Невунöтан луннэз



1

Кыдзкö асывнас айö горöтчис мамöлö:

— Бригадирыс турунавнытö Вадорö иньдö.

— Вадорö? — гажöн горöтчи ме.

— Мый тэныт Вадорыс? — юалiс мамö. — Учöт, том эшö.

Мымда эшö колö овны, медбы шедны Вадорись видззез вылö? Кытчöдз тош оз быдмы и он понды кыскасьны Öльöксан дед моз бедь вылö нырыштсьöмöн?

Но айö менö лыддис мужикöн ни. Сiя юалiс:

— Кытшöмö литовкасö босьтан?

Литовка! Литовкаыс менам эм, вартлан да лопатитан — кыдз бритва лоö, ачыс ытшкö турунсö. Ме эд гожумбыт ни уджалi: тулыссяняс вочим йöррез, а кыдз быдмис видззез вылын туруныс, петiм ытшкисьны. Пöрисьжыккез сьöрись ог кольччы, уджала одз асывсянь сёр рытöдз. Некин оз корит, что ме эшö не уджалiсь, проктöм морт.

Öтпыр кылi, кыдз айö ошшасис Öльöксан дедлö:

— Зонö ассис юрсö вердö ни, мужик ни зонö.

— Нем умöльсö он шу, уджалöны челядьыс, — ошкис старик.

Öнiменö айö нуöтö Вадорö, Коса дорись видззез вылö, кытöн ме эшö некöр эг вöвлы, но кöдна йылiсь уна ни кывлi. Медодз, Вадорас пондам овны öтнаным, кыдз цыганнэз. Некин миян вылын оз ло ыджытыс — асьным хозяиннэс, мый колö сiйö и пондам керны. Нельки мамö оз понды пуны шыдсö.

Сэтчин ваыс-юыс сэтшöм паськыт, что öтiк юок миян гортын сэтшöмыс абу. А ваас чериыс мымда! Щукаэс — метрася кузьжыкöсь; ёкышшес — нянь зыр пасьтаöсь; тыэзас уткаэс — дозмöр ыждаöсь, а вöрас сыспуэс сымда, что быдöс вöрыс топ садитöм сыспунас и быдыс вылын голиэс баран юр гырисяöсь. Мыйыс только и абу Вадорас, ежели веритны сiя жö Öльöксан дедлö. Только одзöв пöрисьмис Öльöксан, а то бы мунiс томмескöт видззес вылö, мыччалiс бы, кыдз колö уджавнытö, черисö бы кыйис, зородсö тэчис.

Но пöрисьмис морт. Видззез вылö ми мунiм сытöг. Ылiсь урочищеö мунiм — Вадорö.

2

Мийö одиннадцатьöн. Бригадирыс иньдöм татчö отирсö дасö, но öтiк мортыс содiс бригадиртöг — этö Ванька. Сiя мöйму пышшис школаись: колiс велöтчыны сизимöт классын, а зонка пондiс уджавны колхозын, нянь шедтiс. Войнаыс только чулалiс, и няньыс вöлiдона.

Учöтик мыгöрнас Ванькаыс. Коккес дженытикöсь, чукыляöсь, но ачыс топыт, ён, уджавтöн некин сьöрись оз кольччы.

— Эй, Ванька, мыля тэ гортiсь пышшин? Мый бригадирыс висьталас? — юасьö Костя дядь, миян старшöйным.

— Мый меным бригадирыс? Ась ачыс гортын ытшкисьö. Ме эд Вадорас кужа жö уджавнытö, отирысся, поди, не умöльжык, — баитö зонкаыс. — Охота, кытöн сьöкытжык.

Ми быдöнным радöсь, что лоис миянкöт öтiк уджалiсьöн унажык. Быд киыс ылiсь видззес вылын не куран тув, кöда чегас дак вильö лöсалан. Мунiм джын лунся унажык, видззез вылö локтiм рытланяс, юским вöввез, телега бердiсь пöрччалiм котомаэз, кутчисим керны аслыным керку — шалаш.

Уджыс пизис. Кин кералiс кöзоккез, а кин вевттис крышасö. И чожа керкуыс сулалiс ни — не зэрыс оз вачкы, не номмес оз пырö. И пондам узьлыны öтiк крыша увтын. Шоныт постелляыс местö лоас небыт, чöскыт дука турун, шебрасыс — гожумся воздух.

Кöр шалаш вöлiготов, пуксим да ужнайтiм, лэдзим баддез коласö вöввез. Луныс чулалiс. Колiс водны узьны. Пырим шалашаным и вдруг сы пытшкын лоис дзескыт. Колiс кинлöкö янсöтчыны — керны аслыс виль керку. Ванька висьталiс:

— Ме некытчö ог мун.

А Гриша дядь кашыкасис, ружтiс, но нем эз висьтав, топ пеллесö нитшöн тупкалiс. Надька сiдз чирзiс, топ сiйö кузь чикиссезöттяс ош кыскис. Модис и Володька. Мый тэ сэтöн керан? Сэк айö чувйыштiс меным бокам, шуис гусьöн:

— Петам.

Ми петiм öтöрö, босьтiм черрез и некой пору керимö виль шалаш. Сэтшöм бур шогмис, что сьöд сина Надька сiдз юрсö и сюйыштiс эта керкуö, горöтчис:

— Вот эд кытöн оланыс лоас.

— Невеста вылö вöзйисян? — серöмтчис айö. Нывка гöрдöтiс да вешшис шалашыс дынiсь.

3

Мийö немымда эг вöлö мыдзöсь. Мыдзан разь, кöр тэ телега вылын ыскöвтiн куимдас километра мымда. Тэ мыдзан разь, кöр тэныт годдэт шестнадцать, кöр вирыт ключöн пизьö.

Колiс миянлö бы водны да шоччисьны ужин бöрсянь, а Ванька котöртiс берег дорас и чеччöвтiс ваас, усис сэтчö, дзик ыджыт кер. Ваыс плеснитчис, кайисö сьöкыт ваввез, повзьöмöн чирнитiсö кайес-витулиэз. Ванькаыс тульгисис ваас и öшис син одзись, кыдз сьöкыт из. Вöлiда эз вöв зонкаыс, öшис — минута абу, мöдiк минута.

