Сьöкыт случай

Васька-Барбос, кыдз нимкодялiсö сiйö деревняас, учöтнас быдмис уджалiсь семьяын, кöдаын вöлi быдöс, мый ловлö колiс. Сылöн тöдвылас эз вöв, кытiсь пызан вылас локтö няньыс, мöдiк сёян-юаныс. Аслас дассизим год кежö лоис шöрöт мыгöра, паськыт пельпоннэза, а вывтырыс лолалiс бырсьывлытöм мылаöн, надсадиттöм сьöлöмыс ёткöптiс паськыт моросас. Чужöмас орсiс визыв гöрд вир. Ыджыт да вына киэс вöлiсö сетöмöсь бура уджалöм понда, медбы кольны оланас мыйкö ассис, кытшöмкö козин. И пасьтасьны пондiс медбöрья мода сьöртi, любитiс вежмасьны томмес одзын. Только вот медбöрья кык годсö эз вöв гортас, сюрлiс не сiдз ылын местаэзас öтöрас хулиганитöм понда. А локтiс гортас и медодзза жö лунсянь пондiс вельмыны да аймамыскöт пиньгыны. Гортас сiя эз мöд уджавны.

— Меным колö шоччисьны, — висьталiс мамыслö. ― Кывлiн эд, кытшöм сэтчин оланыс, кыдз уджöтöны.

— Не тёшша ордын виа блиннэзöн вердiсö, — жалейтiс мамыс.

— Тöдан, мам, — ловö пыран шыöн горöтчис зоныс, ― ме дынö кöсйисисö вовлыны дружоккезö, кöднакöт öтлаын вöлiмö.

— Но и мый жö? Кыдз локтасö, сiдз жö и мунасö.

— Висьталан жö тэ, мам. Мийö жö быд кусöксö торйöтiмö. Сэтшöмсö разь верман вунöтны? Нiя воннэзся донажыкöсь лоисö.

— Дак мый жö ме верма керны?

— Деньга меным колö.

— Кысь ме вая?

— Колхозсис эд неважын сетiсö. Кинлö заптан, мыйлö?

Эн жалейт зоныт понда.

— Айыт мый меным висьталас?

— Он кö явит сылö, оз и тöд.

Барбос ас пондас гусьöника шынньöвтiс да думайтыштiс «Мамöс колö босьтны ас кипод увтö. Сэсся позяс чилькöтны». Мамыс, кöр зоныс петiс, пуксис пызан дорас да пондiс думайтны: «Мый то сыкöт керан? Кöр колiс гажöтчыны да уджавны, сiя тюрьмаын пукалiс. Но кытчö ни воштiсян, аслам эд пиыс, ась кöть вунöтас сьöкыт луннэсö. Ковсяс сетны, а то дружоккес пондасö зонкасö серавны».

Кык гöрдöтöм чужöмбана детина локтiсö сы ордö мотоциклöн. Нiя веськыта корисö юны вина.

— А тэ кыдз думайтiн? — сералöмöн юалiс öт зонкаыс.

— Не учöт ни, вежöртны колö, — дженытик усоккесö малавтöн содтiс мöдыс. — Некытчö эд миян дынiсь он пышшы. Кöть из увтiсь, но адззамö. А локтiм сы понда, медбы дзурскыштны.

Васька только неважын ештiс чеччыны тöння пируйтöм бöрын и эз тöд, мый сэтöн керны. Мамыс эта кадö уджалiс. Барбослöн дрöжитiсö киэс. Сiя эз письты, мый керны.

— Но, тэ, мый сунасян? Или вунöтчин, кыдз баитчимö... сэтчин? Часöт вермамö юрпöвтö веськöтны, не сiдз эд сьöкыт керны.

— Ме инö котрася деревняас — дыша горöтчис Васькаыс.

— Да эн думайт пышшыны, сёравно кутам. Тöдан эд мый сэк лоас.

Барбос чожа локтiс бöр. Киас видзис банка.

— Вот, адззи невна, — висьталiс сiя. — Сiйö, мать, колiс кисиныс кватитны. Гöссезлö, мыся, колö.

— Пыр тöд, кин керö аскурсö, и видз сiйö киат, — висьталiс пöрисьжыкыс. — Законöн повзьöт, медбы ляч чöвтчисö. ― Полöмсяняс нiя лоасö тэнат кипод увтын. Кин оз вежöрт, дак ась уджалö. Миянлö жö колö овны гажöтчöмöн, басöка. Усёк? А öнi плеснит стаканнэзас да юыштамö.

