? Кытöн ротаыт, полкыт?

— Öтнам кольччи.

— Бöбöтан эд, зонка, — кынöмас иньдiсö винтовка. Иваныс öшис, кыдз бöра шедiс пленö, бöра оланыс пурö: документ корисö, а сiя эз вöв. Немецыс эд мырддис, кöр шедлiс ны дынö.

— Дизертир сiя! — ыксö шоч пиняыс. — Вийны гадсö, сымда и эм!

— Сулалö, зонкаэз! Ештам вийны, абу кö предатель... «Сотны бы пельбокат, враглö, пондiн бы тöдны, кытöн предательыс!» — думайтö Иван, но киыс оз лэб, оз вачкы, кöр нiя асланым — сьöлöм гажöтчö ни, рад, кöр берся ни адззылiс, кыным лун ни öвтчис — сорис ни луннэсö, числоэсö, месяцсö ни эз тöд, гажтöмтчис отиртöг.

— Мый тэкöт керны? — командир баитö морт моз. — Может, миянкöт мунан?

И мунiс ни солдат ёрттэзкöт, шаггез чорытжыкöсь ни, вын ни бытьтö содiс, тальччис ни кузьжыка, кöть и сё öтмоз сималiс кынöмыс, некин эз верд, кöр ёрттэс асьныс тшыгöсь.

Мунöны, кымöссэзныс вылiсь чышкöны ньылöм, киэзаныс винтовкаэз да автоматтэз, кöда чотö, кöда моросыс бердö кöрталöм кисö, кöда дзонь, кöда ранитöм, кöдалöн вылас паськöмыс бур, кöдалöн умöльжык, кöдалöн синнэзас мыдз, кöда видзöтö эшö гажöнжык, быдöнныс мунöны гортö — петöны врагыс дынiсь, кытшись. Чожа пемдiс. Петiсö гладьжык да чорытжык туй вылö.

— Эд полö, челядь! Ась фрицыс миянлiсь полö! — гажöн баитiс командирныс. — Ойыс миян.

Ойыс нылöн. Мунiсö гортлань, сьöкыта лолалiсö, талисö нять, видзöтлiсö тöлiсь вылö, кöда омöн югдöтiс золотöй рöма югöрöн. Юррезныс вевдöрын уйисö кымöррез, то вевттьывлiсö тöлiсьсö, то юррезныс вевдöрö öшöтчывлiсö, сыбöрын осьта ыбöсiсь моз бöр мыччисьлiс тöлiсь. Кöз вылын узис кай, повзис и чирзытöн лэбзис пемытiнас. Бадь увтiсь чеччöвтiс кöч, сöтiс котöртны аслас туй кузя — ачыс руд, а вешьяныс чочком. Мурзис я ош или ружтiс му, сьöкыт вежöртны. Солдаттэс мыдзöсь. Пуксисö бы шоччисьны и сэтöн жö ланьтiсö, но командирныс саймöтiс, модис: «Тэрмасьыштам, челядь!» И тэрмасисö одзлань, коккезнаныс меряйтiсö туй, кöдалiсь эз тöдö кысянь пондöтчö и кытöн кончитчö. Тöлiсьыс дыр мыйись сайöвтчис, лоис пемыт, только чушыктöмыс сьöртi и кылiсö öтамöдныслiсь мунöмсö, видзсисö бы зэвжыка, пельпон пельпон бердын. Сувтöтiс пон шы. Ыб дорын тыдалiсö керкуэзлöн вуджöррез. Поныс вувтыштiс и лöнис, кыдз повзис да дзебсисис. Шы эз ло. Кылiс, кыдз командирныс киын сяткöтiс часы, сьöкыта лолалiс раненöй.

— Орддям деревнясö или веськыта сöтам? — негорöн баитiс командирныс.

— Веськыта! — шыасис öтiк.

— Тырмас ой и лун дзебсисьны! Мыдзимö ни пышшавны фриццезсис, — шыасис мöдiк.

Мыдзöсь солдаттэс, эз ни бы орддисьö, дума ни бöбöтiс — кыскис деревняö, надейтчисö, что узясö керкуын, оз я кодя морт мыйöнкö верд...

— Кин разведкаö? — юасис командирныс.

Кинкö пемытiнас локтiс командир дынö, висьталiс, что мунас деревнялань, и öшис. Куньсисö синнэз. Кинкö ныргорöн каргис.

— Эд узьö! — кылiс голос.

Иван вöтöн моз кылiс командирлiсь голоссö: синнэс куньсисö, и топ сё кытчöкö мунiс, и мунiсö вöввез, машинаэз... Осьтiс синнэсö — пемыт, некин абу. Ыкöстiс бы ёрттэсö да полiс, думайтiс абу я матын враг. Синнэс бöр куньсисö, и бöра бытьтö бы кытчöкö мунiс, тэрмасис бы, адззылiс зонсö, Андрейка ыксiс: «Тять! Татöн ме! Он я мый я адззы?!» Думаэзнас котöртiс бы, падмис и усис. Сьöлöмыс повзьыштiс. Командирныс висьталiс: «Мунам, ёрттэз».

Сунки-панки мунiсö. Иванлö рожаас швачкис ув. Вамисö бырöм ботинкиэзöт коккес, кок чуннезсянь кöдзытыс вывтырöттяс кайис юрöдззас. Мыдзöмöсь и зубытöсь коккес, тальччис и чотыштiс. Панталiсö солдаттэсö, кöдна ветлöмась разведкаö. Нiя висьталiсö, что деревняын немеццес етша, часовöй öтiк, и колiс бы уськöтчыны враг вылö.

— Кыдзкö часовöйсö бы дзимлявны.

— Да ме сiйö кыдз курöгöс джагöта, оз ешты öмсö осьтны!

— Оз я кöть сёйны шед!

Смелöсь солдаттэс, немись эз полö, и быдöнныс мунiсö ни медодзза керкуэз дынö. Кылiс, кыдз пыдына лолалiсö отир, сэсся кытчöдзкö шы эз вöв, и сэтöн: «Ур-р-ра!»

Нетшкöвтiс шыыс пемытсö. Öшис мыдз, ыксiсö «Ура» да котöртiсö.

Чожа öзйис и сiдз жö кусiс бой, бытьтö ойыс эз ешты вежöртны, мый лоис, эз ешты повзьыны, бытьтö вöтасис умöль вöт — адззылiс да эз казяв солдаттэсö, тöдны пондас да оз. Кошшы, кин да кытчö ойнас лоис, кин кытчö пемытiнас котöртiс-öшис.

Дзирс пемыт. Иваныс топ усис гуö, малыштiс гöгöрсö — не стена, не потолок, не ёрт, не враг. Öтнас. Ыкöстны бы, но кинöс?

Пемыт. Юрыс вевдöрын пондiс дзöрны öтiк звезда — ылын сотчис биок. Солдат пемытiнас малыштiс асьсö, вöрзьöтiс кикоксö, вежöртiс, что дзонь. Ассис юалiс, кин да кöр и кытчö лоис, но эз вежöрт: ойыс быдöс дзугис. Гажтöм ёрттэстöг, кöть и велалiс ни шатласьны öтнас. Умöль ёрттэстöг, кöднакöт немымда эз пов, но сiдз ни велассис, что оланыс кыдз бöра мырддис меддонаö, и некыдз он вежöрт, адззан я сiйö...

23

Мымда мунiс, эз куж висьтавны, но вывтi уна эз: инмис лапья кöззэз увтö, кытчö туйис дзебсисьны, и пуксис. Только ештiс кушкыртчыны, сэк жö онмöссис да сэтшöм пыд онöн, что лый бы пель бокас, эз бы и чеччöвт.

Саймöтiс кöдзыт асыв: кынмисö коккес и спинаыс. Лöз-югыт. Эз шыасьö каёккез, эз кылö войналöн некытшöм шыэз, бытьтö му вылын олiс дзир öтнас, но мыйкö эз тырмы, бытьтö шогалiс, да эз тöд кыт висьö и мыйöн бы веськöтчыны. Гажтöм. Куритны бы... Сэтчöдз куритiс бы — чигарканас бöбöтiс бы быдöс мый эм, что нырпыссэзас вачкис табак тшын, кöда эз вöв. Пукалыштiс и нач пондiс кынмыны: сяткöтiсö пиннес. Чеччис да пондiс чеччавны öтiк местаын, кытчöдз лолыс эз тыр, сьöлöмыс эз мыдз, эз дугдö сяткöтны пиннес и эз дугды дрöжитны.

Жагвыв югдiс. Иван немымда ни эз вачкись солдат вылö, бытьтö мезмöм ош увтiсь: зверьыс гыжьялöм и косялöм паськöмсö, рожабаннэсö, кöдна йывмисö, нырыс нюжалiс, синнэс ыждiсö, сингуэс вöйисö, чуннес векнямисö, быдмисö гыжжес, рожаас рыжöй тош — тшöк нитш, пантась бы гортын да эшö вöрын, отир бы повзисö.

Ойнас шоччисис, вывтырыс кыдз кокнямис, топ кöз увтö колис сьöкыт котома, кöдö дыр ни кыскалiс, сэтчöдз новйöтiс, что лопаткаэс и пельпоннэсис коскаэс висисö. Доймис и шульга лядьбейыс, кытчö чушкалiс-сибалiс пуля. Ранаыс вылö нем бы и видзöтны, но сiя пондiс орсявны, лоис зубыт. «Ась, — думайтiс Иван. — Видзöтны кö быдтор вылö, уна лоас...» Унажык полiс коккес понда сiйöн, что пыр кынмисö: нач ни разьсисö ботинкиэс, а муыс быд лун асыввезнас лоис сё кöдзытжык. Поди, позис бы кинлiськö кулöмлiсь коккезсис кыскавны сапоггесö или петны туй вылö, видзöтчыны-видзчисьны немецöс, лыйны, чöвтны да пöрччавны и лоис бы кöмкöт-паськöмöн, но эз бы öтнас кутчись тышкасьны. И бöра жö, вийöмыслiсь эз бы босьт паськöмсö, сiдз кыдз гортын айыслiсь кывлiс, что война вылын буржык, он кö вöрзьöт нем кулöммеслiсь, а вöрзьöтан кö, дыр он ов — асьтö торкасö. И терпитiс солдатыс кöдзытсö, нятьсö, васö, модис аслыс: «Адззисьöм чача! Абу эшö тöв, он кынмы». Мунiс одзлань, шагнялiс асывлань да асывлань — гортлань кыскис сьöлöмыс, бöра орддис деревняэз, мунiс зверь следдэзöт, мунтöнняс шырзис лыс да сёйис — нерис ассис тшыгсö. Лун мунiс, коккес вылын джендöтiс мöдiкö и сiдз ни мыдзис, что пöльыштiс бы вынöнжык тöв, пöрис бы, но кытчöдзкö эз усь, шагнялiс одзлань. И кытшöмкö лунö вöрсис петiс ыб вылö, шырзис вундытöм шогдi, сёйис да сёйис, шырзьöм сюсö сюйис зеппезас, бытьтö суслик, и лоис рад. Сюнас эз пöт, но кынöмыс топ дугдiс одззамоз симавны, нимавны гöг гöгöрсö, коккес топ вынсялiсö, пондiс лолавны пыдынжыка и кокнитжыка.

Позьö висьтавны, что эта луныс дзик вöлi счастливöй: медодз межа дорын тэлляинын инмис кулöм солдат вылö, кöдалöн лолыс петöм нето ранаэзсянь — юрыс и шульга киыс каттьöмöсь бинттэзöн, нето лыйöмась — мортыс кыдз бытьтö падмöм, сапкисьöм кыминь, винтовкасö лязöм мороснас, кинас сё видзö, мед эз мырддьö. Но Иваныс бергöтiс вийöмсö спина вылö, босьтiс пишальсö, кышалiс пельпон вылö и пондiс мунны кыдз ёрткöт ни. Сiя жö лунö, рытланяс, кöз увтiсь лыйис кöчöс, кöда ылiсянь ни тыдалiс аслас чочком пасьöн, эз тэрмась чеччöвтны да пышшыны, кыдз вöзйисис тшыг солдатыслö. Кöчсö сэтöн жö кир-пар кулис, чередитiс, яйсö гывьялiс гöпокын сöстöм ваöн и пондiс сёйны. Кöчлöн яйыс вöлi сэтшöм чöскыт, что пурис да пурис, сёйис джын зверьсö, а мöд джынсö нетшкис-торйöтлiс и дзебис зеппезас. Потiс и дзик мезмис сьöкыт шогöтiсь, пондiс думайтны кыным лун ни öвтчö, кытшöм талун луныс, числоыс, мый керны одзлань, кытчö воштiсьны, кöр мунiс и мунiс и некинöс эз пантав, эз адззыв, кыдз быль ни немецыс паздiс армиянымöс — öтiк морт эз коль. Юрас пыралiс ни дума, медбы поздiсьны ош моз тöв кежас кöз увтö, керны лыссэзiсь керкуок кодьö да сэтöн и чулöтны кадсö. Видзöтiс вöрмöслiсь следдэз, орсiс думаэскöт: «Вия зверьсö и понда овны...» Но сэтöн жö синнэс одзö мыччисис лым, кöдзыт да кузь тöвся кад, а сiя вöрас öтнас... Лоис сэтшöм гажтöм, что некинкöт кыв горöтчыны. юасьны и висьтасьны... Одзжык Иван эшö эз пешлы сэтшöм олансö, эз тöвйы кöззэз увтын — этö эд войнаыс янсöтiс отир дынiсь, пöртiс зверьö бы. Но сiя мыдзис ни шатласьны, гажтöмтчис ни баиттöг, кöть думаэзнас öтiк час эз ов öтнас: кинкöткö пантасис, сёрнитiс, видчис и гажöтчис, сьылiс и горзiс, уджалiс и шоччисис — олiс, кыдз олiс бы одзжык, мунiс бы отир коласö, кыссис оланiнö...

Кöз увтын чулöтiс эшö ой. Талун кынмис эшö öддьöнжык, етшажык узис, унажык суналiс коккес вылын, педзис-шонтiсис, видзчисис югытсö, и кыдз саймисö пистöггез да пондiсö быркайтны кöз вылын, сiдз иньдöтчис одзлань. Мунiс, и коккес топ вöлiсö йöзлöн ни, шагнялiс, и думаэс дзик олiсö торйын, и вывтырыс дзик вöлi торья ни, не аслас. Мыдзис — мунiс сэтчöдз, что усис бы и узис лун, мöдiкö, ась сэтчин кöть мый.

Шагнялiс солдат, синнэс одзын öвтчисö пуэс, вöр кытчöкö кыскис, мыйкö модис, шушкис, кытöн видiс, кытöн сералiс. Син одзас мыччисисö то ловьяэс, то кулöммес, адззылiс медбöрья бой, деревня и старухасö, кöда горзiс да причитайтiс: «Серёжка, чеччы! Серёжка-а-а...» «А-а-а, — кылiс пеллес одзын, шушкис вöр. — Серёжка-а-а-а...»

Серёжкаыс куйлiс син одзас, вöтлiсис, баитiс бы, мыйкö висьталiс и эз вермы. «Серёжка. Серёжка. — модис Иван, петiсö синваэс. — Серёжка! — Сэтöн жö син одзас мыччисис зоныс, Андрейка ни топ ыксiс. — Тять! А тять, кытчö нö тэ?! Кытчö?»

Мыдзыс да оныс вермывлiсö: пуксьывлiс сэтчö, кытöн сулалiс, сэтöн жö куньсисö синнэс, но дыр узьнытö эз вермы — кынмис, колiс чеччыны да одзлань кыссьыны. Нач етша пондiс вермыны мунны шоччисьтöг.

Видзчисьтöг кöззэз сайсянь ыкöстiсö: «Сувт! Кин мунö?!» Иван медодз эз вежöрт, мый кылö, йöзлöн кыввес кыдз лэбзисö бокö, эз вежöрт, что ыксöны, топ вöрыс öддьöнжык шушкис пеллес одзын, топ коккес увтын зубытжыка чегис ув. Но ыкöстiсö ни лёкжыка, вынöнжык, шуисö, что лыясö, сэк вöлись кыдз пондiс саймыны, сувтчис, öвтыштчис, сулалыштiс, гудыра синнэзнас топ одзсис эз адззы солдаттэсö, шлёпкисис сэтчö, кытчö сувтчис.

— Киэз лэбты!! Кин сэтшöмыс?! — автомат мöртчис веськыта кымöсас — смерть кöсйис, смерть видзöтчис синнэзас, а Иваныс пукалiс и эз бы вöрзьы, эз осьт öмсö. Петiсö синваэс, визывтiсö нятьöсь рожабаннэзöттяс, тошöттяс, вотялiсö муас

— Киэз лэбты!! — зэв одзас сулалiс том солдат.

Иванлö ыксiсö, а сiя эз вермы лэбтыны киэсö, эз вермы спинаыс сайись вöрзьöтны винтовкасö.

— Ы-ы-ы, гад! Фашистскöй морда! Он бы кывзiсь! Да ме тэныт... — солдат мырддис винтовкасö, сiдз и вачкис бы, брынгис.

— Дугдö, — сьöкыта ловзисис Иваныс. — Тi киннэз? Отир или зверрез? Мыля сiдз керат?!

— Мыля! Мыля!.. Öнi ми тэныт мыччалам мыля... — солдат кутiс шинельöттяс бöрсяняс, лэбтыштiс, ыксiс. — Чеччы, гад!

Иван топ пондiс саймыны, пондiс вежöртны, что сыкöт баитöны асланым, но асланым я?! Эз вежöрт бура, эз верит аслыс, что этадз вермасö керны. «Абу я немецыс?» — дума полöтiс, тшöктiс дорйисьны, но выныс эз вöв...

Кымöра. Кöдзыт. Усис лым: öтi-öтi лымторрес лэбзисö и лэбзисö жагвыв, бырöм ботинкиэс бытьтö осьтöмась öммезнысö, сэтчинсянь мыччисьöмöсь кок чуннес, кöдна гöрдöтöмась, и корöны сёйны.

— Чеччы! — эрзiс солдатыс, автоматсö сiдз бы и мöртiс спинаас. — Чожöн!

— Мыля сiдз? Мыля сiдз? — Иван чеччис, турйöвтiс, модис öтiкö. — Мыля?

— Эн баит, дизертир!

Иванлöн — лы да кучик, выныс эз ни тырмы пыдынжыка ловзисьны, тальччис и кивзiс, но лöгасис да сэтчöдз, что вурис ни бы пельбокас эта салагалö, мед тöдiс бы, но мыйкö видзис.

Нуöтiсö Ивансö — бöрсяняс пыкисö автоматтэзöн. Кöдзыт, ловзисяс и тöдчö, кыдз öмыс одзын гардчö пар-туман. Кымöра. Жонь жевгис кöзок вылын, пистöг кокасис коккез дынын моз, кытöнкö гымалiс гым кымöр — ылын лыйисö пушкаэз. Ружтiс му, дзик сылö вöлi зубыт ранаэзсянь. Мунiс Иван — бöрсяняс пишкöны ныррезнаныс солдаттэз, дума ни гажöтiс: «Петi эд, петi! Асланым ни... Асланым...» И ась кöть кытшöм лёкöсь солдаттэс, ась пыкöны бöрсяняс автоматтэзöн, но быдöс татöн асланым ни, нельки эна салагаэзсянь патшкö тöдса роднöй ньылöмöн, табакöн, сапоггезсяняныс мазьлöн дукыс тöдса. Нуöтöны Ивансö, кыдз врагöс, а сiя думайтö: «Шоччисьыштны бы да вöлись босьтны винтовкасö, вöлись бöра и тышкасьны...»

— Вöрöтчы, тойöсь порода! — думаэсö сорöны бöрсяняс, голоссэзныс вынаöсь, сöстöмöсь, чинняöсь, вердöмöсь солдаттэс: чужöммезныс гладьöсь, синнэзныс лэчытöсь, öммезныс паськытöсь, дзоньöсь пиннезныс — гер видзöны, кужöны ыксыны — велалöмась, топ сы понда и служитöны.

Лым усис и сылiс — след эз тöдчы. Ивансö вайöтiсö керкуок дынö, кöда сулалiс сэтöн жö вöр дорын, кыдз дзебсисьöм войнасис, кушкыртчöм и шы оз сет, дзик абу. Некин бытьтö эстöн эз ов — оз тыдалö не отир, не машинаэз.

— Сулав! — посöдз дынын ыкöстiсö бöрсяняс, зэвжыка сувтiсö öтöрсяняс и мöдöрсяняс.

Öтiк солдат кокнита турски-тарски кайис посöдзö, кылö, пырис керкуö, и дыр мыйись сэтчинiсь петiс офицер, бöра жö öтнас, бур паськöма, бритчöм, мавтчöм одеколонöн — ныр чегис дукыс. Видзöтiс — кваркыш эз кер, лёк чужöма, лöз синвевья, нырыс кузь, кыдз дорöмöсь чукыля сьöктан, и вердöм — кык тшöка öшалöны голяас. — Здоровöн олан! — одзлань здоровайтчис Иваныс.

Офицер дзик эз кыв здоровайтчöмсö, чиння голосöн юалiс:

— Кин сэтшöмыс?!

— Рядовöй тридцать третьöй полкись, третьöй ротаись, — мыдз голосöн шыасис Иван, етшыс эз тырмы, медбы офицерыс моз жö чинньöн висьтавнытö.

— Кытöн сiя тыдалö? Документтэз!

Шы эз сет Иван, юрыс бергöтчыштiс, юалiс кытшöм талун лун и месяцыс мый ни.

Офицер бобгыштiс-висьталiс лунсö и месяцсö, ыкöстiс:

— Документтэз!

Керку сайсянь пöлялiс-лолалiс лэчыт кöдзыт тöв. Лым усис и усис да син одзын сылiс. Ва гöппезын лымыс уялiс сöнöгöн.

— Абуöсь, — кижгыштiс Иван, чикыртыштiс синнэсö зубытсянь, кöда курччалiс кок чуннесö. — Немецыс мырддис.

— Сiдз! — öмсö пиньöвтыштiс офицер, сёйис бы синнэзнас. — Ачыт эм, а документтэт абу. Пленö шедлiн или кыдз?

— Вöлi... — зубыта ньылыштiс дульсö.

— Видзöтам! — пиннесö гичыртiс офицер, солдаттэслö ыкöстiс. — Пока нуöтö!

— Мун! — бöрсяняс тангис солдат. — Вöрöтчы!

Мыдз. Эз бы и вöрзьы, шогалiс я или кынöмыс сималiс, эз вежöрт — нач ни етшыс эз вöв, он петiс, кöр керкуыс бытьтö шонтiс öтöрас, кыскис-корис пытшкас бы, но сiйö нуöтiсö керку бöрö, кытöн вöлöма баня, кöда пуксьöма-сiсьмöма, кыдз бы саясьöм-дзебсисьöм, видзöтчö öшынокöн. Эта баняись и осьтiсö ыбöссö, висьталiсö мед пырис, бöра эд зубытакодь буткисö спинаас. Шагньöвтiс баня пытшкö, кöда паныт ловзисис багсьöм руöн, дзик пытшкас куйлiс вийöм морт, кöдö эз бы ков вöрöтны, но бöрсяняс ыбöссö пöдналiсö да, кылö, мыйöнкö пыкисö.

Джодж сiськодь ни, но вöлiсö киссьöм гор, лабиччез, полок, öшынок, кытчö юрыс эз тöр, а югытыс пырис, и туйис бы нёджжасьны, видзöтны öтöрсö. Эстöн эз вöв шоныт, кыдз керкуын, но и эз вöв öтöр кодь кöдзыт: эз вижгы лэчыт тöв, юр вевдöрсянь эз вад зэрсора лым, коккез увтын вöлi кöс и позис водны полок вылö да шоччисьыштны.

Мыдзувья, кынмöм да вамöм бöрын медодз лоис рад, что шедiс кöть кытшöм да крыша увтö, что оз ни понды ковны шатласьны вöрын, что кöть кытшöм да асланымиссез дынын.

24

Иван рад вöлi, что эз ни ков повны немеццезiсь, что асланым отир коласын ни. Медодз баняын чöвтiс вывсис люзь ва бырöм шинельсö, ольсалiс полок вылö, коккезсис пöрччалiс ботинкиэсö да водiс аскодя ольпась вылö. Пондiс лыддьыны, кыным жö лун öвтчис, эд офицер висьталiс талуння числосö. Лыддис думаэзнас öтпыр, мöдöтпыр, но сорасис и чуннес вылын ни лыддис да вöлись аслыс висьталiс: что вöррезöт ветлöтiс кык неделя, тöн эшö чулалiсö кык неделяыс. «Унаöв жö шатлассьöм... — думайтiс солдат, малалiс рожасис шоч тошсö, пешлiс мороссис лыэсö, кöдна гер видзисö. — Но и мед...»

Мутшнитiс баняись кер. Бергöтчис бок вылö, лöсьöтчис бы узьны, да эз узьсьы: куняс синнэсö, сэк жö одзас мыччисьöны кöззэз, нитш, нять, юр вевдöрын кымöррез. Пеллес одзын шушкис вöр, кыдз висьталiс бы мыйкö, то мыччисьлiс медодзза бой, то Илья, и эна шлёпсьöм тшаккес, кöдна нёштöммöмась ни, но сёйсисö. Кынöмыс сималiс — тшыг пидзралiс сьöлöм гöпсö. Мыдзувья баняыс дюттьöтiс.

«Вайи бы няньтор», — модис ас кежас, чеччылiс полок вылiсь, öшынокöт видзöтiс öтöрö, адззылiс вöр, пуэзлiсь нёкрасьöм, кылiс лэчыт тöвлiсь шы, кöда вижгис угöввезын. Матын öшын дынын быдмисö сэтöррез, кытiсь ягöддэсö сёйöмась ни, но кынымкö тусь кольччöмась. Иван сiдз бы нiйö сёйис, сiдз сёйис...

Кадыс луншöр гöгöр. Чеччылiс да бöр водiс, бöра кунис синнэсö, куйлiс, бöра эз вермы ланьтны — думаэс дзугисö онсö. И кыным кадыс кыссис, сыным лоис недолыт, пондiс асьсö полöтны, сьöлöм пессис — мыйкö тöдiс, мыйкö бöра не сiдз, кыдз колiс бы. Мыля сiйö йöртiсö баняö да öтöрсяняс пыкисö ыбöссö? Кин сiя? Ежели сымда пессис, сымда шагнялiс, тшыгьялiс, мунiс ойöн и лунöн, локтiс асланымиссес дынö — и на! Йöртiсö баняö...

«Но и мый? Мый оз овлы!» — бурмöтiс асьсö — думаэсö бергöтiс мöдöрö, гортö бы кырöвтiс письмо, юöртiс бы, что ловья, мед вывтi эз тöждiсьö. Ловья эд! — дивуйтчис ас вылас. — Мымдаись пондылiсö вийны, а эд эз вермö! Верма кö, локта гортö, висьтася... — думайтiс, но думанас öтпыр ни эз касьтыв иньсö лёк кылöн, эз ни вид — быдöс умöльыс, кöда вöлi, кыдз кольччис немеццес дынö. — Гижны бы гортö письмо, но немöн и нем вылын — не карандаш, не гижöт... Ась. Сыбöрын, — аслыс висьталiс Иваныс, нюжласис полок вылын, бырöм шинельнас шебрасис бы и увтас ольсалiс.

Луныс дженыт, но минутаэс нюжалöны. Кытöнкö сёр павжун гöгöрас оссис ыбöс, кöд коласö сувтiс понпутша, рыжöй солдат, пиннесö гер керис, синнэзас нёштöм лёк югöр и пиннес пыр юалiс: «Ловья?!» Шуис сiдз, топ Ивансö ловйöн эз ни бы адззыв.

— Мый меным лоас? — Иван пондiс кашыкасьны.

— Кынöмыт сималö?!

— Сёйи бы, — содтiс. — Абу кö няньыс жаль.

— Но-но... — кыдз нерис рыжöйыс, швыркнитiс-петiс, топыта жвангис ыбöссö, бöр пыкис зорöн.

Öтöрсяняс пырис кöдзыт ру. Иван сьöкыта ловзисис, шуис: «Сiдз, Ванька...» И сьöлöмыс кыдз орис, мезмис, и бöра пыдына лолалiс да пондiс видзöтны банясис стенаэсö, кывзiсис, топ видзчисис, что кинкö локтас мöдiк, мöдкодь морт, лэдзас эстiсь. Вöлi лöнь, только тöлыс шутнялыштiс öтöрас — угöввезас орсiс.

Недыр мыйись öшын одзын вуджöртчис морт, жолькнитiс ыбöс, дзуркнитiс, оссис. Сiя жö рыжöй солдатыс порог дынсянь нюжöтiс няньтор, пуктiс лабич вылö, эрзыштiс: «Лопайт!»

«Ачыт лопайт, сука!» — бобгыштiс Иван, видзöтчис öшынö, думайтiс, что солдатыс мыйöнкö вачкисьö немец вылö, сэтшöм жö лёк чужöма, и мывкыднас сэтшöм жö, ны моз жö вувтö.

Иван чеччис полок вылiсь, босьтiс няньсö, бергöтiс долоннес вылын. Кынöм сималöмсö мöдöтпыр ни вермис бöб дума: «Пышшыны! Öддьöнжык брынга ыбöсас, и — оз адззылö!»

Но сэтöн жö асьсö падтiс: «Пышшыны... Кытчö? Мый вылö? Кин шогья?»

Öтöрас тöв вижгис угöввезас, мутшкöтiс баняыс, кыдз сiйö кинкö вöрöтiс-пöрöтiс бы. Öтöрас баитiсö. И дума сёйис: «Ме йылiсь я мый я? — модис Иван. — Порссез! Мый нiя думайтöны? Кинöн менö лыддьöны?! Видзöтам...»

Солдат веритiс, что быдöс лоас бур: шоччисьыштас, лэдзасö банясис, но и вежöртiс, что оланыс йöз киын — ас вылас абу хозяин. Мымда бы думаэзнас эз чукляв, эз кошшы осьтасö, мымда бы эз мездöтчы баняись, войнаись, кöр эстöн ни пондiс вежöртны, что сiя морт и бытьтö абу морт — иньдiсö войнаыс горшö и кöть мый, и кöть кыдз, тэ понда оз горзö: падтан пуля и бур... Этатшöм думаэз ни пыралiсö юрас, нiя ни сьöлöмсö чувйисö, мед и нылö эшö эз бы сетчы, эшö вöлi сьöлöмыс тырöм, кыдз порохöн патрон, и визыв да сöстöм вир визывтiс быд жилаöт, вывтырсö тыртiс бур чувствоэзöн.

Ар. Гортын дзимлялiсö ни, натьтö, сюэз. Дзимлялöны, бат, картов, капуста — ой и лун уджалöны. Öтöрас ва, вöрыс чöвтiс вывсис паськöм: кыдззез, пипуэз медöддьöн шушкисö лэчыт тöвсянь. Думайтö Иван и мымда ни думайтiс эна луннэзö, сiдз кыдз пыр вöлi öтнас, некинкöт вöлi горöтчыны кыв. Пыр олiс только думаэскöт, кыдз мöдiк морткöт, мöдiк Иванкöт, сэтшöм жö позтöм да горттöмкöт, кöдö сы понда и нуöтiсö, медбы вийны.

Колiс бы шоччисьны, ланьтны, кöр эстöн зэрыс эз вад и тöлыс эз вижгы, кöть кытöн, да не кöз увтын, но эз узьсьы — думаэс эз лэдзö ланьтнытö, гардiсö мый колiс и эз; то нуöтлiсö гортö, то бöр йöртлiсö этчö, то вийлiсö, то ловзьöтлiсö. Думаэз — враггез и ёрттэз, мöдпöв олiсö олансö, видiсö и ошкисö. Етша олiс, но уна ни пешлiс — гажасö и гажтöмсö, чöскытсö и курытсö... И кольччас кö ловья, думайтiс овны бы мöднёж, кöть и бура эз тöд, кыдз пондас овны. Кадыс чулалiс. Иван куйлiс полок вылын. Öшынö видзöтчис лун: кымöррес топ чорзисö, лэбтiсьыштiсö вевдöрö, лöнис тöв, кыдз бытьтö пондiс пемдыны ни, рöма-дзара лоис — этö солдатыс адззис öшынокöт и кылiс лунлiсь лолалöмсö. Кытчöдзкö сiйö эз вöрöтö: некин эз кыв и эз вöрöтчы баня дынын, топ вунöтiсö Иван йылiсь или пышшисö да колисö сiйö, и кöть тэ эстöн кув, кöть пет да мун, и он я бöра шед пленö, локтас немецыс и кутас, кыдз гидiсь баранöс... Эта медбöрья думасянь нельки повзис, чеччис, локтiс ыбöс дынö, брынгис öтпыр, мöдöтпыр... Петiс бы или корис кинöскö, и сэтöн жö öтöрсяняс кыз голос юалiс:

— Мый колö?!

— Лэдзö, — шыасис солдат да пасьталiс ва шинельсö.

— Ештан. Петан.

Ыбöс сайын, кылö, куритiсö: тшыныс кыткö пырис баняö, павкис нырпыссэзö. Чожа ыбöс оссис, рыжöй солдатыс, кöда бергалiс баня гöгöрын, мурзьыштiс:

— Пет! И лок мекöт, — лэбтыштiс морос одзись автоматсö, бобгыштiс. — Видзöт менам!.. Пуляыс вöтас!

«Рыжöй пон тэ...» — Иван курччöвтiс тырпсö, мурзьыштiс, но нем эз шу, думайтiс. — Сэтчин миянöс куш киэзнаным враглö паныт иньдiсö, а тi эстöн автоматтэзöн... — Падмис, джöмдiс, невна эз берездась.

— Вöрöтчы! — бöрас зэв шыасис рыжöйыс.

Керку вылын пондiс китшсьыны катша, кыдз адззис зверьöс. Вöлi лöнь, ловзисис только тöлок, койыштiс кöз вылiсь лысваöн. Бырöм ботинкиэз увтын шлёчкöтiс ва, пырис и петiс кöмкöтсис, кöдзыт öмöн курччöвтiс кок чуннез. Зубытыс чепöссис юр пыдöсö. Иван топ шоччисьыштiс, мыдзыс эз ни вöв одзза, но коккес эз бы кывзiсьö, сьöлöмыс пондiс гудрасьны, и юрыс бергалыштiс. Шагнялiс Иван, бöрсяняс ыксiсö: «Сэтчин! Этчин! Одзлань!» — ыксiсö, топ нуöтiсö кузь туйöт, кöр посöдз дынöдз банясяняс вöлi нач матын — шаг и сэтчин. Иван эз тэрмась. Сылöн мылякö пондiс пессьыны сьöлöмыс; кыдз чеччалiс моросас, петiс бы öмöттяс. Сiя эз бы видзöт эта солдат вылö, эз кыв сылiсь тявкайтöмсö, видiс сiйö: «Шедас этатшöм бöбöввес киö автомат, и орсöны. Айнысö и мамнысö арестуйтасö, медбы только начальство одзын асьнысö мыччавны, бытьтö нiя и эмöсь... Войнасö, натьтö, бытшöма эз адззылö, а миян кодьсö нуöтöны... Пантасин бы мöдiклаын, дурак! Порсь, пон, сволочь!» Сiдз и пондiс гурйыны лöгыс, но видзсис, бöрас дзар эз кер, а жагвыв кайис посöдзас, пырис керкуокас, порог дорö сувтiс и пондiс синнэзнас кваркышавны, сiдз кыдз öтöрсяняс сэк жö керкуас умöля адззис, и эз вермы дыр видзöтны офицер вылö, кöдакöт пантасьлiс ни, кöда тшöктiс йöртлыны баняас.

— Но и мый? — горöтчис офицер. — Висьтав веськыта, кысянь, кытчö и мыйлö? Кин сэтшöмыс?

«Мый сiя? Ачыс я? Кытшöм пон пурöма? — бöра эз вежöрт Иван, лöгыс петiс офицер вылö. Веськыта ни видзöтiс офицерыс синнэзö, адззис вывсис нач виль паськöмсö, виль сапоггез, басöка шырöм юрсö, гладь рожабаннэсö, лэчыт синнэсö, нырсö, чочком пиннесö: том офицерыс, пизьö, сiдз и чеччалö — асьсö мыччалö, что командир: — Будь тэнö, порсь! Эн я сё нимав мамытлiсь нянясö, а педзан! Сöт бы пельбокат, медбы öшынöттяс лэбзин, сэк öмтö тупкалiн бы...»

Керкуас джоджыс ёгйöсь. Пызанок вылын гижöттэз. Угöлын автомат. Офицер китсасьö:

— Кытiсь? Бöбöтан эд, что шедлiн пленö да эшö öтiк ой кежö, сiдз оз вермы лоны! Тэ или шпион, или дизертир!

Иван шы эз сет, пиннесö гичралiс да видзöтiс офицер вылö, топ эз кыв. А сiя сярзис:

— Шпион тэ! Тэ коддескöт ми уна огö баитö!

— Ачыт тэ шпион! — видзчисьтöг Иванлöн öмсис пышшис кыв, ачыс эз казяв, кыдз горöтчис.

— Кин?! Ме! — офицерлöн чочкоммис чужöмыс, топ кузь нырыс эшö нюжалыштiс. — Да ме тэнö тöдан мый кера!

Ыбöс сайын посöдзас дзуркнитiс джодж: кинкö сулалiс да вöрзис. Иван веськыта дзиргис офицер синнэзö, кöть ёсьöн заргы, кваркыш бы эз кер. Öтöрас гизьнитiс-зэрмис поснит зэрöн, койыштiс öшыннэзас и лöнис.

«Кысь жö ме сiйö адззылi, кысь?! — Иваныс видзöтiс офицер вылö, мырсис-думайтiс. — Адззылi кыськö... Бат, гортiсь, или... Или вачкисьö эта вылö... Зумыт Родя топ... Но н-е-е, Иван!.. Родялöн нырыс абу этатшöм... — и кыдз саймис. — Вот эд, Ванька! Вот эд... öтiкласянь да мöдiклаö, и абу я одзат сэрпöсь немецыс? Сылöн эд топ нырыс, öм гöгöрыс и голосыс сэтшöм жö... Сiдз жö эд голясö нюжлалö да кывсö чеглалö, бытьтö сы кодьыс некин абу, сiя только и эм, миян кодьсö мортö оз пукты...» Кытшöмкö секундаö вачкисис ни, что немеццес пасьтасисö миян паськöмö да куталöны миянлiсь солдаттэсö. Но этö вöлiсö только думаэз, а былись одзас вöлiсö асланым, асланым сэтшöм враггез, что тöдiс-тöдiс бы, эз бы и лок этчö, а кежис нiя том морттэзкöт, кöднакöт пантасьлiс вöрас и кöдна нуöтiсö гортаныс. Войнасö бы кытöнкö чулöтiс! Но эд öнi мый лэбзис, он ни кут. «Ог куж овнытö, ог куж!.. — пиннесö гичралiс Иван. — Отирыс вот кыдзкö кужöны...»

Бöра зэрмыштiс-гизьнитiс: орсiс погоддяыс, асьсö мыччалiс, кыдз часто овлö аррезнас. Иван öшынöт унажык видзöтiс эта лымсора зэр вылö, кывзiс лёк тöвсö, кöда то кытiськö дзик мезмыштлiс да пöльыштлiс быд вынсис и лöньлiс. Адззис сук арся кымöрресö, кöдна уйисö лажмыта, тэрмасисö, кыдз кытöнкö мыйкö матын сотчис и тшыныс путриктiс сука да гардчöмöн. Арыс одзлань кежö кöсйис только лым, кöдзытжык кад, а мый жö Иванлö кöсйис оланыс?

— Ми тэнö öнi жö лыям! Вежöртiн?! — офицер видзчисьтöг тэчöмöн ыкöстiс Иваныс чужöмö. — Ми тэнö...

«Асьтö колö лыйны, сука!» — лöг дума чеччöвтiс Иванлöн, гичыртiс пиннесö, но нем эз шу, сё эшö эз верит, что вермасö асланымиссес вийны.

Стена вылын öшалiс кинлöнкö фотография — нывкалöн портрет, кöда басöк чужöмнас видзöтiс веськыта Иван вылö, топ ловья, нельки сiдз, что вöрзяс Иваныс, и нывкалöн топ синнэс бергöтчыштöны... Эта портретыс видзчисьтöг мылякö мезмис тув бердiсь и брякнитчис стенасис джоджö, рез-паз жугалiс стеклоыс, торрес чеччалiсö нельки Иваныс бырöм ботинкиэс дынöдз. Офицерлöн öтiк юрси тылöп эз вöрзьы, синнас эз чикырт, локтiс ыбöс дынö, осьтiс да ыкöстiс: «Эй! Кытöн тэ, ефрейтор?! Татчö!» Солдат сiйö и видзчисьöма — сэтöн и вöлi: сувтчыштiс ыбöс коласын аслас начальник одзын, эрзыштiс: «Кывза!»

— Видзöт менам, Сидоров, — горöтчис офицер. — Видзöт менам... То мунан передовöйö.

— Кывза! — бöра горöнжык ыкöстiс Сидоров.

— Нуöтö, — офицер осьта ыбöсöттяс зэгнитiс юрнас, содтiс. — Сiдз керö, мед быдöс вöлi кыдз колö. Вежöртiн, Сидоров?!

— Сiдз! — рыжöй ефрейтор моросыс одзын лöсьöтыштiс автоматсö.

И Ивансö петкöтiсö керкусис: ачыс одзас, бöрсяняс спинаас öтiк синнас видзöтчис автомат...

Лöнь бöра вöлi — пуэзлöн эз вöрзьы öтiк улок.

«Пышшыны колiс, пышшыны!» — Иванлiсь сьöлöмсö пидзыртiс лöг, обида, видiс асьсö, синнэс вирдалiсö — бергалiсö öтöрö и мöдöрö, сiдз бы и чеччöвтiс да сöтiс вöрас. Но эз чеччöвт, эз пышшы, мыйкö вылö надейтчис, веритiс, что быдöс этö кыдз вöтасьö, нем умöльыс оз ло, а бöрсяняс автоматнас пыкисö спинаас, тойыштiсö лапья кöз увтöдз. Эстöн сулалiс мöдiк солдат, киас видзис кöртзыр, видзöтiс кытчöкö мöдöрö, видзчисис.

— Кыдз олан, Петька? — рыжöйыс гажöн юалiс ёртлiсь.

— Олам-вöлам, — сьöвзис Петька, дзик сьöлöмыс вылын вöлi кокнит, бытьтö бур удж керö — службаыс сэтшöм, что сэсся оз ков буржыксö кошшыны, эм мыйöн ошшасьны ефрейторлö.

— Эстöн муыс небыт, — горöтчис ефрейтор. — Чожа керам, — öвтыштiс юрнас, шынньöвтiс. — И сто грамм шедтам.

— Сiдз. Фронтовöйезö, — серöмтчыштiс ёртыс, то ли асьсö осудитiс, то ли гажöтчис, что шедтö сто граммсö, кöдö колö юны бы мöдiккезлö, киннэз этатшöм погоддяас кынмöны и косьмöны окоппезын.

«Вот сукаэз, а!» — бытьтö сё нем эз вежöрт Иваныс — эз верит, что миян вермасö лоны сэтшöм отир, кöдна сто грамм понда лыясö öнi тэнö и синöн оз кваркыштö. — Быль я мый я?» — эна думаэзöн и локтiс жагвыв кöз увтöдз моз, видзöтыштiс пу вылö увдöрсянь вевдöрöдз. Уввез вылын силь öшалiсö тавося голиэз, кодя дума бурмöтыштiс, что эмöсь вöрас голиэс, сiдзкö, вöрас эм и ур, но кин гортын вермас бы уравнытö? Айыс киас пишальсö эз босьтлы и оз босьт, а Андрейкаыс эшö учöт.

Кöз вылын притькис уркай. Кайес вевдöрсис мездöтлiсö да уськöтлiсö голиэсö. Перыта уйисö кымöррез, но вöлi лöнь, кытчöдз бöра топ оз мезмы лёк тöв да оз понды летны вöрсö и энö кымöрресö. Омöн ва: коккез увтын и кöзыс уввез бердын.

— Юртö эн бергöтлы! — бöрсяняс ыкöстiс рыжöйыс, и мöд солдатыс ни, кöда кöртзырнас сулалiс кöзыс увтын, Иванлö нюжöтiс зырсö да шуис: «Босьт!»

Иван кыдз тувдiс: йöймисö синнэс, вугмисö киэс, эз вежöрт, мый сыкöт лоис.

— Босьт, босьт, — рамыника горöтчис солдат и сюйыштiс зыр оропсö Иваныс ки лапаö. — И гарйы!

— Мыйлö? — Иван кыдз пондiс саймыны.

— Гарйы, гарйы... Некин тэ понда оз понды уджавны, а то ракаэс синнэтö кокаласö.

Иванлöн пондiсö дрöжитны киэс, тырппес, синваэс сатшкöтiсö синнэзсис, вотялiсö муас, кымöрыс кыдз вожасис вылас, пондiс лязны — не ловзисьны, не ыкöстны, кöр сiдз бы эшö олiс. Курччöвтiс тырппесö, кывсö, видзсис бы, пöдiс аслас ловзисьöмöн, эз бы мыччав, что сылö умöль. Медбöрын ловзисис моростырнас, унньöвтiс стыдитчытöг: «Эх, Андрейка-а-а, ог сэсся пантасьö-ö-ö!» — Мый уннялан? Гарйы! — висьталiс вердöм солдатыс.

Эшö öтпыр кöззэсö нетшкöвтiс тöв, кöз вевдöрсяняс койыштiс лысваöн, катшашыдöсöн швычкис Иваныс голяö, рожаас, киэзас, кöдна кынмисö, но кöдзытсö дзик эз ни тöдö, тöлыс шучкöп мунiс бырöм шинель ныр, топ вижгис быд лы пыр.

— Мый сэтчин?! Вöрöтчы! — керкусянь петiс офицер, чеччöвтiс посöдзсис, кобурасис кыскис наган, перыта локтiс Иван дынöдз, кивзыштiс. — Вöрöтчы! — И наганнас сiдз бы и вачкис, öвтiс юрыс гöгöрын.

Иван ружтыштiс да зырсö мöртiс муас. Нач матын эрзыштiс машиналöн шы, кылiсö мужиккезлöн голоссэз, но машинаыс этчö эз катыльтчы, а мунiс кытчöкö бокö. Лэбзисö туриэз, шыасисö вевдöрын: «Курлы, курлы...» Кайес тулыснас кöсйисисö локны бöр. Иван зырсö вынöнжык мöртiс муас, юрсö лэбтiс и жаднöя пондiс видзöтны кымöррес вылö, кöдна кытчöкö тэрмасисö, вöлiсö сэтшöм ни дзорöсь, что вачкисис, бытьтö öнi жö пондас усьны лым да сэтшöм тшöка, что тыртас мусö, гладьöтас быд гöпсö и Иванлiсь шойнасö... Иван синнэзнас кымöрсис кошшис бы туриэсö, кыдз бытьтö нылö висьталiс, мед гортын сы понда вывтi эз горзö: не сiя öтнас... Олiс сiя эшö гортын, бытьтö асласныс вöрын, топ видзчисис лымсö, мед усяс чожажык, мед сы бöрсянь мунны вöравны, и этасянь моросас лоис личытжык, топ вачкисис, что öнi лыясö Ивансö, да не сiйö, а мöдсö, кöдакöт пыр олiс думаэзнас. Ачыс мунас гортö, быдöс висьталас, пондас овны да овны аймамыскöт, быдтас зонсö...

— Гарйы, гарйы, — модис ни офицер.

Муыс быль вöлi небыт, песöксора. Зыр мöртчис бура, кокнита. Иван уджалiс, гарйисис кöртзырнас, керис гусö сэтшöмö, кытшöмö меряйтiс солдатыс.

— Тэрмась!

Тэрмасьнытö эз вермы: чожа мыдзис, пымалiс аскодя кöдзыт ньылöмöн, бöра пондiс симавны кынöмыс — пидзралiс тшыгыс, гудрасис сьöлöмыс, дрöжитiсö киэс, телоыс, коккес. Тшöктiсö тэрмасьны, но эз тэрмась, кыскис кадсö: сувтчис, шоччисис, видзöтiс кöз вылiсь уркайез. Катша пуксьыштлiс кöз йылö, повзис и китшсьытöн лэбзис бöр. Сулалыштiс, синнэсö лэдзис коккес увтö, дума дзугис мыдзсö: «Мыйлö сы пасьтасö? Вевттяс чужöмöс и бур, ась оз ло стыд видзöтны отир синнэзö... Асланым отир вылö... — Обида лыйис — жмитыштiс сьöлöмсö. — Асланым! Асланым эд. Ванька! Стыд бы и висьтасьны...» — синваэссорöн ньылыштiс дульсö. Вöрыс кыдз ловья, видзöтiс да шы эз сет, полiс.

— Вöрöтчы!! — рыжöйыс ни ыкöстiс, кучиксис петiс.

— Ась шоччисьö... — куритiс офицер. — Некытчö миянлö тэрмасьнытö.

«Эх, Ванька, Ванька! Аслыт гарьян... Пессин мыйкö вылö ой и лун, враг öмись петiн да локтiн шойнаыт дорöдз... Кин этчö вашöтiс, кытшöм чёрт кыскис? — горшсö зэлöтiсö синваэс. — Ванька, кытшöм греххез понда? Кинлö и мый умöльсö керин? Мыля сiдз еныс?»

— Уджавны колö, — офицер сьöвзис чигаркасö. — Вöрöтчы! «Эг адззыв сэсся зонöс! — дульсö синваэссорöн ньылалiс, вирснитiс нырнас. — Кöть бы öтiк кыв горöтчыны, малыштны юрсö... И мамö...»

Карзiс рака, кыдз бы дзугис уджсö или рад вöлi, что керöны виль яй — сылö сёян. Кытöнкö зэв кöззэс сайын пондiсö кывны голоссэз: кинкö кинлiськö юалiс: «Мый сэтчин?!» «А... Эти... Смерш я мый я?» — шыасис мöдiк.

— Но нiйö! — кылiс куимöтлöн голос.

— Уджав! — пистолетсö лэбтыштiс офицер. Мыччисьыштiс шондi, кыдз видзöтыштiс, повзис и сэтöн жö саясис бöр, кыдз вöйис. Иван сьöвзис долоньыс вылö, быд вынiсь заргис зырсö муас.

— Тырмас! — уджсö сорис офицер.

— Етша ышö, — юрсö лэбтыштiс Иван, бытьтö сiдз и колiс, лöсьöтчис керны сiдз, кыдз сылö колö, но офицер шуис:

— Пет!

Иван жагвыв петiс уль гу пытшкись, паськöмыс бердiсь пыркöтiс нятьторрез. Ургыштiс лэчыт тöв.

— Бергöтчы! — ыкöстiс офицер.

Иван бергöтчис, и сэтöн жö бöрсяняс брякнитiс сэтшöм вын, что таралiс, и сэсся нем ни эз адззы и эз кыв...

КАЛЯН



1

Гриша гöтрасис неважын, гожумнас гöтрасис, сiйöн, что мамыс пондiс шогавны, пöрис коккес вылiсь да висьталiс: «Зон, кöть мый, но ме уджавнытö ог вермы, кöть кыдз ов...»

Гöтрасис зонка, кöть гожуммезнас етша кин гöтрасьö, кöр гажаöсь луннэз, ойес сэтшöм дженытöсь, что синнэз он ешты куньлыны, бöр ни пондö югдыны, зонкаэс рыттэзнас котрасьöны нывкаэз дынö. Гриша том иньыскöт узьлöны важ керкуын. Керкуын ойбыт югыт. Югытыс видзöтчö öшыннэзöт, кöднö некытшöм штораэзöн озö саялö (немöн и некытiсь босьтны материалсö, медбы вурны штораэз). Видзöтчö ой öшынö, тöдö бы, кыдз жö томмес узьлöны дженыт ойöн, жмитчöны я öтамöдныс бердö, окасьöны я или узьлöны торйын. Гожумся ойыс тöдö, что томмес зонка-нывкананыс рыттэзöн öтамöдныскöт эзö пантасьлö, эзö сайласьö йöр да гид угöввез сайын, но öтамöднысö адззисö, гöтрасисö и пондiсö овны.

Колхозын уджалöны томмес: öтыс гöрö, мöдыс колхознöй пода гöгöрын бергалö — мöссэз чилькöтö. Уджалöны пöттöдз, мыдзтöдз, но мыдзыс эм и абу: локтасö гортö, сёясö-юасö, и бытьтö нем эз и вöв. Вöлi да чулалiс, дзик орсiсö-уджалiсö.

Некыт оз вись, нем понда бы тöждыны, только гажтöмтчöны, бытьтö кузь гожумся луныс вöлi год кузя, год кежö янсöтчылiсö, кинкö топ сералiс бы или дойдiс сьöлöммезнысö, видзöтчис и видзчисис, мый жö лоас, мый жö пондасö керны. Сiйöн Катя водö Гриша бокö, жмитчö сы бердö, дзиргö öтiк синнас öшыннэзлань, думайтö, оз я бы кинкö öтöрсяняс адззыв, и пöдö-баитö:

— Ой, Гриша!

— Мый лоис? — гажöн юалö мужик.

— Тэ водан да чöскыта узян — кокöн он вöрзьöт, а ме... Ойбыт вöтася, ойбыт бытте кинкö корасьö. Умöльöсь эд вöттэс! Быль, Гриша, менö эд вöтöн тэ бокись кинкö пышшöтö бы. Он верит?! Кытшöмкö кöин чужöма зонка вöтлiсьö. Кöть гыжьяв синнэсö, кöть сьöлав, кöть курччав, нем оз мöртчы. Быль! Сёйö бы горт шöрын, ньылыштö лёк горшас, тасалö томся-томöн. А тэ топ кытчöкö мунан — колян бы менö, тэрмасян и бöрат дзар он кер. Мый бы эта сэтшöмыс? Мый сэрпöсь вöтыс вöрдö?

Гриша шы оз сет, пишкышалö нырнас. Он тöд, пондö я иньсö вежöктыны кинкö дынö или веритö Катя вöттэзö. Мужикыс абу осьта ворота кодь, быдöс дынас оз лэдз и дынсис быдöс оз тойышт — асьсö тöдö.

— Гриша, мый лоас?! — Катялöн том вывтырыс би жарöн сотчö, сьöлöмыс педзö нето вöттэзсянь, нето сiйöн, что любитö мужиксö — ачыс аслыс оз ков, Гришаыс бы вöлi, сiйöн и модьö. — Озö я война кöсйö.

Вишыкасьö, пильтыртö нырнас, сьöкыта лолалö инька.

— Кытiсь тэ сiйö кылiн? — оз-оз да юалö мужикыс, кыдз бы сайкалö иньыс бокын.

— Отирыс лёбöны, — Катя ниртчö Гриша бердын, баснисянь сьöлöмыслö лоö бур.

— Ась лёбöны. Мый отирыслö, сiя и миянлö, — лякö Гриша, ас пондасис немымда оз тöжды.

Кöртавны бы колiс баснисö да узьыштны, кöр петухыс ни китöстiс, но киннэз жö томувья баиттöг ойесö джендöтiсö, кöр баитiсö да быдöс эзö ештö баитны. Катя кыдз хозяйка ни, öтiк лунöн эз ов — одзлань ни думайтiс мый керны, сiйöн и висьталiс, что талун-ашын локтас семик, а нылöн чериыс абу, касьтiсьны немöн.

Гриша пуовöй кровать вылын нюжöтчис, мутшнитiсö кикокыс, гичыртiс пиннесö: выныс нюжлалö том мортсö, пидзыртö. Мужик уджись оз пов, но сэк жö оз висьтав, кертöмнас оз ошшась, пöрьясьны оз куж, думайтыштас да вöлись шуас. И шуис:

— Тэ мый горзан чериыс понда? Абу я Кöсваыс зэв. Отир сьöрись огö кольччö. Кыдз тай сказкаас... Ашын тульгыла бöжöс ваас, сымда и колас!

2

Чериавны мунiсö Лёль Зöтякöт. Эз бы, бат, Гришаыс мун чериавнытö Зöтякöт, но аслас кулöмыс важ ни (сизимись вочöм-гöрдззöм), а ёртыслöн кулöм тавося — виль. И колö висьтавны, что Зöтякöт кöть вöрын, кöть ва дорын бур сiйöн, что кадсö весись он öшты, асьтö весись он мыдзöт: ежели чериалан — чери кыян, вöралан кö — простöн вöрсис он лок, сё ни сьöла да ваян. Веськыта висьтавны, Зöтя тöдö мый керö, öмсö некöр осьтöн оз видз, оз быргы — абуись эмсö оз кер. Сiйöн Гриша чериавны мунтöн иньыслö сералöмöн и горöтчис: «Ме кöть Зöтяыскöт ва дорас пеллезöс шоччöта, то тэ вывтi ни уна тотян...»

Дузгыльтчис жö эна кыввез бöрсянь том инька, но мый керны, кöр мужиклöн öмсис пышшис арттöм кылыс, кыдз ва вотьыштiс да йиджис не муас, а иньыс сьöлöмö, только нем вывтi умöльыс эз ло: кылыс абу пуля, абу пыжьян, оз вий и вирöдз оз дойд, рытнас бöра водасö öтлаö, жмитчыштасö и сэсся некытшöм лекарство оз ков.

Сiдзкö, Гриша да Зöтя лэдзчисö рытöн ва дорö, пуксисö пыж вылö, уйисö сэтшöм местаö, кöдö асьныс тöдiсö, кытöн етша кин чериавлö, и ваö тульгисö кулöм. Уджалiсö и эзö ружтö, кашык эзö керö, эзö куритö, енсö эзö матькö. Ваын — кулöм, пыж вылын — мужиккез. Дюттясьö ва вылын пыж и дюттьöтö чери кыйиссезöс. Ыркыт руöн лолалö юыс. Ас мознас чулöтö ойыс кад, кыдз бы полöтö, топ баддез колассянь берегын мыччисяс вакуль, или кöззэз увтсянь вöрдядьыс юалас: «Эй мужиккез! Кыйит я черисö? Одö я менö вердö?»

Гриша, кыдз быдöнныс деревняын, веритö, что вöрын олö вöрдядь, ваын уялö вакуль, эмöсь каляннэз. Мужикыс не öддьöн и полö нылiсь, но ойнас сякöйыс думайтсьö. Да эшö ёртыс аскодя: мыгöр кузьöв да векнит — кöс, лыэс йöрнöс увтын крон видзöны-тыдалöны, голя кыдз турилöн векнит да кузь, кузь чужöм шондiыс вылын жаритчöма, невна сьöдöтыштöма, и синнэс сьöдвевьяöсь, ойся югöр весьтын кыдз осьта гуоккез, кытiсь нем он адззы, и бытьтö верман вöйны, кытчö кинкö дзебсисьöма и видзчисьö — курччöвтö бы. Гриша видзöтö ёртыс вылö, серöмыс пондылö мыйиськö петны, и думайтсьö: «Калян чужöм! Мыля тэнö сэтшöмö нö вайöмась да быдтöмась, а эшö басöк нывка вылö гöтрасян бы...»

Зöтя видзöтыштлö сьöд синнэзнас ёртыслань да бытьтö бы висьталö: «Начкыла ме тэнö!»

Больгышалö ю, лолалö шоныт гожумся руöн. Гриша пукалö пыж вылын. Важын ни сiя тöдö ёртсö, тöдö, что Зöтяись нем повны, только колö вöрöтчыны, то видзöт кыдз бы веслосö вевдöр эз лэбты да эз вачкы. Мужиклöн киэс и сiдз лудöны-уджалöны бы. Лудö и кылыс — басни кошшö, да басниыс оз адззись: Зöтя баиттöг вермас овны асывсянь рытöдз, рытсянь асылöдз, бытьтö кывсö ньылыштöма или öмас ва видзö, баитiссеслiсь баснисö оз кыв — пеллезас нитш сюйöма. Сiдзкö, Гриша ёртыскöт оз баит.

Визывтö Кöсвалöн ва, тэрмасьö кытчöкö. Ваыс сöстöм — ёгтор абу, кунва кодь шоныт, эстöн чериыс эм, но талун мылякö оз шед, эд кыкись ни чапкылiсö кулöмнысö. Чери кыйиссез рытсянь ва вылын. Ойшöрнас топ пемдыштiс, да сэтöн жö бöр лоис югытжык. Каёккез дугдылiсö шыасьны да бöра пондiсö пиксышавны. Зöтя чужöм вылын сё öткодь югöр, сьöдвевья синнэс сё лёкöсь.

Чериалöны кык мужик, оз и адззö, кыдз чулалö гожумся ойыс, югдö нач. Асывланьын кымöрыс гöрдöтiс, и чожа мыччисис шондi. Кыскисö ваись кулöм. Шöрттэз коласö гардчöмась ёкышшез, кельчиэз, щука-мöд да öтiк налим.

Кулöмсö кыскисö пыжö, пондiсö мездöтлыны нильыг чериэз. Гришалöн öмыс реш видзö, шыннялö, рад — пеллесö адззö, ошшасьö: «Сетiс еныс бöра! Лоас мыйöн касьтывны кын синнэсö!» ¹

Ёртыс топ нем эз кыв, но аклялiс-керис öмас кывсö, вöрöтiс да вöрöтiс тырппесö, топ баснисö сöскис да горöтчис:

— Горш тэ, Григорей. Чери вылö горш и одзалiн менö Катяыс вылö гöтрасьны.

Пеничайтöмöн Зöтяыс баитiс, чорыта, лöга, кыдз бы вартлiс кыввезнас.

Гриша этö эз видзчись — бар вайис ², осьтiс öмсö, эз-эз да вöлись горöтчис:

— Гöтрасин бы. Кин видзис? Ме бы эд мöдiкö адззи. Нывкаэс абу я тыр!

Гажöн баснисö разис мужикыс, ошшасис, что сы сайö кöть кытшöм нывка бы котöртiс, пырис керкуаныс и вашöтны эз вермы, медбöрын шуис: «Тэ нö мый, Зöтя? Колö я дузгылясьны нывкаэс понда?» Баснинас вермис юлiсь ружтышалöм, кайлiсь герчкöм, номмезлiсь бизгöм, сералiс асьсö и ёртсö. Но ёртыс öмас бöра ни кыдз ва босьтiс, только нырнас вирснитiс, юрсö бергöтiс мöдöрö, кузь нырсö нюжöтiс баддезлань.

Гажа ю дорын, гажаöсь видззез. Шондi малыштiс и окыштiс видззез вылiсь быдкодь рöма цвет. Цветтэз пондiсö ошшасьны, ошкыны гажа олансö. Öдззис герчкыны кай, сiдз дзуртiс, бытьтö берегыс дрöжитiс. Ваын болснитiс ыджыт чери. Чери кыйиссез пыж вылын сынiсö пелыссэзöн, уйисö гортлань, тэрмасисö пымавтöдз, медбы ештыны мунны уджавны — отир сьöрись эзö бы кольччö. И ло жö сiдз, что Гриша киын пелысыс кропнитiс-чегис, кык тор лоисö пöлок кодь торись. Кольччис öтiк пелыс, кöдöн чожа он уй.

Гриша кыдз кужис, сiдз асьсö и пондiс видны, касьтылiс дедсö и бабсö, а Зöтя кöть бы мый — нем сылö эз вöв, видзöтiс кытчöкö ылö, кытшöм эм рака кодь чужöмыс, сэтшöм и вöлi.

Шондiыс вылын ни, сералö, мыля сiдз шогмис. Мыйкö колiс керны — тэрмасьны колiс, да ваыс вылöт он котöрт. Зöтя пондiс сёйны-видзöтны ёртыс вылö.

— Ась. Мый тэ сэтöнка. Адззамö пелыссö, — Гриша ёртыс киись мырддис дзонь пелыс, пыжсö бергöтiс береглань, пондiс сынны быд вынсис.

Сынiс том мужик. Пыж чожа тюкнитчис-люкасис берег дорö, повзьöтiс витуллез, чöрсканнэз. Лягушка чеччöвтiс-шлёпкисис кысянькö веськыта Зöтя öлöдзö, лöгöтiс зонкасö. Зöтя кутiс лягушкасö чукыля кокöт, бöр шентiс берегö, сьöвзис.

— Пуктiн бы чериэс дынö. Чериняньыс чöскытжык бы лоис! — Гриша серöмтчис, пыж вылiсь чеччöвтiс берегö, куим-нёлись оськöвтiс остожья дынö, ризь-разь менöвтiс-пиньöвтiс öтiк потш, ош выннас кыскис мöдiкö, шупкис баддез коласö, кутчисис куимöт бердö... Бöрйис гладьжыкö, векнитжыкö, кокнитжыкö, сэтшöмö, кытшöм колiс сылö — эз жалейт остожьясö.

Арайлань китшсис катша, баксiс мöс. Турун вылiсь косьмис арся лысва. Гриша уджавтöнняс падмис да усис — кальснитiсö пиннес, дрöбамис юрыс, мурзьыштiс нырыс увтын: «Пукалö сэтчин!..»

Кылiс я этö Зöтяыс или эз, но шы эз сет.

Ёртыс дзарнитiс гажа видз вылö, чеччöвтiс пыжö, шутньöвтiс, пуксис аслас местаö, кузь потшсö öтiк конецнас заргис ваö, дундöтчис, серöмтчис: «Этадз, Зöтя, колö!»

Зорöн уджалiс мужик — пиннес гер, öмыс реш видзö, синнэзнас нерö. Но эз ешты сiя öмсö пöднавны, кыдз ёртыслö мый и лоис, кытшöм пон и пурис: сувтчыштiс пыжыс вылын да кыдз кулакнас Гришалö пöжалiс пельбокас, мöдыслöн пиннес кальснитiсö, горзöмсорöн бриньгыштiс: «Тэ мый?!»

Зöтя кулакнас эшö öвтыштiс юрыс вевдöрын, пишнитiс нырнас и висьталiс: «Тупкав джыннянтö, то видзöт кыдз эшö сёян!» Зöтя синнэзiсь чеччалiс сэтшöм лöг югöр, бытьтö ёртсö лöсьöтчис вийны, сiйöн и эрзыштiс-содтiс:

— Мыля колхознöй остожьясö разин? Ми арнас керим-керим, а тэ...

— Мый ме? — öшис Гриша. — Жаль лоис öтiк потшок.

Зöтя уджалiс ни пелысöн, дзар эз кер ёртыслань, эз шыась — нырнас эз пишнит.

Чикиссез шырисö-лэбалiсö ваыс вевдöрын нач лажмыта, дзульзисö, кылiсö мöссэзлöн джынняннэз, гортланьын баксiс баля, готсис курöг. Фермаланьсянь кылiсö инькаэзлöн голоссэз — уджавны ни пондöтчис отир, а нiя сё сынiсö — тэрмасисö гортлань.

3

Семик лунö асылöн одза-одз инькаэс пöжисö-пуисö сёяннэз, сыбöрын кайисö шойна вылö. Мужиккесö бригадир иньдiс вочны йöр, кöр кадыс вöлi сэтшöм: кöдзсис, но эзö эшö ытшкисьö — кык гöран коласын кад. Деревняын отир кыдз бы лун-мöд кокнитжыка ловзисьöны, шоччöтыштöны асьнысö кокнитжык уджын сэтчöдз, кытчöдз озö пондö ытшкисьны, а кыдз босьтасö литовкаэз, сэк некöр ни лоас гыжьясьны, бöра пондасö куртны садь быртöдз. Быдöс чулалiс кыдз колiс, кыдз ен шуис: касьтiсян лунö некин код-бöб юрöн эз шатлась, некин асьсö эз серав, рожасö эз стыдит.

Чулалiс семик, горзiсö инькаэз. Семик бöрсянь локтiс Троица, кöда лунö некин эз уджав: инькаэз одз асывсянь бергалiсö горттэзаныс, а мужиккез, томмез и пöриссез, асывсянь чукöртчисö вичку дынö — медгажа местаö — и пондiсö орсны челядь моз, кин мый вермис, кин мый кужис: öтiккез вермасисö-ошшасисö асланыс вынöн, бытьтö олiсö весь олiсь жеребеццез моз, сiйöн и чегисö-нярьялiсö, асьнысö мыччалiсö. Позис ошшасьны, что деревняись мужиккес эзö вöлö лякöмöсь нятись, асьнысö эзö стыдитö ыб вылын и вичку дынын — быдöнлö еныс козьналöма вын и прок. Пöрисьжыккес коласiсь медвына вöлi Лёль Фёдор — топыт, зумыт яя да ён мыгöра мужик, кöдалöн рожабаннэс пыр öгралiсö гöрд рöмöн — вир орсiс кватьдасгодся мужиклöн, кöда ружтышалiс да гардiс-вермалiс томöс и пöрисьöс, только öтнассö косьмöм мыгöра Зöтяöс эз вермы куснявны.

Этасянь Фёдор кыдз кужис, сiдз и пондiс ошкыны Зöтясö, пондiс быздыны, что мыйись-мый, ежели кö уськöтчас Гитлерыс, Зöтя коддес сылiсь ныр гöгöрсö тiлясö.

Зöтя кыдз пыр öмас ва видзис-керис да горöтчис:

— Лязам ныр гöгöрсö страмлiсь, Фёдор дядь!

Висьталiс мортыс и синнэзнас чикыр эз кер, бытьтö сiдз и колö, бытьтö зонкаыс лязiс ни ныр гöгöрсö Гитлерлiсь, кыдз вермасьтöн вермалiс ёрттэсö.

Чожа чулалiс Троица — луныс кыдз лэбзис. Мужиккес орсiсö-шоччисисö, рытланяс ветлöтiсö öтамöдныс ордöт, юыштiсö тагья ырöшшез, а нывкаэс басöка пасьтöтiсö кыдзок, сьывтöн пуоксö нöбöтiсö Кöсва ю дорö, купайтiсö ваын, сьывтöн бöр локтiсö горттэзö.

Чулалiс вежалун, бöра локтiсö будденнез, быд лун бöра лоис донася-дона (минута öштан и сэсся он ни адззы), быд лун страда. Уджалiс отир, асьнысö некин немымда эз жалейтö, быд морт тöдiс, — мый керас, лоас сылöн — быдöс богатство ас киэзын, некин вылö надейтчыны. Отир колхозсö лыддис асласöн, паз керис-уджалiс, öт пемытсянь мöд пемытöдз дзуртiс да сiдз, что Гриша том иньыскöт топ эзö ештö пантасьлыны, пöттöдз эз ештö баитлыны, любитчыны. Сьöлöмыс надейтчис, что чулалас гожум, локтас ар, усяс лым, рыттэз лоасö кузьöсь и, озö кö иньдö уджавны вöрö, сэк вöлись том иньыскöт и ештасö дзудзгöтчыны. Думатор эз вöв, что кинкö вермас янсöтны том гозъясö — лёк зверь котöртас коласöттяныс. А петiс сiдз, что зверьыс важын ни видзчисьöм, медбы отирлiсь дзугны удж, янсöтны öтамöдныскöт, му вылö кöдзны горе и шог, кисьтны синва.

Пондöтчис война.

Медодз гортiсь нуöтiсö томмесö, чожжесö, вынаэсö, кöдна немись эз полö, медуна бергöтiсö удж, кöдна пельпоннэз вылын деревняын видзсис оланыс. Гортiсь мунiс и Зöтя, гортö колис пöриськодь ни ай да мам. Зонка мунiс, кыдз бы петiс уджавны ыб вылö или лун-мöд кежö öшис чериавны, мунтöн синнэзнас кваркыш эз кер, эз горзы, öтiк кыв эз горöтчы.

Гриша Зöтяся вöлi томжык и кытчöдзкö эшö олiс гортын, эшö арöн гортын ештiс чулöтны рыт-мöд, рыт-мöдöн кыйис не öтiк гоз нинкöм, сыбöрын сельсоветсянь вашöтiсö уджавны вöрö, иньдiсö овны ылiсь вöр коласын бараккезын.

Мужик вöр керис месяц-мöд, сэтчöдз болскис лымсö, кытчöдз сельсоветсянь эзö вайö юöр, что сылö колö мунны армияö. Эз позь пыксьыны война вылö мунöмись, некин эз видзöт, что гортö кольччö том инь, кöда тыра, и что мам пöрисьöв, пыр шогалö, — кыкнанныс пондасö горзыны. Он висьтав, что тырмас воюйтны, кöр айез тышкасисö Гражданскöй война коста, да и сыбöрын мужиккесö чувйисö-кыскалiсö то öтöрö, то мöдöрö, то японеццезкöт вермасисö, то финнэзкöт кисьтiсö вир. Война да бöра война.

Гриша война вылö эз бы мун — пыксис бы киöн и кокöн, но сыкöт некин уна эз баит, эз юась-висьтась: саясяс я инькаэс спинаэз сайö или оз. Ковсис тэчны котома, чожажык тэрмасьны котöртны пуляэслö паныт, дорйыны Родина, кöр врагыс лёк, вермас локны и татчöдз. Мужик окалiс иньсö и янсöтчис, сьöлöмыс вылын гортiсь нöбöтiс сэтшöм сьöкыт думаэз, что öтджыныс кольччис бы гортö, а мöдыс вöлi сьöрас.

Мужиклöн грамотаыс вöлi етша — беднöй колхозник вöлi, томсянь немöн вöлi велöтчыны, томся-томöн колiс уджавны, вердны асьсö. Но юрыс вöлi пельпоннэс вылын, арталiс кысянь да мыйсянь, кöдöрсянь пöльтiс тöлыс, адззис, что гортын бытьтö бы эшö лыддисö мортöн, эшö вермисö юавны мыйкö колö или оз, вермас я уджавны или оз. И пыр жö вöлöс моз уджöтiсö, пыр полöтiсö — лöсьöтчисö дойдны, ежели кö тальччан бокö или горöтчан мöднёж, юр вевдöрын пыр бытьтö öшалiс чер, сiдз бы и кералiсö петухлiсь моз юрсö да эзö жö кералö; бригадирыс пыр пурис, предыс сёйис бы, да пиннес эзö мöртчö. А армияын, кыдз вежисö вывсис паськöмсö, вöлись быд командирыс, томжык или пöрисьжык, вермис ыкöстны, вермис дойдны, и солдат паныт эз вермы пиньгисьны-дорйыны асьсö.

Медодзза бойын жö, медодзза атакаын командир вöлi код, вувтiс солдаттэс вылö, вашöтiс атакаö веськыта врагыс öмö, пулемёттэзлö паныт, кöр атакаö бы позис котöртны рытнас или ойнас да эз бы ков котöртны веськыта ыб кузя, эз бы ков моросöн пыкны пуляэз, смертьсö пантавны кымöсöн, эз я бы туй кыдзкö кыткö кытшöвтны — орддьыны умöль местасö, врагсö зэлöтны мöдöрсянь, медбы сiя эз адззыв и эз казяв, кыдз пондасö зэлöтны горшсö.

Öтiк атака — и джын отирыс ротаын абу: пöрисö ота ыб вылö, мöдiк атака бöрсянь ротасис дзоннес кольччисö дас гöгöр.

Эта бойын ранитiсö Гришасö и вийисö бöб командирнысö.

Командир местö локтiс мöдiк.

Медодзза бойын, медодзза атакаэзын солдат некинöс эз вий, нельки эз ешты унаись лыйны. Бой бöрсянь шедiс госпитальö, веськöтчис не öтiк месяц. Кровать вылын куйлыны вöлi бур, но киыс веськалiс, и бöра нуöтiсö фронт вылö да веськыта Сталинград дынö, кытöн войнаыс гымалiс медвынöн.

Враг роч армиясö пыкис танккезöн, самолёттэзöн. Лун и ой сотчис муыс. Ыджыт ыб вылын, кöдалiсь дорресö, межаэсö синнэзöн он судзöт, кытöн эз тыдав öтiк пу, кытöн тöлыс дюттьöтiс тыра сю, омöн гардчис тшын. Бусöсь, чорыт му вылöт, кузь туйöт мунiсö мыдз солдаттэз, гурскисö ботинкиэзöн да сапоггезöн. Юррезныс вевдöрöт лэбалiсö самолёттэз, командиррез сiйö и керисö ыксiсö, медбы водны му вылö — дзебсисьны самолёттэзiсь. Но нiя тэрмасисö лэбзьыны Сталинградлань, бытьтö эзö адззö ыб вылiсь солдаттэсö. Дойдöм муыс ружтышалiс, кыдз бытьтö шогалiс, но эз норась, горзыны эз куж. Эта дойдöм му вылын кытöнкö гирскышалiсö нето танккез, нето...

Сьöкыт вöлi вежöртны, мый кылiс паськыт ыб вылын, кытöн быдмис сю и кöда некинлö эз ков, кöдö талисö и сотiсö. Омöн гардчис тшын, сы пыр шондiыс тыдалiс кыдз гöрд-веж шар, кöда бытьтö тэрмасис-уйис, пышшис бы олан весьтiсь, но эз вермы кольны солдаттэсö. Пондылiс дзульзьыны ыбшар да виньдiс. Вöлi сэтшöм жар, бытьтö отир шедiсö баняö, кöдö öддьöнöв лонтöмась, мыйсянь рожабаннэзöт визывтiс ньылöм, ваöсь вöлiсö спинаэз, юррезаныс мыдзсянь да жарсянь дзик мыйкö пуис.

Станция Чир дынын чушыктiс паровоз, мырсис-тэрмасис бы кытчöкö, öтмöдöрö кыскалiс вагоннэз, кöдна сотчисö сысянь, что нач неважын вагоннэсö бомбитiсö самолёттэз.

— Чожажык, чожажык! Немеццез матын, колö нiйö падтыны! Вöрöтчö! — юр вевдöрас наганöн öвтiс тöдтöм командир, горöтлiс солдаттэзлö, öт кинас сiйö и керис — чужöмыс вылiсь чышкышалiс ньылöм, мöднас — öвтiс наганöн. — Вöтчö, челядь! Тэрмасьö!

Мыдз солдаттэз кыдз саймыштiсö кыз онiсь, кытчöкö и мыдз öшис, топ бöрсяняныс вачкисö шатьöн, чеччöвтiсö öтмöдöрö, водiсö станция гöгöр, пондiсö гуддисьны винтовкаэзаныс, а кöдна гарйисисö муö — тэрмасисö.

Эзö ештö бытшöмика лöсьöтчыны бой кежö, кыдз одзсяняныс мыччисисö танккез.

4

— Хальт! — ыкöстiс немец да брынгис Гришалö. Солдат жмитiс винтовкасö, но синнэсö эз осьт.

— Чеччы! — мöдöтпыр брынгисö солдатлö, кöда жмитчис, крот моз заргисис бы муас, но му вöлi чорыт, эз дорйы. И Гриша жагвыв пондiс лэбтiсьны гырдззаэс вылын, сыбöрын сувтiс пидзöссэз вылö, киас сё видзис винтовкасö, кушкыртчис курöг моз, видзчисис кыдз лыясö или вачкасö. Синнэсö курöтiс тшын, кöда пырис нырпыссэзас, горшас. Ыб вылын нач матын сотчис танк, би нюлiс кöрт, бергалiс, кыссис сю дынöдз. Гриша думайтыштiс, что танксö öзтiсö сылöн ёрттэс, кöдна матын эзö тыдалö, нето ештiсö пышшыны, нето... Зубытöсь вöлiсö шульга киыс и шульга кокыс, но зубытсö кылiс и эз, кöр немец ас мознас ряксiс, чужöм одзын öвтiс автоматöн, брынгис винтовкаö, и сiя таралiс бокö.

Гриша медодз эз вежöрт, мый сiйö тшöктö керны немец, мыля оз лый, кöр колiс бы лыйны. Сiя эз бы сетчы пленö, эшö эз бы верит, что шедiс ни пленас, что сыкöт öнi жö мый вермасö, сiйö и керасö, что оз ни адззыв ассис ёрттэсö, гортсö, том иньсö, кöда сэтöн жö мыччисис синнэс одзö да горзöмсорöн юалiс: «Мый нö тэкöт лоис, Гриша?! Мыля нö сiдз?!»

Синваэз сöдзисö синнэсис. Öшис инь.

Матын сотчис танк, кусны эз вермы. Би нюлiс танк гöгöрись сю. Сiя чажöтiс-сотчис, нырö вачкис пöжалöм няньöн. Вöлi сёр павжун гöгöр — этö вежöртiс Гриша, кöр немец автоматнас тюкнитiс юрас, öвтыштiс, мыччалiс, медбы кытчöкö мунiс. Луныс немымда эз öшты öдсö, сэтшöм жö вöлi жар, пöжис, немöн вöлi ловзисьны.

Гриша жагвыв чеччис му вылiсь, жагвыв киэсö лэбтiс вевдöрö, но шульга ки эз кывзiсь: сотiс и чукыртiс зубыт.

Немец зубыта брынгис бöрас. И пондiс шагнявны джöмдалöмöн солдат, мунiс и ас гöгöрсис топ нем эз адззы, кыдз пон, кöдалöн эз вöв горт, кöда шедiс лёк морт дынö. Чожа петiсö тшын коласiсь, югйöвтiс шондi, пондiс ёрны синнэз да шонтны öддьöнжык. Гриша шагнялiс кытчöкö, видзöтчис, мыйкö синнэзнас кошшис, натьтö, ёрттэсö бы адззис, надейтчис, что нем умöльыс оз ло: вöтасьö, что вот ёрттэс мыччисясö, бöрсис немецсö вашöтасö, и сiя бöра лоас тöдсаэзкöт — асланым отиркöт, кöднакöт эз вöв гажтöм. Но ёрттэс некытöн эзö пантасьö, сэк öддьöнжык повзьöтiс дума: «Мыля нö öтнам?!

А тэ эд сэтшöм и эм. Тöртöм порозок. Некинкöт бытшöма он куж тöдчыны не гортын, не отир коласын. Кольччин ёрттэт сьöрись», — сiдз пеничайтöмöн ас йывсис думайтыштiс Гриша. Думаэзнас пышшис бы немец дынiсь, котöртiс гортöдз, пантасис иньыскöт, кöда бöра топ лоис синнэс одзын, кöритöмöн горöтчис: «Гриша, оз я тэнат гортын кага быдмы...» Катя баитiс сiдз, что бытьтö бы кытöнкö вöлi зэв — голос пеллез одзын. Солдат нельки бергöтыштiс юрсö, видзöтыштiс бöрланяс, и немец мыйкö ыкöстiс — тэрмöтiс.

Солдатöс нуöтiс враг, Гришалö лоис сэтшöм умöль, что горшсö зэлöтiс лолыс, синваэз сöдзисö син доррезас, думаэзнас сiдз и пышшис бы, сiдз бы иньыслö висьталiс, медбы сiя эз горзы, что быдöс лоас бур, ежели озö вунöтö, пондасö касьтывлыны нянь-сов дорас. Катя... Кöдатöг гортын эз вермы овны, öтлаын месяц-мöд олiкö эзö ештö öтамöдныскöт бытшöма любитчыны или киннэзкö моз гир-вар керны, пурсьыны, лöгавны, сiдз кыдз бура эзö ештö тöдсасьны. Зонка-нывкананыс эзö дружитö, пантасьлiсö только сiдз, кыдз томмес öтамöдныскöт пантасьлöны деревняын: öтлаын уджалiсö, öтлаын тöввезöн котрасисö пукаланiннэзö. Овнытö öтлаын эзö ештö, эзö ештö быдтыны челядь. Этасянь, что думаэс вирдыштiсö-пышшисö гортö, пантасисö иньыскöт, сiя лоис эшö донажык, любожык, сэтшöм, кытшöм иньыс öтiк мужиклöн эз вöв, а сылöн вöлi и кольччис. И кыдз пондас овны öтнас да быдтыны зоночкасö? Мылякö думайтсис, что кагаыс зоночка. Кыдз? Или адззас мöдiкö — мöдкодьö, оз пантав Гриша кодьö, озö нуöтö война вылö. Но и ась, мед мунö мöдiк сайö. Оз жö понды öтнас кувтöдз ой-лунсö джендöтны, кöр öтнаслö лоас öддьöн сьöкыт. Солдат некин дынö немымда эз вежöкты иньсö, эз лöгав. Эд Катя эз вöв виноватöй, что сiдз шогмис. Бöрас немец бöра мыйкö ыкöстiс, автоматнас зубыта тангис спинаас. Юрсис зэгнитчисö иньыс йылiсь думаэз.

