Мокася морт

Ванька Пестеров, интеллигент, Яков Ивановичлöн зон, учöтсянь быдмис ассямаöн. Нельки айыс эз вермы висьтавны, кытшöм увтырö сiя мунiс: воныс сылöн, Трöпимок, гортас кыдз бытьтö оз и тöдчы, а сiйö только син вылын и колiс видзны: то ли мыйкö жугдас, или жö ывсöтас, а сэсся суськисяс. Пыр кышасис, кытчö сiйö озö корö, няргис мамыс гöгöрын, кыдз сёйтöм кага. Пызан саяс бöрйöмöн шеверкнитас ыджытжык шöрöмсö и быдöннысö одзалас паньыштны.

— Тэрмасьö быдмыны, — сералöмöн баитiс айыс. — А тэ, Трöпимок, шырся гусьöнжыка сёян, сiйöн и умöля быдман. Мортсö, кыдз вöлöс, сёйöм сьöртi тöдöны.

И Ванька велалiс айыс ошкöм дынö сiдз жö, кыдз кага мамыс морос бердö. Сылö пондiс ковны вонысся басöкжык йöрнöс-вешьян, медбы свиттялiсö ботинкаэз, медодз сетiсö краситöм кольтьсö, ыстiсö Трöпимоксö, а не сiйö карчйöрас летны ёгтурунсö, одз асылö вашöтны мöссö поскотина вылö. Кöр Трöпимок керис кысйöтöммесö, Ванька будзгылясьлiс шондi морос вылас. Школаын велöтчыны сылö эз гленитчы, и öтпырись айыс бытшöмика ременьöн сiдз вурис небыт местасö, что эта бöрсянь неделя ветлöтiс бöрсö гыжьялыштлöмöн, и сэсся эз понды ваявны двойкаэсö. Сiдз сiя велöтчис шöрöт школаын, и некытшöм сылöн план эз чуж.

— Пондан велöтчыны институтын, — висьталiс айыс. — Нем мотырасьны городöттяс.

— Да эд сьöкыт лоас сэтчин, — вишкыштiс нырнас зоныс.

— Кытчöдз ме ловья, пондан велöтчыны.

— Мый вылö понда овны?

— Стипендия лоас.

— Эп-пеп, сымдышка вылас.

— Не пан-барон, колас унажык — дак шедтан.

— Институтыс эд не шабашка, сэтчин велöтчыны колö.

— Кучикыт оз кульсьы, кöть и велöтчикат уджалыштан дак.

— Ог тöд, мый петас.

— Оз пет кö, сэк нагайкалiсь кöрсö пешлан. Ванькалöн тöдвылас вöлi айыслöн ремень кöрыс, и эз понды паныт горавлыны. Дышöтчöмöн, но мунiс велöтчыны. И сэтчин олiкас эз чулав месяц, медбы сiя эз пырав айыс кошелёкö, гортсис эз нуöт сёянсö.

— Стрась кытшöм сьöкыт велöтчыны, — норасис сiя гортас. — Семестр локтö, дак бöрпон некöр гудйыштны, ойбытöн пукалан. Эта институтыс быдöс ни менчим кыскис, мылаöс бырöтiс. Ог тöд, верма ог велöтчыштны.

— Чапкыны эн лысьт и думайтны, — лöга висьталiс айыс. Сiдз, грехыскöт шöриöн, Ванька петiс инженерöн, локтiс гортас и кутчисис строитчан организацияö, пондiс киэзнас макайтны öтöрö да мöдöрö, чапкавны ассис иньдöттэсö öтiкö мöдiкся лöгжыкö.

— Ме не сы понда велöтчи, медбы котрасьны кыдз простöй уджалiсь, — сералiс сiя аслас отделын. — Только бöбöв морт вермас сiдз уджавны. Менам жö правоэс мöдiкöсь — иньдöттэз сетавны да видзöтлыны, кыдз нiйö тыртöны. Колö лоны чорыт мортöн и тöдны ассит местасö, а то недыр и пöрмыны кирпич тэчисьö.

Нильыг налимöн сiя пырис организациясис юралiссез коласö, нылiсь баитöмсö кывзiс осьта öмöн и велöтчис керны только ны моз. Кöр сiйö видлiсö, то ассис лöгсö пондiс öштывлыны бригадиррес вылын. Аслас дыш мывкыдöн Ванька Пестеров учöтсянь велалiс кывзыны сiйö, кöдалöн эм выныс, кöда сулалö сы сьöртi вылынжыка, кöдалöн властьыс унажык. Ны одзын сiя полiс аслас места понда и керис быдöс сiдз, кыдз висьталасö. Петас кö стройка вылö, то чегласьö, кыдз кöс сартас, отирыскöт баитны оз куж, а только горöтлö. Да кöть бы бур кылöн. Сы лексиконын сэтшöм кыввес тöдчöмöн чинiсö. Унажыксö пондiсö кывны мать да перемать. Стройкаэз вылын уджалiссес ас коласаныс нимтiсö сiйö «кычанöн», кöда вувтö, кöр колö и оз ков.

