Кöиннэз



1

Олiс мортыс тöв и гожум, асыввезнас доддявлiс вöв да ветлöтiс уджавны сэтчö, кытчö иньдасö, топ нем бурö эз кер, медбы ошкыны асьсö и немöн эз стыдит, медбы видны. Эз вöв лёк, не эз вöв рам: кытöн колö, öмсö осьтас и дорйисяс, кытöн шы оз сет — адззас и оз — орддяс, кузь руббез понда эз пессьы, эз вöзйись, медбы бöрйисö бригадирö, кытöн колiс мыччавны асьсö кинкöся ыджытжыкöн.

Викторыс уджалiс колхозын.

И вдруг тулыснас сiйö корисö правленнёö. Повзьыштiс, кöр умöльсö эд нем эз кер, нем бы предыс дынын керны. А иньыс пондiс бизгыны:

— Тэтöг оз вермö! Натьтö, пастучитны иньдöны, кöр тöвбыт мöссэс тшыгьялiсö, а öнi кулöны. Кутчись, он я ассит мöстö кулöммес местö нуöт!

Наташаыслö мужиксö жаль. Сiя тöдiс кытшöм Викторыс: гортын — ме, а йöзын — тэ, шы оз сет, кöть юрыс вылын майöг лöсав. Наташаыс сё видö мужиксö, а Викторыс пасьтасьö ни, медбы котöртны предыс дынö, ачыс видчö:

— Пукав! Тэнö некытчö оз корö, — и петiс. Соседыслöн рыжöй поныс кыдз видзчисьöм посöдзныс дынын, уськöтчис паныт и пондiс сёйны-вувтны, сiдз и лякасьö коккес бердö.

— Тэ мый, Шарик?! — Викторыс ыкöстiс поныслö, но мöдыс эшö лёкжыка чеччалiс коккес дынын. — Стыд тэнат абу, Шарик? — Кытшöм хозяиныт, сэтшöм и тэ: тöн ме бердын ниртчин, а талун — пуран бы... Пон тэ, пон.

— Кытчö тэрмасян?! — садниксяняныс ¹ыкöстiс соседыс, йöр вевдöрöт нюжöтiс кузь голясö, гырись синнэсö паськöтöмöн видзöтö, кыдз абу адззывлöм. — Мый öштiн?! — голосас Робертыслöн аскоддя гаж, кöр мортыс йöзсö сералö, топ сы кодьыс некин абу.

— Правленнёö корисö... — висьталiс Викторыс.

— Сэк тэрмась... — рыг-рыг серöмтчис Робертыс. — Тэрмась, мыся, медбы некинöс тэ местö эз пуктö. Ме кылi, топ тэнö бöрйöны ыджыт начальникö, миян коддескöт сэк он понды баитны, хе-хе-хе...

Шы сэтчö эз сет Викторыс: мый баитны мортыскöт, кöр сiя тэсся ылöсажык?

Погоддяыс гажа, оз бы ков öвтчыны, а колö бы тэрмасьны уджавны, кöр локтiс кöдзан кад, и кывзы жö, Виктор, кыдз ыбыс вылын уджалö тракторыс, натьтö, лöсьöтчö кöдзны, колö бы кыскыны сю-кöдзыс, а тэ öвтчан...

Правленнёын отирыс тыр, топ нем нылö керны, топ оз адззö, что шондiыс вылын ни и ендö удж.

Викторыс сувтчыштiс правленнё посöдзö, кывзiс-керис, кин мый лёбö да пырис предыс дынö.

— Здравствуй, Виктор Спиридонович! — панталiс предыс, нюжöтiс кисö да жмитiс, топ куим год эз адззыв. — Кыдз здоровьеыт?

— Бур! Погоддяыс одзын пельпонö висьö жö...

— Эн баит, Виктор Спиридонович. Менам юрö эта уджын одз асывсянь потласьö-висьö, но шы ог сет. Пуксьы да висьтась, кыдз олан.

Викторыс пуксис. Мöдыс одзлань гардö:

— Тöдан жö мый... Эта цыганыс лесникöс кошшö, — чуньнас мыччалiс диванлань, кытöн пукалiс тöдтöм морт, сылöн рожаыс быль вачкисис цыган вылö: сьöд тоша, кыз ныра, лэчыт синнэза, киас видзö газета и видзöтö кымöсыс увтöт тэ вылö, топ мыйкö сылiсь гусялiн, несьö ²бöбöтiн и öнi кöть кытiсь вай.

Викторыс эшö предыс жырын стенаись адззис плакат, кытчö гижöм: «Берегитö колхознöй добро!» И рисуйтöмась, кыдз кыз кынöма морт гусялö тыра мешöк и вачкисьö эта цыган чужöмаыс вылö, сiдз жö чикыртöм öтiк синсö да керö ассис и оз кыв мый баитö Валерий Ивановичыс, кыдз сiя горзö аслас колхоз понда:

— Локтасö татчö быдкодь цыганаыс и ракаэз моз кокалöны колхозсö: «Этö вай! Сiя колö!» А ассиныс... Тöвнас лымсö он босьт...

— Мыйсö?! — обидитчис тöдтöм мортыс. — Висьтав, ёрт председатель, мымда колхозыс миянсянь босьтö? Сетан, сетан, а тi сё тшыгöсь...

— Ог тöд, — сералö Валерий Ивановичыс, — кин кинöс няньнас вердö...

Кыввезнаныс чувйöны öтамöднысö. Кывзö Викторыс баснинысö и думайтö: «Кытiсь жö ме этö мортсö адззылi!? Кытöн пантасьлi?..» И сэтöн тöдвылас усис, кыдз öтiк годö март месяцö, кöр тöвнас лымыс усис косви, Викторыс вöлöн-додьöн мунiс турунла.

Вöлi гажа, шондiа, синнэз гусялiс лымыс, кöда луннас сылiс, а ойезнас кöдздöтлiс — дорис чарöм, кöда асыввезнас лэбтiс мортсö.

Викторыс пукалiс додьын. Сiя шондiыс шонытсянь суналiс, и вöлыс топ мунiс-суналiс жö. Вдруг Чалöйыс сувтiс, юрсö лэбтiс, пырснитiс нырнас, бытьтö туй вывсис адззис зверьöс.

— Но, Чалöй! — шутньöвтiс ямщикыс. — Кöиннэзiсь я мый я повзин?!

Вöлыс одзлань эз мун. И сэтöн вöрсис лямпаэз вылын одзас туй вылö ыскöвтiсö вöралiссез. Быдöнныслöн спинаэзныс сайын тыра котомаэз, пельпоннэзныс вылын пишаллез, нiя нятьöсь чужöмаöсь, ныррезныс топ нюжалöмась, синнэзныс ыждöмась — мыдзöмась отирыс и тэрмасьöны. Медодзас кузь ныра соседыс.

Робертыс чывкнитiс туй шöрас, сувтчыштiс, видзчисьыштiс Викторсö и кижгыштiс:

— Тэ кытчö? Поди, миянöс вöвнат гортö кыскан?

Викторыс öмсö эз ешты осьтны, кыдз вöралiсьыс öвтыштiс кинас, чывкнитiс туйыс вылiсь бокö. Мöддэс сьöрсяняс, кыдз син одзись вотьыштiсö, только бöрсяняныс Викторыс адззыштiс вирöсь котомаэз.

Викторыс тöдiс, что соседыс вöралö не öтiк ойлун ни и, видзöт, гортö простöн оз лок. «Но и мед... Ась отирыс сёйöны... — думайтiс уджалiсьыс, бытьтö ошкис, что кин кошшö, сiя адззö, добычаыс ачыс гортö оз лок, но сьöлöмыс вылын вöлi недолыт, топ вöлi кинкö одзын виноватöй, кöр син одзас гусясьöны, а сiя адззö и оз. «Мед сёйöны», — эшö öтпыр ас кежас горöтчис Викторыс, шутньöвтiс и лöга вачкис Чалöйыслö.

Вöлыс дыша котöртiс одзлань. Додьыс увтын дзуртiс, топ норасис лымыс. Эз ешты мунны джын километра етш, бöра пантасисö лямпаэз вылын отир, бöра куимöн и тэрмасьöны — чужöммезныс гöрдöсь, кымöссэзныс вылiсь вотялö ньылöм, вывсиныс кайö пар и тöдчö, что эна абужык мыдзöсь. Вöрсянь чуйкнитiсö зэв додьыс бердöдз, пыдына ловзисисö, ружтыштiсö и öтiкыс юалiс:

— Тэ некинöс эн адззыв?

— Кинöс колö адззывны? — кыдз эз вежöрт Викторыс, видзöтiс лым вылiсь лямпа следсö и тэрмасьöмöн содтiс. — Некин эз пантась.

— Кöиннэз! — сьöвзис тошаыс, кеписьнас чышкис кымöсыс вылiсь ньылöмсö, лёка дзарнитiс Викторыс синнэзö, кыдз койыштiс кöдзыт ваöн. — Пышшисö эд... Локтö эшö пондылам вöтчыны! — висьталiс ёрттэслö, чуйкнитiс туйыс вылiсь, ачыс сё мыйкö модис, но Викторыс сылiсь кыввесö эз ни вежöрт, вачкис вöлыслö.

Китшсис катша, кыдз сералiс вöралiссесö. Гажöтчис думаэзнас и Викторыс, нерис тöдтöм отирсö: «Кутат васис чериэсö... Быд год этадз вöрас яйсö керöны, но уна я шедiсö? Не тiян öмöн, ёрттэз, куталöны шырресö... Думайтат нiя яйсö гортö ваясö? Öшöтасö котомаэзнысö кытчöкö кöззэз бердö и гусьöн пондасö кыскавны öтiк торöн, сёйны да сосаныс серавны, а тi вöтлiсят... — сэтöн жö кыдз дорйис асьсö. — Мед. Меным мый...» Бöра вачкис вöлыслö, пидзöссэс увтiсь доддяс лöсьöтiс корось ыжда турун, дзарнитiс вöрыслань, кöда кыдз саймис и гажöтчис локтан тулысыс вылö.

Талун предыс дынын сьöд чужöма тоша мужикыс лэчыта дзарнитiс Викторыс синнэзö и кыдз сэк тулыснас, турунла мунтöн, койыштiс кöдзыт ваöн. «Сiя эд!» — сотiс дума. — Тöдiс или эз? Мый думайтö ме йылiсь?»

Тошаыс тöдiс. Сiя веськыта, рамжыка ни видзöтыштiс Викторыс вылö, шынньöвтiс да юалiс:

— Тэкöт эд кöркö вöрас пантасьлiм? Кöр эшö кöиннэс сьöрö вöтчим...

Мый сэтöн висьтавны? Бöбöтны... Викторыс бöбöтчыны эз куж. Мымда ни сiя эта понда лёк отирсянь кывзiс умöльсö, кöр колiс бы бöбöтны, а сiя висьталас веськыта, лöгöтас мортсö, сыбöрын асьсö жö видö.

Öнi йöз мортыслö шуис, что сыкöт пантасьлiс кöркö вöрын.

— Вот и бур, — шынньöвтiс мöдыс, кыдз ошкис, что эз висьтав вöралiссес йылiсь.

«Мый сэтöн бурыс?» — недолыт лоис Викторыслö, думаэзнас лöсьöтчис петны ни керкусис, но тошаыс бöра юалiс:

— Кыдз, Виктор Спиридонович? Пондан миянкöт уджавны? Лесникöн? — Уджыс абу сьöкыт, но узьны, может некöр лоас...

— Ог куж ме.

— Велалан. Уджалыштан, а сыбöрын иньдылам велöтчыны.

— Сiя велалас! — ошкис предыс. — Сiя сэтшöм... «Кытшöм ме?» — лöсьöтчис бы юавны Викторыс, но эз юав.

— Колхозас унажыксö он шедты, а миян — зарплата. Корасьöны кыдз невестаöс. Этö Викторыс оз любит: висьталас — и керö, öнi шуис: «Пондылам».

Сымда и вöлi, сымда и колiс, кöть Наташаыс гортын пондас модьны, но колö жö овны аслат юрöн.

Викторыс петiс правленнёись. Посöдзсянь видзöтiс-керис ассис деревнясö и мыйкö кыдз вöрзис сьöлöмас: ачыс оз тöд — рад или гажтöм, олiс-уджалiс öтiк местаын, а сэтöн видзчисьтöг, кыдз кералiс. Колö кежны роднöй колхозсис и кутчисьны виль удж бердö, кöдö он тöд. Мый виль уджыс кöсйö, вермас я керны сiйö?

Деревняыс грива вылын. Омöн вöррез, тыдалö ылö-ылö, кытчöдз судзö син, кытöн небоыс öтлаасьö муыскöт. Вöрыс кыдз лолалö: шоррез да юэз весьтын öшалö кизерик туман, и лöз небоас чирзöны чикиссез, кöдна таво локтiсö одз.

Викторыс любитiс вöрсö, любитiс аррезнас ветлöтны пишальöн, тулыссэзнас, кöр ештiс, мездöтчывлiс чериавны, но вöравны да чериавны шедлiс етша, сё вöлi некöр: то гортын удж, то бригадирыс оз лэдз, а öнi мезмас...

— Ой, клин да мох! Виктор Спиридоныч! — думаэсö дзугис, ыкöстiс посöдзсяняныс Палич-старикыс, кöдалöн керкуыс правленнёыслö паныт. Рад пöрисьыс несьö шондiыс вылö, несьö Викторыс одзын, малалö тошсö, чотö-биргылясьö. — Здорово, племенник! Кыдз ни олан! Мылякö ме тэнö важын ни эг адззыв! — ылiсянь здоровайтчö да шыннялö.

— Быд лун öшын увтöттят, дед, ветлöта, — сералö Викторыс, иньдöтчис старикыслань, здоровайтчö, юасьö:

— Клин да мох! Пöрисьма, племенник, пöрисьма! — кöс да чорыт кинас пöрисьыс жмитiс томжыкыслiсь кисö, малыштiс сьöд тошсö, сьöд синнэзас — хитрöй бес. — Кыдз, племенник, здоровьёыт? Иньыт мый керö? Кагаэт, хи-хи... Кыным мöс чилькöтан?

— Дед, тэ разь эн кыв, что öтiк ныв менам да сiя...

— Клин да мох! А ме мый кылi!.. Öнджа, топ тэ лесникöн ни уджалан... Быль али отирыс весь баитöны? Катшаыс бöжыс вылын юöрсö новйöтö?..

— Сiдз, дед.

— Вот клин да мох! Важын ни колiс Ныртöм Егорсö кöс росöн вöрсис чышкыны. Кытшöм Ныртöм Егорыс лесник?! Совестьтöм кöиныс! Мый вылö сiйö лесникас видзисö? Ме бы сэтшöммесö тöдан мый кери! — гичыртiс пиннесö старикыс, няпыртiс кулаксö да сiдз Викторыс ныр увтö и сюйыштö. — Öзйис, племенник, сьöлöмö. А мый нö! Кывзы, мöйму меным колiс кер. Тöдан эд ачыт, весь овны ог куж. Кула и мöдöр югытас понда кöньöссэз да шöмöссэз керны... Этадз жö пантаси и шуа Егорыслö. Мыся, Егор Трофимович, колö бы меным веськыт да гладь пу. «Тэ мый, дед?! — Ныртöмыс радмис. — Кытшöм тэныт пуыс колö, сэтшöмö и öкты, вай да кöньöссэтö кер!» — «Во! Кылiн мый лесникыс висьталiс? Но ме, клин да мох, мунi вöрас, пöрöтi пожум, а челядьыс öшын увтам кыскисö. — Сьöвзис Паличыс, нач пондiс син одзын кувны, ружтыны. — Ох, племенник, клин да мох! Абу колöм вöрзьöтны пусö казнасис! Золотöй керыс вöлöм... Золöтöй. Веритан-он, лесникыс керыс понда куим ведра винасö юис. Кыдз рыт, сiдз и пырö. Порогсö вожмöвтас и ыксö: «Клин да мох, юрö висьö!» Стыдита жö бы ас могсим, мыся Егор Трофимович, сiдз разь туйö?! Клин да мох, стыд тэнат абу, пöрисьсö чилькöтан?! А сiя, вежöм, ассис: «Вай, старик! Он юктав, керыс понда тюрьмаö мунан!» Кытчö сэтöн воштiсян? Вешьянтö вузалан да куканьсö юкталан. Полан эд пöрись увья тюрьмасис. Юкталi, понöс!... — пондiс чышкыны синваэсö старикыс и вдруг юалiс:

— Тэ, натьтö, сiдз он понды керны?

— Ме? Да тэ мый, дед?!

Аскоддя гажа лун талун петiс Викторыслö, асывсянь вежсьö оланыс: тöн — колхозник, талун — лесник, тöн бы Паличыс эз и адззы, а талун кыдз уськöтчис. Цветитö льöмпу, пизьö чочком быгöн, кинкö шутнялö карчйöрын, садитö ни картошка, а сылöн думаэс гортыс дынсянь ылын ни — вöрын ни Викторыс и уджалö, ась и ачыс эшö оз тöд мый керö.

Тэрмасьö правленнёсянь гортö, медбы иньыс одзын ошшасьны, что сiя талун ни пондас керны мöдiк удж, тэрмасьö-мунö роднöй улицаöт, не бöрас, не бокас оз видзöт и, кыдз сiдз и колö, Сизов Демьяннэз керку дынын люкасьö Демьяныскöт, кöда локтö вöралансянь: мыдз, рожаыс нятьöсь, нюжалöм, тошсялöм, пельпоныс вылын пишаль, спинаыс сайын тыра котома, кытöн, натьтö, сьöлаэс десяток-мöд. Викторыс здоровайтчис Демьянкöт. Мöдыс кижгыштiс паныт и заргисис посöдзаныс, только ыбöсыс бöрсяняс хлопкисис.

Страда деревняын, кöс гажа тулыс. Ыб вылын ой и лун уджалö трактор, деревняыс кöдзö. Эшö мужиккеслöн Микола гöгöр, кöр сьöлаыс пуксьö пöжны кольттез, оссьö мöдкодь страда — быдöн тэчö котома, босьтö пишаль да лун-мöд кежö öшö гортсис. Талун тэ, ашын ме — быдöнныс ештöны вöравны, нельки и бригадирыс ветлас пишальнас — сэтшöм традиция, кöдö некытчö абу гижöмась, но быд тулыс керöны. Этö топ некин оз адззы, некин оз тöд и тэ, Виктор, лесникыс талуння, кытчöдзкö синнэтö кунь да нем эн адззы, кöр уна тöдiссес миян эз вöлö.

Гажа тулысöн деревняын, сьылöны кайез, цветитö льöмпу, и воздухыс чöскыт, ловзисян, — юр бергалö.

— Тэ, сосед абу я начальник? — пантасис Роберт, кöда кузь коккезнас суййис-мунiс клублань, вевдöрсянь моз дзарнитiс, кыдз ыджытжык учöтжык вылö — брезгуйтiс мыля тэ сэтшöм, а асьтö пуктан бы кодя мортö и вдруг серöмтчис, — лесник пö талунсянь?

— Ог тöд, — öшис Викторыс.

— А ме тöда!..

2

— Мый вылö корлiс предыс?! — кöр осьтiс гортiсь ыбöссö, чорыта юалiс иньыс. — Эз я иньды пастучитны? Мед бы ассис иньсö иньдiс или зонсö... Видзöт жö, зоныс кытшöм Рыжко! Кöть кытшöм додь кыскас, а мылякö колхозас оз уджав, юрсö сюйыштiс школаö да сьылö-олö.

— Мый модян, Наташа? И ме колхозас ашынсянь ог понды уджавны.

— Кытчö лоан? Кинлö сэтшöмыс колан? Верман разь кытöнкö любимöй вöвветтöг овны? Шогавны эд пондан Чалöйыттöг.

— Лесникö корасьöны...

— Лесник... — сералö Наташаыс. — Кытшöм тэись лесник петас, кöр винасö он куж юны? Тэ видзöт Ныртöм Егорсö... Вот сiя лесник! Кывсьö, что Палич дедыслiсь винасö сизим ведра юöм.

— И ме велöтча...

— Ме тэнö велöта! Пондан юны — юрыт орас! — Сэтöн жö «небзис-раммис». — Медодз картошкасö колiс садитны. Видзöт жö: вöвсö колхозсис оз пондö сетны или Ныртöм Егорыс моз жö гортö он понды вовлыны.

— Керам, Наташа, керам...

Медбöрья лунсö уджалiс колхозын. Ашынас бригадирыслiсь корис вöв, садитiс картошка и мунiс лесничествоö, кытöн олiс неделя: велöтчис уджавны. А кытшöм удж эта коста лесниккеслöн?

Медодз чукöртiсö челядь, кöдна дугдiсö велöтчыны. Нiйö нуöтiсö делянкаэзö и пондiсö садитны вöр.

Деревняын дугдiс цветитны льöмпу, эз ни сьылö сьöдкайез, видззез вылын син одзын быдмис турун, но вöрын оланыс кыдз кольччис: льöмпуыс сё цветитiс и луннэс сэтчин ыркытжыкöсь, уджав да уджав, кöр эшö абу жар и номмес етша, но лесниккес уджавны оз тэрмасьö: тойыштасö лунсö и бур.

«Этадз понда уджавны, тшыгйöн кула... — тöждiсис Викторыс, сiя колхозас асьсö öддьöн эз жö нярьяв, но весь луннэсö эз öшты, мый-нибудь да луннас керас. Мый тулыснас кöдзан, арнас вундан, а вöрын делянкаэс вылö кöдзöны, и лесниккес жö ассиныс уджсö сералöны: «Кинлö эта колö? Оз ешты петавны миян кöдзöмным, кыдз сiйö пöдтас кыдз да пипу, кöда кералöм местаö быдмö, кыдз дыш хозяйка гряд вылын ёг».

Викторлö мый? Сiя уджалö медодзза луннэз, кыдз колö, сiдз и керö, и ёрттэскöт оз лысьт вувтны.

Неделя уджалiсö, сэтöн и чулалiс месяцыс. Пондiсö гижны наряддэз. Луныс усис сизим рубöн. Бур эд, Виктор, этö тэныт не колхозын.

Кресення кежö локтiсö гортö. Ыббез вылын синнэз гажöтiсö ни сюэз-петассэз, садникын быдмисö картошка да лук, кöдна дружнöя пондöтчисö ни вевттьыны мусö. Зэр бы этчö! Но зэрыс абу. Шондiыс сотö-шонтö, кымрасьö, а чикиссес сё лэбалöны небоас вылына.

Викторсö иньыс видзчисьö: лонтöм баня. Баняыс ештöм ни и улица шöрöдз нырö павкö аскоддя чöскыт баня дукыс.

— Тэрмась! — Наташаыс панталiс посöдзын. — Ештiс баняыс.

Пытшкись посöдзас жö вывсис чöвтiс уджалан паськöмсö и — веськыта баняö. Заргисис кöс жарас, кöр эшö баня горыс пытшкын кыз öгыр — лöз би öгралö, йöктö. Чöвтiс йöрнöс-вешьянсö, ведраись кöшöн гумыштiс кöдзыт ва да джынсö койыштiс шоммез вылö, мöд джынсö — иззэзас.

Жарыс зэлöтiс горш. Пывсисьыс брякнитiс-осьтiс ыбöссö, и сэкжö топ коккезiсь öшис мыдзыс.

Пондiс миссьыны юрсö. Тöдвылас усис, кыдз учöтнас тулыссянь сёр арöдз нятьöт и ваöт котрасисö кöмтöг сiдз, что коккезныс вартсясö-потласясö и чужöммезныс нятьсис оз тыдалö — синнэзныс був-бав, юрныс вылö кöть гöр да кöдз... Мамныс лонтас банясö, а кöр сiя ештас, айыс челядьсö кыскас би-жарас, гажöн висьталас. «Кай, Витя, полокыс вылö!» Ох, тöдö Викторыс, мый лоас полокыс вылын, оз бы сэтчин кай, кивзö-никсö кычанок моз, но кытчö воштiсян, кöр айыт тэсся вынажык: кутас да шупкас, кыдз каньпиянокöс, кöшас тыр гумыштас васö, койыштас пым иззэс вылö, и зверь-жарыс пöдтö, ловзисьны немöн, пеллез сотö, вирöдз вартчöм коккез пондö пурны пон. Тэ горзан, кеймисян, медбы айыт осьтiс ыбöссö но сiя сё вартлö-вурö коросьнас, кытчö шедас. «Ой, ая! Тырмас! Ой, кула! Эн ни...» — чери моз бергалан ва полокыс вылын, но айыт эшö содтö-койыштö пым горыс вылö, ёнжыка пывсьöтö боккетö, ачыс ыксö: «Терпит, Витька!»

Талун миссьöтö баняын юрсö. Сэтчö пырис Наташаыс да пондiс чöвтчыны, ачыс юасис, кыдз да мый виль уджын, гленитчö я öвтчыны вöрын? Тöдчö, что мужикыстöг гажтöмтчöм, осудитö, что мунiс колхозсис, кöр туйö бы овны гортын, сёйны сiйö жö няньсö, шедтыны сiйö жö деньгасö, а эстöн инь-мортыс öтнат кöть кыдз ов, поданас кöть мый кер.

— Он кув! — пондiс серавны Викторыс, видзöтiс иньыс вылö, кöда вöлi эшö лöсьыт мыгöра и чужöмыс басöк.

Иньыс чöвтчис да кыввезнас желлясис, а мужикыс гажöтчис:

— Грех тэныт абу, Наташа, мужикыткöт öтлаын пывсьыны? Тöдан кöркö кыдз пывсисö мужиккес... Инькаэс орддисö сизим верста.

— Тэ мый? — Наташаыслöн лёка югйöвтiсö синнэс. — Эн ешты кытöнкö неделя овны, виль инь ни адззин?! Дзескыт мекöт баняас.

Баняын пывсис мыдзтöдз. Кайис гортö, пöрöтчис диван вылö. Шоччисьö. Сэтшöм долыт, что нем оз думайт. Вдруг ыбöсыс оссис и керкуас пырис соседыс.

— Здорово! — здоровайтчис Робертыс чорыт голосöн, топ кешитчö — медкодя и медвына. — Пывсин? — юалiс рамжыка ни, кыдз керкуас пырис меддона гöсь, кöда тэтöг оз вермы овны и видзчисьöм ой и лун, кöр вöрсис локтан, медбы конувтас пыртны бекöр, кöда вевттьöм газетаöн.

— Пывси, — дыша висьталiс Викторыс. Кöр одзжык öтiк пызан сайын нянь-совсö эз торкö, öтамöдныс ордö эз вовлiсьö. А талун баня бöрсянь эз видзчись йöзсö.

— Ме тэныт яй тор вайи. — Робертыс кузь коккезнас куимись шагньöвтiс порог дорсянь и пызан вылö торскис бекöрсö да висьталiс. — Дзимляв! Мед некин оз адззыв... — вирснитiс нырнас, кык кылöн ошшасис. — Кышасьöм... Свежöй яйыс.

Викторыслöн кытöн юрыс уджалö и кылыс бергалö, а кытöн думаэс сибдасö и кылыс öмас кыдз лякасяс, кöть пель бокас сöт, нем оз шу. Öнi лöсьöтчис мыйкö висьтавны Робертыслö, но öшис, а соседыс эта коста вуджöртчис ыбöсыс коласын и абу ни.

Каньыс петiс комись да нювсьытöн-лаксьытöн локтiс пызаныс дынö: кылiс кöс гыж яй дуксö!

«Мый сiя? — öшис Викторыс. — Мый одзын?» — лоис недолыт, топ соседыслiсь нахальнöя корис яйсö. Талун жö Робертыс мунас клубö да ёрттэслö гусьöн пондас ошшасьны: «Вот эд... Соседö эшö эз ешты кутчисьны лесникас, а гыжжесö мыччис ни...» Син одзын соседыс, кыдз сiя баитö-сьöлалö душаö, пурö бöрсянь, стыдитö, мортö оз пукты, мед тэ отирыс одзын öштан честьтö и тэ йылiсь, лесник, лэбзяс умöль слава, видзöт, эн эшö кодьöн и уджав, а кинлöкö враг ни.

Каньыс чеччöвтiс пызаныс вылö.

Котсö любитiс, кыдз кагаöс, но öнi гурнитiс сэтшöм лöг, что киас шедiс книга и сiйöн каньыслö швыргис быд вынсис. Öтöрас кылö чирзiсö чикиссес, горалiсö воробейез, а лесникыслö лоис сэтшöм недолыт, что пондiс косьмыны горшыс: чеччöвтiс диваныс вылiсь, босьтiс пызан вылiсь мискаöн ырöш, юис дундытöдз — кылöтiс бы лöгсö, но сьöлöмыс пессис не кольмöмсянь, а вöрзис-дзугсис, чеччалiс моросас, кöр тэнö горт шöрын кокнита небис-сьöвталiс соседыт, кöда кужис овны быдöнкöт, только не Викторыскöт, но талун сiйö ни гардiс ас дынас, и нем он понды вермыны керны, лесник, кöть соседыт тöв и гожум син одзат пондас сёйны вöрсис яйсö, син одзат одззамоз жö зверьсö вияс пишальöн, кыяс петляöн и тэ вылын пондас серавны...

Вот тэ и лесник!... Неделя уджалiн и соседытлö козьналiн ни вöрсис богатствосö, кöдö ачыт эн быдты и кöдö колö бы синйыны.

Тöдан кыдз, Виктор, старшöй лесничöйыс — Евграф Титовичыс — эта тошаыс, кöда тэнö корасис уджавны лесникнас, велöтiс: «Виктор Спиридонович, тэ талунсянь лесник, вöрас хозяин. Дорйы вöрсö биись и врагись, синйы быд зверьсö...».

«Кинiсь вöрсö дорйыны?! — медодз Викторыс топ эз и вежöрт Евграф Титовичсö, но вот тэныт, лесник и на...

Видзöт: гортас вайисö яй.

Робертыс вайис яйсö, баитiс рама, ласковöя, а синнэзас лёк би югöр — лöг тэ вылö: вермис бы, туйис бы, талис, мед тöдiн да эн вермы сылiсь дзугны олансö. А тэ эд, Виктор, верман соседытлiсь джендöтны кузь киэсö, ныждыны лэчыт пиннесö!

«Верма... — асьсö нерис Викторыс, эз вежöрт, эз тöд мый керны, гортын öшис, кыдз быдöн одзын виноватöй, кöть отирыс син одзö талунсянь эн мыччись — симöт рожаат павдöт. — Верма... Норась, пур... Он ешты участковöйыс дынöдз мунны, быдöн ни пондас тöдны, что виль лесникыс соседсö чушкалiс — не морт вöлöм...»

Места эз адззы Викторыс, сьöлöмыс пессис — шогöтся шогöт оланыс, а мый понда? Разь одзжык соседыт син одзат вöрсис яйсö котоманас эз ваяв? Сiя ваялiс и мöдiккез сёйисö пöттöдз, сёйисö тöв и гожум, тулыс и ар, кинлöн дыш эз пет, кин вермис, а сiя эз мырддьы. Быд керкуын кык да куим пишаль, кöднö эшö год-мöд бöртi быдöн вермис небны магазинiсь — вöлi бы деньга.

Баня бöрсянь колiс бы шоччисьны, а лесникыс места эз адззы, жöдзис джоджын и сьöлöмас бытшкис ни ем йылöн, кöть одзжык эз и тöд, кытöн сьöлöмыс...

Керкуын жар, мед и öшыныс осьта. Öтöрын кылö вувтö пон. Кадыс шондi пуксян гöгöр, но китсасьö петух. Мöд соседыс, Демьяныс, бöра юöм вина и кылö летö горшсö, лёбö, видö иньсö.

«Мый тэныт? Мед... Мый ме умöльсö отирыслö кери? Нем умöльсö эг кер, — асьсö бурмöтiс бы лесникыс, но пызаныс вылын тыра бекöрыс чувйис. Кутлiс ни бекöрсö, лöсьöтчис швыгрыны ыбöсыс бердö, медбы син одзын эз вöв, мед рез-паз жугалiс, а яй торрес — каньлö да понлö, но кинкö кыдз падтiс, кутiс кисö и горöтчис: «Сулав, Виктор! Эн тэрмась!»

Некöр эшö этадз топ сьöлöмыслö эз вöв умöль, эшö лекарствоэсö топ öмас эз босьтлы, а öнi пань тыр бы юис кöть кытшöм яд, но иньыслiсь комсис эз адззы валерианасö, кöдö öтпыр-öтпыр Наташаыс пешлышавлiс пань йылiсь, и винаыс эз адззись, кöдö чатыртiс бы стопкаись, медбы гывьялiс горшсö, дзугис бöб думаэсö.

— Тэ мый комас öштiн?! — ышки-пойки пырис баняись иньыс, рожаыс рöмсялöм, öгралö.

— Вина кошша, — мурзьыштiс мужикыс.

— Но-о-о, мый лоис? — дивуйтчис Наташаыс, сiя тöдiс, что Викторыс винаыс вылö абу жаднöй, ежели кöр и юыштас — юас только мыдз увья, но мывкыдыс оз вежсьы, да шоччисяс. Жаль разь сэтшöмыслö винаыс?

— Джоджулын бутылкаыс, — висьталiс Наташаыс и юалiс. — Кытшöм бекöр пызаныс вылын?

— Яй вайисö! — ыкöстiс Викторыс.

— А тэ мый ыксан? Вайисö и ась, — пöрöтчис диваныс вылö. — Менам важын ни дульö сöдзö вöрись яйыс вылö, а тэ, лесник, он вай... Вот шоччисьышта, чечча, масьтам яйтö, и керам пельняннез, öддьöн чöскыта сёян, ошкан.

— Ме тэныт масьта! — комсяняс чеччöвтiс мужикыс. — Ме тэныт масьта... — Викторыслöн дрöжитiсö тырппес. — Ме тэнö яйнас верда!

— Но и сёй ачыт... — шуис Наташаыс, но эшö, тыдалö, эз вежöрт, что мужикыс быль кучиксис петö, лöг.

— Нiя менö сэрпöсь яйнас... Нiя! — пиннесö гичралiс Викторыс.

— Но и сёй мыся ачыт! — обидитчис Наташаыс. — Мый ме яйтö эг адззывлы я мый я? Или тшыгьяла...

Ыксыштiсö öтамöдныс вылын и лöнисö, медбы узьны, шы не сетны.

Яйыс бекöрнас пызаныс вылын сiдз и узис, а каньсö Викторыс швыргис öтöрö, только пызаныс гöгöрын бизгис-лэбалiс öтiк гут.

Наташаыс кыдз водiс диваныс вылö, сiдз и сылiс-онмöссис, а Викторыс кровать вылын бергалiс бок вылiсь бок вылö, ружтiс ойбыт, синнэсö куньлiс, осьтлiс, онмöссис бы, но онмöссьыны некыдз эз вермы.

Югыт гожумся ойыс видзöтчис керкуö öшынöт, топ нерис, чувйис боккесö. Викторыслöн поздiсисö юрас быдкодь думаэз, бергöтлiсö одзас олансö, видiсö и дорйисö.

3

Öтöрын öшын увтöт ужйисö мотоцикллэз, этö томмес ыджыт и учöт машинаэзöн ысласисö деревняись деревняö, весь сотiсö бензин. Узьö бы Викторыс и оз узьсьы, кыдз синнэсö осьтас, пызаныс вылiсь адззö тыра бекöрсö, сiдз лöгыс öддьöнжык пондö петны ас вылас, что яйсö эз шупкы соседыс син одзын. Бекöрыс одзас и соседыс сэтöн и эм, кылö, кыдз гортас тарöвтчис-локтiс мотоциклöн, может, бöра локтiс вöрсис или чулалiс кино.

«Кöин чужöм! Лёк зверь! — видiс Робертсö. — Мый тэныт месянь колö?! Мый вылö вайин яйсö?! Адззи бы ме тэнö и эг, мед бы уджалiн аслат клубын, рыттэзнас мыччалiн кино, а луннэзнас узин шондi сайын или сöтiн-вартiн вöрын, кытöн гусясин, кытöн лыйин да кыйин, только бы меным эн шед. Сосед... Пыр тэ ме вылын сералан...»

И пондiс думайтны, кыдз нылö колiс бы овны воннэз моз, а нiя пыр олöны кыдз поннэз: оз тöрö улицаас, öтамöднысö оз бы адззö роднöй деревняын, сiдз, что и карчйöррезнысö янсöтöмöсь джуджыт стенаöн — не курöг оз лэбзьы, не пон оз пыр, и öшымöснысö, кöдö кöркö стариккес гарйöмась öтлаын, пöввезöн торйöтöмась шöри, мед васö кайöттöн эз люкасьö. Баитöны, что муыс паськыт. Кинлö сiя паськыт, а кинлö и абу. Поди, сэтöн виноватöйыс Викторыс, что сiдз олö соседкöт?

Баитöны, что Робертыс тальччöм айыс следö, а Викторыс кин? Лыддьöны миронöн, не айыслiсь шуöны. Мый керан, кöр природаыс миянлiсь оз юась-висьтась: видзчисян зон, а чужö ныв, челядьыс колöны бы сьöд юрсиаöсь, а нiя вдруг чужасö рыжöйöсь, и пондасö отирыс öшлыны да керавны, кин тэнат айыт и кытшöм вöлi дедыт: öтiк висьталас, что тэ дедыт сьöрья, мöдiк лöгыс увья шуас, что тэ мирон. Умöль кылыс, кыдз нять, лякасьö.

Мед... Викторсö учöтсянь шуöны миронöн и ась шуöны: кывнас оз дойдö...

Учöтсянь Викторыс быдмис кöс и öнi мыгöрыс — лы да кучик, не айыс кодь, кöда вöлi топыт — мусянь тэчöм, учöт мыгöра, а кынöмыс, кöть тшыг, кöть пöт, кöть уджалö, кöть оз, пыр одзас öшалö сельнича кодь, но эн кутчись: пыкас не мороснас — кынöмнас лязас.

Учöт мыгöрнас, но визыв вöлi Викторлöн айыс, и зоныс учöтсянь быдмис чож, смев, уна эз баит, но асьсö дорйис.

Медодз Викторсянь горзывлiс Робертыс. Сiя быдмис Иван Егоровичлöн вöзабыдтöм — öтнас, кыдз челядьыс пыр нерисö: «Амос — ыб вылын кöз... Вöзабыдтöм — кöза йöлöн быдтöм!.. Бе-е-е, баран...» — Ох, мый сэтöн вöвлi, кыдз лöгасьлiс Робертыс! Быдöнкöт кутчисьлiс тышкасьны, кинöс шедас, сiйö курччалiс да гыжьялiс, но унажык боккезас сёйис ачыс: шедас, тэчасö кыдз колö и бöра котöртö горзытöн гортас и норасьö айыслö: «Ая, менö мироныс вартлi-i-iс». Ох тэ, вöзабыдтöм, кöза йöлöн быдтöм! Кöр тэнö Викторыс вартлiс? Эн я ачыт йöрыс вывсянь петшöррес коласö усь!..

