Финагент

— Но дак мый, Катерина, сiдз и ог адззö öтласа кывсö? — негорöна юалiс пызан дорын пукавтöн Митька Кырнышов да виа синнэзöн видзöтiс хозяйкаыс вылö.

— Менам не сы йылiсь думаыс, — сьöкыта ловзисис мöд пызан дорись инькаыс да ки долонь вылас пыкöталiс тшöкасö. — Отирас только война йылiсь и басни. Быд керкуын сымда тöждiсьöм, что сьöлöм потласьö.

— Войнаыс войнаöн, а овны колö, — сьöд уссэсö малалiкö горöтчис Кырнышов. — Ме эд ог насильничайт, баита, не первуись ни тшöктi видзöтны öтöрсянь и мöдöрсянь. Мöдiк год ни мунö, кыдз жöникытсянь письмоэс оз локтö.

— Война вылас эд сякöйыс вермас петны.

— Сэтчин пö только öтiк — вийöны. Ежели тэ он вий, то асьтö виясö. Мöдiксö абу сетöма. Отирсö масьтöны сэтчин, кыдз пельнянь öрын.

— Но стариккес висьтасьлöны, мукöдпырись шедöны пö и пленö.

— Сказкиэз, шедöны только нiя, кöдна сетчöны. Но да не миянлö эта йылiсь баитны, а то ылöдз пырамö. Ловья мортыслö колö аслас олан йылiсь думайтны. Вот видзöта ме и важын ни казялi, кыдз öтнат дудiок моза олан. Некин тэнö оз жалейт, оз лапкöтышт, Натьтö, и сьöлöмыт кынмö?

Кырнышов лэбтiс коксö пидзöс вылас, пöрöтчыштiс стена дынас и недыр, кыдз шыр вылö кань, донсьöтöмöн уйыштiс видзöтöмнас хозяйкаыс вывтыр вылö, куньыштiс виа синнэсö и думайтыштiс мöдiк öткаса инькаэз йылiсь, кöдна сы одзын полöмсянь чожа лэдзлывлiсö ас дынаныс. Кöть и не быдöнныс, но шедлiсö сыöн чапкöм вугыр вылö. Катеринаыс жö мылякö мугсьö. Кöть и кöсыник, а чужöм вылас неумöль, лöсьыт статя да и абу эд пöрись, кöть и не нывка. Мый бы сылö чегласьны? Не сiя медодзза, не сiя медбöрья. Сеника Мари вон кытшöм чатыра мороссö видзö, а сы одзын эз вермы сулавны, кöр висьталiс, что мöссö петкöтас. Кырнышов дыша нюжöтчыштiс, лэдзис пидзöс вывсис коксö, гыжьялыштiс юрбöрсö.

— Вот и налогыт мынттöм, Катерина, — кыввесö нюжöтöмöн горöтчис сiя.

— Ойсö ог узь, сё думайта сы йылiсь, — сьöкыта ловзисьöмöн шыасис хозяйкаыс, — нем ог вермы адззыны. А мöссис ог жö бы орöтчы.

— Ме вот сы йылiсь жö баита. Отсавны верми бы, да ачыт мöдöрö кöстан...

— Тэнат жö инька эм, оз разь тырмы?

— Не инькаö, а тэ гленитчан меным, тэ.

— Куканя мöсыс? А зонö мый висьталас, кöр кылас сэтшöмсö?

— Керамö сiдз, что некин оз понды тöдны.

— Гусясисьыс мымда бы эз пышшав, сёровно шедö. Сiдз жö и инькаыс.

— Этасянь тэ эд он чин, и нем сэтöн дузгыны.

— Тэныт, конечно, кокнит баитны, а менам вот буржык дубасыс вывлам абу.

— Етшажык колö гыны, и быдöс лоас, а тэ ышыöн олан.

— Оз тай телепит, сёйны оз кор.

— Сiдз-ту сiя сiдз, да эд пöрисьман и олансö он ешты адззывны.

— Ась тартарарыö тарöвтчö этшшöм оланыс, нем ни эз кольччы.

— Олмöтчыны колö, олмöтчыны, Катерина. Вежöрт, что мукöдпырся и он бы кер да нуждаыс тшöктö. Овлö эд сiдз?

