Сералöм могись

Одзжык гöтрасьлiсö только арнас, кöр кадыс, кыдз баитлiсö отирас, лоö личытжык, позьö ыркöтчыштны и, веськыта висьтавны, кужöмöн гажöтчыштны. Крестьяниныс вексö гожумнас уджалö, мырсьö да керö быдöс уджсö, медбы Пречиста кежас быдöс вöлi сöстöм. Уджыс сылö тырмö: арнас пашня вылас кöдзöмсö колö вундыны да вартны, карчйöрсис керыштны, лёнсö нетшкыны, тыöтны, нярьявны и пыркöтны, назёмсö петкöтны, тырмöмöдз подасö чинтны, керку гöгöрсö тöв кежас лöсьöтны. Уджыс тырмö, и медодз кöзяиныслö колö тöдны, тырмас ли сюыс кöдзыс вылас, мымда кольччас сёйны, кöдö позяс торйöтны подаыслö. Только семьяыскöт баитчöм бöрын решайтö, мый керны зоныслö или нылыслö, гöтрасьны или жöник саяс мунны. Том йöзыс видзчисисö аймамныслiсь благословеннёсö.

Пöрись отирыс понда эта обычайыс вöлi кыдз закон, кöдö колö соблюдайтны, не то верман шедны отир смех вылö. А одзжык серавны любитiсö. Он и казяв, кыдз лякöтасö нимкодь, кöда оз чышкись не оз мун мортыс кувтöдз, нельки кольччö челядьыс челядьлö. Медбы орддьыны этö, крестьяниныс лöсьöтчис одзжык, медбы виль сватыс одзын совестьыс вöлi сöстöм.

Этö öння том йöзыс разьöны да паздöны важ велалöмсö, вунöтöны бур обычайсö. Адззан ли, нiя пуксисö техника вылö и лыддьöны, что нылö быдöс туйö, быдöс вермöны, немöн эн мешайт. Дзимлявтöг колясö не öтiк сотня гектар сюсö и шуöны, что погоддяыс эз сет. Эта жö кадö техникасö вашöтлöны помеччезöт, кöр колiс бы лун и ой уджавны ыб вылас. А гöтрасьны некытшöм кад озö тöдö. Зонкаыс охотитас гöтрасьны кöдзикас или вундiкас и гöтрасяс, но оз кö инькаыс гленитчы, янсöтчас и некинлiсь оз юась. Не венчайтöм эд. Винасö юны вöлi моментыс да чулалiс, колö мöдiкö адззыны. Степан Жельнöгов ассис Митиперкосö да Яковсö быдтiс строгöя и эз лэдз кисис сэтчöдз, кытчöдз чорыта эзö пондö сулавны оланас. Пöрисьжыкыс, Митиперкоыс, даки пышшис городö, а мöдыс эз ешты вöтчыны воныс сьöрö. А кöзяйкаыс пöрисьмыштiс, да и шогöттэс одолейтiсö, и эз понды ештыны подаыс сьöрын видзöтны.

— Вот, Яков, значит, локтiс тэнат кадыс гöтрасьны, — рытнас пызан сайын сiя висьталiс зоныслö. — Думайта, эм ни невестаыт?

— Невестаыс тыр да меным эшö одзöв, — висьталiс зоныс да гöрдöтiс, кыдз жонь. — Кытчö тэрмасьны?

— Адззан эд, мамыт шогалö, — айыс дзарнитiс зоныс вылö да гыжьялыштiс юрбöрсö и лöгöна видзöтiс зоныс вылö. Сiя эз видзчись эттшöм сералöмсö и кыдз кынмис местаас. — Важын ни паньнас эг шваткы кымöс кузят, а колiс бы. Веммет, тыдалö, тырисö. Айытлö лысьтан паныт горавны. Вот кута пидзöссэз коласам да лэдза вешьянтö и малалышта ременьнас небыт местаэсö, медбы тöдiн, кыдз айыткöт баитны. Вунöтiн, дак верма эшö велöтны. Висьтав, кинöс мöдан босьтны ас саят?

— Верма и Öниськасö Митрош Провыслiсь вайöтны.

— Ровно и мöдiк нывкаэз абуöсь, — зоныслöн кыввес кыдз токöн бытшкисö айыслiсь сьöлöмсö. — Кöзяинтöм керкусис меным оз лöсяв невестаыс. Кинлö колас, дак ась босьтас, а ме ог. Вот Гурич Сенялöн нылыс лöсялас. Сiя мывкыда, уджалiсь и пасьтасьö бытшöма.

— Да ме сайö сiя оз и мун.

— Кыдз этö оз мун? — эз вежöрт айыс. — Ме айыскöт баита, и быдöс лоас чин по чину. Айыслiсь волясö оз лысьт дзугны. Пöрись мортыслöн кылыс — золото. Деревняас век сiдз олiсö. Вот ыстыламö сваттэзöс и сöтам ки кузя.

— Ме то мый, соглашайтча. Кер, кыдз тэныт гленитчö.