— Вöйис я мый я? — повзьöмöн горöтiс Костя дядь. Сэтчö васис мыччисьыштiс Ванькалöн чочком юрсиыс. Пöдöмöн зонкаыс ыкöстiс:

— Кутö! Вöя! — и вились сунгисис ваас.

Не адззывны бы Ванькалö сэсся олансö, да Костя дядь берег дорсяняс нюжöтiс сылö кузь бедь. Кыским вöйисьсö.

Некин эз вид Ванькасö. Быдöнным, кыдз шогалiссез, шы сеттöг кыссим шалашшезным дынö.

Луныс чулалiс. Шондiöшалiс ни кытöнкö берег саяс, кöззэз коласын. Ва вевдöрас лажмыта лэбалiсö чикиссез, лёкжыка курччасисö номмес.

Ванькаыс купайтчöм бöрын колiс бы водны узьны, а Костя дядь вдруг босьтiс литовка да чорыта висьталiс:

— Госныт пизьö! Локтö уджалыштам.

Кинлö охота уджавны ойнас, кöр он петö и номмес сёйöны? Но пöриссес шы сеттöг босьтiсö литовкаэзнысö и пондiсö ытшкыны турунсö шалашшез бердсянь. Мийö, томмес, гажтöма видзöтыштiм öтамöд вылö, но нем эг шуö, пондöтiм покоссэсö пöриссес бöрсянь. Валька мыйкö пильснитiс ныр увтас, но Костя дядь öмалiс сiйö:

— Эн пöт ванас — верман ойбыт купайтчыны!

И пондiсö сьывны кок увтын литовкаэс, кыдз горалiсö тöдтöм каёккез. Туруныс бöрсяняным куйлiс лёдззезöн.

Важын ни шондiыс пуксис юыс сайö, важын ни юыс весьтын уялiс кизерик туман. Ляч вамисö ньылöмсянь йöрнöссэзным. Охота вöлiчапкыны вылiсь паськöмсö, но номмес да гебыс сiдз петшöралiсö, что кышалiн бы вылат пась.

Шутнялiсö литовкаэс.

Турун вылас усис кыз лысва. Небзис туруныс. Лэчамисö литовкаэс. Ю мöдöрас, вöр кералан посёлокын, кылiс джынняннэзлöн шы, сэтчин баксiсö мöссэз, вувтiсö поннэз.

Кöр пондöтiм виль покос, Ванька негорöн шуис:

— Узя бы...

— Узян бы? — шыасис паныт Костя дядь. — Тэ мый, Ванька, узьны локтiн татчö?

Мыйкö модьыштiс Надька, жевгыштiс сылöн соседка Любка, но некин покоссис эз пет и эз чапкы литовкасö. Ме лöсьöтчи ни уджавны ойбыт, узьтöг, шоччисьтöг, но сэтöн айö горöтчис:

— Константин Иванович, талун огö я мый я шоччисьö?

— Шоччисям! — гажöн горöтчис Костя дядь, чапкис литовкасö бадь куст вылö, кыскис кармансис кисет да гижöт и пондiс гардны чунь кыза чигарка.

Сiя куритiс самосад, чигаркатöг эз вермы чулöтны öтiк час. Кöр ытшкисис, сэк и бöрсяняс уялiс табак тшыныс да сэтшöм чорыт аскоддя дука, что, кажитчис, номмес эта тшынсянь несйисö.

4

Сёйыштiм нянь торöн и пырим шалашшезö. Заргисисö öтлаö уджалiссес, кивзыштiсö-никсыштiсö кычаноккез моз томмес и лöнисö. Только кылiс, кыдз эшö ружтiс да бергалiс бокись бок вылö Костя дядь, несйис да кашляйтiс. Костя дядь пöдö. Сiйöн сiя и куритö ассис табаксö, топ табакыс отсалö лолавнытö.

Ме чожа онмöсси кыз онöн, нем эг вöтась. Саймöтiс Ванька:

— Чеччы! Тырмас нюжласьнытö.

Синнэзöс осьтыштi, но нiя пöднассисö бöр, бытьтö синлыссэзöс лякис клей, оныс нырыштiс сьöкыт изöн, пельпоннэз вылын öшалiс шогöт. Узи бы, да Ванькаыс оз сет.

Вöлiюгыт ни. Ыркыт асыв чужтiс виль лун. Уль туман öшалiс видззез весьтын и баддес коласын. Пöриссес вартлöмась ни литовкаэз. Меным вартлöма айö. Эг кыв литовка вартлöмсö.

Мисси кыз лысванас: вада турун бердас ки долоннезöс и нирта чужöмбанöс. Лысваыс и вашöтiс онöс.

Пондöтчим ытшкисьны. Кыдз и рытнас, турун коласын ысласисö да сьылiсö литовкаэз. Герскис баддес коласын кай, тыокын шыасис утка, мöдöр берегас, посёлокын, гургис трактор. Мийö ытшкисим, öтiк покос бöрсянь нуöтiм мöдiк покос. Сувтчышалiм только лопатитны литовкаэз.

Ытшкисим и эг казялö, кöр спина саяным мыччисис шондi, югйöвтiс лысва воттезöн. Öшисö номмес да геббес. Костя дядь сувтчыштiс покос шöрас, веськöтiс спинасö, чышкис йöрнöс соснас кымöс вывсис ньылöмсö, видзöтiс, кыдз ми уджалам, горöтчис:

— Мужиккез, натьтö эд колас пусьыны...

― Вердны бы колö том отирсö, — шынньöвтiс айö. — А то нiя тшыгувьяныс уджаласö-керасö да кок вывсиныс пöрасö...

— Кин миян медчожыс? — юалiс звеньевöй Костя и висьталiс Любкалö: — Любка-голубка, басöк чужöмок, боёк киок, мун жö пу кашасö да верд миянöс.

