Виль гортын



1

Настя ёна видзчисис этö тулыссö, думайтiс: сiя вайöтас нылöс. Но тулысыс öшис я мый я: чулалiс март ни, а крышаэз дорын сё абу йыовöй чöрссэз, сё вижгö лэчыт тöв, лымöн орсö пурга. Но öтiк ойö тöлыс ловзисис лунланьсянь, крыша вывсянь пондiс вотявны ва, кок увтын небзис лым, гажмисö воробейез, пондiс шутнявны пистöг. Эшö лун-мöд и кайпоз вылын сьылiс ни сьöдкай, кöда вайис гаж. Локтiс тулыс, а Настялöн нылыс эз вöв. Дзик ваö вöйис.

— Настя, пышшис нылыт, колис тэнö, — сералiсö отирыс.

— Некытчö ог лэдз. Син одзам пондас уджавны.

— Юасясö тэнчит. Кытчö иньдасö, сэтчин и мунас. Но вот локтiс Клавкаыс, сьöдкай моз чивкнитiс гортас, здоровайтчис, учöтик чемоданö пондiс чукöртны ассис пажытьсö-добросö: куим платье да кык чышьян.

— Тэ кытчö? — эз вежöрт мамыс. Видзöтiс нылыс вылö, топ Клаваыс чеччис зыбкаись да лöсьöтчис пышшыны öтöрö.

— Уджавны, мам. Антарктидаö.

— Кытöн сэтшöм деревняыс? Клава шынньöвтiс:

— Море сайын. Кытöн пингвиннэс олöны.

— Мамытлiсь сьöлöмсö пуран! Разь гортын местаыс абу? Видзöт, Кöчыбас фельдшер колö. Али городас? — Герьялiс мамыс.

— Мам, ме ыджыт ни. Тэ кодь жö.

Мамыс и быль ыджыт, ён, мужик мыгöра. Баснинас кыз онiсь саймöтас, кыдз колокол. Сiйöн и дивуйтчö: «Кин сьöрья нылö?» Сьöдыник да учöтик, курöгыс кокыштö и каньыс падтö. Кытчö сэтшöмыс мунас öтнас?

Быдмис — кыдз эз и вöв: етша горзiс и орсiс. Гусьöн и велöтчис: не эз ошкö, не эз кулитö. Медучилищеö мунiс сiйöн, мыля вачкисис учöтик челядёк вылö: не уджавны, не гортын пукавны. Сiдз и кольлалiс мамыс: «Верман — дак велöтчан, он — кöть олансö видзöтан». Велöтчис, умöльыс нем эз ло. Мамыслiсь деньга эз кор, оценкаэзнас эз ошшась, тшыг или пöт — шы эз вöв.

Талун ачыс ни мунö шедтыны деньгасö. Видзöт да öшлы: «Кытшöм эшö деньга шедтiсь? Вöрпыдöсас номмес курччаласö, кöиннэс сёясö!» Полö мамыс, борд увтас бы нывсö дзебö, шонтö бы сьöлöмнас, а нывкаыс прощайтчö ни. Не синвасö оз чышкы, не голосыс оз вежсьы, мамсö оз жалейт. Только ас кежас зубыта кывсö курччöвтiс да дульсö курыта ньылыштiс.

— Ов кöть лун-мöд, гажöт сьöлöмöс, — баитö мамыс, а нылыслö некöр. Петiс гортсис.

Тулыс. Гажа. Клава пуксис автобусö. Асывсянь рытöдз машинаыс ургис, талис колесоэзнас туй, кöдалöн топ конецыс эз вöв. Машинаыс тарöвтчис то веськыта, то чуклясис, то кайлiс крут керöссэз вылö, то лэдзчылiс логö.

Деревняэз пантасьлiсö етша. Сьöлöм пессис: кытчö нö мунан? Мый кошшан? Эмöсь я кытöнкö отирыс?

Бурмöтiс сiя, что автобусын мунiсь йöз вöлiсö гажаöсь, ошшасисö оланöн, уджöн, горттэзöн. Рытланяс автобусыс вайöтiс районö. Нывкаыс сiдз мыдзис, что сьöкыта петiс öтöрö, юрыс бергалiс, кыдз кольмöтсянь.

Узис тöдтöм отир ордын.

Асывнас мунiс главврач дынö. Врачыс, том, кузь да вöснит мыгöра, лэчыта видзöтiс, топ эз и вöв рад виль фельдшерыслö.

— Кытчö тэнö иньдыны? — юалiс нывкаыслiсь. — Öтiк места эм. Вильгортын. Сэтчин ме тэнö и видзчиси. Быдса год видзчиси. Вильгортсис фельдшерыс эшö мöйму пышшис. Мунi бы сэтчин ачым, да озö лэдзö. А оланыс деревняас и эм: районöдз сизимдас верста,

Туйес умöльöсь, некин тэнö оз синйы, уджав, кыдз душаытлö долытжык. Кыдз, Клавдия Васильевна?..

Мый сэтчö висьталан? Тöдiс, что пондас уджавны деревняын: велöтчис не блиннэз пöжавны, а отирöс веськöтны. И главврачыс оз жалейт, что учöтик да винерик, иньдö ылiсь деревняö, кытöн, натьтö, уджыс абу кокнит.

Врачыс босьтiс телефон, кытчöкö звонитiс. Звонитöм бöрсянь висьталiс, что татöн эм совхознöй машина, кöда босьтас Клавасö.

Эшö мунiс быдса лун. Ылöжык, пыд вöррез коласö, кытöн деревняэс етша, ыббес, кыдз небоын кымöр палаккез. Туйыс кузь, гажтöм, зэгйö юрвеммез. Мыдзан, топ подöн мунан.

Рытнас ни локтiс Вильгортö.

— Доктор, эстöн ми и олам! — гордöя висьталiс фельдшерыслö костыля мужик, кöда локтiс öтлаын районiсь да шуч туй ошшасис, мымда вийис ошшезöс да кöиннэзöс. — Видзöт, кытшöм гажа местаыс!

Гажа... Вотьыштiс сьöлöмыс: деревняыс керöс дорын, керкуэс шöрöт котöртö шорок — лог. Öтiк улица. Улицаöт поннэз котрасьöны — öтiк морт абу. Деревня саяс, веськыт ки вылын, керöс сайын небо, а шульга ки вылын неыджыт видз, кöда пелитчöм вöр коласö. Тыдалö ферма, сы дынын назём, куча вылас рака кокасьö. Лэбзьö чочком бока катша, китшсö кайыс, бур юöр йöзыслö вайö: «Фельдшер локтiс!» Сэсся шы абу. Кöть горзы, некин тэнö оз кыв, не оз адззы. Сьöлöмсö бурмöтiсö телеантеннаэз, магазин, кöда посöдз вевдöрын луннас югьялiс-сотчис би, да радио. «Кöть нiя эмöсь», — гажöтiс думаыс.

2

Овны Клаваöс иньдiсö медпункт дынсянь матiсь керкуö. Хозяиннэс — старик гозъя. Кыкнанныс босьтöны пенсия. Хозяйствоаныс мöс да пон. Мужикыс эшö том, боёк, ачыс панталiс фельдшерсö, ачыс пыртiс керкуас чемодансö, лонтiс печка, вайис кружкаöн ырöш. Топ татöн нывкасö видзчисьöмась: керкусö миськалöмась, ольсалöмась кровать, кыдз невесталö, небыт перинаöн да куим подушкаöн. Кровать весьтын дона ковёр. «Богатöя олöны», ― думайтiс Клаваыс сiйöн, мыля мамыслöн ковёрыс эз вöв.

Мужикыс порог дорын отсалiс чöвтны пальтосö, чемодансö нöбöтiс комö, пуксьöтiс пызан сайö.

— Ов, кыдз гортын, Клавдия Васильевна. Миян некин абу, — баитiс хозяиныс.

— Веськöт отирсö, а ми тэнö тшыгйöн ог видзö, — гажöн сёрнитiс иньыс.

Нывкаыслö эз сёйсьы, эз юсьы. Не мыдзыс нырыштiс, а юрас думаыс полöтiс: кыдз татöн уджавны? Деревня сайын пызандöра пасьта ыб. Сы сайын стенаöн сулалö вöр.

Сёйис нянь торок, пукалыштiс, чöвтчис, быгыльтчис кроватьö, кунис синнэсö и сэк жö кроватьыс пондiс дюттясьны — бергалiс юрыс, пель одзас уннялiс машина, гудрасис сьöлöмыс. Осьтiс синнэсö, юрыс дугдiс бергавны.

Джын час етш пессис чулалöм туйкöт, пондiс онмöссьыны. Сэтчö торкнитiс ыбöсыс. Керкуö пырис гöрд рожабана, чочком юрсиа неыджыт мужик, порог дорсянь пуксис западня вылö, юалiс:

— Фёдор Иванович, тiянын виль фельдшерыс?

— Шоччисьö, мыдзöма. Мый лоис?

— Шогалö учöтыс. Жар.

— Оз кув, — висьталiс Фёдор Иванович.

Клава осьтiс синнэсö, бöр кунис: мыдзыс и оныс лязöны, а басниыс саймöтö. Баитöны кага йылiсь, кöда шогалö и кöдалöн оланыс öнi Клава киын.

— Поди, фельдшерыслöн лекарство эм? Саймöтны бы.

— Но тэ и морт. Мыдз нывкаыс.

Кывзö баснисö Клава, а синнэс куньöмась и думаыс шогалiсь йылiсь. Вежöртö, что оз онмöссьы. Некытшöм мыдз оз видз кроватьын, кытчöдз оз ветлы кага дынö. Абу эшö сылöн не лекарствоэз, не шприццез, но сiя фельдшер, кöда вылö надейтчöны и кöдалö веритöны отирыс. Лэбтiс юрсö.

— Ме тiян дынö, — радмис мужикыс.

— Мый сэтшöмыс?

Тöдiс сiя, что медодзза минутасянь, лунсянь сы вылö пондасö видзöтны, кытшöм морт локтiс уджавны. Нельки пондасö баснисö кыйны, медбы ошшасьны син сайын. Тöдiс деревенсалiсь мывкыдсö — ачыс быдмис не городын. Сiйöн и чеччис мугтöг, пасьтасис да мунiс мужикыскöт.

Кагаыс — зоночка, чужöма витöдз ни. Ён, гöгрöса чужöмбана, синвевья, киэсö нюжöтö Клавалань, сералö, одзись пинёккезнас ошшасьö. Тöдчö, что öддьöнсö оз шогав. Эта гажöтiс фельдшерсö.

— Мый кагаыскöт? — юалiс сiя.

— Керкуаным пырны оз туй. Челядьыс ёгдiсьöны. Киэзö некытчö оз павкö, — виноватöя баитiс мамыс.

Но керкуыс абу сэтшöм ни ёгйöсь, веськыт угöлас телевизор, стенаас бöра жö дона ковёр, пызан вылын вурсян машина.

— Мый кагаыслöн? — мöдпöв юалiс Клава, ачыс думайтiс, что татöн, тыдалö, отирыс олöны богатжыка, нежели горт деревняын.

— Толк абу, кучикас оз тöр. Ой и лун горзö. Вита нiя менам. Быдöнныс аскоддяöсь.

— Быдмасö, отирö пöрасö, — ласковöя висьталiс фельдшер.

— Сьöкыт челядьнас жö... Унаöсь, а быдöнныс сьöлöм бердам: кытöн горза, а кытöн серала. Поди, весись? Сувтасö кок выланыс и чапкасö мамнысö.

Мамыс ён: бытшкы емöн рожабанас — вирыс чижнитас.

— Конувттэс нёльзöмась, сiйöн и горзö, — висьталiс Клава.

— А ми кыдз быдмим!.. — горöтчис кагаыслöн бабыс. — Баля гидйын чужим да нятьын путрайтчим и эг кулö...

— Челядьыс миян меддона отир! — висьталiс фельдшерыс.

Кагаыс уськöтчис сы вылö, чирнитiс дудi голоснас. Оз ков, но босьтан. И нывкаыс босьтiс сiйö, жмитiс морос бердас, полiс, медбы не уськöтны, сiдз и этадз бергöтлiс быдöс медицинасö, тöдвылас уськöтiс, но унажык шогöттэсö сэсся эз адззы. Кагаыс богатырь кодь. Етша и панталан городас этатшöм зоночкасö. Воздухнас я мый я быдмö? Эмöсь жö рахитлöн следдэс, но нiя чулаласö, ежели вердны витаминнэзöн да унажык петкöтлыны öтöрö.

— Быд лун колö купайтны! — висьталiс фельдшерыс.

— А мийö баняын. Баняыс и быдтö челядьсö. Кыдз асьным, сiдз и нiя. Пондас кöда кашляйтны, дак баняö — и быдöс чулалö.

Мыдзыс öшис и гажтöмсö баснинас вашöтiс.

Бертiс гортö аскоддя невежöртана думаэзöн, кöдна полöтiсö сьöкыт уджöн. Сiдз и узьтöнняс бöра пöртмасис чулалöм луныс: сы гöгöр гардчис кытшöмкö тöдтöм отир, кытчöкö кыссис кузь туй.

Саймылiс, öшыннэзас ойыс павкис лöз югытöн. Думайтiс, асыв ни. Повзис, что сёрмис удж вылö, и отирыс пондасö серавны. Но комас пишкис-узис хозяйкаыс, стенаын чакöтiс часы. Дыр видзöтiс чочком потолокö, думайтiс гажтöм думаэз и эз казяв, кыдз онмöссис. Вöтасис аскоддя вöт: топ талисö вöввез. Чеччöвтiс, сьöлöмыс тёпкöтiс горшас.

Клавалö лоис öддьöн гажтöм.

3

Хозяйка шумöн пуктiс джоджö чугун. Клава боёка чеччис, пасьтасис да пондiс дзимлявны ольпась.

— Одз чеччан, — висьталiс хозяйкаыс.

Гортас и велöтчикö узьлiс дырöн. Талун некин эз саймöт, некин школаö эз вашöт, но колiс мунны уджавны. Асьсö медодзза лунсянь велöтiс, медбы некытчö не кольччыны, не сёрмыны.

Öтöрас югьялiс шондi, вувтiсö поннэз, картаын баксыштiс мöс, горöн да гажöн китöстiс петух.

Клава кутчис пöвсавны картов, уджалiс боёка, векнита чапкис кышсö, и картошкаэс, кыдз кольттез, поздiсисö чугунö. Миськалiс пань-бекöр, чышкис джодж и эз казяв, кыдз чулалiс асылыс. Иньдöтчис медпунктö.

Вöлi сiя логокыс сайын, ыджыт öшына керкуын, кöдалöн öтiк угöлыс невна лажмытжык, öтiк öшыныс пиньöвтчöм, кыдз хитрöй морт чикыртöм синсö и топ сералö фельдшерыс вылын. Ыбöсас öшалö ыджыт сiмöм замок, кыдз важ колхознöй складын, кытчö годнас пыралöны етша. Нывка падмис замокыс одзын: кытöн уджавны? Кин дынö котöртны? Вунöтiс юавны ключ йылiсь.

Крыша вылö пуксьыштiс катша, китшкыштiс, öвтыштiс бöжнас.

— Гöсьöс висьталö, — казявтöг горöтчис бöрсяняс голос.

Бергöтчис, пантасис старушкакöт. Сiя висьталiс, что ключыс санитарка дынын да кокнит шаггезöн иньдöтчис улицаöт. Локтiс санитарка, ыджыт мыгöра инька, осьтiс медпунктсö:

— Пыр, хозяйка!

Ачыс шагньöвтiс бöрсяняс, синнэзнас öшлiс да меряйтiс мыгöрсö, мывкыдсö, проксö. Учöтик фельдшерыс, вачкисьö челядёк вылö, и инькаыс пиньлалiс öмсö, но эз баит, натьтö, жалейтiс: и эта каттяс нятьсö, миссяс синваэзнас. Не олiсь миян деревняын.

Керкуыс нывкасö панталiс кöдзыт руöн, лекарство дукöн, шыррез оланöн.

— Кыдз колисö, сё сiдз, — висьталiс санитаркаыс. — Кöр и лонта горсö, медбы досповна эз öш олан руыс.

— Дыр некин оз уджав? — юалiс фельдшерыс,

— Год-мöд ни фельдшеррес понда миянлiсь деревнясö ош госöн мавтöмась. А тiйö?..

— Мый ме? — эз вежöрт Клаваыс.

— Поди, горсö ог и пондö лонтны, весись пессö торкны? Олам вöрын, а песнас дзескыт, — шынь видзис кузь инькаыс. — Бригадирыс песнас зэлöтö. Оз любит фельдшерресö.

— Ась заптö! Поди, жöник адзза! — лöгасис нывкаыс.

— Жöниккес эмöсь! Öтiк синтöм, мöдiк коктöм. Клава пырис бусöсь пызанö, санитарка лонтiс гор. Чулалiс час мымда, и керкуыс ловзисис олан руöн.

Клава лöсьöтiс лекарствоэз увтö шкаффез, обиходитiс быд пельöссö.

Пондiсö кыссьыны медодзза шогалiссез, унажыксö старушкаэз, кöдналöн висис юр, спина, кок.

Кöдö видзчисис, сiя локтiс ашынас. Ештiс пырны медпунктö да чöвтчыны, пырис инька. Негорöн здоровайтчис, сэк жö пуксис и пукалö, оз баит, видзöтö Клава вылö, топ сiя мыйöнкö мортыс одзын виноватöй. Чужöмыс лöзöтöм, пельпоннэс лэдзчисьöмась, кыдз ранитöм кайлöн борддэз. Веськыт киыс морос увтас.

— Мый тiян?

Инькаыс дыша лэбтiс юрсö, дыркодь видзöтiс фельдшерыслань, ньылыштiс дульсö, негорöн висьталiс:

— Висьö.

— Кынöмыт?

— Ойнас пондöтчис, — норасис инькаыс. — Пуртöн вундалö. Мыся, кула ни...

— Он кув, — бурмöтiс фельдшерыс. — Чöвтчы. Чожа мыйись пешлiс кынöмсö. И кытчö бы эз павк, инькаыс кивзiс. Мый висьö? Мусыс?.. Желудокыс али кишкаэс? Кошшы сылiсь шогöтсö, кöр тэ öтнат, одзат медодзза сьöкыта шогалiсь, и киэт дрöжитöны, думаэт тышкасьöны. Некинлiсь юасьны, корны отсöт.

