Повессез

Счастье ас киын



1

Ойнас усис лымок, тыртiс тöння следдэсö, и асывнас кин мунiс — гижис ветлöтöмсö.

Медодз улицаэзöт серöтiсö поннэз. Поннэз бöрсянь саймисö радисттэз, лэдзисö радио. Радио саймöтiс деревнясö. Виль олан — виль мода: отирыс чеччöны не петух китöстöмсянь.

Виль олан — виль мода: не быдöн саймö радиоыс сьöртi, не быдöн тэрмасьö лонтны горсö да пемытöн чепöссьыны уджавны, бергавны пода гöгöр. Не быдöн и видзö подасö: сорласьö городскöй оланыс деревнякöт.

Кытчö тэрмасьны рыжöй Лидалö, кин вылö уджавны, кинöс вердны да пасьтöтны? Олö кыдз кöк. Быдöс ас пондасис, ас вылас. Некин понда юрыс оз вись и некин сы весьтын оз горзы.

Узьö Лида, бок вылiсь бок вылö бергалö. Картаын Лидалöн öтiк порсёк, быдмö ар кежас яёк вылö. Оз тэрмась быдмынытö: коккес чукыляöсь, гöныс — зу. Кашыкасьö подаокыс: он вежöрт, простуда али привычка. Но Лида оз тöждiсь: деревняыс не город, базарас он котöрт, и яёкыс пригодитчас.

Сiдз и олö инькаыс: чеччö и водö — быдöс ас пондасис.

Лида — дöва. Пукалö дöваас не öтiк год. Висьталам, томсянь. Ветлiс жöник саяс, да весись. Не попыс эз венчайт, не мамыс эз благословит, мунiс жöник саяс аслас желаннёöн, аслас думаэзöн, некинлö эз ошшась и эз висьтась. Но оланыс жöникыскöт эз лöсяв. Кин сэтöн виноватыс — сьöкыт висьтавны.

Лида жöникнас оз ошшась. Мыгöрыс мортыслöн кузь, а мывкыдыс дженыт. Садьувья — морт: уджалö и баснинас каньöс оз обидит, а шедас винаок — пеллетö тупкав, пондас ошшасьны, топ сы кодь мортыс свет вылас абу. Кодя и бытшöм, бур и басöк, быдöс сылöн эм и кисис петö.

А Лида вылö нем видзöтны, сьöвзьы да бергöтчы: понпутшöсь, учöтик да рыжöй, коккес чукыляöсь. Гöтрасис бы Венькаыс артистка вылын, ежели бы не эта Лидаыс, кöда кöркö казявтöг сьöвталiс Венькасö, но бöр он ни бергöт: кулöмсö гробсис он чеччöт.

Кöр Веня код, рытсянь асылöдз изö керкуас, модьö эмсö и абусö. Садьмас — порсь. Тшыг али пöт — шы оз сет. Кодувьяс сизим мöсöс высьтö, садьмас — помойö гут вöяс.

Сэк праздникыс оссьö Лидалöн. Видзсьы, кывзы, кытiсь мортыс чужöм!.. Лида тöдö, что садьувья Веня трус, сэк мортсис туйö гардны витиккез. И кутас кокны иньыс мужикыслö, пондас тшупны быд угöвсянь Венялö сiдз, что мöдыс только вишыкасьö да синнэзнас кваркышалö. Командирыс керкуас Лида сэтчöдз, кытчöдз мужикыслö оз сюр вина. Сюрис — видзсьы: Веня сiя рытö гортас локтö сёрöнжык, чорытжык да смевжык походкаöн, гажажык чужöмбанöн.

— Кин хозяиныс керкуас?! — юалö Веня иньыслiсь порог дорсянь.

— Тэ, батюшко, тэ, дона! — висьталö Лидаыс, а аслас коккес небзьöны. И эта гажöтö Венясö. Праздникыс оссьö мужикыслöн. Рытсянь асылöдз Веня хозяин гортас, кодя и бур, вына и смев, и нем тэ сылö паныт он шу.

Рытсянь асылöдз, гожум и тöв — öтiк.

Вит год олiс Лида мужикыскöт, пессис петляын. Но кватьöдз годас мылаыс бырис, и Лида чапкис котома спина саяс, чышкыштiс сола синваэсö да янсöтчис Венякöт.

Öнi Лидалöн аслас керку — карта. Олö öтнас — нем оз думайт.

Мукöдпыр видзö квартиранткаэзöс, но нiя олöны Лида ордын недырöн: чожа чеччöвтöны жöник сайö. Юыштас невестаыслiсь хозяйка винаок и одзлань олö.

Эта оланыс волькöтiс инькасö: мыгöрыс гöгрöса, топыт яя. Бур оланыс Лидалö.

Но мыйкö мортыслö оз тырмы, сьöлöмсö часто жмитö невежöртана тоска, да эшö сэк, кöр ойнас вöт вöтасяс, саймас, и думаэс пырасö юрас. Öтiк дума вежсьö мöдiкöн... Ойыс кузь, и кывсö некинкöт горöтчыны. Йöзыс оз тöд, кытшöм гажтöм öткаса оланыс, кöр абу счастьеыт.

Видзчисис сьöлöмыс счастьесö, тöдiс сьöлöмыс.

Эта тулысö счастьеыс чикись моз лэбзис-пырис öшынöттяс.

Öтпыр Лида получитiс письмо. Тöдтöм мортсянь. Эз бы вöв письмоыс, может, вöлi бы и буржык.

Вöрзьöтiс сьöлöмсö письмоыс, дзугис олансö, разис думаэсö, и мортыс места эз понды адззыны, оланыс лоис не олан.

Думаэс то радöсь, то невежöртанаöсь, вöтлiсисö Лида сьöрын луннас и ойнас, полöтiсö. Мый колiс эна думаэзлö — ачыс эз вежöрт. Оланыс пондiс вачкисьны кузь вöт вылö, кöдаись мездöтчыны эз туй.

Письмоэз локтiсö сьöрсьöн-бöрсьöн. Не армиясянь, не городсянь, а тюрьмасянь. Не быд мортлö инмас сэтшöм счастьеыс. Эм мый вылын думайтны. Кин тöдö мортсö, кöр сiя гижö тюрьмасянь?

А иньдiс этö счастьесö Васька Егор.

Васька Егор — асланым мортыс. Прока: кужö öшын рамасö стружитны и сапогсö вочны — быдöс петö мужикыс киись.

Кыдзкö лэбис ыджыт тöв, чегис льöмпу увсö Лида öшын увтiсь, чапкис öшын рама кузяс — паз жугдiс стеклосö. Осьта öшыннас он ов: гожумнас гутыс лэбзьö, тöвнас морозыс пырö. Котрасис Лидаыс деревня кузя öтiк дынö, вовлiс мöдiк ордö. Кöсъясисö, но некин эз лок, эз воч рамасö, некин эз отсав öткаса инькаыслö. «Аслат абу — йöзыслiсь он мырддьы», — аскöттяс думайтiс Лида.

Мöдiк бы синваэсö чышкис, норасис бы сельсоветö, а Лида кокнита горöтчис ас деревняись мужиккез йылiсь, что нiя кыдз ошшез: ма бы лакны да берлогаын узьны, и котöртiс куим километра, мöд деревняас Васька Егор дынö. Егорыс эз откажитчы. Только юалiс:

— Мыйöн пондан вештiсьны? — малыштiс кузьмöса рожабансö, видзöтö веськыта синнэзö.

— Мый колö? — гажöн юалö инькаыс. — Деньга сета, вина неба.

Сiя жö лунö, павжун бöрас, Васька Егор локтiс Лида ордö, эз дышöтчы шагнявны гортсяняс куим километрасö: öт киас молоток, мöдас — струж, карманас — алмаз. Баснитöг лöсйис, стружитiс, вундыштiс стеклосö, и öшыныс лоис нач виль: не гутыс оз лэбзьы, не морозыс оз пыр. Дыржык Лидаыс котрасис, уджалiссесö кошшытöн, чожажык рамаыс аркмис. Юыштiс уджалöм бöрсянь Егорыс кык стопка и пондöтiс басни:

— Вот, Лида, öнджа... Вот, сiдз бы то, öнджа, кыдз сказкаас...

Сказкаэз Васька Егор тöдiс, сказкаэсö вермис висьтасьны рытсянь асылöдз и асывсянь рытöдз, вöлi бы только стопка вина. Öнi мужикыс висьтасис Лидалö Иван Царевич да Василиса Премудрая йылiсь, и Егорыс сьöртi петiс, что Василисаыс сэтшöм жö, кытшöм и Лидаыс — «кульöм и лякöм». А Иван Царевичыс мыйöнкö вачкисьö Егорыс вылö. Сказкаыс сьöртi петö, что колö бы гöтрасьны Лидаыслö Васька Егоркöт.

— Мыля? — Лидаыс гöрдöтыштiс, öшыштiс, но сэк жö ас дынсис тойыштiс. — Тэ эд, Егор дядь, старик ни, а ме!..

— Пöрись вöлыс, öнджа, бороздасö оз тшыкöт, — кыскö Егорыс асланяс.

Но Лидаыс чорзис, обидитчис аслас отсасись вылö, чапкис Егорыс одзö вит руб, висьталiс:

— Меным колö том!

— Отсала! — Эз босьт вит рубсö Егорыс. — Öшынсö вочны отсалi и жöниксö адзза!

Неетша гардчöны мужиккес öткаса инькаыс гöгöр, гардчöны ас пондасиныс, кöсйöны, кыдз песняас сьывсьö, золотöй керöссэз, но бергöтчасö и вунöтасö. А Васька Егорыс эз вунöт.

Мöд годас жö сiя юыштiс гортат и кодувьяс споритiс соседкöт. Эта понда шедiс тюрьмаö. Недыр кежö: год колiс пукавны мортыслö. Но тюрьмаыс — не курорт, да эшö сылö, кöда ассис вексö чулöтö деревняын, а сэтöн вдруг шедiс йöз отир коласö. Тюрьмаас керис сiйö жö уджсö, мый и гортын, но душаыслö эз тырмы асланым деревенскöй отирыс, кöднакöт туйис баитны, кыдз аслат семьякöт, торйöтны быдöс, мый эм колхознöй уджас и гортся оланын. Гажтöмтчис мортыс аслас отиртöг, кодя ёрттöг.

Сэтшöм ёртыс пантасис. Эта вöлi Мелехин Мишка. Мелехиныс немöн эз вачкись Егор вылö, эз вачкись деревенскöй отирыс вылö, кöднакöт олiс Егорыс, но сылöн вöлi аслас мывкыд: кокнит баснинас пыр кужис вашöтны тоска, вайöтны гаж, пыр вöлi тэ дор — эта Егорлö тюрьмаас вöлi меддона.

Сэк Мелехиныс и лякасис Егорыс бердö, пондiс корны, медбы ёртыс адззис сылö невеста. Мишкалö колiс невестаыс не сэтшöм, кöдö асьсö колö вердны, а кöда бердö туйис бы жмитчыны, кöда бы няньнас вердiс и винанас юкталiс.

— Адззам! — висьталiс Васька Егорыс Мишкалö да сетiс Лидалiсь адрес.

Мишка пондiс иньдавны Лидалö письмоэз, кытöн гижис, что сiя чочком свет вылас öтнас, некин сылöн родняыс абу, некинöс сiя оз любит. Тюрьмаас шедiс иньыс кузя, кöда вежис Мишкасö виль жöник вылö и кöда дынö сiя некöр оз берт. Миша сетiс клятва. Честнöя да веськыта висьталiс, что пондас любитны Лидкасö и оланыс сытöг оз ло. И этöн вöрзьöтiс, сюртнялiс инькаыслiсь сьöлöмсö.

Миша иньдiс фотография.

Быд асылö и рытö Лида видзöтö фотоыс вылö. Фотография вылас не бöрья морт, он кулит: юрыс шырöм, но видзöтö веськыта, смелöя, тöдчö, что мортыс биас и ваас вöлöм, и некытöн сыкöт он торксьы. Быдöс тöдö ни Лида Миша йылiсь, только эз пантасьлы.

Кузь вöлi эта гожумыс Лидалö да гажтöм.

Дыр эз лок арыс, и вот Октябрьскöй паныттэзö деревняö локтiс виль морт. Гöсь и не гöсь — жöник Лидалöн.

Деревняö ылiсянь жöниккес вовлöны не часто.

Сiя дзик кыз онмись саймис. Спасибо Васька Егорлö, не весись мастер: öшын рамаэз керö, пимиэз вочö и тюрьмаас весись кадсö эз öшты.

Дзир-бар керис деревенскöй отир Миша вылö адззö, что мортыс туяна. Только Мишалöн вöлi öтiк изъян: öт кокыс дженытжык, мöдыс кузьжык. Чёрт сыкöт, мортыслö не кöч сьöрын вöтлiсьны! А сiдз мортыс — морт, мусянь тэчöм — топыт, кылыс бердас оз öшшы, синнэзнас гробйись чеччöтас. Лидаöс киэс вылын новйöтö, джоджсö ачыс чышкö. Уна разь деревнясис сэтшöм мужиксö панталан?

Лида пеллесö адззö. Кык шондi керкуас шонтöны. Оланыс — праздник: быд рыт керкутыр гöссез — тшын гардчö. Мишалöн, конечно, деньга абу. Кытiсь? Тюрьмасянь петiс. Лидалöн вöлi деньгаокыс, öктылiс талун кежö. Гöссесö куш пызан дорас он пуксьöт, ась тöдасö, что Лидаыс не медбöрья морт.

Öдззис Лида сьывны да овны жöникнас. Мужик эм — быдöс эм.

Лида уджалö, жöникыс гортын олö. Боёк и вына Мишаыс, но уджавны оз тэрмась: сийöсыс бöрлань кыскö.

— Колö бы уджалыштны жö, — шуас Лида жöникыслö, а сiя: «Уджыс не кöин — вöрас оз котöрт».

Кыдзкö корисö Мишкаöс сельсоветö.

«Колö уджавны бы, том морт», — висьталiсö сельсоветас.

Миша дивуйтчöмöн видзöтыштiс, бытьтö эз вежöрт: быль разь деревняас уджалöны?

— Миян быдöнныс уджалöны, — висьталiсö локтiсь мортыслö.

Мишка будзгыльтчис да обидитчис.

— Кин ме?! — вачкис моросас. — Од тöдö?! Тöдiсö и эзö.

— Ме, — содтiс Мишаыс, — ме гортын уджалi врачöн. Хирургöн уджалi! Вот сiдз, — синваэс пыр висьталiс мужикыс, кыдз черöн кералiс! — Ачым ассим аппендичит вундыштi!.. Во, — лэбтiс йöрнöссö.

Йöрнöс увтас, гöгыс увдöрын, кöркö вöлöм рана. Бурдöм ни.

Предыслiсь ассис кöркö аппендицитсö кодя хирург торкис. Гитлерыс не öтiклаись телосис яй торресö пелялiс, и повзьöтны сiйö аппендицитöн эз туй, но... Но предыс эз кывлы и эз адззывлы, что мортыс ачыс ассис вундыштас аппендицитсö.

Бар вайис предыс, öшис секунда кежö.

— Ме воюйтi, разведчикöн вöлi! Вот! Адззат: кокö дженытжык, — наступайтiс предыс вылö Мишаыс, лöсьöтчис пöрччавны вешшан киззесö.

Син одзын мортыс. Вежсис предыс чужöмбан вылас, чожажык баснисö мöдöрö бергöтö.

— Кытöн документтэт?

— На, — чапкис пред одзö Мишаыс справка.

Босьтiс предыс справкасö, пондiс лыддьöтны ас кежас. Лыддьöтö и сералö. Мый тэ сэтöн висьталан, кöр мортыс весись ошшасьö?

Етша справка вылас мортыслöн биографияыс — джын тетрадь лист вылын абу, но документ, печатьöн и подписьöн. Справкаыс висьталö, что мортыс чужöм война коста, что öнi петiс тюрьмаись, кытöн олiс куим год.

Николай Дмитриевичыс сельсоветас уджавтöн тöдсасьö не только асланым деревенскöй отиркöт. Öнi оланыс сэтшöм, что мортыс öтiк местаас етша пукалö: уджалö то экспедицияын, то туй тайгаын строитö. Деревняö локтö йöз отир, кöдалö уджыс — медглавнöй. Но овлö и сiдз, что быркнитас, кыдз лэбзяс öшöм кай, деревняас йöз морт. Öтнас, семьятöг. Медодз локтас колхозiсь пред одзö, мыччас трудовöй книжка, сувтас сельсоветас военнöй учёт вылö, пондас уджавны колхозас, да не черöн, а машинаöн, но уджалас сэтчöдз, кытчöдз киас оз шед медодзза шедтöмыс. А кöр шедас деньгаыс, пондöтчас юны сто граммсянь, кончитас — сапоггесö вузалас. Саймас — не вылас, не кокас, немöн юрвисянсö веськöтны, не тшыг кынöмсö пöткöтны1, и ковсьö мортыслö бöр босьтны трудовöйсö да катыльтчыны одзлань, вились кошшыны кодя отирöс, кöдна бы недыр кежö шонтiсö, удiсö-вердiсö.

Етша миян сэтшöм отирыс, эшö етшажык деревняас. Но локтiс мортыс Николай Дмитриевич дынö, шедiс медодз сельсоветö, а тэ, кыдз сельсоветлöн юр, видзöт, думайт, öшлы да туйды мортыслiсь одзлань олансö, кер сiдз, медбы мортсö не обидитны, медбы сiя вöлi счастливöй.

Вежöрт Мелехинсö. Может, мортыслöн сэтшöм мывкыд, может, сiя сэтшöм и чужис?

Николай Дмитриевич этö оз тöд. Но сiя чужан годыс сьöртi вежöртö, что Мелехиныс эз воюйт, Сталинградын эз вöв, аслыс операция керны эз вермы.

— Сiдзкö, врач? — юалiс предыс сельсоветсис.

Пöткöтны — пöттöдз вердны. Эстöн: питайтчыны.

— Хирург, — висьталiс Мишкаыс, шынньöвтiс, осьтiс öмсö, мыччис быдöс пиннесö — джыныс вевдöрись анас кöртовöйöсь.

— Враччес миян абу, — согласитчис Николай Дмитриевичыс. Сералiс голоснас, но этö локтiсьыс эз казяв и эз понды ошшасьны быдöс оланнас.

Вöлiсö, конечно, Мелехиныслöн ай и мам, вöлiсö роднöйез. Мамыс кöсыник да боёк — öнi син одзас.

Мишкаыс вöлi учöт, но öнöдз тöдвылас тшыг, сьöкыт медбöрья война годыс, кöр мамыс уджалансянь гортö вовлiс только сьöд ойыс кежö. Олiсö нiя сэк ыджыт керкуын, но учöтик жырокын. Мамыс зонсö лун кежас гортас колявлiс öтнасö, пöднавлiс замок сайö. Зонкаыс олiс öтнас асывсянь рытöдз: орс, узь, горзы, сималö кынöмыт али гажтöм — некин тэнчит этö оз тöд. Котрасьыштан бы öтöрас, шондi вылас, но некин тэнö жыроксит оз лэдз, только мамыт. А мамыс мунлiс гортсис одз, вовлiс сёрöн. Кöр локтас, зоныс норасьлiс да горзiс.

— Локтас айыт, и быдöс лоас бур, — пальöтiс, чышкис кöсыник рожабаннэс вылiсь мамыс синваэсö, мыччывлiс кармансис сьöд да чöскыт нянь торок, кöдö Мишкаыс нимавлiс конфета местö.

Кöр айыс мунiс война вылö, зонка вöлi сэтшöм учöт, что айсö эз тöд, но вежöртiс, что сылöн буржык оланыс, челядься счастьеыс айыс дынын. Локтас айыс, и оз ло не войнаыс, не эта учöтик жырыс, керкуас пырас гаж, и няньыс лоас пöттöдз.

Öтпыр мамыскöт керкуас пырис тöдтöм, ыджыт мыгöра, сьöд синкыма мужик. Спина саяс сылöн öшалiс котома, вылас пасьталöм шинель, юр вылас звездаöн шапка. Керкуас пырис солдат.

Мамыс Мишкалö висьталiс:

— Мишка, эта тэнат айыт! — Ачыс виноватöя шынньöвтiс.

Мишкаыс мылякö думайтiс, что айыс сылöн мöдкодь: учöтжык, чочком юрсиа, гажа, а эта видзöтiс Мишкаыс вылö, топ йöз вылö.

— Мишка, эта айыт! — мöдпыр висьталiс зоныслö мамыс, чышкис йöрнöс соснас синваэсö.

Айыс мылякö эз здоровайтчы, эз жмит морос бердас зонсö, а сьöкыта ловзисис, чапкис стул вылас шапкасö, ыбöс дорас — котомасö, пуксис, кыскис кармансис кисет да гижöт, гардiс чунь кыза чигарка, öзтiс сiйö, пельыштiс тшынсö потолокас, вились сьöкыта ловзисис тшын сорнас, юалiс:

— Тэ сэтшöм, Мишка? А мамыт меным висьталiс мöдiкö...

Корис дынас да пуксьöтiс öлöдзас, пöрччалiс котомасö и кытiськö пельöссис кыскис конфетаэз.

Мишка дынö пырис вöвлытöм морт, кöда вайис не только конфетаэз, но и мужик олан табакöн, басниöн, киподнас.

Зонкаыслöн вежсис оланыс. Öнi сiя унажыксö котрасис öтöрын, гардчис челядь гöгöр и ошшасис быдöнлö, что сылöн война вылiсь локтiс айыс. Ёрттэс кывзiсö да завидуйтiсö зоночкаыслö: не быдöнлöн война вывсис бертiсö айезныс. Ыджыттэс бöрсяняс сьöкыта лолалiсö.

И мамыслöн оланыс вежсис: уджалiс етшажыкöн, гажмыштiс, пондiс сёйны пöтжыка, нельки пешлышавлiсö винаок.

Мöд годас, кыдз локтiс война вывсис айыс, Мишка мунiс школаö. Тöдсасис виль ёрттэзкöт, велалiс гижны и лыддьöтны. Зоночкаыс одзын оланыс оссис паськытжыка. А войнаыс сё эшö олiс отирыс коласын: эз тырмы паськöмыс и сёяныс, эз тырмö челядьыслöн айезныс. Челядьыс эшö олiсö войнанас, мечтайтiсö подвиггез йылiсь, гордитчисö айезнаныс, кöдна тышкасисö врагкöт.

Мишка тожö гордитчис аслас айöн. Но ачыс айыс мылякö воюйтöмнас эз ошшась, эз ошшась орденнэзöн.

— Тятю, кытшöм фронт вылын вöлiн? — юасис айыслiсь зоныс.

— Быд местаын. — висьтавлiс айыс.

— А кытшöмöсь тэнат орденнэс?

— Орденнэс? — малыштiс айыс зоныслiсь юрсö. — Ме орденнэс понда эг тышкась. Ме тышкаси аслам Родина понда.

Зонка ошшасис ёрттэслö, что айыс войнасö чулöтöм разведкаын. Разведчик — солдат не простöй. Сiя не только смев да вына, сiя эшö врагысся хитрöй, боёк, врагсö бöбöтö и смертьсö вермö. Колiс висьтавны примеррез, кыдз тышкасис айыс разведкаын, а нiя эз вöлö. Но Мишкаыс кужис ни лыддьöтны книгаэз, кывлiс йöзыслiсь баснисö война йылiсь, вöтасьлiс войнасö и ёрттэс одзын эз öш, а быдöс, мый кылiс, лыддьöтiс да вöтасис, кöрталiс öтлаö, топ быдöс, мый висьтасьö, вöлi айыскöт.

Но öтпыр кöритiс Витька Мальцев, кöдакöт велöтчисö öтiк классын.

— Э-э-э, — мыччис кывсö Витька, дразнитiс Мишкасö. — Разведчик! Некытшöм разведчик тэнат айыт абу. Айыт тэнат торксис, а эта... — Мальцевыс айыс йылiсь висьталiс сэтшöмö, что Мишкаыслöн гöрдöтiсö пеллес. Сэк вачкис Мальцевыслö ныр кузяс.

Зонкаыс святöя веритiс айыслö.

Мöд классас ни мамыс мылякö эз неб зоныслö виль сумка, иньдiс школаас не только важ сумканас, но и важ йöрнöс-вешьяннас. Сэк челядьыс велöтчисö и вочöмнас, но Мишкаыс надейтчис, что айыс небас виль годас сумка, виль паськöм.

А вильсö небны вöлi немöн. Аймамыс часто пондiсö юны: юисö праздникöн и быд лунö, вöлi бы деньга. Семьяаныс оланыс бергöтчис, топ война годдэзас, эз тырмы пызан вылас сёяныс, эз вöв буржык паськöмыс. Айыс син одзын вежсис, нёштöммис: тошсялiс, умöльтчис, ветлöтiс нятьöсь паськöмöн да важ сапоггезöн, пыр вöлi лёк.

— Тятю, мыля тэ юан? — юалiс кыдзкö айыслiсь зоныс.

— Мый понда ме воюйтi!? — вачкис пызан кузяс айыс.

— Тэ эд!.. — виньдiс обидасянь Мишкаыс. — Разведчик!

— Кытшöм ме тэныт разведчик? — нёштöма серöмтчис айыс. — Разведчик... Трудармеец ме, вежöртiн?.. И тэ менам не зон! — Пондiс чышкыны нятьöсь кулакнас синваэсö. — Менам семьяыс торксис сэтчин. Немецыс сёйис менчим семьясö.

Мишкалö кыдз синнэзас сьöвзисö, кыдз душаас нятьöн шупкисö! Веритiс сiя айыслö, любитiс сiдз жö, кыдз мамсö, а петiс...

Зонкаыс чеччöвтiс ыбöсö и куим лун эз мыччась гортас. Дзебсисис отирсис, кажитчис, что сы вылын сералöны не только отирыс, но и воробейес, шондiыс.

Кытöн сiя öвтчис энö куим суткисö — ачыс оз тöд. Эна куим луныс висьталiсö сылö, что туйö овны айыстöг и мамыстöг, оз туй быдöс веритны отирыслö, кöр бöбöтö роднöй мамыт.

Пышшис бы гортсис, но öтнас эшö овны эз вермы.

Чожа вöзйисьöм айыс кулiс: кодувьяс шедiс машина увтö. Дзебисö и вунöтiсö, но Мишкаыс сьöлöмö эта мортыс колис пыдын борозда, кöда досповна эз бурд, висис аскоддя висьöмöн.

Кöр торксис нероднöй айыс, мамыс пондiс юны эшö öддьöнжык. Зоныс öнi топ эз адззы мамсö: уджалö сiя али оз уджав, узьлö гортын али кытöнкö йöзын, вайöтö гортö тöдтöм мужикöс — олö аслыс.

Чайдiсö мама-зона öтамöдныс бердiсь — немöн он öтлаöт.

Мишкаыс унажыксö быдмис öтöрын да йöзын, гортас пыравлiс узьлыны, öтпыр зонкаыс адззис пызан вылiсь винаöн джыння бутылка, и вдруг сылö охота лоис пешлыны этö винасö, кöдö сымда торкис мамыс.

Юыштiс бутылка понсис. Винаыс пым тшакыльöн чепöссис быд вир жилаöт, сьöлöмас, кайис юрас, дзугис думаэсö, олансö, кокньöтiс сьöкыт чассэсö, и только айыс, кöда эз лок война вывсис, вöлi эшö жальжык.

Эта бöрсянь Мишкаыс пешлывлiс винасö часто, кöр кольччывлiс мамыслöн бутылка пыдöсас.

Витöдз классянь одзлань велöтчыны эз туй: колiс мыйкö сёйны и пасьтавны, а мамыс важын ни эз вермы пöткöтны не только зонсö, но и асьсö. Зонка чапкис школа. Мунiс ремесленнöйö. Ремесленнöй бöрсянь пондiс уджавны заводын. Уджалiс бура. Часто ошкисö. Но кöр босьтлывлiс уджалöм понда деньга, сьöлöмыс кыскис бутылка дынö. Юыштас — кокнит, быдöс чулалöмыс öшö, кыдз вöт. Рытнас юыштас — асывнас юрыс висьö, колö вильдны тöннясö. Öтпыр уджавны локтiс кодыш, кайис варитчыны крыша вылö, мезмис сэтчинсянь. Оз помнит, кыдз кыскисö больницаö. Помнитö, что дыр бытшкалiсö, неöтпыр гипсуйтiсö коксö, но кокыс сiдз и кольччис дженытжык.

Не öтiк месяц быглясис больницаас и сетiс аслыс кыв, что одзлань винасö öмас капля оз босьт, гöтрасяс и пондас овны отирысся буржыка, медбы йöзыс видзöтiс да баитiс: «Вот эта Мишка! Видзöтö, кыдз олансö бергöтiс».

Гöтрасис. Босьтiс иньсö кагаöн. Месяц-мöд эз ю, месяц-мöд иньыскöт олiс бура, любитiс ёртсö и йöз кагасö, но вдруг тöдвылас усис, что колö бы юыштны деньга шедтöм бöрын. Юис. Вöрзьöтiс вина гагсö. Одзлань эз пондö ковны не иньыс, не сылöн кагаыс. Уджаланiнас пондылiсö падтыны, но дорйисис: «Мый ме кера? Менчим враччес наркознас веммезöс тшыкöтiсö!»

Янсöтчис иньыскöт. Уджыс эз пыр киас: вежис уджсö öтiклаись, мунiс мöдiклаö. Прокмис висьтасьны ас йывсис вились-виль биография, да сiдз, что и инькаэс бöбасисö Мелехиныс сайö.

Гöтрасис мöдпырись. Янсöтчис сыкöт, а куимöтыс сюйыштiс тюрьмаö сiйöн, что эз ло рад Мелехиныс алименттэзöн, вина юöмнас да тышкасьöмнас.

Тюрьмасяняс шедiс Тиминаö. Тиминаын — Николай Дмитриевич одзö, кöдалö ошшасис аслас оланöн. Вежöртiсö сельсоветын Мишаöс. «Ов, чёрт тэкöт, только нем эн бöбав», — решитiсö» сельсоветас кодя сьöлöмöн, босьтiсö Мишасянь кыв, что сiя чожа пондас уджавны.

И öшис син одзись Лидалöн виль мужикыс, йöртчис аслас инь дынö, юрсö öтöрö оз мыччы.

Кадыс сё чулалiс. Усис ни лым, важын ни мунiсö кайез шоныт странаэзö, а Миша некытчö эз лöсьöтчы мунны. Сылö и сiдз вöлi бур Лида дынын. Лида мортсö вердiс и юкталiс.

Но вдруг öтiк кымöра лунö оланыс дзугсис. Магазинö вайисö вина. Лидалöн мужикыс лун-мöд эз пешлы винасö, и дульыс сöдзис бутылка вылö. Аслас деньгаыс абу. Лидалöн эм, да оз сет. Надз медбöрын лоис инькаыс, быд копейкасö пиннезнас видзö.

— Тырмас! Торкин горшат. Деньгаыс оз пизь, колö шедтыны!

Лида видчыны прокмис, велöтiс одзза мужикыс.

— Сiдз?! — вежсис Мишаыс. — Мый понда ме тэ ордын ола, висьтав?!

— Менö куштан!

Лида öнi пондiс ни вежöртны, что оланыс кымöртчис сы весьтын.

— Вай сто грамм вылö?!

— Кытiсь?!

— Джоджувсис.

— Кытiсь?! Кытшöм джоджулiсь?!.. — повзис Лидаыс. Аслас тырппес и коккес дрöжитiсö. Сэтшöм повзьöм кутчисис Лида бердö, что вдруг сьöлöмыс кöдзалiс, пымалiс кöдзыт ньылöмöн. Лöзöтiсö тырппес. Но некытшöм повзьöм эз вермы мырддьыны сылiсь медбöрья копейкаэсö.

— Вай, ведьма?! — эрзö Миша инькаыс вылö, кулаккесö няпралö.

