Одзынмунiссез (б, 1975)

Белоевскöй школаись 5«а» классын пионеррез öксисö сбор вылö. Нiя баитiсö велöтчöм йылiсь. Отрядсис председатель Вера Шадрина висьталiс, что быдöс классыс лоис пионерскöй и велöтчö неумöля.

— Только вот отличниккес отряданым етшаöсь, — шуис сiя. — Ударниккес двенадцать, а отличниккес только сылöн джыныс.

Классас минута дырна шы эз кыв. Челядь чöлiсö, гусьöника видзöтлiсö öтамöд вылö да жмитлiсö пельпоннэзöн. Вера видзчисис, мый висьталасö велöтчиссез.

— Меным вот роч кыв сьöкыта сетсьö, — негорöн шыасис Ваня Ермаков. — Ачым ог тöд мыйсянь. Старайтча велöтны, а вот оз пет.

— Ме математика умöля вежöрта, — горöтчис Коля Фирсов. — Öтнам ог вермы решайтны мукöд задачаэсö.

Пионеррес тöдiсö, что зонкаэс невна и дышöтчывлöны велöтны уроккесö.

— Позоритат миянлiсь отрядсö, — веськыта висьталiс Надя Вавилина. — Пионерыслö колö мунны одзын, а тiйö кыссятö бöрын. Талунсянь пондамö занимайтчыны школаас и уроккес бöрын.

— Мыля нö миян нылочкаэс велöтчöны только 4 и 5 вылö, — баитiс Аля Фёдорова да лöгöнмоз видзöтiс зонкаэслань. — Колö буржыка велöтны сетöм уроккесö. Нем ылöтчыны сьöкытыс вылö.

— Отличницаэслö, конечно, бур баитны, — паныт горöтчис Ваня Ермаков да видзöтыштiс аслас дружок Коля Фирсов вылö. — Нылö быдöс кокнита сетсьö.

— А ноко чöлö, — сувтöтiс Ваняöс отрядсис председатель. — Аляыс да Надяыс правильнöя баитöны. Быдсöн класснас пондамö отсавны.

Пионерскöй сбор вылас баитiсö веськыта ны йылiсь, кин падмöтö видзны бур успеваемость, кин дышöтчö велöтны уроккесö.

— Отсавны колö зонкаэслö, — парта сайись чеччис Саша Гущин. — Кыдз позьö не тöждiсьны, кöр бокат эм неуспевающöй. Вот ме и понда отсавны Ваня Ермаковлö.

Эта лунö пионеррес решитiсö: отличниккез пондасö уроккес бöрын занимайтчыны ныкöт, кöдналöн эмöсь двойкаэз. Отсавны кутчисисö Лена Шадрина, Оля Филиппова, Галя Власова да мöдiккез. И, если висьтавны одзлань, то тулыс кежас умöль отметкаэс эзö ни лоö. Быдöнныс вуджисö шестöй классö. А этö эд не сiдз кокнита сетсис: челядьыс не только школаас, но и зонкаэс дынö гортаныс унаись ветлiсö. Не весь эд Зоя Космодемьянская нима дружинаын эта отрядыс öнi лыддиссьö медбурöн. Школаас отряддэс шестнадцать. Абу кокнит лоны медодзын.

Лоис ни традицияöн чулöтны школаас праздниккез «первöй звонок» и «медбöрья звонок». Пионеррес пантасьлöны ныкöт, кин одзжык велöтчис школаас, кывзöны ны удж йылiсь висьтасьöмсö. Вовлöны татчö гражданскöй да Отечественнöй война вылiсь ветераннэз.

5«а» классiсь пионерскöй отряд лоис одзынмунiсьöн. Челядьыс эстöн пыр мый-нибудь да керöны. Быдöнныс велöтчöны бура и олöны дружнöя. Пионеррезлöн эмöсь уна и мöдiк делоэз.

— Ме участвуйтi хоровöй, драматическöй да танцевальнöй кружоккезын, — висьтасьö Надя Вавилина. — Ветлiмö мийö Кузьваö да мыччалiм сэтчин концерт. Выступайтiмö и городскöй Дом культурыас.

Видзöтан Надяыс вылö и дивуйтчан: ачыс учöтик да виньöрик, а велöтчö только 5 вылö. Кужö, тыдалö, сiя торйöтны кадсö, медбы сетöм уроккесö велöтны, гортас отсасьны и лоны активисткаöн. Сэтшöм жö и Оля Филиппова. — Ми эд тожö кружоккезас вöвлiм, — баитö Олег Пахоруков, — да эшö спортивнöй секцияэзын участвуйтiм. Вот кöть Саша Гущиныслiсь юасьö.

Саша только чуть тöдчöмöн качайтыштлö юрнас. Да ме и сiдз тöда, что нiя любитöны спортсö. Быд асылö, а то и луннас зоночкаэс котрасьöны стадион вылын, керöны быдкодь упражненнёэз. Ны коласын овлöны и нылочкаэс. Видзöтан ны вылö и думайтан: здоровöйöсь быдмасö да вынаöсь.

— Миян пионеррес öктiсö восемьсот килограмм металлолом, — висьтасьö отрядсис председатель Вера Шадрина.

Уна эта али етша? Петö, что быд пионерыс сетiс сорок килограммöн.

— Эшö короссез колхоз понда чеглалiмö, — шуö Саша Гущин.

— И картошка отсалiм дзимлявны, — содтö Лена Шадрина.

— А книгаэсö разь эгö вузалö? — юалiс Надя Вавилина.

Книжнöй магазинiсь вузасись часто вовлö пионеррес дынö, и нiя пыравлöны магазинас бöрйыны виль книгаэз, кöднö вузалöны отирыс коласын. Только чулалöм годö том книголюббез книгаэсö вузалiсö двести пятьдесят руб вылö, а Всесоюзнöй книжнöй лотерея билеттэз — четыреста руб вылö.

Кыдзкö тимуровскöй команда локтiс инвалид Василий Яковлевич Караваев ордö, но хозяиныс эз лöсяв гортас. Челядьыс баитыштiсö недыр и чожа тэчисö поленицаö поткöтöм пес. Вöлiсö нiя и инвалид Павел Львович Санников ордын. Пенсионерка Анна Бражкиналö кайöтлiсö посöдзас пес.

— Школаас миян овлöны и мöдiк мероприятиеэз, — висьтасьö Вера Шадрина. — Быдкодь конкурссэз, кöднаын пионеррес пыр мунöны одзын. Гажтöмтчыны некöр. Ог вунöтö классис ёрттэзнымöс, кöр нiя нимлунаöсь.

— Ветлiмö не öтiк походö, — баитö Саша Гущин. — Вöлiмö асланым вöрын да шоччисимö ю дорын. Зонкаэс чериалiсö, а нылочкаэс стряпайтiсö. Медбöрын орсiм клад кошшöмöн. Бура и гажа чулалiс луныс.

Белоевскöй школаас öшалöны миян край йылiсь бытшöма керöм стенддэз, стенгазетаэз. Стекло сайын куйлöны школаыслö сетöм почётнöй грамотаэз да спортивнöй кубоккез. И быдöс эна делоэзын эм удж, кöдö керисö пионеррез 5 «а» классiсь.