Поперёк обычайлö



Таво Борис видзчисис гожумсö, кыдз тшыг морт видзчисьö öбед. Гожум мыйкö кöсйис зонкалö вильö, кöда эшö некöр эз вöвлы Борис оланын. Детина эз на тöд, мый сiя панталас вильсö, только сьöлöмыс кылiс мыйкö гажаö, долытö, бурö. Тöдвылас сё частожык и частожык усьö гортыс, кытöн олöны сылöн айыс да мамыс. Эшö сылöн шуч тöдвылас öтiк нывка, кöда олö сiя жö деревняын, кытöн чужис да быдмис ачыс зонкаыс.

Борис абу сэтшöм, медбы сылöн сьöлöмыс сылiс быд басöк нывка понда. Чулалiс ни эта кадыс зонкалöн, и нывкаэз йылiсь Борис öнiвöтасьö етшажык. Борислöн и городын вöлiсö тöдса нывкаэз, но сьöлöм вылö силой он кышав мортсö: нывкаыс не визитка.

Одзза годас, кöр Борис вовлiс гортас каникуллэз вылö, деревняын аркмис сэтшöм дело, кöда вöрзьöтiс деревняись олансö, кыдз шоныт зэрок кöс погоддя коста вöрзьöтö турун.

Локтiсö деревняö том отир, локтiсö шумöн, горöн, песняэзöн. Локтiсö не тешитчыны сöстöм воздух вылын, а овны да и уджавны — вынсьöтны колхоз. Унажыксö вöлiсö эта деревняись жö отир, кöдна кöркö шыбыльтлöмась городö — кошшыны буржык олан.

Борис эз дивуйтчы локтiссез вылö, эз думайт, кыдз мукöдыс, мый да кытшöм нужда вашöтiс городiсь том отирöс. Борис видзöтiс эта вылö ас мознас, садя, лыддис ас кежас, что быдöс оланыс мунö сiдз, кыдз колö миян Советскöй странаын: партия тшöктiс — комсомол висьталiс: «Керам!».

Мелькнитiс сiя гожумыс, кольччисö деревняö городiсь отирыс, а Борис бöра мунiс велöтчыны. И вот локтö мöдiк гожум ни. Борис бöра лöсьöтчö пантасьны деревняись отиркöт, лöсьöтчö уджавны деревняын, лöсьöтчö овны деревняас быдöс ассис олансö. Сiйöн и оз быравлы тöдвывсис нывка. Нывка Маша, кöдакöт зонка етша дружитiс, но кöда крепыта пукалö сы сьöлöмын. Да и некöр вöлiсэк Борислö часто пантасьлыны нывкаыскöт. Шоччись бы эд гортын, ежели тэныт нарочно сетöмась кад эта вылö, а зонкалö уджавны колö. Эд мыдзö жö юр наукаэз велöтöмсянь, да эшö сэк, кöр тэ парта саяс пукалан дзескыта ни. И наукаыс пырö юрат тожö дзескытöла ни. Бур велöтчыны сэк, кöр тэныт дас год, а не кыкдасся унажык. Эна годдэзын оз-оз да и сорыштас велöтчантö кытшöмкö дума: то аймам йылiсь, то чулалöм годдэз йылiсь, то эшö мыйкö.

Борис шоччисьö гожумнас не сiдз, кыдз мукöдыс: оз куйлы шондiюгöррез увтын пасьтöг. Не этатшöм Борислöн душаыс, оз вермы сiя туплясьны небыт турунок вылын нето ю дорись берегын: то тöв кежö пес кералö, то отсалö лэдзны стенгазета ёрттэслö, то ытшкисьö, то отсалö разьны да тэчны тракторлiсь мотор, кöда вдруг дугдас уджавны. Да и кыдз тэ он отсав трактористлö либо комбайнерлö, кöр тэ год бöртiлоан механикöн?