— Меным бы стройка вылас машина, — кыдзкö горöтчис сылö бригадир Петухов. — Ме бы ваялi сiйöн быдöс, мый колiс, а то часто весь сулаламö.

— Пондан эшö легковöйö корны да гöняйтны городöттяс. Мый сэк пондас диспетчерыс керны? Порядок эм порядок, кыдз начальствоыс сувтöтiс, сiдз и лоас.

— Кадсö весись уна öштамö.

— Кадыс миян быдса год.

— Но эд планыс оз тыр, и уджалiссес шедтöмас уна öштöны.

— Эта понда начальство тöждiсьö.

— Мыйлö но сэк тэ сувтöтöмыт, не стулсö ли только нырыштны?

— Этö уж не тiянлö тöдны.

Пестеров казявлiс, кин сыкöт басниас вермасьлö, и дыр видзлiс тöдвылас, а лöсялöм кадö кыйыштлiс сiйö, медбы горбсö эз лэбтав. Ачыс жö лыддис, что кадыс уджалö сы понда и метитiс пуксьыны управленнёись начальник местаö. Сэк вöлись думайтiс олыштны. А кытчöдз ештiс только гöтрасьны и айыслiсь пондiс корны пай — мöд керкусö, кöда вöлi вильжыкыс, ёнжыкыс.

— А томжык вонытлö мый кольччас? — висьталiс сылö айыс. — Пöрисьжык воныслö колö аслыс строитчыны. Отирас век сiдз вöвлi.

— Тiйö эд вексö одö пондö овны, сылö кольччас эта керкуыс, а меным таво колö овны. Ме мöдпöв лэбта керкусö виль местаö. Эстöн и сiдз дзескыт.

— Вильмоза бы олан, дак виль керку тшуп, тэ жö инженер.

— Тэ ай и должен меным отсавны.

— Кöр жö тэ пондан мынтны босьтöм долгсö?

— Коли долг йылiсь баитны, то меным эшö колö тысяча руб, медбы небны машина. Ачыт думайт, кытшöм ме инженер машинатöмыс? Ковсяс кöшельтö личöтны.

— Кысь менам лоас сымда деньгаыс?

— Жмотас эн пöртчы, а то ачым босьта. Няньсö небны эшö уна кольччас.

— Розоритны менö мöдан?

— Чидны кö пондан, дак умöльжык лоас. Ме нем одзын ог сувт.

— Тэ пöрöтан менö кок йылiсь.

— Лешакыс тэнö пöрöтас, дыр эшö дзуртан.

Ас пондаас Ванька лоöма одзлань видзöтiсьöн. Ордчöн олiсь соседыслöн вöлi важся огородеч, и сiя горисполком пыр торйöтöма сiйö да босьтöма сэтчö жö участок, медбы лэбтыны керку. Позис только дивуйтчыны, кытшöм чожа сiя разис айыслiсь керкусö да керис виль местаас аслыс оланiнсö. Строителлесö уджöтiс городсис, аслас организацияись. Но и сэтöн эз вермы нiйö не бöбöтны: быдöс кöсйöм деньгасö эз сет. Мужиккез жебгыштiсö ас коласаныс да сiйöн сорöн и мунiсö. А Ванька иньыскöт петiс аслас керкуö овны. Но айыс голя бердiсь эз мездöт петлясö и кöбыртiс сылiсь тысяча рубсö.

— Менам кероккес кольччисö, — висьталiс сiя локтöм гожумнас айыслö, — а огородечсит столббес сiсьмöмась, колö вежны. Ме организуйта этö делосö.

— Важын ни думайтi да сё вот ог вермы.

— Менам öтiк лунö шогмас.

И керис, только виль столббес пырисö айыс йöрö чуть ли не метр ылынаö.

— Важ ямаэз местас ме садита ягöда пуэз, — висьталiс сiя айыслö.

— Рябинпусö кöть бы межаас колин.

— Тэ, пöрись, сералан ли мый ли, менам жö челядь пондасö быдмыны, а тэныт старухатö не вердны жö шöма рябинанас.

