Проллöн инь



1

— Прол! Эй, Про-о-л! Турзьöм, мун жö кытчöкö ветлы, он я кинöскö адззы. Оз я, тэ кодь жö кытшöмкö ендöм пантась? Бат, тöдсасят-нюкьясят, свалитчат и пондат овны. Мый тэкöт лоас, кöр кула, да он кö гöтрась? Багсялан и багсялан эд важ керкуат... — кивзö Проллöн пöрись мам, кöда талун-ашын олö, ловсö кыскалö, зонсö гöтрасьны тшöктö, а сiя оз гöтрась, кöть нёльдас год ни зонкаыслö. — Про-о-ол...

— Ачыт гöтрась, — Проллöн пиннес гер, висьталiс и виньдiс, кöть сизимö невестаэсö вайöт, сё лоас Прол — гынзьöм и турзьöм.

Полö гöтрасьны зонка, мед и эмöсь нывка-мöд деревняын, кöдна некинлö оз колö; вина юöны, узьлöны пöрись и том мужиккöт, рочкöт и комикöт.

Öнi зонка полö нывкаэзiсь, а кöркö... Кöркö смев жö вöлi: узис öтiк ой öтiк басöк бокын, лун-мöд узьöмыс бöрсянь олiс да гажöтчис, а сэсся... Вешьянын и ки пондiс видзны — ой и лун гыжьялiс гöг увтсö, кыт сотчис-лудiс. Медодз зонка нем эз вежöрт, мый сыкöт лоис, а кöр баняын лэдзис вешьянсö, мышкыртчис, вöлись кымöсас и сöтiс, вöлись кудöбаыс невна эз дойд, вöлись эз понды тöдны мый керны: или фельдшер дынö котöртны, или джагöтчыны. Умöль шогöтiсь пондылiс веськöтчыны керосинöн, бензинöн, солидолöн, дустöн, хлорофосöн, шöма квасöн и винаöн: мавтчис-ниртчис, но пессис весись...

Оланыс эз понды вачкисьны олан вылö. Прол öшöтiс юрсö да ветлöтiс, кыдз вийöм-вартлöм. Отсалiс Митя Пиля соседыс (ась сылö ен сетö здоровье). Пиля гортын олiс и эз — öтiк ой татöн, мöдiкö, Бобикныс моз жö, — кытöн и эм. Мый да кытчö и öштöма да кошшö или кинiськö пышшалö да ошшасьö: «Öнджа... Ме, челядь, эг вöв только Америкаын, а сэсся... Биас и ваас пыралi ни!» Пиляыс и юалiс Проллiсь:

— Мый нö тэ, зонка? Эн ешты гöтрасьны, а топ кувны ни лöсьöтчин. Шогалан я мый я?

— Шогала, — синваэс петiсö Проллöн.

— Бось бутылка, и ме тэнö веськöта!

Сiдз и керис зонка: небис бутылка, юисö Пилякöт, гажмисö. И Прол соседыслö ошшасис кыдз да мый.

— Шмам! — вак-вак серöмтчис Митя Пиля. — Адззöмыт мый понда тöждыны! Ме, кывзы, сэтшöм шогöтнас дас да кыкьямысiсь ни пондылi шогавны. Быль! — Висьталiс, кыдз кералiс: — Бось бильзин, вежöртiн?! Бильзинас сорлав унажык сов, шырсьы, мавтчы — сымда и лоас!

Прол сiдз и керис: бензинö сорлалiс сов, мавтчис и... Сымда и шогалiс, только паххез гöгöрись кульсьылiс жö кучикыс, но кучик — абу кыдз бердын симöт. Талун абу, ашын важ местö виль лоö.

Эта кадсянь зонка нывкаэсö пондiс орддьыны сизим верста ылына. А мамыс рашмö, бытьтö бырö синнэз одзын важ нинкöм, похлебкасö ни оз вермы пуны, рыт и асыв модьö: «Ой, зон! Кула да мый тэнат лоас?! Кинкöт пондан ой-лунсö джендöтны? Вайöтiн ни бы кытшöмкö резьдöм бöраöс!..»

— Кинöс? Этасö я мый я? — кыз голосöн жергöтчö Прол — лöсьöтчö öтнас кувтöдз овны. Но петiс мöднёж.

Сiя жö Митя Пиля кыдзкö шуис:

— Адззöмыт, шмам, мый понда тöждыны? Мый эм сымдаыс, мымда инькаэс? Гиж газетö объявленнё, ашын жö этчö катша-рака мымда локтасö.

Сiя жö лунö Пиля сорöн вöлi гижöма газетаö объявленнё, что сiдз и этадз: Пальник посадын эм гöтыртöм зонка, кöда грамотнöй, бытшöм, рам, уджа, кодя, прока, чож — кужö быдöс керны, и вина оз ю, табак оз курит, оз гусясь, оз пöрьясь. Кошшö аслыс сэтшöм жö невеста, медбы вöлi öтiк годся, öтiк юрын. А мый сэсся? Кытшöм эшö жöник бы öння кадын невестаэзлö колö, кöр зонкалöн эшö эм пöрись мам, кöда видзö кань да пон, эмöсь баляэз, курöггез, порсь, эм паньбекöр, садитö картов да лук?

Объявленнё вöлi гижöма, иньдöма газетаö, кöдаын печатайтiсö неделя бöртi. Сыбöрсянь лун-мöд эз чулав, кыдз зонка дынö локтiс невеста, бытьтö чикись пырис-лэбзис керкуас. Порогсö эз ешты вожмöвтны, тöдчис ни кытшöм инькаыс: синнэс — бичиррез, зелёнöй рöмаöсь, вирдалöны, рысь моз сотö-видзöтö быд пельöс, рожабаннэс гладьöсь, басöкöсь, юрсиыс рыжöйкодь — би öгралö, мыгöрыс — кыдз чужмöрлöн векнит — ем осьтаö тöрас, пырас и петас. Пырис керкуö невеста, медодз эз öшöтчы жöникыс голя бердö, а окалiс Прол мамлiсь чукрасьöм рожабаннэсö, висьталiс: «Мам, тэ меись эн пов. Ме тэнö ен джаджö пуксьöта да Ен местын понда видзны!»

«Господи! Вöлись эд моньыс локтiс, вöлись эд...» — старухалöн гажöтчö сьöлöмыс. Кывзö, кыдз невеста жöникыс вылын ыждалö ни:

— Жöник! Мый нö тэ джоджыс шöрö кынмин?! Мыля абу бритчöмыт?! Мыля синнэт люммöмась, тырппет люшмöмась?! Окавны медодз невестасö колö, а тэ... Менам кынöмö сималö! Вай чожажык сёйны да кушманöн эн верд. Кушмансяняс менö дундöтö. Котрась ышö магазинöдз, босьт сникерссэз, яблуккез, кампеттэз, пряниккез. Сёям буржыка да вöлись и водам узьны, а сiдз то мый?

— Мый сiя сэтшöмыс? — Проллöн мамыс осьтiс пиньтöм öмсö и пондiс моньыс вылö видзöтны ныжмöм синнэзнас, кыдз обезьяна вылö, кöдö некöр эз адззыв.

— Деньга колö! — мамыс вылö ыкöстiс зон.

— Кысь, кага, деньгасö? Пензасö эз я кык мисеч ни эзö вайö. Чожа няньыслiсь кöрсö ни вунöтам.

— Мам, а голяат пернаыс местын мый öшалö? Абу я деньга кöзичаокын кышалöмыт?! — старухалiсь юалiс моньыс, змея синнэзнас адззис шучкöп.

«Кристос! Абу я ерекнича керкуаным пырис? Кысь сiя тöдö менчим мороссим деньгасö?» — повзис пöрисьыс. Пондiс жевгыны:

— Деньга эм невна, кагаэз, эм. Дзебсьыны бы öктi...

— Одз бы кулан! Тэ, старуха, миянся дыржык олан. Вай татчö кöзичатö! — моньлöн киэс кузьöсь, чуннес вöснитöсь, асьныс пырöны сикöдж увтö, кыскöны важ кöзичаок.

Деньга эм кö — быдöс эм: Прол котрасис магазинö, вайис кык сникерс, яблоккез, конфетаэз да пряниккез. Мамлiсь деньга кыдз горын сотiс, и пызан вылын тыр лоис сёян-юан, кöдö сэтöн жö кушки-кашки керисö и абу. Ньылав öнi дультö, пöрись. Ештiн пешлыны только öтiк конфетка да öтiк пряник, а унажыксö мыйлö бы тэныт, кöр он уджав?

Сiдз чулалiс лун. Медгажа чассэз лэбзисö:. Прол иньыс вылiсь синнэсö эз öшты, дульсö ньылалiс да öдва видзчисис ой.

Эз-эз да локтiс рыт. Эз ешты бура пемдыны, том гозъя лöсьöтчисö водны. Прол чöвтчис, вöрöтчис гöжöм таракан моз, жмитö и оз лысьты бура жмитны иньсö, полö малыштны и окыштны. А инька эз öш: кулис-волис вывсис паськöмсö, кольччис нагöлеч да петух моз чеччöвтiс Прол вылö...

Зонка медодз повзис кодь, йöймис кыдз бы, кивзыштiс: «Кытчö тэрмасян?» — но невеста тэрмасис окасьны.

— Мый ни кератö-ö-ö? — ружтiс горвыв дорын старухаыс. — Одö я косясьö ни?

Томмезлöн öтлаын медодзза ой чулалiс бытшöма — нем норасьны. Ашынас чеччисö, инька веськыта резгис:

— Абу ни тэ, Пролушко, мужик вöлöмыт. Тэныт узьлыны бы порссез бокын.

— Мый лоис? — киргыштiс Прол.

— Мый лоис, сiя и эм! Чышкы джоджсö да эн сэтöн ладжьяв, а вöрöтчы! Сыбöрын горсö лонтан, пуан сёйны! Менам кынöмö вирöдз ни сималö. Тiянö эг лок тшыгьявны!

— Мый пуа сёйнытö? — тэчö-баитö Пролыс.

— Лядьвейтö вундышт да пу. Баляэз он я висьтав гидсиныт. Орлав горшшезнысö!

— Сiдз будь, — шыасьö мужикыс. А пöрись старуха лёбö:

— Баляэсö начкылат да мыйись кеписсесö тöв кежас пондатö гöрдззыны?

— Старуха, тупкав öмтö! Öнi кеписсесö магазинiсь новйöны! — моньлöн кылыс чож, кокнита баснинас олö.

Прол кеслiс пурт, начкылiс баля, и лоис яй, кöдö сёйисö лун-мöдöн. Яй сёйсис, олан овсис. Одзлань бöра ни нем сёйны. Тшыгйöн абу гажа. Инька мужиклö бöра тотьö:

— Мый нö, Прол? Газетаас тай öддьöн ошшасьöмыт, а няньыс сёйнытö абу, — синнэс югьялöны.

