Ягöдавтöн



Ар. Гажа. Шоныт. Вежöтö лист, воö ягöд. Одзöв бы эшö ягöдсö ваявны (кöркö деддэзным да баббезным пуягöдсö быдтывлiсö, кöр пужмалас и туримольсö эз тэрмасьö одза-одз нюррес вылiсь гортö кыскавны), а öнi отирыс оз видзчисьö пужжесö, оз мöдейтö горттэзаныс: гöрдöтыштас ягöд тусьыслöн öт бокыс и сэтöн эмöсь! Вöрö котöртöны том и пöрись — öтамöднысö одзалöны да ягöдсö ваялöны. Мыля бы? Натьтö сiйöн, что весьолiссес лоисö уна да, бöра жö, отирыс деньга керöны: годiсь годö ведра ягöдыс лоö донажык и донажык. А мый петö, кöр вотöм ягöдсö летöны-шырзьöны? Петö, что ягöдыс сорöн коксö нетшкöны и тальöны, нильöны нюр и яг-пу туруныс оз сулав. Веськыта висьтавны сэтшöм оланö райисполкомыс быд годö лэдзö решеннё (постановленнё), медбы одза-одз эз ягöдалö, а видзчисисö, кöр райисполкомыс жö лэдзас ведраэзöн котрасьны вöрас да нюр вылö, но пыр эд лоö сiдз, кыдз баитчö: «Быдкодь законыс, кыдз додёж, эмöсь сылöн кык вож: оз ештö гижны, а сiя мöдорö ни чужгö; отирыс гусьöн мунöны ягöдысла, öктöны сiйö, вайöны сёйны и вузалöны, а кöда вöрас шедас гусясьтöн, дойдöны-штрафуйтöны да суддэзöт кыскалöны, но и мый? Кыдз шуöны: быкыштчы да лый, мышкыртчы да босьт, вот тэныт лоас и ёсь: мымда бы отирсö эз штрафуйтö, эз судитö, сiдз и этадз вöрсис ягöдсö, шуам, гусялöны, только быдöнныс абу жö пон кодь жаднöйöсь, унажыкыс видзчисьöны, кöр райисполкомыс лэдзас котрасьны вöрас, сэк вöлись и уськöтчöны ягöдыс вылö том и пöрись, мужик и инька, ылiсь и матiсь деревняэзiсь, городiсь локтöны, сэк вöлись миян Кöсваным и адззылö праздниксö, кöр медодзза лунсянь одз асывнас паром дынö чукöртчöны сымда машинаэз, бытьтö ва дорö ойшöрсянь кинкö чукöртас кöртiсь дорöм пода, кöда кивзö-баксö, тэрмасьö бы вуджны мöд берегас, нюрланяс... Кытiсь только машинаэсö сэк он и адззыв: Перемись, Кудымкарись, Красновишерскись, Краснокамскись, Урал керöссэс таланись и керöссэс мöдöрись, и быдöс тэрмасьö — öтамöдсö одзалö бы вуджны, унажык öктö бы ягöдсö, дзик ягöдыс сiдз ни колö отирыслö, что няньöн эн верд, но гöрд тусьсö сет!

