Браконьеррез

Миша да Коля вöлiсö кык вон. Нiя уджалiсö вöр кылöтан участокын. Не сэтшöм бура и не сэтшöм умöля, кыдз баитöны. Собраннё коста эзö видлö, но и эзö ошкö. И деньгаоксö гортаныс вайны эзö тэрмасьö. Да и кысь ваясö, кöр нiя уджалiсö улiсь плотбище вылын.

Сiдз вöлi только видзöтöм вылö, отирыс син одзын. А деньганас нiя бергавлiсö. Кысь и кыдз? Да ыджыт юыс жö ордчöн котöртiс. Вот сэтiсь и гумалiсö руббесö, ойсö эзö узьö, а керисö. Ю вылас эд деньгаыс локтö только сылö, кöда вермö, кужö да ылöстö. Кык вон ки выланыс вöлiсö чожöсь и вермисö быдöс бергöтны, но только ас понданыс. Айныс сiдз велöтiс. «Быдкодь делоын перво аслыныт курмыштö, — баитiс сiя, — а сыбöрын думайтö отирыс йылiсь. Тiян понда некин оз тöжды. Оланыс сулалö эта вылын. Мортыс, кöда нем аслыс оз босьт, абутöмöн шусьö. Выгода йылiсь пыр колö думайтны. А законыс оз кö лэдз, дак сiя дзик пу — чеччöвтны он вермы, а орддьыны гусьöника верман».

Арнас, кöр ваыс ыждыштлас, шумитыштас кольччöм гожся мыланас да лöсьöтчö лöньсьыны и пырны йы увтö, кык вон решитiсö сапырнитны ассиныс счастьесö. Эта кадö чериыс öксьö тöвйыны пыдын ямаэзö, и кыйны сiйö не сьöкыт. Мöдiк дело — мыйöн? Быд чери кыйисьыс кошшö эта вылö ответсö. Пыдынiнсис эд кöшöн он гумышт. Мöдiк мыйкö колö. Мишаыс да Коляыс думайтiсö рискуйтны. Мöдiсö керны взрыв. Нiя гусялiсö толсö, сэтчинiсь, кытöн одзжык уджалiсö.

— Вот только пыжыс миян учöтöв, — сомневайтчис Мишаыс. — Кыдз не кыдз, а кык мерёжа сьöраным лоасö да асьным кыкöн.

— Баитышта, ноко, Сашка Мурашкоыскöт, — думайтыштiс Коляыс. — Нылöн пыжыс быдса плот кодь. Висьтала, что черитöг огö лоö. Заряд-мöдсö бузнитамö, и тырмас. Чериыс öнi олö кучаэзын.

Коляыс вöлi томжык, и сiя котрасис Сашкаыс дынö баитчыны, но другыс мылякö дышöтчис мунны чериавны, кöть и чериыс колiс бы.

— Мыйкö оз кыскы вадöрас, — думайтöмöн баитiс сiя. — Верман и инспекторлö шедны. Нiя эд öнi котрасьöны öтмöдöрö.

— Только Одань туйвежöдз лэдзчыламö, — висьталiс сылö Коляыс. — Мигöн бергöтчамö. Вот адззылан.

— Мöдiккезкöт эг мун бы, а тiянкöт ветла инö.

Ыджыт ю вевдöрöттяс жагöника уйисö потшша кымöррез. Ваыс валькыта кежлiс чукыллезас, вöлi лöнь, а берег пöлöняс шочыника быдмисö сякöй пуэс и, кыдз стражниккез, дозирайтiсö юсö, кöда вежис ни рöмсö и вöлi лöзöв-сьöд да дузгыльтчöм.

Мужиккез вылö вачкисян куим зонка локтiсö берег дорас ыджыт рюкзаккезöн да пуксисö ыджыт пыжйö, вöрзьöтчисö мунны посад увдöрас. Перво почти эзö баитö, быдыс думайтiс ас кежас. А пыжыс ва ньылатас уйис кокнита. Сiдзкö, кадыс унасö эз и чулав, кыдз мыччисис островокыс, кöда дынö усис неыджыт Старица юок. Берегыс вöлi отиртöм.

— Колька, веськöт пыжсö остров дынас, — негорöна висьталiс воныс. — Мерёжаэсö колö лöсьöтны. Да и аслыным неумöль гырк шонтыштны. Берегас эд стрась бура кылалö. Бур жö, кöр олан ыджыт ю дынас.