— Кысь деньгасö? Совхозас, видзöт, быдöс разьсис, — Прол не тпру, не ны, кытöн пуксян, сэтöн и чеччан: асьсö оз вермы вердны, бöра мам горш бердö кутчисьö: — Мам, вай деньгасö.

Мамлöн пенсия вöлi да эз ло: деньга кык лунöн видзсис. Монь одзлань старухаöс пурö:

— Пöрись! Деньга колö.

— Кытöн сiя? — дзуртö пöрисьыс. — Эг я удерлун быдöс сет.

— Но тэ и надз, старуха! Но и надз. Джагöтчы копейкаэт понда.

— Мыля ме джагöтча, кöр уджалi-уджалi, но кодя олансö эг адззыв, а öнi тшöктат джагöтчыны, — недолыт пöрисьлö, рос угöлын ни только пукалö, оз ни ошкы моньсö.

Уджавны дышöсь, а сёйны чожöсь: чöскыта бы том инька сёйö, мужиклiсь голя пилитö:

— Вай сёйнытö!

— Ачыт кошшы, — öтiк басни мужиклöн.

Олан кыдз бес: талун öткодь, ашын мöдкодь. Видзöтан кö, öтiккезлöн сёйны абу, мöдiккез богатсялöны, кыдз назём вылын гаггез йылöны.

— Мый пондам керны? — мужик нач кувны ни лöсьöтчö, öмас кылыс нач умöля вöрöтчö.

— Тьфу! Юртö бы керав да эн висьтав мый понда! — инька баитö, биöн сотö, сьöлöмыс гудыртчö овны Пролкöт, сэтöн жö вурö-висьталö: — Мöднёж колö овны! — синнэзас орсö лöг и гаж. — Мöднёж!

— Кыдз мöднёж? — öмыс осьта мужиклöн.

— Видзöт, кыдз отирыс винаöн вузасьöны, а ми мый?!

— Винаыс кизер. Он ешты босьтны, юсьö ни, — няпкö Прол.

— Тэ ачыт кизер. Начкыв Бобиксö! — инька — командир, висьталiс и кер, да эн нер.

Жаль Проллö поныс, кöдö кыдз кагаöс быдтiс. Но инь чирзö:

— Начкыв, дьявол, то ассит горштö вундышта!

Мужик тöдö ни, что Öльзалiсь нем уна он босьт: не енiсь, не тюрьмаись оз пов. Мужик кеслiс пурт, джагöтiс ассис любимöй понсö, кулис, яй торйöтлiс ведраö, пыртiс иньыс одзö, сувтöтiс, вирснитiс нырнас, чышкис синваэсö, шуис:

— Кöть мый яйнат кер. Ме сёйнытö ог понды.

— Тэнö сёйнытö озö и тшöктö. Сэтшöмсö! Котрась бутылкала!

— Мыйöн босьта? — пильскö Пролыс.

— Мыйöн босьтан... — нерö иньыс, кывсö мыччалö. — Мамытлiсь кор. Сылö деньгасö сетöны!

— Абу менам, кагаэз, деньгаыс, — öмыс пиньласьö старухалöн.

— Кытчö видзин?! — монь чеччöвтiс пöрись дынö, öт пельыс бокö — клёп! Мöдыс бокö вачкис, ыксiс: — Поныс моз жö джагöта! Вай!

— Абусö кысь вая? — синваэсö чышкö пöрись мам.

— Вай, сiсьмöм колода! — моньыс дзор юрсиэзöт кутiс матшкасö, пондiс летны-кыскавны джоджöт, кыдз кольмöм каньöс, кöдалöн лолыс видзсис öмыс дорын ни, тальччы эшö моросыс вылö, и — кулас. Но том пöрисьöс перкйис-керис да ловйöн колис.

Прол повзис, пиньöвтiс öмсö, бытьтö бы эшö хозяин керкуас, шуис:

— Пет, Öльза, миянiсь. Кыдзкö ышö мамöкöт оламö.

— Тэ эшö лысьтан шыасьны?! — Öльза клёп да клёп мужикыслö ни лякö. — Котрась, мыся, винала, сивöй мерин!

Мужик котöртiс нiя жö Митя Пиляэзö, одзöстiс деньга, мунiс магазинö, босьтiс вина, локтiс гортö, ыбöссö осьтiс и...

Мамыс джагöтчöма: юрсö сюйыштöма кровать тассэз коласö, сымда и эм! Уна я колö пöрисьлö: печиктiн бы и пöрис эд, а сiя джагöтчöма... Сiдзкö, ен шуис кувны сiдз.

Дзебисö старухасö, кыдз понöс гуö заргисö.

2

Тулыслань кад. Гажöтчö ни шондi. Кокнит да шоныт ру павьялö öтöрын. Талун Масленица. Эмись кöть абуись, но отир пöжалöны тупöссез да пирöггез, а Öльза пон яйöн петiс важ вичку дынö, пондiс быдöнныс одзын пöжавны шашлыккез да чиння голосöн чирзыны:

— Шашлыккез, шашлыккез! Котöртö, мужиккез! Пешлö менчим вина да сёйыштö баран яй. Тэрмасьö, кытчöдз сёяныс пым, кöда козьналö уна вын. Шашлыккез, шашлыккез!

Важ вичку дынын павьялö чöскыт пöжалöм яй дук — öмын дуль сöдзö, и винаок эм. Öтiклöн мужиккез коласiсь юрыс висис да веськöтчис: пешлiс шашлык, рюк горзьöтiс, отирсö басниöн вöрзьöтiс-ошшасис:

— Ой, челядь! Этатшöм сёянсö талунöдз, батя, эг сёйлы. Пешлö жö, кытшöм яйыс кöра!

Мöдiк ни юö сто грамм, сёйö яй, ошкö Проллiсь иньсö:

— Тэ, инька, быль эд прока вöлöмыт. Меным бы сэтшöм иньсö!

— Мый видзö? Гöтрась. Мыдзи Пролыскöт овнытö, — китшсьö Öльза, катша моз бöжтöм бöрнас öвтö, вöзйисьö мужиккеслö, вузасьö винаöн да пон яйöн. Только уна я понлöн яй? Джын лун вылö шашлыккес эзö тырмö, но Öльза деньга гумыштiс, вайис гортö, Прол ныр увтöт öвтыштiс, кыдз дзирыт ваöн койыштiс:

— Адззылiн, кыдз колö шедтiсьнытö, Бобик! Ы-ы-ы... Öмтö осьтан да пыр видзчисян, кöр öмат сёяныс лэбзяс.

Прол кваркыш-кваркыш синнэзнас, пиннес гер... Олiс мужик рытöдз, рытнас пондiс водны: чöвтiс вешьянсö, бергöтчис, а иньыс абу...

«Мед, — аслыс висьталiс мужикыс. — Понсö сёйис да эшö менö сёяс», — синваöн пондiс горзыны да жалейтны Бобиксö.

Эз ло мужиклöн инь. Ой узис. Ашынас пырис Митя Пиля, пондiс вишыкасьны:

— Зонка... Натьтö, одзöв ми тэкöт газетас объявленнёсö гижимö. Мырддис я мый я Öльзатö пон сёйись Кипрейыс? Видзöта, мыся, талун иньыт сы ордын койö. Быль! Ва кайöтiс öшымöсiсь, и пон сёйисьыслöн öмыс резьдöма — рад, калян чужöм!

— Ась. Меным сэтшöмыс оз ков, — нузгö Прол, синнэс гудыраöсь, сiдз бы и горзö.

— Эн пов! Мöдiкö адззамö! — ошшасьö Пиля. — Сэтшöммес номмезся унажыкöсь ни. Э-э-э, зонка. Кытшöм нö посöдзаныт пон кучик öшалö?

— Бобикнымлöн, — Прол сулис зырымсö, чышкис синваэсö, норасис. — Начкывны тшöктiс шашлыккес вылö...

— Ой, шма-а-ам! Иньыт пон яйнас я мый я тöн миянöс вердiс?! — вука-вака Пиля чеччис стул вылiсь, сыбöрын чепöссис öтöрö.

Гудырмис оланыс: ойыс не ой, луныс не лун, кöр Прол думаэзнас Öльзакöт кокнита янсöтчис бы, но сьöлöмыс висис. Олiс кыдз нач öшöм, керкуын и öтöрын туна-тана: не оз сёйсьы, не оз юсьы, киэзö некытшöм удж оз пыр. Неделя етш сiдз том мужик олiс и кулiс бы, но öтiк рытö керкуö быркнитiс Öльзаыс, чеччöвтiс джодж шöрöдз, кыдз нем эз и вöвлы, сили-били пондiс трингыны:

— Мый ни керан? Бöра тай джоджыт чышкытöм. Ой, мужик, мужик! Иньыт öтiк ой кежö гортiсь петалiс, дак тэнат ендöма джоджыт чышкытöг.

— Ог эд ёгас падмав, — будзгыльтчис Прол, чуньнас пондiс гуддьыны ныр пырöтсö.

— Натьтö, тшыг. Сёйышт жö яй тороксö няньнас, — пызан вылын лоис нянь буханка и пуöм яй, кöдöн ошшасис инька, что быдöс этö козьналiс Кипрей. Сэтöн жö босьтiс рос, пондiс чышкыны джодж, уджалiс и киссис-сералiс. А сэсся висьталiс:

— Кывзы жö, мужиккес мый кылöмась! Бытьтö пö ме нiйö пон яйöн вердi. Юрöс оз я лöсьöтчö керавны. Думайтан, быль кераласö? Хренсö озö я! Ме нылiсь ассиныс одзжык масьта!

Прол эз шыась. Рытöдз будзгылясис. Рытнас иньыс одзалiс водны кроватьö, сэк мужик кайис полатьö. Прол водiс полатьö, иньыс кайис бокас. Öтыс кайис да бокас водiс кроватись, мöдыс пышшис полатись да водiс джоджö. Джын ой орсiсö: öтыс пышшалiс, мöдыс вöтлiсис и вöтiс эд. Öльза комын зэлöтiс мужиксö. Сымда и колiс! Öтамöд бердын ниртчисö да миритчисö. Ашынас чеччисö, кыдз нем абу и вöлöма — не ваöн он торйöт, не биöн он янсöт. А сёйнытö эд бöра нем ни абу, и гожумыс эшö ылынöвкодь, кöть и шыннялö ни тулыс бы: лунöн сылöтö, ойöн кынтö — погоддя орсö.