Амосыс (сiдз Иван Егоровичсö шуисö ас коласын) разь кывзас кинöскö, сiя некинлö оз верит, топ челядьыс ас коласаныс оз вермö миритчыны и ош моз ыксö: «Менчим зонöс!.. — соссэсö пуджö, — Масьта! Керала!.. — лöг, синнэс вирдалöны. Мылякö Иван Егоровичыс эз жö кутчисьлы чер бердö, а нетшкöвтас петшöр и топ учöтик вöтлiсьö челядьыс сьöрын. Думайтö кинкö ошкас... Челядьыс пышшалöны, а ыджыттэс бöрсяняс сералöны: «Бöра орсö бöб вирыс весьолiсьыслöн...»

Викторыс быдмис Роберткöт öтлаын, умöля быдмис Викторыс, кытöн вöлi тшыг, кытöн пöт и паськöмыс бырöм да вочöм — не Робертыслöн кодь, кöда эз тöд, мый пасьтавнытö, öтiк зон эд, мый эм — сiя быдöс сылöн.

Кадыс лэбзьö-чулалö. Челядься оланыс топ вöлi тöн, топ вöтасин, саймин, и — абу ни.

Викторыс оз узь. Сiйö пурöны думаэз. Тöдвылас чулалöм годдэз, нем бы тöдвылö уськöтны тшыг кынöм да умöль паськöм. Öнi олö и пасьтасьö отир моз жö, немöн некин сьöрись оз кольччы, гордитчö и ошшасьö уджöн, но оз кешитчы, а вот Робертыс, кыдз кешитчис учöтсянь, топ сы кодьыс некин абу, сiдз лэбтö асьсö и öнi, топ тэ сыся сё ни мыйöнкö умöльжык.

Лöг петö сэтшöм мортыс вылö, кöр сiя тэ вылын сералö. Викторлöн сьöлöмыс оз лöсьöтчы соседыскöт, душаыс бергöтчö мöдöрö, быдöс мый вöлi и чулалiс, вдруг сувтiс паныт и видзöтö веськыта синнэзö да висьталö: «Тырмас сiдз! Кöркö колö жö веськыта висьтавны кин тэ и кин сiя!»

— Мый он узь? Кин курччалö?! — диваныс вылын лэбтыштiс юрсö Наташаыс, мурзьыштiс.

— Лудыккес сёйöны! — эрзыштiс Викторыс, эшö öддьöнжык лöг да обида пондiс пöдтыны и зэлöтны мороссö.

Сiя видiс асьсö, что оз куж овны, кыдз мукöдыс велалiсö петны из увтiсь и ваись, кыдз öманыс киссьö небосис и öшынöт пырö счастьеыс, кыдз кывнаныс небыта ольсалöны, морос берданыс жмитöны, юкталöны и вердöны, но бöрсянят сьöлалöны, а пантасясö, бöра öтлаын — кошшы сэтшöм ёрттэсö, кутчись! Тэ жö лоан виноватöн, тэ вылö жö поннэз моз уськöтчасö, пурасö-летасö. Сэтшöммес уна лёбöны честь да совесть йылiсь, колö и оз кöритöны-чапкасьöны эна кыввезöн, ёрттэзнысö жö тальöны сiйöн, что тэ веськыт — мый синнэзат, сiя и öмат, висьталан-кералан, ва ньылыт он уй, шондi сайö он саясь, сьöкыт удж он орддьы. Не эта понда я, Виктор, тэнö учöтсянь эз любит соседыт?

«Поди, сiйöн... Но и ась... Кула да сэтшöммес моз ог понды овны, понда тшыгьявны, но Роберт кодьыслö ог юрбит, ог понды кыскасьны хитрöй отир одзын, кöдна талун тэ дор, ашын тэнö вузаласö рюмка вина вылö. Узьны бы колö».

Натьтö, чулалiс ни ойшöрыс. Öтöрас топ пемдыштiс и бöр ни лоис югытжык. Пызаныс вылын тыра бекöрыс бöра пондiс тыдавны буржыка. Рытсяняс колiс бы сiйö шупкыны Жучкаыслö, но öнi лесникыс аслыс чорыта висьталiс: «Сулав! Мед олö... Мыйöн думайтан висьтавны, что соседыт бöра джагöтiс лосьсö?.. Ашын чечча и муна сельсоветö да быдöс висьтала!»

«Баран тэ. Кинлö висьталан, кöр ашын кресення и сельсоветас некин оз ло? Поди, милицияö звонитан? — нерис лесниксö мöдiк голос.

Викторыс пессис-джендöтiс гожумся ойсö и онмöссис сэк, кöр öшыныс увтын пондiс сьывны кытшöмкö каёк и öзйис ни асывся заряыс.

— Яйтö кытчö воштан? — саймöтiс Наташаыс. Сiя лэдзöма ни мöссö и öнi бергалiс гор гöгöр.

«Яй?... Кытшöм враг кышалiс меным этö яйсö?!» — чеччöвтiс ольпась вылiсь, перыта кöмалiс вешьян, иньыс вылö дзар эз кер, босьтiс бекöрсö и котöртiс погребö (погребын гожум кежас гуö чапкöм лым, кöда оз сыв августöдз). Лымыс пытшкö дзебис яйсö и ыбöсас öшöтiс замок.

Асылыс гажа, шондiа. Луд вылын сыркьялiс кыз лысва: луныс лöсьöтчис лоны жар. Топ син одзын быдмис картошка. Межа вылын цветитiсö ни öтi-öтi горадзуллез.

— Кöть бы васö кайöтiн! — Наташаыс ыкöстiс посöдзсяняс. — Кытшöм тэнö асывсяняс пон пурис? Юртö öшöтöмыт да ветлöтан, кыдз вузалöм!

Викторыс нем эз шу, улицаöт иньдöтчис сельсоветлань. Пантасисö öтi-öтi морттэз. Кинöс адззис, кинöс эз, кинкöт здоровайтчис, кинкöт эз.

Сельсовет посöдзын гардчис ни отир. Сэтöн жö и сельсоветiсь предыс. Сiя лэчыта видзöтiс лесникыс вылö, здоровайтчис да юалiс:

— Кытчö одз котöртан, Виктор Спиридонович?

— Алексей Иванович, ме бы тэкöт мыйкö баита, — висьталiс гажтöма.

— Лок, баитам, — шуис Алексей Ивановичыс, лэдзчис посöдзсис да висьталiс. — Талун субботник. Мунам бы туй керны и ключсö сельсоветсис гортö коли. Алексей Ивановичыс дыр ни уджалö сельсоветын предöн, кужö овны отиркöт, некинöс весь оз вид, оз дойд, вермö миритны и свалитны, кытöн дзескыт — отсалас, кытöн курыт — öтлаын тöждiсяс. Кужö отирыскöт овны Алексей Ивановичыс, уджалö и гажöтчö, кытöн туйö, тэкöт юас вина, сьылас и йöктас, но тöд асьтö...

Алексей Ивановичыс моз деревняын некин сiдз оз вежöрт олансö...

Öнi Викторыс да Алексей Ивановичыс отир син одзись кежисö сельсовет сайö.

— Мый лоис? — гажтöма юалiс предыс, топ важын ни тöдiс, мый лесникыс сьöлöм вылын, и колö, видзöт, сельсоветыслö кык морт коласын гуддисьны.

Викторыс жалейтiс ни, что талун локтiс Алексей Ивановичыс дынö, но дзир-бар керис ас гöгöрас да сибдöм голосöн висьталiс:

— Алексей Иванович, соседö эд бöра вöрас яй керöм...

Алексей Ивановичыс дыркодь видзöтiс лесникыс синнэзö, топ сылö эз верит, сыбöрын виноватöя шынньöвтiс, сьöкыта ловзисис, чужöмсö бергöтiс мöдöрö и пондiс думайтны.

— Мый пондам керны?!

— Мый тэ бы керан? — кыдз обидитчис Алексей Ивановичыс. — Кутан бы яйнас?

Чикиссес сельсовет крыша бердö быд год лякöны поззэз да пöжöны пияннэз. Каёккес шырöны-лэбалöны, челядь моз чирзöны-гажöтчöны гожумыс вылö. Вдруг нiя уськöтчисö рака вылö и пондiсö сiйö кокавны — гöннэз лэбзьöны. Дöнзис я ракаыслö учöтик каёккезсянь?

Викторыс видзöтiс кайесö, видзчисис, мый эшö висьталас Алексей Ивановичыс, но сiя одзлань нем эз шу, и лесниксö пондiс пöдтыны лöг: горöтчис бы öтiк кыв, мед йиджис сьöлöмöдз, но асьсö видзис, только пиннес пыр висьталiс жö:

— Поди, тырмас Роберт коддеслö?..

— Мый тэ и баитан, Виктор Спиридонович? — сэтчö горöтчис Алексей Ивановичыс. — Тэ разь миянлiсь отирсö он тöд? — кöритiс ни лесниксö. — Быдöнныс эд öтiк гуна вылын вартöны... Öтлаын сёясö-юасö, а ми тэкöт кольччам враггезöн... — Дзарнитiс веськыта Викторыс синнэзö, аслас синнэзын шогöт-тоска, и казялiс, что Викторыс лöг, поди, Алексей Ивановичыс вылö ни, сэк виноватöя шынньöвтiс (эн горзы мортыс вылö, Виктор Спиридонович, кöр ми тэкöт кыкöн). — Тэ эд яйсö вайöмыт жö...

— Вайи! — Викторсö кыдз чушкалiс, оз и тöд, мый сыкöт лоис. Кин вылö надейтчыны отирыс коласын, ежели... Алексей Ивановичыс ни сiдз баитö.

Тöдiс, что вермас петны этадз, но веритiс Алексей Ивановичыслö...

Сэсся эз понды баитны сельсоветiсь предкöт, перыта бергöтчис и мунiс гортö да иньыслö висьталiс, медбы Наташаыс пуктiс павжун.

— Кытчö кресенняас мунан? — пондiс видны Наташаыс.

— Колö! Ме öнi не колхозын...

— Начальник — рос угöлын умывальник. Отирыс пондасö турунасьны, а тэ сё пондан вöрат номмесö вердны, — локтiс дынас, лöсьöтыштiс йöрнöссö, малыштiс спинасö да рам голосöн, кытöн тöдчис обида да гажтöм олан, шуис. — Мыйлö тэ кутчисин эта уджö? Эн куж уджавны колхозас да гортын овны, öнi аслыт враггесö öктан. Ме ог понды лысьтны öтöрас петны...

Викторыс курччöвтiс тырпсö.

— Адзза эд мый сьöлöмыт вылын пусьö. Олiн бы Ныртöмыс моз...

— Наташа! Тэ тöдан ме кытшöм... Некытöн няньсö весь ог сёй! — горшсö зэлöтiс тшакыль.

Наташаыслöн пиньöвтчис öмыс.

Викторыс петiс керкусис, ыбöсöттяс лэдзис ыджыт гут.

Ашынас жö Роберттэзын кошшисисö милиционеррез да лесниккез, но нем эз адззö. Сiдз, лесник, одзжык вöлi и сiдз лоас.

— Мый нö тэ? — лесничöйыс юалiс Викторлiсь. — Сiдзкö бöбöтiн Евграф Титовичсö.

— Эм! — Викторыс котöртiс гортас, пырис погребö, но сэтчин бекöрнас яйыс эз ни вöв: бекöрыс йöр бердын, сiйöн орсiс Демьянлöн кычаныс.

И лесникыс ёрттэс одзын сулалiс, кыдз сiйö судитiсö лыйны, но кытчöдзкö эз вийö: видзöтам эшö, мый тэись петас!

— Мый керан? — гажтöма баитiс Евграф Титовичыс. — Сэтшöм миян удж, Виктор Спиридонович. Кытчöдз отирыс оз пондö вежöртны, что вöрыс абу йöзлöн, а асланым, сэтчöдз миян уджным этатшöм и лоас.

— Пышша! — шуис Викторыс.

— Бöб баснитö эн лёб! Лок жö, пыралам школаö. Директорсö бы колö адззывны, баитны, поди, челядьыс мымдакö вöрас отсасясö. Колö бы эд санитарнöй рубка керны.

— Челядьыс оз ни велöтчö, — висьталiс кинкö.

— Мыля оз велöтчö? Нылöн эд, натьтö, экзаменнэз.

4

Школаын директор — кöсыник да учöтик мыгöра, локтiссес вылö видзöтiс кымöсыс увтöт — очкиэс коласöт, кöдна сылöн лэдзчисьöмась нырыс вылö, и чужöмыс лёк — шынь оз кер, топ лесниккесö адззис медодзись, и нiя сылö оз колö, но минута бöртi лоис рад ни.

— Пуксьö, поди, кынöмныт сималö и горшныт косьмö? — сё сiдз жö очкиэс пыр видзöтiс Павел

Николаевичыс.

— Пырим не гöститны, Павел Николаевич, — диван вылö пуксис Евграф Титовичыс, лöсьöтыштiс моросыс одзись галстуксö, кöдö голясис эз чапкы не гортын, не вöрын, малыштiс сьöд тошсö. — Павел Николаевич, ми тэ дынö весь эг локтö. Отсöт бы колö... Мый челядьыт керöны?

— Челядь?.. Экзаменнэз сетöны, а сыбöрын гожум. А мый?..

— Колö бы черрезöн вöрын уджалыштны... Абу сьöкыт уджыс, но вештам, ог обидитö. — Бöра малыштiс тошсö. — Кокнит уджыс, но номмес сёйöны и, натьтö, жар лоас... Видзöт жö, луннэс кытшöм гажаöсь!

— А тэ, Евграф Титович, роднöй менам, номмезнас кинöс полöтан?! Гажöн пондiс баитны Павел Николаевичыс. — Миян челядьыс, Евграф Титович, деревняын быдмöны, öнджа...

Любитö ошшасьны Павел Николаевичыс, шынь оз кер. Кин мортсö оз тöд, поди, думайтас, что директорыс быздö-бöбöтö, но Викторыс сiйö тöдö и мортыслö веритö.

— Öнджа, миян челядьыс мукöдыс гожумнас вöрсис оз и вовлö. А мый нылö эшö керны, кöр одзза моз учöтся-учöтöн колхозас оз уджалö?

— Может, пишаллезöн ветлöтöны? — юалiс лесничöйыс.

— Ветлöтöны. А мыля бы не ветлöтны? Ме, Евграф Титович, пишальнас пондi ветлöтны, то этатшöмсянь, — Павел Николаевичыс мыччалiс пызаныс сувдöн. — Дас год вöлi и немымда эг тшык. И öнi вöрыстöг ог вермы овны. Но... Лöгасьö, кöть эдö, а тi лесниккес виноватöсь! Мыля сiдз вöрсö сетат керавны? Видзöтö жö öшынöттяс кытшöм миян вöрыс лоис плеша, кыдз зверь-гаг сёйöм. Быдöс масьтöны-кералöны! Этасянь и зверьыс эз ло! Шогалö, ёрттэз, менам сьöлöмö, висьö, а керны нем ог вермы. — Нырыс вылiсь очкиэсö Павел Николаевичыс вештiс синнэс весьтö, чужöмыс вылын öзйис гаж. — Во, Виктор Спиридонович! Молодец, зонка! Сiдз колö уджавны! Сiдз колö, Евграф Титович! Зэлöтны браконьерресö, няпыртны, мед нылö немöн лоас лолавны, а то... Мый тi думайтат?! Мый петö? Тöв и гожум пишальöн, лыям и виям, паздам, гусялам, кöдö сёям, кöдö сiсьтам да ошшезлö вердам, поннэзлö чапкам. Тьфу! Абу миян хозяиныс...

— Кыдз абу хозяиныс? — обидитчис Евграф Титовичыс.

— Абу, мыся!

«Кöть öтiк морт адззисис»... — Викторыс ловзисис ни кокнитжыка, смевжыка ни видзöтiс Павел Николаевичыс синнэзö, кöдö одзжык топ тöдiс бура, но видзöт жö кытшöм вöлöм школаись директорыс! Видзöтiс Павел Николаевич синнэзö, сы сайись öшынöт адззис вöр: кытöнкö керöсыс увтын кöззэс коласiсь кайис кизерик тшын.

— Сотчö эд вöрыс! — Евграф Титовичыс нюжöтiс голясö öшынлань.

— Котöрт чожажык, сотчö вöрыт! — серöмтчис Павел Николаевичыс. — Тэнат синнэт очкиэзтöг, но месся адззöны умöльжыка. Эта пекарняись тшыныс кайö!

— Кайö тай... — виноватöя ни горöтчис лесничöйыс и содтiс смела. — Тэ эд, Павел Николаевич, сэтшöм жö браконьер!

— Ме?! — öмыс резьдiс директорыслöн. — Ме, Евграф Титович, браконьерыс культурнöй. Мöйму годнас öтiк кöч лыйи, а таво эшö эг, но арнас вия, вот адззылан! И пишальыс менам регистрируйтöм, быд год одиннадцать руб взноссэсö вешта. Верма билетсö мыччавны.

— Сё жö тэ, Павел Николаевич, браконьер, — одзлань баитiс лесничöйыс. — Челядьсö он вермы велöтны медбы айезныс кодьöсь эз ни быдмö.

— Эта песняыс мöдiк, — сэтчö шуис Павел Николаевичыс. — Сэтöн, поди, ме быль виноватöй.

Баитiсö унажык природа йылiсь, касьтылiсö колхозiсь олансö, кöда öнi деревняын унаöн кокнитжык, но дыш лоис отирыс, оз бы уджав, а бура сёйö-юö, кöркö ой и лун уджалiс, некöр вöлi пишальнас вöрас котрасьны и зверьыс унажык вöлi.

— Колöны челядьыс? — медбöрын юалiс Павел Николаевичыс, осьтiс дирекцияись ыбöс и ыкöстiс. — Пётр Иванович!

— Мый, Павел Николаевич?! — кыдз кытiськö одзаныс усис учöтик мыгöра зоночка.

— Котöрт, Пётр, интернатас да висьтав челядьыслö, мед нiя öнi жö локтöны татчö. Вежöртiн?

— Ме эд, Павел Николаевич, кöть мукöдпыр и двойкаэз босьтала, но юрö эшö пельпоннэз вылын эм! — шынньöвтiс Петькаыс и öшис, а директорыс бöрсяняс ошшасьö. — Во, лесниккез! Эта зоночкаыс животнöйесö медöддьöн любитö. Школаын гожумбыт вердö кроликкез — шатьöн гортас он вашöт!

— Бöра, поди, бöбöтан, Павел Николаевич? — сералö Евграф Титовичыс, кöр нiя коридорöт мунiсö восьмöй классö, кытчö сьöрсьöн-бöрсьöн пырисö ни велöтчиссез.

Партаэз сайö пуксис восьмöй класс — ыджытöсь ни челядьыс, кöдна школаись директорся ёнжыкöсь и мыгöрнаныс кузьжыкöсь да паськытжыкöсь — кытчö тэныт, Виктор Спиридонович, кöр, учöтсянь эна челядь моз весь эз видзö — уджалiн и пасьтасин, кыдз ен шуис.

Челядь одзö сувтiсö куимöн.

— Челядь, тi кылiт, что миян киномеханикыс петляöн кыйöм лось, а? — челядьлiсь веськыта юалiс школаись директорыс. — Лосьыс эд не сылöн вöлi, сiя зверьсö эз быдты.

«Ошкас, натьтö, кинкö миянöс, что сiдз баитам, — челядьыс вылö видзöтö Викторыс и ас кежас думайтö, кöр томжыккес синнэзiсь оз адззы, медбы кинкö вöлi ны дор.

— Лосьыс, челядь, государстволöн — отирлöн богатство, — сэтчö шуис Евграф Титовичыс. — Кыдз вот эта вöрыс жö, кöдö заптам-кералам быд год и син одзын вöррес чинöны. Вит год бöртi эшö эг думайтö, что талун нем лоас керавны, етша ни кольччас бур вöрыс, и зверьыс быд годö сё лоас етшажык, да эшö сэтöн жö тöв и гожум браконьеррес...

Ыджытжык челядь коласын парта сайын пукалiс учöтжык ёртныс — этö Петька. Сiя топ пукалiс ем вылын: сiйö и керис, жöдзис местаас, и синнэзас орсiс аскодя гаж-югöр, кыдз зоночкаыс мыйкö висьталiс бы или ошкис лесничöйсö, но эз лысьт.

Гырисьжыккес жö пукалiсö мыррез моз, кыдз эз и кылö Евграф Титовичсö, но лесничöйыс смела баитiс одзлань.

— Тi видзöтö жö челядь, мый петö: öтiк мортыс яйсö сёйö кык центнерся унажык и некытшöм деньга сы понда оз вешты, а мöдiккес?.. Да мед бы сiя и сёй, ежели кынöмыс сiдз сылöн сималö, ежели сiя быдöнся кодяжык, но мунö жö вöрас да видзöтö мый керсьö: сэтчин эд, ёрттэз, быд шор пöлöн öшалöны тросiсь гардöм петляэз, кöднö видзöтлöны и озö, а эта коста петляэзас джагалöны зверрез да не öтiк-кык, а десяток-мöд — тоннаэзöн сiсьмö яй, а кöдö и ош кыскалö. Мый вылö ме этö тiянлö висьтася? Мыся, миян яйыс магазинас оз тырмы, а вöрас сiсьтам.

Челядьыс коласын некин шы эз сет, веськыта видзöтiсö синнэзö.

Евграф Титович дугдiс баитны, и Павел Николаевичыс юалiс:

— Вежöртiт, челядь?

Некин шы эз сет, только не öтмоз видзöтiсö синнэзö.

— Öнi эз вежöртö, сыбöрын вежöртасö, — лесничöйыслö висьталiс директорыс, вишкыштiс нырнас и содтiс. — Сэк, кöр зверрес кольччасö только зоопаркын...

— Павел Николаевич! — вдруг парта сайись сувтiс Петька — медучöт велöтчисьыс. — Ме телевизорсис адззылi, кыдз лоссесö видзöны фермаэзын. Поди, ми öтiкö вöрсис кутам жö да пондам видзны? А то видзöтö жö: быль эд вöрсис браконьеррес быдöс зверресö виясö! Сыбöрын юрнымöс пондам гыжьявны да некысь ни лоас вайнытö... А, Павел Николаевич?..

Петькаыс баитiс ыджыт морт моз, сэтшöма, топ дедыс моз жö олöма восемьдесят шесть год и тöдö, кытшöм ыб вылын быдмö зöр, а кытöн шогдi — хозяин! Зонкаыскöт туйö быдöс керны, висьтав — биö и ваö уськöтчас.

— Тэ, Петя, кытчöдз верд кроликкетö, а сыбöрын ми тэкöт пондам думайтны, кинöс вайöтны вöрсис, может, ошöс кутам, может, кабан пондам видзны. Кывзы: Евграф Титовичыс ошшасьö, что вöрас пö кытiськö локтöмась порссез — велöтчисьыслö висьталiс директорыс.

— Локтöмась! — ошшасис Петькаыс. — Кöчыбись бригадирыс ошшасис жö, что таво арнас гурттэзсис джын картошкасö сёйöмась.

— Мый керан, Петька? Миянлiсь крысаэс джоджувсис картошкасö гусялöны, а Кöчыбас ыб вывсис сёйöны. Кытшöм хозяин, сэтшöм и порядок.

Поди, Павел Николаевичыслö велöтчисьыскöт бригадирыс йылiсь йöззэс дырни эз бы ков баитны, но сiя баитiс, — ачыс тöдiс, мый керö, сiя велöтiсь, а тэ, Виктор, куим лунся лесник.

— Челядь, Евграф Титовичыс тiянöс корö деньга шедтыны — вöрын уджавны. Кыдз думайтат? Отсалат, а тiянлö сы понда вештасö. Мымдаöн вештат, Евграф Титович?

— Кыдз уджалат, сiдз и вештам. Пять-шесть рубöн усяс луныс.

...Вит лун Викторыс челядьыскöт ветлöтiс вöрö: черрезöн кералiсö шать кодь векнит пуоккез — шочöтiсö рассэз. А делянкаэз вылö вöрыс быдмис — öтамöдсö пöдтiс и колiс сэтöн колассис керавны — шочöтны шать кодь пуоккез, сэк колана пуэс чожажык быдмасö-нюжöтчасö вевдöрö.

Челядьыслö вöрын уджыс шедiс сьöкыта: быд лун колiс шагнявны грань кузя вит километрася унажык, сэтöн эшö номыс да лöдзыс лун-лун бизгö пеллез одзын, курччалö рожа, пырö синнэзö, и ньылöмсянь ляч ва спина, но велöтчиссес эз норасьö, топ орсiсö да уджалiсö, немымда эз мыдзö, только Петькаыс жö, кöдö эз бы нуöтö вöрас, но некин эз вермы видзны гортас, гажтöма шуис:

— Сьöкыт, воннэз, деньгасö шедтыны...

— А тэ мый думайтiн? Думайтiн, вöрас, кыдз гортын жö, кыдз дедытлiсь сказкаэсö жö кывзыны? Тырмас, Петька, весь овны! — пöрисьжыккес сералiсö томжыкыс вылын.

— Ме и гортын весь ог ов, — обидитчис зонкаыс. — Некытшöм уджись ог пов.

— Мыля сэк люшмин?

— Кин люшмис?!

— Петька, а кроликкетö кин вердö? — челядьыслiсь сорис баснисö Викторыс.

— А дедö мый вылö? Дедö вердö и юкталö. Эн думайт, Витя дядь, что сiя пöрись, дак нем ни оз вермы керны! Таво эшö садниксö ачыс гöрис.

— Но-о-о...

— А мый нö... Тятюö вöвсö оз куж доддявны, а йöзсö стыд жö корны, дедö, рас — доддялiс! Два — гöрис! Эшö вöлi Гырнич Митиперыс корö, но дедö шуö: «Винасö, Митипер, кужан юны, ачыт и гöр!» — сералö зонкаыс.

Сiдз и уджалiсö, кытöн орсiсö, а кытöн лун-лун эз и шоччисьö.

Субботанас вöрись тэрмасисö гортö. Лесникыс ёрттэслö висьталiс, что деревняö пондасö мунны веськыта, только ась оз норасьö, туйыс оз ло гладь — мыр да колода.

Мунiсö веськыта. Вуджисö лог. Коккез увтын талисö чашья, повзьöтiсö дозмöр, каёккез, адззылiсö ошлiсь следдэз. Лун уджалiсö, топ мыдзисö, но öнi чирзiсö да сералiсö вöр тыр. Одзас мунiс лесникыс, кытöнкö коласаныс Петькаыс. Вдруг медучöтныс пондiс горзыны да сiдз, что Викторыс повзьыштiс, думайтiс ни, что зоночкаыс падмис, усис да доймис.

Лесникыс сунки-банки котöртiс Петькаыс дынö, кöда пукалiс колода дынын, киас видзис кöчокöс, аслас синваэс сiдз и визывтiсö рожабаннэзöттяс. Гöгöрас сувтöмась ёрттэс да модьöны, видöны зонкасö.

— Мый лоис, Петька?!

— Кулiс зайчикы-ы-ыс! — бринь горöтiс зоночкаыс.

— Ме тэныт шуи, мыся...

— Балда! Тэныт жö висьталiсö, что кöчоксö лэдз, а тэ... Ы-ы-ы, сё уна тöдан!

— Эд споритö челядь. Мыля кулiс?

— Ме мыйöн тöда? — дугдiс горзыны Петькаыс. — Может, öнджа... пиам пöдiс.

Челядьыс лöга видзöтiсö учöтжыкыс вылö, тышкасисö номмезкöт да видзчисисö, мый висьталас Викторыс.

— Тэ Валериан Васильевичыс кодь жö! — видчис Ваняыс и пондiс висьтасьны. — Мöйму гожумнас ми эта коста жö ветлiм турпоходö. Тöдан эд, кытчö пуксисö космонавттэс... Вот мунiм, мунiм и локтiм Кокорникас. Видзöтам — ыбыс вылöт кöч котöртö. Валериан Васильевичыс пельпоныс вылiсь лэдзис пишальсö и — бух! Вийис кöчсö.

— Бöбöтан, Ванька, — кинкö эз верит челядьыс коласiсь.

— Оз бöбöт! Ме ачым ныкöт вöлi.

— Ме бöбöта? — обидитчис Ванькаыс. — Да ме... Быль дядь Витя! Сiдз и вöлi...

— Петькаыс сэтшöм жö... Ме да ме! Любита животнöйесö, а ачыс...

— Проститö Петькасö, челядь, — ёрттэскöт ни баитö лесникыс. — Сiя эшö учöт, мöдöтпыр сiдз оз ни кер. — Кыдз вермис, сiдз и миритiс челядьсö, висьталiс, что шондiыс пондас чожа пуксьыны, колö бы тэрмасьны гортö.

Викторыс челядьсö любитö, сылö гажа ныкöт уджавны вöрын, топ ачыс томмис, лоис Петькаыс кодь жö. Баитiсö да мунiсö одзлань.

Шондiыс вöрыс весьтын öшалiс сё лажмытжыка. Колö бы тэрмасьны, кöр гортын эшö баня. Лесникыс вожмöвтiс колода и бöрсяняс кылö:

— Дядя Витя!

— Локтö жö да видзöтö...

Öнi челядьыс инмöмась лось лыэз вылö. Зверьыс кулöм кöркö мöйму арнас, кольччöмась только гöныс да лыэс, тыдалö и ошыс яйсö абу сёйöм.

— Кин сiйö?! — повзис Петькаыс.

— Тэ кодь жö браконьер, Петька.

— Браконьер, челядь. Лыйис, бергöтчис и мунiс, а ранитöм зверьыс пышшис кытчöдз вермис да усис. Сэтöн и сiсьмис! — лöга баитiс Викторыс.

— Война я мый я кайеслö да зверреслö вöлöм?! — оз вежöрт Ванькаыс.

— Тулыснас разь асыввезнас эн кыв, кыдз вöрас гымалiсö пишаллезнас? — шуис Петькаыс.

— Локтö, челядь. Номмес сёйöны, — ёрттэсö тэрмöтö лесникыс, и вöрын уджалiссес одзлань тэрмасьöны, мунöны гортö кöзъяинöт ни, кытöн пемытжык и ыркытжык. Мунöв-керисö и одзаныс пондiс тыдавны кöззэз коласöт кушин.

— Петам ни тыдалö! — гажöн висьталiс кинкö челядь коласын.

— Мыдзит?

— Эгö! — горöтiсö öтiк öмись, кыдз Викторыс ёрттэслö козьналiс вын.

Чожа лесникыс повзьöмöн шуис: «Эта мый?!», кöр петiсö не шутём вылö, а сэтшöм местаö, кытöн — асьныс оз вежöртö: одзаныс вöрыс кыдз сотчöм — пуэс сьöдöтöмась, косьмöмась. Ежели бы вöлi пожар, а сэтöн листыс вöрыс вылын абу, но пуэс сулалöны, и кайез оз кылö...

— Мый эта сэтшöмыс, Витя дядь? — челядьыс гöгöртiсö лесниксö, чужöммезныс вылын повзьöмась кодь. — Мыля пуэс косьмöмась?

— Натьтö, сiйöн дозмöрыс и кöчыс кулiсö, — гажтöма ни баитö Петькаыс.

— Петька миян быдöс тöдö, — серöмтчис Ваняыс.

— Поди, пуэсö гаг сёйис...

— Поди, тэнö, Петька, гагыс сёйис, — сiдз бы и гыжьясьöны.

И сэтöн Викторыслö кыдз кинкö вачкис: мöйму жö татöн вöрсö киськалiсö самолётсянь. Яд резiсö... И таво ни бöра лесничествоас Евграф Титовичыс баитiс, что кыткö лöсьöтчöны вöрсö киськавны. Видiс лесничöйыс нiйö, кöдналö мый тöдвыланыс усяс, сiйö и керöны, синнэзнаныс оз адззö, что ядыс вöрас — медлёк враг, етшажык добро керö, унажык вийö.

— Тэ бы кытчöкö гижин, Евграф Титович! Норасин бы, а? — лесничöйыслö, баитiсö ёрттэс.

Евграф Титовичыс кымöртчис, дыр видзöтiс виноватöя лесникыс вылö, топ нiя пантасисö только талун, гыжьялiс юрсö да шуис:

— Гижи, нораси, ёрттэз, но миян коддесö етша кывзöны. Отирыс сэтчин (мыччалiс кымöрас) пукалöны миянся грамотнöйöсь — учёнöйез, быдöс кужöны и тöдöны, а ми мый? Кывзö да керö, а од пондö... Сенькаыслiсь шапкасö бокö вештасö!

— Эшö гиж!

Сэтшöм басни вöлi лесничествоын, а челядьыслö мый висьтавны?

— Ядöн вöрсö киськалiсö, — веськыта лесникыс висьталiс ёрттэслö.

— Кытшöм ядöн?! Мый вылö? Кин? — öтiк öмись юалöны томмес лесникыслiсь, но сiя бöра оз вермы бура висьтавны, мыля яднас киськалöны вöрсö, кöр быд киськалöмыс бöрсянь видзöт жö мый лоö.

— Судитны колö! — шуис Петькаыс.

— Мунам эстiсь, — одзлань иньдöтчис лесникыс. Сiя думаэзнас орддис бы косьмöм вöрсö, но кыт? Кытчö сибалöм зэр моз ядыс, сэтöн и косьмöмась пуэс. А кытчöдз сiя сибалiс?

Косьмöм вöрын вдруг öшисö номмес, коккез увтын кажöтiс-чегласис кöс ув. Викторыс тэрмасис, сiйö полöтiсö думаэз: «А вдруг ядыс шедас челядьыслö?!..»

Тэрмасис лесникыс, бöрас ружтiсö ёрттэс, только Петькаыс жö эшö öтпыр ыкöстiс: «Челядь! Бöра эд кöч кулöм!», но öнi некин ни эз сувт кулöм кöчыс дынö.

— Эн ни лёб, Петька!.. — висьталiс кинкö ёртныслö. «Ох, Петька! — сьöкыта шагнялiс вöрын лесникыс да думайтiс ас кежас. — Шы эн сет, зонка, видзöт кыт мунам да эн вунöт, мый адззылан, поди, пригодитчас...»

Косьмöм вöрöт мунiсö джын час етш, но топ кадсö öштiсö джын лун и сiдз тэрмасисö, что чужöммезныс вылiсь вотялiс ньылöм.

Гортö локтiсö, кöр шондiыс саясис ни керöсыс сайö.

5

Викторыс полiс, что сылö мыйкö керасö сэтшöмö, что пондас горзыны, а сэтöн öшымöс... Серöм петö и лöг. «Мед керöны, оз дойдö! Гожумнас ваыс быд öшымöсын эм, мед кайöтны лоас ылiсьжык, но кайöтасö...»

Сералiс ассис враггесö, думайтiс, что Наташаыс жö унажык пондас видчыны: «Эта тэ понда! Пон юртö сюйыштiн, кытчö оз ков. Сiйöн сiдз и керöны!» Но иньыс талун эз понды пурсьыны, только шуис: «Сэрпöсьтiсö öшымöссö. Кисьтiсö бензин... Кöр öнi бензин дукыс öшас?..» — «Машина вайöтны да насосöн лэбтыны васö... — лесникыслöн чужисö планнэз. — А поди, кыдзкö сiдз?.. Котрасьны Павел Николаевичыс дынö, сiя тöдö химиясö, сетас кытшöмкö реактив...»

Эз и сёй, иньдöтчис школаö.

— А, здорово, лесник! — школа посöдзын сулалiс Павел Николаевичыс да киас видзис краскаöн банка, лöсьöтiс ныр вывсис очкиэсö. Тэ мый, Виктор Спиридонович, кресеннянас жöдзан? Или бöра браконьеррез кошшан?

— А тiйö мый кресенняас уджалат?

— Ме? Сэтшöм кад, зонка, вöтас, что гробись чеччöтасö! Разям да вочам, вочам да бöр разям, видзöт, школасö тöв кежö лöсьöтам.

Баитiсö-керисö, Викторыс висьталiс, мый понда локтiс.

— Да-а-а, — юрнас öвтiс Павел Николаевичыс. — Кöркö ми этадз, зонка, эг олö. Грех вöлi öтамöднымлö и лёк кыв висьтавны... Но тэ эн тöждiсь, мыйкö лоас... Мунам да видзöтам öшымöстö, — директорыс кисис чапкис банкасö и иньдöтчис Викторрезлань.

Тэрмасисö, топ öшымöсыс сотчис.

— Кывзы Виктор, а тэ сельсоветас эн норась? Колiс бы норасьны, — шуис вдруг Павел Николаевичыс.

Сiя казялöма лесникысся одзжык сельсоветсис предсö, и видзчисьтöг улица тыр ыкöстiс:

— Алексей Иванович, сулав жö, ме бы тэнчит мыйкö юала!

Алексей Иванович лэбтыштiс юрсö мотоцикл дынiсь, кöдö мыйкö чувйис, бергöтчис перыта локтiссез дынö. Директорыс сибöтчикас сярзис ни:

— Председатель, тэ нем он тöд? Зонкаыслö эд öшымöсас бензин кисьтöмась, — гогиньтыштiс юрнас Викторыслань, — сэрпöсьтöмась öшымöссö. Поди, фашисттэз моз травитны лöсьöтчисö. А мый?

— Кытшöм тэ фашисттэз йылiсь и баитан, Павел Николаевич, — чочкоммыштiс рожаыс Алексей Ивановичлöн.

— Лок. Видзöтам!

Куимöн ни мунiсö улицаöт, повзьöтiсö Паличлiсь понсö, кöда нёштöма кивнитiс да сöтiс котöртны видззезлань. Локтiсö öшымöсыс дынö, ведраö гумыштiсö ва. Павел Николаевичыс вишнитiс васö, сьöвзис да висьталiс: «Бензин!»

Сельсоветiсь предыс нюкьялiс васö да шуис: «Солярка».

— Тэ ачыт солярка, — шуис Павел Николаевичыс. — Мый, разь нырнат нем ни он кыв, или тöн бöра магазинсис пешлiн?

— Мый пешла? — обидитчис Алексей Ивановичыс. — Ме эд абу тэ кодь. — Содтiс: — Натьтö, кытшöмкö шофёр пыралiс нятьöсь ведранас.

— Думайтан шофёр?! — Павел Николаевичыс лэчыта видзöтiс Алексей Ивановичыс синнэзö.

— Кин эшö? Думайтан нагладь керисö? Сельсоветiсь предыс эз верит, что лöг отир öшымöсас вермасö кисьтны бензин.

— Алексей Иванович, мун да лöсьöт мотоциклтö, — висьталiс Павел Николаевичыс сельсоветiсь предлö, топ раммис, миритчис.

Алексей Ивановичыс мунiс. Павел Николаевичыс гажмис, синнэзас чеччалiс ни лукавöй югöр.

— Ядсö ядöн лечитöны! — гордöя горöтчис сiя. — Вай бензин да истöггез!

— Тэ мый, Павел Николаевич?! — серöмтчис Викторыс. — Сотны мöдан керку-картанымöс и öшымöссö öтлаын?!

— Мед сотчö, мый тэ горзан сiсьмöм керку-картаыт понда? Страховкасö эд вештасö. Тэрмась! Некöр меным!

Викторыс перыта кушман гуись ведраöн петкöтiс бензин, кöдö сэтöн жö Павел Николаевичыс бузгис öшымöсас, кыдз керис медбур удж и ыкöстiс: «Вешшы!», ачыс öзтiс истöг и бисö чапкис öшымöсас.

