Вит руб

Савелий Кычанов вöлi бöрйöм колхозас парткомö секретарьöн. Первосянь сiя етша вежöртiс, мый колö керны, но кадыс чулалiс и жагöника пондiс авйыны, кöдöрö ыстыны ассис вынсö. «Председательыс том коммунист», — думайтiс сiя. — Сылö колö кывзыны партияыслiсь висьталöмсö. Мыля сiя ассис нырсö нöбöтö?» И решитiс баитыштны сыкöт. Кыдзкö пырис сы кабинетö, кöр некин эз вöв, пуксис одзас и пондöтiс баснисö:

— Важын ни мöдi баитны тэкöт, Михаил Фёдорович, да сё кыдзкö оз лöсяв. Отирас тэнö, кыдз веськöтлiсьöс осудитöны, тальччалан пö бокö.

— Но-но, висьтась, мый кылiн?

— Дöваэсö да и мукöд инькасö бокö пö кежöтлан. Сiдз эд оз лöсяв веськöтлiсьыслö.

— Эта колхознöй делоэз дынас оз павк. Планнэсö мийö тыртамö, и райкомыс ошкö. А дöваэс... Кöс росöн эд он вачкы, кöр ки увтат шедасö.

— Сiдз, мыся, оз лöсяв веськöтлiсьыслö.

— Уджалыштан невна и вежöртан, что быдöс лöсялö. Вот босьтамö Сили Петраыслiсь инькаоксö. Кыдзкö ме пыри ны ордö юасьны мошшез вöдитöм йылiсь, а жöникыс гортас абу. Нюраыс менö пöттöдз гöститöтiс аскурöн, и кайи сараяныс узьыштны. Кынымкö минута бöртi кыла, кыдз гужи-важи ме дынö кайис кöзяйкаыс. Ме киэзöс нюжöтi, и сiя водiс бокам. Менам, шушкö, мельникыс лун и ой мельницаас, а меным колö терпитны. Вот сiдз и петавлö. А отирыс миян только баля табун, кытiсь колö кужöмöн бöрйыны колана дзельсö. Велöтчы, кытчöдз ме уджала.

Савелийлöн инькаыс уджалiс вузасисьöн, и нылöн вöлi öтiк кага. Семьяас кытчöдз вöлi спокой, видчöмыс эз кывлы, олiсö да öтамöднысö кывзiсö. Но недыр мыйись и ны коласöт котöртiс сьöд каньыс, кöр пондiс кывсьыны, что и парткомсис секретарьыс орсöтчö пö да бöбавлö пода вöдитiссескöт. Инькаыс эз терпит этö и гортас лэбтiс быдса скандал да намёкöн горöтчис янсöтчöм йылiсь, кöть сiя и секретарь. Вот эд кытшöм зараза! Сiйö он кор собраннё вылö да он накажит, не выговор он сет. Кöть тэ мый кер. Инькаыслöн эд öмыс радиося паськытжык, он пöднав. Пондас ванзыны, дак деревнясö саймöтас. Айтö и мамтö каттяс, да эшö öтлаöтас роднятö и кулöммесö лэбтас, бергöтас да висьталас, киннэзöн нiя вöлiсö. Ас мывкыда морт кытшöмкö.

Кычановыс юрсö öшöтöмöн думайтiс эта йылiсь, но некöдöрö эз лок и решитiс вились баитыштны председательыскöт. Адззис момент, кöр сiя кольччис öтнас, пырис кабинетас, кытöн öшалiс табак тшын, шысеттöг осьтiс öшынсö да негорöна висьталiс:

— Ачыт смолитан-куритан и мужиккесö лэдзан. Не кабинет, а проходнöй! Дак ме мый пыри? Гортын оланыс эз ло. Инькаö пондiс вежöктыны, кинкöт бы эг баитышт.

— А тэ разь не кöзяин? — юалiс председательыс да велöтöмöн висьталiс: — Пыркöтышт сылiсь буссö, медбы сöстöмжык вöлi. Деревнясис некытчö оз мун, а гортаныт кыкöн. Тöдчан местаэсö только эн вöрöт. Велöтышт аслат киöн, и лоас шёлковöй.

Кычановыс дыр думайтiс эта вылын и гортас локтiс сьöд кымöрöн. Сiя мыдзöмöн чöвтчис и пуксис пызан саяс. Инькаыс нёджжöвтiс сы вылö да думайттöг горöтчис:

— Мый, талун эз шед каньыслö шырыс? Колö и постнöй лунсö тöдны.

— Тэнат быд лунö ульлун, да ме тай шы ог сет, — лöга висьталiс Савелийыс да чуннезнас шваткöтыштiс пызан пöв бердас.