Чуньнас чертитiс кынöмсö, думайтiс юрыс висьтöдз, тöдвылас усис, что колö юасьны, мый сёйис-юис шогалiсьыс, кыдз пондöтчис висьны кынöмыс, тшöктiс мыччавны кывсö.

— Бе-е, — паськыта осьтiс öмсö инькаыс, нюжöтiс кывсö.

Кыв вылас лякасьöма чочком шебрас. «Мусыс али аппендицит?» — думайтiс Клава. Эна думаэс зэлöтiсö сьöлöмсö, киэс öшöтчисö, а шогалiсьыс надейтчис...

— Отсав, — кеймисис сiя.

Босьтiс Клава шприц да керис укол. Пырис шкафö, пондiс гуддисьны журналлэзын, вöрöтiс бинт да порошоккез — öштiс кадсö. А уколыссянь шогалiсьыс эз веськав, сё кивзiс.

Кытшöм тэнат, нывка, уджыт сьöкыт. Тэ киэзын не назём вила, а морт. Отсав, веськöт. Эн сет смертьыслö серавны. Лёк дума гаг моз курччалiс ни вемсö. «Кин тэнö иньдiс велöтчыны эта уджö?..» Видiс и осудитiс асьсö. Кытчöдз эз тöд, думайтiс, что медицинаын уджавны кокнит, абу нятьöсь уджыс, оз ков сир ньылöмын пессьыны. А петö... Отсав мортыслö. Тэ вылö эд надейтчö отирыс, кыдз ен вылö.

— Больницаö бы, — сорис думаэсö шогалiсьыс. Больницаö? Кыдз эта одзжык эз пыр сы юрö! Боёка пасьтасис, бурмöтiс инькасö:

— Пукалышт, ме чожа...

Чепöссис öтöрö, медодз котöртiс хозяйкаыс дынö, кöда талун вöлi медтöдса мортöн.

— Мый котрасян? — панталiс хозяйкаыс.

— Шогалiсь сэтчин, тётя Таня. Больницаö бы! — юöртiс Клава, ачыс кыскис кровать увтiсь чемодан, босьтiс справочник да перыта пондiс гуддисьны книгаас: кошшис инькаыслiсь шогöтсö.

— Вöв колö, — висьталiс хозяйкаыс. — Котрась бригадир дынö.

Шогöт дзебсисьöм справочникас. Швыргис книгасö.

— Бригадирыс эта коста овлö дворын. Дворыс деревня коцецас. Тöн локтöннят, натьтö, адззылiн, — баитiс тётя Таняыс.

Котöртiс дворлань. Пантасисö том да пöрись мужик. Нiя споритiсö.

— Кин бригадирыс? — ышки-пойки локтыштiс Клаваыс мужиккес дынö.

— Ме! — лöга висьталiс öтыс. Син увтас öшалöны пуртöссэз. Видзöтö — мусö пыкö.

— Вöв бы меным, — пöдöмöн висьталiс фельдшерыс.

— Кытчö вöвнас? — эз вежöрт мортыс.

— Больницаö. Шогалiсьöс кыскыны.

Сы одзын сулалiс морт — бригадасис хозяин, кöда медодз тöдiс, кин сылöн талун уджалö, кин гор вылын пукалö, натьтö, тöдiс, кин шогалö.

— А тэ веськöт, — асмознас шынньöвтiс бригадирыс, видзöтiс, кыдз кагаок вылö. — Веськöт. Велöтчин эд.

— Конечно, велöтчи! — орöтiс лёка. — Тöда, мый кера. Морт олан понда котрася. А тiйö!

Бригадирыс öмсö осьтiс, дыр нем эз шу, дыр мыйись Клавасö жö пондiс осудитны:

— Ой, нывка! Тэ тöдан, öнi вöввес кытöн? Бригадаас куим вöв да трактор. Быдöнлö колö вöв, а кытiсь ме нiйö вая?! Турунла мунiсö вöввезнас. Локтасö рытнас.

— А шогалiсьсö кытчö?

— Оз кув.

Мый унажыксö сэтшöм мортыскöт баитан? Бергöтчис бригадирыс дынiсь да котöртiс деревняö. Оланыс чарöтiс нывкасö сэк, кöр пондöтчис овны. Некöр бы эта бöрсянь эн пантась бригадирыскöт, а сiя эшö бöрсянят баитö:

— Боёк фельдшерицаным! Зi.

— Эта тэнö веськöтас! Юрсит бöб олантö вашöтас, — серöмтчис мöдыс.

Дворсянь бöра жö котöртiс квартираö, öдззис герьявны.

— Мый лоис? — повзис хозяйкаыс.

Эз вермы висьтавны, пöдiс синванас. Тётя Таня öшис, сулалiс джодж шöрын. Пырис хозяиныс. Сувтiс порог дорас, джöмдiс, оз вежöрт, кин кулiс, мый понда инькаэс кисьтöны синваэз?

— Менö я мый я дзебат? — серöмтчис Фёдор Иванович.

— Бригадирыс... — сыркьялö фельдшерыс. — Бригадирыс, Фёдор Иванович! Вöвсö оз сет.

— Но и артист! Кушман Иван вöвнас пес ваялö, — висьталiс Фёдор Ивановичыс да кыдз паськöмнас пырис, сiдз и петiс бöр. Эз чулав и джын час, а öшын увтын сулалiс ни доддя вöв.

— Бригадир! — видiс бригадирсö Фёдор Ивановичыс. — Öшлывлö туй вывсис, а тэ горзан... Пуксьы да кыскы шогалiсьтö, синваэтö эн кисьт.

4

Сылöтiс кыскöмöн: то быд вынiсь шонтiс шондi, öдззывлiсö котöртны шоррез, то тöлыс бергöтлiс ойсянь.

Гажа луннэзö тулысся небоын дзульзисö ыбшаррез.

Умöль погоддя коста вöлi бы гажтöм, но гажтöмтчыны некöр, ковсис вöрöтчыны. Медодз кутчисис челядь бердö: колiс керны прививкаэз. Прививкаэз татöн эз керсьö не öтiк год. Челядьыс чужисö, быдмисö. Кин мунiс, кин локтiс — быдöс уджсö колiс пондöтны вились, не лэдзны киись. Нывкаыс ветлöтiс керкуись керкуö, Вильгортсянь Ильинчиö, Ильинчисянь Липовöйö, гижис челядьсö журналлэзö. Участокын деревняэс вöлiсö куима: ылынжыкöдззас — вит километра, и луннас котрасян пöттöдз. Котрасьöм бöрсянь ойыс чулалö вöттэзтöг: кöда бок вылö водан, сiя бок вылiсь и чеччан. Сэтчö жö челядьыс пондiсö шогавны жарöн: тöдчис чожа вежсяна погоддяыс. Пондiсö фельдшерсö корны то öтiк керкуö, то мöдiкö, то öт деревняас, то мöдас — только ешты бергавны.

Челядьыс вывтi абу уна, но кык керкуын олöны, кык мамлöн, ныын — кыдз пиня туввез сьöрся-бöрсяöсь, ыджытсянь учöтöдз.

Öт мамыслöн быдöс зоннэз, мöдыслöн ныввез. Маммезныс любитöны челядьсö, а айезныс, тыдалö, не öддьöн. Кынымись бы эз лок фельдшерыс эна ыджыт семьяэзö, айезныс шоча гортаныс, а кöр эмöсь, дак юыштöмась, пыр горöтлöны иннезныс вылын. Челядьыс ны дырни, кыдз шыррез, пукалöны угöввезын.

— Видзöт, доктор, мымда менам! — ошшасьö Кушман Иван зоннэзнас.

— Видзöт, фельдшер, мымда менам! — норасьö Сёртни Иван ныввезнас. — Мый ныись толкыс?

Юыштöм Сёртни Иваныс, мыкталö, оз любит ныввесö.

Иньыс мужикысся кыкись паськытжык, рожабаннэс польдöмась, здоровьеыс путриктö, ошшасьö:

— Тэ, Ванька, кодя мужик бы вöлiн, дак ме бы тэныт эшö бы кык нылöс козьналi. А мый, Клавдия Васильевна, еныс эд инькаэслö шуöм отир чужтыны. Инь мортыс кага чужтöм бöрсянь тулысся цветöн цветитö.

— Сiдз, — нерö иньсö Иваныс. — Ежели бы ме тэ вылö эг гöтрась, вöлiсö бы менам зоннэз. Видзöт, Надяыс мужикыслö мымда зоннэсö козьналiс!

— Öнi зоннэзсянь толкыс сымда жö, — обидитчö иньыс.

Кеслöны, вузалöны пиннезнысö деревняын кык Иван, сё вежсьöны бы. Кушман Иван видö Сёртни Иванöс, а Сёртни Иван Кушман Иванöс. Öтамöднысö сьöлалöны, судьбанысö пурöны.

— Адззан, мый петö, доктор. Висьтав, мыля сiдз? — пильскöны мужиккес. Фельдшерыс öшö эта баснисянь.

Медучöтыс кыскасьö кынöм вылас, джоджсö йöрнöснас чышкö, коккес, кыдз дзодзоглöн, сайкалöмась да гöрдöтöмась.

— Кынтан кагасö! — видчö фельдшерыс.

— Мый лоас? — сералö мамыс. — Быдöнныс джоджын быдмöны. — Босьтö кагасö да окалö, кагаыслöн рожабаннэс нятьöсьöсь. Мамыслöн быдöнныс дынöдз киыс оз сибав: челядьыс дас, а мамыс öтнас. Йöзыслöн эмöсь пöриссес — деддэз да баббез, эм кинлö челядьыс гöгöр бергавны, а Сёртни Иванлöн челядьыс öтамöднысö быдтöны. Ыджыттэс учöтжыккесö пестунничайтöны. Колö висьтавны, что челядьыс дружнöйöсь, оз видзчисьö, кöр пызан вылас мамыс ваяс сёйны, а вердöны асьнысö: похлёбкасö пуасö и тупöсьсö пöжаласö. Уджалöны, кин мый вермö, кин мый кужö, а мамыс только чуньнас нылö мыччалö.

А босьт Сёртни Иванлiсь соседкасö: челядьсö киын быдтö, оз тöд, кыдз пасьтöтны, а кагаыс пыр шогалö, гор вылын простудитчö. Вот тэ и судит эта бöрсянь, кошшы челядьыслö здоровьесö.

Етша Сёртни Иванлöн челядьыс шогалöны, но фельдшерыс медодз пырö сы ордö: син да син колö уна челядьыс сьöрын. Локтас Клава нылочкаэс дынö, видзöтас, мамыслö висьталас, кыдз кинöс вердны да миссьöтны, а мамыслö сё некöр. Кывзö да шыннялö, а керö асмознас, кыдз сылö кокнитжык: мый ачыс сёйö, сiйö и челядьыслö сетö, мый ачыс пасьталö, сэтiсь вурö и ныввеслö, баняын пывсьö и челядь пывсьöтö. Кöр тэ медучöтсö быд лун пондан пывсьöтны? Фельдшерлöн наукаыс мамыслö етша пырö и киэс оз пизьö.

Сэтшöм жö иньыс Кушман Иванлöн: ён, вына да прока, сэтшöм жö винерик, учöтик да кизерик Кушман Иваныс. Сiдз жö юö вина да оз любит зоннэсö.

Фельдшерыс сiдз жö кывзö мужикыслiсь норасьöмсö, бергалö челядьыс гöгöр, висьталö, кыдз колö вердны да пасьтöтны, миссьöтны. Сiдз жö мамыс шыннялö, кывзö наукасö, но Клава моз нем оз кер. Кажитчö, что уна челядя маммесö он вермы вöрзьöтны местасиныс: кыдз быдтiсьöны, сiдз и быдтiсясö, но фельдшерыс Иваникаэс ордö локтö öтпыр, мöдöтпыр, пырö и куимöтпыр.

Клава отсасьö маммеслö, бергалö челядь гöгöр, вердö да отсасьö миськавны — киэс оз полö уджсис.

Челядьыс, уткаэз моз, любитöны купайтчыны. Фельдшерыс миссьöтö учöтик кагасö, пасьтöтö сöстöм паськöмöн, водтöтö узьны.

— Талун менам кагаö узис, кыдз кулöм! — ошшасьö мамыс.

— Купайтi, вот и узис, — висьталö Клаваыс.

Оз ешты пыравны Иваникаэз ордö кык лун, а куимöтас кагаыслöн рожабаннэс бöра ни лякöсьöсь, йöрнöсыс самöм.

— Вунöтi, Васильевна, вунöтi, — дорйисьö мамыс. Нывкаыс бöра пуджö соссэсö, корö шоныт ва.

5

Жагвыв чинiс лым. Кöр Клаваыс пондiс уджавны, медпунктлöн посöдзыс лым увтiсь тыдалiс кык ступеньöн, а öнi куимöт мыччисис ни. Чулалö кадыс. Велалiс нывка хозяин да хозяйка дынö. Пырис йöз семьяö аслас оланöн. Олöмась кыкöн — öтiк челядь абу, а нывкасö панталöны, кыдз ассиныс. Пырас уджалансянь, хозяйкаыс медодз юалö:

— Кынöмыт сималö?

А Фёдор Иванович шынньöвтас:

— Кыным мортöс талун смертьыс киись мырддин?

— Абу смертьыс, — сералö нывкаыс.

Фёдор Ивановичлöн висьö сьöлöмыс. Шедлöма война коста пленö, пешлöм концлагерресö, адззылöм смертьсö и гордитчö, что ловья, что лечитöны враччес, лекарствоэсö вайö Клаваыс и, мымда вермö, эшö уджалö, отсасьö отирыслö. Пондас висьтасьны пленын олансö, синваэсö чышкö, горзö мужик мортыс: не олан олöма — адiсь петöма.

Клавалö гортыстöг сё эшö гажтöм. Кöр отир коласын, кöр эм басни, вунöтö гортсö и мамсö, а кыдз öтнас, гажтöмыс öшöтчö сьöлöмыс бердö. Бур, что отирыс дынiсь янсöтчыны некöр. Луннас отиркöт, рытнас водас, ыбöсас йиркöтчöны, ыксöны:

— Клавдия Васильевна!

— Абу сiя, — бöбöтас тётя Таняыс, но нывкаыслö колö чеччыны да мунны. Мортсö бöбöтны оз вермы. Кыдз бöбöтан, кöр тэсянь видзчисьöны отсöт. Быдöннысö эшö бура оз тöд деревнясис, а сiйö тöдöны быдöнныс, шуöны Клавдия Васильевнаöн. Топ неделянас пöрисьмис, быдмис, лоис начальникöн — серöмыс петö.

Öтпыр саймöтiсö ойнас. Корисö кага дынö. Пасьтасис, чышьянасис, босьтiс сумка и вöтчис зоночка сьöрö.

Шогалiс сизим месяцся кагаок.

Керкуыс пемыт, комын би. Мамыс пукалö зыбка дорын, гыччöтö кагасö. Кадыс сёр, кык час. Ойшöр, но мамыс синнэсö абу куньлöм.

— Кöть петляö юртö сюйышт. Рытсянь лэбис жар, — норасьö инька.

Зыбкаас кагаыс ружтыштiс, кивнитiс и пондiс горзыны.

— Узь, — зэгнитiс мамыс зыбкасö,

Неöтпырись ни видзöтiс этö кагасö, тöдiс сылiсь быдмöмсö, но чöвтчытöн бöра юасис, кыдз быдмö кагаыс, кынымись да мыйöн шогалiс, нимöтö я мороснас. Вдруг горвыв дорын мыччис пашмöм юрсö старушка да лёка висьталiс:

— Сёйисö лёк горшаныс кагасö! Торкисö! — старушкаыслöн би одзас югьялiс дзор юрсиыс, öмсис мыччисьлiсö куим пинь.

— Мый сэтшöмыс? — эз вежöрт Клаваыс.

— Эн кывзы сiйö. Пöрисьмöм да бöбмöм, — дзугис баснисö нылыс.

— Ог тöд, кин бöбмис! — кöритiс старушкаыс нывсö. — Олiт бы миян моз... Кагасö бы сэтчöдз эд вайöтö. И Фёдор Парасьыс горшö бы эд сюйыштö!

Клаваыс пуктiс ни кагаыс конувтö градусник, а пöрисьыс сё видiс Парасьсö:

— Сьöд сина, ведьма чужöмбана, кыдз видзöтас, сiдз и кила кöрталас. Ы-ы, морт сёйись!.. Поди, вовлiс ни лечитчынытö?

Клавалö усис сэтшöм инькаыс. Вовлiс медпунктö, норасис сьöлöмыс вылö. Морт кыдз морт. Поди, эшö и не Парасьыс. И некöр он думайт, что локтас тэ дынö тшыкöтчисьыс.

Старушкаыс бöра öдззис модьны:

— Разь фельдшерыс мыйкö вермас керны икöтаыскöт? Парасьыс миянся грамотнöйжык, дошлöй, кыдз вурас-вочас!

Нывкалöн бöра петiс серöмыс, но серавны эз лысьт: сьöкыта шогалö кагаыс, мамыс осудитас. Сiя чöвтчис, сетiс лекарство, решитiс узьны татöн. Узис и эз, топ осьта синнэзöн вöтасис кагасö, кылiс быд ловзисьöмсö.

Асывнас кагаокыс шыннялiс, но вöлi бледыник. Мамыс гажмис:

— Клавдия Васильевна, ловзис эд!

Фельдшерыс вöлi мыдз, узис етша, но сьöлöмас орсiс гаж сiйöн, что кагаыс сьöкыта эз ни шогав и пантасис сэтшöм старушкакöт, кöда сё олö важ оланöн, баитö асмознас, поди, деревняас сэтшöмыс талун öтнас ни, кöдалö оз мöртчы виль оланыс. Öнi старушкаыс вылын сералiс пöттöдз, а сiя сё ассис модис:

— Одзöв гажöтчан. Керас эшö уджсö Парасьыс,

6

Öтiк лунö зэрмис. Погоддяыс вöлi уль, кöдзыт, омöн паськалiс туман. Фельдшер луннас некытчö эз мун: пукалiс медпунктын да примитiс шогалiссезöс. Нiя вöлiсö етша. Чулалiс гажтöм луныс, и Клава думайтiс ни, что талун быдöс чулалас бура: эз вöлö сьöкыта шогалiссес и эз ков котрасьны мöд деревняэзö. Ужнайтiс. И сэтöн öтöрас лёка шыасисö поннэз. Кинкö чирöстiс и лöнис.

