Вельмисö

Серга быдмис да олiс деревняын, кытöн быд мужикыс уджалiс, мыйкö да керис. Деревенсаыс любитiсö бура керöм дело бöрас не сiдз просто шоччисьыштны, а бура гажöтчыштны, медбы öтöрыслö вöлi жар, но и сы коста мужиккес баитiсö одзланься удж йылiсь. Клубыс ны понда эз вöв, и öксьывлiсö то öтiк, то мöдiк ордын, кытöн вöвлiсö и челядьыс, кывзiсö пöрисьжыккеслiсь висьтасьöммесö да каттисö пель саяныс. А Сергейыслö эта эз ков. Сiя кывзiс только гажöтчöм йывсис да мый керлöны мужиккес сы коста. Куллес ли мый ли сiйö чужтiсö? Кöть и ыджыт ни лоис, а кисис нем оз пет. Лоис шöрöт мыгöра, лöсьыт и басниа, а толкыс уджас абу. Мамыс и пасьтöтiс неумöля. Только уджавны гужиэс вöлiсö личытöсь, сийöсыс эз лöсяв — бöрланьö кыскис. Сы туйö быд рытö петавлiс деревняас и кошшис, кытчö öксьö том йöзыс балагуритны. Сэтöн сiя вöлi медодзын. И гленитчис нывкаэслö гажа баснинас. И эстöн ассис эз лэдз. Кежöтас нывкасö бокö, нуöтас сьöрас, висьталас сылö сякöйкодь кыввесö и, кöр керас ассис делосö, быдöс вунöтчывлiс, бытьтö нем эз и вöв. Не юрсадьыс умöля уджалiс, а сiдз просто, сьöлöмсö эз бы досадит.

— Тэнат годся зонкаэс быдöс ни эд гöтрасисö, — баитiс сылö мамыс. — Только тэ мотырасян да абутöмсö кошшан.

— Тэ ассит олiн и меным эн мешайт.

— Ог тай одзат сувт, — лöга горöтчис мамыс.

— Пондыв только, — нерöмöн шыасис зоныс, — ме чожа верма öвсьöтны.

— Мыля тэ он, верман. Вон кытшöм вызво быдмин. Только тэныт и ордавны дорйытöммес вылö. Некин паныт кыв оз сет. Айыт одзöв то кулiс.

— Вот адзза ичмонькасö и вайöта тэныт.

— Мыля жö меным? Аслыт колö вайöтны. Тэ эд мужикыс.

— Меным и сiдз бур, и этадз.

— Мамыт сивилён вылын пукавны.

— Да мый тэкöт баитны? Сивилёныт вöснитöв — кытöн пуксян, сэтöн и чеччан. Менам колö деревняас петавны.

Сибалiс рыт. Öшыннэзас пырис ни сылöн везыс: керкуас пуксис пемдан дорыслöн лöнь каттьöмыс. Öшынтöм угöввезас лоис пемыт. Важ койкаыс тöдчис только вуджöрöн, кöда вылö вöлi нюжöтчöма пöрись кань. Сергейыс кушым-кашым пасьтасис да петiс гортсис. Улицаас эз тыдав некин и сiя решитiс пыравны Сенька Егор дынö, кöдiя пукалiс ни тюрьмаын да неважын локтiс бöр и некытöн эз уджав, а только керис шабашкаэз да пируйтiс. Сiя дзугыльтчöмöн пукалiс öшын дынын да видзöтiс öтöрас. Юрыс поткöтiс-висис. Кöр ыбöснас клопнитiсö, сiя дзарнитiс порог увтас и горöтiс:

— А-а, Серёга дружокö локтiс! Лок, лок бокам. Кыкöн кокнитжык лоас рытсö джендöтны, а то öтнам тöждiся.

— Мужиклö немись тöждыны, — бокас пуксикö висьталiс Егорыслö.

— Öткöн пукавтöн и потолокыс личкö. Петамö жö öтöрас да мездöтамö дзескытсис ловвезнымöс. Нывкаэс эд эзö эшö бырсьö.