Срубыс пытшкын, кыдз потiс — öзйис бензиныс, чеччöвтiс биыс вевдöрö, но эз судз öтöрöдззас, а пондiс пытшкас ваыс вылын йöктыны шаман моз, нюлiс важ срубсис керресö. Улица весьтö öшöтчис сук тшын.

— Тi мый керат?! — кысянькö йöрсянь чепöссис Наташаыс, чужöмыс — чочком чышьян. — Сотат эд керку-картасö! Ой, мужиккез...

— Эн пов, Наташа. Видзöт, мый лоас, — гордöя висьталiс Павел Николаевичыс да пондiс серавны петухсö, кöда повзьöм, пондöм котöртны-пышшыны йöрö бы да юрыс сибдöм оградаыс коласö. Пессьö сэтöн, коккезнас гыжьясьö, но шы оз сет.

Кытчöдз баитiсö Наташаыскöт да сералiсö петухсö, öшымöс пытшкас биыс виньдiс да кусiс.

— Вевдöрсис васö ведра-мöд кисьт бокö и ашын верман васö керкуас пыртлыны. Ха-ха, Виктор Спиридонович! Миян коддесö разь кинкö кöркö, кытöнкö йöртлö?! — кисö вевдöрö лэбтiс Павел Николаевичыс, гажмис челядёк моз. — Но ме котöрта! — и öдззис школаö — бöрсяняс бус гардчö.

Павел Николаевичсянь гажыс вуджис и Викторлö: сiя кисьтiс мымдакö öшымöс пытшксис васö и пондiс сьывны: «Буря, ветер, ураганы, нам не страшен океан!...»

— Китсасян?! — Наташаыс пондiс видны мужиксö. — Юртö петухлiсь моз кераласö и сё пондан китсасьны.

— Мый нö меным керны?! — гажöн висьталiс Викторыс. — Кайöт васö!

Наташаыс клоп вачкис долоннезнас боккезас да висьталiс:

— Чож менам, кага, чож. Отирыс турун ни керöны, а ми тэкöт öшымöсным дорын орсам... — Керам эшö!

Сэтчин да татчö — кадыс чулалö. Луннэс пондiсö чинны ни, ойес лоисö пемытжыкöсь да ыркытжыкöсь. Асыввезнас видззез вылын лысваыс усьлiс кызжыка ни, умöльжыка ни косьмис ытшкöм туруныс. Кыдззез вылiсь киссисö ни öтi-öтi вежöтöм листтэз. Вöррес весьтын луннэзнас топ öшалiс кизерик лöз тшын. Тöдчис, что кадыс вожмöвтас арлань.

Викторыс эз узь. Мед и кымрасис, пондылiс зэрны, но сiя Наташаыскöт керис турунсö.

Керсис аслас уджыс, лесникыс ветлiс лесничествоö и субботанас бöр локтiс гортö.

Унажык гортö одзжык вовлiс не улицаэзöт, а ыб вывсянь веськыта лэдзчисьлiс садниканыс и пыралiс посöдзö, но талун сьöлöмыс кыскис сельсовет да правленнё öшын увтöт (думайтiс видзöтны, кытшöм кино рытнас лоас клубын). Кöр чулалiс ни сельсоветсö, горт посöдзсяняныс ыкöстiс Палич старикыс:

— Эй, клин да мох! Мыля пöрись мортсö орддян? Кежав жö, племенник, татчö!

Некöр бы Викторыслö, гортын видзчисьöны.

— Дед, баняö тэрмася!

— А баняыс бöрсянь мый пондан керны? Курöггез я мый я кольттьöтны, клин да мох?

— Может, киноö муна.

— Клин да мох, отсавны бы мыйкö тэнö тшöкта...

— Мый?

— Кöр локтан, сэк и висьтала.

Викторыс баня бöрсянь час етш шоччисис, пасьталiс виль костюм, кöдö козьналiс лесхозыс и иньдöтчис клубö.

— Клубсяняс некытчö эн мун, гортö лок! — кольлалiс иньыс.

— Кытчö муна? — обидитчис Викторыс, кöда эз любит öвтчыны рыттэзнас, но петiс мöднёж: эз ешты локны клубыс дынöдз, Паличыс сэтöн и эм, бöра посöдзсяняныс ыксö:

— Виктор Спиридонович, тэнö, зонка, он и тöд ни... Пасьтасьöмыт енерал моз. Клин да мох, ыджыт начальникö пöртчин.

— Дед, кытшöм ме начальник? — недолыт лоис старикыс одзын, но душаас вöрзис хитрöй думаок: «Видзöт, Виктор, кöр уджалiн колхозын, некин генералнас эз шу, эз адззы, а талун Паличыслö колан...»

— Клин да мох, мортсö почитайтöны не мундирыс понда, а уджын, — старикыс чукыльтö баснисö. — Босьт жö старухаöс... Менчим синнэзöс варыш моз ни кокалö, модьö: «Кытшöм тэ мужик? Кытшöм тэ хозяин?..» Мортö ни оз пукты, а öтнас керкуас полö узьны, хи-хи! А быль эд, Виктор Спиридонович, сiдз эд и эм... Некин ни миян кодьыс вылö оз видзöт, некинлö ни пöриссес ог колö. — Тарс-тарс бедьнас вачкис дженытжык кокыс бердö. — Айыткöт, поконниккöт, Спирья сватыскöт, öнджа, клин да мох! Кужим, зонка, овны, пырим и петiм, а тэкöт öтамöднымöс ог адззö. Мыля бы сiдз, а? — чикыртiс синсö и веськыта видзöтö Викторыс вылö. Синнэс сьöдöсь, лэчытöсь, кыдз лöгöсь.

Лякасис старикыс — некыдз он пышшы. Тöдö эд лесникыс, что весь Паличыс тэкöт оз баит, колö бы сэтшöм мортсö орддьыны, но оз вермы, оз куж обидитны пöрисьсö и хозяиныс сьöрö вöтчö керкуö. Палич пырö гортас. Быд шагын сылöн юрыс зэгйиссьö, гордöя öтöр-мöдöрö видзöтлö, мед быдöн адззис, что сiя мортыс абу простöй, а «клин да мох... Лесниккöт тöдчö. Вежöртiт, льöминса?! То-то...»

Лöнь да ыркыт августлöн рытыс. Деревняыс удж бöрсянь лöсьöтчö узьны, только ыб вылын кылö уджалö комбайн да клуб посöдзын кылöны томмезлöн голоссэз.

Пырисö Паличчез ордö. Паличыслöн иньыс чеччöвтiс гор сайсянь, кивзö:

— Ой, старик! Мый тэныт лоис?!

— Сёйны лöсьöт, клин да мох! — хозяиныс порог дорсянь чывкнитiс джодж шöрö — пеллесö адззö. Модьö, кулö бы и кувны оз вермы.

Старухаыс ружтö, но эшö чож, кöр и пызан вылö вайис сёйны. Старикыс кытiськö кыскис бутылка да торскис сёяннэс дынö и сосöттяс кутiс гöсьсö:

— Пуксьы, пуксьы, басни абу, клин да мох! Ми тöдан айыткöт...

Пуксисö пызан сайö, сёйисö и винасö юисö не öння моз, кöр ми бутылкасö ньылыштам и — абу, оз тырмы — мöдiк бердö кутчисям, кытчöдз пызаныс увтö ог таралö. Юисö, кыдз юöмась одзжык: хозяиныс винасö кисьтлiс учöтик рюмкаö — сюйышт чальтö, гыжыс оз тöр, но честьыс мымда!

— Клин да мох, Виктор Спиридонович! Во рюмкаыс! Тэнат эд сэтшöмыс абу, а менам эм. Шкафö дзеблывла, мед тiян коддес оз гусялö. Дедöлöн эшö подарокыс, а дедöлö тöдан жö кысь шедöм, клин да мох! Тропей, зонка. Туроккез дынiсь... Во! Стой! Клин да мох, бöбöта, öнджа, сарыс пö вöлöм Петра Великöй, вежöртiн?! Во, клин да мох! Öнi разь миян сэтшöм рюмкаэсö кужöны керны?

Öнi миян керöны вöввез юктавны, клин да мох! Кыдз рюмкасис юан, сiдз и клин да мох, таракан моз пезьдан! — ошшасис хозяиныс, тошыс зэгйисис, öмсис дульыс резсис.

— Юктав гöсьсö! — ыксö старухаыс.

— Кытчö тэрмасьны клин да мох? Сотчö я мый я керкуыт?! Винасö колö кужны юны, вежöртiн, старуха? То-то, клин да мох! — модьö Паличыс, гыжьялö мороссö. — Кывзы жö племенник... Ме тэныт быдöс олансö рисуйта. — Чольскис винасö рюмкаокас, лэбтiс öмыс весьтö и вотьöтiс кытчöкö тошыс коласö, ружтыштiс, горзьöтiс, чышкис нятьöсь долоньнас öм гöгöрсö, нималыштiс ассис чукыля трубкасö, кöдö öмсис, натьтö, оз и чапкы и одзлань гардö: — Öнджа, Виктор Спиридонович, клин да мох, этö рюмкасö дедöлö дедыс эшö тöдан кытiсь вайöм! Девятьсот японскöяс туроккеслiсь мырддьöм. Понял тэ? Он верит?!

Серавны сэтöн пöрисьсö, что сiя сэтшöм, кöр олö ни сизимöт десяток, но эшö чож, или ошкыны, кöр мöдiк бы Паличыс местын пукалiс гор вылын да видзчисис смертьсö, а сiя эшö, ого! Тöв и гожум уджалö, тöв и гожум, руб-пять, руб-пять... Котрасьö деревняись деревняö, быдöс сельсоветсö ештö ветлöтны, отсасьö мортыс отирлö: вочö öшыннэз, керö туиссэз, пестеррез, лагуннэз да кöньöссэз. öння кадын етша кинöс да кытiсь адззан сэтшöм мортсö — абу ни нiя мастеррес, кöр вина юны кужöны, а кöньöс керны котöртöны дед дынö да кеймисьöны: «Дед, отсав!» Сiя тошсö малыштас, шутньöвтас: «Некöр, зонка! Адззан мымда уджыс...» Донсьöтчö, честьсö оз öшты, а, поди, унажык бы кармансит кыскö, а кин эшö не сы сьöртi, висьталас: «Ме тэныт, зонка, абу быткомбинат...

Киэзö висьöны, ойсö ог вермы узьны». Руб-пять, руб-пять, мунас одзсит, сэсся басни абу.

Старикыс чотö учöтсянь. Некин бура оз тöд, мыля сiя сэтшöм — öт кокыс дженытжык, а мöдыс — кузьжык. Ачыс жö кöр ошшасьö, что коксö чинтiсö «девятьсот японскöйын». Тöд жö тöд, мый сэтшöм «девятьсот японскöйыс», кöр миян вылö быдкодь сюра врагыс ни уськöтчывлiс, а сiя кадö, кöдöн ошшасьö Паличыс, натьтö, эшö котрасис пызан увтöт. Умöль отир жö лёбöны, что пöрисьсö учöтнас керöмась дошлöй отир, тшыкöтöмась тöдiссес, сiйöн, что мамыс вöлöм надз». Вот тэныт, Виктор, и мортыслöн олан.

Кужö уджавны старикыс, и ошшасьны вермö, и уна тöдö. Старухаыс нерö ассис мужиксö:

— Уджав унажык, уджав! Кырым тыррезат деньгасö гумлав! Чожа черпезьдан жö, и деньгаыс сiсьмас пестерат или война лэбас...

— Кытшöм война, клин да мох! Ачыт я, Марпида?! — перыта бергöтчыштас старухаыслань — öмыс осьта, пиннес гер быдöс дзоньöсь, кыдз жöниклöн. — Виктор Спиридонович, кытшöм сiя война йылiсь модьö?! Кытшöм война йылiсь, старуха, лёбан?

— Мый, разь ме радиосис ог кыв? — висьталö старухаыс.

— Во! Клин да мох, Виктор Спиридонович! Мый тэ сэтшöм синтöмыслiсь босьтан, кöр пеллезнас кылö, а синнэзнас оз адззы? Лыддьöтнытö эд оз куж, а асьсö лыддьö медграмотнöйöн. — Гöрдöтiс Паличыс, дундöтчис, пуджис йöрнöс соссэсö — мыччис гöна да жилаа киэсö, няпыртiс кулаккесö. Ась пондылöны, клин да мох! Ась кутчисьöны девятьсот японскöйес! Ми эшö, клин да мох, мыччалам кытöн юссес пöжсьöны! — чеччöвтiс пызан сайись джодж шöрö и легöтö тошнас.

Рытывбыт старикыс гажöтiс Викторсö, юкталiс рюмкаись, ошшасис и сiйöн-сорöн гортö кольлалiс гöсьсö.

Гортö лесникыс локтiс сёрöн ни: асывся заряыс видзöтчис ни керöс сайсянь. Деревняыс узис медчöскыт онöн, только Демьянлöн Ванькаыс сулалiс нывкакöт керку дынаныс.

Наташаыс абу узьöм, сё видзчисьöм мужиксö. Викторыс эз ешты вожмöвтны порогсö, кыдз иньыс уськöтчис:

— Кытöн лаксин?!

— Палич дедö юкталiс, — висьталiс гордöя, кыдз бур удж керис.

— Кытшöм честь понда?

Виноватöй, зонка, шы эн сет, кунь синнэтö да пöж сьöлöмыт бердын думаэтö, поди, асылöдззас Наташаыс небзяс.

Кусiньтчис пон моз джоджö и ланьтiс. Узьö — нырнас шутнялö, нем оз кыв, кыдз иньыс кровать вылын пильскö: обида Наташасö пурö, что Викторыс эз понды кывзiсьны: «Мый и лоас? Кыдз и пондыны овны? Янсöтчыны я мый я ковсяс?»

Инькаыс узис и эз. И кыдз только мыччисис шондiыс, петiс карта вылö.

Эта вöлi одзза субботаö, а мöд субботанас лесникыс бöра гортö локтiс шöрись улицаöт, правленнё да сельсовет дынöт и некыдз эз туй орддьыны Паличлiсь керкусö, кöр кылiс ни, что старикыс тракторöн вайöм вöр.

Сiдз и эм: стариккес йöр бердö ректöмась кыз пожум керрез, кöдна гöгöр бергалö Демьянлöн кöзаыс да йирö кач.

Лесникыс мунiс керрес дынöт, видзöтiс и синнэзнас лыддис керресö. Нiя петiсö двадцать один: веськытöсь, волькытöсь, золотöй рöма веж качöн, кöть керку тшуп, кöть тёс пилит.

«Вот кöс гаг! Мый сымда вöрнас пöрисьыс керö? Кинлö заптö?» — думайтö Викторыс и оз вежöрт стариксö, кöда ордын субботанас гöститiс пöт, а дедыс вöрыс йылiсь эз и шыась, эз юась, кытiсь керавны, кыдз вайны и мымда сы понда колас вештыны лесхозö.

Лесникыс думайтiс öнi жö кежавны Паличыс ордö, юасьны вöрыс йылiсь, но медбöрын асьсö падтiс: «Вдруг старикыс вöрсö вайис колхознöй чертаись? Мый сэк пондан висьтавны? Пондас эд тэ вылö обижайтчыны. Ась, сыбöрын пондам тöдны...» — орддис Демьянлiсь кöзасö, кöда быдöнöс бы люкалö, туйсö оз сет.

Эз ешты локны Демьяннэз дынöдз, кыдз Демьяныс посöдзсяняныс пондiс ыксыны: «Пират, пират, лок гортö! Котöрт, бандит!»

— Мыля кöзасö видан? — Викторыс пондiс серавны Демьяныс вылын.

— Нем сылö Паличыслiсь вöрсö йирны, — висьталiс Демьяныс. — Тэ разь он тöд стариксö? Вачкас кокас бедьöн, а сэсся мый?

Лесник юалiс, кытiсь Палич вайис вöр.

— Лесни-и-и-к, — пондiс серавны Демьяныс. — Ныр увтсит вöрсö гусялöны и он тöд. Сорок пятöйсис старикыс октöм. Натьтö, билетсö эз и босьт?

Нем сэтöн унажык баитны. Лесникыс сэсся шы эз сет, иньдöтчис гортö.

Наташаыс гортын эз вöв. Сiя уджалiс колхозын, ытшкисис да куртiс, а кöр и рыттэзнас аслыныс ытшкисис ноша турунöн — гортö эз тэрмась.

Рытланьсянь деревняыс весьтö öшöтчылiс кымöр, сютки-патки койыштiс гырись зэрöн и вешшис асывлань. Лажмыта му пöлöн лэбалiсö чикиссез, зубыта курччасисö номмез: погоддяыс лöсьöтчис тшыксьыны. «Но и мед тшыксьö», — ас кежас думайтiс Викторыс, кöр сылöн туруныс керöм ни, только иньыслö сё уна колö.

Локтiс Наташаыс. Сiя мыдз, литовкасö чапкис палисадникö, пуксис öтöрись посöдзö, дыркодь видзöтiс мужикыс вылö, ньылыштiс дульсö и горöтчис, кыдз шогалiсь морт, кöда оз бы ни баит, но колö висьтавны:

— Виктор, зородыт мылякö Нинъядзибсис пöрöм...

— Мыля зородыс пöрас, кöр ме сiйö киэзнам тэчи?! — эз вежöрт Викторыс.

— Ог тöд... — Наташаыс чышьян пельöснас син дорсис чышкыштiс ёг. — Куим промежок пöрöмась... Тöлыс пöрöтiс или зородыс кинлöкö мешайтчис...

Мужикыслöн, кыдз сьöлöмыс моросас потiс-паськалiс, вирыс чепöссис юрас, сувтчыштiс жилаэзас. Мурзьыштiс Викторыс, матькыштiс: «Бöра кинкö лукавитiс». Рез-паз бы керис, кöть кинöс, ежели бы шедiс сэтшöм мортыс, кöр гортiсь мунан — спинаыт оз ешты саясьны, а бöрсянят, кыдз кужöны, сiдз и сералöны. Кин жö бы сiйö керö?!

— Мый тэ мурзян? Поди, эшö не морт керис, а тöлыс зородсö разис, — шуис иньыс.

— Тöда ме!.. — пизис лöгыс Викторыслöн, думаэс сёйисö: «Колö сiдз овны, медбы нем бердö вöлi кутчисьны!» Нем ни эз понды ковны, не керкуыс, не мöсыс, ась кöть талун жö быдöс зороддэсö пöрöтöны да сотöны! Ась керöны — сьöлöмнысö бурмöтöны, а сiя пондас уджавны, кыдз колö!

— Вузав мöстö! — ыкöстiс иньыслö. — Баляэтö ась кöиныс сёйö. Мед тэ... — и виньдiс.

Наташаыс дыркодь видзöтiс, кыдз йöз вылö и чорыта висьталiс:

— Мöсыс не тэнат! Сiя менö йöвнас вердö, а тэ мун да шатлась... Хозяин! Эмöсь тэ кодь хозяиннэс Педöт карта бöрын, кöдна горттэзаныс оз вовлö, а сэтiсь жö сёйöны...

— Эх! — ветла... — палисадникись босьтiс вила, посöдзись — чер да уськöтчис садникö.

Шондiыс пуксис ни. Рытся заряыс орсiс-öгралiс джын небоас, кытöн лэбзис самолёт — бöрсяняс ольсалiс чочком дöра.

Кык километрасö зородыс дынöдз мунiс-котöртiс, топ коккес муас эз сибалö. Пизис лöг. Лöгувьяс ас гöгöрсис эз адззы не вöрсö, не ыббез, эз кыв, кыдз спинасö йöрнöсыс пыр курччалöны номмез.

Локтiс зородыс дынöдз. Сiдз и эм: кык промежокись туруныс му вылын. Только мортлöн эта уджыс, этадз не пода, не зверь оз уджалö. Бур, что эз зэр...

«Вот бы инмыны этатчö! Вот бы... — мурзис Викторыс, сiдз лöгыс петiс, что шедiс бы кин — судитiс бы аслас судöн, сiдз, медбы врагыс эз вунöт и аслас кагаэзлö накажитiс... Но кикоксö эд эз кольö... Кошшы кин вöлi! Поди, соседыт, а батi, мöдiк... Лесник, кинлöн медöддьöн лöгыс петö тэ вылö? Тöд жö тöд, кöр öтiкöс лöсьöтчан кутны бы яйöн, мöдiкöс лöсьöтчан штрафуйтны, а куимöтыс, поди, одзлань мыччалö, медбы вывтi эн чеччав».

Рытся заряыс жагвыв кусiс-чочкоммис, кöззэс дзик шебрасисö сьöд öнöн, пемдiс. Пемыт лöнь августлöн рыт. Зородыс топ лолалö чöскыт турун дукöн, ыб вылын сюыс ас кежас шушкö-ошшасьö ни воöм тусьöн, кöсйö бур олан.

Удж бöрсянь Викторыслöн топ öшис лöгыс, раммис. Быдöс бы эд бур, быдöс тырмö, ов бы да ов, уджав да шоччись...

Пукалiс зородыс дынын и гортö бы эз и мун, отирыскöт эз и пантась, водiс бы туруныс бокö, ашын чеччис, ветлöтiс, мый сылö колö уджалiс, ой кежас бöра бы локтiс татчö. Зверь моз бы пондiс овны, природаыскöт янсöтны горе да гаж, — кыдз тэ природаыс дынö, сiдз сiя и тэ дынö. Отирыскöт бы эз пантась, кöр нiя тэнö оз вежöртö, кöр керан бы бурö, а петö умöль.

Эз бы мун Викторыс гортö, асылöдз бы пукалiс зородыс бокын, лолалiс чöскыт турун дукöн, думайтiс, суналiс, но колö мунны, колö пантасьны отирыскöт, кöр тэ абу зверь, кöр оланыс йитö деревняыскöт, соседдэткöт, мед тэныт сысся недолыт, мед он и вермы чеччыны, асьтö бы он лэбты. Дума вийис: «Мый вылö этадз овны?! Колö я мыйкö понда пессьыны, что соседытлö лоин враг? И мый понда? Топ öтнасытлö колö медуна, кöр тэ ны кодь жö — талун эм, ашын абу, сто год он понды овны?..»

— Чорт ныкöт! — чеччис и жагвыв вöрзис гортö.

Гунадорын уджалö мотор — косьтöны сю, сэсся муыс топ суналö, кывзiсьö и унажык шы оз кыв.

Тальччис и эз, мунiс гортö дыша, и вдруг лöнь рытсö повзьöтiс лыйöм, чарöтiс пишаль. Говкыс вачкис бöрсяняс, кыдз спинаас, нетшкöвтiс вöрсö и пондiс лэбзьыны, гажöтчыны. — Поди, тэ и пöрöтiн зородсö! — лöгасис вöралiсьыс вылö Викторыс. — Ветлöтан пемытiнас, гажöтчан, что вермин дойдны лесниксö, а тэ, лесник, некинöс он адззы, он кут, кыдз тэ одзын лесниккес дырни оланыс овсис, сiдз и пондас овсьыны.

Деревнясянь пондiс паськавны радиолöн шы — сьылiсö гажа песня, кöдö любитiс Викторыс. Эта вашöтiс гажтöм думаэсö.

«Пондам уджавны», — висьталiс аслыс, содтiс оськöввесö кокнитжыка ни кайис керöс паныт.

Ашынас, одзся-одз, пельпоныс вылö кышалiс пишаль и гусьöн петiс посöдзаныс, медбы уськöтчыны садникö и йöррез пöлöн мунны деревнясис. Думайтiс, что пемыт сорнас некин оз адззыв, но улица шöрсянь кыз голосöн ыкöстiс Робертыс:

— Кытчö сэтшöм одз мунан?! Миян кодьсö пуран, а ачыт пишальнат быдöнся одзжык...

Висьтавны бы соседыслö кöть öтiк кыв, медбы сьöлöмас йиджис, но Викторыс шы эз сет: нем сэтшöммескöт кутчисьны! Сiя тэрмасис сорок пятöй кварталö, кытiсь Демьяныс кыввез сьöртi Паличыс кералiс вöрсö. (Демьяныслö эд верит и эн: пыр бöбöтö, öтiк кыв веськыта оз висьтав).

Лесникыс гортiсь петiс пемыт сорöн и сорок пятöй кварталöдз локтiс, кöр шондiыс лэбтiсис вöрыс вевдöрö. Сiя мунiс трактор следöт, кыт кыскöмась вöр.

Викторыс локтiс пожумаинö и сё эз верит, что Паличыс вöрсö пöрöтiс татiсь. «Эх, руб-пять!.. Быль я мый я татiсь гусясин? Но, старик, старик... Кытшöм тэ наглöй... Кинлö совестьтö козьналiн? Кинöс бöбöтан?» — кытöн дивуйтчис, кытöн видiс стариксö. — А кулö эд... Лолыс петö и не сiйöн, что шогалö (öтiк кылöн эз норась, что кыткö висьö, эшö ошшасис, что олас сто год: «Некыт менам, клин да мох, оз вись...») кулö старикыс, что нач гöвмис — няньсö ни немöн босьтны, деньгаыс, видзöт томмес карманö пондiс пышшыны. Бöбöтö Клин да Мох — емтöг вурö, кöр быдöн тöдö, что эм сылöн деньгаыс, но жалейтö вöрыс вылö билетсö босьтны.

«Мед, — жагвыв шагнялö яг кузя Викторыс и думайтö. — Быд мортыс — аслыс судья. Кыдз олам, сэтшöм честь и шедтам! Сiйö и босьтам... Ох, дед, думайтiн менö рюмка вина вылö небны? Бöбöтан эд, старик! Бöбöтан... Не сэтшöм вылö инмин. Этö бы Ныртöм Егорыс — одзза лесникыс, сiя бы тэнчит, бочка вина чилькöтiс, но билетыс понда эз бы понды гуддисьны, а менö винаыс вылö, дед, он неб»...

Викторыс видзöтiс ни кыдз оралöмась-октöмась пожумаинсис медбасöк пуэсö, кытöн нiя быдмисö, топ садын, топ кодя морт кöркö садитöм — любо видзöтны, а öнi мый? Дзик гажа ягыс горзö...

Лесникыс пуксис сира виль мыр вылö, ловзисис морос тырнас кокнит воздухöн, кöда кöтöм-сорласьöм пожум лыс дукöн, лог дорись сэтöр сора цветöн и пондiс шоччисьны да думайтны ассис сьöкыт думаэсö.

Пукалöв-керис, шоччöтiс унажык не коккесö, а сьöлöмсö, медбы сiя быд местаын быд торыс понда эз чеччав и пондiс мунны гортö.

Луныс кресення. Талунсянь туйис ни вöравны и боксис не öтiк местаын ни лэбтiсисö сьöлаэз, но киыс эз лэб лыйны кайеслö.

«Уна я билетыс вылö колас деньгаыс? — думайтiс лесникыс. — Ачым вешта. Видза деньгасö и кыдзкö ола жö месяцсö, вердча картошкаöн, сёя капуста, кöда таво грядыс вылын гардчö, кыдз чочком бараннэз быдмöны. И Наташаыс нем оз понды тöдны...»

Викторыс кöда туй кузя локтiс вöрас, сiя туйöт жö и мунiс гортö, и сьöлöмыс вылын лоис долытжык ни, что адззис осьтасö, кыт туйис сайöвтчыны аслас совестись: дорйис пöрисьсö.

Луныс гажа, мыччисясö жö юр вевдöрын кымöррез, но орддясö шондiсö. Ойес ыркытöсь, номмес вöрас етша ни. Шорокын, кöдö вуджис кык пöрöм пу кузя, ваыс лоöм эшö сöстöмжык — синва вылö вачкисьö и визывтö-тэрмасьö, ас кежас больгö-висьтасьö бы мыйкö бурö.

Лесникыс тэрмасис, локтiс деревня дынöдз, пишальнас веськыта кайис улицаö. Кин пантасяс, сiя сыкöт и здоровайтчö, быдöн чужöм вылын гаж, некин Викторыс вылö оз видзöт пиньöлöн, адззöны, кыдз ассиныс мортöс, кöда öнi уджалö мöдöрын — не колхозын ни и сыкöт быд лун он пантась. Сiдзкö, Виктор, весь думайтан, что тэ вылö отирыс лöгалöны — этö аслат быдöн вылö ни пондiс петны лöгыт...

Сiя веськыта мунiс Палич дынö. Старикыс сэтöн и эм: öшын увтаныс быглялö вайöм керресö, ружтö, мыйкö модьö ас кежас — кинöскö видö. Сы дынын бöра гардчö Демьянлöн кöзаыс.

— Бог помочь! — Викторыс горöтчис Клин да Мохыслö.

— Спасибо, Спиридоныч! — юрсö лэбтыштiс пöрисьыс. — Отсавны локтiн?

— Локтi... — мурзьыштiс лесникыс, но синнэзас эз видзöт.

— Отсав, клин да мох! — Палич кымöс вывсис чышкис ньылöмсö. — Куль зöр лоис оланыс, зонка!

Некöр эг думайт пöрисьмыны, берся верми керны: кöньöс, шöмöс, туис и пестер, — шынь керис. — И кагаэс аркмисö, но видзöт... — сьöвзис коккес увтö, пыдына лолалiс. — Быдтiси ас юр вылö. Клин да мох! Öтiкö абу колöм быдтыны, кöда чужис, сылiсь юрсö и колöм тальны. А мый нö! Кулам старухаöкöт и саван дöрасö некинлö чужöм вылö лоас павдöтны. Сэтшöмыс разь олан?!

— Ачыт виноватыс...

— Ме сiйö и шуа, клин да мох, мыся, ачым виноватыс... Абу дак абу!

Вежöрт, Виктор, тэнат эд эта жö лоас: челядьсö эд петухныт жö кольттялiс.

Старикыс пуксис сира кер вылö, лолалö-ружтö, мыдз. Кармансис кыскис трубка и дрöжитан киэзнас пондiс тыртны сiйö. Жаль пöрисьыс.

— Бурö вöрсö адззöмыт? — юалiс лесникыс.

— Вöрсö?! — кокнита горöтчис пöрисьыс. — А вöрыс мымда, племенник, мый эм?!

— Не сорок пятöйсис я? — чорыта ни шуис Викторыс.

Козёлыс локтiс да бöрсяняс сюррезнас заргис Паличыслö сiдз, что сiя шупыта киас босьтiс черсö и лэбтiс юр вевдöрас, но эз жö сöт, только сьöвзис тоша подаыслö, ачыс горöтчис:

— Кытöн, Спиридоныч, сорок пятöйыс? Мылякö ме сэтшöм местасö эг и кывлы... — синсö чикыртiс челядёк моз. Бöбöтö, думайтö, что тэ нем он вежöрт.

— Уджтö, дед, эд адззылi! — лöга ни пондiс видзöтны Паличыс синнэзö.

— Кытшöм след, клин да мох?! — ылöтлö мöдыс. — О, Спиридоныч... Тöдан отирыс вöрас öнi мымда туйсö тальöны!

Козёлыс бöра ниртчис старикыс бердын, нерис пöрисьсö, а сiя видчис подаыскöт и ештiс баитны лесникыскöт.

— Небин бы билетсö, дед. Не мöс мымда жö сувтiс бы...

— Хе-хе, Спиридоныч. А мый, клин да мох, билетнас керны? Сартирö котрасьны? Но тэ... Тэ тöдан, Виктор Спиридонович, что менам деньгаыс абу, ог ни вермы одзза моз шедтыны. Табаксö немöн лоис небны. Отир смех лоис оланыс, — ачыс гажтöма видзöтiс сельсоветлань, кытöн сулалiс легковöй машина.

Викторыс шы эз сет, кывзiс да эз, а старикыс сё модис:

— Отирыс, видзöт, колхозын уджалiсö да пенза шедтiсö, а ме эд колхозас эг уджав, а кокö... — тарс-тарс вачкис бедёкöн дженытжык кокас. — Öнджа, девятьсот японскöяс... Врагыс сёйис.

«Кокнита олiн... — думайтö лесникыс. — Отирыс колхозас пессисö, а тэ леспромхозын да деревняись деревняö öвтчин, а öнi кинкö вылö горзан, кинöскö видан...»

Дедыс тош вылö локтiс уса гаг и пондiс меряйтны ныр увтсис тошсö. Викторыс кутiс этö гагсö, öшöтiс уссэзöттяс воздухас и пондiс видзöтны, кыдз сiя öвтчö и усыс оз ор. Видзöтiс-керис гагсö и шуис:

— Дед, вöрыс эд не менам. Государстволöн... Мый лоас, ежели ми сiйö пондам октыны кинлö шедас?

Китш-китш серöмтчис пöрисьыс, чышкис сирöсь кинас синваэсö и пондiс ружтыны-баитны:

— Ой, клин да мох! Вöрыс мымда миян эм?! Видзöт жö кытшöм деревняыс гöгöр море! Öтiк пу пöрöтан, сы местö сизима быдмöны. Миян бöрсянь эшö сы-ы-мда кольччас... Деддэзным сiйö гусялiсö, деддэзнымлöн зоннэзныс октiсö, но некинöс топ эз адззö, эз кутö, а тэ мыля менö — стариксö? Сэтчö разь тэнö кöркö школаас велöтiсö, племенник? Клин да мох, ми Спиридоныскöт, — этö айыткöт, эг я öтiк бороздаын гöрим...

Вдруг стыннэз сайсянь гусьöн швыркнитiс-лэбзис курöггезлань варыш, сöтiс курöглö, лэбтiс йöрыс вылöдз, но курöгыс мезмис и готсьöмöн котöртiс керрес увтö.

— Ох, розбойник! — чернас кыйис варышлань старикыс. — Видзöт кыдз сiя, клин да мох! А!

Паличыс бöр пуксис местаас, нютшкыштiс трубкасö, гажöн видзöтыштiс лесникыслань и юалiс:

— Дак эта, клин да мох, кин ме вылö норасис?

— Некин эз, — чорыта висьталiс лесникыс. — Мыся, ме вылö, дед, эн горзы... Ачыт тöдан, но ме уджала эд, деньга босьта...

— Спиридоныч, а Спиридоныч! — дедыс чеччöвтiс местасис да кутчисис лесникыс сос бердö. — Христа ради!

Дзескыт улицаын лоис Викторыслö, душаас курыт: сьöлöмыс пöрисьыс дор — жалейтö, но колö керны, мед и сыбöрсянь отирыс синнэзö эз вöв стыд видзöтны.

Зубыта ньылыштiс дульсö, нем сэсся старикыслö эз шу и чорыт шаггезöн иньдöтчис гортлань, мунiс и кылiс, кыдз бöрсяняс дедыс горзiс:

— Кер, кер... Сёй стариксö, поди, пöтан... Но, розбойник, эн вунöт, что еныс не Кривöй Митит, адззас тэнö! Сэк Паличыс усьлас эшö тöдвылат, касьтылан эшö бур кылöн стариксö, клин да мох!

Öшымöсныс дынын сулалiс Наташаыс и, натьтö, быдöс кылiс, кыдз мужиксö пурöны бöрсяняс, — сiйöн чужöмыс топ сьöдöтöм-повзьöм и голосыс топ не аслас. Иньыс лесникыслiсь мыкталöмöн юалiс:

— Тэнö эд бöра сiдз вувтöны?!

— Модян, Наташа, мый оз ков... Палич дедыс Демьяныс кöзакöт тышкасьö.

6

Кöр сьöлöмыс вылын сьöкыт и думаэс пурöны, сьöлöмыс бы шонтiсис бур ёрт дынын. А кин сылöн Льöминаын медбур ёртыс? Натьтö, медодз Наташаыс.

Наташаыскöт олiсö бура. Любитiсö öтамöднысö. «Любитiсö я? — вдруг Викторыс юалiс ассис. — Сiдз разь колiс бы овны?».

Усис бы овны мöдпöв, поди, олiс бы мöднёж, но кыдз? Медодз некöр бы эз лöгалö Наташаыскöт, эз видчö. А нылöн мый петiс? Öтiк лун шондiа, а кык лун зэрö, öтiк лун баитöны, кыкö — лöгалöны. Любитö Наташаыс нырнас пишкайтны — лöгалыштö, кöр асывнас и сёйны оз лöсьöт. Вöрын узян — виноватöй, гортын узян — бöра виноватöй. Талун бöра Наташаыс кымöртчис.

Рытсянь жö кымöртчис и öтöрын, вирдалiс да гымалiс. Зэрис ведра понiсь. Улицаöт кер кызаöн визывтiсö шоррез.

Викторыс ойнас петалiс öтöрö, дыр сулалiс посöдзын, кывзiс, кыдз крыша вылiсь вотялö ва, кыдз вартö зэрыс, видзöтiс небосис чарньöввез, кöдна пемытiнас паськöтiсö-югдöтiсö кымöрсö, шöралiсö сiйö торрез вылö и кусiсö — секунда кежö гусялiсö син югöр. Викторыс кывзiс и видзöтiс, кыдз зэрö да кеймис, медбы луннас öддьöн эз понды зэрны, сылö одз колö мунны вöрö (бригадирыслö кöсйисис кошшыны тёс да плаха вылö вöр).

Саймис одз. Асылыс ыркыт да кымöра. Омöн öшалiс чочком да сук туман, пуэз и кок увтын лудыс миссисö кыз лысваöн. Роберттэз тополь вылын карзiс рака, кыдз кайыс шогалiс-норасис.

Пукав бы гортын, но пукавны оз туй: висьталiн — кер, отирсö, лесник, эн бöбöт. Бöбöтан, кыдз мöдöтпыр пантасян, мый висьталан?

Лесникыс пасьталiс вешьян, кöдна коккезö пытшксяняс вурис полиэтилен (капля ва оз йидж) петiс öтöрö, шутньöвтiс Жучкаыслö и садникöттяныс иньдöтчис вöрö. Мунiс шупыта, веськыта видз кузя, кытöн öтi-мöдiлаын тыдалiсö ыджыт ва гöппез, бытьтö ойнас зэрсис аркмöмась озероэз, ордйис нiйö и петiс туй вылö. Эз ешты бöрас саясьны деревняыс, сэтöн важ ферма туйвежын повзьöтiс голос:

— Руки вверх, лесник!

Викторлöн сьöлöмыс дрöгнитiс, киыс топ ачыс кутчисис пишальыс бердö, но Жучкаыс некин вылö эз вувтчы.

— Здоровöн олан, Виктор Спиридонович! — лапья кöз увтын кылiс тöдса голос, серöмтчис гажöн, и лесникыс одзö мыччисис Павел Николаевич — школаись директорыс. Моросыс куш, öмыс осьта, синнэс — беслöн, кöть окав, кöть вартлы, что повзьöтчö, и сё пондас шуны, что сы моз бура некин оз ов и уджыс сылöн медбур: оз ков не зорьясьны, не гыжьясьны, только куж пöрьясьны-бöбöтны и тэ

Льöминаын лоан медбур морт. Этадз ачыс баитö

Павел Николаевичыс, ась и оз веритсьы, что сiя челядьсö велöтö и бöбöтö, что велöтiсьыслöн медбур удж. Öння кадын челядьыс не миян кодьöсь, Виктор, эд ми быдмим, учöтсянь асьнымöс вердiм. Директорыс пасьтасьöм Викторыс моз жö и спинаыс сайö кышалöм пишаль.