— Вонытлöн, поди, семья жö лоас.

— Этö бабаö эшö надвое висьталiс.

— Мыля только ас пондат думайтан?

— Мöднёжа оз туй öнi овны.

Ванька рожа вылас вöлi неумöль и пасьтасьны пондiс бытшöма. Сылöн лоисö гажöтчись друггез, кöднакöт позис чулöтны шоччисян кадсö. Сьöктöм инькаыс пукалiс гортас и некытчö эз петав. Жöникыслö только этiя и колiс. Сiя сёрöн вовлывлiс гортас, ывсöтчис бригадаэслöн кык сменаын уджалöм вылö, а дынсяняс сё частожык пондiс вачкывлыны вина дукöн.

— Кирпич тэчиссеслöн мастеррес тай юкталiсö, — инькаыс юасьöм вылö баитiс сiя. — Не бöбöв эд ассим деньгасö видзны. А мастеррескöт колö овны. Нiя вермасö и менö пезьдöтны шоныт местасис. Кытöн колас, дак нылö отсала, а мый меным колö, то нiя керасö. Вот и мичуринскöй огородечас мöда керкуок керыштны. Деньгасö материалыс понда ог думайт видзны, плотниккеслö мымдакö сета. Мöдан бы овны, дак кужны колö бергавны. Вот сiдз вот, кöзяйкаок. Вежöртiн? Ов да нем понда эн тöждiсь. Ме сайын лоан, кыдз стена сайын.

— Гажтöм жö öтнамöлö.

— Тэ эд не нывка шатласьны, а то видзöт, ыста аслат нянь вылö.

— Ме сэк чапка кагасö.

— Тэ мый, бöбмин? Перво дак ачыт кышасин, а öнi мöдöрö сьылан? Да ме кöста тэнö баран сюрö, и ачыт он казяв. Пукав гортын да эн бизгы.

Иньыслöн петiсö синваэс. Ванька макнитiс да кинитчис öтöрас и пуксис аслас машинаö, кöда сулалiс тёсiсь керöм оградаас. «Не ветлыны ли Маринка дынö, — думайтыштас сiя. — Нывкаыс беда кыдз кужö гажöтчыны. Город саяс кöть недыр кежö ветламö». Пешлiс куртка пытшксис кармансö, кöдаын видзис деньгасö, сюйыштiс местаас ключсö и давитiс стартер вылö. Сiя локтiс нывкаыс керку дынö и стукöтыштiс. Маринаыс петiс.

— Кытчö талун ыскöвтыштамö? — бокас пуксикö юалiс нывкаыс.

— Иньва дорöдз кежламö. Öддьöн ни гажа сэтчин берегыс.

— А сьöраным?

— Кытшöм басни, быдöс лоас.

— Сэк вашöт, медбы тöлокыс шутнялiс.

Медодзза деревняас нiя пырисö лавкаö небны öтiк-мöдiкö. Ванька казялiс, кыдз пöрись инька босьтiс медбöрья буханка нянь да иньдöтчис вузасисьыс дынö сетны деньгасö, и панталiс сiйö.

— Бабыс, сет меным буханкасö, стрась эд кынöм сималö. Тэнат эд гортат эм заптöсокыт.

— Вöлi бы, дак эг и лок татчöдз, коккезö умöля пондiсö кывзыны.

— Картошка эд, лук сэтчин, морковка — тшыгйöн сёровно он кув. Давай кöть шöри инö керамö. Тэ понда ме мынта продавецыслö.

— И аслым эд колö, да мый вот керан, не кувны жö мортыслö, сета инö.

— Спасибо, бабыс, дыр эшö ов.

Пöрись инькаыс мунiс лавкасис куш киэзнас. Ванька сералöмöн кольлалiс сiйö да локтiс вузасисьыс дынö и небис чочком винаöн бутылка, дона конфеттэз да томатöн консервируйтöм килька.

— Гöсь мöдiс пыравны, дак винатöг оз лöсяв, — висьталiс вузасисьыслö.

— Сытöг öнi оз лöсяв, — шынньöвтыштiс паныт не том ни инькаыс да гусьöника видзöтыштiс томыник нывкаыс вылö. — Нешоча эд миянö пыравлöны городсис нiя, кöдналöн эмöсь машинаэс.

— Мукöдпырся деревняас овлö товарыс унажык, ежели городас.

— Кытшöм ни унажык, сё попутно небöны.

— Мый бы тэ, Марина, висьталiн лавкасис кык старушенцияыс йылiсь? — юалiс Ванькаыс, кöр локтiсö берег дорас.