— Мыла ни бырис öтiксö тувьявны, — паныт горöтчис Сергейыс.

— Сэк вильöсь адззамö. Гортö эд вöрöттöмыс оз лок.

— Сiдз то сiя сiдз, но эд полöм петö.

— Адззöма мыйись повны. Ме тай некинлiсь эг юасьлы. Кин ки увтам шедас, сiйö и кута. Кытшöм сэтöн басни?

Нiя куритыштiсö да петiсö деревняас. Öтöрас вöлi пемыт, тöдчисö только пуэслöн вуджöррес. Деревенсаыс лöсьöтчисö узьны. Не шы, не тöв. Биэс сотчисö керкуэзас, но вöлiсö учöтöсь и эзö сетö öтöрас югытсö. Мунны ковсис кыт кималасöн, кыт мый. Но вот ны одзын кылiсö оськöввез, и минута бöртi пантасис том нывка, кöдiя киас видзис книга. Нывкаыс мöдiс мунны бокöттяныс, но Егорыс панöвтiс сiйö да сувтöтiс.

— Кытчö тэрмасян, Люся, — юалiс сералöмöн Егорыс.

— Библиотекаын тай вöлi да гортö индöтча, — видзис очакывсö нывкаыс да мöдiс мунны, но Егорыс сувтiс сы одзö.

— Эн тэрмась, ештан эшö, — серöмтчис Егорыс.

— Ноко, лэдзö, ме тэрмася.

— Не мамытлiсь жö нянясö нимавны, ачыт мам мыгöра ни.

— Тырмас лёбны, а то сёр ни лоö.

— Кадыс только миян понда и эм, — висьталiс Егорыс да кутiс нывкасö и кежöтiс бокö.

— Кытчö менö тойыштан? Ноко, лэдз.

— Деревня саяс, гырка лог дорас. Кад ни тöдны бы.

— Мый ме сэтчинысь эг адззыв, — эз вежöрт нывкаыс.

— Часöт пондан тöдны, — висьталiс Егорыс да нывкаыслiсь кутiс киэзсö бöрас, зэлöтiс асьсö морос бердас да петкöтiс деревнясис. — Эн пуркöтчы, некин оз тöд.

— Лэдз, а то ме понда горöтлыны, киöс лэдз мыся!

— Ме сiдз тэныт ыкса, что аймамтö вунöтан, — лöга ни висьталiс Егорыс да эшö крепытжыка кутiс нывкасö...

Летöм-вотöмöн Егорыс кыскис нывкасö лог дорас да сэтöн и керис ассис делосö, нельки косялiс увтсис вешьяноксö. Бöр мунтöнняс нывкаыслöн киссисö синваэс, и сiя эз видзöт зонкаыс вылö. Öткö — вöлi стыд, а мöдкö — эз мöд проститны, что сiйö насильничайтiсö, и кин? Асланыс деревняись зонка.

— Эта тэныт тöдвылат дыр лоас, — синваэз пыр висьталiс нывкаыс, синнэсö чышкикö. — Меным эд вöлись дасвит год.

— Тэнат годдэзö йöзыс кага ни вайöны, а тэ горзан. Абуыс понда эн пильтырав. Не тэ эд медодззаыс.

— Мун боксим, медбы синнэзö тэнö эзö адззылö. Насильничайтöмыс понда Егорыслö сетiсö ыджыт срок. Но пукалан местаэзас мывкыдыс эз сод. Кöр сiя локтiс гортас, а лэдзисö срокысся одзжык, лоис эшö вельмöмжык, бытьтö сылö быдöс туйö, и быдöнныс сылö долженöсь керны. Эз кывзы мамсö не дядьсö, не колхозсис председательсö, кöдна пондылiсö вежöртöтны, а быдöс керис асмознас. Мамыссянь корис, медбы сiя лöсьöтiс сёянсö чöскыта да пызан вылас тыр, кыдз праздникöн. Этаись мамыскöт пыр шумитiсö.

