Öткаса морт

Неыджыт туй дорын, деревня Галяшорын, олiс старуха Степанида, кöдалöн керкуыс пöлiньтчис ни, лажмалiс му бердас, и некин эз тöд, мымда сылö тырис кадыс. А строитлiс сiйö эшö жöникыс, Микай Ваняыс, кöдö босьтiсö германскöй война вылö, да сэтчин и пуктiс ассис юрсö. Степанидаыс быдтiс öтiк зон, и сiя гöтрасис да керис виль керку, мöдiс вайöтны сэтчö мамсö, но нем эз пет. «Айыт колис этчö, и ме некытчö сы местаись ог мун, — гажтöма висьталiс зоныслö Степанидаыс да гусьöника чышкис синвасö. — Кöр жö бордтöм кайыс лэбзьö аслас позiсь?»

Перво гажтöм жö вöлi Степанидаыслö öтнаслö овны, но сэсся велалiс. Деревняокас сулалiсö квать керку. Одзжык вöлiсö и мужиккес, да Отечественнöй войнаыс чышкис нiйö, а мукöдыс городланьö иньдöтчисö. Сiдзкö, кольччисö öтiк инькаэз. Степанидалöн картаыс вöлi тэчöма заплотiсь, некыза вевттьöма идзасöн, да важын ни сiсьмис да паськалiс. Сьöкыт годдэзас пондöтiс угöввэзсяняс, а сэсся жагвыв и заплотсö лонтiс. Кольччис только öтнас керкуыс. Но пöрись морт некытчö эз мун, кöть и учöт деревняэсö пондiсö öтлаöтны. Правленнёсис веськöтлiссес кöсйисö бур олан да вунöтiсö. Колхозыс тай мынтiс пенсиясö кынымкö руб, и то спасибо, нянь вылас тырмис. Видзис дас гöгöр курöггез да свиттялан гöнаö сьöд петух. И карчйöрыс вöлi аслас. Ваыс понда эз тöждiсь — öшын увтас котöртiс неыджыт шорок, кöдаись ваявлiс васö, а гожумнас и миссьывлiс сэтöн. Арсянь кырöтöминас керлiс юкмöс и, медбы не öштыны туйсö тöвнас, сувтöтлiс боккезас лысоккез. Слава богу, керисö и бисö электрическöйö. Кöть и öтiк лампочка öшалö керкуас, но югыт. Босьтны кö быдöс — овны позис. Вот только годдэс мылякö перыта чулалiсö. Степанидаыс казявтöг пöрисьмис и гортiсь уджсö сьöкыт лоис керны. А сiя томсянь любитiс, медбы керкуас вöлi сöстöм, да бур, нем эз бы куйлы не аслас местаын. Киас кужис видзны не только пуртсö, но и черсö, молотоксö, вермис керны быдкодь удж, но вот медбöрын выныс öшис, не быд торыс пондiс ки увтас шедны. Не весись эд баитöны, что пöрисьмас мортыс и лоö челядь кодь жö. Гожумнас кыдзкö шедлiс посадö и небис сэтчин веж краска.

— Отирыслö пö джодж краситны колö, — висьталiс сiя соседдэслö. — А ме, мыся, нысся умöльжык ли мый ли? Кватитi да неби быдса кык банка. Джоджсö мöда краситны. Мылаö ни абу песöкавны. Песöксö не öтiк додь ни, натьтö, видзи. Джоджас тöдчöны ув местаэс, кыдз мыррез. Половицаэс бырöны. А плахасö кысь меным вайны? Пöрись лои, инькаэз, пöрисьми.

