Демократия йылiсь

Мойд



Вöрын кулiс зверрезлöн царь, кулiс и эз ло, но сы понда некин эз горзы, только öтнас руч пондылiс чышкыны синваэсö да причитайтны: «Мыля тэ и кулi-i-iн да мый миян öнiи лоа-а-с?! Кыдз и пондам овнытö да ой-лунсö джендöтнытö-ö-ö?! Ох-хо-хо!» Горзiс бытьтö ручыс, но сылö некин эз верит, что горзö былись — орсiс эд хитрöйыс, мыччалiс, что жаль кулöмыс, а сiдз то... Думанас гажöтчис да шуис: «Сэтчин тэныт и туй! Важын ни колiс черпезьдыны, кöр миян кодьыслö тэсянь бур оланыс эз вöв».

Кулiс зверрезлöн царь. Вöрын зверрез кольччисö хозяинтöг, но недыр кежö, кöр сiя жö Вöрдядьыс öктiс-чукöртiс быд зверьсö öтлаö, висьталiс, что нылö колö бöрйыны виль царьöс.

— Бат, царьтöг олам, — медодз ручыс жö пондiс баитны. — Кулöм царьным öнджа эд вöлi... Лёк, проклённöй: миян кодьыслiсь öм эз лэдз осьтны, мыйись-мый... Кутлiс да джагöтлiс и абу...

— Ог тöд... — шыасис кöч. — Натьтö, эд царьыстöг умöль жö лоас. Мыйись-мый, нач эд некинлö лоас норасьны.

— Лад оз ло оланас, — кивзыштiс барсук. — Кинлö и мый колö, сiйö и пондас керны, шуам, эта... Кöин коддес.

— Бöра ме! — лöгасис кöиныс. — Мый ме тiянлö пыр умöльсö и кера ни? Эз понды туйны некинöс и гыжöн ни вöрзьöтны, ойезнас уннявны ни эд пондö лэдзны... Сiдз ни вердча отирыс подаöн, кытчöдз кымöсам оз пöжалö пишальсянь.

— Пöжавны и колö пон чужöмлö, — бобгыштiс барсук.

— Кинлö?! Меным! Видзöтам эшö, кыдз пöжаласö! Оз я тэныт одзжык кымöсат чарöтö! — кöин сiдз бы кинöскö и пурö, сiдз бы и пурö.

— Мед пöжалöны, меным эд сiдз и этадз... — обидитчис барсукыс.

— Дугдö! — зверрезлö висьталiс Вöрдядьыс. — Öксим этчö, медбы öтамöднымöс эг пурö, а тi... Кинöс бöрьят царьнас?!

— Кинöс, кинöс... — шуис ручыс, бытьтö мöдiккез сытöг эз вермö баитны, — том ошсö колас, а сэсся кинöс? Ог жö пондö этö... Кузь пеля кöчсö, кöдалöн толкыс некытчö абу, только кывнас жö лельгö...

— Бöра ошсö?! — кöз ув вылын чирзыштiс урок. — Бöра сэтшöм жö вирьюисьöс? Бöра пондас миян кодьсö зэлöтны, что и горöнжык он понды лысьтны ловзисьны.

— Демократия колö, вот мый! Отирыс, видзöтö, олöны демократияыс сорöн и быдöс нылöн бур, а ми... — висьталiс ёж, кöда эз любит уна баитны, но кыдз висьталас, топ пуктас и сэсся он содты не он чинты.

— Демократия-а-а! — пондiс чеччавны да асьсö мыччавны кöч. — Демократия-а-а-а!

— Тьфу, янька! — кöчлань сьöвзис руч. — Öмнат пыр и верман... Бöжтöм демократ... Видзöтам, кыдз пондан овны демократиянат. Медодзза кöз увтын жö кучиктö кулясö, — и гусьöнжык ни бобгыштiс, — а шедан кö меным, он ешты öмтö осьтны, кыдз мöдöр югытас менам кынöм пыр мунан.

— Сiдз, — сьöкыта ловзисис ошыс, топ вöлiцарьöн ни, кöр вöрас бытьтö быль ни оланыс овсис демократия сьöртi.

— Кинöс сэк бöрьят? — бöра баитö Вöрдядьыс, кöда мöдöтпыр некинлiсь бы эз юась и висьтась, а шуис: «Вот тiянлö, юртöм öнджаэзлö, царь, — мыччалiс бы ош вылö. — Олö сыкöт, да кыдз колö. Од кö пондö кывзiсьны, ас выланыт горзö!» Сымда бы и вöлi, но зверрес пондiсö кö модьны демократия йылiсь, сэк мед асьныс и бöрйöны царьсö...

— Кинöс? — синнэс був-бав кöинлöн. — Менö бöрйö. — А мый? Ог разь куж вöрас царьнас лоны?

— Ой, царь! — пондiс серавны руч. — Ашын жö быдöннымöс сёян! И судö он сетчы...

— Сэтшöм царьыс миянлö оз ков, — лельгыштiс кöч. — Буржык ни, кöр хозяиныс лоас ошыс. Сiя вына, смев, но и этö...