Кык мужик адззисö öтласа кывсö, и вöлi назначитöм свадьба лун, кöда кежö вийöтiсö аскур, керисö сур да брага и уна быдкодь сёянсö, корисö гöссез. Но медодз колiс ветлыны сельсоветö да гижсьыны томмеслö. Эта понда зоныслö колiс машина, кöдö корисö соседыслiсь.

— Ветла, мыля жö ог, — согласитчис соседыс. — Ылын я эстöн, километра вит гöгöр лоас.

Кытчöдз шофёрыс пыралiс соседыс ордö да примитiс сылiсь аскурсö стопка-мöд, сы коста деревнясис челядьыс решитiсö сералыштны том параыс вылын. Одзись колесосис нiя личöтiсö быдöс гайкаэзсö, медбы машинаыс эз вермы ылöдз мунны. Керисö делосö и асьныс пышшисö мöд керку саяс да пондiсö видзöтны. А недыр мыйись керкусис петiсö том гозъяыс, торжественнöя пуксисö машинаас да иньдöтчисö сельсоветас. Челядьыс китшкисö-сералiсö асланыс выдумка вылын и вöлiсö радöсь, что машинаыс мунiс местасис, и некин нем эз казяв. Шофёрыс вöлi опытнöй, петiс деревнясис да иньдöтiс машинасö тракт вылöт и пондiс лэдзчыны керöс увтö, кытöн вöлi вылын дамба.

— Эх, — гажöна горöтчис сiя, — ыскöвтышта керöс увтас да мыччала машинанас ветлöм прелестьсö.

Сiя содтiс газсö, и машинаыс летöвтчис одзланьö. Только тöлыс пондiс шутнявны осьта öшыноккезас. Яковыс жмитыштiс ас бердас невестасö, кöдiя шы эз сет, а мыйкö думайтiс.

— Чожа лоамö сельсоветас, — висьталiс Яковыс. — Машинаыс не телега, оз и тресит, мунö, кыдз подушка вылöт.

Не весь колесоэс резинаись. Вот бы миянлö эттшöмсö. Ачым бы руль саяс ветлi.

Но вдруг мыйкö дзугсис, и Яковыс ештiс казявны, кыдз машина одзас тарöвтчыштiс резинаись колесоыс. Нiйö трекнитiс, машина увтас гырчикнитiс, и сiйö чапкис бокас, онняюрöтiс да шупкис дамба увтас, кынымиськö бергöтiс да пöрöтiс бок вылас. Бöрись колесоэс сё эшö бергалiсö, а одзись осьыс вöлi колесотöм. Ляпкöтöм салонас некин шы эз сет. Мотор гöгöрсис кайис пар.

Гöгöрас некин эз вöв. Жугалöм машинаыс весьтöт мымда лэбзисö öткаса ракаэз. Лоöм несчастьеыс некинöс эз павкöт. Только кытшöмкö каёк пуксис ляпкöтöм кузов вылас да бöжнас öвттöн чивзыштiс. Куим тело неöткодь позаын куйлiсö машина пытшкас. Лэдзчöм вирнас тырисö нельки стеклоэс.

Но вот туй вылас мыччисис телегаöн вöв, кöда рыпкис шогмöм авария месталаняс. Ямщикыс нем керöмись нёджжалiс туй боксö, паськöтыштлiс öмсö да öтмöдöрö öвтыштлiс коккезнас. Сiя эз тэрмась. Уджалiс, тыдалö, колхозын и велалiс лунсö кыскыны. Но вот казялiс дамба увтсис машинасö и повзис. Машинаыс эз сотчы, но сё эшö кайис парыс. Сы гöгöр некин эз тыдав. Мужикыс локтiс эта местаö, чукыльдомалiс вöвсö и лэдзчис видзöтны.

Картинаыс вöлi гажтöм: шофёрсö жмитöма руль бердас, инькаыс кушöтчöма, мужикыс кöстiсьöмöн пырöма пукалан коласас. Вирыс петöм нельки жугалöм ыбöсок увтас.

Мужикыслöн синнэс баралiсö и чушыктöмсö зэлöтiс кулакö, мороссö жмитiс. Только чуть асьсö тöдöмöн сiя кайис вöлыс дынö, пöрччалiс чукыльдомсö да бергöтiс посадланяс, бöбсялöмöн виззис вöвсö бок кузяс и, туйсö адззытöг, гöнитiс гортланяс. Телега бöрас каттисис кöс бусыс. Локтiс сельсовет дынас и, вöвсö кöртавтöг, котöртiс председательыс дынö да дзугсьöмöн висьталiс адззылöмсö. Председательыс босьтiс сьöрас медикöс, и тэрмасьöмöн мунiсö авария местаас.

А челядьыс? Нiя мöдiсö только шутитны, но, кöр кылiсö ыджыт несчастье шогмöм йылiсь, повзисö и некинлö эзö висьтасьö.

Айыс дзебикас герьялöм пыр висьталiс: «Мöдi тай богатöйö босьтны, да зонöлiсь юрсö вот муас сюйыштамö. Добрöй отир, эдö уськöтчö богатствоыс вылö. Сыын только öтiк грех. Господи, помилуй менö. Быд мортыслö колö овны аслас мылаöн, ношасö лэбтыны выныс сьöртi».