Пыжыс пыкöтасис берегас. Чери кыйиссес петiсö неыджыт островок вылас да пырисö баддес коласö. Мишкаыс сэтöн жö осьтiс бутылка и кармансис кыскис стопка, а Колькаыс тэрмасьтöг вундалiс неыджыт кокора вылын гос.

— Но дак мый? — Мишкаыс видзöтыштiс кык дружок вылö да шынньöвтiс. — Удачнöя кыйöмыс понда! — и пöрöтiс öмас тыра стопкасö. — Ах, кытшöм бытшöма лэдзчö. Кыла, быд сöнам локтö. Спасибо сылö, кин керö винасö. Шонытжык лоис. Ноко, друггез, тiйö тожö пешлö, настроеннёнытö лэбтыштö. Ох и бузйыштамö талун, что ямасö бергöтамö.

— А толсö кыдз судзöтiн? — юалiс Сашкаыс.

— Дак эд взрывникыс, поди, асланым мортыс, — серöмтчис Мишкаыс. — Бутылка понда сiя не только мешöк, но и складсö быдсöн сетас.

Но дырсö пукавны вöлi некöр. Нiя простайтiсö бутылкасö да кутчисисö дело бердас. Мерёжаэсö кыскисö рюкзаккезсиныс и вöтисö устьеас, судзöтiсö берегись берегöдз. Мерёжаэс вöлiсö керöмась ёнöсь, капроновöй сунисiсь, некытшöм чёрт оз орöт. Кольччис только заряддэсö ваас чапкыны. Мишкаыс сетiс Сашкаыслö кык бутылка, а бикфордов шнурсö зарядитiс детонаторрезнас ачыс. Эта понда сылöн вöлi заптöма пластилин, кöдöн мавтiс голюккесö, медбы шнурыс эз мезмы голюксис. Быдöс этö керисö тэрмасьöмöн, кöр локтiсö яма весьтас. Сашкаыс пуксис одзас. Перво öзтiс öт шнурсö да чапкис бутылкасö ваас. Сэсся öзтiс мöд шнурсö и мöдiс ни шентны, но шнурыс мезмис голюксис и сiя тэрмасьöмöн пондiс лöсьöтны и эз казяв, кыдз шнурыс сотчис.

— Мый тэ гуддисян? — горöтiс Мишкаыс. — Шент чожажык!

Зонкаыс öвтыштiс кинас да лэдзис бутылкасö, кöда эз ешты быдöс ваас саясьны, и сэкжö бузнитiс взрыв...

Сашкаыс видзчисьтöг лэбтiсьыштiс пыж нырас да гатш-гатш пöрис пыдöсас. Чужöмбаныс вöлi тырöм вирöн, мукöд местас свиттялiсö стекло торрез. Повзьöм увья кык вон нем эзö вежöртö, да сiя жö кадö гыпкис мöд бутылкаыс, и васис лэбтiсис гудырсорыс, а сэсся мыччисисö гырись чериэс, кыдз чочком лым. Но кутавны лоис некинлö — быдöнныс куйлiсö пыжас. Сашкаыс эз ни лолав. Кык вон чукрасисö пыж пыдöсас, кöдiйö кыдзкö эз жугды. Взрывсяняс шогмöм ванырыс зэгнитiс пыжсö да люлльöтлiс ва вылас. Сэтчö Мишкаыс кыдз онiсь саймис, садясис да кватитiс вапассö* [вапас (диал.) — пелыс] и пондiс сынны горт берег ладорö. Воныс сё эшö нюжласис, но Мишкаыс тормошитiс да садьöтiс сiйö и повзьöмöн юалiс:

— Мый нö öнi керны?

— Ловьяöсь кольччимö — и то спасибо, — жагöник горöтчис Колькаыс. — Сашкаыс эд оз ни вöрöтчы, мый миянлö лоас?

— А лешакыс тöдас. Колiс жö сiдз петны. Ответсö эд миянлö колас видзны, — Мишкаыс гыжьялыштiс юрбöрсö. — Сы вылö быдöс валитамö. Сiя öнi шы оз сет. Взрывчаткаыс сылöн пö вöлi. И ружьёэсö мыйлöкö сьöраным босьтiмö? Эшö думайтасö, что вийимö. Но и гортö чожажыка колö мунны.