Нiя пукалiсö крут берег дорын, кöда веж-гöрд изöн крута лэдзчисис жаг визывтан ю дорас.

— Нем ны вылö видзöтны, ассиныс олiсö ни, весь только русö тшыкöтöны.

Сулалiс шондiа да лöнь погоддя. Ны гöгöрын некин эз кыв. Марина чöвтчис маликöдз, медбы ошшасьны чочком яйнас. Синлö нелöсялан местаэсö вевттис только пройми пасьта вешьянок. Кушöтöм няняэс вöлiсö кыдз арся калигаэз. Сiя нюжласис небыт турун вылас да ошшасис аслас вывтырöн, нидзылöн пырис мужикыс увтö, небыта маласис сы бердö, лöсьöтлiс öмсö окавны. Ванька блаженствуйтiс, бöбалöмöн монлалiс сетчана вывтырсö. Пöттöдз тешитчöм бöрас нiя веськыта мунан туйез вылöт локтiсö городас да янсöтчисö, медбы пантасьны ашынся рытö. Сiдз кыссис важын ни, но кытчöдз некин эз тöд. Гортас Ванька пöртчывлiс небаитiсьö и мыдзöмö, отсавлiс керкуас керны только сiйö, мый инькаыс эз ни вермы. Нельки телевизор етша видзöтлiс. Газетаэз жö лыддьöтлiс, медбы тöдны, мый кöть керсьö странаас. Öння должность сьöртi, кыдз сiя лыддис, и эта унаöв. Меддонаыс сiя, кöр кывзан юралiсьсö да видзан сылiсь политикасö. Некöр сэк озö видö. Вермасö и вывланьö лэбтыны.

Öтпыр Марина висьталiс сылö, что сьöктiс. Ванька понда эта юöрыс вöлi, кыдз мича лунö гымалöм. Чужöм вылас нельки сьöдöтiс. Кыввес эзö пондö адззисьны.

— Он ли думайт... вайны? — сьöкыта юалiс сiя.

— Нем ог тöд, мый керны, — гажтöма шыасис нывкаыс.

— Сэк ме висьтала: чöвтны колö, и нем сэтöн думайтны.

— Да эд полöм петö, сякöйыс эд вермас лоны.

— Керны дак он пов. Сьöкытнас меным он ков.

— Колас эд больницаö ветлыны.

— Сета деньгасö, но медбы вöлiн чöвтсьöмыт.

— Кера, кыдз тшöктан.

— Колö ас понда овны, а не кага йылiсь тöждiсьны. Меным эд недыр, мöдiкö верма адззыны. Велалöм мужиклö этö кыдз сьöвзьыны. Ме эд мортыс решительнöй, весись ог любит баитны. Дело дак дело, а то шабаш.

— Кöть и пола, но муна больницаас, ась кöть мый лоö.

— Меным гленитчö, кöр тэ вежöртö мыччалан...

Мöдпырись Пестеров видзчисьтöг вайöтiс гортас монтажнöй управленнёсис начальниксö и пондiс гöститöтны коньякöн. Кöр тырмöмви юисö, Ванька вöлись пондöтiс ассис баснисö.

— Николай Иванович, — дзуглясян кылöн баитiс кöзяиныс. — Мöда бы корны тэнö, кöр тэ пондан мунны управленнёсис, баитышт трестас ме йылiсь. Висьталышт кыв ассянят, медбы менö колисö ас туят.

— Мыля жö не висьтавны, конечно, висьтала, юасьны кö пондасö.

— Тэ эд тöдан, кытшöм ме кывзiсь мортыс?

— Кымöстö поткöтан, а висьталöмсö керан.

— Начальниклöн ыстöмыс быд мортлö лоö законöн, и умöль сiя мортыс, кöда думайтö керны или не керны сiйö, колö ли керны да мый петас.

— Сiя и умöль, что быд мортыс думайтö ас моза да уна лёбö, а делоыс сулалö.

— Дак трестас висьталышт ме йылiсь, долгас ог кольччы.

— Кыдз кöсйиси, сiдз и кера. Мыйлö унаись баитны?

— Этö сiдз, медбы эн вунöт.

