Канюков виталий изосимович

ÖКТÖМ ПРОЗА

Кошшан:

ВИСЬТТЭЗ: Ай 1994 129 Баламут 1994 21 Браконьеррэз 1994 191 Вöр кывттöн ( < Иньва, 1995) Вöралісь 1994 199 Вöтын ( < Иньва, 1995) Велöтчись 1994 Вельмисö 1994 27 Вит руб 1994 162 Внучек 1994 8 Галяман 1994 175 Горвылын 1994 188 Дрожжи 1994 197 «Дружбист» 1994 185 Избушкаын 1994 203 Кöритöмсорöн 1994 106 Кöчка Епка 1994 5 Каёк 1994 93 Колька-шмыг 1994 179 Кольмöм юр ( < Иньва, 1995) Ларец 1994 1994 56 Мам 1994 139 Мама-ныла 1994 Мокася морт 1994 146 Мотоцикл 1994 182 Мынтісьтöн 1994 168 Нинкöммэз 1994 86 Öткаса морт 1994 143 Перыт отсöт 1994 63 Письмо 1994 171

Подряд 1994 82 Пожар 1994 89 Прикашайтчис 1994 132 Прокурор 1994 159 Пышшалісь 1994 66 Сералöм могись 1994 70 Син сайын ( < Иньва, 1995) Ситников 1994 43 Смев морт 1994 36 Стражник 1994 47 Суседко (< Иньва, 1992) Сьöкыт случай 1994 10 Том солдатка 1994 77 Трактористка 1994 103 Треска 1994 194 Туйвежын 1994 51 Тшакыль 1994 97 Уткаэз 1994 166 Финагент (< Иньва, 1992) Чарöтöм пу 1994 74 Честь тöдтöм 1994 41 Чудо 1994 136 Шабашка 1994 ЗЗ Шогалісь 1994 111 ОЧЕРККЕЗ: Терентий Меркурьевич Сьöлöмын бичирöн Бригадалöн юралiсь Одзынмунiссез (< Бичирок, 1975) Олан и öтiк лун

Терентий меркурьевич

(Миян крайын, 1949)

Терентий Меркурьевич пукалiс аслас öшын увтын, видзöтiс керку крышаэз вылö, кысянь шондi вылын свиттялöмöн вотялiсö вотьваэз и натьтö сотöй пырись ни думайтiс мый керны сы понда, медбы получитны вылын урожай.

Сы бöрсянь, кöр вöлi публикуйтöма Министррез Советлöн постановленнё «Сельскöй хозяйствоись передовиккезöс вылын урожай получитöм понда награжденнё йылiсь», сiя эз понды вермыны даже узьны ойöн. Думаын вöлi öтiк: раз партия да правительство беспокоитчöны отир олан понда, то колö быд вынöн кутчыны тыртны ыджытся-ыджыт задачаэсö.

Талуння рыт кежö вöлi назначитöма общеколхознöй собраннё, кöда вылын сулалö вопрос тулысся кöдзан кад кежö лöсьöтчöм йылiсь. Терентий Меркурьевич быдöс думаэзöн сетсис этаö: кыдз сiя талун босьтас колхозниккез одзын ас вылас обязательство — получитны ыджыт урожай.

— Собраннё вылö, Терентий Меркурьевич! Обязательно!

Эз ешты Терентий казявны, кыдз шустрöй зонкаок Гришутка горöтiс да саясис керку угöв сайö. Терентийöс кутiс обида, мыля эз ешты баитыштны зонкаоккöт. Сiя эз вермы терпитны, медбы не мунны собраннё вылас. Локтiс правленнёö и пуксис ордчöн угöлокö öтiк годдэза колхозниккöт.

Сельхозотделiсь агроном чеччис пызан сайись, гöгöр нуöтiс видзöтöмöн колхозниккез чужöммезöт и негорöн пондöтчис висьтасьны колхознöй ыббез вылын достиженнёэз йылiсь. Пондiс баитны и сы йылiсь, что татöн колхозас вунöтiсö звеноэз, кöднö колö вились организуйтны, что партия да правительство сетöны ыджыт вниманнё и öддьöн ценитöны колхознöй ыббез вылiсь передовиккесö.

Терентий эна кыввезсянь сэсся местаас эз ни вермы пукавны. Сiя видзöтiс агроном вылö, ньылалiс сылiсь каждöй висьталöм кывсö.

Агроном выступленнё бöрсянь корис слово Терентийлöн сосед Андрей Ермолаевич. Сiя быд собраннё вылын любитiс уна баитыштны.

— Ме, ёрттэз, — пондöтчис Андрей Ермолаевич, — конечно, абу против, мый баитiс ёрт агропомыс, абу против и сылö, медбы организуйтны звеноэсö. Мый ёрт агроном баитiс быдöс эта правильно. Но, миян эд муыс не алтайскöй. Ме ачым вöлi сэтчин. Му быдöс сэтчин чернозём. А миян некыдз оз туй сымдасö получитны. Мийö уджалам и уджаламö бура, а сэсся миянлö нем оз и ков. Стопудовöй урожайсö мийö эшö асланым векын эгö на адззылö. Мöдiк дело 11-12 центнерöн га вылiсь да и этаö колö пуктыны уна вын, медбы получитны сымдасö.

Эна кыввез öддьöн павкöтiсö Терентийлiсь сьöлöмсö. Да разь туйö баитны сiдз асланым му йылiсь, кытöн мийö чужимö и быдмимö! — думайтiс сiя. Кыдз только кончитiс баитны Андрей, Терентий сэк жö корис сетны сылö слово.

— Пожалуйста, пожалуйста,— ответитiс председательствующöй,— висьталö и тiйö ассиныт мненнёнытö.— Терентий иньдöтчис пызан дынö, сувтiс веськыта, малалыштiс ассис уссэсö и волнуйтчöмöн пондiс баитны:

— Кыдз меным лоис вежöртана, Андрей Ермолаевичлöн кыввес миянлiсь мусö пуктöны абу туйö. Кыдз жö сiдз? Тыдалö, сылöн пöрись кадö памятьыс дженытсялiс. А чулалiс только вит-квать год, кыдз вöлi стопудовöй урожайыс миян понда не вильöн. Эз вöв бы война, мийö бы получитiмö и быдöс двести пудсö гектар вылiсь. А уж если мийö война бöрас кутчисямö кыдз колö уджавны честнöй колхозниккезлö, то обязательно получитамö.

— Кыввезнаныт конечно получитатö!— презрительнöя горöтчис Андрей.

— Сулав ужо. Сетö только меным отсалiссезöс, сэк мыччалам, Андрей Ермолаевич, что и миян муыс алтайскöй, что и миян му вылын туйö получитны ыджыт урожайсö. Ме пожалуй... мыччала тiянлö... Да етшаöв грамотаас велöтöмась, а öнi пöрись ни, но сёдаки, тыдалö, и меным колас велöтчыштны. А мый ог понды вермыны, сэк уж извинитö менö, понда корны отсöт. Унасö ме ог куж баитны, а слово сетi, значит лоас выполнитöм.

Терентийкöт споритны некин эз понды. Колхозниккез быдöнныс согласитчисö, медбы сiйö пуктыны звеньевöйöн вылын урожай понда пессян звеноö.

Кöр чулалiс собраннё, агроном и председатель локтiсö Терентий дынö.

— Но, Терентий Меркурьевич, босьтiн ас вылат удж, дак ло дюж, — висьталiсö нiя. — Мийö тэ вылö надейтчам, что асьтö он позорит.

Эна кыввез вылö Терентий горöтчис:

— Если уж сетi слово, то этö — закон, ачым сы понда отвечайта...

Ашынас Терентий быдöс эта йылiсь висьталiс аслас звенолö. Том нывка Дуся думайтыштiс и быдöнныс понда шуис:

— Тыртамö висьталöмсö. Öнiсянь жö пондамö лöсьöтчыны. Ми мыччаламö Андрейлö, кытшöм миян муыс и мый вылö мийö способнöйöсь. Миян тырмас настойчивость, тырмас смелость и тырмас вынным, медбы честьöн тыртны ассиным слово.

— Кöть и томöсь, а озö полö, — думайтiс Терентий, — сiдз кö лоас и одзлань, то баиттöг получитамö. Ась сэк думайтасö: «Вот гражданскöй войнаись гвардеец, слово сетiс и тыртiс сiйö честьöн». А эд меным участоксö эзö на сетö, — кватитчис Терентий. Сiя перыта пасьтасис да иньдöтчис правленнёö.