— Тьфу! — сьöвзис лöгувья Лида мужикыслö синнэзас. — На, сёй, ю!.. Пешлы, кытшöм чöскыт йöзыслöн шедтöмыс, чöскыт али абу менам ньылöмö!.. — Смевмис, боёксялiс инькаыс.

— Тэ сiдз?! Тэ этадз менö видзöтан?.. — Сьöдöтiс мужикыс. — Ме тэныт кин? Кин ме тэныт, висьтав?! — аслас синнэс гудыртчисö.

Лида топ этö и видзчисис:

— Уйс, на!.. Курччöвт. Он эд сёй, он ньылышт, горшат тасася.

— Ы-ых! — чепсасьö мужикыс Лида вылö.

— Пешлан бы тюрьмасö, важын ни эн эд вöв! — дразнитö Лидаыс мужиксö.

— Ме! — рявкнитiс Мишаыс да сöтiс быд вынсис инькаыслö пельбокас.

2

Митрош Таня, Лидалöн соседка, чеччис одз. Дзирс пемыт. Танялö некöр дыр узьны — челядьыс чукöр: кин школаö, кин детсадö котрасьö. Быдöнöс колö вердны, пасьтöтны, иньдыны. Быдöн дынö колö ки да кад. Инькаыс öтнас челядьыс гöгöр: мужикыс уджалö фермаын.

Таня боёка стряпайтiс гор гöгöр и чепöссис деревняö. Кватьсянь кыкьямыс часöдз котрасис деревняöт. Сэтшöм мывкыд инькаыслöн, что асывнас оз вермы пукавны гортас, и удж не удж, быдöн дынö адззö мог, быдöнкöт адззö басни, только орддис соседкасö. Кыкьямыс гöгöр Таня бöр ни локтiс гортас да пондiс бергавны челядьыс дынын. Кинöс иньдiс школаö, кинöс — детсадö. Пода дынын часыс эз чулав.

Дзимлясис-стряпайтiс Таня гортас, а аслас синнэс соседкаыс öшынö видзöтöны: дырöв оз öзйы Лидаыслöн биыс. Мыля бы сiдз? Любитö узьны Танялöн соседкаыс, да не этадз.

Декабрьскöй ойыс жагвыв чулалiс. Дыша югдiс.

Дасöт час гöгöр югдö досповна, а Лидалöн трубасис тшыныс сё оз пет. Öшыннэс кынöсь. Öтöрсянь кын öшын пыр нем оз тыдав. Танялöн öшынö и син, сьöлöмыс места оз адззы.

Терпитiс одиннадцатьöдз. Одиннадцать лоис сэтшöм югыт, кытшöм овлö миян кымöра декабрь лунö, топ гожумся меддженыт ойö.

Лида посодз дынын пон след эз вöв, и тшыныс керкусис эз пет.

Ештöтчис Таняыс. Колiс бы котрасьны магазинö, школаö да сельсоветö, кыскис Танясö сьöлöмыс отир коласö, но мыйкö видзис гортас, öшын одзас.

Двенадцатöй часын Таня терпитны эз ни вермы. Чапкис пельпоннэс вылö шаль и петiс соседкаыс ордö.

Кайис сiя посöдзас кокнита. Тангис ыбöсас — ыбöсыс эз вöв игана, дзуркнитiс кокнита.

Сьöлöмыс дрöгнитiс, коккес небзисö. Некин эз пет паныт. Жагвыв, полöмöн осьтiс керку ыбöссö. Керкуыс ловзисис шоныт руöн, но эз вöв сiя чöскыт дукыс, кöр асывсянь лонтöны гор да пуöны сёян. Джоджыс Лидалöн вöлi ёгья да сьöд, и патшкис табак тшынöн, не кыдз аслас Таняыслöн, кöдалöн мужикыс эз курит.

— Лида! — полöмöн ыкöстiс ыбöс колассяняс. — Лида! Рыжöй ерекнича!

Керкуыс вöлi пустöй, и некин нем эз шу Танялö паныт. Дрöжитiс ни Танялöн сьöлöмыс, вылас кöдзыт ва киссис. Вежöртiс, что мыйкö вермис лоны невежöртана и вöвлытöм Лида оланын. Но сiя эз вермы бергöтчыны, пышшыны керкусис, ась и полiс. Сьöлöмыс кыскис керку пытшкас: охота вöлi тöдны, мыля эз шыась соседкаыс.

Полöмöн шагньöвтiс керку пытшкас, порог дорсянь веськыта пызан дынöдз. Шаггес горöн вартiсö джодж бердас. Некин керкуас эз вöв. Полöмöн мунiс комас забор саяс. Сьöлöмыс вартiс кöсичаэзас, чеччалiс горшас, косьмис öмас дульыс. Соседкаыс гортас эз вöв, только керкуыс полöтöмöн шыасис коккес увтын.

Комас джодж шöрас валяйтчисö тарелка торрез да вирöсь бинтжуг.

— Лида! — эшö öтпыр Таняыс ыкöстiс соседкасö, но сылö некин паныт эз шыась.

Оз тöд, кыдз петiс керкусис, кыдз пасьтöг котöртiс кöдзыт лым кузя и мыйкö ыксiс, бытьтö мортöс вийисö. Смев Таняыс баснинас, но повзис соседкаыс керкуись, кöда сиротаöн сулалiс улица вылын.

Саймис сельсоветын: сулалiс предыс одзын, кöда чочкоммыштöм, öшöм, мыйкö юасис Таняыслiсь. Вöлi предыс война вылын, адззылiс берсясö, бура тöдiс гортiсь отирсö, но эз видзчись, что этадз вермас лоны деревняас.

— Адззам! — чорыта висьталiс предыс да кутчисис телефон трубка бердö, а Таняыс эта коста котöртiс ни улица кузя да юöртiс отирсö, что вийисö мортöс. Кинöс да кин вийис — вежöртны вöлi сьöкыт.

Милицияын дежуритiс Шапкин Павел Егорович.

— Кывзö милиция, — висьталiс дежурнöйыс телефонас, но, тыдалö, эз вежöртö сiйö и дугдывтöг ыксiсö милициясö. Кöр Павел Егорович горöтiс, что сiя кывзö, только сэк дежурнöйсö кылiсö деревняас. Звонитiс Тиминаись предыс. Баитiс тэрмасьöмöн да сорасьöмöн.

Кывзiс Павел Егорович и медодз нем эз вежöрт, а кöр вежöртiс, что öшис морт, юалiс шуткаöн:

— А, может, сiя мунiс тшакьявны?

Любитiс шуткасö милиционерыс и öнi шутканас бурмöтiс бы сельсоветсис предсö.

— Кытшöм тшакьялöм, тöвнас?! — обидитчисö деревняас.

— А тiйö бура тöдат, что мортыс абу гортын? Эз я кытöнкö йöзын узь?

Предыс эшö öтпыр висьталiс, кыдз öшис Панова Лидия Павловна. Кывзiс мöдыс баснисö, кывзiс да думайтiс, мый вермис лоны Тиминаын. Куритiс.

Павел Егорович тöдiс ни, что Тиминаö ковсяс мунны сылö: сэтчин старшöй лейтенантыслöн участок.

3

Лымьялiс. Ловзисьлiс тöлок, гардiс небыт лымсö, волькöтiс чочком шебрассö му вылiсь. Лöньлiс. Лöньлiс да вились öдззывлiс падеритны.

Туй вылас чулалiс дженыт тöвся луныс: местаыс не матын — сизимдас километр, туйсö тыртiс лымыс. Неöтпыр буксуйтiсö, пыкисö машинасö пельпоннэзнаныс, а кадыс эз видзчись. Деревняö локтiсö биэзöн.

Медодз пырисö сельсоветö. Сельсовет — деревняын юр. Сельсоветын решайтсьöны оланiсь быдöс вопроссэз.

Предыс не том ни, чукыррез рожабан вылас — увья пиняöн пинялöмась, пужмалöм юрсиыс да горбыльтчыштöм мортыс. Синнэс мыдзöсь, голосыс сибдыштöм. Места оз адззы. Думайтö мортыс йöз понда.

Здоровайтчис участковöйыс, чапкис юр вывсис шапкасö.

— Мый тiян, Николай Дмитриевич?

— Нем ог тöд. Торксис мортыс. Видзöтат асьныт, а то ме öши. Конечно, ветлi да видзöтi керкусö. Может, эз ков, но сьöлöмö эз терпит.

— Мый сэтчин?

Предыс только пельпоннэзнас жмитыштiс, висьталiс:

— Абу гортас, некытöн абу...

— Видзöтам, — висьталiс Павел Егорович, а ачыс думайтö, что эстöн уджыс тырмас. Серöмтчис гажöн: — Милиция керас!

Серöмтчыштiс и предыс — гажмис: босьтiсö сы пельпоннэз вылiсь горесö.

— Пондам уджавны, — висьталiс Павел Егорович аслас ёртлö. Шынь керис Бражкиныс. Сiя локтiс старшöй лейтенантыскöт деревняö. Талун практика вылын, может, ашын лоас участковöйöн Павел Егоровичыс местын. Начальникыс не весись кольлалiс: «Видзöт да велöтчы».

— Милиция? — думайтö горöн томжыкыс. — Милиционерыс сэтшöм жö морт... Только совестьтö колö новйöтны не карманын, а сьöлöмын... медбы не öштыны.

— Золотöйöсь кыввет, — согласитчис старшöй лейтенантыс, горöтчис: — Совесть, совесть... Мый сэтшöм совесть? Кыдз думайтан, Борис Михайлович?

— Натьтö, колö лоны честнöйöн.

А ачыс думайтö пöрисьжык ёртыс йылiсь, что сiя быд местын, колö и оз ков, адззö ассис идея, и пондас быд шагын веськöтлыны, кыдз кагаокöс.

Но Павел Егоровичыс висьталiс да вунöтчис, эз думайт томжык ёртыс вылын не серавны, не велöтны — дразнитны быд шагас.

— Сiдз, Борис Михайлович, миянлö тэкöт татöн гажтöм оз ло!

А Борис Михайловичлö гажтöм кодь. Мортыс городскöй. Эз велав овны деревняын, кöр вöрас и кайез оз горалö, мортыслöн басни оз кыв. Шушкö мыйкö ас кежас вöрыс. Но уджавны колö.

Том милиционерыс унасö оз сёрнит. Баитö нюжвылика, небытика, вöснит голосöн. Баитiкас вылö етша видзöтö, дзик полö обидитны мортсö. Мöдiк бы висьталiс: «Чатырöнжык юртö видз, не свадьба вылö лöсьöтчан!» Но Павел Егоровичыс ёртыс йылiсь думайтö: «Петас эта зонкаись уджалiсьыс, только сет кадсö, мыччав уджсö да öзты сьöлöмсö!»

Петас Бражкинсис офицерыс. «А мый петас талуння уджын, вермас я керны кыдз колö ассис уджсö?» — думаэс гарйисьöны юрас.

Милиционерыс тöдiс Тиминаись отирсö. Быдмис сiя татöн. Чулалiсö деревняас челядься годдэз, кöднö некöр он вунöт.

Одза-одз колис мамыс йöз сьöлöм бердö, и шоныт да гажа кывсö кылiс етша. Быдмис — ошшасьны немöн. Умöлик, учöтик, винерик да зырымöсь. Не вылас, не кокас. Виль нинкöммесö кöмавлiс праздниккез коста, виль паськöмсö эз адззывлы. Кыт тшыг, кыт пöт, а кытöн и кынмис — быдöс сы бердын, но отирыс эз тальö кок увтаныс, эз сьöлалö, эз кленитö бöрсяняс, а пыр отсалiсö, кин мыйöн вермис. Зорамис отир коласын. Ласковöй ним и вöлi — Пашка. А öнi кин? Öнi старшöй лейтенант. Асланым милиционерыс, асланым мортыс. Сы дынö жö: горенас и гажнас. Эшö бы отирыс эз тöдö Павел Егоровичсö, али сiя отирсö!

Тöдiс милиционерыс и Лидасö. Лидаыс сысся томжык. Велöтчис не сыкöт и быдмис мöдiккезкöт, но тöдiс Лидалiсь олансö. Мыйöнкö инькаыслöн оланыс вачкисис Павел Егоровичыс олан вылö: сiдз жö одз кольччис мамыс сьöрись, сiдз жö быдмис йöз отир коласын.

Пырис юрö Лидаыс. Син одзись оз вешшы сылöн оланыс, и некыдз оз веритсьы, что вермас торксьыны кытчöкö инькаыс.

Эна думаэзöн участковöйыс иньдöтчис Лида ордö.

Гажöн видзöтчисö деревня вылын керкуэз югыт öшыннэзöн, и только дорись керкуыс сайласис пемыт вуджöрöн, топ дзебсисис йöз син одзись. Увтыштлiсö поннэз йöз отир вылö, патшкис тшын дукöн — лонтiсисö печкаэз, но эта кузь тöвся рытыс етша кинöс пукöтiс гортас: отирыс гардчисö клуб да сельсовет гöгöр. Быдöн тöдiс бы Лидалiсь судьбасö, быдöнлö охота вöлi аслыс бы адззывны преступниксö. Быдöн тöдiс и эз, что Лидасö вийисö, кытчöкö кыскисö деревнясис да тыртiсö лымас. Только некин эз тöд, кытiсь кошшыны преступниксö. Павел Егоровичыс кывзiс и эз этö баснисö. Колiс кывзыны: вермис лоны мыйкö быль эта басниын. Но быдöс вылö веритны тожö эз туй: любитöны деревняас баитыштны, гутсис слонсö быдтыны.

Понятöйез адззисисö чожа.

И понятöйез тöдiсö, что Лидасö торкис жöникыс. Некытшöм мöдiк басни эта йылiсь эз мун. Миша — бандит, тюремщик; баитiсö сы йылiсь веськыта, повтöг, топ Мишаыс сулалiс суд одзын и кывзiс ас вылас смертнöй приговор. Но Мишаыс эз вöв не син одзын, не деревняас — эта тожö волнуйтiс деревенсасö.

Милиционеррез понятöйезкöт иньдöтчисö Лида керкуö.

Посодз да керку гöгöр вöлiсö сымда следдэс, что вежöртны ны сьöртi нем эз туй: отирыс бура ни нёджжалöмась пустöй керкусö, кöда патшкис олантöм ыркыт руöн. Керкуас син вылö эз усь преступниклöн следыс, кöда бы веськыта висьталiс да мыччалiс преступникыс вылö. Только комас сунилабич ¹вылын валяйтчис вирöсь бинтжуг да джоджын — жугалöм тарелка торрез.

Милиционеррез омöн видзöтiсö керку пытшксö. Меряйтiсö, лыддисö, пöлялiсö, гуддисö быд пельöс — нем эз адззö. Быдöс вöлi тэчöм хозяйкаыс киэзöн. Нельки пальтоыс, кöдöн Лидаыс быд лун ветлöтiс деревняöт, öшалiс комас стена бердын, и пимиэс, кöднöн пыр адззывлiсö Лидасö, косьмисö сайкалöм гор вылас. Понятöйез сiдзжö мыччалiсö шаль вылö, кöда öшалiс забор бердын и кöдöн хозяйкаыс ветлöтiс уджавны.

Павел Егоровичлö син вылас усис пластмассовöй шкатулка, кöда вöлi ен джаджйын. Шкатулка пытшкын вöлi быдöс, мый мешайтчис хозяйкаыслö ки увтас: киззез, ем да сунис, кнопкаэз, булавкаэз, кынымкö кöртовöй деньга, но нем сэтшöм донаыс да кодяыс эз вöв.

Может, золотöй предметтэз, уна деньга? Вермас и лоны, что олiс öтнас инькаыс и вöлiсö сылöн золотöй предметтэз, мый вылö лудiсö киэс преступниклöн? Оз веритсьы. Лида уджалiс пекарняын, босьтiс шестьдесятся невна унажык — золотонас он заптiсь. Да вöлi я Лидаыслöн деньгаыс?

— Ёрт лейтенант, — дзугис думаэсö Павел Егоровичлiсь том милиционерыс, кöр нiя керкуас кольччисö кыкöн, — кин вермис вийны Лидасö? — содтiс: — Натьтö, мужикыс. Кыдз думайтан? Отирыслö эд тожö колö веритны.

Баитö Бражкиныс, ачыс гöрдöтыштiс, топ повзис аслас басниись.

— Вермас, — висьталiс старшöй лейтенантыс, а аслас думаэс мöдöрын. Думайтö Павел Егоровичыс, мый понда вермисö вийны Лидасö, и вийисö я. И вермис я керны этö Мелехиныс, ась сiя и локтiс тюрьмаись?

Думаэс споритöны öтамöдныскöт, а истинаыс абу. И отирыс син одзас, быдöн видзчисьö милиционерсянь правильнöй решеннё да преступникöс. Он адззы — пондасö бöрсяняс кöритны: «Вот милицияыс! Кытöн колö — оз адззö!..»

Усьö тöдвылас, кыдз быдмис ачыс, йöзлiсь юасьтöг ёгсö эз вöрзьöт, талунöдз оз вермы небны телевизор, кöдö важын ни небö бы: некыдз оз öксьы киас деньгаыс.

Деньга, деньга... Конечно, деньга понда отирыс торкисö öтамöднысö и öнi овлö — торкöны, но миян Советскöй государствоын отирыс лунiсь лунö олö буржыка и деньга понда преступленнёэз етшажык. А мымда вермис лоны эта деньгаыс Лидалöн?

Вились думайтö и вились локтö, что деньга понда эстöн мортсö некин эз вöрöт.

Эшö öтпыр видзöтiс керку пытшксö, петалiс карта вылö порсь дынö, кöда куйлiс гид бокын да ружтыштлiс и эз думайт тöждiсьны хозяйкаыс понда. И карта пытшкас преступниклöн следыс эз вöв.

Вились иньдöтчисö сельсоветö. Сельсовет кык этажа керкуын. Сэтöн и сельсоветыс, и почтаыс, и правленнёыс колхозлöн — быдöс деревняись властьыс öтлаын. Сельсовет гöгöр сё гардчö отир. Томмез и пöриссез здоровайтчöны Павел Егоровичкöт, юасьöны, висьтасьöны. Сэтшöм обычай деревняын: «Кытчö мунан?» — «Дзебсьыны» — «Кинöс дзебны?» — «Каньным черпезьдiс». Адззöны, что мортыс мунö черöн, сермöтöн вöв дынö, но юаласö, топ оз адззö. Эн висьтав — бöрсянят пондасö видны, мортас озö пондö пуктыны. Кин бы тэ эн вöв, а баит отирыскöт. И Павел Егорович кыв-мöдöн баитö быдöнкöт, кин сыкöт пондöтас басни.

Уна ни рытыс, но предыс сельсоветсис сё татöн жö. Оз узьсьы, оз шоччиссьы. Сьöлöмыс висьö.

— Павел Егорович, ме вунöтi, — висьталö предыс виноватöя, — вунöтi сетны этö часысö тiянлö. Лидаыс пызан вылiсь босьтi. — Кыскö морос бердсис кармансис часы. Часыыс — «Звезда». Важ, нетуяна. Аслас инькалöн вöлi сэтшöмыс: новйис, новйис и эз вермы бырöтны — подаритiс нылыслö. — Часыыслöн стеклоыс паз потласьöм. А стрелкаэс местааныс. Сулалöны точнöя: вит минута первöй час вылын, ежели йöз отир эз бергöтлö стрелкаэсö...

Часыыс козьналiс виль думаэз, но ны коласiсь öтiк дума эз вермы висьтавны точнöя, мый вöлi Лида керкуын.

Жугалöм тарелка, вирöсь бинт, жугалöм часы... Грабительыс бы и жугалöмсö кыскис. Натьтö, некин йöзыс Лида ордö эз пырав, и ковсяс кутчисьны медодз жöникыс бердö.

— Думайта, что тэ прав, — висьталiс Павел Егорович том ёртыслö, кöр нiя кольччисö кыкöн сельсоветас, — уликаэз кышасьöны Мелехиныс бердö. Пемыт душаыс эта Мелехинлöн: то тюрьма, то гöтрасьö тöдтöм инькакöт и некытöн оз уджав. Сельсоветын баитöм кыдз хвастун али бöбöв, а, может, и бöбöввесö кошшö?.. И кыдз только вермис сэтшöм мортыс кокнита сюртнявны Лидасö? Ой и инькаэз!.. — гажöн серöмтчис участковöйыс.

— Не быдöнныслöн öткодьöсь, — гöрдöтыштiс Бражкин.

— Асланым невестаэз йылiсь ог пондö, — хитрöя видзöтыштiс старшöй лейтенантыс аслас ёрт вылö, — не быд мортыс öткодь.

— Хитрöй зверьыс, вердчис инькаыс ордын, олiс и пышшис. Кошшы, кытöн... Ми эстöн ог тöдö, мый керны, а сiя кытöнкö ысласьö да сосас сералö.

— Поди, оз серав? Поди, сьöлöм вылас гажыс етша? Тöдö жö, что сы сьöрын пондасö нюкьясьны, и шедас! — чорыта висьталiс Бражкиныс. — Шедас эд, Павел Егорович, из увтас оз пыр. Отирыс баитöны, что кöиныс мымда бы эз бунтуйт, но пантасьö вöралiсьыслö.

Кадыс ойшöрлань ни бергöтчö. Павел Егорович осьтыштiс öмсö, горöтчис:

— Гортын узьöны ни.

— Миянлö некöр, — серöмтчис Бражкин

— Узям пöт мöдöр югытас, — серöмтчис старшöй лейтенантыс. — Олан, мыля тэ мортыслö вексö дженытö сетан? Узьны уна пондам, Борис Михайлович, няньнас оз пондö вердны.

— Адззам! — чорыта висьталiс Бражкиныс.

— Может, огö! — веськыта видзöтö синнэзас ёртыслö Павел Егорович. Бергöтлö баснисö, кыдз додь шыбыльын: вермы видзсьыны, а то пöрöтас. — Висьтав, Борис, мый вылö тэ мунiн милицияас?

Öшыштiс том ёртыс: эз видзчись сэтшöм вопроссö, эз вежöрт участковöйсö. То баитö — шутитö, кыдз том деревенскöй зонка, то гардыштас — синнэзнат кваркышав.

— Ог тöд, — висьталiс Бражкиныс.

— Эх, том олан! Мöдпöв бы овны. Но колiс бы овны кыдзкö не сiдз... Буржыка бы, медбы кулiн, дак отирыс дыржык эз вунöтö.

— Сiдз эд оз вунöтö.

— Кин тöдö. Но ме бы, Борис Михайлович, эшö велöтчи. Кувтöдз бы велöтча, медбы оланыс вöлi подвиг.

Подвиг! Кöр эшö Бражкиныс велöтчис, думайтiс ни эта подвиг йылiсь. Думайтiс, что медодзза преступленнё осьттöн сiя керас подвиг, а Павел Егоровичыс топ сералö эта дума вылын. Тöдö Борислiсь думаэсö.

— А тэ, Павел Егорович, подвигсö керлiн? — несмелöя юалiс Бражкиныс.

— Син одзат подвиггес, — серöмтчис старшöй лейтенантыс, — быд лун подвиг: коддэскöт тышкасям, кинлiсь киэсö кöрталам, кинлiсь кöдзыт ваöн юрсö миськалам. Подвиггес миян уджын кольччисö революция годдэзö. Вот сэтчин милицияыс уджалiс. И öнi уджавны колö. Оз вермö отирыс овны эшö миян коддестöг. И любитны, натьтö, колö этö уджсö. Он любит — сюйышт коскат чер, унажык добросö отирыслö керан. Быдлаын колö уджавны. А талун шоччисьны пондам, — бергöтiс баснисö: — Менам мыйкö коскаэз висьöны, натьтö, погоддяыс тшыксяс.

Видзöтыштiс Бражкиныс ёртыс вылö, серöмтчыштiс: шутитö «коскаэз висьöны», но нем эз висьтав.

Узисö сельсоветын пызан да стуллэз вылын.

4

Одз асывсянь, пемытöн, кутчисисö удж бердö. Пондöтчисö юасьны Мизёва Татьяна Ивановнасянь, кыдз эшö тöдöны деревня вылас этö инькасö, Митрош Танясянь (дедыссянь мортыслöн нимыс кыссьö).

Таня винерик, кöсыник да кокнит кок вылас, быркнитiс сельсоветö, здоровайтчис да юасьтöг-висьтасьтöг лякасис-пуксис стул вылö ыбöс дорас. Чужöмбан вылас том, видзöтö веськыта, хитрöйкодя, некöр оз сорась не думанас, не баснинас. Вит челядьыс топ только томтöмась инькасö: гажа да том вирок орсö чужöмбан вылас.

— Здравствуйте, Татьяна Ивановна! — гажöн здоровайтчис Павел Егоровичыс инькаыскöт.

— Здравствуйте, Павел Егорович!— здоровайтчис Таняыс и кокнита серöмтчыштiс. — Тэ кытчö сiдз кызан, Павел Егорович?

— Весь ола, нянь сёя — вот и кыза, — эз обидитчы, шынньöвтiс кыдз ёртлö, — а тэ сё вöсняман?

— Вита челядьö — вот и вöсняма, не мужиклöн оланыс, — серöмтчис Таняыс.

— Здоровöсь челядьыт?

— Мый нылö лоас? Быдмöны, — содтiс гажöн: — Не кöркöся оланыс, фельдшерыс быд лун котрасьö.

— Быдмасö, отир лоасö.

— Да нiя, кыдз бессэз, бöбöсь. Может, быдмасö да чапкасö, вунöтасö.

— Оз чапкö. Мамнысö оз вунöтö

— А тiян кыдз, Павел Егорович?

— Сэтшöмöсь жö.

— Кужам ми тiянкöт быдтiсьнытö, — сералö Таня. Мунö басни участковöй да Мизёва коласын, не кыдз милиционеркöт: пантасисö челядься ёрттэз.

— Вот мый, Татьяна Ивановна, колö бы миянлö тэсянь отсöт.

— Ме тiян одзын.

— Мый эшö соседкаыт йылiсь тöдан? Тi эд оча-паныт олiт.

— Соседкаöс! — гажöн висьталiс Таняыс. — Ме сiйö ог тöд?! Да сiя...

— Сулалö, Татьяна Ивановна, — шуис Мизёвалö Бражкиныс, — миянлö колö гижны.

— Гижö, гижö, кылыс не кай: лэбзяс — бöр он кут.

— Фамиллё, ним, айним?

— Менам? Да Павел Егоровичыс менö тöдö, — сярзьыштiс Мизёваыс, — сiдз эд, Павел Егорович?

Вöлi эта басниын простöй ответ деревенскöй инькалöн, кöда эз велав не милиция дынö, не следствие дынö.

— Тöда, Татьяна Ивановна, но эта колö том мортыслö. Документö.

— А ме тай сiйö и баита, — согласитчис Таняыс. Висьталiс нимсö и айнимсö, фамиллёсö и вдруг юалiс: — А эта кин тiян? Начальник?

— Он адззы, месся ыджытжык, менам юрö только пельпоннэсви, — висьталiс Павел Егоровичыс.

Люшмыштiс Таняыс: етша пантавлiс городiсь ыджыт начальствосö. Пондöтчис басни следовательлöн свидетелькöт. Свидетельыс пöрисьжык, следовательыс томжык.

Мизёва висьтасис быдöс. Висьтасис честнöя, подробнöя, быдöс, мый тöдiс Лида йылiсь. Мизёвалö туйис завидуйтны. Сы памятьö тэчöм быд луныс, неделяэз, кöдна йитсисö годдэзö. Эта памятись нельки петiсö чассэз, кöдна чулалiсö не таво и не мöйму.

Сярзис-разис Таня Лидалiсь олансö, кыдз книгаись лыддьöтiс, и петiс, что Лидалöн оланыс не сэтшöм. басöк, что весись сiдз сiйö отирыс жалейтöны.

Таня баитiс дугдывтöг. Лейтенантыс кывзiс, гижны эз ешты. Мукöдпыр падтыштiс бы баснисö инькаыслiсь, но сiя дзик эз кыв голоссö, сё сярзис-баитiс. Бражкиныс гöрдöтыштлiс да гогинялiс юрнас, а Павел Егоровичлöн синнэс шыннялiсö, и нем эз шу. Сiя тöдiс Танясö, тöдiс, мый сы басниись босьтны, а мый лэдзны бокö.

Кöр Таняыс потiс баснинас, кöр дугдiс недыр кежö баитны, Бражкиныс юалiс:

— Мый тiйö думайтат, кин вермис пыравны Лидаыс ордö?

— Ме эг адззыв, но тöда. Ме быдöс тöда суседкаöлiсь олансö. Кытшöм ачыс, сэтшöмö жö вайöтлiс и мужиксö. Абу дак абу сэтшöм мужикыс, ме бы сыкöт пызан саяс эг пуксьы и бокас эг вод. Сiдз рыжöйлö и колö. Еныс адззис. Эз ни тöд, кытчö асьсö пуктыны, миян кодьыскöт эз куж кывсö горöтчыны. Мусö кок увтсис эз адззы.

— Бур, — висьталiс участковöйыс, — вежöртiм.

— А разь не сiдз? — эз вермы дугдыны Таняыс. — Не весись тай баитöны: каньыс поныскöт оз öтлаасьö.

Мизёваыс кыдз кужис кулитiс соседкасö. Тöдчис, что оланнас кык инька абу лöсялöмась.

— Вовлiсьлiт?

— Оча морос. Менам челядьыс бöбöсь, а сылöн некин абу. Дзескамис челядьыс кузя: то сылiсь öшын жугдасö, то садниксис ¹морков гусяласö. Весись увтiс менам челядь вылö. Мый абу, дак абу, весись ог висьтав.

— Медбöрья рытас... Адззылiн мыйкö керку дынсис?

— Кöда рытö? — эз вежöрт Таняыс.

— Лидаыс öшан панытö?

Серöмтчис Таняыс, лöсьöтыштiс юр вывсис чышьянсö.

— Биыс вöлi. Кылi: шумитiсö керкуас. Нылöн эд быд рыт спектак, винатöг кадсö эз чулöтö. Гажöн олiсö, не миян моз. Ми быд копейкасö ог тöдö кыдз видзны, а Лидаыс мый шедтiс — сiйö и аслыс.

— Унажыксö нем од висьталö?

— Мый весись лёбнытö.

— Спасибо, Татьяна Ивановна. Пондат ковны — эшö пантасям.

Петiс сельсоветiсь Таняыс кокнит да гордöй походкаöн.

Юасисö сельсоветiсь сторожлiсь, колхознöй складовщиклiсь, кöда рытнас сёрöн лэдзöм складдэзiсь фермаö пизь, но некин нем бурсö эз висьтав. И Лидаыс гортас эз мыччись. Павел Егорович эшö думанас надейтчис, что сiя кытчöкö мунiс и вдруг локтас, но луныс чулалiс ни, а Панова эз вöв.

5

Узьны иньдöтчисö вежайыс ордö. Год-мöд Павел Егоровичыс эз вöв вежайыс ордын, и сьöлöмыс кыскис сы дынö. Старикыс старшöй лейтенантсö пантавлiс кыдз зонöс.

Вежайыс пöрись, но эшö крепыт. Топыт и кокнит кок вылас. Весись етша олö. Талун нинкöм кыйö. Некин ни нинкöммесö деревняас оз новйы, а сiя кыйö. Тошыс кыдз ур поз: пырейись лякöм, невна рожабаннэс тыдалöны да нырыс гöрд видзö.

Бражкиныс кывзiс стариклiсь басни, гажöн шыннялiс, дивуйтчис мортыс вылö, кöда, кöть и вöлi пöрись, но душанас том, простöй деревенскöй мывкыда, и шоныта панталiс милиционерресö.

Кöр мунiс Бражкиныс деревняö, сылöн вöлiсö думаэз, кытöн сiя пондас ойесö джендöтны тöдтöм отир коласын, мый пондас сёйны? Но эта решитчис простöя: локтiс старикыс ордö, топ тöдсаöсь учöтсянь.

Старикыс ордын вöлi деревенскöй кокнит воздух, кöда овлö только пуовöй керкуын, и кöр керкусö видзöны сöстöма.