— Не унаöв ли лоас? — юалiс Барбосыс.

— Миянлö нормаыс сувтöттöм: мымда колö, сымда и юамö. А закуситны, ноко, кольттез ульöсь чег. И эн вунöт, что öтiк аскурнас он пет. Тити-мити эшö коласö. Бергöтлы бырöм мозганат.

Васька чепöссис комас да судзöтчис джадж дорöдз и пондiс шаритны-кошшыны, бергöтiс быдöс, мый сэтчин вöлi. Медбöрын адззис мамыслiсь бырöм кошелёк и, кыдз нарошно, сэтчин вöлi деньга. Кöть и не уна, а бутылка вылас тырмис. Сылöн ловыс öзйис.

— Вай ме дынö, — висьталiс пöрисьжыкыс. — И одзлань сiдз кер. Мый умöля куйлö — сiя тэнат.

— Мамöлiсь бы колiс юавны.

— Тэ мый? Совсем тай ылöстöм вöлöмыт! Висьталöм кылыс тэныт матö оз сидз. Вунöтiн сэтчинiсь порядоксö?

Пöрисьжык дружокыс чепöссис местасис да вынöн сöтiс Барбослö пельбокас, а сэсся содтiс мöд пельбокас, пиннез пыр висьталiс: «Мый ловытлö колö, сiйö и босьт. Миян векын бöбöввес тырмасö. А öнi ветламö посадас».

Мамыслiсь гусялöм деньга вылас небисö вина да пырисö юны столовöйö, кытöн пондiсö кешитчыны да вежмасьны, а кöр кылiсö, что мöдöны корны милиционерöс, кöд коста и пышшисö.

— Колö кужны аскадö дзимлясьны, — сералiсö нiя. ― Миянлö немлö пантасьны милицияыскöт. Сы дынiсь колö овны ылынжыка.

Нiя вожасисö мотоцикл вылö и — абу. А Барбос эшö недыр шатласис посадöттяс, а сэсся иньдöтчис деревняас. Эта кадö сылöн горшыс öддьöн ни бура пондiс тарзьыны и мунiкас думайтiс, кин ордö пыравны бы да эшö содтыштны. И решитiс кежыштлыны Тамарка ордö, кöда олiс öтнас и видзлiс заптöсоксö. Игансö осьтiс жолькöттöг и смева пырис керкуас. Кöзяйкаыс туплясис койка вылын, и юрыс вöлi пашмöма. Барбос юасьтöг пуксис койка дорас да пуктiс кисö лядьбей вылас и не зубыта шамыртiс чуннесö.

— Ойыс оз тырмы дак луннас нюжласян, — лöга сералöмöн горöтчис сiя Тамараыслö. — Часöт ме гажöтышта тэнö.

— Ой, Вася, мый тэ думайтан? — повзьыштiс нывкаыс.

— Ме ог думайт, а кера, — и личкис да öсилейтiс не том ни нывкасö сэтöн жö кровать вылас, а сыбöрын висьталiс:

— А öнi вай, мый тэнат эм юр веськöтаныс. Он кö сет, видзöт эта вылö, — и мыччалiс свиттялан пурт.

— Жорит, вон тай эм горвылас.

— Тамарка, эн лöгöт менö, а то умöль лоас. Уд кыдз бур гöсьлö.

— Тэ кодьыс быд угöлын сулалöны.

— Да тэ мый? Думайтан, ме пола? — И Васькаыс бöра кватитiс пуртсö.

Тамарка дыша кайис горвылас да гумыштiс флягасис дыр сулалöм ырöшсö.

— Пöтлытöм тэ морт, на, жорит, — кöшсö сеттöн лöга висьталiс сiя.

— Мый пиньган? Али умöля лöсялiс? Пондыв только кинлöкö висьтасьны — сэтöн жö оланнат прощайтчан. Ме ог любит унасö баитны.

— Но и ю да шатöвт ме ордiсь.

— Пыра сэк, кöр меным колан, и шливгыны эн лысьт.

— Ой, господи, мун ни тэ, вражина несчастнöй.

— Кöр аскурсö керан?

— Кöр колас, сэк и кера.