Кырнышов пондiс видзчисьны очакывсö. Сiя, кыдз кырныш, часöт лэбалiс думайтöмнас эта керку вевдöрöт, кыдз пондас вовлыны Катеринаыс дынö гусьöника, кыдз сiя радмöмöн пондас пантавны ассис гöсьсö, а сiя пондас ниглявны этö кöсыник инькасö. Пасьтасьö сiя простöя, оз усь син вылö, но ветлöтö небытика, кыдз утка. И шыыс сылöн сьöлöм бурсьöтö. А вот мывкыдыс чорыт. Мыйöн жö сiйö пезьдöтны?

Хозяйкаыс эта коста пиньöлöн видзöтiс кортöм гöсьыс вылö да думайтiс аскöттяс: «Вот эд кытшöм вердöм жеребец, отирыслö война, а сылö масленича. Эд и плеш ни кымöсас пондöтчöма, а сё бы жыкруйтö, солдаткаэсö повзьöтöмöн босьтö. Ме дынын сылöн шыш петас».

— Эшö öтпырись юала, Катерина, — лöга горöтчис Кырнышов, — талун рытнас петалан или он Чирок логас?

— Ло жö морт обличчоас да вежöрт, кытчö ме верма мунны зонö дынiсь? Гортын чепöль пизь абу, а ме понда шатласьны да мужиккöт маласьны. Кöр жö сiя лöсялас солдаткаыслö? Авйы жö кöть этö.

— Коли сiдз, то эн каитчы, ме эд мортыс государственнöй. Военнöй кадся Закон сьöртi налогсö мынттöм понда колас мыйкö петкöтны кöзяйствосит.

Кырнышов дзöдзыв синöн гöгöртыштiс куш керку пытшксö, но нем эз казяв, кöда понда бы хозяйкаыс пондiс кеймисьны. Сэсся синнэсö лэбтiс полатьö, вуджöтiс гöбеч вылö, лэдзис западнявлö и сэтöн казялiс гармоння.

— Дак вот, Катерина, мöстö кытчöдз ог вöрзьöт, а гармоннятö колас петкöтны. Сроккес эд быдöс чулалiсö. Быдöс колö фронт понда, победа понда.

Хозяйкалöн синнэссис чепöссисö синваэз. Первосянь, медбы не мыччавны вынтöмсялöмсö, Катерина крепитчис, мымда вермис видзис асьсö, но сэсся мороссис мезмис сьöкыт ловзисьöм, пельпоннэз зэгнитчисö, и сiя причётöн норасис: «Мужиктöм инькасö тай кöть кин вермас öбидитны да умöляс воштыны. Абу кö кöзяиныс, дак и поныс тэ вылö вувтö, вуджöрыс тэнат мешайтö, шытö оз туй сетны.

Кытшöм ни эта олан, енiньöй батюшко? Кинсянь меным öнi видзчисьны дорйöмсö? Некинлö сетны меным отсöтсö, только асьнысö бы тешитöны. Öткаса инькаыслö оз югьяв не луныс, не шондiыс. Гов мортыслö му вылас оз адззись шоныт местаыс, а быдлаын тай сiйö вöтлöны да медбöрьясö тай öмсис мырддьöны. Да кöр ни тэ, ен батюшко, босьтан аслат ки вылö, кöр ни уль мунас менö тыртасö?»

Кырнышов перво гажасялыштiс, что вермис чегны инькалiсь гордынясö, да видзчисис, мый жö лоас одзлань, но, кöр вежöртiс герьялöмсö, то лöгасис:

— Медбöрьяись висьтала, Катерина, колö мынтны налогсö, а не герьявны. Москваыс синваэслö оз верит. Менчим корöны план, а сiйö колö тыртны. Ме верми бы тэныт отсавны, но тэ ачыт мугсян. Ачыт он тöд, мый понда донсьöтчан. Ачыт эд тöдан, кытшöм военнöй кадся порядокыс. Ме жö приказ тырта. Сетöм кадыс чулалiс, и месянь корöны плансö. Фронтыс понда колö деньга.