— Ме кытöн вöлi? — рявзiс сiя мамыс вылын. — Тюрьмаын! Пукалi, быдöсiсь орöтöм. Бокö оськöвсö он лысьт керны. Нимкодьöн только шуисö. Вердiсö — каньыс горзас, а уджас корисö норма керöм. Сiдз жö ли мый ли гортын овны? Лöсьöт!

Мамыс эз ни лысьт зоныслö паныт шыасьны. Синваэс лэдзчисö рожабаннэзöттяс. Тöдвылас öнöдз вöлi, кыдз нiя олiсö жöникыскöт, уджалiсö да некöр эзö шумитö. Кöть и вöвлiсö сьöкыт луннэс, чулöтлiсö öтлаын. Кин сьöрья лоис зоныс? Тöждiсьöмыс пыдына пырис сьöлöмас. Синнэзсис кусiс бичирыс. Ачыс косьмис, кольччисö только кучикыс да коскаэс. Полiс петны öтöрас, пыравны да баитыштны соседдэзас. И эта кадö зоныс вайöтiс аслыс инь, а мамыслö шынньöлöн висьталiс:

— Вот менам инька, олö кыкöн да эд видчö. Гöтыртöг тырмас шатласьны.

Инькаыс вöлi годдэзын ни, но мамыс шы эз сет — кинöс вайöтiс, сыкöт и олас. Сiйö только бы эзö вöрöтö. Но мирнас дырсö эзö олö. Кыдзкö зоныс дынö пырис Сергейыс, важся другыс, мыйкö недыр шушкöтчыштiсö, и Егорыс пондiс пасьтасьны.

— Кытчö кык жулик мöдöтчатö? — юалiс Егорыслöн инькаыс.

— Сэтчö только тэ он и тырмы, — нелöга шыасис кöзяиныс.

— Но дак босьтö сьöраныт.

— Пукöтö дак пукав, а то мöднёжа понда баитны.

Нiя мунiсö. Инькаыс пуксис öшын дынас да пондiс видзöтны öтöрсö. Тöдвылас сылö усисö том годдэс, и лоис гажтöмся-гажтöм, кыдз бытьтö керкуыс сайкалiс. «Кык рестант мый-нибудь да керасö, — думайтiс сiя. — Мый нылiсь босьтан? Öткодьöсь шарлатаннэз. Урвитасö, мый ки увтаныс шедас».

— Мыля тэ инькатö он велöт, — баитiс Сергейыс мунiкас.

— Эг тай киöс эшö сэрпав, но колас.

— Менам, даки, мöдö янсöтчыны. Но и ась, абу жаль. Только ме эд кайыс вольнöй. Вот босьта да и шыбыльта томжык дöва дынö. Нiя эд любитöны, кöр ны дынö вовлöны мужиккес. Вот пыраламö-ко Дарьяыс ордö, поди, мыйкö и петас?

— А мый, кежаламö, — согласитчис Егорыс. — Синнэзö эд каньöн оз чеччöвт. Да и не сэтшöм сiя мортыс.

Деревняас эзö пöднасьлö, и нiя пырисö дöваыс дынö, кöда пукалiс да баитiс соседкаыскöт. Здоровайтчис, кыдз овлö отирас.

— Вот эд кытшöм ситуацияыс, — серöмтчöмöн горöтчис Сергейыс да пуксис лабич вылас, — тiйö тöждiсятö кыкöн, и мийö локтiмö кыкöн. Одö эд вашöтö?

— Ловья мортсö кин жö, поди, вашöтас? — шыасис кöзяйкаыс да видзöтыштiс соседкаыс вылö, кöда гöрдöтыштiс. — Кытшöмкö делоöн, поди, локтiтö? Сэк инö висьтасьö.

— Миян дело ли не дело, а пыримö, дак сет, мый аслыт дона, — гажöна висьталiс Сергейыс. — Пызан вылас пукты бутылкасö.

— Бур купецыс ачыс вайö да гöститöтö, — висьталiс кöзяйкаыс.

— Радöсь бы, да небны немöн, — шутитöмöн висьталiс Сергейыс.