— Сэк менö коран, а то видзöт, — и сiя орсыштiс пуртнас.

Барбослö только сiя и колiс: кöр юрас пондiс сильöтны и синнэс калитчисö, то не то вöлись иньдöтчис гортас, кытöн сiдз и сiдз пантасяс мамыскöт. А мамыс казялöма ни öшöмсö да ыбöс дынсяняс жö юалiс:

— Кытчö нö, зонö, деньгаокö лоис?

— Ме тай реквизируйтi.

— Мый, мый керин?

— Городсис тай гöссез вовлiсö, но и ... Да мый юасян? Бутылкасö эд куш киöн он неб. Ноко, пöрччав чулкитö да сет меным эшö кык бутылка вылö. Аппетит оссис.

— Абусö кысь сета.

— А тэ трусиксит да адззы, — лöга висьталiс Барбосыс да паськöтiс морос вевдöрсö. — Вия, ежели он сет! Пукты пызан вылас.

— Айыт мый меным висьталас?

— Сылö нем эн баит.

— Уджавны бы кутчисин да рубсö ачыт шедтiн.

— Ме сэтчин уджалi кык понда, а öнi шоччися. Тiйö гортын чатраситö, а ме сэтчин тойсявлi. Öнi жö понда овны сiдз, кыдз меным гленитчö. Дак сетан или он, кöдö кори?

— Айыт казялас дак мый менö керас?

— Тэ чужтiн менö дак кер, мый тшöкта, а то тымуссэзтö лэдза.

Мамыслöн дзолльöн петiсö синваэс и сiя пондiс сыркьявны. Барбослö только этiя и колiс. Сiя адззис, что мамыслöн оз тырмы выныс мунны сылö паныт, и зверсялöм синнэзöн видзöтiс сы ладорö. И мамыс кышым-кашым, синваэсö чышкикö, петалiс чуланö да сэтчинiсь пыртiс деньгасö и чапкис пызан вылас зоныс одзö.

— Вот сiдз, мамука, — лöга висьталiс зоныс. — Ме понда кöшельтö видз осьтöн. Деньгатö вермасö шыррез сёйны. Ме часöт посадö ветла. Томмес коласын кöть сьöлöмöс гажöтышта,

— Кодыс эд юрсит оз ни петавлы.

— Поди, сэтчинмоза жö чай понда юны? Эг тай мöд. Васька сьöкыта оськалöмöн иньдöтчис порог дынас да желльыштiс ыбöснас. Мамыс полöмöн видзöтiс бöрсяняс да сьöкыта ловзисьöмöн думайтiс: «Учöтсö лележитi да быдтi, мыся, юрвердiсь лоас. А öнi ослопина-мужик, сё кусöксö öмись мырддьö. Наказаннё öтiк».

Зоныс жö шутнялыштлöмöн мунiс деревня шöрись улицаöт и чожа петiс ыбöт кыссян туй вылö, кöда вайöтiс посадас. «Потачкасö мамöлö оз ков сетны, — шыннялöмöн думайтiс сiя. — Ме зэлöта сiйö сiдз, что оз понды лысьтны и нявöстны. Айö сторожалö ни только — пöльышт и пöрас. А деньгаоксö видзöны заптöс вылас. Тöдны бы вот местасö». Киыс пешлiс кармансис виль бумажкаэсö. Посадас сiя медодз пырис уса Колька дружок ордö, кöда неважын локтiс сэтчинiсь жö, кытiсь Барбос, тожö олiс мамыс вердöм вылын.

— Но мый, удiсь-вердiсь, гостö öктан? — джодж шöрöттяс ветлöттöн юалiс Барбосыс. — Видзчисян, кöр öмат кисьтасö?

— Да юрö потласьö-висьö, — дыша горöтчис мöдыс.

— Вунöтiн разь, что кöинсö коккес вердöны?

— Керкусö бергöтi ни онняюрöн, но нем эг адззы. Сотана-мамö быдöс дзебö. Сылiсь пуктöмсö только понöн адззан.

— Значит, умöля кошшан. Керсьы понö и адззан. А то пятаоккезтö часöт гильöтышта.

— Öнi эд не сэтчин, мыйлö повзьöтлан?

— Кошшы, а то быль эд гильöта, вон тай, нöшокнас.

— Тöда эд, эм сотаналöн, но ог инмы.

— А ме пятаат вот инма.