Гожум чулалö уджын, чулалö чожа, казявтöг. Но этатшöм шоччисьöмсянь детиналöн оз тшыксьы мича чужöмыс, а эшö басöкжык лоö: карöй синнэс сöстöммöны, кучикыс лоö бронза рöма, а пиннес чочкомöсь-чочкомöсь. Машакöт пантасьлiс шоча, но сьöлöм вылас кольччис бичир, кöдö эз кусöт не велöтчöмыс, не кузь тöвся кадыс. Зонка дивуйтчис: кыдз сiя эз вермы одзжык пантавны этö нывкасö? Эд быдмис сыкöт öтiк деревняын. Овлö жö сiдз: син одзын олö мортыс, ветлöтан тэ сыкöт каждöй лун ордчöн и бытьтö он и адззы сiйö сэтчöдз, кытчöдз вот этадз сьöлöмыт оз висьтав тэныт, что эта мортыс колö тэныт и тэ понда сiя дона.

Маша локтiс мöйму велöтчансянь уджавны гортö.

Ештöма ни велöтчыны зоотехникö. Да сэтшöм лоöма — не öтiк зонкалiсь, натьтö, вöрзьöтiс ни сьöлöммезнысö: лапытик, кузь чикися, ыджыт мороса, голосыс небытик, ласков, гажа. А уджалö сiдз, что сiйö ошкö районнöй газета. Не быдыс этадз пондöтчö овны.

Борис öдва видзчисис, кöр шедас гортö, лоас ордчöн Машакöт. Размöд ни пондылiс гижны письмоын аслас радейтöм йылiсь, но косявлiс бöр, а сы туйö дженытика висьтасьлiс аслас олан йылiсь, тöвся город йылiсь да ошкис виль машинаэз, кöднö керöны колхоззэз понда. Маша гижлiс паныт сэтшöм жö письмоэз: кыдз йылö колхознöй пода, уна я босьтöны йöв да кольть, кытшöм киноэз видзöтлiс тöвся рыттэзö. И сэсся нем. «А может, сылöн мöдiк эм? — пыравлiс зонка юрö дума. — Эд ми сыкöт просто тöдсаöсь...»

Энö думаэсö вынсьöтiс письмо, кöдö гижис Борислö ёртыс. «Вильыс миян не пожтыр, но öтi-мöдiэм. Машенька лöсьöтчö петны Егор сайö. Ачым эг адззыв сiйö, но отир баитö. И мамö, шуöны, мöдö пöртчыны. Эшö кывсьö, бытьтö тэ вылö мöдö кагасö гижны. Висьтав: грешнöй тэ али не?»

Письмоыс гижöма сэтшöм кылöн, что вöлiсьöкыт вежöртны, кытöн шутка, а кытöн быль. Неделя-мöд зонкаыс ветлöтiс кыдз öшöм, ачыс эз вежöрт, мый сылö оз тырмы. Сэк думаэс öддьöнжыксö и споритiсö ас кежаныс: öтiк кыскис Маша дынö, мöдiк — янсöтiс, тшöктiс чапкыны нывкасö юрсис. «Да мый ме сы йылiсь сiдз думайта! — решитiс Борис. — Мед петö мöдiк сайö... Интересно, кин сiя сэтшöмыс, кытшöм Егор?»

* * *

Вот Борис и гортын. Эстöн быдöс сы сьöртi: и паськыт, югыт улицаыс, и мича öшына керкуэс, и визыв юыс, и важмöм ни посыс. Нельки керку стенаэз, кöдна лякöмöсь ыджыт плакаттэзöн, радöсь тэ вылö. Мам йылiсь нем и баитны. Мамлö зон — меддона гöсь. И лöсьöтö сiя сёянсö медчöскытö, лöсьöтö сымда, бытьтö свадьба кежö. Локтöны Борис дынö и соседдэз — баитыштны, юасьны-висьтасьны. То и Прокопика пукалö. Чужöмбансö сылiсь оланыс куимпöв ни чукралöм, а синнэзас сё эшö бес орсö. Борис тöдö этö старушкасö учöтсянь: любитö баитыштны хитрöйкодь Прокопика, любитö юасьны олан йылiсь, солалö баснисö лэчыт да дзирыт кыввезöн.

— Анжинерö, шуан, Бориска? — пондöтö старушка.

— Ог эшö тöд, баб, кинöн пуктасö, — висьталö Борис и содтö: — А может, и прицепщикö.

— Но-о-о, — бар лоис Прокопика. — Прицепщикас некин тай то нёль годсö городас эз велöтчывлы да...