— А черисö? Вон кыдз прудитöма.

— Да чёрт сыкöт, чериыскöт, — гажтöма горöтчис Мишкаыс. — Трупсö колö нуöтны, этчö эд он коль. А кин тöдiс, что этадз лоас? Но давай инö öктамö черисö, добросö он жö чапкы. Ёдiэс тыдалöны, кыдз мужиклöн нинкöммез...

Чериыс öксис вель тума. Сiйöн тыртiсö кыкнан рюкзаксö. Сыбöрын жагöника иньдöтчисö ва панытас, а сэсся пыжсö сувтöтiсö Кордон увдöрас, да Колькаыс котрасис Сашкаыс аймам дынö, кöдна сэк жö локтiсö берегас. Лэбис сэтшöм шум, что чукöртчисö уна отир. Айыс лёк горшöн горöтлiс: «Вийитö зонöс, дак ме часöт жö кыкнаннытö водтöта ордчöн!» Сiя кватитiс Мишкасö моросöттяс да клёпкис пельбокас и сiдз тапкис дынсис, что мöдыс джöмдiс и усис. Кельдöтöм айыс, кöдалöн тöдчисö жмитöм кулаккес, жагöник иньдöтчис сы дынö, и кин тöдiс, мый мöдiс керны Мишкаыскöт, но сэтчö кысянь и мыччисис участковöйыс да горöтiс: «Ноко, абрашшез! Часöт жö дугдö! Кин тiянлö сетiс правосö ассиныт судсö керны?»

Айыс дзарнитiс сыланьö да мыйкö мöдiс горöтчыны, но казялiс участковöйсö, и шыыс эз шогмы. Сiя шупыта лэдзис пондöтöм лэбтыны кулаксö и кольччис осьта öмöн.

— Милицияыс тöдö, мый керны, — невна гусьöнжыка ни баитiс участковöйыс. — Видзöтам, бöрйисямö, и... кык субчиксö эдö лэдзö мунны. Ны сьöрын ме важын ни видзöтла. Вот и локтiсö точкаöдззас. Часöт мунатö мекöт. Ответсö сетатö отделас...

ТРЕСКА

Гришка Ёкышов олiс неыджыт Малиновка деревняын, кöда бокöт жагвыв кылöтiс васö учöтик юок Синва. Сiя гаг моз виклясис видз вылöттяс, кежлiс быд лажмытiнас. Керкуыс Гришкалöн сулалiс берег дорын. Берег увтас, уджыт кöджас, аркмис гублян. Галечник вылiсь лэдзчöм ваыс öксис сэтчö да гöгралiс ыджыт кругöн. Лöнь рытся кадö, кöр номмес орсöны ва весьтас, гублянас басöка петавлiс гырись чери да польскöтiс шоныт ва вевдöрас. Этö местасö важын ни видзöтлiс Гришкаыс да сё мыйкö эз ешты керны дöмöтсö. А неважын ваялiс лыс, майöггез да кыз потш и пондöтчис керны. Быдса лун сiя уджалiс берег дорас, керис плотеччесö да козлаэз и мöдiс лöсьöтны дöмöтсö, но лэдзис козласö ваас, и сiя эз сувт кок вылас, пондiс уйны. «О-о, местаыс не мордаöн кыйсьыны, — думайтiс сiя, кöр пуксис берегас. — Весись öштi лунсö. А чериыс эд любитö виль лыссö, но да ась, лысыс öтiк ойнас оз косьмы. Ашын кера мöдiклаö».

Гришкаыс сьöвзис бокас да чеччис и копрасьöмöн иньдöтчис гортас. Мöдiс бы кыйны öшын увтсис, да нем эз пет. А кыйсис сiя не первöй год и черитöг эз ов. Сы дынö пыр локтiсö не только соседдэс, но и деревнясис отирыс, кöр колö кинöскö касьтывны или праздник кежö, нимлун чулöтны. Асланыс ва вылiсь чериняньыс не только чöскыт, но и бур козин, кöдö пуктöны пызан шöрас. Гришкаыс некинлö эз откажитлы, кöть кöр отсавлiс отирыслö. Но одзза керöм дöмöттэзнас мылякö медбöрын эз понды шедны чериыс. Кыдз киöн босьтiс. Мый лоис? Ёкышовыс эд тöдiс местаэсö, кытöн овлö чериыс, и сэтчин и керлiс дöмöттэсö. Асывнас и рытнас гортас кайöтлiс быдса пешоркаöн. И керис дöмöтсö галечник вылö, но и сэтöн кыйöмыс эз шогмы. Черисö кыдз кань малыштiс. Абу да и только. Неужто кинкö костiалiс? А мый тэ, вермас и сiдз лоны. Васö эд некин эз дозирайт.