— Сэк голосуйтам! — ыкöстiс Вöрдядьыс.

— Голосуйтам я мый я, — горöтчис барсук и медодз вевдöрö лэбтiс одзись лапасö, сыбöрын лапаэзнысö лэбтiсö и мöд зверрес, да кыдз öтiк. И вöрын царьöн лоис ош.

Ош — виль царь сiдзкö, кöда сэтöн жö пондiс ошшасьны:

— Ёрттэз! Талунсянь ме тiян царь и понда кывзiсьны, но... Тiменö кывзö жö, сэк миян и лоас демократия.

— Мый сiя сэтшöмыс? — кыдз узис да саймис лана. — Кыдз сiйö сёйöны?

Быдöнныс серöмтчисö, нельки шырыс, кöда эз шыась, кыдз вöрас эз вöв, и кöдалiсь нем эз юалö, и кöдалö нем эз висьталö.

Эта лунсянь вöрын зверрез коласын оланыс невна вежсис: кöч, кöда сьöрö пондылiс вöтчыны руч, котöртiс царь-ош дынö, норасис ручыс вылö, и ошыс-царьыс сiдз лöгасис руч вылö, сiдз лöгасис, что вöр тыр эрзыштiс, ыкöстiс:

— Вайöтö татчö хитрöй кумаöс! Ме сылö мыччала кыдз колö кöччес сьöрын вöтлiсьны! Ме сылö...

— Мый лоис, дона царь? — ручыс сэтöн и эм, кыдз ошыс одзö муыс пытшкись петiс. — Кывза тэнö, дона да любимöй царь, — баитö, кывнас мавтö. Но царьыс сiдз и этадз лöга юалö:

— Тэ, кума, мый керан?! Мыля кöчыс сьöрын вöтлiсян? Видзöт менам!..

— Тэ мый, тэ мый, дона царь?! Висьталас тэныт кузь пеляыс! Сылöн сьöлöмыс сiдз и потö быд шысянь. Абу ни вöрас олiсь бы кузь пельыс...

— Сiдз, — ошыс думайтыштiс да пондiс юрсö гыжьявны. А ручыс эта коста модис:

— Пыр менö да сё ме вылö... Кин да мый кытöн керас, сэтöн менö видöны и шуöны хитрöйöн. Олан эз ло... Джагöтчыны колас... — и пондiс чышкыны синваэсö.

— Эн тэрмась мöдöр югытас. Еныс шуöма овнытö öтпыр, — ошлöн-царьлöн сьöлöмас кыдз мыйкö вöрзис — жаль лоис ручыс. — Кöчсö ме тöда... Сэтшöм жö бöжтöм öнджа... Пыр норасьтöн ветлöтö, бытьтö сiдз сiйö кинкö быд кöз увтын и сёйö.

Басниыс сьöртiпетiс, что вöрын виноватыс абу бы ручыс, а кöч, кöда ветлöтö норасьны, мед кöть сизимись ручыс вылö норасьö — нятьсö кисьтö и чёрт сыкöт, некин ни сэтшöмыс дор оз ло, и сiя жö ручыс, эта жö рытö кутiс кöчсö да джагöтiс, джын добычасö сёйис, а мöд джынсö кыскис ошлö, вайис яйсö царьыс одзö, пуктiс, юрсö бергöтiс мöдöрö и бытьтö нем оз тöд.

— Тэ мый керан?! — ошыс ыкöстiс ручлö. — Мыйлö?!

— Сёй, дона царь, — ручыс висьталiс ошлö, — кынöмыт эд чисто сималiс ни, чожа тшыгйöн кулан.

— Оз симав, — дульсö ньылыштiс ошыс, кöр сiдз ни сималiс кынöмыс, что невна садьыс ни эз быр, и рамжыка ни шуис. — Ох, тэ и кума! Ох, тэ и хитрöй. Шедан кö мöдöтпыр, сэк вöлись ме тэныт и мыччала! Ох, и мыччала!.. А öнiвешшы син одзись, мун, ась кытчöдзкö синö оз адззы, и пельö оз кыв!

Ручлö сiя и колö: пышшис ошыс син одзись. Ошыслö бöра сiя жö и колiс, медбы ручыс котöртiс, сыбöрсянь сёйны гöснечсö да думайтны: «Но тэ и кума-а-а... Кужан кузь бöжнат öвтны! Кöть кинöс сьöвталан... — сэтöн жö думаэс бергöтчисö мöдöрö. — Ась. Сiдз и колö. Мöднёж овнытö оз туй. Мый кöть öтiк кöч эз ло... Оланыс эд эз кус: кöччес тыр эшö котрасьöны.»