— Кинöскö поннэс сёйисö, — горöтчис Фёдор Иванович.

— Эз я бригадирнымöс? Сiя эд поннэскöт оз лöсяв.

— Сiдз сылö и колö! — серöмтчис нывкаыс. — Вöвсö эз жö сет.

Мöдöтпыр посöдз дынас чирöстiсö, кыдз каньлiсь бöжсö ыбöс коласö пöдналiсö.

— Бöра коддэс, натьтö, — висьталiс хозяиныс. Чожа мыйись керкуö перыта пырис инька. Одзас лэдзис вит годся пасьтöм зоночкаöс. Кыкнанныс топ пожар вывсянь: юрсиэзныс сувтöмась, паськöмныс лешки-вошки, дрöжитöны — кыв оз аркмы. Пырисö, сувтiсö порог дорас.

— Пуксьы да шоччись, Фёкла! — висьталiс Фёдор Ивановичыс.

Инькаыс топ öмас видзис ва. Сэсся шуис:

— Ёрдöм оланö! — быд горшсис герйöвтiс инькаыс, пондiс причитайтны, кыдз шойна вылын. — Сьöлöмö изсялiс ни. Ог тöд, кöр да кытöн гажöтчи. Лок, Клавдия Васильевна! Отсав, — корис топ ассис, кöдакöт важын ни тöдса, кöдакöт öтлаын вештiсö не öтiк беда, кöдалö туйис веритны.

Öшис нывкаыс.

— Кин сiя тiянлö? Милиция? Сельсовет? — лöгасис хозяиныс. — Тшыг зверь дынö...

— Кытöн миян милицияыс?

— Некытчö ме Клавкасö ог лэдз! — шуис хозяйкаыс.

Клавалöн сьöлöмыс биöн öзйис, кыдз койыштiс вывтырас дзирыт ва. Не сiдз жаль вöлi инькаыс, мымда петiс лöгыс зверь мужик вылö, кöдалö деревняын дзик эз вöв властьыс. Нывкаыс боёка чеччис лабич вылiсь да пондiс пасьтасьны.

— Тэ кытчö? — повзис хозяйкаыс.

— Пукав! — висьталiс хозяиныс.

Нывкаыс эз кыв падтöмсö, юрнас гогиньтiс инькалö да петiс керкусис. Кымöра шоныт тулысся рытыс гудыртчис, только рытся заряыс кизерика öгралiс шондi пуксян местаын. Петiсö туйö, поныс чеччöвтiс нывкаыс сьöрö. «Натьтö, кодыс виртöм!» — думайтiс Фёклаыс мужик йылiсь. Ачыс шагнялiс, а коккес небзисö, оз бы мунö. Гортын етша кин видлiс Клавасö. Некинлö вöлi видчыны. Кывзiс мамсö, отсасис, мый вермис. Да и унажыксö мамыс уджсö керис ачыс. Коддэс гортын эз вöлö, не асланыс, не гöссез. Но коддэсö адззывлiс. Ны вылö пыр видзöтiс брезгуйтöмöн.

Öнi, кыдз кылiс код голоссö, сiдз сьöлöм вывсис мыйкö орис: повзис или öшис... Пышшыны бы да дзебсисьны.

— Клавдия Васильевна, сулав! — посöдзсянь ыкöстiс Фёдор Ивановичыс.

Бергöтчис бöрлань. Хозяиныс пасьтöм да шапкатöм, куш юра сулалiс посöдзын, öвтiс киэзнас, ыксiс. Мый ыксiс — он и вежöрт, но падтiс, эз лэдз мунны. И этасянь Клавалö лоис гажа, что полö код мортсис Фёдор Иванович, öшис полöмыс: не öтнас, хозяиныс оз чапкы. Бергöтчис и чорыт шаггезöн иньдöтчис инькаыс сьöрö.

Фёклалöн керкуыс сулалiс гажтöм, дзебсисьöм, повзьöм. Учöтик öшыннэс видзöтчисö чочком-лöз югöрöн. Посöдзыс ляпкисьöм му бердö, топ татöн мужикыс оз и ов. Паныт чеччöвтiс сьöд понок, виноватöя öвтыштiс бöжнас, нюкайтiс фельдшерсö, лэдзис бöжсö и öшис.

— Шарик, ловья эшö? — синваэс пыр горöтчис инькаыс. — Сысянь эд и поныслö оланыс абу.

Клаваыс пырис пемыт керкуас. Ыбöссянь керкуыс ловзисис аслас руöн, шöма капуста дукöн. Биыс эз вöв.

— Кин сэтчин? — веськыта лабичсянь ружтыштiс мужик голос. Фёклаыс топ эз кыв этö голоссö, висьталiс нывкаыслö:

— Пуксьы, — ачыс шовкнитiс включательöн. Синнэз ёрыштiс югыт би, паськöтiс-осьтiс керку пытшксö, мыччис код мужиксö.

Рыжöй да пашмöм юрсиа, тошсялöм, пыктöм рожабана, пукалiс пызан дорын мужик, öм дорас кузь воньöн югьялiс дульыс. Адззылiс ни этö мортсö фельдшерыс. Эз вачкись ас вылас.

Иньыс пондiс видны, кöритны, мыля вузалiс порсь яйсö да юö деньгасö. Неделя ни юрыс оз сайкав.

— А-а-а, этö тэ... Пышшалан? — гичыртiс пиннесö мортыс.

— Ой, мама! Сiя бöра лöсьöтчö тышкасьны! — горöтiс зоночкаыс, дзебсисис мамыс сайö. Жмитiс мамыс зонсö, бурмöтiс:

— Петька, эн пов. Оз вий. Ась только вöрзьöтö!

— Гы-гы, тi менö! А ме кин тiянлö! — кыдз дом вылiсь пороз, чеччöвтiс пызан дорись. — Ужо!

Сайкалiс морос. Клавасö топ кинкö чапкис порог дорись. Сiя чеччöвтiс джодж шöрö, мужикыслö паныт, сувтiс гозъя коласö — мужикыслö конувтöдззас.

— Тэ мый керан?

И мужикыс дзик пурт вылö тасасис, джöмдiс, дыр видзöтiс Клаваыс вылö, меряйтiс синнэзнас нывкасö и жагвыв лэдзис кулаксö юр вевдöрсис. Кодыс дынiсь патшкис вина да табак дукöн, кыдз кучик шöмöтан кöньöсiсь. Клавалöн гудыртчис сьöлöмыс.

— Пондыв, — негорöн висьталiс нывкаыс, аслас лолыс моросас эз тырмы, косьмис öмас дульыс.

Но кодыс эз тальччы, эз вачкы, а петитчис бöрöн-бöрöн, кыдз ыджыт из дынiсь, кöдö эз вермö вожмöвтны, висьталiс дыша:

— Ведьмаэз! Быдöнныт менö, — турьявтöн иньдöтчис ыбöс дынö, вожмöвтiс порогсö, гымнитiс посöдзас, берездасис, сибдöм голосöн деревня тыр ыкöстiс:

— Бродяга судьбу проклина-а-а-я...

— Рявзы, ась быдöнныс кылöны, — висьталiс иньыс. — Спасибо, Клавдия Васильевна, не тэ бы... Гортын бы эг узь.

— Пыр этадз?

— Сiдз. Кыдз юас, одзлань пышшы.

Öтiк минутаö син одзын мунiс инькаыслöн оланыс. Эз вежöрт, кыдз этадз туйö овны, и мыля иньыс олö этатшöм мужиккöт?

— Вашöт! — лöга висьталiс нывкаыс. — Вашöт и быдöс сэтöн! Кыдз сэтшöм мужикыскöт овны?

— Судитасö эд... — чышкис синваэсö. — Судитасö. Сэтчö бы и туй. Но жаль... Челядьыслö ай колö. Челядьыс жальöсь.

7

Эз казяв, кыдз деревня сайын грива вывсис ыскöвтiс лым. Керку бердын мыччисис му. Шондi гаж одзын, керку керрез бердын, шонтiсьлöны гуттэз, лэбалö ни гöрд борда бабыв, крыша вылын бöжсö дюттьöтö сырчик. Апрель шагнялö мöдiк дасöт луннэз. Разьсисö туйез. Колö вайны гожум кежö лекарствоэз. Бригадир дынö котрасис Фёдор Иванович, корис трактор. Кытчöдз ветлiс районö, сылiс лымыс, — медпунктö ветлöтiс ни кöс туёк кузя.

Поздiсисö сьöдкайез. Видзöтö нывкаыс кайез вылö, тöдвылас гортыс: «Ветлыны бы öтiк ой кежö!»

— Кытчö тэ?.. Смертьсö кошшыны. Отирыс баитöны, что Коса вывсис кывтö йыыс. — Падтiсö отирыс.

Гижис мамыслö письмо. Ошшасис квартиранас, отирöн, кöдна любитöны фельдшерсö. Куим кылöн ошшасис уджöн, но эз гиж вöррез йылiсь, эз висьтась, кытшöмöсь туйез, кыдз пантасьлiс код мужиккöт. Лякис письмосö, чышкис синваэсö и лэдзис почтовöй ящикö.

Шонтiс. Шонытыс вашöтiс отирлiсь шогöттэз. Лун-лун некин абу медпунктын. Асывнас пыралас уджаланiнö, ветлас Сёртни да Кушман Иваннэз ордö, видзöтас челядьсö, котрасяс Ильинчиö керны прививка, кежалас Фёдор Парась дынö, кöдалiсь коксö чукыртiс радикулит, — и луныс öшас. Кокнит уджавны — сьöкыт весь овны.

Тулысся страда. Деревня сайын ыб вылын пондiсö кöдзны. Ой и лун гургö трактор, сьылö кайезкöт. Инькаэз складдэз одзын куралöны кöдзыс.

— Клавдия Васильевна, лок татчö!

Кытшöм нывкаыс мешöк кыскалiсь? Виноватöя шыннялö:

— Мужиккес кытöн?

— Нылö кила мешайтö! — ваксьöны инькаэс.

Фельдшерыс первуись этадз инькаэс коласын. Инькаэс баитöны веськыта, сералöны асланыс мужиккез вылын.

Склад дынсянь Клава мунiс деревня сайö, ыб вылö, кытöн колёснöй трактор гöрис мусö, готовитiс кöдзны.

— Но вот и невеста мыччисис, — шынньöвтiс томыник тракторист.

— Ачыт ме дынö эн лок, дак вот и мыччиси, — сералöмöн шуис Клава.

Тракторист петiс кабинаись.

— Гажтöм öткöн уджавнытö, — шуис сiя. — Да и он петö. Одзöв талун чеччи.

— Одзöв! Сiйöн и гöрöмат джын гектар павжунöдз.

— Гажтöм, мыся. Вот рытöдз кольччан татчö, сэк мыччала ачымöс. Сэк гöрышта унажык, поди.

Сiдз баитiсö, шутитiсö, нерисö öтамöднысö.

— Эн модь, а кывзы, — писис кыскис нывкаыс газета. — Кывзы, мый гижöны окружнöй газетаын. Лыддьöтiс: — Колхоз «Искра» кöдзöм джын мусö ни.

— Кытöн эта колхозыс? Эг кывлы, — эз верит зонкаыс.

Клаваыс висьталiс.

— А тэ тöдан, что «Искраас» яблоккез быдмöны, öнджа.

— Дыш мортлöн аслас песня. Трактористыс эз обидитчы, одзлань дорйисис:

— Мый толкыс эта тулысiсь? Луннас жар, ойнас кынтö. Дорас мусö и плугыс оз мöртчы. Лун шöрöдз колö видзчисьны, кöр сылöтас.

— Рыттэзнас сёрöнжык уджав.

8

Рытнас, кыдз только шондiыс лякасис керöс йылö и пондiсö орсны-лэбавны номмез, Фёдор Иванович ордö пырис нывка. Пырис и порог дорын синнэз гусялö. Цветитö. Вешьяна. Вешьяныс — паськыт, топ свалитöм кык юбкаись: öт юбкасö кöмалöм öт кокас, мöдсö — мöдас. Пальтоыс багсьöм сера, сэтшöм, кытшöмö брезгуйтö новйыны Парась баб. Юр вылын гöрд шапочка, поздiсьöм юр пыдöсас, кыдз гуткулантшак. Мыгöрыс кузь да векнит, и сулалö эта мортыс джуджыт да векнит каблуккез вылын, кыдз Фёдор Ивановичлöн телевизорыс.

— Здрасте! — здоровайтчис сiя.

Фёдор Иванович öтiк синнас дзар керис пырись мортыс вылö, синнэсö бергöтiс Клавалань, гажöн да хитрöя шынньöвтiс.

— Здравствуй, здравствуй, Миля! Висьталам, что Фёдор Иванович отирсö торйöтiс кодяэз вылö и ны вылö, кöдна нем вылö эз туйö. Кытшöм мортыс, сiдз сыкöт и сёрнитiс, сiдз и видзöтiс, эз бöбöт, а веськыта висьтавлiс кывнас и синнас.

— Здрасте, дядя. Локтi гöститны.

Гöстяыс баитiс-сёйис кыввесö, бизгышалiс пиннез пыр, дзугис öтлаö рочсö и комисö, вунöтöм ассис роднöй кывсö.

Миля чывкнитiс джодж шöрö, бергöтчис зеркало одзын, краситöм чунь йыввезнас лöсьöтiс кудриэсö, шынньöвтiс паськыт öмнас, чупнитiс тырппезнас.

— Басöк племенничаö! — шуис хозяиныс.

— Тэныт бы, Милька, жöниксö ас коддят жö... Али адззин ни?

— Фи, — несйыштiс нывкаыс, кокнита горöтчис: — Мый ныись?

— Мыля? — öшис хозяиныс.

— Ачымöс колö вердны... Баитöв-керис сiя, сэсся горöтчис:

— Мый стариккескöт баитны! Клавка, лок клубö.

— Дыш петö, — висьталiс Клаваыс.

Но дыша пасьтасис, сьöлöмыс эз кыскы клубас. Ветлiс öтпыр — эз гленитчы: кык-куим зонка, шовкöтöны доминоэзöн, куритöны... Нем бурыс абу. Да и Милякöт ордчöн мунны оз лöсяв. Видзöт, Миляыс кыдз пасьтасьöм!

Клубыс ордчöн, вожмöвт улицасö.

Клубын кык-куим зонка. Табак дук. Ыркыт. Стенаэзö лякöмась важ плакаттэз. Заведующöйыс пышшис, кык месяц ни том отирыс асьныс осьтöны и пöдналöны клубсö. Кадсö чулöтöны, кыдз кужöны: орсöны доминоэзöн, дзикöтчö гармошка. «Вöр шöр и эм, — гажтöм Клавалö. — Некинöс оз вермö адззыны заведующöяс. Аслым я мый я кутчисьны? Кутчиси бы, да жаль уджсö...»

— Здрасте! — здоровайтчис зонкаэскöт Миля. Зонкаэс, кин лэбтыштiс юрсö пызан дорись, кин и дзар эз кер öтiк пиннесö гер керис, гажöн горöтчис:

— Пардон, Милька! — иньдöтчис нывкаэслань. Этö трактористыс, кöдакöт Клава пантасис ыбас. Зонкаыс крепыт, лöсьыт мыгöра, йöрнöс увтас тельняшка. Моряк вöлöма.

— Володька! Кöр чöвтан этö шабуртö да вежан мывкыдтö?

— Эта менам душаö! — зонкаыс вачкис моросас. — Алёшка, орс!

Дзикнитiс гармошка, летыштiс кöртовöй горшнас клублiсь сунасьöм, кашыкнитiс кыкись-куимись и пондiс эрзыны.

— Орс буржыка! Пилит ассиным!

И öдззис гармошкаыс, кыдз петляись мезмис, ойнитiс, кивнитiс, пондiс серöтны-кисьтны туп да тап, кыдз овлö ыджыт праздниккез коста, сьöлöм быркнитiс! Вот эта удж — гробись чеччöтас. Миля да Володя чывкйисö джодж шöрын. Клубыс кокнита ловзисис, саймис, патшкис одеколонöн.

Клава пукалiс скамья вылын, виноватöя шыннялiс. Сiя эз сибöтчы зонкаэз дынö, и зонкаэс полiсö нывкасис.

Дыр гармошкаыс ойзiс öтiк голосöн. Йöктiссезлöн гöрдöтiсö чужöммез. Сэтöн Миля колис джодж шöрö Володясö, локтiс подругаыс дынö, кыскис киöт джодж шöрö, висьталiс:

— Кутчись, а ме шоччися!

Володя танцуйтiс умöля, эз кывзы музыкасö, ош моз бергалiс нывкаыс гöгöр. Но эта гленитчис Клавалö. Сiя вöлi счастливöй, что оз ков пукавны скамья вылын, тöждiсьны, видзöтны, кыдз танцуйтö Миляыс, кыдз гажтöма орсöны пызан сайын зонкаэс.

Гармошкаыс эрзiс быд вынсис, эз мыдз, горалiс бы асылöдз. Гармонистыс пымалiс, уджалiс, кыдз кöрттуввез дорис.

— Тырмас, — мыдзис Володяыс, пуксис. Бокас пуксьöтiс нывкаэсö. Видзöтöв-керис нывкаыс вылö и юалiс, кöдыс вылö гöтрасьны?

— Тэ разь жöник ни? — дивуйтчис Миляыс.

— Мамö гöтрасьны тшöктö.

— Босьт менö, — кокнита висьталiс Миляыс.

— А тэ городас он пышшы?

— Первöй месяцсö ола.

Зонкаыс öвтыштiс кинас Миляыс вылö, вдруг пондiс корасьны Клавасö. Шутитiс. Эта шуткасянь нывкаыс öшис. Пышшис бы клубсис, но Миляыс пукалiс бокас, видзис кинас, сералiс, что фельдшерыс том и нем оз вежöрт, кöр счастьеыс пырö öмö.

Сыбöрын Володя да Миля куритiсö, кыдз кык мужик: чöскыта ньылалiсö табак тшынсö, шутитiсö. Милялöн табаксянь топ содiс гажыс, а Клавалöн пондiс висьны юрыс, гудрасис сьöлöмыс.

Куритöм бöрсянь эшö петалiсö йöктыны. Йöктiсö пымавтöдз, пöттöдз. Вдруг Клава висьталiс:

— Челядь, чожа праздник. Первöй Май локтö. Öксям да концерт сувтöтам!