Гришка пуксис берег дорö да пондiс думайтны. Юрас пырисö быдкодь догадкаэс. Неужели кинкö пешлö мордаэсö? Но кин? Куттöм мортыс абу гусясись. Колас пятнайтны аслам меткаэзöн. И öтiк асылö Ёкышовыс вöтьöм мордаэс вевдöрö тэчис виль лысоккез, а куимöт морда кыв вылас сюйыштiс магазинiсь небöм треска. «Вакульыс ась джагалас этöн черинас, — думайтыштiс ачыс. — Поди, пöтас жö и сетас меным васис черисö». Берегас сiя пукалiс вель дыр, орöттöг сотiс огородечас быдтöм табаксö да видзöтiс ва вылас, кытöн кучаöн ветлiс арыс да песканыс, кöть ведраöн курав. Шондiыс палитiс сылiсь паськыт кымöссö, чужöмыс гöрдöтiс. Кöр мыдзис пукавны öтiк местаас, чеччис да вискыравтöн оськалiс гортланяс, локтiс аслас керку дынö, пукалыштiс öшын увтас да пырис.

— Ноко, пöрись, лöсьöтышт пызан вылас, — висьталiс кöзяйкаыслö. — Сёйышта, и колö лэдзчыны берегас. Талун узя сэтчин. Неладносö колö сöстöм ва вылö петкöтны. Некöр тай эттшöмыс эз вöвлы.

Пöрись морт пуксис пызан саяс да тэрмасьтöг панялiс иньканас пуöм черивасö, пернапасасис да чеччис. Сiя пасьталiс важ фуфайка, сьöрас босьтiс черок, пешоркасö да иньдöтчис дöмöт дынас. Сулалiс лöнь погоддя. Одолейтiсö только номмес. Гришкаыс пырис тшöк баддяинö, кералыштiс сэтчин мешайтан уввесö да керис куйланiн. Мöдiс керны бипур да макнитiс кинас — абу кöдзыт. А рытыс кыссис, кыдз умöлик гез, жагöна да дзуртöмöн. Чуть пемдыштлiс, а сэсся асылыс пондiс лöзöтны. Пондöтчöм лунсö видзчисьтöн лöньсис и ваыс, эз понды шольöтны. Гришкаыс пуксис и дугдiс куритны. Лэчыта видзöтiс дöмöт дынiсь берегас. Шондiыс только пондöтiс мыччыны югöрресö и эшö эз павк му бердас. Берег дорас локтiс сылöн соседыс, Сили Петраыс. Сiя дзарнитiс öтмöдöрö да кайис дöмöт вылас и кыскис кык морда, петкöтiс му вылас, пöрччалiс бöжжесö да черисö кисьтiс аслас пешоркаö. Сыбöрын сувтöтiс мордаэсö аслас местаэзö да кыскис мöд парасö. Гришкаыс петiс баддез колассис, тэрмасьöмöн сибöтчис дöмöт дынас и локтiс сэк, кöр Петраыс лöсьöтчис кисьтны черисö.

— Но и кыдз, сосед, чериыс шедö жö? — негорöна юалiс Ёкышовыс.

Гусясисьыс эз мöд бы пантасьны дöмöтыслöн кöзяинкöт и синнэсö барöтöмöн дзарнитiс сы ладорö, повзьöмсяняс кокыс нильдiс, и шляпкис-пуксис бöр вылас да дрöжитан шыöн висьталiс:

— То тай, некыдз ог вежöрт, кытшöм чери пондöма пырны да кышасьöма.

— Треска тай кышасьöма, — косöя шынньöвтiс Гришкаыс. — Некö солалöм ни. Эн пешлы? Тöдтöм чериэс эта ваын только солаöсь овлöны. А ме думайта, мыля, мыся, дугдiс шедны. Сiя вот мый вöлöма.

— Вот эд чёрт, онзiльувьям эд, тыдалö, не аслам дöмöт вылö кайи, — полöмöн горöтчис Петраыс да лэдзис синлыссэсö.

