Прокурор

Колхозас мунiс сю дзимлялан страда. Деревняын олiсьыслö эта кадыс öддьöн сьöкыт. Öткö, колö вундыны сюсö, а машинаэс эзö тырмö, и отирыс етша. Председательыс кöть кытчö воштiсь, кöр колхозыс ладан вылö лолалö. Отирыслö колö нянь, а районыс оз лэдз пизьсö сетавны. Медодз пö колö няньсö сетны государстволö и только сыбöрын, мый кольччас, янсöтны колхозниккез коласын. Челядьыс горзöны тшыгсяняс, и аймамныслöн синваэс петöны, да нем озö вермö керны. Гырктöм войнаыс быдöс жоритö. Мöдкö, вундöм сюсö колö чукöртны да тэчны шороммезö. Вартан машинаэс бригадаэзас только öтiкöн. И öвиннэс етшаöсь. А косьтытöм сюсö озö примитö. Эта кад кежö веськöтлiсьнас колхозас бöрйисö Пётр Иванович Бражниковöс, кöда неважын локтiс госпитальсянь война вылас ранитöм бöрын. Кöть эшö чотiс, но унажыксö ветлöтiс подöн. Сiдз пö унажык адззылан и отирыскöт пантасян да баитыштан.

КПСС-лöн окружнöй комитетыс сю сетан кад кежас ыстiс колхозас уполномоченнöйöн прокурор Овчинниковöс, сiя локтiс не öтнас, а куим милиционерöн, кöдна вöлiсö кыдз слугаэз. Прокурорыс керис резиденциясö не правленнёас, а школаын, кытöн тшöктiс классiсь петкöтны партаэз и пыртны пызан да койка.

Ыбöс дорас сувтöтiс караул, медбы кортöмыс некин эз пыр. Окружкомыслöн полномочнöй представительыс эз вунöт и асьсö. Сiя тшöктiс пуны сёянсö сiдз, медбы паньыс сулалiс. Сылö начкылiсö баран да яйсö пуисö Пилика керкуын и ваявлiсö школаас. Колхозниккесö няньнас вердiсö граммезöн, а прокурорыслö пöжалiсö торья керкуын и ваявлiсö öшлытöг. Но сiя эшö и сералiс инькаэсö, что нiя озö кужö петкöтны пышнöй няньсö. «Тiянöс, — баитiс сiя, — только кöвдöмöн вердны».

Сiя пондöтчис сысянь, что дынас корис председательсö да висьталiс сылö:

— Эта лунсянь пондатö нянь сетöм сьöртi тыртны только сiйö, мый ме висьтала. Кин пондас мугсьыны, милиционеррес чожа керасö сiдз, медбы сiя эз ов гортас. Саботажниккескöт басниыс лоас дженыт. Меным сiдз висьталiсö окружкомас. Шутитны ме ог любит. Тöдвылат видз этö. Кер сiдз, медбы государствоыслö сюыс мунiс орöттöг. Организуйт Краснöй обоз.

— Ог тöд мый шогмас, — шыасис председательыс.

— Чапкы кулацкöй предрассудоккезтö и кер, кыдз висьталi. Шагом марш! Кин эстöн кöзяиныс? Кытшöм болтун адззисьöма...

Председательыслö нем эз кольччы керны, кыдз только мунны. Сылöн чужöмыс гöрдöтiс, а сэсся пондiс чочкоммыны. Синнэзас кусiс биыс. Нельки выныс öшис, и ранаыс пондiс доймыны. Сiя öдва локтiс важ складдэз дынöдз да пуксис шоччисьны. Кылiсö инькаэзлöн шыэз. Складас кантаритiсö сюсö. «Нем эд озö думайтö, — председательыслöн мелькнитiс юрас. — Прокурорыс эд былись кыскас быдöс сюсö и кöдзыссö оз коль. Народыс кыдз пондас тöвйыны? Годыс бöра лоас тшыг, мый керны одзлань? Колхознас командуйтö округсис прокурорыс, кöдалöн ыджыт власть».

Мунны правленнёас эз вöв некытшöм охота и сiя иньдöтчис неылiсь деревняö, кöда дынöт котöртiс шор. Бражниковыс локтiс сы дынöдз да пуксис листа баддез увтас, кöдна быдмисö шор дорöттяс, но думайтны вöлi нем йылiсь, раз прокурорыс пондiс командуйтны. Керан кö не сы моз, дак эшö пуксьöтас. Сiя эд вежис председательсö. Кытшöм только дяв сiйö ыстiс колхозас?

Овчинниковыс пукалыштiс пызан саяс да петiс коридорас дозирайтiссес дынö, кöдна пукалiсö да куритiсö. Кöр ыбöсыс оссьыштiс, нiя чеччöвтiсö кок выланыс да пондiсö видзчисьны виль приказ. Прокурорыс думайтыштiс да висьталiс: «Ноко ветлö куимнан бригадаас да видзöтö, мымда сюыс öксьöм. А рыт кежас ме дынö бригадирресö коратö удж керöм сьöртi сводкаэзöн».