— Кытчö тiйö думайтатö участоксö миянлö сетны?

— Участоксö? — юалiс мöдпöв председатель. — Сетамö деревня дынас. Ылö оз понды ковны ветлыны.

— Не-е, висьталöмöн сiдз оз туй. Быдöс правилоэз сьöртi колö керны, меряйтны и сетны меным актöн.

Сiя жö лунö колхоз правленнёлöн председатель, бригадир да ревизионнöй комиссиялöн председатель мунiсö ыббез вылö. Öддьöн неохотнöя бродитiс лымöттяс бригадир, и Терентий сылö висьталiс сералöмöн:

— Тэ мый, лымсис повзин? Э-э, милöй зон, вай-ко рулеткасö меным...

Звенолö сетiсö участок 10 гектар. Вöлi рытъяв кад. Ыб вывсянь Терентий иньдöтчис гортас, сёйыштiс и дыр пукалiс пызан дорас, сё думайтiс аслас участок йылiсь. Ашынас вöлi эшö пемыткодь, а сiя мунiс ни бригадир ордö.

— Степан Иванович,— волнуйтчöмöн горöтчис сiя, — меным вöввез колöны.

― Эн тэрмась, Меркурьевич, вöлись шонтыштлыны пондiс öтöрас, кöдзан кадöдззас эшö ылын.

— Кыдз эн тэрмась? Кöр инö тэ шуанöн мийö долженöсь удобряйтны мусö? Кöдзикас? Не-е, другöй, сiдз дело оз понды одзланьö мунны. Колö öнiсянь жö лöсьöтчыны.

— Пондöтчыны да лöсьöтчыны, — лöга шуис бригадир. — Тэнат звено, а менам быдса бригада.

— Но и мый жö, öддьöн бур, что бригада, а кытчöдз вöввесö меным он сет ме ог мун тэ ордiсь.

— Талун ог вермы нем керны. Талун быдöс вöввезнас уджалöны.

— А чаннез пондасö весь овны?

Бригадирыс öддьöн эз охотит сетны, но Терентий сулалiс чорыта аслас висьталöм кыввез вылын.

— Тэ, Степан Иванович, ровно грамотнöй и лыддьöтан газетаэз, а сэтчин гижöны, что отирыс арсянь лöсьöтöны ассиныс участоккезнысö. Мийö кольччимö, но долженöсь вöтны нiйö.

— Ладно, — охотатöг горöтчис Степан, — сiдз и ло уж вöтны дак вöтны. Кыным вöв тэныт?

— Да пондöтчыны унасö оз колö. Вöв кык-куим и тырмас, а сыбöрын видзöтамö.

Терентий гажöна петiс и мунiс веськыта Евдокия Якимовна ордö. Дуся (сiдз шуисö Евдокия Якимовнаöс) как раз лöсялiс гортас.

— Дуся, öкты быдöс звеносö татчö, баитыштамö невна. Дуся кышалыштiс пельпон вылас пальто и котöрöн петiс. Керкуас Терентий кольччис Дуся мамкöт — Анисья Трофимовнакöт. Недыр чöлöм бöрсянь Анисья Трофимовна петiс комнатаись да пуксис Терентийкöт ордчöн.

— Не аслат годдэз сьöртi тэ босьтiн уджсö, Терентий, — пондöтчис сiя.

— Кыдз некыдз, а менам олöм сетöма колхознöй интерессэзлö. Колö уджавны и уджавны, кытчöдз тырмö вын, а вын оз ло, ог понды вермыны уджавны, сэк и колхозыс меным пондас отсавны и колхозниккез да колхозницаэз пондасö касьтывлыны. Вот уджалiс пö, кытчöдз вермис Терентий Меркурьевич, бура уджалiс, эз жалейт ассис мыласö.

— А кыдз жö обязательствонат?

― Обязательствоöн хлопотливöй уджыс. Примерно, талуння лунсянь мийö пондамö кыскавны назём, инвентарь миян быдöс готов. Унажык ковсяс öктыны местнöй удобреннёэз.

Анисья Трофимовна жагöника чеччис и мунiс комнатаö. Лоис томительнöй чöлöм. Шондi югöррез пондiсö пырны öшынö. Стена вылын шваткöтiс часылöн маятник. Керкуын вöлi жар. Терентий бергöтчис öшын дынö. Улицаöт öтмöдöрö гöняйтiсö вöввезöн, кыскалiсö назём; кузницаланьö бригадир кыскис пиняэз. Вот Гришуткалöн, кöда корис Терентийöс собраннё вылö, шупыта вöв вашöтöмсянь додьыс шыбыльтiс, и назёмöн ящикыс лэдзчисис додь бокас. Терентийлöн чужöмыс кымöртчис и сiя лöга стукнитiс öшын косякас да горöтiс:

— Эй, тэ, стриж пиян! Он разь адззы одзат, добросö улица шöрö киськалан!

Гришутка дзарнитiс öшынланяс, перыта лэбтiс ящиксö и жагöника вашöтiс вöвсö одзлань. Недыр мыйись Дуся да звеносис мöдiк членнэз локтiсö Терентий дынö.

— О-о, орёллэз менам, локтiт! Быдса отделеннё. Мийö öнi вермамö самостоятельнöя нуны бойсö. Эттшöм вынсö некытшöм пöданöн он игнав. Öнi тiйö мунö доддялö вöввез, а ме ветла правленнёöдз, колö баитыштны председательыскöт.

Звенолöн членнэз иньдöтчисö дворланьö, а Терентий мунiс правленнёö, но эз ешты локны правленнё дынöдз, кылiс Дусялiсь том гора голос:

— Терентий Меркурьевич, сулалышт!

Дуся чожа вöтiс сiйö и пондiс норасьны:

— Мийö только локтiмö дворас, а конюхыс миянöс сразу жö откажитiс вöввезсис и менö тэ дынö ыстiсö.

— Кыдз сiдз откажитiс?

― Вöввез пö абуöсь.

Терентий содтiс шаг и пондiс оськавны вöв карта дынö. Дуся öдва ештiс котöртны сы сьöрын и пöдöм голосöн баитiс:

— Мийö бы и радöсь керны быдöс, да адззан первöй жö лунас миянöс паныталiсö.

— А тiйö и повзитö эта паныталöмись?

― Повзьыны эг повзьö, да эд тышкасьны он кутчись, кöр шуö, что öтiк вöв абу.

— Карта пытшкас видзöтiтö?

― Эгö.

— Вот и умöль, что эдö видзöтö. Колö быдлаын асланыт синöн видзöтны.

Нiя чожа локтiсö карта дынö. Сэтчин мунiс назём кыскалан обычнöй удж. Тыра доддезöн вöввез сьöкыта петiсö картаись и кузь лёдзöн мунiсö ыббез вылö. Терентий сэк жö казялiс конюхлiсь тöдса фигурасö и негорöн шуис:

— Андрей Ермолаевич, вовлы жö татчö!

Кöр Андрей сибöтчис, Терентий пондiс баитны:

― Тэ, мый, сосед, бузитны пондöмыт? Вунöтiн разь кин понда ме уджала?

— Мый, кытшöм бузитöм? — повзьöмöн юалiс Андрей. — Ог вежöрт мый йылiсь тэ баитан.

— А тэ эн пов, — сералöмöн шуис Терентий,— ме тэ дынö локтi общеколхознöй важнöй делоöн.

— Кывза тэнчит важнöй делотö.

— Дженытжыка баитöмöн, мыля вöввесö эн сет менам звенолö?

— Ме нылö вежöртöмöн висьталi, что вöввез талун эз кольччö, быдöсöн уджалöны.

— Кыдз жö сiдз, эз кольччö?

— А эд адззан öтiкöдз талун доддялöмöсь кыскавны назёмсö.

— Адзза, адзза, но эд эмöсь миян эшö чаннез, кöднаöн важын ни колö бы уджавны.

— Эмöсь то нiя эмöсь да мыйкö полöм петö сетны. Дойдасö асьнысö нето вöвсö, а сыбöрын отвечайт конюх — мыля сетiн. Не быд морт вермö веськöтлыны нiйöн.

— Чапкы беспокоитчыны. Тэ перво видзöт, кытшöмöсь менам уджалiссез. Не уджалiссез, а орёллэз.

— Ладно, — висьталiс конюх, — кутö чаннесö, только сыбöрын Андрейöс эд винитö.