— Механик пö, — эз терпит, мед не ошшасьны, мамыс.

— Ох тэ, згальник, пöрись отирыс вылын сералан, — не лöга кöритö Борисöс Прокопика и хитрöя мигнитö пöв синнас: — Ыджыт начальникöн лоан, городскöйö иньтö босьтан, грех кöть спасеннё.

— Мыйлö городскöйсö, баб? И деревняас нывкаэс тырмöны.

— Тöдам ми тiянöс, кöркö асьным томöсь вöлiмö. Ох, грех кöть спасеннё, — серьёзнöя содтö старуха. — Сiя бы и ладно, Борис Иванович: мамытлö бы и колö отсасисьыт. Только кытшöм сiя шедас öння кадын? Пöриссесö тай то не öддьöн и моннес радейтöны. Вон зоотехникным, эшö меным племеннича лоö... Невеста дак невеста — немöн он кулит. Сё комидировкаö ветлылiс, городöт чатрасис. Ме эг тöдлы, мый сэтшöм комидировкаыс, а öнiтöда: öлöдзас готовöйö вайöтас. Сэтшöм кö шедас, грех кöть спасеннё...

Борислöн сьöлöмыс ёкнитiс, рожабаннэс чочкоммыштiсö и öзйисö югыт вирöн. Нывка, кöда йылiсь Борис часто думайтлiс городын, лöсьöтчö «öлöдзас готовöйö вайöтны».

— Тэ мый, Прокопика, — öбидитчис старуха вылö Борислöн мамыс, — миян весьтöт светыс пöднассис али мый? Неужто ми ог адззö кодяжык невестасö Али жöникыс китöм-коктöм?

— Да мыля жö бöра, кума, — дугдiс ваксьыны Прокопика, — мыля жö? Зоннат некöр тэ эта добро одзын он позоритчы. Эд то зоныт, Кристос сыкöт, оз öлöдзат чива-лювасö пуксьöт. А нывкаэс, ме тай баитiни... Опоникаыслö нылыс как раз öлöдзас и шлёпкас. Кытчö тэ воштiсян, грех кöть спасеннё...

Прокопикалöн чужöмыс вöлiторжественнöй, бытьтö сiя только öнiвермис ассис вына врагöс, а эз баит Опоника ныв йылiсь.

Старушка эшö öтiк-мöдiкö юасис Борислiсь, но öнiПрокопика эз ни вöв зонкалö интереснöйöн. Юасис сiя, былись я пö ветлöтöны гожумнас городын и нывка, и зонка öтлаын пасьтöг и некытшöм стыд оз тöдö, былись я театрын пасьтöм инькаэз йöктöны. Зонка эз ни шутит, а баитiс паныт лöгöнмоз, недовольнöя, и эшö öтпыр чукыльтiс баснисö Машалань:

— Дак мый, баб, Машаыс вылын, шуан, туяс гöтрасьны?

— Ка-а-к раз только, зонö, — лукавöя шуис Прокопика и печалитчöм голосöн содтiс: — Адззан, мый керöны, зонö, городскöй отирыс, грех кöть спасеннё? Вöзабыдтöм ныв эд вöлiОпонь сватöлöн, а то тай мый шогмис — век он думайт.

Борис шоччисис таво не одзза гожуммезö моз: валяйтчис луд вылын, лыддьöтiс книгаэз, öтпыр-кыкись лэдзчылiс кыйны чери. Видзчисис, кöр сылöн кончитчас отпуск и ковсяс петны уджавны. Нельки рыттэзöн сьöлöмыс мылякö эз кыскы том отир дынö. Пантасьлiс мукöдпыр аслас ёрткöт Алексейкöт, трактористкöт. Пантасясö кык ёрт, баитасö быдöс йылiсь, бытьтö век абу адззисьлöмась. Баитасö машинаэз йылiсь, сэсся том олан йылiсь пондöтчасö висьтасьны. Кыдзкö öтпыр сiдз жö пондöтчисö уджсянь, а сэсся пондiсö баитны нывкаэз йылiсь.

— Ме немымда ог верит нывкаэслö, — шуö Алексей.

— Мыля? — оз вежöрт ёртсö Борис.