Старушкаыс лэдзчис гор вылiсь, здоровайтчис гöссескöт, сэк жö пондiс котрасьны комын.

Пызан вылас лоис сёян: сола тшак, ягöд, йöв. Керкуыс тырис гожумся руöн.

Пуксисö пызан сайö. Кысянькö пызан вылын лоис бутылка да рюмкаэз.

— Юыштам, челядь, — висьталiс старикыс.

— Огö, вежай.

— А тэ мый вылö локтiн ме ордö, кытшöм родiсь чужин?

— Служба, вежай.

— Служба да дружба... Хе, а тэ менö кöркö кодувьям öтöрсис адззылiн, ёрт милиционер? Эн эд. А тэ шедан, дак сьöвтала, кыдз бöб ошöс, и дзеба лабич увтас!.. Да и дозыс менам — рюмка. Нагладь милиция понда видза, — гажöн мигнитiс старухаыслö хозяиныс.

Старикыс кисьтлiс винасö рюмкаэзö, плеснитiс öмас, ружтыштiс да чышкыштiс тырппесö.

— Ох, вежай! — жмитiс бердас вежайсö Павел Егоровичыс.

— Видзöт, вежайыт умöля олiс, но аслас уджöн! — гордöя висьталiс старикыс. — Некинöс немöн эн позорит. Не уджнас, не кывнас. Висьтав, зон, разь ме тэнö умöляс велöтi?

— Ог тöд.

Старикыс юыштiс и чожа коддзыштiс. Тöдчис, что винасö пешлö нечасто.

— Некöр умöляс эн велöт! — висьталiс Павел Егоровичыс. — Сы понда ме тэнö и любита.

Бражкиныс пукалiс да пешлыштлiс деревенскöй сёянсö. Сылö гленитчис и сёяныс, и старикыслöн басниыс, и сiя, кыдз старикыс простöя баитö.

— Ой, Пашка, — пондiс чышкыны синваэсö вежай гöтырыс. Эз пешлы винасö старушкаыс, только бергалiс пызан гöгöрас да быд минутаö тшöктiс сёйны гöссесö. Сiя баитiс. Тэрмасис баснинас, кöдаын вöлi одзза оланыс. Сёрнитiс мортыс, кыдз сьöкыта овсис, кыдз панталiс революциясö, кыдз öтлаасисö колхоззэзö и томсянь пöрисьмытöдз эз вермы овны уджавтöг. И пыр олiсö-пессисö. А öнi оланыс лоис сэтшöм бур, что кулöмыс йылiсь оз думайт.

Эз вунöт старушкаыс и сiйö, кыдз быдмис Павел Егоровичыс. Котрасис вочöм вешьянокöн, важ шабурокöн, дзонь нинкöмсö кокас эз кöмавлы. Пыр кынмöм, зырымöсь да тшыг — сэтшöм син одзын Пашкаыс.

— Помнитан, Паша, кыдз мамыткöт прощайтчин? — чышкö старушка синваэсö.

— Кытшöм сiя мамыс, вежайгöтыра? — сьöкыта юалö старшöй лейтенантыс.

Мам! Некин абу сы кодьыс свет вылас. И эна кыввез бöрсянь пызан саяс лöнис басниыс. Томлö и пöрисьлö тöдвыланыс усис мам. Быдöс оланыс öтiк минутаöн лэбзис син одзын.

Кытшöм бы вöлi мамыскöт оланыс Павел Егоровичыслöн — оз тöд, но вöлi бы сiя счастливöй.

— Тырмас, старуха, — öлiс вежайыс иньсö.

— Ась баитö, — висьталö Павел Егоровичыс. — Басниыс стариккеслöн шонтö, йиджö сьöлöмöдз. Некин сiдз сiйö оз вежöрт, кыдз эна стариккес.

Думайтö Павел Егоровичыс оланыс йылiсь, и аслыс оз веритсьы, что сiя сэтшöм томöн да учöтöн гардчис вöв гöгöр, пинялiс и кыскалiс сю — уджалiс сьöкыт удж, кöдö öнi том отирыс и вöтöн оз вöтасьö: быдöс керö машина. Кыдз тэ вунöтан сiйö? Кöр пондiс зорамны, пондiс вердны да пасьтöтны асьсö, пондöтчис война. Пашаыс эз вачкись аслас ёрттэз вылö: винерик да учöт. Но и сiя мунiс война вылö.

Быдöнлö войнаыс — война, но не быдöнлö сiя дöнзьö öтмоз. Войнаыс Павел Егоровичсö быдтiс, зорöтiс. Смертьыс да гореыс война вылас мортсö пöрисьтiсö, колисö челядься олансö, кöда вöлi да эз вöв. И öнi оз вежöрт: вöлi я сылöн челядься кадыс? И оз вежöрт, кыдз петiс ловйöн война вывсис. Может, мортыслöн сэтшöм счастье, судьба? Кин сiйö тöдö.

Война вылас жö комсомолец Шапкинöс примитiсö партияö. Эта вöлi мортыс оланын öтпыр, кыдз чужан лун, и вунöтны сiйö оз туй.

Партияö комсомолецöс примитiсö, кыдз смев солдатöс. Бура помнитö лунсö: вöлi кымöра, вотясис — лöсьöтчис зэрны. Матын гымалiс бой. Бойезын ранитöм войсковöй часттез врагсö видзисö медбöрья вынöн. Полкыс лöсьöтчис вежны мыдз солдаттэзöс. Командиррез баитiсö бой одзын асланыс боеццезкöт. Кöззэз увтын мунiс партийнöй собраннё öтiк вопросöн, кöда талун вöлi медглавнöй: сувтöтны эта рубеж вылын врагсö, не лэдзны одзлань тальны роднöй мусö да олансö. Сэтöн жö партияö примитiсö том комсомолеццезöс.

Партияö достойнöй вöлi сiя, кöда мыччалiс асьсö храбрöйöн, эз повзьы врагсис, кöда, если колiс, думайттöг сетiс Родина понда ассис олансö. Шапкиныс вöлi ни не öтiк бойын. Пашасö тöдiсö старшинаыс, ротаись командирыс, тöдiсö пöрисьжык ёрттэс-коммунисттэс. Бойын врагкöт тышкасьöм — вöлi рекомендация том комсомолецлö, и ёрттэс голосуйтiсö Пашка понда.

Партийнöй собраннё бöрсянь полкыс сувтiс неыджыт шутёмок вылö и сетiс чорыт солдатскöй клятва: врагкöт тышкасьны медбöрьяись ловзисьтöдз! Сувтöтны врагсö эта рубеж вылын!

Собраннё вывсянь веськыта мунiсö бойö.

Лун гымалiс бойыс. Рытнас врагыс лэдзис уна танккез.

— Шапкин! Снаряддэз! — ыксö батареялöн командир.

Паша машинаöн вайö снаряддэз.

— Шапкин, раненöйесö!

Паша петкöтö аслас машинаöн бойись раненöйезöс.

Гымалö бойыс, зэгйö мусö, летö воздухсö, кöдзö смерть. Дзебсисьны эта бойись некытчö.

Чеччалö Пашалöн машина гöппез вывтi, гардö колесоэс увтын буссö, кыскö солдат машинаöн раненöйезöс. Вдруг машина одзас паськалiс муыс, ловзисис пым руöн, зубыта вачкис морос кузя, и шондiыс разьсис бичиррез вылö.

Лöнь. Асыв. Пашка осьтiс синнэсö. Невежöртана вын пыкис сiйö му бердас, зэлöтiс и эз сет лолавны. Кажитчис, что муыс вожасис мортыс вылö, пöдтiс, чеглалiс коскаэсö. Не вöрзьыны — кулан.

Эз бы кув. Адззис шондiсö.

Жагвыв лэбтiсис. Быд вöрзьöтчöмыс нетшкис да бытшкалiс телосö, вартiс юрвеммезас. Гичыралiс пиннесö, пиннес коласын изiс зубытсö. Пуксис. Эз тырмы воздухыс. Шоччисьöв-керис, видзöтiс ас гöгöрас.

Веськыта пöрöм кыдзок вылын пукалiс рака. Кайыс паськыта осьтлiс öмсö, дюттясис, тыдалö, карзiс.

Эз кыв кайыслiсь карзöмсö. Пырис дума, что эта кайыс лöсьöтчö кокавны синнэсö. Ловья вывтöттяс! Кöр сылö вöлi восемнадцатöй год! И первуись повзис, что смертьыс пукалö пельпоннэс вылын. И сiдз охота лоис овны, адззывны ассис деревнясö, кытöн быдмис, кытöн эз вöв мамыс, но кытöн вöлi быдöс тöдса, дона — асланым отирыс и ыббес деревня гöгöр. Вöрзьöтiс кисö. Ракаыс лэбзис.

Дыр куйлiс аслас гажтöм да сьöкыт думаэзöн, кытчöдз син вылас эз усь морт, кöда вöрöтчис бокынжык и, тыдалö, отсавтöг эз вермы чеччыны местасис. Может, сiя ыксiс, корис отсöт, но Пашаыс эз кыв. Солдатыс паськöм сьöртi сiя вежöртiс: мортыс асланым.

Радмис. Кыссис солдатыс дынö. Вермис ассис зубытсö.

― Сулав! Лыя! — ыксiс Пашалö мортыс. Синнэс — зверьлöн. Ыксöмсö Пашаыс эз кыв, но кисис адззис наган: дулоыс видзöтiс синнэзас.

― Тэ мый? — эз вежöрт Пашаыс. — Топ асланым жö мортыс.

Мöдыс лэдзис нагансö.

Вежöртiс Пашаыс, что мортсö дзугöм войнаыс. Кыссис дынас, босьтiс кисис нагансö, жмитыштiс кисö. öтнас — солдат, кыкöн — врагыс не враг.

Мунiсö гаггез моз: шаг-мöд керасö, шоччисясö и одзлань. Узьлiсö бокын, орддисö деревняэз, отирöс. Олiсö зверрез моз, дзебсисьöмöн.

Тшыгыс, мыдзыс да ранаэс йирисö выннысö.

— Паша, а Паша, висьтав, кин тэнö гортын видзчисьö? — юалö Пашалiсь ёртыс, кöр нiя пуксисö шоччисьны, и кажитчис, что оз ни вермö вöрзьыны местасиныс. Кынымись ни Пашаыс висьталiс ёртыслö, что сылöн гортас некин абу. Сiя вились юасьö.

— Менö? — думайтö Пашаыс. — Менö гортын видзчисьö Серко-Бурко вöв, эшö кот Яша... Эшö воробейез öшын вевдöрын. — Баитö Пашаыс думайтöмöн, жагвыв. Он вежöрт: то ли сералö, то ли быль тöждiсьö вöв да кань понда. Синнэзас мыдз, тоска и гаж. Тöдвылас вöлыс, кöдöн уджалiс колхозас, син одзас котыс, Яшкаыс, и воробейес, кöднö тöввезнас гусьöн вердлiс шыдöсöн.

— А невестаыт? — юасьö ёртыс.

— Невеста? — серöмтчö Паша. — Невеста быдмö... Сiя жö лунö пантасисö асланым разведчиккезкöт. Чулалiс войнаыс. Паша этадз жö локтiс вежайыс ордö. Пызан вылас вöлi не öння сёяныс: няняс унажык турун да картошка, но вöлiсö тшаккез да синва кодь лöз ырöш.

Эта медодз усис талун тöдвылас Пашалö. Эта йылiсь и вöлi басниыс пызан сайын.

— Война вöлi, Паша... Нем он кер...

Любитö старикыс баитны — кывзы. А быдöс кывзынытö некöр: рытнас клубын общественнöй суд, колö лоны сэтчин.

— Ветлам, вежай?

— Ветлам, — висьталö старикыс.

— Видзчисьöны тэнö, — видчö старухаыс.

— Ветлам, — баитö Павел Егоровичыс.

6

Эта одзын джын месяц бöртi

вöлi Павел Егоровичыс Тиминаас. Эз вöв сэк талуння кодь уджыс: некин эз тышкась, некин öтамöд вылö эз норась. Оланыс мунiс бытшöма, милиционертöг. Олiс сэк участковöйыс деревняас кык лун. Медодз чукöртiс добровольнöй дружина. Павел Егоровичлöн участокыс ыджыт — не öтiк сельсовет, и не быд неделяö шедан Тиминаас. Оз вермы лоны сiдз, медбы оланыс мунiс волькыта, медбы быдöс отирыс вöлiсö честнöйöсь, некин вина эз ю, некин некинкöт эз видчы, эз веж юыштöмувья ассис мывкыдсö.

Вайöтiс сельсоветсис предыс дружиналiсь командирöс, тöдсöтö участковöйкöт. Том мортыс, крепыт лы-сьöма, тöдчö, что спорткöт дружитö, вынсö йöзыслiсь оз неб. Да разь только вын колö командирлö! Медодз мортыслö колö уджавны отиркöт. А том зонкаыс баитö дыша, топ кывсö колö кыскыны.

— Пондам уджавны? — юалö том мортлiсь Павел Егорович.

— Кытчö воштiсян? Комсомолеццез бöрйисö, — сьöкыта лолалö командирыс.

— Эз бы бöрйö?

— Кинлö охота грехас пырны?

— Николай Дмитриевич, — пондiс баитны Шапкиныс сельсоветiсь предкöт, — кыдз тiйö думайтат, вермас я лоны эта мортыс дружиналöн командирöн?

— Надейтчам. Комсомолеццез бöрйисö.

— Думайтыштам, Николай Дмитриевич... Может, мортсö мöдiкö кошшам.

Николай Дмитриевичлöн уджыс уна, быдöс отиркöт, и мукöдпыр оз адззы сiйö мортсö, кöда бы бура керис общественнöй удж.

Отсалiс партийнöй организациялöн секретарь: адззис командирнас мöдiк зонкаöс. Учительöн уджалö, неважын партийнöй, только вывтi скромнöй, кывнас некинöс оз обидит, етша серöмтчас.

— Ог тöд, — веськыта висьталiс том коммунистыс, — тышкасьны коддэскöт ог куж.

— Тышкасьнытö оз ков. Ми сы понда и корам тэнö отсасьнытö, медбы етшажык отирыс тышкасис.

— Кыдз ныкöт, — шыннялö зонкаыс, — коддэскöт?

— А сiдз: ась бы отирыс етшажык винасö юисö, етшажык тышкасисö, — баитö участковöйыс.

— Öтнам ме нем ог вермы керны.

— Мыля öтнат! Быдöннымкöт: мекöт, партийнöй организациякöт, сельсоветкöт, комсомолеццезкöт, эшö кин миян эм?.. Быдöс отирыскöт. Видзöт мымда выныс!

— Менам бабö оз любит коддэсö, — сералö дружиналöн виль командир.

— И старухаэскöт! — гажöн баитö Павел Егоровичыс. — Инькаэс эта уджын медбур отсалiссез.

— Пондылам, — согласитчис том коммунистыс.

И уджалö. Только медодзза неделяас жö клубын пондöм öвны код мортöс, а сiя кутчисьöм морос бердас. Ковсис хулиганкöт уджавны аслыс участковöйлö. Мöдiк «артистöс» штрафуйтiсö, куимöтöс сельскöй судöн судитiсö, и коддэс клубын дугдiсö бöбавны, а кин и локтас юыштöм — пукалö шыр моз. Эмöсь эшö деревняас ас мывкыда морттэс, кöдна винатöг овны оз вермö и прокаöсь кулаккезнаныс ошшасьыштны, но öнi етша кин чеччöвтö отирыс син одзö.

Общественнöй судöдз Павел Егоровичлö колiс баитыштны дружиналöн командиркöт. Охота вöлi тöдны, мый думайтö том коммунистыс мортыс йылiсь, кöдö талун отирыс пондасö судитны асланыс судöн.

Командир дынö котрасисö челядь. Чожа сельсоветö пырис том зонка. Шыннялыштлö ас кежас. Здоровайтчис.

— Кыдз олан, Алексей Иванович? — гажöн панталö том мортсö участковöйыс.

— Олам кыдз колö.

— Боккетö эз эшö гындö?

Ась пондылöны! — гажöн висьталiс дружиналöн командирыс.

А тэ полiн, — сералö Павел Егорович. Видзöтö зонкаыс вылö и думайтö: «Унажык бы этатшöм отсасиссесö».

— Кыдз он пов: вöлыс и то зурасьö, а сэтöн отир, — баитö зонкаыс.

— Коддэс эз бöбалö?

— Ми нiйö чожа сермöталам.

— Только эд вартлö, а то асьнытö пондам судитны, — шутитö Павел Егоровичыс.

— Огö, но... — баснисö вежис, — ми сэтшöммесö медодз женсоветö иньдылам. Инькаэс кипод увтын унасö оз чеччалö! Кыдз матегаласö, пуджасö да пидзраласö!..

7

Öксис клубын отирыс — чунь оз мöртчы. Некытшöм кино не спектакль вылö сiдз оз öксьö. Нельки пöриссес локтöмась, некытшöм шогöт оз мешайт.

Клубын — общественнöй суд. Судитö отирыс ассиным мортöс.

— Павел Егорович, чожа пондöтчас, — тэрмöтö клубö участковöйсö сельсоветсис предыс.

— Локта, — тэрмасьöмöн пуктö юр вылас шапка Павел Егоровичыс. Пондö петны, но паныт ыбöс коласас бедьöн сувтö старушка. Видзöтö Павел Егоровичыс вылö, öмсö осьтöм да шыннялö.

— Павел Егорович...

— Мый?

— Тэрмасян? Кывзы, зонö, ме чожа... Öнджа, только вит минута.

— Пуксьы, — пуксис бöр участковöйыс стул вылö.

— Ог эд кыв, — паськöтiс ки долоньсö пель саяс старушкаыс. — Тэ менö тöдан?

— Тöда.

— Эн эд вунöт Фёдор дядьытлiсь невестасö? Ме сылöн и эм.

— Эг! — гажöн висьталiс милиционерыс. — Тэ тай сё невеста вылö вачкисян?

— Ме эд эшö абу пöрись. Öнi пöрисьмынытö оз туй. Öнi оланыс — рай! Тэ тöдан, мый понда ме тэ дынö? Пенсия мылякö меным медбöрын етшажык иньдiсö? Мыся, тэ мортыс асланым — отсалан. Сельсоветас мыйкö бытшöма нем эз висьталö.

Баснисö бы туйис джендöтны кык-куим кылöн, да пенсияэзiсь Павел Егоровичыс и не öддьöн вежöртö, но откажитны старушкалö оз туй.

— Пырала, бабушка, собесас, пырала. И тэныт висьтала.

— Висьтав. Спасибо да спасибо, Павел Егорович. Тэ уж пырав, отсав старушкаыслö. Менам эд эм деньгаыс, телевизорыс вылö тырмö, и тшыгйöн ог ов, а колö бы отирыс моз жö. — И вдруг юалiс — Павел Егорович, мый талун клубас? Кылi, топ суд, топ отирыс трактористсö судитöны? Кыдз сэтчин? Судья жö локтiс и прокурорыс эм?

— Асьныс отирыс.

— Асьныс?! — дивуйтчö старушкаыс. — Сiдзкö, ме?... — торскыштiс бедьнас джодж кузя.

— Верман лоны и прокурорыс местö.

— Видзöт, Павел Егорович, оланыс кытшöм локтiс: кöркö урядниксис дрöжитiм, кыдз ошись полiм, а öнi асьным судитам. Пырала.

Эта коста клубын пондöтчис общественнöй суд. Судитöны том трактористöс. Пукалö сiя быдöс отирыс одзын, клуб сцена вылас, гöрд дöраöн вевттьöм пызан дорын. Зонкаыс чочком юрсиа, юрсиыс кузь, кыдз поплöн, пельпоннэс вылын öшалö. Рожабаннэс вылын орсö вирок. Гажöн да смела видзöтлö отирыслань, гордöя шыннялыштлö, топ сылöн талун праздник. Оз и думайтсьы, что талун зонкасö пондасö судитны, али сiя лыддьö этö судсö шуткаöн, и топ отирыс чукöртчöмась видзöтны зонкаыс вылö.

Отирыс пукалiсö скамьяэз вылын, сулалiсö ыбöс дорас. Морт-мöд гусьöн куритiсö порог вылын. Пырыштiс клубö Павел Егорович, куритiссес сьöвзисö чигаркаэзнысö.

― Клубын лöнис басни. Судья сулалiс гöрд пызандöраöн вевттьöм пызан сайын да торжественнöя, кыдз народнöй судын районын, осьтiс судлiсь заседаннё.

Судьяыс тэчöмöн, не тэрмасьöмöн баитiс, и эз кыв сы басниын не милуйтан голос, не грöзитчöм: ась решитö отирыс.

― Вот сетö! — кинкö скамьяэс бöрын гордöя висьталiс судьяыс йылiсь. — А то сё Кипреян Андреевич да Кипреян Андреевич...

Судьяыс медодз юасис обвиняемöйлiсь да свидетеллезлiсь, согласитчасö я нiя судлöн составöн, а сы бöрын лыддьöтiс заявленнё, кöдö талун колiс видзöтны судлö.

Заявленнёсö тракторист вылö гижöм бригадир, норасьöм, что зонкаыс абу петалöм уджавны и сулöтöм тракторсö. Быдöнлö вöлi вежöртана, что трактористыс керöм прогул, весись сулöтöм машинасö, и, кажитчис, отирыс эз примитö серьёзнöя ас дынаныс этö заявленнёсö: прогуллэс колхозас овлöны не сэтшöм ни шоча, сулöтлöны машинаэсö, и быдöс чулалö судтöг, а сэтöн вдруг бригадирлö охота лоöм норасьны тракторист вылö.

Кывзiсö отирыс судьясö, сералыштлiсö ас коласаныс да шутитiсö.

Но вот сувтiс трактористыс, пондiс висьтасьны, мыля сiя эз пет уджавны. Висьтасис кокнита, асланым отирлö, кöднакöт быд лун öтлаын и кöдна оз вермö накажитны кыдз колö ассиным мортсö — не районнöй судыс.

— Шогалi ме, — висьталiс тракторист.

— Справкаыт эм?! — чорыта юалiс судьяыс.

— Справка? — шынньöвтiс трактористыс да видзöтыштiс кытчöкö потолокас. — Справка абу... Öддьöн шогалi и эг вермы ветлыны больницаас.

— Тэнат быдöс? — юалiс судьяыс.

— Быдöс.

— А мый висьталас бригадир?

Кöсыник да кузь мыгöра бригадирыс чожа чеччöвтiс местасис, лёка югйöвтiс синнэзнас отирыслань, нюжöтiс чуньсö трактористыслань да тэчöмöн висьталiс:

— Юрыс сылöн быль висис!.. Стрась висис. Сiйöн, что ветлiс шабашка вылö и пöттöдззас начкис винасö, — и рамжыка ни содтiс трактористыслö: — Витя, ме бы тэкöт эг понды эстöн баитнытö, но эд тэ этадз не первуись и асьтö лыддян правöн, а мый шуан — паныт пурсян. Ась отирыс и судитöны, кин миян коласiсь правыс да виноватыс.

— Пиннет ме вылö лудöны! — лöга висьталiс паныт бригадирлö трактористыс. — Вот и талян менö быд шагын.

— Сiдзкö, шабашка вылö эн ветлы? — юалiс трактористлiсь судьяыс.

__ Не шабашка вöлi, а отсöт. Мортлö колiс отсавны, а сiя йöзлö оз уджав, асланым колхозын! ― Путёвкаыс вöлi?

— Отсаси ме.

― Отсавны колö, пестöг некин оз ов, — согласитчис судьяыс и юалiс отирыслiсь: — Кин пондас баитны?

Минута-мöд клубын шы эз вöв, только кылiс, кыдз волнуйтчöмöн лолалiс клубыс да отирыс видзöтлiсö öтамöдныс вылö, видзчисисö: кин медодз, кин смевжыкыс?!

— Некин оз баит?! — юалiс эшö öтпыр судья.

— Ме!

— Баит, Алексей Иванович.

Местасис сувтiс дружиналöн командир-учитель, том коммунист, недыр думайтiс, бергöтыштiс киас шапкасö. Отирыс видзöтöны, видзчисьöны баснисö, а сiя чожа оз вермы: тöдчö, что етша шедлö этатшöм суддэс вылö.

— Баит, Алексей Иванович.

— И висьтала, — пондöтiс лöга Алексейыс, — тэ, Виктор, не весись пукалан эстöн.

Трактористыс дрöгнитiс, топ бöрсяняс бытшкисö емöн.

— Тэнö одзжык ни колiс шондi вылас кыскыны, медбы тэ тöдiн, кинлiсь няньсö сёян, — одзлань шырис учительыс.

— Из весись, — модьыштiс трактористыс.

— Тöдан, мöйму кыдз тэ мунiн шабашка вылас? — эз кыв Викторыслiсь Алексейыс баснисö.

— Кöр?! — эрзыштiс Викторыс.

— А кöр ме путёвканас вовлi тэ дынö. Думайтi отсавны Еля баблö. Тэ эд ачыт тöдан, что старушкаыс не миян годдэзся и некин сылö оз отсав, но тэ откажитчин сылö пессö вайны. Мыля тэ думайтан сiдз? Да сiйöн, что Еля баблöн винаыс тэ понда етша. Тэ, конечно, этö эн висьтав, а шуин, что тэнат тракторыс жугалöм, но ойнас пессö вайин мöдiклö да быль жугдiн тракторсö. Тöдiсö этö отирыс и начальствоыс, только эта тэ вылiсь ыскöвтiс, кыдз ва дзодзог вылiсь. Öнi вились думайтан сiдз жö? Натьтö, тырмас!

— Тэ мый ме вылö каян? Колхозас эд он уджав, — кöритыштiс трактористыс учительсö.

— Колхозыс сэтöн жö — менам и лöгö тэ вылö петö, Виктор.

— И менам лöгö петö! — вежис Алексейсö том агроном. — Быль тэ вунöтлан мукöдпыр, кинлö да кытöн уджалан. Тэ, натьтö, вунöтiн, кыдз мекöт гожумнас видчин? Ме тэныт висьталi, что колö кöдзнытö перекрёстнöя да мöдiк нормаöн, а тэ мый керин? Тэ меным веськыта висьталiн, что ме начальникыс эшö зырымöсь и тэ ачыт тöдан, кыдз колö тэныт кöдзнытö. Ме тэнчит, конечно, сэк уджсö эг примит... И правильно кери. Но тэ талунöдз менö он вежöрт. Тöдан, кыдз клуб посöдзас грöзитчин? Шуин: «Пантасям!» Но вот и пантасим. Отирыс син одзын. Висьтав отирыслö: мый думайтан керны одзлань, кыдз овны да уджавны?!

— Стыд абу том мортлö! — чеччис агроном бöрын Павел Егоровичлöн вежайыс, пондiс баитны тэрмасьöмöн да сорасьöмöн, но сiдз шебралiс, что трактористыс мöртiс синнэсö джоджас, мышкыртiс юрсö, и рожабаннэс öгралiсö ни не сiя вирöн, кöдöн локтiс клубас.

— Стыд абу, мыся, Виктор. Умöля эшö тэнö эстöн кульöны том отирыс! Миян моз бы тэ быдмин да олiн. Вот!.. Мийö быд уджсö-торсö уджалiм киэзнаным, сирньылöмнаным няньсö шедтiм. Некинлö эг норасьö, некинкöт эг пиньгисьö. Тшыг кынöмнаным социализмсö строитiм, уджалiм тiян понда, медбы тэ олiн буржыка. Советыслöн властьыс пуховöй перина вылас эз зорам, а тi сiя перина вылын од кужö узьнытö.

— Виноват ме, деда, — гажтöма висьталiс Викторыс.

— Виноват, а эшö гöтрасьны лöсьöтчан. Кин тэ кодьыс сайö мунас? — рамжыка ни горöтчис старикыс.

— Инькаэс дыр, Виктор, оз ков умöля видчыны, а то тэ, том кöть пöрись, шебралан и синнэзнат он кваркышт!

— Клубас куритлан!

Уськöтчисö Виктор вылö сьöрсьöн-бöрсьöн отирыс.

Сiя öшис, жмитчис, мышкыртчис пызан бердас, и, кажитчис, сылiс бы отирыс син одзись, да эз вермы.

— Ёрттэз, вывтi эд шумитö, — только и öлö судьяыс отирсö.

Баитiсö сьöрсьöн-бöрсьöн, тшуписö том мортлö, кыдз колö уджавны да овны. Адззисö сэтшöм примеррез, кöднö Викторыс важын ни керлiс да вунöтлiс, а отирыс сё эз вунöтö. Дрöжитiсö ни киэз да коккез, висис ни эта лёк да справедливöй баснисянь юрыс, но воштiсьны вöлi некытчö: шедiн — видз ответ.

— Мый миянлö эшö висьталан, Виктор Семёнович? — медбöрын юалiс Викторлiсь судьяыс.

Горбыльтчöм да мыдз сувтiс Викторыс отир син одзö. Не сэтшöм ни мортыс, кытшöм локтiс клубас. Öшис зонкаыслöн кешитчöмыс. Дрöжитана голосöн висьталiс:

— Сiдз ог понды.

— Вежöртiн отирсö?

— Вежöртi.

— Ёрттэз! — медбöрын корис кыв Павел Егорович. — Тiйö талун эстöн баитiт асланыт том ёрт йылiсь. Баитiт честнöя, веськыта. Иньдöтiт мортсö бур туй вылö. Ме думайта, что Викторыс вежöртiс тiянöс и овны коллективкöт сiдз, кыдз олiс одзжык, оз понды, а пондас уджавны честнöя да бура. Пондас овны сiдз, кыдз олöны миян странаын том отирыс. Эд мийö строитам коммунизм!

— Сiдз, Павел Егорович!

— Милициятöг мортсö веськöтiт, — сералö Павел Егоровичыс.

— Мийö асьным милиция, — сералiсö отир.

Том трактористöс эшö накажитiсö: вештiсьны прогул понда, но тракторнöй сменася донажык вöлi отирлöн басниыс.

Павел Егорович петiс судiсь кокнит, гажа думаэзöн, ась сы совесть вылын эшö öшалiс удж, кöдö часöт эз вермы кончитны.

8

Асывнас звонитiсö райотделö. — Здравствуйте, Павел Егорович, ловьяöсь? — голосыс начальникыслöн. — Поди, гажтöмтчан ни инькаыттöг? Сiя тэтöг гажтöмтчö, вовлiс ме дынö, юасьö: кытчö пö мужикöс торкин? — Оз сiя этöн шогав.

― Кыдз том ёртным? Тожö гажтöмтчö, оз горзы?

Гажа талун начальникыс. «Мый одзын? Юавны бы?» Но капитаныс вежсис.

— Локтö гортö. Öтлаын баитам уджыс йылiсь. Висьталiс, что Мелехиныс райотделын.

Пуксисö колхознöй машина вылö и кык час бöртi вöлiсö ни районын.

— Шедiс кöиныс! — панталiс райотделын дежурнöйыс Павел Егоровичсö.

— Не велöтчыны, — серöмтчис ас вылас Павел

Егорович.

— Басни абу! — Дежурнöйес öтамöд коласаныс шутитiсö, кöр эз вöв дежурство вылын некытшöм ЧП. Вежöртлiсö öтамöднысö джын кывсянь, кыдз отир, кöдна уджалöны дружнöя.

— Может, одзöв радуйтчам? — падтiс дежурнöйсö старшöй лейтенантыс.

— Адззам мортсö басниыс сьöртi...

— Гортын? — öвтыштiс юрнас участковöйыс начальникыс жырлань.

— Ушлöй, тыдалö, мужикыс, вердчöм не öтiк местаын, — сё эшö баитiс Мелехин йылiсь дежурнöйыс.

— Гортын начальникыс?! — мöдпöв лöгöнмоз юалiс Павел Егоровичыс.

— Тэрмась, видзчисьö. Медаль вылö гижöттэз öктö.