— Вермис и сiдз петны. Тэнат дöмöтыт эд кык кöджöн улынжык и керöма тяп-ляп. Нельки потшыс лöсйытöм и мордаыт вочöм. Дышыт вермö. Вот менам черок и бур сылöн обукыс. Горбтö верма нöитыштны. Деревняас эзö вöлö тэ коддес и озö колö. Гусясисьсö и муыс оз терпит, быдкодь гагсö пытшкас сюйыштö.

Петраыс казялiс, что делоыс петö нешутитана, и шыыс Ёкышовыслöн бурсö нем оз кöсйы, вермас и жунгыльтны, бокöн-бокöн вешшис берегыс вывланьö, чепöссис кок вылас и кинитчис деревня ладорас. Кöдзыт ньылöм люззис кымöссис веськыта синнэзас.

Гришкаыс лэбтiс черсö да пондылiс вöтчыны, но чурс сьöвзис пышшисьыс бöрсянь да сувтiс. Петраыслöн пешоркаыс сулалiс бокас, кöр мордаэсö тэчис местаас. Ёкышовыс кисьтiс черисö аслас дозö да иньдöтчис гортас.

Сэсся эз тай кывсьы морда пешлöмыс, и чериыс шедiс.

ДРОЖЖИ

Эзö пондö кужны керны простöй шöмсö. Одзжык, медбы пöжавны гортас няньсö, быд кöзяйка лöсьöтлiс сiйö ачыс, аслас рецепт сьöртi. Не весись сiйö шувлiсö майöлöн. Кöзяйкаыс пöжалас няньсö, горсис кыскöмсö чеган шöри да нюкайтыштан — и нырат вачкас вина кöрöн. Эта кад кежö пызан вылас овлö заптöм бекöр сметанаöн. Пым няньторсö сутшкан сэтчö и сёян, кыдз медчöскыт гöстинеч, ась и няньыс пöжалöма рудзöг пизись, но эд рудзöгсö быдтiс мортыс аслас киэзöн. Сёйöм бöрас юыштан брагасö, сiйöн жö майöвнас шöммöтöмсö, а сэсся пöт обедöдз. Аскерöм майöвсö сурас и квасас пуктывлiсö.

— Поснитсялiс миян отирыс, — лöга баитiс Дорофей Сюрнов, кöдалöн чужöмыс вöлi добродушнöй, бытьтö шыннялiс, а моросас вирыс пизис. — Босьтамö нывкаэсö. Мый нiя кужöны? Прошвасö гöрдззыны али печкыны, чышкöт дорсö серöтны али дöрасö кыйны? Мывкыдныс лоис кизьöр! Мыгнысö и то озö кужö вурны. Кытчö ни нылö одззася морттэс дынöдз? Важся кадö нывкаыс мöдöтчас аслас киöн керöмнас, дак любо вöлi видзöтны, а öнi мый? Быдöс готовöсь мыччавны. Стыд не только видзöтны, но и баитны. Лунсö узьöны, а ой кежас петöны öтöрас шараборитны. Тьфу, срам да и только. Бур мортыс гунька кышалыштас, и то гленитчö отирыслö. Ме кыкьямысдас год ни тырта, но эттшöмсö первуись адззыла. Локтiсö сэтчöдз, что озö ни ас выланыс надеясö видзö, и кватайтöны быдöс, мый ки увтаныс шедас.

Дорофей Сюрнов лöсьöтыштiс дзормöм уссэсö да гусьöник шынньöвтiс. Сы серöй синнэзын öзйыштiсö гажа бичиррез. Быдсöн чужöмбаныс эта кадö югмыштiс, чукыррес волькамисö, кыдз бытьтö сэтчин павкис шондiлöн югöрыс да пондiс дзардны. Дорофей дзарнитiс öшынас и долоньнас хлопнитiс пидзöс бердас.

— Потешнöй петiс случай, — висьталiс сiя. — Кыдзкö ветлi ме Сарай деревняö, кöда верста кык ылынаын миянсянь. Магазинас сеталiсö пайкасö, кöдö керис правительствоыс война вылын участниккеслö. Ме эд тожö сэтчин вöлi... тракторöн пушкаэз кыскалi. Неби, значит, öтiкö-мöдiкö и ны коласын сетiсö сыр комок. Олышта, думайта, öнi бедатöг. Менам эд лöсьöтны некинлö, дзик öтнам керкуас кольччи. Куим зон вöлiсö да городö мунiсö. Оськала, значит, горт ладорö да радъяла, кыдз бытьтö и мусö кок увтам ог кыв. Сеткаокыс пельпон саям легöтчö. Одзам пондöтчисö соседдэслöн карчйöррес, кöднаын копошитчисö инькаэс. И сэтöн кыла, кыдз меным горöтiсö:

— Дорофей, кытчö ветлiн?!