— Ага, повзин?! — сералiс Павел Николаевичыс, ачыс кисö нюжöтiс лесникыслö. — А кытчö воштiсян? Вöрын эд. Натьтö, эд миян кодь браконьерреслöн тэ вылö öддьöн ни лöгыс петö?

— Нем эшö вывтi умöльсö ме нылö эг кер... — виноватöя висьталiс Викторыс.

— Эн суськись, зонка, керин! Керин и молодец. Чож. — Директорыс кулакнас павкис бокас. — А медлёк браконьерыс тöдан кин?! Ме! Вöртöг овны ог вермы. Вöрын чужи и вöрас кула. Мымда ни городас корисö уджавны, но эг мун и ог мун. Мыся, воннэз, тi городас тшынсö да буссö лолалö, а ме кыдзкö вöр шöрас ола... Да и пишальыс эшö бöбöтö... Муна вöрас и лыя кин шедас, гортö вая, кинöс верма, — рыг-рыг серöмтчис да одзлань ошшасис. — Тöн иньöлö вайи кык рака, тшöктi кайесö куштыны Кирилловнасö, мыся, лöз вешьяна дозмöрреслöн яйыс öддьöн чöскыт. Он верит?! Талун öтiк дозмöрсö Кирилловнаыс пуис ни. — Павел Николаевичыс кармансис кыскис папиросаэз, веськыта видзöтiс лесникыс синнэзö, топ юалiс: «Лесник, веритан я меным?» Кин сылö веритас, кöр этадз гажöтö — кывнас олансö гладьöтö.

— Куритан? — нюжöтiс папиросасö Викторлö.

— Ог.

Эшö висьталiсö öтамöдныслö кыв-мöд и янсöтчисö. Лесникыслö колiс бы мунны öтöрö, а сiя вдруг кежис мöдöрö, сотöй кварталлань, топ коккес асьныс шагнялiсö виль делянкаэзлань — этö Павел Николаевичыс лöгöтiс, кöр баснинас чувйис-нерис зверрезöн да вöркериссезöн, кöдна бöра делянкаэс вылын уджалöмöсь, «отир смех керöмась».

Тöдö ни Викторыс, что делянкаыс вылö бöра джын вöрсö колисö — кöдö пöрöтiсö да вунöтiсö, кöдö тракторрезнас талисö. Штрафуйт бы медодз мастерсö, сыбöрын участокись начальниксö да леспромхозiсь директорсö — кыскы бы кармансис унажык, сэк бы пондiсö тöдны, кыдз колö уджавны, а öнi мый? Но штрафуйтасö леспромхозсö — öтiк государственнöй карманiсь кыскасö, мöдiкö пуктасö... Кинлö сiя дöнзьö? Вот ме бы... Учöт эшö начальникыс, Виктор Спиридонович! Учöт... Нерис асьсö и тэрмасис, топ кинкö сьöрö вöтчис. «Или эта Евграф Титовичыс!..» — пондiс видны Евграф Титовичсö, кöдö лыддис кодя мортöн, кöдалiсь топ эшö эз адззыв умöль удж, но лесниккезсянь жö кылiс, что делянкаэсö примитны лесничöйыс леспромхозiсь начальствокöт катыльтчö машинаэзöн. Сьöраныс вина да сёян — сымда ошыс оз вермы юны да сёйны, а нiя сёясö-юасö вöрас и гижасö акттэз, топ быдöс бур, кыдз шуöны — закон: ош — прокурор, свидетель — дозмöр, ме тэнö эг адззыв и ог тöд, а делянкаэс вылын вöркериссес бöрын синнэз кунь да мун...

Тэрмасис Викторыс, дзик кинкö сьöрö вöтчö, натьтö, думаэзнас бы кутiс, керис асмознас, но аслас жö думаэс осудитiсö: «Уна пондан, Виктор, тöдны, верман мöдöрын кöтны! Миянлö тэ коддес оз колö»...

Кин этö тэныт, Виктор, висьталiс? Ах, эта... Ныртöм Егорыс, кöда уджалiс тэ одзын тэ местын, пантасис кыдзкö и юалö: «Кыдз уджассьö, Виктор?» — «Уджалам» — висьталiс Викторыс. «Уджав, уджав, — серöмтчис Егорыс, содтiс, — но куж уджавны! Уна пондан тöдны, мöдöрын верман кöтны. Миян уна тöдiссесö оз любитö... Ха-ха...»

Лесникыс тальччис ва гöпö. Ваыс нять сорöн чижнитiс-резыштсис чужöмöдззас и думаэс дзугсисö. Кок увтас зэр бöрсянь шлёчкöтiс нять. Туманыс пуксис муö. Жагвыв юр вевдöрын кымöррес вешшисö бокö. Чожа мыччисис шондi, кыдз шоныт киöн малыштiс рожабаннэз. Гажöн шынньöвтiс вöрыс, кöда вежис ни гожумся паськöмсö — джын листыс пуэс вылын вöлi веж ни. Чожа Виктор локтiс Лолым ю дынö.

Юыс лажмыт берега, абу паськыт, но богатöй нюррезöн да гуменичаэзöн. Зэра погоддяö ёна мыдзöтан коккез, кöр шагнялан небыт да кузь нитш кузя, вуджан шороккез.

Нюррес татöн богатöйöсь ягöдöн, видзсьö зверь и кай, а береггезiсь кузь турунсö тальöны бобррез да вöрмöссэз. Местаэс ыркытöсь да ульöсь и номыс-гебыс гожуммезнас — син оз туй осьтны, сiдз сёйöны.

Етша кин татöн вöралiссес коласiсь ветлöтö, быд мортыс оз сибав, но Роберт соседыс татiсь местаэсö лыддьö ассис. Сiя эстöн быдса год: лым вылын лямпа след — сылöн, кöччезлö петляэз — сылöн, тулыснас пишальöн гымалö — лыйö дозмöррез Робертыс, а лоссесö топ ачыс и быдтö — кыйö тöв и гожум.

Тöв и гожум, тулыс и ар Викторлöн соседыс бергалö сотöй квартал гöгöр, кыдз татöн хозяин и некин сы местаэзö оз лысьт кокöн тальччыны. Браконьер олö аслас законнэз сьöртi: мый татöн быдмö, котрасьö и лэбалö — эн вöрзьöт, вöрзьöтан — горзан, не öтнёж дак мöднёж вештiсяс. Вийö Робертыс, кыйö, некинлiсь оз юась, не оз висьтась, только кытöнкö гусьöн ёрттэслö жö ошшасяс добычанас и лöньсяс.

Талун лесникыс мунiс сотöй кварталö, мунiс соседыс туйöт и повтöг шагнялiс — не гусясьны эд тэрмасис, а керис ассис удж. Сьöлöмыс вылын недолыт, кöр тöдiс, что шагнялö Робертыс туйöт и панталас сылiсь умöль удж, кöдö оз ков керны, но соседыс керö и тэ, лесник, этö уджсö дзуган. А сыбöрын соседыт пондас жагвыв «вештiсьны», кытöн зород пöрöтас, кöдö инькаыт керас — сир ньылöмöн миссяс, кытöн видззет вылiсь йöр жугдас, кытöн... Мый эшö тэныт, лесник, вермасö керны браконьеррес? Думайтан этö, а видзчись мöдiкö, берегитчы, кыдз бы керкутö эз сотö...

«Мед керöны!.. Мед сотöны!..» — аслыс висьталiс лесникыс и тэрмасис одзлань, топ соседыс мунiс одзас, и колiс сiйö вöтны-кутны сэк, кöр сiя котомаас пондас тэчны яй.

Вöрыс кыдз мыйкö думайтiс, ойся зэрыс бöрсянь тöждiсис и быд кустыс, кыдз горзiс, сы вылiсь вотялiс лысва.

Локтiс Лолымыс дынöдз, падмис бадь кусттэзö, кöдна дюттясисö берегын. Падмис лесникыс, дзар керис ваыс вылö: шондi югöрыс ва вывсянь пежьялiс-ёрис синнэсö. Бадь кусттэз коласiсь лэбтiсис ыджыт утка и герчкытöн лэбзис вöрыс коласö, шуркнитiс пель бокас чöрскан ¹.

Ва весьтын öт берегсянь мöд берегöдз куйлö кыз пипу — колода. Пусö пöрöтöмась не таво ни, и не тöв мöдöртöм вужжезнас, а йирöмась зверрез да сэтшöм прокöн, топ уджалöмась отир-мастеррез.

Сулалiс лесникыс берегын и дыркодь видзöтiс бобррез удж вылö, дивуйтчис челядьыс моз, кыдз кужöны уджавны зверрес. Колодаыс кузя вуджис мöд берегас, бергöтчис да эшö видзöтöв-керис зверрес удж вылö.

Шоччисьыштiс лесникыс берегын и — одзлань. Мунiс видз кузя, орддис ва гöппез да бадь кусттэз.

— Жек-жек! — баддес коласын повзьöтiс сьöлöмсö жак, кыдз кинкö вачкис Викторыслö. Мыйись полiс, ачыс оз вежöрт, кöр вöрас немись бы повны и киыс топ ачыс кутчисис пишальыс бердö.

Нюрсянь туёкыс кайис кöс ягö, кытöн кокнитжык шагнявны. Викторыс содтiс шаггесö и вдруг юрнас заргисис тросiсь гардöм кытшö. Петляыс зэлöтiс мороссö, жмитiс пу бердö, кыдз кинкö ыкöстiс: «Сулав, лесник, кытчö мунан?!»

Сьöлöмыс кыдз вотьыштiс мороссис, кöдзыт ва киссис спинаыс вылö.

Викторыс дзир-бар керис ас гöгöрас — некин абу.

«Жек-жек! — бöра нерис кайыс.

«Трус тэ, Виктор! — гажтöма серöмтчис ас вылас, кутчисис чорыт петляыс бердö, мездöтiс сiйö голясис. — Мый жö сыкöт керны?» — сыр-лёль öшöтчисö киэс.

Горалiс кырныш. Туёкыс весьтö чераннес гöрдззöмась басöк узöррез-веззэз, что туйис бы, сюйыштiн карманат да вайин гортат. Пеллес одзын бизгисö номмез. Вöрыс сулалiс, кыдз виноватöй — не тöв оз шушкы, не ув оз вöрзьы.

«Герой! Кужан петлясö мездöтны голясит! — аслыс висьталiс лесникыс. — А зверьыс?.. Сылöн эд киэс абу...»

Тачнитiс ув, может, котöртiс кöч или улыс усис пöрись пу бердiсь.

Лесникыс дыркодь кок увтсис видзöтiс туёксö, кöда чуклясис пуэз да вужжез коласöт, орддис кыз колодаэз. Туёкыс кузя тэрмасисö-котрасисö быдса армия кöдзыввез — и керисö ассиныс удж. Бокö кералöмась пожуммез — йöр, зверьыс пондас мунны, кежас петляыс дынö...

Мортыс татöн вöлöм Викторысся одзжык неделяöн — эта тöдчис следдэс сьöртi.

Викторыс медодзза петлясö разис да колис пу бердö, но стальнöй кытшшес вöлiсö уна быд туёкын-следын, кыт гожумнас вермасö мунны ыджыт зверрез, кöдна гуменичаын вердчöны куим листа турунöн.

Мунiс лесникыс, полiс лолавны пыдына, топ сiйö кинкö и кылiс и адззис. Шондiыс вылынкодь ни, унакодь ни — десяток етш панталiс петляэсö, дзугис нiйö, но кытшшес эз бырсьö. Сiйöн соседыс быд гожум и сёйис яйсö.

Викторыслö тöдвылас усис, кыдз кöркö сiйö томнас айыс нуöтлiс вöрö яйла... Айыс сэк уджалiс кытшöмкö экспедицияын, гортö вовлiс месяцнас кыкись-куимись. Локтас тшыг, мыдз, паськöмыс лешки-вошки косяссьöм... Шоччисьö бы да чöскыта сёйыштö айыс, но гортын сёйны нем — картошкаыс ни бырсьö... Баняын пывсяс, сiйöн и пöтас да бöр öшас.

Этадз жö öтпыр локтiс айыс гортö, пырис мыдз, умöльтчöм, но гажа. Эз ешты шоччисьны, зоныслö висьталiс: «Виктор, пасьтась... Яйла ветлам.»

— Кытшöм яйла? — юалiс мамыс повзьöмöн.

— Шы эн сет, мам...

Мунiсö ылö, вöррезö, кытöн и вöлiсö, öнi оз тöд, висьтавны оз вермы. Локтiсö лог дорö, кулисö ыджыт зверьöс, кöда кышасьöм голянас петляö...

Кулисö зверьсö, кералiсö торрез вылö, тэчисö котомаэзö, кин мымда вермас кыскыны и иньдöтчисö гортö. Уль яйыс сьöкыт, котомаыс быд шагын кыскö бöрлань, джагöтö колода вожмöвттöн. Пымалiсö, мыдзисö. Айыс топ спинаыс сайись котомасö эз и кыв, сералiс ёрттэс вылын да йöктiс-мунiс, некытшöм колода одзын эз падмы... Кöр пондiсö локны гортö, пöрисьжыккес висьталiсö: «Виктор... Шы эн сет! Мед некин оз тöд...» Викторыс тöдiс только сiйö, что лосьыс шедöм йöз петляö. Кинлöн петляыс, мыля гусялiсö и кинлiсь гусялiсö, эшö эз вежöрт.

Талун разис петляэсö соседыслiсь, разис мöдiк думаэзöн...

Уджавтöн локтiс оль бердöдз. Сэтöн падмис коскаэзö: лосьыс джагалöм таво ни, кытчö пöрöм, сэтöн и сiсьмöм. Коскаэс вылын сё эшö пукалiсö гуттэз, нырö вачкис сiсьмöм яй дук...

Видзöтöв-керис зверьыс коскаэз вылö, дзарнитiс кöс мырлань, кытöн кокасис кыр и аслыс висьталiс: «Виктор, мать тэнö! Видзöт яйыс мымда сiсьмöм!» Висьталiс, кыдз йöз горöтчис, видiс, топ лесникыс öтнас виноватöй, что öшалöны вöрын быд кöз бердын петляэз, джагöтöны да сiсьтöны лоссезöс, а тэ мый, кытöн, лесник?!

Викторыс сьöвзис, мыйкö вылö кутчисьлiс пишальыс бердö — лöг ни пурис сьöлöмсö, сэтчö жö кымöссö зубыта курччöвтiс ном.

«Кыдз жö бы врагсö кидтыны вöрсис?! — вачкис кымöссис номсö. — Мый жö бы керны? Бöра я мый я кинлöкö норасьны? Кинлö?! Кöть мымда норась, думайтан кинкö вöрас мунас да пондас кошшыны быд петлясö?! Эх, Виктор!..» — коссис жагвыв кыскис черсö, видзöтыштiс югыт да лэчыт дорыс вылö (жаль черыс, кöдö пыр кыскалö сьöрас и лэчыт) и быд вынсис сöтiс — кералiс одзсис проволокасö.

Стальнöй тросыс чеччöвтiс кöзыс бердiсь, нюжалiс коккес дынö.

«Вот сiдз», — лесникыслöн бурмис сьöлöмыс, ловзисис кокнитжыка ни, малыштiс чер дорсö (лэчыт черыс, оз лямсьы).

Шондiыс кыдз уялiс кымöр палачоккез коласын, а кытöнкö Лолымланяс мурзис-гымалыштлiс, Кöз йыввез вöрзьöтiс тöлок. Дзуртiс пу. «Тр-р-р!» — кокасис кöс ув бердын сизь. Вöрыс некöр гусьöн оз ов.

Лесникыс кералiс öтiк петля, мунiс неылöдз и сöтiс мöдiкö. Вöрыс топ пондiс орсны, Викторсö пондiс нерны аскоддя гаж. «Кытöн эшö врагыс?!» — синнэзнас кошшис петляэсö и, кöр адззис кöз бердö кöрталöм стальнöй кытшсö, котöртiс сы дынö, шупыта сöталiс проволокасö.

Керис, кыдз бур удж, топ колхозын жö кералiс пес, мед бригадирыс локтö да видзöтö, что весь лунсö эз öшты, кыдз бур уджын мыдзыштiсö киэс, пымалiс, уджавтöнняс эз кыв, кыдз курччалiсö номмес, гымалiс да бокö вешшис кымöрыс.

Луныс эз тэрмась. Небоын шондiыс топ сулалiс öтiк местаын, но кöр дугдiс уджавны, кадыс лоис рытлань. Лёкжыкöсь лоисö номмес, нюжалiсö пуэслöн вуджöррес, вöрас пондiс пемдыны ни. Викторыс мыдзис, но сьöлöмыс вылын лоис кокнит, нельки ас кежас ошшасис Павел Николаевичлö: «Вот, Павел Николаевич, ветлы вöрас да видзöт, мый ме уджалi!..» — «Ветла, ветла! — шуас Павел Николаевичыс и котрасяс татчöдз, видзöтас лесникыслiсь уджсö, натьтö, бöра пондас медодз серавны. — Ветлi, видзöтi... Адззылi челядь уджтö... Но и мый... Мый тэ сiйöн мыччалан? Неран только соседтö, унажык лöгöтан... Сiя мунас да петляэсö кышалас мöдiклаö...»

«Ме и сэтчинiсь керала!» — висьталiс Викторыс.

«Да. Сiдз, Виктор Спиридонович... Керавны и колö... Масьтыны, мед сэсся оз öшлö...»

Викторыс пуксис колода вылö, малыштiс долоньнас ва кымöссö, горöн ни шуис: «Видзöтам, мый тi эта бöрсянь пондат сьывны!» — кыдз томмис лесникыс, смевмис, некинiсь ни эз пов вöрас, эд сiя керис ассис удж, кыдз гортас хозяин.

Гортö локтiс сёрöн ни, мыдзис кодь, шыннялiс ас кежас.

— Мый талун сэтшöм рад? — юалiс иньыс. — Или пасьтöг одзат чеччалöны?

— Йöктöны, — серöмтчис Викторыс и водiс узьны.

Ойыс чулалiс, кöда бок вылö водiс, сiя бок вылiсь и чеччис. Чеччис и медодз эз вежöрт, мый одзын гажöтчö сьöлöмыс, кытшöм талун праздник, но петiс öтöрö и адззылiс Демьянлiсь нылочкасö, кöда мöдöтчöм, кыдз праздник кежö и öшын увтаныс котрасьö цветтэзöн. Сэк лесникыс ачыс ни пондiс лöсьöтчыны школаö: иньыслiсь корис виль йöрнöс, пасьталiс виль костюм, юрыс вылö пуктiс виль фуражка.

— Поди, челядьыслö мыйкö колö козьнавны? — усис тöдвылас, но эз тöд мый козьнавнытö, эд сылö етша кин-мый козьналö, а öнi, видзöт, отирыс олöны культурнöя: праздник лунö и иньыткöт куш киöн он пантась, а сэтöн, лесник, тэнö видзчисьöны школаын. — Мый жö? Наташа, мый жö? — öвтчис джодж шöрын.

— Бöбмин! — сералiс Наташаыс и висьталiс. — Босьт книгаэз да тетраддез, палисадниксис нетшкы цветтэз, вот тэныт и козин!

— Наташа! Золотöй тэнат юрыт, — Викторыс джаджись конувтас кутiс книга, кöдö важын ни небис магазинiсь и куим-нёлись ни лыддьöтiс ас кежас, кытчö гижöмась зверрез да кайез йылiсь, палисадникись нетшкис цветтэз и иньдöтчис школаö.

Луныс асывсянь лöнь да гажа. Пуэс бытьтö öгралiсö-цветитiсö рöма цветöн — пондöтчис киссьыны лист. Эшö лэбалiсö да сьылiсö чикиссез, сырчиккез, кöдна талун-ашын вдруг öшасö — лэбзясö шоныт местаэзö, сэк напрочь ни локтас ар, а öнi эшö арыс ар вылö öддьöн оз и вачкись.

Викторыс видзöтiс льöмпуэз вылö да гордöя шагнялiс школаö, кытöн öтöрас чирзiсö ни челядь. Тöдвылас усис, кыдз мунiс первöй классö: топ лэдзчис вöв вывсянь и веськыта котöртiс да пуксис парта сайö гожумбыт пинялöм бöрсянь (няньнас весь эз вердö, колiс шедтыны аслыт). Сэк Викторыс эз и волнуйтчы, кыдз волнуйтчис талун: сiя велöтчиссес дынö мунiс кыдз ыджыт гöсь, (кöть сытöг локтасö колхозiсь да сельсоветiсь председателлез, агроном, парторг).

Школа оградаын линейка — сулалöны челядьыс стройын, а ны одзын велöтiссез, колхозiсь да сельсоветiсь председателлез, агроном, парторг, и челядьыс сайсянь ограда бердын сулалö да кузь голясö нюжлалö Робертыс.

Медодз лесникыслö син вылас усис соседыс, мыйсянь сьöлöмыс повзьыштiс — виноватöй эд мортыс одзын, но Викторыс сэтöн жö юрсö бергöтiс Павел Николаевичлань, кöда сылö ласковöя шынньöвтiс, кыдз висьталiс: «Эн пов, быдöс лоас бур и тэрмась, тэнö видзчисям!»

Лесникыс бокöн-бокöн локтiс Павел Николаевичыс дынö, саясис бы сы спина сайö, но директорыс кутiс сiйö сосöттяс да сувтöтiс бокас, мед велöтчиссез видзöтöны, что сiя не Робертыс кодь — местаыс сылö не забор бердын...

Линейка вылын медодз челядьсö ошкис колхозiсь предыс, висьтасис, что велöтчиссес уна отсасисö гожумнас, керисö колхозыслö турун, дзимлялiсö сю, мукöдыс пастучитöмась маммезныскöт куканнез.

Колхозсянь козьналiсö подароккез. Председатель бöрсянь баитiс агроном. Парторг поздравитiс праздникöн, а лесникыс мыйöн?

— Но, Виктор Спиридонович! — чувйыштiс бокас Павел Николаевичыс. Öтнат кольччин...

Викторыс бура эз куж баитны, но челядьыс одзын эз öш, лэбтiс юрсö, веськöтыштiс спинасö, видзöтiс веськыта синнэзö, и пондiс разьны, мый думайтiс, сiйö и висьталiс, кыдз кужис, сiдз и баитiс. Медодз челядьсö ошкис, что нiя гожумнас весь эз олö, отсалiсö колхозлö и лесникыслö — уджалiсö вöрын, эз повзьö сьöкыт уджись, номмезiсь, ошшезiсь, узьлiсö кöззэз увтын, шедлiсö зэр увтö, адззылiсö кайезлiсь да зверрезлiсь олан, кутлiсö кöч.

Кин челядьыс коласiсь гожумнас уджалiс лесникыскöт, чужöммезныс вылын пондiс öгравны сэтшöм гаж, дзик талун жö бы бöра котöртiсö вöрас. Медöддьöн, тыдалö, рад вöлi Петькаыс, кöр сылö Викторыс козьналiс книгасö, и цветтэс понда челядьыс радöсь, паныт висьталiсö: «Спасибо, Виктор Спиридонович!»

— Вот, челядь! — лесникыс бöрсянь челядьыскöт пондiс баитны Павел Николаевичыс. — Эта мортыс учöт мыгöра, но ыджыт сьöлöма. Сiя зверрезлöн да кайезлöн медбур ёрт. Тiянлö бы колö лоны сы кодьöн жö.

«Мый тэ и модян, Павел Николаевич? — гöрдöтiс лесникыс челядьыс одзын, но директорыс топ этö эз и адззы, Викторлö ни шуис:

— Виктор Спиридонович, эшö висьтав челядьыслö кыв-мöд, а? Нiя не городын быдмöны, любитöны зверрез и кайез, быдöнныс вöрас котрасьöны...

— Виктор Спиридонович... — кеймисис ни Петькаыс.

— Мый ме эшö тiянлö висьтала? — мыкталö лесникыс.

Видзчисьöны челядьыс, сулалöны стройын, топ оз и лолалö.

«Мый жö бы эшö висьтавны?.. Мый жö бы...» — пессис-думайтiс Викторыс и вдруг, кыдз мезмис да пондiс разьны-баитны, кыдз тöн ветлiс вöрас, важ мельница дынiсь адззылiс бобррезлiсь удж и разис петляэз.

— Вот, челядь, вöрас öшлöмась стальнöй тросiсь петляэз... Джагалöны зверрез, а дорйыны нiйö топ некинлö... Öтнам кытчöдзкö песся, медбы вöрыс эз ло вийöм да гусялöм. А менö жö отирыс видöны... Чожажык велöтчö да локтö мекöт уджавны, природалö отсавны.

Секунда кежö челядьыс синнэзын кусiс гаж. Нiя веритöны лесникыслö — сы дор, кöр лыддьöтöны книгаэзiсь, мый висьтасьö Викторыс, асьныс кылöны и адззöны, любитöны быд каёксö и зверьсö... Медöддьöн, натьтö, Петькаыс. Сылöн сiдз синнэс и югйöвтiсö.

Лесникыс, мый колiс висьталiс челядьыслö и лöнис. Велöтчиссес вартiсö оча долонь.

Робертыс эта коста сулалiс забор бердын, хищнöй нырнас вишнитiс воздухсö, сьöвзис и перыт кузь шаггезöн иньдöтчис клублань.

7

Кöда луныс год кузя, он тöд, кыдз сiйö чулöтны, кыдз сы дынiсь мезмыны, а кöда неделяыс вачкисьö праздник вылö: уджалан-орсан, шоччисян-сьылан.

Викторыс таво гожумнас, поди, етшажыкись и пымавлiс, кокнитжыка киэзнас уджалiс, но сы местö ойесö етшажык узьлiс, кöр оланыс велöтiс овны мöднёж, отирсö пондiс тöдны топ буржыка.

Сьöкыта лесникыс понда чулалiс гожумыс, но арнас, кöр пондiс думайтны, петiс, что нем уна эз ешты керны, что гожумыс лэбзис-колис, эз ешты синöн кваркыштны, локтiс ни ар и чожа усяс лым. Вöрын чочкоммисö кöччез, вежисö гöннысö уррез.

Öнi лесникыслöн овлö личытжык кад. Мукöдпырсяс, кöр Жучкаыс вöрсис адззас ур, мужикыс гортö вайö добыча, а кöр колö уджавны — керö ассис удж (не вöралiсь эд сiя, а лесник).

Колхозын дзимляссисö сюэз, дзимляссис ыб вылын картошка, öтдруг вундiссис и вартчис. Наташаыслö нем лоис керны гуна дорын и ыб вылын. Öнi сiя ветлöтiс фермаö, а кöр бригадирыс и шуас: «Шоччись талун, Наталья Сергеевна...»

— Мый пондам сёйны? — обидитчас инькаыс, кöр сёяныс йылiсь нем бы тöждiсьны — дышыс петö весь овны.

Эна арся луннэзö Викторлöн иньыс пондiс модьны, что мужикыслöн локтö чужан лун и колö бы кöть öтпыр этö лунсö чулöтны кыдзкö гажöнжык: небны вина, стряпайтны да корны гöссез.

— Кинöс ме кора? Кин менам гöсьыс? — эз вежöрт Викторыс.

— Ой, ой! — нерис Наташаыс. — Сы сьöртi и тöд надз мортсö. Корам Павел Николаевичсö, вежайтö.

— Может, соседнымöс?.. Робертсö! — эрзыштiс Викторыс.

— А мый? Од жö кувтöдз пондö пурсьыны.

— Тэ миритчы...

— Но и ов! Пон моз быдöнкöт пурсьы, — лöгасис Наташаыс.

— Тэ ов любимöй соседыткöт. Колöм тэныт мужикнас Робертыс. Небосö бы судзöтiт! — ныр увтас модис Викторыс и петiс посöдзö. Морос вылас чеччöвтiс Жучкаыс.

Малалiс понсö, но сьöлöмыс вылын гудыр: лöгасис иньыскöт, но и мед... Кин, поди, гозъя коласын лöгасьтöг и олö? Луннас лöгасясö, рытнас миритчасö. Но талун Наташаыс и рытнас абу вунöтöм, мый модис луннас:

— Пыр ми тэкöт пурсям, отир моз ог олö. Колö гажöтчыны да овны, а ми... Ме эд босьтi ни винасö. Лöсьöтчисö-баитчисö и Покров паныттэзö, суббота лунö Наташаыс асывнас чеччис одз, лонтiс гор да пондiс пöжасьны. Югдан гöгöрас сылöн быдöс вöлi керöм ни — пöжалöм и пуöм. Рытнас öксясö гöссез.

Луныс кымöра, арся, топ тöждiсьö, горзö, мыйкö öштöм и оз адззы. Улицаын нять, воздухыс уль. Кöдзыт. Льöмпуэз да рябинаэз вылын лэбалöны сьöвбöррез — кайес пöттöдз сёйöны ягöд. Кинкö лыйис сьöвбöрреслö. Нiя лэбтiсисö деревняыс весьтö и уськöтчисö кытчöкö видззес сайö. Öшын увтын кольччисö воробейез, кöдна пыр чирзöны-норасьöны асланыс олан вылö.

Дженыт арся луныс, но сiя талун чулалiс дыша, натьтö, сiйöн, что Викторыс видзчисис рытсö, а луннас гряддэз вылiсь ештiс дзимлявны капуста, лöсьöтiс гид ыбöс, тöв кежас курöггезлö поз и пемдан дорас ни пуксис телевизор одзö.

Наташаыс бергалiс пода гöгöр, вежис вывсö, пуксис диван вылö и пондiс гöрдззыны носки, ачыс висьтасис вöт, топ талун ойнас керкуныс весьтöт лэбалiс самолёт. Самолётыс гардö-лэбалö, Наташаыс дзебсисьö бы, пышшö и оз вермы.

— Мый жö бы эта вöрдö, Виктор?

— Тэ вöттэс вылö веритан, а ме ог.

Öтöрас чожа пемдiс. Керкуын öзтiсö би, öшыннэзö павдöтiсö чочком штораэз. Ыбöс одзын пукалö каньыс да «миссьö» — висьталö гöссез.

Тарс-тарс, кылö кинкö кайис посöдзас да тарскöтiс ыбöсас — этö медодз локтiс Павел Николаевич. Сiя эз ешты вожмöвтны порогсö, а öмыс осьта ни, ошшасьö, что некöр и некытчö оз сёрмы, что Москваыс сы сьöртi лöсьöтö часыэз... А тэ мый думайтан, Виктор Спиридонович? Кытшöм сiя бы вöлi школаын директор, ежели бы вöлi рызi-бызi? Велöтчö овны Павел Николаевичыс моз!

Здоровайтчисö. Павел Николаевичыс порог дорын коккезсис кыскалiс ботинкаэз, вывсис чöвтiс плащ, öшöтiс сiйö тув вылö, локтiс хозяйкаыс дынö, окыштiс рожабансö, малыштiс юрсö и ласковöя шуис: «Дудi тэ! Виктор Спиридонович, кытiсь тэ сэтшöм чож да басöк иньсö адззин? Вай вежсям! Ме тэныт сета Кирилловнасö, а тэ меным — Наташасö».

— Пöрисьмöмыт ни, Павел Николаевич, сералö Наташаыс. — А кытöн Кирилловнаыс? Мыля эз лок.

— Мый ме сэтшöм пöрисьыскöт понда ветлöтны? — пиннес гер Павел Николаевичлöн — шутитö. Сыбöрын висьталö, что Кирилловнаыс пондiс шогавны.

— Вот, челядь, пöрисьма. Топ мöйму эшö жöник вöлi, а таво нач рожабаннэзö чукрассисö... Эх, клин да мох! Виктор Спиридонович, вöрыс понда Клин да Мохыслö мый висьталiсö? Ме мыйкö эг кыв...

— Вештыны судитiсö...

— Вот кыдз... — Павел Николаевичыс пондiс видны и осудитны стариксö. — Ачыс эд виноватöй. Мый сiя вöрнас керö? Кинлö заптö? Натьтö, тэ вылö дедыс лöг?

— Кин сы вылö оз лöгав? — кымöртчис Наташаыс. — Быд поныс ни пурö бы. Мед... Мымда ни ме сылö кöки, мыся, кытчö оз ков, юртö эн сюйышт, да сiя разь менчим кывзас?!

— Наташа, разь сэтшöм мужиксö туйö видны?! — гажöн баитiс Павел Николаевичыс. — Тэ лыддьöт жö, мый сiя газетаас гижöм!.. Кыдз кыв, сiдз и лыйöм, браконьерресö кок вывсиныс картечöн пöрöтöм. Важын ни, Виктор Спиридонович, эта статьяыс колiс да некин гижисьыс миян эз адззись, а меным сё некöр, кера бы бурö, но петö отир смех! Сiдз, челядь! Мекöт тi эд споритö.

— Но, Павел Николаевич! Кин тэныт веритас? — сералö Наташаыс. — Тэ жö миян коддесö школаын велöтан.

— Ох, Наташа! Тэ думайтан миян коддес коласын быдöнныс учителлез? Абу эд. Шабашниккез коласас шедöны, сiйöн, челядьыслiсь душаэсö и тшыкöтам... Сiйöн и ошка Викторсö. Что сiя талуння моз оз ни бы ов. Ась талун Викторсö видöны, а ашын, Наташа, мужиктö пондасö ошкыны. Он верит?! Адззылан! — Этö тэныт баитö не Палич старикыс, а Павел Николаевич — умöль морт, но школаись директор. Во...

Керкуын праздник. Нем сэтöн касьтывны гажтöм чассэз, кöр колö гажöтчыны.

Кинкö öтöрас пондiс гуддисьны, кыкись кызöтыштiс. Посöдзын пондiс вувтны Жучкаыс.

— Кинöскö эшö чортыс ме кодьöс жö вайöтö, — серöмтчис Павел Николаевичыс. — Винатöг öтiк минута ни ог вермö овны. Телевизорас и то ведра мымда öтiк рытас юöны. Мый сэк керны простöй отирыслö? Кыдз эта бöрсянь велöтны челядьсö?

Павел Николаевичыслiсь баснисö дзугисö йöз отир. Нiя сьöрсьöн-бöрсьöн пырисö керкуас, öтiк колассиныс юалiс жö: «Позьö?!»

— Оз! — сэтчö гажöн горöтчис Павел Николаевичыс, но казялiс, что пырисö йöз отир, вежис баснисö. — Позьö, позьö...

Керкуас медодзын сулалiс участковöй — паськöмыс милиционерлöн и чужöмыс эд тöдса, а сыбöрсянь тыдалiс тошыс Евграф Титовичлöн — лесничöйыслöн, кöда югытiнас эз бы, тыдалö, мыччав чужöмсö, Евграф Титович сайсянь сьöд синнэс югьялiсö Демьян соседыслöн, и эшö кинкö пемытiнас посöдзас маласис — кошшис ыбöс вугсö.

— Вот эта да-а-а... Гöссез дак гöссез! — гажöн горöтчис Павел Николаевичыс и вешшис джоджыс шöрись. — Ме думайтi только öтнам, — и виньдiс. Ыбöс коласöт керкуас эшö вожмöвтiсö кык тöдтöм морт, öтiкыс бöра жö погоннэзöн — кымöснас потолоксö люкалö (сэтшöмö еныс быдтöм), а мöдыс сылö конувтöдззас, но ён — увдöр и вевдöр öтпасьта.

— Пуксьö! — чожа стуллэз бердö кутчисис Викторыс, öшис кодь бы, что локтiсö нiя, кöднö эз кор, эз видзчись, но эд этадз эшö буржык, ежели ёрттэзнас чужан лунö локтiс Евграф Титович, кöдакöт уджалан öтлаын!

— Пуксьö, дона гöссез! — кисö паськöтiс Павел Николаевичыс, чикись моз пондiс сибöтчыны локтiссес дынö, но участковöйыс бытьтö паныт вачкис-висьталiс:

— Ми гöститны эг локтö!..

— А мый нö тi татчö локтiт керны? — сё шутитiс Павел Николаевичыс. — Вина юны? Кытшöм подарок вайит хозяиныслö, кöр сылöн талун чужан лун? Али куш кымöснаныт пороззэз моз ыбöссö люкалiт? Миян, братцы...

— Тiян? — чорыта висьталiс участковöйыс. — Хозяинныт... Лось яйöн гöссесö вердö бы... Сiдз эд?

— Ог тöд кытшöм яй сылöн эм, но масьтöм сьöла яй вылö менам дульö вотялö! — сё сералiс Павел Николаевичыс.

— Шутки в сторону, — джодж шöрöдз шагньöвтiс кузь мыгöра мортыс. — Висьтав, хозяин, лосьсö лыйин или петляöн кыйин?! Ми эд быдöс ни тöдам.

Викторыс öшис: чочкоммис чужöмыс, бергöтчыштiс юрыс. Комын каньыс чеччöвтiс стул вылiсь, уськöтiс бекöр, мыйсянь Наташаыслöн сьöлöмыс кынмис, мыйкö бы локтiссеслö шуö и оз вермы — öмыс пиньöвтчö.

— Кытiсь лось яйсö вайин, лесник? Кытшöм местаись? — пызан сайö пуксис кузь мыгöрыс. — Он бы висьтав? Адззам эд...

— Кытшöм яй? — виноватöя шынньöвтiс Викторыс. — Ме разь сы понда вöрас ветлöта?

— Вот лосьöс вийöмыт...

— Сьöла яй менам эм. Сёят? Верда.

— Ага. Сьöла... — нерис тöдтöмыс. — Öтiк сьöланас разь гöссес пöтасö? Бöбöтан, гражданин, бöбöтан.

Мый сэтöн висьтавны? Мый нiя гардöны? Кытшöм лось йылiсь баитöны? Викторыс öшис, оз тöд мый висьтавны. Думайтiс, что локтiсö гöссес и Павел Николаевичыс моз жö шутитöны-бöбöтöны, медодз повзьöтасö, а сыбöрын пондасö серавны: «А тэ, мужик, полiсь жö вöлöмыт!..»

Павел Николаевичыс ни öмсö осьтiс да видзöтö и кывзö кин-мый керö да баитö керкуас.

— Евграф Титович, мый эта лоö? Быль я мый я тi яй кошшат? — долоннезнас боккезас вачкис Павел Николаевичыс. — Öнджа... Ми тэкöт, Евграф Титович талунöдз тöдан кытшöм ёрттэз вöлiм! Мыля сьöд каньыс миян коласöт котöртiс?

Евграф Титовичыс сулалiс порог дорын, кыдз йöз, и кылiс и эз энö кыввесö, юрсö бергöтiс мöдöрö. Сы местö одзлань шагньöвтiс участковöйыс да чорыта висьталiс:

— Адззам!

— Мыйсö?! — лöгасис Павел Николаевичыс.

— Тэ, гражданин, не гортат! Джоджыс шöрын борддэтö эн паськöтлы, ми баитам хозяиныскöт, — висьталiс кузь мыгöрыс Павел Николаевичлö. — Вежöртiт, мый ме висьталi?!

«Стой, гад, стой! Берите его!» — ыксiсö телевизорын. Кинöскö вот-вот кутасö экраныс вылын и сылöн гажа оланыс овсяс.