— Китсасьны пондат? — серöмтчис Миляыс. Медучилищеын нiя сувтöтлiсö концерттэз. Клаваись артистыс эз пет, но ошкисö.

— Кин кытшöм песня тöдö? — юалiс Клава. Песняэз тöдiсö быдöнныс. Алёшка орсiс гармошкаöн, и том отирыс сьылiсö пöттöдз. Медбöрын, медбасöка бöра жö, сьылiс Клаваыс. Миля дивуйтчис: «Ачыт учöт, а голосыт гора!..»

Клубись мунiсö ойшöр гöгöр. Ойес вöлiсö эшö пемытöсь, но муыс лолалiс шоныт руöн, топ ловья, шоччисис лунся удж бöрын. Клава клубись петiс медодз. Но эз ешты чеччöвтны посöдзсис, кыдз бöрсяняс ыкöстiсö:

— Клава, сулав! — голосыс Володялöн. Сувтiс. Володяыс куим шагöн вöтiс нывкасö, кутiс киöттяс.

— Кытчö колин невестатö?

— Невеста... Кытчö миян кодьыслö?.. Тырппесö краситöм, окасьны оз туй, — сералiс зонкаыс.

Басниыс вайöтiс квартира посöдз дынö. Нывкаыс лöсьöтчис пырны керкуö. А зонкаыслö, тыдалö, эз узьсьы, сiя чулöтiс бы гажа ойсö нывкаыскöт, но мöдыс горöтчис:

— Володя, тэ дынсянь вина дук пöльтö. Мун гортат.

9

Одз асывнас Клава дынö пырис Миля. Вожмöвтiс порогсö, горöтчис:

— Ойбыт ог узь. Шогала. Юрö висьö, кынöмö висьö. Думайтi клубас миськасьны. Но мый меным клубыс? — Чывкнитiс зеркало одзö. — Меным клубас не йöктыны. Этö тэныт, Клава, Володяыскöт колö...

Клава висьталiс, что клубсö миськаласö Милятöг.

Асывнас жö клубö локтiсö нывкаэз, локтiс Парась баб. Боёка кутчисисö удж бердö, и павжунöдз клубсö вочöтiсö, кыдз виль сарафан пасьталiсö.

Уджалiс и мыдзыштiс Клаваыс, гортас локтiс думаöн, что талун сёяс, шоччисьыштас, босьтас гöрдззисян и пондас гöрдззыны басöк цвета кеписсез, кытшöмöсь новйöны деревняын, но фельдшерсö горт посöдз дынас видзчисис ни мужик:

— Инькаö шогалö, — юöртiс сiя. — Челядясьны оз вермы.

И котöртiс гортас.

Кин да кöда керкуын видзчисисö Клаваöс, нывка тöдiс ни. Керку дынын кинкö унньöвтiс нёштöм голосöн и виньдiс. Лöнис деревняыс: не пон оз вувт, не кай оз горав.

Видзчисисö Клаваöс кыдз енöс. Надейтчисö. Быдöн видзöтiс фельдшер вылö, кыдз сiя петiс гортсис, кыдз мунiс улица кузя.

— Тётя Клава, тётя Клава! — посöдзын панталiс сiйö нылочка, пиннес öмас куима, синнэс повзьöмась, но баитö, кыдз ыджыт морт. Оз горзы мамыс понда, веритö тётя Клавалö.

Фельдшерыс жагвыв, сiдз, медбы сьöлöмыс тёпкöтiс шаггес сьöртi, кайис посöдзас, осьтiс керку ыбöссö. Ыбöсыс зубыта дзуркнитiс, топ нетшкöвтiс сьöлöмсис сiмöм кöрттув. Керкуас некин абу. Тикöтö стенаын часы, вирскышалö куим пиня нылочкаыс кровать юр дынын да повзьöмöн видзöтö фельдшер вылö. Комын ружтö морт.

Клава жагвыв чöвтчис, сэк жö думайтiс, мый сылö керны медодз. Эз тэрмась, а кылiс кыдз вартiс кöсичаэзас. Комсис петыштiс, кыдз шыр котöртыштiс, старушка. Сьöд, виноватöй синнэзöн дзарнитiс фельдшерыс вылö, нем эз висьтав. Этö Фёдор Парась. Некин керкуас абу, а сiя локтöм.

Быд минутаыс дона. Минутаыс меряйтö мортыслiсь вексö. Öштан минута, öштан мортсö. Чожа миссис киэсö, локтiс инькаыс дынö, кöда сьöкыта лолалiс, вöлi чочком чужöма, куньöма синнэсö, юрсиыс разьсьöм подушка вылö и кымöсас сöдзöмась ньылöм воттез. Кутiс пульссö, лыддис, кыскис шприццез да керис медодзза уколлэз. Быд шагсö думайтiс, весись эз бытшкав. Старухаыс юасьтöг и висьтасьтöг отсасис: видзис жгут, кöр керис вливаннё, вайис шоныт ва.

Инькаыслö вöлi сэтшöм сьöкыт, что эз баит, эз юась, мый сыкöт, сiдз и этадз сылö вöлi öткодь.

Кöр сылö лоис кокнитжык, кöр осьтiс синнэз да омöн видзöтiс ассис керкусö, топ адззис первуись. Парасьыс пондiс сьöкыта лолавны да зыртны кымöссö, гусьöн видзöтышалiс пöв синнас нывкалань да гогинялiс юрнас, поди, веритiс и эз верит, что Клаваыс мыйкö вермас керны челядясисьыс дынын, кöр кöркöся кадö этатшöм уджын нем эз вермö керны меддошлöй старушкаэс. Но кадыс не кöркöся.

Кöр керис, мый колiс керны медодз, кöр инькаыслö сё вöлi сьöкыт, сэтöн бы эз ни брезгуйт, юалiс и старушкаыслiсь, поди, сылöн вöлi кытшöмкö аслас опыт эта уджын, но гордöй думаэз аслас профессия понда падтiсö, эз туй пöрись мортыс одзын öштыны ассис честьсö.

Öддьöнжыксö полiс, что инькаыс оз вермы чужтыны кагасö, и мортыс кулас вир öштöмсянь. Но инькаыслö лоис кокнитжык ни, сiя пондiс ни баитны, юалiс нылочкаыс йылiсь, пода йылiсь, и сэк фельдшерыс пондiс веритны, что быдöс лоас бур.

— Оз кув, — пель одзас висьталiс Парасьыс.

— Терпитышт, мам, — бурмöтiс Клава инькасö, думайтiс, кыдз бы эшö отсавны, и вдруг пондiс вежöртны, что врачтöг одзлань нем оз пет.

— Тэ олышт, баб, — висьталiс старушкаыслö, — ме котрася звонитны.

— Котрась! — кыдз саймис Парасьыс. — Котрась. Мöйму Игнатыс чегис коксö, дак вертолёт вовлiс.

Телефоныс деревня конецын, бригадир ордын.

Отирыс пантасисö, сетiсö туй, некин эз сувтöт фельдшерсö, эз норась аслас шогöттэз вылö, кыдз вöвлi одзжык, öтнас Еля баб дыркодь видзöтiс бöрсяняс да горöтчис:

— Котрасят, бöбöввез. Прости господи! Олiм жö ми — енсис полiм, а öнi...

Еля баб пöт, уджавны оз ков, думаэс бурöсь, баитö сiдз, медбы тöдвылас уськöтны важ олансö да енсö. Олö сiя сто год, оз тöд, мый сэтшöм насмока, öтiк таблетка эз пешлы, пиннес öмас дзик невесталöн, сiйöн и осудитö том отирсö, что нiя фельдшерыстöг öтiк лун оз вермö овны. Клава дзар эз кер.

И вот сiя звонитö ни. Но и телефоныс дразнитö: то кинкö сёрнитö — государственнöй дело решайтö, кинлöкö чожа колö сводка, кинлöкö машина, кинкö гажтöмтчö мужикыстöг — быдöн тэрмöтö ассис, кыдз сотчö оланыс, но некинлöн юрыс оз вись сы понда, что Вильгортын шогалö морт.

Кöть горзы.

Пырис гортас бригадир. Бусöсь, сьöд рожабана, мыдз да лöг, юалiс:

— Звонитан? Гогиньыштiс юрнас.

— Умöль?

Эз висьтав, чужöмыс вылын гижöм. Бригадирыс босьтiс трубкасö, ыкöстiс:

— Алö! Меным райбольница!

Тыдалö, и сылö откажитiсö, но сiя мужик, голосыс не инькалöн, пондiс видчыны. Нывкаыс радмыштiс: бригадир нюжöтiс трубкасö.

Баитiс главврачыс. Юалiс, мый лоис Вильгортын, кошшис мöдiк врачöс. Кадыс чулалiс. Нюжалiсö кузь минутаэз. Сьöлöмыс пессис, места оз адззы. Дас минута бöртi телефон дынö локтiс мöдiк врач, кыввезнас бурмöтiс, висьталiс кык кыв. «Видзчись. Локта». Полiс Клаваыс, что врачыс пондас видны, кöритны, что керис мыйкö не сiдз, а сiя бурмöтiс кыввезнас, эшö содтiс, мый колö часöт жö керны, и нывкаыс котöртiс бöр шогалiсьыс дынö.

Бöра дрöжитiсö киэс, полiс сьöлöмыс, думаэс пурисö веммесö, что отирыс осудитасö сы понда, мыля эз вермы отсавны мортлö. Кöр пондан асьтö тышкавны, бурсö эн видзчись. Бергалiс инькаыс гöгöр, эз петав öтöрö.

— Буржык ни топ, — гажöтiс Парась баб. Стенаын дыша шовкöтiс часы, öтöрын топ кылiс вертолётлöн шы.

— Локтiс! — гажмис фельдшерыс.

Но эта вöлi эшö не вертолётыс: улицаöт мунiс трактор.

Эшö ковсис уджавны инькаыс дынын, сё сiдз жö перыта бергавны уколлэзöн, бурмöтны ласковöй кылöн.

Парасьыс эта коста висьтасис, кыдз сiйö мамыс чужтöм баля гидйын, кыдз ачыс челядьсö чужтiс суслоннэз увтын, кыдз кулiс куим месяцся зон.

Кывзiс пöрись мортыслiсь баснисö, кывзiс вертолётлiсь шысö, но эз кыв, кыдз машинаыс öшöтчис деревня весьтö, лэдзчисис ыб дорö. Врачыс пырис ни керкуас, а фельдшерыс комсяняс сё эз тöд, что локтiс отсöт. А врачыс ыбöссянь умывальник дынö, умывальник дынсянь комö.

— Быдöс лоас бур! — висьталiс сiя.

Отирыс бобгисö ыбöс саяс, топ полiсö врачсис, кöда вöлi зонка, кöдалöн нем оз пет, но чожа лöнисö: полöмöн да счастливöя кывзiсисö, кöр керкуас горöтас учöтик кагаыс. Но кагаыс эз горöт.

Врачыс видзöтiс инькасö, висьталiс:

— Босьтам сьöраным.

Парась бабыс жö öтöрсис корис морт-мöдöс, и носилкаэз вылын мортсö кыскисö вертолёт дынöдз.

Клава мунiс гортö, эз адззы гажа шондiсö, эз кыв отирлiсь баснисö, кöдна сулалiсö улицаын да видзöтiсö нывкалань, баитiсö ас коласаныс.

10

Стариккес оз и помнитö, что кöркö май паныттэзö цветитiс бы льöмпу, а таво пизис льöмпу цветыс апрель конецын.

Вöлi шоныт, лöнь. Рыттэз сулалiсö мичаöсь, ойес пемытöсь. Стариккес полiсö, что усяс эшö лым, но кайес сьылiсö лог дорын, эз висьталö лымсö. Öддьöнжыксö курзiсö таррез, эз виньдö не рытнас, не асывнас. Нем эз вермы падтыны кайезлiсь песнясö.

Клава радуйтчис тулысыслö, мыйкö видзчисис бурö, бытшöмö да кокнитö. Сё öддьöнжык гленитчис Вильгорт.

Мужикыс, кöдалiсь иньсö кыскисö вертолётöн, котöртiс Фёдор Иванович ордö, рад — пеллесö адззö, киас вайöм бекöр, кöдö вевттьöма чочком чышьянöн. Пырис керкуас, виноватöя шынньöвтiс, торскис бекöрсö пызан вылö, горöтчис:

— Клавдия Васильевна, кылан, кыдз асывнас таррес курзöны? Тiян, натьтö, нiя и абу.

— Эмöсь, да етша. А ме асыввезнас пета да кывза. Адззылi ни, кыдз грива вылас öтiк чеччалiс да пишкайтiс.

— Клавдия Васильевна, а бекöрас ме вайи тэныт. Менам зон эд аркмöм. Спасибо, Клавдия Васильевна, Гöснеч тэныт вайи.

— Зон?! — горöтiс тётя Таня. — Вот и бур.

— Меным нем оз ков, — öшис Клаваыс, чуть синваэс эз петö.

— Тэ мый, Клавка, — баитö Фёдор Иванович. — Миян этадз оз керö, ежели мортыслöн зон, то гöстинечсö медодз тэныт.

Нем он кер — сэтшöм обычай. Босьтiс шебрассö бекöр вылiсь, рöма пирöггес сiдз и шынньöвтiсö, чöскыт дукöн патшкöны — дуль сöдзö, а пирöггес коласын юрсö мыччöм чекушка — эта подарокыс мужиккеслö.

— Кин пöжалiс пирöггесö? — юасьö тётя Таня.

— Пирöггесö пöжавны — не сер серöтны! — ошшасьö мужикыс.

Сёйисö чöскыт пирöггесö, аслас винаöн юкталiсö счастливöй мортсö, бур здоровье да уна годдэз кöсйисö кагаыслö. Коддзыштiс кагаыслöн айыс, пондiс ошшасьны, что сiя кужö мöссö высьтыны, похлёбкасö пуны, йöрнöссö миськавны — золотöй мортыс, велöтчы сы моз овны, но этö баснисö нывкаыслö кывзыны вöлi некöр, колiс котöртны медпунктö, сэтчин локтöма ни зонка, кöда кералöм коксö. Кöр ранасö вурис да домалiс, луныс чулалiс.

Шондi пуксян гöгöр пырис Миля. Краситчöм-баситчöм, кок чуннес вылын ветлö, таррес моз жö бобгö.

— Клавка, талун концерт, а тэ мый?..

А Клаваыс вунöтiс ни эта йылiсь. Но колiс мунны, ежели медодз ачыс томмесö пöртiс артисттэзö. Не тэрмасьöмöн лöсьöтчис клубö. Сэтöн пырис Парась баб. Боёк, эн видзöт годдэс вылö, синнэзас видзöт: нiя лэчытöсь да гажаöсь, и походкаыс кокнит — невесталöн. Старушкаыс пуксис западня вылö, пондiс ошшасьны жöниккезнас, не одззаэзнас — томсяэзнас, а талунняэзнас. Жöникыс не гортiсь, кытiськö Саратов городiсь, кытöн эз вöвлö не Клава, не Фёдор Иванович. Уджалöм мортыс кöркö татöн, козьналöм Парасьлö зон, пышшöм, кольöм нывкасö, а таво невестаыс усьöм тöдвылас и быд месяц письмо гижö. Сералö ас вылас пöрись мортыс. Вдруг юалiс:

— Клавдия Васильевна, велöтчыны бы меным?..

— Кытчö? Не акушерас я?

Сералö Парасьыс, кыскö нывкасö клубö. Мунöны кыкöн. Отирыс сералöны: «Видзöт: кык лекарь!»

Клубын пондöтчис концерт. Медодзза песнясö нывкаыс сьылiс полöмöн. Мöдыс сьывсис кокнитжыка.

Концертсö отирыс примитiсö бура, уна вартiсö оча долонь, ыксiсö: «Бис!» Гажöтчис быдыс öтлаын, кöть мукöд номеррес шогмисö не сiдз, кыдз колiс бы. Концерт бöрсянь томмес и пöриссес йöктiсö, танцуйтiсö. Клава танцуйтiс кинкöт шедас. Миля — Володякöт. Рытывбыт нывкаыс гардчис эта зонка гöгöр. Но морякыс клубсянь шыбыльтiс Клава сьöрö. Мыдз вöлi нывкаыс, но сэк жö гортас эз пыр, ветлöтыштiс улицаöт. Улицаыс сэтшöм ни тöдса, что синнэтö кунь — некытчö он падмы. Володя юыштöм и ошшасьö, что чожа мунас городö, что сэтчин оланыс лоас медбур.

— Олi ни городас. Быдöс шпанаэс тöдсаöсь. Öтпыр меным пантасисö куима... Деньга корöны. Ме öтыслö пельбокас — бряк! Мöдыслö — нырöмас — тырс! А куимöтыс меным юр бöрам... Куим лун садьтöг куйлi.

Сералö нывкаыс.

— Мöдöтпыр деньга гусялiм. Куим мешöк. Öтiк мешöкыс öнi кытöнкö Соликамскын. Натьтö, багсялiс ни керку увтын. Мунам мекöт, Клава?..

— Городас тэ менö вунöтан, — ваксьö нывкаыс. Ойыс югыт. Лöнь. Патшкö льöмпу цветöн, сьылöны ойся кайез. Миля кутöм Алёшка гармонистöс и гардчö сыкöт Володя да Клава гöгöр: кытчö нiя, Миля ёртыскöт бöрсяняныс. Чукыль-мукыль муныштас Володя бокöт, одеколон дукöн öвтыштас, гырдззанас тойыштас. Клаваыс топ этö оз и адззы. Серöмыс петö, видзöтö, мый эшö лоас одзлань. Ойшöрыс чулалiс ни, кöр нывкаыс висьталiс, что колö шоччисьны.

— Клава, ме тэнö любита! — висьталö зонкаыс.

— А ме коддэсö ог любит, — сералö нывкаыс. — Берегит асьтö, быд нывка понда эн вийсьы.

Нывкаыс пырис гортас, чöвтчис да водiс и онмöссис чöскыт онöн, пондiс вöтасьны интереснöй вöт, топ гöняйтö вöв вылын. Вдруг вöлыс чеччöвтiс бокö, уськöтiс вывсис и колис нять гöп дорö. Сэтшöм сьöкыт туйыс, что сьöлöмыс дрöжитö, воздухыс оз тырмы, коккес висьöны. «Этö, натьтö, сiйöн, что пукалi вöлыс вылын», — думайтö фельдшерыс, топ оз узь. Думайтö и саймыны оз вермы.

