Вöр кывттöн

«Иньва», 1995

Тулыс эта годö локтiс кыдзкö гусьöн, одзжык и видзчисьтöг, и, нельки, не аскадö. Шондiыс бöбалыштiс вазьöм лымнас, рышкöтыштiс столаэсö и кушöтiс ыббесö. Сылöм лымыс боргис-лэдзчис лажмытiннэзас, шедiс саймöм юэзас, пöльтiс нiйö, сетiс вынсö да петкöтiс береггезсис, паськöтiс видззез вылöт и осьтiс туйесö веськыта, орддис кöджжесö, тэрмасис кылавны. Не быд годö овлö сэтшöмыс, природаыс только кадiсь кадö мыччалö ассис вынсö, и отирыс, учöтсянь пöрисьöдз, быдöс колхозниккес петiсö деревня бокись вылын берег вылö видзöтны стихияыслiсь гуляйтöмсö. Юыслöн ыждöмас уйис быдöс, мый вермис павкöтны ванырыс: йы пласттэз коласын вöлiсö керрез, остожьяись шедтöм майöггез, потшшез, жугдöм дöмöттэз, сякöй пöвторыс и быдöс сiя, мый вермис öшшыны ва вылас, уйис саридз ладорас.

— Тулысся ваыс миянлiсь бöрнымöс весöтö, — ас коласаныс баитiсö мужиккес. — Му вылас керö порядок.

— А одзжык разь эттшöм бардакыс вöвлi? — пöрись старикыс куритiс ассис табаксö да гыжьялыштлiс юрбöрсö, мыйсянь киссьöм кепкаыслöн козырёкыс легыралiс ныр вевдöрас. — Кералöм вöрсö мымда адззылан только городланьö кывтiкас. Тöждiсись козяиныс арпонас быдöс ки увтас босьтас, ньöралöм майöггэсö öтлаö тэчас, стожарсö надёжнöй местаö пуктас и потшсö дзимлялас — мöд годас быдöс пригодитчö. А öнi вились-вильö кералöны.

— Дак эд öнi колхозын уджаламö, — серöмтчöмöн висьталiс сылö том, Прохор пиян, Митька. — Ежели арсянь керны заптассö, то тулыснас трудоденьсö немöн лоас шедтыны. Весьолöмсö кин донсьöтас? Ваыс вот кылöтас мöймуся керöмсö и таво лоас вились удж, виль трудодень.

— Велалiтö öтiк местаас тальсьыны, — лöга горöтчис старикыс да чурс сьöвзис бокас. — Мыччалатö бы, что тiйö уджалатö. Ох-хо-хо, кытчö только локтатö? Чожа вешьянтöг кольччатö. Бурсö тiянсянь нем видзчисьны. Вöлiтö бы менам зоннэз, дак велöтi вот этна киэзöн!

Старикыс нюжöтiс невеськалана чуннесö да мыччалiс детинаыслö гаддеза кырыммесö, кöднаын вöлiсö и бура тöдчисö чукыррез. Сiя мыдзöм синнэзöн дыркодь видзöтiс невеськыт чуннез вылас да осудитöмöн висьталiс:

— Уджалiссез тiйö дышöсь быдматö, нявда öтiк. Одö думайтö одзлань овны.

— Дак эд сiдз начальствоыс велöтö, сiя думайтö. Миянлö жö мый висьталасö, сiйö и керамö.

— Начальствоыс — тулысся лым, а тэнат мыйла баклашыт?..

Ыджыт ваыс шумитiс-бергалiс и чулалiс, пырис бöр аслас береггезö. И пондiс кывтны городыс понда кералöм вöрыс. Перво тэрмасьтöг, жагöника лэдзчисö öткаса керрез, кряжжез да чуркаэз, кöднiйö дзескыт местаэзас туйдöтлiсö кывтöтiссес, а сэсся Кува юыслöн Мечкоркöт öтлаасьöмас вöрыс пондiс мунны сваль, орöттöг и эз тыдав, кытöн сылöн конецыс. Вöрыс татшöтiс, гыжьялiс небыт берегсö, гудыртiс васö и лоис бур сакасьны. Мужиккес гамузöн бöра тэрмасисö берег дорас, медбы кыйны черисö. Тулыснас эд стрась чöскыт чериваыс. Эз терпитсьы и инькаэслö, медбы не мунны öтлаö.