— Юрсадь вылам кытчöдз ог норась. Гöститöтöмыс бöрын Ванька олiс гажа видзчисьöмöн, надеясö видзис только выигрыш вылö. Сiя öддьöн бы мöдiс шедны начальникас, кöда местаын мыччалiс бы, кыдз колö веськöтлыны. Некывзiссесö сэк жö ыстiс бы производствоö тэчны кирпич, медбы киэзнаныс уджалiсö и етшажык думайтiсö. Сiя сувтöтiс бы порядоксö, быд мортыс бы сы одзын пондiс дрöжитны, йöктiс бы, кыдз начальникыслö колö, а не сiдз, кыдз мöдiс бы. Син одзын эд вельмöны не только мастеррес, но и бригадиррез. А эта бурöдз оз вайöт. Вельмöмыс вайöтас сэтчöдз, что пондасö уджавны, кыдз юсь, щука да рак. Быдса анархия лоас. Но эта сы бöрын, а кытчöдз колö видзчисьны, мый одзлань лоас. И Ванька аскадö вовлiс уджавны, кыдз и одзжык, шысеттöг керлiс тшöктöммесö, мугсьытöг котрасис, кытчö ыстасö, кыдз курьерöс. Мукöдыс сералiсö, а сылö гленитчис: не пызан сайын пукалö, начальниклiсь ыстöт тыртö, гогольöн ветлöтö. Эта коласын сiя эз вунöтлы ассис одзлань судзласьöмсö.

Кыдзкö айыскöт Ванька ветлiс тёткаыс ордö, кöдалöн вöлiсö кык керку. Важын ни эта вöлi, а öнi шогмис план, кыдз бöбöтны тёткасö, медбы сiя весись сетiс öт керкусö. Эта понда адззис кад и мунiс деревняас, медбы бергöтны делосö.

— Кыдз инö тэнö, племянничок, еныс вайöтiс, — пöрись инькаыс паськöтiс киэсö да хлопкис боккезас. — Эта дырна ни эг адззыв, нельки чужöмтö вунöтi. Пуксьы да шоччисьышт, а ме часöт пызан вылас мыйкö лöсьöтышта. Да висьтась, кыдз олан. Ыджыт начальникöн пö уджалан. Вонö эд пöрись ни, мый сiя керö? Кылi, кага ни быдтан пö. Менам тай ая-зона война вылас öшисö, öтнам кольччи. Господи, помилуй, мырся да ола. Быдты зонтö, юрвердiсь лоас.

Гажасялöм тёткаыс сюллис-баитiс орöттöг, мöдiс висьтасьны быдöс, мый öксис сьöлöм вылас öткаса олöмнас, мый понда гажтöмтчö да думайтö. Ванька, бытьтö тёткасö жалейтiс и юрнас беринялiс, бытьтö сьöкыта лолалiс. Кужис орсны. Сы вылö видзöтан, дак синва петас. Вöлi тёткаыс одзын, кыдз судьбанас орддьöм морт.

— Эн бы вермы тэ, тёту, гижны завещаннё менам ним вылö, — горзöмсорöн баитiс сiя пызан саяс, — что öт керкусö сетан меным? Кулан, а тэнат некин сэсся абу. Резасö-паздасö кöзяйствотö, кыдз кай гöннэз.

— Йöзыс, племяш, сiдз и керасö. Некинлö лоас касьтывны. Йöз добро вылас öння отирыс öддьöн рад.

— Дак ме инö гижа документсö, а сэсся тэ сельсоветас пуктан сы вылö печать.

— Гиж, племяш, гиж. Кула, дак кин сэсся касьтылас. А мöдыс вонöлö ась кольччас. Сiя уна отсалiс керны. Ась ен сетö сылö здоровье. Сiдз и гиж. Ме ашын жö котрася сельсоветас да тшöкта шваткыны печатьсö. Гиж, племяш, а ме кера, кыдз тшöктан. Тэ эд вежöра мортыс.

Ванька нельки синвасö лэдзыштiс, кöр петiсö öтöрас да пондiсö кольласьны.

— Тэ понда, тётушка, лолöс пукта, но понда керны, мый тэныт колö.

— Эн вунöт, племяш, эн чапкы. Ме даки котрася сельсоветас.

— Сэк инö вовла кынымкö лун бöртi.

— Кыдз инö, вовлы, ме понда видзчисьны. Поди, вонöс вайöтлiн бы машинканат.

— Кытчö ни сiя, öдва веглясьö, некытчö оз пет. — Но инö ачыт кöть вовлы, ачыт.

— Вовла, тётушка, вовла.

Ванька вöлi сизимöт небоас — быдöс петiс, кыдз сiя одзжык думайтiс. Локтан жö кресенняö сiя видзчисьтöг локтiс тёткаыс ордö дона бумагаыс понда. Сьöрас вöлi модз Маринаыс, но сiйö эз пырт керкуас.

— Кин нö тэнат машинаас, мыля эн пырт керкуас? — юалiс тёткаыс.

— Да сiдз тай пуксис городас мунны, ась пукалас.

