Вöралiсь

Деревня гöгöрас одзжык быдмис сук вöр, графлöн лыддисис. Сэтчинiсь пуэсö эзö лэдзö керавны, кöть тай керкуыт киссьö ни, картаыт паськалö. Нельки ньöрсö гусьöн керавлiсö, но и сы понда вöрас ветлывлiсö пемыт ойö да гымалан коста, кöр зэрö и вирдалö. Мортыс кералас ньöрсö, кыдз масiсьöс да местасö нитшöн тыртас, медбы егерьыс эз казяв, а то вермас штрафуйтны. Пожуммес сулалiсö веськытöсь, басöкöсь да вылынöсь, уввес только конечокас шапка туйö вöвлiсö. Кöть и не аслат, а бур вöлi вöрыс. Быд пуыс, кыдз бöрйöм, волькыт да веськыт, веж качыс свиттялö. Любо видзöтны. Нельки жар лунö сы пытшкын вöлi ыркыт, шондiыс умöля тыдалiс. Быдкодь зверьыс вöдиттöг олiс, и быд животиналöн вöлi аслас туёк, кöда вылöт мунан и он тöд, кытчö вайöтас. Инькакельöпыс полiсö ветлыны вöрас. Только вöралiссес ветлöтiсö сэтчин, кошшисö аслыныс поживасö.

— Одзжык и ме ветлывлi вöравны, — висьтасис гöрд тоша да паськыт корпаа мужик, кöда куритiс сотчöм трубкаöн табак. — Неöтпыр ошыскöт пантасьлi. Нем сэтшöмыс абу, кöр сiйö он лöгöт. Здоровайтчикас нельки лапасö сетас да юасьö, кыдз пö олан да мый керан? Мужикыслöн синнэс эзö и кваркыш керö, а чужöмас паськалiс хитрöй шынньöв. Ме и баита сылö: «Ола жагöника, Михайло, ог тöжды». Пельпонам сiя лап-лап керыштас да советуйтас: «Но сэк инö, мужичок, жагöника ов сiдзжö да сорлась отирыс коласын», — и мунас аслас туй вылöт, бытьтö морт, чукыля бöрись лапаэс вылын. Аслас спинаыс кыдз вартан долонь, öдва коккесö вешталö. Бöрсяняс видзöтан дак, юрсиыт кышöпöн сувтö. А Михайлоыс муныштас дынсим да эшö бергöтчас да видзöтö меланьö, ог ли сы ладорö мун. Кöть эд зверь, а ылöстö. Но сiя эз тöд, что шабур увтам новйöта лэчыт пурт. А то кыдз жö? Вöрас эд сякöйыс вермас петны.

Старикыс мöдiс бы куритны, чмокнитiс öмнас да кыскис тшынсö, но табакыс вöлi кусöма. Сiя трубканас шваткыштiс печкаок кымöсас да пыркöтiс кольччöм пöимсö и кармансис кыскис öддьöн ни важö, нятьсялöмсяняс свиттялан кисетсö да курмыштiс сэтчинiсь табаксö, топöтыштiс чуньнас да чиркнитiс истöгнас и öзтiс. Öтпыр, мöдпыр дженытика кыскыштiс тшынсö да лэдзис труба пöлöняс, кöда жагöника паськалiс конюх понда олан керкуокас, пондiс кöвьясьны, кöр кин-либо осьтлiс ыбöссö. Эта коста, кöр пöрись мортыс тэрмасьтöг кыскасис табакнас, челядьыс пукалiсö öммезнысö осьтöмöн да видзчисисö, мый эшö висьталас тоша дедыс. А сiя недыр куритыштiс, кашельтiс да, кыдз бытьтö эз и дугдыв, баитiс одзлань:

— Вöрас öтiкыслö, нем и баитны, гажтöм овлö. Сэтчин и кöчыс вермас повзьöтны да сэтчöдз, что вешьян бöртö пондан киат видзны. Öтпыр тай Сав Петрасö ошыс вöлi сiдз изналöма, что еныслö ловсö чуть абу сетöма. Вöрас кöзяиныс ачыс ошыс, и сыкöт шутитны оз туй, не бöбалан сiя торыс. А Петраыс мöдöма курковöй пишальöн вермасьны, но не сэтöн вöлöма. Кöть и не бур вöралiсь сiя вöлi, да ошыс дынö колö тöдны кыдз сибöтчыны. Аслас эд вöлi пишальыс, дак сiя мыйла дедыслiсь босьтöма? Сiйöн, натьтö, что курковöйыслöн стволыс кузь да кыз. Да эшö зарядиттöнняс порохсö тэчан, мымда колö и оз ков. Думайтiс, натьтö, ыджыт заряднас кöть кытшöм зверьöс вияс. Вот и резö-паздö мунö чашьяöттяс, а говкыс верста ылына паськалö. Сэтöн не только кайыс пышшас, но и шырыс дзебсисяс. Вöрас эд кань моза колö ветлöтны да кывзiсьны, быд шысö и следоксö тöдвылат видзны, тöдны кытöн да кин олö. Вöралöм одзас и иньыткöт оз ков узьны. Зверьыс öддьöн бура кылö ульдуксö. А Петраыс эта вылö эз видзöт, немлö пö. Мунö вöрöттяс и думайтö: «Талун куш кинам гортö ог ни лок, сёровно кинöскö да вия». Оськалö Петраыс, а кок увтас кöс уввес ризьöтöны. Сiя гусьöника мурзьö ас пондас, нельки одзас оз видзöт. И чожа кушинок, кытöн ошыс шонтiсис шондi вылас. Видзчисьтöмсяняс Петраыс öшас, горöтö бы, да оз вермы, шыыс öшас. Сiя эд первуись адззö ошсö, а ружьёыс пельпон вылас вöлi. Кöр садясьыштас — кватитас пельпон вывсис пишальсö и гымгас, натьтö, оз и метитчы. Сэсся сулалö да видзчисьö, кöр тшыныс чулалас. Мöдiс бы казявны вийöм ошсö, а зверьыс сувтас бöрись коккес вылö да рякöстас вöр пасьтас и уськöтчас вöралiсьыс вылö, кватитас ружьёсö, ризьнитас-чегас прикладсö и шентас бокö, мöдöрö ыстас стволсö, а Петрасö нёкыртас ас увтас. Перво летöма-вотöма паськöмсö, а сэсся лэчыт гыжжезнас шамыртас небыт бöрсö, монлалас лядьбейсö, морос гöгöрсö да спинасö. Петраыс оз ни пессьы, а только еныслö кеймö, медбы ловйöн колис. Мортыслö не сэтöн вöлöма кувны. А ошыс орсыштас да пуксяс бокас да видзöтö. Несчастнöй вöралiсьыс только вöрзьöтчыштас, ошыс бöра сы дынö локтас да эшö нöитыштас. Но пондыв-ко терпитны сэтшöм зубытсö? Петраыс кöстасьö, оз ни шыась. Медбöрын ошыс шамыртас сылiсь юр кучиксö да лэдзас синнэз вылас. Вöралiсьыслöн и бырас юрсадьыс. Куйлö, кыдз Христос. Ошыс эшö, кынымöтпырись ни, нюкайтыштас ассис жертвасö да жагöник лапсыртас-мунас аслас туй кузя вöрас.

— Сiя вийис Петрасö? — повзьöмувьяс юалiсö челядьыс.

— Только рытнас сiйö адззисö мужиккес, кöдна ветлiсö вöрас, — висьталiс старикыс да вились öзтiс кусöм трубкасö. — Вайöтiсö сiйö быдöс мавтчöм вирöн, кучикыс летки-петки торрезöн öшалö, но лолыс видзсис, только чуть тöдчис лолалöмыс. Кыдз казялiс этö иньыс, керкутырьяс лэбтiсис герьявны, пеллез чаналiсö. Сэк вöлись сылö жöникыс бур лоöма, а то, беднöйöс, пыр видiс да умöльсьöтiс. Петраыс жö неделя-мöд боккесö пöжис да и сувтiс кок вылас.

Висьтасисьыс дынö öксисö виль морттэз, кöдна охотитiсö кывзыштны, мый бöра бура-бытшöма бöбöтö эта быкыша старикыс. А сiя тэрмасьтöг кыскалыштлiс сьöдöтöм трубкасис тшынсö да дыша лэдзавлiс бöр. Олiс эд öтнас и отирыс коласын любитiс висьтасьны да касьтывны важся олансö. Сiя тöдiс уна вöвлöм и вöвлытöмсö, кужис ассяняс содтыны и висьтавны, кыдз бытьтö сiдз и вöлi. И кöть бы серöмтчис. Оз эд и синкымсö вöрзьöт.