— Мыг увтсим ли мый ли ме вая деньгасö? — ки бöрнас синваэсö чышкикö лöга шыасис хозяйкаыс. — Адзза, поди, мыйкö вузавны и недыр мыйись мынта.

— Ме и видзчиси бы, да öння кадыслöн терпеннёыс абу. Этö и ачыт арталан. Кöдковну вот и Пиликалiсь куканьсö ковсис петкöтны. А ме разь виноватöй?

— Волькыта ольсалан, да чорыт лоас узьны. Кöда обличчоöн сэсся отирыскöт пантася? Тэныт то мый? Кулин-волин да сэтчö и колин, а меным овны колö да эшö зон быдтыны. Кокнит доля вылас надеясö ог ни видз.

— Но и кöзды сэк аслат доляöн, — лöга ыргыштiс Кырнышовыс да бергöтчис öшын ладорас, — а ме кера военнöй кадся Закон сьöртi.

— Эн горшась, а кер да шатöвт аслат туй вылöт.

Сэтчö керкусис оссис ыбöсыс и порог вевдöрсö чожа оськöвтiс Катериналöн даснёльгодся Мишуткаыс, керис шаг, мöдiкö и вежöрттöнсувтiс джодж шöрас да юасьöмöн сувтöтiс синнэсö мамыс вылö.

— Эн повзьы, зонö, — мыдзöма шыасис мамыс, — мынттöм налогыс понда вот Митрейыс мöдö айытлiсь гармоннясö петкöтны. Мый керны, ачым ог тöд?

Мишуткалö пöдналiс лолалöмсö, кыдз бытьтö керкуыс бергöтчис онняюрöн, синнэс одзын öшис югытыс, коккес тувдiсö öтiк местаас. Минута-мöд гöгöр сiя нельки эз тöд, мый сэтчö горöтчыны, кылыс лякасис öм небоас, только кавтыкыс ветлiс öтмöдöрö да дульыс ыскöвтiс горшас. Но вежöрыс жагöника пондiс бертны сы дынö. Мишутка вöлись сэк вежöртiс мамыс висьталöм кыввезлiсь пыдынасö, мый вöлi ны сайын. Сылöн синнэс паськалiсö да мöртчисö Кырнышовыс вылö, кöда эта кадö некыдз эз видзчись Катериналiсь зонсö и невна повзьыштiс, кыдз бытьтö застанитiсö сiйö пасьтöг ольпась вылын.

— Тэ, этö тэ... фашист, — жагвыв, кыввесö бöрйöмöн, шувлiс Мишутка, — фашист германскöй, мöдан айöлiсь гармоннясö петкöтны? Да тöдан ли тэ, кытöн сiя и мыля гижöтоксö оз ысты? Тэ горвыв сёрдiсь кань, отирыс синва вылын кынöмтö польдöтан да солдаткаэсö сомушшайтан. Бертасö жö бöр война вылiсь мужиккес, дак сивилёнтö бокö пиньöвтасö. Тэныт карточка сетöны, нянь, сёян, а миян пызан вылас нем вайны, тшыгйöн оламö, сiсьмöм картовись кöвдöммез сёямö...

Мишутка перыта пуксис западня вылö, кур-пар пöрччалiс нинкöммесö да шентiс нiйö финагентыс одзö, а бöрсяняс и бырöм нямöттэсö.

— Тэ мый, кычан, сiдз пондiн вувтны? — чепöссис местасис Кырнышов. — Кин сетiс тэныт сэтшöм правосö? Ме эд не акань, а власть! Верма и тэнö, понпиянöс, тюрьмаын сiсьтыны. Сталин висьталiс: «Быдöс победа понда», — и ме кера сiйö. Налогыс сы понда и пуктöма. А ме налогыс сьöртi агент. Вежöртiн, курöг син?

— Сетсисö тэнат налоггес, — чирзiс Мишутка, — Миян дристöсь балялiсь и то коран вурун. Отирсö война вылас вийöны, а сэтöн тэ, лов босьтiсь, миянöс нырыштан. Вийны тэнö колö, медбы дукыт тэнат эз вöв. Ме гöра мусö тулыссянь арöдз, а няньсö ог адззыв. Тiян кодь мироеддэслö сiя мунö. Сiйöн и воюйтан инькаэскöт. Мун син одзись, шудтöм гырк. Кöр ни тэ дугдан юны отирыслiсь вирсö?