* * *

Звено пондöтчис удобряйтны ассис участок. Медодзза лунö нiя кыскисö 22 додь назём. Ашынас, кöр эшö эз ешты петны шондi, кöр горрез лонтöмсянь деревня вевдöрын кöвьясьö тшын, звено быдöннысся одзжык доддялiс вöввез. Кузьлун позис кывны гажа песняэз Олялiсь да Дусялiсь, кöдна кыскалiсö öтлаын мöдiккезкöт асланыс участок вылö назём. Терентий, кыдз бой коста командир, то отсалö тэчлыны назёмсö, то бöра мунас ыб вылö и отсалö сiйö пöрлавны.

— Ыджытжык кучаэзö, ёрттэз, киськалö. Сiя шоналас и пондас сотчыны, — баитiс Терентий.

Назём кучаэз вöлiсö вевттьöмöсь лымöн, кöда вевдöрсяняс чожа пондiс сывны и асыввезнас нысянь кайлiс чочком пар; ылiсянь видзöтiкö кажитчис, что этö, шом керан ямаэзын керöны шом.

Досуг пораö, шоччисян кадö, Терентий кутчис лыддьöтны книгаэз и думайтiс ас думасис, кыдз да мый эшö позьö готовитны ыб удобряйтöм понда. Сiя решитiс öктыны местнöй удобреннёэз. «Нiя бурöсь. Босьтны кö птиччöй помёт, — öтнас думайтiс Терентий,— сiя öддьöн богат азотöн, фосфорöн и кальцийöн, кöдна колöны сю быдмассэзлö быдмикас. Бур удобреннё и пöим, а сiя миянлö некытшöм трудность абу öктыны. Но нiйö öнi ыб вылö оз туй петкöтны. Сылан ваэзöн растворитчасö нылöн самöй ценнöй веществоэзныс, а сыбöрын нiя лоасö пользатöмöсь. Öктыны кöсiнö и сохранитны нiйö кöдзан кадöдз — вот менам задача, — думайтiс сiя. — Этö уджсö бöрланьö кольны тожö оз позь, колö öнi жö организуйтны кытчö öктыны. Кытöн позволяйтö местаыс? Босьтны кö фермаын — оз лöсяв, вöв картаö тожö оз туй». Терентий думайтыштiс и сылö тöдвылас усис, что сылöн гортас эм места, кытöн бура туяс видзны кыкнан удобреннёсö. Сiя советуйтчис эта йылiсь аслас звенокöт.

— Правильно, — висьталiсö звеноись колхозниккез, — мийö вермам нiйö öктыны не öтiк дас центнер.

— И вынным тырмас эта удж понда, мирö не мунны: эна ценнöй удобреннёэз миян горт колхозын куйлöны, — баитiс Дуся. — Быд колхозник сетас, некин оз откажит.

Ашынас, кöр чуть только öтöрыс югдыштiс, нывкаэз бöра вöлiсö вöв карта дынын ни, видзчисисö, кöр сёйсяс вöввезлöн соровтас. Готов лöсьöтiсö додь галя кыскалан ящикöн и петкöтiсö сы дынö сбруя. Вöввез доддялöм бöрын нiя перво мунiсö асланыс горттэзö и петкöтлiсö öктöм пöимсö. Сыбöрын иньдöтчисö деревняö колхозниккез ордö. Пырасö керкуö и ыбöссянь висьталöны:

— Мийö öктамö ыббез удобряйтöм понда пöим.

— Босьтö, босьтö, менам вон посöдзас быдса бочка сулалö, кузьтöв öктi, — ласкова шуас хозяйка, — ме мöдi аслам карчйöрö сiйö киськавны, а колö кö ыббез вылö — босьтö. Менам гряддэз и сытöг вермасö овны, а ыб вылас сюыс буржык каяс. Öтласа уджыс понда абу жаль сетны. Миянлö жö доброыс.

— Тэ, тётка, одзланьын эшö унажык öкты пöимсö и курöггезлiсь оланiн весöтöм бöрын помётсö бокö эн чапкы, чукöрт öтлаö, сiя миянлö тожö колö,— баитiс Оля.

— Ладно, ладно, локтатö мöдпырся ме тiянлö кыкнансö запта.

— Дуся,— вдруг шуис Оля,— ме думайта колö пöимсö öктыны и баня горрезiсь.

— Конечно, колö. Вот пыраламö быд колхозник ордö, а сыбöрын мунам и баняэзö.

Локтiсö школаись челядь. Нiя казялiсö, что нывкаэз öктöны пöим, и каждöй школьник кутчис нылö отсавны. Чожа нывкаэз гöгöр öксисö челядьыс дасся унажык. Мукöдыс даже абу и чапкöм сумкасö, ведёркаöн киас котöртiс додь сьöрас.

— Миянöс учительыс велöтö школаас, что колö унажык октыны местнöй удобреннёсö, нiя пö öддьöн ценнöйöсь и лэбтöны урожай.

— Правильнöя, Коля, тэнö велöтö учительыс. Этö пользасö тiйö адззылатö таво арнас.

Бусöн тырöмöсь, но гажöна шыннялöмöн нiя медодзза ящикöн иньдöтчисö Терентий ордö. Терентий гортас эз лöсяв, сiя эта кадö уджалiс ыб вылын, назём кучаэз гöгöр. Авдотья Ефимовна — сылöн инь — даже эз и понды баитны сы йылiсь, медбы осьтны воротаэз да пыртны пöим.

— Ен сыкöт, мый сiя думайтö, оз эд и висьтав одзлань.

— А миянлö висьталiс, что сылöн местаыс эм и öддьöн бур, кытöн туяс видзны кöдзан кадöдз.

— Местаыс, местаыс,— дразнитöмöн баитiс иньыс, — кытöн сылöн местаыс? Сыкöт ме ог ни тöд мый керны. Оз на югды — оз и сёй мунö аслас удж вылö, локтö рытнас пемытöн да эшö ойбыт пукалö, книгаэз лыддьöтö.

Эта кадö Терентий мунiс вöв картаö и казялiс аслас керку дынын доддя вöвсö. Сiя тэрмасьöмöн локтiс нывкаэз дынö и юалiс:

— Мый сэтшöмыс лоис, мыля сулалатö?

— Авдотьяыс оз лэдз пыртны. Местаыс пö абу.

— Кыдз абу? — инькаыс вылö видзöтöмöн горöтчис сiя да перыта пырис вороткаöт и осьтiс ыджыт воротасö, кутiс вöвсö поводдэзöт и пыртiс сьöрас. Инькаыс тэрмасьöмöн лэдзчис посöдзись да пырис ны сьöрö.

Нывкаэз перыта ректiсö ящиксö и мунiсö вились öктыны пöимсö. Терентий иньдöтчис керкуö.

— Пырамö, Ефимовна, колö невна закуситыштны.

— Ой, господи, да тэ сiдз уджалан, что сёйöм йылiсь ни пондiн вунöтны. Пырамö чожжык.

Терентий перыта закуситiс и вешшис öшын дынö. Керис папироса и пондiс куритны, ачыс видзöтiс öшынö, колхознöй муэзлöн кушамöм мыссэз вылö. Öтöрас гажöн горалiсö кайез, югьялiс небоын шондi, вöрлöн лысыс кыдзкö асмозöн свиттялiс. Терентий вешшыштiс матöжык öшын дынö, нырышсис гырдззаэзнас öшын подушка вылö и пырис аслас думаэзö, одзланься, и чулалöм кадiсь олöмö. Син одзас сылöн паськалiсö роднöй страналöн конечтöм просторрез, кöднö сiя дорйис оружиеöн киас, эз жалейт ассис олансö, пуктiс быдöс вын. И öнi бöра аслас колхозын уджалö мымда вын, старайтчö лэбтыны урожайность, медбы миян Родина лоис эшö вынажык, медбы оланыс лоис эшö гажажык; усис тöдвылас, кыдз кöркö, Октябрьскöй революцияöдз, сiя айыскöт ниртiс-уджалiс йöзлiсь муэз, а асланыс десятина вылын уджавлiсö только свободнöй чассэзö. Да сэк разь уджалöм вöлi? Гöримö сабаннэзöн,а пинялiмö пуовöй пиняэзöн, кöдна только гыжьялiсö, а эз небзьöтö мусö. А öнi? Öнi гöрö трактор, убирайтö комбайн. Оланас сьылöмöн мунö одзлань, быд лунö дорсьö виль победа.

— Да-а, — ловзисьöмöн горöтчис сiя, — эм мый понда любитны ассиным мусö. Сы понда абу жаль сетны олöм, медбы только одзлань сiя вöлi пыр свободнöй да счастливöй, медбы колхоззэз лунiсь лунö богатсялiсö, а колхозниккез олiсö зажиточнöя.

