Стражник

Одзжык, кöр отирыс олiс öткаса хозяйствоэзöн, Вöрсай деревняын олiс стражник Митька Пискунов. Кöр казялас улицаись нять, сэк жö тшöктас тыртны, а чегöм потшсö огородечсис вежны. Мöд лунас проверитас и, он кö кывзы, штрафуйтас, а деньгасö корас сэтöн жö. Квитанцияыс пыр вöлi сьöрас. Кысь деньгасö? А кöть кытiсь, но адззы да пукты сылö, а то вешьянтö отирыс син одзын чöвтас. Сiя вöлi неумолимöй.

— Колö видзны пор-рядок, — баитлiс сiя отирыслö.

Пискуновыс и гортас вöлi строгöй. Зоннэслö и нылыслö эз сет минутка пукавны весь, мый-нибудь да адззас керны. Пöрисьжыкыс, Сергаыс, велалiс и кужис ывсöтчыны, а вот Тикöныс эз вежöрт этö и шедлывлiс айыс син одзö частожык.

— Тэ кыдз синнэзö пыран гут, — сералiс айыс. — И он ни бы ысты, да ки увтö пыран. Воныт вот мизгыр кодь, кужö сайласьны, медбы не керны уджсö, а шатласьны. Тэнат мыгöрыт учöт, да коккет чожöсь. Сiдз и колö порядоксö видзны.

Но властьыс Пискуновлöн чожа бырсис. Революцияыс да гражданскöй войнаыс дзугисö сылiсь планнэсö. Чиннас эз лэб и уджсö öштiс, лоис деревняись простöй олiсьöн, но одзза мывкыдсö эз веж, гортас кольччис сэтшöм жö строгöйöн, челядьсö зэлыта видзис киас, эз сет нылö вольничайтны. А инькасö некин ордö эз лэдз петны. Эта кадö сiя гöтралiс Сергасö, кöда торйöтчис мöд керкуас, и лоисö кык семья. Кытчöдз Тикöныс кольччис дынас, а Параськаыс мунiс ни жöник сайö. Оланыс кыдз бытьтö пырис аслас колеяö. Митькаыс дыр думайтiс, но кöр сылiсь öтлаöтiсö медбöрья пашняоксö, то сэсся нем эз кольччы, кыдз только гижсьыны колхозас, но уджавны эз гленитчы, а начальникас эз шед, и этасянь пыр ветлöтiс учöтик черокöн да лöсьöтыштлiс киссьöм йöррез. Мöртас майöг, вежас сiсьмöм потш или жö сувтöтас йöр бокас пыкöт — эта понда корас трудодень. Эта мунiс сысянь, кöр уджалiс стражникнас. Сэк сiя босьтiс штраф, а öнi мынтiсö сылö. Вот и быдсöн вежсьöмыс.

Пöрисьжык зоныслö кольччис етша ни служитны армияас. Сiя гижис гортас, что чожа локтас бöр и закажитлiс: «...Черсö да щеголёксö эдö öштö, — гижис сiя. — Нiя плотникыслöн главнöй инструменттэз. Локта и понда строитны керку».

Демобилизованнöй солдат локтiс гортас и чожа пондöтiс строитны аслыс керку. Лэбтiс срубсö, а сэсся эз вермы керны — пондöтчис война. Сергасö босьтiсö фронт вылö, а гортас кольччис сылöн инька учöт челядёккезöн. Важ керкуыс сiсьмис, крышаыс осьтасялiс, и айыслö эз кольччы нем, кыдз только строитыштны вильсö. Но и сэтöн эз вермы вунöтны одзза велалöмсö — быд местаö кысйöтлiс учöтжык зонсö, то öтiкö тшöктас керны, то мöдiкö, сё бы Тикöнсö велöтiс. И эн лысьт сылö паныт шыасьны, кöть и аслас толкыс эз тырмы. Джоджсö керны вöрсö сы висьталöм сьöртi орлалiсö дженытжыка и ковсис кыкнан конецас пуктыны поперег плахаэз, мый вöлi не öддьöн басöк.