Миян только кань да поныс ни налогсö озö мынтö. Кытчö миянлö воштiсьны?

— Тэ перво мынт, кöдö тэ вылö пуктöм, — зонкаыс вылö видзöттöг висьталiс Кырнышов да сувтiс джодж шöрас. — Ме — властьлöн морт и тэнчит басниэсö сiдз просто ог коль. Тэнö колö сюйыштны решётка сайö. Сэтчин тэнат местаыс.

— Сэтчин кöть вердны пондасö. Кöть öтпыр да, поди, пöтла.

— Эта йылiсь ме сразу жö висьтала милициялö, ась примитасö мераэз. Эта сiдз просто тэныт, вражонок, оз чулав, — чуньнас легöтöмöн порог дынас грозитчöмöн висьталiс Кырнышов. — Ме мöдi керны мирнöя да, тыдалö, оз сiдз пет.

Керкусис петтöнняс Кырнышов сiдз ёркнитiс ыбöснас, что потолок колассэзсис гизьнитiс муыс. Мамыс дрöгнитiс, кыдз онiсь саймис, да уськöтчис зоныс дынö, жмитiс сiйö морос бердас и повзьöм шыöн, Мишуткалiсь юрсö малалiкö, баитiс: «Мишутка, малинок менам, мый нö тэ керин? Кыдз нö тэ вермин сiдз ассяат пöрисьжык мортыслö висьтавны? Сiя эд, ёрдöм лов, оз простит миянлö, ульöн сёяс, му вывсис чышкас. Да кыдз инö сэсся пондамö овны?» Катерина дугдывтöг видзöтiс угöлас, кытöн неыджыт джаджок вылын вöлi уна годдэзöн öштöма ни вöвлöм краскаэсö «Иоанн-креститель». Сы вылö видзöтiс Катеринаыс, а мыдзöм кинас пашмöтiс зоныслiсь юрсисö. Мишутка лоис, кыдз повзьöм воробей, кöда öшöмсяняс лöгасьöмöн сувтöтiс шпынсö. Сiя нетшкöвтчис мамыс дынiсь да пезьдыштiс öшын дынö, кöда сайын сулалiс рытся лöнь, эзö кылö отирлöн шыэз.

Эта кадö и деревняыс быдсöн тыдалiс жöв керсьöмöн, кыдз бытьтö быд керкуыс видзчисис ас вылас кытшöмкö оказзё. Этасянь быд мортлöн оланiныс видзöтöм вылö мыччассис пöрисьмöмöн, лапытöн, мöртöтчöмöн му пытшкас, медбы етшажык тыдавны син одзын. Юрын чужис сэтшöм вежöртöм, что и важмöм керкуэс вевдöрсяняс нырыштöмöсь кытшöмкö сьöкыт да вына киöн, кöда оз сет веськöтчыны не отирыслö, не керкуэслö. «Кыдз сэсся öвны, кöда мылаöн? — думайтiс мамыс. — Несчастнöй курöг понда и то колö государствоыслö кольтьöн мынтны. Мöссö тöдан только чилькöтны. Баляыс ветлöтö кульöм урся умöльжык, а вурунсö кöть кытiсь тэ мынт. Кытöн эстöн правдаыс, кöр аслат керку понда и то деньга вештан? Налогтöг и карчсö вöдитны оз туй. И колхозас ниртан быдса гожум, сирньылöмын пессян, а трудодень вылас, кöр арыс локтас, бöра жö нем получитны. Шудтöм кынöм понда только и олан. Кöр ни тэ, енiньöй батюшко, босьтан ас дынат?» Мамыс дрöгнитiс быдöс вывтырнас, кöр зоныс горöтчис:

— Не морт ме лоа, ежели кырнышыслiсь тарансö пиньнам ог йир. Мый сiя ыштö миян одзын? Да и кин сiя сэтшöмыс? Адззисьöма тожö финаге-ент...