...Чулалiс кад. Небоöт шочыника ветлiсö кымöррез, кöдна кыдз тшын саясьлiсö горизонт сайö. А шондi аслас золотöй югöррезöн шонтiс мулiсь мороссö. Вöр, кöда ас вывсис чапкис чочком лымовöй халатсö, кажитчис, что эшö буражык зелёнöйсялiс и манитiс ас вуджöр сайö. Охота вöлi мунны сэтчин да лунтырöн бродитны сы пытшкын. Му вевдöрöт кöвьясис сöстöм руок. Быдöс эта: шондi, вöр, кымöррез, чöскыт рулöн запах вöлi аскодьöм басöк и кажитчис, что эта только сказкаын. Но эта вöлi настоящöй миян тулыс. Рыттэзöн улицаэзын öксьывлiсö уна том йöз, дзульзисö, сьылiсö, кылiс гармоння шы. Вылын местаэзын пондiс шуравны му. Неылын вöлi кöдзан кадöдз. Терентий быд лунö ветлывлiс аслас участок вылö, видзöтiс, чожа я позяс петны гöрны.

Звеноыс эта кадö занимайтчис сев кежö медбöрья лöсьöтчöмöн. Эшö и эшö проверяйтiсö сельскохозяйственнöй инвентарьсö, кöдöн нылö ковсяс уджавны. Терентий киас ключöн ветлöтiс, видзöтiс аслас синнэзöн быд плуг и пиня. Пешлывлiс бура я зэлöтöмöсь гайкаэз, винттэз.

— Лöсьöтö каждöйыс ас понданыт. Öнi кадыс эшö эм, а петам ыб вылö — сэтчин некöр лоас лöсьöтны. Сэтчин быд минута лоас дона.

— Тэ миян понда эн пов, — отвечайтiсö сылö, — мийö не первöй год ыб вылас. Ойсö огö узьö, если мый колö керны — керамö. Эта миян чорыт закон.

— Инвентарьыс сьöрын мийö следитам, а кин пондас кыскавны сiйö? — юалiс Терентий и ачыс жö ответитiс: — вöв. Колö ассиным вöввесö дозирайтны, отсавны конюххезлö.

— Правильно, колö организуйтны этö делосö.

— Мийö дежуритлыны пондамö, — висьталiс Оля.

— Сёжö ачыт пондан аслат вöв сьöрын буржыка следитны, аскадö вердны, юктавны, сынавны, — баитiс Алексей. — Талуння лунсянь ме пондöта дежурство.

И рытöн Алексей локтiс картаö. Отсалiс конюхлö лöсьöтны соровтас и лэдзчöтiс вöввесö юктавны. Кайöм бöрын сiя быдöс аслас звенолiсь вöввесö сыналiс.

* * *

Ойсö Терентий чулöтiс томительнöй видзчисьöмын. Быдкодь думаэз сорласьны пондiсö сы юрын: гöрöм, кöдзöм, урожай, собраннё вылын кыв. Кöр чуть только лöзöтiс шондi петанiн, сiя вöлi кок вылас ни. И иньыслiсь сёян видзчисьтöг мунiс. Петiкас висьталiс, медбы сёянсö сылö вайисö ыб вылö. Кöр Терентий пырис Алексей ордö, сiя эшö узис. Терентий, сы вылö видзöтiкö, сералöмöн горöтчис:

— Ай-яй-яй, разь туйö том мортлö эта дырна узьны?

— Ме... ме сейчас... — чеччикö ответитiс Алексей.

— Дыр маласьны некöр. Мун саймöт остальнöйесö, а ме муна вöв картаö готовитны инвентарь да вöввез.

Кынымкö минута чулалöм бöрын локтiсö Терентий дынö Алексейöн саймöтöм нывкаэз.

— Вот и быдöнным чукöртчимö...

— Бур дело, — плуггез вылö видзöтöмöн ответитiс Терентий. — Однако некöр дырсö баитны, адззатö отирыс кыдз тэрмасьö, а миянлö ыб вылас петны колö медодз.

— Да, медодз,— ответитiс Алексей.

Эшö кынымкö минута и звено вöлi готов ни иньдöтчыны ыб вылö. Кöр Терентий видзöтiс аслас отсалiссез чужöммезö, сiя юасьтöг вежöртiс быдöнныслiсь öтiк стремленнё, öтiк желаннё — лоны уджас медодзын, дорны победа. Сылö аслыс охота вöлi эшö пукалыштны гажа том отир коласын, но öнi вöлi учёт вылын быд минута и быд минутаö сiйö вермисö одзавны.

— Н-но-о, — горöтыштiс вöлыс вылö Терентий да петiс карта пытшкись.

Кöр сiя локтiс медбöрья улицаöт ыббез вылö, сы бöрын кылiсö быдкодь голоссэз. Отирлöн баитöм, кайезлöн гора шыэз, подалöн шумитöм — быдöс öтлаасис кывлытöм шумö и кажитчис, что деревняас лоöма кытшöмкö ыджыт происшествие. Пондiсö ыб вылас мыччисьны и мöдiк колхозниккез.

Эта кадö Терентийлöн звено вöлi готов ни пондöтны медодзза борозда.

— А ноко, Терентий, кокнит кинат пондöт, — гажöна шыннялöмöн баитiс Алексей, — медбы мийö кöдзан кадсö чожа чулöтiмö и öтлаын быдöс колхозыс.

— Правильно, правильно, — горöтчисö остальнöйез. Терентий ны чужöммезöт синнэзнас нуöтöм бöрын, веськöтiс ассис вöвсö важ бороздаö и пондöтчис гöрны. Му бердiсь торьясис сьöдмусинлöн медодзза пласт, кöда

нюжалiс Терентий бöрсянь кузь сьöд лентаöн. Сьöрсьöн-бöрсьöн иньдöтчисö эшö куим вöв. Пондöтчöм местаö локтöм бöрын Терентий вöвсö сувтöтiс, видзöтiс быдöнныслiсь, мый пыдына гöрöны, а медбöрын босьтiс киас отвалöн бергöтöм му да, дыр видзöтöм бöрын, горöтчис:

― Если надейтчыны только öтiк гöрöм да кöдзöм вылö, то ыджыт урожай получитны ог вермö. — Сы киын вöлi небыт и öддьöн поснит, бус кодь, му.

— Мыля ог вермö? — интересуйтчис Алексей.

— А вот мыля... — Терентий нюжöтiс кисой быдöннысö корис ас дынас. — Вот видзöтö. Тiйö, конечно, томöсь и может эдö замечайтлö эта муись нем.

— Да и нем ог адззö.

— Эта му, кöда вылö тiйö видзöтатö и кöдö пондöтчимö гöрны, кажитчö тiянлö бур и сэсся нем оз ков. Муыс бур — сьöдмусин сора, гöрикö небыт, но медодзза жö зэр бöрын миян участок вылын лоас ва понда непроницаемöй корка сiйöн, что эта муын эм уна бус. А сы понда, медбы муыс сетiс бур урожай, колö песöка кодь, комочоккезöн. Вылын урожай получитöм понда керны мусö колö структурнöйöн. Миян одзын сулалö задача: петкöтöм назём, кöда куйлö вон эна кучаэзын, рознитны участок вылас. Назёмсянь муас лоасö анькытш кодь комочоккез, кöдна сю быдмас вужжезлö пондасö лэдзны му пытшкас ва да воздух. А ваыс да воздухыс быдмассэзлö колö, кыдз миянлö сёян. Пыдына гöрöм му пондас пыр видзны запасын колана количество ва.

— А тiйö кыдз гöрлiтö? — юалiс Алексейлiсь Терентий.

— Да, мийö... гöрлiмö... гöрлiмö не эта пыдына.

— А пыдына гöрöмыс урожай лэбтöмын медодзза дело. Терентий писис кыскис блокнот и пондiс висьтавлыны опытнöй участоккез йылiсь, кытöн да мый пыдына гöрöмась и мымда пыдынжыка гöрöмсянь содiс урожай. Эта кадö, кöр Терентий проверитiс быдöнныслiсь эшö öтпыр пыдынасö да лöсьöтiс быдöнныслö öтмоза, Дуся, Оля да эшö öтiк колхозница кыскалiсö назём да рознитiсö сiйö гöрöм бокöт, медбы гöриссезлö не сулавны. Часiсь часö му вевттисис сплошнöй назёмовöй шебрасöн, но гöриссезлöн перыта гöрöм заставляйтiс рознитiссезöс уджавны эшö перытжыка.