— Мый ни керан рестанттэзкöт, — ыш ловзисис кöзяйкаыс да мунiс комас и бöр бертiс бутылкаöн. — Пондöтiмö только, да мешайтiтö.

— Не весись менам ныр увтö лудыштлiс, — серöмтчис Сергейыс. — Кытiсь, думайта, талун юан?

— Дак эд добрöй нырыс кулаксö куим лунöн одзлань кылö.

— Пуксьöт инö пызан саяс, Дарья Максимовна.

— Не челядь, асьныт пуксятö.

Мужиккес вешшисö пызан дынас, а соседкаыс кольччис пукавны гор бокын.

— А тэ мый барыняöн пукалан? — горöтыштiс сы вылö кöзяйкаыс. — Торья приглашеннё колö? Эн лэбтав ныртö, а лок öтлаö.

— Кин бы öткажитчис, а ме даки ог, — шыасис Фёклаыс да сибöтчис öтлаö мужиккес дынö. — Енöн сетöм добросö оз туй орддьыны.

Кöзяйкаыс кисьтiс винасö стопкаö да чöсмасьöмöн юыштiс и тыртiс вились да сетiс Сергейыслö, кöда кутiс дрöжитан кинас да öтiк гулькöн юыштiс, а сэсся кезöтчöмöнмоз бергöтiс юрсö и думайтöмöн висьталiс:

— Кр-репыт заразаыт, кужöмыт керны.

— Неделяся унажык сулалiс, — шынньöвтыштiс Дарьяыс, и тöдчис, что сылö гленитчис ошкöмыс. — Менчим эд некин оз вöрöт. Ноко и тэ, Егор, пешлышт. Мыйкö тай шоча пондiн пыравлыны.

— Инькаö боксис оз лэдз да, — стопкасö босьтiкö висьталiс Егорыс.

— Мезмин дак куж öштöтчыны, — кыдз бытьтö просто висьталiс Дарьяыс да мигнитыштiс. — Масленицаыс не пыр овлö.

Кöзяйкаыс эз орддьы и Фёкласö, а пызан вылас вайис эшö мöдiк бутылка. Басниыс пондiс киссьыны, кыдз ведраись ва. Дарьяыс вевттис öшыннэсö штораэзöн, медбы öтöрсяняс эзö видзöтö. Неыджыт керкуас вöлi шоныт, и мужиккеслö ковсис чöвтчыны. Нiя смевсялiсö и пондiсö ни чунясьны да бöбалöтчыны, шутитны, кöда пыр тöдчис öтiк вылö намекайтöмыс. Недыр думайтöм бöрын кöзяйкаыс кусöтiс бисö, этöн сетiс мужиккеслö волясö. Сергейыс нуöтiс кöзяйкасö комас, кытöн сулалiс сылöн койкаыс, а Егорыс лöсьöтчис западня вылö. Шыэс лöньсисö.

Ойшöр гöгöрас, кöр кöзяйкаыс öзтiс бисö, мужиккес эшö юыштiсö кольччöм винасö да гажöна янсöтчисö подружкаэзныскöт. А Сергейсö гортас видзчисис сюрприз — инькаыс вöлi быдöс кульöма керкусис да кöрталöма узöлö. Ассис паськöмсö узöлалöма мöдiк местаö. Кöть и вöлi сёр ни, но сiя эз узь, видзчисис жöниксö öшын дынас пукавтöн. Видзöтiс решительнöя, бурсö нем эз кöсйы. Сiя нельки эз вöрзьöтчы, кöр жöникыс пырис керкуас. Сергейыс казялiс этö и сэк жö садясис, юрыс пондiс уджавны.

— Этта кытшöм тэ вöлöмыт, — горöтчис Сергейыс да локтiс инькаыс дынö. — Кöзяиныс эз ешты петны, а кöзяйкаыс подувсö лэбтö. Ох и виззи бы тэнö, да киöс ог ни лякöсьт. Мун син одзсим! Керкуас медбы дукыт эз кыв!