Оланыс эз кус. Вöрын зверрез олöны одзлань. Дыр мыйись ош-царь дынö норасьны котöртiс лось да пондiс ветшкыны:

— Кывзы, царь... Тöн эд кöиннэс сёйисö менчим невестаöс! Этадз кö бандиттэс пондасö керны, чожа родным орас, — и пондiс лёбны: — эшö модьöны демократия йылiсь! Кытшöм демократия вермас лоны, кöр вöрас сiя хозяин, кöда вынажык? Талун кöиннэс сёйисö невестаöс, ашын кутасö да джагöтасö сойöс, и он понды тöдны, кин джагöтас, кинлö норасьны — правдасö он адззы.

— Ме нылö мыччала! Ме нiйö сьöвтала! Ме нiйö!.. — ошыс пондiс ружтыны.

— Мыччав, мыччав, дона царь миян! — кеймисис-керис лосьыс да иньдöтчис аслас туйöт. А ошыс бöрсяняс думайтiс: «Сiдз тiянлö и колö! Етшажык пондат тöдны да норасьны. Демократия...» Бöра юрас вачкис дума: мый жö бы сэтшöм демократияыс? Мый бы сiйö быд кылын касьтылöны учöттэз и ыджыттэз? Демократия...

Мырсис-думайтiс ошыс, и сэтöн ... Прыг! Одзас чеччöвтiсö кык кöин, öтiкыс пондiс уннявны и юасьны:

— Дона царь, корин миянöс?

— Мыйлö тiменым? — эз вежöрт кöиннэсö ошыс.

— Натьтö, норасис вöрмöсыс да сiйöн и корин...

— Быль! Сiдз и эм. Норасисö тiян вылö, но мый жö бы тiянкöт керны? Кучиккезнытö кульны да вузавны или... — кöиннэзкöт баитiс ошыс.

— Он жö, поди, миян царь, да любимöй! Ми тэныт эшö пригодитчам! — кöиныс ошыс одзын пондiс öмсö пиньлавны, а мöд кöиныс зверрез царь одзö пуктiс ни лосьлiсь лядьбей и шуис:

— Этö тэныт, дона царь! Гöснеч...

— Тэ мый? Тэ мый? Кытшöм гöснеч? Мый ме йылiсь пондасö думайтны? Бöра эд пондас быд шырыс и кырыс ыксыны демократия йылiсь да видны менö!

— Ась видöны! — кöинлöн синнэс був-бав. — Нылöн öммезныс сы понда и эмöсь, медбы кинöскö шуны да видны. Сраммез!

— Сэк мунö син одзись! — кöиннэзлö ыкöстiс ошыс, а эта коста матын кывзiсис ёж, кöда кöиннэс бöрсянь кышöтiс-котöртыштiс ошыс одзö и пондiс лельгыны:

— Царь тэ миян дона! Мый нö эта лоö! Кыдз пондам одзлань овнытö? Демократия йылiсь модям, а кöиннэс син одзам джагöтiсö вöрмöссö. Асьныс сёйöны и тэнö вердöны. Кинöс тэ сэк, царь, пондан дорйыны? Кöиннэсö или миян кодьсö? Абу ни тэ царь!

Ёжыс немись и некинiсь эз пов, кöр сiйö лёк зверрез шогья дорйис желля паськöмыс, сiйöн сiя кöть кытöн веськыта шырзис-баитiс, и öнiбаснинас эз чуклясь, кыдз кужис, сiдз и стыдитiс ош-царьсö, гардiс:

— Стыд тэныт абу, миян царь!.. Мöдiк бы тэ местын веськыта синнэзö эз ни видзöт, а тэныт кöть бы мый...

Ошыс öмсö осьтiс да видзöтiс ёжыс вылö, топ одзас сулалiс не ёж, а слон, кöдö некöр эз адззывлы.

— Ой, царь! Ой, царь! — ёжыс одзлань ошсö шебралiс баснинас. — Мый еныслö кулан да висьталан?

— Да босьт тэ яйсö и сёй! — дыр мыйись ошыс вöлись мурзьыштiс.

— Öддьöн колö тэнат яйыт! Ачыт тыткы, — медбöрын эшö висьталiс ошлö ёжыс и заргисис чашья коласö.

— Öнжда-а-а! — кымöсас лапанас вачкис ошыс. — Эта-а-а... — нельки пымалiс, сiдз пондiс тöждiсьны. — Мый нö?! Кыдз нö?! Сiдз и этадз оланыс хреновöй. Отсав, Ен батюшко!

Еныс сэтöн и эм, кымöрсяняс кыдз усис ошыс одзö, юалö:

— Мый лоис, зверрезлöн царь? Мый менö касьтылан?

— Ен батюшко, сораси оланнас, — Енлö пондiс норасьны ошыс. — Кывзы, öтiк этö керö, мöдiк сiйö. Öтiк сёйö бы, мöдiк оз бы сёй. И быдöнныс ыксöны: демократия да демократия. А мый сiя сэтшöмыс, ог вежöрт.

— И ме ог вежöрт, — серöмтчис Еныс.

— Сэк мый нö? — одзлань ошыс юалö Енлiсь.

— Мый, мый, а сё сiя... Тöнняыс... — висьталö Еныс. — Кыдз олiт, сiдз и олö. Вот тiянлö и демократия.