Колькаыс петiс чуланö, а Барбосыс мизгырасьöмöн видзöтлiс керкусис быд угöлоксö, пыралiс комодö и паськöм колассис адззис одеколон да сюйыштiс карманас. Сэтчö пырис Колькаыс да радувьяс горöтiс:

— Вот, бога мать, адззи банкасö. Мешöкö сюйыштöма, пизь коласö.

— Сувтöт пызан вылас и давай мозгируйтам, — Васька жагöника пуксис пызан саяс. — Юны-то мийö юам, а сэсся мый? Дак вот, медбы мамыт эз казясь, ылöтамö сiйö. Öтiк стаканöн гультымсö керамö, и бутыляс содтан ва да пуктан одзза местаас. Лоас кöиныс пöт, и баляэс быдсаöсь. Овны колö кужны. Заоднем эшö вот мый мöдi баитны. Аскурыс бур, да корыс не сiя. Кабацкöйсö дзурснитан и настроеннё мöдiк лоö. Но колöны тити-митиэз. А эм и мöдiк способ. Пемыт ойöн курмыштны. Колöны только колесоэз. Этö задачасö тэ босьтан ас вылат.

— Гусявны ли мый ли?

— Мыля жö сiдз. Просто босьтлан юасьтöг кытшöмкö кад кежö. Лун кыкыс тырмас? Да медбы зыбкаöн вöлi. Ойшöрнас Чирöк лог дорö локтан. Öнi жö на тэныт червонец и пöльт кабачокö. Ме лоа вон, садокас. Да эн манитчы.

Барбос вöлi нюжöтчöма ирга увтö и жагöника судзлалiс ягöддэсö, кöр сэтчин локтiс дружокыс.

— Вот эшö килька неби, — висьталiс сiя.

— Мыля не горбуша? — рызъялöмöн юалiс Барбосыс.

— Кысь сiйö ваян?

— Начальствоыслöн мыйыс абу. Нылiсь заптöссö колö пешлыны. Видз тöдвылат. А талун тэнö гöститöта. И вот эшö мый. Кызныра челядьсö öкты ас гöгöрат. Мыйла нiйö — висьтала сыбöрын.

Юöм бöрас, пемдан дорас ни, кольмöм юрöн Барбос пырис клубö да пондiс сэтчин нывка понда тышкасьны, вартлiс виньöрик зонкаöс, а кöр казялiс сылiсь отсалiссесö, пышшис, кыдз кöч. А сэсся локтiс деревняас да пырис Тамарка ордö.

— Ноко, горвывсис лэдз, — мирнöя висьталiс кöзяйкаыслö. Меным мыйкö недолыт. Юыштамö кыкöн, ась еныс проститас. Да вöрöтчы жö чожажык, ромозикаас эн ов, а то ме лöгасьны верма. Вай крепыт ырöшсö и быдöсöн лöсьöтчамö.

Ойнас сёрöн, кöр айыс сторожалiс, сiя локтiс гортас, кынымиськö жолькнитiс каличнас, но мамыс эз кыв. Барбослö ки увтас шедiс галя и сiя шентiс ойвывся öшынас. Стеклоыс жолькнитiс да киссис. Сэтчö вöлись мыччисис повзьöм да путшалöм баличаэза мамыс.

— Джагалiн ли мый ли? — горöтiс сылö зоныс.

— Господи, мыля жö джагала, — пернапасасьöмöн шыасис мамыс. — Мый нö, зонö, öшынсö керин?

— Паськавны-узьны он понды. Айö лöсьöтас. Сылö нем керны луннас.

— Сiя эд уки-пыки ни ветлöтö.

— Бакöстiс бы, дак абу и жаль, кешитчö только.

— Менö кöть бы невна жалейтiн.

— Мый тэныт, яймеклö, лоас? Дзурт, кытчöдз верман, да эн шливгы.

Саймис сiя, кöр шондiыс пырис ни веськыта öшынас. Быдöс вывтырыс вöлi вазьöма, кымöссис нильдiс ньылöм, сьöлöмыс ёткöптiс-пессис, кыдз бура уджалöм бöрын. Сэтчö жö сы бердö лякасисö мыла бырöтан гуттэз. Куйлыны лоис недолыт. Аймамыс керкуас эзö тыдалö. Барбос чеччис да адззис кашникись йöв, кисьтiс горшас, но эз вежöрт некытшöм кöр. Сэтöн тöдвылас усисö тöння килькиэс, и сiя кывнас малыштiс тырппесö. Видзöтыштiс ас гöгöрсö и бекöрись казялiс кольттез. Барбос чегис кынымöкö кружкаö, сорлалiс да юис. Сэсся думайтыштiс да иньдöтчис Тамаркаыс ордö, кöда локтiс эта кадö сёйыштны.