«Пон!» — Гриша гичыртiс пиннесö, висьталiс бы немецлö, но сы моз эз куж баитны, нельки вунöтiс роч кыввез.

Враг, бытьтö кылiс думаэсö, вежöртiс, лöгасис, брынгис и вермис бы былись вийны.

«Но и ась вийö! Мед лыйö! Öддьöн тай...» — солдат немымда ни эз жалейт асьсö, медодз вöлi жаль иньыс. Сыбöрын тöдвылас усис мамыс, кöдö бöра жö жалейтiс медöддьöн сы понда, что кывсяс кö гортö, пондасö кö тöдны учöт посаданыс, что шедiс пленö, оз я кинкö понды быздыны — пиннесö вузавны, что немеццеслö ачыс сетчис. Быд морт, кыдз гортын, сiдз и мöдiк деревняэзын, тöдтöммез и тöдсаэз сiдз жö синнэзö пондасö бытшкыны — паныт висьтавны, кöритны и серавны, что быдтiсö Гришкасö, быдтiсö, гöтралiсö, а сiя... Мед ни умöль мортö пуктасö, и кин тöдö, мый эшö лоас одзлань, кыдз эшö ен шуас овны инькаэслö. Оз я эшö сiдз пет, что кыдз враггезлiсь нач разясö олансö, озö я иньсö да мамсö кытчöкö гортiсь нуöтö и керку-картасö разьö.

Эта вермас лоны, кöть солдат и бура тöдiс гортiсь отирсö, тöдiс, что посаданыс етша понкулиссес-мортсёйиссес, етша кинöс кинлöкö вузалöны, олöны дружнöя. Но вöлi ни эд, что Няридз Миколöс öтiк кыв понда кытчöкö дзимлялiсö. Проша Сергейöс нуöтiсö гортiсь, и öшис мортыс. Эшö öтiк-мöдiкöс дойдiсö, кöть и гортiсь эз нуöтö. Олан сэтшöм, что мыйись-мый, кывсяс кö, что пленын, нем вылö вермасö не видзöтны, некин оз жалейт.

— Шнель! — бöрсяняс ыкöстiс немец.

Шондi шонтiс быд вынсис. Кад вöлi рытлань ни, но жар пöдтiс öддьöнжык — немöн ловзисьны. Пакмис-косьмис горшын.

5

Немец вайöтiс деревняö, кöда вöлöма неылын паськыт ю дынын, но ылiсянь эз тыдав. Гортын быд муок и паськытжык ыб мыссэз вылын, и деревняэс унажык абу гладь местаэзын. А эстöн му — гладь, топ пызан пöв. Деревня поздiсьöма логок дорö, керкуэс жмитчöмась öтамöдныс бердö, нюжöтчöмась лог пöлöн. Керкуэс топ тöдсаöсь, гортын кодьöсь жö. И отир вермис сэтöн овны асланыс посадiсь, вермис бы кинкö петны керкуись да тöдса голосöн юавны: «Григорей, мыля нö?..» — и öмсö пиньöвтiс, кыдз казялiс немецсö. Но некин некытшöм керкуись öтöрö эз чепöссьы, öтiк морт эз тыдав улицаын, öтiк пон гав эз кер, öтiк курöг эз готсьы, эз китöст петух, только чирзiсö воробейез, дзик нылiсь кинкö мыйкö гусялöма. Оськалiс улицаöт солдат, биргылясис, сiдз висис ранитöм кокыс. Былись кокыслö лоис зубытжык, топ лидзимас быдмис чирей, ядритiс-тшепитiс, эз лэдз тальччыны перытжыка, топытжыка. Но эз позь сувтны, пуджны вешьян коксö, видзöтны, мый лоис кокыскöт, ыджыт я ранаыс.

Немец нуöтiс улицаöт, вайöтiс школа öшын увтö — ыджытжык да басöкжык керку дынö, кöда вöлi Кöкöваныс кодь жö. Школа дынын öтiк челядёк эз тыдав, öтiк голос эз кыв. Некин эз вöв и сельсовет дынын, кöда посöдз вевдöрын павьялiс гöрд флаг, бытьтö немись эз пов, топ эз лöсьöтчы властьсö сетны немеццеслö, гордöя Гришалö ошшасис: «Эн пов, ёрт! Чожа ми нылiсь ныр гöгöрнысö разямö!»

Этасянь солдат сьöлöм вылiсь кыдз бытьтö ыскöвтiс сьöкыт из, и сысянь, что сельсовет гöгöрын вылына шырисö-лэбалiсö да дзульзисö чикиссез, лоис топ гажажык, кокнитжык, нельки горш дугдiсжык косьмыны.

Сельсовет дынö öтöрсянь и мöдöрсянь пондiсö вайöтны Гриша коддезö жö — немеццес чукöртiсö пленнöйезöс, кыдз бытьтö вашöтiсö пода, кöда шедлöма кöин пиннезö: öтiклöн — паськöмыс летки-петки косяссьöма, мöдiклöн — гимнастёрка вирöсь, куимöт — Гриша моз жö тальччö и биргылясьö — быдöн чужöмыс вылын мыдз, быдöнлöн рожабаннэс тырöмась нятьöн-бусöн. Пленнöйес томöсь, мукöдыс эшö вачкисьöны челядь вылö. Öтiк шынньöвтiс, кыдз бытьтö эз вежöрт, мый ныкöт лоис, мöдiклöн нюжалöма чужöмыс, и синнэзас тыдалö сэтшöм югöр, топ öнi жö горöтас да пондас ыксыны мамсö.

Пленнöйез чукöртчисö сельсовет öшын увтö, казялiсö флагсö, чатыртыштiсö юррезнысö, топ гажмыштiсö.

Вувтiсö-ыксiсö асмознаныс немеццез, сэтöн жö автоматсянь сярйыштiсö-лыйисö флагö, и гöрд рукляыс быдöн одзын резьдiс, бедёкыс чегис, флагторрес онняюрöн лэбзисö увдöрö.

«Сволоччез!» — кинкö солдаттэз коласiсь гичыртiс пиннесö, горöн эз ружтышт, но немец кылiс эд пленнöйлiсь баснисö, лэбтыштiс автоматсö, жмитыштiс кынöм бердас и сотiс-лыйис солдатлö, кöда лиг-ляг водiс бусöсь луд вылö. Гöрд вир пондiс визывтны вийöм морт увтiсь, юкталiс мусö, гудыртчыштiс Гришалöн сьöлöмыс.

Лун, кыдз öшöм, эз тöд мый керны. Шондi тэрмасис дзебсисьны керкуэз сайö да öшис-кышасис керку юр бердö.

Пленнöйезöс пондiсö нуöтны кытчöкö одзлань, пода моз вашöтiсö. Мунiсö табунöн. Гриша бокын ниртчис-шагнялiс пöрись чужöма солдат, кöда ружтышалiс не сiдз ранаэзсянь, кыдз сысянь, что немеццес вартлiсö пленнöйесö, не öтiк морт ни вийисö.

— Зверрез! — ныр увтас тоткис пöрись чужöма солдат. — Сорок первöй годас вöлiсö рамжыкöсь. Кöр ме шедлi кытшас, гортлань мунi и некинлö топ эг ков, сэк немеццес и кутiсö менö, мырддисö ременьöс, сэтöн жö лэдзисö бöр, öвтыштiсö кинаныс, ась пö мунö... А кытчö? Натьтö, враггез думайтiсö, что войнаыс дыр оз кыссьы, неделя-мöдöн миянöс разясö, воштiсьны лоас некытчö, кыдз ны увтын и овны, а петö... Ныждiсö невночка пиннезнысö кöиннэзлiсь и эшö ныждасö, ужо, кыдз эшö чеглаласö!

Биргылясис-шагнялiс ранитöм кокнас Гриша, ружтышалiс, видзöтчис омöн, кывзiс ёртыслiсь басни, кöдалöн баиттöн тошсялöм рожабаннэс пиньласисö, сiя чикралiс синнэсö, модис, что вузаласö нiйö, кыдз бараннэзöс шырасö, нимтасö и пондасö уджöтны, озö кö вийö. Вермасö и вийны: «А мый тэ сэтшöммеслiсь босьтан?! Виясö! Эх! Ог жö бы эшö кув да, тыдалö, ковсяс».

— Кинлö миянöс вермасö вузавны? — Гриша эз вежöрт ёртсö, юасис.

— Кинлö, кинлö... Да американеццеслö жö! Мый тэ думайтан? Нiя и эд бытьтö бы миян дор, а кыдз видзöтны, сiйö и думайтöны, кыдз бы миян кодьсö доддявны.

Сьöкыт туй, сьöкыт басни, сьöкыт думаэз. Пöдтö жар. Бус öшалö юррез вевдöрын. Некин оз тöд, кытчö нуöтöны, мый лоас — смерть видзчисьöны.

Зэв туй бокын сiсьмö вöв, кöда вылын виклясьöны гаггез, лэбалöны гуттэз, ныр чегö сьöкыт дук. Сэтöн жö кулöм вöлыс бокын куйлö кулöм морт. Зэв отир коккез дынiсь лэбтiсьö пöт кырныш да бöр пуксьö нач матö. Гришалöн висьöны киыс и кокыс, висьö юр, сималö кынöм — тшыг нималö сьöлöм гöпсö, етшыс абу мунны. Пуксис бы да шоччисис, но немеццез озö думайтö шоччöтны, лöг голоссэзöн ыксöны-тэрмöтöны. Пленнöйлöн коккес асьныс чышкöны му вылiсь буссö, вешшöны одзлань, кыдз вöтын.

Косьмö горш. Кытшöмкö деревняын öшымöс дынын тыра ведраöн сулалiс пöрись старушка: юрсиыс нач дзор, чужöмыс чукрассьöм, вылас паськöм öшалö топ полокала вылын: некöр абу сёйлöм я мый я, и видзöтö пленнöйес вылö.

— Мый нö тiянкöт, дитяэз, лоис? — юалiс пöрись, кöр пленнöйес локтiсö öшымöс дынö. — Поди, горшшезныт косьмöны, юит бы васö. Гриша ньылыштiс дульсö — горшыс желля, кыдз бытьтö сэтчин кинкö гыжьясьö. Горшыс сiдз ни косьмис, что ваыс бытьтö патшкис аскодя дукöн, кыдз нянь.

Кинкö пленнöйес коласiсь шагньöвтiс öшымöслань, но эз ешты шаг керны, коксö пуктыны муыс вылö, шваткис лыйöм, и мортыс усис.

Пöрись мортлöн, кöда тыра ведраöн сулалiс отир одзын, пиньöвтчыштiс öмыс, öддьöнжык чукыртчисö рожабаннэс, кусыштiс син югöрыс, жевгыштiс: «Господи, мый нö эта лоö? Мыля нö сiдз? Еныс оз я мый я адззы?» — пернапасасис, косьмöм кинас чышкыштiс рожабансö.

— Эх, баб! Еныс эм да узьö, оз адззы, мый керсьö му вылас, — шыасис сiя жö, Иван нима тоша солдатыс, кöда мунiс зэв-зэв Гришакöт, öмсö пöданöн эз вермы видзны — джын голоснас да сё ни мыйкö висьтавлiс, мед немеццес баснисö эзö кылö, поннэз моз эзö лöгасьö да вачкö или лыйö.

Шагнялiсö одзлань, öвтчисö, эзö тэрмасьö. Тэрмасьны вöлi некытчö. Сё косьмис горш. Öтмоз шонтiс шондi. Деревня конецын чирзышалiсö воробейез, кивнитiс пон да сöтiс котöртны ыб кузя.

— Ежели бы командиррезным вöлiсö юраöсь, ылöсаöсь, этадз бы эз ло, — бöра Гриша бокын шыасис ёртыс. — Эз бы ло-о-о...

Гажтöм голосыс. Обида да шог сыын, кыдз мортлöн, кöда абу абыз кодь, кöда некöр эз вöв командирöн, некытшöм начальникöн гортын и армияын эз уджав. Сiя асьсö тöдiс, керис, мый сылö еныс шуис керны, уджалiс. Уджалiс да сiдз, что некин эз серав, некин эз шу сiйö дышöн. Иван гортын вöлi уна басниа, но тöдiс, кытöн и мый баитны, и эстöн, пленын, видзöтчис да вöлись и горöтчис сiйö, мый йылiсь эз думайт Гришаыс, сылö юрас эз пыр видны командиррезöс, норасьны кинлöкö, что ны увья шедiсö пленö.

— Этадз бы эз ло, ежели юраöсь вöлiсö бы командиррезным! — вынöнжык ни шуис Иваныс Гриша пель одзын, — эгö бы ми тэкöт пленас шедö, а то эд, öнджа... Куламö и некин оз понды тöдны, мый понда да кытöн ловным петас. Бойын кыдзкö стыд бы эз вöв кувнытö.

Эна кыввез бöрсянь нем эз вежсьы, сё вöлi сiя жö кузь туй, сэтшöм жö жар. Мыдз öшалiс пельпоннэз вылын, лязiс, кыскис бöрлань. Кынöммез сималiсö сэтчöдз, что солдаттэз эзö ни вежöртö висьöны я кынöммезныс, или тшыгыс нималö кольччöм вын.

Гриша понда нем эз вежсьы, вöлi пленын, пленö и кольччис, мунiс — бокö эз лысьт тальччыны. Мыдз лязiс садь быртöдз. Сiя öвтчис кыдз кольмöм, сылö нем эз ков — нем олансис эз видзчись. Но сэтöн жö вывтырас топ койыштiсö кöдзыт ваöн, кыдз бы сайкалыштiс кольмöм юрыс, саймис кыз онiсь. Думаэз вöрзисö юрас. Сiя видзöтыштiс омöн и вежöртiс, что оланыс му вылас абу кусöма: туй бокын, коккез увтын чеччалöны кöбывкаэз, чирзышалöны, немись и некинлiсь оз полö. Ыб вылын быдмö сю, кöть сiйö и тальöмась, пондылöмась сотны, но быд заыс тальöм бöрсянь лэбтiсьыштöм, сувтыштöм кокыс вылö, нюжöтчöм шондi югöрлань. Туй бокын быд бадёк-шатёк сэтшöм басöк аслас зелёнöй листöн, что кулан кö, некöр этö олансö он адззыв, некöр он понды кывны ёрттэзлiсь басни. Этасянь эшö öддьöнжык охота вöлi овны. Сiя гичыртiс пиннесö, думаэзнас, бöра пондiс баитны аскöттяс: «Ошшасьны кужамö, а кернытö огö вермö. Былись ми, солдаттэс, я виноватöсь, что война вылын быдöс шогмö бöрöн? Ме ачым я мый я сетчи пленас? Менö эд кытчö нуöтiсö, сэтчин и мунi, мый тшöктiсö, сiйö и кери. Öтiк командиркöт эг пиньгись, кывзiси, думайтi, что быдöс лоас бур. Не весь Иваныс командирресö видö. Былись оз я ков юраэсö юртöммезö пуктыны? Командиррез!.. Кин тiянöс и кытчö велöтö? Вердöны, пасьтöтöны, а тi мыля сэтшöмöсь?»

Гриша оськалiс ёрттэс коласын, думайтiс сэтчöдз, что сунки-панки падмис нять корöгö, невна эз усь, но эшö выныс тырмис, медбы топытжыка сувтны коккес вылö, оськавны кузьжыка, сiя жö Иванлiсь юавны: «Мыля миян командиррезным нö сэтшöмöсь?»

Иван сьöкыта ловзисис, оськöв-мöд оськöвтiс, серöмтчыштiс, кижган голоснас кижгыштiс:

— Кывзы, сказкаас мый висьтассьö... Вöлöма-олöма пö царь. Ылöса пö вöлöма царьыс и Иван-дураксö иньдöма пö уджавны сэтшöм уджö, кöдö сiя дыш увья некöр абу керлöма, но мунöма уджавны, — бöра серöмтчыштiс. — Öнöдз пö уджалö, сiдзкö, ачыт, ёрт, думайт кысянь да мый шогмö, ме ог понды веммезöс ёна мыдзöтны, — гурскис-керис, оськалiс, да эшö висьталiс. — Мый кöдзам, сiйö и вундам...

Тоша Иван, тыдалö, вöлi сiя отир коласiсь, кöдна кужисö серавны асьнысö, олансö. Вермисö отирöс пиннезныс вылын видзыштны, да сiдз, что кывзан и он адззы, кытчö баснинаныс пусö пöрöтöны, кинöс сералöны. Юрöн колö думайтыштны, сэк позьö вежöртны Ивансö.

6

Чулалö кад. Нюжалö олан, кöть и оз вачкись олан вылö.

Локтiс ар. Погоддя нач тшыкис: лунiсь-лунö пондiс зэрны, лоис кöдзыт. Пленнöйезöс видзисö ыб вылын, кыдз кöртiсь-проволокаись керöм пода йöр пытшкын. Йöр гöгöрын сулалiсö керкуоккез-вышкаэз, кыдз ыджыт кайпоззэз, кöдна пытшкын поздiсьöны не сьöдкайез, а сулалöны автоматтэзöн да пулемёттэзöн часовöйез.

Лагерьын пленнöйез понда öтiк керку абу: юррез вевдöрын вевтöсыс — кымöр, коккез увтын джоджыс — му. Увдöрсянь и вевдöрсянь ва, и кынмö отир, васянь сiсьмö. Бырö паськöм. Бытьтö ловйöн сiсьмö морт, и омöн павьялö багсьöм дука ру. Вердöны сiдз, бытьтö озö вердö: лунтырöн сiмöм бекöрокö чольскасö похлёбка чужöма сёян — рушытик ва, кытöн, кыдз Иваныс шуö, уялöны картошкалöн кышшез да шыррезлöн гыжжез, мыйсянь чожа вочман и оча кок вачкан.

Отир сэтчöдз тшыгьялiсö, что Гриша аслас синнэзöн адззылiс, кыдз рытöн öтiк пленнöй чöвтiс йöрнöссö, мöдöртiс и вурассэзiсь пондiс кутавны тойез да шупкавны öмас. Морт сöскис гаггез, сёйис нiйö, кöдна сёйисö асьсö. Гриша видзöтiс эта вылö, сылö лоис недолыт, но эз вермы осудитны мортсö, кöдалöн оланыс гудыртчö-кусö. Öтiклöн олан вылö гудыртчис сьöлöмыс, мöдiк бытьтö гажöтчис. А Гриша думайтiс: «Мый нö эта лоö?! Огö я быдöнным бöбмö, огö я пондö сёйны öтамöднымöс?»

Вердiсö умöля, но уджöтiсö öт пемытсянь мöд пемытöдз: уна отир ыб вылын гарйисö му, кöдö тэчисö тачкаэзö, катыльтiсö железнодорожнöй станцияöдз и кöдöн тыртiсö вагоннэз. Сера-кутшша паськöма отир жöдзис öтмöдöрö ыб вылöт, мырсис. Етша кин вежöртiс, мыйлö гарйöны мусö, кыскöны вагоннэзö, мый юрас пырöма немецлö, кöда керö арттöм удж. Сэтöн сiя жö Иваныс серöмтчис да висьталiс:

— Эх тэ, Григорий! Немец абу миян кодь абыз. Тöдö мый керны, бура вежöртö, кытöн няньыс буржыка шогмö, оз миян моз оланнас орс.

Гришалö этатшöм басни бöрсянь юрас пырис, что немецыс весись абу лэбтöма войнасö, богатöя олö да эшö лоö бы богатжык, нельки гортас кыскö сьöд сина мусö.

Кытöн бы эзö вöлö, кыдз бы эз овсьы, кыдз бы врагыс эз дойд, но олiсö. Гриша öтнас пленын эз ов — гöгöр вöлi отир.

Медсьöкыт кадö, кöр эз ни бы овсьы, дынас медодз вöлi Иван нима ёртыс, кöда вöлi пöрисьжык, кöда баиттöг дыр эз вермы овны, ошшасис, что кöр-некöр мезмасо пленсис, мунасö горттэзö, пондасö уджавны аслыныс — гöрны, кöдзны, быдтасö сюэз. И челядь лоасö чукöр. Пондасö овны сiдз, что öтамöднысö кылöн озö пондö дойдны — öтiк морт оз шед тюрьмаö, некинöс гортсис некытчö оз пондö нуöтны. Быдыс пондас тöрны му вылас, только колö вермыны лёк врагсö.

— Гриша, кылiн! Видзöт жö, мымда миян отирыс! Вийöны, вийöны и вийны озö вермö. Эстöн дзöрамö, а фронтыс вылын эшö мымда. И кытшöм отир, а! Кöда, кывзы, ачыс оз сёй да мöдiкöс вердö. Сэтшöммескöт стыд абу тöлiсь бы судзöтны и врагсö пидзыртны. Веськалi бы чожажык киыт, ми бы тэкöт эшö гудыртiм. Мыля киыт дыр оз бурд?

— Ме кысь тöда? — Гриша чутрасис, малалiс кисö, эз тöд мый керны.

— Нем эн шу, ужо, ме пондыла веськöтны! Кыдз бурдас ранаыс, ми тэкöт эстiсь шыбыльтамö, зонка. Мездöтчам немецыс киись да эшö котрасьыштам муыс вылöт. Кыдз думайтан?

Иван баитiс и керис. Мужик кытiськö адззис чигаркапон, адззис кöрт да галяторрез. Рытöн полаыс увтын öзтiс чигаркаторсö, куритыштiс. Табак пöимсö öктiс кырымас и эта пöимöн киськалiс Гришалiсь ранасö.

Чулалiс кад, öтiк лун вежис мöдiкö. Гришалöн киыс пондiс бурдны. Чорзис ар, кöдздöтiс öддьöнжык. Луннэзнас вылын павьялiсö ни чочком кымöррез, и лэбалiсö лымторрез. Луншöрöн, кöр пленнöйес нырьясисö ыб вылын, Иван Гришалö чикыртыштiс синнас, и кыкöн дзебсисисö гуокö, вöрзьытöг куйлiсö сэтчöдз, кытчöдз рытнас эзö нуöтö пленнöйесö.

Кык ёрт пышшисö пленiсь, мунiсö вöррезöт, кежалiсö деревняэзö, пантасьлiсö асланым отиркöт, юасисö кытчö мунны. Отир отсалiсö басниöн, вердiсö кин мыйöн вермис.

Кык неделя öвтчисö пышшиссес да унажык сайласисö вöррезын, кыссисö гортлань, но гортныс вöлi вель ылын.

Чулалiс кад. Öтпыр сёр рытöн локтiсö кытшöмкö деревняö, пырисö дорись керкуö. Панталiсö бура, бытьтö видзчисьöмась. Порог дорсянь пуксьöтiсö пызан сайö. Пызан вылын пань и нянь: сёй пöт да одзлань ов! Ёрттэз юисö-сёйисö да хозяинлiсь кывзiсö басни, кöда питьыртiс уркай моз, кыдз кужис, сiдз и ошкис асьсö, висьтасис, что некытчö оз йöрмы — биись и ваись петас дзонь, видiс немеццезöс — отир сёйиссезö пуктiс, кöсйис и вöзйис смерть, висьтасис, что Гöрд армия нач ни матын: лöнь лунö кылö ни лыйсьöм. «Тi, челядь, кыдз петатö миянiсь, некытчö эдö кежö, сё мунö веськыта, сэк быдöс лоас бур, а öнi сёйö пöттöдз. Ме, кывзö, ачым шедлi пленас и тöда, кытшöм сэтчин оланыс, сiйöн тiянöс и верда — ачым ог сёй, но ёрттэзöлö бöрья няньторсö сета».

Хозяин веськыта видзöтiс синнэзö — кваркыш эз кер, баснинас эз джöмды, сiдз сюльтыртiс, что кык ёрт былись думайтiсö, что этатшöм мортсö кошшан да он адззы, а адззин кö, ошшась сыбöрын.

Пызан сайын сёйисö солдаттэз. Тшыг увья пурисö сымда нянь, мымда тöрис кынöммезö, а эта коста хозяин петiс öтöрö, минута-мöд кытöнкö олiс и сьöрас вайöтiс враггезöс.

— Хальт! — оссис керку ыбöс, немец порог вуджис, автоматсö иньдiс пызанлань и пон моз гавзыштiс.

— Опо-о-о-нь! Тэ нö мый кера-а-ан? — горöтiс керкусис хозяйкаыс, горзöмсорöн пондiс пеничайтны. — Грех жö тэныт лоас отирсö сёйöм понда. Еныс мургыльтас юртö.

Бöра враг киэзын, бöра пленын.

7

Овлö жö сiдз, что морткöт олан бытьтö орсö-сералö. Олан сералiс и Гриша вылын, кöр мöдöтпыр шедiс немеццез киö. Уна вартлiсö, вийисö бы да вийны эзö вермö, веськыта нуöтiсö концлагерьö да сэтшöминö, кытiсь пышшыны нем вöлi и думайтны, кытöн бöра оланыс нач эз понды вачкисьны олан вылö.

Гришаöс бöра уджöтiсö рабöс моз, понöс моз вермисö вийны быд лунö, быд часö. Вердiсö сэтшöм умöля, медбы тшыгсянь отир торксис унажык. Каторга оланiсь мезмывлiсö только ойöн, кöр водлiсö узьны, кöр врагыс мыдзлiс ни кешитчыны ны вылын. Шоччисьны водлiсö пленнöйес: öтiккез сэк жö ланьтлiсö, мöдiккез эшö бергалiсö бок вылiсь бок вылö. Дзуртышалiсö нараэз, эшö сёйисö-вувтiсö поннэз, вышкаэз вывсянь лыйлiсö часовöйез. Баракö пырлiс немец-офицер, вердöм ён морт, кöдалöн голос вачкисис гора джыннян вылö. Офицер кужис баитны рочöн, эшö буржыка вермис матькыны енсö, отирсö. Быдсö, кыдз кужис, сiдз и шуис-видiс, ошшасис, что сiя олöма Москваын, тöдö кытшöм дыш порссез кодь роч отирыс, что нем ны вылö видзöтны, а колö ой и лун уджöтны.

— Сувтö стройö, порссез! Тэрмасьö! Вöрöтчö! Видзöтö, менам пистолетыс заряда, пуляэс тырмасö быдöнлö! Кинлö шуа?!

Немец киын кузь да кыз плеть; кинлö вермö, сылö и вачкö плетьнас, сiдз вурö, что кучик потö, а инмас кö юрö, кольмöтас или вермас вийны.

Пленнöйес полöны офицерсис, перыта чеччöны нараэз вылiсь, сувтöны стройö. Öшö он, смерть маласьö спинаэзын.

Сулалöны стройын пленнöйес — пиннезныс сяткöтöны, кынмöны. Ойыс кöдзыт, уль ру маласьö гöгöрын, полöмöн видзöтчö лампочкаэзсянь веж-югыт би.

— Роччез, тi отир чожöсь и кодяöсь. Ме этö бура тöда. Кöр Москваас олi, вöлi менам Иван нима ёрт. Бура окояннöйкöт дружитiмö. Кыдз пантасям, юыштам винаок. Юыштам, Иван и шуö: «Ганс, тэ öддьöн бур менам ёрт. Ме тэ понда нем ог жалейт. Сёй и ю менчим, мымда верман». Видзöтö, быдöс ме понда. А тi... Тi мылякö нач вежсьöмась — Иваннэз да абу лоöмась Иваннэз, былись порссезö пöрöмась или мый? Эд вунöтö, что ми тiянкöт керамö виль олан — социализмныт, альо, абу ни! Порядок! Веськыта кö висьтавны, талун тi невна буржыка уджалiт.

Сералö отирсö Гансыс — баитö мый абу, а, бат, мыйкö былись вöлi — сьöкыт вежöртны и веритны враглö, враг — сiя враг и эм, враг чужöма, враг мывкыда. Бытьтö тэнö ошкö, а думаэс мöдкодьöсь: дойдö бы, ошшасьö, что öнi пленнöйес дынö локтас ыджыт гöсь — бур офицеркöт пантасясö, кöда кисö пленнöйес вылö оз лэбты, кывнас некинöс оз дойд, вермас мыйöнкö отсавны, ежели кö... пондасö кывзiсьны: озö лоö порссез кодьöсь.

Арся сёр рыт, тöлiсьыс рытйö. Вылын öтi-öтi тыдалöны звездаэз. Вачкисьö, бытьтö отирыс озö ни олö му вылас, а кытöнкö сэтшöминын, кытöн олöны бессэз, кöдна асмознаныс орсöны-сералöны олансö. Вот би югöр весьтын воротаэзланьсянь мыччисисö морттэз, кöдна морттэс вылö озö и вачкисьö, бытьтö чеччöмась гроббезiсь. Чужöммезныс дзик кулöммезлöн — бледыникöсь, кöсöсь, только синнэзныс був-бав — сёйись чужöмаöсь. Киэзныс вылын нiя нöбöтöны немецкöй офицерöс, кыдз сказкаын царьöс. Пленнöйес тöдöны ни, что офицерсö шуöны Арнольдöн, что сiя аскодя мывкыднас и мыгöрнас. Сувтiс коккес вылö, вишнитiс нырнас и пондiс видзöтны отир юррез вевдöрöт кытчöкö пемыт кымöрас — некинöс и нем эз адззы гöгöрсис. Сулалiс, мыйкö видзчисис, топ лöсьöтчис мыйкö керны да вунöтiс мый. Гансыс медодз эз вежöрт, мый бы керö ёртыс, эз висьтав, мый колiс висьтавны пленнöйеслö. Кузь коккес вылын жöдзис-керис да кыдз кинкö бöрсяняс чуткис-бытшкис емöн, чирзыштiс:

— Кин этö коккезныт дынö чапкис?! — чуньнас мыччалiс пленнöйез коккезлань, кытöн кыдз бытьтö бы гардчис кытшöмкö зверь. Коккез дынын тыдалiс ыджытся-ыджыт из, кытчö Ганс жöдзтöнняс сизимись ни падмылiс, сизимись ни висьтавлiс, мед дзимлялiсö неколана торсö, сiйö некин эз кывзы, некин изсö коккез увтiсь эз дзимляв. Этатшöм оланыс да уджыс нем вылö оз туйö, кöр эшö локтiс ыджытжык начальник. А быдöс умöльыс синнэз одзын. Ганс пизис-ыксiс, пленнöйес öшисö, эзö тöдö, мый лоис, кытшöм пон пурис немецсö, кöда оз тöд мый бердö кутчисьны-лякасьны, кыдз дойдны отирсö. Быдыс вежöртiс, что кузь кока немец весись оз педз, öмсö оз лет, мыйкö бöра керас сэтшöмö, что ачыс лоас рад, а пленнöйес кисьтасö синва. И керис Ганс: мышкыртчис, коккез дынiсь босьтiс мыйкö, жмитыштiс чепöль коласас, лэбтiс кисö вевдöрö, бергöтыштiс и юалiс:

— Эта мый сэтшöмыс?! Кин этö чапкис джоджас, а?! Висьталö! Ме некинöс нем ог кер, ежели честнöя висьталат, кин этö уськöтiс джоджас.

Пленнöйез видзöтiсö немец ки вылö, но сiдз кыдз тыдалiс умöля, некин эз адззы, мый Ганс киын, кытчöдз сiя ачыс эз чеччöвт зэв строй одзö и быд ныр увтöт эз понды нуöтны кырымсö. Киас тыдалiс ёг — чочкомвевья сунисок, кöдö кинкö былись вермис уськöтны рызi-бызi паськöмись. Мый бы эз вермы усьны отир коласын джоджö — вермисö джоджись адззыны эд эшö кытшöмкö ёг. Гансöс кыдз петшöралiсö, сiя чеччöвтыштiс вевдöрö, китöстiс-ыкöстiс, что öнi жö быдöнныс котöртасö бараккез сайö, гарьясö ыджыт гу и сэтчö дзебасö-тыртасö ёгсö.

— Вежöртiт, господаэз?! — öмсö пиньлалiс офицер. — Кру-у-у-гом! Бегом!

Барак ружтыштiс, сьöкыта ловзисис, отир бергöтчисö öтiк местаын, оськöвтiсö...

— Котöртö, порссез! — рякöстiс Ганс, — синнэзас орсiс нёштöм югöр, öвтiс кинас.

Пленнöйез дынö поннэз моз уськöтчисö солдаттэз, кинлöкö вачкисö, кинлöкö брынгисö, öвтiсö автоматтэзöн.

— Чожажык!

Бут-бут пондiсö тойны чорыт му пуись керöм котiэза отир, котöртiсö-чушыктiсö. Юррез вевдöрын пемыт кымöрын бытьтö оссис ыбöс; кысянькö ылiсянь лагерь вевдöрö мыччисьыштiс тöлiсьлöн югöр, югдöтiс отирлö туй. Звездаэз лоисö югытжыкöсь, дзик вевдöрсянь сибöтчыштiсö му дынö. Му руалiс-лолалiс ыркыт руöн, а öммезiсь петiс пар.

Бут-бут, бут котöртiс отир. Чушыктiсö пленнöйез, кызöтiсö. Отир чожа мыдзисö — мороссэзын дзиктасисö ловвез, пöдтiс ру. А Ганс сё ыксiс-тэрмöтiс, натьтö, видзчисис, что кинкö усяс, колас лыйны-вийны мортсö, кытчöдз оз ешты чеччыны-сувтны коккес вылö. Эрзiсö поннэз, чеччалiсö солдаттэз гöгöрын, чепсасисö отир дынö, сiдз бы и сёйисö-курччалiсö.

Кыкись кытшöвтiсö бараккесö пленнöйес, мыдз коккезнаныс меряйтiсö ассиныс дженыт веклiсь туй, кöда вермис орны быд оськöлын. И вöлись Ганс воротаэз дынын ыкöстiс:

— Сулалö!

Кöр сувтiсö, пондiсö моростыррезöн кыскавны ру, офицер рамжыка ни бобгыштiс:

— Но мый? Дзебны пондамö врагнытö или огö? Босьтö чожажык зыррез, уджалыштö да тэрмасьö. Велöтчö овны отир моз, то ме пыр модя, мыся, колö овны сöстöма, а тi вунöтiтö, что чистотаыс — эм здоровье. Сiдз я мый я?! Вöрöтчö!

Бöра — поннэз, автоматтэз, сёйöны-видзöтöны солдаттэз.

Пленнöйез тэрмасьöны-уджалöны, гарйöны ыджытся-ыджыт гу, сэтшöмö, бытьтö гуас лöсьöтчöны сюйыштны-дзебны ыджыт машина, либо керку сувтöтны. Уджалöны пленнöйес: öтiккез зыррезöн гарйöны му, мöдiккез гарйöм мусö кырыммезöн новйöны. Уджалöны отир — öтiк морт весь оз ов, оз ештö кынмыны ыркыт ойöн.

Тöлiсь лэбтiсьö вылöжык, унажык кисьтö веж-югыт би, видзöтö — шынь оз кер. Кытöнкö ойшöр гöгöрын гуыс гарйиссьö. Ганс рад, сералö-баитö, згальничайтö:

— Öнi видзöтö: ме ёгсö пукта гу пыдöсас, а тi тыртат-дзебат синнэз одзись, сыбöрын не тi, не ме огö пондö повны, что баракын нять увья лоас кытшöмкö инфекция. Тыртö врагсö да мусö шупкалö кырыммезнаныт, кырыммезнаныт. Тi унаöсь — и чожа уджассяс, вöлись пондатö шоччисьны.

Солдаттэз мырддисö кöртзыррез. Пленнöйес кырыммезнаныс пондiсö гуö шупкавны му, уджалiсö — кöдзыввез моз вериктiсö-вöрöтчисö.

8

Чулалiс ой, локтiс виль лун. Пленнöйез уджалöны лунтыр. Асывсянь рытöдз кыскалöны иззэз, керöны мыйкö, и асьныс оз тöдö мый керöны. Рытöн пемыткодьöн отирöс вайöтöны бараккезö, кыкись-куимись сувтöтлöны стройö, кыкись-куимись лыддьöны кыныма, эз я кинкö пышшы. Пленнöйез коласiсь некин эз пышшы, только кынымакö кулiсö, кынымöскö вийисö. Этö немеццез тöдöны: бухгалтерия лагерьын уджалö бура.

Бура уджалö и Ганс. Сэк, кöр отирöс мало-дело вердiсö, тшöктiсö водны да шоччисьны, сiя бöра ни пленнöйез дынын. Тыдалö, шоччисьны оз сет. Некин эшö ончир эз лэдз, синнэз эз ешты куньны, кыдз Ганс öмтырнас рякöстiс:

— Чеччö да сувтö стройö, господаэз! Чожажык! Вöрöтчö! Мый тойез моз виклясятö?! Или нач тшыгöсь, кöр талун вердiсö потласьтöдз ни. Миян дынö локтö ыджыт начальник. Сiйö панталö кыдз колö, мед эз жö лöгась. Асьным кö лоамö кодяöсь, начальство лоас бур. Сэтшöм олан. Альо!

Сiя кинас öвтыштiс воротаэзлань, кöдöрсянь нёль морт, нёль пленнöй, киэзныс вылын кыскисö офицерöс, кöдö дзик керöмась-лякöмась чочкомвевья сёйись или воскись: кöсыник мыгöра, векнит чужöмбана, тошсö сэтчöдз бритöма-зыртöма, что чужöмыс электрическöй би югöр весьтын невна свиттьöвтыштлö, кыдз бытьтö мавтöма госöн.

Офицер пукалö пленнöйез киэз вылын, видзöтö кытчöкö одзас — кваркыш оз кер.

Кöр немецöс вайöтiсö отир одзö, сiя жагвыв лэдзчисис киэз вылiсь, небыта сувтiс. Пасьтасьöм-кöмасьöм бура: юрсянь коккезöдз быдöс кöмкöт-паскöмыс вурöм сы сьöртi — любо видзöтны, коккезас сапоггес кыдз чачаэз — бустор абу, свиттьöвтöны.

— Господаэз! — петух моз чатыртiс юрсö да китöстiс Ганс. — Тiян одзын фюрерлöн армияись офицер Арнольд. Сiя тiянтöг овны оз вермы. Ойсö эз узь, да локтiс. Гöснеч вайис.

Арнольд киö сетiсö чочком нянь буханка, сэтшöм рöмаö, натьтö, чöскытö, кытшöмö Гриша гортын етша кöр сёйлiс, ежели только сэк, кöр мужиккес вöввезöн ветлывлiсö Усольеö да вайлiсö нянь — гöснеч. А öнi, на! Чöскыт няньыс одзат — тшыгувья öмын дуль сöдзö, но гöснеч матын да ылын, сёйин бы, да кыдз бы эн виньды. Гансыс бöра орсö-баитö ни:

— Господаэз, öддьöн эд чöскыт чочком няньыс! Натьтö, эд тi важын ни этатшöм няньсö колхозаныт эд пешлö, но... — чуньсö лэбтiс вевдöрö. — Еныс висьталöма, кин пö шедтас, сiя и сёяс. Уджын колö шедтыны няньсö. Видзöтö, Арнольдыслöн сапоггес бусöсьöсь, оз я ков ны бердiсь буссö чышкыны. Кин чожыс?! Кин одзалас офицерыслiсь сапоггесö нювны?! Арнольд тöждiсьö миян понда. Кин жö тiян коласiсь медчожыс?

Немеццес кыдз вермисö, сiдз и издевайтчисö пленнöйес вылын, но ассиныс сапоггесö эшö эзö тшöктывлö нювны. Ганс отирöс нерö, нянь да сапоггез вылö мыччалö, видзчисьö.

Отир топ эз пондö лолавны, дзик кылiс, кыдз лэбтiсис тöлiсь, кыдз лагерь сайись гриваок вылö койыштiс веж рöма югöр, кыдз вышкаланьын ружтыштiс пöт пон. Ганс видзöтö пленнöйез вылö, синнэзас лёк югöр, тырппес дрöжитыштлöны, вишыкасьö нырнас, нюлö тырппесö, чикралö синнэсö, кывзiсьö-видзчисьö, кин жö пленнöйес коласiсь чеччöвтас, кин Арнольдлiсь нюлас сапоггесö.

Сапоггез и чочком нянь, тшыг отир, быдыс сёйö бы — öммезын дуль сöдзö.

— Но, — Ганслöн векнит нырборддэс польдыштлöны, синнэзас öгралö ни лёкжык югöр, моростырнас лолалö, кок чуннес вылын дюттясьö.

Тöлiсь лэбтiсьö вылöжык. Лоö кöдзытжык. Ганс пленнöйез ныр одзын ни öвтö няньöн, кöдасянь патшкö сiдз, что öтiк-мöдiклöн кынöммезаныс дзользьышалöны ни кишкаэз, кыдз бы шыасьöны тшыг гаггез, нималöны мортöс. Гудрасьöны сьöлöммез, бергалöны юррез.

Вöрзьытöг сулалöны стройын отир — вирöдз сималöны кынöммез, но öтiк морт эшö эз думайт чеччöвтны да нювны офицерлiсь сапоггез.

Ганс бергалö, видзчисьö, видзöтчö. Öтiк пленнöй усис кок йылiсь, и пондiс мортсö зэгйыны кудоба — öмсис быг петiс.

Пленнöйез кыдз сулалiсö, сiдз и сулалiсö.

Арнольд сiдз жö сулалiс вöрзьытöг, видзчисис.

— Бур, — öмыс пиньöвтчыштiс Ганслöн. — Сэк ме ачым тiянöс верда няньнас.

Офицер кыскис кобураись пистолет, стволнас тюкнитiс пленнöйлöн лыа моросö, шуис: «Тэ!»

— Ме пöт, господин офицер, — кижгыштiс пленнöйыс, ньылыштiс дульсö, векнит голяас вöрзьыштiс катыкыс, йöрнöсыс увтын жмитчыштiсö ордлыэс.

— О-о-о, — чукасö нюжöтiс Ганс. — Былись я мый я талун тiянöс вердiсö потласьтöдз. Вывтi кö бура сёятö, сёянсö колас чинтны.

Шой дук павьялiс бараккез весьтын, кöдзыт багсьöм дука руöн лолалiсö пленнöйез.

— Тэ пондан сапоггесö нювны! — нач лöгасис Ганс, пистолетнас сяткис кузь мыгöра пленнöйлö, шовкнитiсö пиннез.

Пленнöйыс сьöвзис вирсорöн, оськöвтiс — петiс стройись, тальччис-джöмдыштiс, Арнольд вылö веськыта видзöттöн локтiс дынас, уськöтчис пидзöсчаннес вылö.

Пленнöйес, кыдз öтiк, ловзисисö кокнитжыка, дзик пельпоннэзныс вылiсь шупкисö тыра сьöкыт кöзичаэз, чатыртыштiсö юррезнысö. Быдыс бура вежöртiс, что ась оз лыддьö мортöн, но сiя эшö морт, кытчöдз эшö оз нюв враглiсь сапоггесö, эшö надейтчö, что кольччас кö ловйöн, некин оз понды видзны пиннес вылын — оз понды серавны.

— Но, — Ганс öвтiс пистолетöн.

Пленнöйыс, кöда пидзöссэс вылын сулалiс Арнольд одзын, ружтiс-керис, лöсьöтчис, юрсö чатыртыштiс и... Сьöвзис офицерыс рожаö...

Шовкнитiс лыйöм.

9

Пленнöйезöс öтмоз уджöтiсö сьöкыт уджын. Отир одз асывсянь сёр рытöдз гарйисö из, изсö тачкаэзöн кыскалiсö ыджыт ыб дорö. Некин бура эз тöд, мый немеццес мöдiсö керны изнас: öтiккез гусьöн баитiсö, что му пытшкын керöны кытшöмкö завод, мöдiккез бытьтö тöдiсö, что му пытшкас Гитлерлö керöны керку, кытчö врагыс дзебсисяс, и некин сiйö оз адззы, оз вий, кытчöдз оз кув аслас смертьöн. Веськыта висьтавны, враг эшö вöлi вына, пиннес эшö лэчытöсь, уна эшö сёяс отирсö.

Пленын олiкö да тшыгьялiкö Гриша сэтшöм лоис, что мунiкас тöлыс шатлалiс. Но быд вынсис видзсис, медбы враг одзын не усьны. Лунсö, кыдз вермис, сiдз и тойыштiс, надейтчис ойнас шоччисьны. Но рытнас баракын, кыдз только ештiсö водны, кузь мыгöра Ганс бöра ни рявзiс:

— Чеччö! Сувтö стройö да тэрмасьö, тэрмасьö! Вöрöтчö, порссез, кытчöдз ме рам, кытчöдз пулянас ог верд!

Пленнöйез чеччисö нараэз вылiсь, сувтiсö стройö. Быд морт синнэзын шог.

— Веськыта сулалö, господаэз! — Ганс кузь киэзнас öвтiс кыдз аньборддэзöн. — Смир-р-рно!

Отир эз ешты буржыка сувтны стройö, кыдз оссис ыбöс, и нёль морт бöра киэзныс вылын кыскисö баракö ыджыт коробья, кöдö кыдз кужöмась, сiдз и вочöтöмась-мöдöтöмась, бытьтö сказкаын царьлiсь позок, кытöн слугаэз кыскалöны царьсö, только царь я коробьяын пукалiс?

Нёль пленнöй ружтышалöмöн кыскисö басöк коробьясö ёрттэзныс одзö, пуктiсö джоджö. Оссис басöк ыбöс, и пытшксис жагвыв петiс Арнольд, вывтырыс кöс — яйсö пидзыртöмась, тырппесö жмитöма — брезгуйтö быдöнöн, некин вылö дзар оз кер, синнэс видзöтöны мöдöрö.

Кыдз пыр Арнольдлöн кöмкöт-паськöмыс чим-чок, ас сьöртöттяс вурöма, любо бы видзöтны, ежели кö, офицерыс эз бы вöв враг. Сiя петiс коробьяись, нач матö сувтiс Гриша одзö и кыдз бытьтö кынмис.

— Господиннэз! — китöстыштiс Ганс, мороссö польдöтыштiс. — Господиннэз!

Гриша луннас сiдз мыдзис, что синнэс одзын электричестволöн югытыс нач вöлi веж, но коккес вылын топ сулалiс чорытжыка ни, нежели луннас öвтiс тöлыс, и казялiс сэтшöмö, что аслас синнэзлö эз верит. Тыдалiс, бытьтö Арнольдлöн чужöмыс вöлi мыйöнкö тöдса, бытьтö мортсö кöркö кытiськö пантавлiс... Гриша ачыс аслыс эз верит, сэк жö янсöтчис думаэскöт, пондiс видзöтны офицер сапоггез вылö, кöднö озö я бöра тшöктö нювны, озö я нюлöмыс понда бöра кöсйö буханка, и эз я бы Гриша бöбась няньыс понда... Нерисö пленнöйсö думаэс, ныкöт вермасьöв-керис и янсöтчис: видiс и стыдитiс асьсö. Ганс чиння голосöн одзлань ыксiс:

— Тiян одзын, господиннэз, миян медыджыт начальник. Сылöн юрыс медöддьöн висьö тiян понда...

Баракö пырисö эшö офицеррез, кыдз бы öтiк чужöмаöсь, öткодь паськöмаöсь, лöгöсь, синнэзныс вирдалöны.

— Господиннэз, — тоткö Ганс. — Начальствосö колö почитайтны. Невна колö копырасьны, а оз ков лоны дыш порссезöн. Видзöтам, кин жö медöддьöн любитö начальниккесö! Но! — Ганс синнэзнас ни сёйö пленнöйесö — быдыслö мöртö лöзвевья синбугыллесö, моростырнас поиктö, видзчисьö, кулаккесö няпыртöма, сiдз и тöд, что отирсö пондасö вартлыны или кинöскö виясö.

Гриша ёрттэскöт сулалö стройын, оз-оз да öзйыштö лöг, моросас лоö дзескыт, сiдз бы и сöтiс враглö пельбокас, но кытчö тэ!

— Но! — модьö Ганс.

Арнольд сулалö, видзöтö кытчöкö, видзчисьö.

Гриша видзöтö бы Арнольд синнэзö, адззö бы фриц синнэзiсь думаэз, кутö бы мортлiсь олансö, бура бы тöдö, кытшöм сэтшöм немец, мыля сiя мöдiккес коласiсь мыйöнкö мöдкодьжык. Но офицер дзиргö мöдöрö, кыдз бы пышшöтö-дзебö синнэсö. Да кöть бы и видзöтiн синнэзас, то ны пытшкын ылiсянь нем оз тыдав, нем он адззы.

— Но! — чывкйö офицер, ряксö сiдз, что повзьыштö сьöлöм, пондö пессьыны моросын, и Гриша думаэзнас баитö ни сьöлöмыскöт — бур кыввез висьталö, что быдöс лоас бур, что нем повны враггеслiсь.

— Эд вийö менö-ö-ö! Эд вийö-ö-ö! — ойсö резьöтö кинлöнкö голос, кылö мöдiк бараккез сайын. — Но мыля нö менö виятö-ö-ö? Менам эд гортын эшö эмöсь челядь...

Шовкнитö лыйöм. Лыйöмлöн говк паськалö лагерь сайö, пышшö или вöтчö кинкö сьöрö. Гриша видзöтö Арнольд вылö — юрсянь коккезöдз чувйö синнэзнас, бытьтö офицерсö чöвтö, пасьтöтö асланым паськöмö, нуöтö гортас, гортын петкöтö öтлаын уджавны, медбы уджавтöн видзöтны, туйö я кытчöкö немецыс или только кужö вийны отирöс.

Пленнöйез сулалöны стройын, кызöтышалöны, полöны ружтыштны-ловзисьны пыдынжыка. Рыт нюжалö, асмознас нерö-орсö мыдзся-мыдз отиркöт, кöда эз бы кывзы враглiсь басни, важын ни бы шоччисис.

— Но, господиннэз! Мый нö тi, а? Или асьнытö лыддятö офицерся ыджытжыккезöн? Сiдз эд оз туй. Шырыс эд каньысся ыджытжык да вынажык оз вермы лоны. Или мый? Кин медодз юрбитас донася-дона начальникнымлö?! — голясö нюжлалiс да юрсö бергöтлiс Ганс, мöдралiс синнэсö, орсiс нырпыссэзнас. — Кин медодз?!

— Пон, — Гриша бокын шыасис пленнöй да сiдз, топ висьталiс только аслыс, тырппесö вöрзьöтiс, мед некин оз кыв, но Гриша кылiс.

— Кин юрбитас да киэсö окалас Арнольдлiсь? Мый видзчисятö? Дырöв ни ме тiян дынын кылöс мыдзöта, видзöтö, кыдз бы эдö пондö горзыны ас выланыт!

Забор дынын эрзiсö лёк поннэз — сьöлöммез йирисö. Вышка вылын лыйсисö часовöйез. Пуляэз сьöрсьöн-бöрсьöн бичиррез моз лэбзисö пемыт кымöрö, бöбöтiсö син югöр. Вачкисис, бытьтö му мезмис да кытчöкö лэбзьö, отирöс нöбöтö ылö-ылö, медбы олансö нач кусöтны.

— Кин медодз пондас юрбитны?! — нач лöгасис Ганс, вежсис: öм пиньöвтчыштiс, рякöстiс, и голос сибдыштiс, кыдз бытьтö виньдiс, но пленнöйез коласын некин öддьöн эз повзьы, некинлöн юрси тылöп эз вöрзьы. Топ эшö ыркытжык лоис сёр рыт, сукмыштiс пемытыс, юррез вевдöрын вылöжык лэбтiсисö öтi-öтi звездаэз, кыдз бытьтö пышшисö.

— Тэ! — Ганс чеччöвтiс Гриша бокись морт дынö, пленнöйлö косьмöм моросас вачкис кулакнас. — Пет стройсис и юрбит начальникыслö.

Пленнöйыс шатöвтчыштiс, блед чужöмыс чочкоммис öддьöнжык, йöрнöс увтсис буржыка пондiсö тыдавны лыэз, мышкыртчыштiс, дзар керис ёрттэс вылö и петiс стройись.

Ганс чунь йывнас тойыштiс Арнольдлань пленнöйсö, кöда тальччис öтпыр, мöдöтпыр, матö сибöтчис офицер дынö, кыдз полокала, кыдз кувлöм да бöр чеччöм гробись, кöдаись мöдiклаын повзисö бы челядь да инькаэз, ежели эзö адззывлö, кытчöдз вермас локны мортыс. Арнольдлöн чужöм вылас öтiк мускул эз вöрзьышт, кыдз бытьтö эз адззы пленнöйсö, одззамоз видзöтiс мöдöрö.

— Юрбит! — Ганс рякöстiс сiдз, что бытшкасян проволока сайын лёкжыка пондiсö вувтны поннэз. — Юрбит!

— Поннэз, — горöтчис негорöн пленнöйыс, пыдына ловзисис, топ пондöтчис кыскыны тыра додь.

Медодз бытьтö некин нем эз кыв и эз вежöрт, мый баитiс морт. Тувдыштiс Ганс, бытьтö повзис, öшис — ачыс аслыс эз верит, мый кылiс, чукаыс нюжалiс.

— Кыдз кужат, сiдз и сералат миян вылын. — Кыдз бы шоччисьыштiс пленнöйыс, голосыс вынсялiс, и ачыс вынсялiс, пыдынжыка ловзисис, содтiс. — Видзöтö, кыдз бы тiян вылын эзö пондö серавны!

Лоис сэтшöм лöнь, что кинкö лолалiс, и моросас кылiс шутнялыштöм. Пишкис нырнас Ганс. Арнольд одззамоз некинöс эз кыв и эз адззы. Сёр рытыс ловзисис кöдзыт руöн, пöльыштiс пленнöйез спинаэзö, повзьöтiс-висьталiс, что кинлöнкö овсис, и медодз смев мужиклöн.

— Сiдз, — Гансыс кыдз саймис, гажмис, пондiс ниртны оча долонь. — Сiдзкö, тi миянся вынажыкöсь бы лоатö. — Серöмтчыштiс, китш-китш керис, чывкнитiс-öвтыштiс бöрнас. — Тöда ме тiянöс, роч пияннэз. Гордöйкодьöсь тi отирыс, но... — Кобурасис нетэрмасьöмöн кыскис пистолет и лыйис пленнöйыслö, кöда сэк жö эз пöр: медодз лиг-ляг лэдзчисис пидзöссэс вылö, ружтыштiс пыдына, чатыртчыштiс, гудыра синнэсö мöртiс офицер синнэзö и пондiс сёйны-видзöтны.

— Он куж лыйсьынытö, Ганс, — вöлись шыасис Арнольд.

Да не рочöн, немец моз гардiс баснисö. Но Гриша, ась некытöн и некöр эз велöтлы йöз кывсö, öтiк-мöдiкö эстöн вежöртiс ни враглiсь баитöмись. Сiйöн öнi вежöртiс, мый висьталiс Арнольд, мыйсянь вывтыр вылас кыдз бытьтö кисьтiсö кöдзыт ва.

Пленнöйыс сулалiс пидзöссэс вылын, киргис-лолалiс, öшöтiс юрсö, но некыдз эз пöр — эз бы кув. Сэк Гансыс лöсьöтiс пистолетсö ранитöмыслö зэв-зэв кымöсас и лыйис витiсь-кватись: юрвеммез резсисö.

Унньöвтiс пон, кыдз мукöдпыр гортын уннялöны поннэз. Рытыс вöлi вель уна ни. Лэбтiсис тöлiсь, рожатырнас видзöтiс-керис отирлiсь олан да сэк жö дзебсисис, сьöд чышьянöн сайöвтiс чужöмсö, стыдитчис ассис или отирсис. Вылын бараккез весьтын уйис кымöр палачок.

10

Эта рытö пленнöйезлö меддыр эзö сетö узьны, меддыр офицеррез орсiсö: то вартлiсö, то кыскалiсö öтiк-мöдiкöс, петкöтлiсö воротаэз сайö, кытiсь некин ни эз берт...

Ойшöр бöрын немеццез мыдзисö вартлыны да вийлыны отирсö и мунiсö синнэз одзись. Пленнöйез кыссисö нараэз вылö, водiсö, кыдз бы сайöвтчисö недыр кежö умöль олан шогья, узьтöн мезмыштiсö враг дынiсь, но сэк жö ланьтны эзö вермö: то öтiк увтын, то мöдiк увтын дзуртышалiсö пöввез, то öтiк, то мöдiк ружтышалiс.

Водiс да сэк жö эз вермы онмöссьыны и Гриша, кöть и кунис синнэсö, ланьтiс бы. Сы синнэз одзын эшö сулалiс ёртныс, баитiс офицеррезкöт веськыта, резiс кыввез, эз повзьы врагись, дойдiс врагсö, быдыс понда вештiсис и кыдз бытьтö мыйкö висьталiс, тшöктiс мыйкö керны, но эз ешты быдöс висьтавны. Вийöм ёртныс некыдз эз öш Гриша синнэз одзись, нерис Ганссö, кöда бытьтö сё öвтiс пистолетнас, лыйлiс-вийис бы, но мылякö быдöннысö вийны эз вермы. И топ медöддьöн дзарьясис Гриша вылö, бытьтö мыйкö сы йылiсь тöдiс уна, или Гриша немеццес йылiсь тöдiс мыйкö, вермис норасьны кинлöкö. Гансыс топ эшö бергалiс Гриша одзын, кыдз бы видзöтiс пленнöйыс синнэзö, кыдз бытьтö лыддьöтiс думаэз да висьталiс: «Сулав, ме тэнö вия жö, но кытчöдзкö киэзöс ог лякöсьт, кытчöдзкö эшö ов, эшö маитчы свет вылас, тшыгьяв унажык, унажык кыскав сьöкыт иззэз, унажык видзöт, кыдз ми тiян коддесö коттямö». Эшö топ синнэс одзын сулалiс Арнольд, сэтшöм жö враг, но мыйöнкö мöдкодь. Гансыс — аскодя мыгöрнас и мывкыднас, ас мознас прокмö дойдны пленнöйесö, ас мознас орсö отир вылын, кужö вийны да кыдзкö мöднёж: йöз киэзöн торкö мортсö.

Пленнöйез Арнольдсö шуöны предательöн.

Предатель... Гриша адззылiс ни, кыдз öтiк-мöдiк пленнöйес коласiсь гижсисö враг армияö, и эта офицерыс былись вермис лоны асланымöн. Морт вöлi да эз ло, фашистö пöртчис. Но Гришаыс эта фашистлiсь адззис топ сiйö, мый ёрттэс эзö казялö. Арнольдыс, кыдз мыччисяс пленнöйес одзö, некытчö топ дзар оз кер, пыр дзиргö кытчöкö мöдöрö, но бытьтö пöв синнас öтпыр да мöдöтпыр видзöтыштiс ни Гришаыслань, дзик öтiк öм угöвнас шынньöвтыштлiс-пиньöвтчыштлiс öмыс, бытьтö бы висьталiс: «Но мый нö, Горадзуль Гриш, бур эстöн овнытö? Сьöлöмыт оз и вись колхозыт понда? Он и шогав Кöсваыстöг? Тöдвылат озö и усьлö бырöм нинкöммет? Абу и жальöсь асвурöм-аскыйöм дöраись йöрнöс-вешьяныт? Эх тэ!..»

Офицерыс кыдз бы пеничайтiс Гришалö, сералiс, что сiя офицер, что сiйö почитайтöны, а Григорий, кыдз олiс гаг моз, гаг моз и кулас, и быдöсöдз аслас греххес вайöтiсö, кöр гортын ни эз куж овны, медодз мырддис кинлiськö невестасö...

Думаэз бергалiсö, нуöтлiсö гортö, öтлаöтлiсö мамыскöт, иньыскöт да зонокыскöт, кöдö эшö эз адззыв, оз тöд кытшöм, но öддьöн адззылiс бы. Думаэз бергалiсö гортiсь отир гöгöрын, мылякö сё бертлiсö Арнольд дынö — враглiсь мыйкö бы юалiсö, пыралiсö сьöлöмöдззас.

Думаэз... Кöмкöт-паськöм, инь да мам, колхозын удж и колхозiсь начальство — быдöс петалiс синнэс одзö. И кытшöм бы гортын эз вöв олан, кытшöм бы эз вöв колхозын удж, кытшöм бы эз вöв начальство, Гриша гортiсь олан вылö эз горзы: ачыс вöлi бур, и отир вöлiсö бурöсь; кыдз ачыс, сiдз и отирыс. Мый вöлi отирлöн, сiя и — сылöн. Сылö отирся унажык нем эз дöнзьы, нем унажык эз ков, олiсö öтмоз, уджалiсö öтiк ыб вылын, сёйисö-юисö öтiк дозiсь, шогалiсö öткодь шогöттэзöн, олiсö öткодь думаэзöн, тöждiсисö öтмоз, гажöтчисö öтлаын. Некин богатжыка эз ов, буржыка эз сёй — быдöс, мый вöлi и эз, вöлi шöриа, асланыс киэзöн керöма, некинлiсь и нем эзö гусялö, эзö мырддьö, олансö эзö сералö, а вот оланыс пондiс серавны... Врагыс сералö и ась сералö, кытчöдз серöмыс петö, кытчöдз вынажык.

Враг эм враг, но... «Сiя я, сiя я? — Гриша юрын гуддисьöны думаэз, узьны оз лэдзö, сэтчöдз бергалöны, что пондö висьны юр, сьöлöм топ джöмдышалö, берездасьö. Пленнöйсö топ сюйыштöны дзирыт ваö — би жар сотыштö вывтырсö, ыскöвтö юрсянь коккезöдз, гильöтö кок пыдöссэсö, еммезöн чуткöтö кок чуннезас. — Абу я немецыс гортiсь морт, оз я чужöмнас и лысиннас вачкись Лёль Зöтя вылö?» — Думаэз бергалöны ни Лёль Зöтей гöгöрын — Лёль пияныс синнэз одзись оз вешшы. Одзжык Гриша пондылiс ни думайтны эта йылiсь, повзьöтлiс ни асьсö. Но ачыс аслыс эз верит и талун...

11

Зöтякöт быдмисö öтлаын, кыдз бы петiсö öтiк позiсь. Учöтсянь кöмтöг-пасьтöг котрасисö öтiк улицаын, челядь кадö öтамöдныслiсь кулаккезнаныс нильлiсö ныр увттэзнысö — лöгасьлiсö час кежö да бöра вöлiсö öтлаын. Пон эз пур и кöин эз сёй, учöтся-учöтöн гожуммезöн котрасисö вöрö, öктiсö тшак да ягöд. Кöр быдмыштiсö, пондiсö велöтчыны öтiк классын, пукавлiсö öтiк парта сайын, велöтiссез юррезаныс öтмоз сюйисö-тэчисö грамота, öтмоз отирö пöртiсö.

Зöтя велöтчис Гришася буржыка — кокнитжыка зонкалö шедiс велöтчаныс. Учöтнас гажажык да кокнитжык мывкыда вöлi и быдмис смевжыка: эз пов лёк зiись и рам гутiсь, лысьтлiс кутны дзöдзылöс и лягушкаöс. Гриша учöтсянь полiс дзöдзыввезiсь, орддис лягушкаэз.

Быдмисö деревняын челядь. Айез да маммез уджалiсö колхозын, и колхозыс челядьсö быдтiс, медбы нiя учöтсянь эзö пöрö дышшезö, эзö думайтö пышшыны кытчöкö городö, велöтчисö быдтыны сюэз, вердны асьнысö и пöрисьжыккезлö отсасьны. Деревняын овсис умöля, кытöн вöлiсö тшыгöсь, кытöн пöтöсь. Сiйöн челядь учöтся-учöтöн пондiсö шедтыны аслыныс нянь: медодз гожуммезöн орсiсö ыббез вылын: осяэз коласiсь нетшкисö ёгтурун, сыбöрын видззез вылын отсалiсö заптыны подалö вердчан, год-мöд бöртi пуксисö вöввез вылö да пондiсö пинявны.

Челядь уджалiсö öтмоз, некин коласаныс бöрлань уджсö эз кыскы, уджалiсö гожумбыттэзöн. Гожум шöррезöн жар погоддя коста пинявлiсö ойезöн, а луннэзнас шоччисьлiсö. Учöттэсö некин эз жалейт. Öтiк морт эз шу, что челядьлö ойезнас эз бы ков пинявны, вермасö одза-одз горбыльтчыны, озö быдмö. Пöттöдз уджавлiсö челядь, а бригадир пыр желлясис, модис: «Талун ойнас бöра узьöмась, бöра етша пинялöмась. Видзöтö, кыдз шатьсö чега да кыдз чирса бöр гöгöррезнытö, пондат тöдны, кыдз уджавны и пöрисьжыккесö кывзыны, велалат трудоденьсö шедтыны. Пывсьöта вот да эшö трудоденьсö ог понды гижны, сэк мый пондатö сёйны? Пиннезнытö туввез вылö öшлатö я мый я?»

Некин пиннез туввез вылö эз öшлы, уджалiсö челядь — нем норасьны. Но челядь — челядь и эмöсь: мыдзöны быд лун уджавны, дышöтчöны ойезнас пинявны, и ежели кö ыджыттэс озö синйö, мунасö ыб вылö, рытсянь мымдакö пиняласö, ойшöр гöгöр вöввез сувтöтасö шоччöтны, заргисясö бадь увтö, и асьныс озö казялö, кыдз ланьтасö медчöскыт онöн — öммезiсь дуль вотялö.

Öтпыр рытланьын зонкаэс мунiсö пинявны шойна дорись ыб вылö — гортсянь километр-мöд ылына. Гортiсь петiсö шондi пуксян гöгöрын, кöр лöдззез раммисö. Локтiсö уджалiссез ыб вылö, пондiсö доддявны вöввезнысö. Сийöсалöны сивко-буркоэзнысö, асьныс «креста деревнялань» видзöтыштлöны — шойналань синнэзныс. Кресттэз зэв матын, ны увтö дзебöмöсь деддэз, баббез, сойез да воннэз (уна эд война годдэзöдз торксис отирыс то шогöтсянь, то тшыгсянь, то эшö мыйсянь). Доддясьöны челядь, Гришкалöн сьöлöмыс тёп да тёп, топ сiдз кинкö и кутö бöрсяняс, а Зöтейлiсь бытьтö бы спинасö малалöны гöна киöн — синнэс бöрлань да вöрлань. Митька йылiсь нем и баитны. Сiя — полiсь зонка, дрöжитö нельки сэк, кöр казявтöг туй бокись быркнитас каёк, и чужöмыс бледöтö, дышыс пондö петны баитны, но ёрттэслö мыччалö, что смев, ниртчö Воронко бердын. Медпöрись ёрттэс коласiсь Илья. Сiя учöтсянь вель дыр пукалiс седунöн, быдмис умöля, коккес чукыляöсь, юрыс дойöсь да ыджытöв, талун медодз доддялiс вöвсö, ёрттэслiсь гажöн юалiс:

— Челядь, полатö я мый я кын синнэсис? Ме дак ныись тусь ог пов! Ась пондылöны петны кресттэс увтiсь, кöртала бес табунöс вöлыс бöж бердö да кыдз öдззöта Лысанкосö!

— Öдззöтiсь тэ! — Гришка вирскайтö нырнас да нерö ёртсö. — Кыдз бы сьöлöмыт эз пот, кöр дедыт кутас да нопьялас! Лёк эд, натьтö, вöлi пöрисьыс...

Зöтя кывзiс-керис ёрттэсö, пиньöвтыштiс öмсö, шуис:

— Нiя эд, челядь, абу ни отир. Бессэз нiя, во! Бабö тай шуö, кыдз пö пондатö пинявны шойнаыс дорын, эдö вунöтö молитва лыддьöтны.

— Кытшöм молитва? Кин сiйö öння кадын тöдö? Тэ я мый я, Зöтей? — ёртсö нерö Илья. — Дыш петö, Зöтя, тэнö кывзыны.

Гожумся рыт кузь. Шондi лöсьöтчис пуксьыны вöр сайö, но кышасис кöз йыввезö и дыр эз мезмы. Омöн уннялiс ном-геб, эшö бизгисö лöдззез, эшö каёккез лэбалiсö гöрöм му весьтын, кöкис кöк, кöда эшö эз виньды ид шепöн. Шойна дынöт веськыт туйöт Зинкöвлань везйис-мунiс Опонь, кöда пыр ветлöтiс кортöн, тöдiс сымда частушкаэз, что вермис сьылöтны кöть кинöс. Илья шутньöвтiс сылö вöв вывсянь, лöсьöтчис Опоньлiсь юавны, кыдз ни овсьö да мый керсьö, но туй мортыс кыдз бытьтö нем эз кыв, мунiс одзлань.

Муыс вöлi чорыткодь, гöрöм бöрсянь быдмис ни небытик турун. Пиняссис умöля: öтiк следöт пиняэз колiс кыскавны куимись-нёлись.

Ойыс вöлi югыт, кöть му вылö ем уськöт — адззан. Пинялiсö ыб вылын челядь, и кытчö бы эз бергöтчö, адззисö кресттэз, полiсö кодь, кöть некин и некысянь ойнас эз мыччись, некинöс эз сёй. Но нёльнаннысö нерисö думаэз, что ойшöр гöгöрас... Ойшöрнас вöлись бессэс и мыччаласö мывкыднысö.

Кöть мый шуö, но шойна дорын да ойнас, кöть и дженыт сiя гожумнас, полöм петö. Вöввез пирскайтiсö, öвтiсö юррезöн да бöжжезöн. Ном да геб гардчис-лэбалiс юррез гöгöрын, пышналiс и петшöралiс — сёйис вöввесö и челядьсö. Илья уджалöв-керис, зепись кыскис табак, кöдö гряд вылын быдтö мамыс да вузалö мужиккезлö. А зонкаыс ештöм гусявны, ёрттэслö висьталiс:

— Челядь, огö я табак тшыннас номмесö вашöтö? Гардам чигаркаэз!

— Абу я жаль табакыт? — Зöтя вузалö пиннесö.

— Табак жаль! Но тэ и Зöтей! Но и висьталан пожум йылiсь тури! Табакыс абу эд нянь, на курит.

Сувтöтыштiсö вöввезнысö, чеччалiсö сивко-буркоэз вылiсь, гардiсö чигаркаэз и жаднöя пондiсö кыскавны табак тшын — синнэзныс дульсмисö, и юррезныс бергалыштiсö, но номмес былись топ дугдiсö курччасьны. Вöввес нетшкöвтчисö межа дорö, мöртчисö небыт турунаинö и пондiсö мурскыны-сёйны.

Илья швыргис чигаркапонсö, висьталiс:

— Но сiйö... Шоччöтыштам-ко вöввесö, то нiя адззат кытшöмöсь, колкаэзныс вылö кöть пестеррез öшлы. — Бригадирыс... — шыасис Зöтя.

— Хе-хе, бригадир... Сылöн чад кайö öнi, узьö.

Илья, кыдз пöрисьжык ёрттэс коласын, бытьтö командир, мунiс бадь дынö, межаö бадь увтö быгыльтчис-водiс, юрсö каттьыштiс поланас, мед эзö курччалö номмез, и лöньсис.

Бур гожумöн узьны вöр коласiсь ыб вылын, ежели эзö бы курччасьö номмес, но и ась курччасьöны, лыэз бердöдз яй озö вильöтö. Зонкаэз кыдз турбыльтчисö турун вылö, сiдз и сылiсö-ланьтiсö: ныррез чискисö.

Челядь узисö. Вöввез межа вылын йирисö турун. Ойыс пемдыштiс да сэтöн жö бöр лоис югытжык. Лöньлiсö каёккез да бöра пондiсö пиксышавны.

Вöввез сёйисö и, тыдалö, пöтiсö: етшажык пондiсö йирны турун, унажык öвтiсö юррезнаныс — вашöтiсö ном-гебсö. Челядь узисö сэтшöм чöскыта, кöть бöрöн кыскы коккезöт, оз саймö.

Узисö межа вылын пинялiссез, эзö адззылö кыдз югдiс, кыдз мыччисис шондi, кöда эз сулав öтiклаын, эз сунав, а чожа лэбтiсис вылö, пондiс бура шонтны. Бöра пондiсö лэбавны лöдззез, кöдна вашöтiсö вöввесö тшöк понульникö. Нiя, доддялöмöсь пиняэзö, сiдз и заргисисö пуэз коласö.

Гортланьын пондiсö кывны мöссэзлöн джынняннэз, инькаэзлöн голоссэз. Локтiс виль гожумся лун, отирöс тэрмöтiс уджавны. Бригадир кузь коккезнас одза-одз, эшö шондiтöг, ветлöтiс улицаöт, дзир-барасис, бытьтö мунiс гусясянсянь — дзебсисис стыннэз сайö, но нач дзебсисьны эз вермы. Бригадирся одзжык чеччöма Öкся баб, петöма посöдзаныс, ружтышалö-уксышалö, ныж синнэзнас бытьтö адззö нач умöля, пеллезнас оз кыв. Но эстöн бригадирсö казялiс ылiсянь и пондiс жевгыны:

— Миколай, кытчö нö сы одза ветлöмыт? Али нач ендö кертöг колхозас уджыс? Беднöйка тэ, беднöйка, кыдз и пондан пöрисьмытöдззас овнытö!

— Дульсмöм синнэзнат, старуха, уна эн адззы и сiсьмöм пеллезнат уна эн кыв! Кытöн вöлi, сэтöн абу ни, — пон моз эрзыштiс бригадир, полiс, что пöрисьыс висьтасяс, кыдз сiя «невестаыс» дынсянь вугыртö гортас, пышшалö иньыс дынiсь, олö кöин моз.

— Одза-одз асывнас лöгöтiсö мужиксö, кытшöмкö куим пиня старуха туйсö дзугис, эшö содтiс иньыс: гортас эз ешты юрсö мыччыны, кыдз Евлампия пондiс уннявны: «Чöскыта бöра узин ведьмаыт бокын? Пöтiн бöра окасьнытö кöс катшаыскöт! Мый ме тэнö бокам умöльжыка я мый я узьтöтi бы? Ой, ой, мужик! Кытчöдз этадз и пондан овны?»

— Кытчöдз он черпезьды, — мур-мар висьталiс мужикыс, эз понды видзчисьны кытшöм кыввезöн эшö «вердас» иньыс, сöтiс пинялiссез дынö — шойналань уськöтчис бригадир. Лэбзис-локтiс шойна ыб дорöдз, лэчыта видзöтыштiс омöн: пинялiссес эзö тыдалö, и эшö öддьöнжык лöгасис, но öнi челядьыс вылö ни, пондiс бобгыны ныр увтас: «Ме тiянлö, öнджаэзлö, мыччала! Велöта уджавнытö! Дугдат ойбытöн кусттэс увтын пинявны!» Бобгис мужик ныр увтас, кöин моз дзебсисьöмöн оськалiс баддез да кыдззез сайö, öвтiс киэзнас — юрыс гöгöрись вашöтлiс номмесö. Локтiс бригадир грива вылöдз, понуллез коласiсь казялiс вöввез, сыбöрын падмис челядь вылö, кöдна узисö öтамöдныс бердö зэв-зэв жмитчöмöн и нем эзö кылö.

«Ох асныррез! Окояннöй душаэз! Сiдз и уджалатö, этадз и пинялатö! Велöта ме тiянöс!» — медодз эз тöд, мый керны узиссескöт, кыдз «велöтны», смекайтчис-видзöтчис, мурзис-керис, и юрас пырис дума. Миков жагвыв коссис пöрччалiс важ кушак, кушаксис керис кытш, кытшнас коксö кöрталiс Зöтялiсь, кöда узис ёрттэс дорын, узьтöнняс шыннялыштлiс, кыдз бытьтö нерис пöрисьжыксö. Бригадир саясис тшöк увья понуль сайö и пондiс Зöтясö кыскыны.

— Мама! — зонка саймис, повзис, кöза моз бекöстiс, рожабаннэс пиньöвтчисö, синнэс бöбмисö. — Мама, сёйöны!

Чеччöвтiс Илья и — уть! Абу ни Зöтя дынын, только кöмтöм коккес мелькайтiсö да вартiсö бекреннезö. Саймисö мöддэс и сöтiсö быд вынiсь котöртны пöрисьжык ёртныс сьöрö, а Зöтя сё бöба ыксiс: «Сёйöны, сёйöны!» Зонка горзiс, корис отсöт, виклясис кынöм вылас, киэзнас кутчисис турун бердö...

Сiя жö лунö Зöтялöн мамыс уджавтöн горзiс да инькаэслö норасис, что зоныс нельки вешьянокас чисьöма, сiдз повзьöма, нач бöбмöма, кыв оз вермы горöтчыны, кытчöкö бы пышшö и пышшö — видзны он вермы. И кудöбаыс уськöтлiс ни да зэгйис. Мам горзiс, норасис-висьтасис, умöль мортöс видiс, кöда повзьöтiс челядьсö, бытьтö эз тöд, кин сiйö асывнас одза-одз вермис керны. Öтiк морт эз шу, что эта «уджыс» бригадирлöн, кöть отир и тöдiсö, что асывнас пинялiссес дынö мунiс Коля дядь. Полiсö отирыс начальниккезлiсь — эзö лысьтö бригадир йылiсь умöль кыв горöтчыны.

Дыр Зöтяöс зэгйис кудоба, уна зоночка чепсасис — ольпась вылiсь чеччалiс ойезнас. Уна синва мам кисьтiс зон понда, кошшис лекарствоэз да лекаррезöс, кöдна бы отсалiсö-веськöтiсö зонсö, но деревняын фельдшер вöлi, да кыдз эз вöв, етша кинлö вермис отсавны веськöтны шогöттэз. Эзö адззисьö и дошлöй отир, Лоны бы Зöтялö нач тшыкöм мортöн — бур олан эз бы адззыв, но эз-эз да зоночкаыслö кытшöмкö лекарство отсалiс: нето туруннэз, нето капляэз вермисö шогöтсö. Зöтяöс эз понды зэгйыны кудöбаыс, ойезöн эз понды чеччавны ольпась вылiсь да кытчöкö пышшавны. Быдöс бы бур вöлi, только öтiк умöль лоис — зонка нач етша пондiс баитны, бытьтö ньылыштлiс кывсö.

12

Пленын Гриша эз ни вачкись морт вылö, топ джыныс вöлi кулöм, мöд джыныс кыдз бы эшö ловья. Эшö юрыс мымдакö уджалiс-думайтiс. Мужик вöлi том, а пондiс вачкисьны нач пöрись морт вылö: косьмис, горбыльтчис, чукыртчис, тошсялiс. Пленнöй олiс кыдз бы адын, только сьöд ойезнас узьтöнняс кыдз бы мезмывлiс адсис, недыр кежö вöтöн шедлывлiс нето гортас, нето кытчöкö мöдiклаö. Вöттэзлö морт веритiс, веритiс, что нiя мыйкö вöрдöны-висьталöны одзлань. Но веськыта озö висьталö. Тöд жö мый лоас, ежели кö вöтöн, шуам, пантасьлiс Фёдорко Сенякöт, кöда мортыс бур, абу пон кодь, кывнас некинöс оз дойд. А вöтасин кö — пантасьлiн Семёнкöт, висьтав, что бытьтö горшö мöртасö пурт, сiдз и тöд, что мыйкö лоас сэтшöм умöль, кöть горзы.

Вöтö уськöтчö Фёдорко Сеня, Гриша саймö да пондö думайтны горт йылiсь, думаэзнас бергалö челядься олан гöгöр. Мылякö тöдвылас усьö сiя, кыдз пинялiсö шойна дорись ыб вылын, кыдз водiсö узьны, ланьтiсö чöскыт онöн, эзö кылö, кыдз кинкö Зотейöс кöрталiс коккезöт да пондiс кыскыны пуэз коласö — кувтöдз повзьöтiс зонкасö. И кин жö бы повзьöтiс, кытшöм арттöм-ладтöмлöн лэбис киыс керны умöль удж, сiдз бура талунöдз оз и тöд.

Зöтя, Зотей... Думаэз челядь кадся ёрттэз йылiсь, медодз Зотей йылiсь. И мыля медодз сы йылiсь думайтсьö? Не сысянь я, что öтлаын пинялiсö или кыйисö чери, чериавтöн зонка вачкылiс пельбокас, или сы понда, что одзалiс гöтрасьны Катя вылын, кöдö мöдöм корасьны Зотейыс да абу лысьтöм. Сiдз войнаöдз эз и гöтрась, сiдз гортiсь и нуöтiсö: нывкаэз бокын эз узьлы, некинöс эз окав. Эз вöв басниа зонка, кывнас эз куж нывкаэсö смилитны, а сiдз некинлö и немöн эз сетчы. Зöтя йылiсь думайтсьö сiйöн, что Арнольдыс бытьтö кыдз вачкисьö Зöтя вылö.

Арнольд былись мыйöнкö вачкисьö Зöтя вылö, кöдö армияö нуöтiсö медодзза луннэзö, кыдз пондöтчис война, кöда етша баитiс, но вермис висьтавны: «А ми немеччеслiсь чожа ныррезнысö тiлямö!»

Тiлис тай... Кыдз мунiс гортiсь, сiдз и öшис, кыдз помойö гут вöйис: не письмо эз гиж, не юöр эз иньды. Озö я важын ни кытöнкö сiсьмö лыэс.

А кыдз озö? Кыдз ловья. И мед ловья, ась олö. Вермасö кö дзоньöсь локны гортö, тöрасö овны деревняаныс, кокнитжыка пондасö öтлаын уджавны, улицааныс лоас гажажык — сюра пороззэз моз озö пондö люкасьны, озö пондö öтамöдныс вылö будзгылясьны, кыввезныс озö лоö донаöсь, эшö Кöсвасис семиккез кежö кыясö чери. Вöттэз. Нiя озö вийö, унажык новйöтöны гортöт, öтлаöтöны аслас семьякöт, ёрттэскöт. И сё жö думаэс бытьтö лыйöны: «А быль, кыдз Арнольдыс Зöтяыс?!» И сэтöн жö аслыс тасалö: «Тэ мый, Гриша? Ачыт я? Вермас я лоны сэтшöмыс? Кыдз сiдз лысьтан?» Повзьö пленнöйыс, пондö дорйыны кöркöся ёртсö и асьсö. Эмöсь жö öткодь чужöма отир, шуам, что сiя жö Фёдорко Сеня оз я вачкись Пелым Митрей вылö. Да эшö кыдз вачкисьö, бытьтö Семёнсö и Митрейсö, кыдз гоз нинкöм кыйöмась öтiк кабöн, сiйöн и öткодь чужöмаöсь. А быдмöмась эд не öтiк аймамись: öтыслöн айыс гортiсь Фёдор, а мöдыслöн — локтöма Пелымись, но мужиккес öддьöнöв ни вачкисьöны öтамöдныс вылö, нельки кужöны öтмоз баитны.

Эмöсь öткодь чужöма, öткодь мыгöра и мывкыда отир, а эстöн... Öтыс немец, а мöдыс... Коми. Öтыс фашист, а мöдыс...

Гриша эстöн жö, кыдз шуöны, öшлö и кералö — сизимись бергалö асланым коми морт гöгöр, асьсö öтлаöтö отиркöт, отиркöт öтлаöтö Зотейöс. Гриша думаэзнас Зотей дынiсь нач мезмыны эз вермы: мортсö ордчöн сувтöтiс немецкöт, öтлаöтiс и бöр янсöтiс, сорлалiс мывкыддэзнысö. Но Арнольдыс медодз мывкыднас янсалiс ёрттэз дынiсь; кытшöм бы эз вöв пон кодь, зверь кодь лёк, кытöн и хитрöй, но вöлi культурнöйжык, бытьтö и ылöсажык, öтiк-мöдiкö тöдiс унажык, кужис-вермис вийны отир, прокмис асмознас серавны Гриша коддесö. Сiя сералiс сiдз и кужис керны сiдз, что мöдiклö сэтшöмыс и юрö бы эз пыр, эд дзир эта офицерлiсь öтнаслiсь пленнöйезлö колiс нювны сапоггез, öтнас пöртчылiс царьö, кöдö кыскалiсö киэз вылын. Немец асмознас «орсiс» пленнöйескöт, дойдiс ас мознас. А ёрттэслöн пыр киэзаныс вöлi пистолет да автомат. Нiя етша баитiсö, унажык лыйисö-вийисö. Не эта сьöртi я, что öтiкыс етшажык аслас киэзöн вийис отир, унажык сералiс пленнöйес вылын, не сы сьöртi я Гришалö думайтсис, что Арнольдыс вермас лоны советскöй мортöн.