— Мый эта сэтшöмыс, Виктор?! — пондiс горзыны Наташаыс.

Викторыс шы эз сет.

— Наташа, эн горзы. Быдöс лоас бур! — гажöн висьталiс Павел Николаевичыс, серöмтчис. — Вот ме кытчö отирсö велöта. Велöта, велöта, а нiя пырасö горт шöрö и менö жö стыдитöны...

Каньыс сё миссис кроватьыс дынын, а посöдзас вувтiс Жучкаыс.

— Локтö! — пызан сайись чеччис кузь мыгöраыс и висьталiс. — Пондам кошшисьны. Понятöйез миян эмöсь.

— А санкцияныт эм?! — мыдз голосöн юалiс Павел Николаевичыс.

— Быдöс миян эм, гражданин, — кармансис кыскис гижöт кузь мыгöрыс. — Локтö, хозяин и хозяйка. Петам посöдзö, видзöтчам и адззам кытчö дзебит яйсö?

— Нем ме ог тöд! — шуис Наташаыс.

— Сэк локтö...

Быдöнныс петiсö öтöрö. Посöдзын пемыт, ыркыт, уль воздух. Спина сiдз и кынмö. Кымöрын шоча югьялöны звездаэз. Вувтö кинлöнкö кыз голоса пон. Жучкаыс ниртчö коккез дынын.

Милиционеррез киэзын сотчöны-югдöтöны фонариккез. Посöдзись лэдзчисö палисадникö. Биыс югдöтiс кыдз, льöмпуэз, рябина, кöдна би югöр весьтын пемытiнас тыдалiсö, кыдз сказкаын. Пуэс уввес вылын югьялiс бисерöн лысва, рябинаыс сулалiс кыдз картинка вылын.

Шлючка-шлячка мунiсö чомлань, локтiсö ыбöсыс дынöдз.

— Осьтö, — висьталiс участковöйыс.

Мый сэтöн осьтны, кöр ыбöсыс бердын замокыс местын пыр сюйыштöм чунь кыза бедь: поныс да каньыс оз пырö, а отирыс — асланым, нем йöз чомсис кошшыны, нем гусявны.

Чомыс пытшкын гарйöм гу, кытчö гожуммес кежö чапкöны лым, кöда оз сыв август месяцöдз. Лымыс вылын видзöны яй тор, ырöш, картошка... öнi лымыс абу ни.

— Осьтö да пырö, — висьталiс Викторыс, но Наташаыс ачыс ыбöсыс бердiсь кыскис бедьсö, осьтiс чомсö. Сылöн киэс дрöжитiсö, кынмис — оча пинь оз лок.

Чом пытшкын пемытiнас гажтöм, топ гуас сiдз и берездасян и он пет. Стенаэс важöсь — сьöдöсь, угöввезас öшалöны черань веззэз, вачкö шыр дук. Стенаэс бердö хозяиныс керöм паськыт джаджжез, кытчö чапкöмась важ паськöм, гырнич да кринка, симöт гырдзим, косьмöм нин шуллез, сюри быдман, чöрссэз, кöдöн важын ни оз уджалö. Быдöс, мый эм, син одзын, дзебны нем.

Милиционеррес медодз фонариккезнас югдöтiсö гу пытшксö, но сэтчин тыдалiс только осьта öма важ пестер.

— А эстöн мый? — кузьыс шагньöвтiс джадж дынö, асланяс кыскыштiс важ паськöммез, сыбöрын бырöм нинкöммез, кöднö деревнясис, натьтö, сэсся некинлiсь он ни адззы, а Викторыслöн эмöсь (Наташаыс сё бы нiйö сотiс горын, но мужикыс сералiс: «Мед олöны... Пригодитчасö...»). Öнi важ нинкöммес коласiсь кок ныррез дынö катыльтчис учöтик челядёк юр ыжда зi поз, киэз бердö каттисис черань вез. Нем бы сэтöн милиционерыслö кошшыны, но нiя киэзнаныс сыналiсö джаджись «добросö».

Топ кынмис Наташаыс, кыв эз вермы горöтчыны, а Викторыслöн серöмыс ни петiс, но видзсис, эз серав.

— Гарйö, эшö гарйö! — згальничайтiс Павел Николаевичыс. — Угöлас потöм гырнич эм, гырничыс пытшкö важ кеписьö Спиридон дядьным дзебöм золото. Вот кытöн богатствоыс, ёрттэз!

— Гав! — вувтчис Жучкаыс и пондiс эрзыны, топ быль угöлын вöлi гырнич и сы пытшкын золото.

— Сiдз, Жучка! Ог сетö золотосö, — серöмтчис Павел Николаевич.

— Вот сiя! — лöга горöтчис кузь мыгöрыс и ружтыштiс да быдöн одзö шупыта чапкис тыра котома.

Наташалöн топ бырис садьыс, сiя чирнитiс и виньдiс... Жучкаыс пондiс эрзыны. Викторыс öшис.

— Адззит?! — гажöн юалiс Павел Николаевичыс. — Вот мымда вöлöм золотоыс.

— Адззим! — чорыта висьталiс милиционерыс. Пыртам керкуас котомасö да видзöтам кытшöм сы пытшкын «золото».

— Пыртö!.. — горзiс Наташаыс, видiс Жучкасö, кöда пиннезнас сiдз бы и кутчисис мешöкыс бердö.

Брынгисö поныслö. Сiя кивзытöн да никсытöн мунiс коккез дынiсь. Керку öшыннэзын югьялiсö биэз. Кысянькö павкис тшын дук. Би югöр весьтын вуджöртчис кань и котöртiс посöдз сайö.

Тыра мешöксö, пыртiсö керкуö, чапкисö джодж шöрö. Сё уджалiс телевизор, сэтчин висьтасисö ни новосттез.

Каньыс чеччöвтiс мешöкыс дынö да пондiс мурзьыны.

— Э, котыс кылö яйсö, — шуис кузь мыгöраыс, пуксис пызан сайö, одзас пуктiс гижöт, кармансис кыскис ручка и горöтчис. — Сiдз граждана, кинлöн кöзичаыс?

— Ог тöд... — шуис Викторыс, кöть адззис, что кöзичаыс нылöн (мамыс эшö дöрасö кыйлiс).

— Миян кöзичаыс, — нырнас вишнитiс Наташаыс, висьталiс честнöя, чышкис синваэсö. — Миян кöзичаыс... А кин сэтчö яйсö тэчис да пöгребас сюйыштiс? Тэ, Виктор?!

— Тэ мый баитан? — Пиньöвтчис öмыс Викторыслöн. — Кытшöм яй ме кöзичаат тэча?

— Кык неделя, кыдз öштi... — горзiс хозяйкаыс. — Бöбмытöдз кошши, а сiя видзöт кытöн вöлöм...

— Сiдзкö тiян кöзичаыс?

— Миян... — пильскис Наташаыс. — Миян, но... Кöртöтыс не миян. Миян этатшöм воннес важын ни абу...

Чарöтiсö горт шöрын, кöть мый керö, но озö суськисьö, мый эм — син одзын.

— Оз сiдз вермы лоны, — висьталiс Павел Николаевичыс и лэчыта видзöтiс участковöйыс вылö.

— Кыдз оз вермы? — серöмтчис милиционерыс. — Эта мый? — чуньнас мыччалiс кöзичаыслань: яйыс вöлi дука кодь ни.

Демьян соседыс, тыдалö, рад, синнэзас орсö гаж, что Викторыс шедiс, сiдз бы, натьтö, и висьталiс: «Бур, кöр йöззэсö кутан?! Видзöт, мый ачыт пондан сьывны? Натьтö, абу жö басöк...»

Викторыс öшис, кыдз вартлiсö, топ оланыс киссис-разсис. «Суд. Штраф или тюрьма! — пурисö думаэс. — Медодз вашöтасö лесникись. Ась вашöтöны... И штрафсö вешта, мöссö вузала, но вешта... — пессис, но некыдз эз вермы вежöртны, кöр чомас вайисö тыра котомасö и мыля сiя нылöн.

— Не менам яйыс! — лесникыс вачкис кулакнас моросас. — Не менам!

— Мыля сiя миян лоас? — горзiс Наташаыс.

— Мыля сiя тiян лоас? — öшис Павел Николаевичыс, видзöтiс то Викторыс синнэзö, то милиционерреслань.

— Кинлöн сэк? Висьталö... — юасис милиционерыс. — Поди, кöзичаыс керис коккез да ачыс котрасис вöрас?

— Ог тöд... — юрсö öшöтiс Викторыс.

— Адззисяс хозяиныс, Виктор Спиридонович! — шуис ни Евграф Титовичыс.

— Евграф Титович!.. — пондiс чышкыны синваэсö Викторыс. — Веритан или он меным?!

Каньыс нявзiс да ниртчис котомаыс дынын, а кузь мыгöрыс пызан сайын гижис протокол.

— Гижсьö протоколас, — дыр мыйись висьталiсö Викторыслö, но сiя эз гижсьы.

— Асьныт тöдат... — шуис кузь мыгöраыс, гижöтсö сюйыштiс сумкаö.

— Евграф Титович, веритат меным или одö?! — мöдöтпыр Викторыс юалiс лесничöйыслiсь.

— Верита, Виктор Спиридонович, и тэ асьтö öддьöн эн вий, быдöс адззисяс. — Москваö гижа! — мурзис Павел Николаевичыс. — Вот адззылат, что ог гиж. Гижа!

— Локтö, — ёрттэслö висьталiс кузь мыгöраыс, спинаыс сайö кышалiс тыра котомасö. — А тi кöть кытчö гижö, но ме думайта, что яйыс тiян.

8

Покров бöрсянь куим лун кежö усис лым, локтiс тöв. Деревняыс пасьтасис чочком паськöмöн и пондiс видзчисьны напрочь дженыт да кымöра луннэз, кöр шондiыс оз и мыччась.

Куим лун вöлi тöв, нёльöт лунас сылöтiс, öтöрын лоис пидзöсöдз нять, кöть керкуись эн пет: туман, зэрö, пуэз вылiсь киссьö медбöрья лист. Пöриссес кивзöны-шогалöны. Аскоддя шогöтöн шогалö и Викторыс. Сiйö оланыс зэлöтiс да сiдз, что кынöмыс сималö и сёйны оз тöр, оныс петö и узьны оз вермы, уджалö и оз уджав: корасö милицияö, пуксяс машина вылö, ысласяс районöдз витдас километра, туйын кынмас, вамас, нятьöсьмас, гортö локтас кöр сёр рытöн, кöр ойшöр пырас керкуö, порог дорсянь гор вылö, оз ешты буржыка шонтiсьны, оз ешты онмöссьыны, асывнас бöра ни участковöйыс корö сельсоветö да юасьö: «Öтнат яйсö вайин или эшö кинкö вöлi? Поди, Павел Николаевичыс?..»

— Юав Павел Николаевичыслiсь, сiя тэнö эд школаас велöтiс, — лöгасьö ни Викторыс и веськыта висьталö милиционерыслö. — А ме некытшöм яй эг вай! .

— Вайин, зонка, вайин...

Суськись, эн суськись, тöдöны ни кытiсь вайин. Кыдз морт вийисьöс кутiсö да нуöтiсö вöрö, грань кузя вайöтiсö вышка дынö, мыччалiсö, кытчö кышасьöм лосьыс ― кольччöм кучикыс, кишкаэс, коскаэс да сюр.

— Тэнат уджыс?!

— Гы, мыля менам лоас, кöр татчö эг вовлы?

— Тэнат! Отирыс висьталöны.

— Кин висьталö? Ась мыччалö ачыс.

— Висьталöны... Эшö кöркö айытлöн петляэс вöлöмась и яйсö сыкöт ваялöмась.

Дзибын, лажмыт местаэзын, каёккез оз горалö, только лоссезлöн следдэз да сiсьмöм мырресö пöрлалöм ош. Чеччöвт бокö и милиционерыс синöн оз ешты кваркыштны, кыдз öшан-мезман. А сэсся мый? Бандит моз вöрас и пондан овны? Не радио, не газета и отирыскöт он понды пантасьны... Кöть мый, но сэтшöм оланыс Викторсö оз бöбöт, сiя видзöтö участковöйыс вылö и сералö ни.

— Мый сералан? Горзыны колö... — мыччалö милиционерыс кучик вылö, кöдö öшöтöмась уввез вылö. — Тэнат?!

— Поди, тэнат! — Викторсö биа шомöн чувйö лöгыс. — Тi эд соседыткöт öтiк бекöрись сёят, а петляэс как раз сылöн — этö ме учöтсянь тöда, кöр эшö Иван Егоровичыс кыйис лоссесö.

— Но, Виктор Спиридонович, не гортат эд...

— Менам гортыс вöрас и эм, быд кöз увтын рай! Думайтiс ни пышшыны милиционерыс дынiсь, но эз пышшы, локтiс гортö, гажöтчö, а иньыс горзö, видö:

— Медбы тэнö судитiсö ни, нежели этадз кыскалiсö... Сьöлöмö мыйкö тэ понда лоис ни.

Дыр кыскалiс öтмöдöрö милицияыс. Месяц бöртi корисö судö, кытöн судитiсö лосьыс понда вештыны. Судыс бöрсянь öтiк ой узис чöскыта, öтiк лун сёйис пöтжыка, лöсьöтчис ни банкö сетны деньгасö, но локтiс Павел Николаевичыс, кышасис аслас бöб юрöн:

— Тэ мый, Виктор Спиридонович?! Некытчö деньгасö эн сет! Уна разь деньгаыт, медбы козьнавны... Ме Москваö гижи, вот адззылан мый сэтчинсянь висьталасö! Москваас, зонка, не участковöйыс, кöда юрсö оз вермы вердны...

— Но тэнö, Павел Николаевич... Кытöн шестьсот рубыс эз вöв? Ловьяöсь лоам, шедтам, тшыгйöн ог кулö, — баитö Наташаыс. — Тэ тöдан ни мый ме лои эта яй понда!..

Викторыс оз ни уджав лесникнас. Кытшöм лесник, кöр вöрсис ачыс вийö-паздö да гусялö? Кытшöм синнэзöн отирыс вылö видзöтны эта бöрсянь? Кыдз нылö висьтавны, медбы нiя керисö тэ моз: эз браконьерничайтö, эз гусялö вöрсö? Буржык лоас тшыгйöн овны, нежели лесникас уджавны.

Мымдакö Викторыс олiс весь, гуддисис гортас. Öтпыр гортöдззас вовлiс Евграф Титовичыс, недыр кежö пуксьыштлiс диван вылö, öтлаын тöждiсис, унажык Наташаыс понда да Викторыслö горöтчис: «Уджалiн бы...» и петiс.

— Ог! — бöрсяняс ни висьталiс Викторыс. — Честнöйöн колö овны.

Вöлöн уджалö Викторыс. Öнi, кöр соседыс пантасяс, пиннесö мыччас да сералö: «Но мый, сусед, бöра вöлыт бöж бердын видзсян? Сiдз тэныт и колö. Натьтö, думайтiн ни что тэ и эм! Мый колö, сiйö и керан ни... Отирсö пондiн напрочь ни сёйны, но еныс...»

Сэтшöм минутаö вир пизьö, сiдз бы и сетiн пельбокас, но оз туй! Кывтö курччöвт, ружты, но асьтö видз. И видзсис Викторыс, кöть и мукöдпыр Робертыслö бöрсяняс сьöлалiс жö...

Отирыс эта коста лёбöны: кин мый вермö, сiйö и висьталö — унажык Викторыс дор. Кывсьö, что сылö чомö яйсö дзебöм Абрам Коля, а Колясö этö керны бöбöтöм öтiк морт, но... Тöдöны да оз тöдö, оз висьталö, полöны сiдзкö.

Энö сказкаэсö Викторыс кывзiс и эз, эз ни кывзы Павел Николаевичсö, кöда оз-оз да рытнас дзурк-вирк пырас керкуас, здоровайтчас, оз и пуксьы, ошшасьö:

— Нем эн шу, Виктор Спиридонович, чожа ни Москвасис локтас дошлöй следователь и быдöс адззас.

А эта коста чулалö ой-луныс. Погоддяыс кöдздöтiс — би мороз. Викторсö бöра мыйкö вылö корöны сельсоветö, бöра роч мужик юасьö, кытiсь, кыдз да мыля котомаыс яйнас лоис Викторрез чомын.

— Натьтö, котомаыс быль коккез керлiс... — сералö öнi Викторыс. — Мый вылö баитны, кöр вештiси ни... Мый кöдзи...

— Колö! — шуö тöдтöм мортыс.

Бöра Викторлiсь юасьöны, Наташаыслiсь сьöлöмсö чувйöны. Тöдтöм мортыс деревняын олiс не öтiк лун и öшис, а сыбöрын районö корисö Робертсö, Роберт бöрсянь Демьянöс, Демьян бöрсянь Абрам Коляöс, и пондiсö котрасьны сьöрсьöн-бöрсьöн мужиккес — аслыныс абу радöсь, что кыввезнысö видзисö кузя.

Вöлi тöв ни. Чулалiс эшö месяц етш и деревенсаöс лось понда бöра корöны судö: кин свидетель, кин заседатель... Не весь пöриссес баитöны: «Судiсь да ваись пов...» Повзис деревняыс — шы абу, видзчисьöны, мый жö лоас, кинöс жö эшö судитасö. Поди, быдöннысö ни кöрталасö öтiк гезöн, эд быдöнныс не таво, дак мöйму или одзынöсёйлiсö лось яйсö... Но некытчö некинöс эз нуöтö. Суд бöрсянь бöра деревняыс кыдз ловзис, — лэбтiс юрсö, только кык морт юррезнысö öшöтiсö жö — этö Демьян, кöдö штрафуйтöмась, что эз ветлы судас, и Абрам Коля, кöда тыра мешöксö вайöм лесникыс чомö. Вот эд, челядь, кин миян гусьöн медуна яйсö сёйöм! Абрам Колясö эшö сералöны, что сiя карта бöрас оз лысьт мунны, ошсис полö...

Мый керан? Миян оланын овлö и сiдз, а вот кыдз Викторыс пондас овны одзлань?

— Ми сэтшöммесö, Виктор Спиридонович, öнi öмлöсалам! Ми... — пеллесö адззö Павел Николаевичыс. — Кутчись бöр лесникас!

— Ме сылö кутчися! — видчö иньыс.

— Кыдз-нибудь.... — шынь керас Викторыс, кытчöдз öтiк январь лунö öшын увтаныс эз сувт машина и керкуаныс эз пыр Евграф Титовичыс.

Лесничöйыс гажöн пырис керкуас, шыннялö, кыдз шондi югдöтö.

Здоровайтчис порог дорын, тошсö малыштiс и медодз корис юны.

— Ме тэныт, тоша морт! — чирзö Наташаыс. — Тэ миян керкуö только горе пыртан!

— Сулав, Наталья Сергеевна, ме тiянлö подарок вайи, но медодз юктав жö ырöшнат, горшö косьмö...

— Кытшöм эшö подарок? — хозяйкаыс комись кружкаöн петкöтiс ырöш. — Мый эшö?

— Вöрö пышшöта жöниктö. — Евграф Титовичыс юис ырöшсö и ошшасьö Наташаыс одзын. — Сiя меным öддьöн колö!

— Ме сылö! — несьö рад, несьö сiдз и горзö Наташаыс. — Ме сылö муна! Ме сылö муна! — напрочь лöгасис инькаыс, мыйсянь Викторыс гажмис и чорыта висьталiс:

— Муна, Наташа!

Пасьтасис да мунiс лесхозö, кытöн сiя жö лунö гижисö приказ, öнi Наташа горзы кöть эн, но мужикыт бöра колхозсис кежис вöрö. Висьталам, что Викторыс уджалiс колхозас, а думаэзнас пыр олiс вöрын, ветлöтiс аслас граннез кузя, керис сiйö, мый колiс керны лесниклö: лыддис быд зверлiсь след, тöдiс кытшöм местаын кытшöм кай олö-лэбалö, кытшöм кварталын кытшöм вöр быдмö, тöдiс, кин гусьöн ветлöтö пишальöн, гусьöн лыйö зверьсö, гусялö вöрсö.

Сыись полiсö ни браконьеррез, кыдз бур милиционерись жуликкез, кöть колхозас уджавтöн топ некинöс эз вöрзьöт.

Унаись пантасьлiс Паличкöт (кытчö воштiсян, кöр олöны деревняын?). Кöр старикыслö судитiсö вештiсьны вöр понда, сiя вештiсис, но Викторыс вылö топ эз лöгав, а кытöн пантасясö, одзлань здоровайтчö:

— Здорово Виктор Спиридонович! Спасибо тэныт клин да мох. Велöтiн пöрисьсö овны... Сiдз Клин да Мохыслö и колö! Мый вылö бы меным вöрсö?! Висьтав, а? Гроб пöввез важын ни заптi, кöньöссэс етша ни кинлö колöны, а вöрыс колiс эд!.. А, клин да мох!

Клин да Мохыс жö кытiськö и кылöма, что Абрам Коляöс Виктор чомö котомасö тшöктöм вайны Робертыс.

— Тэ видзöт, — гусьöн шушкис Паличыс. — Абрам пияныс разь кужас сiйö уджавны?! Сылöн эд юрас пыр тöв шутнялö — не быдöс гортас... А сэтöн лось яй... Думайт сэк, Виктор Спиридонович, кин тэныт кушмансö тёритiс!..

— Мед тёритöны! — гажмис Викторыс и бöра пондiс уджавны лесникöн. Тöвнас керис вöр: лесничествоыслö тöв кежас сетöны план, кöдö колö тыртны, керавны вöрсö, кöть орöтчы. Вöрын лесниккес уджалiсö кык месяцся унажык, а сыбöрын Викторсö кык месяц кежö иньдiсö велöтчыны.

Велöтчаныс шедiс сьöкыта, наукаэс оз бы пырö юрас — абу ни эд том. Городын вöлi гажтöм, узис и вöтасис деревнясö, вöтöн ветлöтiс аслас вöррезын, гажтöмтчис Наташаыстöг, пурис дума: «Кыдз сiя сэтчин öтнас поданас?»

Городын кадыс дзуртiс-чулалiс, и Викторыс локтiс июнь месяцö, кöр деревняын садитсис ни карч, ыббез вылö кöдзсисö сюэз, кöр вöрыс ошшасис ни гожумся оланöн — быд кайыс пукалiс кольттез вылын, зверрес быдтiсö пияннэз.

Городсянь локтöн медодз öшын увтаныс бöра жö панталiс соседыс. Робертлöн сьöлöмыс кыдз тöдiс, что лесникыс локтö ни гортö и колö сылö мыччисьны медодз, дзарнитны кымöс увтöт да пиннес пыр горöтчыны: «Полицияыс локтö ни...»

— Локта! А мый?

Робертыс сэсся шы эз сет, швыркнитiс бокöттяс. Сы местö голяыс бердö öшöтчис иньыс, окасисö. Эз ештö гортаныс пырны, сэтчö пырис Павел Николаевич, вожмöвтiс порогсö и гажöтчö:

— Кыным год, кыным лун! Наташа, чожажык лонт баня. Пывсям, миссям и ашын жö котöртам чериавны!

— Тэ, Павел Николаевич, Викторыстöг вöрас туйсö он адззы?

— Ог. А кытiсь? Лесникыс эд туйсö каттьöм тупыльö.

Баитiсö-керисö, пуксисö да сёйисö. Школаись директорыс сэтöн и шуö:

— Виктор Спиридонович, тэныт эд челядьыс бöра пондасö ковны?

— Натьтö, коласö.

Чулалiс неделя, и лесникыс челядьыскöт вöрö мунiс уджавны. Кыдз одзза гожумнас жö нiя шочöтiсö-кералiсö том пуоккез и кöдзисö вöр. Лун-мöд öтлаын уджалiс Павел Николаевичыс, но сылö пондiс ковны тöв кежö вочны школасö, и директорыс янсöтчис ёрттэс дынiсь.

Таво медöддьöн лесникыскöт пондiс дружитны Петька. Сiя годнас быдмыштiс, ёнмыштiс, смевмис, и лесникыс сьöрись гортö эз бы кольччы öтiк лун кежö — кытчö Викторыс, сiя бы сэтчин жö — бöж и лоис.

Петькаыс эд быдмö айтöг. Вöлi жö зонкаыслöн айыс, но сэтшöмыс гортын некинлö эз понды ковны. Быд лун пондiс юны вина — садь оз петав, а кыдз код, сiдз гортын жугдö-паздö, вартлö иньсö и зонсö, брынгö каньлö и понлö, кералiс юррезнысö петухлiсь, курöггезлiсь, начкылiс бараннысö да лöсьöтчис вузавны мöснысö и быдöс деньгасö торкö вина вылö. Сэк Петькалöн мамыс жöникыслö и висьталiс: «Пет, вежöм, керкусис! Миянлö тэ сэтшöмыс он ков!» Гажтöм кодь жö Петькалö айыстöг, но мый керан, кöр сiя ештöм гöтрасьны ни мöдiк вылö, и натьтö, думайтö, что сытöг зоныс татöн тшыгйöн кулас, но зоночкаыс, видзöтö, учöтсянь велалö уджавны. Викторыс Петькасö ылö оз новйöт, но и матын вöрас адззисьö уджыс: зоночкаыс то кроттэз кыйö, то кайпоз керö.

Таво гожумыс зэра да шоныт, отирыслö колхозын оз сет не шоччисьны, не уджавны. Лесникыс лесхозлö отсалiс керны турун, мымдакö ытшкис аслыс, но зэррес эз сетö куртны, и öтiк лунö асывсянь пукалiс посöдзаныс да керис чер ороп.

Сэтöн сы дынö котöртö Петька ёртыс. Ышки-пойки зоночкаыс пуксис бокас, пöдöмöн горöтчис:

— Дядя Вить, тöдан жö мый!.. Роберт дядьыс кöч вийöм... Он верит? Ачым адззылi, кöр крот капканнэсö видзöтöм бöрсянь локтi видзыс кузя.

— Уна бöра кыйин?

— Вита шедöмась. Но тэ быль менчим он верит?! Ог бöбöт. Спинаыс сайö кышалöм и локтö, топ сiдз и колö!

— Кыдз ме посöдзсяняс эг адззыв?

— Ог тöд, мыля тэ эн адззыв.

— Шы эн сет, Петька. Ме ачым...

Петькалö уна оз ков модьны: вотьыштiс син одзись и абу.

Лесниклöн керсис чер оропыс. Сiя уджалiс и думайтiс кöч йылiсь, вöрзьöтiс дженыт бöжа зверьыс йылiсь юöрыс сьöлöмсö, места эз адззы. Лöг. Куритö бы, кöть эттшöмыс овлö, только сэк кöр вывтi ни тöждiсьö или кодя морткöт юыштас вина. Талун винасö эз пешлы, но кыскö бы горшас табак тшынсö, медбы юрыс кольмыштiс...

Папиросаэз гортас эз видз. Кытiсь жö бы табаксö лыйны? Öт бокас олö Демьян, сылiсь надзлiсь и смертьсö он кор, мöдöр улицаын Опонь дед, сiя кашыкасьö да нюшкö махорка. Кольччис только соседыс: еныс сыкöт люкалö не уджöн, а табакöн.

Чапкис оропалöм чержуг и öтöрö-мöдöрö нёджжасьöмöн жагвыв вуджис улицасö. Кайис Роберт посöдзö, малыштiс понлiсь юрсö, кöда Викторыс вылö пель эз вöрзьöт и негорöн ыкöстiс:

— Хозяиныс гортын?!

— Гортын, гортын! — пиннес пыр ыбöс сайсянь висьталiс мöдыс.

— Курита бы... — висьталiс Викторыс.

— Мый одзын? — гер мыччис пиннесö Робертыс. — Или погоддяыс тшыксяс?

— Тшыкöта бы...

— Тшыкöт, — кармансис кыскис соседыс папироса. Чуннес вирöсьöсь. Видзöтö и сералö, топ кешитчö: «Яд бы öмат, сосед, а не папироса!» Мортö Викторсö оз пукты, но мöдыс этö топ оз адззы.

«Папироса... — асьсö видiс ни Викторыс. — Табак... Но, сосед...»

Куритö и адззö Робертлiсь вирöсь кисö, киыс гöгöр гуттэз лэбалöны. Поныс посöдзас дульсö ньылалö.

— Мый сiдз видзöтан? Эн адззывлы вирöсь киэсö? Или сёян жö бы яйсö? — пиннес соседыслöн гер.

— Ме? Кынöмö гожумнас кöч яйыс вылö оз симав.

— Тöдам...

— Нем тэ он тöд! — лякасисö кыввезнаныс öтамöдныс бердö — пурсисö ни, сiйö и видзöт, кыдз кутчисясö горшшезныс бердö.

Тшынйисö, сулалiсö.

— Ветлi зороддэз видзöтны, — Робертыс дзебны пондiс спинаыс сайö кисö, баснисö бергöтiс ни мöдöрö, тыдалö, казялiс, что колö бы лесникыскöт мöднёж... — Ыджыт галяыс дынiсь эта заразаыс кутiс кöчсö!

— Гожумнас вöрас понсö нем новйöтны! — висьталiс лесникыс.

— Мый вылö сэк сiйö видзны?!

Посöдзын куйлiс Робертыслöн поныс — йöктiс бöжнас, сiдз бы и чеччöвтiс хозяиныс моросö, нюлiс чужöмсö, корис яйсö, но полiс.

— Сiйöн эд вöрас некин эз и ло! — обидитчис лесникыс.

— Хе. Кин сёйис? Вöрисьыс?!

Луныс гажа, пöдтö жарöн, пöжö. Улицаын, нять гöппез дорын чочком бабыввез — чочком чышьянöн мусö вевттьöм. Курччасьöны лöдззез. Курöггез гуддисьöны посöдз дынын.

— А тэ думайтан Вöрисьыс тшыгйöн олö?! Ми сёям и сiя сёйö бы.

— Лешакыс, — вирснитiс кузь да кöс нырнас Робертыс. — Вöрисьыс öнi отирыссянь жö велалiс: сувтöт бутылка, роднöй мамсö вузалас, и лесникыс нем оз понды тöдны, ха-ха!

Нерис, что тэ, лесник, пыр нюкьясян, а ныр увтсит он тöд. Кыдз бы бöра асьтö эз гардö!..

— Ох, Роберт!

— Мый тэныт Робертыс? Мый бердö лякасян? Или иньыт гортат пöттöдз оз верд? Сималö кынöмыт? Сета. Сёй! Пöтан, поди... И сэсся он понды миян кодьсö быд шагын пурны! Ачыт он вермы, а отирсö...

— Тэ отирыслiсь гусялан! Государствосö быд шагöн чилькöтан! — öзйис лесникыслöн сьöлöмыс. Туйис-вермис, талис бы соседсö, а сыбöрын кöть мый... Но кинкö кыдз падтiс: «Киэтö эн лякöсьт... Оланыс велöтас...»

Кылiс мужиккезлiсь голоснысö и посöдзö бордпавйöн чепöссис Робертыслöн мамыс. Пöрись ни, кыз, но чож эшö, голосыс — вöр мöслöн, кöда гажöтö и полiсь мортöс повзьöтö.

Кивнитiс нёштöма инь-мортыс, топ пурт увтö шедiс и пондiс чирзыны, медбы быдöн кылiс, вежöртiс пöрисьсö, что нылö лесникыс весьтын оланыс эз ло — смерть и медбы быдöн жалейтiс да отсалiс.

— Сёй. Йир. Тасав лёк горшат! Тэ миян вылö не талун ни эд бöрöн каян! Пуран, пуран и пöтны он вермы! — öдззис мамыс герьявны, кöть пеллез тупкав да пышшы.

Викторыс эта голоссянь повзис кодь и пондiс рамжыка модьны.

— Од разь пöтö кöчнас? Ме эд сiйö тiянлiсь ог мырддьы... — и бöрöн-бöрöн лэдзчис посöдзсис, а старухаыс бурундукыс вылын ни сё мороснас пыкис, лязiс бы кортöм гöсьсö, öмнас вермис:

— Судит! Пуксьöт! Ульöн сёй! Асьтö эд кöркö еныс адззас...

— Сёя... — Йöз бурундук вылын лёбис лесникыс. Сылöн дрöжитiсö киэс и тырппес. Видзсис бы, но асьсö видзны эз вермы и бергöтчис да жагвыв иньдöтчис гортлань.

— Пират! Пират! — посöдзсяняс лесникыс бöрсянь понсö ыксiс Робертыс. — Эх, гад Пират! Ме тэныт мыччала! Сволочь!

Лесникыс сё эшö думайтiс, что сiйö бöрсяняс видö соседыс, летö улица тыр горшсö, кöть пеллетö тупкав. Натьтö, думайтö, что сыись кинкö повзяс, но Викторыслöн юрыс вылын öтiк юрси тылöп ни эз вöрзьы, сiя шаг эз содты — Пират! — ыксiс Робертыс и вдруг чарöтiс лыйöм. Лесникыс пельбокöт шутньöвтiсö дроббез, сьöлöмсö нетшкöвтiс лыйöм шыыс, кольмöтiс.

Кивнитiс Пиратыс да Викторыс коккез дынöт лыйис ны палисадниклань, кымöснас люкалiс оградасö, пезьдiс гатш и пондiс легöтны коккезнас.

Викторыс перыта бергöтчыштiс соседыслань: Робертыс киын пишаль, рожаыс пиньöвтчöм, топ шыннялö или сэтшöм лöг, он и вежöрт. Порох тшын посöдзыс весьтiсь жагвыв лэбтiсис вевдöрö.

— Вийисö-ö-ö! — пытшкись посöдзаныс унньöвтiс Робертлöн мамыс.

Повзьöмась воробейез и чирзöны льöмпу вылын.

Викторыс адззис матiсь коккес дынiсь джын кöчлiсь яй, кöдö Пиратыс уськöтiс öмсис.

Нёштöм чужöмыс Робертыслöн. Колiс бы вешшыны ни сы одзись, но лесникыслöн коккес эз кывзiсьö, небзьöмась, кыдз не аслас.

Поныс оградаыс бердiсь чеччис местасис, шаг-мöд керис и бöр таралiс да лöнис.

— Мый керан?! — сьöвзис Викторыс.

Мöдыс шы эз сет, бергöтчис да пырис керкуаныс.

Лесникыслöн мылякö веськыт кокыс лоис зубыт: тальччö и чотыштö.

«Дойдi кытчöкö тэрмасьтöнням...» — Викторыс шагнялiс посöдзныс дынö, ачыс видзöтышалiс иньыс вылö, кöда пырис йöрсянь, чужöмыс сьöдöтöм, кыдз не аслас.

Викторыс шынньöвтiс.

— Мый бöра пурсят кык Серко?! — горöтiс Наташаыс.

— А тэныт мый? — кыдз нерис мужикыс.

— Меным мый? — Наташаыслöн чужöмыс пондiс чочкоммыны, кисис коккес увтö чапкис луктуруннэз. — Меным, шуан, мый?!.. Только юртö сюйыштiн лесникас, бöра улицаас эд пондö тöрны, оз туй керкусис петны... — öмыс сiдз и жугалiс, сiдз и горзö ни. — Пышша... Муна, кытчö коккезö нуöтасö, мед тi соседыткöт кöть быд лун öтамöднытö начкылат, лэбтат война деревня шöрас и пондас гымавны, кин кинöс!... Отирыс пондасö ошкыны... Кодя отирсö милиционерыс сто грамм понда гортсиныс нуöтö, а тiянлö нем оз мöртчы!..

— Наташа... — лöга серöмтчис мужикыс. — Дугды! — и кайис посöдзаныс, пуксис скамья вылö: кокыс зубыт и вешьяныс вирöсь.

Перыта лэбтыштiс вешьян коксö: кок гумаыс весьтöт кинкö кыдз гыжйöвтöм, ранаок, сэтiсь сунис кызöн визывтiс вир.

— Дугдас! — горöтчис Викторыс и лэдзис вешьян коксö.

Воробейезлöн табунок пуксис улицаыс шöрö. Каёккес пондiсö кокасьны да челядёккез моз «модьны» ас коласаныс. Викторыслöн сера котыс му бердöттяс кыссис воробейеслань, йöр пöлöн куранöн мунiс кытчöкö Демьянлöн иньыс. Сылö син вылас усис Пиратыс, и инькаыс повзьöмöн юалiс:

— Но-о, поныслö мый лоöм?!

— Шогалö, — висьталiс Викторыс. — Калера кутчисьöм.

Демьянлöн иньыс сьöвзис да перыта иньдöтчис аслас туйöт.

Кузь эшö гожумся луныс, туйис уджавны пöттöдз. Викторыс босьтiс чер да вешшис иньыс син одзись, медбы не кывны, кыдз быд шагын Наташаыс кивзö да ойзö — одза-одз кулö.

9

Ашынас жö Робертлiсь милиционерыс мырддис пишальсö. Кытшöм пишаль участковöйыс нöбöтiс, лесникыс эз адззыв и эз юась, кöр соседыслöн, поди, пишаллес куим-нёль.

— Мый тэись? Мый вылö свет вылас и олан? Не гортын, не вöрын... Öвтчан и ачыт он тöд мый öвтчан, кинöс öштiн и кошшан... Хозяин! — видiс мужиксö Наташаыс. — Отирыслöн мужиккезныс гортаныс сиррез моз лякасьöны, а тэ адззин удж...

— Мый тэныт месянь колö?!

— Лöсьöт гид ыбöссö!

— Лöсьöта...

Палисадник ограда угöлас сулалö Петькаыс, — синнэзас сэтшöм гаж, топ мыйкö адззöм донаö и эта йылiсь некинлö оз висьтав, оз мыччав и модьö:

— Мунам, дядь Вить?..

— Керин бöра меным ыбöссö?! Кыдз эшö овны сэтшöм мужикыскöт?! Кыдз? Господи прости?! — Наташаыс кивзö, а мужикыс кышалö ни пельпоныс вылö пишаль и Петькакöт мунöны вöрö, медбы грань вылiсь керавны-весöтны чашья.

Зоночкаыс вöрö мунö — пеллесö адззö, сэтшöм ни рад, быд шагын юасьö да висьтасьö, мый керис, кытöн вöлi, и лесникыслö Петькакöт гажа, — эм сылöн вöрын ёрт, кöда отсасьö уджавны. Викторыс, кытöн колö, Петькалö гижö наряд. Уджалöм понда ёртыс босьтö деньга да быдöнлö ошшасьö: «То эд, а тi мый?! Весь олат да нянь сёят!»

Томсö вöрас кыскö сьöлöмыс, вöртöг овны оз вермы. Но и ась, Петькалöн мамыс рад, что зоныс адззис ёрт, кöда ай местын, только вот Робертыс шуö ни Петькаыслö: «Шпиё-ё-ён!..»

Петькаыс лоис шпионöн — этö сэксянь, кöр зоночкаыс лесникыслö висьталiс кöч йылiсь. Но и ась врагыс лёбö: кылыс — не шать, лэбзяс öмсис и оз дойд, а вот кöчыс, тыдалö, öтiк-мöдiкöс зуралiс: етша кин пондiс гожум шöрнас пишаллезнас син одзö мыччасьны, кин, поди, и шыралö жö, но гусьöн, мед лесникыслö да Петькалö эз шед.