— Гöрикö босьтö сы пасьта, мый пасьта вермас босьтны лемех, медбы öтiк челезна эз кольччы и чапкöм назём быдöс бы вöлi тыртöм.

— Эй, Дусенька, перытжыка давай! — горöтлылiс кадiсь кадö Терентий сiйöн, что нiя эз пондö вермыны рознитны.

— Кытчö жö тiянлö нёльыслö верман ештыны, — сералöмöн отвечайтiс Дуся, а ачыс тэрмöтiс подружкаэсö, медбы уджалiсö чожажыка.

— А тэ ешты, сулавны некыдз оз туй, коккезö асьныс мунöны да и вöвсö оз позь видзны...

Лун чулалiс казявтöг. Шондi эз ни вöв, кöр звено дугдöтiс уджсö, а только сы весьтын кымöррез вöлiсö лöзöв-гöрдöсь.

Терентийöс эз пукöт гортас, и сiя тэрмасьöмöн мунiс колхозiсь правленнёö. Председатель пукалiс пызан сайын и мыйкö лыддис счёты вылын. Кöр Терентий локтiс сы дынö да пуксис стул вылö, сiя чеччис пызан сайсис и локтiс Терентий одзö.

— Кыдз лунсö чулöтiн, звеньевöй?

— Чулалiс бура. Нормасö тыртiсö быдöнныс... А кыдз остальнöй колхозниккез?

— Бура, но эмöсь коласас, кöдна и эз вермö талун выполнитны.

— Быдöссö уна я гöрисö?

— Унажык дас гектарся.

— Унажык дасся — этö медодзза лунö неумöль. Однако эта вылын оз ков сувтчыны. Колö миянлö луннас гöрны кыкдас гектарöн.

— И пондасö гöрны...

Правленнёö öтiкöн, кыкöн локтiсö колхозниккез. Ны коласын вöлiсö даже стариккез. Нiя кöть и эз участвуйтö ыбвывся уджжезын, а локтiсö, медбы тöдны, кыдз мунö удж, сетны советтэз.

* * *

Звенолöн удж мунiс организованнöя. Терентий строгöя следитiс, медбы керсис быдöс агротехническöй правилоэз сьöртi.

Сотка бöрсянь сотка и быдса гектарöн содiс звеноöн гöрöм му. Терентий сувтöтiс вöввез и пинявны.

— Гöрöмсö пинявтöг оз туй видзны, — баитiс сiя, кöр сылö висьталiсö, что колö гöрыштны быдöс, а сыбöрын вöлись пинявны. — Пинявтöм му вывсис испаритчас уна ва и муыс öддьöн чорзяс.

Шоччисикö Терентий мунiс пинялiссез дынö.

— Жагöна уджалатö, — шыннялöмöн горöтчис сiя.

— Кыдз жагöна? Ог и шоччисьлö, — обидитчисö пинялiссез.

— Шоччисьлытöг не удж. Тiйö шоччисьтöг верматö ветлöтны, а вöвсö колö шоччöтны.

— И нормасö мийö тыртамö.

— Öтiк нормаыс етша. Видзöтö, ныввез, медбы бöрлань не кольччыны.

— Пондамö и кык нормаöн сетны, а звено одзавны некинöс огö лэдзö.

Терентий серöмтчöмöн ответитiс:

— Молодеццез!

Сёр рытöдз звено уджалiс ыб вылын. Одзланься лун кежö вöлi готовитöма кöдзан машина увтö гектар кык. Терентий меряйтiс синнэзнас этö быдöс керöм уджсö и горöтiс Алексейлö:

— Кад, Алёша, талун гортö ни мунны. Висьтав нывкаэслö.

Ашынас участок вылö кайöтiсö сеялка. Öтлаын ямщиккöт кайис и колхозлöн председатель да партийнöй организациялöн секретарь.

— Вот этö мугöриссез, — баитiс секретарь. — Гöрöм му вылöт öдва коккез лэбталан, кыдз бытьтö зыбунöт мунан.

— Совесть вылö уджалöны.

— Бур удж понда слава мугöриссезлö, — Терентий дынö локтöм бöрын горöтчис секретарь.

— Славасö, пожалуй, эшö нем понда.

— Этадз обработайтöм муыс сетас только бур урожай.

— Раз бура уджаламö, то муыс должен миянлö бур козин и сетны.

— Вöлiм талун öзиммез вылын, кытöн тiйö мульчируйтiтö да керитö подкормка. Öддьöн бур козин öзимыс готовитö тiянлö.

— Мöднёж оз и вермы лоны.

— Мунам, пондöтамö кöдзны.

— Мунам.

Куимнанныс тэрмасьöмöн сибöтчисö сеялка дынö. Терентий кисьтiс ящикö медодзза мешöк. Медбы убедитчыны, бура я сайöвтсьöны сю туссез, председатель и секретарь асьныс пондылiсö кöдзны...

Учöтик звенолö уджавны вöлi некокнит. Терентий тöдiс быд мортлiсь трудносттесö, но эз мун корны отсöт, а надейтчис керны только аслас вынöн. Звеноись некин даже эз и горöтчы, что сьöкыт нылö, а только ответитiсö, кöр Терентий юалiс нылiсь эта йылiсь:

— Мыйлö и звено, керамö асьным.

И уна быдкодь трудносттез пантасьлiсö звенолö кöдзикö, но сiя быдöс вермана вынöн мунiс быдкодь преградаэз и меддженыт кадö кончитiс сев. Участок кöдзисö медбур сюöн. А му обрабатывайтöмöн вермисö гордитчыны. Не му, а пух: вод, кыдз пуховöй перина вылö, и узь.

Терентийлöн керкуыс сулалiс мысок вылын и луннас бура тыдалiс ыббез вывсянь. Но öнi, кöдöрсянь локтiс Терентий, сiйö сайöвтiсö паськыт пожуммез. Терентий чулалiс энö пожуммесö и тэрмасьöмöн мунiс мысок увтö.

Талун сiйö гортас видзчисис инькаыс одзжык сiйöн, что звено уджалiс прополка вылын. Но саясис шондi, мыччисисö шочыника кымöррез, и пондiс пемдыны, а Терентий сё гортас эз лок.

Медбы сёяныс эз сайкав, сылöн инькаыс кадiсь-кадö чапкалыштлiс таганка увтö чаггез да пöлялыштлiс шоммез вылö, медбы эзö кусö.

— О, господи, вермис сёдаки тэнö еныс вайöтны, — горöтчис иньыс, кöр Терентий оськöвтiс порог.

— Не еныс, а ачым локтi. Ваок бы миссьыштны.

— Умывальникас эд эм.

Терентий перыта миссис, пырис керкуö да пуксис пызан сайö.

— Мый жö тэ, быдöс отирыс локтiсö, а тэнö кысь и лыддьы.

— Лыддьы пыр, что ме колхознöй ыббез вылын тырта честнöя, кыдз и быдöс отир, ассим долг.

— Öтнат эд светсö он бергöт.

— Бергöтамö. Тöд одзлань, что ме не öтнам, а мекöт звено, колхоз и быдöс советскöй народ, кöдна честнöя уджалöны Родина благо вылö.

— Отирысся унажыксö тэныт эд озö сетö.

— Сетасö. Мый заслужита, быдöс сетасö. Отирысся унажык меным оз ков, а удж понда отирыс меным сетас. Тэ ветлiн видзöтiн бы участок вылiсь сюэз вылö и тэныт бы эз вöв охота мунны ны дынiсь.

Сiдз иньыскöт баитöмöн Терентий кончитiс сёйны. Судзöтiс полка вылiсь тетрадь, гижис керöм удж, босьтiс книга и пондылiс лыддьöтны, но пырис думаэзнас война годдэзiсь кадö и быдöс лыддьöтöмыс пондiс сорасьны сы юрын.

— А тöдан, Ефимовна, кыдз овсис миянлö фронт вылас?

— Кысь жö меным тöдны, разь только висьталöммезiсь.