Иньыс тöдiс жöникыслiсь обичейсö и кинитчис öтöрас да котöртiс соседкаыс ордö. Сергейыс пуктiс кыкнан узöвсö порог дынас да дыр кошшисис, мыйöн бы öзтыны, но нем эз адззы, и син одзас усис сартас, босьтiс да чегöтiс и сюйыштiс паськöтöм паськöм коласас да öзтiс. Джендöсыс да сöдзыс сотчисö умöля, и кöзяиныс босьтiс лампасö да кисьтiс сэтiсь керосинсö. Керкуыс тырис тшынöн, а кöзяиныс пукалiс западня вылас да любуйтчис, кыдз öгралö паськöмыс. Но соседыс казялiс öшынсис бикыввесö, кватитiс чер да кинитчис сы ордö и чожа кусöтiс керöм бипурсö. Сотчан джодж вылас кисьтыштiс ва.

— Мый томмес только думайтатö? — кöритöмöн висьталiс сiя кöзяиныслö. — Этадз и айнат керöм керкусö верман палитны.

— Дядя Гриша, ме жö только инькаöлiсь паськöмоккезсö сотi.

— Юат, да не юраныт сöтö. Кызжык нагайка тэныт колö. Вöлiн бы зонöн, дак нагайканас пешлi бы небыт местаэтö, пондiн бы тöдны, кыдз шедö крестьяниныслö керкуыс.

А Егорыс? Сiя локтiс гортас да бисö öзтывтöг чöвтчис и мöдiс кышасьны инькаыс вылö, но иньыс одзлань висьталiс:

— Мамыт эд оз узь, норовитышт жö, горвылас куйлö, öнöдз баитiмö.

— Менчим коскаэзöс бергöтлiтö? Ась и кылас, абу тай жаль. Сiя олiс ассис, а меным часöт колö.

— Совестьтöм морт тэ вöлöмыт, не стыд, не опас он тöд. Рожаат бан ли мый ли ашын кышалан? Куйлы, а то чирзыны понда.

— Горштö летны дугды, мать твöйти, не нылочка, — лöга висьталiс Егорыс да водiс инькаыс вылö...

— Тэ, Егор, не морт, а подаысся умöльжык. Кыдз пондан овны?

Мамыс чеччис да пуксис горвыв дорас. Кынымкö минута зоныс чöлiс, а сэсся мыйкö кыдз орис гыркас, и сiя чепöссис местасис да пондiс горöтлыны мамыс вылын, кöдалöн петiсö ни синваэс.

— Сота кыкнаннытö öтлаын, — грöзитчис зоныс. — Аня-моня паныт пондiтö мунны! Сота, и дукныт оз кольччы! Адззöмась кин вылын указывайтны. Ме тiянлö не зоночка, а вывтыра мужик.

Сiя петiс чуланö и босьтiс сэтчинiсь керосинöн бутыль да петiс карта вылас, киськалiс гидсö да öзтiс. Биыс чожа паськалiс да кыссис сараяс, кытöн вöлi идзас заптöс, крыша увтыс пондiс öгравны-сотчыны, петiс фронтон саяс, бикыввес пондiсö нювны крышасö, кöда вылöт котöртiсö керкуланяс. Кöр кватитчисö инькаэс, картаыс быдсöн ни сотчис. Нiя осьтiсö öшынсö да сэтi чапкалiсö öтöрас керкусис паськöмсö. Ойся биыс саймöтiс быдöс деревнясö, и чожа öксис уна отир да кин мыйöн вермис, сiйöн и кусöтiс бисö, кöда вайöтiс тöв да пондiс шентавны головняэсö. Вöлöн вайöтiсö пожар кусöтан машина и сэк жö пондiсö качайтны бочкаись ва. Öтласа вынöн вермисö кусöтны бисö, кöда ашкис* сарайсö да быдöс крышасö, бура палитiс керку боксö. Лöсьöттöг сэтöн овны эз ни туй.

[* ашкис — ашнöя ньылыштiс]

А кытöн жö кöзяиннэс? Кык код юр вöлiсö деревняас, и нiйö ашынас кутiсö Дарьяыс ордiсь да нуöтiсö милицияö.