Годся унажык ни Викторыс уджалö лесникöн. Годыс чулалiс — быдöс ни мыччалiс — медодз велöтiс уджавны и честнöя овны, мед и честьыс да уджыс дöнзисö зубыта — адззис враггесö аслас деревняись, но кытöн эд, шуöны, враг, сэтöн и ёрт, кöр öтiк только ас пондасис бы олö, а мöдiклöн сьöлöмыс унажык висьö государство понда, кыдз Павел Николаевичлöн, но и Петькаыс быдмö сэтшöм жö...

Мöдiк гожум ни чулöтiс Викторыс вöрас, лесникалiс. Таво кыдзкö сылö öшымöсас бензинсö эз ни кисьтö и зороддэсö эз пöрлалö, кöть и пиньласьö жö соседыс, но мед Робертыс ассис уджсö тöдö, йöзсö оз адззы.

Чулалö гожум. Викторыс кольлалiс ассис ёрт Петькаöс школаö и пондiс видзчисьны тöв, кöда тыдалiс ни: чорзисö небоын кымöррез, киссис вöрыс вылiсь лист, кельдöтiс турун. Вдруг öтiк ойö сiдз кöдздöтiс, что пондiс усьны лым. Локтiс тöв.

Викторыс эна луннэзö пукалiс гортын, керис чер ороппез, россэз, додь, уджалiс да видзöтiс öшынö, кыдз лымсö гардiс ой тöв и видзчисис кöр лöняс тöлыс, поди, эшö сылöтас (лымнас ни ветлiс вöрö и адззылiс ошлiсь следдэз — ыджыт примета, что сылöтас).

Сiдз и лоис: тöлыс лöнис, погоддяыс топ пондiс думайтны, а ойнас вдруг ловзисис тöлыс лунланьсянь, кок увтын пондiс небзьыны лымыс и асывнас крыша вылiсь вотялiсö ни ваэз. Лесникыс гажмис, радувья пондiс тэчны котома.

— Кытчö?! — кыввезнас туйсö поперегалiс иньыс. — Натьтö, эд шоррес содiсö. Кытчöкö эшö вöян...

— Поди, тэ гортын вöян! — сералiс Викторыс. Котома тэчис — минута чулалiс. Наташаыс кольлалiс, кыдз янсöтчис год кежö: петiс öтöрись посöдзöдз, ачыс мужикыс пельпон вылö кышалiс пишальсö, юрыс вылiсь лöсьöтiс шапкасö, сьöкыта ловзисис да сибдöм голосöн горöтчис:

— Жагöн... Мыйкö менам сьöлöмö полö.

— Мый ме тэныт? Челядь? — гортiсь вöрзис шупыт да чорыт оськöввезöн, рад, что кольлалö Наташаыс: иньыс кокнит сьöлöма, кыдз кольлалас вöрö, бура чулалас луныс.

Асывнас лесникыс вöлi гортын, а рытнас — ылын ни.

Вöрын гажа, шоныт, сылö лым, кыдз тулысöн пиксöны сьöлаэз. Содöмась шоррез и визывтöны — любо видзöтны.

Лесникыс медодз кежалiс виль делянкаэзö, сыбöрын чукыльтчис кертöм вöрлань, и рытыс вöтiс сiйö грань вылын, кöда пыд вöрын тыдалiс, кыдз би югöр, веськыт да югыт, и вайöтiс учöт шутём дынö.

Викторыс лунтыр коккес вылын. Спинаыс ни мыдзис, висьö кодь, и кынöмыс сималö, но мортыс тэрмасьö — шутёмыс дорын сулалö неыджыт керкуок. Сiйö вит-квать год бöртi колхозыс татчö кыскис, кöр татöн видзисö пода, и öнi избушкаыс шоччöтiс да шонтiс мыдз вöралiссезöс.

Кок увтын кузь нитш, шлёчкöтö ва.

— Чунь-нь-нь! — горалö сьöд кыр, нерö лесниксö, что сiя лун жöдзö, а котомаыс оз кыскы бöрлань, что сэтчин нянь тор, сэсся некытшöм добыча абу.

— Тыр-тыр! — юрыс вевдöрöт лэбзис кайыс.

«Важын бы этадз! — гажмö мортыс, горöн баитö кайыскöт. — Кöсъян тыр доз... — Викторыс видзöтiс коккес увтö, медбы не тальччыны ва гöпö, сылöн кытчöкö писькöтсьöм сапогсö, и öнi ваыс йиджö кокыс бердöдз. Шагнялiс сьöкыта ни, орддис ва гöппез да колодаэз, и вдруг син вылö нитш да лым торрез вылiсь усис морт след. Мортыс мунöм кыдз нинкöммезöн — следдэс лым вылын паськалöмась.

«Кинкö избушкаас локтöм жö... Кыкöн ойыс чулалас гажöнжык... — думайтiс Викторыс и сэк жö юрас вачкис. — Ошлöн жö следдэс!»

Зверьыс мунöм шутёммес вылö жö, таво колхозыс кöдзлiс зöр, но сюсö сiдз и эз вермö дзимлявны. Öнi кöччес, ошшес да каёккес пöтöсь.

Викторыс пишальсис вежис патронсö — сюйыштiс пуля, чинтiс шагсö и гусьöн моз ни вöрсис петiс шутёмыс вылö.

Му дорас пукалöм дозмöр. Кайыс лэбзис, дзик пышшис бисис.

«Осьта öм! Кин талун гортiсь мунтöн адззылiс?!» — дзир-бар керис гöгöрсö лесникыс и небыт шаггезöн иньдöтчис керкуоклань.

Керкуокыс сулалiс пожуммез увтын и кыдз гажтöмтчöм мортыстöг да норасьö: «Кытöн тэ сы дырна?» Багсьöм да нитшсялöм, крышаыс вылiсь вотялiс ва. Викторыс шагньöвтiс ни порогсö и вдруг сiйö повзьöтiс каёк, кöда быркнитiс юрыс вевдöрöт.

«Эх тэ!» — кутчисис пишальыс бердö, дыр видзöтiс кайыс бöрсянь, кывзiс да лолалiс избушкаыс руöн, кысянь павкис тшын дук: кинкö татöн узьöм неважын, Викторыс эд татöн жö узьлiс одзза неделяö. Лабичыс увтö кольлiс песжуггез, но нiя эз вöлö. Öшынокыс вылын эз вöлö не истöггез, не симöтжуг, а кöзичкаокын не сов, не сухаррез...

— Сiдз ми пондiм овны... — юрсö гогинялiс лесникыс, осудитiс отирсö. — Гортын нем оз туй син одзын видзны и вöрас сiдз жö.

И стенасö лöсалöмась-кералöмась, лабич дорсö поткöтöмась, а топчаныс вылiсь пöввес кок увтын... Не зубыт, а обида эшö öддьöнжык чепöльтiс сьöлöмсö: «Абу ни тi отир! Кытöн узят, сэтчö и паздат... Мыля бы сiдз?!»

— «Мыля?! — сералiс бы Павел Николаевичыс. — Не асланыс эд... Ассиныс бы эз жугдö... Велöта, велöта, а кытчö?! Кытчö велöта, Виктор Спиридонович!» — «Ог тöд кытчö отирсö велöтан, Павел Николаевич? — ас кежас думайтö Викторыс. Миян кодьсö кöть сто год велöт, сё сэтшöм бараннэз лоам!..» — «Но тэ, Виктор Спиридонович... Не быдöнныс жö отирыс öткодьöсь, эмöсь жö коласаныс ылöсажыккес...»

Викторыс сьöласис-керис, видiс ас кежас умöль мортöс и избушкасис петiс öтöрö, медбы пемдандорас кошшыны да керавны пес.

Öтöрас вöлi эшö югыткодь. Рытланьын вöрыс эшö тыдалiс бура и тöдчисö кок увтын ва гöппез. Шорланьсянь павкис ыркыт воздух.

Минута етш шы эз вöв вöрас, кинкö шутньöвтiс öтпыр, мöдöтпыр да вувтыштiс кычан моз.

Вöрыс гора, лолалан и ачыт кылан, кыдз ловзисян, а сэтöн... «Но, Мишка! — гажмис мортыс. — Ме тэись ог пов!» — горöн ни горöтчис ошыслö да смела иньдöтчис шорыслань, кытiсь одзжык адззылiс кöс мыррез.

Викторыс шагнялiс песла, кöзоккез дынiсь повзьöтiс ватшканöс. Кайыс быркнитiс, чирзыштiс и лесникыслöн сьöлöмыс дрöгнитiс. Бöра кинкö топ одзас ружтыштiс. Лесникыс сувтчис, кывзiсьыштiс: кытöнкö ылын уджалiс трактор. Эта шысянь лоис гажажык, топ пемыт вöрас вöлi не öтнас ни.

Шорыс дорын кыдзоккез коласiсь син вылас усис чочком бока кöс мыр.

Пишальсö лэбтыштiс пельпоныс вылiсь, мед сiя эз жö усь, кöр пондас пыкны мырсö и шагньöвтiс... Сэтöн кинкö, кыдз пельбокас вачкис, чарöтiс-лыйис. Син одзас паськалiс и кусiс би, шапкаыс усис, ачыс черка-барка таралiс спинаыс вылö.

«Эх, гад!» — сотiс дума да зубыт, кöда лыйис коксяняс сэтчöдз, что зэлöтiс мороссö, ловзисьны эз сет. Пель одзас чиннис öткодь шы.

Медодз кутчисис бы пишальыс бердö, но сiя киас эз шед — чуннес павкисö кöдзыт ваö, куралiсö небыт нитш. Порох тшынсянь пондiс гудыртчыны сьöлöмыс. Зубытсяняс топ сiдз и бырис садьыс, син одзас то пемдiс гу пемытöдз, то лэбзисö бичиррез, но юрыс уджалiс, и киэс кывзiсисö.

Лоис пемыт, ойыс дынсис то вешшылiс, то пондылiс лязны-пöдтыны.

Спинаыс вамис сё öддьöнжык. И Викторыс пондiс чожа кынмыны — сяткöтiсö пиннес и дрöжитiс ни ачыс, поди, не сымда кöдзытсяняс, мымда повзис.

Куйлыштiс и перыта чеччыштiс бы местасис, но коксяняс зубытыс сöтiс юрыс бöрö, кольмöтiс.

Шоччисис, куйлiс да кывзiс, кыдз пеллезас вартö вирыс, топ нерö: «Шедiн эд, шедiн!»

«Кап-кап», — кöзок вылiсь вотялiс ва.

Викторыс вермис зубытсö, пыдына ловзисис да кивзытöн жагвыв пуксис. Небоас югьялiс звезда, то тыдалiс ылын-ылын, то матынжык, кыдз бöбöтлiс, орсiс син одзас. Кытшöмкö кай шыасис шутёмысланьын и виньдiс.

Лесникыс пукалiс. Кымöсыс вылын мыччисисö кöдзыт ньылöм воттез. «Мый сэтöн куйлан?! — пондiс асьсö видны. — Или видзчисян, кöр локтас ошыс да юр вывсит кульыштас кучиктö?!»

«Видзчися... — нерис асьсö и вöрзьöтчис. Сэтшöм лоис недолыт, что петiсö синваэс. — Видзчися», — нюжöтчис кокыс дынöдз да малыштiс пидзöссö. Кокыс пемытiнас тыдалiс умöля, но нырас павкис уль вир дук, вирöсьмисö чуннес, мыйсянь гудыртчис сьöлöмыс и бергалiс юрыс.

«Кытчö жö сiдз дойми?! — эз вежöрт. Думаэс пондiсö гардчыны ош гöгöр, а порох тшыныс сё эшö павкис нырпыссэзас. — Мыля порох тшын?.. Сэтöн вдруг кинкö кыдз висьталiс: «Пишальыт эд лыйис!» «Мыля пишальыс лыяс?!» — эз вежöрт асьсö, мездöтчис, чеччис бы местасис и эз вермы, а думаэс нерисö: — Аслам! Ачыс эд лыйис...»

Аслыс эз верит и йöзлö бы эз висьтав, что сiдз петiс, но мый оз овлы вöрас да эшö öтнасыслöн?

Бур эд, что ловья, пöжалiс аслыс не кымöсас, а кокас, и кокыс кывзiсьö, только бы чеччыны чожажык да пырны избушкаас и домавны ранасö!

Думаэс полöтiсö. Пемытiнас маласис-керис ас гöгöрас. Киас шедiс пишальыс. Кутчисис сы бердö, кыдз бедь бердö и пондiс быд вынсис мырсьыны-чеччыны местасис. Коксö, натьтö, эз бы туй и вöрöтны, сiдз лыйис зубытыс, но колiс вöрöтчыны и сiя вöрöтчис, сувтiс шульга кокыс вылö, кöда эз вöв зубыт, кутчисис да öшöтчис туй бокись кыдзок бердö и пондiс шоччисьны.

Сьöкыт вöлi Викторыслö. Сiя лолалiс пыдына, кыдз зверь, кöдö видзчисьтöг пöрöтiсö коккес вылiсь, домалiсö и бöр лэдзисö — мун, кыдз верман. И лесникыс шоччисис, ружтiс, гичралiс пиннесö, ачыс сё эшö эз вежöрт, кыдз сiдз петiс, что лыйис пишальыс. Челядёк моз... Вермалiс сэтшöм чувство, топ мыйкö öштiс, кöдö сэсся оз ни адззы, оз вермы небны некытшöм деньга вылö и пондас ковны горзыны да овны. Полöтiс эшö пемытыс, кöда янсöтiс отир дынiсь.

Кынмисö-сяткöтiсö пиннес, дрöжитiсö киэс и косьмис горшыс сiдз, что öмас желлясис кылыс.

Пемытiнас тыдалiс избушкаыслöн вуджöрыс, кытöн вöлi сэтшöм жö кöдзыт и гажтöм, но сьöлöмыс кыскис эта керкуокö.

Öт кинас видзсис кöдзыт пишаль стволыс бердын, мöднас öшалiс чочком кыдзок вылын. Шоччисис.

Ошыс шутньöвтiс шорланьын, öнi нач ни матын.

Викторыс вермис эшö киас видзны пишальсö, лöсьöтчис лыйны ни — повзьöтны бы зверьсö, мед тöдiс, что сiйö вермас эшö мортыс, но юрас вачкис, что пишальыс эд лыйис ни и пуляэс сэсся абу!..»

Абу и абу. Лесникыс чеччöвтiс öт кок вылас избушкалань, чеччöвтiс, сувтiс, вермис зубытсö да шоччисис, а эта коста будкаыс стена бердö кыдз кинкö вачкис нöшöн.

«Но, ёрт! — лöгасис лесникыс, öт кинас бöра кутчисис кыдзок бердö, мöднас лэбтiс пишальсö и лыйис. Говкыс нетшкöвтiс воздухсö, вына шыöн пондiс лэбзьыны вöрас.

«Сiдзкö, ёрт!.. — висьталiс аслыс Викторыс. — Кинкö тэныт лыйис мöдiк...»

10

Кыссис избушкаыс дынöдз, ружтытöн вожмöвтiс порогсö, пуксис лабич вылö и пондiс шоччисьны.

Кинкö гуддисис лабичыс увтын, поди, шырок кылiс котомасис нянь дук.

«Нем умöльыс оз ло! — несьö шырокыслö, несьö аслыс висьталiс Викторыс. — Вот öзтам би», — но сэтöн кыдз кинкö пельбокас вачкис: юрыс бергöтчыштiс, сьöлöмыс бöра гудыртчис... Ачыс эз казяв, кыдз кыкнан кинас кутчисис стенаыс бердö. Öтöрас зэв избушкаыс дынын шутньöвтiс зверьыс. Умöль оланыс, тыдалö, Викторлöн, минута минутакöт оз лöсялö...

Колö бы вирсö сувтöтны: зэлöтны коксö ранаыс вевдöрöт.

Эта одзын, кöр узис татöн, стенаас öшалiс проволокажуг — кöч петля, но пемытiнас маласьтöнняс киас проволокаыс эз шед. Пöрччалiс коссис ременьсö и сiйöн коксö быд вынсис зэлöтiс пидзöсысся вылынжык, уджалiс — вирöсьтiс киэсö и рожасö. Зубытыс одзза моз эз ни кыв. Унажык пурис обида, что сiдз петiс, кыдз лыйисö кöчöс, эз вермö вийны, но мый эд эшö лоас одзлань? Кыдз ранаыс? Кыдз кутасö да коксö орöтасö?!.. Кытшöм сэк лоан морт? Кинлö пондан ковны öтiк кокнат? Тöдiс бы, тöдiс... Тöдам бы кытöн петас ловным, кытöн кулам, смертьсö бы орддим сизим верста ылына.

Колiс бы öзтыны би, но песыс эз вöв. Эх, кикимора! И кöзичаыс дынö оз ни вермы мышкыртчыны да кыскыны истöггесö!.. Пондiс петны оныс.

Куньсисö синнэс и сэк жö пондiс вöтасьны Наташасö. Иньыс кысянькö уськöтчис избушка ыбöсас да чирзö: «Мый тэныт лоис?!»

— А тэныт мый?! — паныт эрзыштiс Викторыс.

— Бöра, поди, пурсит соседыткöт? Бöра сiя лыйис кокат?!

Сосед... Робертыскöт колö пантасьны быд лун, здоровайтчыны, баитны... Поди, оз бы и ков дзар керны, но Викторыслöн сэтшöм мывкыд, кöть мымда лöг, здоровайтчö. Мöдiккöт бы баитiсö соседдэз моз, юасисö-висьтасисö кыдз олöны да мый керöны и сьöлöм вылын бы вöлi кокнитжык, но Робертыс тэ вылö видзöтö, кыдз враг вылö.

«Роберт, олам жö ми тэкöт... — синнэсö осьтiс Викторыс, пондiс кынмыны öддьöнжык и ружтытöн нюжöтчис котомкаыс дынö да сэтчинiсь кыскис истöггез. — Сосед тэ, сосед менам... Кыдз тэкöт одзлань овны? Мый керны? Лоам жö ми тэкöт кöркö бур ёрттэзöн или пыр кежö кольччам враггезöн да пондам лыйлыны öтамöднымöс?» — маласьтöн гöжöм чуннезнас коккес увтiсь куралiс чаг торрез да ёг, чапкис нiйö печка пытшкас и öзтiс би.

Биыс югдöтiс избушкасö, йöктiс стена вылын, орсiс мортыс чужöм вылын, кöда öтiк часö умöльтчис — нюжалiс нырыс и ыждiсö синнэс. Би югöрыс жö лабич вылiсь югдöтiс важ чукрасьöм газета.

Викторыс босьтiс газетасö, кури-пари паськöтiс и синнэс вылö усис карандашöн гижöм Робертлöн нимыс. Кытчö бы эз мун, сэтöн и соседыс... Кин кин сьöрын вöтлiсьö? Кинiсь пышшалö? «Но, сосед, тыдалö, вöрас тэ весьтын öтiк зверь кодя олансö оз адззыв! — Викторыс бергöтлiс-керис газетасö и мыйкö вылö сюйыштiс пиас. — И, натьтö, пишальыс сылöн! — Кыдз сöтiс дума. — Ошсö бы вийис, а ме шедi... А, поди, сiя нагладь?.. Лöгыс эд петö... — сайкалiс сьöлöмыс, аслыс эз бы верит, но думаэс чувйисö, лöгöтiсö, ускайтiсö Роберт вылö. — Вот зверь, а! Юрыс пондiс висьны... — Быль сiя или мöдiк?!. Кин эшö миян вермас сiдз керны?» — Думаэзнас пондiс бергавны быд морт гöгöр.

Кошшис деревнясис Роберт кодь мортсö и эз адззы, нельки соседыскöт ордчöн эз сувтöт Абрам Колясö, кöда лесникыслö гусьöн тыра котомасö вайис чомйö, медбы судитны лесниксö. — «Ловья лоа, юала! Адззылан, кыдз, сосед, ошшеслö сиавны пишальсö!» — Пизис лöг, вермис зубытсö. Босьтiс чер да масьтiс-кералiс лабичсö, керис пес, кöть талун ни эта лабич понда видiс умöль отирöс.

Печкаыс чожа шонтiс керкуоксö. Лоис жар. Викторыс вывсис чöвтiс ва паськöмсö, öшöтiс матицаыс бердö, сыбöрын синнэсö мöртiс би югöрас, шоччисис бы, но некытшöм шогöт, не мыдз эз ни вермö водтöтны узьны, кöр думаэз зiэз моз гардчисö йöз пишаль гöгöр, разисö-дзугисö и вились öтлаöтiсö олансö. И кöть кин йылiсь эз бы думайт эта избушкаын, вöр коласын, кыдз бы эз шогав, но думаэс бöр вайöтiсö соседыс дынö, гардчисö Робертыс гöгöр, быдöс гардчис öтлаö, кöртассис öтiк гöрöдöн, и некин этö гöрöдсö эз куж пöрччавны, эз куж разьны, кыдз только ачыс.

Кыным Викторыслöн кокыс вöлi зубытжык, сыным сылöн лöгыс öддьöнжык петiс Робертыс вылö, сыным унажык тöдвылас усис одзза оланыс, кытöн кöть кыдз бергöтлы, Роберт да Виктор коласын нем бурыс эз вöв, не талун, не одзжык, учöтсянь, кöр быдмисö öтлаын.

И Робертыслöн айыс вдруг мыччисис син одзас — кытшöм сiя вöлi.

Медодз тöдвылö усис, кыдз война вылiсь локтiс Амос Иваныс. Кужöм чулöтны сьöкыт кадсö: служитöм кытöнкö тылын, уджалöм поварöн, абу тшыгьялöм и семьяыс эд эз тшыгьяв! Локтiс Робертлöн айыс война вылiсь и сэк жö шедiс уджавны колхознöй складö, складсянь — бригадирö... Быд местаын юрсö видзис сё вылынжыка, лоис гордöйжык, топ вынажык.

Кинлöкö войнаыс дöнзис пöттöдз, и войнаыс бöрын эд оланыс вöлi зэлыт, только бöра жö не Амос Иванлö, кöда кывнас кужис и тöдiс кинöс шебравны, шонтiс, кин сылö колiс, складдэзсянь вердiс нiйö, кöднасянь видзчисис отсöт. Хитрöй вöлi мортыс, а поди, ылöса, не тэ ай кодь, Виктор: баснинас тэ дор, бергöтчас — тэ враг, кыдз кужас, сiдз и шуас, мортö оз пукты, топ тэ быд шагын, быдöн одзын грешнöй, а сiя — святöй. А колö, кок ныррез одзын кыскасяс, нинкöмметö окалас, только бы сы вылö эн тальччы, эн ниль гагöс моз.

Не сiйöн я Викторлöн айыс сiдз эз радейт Амос Ивансö, что öтыс ой и лун уджалiс колхозын, пессис-олiс, а мöдыс эта коста сьылiс да сералiс уджалiсьсö жö?

Кöр Викторыс вöлi эшö учöт, айыссянь жö кывлiс, кыдз öтпыр кымöра да кöдзыт арся ойö Иван Егоровичыс посöдзныс дынö сувтöтiс телегаö доддялöм вöв. Мыля бы пемытiнас нятьсö лойны вöвнас, кöр отирыс уджалöны лунöн? А Иван Егоровичыс уджалiс ойнас...

Спиридоныс, Викторлöн айыс, эта коста петiс öтöрись посöдзаныс и вдруг кылö, топ соседыслiсь кинкö мыйкö гусялö. «Ага!.. — Спиридонлöн эд пыр сьöлöмыс висьö йöз понда и öнi повзис. — Кин жö бы сэтчин? Мыля ойнас?! Не шутка эд, вонö...»

Кöть кыдз олöны сосед соседкöт, но жаль Иван Егоровичыс. Вдруг кöркö тэнö сiдз жö керасö: — гусяласö и сотасö? Мый пондан сэк сьывны?

Спиридоныс лёк пон моз лöсьöтчис ни пасьтöг уськöтчыны зверь-отир вылö, но падмис: соседыс пондiс видны вöвсö и кылiс, кыдз сiя ружтiс-уджалiс, паськыт спинаыс вылын телегасис гортас пыртлiс тыра мешöккез. Быд мешöкын, поди, центнер етш сю, нянь.

Вот тэныт, Спиридон, и вор! Гусялöны, но не соседытлiсь, а соседыт гусялö колхознöй сюсö. И мыля? Сiйöн, сват, что Иван Егоровичыс кужö и вермö — ачыс завхоз, ас киас колхознöй сюыс, мый колö, сiйö эта сюöн и керö, мымда вермö, сымда и нöбöтö, а тэ, колхозник?

Сiдз, вонö... Тэ гöран да кöдзан, кытöн тшыг, кытöн пöт, быд сю тусьыс понда горзан — богатсьöтан колхозсö, а кинкö сёйö... Тэнат совестьыт колхозниклöн — колхознöй добро понда сьöлöмыт висьö, а соседытлöн, видзöт жö, совестьыс мöдiк, сiя топ тэ кодь жö колхозник, но колхозсö гусялö. «Да-а-а, — пемытiнас ойнас посöдзын сулалiс Спиридоныс. — Öнджа-а-а...» Чушкавны бы прокурорыслö.

Деревняыс узис, и тöлiсьыс кытöнкö узис. Отирыс нем эз адззылö, только Спиридоныс сё уна кылö да уна адззö.

Чулалiс арся ойыс. И мед чулалö. Спиридоныс сьöкыта ловзисис, пырис гортас, кайис пöлатьö и дыр мыйись ланьтiс.

Ашынас Иван Егоровичлöн зоныс котöртö Спиридоннэз öшын увтöт. Робертыс юрсö чатыртöм, шутнялö да видзöтлö сьöвбöррез, кöдна кокалöны рябина. Спиридоныс бöра сэтöн и эм — доддялöм вöв.

— Кхе, кхе..! — мывкыдыс ручлöн, кужö бöбöтны челядьсö, шыннялö да малалö рыжöй тошоксö, юасьö. — Тятюыт, Роберт, талун оз шогав?

— Мыля? — эз вежöрт Иван Егоровичлöн зоныс.

— Ойнас мыйкö посöдзаныт ружтiс...

— А сiя, дядь, сю вайöм. Тiянлö разь сюсö эз вайö? Ведомостьнас пö сеталöмась.

— Вайим жö, кага, вайим... Тринадцать кило старухаöкöт шедтiссьöм. Мед. Картошкаыс сорöн, тöдан, няньыс кытшöм чöскыт! Эн эшö пешлы?

— Эг, — öшис Робертыс и öдззис котöртны вевдöрö.

Натьтö, зонкаыс эта лунö жö айыслö висьталiс Спиридоныслiсь баснисö.

Враггез и эмöсь кык сосед, враггез. Быдöс этö Викторыс адззис учöтсянь, кöр челядьыслöн синнэзныс лэчытöсь и памятьныс бур.

Гажöн печкаын чеччалö да сотчö би, шовкöтö-сьöласьö шоммезöн.

Шоныт учöт избушкаын, долыт бы. Вод бы да шоччись, нюжлась да бур вöттэз вöтась, но Викторлöн кокыс зубыт, доймö, кыдз кинкö гуддьö пуртöн.

Кытöн бура, кытöн умöля быдмис Викторыс, и олiс сiдз жö, и öнi олö — туйö бы ошшасьны, но вот не öтiк дак мöдiк, не шогöт дак пишаль... «Эх, бандит! Кытшöм вöлi айыт, сэтшöм и тэ...»

«Дугды, зон! — сэтчö падтiс айыс. — Мый тэ ны вылö видзöтан? Мед вижлок öммезнаныс унажык сöтöны-вартöны, сё эд сымда — тшыгöсь лоасö...»

Викторыс одзын айыс. Спиридоныс баитö зонкаыскöт. Айыс учöт мыгöра, паськыт рожабана, чукыля кодь коккезöн, рыжöй тошока. Порсьöн шуис Амос Иваныс, назём гуддисьöн. И гуддисис Спиридоныс — кувтöдз нырьясис нятьын, некытшöм уджись эз пов.

Иван Егоровичыс Спиридонсö мортö эз пукты, но Викторыс тöдö стариккесö-разбойниккесö, кöдна сьöкыта уджалiсö, умöля пасьтасисö, думайтан, что вермисö только гöрны да кöдзны, а нiя ештiсö эшö и любитны öтамöдныслiсь иннезнысö.

Учöт эшö вöлi Викторыс, кöр Робертлöн айыс янсöтчис семьяыскöт, висьталам, что пышшис колхозсис, кöр гортын тшыгьялiсö, сёйисö турун, Иван Егоровичыс котöртiс кошшыны кокнит да пöт олан, мунiс леспромхозö, кытöн вердiсö чочком няньöн.

Тулысыс цветитiс. Деревняын кöдзисö да гöрисö, кытöн тшыгöсь, кытöн пöтöсь, а Иван Егорович леспромхозын уджалiс магазинын да гортас пыр иньдалiс гöснеч — бур нянь.

Викторлöн айыс уджалiс öт пемытсянь мöд пемытöдз. Мукöдпыр гортö уджалансянь вайлiс «кöч нянь», кöда вöлi сэтшöм жö сьöд, кыдз гортын, но чöскытжык нежели пызаныс вылын.

Спиридоныс луннэзнас уджалiс, ойезнас етша узис — дозирайтiс вöвсö.

Этадз öтпыр Спиридоныс сулалö ойнас посöдзаныс, видзöтö тöлiсь вылö, думайтö, кöр жö пондас зэрны и кымöррес юкталасö тулысся петассэсö, вдруг сэтöн Иван Егоровичлöн иньыс кыдз ойся кай, швырк! Жмитчис йöз мужикыс бердö и пондiс Спиридонсö пыма окавны да пель одзас шушкыны: «Роднöй тэ менам! Любимöй да золотöй!..»

Мöдыс йöз иньсö чуп да чоп, а сыбöрын юалö: «Мужикыт мый висьталас?»

— Сэтшöм мужикыс кöть эм, кöть абу... Мед сiя кытöнкö öвтчö!

Быдöс вöлi пöриссес коласын, вöлi мый касьтывны. Не эта понда я соседныс öнi кучикас эз тöр, пыр лöгалiс Спиридоныс вылö, а соседканыс — Викторыс мам вылö?

Олiсö пöриссес — кык сосед. Не пыр жö пурсисö да лöгалiсö. Кöр оланыс сувтiс коккес вылö, кöр няньсö пондiсö пöжавны картошкатöг, Иван Егоровичыс пондiс пырны соседыс ордö. Осьтö ыбöссö и порог дорын ни модьö:

— Здоровöн олан, сосед! Поди, мыся, винаокыт эм? Мыля абу? Эм. Ю, Иван Егорович, ю, сосед! И юö Иван Егоровичыс, юö пöт и эшö содтö, что пондöны кылыс и коккес гардчыны, баöн ¹кыссьö гортас да модьö:

— Петав, — горзьöтас, — вöрись яйöн верда. Лось яй соседлöн эм тöв и гожум. Яйтöг вöралiсьыс, натьтö, öтiк лун оз ов: пишальöн лыйö и петляöн торкö, этö быдöн тöдö. Тöдö да оз, адззö да оз адззы, кöр отирыс миян пыр вöлiсö дженыт кылаöсь, быдöн думайтiс: «Ась. Карта вылын ог быдтö, йöзлiсь оз гусялö...»

Спиридонсö соседыс умöль мортöн лыддис, но Спиридоныс асмознас гордöй, кытöн колö, кужö кешитчыны, а сэтöн петiс соседыс ордö.

Вöлi праздник. Кöркöся праздниккес вöлiсö не талуння кодьöсь. Талун ми праздниккезнас топ отирсис полам, унакöт ог тöдчö, а сэк кыдз праздник, сiдз и гармошка: чукöртчасö том и пöрись, öтлаасяс отирыс — улицаыс оттöм, керкуö пырасö, кыдз öвинö садитасö, и койöны: пырöны да петöны керкуись керкуö, сьылöны да йöктöны — гажöтчöны кинлöн мый петö. Дружнöя уджалiсö, дружнöя и праздниксö чулöтiсö, но коддэс эз вöлö.

Спиридонсö праздниккес коста отирыс эз орддьö: быдöнлö тырмис ырöш да сюромка, а кöр Викторыслöн мамыс и сур вийöтас. Юасö да сёясö гöссес и öдззасö джодж шöрын йöктыны — тусь тойны, нинкöммезнысö бырöтны, бус лэбзьö, бöрсяняныс нятьсö зырöн зырт.

Иван Егоровиччезлöн жö джоджныс праздникöдз и праздник бöрсянь веж чочком, топ керкуаныс юррезныс вылын ветлöны. Эта сьöртi и тöд, что мортыс надз — отирыс орддьö. Но и ась.

Спиридоныс чапкис совестьсö, пырис Иван Егоровиччезö и медодз зырымöсь нинкöммезнас лякасис порог дорö: полö тальччыны, одзлань шагньöвтны, кыдз гöжис-кынмис местаас, но пöв синнас медодз адззö хозяйкасö, кöда комсяняс дудi моз мыччыштiс юрсö, басöк тупöсь кодь чужöмнас козьналiс гаж, сiдз бы гöсьыс и моросыс бердö жмитыштiс, окыштiс да пель одзас ласковöй кыв висьталiс, но öнi вермис ассис чувствоэсö, пернапасасис ен угöлö, малыштiс рыжöй тошсö топ сэтшöм кодяыс некин абу.

— Вешшы, — шуис хозяиныс.

— Пуксьы, — ласковöя висьталiс хозяйкаыс. Кыскисö гöсьсö порог дорсянь веськыта пызан сайö. Хозяйкаыс комсянь чывкнитiс джодж шöрö — чикись эшö! Бобгö — пеллесö адззö.

Керку тыр пöжöм яй дук — дуль вотялö.

— Сёй! — висьталiс хозяиныс. — Тэныт тырмас и тэ бöрсянь кольччас.

Иван Егорович кужö ошшасьны. Гöсьыс кывзö хозяинсö да пель саяс тэчö, ачыс сёйö и оз.

Басниыс сьöртi Спиридоныс вежöртiс, что Иван Егоровичыс яйсö гортын оз видз, медбы лёк поннэс эз кылö дуксö, эз адззö милиционеррес.

— Меись эн пов! — гöсьыс бекöрись вилкаöн бытшкö кулак ыжда яй тор и курччöвтö сiйö.... Оз вежöрт мый ньылыштiс: сёяныс оз бы кылав, дуксялöм. Но и мый? Ми отирыс абу гордöйöсь, кöр тшыгьялан годдэзнас кулöм вöввез сёйим да эг кулö, а öнi, поди, вöрись яйнас ог жö черпезьдö, кынöм бы пöт вöлi.

— А тэ эшö этö пешлы! — хозяйкаыс кузь да нятьöсь чуньнас тарелка вылiсь одзас вештö мöдiк тор. (Басöк, но киэсö вунöтö миссьыны и рожаыс сэтшöм жö...)

«Но и мед... Сёям и этö яй торсö!» — гöсьыс яй торресö öмас чапкö да чапкö, ньылалö да ньылалö, кыдз оз и сöскы, сёйö и пöтны оз вермы, аслас синнэс хозяйкаыс сьöрын, туйис бы дак öтлаын сёяныскöт ньылыштiс.

— Р-р-р-ас! И абу... — Иван Егоровичыс висьтасьö кыдз лыйöм лосьыслö, топ пишальнас сiдз и лыйö Спиридоныслö, кöр адззö, что сыкöт уна оз туй орсны: чуньтö мыччан — китö курччöвтас.

Сiдз Иван Егоровиччез и вердiсö гöсьнысö: хозяйкаыс öмас сюйыштö, а хозяиныс, натьтö, бы бöр öмсис кыскö.

Спиридоныс сёйис пöт, чеччис пызан сайись, ружтiс, горзьöтлiс, малалiс тошсö да кынöмсö, спасибо висьталiс и еныслö эз вунöт юрбитны, кöр гортын эз и тöд, кöда ен угöлыс, сувтiс порог дорö и эшö мыйкö видзчисис, но сэсся сылö нем ни эз вайö, нельки шоныт ырöшыс вöлi жаль. А мый вылö унажык сэтшöм мортсö юктавны да вердны, кöр сiя сёйис-юис и думайтö: «Враг тэ, Иван

Егорович! Верман вöрсис и торкны... И некин тэнчит эта понда юртö оз вермы пиньöвтны... Оз лысьт...». Вежöрт эта бöрсянь кин тэнат ёрт, кин враг? Öнi Викторыс нюжласьö-ружтö будкаын и думайтö: «Не айыс следö я тальччис Робертыс? Не Иван Егоровичыс кодь жö я кöин?!»

Викторыс эз узь, ранитöм зверь моз куйлiс. Вöлi сылöн кадыс, медбы думайтны оланыс йылiсь, öтлаö йитны томмесö и пöриссесö, кошшыны, кысянь пондöтчö бурыс, мыйсянь чужö умöльыс.

Чулалö кадыс. Топ тöн эшö айезным вöлiсö томöсь, а ми котрасим вешьянтöг, а талун асьным ни лöсьöтчам кувны... Зубыта шагнялiсö отирыс вывтi годдэс, кинлö унажык дöнзис, кинлö етшажык.

Вунöтiм ни талун сьöкыт ой-лунсö, кин и оз верит, что вöлi сiдз. Вунöтiс Викторыс, кöр медбöрьяись сёйис картошка сорöн пöжалöм нянь, кытшöм лунö пешлiс турунiсь кöвдöммез и кöрсянь пондiс сёйны пöттöдз.

Гажöн сотчö печкаын пес. Би югöрыс орсö стенаын, югдöтö Викторлiсь чужöмсö, шонтö. Лесникыслö лоö жар, горшыс косьмö. Сiя баöн кыссьö порог дорöдз, онняюртчö ыбöсыс сайö и гöпись юö кöдзыт ва.

Крыша вылiсь вотялöны ва воттез. Ыбöсыс бердын зэв öшалö туман. Ыркыт öтöрас.

— Ляв-ляв! — матын кычан моз вувтö зверьыс, полöтö Викторсö.

Мый тэныт, зверь, колö? Мыля он узь? Полöтан мортсö, кöр сiя шогалö!

11

Луннас ошыс куйлiс кыз пожумовöй колода бокын, кытöн суналiс, кытöн кывзiсис, кыдз шушкö кöз йыввезын рам арся тöлок, кöда талун вачкисис тулысся тöв вылö и нетшкис кыдззез бердiсь медбöрья лист.

Логланьсянь тöлыс койис сiсьмöм яй дук — нерис зверьсö и бöбöтiс.

Ошыс следдэсö лымыс вылö эз бы мыччав, видзчисис, кöр нач сылöтас, тöдiс, что сылöтас (инстинкт сьöртi, кöда зверьыслöн öксис поколеннёсянь поколеннёö, велöтiс овны вöрын, тöдны сiйö, мый оз тöд мортыс). Сiйöн зверьыс тöв кежас эшö эз и вод аслас гуö, кöдö бöрйис эта жö шор дорö, но ылöжык, медбы лёк врагыс тöвнас эз инмы...