— Ме?! — повзис Любкаыс. — Меным гортын мамö пусьö, а татöн...

— Тэ, Любка, велöтчы пусьынытö, а то жöниккет пондасö орддьыны.

— Абу менам жöниккес! — китшсьыштiс Любкаыс.

— Бöбöтан, Любка. А талун кин бокын шалашас узин? Мылякö ме бокö эн вод, Ванькаыс бокын шонтiсин.

— Костя дядь! — горöтiс нывкаыс, чапкис кисис литовкасö да боёка котöртiс шалаш дынö.

— Вот тэныт лекарствоыс кытöн вöлöма! — сералiс Любка вылын Костя. — Татöн миян не социализм, а коммунизм! Дыш отирсö ог любитö.

Косьмис турун вылiсь лысва. Сьöкытжыка ни босьтö литовкаыс, топ дрöжитöны киэз. Но сёйны да шоччисьны эшö одз. Кöр эшö дыш Любкаыс пусяс? Эшö усяс ытшкыны не öтiк покос.

Эта коста Любкаыс шалаш дынсяняс ыксiс:

— Котöртö сёйны!

— А мыйöн вердан? — юалiс Ванька, кöдалöн голосыс кижгö, но, кöр дундöтчас да ыкöстас быд вынсис, кыдз пороз бакöстас: — Поди, лягушаэз пуин! Хе-хе!

Любитö сералыштны Ванькаыс не только Любка вылын, но ми сiдзжö прокмам кеслыны кыввезнымöс öтамöд вылын, дзик некин абу мыдзöм сьöкыт уджсяняс, топ некинлöн оз симав кынöмыс.

Любка пуöма анькытшись похлёбка. Похлёбкаас сiя пань йылöн чапкö ви тор, солалö и ми вырскам-панялам пым сёянсö, кöда талун светас медчöскыт.

Сёйöм бöрсянь зоночкаэс пондывлiсö орсны нывкаэскöт. Том отирыс вылын Костя дядь сералiс:

— Етша ытшкисит. Ужо, шоччисьыштам и ме тiянöс понда тшыгйöн уджöтны ойшöрöдз.

Сiя ачыс рад бы, тыдалö, вöлiорсыштны томмескöт, да оз туй: кашляйтö-пöдö, да и оськавтöн биргылясьö: öт кокыс дженытжык, мöдыс кузьжык — война вылын коксö враччес вурöмась да вочöмась, кыдз важ нинкöмöс, а вильсö он эд кый.

Гардiме зелёной тшакыльö турун, шупки Надькалö, нывкаыс мышкыртчис бы босьтны мячсö да сэтчö и нюжалiс: онмöссис, бытьтö кулiс местаас.

— Вот тэныт, Надька, лекарствоыс! — сералiс Костя. Но ме этö баснисö кылi, кыдз вöтöн ни.

Кöр да кытшöм минутаö пöрöтiс оныс кок йывсиным?

Зубыта пельöс курччöвтiс ном. Саймыштi, осьтыштiсиннэзöс, видзöта: узьöны быдöнныс, кыскы нюрö коккезöттяныс — оз и саймö. Узимö бы рытöдз, но Костя дядь быд горшсис, кыдз старшина казармаын, ыкöстiс:

— Чеччö! Колö уджавны.

Ми, кыдз мороз вылын кынмöм гаггез, пондiм дыша веклясьны шондiгаж вылас, тiльны синнэзнымöс да сувтны коккез вылö. Дыша босьтiм литовкаэз, пондiм лопатитчыны.

Вились бритiм-ытшким видзсö. Ытшкисьнытö часöт унаись сьöкытжык: шондiыс пöжалö спинаэз, кöс воздухыс дзикталö морос, ньылöмыс шорöн котöртö кымöс вылiсь.

Нывкаэс ведраöн котрасьöны ю дорас, ваялöны шоныт васö. Миссям рожабаннэз да юам пöттöдз. Кыным уна юам, сыным ёнжыка пымалам да öддьöнжык косьмö горш.

Уджалiм сёр рытöдз. Ытшкисим и сэк, кöр пуксис шондiыс.

5

Вот сiдз и олiм Вадорас. Чеччим и водiм шондiтöг, узим сымдаöн, мымда колiс узьны Костя дядь сьöртi, медбы ештыны ытшкисьны и куртны, дзимлявны турунсö зороддэзö.

Квать лун ытшкисим. Эна жö квать лунöн сувтöтiм кык ыджыт зород да сэтшöмö, что туруныс зелёной чай чöскыт дука. Кыдз пондан мунны зородыс бокöт, юр бергалö. Тöвнас подаыс пондас сёйны этö турунсö пряник туйö.

Костя дядь куритiс да шыннялыштлiс, сказкаэз висьталiс. Тэрмöтiс уджавнытö. Мийö и сiдз эг дышöтчö: чöвтам вывсиным йöрнöссэзнымöс и пöжалö кучикнымöс шондiыс, кыдз порсьпияннэзлiсь гор би одзын. Вачкисям ни сьöд цыганнэз вылö.

Кыным унажык уджалам, сыным етшажык мыдзам. Пуксям шоччисьны, нывкаэс песняэз сьылöны, зонкаэс вугыррезöн ва дынö котöртöны. То вуграсьöны, то тульöтчöны-бöбалöны.

Купайтöны бы нывкаэс зонкаэсö, но аслыныслö шедö: петö ваись Надька, кыдз русалка, паськöм вывсис ваыс шорöн котöртö, юрсиыс лякасьöм пельпоннэс бердö.

Юас ваыс шоныт, гудыра, кыдз кунва. А кöркö, кыдз мужиккес висьтасьöны, Косаас ваыс вачкисьöм синва вылö, сэтшöм сiя вöлöма сöстöм. Öнiва кузяс кылöтöны вöр да чапкöны юас быдкодь ёг.

Орсам ми гудыра ваас, а звеньевöй Костя чирзö:

— Бöра ни госныт сылö? Ноко босьтö кураннэсö!

— Но и мо-о-рт! — никсö Любка. — Не морт, а чёрт.

