Бригадалöн юралiсь

(Иньва, 1966)

Ме таво вöлi Кудымкарскöй районын «Иньва» колхозiсь Гришунёвскöй бригадаын, кöдöн руководитö Дмитрий Корнилович Ермаков, чорыт, кыдз алмаз, воляа морт, миян славнöй Коммунистическöй партиялöн зон.

Кöр ме тöдсаси сы уджкöт да кывзi, мый баитiс сы йылiсь отир, меным охота лоис дженытика висьтасьны эта бытшöм морт йылiсь.

...Сёрöн водiс тöн Дмитрий и эз кыв, кыдз асывнас деревня пасьта китсасисö петуххез, отир вашöтiс видз вылö пода. Керöс сайсянь мыччисис лöзöв-гöрд арся шондi, рознитчис ни туман, только лог пыдöсас, самöй деревня бокас, и кольччис сiя, сук да чочком, дзик йöв, а Дмитрий сё узис.

— Локтöма пö виль работник, — ыбöссö осьтiкö баитiс неыджыт мыгöра мужик. — Рад, конечно, рад. Да не ли эта дырни узян? Вот дак солдат!

Сэк жö Дмитрий чепöссис ольпасись, нюжöтчыштiс, макнитiс раз-мöд киэзнас да гажöна висьталiс:

— Важын ни эттшöм чöскыта эг узьлы. Здорово, сосед! Кылi, что бригадирöн уджалан.

— Öтiк маитчöм, а не удж. Думайтан öтнёж керны, а петö мöднёж. Котрасян асывсянь рытöдз, дзик пон, да мый толкыс? Ö-ö, да мый баитны! Куритöт, вайин кö табачоктö. Ас быдтöмыс нечöскыт, горш палитö.

— Курит, — Дмитрий сетiс бригадирыслö фронтовöй кисет. Важын ни бритчытöм и чуть ли не мисьтöм бригадир вачкисис беспризорник вылö и эз гленитчы Дмитрийлö. Эз гленитчы сылöн и басниыс, бригадирскöй уджсö кулитöмыс, сiйöн и шуис:

— Не кокнит, конечно, колхозникыслö öнi. Быдса война отирыс терпитiс. Адзза, вынтöмсялöмась, но не сэтшöм ни сiя беда. Мирöн лэбтамö хозяйствосö.

— Баитны эд кокнит, да баснисяняс няньыс оз сод.

— И баитны колö, — Дмитрий шлёпкис паськыт долоньнас пидзöс кузяс и содтiс: — Отирыскöт колö баитны. Сэтöн быдöс выныс.

— Ö-ö, кылыс мортсö оз вöрзьöт. Разь кыкпöвса матерщина...

— Бöбöтчан! Бур кыв — золото, кок йылö сувтöтö, а видчöмыс да горöтлöмыс — уськöтöны.

— Не партийнöйöн я тэ лоин? — чикыртiс синнэсö бригадир.

— Эг эшö быдмы сэтчöдз.

— Ага, — то ли ошкис, то ли осудитiс гöсьыс и шысеттöг пуктiс юр вылас шапка да оськöвтiс порог дынö, но думайтыштöм бöрын сувтiс, — Мöдi баитны, кыдз солдат солдаткöт, а тэ вон кыдзи... — макнитiс кинас да петiс керкусис.

* * *

Мунiс 1947 год. Тулысыс сiя годö вöлi öддьöн умöль. Лым сылiс жагöна, кöть и одз пондiс сылöтны. Часто кымрасис да вижгис лэчыт ойтöв. Эшö апрель конецын ой пöкаттэзас топыт шебрасöн куйлiс лым. Эта кадö и öксисö гришунёвскöй колхозниккез бригаднöй собраннё вылö, медбы баитны, кыдз овны одзлань.

Бригадир керис отчёт — висьталiс кынымкö кыв да пуксис. Этасянь и лэбтiсис шум-гамыс. Баитiсö одзасьöмöн, вермасьöмöн, каждöйыс мöдiс висьтавны ассис шогсö, ассис зубытсö. Быдласянь пондiсö юасьны. Ны басниись позис вежöртны, что öнöдз горрез лöсьöттöмöсь, мешöккез вочтöмöсь, оз туй доддявны телегаэсö — кöда ящиктöм, кöда чегöм оглобляа, а сеялка нельки колесотöг сулалö зэр увтын. Тöдчис, что эстöн виноват бригадир. Сылöн умöль руководствосянь и ыббесö эз назьмитлö, и умöля гöрисö да кöдзисö, а этасянь трудодень вылö и джын килограммöн эз дöнзьы.