— Чожажык сылöтi бы, кöть бы пиканнэз петiсö, — синнэс дульсмöмась Проллöн, кынöмыс сималö, дышыс петö рожасö миссьыны.

— Сёя ме тэнчит турун!.. — Öльза пишнитiс. — Тшыгйöн кула да турунсö ог сёй, кöр аймамö пряник да конфетаэзöн быдтiсö, — и пондiс ошшасьны: — Фермаö муна уджавны. Куканнез дынö корö бригадирыс.

— Куим кукань фермааныс кольччисö, и ны дынын тэтöг сизима бергалöны.

— Адззылан! — лег-лег юрнас керис Öльза.

— Видзöтам, — бу-бу бобгö Прол. Бергöтчö ыбöслань — иньыслiсь бöрсö ни эз адззыв: петiс да öшис. Лун абу, мöдiк — нем оз кывсьы. Öшын увтын сылiс лым, мыччисис нять. Сьöдкай ни асыввезнас сьылiс кайпоз вылын. И вöлись бöра Проллэзö петiс Митя Пиля, пуксис лабичö, öзтiс куритны, шыннялöв-керис да юалiс:

— Мый нö, зонö? Иньтö совхозас вузалiн я мый я? Кывсьö оз я, штö бригадирыс иньсö пö вашöтöма да, хе-хе... Öльзаыт вылö гöтрасьöма. Мый сiя тэнат, казённöй я мый я?

— Казённöй сылöн, — öмыс пиньöвтчис Проллöн. — Ась кöть мый керö, — синваэсö чышкис.

— Гы, шмам. Мый тэ сэтшöмыс понда горзан? Сизимö адззамö! — ошшасис Пиля. — Сэтшöммезнас кöть пруд пруддьы!

Ырбыльтiс Пиля да петiс: öтнас керкуö кольччис Прол — оланыс бöра эд абу олан, шогöтся-шогöт: лöгыс петö, гажтöм, сьöлöмыс висьö и оз. Öльзаыс бы колö и оз. И мужик босьтiс чер, петiс улицаö, пöриссезлö отсалiс поткöтны пес — нянь вылö шедтiс, а кöр и нач весь олiс. Овсис одзлань — эз кувсьы.

Öтiк асылö керкуö быркнитiс Öльза, пондiс китшсьыны:

— Мый ни керан? Бöра тай джоджыт ёгöсь. Ой, мужик, мужик! Иньыт öтiк ой кежö гортiсь петiс, дак джоджыт ендöма чышкытöг!

— Менам коккезö ёгас озö падмалö, — пишкыштiс Прол.

— Тшыг, поди. Посöдзас ведраöн яй вайи. Пырт, пу да сёй!

— Ачыт яйтö сёй, — дызгыштiс мужикыс, юалiс: — Кытшöм яй вайин? Эн я кинлiськö гусяв или пон джагöт?

— Тэ ачыт пон! Ойнас пермаас начкылiсö куканёк, а тэ бу-бу... Öнджа... — Öльза пизис-чышкис джодж. Проллöн петiс лöг — паздiс-вартлiс бы Öльзасö, но эз лысьты, и рытнас, кöр Öльза одзалiс водны кровать вылö, Прол кайис полатьö. Сэк инька мужик бокö кайис полатьö, но мöдыс пышшис полатьсис да водiс джоджö... Сiдз котрасисö джын ой: öтыс кайö кроватьö, мöдыс — полатьö, öтыс лэдзчö полатись да джоджö, мöдыс — сьöрас.

Ойыс вöлi дженытöв ни, и асъяпонланяс Öльза Пролöс зэлöтiс ен угöлö да сiдз, что асывнас чеччисö и топ нем абу вöлöма — кыкнанныс радöсь, только мужикыс юалiс жö:

— Быль я мый я бригадирыскöт узьлiн?

— А мый тэныт? Бырис я мый я? — кокнита шыасис инькаыс, кок чуннес вылын котрасис джоджöт: лонтiс гор да ыджыт чугунын пуис кукань яй, кöда шедiс нач даром.

3

Лунiсь-лунö вынсялiс тулыс, вельмис, сылöтiс öддьöнжык. Улицаын пидзöсöдз нять, мыччисисö ни лым увтiсь ыббез.

— Мый нö тэ? — Прол юалiс иньыслiсь. — Мыля нö пермаас он мун? Сё ни кöркö уджалöмыс понда вештiсö бы...

— Сiтала тай... Куканнесö нач немöн верднытö. Быд лун кыскöны бöрöн. Ась ачыс бригадирыс уджалö.

Инька уджавны некытшöм фермаö эз мун, а лун-лун öвтчис посадын — öтiк керкуö пырис, мöдiкись петiс. Кыдзкö Öльза пырис Егорика дынö, кöда быд лун кулö бы и кувны оз вермы. Шогалö мортыс да сэтшöм шогöтöн, что мунö кöть оз враччес дынö, нем озö адззö.

— Мыйлö вот враччесö враччезас велöтöны? — шогалiсь норасьö Öльзалö, кöда веськыта висьталö:

— А деньгасö кин босьтас?

— Деньгасö весь босьтöны! — лöгыс петö Егорикалöн, чужöмыс кыдз блин пöжассьö — гладь да вира, синнэзас кусöма гаж, голосыс сибдö, одзлань норасьö: — Öльза, натьтö, эд менö керисö... Ерекничаэс тшыкöтiсö, мыся. Икотаыс кынöмам кыдз порсь нырьясьö да нёштöм голосöн горалö! Пешлы жö, кага, — шогалiсь нюжöтчис кроватьö, лэбтiс подолсö (кынöмыс рись кодь чочком рöма, небыт). Няпыртiс гöг гöгöрсö, висьталiс. — То, то, Öльза! Шедiс лягушаыс! Ой, сёяс! Вöрöтчö эд! Ожо, дзебсисяс бöра, — пидзыртiс бы да выныс эз ни тырмы, горöтiс: — Öльза-а-а!

Керкуын дзир кыкöн. Егорика кулö бы. Öльза рад: пуджис йöрнöс соссэсö, кузь да векнит чуннезнас малалiс небыт кынöм, мыйсянь Егорика кыдз небзис-сылiс, мортлö лоис сэтшöм долыт, бур, что синнэсö кунис, дульсö ньылыштiс, шыасис:

— Ыджыт эд кынöмам икотаыс.

— Ыджыт, ыджыт, — Öльза долоньнас жагвыв малалö шогалiсьлiсь кынöм, юалö: — Мужикыткöт узьлан жö?

— Сэтшöмыскöт! — синваэс петiсö Егорикалöн. — Порсьыскöт... Кыдз лун, сiдз гортö и пырö быкöн. Пырас, порогыс дорын чазьнитас, вешьянас кудзалас... Пышты!

— Узьлыны колö мужиккескöт. Мужикыслöн эд сiя жö лекарство. Егорика паськöтiс синнэсö, шыасис:

— Адззöмыт лекарство! Сьöлöм гудырсö...

— Эн вöрöтчы! — висьталiс Öльзаыс, чорытжыка жмитiс шогалiсьлiсь кынöмсö, гардыштiс. — Вот зараза! Шедлiс да бöр эд мезмис. Но тэныт, инька, кынöмат и тасалöмась икöтасö, но и тасалöмась... Каб кодь! Ёна ни нималö.

— Олан абу, — пондiс пильскыны Егорика да быдкодь умöль кыввезöн видны ерекничаöс-свояченицаöс, ассис соседкасö, кöда мырддьö бы Егорсö, но оз вермы и керöм икöтаэзнас, — Сёйис эд! Морт разь Öтöпкиыс? Оз я мый я пöт мужикнас?! Нем эн шу, сiя эшö уна отирсö гуас сюяс. Нёльзьöм бöрыс! Этаыс...

— Кин йöзыслö гусö гарйö, сiя ачыс сэтчин пырö, — пуктiс-висьталiс Öльза, малалiс-керис Егорикалiсь кынöмсö, юалiс: — Буржык лоис?!

— Буржык...

— Куйлы да эн вöрöтчы! Ме Джунаыс моз пондыла веськöтны, — шуис и кыкнан киыс жагвыв пондiсö лэбавны Егорика вевдöрöт, ачыс юасис. — Кылан шонытсö?

— Кыла.

Öтöрын вöлi кымöра. И вдруг öшынöт керкуö дзарнитiс шондi, койыштiс гажа югöрöн. Керку бытьтö серöмтчис. Öльза долоннесö дюттьöтöв-керис шогалiсьыс весьтын, висьталiс:

— Талун тырмас. Ашын бöра пырала.

— Пырав, пырав, кодя морт! — гажöн ни лёбис шогалiсьыс. — Öнджа... Оз кö буржык ло, кувсяс эд.

— Веськалан! — Öльзалöн югыт зелёнöй рöма синнэс лэчыта дзиргисö-видзöтiсö керкуись быд тор.

Богатöйкодя олiсö Егорикаэзлöн — быдöс, мый колiс бы Öльзалö, сiя и вöлi, но...

— Эн я бы тэ, Петровна, меным одзöсöн руб-мöд сетлы?

— Тэ мый?! Одзöсöн... Ме тэныт сiдз сета! Мыля ог сет кодя мортыслö?! Сета!

Öльза сьöлöмын гурнитiс гаж. Сiя синнэзöн эз кваркышт — Егорикалiсь босьтiс витдас руб и цыганка моз вотьыштiс-петiс керкусис. Шогалiсь талун кыдз из увтiсь мезмис, сэтшöм ни сылö лоис бур да кокнит: медодзза лун некыт эз понды висьны, эз ляз, эз доймы, бытьтö бы томмис дас годöн. Сьöлöмыс топ сьылiс, сiдз ни эд гажöтчис. Мед сэрпöсь кынöма Егорыс тасалö пöттöдз винасö, ась локтас да бöра черпезьдас порогыс дынö, вешьянас тыр какас, иньыс дзар оз кер: ашын вежöмыс чеччас, тiлис синнэсö, петас керкусис и öшас, и кытöнкö бöра лунъяс, лёк горшас кисьтас...

Егорика лун чулöтiс-лэбалiс керкуын. Рытнас Егор локтiс былись ляс код, узис порог дорын, вешьянас чисис ведра етш, чеччис, тiлис синнэсö, иньыслiсь юалiс:

— Кытшöм нö ме увтын ва?

— Отирыс сотчöны винанас, ой и лун кулöны, а тэ сотчынытö он вермы. Враг, пöдiн бы кудзат. Йöктi и сьылi бы юрыт дынын. Тартарарыö бы сэтшöм мужиксö. Кин менö тэ сайö дарсалiс?! Кувтöдз колöма овны öтнамöлö.

— Ачыт эд зонканам сьöрам вöтлiсин, — Егорлöн пиннес гер, öмас пешалiс чигарка и петiс керкусис.