Луннэзöн некöр вöлi думайтны кин да кытшöм, колiс уджавны, видзöтлыны бöрö и одзö, мед не падмыны да не усьны, медбы эзö вачкö, эзö брынгö или эзö лыйö. А рытöн, кöр пленнöй водлiс топчан вылö, куньлiс синнэсö, сэк юрас и пырисö думаэз, висьталiсö: «Ежели кö бöра локтас кикимораыс, бöра чеччöтасö, петкöтасö баракись, сувтöтасö стройö, бöра пондасö тшöктыны керны мыйкö сэтшöмö, кöдö вöтöн он адззыв и, натьтö, бöра Арнольд понда...»

Сьöкыт пленын пленнöйлö, кулö бы и оз бы кув, сьöлöмыс сё эшö кошшö мыйкö бурö, олö, видзчисьö кысянькö да кинсянькö отсöт, кинкö вылö надейтчö, аслыс ни шуö: «Зöтяыслöн эз я кö веськыт пель сайын вöв бурдöм вурыс, кöр пинявтöнняс шойнаэс дорын пондылiсö кыскыны сiйö коккезöттяс и пель сайсö кытчöкö дойдлiсö. Ранаыс бурдiс, но местаыс тöдчис. Ежели кö бес чужöмыслöн пель саяс быль эм вурыс, ежели кö эм... Но и мый, эм кö? Кыв оз позь горöтчыны, öм оз туй осьтны, шыасьны кö, кымöсö лэдзасö пуля.

Пуля да смерть... Кувны öтпыр, только кыдз кувнытö? Или эшö пöттöдз пешлыны ад кодь олансö...

«Кöдакö öтыс», — думайтö Гриша, немись ни оз пов, бат, пондылiс бы пышшыны пленсис. Ёрттэс пель одзас шушкыштiсö-висьталiсö, что пондыласö эстiсь мездöтчыны, и ежели кö сiя ныкöт öтлаын, то ась видзöтчö да лöсьöтчö.

Вöлiсö Гришалöн лагерьын бур ёрттэз, кодя да смев отир, ёртнысö эзö бы кольö этчö. Но Гриша вежöртiс, что эта кадö, этöн здоровьеöн, бура сёйтöм-ютöмöн, кузь туйö лöсьöтчыны басни абу: он ешты петны проволока сайö — сэтöн жö бöр кутасö. Сизимись öшлiс, сизимись думаэзнас меряйтiс, но кытöн олiс, сэтчö жö и кольччис — пышшöм йылiсь думаэз вештiс бокö. Эшö бергалiс Арнольд гöгöрын, аскöттяс баитiс: «Мед и враг Зöтеюшкоыс, ась душасö вузалiс, но калян чужöм эз жö, поди, вунöт роднöй кывсö, и мымдакö совестьыс эшö эм жö или мый? Оз я бы жалейтышт?»

13

Арся погоддя пленнöйезлö нем бурсö эз вай, асывсянь кымöртчис-гудыртчис, пондiс зэрны и некыдз эз вермы дугдыны. Лешки-вошки паськöммез люзь вамисö, ваыс бытьтö йиджис сьöлöмöдз, лыэз бердöдз, и Гриша кынмис — пиннес сяткöтiсö. Немеццез бергалiсö пленнöйез гöгöрын, но асьнысö эзö сетö вадны, пасьтасисö сiдз, что паськöм пытшкö ваыс эз йидж, сiйöн пыр эрзiсö быдыс вылö, тэрмöтiсö кыскавны иззэз.

Мед ни сьöкыта талун Гришалö шедiс оланыс, сiдз мыдзис уджавтöн, что рудзалiсö кикокыс, бытьтö вöлiсö не аслас. Сьöлöмыс мылякö висис и висис, сэтöн жö эшö лёк тöлыс вижгис — шучкöп мунiс умöль паськöм пыр, мыйсянь пеллезын кожгис öткодь шы, топ кинкö юрбöрö вартiс бедьöн. Морт эз ни тöд, тшыг или пöт, сёйö бы, или оз, тшыгсянь öддьöнжык орис кикокыс, синнэс одзын лэбалiсö сьöдвевья гöгляннэз да бичир кодь номмез. Уджалiс морт сэтчöдз, что эз ни понды кывны, кыдз ряксiс немец и быд вынiсь сöтiс-вачкис быдыслö кытчö шедас. Бытьтö эз дöнзьы вачкöмыс, эз кыв зубытыс, кöр шульыштiсö спина кузя Гришалö. Сiя эз ни вежöрт, мый лоö сыкöт, ловья сiя или абу. Мукöд минутаö вачкисис, что оланыс абу ни олан, кытöнкö шатласьö мöдöр югытас ни, и гöгöрын отирыс абу ни отир, ачыс абу морт, эз вежöрт, кыдз эшö лолыс видзсьö, мыля эшö оз кув.

Уджалiс пленнöйыс, мукöд минутаö кыдз бы прикашайтчисö-мыччисьлiсö гортiсь отир — тöдса мыгöраöсь, тöдса паськöмаöсь, кылiс тöдса голоссэз. Кажитчис, бытьтö бригадирныс рявзö: «Гриша, вöрöтчы! Или нач ни мерин моз коккетö он вермы кыскавны! Гриша!..» Или предыс пондö ыксыны: «Эй! Уджавтöннят эн сунав, то видзöт!..» Этасянь кыдз саймыштлiс, юрсö лэбтыштлiс, видзöтыштлiс и бöр усьлiс гуö, кытöн вöлi, кытöн олiс, кытiсь некыдз мезмыны эз вермы.

Пленнöй кыскалiс сьöкыт иззэз и öтпыр-кыкись кылiс ни мамыслiсь голос, кöда горзiс да юасис: «Зон, мыля нö тэ? Кытöн? Мыля письмоэсö он гиж? Ми эд тэнö нянь-сов дорас касьтылам ни, кулöмöн ни лыддямö, но ме пыр вöтöн адззывла ловйöн. Гриша-а-а!»

«Маша-а-а!» — резьöтiс-ыкöстiс пленнöй, кöда Гриша бокын усис кыминь, сьöкыт из уськöтiс пельпон вылiсь ки вылас. Мортыс садьтöг корис роднöй иньсö да весись: сэк жö пленнöй дынö оськöвтiс немец, быд вынiсь брынгис мортыслö и лыйис. Пленнöй ружтыштiс эшö, кивзыштiс — тырппес вöрзисö, ловсорнас öмсис петiс кыв «Маша».

«Кристос тэкöт, — думайтiс Гриша, пельпон вылас быд вынiсь видзис из. — Кувтöннят кöть эшö касьтылiн Машатö. — Курччöвтiс тырпсö, синнэс дорö сöдзисö синваэз, тöдвылас усис том иньыс, кöда лоис сэтшöм жаль, что висьталiс бы кыв-мöд, шуис: «Кыдз тi и пондатö овны?»

Ыб вылын вижгис арся лэчыт тöв, коялiс кöдзыт зэр. Неылын ружтiс вöр, кöда важынкодь ни чöвтiс зелёнöй паськöмсö и öнi бытьтö кынмис, норасис отирлö, мыйкö видзчисис бурö. Некытöн и нем эз гажöт синнэз — быдöс вöлi арся, дзор. Бытьтö природаыс пöрисьмöма, мыдзöма, шогалö, Гришаыс моз жö кулö бы да оз кувсьы.

Уджалiсö лун. Пемытсорöн вайöтiсö бараккезö, сувтöтiсö стройö, сизимись лыддисö, быдöнныс я, эз я кинкö пышшы, сулöтiсö да сулöтiсö мыдз коккез вылын — пöттöдз кешитчисö, вердiсö синва кодь сöдз похлёбкаöн и вöлись водтöтiсö узьны. Да лэдзасö я узьны враг чужöммес, кöдналöн киэзныс лудöны, бессэс гильöтöны: луннас эзö пöтö пленнöйес вылын серавны-орсны, сёйны отирсö. Дзирс пемыт ни вöлi, кыдз пондiсö ряксыны. Сувтöтiсö стройö, и кыдз тöн, кыдз удерлун, пленнöйез одзö кок чуннес вылын мыччисис Ганс.

Сiя локтiс пленнöйес одзö, шынньöвтыштiс, голясö нюжöтыштiс, гажöтчис, топ кыдз пленнöйезлöн ёрт, и пондiс сьывны-ошшасьны, кöсйыны бура вердны, ежели кö гижсясö немеццес армияö. Роднöй, тöдса кылöн баитiс врагыс, но нем сылöн роднöйыс эз вöв — кöдзыт сьöлöма немец пондiс питьыртны, что талун пленнöйес уджалiсö бура, что öнi ны дынö локтас ыджыт начальник, кöда ошкас бур удж понда.

«Тöдам ми тiянлiсь начальниккесö!» — думайтiс Гриша, кывзiс и эз офицерсö. Но сэтöн жö Ганслöн вежсис син югöр — тувдiсö синнэз, ыкöстiс «Смирно!» да сiдз, что забор сайын повзисö поннэз, гир-вар керисö, унньöвтiсö и лöнисö.

14

Вышка вывсянь лыйсисö пулемётсянь. Трассирующöй пуляэз чож биа борда каёккез моз лэбзисö ылö пемытiнас. Кöдзыт уль ру йирмалiс сьöлöм. Пленнöйез одзö мыччисисö офицеррез, электрическöй би югöр весьтын синнэзныс югьялiсö кыдз зверрезлöн. Куим офицер мунiсö-шовкöтiсö сапоггезöн. Шöраныс шагнялiс Арнольд, кöда чужöм вылiсь кыдз тöн, сiдз и талун пленнöйес нем бурö эз адззö, бытьтö карыша рожаыс вылö павдöтöмась симöт, сэтшöм жö чочкомвевья или серакутшша, бытьтö мортыс кувлöм да бöр ловзьöма.

Офицеррез локтiсö пленнöйез одзö, бергöтчыштiсö кок ныррезныс вылын, синнэзнысö мöртiсö отир синнэзö, гичыртiсö пиннезнысö сiдз, что аннэзныс весьтын жмитчыштiсö мышцаэз, голяэзаныс лэбыштiсö да бöр лэдзчисьыштiсö катыккезныс.

Öтiк морт эз несйöвт, эз вирснит нырнас, пыдынжыка эз ловзись.

— Мый нö, господаэз, думайтатö? Вылынжыка юррезнытö видзö! Поди, солдаттэз вöлiтö или эдö. Думайта, что вöлiтö армияын да сэтшöмын, кöда йылiсь стыд и баитны. Пондат кö служитны фюрерыс армияын, вöлись солдаттэзас и пöратö.

И бöра пондiсö корасьны немецыс армияö, бöра кöсйисö бур олан. И кыдз пленнöйес эз шыасьö, сiдз эз и шыасьö — некин несйöвтны эз думайт. Сэк Ганс серöмтчыштiс да висьталiс, что бур удж понда пондасö вердны шыдöсöн, сетасö унажык сёян. Стройын кинкö кашык-кашык керис и семдiс — пондiс кызöтны.

Немец видзчисис, кöр мортыс дугдас пöдны-кашляйтны, да вöлись кöзичаокись джоджö гизнитiс-кисьтiс поснит шыдöс, чажгис сiдз, что туссез катыльтчисö öтмöдöрö.

— Вот тiянлö сёяныс мымда! Мышкыртчö да öктö — öтiк тусь абу жаль.

Стройын öтiк морт эз вöрзьы, быдыс вежöртiс, что немецыс весись тусьсö джоджö оз койышт, мыйкö бöра эстöн лоас, кытшöмкö спектакль оссяс. Офицеррес видзчисисö, что тшыг отир уськöтчасö öктыны шыдöс туссез, пондасö мырддясьны сёян дорын, поннэз моз пурсьыны-курччасьны, гыжьясьны... Некин бура эз тöд, мый офицеррес юррезын, кытшöм думаэз думайтöны.

Öтiк морт эз вöрзьы стройын, кыдз бытьтö пленнöйес вывтi бура сёйисö, вöлiсö пöтöсь.

— Öктö джоджсис сёянсö да чожажык! — Ганслöн мöдöртчыштiсö синнэс, сiдз горöтiс, что голосыс сибдыштiс.

Мöд офицеррес сулалiсö и няпралiсö кулаккезнысö. Вöлi лöнь, нельки лёк поннэс дугдiсö вувтны, вышкаэз вылын дугдiсö лыйсьыны солдаттэз.

— Но! — Ганс малалiс ни кобурасö.

Гришалöн чеччалiс сьöлöмыс, бытьтö кинкö бöрсяняс тойыштiс öктыны шыдöс туссез, модис: «Мый сулалан? Тэрмась! Сэсся эд этатшöм минутасö он пантав».

Минута... Мукöд минута вöвлi вывтi дженыт, а мукöд вывтi кузь. Колiс тэрмасьны, а тэрмасьнытö полiс. Смертьыс сулалiс ни бöра зэв, видзöтiс веськыта синнэзас и пленнöйыс аслыс висьталiс: «Вöлi — эз вöв, кувнытö эд öтпыр». Шуис Гриша энö кыввесö, мый думайтiс, сiйö и керис: уськöтчис пидзöссэс вылö, мышкыртчис и, кыдз курöг, пондiс кокавны-öктыны джоджись шыдöс. Тэрмасис сiдз, бытьтö былись ёрттэс уськöтчасö одзас и мырддясö сёянсö, кöда абу жö бур сёян, кöдасянь бы пöтан.

Пленнöйес коласiсь кинкö Гриша моз жö уськöтчис джоджö и пондiс долоннезнас асланяс куравны шыдöс туссесö, пондiс тэрмасьны ылöстöм морт моз — синнэзас орсiс бöб югöр, ружтышалiс, тöдчис, что мортыслöн дзугсис мывкыдыс.

Гриша джоджись öктiс сёян, тэрмасис. Шыдöс туссес шедiсö етша, мукöдыс кырымсис киссисö бöр, таралiсö офицеррез коккезлань, колiс пидзöссэз вылын кыссьыны-тэрмасьны. И тэрмасис мортыс, локтiс эд яловöй сапоггез дынöдз, кöднасянь нырас вачкис дукöн, пельпоннэс сибалыштiс сапог бердö, тшыг пон моз юрсö чатыртыштiс — видзöтыштiс веськыта Арнольд синнэзö, сыбöрын пель сайсис адззис бы важ рана бöрсянь бурдöм вурыс. Но электрическöй лампочкаэз умöля югдöтiсö, электричестволöн би югöрыс гусялiс-ёрис синнэз сiдз, что Арнольд пель сайись бура нем эз тыдав, некыдз эз позь тöдны былись я Гриша одзын вермас лоны гортiсь морт. Но Гриша веритiс ни, что сы одзын сiя, кин сылö колiс öнi.

Ганс бергалiс бöрас, ыксiс кинкö вылö. Кинкö пишкис нырнас, ружтышалiс бöрас зэв, гусялiс офицеррезлiсь син югöр, кöдна коккес увтö дзар эзö керö, эзö адззö Гришасö, эзö вермö кывны Гришалiсь баснисö. И сiя гусьöнмоз горöтчис:

— Зöтя, кувны ог я мöд ни. Он я мыйöнкö отсав?

Комиöн баитiс пленнöйыс, горöтчис сiдз, медбы кылiс только Арнольд.

Кинлöкö брынгис Ганс, кинкö кивнитiс. Гришалö бöрсяняс вачкисö шатьöн. Сiя эшö дзарнитiс Арнольд синнэзö, но сiдз сы синнэзiсь нем эз и казяв. Немец сiдз и кольччис немецöн, вöрзьöтчытöг видзöтiс кытчöкö вевдöрö.

Пленнöйез жöдзыштiсö джоджын и чожа бöр сувтiсö стройö. Гриша тэрмасис жö сувтны стройö, ышки-пойки ловзисис да лöнис, бытьтö нем эз и вöв, бöра нем вылö эз надейтчы, некинлö эз верит.

Ойыс шоччисис. Одззамоз бараккез гöгöрын гусьöн лэбалiс смерть, кошшис аслыс добыча. Но талун кыдзкö некинöс эз вийö, нельки некинöс вывтi эз вартлö.

Стройын лыддисö пленнöйесö, кыдз бытьтö нiя вермисö лэбзьыны-пышшыны, эшö сулöтiсö кöдзытiнын да вöлись лэдзисö водны шоччисьны.

Шоччисьны бы колiс, ланьтны, вунöтны недыр кежö быдöс мый эм и абу, кöть вöттэзöн мезмывны сьöкыт оланiсь. Но эз узьсьы. Чувйисö думаэз, бергалiсö чулöтöм чассэз гöгöрын. «Мыйлö ме фашистыскöт баитi? Кин менö тойыштiс шыдöссö öктыны да зверьыслö кеймисьны? Эг я ме сiйö баснинам нач лöгöт? Поди, думайтö ни пон юрнас, что кольчча кö ловья, локта гортö, то быдöс висьтася — быдыс пондас тöдны кытöн да мый керис Зотейкиныс».

Думаэз бергалiсö, чушкалiсö зiэз моз, сьöлöмыс полiс, видзчисис, что талун-ашын виясö, кыдз гутöс. Этасянь кыдз ойнас кинкö горöнжык ружтыштас-кызöктыштас, дзуртыштас топчан или джодж, Гриша повзьывлiс — топ сiдз и локтiсö ни сы дынö.

Повзьöтöм сьöлöмнас узис я мымдакö или эз, ачыс оз тöд.

Виль лун локтiс тöннякодь жö, дзик нем умöльыс эз вöв. Кыдз и быд лун пленнöйесö уджöтiсö сьöкыт уджын, вартлiсö. Но талун вийисö етшажык, кыдз бытьтö нормаыс вöлi етшажык, план сьöртi олiсö немеццес.

Чулалiс кымöра да кöдзыт лун, асывсянь рытöдз сизимись пондылiс зэрны, кыдз бытьтö луныс сизимись пондылiс горзыны. Локтiс рыт. Гришаöс талун кыдзкö чуньöн эз вöрзьöтö, и сылöн думаэс бергöтчисö мöдöрö. Пондiс думайтны мöднёж, надейтчис ни мымдакö, что Арнольдыс былись кылiс сылiсь кыввесö или... Кылiс кö, сё ни мыйкö вермис лоны, а эз кö ло — буржык ни: мый эм, сiя и эм, нем кошшыны кодя олансö, некин вылö надейтчыны, колö овны сiдз, кыдз ен шуис.

Чулалiс öтiк лун, сыбöрын мöдiк, но куимöт лунö Гришаöс иньдiсö уджавны кухняö, сувтöтiсö сёян дынö. Но сёйны пöттöдз эз жö шед: öткö, бура синйисö, мед няньтор öмö эн чапкы; мöдкö, нем вöлi гусявны. Но кыдз шуöны, тыра доз дынын позьö пöтны и парнас. Кухняын эз-эз да кöр и шедiс боби ыжда няньторок, тшыг кынöм вермис тыртны паньбекöр ляккезöн. Киэз кö кузьжыка видзны, öмö позис чапкыны картов кыш. Öтiк да мöдiк сёянтор и, видзöтан кö, кынöмын етшажык ни кивзöны кишкаэз. Мортлöн бытьтö пондiс содны вын, и малыштны кö рожабаннэз, нiя бытьтö лоисö гладьжыкöсь. И уджалiс Гриша шонытiнын: тöлыс пыр эз вижгы, зэрыс эз вад, а кöр немеццес пурлiсö, вачкывлiсö или брынгывлiсö, эз горзы,— эд эз вöв стекляннöй, эз жугав, вачкöм бöрсянь висьыштлiс кö кытiкö, да дугдывлiс.

Арнольд Гриша синнэз одзись öшис, дугдiс вуджрасьны-мыччасьны, рыттэзöн эз ни петавлы пленнöйез одзö, эз «орс» отиркöт ас мознас. Гриша думайтiс, что Арнольдыс му пытшкö эз дзебсись, ваö эз уськöтчы — ловья «каляныс», олö кытöнкö эстöн жö, матын, олö да гусьöн видзöтлö Гриша вылö, сосас сералыштлö.

Петiс лöгыс враг вылö, и сэтöн жö думаэзнас висьталiс спасибо, кöр думайтiс, что лагерьын былись эд эм аслас морт, нельки кöркöся ёрт.

— Чеччö, поннэз! Тэрмасьö! Смир-р-рно! Тридцать один двадцать два, пет стройись! — рытöн рявзiс Ганс. — Тридцать один двадцать два, тэ мыля мышкырöн сулалан строяс?! Спинатö он вермы веськöтны? Сулав, ми тэнö веськöтам!

Быд вынiсь вартлöны тридцать один двадцать двасö — мортöс, кöдö нимнас озö шуö, мортö озö пуктö, кöда эстöн некинлö оз ков, шогалö, но кытчöдз олö. Сiйö вартлöны сiдз, что усьö джоджö, виклясьö и лöньö. Абу ни тридцать один двадцать дваыс, абу морт, кулiс. Сэтöн жö кулöмсö коккезöт кыскöны синнэз одзись...

Кулiс тридцать один двадцать два, ловья эшö пять тысяч двести одиннадцатöй. Эта номерыс Гришалöн, сiя кытчöдз ловья, ассис нимсö оз вунöт, видзчисьö, что кöр-некöр озö я миян зэлöтö немеццесö, озö я локтö да мездöтö адсис.

Гриша мый бы эз пешлы, мый бы эз адззыв, но кытчöдз ловья, эз кув не сiйöн, что бергалiс кухня гöгöрын, а что учöтсянь, кагасянь, быдмис ён, етша шогалiс, вöлi вына морт. Лагеррезын бур здоровьеыс пригодитчис.

Пленнöй уджалiс лагерьын кухняын, надейтчис, что этадз кö лоас, вермас и видзчисьны ассиным отирöс, кöдна отсаласö петны пленiсь.

Кöр кывсис, что Краснöй Армияыс матын ни, немеццес пленнöйесö нуöтiсö öтiк концлагерьсянь мöдiкö. Но, кыдз тай шуöны, кöиныс мымда бы эз бунтуйт, шедö, сiдз и эстöн. Война чулалiс, пленнöйезöс мездöтiсö враг киись, но Гриша сэк жö гортö эз шед, дыр эшö уджöтiсö трудармияын, дыр эшö кыскалiс иззэз и гарйис вель уна му, но олан вылö эз ни горзы. Кöр и видзöтлiсö кыдз военнопленнöй вылö, кöр дойдлiсö кылöн — кöритлiсö, что сiя вöлöма предатель. Кылыс абу пуля, вийтöдз оз дойд, абу шать, вир чездытöдз оз вачкы. Кытшöмкö арттöм морт видас да видöмсö вунöтас. Бур вöлi ни, что ас отир коласын олiс и уджалiс, кылiс роднöй басни, сёйис буржыка.

Год да мöдiк, и трудармияись лэдзисö гортö. Локтiс гортö морт, кыдз война вылiсь бертiс, кыдз солдатöс панталiсö отир. Öтiк морт эз шу, что Гриша вöлi пленын, кöть и тöдiсö, что вöлi пленас. Гортын медодз быдыс пондiсö юасьны, кыдз да мый, öддьöнжык инькаэс тöдiсö бы мужиккезныс да зоннэзныс йылiсь. Юасисö, адззылiс я Гриша родимöйезнысö. Юасисö асланыс зон йылiсь и Зöтялöн аймамыс, тöдiс я Гриша, кытчö торксис каганыс, адззылiс я.

— Ой, кытiсь сiйö? Сымда сэтчин отир вöлi, сымда вийисö, и уна кольччисö ловьяэс. Вывтi эд горзö, ай да мам, абу я зонныт ловья, оз я кöркö лок гортö, — мужик бурмöтiс ай-мамлiсь сьöлöммез.

— Ен пельö бы тэнчит кывветö, Григорей, ен пельö, — мамлöн голосыс вежсьыштiс, чышкис синваэсö, надейтчис, что зоныс локтас, эд сiя сылöн вöлi öтнас.

Басниыс кузь, да оланыс дженыт: чулалiсö луннэз, чулалiсö годдэз. Григорий Фролович уджалiс колхозын, пöрисьмис. Олiс морт и етша кöр висьтасьлiс война йылiсь, некöр эз касьтыв плен да пленын олан йылiсь. Олiс морт, кöда вöлi война вылын, но начальниккес дыр эзö висьтавлö, что Созоновыс тышкасис врагкöт, бытьтö некöр эз и вöв война вылас. Только пöрисьман годдэзас вöлись кыдз саймисö, пондiсö баитны, что сiя тожö тышкасьöма врагкöт, содтiсö пенсия, козьналiсö кынымкö юбилейнöй медаль. Но эта немымда эз гажöт, кыдз бытьтö Григорий Фролович некытöн эз вöв. А мый вöлi — чулалiс, бытьтö кöркö вöтасис сьöкыт вöт.

ВУЖЖЕЗ



1

Асыв. Сэтшöм лöнь, что кылö кыдз кышöтö-усьö лым. Лым усьö гырись, бытьтö кымöрсис киссьöны уна-уна гöжöм чочком бабыввез, тыртöны тöрстöм мусö, кöда эшö эз ешты бура кынмыны, нять гöппезын эшö дзöвк видзö гудыр ва. Лым усис да медодз сылiс вагöпоккезын, нятьын, дзик кинкö му вылын пуис лымсора каша.

Мый керан, ежели сэтшöм ар, ежели кыным год ни аррезöн мусö бытшöма оз кынт: нять вылö усяс лым — шебралас тöв кежö мусö чочком öнöн, сiдз и тöвйö лым увтын мый эм. Таво арнас вöлiсö шоныт да гажа луннэз, важын ни вöр вылiсь киссис лист, но эшö цветитiсö öтi-öтi селько-белькоэз да мöдiк туруннэз, топ вились лöсьöтчис локны тулыс да эз ешты. Усьö и усьö лым, синнэз одзын тыртö му. Эшö вывтi абу кöдзыт, эшö абу пыд ар, а былись кыдз тулыс. Только асылöн пемыт, дыр оз югды, пемыт сорöн пондöны притькöтны уркайез, шутнявны жоннез, эшö чирзöны ватшканнэз.

Ыджыт ыб шöрын логок дорын, крут ключ-шорок берегын сулалöны кынымкö дорись кыдз, кöдна чöвтöмась жö гожумся паськöм и кыдз бы жмитчöмась öтамöдныс бердö, саясьöмась бы важ керкуэз сайö да абу вермöмась нач саясьны и ылiсянь тыдалöны. Пуэз сайö кушкыртчöмась важ да пöрись керкуэз, кöдна абу уна, вит-квать, да нiя öтамöдныс дынiсь янсалöмась, кыдз томсянь öтамöдныскöт абу лöсялöмась, сiйöн и янсöтчöмась: öтiк эстöн, мöдiк сэтчин, куимöтыс нач ни гриваыс вылын моз, кыдз бы юрсö мышкыртöма да узьö гриваыс дорын, узьö ой и лун, шоччисьö или кинöскö видзчисьö, поди, хозяиныс локтас, мортöс моз жалейтас, кыт колö вочас и пондас овны. Но öння кадын важ керкуэсö некин оз жалейт, мед нiя вöлi керöмöсь бур вöрись да сэтшöмись, кытшöмö öнi он ни адззы тшупны керку, медбы дыр эз сiсьмы и кöдö только вермис бы сотны би, но некин кыдзкö эшö оз öзты.

Вит-квать важ керку... Ежели кö видзöтны, ежели кö лымыс эшö нач эз тырт ыб, му, важ керку гöгöр позьö казявны, что татöн керкуэз вöлöмась унажык. Кöркö шорок дорын вöлöма ыджыткодь деревня. Тыдалö, бур отир олiс татöн, ежели керкуэз тшуплöмась да лэбтылöмась бур вöрись, бура вевттьылöмась, ежели керкуэз чожа оз сiсьмö.

Вöлöм деревня, и сiя эшö эм, эшö отир тöдöны сылiсь ним, кöть олiссезлiсь ниммез вунöтöны ни, эд нiя олiсö важся каддэзö — эшö царь дырни. Ежели ловьяэзлiсь бура юасьны, бура кошшисьны важ гижöттэзын, позяс тöдны, что эта деревняыс вöлöма медыджыт волостяс, тöдöмась сiйö уездын, кöр эстöн пизьöма олан.

Асыв. Югдö жагвыв. Жагвыв кышöтö-усьö лым. Пыд онöн узьöны отирöн кольöм важ керкуэз. Или ме бöбöта? Эз я важ керкуэз дынын кыв кытшöмкö голос? Эз я вувт пон, и нырö вачкö тшын дукöн, и эшö кылö аскодя чöскыт нянь дук, топ кинкö керкуын пöжалö пирöггез. Сiдз и эм, ныр оз пöрьясь, сiя кылö пирöггезлiсь чöскыт дук да сэтшöмö, что пондö симавны кынöм, и öмын сöдзö дуль.

— Серко! Серко! — кытшöмкö инька пондiс ыксыны понöс.

Асылыс кыдз повзьыштiс, мыля вöрöтчö жагöн, кöр бытьтö вунöтлiс ни, что колö саймыны да уджавны, сэкжö лоис югытжык, бура ни пондiс тыдавны, кыдз öтiк важ керку короминна вевдöрын трубаись кыссьö тшын.

2

Галя чужис Кöчыбын сэк, кöр татöн отир олiс эшö чуть ли не быд керкуын, сэк, кöр деревняын топ дзескытöв вöлi овны, кöр быд керкуын челядь быдмис вит-кватьöн, а Кöч Öльöшшезлöн нельки котрасисö дас зырымöсь куль — öтiк учöт, мöдiк эшö учöтжык. Медодзза годсянь, кыдз Галя пондiс велöтчыны, челядь Кöчыбсянь котрасисö Вильыбöдз, кытöн вöлi бур школа. Быд асыв нывкаöс аймамыс саймöтлiсö одза-одз, иньдывлiсö школаö, эзö видзöтö, что нылочкаыс учöт, эзö жалейтö, что сэтшöмсö гортiсь тöвнас эз бы ков вашöтны пемытiнö, кöр дженыт луннэзö дырöн эз югды.

Гажа вöлi челядькöт ветлöтны школаö, топ нылочкаыс некöр эз мыдз шагнявны куим километр, кöть арöн зэрö, или усяс лым, тыртас туй.

Быдмисö. Тöввезöн велöтчисö, гожуммезöн учöтсянь отсасисö аймамлö, то уджалiсö колхозын, то котрасисö тшакла да ягöдла. Овсис сiдз, кыдз овсис, кыдз вöлi, сiдз бытьтö оланыс одзлань и лоас, кöр некин эз тшыгьяв, пасьтöг эз кынмы. Ыббез гöрисö ни тракторрезöн, сюэз вундiсö комбайннэзöн. А айез да маммез висьтасьлiсö, что одзжык гöрлöмась и кöдзлöмась вöввезöн, новйöмась нинкöммез, тшыгьявлöмась. Нывкалö гленитчис овны гортын, сылö думайтсис, что ны кодь гажа лудъя деревняыс некытöн ни абу. Кöчыб пукалiс ыб шöрын, грива вылын, омöн тыдалiсö вöррез, кöдна пыр гажöтiсö асмознаныс, гожуммезöн вöррезас быдмис тшак да ягöд и, он кö дышöтчы, тшак-ягöдсö позис ваявны да ваявны.

Кöчыбын отир бура тöдiс öтамöдсö, эз вöв пон кодь мывкыда, некин весись öтамöдкöт эз пурсьы, весись эз лöгав, öтамöд вылö эз уджав. Мый пондасö кö керны, быдöн уджалiс öтлаын, öтмоз. Кыдз отирыс уджалiс, сiдз и чулöтiс вежалуннэз: праздниккезöн öксьывлiсö öтлаö да ветлöтiсö керкуись керкуö, юисö ырöшшез да суррез. Орсiс гармоння, отир йöктiс да сьылiс, и некин эз вöв код, эз усяв, эз тiль кинлiськö нырöм гöгöр; некин некинöс пиннес вылын эз видз, весись эз серав, эз вежöктiсьö. Сэтшöм вöлi Кöчыбын оланыс, кöть ордчöн, мöд деревняас, кытöн школа да сельсовет, овсис топ мöдкодьжыка: сэтчин одзжык нюжöтiсö электричество, керисö радио, одзжык пондiсö юны вина, одзжык пондiсö косясьны öтамöдкöт. Вильыбын мылякö умöльжыкыс керсис одзжык, кыдз бы оланыс кытчöкö тэрмасис, кинкö сьöрö вöтчис, а Кöчыбын олан некытчö эз тэрмась, некин сьöрö эз вöтчы.

Галя бура тöдiс Кöчыбись отирöс — быд морт кыдз чеччис, водiс, уджалiс, баитiс, мый радейтiс и эз, кинлö да кытшöм сёян гленитчис, кин кыдз пасьтасис, кöмасис, кöда кыдз кужис баитны — быдöс синнэс одзын, быд мортыс топ сё эшö чеччö и водö татöн, кöть отирыс абу ни, керкуэз сулалöны öтнаныс, деревняын абуöсь йöррез, кайпоззэз. Веськыта кö висьтавны, абу ни Кöчыбыс, эн бы и касьтыв ни деревнясö, но эстöн эшö олöны кык морт — кык инька, пöрись да том, кыдз нiйö кинкö татчö кöрталöма, туйсö нылiсь пöдналöма, синнэзнысö пöртмалöмась, и кык морт озö адззö кытчö мунны, бытьтö полöны петны отирö. Öтыс эшö нач том, эшö эз ешты овны нёльдас год, а мöдыс тыртö ни кыкьямысдасöт годдэз.

Дарья баб йылiсь нем бы и баитны, сiя ачыс некытчö оз бы мун, кулö бы татчö, мед и кытöнкö эмöсь тöдсаэз, кытöнкö олöны кык ныв, но баитö, что кытöн гöгсö орöтiсö, сэтöн и кулас, кытöн томся-томöн пуэз моз лэдзис муö вужжез, сэтöн и кувтöдз пондас овны. Пöрисьöс пондылiсö нуöтны ныввес, но гортсис эзö вермö вöрзьöтны. А томжыкыслö мый бы татöн овны? Мый бы татöн керны Галялö? Керкуын сiя олö чунь öтнас, и мунас кö татiсь, нем бурсö оз коль, нем бы жалейтны важ керкусö.

Галя учöтсянь эз вачкись аслас ёрттэз вылö, котрасис-велöтчис Вильыбын, сыбöрын мунiс велöтчыны районö — шöрöт школаö пондiс тальны туйсö и сэтöн умöля эз велöтчы. Позис велöтчöм понда ошкыны бы нывкасö, позис бы сылö районын велöтчöм бöрсянь мунны городöдз да пондывны велöтчыны кöть училищеын, кöть бы и институтын. Но сiдз петiс, что ёрттэс Даша да Маша висьталiсö, что одзлань велöтчыны озö понда, кольччасö гортö, пондасö уджавны фермаын да быдöнныс öтлаын, кыдз комсомолеццез, мед тöдасö кытшöмöсь нiя, быдöнлö мыччаласö, что весись комсомолö юрнысö эзö сюйышта. Кыдз баитiсö, сiдз и керисö; Даша Машакöт школа бöрсянь быдöн моз эзö пондö видзöтны городлань, а кольччисö гортын, кутчисисö уджавны фермаын, кытöн пыр уджалiсö маммезныс.

Ой и лун, тöв и гожум маммезныс коссэзви лойисö нять, пыр видiсö енсö, асьнысö, колхозiсь пода, начальство — быдöс мый эм и абу, колхозын пода вöдитiссеслö немымда эз гленитчы, сысянь, что пода дынын сьöкыт вöлi уджавны, но уджалiсö эд. А кытчö инькаэс воштiсясö, ежели томсянь етша велöтчисö, томöн гортiсь адззисö жöниккез, петiсö айкаэз сайö, жынöтiсö челядь, кыдз шуöны, томся-томöн бöжжезнысö кöрталiсö колхозö и колхозсис некыдз мезмыны эзö вермö. А öння томмес мый öштiсö колхозас? Мыля бы Машаэзлö да Дашаэзлö эз позь велöтчыны одзлань, кöр нiйö одззамоз томся-томöн колхозö эзö кöрталö, одззамоз эзö зэлöтö, сетiсö паспорттэз и, уттю! Кöть кытчö лэбзьы! А нывкаэт школа бöрсянь веськыта уськöтчисö фермаö.

Ныкöт эз янсöтчы и Галя, кöда ёрттэзтöг нач эз вермы овны, эз повзьы пырны колхозö, эз повзьы сюра мöссэзiсь, сьöкыт да нятьöсь уджись, — фермаын вежис мамсö.

И уджалiсö ни фермаын том комсомолеццез — быдса бригада бергалiс пода гöгöрын. Нывкаэзкöт öтлаын педзисö и зонкаэз, кöдна öтлаын быдмисö, велöтчисö да одзлань велöтчыны эзö жö пондö.

Медодз фермаын уджассяс сьöкытöла, том отир аскежаныс и ружтiсö, и кивзiсö, вöвлi сiдз, что гусьöн чышкисö и синваэзнысö да öддьöнжык сiйöн, что колхозын юралiссез вöлiсö кыдз юртöмöсь, сьöлöммезныс сайкалöмась ферма да пода дынö. И нывкаэслö колiс ёна гичравны пиннез, котрасьны правленнёö, кöр и норасьны райкомö да райисполкомö. Горзытöн да норасьтöн ветлöтiсö томмес, горзытöн уджалiсö пода дынын, и унаись юррезаныс пыравлiс дума, медбы пышшыны гортiсь, мунны кытчöкö сэтшöминö, мед ны йылiсь пеллез эзö кылö, и синнэз эзö адззö. Но нiя не öтнаныс олiсö чочком свет вылас: томмесö дорйис отир, кöда отсалiс кылöн, кöр и киэзöн. Месяц да мöдiк, и видзöтан кö, мöссэз йöвсö пондiсö сетны унажыкöн, мед и вердiсö нiйö важсямоз. Пода эд абу керöма пуись — ловьяöсь мöссэс и топ вежöртöны, кыдз ны гöгöр бергалöны.

Чулалiс эшö мымдакö кадыс, и Вильыбын ферма йылiсь пондiсö гижны газетаэзын, томмесö пондiсö ошкыны-касьтывны собраннёэз вылын, уджалiссезлö вежалуннэзö пондiсö сетавны козиннэз. Петiс сiдз, бытьтö фермаын пода лöсьöтчис кувны ни да бöр ловзис.

И зонкаэс коласiсь, кöдна нывкаэскöт öтлаын чилькöтiсö мöссэз, Петька нимаыс, шмыль кодьыс, кöда мыгöрнас коласаныс вöлi медучöт да медчож, кöда кывнас пыр керис медуна, пондiс ошшасьны, что чулалас эшö мымдакö, и ны йылiсь пондасö тöдны Москваын ни, поди, мöссэзнаныс нуöтласö выставка вылö, премируйтасö, быдöнныслö мороссэзаныс кышаласö медаллез. Ёрттэс сералiсö-баитiсö, что дристöссезнаныс выставкасö век озö адззылö, бур кöть сiя, что правленнёаныс нач озö вунöтö, уджалöм понда пондiсö ни сетавны деньгаок, сiдзкö, нач кöмтöг да пасьтöг озö пондö овны.

Кыным уна томмес уджалiсö, сыным кыдз бы быдмыштiсö, ёнмыштiсö — вир пизис нывкаэслöн, кыдз бытшöм да басöк ловья аканнезлöн. И зонкаэс вежсисö кодь, пондiсö эд нывкаэсö мырсьöтлыны бы, жмитыштлiсö ни мороссэзныс бердö, и медодз чож Петькаыс эз пов жмитыштны да окыштны Галяöс, кöть зонка нывкалö вöлi только пельпоннэзöдззас. Öтпыр да мöдöтпыр — фермаись да гортö, гортсянь да фермаö, кöр асылöн пемыт сорöн, рытöн бöра жö пемытöн, зонка да нывка öтлаын котрасисö уджавны, пондiсö янсöтчывны только оя-ойшöрö да и сэтöн пондiсö гажтöмтчыны, сьöлöммезныс сiдз бы оя-ойшöрнас чеччöвтiсö öтамöдныс дынö, а кыдз пантасясö, сiдз кыкнанныс öгралiсö. И вот öтпыр арнас, фермаö мунтöн, Галялö Петька висьталiс, что сiя нач оз вермы сытöг овны, что сьöлöмыс шöри потö. «Ох, Галька! Любита эд ме тэнö!» — зонка эз повзьы висьтавны нывкалö.

Нывка медодз бытьтö зонкалö эз верит, бытьтö нем эз вежöрт, кыдз учöт кагаок. Пондiс серавны, что Петькасö кай вермас зуравны, ном курччöвтны, и зi чушкавны. Жöник я сэтшöмыс? Зонка вывтi эз вöв гордöй, Но сылö лоис умöль, топ сьöлöмсö пидзыртiсö желля киэзöн, синнэзсис сöдзисö синваэз...

— Горзан я мый я?! — öшис Галяыс, и сылö лоис недолыт, кыдз бы потiс сьöлöмыс шöри — öт джыныс аслас, мöд джыныс Петькалöн. Сiя шамыртiс вына киэзнас зонкасö да сiдз жмитiс тыра моросыс бердö, сiдз пидзыртiс, что невна эз пöдты, эшö шуис, что сiя Петькасö любитö öддьöнжык, Нежели сiйö зонкаыс.

Сымда и вöлi, сэтшöм и колiс Галялö мужикыс, кöр ачыс вöлi мужик кодь, ачыс вöлi гортын хозяин и хозяйка, мыйись-мый, няпыртас кулаксö, горöтчас: «Петька!» И Петька быдöс вежöртiс, быдöс керис сiдз, кыдз колiс керны Галялö.

Гöтрасисö зонка да нывка. Сiя жö годö, сiя жö месяцö, жöниккез сайö петiсö Даша да Маша и эзö ылiсь кошшö жöниккесö, а адззисö сэтiсь жö фермасис да нiйö, кöднакöт уджалiсö öтлаын.

3

Уджалiсö томмес фермаын, немымда асьнысö эзö жалейтö. Медбöрын удж гленитчис сiдз, бытьтö сы вылö и шогмисö, быдмисö и олöны, мед горттэзö етша пыравлiсö, етшаись адззисьлiсö аймаммезкöт, кöдна сё эшö жалейтiсö челядьнысö, эзö ни желлясьö, а кыдз кужисö и вермисö, сiдз и отсасисö томмеслö — бергалiсö горттэзын, а колас кö, вовлiсö фермаö, медбы отсавны вердны пода.

Олан топ вöлi бытшöм, сэтшöм, кытшöм вермис лоны деревняын, кöр кöчыбса гортсянь ылö эзö ветлывлö, городдэзлань шедлывлiсö только гöститöм могись, или кöр томмес служитiсö армияын. Служба бöрсянь бертлiсö гортö и олiсö, кöть медбöрья годдэзö том зонкаэзлö эзö пондö тырмыны нывкаэс, кöдна велöтчисö да пышшисö городдэзö, сэтчин адззисö жöниккез, мед и зырымöссезöс, кикиль-коколлезöс, но сё жö жöниккез да городскöйöсь. Нiя, бат, чер эзö кужö видзны, но лыддиссисö эд городын олiссезöн, ась и городас олiсö не вывтi ни бура, кöр, поди, и поздiсьлiсö курöгпоз кодь керкуэзö, но эд олiсö городын. Кöчыбын кытчöдзкö томмез коласiсь гортiсь пондiсö шыблявны только нывкапöлöс, ась и оланыс топ лоис буржык, кöр деревняын эм ни электричество, бобгис ни радио, отир пондiсö небны телевизоррез, вежалуннэзö пасьтасисö ни городын олiссез моз. Колхоз местö лоис совхоз, совхозын не трудоденнез понда ни уджалiсö, а шедтiсö деньга.

Отир ловзисис кокнитжыка, быдöн пондiс ошшасьны, что пондасö кö шедтыны деньга, пондасö уджавны буржыка, лоас кодяжык дисциплина, кöр колхозын трудодень вылö уджалiсö дышöла, смевжыккес бригадирсö вермывлiсö иньдыны и вöрдядьыс дынöдз, тшöктiсö уджавны асьсö. Но важ отир — пöрись лапöв уджавтöг эзö кужö овны, эзö умöля бы уджалö, кöр нiя война годдэзöдз, война коста и сыбöрын уджалiсö да уджалiсö, висьтав, что нач тшыгйöн, етша кöр шыасисö, что нылö умöль, эзö кленитö олансö, а томмес... И бригадиррес ни лоисö дышöлöсь, кöр пондiсö сiдз уджавны, бытьтö лунсö тойыштiсö, пондiсö пешлышавны винаок, пондiсö дышöтчыны котрасьны ыббез вылö, унажык пондiсö узьны.

Думайтсис, что совхозын отир пондас уджавны буржыка, но петiс, что уджавны пондiсö умöльжыка, кöр гожумшöрöн, страда коста, ытшкисьны пондiсö мунны öкмыс часö, видззез вылын унажык шоччисисö, нежели ытшкисисö, шоччисьтöн пондiсö орсны картаэзöн, уджалансянь локтiсö, кöр эшö шондiыс вöлi вылын-вылын.

Дзугсьыны пондiс олан деревняын, отирлöн мывкыд дзугсис, начальство лоис аскодя, унажык пондiс овны ас пондасис, ассис зобсö пондiс тыртны медодз. Но кытчöдзкö Вильыбись фермаын том пода вöдитiссез эшö уджын асьнысö эзö стыдитö, эшö уджалiсö бура, нiйö касьтылiсö радиоын и гижисö газетаэзын, но кыдз шуöны, керны сьöкыт, а разьны кокнит. Совхозыс пондiс сiсьмыны да медодз юралiссезсянь, кöр öтiк директорöс вашöтöны да сы местö пуктöны мöдiкöс — умöльöс вежасö бы буржык вылö, да шедас эшö умöльжык, дышжык, горшажык, совестьтöмжык, кöда эшö етшажык тöждö отир понда, унажык кыскö асланяс: гусьöн вузалö совхознöй добро да деньга дзебö зеппезас.

Вина юисö и Кöчыбын, сэтчöдз ни мукöдыс пондiсö былскыны, что юас да öштас гортсö, а кöр и вешьянсö мортыс кодувья öштас, неделя кытöнкö шатласяс, осьтас былик синнэсö, и ачыс аслыс оз верит, что ловья, тöдö и оз кытöн вöлi, мый керис, кин бокын узис, кин сылö кымöсас тузгис кулакöн... Вина пондiсö юны Кöчыбын да сэтчöдз, что öтпыр кык вон Онтон да Ондрон кутчисисö оча морос, öтыс трекнитiс öтсö, мöдыс — мöдсö, öтыс резьöтiс, что вияс вонсö, мöдыс рякöстiс, что кералас юрсö. Öтыс эз вежöрт, мый керис, и мöдыс эз вежöрт, мый керö, оз тöдö, мыля бытьтö Ондронлöн öшöма куран, и мыля Онтонлiсь воныс бытьтö гусялöма чер. Петö, что олiсö-олiсö отир моз воннэз, чеччисö и водiсö öтлаын, мый пондасö керны, синнэзöн он ешты кваркыштны, кыдз керасö да сiдз, что любо видзöтны, ошкыны он вермы, а сэтöн бытьтö бесыс котöртiс коласöттяныс, лöгöтiс Онтонöс да Ондронöс, пöртiс нiйö кöза-бараннэзö, и пондiсö люкасьны, пондiсö сюррезнаныс пышнавны öтамöдсö, и не öтiк лун эд. Война лэбис воннэз коласын — воюйтöны воннэз, иннезныс и челядь ни гыжьясьöны öтамöд коласын.

Дзескыт лоис овны Вильыбын Ондронлö ла Онтонлö, и нiя öтiк неделяö (öтыс понедельникö, мöдыс суббота лунö) семьяэзнаныс пышшисö деревняись да ылö эд овнытö мунöмась, бытьтö пö öтыс катыльтчöма город Москва сайö, мöдыс кытчöкö шыбыльтöма нельки Урал керöссэз сайöдз.

Хозяиннэзтöг Вильыбын кольччисö кык керку — медбур короминнаэз увтын поззэз, кöднö некинлö эзö вузалö, да некин бы эз и босьт, ылiсянь татчö некин оз лок, а асланым отирлöн эм кытöн овны. Кольччисö керкуэз хозяиннэзтöг, кыдз ловьяöсь, ой и лун пондiсö кыдз горзыны да сэтчöдз, что синнэзныс дульсмисö-гудыртчисö, отир пондiс орддьыны керкуэсö, бытьтö сэтчин пондiсö овны каляннэз, кöдна рыттэзöн и ойезöн повзьöтчисö.

Чинiсö уджалiссез совхозын, ыб вылын дугдiсö гöрны да кöдзны гектар-мöд етш му, бытьтö бы муыс вылын эз понды быдмыны не сю, не турун — öтiк вöр видзчисис, кöр тракторрез гöртöг колясö вöр дорсянь паськыт межа, кытчö чожа пондö быдмыны-тiльгыны рас.

Етшажык ыббез вылö пондiсö кöдзны сю, унажык пондiс путриктыны сизьюр да быдкодь мöдiк турун, и клеверсö, и турунсö вердiсö подалö, и сю ни эзö жалейтö сетны подаыслö, мед пöрись пöлöсыс — стариккес, уна тöдiссес, кöдна эзö ни вермö уджавны, но кыввезнаныс керисö уна, клопöтiсö боккезаныс, öвтiсö юррезнаныс да модисö: «Эта мый лоис?! Мыля нö сюсö пондiсö вердны подаыслö? Няньсö!»

Но фермаын кытчöдз керисö йöв да яй, кöр эшö томмес уджалiсö, асьнысö эзö жалейтö, вывтi вина эз юö. Кыдзкö öтпыр деньга босьтöм бöрын Петька небис бутылка, чукыль-мукыль керис юрнас, бутылка вайис гортö, торс сувтöтiс иньыс одзö, висьталiс: «Галя, юыштамö жö ноко, мыдзнымöс веськöтамö!»

Öтпыр да мöдöтпыр, кöр öтнаныс свет вылын оз олö, кöр отир эзö-эзö да, видзöтан кö, уджавтöн ни ветлöтöны юыштöмöсь, Петра пондiс юны частожык да кöр и гортö ни пондiс локны люммöм сина, мед Галялiсь уна он бы ю, сiя эшö мужиксö вермис сiдз куснявны, что Петра вунöтiс бы винасö.

Сiдз и вöлi, сiдз и лоис, кöр мöдпыр мужик гортö локтiс люлюшки код, зырымсö пондiс каттьыны нырыс гöгöрö да ошшасьны, что сiя хозяиныс гортын, но мый колö, керас.

— Мый баитан, Петька?! — Галялöн синнэз лоисö рысьлöн кодьöсь — сотö-видзöтö, няпралö кулаккесö, тэчö-баитö. — Мужичок тэ менам любимöй! Зырымтö нырыт увтiсь он ылöст чышкыны, а хозяинö бы пуксян. Кöр вот меным доран кагасö, сэк вöлись и ыждав, сэк вöлись ме тэнö понда шуны хозяинöн, то видзöт... Локтан кö код мöдöтпыр, ме пета керкусис, муна и адзза мöдiкöс — тэсся прокажыкöс, кöда меным дорас кагаок. Кылiн?!

Петька пильснитiс нырнас и вежöртiс иньсö да одзлань топ пондiс овны Галя моз. Кöр горшыс вина вылö косьмис, медодз видзöтiс одзас и бöрас да вöлись кутчисьлiс стопка бердö.

Сiдзкö, том инька эшö веськöтлiс мужикнас — вожжиэз видзис киэзас, уджалiсö кыкöн фермаын да уджалiсö, кытчöдз Вильыбын ферма эз разьсьы, пода эшö сулалiс коккезныс вылын, мöссэз тшыгсянь эзö усялö, кöть Кöчыбын олан топ пондiс ни джöмдавны, вежсис ни. Кык вон Ондрон да Онтон бöрын чожа мый вермисö вузалiсö да гортiсь мунiсö Сяпар Иваннэзлöн, бöра жö кокнит олан кошшыны мунiсö, кöть отирыс падтiсö-баитiсö: «Иван, кытчö гортiсь мунан? Кытiсь и мый бы буржыксö кошшан, кöр гортын бур оланыс, кöр быдöс ни тэнат топ эм, кольччис только небны машина». Но кытчö тэ?! Иван узис и вöтасис уна деньга йылiсь и некинöс эз кывзы, семьянас мунiс кытчöкö шонытiнö, сы сьöрö вöтчис Пороз Миков, кöдö некин вывтi эз жалейт — мунiс и ась, ежели мортлöн сэтшöм мывкыд — етша кинкöт овнытö лöсялiс, пыр пиннес гер, медбöрын вывтiöв жö пондiс винасö юны, начальствокöт нач эз понды лöсявны. Этасянь мужиксö сiдз и талисö, пурисö, нельки вийисö бы. Кытшöм бы эз вöв Миколыс, но Кöчыбын олiс да олiс бы, кöр отир овны тöрисö деревняын, а йöзын...

Кöчыбын видзчисисö гожум, тулысöн лöсьöтчисö садитчыны, отир öнi унажык ни думайтiс ас йывсис, совхоз йылiсь, кыдз кöркö пöрись лапöлыс, етшажык ни кин тöждiс, кин мый керис, сiя топ и бур вöлi, а эзö кö керö, эшö буржык, ежели быдöн ни кысянькö да кытiськö босьтiс деньга и некин эз тшыгьяв.

Галялöн Петра бöра ни пондiс вунöтны, кыдз иньыс няпралiс кулаккесö да кöсйисис пышшыны кодяжык мужик дынö, бöра ни мужик пондiс мезмывлыны инькаыс дынiсь: оз-оз да, видзöтан кö, юыштö, бöра ни кодыш, бöра ни гортiсь öшö...

«Локтан тэ! Петух, юртö керала!» — пиннесö гичралö инька, мужиксö лöсьöтчö зэлöтны-велöтны, кидтö бы вина юöмись, да кытчö ни кидтан мортсö, кöр мужиккес топ быдöнныс ни öткодьöсь — öтiк следö тальччöны. Сiя жö Кöчыбын Курöг Саналöн Мишка нима любимöй зонокыс, кöдö мамыс эз тöд кыдз быдтыны, кöда эз ешты гöтрасьны, эз куж нывкаэз дынö сибöтчыны, а юны велалiс, сотчис винаöн. Сана горзiс, олiс мымдакö öтнас керкуын да мунiс посёлокö сойыс дынö. Кыным керку сэк хозяиннэзтöг кольччисö Кöчыбын? Кыным керкуын ни пондiсö овны каляннэз, осьта öшыннэзöт шутнялiс тöв, уннялiс-горзiс, ойезöн полöтiс отирсö. Кыным керку ни пилитiсö пес вылö, кöр мунiссесö нем видзчисьны, озö ни нiя бöр локтö горттэзаныс. Кöть Спирья дед эшö и модьö: «Бöр эшö вартасö гортö, думайтат кытöнкö оланыс буржык? Кымöрсяняс эд некытöн оз киссьы, быдлаын колö уджавны, а мунiссес озö уджалö. Сэтшöммеслö öння кадын только Кöчыбаным и овны!..» Висьталiс дед энö кыввесö и — бряк! Кытöн мортыс пукалiс, сэтчö и усис да сэсся дрыг эз кер — бур смертьöн кулiс. Дзебисö пöрись мортöс — сюйыштiсö му пытшкö, сыбöрын куим лун олiсö и... Галялöн мужик рытöн локтiс код, водiс джоджö, ланьтiс и асывнас эз чеччы, кыдз водiс мужикыс, сiдз и кулiс... И мый бы Петралö лоны, кöр эз норасьлы, что сылöн кыткö висьö?

4

Инька томся-томöн кольччис мужик сьöрись, томöн Галяöс дойдiс оланыс. Сiя медодз нач öшис, эз тöд мый керны, Петра кулöм бöрсянь нельки лун-мöд эз ветлы фермаö, кытшöмкö лунö босьтiс вина, юис кодззытöдз, коккес вылiсь усьтöдз, думайтiс, что öддьöн кö кодззас, кулас, но нем эз ло: узис, чеччис ловья, а Петра кыдз эз ло, сiдз эз и ло, сэтöн жö вина юöм бöрын висис юр, вöлi сэтшöм умöль, кöть унняв вартлöм пон моз.

Джагöтчис бы, но эз джагöтчы, пон моз быд лун эз унняв, только ружтiс, курччалiс тырппесö да горзiс, чышкис синваэсö. Гажтöм. Умöль. Сэк Галя вежöртiс, что отиртöг овны оз вермы, кöр ёрттэстöг эшö гажтöмжык, отир коласын шогсö öштас кöть баиттöн да уджавтöн... И инька бöра котöртiс фермаö, кытöн сытöг сылiсь мöссэсö абу и чилькöтöмась, видзчисьöны. Ыджыт öма Даша ыксö: «Галя, мыйлö мужиккесö?! Мый ныись?! Эзö кö бы вöлö, оланыс сизимись бы вöлi буржык! Некин бы сьöлöммез эз йир, то видзöт менам!..» Дашалöн мужик сэтöн жö, кылö и оз иньсö, адззö и оз, жöдзö, подалö öтöрись пыртлö вердчан, ас кежас мурзьö: «Тöдi-тöдi бы, что лоан сэтшöм лёк тютя, некöр бы эг гöтрась! Свалитчи бы Галяыскöт... Видзöт, сiя кытшöм бытшöм, топ мужикыс кулöм бöрсянь ёнмыштöма, рожабаннэс югмыштöмась — цветитö, а тэ, кукань, только кужан öмтö летны, бокын узьлыны да кагаэз ваявны; — и Галялö быдöнныс дырни шуö. — Галя, гöтрасям! Кикимораыскöт талун жö янсöтча! Тэнö понда стрась любитны!»

— Эн серав! — Галя орöтiс-висьталiс Öльöшлö. — Кыдзкö öтнам ола. Видзöт, кадыс тулыслань ни, озö я короминнаыс вылiсь вотялö вотьваэз ни. Сылас лымыс, гажа лоас, сьöлöмö вылын кокнямас и, пондас кö ковны, мужиксö адзза, öнi тiян кодь вина юиссес тыр!

Орöтiс-висьталiс инька и бытьтö былись вунöтiс мужиккес йылiсь: сэсся öтпыр эз горзы, эз понды отир дырни касьтывны Петрасö, кыдз бы бöр пöрис нывкаö: пизьö-олö синнэз одзын, сьöдкай моз сьылышалö, ой и лун уджалö. Казявтöг бöра локтiс тулыс, сылiс лым, ловзис быдкодь гут-гаг, вöр пасьтасис зелёнöй паськöмöн, ыббез вылын пондiсö урöтны-уджавны тракторрез. Кытчö мужик сьöрись кольччис инька, сiя керкуын и олiс, батшко-матшкакöт эз янсöтчы, мед моннесö öння кадын унажык радейтöны только сэк, кöр мужик эм, а абу кö, кин бы лоö инькаыс керкуын?

Олö батшко-матшкакöт Галя да гладя и бура оз жö ов: то джоджö тальччö зэркытöла, то дозмук сёйöм бöрын умöля миськалö. Биз да биз... Унажык керкуын инькаэс бизгöны, а батшко кывзö моньсö да иньсö и пеллес сайö тэчö да думайтö, кöр бура вежöртö, что öтлаын оласö-оласö, и моньыс адззас мужик, сэк мый керны? Керкуас эд нач озö пондö тöрны!

Олiсö пöриссез моньныскöт, олiсö гожумöн. Илья лун кежö батшко кивыльтiс посёлокö нылыс ордö гöститны, гöститiс лун-мöд, локтiс бöр, эз ешты пырны керкуö, пондiс иньыслö модьны: «Старуха, лöсьöтчы мунны нылыт ордö. Танькаыс видзчисьö... Сылöн керкуыс прос, тöрамö. Ась моньным кольччö».

— Ой, старик! Ладно я баитан? Гöссесö эд радейтöны недыр, да эшö Таньканым сюра жö эд...

— Верман кольччыны, öтнам муна, — старик орöтiс иньсö.

И мунiсö гортiсь пöриссес. Том инька керкуö овны кольччис дзир öтнас, ежели не лыддьыны каньöс. Да эшö картатыр вöлi пода, кöдö пöриссес колисö кытчöдз.

Вöлi эшö гожум, мед Илья лунсö шуöны ни арся праздникöн. Деревня дынiсь ыб вылын воис ни рудзöг. Кымöрын шондi бытьтö сайкалыштiс, бледöтыштiс, эз ни вывтi шонт. Сайкалiс му. Ойез лоисö кузьжыкöсь да ыркытжыкöсь. Ойезöн вирдалiс сiдз, что повзьывлiс сьöлöм, но эз гымав. Баитiсö, что еныс вирдалöмöн маммез дынiсь янсöтö том кайпöлöс, кöдна таво топ вöлiсö унажык: воробейез лун-лун чивзiсö улицаын, шыркйисö-лэбалiсö сымда, что лыддьыны бы он вермы, дзулимпöлöс эзö орддьö Кöчыбсö, сырчиккез, чикиссез, ракаэз, катшаэз... Чивзö, шутнялö, карзö...

Етшажык отир ни Кöчыбын, унажык кайез лэбалöны. Вачкисис бытьтö бы каёккез, гажöтiсö Галяöс, кöда кыным олiс, сыным пондiс гажтöмтчыны, ойез кежö керкуö öтнас эз бы и пыр ни, кытöн дзик сiйö видзчисис суседко, нерис, узьтöнняс чувйис, кöр былись лязöтлiс, пеллес одзын шушкис, мыйкö висьталiс бы или сералiс, мыйсянь вöтасис умöль вöттэз, сэтшöммезö, что саймас ойшöрöн, осьтас синнэсö и синнэзас кöть ёсь мöрт, озö бы куньсьö, некыдз оз вермы ланьтны. И юрын бергалöны думаэз, кöдна öшлöны и кералöны, ошкöны и видöны, кытчöкö нуöтöны и бöр вайöтöны. Думаэз дойдöны, пурöны, и ась некыт оз вись, мед оз шогав, но унаись эд умöльжык, нежели шогалiс бы да пöттöдз узис, ашынас чеччис, сёйис да котöртiс уджавны. То джын ой оз узь, чеччас и топ öшöм-бöбмöм, юрыс нето висьö, нето бергалö, киэзö некытшöм удж оз пыр, оз бы юктав и верд гортiсь пода, кöда карта вылын тыр: мöс, кукань, порсёк, курöггез, баляэз. Мыйкö вылö эшö батшкоыс вайöтлiс кроликкез, мунiс и колис кузь пеляэсö. Одз асылöн, эшö пемытсорöн, öтiк готсьö, мöдiк китсасьö, куимöт баксö — быдöн бы сёйö и юö, видзчисьö-тэрмöтö хозяйкасö.

Пемытöн чеччö Галя, кань моз тiльö-миссьö рожасö, пондö котрасьны öтöрö да керкуö, пырö-петö, усьö-пöрö, туна-тана... Юкталö мöс, кукань, баляэз, вердö порсь, кроликкез, пон, кань. Пемытсорöн жö осьтö карта ворота, кинöс колö лэдзö улицаö и бордпавйöн лэбзьö-мунö фермаö, кытöн видзчисьöны ни совхозiсь мöссэз, кöдна гортынмоз жö баксöны и бексöны, тэрмöтöны, медбы чожажык чилькöтiсö, вердiсö и юкталiсö, да сiдз, медбы уджалiсьыс некин вылö эз ыксы, эз вид, эз вачкы, медбы быдöнкöт кужис горöтчыны кыв, кыдз отиркöт жö, сiдз кыдз мöссэс озö кужö баитны, но быдöс вежöртöны.

Сiдз и чулалö лун — инька бергалö асывсянь рытöдз, кöр вунöтлö пуксьыштны-шоччисьыштны, сёйны, топ сылö колö медуна, только сы весьтöт ендö удж.

Пондылiс бы юскисьны ни фермасис, но былик сина бригадирыс пиньöвтiс öмсö, пондiс дзуртны: «Тэ мый, Галя? Кин пондас тэнчит мöссэсö чилькöтны? Косьмасö эд...»

— Кöть кин чилькöт! Менам я мый я подаыс? Отирыс тай шляйтчöны. Вайöт фермааныт кытшöмкö весьолiсьöс. Озö я конторааныт тыр пукалö, рожаэзныс гöрд только!

— Ылалан баснинат, инька! Локтас кинкö тэ местö уджавнытö и öтiк лунöн мöссэсö тшыкöтас. Уджав. Кöть эд кытöн колö уджавны.

— Кокнитжык бы вöлi сiдз овнытö... Видзöт Даша гозъяыс кежисö фермасис и озö кулö, олöны да миян коддезся буржыка, кöр мужикыс леспромхозас пондiс шедтiсьны. Мужикаэслö сё ни кокнитжык...

— А тэ адззы...

— И адзза! Мый сэтшöмыс? Адззан торыс я мый я менам абу? Только пола, что вина юись шедас, — юрсö чатыртö инькаыс, — тыра мороссэс чер керöны.

— Вина юиссес эд отир жö, — ассис кöстö бригадирыс.

Инька бригадир одзын чатыртö юрсö, ошшасьö, что мунас кö эстiсь, некытчö оз торксьы, некытöн оз йöрмы, да весись жö ошшасьö, кöр кывнас керö, а думаэс некытчö озö нуöтö, медодз полöны тöдтöм отирись, тöдтöм местаэзiсь и оланiсь, сэтчинiсь, кытöн эз вöв, кытöнöсь, натьтö, абу пода, а веськыта кö висьтавны, овны оз вермы, кöр мöссэс бердö кыдз кöрталöм, ась сiя жö Дашаыс пантасяс да нерö: «Галя, чожа фермаас öтнат нятьсö панявны кольччан. Машаыс мужикнас подаыс дынiсь кежöны жö, кыкнанныс, тай, пышшöны бы посёлокас жö. А мый? Ме тай медпунктас пондi уджавны санитарканас и öддьöн бур лоис! Узя да ола...»

— Дядьыт эз бы кö сельсоветас начальникав, эн жö бы медпунктсö адззыв, — Дашалö пеничайтö Галя, лöгыс петö подругаыс вылö, мыля сiя велалiс овны кокнита, кыдз орсöтчö ни оланыскöт.

— Öнi, Галя, сiдз и овсьö, — немымда баснинас оз чукляв Дашаыс. — Öнi быдлаын колö блат. Ме бы тэ местын...

— Ог тöд, мый бы керин ме местын! Думайтан, кокнит öтнамлö. Отир коласын гардча — öшта лунсö да бöра. Абу кö счастьеыс, дак он неб...

— А мужиккесö сiдз позьö адззыны! — ошшасьö Даша. — Менам, тай, пыр пышшö бы и ась пышшö! Горзыны ог понды. Керкусис следыс оз ешты сайкавны, виль лоас! Хи-хи... Вильмоз колö овнытö, Галя! Адззывлан, телевизорас мый мыччалöны! Ой и лун öтiк... То вийöны, то пасьтöммес любитчöны, кыдз гуттэз пызан вылын, или гöтрасьöны да янсöтчöны. Велöтöны миян кодьсö овнытö!

— Некöр меным берся страмсö видзöтны...

Былись том инькалö некöр телевизорсö видзöтны. Поди, былись бы позис ни Дашаыс моз фермасис кежны, кöр комсомольскöй бригаданыс разьсис, абуöсь ни томмес подаыс дынын, только Галяыс öтнас, Даша коддесö вежисö пöрисьжык инькаэз, кöдналöн мывкыддэзныс и киподныс мöдкодьöсь, сьöлöммезныс кыдз бы сайкалöмась ни, дышöла ни уджалöны, мöссэслiсь йöв етшажык ни чилькöтöны.

Чулалö гожум. Галя понда гожумыс кыдз эз вöв — быдöс кад сёйö удж, кöр кад öшö пода дынын, кöр эшö аслыс колiс керны турун, кöдö ытшкис то ойезöн, то гортсянь или фермасянь мунтöн чепсасис видзоккез вылö, сэтчöдз котрасис, что умöльтчис, сырсмис, öшис синнэзсис гаж, вылас паськöмыс пондiс öвтчыны топ полокала вылын. Гожумбыт инька керис-керис аслыс турунсö и эшö колiс керны, мед видззес вылын туруныс кельдöтiс ни.

— Мыйлö тэ öтнат сымда подасö видзан? — юасьö Дарья баб, кöда томсяняс эд сэтшöм жö горш вöлi, а öнi ныжмис ни, оз ни вермы гортсис ылö ветлöтны, но эшö Кöчыбаныс вайöтiс кöза, кöдö тöвнас мыйöнкö пондас ковны вердны жö, но старуха немымда оз тöжды: сы ордын таво гожйöны мужиккез, кöдна локтiсö тулысöн — кытшöмкö экспедицияын уджалöны, вöррезiсь етша петавлöны, бытьтö пö кошшöны нефть, а кин нiйö тöдö, мый мужиккес öштiсö вöрас, мыля гожумбыт вердöны номмез, кöр бытьтö бы асьныс озö тöдö мый керöны, и ась... Сы местö квартиранттэз отсасьöны баблö керны турун, а сэсся мый колö? И гöснеч эм, кöр мужиккес ветласö городö да вайöны то конфетаэз, то пряниккез, то эшö мыйкö сэтшöмö, кöдö татöн овтöн Дарья баб некöр эз пешлы.

Олöны пöрись ордын мужиккез, кöднö старухаыс пыр ошкö, бытьтö пö квартиранттэс юöны да етша, а эта... Денис нимаыс, винасö öмас оз босьт. Кезöтö мортсö тагьяыс.

— Эмöсь жö эшö, батя, Галю, кодя отирыс, — баб ошшасьö Галялö. — Денисыс эд гöтыртöм и оз думайт гöтрасьнытö. Баитö эд, что ме пö, баб, ме пö этö... Сороккезöдззам ола да вöлись инькасö адзза. Быдтö бы окöяннöй бытшöм невеста, кöда пö этö... Оз понды винасö юны, öддьöн пö пондас любитны Дениссö. Вот эд кыдз, кутю! Веритан, он сэтшöмыслö? Ме дак, öнджа... Верита. — Старуха баитö и видзчисьö, мый висьталас Галяыс, дыр мыйись содтö. — Галю, ожо, ме сыкöт баита, озö я нiя бы тэныт отсалö ытшкынытö. А мый? Вермасö эд!

— Тэ мый, баб?! — повзис Галяыс. — Мыйöн ме тэныт и ныкöт понда вештiсьны? Нiйö эд весь он уджöт.

— А мый нылö колö? Мöсыт эд эм, йöлöн вердан.

— Баб, эн баит, мый оз ков! Ме пола мужиккесис.

— Кыдз он пов öння кадын? Видзöт жö мый керсьö и кывсьö! Абу я пö Кöсас мужиккеслö шедлöма öтiк инька да сыбöрын джагöтчöма, ой-ой!

Баб кыдз пондас баитны, чожа оз дугды — разьö и разьö, бытьтö гортын овтöн быдöс тöдö, кыдз быдöс адззылö ачыс или кылö, только кывзы да пеллет сайö тэч. Галя пöрисьсö кывзiс и эз, шыннялiс, баиттöн шоччисис, сыбöрын котрасис видз вылö, видз вывсянь — фермаö, фермасянь локтö пемыт, йöртö карта вылö ассис пода, эшö усьтöдз бергалö керкуас. Талун-ашын пондас ковны дзимлявны картов, кöдö таво садитiс аслас садникö да дзик эз пöт öтiк садникнас и тулысöн картов сюйис эшö Ондроннэз йöрö.

Гожум дженыт, кыдз тöн вöлi эшö тулыс, а талун ар ни. Вöрын вежöтö ни лист, коккез увтын чорзьö да кельдöтö турун.

5

Талун да ашын и садникын картов босьтсис — йöрын удж керсис да сiйöн одзжык керсис, что былись отсасис баблöн квартирантыс: гуддисис нятьын Денис, кöда кытiсь и вöлi, кысянь Кöчыбö и локтiс, вöлi тöдтöм да лоис тöдса, бытьтö чужис, быдмис, олiс и пондас овны татöн да, видзöт жö, кыдз эшö пондас овны, ежели кытiськö пондöма тöдны, что медбöрья сентябрь лунö Галялöн чужан лун, кöр ачыс инькаыс уджавтöн-бергавтöн вунöтлiс эта йылiсь, кöр мортлö пыр некöр: пыр уджалö, кыдз пуö сир пöртйын, а талун, на! Галя, тэнат чужан лун! И тэ, инька, этö эн суськы, а рытнас пызан вылö вай мый эм и абу: абусö гöссез озö сёйö, эмсö бокö озö чапкö.

Чужан лун инькалöн, кöдö сiя эз бы пызан сайын чулöт: асывсянь, кыдз быд лун, чеччис одза-одз, пемытсорöн тойис-койис аслас пода дынын, вунöтiс, миссис я рожасö, сёйис я, вердiс я понсö, кöда некöр эз кор сёйны, пыр асылöн пукалö посöдзын, вежöрöн видзöтö, мый керö хозяйкаыс, кыдз сiя бергалö öтöрын да керкуын, сыбöрын петö керкуись, жвангö-игналö посöдз ыбöс да сiдз, что поныс ештö только чеччöвтны, гардыштö бöжсö и лэбзьö-котöртö фермаö жö.

Понкöт кыкöн и чулöтöны лун — этчин да татчö, гортö да гортiсь, ветлöттöн ештiс нельки кежавны да ноша-мöд куртны видзок вылiсь турун, кöда нач ни чорзьöма, сорласьöма ни вöр вылiсь киссьöм листсорöн, эз ни ков ытшкыны да косьтыны.

Инька лун жöдзис коккес вылын, сёр рытöн мезмис уджись, пырис керкуö, öзтiс би, вывсис пондiс чöвтны назём да пода дука паськöм, сэтöн посöдзын кивзыштiс, кинкö вылö радуйтчис, Серко, кинкö турски-тарски кайис посöдзö, маласьтöн осьтiс ыбöс и... Керкуö пырис Дарья баб да аслас квартиранткöт, заргисисö кыдз йöрö бараннэз, кöднö татöн эзö видзчисьö, чужöммезын гаж орсö, пöрисьыс кыдз томмöма, кылыс öмас бергалö сярган моз. — Дитю, кагу, тэ миянöс эн вид. Ми весь тэ ордö эгö локтö. Чужан лун тэнат талун абу я? Сэк мый нö? Буржыка тэныт овны, здоровьё буржыкö да чассё керкуат тыр. Да öтнат, кагу, поди, этадз он жö понды овны... Поди, гоз-ёрт жö колас али мый?

Дузгыльтчыштiс Галяыс — сьöлöмсö пидзыртiс гажтöм, кöр этчö колiс бы мужикыс, кöр Петькаыстöг оланыс олан вылö оз и вачкись, кöть уджын асьтö кувтöдз пидзрав! И мыля сiдз керö еныс? Мыля дойдö Галясö?! Мый сiя сэтшöм умöльсö еныслö керис?

Умöль лоис инькаыслö, кöр локтiсö гöссес, и колiс бы гажöтчыны, и сiя пöрисьлö пондiс пеничайтны:

— Баб, кытiсь тэ и мый одзлань тöдан? Ме ачым вунöтi, что талун чужан лун...

— Мыля ме тэнчит чужан лунсö ог понды тöдны? Кинлiсь сэк понда тöдны? Поныслiсь да порсьлiсь я мый я? Не-е-е, дитю... Кöть тэ мый шу, кöть кыдз пöрись кокорасö вид, но ме эшö нач мывкыднам эг дзугсьы.

Баб ырбыльтö, только кывзы, а квартирантыс айпöв сьöла моз, кыдз мампöв сьöла гöгöрын чывкйö-бергалö, тюр-тюр баитö и мый тюргö Денис нимаыс, Галя кылö и оз, кöр том нывка öшис моз нач, чисто рожабаннэзас вир пондiс орсны, а Денисыс жмитыштiс ни пельпоннэсö да сэтшöм небыта, бытьтö киэсö керöмась небыт нянись. Жмитыштiс гöсьыс инькасö, сэтöн жö нюжöтiс цветтэз да сэтшöм басöккезö, кöдна татöн топ некытöн озö быдмö — абуöсь, но Галя понда эмöсь эд! Эмöсь цветтэз, и эшö Денисыс мыйкö каттьöма гижöтö, сiдзкö, козин вайöма, кöда нач и нач эз бы ков инькалö, кöр сiя мужиккескöт одзжык и талун эз бы тöдчы, некытшöм козин эз бы босьт. Но Дарья бабыс сэтöн и эм, бöра пиньтöм öмнас жевгö-шуö, тэ мый пö, кутю. Мыля тэ сiдз, кöр тэныт мортыс бурсö керö.

Вир чепöссис инька чужöмö, öгравны-сотчыны пондiс быдöс вывтырыс ни, сьöлöмыс пондiс пессьыны, кöр эшö Денисыс козинсö сетöм бöрын чуп окыштiс рожабансö да сэтшöм кокнита и пыма окалiс, бытьтö рожабанас пым тупöсь лякис, кöда небыт и чöскыт.

Мый сэтöн керны? Вашöтны я мый я керкусис гöссесö, кöднö эн кор, эн видзчись? Сьöлöм оз лэбтiсь, медбы отирöс репöтны ыбöс сайö. Галя дзебсисис комö ыбöсок сайö, вывсис вежис уджалан паськöмсö и вöлись би югöр весьтын лоис сiдз и сiя, кöда вöлi шоччисьтöн, кöдалö колiс лоны томся-том инькаöн, кöдö удж эшö нач оз дойд, оз вий, оз пöрисьты, а кыдз эшö томтö, басöксьöтö. Пода вöдитiсись эстöн жö, синнэз одзын, пöрис, шуам, топ челядь велöтiсьö или отир веськöтiсьö, сэтшöм мортöн мыгöрнас и чужöмнас лоис, кöда синнэз гусялö, сералö-гажöтö, кыскö дынас да сiдз кыскö, только сы вылö бы и видзöтiн. И Галя вылiсь синнэз эз öшты Денисыс, кöр эшö кыдз кужис и вермис, сiдз ассис соседкасö и ошкис Дарья баб, бытьтö асьсö ошкис, ачыс жöник сайö лöсьöтчис.

Галя кылiс и эз баблiсь лёбöм, кöр сылöн юрас быдöс сорлассисö-дзугсисö думаэз, эз письты нем бы керны, да бöра жö пöрисьыс висьталiс, медбы медодз пызан вылын вöлi сёян-юан, то пызан вылын сулалö ни дона винаöн бутылка да сэтшöм винаöн, кöда ма кодь чöскыт, юан и он кодззы, кöр пöрисьыс юö бы да вöлись эшö содтö бы кыв-мöд.

Инька ась и уджалö, ась сылö некöр бы и сынавны юр, но кöркö ештöма ваявны и солавны тшак, и эм сылöн ягöд, отир моз жö быдтiс помидоррез и огуреццез — быдöс, мый колö, солалiс, пуис-пöжис, тэчис банкаэзö, сiдзкö, сёйö и юö, гöссез, да колхозницасö эдö осудитö, кöр яй эшö абу, но сы местö пызан вылын лоис бекöртыр нöкьяйöв, рись, а сэсся, ёрттэз, мый колö? Сэсся крестьяналö нем оз ков.

Пуксисö пызан сайö, сёйисö, юыштiсö винаок, кöда былись вöлöма ма кодь чöскыт, но аскоддя: кодззöтiс ас мознас, кöр пызан сайын жö медодз орисö кикок, а юрын кыдз нем умöль эз ло, только сьöлöм пондiс быркайтны гажсянь. Быдöнныс юыштiсö пызан сайын, лоис öддьöн бур и öддьöн гажа. Галяöс кыдз кинкö пондiс чувйыны, гильöтiс боккесö, и пондiс инькаыс челядёк моз киссьыны-серавны, сiдз ваксис, что медодз Дарья баб видзöтiс-видзöтiс томжыккес вылö да пондiс серавны жö, но эз эд йöзöс, а асьсö, мыля сiя одз пöрисьмис, мыля гардчö томмес коласын, мыля кулö бы и оз вермы кувны, недыр мыйись бузгис-висьталiс, что пантасис кöбы старичок, ась бы öмас вöлiсö кöть куим пинь, ась бы кöть кыскасис бедь вылын, ась бокас эз ни бы вермы узьны, но вöлi бы керкуын ёрт, медбы вöлi кинкöт кыв горöтчыны, то дзир эд öтнас кольччас деревняас, öтнас кулас кö, некин оз дзеб: шыррес сёясö.

— А ме мый, баб? Ме эд некытчö ог ло. Öтлаасям öтiк керкуö и пондамö овны, — висьталiс Галя.

— Но тэ, Галю! Но тэ и дитю? Тэнат эд борддэт эшö абу ме кодьöсь, тэ эшö каёк моз лэбзян и касьтыв кытшöм вöлiн! — Некытчö ни, баб, ог мун. Некин меным оз ков, — гажтöма висьталiс хозяйкаыс, кымöртчыштiс, мыйсянь топ лоис эшö басöкжык.

Пызан сайын кытчöдзкö унажык баитiсö том да пöрись иньпöлöс, мужик басни эз дзуг, кывзiс, шыннялiс, панялiс сёяннэз да ошкышалiс нiйö, кöр комиэзлiсь сёяннэсö абу адззывлöма, ны йылiсь абу кывлöма, а нiя видзöтö жö!.. Öтiк ырöшыс кытшöм! Кин да кытöн бы эшö этатшöм ырöшсö сысъялö? Кöть мый шуö, коми инькаэс, тыдалö, прокаöсь и чожöсь!

— Вомдзалан эд! — комиöн баитiс Галяыс, кöть гöсьыс чужöма и быдмöма кытöнкö ылын и татöн дыр эшö эз ов, но невна баснисö вежöртö ни, тöдö ни, мый сэтшöм пань, нянь и кин сэтшöм кань.

— Сiдз, — сералö бабыс. — Грех лоас, ежели он понды тöдны, мый сёян и кыдз сёян, и кыдз сёянсö шуöны.

— Чöскыт тiян няньыс! — Денис ошкис том инькалiсь няньсö. — Кин тiянöс велöтö няньсö пöжавны?

— Кин велöтас?! Асьным асьнымöс, дитю, велöтамö. Тэ бы татчö одзжык локтiн — войнаöдззас бы сибалiн, вöлись эд адззылiн бы, мый ми кужимö керны? Ой-е... Дöраэсö кытшöммезö кыйимö, пöкрöммесö, кушаккесö... Господи... Да мый ми эгö кужö керны?! Нинкöммесö асьным эгö я инькаэс кыйимö, — Дарья баб кинас чышкыштiс син дорресö, нач гажтöммис, содтiс. — Сьöкыта ми, дитю, олiмö, умöля. Ёна тшыг кынöмсö пешлiмö — выттезнымöс нюжлалiмö, ой! А некин эд, батя, гортiсь некытчö эз пышшы, тшыгйöн уджалiм ой и лун. Умöля олiмö, кагаэз, — кокнитжыка ловзисис, чатыртыштiс ни юрсö пöрисьыс. — Öнi сы сьöртi öддьöн эд бура ни оламö. Стрась бура! А горзöны-норасьöны эд, что умöля олöны... Тьфу бы сэтшöм баснисö! Дышным увья! Видзöтö тай, öтiк деревняын олi-олi, некöр эг думайт, что сiя разьсяс, а кыдз пондiс разьсьыны, мый и лоис! Кин да кытчö и öшис! — Юрнас пондiс öвтны. — О-о-о, челядь, важся годдэзас, натьтö, этатшöмыс эз бы шогмы. Сотiсö кыдз Кöчыбнымöс, господи! — бöра чышкыштiс син дорресö, одзлань лыддьöтiс. — Озö я джын ыббесö ни озö гöрö, а кöркö стариккес пырасö да пырасö вöрас — быдса лун вöввезöн-няридззезöн мунасö гöрны чöвпан ыжда му. Во кыдз вöлi! Сiйöн и нянь ассиным сёйимö, а öнi няньыс понда некин оз горзы — быдöнныс пöтöсь и кодöсь. Но, господи! Поди, унаöв ни кывнам гöрдзза? Тi эд меным немымда одö веритö.