— Жöник эм да мыля жö не сiдз.

— Ме вот сета тэныт жöниксö. Тупкав öмтö.

— Ме тупкала? Оссьö вöлись менам öмö. Ме тэнö, шыльки-выльки секретарьöс, петкöта сöстöм ва вылас.

— Эшö öтпыр висьтала: тупкав öмтö, не то...

— Бобольнас он повзьöт, пантасьлiсö ни не тэ кодьöсь.

Сэтчö Савелийыс чепöссис иньыс дынö да клёпкис пельбокас. Иньыс эз видзчись эттшöмсö и барöтiс синнэсö жöникыс вылö.

— Мый, эшö етша? — юалiс сiя да содтiс мöд пельбокас. Инькаыс пондiс нюксыны-герьявны да мöдiс петны öтöрас, но кытчö пышшан эта весь олiсьлöн вына киэз увтiсь, кöднöн сiя кутiс да татшöтiс небыт местаэзас, а вартлiкас шувлiс: «Тöд ассит местасö и эн лёб отирыс коласын, кöдö оз ков. Пиннетö чеглала, шабаркнита и юртö, пондан только шевгыны, а то öддьöн ни паськыта видзан öмтö. Горбтö лэбталан, дак ме чинта сiйö...»

Мый нiя керисö — тöдöны только стенаэс. Кöзяиныс водiс западня вылö и ашынас эз и сёй, мунiс парткомас. Инькасö бура висьöтiс, и сiя эз пет уджавны. «Коммунисттэс öнi колхозас видзöны власть, — думайтiс сiя. — Мый охотитöны, сiйö и керöны. Но кин вермас дорйыны простöй мортсö? Только народнöй суд!» — решитiс медбöрын инькаыс и жагöника чеччис, босьтiс бумага да тэрмасьтöг гижис судас, кытöн корис жöникыссянь алименттэз öтiк пияныс вылö. Бумагасö пуктiс конвертö да ыстiс городас. Только рытланяс мунiс да осьтiс магазинсö. Ружтöмöн мышкырасис, но некинлö эз висьтав, мыйсянь шогалö. Колана документтэзöн мымдакö кад бöртi сiйö корлiсö судас и жöникыссянь судитiсö алименттэз. Кöр локтiс исполнительнöй листыс, жöникыс вöлись пондiс тöдны, мый керöма инькаыс. Эта вöлi гымалöм мича лунас. Эта лунöдз нiя эз баитö öтамöдныскöт, но кöзяиныс эз терпит одзлань.

— Значит, алименттэзöн мöдан овны? — юалiс сiя иньыслiсь.

— Мый шедта, сiйöн и ола, — лöга шыасис кöзяйкаыс да висьталiс: — А зонытлö мыйкö сёйны и паськöмокыс колö.

— Немлö сыöн вевттисьны. Зонö понда деньгаыс пыр менам эм.

— Кöдö ме ог адззывлы. Тэ эд кöшельсö кырымат видзан, а меным колö быдöс небны да пызан вылас вайны.

— Сетла тай, мымда колö.

— Копейкаэсö сеттöн киэт дрöжитöны. А карта вылас он видзöт, кытöн мöсыс, баляэс, порсьыс пияннэзнас да курöгпöлöсыс тыр. Быд юрыслö колö сёян.

— Но, тырмас, а то лэдзчисин. Тупкав öмтö!

— Ме то тупкавны верма да видзöта, мый арнас лоас. Öтамöднысö чушьялöмыс вились пондiс лэбтiсьны да паськавны, и кин тöдiс, кытчöдз вермис локны, но Савелийыс чеччис местасис да петiс öтöрас. Сiя ветлöтiс карта вылöттяс и эз тöд, мый керны, да пуксис леснич вылас. «Кытшöм эта олан? — думайтiс сiя. — Инька пондiс кульны алименттэз. Былись эд и вешьянтöг вермас кольны. Мый тэ сылiсь босьтан? Сьöкыт, но колас миритчыны. Кыдз не кыдз, а öтлаын оламö не öтiк год ни. Кыдз баитöны отирас, инькаыс леститчöмсö любитö и проститас».

Савелийыс пырис гортас бöр да босьтiс газета и пуксис öшын дынас, видзöтiс картинкаэсö, но лыддьöтöмыс эз пет. Лöгасьöм инькаыс шысеттöг кыскалiс подаыслö ведраэзöн лöсьöтöм шöмсö. Öтöрыс пемдiс, и öшыннэс сьöдöтiсö, кад ни вöлi биасьны. А инькаыс ой кежас юкталiс подасö да сёдыштiс и пырис, кыш-паш чöвтчис да водiс. Савелийыс думайтыштiс да мöдiс водны сы дынö, но инькаыс висьталiс:

— Подушка вылас перво пукты вит руб и вöлись верман водны.