Егорика бонöн чышкис мужикыслiсь кудзсö, кеймис Енлö, медбы Егорсö кинкö талун жö начкылi, юрсö бы кодя отир кералi, кöиннэз бы страмöс сёйи или уси бы ва гöпö да пöдi.

Пондöтчис грехö пыртан лун. Асывсянь дзескöтiс, зэлöтiс, дойдiс, сералiс — быдöс ни öтлаын. Егорика бöра асывсянь пондiс шогавны — синнэсö бы эз осьт. Син одзö не сёян, не юан эз ков, киэзас некытшöм удж эз пыр. Инька петкöтiс юны мöслö да баляэзлö, сыбöрын нюжöтчис диван вылö, пондiс малавны да няправны кынöмсö, икöтасö кутiс бы да вийис, кöда дзользис-горалiс кынöмас, дзик кишкаэсö соровтiс, сьöлöмсö гудыртiс.

Öтöрын киннэзкö гажöн сералыштiсö, и керкуö кокнита пырис Öльза, кöда тöн весись эз кöсйись, пырис и юалiс гажöн:

— Но кыдз?

— Сё сiдз, — гажтöма шыасис шогалiсь. — Бöра ни вийö бы...

— Оз вий! — висьталiс Öльза. — Ме сiйö асьсö сёя! — локтiс Егорика дынö, кокнита лэбтыштiс платье подолсö, мыччис чочком да небыт кынöмсö, малыштiс.

Дзуркнитiс шогалiсьыс.

— Эн вöрöтчы! — лельгыштiс Öльза, няпыртiс кынöмсö, мыйсянь Егорика кунис синнэсö, ружтыштiс, а Öльзаыс чиння голосöн лякис. — Шедiс эд, зараза! Сулав, морт сёйись! Ме тэнö кыска кынöмсис и сота, мед некöр ни он ловзьы или иньда хозяйкаыт дынö, ась сы кынöмын олан, öт кинас Öльза шогалiсьлiсь малалiс да няпралiс кынöмсö, мöднас тэрмасис-кыскис кытiськö конувтсис ловья шыр, кöда пикнитiс, асмознас чирзыштiс (пышшис бы). Но Öльзалöн чуннес вынаöсь, он мезмы, шырок!

— Ой! — шогалiсьлöн синнэс баралiсö, бледöтiс, чуйкнитiс-пуксис диван вылö. — Кин сiя?!

— Шогöтыс, — Öльза шыроксö бöжöттяс бура чунь йыввезнас видзис, онняюрöн öшöтiс Егорика одзö, куимись сьöвзис, висьталiс: — Эта тэнö, Петровна, и сёйис!

— Вий! — дрöжитiс ни Егорикаыс, синкагаэс ыждiсö, чеччöвтiс ыбöсö бы да коккес эзö кывзiсьö. — Чапкы горас, ась сотчö!

— Сотам морт сёйисьöс! — Öльза киын пессис-мездöтчис шырок. Инька босьтiс горись заслонка, бытьтö швыргис горас шырсö, а ачыс мышкыртчис да чугун сайö лэдзис «икöтасö», кöда чувизнитiс кань осьтаöт джоджулö.

— Сотiн? — юалiс Егорика, кöдалöн топ бырлiс садьыс, и сё эшö дрöжитiсö ки-кок.

— Сотi.

— Спасибо, Öльза. Мед тэныт еныс сетö здоровье да дыржык овны. Счастье тэныт!

— Мый ме счастьенас кера? — эз польды Öльзаыс. — Тэныт, Петровна, счастьесö. Тэ дыржык ов. Видзöт жö, кыдз мужикыткöт олатö, быдöс тiян эм, а ми... Кытöн гöжöмыскöт тшыгöсь, кытöн пöтöсь. Мый и эм оланыс.

— Онняюртiсö олансö да... Разисö. Отирсö вийöны бы. Нач некытöн лоис деньгасö шедтыны. Совхозас кöть отирыс вердчис, а öнi мый? — Егорика тöждiс Öльза понда.

Олансö öшлiсö и кералiсö — олан понда ни шогалiсö. Сыбöрын Егорика горöтчис:

— Эн я бы тэ, кутю, вина юöмсис менчим веськöт?

— Пондыла, — эз шванитчы Öльзаыс. — Етшалавина вылö, юктала и пöтас, одзлань öмас оз понды босьтны.

...Егор сьöрын бутылкаöн оз ков вöтлiсьны, ачыс кошшисьö. И иньыс висьталiс, что комын эм джыння бутылка.

Егор асылöн одза-одз юис комись вина и чожа пондiс котрасьны öтöрö да керкуö — вешьян эз ешты лэдзны да лэбтыны, сiдз дриссис, кыдз ва чурйис-лэдзис кынöмсис. Час эз чулав, кыдз мужик усис коккес вылiсь: сингуэс вöйисö, синнэс ыждiсö, нырыс нюжалiс, голосыс сибдiс — баитны эз понды вермыны, только ештiс кижгыштны:

— Ой, Петровна, кула ни... Гробсö керны коран этасö...

— Кинöс?! — повзис иньыс, кöдалöн некыт ни эз вись, но Егор только öвтыштiс кинас и лöнис.

Инька котöртiс фельдшер дынö, и чожа мужик шедiс больницаö öддьöн умöль шогöтöн: холера адззöма врачыс.

Некытшöм холера Егорлöн эз вöв. Чожа сiя веськалiс и одзлань былись вина месяц-мöд эз ю, и некöр бы эз тöд, что вина юöмись веськöтiс Öльза. Но деревняын кöть кытшöм гусьöн эн бы ов, инькаэз пондiсö тöдны, мый вöлi Егоркöт. И Öльза йылiсь паськалiс бур слава, шогалiсь отир пондiс öтмöдöрсянь кыссьыны Пальникö, пондiс локны ник и няк веськöтчыны Прол инь дынö, кин мымда вермис, сымда и деньга вайис. Богатсьöтiсö Пролöс сэтчöдз, кытчöдз öтпыр, гожум шöрнас ни, вöрдядьыс эз вайöт ерекничалiсь мужиксö — Егорикалiсь соседсö, кöдалö куран кертöн сöтöма коскас да сiдз, что Микит не мышкыртчыны, не веськöтчыны оз вермы — кык кусiньöн кусiньтчöма и мунö, тальччö да ойзö, Öльзалö кеймисьö: «Отсав, кага! Иньöлöн икöтаэс сёйöны, ой. Нем ог жалейт, вештiся».

Вежöртöны, что Митит вештiсяс — ачыс оз сёй да Проллэзлö ваяс, сiйöн Öльза лонтiс баня. Кöр ештiс баняыс, Мититкöт кыкöн лэдзчисö медодзза кöс öдö, пырисö баняö, чöвтчисö. Öльза дзар керис Митит вылö, кöдалöн лыэс гер, коккес коласöт гув видзö: мужикыс мужик вылö оз вачкись, и юалiс сылiсь:

— Кыдз этатшöмнас олан иньыткöт?

— Сiдз и ола эд, — ружтö мужикыс. — Понсö буржыка ни видзö дзöдзылыс...

— Эн тöжды. Быдöс лоас бур, — Öльза босьтiс корось, кöшись ваöн чажгис пым иззэз вылö и пондiс кульны-пывсьöтны шогалiсьсö, пывсьöтiс-пывсьöтiс, сыбöрын спинасö мавтiс стручковöй перецись керöм настойкаöн. Немымда эз жалейт донтöм лекарствосö, кöда спинасö мавттöн ештiс визывтны увдöрö, сибалiс, кытчö колiс и эз, мыйсянь мужиклiсь сiдз пондiс сёйны-сотны бöр гöгöрсö, что нач пасьтöг баняись чеччöвтiс öтöрö и кульöм бес моз öдззис котöртны гортас.

Баня бöрсянь Митит заргисис аслас керкуö, кыдз ош увтiсь мезмöм.

— Мый лоис?! — повзис иньыс.

— Сулав! Некöр! — Митит, кыдз вöлi ляч пасьтöм, сiдз и заргисис джоджулö, пырис ыркытiнö, увтöн-банöн бергалiс да ряксiс, кыдз бы начкылiсö мортсö, сэсся лöнис.

Мититлiсь бытьтö киöн босьтiс шогöтсö, но дыр мыйись сiя гусьöн öтiклö да мöдiклö мужиккеслö ошшасис, кыдз веськöтчис Öльза дынын. И сэксянь Проллэз дынö шогалiссез туйсö öштiсö.

Кыпалiс деньга да дугдiс кыпавны.

Прол бура ни инькаыс сайсянь пондылiс овны: умöлик отиркöт пиннес пыр только баитiс, некинкöт эз тöдчы, юышалiс вина да соседдэслö ошшасис:

— Мый нö тi? Асьныт ни няньсö пöжалат я мый я? Од я турун сорöн ни чöвпаннэзнытö пöжалö, а менö иньö пирöггезöн да тупöссезöн пыр вердö.

— Прока мужикыс, сiйöн чöскыта и вердöны, — медодз сералiс Митя Пиля, кöда отирсö пыр пиннес вылын видзö — асьсö только ошкö. — Бур, кöть вур, да мед кымöсат оз быдмы сюр, кöр оланыс люкасьö и зурасьö, он тöд мый эшö еныс мыччалас, кöдöрö чеччалас.

Деньга вöлi да чожа видзсис. Öльза бöра пондiс öшлыны гортсис — вердсис кытöн шедас, öтпыр гортö локтiс код — синнэс дульсмöмась, чужöмыс пыктöма, нырыс увтын вонь кузьöн зырым öшалö, öт кокас важ сапог кöмалöма, мöдас бырöм галоша кышалöма, чулкиэз лёллясьöмась, платьеыс бусöсь-нятьöсь, платье бöрыс резьдöма — шаг шагньöвтас и нятьöсь трусикыс мыччисьö, рыжöй юрсиыс кыдз баля быд ¹— шышыбар шмаккез лякасьöмась. Пантасян кö сэтшöмыскöт кытöнкö вöрын, повзян.

Прол отир одзын асьсö эз ни бы стыдит: Öльзаöс посöдз омöн лэдзис и жвангасбöрсяняс ыбöссö. Немымда эз лöсьöтчы овны весь, кöр отир лöсьöтчис керны турун. Мужик думайтiс ытшкисьны да куртны, босьтiс бы мöс, порсь, баляэз, ошшасис, что лоас «пермерöн».

Öтiк асылö Прол вартлiс литовка, эта коста юрыс вевдöрö льöмпу ув вылö пуксис да пондiс чирзыны воробей, кыдз нерис мортсö.