Избушкаланьсянь вачкис тшын дук. Эта тшын дукыс вöлi не ни талуння, но зверьыслö висьталiс, что оз ков вунöтны медлёк враг йылiсь, кöда эшö локтас татчö и пондас бергавны сю гöгöр.

Ошыс татöн олö тулыссянь. Сiя бура тöдö ассис местасö-гортсö, кытчö мöдiк зверьыс оз ни пыр, а кöть и пырас, дыр оз ов, мунас аслас туй кузя — сэтшöм природалöн закон.

Ошыс том. Сiя янсöтчис мамыс дынiсь мöйму: быдмин — мун, тэ местö быдмасö мöдiккез, велöтчы вердсьыны ачыт — эта мöдiк закон природалöн. И мунiс зверьыс, бöрйис аслыс бур местаэз, кытöн сылö гленитчис овны, кытöн олöны вöрмöссэс, быдмö рябина, шедö гожумнас öмидз — пыр пöт.

Зверьыс тöдiс, что эта вöрын сiя медвына, сыись полöны быд зверь. Быдöнныс я? Природалöн жö инстинкт висьталiс сылö, что и сылöн эм лёк враг, хитрöй да вынажык, кöдаись колö пыр повны и сiйöн ордйыны.

Эта врагкöт пантасис чожа, сiя жö тулысö, кöр будка дынö локтiс трактор и пондiс гöрны шутёмсö. Ошыс нырö павкис нёштöм дука солярка, вачкис морт дук.

Медодзза лунö, кыдз вöрö локтiс мортыс да пондiс уджавны ыбокыс вылын, ошыс дзебсисис тшöк вöр коласö и сэтчин олiс, кытчöдз эз кöдзсьы.

Гожумыс вöрын чулалiс бура. Ошыс бöра олiс, кыдз сылö колiс, эз кыв мортлiсь дук.

Арнас ни, кöр пуэз вылын пондiс вежöтны листыс, зверьыс пондiс лöсьöтчыны тöв кежö: сёйис буржыка, медбы госсявны — öктiс кузь тöв кежö вын. Сёяныс тырмис, но ошыс видзчисис, кöр муок вылын вöр коласын воас чöскыт зöр.

Сюыс быдмис, пондöтчис воны ни, и ошыс бергалiс шутёмыс гöгöр да кыдз только чочкоммис сюыс, пешлiс виль сёянсö, кöда сылö сiдз гленитчис, что мöдöтпыр кыскис дынас. Но луннас бöра вдруг нырас вачкис морт дук, кöда локтiс и бергалiс муокыс гöгöр, полöтiс пишальöн. Пишальсö ошыс эз адззыв, но кывлiс ни, кыдз сiя вöрас чарöтö-лыйö, повзьöтö сьöлöм и сы бöрсянь вöрас недыр кежö быдöс лöньö да дзебсисьö, топ и тöлыс повзьыштö да дугдö недыр кежö шушкыны кöззэз коласын.

Пишальыс — смерть, сыись колö дзебсисьны. Кыдз вöрын морт, сiдз и кылан пишаль дуксö.

Вöлi сiдз, что зверьыс сюсö сёйны шутём вылö петавлiс луннас, но öнi пондiс зöрсö сёйны только сёр рыттэзöн, кöр пемыт или тöлiсьыс оз эшö öшöтчы юр вевдöрö.

Ошыс кокнит кокшыöн ветлöтiс вöрас и думайтiс, что öнi сiйö некин ни оз кыв и оз адззы — мортыслö оз мыччись, но хитрöй мортыс быд лун кытшлалiс шутёмыс гöгöр, синйис зверьсö и лöсьöтчис керны мыйкö сэтшöмö, что тöдiс только öтнас. Петö, что вöрын зверьыс и мортыс кошшисö добыча. Зверьыс сёйис, мый шедас — ягöд и гаггез, небыт туруннэз и этö сюсö, а мортыслö вöрсис колiс только яй, кöда ветлöтiс и лэбалiс (кöднö туйис сёйны). Сiйöн вöралiсьыс шутёмыс гöгöр пуэз бердö кöрталiс тросiсь гардöм петляэз, кутiс бы ыджыт зверьсö. Чожа петляö гардчис лось. Сiя, голянас кышасис кытшö, повзис, нетшкöвтчис, чеччöвтiс бы пышшыны, но этасянь петляыс только öддьöнжык зэлöтiс горшсö — джагöтiс, и таралiс лосьыс, берездасис, киргис-керис и чожа лöнис.

Шонтiс шондi. Вöрын пизис олан, öтiк кулiс, мöдiк сэтöн и эм: яй дынö медодз лэбзисö ройöн гуттэз, сыбöрын ракаэз да катшаэз, ылiсянь лэбзис сьöд кырныш, матi мунiс рысь, шорыс дынын нюкьясис лана, ветлöтiс и руч — быдöн бы сёйис яйсö, но кытчöдз некин эта яй вылын эз адззись хозяиныс, а мортыс топ вунöтiс петляыс йылiсь.

Чулалiс шоныт лун. Кулöм зверьыс пондiс дуксявны и, эта яй дукыс павкис ош нырö. Сiя эрзыштiс, чеччис аслас местаись, кывзiсьыштiс и небыт шаггезöн иньдöтчис шорлань.

Гажöн больгис шорыс, орсiс вужжез коласын, тэрмасис да ошшасис аслас оланöн.

Зверьыс мурзьыштiс — вöрыс повзис, но кырныш только вöрзьöтiс борддэсö и сё пукалiс кулöм лосьыс вылын.

Ошыс уськöтчис кайыс вылö, но мöдыс быркнитiс ныр увтсис, пуксис кöс кöзок вылö, топ шуис «Гультым. Эн лöгав, ош! Меным уна оз ков». Виньдiс кайыс, топ ньылыштiс дульсö да серöмтчис лёк зверьыс вылын.

Ошыс вожасис кулöм лосьыс вылö, гыжжесö мöртiс кыз кучикас и вына лапанас нетшкöвтiс гöнсö, ачыс сё мурзис-эрзiс, мед быдöн кылiс, что сiя татöн вына! Некинлö добычасö оз сет.

Пöжö шондi. Вöрыс топ суналö. Гажöн больгö шорок, орсö вужжез коласын, сьылö öтнаслö вежöртана песня.

Ошыс сёйис, лакис шороксис сöстöм васö, вишнитiс воздухсö и гöныс спинаыс вылын сувтiс, чорзис быд жилаыс, синнэс лоисö лёкöсь. Лолалiс зверьыс — кывсö öмсис мыччис, и öмсис вотялiс дульыс. Пондiс мунны — ачыс оз кыв ассис шаггесö, кокнит коккес вылын, мунö вöрын, кыдз вуджöр.

Зверьыс думайтiс, что сiя сiдз ни ветлöтö вöрас гусьöн, что некин сiйö оз кыв, не оз адззы, но эта коста эшö гусьöнжык бöрсяняс сибöтчис вöралiсь, ылiсянь ни адззис, что сы петляö кышасьöм зверь: видзöт, кыдз борöм-гарйöм коккезнас нитшсö и мусö, пессьöм-люкалöм кыдзоккез, но мездöтчыны абу вермöм... Вöралiсьлöн сьöлöмыс гажмис, сiя сiдз бы и чеччöвтiс добычаыс дынö, но... Вöрыс мылякö кыдз повзьöм, кыдз сiйö видзчисьö, висьталö мыйкö.

Китшкис катша, кыдз кайыслiсь мыйкö мырддисö.

Керис шаг и сэтöн мортыс син вылö усис ошлöн спинаыс, кöда тыдалiс важ мыр сайын. Медодз мортыс повзис, вирыс зэлöтiс мороссö, öмас косьмис дульыс и пондiсö дрöжитны киэс, сiя жаднöя видзöтiс ошыс вылö и эз тöд мый керны. Сiдз, чулалiс минута, поди, етшажык, и вöралiсьыс лэбтiс пишальсö. Чарöтiс лыйöм.

Зверьыс рявкнитiс, топ небоыс киссис и моросын сьöлöм джöмдiс.

Вöралiсьыс патронташсис дрöжитöмöн кошшис виль патрон, но патроныс эз шед, а ошыс эз ни тыдав. Мортыс сулалыштiс эшö мымдакö öтiк местаын, видзöтчис-керис и шагньöвтiс добычаыслань.

Сiя полiс ошсис, сiдз полiс, что мöдыс кö чеччöвтiс бы, мортыс бы эз ни вермы лэбтыштны пишальсö да лыйны, но зверьыс некытöн эз тыдав.

Яйыс вöлi дука. Ошыс нять сорнас гардöм, гуттэз бизгöны добычаыс гöгöр, сьöлöм гудыртчö.

Вöралiсьыс яйыс понда эз понды тöждiсьны-горзыны: сiя зверьсö эз быдты, нiя эшö уна котрасьöны вöрас, кышасяс мöдiк.

Сiдз торксис лосьыс, кöда дынö сэсся не мортыс эз лок, не ошыс эз сибав.

Яйыс местö шутём вылын воис зöр. Сюсö сёйисö кайез. Ошыс пемытiнас петавлiс сёйны сюсö, кöть и мортсис полiс эшö öддьöнжык, и ветлöтiс эшö гусьöнжык.

Öтiк сёр рытö, кöр зверьыс пондiс петны шутём вылö, вдруг сылiсь голясö зэлöтiс кöртовöй кытш да сэтшöм вынöн, что кöть мымда вöлi сылöн выныс, но эз вермы орöтны проволокасö.

Ошыс повзис. Быд вынсис рякöстiс арся гора вöр тыр, сувтiс кык кок вылö, нетшкис-летiс бы врагсö, а кöртовöй кытшыс голясö сё жмитiс и жмитiс. Пессис зверьыс, кивзiс, рявзiс обидасянь. Мезмис кыдз бердiсь медбöрья вежöтöм лист и жагвыв дюттясьтöн лэдзчисис му вылö.

Ошлöн оланыс овсис, кыдз вöрыс вылын листыслöн, кöда киссис му вылö.

Кöр ошыс дугдiс пессьыны, миритчис аслас судьбаöн и куйлiс öтiк местаын вöрзьытöг, сэтöн вдруг нач матын кылiс лыйöм, кыдз зверьыслö вачкисö зорöн. Сiя бöра чеччöвтiс местасис, öктiс медбöрья вынсö, нетшкöвтiс петлясö и мезмис...

Кадыс эта сьöкыт луннэз бöрсянь чулалiс. Небосö пондiсö вевттьыны кымöррез. Кöдздöтiс и пондiс зэрасьны. Матын ни вöлi тöв.

Сьöкыт таво ошыслö. Локтö тöв, а сiя веськалö дыша. Веськалö, вунöтö бы мортыс йылiсь да оз вермы вунöтны, топ вöралiсьыс сулалö быд кöзок увтын и видзчисьö сiйö.

Талун рытланяс ыркöтiс. Ыб вылiсь и вöр коласiсь туманыс лэбтiсис вевдöрö, но напрочь сiдз эз и öш. Вöрыс лоис горажык, быд шыыс вынсялiс и паськалiс, саймöтiс кымöрсис звездаэз, кöдна öзйисö сьöрсьöн-бöрсьöн.

Ошыс, кыдз быд рыт, видзчисис пемытсö, куйлiс кöзок увтын да нюлiс лапасö, кöда сё эшö эз бурд.

Кöз уввез вывсянь юр вылö вотялiс ва. Вдруг матын воздухсö нетшкöвтiс лыйöм, кыдз чарöтiс зверьыс пеллез одзын, вачкис шатьöн спина кузя, но ошыс бöб кöч моз местасис эз чеччöвт, эз вирдышт котöртны, а сувтöтiс гöнсö, чорзис, синнэзас югйöвтiс лёк югöр и пондiс кывзiсьны.

Лыйöмлöн говкыс то вынсялiс, то джöмдалiс ― лэбзис гора арся вöрын, кылiс дыркодь, но сылiсь вермис ни мортлöн ружтöм.

Ошыс кылiс мортыслiсь ружтöмсö и вежöртiс, что сылöн медлёк врагыс шедiс бедаö, и смевмис.

Пемыт да кузь арся ойыс. Гажтöм. Ошыс гусьöн ветлöтö избушкаыс гöгöрын, ветлöтö да шутнялыштлö, вартлö лапанас муыс бердö, кешитчö-полöтö.

12

Кузьжык арся ойыс эшö сэк, кöр он узь. Ештан думайтны быдöс, мый пырас юрат и усяс тöдвылö, мöдпöв олан ассит олантö.

Викторыс сё эшö думайтiс бы, что лыйис аслас пишальыс, сё эшö эз бы верит, что самострелсö вермис сиавны соседыс. Мый вылö, кöр тöдiс, что татчö вермасö локны отир?

Одзжык эд пишаллесö сиавлiсö жö вöрас, но сэк быд деревняын тöдiсö эта йылiсь, быд кöзö гижлiсö, что вöрöттяс колö мунны да оз ков сунавны. И кöркö эд вöлi ни, что ош местö пишальыс лыйис мортлö, кöда сыбöрсянь кувтöдз ветлöтiс пуовöй кокöн.

И тэ, Виктор, Паличыс моз жö пондан ветлöтны руб-пять, руб-пять... Паличыс кöть мастер, мый бердö кутчисяс, сiйö и керö, а тэись мый? Кужан я керны шöмöссэз, вочны öшыннэз, тэчны горрез? Он эд! Натьтö, и нинкöмсö ни он куж кыйны. Сiдз тэныт, лесник, и шыннялö оланыс, — бöрöн сулалö.

Кусiс печкаын би. Керкуокын сэк жö лоис кöдзыт. Ошыс шутньöвтiс зэв будкаыс дынын.

— Мый тэныт колö?! — Викторыс горзöм сорöн ыбöсöт ыкöстiс зверьыслö. — Ме разь тэ одзын виноватöй?! Этö миян бандиттэс, кöиннэс... — Лöгыс петiс зверьыс вылö, видiс лёк мортöс.

Кокыс ременьсяняс позялiс, нем эз кыв. Кытiськö лыддьöтлiс, что этадз зэлöтöмнас коксö дыр оз туй видзны и синваэс сорöн личöтiс ременьсö, босьтiс чер да пондiс керавны пес, ачыс пешлышалiс ранасö, оз я вирыс чепöссьы-пет, но ранаыс эз жö вöв сэтшöм ыджыт, медбы коксис вирыс визывтiс шорок моз (öнi сiя эз вад вешьян коксö).

Викторыс кералiс пес. Сöтас — сьöлöмыс öмöдззас чеччалö, мыдзö, юрыс пондö бергавны. Сувтчас, öмсö осьтас, лолалöв-керас и одзлань керасьö. Куимись-нёлись сöтiс и пымалiс, люзь вамис йöрнöсыс. «Виктор, тэ Виктор... Мый тэкöт лоис?!

Быль я мый я сэтшöм ни умöль, что пессö он вермы керавны, поди, эшö и лöсьöтчан кувны?» — баитiс аскöттяс лесникыс.

Викторлiсь сьöлöмсö курччöвтiс сэтшöм обида, что моросас пондiс писькöтны, кыдз майöг мöртчис, и петiсö синваэс. Сiя чышкис синваэсö. Лоис кокнитжык. Кивзытöн да ружтытöн пес жугсö сюйис печка пытшкö, пöльыштiс шоммес вылö, паныт синнэзас лэбзис пöимыс.

Адззылiн, и пöимыс сералö ни тэнö...

Тiлис-паджис синнэсö, бöра пöлялiс шоммес вылö, кытчöдз эз öзйы биыс.

Кунис синнэсö и эз ешты онмöссьыны, кыдз ыбöсыс дынын кинкö лыйис: «Ча-а-ав!» — гора вöрас паськалiс шы.

— Ме тэныт! — Викторыс босьтiс пишальсö да чеччöвтiс местасис и бöр таралiс ыбöсыс одзö: зубытыс кольмöтiс.

Саймöтiс топ мамыслöн голосыс.

— Зон, котрась жö соседдэзас... Нылöн истöггес эмöсь, — висьталiс мамыс.

— Бöра война я мый я? — лесникыс жагвыв саймис кыдз кыз онiсь. Только эд война годдэзас мамыс этадз одз асыввезнас вашöтлiс Иван Егоровиччезö истöггесла. Робертлöн мамыс пытшкись посöдзсянь кыз голоснас юавлiс:

— Мый колö?!

— Истöггез, тётка.

— Видзöт, зырымöсь ныр, истöгыс кытöн! — осьтлiс ыбöссö соседкаыс да мыччавлiс кузь чуньнас асывся звезда вылö, но зонкасö он бöбöт, кöр керкуас лонтiсьö гор — тшын и чöскыт нянь дук павкö öтöрöдз, чöскыт нянь дуксянь сiдз кынöм пондö симавны, что Викторыс думайтö: «Муна и мамöс тшöкта пöжавны жö чöскыт чöвпаннэсö...» Но кытiсь да мыйись, кöр пизьыс эз вöв?

— Сэк биа шоммесö вай, — кеймисьö Викторыс.

— Деньга вай! — мурзьö Робертлöн мамыс.

— Ой! А кытöн сiя деньгаыс?

— Сэк татчö эн вовлы! — ныр одзас пöдналöны ыбöссö.

Вот сiдз, зонка! Мый, разь он вежöрт, что соседдэт олöны уна буржыка, но нылiсь тöвнас лымсö он босьт? Буржык, кöр котöртан Коля дяддезö: видзöт жö, нiя кытiськö вайöмöсь ни биа шоммесö и лонтöмась ни горнысö: крышаыс вылын йöктö тшын.

Викторыс нюжöтчис печкаыс бокö, горöтчис: «Мый бы кувны... Мый жö бы лоис?» — «Мый лоас? — сералiс ни ас вылас, — думайтан тэтöг оланыс сувтас? Оз эд. Касьтыласö сорок дёнсö и вунöтасö».

Думайтiс, кин керас гроб, кин гарьяс гу... Поди, некин оз и лок, чапкасö эта кöз бокö...

Мöдiк дума ни сералiс, кыдз куйлö гробын, кыдз сiйö жалейтöны, горзöны-причитайтöны, ошкöны, что вöлi бур морт да эз ло: ловья вывтi эд пыр видöны, а кулöмсö ошкöны. Каньыс ни пукалö гробыс дорын да миссьöтö лапаэзнас чужöмсö — горзö... Гробыс сулалö джодж шöрын. Кулöмыс юр дынын сотчöны масiссез, пызан вылын пирöггез. Ю да сёй, Виктор!

Вдруг порог дорын кивнитiс каньыс да заргисис джоджулö — этö керкуас пырö соседыс. Робертлöн чужöмыс чорыт, пиннесö гичыртöм, синнэс югытöсь — лёкöсь, шаггес чорытöсь, кузьöсь. Зыр-зыр порог дынсянь веськыта локтiс гробыс дынö, сувтчыштiс и пондiс лöгöн видзöтны-сёйны кулöмсö. Старушкаэс повзисö, öммезнысö осьтiсö да видзöтöны, натьтö, думайтöны: «Грех эд сiдз, Роберт! Еныс чарöтас.»

— Ха, кытöн еныс? Кин сiйö, баббез, адззылiс? Тöдам я ми öнi греххесö?.. — сералö Робертыс, топ ачыс некöр кувны оз лöсьöтчы.

13

Печкаыс шонтiс, чискис би. Угöлын гуддисис шыр. Викторыс эз и казяв кыдз онмöссис и пондiс вöтасьны Наташасö, топ инькаыс локтiс дынас, малыштiс юрсö и синваэс пондiсö вотявны мужикыс чужöм вылö.

— Мый лоис, Наташа? — серöмтчис Викторыс.

Иньыс шы эз сет, синваэс сё вотялiсö, сё мужикыслiсь малалiс юрсö да ньылалiс дульсö. Киэс мылякö кöдзытöсь.

— Мый горзан?! — лöгасис мужикыс. Дзуркнитiс ыбöсыс. Наташаыс вуджöртчис и öшис.

Саймис. Дрöжитiс. Кокыс кыдз не аслас — пуовöй и эм, нем оз тöд. Ыбöсас вöр колассянь видзöтчис тöлiсь. Пуэслöн вуджöррес павкисö избушкаыс дынö. Муыс кыдз дзормöм — чочком рöма: несьö усьöм кыз лысва, несьö пуж.

Викторыс кыкнан кинас ниртiс лядьбейсö, кивзiс-ружтiс, печкаö содтiс пессэз, бöр кыссис шонытжыкинö, нюжöтчис печкаыс бокö и пондiс думайтны иньыс йылiсь.

Медодз тöдвылас усис сiя, кыдз локтiс армиясянь. Кадыс вöлi тулыслань, луннэс кузьöсь да гажаöсь. Но некöр вöлi уна шоччисьны солдатыслö да видзöтны природасö: вежис паськöмсö и петiс уджавны. Лун-мöд вöлöн фермаö кыскалiс вердчан, сё отирыс син одзын вöлi.

Уджалiс да гусьöн видзöтлiс нывкаэс вылö: öтiк басöк, мöдiк эшö басöкжык, цветитöны-пизьöны син одзын и асьныс солдатыс вылiсь синнэзнысö оз бы öштö.

Викторыс эшö думаэзнас эз ешты бöрйыны аслыс невестасö, кыдз сiйö локтiсö корасьны: керкуö пырисö куим сват — öтiк пöрись, мöдiк том, куимöтыс ачыс невестаыс.

Корасисö, кыдз кужисö, сiдз и ошкисö невестасö, топ сы кодьыс сэсся некин абу, некытiсь он адззы: «Малин тусь да любöй кага. Сiя эд миян кужö печкыны да дöра кыйны, ва кайöтны да гор лонтны, кужас жöниксö сьöлöмнас шонтны и похлёбканас вердны». Вот кытшöм невестаыс, Виктор, чож, прока, лöсьыт чужöма, кузь чикися, гырись руд сина.

Сэтшöм бы и колiс Викторыслö невестаыс, медбы медодз жöниксö сьöлöмнас шонтiс, йöз йылiсь эз думайт да уджöн гажöтiс. Эз понды жöникыс бöрйисьны да кошшисьны. Гöтрасис.

Наташасö топ ай-мамыс сы понда и быдтöмась, сы сьöртi и эм. Но тёщаыс... Кин тёщасö оз тöд, мед сiя ошшасьö, а Викторыс оз ошшась, кöр тöдö, что Наташаыс мамлöн пиннес кузьöсь, öмыс оз пöднассьы, сё модьö и модьö, öтiк сылö не сiдз, мöдiк не этадз, эх!

Тёщаыскöт я мый я овны?!

Наташаыскöт олöны кыкдас год гöгöр и медодзза годдэзö сiдз любитiсö öтамöднысö, что торйын минута эз вермö овны, а тёщаыскöт медодзза

Лунсянь пурсисö, сiйö и видзöт, кыдз бы эз гыжьясьö.

Тестьыскöт овны туйис: сiя етша баитiс, но унажык керис, олансö томмеслiсь эз сор, вина эз ю, табак эз курит, лэчыта эз баит, няньсö иньыс моз пызаныс вылiсь эз дзеб. Мужик!

Иньыс, тестьыс, тёщаыс — сорласисö думаэс, тöдвылас усис нылыс.

Нывка нылöн чужис том годдэзö. Колiс бы Ленкасö быдтыны гортын жö, но петiс Наташаыс моз: нылоксö быд лун пондiс кыскавны мамыс ордö. Ленкаыс медодз бабыс ордын только лунйис, а сыбöрын пондiс узьлыны ойöн да кыкöн и чожа гортсö вунöтiс. Айыс эз казяв, кыдз тёщаыс янсöтiс нылоксö. Кытöн öнi нылыс?

Думайтö Ленаыс йылiсь и вдруг кылö понлiсь вувтöм. Поныслöн голосыс сэтшöм тöдса, что чеччöвтiс бы да быд вынсис ыкöстiс: «Жучка!» Дынас бы Жучкаыс, натьтö, кадыс бы чулалiс кокнитжыка.

Поныс вöлi чож, вöрас котрасис-лэбалiс, эз пов не ошись, не кöин следiсь. Ой шöра ой сэтшöм нёль кока ёртыскöт некин бы эз вöрзьöт.

Тöлiсьыс лэбтiсис вылö кодь ни и югдöтiс омöн избушка гöгöрсö. Лабич увтын бöра югйöвтiсö шырлöн синнэз-бичироккез.

Лесникыс вдруг ляч вамис-пымалiс: би жарöн пондiс сотны кымöссö, сьöлöмыс чеччалiс моросас, пондiс косьмыны горшыс. Неöтпыр ни порог дорись öтöрсис юис васö, но этасянь кокнитжык эз ло.

Ошыс эз ни полöт. Поди, сiя петiс зöрыс дынö, сёйис пöт и öнi нюжласис кытöнкö кöз увтын или ветлöтiс аслас туйезöт.

Шоныт избушкаын, а Викторыс кынмö, кынмö и жар — öгралö.

Кыссис порог дынö, кеписьсö кöтöтiс ва гöпö и сiйö пуктiс кымöсас. Лоис топ долытжык.

Петiс оныс, но синнэсö эз бы кунь. Кыдз куняс, сiдз одзас и мыччисьöны тöдтöм отир — не отир, а бессэз, пырöны и петöны ыбöсöт, нерöны-сералöны, мыйкö модьöны ас коласаныс. Только куньсисö синнэс, кыдз пель одзас ыкöстiсö:

— Кыдз овсьö, Виктор Спиридонович?! Клин да мох, ме бы тэ местын важын ни сдох! А тэнат, öнджа, натьтö, горшыт косьмö? Ме тэныт винаок видза. — Пиннес гер — эта жö Паличыс! Малыштiс старикыс сьöд тошоксö, пиньöвтiс öмсö и мурзьö. — Сёян бы?! Он сёй! Жаль тэныт, собакалö, няньыс!.. Мед тэ тшыгйöн кулан!..

— Мун синнэз одзись! — Викторыс сьöвзис старикыс рожаö.

— Эн сьöлась, клин да мох! Пригодитчас эшö старикыс.

Висьталiс Паличыс и пöртчис крысаö. Вöлi Паличыс да эз ло — бес син одзын орсö, нерö, бöбöтö, югыт синнэзнас топчан вывсянь видзöтö.

Викторыс босьтiс печка дынiсь чаг, швыргис сiйöн югыт синнэзас, кижгыштiс: «Мый тiянлö месянь колö?!»

— Мый нылö тэсянь колö?.. — бöра баитö Наташаыс и ачыс висьталö: — Нiя тэ вылö лöгöсь. Видзчисьöны, кöр напрочь кунян синнэтö.

Иньыс шоныт кинас малыштiс пым кымöссö, пондiс горзыны: «Роднöй тэ менам!.. Кöсйисисö, кöсйисисö да сёйисö...»

— Наташа!.. Осьтiс Викторыс синнэсö. Крысаыс бöра пукалiс син одзас.

Сiя кань моз пондiс миссьыны чужöмсö, но лесникыс сэсся зверьыс вылö эз видзöт, думайтiс иньыс йылiсь. Думаэзнас шонтiсис Наташаыс дынын.

Шы абу. Сайкалö будкаыс: ловзисяс и öмыс одзын кöдзыт ру.

— Грех сiдз баитны, зон! — вдруг кылiс айыслiсь голоссö. — Сы понда разь ми тэнö быдтiм, медбы аслат олан вылö горзiн?!

— Мый тэ этö ая? — юалiс Викторыс.

— Ме эд быдöс кыла и адзза. — Висьталiс айыс. — Эн тöждiсь. Быдöс лоас бур. Чулалас сьöкыт часыс, веськалан и одзлань пондан уджавны.

— Пешлiн бы! — горзöм сорöн висьталiс айыслö.

— А ме, зон, пешлi! Тöдан кыдз Тагилыс дынын курччöвтiс Колчакыс! Таралi коккезö вылiсь, садьö бырис. Тэ моз жö думайтi, что оланыс овсис, но видзöт, эг кув. Ёрттэзö отсалiсö и тэныт отсаласö.

— Менам ёрттэс абу...

— Бöбöтан! Эмöсь! Öтiк Павел Николаевичыслöн мымда тэ понда сьöлöмыс висьö! И Евграф Титовичыс... А Петькаыс!.. Юасис ни зонкаыс тэ йылiсь... А тэ шуан, ёрттэз абу. Бöбöтан зон! Мортыс ёрттэстöг оз вермы овны.

— Ог тöд... — сьöкыт Викторыслö.

— А ме тöда!

Поди, айсö вöтасис или думаэзнас баитiс — сьöлöмыслö айыс колiс сьöкыт часö, и сiя козьналiс мымдакö вын.

А небоас тöлiсьыс сулалiс, бытьтö öтiк местаын.

Чожажык ни бы локтi асылыс!

Тачкöтö печкаын пес. Биыс малалö Викторлiсь рожабаннэсö. Сiя узьö бы. Онмöссис и пондiс вöтасьны, топ избушкаас пырис Прокоп, пуксис лабичö. Пöрись ни Прокопыс, чукыра рожабана. Мыдз. Куритö. Синнэс гажтöмöсь, жалейтö Викторсö. Мортыс йылiсь лесникыс вунöтiс ни, а öнi сiя вдруг мыччисис, кулöмыс локтiс и сы понда жö тöждiсьö. Тöдам, старик, что тэнö ловья вывтöттят сiдз жö эд некин эз любит — ловйöн бы дзебисö, натьтö, быд морт модис: «Кöртовöй! Смертьыс сылö оз лок. Кодя отирсö шогöт пышшöтö, а Прокопыслö нем оз мöртчы!..»

Вийисö бы одза-одз мортсö, а мыля? Висьталам. Прокопыс быдмис Викторыс айкöт öтлаын и баитiсö, что колхозас пырöм медодз. Кöр колхоззэс сувтiсö коккезныс вылö, оланыс лоис кокнитжык, Прокоп мунiс велöтчыны. Велöтчöм бöрсянь уджалiс районын — ыджыт морт ни вöлi, некöр ни эз думайт джöмдыны да берездасьны, но джöмдiс, берездасис и бöр локтiс гортас. Уджалiс Викторыс моз жö лесникöн. Бура уджалiс или умöля, Викторыс оз тöд, но Пальникись Сьöд Васькаöс кöс чöвтiс.

Отирлö жаль лоис Васькаыс, но немымда эз вöлö жальöсь лоссес (нiя вöрас тыр, кöть быд лун торк), немымда эз вöв жаль и Прокопыс, сiдз кыдз сёйис ассиным мортöс. А кöр кулiс Прокопыс, отирыс ловзисис кокнитжыка.

Öнi кулöмыс локтiс Виктор дынö, пукалiс-керис, шысеттöг куритiс порог вылын да медбöрын висьталiс: «Виктор, мый ме эг вермы керны, тэ кер!» Висьталiс и петiс, кыдз сылiс.

Лесникыс саймис. Юрыс потласьö-висьö, думаэс чувйöны: «Мый вылö эшö старикыс мыччисьлiс?!

Мый лöсьöтчис висьтавны?» — Прокоплöн кыввез сё пельыс одзын... «Ме эг вермы керны, тэ кер!»

Кузь арся ойыс. Кералiс да сотiс быдöс ни пöввесö, а керкуыс сё сайкалö. Асывланяс топ юрыс дугдiсжык висьны, етшажык доймис кокыс. Мымдакö узис, но узис кыдз жельнöг вылын.

Саймис, öшынöт гусьöн ни видзöтчис арся шондi. Кокыс эз кывзiсь — тувдöм. Пуртнас резьöтiс вешьянсö. Пидзöсыс гöрдöтöм и пыктöм.

Кивзытöн кыссис ыбöс дынö. Асылыс гажа, вöрыс миссьö кыз лысваöн. Шондiыс орсö ва гöппезын. Кыдз ув вылын мороссö шонтö жонь. Разь туйö этатшöм лунö шогавны?!

Сьöлöмыс кыскис гортö. Сималiс кодь кынöмыс. Викторыс порог дорись ва гöпись банкаö гумыштiс ва, пизьöтiс сiйö печкаыс вылын и вирскис пым чай. Шоныт ваыс топ козьналiс вын, гывьялiс мороссис шогöтсö. Лоис долытжык. Пондiс думайтны, кыдз кыссьыны гортöдз, кöть бы ыджыт туй вылöдз, сэтчин, поди, кинкö бы пантасис и отсалiс...

Веритiс унажык отирлö.

Гора арся вöрыс гортланьсянь вайöтiс тракторлiсь шы. Натьтö, тракторрезнас лöсьöтчисö фермаö вайны турун. Гортын ни думаэс: син одзас деревняыс панталö асыв, адззö, кыдз челядьыс тэрмасьöны школаö, трактористтэс — гаражö, бригадирыс котöртö фермаö, котрасьöны поннэз, лэбалöны катшаэз, рябина вылын öшын увтаныс чирзöны ватшканнэз — быдöс тöдса, роднöй, аслас. Вермис — лэбзис бы öтлаö отирыс дынö, медодз пырис бы сельсоветö, норасис бы председательыслö пишаль йылiсь, мед кошшисö, кин сiйö сиалiс вöрас.

Эшö эз тöд кыдз пондас мунны, может, баöн или кералас бедь да пондас кыссьыны-беддясьны, но стенаэс пöлöн кыссис öтöрöдз.

Воздухыс сöстöм и уль. Тальччис порог сайö и пондiс öвтчыны ва куканёк моз — вот берездасяс, и кынмис — пиннес сяткöтöны. Умöльтчöм, öтiк ойöн косьмöм рожаыс, тошсялöм, нырыс нюжалöм. Ыждöм синнэс жаднöя видзöтiсö асывсö, межа дорись жаккезöс ¹, кызiсö шорлiсь больгöм.

Кокыс вылö сувтны эз вермы. Сувтчыштiс и юр бöрас сöтiс зубыт, кольмöтiс.

«Бертны... — бöбöтiс хитрöй дума. — Водны и куйлыны, видзчисьны... — Надейтчис, что пондасö кошшыны и адззасö...».

Бергöтчис да дыр видзöтiс керкуыс пытшкö, пишальыскöт думаэзнас янсöтчис, кöдö жалейтiс, эд сэсся сэтшöм пишальсö оз ни адззыв.

«Дугды, бöбöв, лок гортö. Ме талун шыдсö пуи тэ сьöртi», — топ горöтчис ласковöя иньыс, корис гортö.

Викторыс öвтыштiс кинас пишальыслань, öтiк кокыс вылын чеччалiс кыдзоккез дынöдз, пуртнас кералiс костыллез да дзаввез.

Шорыслань кинкö шутньöвтiс морт моз, но öнi сiя некинiсь эз пов, нем умöльсö эз думайт.

Костыллес аркмисö ёнöсь да лöсьытöсь, только учöтика дойдiсö жö конувттэсö, но кытiсь вайны буржыксö?

Чеччöвтiс медодзза шаг, кужис петух моз мунны. «Ого, этатшöм коккес вылын ме чожа гортöдз чеччала!» — сералiс асьсö, но эшö чеччöвтiс шаг-мöд и пымалiс — вамис кымöсыс и сьöлöмыс пессис, топ сiдз и пышшис бы омöттяс.

Сувтчис да шоччисис, видзöтчис öтöрö-мöдöрö. Шондiыс шонтiс спинасö. Долытжык этадз сулавны. Пуксьы бы да сунав...

Шорыслань бöра пондiс полöтны ошыс, кыдз вашöтiс татiсь.

— Мый тэныт месянь и колö?! — ыкöстiс зверьыслö и бöра чеччöвтiс одзлань.

Буржык вöлi чеччавны грива вылын, кытöн муыс чорыт, но кöр пондiс лэдзчыны логлань, беддес мöртчисö муас, падтiсö да дзугисö быд шагын.

Мыдзö. Сьöлöмыс пессьö, пöдö. Пондö висьны юрыс, рожаыс вамö кöдзыт ньылöмöн.

Но сiя мунiс одзлань, лыддис быд шагсö, сорасис, вились лыддис и бöра сорасис, кöр падмис да усис колода бокö и сэтшöм лоис зубыт кокыс, что син одзас лэбзьöны бичиррез, курччалö тырппесö и петöны синваэз. Горзiс бы стыдитчытöг, ежели бы тöдвылас эз усьö нiя жö челядьыс, кöднакöт гожумнас уджалiс вöрын. Öнi топ велöтчиссес котöртiсö паныт да ыксiсö: «Дядя Витя! Дядя Витя!..»

Видзöтö одзас, видзöтö, но некинöс оз адззы, только кылö кыдз бокын вувтö пон — этö бöра эд ошыс. Ошыс!

— Дядь Витя! — Петькалöн голосыс, ыкöстiс зоночкаыс и виньдiс.

Лесникыслö тöдвылас усис, что талун сiя кöсйисис локны школаö и бöбöтiс. «А кин миян медчестнöй öння кадын? — вдруг юалiс ассис и ачыс жö висьталiс. — Челядьыс! А мыля нö ме нiйö бöбöтi талун?! Вот балда, вот öтiк кока пират...»

14

Луныс кыссис год кузя, но эз казяв кыдз вöтiс пемытыс. Пемдiс ни, но кок увтсис эшö адззис туйсö. Горт ладорын кылiс поннэзлöн вувтöм и урöтiс трактор: матын эд, Виктор!

Мыдзис. Телоыс кыдз йöзлöн, оз бы кывзiсь. Юрыс — тыра куд, мый сэтчин и эм, оз вежöрт. Быд коскаыс висьö, кыдз чирей.

Ыркыт лоис вöрас, недолыт. Дзуртö пу, дзуртöны киэзас костыллез. Викторыс öшöтчис беддес вылö, дыр сулалiс öтiк местаын, вермасис аскöттяс: мунiс бы одзлань и эз, олiс бы и эз, но медбöрын бöра вермис асьсö и гичыртiс пиннесö.

Шаг керас и шоччисьö, шаг — и шоччисьö. Муныштас и пуксьö. Пукавтöнняс, кыдз кытчöкö лэбзьö, несьö вöйö.

«Тяв-тяв! — кылö понлiсь вувтöм. — Тяв-тяв...». Нерö кинкö. Поди, ошыс, а поди, и смертьыс ни бöбöтö, кешитчö, но и мед...

— Жучка! — корö бы понсö, но голосыс сибдö, гардчö тшöк вöрас, пондö пöдны. — Жучка! — пизьö юрас дума. — Но тэ, Виктор, этö жö не Жучкаыт...

И быдöс кытчöкö öшö, вешшö, кольччö öтнас. Пукалö и узьö, поди, садьыс ни бырис. Но чожа коксö топ пондö курччавны ошыс, сэтшöм лоö зубыт, что быдöс, вунöтö, нем оз ни ков, кыдз чеччыны да тэрмасьны бы гортлань...

«Тр-р-р-р, — дзуртö пу. — Тр-р-р...

— Кин сiя? Кин?! — оз вежöрт Викторыс, шагньöвтiс, падмис и берездасис. Пондiс чеччыны и бöр усис. Ранитöм кокыс шедiс вужжез коласö, гардчис кытчöкö мöд кокыс увтö. Зубытыс сiдз лыйис, что дыркодь ловзисьны эз вермы. Лöгасис сы бöрсянь, асьсö пондiс видны, что колис пишальсö. «Лыйи бы кымöсам!» — висьталiс кыдз йöзлö. Ружтiс и жалейтiс пишальсö, что колис. Сэтчö син одзас мыччасис Наташаыс, кöда бöра пондiс модьны:

— Чеччы, роднöй, чеччы... Мый тэкöт лоис? Мыля он чеччы?