Бригадир пукалiс да думайтiс: «Пон вувтö — тöлыс нöбöтö. Шумитыштасö да и гортаныс мунасö». Сiя дыша нёджжалiс отирсö да шочыника стукöтыштлiс карандашöн пызан кузя. Но басни бергöтчис мöдöрö, кöдö бригадир некыдз эз видзчись.

— Онняюрöн бергöтiс бригадасö! — чирзiс öтiк.

— Только помеччез йылiсь думайтö, кытöн вина шедö весь, - кöритiс мöдiк. И сразу кынымкö голос öтдруг:

— Вежны сiйö! Эстöн жö вежны! Голосуйт, председатель!..

* * *

Сёр ойöн колхозниккез рознитчисö горттэзаныс. Дмитрий оськалiс жагöника, öтнас, чöлiс. Чöлiс и бöрйис думанас главнöйсö собраннё вылын баитöмись. Кышалiсö вот ношасö, а тырмас я выныс кыскыны сiйö отир син одзын? Колö тырмöтны. Колö лэбтыны хозяйство. А этö колö пондöтчыны му назьмитöмсянь. Но кытiсь вайны сымда назёмсö? Ферма учöт. Содтыны подасö — вердны немöн, сiдз идзас вылын олöны мöссэс...

А поди, не сэтшöм ни умöль муыс, кыдз думайтö Дмитрий? Сiя кылiс талун, кыдз баитiсö соседдэс: «Муыс миян буржык мöдiккезся, а вот мый оз тырмы — и асьным огö тöдö. Уджалö мортыс, кыдз ылöстöм: тшöктöны — керö. А мый сэтiсь петас — некин оз тöд. Сякöй уполномоченнöйыс тулыснас указывайтö, быдыс ас мознас тшöктö керны. Вот и петö, что тэ понда думайтö сiя, кин адззылiс няньсö только буханкаэзöн. Кытшöм жö сэтöн лоас порядок?»

Инькаыс эз узь, кöр Дмитрий локтiс гортас.

— Кыдз, Митя, собраннёыс чулалiс? — юалiс Лена.

— Чулалiс-ту бура, да вот оказзё петiс — бригадирсö вежисö. — Важын ни колiс... А кинöс пуктiсö?

— Менö, — ыш ловзисьöмöн висьталiс Дмитрий.

— Кыдз жö сiдз, Митя? — чуть не горзöмöн юалiс иньыс. — И шоччисьны эз сетö.

— Мый керан... Отирыс сетiс приказ — колö сiйö выполняйтны. А ме солдат.

Водiс Дмитрий ужнайттöг: ыджыт думасянь и кынöмыс эз симав, и мыдзöмыс пöрöтiс. Но и онмöссьыны эз вермы. Некöр сiдз эз вöвлы, а öнi вот тöдвылас усис челядь кад, армия, война.

Дмитрий, винер да гусь зонкаок, стрась любитiс уджавны аймамыскöт. Любитiс гöняйтны вöв вылын. Вöлi радысся-рад, кöр первуись ыстiсö пинявны и шедтiс трудодень. Сэксянь сiя прокод ни отсавлiс колхозлö: тöвнас кресенняэзö да велöтчöм бöрын, а гожумнас — лун-лун. Деревняас сiдз и керсьö, что челядь учöтсянь велалö быдкодь удж дорö. А кыдз охота вöлi ветлыны станцияö, городö, мед адззывны поезд, кöрттуй, ыджыт керкуэз, заводдэз!

Öнi Дмитрий уна ни адззылiс мирсö, чуть не быдöс Азиясö доль ветлiс, буржыка тöдiс олан. Вежöртö сiя, мыля лöгöсь отирлöн чужöммез, голоссэз. Тыдалö, важын ни лöгыс öксьöм да пизьöм ны мороссэзын. Да-а, томжык уджалiссесö ньылыштiс война. Кöдна кольччисö, дак сё эшö олан вылас видзöтiсö боксянь. Кыдз жö небзьöтны нылiсь чорзьöм сьöлöммезнысö? Эта понда колö кад, а эшö адззыны ключ, кöдöн позяс осьтны сэтшöм морттэслiсь сьöлöммез. Этö колö пондöтчыны керны öнi жö, тулыснас...

