Шогалiсь

Серафимаöс, кöр вöлi эшö том да вермис керны быдкодь уджсö — и не только инькалiсь, но и мужиклiсь — лыддисö одзын мунiсьöн. Нывканас вöрсö кералiс и назёмсö кыскалiс, сюсö чарлаöн вундiс и кудельсö печкис, дöрасö кыйис и паськöмсö вурис, ытшкисис и вартiс, мешöккесö кыскалiс и нельки кöдзис кинас. Да мый сiя только эз кер! Öтöрыс зэрö, лымьялö, жарöн палитö или морозöн стукöтö, тулысöн или арöн, гожумöн или тöлöн — сiя пыр петiс колхозас. А новйис мый? Нельки пасёкыс эз вöв. Кокас кöмалас нинкöммез гöрд воннезöн да ноёвöй чулкиэз пидзöс вевдöрöдззас, а вывланьöт кольччö куш. Но эшö унажык сылö дöнзис, кöр мунiс фашисттэзкöт войнаыс. Гожумнас уджалiс колхозас, а тöвнас пöрöтiс вöрсö леспромхозын, кытöн кöмкöтыс эз и косьмывлы. Ладно кöть вöлiсö пöрись мужиккес, кöднiя сьöктавлiсö да кыйлiсö виль нинкöммесö, а то бы просто беда. Вöрас пырлiсö пемытöн и сiдз жö пемытöн локтывлiсö бöр. Одзжык некыдз он пет — мастерыс сулавлiс петан туй вылас, караулит.

Но оланыс босьтö ассис. И Серафимаыс дынö локтiс любитöмыс. Леспромхозас тöдсасис зонкакöт асланыс жö колхозiсь и эз вермы сылö откажитны, петiс жöник сайö. Пондöтчисö овны бура, быдсöн сетчисö любитöмыслö. Мöд тöлас нылöн шогмис кага. Серафимаыс невна пукалыштiс гортас и вились петiс уджавны. А сэсся чужтiс эшö куим зон да кык ныв. Сьöкыта уджалöмыс да ваясьöмыс Серафимаыслiсь орöтiсö етшсö. Сiя пондiс шогавны, одолейтiс висьöмыс, быд коскаыс доймис. «Висьöтас да дугдас, — думайтiс сiя первосянь. — Инька мортыс шогалыштас, и быдöс чулалас. Колхозас некöр вальвалясьны».

Серафимаыс думайтiс öтiкö, а петiс мöдiк. Шогöтыс лэдзчисис коккез вылас да быдсöн босьтiс нiйö. Инькаыс эз вермы ветлöтны, куйлiс койка вылын. Аньыс да йöзайыс пондылiсö туруннэзöн лечитны, но нем эз пет. Жöникыс, Степаныс, эз мешайт и эз отсав лечитны инькасö, пондiс овны аслас оланöн и часто öшлывлiс рыттэзнас, а то и ойбытöн.

— Вот бы ыстыны тэнö курорт вылö, — жалейтöмöн баитiс йöзайыс моньыс вылö видзöтiкö. — Сэтчин лечитiсö бы.

— Сэтчö эд деньга колö, — норöн шыасис моньыс. — А кысь ме вая, кöр быд копейкасö челядьсö быдтыны сетi. А öнi вот пондöны вунöтны менö.

— Колхозыс, поди, бы отсалiс? Тэ эд ниртiн-уджалiн, кыдз мерин.

— Ныр вылат усян, и то колхозыс гроб вылат оз сет, а эшö бы курорт. Кытiсь тэ сiйö кывлiн?

— Председательыс тай ветлö.

— Сiя эд начальство, сылö позьö, кöть и горбсö оз кöсты мешöк увтас, лымас оз бродит.

— Сiдз, моньö, сiдз. Начальникыслö быдöс сетсьö, а уджалiсьыслöн только аслас выныс да киэс. Правильнöя баитан, что ныр вылат усьтöдз уджöтасö, а сэсся чапкасö. Кинкö думайтö миян олан йылiсь, да умöля. Ловсö миянлiсь сiя босьтö. Но... нылö и горöтчыны он лысьт. Властьыс нылöн. Быль эд петö — кин киын властьыс, сiя и керö погоддясö. Кымöра лунсис эгö пондö петавны, Но меным деревняас висьталiсö эшö лекарство: колö пöжны кублина да сэтöн пукавны тэныт. Былись, поди, отсалас?

— Пондылам, отирыс мыйсö оз тöд, колö пешлыны. Ашынас йöзайыс вайис колхознöй гуна вылiсь кык мешöк кублина да огородечас лöсьöтiс бочка и сы увтö керис би. Мешковинаöн вевттьöм бочкаас пöжис кублинасö, а рытъяв кадас пуксьöтiс моньсö пыдын ваннаö да каттис сiйö шоныт соровтасас. Серафимаыс терпитiс быдöс, шы эз сет, кöр яйсö сылiсь чеплялiс, бытшкалiс да зубыта сотiс. Старикыс адззис, кыдз моньыс чикрасьö, но шы эз сет, кöть и жаль вöлi инькасö.

— Кытчö жö шатушшöйыс öшис, — ассис думасö думайттöн горöтчис Серафимаыс да видзöтiс йöзайыс вылö.