— Оз эд сiдз лöсяв, колö корны öтлаö. Петав да корышт.

— Ась тай пукалас, кытшöм дело меным.

— Отирас эд сiдз оз керö: локтiс тэкöт дак ась пырас öтлаын. Петав да кор.

— Да сiя эд тöдтöм, мыйлö?

— Кин бы эз вöв, а морт, ась пырас керкуас. Мийö не сэтшöм богатöсь, медбы мортыс эз пыр миянö. Пет да кор.

— Сэк ыстыла сiйö лавкаас, весь жö пукалö.

— Ачыт тöдан, но оз лöсяв мортсö не корны.

— Ачыт тöдан, ачыт тöдан.

Ванькалöн киас вöлi печатьöн бумага, кöдаын вöлi висьталöма, что сiя лоö кöзяинöн тёткаыслöн мöд керкуас. Мöдöмыс инмис, кытчö колiс. Бöр мунтöнняс сiя сералiс тёткаыслöн вежöрттöм вылын, кыдз кокнита да сьöмтöг сылö дöнзис быдса керку.

— Эта понда колö юыштны.

— Тэ, Ванька, шулер, — сералiс бокас пукалiсь модзыс.

— Этö тэныт не кага вайны.

— Сэсся, поди, менам озö ни лоö да.

— Кера, öддьöн колö бы дак.

— А быдтыны кин пондас?

— Тэныт колöны, ачыт и быдтан.

— Он тэ любит менö, Ванечка.

— Кытшöм вермас лоны басни любитöм йылiсь. Тэныт колö — ме кера. Номсöтчöм только.

— Мокася морт тэ, Ванька, кöдзыт сьöлöма.

— Кытшöмö айö керис.

— Медбы ен эз сет тэ кодьыслö шогмыны.

— А ме кера, и ваян, кытчö воштiсян? Кырымам тэ, кыдз ягöд, кöдö верма ляпкöтны и виртö быдöсöдз юны.

— Варыш кодь тэ, Ванечка.

— Шедiн меным, дак чöв, а то и яймектö нямрала. Вежöртiн?

— Ме пола тэнчит, Ванечка.

— Мöдi бы видзöтны, кыдз олiсö кöркöся отирыс... Ванька сувтöтiс машинасö тэль дынö да мыччалiс Маринаыслö, кытчö мунны. Мöдыс чöвтчис. Ванька видзöтiс-керис сы вылö да висьталiс:

— Лок дынам...

Бöра локтö тулыс. Мичуринскöй огородечас колiс гарйисьны. Ордчöн вöлi Спирялöн торокыс. Пöрись мортлö сьöкыт ни бергöтны мусö, а местасö жаль жö чапкыны. Тöждö пöрисьыс.

— Ягöддэс вот жальöсь.

— Таво сетлы меным, ме гарйышта. Уна я кад сэтчö колас?

— Верман дак, таво босьтлы, весись жö пондас муыс куйлыны.

Ванька гарйис грядоксö да садитiс сэтчö ассис ягöдсö. Мöд годас пондылiс жö Спиридоныс баитны аслас му йылiсь, но Ванькаыс висьталiс, что ягöддэсö эд он вöрзьöт местасис, сiдз и кольччис эта местаыс бöра жö сы сайö. Старикыс только киэзнас макайтiс, да мый ни керан. Томмес вынкöт он пессьы, мылаыт етша, сöныт вöснит. Сiдз и кольччис. Спиридон мöдiс бы вежöртны, мыля сiдз керö Ванькаыс, кытшöм кашникын и кöр да мыля ловзис неколана шöмыс, кин сiйö соровтiс, но эз вермы адззыны бур очакывсö. Вежöрттöм вöлi и сiя, мыля öння том йöзыс босьтö бы только готовöйсö да керöмсö, а не ачыс содтö отирыс понда. Видзöтан кö, дак эд айыс, кыдз истöй коми морт, йöзыслiсь и чагсö оз вöрзьöт, а зоныс кытшöмкö куран киа, кöда куртö быдöс, мый син одзас шедас. Йöзыс шея вылын мöдö райö мунны.

Ванькаöс эз тöждiсьöт, мый сы йылiсь думайтöны мöдiккез, некöр вöлi нёджжöвтны бöрланяс. Юр вемыс уджалiс только öтiк ладорö — кысь эшö позяс кватитны кипод увтас. Йирис сьöлöмсö тёткаыслiсь босьтöм завещаннёыс. Эз терпитсьы чожажык вайны керкусö мичуринскöй огородечас. Мымда эшö ковсяс видзчисьны? Лешакыс вермас кыскыны и не дас год. Инькаэс эд кыкпöвса сöнаöсь, дзуртöны да олöны, сiдз просто озö чорзьö. Да и колö ли видзчисьны сылiсь бакöстöмсö? Эта коста и ачыт верман оча кок вачкыны. Не буржык ли лоас öнi жö курмыштны этö керкусö? И Ванька решитiс керны ассис.