— Мый тэ, мый тэ, зонiньöй, сэтшöмсö баитан, — дзарнитiс сы ладорö мамыс, — кылас кö кин этö баснисö, то эд тюрьма лоас. Терпитны колö, раз миян сэтшöм доля. Кыдзкö, поди, кыссямö, кöть и öмись мырддьöны медбöрья кусöксö. Дарсасяс сiя, поди, кинлöкö горшас, ачыс джагалас. Только тэ эн пыр грехас.

— Ладно, мыйкö эм жö талун сёйны, а то кынöм сималö.

— Похлёбкася мый сэсся лоас.

Эх, похлёбка тэ менам, Кытчö тэнö воштан? Буржык лоас, кöр сёям, Тэ эд менö чожтан.

Этна кыввез бöрын Мишутка оськöвтiс умывальник дынö, гывьялыштiс киэсö да бöр локтiс пызан дынас и пуксис сы сайö. Мамыс гажтöма вайис сёянсö да пуксис мöд дорас, пондiс видзöтны зоныс вылö, кöдалöн только паньыс лэбалiс. «Вот быдмö эд уджалiсь-керисьыс, зорамö и чожа кöзяинöн лоас, — думайтыштiс мамыс да сьöкыта ловзисис. — Норовыс быдсöн айыслöн жö мöдö лоны».

Сёйöм бöрас Мишутка öктiс крöшкиэсö кырымас, чапкис öмас, а сэсся юалiс:

— Дак мый, мам, пондамö керны? Ковсяс ветлыны Митька дядьö ордö да одзöстны деньгасö. Старикыс рубтöг оз ов, сетас, поди. Сыбöрын пес кераламö да вузаламö. Только тэ Кырнышовыс одзö пидзöс вылат эн сувт. Додь песыс понда вит руб позяс босьтны. Быд ловьялö пуктöны налог. Только поныс да каньыс ни ветлöтöны эта ярлыктöг. А менам вот нинкöммезö бырисö, сьöктавны талун ковсяс, а то ашын немöн лоас мунны уджас, чуннезö петасö. Не олан, а мавттöм телега — дзуртö да виртö, кыдз тöв коста сiсьмöм пу.

Мишутка öзтiс шырбисö да пуксис западня дорö, лэдзалiс нинкöммесö, дыр öтмöдöрсянь видзöтiс кöмкöтсö и думайтöмöн горöтчис:

— Да-а, колö жö эд сэтчöдз новйыны, что осьта лоöма. Челядёк и только, кöда нем оз вежöрт.

Эта бöрсянь сiя петалiс чуланö, пыртiс нин-бансö да пондiс шöрасьны, а сэсся кутчисис удж бердас. Пукалiс ойшöр ладорöдз, медбы дöмасавны кöмкöтсö, а медбöрын нинкöммесö лэбталiс гор вылö косьтыны. Недыр мыйись сiя водiс, но оныс эз лок. Мишутка куйлiс полатяс куньöм синнэзöн, думайтiс, кыдз петны лоöм положеннёсис, мый вермас керны локтан луннэзö. Сэсся ачыс эз казяв, кыдз оныс кутiс, каттис сiйö, и ойбыт вöтасис Мишутка Кырнышовыскöт пессьöм, нельки горöтлiс мыйкö онзiльувьяс...

— Молитваöн, мый тэкöт, Мишутка? — саймис мамыс да нюжöтчис зоныс дынö. — Эн ли шогавны понды? Ой, господи милостливöй, жалейт зонкасö. Сiя öтiк менам светас, юр вердiсь быдмö. Енiньöй батюшко, жалейт кагасö.

Одз асылöн мöд лунас Катерина лöсьöтчис котöртны дядя Митрей ордö, медбы висьтасьны, кытшöм беда шогмис нылöн и, кыдз ен шуас, сiдзжö корны одзöс. Но зоныс кылiс кышöтöмсö и горöтчис:

— Тэ кытчö, мам, мунан? Коли дядьö ордö, то висьтав, что ме, нучокыс, öддьöн бура кора деньгасö. Ась оз пов — чожа мынтамö. Туйыс вот только лöсялыштас. Долгсö дыр огö пондö видзны. Тэ сiдз и висьтав.

— Ладно, зонö, ладно.