Öтiк шондiа лунö Степанидаыс миськалiс джоджсö да и кутчисис маляритны. Медодз краситыштiс лабичсö, кöда сулалiс öшын бердас. Нем и баитны, гленитчис, басöка петiс. Но только мыля сэтшöм дука краскаыс? Одзжык тай нем эз кывлы. Старухаыс петалiс öтöрö да шоччисьыштiс и пондiс мавтны джоджсö. Порог дынас банкасис кисьтiс да мавтiс, медбы пö дыржык олiс. Сэсся мунiс зоныс ордö узьны. Ашынас, кöр лöз югдiс, сiя чепöссис ольпась вылiсь да котöрöн мунiс гортас. Нинкöммесö чöвтiс посöдзас и пырис кöмтöг. Ацетон вылын кизьöртöм краскаыс вöлi бура косьмöм, но гильöтiс кок пыдöссэсö. Степанида полöмöн иньдöтчис гор одзас и лонтiс. Бикыввес чожа пондiсö кыссьыны вевдöрись пессэс дынö, а сэсся öдззисö орсны-шваткöтны. Нылöн гажыс сетсис и кöзяйкаыслö, кöда радувьяс нельки йöктыштiс, лэбалiс ловнас керкуöттяс.

Но кадыс вежсьö, и недыр мыйись локтiс тöв, пондiс шутнявны кöдзыт тöлыс. Степанидаыс кутчисис печкан бердö, печкис лёнсö, вурунсö и ватасö, гöрдззис нучоккеслö кеписсез да носкиэз. Шонтiсьыштас гор вылас да одзлань уджалö, оз пукав весь. Кадыс чулалiс бы казявтöг, но эд курöгыс корö юны. Колiс и васö кайöтлыны. Öтпырись пасьталiс шабуроксö да ветлiс юкмöс дынöдз, гумыштiс васö да иньдöтчис бöр. Погоддяыс вöлi шоныт, и виль нинкöммес нильдалiсö. Степанидаыс оськалiс полöмöн, но кöр сiя кайис посöдзас, полöмыс öшис, и смела оськöвтiс порогсö. И вот сэтöн кын нинкöмыс видзчисьтöг ыскöвтiс, и коккес чашкалiсö, тыра ведраэс личкисö, и сiя шлёпнитчис небыт местанас порог дынас. Ведраэс мезмисö коромысласис да пöрисö. «Лешакыс ли мый ли тойыштiс менö? — думайтыштiс Степанидаыс да видiс асьсö умöль кылöн. — Кöть тай кув эстöн, некин оз и адззыв, нельки оз жалейт. Быль эд сiдз вермас петны». Сiя веськöтiс коккесö да ружтöмöн чеччис, нёджжöвтiс ас гöгöрсö, босьтiс бон да чышкис васö. Сэсся пукалыштiс невна да видзöтiс усьöм места вылас и, мый сылö юрас пырис, кватитiс пурт и решительнöя локтiс порог дынас, пуксис джоджас да пондiс зыртны краскасö. «Ме мыччала тэныт, кыдз уськöтлыны кöзяйкасö, — бобгис сiя ныр увтас. ― Аслам векын некöр эг усьлы, а эстöн на тэныт — паськалi, кыдз нярьян. Зырта кöсöдз, нем ог коль».

Час гöгöр Степанидаыс гырскис порог весьтсö, мыдзис ни, а отыс содiс жагöна — краскаыс бура лякасьöма. Не керавны жö? И кöзяйкаыс чапкис пондöтöм делосö. Медбöрын сувтiс да косöйöн видзöтiс аслас удж вылö: джоджыс вöлi серакутшша. «Но и ась, йöзыс ме ордö оз пыр», — думайтыштiс ачыс да мунiс и пуктiс пуртсö.