― Тэ, шуан, мыля талун дыр эг лок, кин понда ме уджала?.. Помнита, Висла ю сайын öтiк посад понда мийö быдса сутки тышкасимö фриццезкöт, отбивайтiмö кыкьямыс яростнöй атака. Бырсисö миян патроннэз, но посадсö враглö эгö сетö. Мийö öктiмö враглiсь кольöм гранатаэз и асланыс гöстинечöн бöра пантавлiмö виль атакаэсö. Эта посад миян понда вöлi горт. Посад дорйöмöн мийö дорйимö ассиным родина, роднöй семья, роднöй деревня. А окоппезын пукалiкö, ме чорыта тöдi, что врагöс победитам, ме локта роднöй колхозö и бöра понда уджавны, кыдз и войнаöдз, кöдзны сю, дзимлявны да сетны страналö унажык нянь, медбы сiя вöлi эшö богатжык и вынажык. Öнi менам думаэз лоисö быльöн. И кыдз тырмас менам совесть, медбы уджавны умöля колхозын, кöда понда кисьтi ассим вир? Мунö быдлаын пятилетка тыртöм понда пессьöм, а ме понда киэз тэчöмöн уджалыштлыны? Душа менам кыскö сэтчин, кытöн отир, кытöн удж, кытöн мунö пым пессьöм. Ме желайта участвуйтны эта пессьöмын и петны победительöн. Ме желайта талун бурö, а ашын медбы вöлi эшö буржык. Вот мыля сiдз уджала ме сетöм удж вылын, Ефимовна.

— Этадз и ме желайта.

— Адзза и тэ вежöртiн менö?

— Вежöртi.

— Но öтiк желаннё оз тырмы, колö сiйö уджöн, аслат ньылöмöн босьтны, сэк лоас быдöс мый желайтан! Этö быдöс миянсянь зависитö. Некин миянлö счастьесö весь оз сет. Асьным мийö долженöсь завоюйтны, кыдз завоюйтiмö войнаын победа.

Водöм бöрын Терентий чожа ланьтiс. И вот сiя вöтасьö: сы участок вылын быдмис бур урожай. Сiя быдöс сюсö вундiс и мунiс гуна вылö вартны. А вартiкö, кöр пондiсö öшлыны вессэз вылын медодзза гектар вылiсь сю, босьтöм обязательство сьöртi эз тырмы. Кыдз бы эз доказывайт öшлiсь, Терентий мымда вын горöтiс сылö: бöбöтан!

Дрöгнитiс аслас горöтöмсянь Терентий и саймис. Гöгöр вöлi пемыт, лöнь и только стена вылын «ходиккез» ровнöя тачкöтiсö да ылын деревня конецын кылiс поннэзлöн вувтöм.

Одз асывнас Терентий иньдöтчис вöв карта дынö. Очереднöй удж сылöн вöлi — керны подкормка и шогдi вылын. Эта понда сылöн вöлi заптöма птиччöй помёт. Но кыдз буржык сiйö применитны? Если керны кöс подкормка, то вермасö дыр не лоны зэррез и эта подкормка дыр оз сет результат, а медбы сю быдмассэзлö сетны отсöт сразу, колö керны разводитöмöн. И сiя чорыта решитiс керны сiдз.

Подкормка вылö Терентийлöн мунiс куим лун. Не кокнит дело керны растворöн подкормка, киськавны мусö, медбы эз кольччы öтiк кöсiн. И быд ведра птиччöй помёт вылö ковсис километр ылынасянь кайöтлыны 4-5 ведра ва. Но бур вöлi видзöтны эта бöрын, кöр сюыс пондiс пышитны-быдмыны зелёнöй да тшöк.

А неделя бöрын Терентий керис эшö öтiк подкормка назём ваöн.

* * *

Сулалiсö июльскöй медбöрья луннэз. Терентий лунiсь лунö кайлывлiс аслас участок дынö и быд пырись орöтлiс рудзöг шеп да лыддьывлiс туссесö. Дас, кыкдас, витдас, кватьдас и унажык вöлiсö туссез быд шепын. Сöстöм, тшöк да тыра рудзöг кайис мортся вылынжыка. Даже стариккез дивуйтчисö эталö. Кытчö бы эн видзöт — быдлаын кöвьясьö, кыдз море, да гажöтö сьöлöм.

Лунöн одзжык сюэз дзимлявны пондöтöмöдз Терентий участвуйтiс открытöй партийнöй собраннё вылын. Колхозлöн председатель. Епанов докладывайтiс коммунисттэзлö рабочöй план йылiсь.

— Артельын — куим жатка, öтiк лобогрейка. Мийö машинаэзнас вермамö дзимлявны 200-220 гектар. Остальнöй массиввез вылiсь колас вундыны чарлаэзöн. Эна цифраэз мыччалöны, что если только öтiк морт оз понды тыртны нормасö, то урожай пондас лунiсь лунö кольччыны дзимлявтöг и киссьыны му вылö.

Дыр обсуждайтiсö коммунисттэз этö плансö. Вöлiсö быдкодь споррез, критикуйтiсö да керисö ценнöй предложеннёэз. Ны коласiсь öтiкö керис и Терентий.

— Ме думайта, — висьталiс сiя, — машинаэзöн позяс вундыны не 3-4 гектарöн, кыдз сувтöтöма планас, а 5-6-öн. Эта понда колöны только сменнöй вöввез.

Медбöрын выступитiс парторганизациялöн секретарь.

— Товарищщез, ог вермö мийö допуститны, медбы сю дзимлялöмöн колхоз кольччис бöрö. Тырмас миян вын, медбы организуйтны эта вылö колхозниккесö. Ми долженöсь дорны победа. Таво миян лоас лозунг: «Эн выполнит норма — эн мун ыб вылiсь, а выполнитiн, мöдiкö старайтчы...»

Ашынас Терентий первöй кайöтiс участок вылö жатка. Öтлаын сыкöт кайисö ыб вылö и звеноись уджалiссез. Ны чужöммез вылын тöдчис радуйтчöм и позис нылiсь адззыны душевнöй гаж; нiя быд мортлö вермисö бы висьтавны: «Адззан, бура ухаживайтiмö сюыс сьöрын, бура да медодз и воис».

Гажа шыэзöн тырис асывся ыб. Отирлöн, жаткаэзлöн да лобогрейкалöн шумитöм öтлаасисö öтiк орлытöм горалöмö.

Терентий машина след кузя ыб вылöт рознитчисö кольта кöрталiссез. Машинист, пружиннöй сиденнё вылын пукалiкö, качайтчыштлiс öтмöдöрö да гажöна шыннялыштлiс. Дуся да эшö кык нывка перыта кöрталiсö кольтаэз. И Алексей эта кадö весь эз ов. Сiя кöрталöм кольтаэз сувтöтлiс суслоннэзö.

Терентий сё перытжыка пондiс кытшлавны уджалiссез одзöт. А вöввез, бытьтö гажтöмтчöмась удж понда, тэрмасисö мунны одзлань, качайтыштлiсö юррезнаныс.

— Кыдз, ныввез, ештатö кöртавнытö?

— Верман эшö перытжыка. Содззесö только поснитжыка чапкы, а то торйöтiкас вынным весь уна öшö.

Алексейöс завид кутiс, что сiя только суслоннэз сувтöтлö, а оз вунды. Кöр Терентий пондiс машинасö мавтны, Алексей локтiс сы дынö да горöтчис:

— Терентий Меркурьевич, тэ шоччисьышт невна, а ме тэ туйö понда вундыны.

— Шоччисьны некöр, Алёша, колö тэрмасьны.

— Сэк нывкаэслö отсав.

— Öддьöн охота вундыны? Вунды. Только видзöт, медбы кöрталiссез эзö вöтö.

— Соревнуйтчыны понда ныкöт.

И кужöмöн вöввезнас веськöтлiкö, Алексей чожа локтiс Дуся дынöдз.

— Кöрталiссез, соревнуйтчыны кора!

— Давай, давай! — горöн ответитiс Дуся. — Видзöтамö кинлöн выныс унажык.

— Конечно менам, — ответитiс Алексей.

— Одзлань эн ошшась...

Обед кежö ыб вылö кайöтiсö сменнöй вöввез. Терентий чожа вежис мыдзöм вöввесö и бöра кутчис вундыны. Жатка пондiс горавны вились, а вундöм сюлöн ряддэз перыта содiсö. Кöрталiссез тöдчöмöн пондiсö кольччыны. Эта кадö локтiс ны дынö парторганизациялöн секретарь. — Кольччатö, ёрттэз, кöрталöмнас! — горöтiс сiя.

— Вöтам, — чорыта ответитiс Дуся. Кöрталöм площадь перыта пондiс паськавны. Öтiк бокыс кöртассис быдöс ни, и нывкаэз баиттöг мунiсö мöдiк боккезас, кыдз бытьтö важын ни тöждiсисö эта удж понда. Да и эшö бы не тöждiсьны. Эд быдса год чулалiс, кыдз нiя кöрталiсö медбöрья кольтаэз да тэчисö шороммезö. А öнi нылöн киэзныс асьныс корисö уджсö.