— Рака, — только и висьталiс дежурнöйлö участковöйыс, ачыс юасис начальникыс дынö,

— Пуксьы, пуксьы, Павел Егорович, да ваксьы, кыдз баитöны коми отирыс. Висьтась, кыдз сэтчин? — панталiс начальникыс.

— Нем ваксьынытö, ёрт капитан. Немöн ошшасьнытö.

— Кыдз отсасисьыт? — Этö Бражкин йылiсь.

— Орёл.

— Чож?

— Чож. Петас сыись уджалiсьыс.

— Надейтчам. А кыдз отирыс?

— Уджалöны, олöны. Только лёкöсь эта Мелехин вылö. Ась спасибо висьталö, что ештöм пышшыны, — серöмтчис Павел Егоровичыс.

— Быль. Озö жö, поди, асланыс судöн.

— А мый? Судитiсö öтiкöс общественнöй судöн. Эг бы ме шед сэтчö...

― Лöгöсь отирыс? — сералö капитаныс.

— Лöгöсь.

― Бур, что лöгöсь хулиганнэс вылö, ныкöт только

сiдз и колö. Преступникнас Мелехинсö лыддьöны?

— Сiйö.

— А тэ кыдз?

Юалö веськыта. Лейтенантыс висьталö сiдз жö:

— Ог тöд!

— Буржык висьтавны правдасö öтпыр, нежели куимись бöбöтны. Баитыштам Мелехиныскöт.

Начальникыс босьтiс трубка, звонитiс дежурнöйлö.

Не öткодь преступниккезöс пантавлiс Павел Егоровичыс. Вöлiсö: мортыс вылö оз видзöтö и милиционеркöт оз шыасьö. Мукöдыс баснинас петас бисис и васис. А эта кыдз? Лöсьöтчö пантасьны виль морткöт, кöда бердö лякасьö преступленнё. Колö решитны эта мортлiсь судьбасö честнöя да веськыта, не керны ошибка... Мый сiя тöдö Мелехиныс йылiсь эта часöдз? Веськыта висьтавны, етша. Документтэз да отирлöн басни — эшö не быдöс мортыс тэ одзын.

Вайöтiсö Мелехинсö. Абу ыджыт — мусянь тэчöм. Ота рожабана, öт пельпоныс вылынжык и öт кокыс дженытжык. «Мыгöрнас сэтшöм, кытшöмö висьтасисö отирыс». И смев. Видзöтö веськыта. Юрсиыс сулалö кыдз ёжлöн. Натьтö, тюрьмаыс бöрсянь эз ешты быдмыны. Шыннялыштлö. Немымда оз вачкись морт вийись вылö. А кин сiйö тöдö? «Эта петас бисис и васис!" — думайтö старшöй лейтенантыс.

— Здравствуй, гражданин начальник! — нюжöтiс Мелехиныс кисö.

— Здравствуйте, гражданин Мелехин! — здоровайтчис, но кисö эз сет.

— А, ме вунöтi, — брезгуйтöмöн горöтчис Мелехиныс.

— Неважын тюрьмасянь? — дзугис милиционерыс.

— Кинлö мам — меным тёща, — обидитчис арестованнöйыс.

— Гленитчис?

— Мортыс чужö не клеткаын овны, а лэбавны!

— Тэ и лэбалан! — лöга висьталiс Павел Егорович.

— Бордтöм, — шыннялö Мелехиныс.

— Тырмас шутитны, Мелехин. Ми тэкöт не базарын. Пондам уджавны. Фамиллё, ним, айним?

— Мелехин Михаил Иванович, гражданин следователь, ежели мамö эз сорав.

— Гöтыра?

— Вöлi.

Точнöй вопрос и точнöй ответ. Некöдныс эз шыбыльтö.

— Кынымись гöтрасьлiн?

— Кыдз кынымись?

— Только Лидаыс вылö?

— Лида менам невеста, а иньö гортын. Абу иньö. Крест! Кытöн сiя — ме сэтчин абу. Не инь — сатана. Бесыскöт и еныскöт тöдчö. Вузалас и небас копейкатöг! — öтiк ловзисьöмöн висьталiс иньыс йылiсь Мелехиныс.

— А Лидаыс?

— Мый Лидаыс? Лидка — менам невеста. Во!.. Ловья лоа — ог вунöт, некинлö ог сет!

— Висьтав, Мелехин, тэ вот олöмыт Лидаыскöт не öтiк месяц и некытöн абу уджалöмыт? Мый эта?..

— Некöр вöлi.

— Кыдз некöр?!

Думайтiс лейтенантыс, что допрос вылын оз понды горöтны, пондас видзны асьсö, а локтiс эта басниöдз и лöгасис, пондiс баитны чорыта, ыкöстыштiс. «Не уджавны меным милицияас», — думайтö Павел Егоровичыс эта бöрсянь. А вот уджалö. Оз вермы горöтышттöг. Кыдз терпитан, кöр мортыс сералö отирыс олан вывтi?

— Мужикыс сы вылö и чужöм свет вылас, медбы вердiсö инькаэс, — гер видзöны кöртовöй пиннес Мелехиныслöн. Сералö. — Эз бы верд — мöдiк адззисис. Сiдз, гражданин следователь, — гуддьыштiс пельсö, юалiс: — Мый месянь милицияыслö колö? Топ сроксö тыртi, некинöс эг гусяв.

— Мый понда судитлiсö?

— Пышши иньö дынiсь. Сiя — милицияö жалоба. Кутiсö да каттисö. Милицияыс прокмö, весись няньсö оз сёй. Но эг гусясь. Закон!

— Вöлiсö челядьыс?

— Челядь?.. — рыг-рыг серöмтчис арестованнöйыс. — Ачымöс колö вердны.

― Подлец тэ, Мелехин!

― Ме не вöв, доддяс весись он доддяв!

― Сiйöн тэ и подлец, — сьöкыта ловзисис Павел Егоровичыс.

— Гражданин лейтенант, тэныт бы пенсия вылö, — ласковöя висьталiс Мелехиныс, — Кыдз думайтан? Важмöмыт да пöрисьмöмыт. Нерваэт бырöмась... А тэ тöдан, лейтенант, что менö оскорбитны оз туй!.. Ме сэтшöм жö морт, — лöгасис, гöрдöтыштiс, ыкöстiс: — Тэ тöдан, гражданин следователь, что ме воюйтi Сталинградын! Ме вöлi Берлинын!.. Он тöд? — шынньöвтiс Мелехиныс. — Менам высшöй образованнё. Тэнат абу, а менам эм. Ме — хирург. Адззан! — лэбтiс йöрнöссö. — На, видзöт. Ачым, аппендичитсö вундыштi!.. А тэ... Дурак я мый я Мелехиныс?!

Öшыштiс Павел Егоровичыс. Висьталiс сылö этö сельсоветсис предыс, но ачыс адззö первуись. Серöмыс петiс, но видзсис, эз серав.

— Мыля Лидаыс дынiсь пышшин?

— Уджавны тшöктö, а кытшöм ме уджалiсь? Син одзат эд.

— А деньгасö гусялiн?

— Ачыс сетлiс, вит руб.

— И деньгаыс понда Лидасö торкин?!

— Ме? Да ме!.. — кватитiс горшсö Мелехиныс, синнэс гудырмисö.

— Кин сэк вийис Лидасö?

— Ой, ог тöд, нем ог тöд, гражданин следователь. Нем ог тöд!

Арестованнöйыс пондiс горзыны, и баитны сыкöт одзлань эз туй.

Мелехинсö нуöтiсö.

9

Гортас эз вöв суткися унажык. Видзчисис иньыс. Эшö вöлi зоныссянь письмо. Зоныс служитiс Германияын, сэтчин, кытöн кöркö война бöрсянь служитiс айыс. Служитiс неумöля. Частьсянь вовлiс письмо, кытöн командирыс ошкис Павел Егоровичсö, что айыс быдтiс сэтшöм зонöс. Зоныс кöсъясис отпускö. Гажмöтiс письмоыс. Нельки öшис туйвывся мыдзыс.

Инькаыс кöритiс да видiс, что мужикыс кувтöдз кытöнкö шатласяс, кöр колö бы горт гöгöр бергавны — годдэс не нiя ни.

— Локтас кадыс, тэнö понда пестунничайтны, — сералiс старшöй лейтенантыс. Тöдö, что иньыс модьыштас да дугдас. Любитöны öтамöднысö томсянь, пöрисьмöны ни, а олöны — йöзыс завидуйтö.

Шедiс бы Павел Егоровичлö инькаыс асныра да дыш, и оланыс бы вöлi не олан. Эз адззыв бур олансö быдмытöнняс, и öнi бы сiя эз вöв.

Быдöс сэтöн: и иньыс, и мамыс.

Не гортын, не казённöй уджас инькаыс оз повзьы. Уджалö столовöйын. Отирöс вердö. Отирсö тожö колö кужны вердны.

Гöтрасисö ас мознаныс.

Машаыс вöлi ни жöник саяс, только мужикыскöт оланыс эз лöсяв. Томöн янсöтчис и эз ни думайт вильсö адззыны. Но сэтöн война вылiсь бертiс Пашаыс — молодец: моросыс колесоöн, не кывнас, не уджнас некытöн эз падмы, тöдчö, что мортыс айтöг-мамтöг быдмöм.

Косьмисö нывкаэслöн сьöлöммезныс зонкаыс понда. Но сiя вдруг локтiс Маша дынö да висьталiс, что Машаыс лоас сылöн. Висьталiс, и откажитчыны оз туй — керис.

Томмезлöн оланыс пондöтчис позтöг, богатствотöг, кыдз тулысöн локтан кайезлöн. Нем нылöн эз вöв: не кöмкöт-паськöмыс, не пань-бекöрыс.

Асланыс уджöн медодз небисö керкуок. Сыбöрын и жагвыв пасьтасисö.

Маша уджалiс колхозын, Паша — клубын заведующöйöн.

Гармонист. Кужис гажöтны деревенскöй отирсö, и клубас отирыс видзсис, кыдз мошшез чöскыт дука цвет гöгöр.

Уджалансянь гортö вовлывлiс сёр рытöн.

— Видзöт, Маша, кыдз öштан мужиктö, — сералiсö инькаэс.

— Гленитчас — ась, — гажöн висьтавлiс Машаыс Сьöлöм вылас полöмыс эз вöв: веритiс мужикыслö.

Уджалiс Паша клубын год етш. Талунöдз деревняын касьтылöны гажа гармонистсö.

Кыдзкö корисö райкомö, пондiсö корасьны милицияö. Тöдiсö райкомас, кинöс корасьны, но Пашаыс милициялiсь уджсö эз тöд. Быдса кык лун корасисö сiйö, корасисö, кыдз невестаöс. Баитiсö кыдз морткöт и коммунисткöт.

Куимöдз лунас öвтыштiс ас вылас кинас: «Пондылам! Быдöс Европасö шагнялi, а сэтöн асланым отир коласын!».

Согласитчис.

И сэксянь талунöдз — служба. Ой и лун служба. Ой и лун — солдат. Кыдз кышалiс солдатскöй паськöмсö фронт вылын, сiдз топ эз и чöвтлы. Думайтiс милицияын кык-куим лун уджавны, а кадыс топ лэбзис, годдэс содiсö, йитсисö, и чожа колö петны ни пенсия вылö.

Кадыс чулалö. Мый вöлi тöн и мый лоас ашын?

Тöн гортсянь райотделö мунiс дежуритны, а локтiс гортö Тиминасянь — эта районсянь медылын деревня. Нельки иньыслö эз ешты висьтавны, кытчö мунö. А иньыс ойсö оз узь, думайтö. Сьöлöмыс места оз адззы. Эз вöв томсяняс Машаыс сэтшöм. Неделяöн да кыкöн видзчисьлiс мужиксö, эз гажтöмтчывлы, эз повлы, а öнi пöрисьмö и вежсьö, берегитö мужиксö.

— Тэ сё аслыт, — кöритö мужиксö Машаыс, — он думайт не ме йылiсь, не ас йывсит.

Машалöн тöдвылас Кöк Игнатыс — бандит, кöда сьöрын вöтлiсис Павел Егоровичыс.

Кöк Игнат. Кыдз сiйö вунöтан? Вöлi сэтшöмыс. Рецидивист, вор и бандит. Мортыслö тюрьмаыс — мам роднöй. Тюрьмасис петавлiс гортö гöститны. Тöвнас тюрьмаын, гожумнас пышшалö. Медодз Кöк Игнатöс судитлöмась кык год кежö, а сiя нюжöтöм приговорсö сорок годдэзöдз.

Сiя кадö, медбöрья годдэзас, Кöк Игнат йылiсь нем эз кывсьы. Думайтiсö, ылöссялiс мортыс. Только эта вöлi недыр: вились мыччисис Игнатыс.

Шонтiс. Вöрыс пасьтасис зелёной паськöмö. Начальникыс öктiс совещаннё: районын опаснöй рецидивист — Кöк Игнат.

Тöдiсö Игнатсö. Мукöдыс сы кузя и чапкисö уджсö милициясис: öтпыр пантасян бандитыскöт, а сiя кöсйисьö пантасьны мöдпырись. Кинлö охота одза одз кувнытö?

Игнат кыдз пышшас — кыссьö гортö. Оз мун городлань, а гортас кыссьö. Пышшис тюрьмасис — кошшы гортiсь. Милиция тöдiс рецидивистлiсь мывкыдсö, мыгöрсö, и чужöмбаныс сэтшöм тöдса: синнэтö кунь — одзат сулалö. Но тöдны — öтiк, а керны — мöдiк.

Игнатöс кошшöны вöрись — сiя гортын. Кошшöны гортсис — сiя вöрын. Кошшöны вöрсис и гортсис — сiя кыдз вöяс, некытöн абу. Кошшöны деревняэзiсь — сiя райцентрын. Кыдз прикашайтчö, дразнитö. И эшö телефонöт баитiс райотделiсь дежурнöйкöт: «Алло, кытöн Павел Егоровичыс? Пым привет сылö. Ась гöститны видзчисьö, винаок заптö!»

Павел Егоровичлöн Игнаткöт «дружба». Аркмис эта «дружбаыс» медодзза годдэзас жö, кöр пондiс уджавны милицияын.

Пышшöм вöлi Игнатыс тюрьмасис и некинлö оз шед. Шедiс Павел Егоровичлö, шедiс, кыдз челядёк: базарын, кöр босьтiс бы деньгатöг яблок.

Сэк Игнатсö милицияыс кошшис быд угöлiсь. Кошшис не öтiк неделя. Но Игнатыс некыдз эз шед. Бандитыс вежис походкасö быд лунö, вежис туйесö и позсö. А отирыслö пантасьлiс. Пантасьлiс казявтöг, öтнаныслö, пантасьлiс и некинлö нем эз кер, ештывлiс баитыштны, милициялö привет иньдыны, ештывлiс петкöтны магазин, гусявны правленнёись деньга — быдöс вермис и ештiс керны, но не шедны.

Павел Егоровичыс вöлi том, милицияын уджалiс етша, опыт сылöн талуння, некытшöм думаэз да планнэз бандитсö кутны юрас эз видз. А öтпыр пасьтасис гражданскöй паськöмöн, кушакасис, коскас сюйыштiс чер да иньдöтчис магазин посодзö, топ мунö уджавны, и кежис небны табак. Небис табаксö, гардiс чигарка, пуксис магазин посöдзö да куритö. Етша тöдiсö сэк районас Павел Егоровичсö. Морт тай пукалö. Ветлöтöны деревенскöйес.... Кысянькö локтыштiс магазин посöдзас Кöк Игнат, здоровайтчис, корис куритны. Баитыштiсö-керисö деревенса, а сыбöрын Павел Егоровичыс Игнатсö нуöтiс милицияö.

Сiя чассянь Павел Егоровичлöн Игнаткöт «дружба». Быд гожумö рецидивист локтö гортас да иньдалö лейтенантлö приветтэз.

Эта гожумö Игнатсö некыдз эз вермö кутны.

Локтiс областись следователь, а Игнатыс сё пышшалiс. Матын гардчис, но эз шед. Тöдiсö — шедас, но кöр?.. И мый сiя вермас керны шедтöдззас?

«Пантасям», — думайтö Павел Егоровичыс.

Кресенняас небис бутылка и иньдöтчис Пестер Анна ордö. Анна некытöн эз уджав, а мыйöнкö вердчис. Сылö бы только винаок. Умöльтчöм инькаыс, чочкоммыштöм, топ öтöрас абу петавлöм. Олö богатжыка. Кыдзкö пыралiс Павел Егоровичыс Анна ордö: тюлевöй штораэс öшыннэс вылын эз öшалö. Пызан вылас виль клеёнка. Джоджыс миськалöм, и платьеыс вылас виль.

— Богатжыка пондöмыт овны, Анна.

— Уджала. Ас вылам шедта.

— Кытöн?

— Кытöн? — дразнитыштiс. — А эшö милиция! Сторожöн раймагазинын. Месяц.

«Месяц...» — думайтö милиционерыс, видзöтö Анна вылö, топ пантасьö первуись. Винерик инькаыс, синнэзас тоска, кыдз шогöт. Эз бы ю, морт бы вöлi... Тшыкöтö ассис олансö. Видзöтан — и жаль мортыс. Веськöтны бы туй вылас, да не учöтик — зыбкаас он тöбав.

Кыскис писис милиционерыс бутылка.

— Юыштам, Анна!

— Видзöт, милиционер, кыдз бы погоннэтö эн öштав! — сералö инькаыс.

Юыштiс Аннаыс, гажöн баитö:

— Быдöнкöт ювлi, но милициякöт эг. Чöскыт милицияыслöн винаыс!

Шуткаöн да прибауткаöн Павел Егоровичыс юалiс:

— Анна, висьтав веськыта: вовлö Игнатыс тэ ордö? — синнэзас веськыта видзöтö, душасö адззö. Юалiс, кыдз сьöлöмсö вундыштiс.

Дрöгнитiс Аннаыс, син кагаэс чиныштiсö.

— Мыля тэ менö торкан, Павел Егорович?! Тэ тöдан менчим олансö. Мый вылö менö каттян, кытчö оз ков? Ме бы отир моз жö ола...

— Вовлö?! Гогиньтыштiс юрнас.

— Часто?

— Сiя тэ вылö лöг, — гусьöн висьталö инькаыс. — Берегитчы!

Аслас синнэс повзьöмась, басниыс гардчö.

Чожа вузалiс Аннаыс Игнатсö. Нельки эз и веритсьы, что этадз петас. Не сэтшöм вöлi Аннаыс. Кöдзыт сьöлöмыс милицияыс дынö. Часто мортсö вöрöтлiсö только сы понда, что эз уджав, олiс не быдöн моз.

— Рад, что Игнатсö вузалi?! — кыдз тöдiс милиционерыслiсь думаэсö. — Гажöтчы, лейтенант, тэнат уджыс... А менам кытöн? Он тöд? Менам нем абу, — курыта горöтчис Аннаыс. — Но ме бы ола не Игнатыс моз, морт моз бы ола. Сiдз бы ола, медбы отирыс завидуйтiсö!.. Эх, Павел Егорович! — чочкоммыштiс инькаыс, лёка öзйыштiсö син кагаэс. — Кöть кытшöм, но ме не бандит. Вот тэныт и вузала Игнатсö. Но сы местö менö сiя вияс, тэкöт öтлаын.

— Эн пов, Анна, тэ жö мортыс советскöй!

— Не Советыслöн бы властьыс — полi бы! — гордöя висьталiс инькаыс. — А кин сэсся менö дорьяс? Бандитыс я мый я?

Томмыштiс Аннаыс, топ пельпоннэс вылiсь шогöт чапкис.

— Юыштам, Анна, — кисьтiс рюмкаэзö милиционерыс.

— Эх, Павел Егорович! Тэ мый думайтан: ме мортыс медбöрья свет вылас? Думайтан, Аннаыс абу ни морт? Ме быдöн кодь, только бы менö вежöртiсö, только бы эз сералö. Ю ачыт, оз тöр! — откажитчис винасис, пондiс чышкыны синваэсö. Лöнис инькаыс, дыр пукалiс шы сеттöг, кыдз öшöм. Вдруг пондiс висьтасьны:

— Ветлi жöник саяс, любитi, а нiя менö вашöтiсö учöтик каганам öтöрö. Кыдз понöс. И некин меным сэк эз отсав. Некин эз юав: сьöкыт я меным? Быдöн ас кежас сералiс: вот мужикыс чапкöм. Некинлö оз ков. Сэксянь сё шатлася. Йöзын. — Чышкис Аннаыс синваэсö, горöн ньылалiс дульсö.

Эз ни вöв тöння Аннаыс, вöлi том Анна, кытшöм вöлi невестанас, кытшöм чужис да быдмис: честнöй да веськыт душаа.

— Вот и гардчö Игнатыс ме гöгöр. Кошшö горттöмсö, аскоддясö. Кöть кытшöм, да морт. Шонтö ласковöй кылöн. Кинкö бердiсь эд менам сьöлöмö кошшö жö шонытсö? А öнi...

— Олансö мийö, Анна, олам öтпыр, и чапкасьны сiйöн оз туй, ась кöть кытшöм миянлö сьöкыт! Висьтав: кöр локтас Игнатыс?

— Ашын. Одз асывнас. Он верит? Лок да видзöт, — нуöтiс комас.

Комас, лабич увтын, — ящик вина, залавкаын — кило-мöд селёдка, ен джаджын — нянь.

— Адззылiн, кыдз ме ола, — серöмтчис Аннаыс.

— Богата.

...Но петiс сiдз, что Кöк Игнатыс локтiс рытнас. Эз тöд и эз вежöрт Павел Егоровичыс, мыля бандитыс эз видзчись асывсö, и кин тöдö, мый юрас вöлi сылöн. Может, сьöлöмыс тöдiс, что лöсьöтчöны кыйны, али велалiс ни кöин моз сöтны-вартны сэк, кöр сiйö оз видзчисьö, а кöр видзчисьöны — абу.

Лейтенантыс Анна ордö локтiс рытсянь, только шагньöвтiс посöдзсис порогсö, кыдз рысь моз сы вылö чеччöвтiс бандитыс. Югйöвтiс пуртыс морос одзöттяс, но милиционерыс вешшыштiс бокö. Вермасисö, кыдз зверрез, — кин кинöс. А керку пытшкын хозяйкаыс лолалiс — кулöм не ловья. Кольмöтiс бандитыс милиционерсö, чеччöвтiс посодзись да падмис...

Эта кадсянь Машаыс часто мужикыслö модьö, медбы сiя чапкис милициясö. Отирыс тай уджалöны, вердöны юррезнысö, и нiя вердчасö. Кывзö Павел Егоровичыс иньсö да шыннялыштлö.

10

Аннушка... Усис тöдвылас Аннушкаыс. Иньыс уськöтiс. Думайтö сы йылiсь, дивуйтчö: «Вот тэныт и Аннушка!» Мунiс кытчöкö районсис. Гижис Павел Егоровичлö письмо. Ошшасьö, что уджалö, шедтö деньга. Уджалö неумöля: наградитöмась Почётнöй грамотаöн. Некин мортыс вылын öнi оз серав. А татöн сералiсö, мортöн эз лыддьö. Быд местаын стыдитiсö.

Думаэс дзугисö онсö. Тöдвылас Игнатыс, кöдалiсь эз вежöрт душасö, эз вежöрт, кыдз вермис мортыс лэдзны асьсö бандитöдз.

«Мый Мелехиныслöн öткодьыс эта Игнаткöт? Вийис я Мелехиныс Лидасö деньга понда?..» — бергöтлö сiдз и этадз. Оз узь и иньыс, сьöкыта лолалö да бергалö бокас.

— Узь, йöзыс йылiсь эн думайт, ачыт бы ловья вöлiн, — видö ни Машаыс мужиксö.

Кыдз он думайт, кöр öшлан отирлiсь олансö? Сьöкыт, кöр уджыс падмö. Водас и думайтö. Оз вермы онмöссьыны. Бергалiс бок вылiсь бок вылö — мыдзисö боккес. Чеччис да звонитiс райотделö. Трубкасö босьтiс начальникыс:

— Этö тэ, Павел Егорович? Мыля он узь?

— Вöтаси, — пондöтчис старшöй лейтенантыс, но начальникыс дзугис:

— Шоччись, Павел Егорович. Ашын юрыт оз понды уджавны, а кинлöн юрыс оз уджав, кытшöм сiя морт?

Уджалö начальникыс ойнас. Асьсö оз жалейт, а мöдiкöс тшöктö узьны. Стыд умöля уджавны сэтшöмыскöт.

Думайтö Павел Егорович начальникныс йылiсь, пондö онмöссьыны, и вдруг ыксö Мелехиныс:

— Тэ менö мыля арестуйтiн, сюра-пеля?!

Дрöгнитiс, топ кинкö зэгнитiс коккезöттяс.

...Узис гортас. Ашынас бöра локтiсö деревняö. Машина сувтöтiсö сельсовет одзö. Панталiс понпутша Егор. Сир моз лякасис:

— Велалiн миян деревняö?

— Гленитчис.

— Некыдз ме тiянкöт, Павел Егорович, ог вермы пантасьны! Вовлöмыт, а ме уджалi фермаын.

— Гажтöмтчин? А то видзöт... — сералö милиционерыс.

— Инькаö вашöтiс: мун да вайöт пö Павел Егоровичсö. Инькаэс öнi тöдан...

Кыдзкö эта мужичокыс дзугсьылiс олансис. Эн видзöт мыгöрыс вылö, видзöт мывкыдыс вылö.

Кодя бы мортыс: уджа и прока. Олiс Егор иньыскöт — ошшасьны иньыс оз вермы. Только медбöрын Егорыс тышкасис, топ мортсö вомдзалiсö. Пондiсö мужикыслöн киэс лудны. Кöритö инькасö йöз мужиккöт, юрсö бы черöн масьтö. Бур бы — быль, а то инькаыс вылö нем видзöтны: челядьнас да уджнас абу рад. Егорыс мыгöрнас учöтик, да мужик. Ме пö хозяиныс гортын! Сувтöта пö олансö керкуас! Кулаккеслö воля сетö. Иньсö и челядьсö гортсис вашöтö.

Терпитiс иньыс Егорлöн, смевмис да норасис Павел Егоровичлö. Пондылiс Павел Егоровичыс Егоркöт морт моз: «Думайт, видзöт челядьыт да иньыт вылö!..» А Егоркалö кöть мый: что сылö, что стенаас юрнас брякйы. «Иньыс менам, не тэнат. Ачым хозяиныс!»

Шагнялiс сэк Егорка подöн райотделö. Джендöтiс суткиэсö дасö и ошшасьö, что сэтчин оланыс не сы сьöртi.

А талун Павел Егоровичöс корö гортас.

— Инькаö, Павел Егорович! — кеймисьö мортыс. — Гортö пö öтнат эн пыр.

— Локта, но öнi некöр. Поди, отсалан?

— Мый колö?

— Висьтала.

Кежалiсö Мизёва Таня ордö. Таня вöлi гортас. Сулалö джодж шöрас, киас бон: джодж миськалö. Джоджыс абу и сьöд, вились миськалö. Винерик инькаыт, челядьыс вита, а керкусö видзö — чача: стенаэс — рожабаннэз, джоджыс — веж кольть, öшыннэс — чочком цветтэз.

— Татьяна Ивановна, тэ кöр шоччисьлан? — юалö участковöйыс.

— Мöдöр югытас, а öнi некöр, — сералö Таняыс, юрсö чуклялыштлö.

— Усян кок вывсит.

— Ме уся? — китшкö Таня. — Этö тэ кыз яйнат усян, дак он чеччы, а ме кыдз бордтыв.

— Тэ миянлö колан, Татьяна Ивановна.

— Сiйö и вöтаси, что милиция локтас и спокойыс оз ло, — сералö Таняыс.

— Тэ эшö и вöттэз тöдан?

— Сьöлöмö менам сэтшöм!

— Недыр, Татьяна Ивановна, служба.

— Служба да дружба, эх!

— Боёк, ештан миськавнытö.

— Лоан боёкöн кватьыс весьтын.

— Кин кватьыс?

— Челядьö да мужикö. Тi эд, мужиккес, бокын бы узьны, а уджсö кинкö бы кери.

Шутитыштiс Таняыс. Согласитчис петавны соседкаыс ордö. Эшö тöн гортас Павел Егорович решитiс мöдпырся видзöтны Лидалiсь керкусö.

Керкуыс сё сiдз жö сулалiс кын öшына, чапкöм, и некин посодз дынас абу сибавлöм, только карта пытшкас öтiк след: вердö Таняыс Лидалiсь порсьсö.

Керку пытшкас шой дук, кöдзыт.

— Кытшöм тэ вöлiн кöдзыт сьöлöма, сэтшöмö и керкутö колин, — причитайтыштiс Таняыс.

— Кысянь пондöтчам? — юалiс понятöйезлiсь Павел Егоровичыс.

— Тэ уж ачыт, — висьталiс Таня.

— Сiйö думайта, что колö порог дорсянь.

Порог дорсянь жагвыв видзöтiсö щеллез. Гарйисисö Бражкинкöт, кöда буссяняс пондылiс ни несйыны.

Пыралiсö джоджулö, лабиччез увтö. Мый колö — абу, мый эм — асланыс местаын. Лидаыс любитлöм, медбы быд торыс сылöн куйлiс öтiк местаын, и вöрöтлöм керку пытшксö, тыдалö, только ыджыт праздниккез панытö.

Следователлез бусöсьмисö, ружтiсö, а понятöйез сулалiсö бокын: Таня сералыштлiс ас кежас, Егор тшынöтiс чунь кыза чигарка.

Кöр нем лоис кошшыны, Таняыс серöмтчис:

— Пöтiт буснас?

— Пöтiм.

— Эм сылöн эта доброыс, — висьталiс Егорыс.

— Тэ бы чапкин чигаркатö, а то öзтан керкусö, — видыштiс Егорсö Таняыс.

— Кöр куритан, юр буржыка уджалö, — кыз голосöн висьталiс Егорыс, топ Лидалiсь судьбасö кошшис сiя.

— Эх тэ, Егор! Тэнö бы милиционерас, — и Павел Егоровичыс дынö:

— Вунöтiт öтiкö.

— Мый вунöтiм?

— Ен джаджсис книгасö.

— Тэныт бы, Татьяна Ивановна, следовательнас.

— Ме сiдз прокурор. Гортын! — гордöя висьталiс Таняыс.

Книгасö видзöтiсö. Сiя важ, коркаэс бырöмась, и гижöмыс ны вылын тöдчö умöля. Старшöй лейтенантыс эз понды лыддьöтны, мый гижöм книга корка вылас. Осьтiс книгасö, зэгнитiс. Книга колассис лэбзис гижöток, жагвыв öвтчöмöн, усис джоджас.

Мышкыртчис да босьтiс гижöтоксö. Эта вöлi лотерейнöй билет. Некинлö нем эз висьтав, сюйыштiс билетсö карманас.

— Мый адззит? — юалiс Бражкиныс.

— Лотерейнöй билет, — висьталiс негорöн старшöй лейтенантыс.

— Нем эз пантась? — сералö Таняыс.

— Эз.

— Но и Лида, но и суседка менам! Кыдз олiс, сiдз и черпезьдiс, кыдз гаг. Тьфу! Сьöлöм гудрасьö, ась бы кöть кулан одзас джоджсö миськалi. Эд комас лабич увтас нятьыс чунь сувда. Некöр вöлöма дзимлявнытö. Кытшöм эшö деньга вермас лоны эта мортлöн, Павел Егорович?!..

— Сiдз, — согласитчис милиционерыс, юалiс, кытiсь бы адззыны лотереяись тираж.

— Счастьетö кошшан? — сералö Таняыс. — Кошшы. Таблицаыс эм почтаын.

— Почтаыс öнi игана, — висьталiс Егорыс. — Менам топ эм «Сельскöй жизньын».

— Хитрöй тэ, Егор. Гортат кыскан. Колö бы отсасьны, кыдз кодя мортлö, а тэ дзуган.

— Котрасьлыны?

— Котрась.

Быдöнныс иньдöтчисö сельсоветö.