― Мый тэ, Любка, баитан? — пель одзас пуктö кисö Костя.

― Туриэз, мыся, лэбзисö! — гажöн сералö Любка.

— Уджалö, челядь, уджалö. Аслыным уджалам. Некин миян дынö йöзыс оз лок да уджсö оз кер.

Рытнас, водтöнняным, ныр увтас Ванька горöтчис:

— Кöть бы зэрми я мый я!..

— Мый, мый?! — лöга юалiс Костя дядь.

— Мыся, юрö висьö! — горöтчис зонкаыс.

— Вот шатьсö босьта да веськöта юртö, — кöсйисис начальник.

Но не лёка, не ласковöя, а жалейтöмöн.

6

Ашынас ытшким баддез сайись видз — медумöль места, кытöн кöчкаэс öтамöдныс коласö пелитчöмась, кытöн и туруныс турун вылö оз вачкись: шочыник осока да зутурун. Кытшöм ни лэчытöсь литовкаэс, кыдз ни бура лопатитан, а чеччöвтö сiя туруныс бердiсь, дзик проволока ытшкан.

Киэз мыдзöны эта уджын и спина лоö, кыдз пуовöй — оз бы кöстась. Сiдз бы и сьöвзин эта видз вылö да мунiн шоччисьны бадь сайö, но пöриссес, топ оз кылö литовкаэс увтiсь чорыт турунсö, ытшкисьöны.

— Костя дядь, а Костя дядь... Тöдан жö мый?.. — пондöтö Ванька.

— Нем ме ог тöд, — мурзьö звеньевöйным.

— Вузалiн бы тэ этö видзсö... Литра вылö. Леспромхозовскöйес босьтасö.

Костя дядь кокасис кöчкаэс гöгöр, ружтыштiс, веськöтiс спинасö, гардiс пев кыза чигарка, öзтiс да пондiс куритны — думайтны Ванька кыввез вылын. Ванькаыс видзчисьö, мый висьталас сiя. Костя висьталiс:

— Кöр тэ лоан ме местаын, сэк и вузав колхозыслiсь видззесö, а меным овны эшö колö...

Лöгöн да чорыта висьталiс Костя дядьыс. Одзлань эн модь, мый оз ков. Рам сiя, но кöр унаись пондан поперегавны туйсö, висьталас сiдз, что гажа луныс лоас кымöра.

Чорыт старшöйным и киэс вынаöсь, кыдз мый не сы сьöртi, öзтас чигаркасö да пондас öвтны литовканас, топ орсö чачаöн, уджалö и бöрас оз видзöт.

— Но тэ и Костя дядь! — дивуйтчö Любка. — Мый вылö да кытчö тэрмасян, кин сьöрö вöтчан? Сибдас вот лолыт моросат и пöдан!

Шуткаöн баитö нывкаыс, но бригадирыс оз кыв этö баснисö. Не орсны эд локтiм умöль видз вылас, а ытшкисьны.

— Жаднöй. Гумлав да кый унажык!.. Уна колö, — баитö Ванька Костя йылiсь.

— Иван, дугды, — висьталö Ванькалö айö.

— Не я мый я сiдз? — дорйö асьсö зонкаыс.

Быдöн эд тöдö, что Костя дядьлöн челядьыс абу. Олöны иньыскöт кыкöн да эшö эм нылöн пон — Мишка. Кузь гöна поныс, ош вылö вачкисьö. Эм эшö мöсок, учöтик да умöлик, поныс кодь жö кузь гöна, куканёк вылö вачкисьö. Вот отирыс и дивуйтчöны, мый понда свет вылас Костя дядьыс олö да сiдз пессьö-уджалö.

— Шедты, шедты унажык, — сералö сы вылын Любка. — Мый шедтан, сiйö и сьöрат босьтан.

Костя дядьыс кылö умöля. Сувтчыштiс, чышкис йöрнöс соснас кымöссö, юалiс:

— А? Мый тэ, Любка, баитан?

— Мыся, эн тэрмась. Кольччис эд öтiк видзок, кыдзкö ытшкам.

— Тэ, Любка, öнджа... Каджыт тэнат шыгыра, да юрыт гудыра. Тэ бöра небосис туриэсö кошшан? Ми тэкöт не ас пондасиным ытшкисям. Кöр пондам ас пондасиным ытшкисьны, вермам и шондiвылас шоччисьны. А серавны колхознöй уджыс вылын нем!

Висьталiс Костя дядьыс — öмалiс Любкасö. Но сылö не унажык, не етшажык он содты. Сэтшöм уж нывка — невна дышöв.

Пиньгисьöны Любкаыс да Ванькаыс Костякöт, а весь. Ми дзик öтiк семья. Чукыля кока Ванькаыс, кузь да сьöд чикися Надькаыс, и мукöддэс, пöриссес и томмес — öтiк коллектив.

Кытшöм бы эз вöв сьöкыт уджыс, но уджалам, ог горзö, а сьылам песняэз, сералам öтамöдным вылын, кöр кинкö керас мыйкö не сiдз. И эта видзыс медбöрья. Эта видз бöрсянь миян ытшкыны нем ни. Вермам я ытшкынытö рытöдззас — вот кытöн думаыс.

— Костя дядь, тöдан жö мый, Костя дядь. — Баитö

Ванька. — Ежели луннас этö видзсö ог вермö ытшкынытö, пондам ойбыт ытшкисьны?

— Ме ог тöд, мый тiпондат керны, — висьталö пöрись морт.

— А тэ мый пондан керны?

— Ме, поди, пöра кöчкаэс коласö да сэтчö и лолö петас.

— Мый сэтшöмыс лоис?

— Олан ме годдэзöдз, пондан тöдны...

Уджалам недыр, пуксям шоччисьны, Костя норасьö:

— Челядь, погоддяыс тшыкас.

— Но тэ, Костя дядь, кыдз катша. Чиганнэс дынö я мый я ветлiн? — сералö Любка.

— Ветлi, Любка. Фашисттэс дынö. Нiя меным погоддясö ворожитiсö. Быд коска умöль погоддяыс одзын висьö.