— Мый, мый, — эз вежöрт кöзяиныс баралöм синнэзнас.

— А сiя, кöдö кылiн. Ме эд не партийка, медбы ачымöс юны винаöн. Перво пукты и вöлись баит.

— Эта жö лоö проституция, — бобгыштiс Савелийыс койка дынсис мунтöн да локтiс забор вылын öшалан жакет дынас, кыскис кармансис вит руба деньга и бертiс да пуктiс подушка вылас, кыдз иньыс тшöктiс.

— Вот öнi, пожалуйста, вод, — серöмтчыштiс инькаыс да вешшыштiс стена ладорас. — Тэнат партийкаэс асьнысö тыртöны винаöн, а этадз пондан гортö ваявны деньгасö. Хозяйствоас кöть невна да лоас отсöт. Меным эд унаыс оз ков.

— Пыр ли мый ли этадз лоас?

— Кытчöдз юрсит мöдiккесö он чапкы. Спокой вöлi, кытчöдз секретаряс эзö бöрйö. Сетöм властьыс тэнö бöбтiс.

— Пöднав ни öмтö, — небыта ни висьталiс Савелийыс. — Öнi некöр баитны. Важын ни öтлаын эг узьлö.

— Но эн вунöт висьталöмсö. Ме эд лöгсö дыр ог вунöт, мус вылам видза. Не сiдз просто чулалö.

Ашынас инькаыс лöсьöтыштiс сёйны, и Кычановыс мунiс уджавны пöтöн, но инькаыслöн кыввес эзö петö юрсис. Эта лунö сiя вöлi неласковöй нельки пöрись морттэскöт. Натураыс сьöртi кöть и уна баитiсь, талун сiя вöлi ас вылас не рад, и эз тöд мый керны и унажыксö чöлiс. Мучитчöмöн думайтiс сэтчöдз, что кымöсас дзулльöн петiс ньылöмыс. Сiя петiс мöдöдз этажас пуись керöм балкончик вылö, медбы сайкöтчыштны. Председательыс кабинетсянь кылiс горöн баитöм, но шыэс сорласисö, эз позь вежöртны. «Председательыслöн велöтöмыс меным оз лöсяв, — думайтiс сiя сулалiкас. — Пöрисьöват ни мортыс, а баитö не сiдз, кыдз колö. Этö и аслыс ме висьтала, ась тöдö».

Эта бöрын аслас оланыс пондiс лöсявны.

УТКАЭЗ

Редактор Василий Николаевич Рябчиков асывнас корис кабинетас шофёрöс, кöдiя тöн кыскалiс командировкаö редакциясис сотрудникöс и колана кадö эз лок, мыйсянь редакторыс öддьöн лöгасис. Сiя талун решитiс тöдны, мыля шофёрыс эз тырт сылiсь висьталöмсö. Неыджыт мыгöра, абу ни том шофёрыс чожа локтiс сы дынö да сувтiс порог дорас, босьтiс шапкасö да кутiс кыкнан кинас кынöм увтас, пондiс видзчисьны, мый висьталас начальникыс, кöдiя видзöтлiс кытшöмкö бумагаэз. Но вот Рябчиковыс пуктiс бумагаэсö бокö и лöчыт синнэзнас видзöтiс шофёрыс вылö, кыдз бытьтö первуись адззылiс мортсö. Шофёрыслöн öт киыс мезмис шапка бердсис, а спинаöттяс бытьтö котöртыштiсö кöдзыввез. Сiя бура тöдiс редакторыслiсь норовсö и тöдiс, что часöт пондас гымавны-вирдавны, но эз вежöрт мыйсянь. Пидзöссэс пондiсö дрöжитны. А редакторыс дыр эд видзöтiс сы вылö да ехиднöя юалiс:

— Любезнöй Иван Степанович, висьтав-ко меным, мыля тöн командировкасис дыр эн лок? Кытшöм сэтшöм причина?

— Ме эд мортыс подневольнöй, — дрöжитан шыöн пондöтчис шофёрыс, — мыля менчим юасятö? Ветлiс тiян заместительыс и сiя тöдö.

— Меным не заместительыс, а тэ донажык, — видзис очакывсö редакторыс да лöга серöмтчис. — Тэ менам заместительыс. Тöн вöлi менам важнöй пантасьöм и колiс мунны, но тэ эн лок сiя кадö, кöр висьталi. Мыля?