— Ытшкисьны лöсьöтчан, — сэтöн ни бöра Митя Пиля, сулалö посöдз дынын, нютшкö табак, баитö — небыта ольсалö, кыдз медбур ёрт, жалейтö Пролсö, юасьö: — Мый нö? Быль я мый я Öльзаыскöт янсöтчан бы? Мыйкö гортат оз вуджрась.

— Меным сэтшöмыс оз ков! — умöль кыв гардыштiс Прол — Öльзаöс мортö эз пукты. — Сытöг кыдзкö оламö.

— Отирыс баитöны, öнджа пö... Öсипыскöт пö оча пельпон ниртчöны. Стыд бы и баитны, а нылö нем абу.

— Ась, — бобгыштiс Прол, сьöлöмыс кыдз би вылын пöжассис — сэтшöм вöлi умöль, сiдз лöгыс петiс, что öнi Пиля местын одзас сулалiс кö бы иньыс, олан бы овсис, масьтiс бы торрез вылö и — абу! Мыйлö сэтшöмсö?! Нем вылö сэтшöмсö, но Öльза суббота рытö локтiс, пырис, кыдз нем абу и вöлöма, пондiс юрнас öвтны да сярзьыны:

— Ой, Прол, Прол... Джоджсö метöг абу чышкöмыт. Кытшöм тэ сэтшöмыс мужик?!

— Ме вылö ёгыс оз чеччав, кыдз эта... Мыйлö этчö локтiн?

— Мыйлö ме, шуан, локтi? — иньыс шыасис и пызан вылö сувтöтiс бутылкаöн спирт, нимыс кöдалöн «Рояль», пондiс пеничайтны:

— Юртöм тэ менам! Нем он ылöст. Отирыс вузалöны спиртсö да деньга кыйöны, а тэ...

— Нем деньганас керны, — Прол небзьыштiс ни.

— Деньганас нем керны! — нерис инька. — Мый нö тэныт сэк колö?!

— Эз я спиртыссянь Дзут Яшаыс пезьды, — мужик нузгис ныр увтас.

Öльза пондiс куснясьны-серавны, витшыктiс да баитiс:

— Ой тэ, Прол! Мед кöть öтiк лунöн быдöнныс чорзьöны, миянлö мый? Миянлö деньга колö, кылiн?!

Мужик топ вежöртiс иньсö, но рытсянь Öльза бокö эз вод — турбыльтчис полатьö. Прол — полатьö, и Öльза — полатьö, сэк мужик полатьсянь уськöтчис джоджö, и Öльза сьöрсяняс — полатьсянь онняюртчис джоджö. Пышшалiс мужик иньсис, эз бы вод бокас, но посöдзын ни шедiс. Сэк Öльза öшöтчис голяыс бердö и пондiс окавны-нювны тырппесö.

Сыбöрын локтiс эшö медгажа асыв. Прол да Öльза öтамöднысö любитiсö медöддьöн. Олан лöсямис: инька ачыс городiсь ваялiс спирт да эшö öтiк-мöдiк шурум-бурум и вузасис.

Деньга бöра пырис Прол зеппезö сэтчöдз, кытчöдз спиртöн эз сотчы Жевган Трипан, кöда рытöн Öльзаэзö локтiс деньгатöг, сувтiс горш вылö и пондiс кеймисьны:

— Вайö кöть сто грамм. Ытшкиси, видзöтö, да стрась мыдзи. Юа бы, челядь!

Сiдз и кулiс бы винатöг Трипаныс, сiдз лолыс и петiс бы, но Öльза мортлö сетiс бутылка «Рояль», веськыта висьталiс:

— Ваян деньгасö. Он кö вай, сэсся этчö кокöн эн тальччы!

— Вая, вая, любимöй! Кыдз лоас деньга, сiдз и вая! Ме морт, тöдат кытшöм! — няпыртiс кулаксö, нöбöтiс бутылкасö, а ашынас...

Мед эг бы вöв сэтшöм луныс, кöр деревняын отир чира-жака. Проллэзö котöртiс Трипаника — сюзь чужöм, летiс юрсиэсö да быд горшсис чирзiс:

— Мортвийиссез! Мортсёйиссез! Сёйит эд мужикöс. Тi эд тöн спиртсö Трипаныслö сетöмась, тi!

— Но и мый?! — Öльза киэзнас асыкалiс коссö, чатыртчис, лег-лег керис юрнас, карзыштiс. — Но и мый? Ми я мый я öмат мужикытлö винасö кисьтлiм? Тöдны колiс, мымда юны.

— Тöдiс я сiя, мымда юнытö?! — Трипаника риксьö. — Сылö эд только шедiс бы... — дугдiс уннявны. — Ась. Пöтiс öнi. Оз понды горшыс винаыс вылö косьмыны.

Одзлань Öльза вузасис винаöн — пöдтiс-юкталiс отирöс. Деревняын быд лун вöлi кыдз бы ыджыт вежалун. Быд лун зызiс отир, уджавны эз думайт, кытчöдз бöра винаöн эз сотчы Петра Зöтя, кытчöдз иньыслiсь юрсö эз керав Сьöла Ондрон, кытчöдз ассис кынöмсö пуртöн эз резьöт Васька Öгань, кытчöдз отир эз понды овны пода моз: сваль пондiсö узьлыны инька да мужик, вежсисö-пансисö мужиккез иннезöн. Сэк отир коласын адззисис садь морт — этö Мöс Серафим. Сiя и гижис деревняись олансö газетаö. Етша эта, дак эшö содтiс-норасис милицияö и прокурорлö. Но и ась норасьö арттöм Серафимыс! Кинлö öнi сiя норасьтöнняс былик синнэзнас колас? Аслас юр вылö эд мужикыс кисьтiс нятьсö — отирсö лöгöтiс сэтчöдз, что аслыс эз понды туйны петны öтöрö, кыдз мыччисяс код синнэз одзö, сiдз моросыс бердö и кутчисьöны.

Веськыта висьтавны, деревняын гажа лоис овны. Чожа деревняö мыччисисö милиционеррез — кык командир да командир вылын эшö командир. Туй вывсянь начальниккез веськыта заргисисö Проллэзö, пырисö керкуö, здоровайтчисö. Начальникыс медодз видзöтыштiс Öльза вылö, кыдз бы инькасö лöсьöтчис гусявны, юалiс:

— Тi, Öльза Ивановна, лоатö?

Прол кыдз пукалiс стул вылын, сiдз невна садьыс эз быр, повзис, öмыс пиньöвтчис, синнэсö паськöтiс и пондiс видзöтны милиционерыс вылö.

— Ме Öльза Ивановна. А мый?

— Норасьöны тiян вылö, Öльза Ивановна! Винаöн пö вузасян, винасяняс отир кулöны.

— Ха! Кин öнi винанас оз вузась? Кин öнi винасяняс оз кув?! Чожа быдöнным код юррезнаным винасяняс пезьдамö.

Смев инькаыс, баитö-сярзьö: мужиккес öммезнысö озö ештö осьтны, но медбöрын начальникыс ештiс содтыны:

— Умöль удж уджалатö, Öльза Ивановна.

Инька тöдiс, мый керис, кöинлö бы эз сетчы, дорйис асьсö, медбöрын лыйис-висьталiс:

— Асьнытö тöдö! Öнi демократия! Мый колö, сiйö и кера. Вузася или гыжьяся, тiянлiсь ог понды юасьны! — öзйис сьöлöмыс, пондiс лыддьöтны, веськыта шырис, быдöнöс кöритiс кин да кытшöм эм: кыдз начальствоыс разисö совхозсö, горттэзаныс кыскалiсö, мый вöлi и эз. — А ми мый?! — чирзiс — öмсис дуль резсис. — Совхозас туртiм-туртiм да сэтчö и кольччим, мало-дело кишкапон мыйöн шедас тыртамö, мый шедас, сiйö и пасьталамö! Талун-ашын Пролыслöн бырöм вешьянсис пондас тыдавны. Мый сэк лоас?! Стыд эд быдöс Рассеяыс одзын лоö, а тi... Öтiк гуна вылын вартатö, öтiк пызан сайын сёятö! — горöтчис, кыдз бы сьöвзис, висьталiс, мый пöжис сьöлöмыс бердын. Быдöс и эз бы ков висьтавны, инькалö колiс тöдны, кин пырис керкуас. Милиционеррез жмитiсö тырппезнысö, сотiсö-видзöтiсö инька вылö, кöдалö öд шедiс, кöда ыксiс: — Адззат, вылам кытшöм платтёö! Кавзьöм да бырöм. Трусиккесö абу я нем кöмавны! — синнэзсис вотьыштiсö синваэз. — Видзöтö, одö кö веритö!

Инька мужиккес одзын лэбтiс подолсö, мыччис сiйö, кöдö лыддис меддона да медыджыт богатствоöн, бузгас:

— Тöвнас нач ни кынтi, и гожум шöрнас вöлись сылiс, а тi... Ойе-е-е! Джагöтчыны я мый я?!

Джын час етш Öльза милиционеррез одзын баитiс-разис, мыдзис баитны и лöнис. Сэк инькасö нем эз керö — чуньöн эзö вöрзьöтö, кылöн эзö дойдö, эзö штрафуйтö, только этаыс... Начальниккес вылын начальникыс, тыдалö, медкодя командиррез коласын, дызгыштiс:

— Öльза Ивановна, тэ бöра, инька, одзлань эн кув. Талун-ашын пондамö овны богатöя да счастливöя.

— Мый нö ме шуи?! Кытчö нö пусö пöрöта?! — пильскис Öльзаыс, кольлалiс гöссесö öтöрись посöдзöдз — öтiк минута горзiс, мöдiк минутаö вöлi радся-рад, сьöлöмыс сьылiс, думаэс чеччалiсö: «О-о-о, юртöм пальнишана! Змея табун! Тiян öммезöн я шырресö куталöны? Норасьö унажык, норасьö! Сералö миян кодьсö. Видзöтам эшö, кин пондас медбöрын серавны. Тi эд эшö Öльзасö умöля тöдатö. Тi эд нем эдö адззылö совхозаныт нырьясьтöн, а ме быдöс ни пешлi, нельки тюрьмаас тойесö вердi (эта йылiсь пальнишана бытьтö кытiськö кывлiсö ни, но бура эзö тöдö, а Öльзаыс некöр и некинлö эз ошшась, нельки арттöм Пролыслö джын кыв эз явит, что шедлiс сэтчин)».

Öльза бöра кöс петiс нятьöсь ваись, кытчö сiйö пондылiсö вöтьны бы пальнишана. Инька бöра олiс, топ кымöрсö судзöтiс. Прол некöр и немöн эз ни ошшась, а сэтöн соседыслö жö горöтчис:

— Менам эд иньö, кывзы жö, кытшöм! Менам эд сiя золотöй вöлöма. Некытчö оз йöрмы.