— Вот и бур, что гортат, — серöмтчис Васькаыс. — А ме полi, что ог застанит. Гортын мыр моза пукалан-пукалан да и мыла бырас.

— Ловтö бöра тешитны локтiн?

— Дак эд кöбы не нывкаыс да не ватрушкаыс, дак и муыс, натьтö, бы эз бергав. Мöдан бы, дак часöт маликöдз чöвта. Мöдан?

— Тэсянь эд бурсö он видзчись.

— Öнi мыйкö дыш петö. Флягасит, ноко, чöвтышт. Стрась юрö висьö.

— И пондас висьны, кöр он и садясьлы.

— Тэнат лекарствоöн лöсялас. Да эн сунась, а то гильöтышта.

Васька пичкисис да юис сахар вылын керöм ырöшсö да ошкис кöзяйкасö, а сэсся тшöктiс:

— Рытнас ыбöстö видз осьтöн.

Шоныт да мича луныс горалiс уджöн: кытöнкö ылынiнас гурöтiсö машинаэз, кузницасянь кылiс кальскöтчöм, кытöнкö тшупсисö черрезöн, сяркöтiс «Дружба». Васька тэрмасьтöг мегыралiс посад ладорö. И сэтчин панталiс важся дружок Алёшкаöс, кöда обед бöрсяняс мунiс уджавны.

— Сулалышт ноко, Лёша, — сувтöтiс сiйö Барбосыс. ― Бура уджалöмсяняс и вöввес пö кулöны. Сьöмоккез менам эмöсь. На-ко нiйö да шыбыльтлы лавкаас. Пантасьöмсö кöть отметитамö.

— Да ме то мый, дыр ли котрасьышта.

— Уджыт не мыйкö, вермас и век сулавны. А ме вон берег дорас киссьöм мельница дынас пукся. Дак котрась инö.

Недыр-мыйись дружокыс котöрöн локтiс бöр. Барбос, кыдз клещиöн, пиннезнас пиньöвтiс бутылкаыслiсь тупкöтсö да кисьтiс горшас кынымкö гультым, а сэсся висьталiс:

— Кут да юышт. Крепыт заразаыт, но миянлö лöсялас.

Нiя дыр пукалiсö ва дорас и торйöтчисö только сэк, кöр уджалiсь отирыс пондiс мунны гортас. А Васькалö эз терпитсьы тöдны, мый керö ни уса Колькаыс, и сiя иньдöтчис сы ордö.

— Но, кыдз тэнат колесоэзнас? — юалiс сiя веськыта.

— Öтiк видзö оградаас. Думайта, кыдз тарöвтны.

— Горт дынас эн заводит, а тарöвт ылöжык, мöдiк улицаö.

— Да эд сьöкыт лоас öтнамöлö?

— Винаыс кокнита оз шед. Мырсьыштан невна, кöть госоктö чапкан. А сэсся заводитан и... аллё ме дынöдз. Колö керны перыта и ляксьытöг. Значит, кöрталiм. Видзöт, ме серавны ог любит. Менам эшö колö пыравны Тамарка ордö. Кыдз и баитiс, ыбöсыс вöлi осьта. Барбос сэк жö казялiс, что ачыс кöзяйкаыс юыштöма и ветлöтiс-турьялiс да сералыштлiс.

— Польдiн бöра, дзирдöтiн синнэтö? — юалiс сiя.

— Эттшöмыс тэ, Тамарка, меным гленитчан.

— Томмесö он адззы да.

— Томмес эшö озö ылöстö, а тэ авьян. Лок ноко, зэлöтышта...

Эта ойö Барбос эз ветлы гортас. Кодззыштöм кöзяйкаыс тшöктiс кольччыны ас дынас; сизим грех понда пö öтiк очакыв. Юисö, мымда тöрис, песока ырöшсö да сiдз и узисö. Ашынас Барбос луншöрöдззас быглясис койка вылас, а сэсся мунiс посадö. Сэтчин тöдвылас усис, что неумöль бы вöлi адззыны учöт калибра винтовка. Ась кöть и не талун жö, но колö. А сэтчö магнитола бы кабыртны. Вöт оланыс лоас! Но сэтöн казялiс уса Колькасö, кöда мотырасис магазин дынас. Пантасисö да баитыштiсö.