И сэк пондiс жагвыв кыссьыны одзлань нёльподöн. Этадз одзлань вешшыны вöлöм кокнитжык, мед и вамисö да кынмисö киэс да пидзöссэс.

Пемыт ни, тыдалö умöля, но местаэс тöдсаöсь — тöдiс бы куньöм синнэзöн.

Юр вевдöрас лэбзис тупка — не борд шы, не голос, кыдз вуджöртчис. Кайыс пуксис одзас матö, пукалö кöз ув вылын и видзöтö, видзöтö, мый жö сы одзын, кин сэтшöмыс мунö нёльподöн. Лесникыс öнi кыссис кайыс дынö, бытьтö тупкаыс вермис козьнавны ассис борддэсö...

Пондiс симавны кынöмыс. Пырис карманас и сэтчинiсь кыскис боби ыжда нянь тор. Нянь дук павкис нырас, топ гортас ни, и мамыс гор одзын лöсьöтчö пöжавны идовöй чöвпаннэз.

Викторыс босьтö нянь чöвпансö, курччöвтö сiйö.

— Сёй, сёй! — ошкö мамыс и кружкаö кисьтö йöв — каньыскöт öтмымда, эд йöлыс колö мöдöрö: сэтiсь мамыс керö ви да сетö магазинö.

Натьтö, Викторлöн медсчастливöй чассэс чулалiсö горби одзын, кöр сёйис пым няньсö, и мамыс ошкис: «Сёй, кага, сёй. Ыджытжыка быдман!»

Жагöна быдмисö, а мамыс тэрмöтiс: «Кöр ни тi и быдмат? Ме бы только висьталi да чуньнам мыччалi, а тi бы уджсö керит». Ох, мам! Кыдз тэ надейтчин, что зоннэт пондасö уджавны тэ местö, а ачыт... Кувтöдз уджалiн, и локтiс кад, кöр быдöнныс янсöтчисö — кинлö кытчö туй! Гижтöм закон сьöртi гортö бы колiс кольччыны медтом воныслö — Петькалö. И пöрисьмис бы Петькаыс борд увтын мамыс, а сiя — разбойник гöтрасис, куим неделя олiс невестаыскöт, киас босьтiс чемодан, петiс керкусис. Вотьыштiс воныс шальнöй тöв ньылат, гортö колис том иньсö.

Шöрöт воныс — Степаныс армиясянь вайöтiс инь. Юсь кодь нывкаыс. Туйис бы сэтшöмыскöт овны, но невестаыслöн öтiк изъян — полö деревенскöй уджись, дышыс петö асывнас одз чеччыны, пода дынö петны, назём кыскавны. Бр-р-р! Деревняын улицаэс нятьöсьöсь, оланыс сьöкыт, узьны некöр и весь овны оз сетö. Кытшöм сэтöн олан?! Ась кин татöн чужис да быдмис, сiя и олö!

Чожöсь, мам, моннет шедiсö, но эн куж ныкöт овны: öтiкöс чапкис зоныт, мöдiк — зонтö пышшöтiс городö.

Вöлiсö Викторлöн воннэс да эз лоö и только талун мылякö бöра сьöкыт часö усисö тöдвылö, но кöть мый, а öддьöнжык сьöлöмсö шонтö мамыс. «Мам тэ мам, жмитчин бы ме бердö, шонтiн бы сьöлöмтö, но быд местаын ме тэнö эг куж жалейтны, öддьöнжык сэк, кöр керим керку и медсьöкыт уджыс мунiс тэ кузя — талис горбтö, кöр Наташаыс гардчис бокын, эз куж отирыс гöгöр бергавны.

Син одзас мамыс кöс да учöтик, чож, кувтöдз котрасис керкуын. Медбöрья годдэзас сьöкыта эз ни уджав, колхозас эз ни ветлöт, сiйö и керис, что джодж чышкис да лонтiс гор, но пыр мылякö норасис-ружтiс, что быд коска висьö, а ачыс сё котрасис, сё тэрмасис кытчöкö, топ ендiс уджыс.

Жаль Викторыслö пöрисьыс, кöр сiя абу ни, кöр ачыс ни не том и шедiс дзескыт кадö. Курыт сылöн горшас. Вöрын лоис кöдзыт, уль. Баняö бы öнi! Койыштны бы биа шоммес вылö кöш ва, морос тырöн ловзисьны дзирыт воздухöн, медбы шоналiс сьöлöм и быд вир жила, но кытiсь вöрас банясö? Тэрмась, Виктор, тэрмась, поди, Наташаыс лонтiс банясö и видзчисьö.

— Китш-китш, — китшкö катша. Этö ойнас кöр вöрыс узьö ни.

Кытöнкö лыйисö. Гора вöрыс повзис. Говкыс лэбзис, нерис асьсö. Викторыс лэбтыштiс юрсö, кывзiсьыштiс, пуксис, медбы минута-мöд шоччисьны и сэтöн тöдвылас усис, кыдз сiя мöйму мунiс вöрö.

Тулыс. Шондiа, гажа. Визывтöны шоррез, сьылöны кайез и кок увтын быдмö медодзза зелёнöй турун. Луныс гажа, а рытыс эшö гажажык, кöр öтамöднысö одзалöны, кöкöны кöккез.

Лесникыс гортсянь ылö эз мун. Шондiыс пуксис, кöр Викторыс вöлi тригонометрическöй вышка дынын, сiя местаын, кытöн öтамöднысö вожмöвтöны вöркыскалан туйез, и грива вывсянь öтмöдöрö тыдалö ылö-ылö, топ вöрыс паськöтöм борддэсö и лэбзьö мортыслö паныт.

Викторыс пуксис колода вылö и пондiс видзчисьны машинаэз, медбы ветлыны лесничествоö. Одзас пипуок вылö пуксис кöк да пондiс кöкны сэтшöм гажöн, кöть кайыскöт сьыв öтлаын.

Тулыс эд. Быдöн гажöтчö — олö бы. Видзöт, кыдз межа дорö, кытöн быдмö зелёнöй турунокыс, вöрсис чеччöвтiс кöч, пуксис, кывзiсьыштiс и пондiс сёйны: прыг чеччöвтас, кывзiсьыштас и сёйö.

Тулысыс путриктö. Некытшöм кадö эд абу сэтшöм гажа. Но вдруг лесникыс бокын зэв чарöтiс лыйöм. Викторыс дрöгнитiс, чочкоммис чужöмыс,

Лыйöм шыыслöн говкыс лэбзис ылö-ылö. Кöчыслö кыдз вачкисö. Сiя чеччöвтiс местасис, сöтiс котöртны, но сэтöн жö берездасис, нюжалiс и лöнис.

— Кин лыйис?! — мурзьыштiс лесникыс, сiдз бы и чеччöвтiс, мырддис пишальсö, но кытчö? Кинöс вöрсис кутан, кöр некин оз тыдав?!

Каёккес виньдiсö, дугдiсö сьывны. Тачкис-чегис кинкö коккез увтын ув, и кöззэз сайись мыччисисö кык морт: öтыс том, мöдыс пöрисьжык, томжыкыс кизерик тоша, а пöрисьжыкыс гладь чужöма. Öтыс учöтик мыгöра, но топытжык, а мöдыс кизержык, но кузьжык. Лесникыс энö морттэсö топ кытiськö адззылiс ни, но вунöтiс, кöть тэ вартлы, оз тöд!

Викторыс чеччис колодаыс вылiсь, локтiс тöдтöммес дынö. Здоровайтчисö. Кыкыс куритiсö, синнэзаныс гаж, а Викторлöн пизьö лöг, но кытчöдз видзсьö. Нылöн пишаллез, а лесниклöн карманас öтiк пурт.

Медодз баитiсö, ошкисö тулыссö. Тошаыс полöмöн видзöтышалiс веськыта лесникыс синнэзö, кыдз гусясис и шедiс, пондас ковны мунны судö, сiйöн и кеймисьö: «Тэ миянöс, дядь, эн пур... Кинлöн оз овлы...» А мöдыс, лёк чужöмаыс, баитö и мурзьö, лöг, сiдз бы гадлö пель бокас и вурин, но кутчись-ко кыкыс бердö!

Питиртö кöз йылын ватшкан, кучиксис петö — гажöтö тулыссö. Баитöв-керисö, Викторыс и юалö йöззэслiсь:

— Кинлö лыйит?

— Öнджа... — виноватöя шуис томжыкыс. — Туйнымöс кань поперегалiс.

— А кöчыс мыля пöрис?! — чорзис лесниклöн голосыс. — Кöчыс?! — серöмтчис кузьжык мыгöраыс. — Кöчыс жö трус, дядь. Лыйöмсяняс повзис и, натьтö, сьöлöмыс, шлоп! Потiс беднöйлöн.

Ватшканыс öддьöнжык пондiс сьывны, а Викторыс чорыта висьталiс:

— Öнi, ёрттэз, лыйсьыны вöрас оз туй!

— Туйö, — кокнита горöтчис пöрисьжыкыс, синнэзнас сёйис ни, видзöтiс лесникыс вылö и думаэс гижöмась чужöмас: «Мун тэ татiсь, дядь, кытчöдз боккет дзоньöсь, а то видзöт...» Но сiдз эз шу, а юалiс: — Тэ мый, дядь?.. Милиционерын уджалан?

— Лесник ме!

— А-а, лесник... Вот грехыс... Гавря, бергöт кок нырретö да вешшан лесникыс одзись, видзöт сiя кытшöм миян вылö лöг!..

— Сулалö, ёрттэз! — лесникыс учöтжыкыслiсь кутiс соссö.

— Кöчыс понда колас, челядь, вештiсьны!

— Ага! Вештiсям!.. Кöчыс бокö водтöтам тэнö и пондат кыкöн гаггесö вердны!

Викторыс чочкоммис, коккес небзисö, но петух моз йöззэс одзын лэбтыштiс юрсö да висьталiс лöгсянь чорыт голосöн:

— Ог пондö пурсьыны. Од ештö меным вачкыны, кыдз асьныт сюртнясят. Тi думайтат вöрас ме öтнам?! — и шутньöвтiс, кыдз кужис шутнявны, что, натьтö, кылiсö гортын.

— Мый сыкöт баитны?! — горöтiс пöрисьжыкыс, кöда, тыдалö, вöрас шутнялöмсис эз пов и вдруг Викторыслö сьöвзис веськыта чужöмас.

Öнi Викторлö тöдвылас усьö мый колö и оз, нерö оланыс.

«Гаддэз! Кöиннэз! — курччалö лесникыс тырппесö, кöр сылö зубыт не только кокыссянь, но и обидасянь. — Тiян понда, кöиннэз, кысся гортöдз! Веськала и эшö пантасям... Эшö адззисям...»

Туйыс дынöдз кольччис матын ни, но пемытiнас быд шатёкыс вачкис и падтiс, сорис шаггесö, коккес нильдiсö вужжезö, гардчисö, кыскисö медбöрья вынсö.

Видзчисьтöг гортланьын пондiс кывны тракторлöн шы. Эта шыыс арся вöрын пемытiнас кылiс сэтшöм бура, топ Викторыс вöлi ни матын горт дынын, а машинаыс уджалiс гаражлань и чожа локтас сы дынö.

Синнэс куньсисö. Олiс вöтöн моз, но тракторлöн шыыс, бытьтö миссьöтiс кöдзыт сöстöм ваöн, кокнитжык лоис сьöлöмыслö.

Вöрыс суналiс. Гортлань уджалiс трактор. Сiя лесниксö тэрмöтiс, кыскис туйлань. Викторыс шагнялiс пемытiнас, коккес увтiсь эз адззы не пуэзлiсь вужжез, не колодаэз, усис-пöрис, но мунiс одзлань. Ошыс шутньöвтiс кытöнкö матын ни. Öнi зверьыслiсь шутньöвтöмсö кыдз эз кыв, немись ни эз пов, думайтiс трактор йылiсь, кöда рапкис зэв ни.

Думаэзнас Викторыс тэрмöтö трактористсö и ачыс тэрмасьö бы туйлань. Тэрмасьö... Но тракторыс оз тэрмась. Поди, Петрасö (трактористсö) гортсис оз лэдз иньыс, эд Ленаыс оз кыв Викторыслiсь ружтöмсö — йöзлöн зубытыс оз йидж сьöлöмас, или Петраыслöн юрыс висьö... Вина бы юö трактористыс, кöр кöсйисис кинлöкö вайны пес или турун, кöр быд лун сылö вайöны путёвкаэз: кинлöн вöрын ендö турун, кинлöн сiсьмö зэр увтын пес... Пондыв, тракторист, не мунны, эн отсав асланым отирлö, синнэзат сьöлаласö, а мунан да уджалан — мортлö бурö керан, сiя тэныт вештiсьö винаöн, кöть пондiм овны виль закон сьöртi ни, но отирыс сё эшö керöны асмознаныс.

Тракторыс уджалiс асывсянь рытöдз и эшö рытнас колö уджавны. Трактористыс мыдз, вöрöтчö дыша, а Викторыслö колö бы чожажык.

Машинаыс кылö рапкис öтiк местаын. Викторыс эта коста кыссис одзлань, торкис медбöрья вын, тöдiс, что матын туйыс, кылiс, что локтас отсöт.

Матын бокас пöрис сiсьмöм мыр, топ сiйö кинкö тойыштiс, кöр вöрас лöнь, кöр и рам тöлок оз ловзись. Мырыскöт öтдруг пöрис и лесникыс и пондiс гыжьявны нитшсö да мусö — гырдззаэз вылын ни кыссьö одзлань. Пессьö и оз ни пымав, оз вежöрт, мый ни керö.

Сэтöн зэв эрзыштiс трактор. Веж-гöрд би югдöтiс нятьöсь туй, кыз пипуэз и баддез. Лесникыслö кинкö кыдз вачкис бöрсяняс, сiя сувтчыштiс пидзöссэс вылö, лэбтiс кисö и быд вынсис ыкöстiс:

— Сулав, Петра!

Голосыс сибдiс. Выныс эз ни тырмы корны отсöт. Тракторыс мунiс зэв, топ рожабаннэсö малыштiс шоныт руöн, ловзисис солярка дукöн. Кабинаын тыдалiс трактористыс. Петралöн юрыс дюттясис, нырнас кокалiс рычаггесö, и доддяс топ кинкö пукалiс.

— Петька-а-а! — киж-киж Викторлiсь дзикталiс горшсö, и сiя пондiс öмтырнас кыскавны кöдзыт да уль воздухсö.

Тракторлöн шыыс кылiс сё умöльжыка.

15

Робертыс вöрас сёрмис. Лöнь рытыс, пемытыс гажöтiсö сiйö. Вöралiсьыс любитiс этатшöм кöдзыткодь лöнь арся рыттэсö, кöр вöрыс топ узьö, а тэ мунан и кылан, кыдз кок увтын шлячкöтö ва и думаэз юрын кокнитöсь — некин нiйö оз дзуг.

Робертыс öтнас и ошшасис аслыс, мый сылöн эм бур и мый эм умöль. Талун вöлi мыйöн сылö кешитчыны, кöр котомаыс сьöкыт: гортö кыскö кык кöч да тулан. Не быдöнлö этадз öтiк лунö пантасьö добычаыс, кöр öнi вöррес быд ладорсянь чинöны, торкöны нiйö, и отирыс лоисö поннэз кодьöсь: сöтöны-вартöны и пурöны öтамöднысö быд шагын — ловзисьны оз сетö.

Босьт сiйö жö соседсö. (Роберт думаэзнас пондiс бергавны Виктор гöгöр). Мый лесниклö оз тырмы? Дзескыт разь сылö вöрас? Сёйö и сёйö отирсö быд шагын!.. «Тьфу! — матькыштiс Робертыс, кузьжыка тальччис ва гöп дорö. — Мыля жö бы сэтшöм Викторыс?! — И гордöя висьталiс. — Сулав, ёрт! Панталан жö эд кöркö! Адззисяс кодя морт, что кымöсат сёян пуля, и — аминь! Кошшö вöрсис!»

Вöрыс топ пемытiнас узьö. Ыркыт. Лöнь — шыр котöртас бокат и кылан.

Кузь шаггезöн мунö гортö вöралiсьыс и думайтö соседыс йылiсь, кöда сувтö сылö оланас поперёг, кöть тэ синнэзас сьöвзьы, кваркыш оз кер, ассис пиньöвтö. Враг, законник, морт сёйись, а сiя Викторыс моз оз кер, сiйö еныс пыр и иньдö: некин Робертыс мымда вöрсис оз вермы вайны, а сiя вайö. И пондас вайны, кöть и ошшасьны бы вывтi немöн ни: етша эд лоис зверьыс и кайыс, а быдöн веж öмсö осьтöм да кивзö: «Вай да вай!» Жаднöй лоис отирыс, сэтшöм жаднöй, ох! Кыным уна — сыным унажык колö. Ог ни тöдö мый керны — кучиксиным петам, кöр деньгасö кöшöн гумлалам, кыдз öшымöсiсь ва. «Кикимораэз, бес чужöммез! — сералö ас кежас Робертыс. А думаэс сё одзасисö:

«Кытшöмкö кепись ыжда кучишок понда сто руб оз жалейтö, чапкöны сто руб! Колö жö сiдз, а? А мый, ежели корны талун кучикыс понда сто пятьдесятö? Сетасö или озö? Сетасö эд? Сетасö, нем керны! — шаг шагньöвтiс, туйыс бокись повзьöтiс кытшöмкö зверьöс, кöда котöртiс — чашьясö кок увтсис чеглалiс, но пемытiнас эз тыдав. — Ничего, тэ меным пантасян! — эта зверь йылiсь гажöн думайтiс Робертыс. — Пантасян, ёрт, кытчö тэ воштiсян? Да-а-а... Кучиктö вузала ме жаднöй отирыслö, сета, мед нiя вурöны шапкаэз да жöниккезныс одзын кешитчöны, ежели нылö некытчö деньгасö воштыны.»

Робертлöн кузь мыгöрыс öвтчис ни матын ыб дорын, кытiсь вдруг сiя пемытiнас адззыштiс топ морт мыгöр и сьöлöмыс повзьыштiс: смев думаэзнас — ошöс доддялас, а мыйись мый дак личыт жö тупкöтыс, сэк жö кутö кынöм висян. Лесникыскутчисьыштiс пишальыс бердö, сувтчыштiс: одзас вöлöм мыр, кöда пемытiнас топ вöрöтчис. Сьöвзис думаэзнас мырыс вылö и гусьöнжык моз ни пондiс тальччыны-шагньöвтны быд шагсö, ачыс сё ошшасис: «Сета ме нылö кучиккесö, сета, мед тупкалöны гöна кеписьнас горшшезнысö, но таво витдас рубнас, хрен! Ог ни чапкы. Тырмас! Мöйму эд дурак вöлi, а таво оланыс велöтiс ни кыдз колö вузасьны. А мый нö! Мыйись мый, эта жö лесникыс чушкалас, шедан — юрöн-кокöн он тырмы, кулясö асьтö туланыс местö да кучиктö вузаласö, ха-хе!»

Гажа думаэз вöрсянь гортö кольлалiсö Робертсö, эд сiя таво медодз кутiс ни тулансö и лöсьöтчис небны виль пишаль да машина.

Гортлань кылö пондiс урöтны трактор. Сiя топ сибöтчис, локтiс паныт и кытöнкö одзас кежис бокö, натьтö, Печкана ыббезö, кытiсь ваяс турун.

Робертыс суййис-мунiс кузь коккезнас и чожа петiс трактор следö. Коккес увтын лоис гладьжык да чорытжык — коктö вешты.

Бöра думаэс лякасисö ас дынас, кöр вуджöтiс ни сорок год, а петö, что оз пöрисьмы, а томмö: коккес вылын уна кокнитжык и некыт оз вись, оз доймы. Видзöт жö, талун лунтыр коккес вылын, но спинаыс сайын котомаыс оз и тöдчы, кыдз абу и шаггес кокнямöны.

Шутёмыс дорын, зэв коккес увтiсь чеччöвтiс чочком кöч, котöртiс кöзоккез увтöдз, и, балда, сувтiс кык кок вылö да пондiс гырись синнэзнас видзöтны, кин сiйö повзьöтiс, ачыс пеллезнас орсö. Но и ась!.. Мый кошшан, сiйö и адззан: Робертыс дугдiс лолавны, сулалыштiс, ачыс жагвыв пельпон вылiсь лэдзис пишальсö и чарöтiс. Пемытсö паськöтiс би югöр. Вöрыс кузя зубыта вачкис лыйöмлöн говк и пондiс готсьыны-лэбзьыны ылö-ылö. Кöчыс кузь коккезнас чеччöвтiс вевдöрö, брякнитчис-усис, чужьясьöв керис и лöнис.

Робертыс ньылыштiс дульсö, дзир-бар керис ас гöгöрас, пишальсис вежис лыйöм патронсö, пыдынжыка ловзисис и небыт шаггезöн иньдöтчис кöчыс дынö, кöдö кутiс да лэбтiс бöрись коккезöттяс: небыт да кузькодь чочком гöна зверьыс вöлi басöк и сьöкыткодь.

Вöрыс бытьтö повзис, пондiс кывзiсьны, медбы мыйись мый... Вöралiсьыс бы кыкись чеччöвтiс и саясис син одзись, кöр кытшöмкö аскоддя чувство сiдз и этадз Робертсö пондiс полöтны — не гаж, а топ сiдз кинкö мышксяняс и кутö... Сiя перыта спинаыс сайö кышалiс кöчсö, пöв синнас бöра дзар керис ас гöгöрсö и нетэрмасьöмöн иньдöтчис одзлань.

Некин вöралiсьсö эз адззы. Сiя вöрас öтнас, шагнялö и кылö ассис ловшысö. Часто куритö-нютшкö табаксö. Но не добычаыс, не табакыс сьöлöмсö эз лечитö. «Но тэ и жаба! — ачыс эз тöд кинöс видiс. — Но и жаба!.. — гичралiс пиннесö, терпитны эз вермы враггесö — умöль отирöс, кöр коккес увтын туйыс бöра лоис нятьöсь, нильыг и гардчö сапоггес бердын быдкодь шать да нять.

Талун рытнас сылö колiс бы уджавны — клубын мыччавны кино, керны ассис удж, кöда понда босьтiс деньга, но сёрмис. Мед... Оз джагöтö, кинотöг рытнас некин оз кув. Локтас лун и ашын öтiкыс местö мыччалас кык кино: öтпыр велöтчиссезлö, мöдöтпыр ыджыттэслö, и мыччалас сэтшöммезö, что видзöтан и ойсö он понды узьны, сё йöз оланыс син одзат.

Мунiс вöралiсьыс гортö, тэрмасис и вдруг логыс дорын моз веськыт ки ладорсис кылiс невежöртана шы, бытьтö туй бокын дзуркнитыштiс пöрись пу. Пу и не пу, кöр сiдз натьтö пуыс оз дзурт, а жексö только кага, кöдö мамыс вунöтö нимöтны. Вöралiсьлiсь пеллесö он бöбöт, сiя сувтчыштiс, кыдз падмис, морос тырнас ловзисис и пондiс кывзыны, но кылiс только, кыдз вартiс пеллезас сьöлöмыс, кож-кож!

Кöз йыввезын шушкыштiс тöлок, топ ойыс ловзисис кöдзытжыка и чожа пондас зэрны.

Робертыс кывзiсьыштiс зверь моз — киыс пишаль бердын, но сэсся нем сэтшöмсö эз кыв, только кытöнкö Печкана ыблань, кыдз муыс пытшкын, уджалiс трактор.

Бöра кармансис кыскис папироса (часто жö ни куритö), öзтiс сiйö да ньылыштiс курыт табак тшынсö, видзöтчыштiс.

Шоча да поснита зэрмис. Зэрыс кышöтчис пуэзын, ва воттес павкисö рожабаннэзас. Робертыс шагньöвтiс шаг-мöд, и сiйö невежöртана шыыс сувтöтiс вились. Сьöвзис да горöн юалiс: «Мый сэтшöмыс?!» Но бöра шы абу.

Вöралiсьыс чапкис коккес увтö папиросасö, талис нятяс. Сьöлöмыс тёпкöтiс ни, кыдз кöчлöн. Эз верит, что эм лешакыс, но вöравтöн этадз кывлiс ни шыэз, кöднö ачыс оз вежöрт, и отир нем оз вермö ны йылiсь висьтавны, только шуасö, что эта лешöйыс. А пемытiнас эшö кöть мый верман кывны, и думаэзнас Робертыс пернапасасис ни, касьтылiс енсö да сiйöн сорöн вöрзис местасис, медбы мунны гортö чожажык.

— Ойи-и-и, — кивнитiс кинкö кöззэс коласын.

— Кин сэтчин?! — горöн ни ыкöстiс вöралiсьыс, и сэтöн синнэс вылö усис сьöд мыгöр: кинкö вöрöтчис бадьыс сайын — морт я, пемытiнас он вежöрт.

Лэбтыштiс Робертыс пишальсö. Мушкаыс эз тыдав, но и лыйны эз лысьт: а вдруг быль морт!

Этасянь öмас косьмис дульыс, юрсиыс пондiс топ лэбтыны шапкасö. Сыр-лёль öшöтчисö киэс, дрöжитiсö ни коккес и бöб дума нерис: «Мортыслö... Эх!»

«Пышшы! Пышшы!» — кинкö кыдз вашöтiс местасис, висьталiс, медбы орддис, — топ нем эз кыв, эз адззыв и отирыслö оз висьтав, но коккес эз кывзiсьö.

Кытöнкö уджалiс трактор, кытöнкö вöрас жö эд вöлiсö отир. Поди, колiс бы котöртны ны дынö, но Робертыс эз бы гард татчö йöзсö, мед некин эз тöд, что вöлi татöн, а вдруг... Мый оз овлы вöрас. Поди, кинöскö ранитiсö?.. Поди...

Робертыс пыдына ловзисис, шоччисьыштiс, малыштiс вамöм чужöмсö и пондiс кыдз садьмыны, ачыс сё видзöтiс туй бокас, но пемытiнас сiдз нем эз и адззы. «Кин сэтчин?!» — чувйис дума.

Шутньöвтiс. Шыыс пемыт вöрас лэбзис кай моз, повзьöтiс кинöскö. Кинкö бöра одзас кивнитiс кычан моз и лöнис.

«Морт эд, жаба!» — висьталiс гажажык дума. Мыччисис бы öнi Лешакыс, натьтö етшажык бы повзис, но сэтöн морт. Кытшöм ойнас вермас лоны туйыс бокын морт? Мыля сiя сэтöн?

Тысяча дума вермасисö Робертыс юрын и дзугисö сылiсь вöралан счастьесö, поди, не öтiк лун кежö.

— Кин тэ?! — эшö ыкöстiс вöралiсьыс öтпыр, смела ни шагньöвтiс туйыс бокö, киас чорыта видзис пишальсö, медбы лыйны быд секундаö, кöр сьöлöмыс сiдз öмöттяс и чеччöвтiс — полiс.

«Ош эд, жаба! — сöтiс эшö öтiк дума. — Натьтö, зверьыс кинöскö гыжьялiс, лöсьöтчис сёйны, но ме сэтчö инми... — сунки-банки ни тэрмасис туйыс бокö.

Одзас вöрзьöтчис морт, лэбтыштiс юрсö.

«Ловья! — гажмис Робертыс. — Ловья, жаба! — смела мышкыртчис да вынöн кутiс паськöмöттяс мортсö и бергöтiс спинаыс вылö да юалiс. — Кин тэ?!»

Поснита зэрмис. Омöн ва. Вамö паськöм — павкöтчыны дыш петö.

Робертыс бергöтiс мортсö, но пемытiнас эшö эз тöд кин сiя, бур кöть, что ловья.

— Отсав, — вдруг кивнитiс тöдса голос и сибдiс.

— Но жаба-а, — вöралiсьлöн сыр-лёль öшöтчисö киэс. — Но жаба! Тьфу тэ, ведьма. Сералö я мый я ме вылын оланыс? Кытчö бы эг мун, сiя сэтöн да эшö ойнас, да эшö... тьфу!

— Отсав, — бöра корис Викторыс, тыдалö, эз вежöрт, кин сы дынын.

«Отсала! Видзчись!..» — вöралiсьыс медодз лöсьöтчис пышшыны — сöтны кузь коккезнас гортö, кытчöдз некин эз адззыв и эз кыв, что вöлi эстöн, но мыйкö сiйö видзис, кыдз пемытiнас кöрталiс аслас враг дынö, топ видзчисис: «Мый жö лоас? Кыдз лесникыс эшö пондас кеймисьны, кыдз юрбитас, а ме видзöта...»

Сiя перыта лэбтiсьыштiс Викторыс весьтiсь, сьöвзис, чатыртiс юрсö вевдöрö и синнэзнас небосис пондiс кошшыны звездаэз, но сэтчин нем эз тыдав.

Коккес дынын ружтiс соседыс. Сiя вöрöтчис гаг моз; кöть таль юрсö, вий, некин öнi оз адззыв.

Судьбаыс сералiс Робертыс вывтi, тшöктiс бы керны сiйö, мый эшö эз керлы, но вермис керны.

«Ча-а-а-в! — вöрас кылiс шы, паськалiс омöн, нерис и полöтiс, но вöралiсьыс немись ни эз пов, эд сiя хозяиныс вöрас.

Кивнитiс Викторыс, сё корис отсöт аслас враглiсь.

— Жаба! Вежöм! — гажöн горöтiс вöралiсьыс. — Мый, разь эн адззы буржык местасö, медбы черпезьдыны? Етша гортын сёян, эшö эстöн ме юр вылö пантасин! — сьöлöмыс гажöтчис, тырис вынöн, сылöн петiс праздникыс! — Висьтав, жаба, еныс эм или абу? Вот сiдз. Сёян менö, сёян, а ачыт... Адззин... А кин сэтöн виноватыс? Бöра ме я мый я? Ме тэкöт, жаба, эг вöв, ме тэнö эг пур, не эг вартлы. Тыдалö, тэнат эшö эмöсь лёкжык враггез. Сiдз эд?! Сiдз, жаба!

Шы эз сет Викторыс, ружтiс. Поди, сiя эз и кыв, мый баитö соседыс.

Вöралiсьыс лöсьöтiс спинаыс сайись котомасö, малыштiс кöдзыт да вамöм пишальсö, серöмтчис и сьöвзис Викторыслань:

— Жаба, мый тэкöт керны?

Шы эз сет Викторыс. Кылiс и эз соседыслiсь голоссö, кöр адззис, что рокыс сы дынö вайöтiс Робертсö, кöдасянь нем видзчисьны бурсö.

— Чеччы, пон мульöс! — ыкöстiс Робертыс. — Вöрисьыс я мый я котомасö тэчис, что он вермы кыскыны?! Дзескыт тэныт кöть кытöн.

Викторыс кивнитiс и лöнис.

— Чеччы, жаба! — кокнита брынгис бокас Робертыс.

Ружтыштiс лесникыс, осьтiс пемытiнас синнэсö, кыдз гробсянь дзарнитiс, повзьöтiс.

«Еныс бы эг шу тэ местö... — жаль кодь чувство вöрзьыштiс Робертыслöн. — Вдруг ме бы... Лыйи бы кымöсам...» Эз думайт, что кымöсас лыйны киыс бы эз лэб, но ошшасьö, кöр дзонь.

Вöрын ружтiс тöв и лöнис.

— Мый тэкöт? — пиннес пыр Викторлiсь юалiс соседыс.

Мöдыс сыр-лёль нюжалiс бадьыс увтö.

— Мый тэкöт?! — Робертыс адззис ни, что лесникыслö умöль, вот-вот вермас син одзас ештыны.

— Юа бы...

— Ах, юан бы! — нерис вöралiсьыс лесниксö. Виньдiс аслас гажöн, что сылö кеймисьöны.

Тракторыс кылö вöрзис гортлань. Машиналöн шыыс кылiс ни туйыс дынын и пондiс вешшыны ылöжык. Мöдiк бы Робертыс местын, кыдз вермис котöртiс да сувтöтiс машинасö, сiйöн гортö кыскис лесниксö, но сiя эз тэрмась, сулалöв-керис соседыс дынын, куритiс да дыр мыйись бöра горöтчис:

— Еныс адззис...

— Еныс! — сэтöн Викторыс кыдз саймис, кöть и тыдалiс ни Робертыслö, кыдз сiя уль муыс вылын дрöжитiс-кынмис. — Еныс миянöс кыкнаннымöс адззö!

— А кин эшö? — öзйис лöгыс Робертыслöн. — Еныс миян вылын судья. Сiя менö талун тэ вылö и иньдiс. Вот черпезьдан...

— И мый тэныт содас?! Сöстöм голосöн ни юалiс Викторыс. — Сё эд сэтшöм кöин лоан. Пондан быд местаын сöтны да вартны. Поди, ме кула да пöтан ни... öнджа... Тэ коддес эд уна ни дзугисö бы олансö, но нiйö сё ни мылякö öмлöсалöны.

— Хи-хи, — серöмтчис Робертыс. — Но тэ, Виктор, и сука! Гробйын ни куйлан, а сё ассит гардан. Кытчö кöстан?! Думайтан мöдöр югытас кинкö миянöс и ошкас? Мымда татöн бур олансö адззылам, сымда и пешлам... Ме бы тэ местын сёйи да юи, кытчöдз ловья, а тэ ачыт он сёй и йöзыслö он сет. Менö медодз врагöн лыддян, а ме бы тэныт врагнас эг вöв, ежели бы думайтны, а? Мый ме тэныт сэтшöмсö кери, тьфу! А? Топ ме не тэ кодь морт сёйись. Некинöс тэ моз ог пур, ог курччав.

Тракторлöн пемытiнас шыыс кылiс сё ылынжык и ылынжык. Вöрын пондiс лязны сьöкыт чувство, топ некöдныслö ни эз туй вöрзьыны местасиныс, кытчöдз öтамöдныслö оз висьталö, мый тöдiсö и висьталiсö бы öтамöдныслö одзжык.

Баитiс Робертыс, сыбöрын сьöкыта ловзисис Викторыс: — Эх, сосед!.. Нем тэ, тыдалö, он вежöрт. Висьтав: кытöн жö тэ чужин да быдмин?

— Ме?! — кыдз биа шоммез вылö тальччис Робертыс. — Не Америкаын жö, сусед! Вежöртiн?! И пусö ме вылö эн пöрöт — асьтö лязан!

— Сiйöн сiдз и керан? — кыдз нерис Викторыс, кыскис ас вылас.

— Мый кера?! Этö кера, что котомасö кыска... Ог гусяв и тэ вöрас он быдты, вежöртiн?! Вöрас не тэ хозяиныс!

«Тальччы, Роберт, юрыс вылö, тальччы! Мый тэ сылiсь кывзан да видзöтан?! Тальччы и мун, некин оз понды тöдны: видзöт жö зэрö — следдэтö миськалас...» — кинкö шушкис лöга пель одзас вöралiсьыслö, но сiя коксö лэбтыны эз вермы, мед и тальччис бы соседыс юр вылö — вийис и мунiс — кошшы, кин татöн ойнас вöлi.

А мыля? Ачыс оз висьтав, но Викторыс тöдö, что соседыс сылöн смев только вöрас, кöр сы вылö хозяиныс оз адззись, а кöр адззисяс, юрсö конувтас сюйыштас и пондас овны — не шы, не тöв, или гусьöн кöин моз пондас вартны-сöтны, мед некин эз адззыв.

— Эм хозяиныс вöрас! — чорыта висьталiс Викторыс соседыслö, пыдына лолалiс-шоччисьыштiс да содтiс. — Эм вöрас хозяиныс, Роберт!

— Тöда ме тiян кодь хозяиннэсö...

— Кöть мый, сосед, но ежели лоа ловья... Тiян кодь кöиннэсö вöрсис кидта, вот адззылан! — баитiс одзлань лесникыс.

— Ага, — серöмтчис Робертыс. — Кидтiссис тэнат...

— Кидта... — ыкöстiс бы лесникыс, но голосыс сибдiс.

— Но сэк черпезьды! — Робертыс чеччöвтiс местасис, перыта спинаыс сайö кышалiс пишальсö. — Мед тэ сэтöн чорзян! Мед, жаба, черпезьдан, ме и иньытлö ог висьтав, кыдз кулан.

Кивзытöн Викторыс бергöтчис мöд бокыс вылö.

Вöрас пондiс китшсьыны катша, топ кайыс пемытiнас адззис и кылiс морттэслiсь баснисö.

Бöра кытiськö тöлыс вайöтiс кымöррез да пондiс коявны зэрöн. Зэрис поснита, шушкис вöрас, миськалiс следдэз, öнi некин бы эз ни адззыв, мый кыкыс керисö.

Робертыс чеччöвтiс туйлань. Коккес увтын шлёчкöтiс нять. Викторлö пемытiнас тыдалiс сылöн спинаыс — вуджöр, топ дынсис мунiс не соседыс, а бöра адззылiс вöт.

Дзирс пемыт. Викторлö вдруг лоис кокнит. Поди, сiйöн, что соседыслö висьталiс медбöрья кыв, кöдö пыр бы висьталiс сьöлöмсянь, но сё вöлi некöр, эз инмö этадз, а талун судьбаыс иньдiс...

Ашын кöть мый ни. Ашын, поди, кинкö инмас лесникыс вылö, инмасö и дзебасö, а, поди, сiя вермас и кыссьыны гортöдз.

Викторыс бергöтчис кынöмыс вылö, шоччöтiс сьöлöмсö, кöда сiдз ни мыдзис, что и дышыс ни петiс лолавны, но кытчöдз эшö лолалiс. Лесникыс лöсьöтчис эшö сьöкытжык час кежö.

Видзчисьтöг сiйö повзьöтiс голос:

— Ловья эшö?!

— Мый меным лоас? — шуис лесникыс, кöр кылiс дынсис соседыслiсь голоссö, кöда колис ни сiйö, нö, тыдалö, эшö мыйкö вунöтöм — бертiс бöр и бергалiс юрыс дынын.

Викторыс эз ни бы баит — выныс эз тырмы и горшсö желлялiс зубыт, сылöн эд быдöс ни телоыс, кыдз чирей, висьö и оз вежöрт, кыт висьö медöддьöн.

Робертыс сэсся шы эз сет, ружтiс да пишкис, гуддисис соседыс дынын. Чожа сiя Викторыс ныр дынö чапкис кöс уввез и öзтiс биок.

Уна я кадыс? Поди, рыт, а поди, и ойшöр, Викторыс оз тöд. Сiя öнi видзöтö биокыс вылö и рад сылö, что шоналö нырыс.

Чожа сотчö учöт биыс. Лесникыс юр весьтын ружтö Робертыс. Мый сiя керö, Викторыс оз адззы, видзöтö биыс вылö и думайтö, что соседыскöт эз бы ков пантасьны талун, но пантасисö и эшö колас эд пантасьны: некытчö он вештiсь, кöр сэтшöм олан. Но лоас я кык сосед коласын бур оланыс — этö колö юавны Робертыслiсь.