— А тэ кынымö фашисттэсö вийин? — вдруг юалiс Васька.

— Öтiкö. Тэ кодьö жö. Сьöдö, кыдз баня чудöс, век чужöмсö абу миссьöтлöма, — сералö бригадирным.

— А быль, кынымö? — юалö Любка.

— Тэ бы юалiн, кыным тури ме вийи, а фашисттэсö ог тöд.

Но сёдаки висьтасис, кыдз сiя ёрттэскöт мунöма атакаö, а фашисттэс — паныт. Оча морос. Сiдз, что кин кинöс! Кин мыйöн кужö да прокмö: кин лыйö, кин штыкнас бытшкö, кин кулакнас вачкö, кин пиннезнас джагöтö, топ тышкасьöны не отир, а лёк зверрез. Костя дядьыс падмöм вийöм морт вылö да усьöм. Дзир-бар керис ас гöгöрас, а ловьяыс некин ни абу. Тарöвтчöм войнаыс, кыдз лёк тöвчик, резöм-паздöм отирсö. Чад, патшкö уль вир дукöн. Видзöтö ас гöгöрсис вийöммесö Костяыс да дивуйтчö: кыдз вермис кольччыны ловйöн? Адззö: мысок сайсянь, кыдз змея синнэзöн, сы вылö видзöтö враг. И врагыс иньдö пистолетсö веськыта кымöсас, синнэс коласö. Воштiсьны некытчö: не муас он пыр, не воздухас он лэбзьы. Овсис оланыт! И оз пондö тöдны, кытшöм местаын гаггес синнэтö писькöтлiсö...

Но смертьыс йылiсь Костя дядьыс абу думайтöма, только тöдвылас усьöма аслас деревняыс да колхознöй вöлыс, кöда вылын гöрис да додьнас ысласис.

Сэтöн и лыйис врагыс. Сотiс шульга кисö, топ кыз шатьöн зубыта вачкис чуннес кузя. Тыдалö, врагыс ачыс полiс смертьсис, ежели сылöн киыс дрöжитiс и пулясö эз вермы иньдыны мортыс кымöсö.

Висьтасис этö шоччисьтöнняс звеньевöй и кунис синнэсö. Может, сiйöн, что мыйкö думайтны пондiс.

Шоччисьыштiм да баитыштiм и уджыс кокнямис. Рытöдззас видзсö быдöс ытшкимö.

А куртнытö эшö мымда! И туруныс куйлö кыз лёдззезöн, чöскыт дука. Косьмис, кажöтö кок увтын, кыдз чарöм. Курт бы öтiк киöн да чукöрт зородас. Уджалiм бы эшö, куртiм додь етш, но лажмыт ласта видзланьсянь да юыс бердсянь жагвыв паськалiс сук чочком туман. Туруныс небзис, вамис.

Полöмöн ва дынас горалiс витулик: уик-уик-уик...

Петшöралiсö-курччалiсö номмес.

Кадыс вöлiсёр ни. Эз ни герскы баддез коласын герскан, только ваас тульскöтiс хищнöй щука.

7

Небоыс сöстöм. Öтiк кымöр тор абу. Жар. Туруныс каж жугалö.

Куртам. Чапким йöрнöссэзнымöс — этадз абужык жар.

— Но и турун. Но и погоддя! — радуйтчö Костя дядь.

Погоддяыс бур и уджыс бура аркмö: кин турунсö тэчö зородö, кин куртö, кин юррез кыскалö — тшын видз весьтас гардчö. Этадз пондам уджавны, кык-куим лун — и туруныс керсяс. Мунам гортö. Ме гажтöмтчи ни гортся олантöг: татöн рытнас клубас он котöрт, гармошканас некин оз орс, не газетаэз абу, не радиоыс оз кыв, лун и ой пеллез одзын бизгöны номмез.

Но некöр бы и газетаэсö лыддьöтны, некöр и кымöс вылiсь ньылöмсö чышкыштны. Айöлöн да Костя дядьлöн, натьтö, йöрнöссэзныс оз косьмывлö. Бур, что йöрнöссэс вурöмась аскыйöм дöраись, крепытöсь: тöн айö пондiс вожмöвтны зород дынсис остожьясö, кышасис майöг йылас йöрнöс подувнас, онняюртчис и веклясис гаг моз, кытчöдз ме эг мездöт майöг йывсис. Тэрмасям ми уджавнытö. Мыдзам. И вдруг Ванька менчим юалö:

— Илья, а мыйлö тэ мырсян-пессян эстöн миянкöт? Тэ эд миян моз он понды мозолитны киэтö колхозас. Велöтчан и лоан начальникöн.

— Кытшöм ме начальник? Мыля — начальник? — öши ме ёртö одзын.

— Разь он ло начальникнас? Весь разь дас годсö велöтчан? Не миян моз: нёль класс да коридор, — обидаöн баитö зонкаыс.

— Сiдз, Ванька, — баитö Любка. — Конечно, Ильяыс миян моз оз понды мырсьыны. Öтiк бекöрсис панясьны оз понды и невестасö рочö адззас, не дöраовöй дубасаö, а небыт йöрнöсаö.

Ме нач ни öши Любкаыс баснисянь. Гöрдöтi, кыдз нывка, нем ог письты висьтавны. Юрö оз пыр, что лоас оланыс мöдiк, сэтшöм, кытшöмö баитöны ёрттэзö. Мыйöн ме не ёрттэзö кодь, кöр öтiк удж кера, öтiк дозiсь юа, öтiк бекöрись сёя, öтiк постеля вылын узьла? И на тэныт — начальник! Топ ме ёрттэзöся мыйöнкö кодяжык да вынажык, топ нырöс вевдöрö видза, мусö кок увтсим ог адззы.

И кин сiя сэтшöм начальникыс? Колхозсиным предыс али районiсь уполномоченнöй, кöднiя гожумбыт, не öтiк дак мöдiк, гардчöны миян деревняын, отсасьöны кыввезнаныс гöрнытö и кöдзнытö, туруныс нытöг оз керсьы. Поди, ме уполномоченнöйöн понда гортын уджавны? Висьталас Ванька пожум вылiсь турисö...