— Гы, бытьтö он тöд, — философствуйтö Алексей. — Эшö дедö баитлiс: «Пыж вылö да инька вылö некöр эн надейтчы!»

— Тэ вунöтiн, ёрт, — сералö Борис. — Эшö кобыла вылö — öтiк породаыс эд, — сiдз баитiс дедыт... Петö, что тэ дедыт кодь жö.

— А мыля ме понда веритны нылö? — юалö Алексей. — Вот пример: Ленаыскöт ме дружитiбыдса месяц, а сiя кутiс да бокö шыбыльтiс. Вежис менö. Нельки öтпыр эг окав.

— Но и дурак!

— Конечно, дуракöн кольччи.

— Не быдöнныс öткодьöсь, — баитö Борис. — И тэ öтiк сынаннас эн сынав быдöннысö.

— Эн дорйы, — оз сетчы Алексей. — Босьтам Машасö жö. Пантасис кытшöмкö стилягакöт и сы сайö петiс. А неделя бöртiкватитчис, да некысь вайны.

Борисöс кутiс невежöртана öбида:

— Сiдз, конечно, Алёша, овлö. Тэ прав эстöн: может, и виноват эстöн Машаыс. Но мöдыс... Сылö, натьтö, некытшöм стыд не срам. Сiя оз думайт, что калечитiс душасö мортыслiсь, кöда, может, думайтiс сы йылiсь медбура.

Борис эз вермы висьтавны быдöс, мый сiя думайтiс Маша йылiсь, эз вермы дорйыны нывкасö. Веськыта висьтавны, Борис эз вермы досповна вежöртны, кыдз сiдз вермис лоны Машакöт, кöда зонка син одзын вöлiбур мортöн. Некыдз эз веритсьы, что Машаöс чапкис мортыс сэк, кöр сiя лöсьöтчис лоны мамöн.

— Вот вöлись и верит тэ нылö, — гажтöма горöтчис Алексей.

— Эта öтiк случай сотняись.

— А Ленаыс? — горöтыштiс Алексей. — Вот десятокись кык случай ни.

Чожа Борис пондiс уджавны колхозын механикöн. Удж вöлiсы сьöртi. Мöднёж эз и ков лоны: эд Борис учöтсянь любитiс машинаэз, велöтчис, медбы тöдны буржыка техника, и öнiсылöн мечтаэз пырисö оланö.

Медодзза удж вöлiфермаын — колiс керны водопровод. Эта удж вылын первуись таво гожумöн и пантасис Машакöт. Нывка öнiетша мыччасьлiс деревняын, нем и баитны клуб йылiсь. Зонкаэз Машалiсь керкусö ордйывлiсö ывтiжык, бытьтö полiсö, что эта керкусянь ны бердö лякасяс умöль слава. Да и нывкалöн мамыс лöсьöтчис поткöтны юрсö сiя зонкалiсь, кöда лысьтас тальччыны Опоника посöдз вылö.

Борис öтлаöтлiс гайкаэзöн трубаэз и эз казяв, кыдз локтiс да сувтiс мышкас Маша. Кöр Борис бергöтчис, пантасис оча син нывкакöт. Нывкалöн öтiк мускул эз вöрзьы чужöмбан вывсис: тырппес жмитöмöсь, синнэс лöгöсь, лэчытöсь, шуч мортсö видзöтiсö-бытшкисö. Маша вöлiсэтшöм жö, только чужöмыс бледöтöм. Борис öшис: сiя полiс, что ежели мыйкö öнiгорöтчас нывкалö, то вöрзьöтас сылiсь шогсö, быдöс умöльсö, мый сыын öксис медбöрья кадö. Но и шытöг сулавны нывка одзын вöлiсьöкыт, сэтшöм сьöкыт, что, кажитчис, джоджыс дюттясис кок увтын. Да и эз вермы Борис не шыасьны, эз вермы лöгавны эта морткöт.

— Здравствуйте, — здоровайтчис зонка.

— Здравствуйте, — гусьöн, повзьöмöн моз шыасис Маша.

— Тiянлö вот лöсьöтам, мед ачыс ваыс локтiс, — висьталiс Борис.