Чожа таблицаыс вöлi ни Павел Егорович киын. Котöртiс таблицаыс кузя синнэзнас, синнэс кышасисö сiя номер вылö. Эз верит. Мöдöтчид бöрйис номерресö, мöдöтчид инмис номерыс сiя билетлöн. Сьöлöмыс джöмдыштiс, тырыштiс лолыс. Аслыс эз верит. Некöр сылö эз инмыв лотереяöн. Кынымись бы эз неблы, эз вöв счастьеыс. Кытöнкö öтiк руб... А сэтöн машина! Мотоцикл. Тысячася донажык. Нечасто этадз мортыслö счастьеыс шыннялö. Уна колö уджавны Лидалö эта машина вылö. А тöдiс я Мелехиныс этö?

Чочкоммыштiс Павел Егоровичыс — волнуйтчö. Вевттис газетанас рожабаннэсö.

— Мый адззин, Павел Егорович? — юалö Егорыс.

— Кошша ассим счастьеöс.

— Эм?

— Вунöтöмась.

— Мунам мекöт, — кыскö гортас Егор.

— Локта, — висьталö Павел Егоровичыс.

Петiс Егорыс. Сылöн милициякöт дружба не öддьöн: шедлiс öтпыр и тырмас. Кöр сiя петiс сельсоветсис, Николай Дмитриевичыс мыдза шынньöвтiс, висьталiс:

— Кодя тiян родняныт.

— Кытшöм родня? — эз вежöрт Павел Егорович.

— Петiсьыс.

— Эмöсь, — серöмтчис ас вылас милицонерыс, — оланыс йитö.

— Сэтшöм мортыс: мый пондас керны — кымöссö жугдас, но керас. Чорыт мывкыда. Быд асыв бригадирыскöт споритö. Некыдз сылö бригадир бур удж оз адззы. Сё не сы сьöртi.

— Оз уджав?

— Уджалö, быдöс керö, но сэтшöм мывкыд: оз спорит — не сылöн луныс. Эмöсь эшö миян сэтшöм отирыс. — Пондiс висьтасьны, что талун ветлiс ылiсь бригадаö. Липовöйö. Туй вылас мыдзис: кöдзыт, и унажыксö додь бöрас котрасис. Ветлiс öтiк старушка понда.

— Öтнас олö. Ме бы эг вермы, — дивуйтчö Николай Дмитриевичыс. — А меным тöн иньдö юöр: «Николай Дмитриевич, дона зон, вовлы ме дынö, видзöт, кыдз ола, да отсав. Кыв-мöд горöтча ме тэкöт — сьöлöмö бурмас». Ковсис делоэсö чапкыны да котрасьны. А кытчö воштiсян? Он эд мортсö чапкы. Ме, конечно, — виноватöя видзöтыштiс Павел Егоровичыс вылö предыс, — зоннас ог ни сылö ло, но мымда верма... Бригадирыс сэтчин сэтшöм жö! — лöгöн висьталiс бригадирыс йылiсь. — Тшöктi эд посодзсö вочны. Эшö арнас висьталi, а абу вочöм. Баитö, что мортсö эз адззы, топ некин абу кутчисьöм. Веритан, Павел Егорович?

— Ог.

— Тёсыс пö абу. Куим тёсжуг да дас кöрттувсö абу адззöма! — сьöвзис предыс. — А ме адззи. Мыля ме ог адззы, кöр старушкаыс заптöм тёссэсö йöр бердас. Ме нiйö гарйи лым пытшкись, орлалi и вочи посодзсö. Öнi лымыс оз тырт и поныс оз пыр, — долыта висьталiс медбöрын Николай Дмитриевичыс.

— А бригадирыс мый баитö? Кыдз дорйö асьсö?

— Бригадир! Конечно, ме этö бригадирыслö кытшöмкö собраннё вылын висьтала, но не эта главнöйыс. Главнöйыс сiя, что старушкасö вунöтам. Деревняыс учöт, быдöнным син одзын, некин сэсся сэтшöм инвалиддэс абу, и на тэныт... Пыралi и учительницаыс дынö: пионеррес миян чожöсь, но пессö тожö быд лун оз пыртö.

Öзйис сьöлöмыс предыслöн, баитö, топ сы одзын не Павел Егоровичыс, а старушкаыслöн челядьыс, кöдна вунöтiсö мамнысö, дыш бригадирыс и быдöс нiя отирыс, кöдна кöдзыт сьöлöмаöсь, кöдна весись йöзыс понда оз чепсасьö.

— Умöльжыкыс сiя, — баитö Николай Дмитриевич, — что старушкаыс оз вермы кок вылас сувтны, бедь вылын кыскасьö: паралич дойдöм веськыт кисö да коксö, а зоннэс кытöнкö котрасьöны, боёка мамныс дынiсь пышшалöны. Вот локтi, пукси и сэк жö гижи пöрисьжык зоныслö. Ог тöд, йиджасö я менам кыввес сьöлöмöдззас, но, может, дас рубсö мамыслö чапкас. Руб-мöдсö чапкас, — лöга серöмтчис Николай Дмитриевичыс, — но ачыс оз лок, полö, что локтас кö, мамыс кышасяс, колас мамсö сьöрас кыскыны. Городас. Сiдз, Павел Егорович, мöдiк месяцö мöдiк зонлö гижа — виль десятка, куимöтö — ныввеслö. Оланыс ны понда оз сувт, и ми старушкасö ог чапкö, — энöн кыввезöн предыс петiс.

Кольччисö сельсоветас — некин оз мешайт, пуксьы да думайт. Пукалöны кыкöн. Отсалi бы Бражкиныс гажа кылöн, а сiя оз баит. Шутнялö öм увтас да мурзьö. А баснитöг Павел Егоровичыс оз вермы, сьöкыт баснитöг.

Борисыс гажтöмтчö деревняас. Öтiк дело, да сэтöн джöмдалöны. Городас бы!.. Жуликкес бы дрöжитiсö, кыдз шыррез кань одзын, нывкаэс пöв синнэзнаныс видзöтлiсö.

— Борис, тэ мый гажтöм? Ёртыс нельки дрöгнитiс.

— Мыдзин?

— Тöдвылам усис öтiк нылочка, — шынньöвтiс Борисыс.

— Одзöв пöрисьми, мырдди бы нывкатö, — сералö Павел Егорович.

Борисыс куритö да шыннялыштлö. Тшыныс кымöрокöн уялö сельсоветас. Предыс оз курит, а тшын дукыс оз бырсьыв.

— Мамыт эм? — юасьö Павел Егоровичыс.

Сiя быдöс ни тöдö Борис йылiсь, тöдö мамыс йылiсь, но охота баитны, и юасьö.

— Кытöн уджалö?

— Лаборанткаöн. Заводын.

— А тэ?

— Блуднöй зон.

— Эз гленитчы заводыс?

— Романтика кошша.

— Романтика? — дивуйтчö старшöй лейтенантыс. — Романтика... Узьны некöр. — Кыскö кармансис лотерейнöй билетсö. — Борис, а Борис, вот кытöн мортыслöн счастьеыс!

— Бöбöтчан.

— Он верит?

— Мый сэтчин?

— Машина.

Босьтiс Борисыс билетсö, видзöтiс таблица вылö, горöтiс:

— Быль эд машина!

— Машина. Романтика... Адззылiн, кытöн романтикаыс?

Звонитiс начальникныс, юалiс здоровьенысö, уджсö. Висьталiс, что Мелехиныс юрсисö нетшкö, горзö Лидаыс понда.

— Ой тэ, Мелехин, кысянь тэ усин миян юр вылö?

— Думайта, что Мелехиныс гуддисьлiс ен джаджьяс, — баитö Бражкиныс.

— Конечно, эз эд уджав, а мыйкö керис.

— Сэк мый?

— Сiдз. Думайт, Борис Михайлович, виноват Мелехиныс али абу? Тöдiс билетсö и эз босьт...

— А вдруг...

— Вдруг кинкö билетыс йылiсь тöдiс? Мöдiк?.. Мöдiк... Не простöй эд билетыс: машина, деньга...

А вдруг билетыс понда пыралiсö Лидаыс ордö? Эта версияыс кутчисис и пондiс дразнитны, кыдз пон, кöда чепсасьö, лöгöтö, а аслыс вачкынытö оз лэдз.

— Кин вермис тöдны эшö эта билет йылiсь? — юалö ёртыслiсь старшöй лейтенантыс.

— Сiя, кин вузалiс.

— А билетыс не простöй, — думайтö ассис Павел Егоровичыс.

— Кыдз сказкаын, Павел Егорович, сулалам куим туй одзын...

— Сказка!.. Вöлi бы кыдз сказкаын. Решитiсö вились пондöтчыны лотерейнöй билетсянь.

Узьны иньдöтчисö Егор ордö.

— А ме думайтi, од ни локтö, — панталiс Егорыс, гöрдöтыштöмась рожабаннэс, — пешлi стопка. Терпитнытö эг вермы, — виноватöя висьталiс хозяиныс.

— Тöдчö, Егор — телега вор. Лечитi ме тэнö, лечитi, а тэ...

— Курöгыс и то юö, Павел Егорович.

— Только курöгыслöн мывкыдыс не миян кодь. Милицияас оз норась, а тэ вылö норасьöны.

— Курöгыс пö не кай, инькаыс не морт...

— Сiдз тэ, Егор, инькатö и видзöтан? Ме бы тэнö порог дорас эг лэдз.

— Шутита ме, Павел Егорович. Ме абу сэтшöм. Сёйтöнняс ни Егорлöн инькаыс баитiс:

— Адззылiн тэ, Павел Егорович, кытшöм морт вылö эшö инман. Асьным эд кошшам. Юр жö миян инькаэслöн! Сё мужик колö: кöть кривöй, кöть хромöй — вöлi бы... Вайöтiс кытiськö Лидаыс, а адззылiн, мый петiс. Натьтö, бöра жö не садьувьяс, винаыс эд бурсö и умöльсö керö. Ме тöда. Менам кыдз пондас юны...

Видзöтö гöсьыс осудитöмöн хозяиныс вылö: «Адззан, тэ йылiсь мый сёрнитöны!» Егор только шыннялыштлö.

— А тэ кылiн ни, Павел Егорович, что Мелехиныс мунтöнняс пируйтöм? — интересуйтчö Егорлöн иньыс.

— Эг.

— Отирыс баитöны.

«Колö проверитны», — думайтö милиционерыс.

Эшö баитiсö олан йылiсь, но эта вöлi не сiя басниыс, кöда колiс милициялö. Только Таня моз жö Егорлöн инькаыс осудитiс Лидасö, видiс дыш кучикöн, дженыт юрсиöн да кокнит мывкыдöн и вдруг висьталiс, что Лидаыс вермис гортсис пышшыны.

Эта думаыс Павел Егоровичлöн вöлi, эта йылiсь баитö и Егорлöн иньыс.

Виль лунö пондöтчисö кошшыны туйсö лотерейнöй билетлiсь. Билетыс вермис шедны ылiсь и матiсь: отирыс часто ветлöтöны деревнясис и билетсö вермисö небны туйын. Но Лидаыс некытчö ылö эз ветлöт, сiдзкö, билетыс сылö шедiс татiсь.

Сiдзжö решитiсö проверитны, быль я Мелехиныс мунтöнняс кытöнкö юис. Кинкöт юис и мый баитiс?

Босьтiсö вöв, пуксисö доддьö и иньдöтчисö деревняö, Мелехин туй кузя. Деревняöдз сизим верста. Туйыс умöль: тыртöм пурга. Öнi ветлöтöны только подöн да вöввезöн.

Ордчöн мунö вöркыскалан туй, и деревняыс кыдз станция, кытчö часто сувтöны шоччисьны отир. Деревняыс — ылiсь бригада колхозлöн, но оз тöдчы, что бригадаыс медылiсь и бокын. Отирыс олöны бура. Керкуэзаныс небöм-лöсьöтöм городскöй модаöн, да и отирыс веськытöсь баснинаныс. Некöр оз юасьö, кытiсь тэ да кытчö мунан, бур али умöль тэ мортыс, вердасö и ырöшöн юкталасö, кольлаласö, кыдз гöсьöс.

Деревняын öтiк улица. Улица шöрас тöв и гожум лöз видзöны сыспуэз.

Нельки быд керку дынын пон.

Деревня конецас, веськыт ки вылас, олö пöрись инька. Олö öтнас. Керкуыс важ, пиньöвтчыштöм. Но не керкуыс, а хозяйкаыс тöдса туй отирыслö сiйöн, что мортыслöн душаыс аслас: некинöс потшшуйттöг гортсис оз лэдз. И эшö Дарья Сеника — честнöй, некöр некинöс оз бöбöт, некöр и нем абу гусявлöм и оз любит гусясись мортöс. Сiя ачыс мужик. Куритö и черöн тшупсьö. Пишальöн вöралö — кошшы сэтшöм вöралiсьсö. Эшö мöйму лицензияöн лось пöрöтiс.

Сеника пöрись ни, босьтö пенсия, но уджалö. Бригадирыс оз тöд, кыдз ошшасьны сы уджöн.

Инькасö тöдöны не только сельсоветас, районын тöдöны.

Декабрь лунö Сеника ордö пырис Лидалöн мужикыс. Роч и тöдтöм, но культурнöй. Оз чеглав кинкö моз кывсö — тöдчö мортыс.

— Бабушка, ме хирург, — здоровайтчис хозяйкаыскöт локтiсьыс.

Сеника ордö разь профессор эз вовлы?

— Любита враччесö, — висьталö хозяйкаыс. Лонтö печка: öтöрас кöдзыт, и мортыс кынмöм.

Керкуыс шоналiс, и мортыс шоналiс.

— Хирург ме, бабушка, — нырсö шонтö печка одзас локтiсьыс. — Вежöртан? Сталинградын воюйтi.

— Бур, — ошкö хозяйкаыс да юрсянь коккезöдз видзöтö гöсьыс вылö.

— Кокö раненöй.

Мыйыс оз овлы свет вылас? Кывлiс Сеникаыс и сiйö, что челядьыс шедлiсö война вылас.

— Куритан? — кыскис Сеникаыс пройми увтсис табакöн сера кисет. — Только махорка.

Гардiсö чигаркаэз. Öзтiсö. Ловзисис керкуыс лöз тшынöн. Куритiсö тшыга, баиттöг: вежöртiсö öтамöднысö баснитöг.

Пырис колхозсиныс бухгалтер. Асланым мортыс. Кынмöм. Нем, тыдалö, керны этатшöм погоддяас, дышыс вешьянсö петö бырöтны правленнёас — ысласьö. Сеника тöдö бухгалтерсö. Не öддьöн и любитö. Мортыс хитрöй, пыр видзчисьö сто грамм, он юктав — вермас обидитны: начальник. Етша бöбöтö сiйö бухгалтерыс, но отирыс баитöны... Юыштöм Матвейыс. Сивöй юрыс сiдз и бергалö, кыдз шарниррез вылын. Садьувьяс он вежöрт, мый лёбö, топ кылыс гöна, сёйö кыввесö, а юыштас — быргö, нем он вежöрт.

— Здорово, Сеника!

— Здорово, сват. Кысянь?

— Ме? — сералö бухгалтерыс. — Кытöн вöлi — сэтöн абу. Ыслася.

— Абу масленича.

— Мый меным масленичаыс? Дело вöлi. Колхознöй. Посёлокас. Туй вылас и юыштi, ха-ха-ха! Оз туй, тётка, сытöг. Гажтöм.

— Сiдз, — серöмтчис старухаыс.

— А тэ кытчö, партизан? — юалiс Мелехинлiсь бухгалтерыс.

— Кытöн Макарыс пастухалö...

— Мыля сiдз?

— Мыдзи öтiк местаас...

— Вашöтiс Лидаыс?

— Тэныт коли! — мурзьыштiс Мелехиныс.

— Меным, ха-ха-ха. Менам аслам эм. А тэныт сiдз и колö. Правильно. Нем весись видзны тунеядеччесö. Сiдз, Степановна?

— Ог тöд, — висьталö Сеникаыс. — Менам важын ни мужикö абу, и некинöс эг примитлы.

— Лöгасин, Мишка?!

Мишка будзгыльтчис. Нем эз висьтав. Бухгалтерыс серавтöн кутiс пельпонöттяс, жмитiс бердас, модис:

— Эх да тэ, Мишка. Тэ ме вылö эн лöгав. Ме мортыс тэ кодь жö. Талун эстöн, ашын — ен позйын. Инькаö пыр вашöтö гортiсь. Колас тожö ыскöвтны кытчöкö. Мишка, примитан?

— Лок, — гажтöма висьталö Мишкаыс.

— Быдöс бур, но тi нем од тöдö. Тётка, менам кынöмö сималö! Тэ кылан?

— Ме дынöдз оз кыв.

— Ой тэ, тётка, ой тэ, кодя! Верд мыйöнкö. Чапкы нянь да сов беднöй мортыслö.

Сеника чукöртiс пызан вылö нянь да сов, лукторрез да сола тшак: мыйöн богат — сiйöн и рад. Матвей пызан вылö торскис бутылка.

— Юыштам, — висьталiс сiя, — медбы няньыс буржыка кылалiс. — А тэ юртö эн öшлы, Мишка. Иннес нiя быд шагын эмöсь. Вот сёям, юам и мунам кошшыны виль инь. Он верит?

Мишка пукалiс да виноватöя шыннялiс. Эз думайт сiя, что пантасяс туй вылын не öддьöн тöдса морткöт, кöда пондас сiйö потшшуйтны винаöн.

— Тэ мый, Степановна, думайтан, менам винасö немöн юны? Али жаль бутылкаыс? Ась кытшöм, да ме эшö бухгалтер, вот сiдз!

— Начальник, — согласитчис Сеникаыс, торскис Матвей одзö стакан. Он вежöрт старушкасö, мый шыннялö ас кежас: рад гöссеслö али осудитö.

Матвейсö тöдö важын ни. Матвейыс локтiс кысянькö Украинасянь. Чожа велалiс деревенскöй оланас. Комиöн велалiс баитны, топ чужис и быдмис татöн. Оз любит, кöр тэ сылö мыйкö поперег керан. Часто ветлöтö леспромхозö да районö. Туй вылын оланыс. Пыр кежö Сеника ордö. Некин ордö оз пыр, а Сеника ордö сё ни кежалас. Старухалöн нем отирысся буржыкыс абу: не сёян-юаныс, не басöк керкуыс, но сiя некöр мортсö бöрöн оз пантав: кытшöм эм — сэтшöм и эм, кыдз пырин гöсьöн, сiдз и петан. Тöдö Сеника мужиккеслiсь мывкыдсö, кужö сёрнитны, торйöтны тоскасö да гажсö, мыдзсö туй вывсис, эшö и куритыштас öтлаын.

Кисьтлiс винасö стаканö Матвейыс. Медодз юис ачыс, джын стакансис. Чышкыштiс соснас ныр увтсö, чапкис öмас тшактор. Дыркодь видзöтiс гудыра синнэзнас потолокас. Синнэсис сöдзис синва, горшас горалiс вина гагыс. Горöтчис:

— Но и бес!

Сэсся нем эз висьтав, кисьтiс винасö Мишкалö.

— Ме ог, — откажитчис рочыс.

— Он? — дивуйтчö Матвейыс. — Ю да касьтыв Матвейсö.

Мишка дрöжитана киэзöн босьтiс винасö, ньылыштiс стакансис öтiк гулькöн. Ружтыштiс и пондiс чапкавны öмас сьöрсьöн-бöрсьöн тшаккесö сiдз, что пиннес увтын дзуртiс сёяныс, и тарелкаыс син одзын простамис.

— Тэ, Мишка, эн тэрмась. Ме бы тожö сёя. Адззан, кытшöм кöраöсь тшаккес. Этадз только Сеника тёткаö солалö, а тэ öтiк гулькöн... Эта тэныт не город.

Мишка виньдiс.

— Тэ пуксьы да сёй öтлаын, — Матвейыс корис пызан сайö хозяйкасö.

Мишка вежсис син одзын, пондiс ласковöя шыннявны, рожабаннэс öгралiсö арся пипу листöн, и эз ни вöв Мелехиныс сэтшöм тальöм да чапкöм тюрьмаöн да оланнас, и инькаэс сылö эз ни колö: вöлi бы бур да кодя оланыс Лидкакöт. Охота лоис водны да узьны эта шоныт керкуын, добрöй старушкаыс борд увтын, медбы некытчö не мунны, пон моз не кошшыны узьлан места.

Мужиккес юисö: етша бухгалтерыс, унажык Мишкаыс.

Бухгалтерыс вöлi кодышкодь и юыштöм бöрсянь совсем тшыксис, пондiс дугдывтöг лёбны, баитны тэрмасьöмöн, гардiс баснисö сiдз, что кыввес сорласисö öтлаö, и басниыс боргис, кыдз тулысся бöб шор.

Сеника тожö юыштiс рюмка етш. Сылöн мывкыдыс эз вежсьы. Пукалiс да кывзiс мужиккезлiсь баснисö, куритiс.

Модисö код мужиккес — спас абу. Колö бы мунны, а нiя пукалöны.

— Колин Лидкатö?

— Коли, — öшöтö юрсö Мишкаыс.

— Кинлö колин? — оз дугды Матвей.

— Кинöс адззас. — Мишка жаднöя ньылалö табак тшынсö.

— Пыравны бы, а?.. Сеника тётка, кыдз думайтан?

— Верман, — висьталö Сеникаыс. Тöдö, что Матвейыс шыблялö йöз инькаэс дынö. Аслас инькаыс пыр уджын да заботаын: челядьсö быдтö и подасö видзö, колхозас котрасьö и гортын уджалö, а Матвейыс мый? Матвейлöн уджыс öтiк: правленнёын пукавны да винаок кöстыны — не зорöн зорьясьны, выныс бердас и яйыс вылас.

— Туяс, сiдзкö, вовлыны? — сералö Матвейыс.

— Мый тэ юасян? Воротаэс осьтаöсь. Ключсö карта угöлас видзö. Оз понды лэдзны — ачыт осьтан ыбöссö.

— Ха-ха, окояннöй душа! Мишка, вузалан Лидкатö? А туйö эд инькаыс, Сеника тётка. Каджыс шыгыра. Ме эшö сылö кодувьям лотерейнöй билет подаритi. Может, ассим счастьесö?

— Кытшöм билет? — оз вежöрт Мелехиныс.

— Сэтшöмö, кытшöмыс абу. Тэнö асьтö важын ни вузалiсö, — сералö Мишка вылын Матвейыс.

Но и Матвей! Öвтышалö юрнас старухаыс. Тöдö Матвейсö не талун, но этадз койö не пыр. Пемытсорöн мужиккес петiсö туйö.

— Ме тэнö кыска туй вылöдззас, — висьталiс Мишкалö Матвейыс.

— Сюра-пеля... Ме Сталинградын вöлi... Ме некытчö ог торксьы, — нач кодззис рочыс.

Асылöдз керкуас патшкис сук табак тшын дукöн. И кылiс Сеникалö Матвейлöн басниыс. Адззылiн, кыдз вежсьö мортыс, кöр юыштас!

11

Старшöй лейтенантыс Матвейкöт пантасис сельсовет öшын увтын. Бухгалтерыс тэрмасис районö. Машинаыс сулалiс посодз дынас, негорöн урöтiс мотор. Том шофёр гуддисис моторас, бобгис ныр увтас.

— Кытчö? — юалiс милиционерыс шофёрлiсь.

— Районö. Бухгалтерсö кыска.

— Ой кежас?

— Не аслам удж вылын, кöр прикажитасö.

— Дыр олат сэтчин?

— Мымда видзасö: час али сутки — не асланым уджöн.

Машина дынö локтiс Матвей. Здоровайтчис, шыннялö ота рожабаннас. Юалö:

— Мый гардчö милиционерыс?

— Нем кернытö — отсала... Кытчö мунан?

— Районö. Семинаррез пö... Чожа эд годовöй отчёт.

Павел Егоровичыс кутыштiс Матвейöс конувтöттяс, вешшисö машина саяс.

— Матвей Иванович, ме кылi, что тiйö Мелехинкöт винаок юöмась?

— Кöда Мелехинкöт?.. А, казялi... Но, а мый сэтшöмыс? Пантасим, юыштiм!

Не разбойник, не хулиган, некинöс эз вид и эз вартлы. Видзöтö хитрöя да гажöн милиционерыс вылö, сералö ас кежас: «Вот сiдз, ёрт милиционер!»

Матвейыс бердö куш кинат он кутчись. Тöдö и кужö асьсö дорйыны не только баснинас.

Кольлалiс Павел Егорович Матвейсö районö. Узьнытö локтiс вежайыс ордö. Только кыскалiс пимиэсö порог дорас, бöрсяняс ыбöссö осьтö Ванька Мошев, комсомольскöй организацияись секретарь. Пырис, здоровайтчис. Тэрмасьöм: пöдö-лолалö, баитны оз вермы.

— Пуксьы да ваксьы, — панталiс зонкасö старикыс.

— Некöр, дед.

— Пожар я мый я?

— Собраннё вывсянь. Комсомольскöй вöлi. Сё эшö кымöсö ва, — висьталö тэрмасьöмöн зонкаыс.

— Тэ пуксьы. Баитöны, что коккез вылын правдаыс абу. Кин тэныт пондас веритны, что тэ он ешты да мыдзин, — пуксьöтiс Ванькасö лабич вылö Павел Егорович.

— Öнджа, — оз терпит Ванькаыс.

— Сулав, ме киэзöс мисся, — мунiс комас умывальник дынö Павел Егоровичыс.

— Шоччись, зонö, шоччись. — Эта коста баитiс Ванькакöт старикыс. — Эн эшö гöтрась? Тэрмась, а то öнi тöдан, кадыс кытшöм. Öнi томмес городдэзö пышшöны, гортö кольччöны куим пиня старушкаэз, а кытшöм нiя невестаэз? Али городас жö лöсьöтчан?

— Ог, деда. Думайта шофёрö велöтчыны, а сыбöрын механикö.

— Ме мый баита! Öнi только том отирыслö деревняас и овны: няньыс эм, паськöм тырмö, киöн оз вундö. Уджав да уджав. Давитлы кнопкаэсö да видзöт, медбы эз виньды машинаыт.

Ванька пукалö. Чулалöны ни тэрмасян минутаэз. Зонкаыс босьтiс юр вывсис шапкасö, мыччис кудриэсö, пöрччалiс пальтосис киззесö — серöмтчис йöрнöс увтас сьöд пиннезнас тельняшкаыс — Ванькаыс вöлi моряк и гортын кольччис морякöн! Синнэс шыннялöны голубöй небоöн.

Дивуйтчöны йöзыс Ванька вылö, что локтiс армиясис и одзлань эз мун велöтчыны, кольччис колхозын. Мый öштiс деревняас?

— Но мый тэнат, Ваня? — комсяняс петiс Павел Егоровичыс.

— Ох, Павел Егорович! Ог тöд, кытчö воштiсьны. Тiян дынö котöртi. Вöлi миян талун комсомольскöй собраннё. А ме секретарьыс.

— Кылi, Ванька. Думайтi пантасьны, да кадсö эг адззы.

— Вöлi миян комсомольскöй собраннё, — висьтасьö тэрмасьöмöн Ванькаыс. — Лэбис собраннёыс вылын ыджыт спор.

— Ыджыт спорныт?

— Споритiм. — Висьталiс, мый понда споритöмась: — Миян эм дружинник Сашка Петров. Комсомолец. Мöд неделяас Петровыс дежуритiс клубын, — тэрмасьöмöн да волнуйтчöмöн баитiс Ванькаыс.

— Вежöртi.

— Пырöм клубас Аркадий. Тöдат сiйö? Учöтик трактор вылас уджалö. Комсомолец жö. Аркадийыс клубас локтöм не öтнас — кык ёрткöт. Ёрттэс кытiськö городiсь. Эшö пö родня Аркадийыслöн. Клубас эта коста зонкаэс биллиардöн орсöмась. Городскöйыс пондöма тешитчыны: «Разь тi деревенскöйес мыйкö кужат?!» Но и... Мырддьöмась кийсö, пондöмась куритны, сьöласьны, матькыштöмась Сашкаыс вылö... Сашкаыс, кыдз дежурнöй, пондöма мöддэсö вашöтны клубсис, а нiя паныт... Öтiкыс дежурнöйыслö вачкöм...

— Тышкасьöмась?

— Сiдз петö. Сашкаыс — паныт. Öтпыр только и пöжалöм ныр увтас. Сысянь шум лэбис: кин Сашкасö осудитö, а кин и ошкö. А городскöйес норасьны пö лöсьöтчöны, судитны Сашкасö. Кин виноватыс, Павел Егорович? Ме думайтi собраннё вылас тiянöс корны, да тiйö пö деревняö мунöмась...

— Абу басöк уджыс. Одзжык колiс меным юöртны, — жалейтö милиционерыс то ли Сашкасö, то ли Ванькасö. — Тiян собраннёыс эта понда и вöлi?

— Сы понда. И эшö ашын лöсьöтчам субботник кежö, колö лыс керавны да подаыслö изны. Но споритiм. Сашкаыс понда.

— Кöдныс одзжык вачкöмась? — юалiс старшöй лейтенантыс.

— Городскöйыс.

— Эн тöждiсь, Ванька, кыдз баитсьö, законыс правдаыс дор. Дружинникыс керис колана удж. Но... Кыдзкö колö видзсьыны, тышкасьтöг бы колö. Ме бы, конечно, секрет висьтала, что и ачым... — жмитiс кулаксö милиционерыс да гажöн серöмтчис. — Только тi ме сьöрö эд вöтчö, а то пондат шуны: "Милиционерыс велöтö!» Культура, служба, долг, мортыслöн достоинство — вот миянлö мый медодз колö. Прав дружинникыс. Мöдпырся, сэтшöм делосö разбирайттöн, собраннё вылас эд вунöтö корны, öтлаын видзöтам, поди, пригодитча? Сiдз, Ванька?

— Сiдз, Павел Егорович! — гажмис комсомольскöй секретарьыс, содтiс: — Сьöкыт секретарьнас уджавны

— Ми тiян годдэзын, Ванька, воюйтiм. Тожö эз вöв кокнит. Кытöн кокнитыс, а? Постелля вылас? Куйлы да узь дыржык — боккет пондасö висьны. А тэ, кытöн сьöкыт, котöрт партийнöй секретарьыс дынö. Юась да висьтась. Зонкаыс асланым, толковöй. И предыс сельсоветсис бокö оз чапкы, видзöт: старушкаэс зонöн лыддьöны, а тi, томмес, котöртö, кыдз ай дынö. И ме, кöр татöн, ог понды орддьыны. Öтлаын эд гажажык, уджыс аркмöжык.

Ванька мунiс милиционерыс дынсянь гажöн, сэтшöм чувствоöн, топ сьöкыт туй вылын юис капля кык лекарство, кöда мыдзсö вашöтiс öтiк часöн.

Кольлалiс милиционерыс Ванькасö, ужнайтiс да водiс. Мыдзыштiс, кынмалыштiс, деревняэзöт ветлöттöн, и узьны бы, шоччисьны шоныт постелля вылас, но сэк жö эз онмöссьы: колис Ванькаыс, вöрзьöтiс душасö, тöдвылас уськöтiс том годдэсö, комсомольскöй кадсö. Öшлiс ассис олансö, йитiс Ванькаыскöт, и петiс сiдз, что Ванькаыслöн оланыс сэтшöм жö, кытшöм вöлi томнас Пашкаыслöн. И охота лоис Павел Егоровичлö томмыны, олансö овны мöдпöв, котрасьны комсомольскöй собраннёэз да субботниккез вылö, но войнаыс эз ков.

Онмöссис сiя томöн, вöтасис, топ тöн бертiс война вылiсь, вились уджалö клубын, клубас мунö комсомольскöй собраннё, кытöн баитö Пашкаыс, висьтасьö, кыдз тышкасис война вылас. Сэтöн жö вöтасьö, топ войнаыс важын ни чулалiс, что строитсьö ни коммунизм, и Ванькаыс, комсомольскöй секретарьыс, кольлалö ни Павел Егоровичсö пенсия вылö. Пенсия вылö милиционерыс петö сiйöн, что уджыс сылöн коммунизм дырни оз ков. Этатшöм вöттэзöн чулалiс ойыс. Вöттэс то томтiсö, то пöрисьтiсö, уджöтiсö не аслас уджöн, не милицияын, а том отир коласын.