* * *

Ыббез, кöдна неважын эшö вöлiсö лым увтын, тöдчöмöн кушамисö, но сьöд видзисö только кынымкö ыб, а мукöдыс вöлiсö рудöсь — гöртöмöсь. Петö, что колö унажык отирöс да вöввезöс сувтöтны гöрны да пинявны. И этö колö керны чожа, дженыт кадö, мед не сёрмыны севöн. А медперво, конечно, пондöтчыны öзиммезсянь.

Вöлi заптöма ни вöв назём, и югдандорас бригада петiс ыбö.

Бригадир эз думайт, что öксяс сымда отир, и öшисмоз: кытчö сувтöтны сымдасö? Думайтiс-керис, баитiс отиркöт и тшöктiс доддявны эшö кынымкö вöв, кынымöскö иньдiс амбаррезö тöлöтчыны.

Дмитрий час-мöд, кытчöдз эз понды сылöтны, уджалiс öтлаын ыб вылас, а сыбöрын, довольнöй ыджыт удж керöмсянь, мунiс видзöтны, кыдз уджалöны мöдiккез.

Тулысся страда пондöтчис бура, быд колхозниклöн сьöлöм вылас вöлi долыт да гажа. Радуйтчис и бригадир, кöр öтмöдöрсянь кылiс уджлöн шум: складын голлис сортировка, кузницаын кальскöтiс кöрт, карч яма дын жольöтiсö ведраэз.

Сiдз и чулалiсö луннэз. Му вевдöрын пондiс кöвьясьны чуть тöдчана парок — пакмисö вагöппез. Мöймуся вундöмпод вылын свиттялiс чераньвез. Локтiс кад, кöдö дыр видзчисисö колхозниккез. Ыб вылö петан одзын бригадир эшö öтпыр видзöтiс хозяйствосö: гöррез, пиняэз, сеялкаэз да мöдiк инвентарь сулалiсö ряддэзöн — кöть öнi жö доддясь и пет ыб вылö. И быд колхозник тöдiс ассис заданнё, ассис участок. Видзчисисö только команда.

Тулысся шондi увтын деревняыс бытьтö ланьтiс: мымда вöлi отир, мунiсö гöрны, пинявны, лöсьöтны кöдзыс. Только öтi-öтi пантасяс старик нето старуха, кöда пукалö мудьöт вылын да шонтiсьö. И нылö гажтöм. Морт пыр гöрис, кöдзис да дзимлялiс сю, а öнi вот бырсис выныс и ковсьö овны гортын кань туйö. Бур, эм кö семьяын кага. Удж не удж, а сёжö не весь олан. Правда, бригадир и нылö адззö уджсö: то кудель печкыны да геззэз кыйны, то сбруя лöсьöтны, то эшö мыйкö. Адззисьö деревняас уджыс.

Кузьöсь тулысся луннэс, но Дмитрий понда нiя вöлiсö дженытöлöсь. Чеччывлiс сiя шондiтöг и водлiс шондiтöг. Кöр пажнайтас, а кöр и оз. Этасянь и чужöмыс векнямис и ачыс вöснямис — коскаэс пондiсö тöдчыны. Сэк и усисö тöдвылас одззася бригадирыслöн кыввес: «Котрасян, кыдз пон, а толкыс абу...» И сэтчö жö панöвтiс асьсö: «Не жö, батя, котрасян, дак унажык и чожжыка адззан, мый да кыдз».

Бригадир велалiс ни, кыдз организуйтны севöн да уборка коста удж, но чулалiс год бöрсянь год, а сiя некыдз эз вермы эта кадö овны волнуйтчытöг: государственнöй дело эд керö. Öнi сiя коммунист, а коммунистсянь и юалöны унажык. «Иньва» колхозлöн партийнöй организация не öтпыр кывзывлiс сiйö бригадаын удж йылiсь да висьтавлiс, кыдз буржыка уджавны. Эта вöлi умнöй, вына ёрт да велöтiсь, кöда сетас отсöт, кöр ковсяс — любöй минутаö. И Ермаков старайтчис сiдз керны, медбы мортыс мунiс уджавны гажöн, любöй делосö керис бы кокнит сьöлöмöн. Некöр сiя эз горöт, эз видчы, кöть кинкöт баитiс бытшöмика, а уджыс мунiс бура. Колхозниккес адззисö этö и пондiсö уважайтны сiйö да быд местаын отсавны, асьныс кутчисö пессьыны дышкучиккезкöт, дисциплина дзугиссезкöт.