Саймöтiс сiйö Миля. Кадыс одз вöлi — кыкьямыс час:

— Сё узян. Талун эд праздник!

Мый Клавалö вайис праздникыс? Мамыс дын бы вöлi, дак пирöггезöн потшшуйтiс, тöдсаэз ордö петалiс бы, а татöн кин дынö?

Миля юасьö Володя йылiсь, тöдчö, что вежöктö.

— Гöтрасьны думайтам, — нерö Клаваыс.

— Молодец, Клавка, кужин öмлöсавны! Туяна эд зонкаыс. Гард кыдз колö, медбы эз и пикнит. А ме городсис адзза.

— Клавкаыс не тэ кодь краситöм кульбук. Сiя малин тусь. Быд зонкалöн öмсис дульыс вотялö. Мый бурыс эта Володяын? Ми зонкаэс сьöрын ог пондö вöтлiсьны, а мунам лучше пиканла. Может, пиканнэс петалiсö ни, — баитö тётя Таня.

Весись Клаваыс думайтö, что мамыс дынын праздникыс вöлi бы гажажык: татöн сiя жö горт. Хозяйкаыс ештöм пöжасьны. Вердö нывкаэсö не только баснинас, а постеля вывсянь пуксьöтiс пызан сайö, кытöн пирöг-тупöсьыс — сёй мымда тöрас. Луннас мунiсö пиканла не сiйöн, что охота пешлыны сiйö, а охота вöлi видзöтны видззесö да вöрсö. Пиканыс ештöм мыччисьны, öктiсö кырым-мöдöн и тырмас.

Пиканалöм бöрсянь лыддьöтiсö книга, но луныс сiдз и этадз кажитчис кузь и кузь. Эта сiйöн, что талун праздник, нывкаыс оз уджав. Уджавтöн öтiкö керан, мöдiкö пондöтан, а куимöтыс бердö кутчисьны сёр ни.

Мый нывкаыслö вайис праздникыс? Öтöрсянь гаж, что лунсö чулöтiс — шоччисис, а мöдöрсянь гажтöмтчис: тöдвылö усис гортыс да мамыс.

Гортын отирыс унажык, а татöн мый? Шы абу. Отирыс ыбын — страда, öтнас Проша Миня — Фёдор Ивановичлöн сосед, пенсионер, асывсянь юис и лунтыр пукалö öшын увтын да сьылö быд горшись:

Это есть наш последньö-ö-ö-й…

Унажык Миня песнясö оз тöд, и медодзза предложеннё бöрсянь виньдö, то ли онмöссьö, то ли видзöтö шондiыс вылö и недыр мыйись вились нюжöтö песнясö.

Рытланяс кватьöдз час гöгöр деревняын эрзыштiс Володялöн трактор, кабинаись чеччöвтiс трактористыс, шынньöвтiс. Быдöнныс тöдiсö ни, что талун удж кончитчис: страда не страда, а праздник.

Кытöнкö деревня конецын сьылiсö инькаэз. Мöдöтпыр Фёдор Иванович вина юöм понда отирсö стыдитiс бы, а талун чöлiс. Ась юöны. Праздник эд.

Бöра Фёдор Иванович ордö локтiс гöсь — Васька. Вились ошшасис зоннас, кöдö эшö эз адззыв, но быдтiс ни лётчикöдз. Вайис конфетаэз да потшшуйтiс Клавасö. И Миля эз вермы овны Клаватöг. Пырис, кыдз катша лэбзьыштiс, босьтiс Васька киись конфетаэз, козьналiс быдöнлö, а унажыксö сёйис ачыс. Миля кок чуннес вылын ветлöтö, рожабаннэс — гöрд кумаччез. Пешлöм деревенскöй сур, кыскö Клаваöс öтöрö. Бöра мунiсö клубö. Отирыс сэтöн чукмöр: важöсь и напрочь вильöсь, томмез и пöриссез. Чукöртöм деревенсасö праздникыс, ылiсь и матiсь родняöс, корöмсö и кортöмсö. Быд керкуын гöсь, кин мортыс — оз и тöдö, кытшöм дедсянь-бабсянь родняыс лоö — пондыв вежöртны. Но деревняын некинöс оз откажитö: пыр быд керкуö, юкталасö и вердасö, винаок чольскасö. Гöсьыс и рад. Корö гортас, а кытöн сылöн гортыс — кин тöдö.

11

Праздниксö сорисö öтöрсянь.

— Кытöн фельдшерыс? — посöдзсянь ыксiс код да лёк голос. — Фельдшерыс колö!

— Клавка, тэнö, — висьталiс Миляыс. — Котöрт, коль меным Володясö.

— Кытöн фельдшерыс? — мурзис посöдзын Липовöйись мужик.

— Мый летан горштö? — лöгасис Володя.

— Лета! — ыбöс коласын öмсö пиньöвтiс неыджыт рыжöй детина. — Морт кулö, а тi кучиксиныт петат!

Фельдшерыс эз понды кывзыны мужиккеслiсь видчöмсö, петiс дзескыт да жар клубсис, и посöдзас люкасис рыжöйыскöт, топыт, ота рожабана мужикыскöт.

— Морт кулö, — сьöкыта да вина дукöн лолалiс сiя.

— Кытöн? — повзьыштiс нывкаыс, веритiс, тöдiс, что весись сы дынö оз локтö. Син вылö усис клуб бокын трактор, кöда гурöтiс учöтик обороттэз вылын.

Öтiк минутаö öшис праздникыс, колис, вешшис аслас весь шумитöмöн, орддис гажнас. Котöртiс Клава гортас, босьтiс чемодан.

— Кытчö, Клавка? — кыдз пыр юалiс тётя Таня. — Кин бöра кулö?

— Паша Петра, — кыз да сибдöм голосöн висьталiс трактористыс порог дорын. — Сотчö! Öмсис быг петö.

Пырис Клава дука да жар кабинаö. А рытыс вöлi шоныт. Подöн бы мун, кывзы, кыдз деревняын орсö гармошка, сьылöны инькаэз, лог дорын шутнялö кай, лэбалöны ойся бабыввез... Но некöр кывзыны отирлiсь гажöтчöмсö. Зэгнитiс трактор, кыдз вöв, кöдалö зубыта вачкисö бок кузя, и пондiс летны шуч туй. Фараэс бисö видзисö умöля, унажык пемдöтiсö, а этасянь кажитчис, что мунан кытчöкö тöдтöм туй кузя. Ачыт он вежöрт, кытчö тэнö кыскöны и мый тэныт колö эта ойö. Кадыс нюжалiс век кузя.

Деревня панталiс гажтöма. Öтi-öтi öшыннэзын дзуз видзисö биэз. Кыдз вöтын вувтiсö поннэз. Кинкö горзан голосöн ыкöстiс, саймöтiс думаэзiсь:«Ой тэ менам, милö-ö-ö-й, да мыля тэ и сивö-ö-ö-й?» Кинкö сьылiс или горзiс — не вежöртны.

Виль керку дынын панталiс пон, виноватöя öвтiс бöжнас. Керкуын, кыдз зi позын, кылiс шум: кинкö горзiс, а кинкö гымöтiс. Клава маласьöмöн осьтiс ыбöс.

Керку ловзисис табак тшынöн, помой да вина дукöн. Гудыртчис сьöлöм. Джодж шöрын кинкö ловья бергалiс турун юрöн. Кинкö ыксiс, кинкö видчис, кинкö горзiс, поди, тышкасисö.

— Бутылкатöг эстöн нем оз пет, — висьталiс трактористыс, кöда вайöтiс Вильгортсянь, кöдалöн туй вылас чулалiс кодыс.

Джожд шöрын куйлiс косви пасьтöм мужик. Сы вылö, кыдз тшыг поннэз, öтмöдöрсянь чеччалiсö морт куим-нёль да зэгйисö, летiсö юрсисö сiдз, что юрыс вартчис джодж бердас.

— Петра, саймы! Петра-а-а!

«Эстöн не кувны, да кулан» — мелькнитiс дума. Нывкаыс сiдз ни гуддисис сумкаас, но киэзас нем эз шед.

— Вöрöтчы! — гирчкис пиннесö мужичокыс. — Гöжин я мый я? Да мыйлö тiянöс няньнас вердöны?

Мед ни зубыт, кöр тэнö кöритöны няньöн.

А Клава кыскис ни ампулаись кофеин, лэбтыштiс шприцсö би югöр весьтö, медбы видзöтны, шедiс я лекарствоыс, а мужикыс сё киэсö сюйис ныр увтас. Нывкаыс öнi немись ни эз пов, сылöн киэс уджалiсö, мый колiс, садь юрыс думайтiс, эз бöбöт.

Нывкаыс мужикыслань сэсся дзар эз кер, бергалiс шогалiсьыс дынын. Керкуыс лöнис, садьмис. Отирыс лякасис лабиччез бердö, только кылiс, кыдз сьöкыта пишкис-лолалiс быд мортыс.

Клава керис уколлэз да пондöтiс искусственнöй дыханнё. Кодыс пондiс öсны вина дукöн, что фельдшерыслöн гудыртчис сьöлöмыс. Клава чепöссис öтöрö.

Шоччисьыштiс сöстöм воздух вылын и брезгуйтöмöн пырис бöр.

Кöр кодыс саймис да пондiс баитны, кадыс вöлi нёльöт час.

Саймис кодыс, и отирыс садьмисö. Öтамöднысö одзалöмöн öдззисö баитны, мый вöлi Петракöт и мыля сылö еныс абу шуöм кувны. Ошшасисö, кин кыдз веськöтiс шогалiсьсö, етша ошкисö фельдшерсö, спасибо висьталiсö судьбалö. Клаваыс код отирсянь и сiдз бурсö нем эз видзчись. Рад вöлi, что мортыс эз кув, что ештiс отсавны бертны мöдöр югытсис, что эз вартлö коддэс.

Петiс керкусис да кокнита иньдöтчис горт туй кузя.

Тулысся асылыс тэрмасис саймыны. Лолалiс сöстöм воздухöн, öтамöднысö одзалöмöн кöкисö кöккез. Гортын панталiс сiйö тётя Таня, жалейтiс, что Клавалö медуна шедö коддэзсянь. Жаль мортыс, кöр шогалö. Отсалан шогалiсьлö, кыдз верман, быдöс вынтö сетан, а эстöн... Тэнö жö оскорбитасö. Видчис тётя Таня, сьöласис, немымда коддэсö эз жалейт, вийис бы, а Клава дорйис нiйö жö. Сэтшöм фельдшерлöн удж. Пантасьны колö и коддэскöт, кöр и кулак сюйыштасö ныр увтö.

— Норась милицияö!

— Но нiйö. Асьныс вежöртасö, — баитö нывкаыс.

— Вежöртасö... Öддьöн тай вежöртöны. Юасö — бöрöн стенаэс вылö кайöны, тышкасьöны, сотчöны. Нем оз думайтö: не удж оз ков, не здоровьеныс абу жаль.

Фельдшерыс кывзiс пöрись мортсö. Паныт нем эз вермы висьтавны.

12

Май праздник бöрсянь Клава мамыссянь босьтiс письмо. Мамыс горзiс письмоас: «Клавка, кытöн тэ? Мыля праздникнас гортö эн лок? Ловья я? Может, ошшес коскаэтö вильöтiсö ни?»

Некöр нывкаыслö письмосö гижны. Но гижис, куим кыв да гижис: «Здравствуй, мама! Ловья да здоровöй. Уджала, жöник кытчöдз эг адззы». Думайтiс гижны унажык, вöлi мый гижны мамыслö, но локтiс заведующöй врачебнöй участокись, пондiс гуддисьны фельдшер уджын. Корö öтiк гижöт, мöдiк документ, куимöтсö журнал. Кöда эм, кöда абу. Кöдö фельдшерыс эз ешты гижны, а кöда йылiсь кылö первуись. «Он куж уджавны — куж отчёт видзны», — висьталiс заведующöйыс да отсалiс осьтны виль журналлэз, виль документтэз. Медицина документтöг — кулöм. Ежели он понды гижны, некин тэныт оз понды веритны, что тэ уджалан. Вот лоас годовöй отчёт, видзöтам сэк, нывка, кыным ой тэ пондан мырсьыны гижöттэс дорын!»

Думайтiс Клава, что мамыслö письмосö кончитас асывнас, но асывнас корисö комсомольскöй собраннё вылö. Сюйыштiс письмосö карманас и шагнялiс сельсоветö дас километр.

Школаын велöтчикö вöлi сiя бур комсомолкаöн, а уджавтöн дзик вунöтiс этö. Локтiс да сувтiс учёт вылö и сибдiс аслас уджö. Но комсомолеццес эз вунöтö, корисö собраннё вылö. Полöмöн пуксис медбöрья скамья дорö, видзöтö тöдтöм ёрттэсö. Эстöн абу школа, комсомолеццес не öткодьöсь. Öтiккез пöрисьжыкöсь, мöдiккез томжыкöсь. Öтiк гöтыра, а мöдiк эшö зонка. Быд комсомолецлöн аслас удж. И сылöн аслас удж, кöдö сiя вежöртö да керö öтнас. Но эм öтiк девиз: «Ми комсомолеццез! Кытöн бы эг уджалö, а керам öтiк удж».

Пондiсö бöрйыны «Комсомольскöй прожектор», медбы сiя югдöтiс уджсö трактористтэзлiсь, кöдна уджалöны ой и лун, и нем суськыны, ойнас любитöны узьыштны, кöр колö гöрны. Этö нагрузкасö пондiсö сетны ён зонкалö, а сiя вдруг откажитчис. Висьталiс, что рыттэзöн иньыс гортсис оз лэдз.

«Комсомолец... — думайтiс Клава. — Иньыс сивиас тальччöм!..» Лöгыс петiс сэтшöм комсомолец вылö, а ёрттэс думайтiсö-керисö и решитiсö, что Тимасö иньыскöт янсöтнытö оз туй — умöль олан мыччан. «Прожекторö» бöрйисö нывкаöс.

Эта жö собраннё вылын Клаваöс вдруг бöрйисö Вильгортiсь агитпунктöн заведующöйöн.

— Эта уджын ме нем ог вежöрт, — öшис нывкаыс.

— Ми тэнö тöдам. Уджалан! — чорыта висьталiс секретарь.

Кытiсь сiя тöдö фельдшерсö, кöр пантасисö мöдöтпыр: медодз, кöр Клаваыс сувтiс учёт вылö, и талун собраннё вылын.

— Тöдам! Отирсянь кылам. Тэ жö комсомолка! — сьöлöмсö бурмöтiс секретарьыс. — Отирыс отсаласö. Вильгортын эмöсь эшö и коммунисттэз. Бригадирыс отсалас.

Кöр мунiс гортö, туйыс бурмöтiс сьöлöмсö, вашöтiс полöмсö. Мунiс вöрöт, öтнас. Омöн зелёнöй стена, кок увтын небыт турун, юр вевдöрын небоыс öвчина пасьта.

Туй вывсис öктiс тшак, ягöд, цветтэз. Рытнас котöртiс клубö. Клубын заведующöйыс виль ни. Гармонист Лёня. Но бöра жö он тöд, мымда уджалас аслас местаын. Вильгортын клубас отирыс недырöн уджалöны. Оз гленитчы уджыс.

Öнi Ленька вылö отирыс надейтчöны: гармонист и асланым мортыс. Может, оз пышшы, кузь руббез сьöрö оз вöтчы. Виль заведующöйлöн мывкыдыс — клубын и уджавны, кужö кывсö горöтчыны, тöдö, кöр серöмтчыны. Томмесö баснинас да синнэзнас гажöтö.

— А, виль начальник! — панталiс нывкасö заведующöйыс. — Любита том начальствосö. Поди, сэтöн менам счастьеö и эм?

— Одз ошшасян.

— Висьтав, кытшöм начальникö бöрйисö комсомолеццес?

Кöр висьталiс, норасис, что сылöн нем оз пет, Лёнькаыс синнэзнас шыннялiс, гажмис:

— Агитпункт лоас!

Клава эз тöд, мыйсянь кутчисьны виль удж бердö, кыдз агитируйтны отирöс. А кöр асывнас чеччис, видзöтö и синнэслö оз верит: клуб посöдз вевдöрын öгралö гöрд кумач, кöда вылö ыджыт букваэзöн гижöм: «Агитпункт». Басöка и вежöртана.

— Главнöйыс керöм! — висьталö Ленька. — Некытшöм начальник оз лякась, что ми тэкöт ог уджалö. Эшö мый миян оз тырмы? Плакаттэз эмöсь, газетаэз пызан вылын, лозунггез гижам. Клуб лоас осьта быд рыт, а колас — луннас осьтам. Верит меным.

Висьталiс этö Ленька, босьтiс гармошка да сiдз öдззис орсны, что клубö, кыдз ма вылö гут, пырис Парась баб и ыбöссянь чеччöвтiс йöктыны туп да топ — дубас подолыс чикись бердöдз лэбалö.

Йöктiс-керис Парась баб, Лёнькалiсь юасьö:

— Кытшöм талун праздник?

— Выборрез локтöны, Парась баб.

— Кинöс бöрьям?

— Совет власть.

— Сiдзкö, эшö öтiк праздник локтö.

— Праздник, Парась баб. Ыджыт праздник. А тэ тöдан жö, кыдз голосуйтöны?

— Ме? — дивуйтчö старушкаыс. — Ме, поди, Ленька, тэсся пöрисьжык! Голосуйтлi ни унаись.

— Видзöт, Клавдия Васильевна, кытшöмö ме кери агитациясö! — ошшасьö Лёнькаыс, кöр петiс клубись Парасьыс. — Öнi ме аслам журналö гижи ни, что кери выборрез йылiсь беседа. А тэ мый гижан?

Ленька кужö серавны ас вылас и тэнö вöрзьöтас, но лöгасьны оз туй: лöгсö бергöтас шуткаö, горесö — гажö. И ачыс эз казяв, кыдз фельдшерыс лоис агитаторöн: рытнас клубын отирлö лыддьöтö газетаэз, висьтасьö страна олан йылiсь, депутаттэзлiсь биографияэз, а луннас керö ассис удж: ветлас Сёртни Иван ордö, медбы видзöтны челядьыслiсь здоровьесö. Но и аслас уджын сiя жö агитатор, сiйö жö керö, что висьтасьö олан йылiсь.

13

Выборрез бöрсянь ветлiс районöдз лекарствоэзла. Локтiс ойнас. Эз ешты ректыны лекарствоэз, медпунктö котöртö хозяйкаыс.