Узис чöскыта, саймис шоччисьöм, сьöлöм вылас кокнит да долыт думаэзöн, кöдна кöсйисö бур лун. Миссьыштiс, пасьтасис, öмас чапкис сола няньтор, юыштiс ырöш, петiс керкусис.

Любитiс уджавны одз асывнас, кöр юр абу мыдз.

Öтöрас ылiсянь сельсоветiсь öшыннэс видзöтчисö ни югыт биэзöн. Кадыс вöлi кыкьямыс час гöгöр. «Натьтö, сельсоветас горсö лонтiс сторожихаыс», — думайтiс Павел Егорович. Но сэтчин пызан сайын пукалiс сельсоветсис предыс.

— Николай Дмитриевич, тэ татöн я мый я узин? Рытнас гортат эд мунiн? — здоровайтчöмыс местö юалiс предыслiсь старшöй лейтенантыс.

Николай Дмитриевичыс то ли хитрöякодь, то ли виноватöя шыннялiс да видзöтiс гажöн милиционерыс вылö, ачыс юалiс:

— А тэ мый он узь?

— Удж сэтшöм.

— И менам удж. Корисö тöн фермаö. Подавöдитiссес. Колö одзжык, кöр подасö пондасö сёдны. Ветлам öтлаын? Али уджыт дзескыт?

— Ветлам, — согласитчис Павел Егоровичыс. Тöдiс, что кык-куим часнас Лидасö он адззы, а фермаас пантасяс отиркöт, видзöтас подавöдитiссезлiсь уджсö — быдöс колö участковöйлö. Сiдз думайтö милиционерыс, думайтö не только преступленнёэз йылiсь, но и колхознöй уджыс сьöлöм вылас, кыдз аслас.

Мунiсö бы фермаас öнi жö, но эз вöв Василий Максимович, партийнöй организациялöн секретарь, кöда öтлаын предыскöт лöсьöтчис фермаас.

— Мый сiя дыр? — видзöтлiс часы вылö Николай Дмитриевич.

— Локтö ни, — иньдiс Павел Егоровичыс чуньнас ыбöс вылö: посодзас кылiс ботинкаэзлöн торскöтöм. Ыбöсыс оссис, и секретарьыс местö маласьöмöн да не тэрмасьöмöн мыччисис Проша Ольöксанлöн клин вылö вачкисяна сивöй тошыс да кузь векнит мыгöрыс. Ольöксаныс ружтыштлiс, кашыкасис, сьöласис да мыйкö модис ныр увтас. Веськыт киас видзис кыз, майöг вылö вачкисяна бедь.

Дивуйтчöмöн видзöтiсö старикыс вылö милиционерыс и предыс. Öтдруг думайтiсö: «Мый эта стариклö колö одза одз сельсоветсис?» Öльöксаныс пырис, боёкжыка ни веськыта пуксис стул вылö, горöтчис:

— Ой кыдз тэрмаси, мыся, Миколай Дмитриевичсö ог застанит!

— Кытiсь тэ тöдан, что ме одз лоа татöн? — юалiс старикыслiсь Николай Дмитриевичыс.

— Мыля ме ог тöд! Ме быдöс тöда. Кöр эшö предыс лоас сельсоветас, кыдз не асывнас?

Баитöны этö, вдруг тöвчикöн пырö Öльöксанлöн иньыс, уна боёк старикысся не только кывнас, но и кок вылас; старикыслö пельпонöдззас, но сы кык пасьта, кыдз петух чеччöвтiс ыбöссяняс пызан дорöдззас и пондiс сярзьыны:

— Миколай Дмитриевич, дона тэ, роднöй да любимöй, тэ эд нем он тöд?! А миян эд делоыс вийсяна. Торйöтчам эта сотанакöт, — мыччис кöс кулаксö мужикыс вылö. — Век олiм да эта спектакыс эз вöв, а талун торйöтчам. Тырмас! Ась. Мый ен шуис, кыдз судьба кöсйис. Кинкö дзебас.

— Мый сэтшöмыс? — эз вежöрт Николай Дмитриевичыс.

— Эд сералö. Ме вылын нем серавны! — уськöтчис ни старушкаыс Павел Егоровичыс вылö, кöда сулалiс, видзöтiс пöрись гозъя вылö да шыннялыштлiс ас кежас.

— Мый лоис?! — эшö öтпыр дзугис старухалiсь баснисö Николай Дмитриевичыс.

— Янсöтчам ми старухаöкöт, — висьталiс старикыс. — Ме муна зонö дынö, городö, а сiя гортö кольччö.

— Сiя менчим медбасöк бекöрсö мырддьö. Гусялö ассим добросö, аслам киöн небöмсö! — норасьö старушкаыс.

— А мый ме сэтöн? — эз вежöрт предыс.

— Мый тэ! Сельсовет тэ — вот мый! Янсöт миянöс чесь чессю! — висьталiс старикыс.

— Ме эд не суд, — откажитчис Николай Дмитриевич.

— Миянлö судыс öтiк бекöрыс дорын оз ков, — сулалiс аслас басниöн Öльöксаныс.

— То милиционерыс.

— Миянлö тэ колан. Сельсоветыс! Чтобы быдöс закон сьöртi.

— Тэ колан, Миколай Дмитриевич, ась кулам, и мöдöр югытыс весись греххезным понда мед эз кыскалö, медбы суддэс понда бессэс пым пöим вылас эз пöжалö! — висьталiс Öльöксаникаыс чорыта, да сiдз, что откажитчыны эз туй: откажитчан — локтас мöдöтчид, куимись-нёлись воляс бекöрыс понда сэтчöдз, кытчöдз оз мун предыс Öльöксаникаыс ордö и оз отсав торйöтны пöрись гозъя коласын басöк бекöрсö.

«Но и комедь!» — думайтiс милиционерыс, кöда аслас уджын адззывлiс берсясö, но этатшöмсö эз пантавлы.

— Милиционер! Тэ сё сералан. Тэ пöриссесö он дорйы! — видыштiс Öльöксаникаыс милиционерсö.

Сэтчö пырис детсадiсь заведующöй да пондiс норасьны, что садас бырсьö пес, и колö сiйö вайны талун жö. Нылочкаыс эз видчы, эз горзы, но песнас сылö колiс отсавны одзжык, нежели эна старик гозъялö, и

Николай Дмитриевичыс висьталiс, что сiя талун жö адззылас да висьталас бригадирыслö, медбы садас вайисö пессö.

Петiсö сельсоветсис старик гозъяыс. Ыбöс коласас ни пантасисö Василий Максимовичкöт и пондiсö норасьны, что вовлiсö Николай Дмитриевич дынö, висьтасисö асланыс беда йылiсь, бекöрныс йылiсь, торйöтiсö судьбанысö. Партийнöй организацияись секретарь кывзiс норасиссесö ыбöс коласас да висьталiс, что предыскöт талун жö вовласö ны ордö. «Гöтраламö», — гажöн кольлалiс сiя Öльöксаника гозъясö.

— Гажöн эд олам, Павел Егорович! — стариккес бöрсянь сералiс Василий Максимовичыс.

Фермаас мунiсö куимöн. Локтiсö лöзъюгыт. Мöсвöдитiссес тэрмасисö подаыс гöгöр: кин чилькöтчис, кин сёдсис, кин лöсьöтчис йöвсö лэдзны сепаратор пыр. Медодз пыралiсö мöссэз дынö. Видзöтiсö, кытшöмöсь подаыс. Николай Дмитриевичыс эз вöв фермаас неделя, и мöсвöдитiссес лякасисö предыс бердö, топ сiя эз вöв ны дын быдса год, топ фермаас хозяиннас вöлi сiя и вунöтлiс ассис уджсö.

Фермаас эз тырмы то песыс, то колiс чочком сёй белитны гор, то абу вайöмась матег. Норасисö и партийнöй секретарьыс вылö, а унажыксö бригадирныс вылö, кöда фермаас абу вöлöма куим лун. Бригадирыс — коммунист, и сэтöн унажыксö виноватнас лыддис асьсö Василий Максимовичыс. И Николай Дмитриевичыс сьöлöм вылын вöлi не долытжык: отирыс не подаыс, тöдöны, что тэ предыс сельсоветас и колö отсасьны тэныт.

Медумöльыс талун фермаас вöлi сiя, что турунсö вердiсö тшыкöмö, багсялöмö, нормася етшажыкöн, кöр бур туруныс сулалiс видз вылын, зородын, только колiс сiйö вайны.

Конечно, сэтöн виноватнас вöлi бригадирыс. «А коммунисттэс кытöн, мыля абу депутаттэс?» — вот эд мый думайтöны отирыс.

Павел Егоровичлö мöсвöдитiссес эз норасьö не туруныс понда, не матегсö эз касьтылö, но быдöнлöн милиционерыс дынö адззисис аслас мог, кöдö колiс юасьны участковöйыслiсь. Юасисö унажыксö законнэз йылiсь, быдöс Конституциясö, кытчö гижöмась миян правоэс чужан лунсянь кувтöдз.

Видзöтчисö, баитiсö, а эта коста фермаас бригадирыс ыскöвтiс кошоваöн. Сувтöтiс вöвсö, чеччöвтiс коккес вылö, здоровайтчис и сэтöн жö пондiс ыксыштлыны уджалiссез вылö, мыля нылöн оз тырмы то сiя, то эта, мыля нiя абу керöмась этö да сiйö.

— Дырöв узям, — öмалiс Василий Максимович бригадирсö.

— Топ тiянся одзжык чеччи, — пиньгисис бригадирыс.

— Мыля куим лун эн вовлы фермаас? — юалiс Николай Дмитриевич.

— Некöр вöлi!

Голосыс — хозяинлöн, не только гортас, бригадаас.

— Спиридон Иванович, тэ талун гортат мöстö сёдiн? Пöт, натьтö, вердiн. А мыля колхознöй подасö пöт он верд?! — лöгöн юалiс бригадирлiсь Павел Егоровичыс. — Эн вунöт, что колхозыс миян — государственнöй. А сiйöн уджсö пондам керны, кыдз государственнöй, общественнöй добро понда!

— Виноват ме, Павел Егорович, — вежсис бригадирыс. — Талун жö туруныс лоас. Ваям.

Баитiсö дояркаэзкöт, лöсьöтчисö талун жö отсавны, мый оз тырмы фермаас, а мунтöнняс ни партийнöй секретарьыс бригадирлö висьталiс:

— Спиридон Иванович, лöсьöтчö: пондам бюро вылын кывзыны, кыдз уджалат.

Абу топ уджыс участковöйыслöн, топ весись öвтчö, а отирыслö пригодитчö: сёрнитiс комсомольскöй секретарькöт, вöлi фермаын, ашын сылö женсовет вылö колö. Гöтрасьны — свидетель, кага гижны — вежай. Олö бродяга моз: кин вердö да юкталö, кин басниöн кольлалö. Топ не удж, не дума, старухаэс повзьöтлöны ни челядьнысö: «Ожось, норасям милиционерыслö!..»

Митрош Таня кеслö пиннесö:

— Но и олан! Каньлö да тэныт. Сё кызан.

— Кин кыдз кужö, Татьяна Ивановна.

— Хитрöй тэ, Павел Егорович. Быль вöлi Лидаыслöн лотерейнöй билетыс? — юалiс, кыдз лыйис.

— Эг кыв. Золото вöлöм, — чорыта висьталiс Павел Егоровичыс.

— Вот эшö!..

12

Олö деревняын милиционерыс. Командировкаын и не командировкаын. Олö да вердчö йöз отир няньöн, нёджжалö олансö. Кытöн колö — отсалыштö, кытöн колö — зэлöтыштлö. Служба. Кывзöны отирыс милиционерсö, и сiя кывзö. Отирыс видзсьö Павел Егоровичыс гöгöр, и сiя отирсö оз орддьы. Быдöнлiсь ни тöдö олансö, уджсö и семьясö. Öтпыр Попова Таняыс магазинын бокас чуткис, юрнас гогиньтыштiс: öтöрö корö. Петiсö öтöрас. Китш-китш серöмтчис Таняыс, топ майöг вылö катша пуксис.

— Павел Егорович, кöр тэ миян син одзись тарöвтчан?

— Мешайтча?

— Мужикö юрöс бы кералö!

— Ме понда?

— Тэ понда. Колас миритчыны, — ваксьö Таняыс. Локтiс матöжык, пель одзас шушкö: — Отирыссянь кылi, бытьтö бухгалтерным иньсö каж вартлöм. Невна абу вийöм.

— А меным мый? — эз вежöрт милиционерыс.

— А тэнö мый вылö?!.. Кытшöм тэ милиционер, прости господи! — сiдз и вартлö бы кулаккезнас.

— Эн ыксы, Татьяна, не базарын, и милицияыс вылö кулаккетö эн лэбтав!

Чорзьыштiс Таняыс и лöнис: магазинö локтiсö отир. Гусьöн пель одзас шушкö:

— Павел Егорович, быль Матвейыс Лидаыслö билетсö вузавлöм? Кывсьö, что иньыскöт сы понда и тышкасьöмась...

— А мый тэныт?

— Милиция! — сьöвзис Таняыс и пондiс баитны Лида йылiсь: — Сiдз сылö и колö, кöбыла кучиклö. Бöбöтлiс мужиккесö...

— Милиция да милиция! — лöгасис Павел Егоровичыс. — Мый милицияыс тэныт умöльсö керис?

— Мый вылö милициясö? Виясö и вартласö — сё öтiк!

— Ась, Татьяна Ивановна, — сьöкыта ловзисис милиционерыс, — кинлö мый...

— Иньыс эз норась?

— Эз.

— А тöдан мый лоас, кöр норасяс? Он тöд. Вермас юртöг кольччыны. Инька сiя, и колö сылö быдтыны челядь.

Колiс адззисьлыны бухгалтерыскöт. Кытшöм бы уна басниа эз вöв эта Таняыс, не быдöс жö лёбö весись.

Бригадирыслiсь корис вöв. Висьталiс, что корöны районö, а машинаэс абу.

Бухгалтерыс олö мöдiк деревняын — куим километр ылына.

Лэчыт тöв гардiс лымсö и шуч нöбöтiс паськöм пыр. Вöлыс тыртöм туй кузя мунiс жагвыв. Павел Егорович пукалiс доддяс да кывзiс тöвлiсь норасьöмсö, кöда норасис аслас судьба вылö.

Тöдвылас Сеникалöн висьтасьöмыс. Мый сёжö йитiс бухгалтерсö Мелехиныскöт? Öтiк винаыс я? И сэтшöм я кодя бухгалтерыс, что юкталö быд мортсö, кöда пантасяс туй вылын? И вöлöм жö басниыс Мелехиныскöт эта лотерейнöй билет йылiсь.

Эна думаэс и вайöтiсö бухгалтерыс ордö.

Улица кузя мунiс старушка, кайöтiс ва; горбыльтчöм мортыс ведраэс увтын.

Павел Егорович юалiс бухгалтерлiсь керкусö.

— Сэтчин, — мыччалiс старушкаыс неыджыт керкуок вылö.

— Спасибо. Адзза.

Сувтöтiс вöвсö посодз бердас, чапкис одзас турун, домалiс. Ыбöссö осьтiс неыджыт кöсыник инька. Сьöд юрсиа, синнэс рудöсь, чужöмбан вылас аслас гаж: сералö джын рожабаннас. Баитö дыша, кыдз вывтi мыдз. Шульга син увтас неыджыт лöз анькытш пуртöс. Сайöвтö бы лöзöтöм синдорсö, но чышьяныс вешшö юр вылас.

— Кынми, — норасьö порог дорсянь милиционерыс. — Но и погоддя!

— Петантöм.

Инькаыс тэрмасьöмöн лонтiс печка. Печкаыс чожа да гажöн öдззис гурйыны. Керкуас öшöтчис шоныт ру.

— Кытчöдз? Этатшöм погоддяас?

— Служба.

— Служба не дружба, узьтöнняс оз керсьы, — шуткаöн согласитчис инькаыс да веськыта видзöтыштiс синнэзас.

Сiя чапкис юр вывсис чышьянсö, мыччис син дорсис пуртöссö, вевдöрö чатыртчыштöм нырсö, чим сьöд чикись бордтыв синкыммесö да пондiс баитны простöя, веськыта, нем эз суськы. И быдöс вылö веритö, кыдз челядь, кöдалiсь эшö олансö эз дзугö сьöкыт да хитрöй годдэз.

Инькаыслö нёльдасся унажык, но тöдчö нывкася басöкыс, кыдз цветоклöн, кöда кельдöтöм ни арся кöдзыт погоддяö, и эм эшö гожумся рöмыс. Ачыс кöсыник, и киэс кöсыникöсь, тыдалö, оз полö уджсис: вир жилаэс уджалiсь мортлöн — польдöмась. Абу киэс вылын нежнöй кучикыс, и тöдчö киподыс: керкуыс миськалöм, быдöс тэчöм аслас местаö.

— Ме думайтi, тшына керкуын олат, — шутитö милиционерыс.

Вак-вак серöмтчис инькаыс, висьталiс:

— Миян и баняыс чочком, керкуным кодь жö. Вайис мискаöн ырöш. Шöма да кöра. Ырöштöг деревняын оз олö. Юыштан — пöт, и няньыс оз ков. Юис ырöшсö, ошкыштiс хозяйкасö.

— Ырöштöг мийö ог олö. Мужикö сэтшöм жö.

— Кытöн сiя?

— Кин сiйö тöдö? — дивуйтчöмöн висьталiс инькаыс. — Рытсянь абу. Вöлi лямпаэз вöрöтö. Может, лешакыс вöрö кыскис? Сiя эд меным оз висьтась. «Мунiс командировкаö, а лоис вöрын!» — сöтiс милиционерлö юрас дивуйтчана дума.

— Оз висьтась?

— Кылан сысянь. Он жö эд. Поди, йöз инька дынö, а, может, и вöрö. — Висьталiс топ не мужикыс йылiсь, йöз морт йылiсь баитö.

— Ох, лешак, а ме неделя ни гортын абу, — норасьö Павел Егоровичыс, — тöдi бы одзжык... Вöзйиси.

— Тi, мужиккес, быдöс öткодьöсь, — кöритö инькаыс. — Мыля ми гортiсь ог пышшалö? Колö бы кöть öтiк ой кежö. Мый бы пондiс сьывны бöрсяням? Натьтö, унньöвтiс бы? Ачыс эд шыдсö оз пу.

Быдöс висьтасис инькаыс мужикыс йылiсь — кывзы.

Тэрмасьны некытчö: öтöрас вижгö лэчыт тöв, а керкуас шоныт.

Висьтасис инькаыс и ас йывсис.

Чужис да быдмис сiя эта деревняын. Нiя жö годдэзö, кöдна годдэзö быдмис и Павел Егоровичыс. Только инькаыс год-мöдöн томжык. Оланыс вöлi не талуння, «Öнi нинкöмсö кокас некин оз кöмав, а сэк асьным печким и кыйим, вурим и пасьталiм, — висьтасьö инькаыс. — Уджалiм лун и ой, а кынöмным сё сималiс. Няньыс эз вöв. Берсянас тшыгсö тыртiмö».

Нёля Марьюшка айлöн вöлiсö челядьыс. Кольччис öтнас. Кин тшыгсянь кулiс, кинöс шогöт вийис.

А быдмис эд нылочкаыс. Кöр пондiс вердны асьсö, кöр пондiс отсасьны мамыслö, лоис невеста юра, пондöтчис война. Сьыв бы да ов — сэтшöм ни зорамис оланыс, а сэтöн войнаыс чарöтiс олансö, быдöс дзугис да разис.

Мужиккес гортö колисö челядьсö да пöриссезöс. Инькаэс кутчисö гöррез бердö.

Марьюшкаöс босьтiсö ФЗО-ö. Велöтчис и петiс токарьö. Кутчисис уджавны заводö. Пондiс вердны асьсö, пасьтасис и нуис колана удж: керис снаряддэз.

Городсис и адззис жöниксö.

Матвейыс гленитчис: орденнэс моросас тыр. Боёк, ваыс вылас оз видзсьы.

А пантасисö кыдз!

Сулалiс нывкаыс улица вылын, видзчисис трамвай. Видзöтö: солдат мунö тротуар кузя, чотö, киас кыскö ыджыт чемодан. Чышкö кымöс вывсис ньылöмсö. Видзöтö нывкаыс сы вылö, и жаль мортыс, что некин сылö оз ылöст отсавны, топ городыс отиртöг. Сьöлöмас пырö сэтшöм тоска, кöть горзы. Сымда ни эна годдэзö мунiсö син одзöт сиротаэс, и челядьыс, и пöриссес, да эшö победа бöрсянь том солдаттэс!..

Быдöн эд война костас отсасисö öтамöдныслö, кин кытöн вермис, мыйöн чайтчис. Йöз отир лоисö воннэзöн, сиротаэс — зоннэзöн. Жаль нывкалö солдатыс. Шагньöвтiс паныт, висьталiс:

— Служивöй, вай отсала.

Сувтыштiс солдатыс, дзарнитiс и сотiс нывкаыслiсь сьöлöмсö. Вöлi эта синнэзын зубыт тоска, отчаяннöй думаэз, кöдна баснитöг баитiсö-юалiсö: «Но мый эшö тэныт колö, нывка? Разь он адззы!..» Но Марьяыс адззис, эз бы адззы — эз шагньöвт, и не только адззис, кылiс, кыдз солдатыслöн уджалö сьöлöмыс, места оз адззы.

— Кытчö? — гажöн юалiс солдатыслiсь нывкаыс. Юасьтöг кисис босьтiс чемодансö.

Вöлi сiя стройнöй да топыт, вына, кыдз нывка, кöдö быдтiс деревенскöй олан, нимöтiс сöстöм воздух.

— Ог тöд! — лёка висьталiс солдатыс.

— Кыдз он тöд? — öшис нывкаыс. Жалейтiс ни, что кутчисис чемоданыс бердö.

«Сералö я мый я солдатыс? Нысянь тожö видзчись...»

— Некин менам абу. И гортö абу! — öшöмöн висьталö солдатыс.

Видзöтан: кöда война вывсис сьылö да локтö — рад, а эта?..

— Кыдз жö сiдз! — горöтiс нывкаыс. Ачыс эз казяв, кыдз чепöссисö синваэз. Адззылiс эна годдэзö китöм-коктöмсö, челядьсö айтöг-мамтöг, а öнi война бöрсяняс... Колö гажöтчыны, а не сулавны öшöмöн улица вылас.

— Эн горзы, нывка! — чорыта висьталiс солдатыс. — Мый керан? Война.

Висьталiс — сьöлöмöдз йиджис.

— Лок мекöт, — висьталiс солдатлö Марья, иньдöтчис гортлань. И мыля этö висьталiс, öнöдз ачыс оз тöд. Может, жаль вöлi солдатыс али любо? Кыдз бы эз вöв, но солдатсö нуöтiс гортас. Кылiс бы этö мамыс — умöль бы лоис.

Сiдз панталiс Марьюшка жöниксö. Дружитлiс и одзжык зонкаэзкöт, но некинлö сьöлöмсö эз сет, эз любит, только Матвейсö и пондiс любитны.

И Матвейыс любитiс иньсö. Любитiс сiдз, что киэс вылын новйöтiс, некинлö кывнас эз сет обидитны.

Марьялöн киэс золотöйöсь и шоныт сьöлöмыс.

Олiсö нiя городас куим год.

И вдруг сьöлöмыс нывкасö пондiс кыскыны гортö, деревняö. Олiс городас — эз ков деревняыс, а локтiс кад: водö городас — чеччö бы деревняас. Олö и вöтасьö сiйö. Оз вермы деревенскöй ыббезтöг да видззезтöг, кытöн шумыс етша и машинаэзлöн дукыс абу.

Воздухыс деревняас кыскö.

Матвейлöн некин абу, öтнас Марьяыс. Аймамсö торкöм войнаыс Оз тöд, кытöн могилаыс пöриссеслöн.

И Марья гозъя локтiсö деревняö, мамыс ордö. Айыс эз ни вöв: кулiс, и мамыс зятьсö примитiс, кыдз ассис роднöй зонöс. Мый бы эн шу, а керкуас мужикыс колö. Матвейсис некытшöм тёща бы эз откажитчы: уджнас некинлö оз сетчы.

Марьялöн лоисö челядь. Öтiк, мöдiк.

Медодзза годас жö Матвейыс деревняын уджалiс бригадирöн. Бригадир — деревняын командир. Кытшöм командир, сэтшöм и удж, сiдз и олöны отирыс.

Матвейлöн бригада пыр мунiс медодзын. Слава паськалiс бригадир йылiсь. Матвей олiс отиркöт одз асывсянь сёр рытöдз, колас — ойнас мунас отир дынö.

Сiдз лунiсь лунö, годiсь годö. Кык год бригадиралiс Матвейыс, кык год олiс заботаэзöн да уджöн. Часто гортсö и семьясö вунöтлiс. И быдöс гортiсь уджсö колiс керны инькаыслö.

Вежöртiс инькаыс мужиксö, миритчис: мый керан — сэтшöм удж Матвейлöн. Кöр и винитас жö мужиксö, да думайтö мöдöрö.

Эз ни ло гозъя коласын одзза оланыс: Матвей олiс аслыс, иньыс челядьнас — аслыс. Матвейыс часто пондiс юны, эз понды сетны ассис шедтöмсö иньыс киö: ачыс ас вылас хозяин.

Бригадир йылiсь деревняас лёбисö, что сiя дöваэскöт гардчö. Эз верит эта вылö иньыс. Вöлiсö лöггес Матвейыс вылö: не быдöнлö бригадирыс сват да вон.

Кыным уна уджалiс Матвейыс, сыным уна сы гöгöр пизисö умöль да бур славаыс. Сьöкыт янсöтны, кытöн бурыс, кытöн умöльыс.

Пондас иньыс кöритны, бергöтас шуткаö: «Ме öнi начальник!»

И ачыс эз казяв, кыдз Марьяыс пöрис Матвейлö слугаö. Лыддисис иньöн, а олiс слуга местö. Мый шуас иньыс, öмалас:

— Верма мунны...

Норасьны? Кыдзкö эз лöсяв, стыд. Мый шуан — кутчисьö тышкасьны. Одзжык эз лэбты кисö, а кыдз öтпыр лэбтiс, и пондiс воюйтны: юыштас — шы эн сет, мый шуан — керкусис вашöтас.

Жагвыв велалiс и эта оланö.

Вежисö бригадирсис.

Но Матвейыс эз ни вермы сюйыштны коскас чер да иньдöтчыны вöрö. Мунiс велöтчыны бухгалтерö.

Велöтчис. Пондiс уджавны правленнёын, бöра жö отир коласын, деньга дынын. Сё сiдз жö часто юис, ветлывлiс командировкаэзö.

Сё частожык узьлiс йöзын. Сё сiдз жö сералiсö Матвейсö, что узьлö йöз инькаэскöт.

Гортыс лоис кыдз квартира. Иньыс норасьлiс предыслö, но Матвейыс эз вежсьы.

Миритчис инькаыс оланнас. Челядьыс вылö надейтчис. Челядьыс быдмисö, мамнысö оз чапкö.

Быдöс висьталiс мужикыс йылiсь, нем эз суськы.

— Юö? — юалö старшöй лейтенантыс.

— Туйис — вывсис вешьянсö бы вузалiс. Кыдзкö вöлi ошшасьö: деньгаыс абу тырмöм, лотерейнöй билет вузалöм да юöм. А меным мый? Меным эд сё сымда.

Олiс инькаыс мужикыскöт, олiс джын вексö. Тöдiс, кытшöм вöлi томнас. Вöлi бы сё сэтшöм, кытшöм томнас, оланыс бы вöлi олан кодь. А öнi мый? Отирыс сералöны.

Чышкис синваэсö инькаыс. Гореыс визывтiс рожабаннэзöттяс. Мыйсянь мужикыс тшыксис? Винасянь. А кöр эта врагыс локтiс да дзугис олансö?

Жаль Марьясö. Кытшöм кылöн отсавны эта мортлö? Кытшöм совет сетны?

— Оз ни сыись мортыс пет, — горзö инькаыс.

— Петас! — висьталö Павел Егоровичыс, ачыс думайтö, кыдз веськöтны мортсö, иньдыны виль туй вылö. Мыля мортсö абу туйдöмась одзжык, эд öтнас свет вылас оз ов, оз уджав?

Ошибкасö веськöтны некöр абу сёр, нельки Матвейлiсь. Но колас эта понда кад, и бöра жö медодз Павел Егоровичлö.

Талун Матвейыс абу гортас. Кытöн? Öтöрас уннялö тöв-пурга. Йирö пургаыс керку угöввесö, мутшкöтö керку крышаыс, а Матвейыс кытöнкö вöрын. Кытшöм нужда мортсö вашöтö гортсис талуння лунö?

Может, пышшис? А, может, быль Лидаыскöт мыйöнкö каттисьö?

Вились тöдвылас усьö Аннушкаыс, кöда Павел Егоровичлö осьтiс душасö и горзiс кольöм годдэс понда. Одзжык бы пантасьлыны Аннаыскöт, может, вермис бы отсавны мортыслö, вештiс бы умöль славасö мортыс весьтiсь... Кытшöм слава кышасьö Матвейыс бердö?.. Если преступник — накажитны, кыдз преступникöс, олö не сiдз, кыдз колö овны миян обществоын, керö ошибкаэз — веськöтны бур туй вылö, кыскыны нятьсис. Но медперво колö пантасьны мортыскöт, пыравны душаас, баитны сьöлöмсянь.

— Вот и шоналi, — осьтлö öмсö милиционерыс, — нельки онö пондiс петны. А аслас думаэс гаг моз йирöны веммесö, тэрмöтöны.

Рытланяс мичамис. Небоас кымöртор эз вöв. Вашöтiс тöлыс кымöрресö. Мыччисис югыт, кöдзыт тöвся тöлiсь. Небоас дрöжитiсö одз звездаэз.

Сельсовет посодзын пантасис партийнöй организацияись секретарькöт. Василий Максимовичыс школасянь мунiс гортас и кежис сельсоветö. Шынньöвтiс, лöсьöтыштiс галстуксö, здоровайтчис:

— Здравствуйте, Павел Егорович! Кыдз здоровье?

— Здоровье, кыдз солдатлöн! — боёка лэбтыштiс юрсö старшöй лейтенантыс. — Мыйкö ме тiянöс дыркодь ни эг пантавлы?

— Дыр? — дивуйтчö Василий Максимовичыс. — А тöн?

— Склероз, — сералö Павел Егорович. — Пöрисьма.

— Тöдчö, — шыннялö секретарьыс.

— Колö бы баитыштны. Кыкöн... Тöдан, ме талун кытчö ветлi?

— Висьтав. А то ме школасяняс эг адззыв.

— Ветлi ме Важыбö. Колiс пантасьлыны интереснöй морткöт. Но эг вермы.

— Кöдзыт öтöрас, Павел Егорович, — жмитыштiс пельпоннэсö Василий Максимовичыс.

— Ме дыр ог сулöт, — öзтiс папироса. — Пантаси Важыбас Матвей Ивановичыс инькакöт. Шонтiсьыштi, ырöш юыштi, басни баитыштi... И жаль лоис меным инькаыс. Норасьö мужикыс вылö!

Видзöтö Василий Максимович старшöй лейтенантыс вылö, видзчисьö, кöр дугдас баитны, ассис бы висьталö.

— Ме виноватыс? — гажтöма юалö партийнöй секретарьыс.

— Коммунист Матвейыс?

— Абу.

— Думайта, что коммунистыслöн инькаыс эз бы норась. Коммунисттэс абу сэтшöмöсь — ас сьöртi думайта.