— Вот уж начальник лоа! — польдöтыштiморосöс, лэбтыштiнырöс вевдöрö. Ас вылын серала, гажöта ёрттэзöс, а нiя оз сералö. Кыдз бы ме ёрттэзö одзын эг бергав, нiя тöдöны, что ме велöтча. И ны сьöртiпетö, что лоа грамотнöйжык, лоа начальник, ог понды этадз сьöкыта уджавны.

А кинöн ме лоа? Ог тöд. Ме эшö эта йылiсь эг думайт. Меным öнiгажа, бур, ме асланым отир коласын. Меным кодяжык оланыс оз и ков, вöлiсö бы эна ёрттэзö.

Юрам пырöны думаэз, кильöтчöны. Кыскала турунъюрресö видз вывсис зород дынöдз и думайта ёрттэзö йылiсь, ола не талуння олансö, а сiйö, кöда лоас одзаным.

И вот Ванькаыс — не Ванька, а Иван Фёдорович — ыджыт морт, кöда олö аслас оланöн, кöмалöма не нинкöммез, а сюйöм коккезас сапоггез, юр вылас кучиковöй фуражка, вылас сера костюм, быдтöма учöтик тошок и оз ни кураннас курав турунсö, а пукалö машинаын, небыт кабинаын да веськöтлö машинасö видз вылас, ачыс гордöя шыннялö.

Ме эшö ог тöд, кöр пуксяс Ванькаыс машинаас, кöр эшö кокнита машинанас керсяс туруныс видз вывсис, но ме тöда, что машинаэс лоасö.

Видзöт жö, Ванька, да думайт, кытчö миян оланыс шагнялö! Мый миян оланын вöлiмедодзза война бöрся годдэзас?

Эшö тöн эд няньыс туйö турун сёйимö, а талун миян няньыс кытшöм ни! Колхозас мусö пондiсö ни гöрны тракторрез!

Сiдзкö, Ванька, тэ менö эн кöрит начальникнас. Мый ме кера, что тэнчит война вылас вийисö айтö и ковсис тэныт школасö чапкыны, медбы отсасьны мамытлö?

Мый ме, ёрт, кера, кöр тэнат ыджытжык воныт абу, а менам эм? Менам вонö эд тожö тышкасис врагыскöт, бертiс война вывсис ранитöм-калечитöм, öнiуджалö районын и кыскö менö сьöрас, отсалö велöтчыны.

Тiян одзын, Любка, Надька, Анютка, ме абу виноват, что тiян айезныт абу, и тiод вермö эшö велöтчыны ме мымдасö.

Сiдз ме сёрнитiдумаэзнам ёрттэзöкöт, кöр кыскалiтурунъюрресö. Думаэзö олiсö одзза кадын. А öнiкерам ассиным уджсö. Зородыс быдмö, видзыс волькалö.

— Долггезын не деньга, юррезын не турун! Тэрмасьыштö, челядь, — баитöны пöрисьжыккес.

Ми и сiдз тэрмасям. Зородыс быдмö син одзын. Пуксим минута-мöд кежö шоччисьны, Любка пондылiс вермасьны Костя дядькöт, но сэтöн сiя горöтчис:

— Челядь, тiнем од кылö? Менам глухöй пеллезö топ гымалöм кылöны.

— Вöтасян, — сералö Любка.

— Ме тэныт вот вöтася! Вот босьта шатьсö да волькöта каджтö...

И вдруг вöр саяс чаркнитiс, топ пушкаись лыйисö. Кöз йыввез сайсянь мыччис нырсö клин вылö вачкисяна гудыра лöз да кыз кымöр. Сэк жö кокнямис да ыркамис воздухыс, повзьöмöн пондiсö чирзыны ва весьтас чикиссез.

Ме эг ешты кыскыны зород дынас и кык турунъюр, кыдз чужöмам павкисö гырись ва воттез. Зэрмис, кыдз койыштiс ведра понiсь. Чирзöмöн нывкаэс котöртiсö лапья кöз увтö.

Биргылясис кöз увтö Костя дядь, эз вермы котöртны миян моз, зэрыс сiдз миськалiс начальникнымöс, нельки кöс сунис вылас эз кольччы.

— Куртсис, — гажтöма горöтчис сiя.

— Нем он кер. Сякöйыс овлö, — шуис айö.

― Спасибо челядьыслö, бура уджалiсö. Ештiмö кымöрыслiсь турунсö мырддьыны.

Зэрис недыр, но кисьтiс ведра понiсь да сiдз турунсö вадiс — кöть пидзырт.

― Шоччисьö, челядь! — висьталiс старшöйным да сера котомкасис кыскис мымдакö деньга, нюжöтiс Ванькалö. — Котрась. Ньöбан öм чöскöтанторсö.

― Мый сэтшöмсö? — повзис Любка.

— Гöрд вина пö посёлокас вайöмась. Пешлам невночка. Заробитiм.

8

Вöлiлуншöр кад. Вöр весьтын, асывланяс, öшалiс енöшка — спинаыс басöкся-басöк. Кытöнкö посёлокланяс мурзьышалiс гым кымöр, смевмисö номмез, кöз уввез вылiсь гырись воттезöн вотялiс лысва, гажмисö кайез. Вöлiлöнь, ыркыт да кокнит воздухыс сiдз и гывьялiс морос, бытьтö лекарство. Костя дядь лэчыт черокöн кералiс пес.

— Мый пондам пунытö? — юалiс Любка.

— А лягушаэз эд эмöсь.

Пунытö миян нем ни эз вöв. Черисö, кöдö кыйлiс Костя дядьыс, сёйим эшö асывнас. Поди, кытöнкö содз етш вöлiанькытш пизьыс? Но ме анькытш пизьыслiсь и дуксö ни эг вермы кывзыны.

Айö вдруг пуксис аслас мерин вылö да иньдöтчис ласта видзыс кузя.