Мечкор деревня увдöрас сэк вöлi Строганов графлöн важ мельница, кöда створ дынö быд тулысö керлывлiсö плашкоттэз, медбы вöрыс кывтiс кышасьтöг. И колö жö лоны сiдз, что эта створö поперегасис вужья да гырись уввеза кытiськö нетшкöвтöм кöз, сувтöтiс ассис шпынсö и пондiс кутавны быдöс уянсö. Кывтан керрес падмалiсö, чукöртчисö, сувтчисö, тойласисö и перво пырисö увтас, а сэсся öштiсö выннысö и пондiсö муркöтны. Лоис затор. Десятник Матвей Турöпов, кöр казялiс этö, чепöссис мельница бокас керöсок вылын сулалан керкусис да кинитчис деревнясис мужиккес дынö и корис нiйö мездöтны заторсö. Перво мöдiс сетны сто руб, а сэсся кыкись унажык, но некин эз кутчись. Полöмныс петiс да и уджыс вöлi неетша. А заторсö кольны сiдз эз туй — сыын быд часö вöрыс зэлалiс, керресö сюйис топытжыка и керис уджсö не öтiк лун кежö. Турöповыс думайтiс-керис да иньдöтчис посадас, кытöн чожа адззис кынымкö мужикöс и баитчис мынтны 250 руб, мездöтасö кö заторсö.

— Кытчöдз эшö эгö сöтö оча ки, колö баитчыны и магарыч йылiсь, — висьталiс паськыт корпаа Гришка да мигнитыштiс дружоккеслö. — Сiдз важынсянь мунö. Деньга деньгаöн, а магарычыс торйын. Мийö корамö четверть вина. Донсьöтчыны огö пондö. Делоыс простöй — тулысся ваас верман и кöтöтчыны, а сiя эд не шоныт. Дак кыдз, согласитчан?

— Кытчö инö воштiсян, ась уж тiян моза лоас, - шынньöвтыштiс десятникыс да нюжöтiс кисö Гришкаыслö, кöдiя клопкис паныт ассис паськыт долоньсö, и сiдз баитчисö подряд йывсис.

— Мийö часöт ветламö горттэзö и öксямö этчö жö, лавка дынас, — мича чужöмöн шыасис Гришкаыс да висьталiс друггеслö: — котрасьö да лэчыт черрезнаныт локтатö. Вöрöтчö, тувдöм яйез!..

Джын час эз чулав, кыдз куимнан мортыс локтiсö уджалан паськöмöн и иньдöтчисö деревняас.

— Зимогоррез, мый юррезнытö öшöтiтö? — гажа шыöн юалiс Гришкаыс да нёджжöвтiс друггес вылö, — Этö эд не Чердыньöдз мунны. Часöт локтамö и видзöтчамö. Сякöй заторыс овлö. Вуджсö колö адззыны.

Кöр нiя локтiсö деревняас да пуксисö шоччисьыштны мельница бердсис пос вылас, тöдвыланыс вöлись усис, что гезсö эзö босьтö гортсиныс.

— Эдö тöждö, часöт ме вая сiйö, — чепöссис местасис Турöповыс да котöртiс изiссес понда керöм керкуокас и кынымкö минута бöртi петкöтiс не öтiк гез.

— Конеццесö гöрöдалö посiсь кер бердас, — висьталiс Гришкаыс и чеччис местасис. — Кöдалöн сьöлöмыс вынтöм да полö — верматö кöртасьны. Ме даки ачымöс ог арканав.

Мужиккес лэдзчисö затор вылас да смекайтчисö, кытi да мый колö керавны. Ваыс шумиттöн мунiс прудйöм вöр коласöттяс. Сякöй пуыс вöлi сюйöма кыдз горö, кутчись кöть кöдöрсянь.

— Öммезнытö мый паськöтiтö, — шумсö вермöмöн рявöстiс Гришкаыс да вазгис чернас увья кöз кузяс. — Синнэз полöны, а киэз керöны. Пондöтö керавны улiсь керресö, кöдна пыкöталöны!