— Öткаса дöваыс ордын бöра, натьтö, — висьталiс старикыс табаксö папкикö. — Отирас сiдз баитöны. Бöбмис совсем зонö, жеребеч моза чеччалö, не стыд, не опас абу.

— Мый сiя ме дынын пондас пукавны? — норöна горöтчис моньыс синваэсö чышкикö. — Шогалiсь мортыс сылö оз ков. Да бурсö оз жö эд адззы, а только тöвбöрсö, кöда некинлö оз ков. Ась ни красуйтчö, мымда вермас. Меным только челядьö жальöсь.

— Мишкаыс тай тёткаыс ордö велалiс.

— Ась и олас, медбы только умöльсö нем эз кер. Афоняыс да Васяыс вот эшö учöтöсь. Нiйö колö велöтны. Ой, да ась ни проститас менö Господь Батюшкоыс, мыдзи пукавны, садьö бырис.

— Но инö чеччы да весöтчышт, — висьталiс старикыс, — а сэсся водан, и ме шебрала шонытжыка.

Ашынас Серафимаыс пондiс кывны асьсö буржыка и койка да лабич дорöттяс локтiс пызан дынас, вермис похлёбкасö öтлаын панявны. Бöр мунiс бöра жö лабич пöлöняс. Но йöзайыс и эта вылö вöлi рад. Сiя висьталiс: «Талун эшö пöжа кублинасö. Отсалö эд тыдалö? Вот и бур, куимись колö пукавны».

Жöникыс эта сьöкыт кадö совсем мунiс гортсис öткаса дöваыс дынö да пондiс овны сыкöт. А Серафимаыс жагöника пондiс лöсявны, невнаöн сувтiс кок вылас, эд год мымда куйлiс. Но кытчöдз ветлöтiс только гортас, эз петавлы öтöрас. Некывзан коккесö велöтiс ветлöтны. Но зубытыс эшö кылiс, и Серафимаыс одзлань корис кублинасö пöжны да пукалiс шонытас. Йöзайыс видзöтiс сы вылö, ачыс дивуйтчис, кыдз моньыс сувтiс кок вылас, жыв сiя вились ловзис. Сiя эз вермы крепитчыны и öтпыр висьталiс:

— Еныс кö сетас, дак шогöттö кыдз киöн босьтас.

— Инькаыс эд пон кодь, — серöмтчис моньыс. — Нельки оланажык. Кин висьталас, что сiя оз вермы? Ась Егоркоыс видзöтас, кыдз челядьыскöт понда овны. Думайтiс, натьтö, ог ни лэбтiсь, но еныс не Микишка, эз чапкы менö. Видзöтамö, кыдз пондамö овны. Кыдз эз мöд бы, а сылö абу сетöма светсö сайöвтны. И миян улица вылын лоас праздникыс.

— Оламö ли сэтчöдз?

— Вот адззылан — оламö. Ме эстöн, веськытаас пукала. Кытчöдз вермас, ась и чатрасьö. Абу жаль...

Серафимаыс эз жалейт жöниксö, кöда сьöкыт кадас чапкис сiйö челядьнас да мунiс чатыра моросыс дынö. Но лöгыс петiс только сы понда, мыля сiя эз отсав челядьыслö. Аслас думаэзöн Серафимаыс кыдз кужис, сiдз и видiс жöниксö, тшöктiс Енсö накажитны сiйö, медбы сивилёнсö чегöтiс. Шогувьяс бурсö сылö нем эз кöсйы. Еныс одзын кеймисис. А кöр пырис Афоня зоныс, кöда велöтчис витöт классын, сэтöн жö юалiс:

— Но мый, зонö, айтö талун адззылiн?

— Кысь адззыла, кöр сiя оз мыччась...

— Кöть бы эд паськöмокнас отсалiс.

— Видзчись, вöтчас да эшö сетас. Кöть Васюыслö бы гöстинечок небис, и то ладно бы вöлi. Быдмышта вот и мыччала сылö, дугдас миян вывтi кешитчыны.

Но зоныс эз ешты вештiсьны. Öтiк лунö аслас керку дынын айыслö пантасьöм орлавтöм вöрöн машина и кежикас висйыштöм пу йывнас кынöм кузяс.

Егорыс эз казяв, кöдöрсянь мый и лоис, а только кылыштiс зубытсö и öштiс юрсадьсö. Сiдз куйлiс куим лун и кулiс. Мöдiс жö овны-гажöтчыны, да эз пет. Еныслö сэтшöм мортыс эз ков, и сiя дзимлялiс му вывсис, медбы эз мешайт мöдiккезлö уджалöмöн овны. Модзыс дзебис сiйö, не вичкусис, не отирсис обряддэсö эз видзöт. Мöдiклiсь мырддьöм жöникыс счастьесö сылö эз сет. И челядьыс эзö вовлö гроб дынас, а Серафимаыс кольлалiс жöниксö только синнэзнас, а сэтчин эз мун, медбы не пантасьны своянкаыскöт.

— Енсö немöн он бöбöт. Сiя быдöс адззö и быдöс тöдö. Оз туй сiйö лöгöтны, — пернапасасикö шушкис инькаыс. Эта кад кежö сiя вöлi кок вылас ни и петавлiс öтöрас бедёкöн.