— Спасибо, — шуис Маша, и бöра öтiк мускул эз вöрзьы чужöмбан вывсис, только синнэзас югйöвтiс невежöртана биок. — Лöсьöтö чожжык. Ми радöсь лоам.

* * *

Борисöс бöрйисö колхознöй комсомолеццез асланыс секретарьöн. Не унаöв ли эта? Эз на ешты лöсьöтчыны уджавны и — командир том отирлöн. Справитчас я сiя этöн, кужас я? Öнiэд колас не только машинаэз сьöрын видзöтны, но и лоны бур ёртöн том отирлö, нуöтны сiйö ас сьöрö, мыччавны нылö пример и уджын, и велöтчöмын, и шоччисьöмын. «Абу кокнит, — висьталiс райкомись секретарь, — но тэ, Борис, не öтнат. Тэнат уджыт не только сыын, медбы том отир уджалiс бура, но и сыын, медбы комсомолец быд местын вöлiпримерöн. Эн вунöт и Машаыс йылiсь — эд сiя тожö комсомолка».

Маша видзчисис кага. Тöдчис, что сiя олiс öнiтолько кага понда и эз думайт немымда не Борис йылiсь, не отир йылiсь, кöдна видзисö уна басни нывка йылiсь. Но Борис öнiачыс пондiс кошшыны мог, мед частожык пантасьлыны Машакöт.

И тöдчис, что Борислöн басниыс невнаöн мунiс бур туйö: Маша етшажык пондiс пышшавны отир син одзись и нельки неöтпырись вовлiс киноö. Но комсомольскöй собраннёэз вылö эз пыравлы — ыстiсьлiс шогöт вылö.

Деревняын эта гожумö мыйкö лоис виль: клубын часто горавлiс концерт, орсöм да йöктöм, пöрись отир висьтасьлiсö важ олан йылiсь, касьтывлiсö, кыдз воюйтiсö гражданскöй война коста, кыдз аркмисö колхоззэз. Том отир чулöтiсö не öтiк воскресник — весöтiсö колодеццез, улицаэз, керисö поссэз да тротуаррез, виль тёсöн вевттисö клуб крыша, лöсьöтiсö спортплощадка. И уджын мöднёж лоис: кытöн сьöкытжык нето зэлытжык, сэтчин и мунö томпöлöс. Эз вöв сэтöн только Маша, и Борис прокод чувствуйтiс, что сiя виноват мыйöнкö эта нывка одзын. Зонкалö колiс, медбы нывка одззамоз веритiс отирлö, медбы сылöн олан одззамоз вöлiбогатöй, гажа. Но кыдз Машаöс петкöтны öнiотир коласö? Колö адззыны туй нывка сьöлöмö. Этö колö керны только Борислö кыдз секретарлö.

И öтпыр Борис локтiс Машаэз ордöдз. Нывка вышивайтчис пызан дорын и, кöр казялiс Борисöс, öзйыштiс, дивуйтчöмöн дзарнитiс локтiсьыс вылö. Синнэзас öнiэз ни вöв кöдзыт биыс.

— Маша, — шуис Борис, — ме тэ дынöдз...

— Мый колö? — повзьöмöн юалiс нывкаыс.

— Маша, ме тэныт верита. Тэ ме понда сё сэтшöм жö...

— Оз ков, Борис, — сьöкыта ловзисис Маша, лэбтыштiс синнэсö зонкалань — синнэс тырöмась сöдз синваöн.

Сэтчö пырис Машалöн мамыс. Ыбöс колассянь жö вирдыштiс синнэзнас Борис вылö — нёджжöвтiс юрсянь коккезöдз, чывкнитiс комö и сэтчинсянь пиннес пыр юалiс:

— Мый висьталан, Борис Иванович?

— Да вот пырыштiтай. Дело неыджыт эм.

Ежели бы Борис эз вöв бур механикöн, может, и вöтлiсö бы сiйö эта керкуись, и немöн вöлiбы сылö дорйыны асьсö.

* * *

Матын ни вöлiыджыт праздник — Октябрьскöй революциялöн лун. Ась и ар, ась и лэбзисö ни шоныт странаэзö гажöн сьылiсь кайез и природаыс чöвтiс ни гожумся паськöмсö, но отирлö вöлiгажа. Сэтшöм гажа, кыдз прокод овлö ыджыт праздник одзын уджалiсь отирлö.