Ивашково деревняись магазиныс вöлi строитöма керкуэс бöрын, кытчö пондöтöмась лэбтыны эшö клуб. Торговöй точкасö ойнас эзö дозирайтö. Эта вылö и видзис надеясö Барбосыс. Гусялöм мотоциклöн нiя локтiсö ыб вылö, а одзлань мунiсö подöн. Заптöм ломокöн кокнита тёсiсь строитöм складö керис осьта, кöдаö жагöника пырис уса Колькаыс и кынымкö минута бöртi мыччис винаöн ящик. Бутылкаэсö сэтöн жö тэчисö мешöкö да пышшисö местасис. Гусялöм винасö дзебисö пожумаинö, а машинасö мöдiсö вашöтны ылöжык городланяс мунан туй вылöт, да бензиныс бырсис. Гортланьö подöна туйсис кык дружок кежалiсö вöрас да дзебисö винасö неыджыт кырасö, и бутылка босьтiсö сьöраныс.

— Ашыння рыт кежö корамö городсис, да сьöраныс ась вайöтасö финтиклюшкаэзöс, — мунiкас баитiс Барбосыс. ― Местаыс бур, гажöтчыштамö эстöн. Но, а вина йылiсь некинлö, шабаш.

Посадас локтытöдз нiя дзурснитiсö голюкпонсис, пукалыштiсö недыр да янсöтчисö.

Милициялöн эта участокись инспекторыс жугдiс юрсö сы вылын, кин бы вермис ойнас пыравны магазинас? Сiя бöрйис öтöрсянь и мöдöрсянь нiйö, кöдна лыддисисö пукалöм бöрас сы дынын учёт вылын и мыччасьлiсö отделас быд неделя. И корлiс нiйö ас дынас баитыштны. Локтiс очередьыс и Васька дынöдз.

— Мыля тэ дынiсь вина дук петö? — юалiс сылiсь.

— Да кыдз висьтавны, — Барбос думайтыштас да ывсöтчöмöн пондiс висьтасьны, — Тамаркаыс ордын тай песöкöн керöм ырöш юыштi. Аскурсö лöсьöтчöма керны. Стрась эд крепыт заразаыс.

— Тэ разь он тöд, что сахарсис озö лэдзö керны аскурсö?

— Дак не ме жö кера, Тамаркаыс.

— Ась лоас сiдз, но ме проверита, — висьталiс участковöйыс.

— Точнöя висьталi, начальник.

Эта вöлi медбур адрес, кöда сетiс Барбослö алиби. Сiя ылöтiс участковöйсö ас дынсис. Деревняын пос дынiсь адззисö и мотоциклсö. Тамаркаыс шедiс ырöшнас. А рытнас пожумаинö локтiсö городсис гöссез. Ны коласын вöлiсö и томыник нывкаэз. Компанияыс иньдöтчис кöркöся чочком из шедтан ямаэзö. Эта местаыс вöлi быдмöма ни нитшöн. Барбос висьталiс, медбы пуксисö кытшöн и вöлись вайис винасö. Юисö вель тума. Нывкаэс эзö кольччö зонкаэс сьöрись, юисö да ошкисö кöзяинсö. И некин эз юась, кытiсь сымда винаыс. Коддзисö быдöнныс и пондiсö орсöтчыны, кешитчыны, паськалiс настоящöй гульба.

— Васичка, ноко менö окав, — сералöмöн баитiс гöгрöса чужöма, гöрд юрсиа да гырись мороса коддзöм нывка. — Он разь адззы, кытшöм басöкöсь менам лядьбейезö?

— Нем он шу, бытшöмöсь, — коккез вылас видзöттöн горöтчис Барбосыс да пуктiс кисö небыт местаас, шамыртiс юбкаок увдöрсö и нигыльтiс няняэсö быдöнныс син одзын, окалiс.

— Жыкруйтö, челядь, öтпыр оламö, — кылiс öтласа шумитöм коласас.

— А ки вылат менö верман босьтны? — крятайтчис нывкаыс.