Машинист казялiс, что кöрталiссез пондiсö вöтны и быд вынiсь старайтчис пöрöтны сюсö унажык, не шедны позорнöй положеннёö. Сiдз машинист да кöрталiссез коласын часiсь часö вынсялiс социалистическöй соревнованнё. И только рытнас, кöр саясисö шондiлöн медбöрья югöррез да пондiс пемдыны, нывкаэз мыдзöмöсь, но довольнöйöсь керöм уджöн, пуксисö шоччисьны.

— Уджалатö сiдз, что и ошкыны туйö, — шуис Терентий. Эта кадö локтiс бригадир да меряйтiс Терентийлiсь вундöмсö. Сiя даже эз понды веритны аслас лыддьöм вылö и эшö öтпыр проверитiс правильнöя ли лыддис, но вились получитiс сiйö жö итогсö.

— Вундiн талун, Терентий, 6 гектар 15 сотка.

— А кöрталiсö?

— Сейчас и нылiсь меряйта. — И недыр мыйись бригадир висьталiс Терентийлö, что кöрталiссез, Дуся руководство увтын кöрталiсö 3 гектар 38 сотка.

Локтiс Терентий гортас, кöр совсем ни пемдiс. А эшö колiс ветлыны правленнёöдз.

* * *

Барабан бергöтчис кынымиськö, дугдыштiс да вдруг пондiс уннявны. Терентий босьтiс киас медодзза кольта и жагöника „моритöмöн", сюйыштiс сiйö барабан пиннез увтö. Отир, кöдна эта кадöдз сулалiсö кураннэз вылö пыксьöмöн, вöрзисö местасиныс да рознитчисö гуна пасьта. Кольта сеталiссез лэбталiсö кольтаэсö машина пызан вылö. Терентий тэрмасьöмöн сеталiс нiйö барабан пиннез увтö, кöдна, кыдз кытшöмкö ыджыт öмöн, ньылалiсö и конец нылö эз вöв.

Вартiссезöс вевттис бус. Тырисö отир, кыдз не ловья предметтэз, но эта только кажитчис. Ны удж вылö туйис радуйтчыны: инькаэз киэзын, кыдз чачаэз, ветлiсö кураннэз, томыник мужик кокнита лэбталiс роженнез да петкöтлiс стопа вылö.

Вешталiсö машина одзись медодзза вартöм сю, тöлöтiсö да кисьтлiсö мешöккезö. Öшлiсь, кöда отсалiс тöлöтчиссезлö, мешöккесö тэчис вес вылö. А Терентийлöн эта кадö вились ни öксис машина одзас сюыс и сiя сувтöтiс машинасö.

— Уна я вартöмыс? — юалiс сiя öшлiсьлiсь.

— Вит центнер.

— Кыдз сортируйтöм?

— Öтiк ёгок он адззы.

— Складын ась приходуйтасö и ыстасö месянь страналö подарок, — наказывайтiс Терентий сю кыскалiсьлö..

— Да эд складас тшöктасö кисьлыны, а сэтчинсянь вöлись ыстасö.

— А тэ ачыт... ачыт кыскы Белоевоöдззас, абу эд ылын.

— Сiя сiдз, но лэдзас ли кладовщикыс?

— А тэ висьтав: «Звено ыстö подарок страналö. Терентий корис, медбы иньдiсö часöт жö».

— Висьтала, кыдз тшöктiн.

— Рытланяс ась унажык вöввез лöсьöтасö, кыскыны сюыс лоас.

— Обязательно висьтала.

А рытнас правленнёö бöра чукöртчис отир. Мужиккез унажыксö куритiсö и öтамöдкöт оживлённöя баитiсö. Парторганизациялöн секретарь юалiс Терентийлiсь:

— Уна я вартiн талун?

— 40 центнерся унажык.

— Кыным гектар вылiсь?

— Гектарресö эг лыддьö. Думайта вартыштны быдöс, а сыбöрын и лыддьыны мымдаöн гектар вылiсь усяс.

— Туяс и сiдз...

— Быдöс кыскисö вартöм сюсö? — юалiс Терентий.

— Не. Только 15 центнер.

— Кыдз сiдз? Мыля?

— Задержка неыджыт лоис. Эз ештö клейтон пыр лэдзны.

— Ай-яй-яй, дыш кучиккез, неужто вартöмсö эз вермö тöлöтны.

— Ашын сетсяс быдöс, эн беспокоитчы.

― Кыскыны колö. Тэрмасьöмöн колö сетны. Ме сайын дело оз сувт. Вартны понда 50-69 центнерöн, но медбы государстволö мунiс орöттöг.

— Организуйтам, медбы сетны орöттöг, — решительнöя висьталiс секретарь. — Этö миян задача.

Ашынас, кöр эшö пондöтчис лэбны заря, гуна вылын пизис ни удж. Колхозниккез старайтчисö мунны одзжык и вартны эшö унажык.

Терентий бöра сулалiс машина дынын и вартiс орöттöг, только сувтöтлiс, медбы дзимлявны сю да мавтны машинасö. Вотьваöн вотялiс сы чужöм вылiсь ньылöм, но сiя эз обращайт эта вылö вниманнё, эз чувствуйт мыдзöмсö.

Рытнас öшлiсь лыддис, уна я гуна вылiсь кыскöма вартöм сюыс, и гажа голосöн горöтiс:

— Слава вартiссезлö! Вартiт 48 центнер.

— Медодз машинистыслö!

— Ашын миян бригада вермас сетны страналö 600 пудов нянь, — ошшасьöмöн баитiс öшлiсь.

— Бöра задержкаэз лоасö?

— Керамö, медбы каждöй морт миян моз жö уджалiс.

— Правильно. Оз кö пондö тэрмасьны, заставитам.

— Отирыс миян оз дышöтчы, только висьтавны колö.

— Но и семьяас пö не уродтöг, эмöсь и отир, кöдна думайтöны только ас йывсиныс. Вот сэтшöммес и мешайтöны.

— Мешайтöны... А мийö нылö керамö сiдз, медбы эз мешайтö... Да, да, медбы эз мешайтö. И пондам уджавны эшö буржыка. Сорок восемь центнер — эта абу предел.

― Этö мийö докажитiм ни.

Колхознöй ыббез весьтын кадiсь кадö явитчывлiсö блед кымöррез. Августовскöй шондi сетiс мулö ассис медбöрья шоныт югöррез. Воздухын чувствуйтчис запах сюэзлöн, вöрлöн, кöда сулалiс лунланись керöс дорöт. Колхозниккезлöн быдöс думаэз вöлiсö иньдöтöмöсь сы вылö, медбы не сетны сюлö киссьыны и аскадö сетны страналö нянь. Лöнь вöлi эта кадö деревняын. Разь только поснит челядь да стариккез, кöдна эзö вермö уджавны, петавлiсö асланыс керку öшын увтö, медбы шонтiсьыштны шондi морос вылын. Ыб вылын и вартанiнын мунiс боевöй удж. Каждöй старайтчис босьтны первенство, лоны медодзын, тыртны не только öтiк норма, но и кыкö, куимö. Быд уголокын öшалiсö «молнияэз», «боевöй листоккез», кöдна славитiсö бура уджалiссезöс и, кыдз солдатскöй штыкöн, бытшкалiсö бöрлань кольччиссезöс. Лунiсь лунö кузь обоззэзöн колхоз кыскалiс нянь. И эта уджын колхозниккезлöн чувствуйтчис ыджыт гордость. Ны телегаэз вевдöрын павьялiсö лозунггез, флаггез. Коммунисттэз и комсомолеццез эта уджын вöлiсö медодзись ряддэзын. Нiя öдззöтiсö колхозниккесö, лэбтiсö нiйö победа дорöм вылö. И этö боевöй удж нуöтiкö, молодёжь часто пондöтлiс сьывны песняэз, кöдна горалiсö ыббез весьтын, тыртiсö говкöн матiсь вöрсö.

«Аскадö тыртамö страналö нянь сетан план» — эта лозунг вöлi колхознöй фронт вылын вына оружиеöн и каждöй старайтчис пуктыны быдöс вын, медбы тыртны колхозлiсь этö первöй заповедь.

* * *

— Мый, пожалуй пондöтамö собраннёсö? — юалiс партийнöй организация секретарьлiсь правленнёлöн председатель.

— А быдöнныс ни чукöртчисö?

— Ме сьöртi быдöнныс. Öтiк простöй места абу, а кин сёрмис — ас вылас ась пеняйтö.

— Проверитö.