— Оз кö гленитчы, дак ачыс мöдпöв керас, — юрбöрсö гыжьялiкö горöтчис Пискуновыс, кöр плахаэс пуксисö местаэзас.

— Войнанас эд озö орсö, — висьталiс зоныс. — Сэтчин вермасö и вийны. А мый тэ босьтан?

Не весь и висьталiс, воныс сiдз и эз берт.

— Эн карзы. Ачым тöда мый сэтчин петö. Том эшö айтö велöтны. Перво ныр увтсит весöтны куж, а сыбöрын вöлись баит. Ме эшö четырнадцатöй годö фронт вылас вöлi, кытöн ранитiсö. Сэксянь вот и чотыштла. Войнаыс эд бурсö оз кер.

— Сiдз тэныт и колiс, стражниклö, — гусьöна бобгыштiс

Тикöныс мöд угöлас мунiкö, кытöн колiс сувтöтны шкант. — Аслыс тебенитас, а сыбöрсянь зулльы-кер. Мездöтчыны бы сы дынiсь вот. Чожажык бы армияас кöть босьтiсö. Эстöн öтiк маитчан.

И вот сiя кадыс локтiс — Тикöныслö сетiсö повестка мунны фронт вылö. Гуляйтöмыс вöлi дженыт да и паськыта гажöтчыны немöн. Трудоденнез вылас праздниксö он кер. Соровтлiсö брага, а сур йылiсь и басни эз вöв. Войнаыс мунiс куимöт год ни и крестьянаыс говсялiсö, быдöс сетiсö фронт понда. Тикöныс мунiс шумтöг, казявтöг, отиртöг, не сiдз кыдз кольлалiсö вонсö, песняэзтöг. Сiя кад кежö локтiсö öддьöн ни уна вийöм йылiсь извещеннёэз. Менделееваöдз мунiс подöн, котомкасö кыскисö вöлöн, а сэсся поездöн и локтiс Бершетьöдз. Сэтчин велöтыштiсö невна и ыстiсö фронт вылö, кытöн шедiс сэтшöм местаэзö, кöднаись етша петiсö ловйöн, воюйтiс нюра местаэзын, кынмалiс и сьöкыта ранитöм бöрын да госпитальын лечитчöм бöрын локтiс гортас, кытöн олiсö айыс да мамыс, кöдна öддьöн пöрисьмöмась. Нылöн нельки немöн вöлi гöститöтны зоннысö, олiсö только норма вылö, кöдö сетавлiсö колхозсис.

— Зонö, умöля пондiмö овны, — норöна баитiс айыс да сьöкыта лолалiс. — Няньсö колхозыс етша сетö, а пашняыс асланым абу. Кыдз и пондамö овны, огö кö кулö.

— Вежöртана, что сьöкыт, но овны колö. Отирыс эта понда и вирсö кисьтö. Гитлерыслiсь сивилёнсö мургыльтамö, и вöлись оланыс лöсялас. Некин оз понды мешайтны.

— Дак эд кöр сiя эшö лоас? — айыс видзöтыштiс енугöлас да пернапасасис, а сэсся думайтыштiс и висьталiс: — Меным унаöсь ни годдэс и чередь, поди, адззыла.

— Еныс не Микишка, олан эшö, — серöмтчис зоныс. — Öнi эд не деревняöттяс ветлöтны, — Тикöныс мöдiс висьтавны «кыдз стражниклö», но видзсис, эз ни понды лöгöтны айсö, — колö уджавны, а не киэзöн макайтны. Небосис сiдз нем оз усь, сё колö керны.

— Тэ том, вот и кер, а менам керсьö ни, тыдалö.

— Норовит, вот гöтрася и понда керны.

— И аймамытлiсь он юась?

— А мый тэнчит кылан? Тэ орöтан дженытжыка нельки джоджсис плахасö. Ме кыдз думайта, сiдз и кера...