Отир панталiсö праздниксö бур уджöн, песняэзöн. Борислöн эта кадö уджыс тöдчöмöн содiс: колiс лöсьöтны концерт, гижны лозунггез, керны уджлö итоггез и эшö уна делоэз. Эна заботаэзын сьöлöм вывсис мымдакö кежö ыскöвтiс Маша. Сэтчö жö сё частожык и частожык Борислö пантасьлывлiс Настя, мывкыд юра, лöнь характера, песня радейтiсь нывка.

— Эта нывкаыс — ма! — ошкис Настяöс Алексей. — Чочком светас, ме думайта, абу сэтшöмыс сэсся. Только, Борис, öмтö осьтöн эн видз.

Но Борислö Настякöт пантасьöмыс эз вöв сьöлöмви: зонка кылiс, что мыйкö сылö эз тырмы. Кытшöмкö невежöртана öбида гусьöн чеплялiс сьöлöмсö. Борис лыддис асьсö виноватöн Маша одзын. И праздник панытö Борис, мöдöтчöм медбур костюмö, бöра иньдöтчис Машаэз ордö.

Вöлiрöма-дзара кöдзыт рыт, мусö важын ни дорис морозыс, только неылын деревня дынсянь сё эшö боргис юок, и сы весьтын путриктiс кизерик туман. Вот и мичамис, мый йылiсь вöрдiс Борис, видзчисис отирыс. Öнiоз ни сылöт.

Опоника стряпайтiс комын. Маша отсалiс сылö. А Опонь, кыдз прокод, мыйкö уджалiс öтöрын. Борис здоровайтчис, юасис, кыдз олöны, быдöнныс я здоровöсь. Опоника талун эз лöгав, баитiс спокойнöя и нельки юкталiс Бориссö ырöшöн да корис пыравны ашынас.

— Мунам концерт видзöтны, Маша, — корис нывкаöс Борис, кöр быдöс ни баитчисис Опоникакöт.

— Сылöн талун-ашын концертыс öлöдзас лоас, — сералöмöн висьталiс мамыс. — Вот сiйö и пондас видзöтны пыр... Кузь сiя концертыс лоас.

Маша, блед чужöма, курччöвтöм тырппезöн, чепöссис комсис да кöмтöг-пасьтöг уськöтчис ыбöсö. Тыдалö, дойдiсö мамыслöн кыввес.

Буржык бы вöлi, ежели бы мамыс висьталiс мыйкö лёкö. Велалiс ни нывка лёк кыввес дынö, но öнi...

Борис перво эз вежöрт, мый эта лоö. Сэсся юрсянь коккезöдз киссис кöдзыт ва, горшас тасасис пурт, кынымкö секунда кежö сiя кынмис местаас. Быдöнлö праздник паныт вöлiгаж лунöн, долыт кадöн, некин некинöс эз öбидит кылöн, а Машаöс... Борис нетшкöвтчис Маша сьöрö.

Рытыс вöлiмича, и Борис, кöр петiс посöдзö, сразу жö казялiс, кыдз Машалöн чочком платьеыс мелькнитiс юланьын.

Зонка чеччöвтiс посöдзись и уськöтчис котöртны юлань, кытöн кизерик туманö саясис Маша. Туйыс неволькыт, комока, и Борис неöтпырись усьлiс, чеччылiс и котöртiс одзлань. «Только бы ештыны, только бы ештыны!» — вартiс вирыс кöсичаэзас.

Берег дорас Борис секунда кежö öшис, падмис ваыс одзын. Но вот тумана ва вевдöрсис казялiс чочком платье и нетшкöвтчис эта платье дынö...

Джын час бöртiБорис пукалiс ни гортас, юис пым чай. А мöдiк жырын небыт ольпасьын куйлiс Маша, кöдö лечитiсö кынмалöм бöрсянь Борислöн мамыс да акушерка. А эшö джын час бöртiдеревняын мунiс басни öмтыр: том и пöрись лэбтiсö-лэдзисö виль механиклiсь гöтрасьöмсö.