— Öнöдз тöдвылам видза, — одзлань баитiс сiя да видзöтыштiс бокас пукалiссес вылö, — кыдз деревнясиным öшис чилькöтан мöс. Мый эта сэтшöмыс, тöдö быд кöзяиныс, кöдалöн быдмöны челядь. Рытнас локтiс быдöс стадоыс, а вот Тöвчиковыслöн мöсыс эз вöв. Кытчö бы, ёрдöм скотина, лоис? Кöзяиныслöн сьöлöмыс вöрзис. Тыдалö, кылiс бедасö. Сэк жö котöртас кошшисьны. Мунiсö и мöдiккез. Деревняас вежöртлывлiсö эд тöждiсьöмсö и отсасьлiсö, кыдз асланыс беда коста. Вöрас мотырасясö и гортаныс ни лöсьöтчöны мунны, но подаыс петанiнын казяласö джагöтöм мöссö, кöда пырöма вожасялöм кыдз коласö, шедöма, кыдз налькö. И быдöнныс решитiсö, что этчö вашöтiс сiйö ошыс. Кавтыкыс эд вöлi йирöм. Кин мöдiкыс сымдасö вермас керны?

Недыр думайтöм бöрын кöзяиныс босьтас чер, пишаль да мунас вöрас и керас пу вылö шалаш да каяс сэтчин ой кежас. Видзчисьö. Гожумнас эд ойыс дженыт. Асывнас, кöр лöз видзö югданпоныс, мужикыс кылас, кыдз ризьöтыштлö вöрас, и мöртöтас синнэсö шум вылас. Видзöтас сiдз, что синваыс петас. Недыр мыйись Кузькаыс казялас — петö пожива дынас ляшмасьöмöн, тэрмасьтöг ош, тöвньылат кывзö дуксö. Кузькаыс кутас локтiсь ошсö мушка вылас, но ошыс гöгралас-гöгралас мöс тушасö, а матö оз сибöтчы. Сэсся Кузькаыс эз ни вермы терпитны и ляпкöтiс лэдзан крючок вылас, но пишальыс эз гыпкы, только шляпнитiс, а ошыслö тырмис и эта негорöна тачнитöмыс. Сiя, медбы кывзiсьыштны, сувтiс бöрись коккез вылас, лэбтiс чукасö и пондiс локны лабазыс ладорö. Локтiс пу дынас да сувтiс и, натьтö, думайтiс: «А кытöн тэ сэтчин, мужичок? Ноко, лэдзчы ме дынö баитыштны». Но мужикыс чöлiс. Сiя мöдiс бы мöдпöв зарядитны пишальсö да патроныс сибдiс и некыдз эз шед. Ошыс гыжьясьö, кайö ни пу кузяс. А Кузькаыслö кытчö воштiсьны? Сiя чепöссис да кайис эшö вылöжык, а йылас уввес лоисö вöснитжыкöсь, эзö пондö терпитны мортсö, и вöралiсьыс мезмис да усис веськыта ошыс вылö. Ризя-вазя кыкнанныс буткисисö му вылас. Кузькаыс мöдiс бы чеччыны да киыс шедiс ошыс увтö, а сэсся садьыс öшис. Кадыс вель дыр кодь чулалiс, кöр сiя садясис. Сэк и локтiсö сы дынö мужиккес:

— Мыля ошыс бокын куйлан? — юалiсö нiя.

— Да вот водыштi тай Михайлоыскöт да ланьтсьöма, — кыдз бытьтö сiдз и вöлi, висьталiс Кузькаыс. — Мийö эд сыкöт важся друггез, и вöлi мый йылiсь сёрнитны. Висьталiс тай, ме пö эд мöссö эг бы джагöт, да кынöмö öддьöн сималiс. Вот сiдз вöлi делоыс...

— А дружокыт мыля нö оз чеччы? — юалiсö сылiсь.

— Сiя, натьтö, öддьöн мыдзис. Вöрöттяс эд не кокнит бродитны...

Мужиккес вöрзьöтiсö ошыслiсь тушасö, но сiя вöлi тувдöма ни. Кöр кыскисö сiйö деревняас, кулисö да гырксö лэдзисö, сэтöн казялiсö, что сьöлöмыс сылöн потöма повзьöмсяняс.