Недыр мыйись Тикöныс гортас пыртiс неыджыт мыгöра нывкаöс да айыслö висьталiс, что вайöтiс аслыс инькаöс. Кöть вöлi сiя том, но жаг, небергалiсь, кöть и вывтырнас еныс абу обидитöма — волькыт, но эз тэрмась уджас. Йöзайыслö эз гленитчы первöй лунсянь, мыля сiя дыша ветлöтiс сы одзöт. «Эх, жаль не менам öнi властьыс, — думайтiс сiя кулаккесö пидзралiкö, — а то мыччалi бы, кыдз колö ветлöтны öтiк половица вылöттяс. Дышыссяняс госсялöма быдöс, коксö оз вермы вештыны. Нагайка тэныт кызжыкö колö. Да и мужикыс колö тэныт не Тикöныс кодь виньöрик, а Гурич Васька-пороз кодь».

Айыс да зоныс ас коласаныс эзö пондö лöсявны, споритiсö быд лунö, кöр колiс и эз ков. Айыс пондiс дзескöтчыны и Тикöныс решитiс строитны аслыс керку. Война бöрсянь инвалидлö сетiсö вöркералан билет, и сiя керлiс не öтiк помеч, медбы заптыны вöрсö да ваявны гортас. Инькаыс уджалiс колхозас и транспортсö сетiсö мынттöг, сiдзкö, вöрыс чожа вöлi строитчан местаас. Тикöныс тэрмасьöмöн сiйö волис, а сэсся керис помеч и кык лунöн тшуписö. Кöзяиныс эз понды кыскыны кадсö и öтласа вынöн керкуыс лэбис да шедiс крыша увтö. Тикöныслö уджавны лоис паськытiн — колiс потолоксö вöвдны и джоджсö керны, öшыннэз местасö осьтны, ыбöссö лöсьöтны. Уджыс вöлi уна, но и гожумся луныс не дженыт. Айыс, кöть и лöгалiс, невнаöн отсалiс зоныслö. Нельки горсö ачыс панiс, вартiс да осьтiс öмсö. И вот сибöтчис кад петны керкуас.

— Ухватыс да сковородкаыс асланыт эмöсь, — горöтчис сэтчö айыс, — а шöмöссö бы колiс сетны, да сiя менам öтiк. Эдö ни осудитö. Еныс сетас, и асьныт наживитатö.

— Спасибо и эта вылын, — Тикöныс пуктiс айыслö поклон. — Сэсся ог понды овны стражникыс кысйöтлöмöн. Ачым лоа кöзяиннас.

— Кокнит висьтавны, да не сiдз просто оськавны.

— Бобольнас эн повзьöтлы.

— Стражникыс дырни порядок вöлi, а öнi мый? Керöмсö ризь-вазь жугдöны да чапкöны, а вильыс оз сод. Одзланься йылiсь некин оз думайт. Олöны öтiк лунöн. Дыр я сiдз кыссяс?

— Олыштамö и адззылам.

Асылыс вöлi гажа, кöр Тикöныс иньканас петiсö виль керкуас. Нiя мунiсö улицаöт. Лэбтiсьöм шондiсяняс бöраныс кыссисö кык кизьöрик вуджöр. Тикöныс мунiс одзас и киас вöлiсö чугунок да пызандöраö каттьöм чöвпан нянь, а инькаыс оськалiс бöрсяняс шальö кöрталöм паськöмоккезöн да киас няньзырöн, кöдö сетiс мамыс. Нылöн эта вöлi быдöс богатствоыс. Сiдз и пондöтчисö овны виль керкуас.

— Эн тöждiсь, Мари, — гажöна горöтчис Тикöныс, — жагöника быдöс наживитамö. Тырмас стражникыслö уджавны. Сiя сöскö бы только ас пондас и некин йылiсь оз думайт. Тырмас сы понда спина кöставны, колö и аслыным уджавны. Мездöтчимö стражникыс дынiсь, позьö и ловзисьны кокнитжыка.

И пондiсö овны.