Öтiк лунö медалiс машина, öктiс весь олiсь морттэзöс и öтлаын мунiс деревняас кöсйöм козинысла. Тёткаыс кыдзкö эз лöсяв гортас, и сылö эз ков висьтасьны, мый мöдö керны. Бывалöй мужиккес чожа пятнайтiсö и кир-вар резьöтiсö керкусö. Керресö лэдзалiсö покаттэз вылöт веськыта ыджыт прицепа машина кузовö. Рыт кежас кольччис только глинаись вартöм горыс да мудйöттэз. Горыслöн эз вöв некытшöм щель, и Ванька жалейтiс, мыля сiйö оз туй кыскыны городас, кытöн горыс сулалiс бы ассис вексö. Кöр тёткаыс бертiс гортас, то керку местас вöлiсö öтiк чегласьöм потшпоннэз. Пöрись инькалöн брызнитiсö синваэс, бырис мылаыс.

— Мый жö эта петö? — мöд лунас норасис сiя воныслö. — Ловья дырням тай пондiсö розоритны. Мыля жö зоныт сiдз керö?

— Ме разь тöдi, кыдз тiйö баитчитö?

— Думайтi, только кулöм бöрам, мыся, босьтас.

— Не бöрнат, а юрнат колiс думайтны.

— Öнi посöдзö эд кольччис осьтöн, мый понда керны?

— Кин разис, сiя ась и лöсьöтас. Ветла ачым да отсалышта кöть невна. Бöбöв юрнат эз ков сiдз керны.

— Дак эд сiя ачыс бумагасö гижис.

— А тэ ачыт тшöктiн печатьсö пуктыны. Паока тэнö гöгöртiс, нем он висьтав. Не жö бы ме дынö локны да баитыштны.

— Дак эд сiя вöлi видзöтöм вылö сэтшöм несчастнöй.

— Эта несчастнöйыс и менчим межасö кватитiс. Но ась, ме дырсö ог ни ов.

— Да и меным эд не кык век сетöма. Ась ни уж, терпита.

Только начальникыс местаöн Ванькалöн шогмис осечка — трестыс сувтöтiс сэтчö мöдiк мортöс, но и ась, сылö эз вöв жаль местаыс, кытöн колiс бы тöждыны не только производствоыс, но и быд мортыс понда. Этадз тожö позьö овны да гусьöника гуляйтыштны. Не кагаöн жö вöдитчыны. Эта йылiсь ась инькаыс тöждiсьö. Сiя эта понда и сетöма. А то эшö голя вылö вожасяс, сетан кö сылö волясö. Ась пукалас гортын.

Эта кадö айыс пондiс öддьöн шогавны, эз чеччы ни ольпась вылiсь, маитчис, маитчис, да енлö сетiс ловсö. Гортас кольччис только мамыс, кöдалö сетiсö неыджыт пенсия. Томжык воныс гöтрасис да олiс торйын. Ванькалöн синнэс паськалiсö и важ усадьба вылас, но кытчöдз эшö вöлi мамыс, эз лысьт вöрзьöтны айыслiсь керöмсö. Матегалöм киэсö сiя нюжöтiс мамыс пенсия увтö.

— Мый сылö керны деньганас? — баитiс сiя инькаыслö. — Паськöм оз ков небны, нянь понда унаыс оз ков. Сiдз олас. Кин тöдö, мымда айöлiсь колис. Ме зэлöта сiйö сэтчöдз, что ачыс пондас кортöг сетны деньгасö.

Перво корлiс мамыслiсь одзöсöн, но вештыны пыр вунöтлiс. Локтiс сэтчöдз, что пондiс караулитны почтальонсö, кöр сiя ваяс пенсиясö, пыравлiс мамыс туйö гижсьыны, а сэсся кольлiс червонец и «адью» висьтавлiс. Мамыс горзiс да норасис томжык зоныслö, но мый сiя вермис керны, кöр важын ни нiя эзö баитö öтамöд коласаныс. А Ванькалöн карманас пыр лоис деньга, кöдö видзис только аслас лов вылö, медбы гажöнжыка чулöтны рыттэсö, юны вина сылö колана морттэзкöт. Мичуринскöй мутор вылö лэбтöм керкуыс öддьöн бура лöсялiс эта понда. Только Мариналö висьталiс, медбы сылöн и вуджöрыс эз вöв керку дынас, одззамоз пондасö пö пантасьлыны только город саяс. Машинаыс эд асланыс. Нылö оз ков вежмасьны отирыс син одзын, медбы эз вöлö басниэз, вермас кывсьыны гортас.

