13.1-Сурет. Microsoft Word программасының терезесі

Microsoft Word мәтіндік процессорының терезесі тақырып жолы, мәзір жолы, сызғыш, қалып-күй қатары, стандартты аспаптар тақтасы, пішімдеу тақтасы, сурет салу аспаптар тақтасынан тұрады (13.1-сурет).

Тақырып жолы - терезенің жоғарғы бөлігіндегі көк түсті белдеу, мұнда құжаттың атауы бейнеленеді және үлкейту, кішірейту, жабу батырмалары орналасады. Мәзір жолы – терезенің жоғарғы жағында, тақырып жолынан кейін орналасқан, мәзір бөлімдерінің атаулары көрсетілген командалар жолы. Олардың бірін таңдап алғанда, келесі орындалуға тиіс командалар тізбегі бар суырмалы (drop-down menu) мәзір жолдары шығады. Қажетті команданы тышқан арқылы таңдап алған соң, мәзір жабылады. Бұл мәзір экрандағы орынды үнемдеу үшін жасалған. Сызғыш жаңа жолдың шегініс мөлшерін, табуляция орнын, бағаналардың өрісі мен енін қарап шығуға және тағайындауға мүмкіндік береді.

Қалып-күй қатары экранның төменгі жағында орналасып, ағымдағы құжаттың қалыпты көрсеткіштерін (парақ нөмірі, парақ саны, меңзер тұрған орын және т.б.) көрсетіп тұрады.

Стандартты аспаптар тақтасы өте жиі орындалатын операцияларды жылдам атқаруға мүмкіндік береді. Мысалы: файлдарды ашу, сақтау, баспаға шығару және т.б. Стандартты аспаптар тақтасын экранға шығару үшін Түр(Вид) – Стандартты аспаптар тақтасы командасын таңдау керек.

Стандартты аспаптар тақтасының батырмалары: - жаңа құжат құру, - құжатты ашу, - сақтау, - баспаға шығару, - алдын-ала көру, - емле ережесі, - анықтама, - қиып алу, - көшірмесін алу, - кірістіру, - болдырмау, - қалпына келтіру, - кесте құру, - Excel кестесін қосу, - бағаналар, - формулалар редакторы, - құжат сызбасы.

Пішімдеу тақтасы мәтінді пішімдеу мақсатындағы стандартты операцияларды орындайтын параметрлер мен батырмаларды қамтиды. Пішімдеу тақтасын экранға шығару үшін Түр(Вид) – Пішімдеу тақтасы командасын таңдау керек. Сурет салу аспаптар тақтасы - терезенің төменгі жағында орналасқан, сурет салуға арналған қарапайым құралдардан (сызықтар, түзулер мен қисықтар, геометриялық фигуралар және т.с.с.) тұратын тақта.

Мәзір жолының барлық командалары Файл, Түзету(Правка), Түр(Вид), Кірістіру(Вставка), Пішімдеу(Формат), Сервис, Кесте(Таблица), Терезе(Окно) және Анықтама(Справка) мәзірлеріне топтастырылған.

13.1. Құжаттарды дайындау, сақтау және баспаға шығару

Microsoft Word программасы іске қосылған соң, экранда 1-құжат атауымен бос терезе пайда болады. Келесі құжаттар 2-ші, 3-ші және т.с.с жалғаса береді. Жаңадан ашылған құжат кәдімгі (обычный) нұсқа бойынша жасалады.

Жаңа құжат құру үшін Файл – Құру командалар тізбегін орындайды. Осы әрекетті стандартты аспаптар тақтасындағы батырмасын басу арқылы немесе Ctrl+N пернелер комбинациясы көмегімен де іске асыруға болады. Нәтижесінде пайда болған құжатқа қалауымызша жаңа атау беріп, сақтауға болады.

Егер дискіде сақталған құжатты ашу қажет болса, онда Файл – Ашу командалар тізбегі немесе батырмасы пайдаланылады. Ctrl+O пернелер комбинациясы да сақталған құжатты ашу қызметін атқарады. Экранға шыққан «Құжат ашу» терезесінен құжат орналасқан буманы таңдап, бумада орналасқан құжаттар тізімінен керекті құжатты таңдаймыз.