Суседко

Öнi вунöтчисö ни, етша баитöны, а одзжык эта темаыс вöлi öддьöн занимательнöй. Суседкоыслiсь проделкаэсö бöрйывлiсö быд угöлын, луннас и рытнас, мужикыс и инькаыс, öксясö кык-куим морт и сё ни висьтасьыштасö сы йылiсь, кыдз ойнас личкöма инькасö да вайöтöм сэтчöдз, что лолавны лоöма сьöкыт, пöдтыны пондöма, но мортыс саймöма.

— Думайтi, Сеняыс онзiльувьяс бöра бöбалö, а сiя пишкö нырнас — узьö. Кытшöм эд сьöкыт, оз лэдз бергöтчыны. Гор вылас кайи да только ваньтны пондi, а сэтöн вились личкис. Ойбыт эг вермы узьны. Сеняыслö ог лысьт баитны, эшö вежöктыны пондас. Бурсö эд сысянь он видзчись.

— И бур вöвсö суседкоыс любитö, — содтiс баснисö мöдiк инька. — Данькоыс вöвлöн адззат кытшöм лоöм бурсиыс? Каттьöма сiдз, что немöн он путшöт, а кöзяиныс полö орöтны, грех пö лоас.

— Баитöны тай, ачыс пö учöтик, а керны вермö быдöс...

Вот уж кин деревняас веритiс этаö, то этö шöрöт мыгöра да гöрд тошока Максим Олёш, кöда öддьöн любитiс винасö и кöдö етша кин адззывлiс садьнас. Юис сэтчöдз, что рюмкаись пондiс коддзыны. Оз кö шед вина кöрыс, то мусö оз адззы, керкуыс сылö нероднöй, инькасö видö и йöрнöссö косялö. Нем сэк абу жаль, медбöрья вешьянсö вузалас да винасö небас. Сы бöрсянь и инькаыс пондiс юыштлыны. Эта семья йылiсь деревняас баитiсö, что изводасис пö Олёшыс, бурсö нем оз кер. Сылöн хозяйствоыс киссис, орласис и гидсис угöввес шуч пондiсö тыдавны. Мöдiк бы дак важын ни лöсьöтiс, а сылö и этадз бур.

Кыдзкö инькаыс керис аскур, но эз сет юыштны, а дзебис кытчöкö кыкнан бутыльсö. Не öтпыр ни пондылiс Олёш кошшыны, но эз адззы.

— Нечистöй дук, — видiс сiя инькасö. — Öтнас ли мый ли жоритö? Ме чеглала сылiсь коскаэсö, пондас тöдны.

Мыдзöмсяняс пуксис шоччисьыштны, думайтiс, кысь эшö эз кошшы. Сэтöн и юрыс пондiс бергавны, чуть оз öсöт. Синнэсö сувтöтiс веськытаись угöлас. Перво нем эз адззы, а сэсся вдруг мыччисис учöтик морток да пондiс вежмасьны. Пасьтöм куль оз и пов.

— Прысь, дьяв мыгöр! — рякöстiс Олёшыс да шентiс угöлас киас шедöм тшакыльöн. — Тэтöг сьöлöм гудрасьö.

Пасьтöм мортокыс пышшис мöдiк местаö и сэтчин чегласис. Олёшыс чепöссис местасис да мöдiс тальны, но не сэтöн вöлi. Прикашайтчöмыс мöдпöв мыччисис комас. Сэтчö Олёшыс лöгасис да кинитчис вöтлiсьны сы сьöрын. Котрасис сэтчöдз, что садьыс бырис и казявтöг сувтiс джоджулö пыран ыбöс вылас. А сылö пасьтöм кульыс и баитö: «Мый нö думайтан? Осьт ыбöссö, осьт. Ки садьыт разь бырис. Эх тэ, мужик! Немла тай он лöсяв, проктöм враг!»

Олёшыс мышкыртчис да осьтiс ыбöссö. «Кытшöм сулема джодж увтас пуктiсö? Инькаö эд не сэтшöм морт, медбы джоджулас дзебны». А мороссö жыв кинкö чувйö: пыр да пыр, шуö, сэтчин, мый полан? Олёшыс оськöвтiс поспу вылас да лэдзчисис улö и пондiс чувйыны мудеттэсö. Но кинлöнкö шыыс висьталiс: «Не сэтiсь кошшан. Тэ картошка вылас видзöт. Адззан, кучкаокö тэчöма? Вот сэтiсь и босьт.» Олёшыс рознитiс картошкасö, — и былись эд сэтöн вöлiсö бутыллес. Радыс мымда лоис! Кöд коста и петалiс бöр да босьтiс банка, медбы кисьтны винасö. Гусясис кужöмöн: куим литраа бутыльсö, кöдаись кисьтiс винасö, пуктiс бокöн, медбы инькаыс думайтiс, что винаыс киссис. Сiя гажöна петiс джоджувсис да пуксис пызан саяс и пондöтчис юны, но эз ешты мöд стопкасö простайтны, кыдз кысянькö пырис инькаыс и застанитiс кöзяинсö.

— Кысь бöра винасö адззин? — повзьöмöн юалiс сiя.

— Да, мм... Петрикаыс тай петух тшöктiс начкывны, и вот сетiс джын банкаас... Поди, юыштан?

— Кисьтан, дак ог откажитчы, — инькаыс локтiс пызан дынас да босьтiс стопкасö. — Юа инö петухыс понда.

Инькаыс чöсмасьöмöн юис аскурсö да ошкис: — Бур петöма, и выныс эм. Кöрыс миян кодь жö.

— Дак эд öтiк магазинiсь сахарсö небатö, — эз и гöрдöт, висьталiс жöникыс да вились тыртiс стопкасö. — Майöвсö одö кужö керны, дрожжиöн шöммöтатö. Вот и петö öткодь.

— Может, и кери бы майöвсö да пизьсö он шедты.

— Етша кин öнi уджалö колхозас. А тэ тово... адззин бы ассит керöмсö да сравнитiмö бы пешлöмнас.

— Лёк вир бы тэныт оз ков? Сiя дело вылö пуктöм и ась олö.

— Он сет дак он, ме только эд сiдз висьталi. Меным и эта тырмас, унажыкыс оз ков. Петуххес эмöсь эшö начкывны.

— Отирсö сэтчöдз вайöтiтö, что петухсö начкылöм понда коратö бутылка. Мужиккеслöн совестьыс öшис.

— А тэ бы олiн мужиктöг? Шы он сет. Сiя и петö, что мужиктöг инькаыслö оськöвтны оз туй, нем оз шогмы. Быдлаö мужикыс колö, сiйöн и донтöма озö керö. Босьтамö менö. Верма керны сiйö, кöдö тэ век он думайт...