— Тэ кытчö, сват? — юалiс айöлiсь звеневод.

— Вöвсö юктала.

— Поди, косьмас горшыс... — кöритiс айöс Костя дядь.

Айö шы эз сет, сё вешшис керöс кырылас. Сiя любитö вöвсö, вердö, кöр пöт, юкталö, кöр горшыс оз косьмы. Умöлик вöлыс вылö оз пуксьы. Сэтшöм вöлыс сэсся районас абу. Не весись жö Уралöн шуöны.

Айö гöнитiс видзыс кузя, саясис крут берег сайö, кытöн видзыс сибалiс кузь да векнит курья дынö. Эта курьяын быдтiсис ыджыт утка, а курья конецас, видз вылас, эм чöвпан кодь гöп, натьтö, керку пасьта лоас. Айö веськыта бузгисис эта гöпö и пондiс ваас Уралсö вашöтлыны одз да бöр. Вöлыс лойис кок увтсис нятьсö да пирскайтiс нырнас.

— Тыдалö, дзугсис олансис, — пондiс серавны айö вылын Любка. — Эшö лун-мöд этадз уджалам и быдöннымöс кыскасö больницаö.

А мый? Разь ылöса мортыс пырас вöвнас ваö да пондас соровтны нятьсö?

— Ага-га, иго-го!— быд горшсиныс сералiсö томмес. А Костя дядь öзтiс чунь кыза чигаркасö да хитрöя видзöтiс айö вылö.

— И мый тэ сэтчинiсь адззин? — юалiс сiя.

Айö шы эз сет. Петкöтiс васис вöвсö, чеччöвтiс сы вылiсь и, кыдз вöлiкöмкöт-паськöмнас, бузгисис ваас. Мышкыртчис, гумыштiс нятьöсь васö содзнас да берег вылö боёка чапкис ки долонь пасьта карасьöс, кöда осьтлiс öмсö, каньпиянок моз кошшис мамыслiсь нянясö. Карась бöрын берегас чеччöвтiс пурт кузя щука. Ми, кыдз бöб отир, уськöтчим ва гöпас айö дынö и пондiм кутавны чериэсö.

Эта вöлiдивуйтчана чериалöм: щука ачыс пырис киэзö.

Учöтик гöпоксис черисö кыскалiмö джын ведра.

— Тэныт бы, Степан, эта юрöн министерствоын пукавны! — висьталiс старшöйным.

— И уджалiс бы, пожалуй, — сералiс Любка.

— А мый?

Миян одзын виноватöя шыннялiс айö, сера дöраовöй йöрнöсока, рыжöй тошока, учöтик мыгöра, но ота пельпона. Коккезас вочöм-сьöкталöм нинкöммез, воннес гезовöйöсь, сэтшöмöсь, что пуд сьöкытаöсь нинкöмсö видзасö.

Сэтшöм айö вывтырнас. И мывкыдыс аслас: кытöн колö, ойсö оз узь да уджсö керас, а кытöн и пелыстöг да пыжтöг ю сайö вуджöтас и васö он адззыв, нянь зыртöг чöвпаннэз пöжалас, емтöг вурас и вочас, и вöвнас черисö кыяс. Нуждаыс быдторсö керны велöтас...

Куталiм ми ведраö черисö, иньдöтчим асланым стан дынö.

Видзöтам, и Ванькаыс чукыля берег сайсянь мыччисис.

9

— Вайö, тыдалö! — гажмис старшöйным. Ванькалöн чуклясисö коккес, сiя сьöкыта лолалiс.

Ньылöмыс гырись воттезöн вотялiс кымöс вывсис, а спина саяс дюттясис польдöм сера кöзича.

Сiя вайис вит буханка нянь, нёль бутылка вина, консерва банкаэз, кöзичаокын сов, истöггез, табак: ов эшö месяц, пöт и код лоан! А уджавнытö кин пондас?

― Шоччисьыштам талун, а ашын менам... — висьталiс Костя.

— Ог эд татöн пондö гожйыны, — шыасис айö. Ведраын костёр весьтын пусис ни чöскыт дука черива.

Костя дядь би бокас ольсалiс чочком пызандöра, шöралiс няньсö, осьтiс кык бутылка. Ружтöмöн кисьтлiс ведрасис котелоккезö черива и öтдруг öдззим панявны пым сёянсö.

— Эд тэрмасьö шербасö торкны, эта тiянлö не турун, васис оз пов, — баитiс Костя да кисьтлiс винасö кружкаэзö. Эз орддьы некинöс. Быдöнлö öтмымдаöн.

— Томöсь эшö ми, — откажитчис юны Любка.

— Но! — чорыта висьталiс старшöйным. — Кыдз уджавны, дак абу томöсь, а эстöн томöсь.

Винаыс кружкаам эз вöв уна, но ме сiйö ньылалi, кыдз калитöм галяэз, кöдна зэлöтiсö-тупкалiсö горшöс, пöдтiсö лов. Петiсö синваэз. Зелляыс сотiс сьöлöм гöпöс, паськалiс кынöм пытшкам, чепöссис жилаэзö, кайис юрам и пондiс орсны син одзам.

А Любка пондiс вдруг куснясьны-серавны, топ сiйö кинкö гöна киöн гильöтiс. Пöриссес вежсисö етша, только айö пондiс кашляйтны, бытьтö виньдiс чериванас, а Костя дядьлöн лöзöтiс нырыс.

Мийö вырским пым черивасö, дзик век вöлiмö тшыгöсь.

— Мый, челядь? Етша эд, — дыр мыйись шуис Костя дядь.

— Кисьтышт эшö, — горöтчис Ванька.

Мийö эшö юим да сёйим. Ме коддзи. Топ оланыс дзугсис, вежсис, гудыртчис. А Любка вдруг кутчис мекöт орсны, сылö охота лоис окасьны и этö сiя висьталiс быдöнлö. Костя дядь решитiс менö гöтравны Любкаыскöт, сiйöн и иньдiпö Ванькасö посёлокö винаысла. Быдöнныс шутитiсö да сералiсö пöттöдз, только меным мылякö лоис гажтöм, вöлiнедолыт, висис юрö, ме лöгаси Любкаыс вылö. Заргиси шалашö, быгыльтчи небыт да чöскыт дука туруныс вылö, но онмöссьыны эг вермы — бергалiс юрö.