Милиционеррес рытнас бертiсö бöр школаас и вайöтiсö сьöраныс бригадирресö да сувтöтiсö прокурорыс одзö.

— А председательыс сiдз эз и лок, — пондöтiс прокурорыс, — но и сытöг решитамö. Тiян складдэзын öксьöма уна сю, а поставкаэс озö мунö. Кыдз этö сiдз? Ме тiянлiсь юала! Чöлатö, нем висьтавны? Дак вот, ашын кератö Краснöй обоз. Кыскатö быдöс вартöм сюсö. Тöбалöм телегаэзнас öксятö правленнё дынас. Ачым локта видзöтны. Да эд вунöтö ойнас сюсö кантаритны. Заданнёыс быдöс, верматö мунны.

— Кöдзыс вылас заптöссö тожö кыскамö? — юалiс пöрись бригадирыс.

— Кöдзыс йылiсь öнi басниыс абу, сыбöрын лоас. Медодз колö первöй заповедьсö тыртны, а сэсся думайтны ас пондасиныт.

Ашынас Мишпиян деревняын вöлi вежöрттöм зык: кинкö горöтлiс, сералiс, ойзiс, мöдiк лöгöн баитiс, кытöнкö ризьöтiс да кажöтiс, öтласа карта дорас гöрдлiс вöв да кинкö видчис. Амбар дынöт перыта ветлöтiс том бригадир Алёшка Аксёнов, кöда эз ешты кытчöдз служитны армияас, тэрмöтiс отирсö. А деревняас локтан туй вылöт тэрмасьтöг оськалiс пöрись агроном Никита Горбунов, кöда тöд ылас видзис гажтöм думаэз. Кöр сiя локтiс склад дынас, подводаэс вöлiсö ни готовöсь мунны обознас.

— Кытшöм сю кыскатö? — юалiс сiя ямщиккеслiсь.

— Медбур идсö тай тöбалiмö, обозыс эд Краснöй.

— Не ли заптöм кöдзыссö вöрзьöтiтö?

— Дак эд прокурорыс тшöктiс.

— Кытöн сiя, не крестьяниныс? Или медбöрья лун ни олатö? Öнi жö бöр кисьтлö сусекас!

Колхозниккес дыша кывзiсö агрономсö, ныр увтаныс бобгисö, что тыр лоис начальствоыс, он и тöд кинöс кывзыны, кин талун гижас трудоденьсö? Кыдз орсöны, сiдз и йöкты.

— Прокурорыс вовлiс да мунас, а миянлö овны колö и локтан тулыс йылiсь думайтны. Эта понда дядяыс оз тöждiсь.

Агрономыс вежис прокурорыслiсь приказсö. Мöдiк сю сэсся эз вöв, и обозыс бригадасис эз шогмы. Овчинниковыс стрась лöгасис агрономыс вылö и корис резиденцияас.

— Дак тэ мый! — горöтлiс сы вылын, — поставкасö мöдан дзугны? Государствоыслö паныт мунан? Партияыслiсь политикасö он вежöрт? Некывзiсьсö ме баран сюрö кöста! Не тэ кодьöсь ни пантасьлiсö да кок увтам кеймисисö. Статьяыс тэ понда горзö. Сюыс не тэнат, а государствоыслöн, и босьтам мымда колö. Тэ кодь саботажниккесö пондам судитны!

Аслас свитаöн прокурорыс колхозсис мунiс только сэк, кöр тырис поставкаыс. Председательыс гажтöма видзöтiс сы бöрсянь: амббаррес кольччисö нач пустöйöсь, нельки кöдзыстöг. Мый лоас локтан годö? Но эз чулав и неделя, кыдз председательсö да агрономсö корисö окружкомö. Мыйлö бы? Нiя некыдз эзö вермö вежöртны, кöр колхозыс тыртiс поставкаэсö. Но прокурорыс эз вунöт, кыдз агрономыс бергöтiс подводаэсö и эз мöд сетны сюсö. Мыля сiя сiдз керис? Этö прокурорыс сувтöтiс кывзыны бюро вылас.

— Кыдз жö колхозыс вермас овны кöдзыстöг, — пондылiсö асьнысö дорйыны кык веськöтлiсь, — мыйöн пондамö кöдзны?

— Вунöтiтö одззася заповедьсö, — öмалiсö нiйö. — Колö государство йылiсь думайтны, а сыбöрын вöлись ас йывсиныт. Неправильнöй тiян вежöрыс.

Сетiсö кыкнанныслö выговöрöн. Ась пö лоас тiянлö велöтöмöн.

А кыдз жö отирыс? Партияыс думайтiс ас йывсис.