Галяман

Важся кадö быд деревняын вöвлiсö морттэз, кöдна быдöс кужисö, и сякöй уджсö вермисö керны. Сэтшöм мортыскöт полöм петiс не только споритны, но и вермасьны вынöн. Да и некин эз кутчисьлы. Одзлань тöдiсö, что вермас сiдз мургылявны, что и коскаэтö он öкты, ежели мортсö лöгöтан.

Не öддьöн ыджыт деревня Тортаын олiс крестьянин Фома Турунов, кöдалöн, ныввезся, вöлi öтiк зон. Кöзяиныс унажыксö радейтiс зонсö, сiдз кыдз ныввесö лыддис ракаэзöн, кöдна быдмасö да лэбзясö гортсиныс öтмöдöрö. Юрвердiсьыслö сетiс нимсö Иван. Зоныс быдмис жагöна, но топыта тэчöмöн. Челядься годдэзас соседдэс уна норасьлiсö айыслö, что зоныс обижайтö нылiсь пияннэзнысö, но сiя гортас некöр эз висьтась, что мыйкö колö или оз тырмы, кинкöткö оз лöсяв. Фомасö диво босьтiс, мыля сэтшöм быдмö зоныс: некöр гунясö оз кизяв, ветлöтö ростопашки, и некытшöм шогöт сы бердö оз кутчись? Рожаыс и тöвнас гöрд, кыдз малина.

Но чулалiс челядься кадыс, и зонкаыс тöдчöмöн вежис ассис мывкыдсö, лоис лöньжык да эз мыччав ассис вынсö. Сылöн паськалiс корпаыс, пельпоннэс. Лоис шöрöт мыгöра морт, вунöтiс челядься тышкасьöммесö, отсалiс айыслö, кöда вермис ни казявны зоныслiсь вöвлытöм вын. Этö лоис сэк, кöр кыкöн ветлiсö керавны пес. Иваныс босьтiс пельпон вылас кышасьöм пулiсь дынсö да нуöтiс бокö и мездöтiс.

— Нюжвыла, зонöй, колö кутчисьны, — баитiс сэк Фомаыс мыр вылын пукалiкö, — а то гöгтö верман орöтны. Гöгтöг мортыслö не овны. Гöгыс вылын и уджыс видзсьö. Тэнат вон и юрыт пондiс кушмыны. Но да ладно: тойыслö некытöн лоас овны. А тэ берегит асьтö. Берегитчисьсö и еныс берегитö. А уджыс миянöс одзалöма шогмыны, кулан да эшö тэ бöрсянь кольччас. Ештан эшö маитчыны, олантö эд вöлись пондöтан. Мукöд кадас сiя ку-узь овлö.

Иваныс пороз моз видзöтiс айыс вылö, а ас пондас думайтiс: «Мый тэкöт, пöрись чёрткöт, баитны. Дзормытöдз олiн, а вильсö нем он висьтав. Модян пыр только öтiксö. Черыс киат ни оз öшшы, а сё велöтан бы. Пукалiн бы горвыв сёрдас да тараканнэсö пысалiн. Тэнат песöкыс киссьö ни бöрсит».

Зоныс орсöмöн шупкалiс кряжжесö öтлаö да тэчис доддяс, и мунiсö гортаныс.

Фомаыс олiс öткаса хозяйствоöн, и быдöс колiс керны зоныскöт, ныввесö важын ни сетiс жöник сайö. Видзöтöм вылö Иваныс кывзiс айсö, но унажыксö керис асмознас. Кöр нiя пондöтiсö строитны гид, а вöрныс эз тырмы, дзибö мунiсö гусясьны. Айыс бöрйис пуэсö медтшöк местаись, кытчö телеганас оз туй пырны. Пöрöтны пöрöтiсö, а вот кыскавны вöлi немöн да и эз туй. Иваныс гыжьялыштiс юрбöрсö, меряйтiс синнэзнас керсö да и кватитiс дынсö пельпон вылас, петкöтiс туй вылас. Этасянь айыслöн синнэс чеччöвтiсö кымöсас, паськалiсö да сувтiсö. Кин адззывлiс, медбы мортыс уджалiс вöв туяс? Думайтiс, что этö прикашайтчö. Повзьöм увьяс нельки пернапасасис. А зоныс эта кадö босьтiс да нуöтiс ни мöд керсö. Гортаныс локтiсö пыд ойöн. Мöд лунас айыс мöдiс корны отсасисьöс, но Иваныс висьталiс:

— Немлö, кыкöн керамö. И тёссö пилитамö асьным, кытчöдз киэзным эзö косьмö.

Сiдз и лэбтiсö гидсö да вевттисö.

— Юрыт тай нач кушмö, галя кодь эд лоас. Галяманöн пондасö нимкодявны, — кыдзкö висьталiс зоныслö Фомаыс, кöр казялiс кушмöм юрвомансö.

— Ась, — макнитiс кинас Иваныс. — Дурнöй юрсиыс быдлаö быдмö, а умнöй юрсö кольö.

Айыс эта кадö кыйис виль завёрткаэз трепичöн — локтiс очередь кыскыны чугун Куваись Чердыньöдз. Туйыс не матын и, медбы завёрткаэс терпитiсö, нiйö гардлiсö трепичнас. Иваныс видзöтiс-керис айыслiсь уджсö да и шуö:

— Эх, ма-а, ноко ме ветла туяс, а тэ гортын пукав, керку гöгöрсö лöсьöт.