Сiдз бы и вунöтсис эта кадыс, но притчаыс öтнас оз ветлöт. Вот и горыс век тай эз тшынöт, а тулысъявнас тшынсö пондiс чапкыны керку пытшкас. Степанидаыс мавтiс потласьöм важ горсö, белитiс и мый только эз кер, но нем эз отсав. «Поди, кирпич усис трубкаас, — тöдвылас усис сылö. ― Колас кайлыны да видзöтны». Сiя эз любит корны йöзсö, и ачыс мöдiс кайны трубаыс дынö. Керкуыс эд абу вылын, кульыс, поди, оз жö чапкы? Эта понда лöсьöтiс лиснич да мырсьöмöн кайис вазьöм лымок вевдöрöттяс, кыссис вывланьö труба дынас и эз казяв, кыдз лымыс мезмис, и сыкöт öтлаын перыта шылльыштiс улö и Степанидаыс. Сiя пуркнитчис керку бердас вайöтöм лым пытшкас, а киссьöм лымыс топыта зэлöтiс сiйö да сiдз, что эз вермы чеччыны. Сэтöн кöть горзы или серав, нето ряксы. Быль эд сибдiс лымас, коккезнас эз позь вöрöтны, шедiс пленö, кöдаись колiс мездöтчыны. И сэтöн тöдвылас усис, кыдз одзза кадö орстöн этадз жö сибдöтлiсö томпöлöссö. «Кыдз инö ме пета? — думайтыштiс Степанидаыс да гажтöма шынньöвтiс. — Вот эшö адззылас кин да смех вылö лэбтас». Но петны öтнаслö вöлi не сiдз просто. Киэс шучкöп гöжисö лымсö асгöгöрсис курмалiкö, а кымöсыс пымалiс. Сiя вель дыр гуддисис и сё жö гужи-важи петiс, а сэсся пырис гортас да дыр пукалiс öшын дынас, видзöтiс туй вылас, кытi кöркö мунiс жöникыс да гортас эз лок. Сэсся ковсис ветлыны корны нучоксö, медбы кайлiс вöскас да видзöтiс трубаыслiсь чукыльсö. Сэтчö и пуксьöма вöлi саыс, кöдö весöтöм бöрын тшыныс путриктöмöн пондiс кайны вылö. Ой кежас Степанидаыс кайис горвылö да узис крепыт онöн. Калитчöм горыс жагöник небзьöтiс пöрись коскаэсö, а лядьбейсö сотiс. Только асывнас кöзяйкаыс чепöссис местасис да ойнитiс — бокыс вöлi öддьöн зубыт. Нельки кок вылас позис тальччыны умöля. Ох и ругайтiс асьсö, видiс медбöрья кыввезöн, кыдз только кужис. Натьтö, сэксянь и пондiс дзöрны юрыс, но больницаö эз мун, а лечитчис туруннэзöн гортас. Керис нельки настойка, ранасö мавтыштiс. Сотöм местаыс жагöника веськалiс. Но эз на чулав эта бедаыс, мöдiк локтiс. Кöзяйкаыс мунiс видзöтны гуяма, мый сэтчин керсьö. Сэтчин эшö вöлi картошка заптöс. Ямаыслöн вевдöрыс важын ни пуксис и муыскöт лоис öтровня. Только пыранiн ыбöсокыс эшö тöдчис. Степанидаыс мышкыртчис осьтöм ыбöсок весьтас да пыксис киэзнас сiсьмöм керок дорас, но дорыс чегис, и старухаыс öнняюрöн усис гуяма пыдöсас. «Мый нö ни эттшöмыс мекöт керсьö, — асвылас нерадöн думайтiс Степанидаыс. — Кöть эд мый шу, а дявыс эм, и сiя тойлалö менö. Кин сысся вермас эттшöмсö керны?» Спасибо, кыдзкö эз доймы, а кисö кырöвтiс, дак сiя веськалас. Старухаыс жагöника петiс ямасис да дыр видзöтiс сьöд пыран осьтаас и сьöвзис кок увтас, бергöтчис да мунiс керкуас.

— Еныслö ни ме эг понды ковны, — жагвыв висьтасис сiя моньыслö, кöр шоччисьыштiс да петiс зоныс ордö. — Дявыс менö новйöтö аслас местаэзöт, ызйöтлö, пöрись мортöс кыскалö сэтi, кытi оз бы ни ков. Беда, ыджыт беда лоис. И сё сы понда, мыля умöля пондi пернапассö тэчны. Грех шедта да и только. Ох-хо-хо, сьöкыт лоис оланыс. А кульыс сё кыскö овны. Кыкьямысдас ни эд меным тырис...

Степанидаыс дыр эшö пукалiс зоныс ордын да висьтасис ассис олансö. Челядьыс кывзiсö öммезнысö осьтöмöн.