Мельница пос вылас öксис уна отир. Морттэсö вайöтiс сэтчö заторыс, кöда лэбтiс прудсис васö да пондiс паськöтны вöрсö лажмытiннэзас, сюйны тыэзас. Десятникыс котрасис пос вылöттяс да тэрмöтiс мужиккесö, кöднiя уджалiсö сiдз, что только черрес триньöтiсö. Нiя эзö жалейтö выннысö, кералiсö, кытшöм шедас керыс да зэлалöм чашьяыс. Ваыс ыджыт вынöн пыкис вöрсö, и быд орöтöм бöрын кылöмöн муркöтыштлiс. «Зэлöтö вöрсö, — думайтiсö уджалiссес. — Колö шупытжыка вöрöтны киэз, а то керасьöмыс лоас весись.»

Гришкаыс пуксьöмöн кералiс увья кöзсö, кöдасянь пондöтчис заторыс. Но вот пуыс ризьнитiс, ваыс булькнитiс и мужиккес кинитчисö лöсьöтöм геззэз дынас, но Гришкаыс сё кералiс пондöтчöм чегны пусö, кöдiя эшö öтпыр ризьнитiс да увтсис чапкис мезмöм ванырсö, кöда кватитiс кералiсьсö да пöрöтiс оссьöм гудыра ва пытшкас. Юрыс саясис. Пос вылас отирыс шай-пай лоис, кыдз бытьтö тувдiс осьта öмнас. Быдöнныс видзöтiсö бульчиктан ва вылас, кытчö саясис мортыс. Деревнясис инькаэс вашкисö: «Господи помилуй. Енiньöй батюшко, пресвятöй богородича, эдö чапкö мортсö, а кыскö берегас.»

О, кытшöм жагöна кыссисö минутаэс! Етшныс пондiс орны ни, кöр Гришкалöн юрыс мелькнитiс гублян дорас, кытöн ваыс бергалiс паськыт кругöн да чукöртiс керресö.

— Пыжсö сетö, пыжсö! — горöтлiс десятникыс. — Пыжöн мунö сы дынöдз!

Сэк жö кынымкö мужик уськöтчисö берегас кöрталöм пыжжес дынö и лэдзисö ва вылас кык пыж. Кöдзыт ваас уялiсьыс эта кадö кутчисис кывтан кер бердö да öшöтчис сы вылö. Сiя кытшöвтiс гублянсö мöдпырись ни, кöр сы дынö ештiс пыжыс, и Гришкасö лэбтiсö ас дынаныс. Сiя эз ни кыв кöдзытсö, киэс вугмисö и быдöс пондiс тувдыны, но öт мужикыс, кöда эз сын, нöитiс уялiсьыслiсь вывтырсö. Пос вывсис отирыс котöртiс берегас да сувтiс сэтчин немöй кучаöн и видзчисис. Только десятникыс кинитчис лавкаас чожажык небны винасö. Эд вöрыс мезмис да пондiс кывтны ва кузяс, да и мортыс эз пöд. Ась юöны, деньгаыс эд не аслас.

Кöр Гришкаыс кайис берег вылас, десятникыс локтiс мужиккес дынö да дрöжитан шыöн висьталiс:

— Ноко кисьтö сылö быдса стакан да ась юö. Да тэрмасьö, а то сiя кынмö.

— Ва пытшкас эг пöд, дак öнi му вылас ог ни кöзды, — пиннезнас сяткöтöмöн горöтчис Гришкаыс, кöда вылiсь дзулльöн лэдзчис ваыс. — Да перытжыка инö кисьтö шонтiсян торсö. Э-эх, шапкаö абу, жаль, да эттшöм черöс прокутитi. Сэтшöмсö сэсся он адззы. Бур черыс эд мужиксö питайтö. Ме сiйöн ох-хо-хо мымда уджсö кери! А вот шапкатöг кöдзыт. Кинлiськö колас корлыны. Видзöт тэ, и киэз стакансö озö видзö бы.

Кутiс стакансö кыкнан кинас да ровно öтiк павкйöн и юис, а сэсся бергöтчис Турöповыс дынö и висьталiс:

— Деньгасö пукты бочка вылас. Кисьтö сылö, мужиккез! Ась юас миян здоровье понда.

— Эн тöждiсь, Григорий, часöт жö мынта. Некытшöм басни абу. Öнi эд вöрыс кывтас городöдззас. Зэлыт местаэс сэсся абуöсь. А то чуть беда эз шогмы.

— Мый-либо кинлöкö лоас, а коми-пермякыслö нельки вöрдядьыс отсалö. Ва пырйöттяс мунас и нем сылö оз ло. Часöт гырк калитчас и нельки öтпырись ог несйы.