— Тэ мый, баб? — кыдз повзис Галяыс, кöр сiя бура вежöртiс пöрисьсö, кöда чеччис пызан сайись, пондылiс юрбитны ен угöлö да дугдiс, кöр еннэз хозяйкалöн абуöсь — тöдö и оз енсö.

Пызан сайись чеччис и гöсь, бöра асьсö кинкö моз эз лэбты, эз польды-кешитчы, немöн эз мыччав, что сiя роч и мыйöнкö буржык комиэзся.

Баб лöсьöтчис петны керкусис, висьталiс спасибо Галялö, корис вовлыны жö бöра баббезас, а то пö гажтöмтчö сытöг.

Баб сьöрö вöтчис гöсьыс, петтöн эз вунöт роччез моз окыштны хозяйкалiсь кисö, эз брезгуйт пода вöдитiсьлiсь-уджалiсьлiсь тырппезнас шонтышны вына килапа, эз вунöт видзöтны веськыта синнэзö, кыдз бы аслас лэчыт синнэзöн сотыштiс, чапкис инька сьöлöмö шоныт бичирок.

6

Мунiсö гöссез. Хозяйка бöра öтнас кольччис керкуö, кытöн полiс и эз овны, а талун мый и лоис, кыдз бы соседдэс тшыкöтiсö олансö, керкуö колисö аскодя икотаэз, кöдна ольпась вылын пондiсö чувйыны боккез, некыдз эзö лэдзö онмöссьыны, мед синнэсö кунис, куйлiс ольпась вылын, неöтпыр пондылiс ланьтны, да саймылiс: то мутшнитас кер, то тачнитас забор, топ мыйкö кытiськö вотьыштас, или джодж кузя топ сiдз кинкö и мунö — чуш-паш кылöны кокшыэз. Топ бессэз керкуас пырисö да оййöны, нерöны, мыйкö бы висьталöны. А мый бы висьталöны, кöр Галялöн синнэс одзын роч мужикыс, бытьтö сё легöтö вина бутылкаöн, козьналö бы козин, синнэс сералöны, мыйкö висьталö бы и оз. Дума курччалö: «Ой инька! Эта мортыс мыйöнкö мöдкодь — абу миянiсь мужиккес кодь. Поди, синнэс весись озö шыннялö? Бат, кырныш моз лэбалö ни тэ весьтын, кокыштö бы, кöр бабыс сэтшöм жö...» Сэтöн жö асьсö пурö: «Тэ мый, пасма?! Ачыт я? мый сы йылiсь думайтан? Юртö эд керавны бы...» Видö асьсö Галя — вöвлытöм шогöтöн шогалö, сьöлöмыс пессьö, мыйкö кошшö, висьö.

Сiдз ойыс и чулалiс — шогöтся-шогöт кодь вöлi, асывланяс ни ланьтiс, но бура эз узь, кöр бöра колiс одзжык чеччыны да уджавны, и чеччис, и уджалiс медодз гортын. Нач пемытсорöн иньдöтчис фермаö, тэрмасис тöдса туйöт, лэчыта видзöтiс одзас, коккес увтö и бöра мыйиськö полiс, бытьтö туй бокын кинкö сулалiс, видзчисис, лöсьöтчис чеччöвтны да шамыртны. Только поныс вылö и надейтчис, кöда немись эз пов, котрасис — öшлiс синнэз одзись да казявтöг мыччисьлiс бöр, повзьöтлiс.

Уджалiс быдса лун, гортö локтiс пемыт, мыдз: кикок эз бы вöрзьöт, водiс да узис бы, топ вунöтiс ни тöння рытсясö. Меститiс ассис пода, лöсьöтчис водны, но эз ешты: керкуö кивзытöн, ружтытöн да бедьöн беддясьтöн пырис Дарья баб.

— Мый ветлöтан сэтшöм сёрöн? Он узь! — юалiс Галяыс.

— Кудöбаыс кыскалас эд, уф! Керкуам аслам юр вылö лэдзи, нiя и чулошитöны. Этаыс... Рочыс, икота, зника оз сет... Ачыс, кывзы, неделя кежö бöра мунiс вöррезас, меным сетiс деньга и висьталiс: баб, тэ пö кöть кулöм, кöть ловья лоан, петав Галяэзас и висьтав, уф! Господи, сьöлöмö я мый я сувтö бы... Но и ась. Дак кывзы, мый рочыс тшöктiс висьтавны! Сiя шуис, медбы тэ дынö петалi да висьталi, что тэнö любитö, уф! Господи! Ме кöркö сэтшöм кывсö эг и кывлы, а нiя öнi... — Юрсö лэбтыштiс, виноватöя содтiс. — Дитю, любитö сiя тэнö и гöтрасьö бы! Быль! Мунан али он?

Баблöн синнэс гöрдöтöмась, тырппес лöзöтöмась, лолалö — моросыс паськöмсорöн дюттясьö. Кувны бабыс лöсьöтчö, а корасьтöн ветлöтö и любитöм касьтылö...

— Ме тэнö, старуха! Ме тэнö, баб, кыдз ыбöсыс бöрö иньда! Кыдз посöдзыс омöн лэдза, он понды сэтöн-ка ветлöтны! — Сьöлöм öзйис том инькалöн, нач лöгасис пöрись вылö. — Тэ быдöс эстöн соровтан арттöм юрнат! Колö кö, любо кö Денисыт, ачыт сы сайö и мун, а мыйлö этчö вовлан? Стыд тэныт абу, баб! Симöт рожаат, поди, колö павдöтны да вöлись. Тэ эд тöдан менчим олансö: öтiк мужик муö сюйыштi, öнi мöдiкöс, думайтан, кошша. Думайтан, сiдз менам и лудö бöр гöгöрö.

— Уф, Галю! Но тэнат и кыв! Но тэ висьталан дак висьталан — не бöрат, не одзат он видзöтлы... Думайтi, что бурö кера, а петö... Быль я мый я рожаам симöт павдöтны?

— Котöрт сэк гортат да шоччись. Ме бы узя.

Пöрись ружтытöн да нырыс увтын тоткытöн петiс керкуись. Галя пöрисьсö кольлалiс — отсалiс лэдзчыны посöдзись. Бурундук вылын ни бöра шыасис: «Тэ, пöрись, этö... Эн лöгась».

— Сэк мый висьтавны? — баб сё эд кöстiс ассис. Томыс мурзьытöн бергöтчис и пырис керкуö.

Чулалiс неделя, кöда кыдз шогалiс: ар да гожум тышкасисö-вермасисö, то кöдздöтлiс, шлячитiс и зэрис öтлаын, то шонтiс бöр. Галялöн олан невна лоис личытжык: турун керсис, картов босьтсис, кералiс ни гряд вылiсь капуста, дзимлялiс морковь.

Инька уджалiс фермаын и тöв йылiсь думайтiс, кöда лоас кузь, кöдзыт, кыссяс дыр и дыр, берся бöра мыччалас, кöр таво совхознöй подалö турун керисö етша. Юскисис ни бы мöссэс дынiсь, но кытöн бы öння кадын уджавны деревняын, мый керны? Некин сайсянь эд адззыны кокнит удж.

И олiс одзлань инька, некинiсь и немись вывтi эз пов, бура помнитö кресення лунсö, кöда асылö вöлi кöдзыт, кынтiс, усис кыз пуж, шондi петтöн лоис эшö кöдзытжык. Етшажык ни лэбалiсö да льöмпуэз вылын кокасисö ватшканнэз, жонь пукалiс пу ув вылын, топ ошшасис, что сiя басöк, жевгышалiс-шутнялiс, дынас корис ёрттэсö. Короминна вылын китшсис катша, висьталiс гöсьöс, лöгöтiс Галяöс, кöда кывзiс-кывзiс катшалiсь китшсьöм да посöдзсянь кайлö ыкöстiс:

— Кыдз босьта пишальсö да бокыт кузя пöжала, пондан тöдны кыдз китшсьыны! Лэбзьы да кытöнкö китшсьы, а эн эстöн кучиксит пет! Тэтöг тöда, кин меным колас или оз.

Галялöн былись эм пишаль, сiя эшö виль: ниртöм-мавтöм, дзебöм гор сайö. Пишальыс айыслöн, кöда сытöг эз вермы овны, пыр вöрын да вöрын öвтчис, гортö кодьöн эз и вовлы, некытчö дзар бы эз кер, кöть Галялöн мамыс пыр мужиксö видiс, модис:

— Вöрдядьыс инь дынö я мый я ни вöрас ветлöтан?! Мун да гöтрась лешачикаыскöт, менчим юрвеммезöс эн ни сёй! Он адззы, гид ыбöсыс оз пöднассьы, усьö ни. Кöрттув бы дорин! Абу дак абу сэтшöм мужикыс!..

— Дорам, — висьтавлiс мужикыс, босьтлiс пишаль и öшлiс лун-мöд кежö: не ойöн он адззыв, не лунöн он кут, олö — нерö олансö, совхозын только лыддиссьö уджалiсьöн, а висьтавны кö, оз уджав.

Сэтчöдз вöрын öвтчис мужикыс, что öтпыр тöвнас, меддженыт гажтöм кöдзыт луннэзö, кöр лымыс вöлi косви ни, асывнас одз, пемытсорöн мунiс гортiсь и рытнас эз лок. Иньыс, мед мужиксö и эз радейт, желлясис, кыдз кужис, сiдз и видiс, öнi пондiс педзны, бытьтö пуксьöтiсö пым пöим вылö, öтöрö да керкуö котрасис, лёбис, что Макарыскöт мыйкö лоис — торксис мортыс.

Вермис я Макарыс торксьыны вöрын, кöда вöрсис кодьöн эз и вовлы, кöр тöлöн узьö ош, юэз кынöсь — мортöс джагöтны некинлö, и вöйны оз бы вермы. Оз веритсьы, что вöралiсьöс вöрын вермас кинкö дойдны, но абу мужикыс. Локтiс рыт, вöлi кöдзыт да эшö кöдздöтiс, кымöрын дзöрисö звездаэз, видзöтiс тöлiсь — синнэзнас кваркыш эз кер, вöр узис пыд онöн, чочком гладь лым вылын след эз тыдав, кыдз только Макарлöн лямпа след, Макар сiдз эз и лок.

Узисö я, эзö я ойсö, быдöнлöн пессисö сьöлöммез. Чулалiс кузь тöвся ой. Макарика одз асывнас котöртiс мужиккез дынö, пондiс горзыны да кеймисьны, медбы отсалiсö — кошшисö «люш пельсö», кöр, поди, вöралiсьыс кытöнкö вöлi эшö ловья.

Кöр мужиккесö вöрö, бат, зорöн бы эн зорьяв, шатьöн горттэзiсь эн вашöт, но талун кывзiсö Макарлiсь иньсö, кöмалiсö лямпаэз, босьтiсö пишаллез и вöралiсь след кузя ыскöвтiсö вöрö.

Лун бöра вöлi кöдзыт — тшын гардчис, кöдзытыс сiдз и сотiс. Шондi кымöрын мыччисьлiс луншöр гöгöрын, мыччалiс гöрд-вежвевья чужöмсö, топ кынмис жö, немымда эз лэбтiсь вöрыс вевдöрö, бöр сунгисис вöр сайö. Только шондiыс ештiс пуксьыны, мужиккес сэтöн и вöлiсö ни — локтiсö вöрись, кынмöмась, öммезнысö озö вермö осьтны. Висьталiсö, что Макарыс кулöма: тон-тон кынмöма ни лым вылын, сiдзкö, медодз колö юöртны милицияö, медбы видзöтiсö, вöралiсьыс аслас смертьöн абу эд кулöма — вир мортыслiсь лэдзöмась, и, натьтö, зверрез...

— Кыдз?! Мый?! Мыля?! — Галялöн мам пондiс нетшкыны юрсиэсö да уннявны пурöм пон моз.

Локтiс милиция, мунiсö вöрö, видзöтiсö и пондiсö тöдны, что Макар лямпаэзöн вöтлiсьöма вöрын олiсь порссез сьöрын, öтiклö лыйöма — ранитöма, и зверьыс лöгувья уськöтчöма вöралiсь вылö, кузь ков пиньнас мортлiсь орöтöма веськыт кок лидзимсис жила. Орöтöма зверь морт кокись жила, и сэсся кытчö ни лямпаэзнат лымыс кузя ыскöвтан, кöр эшö вир визывтö. Сiдз лым вылö и кулöма Макарыс.

Дзебисö мужиксö. Галялöн мам мужиклiсь пишальсö лöсьöтчис сотны, но мылякö эз жö сот и эз вузав. А нывсö ай учöтся-учöтöн велöтiс лыйсьыны, пыр ловьядыр баитiс, что пондасö Галякöт вöравны кыкöн...

Галялöн, сiдзкö, эм пишаль, сiя пыдö дзебöма, оз китсась, некин оз тöд, эм я керкуын.

Талун том инькалö мылякö тöдвылас усис пишальыс, сыбöрын роч соседыс, кöда вуджöртчис ни баббез öшын увтын, тыдалö, посöдзись казялiс Галясö, ыкöстiс: «Галя, сулав!»

— Мый ме дынö öштiн? — нето сералiс, нето лöга юалiс Галяыс.

— Сулав, — кеймисьöмöн мöдпöв шыасис рочыс да кузь шаггезöн шагньöвтiс инькалань, кöдалöн сьöлöмыс ёткöп мунiс, саясис бы, но мылякö коккес эзö кывзiсьö, а Денисыс шагньöвтiс ни посöдзöдз, шамыртiс кыкнан кинас Галясö, жмитiс моросыс бердö, окыштiс и висьталiс, что öддьöн гажтöмтчис, что любитö, что этö... Талун жö гöтрасяс.

— Гöтрась, гöтрась, — то ли нерис инькаыс, то ли былись вöзйисис, шай-пай мунiс, ачыс эз ни тöд, мый баитiс.

Рытнас и гöтрасисö, гöтрасисö сiдз, кыдз кужисö: пуксьылiсö пызан сайö, сёйисö да юисö бур вина, но кодззытöдз эзö юö, кывзiсö, кыдз жевгис Дарья баб, кöда вöлi сэтöн жö, кöда висьталiс, мед оласö бура-бытшöма, ась лоасö нылöн челядь — «чассё» кöсйис, ыксiс бы «горько», да голосыс сибдiс, сыбöрын петiс керкуись, а томмес водiсö ольпась вылö и пондiсö окасьны...

Галя эшö бура эз тöд, мый керис: колiс я этадз, топ былись эз вöв ачыс, топ кинкö юасьтöг-висьтасьтöг кöрталiс Денис бердö, кöр одзжык полiс моз, ежели мужикыс эз вöв миян мужиккез кодь мывкыднас и мыгöрнас, и киподнас...

7

Неделя олiсö сэтшöм бытшöма: Денис иньсö нем эз лэдз керны — быдöс бы керис ачыс, нырсö сюйис быд пельöсö, нельки велöтчис чилькöтны мöс, кольттьöтiс курöггез. А тэ, Галя, пукав-ко да видзöт, мый мужикыт керö, кытшöм сiя прока, чож и вына. Бура бы мужик видзис иньсö — киэс вылын новйöтiс. Сiдз чулалiс неделя, мöд неделяö мужик гортiсь öшис, бöра мунiс уджавны вöррезö. Инька кольччис öтнас, котöртiс фермаö, кытöн сiйö быд лун видзчисисö мöссэз, кöднакöт янсöтчыны эз вермы, эз вермы овны податöг, уджалiс сiдз, кыдз кужис, вермис и висьталiс сьöлöмыс, керис сiдз, медбы бöрсяняс мöдпöв эз керö, медбы гортö локтiс, да сьöлöмыс эз вись сюра-бöжаэз понда.

Кад чулалiс. Эз эшö вöв тöвшöр — локтiс вöлись декабрь месяц, эзö эшö вöлö кöдзыт мороззэза луннэз, а фермаын пода вердiсö ни нормаöн — кырымись ни сеталiсö турун, кöр эшö арсянь дышöтчисö быд лун керны запарка, эзö кералö да ваялö лыс.

Петiс, что кыным олiсö одзлань, сыным совхозныс киссис-разьсис, медодз дисциплина чотiс нёльнан кокнас. И мыля сылö не чотны, кöр юррез эзö сайкавлö директорлöн, бригадирлöн. Директоррезöн кыдз орсiсö-вежласисö: öтiкö пуктасö, джын год оз уджав, бöр ни брынöтöны. Öтiк директор мöс начкылö да сёйö совхозiсь, мöдiк — совхознöй машинаöн ысласяс-керас и катыльтчас кытчöкö гортас, кытöн олö иньыс, кöдö совхозö эз вайöтлы, куимöт...И куимöтыс варыш синнэза, сiйö и видзöтö, кыдз бы сöтны-вартны.

Районiсь начальство орсöны совхозiсь директоррезöн — вежлалöны, а отир уджалö, но вывтi оз ни уджав, кöр быдöн адззö, мый ни керсьö, кöдöрö кежö оланыс. Бригадирыс директоррез сьöрись тожö оз кольччы: öтiк пемыт рытö фермаись тшöктöма начкывны медбур мöс, кöда бытьтö бы пондöма пиявны да абу вермöма. Только пода вöдитiссес ас коласын пондiсö сёпкыны, что мöсыс посниасьöма, кыдз колöма, нем сылöн умöль абу вöлöма, но бригадирыс локтöма фермаö, зепсис кыскöм пурт и мöслiсь орöтöма горшсö...

Мöс абу и яй абу. Медодз Галя сэтчин да татчö: инькалöн совхоз понда сьöлöмыс сотчö кыдз би вылын, кöр эшö ёрттэс шушкöтчöны, что мöслiсь яй начальниккез кыскалöмась öтамöдныс коласын, и бытьтö бы кин мымда вермöма, сымда и босьтöма. Галя нач лöгасис: «Эта мый лоö?! Этадз эд быдöс подасö туйö начкывны да яйсö кöиннэз моз кыскавны! Ми пессям ой и лун, назём лоям, гортö кодьöн огö и вовлö, но миянлö абу, а нылö эм! Кытöн правдаыс?! Судитны колö кыз кынöммезöс!»

Вывтi ни чож инькаыс, а кылыс эшö чожжык: ыксi-кери бы да дугдi, а сiя дульсмöм сина бригадирлö веськыта ни шырзис-висьталiс, кин сiя сэтшöмыс, кытöн чужöма, кытöн аймамыс, киннэз вöлiсö дед и баб. Бригадир кылiс да эз пода вöдитiсьлiсь вувтöмсö, кöть синнэзас сьöлав — шы оз сет да ассис керас. Бугай Сергейыс пыр код, етша и вовлö фермаö, но мыйöнкö тöдö, что Галялöн öтiк грешнöй лунö пиялiсö кык мöс, кыкнан мöсыслöн сiя жö лунö кулiсö пияннэзныс. Кулiсö куканёккез и ен ныкöт бы, ась кулöны, ежели мöссэсö умöля вердöны, ежели нiя бура пиявны озö вермö. Сьöкыта посниасьö пода фермаын, вель уна куканёккез кыскöны катша-ракалö, да эта понда некинöс озö дойдö. Да и кинöс дойдны? Кин виноватыс, что куканнез кулöны? Вердiсö бы мöссэсö бура, куканёккез эзö бы кулö — этö деревняын тöдöны нельки челядь, начальство бура тöдö, кöда важын ни фермалань дзар бы оз кер, а бригадир зызö, что уна тöдiсь Галя нач оз куж вöдитны пода: кыдз куканнез шогмöны, сiдз и кулöны, сiдз совхозын и изъян лоö. Бугай Сергей норасьö ни совхозiсь директорлö, сельсоветын ни чушкалö Галяöс. Совхозiсь виль директор фермаö эшö кымöссö эз мыччав, но гижис ни приказ, медбы кулöм куканнез понда вештiсисö пода вöдитiссез. Инькаэс етшажык шедтöны, унажык нылiсь бöр ни кульöны.

Зубыт лоис пода вöдитiссезлö, и инькаэс начальствосö веськыта иньдiсö вöрдядь дынö, кресталiсö фермаö туйсö...

Галялö умöль жö лоис, но сiя удж эз веж, эз пышшы пода дынiсь, сьöлöмыс бердын пöжис обида, лöсьöтчис гижны прокурорлö, но эз гиж, кöр бура тöдiс, что начальствоыс «вартöны öтiк гуна вылын», öтамöдныслiсь рожаэз озö гыжьялö: нiя кольччасö правöсь, а тэ лоан виноватöй.

Инька одзлань уджалiс фермаын, одз асыввезöн ёна ни кынтiс ныр да рожабаннэз. Вель уна ни усис лым, уна ни чинiсö луннэз — кад лоис кöдзыт, но эшö öтiк платьеокöн öтöрö керкуись вермис петны Дарья баба, вермис котöртны Галяэзöдз, ышки-пойки тэрмасьны-висьтавны, что тöн мыйлöкö татчö вовлiс бригадирыс, пыралiс баббезö, корис вина, баитiс, что ваяс уна пес, и öддьöн эд ошкис Галясö, кöда пö уджалö медбура, и колö бы пö сыкöт миритчыны, да сiя пö оз миритчы — лöгалö.

— Быль я мый я меным пессö ваяс? — Галялiсь юасьö бабыс. — Ме эд сылö винасö тасалi быдса бутылка!

— Вешьянсис оз вай!.. Ваяс тэныт сэтшöмыс пес... — Галя пондiс видны соседкасö. — Мыйлö тэ сэтшöмыслö винасö торкин?!

— Ме мыйöн тöда? Бригадир эд, поди... Йöрман кö... Тулыснас эд садниксö немöн гöрны, бöра вöв понда пондас ковны котрасьны.

— Но и юкталö вижлöккесö! Нiя миян коддесö и кошшöны, кöдна полöны кыз кынöммезсис...

Галя бабкöт рез-паз баитiс и мунiс фермаö. Сьöлöмлö вöлi сьöкыт, аслыс сьöкыт, топ кыткö висьö, и оз тöд, кыт висьö, бытьтö кинкö лöсьöтчис вартлыны.

Вöлi кöдзыт асыв. Фермаö локтiс нач пемытöн, веськыта пырис мöссэс дынö, öтiкöс малыштiс, мöдiк одзö кырымтыр шупкис турунчир — быдöнкöт баитiс кыдз аслас ёрттэзкöт, а пода ылöсöн видзöтiс морт вылö, дызгышалiс — корис сёйны. Жальöсь мöссэс. Галя öмсис бы кыскис да вердiс ёрттэсö, но вердчан нач етша.

Пода вöдитiсь чилькöтчис, котрасьöв-керис öтöрö да мöдöрö, и, видзöтан кö, югдiс. Вынсялiс мороз, лоис лёкжык, сiдз и кутчисис ныр бердö, чеплялiс нельки карта пытшкын. Инькаэз лун кежö бöр ни лöсьöтчисö мунны горттэзö, но сэтчö локтiс кöньöс кыза бригадир, кöдалöн тöдчис, что асывсянь ни кисьтöма горшас, дульсмöм синнэс дульсмöмась öддьöнжык, öмас кылыс гардчö, модьö, что инькаэс пондiсö уджавны умöля, етша чилькöтöны йöв.

— Мöссэслöн йöлыс öманыс! Кыдз вердам, сiдз и чилькöтам, — немымда бригадирись эзö полö инькаэс, кöр пышшылiсö ни фермасис да бöр локтiсö уджавнытö. — Вайö турун!

— Турун-вурун... Кытöн туруныс?

— Гожумнас эз ков узьны!

— Ме я мый я узи? — пишкö нырнас бригадирыс.

— Огö тöдö, кин тiян узис, отирыс унажык или начальство? Басни эз аркмы — öтамöдöс дойдiсö кыввезöн. Баксiсö мöссэз, корисö сёйны.

— Кылан, бригадир?! Сёйöны бы эд мöссэс. Гортат, натьтö, сюрасö тшыгйöн он видз!

— Ась баксöны. Озö кулö, — дульсö ньылалiс бригадир, чикралiс синнэсö, лэбтышалiс вешьянсö, кöда мылякö сылöн пыр бы усьö, жагвыв сибöтчис Галялань, кöда малалiс Сырчик нима мöссö, и пондiс нюжлавны: — Мый сiдз ме вылö кымöсыт увтöт видзöтан? Сё ме вылö лöгыт петö?! Тырмас будзгылясьны порозыс моз, — зэв ни локтiс том пода вöдитiсь дынö, ловзисис сэтшöм вина дукöн, что матын кö вöлi бы таракан, пезьдiс бы, бригадирыт нюжöтiс кузь кисö, малыштiс Галялiсь спинасö, но эта лоис етша, сэк нюжöтчис, ружтыштiс да чуп окыштiс гладь рожабансö. И вöлись инька синнэзын öзйис нёштöм югöр, вöлись сiя перыта чатыртчыштiс и... сьöвзис бригадир синнэзö, пыкнитiс-висьталiс:

— Тöд кин дынын кузь киэтö нюжлавны! Ме тэныт абу инь, кöдö позис бы чунявны!

Мöссэз дынын öтнаныс эзö вöлö — вöлiсö эд мöд инькаэс, кöдналöн синнэзныс осьтаöсь и пеллезныс абу тупкалöмöсь. Шы не тöв лоис фермаын, только пондiс кывны, кыдз рöмысьтiсö мöссэс.

Бугай Сергей веськыт ки лапанас чышкис рожабансö, шы эз сет, бергöтчис и мунiс.

— Галю, эз эд сiдз бы ков, — эз-эз да öтiк пода вöдитiсьлöн пондiс дрöжитны голосыс.

— Галя... — пыдына ловзисис мöдiк.

— Ачым тöда! — Галя орöтiс ёрттэслiсь басни.

Луныс вöлi кресення. Рытнас Денис локтiс уджаланiсь, вывсис вежис паськöм, вöлись Галялiсь юалiс, мыля сiя дузгылясьö, гажтöм.

Том инька вишыкасис-вишыкасис да висьталiс, кыдз уджассис эта неделяö, кыдз талун ни пурсис бригадиркöт.

— Мунам! — сэтчö висьталiс Денисыс, и кыдз кужис, сiдз и пондiс ошкыны ылiсь гортсö, кытöн чужис, быдмис, и олöны роднöйез.

8

— Мунам! Мый тэ татöн керан?! Кытшöм кодя тор? Кувтöдз я мый я зырымтö пондан каттьыны мöссэс дынын? Уджалан, уджалан, а сё не бöрат, не одзат, не сёйны буржыка абу, не юны. Öтiк картов вылын оламö, кöда кöр быдмö, кöр оз, а миян... Яблоккез, грушаэз, сливаэз!.. Рай тiян сьöртi оланыс! Тöлыс топ оз и вöвлы. Мунам, инька, кытчöдз Бугай коддес нач эзö зэлöтö!

— Некытчö ме ог мун, — медодз дузгылясис Галяыс, полiс кывзыны мунöм йылiсь, кöр эшö некытöн эз вöвлы и быдöс кольны-чапкыны вöлi жаль: эд гортын быдöс аслас киэзöн керöм. Но синнэс одзын быд лун бригадир, кöда кытöн пантасьö, тшыг пон моз видзöтö, топ сiдз бы и курччöвтö-сёйö. И инькаыс бригадиркöт полö ни пантасьны отир синнэз сайын, кöр чёрт тöдö, мый код мужик юрын.

Тöв кузь и кузь. Пода дынын уджавны лоö сё сьöкытжык. Мöссэз чужтöны кулöм куканнез да пиявтöн асьныс кулöны, а ферма гöгöрын пондiсö котрасьны руччез да кöиннэз, карзiс рака табун. Зверь да кайпöлöс видзчисис, кöр эшö кулас пода, и кулöммесö кыскасö матiсь вöрокö.

Кывсис перестройка йылiсь, демократия йылiсь. Эта йылiсь медодз пондiс тöдны начальство. Нiя медодз и совхозсö нач ни разисö: тшыг кöиннэс моз пондiсö кыскавны, мый совхозас эшö эм и абу. Медодз öшыннэзныс увтö сувтöтiсö тракторрез да машинаэз, кöднö сэк жö пондiсö шуны асланысöн. Öтiккезлö вöлi и лоис, а мöдiккезлöн кыдз эз вöв, сiдз эз и ло. Фермасö пондiсö кыскыны-вöвдны, подасö пондiсö начкывны да яйсö вузавны, но деньгасö пода вöдитiссес кыдз эз адззылö, сiдз озö и адззылö.

Нач пондiс дзугсьыны деревняын оланыс, топ некинлö эз понды ковны деревенсаыс: дышшез лоисö чожöсь, кöдна эзö любитö уджавны, нылö шедiс унажык, нiя лоисö бур отирöн, кöть важын ни велалiсö гусясьны. А Галя коддес сё эшö дрöжитiсö совхоз понда.

— Тырмас тэныт фермааныт асьтö вийны! Мунам! Менам тiян вöррезын уджассяс и одзлань татöн ог понды мырсьыны. Гортлань колö вартны. Мамö видзчисьö. Ме сылöн öтiк зон. Он кö мун мекöт, ачыт тöдан... — Денис баитö кыдзкö мöднёжа, дзик сьöлöмыс сайкалö ни Галя дынö, кöть нач неважын инькасö новйöтiс киэз вылас.

И былись эд мужик вермас кольны! Сэк мыйлö вöлi гантайтны юр, ежели позис öтнасыслö овны да овны? Кольччыны кö öтнаслö керкуын, курöггес эд пондасö серавны, и Бугай Сергей коддессянь олан оз ло, джöмыт и паныт пондасö туйсö поперегавны-дойдны. Сэк инька мужикыслö висьталiс, что мунас сыкöт, но медодз, натьтö, пондас ковны гижсьыны сельсоветын, сiдз кыдз нiя бытьтö талун инь да мужик, а ашын Денисыс вермас сы дынiсь кежны, и нем сылiсь он босьт, синнэсö он кыскав. Эшö Галя Денислö висьталiс, что мунас, но кытчöдзкö керкусö оз вузав.

Тöдiс мый баитiс инька — арттöммоз эз бызды, баснисö кöть кинлö колiс бы вежöртны. И Денис инькасö вежöртiс: медодз бöра окыштiс рожабаннэсö, малыштiс спинасö, шынньöвтiс, думайтыштiс да шуис, ась пö лоас Галя моз: гижсясö нiя да не татöн, а сэтчин — виль гортаныс, сэтчин, кытöн оланыс буржык, кытöн Дениссö бура тöдöны, кытöн эм эшö вичку, кытöн позьö венчайтчыны. А эстöн мый? Гижасö сельсоветын да бытьтö сераласö, олан сё лоас кыдз важ. А керку... Да ась сiя кольччö вöрыс шöрын! Некин сiйö оз гусяв, оз сёй. Вузаласö вот пода, шурум-бурум паськöммез, джоджулiсь картов, телевизор. Нем озö нöбöтö, мый выланыс, сiя и сьöраныс — вöлi бы деньга.

Мунасö вот деревняись и пондасö кытöнкö овны бура-бура, и тэ, баб, Галя понда эн тöжды, а ас пондасит горзы, кöр дзир öтнат кольччан Кöчыбын. Кыдз пондан овны? Кöиннэс сёясö...

«Мыля öтнам кольчча? — оз бы тöжды пöрись, думайтö ас кежас, — Дзимбыр Миковвес тай эшö эмöсь, эмöсь и Кöч Öльöшшес. Кыдзкö тöвьям, а тулыснас бöра лоас гажа. Кристос тiянкöт, мунö да олö бытшöмжыка». Дарья баб кольлалö томмесö, тöдчö, что гажтöмтчö.

Тöв сё вынсялö, унажык усьö лым, лёкöсь лоöны мороззэз, вынажыкöсь пургаэз. Томмез вузасисö унажыксö Вильыбö: öтiклö öтiкö руб да копейка вылö, мöдiклö сымда жö да сымда вылö жö. Мöс некин эз босьт, и сiйö ковсис начкывны да яй вузавны детсадö.

Кукань, порсь, курöггез, баляэз... Быдöнлö адззисис туй... Хозяйство разьны — не дöра кыйны: сют-сят керин, бергöтчин и абу. Керкуын кольччисö куш стенаэз, гор сайкалiс, горвылын кань кынмö, кöдö лöсьöтчис нуöтны бабыс. Только понсö озö тöдö, кытчö воштыны, кöда бöжсö öшöтiс и пондiс öвтчыны, кыдз öшöм. Вежöртiс, мый керсьö гортын. Но медбöрын и понлö адззисис туй: сiя жö Дарья баб нуöтiс гортас и висьталiс, что кытчöдз лоас ловья, пондас овны канькöт да понкöт.

Жунь да мань, лун да мöдiк, сэтчин да татчö — öтiк лунöн туйö эзö лöсьöтчö, вузасьтöн чулалiс кад. И видзöтан кö, локтiс март месяц. Тулыс ни ныр вылö пуксис: луннэзнас пондiс шонтны шондi да сiдз, что крыша вылiсь вотялiсö вотьваэз, а ойезöн короминна дорö öшöтчывлiсö чöрс кодь кузь йыжоллез. Пистöг треньгис тулыссямоз, кымöррез небзисö, топ сiдз и зэрас. Но эшö пондывлiс усьны гöн кодь небыт лым, кöр и öдззывлiс уннявны пурга, бытьтö тöвбытöн уннявны эз пöт, вöлi тшыг и гардiс-пышшöтiс кытчöкö лымсö.

Туйö петiсö одз асылöн. Мороз чеплялiс ныр, пырис полаэз увтö. Но чожа петiс шондi, и кöдзытыс кыдз эз вöв, коккез увтын пондiс небзьыны лым.

Вильыбын дыр видзчисисö машина, кöдалö колiс бы локны да сiдз эз и лок, бензин пö небны лоис немöн. Медбöрын, павжун гöгöрас ни, инмис кытшöмкö легковöй машина, кöда кыскис Кöсöдз. Шофёр кульыштiс сымда деньга, что стыд бы и висьтавны, но деньга йылiсь эзö ни баитö, думайтiсö, кыдз бы чожажык мунны.

9

Галя колис гортсö, вöлi Кöсын, сыбöрын шедiс Кудымкарö, и ачыс аслыс эшö эз верит, что кытчöкö мунö. Инька панталiс уна отирöс, кöдна кытчöкö тэрмасисö, педзисö, бытьтö быд морт мыйкö öштöма да кошшö и оз адззы. А сiя бытьтö нем эз öшты, нем оз кошшы, сылöн сьöлöмыс олiс эшö Кöчыбын, что сiйö эшö видзчисьöны фермаын, и бытьтö сытöг гортын пода баксö, корö сёйны-юны.

«Мый ме кера?! — инька бытьтö саймывлiс тöдтöм отир коласын, повзьыштлiс, сьöлöмыс ёткöп керлiс. Вöлi сэтшöм гажтöм, что син доррезас сöдзисö синваэз, и вöлiсö кö бы борддэз, бöр бы лэбзис гортö: мед и отирын олöны буржыка, ась ошшасьöны оланöн. Эд быдöн, кыдз кужö и вермö, медодз ошкö ассис поз, кыдз тай шуöны, лягушкаэс, и нiя, ошшасьöны асланыс нюр-гöпöн. А Галя эз эд ов нюр-гöпын: чужис и быдмис деревняын, кöда сы понда вöлi медгажа, сэтшöм, что некытiсь Кöчыб кодьсö оз ни позь пантавны. Этö, натьтö, сiйöн, что том инька некытöн эшö ылын эз вöв — городдэз да мöдiк деревняэз сы понда вöлiсö нач тöдтöмöсь, бытьтö сэтчин олiсö нач мöдкодь отир, кöднакöт баитны полöм петö.

Кузь туйын, кöр мыдзтöдз пукалiс автобусын, и керны вöлi нем, юрас пырисö быдкодь думаэз, кöдна бергалiсö и ылöтiсö-велöтiсö асмознаныс овны, нето дзугисö бы олансис. Тöдвылас усьлiсö айыс да мамыс, кöдна бытьтö эшö вöлiсö ловьяöсь, шуч туй видiсö-шуисö: «Мыйлö, арттöм пасма, гортiсь мунан?! Кытчö? Ми ассиным векнымöс тыртiмö Кöчыбас да тшыгйöн, кöмтöг-пасьтöг эгö олö, а тэ... Ой, нывка!»

Нывка, нывка... Галя аймамлöн вöлi öтнас — вöзабыдтöм быдмис. Мыля мамыслöн сiя вöлi öтнас, Галя эз тöд, да эз и юась. Мам эта йылiсь сiдзжö эз баитлы, только öтпыр гожумöн кытшöмкö вежалунö, кöр лыддиссис, что уджавны грех, нывкасö нуöтiс ягöдавны. Галя сэк вöлi ыджыт ни, чож. Эз ни ков сiйö синйыны ягöдавтöн. Сiя нылочкаэзкöт ягöдавны котрасьлiс видззез сайись вöрокö и некытчö эз öшлы, челядь сьöрись эз кольччыв. И талун мамлö нем бы вöлi тöждыны, что нылыс ягöдавтöн кольччас кытчöкö, но петiс сiдз, что Галя ачыс эз казяв, кыдз видззез вылын янсöтчис мамыс дынiсь, öшис, и кошшы арттöмсö. Мам горзiс-чирзiс, ыксiс нывсö, шардöм синнэзнас эз тöд, кытчö котöртны, мый керны: заргисьлiс то вöрö, то бöр вöрись котрасис видз вылöдз. Повзис сiдз, что уськöтчис бы ваö, ась бы только вöлi Галяыс. Нылочка эта коста пукалiс кöз увтын, видзöтiс кöдзыввез вылö, кыдз нiя педзöны-уджалöны, кытчöкö котрасьöны, бытьтö гаггезлöн вöлi асланыс колхоз. Нывкаок кылiс мамлiсь голоссö да бытьтö и эз кыв сiйöн, что пеллес одзын дзингис-уннялiс быдкодь гаг-гут, ном и лöдз.

Часся унажык мам бöбсялöм юрнас котрасис öтмöдöрын, кытчöдз эз инмы нылыс вылö. А кыдз адззис Галясö, эз тöд вартлыны я, окавны я сiйö. Пондiс горзыны да причитайтны: «Öтiкöс еныс мырддис синнэзö одзын, да эшö тэнö невна эг öшты! Галя, мыля янсöтчин? Эг бы кö адззы, мый бы лоис? Тшыгйöн бы кулiн эд вöрас!»

Сэк мам и висьтасис, что Галялöн вöлöма пöрисьжык Зина нима сой, кöда луннэзнас пыр олöма гортын, сiдз кыдз садик да ясли абу вöлöмась, пестунничайтны вöлöма некинлö. Зина лун-лун котрасьöма öшын увтын. Öтiк лунö мамыс синнэз одзын пондöма мышкырасьны öшымöс осьта весьтын и... онняюртчöма ваö... Мамлöн пыр кежö повзьöм сьöлöм.

Висьтасьны кö Галя мам йылiсь, позьö шуны, что мам вöлöма учöтсянь повзьöм-шардöм. Сэтшöм сiя чужöма, или оланыс инькасö шардöтöма-повзьöтöма. Галялöн бабыс — этö мамыслöн мамыс — томöн пуксьöма вöв вылö, кöда вöлöма вöй, пондöма гöнитны и вöлыс вылiсь усьöма да майöг вылö заргисьöма. Мортлö кынöмас мöртчöма майöгыс, сэтöн жö кишкаэз буль-боль петöмась кынöмись... Сiдз жö вöрын кулöм и айыс... Сэксянь мам пыр мыйиськö полöм, чепсасьöм-котрасьöм гортын и йöзын, пизьöм-уджалöм садь быртöдз, норасьöм, что оз кö понды уджавны, весь овтöн сьöлöмыс потас. Мам абу вöлöм грамотнöй — öтiк буква абу тöдöм, абу кужöм лыддьöтны и гижны, но кужöм быдöс керны: мый бердö кутчисьöм, сiя и шогмöм, сiя и петöм да сэтшöм, что кöть киись эн чапкы, кöть синнэз одзись эн öшты. Инька уджавтöг нач абу вермöм овны, и сiдз лоöм, что öтпыр уджавтöн усьöм коккес вылiсь, и сэтöн лолыс петöм.

Висьтасьны кö ай йылiсь, басни лоас дженытик. Айыс мамлöн вöлöма öтнас жö (айыс кулöма сэк, кöр зоночкалö вöлöм вöлись год). Макарöс быдтöм мам, кöда сiдзжö вöлöм чож, только абу вермöма баитны — кылыс öмас бергалöм, а басниыс абу шогмöм. Но кыдзкö зоноксö вермöм велöтны школаын, кöть и етша. Макар абу вöлöм ылöстöм, кужöм лыддьöтны, гижны, абу полöм томсянь уджавны нельки бригадирöн, шедлöм война вылö, кытöн берся адззылöма, но кольччöма дзонь да ловья. И мужик асьсö лыддьöм счастливöйöн: вермöм гöтрасьны сэтшöм визыв нывка вылö, что завидуйтöмась деревняын, дзик лöсьöтчöмась мырддьыны. Но кытчö ни мырддян, ежели Макар вöлöм горш мывкыда, ассис пайсö некинлö абу сетöм не гортын, не отирын, не вöрын: пыр вермöм удж бергöтны горт гöгöрын и ештöм вöравны.

Вöлiсö бы Галялöн ловьяöсь аймамыс, бат, туйдöтiсö бы овны, гортсис, поди, некытчö бы эз и мун, эз бы понды кошшыны бур олан, ежели ачыс тöдö, что только сэтчин бур овны, кытöн ми абуöсь... Кытöн Галя коддес абуöсь, кытöн инька эз вöв, сэтчин и мунiс, катыльтчис машинаэзöн да поездöн. И сiдз сылö эз гленитчы кузь туйыс, сiдз мыдзис пукавны да öвтчыны отир коласын, что Москваын вокзалын синнэсö ни эз бы осьт, сiдз охота вöлi узьны. Узьны вöлi некытöн: омöн отир сымда, оськöвтан Денис дынiсь и öшан.

Öвтчисö мымдакö дзескыт вокзалын, видзчисисö поезд. Денис пондiс шуны, медбы Галяыс пуксис скамья вылö, суналыштiс минута етш, а сiя котрасяс туалетöдз и локтас бöр.

Галя пуксис скамья вылö — пелитчис отир коласö, мыдзувья сэкжö пондiсö куньсьыны синнэс, кытчöкö пондiс вöйны или лэбзьыны, бытьтö ылiсянь кылiс öткодь шы: гу-гу-гу... Этö отир жöдзис, койис, модис-лёбис ас коласын, кыдз зiпозын зiэзлöн кылiс öткодь шы, мыйсянь эшö öддьöнжык петiс он. И инька узис пуксьöмöн, вöтасис, бытьтö бöра гортын — Кöчыбын, — и топ керкуаныс олöны тöдтöм отир, кöдна хозяйкасö адззöны и озö, мыйкö гуддьöны да будзгылясьöны, а сiя... Серкоыс топ чеччалö моросас, нюлö рожабаннэсö, кивзышалö, сэтшöм поныс рад, что оз тöд мый керны.

Мымда узис или сунасис отир коласын, Галя оз тöд. Саймис, дзик кинкö вачкис юрыс бöрö, зэгнитiс пельпоннэзсорöн. Он кыдз эз вöв: осьтiс гудыра синнэсö, видзöтiс-керис гöгöр, вöлись пондiс вежöртны, кытöн и мый керö.

Денисыс эз вöв.

Мылякö эз повзьы, эз верит, что мужикыс вермас öшны, эд сiя быдлаын ни вöвлi, тöдö кытчö пырны-петны, туй адззас кöть кысянь и кöть кытчö.

Отир вокзалын жöдзис одззамоз, кыдз дюттясис ловья ва, öтмоз аскодя шы дзескöтiс, лязiс, пöдтiс ру, кöда сорласис аскодя жö отир дукöн. Тöлок бы этчö, кыдз вöрын, кöда бы ургыштiс, и инька бы ловзисис моростырнас. Сылöн висис юр, и эз позь веритны, мый оз тырмы, мыйöн сiйö веськöтны. Бура косьмис горш, сималiс кынöм.

Унаись ни рочöн, кыдз радиоын, ыксiс инька, висьтавлiс, кытшöм поезд да кытчö мунö, кöда кысянь локтö, висьтавлiс чассэз, минутаэз. Эта голос сьöртi отир утугаöн ветлiс öтöрö-мöдöрö, кыдз визлалiс ва, но вокзалын йöзыс немымда эз чин.

Галя дыр пукалiс сэтöн, кытöн вöлi дзескыт, умöль, но пукалiс, видзчисис, синнэзнас кошшис мужиксö, кöда отир коласын эз мыччись, эз лок. Тыра сумка да чемодан Галя коккез дынын мылякö эзö ни вöлö. Вöлись и повзис, кöр казялiс, что сумкаыс да чемоданыс абуöсь, вöлись моросас сьöлöмыс и берездасис, кикокыс пондiсö дрöжитны. Чеччöвтiс скамья вылiсь, шагньöвтiс öтöрö да мöдöрö, эд тöд кытчö чепöссьыны, повзьöм голосöн юалiс отирлiсь, эзö я адззылö сумкасö, чемодансö да и мужиксö öтлаын. Но сы вылö некин дзар эз кер.

Галя котрасис да адззис милиционерöс, кöда шынньöвтыштiс — синнэзас öзйыштiс гаж, топ важын ни тöдiс том инькасö, важын видзчисис, кывзiс Галяöс. Но сэтöн жö эз понды бöб пон моз кошшисьны, а висьталiс, что адззисяс Денисыс, ежели кö мужикыс — мужик, абу кытшöмкö сэтшöм öнджа, кöда инь дынiсь пышшалö. Милиционерлöн синнэс шыннялiсö, тыдалö, адззис, что Галя деревняись.

Инька пондiс горзыны, кöр вежöртiс, что Денисыс абу. А сы дынö шедiс быдöс деньгаыс пода да картов вузалöм бöрын. Думаэзнас эшö надейтчис, что пантасясö. Эшö адззис кытчö пырны и кытiсь петны, шедлiс быдкодь вокзалiсь начальниккез дынö, бöра сёрнитiс милиционеррезкöт, горзiс, кеймисис. Кад чулалiс — час, бöрын час, и видзöтан кö, луныс абу ни, рыт ни локтiс. Но Денис сiдз эз и адззись.

Ойсö Галя джендöтiс вокзалын нач тшыг и мыдз — ончир эз кер, минута кежö синнэсö эз куньлы, пукалiс отир коласын тупка моз да видзчисис, вöлi тувдöм и öшöм, кыдз шупкöм кытчöкö, кытiсь некöр ни он мезмы, он пет, кытöн сiйö нач некин оз и вежöрт, оз жалейт, оз юав мыля сiдз, а не мöднёж.

Город олiс аслас оланöн, уджалiс и лолалiс ас мознас. Тöдтöм олан пизис Галя гöгöрын, нерис, дойдiс сьöлöмсö, кöда пессис, тэрмасис бы кытчöкö, чеччалiс — некöр одзжык эз вись. Но талун эз-эз да сьöлöм шöрас кыдз бытшкышалiсö емöн; зубыт паськöтiс мороссö, мороссянь кайис горшöдз. Öддьöн дыша чулалiс ой. Ойбыт вокзалыс ружтiс, ойбыт педзис отир.

Локтiс асыв сэтшöм жö арттöм, аскодя, дзескыт, лёк. Галя сё вöлi тöдтöм отир коласын, дзескытiнын да нач эз тöд мый керны, кытчö воштiсьны. Сiя бура вежöртiс, что Дениссö оз ни адззыв. Сiя, поди, абу ни ловья, или... Эз веритсьы, что мужик вермис пышшыны, кольны.

Кошшыны колiс, эд морт абу ёг, и оз вермы ёг моз öшны отир коласын. Ежели мыйкö былись лоис Денискöт, сiдз и этадз кинкö-мыйкö адззылiс. А кытiсь да кинлiсь бы эшö юасьны? И бöра тöннямоз Галя котрасис отир коласын, öтiклiсь юасис, мöдiклiсь, горзiс, кеймисис, но бöра некин нем эз тöд, эз висьтав, эз туйды-иньды. Чулалiсö чассэз, вöлись луншöр гöгöрын öтiк кодя милиционер нуöтiс аслас начальниккез дынö. Вайöтiс кытшöмкö лёк чужöма морт дынö, кöда мурзис-керис, босьтiс телефоннöй трубка, звонитiс öтiклаö да мöдiклаö, видiс кинöскö, тэрмöтiс, но сылö висьталiсö, что нем озö тöдö, некинöс сэтшöмсö эзö адззылö. Инька сы басни сьöртi вежöртiс, что начальник звонитiс больницаэзö, юасис кулöммез да ловьяэз йылiсь. Звонитiс ас кодь жö начальниккезлö, медбöрын мужикыс шупкис трубкасö, лэбтiс юрсö, дыр видзöтiс öшынö, вöлись öзтiс папироса, сьöкыта ловзисис...

Галя тэрмасис бы и тэрмöтiс начальниксö, кöда куритiс — пöлялiс табак тшын, бöра мурзис, ружтiс, няпралiс кулаксö. Вöлись шуис, что нем сылö, Галялö, мужикыс понда горзыны, кöр сiя пышшис и абу, оз ни ло. А ежели колö кö, то милиция вермас кошшыны, медбы судитны гадöс, мед алименттэз вештiс.

— Кытшöм алименттэз?! — повзис инькаыс. — Ми жö сыкöт гöтрасим, да эгö ештö гижсьыны.

— Вот мый! — начальник ньылыштiс табак тшын, виньдiс, дыркодь кызöтiс, и резгис-висьталiс — Сэк мый кошшисьны? Кöда эз вöв и абу мужик. Сэтшöммес öнi адззисьöны...

Инька этасянь нельки повзьыштiс, видзчисис, что начальникыс пондас видны, умöль кыввез висьталас, вашöтас дынсис. Но мортыс горöтчис:

— Мун гортö, басöк инька, да ов деревняат и сэтшöммесö вунöт! Поди, тэныт эшö мыйöнкö колö отсавны?

— Нем меным сэсся оз ков!— пондiс пильскыны Галя, горзытöн петiс начальник дынiсь, эшö эз верит аслыс и оланыслö, что сiдз сiйö бöбöтiсö, дойдiсö, сералiсö. И кин бы? Сiя мортыс, кöдö любитiс.

«Ась. Кöть мый ни. Ачым эд бöб юрöс, кытчö оз ков, сюйыштi, ачым! Кыдз öнi гортö мунны, кыдз мыччисьны отир син одзö? Быдöн эд пондас серавны — синнэзö бытшкыны! Сiдз меным и колö! Вöлись адззылi олансö, вöлись! И кытчö öнi воштiсьны, мый керны? Джагöтчыны я мый я?» — быдкодь думаэз ветлiсö инька юрын.

Джагöтчис бы, ежели бы вöлi кытöнкö öтнас, но омöн сё педзис отир. И Галялö стыд вöлi, что пондасö серавны сiйö, висьталасö, что сэтчин и туй, сiдз и колö, мед тöдö кыдз овны. Этасянь юрсис вашöтiс джагöтчöм йылiсь думаэз. Охота вöлi кытчöкö мунны, пышшыны, мед некин эз тöд, кытöн лоас, мый пондас керны. Но кытчö мунны? Кин и кытöн видзчисьö?

Кинлö сэтшöмыс колас, кöда Денис кодьыслö ни эз ков, да эшö деньга абу — немöн небны поезд вылö билет.

Инька öтiк кылöн эз вид Денисöс. Сiя бытьтö сьöлöмыс бердiсь мездöтiс, дынсис вашöтiс, öштiс мужиксö.

Город весьтын шондiыс эз вачкись шондi вылö, кымöрыс эз вöв кымöр кодь: тшын да бус, шум да гам. Кöдöрын гортыс? Кытшöм поездö пуксьыны? Кысянь? Машинаэз, кыдз стена, катыльтчöны зэв-зэв öтамöд бердын: бокö тальччан и шедан колесоэз увтö! Нилясö-талясö, вот тэныт и Галя! Вот тэныт и Москва, кöдö дундöтчöны да ошкöны. Но ась кин городын олö и олö, а Галя мунас деревняö, мед быдöн пондас юасьны: «Мый нö, кагу? Мыля бöр? Или городас няньыс абу чöскыт?»

10

Эз повзьы пуксьыны вагонö, пырис отир коласö, пуксис небыт пукаланiнö, öшöтiс юрсö: некинöс бы эз адззы и эз кыв. Но отир вöлöмась отир кодьöсь, адззисö басни, тöдiсö бы кытчö мунö, кытiсь да кытöн олö. И ковсис баитны, ковсис лэбтыны юр, шынь керны, висьтавны быдöс кыдз вöлi, мый лоис. Сiдз тöдтöм отир коласын адззисисö ёрттэз, сэтöн жö пондiсö жалейтны, бур кыввезöн бурмöтiсö сьöлöм. А кöр шедiс контролёрлö, кöда лöсьöтчис дойдны штрафöн, бöра жö отир отсалiсö деньгаöн, небисö билет, кöть и стыд вöлi босьтны билетсö.

Дыркодь катыльтчис поезд Перемöдз, и кадыс лоис лекарство местö. Локтiс тöдса вокзалöдз, лэдзчис вагонiсь, и бытьтö нач вунöтiс Москвасö, Дениссö. Сьöлöм вылас лоис кокнитжык. Нач матын лоис гортыс — деревняыс.

Кузь туй бöрсянь колiс бы кытöнкö шоччисьыштны, пöттöдз сёйны-юны да вöлись кыдзкö одзлань мунны, но кытöн? Кин ордын шоччисьны, кöр öтiк роднöй татöн эз вöв, и некинöс эз тöд. Думаэз вайöтiсö автобуснöй станцияöдз, кытöн бöра лöсьöтчис джендöтны ой, бöра узьны отир коласын. Пуксис скамья вылö, öшöтiс юрсö и пондiс сунасьны. Пукалiс-суналiс и на тэныт! Кинкö юалiс: «Галя, тэ кытчö?!»

Вöтасис я или былись кылiс басни да комиöн — роднöйся роднöй кыв кылiс, топ шедiс гортас, деревняас.

— Ой, Иринка! — вöлись кыдз онiсь саймис инька, вöлись кыдз кытiськö мезмис. Одзас сулалiс Иринка соёкыс — тёткалöн ныв, кöда татöн олö важын ни, кöдакöт етшаись пантасьлöны. Сiйöн Ириналiсь чужöмсö тöдö умöльöла, но тöдö: казялi бы улицаись или татiсь, вокзалiсь, — эз орддьы бы.

Пантасис и öддьöн бур. Сэкжö мунiсö Иринаэзö, кöда олiс ыджыт да джуджыт керкуын, бур квартираын, кöдаын вöлiсö куим ыджыт жыр, кухня. Сэтöн жö вöлi туалет, кытчö пыралiс Галя, и стыд сылö вöлi öтöрасьны керку пытшкын, — бытьтö öтiк минутаö пöрис порсьö да сы моз и колiс ректiсьны. Сыбöрын миссис киэз, ас кежас бöра эд осудитiс-сералiс городiсь олансö. А Ирина ошшасис оланнас:

— Ме! — баитiс хозяйка. — Ме понда овны городын да умöль квартираын?! Кытiсь тэ, сой, сэтшöмсö кылiн бы?! Медодз, кыдз ме татчö шедi, велöтчытöнняс жö кошши бур жöник! Начальник кодьö... Сылö веськыта висьталi, мыся, этö... Или ме да квартира, или кошшы мöдiкöс. А мый нö эшö?! Думайтан эг бы адззы Витя коддесö?! Гы... Нiя татöн сымда! Ой, Галя, мымдаöсь! Тэ бы тöдiн. И ме былись бöрйи. Веськыта висьтавны, сыкöт дыр эгö олö — год да мöдiк и, утю! Абу Витькаыс! А мый сэтшöм гöнзяыскöт овны? Кыдз? Сiя эд, кывзы, бокам бытшöма эз куж узьны, водас да пишкö пишкан нырнас или маласьö и маласьö... А мый бы весись маласьны, ежели маласян торыс умöля уджалö? Тьфу! Сьöлöм гудыртчö касьтывны! Кыдз бы ме сэтшöмыскöт пöрисьмытöдз олi? Ог тö-ö-öд... Натьтö бы, одза-одз сивöйсялi, да кыдзкö еныс мездöтiс... Машина увтö Витёкыс юрсö сюйыштiс. Бат, нагладь пырис смертьыс öмö, ежели сэтшöм вöлi... — Иринка китшкис катша моз. — Кывзы... Эз ло менам Витькаö, а квартираыс эд меным кольччис!.

Газ вылын чижа-важа пöжассисö блиннэз, дыша вöрöтчис хозяйка, но эз дышöтчы баитны. — А тэ, Галька, тöждан кытшöмкö жöник понда! У-у-у, нiя! Кольччы татчö. Он кö понды жалейтны ассит жалейтан тортö, чожа адззамö. Мужиккес, кывзы, юрнысö сетöны инькаыс öнджа вылö, бытьтö гуттэз лэбзьöны ма доз дынö, а! — сералiс Иринаыс. — Но и вот, думайта, что тэнат ма дозыт эшö туйö кытчöкö, и ачыт басöккодь. Öтiк синнэт кытшöмöсь! Ме бы тэ синнэзöн генералöс адззи, хи-хи! Вунöт страм Денистö, мед сiйö ошшес сёйöны. Мый думайтан? Или сьöлöмыт висьö Кöчыбыт понда? Мунан кö Кöчыбат, сэтчин и кулан, олансö он адззыв.

Ирина дынын бур, шоныт, долыт, кынöм пöт, юр оз вись, öшис мыдз. Только Галя эз велав кинкö пызан сайын виздiсьны-видзчисьны, кöр шупкасö няньтор, и оз куж Ирина моз мужиккесö бöбöтны. Эд кыккöт ни пондылiс овны да эз удайтчы. Кывзö, кыдз хозяйкаыс нёль мужиккöт ни олöма, талун-ашын лöсьöтчö вайöтны вильö, бурся-бур морт пö.

Кад тулыслань. Городын улицаэзын луннэзöн сылö ни лым, нять, ва, шум да гам, кöть пеллезö нитш сюй или дзебсись. Галяöс и Перемын дзескöтö оланыс. Лун олiс городын, мöдiкö. Куимöт лунö сойлö висьталiс:

— Иринка, ме муна ни.

— Ачыт тöдан, ежели он вермы овны татöн. Ыскöвт. Ме тэныт мымдакö сета деньгасö. Да мунан кö, эн жö вунöт кокнит мывкыда сойтö, то лöгася!

Кольлалiс Ирина Галяöс Перемись. И одзлань Галя мунiс гортö — сьöлöмыс лэбзис бы, сiдз тэрмасис аслас вöр коласiсь деревняö, кытiсь отир пышшис, а сiя...

Гортö локтiс сёр ыркыт сöдз тулысся рытöн. Луннас невна сылöтiс, ой кежас кöдздöтiс, лымсö кынтыштiс, коккез увтын пондiс кажöтны чарöм. Вильыбöдз локтiс машинаöн. Вöррезын уджалiссез дынö мунiсö кытiськö начальниккез, пуксьöтiсö инькасö Кöсын и шуч туй етша баитiсö. И бур, что некин тöдсаэс эзö пантасьö, а то сiя жö рытö деревняын пондiсö бы тöдны, мый лоис, пондiсö бы лёбны эмсö и абусö — сералiсö бы.

Кöчыбын нач ни лоис пемыт, вачкисис, топ деревняыс кулöм — öтiк пон гав оз кер. Дзир юр вевдöрын, кымöрын, дзöрисö звездаэз. Галя жагвыв локтiс аслас керку дынö, кöда бытьтö узис жö пыд онöн, эз видзчись хозяйкасö. Посöдз гöгöрö лэчыт тöввез пуксьöтöмась лым. Лым вылын некытшöм след эз тыдав, нельки пон абу котöртöма. Но керку дынын вöлiсö следдэз Дарья баблöн, кöда вовлöма гортсяняс. Сiдзкö, баб ловья, петалöма гортсис и öнi, поди, пишкö-узьö да вöттэз вöтасьö.

Галя сулалыштiс посöдз дынын, видзöтчыштiс. Быдöс вöлi роднöй да тöдса: вот песжуг мыччисьöма лым увтiсь, вот пöвтор гид бердын, а вот важ стул, кöдö колисö посöдзö да кöдö абу тыртöмась тöввез лымöн.

Керкулö хозяйкатöг нем абу лоöма. Дзонь керку — пыр да ов. Только хозяйкалiсь сьöлöм чулошитiс дума: «Не пань, не бекöр, не кöмкöт, не паськöм, не сёйны, не юны... Арттöм тэ, инька! Юртöм. Кыдз тшöктiсö кольччыны Перемас, да эг кольччы!»

Враг кодь думаэз педзисö юрас. Керку дынын сулавтöн сайкалiс. Видзöтчис, кыдз бы дорöм ыбöс осьтны. Эта коста бöрсяняс котöртiс пон, чеччöвтiс моросас, пондiс радöн кивзыны, хозяйкалiсь нювны рожабаннэсö. Галя некыдз эз вермы мездiсьны. И вöлись нач быдöс сьöкытыс öшис, кыдз эз и вöв. Галя жмитiс Серкосö, пондiс окавны.

11

— Вот эд, вот эд! — Дарья баб Серко моз жö вöлi радся-рад, кивзiс-ойзiс, эз тöд, ошшасьны медодз я, кыдз олiс öтнас, или юасьны. Сiя дивуйтчис — клопöтiс киэзнас боккезас да висьталiс, что Галяыс мунöм бöрсянь поныс öшис. И баб думайтiс ни, что Серко вöтчис хозяйкаыс сьöрö, а сiя...

— Кытöн и мый керис?! Кыдз тöдiс, что тэ, Галю, локтан! А эшö шуöны, что подаыс нем оз тöдö. Но мый нö? Кыдз нö?

— Öтнам, баб... Колис сiя менö...

Быдöс баблö висьтасис инька, нем эз суськы.

— Но мыля нö сiя сэтшöм вöлöма? Пон оз вунöт хозяйкасö, а сiя... Весь, инька, озö баитö, что сто год олан морткöт и мывкыдсö он вермы тöдны. Сiдз и эм...

Пöрись бытьтö öтiк рытöн томмис, рожабаннэс мичамисö, коккес кокнямисö, öдззис чывкйыны джоджöт, висьтасис и норасис, кыдз деревняö кольччис нач öтнас, кувны ни лöсьöтчис бы сысянь, что гажтöм, а эстöн...

— Галю, дитю! Чожажык чöвтчы, пуксьы да шоччисьышт. Мый пондамö керны? Кытчö юртö сюйыштан? Он, поди, кольччы татчö овнытö или мый? Кыкöн я мый я Кöчыбнымлiсь ловсö пондамö кыскыны-видзны, мед эшö оз кув? Видзöт, ачыт.

— Некытöн, баб, миянöс гöснечнас озö вердö, некытöн озö видзчисьö, и думайта, что некинлö мийö огö колö, огö кö асьным асьнымöс пондö вердны, — чöвтчикас баитiс инька. — Видзöт, ветлi кошшыны бур олансö да горзытöн бöр локтi. Баб, копейка деньга эд абу! Сёйнытö мый понда? Мыйöн? Не бекöр, не пань... Адззылiн, кыдз миян коддесö овнытö велöтöны!

— Пань да бекöрыс понда эн горзы. Менам нiя эмöсь, мед и важöсь. Адзза ме тэныт бекöр и пань, и кринка, и деньга руб-мöд сета. Эзö я только одерлун пензасö вайö. Но и вот! Аслат керкуын пондан овны или мекöт тöрöтчамö? Бур, что лешак пияннэс кытчöдзкö электричествосö эзö орöтö, то ковсис бы кöркöсямоз сартас сотны. Биыс видзöт эм, а радивосö разисö. И ола кыдз гуын, ог тöд, кытöн и мый керсьö. Бат, джын отирыс тшыгйöн ни кулiсö, а ме сё надейтча, что оланыс вочмас, бур лоас.

— Баб, öнi олан сэтшöм, что он куж и висьтавны кытшöм. Öтiккез сiдз ни зобнысö тыртöмась-богатсялöмась, что озö тöдö мый керны, а мöдiккез кортöн ветлöтöны. Быль! Ачым адззылi, кыдз челядь да пöрись лапöлыс кортöн ветлöтöны.

— Господи, господи! Библияас сiдз и гижöма эд пö... Öтiккез пö лоасö вывтi богатöйöсь, мöдiккез вывтi беднöйöсь. Öтамöднысö пö пондасö вийны да сёйны... Мый тэ думайтан? Бурсö эта отиркöт нем видзчисьны. Видзöт, совхозным тай нач разьсис, некин эз понды уджавны: томся-томöсь, кыдз весь олiсь вöввез котрасьöны да вина юöны. Юöны да гусясьöны. И мыйöн бы сiдз кодавны, господи?! Деньгасö эд некытiсь озö шедтö! Ме, кывзы, эстöн не кулöм, не ловья öтнам ола. Пензасö ваясö, да ой и лун дрöжита, сiйö и видзчися, кыдз руб-мöд понда горшöс орöтасö.

Пöрись топ сорасис басниöн, ошшасис и норасис, медбöрын гажтöма шуис, что öнi кыкöн некинiсь ни озö пондö повны.

Галя узис баббезын. Сёйис-юис пöрисьлiсь. Ашынас чеччис, медодз одзöсöн корис деньга, медбы талун жö небны пизь да пöжавны нянь.

Тулысся асыв локтiс, кыдз кодя, бытшöм да ён невеста, кöдалöн некыт эз вись, ошшасьö-мыччалö ассис рöма чужöмбан, видзöтчö аслас лöзчача цвет синнэзöн. А деревня бöрын, крут лог дорын бобгö ни тар, нерö вöралiссезöс.

Гор лонтöм бöрсянь шоныт руöн пондiс лолавны Галялöн керку. Гор пытшкын медодз би öзйис кусöмöн-пöдöмöн, тшынсö кыскис умöля. Тöдчис, что ульсалöмась гор пытшк да труба. Недыр мыйись би öзйис, гажöн кутчисис важ пессэз бердö, кöднö Галя кольлiс мунтöнняс посöдзö.

Гажöн чалöтiс-лонтiсис гор. Хозяйка сэтöн жö пöжалiс тупöссез, пуис похлёбка, картошка одзöстiс Дарья баблiсь.

Пöрись морт гортас öтнас овны эз вермы, ештiс ни петавны соседкаыс дынö, эз мыдз эшö öтпыр висьтавны, кыдз Кöчыбись мунiсö медбöрья мужиккез да мунтöнняныс öддьöн горзiсö. Отир мунiс деревняись кошшыны бур олан. И, ежели кö видзöтны, ежели öшлыны, öнi оланыс Кöчыбас и эм, только оз ков дышöтчыны, колö видзны унажык пода, и быдöс лоас. Подалö турун улицаэзын быдмö пидзöссэзви, ыббез вылiсь позьö ытшкыны мымда колö, некин шы оз сет. Баб сьöртi петö, что öння отирыс юртöмöсь, озö вежöртö, кытöн бур оланыс, «чассёыс».

Асывсянь шоныт, сылö лым, визывтöны ни шороккез. Лöнь Кöчыбын, бура кылö, кыдз больгöны шороккез, кыдз лог дорын ас коласаныс шушкöны кöззэз, кыдз дзульзьö-сьылö юр вевдöрын ыбшар. Мурка петiс керкуись да нюжласьö.

Тулыс. Лун-мöд, и öшын увтын мыччисис луд, кöда синнэз одзын рöмсялас зелёнöй рöмöн. Талун-ашын садниккезын пондас ковны садитчыны, а кыдз да мыйöн? Кытöн вöлыс да горыс? Бöра колö котöртны да кеймисьны кыз кынöма бригадирлö, кöда асьсö пондöма лыддьыны медыджыт начальникöн.

Галя котрасис Вильыбöдз, пантасис бригадиркöт, здоровайтчис. Бугай Сергей чатырöн юрсö видзис. Кыввес лоöмась донаöсь, медбы Галя коддескöт сёрнитны, ризъялö-сералö:

— Мый нö, ударнича? Кöчыбас няньыс медчöскыт я мый я, сiйöн бöр гортö и локтöмыт? Или кодя мужикыт сьöвзис? Бокас, натьтö, эн куж узьлынытö... Колiс пымжыка окавны, а тэ, натьтö, менö моз жö... Сьöлалiн, бат, рожаас, а? Роччес эд, кывзы, абу миян кодьöсь, озö радейтö дулльöссесö. Мый висьталан? Бöра, поди, синнэзам сьöлавны котöртiн?

— Колас кö, сьöлала! — эз öш инька. — Миян коддеслö сьöласьтöг оз туй овнытö, чожа вожасятö поннэз моз...

— Сiдз тэ вылö и чеччалöны, гы-гы... Баит, да тöд мый баитны!

— Уджавны вöзйися.

— Киэт лудöны я мый я, или бöра жель мöртчис, да гортын он вермы пукавны? Öнджа, миян сийöсыс эм, кöть талун жö доддясь. Мöссэс дынын некинлö уджавны. Антилегенттэс полöны киэзнысö нятьöсьтны. Кузь руббез понда бы... То совхозаным талун öтiк копейка абу, кöть джагöтчы. Öтiк трактор кольччис, да сылö соляркасö немöн босьтны, сулалö машинаыс фермаыс дынын кöззэс увтын. И вöввес, шмам, абуöсь. Нач немöн мöссэслö вердчансö ваявны, кöть талун жö тпрутюэслiсь горшшезнысö орлав. Эз ни уна кольччö, только витдас гöгöр ни.

— Сiдзкö, совхозсö нагöлеч чöвтiтö... Но и начальство!

— Ме разь öтнам?! — горзöмсорöн шыасис бригадир. — Быдöнныс эд отсасисö. Öддьöнжык, öнджа... Асланым жö. Адззылiн эд, кыдз аслыныс пышшöтiсö машинаэсö да тракторресö, и подасö сiдз жö. Пышшöтiсö пон табун колхозсис и асьныс пышшисö, а ме бöб юрнам кольччи да иза. А мый керны, ежели ог куж мухлюйтны? Кывзы, мый гусяла, сэтöн жö винаöн юа и абу, гы-гы. Поди, былись бöра синнэзам сьöлалан? Но и сьöлав, он вий. Кыдз шуöны, кыным унажык сьöлалöны, сыным унажык гусялöны, гы-гы. Нем ни, тыдалö, миян кодьыслö оз мöртчы. Кытшöмöсь эмöсь, сэтшöмöсь и куламö. Вöлiсö бы быдöнныс, шуам, тэ кодьöсь, талун басниыс бы вöлi мöдкодь. Но и ась... Вунöт, мый вöлi и эз, да котöрт сюраэс дынö, то нiйö, натьтö, некин бöра талун эз верд и эз чилькöт.

Галя сiя лунö гортö сэсся эз и ветлы: Вильыбсянь веськыта котöртiс фермаö, сiдз тэрмасис, топ коккес увтiсь мусö эз адззы. Сьöлöм тёпкöтiс моросас, дзик полiс, что сытöг подаыс кувтöдз тшыгьялiс. И былись, ферма дынö эшö эз ешты локны, эшö вöлi логок дорын, а кылiс ни, кыдз баксiсö мöссэс, ас мознаныс нюжöтлiсö-резьöтiсö тулысся ру, бытьтö горзiсö. Кин пода гöгöр эз бергав, эз вöдит мöссэз, сiя ны голоссэз сьöртi оз вежöрт, мый колö сюраэслö. А Галя вежöртö. Сылöн сьöлöмыс жмитчыштiс, сувтчыштiс, повзьыштiс, нельки синваэс петiсö. Дыр сiя фермаын эз вöв, а вежöртiс ни, что мöссэс тшыгöсь. А вердны, натьтö, нач немöн, ежели тулысöдз вердчан эз тырмывлы. Некин Галяöс фермаö уджавны оз тойышт, сiя ачыс котöрöн котöртö сэтчин, кытчö колö, керö сiйö, мый сьöлöмыс кошшö.

Назёмöсь ферма туй кузя визывтiсö ни гудыра шороккез, тэрмасисö, вöтчисö öтамöд сьöрö, ас коласаныс мыйкö больгисö. Сьöдракаэз беринясисö-ветлöтiсö туй вылын. Рака табун карзiс ферма сайись вöрокын, кытчö тöн кыскисö кулöм мöс. Нырö вачкис назём да уль яй дукöн. Кöркöсямоз ферма дынын отир эзö тыдалö. Öтiк морт эз шыась.

Галя пырис мöссэз дынö, кöдна нюжöтiсö голяэзнысö, корисö сёйны. Синнэзаныс тыдалiс сэтшöм шог, что сiя медодз эз тöд, мый керны: видзöтыштiс öтöрö да мöдöрö, думаэзнас кошшис бы турунчир, но карта пытшкын эз вöв öтiк желепинка. Мöс куим-нёль эзö чеччö, кыдз куйлiсö джоджын, сiдз и куйлiсö. Быдöнлöн кучиккез увтiсь тыдалiсö лыэз, етша кытшöм мöслöн вежсяс гöн, кöр гöн бердö бытьтö штукатуритöм-лякöм назём.

Подасö колiс медодз вердны да вöлись чилькöтны. А мыйöн? Кинлiсь вердчансö корны? Мыля беднöй подаöс лун кежö кольöмась öтнанысö? Эмöсь я сайкалöм сьöлöммезлöн кытшöмкö бур думаэз? Мыля нö отирыс сэтшöм чожа вежсис? Эшö тöн, кöть умöля, кöть бытшöма, но совхознöй подасö вердiсö, юкталiсö, чилькöтiсö аскадö, а талун...

Галя адззис лым вылiсь туйыс бокись турунчиррез, кöдна тöвнас турун ваявтöн киссьывлöмась доддезiсь, тырлöмась лымöн, а öнi мыччисьöмась, косьмöмась шондi гаж вылын. Галя киэзнас куралiс туй бокись лым вылiсь турунчир, öктiс ноша куим-нёль, пыртiс карта пытшкö, торйöтiс учöт корось ыждаöн и сетiс мöссэзлö. Мöссэз турун сёйисö чöскыта-чöскыта, кыдз нималiсö челядь моз конфетаэз, дызгисö да нюжлалiсö голяэзнысö, корисö эшö.

Сэтчö локтiс Тоня тётка — Галя кодь жö арттöм мывкыда инька. Сiя сiдз жö оз вермы пукавны гортын, а пыр гардчö отир коласын. Талун желлясис, кыдз кужис, сiдз ни видiс начальствосö. Инька важын ни эз любит коммунистпöлöссö: öмсис пыр дуль резсис — быднёж шуис кöть кинöс. Эз пов не бригадирись, не директорись, не бухгалтеррезiсь, дрöг эз кер и районiсь начальствоись, вермис веськыта касьтывны райкомись первöй секретарь одзын бöрсö и одзсö, ежели мöссэсö озö вердö... Талун первöй секретарьыс абу, сiя асьсö оз ни шу райкомись секретарьöн, а ырбыльтö, что öнi сiя администрациялöн глава. Сiдзкö, мортыс бытьтö вежис кульпиян моз кучиксö, пасьталiс мöдiкö, а юрыс да сьöлöмыс эд нiя жö...

— Ой артиссэз! Бессэз! Кужö, батя, отирыс овнытö... Галю, тэ кылiн али эн, кыдз тöн эшö коммунисттэс ыксiсö: «Да олас партияным! Да олас Ленин!» А талун... Кöсаным Лениныслiсь портреттэсö абу я сартирö заргöмась. Поди, миянлö тэкöт гижсьыны жö демократтэзас, а?

— Миян кодь демократтэсö сартирас важын ни сюйыштiсö бы да кытчöдзкö видзчисьöны, — висьталiс Галя и шынь эз кер. — Демократтэс эд нiя жö, кöдна партийнöй билеттэсö сьöлöммезныс бердын кыскалiсö. А тэнат мый? Кытöн билетыт?

— Эз сiя менам вöв, — пизис Тоня. — А кöть бы и тшöктiсö пырны партияаныс, эг бы юрöс сюйышт. Нiя гусясисö пыр, а ме гусясьнытö ог куж, эг велöтчы.

— Пöдналiн бы öмтö, то менам юрö висьö баснитö кывзыны...

— А тэ, чупет чужöм, кывзы! Ме кöть еныслö ог верит, но умöльö ог велöт Лöг менам, видзöт, петö, кöр олансö нач пондiсö разьны, — рамжыка пондылiс баитны Тоняыс, но кыдз биа шомöн бöрсяняс чуткисö и öдззис вились пизьны. — Тэ кытiсь сэтшöмсö кывлiн, медбы бур, ылöса хозяиныс разис гортсö, ась кöть бы сизимись оланыс онняюртчис, медбы кöть вöлi социализм, кöть капитализм. Юрöн колö думайтны, мый керан. А миян юраэс кыдз юртöмöсь, или нiя былись вина юöмись бöбмисö? Менам тай, кывзы, юö, юö да кöр и баснинас сорасьö ни: тöн чеччöма, пуксьöма пызан сайö, юрсö кыкнан кинас жмитöма и пороз моз дызгö. Шуö, öнджа пö, кузь бурси, вай пö пондамö жö керны перестройка... Вай пö мöссö вузаламö, баляэсö начкыламö, курöггеслiсь юррезнысö кераламö и пондамö овны — не курöг, не петух, о! Кокнит лоас оланыс! Кылiн, кытшöмöсь миян алкоголиккес! — вак-вак серöмтчис инька да висьтасис одзлань. — Ме медодз öши, — аслам пеллезлö эг верит, мый кылi алкоголикöсянь. А сыбöрын кыдз öзйис сьöлöмö, кыдз лöгаси да веськыта висьталi, мыся, тэ мый?! Юан-юан винасö да нач ни дзугсисö юрат думаэт?! Ноко, пасьтась, пет керкусис, мед сэсся тэнö эстiсь эг адззыв! Кöзяин!.. Тэнат я керку-картаыс, кöр этчö локтiн горттöм пон моз и олан кыдз патераын, не он бытшöма уджав, не бокам он вермы мужик моз узьлыны, а быдöс бы разян хозяйствосö. Ме тэныт!..

Тоня баитiс, кыдз пулемётсянь лыйис, мыдзис висьтасьны, шоччисьыштiс, серöмтчис да содтiс:

— Сэтшöм миян мужиккезным и эмöсь. Сiдз нiя оланнас и веськöтлöны. Менö бы то Москваас пуктi государствонас веськöтлыны... Менам некин, öтiк морт, некысь и нем бы эз гусяв! Ме бы...

— Уна ни баитан, — Галя дзугис баснисö ёртыслiсь.

— Кылö сы вылö и эм, медбы баитны, — виноватöя ни шыасис Тоняыс. — Мийö эд только кыкöн, сэсся некин басниöс эз кыв. Поди, мöссэс озö жö висьтасьö, мый кылiсö, или тэ кывтö кузя видзан?

— Öддьöн колас...

Дызгисö мöссэс — ловвезнысö кыскалiсö тшыгсянь. Ферма дынын треньгис-сьылiс, кыдз кужис, сiдз олансö и гажöтiс пистöг. Вылын, юр вевдöрын, лöз и лöз кымöрын шыасис ыбшар. Тулыс! Зелёнöй рöмöн шыннялöны пожумоккез да кöззэз. Короминна вылiсь дзоллис-виялiс ва, йиджис лымö, и лым синнэз одзын пуксис-чинiс, Талун-ашын ыб вылын мыччисяс му, лым увтiсь юрсö лэбтас лымдорчача и пондас гусявны син югöр, дынас бöбöтны быдкодь гут-гагöс, кöдна шонытiнын саймисö ни кыз тöвся онiсь да öтi-öтi лэбалöны ферма дынын. Олан саймö, ловзьö.

— Жаль меным подаыс, — синваэсö пондiс чышкыны Тоня — тiлис уджын вартчöм-чорзьöм долоннезнас. — Мыля жö подаыс некинлö эз понды ковны? Мый мöдöны начкыны отирыс? Или былись городын и гортын пондасö нимавны чуннезнысö? Мыля нö одзжык, нiя жö, лешак пиян коммунисттэс, эзö-эзö да сё ни сибавлiсö фермаас, кöть кыввезнаныс да отсасисö миян кодьыслö, пыр эд кöсйисö керны бур олан. А öнi некинлiсь кодя кыв ни он кыв, только мать да квать... Кöть бöра бы кыз пучей кынöма бригадирыс сибавлi, кöть пыр зызö, дульсмöм синнэзнас оз адззы подасö, но локтi да кöть карта угöлас бы бöра кудзалi, миян кодьыслö и сэтöн вöлi бы кыдзкö кокнитжык.

— Мый сыись, кыдз кодзöм клёктунiсь? — сьöкыта шыасис Галяыс.

— Быль! — кокнитжыка ни шыасис Тоня. — Кыдз вот сэтшöм люшмöмыскöт иньыс олö?! Ме бы сэтшöмыскöт öтiк лун эг ов — пурт бы мöртi сьöлöмас!

— Нем тэ он тöд, Тоня, — гажмис Галя. — Эн я мый я кывлы, кыдз иньыс норасьö... Ойбыт-ойбытöн пö ойезнас узьны оз сет... А тэ начкылан бы...

Тонялöн эта басни бöрын нельки чужöмыс нюжалiс, синнэс ыждiсö, ньылыштiс дульсö. А ёртыс одзлань пондiс пеничайтны:

— Эн бы, Тонь, бригадирсö сiдз вид. Лöгасяс и быд шагын пондас зэлöтны.

— Кинöс?! — öмтырнас чирзыштiс Тоня. — Менö зэлöтас?! Менö гортын зырымöсь куль мужикö оз вермы зэлöтны, а сэтшöммес!.. Нёльзьöм чужöммес... Ме нiйö тöда и ог, ась ныррезныс увтiсь адззöны да тöдöны. Подасö отсалi бы вердны! Видзöт, Сьöданькаыс оз я неделя ни оз вермы чеччыны, кусö ни синнэзас оланыс. Ежели озö начкылö, кулас, а начкыласö кö, дак кöть садикас челядьыс лыэсö бöра вильöтасö. И медодз яйыслö бöра котöртас кыз кынöма бригадирным. Сылöн адыс паськалöма совхознöй подаыс весьтын, а ми тэкöт мымда ни уджалам, а уна я сёямö яйсö да йöвсö?! — раммыштiс инька, чужöмыс небзьыштiс, синнэзсис öшис лёк югöр, висьталiс. — Ме нiйö тöда и ог, сэтшöм начальствосö... Кыдз нiя, сiдз и ме... Удерлун кутi да гортö нуöтi Чайкасö, кöда йöвсö сетлiс медуна. А мый? Нуöтi гортö мöссö юасьтöг-висьтасьтöг, и ась пондылöны судитны, судас веськыта шырзя, кытöн юссес пöжсьöны! А былись-то, Галю, кин да мый керас, кöр совхозаным кольччис öтiк начальник, да сiя нёльзьöм сина, ныр увтсис оз адззы мый керсьö. Нуöтi Чайкасö, гортын верда кыдз колö, юктала, и сувтас коккес вылö, и пондам дзулим мужикöкöт йöв сёйны. Сiдз колö, инька, öнi овнытö! Кытiсь-мый шедас сöтны-вартны, гусявны-нöбöтны, сэк мортöн лоан, он кö... Тэнö гагöс моз талясö, и он ло...

— Вердны колö мыйöнкö подасö, — Галя дзугис ёртыслiсь басни, кöда вермис баитны час и мöдiкö.

Пода вöдитiссез адззисö ныж чер, болскисö-шагнялiсö вöр дорöдз тулысся шондi югöр вылын небзьöм лымöт, суййисö-кералiсö кöзоккез да пожуммезлiсь уввез, кыскалiсö нiйö карта пытшкö да нiйöн вердiсö пода. Мöссэз чöскыта сёйисö лыс...

Мыдзтöдз уджалiсö инькаэс, кытчöдз кымöрын шондi эз бергöтчы сёр павжунлань. Сёр павжун гöгöр вöлись пуксисö шоччисьны, и Галя бöра Тонялiсь юалiс вердчан йылiсь.

— Вайöны жö кöр сiсьмöм идзас да багсьöм кöрым, а медбöрья луннэзö сiйö ни эзö вайö. Пучей бригадирыс тай шуö, что кык вöв эмöсь пö совхозаным, да нiйö некин бы оз доддяв, и тракторсö пö немöн заводитны — абу соляркаыс. Ой, Галю! Оз эд уджав отирыс... Дбруньгаггезö пöртчимö...