Отир не только пукалiсö, но и етша вöлi местаыс, медбы сулавны, быд уголокын вöлi морт, даже ветлыны колас эз кольö. Эз вермö локны только сторожжез да колхозницаэз, кöдна уджалöны фермаэзын. Общöй собраннё пондöтчис. Председательствующöй сетiс кыв колхозiсь председательлö.

— Дона ёрттэз! — пондöтiс председатель. — Медодз разрешитö меным поздравитны тiянöс сю дзимлялöмын да няньсетан план тыртöмын победаöн. Получитiм таво урожай неумöльö. Нянь государстволö сетiмö срокöдз. Вермам гордитчыны, что сетiмö планся унажык 5000 пуд.

Председатель особöя сувтлiс Терентий звеноöн керöм удж результаттэз вылын. Эз вунöт и ошкыны бура уджалiсь колхозниккезöс. А медбöрын правленнё нимсянь объявитiс нылö благодарность да лыддьöтiс кинлö кытшöмöсь присудитöмöсь заседаннё вылын премияэз.

Председатель бöрын сетiсö кыв колхозiсь медбура уджалiсьлö — Терентий Меркурьевичлö. Терентий кыдз öшис кытшöмкö пространствоö, дзар керис колхозниккез чужöммез вылö. Сы спина вылöт пондiсö котрасьны поснитик кöдзыввез, а кымöс вылас мыччисис ньылöм. Эта выступленнё кежö сiя бура лöсьöтчис, мöдiс висьтавны быдöс, мый сылöн öксис сьöлöм вылас, но öнi чувствуйтiс, кыдз мыйкö мешайтö. Мыйсянь, кыдз буржыка пондöтчыны? — думайтiс сiя. — Мый йылiсь висьтавны? Но бöрйыны вöлi некöр. Сiя матöжык сувтiс гöрд материалöн вевттьöм пызан дынö, видзöтыштiс секретарь вылö да пондöтчис дрöжитан голосöн:

— Ёрттэз колхозниккез! Разрешитö меным висьтавны кынымкö кыв. Кыдз ассис зонöс быдтiс менö советскöй власть. Кыдз ассис зонöс петкöтiс сiя менö нуждаись и великöй югыт туй кузя иньдöтiс зажиточнöй оланö. Великöй Ленин да Сталин сетiсö миянлö этö колхознöй свободнöй олансö. Колхоз ме понда — менам горт, менам счастье. Ме эшö окопын пукалiкö мечтайтi сю быдтöм йылiсь, быд тальöм шеп понда ыстывлi фашистскöй сьöлöмö пуля, быд лыйöмлö лыйлi куимись, витiсь, дасiсь. И вот тырис менам окопнöй дума. Вились ме паськöтi ассим пельпоннэз аслам колхознöй ыб вылын. Ась шуöны — Терень природнöй мугöрись. Ме гордитча этöн. Да, гордитча. Локтiмö таво бур результаттэзöдз. Слава колхозниккезлö, что нiя честнöя, упорнöя, настойчивöя уджалöны и тöдöны, что ны уджсянь быдöс зависитö одзланьсяыс. Мыйсянь миян колхоз богатсялö? Богатсялö колхоз сiйöн, что колхозниккез коласын чувствуйтчö дисциплина, правильнöй руководство, правильнöя иньдöтлö миянöс партийнöй организация, кöда адззö одзлань.

— Унажык аслат удж йылiсь, — кылiс голос отир колассянь.

— Уджыс аслам абу. Эм öтiк öтласа удж, кытöн меным усис честь быдтыны вылын урожай. Ме öтлаын тiянкöт уджалi, эг вöв мöдiк мирын, öтiк ыб вылын вöлi, а получитi урожай богатöйö. И некытшöм секрет сэтöн абу, эм только желаннё. Колö одзлань думайтны, фантазируйтны и аслат киэзöн жö керны. Быдöс секрет менам сыын, что мусö звено обрабатывайтiс виль агротехническöй методдэз сьöртi, сетiс колана питательнöй веществоэз да бура ухаживайтiс сю быдмассэз сьöрын.

Андрей, кöда серавлiс Терентий затея вылын, öнi немымда спокойнöя эз вермы пукавны. То öт пельсö лöсьöтас, то мöдсö, сувтыштас да бöра пуксяс, дивуйтчöмöн дзарнитас бокас пукалiссез вылö.

— Тэ эд не катша, эн чеччав öтмöдöрö, а кывзы мый баитöны, если абу охота, пет, — лöга баитiс сы бокын пукалiсь колхозница.

— Кыдз сiдз абу охота? Кылат? Быдöс правда баитö. — Öнi Андрейлö öддьöн охота вöлi вöвны бы Терентийыс местаын.

— Получитiс сiя 150 пудöн быд гектар вылiсь, — шуис Андрей. — Этö рекорд миян колхозын. Локтан годö ачым понда пессьыны эта понда. Кылат? Ачым пета ыббез вылас. Стыд миянлö, позор кольччыны.

— Да, ме получитi 150 пудöн быд гектар вылiсь. Эта, конечно, достиженнё, но сувтчыны эта вылын ог думайт, локтан годö понда пессьыны сы понда, медбы получитны не 150 пудöн, а 200-ся не етшажыкöн.

Уна колхозниккез эшö баитiсö Терентий Меркурьевич бöрын и каждöйыс, кыдз присягаöн, кончайтлiс ассис баитöмсö:

— Лоа самöй активнöй участникöн вылын урожай понда пессьöмын. Сета кыв.

Заключительнöй кыв босьтiс парторганизациялöн секретарь Егор Львович. Сiя висьталiс:

— Ми радöсь кывны талун бур результаттэз. Серьёзнöй успеххезöдз мийö локтiм сiйöн, что колхозын чорыт дисциплина и правильнöя организуйтöма удж. Быд колхозник чувствуйтiс ответственность аслас удж вылын. Этö медперво. Но оз туй, ёрттэз, вунöтны, что эмöсь эшö миян коласын сэтшöм колхозниккез, кыдз, шуам, Гаврило Семёнович, кöдна уджалöны умöля, оз тыртö нормаэз. Правильно баитiсö колхозниккез, что миян успеххез вермисö бы лоны эшö ыджытжыкöсь, если бы каждöй морт уджалiс честнöя да бура. Терентий Меркурьевич висьталiс миянлö, что сы уджын некытшöм секрет абу. Этö правильно. Сылöн звено сетiс миянлö урок. Примерö босьтамö этö и пондам уджавны сы моз жö. А вылын урожай получитöм понда не предлагайта представитны сiйö СССР Верховнöй Совет Президиум Указ сьöртi правительственнöй наградаöн наградитöм вылö.

— Правильно, правильно!

— Заслужитiс!

Отир вöрзис местасис, пондiс шумитны, баитны, поддерживайтны висьталöм предложеннё.

— Чöлö, чöлö, колö голосуйтны.

— Кытшöм эшö голосуйтны, гиж единогласнöя.

— Не-е, правилоэз сьöртi колö.

— Кытшöм эшö правилоэз, кöр быд морт этö желайтö.

— Сёжö лэбтö киэзнытö, лыддьыны колö.

И кыдз красноармейскöй штыккез лэбисö киэз. А кöр юалiсö «кин против», отир лöньсис, шы эз ло. Öтiк ки эз лэбтiсь.

Кад вöлi ылын ни ойшöр саяс, кöр колхозниккез петiсö правленнёись. Öтöрас эшö нiя оживлённöя беседуйтiсö и жагöника иньдöтчисö горттэзаныс. А нывкаэз да зонкаэз дзульзисö, шутитiсö, сьылiсö частушкаэз, песняэз. Только асывланяс лöньсисö нылöн гора голоссэз.

* * *

Март 23 лунö 1948 годö областнöй газета «Звезда» публикуйтiс СССР Верховнöй Совет Президиумлiсь Указ миян областись вылын урожай понда отирöс наградитöм йылiсь. Эта Указын вöлi и Терентийлöн нимыс. Сiйö наградитiсö трудовöй Краснöй Знамя орденöн. Ыджыт гажöн панталiсö этö Указсö колхозниккез, а Терентий, кöр лыддьöтiс асьсö газета страницаэз вылiсь, волненнёсянь дрöжитан киэзöн каттис газетасö да пуктiс öтлаö книгаэзкöт.

«Мый ме эшö верма керны эта вниманнё понда? Менам керöмыс етша. Ог позорит ачымöс партия да правительство одзын. Эшö буражык уджавны понда» — думайтiс сiя и петiс соседдэз ордö баитыштны да советуйтчыны.