— Небось инькаытлiсь полан, бöбалiсь кань, — сералiс модзыс.

— Ме сiйö öтiк сöтöмöн лöньсьöта, оз лысьт горавны.

— И дыр тэ мöдан асьтö этадз торйöтлыны?

— Кытшöм ме лоа мужик, кöр модз ог понды видзны?

— А ме йылiсь тэ думайтан? Дыр ли пондамö этадз гусясьны?

— Мийö босьтамö сiйö, мый судьбанас сетöма.

— Меным оз ков сэтшöм судьбаыс.

— Мый тэныт оз тырмы?

— Сьöлöмöлö отыс. Ме ола бы не сайласьöмöн.

— Он думайт, кыдз ме вот эта лапаöн невна гильöтышта öддьöн горалан кавтыктö, что и пикнитны он ешты.

— Тэсянь бурсö нем он видзчись.

— А колö, медбы ме ашын жö тэныт платье неби?

— Ачыт тöдан.

— Локтан магазинас и мыччалан, кöда гленитчö — ме мынта.

Нiя пукалiсö пожума тэлльын. Шондiыс саясис ни ылынiнас тыдалан керöс сайö, и öнi сы весьтын öгралiс гöрд рöма паськыт кымöр, кöда тöдчöмöн чинiс отнас да жагöника öштiс рöмсö. Жара чулалöм лун бöрсянь руыс эшö эз ешты сайкавны, но лолалiс ни ыркытокöн. Каёккеслöн шыэс пондiсö лöньсьыны. Ванька курмыштiс нывкасö ас дынас да зэлöтiс киэсö.

— Ой, кытшöм чорытöсь тэнат киэт, — горöтыштiс Маринаыс. — Этадз жö, поди, инькатö монлалан? Абу тэ велалöмыт миян пöлöсыскöт овны.

— Ме гöтраси не любитчöм понда. Ась горби одзас тöдö.

— Инькаыт туйö ме бы мöдi тай пукавны гортын. Тэ ылöтчан рыт кежас, и ме шатöвтi бы мöдiк дынö. Ме бы ассим эг лэдз.

— Тэ кодь шар синыслiсь верман быдöс видзчисьны.

— Ме и орöтны тэнчит верма, чепсасьны кö пондан.

— Огö пондö, Марина, чушкасьны. Не сы понда татчö локтiмö. Ноко гывьялышт небытик тырпоккетö чöскыт винаокнас.

— Тэ мöдан пöртны менö алкашö. Кинлö сэк понда ковны?

— Не быд лунö эд юамö.

— Но сё частожык и частожык.

— Öтпыр эд оламö. Ю только, кытчöдз юöтö дак.

Нiя петiсö волькыт туй вылас, кöр городас быдлаын сотчисö ни биэз, етша пантасисö и машинаэс. Марина кузь туй сералiс да гажöтчис. Неважынся лöгасьöмыс и тöдвылас эз вöв.

— Ноко вашöт, медбы тöлыс пельын шутнялiс, — тшöктiс сiя дружоксö. — Мунан, кыдз пöрись черепаха, а эшö кавалерöн шусян.

Кодыш Ванькаöс лöгыс босьтiс. Сiя тальччис газнас веськöтлан педаль вылас, и сэтöн жö машинаыс пуксис бöр вылас, лэбтыштiс одзсö да визжитöмöн нетшкöвтчис одзланьö. Быд минутаö мунöмыс пондiс содны, спидометрлöн стрелкаыс лэбис сто километр дынö, вуджис сiйö цифрасö. Моторыс уджалiс уннялöмöн.

— Вашöт сулалöм жеребецтö, — сералiс Марина. Ванька бергöтыштiс сы ладорö юрсö да шынньöвтiс, кыдз бытьтö висьталiс, что тöд кинкöт мунан. Кöр дзарнитiс туй вылас, синнэс баралiсö: одзас вöлi разьöм пос. Сiя мöдiс тормозитны, но вöлi сёр ни. Бöбмöм скорость вылын машинаыс нырнитiс гарйöм ямаас. Усьöм местасяняс лэбтiсис сук пар. Машинасис кольччис чукрасьöм кöрт груда.