— Тэ кодь бабывсö? — Барбос кабыртiс лёльзьöм нывкасö да пезьдалöмöн нуöтiс сук тэлляс. — Пондан тöдны деревнясö.

— Бобольсис эд ме ог пов, — сывьясис нывкаыс. — Вот эттшöм вынаэсö ме и любита. Пукалöм бöрас мужиккес бура авйöны и пракныс тырмö, нетолишто зырымöсьбеддес мисулитчöны.

Эта кадö и мöддэс тожö рознитчисö, а кöр грудитчисö бöр, пöрисьжыкыс юалiс:

— Но кыдз, Вась, öмидз-ягöдыс?

— Моросвевья, вöвлöма ни, бура авйö, — висьталiс Барбосыс.

— А менчим, вот этö, мöдiн бы? — дружокыс тойыштiс ас дынсис люммöм сина нывкасö. — Только сы одзын невна плеснитыштамö. Миян нывкаэс эд озö чегласьö, да и ме ог вежöкты. Миян коласын — коммуна, клубыс асланым. Öткасалöн вежöрыс абу. Но дак кыдз, гленитчö? Сэк инö ветлö гуляйтö.

Нiя пируйтiсö ойбыт. Нывкаэс ветлiсö киись киö и некöда эз гöрдöтышт. Только шондiыс петöм бöрын мыдзöмöсь да кодöсь нiя нюкыртчисö шоччисьны. Обед гöгöрас пöрисьжыкыс лэбтiс юрсö, гудыра синнэзнас видзöтiс ас гöгöрсö да горöтчис:

— Но и бур вöлi гулянкаыс, но колö веськöтчыны. Öй, ноко чеччö, дявкельöп!

Узиссес саймисö да пондiсö нюжласьны. Нöитчöм чужöммезöн чеччисö и нывкаэс да дыша иньдöтчисö неылiсь юок дынö, а мöддэс пуксисö кругöн.

— Ась кобылаэс кöдзыт ванас синнэзнысö осьтасö, а мийö дзурснитамö, — дыша горöтчис пöрисьжыкыс. — Нылö, кыдз юасö, сiдз и мужик колö. Мывкыдныс сэтшöм. Винаыс кольччис жö? Мунны пондамö подöн, сьöраным колас. Туйпоныс эд абу дженыт. А нывкаэскöт неöтпыр пуксьыламö шоччисьны.

Быдöнныс вöрзисö. Вöр дорöттяс мунтöн гöрд юрсиа нывкаыс кольччыштiс бöрас да негорöна висьталiс Барбосыслö:

— Василь, ноко видзöт, мый эстöн?

— Мый сэсся, кыдз не нитш.

— Ылöстöм тэ рожа, небыт ольпасьсö он вежöрт, — горöтчис нывкаыс да öшöтчис голя бердас. — Шоччисьыштамö недырик.

— Пöтлытöм тэ, Валька, морт, — пöрисьжыкыс дзарнитiс бöрас. — Мийö эд дырсö огö пондö видзчисьны.

— Базильыс меным гленитчö да.

— Вот и вовлы сы дынö, кöр порознас ветлан бы дак.

— Тiйö петö вöр дорас, а мийö чожа...

Эта вылын компанияыс торьясис. Сыбöрын Барбос дыша лякис оськöввесö. Думайтöмöн другыс мунiс бокас.

— Вежöртан, Колька, — нюжвыла горöтчис Барбосыс. — Вöлi бы менам часöт пистолет, некинлiсь эг бы пов. Баит челядьыскöт, ась школасис гусяласö учöт калибра винтовкасö. Орöтамö дулосö и öддьöн бур лоас. Сэк быдöс посадсö пондамö кианым видзны.

— Норовитышт, лоас керöм. А нывкаэс, нывкаэс кытшöмöсь! И эд не пöрисьöсь. Кужöны жö ас пондааныс овны!

— И мийö посадас велöтамö, сет только кад.