Медодз туримольсö миян нюрись сiдз öктöны, туримольыс эд лоис меддона тор, кыдз инькаэс сытöг оз вермö тырсявны да челядясьны, мужиккес эз пондö вермыны гöтрасьны да янсöтчыны, овны садьöн и садь быртöдз юны вина, бытьтö ягöдыс лоис медбур лекарство, кöда веськöтö быдкодь шогöт, вежö нянь, козьналö витаминнэз, бытьтö медбур кулан да ловзян тор. Сiйöн ныр вылö и уськöтчöны асланым и йöз отир, инькаэз и мужиккез, томöсь и пöрисьöсь, уськöтчасö да öтамöднысö одзалöны, летöны ягöд туссесö, кöдна годiсь годö шогмöны етшажык и етшажык. Кöр арыс умöль — нять да ва, ой и лун зэрö, а кöр и гажа, кыдз шуöны золотöй ар, кöр киссьö пуэз вылiсь лист, топ отирыслö козьналö деньга — ов да ошшась, гажöтчы, куль пиян, кытчöдз лымыс эз усь, а усяс кö, касьтыв гажа арсö да ягöдсö, кöдö öктыны абу кокнит; больскы васö, джöмдав быд кочка дынын, мышкырась быд тусьыс одзын, кокась курöг моз, тырт дозтö, кисьт öтiк ведра котомкаат, сыбöрын мöдiкö, куимöтö, нёльöтö, витöтö... Уна ни кывнам öкта — йöз уджöн ошшася, кöр ачым луннас ведрася унажыкöн ог öкты — этö жаднöйес да чожжес зоббезнысö тыртöны, а ме нюр вылын чожа мыдза: оз кывзiсьö черань коккезö, коскö висьö, пельпоннэз дзуртöны, кынöм сималö, горш косьмö, сьöлöм гудрасьö, ошись пола, кöда пантасис кö, оз понды баитны, оз орс, а рявкнитас, кутас гöна лапаэзнас да кузь гыжжезнас юр вылiсь кучиксö кульыштас синнэз вылö и мун да ов!.. Овсяс, мыся, оланыс... А змеяэс... Ме эд нiйö сэтшöммезö ни адззылi, сэтшöммезö, кыдз Амазонкаись анакондаэз — потш кызаöсь да потш кузяöсь! Öтпыр сэтшöмыс син одзам ньылыштiс кепись ыжда понокöс и эз виньды, мöдöтпыр чушкалiс инькаöс... И эз бы мортсö ештö кыскыны больницаöдззаным, аминь бы эд лоис! Или этö... Лягушаэс змеяэс кодь сьöдöсь да важ нинкöм гырисяöсь, сiдз пö чушкасьöны... да ва гöппес — чудскöй öшымöссэс... Он казяв, тальччан гöпас и абу... Кошшы кытöн мортыс... Оз ешты досвиданнёсö висьтавны... И вот эшö Вад тыас пö олöны вакуллез, кöдна миян коддесö видзчисьöны и вермасö кыскыны ва пыдöсас, но а öшан кö?! Эстi нюрас пыран, сэтчин бы петан да он вермы петнытö, öшан-бергöтчан, видзöтан, гортö бы мунан, но кытчö?! Он вежöрт кытöн туйыс, кöдöрын гортыт: кымöра, шондiыс оз мыччась, дзебсисисö и кысянькö гусьöн пöв синнас видзöтö, мый керан, кытчö пондан мунны... Ау-у-у! Уа-а-а! Нем он адззы, нем он тöд: нюрын пожуммес быдöнныс öтыждаöсь, öткодьöсь... А мыля бы сiдз? Да сiйöн, что Вöрисьыс видзöтас-видзöтас отирыс вылö кыдз нiя жаднöя öктiсьöны, кыдз городскöйес нюрсö сыналöны «комбайннэзöн» — кок сорнас нетшкöны, лöгасяс и новйöтö нюрöттяс и новйöтö, сiдз кö, велöтö бы юрас совестьсö, но... Ох тэ! Кытшöм бы öння кадын совесть йылiсь баитны, кöр сiйö чужтöнняныс жö колямö маммезным кок увтö, кöда таляс и абу... Мыся, öшан кö нюраным, кöть мымда горштö лет, некин тэныт оз отсав ― отирыс вежсис, эг пондö радейтны колхоззэсö, артельсö. Лоим господа ― быдöн ас пондасис, аслыс, сiйö и видзöт, кыдз бы юртö эз босьтö, эз чöвтö луншöрнас бырöм зипунтö, эз кольö вешьянтöг, да эшö еныс шуöма кö тэныт чужны да овны инь мортöн. горзы ас вылат, кöр нюрас верман шедны бандит чужöмаэслö, кöдна кутасö сераласö кыдз колö, шупкасö бырöм фуфайкалö моз и ов... Öтiк прокурор, мыся, оз дорйы, некытшöм следователь оз адззы шпанаэсö. Нiйö, кöдна тэ вылын сералiсö сiдз жö, кыдз тай быд лун мыччалöны телевизорас. Öнджа, мыся, сьöкыт öктыны нюр вылiсь туримольсö, берся тэкöт вермас лоны, мед и унажык отирыс кольччöны ловйöн, но овлö и сiдз, что... Öтпыр кык инька öшисö и нiйö кошшисö быдса неделя — лунiсь-лунö мужиккес изiсö нюрыс вылын, быд мырыс дынын нюкьясисö, быд пуыс дорöт котрасисö, талисö да талисö нитшсö, но сiдз эз и адззö беднöй инькаэсö, кöднö, натьтö, ошыс сёйис — киж-каж керис, öтiк коска эз коль, нельки юрси тылöппезнысö ньылiс... Сiдз вöлi — öшлiсö инькаэс, но сыбöрын ловйöн петiсö жö гортö, куим ведра ягöдöн вайисö и сэтöн жö вузалiсö ведраэсö тысяча рубöн: городскöйес хитрöйöсь, нюрас оз бы педзö, оз мыдзöтчö, а сувтасö туйыс дорö и видзчисьöны тыра мешöккезнас инькаэсö, видзöт, шупкасö ведра ягöдыс понда рубмöд и бур, несьö сувтöтасö бутылка, а миян и радöсь, что вузалiсö добычанысö — деньга кыйисö, винаок юыштасö, оз думайтö, что небиссес ягöдсö гортö кыскасö да вузаласö куимись донöнжык...