— Клавдия Васильевна! Хозяинным шогалö.

«Эта эшö эз тырмы!» — öшис нывкаыс. Чожа ректiс лекарствоэз, котöртiс гортö. Фёдор Иванович куйлiс кроватьын. Синнэс вöйöмась, чочкоммöм, оз и кваркышав, местасис оз вöрзьы.

— Мый сэтшöмыс, Фёдор Иванович?

— Пöрисьми, — сьöкыта горöтчис сiя. — Сьöлöмö... Кутiс пульссö, шприццез пыр готовöйöсь, кыдз солдатлöн винтовка: чеччас ольпась вылiсь, минута оз чулав, пондас бытшкавны. Быд шагын оз öшты кадсö. Юрыс оз дзугсьы, тöдö, мыйöн отсавны медодз.

— Тэ ме понда, Клава, эн тöжды. Мекöт нем оз ло, — баитö ас йывсис шогалiсьыс. Но нывкаыс тöждö, веритö ас вылас, а пессьö сэтчöдз, кытчöдз Фёдор Иванович оз шынньöвт. И абу кокнит отсавны сьöлöмыслö, кöр сiя дзугсис аслас уджын, вежис шагсö, джöмдалö. Быд вынсис уджалö, быд вынсис кыскö олансö.

Быдöс ни топ керис: бытшкис кордиамин и камфора, магнезия и новокаинамид, а сьöлöмыс сё пессьö, топ смертьыс жмитiс кырымас да сералö: «Вот эд ме кыдз кужа да прокма!»

Но кин ошшасис, что сiя кокнита да чожа сетчас смертьыслö? Кытiсь кылiн, медбы ловья существоыс кулiс кокнита? Эз вöв эта и гагыслöн, а мыля вермас лоны мортлöн, кöр дынат эм Клава, кöдалö веритан ёнжыка, нежели аслыт.

— Пессян тэ, Клава! — жалейтö тётя Таня.

Конечно, жаль тётя Танялö нывкаыс: сутки ни кыдз кок вылас. Да и туйес миян сэтшöмöсь: кин эз ветлöт, ась сiя ошшасьö. Нывкаыс ас йывсис оз тöждiсь. Сiя вермас узьны сымда, мымда шедас. Вермас неделя котрасьны, медбы Фёдор Ивановичыс веськалiс.

Пессьö сьöлöм, джöмдалö, лекарство бы оз отсав.

Ой. Пемыт öтöрас и гажтöм керкуас.

Вдруг сьöлöмыс сорасис, джöмдiс, топ думайтыштiс, öшис туй вывсис и пондiс тёпкöтны öтiк шагöн, вынöн да не тэрмасьöмöн.

Кöдзыт ньылöмöн пымалiс шогалiсьыс, вирсялыштiс, шынньöвтiс одззамоз жö гажöн, висьталiс: «Эг эд кув!»

Чышкö синваэз тётя Таня, и фельдшерыс пондiс кывны, кыдз мыдзыс небзьöтö коккесö и синнэс куньсьöны.

14

Гожумшöр. Видззез вылын туруныс дюттясьö валлэзöн. Ыббез вылын рудзöгыс море вылö вачкисьö. Сэтшöм шоныт, что Клава узьлö посöдзын, шебрастöг.

Шогалiссез етша. Некин этатшöм погоддя коста оз шогав. Öтнас Пилика баб норасис кынöмыс вылö, лун-мöд ветлöтiс медпунктö и веськалiс.

Öнi унажык фельдшерыс ветлöтö деревняэзö. И вдруг сiя пондiс гажтöмтчыны, мыйкö эз понды тырмыны оланас, сьöлöмыс кошшис удж. Эд ов бы весь, быглясь шондi югöр вылын, пöж кучиктö, а оз куйлiссьы. Думайтiс ветлыны гортö да главврачыс эз лэдз: «Страда. Мунан, а бöрсянят мыйкö лоас...»

Сэтöн и пондiс шогавны не кин-нибудь, а бригадирыс. Ойсянь пондöм висьны горшыс, лэбöм жар. Шондiтöг иньыс котöртiс фельдшер дынö.

— Клавдия Васильевна, лок. Хозяинö кувны лöсьöтчö, коляс! Челядьнам мый понда керны? — горзö, баитö, кыдз пулемётiсь шырö.

— Кулiс ни тэнат дона чачаыт! — сералö тётя Таня.

Котöртiс фельдшерыс. Мортыс би пытшкын бергалö. Ангина. Горшыс тупкасьö.

Клава кутчис лечитны Вильгортiсь командирöс. Нёлись луннас вовлiс, уколлэз керис. И мöд лунас шогалiсьлö кокнитжык ни, лэдзчисис жарыс. Но бригадирыс места эз адззы. Шогöтыс етшажык вийö, погоддяыс мортсö калечитö.

— Клавдия Васильевна, спасибо, что лечитiн. Ась тэныт еныс здоровье сетö да кодяжык мужик.

— Мый ме мужикнас кера, — сералö нывкаыс.

— Шутита, а аслам синваэз петöны. Погоддяыс кытшöм! Ловйöн начкылö. Ой и лун ог узь, ой и лун бы уджав, а ме боккез пöжа.

Весь олö мортыс. Постеляын куйлö, сьöкыт сылö шогöтыссянь, а эшö сьöкытжык, кöр колхозас уджыс джöмдалö. Клава керö укол, лöсьöтчö мунны, а бригадирыс баснинас оз пöт, янсöтö горесö. Бöра сэтчö тöдвылас усьö бригадирыскöт медодзза пантасьöмыс и оз ни веритчы, что вермас оскорбитны эта мортыс — кадыс вежö мывкыдсö.

— Клавдия Васильевна, — норасьö бригадирыс, — сьöкыт менам уджыс. Быд морткöт колö кужны уджавны да кыв горöтчыны. Тэ менö простит. Кöркö и тэнö обидитi.

— Мыйыс оз овлы...

— Адзза, Клавдия Васильевна, что мукöдпыр и тэныт сьöкыт.

— Отиркöт жö.

— Миян коддескöт. А кытöн бы кокнитыс и эм? Кытöн ми абу. Али кин нем оз уджав, таракан моз. Вот босьта ассим бригадасö. Сувтöта видз вылö литовкаэзöн. Етша отирыс, не кöркöся моз, кöр ытшкисьны петлiсö видзтыр. Уджав бы, öтмоз кер, а видзöтан — надейтчöны. Öтiк ытшкö — картина рисуйтö, мöдыс турунсö нильö да ракаэз видзöтö — брынöтö кадсö. Вот тiянöс жö босьтам, — ошкö фельдшерсö сiдз, что Клава гöрдöтö. Öшö. Оз любит, кöр син одзас баитöны сы йылiсь. — Вöлiсö тэ одзын фельдшеррес, а отирыс нiйö мылякö эз любит. Мыля? Ог тöд... Али климатыс миян не быдöнлö öткодь, погоддяыс не сэтшöм? Сiйöн, поди, и пышшöны миянiсь фельдшеррес?

— Ме эд муна жö, — висьталiс нывкаыс.

— Мыля? — кыдз повзис бригадирыс.

— Миян оланыс мöдiк.

— Властьыс мöдiк али...

— Туйес эмöсь и колхозыс богатжык. Дисциплинаыс буржык.

— Дисциплина... Сiдзкö, командиррес буржыкöсь? А ми...

Бригадирыс юис аспирин. Курыта ньылыштiс лекарствосö, одзлань баснинас лякасис:

— И тэ лöсьöтчан пышшыны? Томмес сьöрö вöтчыны.

— Ме абу старуха.

— Стариккес да старухаэс и кольччам. Некинлö лоас уджавны. А кин миянлö буржык олансö пондас керны?! Сюсö быдтыны? Подасö видзны? Али городас чöвпаннэсö заводын керöны? — Пымалiс нельки бригадирыс, сымда баитiс, шоччисьыштiс, юалiс:

— Пышшан?

— Пышша.

— Ачыт тöдан. Гезнас ог кöрталö. Спасибо, что кувны меным эн сет, пригодитча эшö. Но уджыс менам, висьтала, кöть эн и вод. Погоддяыс — золото! А уджалiссес етша. Локтiсö вот городiсь, шоччисьöны, сöстöм воздух ньылалöны да мöс йöв юöны, а пондыв видз вылö иньдыны!..

— Ежели пондывны? Поди, воскресник артавны?

— А тöдан, Клавдия Васильевна, öтiк морт меным эта йылiсь баитiс ни, но вот пондi шогавны. Толковöй зонкаыс. Неважын армияись локтiс. Иван дядьöлöн Костяыс. Пантавлiн ни?

Адззылiс нывкаыс солдатсö размöд, но эз баит.

— Юра зонкаыс, весись кывсö оз чапкы, кинкö моз оз кешитчы, — ошкö зонкасö бригадирыс. — Локтiс, видзöт, армиясис, эз и шоччись, кутчис удж бердö,

«Жöник я мый я кöсйö?» — думанас сералiс Клаваыс, но баитiс мöдiкö:

— Борис Иванович, а воскресниксö колö пондывны. Верита, быдöс бур лоас.

— Спасибо бы тiянлö, Клавдия Васильевна!

15

Медодз котöртiс клубö, бöра жö заведующöй дынö: öтнас мый керас? Клуб гöгöр том отир гардчöны.

— Лёнька, воскресник колö чукöртны!

— Неделя шöрас?!

— Шöрас али дорас, но колö! Ми жö комсомолеццез!

«Кытшöм ме комсомолец? — думайтiс зонкаыс. — Адззан, менö еныс мыжйис!» Шогалö Лёнькаыс. Кöритны сiйö немöн: неважын эшö кыскасис костыллез вылын. Сiйöн и городiсь локтiс, что сэтчин калека вылö некин оз видзöт, а гортын мамыс сьöлöм бердас жмитiс, паньöн öмас сёянсö кисьтлiс, кутiс пöжны да миссьöтны баняын, вердны да юктавны и сувтöтiс зонсö коккес вылö. Вöлi калека, а öнi кытшöмкö польза да пондiс керны отирлö. Отчаяннöя баитö заведующöйыс:

— Эх, Клавка! Отсала!

Клубын жö лякасис Володя, кöдакöт лун-мöд эз пантасьлы:

— Сулав. — Умöльтчöм, синнэс ыждöмась, яйыс шондi вылын сьöдöтöм. — Гöтрасьны лöсьöтча. — Öмсö пиньöвтiс, сералö — медсчастливöй морт.

— А ме турунасьны, — висьталiс нывкаыс. — Видз вылö. Быдöнныс мунöны. Томмес и пöриссес. Думайта, и тэ он кольччы?

— Менам спинаö висьö, — вдруг жмитыштiс Клавасö да чуп окыштiс рожабансö. Нывкаыс тойыштiс ас дынсис зонкасö, котöртiс гортланяс.

— Шедан! Гусяла, кыдз одзжык гусявлiсö.

— Киэт дженытöсь! — серöмтчис нывкаыс, аслас рожабаныс сiдз и сотчис. Дыр эз онмöссьы, думайтiс Володя йылiсь. Эз вежöрт асьсö, эз любит зонкасö.

Чеччис одз. Фёдор Ивановичлö висьталiс, что пондас ковны литовка. Котрасис медпунктö. Шогалiссес эз вöлö, только Парась баблö спинаас сувтöтiс банкаэз. Погоддяыс тöння кодь жö: асывсянь öдззöтчис пöжны шондi, чожа косьтiс турун вылiсь лысва.

Клава инькаэскöт иньдöтчис видз вылö. Эшö тöн рытнас клубын баитчисö зонкаэзкöт, что талун быдöнныс петасö ытшкисьны, и видз вылö локтасö не только инькаэз.

Картабöр видз кузя деревняланьсянь визывтö тулысся ва. Этасянь туруныс быдмö сук да кузь. Путриктö горадзуль, тысячелистник, клевер, лажмыт местаэзöт зу турун. Ытшкисьны сьöкыт, а машинаöн оз туй — видзыс кöчкаа. Вот и мырсьöны уджалiссес.

Одз асывсянь видз вылас дзингисö ни мошшез, шырис-лэбалiс цветтэз весьтöт чикись. Кивзiс канюк.

Пондöтчисö ытшкисьны. Клава покоснас сувтiс инькаэс шöрö. Нiя гусьöн видзöтлiсö нывкаыс вылö, натьтö, думайтiсö: прокмас я миян фельдшерным ытшкисьны? Не миян увтырись мортыс: киэс вöснитöсь, мыгöрыс учöт. Уджыс не нывкаыс сьöртi.

Клава ытшкисьлiс и одзжык, мамыслö отсавлiс керны турун, уджсис эз пов. И лöсьöтiс Фёдор Иванович литовкасö — чача, кокнит да лэчыт. Оропсö гладитöм, краситöм — ки вылын ысласьö.

Пондöтiсö покос. Клава кокнита ытшкыштiс и эз кыв, кыдз одзас ольпасьöн ольсассис туруныс — лэчыта босьтö литовкаыс.

Инькаэс ытшкисисö эшö кокнитжыка, топ эз и уджалö, а керисö физкультура: öвтiсö киэзнаныс öтiк ритмöн — бритiсö видзсö. Эта кажитчис боксянь, а ки увтын чожа ныжмö литовкаыс.

Кыным покоссэз нюжалöны логлань, сыным ва местаын сукмö туруныс, сыным чожажык ныжмö литовкаыс, ытшкö сьöкытжыка. Ытшкан, ытшкан, дзарнитан бöрлань, а сэтчин сулалöны туруннэс. Колö ытшкыны мöдпöв, а эта коста одзись ытшкисиссес янсалiсö, колисö ни тэнö. Бöрсянят тэрмöтöны мöддэс. Содты вынтö, тэрмась, эн кольччы отирыс сьöрись, медбы тэ понда мöдiккес видз шöрас эз сулалö. Тэрмасис, но этасянь литовкаыс унажык нилис туруннэсö.

Ньылöмыс вотялiс ни кымöс вывсис, вамисö лопаткаэс. Инькаэс видзöтiсö жалейтöмöн: «Не аслас удж бердö кутчис!»

— Костя, отсав нывкаыслö! — ыксiсö ни ытшкисиссес.

Зонкаыс, кöда йылiсь баитiс тöн бригадирыс, локтiс нывкаыс дынö, сулалыштiс, видзöтöв-керис уджсö, юалiс:

— Оз босьт литовкаыт?

Клаваыслö колiс, медбы лэчытжыка босьтiс литовкаыс, медбы сылö некин эз отсась, керис бы уджсö быдöнся не умöльжыка, и сiя зонкаыслö висьталiс:

— Ытшкö.

— Вай видзöта, — Костяыс кутiс ни литовка оропсö, кыскис асланяс. Босьтiс, кыкись-куимись ытшкыштiс. Падмисö бöра ытшкисиссес, видзчисьöны, кöр одзаныс пондасö ытшкыны одзлань.

Бергöтлöв-керис, разьлiс, лопатитiс, пондылiс ытшкыны, но мыйкö эз гленитчы и вились гуддисьыштiс.

— Костя, тэ мый, он я покос шöрас павжнайтны лöсьöтчы? — ыксöны ни уджалiссес, а сiя пишкö нырнас да ассис керö, и вдруг кыдз мезмис, кыдз пондiс чавкйыны турун коласас, что минутаöн колис бöрсис и вöтiс одзсис, виноватöя шынньöвтiс да нюжöтiс литовкасö.

Топ литовка бердiсь пöрччалiсö из, кыдз вежисö оропсö, öнi вачкисьö ни, дзик литовкаыс ачыс мöртчö турунас, уйö ва вывтi: вештав да вештав одзат.

Сьöкыт уджавны, а гажа: гизи-вези лопатитöны литовкаэз, сералöны уджалiссез, омöн цветитö быдкодь цвет. Пуксисö шоччисьны. Клава видзöтö и адззö, что отирыс етша. Сё нiя жö инькаэс, кöдна тöвнас назём кыскалöны и гожумöн турун керöны. Томмес видз вылö абу петöмась.

Ытшкисянiнö локтiс Лёнька — клубись заведующöй, конувтас газетаэз.

— Газетаэзöн лöсьöтчан отсавны? Кытöн отирыт? — кöритö Клава зонкасö.

— Пастучитöны да пестунничайтчöны, — эз öш Лёнькаыс.

Луныс кузь, видзыс паськыт. Рытланяс пондöны доймыны кырым пыдöссэз, висьö спина, и, кажитчö, он ни вермы веськыта сувтны, он вермы нуöтны öтiк покос, а инькаэс ытшкисьöны, орсöны-уджалöны да эшö шутитöны. Рытнас лöсьöтчöны аслыныс турунасьны.

16

Одз асывнас луд вылiсь лысвасö пыркöтiс бригадир, локтiс Фёдор Иванович ордö, саймöтiс Клаваöс.

— Он шогав? Сьöкыт эд ытшкисьнытö. Ме этатшöм уджыс бöрсянь неделя боккезöс пöжа. Молодец, Клавдия Васильевна, ме думайтi, что тэ полан уджсис, а тэ öнджа... А быдöнныс, лешак, эз эд петö видзыс вылö!

— Кытшöм нужда вашöтас? — горöтчис Фёдор Иванович. — Этö ми учöтсянь садь быртöдз уджалiм, кöр нем вöлi сёйны, а öнi няньсö кок увтаным талям.

— Кеймись дышшеслö!.. — сьöвзис куритчöм чигаркасö бригадирыс. — Клавдия Васильевна, тэ мун да видзöт, мый рисуйтöм Лёнькаыс, кикимора! Синнэзаныс бытшкöм.

Клава котöртiс клубö. Люкасис посöдз ыбöсö, кытчö лякöм ыджыт гижöт. Гижöт вылö рисуйтöм том да кузь юрсиа морт, кöда ыджыт паньöн ыджыт бекöрись панялö сёян, ачыс ошшасьö:

Ола, кыдз гор вылын кань,

Киам менам ыджыт пань

Уджавны киэз висьöны,

А сёйны: Унажык кисьтö жö!

Мед ни увдöрас гырисьжык букваэзöн гижöм: «Дышшеслö — позор, чожжеслö — слава!» Абу повзьöм гижны ниммез. Кыкдас гöгöр. Лыддьöт да думайт, мымда миян учöтик деревняын гожумнас оз уджалö том отирыс? Кöдна бы отсалiсö колхознöй подалö заптыны турун, и подаыс бы...