Умöль вöлi гожумыс 1965 годö, орöттöг зэрасис. Шондi мыччасьлiс, дзик дона гöсь. Дмитрий места эз адззы. Чöлiсö да качайтiсö юррезнаныс стариккез, тöждiсö инькаэз, ёрдiсö умöль погоддясö механизаторрез. Дона, öддьöн дона вöлi быд мича часыс. А сэтöн эшö «ЧП».

Кыдзкö Дмитрий мунiс Юсьвадор ыб вылö, кытöн гöрис тракторист Николай Трубинов. И мый жö? Эшö ылiсянь казялiс, что тракторыс сулалö. Дмитрий вачкис вöлыс бок кузя темлякöн и минута-мöд бöртi вöлi тракторыс дынын. Трактор одзын, бороздаын, гатш-гатш куйлiс тракторист. Ермаков повзис, чеччöвтiс вöв вылiсь и котöрöн мунiс сы дынö: «гöрись» узис ныргорнас, осьта öмсис пöльтiс вина дук.

— Эх, шудтöм морток, — только и горöтчис бригадир, кöр эз вермы саймöтны кодсö. Ермаков мездöтiс пускач бердiсь заводитан ременьсö. Охота вöлi этöн ременьнас пöвсавны нечестнöй мортöс, но... Эттшöм лун — тöнсянь ни эз зэр, а сiя узьö!

Эта случай йылiсь бригадир сэк жö юöртiс правленнёö да корис вежны трактористсö и мырддьыны сылiсь праваэсö. Ермаковкöт согласитчисö. Трубинов, кöр тöдiс, что сiйö чапкöны трактористiсь, бура грöзитчис бригадир вылö. А Дмитрийöс дорйисö быдöс колхозниккез. Да не только дорйисö: нiя вöлiсö готовöсь вартлыны вина юисьсö!

— Ась и, челядь, погоддяыс умöль, — лунiсь лунö повторяйтiс бригадир, — но колö уджавны. И эшö буржыка. Ас понданым эд. Да тöдö, что мийö сувтöтöмöсь хозяйственнöй расчёт вылö.

Натьтö, эз и ков эта йылiсь баитны — отирыс сiдз старайтчисö. Кöдзан агрегаттэз дынын дежуритiсö быдса суткиэзöн. Мукöдпырся öтiк сеялка вылын уджалiсö кык да куим мортöн, медбы аскадö весöтны нятьöн тырöм дисккез. Вагöппез колiс кытшлавны, а медбы нiя эз кольччö кöдзтöг — коялiсö киöн. Узьтöм ойез бöрын бригадирлöн синнэс вöйисö, чужöмыс умöльтчис, а вылын да веськыт мыгöрыс тöдчöмöн горбыльтчис. Мыдзöм, вынтöм, сiя ветлöтiс ыббез кузя, смекайтiс кöсiннэсö, вежлiс трактористтэзлiсь маршруттэз — ковсис лöсьöтчыны погоддяыс сьöртi. Кажитчис, природаыс нарочно орсiс отир нерввез вылын, пешлiс сылiсь крепсö да терпеннёсö. Но эта пессьöмын гришунёвса вермисö.

— Бура мырсим, — баитiс сыбöрын Ермаков, — но кöдзан плансö тыртiм. Кöр и горзытöдз вöвлiм, но мый колiс — керим...

Чулалiс öтiк шог, а ыбöс одзас видзчисис ни мöдiк: ытшкисян кад.

— Бергöтам турунсö, только-только пондас косьмыны, — касьтылö бригадир, — сэтöн и вöлöм кымöр — брызнитас и быдöс дзугас, весь кадсö каттян. Сiдз и пессим, но турунсö заптiм. А медсьöкытыс вöлi эшö одзаным...