— Сэтшöм. Нем баитны, — кашык-кашык керис Митя Пиля, кöда кужö отирсö пиннес вылын видзны, асьсö бытьтö оз тöд кытшöм. Öнi шынньöвтыштiс и содтiс: — Золотöй тэнат, Прол, иньыт. Кристос сыкöт, не вомдзавны бы.

Мый эм, сiйö он мырддьы: милицияö Öльзаöс эзö нуöтö. Проллэз одзлань кыйисö деньга, вузасисö спиртöн, сэтчöдз вузасисö, что юöмсянь невна эз кув инь морт ни — этö Денис Öпим, кöда кужö жö юны — литра былскас и оз турйöвт, кыдз сира мыр, только невна мывкыдыс вежсьыштö — быд мужик голя бердö öшöтчö. Öпимлöн керкутыр челядь, но только öтiк роднöй мужикыссянь, а мöддэс — витыс, кыдз ошшасьö инькаыс, понсянь и порссянь, ачыс бура оз тöд, кöр да кин бокын кодувья узьлö. Эшö ошшасьö, что кага ваялан торыс аслас, мый колö, сiйö и керö, и ныр этатчö уна тöдiссезлö нем сюйны. Сiдзкö, инька орсiс-олiс челядьöн, юышалiс вина, а медбöрын гленитчис сылö юны спирт «Рояль». Юис инька спиртсö, и, кыдз сералöны мужиккес, пондiс «орсны «Рояльнас» — сотчыны пондiс, öмсис быг только петiс, топ эз ни лолав, ки-кокöн трек эз кер, но инькаэс сiйö жалейтiсö (да не асьсö Öпимсö, а челядьсö), кутiсö да кодсö юкталiсö асланыс кудзöн, и ловзис эд инькаыт.

Басни бы эстöн эз вöв, кöр коддэз öвтчöны лун и ой, но Пальникын эшö адззисисö сэтшöм инькаэз, кöдна винасö юöны да тöдöны мымдаöн юны, нач эшö эзö бöбмö. Сэтшöммес Öльза вылö нач и лöгасисö, и арланяс, кöр рыттэс пемытöсь ни да ыркытöсь, öшымöс дорын кутiсö Öльзаöс, жмитiсö стын бердö да сiдз тiлисö ныр гöгöрсö, сiдз нетшкисö юрсисö, сiдз кулаккезнаныс сюйисö кынöмыс гöгöрö, что инькаыслöн невна кишкаэс эзö сорласьö.

Ёна Öльзаöс инькаэс пыркöтiсö и перкйисö, вийны бы лöсьöтчисö да эзö жö вийö, шуисö:

— Эта-ка, Öльза, мортсёйись тэ, варыш син, эта-ка, пондан кö эшö винанат вийны мужиккесö, асьтö виям. Вежöртiн, кöин чужöм!

— Эдö вийö, матуэз! Ог сэсся понды винанас вузасьны и мужиккезнытö ог понды мырддявны, ог, — кеймисис Öльза, нырыс увтын тiлис зырымсö, ачыс думайтiс ни, что нiя шедасö милицияыслö. Сэк вöлись видзöтас кин да кинöс...

А кинöс бы пемытiнас видзöтны? Мый адззис, кöр öтöрын гу пемыт — синнэзö рос заргы, и он адззы кин тэнö вартлiс. Сiдзкö, Öльза Ивановна эз тöд, кыдз инькаэсö дойдны. Сiя лун-куим боккесö пöжис гор вылын, мурзис-ружтiс, гичралiс пиннесö, няньтор öмас эз босьт да думайтiс, кыдз овны одзлань.

Думаэс инькалöн чожöсь, чикись моз лэбалiсö, сё бы кытiськö деньга сыналiсö, но кысь вот? Инька лöсьöтiс басни, мужиклö шуис:

— Эй, Прол! Кывзы менö, мый ме баита. Босьтiн бы пишаль, котöртiн вöрö, лыйин лосьöс, ошöс, кöинöс, паздiн бы туланнэз, кöччез, руччез, сьöлаэз, таррез. Дозмöр бы вийин да вайин гортö. Яйсö бы сёйимö, а кучиккесö вузалiмö. Вот эд вöлись кытöн деньгаыс!

— Кытшöм ме вöралiсь? — дзуртö-баитö Прол. — Пишальсö киам ог куж видзнытö эд. — Сэк пода пондам видзны, — кокнита кывнас пода видзö Öльза. — Босьтам мöс, баляэз, порссез, кукань-мöд.

— Мыйöн эшö босьтан? Кытöн деньгаыс? — дзуртö мужик.

— Но тэ и мужик менам! Но тэ и бес! Мыля деньгаыс абу? Мыйлö нö винанас вузасим? Тьфу тэ, господи! Вöтöн эг вöтась, что кöркö понда овны этатшöм дзуткöт, — сьöласьö Öльза.

— Босьтам нö подасö, а турунсö кысь? Кин пондас ытшкисьны да куртны? Менам киö висьö.

— Шöрись кокыт оз я бы вись?! — инька öзйö, сёйö-видö Пролöс. — Мыйлö тэнö еныс овнытö сетöма да эшö мекöт? Мыйлö?

— Ог тöд, — нырнас вирснитiс Прол, нятьöсь чунь йывнас чышкис син дорсö, гыжьялiс конувтсö, юрсö, топ тойез сёйисö.

— Сэк мый пондамö керны? Бöра тшыгьявны я мый я?

— Кöр нö ми тэкöт тшыгьялiм? — синнэс мужиклöн куньсьöны, öмсö осьтöтлö, нюжласьö, пиннесö гичралö, сьöкыта лолалö.

— И ов, кыдз тэныт гленитчö! — Öльза висьталö медбöрын и лöньсьö, аслас думаэзкöт пондö баитны: «Эн пов, Öльза! Ме эшö некытчö эг йöрмыв. Ась мериныс кыдз колö, сiдз и олö. Веськавны бы чожажык». Кивзö, бергöтчö бок вылiсь бок вылö, малалö каджсö, кыт медзубыт, пыктыштöма, лöзöтöма. «Ась. Лешак сыкöт! Бöрö абу казённöй, бурдас. Сэк мый понда керны? — думаэз бергалöны, лöгасьö-мурзьö. — Пышша вот мериныс дынiсь. Адзза эшö сэтшöмö, кöда пондас...» — синваэс петiсö, горшсö зэлöтiс шог, кöр веритiс и эз аслыс, тöдiс, что синнэс гöгöрын эмöсь ни чукыррез, что абу ни вывтi том, что сьöрас табунöн котрасисö зонкаэс одзжык, а öнi вешьянаэс сьöрын колö вöтлiсьны аслыс, кöдна и пантасьöны, но медбы только поннэз моз чеччавны, а овнытö кинкöт? Бур, что турзьöмыс пантасис и мед оз и вачкись мужикыс вылö, но вешьяна эд, мужик дука, сiдзкö, колö куйлыны кытчöдзкö гор вылын да не китсасьны.

Öльза веськалiс кыдз пон, кöдö вийтöдз вартлöны, но вийны озö вермö — кувлас ни да ловзьö. Веськалiс инька, кыдз бы ловзис, чеччис гор вылiсь, сэсся гортiсь эз мун, медбы кытiськö ылiсь босьтны вина, вайны да вузасьны. Етша инька винаöн вузасис, но тöдiс кыдз шедö деньгаыс.

Сiдз, Проллэз месяц етш олiсö бытшöма, эз торйöтчö-янсöтчö, весь олiсö, кöр не совхозын, не гортын удж эз вöзйись. Сыбöрын, кöр усис ни лым, кöр локтiс праздник, кöдö тöдлiсö да бытьтö бы эзö ни тöдö, но вина сiдз и этадз юисö, сэк Öльза öтiк асылö петiс гортсис и öшис: лун абу, ой оз тыдав, мöдiк лун локтö, инька бöра гортын абу. Прол керкуын пукалö öтнас, кыдз сюзь, кыдз калян или суседку: оз сёй, оз ю, рожасö оз миссьы, гор оз лонт, юрсö öшöтöма и пукалö веськыта пызан сайын, пукалö, кытчöдз бöра эз пыр Митя Пиля соседыс. Сiя талун модьö, что иньсö кыскисö больницаö, сэтчин резьöтiсö кынöмсö, кишкаэз чапкисö поннэзлö, а ны местö кынöмас тöбалiсö турун.

— Эзö жö идзассö кынöмас сюйö, — шыасис Пролыс, кымöс увтöт видзöтыштiс соседыс вылö, кöда быздiс — öм угöввезiсь дуль резсис.

— Быль, Прол! Ог жö ме тэныт понды пöрьясьны. А тэ мыля нö öтнат? Кытöн нö золотöй иньыт?

— Сэтчин, — Прол öвтыштiс кинас öшынлань.

— Бöра винала мунiс? — реш видзö öмыс Пилялöн.

— Эз, — тырппесö нюлышт-малышт кывнас керис Пролыс.

— А, вежöртi. Öнджа керас, мыйкö керас — быдöс сьöрас. Инька тэнат быль золотöй! Меным бы сэтшöм иньсö! Ме бы вöлись эд... А этатшöмыскöт мый? Видзöт, резьöтiсö кынöмсö, сэсь мортыс оз ни пет. Калека. Енвалид. Быдöс пондас ковны аслым! — горöтiс и виньдiс, вишыкасис, содтiс: — Начкыла мöссö и понда овны!

Уна баитiс Пиля, но мый бы колiс эз висьтав. Эз понды тöдны Прол, что иньыс кык ой ни узис Пиляэзын и часöт чазьнитö сэтчин — öт кокыс этчин, мöдыс сэтчин, платье подол лэбтöма — гöг увтыс быдöс синнэз одзын.

Узьö Пиля инь местын Öльза — вöттэз оз вöтась, кынöмыс оз симав, оз кынмы-косьмы, пода сы понда карта вылын озö баксö, озö корö хозяйкасö. Роднöй мужик кöть эм, кöть абу.

Прол кивзö, бытьтö бы хозяин жö керкуаныс, няпралö кулаккесö, нырыс увтын модьö, что локтас кö гортö нятьöсь подолаыс, вöлись мыччалас ыбöссö, иньдас гортiсь кузь туйö.