Сулалö нывка клуб посöдзын, лыддьöтö «Крокодил». Петух китсасьö йöр вылын быд горшсис, порсь купайтчö нять гöпын, бригадирыс мунö улицаöт, кинкö вартлö литовка. И вдруг лэбис шум да гам, кыдз дас пон кутчисисö летны öтамöднысö. Шумыс кылö öт деревня конецсянь мöд конецöдз, повзьöм, чепöссьö ыб вылö, вуджö керöссö да павкö Ильинчиöдз. Ильинчиын сыбöрын ни висьтасисö, что повзисö шумсис.

А бригадирыс шы сеттöг мунiс улица шöрöт, сэсся шы эз сет, кöдалö оланыс не гортас абу, не улицаö эн пет, и видiсö мортсö — пеллетö тупкав да синнэтö кунь. Бергöтлы боккетö, бригадир! Тэ думайтан Вильгортын медыджыт начальник ни, думайтан тэныт нем ни оз мöртчы, а кыдз пурасö! Этö тэныт не иньыт ыксö, кöда видас да бöра жö ас бердас жмитас!

Кылö Клаваыс, кыдз видöны бригадирсö, но отсавны мортлö оз вермы. Аслас сьöлöмыс шыр позйö дзебсисьö, полö отирсис, эд сiя Лёнькасö ускайтiс эта уджö.

Эта асылö Клавалöн содiс уджыс. Эз ешты пырны медпунктö да пасьтавны халат, кыдз бöрсяняс ыбöссö жавкнитiс Опоника. Инькалö пенсияöдз кык год, чукрасьöмась рожабаннэс, но кок вылын боёк, кыдз кань, чеччöвтiс, чывкнитiс ыбöссянь джодж шöрö, здоровайтчис. Чужöмбан вылас вежöтыштöм, синнэс вирдалöны — места оз адззö, öт öм угöлыс дрöжитö.

— Клавдия Васильевна, отсав! Сьöдыс жугдас, парализуйтас!

— Мый сэтшöмыс?

— Сёйисö кодя отирыс и пенсиясö ог адззыв! — синваэсö чышкö. — Зонö! Торкöны, тюрьмаö лöсьöтчöны сюйыштны, а сiя шогалö. Сиротасö китöм-коктöмсö...

Тöдö нывкаыс Опоникалiсь зонсö. Умöль мортас он пукты, битюг, ыбöсас оз тöр, кымöснас потолоксö люкалас. Некытöн оз велöтчы и оз уджав. Городын абу оланыс и деревняын дзескыт: ветлас кытчöкö, месяц етш ысласяс мамыс деньга вылын. А кöр, тыдалö, бырсясö копейкаэс, гортö бертö, горзö да вились деньга мамыслiсь бöбöтö... Таво мылякö месяц-мöд некытчö эз ветлы. Пондылiс колхозас отирыс коласын гардчыны, но коскас сöтiс, — и котрасьö учöттэскöт. Сы понда медодз и гижöмась клуб посöдзö.

Модьö Опоникаыс — петшöралö кыввезнас, чапкы паныт кыв — гурнитас и сотас.

— Стенгазетö рисуйтöмась... Оз пö уджав... А кин сiйö вердö? — чирзö инькаыс. — Висьтав, Клавдия Васильевна!

Мортыс локтiс медпунктö кыдз шогалiсь, и фельдшерлö колiс баитны кыдз шогалiськöт, ась и Опоника вылö петiс серöмыс — сы дор горöтчис:

— Ачыт эд быдтiн да вердан.

— Зыбкасянь, Клава. Этатшöм сiя менам кодя да бытшöм!.. — рык-рык горöтiс инькаыс, чышкыштiс синваэсö. — Сiя менам не гутыслö оз сьöвзьы, не поныслö оз брынгы.

Видiс-керис кинöс шедiс, дорйис, кыдз вермис зонсö, тшöктiс меряйтны давленнё, медбы тöдны, оз я лöсьöтчы парализуйтны, и, кöр Клаваыс меряйтiс давленнё, висьталiс, что быдöс бур, повны немись, инькаыс сьöкыта ловзисис, пондiс видзöтны веськыта фельдшерыс синнэзö, кыдз аслас ныв вылö, кöдасянь туйö видзчисьны быдкодь отсöт, горöтчис:

— Справка бы колö...

— Ог вермы. Оз туй.

Сэк инькаыс и пондiс кöритны:

— Ачыт тöдан. А эшö думайтi, мыся, кодя нывкаыс. Зонö сайö корася...

Петö инькаыс, кыдз тшына баняись пышшö, а сыбöрсянь медпунктö пырö Öльöксанлöн нылыс. Вот еныс сетас мортсö: пизьö цветитö, кыдз тулысöн горадзуль, ылiсянь адззан, а кутчисьны полан, öтiк синнэзнас колдуйтас: нiя гöгрöсаöсь, сьöдöсь, лэчытöсь. Кыдз видзöтас, сiдз сьöлöмтö кöрттулöн дорас, и, мымда бы эз пессьы сьöлöмыт, — оз ни вунöт этö нывкасö. Велöтчö шырсьыны.

— Мый висьталат? — юалö нывкалiсь фельдшерыс.

— Киö висьö, — нюжöтiс тупöсь кодь небыт кисö, вевдöр бергöтiс долоньсö, — жель мöртчöм.

Кыскис фельдшерыс жельсö, местасö йодöн мавтiс. Лечитiс. А нывкаыс оз мун. Сулалö, синнэсö козьналö. Сулалöв-керис, виноватöя шынньöвтiс, горöтчис:

— Меным бы справка колö. Тятюö тшöктiс корны, колхозö вашöтöны.

— Этатшöм шогöттэзнас справкаэсö ог сеталö, — висьталiс Клаваыс.

— Спасибо сэк, — петiс нывкаыс.

«Но талун и шогалiссез! — дивуйтчö Клаваыс. — Важын колöм эта лекарствоыс весьолiссеслö».

Луннас мунiс ытшкисьны. Ытшкисис талун кокнита, топ туруныс вöлi небытжык и литовкаыс лэчытжык. Киэс велалöны ни сьöкыт уджö.

Талун видз вылын отирыс кыкись унажык. Гажажык уджыс. Унажык кылö сералöм да шуткаэз. Кин, веськыта висьталам, видчö, лöгöтöм «Крокодилыс». И бригадирлöн гажыс эм. Ветлöтö ытшкисиссез коласöт, видзöтыштас Клавалань да шыннялö, и пöриссес ошшасьöны:

— Вот бригадир, пыр бы этадз отирыс!

— Кин виноватыс? Асьныт. Быдтiсят да вашöтат гортсиныт челядьсö.

— Вай городскöй олансö, оз пондö пышшыны. Нюмрасьö öмыс бригадирлöн, сэк жö кывсö оз адззы. Висьталiс бы, кыдз быдмис, но терпитiс, шы эз сет: сiдз и этадз томмес одзза олансö оз вежöртö — эз пешлö.

— Гажтöм татöн, — норасьöны том отирыс.

— Кытшöм эшö гаж колö? — оз вежöрт бригадирыс. — Клуб эм. Телевизоррез быд керкуын, киноэз мыччалöны и нывкаэс дынаныт.

— Туйес абу.

Споритöны томмес, оз гленитчы деревняын не оланыс, не уджыс, а уджалöны, нуöтöны покоссö — любо видзöтны. Тöдчö, что деревняын быдмисö.

Клава ытшкисьö Костя дынын. Висьталам, что не нывкаыс сувтö зонкаыс дынö, а Костяыс покоснас шедöтчö нывкалань. Етша баитö, а кыссьö фельдшерлань. Вачкисьö сiя старик вылö, горбыля кодь, весись оз баит, уджалö — эм и абу. Нуöтö покоссö — син гажöтö. Лопатитас — кисит эн чапкы. Только оз вежöрт Клаваыс, мыля зонкаыс сы дынын да сы гöгöр? Кöть бы мöд зонкаэс моз жö бöбалi да сералi!

Инькаэс бöрсяняс пиннезнысö кеслöны ни: «Видзöтö, Костяыс фельдшерным гöгöр гардчö. Оз я кокышт? »

— Вöзйися, да оз корась, — сералö нывкаыс.

17

Локтiс ытшкисянсянь. Вежис вывтсö, миссис, и сэтöн корисö Ильинчиö. Мыдзыс кылiс быдöс телоас, но сьöлöм вылас вöлi кокнит. Ильинчиын шогалiс кага. Видзöтiс шогалiсьсö, сетiс лекарствоэз, висьталiс, что вовлас одз асывнас, пондiс локны гортö.

Дыш да жар рыт. Деревня лöсьöтчö шоччисьны сьöкыт удж бöрсянь, только карта пытшкын бронгö джыннянöн мöс. Клуб дынын зонкаэс орсöны волейболöн. Клуб ыбöс бердын «Крокодилыс» оз ни öшав: кинкö косьöвтiс или Лёнька босьтiс, но рисуйтöмыс ассис уджсö керис. Клавалö колiс, медбы гижöтыс öшалiс быд рыт. Натьтö, талун колас гижны «Боевой листок». Колö висьтавны Лёнькалö.

Локтiс гортö да пуксис ужнайтны. Эз ешты пöтны, пырö Парась баб, горбыльтчыштöм — кыскö быдкодь юöр, кöдö оз тöдö татöн. Старуха бöрын пырö Костялöн мамыс.

Парась баб шагньöвтiс керкуö веськыт кокнас, сувтiс косяк бердö, пернапасасис не ен уголö, а пызан дорö Клава вылö.

Старуха бокö сувтiс Костялöн мамыс, тожö кресталiс мороссö.

— Пуксьö да ваксьö, — висьталiс Клаваыс.

— Некöр миянлö. Ми могöн пырим! — чорыта висьталiс Парась.

— Кытшöм эшö тiян мог? — дивуйтчис Таня тётка.

— Чур не лöгасьны, пöимöн не коясьны. Гыр вöрзьы и невеста вöрзьы! — сярзьыштiс Парасьыс.

— Невеста? — эз вежöрт хозяйкаыс.

— Мийö ньöбиссес, тi вузалiссез.

— Кин ньöбисьыс да вузалiсьыс? — комсяняс мыччисис Фёдор Иванович. Малыштiс плешсö. — Ме я мый я невестаыс, может, ньöбат?

— Менам тэтöг тырмöны! — гордöя висьталiс Парасьыс. — Миянлö не тэ колан.

— Не иньö я?

— Пестуння вылö? — сералöны пöриссес. — Миянлö невеста колö!

— Невестаыс миян эм, да весись ог сетö.

— Ми весись ог и корö.

— Мымда сетат?

— Ой, Фёдор Иванович! Тiйö менö ни вузалат? — повзис Клаваыс.

— Гм, вузалам, — пуксис западня вылö Фёдор Иванович. — Клавдия Васильевна, колö гордитчыны, что жöник адззисис, а тэ?.. Умöлик вöв моз додьсö бöрö кыскан. — Шутитö и шутканас öзтö нывкасö.

— Жöникныт кытöн? Поди, сiя и жöникыс вылö оз вачкись? — юалiс Клава.

— Зонка. Кодя, бытшöм. Винасö оз ю, енсö оз матькы. Вöравны ветлöтö, яйтöг оз понды видзны.

— Тöдам ми жöникнытö. Кодя жöникныт, — висьталiс Фёдор Иванович. — Немöн он кулит, но кытöн сiя?

— Сiя оз лок. Пышшис баля гидйö.

— Ме некытчö ог мун, кытчöдз оз лок жöникныт! — горöтчис невестаыс.

— Сэк асьныт и йитсьö-свалитчö. Кöркö ме ачым жö жöниккесö кошши да эшö не öтiкö адззи: ола öтнам, а кагаэс вöлiсö.

Быдöнныс пондiсö ваксьыны. Корасиссес пуксисö Фёдор Иванович бокö да öдззисö öтамöдныслö ошшасьны, кыдз нiя быдмисö, кыдз гöтрасисö да мунiсö жöник сайö. Медбöрын Парась баб рыг-рыг серöмтчис да висьталiс:

— Корасям невестаöс, а жöникным этö оз и тöд. Ха-ха, но ме бы!.. Во! На сто двадцать!.. Ме бы Клавасö некинлö и синöн эг сет видзöтны. Этатшöм нывкасö, малин тусьсö! Сiя эд кужö лечитны и кывсö горöтчыны.

Сэтшöмöсь старушкаэс Вильгортын — артисттэз! Пырасö керкуö, колясö гаж — кувтöдз он вунöт.

18

Гажа август. Деревня сайын йöзсö панталö богатöй гожум, кöда ыб дорын межа вылын козьналö сёрмöм озъягöд, сэтöн жö öктан рыжиккез, тыртан дозтö гöрд юра грибöн, песока борозда дорын шыннялöны ниндуллез. Льöмпу вöзйö гырись чöскыт ягöдтуссез. Ежели мунны ылöжык, вуджны логсö, кайны шутём вылö, кöда тырö ни пожумьяöн, видзöт кок увтö турун коласö, медбы не тальны веж рöма кыз рыжиккез, кöднö топ кинкö кöдзöм, чапкöм турун коласö золотöй деньгаэз.

Богатöй гожумыс, богатöй и Вильгорт. Тётя Таня гортас öтiк лун оз пукав, асывсянь рытöдз ветлöтö вöрын, кöть и рытнас гортö кыссьö бедьöн, но спина саяс пыр тыра пестер. Жаднöй инькаыс: тшаксö солалiс ведра тöран туиссэзö, кöньöсö да косьтiс, ягöдiсь пуис вареннё. Кинлö бы сымдасö заптыны, кöр олöны кыкöн и родняыс некин абу, но заптö. И тöвнас, кин мунö Вильгорт пыр, тöдсаыс и тöдтöмыс, пырöны Фёдор Иванович ордö. Тётя Танялöн эм мый пызан вылö вайны. Вердас пöт да эшö сьöрö козьналас, висьталас: «Ась пешлöны кагаэт. Ягöдыс челядьыслö лекарство местö».

Тётя Таня вöрö кыскис и Клаваöс да не умöль местаö, а кытöн быдмö ягöдыс — содзнат курав.

— Зэрны лöсьöтчö, — висьталiс Таня тётка.

— Кытiсь тэ и тöдан? — эз верит нывкаыс. — Пöрисьман, дак и тэ пондан тöдны.

Баиттöн эз и казялö, кыдз локтiсö гажа грива сайö, пырисö кöзъяинö — лешакыс позö, кытчö сьöд ягöдыс быдмöм — мышкыртчы да ведраат тэч. Уськöтчисö ягöдыс вылö жаднöя, топ тшыг курöггез, пондiсö кокавны. Клава öтiк тусь öмас, мöд тусьсö ведраас. Джын ведраас öктiс и пöтiс, мавтiс киэсö и рожабаннэсö.

Öктiсьтöн эз казялö, кыдз кымöртчис, кыдз спина вылас павкис медодзза зэр воть, кыдз зэрыс öдззöтчис — вынсялiс и пондiс кисьтны. Чожа некытчö эз ни туй павкöтчыны — увдöрсянь и вевдöрсянь ва. Вамисö — кöс сунис абу. Кынмис ни спинаныс, а ведраэзныс абу тырöмась. Зэрö, и ягöдыс бöбöтö. Чапкы бы, гортö котöрт, а жаднöй душаныс гортö оз лэдз — жаль кольны ягöдсö.

Кытчöдз тыртiсö ведраэзнысö, вамисö вакуллез моз. Лöсьöтчисö кöз увтö öзтыны би, тётя Таня пырис моросас, кыскис истöггез, а нiя вамöмась. Кольччис котöртны гортö.

Гортын вежисö ва паськöмнысö да тараканнэз моз кайисö гор вылö. Шонтiсисö, шоччисисö, Клава эшö ветлiс Кушман Иван ордö, керис медучöтыслö прививка, пыралiс клубö, кытöн медбöрья рыттэзö кучиксиныс петiсö-койисö том отирыс, кöдна талун-ашын деревняись мунасö велöтчыны. И кольччасö Вильгортö тöвзьöм-тувдöм зонкаэс, кöдна клубын быд рыт пондасö орсны доминоöн, куритны да пилитны важ гармошкаöн. Клаваыс велöтчиссезкöт думайтiс сувтöтны концерт.

Сьылiс-керис том отиркöт, гортöдз кольлалiс Володя, кöда эз тöд, кин бердö лякасьны, кыдз гут цветтэз бердö, кöр цветтэс уна и öтiк басöк, мöдiк эшö басöкжык.

Водiс узьны. Кунис синнэсö и онмöссис. Мымда узис, эз видзöт, но вöтасис аскоддя вöт: топ борддэзтöг лэбалö, öвтö киэзнас... Лэбалiс Вильгорт весьтын. Вдруг мезмис воздухсис и зубыта усис му вылö. Сэтöн и саймис. Моросас тёпкöтiс сьöлöмыс, вартiс кöсичаэзас, косьмис горшыс. Мылякö эз тырмы воздухыс и горшас горалiс кöбывка.

Шогалiс. Гусьöн чеччис да пызан вывсис юис ырöш. Кровать увтсис маласьöмöн адззис сумкасö, кытiсь кыскис аспирин да öмас чапкис таблетка.

Одзлань онмöссьыны эз вермы: висис юрыс, пымалiс кöдзыт ньылöмöн. Юрас сякöйыс локтiс. Бергалiс бокись бок вылö. Сэк и пырис дума, кöда повзьöтiс, что ашын оз вермы чеччыны, а колö мунны Ильинчиö, кытчö ветлöтiс керны уколлэз öтiк шогалiсьлö. Оз мун, а сiйö пондасö видзчисьны...

Асывланяс онмöссьыштiс недыр кежö, но саймöтiс петух, кöда китöстiс öшын увтын. Чеччис бы одззамоз боёка, но дрöжитiс, эз кывзiсьö коккес, топ эз сёй неделяся унажык.

Висис горшыс и сэтчин сё горалiс кöбывка. Некинлö нем эз висьтав. Миссис да пондылiс сёйны. Сёйны эз тöр. Ньылыштiс кык таблетка аспирин да мунiс уджавны.

Уджаланiнас пукалiс пызан сайын, керис уколлэз, сувтöтiс банкаэз, кывзiс шогалiссесö. Уджыс абу сьöкыт, но уджалiс, топ ытшкисис, пымалiс кöдзыт ньылöмöн, бергалiс юрыс.