Сьöкыт, мыся, нюр вылын шедтыны деньгасö, берся вермас лоны, кыдз таво... Таво эд арыс вöлись вöлi гажа да кöс, таво эд вöлись!.. Отирыс уськöтчисö ягöдавны бöра деревнясянь и городсянь, бытьтö бöра оссис страда да сэтшöм, что сэсся миянлö нем ни оз ков — не ыб вылын сю, не гортын удж, вай ягöд! И быдöс сiйöн, что нюрыс миян паськыт, кодя, быдöнлö козьналö ассис добросö, только вот Петровöс бöра чушкалöм змея, Сидоровлöн, господи прости... Мамыс и иньыс öшлiсö и куим ой узисö кöчкаэс коласын, Ивановлö пантасьлöм вöр сувда ош и сiдз повзьöтöм Ивановсö, что мортыс вешьянас какöма. Берся, мыся, овлö нюраным, но таво лоис эшö и сiя, что ягöдавтöнняс вийöмась мортöс, и бытьтö пö сiя вöлöма Перем городiсь и видзöтö, мый мортыскöт лоöма... Милицияыс кошшисьöм ёна: кытшöвтöмась öтöрмöдöрсянь вöрсö да кошшöмась... Ой и олан петiс-вöтiс! Ой и олан. Горт шöрын ни тай отирсö пондiсö начкывны-вийны, и бытьтö пö морт яйись бöра пирöггез керöны да вузалöны. Господи, господи! Кулöмыс, кывсис, куйлö пö нюрас кöчкаэз коласын, нагöлеч пö эд — нач пасьтöм, кымöсыс вылын пö лягушка пукалö, конувтас пи змеяыс ештöма керны ни поз, кудзасянсö пö пурö-сёйö кöдзыв... Господи, господи! Мыля нö сiдз?! Кыдз пондасö сы ылынасис петкöтны кулöмсö?! Кыдз кыскасö Гайнаöдз да резьöтасö? Вот эд вöлись оланыс роднöйеслö! Медбы сэтшöмыс вöтö эз уськöтчы! Кин бы мортсö вийö, керав бы киэсö, ась пешлiс бы овны китöг, ась тöдiс бы кытшöм оланыс! Простит господи да ен батюшко, простит грешнöй душаöс...

Рам таво вöлi арыс, лöнь. Вöрыс вежö паськöмсö, гажöтчö, орсö быдкодь рöмöн, ошшасьö кольöм гожумнас, а отирыслöн сьöлöммезныс пессьöны, тöждiсьöны вийöм морт понда, оз лысьтö сэсся ягöдавны, господи!

Сiя и басни, кулöм-вийöм морт йылiсь и лёбöны. Чулалiсö кык лун да кык ой, сэтчö кинкö бöра содтiс, что нюрыс вылын насмекайтчöмась-насилуйтöмась пö инькаöс: бандиттэс вöлöмась сизима, и кыдз мортсö кутöмась, сiдз и издевайтчöмась, сiдз сералöмась, что стыд и висьтасьны...

Господи, господи, мый ни эта лосьö?!. Эз ни тай понды туйны петны керкуись! Еныс бы и чарöт изверггесö, вий бы öтiк лунö да öтiк часö, кыдз поннэзöс...

Пессьöны отирлöн сьöлöммез. Арыс гажа, вöрыс öгралö. Золотöй кадыс. Рыттэзнас инькаэс оз лысьтö, петны öтöрö, поннэс вувтöны лёк голоссэзöн. И. сэтöн (еныс быль тыдалö, эм), пондiс кывсьыны, что нюрын мортсö абу вийöмась, а вöлöма пö сiя вывтi код, кöчкаэс коласын узьöма нач пасьтöг, кык ой и кык лун каргöма, сыбöрын саймöма, локтöма гортас да эшö пö вайöма ведра ягöд, и некытшöм пö Перем городiсь мужикыс абу вöлöма, а асланым, будь сiйö проклят! Мый сэсся? А эта эшö... Арыс, мыся таво вöлi гажа, ягöдыс эз вöв вывтi уна, но тырмис быдöнлö — меным ведра, иньöлö кыка, жаднöйес оз висьтасьö мымда вылö вузалiсö. Мöдiк год бöра локтö нюраным, бöра ягöдыс лоас, мед и етшажык, и етшажык, и ог ештö нач пöрисьмыны, туримольыс, натьтö, оз понды быдмыны, а кытчöдзкö олам...