12

Таво тулыс эз сунав, тэрмасис дзимлявны лым: кыдз кутчисис сылöтны, лун-мöд и, видзöтан кö, туйез вылын нять ни, ыббез лым увтiсь мыччисисö. Öтiк-кык лунöн шоррез сiдз визывтiсö, что нöбöтiсö нять и ёг.

Тулыс. Гажа кад. Кин сы вылö абу рад? Только Галялö тулыс кытчöдзкö нем бурсö эз вай: пырас гортö, керкуын бытьтö быдöс росöн чышкöм, нельки пызан вылö нем вайны — не пань, не бекöр. И ольпась абу: узьлö куш джоджын.

«Мый ме кери-и-и? — чеччас да одз асылöн вишыкасьö том инька. — Кинöс кывзi? Мыля бöб юрöс вузалi кытшöмкö кöин горшö?! Бось бы чунь кыза шать, кушöт бöр гöгöрöс и шатьнас вур да вур, Кодя отирсö эг кывзы, кöр сiя жö Тоня велöтiс овны, уна модис: «Галю, юртö кытчö оз ков, эн сюй! Öддьöн кö колö мужик, бöжтö лэбты, и чеччöвтасö, а эн вöтлiсь вöрын уджалiссес сьöрын! Кин сiя сэтшöмыс? Бат, сизимись ни тэ коддесö гогналiс, а тэ... Но видзöт ачыт, ежели ме кодь арттöмсö он кывзы, только сыбöрын некин вылö эн горзы...»

Тоняöс лыддьöны умöль мортöн и медодз сы понда, что вина оз ю, что мужикыс, кыдз учöт рукйöсь гöна баранок, не уджавны, не... Но инька оз соседдэс дынö котрась — быдöс, мымда чужöны челядьыс, Прокопыс жö дорö. Галя моз Тоня кытшöмкö роч голя бердö оз öшöтчы, гортсис быдöс оз вузав да оз пышшы Прокоп дынiсь.

Асыв. Öшын увтын важ кайпоз вылын питьыртö-сьылö сьöдкай. Асывся шондi öшынöт видзöтчö керкуö. Галя миссис, лонтiс гор. Горби одзö чугунöн сувтöтiс картов, и думаэз гажмисö, кыдз ловзисö, лоис кокнитжык, нельки сэтшöм бур, что öнi жö чепöссис бы садникö, босьтiс зыр, зырнас быдöс мусö борис бы: гöрис, садитiс картов, лук, морковь, кушман...

Сьöлöм пондiс гажöтчыны ни сьöдкайыс моз жö. Чув-чав и ештiс гор. Инька пасьтасис да котöртiс мöд деревняас, мунiс бригадир Бугай Сергейезö, кöда эшö черпезьдiс-узис, сылöн юр немымда эз вись совхоз понда. Сергей совхозсö разьтöн зоб тыртöма пöттöдз; медодз öшын увтын сулалö трактор, лым увтiсь мыччисьöма турун ытшкан машина. Керку бердын лым увтiсь жö мыччисьöны фермаись вайöм мöссэзöс юкталан доззэз. Колöмась и фермаись вилаэз да важ ведраэз... Галя кыдз казялiс кöртторресö, сiдз сьöлöмыс и öзйыштiс, сiдз бы и вердiс-сотiс бригадирсö лёк кыввезöн, но сэтöн жö асьсö падтiс: «Чöв, инька... Мый тэныт содас, пондан кö вувтны? Ась гусялöны-нöбöтöны, ась...» — и эна думаэзöн пырис бригадир ордö, кытöн руыс бытьтö шöмалöма — ныр чегö, немöн ловзисьны, дзик хозяиныс узьтöнняс вешьянас какöма и сё кровать вылын пишкö ныргорöн, кöть шондiыс кымöрас вылынкодь ни. Хозяйка вöлись чеччöма да маласьö джодж шöрын, кивзö-юасьö:

— Мый нö сы одза ветлöтан? Ми, видзöт, вöлись чеччамö. Эй, пороз! Чеччы! Тэ дынö, бат, локтiсö!

— Кинлö и мый ме дынiсь колö?! — Сергей пишнитiс нырнас, мурзьыштiс-эрзыштiс, осьтiс синнэз, лöга пондiс видзöтны локтiсь вылö, бытьтö казялiс ассис медлёк врагсö, кöдалö нем татöн керны. Сэсся юалiс, кыдз черöн кералiс. — Мый нö бöра колö?!

— Мöссэсö эд мыйöнкö колö вердны! — висьталiс Галя.

— Кытшöм мöссэз?! — öмсö осьтiс бригадир, пуксис кровать дорö, кынöмыс öшöтчис пидзöссэс вылöдз.

— Натьтö, совхозыслöн! Ны понда ме котрася...

— А тэныт мый бы? Мыля юрыт, кытöн оз ков, висьö? Али ме моз жö тöн юин? Тэ, инька, баснинат эн бы öш — баит да тöд мый баитны, то ме верма эд лöгасьны. Эн ешты бöр кысянькö ракаэс моз жö локны, бöра ни карзан, Вöлiн я мый я фермаас? Тöдан я мый сэтчин керсьö? Милиционер!

— Тöн эн я ачыт иньды уджавныт

— Кöр? — öмыс осьта бригадирлöн, дуль вотялö тырппес дорись, малалö кынöмсö да видзöтö то иньыс вылö, то Галялань. — Кöр ме тэнö фермаас иньдi?

— Быкöн бöра ветлöтiн да кысь тöдан, кинкöт пантасьлiн да мый баитiн! Порсь тэ, порсь... — бригадирика стыдитiс мужиксö. — Талун бöра дзунган асывсянь и он понды тöдны, кыдз луныс öшас. Кöть бы шондiсис ни стыдитчин быд лун юнытö! Абу я тулыс ни локтiс!..

— Гы-гы, быль тай тулыс! — бригадир видзöтыштiс öшынлань. — Дзöдзыв, тöдан жö мый... Ютöг эд гажтöм овнытö, — ружтö, пондö кöмавны нятьöсь вешьян. — Öнi, дзöдзыв, сiя юö, кöдалöн горшыс косьмö, и сiя оз ю, кöдалöн абу, да кöдö озö юкталö. А менö отирыс юкталöны! Вежöртiн?! Но вот... — кöмалiс öтiк вешьян коксö, пондiс шоччисьны — öмтырнас лолалiс-керис, одзлань нерис иньсö. — Тiян коддесö вот озö юкталö, сiйöн и лöгöсь... Юа и понда юны, тэнчит ог юась!

— Ю унажык, он я сотчы бы. Совхозаныт эз я мыйкö эшö кольччы винаыс вылö вежны? Бöрья мöссэсö, будь, вермат гортаныт тасавны, кöдна вылö кöиннэслöн ни сьöлöммезныс гудыртчöны... Кык юр, дак öтiксö и керавны бы! — кивзiс хозяйка.

— А тэ, гы-гы, керав кыкнан юрöс! — Сергейлöн пиннес гер. — Сыбöрын пондан горзыны да кошшыны ме кодь мужиксö. — И Галялö ни содтiс. — Былись, инька, уджалiн бы фермаас, ежели дышыт оз пет. Быдöнныс тай повзисö да пышшисö, только Тоня да Зоя эшö ветлöтöны...

— Кин дынö эшö ветлöтöны?! — мужиклiсь лöга юалiс иньыс. — Эмöсь я эшö ловья мöссэзныт? Ме тай кылi, бытте пö öтiккезöс начкылöмась, мöдiккесö бöрöн кыскöмась...

— А мый тэныт?! Весь овтöннят пыр уна тöдан! Ловья эшö подаыс, ловья. Вердчаныс только... Деньга колö, деньга...

— Юнытö деньгасö адззатö!

— Тупкав, мыся, помой дозтö! Асьным тöдамö, мый керамö! — бригадир öмалiс иньсö да Галялö висьталiс. — Тэ сэтшöммесö эн кывзы, а талун жö этö кер... Öнджа кер... Сьöданькасö и Серанькасö нуöт гортат. Нуöт кыкнан мöссö, и куканнесö верман кык-куимö нуöтны, кытчöдз ловьяöсь.

— Мыйлö?! — Галялö кыдз кымöсас вачкисö.

— Мыйлö-мыйлö! — Лёка шыасис Сергей. — Пондан кö уджавны, пондас ковны мыйöнкö вештiсьны, а мыйöн? Кытöн, мыся, совхозыслöн деньгаыс, кöр ашын ни колö петны бы кöдзны, а соляркасö небны немöн? Вежöртiн сэк?! Нуöтан гортö мöссэсö, пондан вердны, и, бат, озö кулö — тэнат лоасö, а фермаас ачыт адззылiн, мый керсьö...

— Юррезнытö бы начальствоыслiсь керав! — бöра бизгыштiс Сергейика.

— Ме тэныт мый шуи? Мыся эн шыась, кöр тэнчит озö юасьö мый керны! — бригадир одзлань сёрнитiс Галякöт, кыдз нач ни садь морт. — Мöссэсö, кöднö висьталi, нуöтан гортат, а ме асывсянь жö котрася директор дынö да баита пон юркöт, кыдз да мый... Кыдзкö бы подасö кыскыны виль турунöдззас! Жальöсь мöссэс...

— Страм партееццез, — нырыс увтын тоткис Сергейика. — Вермит тi партияаныт овтöн и ошшасьны, вермит и ошшасьны, и öнi бöра арттöм дöрасö панатö... Ме бы тэ местын таракан моз ни олi: отирыс одзын рожаöс эг ни бы стыдит, а тэ!.. Партийнöй билетнат бöр гöгöртö я мый я чышкин?

— Мыля бöра билетнас чышка? — повзьыштiс Сергей, пороз кодь кыз голясö нюжöтiс бы, да эз вермы, дундöтчыштiс. — Мыля ме партийнöй билетнас бöр гöгöрöс чышка, а? Менам сiя во кытöн! — ыджыт кыз кулакнас вачкис моросас — бут керис моросыс, кыдз жечись дорöм сiмöм важ ведра. — Эстöн сiя! Мыйись-мый... Вежöртiн, дзöдзыв син?!

Лун оссис гажа. Только синнэз эн кунь да видзöт, пеллез эн тупкав да кывзы отирлiсь басни. Талун Галялö бригадир гозъялöн арттöм басни гленитчис кодь, колiс бы эшö кывзыны, да некöр, колö котöртны фермаö. И инька бригадир ордсянь веськыта сöтiс фермаö, кытöн медодз адззис Тоняöс, кöда чиння голоснас резьöтiс-ыксiс сiдз, что ылiсянь позис вежöртны, что татöн бöра мыйкö шогмö мöднёж, не сiдз бы колiс лоны. Инька ыксö сiдз, что голосыс сибдö, ылiсянь кылö, кыдз асывсянь кинöскö вийö бы и судитö, быдöс олансö чередитö бы, да оз вермы, ас мознас керö бы, да прокыс абу.

— Мый лоис?! — Тонялiсь юалiс Галя, тэрмасис ферма дынöдз.

— Мый лоис, мый лоис... — киэзнас öвтiс инька, летiс горшсö, мужик моз матькис ни енсö. — Мать-перемать, шедiсö бы кö, эстöн жö вийи бы, мед менö бы судитiсö! Абу ни тай эта олан! Тасась бы кинлöкö лёк горшас мöсыс! Абу я Чикисьсö начкылöмась да яйсö нöбöтöмась! Лок да видзöт кучиксö! Воротаыс одзö и кольöмась! Адззылiн, кык кока кöиннэс кыдз смевмисö!

— Сельсоветас колö висьтавны или милиционерыслö...

Галякöт мыйкö лоис: кикокыс небзисö.

— Сельсовет, милиция-полиция... Тэ думайтан, кутан бандиттэсö?! Да быдöнныс нiя öтлаын керöны — öтiк пызан сайын сёйöны-юöны! Видзöт, кыдз бы миянöс тэкöт эзö судитö! А мый? Висьталасö, что асьныт начкылiт мöссö, яйсö вузалiт и быдöс эд! Пондыв суськисьны, озö веритö. Вöлi ни сiдз эд тэтöг: этадз жö начкылiсö сера мöссö, кулисö-волисö, яйсö нöбöтiсö, кучиксö колисö. И мый думайтан? Думайтан кинöскö кутiсö! Бригадирыс жö висьталiс, мед уна эг адззы и эг тöд, то ас вылам понда горзыны. Öнi бöра сiя жö... Думайтан бунтуйтнытö кинкö ылiсянь вовлiс?! Асланым керисö!..

— Колö висьтавны, — шыасис Галя, видзöтiс мöс кучик вылö, кöда дынсянь патшкис уль вирöн. Сьöлöм гудыртчис, и инька аслас синнэзлö эз верит, что фермаын вермисö начкывны мöс да яй нöбöтны юасьтöг-висьтасьтöг.

— Бу-у-у! — баксiсö ловья мöссэс.

— Мый пондам керны? — эз тöд мый керны Галя.

— Медодз вердны колö подасö! — пизис-койис Тоня. — Тöн рытнас ни мымдакö багсьöм кöрым вайöмась. Сеталамö кöрымсö корось ыждаöн кöть раз-мöдiсь, а сэсся бöра кöть мый... Бöра босьтамö черрез да пондамö масьтыны вöрсö. Вöрыс уна...

— Тонь, тэ сё жö котрась сельсоветöдззас и контораас пырав, то былись эшö пондасö шуны миян вылö...

И öтiк пода вöдитiсь лэбзис-мунiс фермасянь, медбы висьтасьны-норасьны, мöдiк эта коста пондiс вердны подасö кöрымöн, юктавны сöдз ваöн, матiсь вöрокись керавны да ваявны лыс. Сэтчöдз Галя уджалiс, что некöр вöлi шоччисьны и минута етш, эз адззыв, кыдз кымöрын шондi бергöтчис сёр павжунлань. Деревняланьсянь кыдз бордпавйöн мунiс, сiдз и локтiс Тоня, пондiс чанзыны-ошшасьны, что директорлiсь и бригадирлiсь «осьтiс синнэзнысö», нылö висьталiс, кыдз колö уджавны...

— Кывзы, Галя, директорным пуксьöма пызан сайö и пукалö да суналö. Быль! Натьтö, кывзы, Галя, мöс яйсö тыткис, сiйöн луннас синнэс и куньсьöны. Ме сылö веськыта и резги, мыся, мать-перемать, директор! Дыр эшö этадз пондамö овнытö али мый? Мöссö эд бöра ойнас чередитöмась! Эн я тэ öтлаын яйсö сёй? Быль, Галька, сiдз и резьöтi! Эг повзьы! А мый менчим босьтан?! Синнэзöс эд он кыскав да сунис вылö он пысав, а судитасö кö, мед судитöны! Сэтчин и туй! Эстöн ме этатшöм оланыс вылö ог ни вермы видзöтны! — инька ыксiс-видiс начальствосö, мыдзис, минута-мöд шоччисьыштiс, видзчисьтöг серöмтчис, содтiс. — Ой и лöгасис директорным, кöр ме сылö веськыта шыри, мыся тэ, Егор Петрович, бандиттэскöт öтлаын мöссö начкылiн, сiйöн и суналан пызан сайын и бытте нем он тöд. Ой и лöгасис мухлюй чужöмыс! Кышалiс шапкасö юрыс вылö да öтöрö! Кыдз тай лыйис-мунiс! — Тоня шоччисьыштiс, содтiс. — Сiдз, инька, сэтшöммеслö и колö, то нач ни вельмисö, öтiкö озö стыдитчö, кыскöны и кыскöны асланяныс, тыткöны и тыткöны да пöтны озö вермö — кыным уна, сыным унажык колö, а миян кодьыслö мый?! Мыля ми нем аслыным огö кыскö? Мыля асьным огö сёйö да совхознöй мöссэсö вердамö бы?! Еныс я мый я миянöс, сэтшöммезöс, бöб сьöлöммезнаным свет вылас сетiс?

Кинлöнкö кöин ыжда пон локтiс пода вöдитiссез дынö да пондiс вувтны, нерис Тоняöс, бытьтö сералiс или яй корис.

— Ы-ы-ы, проклённöй! — Тоня босьтiс назём вила, öвтыштiс поныслань. — Видзöт, эта кöиныс эд директорнымлöн, а! Сiдзкö, тöдö сотана, кытöн юссес пöжсьöны, поди, ойнас хозяиныскöт öтлаын вöлi?

Сэтчин да татчö, öтiк да мöдiк, и инькаэз раммисö, дзик нач вунöтiсö начкылöм мöс йылiсь, дугдiсö касьтывны начальство, пондiсö видзöтлыны шондiлань, кöда то саясьыштлiс кымöр палачоккез сайö, то мыччисьлiс.

Рытлань кад. Тöдчöмöн кöдздöтiс: ойланьсянь пондiс руавны кöдзыт тöлок, коккез увтын кажöтiс лымок, кöда эшö абу сылöма шондi гаж увтын. Уджалiссез пондiсö лöсьöтчыны горттэзö. Галялöн юрсис эз öш дума сы йылiсь, кыдз бы гортö нуöтны мöс, но полiс явитны эта йылiсь Тонялö, кöда некыдз эз вермы лöньсьыны: то эшö пондылiс видны кинöскö, то лöсьöтчис пышшыны вöрö да овны нач öтнас, — саясьны отир синнэз одзись.

Инька фермаись лöсьöтчис мунны гортö. Эз-эз да вöлись полöмöн горöтчис:

— Тоня, а меным бригадирыс кöсйис мöс... Тшöктiс нуöтны кöть кытшöмö. Эта понда пö... Уджалöмыс понда немöн пö вештiсьнытö.

— Мый нö узян?! — бöра лöгасис Тоня. — Тшöктöны кö нуöтны, и нуöт да не öтiкö! Кöть мöссэс ловьяöсь кольччасö, то видзöт, мый эстöн керсьö. Да юрнат думайт, кыдз деревняын миян коддеслö мöстöг овны! Мыйлö подаыстöг овны вöр шöрас?

И инькаэз Галялö фермаись нуöтiсö сьöд гöна ёнжык мöс, кöда топ пода вöдитiсьыс синнэзö и видзöтiс, кеймисис-корсис гортö. Дарья баб керкусянь öшынöт адззылiс соседкалiсь удж, чеччöвтiс посöдзö, долоннезнас вачкис боккезас, том голосöн ыкöстiс:

— Галю, эн я бöра мöс ни вайöт?! Вот тэнö и йöрт... Биись и ваись тай петан. Биовöй мывкыдыт, инька!

— Вайöтi, баб, да немöн эд верднытö! Туруныс кöр эшö лоас? — Галя видзöтiс пöрись садниклань, кытöн сулалiс неыджыт зородок (турунсö бабыс керис гожумнас медгажа луннэзö и ачыс эз тöд, мый вылö мырсис-пессис).

— Тэ мый горзан туруныс понда?! — висьталiс баб. — Вердан менчим турунсö. Ме йöвсö ог сёй, а каньыслöн кынöмыс сималö.

Баб коккез дынын ниртчис Мурка, топ хозяйка моз жö вöлi рад, что соседкаыс вайöтiс мöс и пондас вердны йöлöн. Мöс вылö дзик рад и Серко, сiя чеччалiс öшын увтын, мыччалiс гаж. Рад вöлi и шондi, радöсь вöлiсö хозяиннэзöн кольöм керкуэз, кöдна быд лун бытьтö суналiсö да шогалiсö. А сэтöн кыдз бы веськалiсö, чатыртыштiсö юррезнысö да шуисö: «Овны пондам!» И каёккез быркнитiсö-лэбзисö зэв керку дынöт, сьылыштiсö — сьöлöм гажöтiсö.

Галя посöдзись босьтiс кöртзыр, кöдö городö мунтöн эз ешты вузавны. Зырнас карта ворота одзись чапкис лым, осьтiс ворота и карта пытшкö йöртiс мöссö да сэк жö баб йöрö котöртiс турунла.

13

Тулысыс бытьтö тэрмасис-котöртiс да джöмдiс, усис и пондiс видзöтчыны, мый керны одзлань. Пондiс думайтны, оз я кер арттöм удж — одзöв сылöтö и колö шоччисьыштны да вöлись уджавны. Тöлыс, кöда лöсьöтчис пышшыны деревняись, топ садьмис, саймис, сувтiс, видзöтчис-керис и ойланьсянь ловзисис лэчыт да кöдзыт тöлöн, вайöтiс чочкомвевья кымöррез, койыштiс катша шыдöсöн — лымöн. Унньöвтiс пурга.

Бытьтö пургаыс районiсь вайöтiс начальниккезöс, кöднö öння кадö деревняын етша пондiсö адззывлыны, топ начальниккес пондiсö повны отирись и олiсö кытöнкö ошшез моз, етшаись мыччалiсö юррезнысö. А сэтöн, на! Локтiсö Вильыбö быдса бригада: öтiк начальник ыджыт, мöдiк эшö ыджытжык, öтiк ылöса, мöдiк эшö ылöсажык, веськыта туй вывсянь заргисисö сельсоветö, сыбöрын пырисö совхозiсь контораö и тшöктiсö клубö чукöртны отир.

Районiсь начальниккез деревняись начальниккезкöт мылякö етша баитiсö, унажык мурзисö, пишкышалiсö ныррезнаныс, пизисö-педзисö, тэрмасисö, етша кин видзöтiс веськыта синнэзö, бытьтö кытiськö мыйкö уна гусялöмась да бытшöмö, донаö, ыджытö, но быдöс абу вермöмась гусявны, сiйöн и мурзьышалöны, сiйöн и лöгöсь, полöны отирись, матö дынаныс некинöс озö сибöтö.

Тоня коддескöт начальниккез эшö эзö баитö. Нiя вöлись пантасисö ас кодьöммескöт жö, кöднö бура тöдöны, сiйöн и öтамöдлiсь синнэз эзö пондö бытшкыны — эзö дойдö лёк кыввезöн. Нiя бура тöдöны, кин, мый, кытiсь, кинлiсь унажык гусялiс или вузалiс, кин да кытöн буржыка тыртiс зобсö, тöдöны и вежöртöны, кинлö да кинкöт кутчисьны, тöдöны, кинлö кöда спина сайын сайласьны, кин да кинöс вермас дорйыны, кин кинкöт сюртнялöм öтiк нятьöсь гезöн.

Рытнас клубö öксисö отир. Öтiккез важын ни олiсö, кыдз баля табун, асьнысö эзö ни лыддьö совхозниккезöн. Мöдiккез вöлiсö кыдз тöн, сiдз и талун, кодöсь, кинкö узис ни. Осьтiс собраннё районiсь медыджыт начальник, господин Филипп Филиппович, кöдö начальникавны кык год бöрлань бöрйис отир. Быд морт надейтчис, что Филипп Филиппович кыдз грамотнöй, ылöса и бур морт пондас уджавны бура, ежели ачыс вöзйисис юравны, уна öтiк-мöдiкö отирлö кöсйисис керны. Лöсьöтчис коккез вылö сувтöтны совхоззэз, сыбöрын думайтiс бы ловзьöтны «Сельхозтехника», кöда вöлi паздöм-разьöм, важ пекарня местö керны виль пекарня, районö керны убойнöй пункт, кöда вöлi сiдз жö разьöм. Ошшасис Филипп Филиппович, что быд тулыс деревняэзын пондасö гöрны и кöдзны, гожуммезöн подалö керны турун...

Талун клубö отир весь эз лок, бöра мыйкö вылö надейтчис. Быд морт веритiс, что районiсь начальниккез мыйкö висьталасö бурö, отсаласö, туйдасö-иньдасö, кыдз овны одзлань. Но петiс сiдз, что Филипп Филиппович рожасö мыччис отир синнэз одзö — синнэзöн кваркыш эз кер, кылыс эз джöмды висьтавны, что вильыбсалö немöн оз вермы отсавны, что районын немымда абу деньга, ежели и государствоыс нач гöвмис, сiдзкö, совхоз вермас разьсьыны талун жö, сы понда некинлöн синва оз пет. А отир вермас прапрадеддэз да баббез моз талун жö этö керны... Доддявны вöввез, петны ыббез вылö, гöрны да кöдзны или быдöнныс вермасö уджавны только аслыныс, кыдз öння кадö шуöны, лоны фермеррезöн.

— Мый сiя сэтшöмсö кöтö?! Кытшöм пермаэз йылiсь баитö?! — Тоня рака моз клубын отир коласын трек-трек керис юрнас, карзыштiс и виньдiс аслас дульöн.

— Сэк сiдз, господа-ёрттэз! — эта коста тэчис-баитiс Филипп Филиппович. — Нем миянлö талун совхоззэзiсь видзчисьны. Эта сьöртi и думайтö, кыдз пондатö овны.

Клубын отир шай-пай лоис: некин эз лысьт несйыны, кызöтны, пыдынжыка ловзисьны. Совхозiсь директор — господин Егор Петрович Пестерин, — кöда асьсö умöль мортöн эз лыддьы, а отир жö шуисö сiйö только «пестерöн», видзчисьтöг веськыта лыйис-горöтчис, что сылö совхозыс оз ков, что сiя талунсянь оз понды директоравны, что керö аслыс фермерскöй хозяйство.

— Былись, инькаэз, пермаыс да пермерскöй хозяйствоыс мый лоö? Бат, миянлö сэтчин жö колö котöртны, а ми öммезнымöс осьтiмö да огö тöдö мый керны, — бöра эд Тоня пöртчис бöб инькаö, бытьтö нач оз кывзы радио, оз лыддьöт газетаэз, талун вöлись чужис. — А кысь ме радивосö кыла?! Разисö да... И газеттэсö ог лыддьöт, кöр нiйö гижнытö немöн — абу деньгаыс!

Антонидаöс отир öмалiсö, и сiя лöнис.

— А тэ, бригадир, мый сэтöн пукалан?! Али пеллезат нитш сюйин да он кыв, кыдз миянöс этö керöны?! — кинкö то ештiс ни юавны бригадирлiсь, кöда пызан сайын начальство коласын эз пукав и эз бöрсö ляз отир коласын, а нырнас пишкис стул вылын бокынмоз. Бригадирыс, кыдз тöн, кыдз удерлун, кыдз и сэсьудерлун, бöра ни юыштöма, пукалö да суналö. Но кылiс эд Бугай Сергейыт, что сiйö видöны, дзик кинкö бокас вачкис зорöн. Повзьыштiс, юрсö лэбтыштiс, юр вылiсь босьтiс важ шапка, порсь моз рокнитiс да висьталiс, что сэсся бригадиравны оз понды.

Сiдзкö, совхоз öтiк часö кольччис нач юртöг, бытьтö некинлö эз понды ковны, бытьтö сiдз талунсянь оланыс и пондас мунны — кинлö да кытчö туй! Отир янсöтчас öтамöд дынiсь, торйöтасö öтамöд коласын ыббез, каясö ыббес вылö кöда вöлöн, кöда мöсöн, пондасö гöрны да кöдзны.

— Нахрен меным ыббес! Менам нiйö немöн гöрнытö, кöр не мöс, не вöв абуöсь! — векнит голосöн пик-вик отир коласын шыасис Шырöм Ондрон, кöдалöн гортын не мöс абу, не вöв оз думайт видзны; кöзабаран видзö да кык баля, сiйöн и кивзö. — Америкаыс вердас! Америкаыс богатöй, гы-гы... Совхозныт оз ков, ась разьöны ни досповна!

— Тi, начальство, мый кератö?! Тi миянöс эшö отирöн лыддятö или одö ни?! Ми эгö я тiянсянь видзчисьö бурсö, а тi... Былись тай миян кодьсö тшыгйöн вийны лöсьöтчат. Разят совхозсö, а миян кодьыс кытöн пондас уджавны и мый керны? Кытiсь няньсö шедтыны? Кытöн пондамö юррезнымöс вердны, кöр эшö челядь быдтамö?! Али былись тшöктатö кöркöся моз кортöн ветлöтны?! Ме, бат, и мунi бы кортöн ветлöтнытö, но кин и мый öнi сетас корисьыслö? Öнi, кывзы, отирыс эд абу ни кöркöсякодь — надзöсь лоимö, картовсö ни жалейтамö беднöй мортыслö сетны. Сэк думайтö юррезнаныт мый баитат! — бöра öзйис Тоня, бытьтö пондiс чиж-важ пöжассьыны пым сковорода вылын, висьталiс сiйö, мый думайтiс.

— Думайт кöть эн, а ме нем ог вермы керны, — пызан сайын сьöкыта ловзисис Филипп Филиппович, дзик сiя былись вывтi тöждiс отир понда, сiдз тöждiс, что ойез эз узь, нянь эз сёй, эз ю, сiйöн рожабаннэс и кызöмась, кыдз тупöссез лоöмась...

Инькалöн аслас мывкыд — мортыс нинкöм моз сьöктанöн абу кыйöма, черöн абу лöсалöма. Кывсьö, что инькалöн вöлöма пö сэтшöм жö асныра баб, сiдз жö кидласьöма отир вылö, и кулöма пö бабыс томöн: брякнитöм-вийöм еныс старухасö, чарöтöма джоджныс шöрын. А эта эшö кувны оз лöсьöтчы, эшö пиннесö кеслö и пурö-баитö:

— Филипп Филиппович, мыйлö нö ми тiянöс начальникас бöрйимö?! — Филипп Филиппович рожаö кань моз чеччöвтiс ни бы Тоня, сотiс кыввезнас.

Но Филипп Филиппович Тонялiсь кыввесö кылiс и эз — синнэзнас кваркыш эз кер, виртор чужöмас эз чепöссьы, юр вылас юрси тылöп эз вöрзьы, кыдз кужис-вермис, кыдз колiс, сiдз и висьталiс.

— Ме тiянöс, Антонида Михайловна, ачымöс начальникас бöрйыны эг тшöкты. Вермит бы закон сьöртi ме местö бöрйыны мöдiкöс, кöда бы, думайта, уджалiс ме моз жö.

— Сэк былись я мый я деревняэзным нач ни разьсясö?

— Мыля разьсясö? Мыйкö колö керны! Думайтö да керö, может, ми мыйöнкö вермамö отсавны, шуам, отирыс моз жö öтлаасят ассоциацияö.

— Мый сiя сэтшöмыс? — бöра Тоня, кыдз яг вылын баб, осьтiс öмсö.

Веськыта висьтавны, Вильыбын отир нач öшис — öтiк этчин, мöдiк сэтчин, öтiк кывнас вартö, а мöдiк кöдзны бы лöсьöтчö. Клубын унажык инькаэз модисö, керисö бы сiйö, мый нылö висьталöны, мед кöть Вильыбын лоас бы аскодя хозяйство.

— А директорнас бöрьямö Галина Макаровнаöс! — медодз бöра Тоняöс бöрсяняс бытьтö чувйыштiсö биа гормöччанöн: инька чеччöвтiс быдöн одзö и кывнас вермис быдöнöс, сiдз висьталiс, что Галяöс, кöда пукалiс öтлаын жö, невна кудоба эз чапкы, кöр эз и вöтась, что сiйö кинкö, кöркö, кытöнкö пондас бöрйыны директорö. Да кытшöм сыись директор? Вермас я начальникавны отир вылын, кöр и мöссэз вылын оз вермы ыксыны бытшöма... Кыдз веськöтлыны öння кадö öння отирöн?

— А тэ, Галю, вывтi эн тöжды! Кытöн лоас дзескыт, менö коран! Ме понда дышшес вылö вувтны и вирöдз пура алкоголиккесö, кытчöдз пиннезö лэчытöсь! — эшö öтпыр öзйис баснинас Тоня и сотчис-баитiс. — Мыйлö миянлö дышшесö?! Кытöн нiя эмöсь, ась сэтчин и олöны, а ми... Мед кöть дас морт да пондасö уджавны честнöя, бура! Аслыным эд пондамö керны! Сiдз али мый, Галя?!

Былись сiдз или... Отир эшö эзö вежöртö öтамöдсö, кöр оланыс орсiс-нерис, быд лун мый-нибудь да вежсис.

14

Тулыс вермасис-керис тöвкöт и бытьтö мыдзис вермасьны, пондiс шоччисьны, да видзчисьны, мый жö эшö пондас керны отир, эз тэрмась сылöтны нач, эз разь одза-одз туйез. Туйез нач разьсясö, оссяс Кöсва, ю ыждас, паськалас, вынсялас, деревня Вильыб гожум шöрöдз янсалас Кöс да городдэз дынiсь. И кöть тэ горзы, кöть китсась, некин и некытiсь тэ дынö оз котöрт, оз лэбзьы, немöн оз отсав, ежели только вермасö шогалiсь мортöс кыскыны вертолётöн. А совхозiсь директорлö ковсяс бергавны нач öтнаслö, кыдз вермас, кужас, сiдз и пондас уджавны отиркöт.

Эшö эз чулав сiя рытыс, кöда йылiсь эз вöтась Галя, эшö Бугай Сергей пишкис нырнас да нерис инькасö, что сiя вöлись эд шедiс, вöлись эд адззылас олансö, вöлись пондас туртны ой и лун, а Сергей водас гортас, лэбтас вевдöрö коккесö и...

— Ась! Мед мöдiк курччалö чöскыт няньсö! Тырмас менам Бугайлö совхозсö куштыны, мед бöра мöдiккез винасö юöны да отирсö сёйöны, то мужикöлö öтöрö ни эз туй мыччисьны, ник и няк синнэзас бытшкисö, что только ас пондасис да родняыс понда бригадиралö, кытчöдз сто граммöн он юктав, вöвсö оз сет. Натьтö, быдöн ни думайтiс, что оз кö понды бригадиравны, тшыгйöн куламö. Эд полö! Кинкö, бат, тшыгйöн кулас, а ми эшö абу китöм-коктöмöсь, эшö вердамö асьнымöс! — тотис Бугай Сергейлöн иньыс, быргис ныр увтас, нюжлалiс чуксö. Инькалö колiс, медбы мужикыс эшö бригадиралiс, эд Сергей кодувья не весь пыр моросас вартлö да ошшасьö: «Ме команде-е-ер! Метöг тiян Вильыбаныт овсяс! Тшыгйöн пезьдалатö!»

— Уна ни тай кулöммес улицаас валяйтчöны, — сьöласьö Тоня — аслас юр вылö жексö. Бригадир инькасö кузь кылыс понда, кытöн вермö, сэтöн и зэлöтö: то тулыссэзöн садитчытöн вöв оз сет, то кулас кö фермаын дристöсь кукань, кышалö бы вештiсьны пода вöдитiсьлö, кöть быдöн тöдö, что пода кулö не пода вöдитiссез увья, а бригадирыс увья...

Öтiк лун Галя эшö эз директорав, эшö бура эз вежöрт, мый сыкöт лоис, кытшöм сийöс кышалiсö голяас, а нерисö и кöритiсö ни, бытьтö отирлö ештiс керны только умöльö, и этасянь вöлi умöль, недолыт.

— Эн пов, Галина Макаровна! Быдöс лоас бур! — виль директор дынын гардчис ни Мазьöсь Фёдор, кöдö сiйöн сiдз шуöны, что пыр уджалö трактор да комбайн вылын, пыр бергалö машинаэз дынын, и киэс пыр мазутöсьöсь. Трактористтэз коласын етша юö вина и оз радейт дыш отирöс, совхозiсь арттöм удж, надейтчö, что виль директор пондас уджавны кыдз колö — бур хозяин лоас. А Фёдорлöн инь сэтöн и эм, кужö жö лельгыны, пыр мужикыс öм вылын пукалö, кивзö, медбы Фёдор уна эз адззы, уна эз тöд.

— А мый меным? Меным эд портпельсö не новйöтны! Буди этö... Разьсьöм тракторöс мырддясö! И ась мырддьöны, мед öшын увтсиным öнджасö кыскöны, то сулалö кыдз кульöм да кулöм вöв... Отирыс кыдзкö олöны, и ме понда овны, — тракторист пыр öмалö иньсö, смела баитö, думайтö, кыдз бы чожажык вочны важ тракторсö да кайны ыб вылö и пондöтчыны гöрны. — А мый нö?! Ыббес вылын огö жö пондö ёг быдтыны!

— Кöдзись тэ! — дзель моз няксö Фёдорика. — Кöдзлiн, кöр виль вöлi тракторыт, а öнi тракторресö, видзöт, ылöса отирыс важын ни ассинысöн пондiсö шуны. Сулалöны тай машинаэс öшыннэзныс увтын... Аслыныс тракторрезнас озö уджалö, и отирлöн абуöсь!

— Кöдзам бöра! — ошшасьö тракторист, синнэзас гажа и лёк югöр, видзöтö Бугай синнэзö или дзиргö районiсь начальниккезлань, кöр вовлiс жö собраннё вылö. А начальниккез мыччалiсö рожаэзнысö, жöдзисö-педзисö, тэрмасисö, медбы янсöтчыны отиркöт.

Öнi Галясö некин оз вермы пальöтны, сiя челядь моз пильскö, да оз бы директорав, кöть Фёдор веритö и тöдö, что том инька кужас и вермас отиркöт уджавны. А сырчик кодь чож Фёдорика малалö Галялiсь гладь юрсö, бурöтö сiйö. Баитö, что отирыс уна эмöсь, кöдна ашын жö петасö уджавны и пондасö уджсö бергöтны ошшез моз.

— Сотчö-ö-ö! — кинкö пондiс чирзыны клуб посöдзын, сiдз öдззис летны горшсö, кыдз былись кытöнкö мыйкö сотчö: би оз тыдав, и тшын оз кай, но мыйкö эд сотчö, ежели ыксö отир.

Инькаэз сьöрсьöн-бöрсьöн, кыдз баля табун, клубись уськöтчисö ыбöсö. Клуб пытшкын осьта ыбöс коласöт эшö горöнжык, ятнöйжыка кылiс, кыдз кинкö ыксiс: «Сотчö!» Повзьыштiс и Галя, дугдiс пильскöтчыны, клубись петiс отир сьöрö.

Чорыт мывкыда тулысся рыт эшö нач эз узь. Вöр сайын рыт ладорсянь пуксян шондi видзöтчис гырись гöрд синнэзöн, бытьтö лöгасьöма отир вылö да думайтö, мый керны или нем не керны, мед отир кыдз олö, сiдз и олö.

Клуб посöдзын гатш павдöма фельдшер, пезьдöма том морт, и öмсис быг петö. Сiдзкö, мортыс былись эд сотчö винасянь. Тура-тара клуб посöдзын инькаэз жöдзöны код фельдшер гöгöрын, ружтöны, кивзышалöны, касьтылöны енсö, Христослiсь корöны отсöт, и сэтöн жö матькöны сiйö, бытьтö еныс виноватöй, что сiдз петö, что Вильыбын фельдшерлö сэсся некин оз вермы отсавны сысянь, что öтiк медик сельсоветас.

— Вешшö, будь, сэтiсь! — Мазьöсь Фёдорлöн учöт мыгöра сырчик кодь чож инькаокыс киоккезнас рез-паз инькаэсö тойыштiс öтмöдöрö, мышкыртчис код весьтö, кыкнан кинас кутчисис фельдшер пеллез бердö и пондiс зыртны-ниртны...

Чожа Павел Петрович саймис, осьтiс гудыра синнэсö, юалiс кытöн и мый сыкöт, прыг чеччöвтiс и мунiс гортас.

Галя, кыдз пурöм и вартлöм, клубись иньдöтчис гортас, эз казяв рытся зарнилiсь орсöм, улицасянь веськыта кайис ыб вылö. Сылiсь чужöмсö пондiс малавны ыркыт ойся ру, кыдз бы ойыс жалейтiс и сёрнитiс-висьталiс, что быдöс лоас бур, и немись тöждыны! Мöдiк лун локтiс сöстöм, гажа, шондiа. Эшö вöлi кöдзыт, но му лолалiс ни тулысöн моз. Сьöдкайез, кöдна кöдзытiсь кытчöкö дзебсисьлiсö, мыччисисö бöр, сьылiсö кайпоззэз вылын. Кытöнкö ыб вылын одза-одз асывнас пондiс бобгыны тар. Галя шондiтöг ештöтчис гортын: медодз лонтiс гор, мый колiс, сiйö пуис-пöжис, чилькöтiс, юкталiс да вердiс мöс, вердiс пода да кань, аслыс öмас шупкис няньтор и, сiйö курччавтöн, петiс керкуись. Ыбöсö öшöтiс замок, сэсся пыралiс Дарья баб ордö, кöдалö кык кылöн висьталiс мый сыкöт лоис, кытшöм сiя талунсянь начальник. Эшö баб одзын ештiс норасьны, но пöрись сэтöн жö öмалiс, что горзыны нач немись. Висьталiс, что война годдэзö и сiя бригадиралiс — ой и лун гортö эз ешты пыравны. А кытшöм сыись бригадир вöлi, ежели сiя мало-дело только кужис ассис ним гижны, но уджалiс, старайтчис.

— Отирыс сэк, баб, мöдкодь вöлi, — вишыкасис том инька.

— Мый керан, ежели оланыс вежö миянöс, и эгö пондö кужны овнытö? — гажтöмжыка ни шыасис Дарья баб, содтiс, что быдöнкöт колö овны чорытжыка, мöссö сiя видзöтас, луннас вердас.

Баблö позис веритны, сыкöт туйис овны, и, ежели бы совхозын быд мортлöн мывкыд вöлi баб мывкыд кодь, нем бы вöлi тöждыны. А öнi асывнас одза-одз колiс котöртны фермаö.

Вöр сайсянь шондi ештiс только мыччисьны, ештiс осьтны синнэсö, а том инька вöлi фермаын ни, кылiс кыдз баксö пода — сьöлöм йирмалö, эн бы и лок этчö, но колö. Карта пытшкись петiс Тоня, дзöдзыв моз чувизнитiс воротаэз коласöт, пондiс сярзьыны-видны Гöжöм Колькаöс:

— Но гöжöм! Но турзьöм! Сiйöн гöжöм-турзьöм и эз вермы гöтрасьны. Ме эд сылö тöн шуи, мыся, Колька, тэ асывнас дыр эн черпезьды, чеччы одзжык, доддяв вöвсö да кынувьяс матiсь кушсис мöссэслö кöрымсö вай, а сiя сё эд абу... Багсьöм вешьян! Сiдз тэныт и колö! Мед тэ иньтöг и пöрисьмин — кулöм шыр эн адззыв! Вот, Галина Макаровна, сэтшöммескöт и уджав! Кöр ми Колька коддескöт бура пондамö овнытö?! Тьфу, порсьпöлöс! Аслам колас котöртны да вöвсö доддявны.

Шондiыс лэбтiсис вылöжык да тöдчöмöн пондiс шонтны быдöс, мый эм му вылын. Короминна вылiсь пондiс патькöтны вотьва. Вöлись деревняланьсянь лыннялiс Гöжöм Колька, ылiсянь тыдалiс сивöй юрыс, зонка эз тэрмась.

— Вöрöтчы, Миколок! Коккет абу я мый аслат? Мунан кыдз кодзöм баран, — панталiс зонкасö Тоня.

— Кытчö тэрмасьнытö? Луныс кузь, — ныр увтас бобгыштiс Миколыс, чужöмбаныс бледöтöм, бытьтö неделя абу сёйöма, нузгö. — Öтнам я мый я идзассö понда ваявны? Додьсö умöль лоас тэчны...

— Нывкаэс сьöрын вöтлiсьны öтнат верман, сэк и додьсö тэчан!

— Кытöн кузь бурсиаэс? Кытiсь тэ нiйö адззывлан? — додь дынын ни бергалiс Колька.

— Уджав, зонка! Ме тэныт невестасö талун жö адзза, только гöтрась. Корася Дуся бабсö, сiя велöтас бокас узьлыны и уджавны. Окасьнытö бабыс эшö бура кужö, эшö тэнö пондас борддэс увтын видзны да быд асыв тупöссезöн вердны, кыдз этасö... Роч Öльöшсö, кöда, видзöт, кытiськö вовлiс, гогналiс пöрисьсö да пышшис.

Тоня ырбыльтiс Миковкöт, киас видзис вила да öвтiс сiйöн; то шыннялiс, то лöгасьлiс — орсiс баснинас и чужöмбаннас, мыччалiс, что талун кытчöдзкö фермаын быдöс бур, кöть сiя талун татчö и локтiс дзирс пемыт, сьöрас вайис лэчыт чер сiйöн, что полiс шпанаэзiсь, но и чернас лöсьöтчис бöра керавны лыс.

— Сöтi бы юррезаныс, сымда и эм! А мый эшö? Нiя пондасö картавыв шöрас мöссэсö начкывны, а ми сё пондам видзöтны! — баитiс инька, сэтöн жö мöдiкö шуис, что кывнас пыр уна керö, а мортлö сöтны киыс оз лэб.

Öтiк да мöдiк, и инькаэз баитчисö, что фермаын колö бы сторож, кöда бы синйис подасö. А то мый петö: öтiк мöс тöн коксö кыдзкö сюйыштöма кык столб коласö, сибдöма, и эз бы некин ешты локны да мездöтны мöссö столббес коласiсь, бöра бы лоис изъян.

Пода. Хозяйство. Бергавны колö виль директорлö гортын и отир коласын, тöждыны ас понда да совхознöй понда. Галялöн талун медодз юр висис пода понда, но думаэс гардчисö эшö ыббез гöгöрын, колiс кыдзкö кöдзны.

Кöдзны, кöдзны, кöдзны сю... Кöдзан — мыйкö босьтан, он... Нем оз ло и одзлань пондан овны не кулöм, не ловья. Кöдзны колö медодз!

Директор локтiс контораö, кытöн кыдз шатьöн вачкöм, некин абу. Кöдзыт контораын да сэтшöм, что öтöрын шондi югöр вылын шонытжык ни.

Галина Макаровна лöсьöтчис бöр ни петны керкуись, но сэтöн пырис Егор Петрович, кыдз лёк пороз заргисис керкуö, пишнитiс нырнас, бытьтö инькасö эз адззы, эз здоровайтчы. Но Галя мужиклiсь, кыдз эшö директорлiсь, юалiс, мый медодз колас керны.

— Кин ме тэныт? Мый юасян? Ме эшö тöн висьталi, что директоравны ог понды! — ыксiс Егор Петрович, дзик Галя вöлi виноват, бытьтö Егор Петрович местö ачыс бы пырö начальникавны.

Пишкайтiс нырнас мужик, чывкйис-керис джоджöт, зепсис кыскис ключчез да шупкис пызан вылö, эрзыштiс:

— Вот тэныт ключчез, вот тэныт стул, пызан, шкаф! Э-э-э, шкафас эмöсь гижöттэз да печать. Верман öнi жö пуксьыны да гижны приказзэз, а Петровичыслö тырмас весись няньсö сёйны. Тэ лоан кодя, ылöса, он понды гусясьны и юны вина...

Егор Петрович пеничайттöн кымöснас люкалiс ыбöс и öшис контораись, колис аскодя недолыт думаэз.

Шондi видзöтчис öшынöт и сералiс öмтырнас. Контораö пырис Люба нима кассир, кöдалö дыш петiс весь овны гортын, и татöн вöлi керны нем, но колiс жö асьсö мыччавны виль директорлö. Кассир здоровайтчис, гажöн висьталiс, медбы Галя босьтiс пызаныс вылiсь ключчесö да чожажык, то Егор Петровичыс вермас бертны, бöр ключчесö босьтны и сэсся сiйö директорсис он вашöт, кувтöдз пондас гудыртны Вильыбын олансö.

— Оз ни берт Егор Петровичыс, — Галя босьтiс ключчез. Люба гажöн баитiс одзлань:

— Фермерö тай керсьö Егор Петровичным... Видзöтам, кытшöм сыись фермер петас, кöр уджавнытö дыш, пыр надейтчö, что сылö кинкö керас.

— Может, петас, — ыш ловзисис виль директор.

— Отирыс киэзöн... Миян коддесö пондас уджöтны, кыдз раббезöс... А мый? Уджалам. А кытчö воштiсям, кöр кынöм сималö?

Люба модис ассис, сылiсь басни Галя кывзiс и эз, бöра думаэзнас видiс асьсö, мыля босьтiс ключчез, мыля кутчисьö уджавны сьöкыт удж бердö. Колiс бы мунны контораись, но эз ешты: локтiс Мазьöсь Фёдор, тракторист, кыз мыгöрнас пелитчис ыбöсö, кыз голоснас гажöн здоровайтчис, поздравитiс директорсö виль должностьöн, вöлись юалiс мый керны, кытiсь тракторö адззыны кытшöмкö кöрттор-часть, кöда йылiсь Галя эз и кывлы. Адззыны бы тракторö частьсö, талун жö позьö гöрны. Кад оз видзчись, тэрмöтö, и Фёдор пондiс баитны, что бур бы начкывны мöс, яйсö вузавны, деньгаыс вылö небны мый колö: солярка лоас и часттез тракторö лоасö!

Фёдор мöссö баснинас вундыштiс бытьтö Галя сьöлöм бердiсь — вир оз пет, а зубыт. Но тракторист дор лоис Люба, сiя пондiс кöстыны, что, натьтö, былись бур бы начкывны мöссö, яйись керны деньга, небны, мый медöддьöн колö, и пондыны кöдзны.

Директор эз шыась, мымдакö эз вермы баитны. А тракторист висьталiс ни, что бур бы ветлыны районöдз, кöр Кöсва вылiсь йы эшö эз кывт, эшö эмöсь туйез. Котрасьны бы районöдз, юрбитны бы начальник коддеслö, эзö я бы чиновниккес мымдакö адззö деньга.

Галялöн чужöмыс пиньöвтчыштiс, бытьтö повзьыштiс тракторист басниись, сэтöн жö шынньöвтiс да сiдз, топ оссьыштiс тулысся басöк дзоридз, мыйсянь Фёдорлöн мыйкö вöрзьыштiс сьöлöмас, дума нерис: «Эх, Фёдор! Мыля тэ одз и пöрисьмин?!»

И сэтöн жö мужиклö жаль лоис том инькаыс, туйис — вермис бы Галя, местö котрасьны Кöсöдз, адззис бы кин дынö пырны, кин дынiсь петны, колiс кö, эз бы повзьы кулаксö няпыртны кöть прокурор, кöть судья одзын, правда понда люкалiс бы кöть кытшöм ыбöс (герой кодь öтiк часöн лоис, но...) Но мужиксö некин и некытчö эз иньды, эз кор, районын некин эз видзчись. Фёдор эшö висьталiс, что ачыс адззылiс, кыдз Вильыбö локтiс кытшöмкö машина, натьтö, бöра сьöд чужöма отир локтiсö вузасьны. Сiя машинаöн и позьö ысласьны Кöсöдз.

Шондi эшö эз ешты Вильыбись саймöтны быдöс дыш отир, а Галя пукалiс ни машинаын да ыскöвтiс районö.

Туй эз ни вöв тöвся, эз вöв гладь. Гу да гöп машинасö зэгйис, эз лэдз сунавны, юрись зэгйис умöль думаэз, сьöлöм вылiсь пыркйис аскодя полöтан шог, сысянь, что Галя начальство дынö мунiс медодзись, некинöс эшö эз тöд и полiс пантасьны отиркöт.

Луншöр гöгöрын локтiсö районö. Медодз Галя пырис медыджыт юралiсь дынö — заргисис бы веськыта Филипп Филиппович жырö, но...

— Тэ мый, нывка?! Роч кывсö он я мый я вежöрт? Лыддьöт ыбöсыс вылiсь да вöлись баля моз пыр кабинетас! — Филипп Филиппович ыбöс дынын пондiс китшсьыны читкыля юрсиа да чукрассьöм кодь ни рожабана инькаок, кöда, тыдалö, весь няньсö эз сёй и деньгасö весь эз босьт: кычанок моз начальник ыбöс дорын кужис лявзыны. — Филипп Филиппович дынын эмöсь отир. Видзчисьышт!

— Ме мортыс коми! — чиж-важ горöтчис Галя, кыдз пондiс пöжасьны сковорода вылын. — Рочöн ог куж лыддьöтнытö!

Пишнитiс нырнас читкыля юрсиа инькаок, пуксис пызанок сайö, юрсö бергöтiс öшынлань и тувдiс: нач вунöтiс локтiсьыс йылiсь...

Галя сулалiс ыбöс дынын, натьтö, час етш, эта коста мый только эз и ешты думайтны, бытьтö сулалiс ен ыбöс одзын, лöсьöтчис шедны нето райö, нето адö... Сулалiс сiя коккез мыдзтöдз, вöлись жырись петiсö бура вердöм тöдтöм мужиккез, и кöр нiя петiсö, читкыля юрсиа инькаок рамжыка ни висьталiс, что вермас пырны.

Филипп Филиппович ен моз пукалiс басöк пызан сайын, кöда дынсянь пороглань моз сулалiс мöдiк кузь пызан. Сiя бура вердöм — польдöм чужöма и топыт мыгöра, пасьтасьöма вывтi бура, синнэс мылякö гöрдöсь-вираöсь, топ ештöма петны баняись, мезмöма тшын коласiсь. Юрсö лэбтыштiс и бытьтö некöр эз адззывлы Галясö, эз тöд и медодз нем эз шу.

Инька думайтiс, что Филипп Филиппович юö вина, былскö сiдз, что асывсянь вывтi шогалö.

Галя юасьтöг пуксис стул вылö.

— Мыйлö ме дынö? — вöлись юалiс Филипп Филиппович.

— Ме Вильыбись... Тöн бöрйисö директорö... И мыйкö колö керны эд, Филипп Филиппович! Кöдзны колö, а миян немöн кöдзнытö или этö... Сьöвзьыны быдöс вылö!

— Тэ, Макаровна, эн пов. Пондам уджавны да эшö кыдз уджалам! Натьтö, тэныт деньга колö? А деньгаыс абу... Видзöт, зарплатасö джын годся унажык ни эгö сеталö... Кöть, батя, джагöтчы!

Рамыника сёрнитiс Филипп Филиппович, эз бы инькасö дойд кыввезнас и мылякö öтпыр веськыта синнэзö эз видзöт, а сё видзöтiс öшынлань — öтöрлань синнэс кыскисö.

— Кытчöдз деньгасö одö сетö, эстiсь некытчö ог мун! — вельмис Галяыс, кöдалö и былись некытчö вöлi воштiсьны.

— Но абу деньгаыс! — кеймисьöмöн моз ни баитiс районiсь хозяин.

— Ме тiянлiсь миллиард ог кор. Адззат мымдакö! — инька эз мездöтчы мужик дынiсь. — Ежели банканыт абу, ассиныт, Филипп Филиппович, сетатö!

— Мы-ы-ый?! — вöлись Филипп Филиппович видзöтыштiс веськыта синнэзö. — Но тэ и морт вöлöмыт! Но и инька...

Кытiсь менам деньгаыс? Ог эд мöснымлiсь копейкаэсö чилькöт. Иньö эз бы кö верд, тшыгйöн ни бы кулi.

— Кин тэнат иньыт? Йöла мöс кодь я мый я?

— Вузасьышлö сiя менам, — Филипп Филипповичлöн гöрд вöлi рожаыс да нач гöрдöтiс, польдöм вöлi да нач польдiс, кöда йылiсь инька думайтыштiс: «Спекулянттэз тi... Мылякö быдöнныт вузасят да олат, а ме мыля ог?» И висьталiс бы энö кыввесö районöн юралiсьлö, но сэтöн жö бытьтö саймис — кывсö курччöвтiс, кöр пондiс вежöртны, что Филипп Филипповичкöт эшö ковсяс пантасьны, а пантасьны кö лёк кыввез бöрсянь, бурсö нем видзчисьны. Вильыбись директор эшö кеймисис-керис Филипп Филиппович жырын да петiс.

Вöлi луншöр. Öтöрын öтмöдöрö жöдзис отир, бытьтö районын былись öтiк морт эз уджав — быдöн адззис кад, медбы öвтчыны улицаэзын. Магазиннэз одзын вузасисö быдкодь товарöн — кин да кинöс вермис, сiйö и шныгис, кинлö мый колiс, сiйö и небис.

Галя Филипп Филиппович дынсянь мунiс нето лöг, нето рам, ачыс эз тöд, мый сылö колiс. Мунiс сiя прокурор дынö, кöда дынын некин эз вöв, позис веськыта пырны да пондывны норасьны, нето кеймисьны — корны деньга. Но прокурорлöн, кыдз и Филипп Филипповичлöн жö, некытшöм деньга эз вöв.

15

Неделяся унажык шогалiс тулыс: то шонтлiс лун кежö, то кöдздöтлiс. Погоддя бытьтö отсасис вильыбсалö: совхозын кык неделяöн вермисö вочны кык важ трактор, кыдз вермисö, сiдз и вочисö, тракторист Фёдор сералiс: «Кытчö клин, кытчö блин... Кыт гайкаöн зэлöтам, кыт зырыммезнаным лякöтам да енлö пондамö юрбитны, ась машинаэзным медодзза лунö жö ыбыс вылын эзö жугалö...»

Совхозiсь виль директор ойез эз узь да лöсьöтчис кöдзны, кöть бы невна, кöть бы сто гектар етш, медбы арнас вундыны да мымдакö сюöн сетавны уджалiссезлö уджалöм понда, пуктыны кöдзыс и, ежели кö сюыс кольччас, мымдакö вердны подалö.

Сю — этö нянь. Нянь понда öнi некин ни вывтi оз тöжды,кöр вузавны вайöны мешöк вылiсь мешöк. Вöлi бы деньга, и лоан пöт, кöть öтiк лун эн уджав. Нянь понда öнi етша кинлöн юрыс висьö, медбы тулысöн кöдзны ыббез вылö. Öнi быдöн думайтö только деньга йылiсь — юр орöтасö копейка понда. Горш лоис отирыс. Горш бердö сiдз и кутчисьöны да ыксöны: «Вай, директор, деньга, сэк пондамö уджавны!» А кытöн деньгаыс? Кытiсь сiйö шедтыны да вайны? Совхозын пода пондiсö видзны сымда, мымдаöн грех и стыд ошшасьны. Чилькöтöны мымдакö Вильыбын, керöны йöв, но сiйö вузавны нач некытчö: районын вöлi учöтик маслозавод, да сiйö разисö.

Эз понды ковны некинлö яй, йöв, ви — вай только деньга, но Галина Макаровна думайтö и лöсьöтчö гожумнас керны ви, кöдö позяс бы вузавны гортын или кыскыны городöдз да сэтчин вöзйыны отирлö, кыдз кöркö, кöр эшö Вильыбын вöлi колхоз, и керлiс колхозыс висö. Только öнi сепаратор жугалöма, и вермасö я вочны? Öтiк надежда, что ремонтируйтасö аппаратсö.

Вермас ремонтируйтны и Фёдор. Золотöйöсь киэс трактористлöн, кыдз баитöны отир. Но Галя думайтö, что мортыслöн не киэс золотöйöсь, а юрыс бура уджалö, мый бердö кутчисяс, сiйö и керö.

Сiдзкö, совхозiсь директор надейтчö отир вылö, веритö, что отиркöт быдöс шогмас. Совхозын уджалiссез лыддиссьöны куимдас морт гöгöр, но ежели кö пондасö бура уджавны и овны буржыка, уджалiссез, поди, содасö.

Кöр бур погоддя, бур тулыс, и думаэз бурöсь. Медодз öнi директорлöн сьöлöмыс висьö тракторрез понда, медбы нiя вöлiсö дзоньöсь, сыбöрын бергалö складдэзын — синйö кöдзыс, тöдö ни кытшöм сю и кыдз вермас петавны ыббез вылын. Агрономмез вöлiсö совхозас не öтiк, да öтiк эз ло, кыкнан агрономлöн следдэз ни сайкалiсö, öшисö-пышшисö кытчöкö специалисттэс, котöртiсö кошшыны кузь руббез.

Тулыс. Галяöс оланыс эз узьтöт. Луннэзöн жöдзис отир коласын: котрасис фермаö, складдэзö, гаражö, кузницаö, пыралiс сельсоветö, детсадö, школаö, магазинö — быдöнкöт адззис басни, кужис баитны отиркöт, висьтасис, норасис, корасис, надейтчис, веритiс, кöсйис, видзöтчис, думайтiс, гажöтчис и тöждiс. Инька вöлi, кыдз инька, но кытöнкö мывкыдöн пондiс вачкисьны мужик вылö: кытöн колiс ыксышалiс, мурзис, кытöн и öмсис мужиклöн моз чеччöвтлiс лöг кыв, вермис веськыта висьтавны нылö, кин оз уджав, мед синнэз одзын эз гардчö, эз дзугö олансö.

Деревняын отир янсалiсö öтамöд дынiсь. Кöркöсямоз быдöнныс öтмоз эзö ни олö, öтмоз öтамöдкöт эзö пырö-петö, эзö сёйö-юö, одззамоз личыт кад гармонняöн да сьыланкыввезöн эзö чулöтö, эзö гажöтчö, нельки томммес не одззамоз öтамöдöс любитiсö. Öтiккезлöн пондiс тшыкны оланныс, мöдiккез пондiсö овны нач бура; öтiккез богатсялiсö, мöдiккез говмисö да сэтчöдз, что нянь эз вöв сёйны.

Öтiккез пондiсö вузасьны, а мöдiккез эз тöдö мый керны. Медчожа да медуна пондiс вузасьны совхозiсь одзза директор Егор Петрович Пестерин, кöда, кыдз шуöны отирыс, вузасьны велалiс эшö сэк, кöр вöлi Советтэзлöн власть, кöр эшö отир эз радейт вузасиссесö, шуис нiйö спекулянттэзöн. Вöлi сiдз, что спекулянттэсö судитлiсö, но Егор Петровичöс некин эз судит, только осудитiсö, медодз кыдз коммунистöс, сыбöрын кыдз директорöс. Но мый сэтiсь? Отирыс полiс сыись кыдз директорись — баитiсö да гусьöн. Баитiсö, что Пестерин кытiськö ваялö бур товар, сэтшöмö, кытшöмö он адззыв и он неб магазинiсь. Кöть и быд мортыс Егор Петрович киись бур товарсö эз адззыв и эз неб, а басни мунiс, — тöдiсö Вильыбын, кытшöм Пестериныс.

Сiдзкö, Вильыбын Егор Петровичлöн тулыснас ни лоис аслас магазин. Пестерин сосас сералiс да олiс, пеллесö адззис да шыннялiс. А кыдз казялас Галяöс, сiдз пиннес и гер — сералö: «Мый ни, директор? Ловьяöсь жö эшö фермаат мöссэт? Чожа ни пондатö кöдзны? Оз я бы деньгаок ков, ме верма проценттэз увтö невночка чольскыны...»

— Мыля мöссэс, Егор Петрович, озö лоö ловьяöсь, кöр тэ директоралiн, и подасö вердiсö сiдз, кыдз ачыт сёйин. Ловья подаыс! Только деньгаоксö тэ мылякö совхознöй кассаас немымда эн коль — быдöс я мый я аслыт гумыштiн? И сетiн бы кöть копейка-мöд, босьтiм бы. Ми отирыс абу гордöйöсь!

— Шоччисьыштö да вöлись, — пиннес гер Пестеринлöн. — Колöны кö сьöммес, ме моз жö уджалö да вöлись и ошшасьö да козьнасьö...

— Спасибо, Егор дядь! Кужам ми тэкöт овнытö, прокмамö öтамöднымлiсь синнэз бытшкыны, — висьталас Галина Макаровна Егор Петровичлö, швыркнитас-мунас ылöжык Пестерин дынiсь, думайтас: «Но тэ, Егор дядь, и жулик! Верман отирыслiсь вирсö юны!» А Егор Петрович видзöтö Галя спинаö да ас мознас жö думайтö: «Сулав, кага! Тi эшö пондатö менчим нятьöсь сапоггезöс нювны! Эшö пондатö юрбитны Егор Петровичыслö!»

Кыдз бы отирсö оланыс эз вермав, кытшöм бы богатöй эз вöв Егор Петрович Пестерин, но сiя вöлi öтнас, а öтнас уна я и мый вермас керны морт? Бур, что Егор Петрович асьсö пондiс лыддьыны фермерöн. Фермерöн сiйö шуисö районын. И округын ни касьтылiсö кыдз фермерöс. Кыдз фермерлö государство козьналiс ссуда — уна деньга дарсалiс, кöда вылö Егор Петрович медодз аслас магазинö вайис эшö товаррез, босьтiс виль машина, виль трактор.

Машинаэз öтнаныс ыб вылö эзö кайö, öтiк трактор кабинаын пукалiс Жбан Митрей, кöда вöлi одзжык совхозник, но мыля вöлi дыш, сiйö Егор Петрович репöтлiс совхозсис. А öнi босьтöм дынас. Зонкаыс пеллесö адззö; сэтшöм гордöй да рад! Мöд трактор веськöтлö ыджыт юра нузган Валерик. Валерикöс некыдз бы он шу — абу пон мывкыда, кытчö иньды, сэтчин медодз и котöртас, сiйö и керас, но совхозiсь чайдiс медодз сiйöн, что лöсьöтчис шедтыны уна деньга, бытьтö лöсьöтчис кытчöкö мунны. Но некытчö эз мун. Мортлöн сэтшöм мывкыд, что полö нывкаэзiсь и тöдтöм отирись, оз вермы бытшöма кыв горöтчыны. Мый шуны кö, нузгыштас-бизгыштас ныр увтас и лöняс. Егор Петрович кужис бöрйыны аслыс уджалiссезöс, тöдiс кытшöм лунö и часö тракторрезöн кайны ыб вылö, одзалiс совхозниккезöс пондöтчыны гöрны и кöдзны.

Мазьöсь Фёдор öшын увтас сё эшö гуддисис трактор дынын, паськöм бердö каттис нять, вирскайтiс нырнас да видзöтышалiс шондi вылö, чуннезнас перститiс кытшöмкö гайкажуг и думайтiс, что сiйö сералö шондiыс, катшаэз сералöны, оланыс сералö и, натьтö, тракторсö оз ни вермы лöсьöтны.

«Да мед нiя онняюртчöны, мед... А ме кера тракторсö и эшö мыччала, кыдз колö уджавны, адззылас эшö Пестериныс, кыдз колö гöрны!» — кинöс шедiс, сiйö и видiс Фёдор, думаэс пизисö-кыскисö ыб вылö. Эд фермерлöн тракторрез урöтiсö ыб вылын, а совхозлöн трактор эз и думайт вöрзьыны местасис.

Егор Петровичлöн кыкнан тракторыс гöрисö ыб вылын — пöдтiсö ыбшаррезлiсь сьыланкыв. Тракторрез дынын гардчис ачыс хозяиныс, мышкырасис, бороздаись няпралiс улькодь му, ружтышалiс да шыннялiс, то пондылiс гöрдлыны-серавны. Вöлись Егор Петрович мыччалас, кыдз колö уджавны да овны, вöлись вильыбса адззыласö, кытшöм хозяин вöлöма Пестерин, ась öнi адззöны! Ась арнас котöртасö Егорыс дынö да юрбитасö, корасö тракторресö! Пондасö бöра корны то пес вайны, то турун, или пондасö шыасьны нянь йылiсь! Егор Петрович оз люкась, оз курччась, а быдöнлö висьталас веськыта, что колö дзир деньга — и быдöс лоас!

Кытшöм асылыс лöнь, Шоныт, гажа, кыдз каёккес сьылöны! Ыббес топ шыннялöны да ошкöны Егор Петровичсö, кöдалöн тракторрес гöрöны, мусö шулялöны, пласт вылö пласт водтöтöны. Вот Пестерин гöрас аскадö, кöдзас кöр колö, аскадö сю быдмас и воас, арнас только ешты вундыны! Комбайн Егор Петровичлöн абу, но морт кытчöдз комбайн понда оз тöжды.

Шондi öшалö ыббез весьтын, шонтö. Шороккез больгöны межа вылын, межа вылын жö юррезнысö мыччисö дзоридззез, лымдорчачаэз, бытьтö сотчисö-öгралiсö масiссез. Бороздаын бöррезнаныс беринялöмöн ветлöтiсö ракаэз. Сьылiсö ыбшаррез. Кöкис кöк. Пестеринлöн сьöлöмыс сьылiс, сэтшöм сiя вöлi рад, медодз сiйöн, что эз ни вöв коммунистöн, эз ни вöв директорöн — ачыс ас вылас вöлi хозяин. Мый колö, сiйö и керö, некытшöм зырымöсь нырлö дело абу сы дынöдз: некин оз кор районö бюро вылö, оз вид. Тöдвылас мужиклö усис, кыдз сiйö öтпыр тулыснас корисö бюро вылö, йöртiсö райкомö да кыдз матегалiсö, кыдз пывсьöтiсö, сэтчöдз видiсö, что бöбмис, öшис, пымалiс, чеччöвтiс бы петны райкомись да ыбöсыс местö заргисис öшынö. Баран моз рез-паз жугдiс стекло, усис öшын увдöрöдз, татшкисис изторрез вылö, курччöвтiс кывсö, дойдiс кисö! И уджассис директорлö некокнита. Сiдз няньыс Егор Петровичлö и сёйсис, кöр райкомын пукалiсö бöб юра отир, эзö вежöртö, кöр да кыдз колö кöдзны.

Талун ыб вылын сьылöны каёккез, сьылö и сьöлöм Егор Петровичлöн.

«Эх, челядь! Уджалö буржыка, гöрö да челезнаэз эд колялö, порссез моз мусö эд жö бöра борö. Бура кö гöратö, деньга руб-мöд содта: вештiся кыдз колö! Эй, Митька и Валерка!»

И сэтöн тырк-пырк... Несйöтiс сiйö тракторсö, кöдö совхозiсь Пестериныс катыльтiс аслыс и öтiк копейка некинлö эз вешты, кöда эшö вöлi нач виль, но öнi ыб вылын видзчисьтöг бытьтö несйöтiс сiйö, и сiя сувтiс как раз ыб шöрö...

— Мый лоис?! — ыкöстiс Егор Петрович и кыз бöрнас беринясис-котöртiс трактор дынö, кöда дынын бергалiс ни тракторист. — Мый лоис, Валера?!

— Чёрт тöдас! — Валера öвтiс киэзнас и юрнас. «Этатшöммескöт и уджав, этатшöммескöт и ов! Етша ме совхозас тiянкöт грехас пыри, эшö öнi сьöлöмöс пондатö... — сёйис дума хозяинöс, биöн палитiс, пöжалiс, пурис и йирис. Мужик сiдз лöгасис, что вартлiс бы ыджыт юра нузгансö, тiлис ныр гöгöрсö, но ачыс лад эз вежöрт машинаись, сiйöн вывтi и эз ыксы тракторист вылын, а висьталiс, мед лöсьöтiс чожажык.

— Лöсьöтсис ни, бат, — гажтöма шыасис Валера. — Э-э-э, моторыс абу я, Егор дадь, сотчöма... Поди, пондас ковны кыскыны мастерскöйö?

Колiс сувтöтны мöд тракторсö. Кык тракторист пондiсö гуддисьны öтiк машина дынын и нем эзö вермö керны...

— Котöрт эстiсь!! — Валерик вылö вывтi лöгасис Пестерин. — Мун да менам синнэз одзö эн ни мыччись!!

— Э-э-э, Егор дядь...

— Котöрт, мыся, эстiсь, кытчöдз юрыт дзонь! — ряксiс Пестерин.

Сьылiс-кисьтiс кымöрсянь ыбшар, и шондi öддьöнжык шонтiс-ёрис синнэз. Рака пуксис му вылö нач зэв, видзöтiс и эз ошкы уджалiссезöс. Кöкис кöк, морт моз вак-вак серöмтчис.

Лыйис-мунiс гортлань Валера, сылö вöлi недолыт, кöть и велалiс ни этадз овны, кöр сiйö эмись и немись пыр видöны.

— Гöр! — Митрей вылö ни эрзыштiс Егор Петрович. Сэтöн сылö тöдвылас усисö налоггез, кöднö кыдз фермерлö, пондас ковны вештыны, а мыйöн, ежели кöдзны оз вермы, етша деньга кыпалас вузасьöм понда.

«Етша, етша... Немöн вештiсьны! — топ ыб вылын ни тоткö Пестеринлöн иньыс. — Сё тэныт уна колö! Пыр ме вылын ыксан, а менам юрö и коскö висьöны, горыс гöгöрын ог вермы бергавны, ойи-и-и! Вайöтiн бы мöдiк инь...»

«Мый ме сэтшöмыскöт ола?! — Синтöм-пельтöмыскöт!.. Кöдалöн грамотаыс, кыдз эта ракалöн, а пыр эд карзö. Эшö сьöд кань татчö локтöн туйöс поперегалiс, и дзöдзыв сина соседкаö тыртöм ведраэзöн пантасис... Проклённöйез!» — ружтiс Егор Петрович, видзöтышалiс кытчöкö кымöрас. Тöдвылас усисö иньыс, соседкаыс. Иньыскöт пурсис быд лун да унажык сы понда, мыля Таисьяыс уна тöдö, вежöктiсьö мöдiк инькаэз дынö.

Дзугсис ыб вылын удж. А Пестерин бура тöдö, что тулысöн быд часыс золотося донажык: минута етш öштан кö, тöвнас пондан неделя тшыгьявны. Кöть Егор Петрович тшыгьявны эз лöсьöтчы, но тэрмасьö уджавны. Но вöт öтiк тракторыс жугалiс. Мöдыс эшö час етш гöрис, сэсся межа дорын сувтiс, пондiс рапкыны-урöтны. Кабинаись чеччöвтiс тракторист, таралiс межа вылö, кытöн зеленитiс ни нерыник турун, и пондiс быглясьны да кычанок моз никсыны. Ачыс кыкнан кинас видзис кынöмсö...

Пестеринлö эстöн сьöлöмас бытьтö лэчыт пурт мöртiсö. Сiя быд вынсис котöртiс межа дорö, ылiсянь трактористлö ыкöстiс: «Мый лоис?!»

— Он я мый я адззы мый лоис? — му вылын юрсö лэбтыштiс Жбан Митрей — чужöмыс чочком чышьян кодь, голосыс сибдö, ружтö-лолалö öмтырнас, киэзнас малалö пöв кодь жмитчöм кынöмсö, кивзö, и чужöм вылас дзулля ньылöм котöртö.

Больгö межа вылын шорок, визывтö аслас туёк кузя. Кöкö кöк.

— Мый лоис?!

— Ойи-и-и, Егор дадь!.. — межаись чеччöвтiс тракторист, руч-рач пöрччалiс вешьян киззез, эз ешты бытшöма лэдзны вешьянсö, дриснитiс-лыйис вöрлань...

— Тьфу, пон юррез! Тшыгьялат, тшыгьялат да сыбöрын сёят дундытöдз и дриссят вöлись... Эн бы личемерит, пуксин бы кабинаö да уджалiн!

— А кула кыдз? — межа вылын куснясис трактористыс. — Тэнö эд пондасö винитны...

16

Талун гöрсис Пестеринлöн. Ашынас, мöдлунас и эшö куимöт лунас тракторрезöн ыб вылö эз понды туйны кайны сысянь, что ыббез, вöррез да деревняэз весьтö öшöтчисö сук кымöррез, и пондiс кисьтны-зэрны.

Егор Петрович кучикас эз понды тöрны, педзис да видiс енсö. Гортын иньыскöт пурсис, кöда кузь кывнас нерис:

— Тэ думайтан мый? Думайтан сiдз тэныт оланыс и овсяс? Еныс эд адззö, мый керны. Кöр коммунистас вöлiн, бура эд грешитiн, быд шагын матькин Кристоссö. Öнi бытте пондiн енсö тöдны... Талун гусьöн юрбитiн асывнас, эн думайт, кыдз невестаэзнат этö керин... Эн я нёльзьöм сина Öдясö гортöдз кыскылiн да посöдзас и гогналiн...

— Сiя ачыс вовлiс, — рыг-рыг серöмтчис Егор Петрович — нерис иньсö. — Мый горзан? Жаль я мый я менам? Не сылöн, не менам немымда эзö бырö...

— Сьöлöм гудыр тэ! — сьöласьö Таисья. — Котöрт бöра нильзьöмыт дынö, бат, видзчисьö ни...

Мужик пыралiс аслас магазинö, пиас заргис бутылка вина и былись мунiс Öдяэзö, пырис керкуö, здоровайтчис. — А, здоровöн локтiн, Егор Петрович! Бöра иньö дынö. сьöлöмыт кыскис я мый я? Колö кö öмидзтусьö, нуöт, ог понды горзыны. Ой, кыдз юрö висьö! Сто грамм вылö кора деньга, да оз сет, — модис-керис керкуын хозяин и иньыслö ыкöстiс. — Джагöтчы, ведьма, рубыт понда!

— Тэ юртö петляас сюйышт, а ме эшö ола бы! — паныт эрзыштiс Öдя — синнэс люммöмась, тöдчö, что пешлыштöма ни курытсö — мужикыс шогья гусьöн кытöнкö.

Егор Петрович пöв синнас видзöтыштiс инькалань, кöда шыгыра каджа, небыт яя, моросас няняэс öшалöны кыдз пестеррез, чужöмыс вылын блин пöжассьö — вир орсö. Росолакодь инькаокыс, а мужикыс... Эн бы и видзöт — сьöлöм гудыртчö. Рожабаннэс тошсялöмась, вина юöм вылö да сёйтöмлö горбыльтчыштöма, косьмöма — лы да кучик, а ыксö эд: «Кин керкуас хозяиныс?! Тэ али ме? Вай деньга, юыштамö Егор Петровичыскöт, сiя бур мортыс! Вай, мыся, деньгасö, кöбыла!»

Пестерин ньылыштiс дульсö, писис кыскис бутылка, висьталiс: «Эн горзы, Гавря. Веськöта юртö. Вай стакан!»

— А ме мый шуи! — пиннес гер Гаврялöн. — Ме сiйö и шуи, мыся, Егор Петровичыс бур морт!

Вина медодз юисö кык мужик, сыбöрын кисьтiсö хозяйкалö, кöда чипышалiс стаканiсь, кыдз чöскыт чöчиль юис — немымда курытыс эз кезöт и немымда мужиккез моз эз кодззы. А Гаврялö уна эз ков: курöг моз кокыштiс, сымда и эм! Зызö ни мужикыс, öмас кылыс гардсьö, синнэс нач люммисö, ачыс оз тöд, мый керö, кытчö бы мунö, öвтö киэзнас. Эшö тарксьö горшыс, и мужичокöс эшö юкталöны, озö жалейтö вина. Юö Гавря, таралö пызан увтö, пондö чискыны узьны, чисьö вешьянö, ныр гöгöр тiльö зырымöн. А эта коста Егор Петрович пондö маласьны кыз яя Öдя дынö, малалö инькасö, кань моз мурзьö:

— Кутю тэ... Ой эд кыдз ме тэнö любита! Кыдз эд ме тэнö...

— Иньтö любит, а эн сэтöн киэтö подол увтö нюжлав, кöр абу ни директор и, натьтö, киэтö вунöтiн миссьыны! Ме эд тэкöт сюськöтчи, кöр начальник кодь вöлiн, а öнi...

Вöлись Пестеринлö веськыта висьталiсö. Сiя нельки бöбмис кодь, медодз öшис, тувдiс Öдя дынын, нельки киэс пондiсö дрöжитны, но асьсö сё ылöсаö, ыджытö, донаö пуктiс, пондiс модьны: «Тэ мый, тэ мый, Дуся? Одзöв он я бы дынсит менö кидты? Ме эд эшö мортыс ого-го! Эн я бы, öмидзтусь, гырдззаэтö понды курччавны да вир синваэзöн горзыны? Вай кöть эшö öтчид небыт каджтö малышта!» — и мужик малыштiс хозяйкалiсь небыт каджсö, кöда коста Гавря пишкис-узис пызан увтын, нем эз кыв, кöть коккезöттяс кыскы.

Öтöрын мыччисис шондi, сiдз югдöтiс омöн, что недыр кежö керкуын гусялiс синбур. Сы коста Егор Петрович окыштiс Öдялiсь небыт рожабансö, жмитыштiс, мыйсянь инька бытьтö сылiс, небзис, лаж керсис, кыдз петух одзын курöг.

Петух китсасис öтöрын. Готсис курöг. Баксiс баля. Öшын увтын эрзыштiс трактор, сiдз мунiс, что вöрзьыштiс бытьтö керкуыс, öшыннэзын дрöжитiсö стеклоэз. Этö мунiс гöрны Мазьöсь Фёдор, кöда ештöма вочны тракторсö.

Егор Петрович сэтчöдз любитчис Öдякöт, что пымалiс, мыдзис, сьöлöмыс пондiс пессьыны; чушыктöв-керис мужик да вöлись кыдз саймис, вежöртiс, что колö мунны гöрны, медодз кöть бы öтiк тракторнас.

Пестеринöс нем осудитны. Сiя — мужик, сiйö любитöны инькаэз. Мортыс ештö сибöтчыны сэтчин и татчö, ештö тöждыны удж понда. Эшö öтпыр окыштiс Öдяöс, вöлись петiс керкуись. Кузь оськöввезöн веськыта нятьöт локтiс Митрейезö, нятьöсь сапоггезнас и пырис керкуö. Зонка мамлiсь юалiс, мый керö зоныс. А зонкаöс шогöтыс сiдз ни маитöм, что турьялö-ветлöтö, нельки голосыс сибдöм-вежсьöм. Ловсö кыскалöмöн, висьталiс, что некытчö оз вермы мунны.

Погоддя бöбмылiс да бöр гажасялiс, зэрис-зэрис, да кымöррес топ кытчöкö вешшисö, бытьтö небосö чышкисö росöн. Тöн рытнас шондi пуксис басöка: эз нёджжась, эз саясь кымöр палаккез сайö. Номмез пондiсö койны-лэбавны пес костёр весьтын, рудкайез чирзiсö гажöнжык.

Фёдор ойбыт гугйис-гöрис песока ыб вылын — ончир эз лэдз, сэтчöдз уджалiс, кытчöдз асывнас шондi эз лэбтiсь вылöкодь, эз саймöт тулысся олансö. А сiя, тулысыс, тэрмасис овны: межаэзын синнэз одзын быдмис ни зелёнöй турун, вöр шыннялiс, бытьтö орсiс да мыччалiс, что сылö бур, ошшасис зелёнöй рöма югöрöн, тöдчöмöн польдiсö бадьлöн да льöмпулöн пугыррез. Пипу кышалiс уна пелькытшшез. Видз вылын и межаын унажык ни цветитiсö лымдорчачаэз. А кöчок, кöда вöрись чеччöвтiс межа дорö, медбы мурскыны чöскыт да небыт зелёнöй турунок, пасьтасьöма ни руд паськöмö. Каёккезлöн пизьö гаж. Нiя öксьöмась расокö да сiдз сьылöны, что кык пельшы оз кыв. Питьыртö и питьыртö кöз йылын ватшкан. Урöтö и урöтö ыб вылын трактор. Кабинаын шоныт. Фёдор пондiс сунавны, сiдз бы и сунгисис-водiс рычаггез вылö, узис чöскыта-чöскыта. Но колiс гöрны, кытчöдз оз лок мöд трактористыс да оз веж ойöн уджалiсьсö. Но мöдыс кыскис кадсö, эз тэрмась ыб вылö. Шондi лэбтiсис сё вылöжык, шонтiс буржыка, лажмыт местаэзiсь вевдöрö лэбтiсис кизерик пар, дзöрис синнэз одзын, орсiс. Урöтiс трактор. Содiс гöрöм му. Вöр дорöт межа вылöт аслас муэзлань, кöднö янсöтiсö совхозiсь, лынь-лынь мунiс важ директор Егор Петрович — хитрöй морт, кöда некöр, нем бытшöма оз висьтав, мый юалан, сё ни ылöтас-чукыльтас баснинас. Егор Петровичöс Фёдор эз радейт кыдз нильыг мывкыда мужикöс, кöдалiсь нем бурсö он босьт, он одзöст, он мырддьы, сё ни кыскас асланяс. Фёдорлö эз ков, мед сiя кежис сы дынö да сувтöтiс, дзугис уджись, пондiс корны отсавны. Фёдор кылiс ни, что Пестеринлöн жугалiсö кыкнан тракторыс, да öтiк трактористыс шогалö.

Трактор кыссис межалань — керöс кырыл моз лэдзчисис. Тракторист содтыштiс газ. Машина, кыдз ловья, эрзыштiс, чожмыштiс, бöрас плуг увтсянь колесоöн гардыштсис пласт. Уджассис кокнита и бура. Но сэтöн тракторлань межасянь пондiс котöртны Егор Петрович — бороздаöт веськыта сöтiс трактор дынö, сiйö и видзöт, кыдз бы юрсö эз сюйышт гусеницаэз увтö!

