Колька-шмыг

Колька Дубасов быдмис бабаыс дынын. Мамыс сылöн нывканас сьöктiс да вайис зон, аслыс лоис стыд отирсяняс и мунiс городö, а зонсö колис мамыс дынö. Учöтсянь зонкаыс шмоннялiс улич вылöт, пасьтасис шулды-болды и одз велалiс неколана кыввез баитны, умöля кывзiс бабсö, дырöдз котрасис рыттэзнас. То сiя лунтыр пукавлiс мельницаын да сёйлiс изын увтiсь петöм шоныт пизьсö и вунöтлiс ветлыны гортас обедайтны, то вовлiс конюховкаö да кывзiс мужиккезлiсь басниэсö. Или жö öтлаасяс инькаэскöт и мунас ытшкисян местас да ветлöтö покосöттяс шебенькивайттöн. Инькаэс любитiсö баитiсь зонкасö и вердiсö сiйö, мый ваясö сьöраныс. Но унажыксö сiя любитiс мужиккесö, кöдна частожык пуксьывлiсö куритны да висьтасьлiсö сякöй байкаэз. Колькаыс кывзывлiс осьта öмöн, öтпыр шогмис вот кытшöм история.

— Коля, котрась жö инькаэс дынö, — сералöмöн висьталiс Пахом Васька, кöда тэчис турунсö зородас, — да адззы менчим Öкульсö. Тöдан эд? Вот и бур. Да висьтав сылö, медбы часöт жö ыстiс зород вылас ватрушкасö.

— Мый сэтшöм ватрушкаыс? — мöдпöв юалiс Колькаыс.

— Öкульыс тöдö. Тэ только висьтав.

Зоночкаыс котöрöн иньдöтчис инькаэс дынö, кöдна куртiсö косьмöм турунсö, ачыс бобгис этö тöдтöм кывсö. Сiя адззис Василийыслiсь инькасö да видз пасьтас горöтiс:

— Тётка Öкулина! Дядя Василийыс часöт жö корис зород вылас ватрушкасö!

— А мыйöн, кага, ыста? Коробкаын ли мый ли?

— Сiя эз висьтав, а только корис.

— Висьтав сылö, медбы эз бöбмы зород вылас.

— Ме то висьтала, но сiя корис часöт жö.

— Висьтав, медбы мывкыдсис эз ылавлы.

Колька бертiс зород дынас мугöм, юрсö öшöтöм да дыша висьталiс:

— Дядя Василей, ачыт ветлы. Öкулинаыс менö оз кывзы.

— Эн тöжды, Миков. Кöр тэчсяс зородыс ме сылiсь юала, мыля эз ысты ватрушкасö. Эстöн сэтшöм небыт туруныс. А дукыс маöн кылö. Кöр сэсся адззылан эттшöмсö? Быдса год колö видзчисьны.

— Дядя Василей, мыля гожумыс сэтшöм дженыт? — юалiс Колькаыс. — Тöлыс дзор старик кодь да кузь и кузь?

— Тэ мамытлiсь юав, сiя дженыт юбкасö новйö, а меным вот турунсö колö тэчны. Вон кымöроккес лэбтiсьöны ни.

Жаль вöлi гожумсö, но чулалiс. Колька пондiс вовлыны кузнец Архип дынö и отсавлiс сылö пöльтны мехсö. Или жö пуксяс горно пытшкас да видзöтö, кыдз öгралöны шоммес, а ны пытшкын чочкоммö доран кöртыс. Талун кузнецыс керис подковвез. Архипыс дорис подковсö, сайкöтiс ваын да чапкис наковальня бокас и пуксис думайтны-шоччисьны, малыштiс дзор тошсö да горöтчис:

— Подковыс то эм, да кöрттувсö немись керны.

— Пöрись синнэзнат он ли мый ли адззы? Слепöй тамыш тай лоин. Кузнецаыс тырöма кöртнас.

— Подковас колö небыт, но крепыт кöртыс. Кöть бы, вон тай öшалö, проводыс кодь. Но ме ог вермы кайны столб вылас.

— А ме верма, — висьталiс Колькаыс. — Только кыдз сiйö мездöтан?

— Сета кусачка. Сiйöн орöтан провкасö.

Кузнецыс висьталiс зонкаыслö босьтны ылiсьжык столбсö, и сiя котöртiс керöс панытас да, кыдз кань, кайис столб вылас и стакан дынас орöтiс проводсö, сэсся, кыдз ур, лэдзчис бöр да котöртiс одзланись столб дынас, кайис сы вылö, орöтiс и лэдзчис му вылас. Каттис проводсö и котöртiс кузницаас. Архипыс тшöктiс чöвны эта йылiсь и ошкис зонкасö. И эта жö кадö деревнаас дугдiс кывны радиоыс. Мый лоис? Пондiсö котрасьны монтёррез. Нiя адззисö орöтöм местасö, но сiдз и эзö тöдö, кин сiйö керис.

А тöвнас Колькаыс пукавлiс конюховкаын. Сэтчин öктывлiс отирсö бригадирыс и сетавлiс нарядсö. Колька петкöтлiс избушкасис сбруясö, отсалiс доддясиссеслö кутавны карта вылас вöввесö, адззыны гезсö, вайны вожжиэсö, тэчны доддяс пес ваялан дугаэз и быдöс керис тöдöмöн, чожа, бытьтö ачыс лöсьöтчис уджавны. Но сiя только кышасьлiс додь бöрас да муныштлiс невна и бертлiс бöр конюховкаас, кытöн осилейтлiс конюх Демидсö.

— Дядя Демид, — гусьöн баитiс сiя, — мыля Терень моньыслöн баляыс тоша? Да эшö и люкасьö.

— Дак сiя жö кöза, — серöмтчис Демидыс.

— Мыля ракаыс сьöд?

— Сiя жö оз миссьы.

— А тöдан мый баитö ендöм Парасьыс? Тарас дедыслö пö колö узикас öмсö подушкаöн ляпкöтны и — быдöс сылö.

— Кöр ачыс кулас, дак сiйö муыс оз терпит. Парассяыс не морт, а вирьюись. Кыдз только муыс сэтшöммесö примитö?

Павжун кежас Колька котöртiс гортас, кыдз керлывлiс быд лунö. Порог дынсяняс жö горöтiс бабыслö: — Ноко, вай чожажык сёйыштны, а то меным эд некöр!

— Мый бöра талун сiдз уджалан?

— Пес тай ваяламö. Öтöрас эд кöдзыт лоö. Сёйтöнняс зонкаыс дынö пызан саяс локтiс руд кань да пондiс леститчыны сы бердö. Колькаыс думайтыштiс мыйкö да юалiс бабыслiсь:

— Дедöлöн, натьтö, бритва вöлi? Ноко, адззы жö да вай меным часöт.

— Мый тэ бритванас керан?

— Каньыслöн уссэс öддьöн ни кузьöсь. Бритны колö.

— Господи помилуй, кин жö каньсö бритö?

— Но и ась сэк олö, кыдз лэдзчисьöм мужик. А меным дворас эшö колö ветлыны. Мый сэтчин отирыс метöг керасö?

Сiя чеччис пызан сайсис да петiс öтöрас.