Би гöгöрас сё сералiсö, мыйöнкö ошшасисö öтамöдныслö, кинöскö кулитiсö. Вдруг Ванька быд горшсис пондiс ыксыны:

— Кытiсь тiянлö винасö?! Тiэд од тöдö, кытiсь тiянлö винасö вайи.

Зонкалöн сибдiс голосыс, сiя ружтiс да сьöкыта лолалiс, видчис:

— Этö эд бригадирным видзсö вузалiс роч отирыслö да тiянлö винасö юкталiс! Норася ме предыслö...

— Иван, эй Иван! — öлiс Ванькасö Костя дядь. — Тэ тöд жö, мый баитнытö. Абу эд учöт ни.

Ванька вылö топ дзирыт ва койыштiс. Сiя зубыта вачкис моросас, горзан голосöн модис ассис:

— Ме не Иван, ме — баран! Менö туйö сэтчин и татчин бöбöтнытö!

Быдöнныс пондiсö кытчöкö котöртны, кинкö чирзiс:

— Ванька! Сулав, Ванька!

— Вöяс эд! — кылiс повзьöм голос. Бузгисис кинкö ваö.

Ме чеччи да петiшалашсис. Би дынас бытьтö разбойниккез вöлöмась, вашöтöмась отирсö, пöрöтöмась ведрасö, онняюртöмась котелоккез, пöимсорнас гардöмась пызандöрасö, кок увтам шедiс кинлöнкö пань. Кöз увтын сулалiс Урал да дивуйтчöмöн öвтiс юрнас.

Берег дорас чирзiс Любка:

— Ой, вöйис, вöйис Ванькаыс!

Садьми, бытьтö юрам эз и вöвлы винаыс, котöртiда сувтiкрут берег дорас. Ваас уялiс Костя дядь, пирскайтiс нырнас, а шульга киас видзис Ванькаыслiсь рыжöй юрсиэсö. Старшöйным петiс берегас, кыскис сьöрас Ванькаöс, матькыштiс лёка, сьöвзис, иньдöтчис станланяным.

Ми уськöтчим Ванькаыс дынö.

Зонкаыс осьтiс синнэсö, садь голосöн горöтчис:

— Мунö сэтiсь!

Вешшим бокö. Ванькаыс чеччис местасис, вукыштiс да чукыля коккезнас пондiс боёка шагнявны би дынö.

Мийö, öшöмöсь да виноватöйöсь, дыркодь сулалiм берег дорас.

— Но и Ванька! Куимöтпыр куллес кыскасö ни ваас, — горöтчис Любка.

Ойнас узи умöля. Вöлiжар, курччасисö номмес. Чеччи, кöр шондiюгöрыс золотöй сунисöн нюжласис шалаш пытшкас. Вöлiсэтшöм сьöкыт, топ куим ой эг узь. Эг тöд, мый тöння понда висьталасö пöриссес. Может, вашöтасö гортö? Эд уджыс кольччис не вывтiни уна.

— Эй, гвардия, чеччö! — горöтiс вдруг начальникным.

Пишкöмöн да ружтöмöн шалашись кыссисö ёрттэзö.

Чискис-тшынöтiс би, сы весьтын öшалiс ведраын черива.

Чурка вылын пукалiс Костя дядь да куритiс чигарка, кашляйтiс, ружтiс да модис мыйкö ныр увтас, видiс погоддясö.

— Миссьö чожажык да сёйны пондам! — висьталiс Костя дядь.

Вырским черивасö, сёйим тöння небыт нянь, но некин эз баит. Шондiпондiс косьтыны ни турунсö, кутчисим ни куртны, а сё некин эз баит, топ тöн винасорнас быдöнныс ньылыштiсö кыввезнысö.

Павжунöдз тэчим зородсö ёнö да топытö, а павжун гöгöрас тöннямоз жö вöр сайсяняс уськöтчис видзыс весьтö кымöр, койыштiс гырись зэрöн. Кöр зэрыс дугдiс, мийö котöртiм нюрö кошшыны сыспуэз.

Сэсся пондöтчисö луннэз, кöдна орсiсö миянкöт, пешлiсö мывкыднымöс. Эз пет не шоччисьöмыс, не уджыс: только пондöтчам куртны — зэрмас, вешшам туруныс дынiсь — мичамас. Етша ни куртнытö, а гортö он мун, он чапкы уджсö.

Вина юöм йылiсь басниыс эз вöв, и Ванькалiсь купайтчöмсö эг касьтылö. Кыдзкö ме гусьöн юалiайöлiсь:

— Быль я мый я Костя дядь турунсö вузалiс?

— Кытшöм турун?! — лöгасис айö. — Тэ мый? Ванька ёртыт кодь жö?..

Кыдз шондiыс петас, босьтам кураннэз, и котöртам куртны. Погоддяыслiсь гусялам турунсö.

А кöр пондiм сувтöтны медбöрья зородсö, мымда вöлiгажыс! Любка бöра кутчисис мекöт вермасьны, но ме сылö вештiси: тыртiтуруныс коласö да видзи сэтчöдз, кытчöдз сiя эз понды кеймисьны да корны, медбы ме эг быгляв сiйö турун пытшкас. Кöр петiс турунсис, дразнитчис:

— Пантасян тэ меным эшö.

— Пантася, конечно. Гожумыс кузь эшö, — гажöн висьталiме.

Лэбтiм медбöрья зородсö, телегаэзö тэчим литовкаэз, кураннэз, вилаэз и сьывтöн иньдöтчим гортö.

Сьöлöм вылын вöлiгажа, но дзик мыйкö кольччис эта видз вылö, кытчö ме, натьтö, некöр ни ог шед. А шеда, дак лоас не эта ни кадыс.