— Да вот, магазинö тай котраси.

— И мый жö сэтчин бурыс?

— Öння кадö мыйкö разь лоас бурыс. Вот неби öтiк-мöдiкö.

Юрам сэтчö пырис бöб думка: «Нiя гуддисьöны огородечаныс, а ме шатлася. Не орсыштны ли ны вылын? Чапкыласö ась уджсö да мотырасясö магазинас. Нылö эд нем абу верстасö тальны».

— Дрожжи тай чапкыштöмась, — небрежнöя сiдз содтыштi. — Пачкаöн сетöны и то корöны руббесö быдса дюжина.

Олёшикаыс кöдкоста эд и чапкис уджсö да кинитчис керкуас, сэсся ветлiс соседкаыс ордö да чожа бертiс бöр. Чулалiс кынымкö минута, и карчйöррезас эз кольччы некин. Видзöта, а туй вылас люшки-пешки котöрöн мунöны инькаэс. Кин да мыйöн шедöм, вывтнысö нельки абу вежöмась. «Вот, — думайта, — шедi забавнöй историяас». Но видзöта, мый одзлань лоас. Чожажык гортö пыри да öшын дынас пукси, кöдасянь туйыс тыдалö. Час гöгöр кадыс чулалiс, и адзза, локтöны чукöрокöн да киэзнаныс макайтöны. Вежöртi, что не небöм йылiсь баитöны. Серала бы, да серöмыс оз пет. Кыла, кыдз шочыник юрсиоккезö пондiсö лэбтiсьны. Инькаэзсянь эд бурсö он видзчись, кöр нiя лöгöсь. Вот чукöрыс сибöтчис деревня дынас да саясис керкуэз саяс. «Но, — думайта, — нуöтiс боки гымалöмыс». Сэтчö нельки пернапасаси. И мый жö думайтан? Кынымкö минута бöртi эта бура лöгöтöм инькаэс лоисö менам керку дынын. Пырисö ёркöттöг да порогсяняс жö öтамöдсö одзалöмöн пондiсö öмнысö летны:

— Дзормöм мерин, мыля бöбöтiн?

— Сивöй юрсиоккетö часöт öтiк тылöпокöн летамö!

— Пöрись морт, а сё грешитан!

Да висьталiсö эшö уна мöдiк обидитан кыввез, кöр локтiсö дынöдззам гöрдöтöм жоннез кодьöсь. Нылö мыччалi пызан вылас да висьталi:

— Мый тiйö шлявгатö, вон паёкыс, проверитö. Инькаэс кинитчисö небöмыс дынö да ошкöмöн видзöтiсö менчим продуктаэсö, киэзнаныс пешлiсö кöркöся солдатлiсь сёянсö.

— Кытöн нö дрожжиыт? — юалiс Олёшикаыс да видзöтiс ме вылö.

— Совсем ли мый ли тамышсялiн? — обидитчи ме. — Одзат тай куйлö. Синнэтö паськöт буржыка.

— Синнэс менам адззöны, но только öтiк сыр.

— А ме мый баита? — лöгöна висьталi сылö. — Сiя эд тожö шöммöтö. Чайсö ютöн босьтан öмат, и шöм кöрыс кылö.

— Миянлö не сiя майöвыс колö.

— Но дак сэк и керö асьныт, а то ме дынö лякаситö.

— Да тэ эшö миян вылын кешитчан! Кутамö жö да вешьянсö лэдзамö! Видзöтамö, мый пондас сьывны. Ась тöдас, кыдз миянöс серавны! Поди, мывкыдыс кöть невна содас.

— Чокнитчит ли мый ли? Кин жö старикыслiсь видзöтö? Не уджавны, а только бы мыйöнкö гажöтчыны.

Инькаэс дзарнитiсö öтамöдныс вылö да кышым-кашым петiсö менам керкуись. Луныс сулалiс гажа. Колiс садитны карчсö.