Тем-тюöн кöть шуöны Пролöс, а кужö жö лöгавны, но кöть мымда лöгав, кöр оз тöд кытöн иньыс. Некин эз адззыв Öльзаöс Пиля ордiсь. Проллö лоис сэтшöм умöль, сiдз сьöлöмсö пидзыртiс гажтöм, что унньöвтiс и пондiс горзыны, синваэсö содззезнас вештiс. Горзiс морт, кöть некыт эз вись, эз вöв дойдöм. Томнас зонка эз вермы гöтрасьны, эз бытьтö адззись кодя да уджа нывка. И кин сэтöн виноватыс? Эзö вöлö гöтрасьны нывкаэс и быдöс: абуись эд эмсö он кер, кöр ныв отир ештасö только велöтчыны гортiсь школаын и абуöсь ни, пышшöны кинлö кытчö туй.

Деревняын Прол кодь мужиккес адззисьöны, кöдна сiдз и пöрисьмöны иннезтöг — куласö и озö тöдö инька кöр.

Асывсянь Прол горзiс, синваöн сьöлöмсö личöтiс шогись, пасьтасис, петiс посöдзö, босьтiс чер, пондiс пес чуркаись керны öр, кöда нем вылö бы эз ков, но мужикыс тюкöтiс-керасис чернас, öштiс кадсö, юрсис дзугис сьöкыт да умöль думаэз, лолалiс сöстöм руöн и уджавтöн эз казяв, кыдз чулалiс кад. Локтiс рыт, и рытöн телевизорись видзöтiс американеццезлiсь кино, кытöн паздiсö отир, инькаэз пышшалiсö мужиккезныс дынiсь, узьлiсö мöдiккезкöт, поннэз моз не стыд, не срам эз тöдö. Мужик сьöласис да видзöтiс кино, а сэсся мый керны, кöр керны нач нем. Только бöра тöдвылас усис Öльзаыс, кöда киноас моз жö...

И эшö Проллö лоис сысянь умöль, что сiйö сералiс отир, синнэзас бытшкис, веськыта висьталiс кытшöм сылöн иньыс, а сiя кылiс да эз — нем бытьтö эз вермы керны, кöть и гичралiс жö пиннесö, ыксiс керкутыр: «Вашöта öнджаöс! Вашöта!»

Некин эз повзьы Пролiсь, кöр керкуын некинлö вöлi повзьыны, мымда бы эн ыксы.

4

Прол лун-мöд тшыгьялiс, сiйöн одзжык асывнас ветлiс пекарняö, кытöн эшö пöжалiсö и вузалiсö нянь. Босьтiс буханка, локтiс гортö, небыт да чöскыт няньсö пидзыртiс öтiк сёйöмöн, юис öшымöсiсь кайöтöм кöдзыт ва, и лоис топ буржык.

Кынöм пöт, и керны нач нем. Прол петалiс посöдзöдз, дыркодь видзöтiс ыббез вылö, кöдна деревня сайын бытьтö горзiсö сысянь, что таво гожумнас нiйö эзö ни гöрö-кöдзö, быдмис ёгтурун, бытьтö отирыс эзö лöсьöтчö овны — талун эмöсь, ашын абуöсь, оланыс кусас. Мед и некин эз кув, но вот сэтшöм олан локтiс, что некинлö и нем эз понды ковны. Проллö нем жö бы эз ков, думаэзнас олiс только öнi — талун.

«Эх-хе-хе... Мый жö бы керны?» — посöдзын юрсö гыжьялiс мужикыс, малыштiс кынöмсö, видзöтыштiс йöрлань, кöда бердö вöлi тэчöма пес поленича. Песыс етша ни, чинö быд лун, кыдз сёйсьö нянь. И некин йöзыс оз керав, аслыт колö уджавны. Сiйöн мужиклöн юрас и вöрзис бур дума: «Ожо, босьта черсö, муна да пöрöта кöть öтiк кöз, ог я сiйö мыйöнкö вермы вайны».

Висьталiс аслыс мужикыс и керис: пырис бöр керкуö, пасьтасис, кыдз колiс пасьтасьны, медбы уджавны вöрын. Посöдзись босьтiс чер, жвангис-пöдналiс иган вылö ыбöссö и иньдöтчис вöрлань, шагнялiс медодз улицаöт, сыбöрын вожмöвтiс видз вылö и вöлись кежис сылань, кытöн ылiсянь тыдалiсö кöззэзлöн йыввез.

Мужик талис лым, кöда дзуртышалiс керзаись вурöм сапоггез увтын. Лымыс эшö эз вöв пыдын. Гöпоккез весьтöт тальччалiкö Прол сунгисялыштлiс, зэгнитчыштлiс юрыс, кыдз бы пыркамисö сьöкыт думаэс. Морт везйис-мунiс кузь коккезнас ыб вылiсь межа дорöдз, локтiс лапья кöз дынö, кöда паськöтöма уввез, мымда вермöма, пöдтöм гöгöрсис кыдзоккез да пипуоккез и сулалö — тöв оз вöрзьöт. Кöз уввез бердö сымда гожумнас шогмöмась голиэз, что мукöдыслöн йыввезныс мышкыртчыштöмась. Голиэсö кокалiсö уркайез, притькышалiсö, уськöтлiсö сёяннысö лым вылö. И ур ни ештöма обедайтны: кисьтöма лым вылö голи кыш.

Кöзыс кыз, швавья. Этатшöм пуись песыс шедiс бы сьöкытöла, но Прол эз тöд, кытчö öштыны ассис лöг, кöда сы сьöрын вöтлiсис вель уна и вель дыр ни, сiйöн думайттöг коссис кыскис чер, медодз пондiс сiлльыны-керавны кöз гöгöрись кыдзоккез, пипуоккез — быдöс, мый киэз увтын дзугис удж, масьтiс да шупкис бокö. Вöлись пондiс сизьдыны кöзсö, кöдалöн кыз качыс вöлi чорыт, и черыс мöртчис умöля, чеччалiс. Кыным умöля пуö мöртчис черыс, сыным уджалiсьыс öддьöнжык öдззöтлiс киэсö, сеталiс, да сiдз, что чожа чорытжыкыс керассис, пуö черыс пондiс мöртчыны кокнитжыка ни.

Морт уджалiс — чаггез чеччалiсö, сьöлöмыс токöтiс, тырис лов. Уджалiсьыс сувтчышалiс, öмтырнас лолалiс, видзöтiс лымöн вевттьöм ыб вылö, öвтышалiс юрнас, сьöласис и горöн баитiс: «Но мый нö эта? Кыдз нö сiдз? Предным да бригадерным тай иньö кодьöсь жö лоисö. Нем нылö эз понды ковны: не колхоз, не совхоз эз ло... Няньыс сэрпöсь кынöммезлö эз понды ковны, пондiсö надейтчыны дяддез вылö, бытьтö дяддез кувтöдз быдöннымöс пондасö вердны. Хе, сулалö, ёрттэз! Дядьыслiсь эд öтпыр сёян да мöдöтпыр, а куимöтпыр сiя лёнъят сеталас и висьталас: «Ачыт, кага, гöр да кöдз и ассит няньсö сёй!» Сiдз и лоас! А мый сэсся? Деддэзным да баббезным этадз бы эз керö. Вöввезнас да быдöс бы бергöтiсö, а ми... — сьöвзис, пондiс думайтны. — А мый, Прол? Вöв бы быдтыны и кутчисьны гöрны да кöдзны, а? Повзи я мый я бы ыбыс вылын уджавнытö? Ышö кыдз бы...

Пымалöм спинасö малыштiс кöдзыт, кыдз чорыт киöн, и сэтöн жö Пролыс аслыс висьталiс: «Öддьöн тай!.. Уна я меным колö? Вайöны тай спикулянттэс. Мешöк пизь босьта и мисеч-мöд меным тырмас, оз кö этаыс... Кузь бöжыс ме дынö оз ни лок, да оз понды ковны сiйö эшö вердны. Или локтас?»

Öльзаыс бöра эд бергалiс юрас, сiйö некыдз эз вермы öштыны тöдвывсис, мед и лöгасис, умöль кыв гардыштiс, сьöвзис долоннез вылö, ружтыштiс, лэбтiс пельпоннэз вевдöрö черсö: «И-и-и-ех!» — и сöтiс кöзас, бытьтö пуыс дзугис быдöс олансö, и сыкöт колiс вештiсьны.

Ён да кыз вöлi пöрись кöзыс, том да вына уджалiсьыс, прокмис керасьны, кужис уджавны. Уджалiс мужикыс, люзь пымалiс, кылiс кыдз öддьöнжык вамис да спинаыс бердö лякасис йöрнöсыс.

Пролыс öтöрсянь и мöдöрсянь кöзсö кералiс сэтчöдз, что керавтöг кольччис только чунь кыза. Но пу эз пöр, кыдз бы уввезнас видзсис руыс бердын.

Ковсис керавны майöг кыза кузькодь кыдз, керны шест и сiйöн быд вынiсь пыкны-ружтыны пусö, кöда öвтчис-öвтчис да вöлись шатöвтчис, ризя-разя пондiс пöрны, му бердö буткисис сiдз, что гöгöрсис пöльыштiс сымда лым, что минута-мöд кежö Пролыс кунис синнэз да сулалiс, а кöр осьтiс, сэтöн... Кöз йыв дынын сулалiс Митя Пилялöн иньыс — спинанас мужиклань, чужöмнас вöрлань, но сiдз и этадз Пролыс тöдiс соседкасö паськöмыс да мыгöрыс сьöртi.

«Мый сiя эстöн керö?! Кöр ештiс локны?! — вирдыштiсö думаэз. Эз повзьы мужикыс, лöсьöтчис юавны: «Тётка, тэ эстöн мый керан? Кыдз нö ме тэнö пунас эг вий?!» — но дышыс я мый я петiс баитны, сiйöн эз-эз да осьтiс öмсö, синнэзнас кваркыштiс и — эз ло кöзыс дынын соседкаыс, кыдз сылiс или лэбзис, лымыс вылын след эз тöдчы.

«Öнджа... Лешачикаыс эд, Прол! Мый сылö ме дынiсь колö?!» — горöн мурзьыштiс Пролыс, сьöвзис, сулалыштiс и вöлись пондiс кывны, кыдз сайкалö пымалöм, вамöм спинаыс. И вöлись повзис, кöр вежöртiс, что весись бесыс оз мыччись, мыйкö лоас умöль. Пышшис ни гортö бы, да жаль лоис суййытöг кольны пöрöтöм пусö, кöр лöсьöтчис керны пес (думаэзнас эшö эз бы кув).

Кöз уввез вöлiсö ки кызаöсь, чорытöсь, черыс мöртчис умöля, сöтöм бöрсянь быд ув бердiсь чеччалiс, но мужикыс ружтiс да керасис-масьтiс пу бердiсь уввесö, сыбöрын чукöртiс öтiк кучаö.