— Павел Егорович, а, может, ме быль виноват. Уджала секретарьнас арсянь. Эшö не быд мортыслiсь душасö тöда. Матвейыс, конечно, кыдз специалист, бура тöдö ассис уджсö. Эм сылöн сэтшöмыс: кытöн туйö — чуклялö, юыштö. Кывзiм ми сы понда собраннё вылын колхознöй предсö. Матвейыс чорыта висьталiс, что юны оз понды.

— И быдöс? — жалейтöмöн юалiс старшöй лейтенантыс.

— Не быдöс, Павел Егорович. Выговор сетiсö. Мыччавны протоколсö?..

— Но, Василий Максимович, — обидитчис участковöйыс, — кыдз секретарьлö, ме уж верита.

— Пантавлi ме инькасö, — висьталö Василий Максимовичыс. — Баитi, но эз норась, что мужикыс вартлö.

— А меным норасис.

— Сiдз... Эм сэтшöмыс Матвейыслöн. Жалоба вöлi отирыссянь, что бöбöтö наряддэзöн. Районiсь корлiм комиссия. Керисö ревизия. Нем умöльсö эз висьталö. Ме эд öддьöн ог вежöрт бухгалтерыслiсь уджсö. Специалисттэз эмöсь. Что юö да тышкасьö!.. — лöга кончитiс Василий Максимовичыс. — Эшö колас уджалыштны.

— А тэ шуан: ме виноватыс! — гажöн горöтчис старшöй лейтенантыс. — Кытчö тэрмасян?

— Сельсоветö. Колö Николай Дмитриевичыслö лекция сетны, ась лыддьöтас.

— Кытшöм темаыс?

— Алкоголизмсянь вред.

— Тiйö пыр алкоголизмсö критикуйтат? Али только ме дырни?

— Лекцияэс быд неделяын. Тiянлö колö жö бы, Павел Егорович?

— Менам эм! — вачкис долоньнас сумка бердас милиционерыс. — Кыдз только адзза Лидасö, лыддьöта.

Ойнас районсянь локтiсö том милиционер да следователь.

— Колö кошшыны! — висьталiс следовательыс. —

Кöть кулöмö, кöть ловьяö... Мелехинсö ми ог вермö судитны сэтчöдз, кытчöдз делосö ог кончитö. Вежöртiт, ёрттэз?!

Эшö бы не вежöртны!

Павел Егоровичыс топ талун виноват, етша баитö, пишкыштлö нырнас. Оз тöд, мый висьтавны ёрттэслö, а следовательыс медодз видзчисьö кывсö сысянь. Уджалö следовательнас не öтiк год. Оз любит весись баитны, весись чепсасьны: сизимись меряйтас — öтпыр орöтас.

Сьöкыта ловзисис Павел Егоровичыс.

— Мый, Павел Егорович? — шыннялö следовательыс.

— Табакыс вот...

— Табакыс не лекарство — яд. А ядыслö эм лекарство. Сiдз?

— Сiдз.

«Яд да лекарство», — думайтö ас кежас следователь, шутнялыштлö гажа песня и вдруг горöтчö:

— Но и лотерея, Павел Егорович: то билет, то Мишка!.. Орсам ми эта лотереяöн дырöв.

Следовательыс видзöтö делосö, куритö.

— А табакыс эд яд! — сералö öнi Павел Егорович.

— Табакыс? Кытöн и яд, а кытöн и лекарство.

13

Пукалöны сельсоветас. Деревняас асланыс местаыс да нагладь жырыс абу.

— А, может, пышшис ни? — юалö Борисыс.

— Кин да кытчö? — юалö следователь.

— Преступникыс. Городö, граница сайö.

— Вермас. Но городöдз, Борис Михайлович, ылын. Граница замок вылын.

— Татöн сiя, — баитö старшöй леитенантыс.

— Кыдз, Павел Егорович?

— Бухгалтерыс вöралö, — висьталö Павел Егоровичыс.

— Мымда мортыс вермас öнi овны вöрас?

— Мымда? — думайтыштö старшöй лейтенантыс. — Ме бы олi неделя, колiс — кыкö.

— Кыдз? Морозас да лымыс увтын? — оз верит Борис.

— Но, Борис Михайлович, Павел Егоровичыс миян вöлi фронт вылын, — висьталö следовательыс.

Борисыс гöрдöтыштö.

— Охота овны — он кув.

— Сiдз, Павел Егорович, — согласитчис следовательыс, — миян отирыс, видзöт: кöз увтын чужö, сiдз что... Мымда вöрас тöвнас тшыгйöн олан?

— А ме бы эг тшыгьяв. Пишальыс абу — петляöн кыя.

— Кыдз вöралiсь?!

Мортыс не кöин. Эм сылöн пишаль, истöггез, чер, нянь да сов, котелок — ойсö чулöтас нодья бокын. Пантасяс — пöрöтас лосьöс. И пондас овны... Гожумöдз. Гожумнас быд гагыс ловзьö.

— Адззыны бы?! — баитö том милиционерыс.

— Адззыны бы, Борис Михайлович. Адззыны бы. Миянлö бы колiс Матвейыс. Мый бы нiя сёрнитiсö Мелехиныскöт?

— Вертолётöн. Тшыныс сьöртi, следдэз, натьтö, эмöсь, — висьталö Борисыс.

— Ачыс локтас, — думайтö Павел Егорович.

— А кытчö сылö воштiсьны? Не кöин эд, — согласитчö следовательыс.

— А ме ветла. Неылöдз,— висьталö Борис.

— Кытчö?

— Вöрас. Ысласьышта.

— Ась ветлöтö, коккес томöсь да боёкöсь, — согласитчис следовательыс.

Борисыс петiс одз, шондiтöг. Лямпаэз ыскöвтiсö кокнита. Топамöм ни виль лымыс эз сiдз вöть.

Кыдз только пондiсö пиксыштлыны кöззэз вылын пистöггез да пондiсö тыдавны сажень куим-нёль ылынаын кöч следдэз, инмис тырöм важ лямпа след вылö. Следыс кыссис деревнясянь.

Борисыс сюйыштiс пистолетсö пиас, зэлöтiс лямпа геззэз и пондiс мунны важ лямпа следыс кузя öткодь шагöн, кыдз сiйö велöтiсö эна луннэзö вöралiссес, медбы чожа не мыдзны и унажык мунны.

Тырöм ни важ следыс. Лямпаэс ыскöвтiсö умöля. Медодзза километраэзас жö моросас воздухыс эз понды тырмыны, топ петляöн кышалiс горшсö и пондiс джагöтны, — кыскыны бöрлань. Лоис жар. Сирньылöм сöдзис кымöс вылас. Лякасис йöрнöсыс яй бердас, и некыдз эз туй чапкыны этö жарсö.

Лямпаэс эз кывзiсьö, гардчисö, кышасьлiсö кöзоккез бердö, кöдна видзöтчисö йыввезнаныс лымыс увтiсь.

Тэрмасис. Кыным тэрмасис, сыным частожык гардчисö лямпаэс кöзоккес гöгöр, пиньлалiсö коккесö. Кленитiс лямпаэсö. Эз тöд, что лыжаэзöн вöлi бы эшö сьöкытжык.

Косьмис горшыс. Сотчис горшыс. Чапкалiс лымсö öмас и мунiс одзлань. Эз тöд, что пымалöмувья оз ков ньылавны кöдзыт лымсö, что этасянь эшö öддьöнжык косьмö горш и öддьöнжык пымалан. Но сiя вöрас öтнас, и некин сылö оз вермы сетны бур совет.

Рытланяс вöтiс мортöс. Вöтiс казявтöг расокын, том да басöк кыдззаинын. Петыштiс уль вöрсянь эта расокö, и синнэс вылö усис спинаыс: мортыс öвтчис пуэс коласын, эз тэрмась. Пельпон вылас пишаль.

Кылiс, кыдз лямпаэс увтын дзуртö лымыс, кыдз сьöкыта лолалö да кашыкасьö мортыс.

Сiя эз кыв бöрсис Бориссö, эз бергöтчы бöрланяс. Ыджыт мыгöра, ёнжык Борисысся и вылынжык. «Сьöкыт лоас!» — думайтö ас кежас зонкаыс. Чинтö шаггесö, сайласьö пуэс коласö, шоччисьыштö, öктö вынсö.

Аслас сьöлöмыс чепсасьö моросас, тёпкöтö горшас, лолыс тырыштлö, волнуйтчö. Керöм следдэс кузя жагвыв мунiс мортыс сьöрö.

А мортыс и бöрас эз видзöт. Али эз кыв?! А, может, видзчисьö, кöр локтас матöжык?!

— Сулав! — быд вынiсь ыкöстiс зонкаыс. Вöралiсьыс дыша бергöтчис. Видзöтыштiс Борисыс вылö дивуйтчöмöн и шынньöвтiс. Милиционерыс одзын сулалiс тоша, чукрасьöм рожабана, веськыт мыгöра старик. Синнэзас öгралö лукавöй биок.

Борисыс веськыт кисö видзис моросас, пистолетыс дынын. Кыдз адззис энö синнэсö, сiдз невна эз пуксьы лым вылас мыдзсяняс да обидасянь, что сiдз бöбöтiс лямпа следыс. Дрöжитiсö коккес, бергалiс юрыс.

— Мый, зон? — гажöн юалiс старикыс. — Али öшин?

Тшыгыс пидзралiс кынöмсö. Сьöвзис бы эта старик вылö.

— Мыдзи, — висьталiс зонкаыс. Кытöн сулалiс, сэтчö и пуксис. Чапкис юр вывсис шапкасö. Юрсиыс вöлi ва, и кайис пар.

— Мыдзöмыт, — жалейтiс старикыс.

Öзтiс кыз аскерöм трубка, сöстöм воздухас сорласис курыт махорка тшын.

— Али шогалан? — сибöтчис Борисыс дынö старикыс да малыштiс ва юрсö. Видзöтiс дивуйтчöмöн.

— Горш косьмö, — норасис зонкаыс, ньылыштiс дульсö, кöда лякасис öмас да желлялiс горшсö.

— Юан бы? Юкталам. Только тэ, зон, эн пукав öтiк местаас, вöрöтчы. Морозыс шупыт, а пымалöмыт. Недыр и простудитчыны.

Öнi Борисыс казялiс, что погоддяыс чорыт и чожа сайкалö ва спинаыс.

Старикыс кыскис коскысис чер, чеглалiс кöс уввез, öзтiс биок. Биок весьтö öшöтiс лымöн учöтик котелок.

Кöр сылiс котелокас лымыс, кöр юисö чайсö, öшыштiс мыдзыс.

— Вакрамеш, кыдз тэ сiдз лöсьöтчин вöрас пырны? Нем сьöрат абу. А кулiн бы?.. Вакрамеш, кынмин бы и быдöс сэтöн. Нельки истöггез абу. Но и но!.. Сiдз эд вöрыскöт шутитнытö оз туй, — баитiс нюжвыла старикыс. — Сiдз, кага, тэ менö кывзы да пель саят тэч. Поди, пригодитчас. Ме ачым удерлун мунi гортiсь. Муна, мыся, видзöта петляжуггез. Кöччезлö чапкалi. Чожа, думайтi. Кöсйиси гортö сiя жö лунö, а адззан, талун сё татöн. А яйыс бы колiс. Зонöлöн виян лун локтö. Эна луннэзö вийисö война вылас. Вот кöчсö бы и кыя. Думайтi: оз я еныс иньды öтiкö косöйсö, но нем эз пет. Кышасьлöм öтiк, вакрамеш, да не менам вöлöм. Тулан инмöм. Быдöс дзимлялöм. Тыдалö, чассёö менам сэтшöм, — баитiс старикыс, куритiс аскерöм трубка. Сотчис лым вылас неыджыт биок, шонтiс ныр. — Няньтöг шедi, — норасис старикыс, — не туланыс бы, конечно, гортын ни бы вöлi. Лöгöтiс. Мыся, сёйис кöчсö, дак ачыс шедас, а сiя колис.

Старикыслöн басниыс сунöтiс. Юис Борисыс васö эшö быдса котелок, и кынöмыс дугдiс симавны.

— Тэ кысянь, зон? Мыйкö тöдтöм?

— Ме?.. Геологгез ми, — бöбöтiс Борисыс. Сылö стыд вöлi висьтавны, что быдса лун вöтчö старикыс сьöрö, следитö сы сьöрын. Серавны пондас.

— Геологгез? Бур дело. Тожö колö уджавны. Быдлаын колö уджавны, — мудрöя баитiс старикыс. — Тшыгйöн овны оз туй. Видзöт: меным сизимöт десяток шыбыльтö, а сё шатлася. Ачым ог тöд, мый кошша. Не гортын, дак вöрын. Отсася отирлö, кытчöдз верма. Сьöлöмö öтiк местаас оз вермы овны...

Вежис старикыс сотчöм табаксö, висьталiс:

— Но, зон, морозыс эд казялiс миянöс, адззö, что весь олам, кутчисьö спина бердö. Колас, натьтö, вöрзьыны.

Старикыс пондiс кышавны спина саяс котомкасö.

— Дед, а дед, может, ёрттэзöлiсь следдэсö адззылiн?

— Следдэз?.. — думайтыштiс юрись вöралiсьыс. — Следдэз, следдэз... Кытiсь жö ме нiйö адззылi? Вот памятьыс! Топ пурга мöдöдз лунас... Али мый? Натьтö, сiдз. Менам петляись öшис кöч. Кинкö тöдтöм ветлöтöм, лямпаэзöн. Босьтöм кöчсö. Асланым оз вöрöтö. Томмеслö öння кадын китö тожö эн сет, но томмес öнi миян вöрас эзö ветлöтö. Может, тэнат и вöлi ёртыт? Кынöмыс сималiс да босьтiс кöчсö. Босьтiс и ен сыкöт. Ась сёйö. Мортыслö бедаас колö отсавны. А ме думайтi!.. Лöгö петiс.

— Кытiсь адззылiн?

— Да не öтiклаись. Котрасьöм, — думайтыштiс. — Топ вöрмöссэз сьöрö ветлöтöм.

— Кытчö сiя вермис мунны? — думайтö Борисыс.

— Кин тöдö? Вöрыс паськыт. Но тэ эн пов: мортыс сэтшöм тварь, что асьсö оз сет торксьынытö. А черыс вöлi жö сылöн?

— Вöлi.

— Но вот, а тэ тöждiсян. Видзöт, кытöнкö избушкаын шоччисьö али нодья бокын узьö.

14

Вöлi эшö югыт. Борисыс надейтчис, что югытiнас мунас эшö не öтiк километра. Прощайтчис старикыскöт и иньдöтчис гортлань. Мунiс öнi туйтöг, лямпа следтöг. Ойыс вöтiс казявтöг: тöвся дженыт луныс топ джöмдiс, падмис и кусiс. Чожа пемдiс и чожа вынсялiс морозыс. Сё эшö тыдалiс вöрас, а юр вевдöрын öшалiс ни чарла пасьта тöлiсь.

Морозыс пырис паськöм увтас, курччалiс рожабаннэсö, мороссö, зэлöтiс кöдзыт воздухнас. Решитiс морозыслö не сетчыны: мунны кузь ойсö, но пыд, сук вöрас кок увтын пондiс тыдавны умöля, и быд шагын лямпаэс пиньлалiсö коккез: нильдалiсö бокö да кышасьлiсö кöззэз бердö.

Инмис кöс мыр вылö. Тойыштiс мырсö. Чеглалiс кöс уввез, лыссэз. Кыдз вермис, поздiсис мырыс бокö да öзтiс би.

Ойыс эз думайт узьтöтны ласковöй постелля вылын. Ачыс виноват, что мунiс ылö деревня дынсис. Кöдзыт да гажтöм вöрыс йöз синнэзöн видзöтiс зонкаыс вылö. Сьöлöм вылас öшалiс невежöртана полöтана тоска, душаыс кыдз кöртовöй пустöй бочка. «Нельки эг и прощайтчы, — сералöмöн думайтö ас йывсис Борис. — Вот тэныт и удж. Видзчисин тэ геройскöй подвиг, а шедiн öтнат вöр шöрö, кöда тэкöт оз думайт орсны!» Дзар керас ас гöгöрас: омöн сулалöны кöззэз — оз и вöрзьö, кыдз сказкаись богатыррез, кöднö асланят некытшöм кылöн он бöбöт.

Оз узьсьы. Вöрыс кыдз кулöм, оз лолав, и морозыс полöтöмöн, кыдз вöрисьыслöн душаыс, лолалö да ветлöтö вöрас: вартö пуэз бердö. А вдруг эта не морозыс, а лешакыс, али кытшöмкö зверь? Зверь эз вермы лоны, ошшез узисö — тöдiс этö, но сьöлöмсö гусьöн гильöтiс невежöртана полан дума, эз сет онмöссьыны. Морозыс кынтiс то спинасö, то мороссö.

Ойыс нюжалiс. Некытчö вöлi пышшыны эта ойись, кöть горзы. Только учöтик биокыс и бурмöтiс, кыдз кодя ёрт. Вылын, юр вевдöрын, дрöжитiсö звездаэз, и сэтшöм нiя ылын вöлiсö тэ дынсянь, что кажитчис, бытьтö шедiн кытчöкö вселеннöяс, кытiсь му вылас некöр ни он берт.

Тöдвылас усьлiс мамыс, невестаыс, ёрттэс, кöднакöт быдмис и велöтчис. Быдöнныс нiя олiсö гажа оланöн, джендöтiсö ойсö шоныт постелля вылын, а Бориссö öтiк минута кежö эз лэдз кöдзытыс, кажитчис, сьöлöмыс кынмис ни йыовöй шарö.

Унажыксö думайтiс не морозыс йылiсь, думайтiс и олiс не вöрас — отиркöт. Вились тöдвылас ёрттэс, учительыс, кöда велöтiс восьмöйсянь десятöйöдз. Быд шагын учительыс велöтiс не только решайтны задачаэз, но медодз овны будденься олансö. «А мый бы тэ, Борис, керин эстöн?» — кыввес учительыслöн. «А мый бы тэ керин ме местаын, учитель?» — юалö зонкаыс. «Ме бы тэ местын узи», — ласковöя висьталö учительыс. «А морозыс?!» — «Мый морозыс? Морозыс мороз и эм. Сылöн сэтшöм удж. Тэнат уджыт тожö сэтшöм. Кутчисин — эн чапкы. Тэ вылö видзöтöны отирыс и надейтчöны!»

Узис я, эз я, может, вöтасис — оз тöд. Но син одзас петалiс Матвейыс, кöда пышшис одзсис, а вöтны эз вермы. Локтiс Павел Егорович и пондiс серавны, что мунiс вöрас, эз кывзы ёрттэсö.

Саймис и вежöртiс, что вöтасис. Биыс учöтика шаялiс, немымда эз шонт, и зонкаыс кынмис — пиннес чакöтiсö. Кöр жарöтiс бисö, киэс эз кывзiсьö.

15

Югдiс дыша: медодз югмыштiс юр вевдöрын, джын час бöртi пондiс рöмсявны асыв ладорыс. Кыдз только пондiс тыдавны, сувтiс лямпаэз вылö. Ась кынмис, ась узис умöля, ась сёйны вöлi нем, но виль локтан луныс быдöс вашöтiс бöрлань. Эз тöдчы мыдзöм, эз симав кынöм, кылiс только быдöс телоас долыт да гажа вын, кöда котöртiс вир жилаэзöт. Этö вынсö да гажсö сетiс виль локтан луныс, кöда янсöтiс мортсö кöдзыт ойкöт. Öнi зонкаыслöн петiс ни серöмыс ас вылас, кыдз сiя пессис ойнас, кыдз топ вöтчис старикыс сьöрö. Висьтав этö ёрттэслö, пондасö згальничайтны — пеллетö тупкав. Тöдö ни Павел Егоровичсö: кытöн колö — висьталас-кералас, кытöн — кулiсьсö саймöтас.

Талун эз ни кышасьö лямпаэс быд кöзокыс бердö, ыскöвтiсö кокнитжыка.

Луншöр гöгöрас петiс ыббез вылö. Ыбоккез негырисьöсь, кыдз пызаннэз, вевттьöмась чочком пызандöраöн. Ыбоккес шöрын сулалiсö турун зородоккез.

«Натьтö, турунсö ваялiсö и эм кытöнкö туй», — думайтiс Борисыс. И быль: муныштiс невна одзлань, петiс трактор след вылö. Туй боккезас киськасьöм турунчир, и сiйö öктöмась кöччез: печатайтöмась лым вылас лапаэзнаныс. «Шоччисьыштам и ми», — пуксис зонкаыс корось ыжда уськöтöм турун вылö.

Пуксис и пондiс кывзыны, кыдз зубыта сималö кынöмыс и мыдзыс изöн личкö увдöрö. Охота вöлi куритыштны, но папиросаэс эз вöлö. Дыркодь пукалiс трактор след дорас и пондiс кывны, кыдз морозыс чорзьöтö ньылöмöн вамöм паськöмсö и пырö тело бердö. Жагвыв пондiс чеччыны местасис, и сэтöн мöд ыб дорсис быркнитiс жак да жексьыштiс нёштöм голосöн, топ кайсö кинкö кутiс бöжöттяс. Кайыс лэбзис ыбоксö мöд конецöдззас да заргисис лымья кöззэз коласö. «Кин сiйö повзьöтö?» — думайтö Борисыс кайыс йылiсь, видзöтö вöрас. Недыр мыйись кайыс бöрсянь мыччисис морт. Спина саяс котома и пишаль. Мортыс мунiс жагвыв, невна одзлань мышкыртчöмöн. Тöдчис, что мыдз. «Видзчисям, — решитiс Борисыс, — может, сылöн куритны эм?»

Бöр пуксис лым вылас и пондiс видзöтны, кыдз локтö туйланяс мортыс.

Кöр сiя локтiс матö ни, зонкаыслö рожабаннэзас чепöссис вир, сьöлöмыс сувтчыштiс моросас. Сы дынö локтiс топ Матвейыс.

Тошсялöм, и этасянь кажитчö, умöльтчöм вöралiсьыс. Нырыс нюжалöм, синнэс, мыдзöсь да ыджытöсь, видзöтыштiсö Борис вылö дыша.

Мортыс вачкисис Матвейыс вылö, кыдз фотография вылас, только фотография вылас эз вöв тошыс, и öнi сiя эз шынняв хитрöя да гажöн.

Борислö кажитчис, что Матвейыс сiйö тожö тöдiс, и этасянь сiя нельки горбыльтчыштiс, дзебсисьыштiс бы вöралiсьыс шогья, но дзебсисьны вöлi некытчö. Кажитчис, что Матвейыс часöт перыта чапкас пельпон вывсис пишальсö и пезьдöтас сiдз, что синöн он ешты кваркыштны. Но лоис не сiдз. Матвейыс дыша здоровайтчис, дыша лэдзис спина сайсис котомасö.

— Пемдiсö мыдзсяняс синнэзö, — виноватöя висьталiс вöралiсьыс да пуксис Борисыс бокö, лым вылас.

«Матвейыс я?» — гусьöн видзöтö сы вылö Борис. Вöралiсьыс эз и думайт пышшыны, пондiс баитны, кыдз тöдса:

— Шоччисям?

— Шоччисям.

— Кытчö?

— Деревняö.

— Куритыштны! — сьöкыта ловзисис вöралiсьыс да кыскыштiс одзас котомасö. — Папиросаэс кытöнкö котомаам.

Борисыс видзöтiс котома вылас — и ёкнитiс сьöлöмыс: котомасис мыччисисö лосьлöн гыжжез, гыжжес увдöрын сивöй кокыс.

Вöралiсьыс казялiс Борислiсь видзöтöмсö да простöя висьталiс:

— Еныс иньдiс... Свокоту...

Кыскис тувдöм чуннезнас котомасис папиросаэз. Öтiкö чапкис öмас, мöдiкö нюжöтiс зонкаыслö, öзтiс чигарка, кыскис öмас жаднöя кыкись-куимись тшынсö, сiдз жö не тэрмасьöмöн бöр кöрталiс котомасö.

Видзöтiс Борисыс вöралiсьыс вылö, аслас сьöлöм вылас пизис лöг: «Вот, гад, öтiк жила оз дрöгнит, что вайö лосьяй. Торкис зверьсö юасьтöг-висьтасьтöг. Но видзöтам! Шедан, браконьер!»

— А он пов? — сералöмöн юалiс да мыччалiс котомаыс вылö.

— Мыйись? — топ эз вежöрт вöралiсьыс. — Ме эд ог гусясь. Некин сiйö картаас эз быдты. Эз верд.

— Эмöсь эд отирыс...

— Отирыс?! — лöга видзöтыштiс Борис вылö вöралiсьыс. — Кинлö охота — ась пурö. Панталас эд! Меным унаыс оз ков. Кинлö колö, ась ачыс кутö. — Висьталiс да кöдзыта видзöтыштiс Борисыс вылö, юалiс: — Ме тэнö топ кытiськö адззылi?

— Ми тожö вийлiм, — бöбöтiс зонкаыс, — экспедицияас. А мый? Тшыгйöн я мый я овнытö?! — Думайтыштiс.

— Экспедицияын... Вежöртi. А ме думайтi ни, что тэ милиционер. Мыся, топ кытiськö адззылi.

Баитö простöя, оз пов. Кыкöн мунiсö деревня дынöдз. Кöр мыччисисö керкуэз, вöралiсьыс кежис бокö, отир син сайö. Янсöтчис Борисыс сыкöт, и сьöлöмыс тырис гордöй думаöн, что адззис Матвейсö. Öнi сiя некытчö ни оз пышшы.

16

— Кытöн вöлiн? — панталiс Бориссö следовательыс. — Матвейсö кошши.

— Адззин? — дразнитö Павел Егорович.

— Адззи. Быль адззи! — невна оз горзы Бражкиныс. Тэрмасьöмöн висьтасьö, кыдз узис вöрас, кыдз пантасис вöралiськöт, только эз висьтав старикыскöт пантасьöмсö.

Кывзiсö том милиционерсö ёрттэс да юрнаныс öвтыштлiсö: но и Борис! Кин думайтiс, что мунас вöрас да узяс?

— Лось кок кыскис! — висьталö Борисыс.

— Колiс сэк веськыта. Татчö.

— Оз лок. Шванитчö, — виноватöя баитö зонкаыс, адззö, что сы вылын сералöны.

— Пыксьö? Но ась. Может, кöркö и локтас. Сiдзкö, тэ узин би бокын, Борис Михайлович? Смев зонкаыс, нем он шу. Быль Матвейыс гортö ни локтiс? — юасьö следовательыс.

— Ветлö да видзöтö.

— Ветлам. Видзöтам. Только тэныт, Борис Михайлович, колас шоччисьыштны. Мыдзин эд? Матвей дынö мунас Павел Егорович. Сылö керкуыс тöдса, инькасö Матвейыслiсь тöдö, и ырöшыс гленитчöм.

— А ме? — обидитчис зонкаыс.

— Ась мунö, — жалейтöмöн горöтчис Павел Егорович.

— Но и мун, — серöмтчис следовательыс, — кыдз тiянöс янсöтан кык ёртсö? Только вывсит паськöмтö веж да пимиэз кöмав!

Матвейöс застанитiсö гор вылiсь. Дзебсисьöм шонытiнас и ныргорнас узьö. Ештöм бритчыны, рожабаннэс рöмсялöмась югыт вирокöн, кымöс вылас бисерöн югьялöны ньылöм воттез.

Инькаыс петыштiс комсяняс, казялiс Павел Егоровичсö, чочкоммыштiс, нюмыртiс öмсö и вунöтiс здоровайтчыны.

— Эд видзчисьö? — гажöн юалiс Павел Егорович. — А ме велалi. Ырöшныт гленитчис.

— Локтö, локтö, — сярзьыштiс Матвейлöн инькаыс. — Ми отирсис ог полö. — Ачыс саясис комас да ружтiс.

— Мый ружтат? — юалiс милиционерыс.

— Оланыс сэтшöм. Погоддяыс тшепитö. Горвыв дорын юрсö лэбтiс Матвей.

— Хе, милиция! — горöтiс хозяиныс, топ милициясö видзчисис гöститны.

— Лосьяй сёйны локтiм! — гажöн висьталiс Павел Егоровичыс.

— Сималö кынöмныт? А менам лосьяйыс абу. Вöлi — вердi бы.

— Ёртö эд висьталö, — юрнас гогиньтыштiс старшöй лейтенантыс Бражкиныс вылö.

— Кытшöм ёрт? — гор вывсянь нюжöтiс юрсö Матвейыс. — А-а... Пантасьлiм. Ме сiйö и думайтi, мыся, кытiськö мортсö пантавлi... — рыг-рыг серöмтчис. — Но и олан! Он тöд, кытöн пондан мортыскöт öтiк бекöрсис панясьны.

— Эм яйыт?!

— Конечно, эм! — эрзыштiс Матвей. — Только весись ме тiянöс ог верд — бутылка!

Тöдчис, что Матвейыс юыштöм: гардчыштлö кылыс.

— Бутылка колö?

— Колас.

— А ми яйсö ог сёйö. Протокол гижам.

— Кытчö воштiсян? Гижö. Тiян уджыс, — кокнита согласитчис Матвейыс.

— Кытöн яйыс?

— Эд полö. Вая. Ог пышшы. — Коккезас сюйö пимиэз.

Инькаыс комас ойзö да причитайтö:

— Сёйис менö öтмоз да эшö торкö мöднёж.

— Тэныт сiдз и колö. Тэ важын ни ме пыр дзескаман, — рада öмалö иньсö Матвейыс. Сы басниын кылö не горе, а гаж, кыдз челядёклöн, кöда орсö.

Петiс öтöрö. Чожа ыбöс коласас тойыштiс керкуас котома. Гымгис джодж шöрас. Вачкисö джодж бердас чорыт гыжжез сивöй гöна кок бердiсь.

Ачыс пöрччалiс кöзичасö, кыскис зверьлiсь коксö, чапкис милиционеррез син одзö. Кералöм зверьыслiсь коксö туша бердсис лядьбей сорнас. Кык пуд гöгöр лоас.

Павел Егорович бергöтлö коксö.

— Лэдзчö дульыт, — дразнитö Матвейыс старшöй лейтенантсö. — Сёян öнi, пöтан йöз ньылöмнас.

Борисыс гижö протокол.

— Ой да ой, Матвей! Кöть бы тэ эн ни карзы! — горзö иньыс.

— Горзыны тшöктан? Ог эд. Мöстö вузалан и вештiсян, — сералö иньыс вылын мужикыс. — Менам деньгаыс вештiсьнытö абу.

— Вештiсян тэ быдöс понда! — лöгасьö милиционерыс, унажыксö не эта лось понда, а иньыс понда, кöда вылын Матвейыс сералö нельки öнi.

— Лöгныт петö? Судитö! Меным эд сiдз и этадз... Кончитiсö гижны протоколсö. Матвей юалiс:

— Мымда сетасö?

— Мымда колö. Суд решитас.

— Öнджа, сто граммсö од пешлö? Менам кольччис.

— Тэ мый отирыс вылын сералан? Совестьтöм! — горзö инькаыс.

— А мый?

— Эх, Матвей! — кöритö Павел Егоровичыс.

— Браконьер! — вирдыштö синнэзнас Бражкин.

— Быль? А тi эд менчим паспортсö эд видзöтö. Может, ме эшö шпиён? Но и милиция! Тi бы кодöс адззит, кыскит райотделö, узьтöтiт, гöтралiт штрафöн, а кыдз браконьер, хе-хе... — Матвейыс нюжöтiс паспортсö Павел Егоровичлö.

Паспортсö босьтiс Бражкин. Осьтiс и дивуйтчöмöн горöтчис:

— Лицензия!

— Кытшöм лицензия? — эз вежöрт Павел Егорович.

— Лось кокыс вылö, — ваксьö Матвейыс.

— Мыля одзжык эн висьтав? Охота миян вывтi серавны? — юрнас öвтö Павел Егоровичыс.

— Хе-хе! — гöрдлö Матвейыс. — Сёйит? Тi бы менчим яйсö сизим понöн эд адззö. Но тi эд лöгасьö, ме эд шутита, шуткатöг гажтöм, öння кадас шуткаыс — здоровье.