— Мый колö?! — тан сувтiс машина, кабинаись юрсö мыччис тракторист, резьöтiс-ыкöстiс быд вынсис.

— Фёдор, сулалышт жö... Кытчö тэрмасян? Ме бы тэкöт баита.

— Мый лоис?!

— Уна ни, зонка, пöвсалöмыт, — ырбыльтiс Пестерин. — Поди, ойбыт гöрин! А ме кöр понда гöрнытö? Öтiк öнджаыс жугалiс, а бандитыс пондiс шогавны. Мыйлö аслам юр вылö сэтшöммесö примитi?

— Ме тэныт вöзйиси... — шыасис Фёдор. — Полiн, что уджалöмыс понда уна понда корны?!

— Быль эд, Федя! Эг кывзы тэнö, — вежсис голос Егор Петровичлöн, кывнас небыта пондiс ольсавны. — Кывзы... Эстöн некин абу... Эн я бы меным час-мöд гöрышт? Зэв эд менам! Кин тöдас? Ме китсасьны ог понды и вештiся кыдз колö, а...

Медодз Фёдор бытьтö эз кыв и эз вежöрт, мый баитö пöрисьжыкыс, видзöтiс басöк варыш вылö, кöда лажмыта лэбалiс му весьтын.

— Гöрыштан? — öмсö осьтiс и веськыта видзöтiс Егор Петрович.

— Нем оз пет! — орöтiс тракторист. — Сейчас локтас директорным и мый висьталас? Сiя эд тöдан, поди, кытшöм... Чушкалас!

— Ветлам, а... — топ горзiс ни Егор Петровичыс, долоньнас ниртiс кыз рожабансö.

— Тэ мый, Егор Петрович?! Öнi локтас мöд трактористыс, адззылас и норасяс...

— Сэк ась, — вöлись тракторист дынiсь мездöтчис Пестериныс, тöдчис, что сылö абу долыт, что мöдöтпыр бы, кытöнкö мöдiклаын Фёдорлö висьталiс мыйкö сэтшöмö, кöдö том мужик дыр бы эз вунöт.

Эзö ештö кык морт баснинысö орöтны, сэтчö локтiс Гöжöм Колька, кöда эшö тiлис синнэсö, гыжьясис, норасис, что мамыс дыр эз саймöт, сiйöн дырöв уджавны эз лок.

— Петшöрöн колiс петшöравны, сэк луншöрöдззас эн бы узь, — томжыклö висьталiс пöрисьжыкыс. — Мавт, кыт колö машинасö, да уджав! Соляркаыс эшö тырмас, а оз кö, бат, ваясö. Гöтрасьны колö, Колька! Мый сiдз видзöтан? Или кувтöдз пондан овны монах моз?

— Невестаэс абуöсь...

— Этадз кö пондан узьны, былись некытшöм невеста тэ понда оз ло, — эшö öтпыр лёкжыка шыасис Фёдор и ыб вылiсь перыт шаггезöн мунiс гортö, бöрас эз видзöт.

Деревня дынын ни Фёдорлö пантасис директорныс, кöда юалiс, кыдз уджалö трактор. Тракторист висьталiс, что быдöс бур, что ойнас джын ыбсö шулялiс; а мöд джынсö Миколыс рытöдззас гöрас.

— Ашын Миколыс пондас культивируйтны, а тэ петан кöдзны, мöд тракторнас уджалыштан, — висьталiс Галина Макаровна.

— Колö, — Галина Макаровнакöт согласитчис тракторист, — только бы тракторыс эз жугав, то сiя шогалiсь морт моз жö олö и оз...

— Поди, оз жугав, — шынньöвтiс том инька, и Фёдор директор синнэзiсь адззис, что абу гажыс ныын, и чужöмыс вылын тöдчö, что мортыс мыдз, нето шогалö. И этö мужик вежöртiс ас мознас, думайтiс, что инькалö сьöкытöв бергавны гортын и отиркöт. Сы местын уджавнытö, натьтö, адззисис бы мужик. И эшö Фёдор думайтiс, что инька мортлö колö гоз-ёрт, кöдакöт, кыдз бы эн шу, оланыс чулалö кокнитжыка. — Котрасьны лöсьöтчи тракторыс дынö, да ог ни мун, — топ виноватöя дзугис думасö Фёдорлiсь Галина Макаровна. — Талун одза-одз сибдылi контораам и фермаас эшö эг ешты сибавны. Мый сэтчин керсьö?

— Ойнас, бат, мöссэсö кöиннэс эзö сёйö и тшыгйöн эзö кулö, — шыасис тракторист, кöр кыкöн мунiсö ни гортлань.

— Вердам подасö мыйöн шедас. Идзассö пöжамö, мымдакö адззим комбикорм да сiйö кöр удамö. Этасянь я мый я мöссэс синнэзын мыччисис гаж. Еныс шонтi бы буржыка, да чожажык быдми турун!

Деревня дынöдз кылiс, кыдз ыб вылын урöтiс трактор. Гöрис Колька, кöдö, поди, весись шуöны гöжöмöн, кöр зонка эз жö вачкись нач гöжöм вылö. Пукалö кабинаын да сьылö, вина эз ю лун куим-нёль ни, да не сiйöн, что абу деньга, а сiйöн, что кывзö пöрись мамсö, кöда пыр модьö: «Колька! Зон, эн ю! Пондыв уджавны тракторнас! Кыдз уджалан, сiдз мымдакö и шедтiсян. Бат, арнас сю сетасö или невночка деньга, то ми тэкöт менам пенза вылын кыт пöтöсь, кыт тшыгöсь, и коккезат чожа нем лоас кöмавны: нинкöммесö эд одззамоз он куж кыйнытö, да и кин ни öнi нiйöн ветлöтö? Сэк уджав, зон, уджав! Тöдан ми кыдз кöркö олiмö, ой!..»

Мöдöтпыр зонка мамыскöт пиньгис бы, эрзiс паныт, резгис-висьталiс: «Пондан сэтöнка сказкаэсö висьтасьны! Уджалiссез!.. Мыля нö модят, а одö уджалö? Мунiт бы да гöрит...»

Öнi мылякö зонка паныт мамлö эз шыась, тыдалö, вежöртiс мамсö или... Ылöса отирсянь кылö, что томмеслö оз бы ков гусясьны, юны вина да весь овны, а колö уджавны.

Гöрö ыб вылын зонка — öтнас пукалö кабинаын. Шондi гажöтö кыдз вермö. Трактор одзын паськыт ыб гажöтчö, ошкö Колькасö, кöр локтiс кыдз вежалун, и мусö отир эзö вунöтö, эзö чапкö, и сiя вештiсяс удж понда отирлö. Ыб вылын быдмас сю, кöда колö быдöнлö.

Уджалö ыб вылын Колька, трактор кабинаын пукалö да бытьтö не ни сiя, а мöдiк зонка, абу асныра, чож, вына, смев, кодя — быдöс вермö и кужö. Талун сымда гöрас, что отир пондас ошкыны. Быд морт шуас: «Вöлись эд! Эта эд миян Кольканым! Сiя эд...» И нывкаэс... Вот читкыля юрсиа визыв Катя, кöда школаын велöтö челядь, чатырöн новйöтö юрсö, кужö Колькасö серавны, пыр пантасяс да ризъялö: «Колька, кöр ни ме вылын гöтрасян?! Видзöт, ме эд мöдiкöс адзза!..» Вöзйисьö бытьтö бы Катькаыс, а ачыс... Чывкнитас одзöт и абу... Миков, натьтö, сiйöн унажык винасö и юыштлö, медбы лоны смелöн, медбы не повны локны нывкаэс дынö, веськыта висьтавны Катькалö, что этö... Что гöтрасяс и быдöс сэтöн! Сiдз бы зонка думаэзнас керö, но нывкаыс чукыль-мукыль керас юрнас и лельгö: «Миков, кöр дугдан винасö пешлышавны, сэк тэ сайö и муна!» Но и мый? Пондылiс зонка садьувья локны нывка дынö, пондылiс да весись. Катька кутчисяс оча ки этакöт... Лёнькакöт, кöда школаын жö юрсö вердö, и абуöсь... Шушкöтчöны кытöнкö синнэз сайын...

«Сiдз, сiдз, — кабинаын думайтö зонка, веськöтлö тракторсö, гöрö. — Тöдам, Катька, кыдз Лёнькаыскöт дзудзгöтчан, кöда тэ кодь жö, оз ме моз трактор дынын киэсö мазьöсьт. Но и мед... Ох, Катерина! Менам эд былись тэ понда сьöлöмö висьö, а Лёнька бытьтö талун тэкöт, а ашын Райкакöт ни ниртчöны. Кыдз сэтшöмсö шуны? Вот понда гожумбыт тракторнас уджавны, шедта деньга и винасö ог понды юны, сэк видзöтам!» — зонка кабинасянь лэчыта видзöтö одзлань, ештö видзöтны и вöрлань, адззö, кыдз кинкö кузь шаггезöн шупыта локтö-тэрмасьö, дзик кинкö сьöрö вöтчö или кинiськö пышшö мужик мыгöра и некыдз он вежöрт, мый мортыс гардчö ыббез гöгöрын, оз я тракторлань суййы бы, оз я вачкись Егор Петрович вылö...

17

Зонка сувтöтiс тракторсö, чеччöвтiс кабинаись, юалiс Пестеринлiсь: «Мый колö, Егор дядь?! Мый котрасян?»

Кöр зонка садь, сэк сiя рам — гутлö весись оз печикты. А юыштас кö, кымöсыс увтöт видзöтö, нырнас пишкö, порозок моз быдöнöс бы люкалö. Сiйöн боккезас часто томмезсянь жö и сёйлö, сэтчöдз вартласö, что рожабаннэс пыктöны. Талун зонка садь — морт кодь, мый колö, сiйö и вермас отсавны. Этö бура тöдiс Егор Петрович, сiйöн сiдз и котöртiс трактор дынö, ышки-пойки кыскалыштiс ловсö, долоньнас кымöсыс вылiсь чышкис ньылöм, басниöн веськыта пырис том сьöлöмöдз, кужис вöрзьöтны сiйö, шуис рамыника:

— Колька, тэ эд мортыс кодя. Тэ кодь бур мортыс Вильыбаным сэсся некин эд абу. Мукöдлö кöть мымда юрбит, а оз адззы миян кодьсö и оз кер. Кыдз эта... Фёдорыс... Морт я сэтшöмыс? Сылö бы только ло, а мöдiк эм кöть абу. Буржуйö ни, кывзы, ёртыт пöртчис, оз думайт некöр пантасьны миян кодьыскöт. — Мый лоис, Егор дядь? — тракторист пöрисьжыклiсь дзугис басни, юалiс сiдз, топ Пестерин понда лöсьöтчис ни кöин öмö чеччöвтны.

— Сiя бы колö, Колька, кöдö эг öшты, но кошша и некыдз ог адззы. Видзöт, тэ гöран, ашын этчö кöдзасö, а ме мый?.. Лешак, öтiк тракторыс разьсис, а мöднас некинлö лоис уджавны. Дристöсьыс, кывзы, пондiс шогавны, будь сiйö проклят! А погоддяыс видзöт жö, а! Дурак ме. Арттöм чужи, арттöм и кула... Мыля ме тэнö тракторнас уджавны эг кор?! Кытшöм пон пурис, а? Уджалiн бы тэ öнi меным да уджалiн, и деньгасö бы эг жалейт, вештiси, кыдз колö...

Недолыт Егор Петровичлö, недолыт и Колькалö. Эд сiя кыкись вовлiс Пестериннэзас, кыкись вöзйисис уджавны сы тракторöн. Но мöдыс не тпру, не ны эз висьтав. И öнi нач бы нем эстöн сылö ловсö кыскавны.

— Поди, гöрыштан меным, Колька! Ме тэныт, мыся, стрась бура вештiся — нем ог жалейт! И винаок лоас, а...

Тракторист эшö эта йылiсь эз ешты думайтны, кывзiс кыдз сьылö ыбшар, кыдз лымдорчача цветтэз гöгöрын бизгö-лэбалö малянка, кыдз öткодя джöмдытöг уджалö тракторлöн мотор, видзöтышалiс шондiлань, кöда кымöрас эшö эз ешты вештыны луншöрись, кöр гöрны эшö вель уна.

— Колька, уна эн думайт. Луннэс эшö пожтыр, тырмасö эшö тэныт ыб вылын тракторнас чатрасьны. Мый тэ сiдз страм совхозыс понда тöждан, кöда талун-ашын лолалö? Уна деньга я мый я видзчисян? Шышсö он я бы адззыв! Кöр деньгаыс овлö совхозас? Кöть и лоас, ас коласаныс торйöтасö энаэс... А уджалiссес нималöны! Сiдз öнi керсьö, зонка! Кöда оз уджав, сылö эм, кöда уджалö, сылö абу. Вештiся, мыся!

Юр вевдöрын öтiк кымöр палачок абу, бытьтö кинкö кымöрсö нюлöма. Вылын-вылын лэбалö варыш — борддэз оз вöрзьöт. Гажа, бур погоддя. Но сэтöн кытöнкö пондiс мурзьышавны кымöр, кöда эшö эз тыдав. И вöлi я кытöнкö? Натьтö, вöлi, поди, гудыртчис, вынсьöтчис, польдiс вöррез сайын, бытьтö кымöрсö басниöн лöгöтiс Егор Петровичыс. И вот вирдыштас, чаркнитас — кымöр мыччалас ассис вын. Егор Петрович перыта пиись кыскис винаöн тыра бутылка, и деньга кытiськö лоис киас, кöдö нюжöтiс трактористлö да чорыта ни висьталiс: «Мунам!»

— Егор дядь, павжун бöрас вöлись... Эшö мымдакö гöрышта, то этö... Директорыс!

— Гы, директор!.. Мый тi сыись сiдз полатö? Курччалö я мый я? Ме ачым пöттöдз директоралi и эг курччась, а тэ полан кинлiськö... Сэк павжуныс бöрын локтан. Кылiн?! Видзчися!

Топ эшö начальник, эшö хозяин Пестериныс, дзик кинкö сылiсь повзяс, ежели ыксышалö, сiдз висьталö Колькалö, бытьтö зонка былись сылöн слуга; томжыкыс тöдö и оз сэтшöммесö... Ыждассис сылöн отир вылын и нем эстöн горбсö лэбтыны — китсасьны сэтшöм голосöн, сiйöн зонка и висьталiс: «Унаöв ни модян, Егор дядь! Ме модиссесö ог радейт!»

Дзугыльтчö тракторист пöрисьжык вылö, видзöтö шондiлань, видзчисьö павжун.

Быдöс бур: шондi кымöрын эз сулав, вешшис павжунлань. Трактористлöн пондiс симавны кынöмыс, но сiя сёйны эз понды. Эшö öтпыр кытшöвтiс тракторнас, гöрис ыбсö и межаöт иньдöтчис расок сайö. Тэрмöтiс тракторсö, бытьтö пышшис уджаланiсь, полiс, медбы некин эз адззыв, эз кут, эз юав, кытчö мунö, эз шу, что джын лун уджалiс совхозлö, мöд джынсö шабашничайтö.

Бур му Егор Петровичлöн гладь места, кыдз ыджытся-ыджыт пызан пöв. Сэтшöм места кытчö быдмö сю и турун.

— Тракторрезö кö пондасö уджавны, назём кыскала! — Егор Петрович пуксис кабинаö Колька бокö и пондiс ошшасьны, öмсис дуль резсис. — А тэ уджалышт меным, некинлiсь эн пов! Вашöтасö кö тракторыс вылiсь, ме дынö котöртан и пондан уджавны дристöсьыс местын, но! Ась сiя гортас боккесö пöжö да муссö нималö, меным дыш отирыс озö колö!

Одзлань урöтiс трактор, кыскалiс плуг, гöрис. Кад чулалiс казявтöг. Казявтöг и шондi бергöтчис рытлань. Межа дорын пуэзлöн вуджöррез нюжалiсö, му вылö вöвдiсö сьöдвевья шебрассэз. Ыркöтыштiс сiдз, что ыркытыс кöдзыт киэзöн нельки кабинаын малалiс рожабаннэз.

Колька гöрис Пестеринлö, нем бы эз думайт, но мылякö тöдвылас усис мамыс, кöда бытьтö пондiс тiльны синнэсö, вишыкасис-ружтiс, рик-рик горöтiс и пондiс, и пондiс...

— Колька! Мыля тэ сэтшöм? — горзiс мам.

— Мам, мыля тэ вот сэтшöм? Мыля быд лун кулан бы? Няньыс пызан вылiсь оз бырсьывлы. Или былись монь бы вайöтан? Вайöт, вайöт! Эмöсь эд алкоголиккес, кöдна нач томöсь, но юöны ни и куритöны. И зонкаэс гöгöр гардчöны, а зонкаэс кыскалöны, кыдз энаэзöс... Меным сэтшöм иннес озö колö!.. Гöрö тракторöн зонка. Гажа ыб вылын и сэк, кöр шондi лöсьöтчö пуксьыны, кöр югöррезнас окалö вöр, гöрöм и гöртöм му, сералö-гажöтчö, ошкö том трактористöс.

«Мыйлö меным эта?! — зонкалöн сьöлöмыс видзчисьтöг берездасьö, лöгалö ни ас вылас, сувтöтö тракторсö, чеччö кабинаись, пондö видзöтны гöрöм му вылö, кылö кыдз ошшасьö Пестерин:

— Колька, бöра эд, тыдалö, ми тэкöт совхозниккезлiсь ныр гöгöррезнысö зыртiмö! Бöра эд ми тэкöт...

— Егор дядь, винаыт эм эшö, то меным сетiн бутылкасö, и сiйö ог бы джынняв.

— Винаыс эм! — ырбыльтö Егор Петрович, писис кыскö бутылка, курччöвтö бутылкаись тупкöт, гуль-гуль, чышкö соснас öм гöгöрсö, ружтыштö, вöлись юан нюжöтö трактористлö.

Зонка бутылкасö сiдз босьтö, бытьтö мырддьö пöрисьжык киэзiсь, öмас заргö голюксö, лэбтö вевдöрö и пондö юны: гультымасьö. Голяын кадык ветлö увдöрö-вевдöрö, вевдöрö-увдöрö, пишкö нырнас, оз тöдчы, что вина курыт — оз кезöт, дзик морт юö ва и пöтны оз вермы.

Егор Петровичлöн баралöны синнэс, кöр адззö, что вина кольччö только бутылка пыдöсын, а сылöн аслас эшö вина вылö косьмö горшыс и жевгö: «Коль мымдакö меным!»

Зонка öтiк капля эз коль, быдöс дзунгис. Ректöм бутылка быд вынiсь шентiс гöрöм му вылö, кывзыштiс, кыдз вина шонтö гырксö, и кыдз сималö кынöмыс.

Пестеринлiсь уна он сёй. Кольччö пуксьыны кабинаö да эшö уджавны. Шондi чожа пуксяс ни, ой кежö уджавны локтас Фёдор. Былик синнэс сылöн ыждасö, вижлок öмсö осьтас да пондас вувтны, пондас эрзыны, мыля Миколыс сiдз керö. «Тöда и ог тiян коддесö! — том тракторист кодззис ни, сьöвзис, лöгасис быдöн вылö, пуксис кабинаö и пондiс одзлань гöрны.

Шондi лöсьöтчис ни дзебсисьны вöр коласö, кöть видзöтчис эшö бытьтö стыдитчöмöн, мыля том тракторист юис. А сiя вашöтö ыб кузя трактор: кыт гöрö бура, кыт лэбтö пыд сёй, гöрд сёй сора му, кытчö кольö челезна, и бöрсяняс мыдзтöдз котрасьö Пестерин, öвтö киэзнас, кулаккезнас изö юр вевдöрас, ыксö: «Челезнаэсö эн коляв! Эн коляв, будь тэнö проклят, челезнаэсö!! Мыйлö ме тэнö, винагагöс, винанас юкталi? Талун уджалан, а ашын мед тэнат эстöн дукыт оз ло!! Буржыка, гагйöсь ныр, гöр!»

Кылас я Колька кабинаын пöрисьжыклiсь ыксöм, кöр машина эрзö-уджалö, шынас вермö коклiсь кöкöм.

Локтiс сменщик. Фёдорлöн чужöмбан чорзьöма, пиннесö гичыртöма, синнэс тувдöмась, ылiсянь топ лöсьöтчö вартлыны. Локтiс, öвтыштiс кинас, и кöр Колька лэдзчис кабинаись, эз шыась, нельки эз мурзьышт, бытьтö эз кыв томжыклiсь лёбöм. Турйöвтiс бороздаын зонка, Пестеринлiсь вунöтiс корны унажык деньга, кöдö сiя кöсйис...

Шондi вотьыштiс вöр коласö. Трактор сулалiс, кыдз мыдз вöв и лолалiс шоныт руöн.

— Гортö жö колö мунны, — шыасис Егор Петрович, сапоггезнас пондiс лойны нять, шагнялiс трактор дынiсь да ас кежас сералiс Фёдор коддесö: рад мортыс, кöр быдöс аркмис кыдз колö, сы моз лоис.

18

Галина Макаровнаöс дзик вартлiсö: юрыс висис, сьöлöмыс гудрасис. Инькаöс кыдз кудоба дойдöм. Сiя вель дыр пукалiс гортас, видзöтiс öшынöт öтöрö. Юрас некытшöм дума эз вöв, бытьтö нач нем эз ков. Колiс бы котöртны отир дынö, мыйкö висьтавны сэтшöмö, кöда бы быд мортлö йиджис сьöлöмöдз.

Директор асывнас гортын эз чышкы джодж, аслыс нем эз пу-пöж, пукалiс-керис öшын одзын. Сэсся петiс керкуись, ыбöс бердö öшöтiс замок и мунiс Вильыбö, веськыта иньдöтчис контораö. Мунiкас казьмöтiс кассир Любалö, мед сiя котрасис отир дынö да корис быд морт-уджалiсьöс кежыштлыны контораö.

— Эшö мый, Галина Макаровна? — Люба кокнита баитö, орсö-олö. Сiйö любитöны зонкаэз, и сiя любитö нiйö. Вайис ни кага и бытьтö нем и абу. Кагасö быдтöны ай да мам, а Люба кошшö ни мöдiк кага да уджалö контораын.

Дышöла асылöн вöрöтчö отир. Кöркöсямоз шондiтöг уджавны некин оз котöрт, быдöн гортын кыскас да кыскас кадсö и вöлись кытöнкö öкмыс час гöгöрын сьöрсьöн-бöрсьöн лынь-лынь локтöны контора дынö, кытöн видзчисьö директорныс. Сiя пукалö посöдзын, кыдз пым пöим вылын, видзчисьö уджалiссесö, быдöнлiсь юалö, пондасö я кöдзны, пондасö я уджавны совхозас.

— Или кинлö да кытчö туй! Этадз уджавны ме тiянкöт ог куж. Овны да орсны огö пондö. Колö кöдзны чожажык, а ми бутылкаэз вылö видзöтам да ны вылö уджалам! Мый эта лоö, ёрттэз?! Асьныт думайтö...

— Мый сэтöн думайтны. Доддясим кö öтiк доддьö, оз ни ков юскисьны. Одзлань колö кыдзкö овны... — шыасьö öтiк.

— Öтнаным мый миян лоас? Пестериныс моз вöлiмö бы богатöйöсь, медалiм бы ыббезным вылын уджавны. Вашöтны колö юиссесö! Ась Пестериныслö и уджалöны...

— Ха? Пестериныслiсь уна он ю и он сёй, сiя важын ни дорын узьны велалöма! Öтпыр юкталас, мöдöтпыр öмлöсалас... Тöдат эд, кыдз кывнас небыта ольсалö Егор Петровичыс, кöр иньсö, шуöны, кроватьыс увтын жö узьтöтлö.

— Сэк мый?! — синнэс вирдалöны директорлöн. — Кин юö бы, ась юö. Ме абу врач, юиссесö юöмсис веськöтны ог куж, но кинöс эшö уджавтöн адззыла кодöн, ас выланыт горзö! Мед кöть совхозас öтiк морт кольччас, но сiя пондас уджавны кыдз колö! Гöжöм Колька коддескöт ог понды орсны!

— Сiдз, Макаровна! Нем миян вылö видзöтны!

— Галина Макаровна! Галина Макаровна! — посöдз сайсянь пондiс никсыны Миколка. — Ме сэсся сiдз ог понды...

— Николай, тэ мый татöн талун керан?! — директор швырк чеччис местаись, кытöн пукалiс, и пондiс пырны контораö. — Котöрт сэтчин, кин тэнö юкталö и вердö! Котöрт, котöрт, то тэ коддес одзаласö Егор Петровичыслiсь нювны.

— Ас вылат, Колька, горзы!

— Да мунö тi ме дынiсь! — Миколка лэдзис лёк умöль кыв, чатыртiс юрсö, нырыс увтын мыйкö модьтöн былись иньдöтчис Пестериннэзлань, кöдалiсь тöння удж понда лöсьöтчис корны унажык деньга.

Пестерин сулалiс посöдзаныс, чикралiс синнэсö, видзöтiс кытчöкö ылö-мöдöрö, бытьтö Колькасö эз адззы. Сiя сибöтчис пöрисьжыкыс дынö, здоровайтчис и пондiс няргыны: «Егор дядь... Мый нö? Примитан менö тракторнас уджавнытö али он?»

Егор дядь вöлись юр бергöтiс зонкалань, öмыс реш видзö-сералö:

— Одзжык бы, Колька! Видзöт, дугдiс дриссьыны дристун, а мöд тракторсö, бат, ог и лöсьöт ни...

— Сэк вештiсин бы тöння удж понда...

— Мы-ы-ый? Ме разь тöн тэкöт эг вештiсь? Эн я сотчытöдз винасö ю! И деньгасö босьтiн... Не-е-е, зонка! Этадз, батя, оз лöсяв. Ме эд абу тэныт мöс, кöдö быд рыт и асыв чилькöтны.

— Кöсйин эд эшö сетны...

— Нем ме тэныт унажыксö эг кöсйы!

Пестерин дынын Миковлö нач нем лоис керны: зонка бергöтчис гортланяс, дума вийис: «Но тэ и буржуй! Тэ тай абу ни морт!.. Он я бы кöркö этö кер...» Мый вермас лоны Егор Петровичкöт, Колька эз тöд и тöдны эз вермы, но думаэзнас дойдiс бы мортсö — вештiсис бы, ась тöдiс бы Пестериныс, кыдз отирсö весь уджöтны.

Колька Пестериннэз ордiсь мунтöн йöр угöлiсь адззис бур чер, кöдö, тыдалö, хозяиныс вунöтöма отир синнэз одзö. Но черсö некин абу казялöм, и сiя пригодитчас зонкалö! Колька босьтiс чер, кутiс конувтас да веськыта иньдöтчис аслас соседдэзö, кöдна ой и лун вузасьöны спиртöн — горш отир. Сiдз и лоис: минута-мöд и чер абу ни... Колька сэтöн жö юыштiс спиртсö, и быдöс лоис öддьöн бур, нем сэсся эз понды ковны — гöрсис и кöдзсис, йöраныс картов садитсис. А эд асывнас мамыс тотис: «Чеччы, зон! Отирыс озö я картоввез садитöны... Поди, былись бы кытiськö вöвсö адззин, да гöримö бы, то гожум шöрнас садитчамö, и картовыс лук гырися быдмас. Зон!..»

— Важын ни тэныт вöвсö быдтöмась и вердöмась! — ассис пиньöвтiс зонка — лöг мам вылö, мыля сiя тэрмасьö садитчыны, кöр былись вöввес абуöсь... А веськыта кö висьтавны, öддьöн тай колö картовыс Колькалö. Ведра-мöд и тöвьяс! — Тэныт уна, мам, колö кö, тэ и кошшись, и садитчы, и сёй, верд податö.

Зонка юыштiс, и быдöс лоис бур: транды-бранды, транды-бранды! Эшö кытiськö мыйкö юыштны бы. Деньгаок бы, транды-бранды!

— Эй, Борис! Кытчö вартан?! Мый сыланьö öштiн?! Деньгаыт эм? — аскоддя жö зонка усис Миков синнэз одзö.

— Кытшöм менам деньга вермас лоны? — мурзьö Борис, мунö кытчöкö, натьтö, сiйö кошшыны, кöда абу, кöдö эз пукты, эз öшты, эз шедты — тöв чужьялö, поннэз нерö, синнэзнас сэтчин-татчö, кыдз тшыг пон, кыдз вартлöм, дойдöм, сiйöн и лёк, сiйöн и эр да эр!

Борис некинлö оз ков, и сылö некин оз ков, бытьтö зонкасö кöркö мамыс весись вайöма, быдтöма, велöтöма. Зонка вöлi армияын ни, но некытчö толкыс абу — нем эз велав керны-уджавны, асьсö оз вермы вердны, а вина юны... Сувтат одзас винаöн тыра ведра, дзунгас и эшö пондас корны. Вина юö том морт и пыр сёйö бы — ой и лун тшыг, ой и лун кошшисьö. — Борис, транды-бранды, сулав! — ыксö аслас ёртлö Миков. Борис падмис, сувтiс, öмсö пиньöвтiс: синнэс гудыраöсь, лöга видзöтыштiс ёртыс вылö, малыштiс рожасис рыжöй тошсö, кöда тiльгöма-быдмöма, кыдз нитш, юалiс:

— Мый колö?!

— Мый колö, мый колö, транды-бранды, — Миков турйöвтiс — öвтыштчис кузь да векнит мыгöрнас. — Тэ колан! — оськöвтiс, юалiс. — Сто граммыт эм?

— Кытiсь?

— Адззы, транды-бранды! Или... — юалiс сiйö, мый кылiс ни мамыссянь, — тэ гунаысланись столббес вылiсь лэдзин?

— Мыйсö?! — нач лöгасис Борис, синнэс ыждiсö. — Тэ кинöн менö лыддян?! Мед менö шуöны ворöн, но...

— Дугды, транды-бранды, Бориска. Менö пыжтöг ваыс вылын он ыслöт. Транды-бранды, Колькаыс важын ни велалöма дорын узьны, вежöртiн?!

— Сiйöн тракторыс вылiсь сэтшöм чожа и вашöтiсö.

— Нем он кер, зонка, — бöра сьöкыт лоис Миковлö. — Кодя отирыс велöтöны овны миян кодьсö. Буржуйыслö тöн садь быртöдз гöри, и мый тэ думайтан? Джын бутылкаöн вештiсис, да эшö трактор вылiсь вашöтiсö, во, транды-бранды! Тэ только уна эн баит, но... Сэтшöм отирыс кöркö ме моз жö пондас тшыгьявны. Вежöртiн, транды-бранды. Сэк висьтав, лэдзин или эн столббес вылiсь проводсö. Лэдзин кö, нем сiйö гортын видзны, то транды-бранды лоас! Норасьöмась ни пö участковöйыслö... Вай чераньвезсö кыскам Тупöсьыслö да сетам. Сiя, поди, чольскас мымдакö. А мый?! Ме весись, транды-бранды, ог баит! Видзöт жö, погоддяыс кытшöм бур, только вина юны и эм...

Былись тулысся лун оссис гажа. Шондi шыннялiс кымöрын, томмесö корис уджавны. Кык ёртлö нач нем керны, кыдз только вина юны, кöр эм мыйöн. Кык зонка мунiсö Бориссэзö, пырисö чомö. Чомын мешöкö заргисö алюминиевöй провод, кöдö Борисыс ойнас лэдзöм гуналанись столббез бердiсь, вайöм гортас и öтнас лöсьöтчöм кыскыны Тупöсь Степанлö, кöда öктö берсясö, и эшö вузасьö аскерöм винаöн да спиртöн.

Кык ёрт тыра мешöксö вайисö Тупöсь Степанлö, кöда бытьтö важын ни тöдiс, мый и кытiсь сылö ваясö, сулалiс да видзчисис öшын увтаныс, пиньлалiс öмсö. Сэк жö куимöн пырисö-саясисö загонö. Степан бытьтö бы проводсö öшлiс жö безменöн, бытьтö лыддис мымда вылö сувтiс проводыс, сетiс бутылкаöн спирт да висьталiс, мед тарöвтчисö синнэз одзись.

— Бура эд бöра миянöс шныгин, Степан, транды-бранды... Донажык жö, натьтö, миян товарыс... Чушкавны бы тэнö, гадöс, прокурорлö, мед машинатö мырддясö и асьтö, транды-бранды керасö, а! — пондылiс модьны Колька, пеничайтiс Тупöсьлö, мыля сiя горш, надз, умöль морт, но мöдыс сэтöн жö öмалiс:

— Мыля он чушкав? Норась, озö я кыкнаннымöс кын кирпиччесö йирны нуöтö...

Тупöсь синнэзнас кваркыш эз кер, баитiс, бытьтö вöлi честнöй морт. Бур кöть сiя шедiс: зонкаэз босьтiсö спиртöн тыра бутылка, саясисö вöроклань, пуксисö кöзок увтö, пöттöдз юисö, пöрисö зелёнöй луд вылö и пондiсö каргыны-узьны, эз и адззылö, кыдз луныс чулалiс. Колькалöн мамыс рытланяс котрасис, юасис ни, эз я кинкö адззыв зонсö.

Öтiк зон мамлöн да сiя сора.

19

Погоддя сулалiс. Лун-мöдöн вöр пасьтасис гожумся зелёнöй паськöмö. Лун-мöд и сiдз пондiсö цветитны льöмпуэз, что Вильыбын, кытöн льöмпуэз быдмöны быд öшын увтын, ру сорлассис сэтшöм чöскыт дукöн, дзик деревнясö резiсö одеколонöн.

Сьöдкайез асыввезöн дугдiсö сьывны, только эшö айпöв каёклö тöдвылас кöр и усьлiс, кыдз любитчис невестаэскöт. Сысянь сiя кыдз бы соравлiс кадсö, öшлiс и пондывлiс питьыртны кайпоз вылын, но сэтöн жö лöньлiс.

Одз асыввезöн кытöнкö эшö бобгис тар. И эта бобгöмыс кыссяс сэтчöдз, кытчöдз пипулöн лист оз быдмы пятак ыжда. А пипулöн пугырыс потö медбöрын.

Деревняын садниккезын садитiсö картоввез — оссис аскоддя вежалун: садитчытöн чукöртчö öтлаö уна отир — быд морт бытьтö бы уджалö-отсасьö öтамöдлö, а петö, что отир етшажык уджалö, унажык юö вина. Бытьтö джын деревня отсасьö öтiк мортлö, жöдзö отир садникын, сыбöрын йöктöны и сьылöны садь быртöдз, орсö гармоння, а кöр овлö и сiдз, что кинкö кодувья горзö.

Гажа тулысöн деревняын, кöть мукöд коста и пöттöдз сёйны нем. Только умöль сiя, что вöввез эзö лоö, и медбы садитчыны, колö видзчисьны, кöр совхозiсь вермасö сетны вöв. Öтiк-мöдiк вöввез пондiсö ни видзны аслыныс. Миковлöн да Борислöн маммез садитчисö медбöрын, кытöнкö июнь месяцö ни, а Галина Макаровна таво йöрын бергавны эз тэрмась, медодз аслыс гöрис гряддэз вылö му, сюйис лук и бöра пондiс быд лун жöдзны отир коласын, гортö пыравлiс только сьöд ой кежö. Дарья баб баитiс, что эшö усьлас лым.

Веритны кö баблö, усяс кö эшö лым, сэк эд быдöс кынтас. Вöрын бöра некытшöм ягöд оз ло, кайезлöн поззэзаныс кынмасö кольттез, садниккезын вермас кынмыны садитöм ни картов да лук — кöртовöй бöра лоас годыс, сьöкыт.

— Сьöкыт и лоас, — висьталö баб. — Эз я куш шатьыс вылö гымав. Одзöв тулыснас гымалiс.

Совхозын кöдзсисö одз, кыкнан тракторыс гугйисö-гöрисö и кöдзисö, эзö жугавлö — бус гардчис бöраныс. Кыдз сылöтiс, бура эшö öтпыр эз зэр, му косьмис, пондiс паз жугавны.

Совхозын кöдзисö кык сотня гектарся унажык ни и эшö лöсьöтчисö кöдзны, но сэтöн солярка кольччис нач етша: лун-мöд и оз ло. Директор пондiс бöра котрасьны öтöрö да мöдöрö, ештiс ветлыны районöдз, пыралiс öтiклаö и мöдiклаö. Öтiк начальниклö кеймисис и мöдiклö, куимöт одзын тiлис синнэз да мымда ыджыт керкуэзын бырöтiс ыбöс дзиррез, сымда деньга и адззылiс: некин сьöвзьыны эз думайт.

Солярка босьтны вöлi немöн...

Галина Макаровна локтiс районсянь, баитiс отиркöт, мый керны одзлань, кыдз овны. Öтiккез велöтiсö, туйдiсö-иньдiсö, висьталiсö, что колö начкывны мöссэз, яй кыскыны Березникиö или Соликамскö, кытöн яй вылö позьö быдöс адззыны. Но эта басниыс кузьöв да лёк, кöр туйез абуöсь, да и мöссэс жальöсь, медбы нiйö гожумöн торкны. Нем кыввезöн изны куль пизь, кöр фермаын удж пондiс йывны: мöссэз пондiсö сетны унажык йöв, йöлiсь пондiсö керны ви. Пондiс уджавны важ сепаратор. Ви пондiсö вузавны гортын и мымдакö кыскисö вöр керан посёлокö. Совхозлö подасянь шедiс мымдакö деньга, ась етша, ась солярка босьтны эз тырмы, но, кыдз шуöны, етшаись вермас лоны уна: лöсялас оланыс и, лоас мыйöн ошшасьны, лоас и солярка, лоас нянь, но... Висö эд некытчö лоö вузавны: сiя жö Егор Петрович аслас магазинö вайис городiсь висö да не асланым государствоись — абу керöм тöдса отир киэзöн, а сылöтöм кытöнкö Америкаын или Голландияын.

Гортын ви етша кин босьтiс, унажык отир пондiс вердчыны Пестерин магазинын. Эта вöлi умöль.

Бур вöлi, что погоддя бур. Тулыс гажöтiс, и гожум локтiс сэтшöм жö шондiа, шоныт. Бур погоддя, и отирлö кокнитжык, етша кин бы кулö, только Колька да Борис коддез озö тöдö мый керны. Кöр юасö — юррез висьöны, вывтi шогалöны.

Фёдор сералö ны вылын. Абу ни сiя морт, и совхозiсь директор абу морт: тöн эд бöра совхозiсь вашöтiс Фёдор Аннаöс, кöда пастучитiс мöссэз. Уджавтöн инькаыс юöм, пöрöм ыб дорись кöззэз увтö, вешьянсö мыйлöкö лэдзöм. Ланьтöм сэтшöм пыд чöскыт онöн, что абу и кылöм, кыдз сы дынö котöртöм вижлок понныс, лэбтöм коксö и Анналö куш лядьвеяс чиж-чиж только кудзалöм. Натьтö, пон чужöм думайтiс, медбы хозяйкаыс кыз лядьвей вылö эзö пуксьö лёк лöдззес, эз курччалö чöскыт госа яйсö и эзö юö вир. А вир юиссес сэтöн и эмöсь: биз-з-з да биз-з-з! Öтiк пуксьö куш яй вылö да нырсö заргö, мöдiк пуксьö да лэчыт нырсö заргö, и юöны, öнджаэз, вир. А Анна узьö, нем беднöй морт оз кыв и оз адззы, что эта коста мöссэс совхознöй ося мурскöны-сёйöны öмтырнаныс.

Бытшöм сю бы тапкис-быдмис ыб вылö, но осяэсö мöссэс сёйöмась да тальöмась вель уна. Галина Макаровна вывтi лöгасис Фёдор Анна вылö, сэк жö гижис приказ: и Анна совхозын оз ни уджав, ветлöтö улицаöт да ныр увтас бобгö: «Бу-бу! Мортсёйисьыс сёйис менö. Ась менам синваэс сылö бергöтчöны, мед челядьыслö...» А кытшöм челядь вермасö лоны директорлöн, кытöн нiя котрасьöны, ежели Галя матö дынас мужиккесö оз лэдз?

Галялöн сьöлöмыс пизьö-педзö удж понда, немымда асьсö оз жалейт, сё котрасьö, сё совхоз понда жöдзö — совхоз юрсис оз петавлы, сэтчöдз уджалö, что тулыссö топ оз кыв, оз адззы. Дарья баб шуö:

— Ой, одзöв старикö кулiс! Натьтö, эшö окасьыштiм бы. Галя, мый нö тэ аслыт некинöс он адззы? Эмöсь жö эшö миян мужиккес или нач ни абуöсь?

— Тэ бöра, баб, меным кошшан бы жöник? Тырмас, öтпыр бöбасьлi...

Галина Макаровналö озö колö жöниккез, но овлö сiдз, что рытöн локтас гортö, пырас керкуö, и мылякö лоö гажтöм, сiдз бы кытчöкö и котöртö, гортсис пышшö, кинкöткö пантасьö да сэтшöмкöт, мед мортыс вöлi бы морт, кöдакöт туйис бы баитны да сiдз, медбы басни йиджис сьöлöмöдз. Но абу эд сэтшöм мортыс. Отирыс нач ни тшыкис, вина юöмсянь лоис лёк. Да и Галяöс пондiсö шуны мортсёйисьöн, кöр мужиккес и инькаэс Галяись пондiсö повны. Рам вöлi инька да лоис лёк — биöн сотас, ежели мыйкö кытöнкö абу сы сьöртi. Лёк лоис Галя, да не жö лёк пон кодь. Морт жö эшö, кужö серавны и баитны. Сёр рытöн Дарья бабкöт пуксясö посöдзö и кывзöны, кыдз лолалö рытыс, кыдз быдмöны туруннэз.

Гожум локтö-видзöтчö. Ыббез вылын быдмисö сюэз, и ась нiя эшö вöлiсö дженытöсь, но Галина Макаровна думаэзнас вундiс ни, вартiс сюэсö, лыддис, мымда öтiк гектар вылын шогмас шогдi, ид, зöр, да рудзöг, кöдö мöйму кöдзис даскык гектар етш. Осяэз вöлись вынсьöтчисö, нюжöтчисö шондiлань, гажöтiсö синнэз, бурмöтiсö сьöлöм, кöсйисö бур урожай, кöдö пондас ковны кыдзкö дзимлявны.

Директорлiсь сьöлöмсö няпыртiс лöг, кöр гуна дынiсь столббез вылiсь лэдзисö проводдэз. Сiдзкö, ежели вились проводдэсö озö нюжöтö, то гунаын электричество оз ло, озö пондö уджавны моторрез, озö пондö бергавны тöлöтчан да косьтiсян машинаэз. «Мый сэк лоас?!» — Галялöн юрси сувтлiс кышöпöн, повзьывлiс, норасис участковöйлö, телефонöн звонитiс милицияись начальниклö, кöдна кöсйисö кутны враг-мортöс, но кытчöдз некинöс эзö кутö.

Кыдзкö отир кужöны юравны и кужöны овны. Эмöсь сэтшöм начальниккез, что кöть талун жö кымöрыс усяс юр вылö, юралiсьлöн юрси тылöп юр вылiсь оз вöрзьы — дрöг оз кер, оз горзы совхоз понда. А Галина Макаровна ойбыт онмöссьыны оз вермы, думайтö и думайтö аслас удж йылiсь. Быд местаö думаэзнас сибалö, быд морткöт пантасьлö, сёрнитö, керö бы ас мознас.

Отир, сюэз, пода, проводдэз... Бур, что гуна вылiсь эзö ештö гусявны электромоторрез, кöднö Галина Макаровна электрик Митькалö тшöктылiс дзебны замок сайö. Электрик Митька ась и юö жö винасö, асныракодь мужичокыс, вермас кöть асьсö, кöть иньсö, кöть сойсö, кöть мамсö, кöть кытшöм начальникöс матькыны и иньдыны бессэс дынö, но кöр и кывзiсьö. Дзимлялiс моторрез да вöлись и мунiс кошшыны буржык олан — виль местаэзö иньдöтчис ассис вексö джендöтöны, гортö колис семьясö. Мунiс морт да öшис — письмо абу, и юöр оз иньды. Колö бы электричество совхозын да кытiсь сiйö?

Абу гуна дынöдз столббез вылын провод, абу электрик совхозын; быдöс, мый талун абу совхозын, талун жö он вайöт, он неб, и эта йылiсь кытчöдз думайтны нем. Но Галя думайтö, одзлань бы быдöс керö, жалейтö сiйö, кöда эм, да озö берегитö. Деревняын мöссэз, баляэз, куканнез пондiсö видзны тöдчöмöн унажык. Но нiя деревня вылын кузь луд озö сёйö, озö вердчö кырылiсь видз вылын, оз мунö гöртöм да кöдзтöм муэз вылö, кытöн быдмö берся ёгтурун, а сёйöны и тальöны осяэз. Травитчöны совхозлöн сюэз, и директорлöн сiдз лöгыс петö, что и дойдiс бы лёк отирöс, кöдналöн мöссэз, баляэз, куканнез, штрафуйтiс бы мöссэзлiсь хозяиннэсö, но оз позь! Дойдасö асьтö, сiдз «штрафуйтасö», что нимыт вунöтчиссяс.

Эстöн том инькалö тöдвылас усьö сiя оланыс, кöр эшö вöлi учöт, но адззис аймамлiсь удж, отирлiсь удж, тöдiс, кыдз нiя берегитiсö и синйисö ыббесö, сюэсö. Донтiсö сэк отир ассиныс удж, ыббез лыддисö юрвердiссезöн, нянь понда сетiсö лов, а öнi...

20

Галя ойезöн умöля узьö, кöр только асывланяс ланьтö, и саймö, топ кинкö лыйö пельыс бокын. Инька чеччöвтас ольпась вылiсь, миссяс и петö аслас мöс дынö, кöда йылiсь некöр оз вунöтлы, кöда вердö йöлöн, нöкöн и виöн. Мöскöт хозяйка дружитö, думайтö, что и одзлань сiдз лоас.

Талун, кыдз только инька саймис, одза-одз шондiтöг, эшö эз ешты бура осьтны синнэз, эз ешты петны мöс дынö, кыдз ыбöсö кинкö пондiс стукöтны: тук-тук...

— Кин сэтчин? — ыбöс осьтiс хозяйкаыс да юалiс.

— Этö ме, Галю, горзöмсорöн ыбöс сайын посöдзын шыасис Дарья баб. — Петав жö, кагу... Талун эд менчим узьтöнням садниксим быдöс гусялöмась! Кытшöм мортсёйисьлö колiс менам лукö?

И пондiс пöрись пильскыны да висьтасьны, что гряд вылiсь луксö быдöс нетшкöмась. А пöрисьлöн быд гожум лук быдмö сэтшöм гырись, яблок вылö вачкисьö быд луковкаыс.

Баб босьтiс посöдз бокись пишаль, кöдö вайöма гортсис да сайöвтöма посöдзыс бокö, сувтöтiс пишальсö медодз коккес дынö, малыштiс стволсö, висьталiс:

— Тэнат эд, Галю, пишальыс. Мый, вунöтiн я мый я ни сы йылiсь? Эн я шу, что сiя айытлöн, и оз я пригодитчы.

— Ась бы олiс тэ дынын, — баитiс томжыкыс.

— А мый ме сiйöн кера? Лыйсьынытö ог эд куж, кужи бы... Гусясиссеслö базги бы бöр гöгöраныс, ась бы тöдiсö... Босьт да дзеб пыдöжык, то эшö сiйö гусяласö. Или пондасö кö эшö гусясьны, лый сотанаэзлö!

— Тэ мый, баб? Отирсö тшöктан вийны...

— Тьфу! Кытшöм тэ сэтшöмыс директор?! Адззöмыт отир... Видзöт, менö мый керисö! Да менö я öтнасöс? Лый, пондасö кö эшö гусясьны!

— Менчим, бат, озö лысьтö...

— Поласö... Видзöтасö тай, кытшöм тэ директор... Берегитчы, кыдз бы юртö эзö кералö...

Мый-мый, но мортлö лыйны Галялöн ки бы эз лэб, но баб киись босьтiс пишальсö, пыртiс керкуö, дзимлялiс; топ киэс пондiсö лудны, кошшис и адззис патроннэз да лыддис кыным патрон заряд, видзöтiс эм я джаджын порох. Бытьтö не аслас уджöн уджалiс, но патроннэз лыддьöм бöрсянь топ сьöлöм вылас лоис буржык, бытьтö вöлi эшö челядь мывкыда, бытьтö айыс вöлi ловья, малыштiс юрсö и висьталiс: «Ныв, менам зоннэз эзö вöлö, тэнö ныв и зон местын быдтi, сiдзкö, нывка и зонка местын и ов да некинiсь эн пов!»

Талун бытьтö бы думаэзнас пантасис айыскöт и сыкöт мунiс уджавны, думаэзнас сёрнитiс Макаркöт, висьталiс, что некинiсь повны, кöр локтiс виль лун, шондi мыччисис, пантасяс отиркöт.

Галина Макаровна улицаöт веськыта мунiс конторалань, да коккес асьныс кежисö Егор Петровиччезлань, кöдöрсянь кылiсö лёк голоссэз, улицаын поннэз моз пурсисö мужиккес. Пестериннэз öшын увтын оча морос кутчисьöмась Егор Петрович да Миколка, и кыкнанныс топ садьöсь, кыкнанныс лёкöсь, вынаöсь, сiйöн öтамöднысö зэгйöны, кыдз зверрез улицатыр эрзöны — öтыс öтыслö ыксö, что мыччалас, мöдыс ряксö, что, ожо, адззылас!..

Посöдзаныс сулалö Пестеринлöн иньыс и кеймисьö-модьö:

— Егор! Ен сетöм тэ менам, эн жö бы тэ страм черыс понда асьтö стыдит! Мый, черыс миян сэсся абу? Вильö босьтан, а сылöн сё нем оз ло. Егор! Да провалитчы бы сэтшöм мужикыс!

Галина Макаровна смела локтiс мужиккес дынöдз, смела юалiс, мый нылö оз тырмы, мыля одза-одз асывнас тышкасьöны. Гыжьясиссез мезмисö öтамöд дынiсь, öдва чушыктöны, чужöммезныс бледöтöмась, дзик поткöтiсö пес да мыдзисö. Миков сулалö, кымöс увтöт видзöтö, а Егор Петрович чеччöвтiс Галя дынö, пондiс кивзыны: «Свидетельöн лоан! Свидетельöн...»

— Некинлö ме некытшöм свидетельöн ог ло! Тi пурсят-керат да бöра öтлаын лоатö, а ме...

— Лоан!

— Ог ло!

— Ло, кöть эн, директор! Ме важын ни тöда, кыдз тэ ме вылö бöрöн каян! Сiйöн ме местö юртö и сюйыштiн директоравнытö! Эн вермы асьтö вердны фермаас! — эрзiс Егор Петрович, бытьтö рожаас чеччöвтiс кань и гыжьялiс мужиксö.

Весись эд озö баитö, что кытöн кыка гыжьясьöны, куимöтлö керны нем, сiя кольччас виноватöй, сiйöн Галя сьöвзис, бергöтчис тышкасиссез дынiсь, недолыт лоис Галялö, умöль, бытьтö сылö вачкисö пельыс бокö.

— Гав, гав! — вувтiс пон — сералiс отирсö.

Эз ешты директор мездöтчыны лёк отир дынiсь, кыдз паныт усьöмöн-пöрöмöн котöртiс кассир Люба, ышки-пойки ловзисис, висьталiс:

— Галина Макаровна! Совхозсис эд бöра мöс öшöма! Тöн ни абу вöлöма...

— Мыля меным тöн эзö висьталö?

— Натьтö, кошшисисö... Думайтiсö, что адззасö...

— Кытчö вермис мöсыс лоны? Мый видзöтiс пастухыс? Поди, бöра вöлi код? — нето лöг, нето аскодя шог пондiс пидзыртны том инькасö, сiя пырыштлiс контораö, кыв-мöд эшö горöтчис Любалö и висьталiс, что мунас мöссэс дынö.

— Кытчö?! А ме? — падтiс Любаыс, кöда удерлун юасьлiс, медбы отирись и мамись гусьöн котрасьны больницаö, сибавны враччез дынö да кынöмсис кольны кага, кöдöн тырсялiс не öддьöн важын.

— Кинкöт? — только ештiс юавны Галяыс. — Висьтав, ме ог понды баснисö кöдзны.

— А этаыскöт... Куль пияныскöт... Но кöда, тай, эшö винасö Колька да Бориссэс моз оз ю. Сыкöт... Ась. Ме сэтшöмыс сайö сiдз и этадз ог мун, адззи ни бöра мöдiкö, бытшöмжыкö, чожö. Сiя нач винасö оз ю. Быль! И нывкаэс сьöрö оз котрась, только менö и любитö. Он верит?! Чожа гöтрасям. Сiйöн и простама бы. Жöник саяс пета да ог жö бы козьнав. А мый? Öнi жöниксö, кывзы, он адззы сэтчöдз, кытчöдз ачыт голяас он öшöтчы!

Кык лун кежö Люба öшлiс гортсис, локтiс и чиннялö — бöра нач виль невеста: дзонь, счастливöй, кöр простамис и виль жöник адззис. Любакöт кокнит овны, гажа — мортсö некöр кыв оз бергöтчы видны. Сiя счастливöй, пыр жалейтö Галина Макаровнаöс. Öнi оз бы лэдз мунны пода дынö, подöн шлёпöтны вöрöт, оськавны вит-квать километр гöгöр. Жар, курччасьöны номмез да лёдззез, вермасö пантасьны кöиннэз...

— Некытшöм кöинлiсь и ошлiсь ог пов! — Любалiсь басни орöтiс директор.

Петiс контораись да веськыта сöтiс вöрлань, час бöртi локтiс совхознöй мöссэз дынö, здоровайтчис пастухкöт, кöда тошсялöма, голосыс мöссэз увья сибдöма, синнэс пыктöмась геб да ном курччалöмсянь.

Гожумöн пастухлöн удж сьöкыт. Пода унажык олö вöрын. Жар, ой и лун уннялöны да курччалöны ном, геб да лöдзпöлöс. Пода заргисьö тэлляинö, пырö чашьяинö, и ны сьöрын пыр колö котрасьны.

Тулысöн сьöкыт мужиккесö иньдыны пастучитны, и Галина Макаровна ёна кеймисис Витя дядьлö, медбы сiя дозирайтiс мöссэсö. Мужик эз вöв асныра, кытчö иньдасö, сэтöн и уджалö.

Пастучитö Витя дядь мöссэз, вöтлiсьö пода сьöрын. Вöрын кöр и öштывлö серанькаэсö да кытiськö пыр адззö: нето тшöк вöрись, нето шор сайись делянкаэз вылiсь. А удерлун мый и лоис, кытчö мöсыс и öшис.

— Эшö удерлун öшис?! Эз жö эд ош сёй?! — желлясис директорыс, виноватöн лыддис пастухсö.

— Кытшöм, поди, ош сёяс? — вишыкасис Витя дядь. — Тöн кошшисим витöн да талун... Ошыс джагöтiс бы, сэк жö быдöс бы эз сёй, а сёйис кö, колис бы кöть сюр да бöж, а то некытöн и нем абу, кыдз ваö вöйис или лэбзис. Бат, бöра кык кокаэс начкылiсö да сёйисö... А мый? Верма я ме öтнам этатшöм жарас да лöдззаас быд мöсыс сьöрын вöтлiсьны? Кöть мый, но ме сэсся пастучитны ог понды, ась мöдiк номмесö вердö, а ме шоччисьнытö кужа жö!

Мый сэтöн керны? Дойдны пастухсö или жалейтны? Галя жалейтiс Витя дядьöс, висьталiс, что быдöс лоас бур, и ась Витя дядь баснинас оз ылавлы, ась уджалö, некинлö сы местын пастучитнытö.

Жар. Вöрын топ ловзисьны немöн — пöдтö жарыс. Лöдзпöлöс лэбалö табунöн-табунöн, бизгö, пуксьö, курччасьö... Бöра эд изъян совхозын. Совхозiсь добро понда медодз тöждö Галина Макаровна, бöра сьöлöмыс пессьö, тöждö совхозыс понда, дойдö бы враггесö, но кинöс и кытiсь кутны, кöр вöррез пыдынöсь, тшöкöсь, эм кытчö дзебсисьны и дзебны вийöм мöслiсь кучик.

Жагöн чулалö кузь гожумся лун, кöр морт тöждö. Жагвыв рытлань вешшö шондi. Директор люзь пымавтöдз котрасис öтöрö да мöдöрö, асьсö мыдзöтiс уджын, кöда бытьтö оз и вачкись удж вылö. Юöртiс участковöйлö, сiя висьталiс, что мöссö колö кошшыны. Адззыны кöть гöнторрез.

«Кытöн бы мöсыс?! Былись я мый я кинкö начкылiс? И кин бы? — думаэз пизьöны-бергалöны асланыс отир гöгöрын, думаэзöн веськыта бы видзöтiс быд синнэзö, пыралiс быд сьöлöмö, быдöнлiсь юалiс: «Мыля нö тi? Кин миян коласын поныс? Тэ, Миков — гöжöм тури, кöр лöгыт петö ме вылö, или тэ, Бугай Сергей — пучей кынöм, лёк пон, кöр бригадиравтöннят гусялiн да гусялiн совхозсö и эн пöт. Эшö етша, мöс яйсö эшö тыткан бы, или тэ, Борис — тшыг кöин, кöр винасö юан, натьтö, некöр пöттöдз он сёйлы, или...»

Тöждiсьöм шогöтся-шогöт кодь, кöр умöль, но бура он тöд, кыт и висьö, он тöд мыйöн и кыт веськöтны.

Кузь гожся лун. Галина Макаровна мыдзтöдз котрасис, гортö локтiс шондi пуксян гöгöрын, думайтiс ни, кыдз бы чожажык пырны гортö, водны да ланьтны, медбы кöть ойнас вунöтны гожумся лунсö и олансö. Но эшö колiс чилькöтны мöс, вердны кань, пон, кöдна быд лун хозяйкасö кольлалöны гортiсь и панталöны. Талун пон ылiсянь казялiс Галясö, лэбзис-котöртiс паныт, чеччöвтiс моросас, пондiс никсыны да нювны рожабаннэз. Серко синнэзын тыдалiс гаж и шог, бытьтö сiя тöдiс, что хозяйкаыслö сьöкыт, тöждö, сiйöн и отсалö бы — ас мознас гажöтö. И кыдз сэтшöм ёртсö он верд, кыдз сыкöт он баит да кыдз бы морткöт, он юась-висьтась?

Инькалöн гортын эм кинкöт сёрнитны, эм кинлö висьтавны, кыдз чулалiс лун, и медодз посöдз дынын сёрнитiс Серкокöт, лöсьöтчис пырны керкуö, но сэтöн аслас керку дынсянь ыкöстiс Дарья баб, кöда öтнас лунтырöн бöра ни гажтöмтчöма, кылыс лудö, медбы юасьны, кыдз чулалiс луныс. Висьтасьö, что сылiсь талун курöгсö пондылiс пышшöтны варыш. Уськöтчис лёк кай курöг вылö посöдз дынас, няпыртiс лэчыт гыжжезнас, лэбтiс-пышшöтiс бы, да поныс сэтöн и вöлi. Серко чеччöвтiс варышлань... Баб видiс лёк кайсö и ошкис понсö, öтлаö гардiс зверрезлiсь, кайезлiсь, отирлiсь и подалiсь олан. Бабкöт баиттöн öшис тöждiсьöм, бытьтö пöрисьыс сьöлöм вылiсь киэзнас шогöттэсö босьтiс, и сералiсö том да пöрись. Посöдзын Мурка Серколiсь пондiс нювны нырсö — любитчисö пон да кань, кöть унаись кывсьылiс, что пон да кань пыр гыжьясьöны.

Эз казялö, кыдз пуксис шондi. Лёкжыкöсь лоисö номмез, эз адззылö, кыдз Вильыбланьсянь керöс кырылö велосипедöн катыльтчис пастухлöн зоныс, веськыта швыркнитiс посöдз дынö, чеччöвтiс велосипедыс вылiсь, висьталiс, что айыс вöрись адззöма кучик, кöдö дзебöмась ключ-шорыс дынö дзескытiнö.

— Господи! Нач ни тай эз понды туйны овны! Кувны ни колö миян кодьыслö! Отирыс тай зверрезся лёкжыкöсь ни лоисö! — пондiс дзуртны Дарья баб. — Кин бы мöссö торкис?

— Кикоксö эд эз коль, — сыр-лёль öшöтчисö Галялöн кикокыс, сiя бытьтö небзис, сырсмис, эз понды вермыны баитны, бытьтö мортсö асывсянь рытöдз вартлiсö, и некин эд дорйы. А эна минутаэзöдз эшö думайтсис, что мöсыс кытöнкö вермас лоны ловья.

— Мый пондам керны, Галя тётка? — посöдз дынын сулалiс пастухлöн зоныс и юасис.

— Мый ни öнi керан, Петька? Ой ни локтö, видзöт... Ашын ни юöртам милицияас.

— Айö эд абу виноват, — нач гажтöма шуис зонка.

— Кин шуö, что айыт виноват? — успокоитiс сiйö Галя.

— Айыт эд эз начкись, — пастухсö дорйис ни баб.

Бöра касьтылiсö зверь кодь отирöс, бытьтö былись отирлöн оланыс пондiс вачкисьны зверрез олан вылö.

Эта вылын и рознитчисö быдыс горттэзö. Галя бергалöв-керис гортын да водiс, куйлыштiс мымдакö ольпась вылын, и ачыс эз казяв, кыдз ланьтiс аскодя пыдын онöн, бытьтö шогалiсь.

Узьö инька керкуын дзир öтнас. Югыт. Гожумся ой видзöтчö öшынö: пет керкуись, и быдöс тыдалö вöр дорöдз, кылö, кыдз видз вылын герчкö кай, бизгöны номмез. Гожум узьö кокнита, дзир суналö, сiйö и видзöт, кыдз ойшöр бöрын пондас гöрдöтны ой ладорын кымöрыс, и чожа пондас югдыны.

Пыд онöн узьö инька. Узьтöн и мезмис лунся оланiсь. Но асылöдз саймытöг узьны эз сет пон. Серко пондiс сёйны-вувтны, дзик кинкö сiйö чувйис-нерис. Галяöс дзик кинкö ольпась вылiсь кыскыштiс коккезöттяс, повзьöтiс. Серко пытшкись посöдзын вувтiс эшö лёкжыка, чеччалiс да гыжьялiс ыбöс. Поди, кинкö гусясьö? Оз я садникын кинкö нетшкы лук или огуреццез, кöднö колö мырсьыны-быдтыны, уна уджавны.

Инька кровать вывсянь уськöтчис öшын дынö, öтiк кинас вештiс штора, косяк пöлöн пондiс видзöтны садникись гряддэзлань. Гряддэз коласiсь синнэз вылö усис морт, кöда рöма-дзара ойöн тыдалiс умöлякодь, мышкырасис и бытьтö бы вöлi мужик мыгöра. Бытьтö Вильыбись Миков. Гусясись тэрмасис, юрсö эз и лэбты, некытчö эз видзöт, сё уджалiс — нетшкис лук.

Медодз хозяйка повзис, но чожа бытьтö саймис. Повзьöм местö чувйыштiс аскодя гаж-вын. Чеччöвтiс бы öтöрö, да киэзас нем эз шед, вежöртiс, что куш киэзöн инь мортлö гусясись дынын нем керны.

Сэтчин да татчö... Киэз увтын нем сьöкытыс эз вöв, нем эз шед, медбы мыйись-мый дорйыны асьсö, но сэтöн син вылö усис комись гор сайись важ бусöсь пальто, кöда увтын öшалiс ружьё. Галя юр вевдöрсис грядка джаджись кватитiс зарядка патрон.

Дыр я зарядавны пишаль? Шовк и лый! Хозяйка зарядалiс пишаль и уськöтчис ыбöсö. Петiс посöдзö öтiк йöрнöсокöн, кöдöн узис, кöда бытшöма эз сайöвт не морос гöгöр, не коккез. Сынавтöм логзя юрсиыс гардыштсис юр гöгöрас...

Пон лёкжыка чеччöвтiс ыбöс дынö, пондiс гыжьявны ыбöс пöввез. Пöдан-иган осьтны чулалiс секунда-мöд. Серко пытшкись посöдзсянь уськöтчис кыдз ош вылö, сэтöн жö кивнитiс, бытьтö сiйö сiдз вачкисö, что вийисö.

Галя падмис, усис, но чеччöвтiс бурундук вылiсь, лэбтiс пишаль и горöтiс быд вынiсь.

Гусясись гряд коласын бытьтö тувдiс, öшис, пондiс гырись синнэзöн видзöтны хозяйкалань.

— Шедiн эд! Мый керан?! — юалiс инька, и сэк мужик перыта вугымтiс-чеччöвтiс пöввезiсь дорöм йöрлань.

— Кытчö пышшан?! Сулав! Мыччав рожатö! Ме öтпыр синнэзат сьöвзя! — чирзiс Галя, но кытчö тэ!

Тöдтöм морт йöр дынын кыдз бы падмыштiс, öшыштiс.

— Сулав, вежöм! — Галя ачыс ни эз тöд мый керис, киэс кыдз асьныс лэбтыштiсö пишальсö.

Чарöтiс лыйöм. Ой повзис и эшö öддьöнжык лöнис. Серко кысянькö чеччöвтiс хозяйкаыс дынö, пондiс никсыны.

Видз вылын дугдыштiс герчкыны кай, но недыр мыйись бöра пондiс дзуртны.

21

Кытшöм ни вермас лоны эта бöрсянь узьöм? Галялöн киэс сыр-лёль öшöтчисö, сiя шлёпкисис-пуксис посöдзö, и видзчисьтöг унньöвтiс да пондiс сыркявны-горзыны. Некытшöм лöг ас вылас эз пет, некин вылö эз лöгав, быдöс оланыс бытьтö орис. Кольччис дзир öтнас.

Дыр я горзiс посöдзын пукавтöн, дыр я зэгйисисö пельпоннэс, дыр я Серко ниртчис дынас, нюлiс рожабаннэсö, дыр я эшö нач эз югды, инька эз вежöрт. Горзiс-керис, сьöкыта ловзисис да коккесö гужгöмöн пырис керкуö. Пишаль бöр дзебис гор сайö, водiс кроватьö да бöра пондiс дрöжитны: оча пинь эзö локтö, кальскöтiсö, бытьтö кынмис, а думаэз пурисö: «Вийи эд! Кытшöм ни öнi олан лоас? Шондi петас, локтасö милициясянь и... судитасö».

Моросын пессис сьöлöм. Чеччылiс ольпась вылiсь, пондылiс кошшыны лекарство, кöдасянь лоис бы бур. Но керкуын некытшöм лекарство эз вöв. Бöр водiс, но синнэз эзö куньсьö.

Гожумся ой вежсис ни öшыннэз весьтiсь, öтöрын лоис нач югыт. Кылiс, кыдз улицаын борддэзнас шовкнитiс соседкалöн петух, китöстiс. Гажа петухлö, некин сiйö оз вид, оз вартлы, а кöть и видасö, вартласö, сэтöн жö вунöтас, китöстас эшö гажöнжык. А мортлöн петöны синваэз. Галя эшö вишыкасис, ружтiс-керис ольпась вылын, вöлись чеччис, пасьталiс йöрнöс, полöмöн петiс öтöрö, лэдзчис посöдзись и мунiс йöр дынö.

Турун вылын сырк видзис кыз лысва. Некытöн некытшöм виртор эз тыдав, нельки и следдэз некинлöн эзö тöдчö.

— Оз узьсьы тэныт, — сэтöн и эм ни бöра Дарья баб, посöдз дынын сулалö, басни адззö, висьталö, что ойнас кылöм лыйöм.

Галя местын мöдiк бы, бат, кылiс и эз этö баснисö, пиннесö гичыртiс да видзсис бы, эз баит. А сылöн сэтшöм мывкыд, что кöр умöль, сьöкыт чулöтны кад, некыдз оз вермы овны öтнас: вермасяс-керас думаэскöт и мунас отир дынö. Отиркöт баитас, висьтасяс-юасяс, и сьöлöм вылас лоö кокнитжык. И эта гожумся одз асылö эз вермы овны öтнас. Бур, что одз чеччис баб, локтiс и юасьö, кыдз да мый. Галя нем эз суськы, висьталiс кыдз вöлi.

Пöрисьжыкыс, кыдз медодзза судья, ылöса и веськыт мывкыда морт, кöда законнэсö тöдiс и эз, лыддис, что законнэс инькаэз дор, висьталiс, что нем тöждыны, сiдз и колö гусясиссеслö: кин мый кошшö, сiйö и адззö.

— Бур, кага! — медбöрын эшö висьталiс баб.

— Судитасö эд! — Галя пондiс горзыны, челядь моз сыркьялiс, треситчисö пельпоннэс.

— Адззöмыт кин понда горзыны... — баб öтiк кылöн эз дойд томжыксö. — Да вийин я тэ разбойниксö? Кытöн нö пон моз нюжласьö? Мылякö тай некытöн вийöмыс оз тыдав. Поди, тэ сылö эн и лый, только повзьöтiн?

— Лыйи, баб... — вишыкасис томжык.

— Эн жö пуляöн эд, а дробöн чажгин. Сэк мый но? Ась бöр гöгöрас новйöтö гöснечсö!

— Баб, абу я тэнат кытшöмкö лекарство? Сьöлöмö... — медбöрын шыасис Галя.

— Эм лекарствоыс, кага, эм! Лок юктала, то пондан сэтöн эшö кинкö увья шогавны.

Нач югдiс. Вот мыччисяс шондi. Рудкайез чирзiсö öшын вевдöрын, баксiс карта вылын мöс, жолькнитiс джыннянöн. Петух чатрасис улица шöрын, кыдз вына, смев хозяин, кöда некинлiсь оз пов, нельки варышлiсь, кöда лэбалiс вылын-вылын керкуэз весьтын.

Галяöс думаэз эзö ни сiдз дойдö, сьöлöм вылын невна личамыштiс шог, колiс чилькöтны мöс да котöртны Вильыбö. Тöн директор баитчис отиркöт, что петасö ытшкисьны, кадсö кыскыны нем, ежели погоддяыс сулалö: луннэз бурöсь, и турун только кер да кер — ытшкись да курт. И медодз директор думайтiс, что кытчöдз отир аслыныс оз турунась, колö тэрмасьны-уджавны совхозын.

Инька тэрмасис чилькöтны мöс, лэдзис сiйö карта вылiсь, вердiс пон да кань, но вунöтiс сёйны ачыс: пасьталiс басöк платье, юрыс бердö гардыштiс чышьянок да тэрмасьöмöн иньдöтчис уджавны.

Бöрсяняс бура ни шонтiс асывся шондi, видззез вылын кыз лысваöн миссис кузь турун. Лысва синнэз одзын косьмис, и кизерик, блин кыза туман логок дорын тэрмасис шондi югöр весьтiсь дзебсисьны вöрокö. Сьылiс ыбшар. Жар и гажа бöра локтiс луныс. Но инькалöн сiдз некытшöм гаж эз и вöв. Мунiс да бöра синнэзас сöдзисö синваэз, быд шагын сiдз топ и кылiс, бытьтö Вильыбын кинкö уннялö-горзö, причитайтö: «Вийисö-ö да вийисö-ö-ö!..» Галя сувтчышалiс, кывзiсис и кылiс, что этö уннялö кöин моз пон, бытьтö былись тöдö, что кинкö вермас кувны.

Чожа директор сибöтчис деревня дынö, кöда узьöм бöрын бытьтö эшö сулалiс, тiлис синнэз. Отир вöрöтчис жагöн. Галина Макаровна мунiс ни улицаöт, кежласис то öтiк керку дынö, то мöдiк дынö, баитiс отиркöт, корасис быд мортöс уджавны, мед том и пöрись босьтiсö литовкаэз да петiсö видз вылö, сувтiсö сьöрсьöн-бöрсьöн видз вылö, кыдз вöвлi кöркö и öдззисö ытшкисьны да сiдз, что литовкаэз бы шутнялiсö. Деревняын оссис бы вежалун — праздник. А директор покосöн мунiс бы медодзын.

Кыдз бы эз вöв, мый бы эз ло, но отиркöт баиттöн том инька бурмöтiс сьöлöмсö, сiйöн, что эшö öтiк морт Вильыбын эз шыась сы йылiсь, что кинкö кулiс. Гажажык лоис Галина Макаровналö. Шондi лоис кыдз шондi, лун оссис кыдз лун, отир вöлi кыдз отир, кöть и некин томмез коласiсь эз висьтав, что мунас ытшкисьны.

22

Миков бытьтö пурöм пон, ойнас локтiс гортö, пырис важ керкуаныс, ружтытöн чöвтiс вирöсь вешьянсö, ружтышавтöн да кивзышавтöн пызан вылiсь пань-бекöр коласiсь кошшис жугалöм зеркалотор. Маласьтöн да мышкырасьтöн, зеркалосö киас видзтöн видзöтiс, мый жö сылöн бекреннезас, öддьöн я дроббез разисö бöр гöгöрсö. Но ранаэз бура эз вермы адззыны, кöть и кытiськö коккезöттяс визывтiс вир, кöда вирöсьтiс кок лидзиммесö, вотялiс джоджö. Зубытöсь бекреннез, но ветлöтны вермис, да и вож коласыс вöлi дзонь. Кивзышалöмöн, вартлöм пон моз кошшис чышкöт, чышкöтнас кыдз кужис и вермис öмлöсалiс-кöрталiс бöр гöгöрсö.

Вöлi эшö ой, но öтöрын вöлi сэтшöм югыт, что тыдалiс быдöс. И керкуын бура тыдалiс, медбы адззыны мый колö и оз.

Недолыт вöлi зонкалö, кöть и вывтi бöр гöгöрыс эз вись, ранаэз вöлiсö сэтшöмöсь, что нысянь он жö кув. Позис овны, только... «Этö сука Борисыс эд! Юкталiс спиртнас, ылöтiс гусясьнытö... Аслыс и колiс мунны, мед сукалö пöжалiсö бöр гöгöрас да сiдз, ась бы мошнясö дроббез разисö, сэк пондiс бы тöдны. А то гортас узьö, ашын чеччас — пиннес гер, пондас серавны, что колiс кужны... Эшö шуас, что сiдз тэныт и колö! Оз я мый я сэтшöм кöиныс шу?! Шуас! Сылöн, сукалöн, вижлок öмас пыр сiт пуö, кöть кинöс дзерöтас, эх!» — зонка гичыртiс пиннесö синваэс петiсö не зубытсянь, а обидасянь, сьöлöмсö курччалiс, лöг пöдтiс.

Недолыт зонкалö, кöть и абу вывтi умöль. Маласис-керис и вежöртiс, что бöр гöгöрас ранаэз абу ыджытöсь, сiдзкö, позьö овны, только, натьтö, колас куйлыны мымдакö. Куйлыны, куйлыны... Кыдз зверьлö или понлö, кöда смела ветлiс гусясьны, эз бура думайт, кинлiсь и мый сöтны. А мунтöн думайтiс, что нем сэтшöмыс оз вермы лоны. Кöчыбын олöны кык инь морт, кöдна, натьтö, ойнас керкуись полöны петны, а петiс, что кытшöмкö страм курыт лук понда лыйисö.

Зонка бергалöв-керис асланыс важ керкуын, бöра пондiс видны ёртсö, мурзис: «Но, Бориска! Кужан. Етша кöр ачыт ойезнас котрасян йöз садниккезö, пыр миян кодьсö... Тöдiн, кытчö менö иньдыны, кöр полан начальство коддезiсь». Борис... Борислöн былись гортын пыр нем сёйны, пыр олöны кытöн нач тшыгöсь, кытöн сёйöны мый шедас. Зонкалöн и мамыс то гортын эм, то абу, некытöн оз уджав, нем оз кер, пыр öвтчö-кошшисьö тшыг пон моз. Вывтi ни дышöв инькаыс, эз куж и эз вермы овны аслас мужиккöт. Ветлiс жö жöник сайö, ештiс вайны куим кага, но куим коласiсь овмöтчис только Борисыс, а мöддэс... Кулiсö нето тöлöн кынмисö кöдзыт керкуын — ен босьтiс умöль мам киись учöттэсö. Сэтшöм мам весьтын, натьтö, отирö эзö бы пöрö, бат, алкоголиккезöн жö лоисö, кыдз Борискаыс, кöда томся-томöн пондiс юны вина, велалiс гусясьны. Сэтшöмöсь мамыскöт дышöсь, что садниканыс озö вермö садитны картов да лук, озö видзö пода, кöть олöны деревняын, кытöн быдöс ылöса да чож морт асьсö вердö.

Олöны деревняын мам да зон — кыкнанныс пöтöсь только сэк, кöр кытiськö мыйкö гусяласö да сёясö, кöр эшö горшшезныс пыр дзользьöны вина вылö: юасö, узясö, дзар керасö — бöра не сёйны, не юны, и бöра ни кынöм сималö, одзлань колö гусясьны. И Борис котöртö Миков дынö, пондö пиксыны:

— Колька, тэнат сёйнытö мыйкö эм? Вай кöть няньтор да этö... Ойнас пыравны я мый я кинкö садникö, поди, огуреццез ни быдмöны... Пыралан?

— Кытшöм нянь коран менчим?! Мый миян пекарня я мый я?

— Мамыт эд пенсия босьтö.

— Но и мый?!

— Богатсялiн, Миколок, богатсялiн, видзöт, кыдз бы эта... — Борис кöстö ассис, полöтö Колькасö. Колькалöн мам пöрись, чожа кулас, и вöтас сiя жö тшыг олан. А öнi зонкалöн пöрись мам ружтiс да садитiс тыр картов, лук, йöрын быдмöны огуреццез, бобиэз, анькытш. Мый колö, сiя и быдмö Колькаэзлöн.

— Уджавны колö! — Колька висьталiс ёртыслö.

— Мый ме тэныт мерин я мый я уджавнытö?! — пиннес гер Борислöн. — Уджав, колö кö... Тэ эд ачыт киэзат вилаэсö да кöртзырсö он жö куж видзны, а польдан!

Былись, Колька ачыс садникын нем оз кер: асылöн чеччö, иньдöтчö Бориссэзö, ежели Борис одзжык оз ешты локны ны ордö. Бöрсяняныс мамыс тотьö: «Зон, бöра öнджаэзас мунан! Эн бы сэтшöммескöт тöдчы. Нiя дзугöны тэнчит олантö, велöтöны юны, куритны, гусясьны».

Колька мамлiсь басни бытьтö оз и кыв, и öнi медодз усьöны тöдвылö ёртыскöт пантасьöммез, лöгыс пондö петны, бобгö ныр увтас: «Но тэ и зараза, Борис!» — ранитöм ош моз турбыльтчис важ сiмöм кровать вылö, чöлiс, пондiс вöрзьытöг куйлыны.

Гожумся ой чожа чулалiс, öтöрын нач югдiс, пондiсö китсасьны петуххез, воробейез чивзiсö посöдз дынын. Мам, кылö, чеччис мöд керкуас да петiс öтöрö, ружтiс, кивзышалiс, видiс петухсö. Сыбöрын вöлись мыйкö вылö пырис важ керкуас, шурки-шарки мыдз коккезнас локтiс джодж шöрö, повзис:

— Коля! Гортын я тэ?! Кытшöм нö вир джоджыс шöрö вотялöма?! Тэнат я мый я?! Эзö я тэнö бытшкалö?! Кылан?!..

— Мый ыксан?! Ме тэныт абу пельтöм, кыла! — мур-мар шыасис зонка. — Дойдi кокöс! — Кытчö?! Мыля?!

— Тэныт мый?! Пыр уна бы тöдан и адззан!

Мамлö недолыт, мамлöн сьöлöм висьö зон понда, мед кöть сiя кытшöм, ась кöть сыкöт мый вермас лоны. Мам сэсся эз понды юасьны, чушки-пашки петiс керкуись. Зонка куйлiс кровать вылын и сылö лоис сё умöльжык, видзчисьтöг пондiс кынмыны, кöть керкуын и эз вöв сэтшöм ыркыт. Сяткöтiсö пиннес, сiдз дрöжитiс. Кынмис зонкаыс. Лядьвейсö пондiс чукöртны зубыт да сэтшöм, что йöвкис, бытьтö кöрталiс коскöдззас. Колька пондiс гичравны пиннесö да няправны кулаккесö.

— Кытöн Миколыс?! — öтöрын пондiс кывны тöдса голос, юасис мамлiсь, кöда мыйкö вылö петiс посöдзö.

— Узьö, — шыасис пöрись мам. — Коксö вирöдз кытчöкö дойдöма.

— Ась петалö!

— Ачыт саймöт. Ме ог лысьт. Лöг талун зонкаыс. Поди, сё лöгыс петö, мыля тракторыс вылiсь вашöтiсö. Пырин бы керкуас...

— Вунöтны колö тракторрес йылiсь ни, — висьталiс Борис, бытьтö кодя морт, и öшис öтöрын голосыс. Миков одзлань вöрöтчытöг куйлiс важ кровать вылын и пöжис ранаэз, синнэз бы эз осьт, сэсся топ шыасис совхозiсь кузь кыла директор, и дума сöтiс: «Вот тютя! Эшö мыйлöкö гортöдз локтöм. Поди, кошшö менö? Кыдз черсö босьта...»

Гичыртiс пиннесö, дзебсисис бы, но кытчö керкуын дзебсисьны, сiйöн буржыка и шебрасис важ öнöн — тöбалiс нельки юрсö.

Улицаын кылiс директорлöн голос да öшис, и бур, что эз пыр керкуö.

Шондi лэбтiсис вылö. Мам кылiс йöрын, но Миков эз и думайт чеччыны, сё куйлiс, пöжис боккесö, мымда колiс. Но öтöрын бöра мамыс пондiс кинкöткö тоткыны, бöра кинкö, кылö, юасис, эм я гортын Миколыс.

«Но тютяэз, но... — Миков бöра гичыртiс пиннесö, кровать вылын бергöтчис öт бок вывсянь мöдыс вылö, пондiс кывзiсьны, и вот бура ни пондiс кывны участковöйлiсь голоссö. — Но паразит!. — одзлань ружтыштiс зонка. — Мый нюкьясьö? Или кылiс ни лыйöмыс йылiсь? Быдöс эд, Миколок! Шедiн эд, кыдз гидын баран! Вöлись шырасö и кучиктö кулясö!»

Повзис Миколыс, кöть ас мознас бытьтö некинлiсь эз пов, а сьöлöмыс повзис милиционерлiсь, кöр вежöртiс, что пондас ковны висьтасьны, мый ойнас вöлi. Повзис зонка, юрсö сюйыштiс юрöдз увтас, пеллесö буржыка вевттис öнöн. Но сiдз и этадз öтöрись кылiс, кыдз участковöй кайис посöдзö, пырис и пытшкись посöдзö, дзуркнитiс керку ыбöсöн и висьталiс:

— Миков, тырмас узьны! Чеччы да петав посöдзас. Ме бы тэкöт баитышта.

— Мый месянь колö?! — зонка вывсис шупкис шебрас.

— Колан! Вöрöтчы, ме тэрмася!

«Мент. Из увтiсь адззас! — Миков ружтышавтöн пуксис кровать вылö, кöмалiс вешьян, пондiс маласьны: куритiс бы, но сылöн табак етша кöр вöлi, и кöмтöг да косви ляч пасьтöг петiс посöдзö, эз чотышась, кöть и коккес висисö, и синбугыллес вöлiсö гöрдöсь, синнэс дульсмöмась, юрсиыс пашмöм, и юрыс висьö.

— Бöра я мый я код? — панталiс милиционер, содтiс: — Пуксьы бокам и висьтась, кыдз тэ...

— Мый ме? — кымöс увтсянь видзöтiс зонка, лöсьöтчис мунны ни участковöйкöт, кöда весись эз лок.

— Зон, мый бöра да кытöн керин?! — пондiс посöдзын кивзыны мам. — Колька!

— Нем ме эг кер! — мурзьыштiс Колька, пуксис милиционер бокö.