Лунсö чулöтiс, кыдз вöтын. Вöтöн моз мунiс гортö, ыбöссянь брякнитчис кроватьö.

Но ойнас эшö ёнжыка зэламис горшыс. Жарыс топ эз вöв ыджыт, а мырддис вынсö сiдз, что кисö лэбтiкö ружтiс. Сьöкыта чулалiс ойыс, и ашынас бöра мунiс уджавны.

Нёльöдз лунö совсем пöрис кок вылiсь — эз ни мун медпунктö.

Шогалö фельдшерыс, а отирыс дугдiсö шогавны. Öтiк морт оз лок медпунктö, но Фёдор Ивановичлöн керкусис бырис ыбöс дзирыс: öтiк пырö, мöдiк локтö, кин юасьö Клавалiсь здоровьесö, кин вайö туруннэз — медбур лекарство, кин ви да кольттез. Но Клавалö лоис эшö сьöкытжык. Ковсис мунны больницаö.

19

Больницаын чулалiсö медгажтöм луннэз. Локтiс Вильгортö, кöр вöрыс пасьтасис рöма басöк паськöмöн. Вöлi ар. Шогалöм бöрсянь корсьылiс гортас. Мамыс дивуйтчис, панталiс нывсö:

— Клавка, абу я быдмыштöмыт? Али умöльтчин?

— Тэ, мам, менö сё учöтöн лыддян. А менö корасьны ни вовлiсö.

— Ой! — мамыс кутiс мороссö.

Но нылыс сералiс. Жöник сылöн эз вöв.

— Видзöт менам! — видiс мамыс. — Мун, да не вöр шöрö. Не кöин позö. Сэтчин, поди, отирыс не отир — чуддэз, сё баняэзын олöны? Кытчö еныс тэныт и шуас поздiсьны, — тöждiсис мамыс.

Гортас Клава олiс куим лун. Топ олiс не гортын, кыдз мыйкö эз тырмы. Мый эз тырмы — эз вежöрт. Куимöдз луныс сымда нюжалiс, что эз тöд, мый бердö кутчыны, кытчö воштiсьны. Книга эз лыддьöтсьы, и роднöй деревняын керны нем. Ёрттэз абу: кинкöт быдмис — абу гортын, томмес — не сы сьöртi. И вежöртiс сэк нывкаыс, что сылö оз тырмы вöррес шöрись деревняыс, отирыс, кöднакöт джендöтiс ассис уджсö, горесö и гажсö. Нельки узьтöнняс вöтасис Фёдор Ивановичöс, вöтасис Сёртни Иванлiсь ныввесö, топ челядьыс öтдруг пондöмась шогавны и видзчисьöны фельдшерсö.

Эшö туйис овны мамыс дынын, но чеччис асывнас и висьталiс, что мунас Вильгортö.

Мамыс обидитчис, пондiс баитны:

— Видзöт, мамыскöт дзескыт лоис! Олыштiн бы эшö лун-мöдсö.

— Мам, вежöрт, погоддяыс лöсьöтчö вежсьыны, а миянлiсь тэ туйесö он тöд.

Кымрасьö, номмес курччасьöны, тшынсö пуксьöтö муö — видзчись зэр. Янсöтчис мамыскöт да ыскöвтiс кузь туй вылöт вöррез коласö. Вильгортын тётя Таня панталiс:

— Ме тэ сьöрö лöсьöтчи мунны ни. Сэтшöм тэтöг гажтöм вöлi.

— Бöбöтан эд, тётя Таня?

— Нем тэ он вежöрт, — обидитчис хозяйкаыс. — Пукалыштiн-чулöтiн бы рытсö öтлаын, висьтасин, кыдз ветлöтiн, ошшасин, кыдз мамыт ордын гöститiн, а некöр тэныт. Липовöйсянь юöр вайисö...

Ежели Липовöйсянь юöр вайисö, то чапкы быдöс да котöрт. Лун али ой, но мун, фельдшер, Липовöйö. Сэтчин тэтöг овны оз вермö: кинкö чужö, пессьö, шогалö. Клава туй вывсянь босьтiс сумка, мунiс Липовöйö.

Сiдз и уджалö. Неделя бöрсянь неделя. Кадсö эз казяв, кöр чулалiс гожумыс, локтiс ар. Оз и веритчы, что татчö локтiс тулысöн, кöр сылiс лым, вöлiсö гажа да кузь луннэз, а öнi луннэс джендамöны, лоö кöдзытжык, часто зэрö. Лэбзисö ни лунлань туриэз. Асыввезöн усьö пуж — медодзза лымок.

Быд лунö вöрыс öштiс-чöвтiс гожумся листсö, пасьтасис сера тöвся паськöмöн.

Этатшöм гажтöм лунö фельдшерыс пукалiс медпунктын да сувтöтiс отчёт. Вдруг öтöрын лэбис шум. Горöтлöны повзьöмöн, и тэнö повзьöтасö. Чеччöвтiс Клава öшын одзö, но сэтöн оссис ыбöсыс, и Парась вайис умöль юöр. Повзьöм старушкаыс кынöм висянöдз, рожабаннэс — саван дöра, синнэс — кöчлöн, нёштöма ыкöстiс:

— Клавдия Васильевна, Костясö...

Кыдз пуртöн мöртiс сьöлöмö. Кöдзыт ва ыскöвтiс юрсянь коккезöдз. Эз бы повзьы, видзсис бы, но эз вермы.

— Вийöмась Костясö! — чышкö синнэсö Парась бабыс.

— Кыдз вийöмась? — оз вежöрт Клава. Котöртiс ни бы, да коккес оз кывзiсьö.

— Эн пов. Ловья пö. Тракторöн тальöм моряк Володяыс.

Тэчис чемодансö, ачыс сё эз верит, что мортсö дойдiсö, что вермис сiдз лоны Костякöт, кöда уджавтöн пыр гардсис сы дынын. Колö зонкаыслö отсавны, а сiя оз вермы тэрмасьны. Синваэс петöны. Син одзас чулалö зонкаыслöн оланыс.

Пырис Кушман Иванлöн зоночкаыс, кöда нуöтiс ыб вылöдз.

Ыб дорас пантасис тракторыс. Машинаыс сувтчыштiс фельдшерыс дынö, ловзисис жарöн да солярка дукöн. Кабинасис юрсö мыччас трактористыс, ыкöстiс:

— Татöн сiя!

Öнi адззис ни кабинаись дойдöм мортсö. Костяыс вежöтöм чужöмбана, синнэсö куньöм, пукалiс бокöн, шульга лядьвей вылас, веськыт коксö нюжöтöм рычаггес коласö. Ловья! Но оз баит. Абу ни зонкаыслöн старик кодь мудрöй советыс да негора сералöмыс.

— Котöрт медпунктат. Ме сэтчин вайöта, — висьталiс трактористыс.

Тракторыс эрзыштiс, жольнитiс гусеницаэзнас улица кузя. Шогалiсьыс пымалöм кöдзыт ньылöмöн, чочкоммöм, шы сеттöг лэдзис асьсö кыскыны кабинасис.

Нем эз висьтав, думайтiс: «Велöтны да велöтны тiянöс... А кин велöтас? Бöра жö меным колö!» Котöртiс кабина дынö, жмитiс шогалiсьыслiсь морос одзас коккесö и быд вынсис кутчисис кыскыны. Пыртiсö Костясö медпунктö, водтöтiсö джоджö...

Коскаэсö пешлытöг тöдчис, что кокыс чегöм, öвтчö.

Лöгыс петiс Володя вылö, сiдз бы и сьöлалiс синнэзас, но терпитiс да баитiс:

— Мый тiян лоис?

Трактористыс жмитыштiс пельпоннэзнас.

— Вай дзаввез!

Володя котöртiс öтöрö, а сiя пондiс видзöтны шогалiсьсö. Разис коксис нямöтсö да резьöтiс вешьянсö. Кокыс чегöм, но чегöмыс весьтын вöлi эшö и рана — эта умöль. Осьта ранаöн лечитны сьöкытжык. Мавтiс да миськалiс ранасö, домалiс — каттис коксö аскерöм шинаэз бердö. Костя видзöтiс потолокö, сьöкыта лолалiс да юалiс:

— Веськала жö?

— Свадьбаöдззат веськалан!

— Кин коктöмыс сайö мунас?

— Ог любит горзiссесö, — горöтчис фельдшерыс. — Стыдитчы меись, зонка.

— Простит, доктор. Ме ачым виноватöй. Эз ков сувтны матö... тракторыс дынö.

— Тöдан бы кытöн рокыс вöтас?.. — горзiс мамыс. Асывсянь вöлi кымöра, ыркыт. Небоыс вевттисис кокнит да бусöсь шебрасöн, видзöт, кыдз пондас зэрны.

Кытчöдз бергалiс шогалiсьыс дынын, öтöрас пемдiс, вöрланьсянь катыльтчис чочком тшын-туман, сибöтчис бускодь зэр, кöда эз и вачкись зэрыс вылö, а вачкисис кыз туман вылö, каттис деревня дынiсь ыбсö да вöроксö. Эз и чулав джын час, а керкуэс эзö ни тыдалö.

Звонитiс главврачлö, баитчис, кыдз кыскыны шогалiсьсö.

— Кыскам! — висьталiс врачыс, ачыс пондiс звонитны санавиацияö.

А туман кодь зэрыс сё сукмис и эз ни туй вежöртны: то ли кымöррес лэдзчисисö му вылö, то ли муыс лэбтiсис кымöрреслö паныт.

Бöр ни звонитiс врачыс и висьталiс, что вертолётыс оз лок: погоддяыс не лэбалан.

Мый керны? Колö кыскыны — быдöн тöдö. А кыдз? Некин оз висьтав, öтнат думайт, фельдшер.

Медодз бедаыс павкис бригадирлö: сылöн уджалiсьыс доймис.

— Пондам кыскыны! — висьталiс бригадирыслö. Клава котрасис квартираö. Пасьтасис шонытжыка.

Эта коста «Беларусь» локтiс медпункт дынö. Трактористыс бöра жö Володя. Ачыс кутчисис: «Ме виноватöй, ме и кыска!»

Кытчöдз ыб вылын тележкаö тэчисö идзас да тележка вылö нюжöтiсö брезентсö, рытыс вöтiс. Пемдiс. Öтöрын уль, кöдзыт, воздухыс йиджö коскаэз бердöдз.

Костяöс лэбтiсö телега вылö, сiя шы сеттöг терпитiс зубытсö. Мамыс причитайтiс-горзiс, топ зонсö кольлалiс мöдöр югытö. Некин мамсö эз осудит, быдöн бурмöтiс, адззис ласковöй кыв.

Вöрзис тракторыс, зэгнитiс тележкасö медодзза гöпас жö, и кивнитiс Костяыс, чочкоммыштiс да гичыртiс пиннесö.

— Кыдз, Костя?

— Кыдз самолётын.

Фельдшерыс пешлiс пульс. Сiя дзугсьö, öдззö тёпкöтны и падмö, пондö вартны öтiк шагöн. Шогалiсьыс сьöлöм бердын быд гöпокыс.

— Зубыт?

— Абу. Вот мамöлö, натьтö, зубыт.

— Тöждiсь ас пондасит.

Сiдз керöма мортлöн сьöлöм, что шогалö, сьöкыт, а думайтö мöдiк йылiсь, мöдiклöн судьбаыс волнуйтö мортсö.

Басни ойсö вештö бокö, но басниыс не кузь. Дугдö баитны зонкаыс. И вились нюжалöны не чассэз, минутаэз. Зэлöтö невежöртана тоска. Буржык бы аслыт шогавны.

— Умöль? — юасьö фельдшерыс.

— Тэ эд кынман, Клавдия Васильевна? Тракторыс дугдывтöг эрзö, йирö сьöлöм. Зэр воттез павкöны рожабаннэзö.

— Мымда кадыс?

— Кадыс двенадцатöй час. Ойшöр.

— Ылын эшö?

— Матын. Матын, да ылын.

Мунiс, мунiс тракторыс и вдруг пондiс эрзыны öтiк местаын, зэгйис телегасö одзлань да бöрлань — коскаэз нярьялiс. Кивнитiс зонкаыс:

— Тыдалö, локтiм. Бöбмис Володяыс!

Малыштiс нывкаыс кымöссö, и чуннес бердö лякасис кöдзыт ньылöм. Тракторыс дёрнитiс, пöдыштiс и пондiс рапкыны öтiк местаын.

Брезент кузя вартiсö зэр воттез. Öт бокыс, кöда вылын куйлö, шоныт, мöдыс кынмö. Кувтöдз бы эн вöрзьы местасит. Увдöрсянь ыкöстiс трактористыс:

— Ловьяöсь?

— Тэ кинöс кыскан?! — лöгасис Клаваыс.

— Мый ме? — öшис зонкаыс. — Тэ видзöт... Тракторыс кынöм вылас пукалö.

— Пуксьöтiн!

— Тэ бы эн пуксьöт. Зi! — видчö трактористыс. Чеччöвтiс боёка телега вылiсь, коккес нятяс вöйисö пидзöссэсви. Кынмö. Пиннес оча чакöтöны.

Миритчис бы ойыскöт, кöдзытыскöт, нятьсис бы эз повзьы, пон моз узис бы кöз увтын, но сы киын мöдiк морт.

— Вайöт тракторсö, — кеймисьö трактористлö. — Эмöсь жö кытöнкö отирыс!

— Одзаным. Китайыс граница дорын! — видчö зонкаыс.

Кыскис нятьсис сапоггесö, öзтiс фонарик да ва гöппесö орддялöмöн иньдöтчис одзлань. Колис бöрас тракторсö, нильдалiс, лойис нятьсö. Бöрас эз видзöт. Кытчö? Эз тöд, но веритiс, что кытöнкö олöны отир и отсаласö. Эз повзьы не пемыт ойсис, не нятьсис, не кöззэзiсь, кöдна би югöр вылын асланыс вуджöррезöн сулалiсö, кыдз сказкаын ведьмаэз: кутасö и кыскасö вöр коласö!

Лойис нятьсö вель ылö ни, кöр бöрсяняс ыкöстiс Володя:

— Клава, сулав!

Сiя топ эз и кыв ыкöстöмсö. Вуджöрыс окласис чукыляс ни.

Тракторыс рывкöтiс кытöнкö му пытшкас и судзöтiс эшö би югöрнас нывкаыслiсь коккесö. Трактористыс öдззис котöртны нывкаыс сьöрö. Ышки-пойки вöтiс чукыль саяс, кватитiс сосöттяс, сувтöтiс, бергöтыштiс асланяс: синнэзас нёштöм югöр.

Кöр локтiс бöр трактор дынö, нильдiс, усьлiс, сысъясис нять гöпын. Бур, что пемытiнас некин эз адззыв, и ачыс эз адззы, кытшöм сiя.

Шогалiсьыслö вöлi эшö умöльжык.

Пешлiс пульссö, кымöссö, шебралiс буржыка.

— Киэт, кыдз кай борддэз, — баитiс Костяыс. Бöбöтан, зонка. Нывкаыслöн киэс, кыдз йыжоллез.

Шонтö бы ловнас, да оз шоналö.

Оз тöдö, мымда кадыс. Часы вылö оз видзöтö — пемыт. Баитöны, вашöтöны ойсö, и Володя йылiсь оз баитö. Мунiс трактористыс и öшис. А вдруг сiя оз лок? Водас узьны. И некин вылö лоö надейтчыны. А кöр мортлö он верит, оланыс курыт, кыдз эта ойыс.

Öзтыны бы телега вылö би.

Петö он. Клава лэдзчö телега вылiсь. Нильдалö, мунö пемытiнас неылöдз, кывзiсьö. Шушкö зэр, тракторлöн шыыс оз кыв. Сэтшöм обида сьöлöм вылын, что синваэз курöтöны горшсö. Гусьöн горзö, чышкö синваэсö. Личöтö сьöлöмсö и тэрмасьö — бертö трактор дынö, кайö тележка вылö.

Пемытiнас дыр гуддисис вугмöм чуннезнас аслас сумкаын, шогалiсьыслань нюжöтiс учöтик бутылка. Юыштiс öтiк гульк, медбы кольччис керны уколлэз.

Виньдiс. Нывкаыс öмас кисьтiс бутылкаись ырöш. Спиртыс биöн шонтыштiс сьöлöмсö, йиджис коккезöдз, спинаöдз.

— Бур лекарствоыт! Öнi ог ни кув.

Ачыс кынмис. Сiдз ни кынмис, что эз ни вермы баитны.

— А ме, Костя, мыйöн шонтiся?

— Тэ вод ме бердö зэвжык. Эн пов, ме ог курччась. Кин Костяыс Клавалö? Шогалiсь, кöдö тöн эшö тöдiс умöля, а öнi кöдзыт телега вылын роднöйся роднöй.

Баитöны асланыс олан йылiсь. Висьтасьöны, кыдз быдмисö и олiсö. А мымда нiя свет вылын олiсö, мый олансис адззылiсö? Öтыс ошшасьö армияöн, а мöдыс Вильгортöн. Петö сiдз, что некин ны моз эз ов и оз понды овны.

Зэрö орöттöг. Арыс орсö кöдзыт ваöн. Жмитчöны кык морт öтамöдныс бердö, шонтöны асьнысö.

Шушкö ойыс. И вдруг эта зэр пыр кылö кытöнкö трактор шы. Не «Беларусьыслöн» шыыс, а дзик «ДТ» уджалö.

— Локтö! — гажмö Костяыс.

Тракторыс паськöтiс пемытсö югыт биöн, петыштiс чукыль сайсянь и тыртiс олансö аслас голосöн. Машинаыс вынöн бергöтчис «Беларусь» одзын, югйöвтiсö би югöр вылын гусеницаэз. Кабинасис чеччöвтiс Володя, ыкöстiс:

— Ловьяöсь?!

Ловьяöсь. Тэ эн кынмы, а мöддэслöн кывныс оз бергöтчы, медбы висьтавны, что ловьяöсь.

Кышалiсö трактор бердö «Беларусьсö», кыскисö нять гöпись и вöрзисö одзлань. Ойыс лоис эшö кöдзытжык, нятьыс кизержык, гöппес пыдынжыкöсь.

Больницаö локтiсö асывнас. Колисö Костяöс стационарö, янсöтчисö, желайтiсö чожажык веськавны. Фельдшерыс ештiс пантасьны главврачкöт.

— Кыдз локтiт? — юалiс сiя.

— Локтiм тай, — гусьöн висьталiс Клава.