— Прокман, — сьöласьö старшöй лейтенантыс. — Молодец. Иньдыв инькатö магазинас! Ме бы тожö пешла вöрсис яйсö.

— Котрася ме! — гажöн горöтчис инькаыс да сэк жö пондiс пасьтасьны.

Кöр петiс керкусис Матвейлöн инькаыс, Павел Егорович висьталiс:

— Пуксьы, Матвей Иванович, пызан саяс да висьтась, кытшöм вина тэ юин Мелехиныскöт?

— Но, ёрт лейтенант, тi мыйкö ме бердö...

— Не ме виноватыс, Матвей. Мый сёжö Мелехиныскöт öтлаöтiс?

— Мый колö? Не жöника невеста. Бутылкаыс и öтлаöтiс.

— Мый баитiт?

— Мый адззим.

— Хитрöй тэ, Матвей Иванович. Ох и хитрöй!

— А милицияыс эшö хитрöйжык. Кыйö бы черисö гудыра васис, только чериыс не сiя гöпйын. — Матвейыс эз ни серав, но басниас öшöмыс да повзьöмыс эз вöв, вöлi только ас вылас веритöм.

— Висьтав честнöя: вузалiн лотерейнöй билетсö Лидаыслö?

— Мый тiянлö эта грешнöй билетыс? Синнэзнытö тыртö. Иньö голяöс билетыс понда пилитiс да эшö тi кышасят?

— Сэтшöм сiя гижöтокыс. И думайта, что тэ, Матвей Иванович, Мелехиныскöт винасö юин не весись? — Павел Егоровичыс видзöтiс веськыта хитрöй Матвей синнэзö.

— Висьтав, Павел Егорович, мый меным бы колiс эта кикиморалiсь? — ачыс юалiс милиционерыслiсь Матвейыс.

— Матвей, ми эд тэ дынö не весись локтiм!

— Ыбöсыс осьта, керкусис некинöс ог вöтлы.

— Кошшам ми Лидасö.

— Öштiт я мый я? — дивуйтчö-сералö Матвейыс. — Али виль жöник пышшöтiс?

— Пышшöтiсö... Öшис инькаыс. Сiя ойö, кöр тiйö юит винасö Мелехиныскöт.

— Конечно, этатшöм красавицасö вермисö и пышшöтны, — сералö Матвейыс.

— Згальничайтан? Только видзöт: кыдз бы эн понды горзыны.

— Ме?! — дивуйтчö Матвейыс.

— Тэ, Матвей. Висьтав: тöдiн лотерейнöй билетыслiсь номерсö?

Бар вайис. Öшыштiс хозяиныс.

— Номер?.. Ме, Павел Егорович, не картёжник. Памятьö öнi курöглöн: чапки и абу.

— А эта билет вылö инмис машина...

— Машина?! Тьфу тэ, бес чужöм!.. Эз вöв менам счастьеыс да оз и ло, кöр ме ачым сiйö поныс бöж увтö чапкала!

Матвейыс пондiс ваксьыны, клопöтны боккесö да дивуйтчыны, кыдз челядёк, кöда кылiс мыйкö сэтшöмö, кöдö некöр эз видзчись и эз думайт. Вдруг гажöн юалiс:

— А эз я Лидаыс джагöтчы?.. Али сьöлöмыс потiс радысувья. Машинаыс эд не мужик — öтпыр овтöнняс пантасьö.

Топ Матвейыскöт баитöны недыр, а инькаыс ештöм ни котрасьны магазинöдззас. Пырис керкуас, дивуйтчöмöн видзöтö мужиккес вылö: жöникыс пизьö сё сiйöн жö гажнас, а милиционеррес етша баитöны.

— Но, Павел Егорович, ась ен шуö не бöрьяись... — босьтö бутылкасö иньыс киись.

— Матвей Иванович, тэ бутылкасö коль мöдöтпыр кежö! — чорыта висьталiс старшöй лейтенантыс.

— Мый сэтшöмыс?

— Сё сiя. Тöнняыс жö, — серöмтчис Павел Егорович.

— Служба. А менам тожö служба, — обидитчис Матвейыс и иньыслö висьталiс: — Чапкы комас, кöркö юам.

Босьтiсö Матвейсянь расписка, что сiя висьтасьтöг эна луннэзö некытчö оз мун.

Мунiсö Матвей дынсянь, и туй вылас Павел Егоровичыс сьöласис, сералiс да дивуйтчис Матвей вылö, кытшöм сiя мортыс нето гажа, нето хитрöй — он вежöрт öтiк пантасьöмнас. Вермас я эта мортыс орсны Лида судьбаын? Дасiсь видзöт, да öтпыр решит.

17

Тöн луныс содiс öтiк минута вылö, кöда некинлö эз тöдчы, но астрономическöй приборрез да календарь лыддисö лунлiсь содöмсö. Только эз сод уджыс Павел Егоровичлöн.

Баитiсö сельсоветын Матвей йылiсь. Висьтасис Павел Егоровичыс следовательлö, кыдз пантасис гортас бухгалтерыскöт, кыдз гöститiсö, и следовательыс эз вермы видзсьыны, медбы не сералыштны ёрттэс вылын, кыдз нiйö емтöг вурис Матвейыс. Баитiсö-керисö и решитiсö кытчöдзкö Матвейсö не вöрöтны: некытчö сiя оз пышшы, пыр лоас син одзын.

Пукалöны милиционеррез сельсоветын, думайтöны, баитöны удж йылiсь. Думаэзнысö дзугис машина: урöтö улица вылас не колхознöй трактор, а вездеход.

— Кытшöм машина? — юалiс следовательыс.

— Натьтö, геологгезлöн. Нiя пö уджалöны кытöнкö вöррезас.

— Геологгезлöн... И часто нiя татi ветлöтöны?

— Неделянас öтпыр, а кöр и кыкись.

— Бурö техникасö öнi миян лэдзöны! — гордитчö следовательыс геологгес машинаöн.

— А вдруг... — ас кежас баитö Павел Егорович.

— Думайтан, Лидаыс виль жöник адззис? Геологгес коласiсь? — видзöтö следовательыс Павел Егорович вылö.

— А мый? Инька сiя, тыдалö, сэтшöм: оз джöмды миян моз.

— Но тэ, Павел Егорович, — шынньöвтiс ёртыс и содтiс: — А мый? Мыйыс миян оланын оз аркмы?

Геологгезлöн машина урöтiс ни деревня саяс.

— Пондылам? — юалö Павел Егоровичыс.

— Пондыв, — согласитчö следовательыс, — ми эд öнi куимöн: öтiк бороздаас ог сувтö.

— Кежлам эта версия вылö, Борис Михайлович, медбы не гажтöмтчыны, — висьталö Бражкинлö старшöй лейтенантыс.

— А ме эта коста эшö пондыла Матвейыскöт да Мелехинкöт. Отирыс тожö интереснöйöсь. Только пыдö эд гарйисьö, а видзöтö и адззö, — советуйтö следовательыс.

Виль версия — виль туй. Медодз колiс тöдны, пыравлiсö я тун отирыс деревняас кинкö ордö и тöдсаöсь я нiя вöлiсö Лидакöт. Буржыка думайтан — оз веритсьы, но деревняын машинаэс не вывтi уна. Кыныма мунасö-локтасö, сё ни кинкö адззылö али кылö машиналiсь шысö. Шуам, Лидасö кö мыйкö йитö эта машиналöн следыс, то машинаыслö колö лоны сiя рытö...

Пондiсö юасьны бöра жö отирлiсь, но машинасö сiя рытö некин абу адззылöм. Нельки нем оз тöд Митрош Таня, кöда деревнясис тöдö быдöс новосттесö.

Только öтiк морт и висьталiс, что кылiс Лидаыс öшан ойö кытшöмкö машина шы. И кин висьталiс? Петра Сана, кöда пеллезнас учöтсянь кылö умöля, а сiя ойö ончир абу керöм: лыйлöм да чирзöм пеляс ыб кöбывка. Но Сана сетiс клятва, что бура кылiс машиналiсь шысö. Топ машинаыс сувтчылiс керöс вылас Вара öшын увтö. «Юалö ассис Вараыслiсь — висьталас», — тшöктiс инькаыс.

— Вараыс гортас?

— Городö пö ветлöм. Нылыс ордö. Лун куим абу вöлöм. Но, может, локтiс ни, — баитö Петра Санаыс.

Вара олiс неыджыт керкуокын. Öтнас. Кытшöм ачыс учöтик, сэтшöм и керкуокыс. И кыдз только лысьтö овны деревня дорас?

— Велалi, — гажöн баитö инькаыс. — Кытчö воштiсян? Оланыс велöтас.

Некин Вара ордö öддьöнсö оз вовлы не праздникöн, не будденьсö: ачыс оз ветлöт, и отирыс оз пырö. А талун вот туй отир шонтiсьны пыралöмась, сёйöмась-юöмась и одзлань ыскöвтöмась.

— Часто пыравлöны? — юасьö Павел Егоровичыс.

— Первуись. Буритчöны нiя.

— И ветлöтöны первуись?

— Кыдзкö ойнас топ нiя жö мунiсö. Мыйкö дыркодь сулалiсö öшын увтам. Машинаныс я мый я жугавлiс? Асывнас видзöтi: топ нылöн жö следныс вöлi, сiдз жö лымсö тальöм машинаыс.

— Сэк эз пыралö?

— Эзö. А талун пыралiсö. Час етш олiсö. — Мый баитiсö?

— Мый баитасö?.. — малыштiс юрсö инькаыс. — Мужиккеслöн эд öтiк басниыс. Юасьöны, корасьöны...

— Согласитчин?

— Кытшöм тэныт!.. — виноватöя висьталiс инькаыс. — Шутканас. А ошшасисö: öтiк пö тiянiсь эта одзын мунiс миянкöт. Кытшöмкö пö аскоддяс, лёк. Сэтшöм иньыс пö тожö оз ков.

«Не сiя я Лидаыс?» — думайтö Павел Егорович.

— Кысянь нiя ветлöтöны? Эз баитö?

— Берёзовкасянь. Неделянас öтпырöн. Кöр вертолётöн, а кöр и машинаöн.

— А Лидаыслöн сылань родняыс абу?

— Думайтат, сiя ныкöт мунiс? — кыдзкö виноватöя видзöтыштiс Вараыс. — А чёрт тöдö... Ми эд сыкöт öтiк годдэзö быдмим. Ме мужиктöг олансö джендöта, ачыт эд тöдан. Павел Егорович, а Лидаыс оз пов, неöтпыр тай пантавлiс. Смелöй инькаыс, не миян кодь, — осудитö Вараыс. — Топ быль сылöн Васькинаын тётка олiс...

Петiсö Вара керкуись, кыдз баняись, сiдз пымалiсö.

— Вот эта похлёбка!... — чышкис кымöс вывсис кöдзыт ньылöмсö старшöй лейтенантыс. — Колiс я миян этадз вийны асьнымöс?

— Думайтан, Лидаыс?

— Ог тöд, но вачкисьö. И кытöн только вöлi одзжык эта Вараыс, мый кошшис городсис? Грешитiм ми тэкöт, Борис Михайлович, отирыс коласын эта Лида понда и эшö ковсяс. Колас котöртны мöдiк районö. Бабушка ордö гöститны. Васькинаö.

— Кытöн Васькинаыс?

— Тöда ме, вöвлi. Адззам, но медодз висьталам следовательыслö, что мийö мунам гöститны.

— Мунö. Только ошшес ась оз сёйö, туйыс эд вöрöт, — сералö ёрттэс вылын следовательыс. Кыскис сумкасис лотерейнöй билет да сетiс Павел Егоровичлö. — Адззат невестанытö — подаритö и часысö сетö.

Васькинаö шедiсö вöлöн. Туйыс мунiс вöррезöт, гырись пожумаиннэзöт, и Борислö кажитчис, что первуись панталö Пармасö, кöдöн ошшасьö Павел Егоровичыс.

— Эта вö-öр! — дивуйтчи Борис. — Мунан, мунан, и следыт абу... Кыдз сказкаын.

— Видзöт да эн вунöт.

— Кувны я мый я лöсьöтчам? — сералö Бражкиныс.

— Ошыс сёяс! Кывзы: кылан машинаэс? Чожа Васькина ни.

Панталiсö просека — веськыт, кыдз грань. Туй вылас уджалiсö машинаэз.

— Адззан, уджалöны. Год-мöд — и вöрыс эстöн оз ло.

— Кин сёяс?

— Мортыс. Кералас, кыскас Кама вылö.

— Эта мымдасö!

— Машинаэз. Чернас увсö оз сöтö.

— Жаль.

— Быдмас!

Васькина олiс аслас оланöн. Гора да шумитана вöркеран туй орддис деревнясö. Керкуэз вевдöрын трубаэзiсь кайис тшын, дыша увтыштлiсö поннэз.

— Тiянлö Öпрöсь бабсö? — панталiс зоночка, учöтик да ён — мороз вылын быдмö. — То сiя кытöн олö. Адззат радиоыслiсь антеннасö? Миян только сылöн телевизорыс абу. А тi киннэз сылö лоатö?

— Племенниккез, — висьталiс старшöй лейтенантыс.

— Гöссез? А неважын Öпрöсь бабöлöн тожö вöлi гöстя. Ылiсь. Только пондöма шогавны, и кыскисö сiйö больницаö, — боёка висьтасис зоночкаыс.

Лидалöн тёткаыс дзор, чукрасьöм рожабана, но боёк кок вылас. Лэчыт синнэзöн видзöтö локтiссес вылö.

— Тi кытiсь?

— Тиминаись. Гöститны мунам. Усольеö.

— Вöввезнас? Вöввезнас öнi оз ни ветлö...

— Туйес абу, баб.

— Сiдз.

Шоччисьöв-керисö. Павел Егоровичыс юалiс:

— Баб, отирыс баитöны, что племенничаыт пö тэ ордын гöститö?

— А тi тöдат я мый я сiйö?

— Кыдз ог тöд? Öтiк деревняын олам.

— Лешакыс вайис. Некöр эз вовлы, а сэтöн... Грех кöть спасеннё, ме юр вылö. Абу вермöм гортас черпезьдынытö...

— Мый сэтшöмыс?

— Тьфу! Том отирыслiсь разь öнi тöдан? Нiя оз ошшасьö. Думайта, что тшыкöтöмась инькасö... Керöмась дошлöй отирыс. Сiдз керöмась, что больницаö кыскисö кулöм не ловьяöс. Мымда ме ола, мыйсö эг адззыв ас пондасим, да сiя сэтчö жö... — лёка баитiс старушкаыс. — Том отирыс любитöны шогавнытö, а кöркö миянлö вöлi некöр, — видзöтыштiс локтiссес вылö, ас вылас, горöтчис: — Тiян эд кынöмныт сималö?

— Оз. Ми эд вöвнас чожа. Вöлыс миян вердöм.

— Но асьныт тöдат, — согласитчис хозяйкаыс. — Ме эд томнам Тиминаас вöвлi, жöниксö сэтчинiсь жö бöбöтлi. Отирыс Тиминаас бурöсь, кодяöсь.

— Больницаас тасянь туйö звонитнытö? — дзугис Павел Егоровичыс старушкасö.

— Больницаас тасянь туйыс ылын, но телефоныс эм. Бригадирыс ордын. А мый тiян сiдз Лидаыс понда сьöлöмныт висьö?

— Асланым мортыс, бабушка!

— Морт эд. Кöть кытшöм, да морт, — согласитчис старушкаыс. — Ме тай сiйö и баита, мыся, Тиминаас отирыс кодяöсь, мыйись мый...

Но милиционеррес эз пондö кывзыны старушкасö, петiсö бригадирыс ордö. Дыр эз вермö звонитны городöдззас. Умöля кылiс басниыс телефонас. Баитiсö дежурнöй врачкöт. Врачыс висьталiс, мыйöн шогалö Лидаыс, но медодз юалiс, кин звонитö, юасьö шогалiсьыс йылiсь.

— Воныс, — висьталiс врачлö милиционер.

— Локтан — пондан тöдны, — кончитiс баснисö врачыс, и тöдчис эта сьöртi, что сiя Лидалiсь шогöтсö телефонас веськыта эз висьтав.

— Ловья миян геройным, Борис Михайлович! — гажöн висьталiс ёртыслö Павел Егоровичыс. — Кöть талун жö гöтрась.

— Любитны пондiн? — сералö Борис.

— Кытчö воштiсян?

Петiсö бригадирыс ордiсь. Старушка карта пытшкö юскисö вöвнысö, видзöтлiсö дженыт деревенскöй улица вылiсь машинаэз. Нiя эз вöлö, и только джын час бöртi мыччисис вöркеран туйланьсянь грузовöй машина.

Городöдз чулалiс не öтiк час. Городыс панталiс нiйö югыт биэзöн, тшына воздухöн да ойся ружтана уджöн. Больница дынöдз вайöтiс такси.

Дежурнöй врач, пöрись да кызкодь инька, лёк чужöмбана да чорыт басниа, дыркодь видзöтiс шы сеттöг локтiссес вылö, юалiс:

— Жöник?! — Сэтшöм кылöн, топ пуртöн вундыштiс сьöлöм бердöт, брезгуйтöмöн сьöвзис рожабанö.

— Жöник, — спокойнöя висьталiс Павел Егорович.

— Жöниккез, — сiдз жö брезгуйтöмöн чапкис врачыс. — Кыкнанныт я мый я?

— Кыкнанным, — кыскис лейтенантыс удостовереннё.

— Ме думайтi, быль жöниккез. Чапкалöны эстöн мукöдпыр иннезнысö и кагаэзнысö... Терпитны ог вермы! — шынньöвтiс мам шынньöлöн. — Пырö да баитö.

Лида эз узь, ветлöтiс коридорын. Син вылас ыбöс дорись усис Павел Егоровичыс. Пасьтасьöм чочком халатöн, сiя нёджжалiс шогалiссесö. Инькаыс дивуйтчöмöн видзöтыштiс локтiссес вылö, горöтiс:

— Абу я миян?! А ме думайтi, пырöны кытшöмкö враччез.

Лидаыс сё сэтшöм жö топыт да гöгрöса. Не больничнöй халатыс да чочкоммыштöм рожабаннэс, эн бы и думайт, что мортыс шогалö. А врачыс висьталiс, что Лида вöлi сьöкыт и колiс сылö отсавны нельки йöз вирöн. Кылiсö локтiссеслiсь шогалiссес баснисö, мыччисö юррезнысö палатаэзiсь, дзиргöны мужиккес вылö. Павел Егорович корис Лидасö ординаторскöйö.

— Тiйö кысянь? — оз и верит, что сы одзын вдруг пукалö Павел Егорович.

— Гöститны городас локтiм. Кылiм, что тэ татöн — пырим. Гажтöм жö чужöй отирыс коласын?

— Гажтöм, Павел Егорович.

— А тэнö гортын öштöмась.

— Кинлö ме кола?

— Кошшöны.

— Öштiм и кошшам, — висьталiс Бражкин. Лидаыс дивуйтчöмöн видзöтiс тöдтöм мортыс вылö.

— Кыдз татчö шедiн? — вежис баснисö Павел Егорович.

— Шогала.

— Больницаас сiдз оз шедö, — согласитчис милиционерыс.

— Дойми ме, — висьталiс Лидаыс.

— Кыдз доймин? — автоматическöя юалiс Павел Егоровичыс.

— Посöдзсянь уси.

— Мыля не ас районын лечитчан?

Шы оз сет. Сiдз öмыс и нюмрасьö: волнуйтчö али горзыны лöсьöтчö. Бергöтiс юрсö мöдöрö. Милиционеррес пукалöны.

— Лида, тэ гортсит ыбöстö кольöмыт осьтöн.

— Мыля осьта? — саймыштiс Лидаыс.

— Осьта ыбöсыт... Гусялöмась керкутö.

— Эзö жö эд, — не чужöмбан вылас эз вежсьы, не баснинас эз дзугсьы, топ гортыс инькаыслöн эз вöв.

— Жöникыт и гусялöм. Мишаыс.

— Мывкыдыс кокнит, киэс дженытöсь! — чорыта висьталiс Лидаыс. — А гусялiс, дак тiянöс мый вылö? — дивуйтчö инькаыс. — Абу менам жöникыс и оз ло. Абу чассёыс и оз ло, мый ен шуис.

«Счастье?!» — думайтö Павел Егорович, видзöтö инькаыс вылö.

Тöдвылас усьöны врачыслöн кыввес, что не эта бы шогöтыс, может, Лидаыслöн сэтöн бы и вöлi счастьеыс. Юалö.

— Кагаыс разь абу счастье?

— Кытшöм кага? — оз вежöрт инькаыс.

— Тэ жö видзчисин кага?

— Ме эд висьталi, что уси. Уси и жугдi... — кыдз жугдöм чача йылiсь баитö мортыс.

— Сiдз, — öшыштiс милиционерыс. Минута-мöд эз тöд, мый эшö баитны. Может, эз ков и нуöтны следствиесö: Лидасö нельки штрафöн он накажит. Немöн он докажит, что вийис кагасö кынöмсис нарочно. Усис и доймис. Сэтшöм случайес следственнöй практикаын пантасьлöны. Врач тöдö, и следователь тöдö, что эстöн криминальнöй аборт, а инструментыс абу — вещественнöй доказательствосö он адззы. А висьтавны инькаыслö колö бы сiдз, медбы судтöг йиджис сьöлöмöдззас, медбы вежöртiс, что оланыс сiйö оз дойд, и эмöсь сылöн ёрттэз, кöдна отсаласö сьöкыт минутаö, и счастьесö оз ков тальны кок увтын, что быдöнлöн миян счастьеыс ас киын.

— Может, сэтöн и вöлi счастьеыт? — юалö Лидалiсь милиционерыс.

— Кытöн? — оз вежöрт Лидаыс.

— Кöдö жугдiн.

Лида вдруг первуись веськыта видзöтыштiс Павел Егоровичыс чужöмö, и вöлi инькаыс синнэзын тоска, кöдö öтiк минутанас он вашöт.

— Ме разь тöда, Павел Егорович? ― пондiс чышкыны синваэсö Лидаыс. — Быдöс аркмис лöгувьям: орöтi ме олансö нелюбöйыскöт и быдöс...

— Только веськав. Тэ эшö том.

— Абу ни том. Торки оланöс весись, Павел Егорович...

Вились ординаторскöйын джöмдiс басни: быдöн думайтiс ассис.

— Лидия Павловна, сiдзкö, тэ гортiсь пышшин? Лидаыс видзöтыштiс милиционерыс вылö, эз вежöрт.

— Эта меным колö кыдз милиционерлö. Удж менам сэтшöм.

Инькаыс нем эз висьтав. Пыкис веськыт кинас рожабансö, нырыштсис пызан вылö.

— Гортат тэнат топ тышкасьöмась: тарелкаэз жугалöмöсь часы жугалöм, кытшöмкö вир резсьöм?..

Видзöтö Лидаыс Павел Егорович вылö, оз вежöрт, мый сылiсь юасьöны.

— Тышкасис кинкö?

Шынньöвтiс Лидаыс и вдруг гордöя да лёка висьталiс:

— Паздi, жельдi!.. — легнитiс юрнас. — Куш кинат мортсö эн вöрзьöт. Панялiс менам кöин мульöсыс. Ась оз кошшы кодя иннесö!

Шынньöвтiс Павел Егоровичыс инькаыс боёк басни вылö, кöдö казялiс Лидаыс, и топ öд шедiс инькаыслö:

— Часыö лöгувьям эз вöв жаль: шентi рожабанас! Мыйöн шедiс, сiйöн и жельдi... Ачым пышши гортiсь. Поди, сё эз мун? Эз мун — локта и юрсö керала! Не йöзлö — милициялö висьтала!

— Мунiс сiя тэ дынiсь, — висьталiс Павел Егоровичыс.

«Вот эта инька! Нельки Мелехинсö вашöтöм, а мый миян кодьыскöт лоас?» — гажöн думайтыштiс Лида йылiсь том милиционерыс.

— Эз бы мун!.. — но падмис, эз висьтав, мый бы вöлi Мелехиныскöт, эз бы кö сiя мун Лида дынiсь.

— Неблiн тэ лотерейнöй билет бухгалтерлiсь? — дзугис инькасö милиционерыс.

— Мый сiя тiянлö?! — дивуйтчö инькаыс. — Ачыс сiя меным билетсö чапкис: деньга одзöстлiс, а вештiсьнытö вöлi немöн. Сэтшöм жö эд — алкоголик...

— Копейка рубль берегитö, — висьталiс Павел Егорович. — Деньгаыс государственнöй, чапкасьны сiйöн грех. А лотерейнöй билетсö тэныт бухгалтерыс весись абу вузалöм.

— Вузалас весись!. . Деньга торкис да эшö сто грамм шыасис.

— Счастливöй эта билетыс, Лидия Павловна, машина сы вылö инмис

— Кытшöм эшö машина?! Сералат тi миян коддесö...

— На, видзöт, — кыскис кармансис милиционерыс лотерейнöй билетсö и таблицасö, кытöн счастливöй номерыс увтöттяс вöлi кырöвтöм карандашöн.

Лидаыс босьтiс газетасö да билетсö, дыркодь видзöтiс то билетыс вылö, то газетаыс вылö, и вирыс эта коста орсiс чужöмбан вылас: медодз чепöссис гöрд би кылöн, сэсся вотьыштiс-öшис, и чужöмбаныс пондiс вачкисьны чочком чышьян вылö. Кин тöдö, мый думайтiс Лидаыс эта минутаö. Может, мöдпöв олiс ассис олансö, али öшис видзчисьтöм удачасянь? Но пукалiс вöрзьытöг, кыдз кынмöм.

— Но мый? — юалiс Павел Егоровичыс. Лидаыс нето повзьöмöн, нето öшöмöн, кыдзкö отчаяннöя, дзарнитiс милиционерыс вылö, и син угöлас сöдзис синва. Сiя зубыта ньылыштiс дульсö, горöтчис:

— Мый сiя деньгаыс, Павел Егорович? Деньганас счастьесö он неб. Не деньгаыс мортыслö колö...

Милиционерыс эта кадö Лидасянь видзчисис не энö кыввесö, думайтiс, что инькаыс радувьяс мыйкö висьталас сэтшöмö, что сувтöтас кок выланыс быдöс шогалiссесö — эд не пыр этадз инмö лотерейнöй билетнас, а сiя...

Дежурнöй сестраыс осьтыштiс ыбöссö, виноватöя шынньöвтiс, мыччалiс часы вылö.

— Чожа! — висьталiс Павел Егорович сестраыслö, пондiс кольлавны Лидасö.— Шоччись, Лидия Павловна, веськав чожажык, керкуыт тэнат сэтчин öтнас — хозяйкасö видзчисьö. А, может, Мелехиныс локтас? — юалiс веськыта, гарйыштiс душасö.

Зэгнитчис инькаыслöн рожабаныс, топ зубыта шатьöн вачкисö спина кузяс, но сэтöн жö чорзьыштiс, сьöкыта ловзисис кöритöмöн дзарнитiс старшöй лейтенантыс синнэзö:

― Павел Егорович, менам эд годдэзö не семнадцать. Кыдз ен шуис... Öтнам понда пöрисьмынытö, честнöя уджавны, сёйны да юны, спокойнöя узьлыны.— Вдруг виноватöя юалiс: — Кери ме тiянлö уджсö?

— Эх, Лидия Павловна!.. — лöсьöтчис висьтавны, что Лидасö немöн он вермы, но сэтöн жö босьтiс асьсö — аскоддя гордöй дума пырис мортыс йылiсь: Лидасö эз дзуг не Мелехиныс, не шогöтыс, кольччис мортыслöн гажыс ас дынас, и колö только сылö висьтавны, что счастьенас оз ков орсны, оз ков сiйö чапкавны йöз мортлö, кöдалöн сьöлöмыс тэ понда оз вись.

— Ло здоровöн! — прощайтчис Лидакöт милиционерыс.

Петiсö больницасис, колисö лекарство дуксö, чочком халаттэз, ассис больничнöй, не öддьöн вежöртана олан, кöда вылö Павел Егоровичыс пыр видзöтiс кыдзкö полöмöн, сiйöн что больницаас овтöнняс шедлiс только ранитöм бöрсянь да недыр кежö сэк, кöр аслас уджын колiс пырны враччес дынö.

Рытся городыс лолалiс тшын да газ сорöн, но эта воздухыс вöлi уна кокнит больничнöйся.

Городыс эз узь. Городыс уджалiс и ойнас: омöн югьялiсö биэз, ружтiсö машинаэз, кытöнкö чирзыштлiс паровоз, тэрмасисö ойся смена вылö отир, кылiс томмезлöн басни.

Эта боёк оланыс вдруг кыдз саймöтiс милиционерресö асланыс уджись, кöдöн олiсö нiя медбöрья кадас. Павел Егоровичлö лоис сэтшöм жö кокнит, сэтшöм жö гажа, кыдз эта городлö, кöда ой и лун керис ассис любимöй уджсö. Старшöй лейтенантыс öнi вдруг томмис, топ сылö годдэс вöлiсö не пятьдесят, а кыкдас, сылöн оланыс быдöс эшö одзлань, и усис сылö не только тышкасьны врагкöт, зорöтны олансö сьöкыт война бöрсянь, строитны коммунизм, но эшö и овны коммунизмас.

Сiя кылö эшö ассис вынсö, эм эшö здоровьеыс и гажыс, медбы уджавны одзлань и пыр отсавны сьöкыт часö отирлö, медбы йöзыс пыр висьталiс: «Спасибо, Павел Егорович!»

— Любита городсö! — гажöн горöтчис Борисыс.

— А тэныт, Борис Михайлович, ковсяс деревняын уджавны, — висьталiс ёртыслö старшöй лейтенантыс.

— Ковсяс, — согласитчис томжыкыс, содтiс: — Уджыс кокнитжык.

— Кокнитжык я? — дивуйтчöмöн баитiс старшöй лейтенантыс, висьталiс: — Не быдöнным ми öткодьöсь. Видзöт: öтлаасисö мужик да инька, сiдз гардiсö олансö, что асьныс оз вежöртö, кыдз одзлань овнытö, — колiс милиционер. Мöдiклаын — миянтöг нем оз аркмы. Тырмас и деревняас уджыс. Вот коммунизмас...

— Ёрт милиционер, — дзугис милиционеррезлiсь баснисö тöдтöм морт, — кыдз адззыны Дзержинскöй нима улица?

— Проститö, ёрт, ачым ог тöд, не татiсь, — виноватöя висьталiс Павел Егорович, и кöр мортыс мунiс дынсиныс, баитiс одзлань: — Ковсяс пантасьны эшö и Лидаыскöт: может, ме одзжык локта сы дынö, али сiя одзлань котöртас, медбы висьтавны «спасибо», конечно, вежöртiс дак? Сiдзкö, милицияыслöн уджыс öткодь, что городас, что деревняас — татöн и сэтчин отир.

— Ковсяс пантасьны и Мелехиныскöт, — думайтö Бражкиныс.

— Мелехиныскöт? Тьфу, вунöтны ни мöда, — серöмтчис ас вылас Павел Егоровичыс. — Сыкöт он гажтöмтчы. Гажöтас эшö милициясö. Артист! Лида, тыдалö, сыкöт янсöтчис, и тюрьмаас топ нем понда йöртнытö. Но думайт: деревняын Мишка уджавны оз куж, оз любит — не сы сьöртi деревняас уджыс... Катыльтчас, натьтö, Мишкаыс городлань, — точнöя висьталiс старшöй лейтенантыс. — Содтас городас уджсö милицияыслö, — жалейтöмöн кончитiс сiя.

Сiдз нiя мунiсö городскöй улица кузя, шоччисисö удж бöрсянь, но эз вермö овны асланыс уджтöг — баитiсö сы йылiсь. Шагнялiсö гортлань.

Вöтiс машина. Сувтöтiсö, пуксисö кабинаас. Чожа городыс кольччис бöраныс.