Милицияас лыддисö, что гусясиссес вермисö лоны и городсис, если мотоциклыс кольöма сылань мунтöн. Кошшисö и деревня гöгöрöттяс, но унажыксö шедiсö только аскур кериссез. А гусясисьыс ветлöтiс гортас да вöджжис, кин ордö бы пыравны. Аскур дуксö сiя кылiс буражык сякöй понся. Деревняас, медбы не шедны, юкталiсö Барбоссö. И олiс сiя да думайтiс умöль делоэз. Сы вельмöм йылiсь баитiсö уна, но некин эз мун норасьны. Аймамыслö сiя эз лэдз и öм осьтны. Öтпыр босьтiс лэчыт пурт да татшкис-мöртiс пызан пöлас и горöтiс мамыслö: «Деньгасö он сет, дак тымустö каття эта ки вылö». — И мыччалiс кöстöм шульга кисö. А мöдпырсяас кутiс сiйö голяöттяс да сэтчö лöсьöтiс пуртсö и висьталiс: «Часöт кавтыктö орöта», — и кырöвтыштiс сöн дынсö. Кöр жö айыс падмöтiс сiйö, то Барбосыс сiдз сылö сöтiс, что пöрись морт пешкаöн тарöвтчис лабич увтас, а сэсся неделя куйлiс больницаын. Тамаркаыс тожö эз тöд, кин висьталiс милицияас керöм ырöш йылiсь и эз лысьт не примитны гортас Барбоссö. А сiя пондiс узьны и овны сы ордын. Барбосыс нем эз кер, а аппетитыс ыждiс, горшыс паськалiс:

— Ме аймамöс орöта вужöдз, — баитiс сiя Тамаркаыслö. — Нылö рубыс жаль, дак ась оланнаныс прощайтчасö.

Сылö гортыс лоис ошöн, кытчö эз бы и пыр. Мамсö лыддис грамотатöм мортöн, айсö просто синнас эз адззы, мыля сiя тшöктiс уджавны. Öтiк эта йылiсь баитöмыс сылö вайöтлiс горшас джаг.

— Тiянöн керöмыс меным тырмас кувтöдз, — асныралiс Барбосыс.

— Тэ кыдз ном, кыскан бы только йöзыслiсь вирсö, — спокойнöя баитiс айыс. — Мый нö ас бöрат колян?

— Ме вот мыччала тэныт номсö...

Барбос бергöтчис да петiс керкусис. Недыр мыйись локтiс гортас да джодж шöрас бряк сувтöтiс тыра канистра:

— Вот видзöт эта вылö. Менам басниыс дженыт — или сетатö сотеннöйö или тiянiсь озö кольччö и коскаэзныт.

— Юр бöбтаныс понда менам деньгаыс абу, — висьталiс айыс.

— Но и видз кöль увтат.

Барбос кватитiс канистрасö да кинитчис öтöрас, петiс огородечас да пондiс киськавны бензиннас гид бöрсö. Айыс кинитчис сы бöрсянь да кватитiс киöттяс, но Барбосыс тапкис сылö моросас да сiдз, что айыс, кыдз лягуша, нюжалiс му вылас. «Öзтас, палитас, дявпиян», — мелькнитiс юрас. Сiя быкöн кыссис карта пытшкас, сувтiс кок йылас да кинитчис керкуас, кватитiс важ ружьё, кöдöн ветлывлiс сторожавны да котöртiс бöр огородечас.

— Тэ мый, шальнöй понпиян, мöдан керны! — горöтiс зоныслö да лэбтiс ружьёсö.

Барбос бергöтчис тöвньылатас и чиркнитiс истöгнас да чапкис киськалöм бензин вылö, но истöгыс лэбзикас кусiс. Васькаыс öзтiс мöдiкö да мöдiс чапкыны, но сэтчö гыпкис лыйöм, и зонкаыс пöрис, кыдз кольта. Лоис лöнься-лöнь. Порок тшыныс жагöника паськалiс. Айыслöн бöбмöма паськалiсö да сувтiсö синнэс. Сiя чапкис пишальсö кок увтас и, вежöрттöг мый керис, бергöтчис да петiс öтöрö, а сэсся котöрöн мунiс посадас да пырис участковöй инспектор дынö.

— Пуксьöт менö, — атшалöма горöтчис сiя, — ачым локтi, начальник.

— Мый понда? — пöрись мортыс вылö видзöттöн юалiс участковöйыс.

— Зонöс вийи. Ачым быдтi и вот вийи.

— Кыдз вийин?

— Пишались паздернитi.

— Вежöртан жö тэ, мый кöть баитан?

— Ветламö миянö, и вежöртан.

Сэсся вöлi народнöй суд. Айыслö сетiсö срок, но не тюрьмаын пукавны, а гортас уджавны.