А югдöм бöрас Мишуткалö локтiс сельсоветсянь повестка явитчыны районнöй отделiсь милицияö сылö павкан делоöн. Мамыс повзис да пондiс горзыны и заптыны сьöрас сёянсö, а ачыс баитiс:

— Мый нö сэк öнi лоас? Пуксьöтасö эд, зонö? Кыдз ме понда öтнам овны? Кин вылö надеясö понда видзны, кöдöрсянь отсöтсö понда видзчисьны? Вот и деньгасö одзöстi.

— Шупкы тэ сiйö Кырнышовыслö, ась джагалас. А ме даки ветла, мый висьталасö.

Мунiс сiя районнöй центрас подöна туёк кузя, кöда виклясьöмöн кыссис телегаöн ветлан туй бокöт. Кадыс вöлi арся, и мукöд пуэс сулалiсö ни листтöг. Только пожума да кöзъя тэллес жугыля сулалiсö бокöттяс, пуэслöн лысыс вöлi лöз-зелёнöй, сiдз кыдз арпоныс чулалiс зэрреза, и вöлi кад, медбы нiя вермисö керны заптöссö локтан тöв кежö. Керöс увтсис логöт котöртан шор дорöт лепитчöм деревня бокись кыдззаин быдöс ни кушмöма и тöдчисö öтiк дыннэс. Поката туй вылöттяс öнi колiс бы мунны перытжыка, но коккес талун мылякö умöля кывзiсö, лоисö дышöсь, озö бы мунö одзлань, пыкöтасисö му бердас, кыдз бытьтö бы лякасисö, и нiйö колiс шедтавны, лэбтыны да вештыны одзлань. «Мыля жö бы сiдз? — думайтыштiс Мишуткаыс. — Колхозас уджавны дак котöрöн мунöны, а эстöн-то мугсьöны. Озö бы, тыдалö, мунö готовöй няньсö сёйны. А ме даки муна. Меным нем öштыны».

И сэтчö тöдвылас усис, кыдз сiя мöдiк зонкаэскöт гöрд флагöн кыскис сюсö заготзерноö, а гортаныс, складдэзас, нельки кöдзысыс эз кольччы. Вились лоас немöн тöвйыны. А пуксьöтасö, дак кöть няньöн вердны пондасö. Этна думаэзöн сiя локтiс милициялöн районнöй отдел дынö, кытöн кык этажа керку öшыннэз увтас быдмисö рябинпуэз, кöдна лысöмась ни, и только рябина роззэс гырисьöсь да гöрдöсь тшöка öшалiсö уввес вылын. «Некин эд то оз думайт öктыны да пöжавны сэтiсь шöма пирöг», — думайтiс Мишуткаыс да оськöвтiс лажмытик поспу вылö, кытöн сулалiс милиционер.

— Дяденька, меным бы вот эта бумажка сьöртi, — горöтчис сiя, милиционерыслö бумажкасö мыччавтöн.

— Тэ мый, мортöс вийин или кинöскö грабитiн?

— Налог öктiсьöс тай гортiсь вашöтi.

— А-а, сэк мöдöдз кабинетö пыран. Вежöртiн?

— Не ылöстöм, вежöрта, — висьталiс Мишуткаыс да пырис милицияас. Панталiс сiйö пöрись ни, кöстiсьöм дежуритiсь, кöда юалiс:

— Мый, зоныс, висьталан?

— Да вот тай корисö, и локтi тiян дынö.

— Не козин ли кöичаат вайин?

— Сiдз тай просто сьöрам мамö мыйкö тэчис, поди, ковсяс.

― Сiя, конечно, сiдз, — сетöм бумажкасö видзöттöн горöтчис дежурнöйыс. — Мунам инö, мыччала тэныт начальниксö, кöда корöма.

Неыджыт кабинетын дубись керöм пызан сайын пондöтчöм дзорсявны, но эшö не пöрись морт мöртöтчöма бумагаэзö. Кöр пырис локтiсьыс, сiя орöтчис ны дынiсь да лöга юалiс:

— Висьтась, кöда лапöлiсь да мыйöн локтiн?

— Коритö да кытчö нö воштiсян. Вот и локтi. Вермат пуксьöтны.

— Миянлö сiя нем оз сулав, ештам и пуксьöтны, колö только формальносттез керыштны. Висьтась ноко, кыдз шуöны?