Локтiс кад, кöр вились ковсис петны ыббез вылö — дзимлявны сю. Одзза годдэзас эта коста сулавлiс пыль страда, а сэк... Дмитрий Корнилович двадцать год ни уджалiс бригадирöн, а эттшöм погоддяыс тöдвылас эз вöв. Кажитчис, быдöс пондiс отирыслö мунны паныт. Но колхозниккес эз думайтö повзьыны погоддясис да сылö сетчыны. Зэр увтын, паныт шучнöбöтан тöвлö мунiсö и пöрись и том, и мужик и инька. Быд мортлöн вöлi только öтiк желаннё — дзимлявны сюэсö, не кольны ыб вылö сьöкыта быдтöм богатство. И кыдз тулыснас жö, бригада лун и ой вöджжис погоддя сьöрын да уджалiс. И не весь: быд гектар вылiсь öктiсö кыкьямыс центнерся унажык сю, тыртiсö нянь вузалан план, унажык заптiсö кöдзыс, подалö сёян, а быд трудодень вылö дöнзис полтора килограммöн. Дöнзис бы колхозниккезлö унажыкöн, да соседдэзныслöн сюыс эз шогмы, и колiс отсавны нылö. Сiдз миян оз керсьы, медбы кинöскö кольны бедаын. Эд советскöй власть дырни быдмимö, öтiк шондi миянöс шонтö — партия.

* * *

Мусö шебралiс лымöн. Сöтiсö мороззэз да сэтшöмöсь, что полан öтöрас ныр мыччыны. Потласис йы, шовкöтiсö стенаэз, бытьтö сöталiс ны кузя кинкö чорыт киöн. Керкуэзын дугдывтöг лонтiсисö печкаэз, а трубаэз гöгöр шонтiсисö воробейез. И нельки эта кадö бригадаын мунiс удж: отир лöсьöтчис пантавны партиялiсь XXIII съезд. Олан пизис фермаын, шум сулалiс вöв карта дынын. Чулалöм годся успехыс сюбыдтiссезлö содтiс вын, лэбтiс настроеннё и сетiс уверенность босьтны кöть кытшöм рубеж.

— Ме часто касьтывла, — баитö бригадир, — сiйö кадсö, кöр сувтöтiсö эта должность вылö. Юрö сякöй думаыс пырис. Уджавны отиркöт не кокнит. Быд мортыс дынö колö кужны сибавны. Армияын сетiн приказ — и лоас керöм. А колхозас приказнат ылöдз он мун. Колö мортыслiсь думасö тöдны, сылiсь быд жиласö, зубытсö и долытсö... Лэбамö вывланьö, бурсялö оланыс, лэбö да вежсьö отирлöн сознаннё. Öнi быд морт берегитö колхознöй добросö.

— Тэ сiйö вежöрт, Дмитрий Корнилович, — бригадирыс дынö пуксикö баитö Юлий Сергеевич Ермаков, — некин оз понды керны аслыс умöльсö. Колхозсис кытчö ми мунам? Эмыс и абуыс — быдöс миян сэтöн. Шогмим, быдмим и кулам колхозас. Мый бы отирыс сёйис, эз кö вöлö бы сюбыдтiссес, сэтшöммес, кытшöмöсь ми?

— А кыдз тэ думайтан? — öтлаасьö баснинас Анна Калистратовна Галкина. — Челядьыс аймамныс туй кузя мунöны. И деддэзным сэтi жö ветлöтiсö. Только пашняыс вöвлi торья. Öнi ыбсö синöн он судзöт. А тракторыс, а комбайныс! Ме пыр думайта: кöбы позис кöркöся олiссесö лэбтыны могилаись да мыччавны нылö öння олансö — вот завидыс бы вöлi — сьöлöмныс потас. Нiя эд машинаэсö эз адззывлö.

Бригада... Кыдз вежсис сiя эна годдэзö! Колхозниккез кывзöны радио, рытнас шоччисьöны электрическöй свет дырни, вичку туйö ветлöны клубö, лыддьöтöны книгаэз, газетаэз. Быдöссö он и висьтав. Вежсис деревняэзлöн чужöмбан.

Дмитрий Корнилович синнэзын югьялö гордитчöм. Кыкдас год сiя уджалö бригадирöн и оз тöд случай, кöр бы колхозник откажитчис уджись. Вот эта öтласа, дружнöй уджыс и лэбтö бригадасö. Эта бердын и гардсьö оланыс, кыдз матка гöгöрын рой.