— Мунан бы дак ветлы, — согласитчис айыс. — Кöть пондан тöдны, кыдз крестьяниныслö шедö деньгаокыс. Сiя эд дзескöтчöмöн пырö миян кошельö, мунö бы боки.

— Быд мортлöн деньгаыс тöдвылас, но шедтöны неöткодя. Ме тожö пондыла, ноко мый петас. А доддяс мымда тöбалöны?

— Кыкдас вит пудöн, а то и кыкдасöн.

— Только вöлыс бы кыскис.

— Колö зöрокнас вердыштлыны Савраскосö. Деревнясис ветлiсö вит подводаöн заводöдз и сэтчин тöбасиссö да бертiсö бöр гортаныс, а мöд лунас иньдöтчисö кузь туйö. Тöвся туйыс вöлi юждöтöм одзза ветлiссезнас, и додьыс, кöть и вöлi сьöкыт, ыскöвтiс падмавтöг. Керöссэз увтас лэдзчытöн Иваныс пуксьывлiс доддяс, но унажыксö мунiс подöн. Но вот пантасис кузь обоз и нылö колiс кежны бокö, а лымыс вöлi косви. Иваныслöн додьыс пуркнитчис сэтчин, пырис кыдз ваö, увтас ляпкöтiс вöрзьöттöм лымсö аслас сьöкытöн. Иваныс видзчисьыштiс, кöр обозыс мунас, дернитiс вожжиэсö да мöдiс петны туй вылас, но вöвыс дёрнитчис, и оглобляыс петiс завёрткасис. Веськöтлiсьыс юскис вöвсö, видзöтiс-керис да ачыс кутчисис додь ныр бердас и кыскис сiйö лымсис, а сэсся лöсьöтiс оглоблясö колана местаас. Öтлаын мунiссеслö эта вермис бы и вунöтсьыны, но ойнас, кöр нiя пырисö деревняö да сувтiсö шоччисьны мужик ордö, Иваныс вились чудитiс — сiя петалiс öтöрас да соседыслiсь вöвсö лэбтiс сараяс, а пырис бöр да висьталiс:

— Педöт, тэнат вöвыт тайнö абу додь дынат.

— Кристос мекöт, кытчö вермис лоны? — повзис Педöтыс да шапкатöг кинитчис öтöрас. — Мый, шмать, öнi лоас? ― Сiя гöгöртiс доддесö, вовлiс да видзöтiс воротасис каличсö и пырис карта вылас. Тыдалö, кöзяинсö кылiс сылöн Буланкоыс, гöрöвтыштiс пемытiнсяняс. Мужикыс повзьыштiс и чуньнас гарйыштiс пеллесö да эшö öтпыр корис Буланкосö, и вöвыс шыасис. Ышки-пойки Педöтыс котöртiс керкуас да корис мужиккесö öтöрас. Сэтöн и быдöнныс пондiсö боккезнысö шовкöтны, эз пö петавлы эттшöм случайыс, медбы вöвыс кайис сараяс сёйны турунсö. Эд сэтчин вöлi öтiк лиснич. Судитiсö-рядитiсö, кыдз лэдзны вöвсö сарайсис, а Иваныс спокойнöя висьталiс:

— Педöт, гортын сувтöтан четверть аскурсö, дак часöт вöвтö лэдза.

— Лэдз, батюшко, лэдз, — горзöмöн моз ни корис Педöтыс. — Гортын сувтöта, ог бöбöт. Енöн кора, только лэдз.

Иваныс, кыдз бытьтö дышöтчöмöн, кайис быдса пуись керöм лиснич вылöттяс, сьöвталiс вöвсö да лэбтiс пельпон вылас и жагвыв лэдзчис ношанас улö, а сэсся пырис керкуас, кыдз нем эз и вöв, водiс аслас местаö.

Бöр туйнас вайисö товар заводчанаыс понда. Гортаныс, медодзза жö рытас, Педöтыс корис быдöннысö, кöднакöт ветлiс Чердыняс, торйöтны кöсйöм аскурсö. Кöзяиныс бура потшшуйтiс гöссесö, и нiя нельки кодззисö. Горттэзаныс мунтöн пондiсö пессьыны, и Назар Петраыс курмыштiс Иваныслiсь шапкасö, шентiс матiсь баня крыша вылö да сералöмöн шуис:

— Миянöс то верман, а пондыв-ко судзöт.

— Но и ме ог кольччы долгас, — горöтчис Иваныс да кватитiс Петраыслiсь шапкасö, оськöвтiс баняланяс, öт кинас лэбтiс угöлсö, мöднас пуктiс шапкасö и лэдзис угöвсö бöр. Сэсся шедтiс йöрсис стынник да сiйöн судзöтiс ассис шапкасö, а Петраыслö висьталiс: «Öнi тэ пондыв кыскыны, видзöта, мый тэнат петас».

И только ашынас мужиккес лагаöн отсалiсö мездöтны шапкасö. Иваныслöн эз вöв привычка шумитны или тышкасьны, а керлiс сы понда, медбы сералыштiсö. Öнi он адззы сэтшöм мортсö. А, поди, тiян деревняын эм?