— Мам, эн пов. Нем умöльыс абу. Зоныткöт баитыштам, и ме муна, — мамлö висьталiс участковöй, зонкалiсь юалiс. — Но, ёрт, висьтась, кыдз тэ Ёгор Петровичыслiсь черсö гусялiн?

Колькалöн синнэс баралiсö, öшис, пишкис нырнас, бытьтö руыс эз понды тырмыны, немöн лоис лолавны.

— Висьтась, висьтась, то ме тэрмася, — немымда эз серав милиционер.

— Ме эд висьталi ни, кытiсь черсö босьтi! — вöлись мурзьыштiс зонка.

— Сiя мöдiк заявленнё ни гижö. Норасьö тэ вылö... Бытьтö иган увтiсь пышшöтöмыт. Сiдз эд?

— На хрен бы меным сылöн страм черыс, ежели сiя эз бы валяйтчы йöрныс бокын. Улицаас...

— Ме бы сiдз жö думайтi, да сiя, кывзы, сiдз оз думайт. Судö лöсьöтчö лэдзны, а сэтчин вермасö öддьöн дойдны. Сетiн бы черсö, и некытшöм бы басни эз вöв, или кыдзкö мöднёж вештiсин...

— Да ме важын ни страмсö нöбöтi и аслам киэзöн кыз кынöмлö сетi! И мый сылö эшö месянь колö? Мыля менö вижлок öмнас сёйö бы?! И ась сёйö! Бат, сьöлöмыс бурмас! Етша эшö директоравтöнняс отирыслiсь юис вирсö, дак менчим эшö юö. Мед пöттöдз юö, ась менö тюрьмаö страм черыс понда пуксьöтöны, ась... Но локта кö ловйöн сэтчинiсь, сылiсь юрсö керала!

— Оз ков сiдз, Коля!

— Керала! Спекулянт...

Гажа асылыс. Шондiыс быд вынсис шонтö. Улицаын етша кин тыдалö. Миков немымда ни эз пов судiсь, Пестеринiсь. Полiс сiя сэтiсь, что пондасö кыскавны ойся понда: норасяс эшö директорыс, кöда одз асывнас, кылö, ветлöтiс улицаöт. Сiйöн зонка дзир-бар видзöтышалiс öтöрö да мöдöрö, чожажык янсöтчис бы милиционеркöт, кöда юасис чер йылiсь, эшö мыйкö вылö басни лöсьöтiс:

— Мый ни керан? Кыдз олан? Думайтан я кытöнкö уджавны?

— Кытöн ме понда уджавны? Некытöн ог ни...

— Эх, Миков, Миков! Колiс я уджавтöннят юны да Пестериныслö мунны гöрны? Колiс кö сылö гöрны, ась юасис-висьтасис бы директорыслö и вöлись тэнö... Сiдз и пондан мамыт голя вылын той моз вердчыны. Кузь эд лоас оланыс.

Зонка пишкис нырнас, видзöтiс мöдöрö, дзик эз кыв милиционерлiсь баснисö. Сылö лоис умöль: сэтшöм шог пидзыртiс, что горзiс бы. Но эз горзы, терпитiс, видзсис и швыркнитiс-чеччис посöдзись да пырис важ керкуас.

Бур куйлыны гожумöн ыркыт керкуын небыт ольпась вылын, кöр оз ков мунны уджавны. Но зонкалö недолыт, сэтшöм мукöд минутаö умöль, что эз ни бы ов — кулiс бы, некинöс эз кыв, эз адззы. Но одзöв эшö сылö кувны, етша эшö олiс, и ружтышалö, и бобгö-видö кинöскö, матькö асьсö, енсö, Борис ёртсö. Тöдвывсис эз и понды öшны Пестериныс, кöда увья вашöтiсö трактор вылiсь, кöдалö керис бурö, а петö... «Бур мортö пуксьö, зараза! А петö... Миян коддесö тальö, миян коддесö умöль отирö пуктö... Враг! Тальны бы юрсö или сьöлöмас заргыны пурт! А мый сэсся? Кыдз сэтшöмыскöт овны?» — думайтö и думайтö зонка, асьсö дорйö, мöдiкöс свет вывсис вийö бы. Думаэз озö лэдзö шоччисьны.

— Колька, чеччин да сёйин бы... Ме поплёбка пуи и луктуруннэз тойи... Тшыгйöн кулан эд, — мамыс дзуркнитiс-осьтiс ыбöс, корис сёйны.

— Оз менам симав, — висьталiс зонка.

— Кыдз оз симав? Луныс эд уна ни...

— Оз, мыся, симав! — лöгжыка висьталiс Миколыс, и мамыс ружтыштiс да пöдналiс ыбöссö.

Сэтшöм лун петiс Миковлö, сэтшöм олан локтiс зонкалö, кöдö сiя ачыс кошшис, но дорйисис.

Шондiа. Лöнь. Жар да сэтшöм, что ылiсянь тыдалö, кыдз ыб дорын «орсö» йöр, ёрö синнэз. Петух посöдз дынын осьтöма öмсö да лолалö öмтырнас. Пон лолалö öмтырнас жö, мыччöма кывсö, нюжöтöма, и öмсис вотялö дуль. Бобиклö шондi югöр вылын умöль. Сiя чеччö улица шöрись да мунö чоммез сайö.

Дыш отир дышöтчöны уджавны нельки гожум шöрын. А Миковлöн пöрись мам оз куж и оз вермы весь овны. Сiя олiс и пыр уджалiс, пыр педзис-жöдзис, гуддисис, бытьтö пыр мортлöн мыйкö ендiс кертöг, бытьтö сытöг некытöн и нем эз керсьы, эз шогмы. А öнi пöрись ни, пыр висьö косыс, киэс, юрыс бергалö, сьöлöмыслö сьöкыт, дышыс петö вöрöтчыны, но весь овны оз вермы, эшö ас могись гуддисьö садникын, кытöн гряд вылiсь нетшкöвтас то ёгтурун, то кöшись ваöн киськалас огуреццез, кöднö ачыс оз и сёй, Колька понда быдтö, Колька понда садитö лук, картов, переццез, кöдна йылiсь кöркö эзö и кывлö, а öнi быдöн садитö. И зонкалöн мам садитiс зоныс понда, эд мам берся олан адззылiс и пешлiс: тшыгьялiс пöттöдз, кынмис-косьмис, кöр мужикыс одза-одз кулiс, и пыр колiс быдöс керны аслыс. И керис инька быдöс, мый вермис. Етша кöр котöртiс йöзö, эз кор соседсö отсасьны, эз куж гусясьны, кöть гортын и нем бурыс эз вöв. Умöльöла олiс мам, но ошшасьö, что олiсö и олö бура. Öнi некытöн оз ни уджав, босьтö пенсия, ас кежас думайтö, что деньга оз шедты, а сетöны.

Мамлö нем вывтi бурыс оз ков — нянь эм, и быдöс эм. Только вöлi бы здоровье да Колькаыс! Зоныс понда пыр тöждö мам, отирлö ошкö — мортö бы пöртö зонкасö, а сiя... Оз бы уджав, оз гöтрась, куритö да юö вина.

Мам петö садникö, бергалö гряддэз коласын. Жарсянь бöра пондö висьны юрыс, сiя пырö керкуö, юö бы юрвисянiсь таблетка. Джаджись кошшö лекарство, кöда абу и небны немöн. И думайтö мам: «Ась. Кристос мекöт, бат, ог жö кув, — и лöсьöтчö ветлыны аскодя жö Митрейика ордö, кöдакöт неделя ни эз пантасьлö, эзö баитö. Пöрись ружтытöн ляшмасис-мунiс Митрейикаэзö, кöдакöт вель дыр пукалiсö шондiгаж сайын посöдзын, берся баитiсö, и вöлись мамлöн сьöлöмыс бурмис, вöлись гортö лöсьöтчис мунны кокнитжыка ни.

— Мый ни зоныт керö? — медбöрын юалiс Митрейика.

— Мый сылö керны? Öнi тöдан эд, мый керöны томмес. Уж моз куйлö тай важ керкуас. Кöркöсямоз томмес öнi асьнысö озö вийö. Этö ми эд сэрпöсь кынöммезным понда ой и лун уджалiмö, да пыр пöттöдз эгö сёйö...

— Оз я кывсьы, бытте пö Колькаыс гусясьöма... Егор Петровичыслiсь чер пышшöтöма... — пиньöла öмыс Митрейикалöн осьта, юрыс висьö быдöн и быдöс понда: колiс жö юавны, мый оз ков...

— Кытшöм чер?! — недолыт лоис Миков мамлö. — Мый, поди, сiя спикулянтыс черöн керас, кöр асланым эмöсь?

— Отирыс баитöны эд...

— Нем керны отирыслö и лёбöны... — висьталiс мам, и бöра сьöлöмас кыдз бытшкисö емöн, ружтытöн иньдöтчис гортö. Но эз ешты локны гортöдз, только улицаын креста туй вылö тальччис, пантасис мöдiк, Митрейика кодь жö, и юалö: — Баб, зоныт мый керö? Милицияас эзö жö нуöтö?

— Мыля бы сiйö милицияас нуöтасö? — мамлöн нельки лöзöтiс чужöмыс, пондiс пöдöмöн лолавны.

— Абу я гусясьöма...

— Отирыс гусясьöмнаныс и олöны, да некин оз адззы и оз кыв, а миянöс мыйкö понда сёйöны бы! И кытшöм бы чер öнджаыслiсь гусялiс?! — пöрисьлö нач умöль лоис, стыд отир синнэз одзö мыччисьны, кöть и кувны пондан, фельдшерыс дынö он ни лысьт котöртны.

23

Пöрись сулалiс-керис улицаын, öмтырнас лолалiс, шоччöтiс сьöлöмсö да вöлись бедьöн кыссис гортöдззас, пырис керкуö, зоныскöт пондiс баитны.

— Миков, отирыс мый гыöны... Былись я мый тэ страмыслiсь чержугсö вöрзьöтiн?

— Да ась сiя чернас тöдан кытчö мунö!.. — зонка чеччöвтiс ольпась вылiсь, вунöтiс, что бöр гöгöрыс зубыт, пондiс ыксыны да матькисьны. — Некытшöм ме чер эг гусяв! — пыдына чушыктiс-лолалiс, содтiс. — Черсö ме йöр угöвсиныс адззи да бöр ни сетi.

Недолыт пöрись мамлö, веритö зоныслö, жалейтö, сiйöн öддьöнжык и пондö висьны юрыс, сiйöн чожажык шондi гажись и дзебсисис керкуö да водiс джоджö.

Миков куйлö кровать вылын. Зонкалö умöль, синваэс петöны бы, но оз горзы, а лöгасьö, мурзьö, кыдзкö вештiсьö бы Егор Петровичлö, ась страм морт пондас тöдны, кыдз горшсö летны, кыдз бöрöн кайны морт вылö, висьтавны сiйö, кöда абу.

Лун модейтöмöн чулалiс. Миков нач тшыг асывсянь рытöдз куйлiс ольпась вылын. И одз рытöн эз чеччыв, чеччис вöлись кытöнкö ойшöр бöрын, кöр, натьтö, быдöн ни узис.

Миков чеччис, бытьтö немымда эз кыв, что бекреннес зубытöсь, петiс гортсис, бöрсяняс жагвыв пöдналiс посöдз ыбöс. Посöдзын видзöтчис, кывзiсис и вöлись улицаöт иньдöтчис Егор Петровиччезлань.

Кымöрыс ойланьсянь нёджжасис ни гöрд рöма чужöмбанöн: вот-вот мыччисяс шондi, китöстас петух, саймасö каёккез. А öнi деревня эшö узис, некин и некытöн эз тыдав. Миков йöррез пöлöн локтiс Пестерин магазин дынöдз, йöрнöс зепсис кыскис истöггез. Чиркнитiс öтiк истöг и шупкис бисö магазин посöдз увтö, кытчö мый вермöмась, сiйö и чапкöмась: чигаркапоннэз, кытшöмкö гижöттэз, картонiсь коробкаэз — ёг, лыс да рос, кöдна бердö сэк жö кутчисис би и пондiс нювны. А зонка чотышасьтöн, кузь шаггезöн бöр мунiс гортас. Тэрмасис, но эз котöрт, мед кин бы и адззылiс, эз думайт, что кинкö шогья пышшö.

Гажöн китöстiс петух. Улицаын нач югыт. Тыдалiс ни, кыдз чомлань котöртiс крыса, и сылань жö лэбзис воробей. Егор Петровиччезлань кыз тшын гардчис и лэбтiсис вевдöрö, шовкöтiс-сотчис магазин. Би нюжласис ни кымöрлань, йöктiс короминна вылын, сьöласис бичиррезöн, гугйис-гардiс ру. Миков тэрмасьöмöн пырис важ керкуаныс, кыдз вöлi йöрнöс-вешьянöн, сiдз кыминь и брякнитчис кровать вылö да пондiс куйлыны, бытьтö нем эз вöв и нем эз тöд. Кинкö öтöрын, кылö, пондiс летны горшсö: «Сотчамö-ö-ö!»

— Быль я мый я сотчамö?! — посöдзын пондiс ружтыны пöрись мам. — Коля, быль я мый я сотчамö?!

Мам жолькнитiс ведраöн, эшö ыкöстiс зоныслö, что сотчöны, и прос ведранас ружтытöн, кивзытöн да ойзытöн иньдöтчис Пестериннэзлань, кытöн тыдалiс би, гардчис тшын.

Миков думаэзнас чеччöвтiс бы да висьталiс мамыслö, мед эз котрась, кöр сытöг кусöтасö, но эз вöрзьы.

— Сваття, Миколыс гортын?! — кинлöнкö чиння голос öшын увтын вермис быдöс шыэз. — Абу я пö Миколыс магазинсö öзтöма! Кылiн, баб?!

Пöрисьыс эз вöв гортын. Сiя гардчис би дынын, жöдзис ведраöн отир коласын, кыдз вермис, сiдз и кусöтiс би. Кусöтны вöлi нем: короминна укнитiс увдöрö, бичиррез ыджыт столбöн нетшкöвтчисö вевдöрö — пышшисö кымöрö, мукöдыс киссисö керку юррез вылö. И мужиккес пондiсö ыксыны, что колö киськавны матiсьжык керкуэз, мед эз öзйö. Веськыта кö висьтавны, етша кин гардчис би гöгöрын: кöркöсямоз етша кин кусöтчис. Талун только пöрись лапöв котрасис би гöгöрын...

Гажöн сотчис Пестеринлöн магазин, сы гöгöрын мымдакö педзис отир. Кинкö ештiс мунны Миковвез öшын увтöт да ыкöстны, что пожарсö керöма Миколыс.

Эна кыввес зонкалö бытьтö сьöлöмас мöртчисö, повзьöтiсö. Миков вежöртiс, что сiйö адззылiсö магазин öзтытöн. Зонкалö лоис нач умöль. Медодз эз тöд, мый керны, думаэзнас пышшис бы вöрö — дзебсисис. Но дыр я тшыгйöн да номмес дынын олан?

И сэк грядка джадж вылiсь синнэс вылö усис мамыслöн важ пöкрöм, кöдöн важын ни озö йиасьлö. Но пöкрöмсö мам оз шупкы, мыйкö вылö видзö. Миков видзöтiс-керис пöкрöм вылö, чеччис ольпась вылiсь, босьтiс пöкрöмсö, керис сэтiсь кытш, пöкрöмлiсь öт конецсö бура кöрталiс грядкаыс бердö, юрсö сюйыштiс кытшас да öшöтчис.

24

Гожум шöрын дзебисö зонкасö — том мортсö сюйыштiсö муö, кöр быдöн бы олö. Мам нач бöбмис горзöмлö, енлiсь корис смерть, лöсьöтчис джагöтчыны ачыс... Быдöн жалейтiс только пöрисьсö, но етша кин горзiс Миков понда, етша кин жалейтiс зонкасö, топ сiдз и колiс. Только Борис гардчис отир коласын, дзебсьытöн пöттöдз сёйис да юис вина, жалейтiс ёртсö, висьталiс, что Колька кодьыс некин эз вöв и оз ни ло, что сiя вöлi медбур морт...

Томмез кулiсö не öтнёж, дак мöднёж. Вильыбын öтiк лунö дзебисö öтiкöс, мöдiк лунö гробöн городiсь вайöтiсö Бугай Сергейлiсь медыджыт зонсö, кöдö нем понда начкылöмась пуртöн. И Сергейлiсь зонсö дзебисö Миков бокö. Эшö чулалiсö кык лун, и Чечняись ни Вильыбö машинаöн кыскисö Митрейика баблiсь внучексö, кöда армияö мунiс нач неважын.

Войнатöг и война вылын торксис отир. Еныс я мый я сiдз керис олансö греххез понда? Мыля лэбис война чеченнэзкöт, кöдна, натьтö, абу жö зверрез, а отир чужöмаöсь, отир кодьöсь. Кöркö и Вильыбын чеченнэс уджалiсö: брякнитiсö-лэбтiсö сэтшöм ферма, что öнi гусьöн разьöны бы, да разьны бандит коддес озö вермö.

— Паздыны и колö сэтшöммесö! — чеченнэс вылö медöддьöн ружтö-мурзьö Пестерин, лöг петö быдöн вылö. Нач ни вунöтiс, что сылö, кöр эшö директоралiс совхозын, эна враг-чеченнэс ферма кертöн вель уна козьналiсö деньга, кöда сылö кылалiс нач весись. Сэк Егор Петрович уджалiсь отирлiсь шедтöмсö эз стыдитчы босьтны. Босьтiс деньга да юис винаöн, а аслас «невесталö», Öлдöттялö, ошшасис:

— Ме эд, Дуся, ме!.. Меным деньгаыс кымöрсянь киссьö.

— Бур, бур, — нето сералiс, нето былись ошкис Егор Петровичöс «невестаыс». — Бур, кöть мöдпöв вур да видз, кыдз бы йöз киэзöн шедтöмыс эз тасась горшат...

— Дуся, тэ менö, батя, эн полöт! Ме мортыс абу полiсь и кужа отирыскöт овны, кöть вильыбсаыскöт, кöть чеченнэскöт. Вежöртiн, нятьöсь дубас?!

— Вежöртi, вежöртi...

Сэк эз вöв война, а öнi мунö война — ылын гымалö Вильыб дынсянь, но кылö татчöдз, татiсь гусялö отир, быдöнлiсь чеплялö сьöлöммез не öтнёж, дак мöднёж.

Мый бы эз вöв, но совхозын пондöтчисö керны туруннэз, кöть ытшкисьны да куртны кöркöсямоз быдöн эз котöрт, эз тэрмась. Совхозiсь директор сибалiс быдöн ордö, корис томмесö уджавны, но юртöм-бöб отир эз адззись, сiдз кыдз вештiсьны вöлi немöн или вештiсисö етшаöн.

Медодз пондiсö ытшкыны клеверрез, кöдна таво топ орсiсö да быдмисö, синнэз гажöтiсö, быдмисö тшöкöсь, кузьöсь, только кер турунсö аскадö. Вöлись тöвнас мöссэз пондасö сёйны пöттöдз, пондасö сетны йöв, лоас деньга.

Совхозiсь кольччис трактор «Беларусь». Разьны лöсьöтчисö тракторсö, но Галина Макаровна, кыдз пондiс уджавны директорнас, быдöнлö висьталiс, что öшас кö «Беларусись» кöть öтiк гайка, кöть öтiк винт юасö винаöн, сiя прокурорлö оз понды норасьны, а босьтас чер и гусясисьлiсь кералас киэсö. Медодз том инькалiсь некин эз пов — некин дрöг эз кер, но, тыдалö, öтiк-мöдiклöн юррезын вöрзисö думаэз, мужиккес пондiсö вежöртны, что том инь морт — абу мужик, сылöн аскодя мывкыд, и лешак оз тöд, мый вермас керны.

Кыдзкö öтпыр Тонялöн мужикыс пырöма контораö, вайöма вина, сувтöтöма бутылкасö пызан вылö и пондöма кивзыны: «Галина Макаровна, тэ бур морт, кодя... Ежели бы тэ эн директорав, менам инькаö фермаас эз ни бы уджав. Вай жö ми тэкöт сто граммöн юыштамö, а...» Галина Макаровна видзöтöма-видзöтöма мужичок вылö, босьтöма тыра бутылкасö да винасö мужик юр вылö кисьтiкö шуöма: «Видзöт, кыдз ме кужа юнытö, тэ сiдз жö велöтчы!» «Спасибо!» — этчö шуöма Тонялöн жöникыс да петöма контораись и некинлö абу ошшасьöма, кыдз директорыскöт юöмась винасö, но кытiськö эта йылiсь кылöмась отирыс — быдöн тöдö мый вöлi...

Галина Макаровна кыдзкö тракторист Фёдорлiсь, кыдз кодя мортлiсь юалiс:

— Он я воч «Беларусьсö»? Он я лöсьöт ытшкисян кежö?

— А чёрт тöдö! — Фёдор медодз вишыкасяс, быд тор керны сэкжö оз уськöтчы, а мымдакö кыскас кадсö да вöлись и кутчисяс уджавны, и öнi мугис, видзчисис, оз я директорыс понды кеймисьны да кöсйыны деньга.

И директор гажöн шуис:

— Давай кыкöн пондам тракторсö вочны! Тэ пондан гайкаэсö винтитны, а ме понда тэныт киат сетавны!

Шынньöвтiс сэтöн Фёдор, гардыштiс: «Тэ сiдз ни менчим гайкаэсö винтитiн да сэтчöдз, что ме ог лысьты паныт кыв горöтчыны, чожжык котöрта уджавны».

И Фёдор, кыдз пыр, кытiськö мыйкö адззö и керö да отир синнэз сайын, важ гараж пытшкын, бытьтö полö отир синнэз одзын уджавны, медбы эз вомдзалö.

Уджалiс трактор дынын Фёдор — неделя-мöд эз мыччась отир синнэз одзö, и вот тыр-пыр мыччисис трактор, катыльтчис контора дынö, сувтчис, кабинаись нятьöсь-мазутöсь чужöмсö мыччис тракторист, ыкöстiс: «Галина Макаровна, гиж меным приказöн благодарность, мед менам сьöлöмö бурмö, а то сто грамм тэ дыр ог лысьт юны...»

Директор лоис рад, чеччöвтiс контора посöдзись и быдöн синнэз одзын öшöтчис Фёдорыс голя бердö да окалiс нятьöсь чужöмсö.

Сiдз вöлi нач неважын, топ тöн Галина Макаровна окалiс Фёдорсö, а талун трактор урöтö ни ыб вылын, ытшкö клевер.

Гожум тулыссянь бур: кöр колö, зэрыштлö невна — юкталö му, туруннэз быдтö. Вöрын эм тшак да ягöд, и весь олiссез тшакьялöны ни. А совхозын керöны турун. Неделя ытшкисисö да куртiсö ыб вылын. Отир уджалiсö, кöть и эзö ружтö кöркöсямоз öт пемытсянь мöд пемытöдз. Уджавтöн видзöтлiсö часыэз вылö, бура тöдiсö, кöр шоччисьны, кöр пажнайтны, кöр уджалансянь локны гортö. Но мымда вермисö, мымда колiс, уджалiсö. Ыббез вылö сувтöтiсö зороддэз, тэчисö турунсö трактор доддез вылö. Но быдöн вежöртiс, что эта туруныс тöвйыны оз тырмы. Турунасьны вöлi сьöкыт, отир топ мыдзисö ни уджавны, да и быдöнлöн эм эшö аслас пода, и колö аслыныс керны турунсö, сiдз жö и тракторлö солярка кольччис — уджаласö öтiк-кык лун — и бырсяс, öтiк-мöдiк пондiс ни модьны, что колö совхозсис мöссэсö начкывны, кольны только сымда, мымда вермöны вердны. Начкыласö вот мöссэсö, яйсö вузаласö, небасö солярка. Мымда деньгасö юкаласö öтамöд коласын, а унажыксö... Унажыксö начальство дзебас асланыс зеппезö...

Сiсьмöм думаэз шогöт моз дзугöны олансö, лöгöтöны директорöс, кöда неколана басни кылöм бöрын, лöгасис да резгис-висьталiс:

— Тi, ёрттэз, мый кöтат, кöдö оз ков?! Мыля мöссэсö гожум шöрнас пондам торкны? Или ми нач ни китöм-коктöмöсь лоимö? Вунöтö жö баснинытö, да вай пондамö одзлань уджавны.

— А мый, Галина Макаровна... — Тонялöн мужичокыс пондö лельгыны, асьсö лыддьö грамотнöйöн, тöдiсьöн, кужисьöн, вермисьöн. — Вот мöссö кинкö начкылiс, да сiдз начкисисьыс эз и адззись. Мымда совхозас лоис изъяныс? Гожумыс эшö кузь, эшö начкыласö, и эшö некинöс озö кутö... Кыдз эта шусьö? Не лучше, ли аслыным начкывны...

— Кутан кöиннэсö, кöр лымыс гожумнас абу, му вылын следдэз озö тыдалö... Кхе-кхе... Тöн абу я Фёдорыслiсь карта вывсис баляэсö пышшöтöмась! Кинкö начкылöма, кöин моз шупкöма пельпоныс вылö и, алё! Котöртö пö балянас улицаöттяс, а бöрсяняс Митрейика старуха казялöма да кивзöмöн, усьöмöн-пöрöмöн пондöма вöтчыны. Котöртö пöрисьыс, öвтö киэзнас и горöтлö: «Сулав, разбойник! Мый керан?! Мыля балясö йöзыслiсь начкылiн?! Стыд тэныт абу, страмлö. Кынöмыт сималö кö, быдтiн бы аслыт, начкылiн да сёйин!» Старуха ыксöм мымда вермöм, котöртöм-вöтчöм баля сёйисьыс сьöрö, да кыминь и сапкисьöма... — висьтасьö öтiк инька, Митрейикалöн соседка.

— Кин начкылöма? — юасьöны отирыс.

— Кин, кин... Старуха абу тöдöма бöрсяняс... Кöть и тöдiс, сылiсь кывсö öмсис он кыскы, адззылас да оз адззыв...

— Борис кодьыс, поди? — полöмöн шыасьöны инькаэс, кöдна пондiсö повны Борис коддезлiсь, кöдналiсь нем босьтны: лöгöтiн, рытнас петан керкуись öтöрасьны, горштö баляыс моз жö орöтасö, и некин оз понды тöдны, кин вийис туалет пытшкас...

— Тöдi бы, кин балясö начкылiс, юрсö ассис кералi бы! — отир коласын мурзьö Фёдор, пажнайтö — марскö луктурун.

— Смелöсь лоисö öнi отирыс, абу ни кöркöсякодьöсь, кöр нинкöммез новйимö, бырöм вешьянöн ветлöтiмö, нач тшыгьявлiмö, но ыбöссэз пыр вöлiсö осьтаöсь, и некöр, некинлiсь некин нем эз гусяв, — жевгöны пöриссез.

— Нем вöлi гусявнытö, да мый гусяласö, бырöм нинкöммезнытö я мый я? — сералöны томмес.

— Гусясисьыс адззис бы, мый нöбöтны, — висьталöны пöрисьжыккес. — Телевизорас тай баитöны, что миян странааным пыр гусясьöмась...

— Тьфу, господи! Телевизорас öнi асывсянь рытöдз мыччалöны, кыдз этö... Гуттэз моз ни гогнасьöны лун и ой... И челядьыс дырни!

— Челядьсö учöтсянь велöтöны бардакас...

— Хи-хи, секс мыччалöны, во! И челядьсö школаын ни сексас велöтöны.

— Господи! Синнэз бы кунь да оланыс вылö эн видзöт. Сьöлöм гудыртчö, кöр велöтчиссес велöтчытöнняныс партаэс сайын ни кагаэсö ваялöны. Оз я кывсьы, öнджа... Багайсис Кузь Васькаыслöн нылыс, кöда велöтчö кыкьямысöт классын, тыра пö... Велöтчö, и парта саяс кынöмыс оз ни пö тöр.

— Ась тыра! Тэ моз эд нывкаыс оз понды пöрисьмытöдз мурьявны. Ваяс томся-томöн кагасö, аймамыс быдтасö, и бöра содас деревняын морт, то отирыс нач ни етша лоö.

Отирлöн уджавтöн кикок мыдзö, но кыввезныс эд озö мыдзö, и öммезныс вылö он пуксьы, ежели нiя шоччисьтöн любитöны баитны олан йылiсь — кужöны касьтывны важсö и вильсö, вермöны басниöн дюттьöтны.

Уджалöны талун совхозын, а ашын мый керны, кöр трактор немöн лоас заводитны? Галина Макаровна кучикас оз тöр, оз тöд, мый керны, кытiсь адззыны деньга или солярка, кöда эм, да совхоз понда абу, кöдö позьö босьтны кöть талун жö деньга вылö, но деньга абу. «Или былись мöссэсö начкывны да яйсö вузавны? Пондамö кö быд неделяö начкисьны, немлö сэк турунсö керны. Мыйкö колö мöдiкö думайтны! Но мый? Бöра я мый я висö кыскыны Соликамскöдз да вузавны кöть мый донöн?» — думайтö директор, сiдз тöждö, что, умöльтчис нельки — лы да кучик инькалöн кольччисö. Сэтчöдз олiс, что отирыс пондiсö жалейтны, öтiк-мöдiк юасьöны, сёйлывлö я. Сёйлывлö Галя луннас кöр öтпыр, кöр кыкись и сералö, что мыйлö сёйны, ежели кынöм оз симав, нянь колö заптыны тöв кежö. Или эшö кинкö сералас-висьталас:

— Кулан эд, инька, сэсся жöник он пантав...

— Жöниккесö позьö зырöн зыртны, сымда нiя, только ыкöст, и котöртасö öнi жö... Вот соляркасö, ёрттэз, адзза, турунсö керамö, сэк вöлись жöник саяс и муна! — сералö директорыс.

— Ме бы тэныт, Галина Макаровна, жöниксö важын ни адззи, да он тшöкты адззынытö, — ошшасьö тракторист Фёдор, — и соляркасö адзза, только висьтав, лэдз кошшыны.

— Кытiсь?

— Отирыс вöзйöны: öтiк тшöктö турун вайны, мöдiклö колö пес, а Егор Петрович шуö, что тонна пö сета, только отсалö меным турунсö керны.

— Егор Петрович, Егор Петрович... — кыдз бы Егор Петровичсö эн шу, кыдз бы эн орддьы, но сiя сэтöн и эм — сулалö поперег и быдöс эд! Оськöвтан и бöра ни йöрман Пестерин дынö, кöдакöт сiдз бы он тöдчы, сiдз бы он баит öтiк сiйöн, что сiя весись нем оз вöзйы: килограмм сетас, куимö босьтас... — А кытчö воштiсьны? Мый пондыны керны, Фёдор? — юалö Галя.

Тракторист гыжьялö юрбöрсö, ружтö, сьöкыта лолалö, думайтö-тöждö и дыр мыйись висьталö, что ветлас рытнас турунла. Кин тшöктас турунсö вайны, сылö и ваяс! Уджалöм понда оз босьт деньга, а корас мымдакö солярка.

— Кин сiдз уджалö?! Миян эд абу базар! — ылöсаэс баитöны, кöстöны ас мознаныс.

— Велöтчыны колö, челядь, овнытö, велöтчыны!

— Олам и кулам, сё велöтчам: велöтчам, велöтчам, отир сьöрö бы вöтчам, кыдз бöбöввез, да бöбöввезöн и куламö...

И Фёдор сiя жö рытö тракторнас бöра тыр-пыр... Ыб вывсянь катыльтчис турунла... Мунiс, вайис мортлö турун, шедтiс совхозлö солярка. И бöра öтiк лун да куртöны тракторöн, бöра тэчисö ыджыт зород.

— Зэрны пондас! — висьталö Тонялöн мужичокыс. — Тöлiсьыс виль и пондас миссьыны.

Зöрна лэбалö ыб весьтын, лэбзьытöн сувтчышалö öтiк местаö и борддэзнас öвтö, дзик кышасьлö руö. Отир куртöны, уджалöны садь быртöдз, юр бергавтöдз. Öтöрын сэтшöм жар, что ловзисьны немöн, жар сотö горш. Павжун гöгöр куртiссез весьтö öшöтчис чöвпан ыжда палачок да кыдз ведрапонiсьмоз койыштiс ваöн! Зэрис дзир минута-мöд, но вадiс турунсö, уджалiссезöс, кöдна эзö ештö котöртны лапья кöз увтö. Зэр вадiс ыб вылiсь каж косьмöм турун. Лысва дзöвк пондiс видзны кыдз лист вылын, коккез увтын. Зэр миссьöтiс шондiлiсь рожабансö, и шондi шынньöвтiс гажöнжык, югытжык югöрöн, топ ошкис отирсö бур удж понда, тшöктiс шоччисьны, кöдкоста сiя бöра косьтас турунсö.

Галина Макаровна, кöда куранöн уджалiс öтлаын отиркöт, талун быдöнлö висьталiс спасибо да павжун бöрын тшöктiс шоччисьны. Некинлöн шоччисян йылiсь дума эз вöв, быд мортлöн сьöлöммез чеччалiсö асланыс турун керöм понда, и быдöн ыб вывсянь котöртiс нето аслыс ытшкисьны, нето куртны, только öтнас Фёдор висьталiс, что мунас шабашка вылö.

Сiдз Вильыбын и овсьö да уджассьö, кыдз отир кужöны да вермöны, сiдз и керöны. Талун Фёдор вайис кинлöкö турун, шедтiс мымдакö солярка, ашынас трактор ыб вылын гугйис лун-лун: джын лунсö ытшкис, мöд джынсö куртiс, ашынас бöра сiя жö...

Луннэз эшö кöсöсь, удж эзö дзугö. Турун совхозын керисö и керны эзö вермö. Поди, арöдз некыдз озö вермö быдöс керны. Галина Макаровна сiдз пондiс думайтны, и сэсся висьталiс, что керасö кö совхозлö уна вердчан, арнас турунсö ведомостьöн юкаласö öтамöд коласын — кин мымда уджалас, сымда и босьтас, кыдз кöркö вöлi совхозын.

Отир уджавны эз дышöтчы эна луннэзö, етша кинöс совхозниккез коласiсь позис адззывны кодöн, кöда бы юис, водiс кöз увтö да пишкис лунтыр. Кинлöн вывтi ни горш косьмис вина вылö, юисö рыттэзöн: юисö, шоччисисö и асылöн мунiсö уджавны.

Öтпыр сёр рытöн, кöр пуксис шондi, но эшö вöлi нач югыт, Галина Макаровна Вильыбсянь аслас гортö локтiс мыдз, мунiс нетэрмасьöмöн. Мунтöнняс шоччисис, видзöтчис, кыдз гожумöн олан пизьö, оз и узь: быд каёк пемытсорöн лэбалö, дзуртö, герскö, чивгö, пиксö; ыббез суналöны, но ланьтны озö вермö, сунасьö вöр, мыйкö думайтö, тöждiсьö. Гожумыс дженыт: он ешты асывнас чеччыны, рытнас бöра ни колö водны, а сэтчин, видзöтан кö, чулалö месяц, пондöтчö мöдiк — июль месяц ни бöжсö мыччалö...

Том инька локтiс лажмытiнöдз, садниккез кырылöдз ни, кытöн быдмö öтнас том пожум, кöда некытшöм лэчыт тöлiсь оз пов, некытшöм код тракторист тракторнас оз вермы тальны. Эта пу увтын сулалö Сюзь Öльöш. Код зонкаыс, пишкö-лолалö нырнас, вишыкасьö, пожумсö малалö, видзöтчö, видзчисьö Галина Макаровнаöс, дульсö ньылалö. Юрсиыс зонкалöн сивöй, кузь, нырыс кузь жö да йыла, а синнэс гырисьöсь, сьöдвевьяöсь, кузь пиннес öмас гер, киэзнас öвтö, шыннялö-панталö том инькаöс:

— А, директор... Вöлись эд меным шедiн! Мый öнi пондан керны? Ачыт ме одзын вешьянтö лэдзан или отсавны?

Югыт рытыс, тыдалö ылö-ылö, но öтiк морт некытöн абу — некин вылö надейтчыны, некин оз отсав, кöть пондасö вийны. Галя медодз повзис, сьöлöмыс моросас тёп да тёп, дума сотiс, что сералас кузьыс, сыбöрын джагöтас, и некин оз понды тöдны, кин вийис.

— Бу-бу, — ружтö кузьыс, пишкö нырнас, дынсис сизим метра ылына пыкö вина дук. — Мый вешьянтö он лэдз? — кузь киэсö паськöтiс ни туйыс шöрын, шамыртiс ни Галина Макаровнаöс пельпонöттяс — зубыта няпыртiс, сёйö-видзöтö синнэзнас...

— Кывзы, Алексей... — Галя топ эз повзьы, баитö рамыника. — Тэ мый? Нывкаэсö он я мый я адззы, педзан сэтöн?

— Тэ меным колан! Гленитчан! Окала, и сьöлöмö бурмас.

— Сыбöрын мый?

— Сыбöрын... Тэ эд ме сайö сiдз и этадз он мун! Он... Ме тöда. Или мунан? Верма гöтрасьны. Тэрмась вешьянтö чöвтны, кытчöдз эг лöгась да ачым эг чöвт.

Серкосö бы этчö! Нёль кока ёртсö, сiя чожа бы вешьянсö лэдзис Сюзь Öльöшыслiсь и нетшкис нетшкан торсö. Но поныс абу, оз кыв, кыдз хозяйкаыс вылын сералöны бы. Галина Макаровна думайтö, кыдз бы бöбöтны зонкасö, мезмыны страм дынiсь да пышшыны, и шуö:

— Алексей, кытчö тэрмасьнытö? Ойыс эд миян. Менам вешьянö бура каличалöма. Ожо, мездöта киззесö да вöлись, только тэ эн няпрась... Бергöтчы мöдöрö, то öнджа кыдз...

— Бергöтчи! Но и мый?

— Мый, мый... Мунам жö эта гриваок вылöдз, сэтöн бур лоас.

И мунiс инька зонка одзын гриваок дынöдз, мышкыртчис, малалiс кузь турунсö, лöсьöтчис, мед Öльöшкаыс вежöртiс, что пон да порсь моз оз жö пет нылöн уджыс.

Чик-чирик шыасис учöт каёк, швыркнитiс-лэбзис нач зэв, топ кинлiськö повзис да пышшис. Лякалiсö-пуксисö рожаö номмез да геббез, петшöралiсö-курччалiсö.

— Сёй бы тэнчит öнджатö ном-геб, кöр лэдзан вешьянтö, — висьталiс зонкалö инька, водiс гриваокыс вылö: — На, чеччöвт да тiль, пон! Мымда адззылан, сымда и адззылан! Судитчыны тэкöт ог понды, кöр удж адззöны вöр да кымöр, кöдна озö кужö висьтасьны.

Инька паськöтчис-водiс зонка одзö, кöда лэдзис вешьянсö, — мышкыртчис инькаыс коккез дынöдз, пишкис нырнас, и сэтöн... Галя кы-ы-ыдз быд вынсис кыкнан кокнас кузь нырыс кузя тасалiс, кыдз сетiс, мöдыс сiдз гатш и пезьдiс, нельки

пиннес кальснитiсö, муыс дрöгнитiс. Öльöш ружтыштiс, нырсис чепöссис сук вир. Но эта вöлi етшаöв: инька чеччöвтiс да кыдз кузь чужöмас быд вынсис брынгис да брынгис, мыла быртöдз вартлiс и юалiс: «Чöскыт менам, Öльöша, ма дозö?! Эшö мöдöтпыр менö кытöнкö видзчись, сэк ме тэныт эшö мыччала, кыдз колö миян кодьсö гогнавны, вöлись адззылан! Öнi чеччы и, адззисьлытöдз! Да некинлö эн ошшась, кыдз ми тэкöт любитчимö, то отирыс тöдан миян кытшöм! Быдöн пондас серавны...»

«Оз серав, оз серав», — видз вылын дзуртiс-герчкис кай, гажöтчис ас мознас.

Ойсö Галя узис и эз. Вöлi ловья или кулöм — ачыс асьсö эз вежöрт. Но дженыт ой чулалiс. Одз асылöн Дарья баблöн китöстiс петух, и инька чеччис ольпась вылiсь, миссис да сувтiс юрбитны ен одзö, кöть некöр эз думайтлы, что колö юрбитны, кöр веритö и оз еныслö. Но талун бура веритiс, что еныс эм...

Юрбиттöн Галя öшынöт адззö, что сы дынö котöртö соседка. Старуха пырö керкуö и пондö юасьны олан йылiсь. Тöдö бы, мымда ни керисö турун, юалö, кöр Галя пондас аслыс керны турунсö, отсасьö бы соседкаыслö.

— Баб, невна эд тöн рытнас менö эзö вийö, — пондö висьтасьны томжыкыс. — Этаыс... Сюзьыс. Видзчисьöма пожумыс увтын и кутчисис серавны бы, но ме сылö мыччалi! Брынöтi понсö!

— Тальны и колiс сэтшöмсö! Мыля менö эн ыкöст? Ме бы отсалi юрсö мургыльтны! — баб пондiс дрöжитны.

— Быдöс бур, баб. Турун керамö и Сюзь коддесö велöтамö овны.

Галя баитiс-керис бабкöт, бергалiс мöс гöгöрын да котöртiс уджавны. А юрсис öтiк минута кежö эз петав дума, кыдз сiйö пондылiс бы серавны Öльöшка, кöдö часöт эз пантав и, натьтö, оз ни пантав.

Тонялöн мужикыс висьталiс, что соседыс чеччöма одза-одз, спинаыс сайö кышалöма важ котома и питкыльтöма Кöслань. Мунтöн ештöма Прокоплö висьтавны, что гортiсь пышшö овны городö, кытöн сылöн олö вон, кöда арттöмсö бытьтö бы видзчисьö.

— И ась мунö! Юрыс увтас, коккес вевдöрын, — висьталiс Галина Макаровна.

— Тэ мыля сэтшöм лöг зонкаыс вылö? — юалiс Прокоп.

— Гöтрасьны лöсьöтчис ме вылö, а ачыс пышшис, сiйöн и лöгö петö!

— А-а-а... Сiйöн сылöн чужöмыс сiдз и разьсьöма, — реш видзö öмыс Тоня мужиклöн. — А ме думайтi...

25

Тöдвылö усьö, кыдз одзжык ваялiсö бензин да солярка, кöдö немымда эзö жалейтö. Совхозö, кöть колiс, кöть эз, вайöтiсö тракторрез, комбайннэз, сеялкаэз, культиваторрез, и эшö кыскисö öтiк-мöдiк быдкодь машина, сувтöтiсö гаражлань туй бокö. Вайисö сымда, что гараж дынö некытчö вöлi сувтöтны быдкодь машинасö, и быд машина сулалiс зэр да лым увтын, видзчисис, кöр сiйöн пондасö уджавны. Но мукöд машинаыс эз и вермы видзчисьны уджалöмсö, сiдз и сiмис-сiсьмис зэррез увтын. А кöдö, кыдз вайисö, сiдз нач вильö бöр и кыскисö городö, утильö нöбöтiсö. Вöлi и сiдз, что виль тракторись öшас кö винт или гайка, чегас кыткö мыйкö, тракторсö позьö эшö вочны, но некин эз кутчисьлы вочны, а разисö да бöра жö кыскисö городö, утильö нöбöтiсö.

Кокнит мывкыдöн олiс деревня, кокнит мывкыдöн начальниккез веськöтлiсö олансö, думайтiсö, что пыр этадз лоас, пыр городсянь деревняö пондасö пыкны-сетны тракторрез, комбайннэз, культиваторрез, сеялкаэз. Но кад вежсис, вежсисö юралiссез. Олан лоис мöдкодь; и мый вöлi, сiя абу ни: деревняын öтiк трактор абу вильыс, öтiк комбайн нач дзоньö он адззы, чожа вунöтасö, мый сэтшöм сеялка, дисковöй борона.

Совхозiсь директорлö кöть юр жугды, кöть рожаö симöт павдöт да котöрт корны соляркасö Егор Петровичлiсь, кöда бытьтö важын ни видзчисьöма Галина Макаровнаöс, кыдз казялiс, киэсö паськöтiс, öмсö осьтiс и сьылö:

— Галина Макаровна! Кысянь да кытчö? Ме тэнö важын ни эг адззыв. Гажтöмтчи, тöда бы, кыдз ни уджалан, мый ни керан. Отирыскöт эд уджавнытö сьöкыт, ой-ой! Пешлi, тöда... — видзöтö нахальнöя, веськыта, синнэсö чикралö, гаж синбугыллезас, басниыс кыдз ылöса артистлöн, кöда кужö орсны-бöбöтны, юасьö: — Мый меным лоас, ежели кö былись ме тiянлö сета горючöйсö? Мыйöн вештiсян, директор? Ме, натьтö, уна ог кор: окасям да маласям и лöсьöтчам, то менам кöбылаöлöн сьöлöмыс нач ни ме дынö сайкалiс.

— Егор Петрович, менам абу казённöй, совхозыс понда вöзйисьтöн ог ветлöт, бат, тэ вöзйисьтöн ветлöтан, да некинлö ни он ков.

— Быль! Некинлö ни, Галина Макаровна, эг понды ковны. Кöр, видзöт, директоралi, сэк сьöрам асьныс вöтлiсисö, а öнi... Но тэ бöра эн лöгась, баснинам только и гажöтча... Сьöкыт лоис оланыс, директор, сьöкыт! Одзжык сотiсö я бы менчим керкусö? Эзö эд, а öнi, видзöт, мый шогмö, а! Сiйö и видзöт, кыдз бы кымöсö эзö лыйö! И мыйлö бы пессьыны-овны меным? Магазинын вузасьны, ыб вылö кöдзны... Жаднöй ме мортыс, горш, сотана! Сiдз меным и колö, мед и сотöны! Видзöт тай, Вильыбаным некытшöм радио эз ло — разисö радиосö, öнi оламö кыдз ва пыдöсын, огö кылö, мый керсьö государствоаным. — Егор Петрович баснисö бергöтiс мöдöрö. — Чожа разьöны, мый пондасö кö разьны: столббесö чисто ештiсö ни пилитны, а! Но тэ, директор, вывтi эн тöжды. Сета ме тэныт соляркасö, сета, но эта... Проценттэз вылö эд. А кыдз нö? Мыйлö сэк ме ола? Может, эта... Арнас комбайннат отсыштан сюэзöс дзимлявны?..

— Егор Петрович, ме бы тэкöт öтлаö öтöрасьны эг пуксьы, да некытчö воштiсьнытö!

Совхозын бöра адззисö солярка. Отир эшö керис турун, кöда дынiсь мездöтчыны эз позь. Таво гожум сэтшöм бур, что öтпыр ытшкöм бöрсянь отаваэз быдмисö топ синнэз одзын, сiйö и видзöт, кыдз пондас ковны клеверресö ытшкыны мöдöтпыр, только бы уджалiсö тракторрез да отир. Быд морт уджалiс и видзöтлiс шондi вылö, колiс керны турун аслыныс. Чулалiс ни июль месяц, локтiс август. Ыб вылын дзормис рудзöг, сю дзормис-воис, и талун-ашын пондас ковны вундыны, кöть сэтöн шöри орöтчы: öтiк киись кер бы кык ки да уджав.

Директор чукöртiс куим-нёль мортiсь комиссия, меряйтiс зороддэз, лыддисö мымда керисö турунсö. Петiс, что турун тöвйыны тырмас.

Колiс кутчисьны вундыны рудзöг, кöдö бöра жö эзö вундö чарлаэзöн, а ыб вылö кайис комбайн, кöдöн веськöтлiс Фёдор. Комбайн сiя ештiс вочны эшö тöвнас, кöр вöвлi свободнöй кад, гуддисис машина дынын. И вот важ вочöм машина кыскис асьсö ыб вылö, несйис жö, пöрись морт моз кызöтышалiс, джöмдалiс-уджалiс мотор, сувтчышалiс уджавтöн вердтöм вöв моз. Но Фёдор гуддисьöв-керас, и машина бöра вундö тыра рудзöг. Фёдор ошшасис, что сюыс гектарыс вылiсь öксьö нельки дас да вит центнерöн. А сэсся мый колö?

— Кысь тэ тöдан, что гектар вылiсь усьö сымдаöн? — няпкö Прокоп, Тонялöн мужик. — Öшлiн я мый я рудзöгсö?

— Öшлi .. — висьталiс Фёдор. — Кырыммезö вылын. — Сералö, содтö-висьталö. — Бункерас одзлань öшлöмась, вежöртiн, пасма?!

— Сiдз будь...

Луннэз бöра мичаöсь: лун-лун кымöрын öшалö шондi. Сю косьмö кок вылын.

Уджалöны отир да озö вермö быд вынiсь уджавны, кöр бöра умöльыс вöтiс. Бöра Галина Макаровна и гыжьясьöв-керис, котрасис садь быртöдз, олансö видiс и умöль отирлö корис умöль шогöт, кöдна гуна дынiсь столббез вылiсь лэдзисö проводдэз, и медбы уджавны гуна вылын, эз вöв электричество. Котрасис директор электричество понда сэтчöдз, что сiйö пондiс жалейтны электрик Митька, кöда кытчöкö ветлiс овны да бöр локтiс гортö, сiдз кыдз олан абу гленитчöма. И öнi морт бöра уджалiс совхозын электрикöн, кытiськö адззис провод, кышалiс столббез вылö, нюжöтiс гунаэз дынö.

Август месяц. Илья лун. Галина Макаровна ыб вывсянь локтiс гортö, радуйтчис, что оланыс эз джöмды, удж эз сувт. Гортö мунтöн мöдiс эшö кежавны гуна вылö, видзöтны, кыдз уджассяс лунöн, да вöлись и оськавны гортöдз. Кымöрын шондi öшалiс эшö вылынакодь, и ылiсянь бура тыдалiс, кыдз кинкö гуналаньын электрическöй столб вылын вöрöтчö. Директор медодз думайтiс, что этö электрик бöра мыйкö керö, но Митька пантасис воротаэз дынын, тэрмасис куранöн. Сiдзкö... Галина Макаровна, кыдз бы эз видзöт, кыдз бы синнэзöн эз чикрав, но адззис, что кинкö былись вöрöтчö столб вылын да морт мыгöра.

«Оз я бöра кытшöмкö туник проводдэсö гусяв бы?! — директорлö сöтiс юрас, повзьыштiс, пондiс тэрмасьны, локтiс межалань, босьтiс кузькодь шупыт бедь, вöлись эшö кузьжык оськöввезöн иньдöтчис сiя столблань, кытöн тыдалiс мортыс. Шупыта мунiс инька, пизис ни лöг, бедьнас сiдз и думайтiс вартлыны бы умöль мортöс. Ылiсянь ни ыксiс, что юр поткöтас, ась кытчö оз ков, оз кай.

— Вияс эд токыс! — ыксiс Галя. — Лэдзчы сэтчинiсь! Мый öштiн столбыс вылiсь?!

Столб вылiсь мортыс кылiс инькалiсь чирзöм, бергöтыштiс юрсö и... буткисис-усис му вылö, ружтыштiс.

Галина Макаровна быд вынiсь ни котöртiс столб дынöдз, шупкис кисис бедьсö, мышкыртчис зонка дынö, вöрзьöтiс сiйö. Зонкалöн сьöд юрсиа юрыс сыр-лёль öшöтчис пельпоннэс вылын, чужöмыс бледöтöм, и оз ни лолав... Этö вöлi Витька, Фёдорлöн зон.

«Мый ме кери?! — повзис директор, пондiс треситны Витькасö, кöда айыслöн зоныс только öтнас и эм, пыр гардчö айыс дынын, айыс кодь жö, пыр паськöмыс мазутöсь да бусöсь, и мывкыдыс Витькалöн айыслöн кодь жö. Быдмис зонка, ылöса, вежöра. Некин сы вылö немöн эз норась, а талун мый нö? Мый керис столбыс вылын? Мыйлö кайис проводдэс дынö?

— Витька! Витька! — дрöжитiс ни Галина Макаровна, саймöтiс, ловзьöтiс бы зонкасö, невна ассис юрсиэсö эз нетшкы. Думайтiс, мед проводдэз эз вöлö, только бы мортыс вöлi ловья.

Кулiс зонка, и он ни ловзьöт, кöть мымда ыксы-горзы, зэгйы том мортсö.

Мöдiк столб вылын пукалiс да кивзiс канюк, деревняланьын уннялiс, бытьтö горзiс, пон, и сэсся шы эз кыв, топ инька шедiс шойна вылö, кытöн лöнь, кытöн петöны синваэз, и бытьтö горзöны пуэз, турун, и шондi чужöм вылын абу гаж.

Директор пукалiс кулöм дынын, кикокыс эзö кывзiсьö, эз вермы котöртны-висьтавны мый лоис, думайтiс, что зонка лöсьöтчис столб вылiсь мездöтны проводсö, сiдз кыдз сылö, натьтö, колiс деньга. Витька деньга понда торксис.

26

Дзебисö Фёдорлiсь зонсö, и мужик кыдз öшис, дзугсис олансис, нем сылö эз понды ковны, нем эз понды кывны, адззыны, вежöртны: немö эз верит. Лун чулалас и бур! Мунас уджавны, заводитас комбайн и уджалас сэтчöдз, кытчöдз уджалас машина, а сувтас кö, жугалас, комбайнёр чеччас кабинаись и пондö бергавны машина гöгöрын, модьö ас кежас: «Мый жö меным колö? Мый жö колö? Витька, тэ эд гайкаэсö кытчöкö дзебин! Вай чожажык!» — и чышкö синваэсö, пильскö гусьöн, мед некин эз кыв.

Вермас мужик горзыны и час, и мöдiкö, кытчöдз кинкö дынас оз лок, кытчöдз иньыс оз шупкы быдöс да котöрт мужикыс дынö. Галина Макаровна висьталiс инькаыслö, медбы синйис Фёдорсö. А кöр и директорыс ачыс сэтöн и эм ни: локтас комбайн дынö, здоровайтчас, горзыштасö öтлаын или лöсьöтас басни, пондас юасьны, кыдз да мый, мыля да кысянь, кытöн вермас лоны сiя гайкаыс, кöдö кошшö мужик. Дзугсясö уджын Фёдорлöн сьöкыт думаэз, — басни лекарство туйö, и видзöтан кö, мужиклöн топ чужöмыс югмыштö, пондö вöрöтчыны чожажык, кыдз бы казялö, что сюэсö колö вундыны-тэрмасьны, кытчöдз погоддя оз дзугсьы.

Вундiс комбайн. Сы дынiсь гуна вылö сю кыскалiсö кык тракторöн. Отир совхозын уджалiсö сю дынын, ытшкисьны лоис нач некинлö. Клеверрес ытшкöм бöрсянь бöра быдмисö одззакодь жö сука, тшöка, бöра цветитiсö кыдз гожум шöрын. Одззамоз жö ыббез вылын сьылiсö ыбшаррез, лун-лун цвет вылiсь цвет вылö бизгисö-лэбалiсö мошшез.

Няньлöн да цветтэзлöн чöскыт дук öшалiс ыббез весьтын. Вöррез лöсьöтчисö ар кежö: пуэз вылын пондöтчис вежöтны и гöрдöтны лист, кöда киссис му вылö. Межаэзын чорзисö ытшкытöм туруннэз, кельдöтiсö. Луннэзöн вöррез весьтын öшалiс нето кизерик тшын, нето лöзвевья туман. Шондiлöн югöрыс эз ни вöв сэтшöм сöстöм да вывтi югыт, и кымöрыс юррез вевдöрын öшалiс топ лажмытжыка. Каёккез лэбалiсö табуннэзöн, гажöтчисö-чирзiсö, и чивзiсö нылöн пияннэз, кöдналöн öммезныс вöлiсö эшö веж рöмаöсь. Айпöв да мампöв каёккез пияннэзнысö велöтiсö овны и лöсьöтчисö лэбзьыны шонытiнö.

Пемыт ойезöн вирдалiс сiдз, что повзьывлiсö пöриссез. Но мылякö эз зэр, кымöррез вöлiсö кöсöсь: ойезöн павдöтчывлiсö деревня да вöррез весьтö, а асыв кежö öшлiсö. И бöра лун-лун кымöрын öшалiс шондi, öддьöнжык косьтiс косьмöм ни му.

Совхозын дзимлялiсö ыббез вылiсь сюэз, но директор клеверрез йылiсь эз вунöт. Сiя думаэзнас сiдз бы турунсö и гумыштiс-курмыштiс тöв кежö, да эз вермы. И сэк юрас пырис, что бур бы ытшкытöм клеверресö сетны отирлö, мед кин да мымда вермас ытшкас и куртас аслыс, но зороддэзiсь оз вунöт совхозлö сетны, шуам, кыкдас процент мымда бур турун. Этадз вöлi ни кöркö, кöр отир совхозлiсь керисö турун и керöмсö юкалiсö совхозыскöт кыкдас процент мымдаöн. Öнi мыля бы сiдз не керны?

— Кокнита бы йöз киэзнас богатсялан, — кöр кылiс эттшöм басни, висьталiс Фёдор. — Кин öнi, поди, пондас ытшкисьны да ассис пайсö нем понда козьнавны совхозлö, кöр, видзöт жö, чапкöм ыббес вылын мымда позьö ытшкыны.

— Клеверрез эд ме отирыслö вöзъя! — баитö директор и сэтöн жö повзьö кодь, сысянь, что вермас лоны Фёдор басни сьöртi. Но сiдз и этадз керö асмознас, оз дышöтчы пантасьны отиркöт, оз мыдз баитны. Нiя, кöдна етшажык думайтöны ягöд да тшак йылiсь, кöдна тöждöны кыдз бы унажык видзны пода, пондiсö ытшкыны совхозлiсь клеверрез.

Деревняын овлö сiдз: мый керö öтiк, сiйö жö пондöны керны быдöнныс, öтамöд сьöрö вöтчöны сьöрсьöн-бöрсьöн, одзасьöны да уджалöны. А Сунис Роман, кöдалöн эм аслас учöт трактор, медодз тракторöн кайис ыб вылö и пондiс кульны-ытшкыны. Сымда ытшкис, что ытшкöмыс тырмис соседдэслö, дед-бабыслö, тесть-тёщалö, сваттэзлö да сватьяэзлö. Роман джын деревнялö ытшкис медбур турун, джын деревня лоис рад, что сiдз аркмис-шогмис. Рад вöлi и Галина Макаровна, кöр оланыс кытöн и сералö, а кытöн бöра оз чужьясь, а отсасьö.

Кокнитжыка отиркöт уджассьö. Уджавтöн луннэз чулалöны казявтöг: тöн эшö вöлi тулыс, а талун ар ни. Сiя лолалö кöдзыт руöн. Отир гуддисьöны асланыс садниккезын, дзимлялöны картов, оз видзчисьö лым усьöм. Кöркö картов босьтлывлiсö кытöнкö октябрь месяцö, а öнi лым некин оз видзчись: öтiк да мöдiк асланыс йöррезын пондiсö уджавны август месяц конецын. Но а талун сентябрь ни. Вöрын нач вежöтiс лист, вöр пондiс орсны-öгравны сэтшöм басöк да гажа югöрöн, что сiйö бы и керин, что видзöтiн да гажöтчин вöррезöн. Но совхозын эшö кольччис вундыны. И бöра бырсис солярка, эшö жугалiс комбайн, кöда лун да джын уджалiс Пестеринлö. Егор Петрович зника эз сет: ой и лун вöтлiсис директор сьöрын, ловсö кыскалiс, бытьтö сiдз и кулiс бы, ежели сiя отсалiс соляркаöн, то и сылö колö отсавны. «Локтат эшö ме дынö!.. Кушман адззылат соляркаыс местö...» — кивзiс Пестерин.

Комбайн уджалiс Пестериныслö да сы ыб вылын и жугалiс, сiдз жугалiс, что, натьтö, пондас ковны вель дыр лöсьöтны, да ежели кö адззисяс эшö частьыс. Дед Морозыс кольччöм сюэсö дзимлялас...

— Эх, директор! Виль комбайн бы! — юрбöрсö гыжьялiс Фёдор. — Кытiсь вот бöра запчастьсö адззыны?!

— Адззам! — висьталiс Галина Макаровна.

— Мыля огö адззö, кöдö эгö öштö... — мурзис комбайнёр, думайтiс и думайтны эз вермы, кытiсь кошшыны машинаö часттез, кöднö эз запты.

— Думайт, думайт чожажык, Фёдор Матвеевич!

— Вывтi ни тэ чож, Галина Макаровна! Быд морт бы миян тэ кодь, олiм бы бура эд. То эта абу, то сiйö колö кошшыны, — Фёдор чукыльтö баснисö, висьталö. — Ыджыт юра хозяиннэс миян нем вылö озö туйö. Прах эд разисö олансö! Мыля бы керöмсö ни разьны, кöр сiя керöма?! Бур, что гаражжезнымöс нач эзö паздö, тöв кежас лоас кытчö машинасö сайöвтны. —

Бöра мöдöрö кывнас баснисö бергöтö. — Тэнö бы то, нывка, Москваас начальникас пуксьöтны, а! — Дзугсин баснинат, Фёдор...

— А мыля ог дзугсьы, кöр видзöта тэ вылö, и сьöлöмö пондö пессьыны... Думайта, мыся, мыля жö менам одзöв гöтрассьöма?

— Но тi и мужиккез! Кыдз адззатö басöкжыкö, сiдз сьöлöммезныт и пондöны пессьыны, сiдз бы иннезнытö и вежатö...

Фёдор пондö вишыкасьны да видзöтны кымöрö: юр вевдöрын вылын-вылын кривзöны туриэз, кöдналö одзöв бы эшö шонытiнö лэбзьыны, и, натьтö, лэбалöны сiдз, бытьтö гортсиныс öшöмась. Ыб вылын дзир кыкöн — комбайнёр да директор, и мыйлö бы лёбны сiйö, кöдö оз ков, но кык морт эд ловьяöсь, минута кежö да басниöн мездöтчöны сьöкыт удж бердiсь, баитöны-шоччöтöны сьöлöммез.

Кад чулалö. Совхозын вундыны кольччис эшö дас гектар етш. Комбайн эзö ештö вочны, а погоддя дзугсис, нач дзугыльтчис: кöдздöтiс, ойланьсянь пондiс пöльтны лэчыт тöв, вайöтiс кымöррез, и пондiс зэрны ой и лун, бытьтö еныс эта зэрöн тыртiс план, кöдö эз ешты керны гожумöн. Зэрö ой и лун, кöть öтöрö эн пет. Фёдор места оз адззы, оз вермы пукавны гортын, жöдзö гараж гöгöрын, кытiсь гайка ни он бы адззы — быдöс ни гусялiсö, но мужик кошшисьö гаражын, сыбöрын ветлö мöдiк деревняöдз, тöдса механизаторрезкöт юö вина — лöгöтö иньсö, кöда кöкö:

— Тэныт пыр уна колö! Видзöт да отирыссянь велöтчы овнытö, а эн гыжьясь. Видзöтны ог вермы, кыдз тэ öнджа керан!

— А тэ эн видзöт. Синнэтö кунь да сiдз и ов, — сералö мужикыс, петö керкуись — и абу, бöра ни ыб вылын комбайн дынын, бöра ни гырдззаэзви гуддисьö нятьын да мазутын, видзöтышалö юрыс вевдöрö, кытöн эшö кымöррез сукöсь, лажмыта уйöны ойланьсянь лунланьö. Омöн му вылын кыз лысва, вöррез кыдз бы öзйисö да сотчöны — ылын и матын, вевдöр лэбтiсьöны тшыннэз, туман.

Фёдор гуддисьö комбайн дынын, бытьтö горт йылiсь дума абу. А садникись колö бы дзимлявны картов, да некинлö дзимлявны: зон кулiс, Наташка эшö оз вермы видзны вила, мымда кывнас лельгö-отсасьö мамыслö, сымда и эм. Инька пыр видö мужиксö, мыля сiя ас йывсис етшажык думайтö, сё олö совхоз понда, а ачыс асывнас медодз котöртö босьтны совхозлiсь картов, кöдö тулысöн садитiсö только гектар мымда — етша, но и сiйö эд колö дзимлявны. Директорныс öдззöтö инькаэсö, кужö кывнас отирсö бöбöтны, висьталö:

— Ой, инькаэз! Картовыс кытшöм быдмöма. Каббез кыдз картоввес. Босьтамö да вузаламö, деньга лоас! Видзöтö, кыдз таво картовсö кошшöны, кöда мукöд отирын абу шогмöма. Машинаэзöн ветлöтöны сьöд чужöмаэс. Кыдзкö бы гарйыны да донöнжык сетны...

— Верман кö, кер. Тэ эд директорыс...

Директор, директор... Мужик жö бы колö директорыс, то Галялöн гортын мый и керсьö. Мöссö оз ешты чилькöтны. И Дарья баб пондiс шогавны. Кулас кö пöрисьыс...

Бабыс, мед и абу роднöй — не мам, не матшка, не тётка, не сватья, — а только соседка, сытöг Галина Макаровна овны оз вермы. Шогавны вот пондiс соседкаыс, сiя рыт и асыв пыр сы дынö, мыйöн вермö, сiйöн и отсалö да вöлись котöртö отир дынö: то картов дынын, ыб вылын мымда вермас отсасяс, то сыбöрын пемытсорöн ни котöртö мöссэз дынö, кöдна понда юрыс ой и лун висьö, синнэс вылiсь оз бы öшты, кöть и надейтчö пода вöдитiссезлö, веритö пастухлö, кöда немымда эз ни бы пастучит, гожумнас начкылöм мöс понда. Но эз-эз да бöра пондiс котрасьны пода дынын, гортас кодьöн оз и пыравлы, ошшасьö:

— Видзöт, Галина Макаровна, öнi ме кытшöм! Солдат вылö ог я вачкись, кöр пишаль сьöрам пыр, новйöта гормöччансö, сытöг öтöрасьны кöз увтö ог пуксьы, во! Ась эшö кинкö пондылö вöрзьöтны подасö, сёяс бöр гöгöрас! — директор синнэзö веськыта видзöтö Витя дадь, бытьтö тöдö, кыдз Галя Миковлö ойнас пöжалiс бöр гöгöрас. Тöдö или оз пастухыс Галялiсь пишальöн ойся удж, но инька мылякö думайтö, что тöдö, да оз висьтась, этасянь лоö нето сьöкытжык, нето кокнитжык, кöр нач вунöтны арттöм Миколокöс оз вермы.

Эшö öтiк лун чулалiс, кыдз лэбзис, мöдiк лун локтас и чулалас, бöра кыдз лэбзяс. Сё эшö зэрö, и приметаэз сьöртi дыр пондас зэрны, ежели шогмис рябина. Арся погоддя вылö нем надейтчыны, кыдз бы ыб вылö эз енды картов и сiя сюыс, кöда кольччис вундытöг. А Фёдор сё эшö эз вермы лöсьöтны комбайнсö. Комбайнёрыс басниöн оз полöт, гажöн висьталö:

— Ашын пондам вундыны!

— Фёдор Матвеевич, дыр тэ эшö менö ашыннэзнас пондан вердны?! — нето лöгасьö, нето сералö директор.

— Ашын эшö верда, сэсся ог, — Фёдор шынь оз кер. Ашынас бöра асывсянь зэрö, бöра комбайнёр асывсянь пондiс гуддисьны машина дынын. Талун иньыс мылякö мужиксö вывтi ни лöга кольлалiс. Видчис быдöсiсь, нельки кöритiс, что иньыс бокын оз куж узьны, ойбыт чужьясьö да гырдззаэзнас боккезö тойö, поди, адззис вильö, сыкöт гусьöн окасьö, сыкöт любитчö. Петö, что мужик, кыдз абу ни мужик — сьöвзьы да бергöтчы. Мыля жö сiдз, кöр Фёдорыс гöтрасис да мöдiк инька дынöдз эз сибöтчыв, бытьтö полiс инькаэзлiсь, топ нiя курччасьöны. И Надясö любитö. А Надя мыйкö понда желлясьö, бытьтö былись мужикыс кинкö дынö котрасьö. Сэтчöдз талун асывнас тотис, что мужикыс лöгасис и сотiс-висьталiс: «Эн я ачыт бытшöмжыкö адззы бы!..»

Янсöтчисö асылöн мужик да инь — öтыс гортiсь мунiс горзытöн, мöдыс кымöртчис да думайтiс: «Миритчан бöра, ежели ой-мöдсö торйын узям! Ме тэныт пыр ог понды юрбитны...»

Ар. Кадыс кöдзытжык и кöдзытжык. Ыб вылын дзимлялöны картов. Тэрмасьöны, но озö вермö чожа керны. Мешайтö нять, да уна шогмис картовыс. Сьöкытöла босьтöны картов, но унажыксö гарйисö ни, кöр быд лун кык вöлöн гöрöны. Босьтiсö картовсö и ыб вывсянь жö вузалiсö совхозлiсь добросö — деньга керисö, кöр быд копейка эзö тöдö кытчö воштыны. Думайтiсö медодз мыйкö босьтны совхозлö, сыбöрын руб-мöдöн сеталiсö отирлö, мед и етшаöн дöнзис. Но и сiя вöлi деньга, кöр мукöдыс не öтiк месяц ни киэзын копейка эзö видзö, нач немöн вöлi небны сахар, истöггез, матег. А кинкö норасис, что дубöн похлёбка ни сёйö. Сiдз петö, что кöда оз тöд кытчö деньгасö воштыны, а кöдалö и истöггез немöн босьтны.

Кымöраöсь и гажтöмöсь луннэз, бат, сiйöн отир и öддьöнжык кодалö. Öтiккез уджалöны, а Мутэй Ефрем Пестериннэзланьсянь иньсö гортас кыскö аскерöм телегаок вылын. Кыскö гортö мужик кодся-код иньсö, кöда улицатыр резьöтö-сьылö: «Ой тэ, Иньва да Иньва ваиньöй, голубöй синбана ва, вексö важын крайиньöй, кисьтiн шоррезöн синва-а-а!»

Гажа мужиклö, кöр начальниккесö иньдалiсö ылöжык, мед ныррез кытчö оз ков эз сюйö. Ефрем вöлi «партейнöй», а партияö юрсö сюйыштлöма, медбы только вештыны взноссэз да пырны кытчöкö начальникавны. Но мужиксö абу вежöртöмась — абу начальникавны пуктöмась, сiйöн öнi лöгыс и петö быдöн вылö. Юыштасö иньыскöт и сьылöны, дзик горзöны: «Ой тэ, Иньва да Иньва ваиньöй, голубöй синбана ва-а-а... Ие-е-ех!»

— Мужиккез тi, мужиккез! — аслас посöдзын сулалö покойник Миковлöн пöрись мам. — Мый ни пондiтö керны? Мыля нö сiдз? Ми тай тiян моз эгö олö... — и старуха пондö горзыны да корны еныслiсь смерть.

Луныс синнэсö оз и осьтлы. Уль ру гусьöн öвтчö деревняын, вöрын, лог дорын, ыббез весьтын: орсöмöн зэрö. Фёдорлöн инь Надя асывсянь тэрмасьö мунны ыб вылö. Думайтö, что сiя кольччис ни отир сьöрись — колисö уджавны мунны, а сiя эшö сёйны эз ешты. Инька öмас чапкис няньтор, керкусянь öшынöт видзöтыштiс öтöрö. Луныс бытьтö синнэсö осьтö: зэрыштiс да дугдiс, кымöррес асывлань вешшöны, мичамö бы. Надя педзис-керис гортын, петiс керкуись, подол гардыштiс и котöрöнмоз мунiс туй кузя вöроклань, кежис ыббез коласö, тэрмасис. Вöрокын повзьöтiс кырнышöс, кöда кысянькö лэбзьыштiс — öвтыштiс борддэзнас нач лажмыта, невна юрыс вылö эз пуксьы. Панталiс совхозiсь сера порозöс, кöдö шуöны Балдаöн. Сувтöма туйыс шöрö, сэтчö, кытöн трактор няпралöма песок, сулалö порозыс да будзгылясьö, пишыкайтö нырнас, боксö, дзик одзас сулалö лёк враг — зверь, кöдö лöсьöтчö люкавны.

— Балда, мый сэтöн керан?! Вешшы туйыс вылiсь! Адззан, ме тэрмася. Отирыс колисö ни и пондасö серавны, а сэтöн тэ... — Надя пондiс ыксыны порозлö, кöда эшö пишнитiс нырнас и одзись кокнас пондiс борны песок.

— Люкав, люкав мусö, ежели вынтö некытчö воштыны, да ме вылö эн пиньлась, ме тэись ог пов! — инька туй бокись босьтiс шать, шагньöвтiс Балдалань, öвтыштiс шатьнас.

Вöр вылын етша ни вöлi вежöтöм лист. Медбöрьяэс киссисö му вылö, бытьтö Надя одзö ольсалiсö веж рöма дöра, кöда кузя гажа мунны, только вешшы бы одзись порозыс, кöда песоксö туй вылiсь пондiс борны вынöнжык, синнэс лоисö вирвевьяöсь. Инька эшö оськöвтiс öтiк оськöв, эшö öвтыштiс шатьöн, эшö висьталiс, медбы порозыс вешшис одзсис и сэтöн... Балда перыта бергöтчыштiс, сюррезнас заргис Надялö моросас. Инька черк-барк таралiс коккес вылiсь. Думаэз сотiсö юрас, тшöктiсö бы чеччыны да пышшыны, но эз ни вермы. Ловзисьны лоис сьöкыт. А порозыс люкалiс öддьöнжык...

Надяöс адззисö сiя жö лунö, но только рытланяс, кöр отир локтiсö ни уджалансянь.

«Вийисö да вийисö! — ныв вылын брякöтчис-горзiс пöрись мам, кöда пыр баитiс, что пора аслыс кувны.

Бöра беда пырис Фёдор керкуö. И баитiсö ни, что бедаыс öтнас оз ветлöт: öтiк торксис столб вылын, мöдiкöс пороз люкалiс...

Участковöй аслас синнэзöн видзöтiс мортлiсь кулан места, мыйкö гижис гижöтö, ружтiс, но нем бурсö эз висьтав, только шуис, что кулöмсö колö кыскыны городöдз, сэтчин резьöтасö, гижасö справка, а татöн некин и некытшöм справка оз гиж, кöдатöг мортсö дзебны оз туй. Кужан овны, куж и кувны. Кулан да эшö справкатöг озö дзебö, бытьтö мöдöр югытас олöны да уджалöны сэтшöм жö чиновниккез, кöдна весись нянь озö сёйö, гижöттöг не райö, не адö озö примитö. Фёдорлöн тесть Еремей сэтчö висьталiс, что мöдöр югытас уджалöны нiя жö морттэз, кöдна уджалöны татöн...

Кулiс Фёдорлöн инь. Медодзза часö, медодзза минутаэзö мужик нач öшис, эз тöд, мый бердö кутчисьны, мый керны, кыдз овны нылокнас, кöда чеччалö да горзö, корö мамсö. Сiдз жö горзö-баксö пода, готсьöны, нявзöны да китсасьöны — и быдöнлö колö хозяйка, быдöн дынö колö кужны сибöтчыны, вердны-юктавны. А мöс колö рыт и асыв чилькöтны.

Юрси кышöпöн юр вылын сувтö.

Эзö ештö эшö кулöмсö дзимлявны-дзебны, а мужикöс олан зэлöтö ни. Фёдор одзжык ас кежас думайтлiс: «А мый миян инькаэс? Уджалöны я нiя миян мымда? Весь унажыксö олöны...» Öнi вежöртiс Фёдор, кыдз иньтöг овны...

«Öтлаö гробас вода», — думайтö мужик и котöртö сельсоветö, сельсоветсянь — фельдшер дынö, сы дынсянь бöра сельсоветö — тальö да тальö нять, кеймисьö да кеймисьö — корö справка, что иньыс кулiс.

Сельсоветын бытьтö мужиксö вежöртöны, отсалöны бы: телефонöн звонитöны прокурорлö, милицияись начальниклö, следовательлö, врачлö, и эшö кинлöкö трингöны. Районын быдöс тöдöны и нем озö тöдö — ывсöтчöны, кöсйисьöны керны да кöстöны асланяныс.

— Зять, нiя эд горшаныс видзчисьöны, — Фёдорлö висьталö тестьыс. — Юкталiн бы пöттöдз, асьныс бы гортöдз вайисö гижöтсö, а тэ он юктав...

— Сiдз, дед, — сэтöн и эм Борис, топ Вильыбын сытöг öтiк кулöм морт озö вермö дзебны. Только кинкö ештас синнэз куньны, кыдз зонка босьтö кöртзыр и котöртö гарйыны гу. Гарйисяс да юас пöттöдз талун, ашын и оз вунöт касьтiсьны öкмысöт лунö: пöт и код мортыс. Ачыс модьö: «Кöть бы бöра кинкö кулi».

Веськыта висьтавны, петiс сiдз, что нёль ой гортын узьтöтiсö кулöмсö и вöлись дзебисö.

26+

Дзебисö Надяöс шойна вылö зэв зоныс бокö, мед пö лоас кулöммеслö гажажык... Дзебисö Надяöс, и Фёдорлö вöлись «оссис» оланыс. Гортас кöть пыр, кöть эн. Пырас кö, медодз Наташка чирзö-горзö: «Тять, мамö кытö-ö-öн?! Кытöн мамö? Мыля дыр ни оз лок? Мама-а-а!..»

Нетшкö учöтыс сьöлöм. Сэтöн эшö арыс бытьтö синнэсö оз осьт — кымöррез озö öшö-вешшö: зэрö и зэрö быд лун, да кöдзыт, кыдз бы лым эз понды усьны.

Колö бы тэрмасьны вундыны медбöрья сюэз и вунöтны вундан йылiсь, но Фёдор некыдз оз вермы лöсьöтны комбайн, кöда кынымöтпыр и жугалiс ни.

— Фёдор, эн ни бы тэ нятяс купайтчы! Ась ни комбайныс... — жалейтö мужиксö Галина Макаровна, кöда чеччö и медодз котöртö Фёдоррезö, отсасьö керку-карта гöгöрын, мый вермö, керö. И деревняын эшö эмöсь кодя инькаэс, кöдна ордчöн олöны и озö вунöтö Фёдорлö то вайны ва, то кöр и джодж миськаласö, то Наташка гöгöр бергаласö, эд деревняын детсад эз ло, и луннэзöн челядь кин кытöн и олöны.

Мужик асылöн чеччö дзирс пемыт, сэк жö кутчисьö удж бердö, кöдö кужö — керö, кöдö оз, думайтö керны мöдöтпыр. Бергалöв-керас гортын, мунас комбайн дынö и гуддисьö нятьын, бытьтö бы уджалö, а аслас сьöлöмыс пессьö — кыскö бöр гортö, — öтiк минута оз вунöт Наташкасö, кöдö кольö соседдэзас. Думаэз педзöны: «Кыдз Наташкаыс сэтчинын?! Мый керö? Озö я бöра бы Петриччеслöн вина юö? Юасö кö... Быдкодь спектакль эд мыччалöны, и Наташкаыс сэтöн...»

Луныс кыдз горзö-зэрö, синваэз да синваэз... И Фёдор чышкö ассис синваэсö да котöртö гортö. Медодз пырö нылокыс дынö, сыбöрын гортö и адззö, что порог дорын стул вылын пукалö асланыс деревняись Наста, кöда адззöма ключ, осьтöма замок и пырöма керкуас...

— Тэ кыдз татöн? Тэ мый? — хозяин юалö инькалiсь.

— Фёдор, ме эд тiянö Надяыс дыр вовлывлi... Инькаыткöт эгö я дружитiмö, и сiя висьтавлiс, кытöн ключсö видзатö...

Юыштöма Настаыс, кылыс öмас бергалö сярган моз — оз джöмды. Инька эшö абу пöрись, но чужöмыс чукрассьöма, юрсиэс дзормöмась, öмас пиннес быдöс абу, и синнэс куньсьöны.

— Фёдор, кыдз ни олан? Мыся, пырала да видзöта... Öтнат, сiдзкö, керкуат бергалан. Ме тай öтнам жö: пышшис тай морт вийисьыс, колис менö. Думайтiс, что ме сытöг ог куж овны, а ме ышö кыдз ола! Сьöкыткодь, мыся, öткöн овнытö тэныт и меным. Эн я бы менö бось? Ме эшö невестаыс на все сто двадцать, ась и юрсиö дзормöм!

Фёдор öшö, туна-тана мунö комö, вывсис чöвтö нятьöсь да ва паськöм, ружтö — не тпру, не ны! Невесталö нем оз адззы висьтавны, а Наташка лельгö-баитö, юалö:

— Баб, а тэ мыля вина юан? Юöмыт, а он сьыв. Петра дедыс кыдз кодззас да кыдз пондас сьывны!..

— Кытшöм Петра дед?! — синнэс вöлись ыждöны Насталöн.

— Сiя, кöда ордын луння...

— Мый нö, жöник? Или ог гленитчы? Эн пов! Кужамö овнытö! — невеста бöра ни лякасьö Фёдор бердö.

— Некин меным оз ков, — бобгö ныр увтас жöник, думайтö, кыдз рытнас ештöтчыны: чилькöтчыны, юктавны пода, мыйкö пуны сёйны.

Наста эшö порог дорын стул вылын мымдакö педзö, бытьтö бöрас мöртчöма ёсь и вöлись петö керкуись. Оз ешты гöстялöн саясьны спина, Наташка айлö висьталö:

— Тять, ме сылiсь пола!

— Эн пов, Наташка, — тырпсö курччöвтö тять, горшас лоö курыт.

Одзлань олöны нылокыскöт, кöдö вывтi любитö — нылочкатöг овны оз вермы. Чулалiс лун, локтiс рыт, узисö, и ашынас бöра Фёдор одза-одз чеччö, бергалö керкуын и öтöрын: пуö-пöжö, вердö-юкталö, чилькöтö мöс, пода лэдзö öтöрö, нывсö кольö соседдэзас, кöдналö кöсйисьö кöркö мыйкö пестунничайтöм понда отсавны.

Виль лун тöннякодь жö — арся погоддя. Дыша чулалö дженыт арся лун. Уджалö мужик ыб вылын комбайн дынын — нять панялö, зырымсö ныр увтсис тiльö, кынмö, рытланьын пемытсорöн ни локтö гортö, лöсьöтчö чожажык керны гортiсь удж да шоччисьны, шоччисьтöн видзöтны телевизор да дзудзгöтчыны Наташкакöт. Только ештiс чöвтчыны, ештiс миссьыны рожасö, кыдз дзуркнитiс керку ыбöс, и керкуö жагвыв пырис нач том нывка, кыдз акань. Этö Митя Миковлöн нылыс, кöда ён мыгöра, мича рожабана — невеста и эм, но мылякö некин жöник сайö оз босьт. Талун пемытсорöн ни пырис Фёдор ордö, эз здоровайтчы, эз юась-висьтась, ыбöссянь шлёпкисис-пуксис порог дорö сiя жö важ стул вылö и пукалö тупка моз, пукалö и пукалö, оз шыась, топ кывсö ньылыштöма, öмыс топ кизялöма, только ыджыт гöгрöса синнэс сьöртi и тыдалö, что мыйкö бы висьталö или юалö. Кöр öтöрас нач пемдiс, кöр керкуас öзйис би, вöлись зепсис кыскис конфетаэз, нюжöтiс Наташкалö, кöда аканнезöн орсiс пызан дынын, висьталiс, мед нылочкаыс босьтiс да нималiс чöскытсö.

Наташка сэтöн и эм, Наташкалö только вай конфетаэз! Сiя прыг да скок и ыджытжык нывка дынын ни, кöда кутiс учöтсö, жмитiс морос бердас, окалiс и Фёдорлö ни висьталiс, что узяс ны ордын.

Мужик аслас керкуын хозяин, думаэзнас гöстясö думайтö керкусис репöтны, но кылыс оз бергöтчы, медбы висьтавны эта йылiсь.

— Вода кроватьныт вылö и узя, — ассис гыö Таня.

— Сэтöн мийö тятюöкöт узьламö! — кровать вылö чеччöвтiс Наташка, лельгыштiс и содтiс. — Верман каньыс дынö гор вылас кайны да узьны.