Уджалiс-шоналiс, киэс весь эзö олö, и юрын думаэс пуисö кыдз чугункаын, вермасисö, вежласисö, сё бергалiсö соседыс инь гöгöрын. Лешачикаыс синнэс одзись эз öш, нерис, полöтiс, и öддьöн унаись ни мужикыс ассис юалiс: «Мый одзын бы?!» — и сэтöн жö аслыс висьталiс: «Кулан, натьтö, Прол...» Кытöн кулас, мыйсянь да мыля, эз тöд, но веритiс, что кулас. Эд смертьыс отирсö вийö гаггез моз: öтiккез сотчöны винасянь, мöдiккез джагöтчöны, куимöттэз... Мамыс ни тöдвылас усьлiс куим-нёлись, кöда зонсö видiс, пеничайтiс, что быдтiс аслас юр вылö, колiс джагöтчыны зоныслöн «кодя» инь понда.

«Мый ме кера, мам, ежели вöрдядьыс павдöтiс ме вылö?! » — курыт вöлi сьöлöм вылын.

«Мый керан, мый керан... Ачыт эд кошшин сэтшöм иньсö, ачыт и ов, ме вылö эн горзы», — бытьтö одзас сулалiс мамыс, баитiс веськыта, кöритiс зонсö.

«Сiдз, мам... Эг кывзы ме тэнö, кывзi этасö... Öнi ола и кыдз пуся сир пöртйын. Сiдз меным и колö!» — Прол быд вынсис сöтiс-орöтiс кöзлiсь йыв, черыс чеччöвтiс, и обухыс шмоньгис шульга киас: зубыт лыйис сьöлöмöдззас, синнэс одзын пондiсö лэбавны быдкодь сера гöгляннэз. Ружтiс-вырскис дульсö, öвтiс кисö, кытчöдз эз дугды мозжитны ки лапаыс, пуксис мыр вылö, шоччисьыштiс и вöлись лоис бур, кыдз бы пывсис-миссис баняын, вывсис гывьялiс нять.

Матын эшö сулалiсö кöз-мöд, кыдз бы нерисö, корисö, мед и нiйö пöрöтасö. Нiя вöлiсö гладьжыкöсь, вöснитжыкöсь, пес петiс бы буржык, но Прол öвтыштiс кинас, пуэзлö висьталiс: «Олö да быдмö эшö, бат, и этö ог вермы вайны, этчö и сiсьмас». Тöдiс, что совхозын нач ни разьсисö тракторрез, а дзоннесö сувтöтiсö асланыс öшыннэз увтö — быдкодь кöин мывкыдалö шедiсö, кыдз отирыс шуö: «Сöтiсö-вартiсö и абу...»

Кыдз бытьтö öтiккез уджалiсö совхозас, а мöдiккез — эзö, öтiккезлö — колö, а мöдiккезлö — оз, соседыт сосас сералö да олö, а тэ видзöтлы да чуннетö нимав.

Бöра шог да обида пондiсö нимавны сьöлöмсö, гудыртiсö, и эз бы мун гортö, а пышшис кытчöкö пыдöжык вöрö, мед этатшöм олансö не синнэзнас эз адззы, не пеллезнас эз кыв. Но кытчö мунас, кытчö пышшас, кин да кытöн видзчисьö, кинлö да кытöн колас, кöр шогмис татöн — эстöн орöтöмась гöгсö, татöн быдмис, велöтчис, уджалiс совхозын, тöдö быд мортöс и понöс — быдторыс кыдз аслас, а йöзын мый?

Кöть мый, кöть кыдз, кытöн тшыг, кытöн пöт, кöть оланыс пурö, иньыс сералö, но колiс мунны гортö. И Прол коскас ремень сайö сюйыштiс черсö, юрыс вылiсь лöсьöтiс шапка, малыштiс шульга кисö, кöда невна пыктыштöма вöлi, зубыт. Жагвыв кеписясис, вель дыр видзöтiс аслас удж вылö, кыдз бы думаэзнас ошкис асьсö, что мый колiс керны — керис, и вöлись иньдöтчис гортлань — болскис лым.

Луныс одз асывсянь кымöра, кыдз бы лöсьöтчис горзыны. Лöнь. Притькышалiсö уркайез, кыдз вылын шыасис дзулим табун. Проллö вöлi гажтöм, кыдз мыйкö кытчöкö öштiс, колис-вунöтiс, этасянь сувтчышалiс, малалiс кеписсезнас ассис паськöмсö, видзöтiс одзас и юрсö бергöтлiс бöрлань: нем топ эз öшты, но вачкисис, что мыйкö öштiс. Эна аскодя думаэзöн и локтiс гортö. Медодз пондiс мунны Митя Пиля соседдэс öшын увтöт, и сэтöн кыдз öбырнитiсö-вачкисö кымöсас да сiдз, что повзис. Пиля öтöрись посöдзаныс инька моз быд горшсис риксис-горзiс да причитайтiс: «Мыля тэ менö и коли-и-ин? Мый ме тэтöг и понда керны?»

«Мый сылö лоис?!» — шай-пай лоис Пролыс, дзугсис шагыс, сьöлöмыс кыдз бы жмитчыштiс, мезмыштiс — быдöс гыркас киссис, и кольччисö только юрыс да лыэс.

— Мыля тэ менö и коли-и-ин?! — герьялiс Пиля.

— Мый лоис?! — ыкöстiс Пролыс.

— Лоис, тай, видзöт, — клоп вачкис боккезас Пиля. — Кулiс эд иньö.

— Мыля кулас? — эз верит Пролыс.

— Кулiс... Враччес сiдз веськöтöмась... Понлiсь моз резьöтöмась мыйкö вылö кынöмсö, бöр вурöмась, и — на тэныт! Абу ни Öлдöттяö.

«Вот Öлдöття... Вот кыдз... Сымда и олiс мортыс, сы кузя сылöн и век... Кыдз нö сiдз?!» — Прол мышкыртiс юрсö и мунiс гортöдз. Некыдз эз веритсьы, что соседкаыс кулiс.

5

Проллэзлöн посöдз ыбöс вöлi осьта, сiдзкö...

Мужик сэк жö гажмис, кöр адззис, что, натьтö, Öльзаыс гортын, кöть иньсö эшö час бöртi кыдз кужис, сiдз и видiс, лыддис медумöль мортöн. И, вот — гортын Öльзаыс. Унажык нем ни мужиклö эз ков — счастьеыс сэтöн и вöлöма: пышшылiс иньыс — да локтiс бöр.

Прол вунöтiс недыр кежö соседкасö, кöда кулiс. Кокнита кайис аслас посöдзö, кыскис коскись чер да заргис важ кöньöс увтö и пырис керкуö, кöда лолалiс шой дукöн — ыркамöма. Джодж шöрын сулалiс Öльзаыс да сыналiс юрсисö, чожа бергöтчыштiс пороглань и гажöн да кокнита юалiс:

— Кытöн нö вöлiн?

Инькалöн чужöм кыдз шондi шонтö и югдöтö — медбасöк. Баитö, бытьтö нем эз вöв и оз ло. Петалiс гортiсь час кежö, пырис да медодз чышкис джодж, ештiс лонтны ни гор, кытöн пусьö похлёбка, и ло здоровöн мужик! Эн сэтöн чукаэтö нюжлав, эн пиньлась иньыт вылö, кöр сытöг öтiк-кык лунöн ештан тойсявны и багсявны, тшыгйöн олан и аслат керкуись полан.

Гажöтчыны бы колiс, и гажöтчис сьöлöмыс, но сiя эд мужик — ассис гордостьсö эз бы öшты, сiйöн юрсö бергöтiс мöдöрö, öт öм угöвнас шынньöвтiс, и сэк жö кыдз бы лöгасис, чорзис чужöмыс, лоис лёк. Эз шыась паныт Öльзалö, нырнас пишкайттöн чöвтчис, пöрччасис, кайис гор вылö, турбыльтчис и кыдз бы сэк жö ланьтiс.

Только сэк жö эз онмöссьы, думаэс нерисö, чувйисö, видiсö, лöгöтiсö иньыс вылö. Сiя шатласис кытöнкö, локтiс и кыдз нем эз вöв: дзульзьö сэтöн. Кыдз эстöн шуны Öльзасö? Не дзöдзыв я сiя ассяма-аскодя, ветлöтас кытöнкö не öтiк ой-лун, узьлас кинкöткö. Кинлöн жö бы эшö Пальникын сэтшöм иннес? Сэтöн жö дума тасалiс: «Сулав жö, Прол! А этаыс... Зöтяыслöн иньыс кытшöм... Былскö жö винасö да мый керö!..

Кыным ойöн гортас оз узьлы? Эн я аслат синнэзöн сизимись ни адззыв, кыдз Юлькаыс йöз мужиккескöт кыскасьö, но и мый? Бырö я мый я? Оз тырмы мужикыслö? Мый нö сэк? А эта... Романыслöн... Вöлись эд! Юас да вит-кватись янöтö Зöтяыслiсь. Или эта...»

Думаэз мужиклöн пондiсö педзны и жöдзны, улицаэзöт быд керку дынöт шагнявны, видзöтны, кин да кыдз олö, кöда кытшöм эм. Петö, что отир пондiсö овны пода моз или кыдз эшö этатшöм олансö шуны?

Олан вежсис, лоис мöдкодь, нежели вöлi кöркö, кöр эшö быдмис Пролыс, кöр отир юис етша, инькаэс код юррезöн асьнысö эзö стыдитö, быдöнныс уджалiсö. А öнi — вöлi бы вина...

Прол уджалöм бöрсянь куйлiс гор вылын, кöда пытшкын сотчис пес, жагвыв мужиклöн шоналiсö боккес, и сэтöн бокас кышым-так кайис иньыс, нюжöтчис бокас, кутчисис голяыс бердö и вынöн Проллiсь чужöмсö бергöтiс асланяс.

Мужик чорзьыштiс, нетшкöвтчис иньыс бокись, омöн лэдзчисис горыс вылiсь, водiс кроватьö — юрсö заргис юрöдз увтö. Но Öльза сэтöн ни: бöра ни киэзнас асыкалö голясö, сiдз жмитiс мужиксö бердас, бытьтö джагöтiс бы, и бöра мездöтчис Пролыс, чыв-пав кроватись кайис полатьö.

Öтыс кайис полатьö, мöдыс вöтчис сьöрас, зэлöтiс Пролöс пельöсö сiдз, что некытчö ни лоис дзебсисьны, пышшыны эз вермы.

Час эз чулав, кыдз окасисö, и мужик сьöлöм вылын лоис öддьöн кокнит, бур, топ юис лекарство, мыйсянь думаэс меститчисö, аслыс висьталiс: «Отирыс кыдзкö олöны, и ми оламö».

Керкуын лоис пемытжык. Лун пондiс кусны.