— Мишка Малямутов, — висьталiс Мишутка да вештыштiс бердас ассис котомкасö.

— Тэ, Малямутов, эн тэрмась, висьтав айнимтö.

— Мыйлö, кöр сiя фронт вылас öшис. Вöлi гортын бы, дак ачыс висьталiс, кинлöн ме зоныс, а öнi ме айтöм. Дак ылö я ыстатö, а то менам нинкöммес...

— Айтö кыдз шуисö? — орöтiс сiйö оперуполномоченнöйыс.

— Ёгорöн.

― Вот сiдз вот, Егорович — чорыта горöтчис оперативникыс да лöга видзöтiс локтiсьыс вылö. — Финагентсö кыдз инö видiн?

— Сiя фашист и эм. Война вылас фашист грабитö отирсö, а татöн сiя. Колхозас садь быртöдз ниртан-уджалан и сё сымда шедтан, гортын сёйны нем, а налогнас тыртöны, он тöд мыйöн мынтны. А сiя медбöрьясö бы петкöтö. Адззан ли — сылöн сроккез, а миян мый? Деньгаоксö мамö одзöстiс, талун мынтас. Государствоыслö долгас огö кольччö. Только вот бы пессö керавны да вузавны. Айöс вот войнаыс ньылыштiс, дак меным колö думайтны. Заптöсыс нем эз кольччы. Да и кысь лонытö? Колхозыс нем оз сет, а гортiсь тöвчикöн чышкис. Вешьянжугсö и то немись вурны, дöмас вылö дöмас мамö вурö. А фашистыслö вай да пукты одзас.

― Но-о, тырмас, эстöн не собраннё, медбы баитны, а то и менö фашистö керан. Эстöн юасьöмсö кера ме. И только ме. Тэныт колö только сетны ответ. Дак кыдз видiн Кырнышовсö? Паразитöн, вирьюисьöн, ыджыт туй вылiсь разбойникöн? Да тэнö аслат коккезöн колö ыстыны Сибирьö.

Мишутка видзöтыштiс сьöкталöм нинкöммес вылö да донсьöтöмöн думайтыштiс: «Тырмасö ли нiя мунны сэтчинöдз?»

— Кырнышовыс Советскöй властьлöн представитель, — баитiс одзлань оперуполномоченнöйыс. — Сылö сетöма власть и сiя тыртö партиялiсь заданнё. Адззисьöмат кытшöмкö понпиян вувтны сы вылö. Кин тэныт сетiс правосö? Сiсьтi тэнö бы КПЗ-ас да... некöр тэкöт кыскасьны, зырымтö он вермы чышкыны.

Оперативникыс эшö дыр лыддьöтiс сылö моральсö, но Мишуткалöн думаэс вöлiсö кытöнкö ылын, сiя туй вылын, кöда нуöтö пукалан местаас.

— А öнi верман мунны, — медбöрын локтiс сы дынöдз. — Да сэсся меным эн пантась, умöль лоас. Миянкöт вермасьны оз туй.

— Кытчö муннытö? — öшис Мишуткаыс.

— Нёль ладорас, кöть тай кытчö, кытшöм меным дело. Год куимсö-нёльсö верман эшö быдмыны, а сэтчин видзöтамö, мый тэись петас. Бур мортыс тэись оз ло. Ме вот ас понда пятноок пукта. Часöт шыбыльт татiсь, нем мешайтны.

— Дак ме гортö ли мый ли муна? — эшö öтпыр юалiс Мишуткаыс и босьтiс ассис кöзичасö да жагöник, бöрас видзöтöмöн, петiс кабинетсис. Дежурнöйыслö вöлi диво, что зонкасö сiдз вот просто милициясис лэдзисö бöр, эзö и пуксьöтö КПЗ-ас. Мишутка котöрöн петiс öтöрас да вöлись ловзисис быдса мороснас, а сэсся жагöника иньдöтчис пожуммез увтö, кöдна быдмисö отделыс бокын, пуксис сэтчин да пöрччалiс кöзичасö, кöдаö вöлi тэчöма сёяныс. Крепитчыштöм бöрас сiя иньдöтчис гортланяс мунан туй вылöт. Сьöлöм вылас вöлi кокнит.