Таня эз лöгась, чöвтчис да кайис гор вылö, кытчö нюжöтчис, нырнас пирснитiс-вирснитiс да юалiс Фёдорлiсь: «Поди, менö босьтан? Ме, видзöт, кужа ни мöссö чилькöтны и понда пыр орсны Наташкаыскöт».

Узисö. Öтiк пишкис гор вылын, мöдiккез чискисö кроватьын. Мужик ойнас саймылiс кык-куимись, дырöн эз ланьт, бергалiс бок вылiсь бок вылö, вермасис думаэскöт, кöдна кыскисö Таняок бокö, бöбöтлiсö Фёдорсö арттöм-ладтöммез, но пиннезнас гручкис да асьсö видзис, видiс, эз кер сiйö, кöдö вежöртiс, что оз туй керны. А керас кö, вöлись сьöвталасö. Вöлись эд оланыс пондас серавны. Фёдор бура тöдö, что Танькаöс уна Ванькаэс любитöны.

Чулалiс ой, мырсис, шогалiс, сералiс-нерис, ызйöтiс-вöзйис невеста, бытьтö кöсйис любитöм да счастье, бур олан. Вöлi бы Фёдорыс том, челядь мывкыда, пондiс бы любитчыны виль инькöт, а сылö эд годдэз сорок гöгöр ни. Фёдор асывнас чеччис дзугыля, кыдз вартлöм, дойдöм, пурöм, эз баит, эз гажöтчы, пырис-петiс öтöрö да керкуö, гым-йирк, йирк-гым осьтiс да пöдналiс ыбöссö. Тэрмасис, талун эз жалейт нылоксö, кöда эшö узис, сэсся саймис, кивзыштiс, мед тятьыс эз гымöт-ёркöт ыбöснас. Но тятьлö нем эз мöртчы, ассис керис.

Асыв. Чожа пондас югдыны. Гор вылын пишкö-узьö Таня, кокöн дрöг оз кер, синнэз оз осьт, тыдалö, оз и вöтась, медбы мунны гортас. Фёдор оз вежöрт нывкасö, оз лысьт саймöтны «öмидзтусёксö», кöдö кутiс да бöрöн кыскис бы коккезöттяс öтöрö. Эшö нывка пондас шуны, что мужикыс кутчисьлiс чöвтны небыт вешьяноксö... Быдöс эд вермас шогмыны, ежели бесыс пырис керкуас.

Сiдз асылыс дыша и югдiс, öшынö дзар керис локтан лун. Фёдор смевмöтчис, смевмöтчис да пон моз эрзыштiс гор вылын узисьлö, юалiс:

— Тэ сэтчинiсь чеччан или он?!

— Чечча, чечча... — гор вылын юрсö лэбтiс Татьяна, видзöтiс-керис веськыта синнэзас хозяинлö, эшö öтпыр юалiс, гöтрасяс или оз сы вылö Фёдорыс, вöлись нач лöгасис, пондiс модьны, что сылö колö деньга...

— Кытшöм тэныт эшö деньга?! — мужик горт шöрас невна гатш эз пöр.

— Кытшöм деньгаыс овлö? Кытшöм эм. Сэтшöмсö и вай! Тэ эд уна шедтан, а ме эшö ог уджав, но чожа понда уджавны.

— Некытшöм деньга менам абу...

— Тьфу тэ, зараза! Абу ни тэ тай морт вöлöмыт, а ме лыдди мортöн. Ась тэ талун жö...

— Спасибо, — серöмтчыштiс Фёдор, кольлалiс «невестасö» ыбöс сайöдз, жвангис-пöдналiс ыбöссö, кокнитжыка ни ловзисис, саймöтiс нылоксö, кöмöтiс-пасьтöтiс, вердiс, окалiс, нуöтiс соседдэзас и вöлись бöра кайис ыб вылö. Талун вермис ни заводитны комбайнсö да мымдакö вундiс, кöр зэран кымöррес асывсянь топ лэбтiсисö вылöжык, чорзисö. Лоис эшö ыркытжык, и тöлок ни руалiс.

Фёдор тэрмасис уджавны комбайнöн, но рытöдз эз вермы вундыны: кольччис öтiк учöт ыбок, сэтчö бöра жугалiс машинаыс, и бöра колiс гуддисьны нятьын, уджавны да видзöтлыны, кыдз арся дженыт луныс пышшас-коляс. А гортын видзчисьö нылокыс, кöда айыс локтöм бöрын чеччöвтас паныт, öшöтчас нятьöсь-мазьöсь голяыс бердö, пондас окавны да лельгыны, что гажтöмтчис.

— Ох тэ, олан! — мужик гуддисьö машина дынын, курччалö тырпсö, касьтылö иньсö, кöда сiдз бы колö!

— Фёдор, шоччись талун, — сэтöн и эм директорныс, кöда быдöс тöдö и бытьтö ылiсянь кыла мужиклiсь басни, лэбзьö-локтö сэк, кöр... Колö и оз бы ков, кöр Фёдор эз ешты нятьöсь киэсö чышкыны, чужöмсö, синнэс дорись синваэсö. Бергöтчыштiс, дзебис бы чужöмсö, но Галина Макаровналöн синнэс лэчытöсь, быдöс адззис, курччöвтiс тырпсö.

Рыт лолалiс кöдзыт руöн. Ыб вылын лэбалiс-орсiс перыт тöлок, ургышалiс вöр коласын. Комбайнёр гуддисис мотовило дынын. Директорлö висьталiс, медбы сiя адззис да эз Фёдорлiсь уджсö, кöр сiя кыдз карсап: нятьöсь, мазутöсь, вачкисьö порсь вылö.

— Гöтрасьны колö, Фёдор! — Галя туйдöтiс-иньдiс мужикöс. — Кыдз пондан овны иньтöг, кöр эшö Наташкасö колö быдтыны.

— Кин ме сайö мунас? Мый меись?

— Но-но, мый тэись... Асьтö, мужик, эн жö бöра пуксьöт Борис коддес бокö, ежели пондiн бы гöтрасьны, адззисис бы инькаыс.

— Кошшыны, дак мыля бы он адззы, кöр асьныс гортö локтöны, — вöлись гажöнжык шуис комбайнёр. — Наташкаыс понда бы колö, но адззисяс я нылочкаыслö мамыс?

И пондiс мужик висьтасьны, кыдз да кин вовлiс сiйö корасьны.

— Но тэ, Фёдор, и баитан!.. Быль я мый я?

— Мунiн бы ме сайö, Галя? — видзчисьтöг юалiс Фёдор Галялiсь да сiдз, что инькаыслöн моросас бытьтö мыйкö вöрзис, кыдз бытьтö сьöлöмыс жмитчыштiс; то ли небыт, то ли чорыт киэзöн пидзыртiсö, синваэз синнэзас чездiсö. Бöра горзiс бы, но пыдына ловзисис и асьсö видзис, эз ни понды горзыны да висьталiс:

— Кытшöм ме, Фёдор, невеста? Видзöт, кыдз ачымöс сералi, и отир сералiсö — лэбтiсö да лэдзисö. И пондасö шуны, кыдз этаöс... Сьöлöмöлö эд часöт умöль, кöр тöдвылö усяс, кыдз быдöс вузалi да вöтчи кытшöмкö öнджа сьöрö — стыд отирсис. Кöть мый, мужик, но öтнам ни кыдзкö понда ойлунсö джендöтны.

— А ме бы тэ вылö гöтрасьнытö эг повзьы, ась тэ талун начальница кодь, а ме мазьöсь тракторист.

— Эн тöжды да вывтi эн тэрмась. Адззамö невестасö! Абу жö, поди, миян отирыс нач тшыкöм, инькаэс быдöнныс винасö озö жö юö.

— Етша тай мылякö садь юраэс ни...

Ыб вылын ыркыт уль ру сiдз и пелитчö бы шонтiсьны паськöм увтö. Кытшöмкö каёк быркнитiс-чирзыштiс, лэбзис нач зэв. Шырок пиксыштiс бороздаын. Ыб дорись вöр узис, но мылякö полöтiс узьтöнняс, топ кöз увтö дзебсисис да видзöтчö-видзчисьö кинкö лёк, ыджыт, вына, кöда повзьöтас, но отир синнэз одзö оз мыччись. Тöдчöмöн чожа пондiс пемдыны.

Галина да Фёдор комбайн дынсянь иньдöтчисö гортö, шлёпöтiсö-мунiсö нятьöсь туйöт, баитiсö и тöждiсö сю понда, кöда кольччис вундыны вит гектар етш, и сэтöн уджыс дзугсис. Басни вуджис Пестерин вылö, кöда талун асывнас директорсö панталiс и кольлалiс матiсь ыб дорын, ловсö кыскалiс-модис, что сылö эшö колö отсавны, пеничайтiс, что солярка понда етшаöв сылiсь вундiсö, и сiя пондас судитчыны.

— Адззылiн тэ, кытшöм кöин! Горш орöтас да босьтас. Мымда бы эшö сылö соляркаыс понда уджавны?! — лёк голосöн баитiс директор.

— Да иньды тэ сiйö ылöжык, ась оз кидлась! И мед судитчö! Видзöтам, мый висьталас судыс. Судитасö кö, да эшö локтас мый корны, сэк сэтшöмыслö колö висьтавны, мед Öлдöттяыс кодь невестаэслiсь корö... — пизис Фёдор. — Деньгасö Егор Петровичлiсь, натьтö, мутэйöн он соровт, ась и босьтö аслыс комбайнсö! Кывсьö тай, бытьтö бы виль магазин керö да кирпичись, кöдö некин ни оз сот.

— Керсьöма ни магазиныс, — серöмтчыштiс Галина Макаровна. — Колö только сотчыны! Биыс эм би, нем оз коль, быдöс дзимлялö. Сьöкытöв ни Пестериныслö вились деньгасö öктыны. Горзö, мыля кöдзис сюсö, баитö, что колас пö муыс вылiсь кежны, то пö налоггезнас джагöтасö.

— Верит сэтшöмыслö!.. Пестерин коддесö он дойд. Öтiклаись мездöтчасö, мöдiклаö кутчисьöны. Велалiс ни овнытö, шмыль!

— Ась. Сiдз и этадз колас отсавны. Кöть кытшöм, а морт Пестериныс, — директор эз лöсяв баснинас трактористкöт.

Ыб вывсянь оськалiсö километрся унажык, эз и казялö, кыдз локтiсö Вильыбö, и деревня дынын Галина Макаровна вöлись кыдз саймис, горöтчис:

— Мый ме, Фёдор, кера?! Колiс эд кежны да веськыта гортö мунны, а ме ырбыльттöнням тэ сьöрö вöтчи, да мед ни... Пырала эшö Любаэзас, керис я сiя ведомостьсö, медбы отирыслö сюсö сетавны.

— Ме тэнö, поди, гортöдззат кольлала?

— Тэ мый, мужик?! Наташкаыс, натьтö, семдытöдз горзiс ни тэнö видзчисьтöн. Котöрт жö гортат, а ме некинiсь ог пов, оя-ойшöр тай ветлöта да некин эшö эз сёй...

— Сэк эн лöгась да висьтав, мымдаöн усьö сюыс?

— Невнаöн усьö... — эз бы ошшась Галина Макаровна, но голосас тöдчис гаж. — Тэнат тоннася унажык, кыдз трактористлö да комбайнёрлö, а... Петрич Иваныслö сизим центнерся унажык лыддьöмась... Видзöт, нiя эзö дышöтчö уджавнытö семьясиныс быдöнныс уджалiсö, ытшкисьны ветлiсö и гуна вылын часöт бергалöны, мед и кöть Иваныс юыштлö жö... Сымда няньнас позяс семьялö годйыны, да кужасö я бöра Петриччес няньсö сёйны? Озö я бöра спирт вылö сюсö вежö? Ме мылякö пола, что спиртöн юасö и пондасö поннэз моз виннявны да горзытöн ветлöтны и отирлiсь корны няньторрез. Вермас эд сiдз лоны?

— Кужöны, да мыля оз! — нето сералiс, нето лöга висьталiс Фёдор.

— Асьныс бы то, спирт вузалiссес, и сотчи, а нiя отирсö сотöны. Быдöс ни эд отирсö спиртнас тшыкöтiсö, сэтчöдз юкталiсö, что мукöд мортыс морт вылö ни оз вачкись. И некинлöн миян понда юр оз вись, некин бытьтö оз кыв и оз адззы, мый керсьö. Мыля нö сiдз, Фёдор?

— Этö тэнчит колö юавны. Тэ грамотнöйжык, ылöсажык, тэ начальствоыс гöгöр бергалан и, натьтö, тöдан, мыля сiдз керсьö.

— Сiдз. Асьным бöрьямö тшыкöм юралiссесö, Фёдор! Кыдз пондасö локны выборрес, сiдз отирсö веськöтлöны и пелитчöны кандидаттэс-депутаттэс, дундöтчöны да ошшасьöны, кöсйисьöны керны медбур олан, а ми пеллезнымöс öшöтамö да кывзамö, думайтам, что былись эд, маш! Вöлись эд эта керас! И керöны тай... Нятьын оламö да пыдöжык нятяс пырамö. Эшö этадз год-мöд, и деревняэзаным отирыс и поннэс куласö.

— А тэ тöдан, мый керсис выборрезнас, кöр бöрйимö районаным юралiсьсö! — серöмтчис тракторист. — Эзö я винасö избирательнöй участокас деньгатöг козьналö отирыслö: кöда пырö голосуйтны, сылö бутылка, кöда пырö, сылö бутылка! И отир голосуйтiсö! Мый миян законнэс абу я мый этатшöм уджыс понда сьöвтавны жуликкесö?!

— Закон... Кытiсь тэ, Фёдор, кылiн, медбы миян законнэз сьöртi олiсö? Сэк мыйлö законнэс йылiсь баитан? Ме вот пола, что ми тэкöт унаöв ни асланым юр вылö баитамö, и кыдз бы эзö пурö, — висьталiс Галина Макаровна да сэтöн жö баснинас бергöтчис мöдöрö. — Вежсяс жö оланыс! Ылöсажык жö, бат, кинкö государствонаным пондас веськöтлыны или мый? Или былись Россияным прах мунас?! Думайта, что оз.

Нач ни пемдiс, тракторист да совхозiсь директор баитiсö и жагвыв пемытiнын талисö нять — янсöтчыны эзö вермö, эзö ештö эшö быдöс баитны. Янсöтчисö только сэк, кöр мунiсö ни улицаöт да нерисö кинлiськö пон, кöда сiдз вувтiс, бытьтö нач чужöйез мунiсö улицаöт. И вöлись öтыс кежис гортланьö, мöдыс мунiс Любаэзö, кöдалöн чиння голосыс кылiс öшын увтаныс: видiс кинöскö нывка — чирзiс:

— Ме тэнö кори я мый я?! Мун гортат да шоччись, а эн сэтöн ветлöт. Котöрт, котöрт, то видзöт, кыдз петас тятюö да горбат тэчас!

27

Арыс ёна ни мырсис-вермасис тöвкöт, кöдалö эз сетчы: то петалiс шондi, то кымöррез сайöвтлiсö шондiсö, кöда эз мыччисьлы неделя етшöн. Пондывлiс ни усьны лым, койис катшашыдöсöн, кöда сэсся сылiс да унажык керис нять. Тöв то пондывлiс вижгыны ойланьсянь, то пöльтiс лунланьсянь, то вöлi лёк, кöдзыт, то раммис-небзис. Важын ни лунлань лэбзисö туриэз и быдкодь каёк. Ыббез вылiсь позис ни адззыны чочком гöн кодь лымоккез и лымкаёккезöс, кöдна лэбалiсö табуноккезöн. Кöч пасьталiс чочком пась.

Совхозын вермисö вундыны быдöс сюэз и, кöр вундiссис медбöрья гектар вылiсь шогдi, Фёдор нельки пернапасасис, спасибо висьталiс важ комбайнлö, пуксис кабинаö да машинаöн пондiс ыб вывсянь локны гортö, колесоэз лойисö нять, и комбайн вермис эд катыльтчыны деревня дынöдз, но дорись керкуэз дынын машина бытьтö мыдзис, ружтыштiс и лöнис.

— Мунсис эд, — кабинаись чеччöвтiс комбайнёр, баитiс машинакöт. — Одзлань тэ менö, ёрт, он ни понды нятьнас резны. Шоччись кытчöдзкö эстöн, сыбöрын, бат, ме тэнö тракторöн кыска гаражöдз, мед бандит чужöммес озö жö бöра разьö.

Фёдор лöсьöтчис гортын шоччисьны лун-мöд, медбы öтiк-мöдiк уджалыштны, кöр керкуö кöть эн и пыр, сэтшöм нятьöсь да ёгйöсь джодж, и баняын бы колö миссьыны да паськöм бы колö пеславны...

Джодж, кöмкöт да паськöм... Бат, былись медавны кинöскö, корны чож инькаöс, кöда деньга вылö эз я бы отсась? Или... Вина юны кужöны, бокын узьны вöзйисьöны, а удж керны... Натьтö, мужик, уджавны озö котöртö... — ружтiс да думайтiс Фёдор, мунiс уджалансянь гортö.

— Фёдор, тэ нö мый? Мыля меным эн вунды, кöр кöсйисин? Менам эд гриваыс вылын кольччис гектар-мöд...

Кысянькö рака моз лэбзис-локтiс Пестерин и пондiс карзыны, бытьтö виноватöй вöлi Фёдорыс, что сылö эзö вундö гектар-мöдсö.

— Юав комбайныслiсь, мыля сiя тэныт оз вунды, — висьталiс Пестеринлö комбайнёр. — Ме, кывзы, Егор Петрович, уджавнытö етшажык мыдзи, нежели вочны важ машинасö. Видзöт, ыбыс вывсянь гортöдз эг вермы локны, бöра жугалiс.

— Кöть мый, мужик! Кöть шöри орöтчы, но меным кыдзкö вунды. Вунды! Ме тэныт бура вештiся. Эн дойд Егор Петровичсö, сiя эд мортыс кöр умöль, а кöр бöра туйö жö эшö кытчöкö. Отсав!

— Егор Петрович!..

— Отсав, мыся! Грех оз ло. Юрбита ме тэ вылö... Кöдзыт рытыс. Котöрт бы гортö, кай гор вылö да шонтiсь. Но мездöтчыны Пестерин дынiсь не сiдз просто, кыдз лякасян турун бердiсь: лякасис, и кер тэ сылö, кöть ойнас жö кай ыб вылö да вунды, мед и пызитö-зэрö бöра.

— Ладно... — медбöрын висьталiс Пестеринлö Фёдор. — Ашын пондыла гуддисьны, может мыйкö петас, а оз кö... Эн горзы ме вылö.

Мужик вöлись пемытöн ни иньдöтчис гортö да медодз кежис Наташа дынö, кöда талун соседдэзас жö. Наташка казялiс тятьсö, кыдз пыр чеччöвтiс паныт и пондiс лельгыны, мыля тятьыс дыр эз лок.

Сiдз и чулалiс арся лун, кыдз шогалiс. Узисö, ашынас Фёдор чеччис, петiс öтöрö и... Ойнас усьöма лым, омöн быдöс чочком-чочком...

«Вундiссис, Егор Петрович! — рад лоис мужик лым вылö. — Талун ме гортын уджалышта... Кöть джоджсö миськала».

Асыв. Эшö умöля тыдалö. Фёдор лöсьöтчис бергавны гортын, эз тэрмась: нюжласис, öмсö осьтöтлiс, рожабаннэсö малалiс — бур, кöр оз ков кöдзытiнын котöртны комбайн дынö, мырсьыны-заводитны машинасö, ежели заводитчас, кайны ыб вылö...

Мортлö и каньлö бур, кöр хозяин гортын. Кань гажтöмтчöм хозяинтöг и öнi ниртчö коккез бердын.

Наташка эшö узьö. Наташкалö мед ни бур, кöть кыдз, кöть мый, мед и мам абу, но сiя, тыдалö, счастливöй, ежели узьö кокнит да чöскыт онöн. Саймас и медодз пондас ыксыны тятьсö, медодз окалас Фёдорöс, окалас каньöс, вöлись пондас пасьтасьны да жагвыв кöмасьны, пондас корны то кöмкöт, то паськöм...

Ружтытöн Фёдор лонтiс гор, чугунöн пусьыны öшöтiс ¹картов, чилькöтiс да юкталiс мöс. И видзöтан кö, öтöрын асыв лöз видзö — югдö ни. Кинкö ыбöсас ёркöтiс, этö локтiс контораись техничка и висьталiс, что Фёдорсö корöны контораö.

— Мый бöра лоис? Кинлö ме одза-одз кола? Шоччисьны озö сетö! — мужик босьтiс гормöччан и пондiс горись гуддьыны би, медбы чожажык сотчисö пессэз. Горын пессэз эшö сотчöны мымдакö, вöлись кусöны...

Мужик нылоксö вердiс-юкталiс йöлöн, пасьтöтiс, и кыкöн котöртiсö контораö. Локтiсö контораö Фёдор да Наташка, пырисö керкуö, здоровайтчисö директоркöт, кöда пукалiс öтнас пызан сайын и вöрöтiс гижöттэз, бытьтö пыриссесö эз адззы. Но Наташка ыбöссянь чеччöвтiс Галина Макаровна дынö, эз повзьы окыштны инькасö, пуксис пидзöссэс вылö, кыкнан кинас кутчисис голя бердö, пондiс окавны рожабаннэз. Окалiс Наташка Галина Макаровналiсь рожабаннэз да ошшасис, что узисö тятьыскöт кыкöн — öтiк койка вылын, и каньыс сэтöн жö мурзис да нюлiс Наташкасö, что лöсьöтчисö йöлöн пуны каша да некöр лоис. Юасис Галя тёткалiсь, пуис я гортас сiя каша, поди, вердас Наташкасö.

— Дугды, Наташка! — сералiс и видiс нылоксö тятьыс. — Мый миян йылiсь думайтас тётя Галяыс? Сералас эд...

— Кин сералас? Кинöс сералас?! Этатшöм нылочкасö серавны... — Галя Наташаöс жмитлiс, окалiс, сiдз любитiс, топ ньылыштiс бы. Сэтöн жö пызанiсь кыскис конфета, вердiс гöстясö чöскыт торöн да вöлись пондiс баитны Фёдоркöт, бытьтö Фёдорыс совхозаныс сэтшöм ыджыт морт, что сытöг директор нем оз куж керны:

— Кывзы жö, Фёдор Матвеевич, инькаэс озö я баитö, что колö пö керны «чарлачöвтан», сэтшöм вежалун, кытшöм кöркö вöвлi колхозын, кöр арнас быдöс дзимляссяс ыббез вылiсь — ештöтчасö отир, картаэзö йöртасö пода, сысъяласö ырöшшез, керасö суррез, начкыласö баля-мöд, пуасö-пöжасö, öтiк лунö быдöс уджалiссес чукöртчасö öтлаö, сёясö пöттöдз, йöктасö-сьыласö и, видзöтан кö, отир öддьöн радöсь, бöра бура одзлань уджалöны. Кинся ми умöльжыкöсь, ежели честнöя уджалiм — быдöс дзимлялiмö, керим, мый вермим и эшö пондамö керны? Мый юртö öшöтiн да пондiн думайтны?

Колö висьтавны, что эта вежалунö некин эз вöв вывтi код, мед и пöттöдз дзунгисö сур да ырöш, некин кодувья öннямоз эз усяв, эз туплясь нятьын, некин некинкöт эз косясь, эз видчы — быдöс кыдз отирлöн чулавлiс, отир моз.

— Мыля менчим сэтшöмсö, Галина Макаровна, юасят? Отирлiсь колö юавны! Кыдз нiя, сiдз и ме. Ме эд ырöшшесö сысъявны ог куж... Галина Макаровна пиньöвтыштiс öмсö, нюжöтыштiс чуксö — синнэзас öзйыштiс гаж или лёк, он вежöрт, сэсся кыдз бы виньдiс, петух моз гультым-гальтым ньылыштiс дульсö, вöлись бöра öдззис сярзьыны-баитны, висьталiс, что сiя чуть ли не быдöнкöт баитiс, и быдöн сы дор, сыкöт, и сэтöн жö зэркытжыка ни висьталiс:

— Кöдна мöс мымда юасö да пондасö мыччавны обезьяна кодь мывкыддэзнысö, сэтшöммескöт тöдчыны огö пондö!

— Öнi верит и эн отирыслö...

— А колö отирыслö веритны, Фёдор Матвеевич! Огö кö пондö нач веритны öтамöднымлö, поди, нем вылö и лоас овны. Ме тэнö сы понда и кори, и эшö, деньгаок бы кытiськö... Вочны эд пондас ковны тракторрезнымöс, подалö пондас ковны ваявны вердчан — эта да сiя, да эшö мыйкö да öнджа... Ох тэ, чисто юр бергöтчö! Или меным юскисьны директорсис? А мый? Кыдз верми, сiдз и уджалi: кöдзим, быдтiм, дзимлялiм...

— А тэ местын кин? Или пондам орсны — талун тэ, а ашын Наташкасö бöрьям юравнытö, кöда эшö ныр увтiсь оз ылöст чышкыны! Шуам, менö бы тэ местö, ашын жö совхозсö винаöн юа! Мый сiдз видзöтан? Думайтан, юнытö ог куж?! Эшö кыдз понда гундыртны, кыдз понда...

— Но и чож тэ миян морт! Но и кужан... Кыдз только кылыт бергалö сiдз баитнытö?! — Бöра Галина Макаровна чупöтiс окалiс Наташкасö да баитiс Фёдоркöт, педзис-тэрмасис, öнi жö мунiс бы районöдз, кытöн öтiк морт пö сю вылö вежö тракторись мотор, и сыкöт вермис бы, бат, баитчыны небны моторсö!

— Ог я ме ветлы районас?! — директорлiсь баснисö орöтiс комбайнёрыс. — А мый? Аслам синнэзöн видзöта, мый колö и мый оз.

— Фёдор Матвеевич, ме эг бы панлась, но тэ нёль кока или мый? Гортын и сэтчин...

— Ась мунö, ась мунö! — лельгис Наташка. — Ми тэкöт кольччамö.

Наташка эз бы янсöтчы Галина Макаровнакöт и горзöмсорöн ни тятькöт петiс контораись.

Öтöрын бöра поснита зэрис. Вöлi югыт ни. Сьöвбöррез сильгисö-сьылiсö рябина вылын да кокалiсö ягöд. Пода вöдитiсь Тоня котöртiс фермалань и öддьöн эд горöн видiс мужиксö, мыля сiйö абу одз саймöтöма.

Асыв, кыдз асыв деревняын, кöр некытшöм погоддя оз дзуг удж и олан.

29

Баитчисö директоркöт, и Фёдор ветлiс Кöсöдз, керис мый колiс керны: лöсьöтчис кодя морткöт, медбы сiя сю вылö сетiс мотор. Хозяин видзö дзуттэз, кöднö мыйöнкö колö вердны, сiйöн сю вылö и вежö моторсö. И кыдз только лоасö туйез, кыдз только кöдздöтас, пондас ковны моторсö вайны... Öнi Вильыбын уджалiсь отир эз узь, лöсьöтчис «чарлачöвтан» кежö: мукöдыс сысьялiсö тагья ырöшшез, а кöдна пöжисö да вийöтiсö суррез, начкылiсö кукань.

Вина эм тыр: кытчö тальччан, сэтöн и вузалöны спирт — ю да эн сотчы, тöд асьтö, эн пöртчы понö да порсьö! Директор вежалун кежö ачыс небис винасö — быд мортлö быдса бутылка, и вот отир суббота рытö öксисö совхозiсь контораö, пуксисö тыра пызан сайö, стаканнэзö кисьтлiсö вина, но эзö косьтö доззэзнысö — эзö юö сэтчöдз, кытчöдз директор эз понды баитны. Сiя сувтiс пызан сайын, киас босьтiс тыра рюмка, малыштiс гладь юрсö и пондiс ошшасьны да ошкыны уджалiссезöс, некин йылiсь эз вунöт висьтавны бур кыв, нельки бур кылöн касьтылiс Павел Петрович Отопкинöс, фельдшерöс, кöдö эзö вунöтö корны öтлаö жö, кöда ой и лун котрасьö Вильыбын, веськöтö челядь, ыджыттэзöс — томмезöс и пöриссезöс — гробись кужас и вермас чеччöтны стогодся старухаöс, ежели сiя чеччас. Галина Макаровна пызан сайын эз вунöт касьтывны и Жбан Митрейöс, кöть сiя джын гожум уджалiс Пестеринлö, а мöд джынсö педзис öтлаын жö, кöть и юыштлiс вина да вунöтлiс, кытöн олö и мый керö. Директор öтiк-мöдiклö козьналiс козиннэз, а сыбöрын сеталiс почётнöй грамотаэз. Отирöс ошкис сэтчöдз, что дулльöсь Жбаныс радувьяс нельки окалiс инькасö, шуис, что ежели бы... Сiя вермис бы гöтрасьны Галяыс вылын. А мый? Мыйöн умöль Митрейыс? Киэс или коккес абуöсь? Гöтрасяс вот и юны дугдас, ош моз пондас бергöтны уджсö.

— Веритам, веритам! — шыасис директор, киас видзис тыра рюмка, висьталiс. — Юыштам, ёрттэз, ась миян пыр тырдоз лоас!

Дзикöтчисö ни гармонняöн. Пода вöдитiсь Тоня талун, кыдз чужмöр, чож, кыдз чикись, басöк, чиркнитiс-ыкöстiс, быркнитiс пызан сайись джодж шöрö и пондiс чож коккезнас тойны тусь — йöктыны, öдззис сiдз чывкйыны, что сьöрас вöтчисö мужиккес и инькаэс, талун некинлöн и некыт эз вись. Гаж пизис контораын — бус джоджын гардчис, гармоння дундöтчис да орсiс, ружтiс керку, жольöтiсö öшыннэз. Кужисö деревняын гажöтчыны, прокмисö сьывны и йöктыны! Йöктiсö отир да мыдзисö, пуксисö шоччисьыштны, сэтöн кинкö горöтчис: «Ёрттэз! Мый нö ми?! Отир или абу? Мыля сёям-юам, кучиккезiсь петам — гажöтчам, а челядьыс кытöн? Эзö я нiя бура отсасисö турунсö керны и картовсö дзимлявны! Кöркö, батя, этадз эзö керö, кöркö, кывзö, челядьыс öтлаын уджалiсö и öтлаын «чарлачöвтансö» кольлалiсö. Ми эд нiйö винанас огö пондö юктавны.

Сэк жö кинкö уськöтчис ыбöсö, и час эз чулав, кыдз öтлаын пызан сайын пукалiсö ни нiя велöтчиссез, кöдна былись гожумöн уджалiсö совхозын, мед етшаöн уджалiсö, но öтлаын эд гудыртiсö.

Кык лун гажöтчисö совхозниккез, и, тыдалö, мукöдыс эзö пöтö винаöн, натьтö, вöлi бы деньга, неделя бы эзö садясьö, но вежалун чулалiс, колiс одзлань уджавны, кöть деревняын вывтi и нем лоис керны, кыдз только бергавны фермаын.

Кытöнкö ноябрь месяц пондöтчытöн тапкис-усис лым да öтiк суткинас усис четверть сувдаöн, кöдздöтiс. Мороз ойöн пондiс шовкöтны керку бердын, топ юасис шонтiсьны отир дынын. Луннэзöн шондi кыдз бы дзебсисьлiс ни вöр сайö, гусьöнмоз видзöтчис только луншöрöн. Тöдчöмöн чинiсö луннэз.

Лун-мöд только и вöлi вывтi кöдзытжыкыс, а сэсся бöра небзис погоддяыс, кымöртчис. Лöнь луннэз бытьтö суналiсö. Недыр кежö кöдздöтлiс, но эта кадö ештiс кынтiсьны Егор Петрович подругалöн мужичокыс, кöда кодувья рытнас усьöма öшын увтаныс, ланьтöма и кынтöма ки лапаэсö. Мужиксö кыскисö больницаö, и быдöн пондiс жалейтны Гавряöс, мыля сылöн сiдз шогмис, кöр киэсö вермасö орлавны, и кольччас нач сиротаöн — асьсö оз понды вермыны вердны.

— Жаль я мый я тiянлö алкашыс? Ась кынтö киэсö, аслас эд нiя! Етшажык колiс юны! Вон менам... — отирöс и коддэзöс эз вежöрт Тоня, кöда фермаись кодьöн эз и петавлы не тöв, не гожум. Кылыс сылöн пыр лудö, и пыр адззö мыйкö висьтавны да сэтшöмö, мый йылiсь он думайт и кывны. — Жаль я мый я Öлдöттяыслöн мужичокыс, ежели инькаыс талун жö вермас адззыны мöдiкöс.

Гажöн баитö Тоня — гажöтö бы кывнас асьсö и отирöс, кöть и сьöкыт фермаын уджавны, да мöймуся сьöртi кокнитжык сiйöн, что таво мöссэслö тырмö турун, мöймусямоз серанькаэс да сьöданькаэс картатыр озö баксö — ловнысö озö кыскалö, и йöв сетöны мед етшажыкöн, нежели гожумöн, но эм мыйöн ошшасьны. Мöссэсö чилькöтöны, керöны ви, ви кыскöны вузавны нето Кöсö, нето городö и ась донтöма, но вузалöны. Сiдзкö, уджавны совхозын да овны позьö. Тöн да удерлун ведомостьöн сеталiсö сю, и бöра эм мыйöн ошшасьны. Вон Тонялö гортö сюсö вайисö кыкьямыс центнерся унажык. Этасянь инька только шыннялыштлö, дышшесö пинь йыввес вылын видзö-сералö, öтiк-мöдiк завидуйтöны ни сылö.

«Эз ков трали-вали овны! Гожумнас эз ков шондi югöрыс вылын нюжласьны, а колiс уджавны!» — Тоня немымда оз сетчы завидуйтiссезлö.

Совхозын сеталiсö сю, и пöтöсь лоасö совхозниккез — асьныс сёясö и пода вердасö. Тоняэзлöн босьтiсö кыкьямыс центнерся унажык: шогдi, рудзöг, зöр — быдöс пöдналiсö важ чомö, лöсьöтчисö косьтыны да изны, а Петрич Иваннэз гортö кыскисö сизим центнер гöгöр, тыра мешöккез пыртлiсо пытшкись посöдзö, кöдна эзö ештö, кыдз шуöны, шонавны, хозяиннэз пондiсö сюöн вузасьны ни: öтiклö — мешöк, мöдiклö — мöдiк мешöк... Вöлi бы только мый вузавны, а босьтiссез адззисьöны: öтiк небис мешöк да мöдiк и, видзöтан кö, Петрич Иван бöра код мунö улицаöт, кинöс панталö, сылiсь и корö куритны да модьö: «Сёйнытö эд, кум, нач нем... Эх!»

— Стыдитчин бы, Иван! Эн я гортат сюсö машинöн вай, — видöны мужикöс, а сiя дорйисьö:

— Вайи да, дурак, кодувья быдöс вузассьöма...

— Эх, Иван Петрович, Иван Петрович, да кöть тэ асьтö вузав, но зырымтö эн каттьы нырыт увтö да норасьтöн эн ветлöт!

Локтiс тöв. Öнi отир унажык уджалiсö фермаын: öтiккез вердiсö пода, мöдiккез ваялiсö турун, кöдö ыб вылiсь кыскалiсö тракторöн. И бöра кабинаын пукалiс Фёдор, кöда уджавтöг овны оз вермы и гöтрасьны оз вермы: невестаэз бöрйö, кöдна асьныс гортöдз вовлiсö сизима ни, только нiя быдöнныс мыйöнкö öткодьöсь — öтiк мывкыдаöсь я мый я: öтмоз юыштлöны вина, а мужиклö вина юисьыс оз бы ков...

Галина Макаровна быд лун педзис-жöдзис унажык фермаын жö — пода понда öддьöнжык сьöлöмыс висис. Но таво оланыс вöлi топ личытжык. Гортö вовлiс одзжык, кöр и лунöн шыбыльтас гортö да ендас рытöдз, ештас пыравны Дарья баб дынöдз. Шогалö и шогалö пöрисьыс, кивзö и ружтö, топ быдöс висьö, но бура оз тöд, кыт öддьöнжык и висьö. Баблöн öшис гаж, пондiс дышöтчыны нельки чышкыны джодж, баитö:

— Ой, Галю... Натьтö, таво кула... Öтнат кольччан деревняаным. Кыдз пондан овны? Нач эд гажтöм лоас! — ружтыштас да висьталас. — А тэ татöн эн ни ов. Мун кытчöкö.

— Кытчö, баб, ме татiсь муна? Кин да кытöн видзчисьö? — оз вежöрт Галяыс.

— Жöник адззы...

— Тэ бöра меным жöник вöзъян?! — öбидитчö инька.

— Сэк мый нö керны? — одзлань бабыс норасьö. — Кывзы, Галю, юрö бергалö. Натьтö, давленнё менам... Ветлыны бы то фельдшерыс дынöдз да ог чайтчы, лымыс пыдын ни, туйыс Вильыбöдззас абу. Кыдз тэ ветлöтан?

— Ме кöч моз чеччала!

— Сэк кыссьыла и ме фельдшерыс дынöдз...

Пöрись весись кывсö эз мыдзöт, висьталiс и керис: ружтiс да ветлiс медпунктöдз, кытöн сылö былись фельдшерыс висьталöма, что баблöн ыджыт давленнё и чожа кулас.

— Быль, кага! Сiдз и шуис кодя фельдшерыс, что кула пö, — баб норасьö-висьтасьö Галялö. — А мый? Колас кувны... Кула кö, Галю, тэ менчим доброöс быдöс гортат петкöт! Медодз енсö, сыбöрын каньсö и йöрнöс-дубассэзöс эн коль. Пригодитчасö, да ов бытшöмжыка — юртö эн серав!

— Талун я мый я, баб, кулан?

— Лун-мöдсö ола да вöлись.

Талун кык пасма баитiсö этадз, ашынас Кöчыбö овны локтiсö Тимофееввез — асланыс жö отир, кöдна важынкодь ни кытчöкö ветлiсö овны, и бытьтö öшлiсö — вунöтлiсö ни ны йылiсь отир. Локтiсö кысянькö, туй вывсянь веськыта пырисö асланыс пиньöв-паньöв керкуö, поздiсисö, вöлись дзир-бар керисö гöгöраныс. Керку гöгöрын некытшöм след эз тыдав, омöн лым. Кытöн но отирыс?

— Ме эстöн овны ог понды, бöр муна бандиттэс дынöдз! Сэтчин ась быд лун вийöны, но кöть отирыс эмöсь, а эстöн ошыс сёяс! — жексьö Тимофеевлöн инь, кöда эз велав овны вöррез коласын, öшынöт видзöтö баб керкулань, кытöн короминна вевдöрын кыдз бы тшын йöктö-петö трубаись, и кытöнкö топ пон вувтышалö.

Чожа Тимофееввезлань беддясис-мунiс ни Дарья баб, ружтiс, кöдаись нач повзис Тимофеевлöн чача кодь иньыс, кыз бöрсö беринь-беринь керис, пондiс чирзыны-юасьны мужикыслiсь: «Кин эта? Не Баба-Ягаыс ли сiя?»

— Сiя, сiя! — Тимофеев нач повзьöтiс иньсö. — Сёяс миянöс!

— Не-е-е, ме эстöн овны ог понды! — кöза моз мексö Тимофеева, кöда чужис, быдмис и олiс шонытiнын — кокнита олiс, бура сёйис и пасьтасис, вöррез йылiсь вöтöн эз вöтасьлы, некöр эз думайт шедны татчö да разьсьöм ни деревняö, кытöн öтöрын кöдзыт, омöн лым, и лым вылын отир след абу, только керку дынö сибöтчö-беддясьö кытшöмкö старуха, пасьтасьöма-кöмасьöма ас мознас, ружтö-мунö.

Тимофеевлöн инь виль местаын лов кыскалö, а Тимофеев пеллесö адззö да гажöтчö, сералыштлö, иньсö нерö, видзчисьö керкуö Дарья бабöс, кöда йылiсь ылын овтöн нач ни вунöтлiс, а сэтöн керкусянь видзöтыштiс öтöрö и сэк жö тöдiс Дарья бабсö. И бур, что пöрисьыс ловья, лоас кинкöт кыв горöтчыны, юасьны да висьтасьны.

Пöрись питкыльтiс-беддясис Тимофееввез керку дынö. Адззис, что керку гöгöрын былись кинкö ветлöтöма, сувтчис посöдз дынö. Сэтчö керкуись петiс тоша мужик — кузь да векнит мыгöра, юалiс:

— Дарья баб, тэ или абу?

— Ме. А тэ кин?

— Баб, хозяин, поди, эта керкуись! Вунöтiн ни Елисейсö?!

— Господи! — баб хлоп-хлоп киэзнас вачкис боккезас. — Мыйöн ни ме тöда тэнö, кöр ассим нимöс ни вунöтла? Ылiсянь я кысянькö? Овны локтiн али шоччисьны?

— Овны, баб!

— Сэк Кристос тiянкöт! Тöрамö. Видзöт, мый ыжда деревняным вöлi, да кин кытчö и лоис. Сiсьмасö керкуэс, и ми куламö. Некин оз понды тöдны, что кинкö кöркö олiс эстöн. И мыля отир гортiсь пышшöны? Мый нылö оз тырмы? Натьтö, дышныс петö уджавны, сiйöн и кошшисьöны. Висьтав, Елисеюшко, буржык кытöнкö оланыс али абу?

— Кытöн буржык, кытöн умöльжык... Öт бокнымöс шондiыс пыр эд шонтö, а мöдным сайкалö.

— Но, а мый нö пондан керны гортын? Видзöт, эд миян нач разьсис оланыс.

— Баб, дзоньöсь бы вöлiсö юр да кикок, а уджыс адззисяс.

— Сiдз. Уджалöны жö эшö отирыс, и тэ пондан уджавны.

Öтiк кыв да мöдiк — гöрдззисö басни. Елисей пöрисьсö корис керкуö, пуксьöтiс лабичö, одзас вайис кык гöгрöса гöрд рöма яблок, тшöктiс сёйны. Пöрисьыс пон моз эз уськöтчы ны вылö, эз понды сэтöн жö курччавны, а медодз гусьöнмоз видзöтлiс мужик инь вылö, кöдалöн чужöмыс эз вöв миян кодь югыт вира, а вöлi сьöд рöма, бытьтö мортсö кытöнкö мавтöмась саöн, и вачкисис цыганка вылö. Но цыганка моз эз бызды-баит, а пиньласис-видзöтiс пöрисьлань, дзик бабыс сiдз сiйö и курччöвтас или чöвтас-мырддяс вывсис басöк паськöмсö.

Пукалыштiс мымдакö баб Елисейезын, юалiс мужиклiсь, кытiсь сiя адззис сэтшöм басöк да бытшöм иньсö, босьтiс яблоккез, сюйыштiс пиас, висьталiс спасибо и петiс керкуись аскодя думаэзöн. Эз вежöрт, мыля роч инькаыс (поди абу роч, а кин и эм) керкуын öтiк кылöн эз шыась, натьтö, брезгуйтiс пöрисьсö, эд бабыс кöть кытшöм, да морт жö и одзсис нем эз мырддьы да пышшöт.

Старуха петiс керкуись, эз ни кыв, кыдз бöрсяняс том инька пиньöвтiс чужöмбансö, пишнитiс и висьталiс мужикыслö:

— Кытшöм дук старухаыс дынсянь пыкö! Ловзисьны немöн. Чожажык осьт ыбöссö, то пöда!

— Вийны тэнö колiс душманнэслö да мылякö эзö вийö! — гажöн иньыслö висьталiс Енисей, но осьтiс керку ыбöссö, керкуö лэдзис тöвся кöдзыт ру, кöдасянь иньыслö бöра умöль, пондiс чирзыны. — Пöднав бöр, то ме кынма зiпозат!

Елисейезсянь питкыльтiс-беддясис Дарья баб, кöдö посöдз дынын видзчисис ни Галина Макаровна, юалiс, кин сэтчин локтöм, кытшöм тшын петö Тимофееввез керкуись.

Баб висьталiс, мый эм и кыдз вöлi, кыдз панталiсö и кольлалiсö Елисей гозъя, висьталiс и сiйö, что колö бы ветлыны фельдшер дынö.

Сэтöн жö баитчисö, что Галя мунас Вильыбöдз, медбы небны пизь, только вот босьтас дадь, и колас кö, кытöн нач ни умöль туйыс, бабсö кыскас дадьнас.

— Тэ мый баитан, Галю? — пöрисьыс сералiс. — Ме эшö абу жö нач кулöм, верма эшö бедьнам беддясьны.

Погоддя вöлi рам, шоча усис поснит лым, а сэсся тöвтор эз вöв, лун вöлись öддьöнжык осьтiс синнэсö, лоис югытжык. Том да пöрись иньдöтчисö Вильыбö, ны сьöрö вöтчис Серко. И быдöс бы бур вöлi, ежели бы Кöчыбсянь Вильыбöдз ветлöтiс унажык отир, буржыка талис лым — керис гладьжык туй. Но туй кузя унажык ветлöтö только Галя и оз вермы бура коккезнас гладьöтны лымсö. Сэтöн эшö мунöма трактор, гусеницаэзöн да додьöн лымсö тальöма-нильöма, бергöтöма-нырьялöма, сiдз соровтöма, что керöс паныт пöрись пондiс шагнявны воробей шаггезöн — нач сийöсыс пондiс кыскыны бöрлань. Мунiс и пöдiс, чужöмыс лöзöтiс. Сэк Галя уна эз понды баитны бабкöт, а пуксьöтiс дадьö. Баб казялiс, кыдз лэбзьö катша да горöтчис: «Мыля меным еныс катшаыслö моз борддэсö абу козьналöма?!» И пондiс ружтыны дадь вылын ни.

Недыр кежö кымöрын мыччисьыштлiс шондi да öшис-дзебсисис, кыдз мыйиськö повзис! Галя дадьöн кыскис бабсö умöль туйöт, сьöкыта чушыктiс. Мунiс инька и кылiс, кыдз бöрас дадь вылын тожö ружтö ёртыс — сьöкыта лолалö. Дадь увтын дзуртышалiс лым. Одз да бöр котрасис Серко, чушыктiс öмтырнас.

Ылын я Кöчыбсянь Вильыбöдз? Километрся только невна унажык. Галя некытчö эз тэрмась, жагвыв кыскис сьöкыт дадь, кывзiс, кыдз ружтö бабыс. Шаг и эшö шаг... Сэтöн бытьтö ёртыс дадь вылын эз понды лолавны...

Томжык сувтчис, бергöтчис, мышкыртчис Дарья баб весьтö и повзис: пöрись эз лолав, топ ланьтöма дадь вылын и узьö пыд онöн. Мортсö фельдшер дынö кыскыны лоис немлö.

30

Бура дзебисö бабсö. Сiя одзлань дзебсьыны лöсьöтöма паськöм, небöма вина, и Галялö одзжык висьтавлiс, кытчö дзебны, кытöн куйлö деньга. Отир-кольлалiсö бабсö.

Вильыбын нач лоис гажтöм, топ нач орис и кусiс деревняын оланыс, бытьтö Галяöс сэсся шондiыс эз понды шонтны, югдöтны, тöлiсь ойезнас эз понды мыччасьны, кымöрись киссисö быдöс звездаэс, му вылын нач пемдiс, лоис вывтi кöдзыт; оз локтö не тулыс, не гожум, оз пондö сьывны кайез, гожумöн оз понды быдмыны турун, оз понды цветитны быдкодь цвет, оз пот вöр вылын лист — кусас оланыс, и оз ло отир.

Медгажтöмöсь лоисö нiя ойес, кöднö колiс чулöтны Дарья баб кулöм бöрын, кöр Галя керкуын узьлiс нач öтнас, öшис он — эз вермывлы ланьтны рытсянь, ольпась вылын куйлас да куйлас, бергалас да бергалас, юрас пырлiсö быдкодь арттöм думаэз.

Думаэз, думаэз... Чувйöны думаэс, пурöны, дойдöны, видöны. Етша думаэс ошкöны. И мыйлö быдöс эта Галялö, олö öтнас, а öтнаслö уна я колö? Öтiк садникись вердчас, кöр таво картовыс шогмис триста ведра гöгöр, аслыс тырмас сёйны, мöслö вердны и вузавны кольччас, да эшö лук дзимлялiс дас ведра гöгöр. Сэк кин да мый понда пессьыны, садь быртöдз мырсьыны, котрасьны, кöть пон моз вувт, пурсьы — ойез эн узь да кер. А керан кö, висьталас я кинкö спасибо?

Кыдз одзлань уджавны и мый керны медодз? Сьöкыт отиркöт уджавны, сьöкыт лоис овны деревняын. Вот чеччас, мунас Вильыбö и быдöнлö висьталас, что сэсся директоравны оз понды, ась бöра мöдiк сы местын уджалыштö. А сiя вермас уджавны фермаын, нiя жö мöссэз дынын, кöднö кужас вердны и малавны. Кузьöсь тöвся ойез, пемытöсь. Галя понсö ни керкуын узьтöтлiс, эмöсь сылöн курöггез и петух, кöдö гожумнас типöн вайöтлiс Дарья баблiсь, и кык кань ни узьлöны бокас, но сылö сiдз и этадз гажтöм. Рытсянь дырöн оз ланьт, и только асыввезöн, кöр пондöтчö югдыны, лоö кокнитжык, и асылöн кокнита чеччö. Бöра, кыдз быд лун, лонтö гор, бергалö керкуын да карта вылын, сыбöрын петö гортiсь, ловзисьö ыркыт руöн. Асыв мича, тöлiсь, кыдз золотоись керöм гöглян, лажмыта öшалö кымöрас деревня сайись ыб весьтын. Дзöрöны звездаэз. Лöнь. Ыб сайын узьö вöр. Тимофееввез керку весьтын вевдöрö лэбтiсьö кыз тшын, öшыннэзын дзуз видзö би.

Лöз югдö. Ойся узьтöм чассэз кыдз эзö и вöлö, кöр эшö Галя адззö Тимофееввез керку весьтiсь тшынсö. Сiдзкö, сiя деревняын абу дзир öтнас, эмöсь эшö отир, кöть нiйö тöдö и оз. Галина Макаровна медодз лöсьöтчö мунны Вильыбö, Вильыбсянь думайтö мыйöнкö ветлыны Кöсöдз. Сэтчин колö бы сибавны öтiк юралiсь дынö да мöдiкöс бы адззыны, колö бы чиновниккезлö мымдакö юрбитны, бöра пондывны корны деньга.

Директор видзöтыштiс кымöрись тöлiсь да звездаэз вылö, кöдна пондiсö ни кусны, лэдзчис посöдзись, думаэзнас иньдöтчис Вильыбö, но коккес кыдз асьныс пондiсö нуöтны Тимофееввезö, кöр ны ордö эшö эз ешты пыравны, кöть и Елисейкöт адззисьлiс ни дзебсьытöн, но сэк вермис я морткöт бытшöма баитны? Дзебсьытöн Елисей кыв-мöдöн пондылiс бы ошшасьны, что локтiс овны пыр кежö, что киэз сылöн золотöйöсь, мый бердö кутчисяс, сiя и петö, вермас уджавны тракторöн, автомашинаöн, вермас пилитны вöр, кöр уджавлiс бензопилаöн, а колас кö, котöртас фермаö да высьтас мöссэз. Мужик топ юра, баитö и оз пöрьясь, а ежели кö веритны Елисейлö, оз я бы туй сыкöт уджавны?

Директор думаэзнас пöрöтiс бы вöр (лесхозiсь билетсö босьтiсö ни). И колö бы вöрсö керны, кыскавны пилорама дынö, кöдö тракторист Фёдор басни сьöртi позьö вочны лун-мöдöн, адззыны электромотор.

Вöр эшö сулалö коккез вылын, а Галина Макаровна сiйö пöрöтö ни, вайö и пилитö да тёс вузалö — вот тэныт и деньга!

«Чожа кыввезнам уджала, только пилорамщикыс эд абу, и оз я бы Тимофеевыс кутчись пилитны вöрсö? Отсалас кö мортыс, öддьöн бы бур лоас!» — инька мунiс ни Тимофееввезö, баитiс аскöттяс, локтiс соседдэз посöдз дынö, кайис и тангис ыбöсö, кöда вöлi пöдана.

Нырö патшкис тшынöн — лонтiсис гор, öшынöт тыдалiс би, но некин эз чеччöвт осьтны ыбöссö, и колiс öддьöнжык сяткöтны. Дыр мыйись директор одзö посöдзын мыччисис нач пасьтöм мужик, кыз голосöн юалiс, кинлö и мый колö эта одза, кöр нiя эшö узьöны.

— Тэ бы колан, Елисей Кондратьевич! Тэ колан, мужик. Мужик жö шусян, а гортат он и рочав. Кыдз соседка, поди, тöда жö бы, кыдз поздiсит и олатö...

— Олам, огö тшыгьялö. Пырö, только эдö сералö, кöр миян нем абу — куш стенаэз керкуаным.

— Лоас, только эд дышöтчö, — Галя пырис керку ыбöс коласö, повзьöтiс хозяйкасö, кöда вачкисис сьöд чужöмнас цыганка вылö. Сiя шардöм синнэзöн вöлись чеччöвтiс кровать вылiсь, öшис и пондiс видзöтны — не кыв горöтчыны, не пасьтасьны.

Галина Макаровна здоровайтчис, висьталiс, что локтiс Елисей Кондратьевич дынö, кöдö оз курччав, оз пышшöт, а, ежели кö этадз инька пондас узьны, вермас и пышшöтны...

Сералiс инька — гажа кыввез висьталiс, синнэзöн кваркыш эз кер, одзлань эз думайт, мый сы йылiсь пондасö думайтны, кыдз кольлаласö. Эшö Галина Макаровна баитiс, что колö бы кинлöкö уджалыштны пилорама дынын, но медодз пилорамасö колö лöсьöтны.

Елисей Кондратьевич пасьтасис, öзтiс чигарка, пондiс куритны да пукавны лабич вылын — мугис мужик, думайтiс, лöсьöтчис мыйкö бы висьтавны директорлö.

— Ме ог тöд, ме ог тöд, — вöлись мужик дзик саймис и пондiс ырбыльтны. — Ме эд ылiсь гортаным уджалi мастерскöйын, вури паськöм, а татöн мастерскöйыс абу.

— Сэк мыйнö пондан керны, Елисей Кондратьевич?

— Гортын понда овны...

— Но и ов, чёрт тэкöт, иньтö буржыка пестунничайт, то сiя вермас госсялöмсяняс эшö шогавны или мый... Ме бы тiян местын!..

— Сэк пондыла ли мый ли... — дыша баитiс Елисей. Директор Елисейезö пыралiс кыдз тöвчик, пырис-петiс — и абу! Галина Макаровна бöрсянь Кöчыбö локтiссез пондiсö думайтны да öтамöд коласын баитны, что татчö локтiсö весись, что колiс кольччыны городö, кытöн адззисис бы удж, а эстöн... Пилорама... Гы, кöдзыт эд öтöрын лоас уджавныт

— Тэ эд, козёл, татчö сьылöй кыскин! — видiс инь мужиксö. — Тэ кузя быдöс сiдз аркмö!

— Мыйнö, ме кузя... Пыр ме кöть кытöн виноватöй... Пурсьöны ни мужик да инька — нерöны тöвся асыв. Олан локтiссезлö оз шынняв или шыннялö да лёка, кöр татöн директор кокнит удж оз кöсйы и весись оз лöсьöтчы вердны. Мужик думайтiс, что инькаыс лёккодь, мый не сы моз, оз кö понды кывзiсьны Елисейыс, зэлöтас... Только мужиксö чожа он повзьöт, сiя не эттшöм кузь пиняэзöс ни адззывлiс!

Асыв. Дыркодь асывлань кымöрыс миссис-ниртiс веж-гöрд рожабаннэз, кыдз кодя невеста, бытьтö кытчöкö лöсьöтчис-мöдöтчис. Смевмис и вынсялыштiс мороз, кöда нырсö сюйис быд местаö, быд пельöсö. Галина Макаровна Кöчыбсянь локтiс веськыта контораö, кытöн гажöн лонтiсис ни кöртiсь дорöм печка. Керкуын вöлi шоныт, быдöс чышкöм-миссьöтöм, некытöн ёгтор абу. Пызан гöгöрын жöдзö техничка, кöда куим копейка понда уджалö мыдзтöдз: чышкö контора, миссьöтö, талун бöра ни ештöма гортын ештöтчыны и татöн удж керöма сiдз, что только ошкы.

Контораын Елена тётка не öтнас, сьöрас вайöтöма кузь гöна учöт понок ыжда каньöс, ештöмась Кöсiсь локны куим том мужик, кыдз ослопинаэз. Чужöммезныс, кыдз паськыт гöрд рöма бекöррез, пельпоннэзныс, кыдз гор пöданнэз, киэзныс, кыдз ошшезлöн лапаэз. Гöрны бы иньдыны томмесö или вашöтны вöр пöрöтны, а нiя тöв чужьялöны. Мый жö бы нылö асывнас одза-одз Вильыбын колö?

Галина Макаровна том отирсö адззис первуись, эз тöд, кытшöм нiя нянь сёйиссез, мый татчö öштiсö да кошшöны. Öтiкыс локтiссез коласiсь синнэсö мöртiс Галя вылö и юалiс, не сiя ли директорыс.

— Басöк я мый я менам чужöмö, сiйöн татчö одза-одз и локтöмныт да видзöтат бы ме вылö? — Галина Макаровна томмез одзын эз öш, кöр сылöн лун бöра пондöтчис отир коласын, и лунсö колiс бы чулöтны кыдзкö буржыка.

— Сэтöртусь тэ да шондiбан. Еныс тэнö сэтшöмсö сетöма! Кыдз казялi, сiдз бы и окыштi öмидзтусьöс! — медъёнлöн сiдз и киссис басни, пиннес гер, варыш моз и видзöтö, варыш моз и уськöтчö бы да былись бы окыштö инькасö. Но Галина Макаровна кывнас уна эз понды орсны, веськыта резгис-юалiс:

— Мужиккез, тi эд, натьтö, татчö не менчим чужöмöс видзöтны локтiт, а эм кытшöмкö мог? Синнэзныт мылякö кыдз варышшезлöн, сiдз бы и кокалатö...

— Но и нывка! Кыдз тэ и кытiсь татчö сэтшöмыс шедöмыт? Ми локтiмö, медбы совхознытö невна сыналыштны, кöр кывсьö, что лоöмась богатжыкöсь, бытьтö бы унажык йöв чилькöтат, сю быдтöмась, турун унаöв керöмась, картов ни мымдакö вузалöмась. Эдö я бы сьöммез öктö? Закон сьöртi колö бы налоггез вештыны, а тi бытьтö нем одö тöдö и одö вежöртö. Кыдз думайтат, Галина Макаровна? Одö кö вештiсьö, ми асьным босьтамö, и сыбöрын кöть Москваö норасьö, миян моз лоас!

— Ен-батюшко! — былись повзис директор, чисто юрыс бергöтчыштiс, вачкисö-кольмöтiсö, но пондiс пеничайтны.

— Сир ньылöмöдз пессям уджалам, думайтам, думайтам медодз, кыдз бы дристöсь мöссэзнымöс тöвйöтны да аслыным тшыгйöн не кувны, огö ештö пыдынжыка да кокнитжыка ловзисьны, сэтöн тi бöра и эмöсь ни: горш бердö кутчисят и луншöрнас джагöтат!

— Служба миян сэтшöм, Галина Макаровна, служба! — пöрисьжыкыс зника эз сет — кöстiс асланяс, былись луншöрöн чöвтiс бы и пасьтöг колис директорсö и совхозсö, некинöс эз жалейт, кыдз эз ов отир коласын, немымда эз вежöрт олансö.

— Служба службаöн, а дружбаыс оз я мый я тiянлö ков бы? — Галина Макаровна сынiс асланяс — совхоз понда юрыс висис. — Вайö жö, челядь, пондамö дружитны, öтамöднымöс огö пондö дойдны, а! Сiдз, поди, буржык лоас. То ме öтiкö думайта керны, а тi мöдiкö... Отирыс меным жальöсь, отирыс! Кыдзкö бы нiйö кöть мало-дело вердны, медбы тшыгйöн эзö жö кулö... Сiдз ни миянöс сералöны, кöр, натьтö, папуассэс джунгляэзас буржыка ни олöны.

Öтiкö да мöдiкö, рочöн да комиöн, мужиккез да инька öтамöд коласын чапкасисö кыввезöн — басниöн öтамöднысö чувйисö, то зубытжыка, то небытжыка, кыдз орсiсö шырöн да каньöн, и нем сэтöн бы совхозiсь директорлö налоговöй инспекцияись отиркöт орсны, ежели сэтшöм законнэз, сiйö озö дорйö, висьталöны, что кöть джагöтчы, кöть тшыгйöн кув, но сет и, быдöс сэтöн!

Бöра оланыс сералiс бы Галина Макаровнаöс, но инькаыс думаэзнас висьталiс: «Нем тi, мужиккез, кытчöдзкö месянь одö адззылö! Кыт керкуас пыритö, сэт и петатö, сiдз и мунатö да ошшасьны одö пондö».

— Галина Макаровна, извинитö миянöс! Ми тэрмасям бы Егор Петрович ордö. Сiя бытьтö бы богатöйкодь, поди, эм мый сэтшöмыслiсь кыркöтны.

— Ог тöд, — шыасис директор. — Дзескытöла жö фермерным олö. Эшö магазиныс сотчис...

— Жалейтат? А, бат, оз ков сэтшöмсö жалейтны, кöда, натьтö, тiянöс оз жалейт. Мунам, адззам мый Пестеринлiсь гогнавны, кöр видзöтö жö, фермернытлöн абу я кык трактор и машина видзö!

— Тiянкöт быль эд, мужиккез, гажа, — медбöрын инька бöра ошкис том мужиккесö, эз вунöт юавны, эм я нылöн машина, кöдöн эзö я бы кыскö районöдз.

Дженыт тöвся лун, но кад эшö абу сёр. Галина Макаровна том мужиккезкöт ештiс мунны районöдз, кытöн бöра чужмöр моз котрасис вель уна. Медодз пыралiс, кыдз öнi шуöны, мэрияö, пантасьлiс мэркöт, кöда уна баитö да етша керö. Кöр сiйö бöрйисö, уна кöсйисö-вöзйисö, а öнi... Кöть сiмöм кöрттув корны, — öтiк кыв тöдö начальникыс, пыр шуö, что абу. Абу эта, абу сiя... Абуись эмсö он кер. И котöртны бы, Вильыбись директорлö бöр гортас да татчö не вовлыны, вунöтны бы туйсö мэрияö.

Кöсын вунöтлöны жö нач — эм и абу бырöм вешьяна совхозыс. А улицаын — кыдз шаг, сiдз и магазин, сэтöн и вузасьöны быд берся торöн да басöкöн и эшö басöкжыкöн. Отир дзöрö-вöрö, шуксьö, бытьтö Москваын, бытьтö некин и некытöн оз уджав. Быдöн абу нач тшыг, а кöда, бат, вывтi бура сёйö, кöда код, кöда садь. И мый жö сёйö-юö отир, ежели некин оз уджав? Вежалун лоис быд лун — праздник вылö вачкисьö оланыс!

Галина Макаровна Мэр дынсянь öшынöт дзар керис улицаö, сьöкыта ловзисис. Деньга сылöн эз вöв, петiс керкуись, сувтчис посöдзö, но эз ешты кваркыш керны, кыдз одзын пондiс сулавны инька, пиннес гер, синнэс тувдöмась, и бытьтö важын ни тöдса директорлö, бытьтö медбур ёрт Галина Макаровналö, и сьылö-баитö, корö руб-мöд деньга.

— Мый деньганас керан?! — лöгыс петiс том инька вылö Галина Макаровналöн.

— Мужикö шогалö, — пондiс вишыкасьны томыс. — Чеччыны оз вермы.

— Код, бат?

— Абу. Тöн только невна пешлыштiс. Сетö кöть копейка-мöд...

— Абу менам деньгаыс! — орöтiс директор.

— Кöть копейка...

— Абу, мыся! — Галина Макаровна сэсся эз и видзöт том инька вылö, швыркнитiс-лэдзчис посöдзись и ештiс эшö пыравны банкö, кежалiс почтаö, вожмöвтлiс сберкассаö — öтiклаö да мöдiклаö и адззис мымдакö сьöммез, только пондас ковны вештыны проценттэз. Кöсын жö öтiк тоша мужиклö вöзйис вöр, тёс да плаха. Кöть и вöрыс эшö сулалö коккес вылын, но инька баитчис мужикыскöт и пондiс надейтчыны, что вермас гумыштны деньга.

Лун чулалiс. Галина Макаровна эшö думаэзнас пыралiс бы поп дынö, кöда... Отир жö висьталiс, что татöн поппес вöлiсö не öтiк ни, но вöлöмась жуликкез кодьöсь. Öтiк пö донöнжык, нежели колöма, вузалöма масiссез, мöдiк пö ештылöма гöтрасьны, дорöма кага и пышшöма — кольöма том мамсö ыджыт кынöмнас. Öнi видзчисьöны куимöт попöс.

Петiс сiдз, что Галина Макаровна талун енлö юрбитны эз вермы, нач ни пемдiс Кöсын овтöн. И инька мунiс улицаöт да видзöтчис, кыдз сё вузасьöны вузасиссез. Эшö койис-дзöрис отир, Галина Макаровна смекайтiс машина, медбы мунны гортö. Но гортлань некытшöм драндулет эз мун, кöть тэ гортöдз ойнас подöн котöрт, ежели аслат машина абу.

Кöсын улицаын ужйисö машинаэз, но öтiк шофёр эз жалейт директорсö, эз пуксьöт да нуöт. Веськыта висьтавны, эз ни вöв одззакодь отирыс. Эз адззись сэтшöм шофёр, кöда бы сувтöтiс машина, осьтiс кабинаись ыбöс и шуис: «Пожалуйста, Галина Макаровна!»

Пуксьöтiс бы машинаö, нуöтiс и эз босьт не руб, не копейка или босьтiс бы сымда, мымда вештiн ачыт.

Деньга, деньга, деньга... Враг деньгаыс или ёрт? Кинлöкö сiя бур ёрт, и кинлöкö враг, кинöскö вывтi любитö, а кинöскö нач оз... «Кужны колö деньгасö керны! — баитöны чож да ылöса отир. А директор пыр думайтö только кинкö понда — совхоз йылiсь думаэс пыр бергалöны. Сiя думаэзнас то асьсö сералö, то видö, висьталö: «Ась кинлö колö, кыкнан кинас и öмтырнас сöбö, а ми кыдзкö сiдз ни оламö».

Инька миритчис аслас рытся оланкöт, лöсьöтчис узьны Кöсын. Мöдiс пырны кытшöмкö тöдсаэз ордö, кöдна, поди, эзö бы вашöтö керкусис, и вöлись ашын асывнас пондiс бы бöра сулавны креста туй вылын, видзчисьны ассис счастьесö, кеймисьны шофёррезлö Кытшöмкö код морт улицаын öвтчис-мунiс и резьöтiс-сьылiс, сылö талун вöлi мед ни бур.

«Ой, да овны лоис дзескы-ы-ыт,

Винаыс лоис вывтi чö-ö-öскыт!»

31

Галина Макаровна Кöсын рытнас вель дыр эшö сулалiс улицаын, видзöтчис-видзчисис, оз я Вильыблань мун кытшöмкö машина, оз я кыскы сiйö. Инька сэтчöдз сулалiс лым вылын, что пондiсö кынмыны коккес, кöть и коккезас вöлiсö бур шоныт сапоггез. Сайкалiс ачыс, мед вöлi пасьтасьöм шоныт паськöмöн, чышьянасьöм небыт вурунiсь гöрдззöм шальöн.

Татöн директорлö быд морт вöлi тöдса, колiс бы кинкö ордö пырны да шоччисьны. А сiя сулалiс улицаын, педзис-жöдзис, шонтiсис педзöм-жöдзöмöн, надейтчис мыйкö вылö, олiс ни ашыння лунöн, думайтiс, мый медодз керны. Лöсьöтчис кытшöм лунö да мыйöн вердны пода, кöда лунö чожажык отирöс иньдыны вöрö, кöр вот-вот погоддя тшыксяс, пондас усьны лым, лымыс содас вöрын, вöрас уджавны лоас сьöкыт. Öтiк час кежö думаэзнас эз вермы янсöтчыны Вильыбкöт да вильыбсанакöт, асьсö немымда эз шоччöт. Тöдвылас усис гортiсь быд мортыс, кöдна синнэс одзын чеччисö и водiсö, уджалiсö и шоччисисö, гажöтчисö и тöждiсисö, вöлiсö садьöсь и кодöсь.

Тöвся рыт. Пемыт. Кöдзыт. Керкуэз сайсянь мыччисисö кык мужичок. Ас коласаныс мыйкö бобгисö да жагвыв сибöтчисö Галина Макаровналань, здоровайтчисö, юалiсö, мыля сэтöн кынмö рытöн, кинöс видзчисьö. Тöдчис, что мужиккес кодышöсь, сiдз бы и лякасьöны, сiдз бы нылö мыйкö колö том инькасянь. Галялöн этатшöммес вылö лöг петiс, дума ызйöтiс ни сьöлöмсö, кинкö кыдз пель одзас гусьöн шушкис: «Сöт пельбокас, ась вешшасö!» Но инька инька и эм: вына, да выныс абу мужиклöн мымда, сöтiс бы кодыслö, мед былик синаэс тöдiсö, мый кыввезнаныс гардны, сыбöрын ылi бы пондiсö орддьыны инькаэсö. Мый ни лёбöны, оз я секс ни касьтылö, бытьтö кык арттöм посаданыс узьлöмась ни быд инька бокын, и тэ пö, деревняись басöк чужöма, шедiн!

— Мужиккез тi, мужиккез! — пондiс серавны Галя. — Эм я тiян толкныт кытчöкö? Поди, иннезныт бокын одö ни узьлö, а эшö менö бы кытчöкö кыскатö. Меным тiян коддес колöны сизима и нiйöн ог пöт!

— Быль эд, Яшка! — ыджытжык мыгöраыс бытьтö саймис.

— Вартам-ко эстiсь, — Яшкаыс ни пондiс модьны. — Вешшам, кытчöдз ныр гöгöррез эзö тiльö!

Яшка да Пашка Галина Макаровна дынiсь эзö ештö оськöвтны, кыдз сэтчö кысянькö уськöтчис куимöт том морт, некинлö нем эз шу, клёпкис Яшкалö пельбокас.

— Тэныт мый месянь колö?! — Яшка кутчисис вачкись морос бердö.

И мужиккес öдззисö гындыны öтамöднысö. А Галя чожажык вешшис коддэз дынiсь, лöсьöтчис мунны ни узьны, но, кыдз шуöны, еныс отсалiс: туй вылын югйöвтiс би югöр, ужнитiс машина да сувтiс зэв инька дынö. Оссис кабинаись ыбöс, и тöдса чужöма шофёр гажöн висьталiс, медбы Галя чожажык пуксис кабинаö. Директор эшö мыйлöкö юалiс, кытчö сiйö нуöтасö.

— Гортат нуöта, Галю, гортат! — бöра гажöн висьталiс шофёр, юалiс. — Мый? Менö он я мый я ни тöд? Эгö я мийö тэкöт, ёрт, öтлаын велöтчö? Ме тэнö эшö думаэзнам öддьöн эд любитi да эг лысьт тэныт висьтавны, а тэ...

— Ой, Женька! Кыдз нö ме тэнö эг тöд?! — вöлись Галина Макаровна вежöртiс, что сы одзын Женя, кöдакöт кöркö велöтчис öтлаын, кöда томнас вöлi полiсь, етша кöр öмыс оссьывлiс, медбы мыйкö висьтавны. Женька велöтчикас и мыгöрнас пыр вöлi учöт челядь кодь, а öнi... Сэтшöм бытшöм ён мужик лоöма! Кöр ештöма быдмыны да ёнмыны?

Вöлись öзйис кык морт коласын басни, сорис и вермис машиналiсь негора шы, кöда катыльтчис Вильыблань.

— Э, Галя! Ме сьöрö тэ вöтчы! Ола ме Сибирьын, сэтчин, кытöн дедö да бабö эзö олö, кöдна пыр бы гортiсь пышшисö Сибиряс да эзö вермö мунны. А ме мунi и ола морт моз. Кывзы, менам эд быдöс эм, только петухлöн кольттез абуöсь, кöр петухсö ог видз и ог кольттьöт, и кöччезöс ог чилькöт. Но вермас и лоны сiдз, что петух пондас кольттявны и кöчсö понда чилькöтны. Он верит?! — вöлись Женя Галя синнэзö видзöтыштiс веськыта — шынь эз кер, одзлань ошшасис. — Галька, колö кужны овнытö! Поди, колö тэныт машина? Верма этö козьнавны, а аслым босьта нач вильö, иномарка вылö пукся. Думайтан, ог? Висьтала тэныт, что сiдз и лоас! Мый он баит? Ой, Галька! Ме эд тэнö сё любита! Эм менам инёк, чож да басöк, но... Нем оз куж керны... Вежöртiн?! Бокам мымда узьлö, сымда и эм, а меным мукöдпыр сiдз колö инькаыс деревняись, кöда немись бы эз пов и некытчö эз сибды, кöда боксим медбы мöдiккез дынö эз пышшав, пуис бы меным Вильыбаныт моз деревенскöй похлёбка, и тöдан, ме бы кытшöм вöлi рад... Кöр юышта, сайма, дзар кера — иньö бокам абу! Пышшöма эд крыса моз мöдiк дынö. Быль! Сiдз и эм: пышшас мöдiк дынö и кöть юрсö керав, нем оз мöртчы — ассис керас. Вот и думайт сэтöн, любита я иньöс...

Машина вына, кыскис чожа, кыдз мöртчис-мунiс пемыт ойö. Женя сярзис-баитiс. Галя эз ешты и öмсö осьтны да кыв горöтчыны,

— Галю, тэ кöть öтiк кыв висьтав! Поди, былись тэкöт гöтрасям? А мый? Ме тэнö понда любитны, нем ог понды тшöктыны керны, только ов да гортын ло хозяйкаöн. Мый он шыась?!

— Ежели ме жöник сайын? — вöлись шынньöвтiс инька.

— Буржык я мый я месся жöникыт? Бат, кытшöмкö тракторист, а ме абу тракторист. Видзöт, вылам паськöмыс кытшöм! Министррез сэтшöмсö озö пасьталö.

— Трактористыс абу я мый я морт?

— Мыля абу морт? Морт, да абу сэтшöм... Ме эд былись татчö катыльтча и надейтча... Шуч тай думайтi, мыся, адззывны бы любимöйöс... Кытöн и кинöн уджалан? Сё Вильыбат ниртчан? Поди, сё мöссэтö чилькöтан да порозоккезлiсь боккезнысö гыжьялан?

Тöвся туй гладь. Машина кокнита чышкö-мунö, нельки оз и кыв моторлöн шыыс. Фараэзсянь лым вылын чеччалö билöн югöр, югдöтö одзись туй, орсö пуэзкöт, лэбзьышалö кымöрлань. Туй бокын лым вылын некинлöн след абу. А кöркö, топ нач неважын, куим-нёль год бöртi, этадз туй бокись лымсö талясö да талясö кöччез, топ ыджыт зверрез йöктасö вöр дорын. Öнi кытчö кöччес лоисö? Öтiк след лымыс вылын абу... Сэтчö нач ни машина колесоэз увтiсь чеччöвтiс рыжöй гöна руч и абу ни — кольччис бöрö.

— Сулав, видзöтам ручсö, — Галялöн сьöлöмас öзйыштiс аскодя гаж, бытьтö сылö эз вöв эшö куимдасгодся унажык, а вöлi только дассизим год.

— Галька, сiдз эн и висьтав, кинöн ни уджалан, мый керан... — Женя быдöс бы тöдiс, сувтöтiс машинасö.

Петiсö кабинаись, ловзисисö кокнит да кöдзыт руöн; тöвся ой эз курччась, эз лöгав, ас мознас гажöтiс, топ висьталiс: «Томмез тi, томмез!.. Тэрмасят овнытö, топ мыйкö öштiт да кошшат ойнас. Ме тiянлö быдöс верма висьтавны и козьнавны, только асьныт эдö джöмдö, а керö сiдз, кыдз колö керны». Кымöрын дзöрисö звездаэз, видзöтчисö топ кысянькö пыдын-пыдын ва пыдöссянь, кытчö некöр Женя да Галя озö шедö. Руч, кöдö адззылiсö, важын ни котöртiс кытчöкö аслас туйöн. Вöр узис чöскыт онöн, нем эз кöсйы.

— Висьтав нö, Галю, кытöн уджалан? — Женя зэв локтыштiс инька дынö, веськыт кинас кутыштiс Галяöс да жмитыштiс бердас.

— Совхозаным директорöн уджала, — гордöя шыасис Галина Макаровна, чатыртыштiс юрсö.

— Ме мылякö сiдз и думайтi, что тэ пондан уджавны директорöн, — Женя эшö буржыка жмитыштiс инькасö, басниыс вежсьыштiс-чорзьыштiс, шуис. — А эта...

Мужик мыйкö бы эшö висьталiс или юалiс да джын кыв вылын джöмдiс, кöр видзчисьтöг кымöрын мыччисис тöлiсь, да лоис нач югыт.

— Мунам! — висьталiс Галя.

— Мунам, — шуис Женя и пуксис кабинаö.

Машина бöра ужйис-мунiс одзлань, и чожа, кыдз сказкаын, тöлiсь одзсиныс югдöтiс Вильыбись керкуэз, кöдна быдöнныс чышьянасьöмась лымöн, лаж керсьöмась столаэз пытшкö — дзебсисьöмась. Сымда и вöлi: туй кузь да дженыт лоис. Машина виль да чож, мунiс и топ немымда кад эз чулав, немымда эзö ештö баитны и локтiсö ни гортö.

Женя эшö сералöмöн моз юалiс или висьталiс, что Галя ордö кольччас гöститны. Но Галина Макаровна пыдына ловзисис, серöмтчыштiс и висьталiс, что сiя оз ов Вильыбын, а олö Кöчыбын, кытчöдз колö эшö подöн мунны да мунны, сiдзкö, вермасö сёйны кöиннэз. Висьталiс спасибо, бур туй кöсйис и чеччис машинаись.

Галина Макаровна чеччис машинаись и улица шöрын бытьтö öшис, мыйиськö пондiс повны мунны Кöчыбö. Директорлö тöдвылас усис, что колö пыравны тракторист Фёдор дынö, кöда, бат, эшö оз узь...

Кежавны да саймöтны трактористöс, юавны бы сылiсь, адззис я тракторö часть, кöдö кошшис, вермис бы, конечно, ашын, но бöб мывкыдыс кыскис Фёдоррезö, аслыс сiдз и этадз лöсьöтiс мог. Галина Макаровнаöс коккес топ асьныс кыскисö Фёдор ордö, кöдалöн виль да ыджыт керку сулалiс ыб дорын моз, кытчö, бат, öнi эз бы ков мунны, ежели Фёдорлöн нылок вермас узьны ни, и нем кагасö саймöтны. Колiс бы тэрмасьны гортö, кöр гортын мöсыс чилькöттöм и вердтöм, но... Но Галя кежис эд Фёдорыс керкулань, оськалiс да видзöтчис, медбы отир эзö адззылö! Том инька локтiс ыджыт керку дынö, кайис посöдзö, тойыштiс ыбöс, кöда эз вöв пöдана иган вылö, кокнита оссис, и инька пырис керкуö, кыдз усис тракторист одзö.

Керкуын сотчис би, и вöлi вывтi югыт, лампочкасянь би югöр ёрис синнэз. Галина Макаровна бытьтö падмис керку порог дорын, кваркышалiс синнэзнас, эз казяв, кыдз комись мыччисис хозяиныс. Йöрнöс соссэз пуджöма, и киэс ваöсь, ниртö оча долонь, висьталö, что стряпайтö. И Наташка сё оз узь, чеччöвтiс пызан дынсянь, паськöтiс киэсö, топ гумыштiс-курыштiс бы Галясö, чирзыштiс-ыкöстiс: «Мама-а-а!» Нылочка локтiс Галина Макаровна дынö, чеччöвтiс-öшöтчис гöстя голя бердö, жмитчис и пондiс окавны инькасö да лепечитны: «Мамук тэ менам! Кытöн сы дырна олiн?! Ме тэтöг öддьöн гажтöмтчи!»

И сысянь, что Наташка баитiс комиöн да сэтшöм ятнöя, и сысянь, что öтöрсянь шедiс шоныт керкуö, кытöн джодж миссьöтöм — веж-югыт, инькалöн моросас дзик мыйкö орис, мезмыштiс, сьöлöмыс жмитчыштiс, лолыс тырыштiс. Кытшöмкö аскодя шог, обида или гаж няпыртiс вывтырсö да сэтчöдз, что бергöтчыштiс юрыс, и синваэз сöдзисö синнэз дорö Наташкаыс жмитчöмсянь.

Горзытöн да окасьтöн Галя да Наташка шагньöвтiсö пызан дынöдз, кöть Галя öтöрсянь эз ешты вывсис чöвтны паськöм, эз кыскав коккезсис сапоггез. Пызан дынын пуксисö стул вылö, и Наташка бöра ни пукалiс пидзöссэз вылын да Галялiсь малалiс кымöс, чышьян увтiсь юрси, ачыс сё видзöтiс и видзöтiс инька чужöм вылö. И кага синнэзын чеччалiс сэтшöм гаж, бытьтö былись панталiс роднöй мамсö, кöдатöг сiдз ни гажтöмтчис.

Ыджыт керку пытшкын вöлi долыт и шоныт. Комод вылын телевизорын мыччалiсö кытшöмкö кино, кань ниртчис Галя коккез бердын. Только öшыннэзын штораэз вöлiсö бусöсьмöмöсь.

Галина Макаровна эшö чышкис синваэз, кöр нылочка ештiс ни юавны, мыля горзö мамыс, кöр нылöн быдöс бур. Тятьыс рытнас пуис чöскыт шыд, вердiс нылоксö, ачыс сёйис. Юкталiс, сёдiс и чилькöтiс мöс, кöдö иньыс кулöм бöрсянь некытчö эз вузав.

— Мыля нö ме Наташаыслö гöснечсö эг босьт?! — кыдз саймис Галя, недолыт лоис.

— Ме сiйö сiдз конфетаэзнас пöттöдз верда, — ветлiс комö да бöр петiс хозяин, чим-чок мужикыс, кöркö ештöма вывсис вежны йöрнöс, шыннялöмöн шуö:

— Галина Макаровна, ми эд нылöкöт гажöн оламö, да мамным оз тырмы.

— А эта кин? Абу я мый я менам мам? — адззис Наташа кыввез да эшö пондiс ниртчыны Галя бердын. — Мам эта менам, и тэ, пап, бöба эн баит!

Фёдор вöлись шагньöвтiс том инька дынö, эз юав, эз висьтав, окыштiс Галяöс, вирснитiс нырнас, ки лапанас чышкис син дорресö, кытöн мыччисисö анькытш ыжда синва воттез, бытьтö пондiс норасьны нылокыс вылö:

— Адззан сiя мый керö... Öшöтчис то, Галя, голяыт бердö... Былись эд тэнö Наташкаыс öддьöн радейтö, — ньылыштiс дульсö, горзöмсорöн содтiс. — Чöвтчы, пöрччась да некытчö ни эн мун. Öтлаын пондам овны, то тэтöг миян оланыс оз ло олан.

— Фёдор, тэ мый?! Менам эд гортын пода...

— Гы, пода... Подаыс öтiк ойнас тэтöг озö кулö, и кöиныс карта вывсис оз пышшöт. Ашын юкталам и вердам или сейчас жö ветламö!

— Ветлам, ветлам! — джоджын чеччалiс Наташка. — Ме котöрта одзаныт.

Фёдор отсалiс чöвтчыны Галялö, гусьöн нылокыс шогья окыштiс инькасö, тöдчис, что вывтi ни гажтöмтчöма.

— Тэ мый, тять, мамöс окалан? Ме сiйö понда окавны! — лельгис нылочкаыс, адззис сiйö, мый бы эз ков адззыны.

Керкуын вöлi шоныт, бур, а öтöрын шовкöтiс мороз.