«Ах, вот мыйись тэ лöгасин, — мелькнитiс юрас шофёрыслöн. — Мöдiн мунны подругаыт дынö машинаöн, да эз пет». Иваныслö лоис невна кокнитжык. Сiя тальччис коклiсь кок вылö, шапкасö нöитiс кыкнан кинас, лэбтыштiс юрсö. Сiя казялiс, что редакторыс лöгалö не сы вылö.

— Мый сулалан, кыдз мугись вöв, — пытайтiс одзлань редакторыс. — Ме эд ог вид тэнö, а только юася. Вежöртiн?

— Да мый сэтöн не вежöртны, — маитчöмöн висьталiс шофёрыс. — Но тiян заместительыс уткаэз видзчисис.

— Кытшöм эшö уткаэз, — редакторыс сувтiс пызан саяс. ― Нiя мый, блокнот вевдöрас лэбалöны?

— Пруд вылас уялiсö.

— А тэныт-то мый?

— Дак эд заместительныт видзчисис.

— А тэныт вöлi висьталöма локны квать час кежö.

— Дак эд уткаэс пукалiсö пруд шöрас.

— Тэныт-то кытшöм дело? — нем эз вежöрт редакторыс и горöтлiс шофёрыс вылын, — Кöть бы тай йирас ась пырисö!

— Заместительыслö колiс кутны.

— Тэ мый, совсем бöбöв? Кин жö куш кинас пöткасö кутавлö?

— Рыт кежас пö берегас вовлöны. Мийö берегас и пукалiмö.

— Редакцияыслöн заданнёыс вöлi не берегас пукавны, а колхозас вовлыны да тöдны, мый керсьö ыббез вылас. Эталö уна кадыс оз ков. А тiйö олiтö сёр рытöдз. Мый керитö?

— Машинасис ме öзта бисö, а уткаэс пышшöны.

— Чёртыс тöдас, кытшöм орсöмöн тiйö орсiтö, — редакторыс петiс пызан сайсис да пондiс оськавны кабинетöттяс. ― Ме кöсйиси пантасьны и тiян кузя эг вермы. Быдöс дзугсис. Куш киöн то мöдöмась борда пöтка кутны. Кин сiйö веритас? Эстöн старайтчан бы керны кыдз буржык, а петö мöдöрöн. Личыта видза вожжиэсö. Колас зэлöтны. Сотрудниккес керöны, кöдö оз ков. Но ме кута нiйö жабраэзöттяныс. Пикöстны оз пондö лысьтны. А тэ мый, кыдз мыр, сулалан? Беднöй Иван, натьтö садьыт бырис пöткаэс сьöрын вöтлiсьтöн?

— Ме эг вöтлiсь, а руль саяс пукалi. Заместительныт котрасис уткаэс сьöрын, кöр нiя берегас локтасö.

— Но и мый жö?

— А сiя, что, кöр пемдiс, да утка вöдитiсь инькаыс кытсалiс нiйö сёйны — асьныс петiсö берегас.

Кабинетас пырис редакторыслöн заместительыс, пондöма кызны не том ни инька, киас кыз блокнотöн и порог дынас пöдiс да пондiс кашляйтны. Редакторыс орöттöг сотiс папиросаэз, кöть и тшынсö эз кыскы лёгкоэзас.

— Но куритöмась, — ас гöгöрсис тшынсö макайтiкö горöтчис сiя да мунiс пызан дынiсь стул вылö. — Василий Николаевич, мöда висьтасьны тöння ветлöм йылiсь.

— Мöдi бы тöдны, мыля сэтшöм дыр эдö локтö, — спокойнöя ни висьталiс редакторыс аслас пызан сайö пуксикö. — А то шофёрыс баитö кытшöмкö уткаэз йылiсь. Ме нем сылiсь эг вежöрт.

— Да, да, колхозыс пондöма нiйö вöдитны. Председательыс сэтшöм бура висьтасис, что ме решитi небны пара, но нiя вöлiсö пруд вылас, и миянлö ковсис видзчисьны. Дженытжыка висьтавны, падмимö локны аскадö. Думайта гижны эта йылiсь.

— Гиж, только дженытжыка, но вежöртана, медбы и мöдiккез думайтiсö да сiдз жö керисö.

«Вот эд, — ыбöс дынас сулалiкö да шапкасö шамралiкö думайтiс шофёрыс, — ме вылö горöтлiс, а заместительыслö шы эз сет. Модзыс дынö вовлö бы только машинаöн. Ме эд тожö морт. Мöдпырся висьтала, что машинаыс жугалiс».

— А тэ мый сулалан? — дзугас сылiсь думаэсö редакторыс. — Мун да видзöт машинасö. Талун некытчö он мун, но быд минутаö ло готовöй. Ов гаражас.